ح

ܬܘܒ݂ ܥܲܠ ܚܲܝܠܹܗ ܕܐܲܠܵܗܲܢ ܣܓ݂ܝܼܕܼܵܐ ܟܵܬ݂ܒ݁ܝܼܢܲܢ

ܩܘܕܫܐ ܕܡܪܝ ܬܐܕܘܪܘܣ ܡܦܫܩܢܐ ܕܲܟ݂ܬ݂ܵܒ݂ܵܐ ܐܲܠܵܗܵܝܹ̈ܐ: ܐܲܦܸܣܩܘܿܦܵܐ ܕܡܲܗܦܣܘܿܣܛܝܼܵܐ

ܕܐܲܦܩܹܗ ܘܦܲܫܩܹܗ ܡܼܢ ܝܵܘܢܵܝܵܐ ܠܣܘܼܪܝܵܝܵܐ ܡܵܪܝ ܐܲܒ݂ܵܐ ܩܵܬ݂ܘܿܠܝܼܩܵܐ:

ܟܲܕܼ ܣܠܸܩ ܠܒܹܝܬ݂ ܪ̈ܗܘܿܡܵܝܹܐ:

ܘܐܲܦܩܹܗ ܥܲܡܹܗ ܒܲܡܥܲܕܼܪܵܢܘܼܬ݂ܵܐ ܕܡܵܪܝ ܬܐܘܿܡܵܐ ܐܘܼܪܗܵܝܵܐ ܡܲܠܦܵܢܵܐ.

ܘܲܡܩܲܕܫܝܼܢ ܒܹܗ ܡ̣ܢ ܚܲܕܼܒ݁ܫܲܒܵܐ ܩܲܕܼܡܵܝܵܐ ܕܣܘܼܒܵܪܵܐ ܘܲܥܕܲܡܵܐ ܠܚܲܕܼܒ݁ܫܲܒܵܐ ܕܐܘܿܫܲܥܢܹ̈ܐ.

ܩܲܕ݂ܡܵܝܲܬ݂ ܡܫܲܪܸܐ ܟܵܗܢܵܐ: ܒܫܸܡ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܬܸܫܒܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ (ܓ: ܙܲܒ݂ܢ̈ܝܼܢ) ܘܥܲܠ ܐܲܪܥܵܐ ܫܠܵܡܵܐ ܘܣܲܒ݂ܪܵܐ ܛܵܒ݂ܵܐ ܠܲܒ݂ܢܲܝ̈ܢܵܫܵܐ: ܒܟ݂ܠܥܸܕܵܢ ܠܥܵܠܡܝܼܢ ܐܵܡܹܝܢ. ܘܟܸܢ:

ܐܲܒ݂ܘܼܢ ܕܒܲܫܡܲܝܵܐ ܢܸܬ݂ܩܲܕܲܫ ܫܡܵܟ݂ ܬܹܐܬܸܐ ܡܲܠܟܘܼܬ݂ܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁: ܐܲܒ݂ܘܼܢ ܕܒܲܫܡܲܝܵܐ ܕܲܡܠܹܝܢ ܫܡܲܝܵܐ ܘܐܲܪܥܵܐ ܪܲܒܘܼܬ݂ ܫܘܼܒ݂ܚܵܟ݂: ܥܝܼܪܹ̈ܐ ܘܐ݇ܢܵܫܵܐ ܩܵܥܹܝܢ ܠܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁:

ܐܲܒ݂ܘܼܢ ܕܒܲܫܡܲܝܵܐ ܢܸܬ݂ܩܲܕܲܫ ܫܡܵܟ݂ ܬܹܐܬܸܐ ܡܲܠܟܘܼܬ݂ܵܟ݂ ܢܸܗܘܸܐ ܨܸܒ݂ܝܵܢܵܟ݂: ܐܲܝܟܲܢܵܐ ܕܒܲܫܡܲܝܵܐ ܐܵܦ ܒܐܲܪܥܵܐ. ܗܲܒ݂ܠܲܢ ܠܲܚܡܵܐ ܕܣܘܼܢܩܵܢܲܢ ܝܲܘܡܵܢܵܐ: ܘܲܫܒ݂ܘܿܩ ܠܲܢ ܚܲܘ̈ܒܲܝܢ. ܐܲܝܟܲܢܵܐ ܕܐܵܦ ܚܢܲܢ ܫܒܲܩܢ ܠܚܲܝܵܒܲܝ̈ܢ. ܘܠܵܐ ܬܲܥܠܲܢ ܠܢܸܣܝܘܿܢܵܐ: ܐܸܠܵܐ ܦܲܨܵܢ ܡܸܢ ܒܝܼܫܵܐ: ܡܸܛܠ ܕܕ݂ܝܼܠܵܟ݂ ܗ݇ܝܼ ܡܲܠܟܘܼܬ݂ܵܐ ܘܚܲܝܠܵܐ ܘܬܸܫܒ݁ܘܿܚܬܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ.

ܟܵܗܢܵܐ: ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ: ܡܸܢ ܥܵܠܲܡ ܥܕ݂ܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.

ܥܲܡܵܐ: ܐܲܒ݂ܘܼܢ ܕܒܲܫܡܲܝܵܐ ܢܸܬ݂ܩܲܕܲܫ ܫܡܵܟ݂: ܬܹܐܬܸܐ ܡܲܠܟܘܼܬ݂ܵܟ݂. ܩܲܕܝܼܫ ܩܲܕܝܼܫ ܩܲܕܝܼܫܲܬ݁: ܐܲܒ݂ܘܼܢ ܕܒܲܫܡܲܝܵܐ. ܕܲܡܠܹܝܢ ܫ̈ܡܲܝܵܐ ܘܐܲܪܥܵܐ ܪܲܒܘܼܬ݂ ܫܘܼܒ݂ܚܵܟ݂: ܥܝܼܪܹ̈ܐ ܘܐ݇ܢܵܫܵܐ ܩܵܥܹܝܢ ܠܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁.

ܘܐܵܡܲܪ ܫܲܡܵܫܵܐ: ܢܨܲܠܸܐ ܫܠܵܡܵܐ ܥܲܡܲܢ.

ܨܠܘܿܬ݂ܵܐ ܕܲܩܕ݂ܵܡ ܡܲܪܡܝܼܬ݂ܵܐ:

ܕܥܹܐܕܹ̈ܐ ܡܵܪ̈ܵܢܵܝܹܐ: ܚܲܝܸܠ ܡܵܪܲܢ ܘܐܲܠܵܗܲܢ ܠܲܡܗܲܝܡ̈ܢܲܝ ܒܲܫܡܵܟ݂ ܬܪܝܼܨܵܐܝܼܬ݂. ܘܲܠܡܲܘ̈ܕܝܲܝ ܬܲܘܕܝܼܬ݂ܵܐ ܠܵܐ ܙܠܝܼܡܬܵܐ ܫܲܪܝܼܪܵܐܝܼܬ݂. ܠܲܡܫܲܡܵܫܘܼ ܐ݇ܪ̈ܵܙܹܐ ܡܚܲܣܝܵܢܹ̈ܐ ܡܩܲܕܫܲܝ̈ ܢܲܦ̮ܫܵܬ݂ܗ̈ܘܿܢ ܘܦܲܓ݂ܪ̈ܲܝܗܘܿܢ ܩܲܕܝܼܫܵܐܝܼܬ݂ ܘܠܲܡܟܲܗܵܢܘܼ ܠܵܟ݂ ܒܠܸܒܵܘ̈ܵܬ݂ܵܐ ܘܪܸ̈ܥܝܵܢܹܐ ܡܪ̈ܝܼܩܲܝ ܡܼܢ ܛܘܼܠܫܹ̈ܐ ܘܪ̈ܲܚܝܼܩܲܝ ܡܼܢ ܡܲܚܫ̈ܒ݂ܵܬ݂ܵܐ ܡܟܲܬ̈ܡܵܬ݂ܵܐ ܙܲܗܝܵܐܝܼܬ݂. ܘܠܲܡܫܲܒܵܚܘܼ ܠܵܟ݂ ܥܲܠ ܦܘܼܪܩܵܢܵܐ ܕܫܲܟܸܢܬ݁ ܠܲܢ ܒܪ̈ܲܚܡܹܐ ܫܦܝܼܥܹ̈ܐ ܕܛܲܝܒܘܼܬ݂ܵܟ݂ ܐܲܡܝܼܢܵܐܝܼܬ݂. ܡܵܪܵܐ ܕܟ݂ܠ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܕܚܲܕ݂ܒ݁ܫܲܒܹ̈ܐ: ܚܲܝܸܠ ܡܵܪܲܢ ܘܐܲܠܵܗܲܢ ܠܲܡܚܝܼܠܘܼܬܲܢ ܒܲܚܢܵܢܵܟ݂ ܕܲܢܫܲܡܸܫ ܠܐ݇ܪ̈ܵܙܹܐ ܩܲܕܝܼܫܸ̈ܐ ܕܐܸܬ݂ܝܼܗܸܒ݂ܘ ܠܚܘܼܕܵܬܹܗ ܘܲܠܦܘܼܪܩܵܢܹܗ ܕܲܟ݂ܝܵܢܲܢ ܚܲܠܵܫܵܐ. ܒܪ̈ܲܚܡܵܘܗܝ ܕܲܒ݂ܪܵܟ݂ ܚܲܒܝܼܒ݂ܵܐ. ܡܵܪܵܐ ܕܟ݂ܠ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܕܕ݂ܘܼܟ݂ܪ̈ܵܢܹܐ ܘܲܕ݂ܝܲܘ̈ܡܵܬ݂ܵܐ ܫܚܝܼܡܹ̈ܐ: ܢܸܣܬ݁ܓܸܕ݂ ܘܢܸܫܬܲܒܲܚ ܘܢܸܬ݂ܝܲܩܲܪ ܘܢܸܬ݂ܪܲܡܪܲܡ ܘܢܸܬ݁ܬܲܘܕܸ݁ܐ ܘܢܸܬ݂ܒܲܪܲܟ݂ ܒܲܫܡܲܝܵܐ ܘܒܲܐܪܥܵܐ: ܫܡܵܐ ܣܓ݂ܝܼܕ݂ܵܐ ܘܲܡܫܲܒܚܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ: ܒܟ݂ܠܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܘܲܡܫܲܪܹܝܢ ܡܲܪܡܝܼܬ݂ܵܐ ܕܝܵܘܡܵܐ ܐܲܝܕܵܐ ܕܗܝܼ ܘܟܸܢ: ܫܠܵܡܵܐ ܥܲܡܲܢ.

ܨܠܘܿܬ݂ܐ ܕܲܩܕ݂ܵܡ ܥܘܿܢܝܼܬ݂ܵܐ ܕܩܲܢܟܹ݁ܐ:

ܕܥܹܐܕܹܐ ܡܵܪ̈ܵܢܵܝܹܐ (ܕܡܵܪܝ ܐܹܠܝܼܵܐ ܩܵܬ݂ܘܿܠܝܼܩܵܐ): ܩܕ݂ܵܡ ܒܹܝܡܵܐ ܕܚܝܼܠܬܵܐ ܕܪܲܒ݁ܘܼܬ݂ܵܟ݂: ܘܲܬ݂ܪܘܿܢܘܿܣ ܡܥܲܠܝܵܐ ܕܐܲܠܵܗܘܼܬ݂ܵܟ݂. ܘܟ݂ܘܼܪܣܝܵܐ ܗܕ݂ܝܼܪܵܐ ܕܐܝܼܩܵܪܵܟ݂: ܘܩܲܬ݁ܕ݂ܵܪܝܼܢ ܫܒ݂ܝܼܚܵܐ ܕܡܵܪܘܼܬ݂ܵܟ݂. ܐܲܝܟܵܐ ܕܲܟ݂ܪ̈ܘܿܒܹܐ ܡܫܲܡܫܵܢܲܝ̈ܟ ܡܗܲܠܠܝܼܢ ܐܲܡܝܼܢܵܐܝܼܬ݂: ܘܲܣܪ̈ܵܦܹܐ ܡܫܲܒ݁ܚܵܢܲܝ̈ܟ ܡܩܲܕܫܝܼܢ ܠܵܐ ܫܲܠܘܵܐܝܼܬ݂. ܒܵܪܟܝܼܢܲܢ ܒܕܸܚܠܵܐ ܘܣܵܓ݂ܕ݂ܝܼ݁ܢܲܢ ܒܪܸܥܠܵܐ: ܘܡܲܘܕܹ݁ܝܢܲܢ ܘܲܡܫܲܒ݁ܚܝܼܢܲܢ ܕܠܵܐ ܫܲܠܘܵܐ ܒܟ݂ܠܥܸܕܵܢ: ܡܵܪܵܐ ܕܟ݂ܠ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܕܚܲܕ݂ܒܫܲܒܹ̈ܐ: ܩܕ݂ܵܡ ܬܪܘܿܢܘܿܣ ܡܵܪܝ ܫܒ݂ܝܼܚܵܐ ܕܪܲܒܘܼܬ݂ܵܟ݂ ܘܟ݂ܘܼܪܣܝܵܐ ܪܵܡܵܐ ܘܲܡܥܲܠܝܵܐ ܕܐܝܼܩܵܪܵܟ݂: ܘܒܹܝܡܵܐ ܕܚܝܼܠܬܵܐ ܕܥܲܙܝܼܙܘܼܬܹܗ ܕܚܘܼܒܵܟ݂: ܘܡܲܕ݂ܒ݁ܚܵܐ ܡܚܲܣܝܵܢܵܐ ܕܲܩܒܲܥ ܪܸܡܙܵܟ݂: ܘܐܲܬ݂ܪܵܐ ܕܡܲܫܪܝܹܗ ܕܫܘܼܒ݂ܚܵܟ݂: ܚܢܲܢ ܥܲܡܵܟ݂ ܘܥܵܢ̈ܵܐ ܕܡܲܪܥܝܼܬ݂ܵܟ݂: ܥܲܡ ܐܲܠܦܹ̈ܐ ܕܲܟ݂ܪ̈ܘܿܒܹܐ ܡܗܲܠܠܵܢܲܝ̈ܟ. ܘܪܸ̈ܒ݁ܘܵܬ݂ܵܐ ܕܲܣܪ̈ܵܦܹܐ ܘܲܕ݂ܪ̈ܲܒܲܝ ܡܲܠܲܐܟܹܐ ܡܫܲܡܫܵܢܲܝ̈ܟ. ܒܵܪܟ݁ܝܼܢܲܢ ܘܣܵܓ݂ܕ݁ܝܼܢܲܢ ܘܡܲܘܕܹܝܢܲܢ ܘܲܡܫܲܒ݁ܚܝܼܢܲܢ. ܒܟ݂ܠܥܸܕܵܢ: ܡܵܪܵܐ ܕܟ݂ܠ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܕܕ݂ܘܼܟ݂ܪ̈ܵܢܹܐ: ܠܲܫܡܵܐ ܪܲܒܵܐ ܘܲܕ݂ܚܝܼܠܵܐ ܘܩܲܕ݁ܝܼܫܵܐ ܘܲܡܒܲܪܟ݂ܵܐ ܘܛܘܼܒ݂ܬ݂ܵܢܵܐ ܘܠܵܐ ܡܸܬ݁ܕܲܪܟܵܢܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ: ܘܲܠܛܲܝܒ݁ܘܼܬ݂ܵܟ݂ ܕܲܠܘܵܬ݂ ܓܸܢܣܲܢ: ܚܲܝܵܒ݂ܝܼܢܲܢ ܕܢܲܘܕܸ݁ܐ ܘܢܸܣܓ݁ܘܿܕ݂ ܘܲܢܫܲܒܲܚ ܒܟ݂ܠܥܸܕܵܢ: ܡܵܪܵܐ ܕܟ݂ܠ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܘܐܵܡܪܝܼܢ ܥܘܿܢܝܼܬ݂ܵܐ ܕܩܲܢܟܹ݁ܐ ܐܲܝܕܵܐ ܕܗܝܼ.

ܘܡܵܐ ܕܢܵܦܹܩ ܩܲܫܝܼܫܵܐ ܘܲܨܠܝܼܒ݂ܵܐ ܥܲܠ ܐܝܼܕ݂ܵܘ̈ܗܝ ܘܣܵܠܹܩ ܠܒܹܝܡ ܐܵܡܲܪ ܡܫܲܡܫܵܢܵܐ: ܫܠܵܡܵܐ ܥܲܡܲܢ

ܨܠܘܿܬ݂ܵܐ ܕܠܵܟ݂ܘܼܡܵܪܵܐ ܕܚܲܕ݂ܒ݁ܫܲܒܹ̈ܐ ܘܲܕ݂ܥܹܐܕܹܐ: ܘܡܵܐ ܕܦܵܐܲܚ ܒܲܢ ܡܵܪܲܢ ܘܐܲܠܵܗܲܢ ܪܹܝܚܵܐ ܗܲܢܝܼܐܵܐ ܕܒܲܣܝܼܡܘܼܬܹܗ ܕܚܘܼܒܵܟ݂. ܘܢܵܗܪ̈ܵܢ ܢܲܦ̮̈ܫܵܬܲܢ ܒܝܼܕ݂ܥܬܹܗ ܕܲܫܪܵܪܵܟ݂. ܢܸܫܬ݁ܘܸܐ ܕܢܲܩܒܸ݁ܠ ܓܸܠܝܵܢ ܚܲܒ݁ܝܼܒ݂ܵܟ݂ ܕܡܸܢ ܫܡܲܝܵܐ. ܘܬܲܡܵܢ ܢܲܘܕܸ݁ܐ ܠܵܟ݂ ܘܲܢܫܲܒ݁ܚܵܟ݂ ܕܠܵܐ ܫܲܠܘܵܐ: ܒܥܹܕ݇ܬܵܟ݂ ܡܟܲܠܲܠܬܵܐ ܡܲܠܝܲܬ݂ ܟܠ ܥܘܼܕ݂ܪ̈ܵܢܝܼܢ ܘܟ݂ܠ ܛܘܼܒ݂ܝܼ̈ܢ. ܕܐܲܢ݇ܬ݁ܘܼ ܡܵܪܵܐ ܘܒ݂ܵܪܘܿܝܵܐ ܕܟ݂ܠ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܕܕ݂ܘܼܟ݂ܪ̈ܵܢܹܐ: ܘܥܲܠ ܐܲܦܲܝ̈ ܟܠܗܘܿܢ ܥܘܼܕ݂ܪ̈ܵܢܲܝܟ ܘܛܲܝ̈ܒ݁ܘܵܬ݂ܵܟ݂ ܕܲܠܘܵܬܲܢ ܕܠܵܐ ܡܸܬ݂ܦܲܪܥܝܼܢ: ܢܲܘܕܸ݁ܐ ܠܵܟ݂ ܘܲܢܫܲܒ݁ܚܵܟ݂ ܕܠܵܐ ܫܲܠܘܵܐ ܒܥܹܕ݇ܬܵܟ݂ ܡܟܲܠܲܠܬܵܐ ܡܲܠܝܲܬ݂ ܟܠ ܥܘܼܕ݂ܪ̈ܵܢܝܼܢ ܘܟ݂ܠ ܛܘܼܒ݂ܝܼ̈ܢ. ܕܐܲܢ݇ܬ݁ܘܼ ܡܵܪܵܐ ܘܒ݂ܵܪܘܿܝܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܕܲܣܝܵܡ ܒܸܣܡܹ̈ܐ: ܒܲܫܡܵܐ ܣܓ݂ܝܼܕ݂ܵܐ ܘܲܡܫܲܒ݁ܚܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ ܢܸܬ݂ܒܲܪܟ݂ܘܼܢ ܒܸܣܡܹ̈ܐ ܗܵܠܹܝܢ ܕܣܵܝܡܝܼܢܲܢ ܠܐܝܼܩܵܪܵܟ݂: ܘܢܸܗܘܘܿܢ ܠܚܘܼܣܵܝܲܢ: ܒܵܪܘܿܝܵܐ ܕܥܸܩܵܪܹ̈ܐ ܒܲܣܝܼܡܹ̈ܐ ܘܲܕ݂ܗܹܪ̈ܘܿܡܹܐ ܗܲܢܝܼܐܹ̈ܐ. ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܕܟܲܕ݂ ܡܲܟ݂ܪܸܟ݂ ܫܲܡܵܫܵܐ ܦܝܼܪܡܵܐ: ܡܫܝܼܚܵܐ ܢܒܲܣܡܵܟ݂ ܒܡܲܠܟ݁ܘܼܬܹܗ ܘܲܢܩܲܒܸܠ ܬܸܫܡܸܫܬܵܟ݂ ܒܛܲܝܒ݁ܘܼ ܕܲܚܢܵܢܹܗ ܐܵܡܹܝܢ.

ܘܡܲܩܦܝܼܢ: ܠܵܟ݂ܘܼܡܵܪܵܐ ܕܟ݂ܠܵܐ ܡܲܘܕܹ݁ܝܢܲܢ: ܘܠܵܟ݂ ܝܼܫܘܿܥ ܡܫܝܼܚܵܐ ܡܫܲܒܝ݁ܚܝܼܢܲܢ: ܕܐܲܢ݇ܬ݁ܘܼ ܡܢܲܚܡܵܢܵܐ ܕܦܲܓ݂ܪ̈ܲܝܢ: ܘܐܲܢ݇ܬ݁ܘܼ ܦܵܪܘܿܩܵܐ ܕܢܲܦ̮̈ܫܵܬܲܢ.

ܐܲܫܝܼܓܹܬ݂ ܕܲܟ݂ܝܵܐܝܼܬ݂ ܐܝܼܕ݂ܲܝ̈: ܘܐܸܬ݂ܟܲܪܟܹ݁ܬ݂ ܠܡܲܕ݂ܒ݁ܚܵܟ݂ ܡܵܪܝܵܐ: ܠܵܟ݂ܘܼܡܵܪܵܐ . . .

ܫܲܒܲܚ: ܥܵܠܲܡ: ܠܵܟ݂ܘܼܡܵܪܵܐ . . .

ܫܲܡܵܫܵܐ: ܢܨܲܠܸܐ ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܐܲܢ݇ܬ݁ܘܼ ܡܵܪܝ ܫܲܪܝܼܪܵܐܝܼܬ݂ ܡܢܲܚܡܵܢܵܐ ܕܦܲܓ݂ܪ̈ܲܝܢ: ܘܐܲܢ݇ܬ݁ܘܼ ܦܵܪܘܿܩܵܐ ܛܵܒ݂ܵܐ ܕܢܲܦ̮̈ܫܵܬܲܢ: ܘܲܡܢܲܛܪܵܢܵܐ ܐܲܡܝܼܢܵܐ ܕܚܲܝܲܝ̈ܢ: ܘܠܵܟ݂ ܡܵܪܝ ܚܲܝܵܒ݂ܝܼܢܲܢ ܕܢܲܘܕܸ݁ܐ ܘܢܸܣܓ݁ܘܿܕ݂ ܘܲܢܫܲܒܲܚ ܒܟ݂ܠܥܸܕܵܢ: ܡܵܪܵܐ ܕܟ݂ܠ ܠܥܵܠܡܝܼܢ.

ܫܲܡܵܫܵܐ: ܐܲܪܝܼܡܘ ܩܵܠܟ݂ܘܿܢ ܘܫܲܒܲܚ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.

ܘܥܵܢܹܝܢ: ܩܲܕ݁ܝܼܫܵܐ ܐܲܠܵܗܵܐ: ܩܲܕ݁ܝܼܫܵܐ ܚܲܝܠܬ݂ܵܢܵܐ: ܩܲܕ݁ܝܼܫܵܐ ܠܵܐ ܡܵܝܘܿܬ݂ܵܐ: ܐܸܬ݂ܪܲܚܲܡ ܥܠܲܝܢ*

ܫܲܒܲܚ: ܩܲܕ݁ܝܼܫܵܐ ܐܲܠܵܗܵܐ . . . ܥܵܠܲܡ: ܩܲܕ݁ܝܼܫܵܐ ܐܲܠܵܗܵܐ . . .

ܨܠܘܿܬ݂ܵܐ ܕܲܩܕ݂ܵܡ ܩܸܪ̈ܝܵܢܹܐ: ܩܲܕ݁ܝܼܫܵܐ ܘܲܫܒ݂ܝܼܚܵܐ ܘܚܲܝܠܬ݂ܵܢܵܐ ܘܠܵܐ ܡܵܝܘܿܬ݂ܵܐ: ܕܲܒ݂ܩܲܕ݁ܝܼܫܹ̈ܐ ܥܵܡܲܪ ܘܡܸܬ݁ܬ݁ܢܝܼܚ ܨܸܒ݂ܝܵܢܹܗ: ܡܸܬ݂ܟܲܫܦܝܼܢܲܢ. ܐܸܬ݂ܦܲܢ ܡܵܪܝ ܘܚܘܼܣ ܘܪܲܚܸܡ ܥܠܲܝܢ ܐܲܝܟ݂ ܕܲܡܥܵܕ݂ܲܬ݁: ܒܟ݂ܠܥܸܕܵܢ ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܟܲܕ݂ ܐܵܬܹܐ ܩܵܪܘܿܝܵܐ ܕܩܸܪ̈ܝܵܢܹܐ ܠܘܵܬ݂ ܟܵܗܢܵܐ ܐܲܘ ܪܹܫ ܟܵܗܢܹ̈ܐ: ܡܒܲܪܸܟ݂ ܠܹܗ ܘܐܵܡܲܪ: ܐܲܠܵܗܵܐ ܡܵܪܹܐ ܟܠ ܢܚܲܟܡܵܟ݂ ܒܝܘܼܠܦܵܢܹܗ ܩܲܕܝܼܫܵܐ: ܘܥܲܠ ܩܵܪܘܿܝܵܐ ܘܥܲܠ ܫܵܡܘܿܥܹ̈ܐ ܪ̈ܲܚܡܵܘܗܝ ܘܲܚܢܵܢܹܗ ܢܸܗܘܘܿܢ ܘܬܸܗܘܸܐ ܡܲܚܙܝܼܬ݂ܵܐ ܫܲܦܝܼܪܬܵܐ ܠܟ݂ܠܗܘܿܢ ܐܲܝܠܹܝܢ ܕܨܵܝܬ݁ܝܼܢ ܘܫܵܡܥܝܼܢ ܡܸܠܬ݂ܵܐ ܕܡܲܠܦܵܢܘܼܬ݂ܵܐ ܡܸܢ ܦܘܼܡܵܟ݂ ܒܛܲܝܒ݁ܘܼ ܕܲܚܢܵܢܹܗ: ܐܵܡܹܝܢ.

ܘܐܸܡܲܬ݂ܝ ܕܐܵܡܲܪ ܩܵܪܘܿܝܵܐ: ܒܲܪܸܟ݂ܡܵܪܝ. . ܡܒܲܪܸܟ݂ ܠܹܗ ܗܵܟܲܢ: ܐܲܠܵܗܵܐ ܡܵܪܹܟܠ ܢܚܲܝܠܵܟ݂ ܘܲܢܚܲܟܡܵܟ݂ ܒܝܘܼܠܦܵܢܹܗ ܩܲܕܝܼܫܵܐ ܒܛܲܝܒ݁ܘܼ ܕܲܚܢܵܢܹܗ: ܐܵܡܹܝܢ.

ܘܩܵܪܹܝܢ ܩܸܪ̈ܝܵܢܹܐ ܘܡܲܩܦܝܼܢ ܫܘܼܪܵܝܵܐ ܕܠܵܚܹܡ.

ܨܠܘܿܬ݂ܵܐ ܕܲܩܕ݂ܵܡ ܫܠܝܼܚܵܐ: ܐܲܢܗܲܪ ܠܲܢ ܡܵܪܲܢ ܘܐܲܠܵܗܲܢ ܙܲܘܥܹ̈ܐ ܕܚܘܼܫܵܒܲܝ̈ܢ: ܠܲܡܨܵܬ݂ ܘܲܠܡܸܣܬܲܟܵܠܘܼ ܫܸܡܥܵܐ ܗܲܢܝܼܐܵܐ ܕܦܘܼܩܕܵܢܲܝ̈ܟ ܡܲܚܝܵܢܹ̈ܐ ܘܐܲܠܵܗܵܝܹ̈ܐ. ܘܗܲܒ݂ܠܲܢ ܒܛܲܝܒ݁ܘܼܬ݂ܵܟ݂ ܘܲܒ݂ܪ̈ܲܚܡܲܝܟ ܕܢܸܩܛܘܿܦ ܡܸܢܗܘܿܢ ܝܘܼܬ݂ܪܵܢܵܐ: ܚܘܼܒܵܐ ܘܣܲܒ݂ܪܵܐ ܘܦܘܼܪܩܵܢܵܐ: ܕܚܵܫܲܚ ܠܢܲܦ̮ܫܵܐ ܘܲܠܦܲܓ݂ܪܵܐ: ܘܢܸܙܡܲܪ ܠܵܟ݂ ܫܘܼܒ݂ܚܵܐ ܐܲܡܝܼܢܵܐ ܕܠܵܐ ܫܲܠܘܵܐ ܒܟ݂ܠܥܸܕܵܢ: ܡܵܪܵܐ ܕܟ݂ܠ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ.

ܒܕ݂ܘܼܟ݂ܪ̈ܵܢܹܐ ܕܹܝܢ ܘܲܒ݂ܨܲܘܡܵܐ ܣܛܲܪ ܡܸܢ ܚܲܕ݂ܒ݁ܫܲܒܹ̈ܐ ܕܨܲܘܡܵܐ ܡܨܲܠܹܝܢ: ܠܵܟ݂ ܡܕ݂ܲܒ݁ܪܵܢܵܐ ܚܲܟܝܼܡܵܐ: ܝܵܨܘܿܦܵܐ ܬܡܝܼܗܵܐ ܕܒܲܝܬܵܝܵܘ̈ܗܝ: ܓܲܙܵܐ ܪܲܒܵܐ ܡܲܪܕܸ݁ܐ ܟܠ ܥܘܼܕ݂ܪ̈ܵܢܝܼܢ ܘܟ݂ܠ ܛܘܼܒ݂ܝܼ̈ܢ ܒܲܡܪܲܚܡܵܢܘܼܬܹܗ: ܡܸܬ݂ܟܲܫܦܝܼܢܲܢ ܐܸܬ݂ܦܲܢ ܡܵܪܝ ܘܚܘܼܣ ܘܪܲܚܸܡ ܥܠܲܝܢ ܐܲܝܟ݂ ܕܲܡܥܵܕ݂ܲܬ݁ ܒܟ݂ܠܥܸܕܵܢ: ܡܵܪܵܐ ܕܟ݂ܠ.

ܘܐܵܡܪܝܼܢ ܬܘܼܪܓܵܡܵܐ ܕܲܩܕ݂ܵܡ ܫܠܝܼܚܵܐ ܕܟ݂ܠܝܼܘ݁ܡ

ܐ. ܐܘ݁ ܕܐܸܙܕܲܡܲܢܘ ܒܪܸܡܙܵܐ ܪܲܒܵܐ ܠܲܚܠܘܼܠ ܚܲܝܹ̈ܐ:

ܕܡܸܫܬ݁ܘܼܬ݂ ܡܲܠܟܵܐ ܕܲܫܡܲܝܵܢܹ̈ܐ ܘܕܲܐܪ̈ܥܵܢܵܝܹܐ܀

ܒ. ܒܚܘ݁ܪܘ ܒܢܘܼܪ ܣܒܲܪܬ݂ܵܐ ܘܲܡܪܘ݁ܩ ܒܟ݂ܘܼܪܹ̈ܐ ܐܲܠܵܗܵܝܹ̈ܐ:

ܡܼܢ ܪܸܥܝܵܢܟ݂ܘ݁ܢ ܟܠ ܚܘܼܫܵܒܹ̈ܐ ܥܵܠܡܵܢܵܝܹ̈ܐ܀

ܓ. ܓܲܙܵܐ ܕܛܘܼܒܹ̈ܐ ܦܲܬ݂ܚܹܗ ܡܵܪܝܵܐ ܩܕ݂ܵܡ ܒܲܥܵܝܹ̈ܐ:

ܘܐܸܡܲܪܘ ܕܬ݂ܵܘ ܣܲܒܼܘ ܐ݇ܫܛܵܪ ܚܵܘܒܲܝ̈ܟ݁ܘ݁ܢ ܐܘ݁ ܚܲܛܵܝܹ̈ܐ܀

ܕ. ܕܲܟܵܘ ܠܸܒܵܐ ܘܐܸܬ݂ܗܲܦܲܟ݂ܘ ܠܲܡ ܒܲܕ݂ܡܘܼܬ݂ ܛܠܵܝܹ̈ܐ:

ܕܬܸܗܘܘ݁ܢ ܝܵܪ̈ܬܹܐ ܕܡܲܠܟ݁ܘܼܬ݂ ܪܵܘܡܵܐ ܐܵܦ ܒܲܝܬܵܝܹ̈ܐ܀

ܗ. ܗܵܐ ܡܸܬ݂ܟܲܪܙܵܐ ܥܠܲܝܟ݁ܘ݁ܢ ܒܩܵܠܹ̈ܐ ܪ̈ܘܼܚܵܢܵܝܹܐ:

ܘܐܵܦ ܕܵܪܫܵܐ ܠܟ݂ܘ݁ܢ ܐܘܼܪܚܵܐ ܠܛܘܼܒܹ̈ܐ ܥܵܠܡܝܼܢܵܝܹ̈ܐ܀

ܘ. ܘܵܠܹܐ ܕܬܹܗܦܟ݂ܘܼܢ ܡܼܢ ܢܵܡܘ݁ܣܹ̈ܐ ܠܲܡ ܛܲܠܝܵܝܹ̈ܐ:

ܠܢܵܡܘ݁ܣ ܫܪܵܪܵܐ ܒܲܕ݂ܡܘܼܬ݂ ܦܵܘܠܘ݁ܣ ܒܲܪ ܥܸܒܼܪ̈ܵܝܹܐ܀

ܙ. ܙܪܝܼܙܵܐ ܕܲܚܙܵܝ ܗܝ ܡܵܪܹܗ ܛܲܢܵܢ ܒܝܼܣܲܪ̈ܠܵܝܹܐ:

ܘܲܩܪܵܝܗܝ ܕܢܸܗܘܸܐ ܛܲܢܵܢ ܒܥܲܡܵܐ ܕܲܡܫܝܼܚܵܝܹ̈ܐ܀

ܚ. ܚܙܵܘ ܕܗܵܐ ܐܸܣܬ݁ܡܝܼ ܡܼܢ ܦܘܼܩܵܕܹ̈ܐ ܢܵܡܘܼܣܵܝܹ̈ܐ:

ܘܟܸܢ ܐܸܬ݂ܦܲܬܲܚ ܒܚܹܝܠ ܦܘܼܩܕܵܢܹ̈ܐ ܝܼܫܘ݁ܥܵܝܹ̈ܐ܀

ܛ. ܛܪܲܕ݂ ܡܼܢ ܢܲܦ̮ܫܹܗ ܟܠ ܚܘܼܫܵܒܹ̈ܐ ܙܹܐܦܵܢܵܝܹ̈ܐ:

ܘܲܗܸܘܵܐ ܫܠܝܼܚܵܐ ܘܐܲܟ݂ܪܸܙ ܚܲܝܠܹܗ ܒܹܝܬ݂ ܝܵܘܢܵܝܹ̈ܐ܀

ܝ. ܝܵܐܹܐ ܕܲܢܨܘܼܬ݂ ܠܡܸܠܵܘ̈ܗܝ ܫܒܼܝܼܚܹ̈ܐ ܘܩܘܼܫܬܵܢܵܝܹ̈ܐ:

ܕܡܲܟ݂ܪܸܙ ܗܵܫܵܐ ܒܓܼܵܘ ܐܸܓܲܪܬܹܗ ܠܲܦܠܵܢܵܝܹ̈ܐ܀

ܘܲܒ݂ܥܸܩܒܹܗ ܩܵܪܹܝܢ ܫܠܝܼܚܵܐ ܘܐܸܡܲܬ݂ܝ ܕܐܵܡܲܪ ܫܲܡܵܫܵܐ ܕܩܵܪܹܐ ܫܠܝܼܚܵܐ: ܒܲܪܸܟ݂ܡܵܪܝ. ܥܵܢܹܐ ܟܵܗܢܵܐ: ܡܫܝܼܚܵܐ ܢܚܲܟܡܵܟ݂ ܒܝܘܼܠܦܵܢܹܗ ܩܲܕܝܼܫܵܐ ܘܢܸܥܒܕ݂ܵܟ݂ ܡܲܚܙܝܼܬ݂ܵܐ ܫܲܦܝܼܪܬܵܐ ܠܟ݂ܠܗܘܿܢ ܐܲܝܠܹܝܢ ܕܨܵܝܬ݁ܝܼܢ ܠܵܟ݂.

ܕܟܲܕ ܢܵܚܹܬ݂ ܟܵܗܢܵܐ ܡܸܢ ܒܹܝܡ: ܘܡܵܛܹܐ ܠܬܲܪܥܵܐ ܕܡܲܕܒܚܵܐ: ܗܘܼ ܘܫܲܡܵܫܵܐ ܓܵܗܢܝܼܢ ܬܪܲܝܗܘܿܢ. ܘܐܵܡܲܪ ܫܲܡܵܫܵܐ: ܢܨܲܠܸܐ ܫܠܵܡܵܐ ܥܡܲܢ.

ܘܲܡܨܲܠܸܐ ܟܵܗܢܵܐ ܢܝܼܚܵܐܝܼܬ݂: ܠܵܟ݂ ܨܸܡܚܵܐ ܕܫܘܼܒ݂ܚܹܗ ܕܐܲܒ݂ܘܼܗܝ: ܘܨܲܠܡܵܐ ܕܲܩܢܘܿܡ ܝܵܠܘܿܕܹܗ: ܕܐܸܬ݂ܓܠܝܼ ܘܲܕ݂ܢܲܚ ܒܦܲܓ݂ܪܵܐ ܕܐ݇ܢܵܫܘܼܬܲܢ: ܘܐܲܢܗܲܪ ܠܲܡܠܝܼܠܹ̈ܐ ܒܝܼܕ݂ܲܥܬ݂ܵܐ ܕܪܲܒܘܼܬܹܗ: ܐܲܢܗܲܪ ܡܵܪܝ ܢܲܦ̮̈ܫܵܬܲܢ ܒܢܘܼܗܪܵܐ ܕܲܣܒܲܪܬ݂ܵܟ݂: ܘܗܲܒ݂ܠܲܢ ܕܢܸܬ݂ܗܲܓܸܐ ܒܣܸܦܪ̈ܲܝܟ: ܘܢܸܬ݂ܗܲܕܸܐ ܒܦܘܼܩܕܵܢܲܝ̈ܟ ܡܲܚܝܵܢܹ̈ܐ ܘܐܲܠܵܗܵܝܹ̈ܐ. ܡܵܪܵܐ ܕܟ݂ܠ ܠܥܵܠܡܝܼܢ.

ܦܘܼܢܵܝܵܐ ܠܡܲܢ ܕܲܡܙܲܡܲܪ ܟܲܕ ܐܵܡܲܪ: ܒܲܪܸܟ݂ܡܵܪܝ. ܐܵܡܲܪ ܠܹܗ ܟܵܗܢܵܐ: ܐܲܠܵܗܵܐ ܡܵܪܹܐ ܟܠ ܢܚܲܝܸܠ ܚܘܼܫܵܒܲܝ̈ܟ ܘܲܢܨܲܠܸܠ ܩܝܼ̈ܢܵܬ݂ܵܟ݂ ܕܬܸܙܡܲܪ ܬܸܫ̈ܒܚܵܬܹܗ ܒܛܲܝܒܘܼ ܕܲܚܢܵܢܹܗ: ܐܵܡܹܝܢ.

ܘܐܵܡܪܝܼܢ ܙܘܼܡܵܪܵܐ ܕܝܵܘܡܵܐ

ܕܟܲܕ ܐܵܙܹܠ ܟܵܗܢܵܐ ܕܢܸܣܥܘܿܪ ܐܹܘܲܢܓܲܠܝܼܘܿܢ: ܫܘܼܒ݂ܚܵܐ ܠܪ̈ܲܚܡܹܐ ܡܬ݂ܘܿܡܵܝܹ̈ܐ ܕܫܲܠܚܘܼܟ݂ ܨܹܐܕ݂ܲܝܢ: ܡܫܝܼܚܵܐ ܢܘܼܗܪܹܗ ܕܥܵܠܡܵܐ ܘܚܲܝܹ̈ܐ ܕܟ݂ܠ ܠܥܵܠܡܝܼܢ ܐܵܡܹܝܢ.

ܕܟܲܕ ܛܵܥܹܢ ܠܹܗ ܕܢܸܦܘܿܩ: ܚܲܟܸܡܲܝܢ ܒܢܵܡܘܿܣܵܟ݂ ܘܐܲܢܗܲܪ ܙܲܘܥܲܝ̈ܢ ܒܝܼܕ݂ܥܬ݂ܵܟ݂: ܘܩܲܕܸܫ ܢܲܦ̮̈ܫܵܬܲܢ ܒܲܫܪܵܪܵܟ݂: ܘܗܲܒ݂ܠܲܢ ܕܢܸܗܘܸܐ ܡܸܬ݁ܛܦܝܼܣܵܢܹ̈ܐ ܠܡܸܠܲܝ̈ܟ ܘܓ݂ܵܡܘܿܪܹ̈ܐ ܠܦܘܼܩܕܵܢܲܝ̈ܟ ܒܟ݂ܠܥܸܕܵܢ: ܡܵܪܵܐ ܕܟ݂ܠ ܠܥܵܠܡܝܼܢ.

ܐ݇ܚܪܹܬ݂ܵܐ: ܡܲܢܗܲܪ ܠܲܡܠܝܼܠܹ̈ܐ ܒܝܼܕ݂ܲܥܬ݂ܵܐ ܕܪܲܒܘܼܬܹܗ: ܐܲܢܗܲܪ ܡܵܪܝ ܚܘܼܫܵܒܲܝ̈ ܠܡܸܬ݂ܗܲܓܵܝܘܼ ܒܣܸܦܪ̈ܲܝܟ ܩܲܕܝܼܫܹ̈ܐ ܘܐܲܠܵܗܵܝܹ̈ܐ ܒܟ݂ܠܥܸܕܵܢ: ܡܵܪܵܐ ܕܟ݂ܠ ܠܥܵܠܡܝܼܢ.

ܕܦܹܪܝܡܵܐ: ܪܹܝܚܵܐ ܡܵܪܝ ܗܲܢܝܼܐܵܐ ܕܦܵܚ ܡܸܢܵܟ݂ ܒܥܸܕܵܢܵܐ ܕܐܲܫܦܥܲܬܸ ܡܲܪܝܲܡ ܚܲܛܵܝܬܵܐ ܡܸܫܚܵܐ ܡܒܲܣܡܵܐ ܥܲܠ ܪܹܫܵܟ݂: ܗܘܼ ܢܸܬ݂ܚܲܠܲܛ ܒܒܸܣܡܹ̈ܐ ܗܵܠܹܝܢ ܕܣܵܝܡܝܼܢܲܢ ܠܐܝܼܩܵܪܵܟ݂: ܘܲܠܚܘܼܣܵܝܵܐ ܕܚܲܘܒܲܝ̈ܢ ܘܕ݂ܲܚܛܵܗܲܝ̈ܢ: ܡܵܪܵܐ ܕܟ݂ܠ ܠܥܵܠܡܝܼܢ.

ܘܐܵܡܪܝܼܢ ܬܘܼܪܓܵܡܵܐ ܕܲܩܕ݂ܵܡ ܐܹܘܲܢܓܵܠܝܼܘܿܢ ܘܲܒ݂ܥܸܩܒܹܗ ܐܵܡܲܪ ܫܲܡܵܫܵܐ ܒܩܵܠܵܐ ܫܡܝܼܥܵܐ: ܢܩܘܼܡ ܥܬ݂ܝܼܕ݂ܵܐܝܼܬ݂ ܠܡܸܫܡܲܥ ܐܹܘܲܢܓܲܠܝܼܘܿܢ ܩܲܕܝܼܫܵܐ܀ ܘܐܸܢ ܝܲܘܡܵܐ ܗ݇ܘܼ ܐ݇ܪܵܙܵܢܵܐܝܼܬ݂ ܐܵܡܲܪ: ܒܫܸܠܝܵܐ ܗܘܵܘ ܘܲܫܠܵܘ.

ܘܡܲܩܸܦ ܟܵܗܢܵܐ ܘܐܵܡܲܪ: ܫܠܵܡܵܐ ܥܲܡܟ݂ܘܿܢ. ܘܥܵܢܹܝܢ: ܥܲܡܵܟ݂ ܘܥܲܡ ܪܘܼܚܵܟ݂. ܘܩܵܪܹܐ ܐܹܘܲܢܓܲܠܝܼܘܿܢ ܘܡܵܐ ܕܫܵܠܹܡ ܐܹܘܲܢܓܲܠܝܼܘܿܢ ܐܵܡܪܝܼܢ: ܫܘܼܒ݂ܚܵܐ ܠܲܡܫܝܼܚܵܐ ܡܵܪܲܢ܀

ܘܐܵܡܲܪ ܫܲܡܵܫܵܐ ܟܵܪܘܿܙܘܼܬ݂ܵܐ: ܐܲܒ݂ܵܐ ܕܪ̈ܲܚܡܹܐ: ܘܲܚܒܲܪܬ݂ܵܗ݁܀

ܘܥܲܕ݂ ܡܸܬ݂ܐܲܡܪܵܐ ܐܵܙܹܠ ܟܵܗܢܵܐ ܕܢܲܣܸܩ ܐ݇ܪ̈ܵܙܹܐ ܥܲܠ ܡܲܕ݂ܒ݁ܚܵܐ. ܘܟܲܕ݂ ܡܲܣܸܩ ܦܵܬ݂ܘܿܪܵܐ ܥܲܠ ܡܲܕ݂ܒܚܵܐ: ܢܵܣܹܒ݂ ܟܵܗܢܵܐ ܦܝܼܠܵܣܵܐ ܘܫܲܡܵܫܵܐ ܟܵܣܵܐ܀ ܘܲܡܫܲܪܹܝܢ ܥܘܿܢܝܼܬ݂ܵܐ:

ܡܣܲܒܵܪܘܼ ܣܲܒ݁ܪܹܬ݂ ܒܡܵܪܝܵܐ܀ ܢܹܐܟ݂ܠܘܼܢ ܡܸܣܟܹܢܹ̈ܐ ܘܢܸܣܒ݁ܥܘܼܢ: ܦܲܓ݂ܪܹܗ ܕܲܡܫܝܼܚܵܐ ܘܲܕ݂ܡܹܗ ܝܲܩܝܼܪܵܐ ܥܲܠ ܡܲܕ݂ܒܲܚ ܩܘܼܕ݂ܫܵܐ: ܒܕܸܚܠܬ݂ܵܐ ܘܲܒ݂ܪܸܚܡܬ݂ܵܐ ܟܠܲܢ ܢܸܬ݂ܩܲܪܲܒ݂ ܠܹܗ. ܘܥܲܡ ܡܲܠܲܐܟܹ̈ܐ ܢܝܲܒܸ݁ܒ݂ ܠܹܗ ܩܲܕܝܼܫ ܩܲܕܝܼܫ: ܩܲܕܝܼܫ ܡܵܪܝܵܐ ܐܲܠܵܗܵܐ. ܬܢܝܼ.

ܘܢܵܣܹܒ݂ ܟܵܗܢܵܐ ܒܐܝܼܕܹܗ ܕܝܲܡܝܼܢܵܐ ܟܵܣܵܐ ܘܒ݂ܐܝܼܕ݂ܗ ܕܣܸܡܵܠܵܐ ܦܝܼܠܵܣܵܐ: ܟܲܕ݂ ܥܵܒܹܕ ܐܝܼܕܵܘ̈ܗܝ ܨܠܝܼܒ݂ܵܐܝܼܬ݂. ܘܐܵܡܲܪ ܫܲܡܵܫܵܐ: ܢܨܲܠܸܐ ܫܠܵܡܵܐ ܥܲܡܲܢ.

ܘܐܵܡܲܪ ܟܵܗܢܵܐ: ܢܲܣܸܩ ܬܸܫܒܘܿܚܬܵܐ ܠܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ ܒܟ݂ܠܥܸܕܵܢ ܠܥܵܠܡܝܼܢ܀ ܡܫܝܼܚܵܐ ܕܐܸܬ݁ܕܒܲܚ ܚܠܵܦ ܦܘܼܪܩܵܢܲܢ: ܘܦܲܩܸܕ݂ ܠܲܢ ܕܢܸܥܒܸ݁ܕ݂ ܥܘܼܗܕܵܢܵܐ ܕܡܲܘܬܹܗ ܘܕ݂ܲܩܒ݂ܘܼܪܬܹܗ ܘܕ݂ܲܩܝܵܡܬܹܗ. ܗܘܼ ܢܩܲܒܠܝܼܗ݁ ܠܕ݂ܒ݂ܚܬ݂ܵܐ ܗܵܕܹܐ ܡܸܢ ܐܝܼܕ݂ܲܝ̈ܢ ܒܛܲܝܒܘܼܬܹܗ ܘܲܒ݂ܪ̈ܲܚܡܲܘܗܝ ܠܥܵܠܡܝܼܢ ܐܵܡܹܝܢ.

ܐ݇ܚܪܹܬ݂ܵܐ ܐܵܡܪܝܼܢ ܠܵܗ݁ ܒܨܲܘܡܵܐ ܟܲܕ݂ ܣܵܝܡܝܼܢ ܐܪ̈ܵܙܹܐ ܥܲܠ ܡܲܕܒܚܵܐ: ܐ݇ܪ̈ܵܙܹܐ ܩܲܕܝܼܫܹ̈ܐ ܕܐܸܬ݂ܓܡܲܪܘ ܚܠܵܦ ܦܘܼܪܩܵܢܲܢ ܢܸܗܘܘܿܢ ܠܚܘܼܣܵܝܵܐ ܕܚܲܘܒܹ̈ܐ ܕܥܲܡܡܹ̈ܐ ܕܫܵܩܠܝܼܢ ܠܗܘܿܢ ܒܛܲܝܒܘܼܬܹܗ ܘܲܒ݂ܪ̈ܲܚܡܵܘܗܝ ܕܲܡܫܝܼܚܵܐ ܠܥܵܠܡܝܼܢ.

ܘܢܵܩܹܫ ܦܝܼܠܵܣܵܐ ܠܟ݂ܵܣܵܐ ܬܠܵܬ݂ ܙܲܒ݂ܢܝܼ̈ܢ: ܘܲܒ݂ܟ݂ܠ ܙܒܲܢ݇ܬܵܐ ܐܵܡܲܪ:

ܒܦܘܼܩܕܵܢܵܟ݂ ܡܵܪܲܢ ܘܐܲܠܵܗܲܢ܀ܬܢܝܼ܀ ܡܸܬ݁ܬ݁ܣܝܼܡܝܼܢ ܘܡܸܣܬܲܕ݂ܪܝܼܢ ܐ݇ܪ̈ܵܙܹܐ ܗܵܠܹܝܢ ܫܒ݂ܝܼܚܹ̈ܐ ܘܩܲܕܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ ܥܲܠ ܡܲܕ݂ܒܚܵܐ ܡܚܲܣܝܵܢܵܐ: ܥܕ݂ܲܡܵܐ ܠܡܹܐܬ݂ܝܼܬܹܗ ܕܡܵܪܲܢ ܕܬܲܪܬܹܝܢ ܙܲܒ݂ܢܝܼ̈ܢ ܕܡܸܢ ܫܡܲܝܵܐ: ܕܠܹܗ ܫܘܼܒ݂ܚܵܐ ܒܟ݂ܠܥܸܕܵܢ: ܠܥܵܠܡܝܼܢ ܐܵܡܹܝܢ.

ܘܣܵܕ݂ܲܪ ܠܐ݇ܪ̈ܵܙܹܐ ܥܲܠ ܡܲܕ݂ܒܚܵܐ: ܘܲܡܟܲܣܸܐ ܠܗ݇ܘܿܢ ܒܫܘܿܫܸܦܵܐ ܙܗܝܼܪܵܐܝܼܬ݂܀ ܘܐܵܡܪܝܼܢ:

ܫܲܒܲܚ: ܥܲܠ ܡܲܕ݂ܒܲܚ ܩܘܼܕ݂ܫܵܐ ܢܸܗܘܸܐ ܕܘܼܟ݂ܪܵܢܵܐ ܕܲܒ݂ܬ݂ܘܼܠܬܵܐ ܡܲܪܝܲܡ ܐܸܡܹܗ ܕܲܡܫܝܼܚܵܐ܀

ܥܵܠܲܡ: ܫܠܝܼܚܵܘ̈ܗܝ ܕܲܒ݂ܪܵܐ ܘܪ̈ܵܚܡܵܘ̈ܗܝ ܕܝܼܚܝܼܕ݂ܵܐ: ܨܲܠܵܘ ܕܢܸܗܘܸܐ ܫܲܝܢܵܐ ܒܲܒ݂ܪܝܼܬ݂ܵܐ.

ܢܹܐܡܲܪ: ܕܘܼܟ݂ܪܵܢܵܟ݂ ܐܲܒ݂ܘܼܢ ܥܲܠ ܡܲܕ݂ܒܲܚ ܩܘܼܕ݂ܫܵܐ: ܥܲܡ ܟܹܐܢܹ̈ܐ ܕܲܢܨܲܚܘ ܘܣܵܗܕܹ̈ܐ ܕܐܸܬ݂ܟܲܠܲܠܘ܀

ܗܵܐ ܫܟܸܒ݂ܘ ܥܲܠ ܣܲܒ݂ܪܵܟ݂ ܟܠܗܘܿܢ ܥܲܢܝܼܕܹ̈ܐ:ܕܒܲܩܝܵܡܬܵܐ ܫܒ݂ܝܼܚܬܵܐ ܒܫܘܼܒ݂ܚܵܐ ܬܩܝܼܡ ܐܸܢܘܿܢ܀

ܘܢܵܦܩܝܼܢ ܠܒܲܪ ܠܗܲܝܟܠܵܐ: ܘܡܲܛܥܸܢ ܟܵܗܢܵܐ ܠܲܡܫܲܡܫܵܢܹ̈ܐ ܨܠܝܼܒ݂ܵܐ ܘܐܹܘܲܢܓܲܠܝܼܘܿܢ. ܘܐܵܡܲܪ:

ܡܫܝܼܚܵܐ ܡܵܪܲܢ ܢܲܫܘܹܝܟ݂ܘܿܢ ܕܲܬ݂ܩܲܒ݁ܠܘܼܢ ܦܲܪܨܘܿܦܹܗ ܒܐܲܦܹ̈ܐ ܓܲܠ̈ܝܵܬ݂ܵܐ: ܐܵܡܹܝܢ܀

ܘܡܵܐ ܕܫܸܠܡܲܬܸ ܟܵܪܘܿܙܘܼܬ݂ܵܐ: ܐܵܡܲܪ ܟܵܗܢܵܐ: ܠܵܟ݂ ܡܵܪܝܵܐ ܐܲܠܵܗܵܐ ܚܲܝܠܬ݂ܵܢܵܐ ܡܸܬ݂ܟܲܫܦܝܼܢܲܢ ܘܫܵܐܠܝܼܢܲܢ: ܫܲܡܠܵܐ ܥܲܡܲܢ ܛܲܝܒܘܼܬ݂ܵܟ݂ ܘܐܲܫܦܲܥ ܒܐܝܼܕܲܝ̈ܢ ܡܲܘܗܲܒ݂ܬ݂ܵܟ݂: ܘܪ̈ܲܚܡܹܐ ܘܲܚܢܵܢܵܐ ܕܐܲܠܵܗܘܼܬ݂ܵܟ݂ ܢܸܗܘܘܿܢ ܠܚܘܼܣܵܝ ܚܲܘܒܹ̈ܐ ܕܥܲܡܵܟ݂: ܘܲܠܫܘܼܒ݂ܩܵܢ ܚܛܵܗܹ̈ܐ ܕܟ݂ܠܵܗ݁ ܥܵܢ̈ܵܐ ܕܡܲܪܥܝܼܬ݂ܵܟ݂: ܕܲܓ݂ܒܲܝܬ݁ ܠܵܟ݂ ܒܛܲܝܒܘܼܬ݂ܵܟ݂ ܘܲܒ݂ܪ̈ܲܚܡܲܝܟ: ܛܵܒ݂ܵܐ ܘܪܵܚܹܡ ܒܢܲܝ̈ܢܵܫܵܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܐܵܡܪܝܼܢ ܡܫܲܡܫܵܢܹ̈ܐ ܒܩܵܠܵܐ ܪܵܡܵܐ: ܐܲܪܟܸܢܘ ܪܹ̈ܫܲܝܟܘܿܢ ܠܲܣܝܵܡܐܝܼܕ݂ܵܐ ܘܩܲܒܸܠܘ ܒܘܼܪܟܬ݂ܐ.

ܘܡܲܪܟܢܝܼܢ ܪܹ̈ܫܲܝܗܘܿܢ ܥܲܡܵܐ ܥܲܡ ܫܲܡܵܫܹ̈ܐ. ܘܬ݂ܵܢܹܐ ܟܵܗܢܵܐ ܣܝܵܡܐܝܼܕ݂ܵܐ ܗܵܢܵܐ ܒܠܸܒܹܗ ܢܝܼܚܵܐܝܼܬ݂ ܟܲܕ݂ ܓܗܝܼܢ: ܡܵܪܝܵܐ ܐܲܠܵܗܵܐ ܚܲܝܠ̱ܬ݂ܵܢܵܐ ܬܢܝܼ. ܕܝܼܠܵܟ݂ ܗ݇ܝܼ ܥܹܕ݇ܬܵܐ ܩܲܕܝܼܫܬܵܐ ܩܵܬ݂ܘܿܠܝܼܩܝܼ: ܕܲܒ݂ܚܲܫܹܗ ܪܲܒܵܐ ܕܲܡܫܝܼܚܵܟ݂ ܐܸܙܕܲܒ݂ܢܲܬܸ ܥܵܢ̈ܵܐ ܕܡܲܪܥܝܼܬ݂ܵܟ݂. ܘܡܸܢ ܛܲܝܒܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ: ܗܵܘ ܕܐܝܼܬ݂ܵܘܗܝ ܒܲܪ ܟܝܵܢܵܐ ܕܐܲܠܵܗܘܼܬ݂ܵܟ݂ ܡܫܲܒܲܚܬܵܐ: ܡܸܬ݂ܝܲܗܒ݁ܝܼܢ ܕܲܪ̈ܓܹܐ ܕܲܣܝܵܡܝܼܕ݂ܵܐ ܕܟ݂ܵܗܢܘܼܬ݂ܵܐ ܫܲܪܝܼܪܬܵܐ. ܘܒܲܡܪܲܚܡܵܢܘܼܬ݂ܵܟ݂ ܡܵܪܝ ܐܲܫܘܝܼܬܵܗ݁ ܠܲܒ݂ܨܝܼܪܘܼܬܹܗ ܕܲܟ݂ܝܵܢܲܢ ܚܲܠܵܫܵܐ: ܕܢܸܗܘܸܐ ܗܲܕܵܡܸ̈ܐ ܝܼܕ݂ܝܼܥܹ̈ܐ ܒܓ݂ܘܫܡܵܗ݁ ܪܲܒܵܐ ܕܥܹܕ݇ܬܵܐ ܩܲܕܝܼܫܬܵܐ ܩܵܬ݂ܘܿܠܝܼܩܝܼ: ܘܲܢܫܲܡܸܫ ܥܘܼܕ݂ܪ̈ܵܢܹܐ ܪ̈ܘܼܚܵܢܵܝܹܐ ܠܢܲܦ̮̈ܫܵܬ݂ܵܐ ܕܲܡܗܲܝܡܢܹ̈ܐ. ܐܲܢ݇ܬ ܗܵܟܹܝܠ ܡܵܪܝ ܫܲܡܠܵܐ ܥܲܡܲܢ ܛܲܝܒܘܼܬ݂ܵܟ݂: ܘܐܲܫܦܲܥ ܒܐܝܼܕܲܝ̈ܢ ܡܲܘܗܲܒ݂ܬ݂ܵܟ݂: ܘܪ̈ܲܚܡܲܝܟ ܘܲܚܢܵܢܵܐ ܕܐܲܠܵܗܘܼܬ݂ܵܟ݂: ܢܸܗܘܘܿܢ ܥܠܲܝܢ ܘܥܲܠ ܥܲܡܵܐ ܗܵܢܵܐ ܕܲܓ݂ܒܲܝܬ݁ ܠܵܟ݂.

ܘܡܵܬܲܚ ܩܲܘܡܬܹܗ ܘܲܡܪܝܼܡ ܩܵܠܹܗ ܘܐܵܡܲܪ: ܘܗܲܒ݂ܠܲܢ ܡܵܪܝ ܒܲܚܢܵܢܵܟ݂ ܕܟ݂ܠܲܢ ܐܲܟܲܚ݇ܕ݂ ܫܲܘܝܵܐܝܼܬ݂ ܟܠܗܘܿܢ ܝܲܘ̈ܡܵܬ݂ܵܐ ܕܚܲܝܲܝ̈ܢ: ܢܸܫܦܲܪ ܠܐܲܠܵܗܘܼܬ݂ܵܟ݂ ܒܲܥܒ݂ܵܕܹ̈ܐ ܛܵܒܹ̈ܐ ܕܙܲܕܝܼܩܘܼܬ݂ܵܐ: ܕܲܡܢܝܼܚܝܼܢ ܘܲܡܪܲܥܹܝܢ ܠܨܸܒ݂ܝܵܢܵܐ ܡܫܲܒ݁ܚܵܐ ܕܡܵܪܘܼܬ݂ܵܟ݂: ܘܢܸܫܬܘܸܐ ܒܥܘܼܕ݂ܪܵܢ ܛܲܝܒ݁ܘܼܬ݂ܵܟ݂ ܠܡܲܣܵܩܘܼ ܠܵܟ݂ ܬܸܫܒ݁ܘܿܚܬܵܐ ܘܐܝܼܩܵܪܵܐ ܘܬܲܘܕܝܼܬ݂ܵܐ ܘܣܸܓ݂ܕ݁ܬ݂ܵܐ: ܒܟ݂ܠ ܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܥܵܐܠܝܼܢ ܡܫܲܡܫܵܢܹ̈ܐ ܠܡܲܕ݂ܒ݁ܚܵܐ ܘܐܵܡܪܝܼܢ: ܡܲܢ ܕܠܵܐ ܫܩܝܼܠܵܐ ܠܹܗ ܡܲܥܡܘܼܕ݂ܝܼܬ݂ܵܐ ܢܹܐܙܲܠ: ܡܲܢ ܕܠܵܐ ܡܩܲܒܲܠ ܠܹܗ ܪܘܼܫܡܵܐ ܕܚܲܝܹ̈ܐ ܢܹܐܙܲܠ: ܡܲܢ ܕܠܵܐ ܢܵܣܹܒ݂ ܠܹܗ ܢܹܐܙܲܠ: ܙܸܠܘ ܫܵܡܘܿܥܹ̈ܐ ܘܲܚܙܵܘ ܬܲܪ̈ܥܹܐ܀

ܘܐܵܣܪܝܼܢ ܘܹܐܠܹ̈ܐ ܘܲܡܫܲܪܸܐ ܟܵܗܢܵܐ ܥܘܿܢܝܼܬ݂ܵܐ ܕܐ݇ܪ̈ܵܙܹܐ ܐܲܝܕܵܐ ܕܗܝܼ. ܘܬ݂ܵܢܹܝܢ ܠܵܗ݁ ܐܲܝܠܹܝܢ ܕܲܒ݂ܡܲܕ݂ܒ݁ܚܵܐ܀ ܘܣܵܓܹܕ݂ ܟܵܗܢܵܐ ܠܐܲܪܒܥܵܐ ܓܲܒ݁ܝܼ̈ܢ ܕܒܹܝܡ. ܩܲܕ݂ܡܵܝܲܬ݂ ܣܵܓܹܕ݂ ܠܡܲܕܢܚܵܐ: ܒ: ܙܲܒ݂ܢ̈ܝܼܢ. ܘܟܸܢ ܠܝܲܡܝܼܢܵܐ. ܘܟܸܢ ܠܡܲܕܢܚܵܐ ܚܕ݂ܐ ܙܒܲܢ݇ܬܵܐ. ܘܩܵܐܹܡ. ܘܟܸܢ ܣܵܓܹܕ݂ ܠܡܲܕ݂ܢܚܵܐ: ܒ: ܙܲܒ݂ܢ̈ܝܼܢ. ܘܟܸܢ ܠܣܸܡܵܠܵܐ: ܙܒܲܢ݇ܬܵܐ. ܘܲܠܡܲܕ݂ܢܚܵܐ: ܙܒܲܢ݇ܬܵܐ. ܘܲܠܒܸܣܬܪܹܗ ܙܒܲܢ݇ܬܵܐ. ܘܗܵܝܕܹܝܢ ܦܵܬ݂ܚܝܼܢ ܘܹܐܠܹ̈ܐ ܕܡܲܕ݂ܒ݁ܚܵܐ: ܘܢܵܦܩܝܼܢ ܡܫܲܡܫܵܢܹ̈ܐ ܠܐܘܼܪܲܥ ܟܵܗܢܵܐ. ܘܲܡܫܲܒܲܚ ܟܵܗܢܵܐ ܒܥܘܿܢܝܼܬ݂ܵܐ ܕܐ݇ܪ̈ܵܙܹܐ. ܘܢܵܚܹ݁ܬ݂ ܘܲܡܫܲܠܸܡ ܡܼܢ ܥܲܡܵܐ ܟܠܹܗ܀ ܘܡܵܐ ܕܡܵܛܹܐ ܠܘܵܬ݂ ܡܫܲܡܫܵܢܹ̈ܐ: ܣܵܓ݂ܕܝܼܢ ܦܲܪܨܘܿܦܵܐܝܼܬ݂ ܠܘܵܬ݂ ܚܕ݂ܵܕܹ̈ܐ.

ܘܐܵܡ݁ܪܝܼܢ ܡܫܲܡܫܵܢܹ̈ܐ: ܒܲܪܸܟ݂ܡܵܪܝ: ܢܨܲܠܸܐ ܫܠܵܡܵܐ ܥܲܡܲܢ܀

ܘܗܘܼ ܐܵܡܲܪ ܠܗܘܿܢ: ܐܲܠܵܗܵܐ ܡܵܪܹܐ ܟܠ ܢܸܬ݁ܬ݁ܢܝܼܚ ܒܬܸܫܡܸܫܬܟ݂ܘܿܢ ܘܲܢܗܲܕܲܪܟ݂ܘܿܢ ܒܟ݂ܠ ܫܘܼܦܪ̈ܝܼܢ: ܘܢܲܥܬܲܪܟ݂ܘܿܢ ܒܟ݂ܠ ܫܘܼܟܵܢ̈ܝܼܢ ܕܡܲܘ̈ܗܒ݂ܵܬܹܗ ܠܥܵܠܡܝܼܢ ܐܵܡܹܝܢ܀

ܘܟܸܢ ܣܵܠܹܩ ܠܕܲܪܓ݂ܵܐ ܕܩܸܣܛܪܘܿܡܵܐ ܘܡܵܐ ܕܡܵܛܹܐ ܠܲܬ݂ܪܲܥ ܩܲܢܟܹ݁ܐ ܕܗܘܼܝܘܼ ܡܲܕ݂ܒ݁ܚܵܐ ܣܵܓܹܕ݂: ܘܐܵܡ݁ܪܝܼܢ ܡܫܲܡܫܵܢܹ̈ܐ ܟܠܗܘܿܢ ܫܲܘܝܵܐܝܼܬ݂: ܢܨܲܠܹܐ ܫܠܵܡܵܐ ܥܲܡܲܢ.

ܘܩܵܐܹܡ ܘܦܵܫܹܛ ܐܝܼܕ݂ܵܘܗ̈ܝ ܘܐܵܡܲܪ: ܟܲܕ݂ ܪܣܝܼܣܝܼܢ ܠܸܒ̈ܵܘܵܬܲܢ ܘܲܕ݂ܟܹܝܢ ܡܼܢ ܬܹܐܪܬܵܐ ܒܝܼܫܬܵܐ: ܢܸܫܬܘܸܐ ܕܢܸܥܘܿܠ ܠܲܩܕ݂ܘܿܫ ܩܘܼܕ݂ܫܹ̈ܐ ܪ̈ܵܡܹܐ ܘܲܡ̈ܥܲܠܲܝܵܐ. ܘܕ݂ܲܟ݂ܝܵܐܝܼܬ݂ ܘܙܲܗܝܵܐܝܼܬ݂ ܘܩܲܕܝܼܫܵܐܝܼܬ݂ ܢܩܘܼܡ ܩܕ݂ܵܡ ܡܲܕ݂ܒܚܵܟ݂ ܩܲܕܝܼܫܵܐ: ܘܲܢܩܲܪܸܒ݂ ܠܵܟ݂ ܕܸܒ݂ܚܹ̈ܐ ܪ̈ܘܼܚܵܢܵܝܹܐ ܘܲܡܠܝܼ̈ܠܹܐ ܒܗܲܝܡܵܢܘܼܬ݂ܵܐ ܕܲܫܪܵܪܵܐ. ܘܡܲܩܸܦ: ܐܲܢ݇ܬ ܕܹܝܢ ܛܵܒ݂ܵܐ ܕܠܵܐ ܐܵܠܹܡ ܠܥܵܠܲܡ: ܘܠܵܐ ܠܥܵܠܲܡ ܢܵܛܲܪ ܪܘܼܓ݂ܙܹܗ. ܐܲܗܦܸܟ݂ ܐܲܦܲܝ̈ܟ ܡܼܢ ܚܛܵܗܲܝ̈: ܘܟ݂ܠܗܹܝܢ ܣܲܟ݂ܠܘܵܬ݂ܝ̈ ܥܛܝܼ: ܒܣܘܿܓ݂ܐܵܐ ܪܲܒܵܐ ܕܲܡܪܲܚܡܵܢܘܼܬ݂ܵܟ݂: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܐܸܢ ܠܲܝܬ ܠܹܗ ܐܲܬ݂ܪܵܐ ܐܵܡܲܪ: ܡܵܪܲܢ ܝܼܫܘܿܥ ܢܸܗܘܸܐ ܥܲܡ ܟܠܲܢ ܒܛܲܝܒܘܼܬܹܗ ܘܲܒ݂ܪ̈ܲܚܡܵܘܗܝ ܠܥܵܠܲܡ: ܐܵܡܹܝܢ.

ܘܗܘܼ ܟܵܗܢܵܐ ܣܵܠܹܩ ܠܲܬ݂ܪܲܥ. ܡܲܕ݂ܒ݁ܚܵܐ ܘܣܵܓܹܕ݂ ܘܩܵܐܹܡ ܘܦܵܫܹܛ ܐܝܼܕ݂ܵܘܗ̈ܝ ܠܥܸܠ ܘܐܵܡܲܪ ܒܟ݂ܠܹܗ ܩܵܠܹܗ:

ܡܗܲܝܡܢܝܼܢ ܚ݇ܢܲܢ ܒܚܲܕ݂ ܐܲܠܵܗܵܐ: ܐܲܒ݂ܵܐ ܐܲܚܝܼܕ݂ ܟܠ. ܥܵܒ݂ܘܿܕ݂ܵܐ ܕܟ݂ܠܗܹܝܢ: ܐܲܝܠܹܝܢ ܕܡܸܬ݂ܚܲܙ̈ܝܵܢ: ܘܲܕ݂ܠܵܐ ܡܸܬ݂ܚܲܙ̈ܝܵܢ. ܘܲܒ݂ܚܲܕ݂ ܡܵܪܝܵܐ: ܝܼܫܘܿܥ ܡܫܝܼܚܵܐ: ܒܪܹܗ ܕܐܲܠܵܗܵܐ. ܝܼܚܝܼܕ݂ܵܝܵܐ: ܒܘܼܟ݂ܪܵܐ ܕܟ݂ܠܗܹܝܢ ܒܸܪ̈ܝܵܬ݂ܵܐ. ܗ݁ܘ ܕܡܼܢ ܐܲܒ݂ܘܼܗܝ ܐܸܬ݂ܝܼܠܸܕ݂ ܩܕ݂ܵܡ ܟܠܗܘܿܢ ܥܵܠܡܹ̈ܐ: ܘܠܵܐ ܐܸܬ݂ܥܒܸܕ݂. ܐܲܠܵܗܵܐ ܫܲܪܝܼܪܵܐ. ܕܡܼܢ ܐܲܠܵܗܵܐ ܫܲܪܝܼܪܵܐ: ܒܲܪ ܟܝܵܢܵܐ ܕܐܲܒ݂ܘܼܗܝ ܕܒ݂ܐܝܼܕ݂ܵܘܗ̈ܝ ܐܸܬ݁ܬܲܩܲܢܘ ܥܵܠܡܹ̈ܐ: ܘܐܸܬ݂ܒ݁ܪܝܼ ܟܠܡܸܕܸܡ. ܗ݁ܘ ܕܡܸܛܠܵܬܲܢ ܒܢܲܝ̈ܢܵܫܵܐ: ܘܡܸܛܠ ܦܘܼܪܩܵܢܲܢ: ܢܚܸܬ݂ ܡܼܢ ܫܡܲܝܵܐ. ܘܐܸܬ݂ܓܲܫܲܡ ܡܼܢ ܪܘܼܚܵܐ ܕܩܘܼܕ݂ܫܵܐ ܘܲܗܘܵܐ ܒܲܪܢܵܫܵܐ: ܘܐܸܬ݂ܒܛܸܢ ܘܐܸܬ݂ܝܼܠܸܕ ܡܼܢ ܡܲܪܝܲܡ ܒܬ݂ܘܼܠܬܵܐ. ܘܚܲܫ ܘܐܸܙܕܩܸܦ: ܒܝܲܘܡܲܝ̈ ܦܲܢܛܝܼܘܿܣ ܦܝܼܠܵܛܘܿܣ. ܘܐܸܬ݂ܩܒܲܪ: ܘܩܵܡ ܠܲܬ݂ܠܵܬ݂ܵܐ ܝܲܘܡ̈ܝܼܢ ܐܲܝܟ݂ ܕܲܟ݂ܬ݂ܝܼܒ݂. ܘܲܣܠܸܩ ܠܲܫܡܲܝܵܐ: ܘܝܼܬܸܒ݂ ܡܼܢ ܝܲܡܝܼܢܵܐ ܕܐܲܒ݂ܘܼܗܝ. ܘܬ݂ܘܼܒ݂ ܥܬ݂ܝܼܕ݂ ܠܡܹܐܬ݂ܵܐ: ܠܲܡܕ݂ܵܢ ܠܡܝܼ̈ܬܹܐ ܘܲܠܚܲܝܹ̈ܐ. ܘܲܒ݂ܚܲܕ݂ ܪܘܼܚܵܐ ܕܩܘܼܕ݂ܫܵܐ: ܪܘܼܚܵܐ ܕܲܫܪܵܪܵܐ: ܗ݁ܘ ܕܡܼܢ ܐܲܒ݂ܵܐ ܢܵܦܹܩ: ܪܘܼܚܵܐ ܡܲܚܝܵܢܵܐ. ܘܒܲܚܕ݂ܐ ܥܹܕ݇ܬܵܐ ܩܲܕܝܼܫܬܵܐ: ܘܲܫܠܝܼܚܵܝܬܵܐ ܩܵܬ݂ܘܿܠܝܼܩܝܼ. ܘܡܲܘܕܹܝܢܲܢ ܒܲܚܕ݂ܐ ܡܲܥܡܘܿܕ݂ܝܼܬ݂ܵܐ: ܠܫܘܼܒ݂ܩܵܢܵܐ ܕܲܚܛܵܗܹ̈ܐ ܘܒܲܩܝܵܡܬܵܐ ܕܦܲܓ݂ܪ̈ܲܝܢ: ܘܲܒ݂ܚܲܝܹ̈ܐ ܕܲܠܥܵܠܲܡ ܥܵܠܡܝܼܢ: ܐܵܡܹܝܢ܀

ܘܥܵܐܠܝܼܢ ܒܣܘܼܪܗܵܒ݂ܵܐ ܘܣܵܓ݂ܕ݁ܝܼܢ ܬܠܵܬ݂ ܙܲܒ݂ܢ̈ܝܼܢ: ܘܲܒ݂ܡܲܥܲܠܬܹ݁ܗ ܟܵܗܢܵܐ ܣܵܐܹܡ ܐܝܼܕ݂ܵܘܗ̈ܝ ܡܼܢ ܗܵܢܵܐ ܓܲܒܵܐ ܘܡܼܢ ܗܵܢܵܐ ܓܲܒܵܐ ܥܲܠ ܪܹܫ ܡܫܲܡܫܵܢܹ̈ܐ ܟܠܗܘܿܢ ܘܣܵܡܹܟ݂ ܒܪܹ̈ܫܲܝܗܘܿܢ܀ ܘܐܸܢ ܐܝܼܬ݂ܵܘܗܝ ܐܲܦܸܣܩܘܿܦܵܐ ܐܲܘ ܡܝܼܛܪܵܦܘܿܠܹܝܛܵܐ ܐܲܘ ܩܵܬ݂ܘܿܠܝܼܩܵܐ ܣܵܡܹܟ݂ ܒܡܲܨܛܲܒ݁ܬ݂ܵܐ ܟܲܕ݂ ܐܲܦܵܘܗ̈ܝ ܚܵܐܲܪ ܠܡܲܥܪܒ݂ܵܐ: ܥܕ݂ܡܵܐ ܕܫܵܠܡ݁ܝܼܢ ܡܼܢ ܗܲܝܡܵܢܘܼܬ݂ܵܐ.

ܘܟܲܕ݂ ܣܵܓܹܕ݂ ܩܕ݂ܵܡ ܡܲܕ݂ܒܚܵܐ: ܐܵܡܲܪ ܟܵܗܢܵܐ: ܐܲܠܵܗܵܐ ܡܵܪܹܐܟܠ ܢܸܗܘܸܐ ܥܲܡ ܟܠܲܢ ܒܟ݂ܠܲܢ: ܒܛܲܝܒܘܼܬܹܗ ܘܲܒ݂ܪ̈ܲܚܡܵܘܗܝ ܠܥܵܠܡܝܼܢ: ܐܵܡܹܝܢ.

ܗܵܪܟܵܐ ܡܫܝܼܓ݂ ܟܵܗܢܵܐ ܐܝܼܕ݂ܵܘܗ̈ܝ. ܘܲܡܫܲܠܡܝܼܢ ܡܼܢ ܪ̈ܘܼܫܡܹܐ ܕܲܒ݂ܡܲܕ݂ܒܚܵܐ ܥܕ݂ܡܵܐ ܕܫܵܠܡܝܼܢ. ܘܡܵܐ ܕܲܡܫܲܪܸܐ ܡܫܲܡܫܵܢܵܐ ܠܡܲܟ݂ܪܵܙܘܼ ܟܵܪܘܿܙܘܼܬ݂ܵܐ ܗܵܝܕܹܝܢ ܩܵܐܹܡ ܟܵܗܢܵܐ ܒܡܸܨܥܲܬ݂ ܡܲܕ݂ܒܚܵܐ: ܘܡܲܗܦܸܟ݂ ܪܹܫܹܗ ܩܲܠܝܼܠ ܠܘܵܬ݂ ܡܫܲܡܫܵܢܹ̈ܐ ܕܲܒ݂ܝܲܡܝܼܢܵܐ ܘܲܒ݂ܣܸܡܵܠܵܐ ܘܐܵܡܲܪ: ܒܲܪܸܟ݂ܡܵܪܝ: ܨܲܠܵܘ ܥܠܲܝ ܐܲܚܲܝ̈.

ܘܲܡܦܲܢܹܝܢ ܠܹܗ ܗܵܟܲܢ: ܡܫܝܼܚܵܐ ܢܸܫܡܲܥ ܨ̈ܠܘܵܬ݂ܵܟ݂ ܘܢܸܬ݂ܪܲܥܸܐ ܒܬܲܟ݂ܫ̈ܦ̮ܵܬ݂ܵܟ݂ ܘܲܢܩܲܒܸ݁ܠ ܩܘܼܪܒܵܢܵܟ݂ ܒܛܲܝܒܘܼ ܕܲܚܢܵܢܹܗ ܠܥܵܠܡܝܼܢ ܐܵܡܹܝܢ.

ܟܵܪܘܿܙܘܼܬ݂ܵܐ: ܢܨܲܠܸܐ ܫܠܵܡܵܐ ܥܲܡܲܢ. ܨܲܠܵܘ ܥܲܠ ܕܘܼܟ݂ܪܵܢܵܐ ܕܐܲܒ݂ܵܗܲܝ̈ܢ ܩܵܬ݂ܘܿܠܝܼܩܹ̈ܐ ܘܐܲܦܸܣܩܘܿܦܹ̈ܐ. ܘܲܕ݂ܟ݂ܠܗܘܿܢ ܩܲܫܝܼܫܹ̈ܐ ܘܲܡܫܲܡܫܵܢܹ̈ܐ ܘܓܲܕܘܼܕܹ̈ܐ ܘܲܒ݂ܬ݂̈ܘܼܠܵܬ݂ܵܐ. ܘܲܕ݂ܟ݂ܠܗܘܿܢ ܐܲܝܠܹܝܢ ܕܲܥܢܲܕ݂ܘ ܘܲܢܦܲܩܘ ܡܼܢ ܥܵܠܡܵܐ ܗܵܢܵܐ ܒܗܲܝܡܵܢܘܼܬ݂ܵܐ ܕܲܫܪܵܪܵܐ. ܘܲܕ݂ܟ݂ܠܗܘܿܢ ܐܲܒ݂ܵܗܲܝ̈ܢ ܘܐܲܚܲܝ̈ܢ. ܘܲܕ݂ܟ݂ܠܗܘܿܢ ܒܢܲܝ̈ܢ ܘܲܒ݂̈ܢܵܬܲܢ. ܘܲܕ݂ܟ݂ܠܗܘܿܢ ܡܲܠܟܹ̈ܐ ܡܗܲܝܡܢܹ̈ܐ ܪ̈ܵܚܡܲܝ ܠܲܡܫܝܼܚܵܐ. ܘܲܕ݂ܟ݂ܠܗܘܿܢ ܢܒ݂ܝܹ̈ܐ ܘܲܫܠܝܼܚܹ̈ܐ. ܘܲܕ݂ܟ݂ܠܗܘܿܢ ܣܵܗܕܹ̈ܐ ܘܡܵܘܕܝܵܢܹ̈ܐ ܕܲܬ݂ܢܵܢ ܘܕܲܒ݂ܟ݂ܠ ܐܲܬܲܪ. ܕܐܲܠܵܗܵܐ ܢܟܲܠܸܠ ܐܸܢܘܿܢ ܒܲܩܝܵܡܬܵܐ ܕܡܼܢ ܒܹܝܬ݂ ܡܝܼܬܹ̈ܐ: ܘܢܸܬܸ݁ܠ ܠܲܢ ܥܲܡܗܘܿܢ: ܣܲܒ݂ܪܵܐ ܛܵܒ݂ܵܐ ܘܲܡܢܵܬ݂ܵܐ ܘܝܵܪܬܘܼܬ݂ܵܐ ܘܚܲܝܹ̈ܐ ܒܡܲܠܟܘܼܬ݂ܵܐ ܕܲܫܡܲܝܵܐ܀ ܘܢܸܬ݂ܩܲܒܲܠ ܩܘܼܪܒܵܢܵܐ ܗܵܢܵܐ ܒܐܲܦܹ̈ܐ ܓܲܠ̈ܝܵܬ݂ܵܐ: ܘܢܸܬ݂ܩܲܕܲܫ ܒܡܸܠܬ݂ܵܐ ܕܐܲܠܵܗܵܐ ܘܲܒ݂ܪܘܼܚܵܐ ܕܩܘܼܕ݂ܫܵܐ: ܕܢܸܗܘܸܐ ܠܲܢ ܠܥܘܼܕ݂ܪܵܢܵܐ ܘܲܠܦܘܼܪܩܵܢܵܐ ܘܲܠܚܲܝܹ̈ܐ ܕܲܠܥܵܠܲܡ ܥܵܠܡܝܼܢ: ܒܡܲܠܟܘܼܬ݂ܵܐ ܕܲܫܡܲܝܵܐ ܒܛܲܝܒܘܼܬܹܗ ܕܲܡܫܝܼܚܵܐ.

ܘܟܸܢ ܐܵܡܲܪ ܟܵܗܢܵܐ ܠܲܡܫܲܡܫܵܢܵܐ ܕܲܡܫܲܡܠܸܐ: ܐܲܠܵܗܵܐ ܡܵܪܹܐܟܠ ܢܚܲܝܠܵܟ݂ ܕܲܬ݂ܫܲܒܲܚ ܬܸܫܒܚܵܬܹ̈ܗ.

ܘܡܲܗܦܸܟ݂ ܐܲܦܵܘܗ̈ܝ ܠܡܲܕ݂ܒܚܵܐ ܘܲܡܩܲܪܸܒ݂ ܬܠܵܬ݂ ܡܵܛܘܿܢܝܹ̈ܐ: ܟܲܕ ܒܟ݂ܠ ܚܕ݂ܵܐ ܡܵܛܘܿܢܝܼܵܐ ܠܲܩܕ݂ܵܡܵܘܗܝ ܩܵܪܹܒ݂. ܘܥܲܡ ܫܘܼܪܵܝ ܡܵܛܘܿܢܝܼܵܐ ܡܫܲܪܸܐ ܘܡܸܬ݂ܟܲܫܲܦ ܗܵܟܲܢ: ܟܲܕ ܡܲܪܬܸ݁ܡ ܒܣܸܦ̈ܘܵܬܹܗ ܗܵܕܹܐ ܨܠܘܿܬ݂ܵܐ ܕܡܵܪܝ ܒܲܪ ܨܲܘܡܵܐ: ܫܘܼܒ݂ܚܵܠܵܟ݂ ܡܸܫܟܚܵܢܵܐ ܕܐܲܒܝܼܕܹ̈ܐ. ܫܘܼܒ݂ܚܵܠܵܟ݂ ܡܟܲܢܫܵܢܵܐ ܕܲܡܒܲܕܪܹ̈ܐ. ܫܘܼܒ݂ܚܵܠܵܟ݂ ܡܩܲܪܒ݂ܵܢܵܐ ܕܪ̈ܲܚܝܼܩܹܐ. ܫܘܼܒ݂ܚܵܠܵܟ݂ ܡܲܦܢܝܵܢܵܐ ܕܛܵܥܲܝ̈ܵܐ ܠܝܼܕ݂ܲܥܬ݂ܵܐ ܕܲܫܪܵܪܵܐ. ܫܘܼܒ݂ܚܵܠܵܟ݂ ܡܵܪܝ ܕܲܩܪܲܝܬܵܢܝ ܐܵܦܠܝܼ ܚܲܠܵܫܵܐ ܒܛܲܝܒ݁ܘܼܬ݂ܵܟ݂: ܘܩܲܪܸܒ݂ܬܵܢܝ ܠܘܵܬ݂ܵܟ݂ ܒܲܚܢܵܢܵܟ݂. ܘܣܵܡܬܵܢܝ ܐܲܝܟ݂ ܗܲܕܵܡܵܐ ܝܼܕ݂ܝܼܥܵܐ ܒܓ݂ܘܼܫܡܵܐ ܪܲܒܵܐ ܕܥܹܕ݇ܬܵܟ݂ ܩܲܕܝܼܫܬܵܐ ܩܵܬ݂ܘܿܠܝܼܩܝܼ: ܕܐܹܩܲܪܸܒ݂ ܩܕ݂ܵܡܲܝܟ ܕܸܒ݂ܚܬ݂ܵܐ ܗܵܕ݂ܐ ܚܲܝܬ݂ܵܐ ܘܩܲܕܝܼܫܬܵܐ ܘܲܡܩܲܒܲܠܬܵܐ. ܕܐܝܼܬܹܝܗ݁ ܕܘܼܟ݂ܪܵܢܵܐ ܕܚܲܫܹܗ ܘܲܕ݂ܡܲܘܬܹ݁ܗ ܘܕ݂ܲܩܒ݂ܘܼܪܬܹ݁ܗ ܘܕ݂ܲܩܝܵܡܬܹ݁ܗ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ܀ ܕܒܹܗ ܐܸܨܛܒ݂ܝܼܬ݁ ܘܐܸܬ݂ܪܲܥܝܼܬ݁: ܠܡܸܫܒܲܩ ܚܛܵܗܹ̈ܐ ܕܟ݂ܠܗܘܿܢ ܒܢܲܝ̈ܢܵܫܵܐ. ܬܢܝܼ.

(ܗܵܪܟܵܐ ܓܹܝܪ ܡܲܘܕܲܥܢܵܐ ܠܚܘܼܒܵܟ݂ ܐܘܿ ܡܵܪܝ: ܕܐܲܝܟܲܢ ܩܵܪܹܒ݂ ܟܵܗܢܵܐ ܠܲܩܕ݂ܵܡ ܡܲܕ݂ܒ݁ܚܵܐ. ܡܵܐ ܗܵܟܹܝܠ ܕܩܵܪܹܒ݂ ܟܲܕ ܡܸܬ݂ܟܲܫܲܦ: ܣܵܓܹܕ݂ ܥܕܲܡܵܐ ܕܡܵܛܹܐ ܠܡܲܕ݂ܒ݁ܚܵܐ: ܘܟܸܢ ܣܵܓܹܕ݂ ܘܩܵܐܹܡ ܘܢܵܫܹܩ ܠܲܡܨܲܥܬ݂ܵܐ. ܘܟܸܢ ܣܵܓܹܕ݂ ܘܩܵܐܹܡ ܘܢܵܫܹܩ ܠܩܲܪܢܹܗ ܕܝܲܡܝܼܢܵܐ. ܘܟܸܢ ܣܵܓܹܕ݂ ܘܩܵܐܹܡ ܘܢܵܫܹܩ ܠܩܲܪܢܹܗ ܕܣܸܡܵܠܵܐ. ܘܟܸܢ ܣܵܓܹܕ݂ ܘܩܵܐܹܡ ܘܢܵܫܹܩ ܠܲܡܨܲܥܬ݂ܵܐ ܘܲܠܓܲܒܵܐ ܕܝܲܡܝܼܢܵܐ ܘܲܠܓܲܒܵܐ ܕܣܸܡܵܠܵܐ. ܘܚܵܐܲܪ ܠܘܵܬ݂ ܗܵܢܘܿܢ ܕܲܒ݂ܓܲܒܵܐ ܕܝܲܡܝܼܢܵܐ ܘܐܵܡܲܪ: ܒܲܪܸܟ݂ ܡܵܪܝ. ܐܲܚܲܝ̈ ܨܲܠܵܘ ܥܠܲܝ: ܕܢܸܫܬܲܡܠܸܐ ܩܘܼܪܒܵܢܵܐ ܗܵܢܵܐ ܡܼܢ ܐܝܼܕܲܝ̈.

ܘܲܡܦܲܢܹܝܢ ܠܹܗ: ܐܲܠܵܗܵܐ ܡܵܪܹܐ ܟܠ ܢܚܲܝܠܵܟ݂ ܠܡܸܓ݂ܡܲܪ ܨܸܒ݂ܝܵܢܹܗ. ܘܲܢܩܲܒܸ݁ܠ ܩܘܼܪܒܵܢܵܟ݂. ܘܢܸܨܛܒܸܐ ܒܕ݂ܒ݂ܚܬ݂ܵܟ݂. ܕܲܡܩܲܪܸܒ݂ ܐܲܢ݇ܬ ܚܠܵܦܲܝܢ ܘܲܚܠܵܦܲܝܟ ܘܲܚܠܵܦ ܐܲܪܒܲܥܦܸܢ̈ܝܵܬܹܗ ܕܥܵܠܡܵܐ: ܒܛܲܝܒ݁ܘܼ ܕܲܚܢܵܢܹܗ ܠܥܵܠܡܝܼܢ: ܐܵܡܹܝܢ܀

ܘܟܸܢ ܬܵܢܹܐ: ܫܘܼܒ݂ܚܵܠܵܟ݂ ܡܸܫܟܚܵܢܵܐ ܕܐܲܒ݁ܝܼ̈ܕܹܐ. ܟܲܕ݂ ܣܵܓܹܕ݂ ܘܩܵܐܹܡ ܘܢܵܫܹܩ ܠܲܡܨܲܥܬ݂ܵܐ. ܘܟܸܢ ܣܵܓܹܕ݂ ܘܩܵܐܹܡ ܘܢܵܫܹܩ ܠܓܲܒܵܐ ܕܝܲܡܝܼܢܵܐ. ܘܟܸܢ ܣܵܓܹܕ݂ ܘܩܵܐܹܡ ܠܓܲܒܵܐ ܕܣܸܡܵܠܵܐ. ܘܲܡܩܲܪܸܒ݂ ܡܵܛܘܿܢܝܼܵܐ. ܘܩܵܐܹܡ ܘܢܵܫܹܩ ܠܲܡܨܲܥܬ݂ܵܐ. ܘܲܠܓܲܒܵܐ ܕܝܲܡܝܼܢܵܐ. ܘܲܠܓܲܒܵܐ ܕܣܸܡܵܠܵܐ. ܘܚܵܐܲܪ ܠܘܵܬ݂ ܗܵܢܘܿܢ ܕܲܒ݂ܓܲܒܵܐ ܕܣܸܡܵܠܵܐ. ܟܲܕ݂ ܗܸܘ ܒܓܲܒܵܐ ܕܝܲܡܝܼܢܵܐ: ܘܐܵܡܲܪ: ܒܲܪܸܟ݂ ܡܵܪܝ. ܨܲܠܵܘ ܥܠܲܝ ܐܲܚܲܝ̈ ܘܚܲܒ݁ܝܼ̈ܒܲܝ. ܕܐܸܫܬ݁ܘܸܐ ܕܐܹܩܲܪܸܒ݂ ܩܕ݂ܵܡܵܘܗܝ ܕܡܵܪܲܢ ܡܫܝܼܚܵܐ ܕܸܒ݂ܚܬ݂ܵܐ ܗܵܕܹܐ ܚܲܝܬ݂ܵܐ ܘܩܲܕܝܼܫܬܵܐ: ܚܠܵܦܲܝ ܘܲܚܠܵܦ ܟܠܹܗ ܓܵܘܵܐ ܕܥܹܕ݇ܬܵܐ ܩܲܕܝܼܫܬܵܐ: ܒܛܲܝܒ݁ܘܼ ܕܲܚܢܵܢܹܗ ܠܥܵܠܡܝܼܢ: ܐܵܡܹܝܢ.

ܘܲܡܦܲܢܹܝܢ ܠܹܗ: ܐܲܠܵܗܵܐ ܡܵܪܹܐ ܟܠ ܢܸܨܛܒܸܐ ܒܕ݂ܒ݂ܚܬ݂ܵܟ݂: ܘܲܢܩܲܒܸ݁ܠ ܩܘܼܪܒܵܢܵܟ݂: ܕܲܡܩܲܪܸܒ݂ ܐܲܢ݇ܬ݁ ܚܠܵܦܲܝܢ ܘܲܚܠܵܦܲܝܟ: ܒܛܲܝܒ݁ܘܼܬܹܗ ܘܲܒ݂ܪ̈ܲܚܡܵܘܗܝ ܠܥܵܠܡܝܼܢ: ܐܵܡܹܝܢ܀

ܘܟܸܢ ܐܵܡܲܪ: ܫܘܼܒ݂ܚܵܠܵܟ݂ ܡܸܫܟܚܵܢܵܐ ܕܐܲܒ݁ܝܼ̈ܕܹܐ. ܟܲܕ݂ ܣܵܓܹܕ݂ ܐܲܝܟ݂ ܛܲܟ݂ܣܵܐ ܩܲܕ݂ܡܵܝܵܐ. ܘܡܵܐ ܕܐܵܡܲܪ ܡܫܲܡܫܵܢܵܐ: ܘܢܸܬ݂ܩܲܒܲܠ ܩܘܼܪܒܵܢܵܐ: ܣܵܓܹܕ݂ ܟܵܗܢܵܐ ܠܩܘܼܒ݂ܠܹܗ ܘܐܵܡܲܪ: ܚܠܵܦ ܟܠܗܘܿܢ ܕܚܲܝܝܼܢ ܘܲܕ݂ܡܝܼܬ݂ܝܼܢ: ܡܸܬ݂ܩܲܪܲܒ݂ ܩܘܼܪܒܵܢܵܐ ܗܵܢܵܐ: ܢܸܬ݂ܩܲܒܲܠ ܡܼܢ ܚܲܛܵܝܘܼܬ݂ܝ ܩܕ݂ܵܡ ܒܹܝܡ ܕܚܝܼܠܬܵܐ ܕܪܲܒ݁ܘܼܬ݂ܵܟ݂ ܡܵܪܲܢ ܒܐܲܦܹ̈ܐ ܓܲܠ̈ܝܵܬ݂ܵܐ.

ܘܟܸܢ ܢܵܚܹܬ݂ ܟܵܗܢܵܐ ܡܼܢ ܡܸܨܛܲܒ݁ܬ݂ܵܐ ܡܣܲܪܗܒ݂ܵܐܝܼܬ݂: ܘܡܲܗܦܸܟ݂ ܦܲܪܨܘܿܦܹܗ ܨܹܝܕ݂ ܡܫܲܡܫܵܢܵܐ ܕܲܡܫܲܡܠܸܐ: ܟܲܕ݂ ܣܵܓܹܕ݂ ܠܘܵܬܹܗ ܘܐܵܡܲܪ ܗܵܟܲܢܵܐ: ܡܫܝܼܚܵܐ ܢܲܫܲܪ ܡܸܠܲܝ̈ܟ: ܘܲܢܩܲܒܸ݁ܠ ܦܹܐܪܹ̈ܐ ܕܣܸܦ̈ܘܵܬ݂ܵܟ݂: ܘܲܢܚܲܣܸܐ ܚܲܘܒܹ̈ܐ ܘܲܚܛܵܗܹ̈ܐ ܕܟ݂ܠܗܘܿܢ ܐܲܝܠܹܝܢ ܕܨܵܝܬ݁ܝܼܢ ܠܵܟ݂.

ܘܟܸܢ ܡܲܗܦܸܟ݂ ܐܲܦܵܘܗ̈ܝ ܠܲܩܕ݂ܵܡ ܡܲܕ݂ܒ݁ܚܵܐ: ܘܲܡܩܲܪܸܒ݂ ܡܵܛܘܿܢܝܼܵܐ: ܘܥܵܒܹܕ݂ ܣܝܵܡ ܒܘܼܪܟܵܐ: ܥܕ݂ܲܡܵܐ ܕܫܵܠܡܵܐ ܟܵܪܘܿܙܘܼܬ݂ܵܐ. ܘܟܲܕ݂ ܗܘܼ ܒܲܣܝܵܡ ܒܘܼܪܟܵܐ: ܬܵܢܹܐ ܢܝܼܚܵܐܝܼܬ݂ ܒܠܸܒܹ݁ܗ ܡܸܬ݂ܟܲܫܦܵܢܵܐܝܼܬ݂ ܗܵܕܹܐ ܨܠܘܿܬ݂ܵܐ:

܀ ܟܘܼܫܵܦܵܐ܀

ܐܹܝܢ ܡܵܪܲܢ ܘܐܲܠܵܗܲܢ. ܬܢܝܼ. ܠܵܐ ܬܚܘܼܪ ܒܣܘܿܓ݂ܐܵܐ ܕܲܚܛܵܗܲܝ̈ܢ: ܘܠܵܐ ܬܸܓ݂ܥܲܨ ܡܵܪܘܼܬ݂ܵܟ ܡܼܢ ܝܘܼܩܪܵܐ ܕܒ݂ܝܼ̈ܫܵܬܲܢ ܐܸܠܵܐ ܒܛܲܝܒ݁ܘܼܬ݂ܵܟ݂ ܠܵܐ ܡܸܬ݂ܡܲܠܠܵܢܝܼܬ݂ܵܐ: ܩܲܒܸ݁ܠ ܠܕܸܒ݂ܚ݇ܬ݂ܵܐ ܗܵܕܹܐ ܡܼܢ ܐܝܼܕ݂ܝ̈ܢ. ܘܗܲܒ݂ ܒܵܗ݁ ܚܲܝܠܵܐ ܘܡܸܬ݂ܡܲܨܝܵܢܘܼܬ݂ܵܐ: ܕܬܸܫܟܲܚ ܚܛܵܗܲܝ̈ܢ ܣܲܓ݁ܝܼܐܹ̈ܐ ܠܲܡܚܲܣܝܘܼ. ܕܡܵܐ ܕܡܸܬ݂ܓܠܸܐ ܐܲܢ݇ܬ݁ ܒܚܲܪܬ݂ܵܐ ܕܙܲܒ݂ܢܹ̈ܐ: ܒܒܲܪܢܵܫܵܐ ܕܡܸܢܲܢ ܢܣܲܒ݂ܬ݁: ܢܸܫܟܲܚ ܩܕ݂ܵܡܲܝܟ ܛܲܝܒ݁ܘܼܬ݂ܵܐ ܘܪ̈ܲܚܡܹܐ: ܘܢܸܫܬ݁ܘܸܐ ܠܲܡܫܲܒܵܚܘܼ ܥܲܡ ܟܸܢܫܹ̈ܐ ܡܸܬ݂ܝܲܕ݂ܥܵܢܹ̈ܐ.

ܘܡܵܐ ܕܫܸܠܡܲܬܸ ܟܵܪܘܿܙܘܼܬ݂ܵܐ ܩܵܐܹܡ ܘܢܵܫܹܩ ܠܡܲܕ݂ܒ݁ܚܵܐ ܘܬ݂ܵܢܹܐ ܓܗܵܢܬܵܐ: ܟܲܕ݂ ܠܵܐ ܦܵܫܹܛ ܐܝܼܕ݂ܵܘܗ̈ܝ ܠܲܩܕ݂ܵܡ ܡܲܕ݂ܒ݁ܚܵܐ. ܘܕ݂ܲܥ ܕܗܵܪܟܵܐ ܠܵܐ ܙܵܕܹܩ ܠܹܗ ܕܢܸܦܫܘܿܛ ܐܝܼܕ݂ܵܘܗ̈ܝ ܟܠ ܟܠܵܢܵܐܝܼܬ݂: ܒܗ݁ܝ ܕܠܵܐ ܫܩܝܼܠ ܠܹܗ ܦܵܪܹܗ݇ܣܝܼܵܐ. ܘܒܲܓ݂̈ܗܵܢܵܬ݂ܵܐ ܕܹܝܢ ܐ݇ܚܪ̈ܵܢܝܵܬ݂ܵܐ ܢܸܦܫܘܿܛ ܐܝܼܕ݂ܵܘܗ̈ܝ ܕܩܲܒܸ݁ܠ ܡܸܟܹ݁ܝܠ ܦܵܪܹܗ݇ܣܝܼܵܐ. ܘܲܒ݂ܟ݂ܠ ܓܗܵܢܬܵܐ ܣܵܓܹܕ݂ ܩܕ݂ܵܡ ܡܲܕ݂ܒ݁ܚܵܐ: ܒܪܹܫܵܗ݁ ܘܲܒ݂ܚܲܪܬ݂ܵܗ݁. ܘܩܲܘܡܹܗ ܕܹܝܢ ܢܸܗܘܸܐ ܪܲܚܝܼܩ ܡܼܢ ܡܲܕ݂ܒ݁ܚܵܐ ܐܲܝܟ݂ ܐܲܡܬ݂ܵܐ ܚܕ݂ܵܐ: ܘܒܲܝܢܵܬ݂ ܐܝܼܕ݂ܵܘܗ̈ܝ ܗܵܟ݂ܘܵܬ݂. ܘܢܲܪܟܸ݁ܢ ܪܹܫܹܗ ܥܕ݂ܡܵܐ ܠܒ݂ܘܼܪ̈ܟܵܘܗܝ ܘܲܒ݂ܫܘܼܠܵܡ ܟܠ ܓܗܵܢܬܵܐ ܢܸܣܓܘܿܕ݂ ܘܢܸܫܘܿܩ ܠܲܡܨܲܥܬܹܗ ܕܡܲܕ݂ܒ݁ܚܵܐ܀

ܘܟܸܢ ܡܩܲܪܹܒ݂ ܩܘܼܕܵܫܵܐ ܕܲܫܠܝܼܚܹ̈ܐ ܛܘܼܒ݂ܵܢܹ̈ܐ

ܡܪܝ ܐܕܝ ܘܡܪܝ ܡܐܪܝ

ܡܬܲܠܡܕ݂ܵܢܹ̈ܐ ܕܡܲܕ݂ܢܚܵܐ

ܕܒܹܗ ܡܸܬ݂ܩܲܕܲܫ ܡܼܢ ܫܲܒ݁ܬ݂ܵܐ ܕܲܩܝܵܡܬܵܐ ܘܲܥܕܲܡܵܐ ܠܣܘܼܒܵܪܵܐ ܘܲܒ݂ܥܲܢܝܼ̈ܕܹܐ ܘܲܒ݂ܕ݂ܘܼܟ݂ܪ̈ܵܢܹܐ ܕܩܲܕܝܼܫܹ̈ܐ ܘܲܒ݂ܝܲܘ̈ܡܵܬ݂ܵܐ ܫܚܝܼܡܹ̈ܐ.

ܘܐܵܡܲܪ ܟܵܗܢܵܐ: ܒܲܪܸܟ݂ ܡܵܪܝ: ܒܲܪܸܟ݂ ܡܵܪܝ: ܒܲܪܸܟ݂ ܡܵܪܝ. ܐܲܚܲܝ̈ ܨܲܠܵܘ ܥܠܲܝ.

ܘܥܵܢܹܝܢ: ܡܫܝܼܚܵܐ ܢܸܫܡܲܥ ܨ̈ܠܵܘܵܬ݂ܵܟ݂: ܡܫܝܼܚܵܐ ܢܩܲܒܸ݁ܠ ܩܘܼܪܒܵܢܵܟ݂: ܡܫܝܼܚܵܐ ܢܙܲܗܸܐ ܟܵܗܢܘܼܬ݂ܵܟ݂ ܒܡܲܠܟܘܼܬ݂ܵܐ ܕܲܫܡܲܝܵܐ. ܘܢܸܨܛܒܸܐ ܒܕܸܒ݂ܚܬ݂ܵܐ ܗܵܕ݂ܐ ܕܲܡܩܲܪܸܒ݂ ܐܲܢ݇ܬ݁: ܚܠܵܦܲܝܟ ܘܲܚܠܵܦܲܝܢ ܘܲܚܠܵܦ ܟܠܹܗ ܥܵܠܡܵܐ ܡܼܢ ܣܵܟܹܗ. ܕܚܵܐܲܪ ܘܲܡܣܲܟܸ݁ܐ ܠܛܲܝܒ݁ܘܼܬܹܗ ܘܲܠܪ̈ܲܚܡܵܘܗܝ ܠܥܵܠܡܝܼܢ܀

܀ ܓܗܢܬܐ܀

ܘܬ݂ܵܢܹܐ ܟܵܗܢܵܐ ܗܵܕܹܐ ܓܗܵܢܬܵܐ ܩܲܕ݂ܡܵܝܬܵܐ ܢܝܼܚܵܐܝܼܬ݂ ܒܩܵܠܵܐ ܕܡܸܫܬܡܲܥ ܠܗܵܢܘܿܢ ܕܲܒ݂ܩܲܢܟܹ݁ܐ ܠܚܘܿܕ݂: ܘܠܵܐ ܟܲܣܝܵܐܝܼܬ݂ ܒܠܸܒܹ݁ܗ ܐܲܟ݂ܡܵܐ ܕܐ݇ܢܵܫܝܼ̈ܢ ܥܵܒ݂ܕ݁ܝܼܢ ܒܠܵܐ ܝܼܕ݂ܲܥܬ݂ܵܐ. ܐܵܦܠܵܐ ܒܩܵܠܵܐ ܪܵܡܵܐ ܕܡܸܫܬܡܲܥ ܠܗܵܢܘܿܢ ܕܲܒ݂ܗܲܝܟܠܵܐ ܐܲܟ݂ܡܵܐ ܕܐ݇ܢܵܫ̈ܝܼܢ ܣܵܥܪܝܼܢ ܒܠܵܐ ܡܛܲܟܣܘܼܬ݂ܵܐ.

ܡܵܪܝܵܐ ܐܲܠܵܗܵܐ ܚܲܝܠܬ݂ܵܢܵܐ ܐܲܚܝܼܕܼ ܟܠ: (ܬܢܝܼ) ܗ̇ܘ ܕܗܘܝܘܼ ܡܬ݂ܘܿܡܵܝܵܐ ܒܲܠܚܘܿܕܼܵܘܗܝ:ܘܗܘܝܘܼ ܥܸܠܬ݂ܵܐ ܘܥܵܒ݂ܘܿܕܵܐ ܕܟ݂ܠܗܹܝܢ ܒܸܪ̈ܝܵܬ݂ܵܐ. ܡܲܠܟܵܐ ܡܫܲܒܚܵܐ ܕܲܥܒܲܕܼ ܪܵܘܪ̈ܒ݂ܵܬ݂ܵܐ ܕܠܵܐ ܡܸܬܕܲܪ̈ܟܵܢ ܘܲܫܒ݂ܝܼ̈ܚܵܬ݂ܵܐ ܘܲܡܥܲܠ̈ܝܵܬ݂ܵܐ ܕܠܵܐ ܡܸܬ݂̈ܡܲܠܠܵܢ. ܐܲܢ݇ܬ̇ ܕܒܲܡܕܲܒ̇ܪܵܢܘܼܬ݂ܵܐ ܬܡܝܼܗܬܵܐ ܘܲܕ݂ܚܝܼܠܬܵܐ ܕܲܒ݂ܝܲܕܼ ܐ݇ܢܵܫܘܼܬܲܢ ܣܥܲܪ ܝܼܚܝܼܕܵܝܵܟ̣ ܡܵܪܲܢ ܝܑܼܫܘܿܥ ܡܫܝܼܚܵܐ: ܥܒܲܕܬ̇ ܠܲܢ ܚܘܼܕܵܬ݂ܵܐ ܕܚܲܝܹ̈ܐ ܚܲܕܼܬܹ̈ܐ. ܘܝܲܗܒ݂ܬ̇ ܠܲܢܪܲܗܒ݂ܘܿܢܵܐ ܕܪܘܼܚܵܐ ܕܩܘܼܕܼܫܵܐ ܒܠܸܒܵـ̈ܘܵܬܲܢ. ܘܠܝܼܕܲܥܬ݂ܵܐ ܬܘܼܒ݂ ܕܐ݇ܪ̈ܙܹܐ ܗܵܠܹܝܢ ܫܒ݂ܝܼܚܹ̈ܐ ܘܩܲܕܝܼܫܹ̈ܐ( ܘܐܲܠܵܗܵܝܹ̈ܐ) ܐܲܫܘܝܼܬܵܢ ܒܛܲܝܒܘܼܬ݂ܵܟ̣ ܟܲܕܼ ܠܵܐ ܫܵܘܹܝܢܲܢ. ܠܵܘ ܒܲܚܘܿܕܼ ܕܢܸܩܪܘܿܒ݂ ܘܲܕܢܸܓ݂ܡܘܿܪ ܐܸܢܘܿܢ. ܐܸܠܵܐ ܐܵܦ ܠܡܸܣܲܒ݂ ܘܲܠܡܸܫܬܵܘܬܵܦܘܼ ܒܗܘܿܢ ܠܵܐ ܡܵܪܝ ܬܚܘܼܪ ܒܲܒ݂ܨܝܼܪܘܼܬܲܢ. ܘܲܒ݂ܚܲܠܵܫܘܼܬܲܢ. ܐܸܠܵܐ ܒܛܲܝܒ̇ܘܼܬ݂ܵܟ݂ ܘܲܒ݂ܪ̈ܲܚܡܲܝܟ ܫܦܝܼܥܹ̈ܐ: ܡܠܝܼܢ ܡܼܢ ܛܲܝܒܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ. ܕܡܵܐ ܕܩܵܝܡܝܼܢܲܢ ܩܕܼܵܡܲܝܟ ܒܬܹܐܪܬܵܐ ܕܟ݂ܝܼܬ݂ܵܐ. ܘܲܡܩܲܪܒ݂ܝܼܢܲܢ ܠܵܟ̣ ܕܸܒ݂ܚܬ݂ܵܐ ܗܵܕܹܐ ܚܲܝܬ݂ܵܐ ܘܩܲܕܝܼܫܬܵܐ ܘܲܡܩܲܒܲܠܬܵܐ: ܘܲܕܠܵܐ ܕܡܵܐ܀ ܛܲܝܒܘܼܬ݂ܵܐ ܘܪ̈ܲܚܡܹܐ ܢܸܫܟܲܚ ܩܕܼܵܡܲܝܟ. ܬܢܝܼ.

܀ ܩܢܘܢܐ ܀

ܥܲܡ ܟܠܗܘܿܢ ܐܲܝܠܹܝܢ ܕܡܼܢ ܥܵܠܲܡ ܫܦܲܪܘ ܠܵܟ݂. ܒܛܲܝܒܘܼܬܹܗ ܘܲܒ݂ܪ̈ܲܚܡܵܘܗܝ ܕܝܼܚܝܼܕ݂ܵܝܵܟ̣. ܕܠܵܟ̣ ܘܠܹܗ ܘܲܠܪܘܼܚܵܐ ܕܩܘܼܕܼܫܵܐ: ܫܘܼܒ݂ܚܵܐ ܘܐܝܼܩܵܪܵܐ ܘܬ݂ܵܘܕܝܼܬ݂ܵܐ ܘܣܸܓ݂ܕܼܬ݂ܵܐ ܢܲܣܸܩ. ܗܵܫܵܐ ܘܲܒ̣ܟܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܨܠܝܼܒ݂ܵܐ ܥܲܠ ܩܢܘܿܡܹܗ. ܘܥܵܢܹܐ ܥܲܡܵܐ: ܐܵܡܹܝܢ.

ܐܸܢܗܘܼ ܡܵܢ ܕܦܵܛܲܪܝܵܪܟܵܐ ܐܲܘ ܡܝܼܛܪܵܦܘܿܠܹܝܛܵܐ ܐܲܘ ܐܲܦܸܣܩܘܿܦܵܐ ܐܝܼܬ݂ ܬܲܡ݁ܢ ܠܵܐ ܡܲܣܸܩ ܗܵܢܵܐ ܩܵܢܘܿܢܵܐ: ܡܸܛܠ ܐܝܼܩܵܪܵܐ ܕܪܲܒܟܵܗܢܹ̈ܐ ܕܩܵܐܹܡ: ܗܵܟ݂ܘܵܬ݂ ܕܹܝܢ ܘܲܒ݂ܥܹܕ݇ܬܵܐ ܕܟ݂ܘܼܪܣܝܵܐ. ܐܸܠܵܐ ܬܵܢܹܐ ܠܹܗ ܥܲܡ ܓܗܵܢܬܵܐ: ܘܲܡܪܝܼܡ ܩܵܠܹܗ: ܘܲܠܥܵܠܲܡ ܥܵܠܡܝܼܢ.

ܘܟܲܕ݂ ܐܵܡܲܪ: ܗܵܫܵܐ ܡܪܝܼܡ ܐܝܼܕܹܗ ܒܲܦܬ݂ܵܝܵܗ݁ ܬܪܝܼܨܵܐܝܼܬ݂ ܠܥܸܠ ܡܼܢ ܒܹܝܬ݂ ܥܲܝܢܵܘܗ̈ܝ. ܟܲܕ݂ ܨܸܒ݂̈ܥܵܬܹܗ ܠܥܸܠ ܡܼܢ ܪܹܫܹܗ ܡܸܬ݂ܚܲܙ̈ܝܵܢ: ܟܲܕ݂ ܐܲܦܲܝ̈ ܐܝܼܕܹܗ ܠܡܲܥܪܒ݂ܵܐ: ܘܡܲܚܸܬ݂ ܠܵܗ݁ ܒܗܵܫܵܐ ܥܕܲܡܵܐ ܠܬܲܚܬ ܡܼܢ ܚܲܕ݂ܝܹܗ ܩܲܠܝܼܠ: ܘܡܲܝܬܹܐ ܠܵܗ݁ ܒܡܸܠܬ݂ܵܐ ܘܲܒ݂ܟ݂ܠܙܒܲܢ ܠܘܵܬ݂ ܟܲܬ݂ܦܵܐ ܕܝܲܡܝܼܢܵܐ ܘܲܕ݂ܣܸܡܵܠܵܐ. ܟܲܕ݂ ܢܵܦܩܵܐ ܐܝܼܕܹܗ ܩܲܠܝܼܠ ܡܼܢ ܟܲܬ݂ܦܹܗ. ܘܲܒ݂ܗܵܕܹܐ ܡܲܘܕܲܥ ܕܲܠܥܲܡܵܐ ܡܫܲܘܬܸܦ ܒܒ݂ܘܼܪܟܬ݂ܵܐ ܘܗܵܟܲܢܵܐ ܟܠܗܘܿܢ ܪ̈ܘܼܫܡܹܐ ܘܲܨܠܝܼܒܹ̈ܐ ܩܲܕ݂ܡܵܝܹ̈ܐ. ܘܛܲܝܒ݁ܘܼܬܹܗ ܐ݇ܚܪܵܝܵܐ. ܘܗܵܘ ܕܒ݂ܵܐܘܝܘܼܬܲܢ ܕܡܵܪܝ ܢܸܣܛܘܿܪܝܼܣ.

ܘܟܸܢ ܡܲܩܸܦ ܟܵܗܢܵܐ: ܫܠܵܡܵܐ ܥܲܡܟ݂ܘܿܢ.

ܘܥܵܢܹܐ ܥܲܡܵܐ: ܥܲܡܵܟ݂ ܘܥܲܡ ܪܘܼܚܵܟ݂. ܘܐܵܡܲܪ ܡܫܲܡܫܵܢܵܐ: ܗܲܒ݂ܘ ܫܠܵܡܵܐ ܚܲܕ݂ ܠܚܲܕ݂ ܒܚܘܼܒܹ݁ܗ ܕܲܡܫܝܼܚܵܐ.

ܘܝܵܗ݁ܒ݁ܝܼܢ ܫܠܵܡܵܐ ܠܲܚܕ݂ܵܕܹܐ ܘܐܵܡܪܝܼܢ: ܚܠܵܦ ܟܠܗܘܿܢ ܩܵܬ݂ܘܿܠܝܼܩܹ̈ܐ ܘܐܲܦܸܣܩܘܿܦܹ̈ܐ ܘܩܲܫܝܼܫܹ̈ܐ ܘܲܡܫܲܡܫܵܢܹ̈ܐ. ܘܲܩܝܵܡܵܐ ܟܠܹܗ ܕܲܥܢܲܕ݂ ܡܼܢ ܟܢܘܼܫܝܵܐ ܕܥܹܕ݇ܬܵܐ. ܘܲܚܠܵܦ ܚܲܝܹ̈ܐ ܘܫܲܝܢܹܗ ܕܥܵܠܡܵܐ. ܘܲܚܠܵܦ ܟܠܝܼܠܵܐ ܕܫܲܢ݇ܬܵܐ ܕܢܸܬ݂ܒܲܪܲܟ݂ ܘܢܸܫܬܲܡܠܸܐ ܒܛܲܝܒ݁ܘܼܬ݂ܵܟ. ܘܲܚܠܵܦ ܟܠܹܗ ܝܲܠܕܵܐ ܕܥܹܕ݇ܬܵܐ ܕܫܵܘܹܐ ܠܡܲܣܒ݂ܵܐ ܕܩܘܼܪܒܵܢܵܐ ܗܵܢܵܐ ܕܲܩܕ݂ܵܡܲܝܟ. ܘܲܚܠܵܦ ܟܠܗܘܿܢ ܥܲܒ݂ܕܲܝ̈ܟ ܘܐܲܡ̈ܗܵܬ݂ܵܟ݂ ܕܩܵܝܡܝܼܢ ܩܕ݂ܵܡܲܝܟ ܒܥܸܕܵܢܵܐ ܗܵܢܵܐ. ܚܠܵܦ ܟܠܗܘܿܢ ܘܲܚܠܵܦ ܟܠܲܢ ܢܸܬ݂ܩܲܒܲܠ ܩܘܼܪܒܵܢܵܐ ܗܵܢܵܐ ܠܥܵܠܡܝܼܢ: ܐܵܡܹܝܢ.

ܘܥܵܒ݂ܪܝܼܢ ܒܲܫܠܵܡܵܐ. ܘܩܵܪܹܝܢ ܕܝܘܿܦܲܛܟ݂ܝܼܢ: ܕܗܘܼ ܣܦܲܪܚܲܝܹ̈ܐ ܘܡ̈ܝܼܬܹܐ.

ܘܐܵܡܲܪ ܡܫܲܡܫܵܢܵܐ ܟܵܪܘܿܙܘܼܬ݂ܵܐ: ܢܲܘܕܸܐ ܘܢܸܒ݂ܥܸܐ ܘܢܸܬ݂ܟܲܫܲܦ ܟܠܲܢ ܕܲܟ݂ܝܵܐܝܼܬ݂ ܘܲܚܢܝܼܓ݂ܵܐܝܼܬ݂ ܠܡܵܪܝܵܐ. ܩܘܼܡܘ ܫܲܦܝܼܪ: ܘܚܘܼܪܘ ܒܐܲܝܠܹܝܢ ܕܡܸܣܬܲܥܪ̈ܵܢ ܒܐ݇ܪ̈ܵܙܹܐ ܕܚܝܼ̈ܠܹܐ ܕܡܸܬ݂ܩܲܕܫܝܼܢ. ܟܵܗܢܵܐ ܩܪܸܒ݂ ܕܲܢܨܲܠܸܐ ܕܲܒ݂ܡܸܨܥܵܝܘܼܬܹܗ ܫܠܵܡܵܐ ܢܸܣܓܸ݁ܐ ܠܟ݂ܘܿܢ. ܐܲܪܟܸ݁ܢܘ ܥܲܝܢܲܝ̈ܟ݁ܘܿܢ ܠܬܲܚܬ݁: ܘܪܸܥܝܵܢܟ݂ܘܿܢ ܡܬ݂ܘܿܚܘ ܠܲܫܡܲܝܵܐ.

ܘܒܲܪ ܫܵܥܬܹܗ ܩܵܪܹܒ݂ ܟܵܗܢܵܐ ܠܲܩܕ݂ܵܡ ܡܲܕ݂ܒ݁ܚܵܐ ܟܲܕ݂ ܠܵܐ ܡܟܲܬܲܪ. ܐܲܝܟ݂ ܕܥܵܒ݂ܕܝܼܢ ܐ݇ܢܵܫܝܼ̈ܢ ܒܕ݂ܘܼܟ ܕܘܼܟ ܒܠܵܐ ܝܼܕ݂ܲܥܬ݂ܵܐ: ܕܲܥܕ݂ܲܡܵܐ ܕܢܹܐܡܲܪ ܡܫܲܡܫܵܢܵܐ: ܟܵܗܢܵܐ ܩܪܸܒ݂: ܘܗܵܝܕܹܝܢ ܢܸܩܪܘܿܒ݂܀ ܘܐܵܦܠܵܐ ܬܘܼܒ݂ ܠܛܲܟ݂ܣܵܐ ܗ݁ܘ ܕܡܵܛܘܿܢܝܹ̈ܐ ܬܵܢܹܐ ܡܼܢ ܕܪܹܫ. ܟܲܕ ܡܼܢ ܟܲܕܘܼ ܫܲܡܠܝܼ ܨܠܘܿܬ݂ܵܐ ܕܲܩܕ݂ܵܡ ܡܲܕ݂ܒܚܵܐ. ܟܲܕ݂ ܓܗܝܼܢ ܘܟܲܕ݂ ܒܲܪܝܼܟ. ܘܬ݂ܵܢܹܐ ܟܵܗܢܵܐ ܟܘܼܫܵܦܵܐ ܗܵܢܵܐ ܕܡܵܪܝ ܢܲܪܣܲܝ ܢܝܼܚܐܝܼܬ݂:

܀ܟܘܼܫܵܦܵܐ܀

ܡܵܪܝܵܐ ܐܲܠܵܗܵܐ ܚܲܝܠܬ݂ܵܢܵܐ. ܬܢܝܼ: ܣܲܝܲܥܹܝܗ݁ ܠܲܡܚܝܼܠܘܼܬ݂ܝ ܒܲܡܪܲܚܡܵܢܘܼܬ݂ܵܟ݂. ܘܒܲܡܥܲܕܪܵܢܘܼܬ݂ܵܐ ܕܛܲܝܒ݁ܘܼܬ݂ܵܟ݂: ܐܲܫܘܵܢܝ ܕܐܹܩܲܪܸܒ݂ ܩܕ݂ܵܡܲܝܟ ܕܸܒ݂ܚܬ݂ܵܐ ܗܵܕܹܐ ܚܲܝܬ݂ܵܐ ܘܩܲܕܝܼܫܬܵܐ: ܐܲܝܟ݂ ܕܲܠܥܘܼܕ݂ܪܵܢܵܐ ܕܟ݂ܠܹܗ ܓܵܘܵܐ: ܘܲܠܬܸܫܒ݁ܘܿܚܬܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ܀

ܘܟܲܕ݂ ܐܵܡܲܪ ܡܫܲܡܫܵܢܵܐ: ܥܝܼܪܵܐܝܼܬ݂ ܘܲܚܦܝܼܛܵܐܝܼܬ݂ ܒܥܵܘ ܘܐܸܬ݂ܟܲܫܲܦܘ ܒܥܸܕܵܢܵܐ ܗܵܢܵܐ. ܘܐ݇ܢܵܫ ܠܵܐ ܢܲܡܪܲܚ ܕܲܢܡܲܠܸܠ: ܘܡܲܢ ܕܲܡܨܲܠܸܐ ܒܠܸܒܹܗ݁ ܢܨܲܠܸܐ. ܘܲܒ݂ܫܸܠܝܵܐ ܘܲܒ݂ܕ݂ܚܠܬ݂ܵܐ ܗܘܲܝܬ݁ܘܿܢ ܩܵܝܡ݁ܝܼܢ ܘܲܡܨܲܠܹܝܢ. ܫܠܵܡܵܐ ܥܲܡܲܢ.

ܘܡܸܚܕ݂ܵܐ ܩܵܐܹܡ ܟܵܗܢܵܐ ܘܲܡܪܝܼܡ ܠܫܘܿܫܸܦܵܐ ܙܗܝܼܪܵܐܝܼܬ݂ ܡܼܢ ܐ݇ܪ̈ܵܙܹܐ: ܘܡܲܟ݂ܪܸܟ݂ ܠܹܗ ܚܕ݂ܵܪ̈ܲܝ ܟܵܣܵܐ ܘܦܝܼܠܵܣܵܐ ܘܐܵܡܲܪ: ܕܐܲܫܘܝܼܬܵܢܝ ܡܵܪܝ ܒܛܲܝܒ݁ܘܼܬ݂ܵܟ݂ ܠܦܲܓ݂ܪܵܟ݂ ܘܲܕ݂ܡܵܟ݂: ܗܵܟܲܢ ܐܲܫܘܵܢܝ ܠܓܲܠܝܘܼܬ݂ ܐܲܦܹ̈ܐ ܕܲܩܕ݂ܵܡܲܝܟ ܒܝܘܿܡ ܕܝܼܢܵܐ: ܐܵܡܹܝܢ.

ܕܟܲܕ݂ ܣܵܐܹܡ ܒܸܣܡܹ̈ܐ: ܒܡܘܼܪܵܐ ܡܵܪܝ ܘܥܸܠܘܲܝ ܕܢܝܼܩܵܕܹܡܘܿܣ ܐܸܬ݂ܚܢܸܛ ܦܲܓ݂ܪܵܟ݂ ܩܲܕܝܼܫܵܐ ܒܝܲܘܡܵܐ ܕܲܩܒ݂ܘܼܪܬܵܟ݂: ܘܲܒ݂ܒܸܣܡܹ̈ܐ ܗܵܠܹܝܢ ܐܵܦܚܢܲܢ ܣܵܓ݂ܘܿܕܲܝ̈ܟ ܠܦܲܓ݂ܪܵܟ݂ ܕܲܩܒ݂ܝܼܪ ܐܲܝܟ݂ ܕܲܒ݂ܚܘܼܢܛܬ݂ܵܐ ܡܒܲܣܡܝܼܢܲܢ. ܢܸܬ݂ܒܲܪܟ݂ܘܼܢ ܗܵܟܹܝܠ ܡܼܢ ܛܲܝܒ݁ܘܼܬ݂ܵܟ݂ ܘܢܸܬ݂ܩܲܕܫܘܼܢ ܘܲܢܡܲܠܘܿܢ ܐ݇ܪܵܙܵܐ ܘܢܲܝܬܘܿܢ ܚܘܼܣܵܝܵܐ ܠܚܲܘܒܲܝ̈ܢ ܘܠܲܚܛܵܗܲܝ̈ܢ: ܐܲܝܟܲܢܵܐ ܕܪܹܝܚܵܐ ܒܲܣܝܼܡܵܐ ܢܗܸܐ ܠܵܟ݂ ܘܠܲܐܒ݂ܘܼܟ݂ ܘܲܠܪܘܼܚܵܐ ܕܩܘܼܕ݂ܫܵܐ: ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ.

ܐ݇ܚܪܹܬ݂ܵܐ: ܒܲܫܡܵܐ ܣܓ݂ܝܼܕ݂ܵܐ ܘܲܡܫܲܒ݁ܚܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ: ܢܸܬ݂ܒܲܪܟ݂ܘܼܢ ܒܸܣܡܹ̈ܐ ܗܵܠܹܝܢ ܕܣܵܝܡ݁ܝܼܢܲܢ ܠܐܝܼܩܵܪܵܟ݂ ܘܲܠܚܘܼܣܵܝܲܢ ܠܥܵܠܡܝܼܢ: ܐܵܡܹܝܢ.

ܘܡܲܥܛܲܪ ܟܵܗܢܵܐ ܦܵܬ݂ܘܿܪܵܐ ܒܒܸܣܡܹ̈ܐ ܟܲܕ݂ ܐܵܡܲܪ: ܢܸܒ݂ܣܲܡ ܠܵܟ݂ ܡܵܪܲܢ ܘܐܲܠܵܗܵܢ ܥܸܛܪܵܐ ܗܲܢܝܼܐܵܐ ܕܲܡܩܲܪܒ݂ܝܼܢܲܢ ܠܵܟ݂ ܩܕ݂ܵܡ ܡܲܕ݂ܒ݁ܚܵܟ݂ ܩܲܕܝܼܫܵܐ ܒܓ݂ܵܘ ܗܲܝܟܠܵܟ݂ ܫܒ݂ܝܼܚܵܐ. ܘܢܸܗܘܸܐ ܠܚܲܕ݂ܘܼܬ݂ܵܐ ܕܲܫܡܵܟ݂ ܩܲܕܝܼܫܵܐ: ܘܲܕ݂ܚܘܼܣܵܝܵܐ ܕܥܲܒ݂ܕܲܝ̈ܟ ܘܲܕ݂ܡܲܪܥܝܼܬ݂ܵܟ݂. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ܀

ܘܐܵܡܲܪ ܟܵܗܢܵܐ ܠܲܡܫܲܡܫܵܢܵܐ: ܡܫܝܼܚܵܐ ܢܚܲܝܠܵܟ݂ ܕܬܸܼܥܒܸ݁ܕ݂ ܨܸܒ݂ܝܵܢܹܗ ܒܐܲܡܝܼܢܘܼ.

ܘܡܲܩܸܦ ܒܩܵܠܵܐ ܫܡܝܼܥܵܐ:

܀ ܩܢܘܢܐ܀

ܛܲܝܒ݁ܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܘܚܘܼܒܹ݁ܗ ܕܐܲܠܵܗܵܐ ܐܲܒ݂ܵܐ: ܘܫܲܘܬܵܦܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ: ܬܸܗܘܸܐ ܥܲܡ ܟܠܲܢ. ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܐ݇ܪ̈ܵܙܹܐ: ܘܥܵܢܹܝܢ: ܐܵܡܹܝܢ.

ܘܲܡܪܝܼܡ ܐܝܼܕ݂ܵܘܗ̈ܝ ܠܥܸܠ ܒܟ݂ܠ ܩܵܢܘܿܢܵܐ ܕܠܲܝܬ݁ ܒܹܗ ܗܵܫܵܐ.

ܘܡܲܩܸܦ: ܠܥܸܠ ܢܸܗܘܘܿܢ ܡܲܕܥܲܝ̈ܟ݁ܘܿܢ.

(ܠܥܹܐܕܹ̈ܐ: ܠܥܸܠ ܒܲܡܪ̈ܵܘܡܹܐ ܥܸܠܵܝܹ̈ܐ ܒܐܲܬ̣ܪܵܐ ܕܚܝܼܠܵܐ ܕܬܸܫܒܘܿܚܬܵܐ ܐܲܝܟܵܐ ܕܠܲܝܬ ܫܸܠܝܵܐ ܠܡܲܫܒ̣ܵܐ ܕܓܸܦܲܝ̈ܗܘܿܢ ܕܲܟ̣ܪ̈ܘܿܒܹܐ ܘܲܠܗܘܼܠܵܠܹܐ ܘܠܸܥ̈ܙܹܐ ܗܲܢ̈ܝܼܹܐܐ ܕܩܘܼܕܵܫܲܝ̈ܗܘܿܢ ܕܲܣܪ̈ܵܦܹܐ ܬܲܡ̇ܢ ܢܸܗܘܘܿܢ ܡܲܕܥܲܝ̈ܟܘܿܢ.)

ܘܥܵܢܹܝܢ: ܠܘܵܬ̣ܵܟ̣ ܐܲܠܵܗܹܗ ܕܐܲܒ̣ܪܵܗܵܡ ܘܕܼܐܝܼܣܚܵܩ ܘܕܼܝܼܣܪܵܝܹܠ ܡܲܠܟܵܐ ܡܫܲܒܚܵܐ.

ܘܡܲܩܸܦ: ܩܘܼܪܒܵܢܵܐ ܠܐܲܠܵܗܵܐ ܡܵܪܹܐ ܟܠ ܡܸܬ݂ܩܲܪܲܒ݂.

(ܠܥܹܐܕܹ̈ܐ: ܩܘܼܪܒܵܢܵܐ ܚܲܝܵܐ ܘܲܡܠܝܼܠܵܐ ܕܪܹܫܝܼܬܲܢ ܘܕܸܒ̣ܚܵܐ ܠܵܐ ܕܒ̣ܝܼܚܵܐ ܘܲܡܩܲܒܠܵܐ ܕܒܲܪ ܓܸܢܣܲܢ ܕܲܢܒ̣ܝܼ̈ـܹܐ ܒܐ݇ܪܵܙܵܐ ܨܵܐܪܘܼܗܝ ܘܲܫܠܝܼܚܹ̈ܐ ܒܓܸܠܝܵܐ ܐܲܟ̣ܪܙܘܼܗܝ ܘܣܵܗ̈ܕܹܐ ܒܕܸܡ ܨܵܘܪ̈ܲܝܗܘܿܢ ܙܲܒ̣ܢܘܼܗܝ ܘܡܲܠܦܵܢܹ̈ܐ ܒܥܹ̈ـܕܼܵܬ̣ܵܐ ܦܲܫܩܘܼܗܝ ܘܟ̣ܵܗܢܹ̈ܐ ܥܲܠ ܡܲܕܼܒܲܚ ܩܘܼܕܼܫܵܐ ܕܲܒ̣ܚܘܼܗܝ. ܘܠܹܘܵܝܹ̈ܐ ܥܲܠ ܕܪ̈ܵܥܲܝܗܘܿܢ ܛܲܥܢܘܼܗܝ. ܘܥܲܡܡܹ̈ܐ ܠܚܘܼܣܵܝ ܚܵܘܒܲܝ̈ܗܘܿܢ ܢܲܣܒܘܼܗܝ. ܚܠܵܦ ܟܠܗܹܝܢ ܒܸܪ̈ܝܵܬ̣ܵܐ ܡ̣ܢ ܣܵܟ̣ܗܹܝܢ ܠܐܲܠܵܗܵܐ ܡܵܪܹܟ̇ܠ ܡܸܬ̣ܩܲܪܲܒ̣.)

ܘܥܵܢܹܝܢ: ܝܵܐܹܐ ܘܙܵܕܹܩ.

ܘܐܵܡܲܪ ܡܫܲܡܫܵܢܵܐ ܕܥܲܠ ܒܹܝܡ: ܫܠܵܡܵܐ ܥܲܡܲܢ.

ܘܣܵܐܹܡ ܒܘܼܪܟܵܐ ܟܵܗܢܵܐ ܘܲܡܨܲܠܸܐ ܠܸܒܵܢܵܐܝܼܬ݂: ܘܐܵܡܲܪ ܟܘܼܫܵܦܵܐ ܗܵܢܵܐ ܢܝܼܚܵܐܝܼܬ݂:

܀ܟܘܫܦܐ܀

ܡܵܪܝܵܐ: ܡܵܪܝܵܐ: ܗܲܒ݂ܠܲܢ ܓܲܠܝܘܼܬ݂ ܐܲܦܹ̈ܐ ܩܕ݂ܵܡܲܝܟ: ܕܲܒ݂ܦܵܪܹܗ݇ܣܝܼܵܐ ܕܡܸܢܵܟ݂ ܢܸܓ݂ܡܪܝܼܗ݁ ܠܬܸܫܡܸܫܬܵܐ ܗܵܕ݂ܐ ܚܲܝܬܼܵܐ ܘܩܲܕܝܼܫܬܵܐ: ܟܲܕ݂ ܕܲܟ݂̈ܝܵܢ ܬܹܐܪ̈ܵܬܲܢ ܡܸܢ ܟܠܵܗ݁ ܒܝܼܫܘܼܬ݂ܵܐ ܘܡܲܪܝܼܪܘܼܬ݂ܵܐ. ܘܲܙܪܘܿܥ ܒܲܢ ܚܘܼܒܵܐ ܘܫܲܝܢܵܐ ܘܐܵܘܝܘܼܬ݂ܵܐ ܕܲܠܘܵܬ݂ ܚܕ݂ܵܕܹ̈ܐ ܘܕ݂ܲܠܘܵܬ݂ ܟܠ ܐ݇ܢܵܫ܀

ܘܩܵܐܹܡ ܘܢܵܫܹܩ ܠܡܲܕ݂ܒ݁ܚܵܐ܀ ܘܐܵܦ ܗܵܕܹܐ ܐܵܠܨܵܐ ܠܡܲܘܕܵܥܘܼ: ܕܲܒ݂ܫܘܼܪܵܝ ܟܠ ܓܗܵܢܬܵܐ ܘܲܒ݂ܫܘܼܠܵܡܵܗ݁ ܡܵܛܘܿܢܝܼܵܐ ܥܵܒܹܕ݂ ܘܲܠܡܲܕ݂ܒ݁ܚܵܐ ܢܵܫܹܩ. ܘܡܲܩܸܦ ܟܵܗܢܵܐ ܟܲܕ݂ ܦܫܝܼ̈ܛܵܢ ܐܝܼܕ݂ܵܘ̈ܗܝ ܡܼܢ ܗܵܫܵܐ ܘܲܠܗܲܠ ܡܛܲܟ݁ܣܵܐܝܼܬ݂ ܘܐܵܡܲܪ ܗܵܕܹܐ ܓܗܵܢܬܵܐ:

܀ܓܗܢܬܐ܀

ܝܵܐܹܐ ܡܵܪܝ ܒܟ̣ܠ ܝܵܘܡܝܼ̈ܢ. ܬܢܝܼ. ܘܙܵܕܹܩ ܒܟ̣ܠ ܙܲܒ̣ܢܝܼ̈ܢ.ܘܫܵܘܹܐ ܒܟ̣ܠ ܫܵܥܝܼ̈ܢ. ܠܡܵܘܕܵܝܘܼ ܠܲܫܡܵܟ̣ ܩܲܕܝܼܫܵܐ. ܘܲܠܡܸܣܓܲܕܼ ܠܡܵܪܘܼܬ̣ܵܟ̣ ܒܟ̣ܠ ܐܲܬܲܪ ܘܲܒ̣ܟ̣ܠ ܕܘܼܟܵܐ. ܠܵܟ̣ ܐܲܠܵܗܵܐ ܐܲܒ̣ܵܐ ܕܲܫܪܵܪܵܐ ܐܝܼܬ̣ܝܵܐ ܕܡ̣ܢ ܥܵܠܲܡ. ܘܠܲܒ̣ܪܵܟ̣ ܝܑܼܚܝܼܕܼܵܝܵܐ ܡܵܪܲܢ ܝܑܼܫܘܿܥ ܡܫܝܼܚܵܐ. ܘܲܠܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ ܐܵܡܹܝܢ܀ ܕܐܲܢ݇ܬ̇ ܐܲܢ݇ܬ̇ ܡܵܪܵܐ ܘܥܵܒ̣ܘܿܕܼܵܐ ܕܟ̣ܠ ܕܡܸܬ̣ܚܙܸܐ ܘܟ̣ܠ ܕܠܵܐ ܡܸܬ̣ܚܙܸܐ. ܕܲܒ̣ܝܲܕܼ ܒܪܵܟ̣ ܝܑܼܚܝܼܕܼܵܝܵܐ ܐܲܠܵܗܵܐ ܡܸܠܬ̣ܵܐ. ܗ̇ܘ ܕܗ̤ܘܝܘܼ ܢܘܼܗܪܵܐ ܕܬܸܫܒ̇ܚܬܵܟ̣: ܘܨܸܡܚܵܐ ܕܡܸܢܵܟ̣ ܘܨܲܠܡܵܐ ܕܐܝܼܬ̣ܘܼܬ̣ܵܟ̣. ܒܪܲܝܬ̇ ܘܐܲܬ̣ܩܸܢܬ̇ ܫܡܲܝܵܐ ܘܐܲܪܥܵܐ ܘܟ̣ܠ ܕܲܒ̣ܗܘܿܢ.ܘܲܒ̣ܪܘܼܚܵܐ ܕܩܘܼܕܼܫܵܐ ܪܘܼܚܵܐ ܕܲܫܪܵܪܵܐ ܗ̇ܘ ܕܡܸܢܵܟ̣ ܐܲܒ̣ܵܐ ܐܝܼܬ̣ܵܘܗܝ.ܟܠܗܘܿܢ ܟܝܵܢܹ̈ܐ ܡܠܝܼܠܹ̈ܐ ܕܡܸܬ̣ܚ̄ܙܹܝܢ ܘܲܕܼܠܵܐ ܡܸܬ̣ܚ̄ܙܹܝܢ: ܡܸܬ̣ܚܲܝܠܝܼܢ ܘܡܸܬ̣ܩܲܕܫܝܼܢ: ܘܡܸܫܬ̇ܘܹܝܢ ܠܡܲܣܵܩܘܼ ܬܸܫܒ̇ܘܿܚܬܵܐ ܠܐܲܠܵܗܘܼܬ̣ܵܟ̣ ܣܓ̣ܝܼܕܬܵܐ. ܕܲܩܕܼܵܡܲܝܟ ܐܲܠܵܗܵܐ ܐܲܒ̣ܵܐ ܕܲܫܪܵܪܵܐ: ܘܲܩܕܼܵܡ ܒܪܵܟ̣ ܝܑܼܚܝܼܕܼܵܝܵܐ ܡܵܪܲܢ ܝܑܼܫܘܿܥ ܡܫܝܼܚܵܐ. ܘܲܩܕܼܵܡ ܪܘܼܚܵܐ ܕܩܘܼܕܫܵܐ ܩܵܝܡ̇ܝܼܢ ܐܵܠܹܦ ܐܲܠܦܝܼ̈ܢ ܕܥܸܠܵܝܹ̈ܐ ܘܪܸܒ̇ܘܿ ܪܸ̈ܒ̇ܘܵܢ ܕܡܲܠܲܐܟܹ̈ܐ ܩܲܕܝܼܫܹ̈ܐ. ܗܵܢܘܿܢ ܕܲܠܒ̣ܘܼܣܵܡܵܐ ܕܚܲܝܲܝ̈ܗܘܿܢ ܒܐܲܡܝܼܢܘܼܬ̣ܵܐ ܕܨܸܒ̣ܝܵܢܗܘܿܢ. ܠܲܫܡܵܟ̣ ܪܲܒܵܐ ܘܩܲܕܝܼܫܵܐ ܒܬܸܫܒܘܿܚܬܵܐ ܐܲܡܝܼܢܬܵܐ ܡܩܲܕܫܝܼܢ. ܘܐܲܫܘܝܼܬܵܝܗܝ ܡܵܪܝ ܒܛܲܝܒ̇ܘܼܬ̣ܵܟ̣ ܐܵܦ ܠܓܸܢܣܵܐ ܡܚܝܼܠܵܐ ܕܲܒ̣ܢܲܝ̈ܢܵܫܵܐ ܡܵܝܘܿܬܹ̈ܐ. ܕܥܲܡ ܟܸܢܫܹ̈ܐ ܟܠܗܘܿܢ ܕܥܸـܠܵܝܹ̈ܐ ܠܡܵܪܘܼܬ̣ܵܟ̣ ܫܲܠܝܼܛܲܬ̣ ܒܟ̣ܠ: ܬܸܫܒ̇ܘܿܚܬܵܐ ܘܐܝܼܩܵܪܵܐ ܢܲܣܩܘܼܢ. ܥܲܡ ܐܲܝܠܹܝܢ ܕܲܒ̣ܟ̣ܠܙܒܲܢ ܩܕܼܵܡ ܪܲܒ̇ܘܼܬ̣ܵܐ ܕܩܲܕܝܼܫܘܼܬ̣ܵܟ̣ ܡܬܲܒ̇ܒ̣ܝܼܢ: ܠܲܡܫܲܒܵܚܘܼ ܠܲܬ̣ܠܝܼܬ̣ܵܝܘܼܬ̣ܵܟ̣ ܡܫܲܒܲܚܬܵܐ܀ ܗ̇ܝ ܕܒܲܬ̣ܠܵܬ̣ܵܐ ܩܢܘܿܡܹ̈ܐ ܫ̈ܘܲܝܵܐ ܘܠܵܐ ܣܕܼܝܼ̈ܩܹܐ ܡܸܬ̇ܬܵܘܕܝܵܐ܀ ܬܢܝܼ.

܀ܩܢܘܢܐ܀

ܟܲܕ݂ ܩܵܥܹܝܢ ܘܲܡܫܲܒ݁ܚܝܼܢ ܕܠܵܐ ܫܲܠܘܵܐ: ܘܩܵܪܹܝܢ ܗܵܢܵܐ ܠܗܵܢܵܐ ܘܐܵܡ݁ܪܝܼܢ:

ܘܥܵܢܹܝܢ: ܩܲܕܝܼܫ ܩܲܕܝܼܫ ܩܲܕܝܼܫ: ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܕܲܡܠܹܝܢ ܫܡܲܝܵܐ ܘܐܲܪܥܵܐ ܡ̣ܢ ܬܸܫܒܚ̈ܵܬܹܗ: ܘܡ̣ܢ ܟܝܵܢ ܐܝܼܬ̣ܘܼܬܹܗ ܘܡ̣ܢ݂ ܗܸܕܪܵܐ ܕܙܝܼܘܹܗ ܡܫܲܒܚܵܐ. ܘܡܲܩܦܝܼܢ ܒܥܹܐܕܹ̈ܐ ܐܘܿܫܲܥܢܵܐ ܒܲܡܪ̈ܲܘܡܹܐ. ܐܘܿܫܲܥܢܵܐ ܠܲܒ̣ܪܹܗ ܕܕܼܵܘܝܼܕܼ. ܒܪܝܼـܟ̣ ܕܐܸܬ̣ܵܐ ܘܐܵܬܹܐ ܒܲܫܡܹܗ ܕܡܵܪܝܵܐ. ܐܘܿܫܲܥܢܵܐ ܒܲܡܪ̈ܲܘܡܹܐ. ܘܥܲܡ ܟܠ ܩܥܵܬ̣ܵܐ ܕܩܲܕܝܼܫ ܥܵܒܹܕܼ ܟܵܗܢܵܐ ܡܵܛܘܿܢܝܼܵܐ ܩܕܼܵܡ ܡܲܕܼܒܿܚܵܐ. ܘܣܵܐܹܡ ܒܘܼܪܟܵܐ ܘܐܵܡܲܪ ܟܘܼܫܵܦܵܐ ܗܵܢܵܐ.

܀ܟܘܫܦܐ܀

ܩܲܕܝܼܫ ܩܲܕܝܼܫ ܩܲܕܝܼܫ: ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܕܲܡܠܹܝܢ ܫܡܲܝܵܐ ܘܐܲܪܥܵܐ ܡ̣ܢ ܬܸܫܒܚ̈ܵܬܹܗ: ܘܡ̣ܢ ܟܝܵܢ ܐܝܼܬ̣ܘܼܬܹܗ ܘܡ̣ܢ݂ ܗܸܕܪܵܐ ܕܙܝܼܘܹܗ ܡܫܲܒܚܵܐ. ܐܲܝܟܲܢܵܐ ܕܲܫܡܲܝܵܐ ܘܐܲܪܥܵܐ ܡܹܢܝ ܡܠܹܝܢ: ܐܵܡܲܪ ܡܵܪܝܵܐ. ܩܲܕܝܼܫܲܬ̇ ܐܲܠܵܗܵܐ ܐܲܒ̣ܵܐ ܕܲܫܪܵܪܵܐ: ܗ̇ܳ ܕܡܸܢܹܗ ܡܸܫܬܲܡܗܵܐ ܟܠ ܐܲܒ̣ܵܗܘܼܬ̣ܵܐ ܕܒܲܫܡܲܝܵܐ ܘܒܲܐܪܥܵܐ. ܩܲܕܝܼܫܲܬ̇ ܒܪܵܐ ܡܬ̣ܘܿܡܵܝܵܐ: ܕܟ̣ܠ ܒܐܝܼܕܹܗ ܗ̤ܘܵܐ. ܩܲܕܝܼܫܲܬ̇ ܪܘܼܚܵܐ ܕܩܘܼܕܫܵܐ ܐܝܼܬ̣ܝܵܐ ܕܟ̣ܠ ܒܐܝܼܕܹܗ ܡܸܬ̣ܩܲܕܲܫ܀ ܘܵܝܠܝܼ ܘܵܝܠܝܼ ܕܬ̣ܵܘܝܼܪ ܐܢܵܐ: ܡܸܛܠ ܕܓܲܒ̣ܪܵܐ ܐܢܵܐ ܛܡܲܐ ܣܸܦ̈ܘܵܬ̣ܵܐ: ܘܒܲܝܢܵܬ̣ ܥܲܡܵܐ ܕܛܲܡ̈ܐܵܢ ܣܸܦ̈ܘܵܬܹܗ ܥܵܡܲܪ ܐܢܵܐ: ܘܲܠܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ ܚ̈ܙܲܝ ܥܲܝ̈ܢܲܝ. ܡܵܐ ܕܚܝܼܠܘܼ ܐܲܬ̣ܪܵܐ ܗܵܢܵܐ: ܕܝܵܘܡܵܢܵܐ ܥܹܝܢ ܒܥܹܝܢܠܡܵܪܝܵܐ ܚܙܹܝܬ̣. ܘܠܲܝܬܵܘܗܝ ܗܵܢܵܐ ܐܸܠܵܐ ܐܸܢ ܒܲܝܬܹ̇ܗ ܕܐܲܠܵܗܵܐ ܘܗܵܢܵܘ ܬܲܪܥܹܗ ܕܲܫܡܲܝܵܐ܀ ܘܗܵܫܵܐ ܬܸܗܘܸܐ ܛܲܝܒ̇ܘܼܬ̣ܵܟ̣ ܥܠܲܝܢ ܡܵܪܝܵܐ. ܬܢܝܼ. ܘܕܲܟܵܐ ܛܲܡܐܘܼܬܲܢ: ܘܩܲܕܸܿܫ ܣܸܦ̈ܘܵܬܲܢ: ܘܚܲܠܸܛ ܡܵܪܝ ܩܵܠܹ̈ܐ ܕܲܒ̣ܨܝܼܪܘܼܬܲܢ ܒܩܘܼܕܵܫܵܐ ܕܲܣܪ̈ܵܦܹܐ ܘܗܘܼܠܵܠܹ̈ܐ ܕܡܲܠܲܐܟܹ̈ܐ. ܫܘܼܒ̣ܚܵܐ ܠܪ̈ܲܚܡܲܝܟ ܕܲܠܥܲܦܪ̈ܵܢܹܐ ܫܵܘܬܸ̇ܦܬ̇ ܐܸܢܘܿܢ ܥܲܡ ܪ̈ܘܼܚܵܢܹܐ.

ܘܩܵܐܹܡ ܘܐܵܡܲܪ: ܒܲܪܸܟ݂ ܡܵܪܝ: ܒܲܪܸܟ݂ ܡܵܪܝ: ܒܲܪܸܟ݂ ܡܵܪܝ. ܐܲܚܲܝ̈ ܨܲܠܵܘ ܥܠܲܝ.

ܘܬ݂ܵܢܹܐ ܓܗܵܢܬܵܐ ܗܵܕܹܐ ܢܝܼܚܵܐܝܼܬ݂:

܀ܓܗܢܬܐ܀

ܫܲܪܝܼܪܵܐܝܼܬ̣ ܡܵܪܝܵܐ. ܬܢܝܼ. ܩܲܕܝܼܫ ܐܲܢ݇ܬ̇ ܘܲܡܫܲܒܲܚ ܐܲܢ݇ܬ̇ ܠܥܵܠܲܡ ܥܵܠܡܝܼܢ. ܩܲܕܝܼܫܲܬ̇ ܐܲܠܵܗܵܐ ܐܲܒ̣ܵܐ ܕܲܫܪܵܪܵܐ. ܘܩܲܕܝܼܫ ܗ̣݇ܘ ܐܵܦ ܒܪܵܟ ܝܑܼܚܝܼܕܼܵܝܵܐ ܡܵܪܲܢ ܝܑܼܫܘܿܥ ܡܫܝܼܚܵܐ. ܘܩܲܕܝܼܫ ܗ̣݇ܘ ܒܲܫܪܵܪܵܐ ܘܐܵܦ ܪܘܼܚܵܐ ܕܩܘܼܕܼܫܵܐ ܟܝܵܢܵܐ ܐܲܠܵܗܵܝܵܐ ܕܠܵܐ ܥܒ̣ܝܼܕܼ. ܥܵܒ̣ܘܿܕܼܵܐ ܕܟ̣ܠ ܡܸܕܸܡ. ܗ̇ܘ ܕܲܟ̣ܝܵܢܵܐܝܼܬ̣ ܡ̣ܢ ܡܬ̣ܘܿܡ ܒܲܫܪܵܪܵܐ ܩܲܕܝܼܫܵܐ ܐܝܼܬ̣ܵܘܗܝ. ܘܩܲܕܝܼܫ ܫܡܹܗ ܘܩܲܕܝܼܫ ܡܲܫܪܝܹܗ. ܘܲܡܩܲܕܸܫ ܒܲܫܪܵܪܵܐ ܠܟ̣ܠܗܘܿܢ ܐܲܝܠܹܝܢ ܕܡܸܫܬܘܹܝܢ ܠܲܡܩܲܒܵܠܘܼ ܡܵܘܗܲܒ̣ܬ̣ܵܐ ܕܛܲܝܒ̇ܘܼܬܹܗ. ܘܡܲܣܩܝܼܢ ܚ݇ܢܲܢ ܬܸܫܒܘܿܚܬܵܐ ܘܐܝܼܩܵܪܵܐ ܘܬ̣ܵܘܕܝܼܬ̣ܵܐ ܘܣܸܓ̣ܕܼܬ̣ܵܐ: ܠܐܲܒ̣ܵܐ ܘܠܲܒ̣ܪܵܐ ܘܲܠܪܘܼܚܵܐ ܕܩܘܼܕܼܫܵܐ. ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ ܐܵܡܹܝܢ܀ ܣܵܓ̣ܕܝܼܢܲܢ ܠܵܟ̣ ܡܵܪܝ. ܬܢܝܼ. ܘܡܵܘܕܹܝܢܲܢ ܠܵܟ̣. ܘܲܡܫܲܒܚܝܼܢܲܢ ܠܵܟ̣. ܥܲܠ ܐܲܦܲܝ̈ ܟܠܗܹܝܢ ܛܲܝܒ̈ـܘܵܬ̣ܵܟ̣ ܕܲܠܘܵܬܲܢ. ܕܲܒ̣ܪܲܝܬܵܢ ܡ̣ܢ ܠܵܐ ܡܸܕܸܡ. ܘܐܲܫܘܝܼܬܵܢ ܠܐܝܼܩܵܪܵܐ ܪܲܒܵܐ ܕܚܹܐܪܘܼܬ̣ܵܐ ܘܲܕܼܝܲܕܘܼܥܬ̣ܵܢܘܼܬ̣ܵܐ. ܘܲܕܡ̣ܢ. ܡܬ̣ܘܿܡ ܘܲܒ̣ܟ̣ܠܫܵܥ ܒܛܝܼܠܘܼ ܠܵܟ̣ ܥܲܠ ܩܘܼܝܵܡܵܐ ܕܚܵܝܲܝ̈ܢ. ܘܲܩܕܼܵܡ ܫܡܵܟ̣ ܪܲܒܵܐ ܘܲܕܚܝܼܠܵܐ ܒܵܪܟܝܼܢܲܢ ܘܣܵܓ̣ܕܝܼܢܲܢ. ܘܥܲܡܲܢ ܡܫܲܒܚܝܼܢ ܘܡܵܘܕܹܝܢ ܐܵܦ ܟܸܢܫܹ̈ܐ ܟܠܗܘܿܢ ܕܥܸܠܵܝܹ̈ܐ: ܥܲܠ ܛܲܝܒܘܼܬ̣ܵܟ̣ ܕܠܵܐ ܡܸܬ̣ܡܲܠܠܵܐ. ܕܡܸܛܠܵܬܲܢ ܒܢܲܝ̈ܢܵܫܵܐ ܘܡܸܛܠ ܦܘܼܪܩܵܢܲܢ: ܝܑܼܚܝܼܕܼܵܝܵܐ ܐܲܠܵܗܵܐ ܡܸܠܬ̣ܵܐ: ܗ̇ܘ ܕܐܝܼܬ̣ܵܘܗܝ ܕܡܘܼܬ̣ܵܐ ܕܐܲܠܵܗܵܐ. ܠܵܐ ܗ݇ܘ̣ܵܐ ܚܛܘܼܦܝܵܐ ܚܲܫܒܵܗ̇ ܠܗܵܕܹܐ ܕܐܝܼܬ̣ܵܘܗܝ ܦܸܚܡܵܐ ܕܐܲܠܵܗܵܐ ܐܸܠܵܐ ܢܲܦ̮ܫܹܗ ܣܲܪܸܩ: ܘܲܕܼܡܘܼܬ̣ܵܐ ܕܥܲܒ̣ܕܵܐ ܢܣܲܒ̣. ܟܲܕܼ ܢܚܸܬ̣ ܡ̣ܢ ܫܡܲܝܵܐ: ܘܲܠܒܸܫ ܐܢܵܫܘܼܬܲܢ: ܦܲܓ̣ܪܵܐ ܡܵܝܘܿܬ̣ܵܐ ܘܢܲܦ̮ܫܵܐ ܡܠܝܼܠܬ̣ܵܐ ܘܝܲܕܘܼܥܬ̣ܵܢܝܼܬ̣ܵܐ ܘܠܵܐ ܡܵܝܘܿܬܬܵܐ: ܡ̣ܢ ܒܬ̣ܘܼܠܬܵܐ ܩܲܕܝܼܫܬܵܐ ܒܚܲܝܠܵܐ ܕܪܘܼܚܵܐ ܕܩܘܼܕܼܫܵܐ. ܘܒ̣ܐܝܼܕܼܵܘ̈ܗܝ ܫܲܡܠܝܼ ܘܲܓ̣ܡܲܪ ܟܠܵܗ̇ ܡܕܲܒ̇ܪܵܢܘܼܬ̣ܵܐ ܗܵܕܹܐ ܪܲܒܬ̣ܵܐ ܘܲܬ̣ܡܝܼܗܬܵܐ. ܕܲܡܥܲܬ̇ܕܼܵܐ ܗ̣݇ܘܵܬ̣ ܒܲܡܩܲܕܡܘܼܬ̣ ܝܑܼܕܲܥܬ̣ܵܟ ܡ̣ܢ ܩܕܼܵܡ ܬܲܪ̈ܡܝܵܬܹܗ ܕܥܵܠܡܵܐ. ܘܫܲܡܠܝܼܬܵܗ̇ ܗܵܫܵܐ ܒܙܲܒ̣ܢܹ̈ܐ ܐܚܪ̈ܝܹܐ: ܒܝܲܕܼ ܒܪܵܟ̣ ܚܲܒܝܼܒ̣ܵܐ ܡܵܪܲܢ ܝܑܼܫܘܿܥ ܡܫܝܼܚܵܐ. ܗ̇ܘ ܕܒܹܗ ܥܵܡܲܪ ܟܠܹܗ ܡܘܼܠܵܝܵܐ ܕܐܲܠܵܗܘܼܬ̣ܵܐ ܓܘܼܫܡܵܢܵܐܝܼܬ̣. ܘܗ̤ܘܝܘܼ ܪܹܫܵܐ ܕܥܹܕܬܵܐ: ܘܒܘܼܟ̣ܪܵܐ ܕܡ̣ܢ ܒܹܝܬ̣ ܡܝܼـܬܹ̈ܐ. ܘܗ̤ܘܝܘܼ ܫܘܼܡܠܵܝܵܐ ܕܟ̣ܠ: ܘܟ̣ܠ ܒܹܗ ܡܸܫܬܲܡܠܸܐ ܗ̇ܘ ܕܲܒ̣ܪܘܼܚܵܐ ܕܲܠܥܵܠܲܡ ܢܲܦ̮ܫܹܗ ܩܲܪܸܒ̣ ܕܠܵܐ ܡܘܼܡ ܠܐܲܠܵܗܵܐ ܘܩܲܕܫܲܢ ܒܩܘܼܪܒܵܢܵܐ ܕܦܲܓ̣ܪܹܗ ܕܲܚܕܼܵܐ ܙܒܲܢ. ܘܫܲܝܸܢ ܒܲܕܼܡܵܐ ܕܲܙܩܝܼܦܹܗ ܒܐܝܼܕܼܵܘ̈ܗܝ ܡܵܐ ܕܒܲܫܡܲܝܵܐ ܘܡܵܐ ܕܒܲܐܪܥܵܐ. ܗ̇ܘ ܕܐܸܫܬܠܸܡ ܡܸܛܠ ܚܛܵܗܲܝ̈ܢ: ܘܩܵܡ ܡܸܛܠ ܕܲܢܙܲܕܩܲܢ. ܕܥܲܡ ܫܠܝܼܚܵܘ̈ܗܝ ܩܲܕܝܼܫܹ̈ܐ ܒܠܸܠܝܵܐ ܗ̇ܘ ܕܒܹܗ ܐܸܫܬ̇ܠܸܡ ܗ݇ܘ̣ܵܐ: ܥܒܲܕܼ ܐܪܵܙܵܐ ܗܵܢܵܐ ܪܲܒܵܐ ܘܩܲܕܝܼܫܵܐ ܘܐܲܠܵܗܵܝܵܐ. ܟܲܕܼ ܫܩܲܠ ܠܲܚܡܵܐ ܥܲܠ ܐܝܼܕܼܵܘ̈ܗܝ ܩܲܕܝܼ̈ܫܵܬ̣ܵܐ ܘܒܲܪܸܟ̣ ܘܲܩܨܵܐ: ܘܝܲܗ݇ܒ̣ ܠܬܲܠܡ̈ܝܼܕܵܘܗܝ ܘܐܸܡܲܪ: ܗܵܢܵܘ ܦܲܓ̣ܪܝ ܕܥܲܠ ܐܲܦܲܝ̈ ܚܲܝܵـܘ̈ܗܝ ܕܥܵܠܡܵܐ ܡܸܬ̣ܩܨܸܐ ܠܫܘܼܒ̣ܩܵܢܵܐ ܕܲܚ̈ܛܵܗܹܐ. ܘܗܵܟܲܢܵܐ ܐܵܦ ܥܲܠ ܟܵܣܵܐ ܐܵܘܕܝܼ ܘܝܲܗ݇ܒ̣ ܠܗܘܿܢ ܘܐܸܡܲܪ: ܗܵܢܵܘ ܕܹܡܝ ܕܲܕܼܝܵܬܹܩܹܐ ܚܕܲܬܵܐ: ܕܲܚܠܵܦ ܣܲܓ̣ܝܼـ̈ܐܹܐ ܡܸܬ̣ܐ̱ܫܸܕܼ ܠܫܘܼܒ̣ܩܵܢܵܐ ܕܲܚܛܵܗܹ̈ܐ. ܣܲܒ̣ܘ ܗܵܟܹܝܠ ܟܠܟ̣ܘܿܢ ܐܲܟ̣ܘܿܠܘ ܡ̣ܢ ܠܲܚܡܵܐ ܗܵܢܵܐ: ܘܐܸܫܬܵܘ ܡ̣ܢ ܟܵܣܵܐ ܗܵܢܵܐ. ܘܗܵܟܲܢܵܐ ܗ̤ܘܲܝܬܘܿܢ ܥܵܒ̣ܕܝܼܢ ܟܠ ܐܸܡܲܬ̣ܝ ܕܡܸܬ̣ܟܲܢܫܝܼܢ ܐ݇ܢܬ̇ܘܿܢ: ܠܕܼܘܼܟ̣ܪܵܢܝ. ܘܐܲܝܟܲܢܵܐ ܕܐܸܬ̣ܦܩܸܕܼܢܲܢ ܐܸܬ̣ܟܲܢܲܫܢܲܢ: ܐܵܦ ܚܢܲܢ ܥܲܒ̣ܕܲܝ̈ܟ ܒܨܝܼܪܹ̈ܐ ܘܚܲܠܵܫܹ̈ܐ ܘܕܼܵܘܲܝ̈ــܵܐ. ܕܡ̣ܢ ܡܲܦܣܵܢܘܼܬ̣ܵܐ ܕܛܲܝܒܘܼܬ̣ܵܟ̣: ܢܸܥܒܸ̇ܕܼ ܐܪܵܙܵܐ ܗܵܢܵܐ ܪܲܒܵܐ ܘܲܕܼܚܝܼܠܵܐ ܘܩܲܕܝܼܫܵܐ ܘܐܲܠܵܗܵܝܵܐ܀ ܕܒܹܗ ܗܘ̤ܵܐ ܦܘܼܪܩܵܢܵܐ ܪܲܒܵܐ ܠܟ̣ܠܹܗ ܓܸܢܣܵܐ ܕܲܒ̣ܢܲܝ̈ܢܵܫܵܐ. ܬܢܝܼ.

܀ܩܢܘܢܐ܀

ܟܲܕܼ ܡܲܣܩܝܼܢܲܢ ܬܸܫܒܘܿܚܬܵܐ ܘܐܝܼܩܵܪܵܐ ܘܬ̣ܵܘܕܝܼܬ̣ܵܐ ܘܣܸܓ̣ܕܼܬ̣ܵܐ ܠܐܲܒ̣ܵܐ ܘܠܲܒ̣ܪܵܐ ܘܲܠܪܘܼܚܵܐ ܕܩܘܼܕܼܫܵܐ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ܀ ܘܪܵܫܸܡ ܥܲܠ ܐܪ̈ܵܙܹܐ܀

ܘܥܵܢܹܝܢ: ܐܵܡܹܝܢ. ܘܐܵܡܲܪ ܡܫܲܡܫܵܢܵܐ ܕܥܲܠ ܒܹܝܡ: ܒܡܲܕܥܲܝ̈ܟ݁ܘܿܢ ܨܲܠܵܘ. ܫܠܵܡܵܐ ܥܲܡܲܢ.

ܘܡܲܩܸܦ ܟܵܗܢܵܐ ܟܘܼܫܵܦܵܐ ܗܵܢܵܐ ܟܲܕ݂ ܒܲܪܝܼܟ݂ ܠܸܒܵܢܵܐܝܼܬ݂:

܀ܟܘܫܦܐ܀

ܡܵܪܝܵܐ ܐܲܠܵܗܵܐ ܚܲܝܠܬ݂ܵܢܵܐ: ܩܲܒܸ݁ܠܲܝܗܝ ܠܩܘܼܪܒܵܢܵܐ ܗܵܢܵܐ ܡܸܢ ܐܝܼܕ݂ܝ̈ ܚܲܠܵܫܘܼܬ݂ܝ: ܚܠܵܦ ܟܠܵܗ݁ ܥܹܕ݇ܬܵܐ ܩܲܕܝܼܫܬܵܐ ܩܵܬ݂ܘܿܠܝܼܩܝܼ. ܘܲܚܠܵܦ ܟܠܗܘܿܢ ܐܲܒ݂ܵܗ̈ܵܬ݂ܵܐ ܟܹܐܢܹ̈ܐ ܘܙܲܕܝܼܩܹ̈ܐ ܕܲܫܦܲܪܘ ܩܕ݂ܵܡܲܝܟ. ܘܲܚܠܵܦ ܟܠܗܘܿܢ ܢܒ݂ܝܹ̈ܐ ܘܲܫܠܝܼܚܹ̈ܐ. ܘܲܚܠܵܦ ܟܠܗܘܿܢ ܣܵܗ̈ܕܹ݁ܐ ܘܡܵܘܕ݁ܝܵܢܹ̈ܐ. ܘܲܚܠܵܦ ܟܠܗܘܿܢ ܐܲܒ݂ܝܼ̈ܠܹܐ ܘܲܡܥܵܩܹ̈ܐ. ܘܲܚܠܵܦ ܟܠܗܘܿܢ ܣܢܝܼܩܹ̈ܐ ܘܲܡܛܲܪ̈ܦܹܐ. ܘܲܚܠܵܦ ܟܠܗܘܿܢ ܟܵܗܢܹ̈ܐ ܘܡܲܠܟܹ̈ܐ ܘܫܲܠܝܼܛܵܢܹ̈ܐ. ܘܲܚܠܵܦ ܟܠܗܘܿܢ ܟܪ̈ܝܼܗܹܐ ܘܐܲܠܝܼ̈ܨܹܐ. ܘܲܚܠܵܦ ܟܠܗܘܿܢ ܥܲܢܝܼ̈ܕܹܐ ܕܲܦܪܲܫܘ ܘܫܲܢܝܼܘ ܡܸܢ ܒܲܝܢܵܬܲܢ. ܘܲܚܠܵܦ ܥܲܡܵܐ ܗܵܢܵܐ ܕܚܵܐܲܪ ܘܲܡܣܲܟܸ݁ܐ ܠܪ̈ܲܚܡܲܝܟ܀ ܘܲܚܠܵܦ ܚܲܠܵܫܘܼܬ݂ܝ ܘܕ݂ܲܘܝܘܼܬ݂ܝ ܘܡܸܣܟܹ݁ܢܘܼܬ݂ܝ. ܬܢܝܼ. ܐܹܝܢ ܡܵܪܲܢ ܘܐܲܠܵܗܲܢ: ܐܲܝܟ݂ ܪ̈ܲܚܡܲܝܟ ܘܣܘܿܓ݂ܐܵܐ ܕܛܲܝܒ̈ܘܵܬ݂ܵܟ݂: ܣܥܘܿܪ ܠܘܵܬ݂ ܥܲܡܵܟ݂ ܘܲܠܘܵܬ݂ ܕܵܘܝܘܼܬ݂ܝ: ܘܠܵܘ ܐܲܝܟ݂ ܚܛܵܗܲܝ̈ ܘܣܲܟ݂̈ܠܘܵܬ݂ܝ. ܐܸܠܵܐ ܢܸܫܬ݁ܘܸܐ ܐܸܢܵܐ ܘܗܵܠܹܝܢ ܠܚܘܼܣܵܝܵܐ ܕܚܲܘܒܹ̈ܐ: ܘܲܠܫܘܼܒ݂ܩܵܢܵܐ ܕܲܚܛܵܗܹ̈ܐ: ܒܝܲܕ݂ ܦܲܓ݂ܪܵܐ ܗܵܢܵܐ ܩܲܕܝܼܫܵܐ: ܕܲܒ݂ܗܲܝܡܵܢܘܼܬ݂ܵܐ ܕܲܫܪܵܪܵܐ ܢܵܣܒ݁ܝܼܢ݇ ܚ݇ܢܲܢ ܒܛܲܝܒ݁ܘܼ ܕܡܸܢܵܟ݂ ܐܵܡܹܝܢ܀

ܘܩܵܐܹܡ ܘܐܵܡܲܪ: ܒܲܪܸܟ݂ܡܵܪܝ ܬܢܝ ܓ ܙܲܒ݂ܢ̈ܝܼܢ ܐܲܚܲܝ̈ ܨܲܠܵܘ ܥܠܲܝ.

ܐܸܡܲܬ݂ܝ ܕܗܵܘܹܐ ܩܘܼܪܒܵܢܵܐ ܕܥܲܢܝܼܕ݂ܐ ܩܪܝܼ ܗܵܢܵܐ:

܀ܟܘܫܦܐ ܕܥܢܝ̈ܕܐ܀

ܣܵܓܹܕ݂ ܐ݇ܢܵܐ ܡܵܪܝ ܠܛܲܝܒܘܼܬ݂ܵܟ݂: ܘܡܲܘܕܸ݁ܐ ܐܢܵܐ ܠܲܡܪܲܚܡܵܢܘܼܬ݂ܵܟ݂: ܕܟܲܕ݂ ܠܵܐ ܫܵܘܹܐ ܐ݇ܢܵܐ ܡܸܛܠ ܚܛܵܗܲܝ̈: ܩܲܪܸܒ݂ܬܵܢܝ ܠܘܵܬ݂ܵܟ݂ ܒܲܚܢܵܢܵܟ݂. ܘܣܵܡܬܵܢܝ ܡܫܲܡܫܵܢܵܐ ܘܡܸܨܥܵܝܵܐ ܠܐ݇ܪ̈ܵܙܹܐ ܗܵܠܹܝܢ ܫܒ݂ܝܼܚܹ̈ܐ ܘܩܲܕܝܼܫܹ̈ܐ. ܟܲܕ݂ ܒܵܥܹܐ ܐܢܵܐ ܡܸܢܵܟ݂: ܘܡܸܬ݂ܟܲܫܲܦܢܵܐ ܠܡܵܪܘܼܬ݂ܵܟ݂: ܕܢܸܗܘܘܿܢ ܠܫܲܝܢܹܗ ܘܠܲܫܠܵܡܹܗ ܕܥܵܠܡܵܐ: ܘܲܠܢܘܼܛܵܪܵܐ ܕܥܹܕ݇ܬܵܟ݂ ܩܲܕܝܼܫܬܵܐ: ܘܲܠܬܲܪܒܝܼܬ݂ܵܐ ܕܗܲܝܡܵܢܘܼܬ݂ܵܐ ܫܲܪܝܼܪܬܵܐ: ܘܲܠܪܘܼܡܪܵܡܵܐ ܕܙܲܕܝܼ̈ܩܹܐ: ܘܲܠܚܘܼܣܵܝܵܐ ܕܚܲܛܵܝܹ̈ܐ: ܘܲܠܩܘܼܒܵܠܵܐ ܕܬܲܝܵܒܹ̈ܐ ܘܠܲܫܟ݂ܵܚܬܵܐ ܕܐܲܒ݁ܝܼ̈ܕܹܐ: ܘܲܠܩܘܼܝܵܡܵܐ ܕܒܲܝܬܵܝܹ̈ܐ: ܘܲܠܦܘܼܢܵܝܵܐ ܕܪ̈ܲܚܝܼܩܹܐ: ܘܲܠܠܘܼܒܵܒ݂ܵܐ ܕܲܡܚܝܼ̈ܠܹܐ: ܘܠܲܪܘܲܚܬ݂ܵܐ ܕܲܡܛܲܪ̈ܦܹܐ: ܘܲܠܚܘܼܝܵܠܵܐ ܕܐܲܠܝܼ̈ܨܹܐ: ܘܠܵܐܣܝܘܼܬ݂ܵܐ ܕܲܟ݂ܪ̈ܝܼܗܹܐ: ܘܲܠܦܘܼܪܢܵܣܵܐ ܕܡܸܣܟܹ݁ܢܹ̈ܐ: ܘܲܠܕ݂ܘܼܟ݂ܪܵܢܵܐ ܛܵܒ݂ܵܐ ܕܥܲܢܝܼ̈ܕܹܐ. ܘܲܣܥܘܿܪ ܡܵܪܝ ܥܲܡ ܟܠܲܢ ܐܲܝܠܹܝܢ ܕܥܵܕ݂ܪ̈ܵܢ ܘܫܵܦܪ̈ܵܢ ܠܡܵܪܘܼܬ݂ܵܟ݂. ܐܹܝܢ ܡܵܪܝܵܐ ܐܲܠܵܗܵܐ ܚܲܝܠܬ݂ܵܢܵܐ. ܬܢܝܼ. ܢܸܬ݂ܩܲܒܲܠ ܩܘܼܪܒܵܢܵܐ ܗܵܢܵܐ ܒܲܡܪ̈ܲܘܡܹܐ ܥܸܠܵܝܹ̈ܐ: ܡܼܢ ܐܝܼܕ݂ܲܝ̈ ܥܲܒ݂ܕܵܟ݂ ܚܲܛܵܝܵܐ ܘܡܲܣܟ݁ܠܵܢܵܐ. ܐܲܝܟ݂ ܩܘܼܪܒܵܢܹܗ ܕܗܵܒܹܝܠ ܒܲܦܩܲܥܬ݂ܵܐ: ܘܲܕ݂ܢܘܿܚ ܒܟܹܐܘܸܠܵܐ: ܘܕ݂ܲܐܒ݂ܪܵܗܵܡ ܒܕ݂ܒ݂ܚܵܐ ܕܲܒ݂ܪܹܗ: ܘܕ݂ܐܹܠܝܼܵܐ ܒܛܘܼܪܵܐ ܕܚܘܿܪܝܼܒ݂. ܘܕ݂ܐܲܪܡܲܠܬܵܐ ܒܹܝܬ݂ ܓܲܙܵܐ: ܘܕ݂ܲܫܠܝܼܚܹ̈ܐ ܒܥܸܠܝܼܬ݂ܵܐ. ܘܥܲܡ ܩܘܼܪܒܵܢܵܐ ܕܐܲܒ݂ܵܗ̈ܵܬ݂ܵܐ ܟܹܐܢܹ̈ܐ ܘܙܲܕܝܼܩܹ̈ܐ: ܐܲܝܠܹܝܢ ܕܲܒ݂ܕ݂ܵܪ̈ܝܼܢ ܕܵܪ̈ܝܼܢ ܩܲܪܸܒ݂ܘ ܩܘܼܪ̈ܒܵܢܲܝܗܘܿܢ܀ ܐܹܝܢ ܡܵܪܲܢ ܘܐܲܠܵܗܲܢ: ܢܸܬ݂ܩܲܒܲܠ ܩܘܼܪܒܵܢܵܐ ܗܵܢܵܐ: ܚܠܵܦ ܟܠܵܗ݁ ܥܹܕ݇ܬܵܐ ܩܲܕܝܼܫܬܵܐ ܩܵܬ݂ܘܿܠܝܼܩܝܼ: ܕܬܸܬ݂ܩܲܝܲܡ ܘܬܸܬ݂ܢܛܲܪ ܕܠܵܐ ܙܘܼܥܙܵܥܵܐ. ܘܲܚܠܵܦ ܟܵܗܢܹ̈ܐ ܘܡܲܠܟܹ̈ܐ ܘܫܲܠܝܼܛܵܢܹ̈ܐ: ܕܢܸܬ݂ܩܲܝܡܘܼܢ ܒܫܲܝܢܵܐ ܕܥܹ̈ܕ݂ܵܬܵܐ ܘܒܲܫܠܵܡܵܐ ܕܦܸܢ̈ܝܵܬ݂ܵܐ. ܘܲܚܠܵܦ ܡܸܣܟܹ݁ܢܹ̈ܐ ܘܲܣܢܝܼܩܹ̈ܐ ܘܲܡܛܲܪ̈ܦܹܐ. ܘܲܚܠܵܦ ܐܲܒ݂ܝܼ̈ܠܹܐ ܘܲܡܥܵܩܹ̈ܐ ܘܲܡܢܲܘ̈ܠܹܐ. ܘܲܚܠܵܦ ܟܠܗܘܿܢ ܥܲܢܝܼ̈ܕܹܐ ܕܲܦܪܲܫܘ ܘܫܲܢܝܼܘ ܡܼܢ ܒܲܝܢܵܬܲܢ. ܘܲܚܠܵܦ ܟܠܗܘܿܢ ܐܲܝܠܹܝܢ ܕܲܩܕ݂ܵܡ ܡܲܕ݂ܒ݁ܚܵܟ݂ ܩܲܕܝܼܫܵܐ ܩܵܝܡܝܼܢ: ܘܲܨܠܘܿܬ݂ܵܐ ܒܐܝܼܕ݂ܲܝ̈ ܚܲܛܵܝܘܼܬ݂ܝ ܫܵܐܠܝܼܢ. ܦܲܢܵܐ ܫܸܐܠܵܬ݂̈ܗܘܿܢ: ܘܚܲܣܵܐ ܚܲܘܒܲܝ̈ܗܘܿܢ: ܘܲܥܛܝܼ ܚܛܵܗܲܝ̈ܗܘܿܢ. ܘܲܚܠܵܦ ܐܲܬ݂ܪܵܐ ܗܵܢܵܐ ܘܥܵܡܘܿܪ̈ܵܘܗܝ: ܘܲܚܠܵܦ ܩܪܝܼܬ݂ܵܐ (ܐܲܘ ܡܕ݂ܝܼܢ݇ܬܵܐ) ܗܵܕܹܐ ܘܝܲܬܵܒܹܝ̈ܗ݁: ܐܲܟ݂ܪܸܟܹܝܗ݁ ܡܵܪܝ ܫܘܼܪܵܐ ܚܲܣܝܼܢܵܐ: ܘܐܲܥܒܲܪ ܡܸܢܵܗ݁ ܒܛܲܝܒ݁ܘܼܬ݂ܵܟ݂ ܒܲܪܕ݂ܵܐ ܘܟܲܦܢܵܐ ܘܡܲܘܬܵܢܵܐ ܘܩܲܡܨܵܐ ܘܙܲܚܠܵܐ ܘܨܲܪܨܘܼܪܵܐ. ܘܠܵܐ ܢܸܫܬܲܠܲܛ ܒܲܢ ܒܵܙܘܿܙܵܐ: ܘܠܵܐ ܢܸܚܕܸ݁ܐ ܠܲܢ ܣܵܢܐܵܐ. ܘܲܚܠܵܦ ܦܠܵܢ ܘܲܦܠܵܢ܀ ܘܲܡܫܲܡܲܗ ܠܵܗ݁ ܠܥܸܠܬ݂ܵܐ ܘܲܠܣܘܼܥܪܵܢܵܐ ܟܲܕ݂ ܒܲܪܝܼܟ ܩܕ݂ܵܡ ܡܲܕ݂ܒ݁ܚܵܐ. ܘܟ݂ܠ ܥܸܠܬ݂ܵܐ ܕܝܼܠܹܗ ܘܕ݂ܐܲܚܪ̈ܵܢܹܐ ܗܵܪܟܵܐ ܡܲܥܸܠ ܠܵܗ݁ ܩܕ݂ܵܡ ܐܲܠܵܗܵܐ܀

ܘܡܲܩܸܦ: ܐܹܝܢ ܡܵܪܲܢ ܘܐܲܠܵܗܲܢ: ܐܲܝܟ݂ ܪ̈ܲܚܡܲܝܟ ܘܣܘܿܓ݂ܐܵܐ ܕܛܲܝܒ̈ܘܵܬ݂ܵܟ݂: ܣܥܘܿܪ ܠܘܵܬ݂ ܥܲܡܵܟ݂ ܘܲܠܘܵܬ݂ ܕܵܘܝܘܼܬ݂ܝ. ܘܠܵܘ ܐܲܝܟ݂ ܚܛܵܗܲܝ̈ ܘܣܲܟ݂̈ܠܘܵܬ݂ܝ. ܐܸܠܵܐ ܢܸܫܬ݁ܘܸܐ ܐܸܢܵܐ ܘܗܵܠܹܝܢ ܠܚܘܼܣܵܝܵܐ ܕܚܲܘܒܹ̈ܐ: ܘܲܠܫܘܼܒ݂ܩܵܢܵܐ ܕܲܚܛܵܗܹ̈ܐ: ܒܝܲܕ݂ ܦܲܓ݂ܪܵܐ ܗܵܢܵܐ ܩܲܕܝܼܫܵܐ: ܕܲܒ݂ܗܲܝܡܵܢܘܼܬ݂ܵܐ ܕܲܫܪܵܪܵܐ ܢܵܣܒ݁ܝܼܢ ܚ݇ܢܲܢ ܒܛܲܝܒ݁ܘܼ ܕܡܸܢܵܟ݂ ܐܵܡܹܝܢ܀

ܘܩܵܐܹܡ ܘܐܵܡܲܪ: ܒܲܪܸܟ݂ ܡܵܪܝ: ܒܲܪܸܟ݂ ܡܵܪܝ: ܒܲܪܸܟ݂ ܡܵܪܝ: ܐܲܚܲܝ̈ ܨܲܠܵܘ ܥܠܲܝ.

ܘܡܲܩܸܦ ܘܬ݂ܵܢܹܐ ܗܵܕܹܐ ܓܗܵܢܬܵܐ ܢܝܼܚܵܐܝܼܬ݂:

܀ܓܗܢܬܐ܀

ܣܵܓ̣ܕܝܼܢܲܢ ܠܵܟ̣ ܡܵܪܝ. ܬܢܝܼ. ܘܡܵܘܕܹܝܢܲܢ ܠܵܟ̣ ܘܲܡܫܲܒ̇ܚܝܼܢܲܢ ܠܵܟ̣. ܕܟܲܕܼ ܠܵܐ ܫܵܘܹܝܢܲܢ ܡܸܛܠ ܚܛܵܗܲܝ̈ܢ . ܩܲܪܸܒ̣ܬܲܢ ܠܘܵܬ̣ܵܟ̣ ܡܸܛܠ ܪ̈ܲܚܡܲܝܟ ܣܓܲܝܼـܐܹ̈ܐ. ܘܚܲܕܸܬ̣ܬܲܢ ܘܩܲܕܸܫܬܲܢ ܒܛܲܝܒ̇ܘܼܬ̣ܵܐ ܕܪܘܼܚܵܐ ܕܩܘܼܕܼܫܵܐ ܘܐܲܫܘܝܼܬܵܢ ܠܲܡܫܲܡܵܫܘܼ ܩܕܼܵܡܲܝܟ ܬܸܫܡܸܫܬܵܐ ܗܵܕܹܐ ܕܚܝܼܠܬܵܐ ܘܐܲܠܵܗܵܝܬܵܐ ܠܦܘܼܪܩܵܢܐ ܕܚܲܝܲܝ̈ܢ. ܟܲܕܼ ܡܵܘܕܹܝܢܲܢ ܩܕܼܵܡܲܝܟ ܬܵܘܕܝܼܬ̣ܵܐ ܒܩܘܼܒܵܠ ܛܲܝܒ̇ܘܼܬ̣ܵܐ ܪܲܒܬ̣ܵܐ. ܡܸܛܠ ܦܘܼܪܩܵܢܵܐ ܪܲܒܵܐ ܕܲܗ̣ܘܵܐ ܠܟ̣ܠܲܢ. ܒܝܲܕܼ ܒܪܵܟ̣ ܚܲܒܝܼܒ̣ܵܐ ܡܵܪܲܢ ܝܑܼܫܘܿܥ ܡܫܝܼܚܵܐ . ܘܲܡܩܲܪܒ̣ܝܼܢܲܢ ܩܕܼܵܡ ܬܠܝܼܬ̣ܵܝܘܼܬ̣ܵܟ̣ ܡܫܲܒܲܚܬ̣ܵܐ : ܒܠܸܒܵܐ ܫܚܝܼܩܵܐ ܘܲܒ̣ܪܘܼܚܵܐ ܡܲܟܝܼܟ̣ܬܵܐ. ܕܸܒ̣ܚܬ̣ܵܐ ܗܵܕܹܐ ܚܲܝܬ̣ܵܐ ܘܩܲܕܝܼܫܬܵܐ ܘܲܡܩܲܒܲܠܬܵܐ. ܐܪܵܙ ܐܸܡܪܹܗ ܕܐܲܠܵܗܵܐ ܗ̇ܘ ܕܫܵܩܹܠ ܚܛܝܼܬܹܗ ܕܥܵܠܡܵܐ. ܟܲܕܼ ܒܵܥܹܝܢܲܢ ܡܸܢܵܟ̣ ܘܡܸܬ̣ܟܲܫܦܝܼܢܲܢ ܠܵܟ̣. ܕܬܸܨܛܒܸܐ ܡܵܪܝ ܐܲܠܵܗܘܼܬ̣ܵܟ̣ ܣܓ̣ܝܼܕܬܵܐ. ܘܒܲܡܪܲܚܡܵܢܘܼܬ̣ܵܟ̣ ܢܸܬ̣ܩܲܒܲܠ ܩܘܼܪܒܵܢܵܐ ܗܵܢܵܐ ܕܲܟ̣ܝܵܐ ܘܩܲܕܝܼܫܵܐ. ܕܒܹܗ ܐܸܨܛܒ̣ܝܼܬ̇ ܘܐܸܬ̣ܪܲܥܝܼܬ̇ ܥܲܠ ܐܲܦܲܝ̈ ܚܛܵܗܵܘ̈ܗܝ ܕܥܵܠܡܵܐ܀ ܘܐܵܦ ܗܵܫܵܐ ܡܵܪܝܵܐ ܬܢܝܼ. ܗܵܐ ܡܸܬ̣ܩܲܪܲܒ̣ ܩܘܼܪܒܵܢܵܐ ܗܵܢܵܐ: ܩܕܼܵܡ ܫܡܵܟ̣ ܪܲܒܵܐ ܘܲܕܼܚܝܼܠܵܐ. ܚܠܵܦ ܟܠܵܗ̇ ܥܹܕܬܵܐ ܩܲܕܝܼܫܬܵܐ ܩܵܬ̣ܘܿܠܝܼܩܝܼ. ܕܬܲܫܪܸܐ ܒܓ̣ܵܘܵܗ̇ ܫܲܝܢܵܟ̣ ܘܲܫܠܵܡܵܟ̣ ܟܠܗܘܿܢ ܝܵܘ̈ܡܵܬܹܗ ܕܥܵܠܡܵܐ܀ ܐܹܝܢ ܡܵܪܲܢ ܘܐܲܠܵܗܲܢ. ܬܢܝܼ. ܐܲܫܪܵܐ ܒܓ̣ܵܘܵܗ̇ ܫܲܝܢܵܟ̣ ܘܲܫܠܵܡܵܟ̣ ܟܠܗܘܿܢ ܝܵـܘ̈ܡܵܬܹܗ ܕܥܵܠܡܵܐ. ܘܢܸܬ̣ܪܲܚܩܘܼܢ ܡܸܢܵܗ̇ ܪ̈ܕܼܘܼܦܝܹܐ ܘܲܫܓ̣ܘܼܫܝܹ̈ܐ ܘܚܸܪ̈ܝܵܢܹܐ ܘܣܸܕܼܩܹ̈ܐ ܘܦܵܠܓ̈ܘܵܬ̣ܵܐ. ܘܢܸܬ̣ܢܲܩܲܦ ܟܠܲܢ ܠܲܚܕܼܵܕܹ̈ܐ ܒܲܚܕܼܵܐ ܐܵܘܝܘܼܬ̣ܵܐ. ܒܠܸܒܵܐ ܕܲܟ̣ܝܵܐ ܘܲܒ̣ܚܘܼܒܵܐ ܫܲܠܡܵܐ܀ ܘܲܚܠܵܦ ܟܠܗܘܢ ܐܲܒ̣ܵܗܲܝ̈ܢ ܐܲܦܸܣܩܘܿܦܹ̈ܐ ܘܦܸܪ̈ܝܵܕܼܘܿܛܹܐ: ܘܩܲܫܝܼܫܹ̈ܐ ܘܲܡܫܲܡܫܵܢܹ̈ܐ: ܐܲܝܠܹܝܢ ܕܐܝܼܬܲܝܗܘܿܢ ܒܬܸܫܡܸܫܬܵܐ ܗܵܕܹܐ ܕܲܫܪܵܪܵܐ. ܕܢܸܬ̣ܩܲܝܡܘܼܢ ܘܲܢܫܲܡܫܘܼܢ ܩܕܼܵܡܲܝܟ ܕܲܟ̣ܝܵܐܝܼܬ̣ ܘܙܲܗܝܵܐܝܼܬ̣ ܘܩܲܕܝܼܫܵܐܝܼܬ̣. ܘܢܸܫܦܪܘܼܢ ܠܨܸܒ̣ܝܵܢܵܟ̣: ܐܲܝܟܲܢܵܐ ܕܢܸܫܬ̇ܘܘܿܢ ܠܲܡܩܲܒܵܠܘܼ ܡܸܢܵܟ̣ ܕܲܪ̈ܓܹܐ ܛܵܒܹ̈ܐ ܘܲܡܥܲܠܲـ̈ܝܵܐ. ܒܓܸܠܝܵܢܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ܀ ܘܲܚܠܵܦ ܟܠܗܘܿܢ ܒܢܹܝ̈ܗ̇ ܕܥܹܕܬܵܐ ܩܲܕܝܼܫܬܵܐ ܩܵܬ̣ܘܿܠܝܼܩܝܼ ܕܲܬ̣ܢܵܢ ܘܕܲܒ̣ܟ̣ܠ ܐܲܬܲܪ. ܕܢܸܬ̣ܪܲܒ̇ܿܢ ܒܣܸܓ̣ܕܼܬ̣ܵܐ ܕܡܵܪܘܼܬ̣ܵܟ̣: ܒܗܲܝܡܵܢܘܼܬ̣ܵܐ ܕܲܫܪܵܪܵܐ ܘܒܲܥܒ̣ܵܕܹ̈ܐ ܛܵܒܹ̈ܐ ܘܲܡܝܲܬ̇ܪܹ̈ܐ: ܠܦܘܼܪܩܵܢܵܐ ܕܚܲܝܲܝ̈ܗܘܿܢ. ܘܲܚܠܵܦ ܥܲܒ̣ܕܵܟ ܚܲܛܵܝܵܐ ܘܡܲܣܟ̇ܠܵܢܵܐ: ܕܲܒ̣ܛܲܝܒ̇ܘܼܬ̣ܵܟ ܡܵܪܝ ܬܚܲܣܸܐ ܚܛܵܗܲܝ̈ ܘܬܲܥܒܲܪ ܣܲܟ̣ܠ̱̈ܘܵܬ̣ܝ. ܐܲܝܠܹܝܢ ܕܟܲܕܼ ܝܵܕܲܥ ܐܢܵܐ ܘܟܲܕ ܠܵܐ ܝܵܕܲܥ ܐܢܵܐ: ܚܛܹܝܬ̣ ܘܐܲܣܟ̇ܠܹܬ̣ ܩܕܼܵܡܲܝܟ. ܘܲܚܠܵܦ ܟܠܗܘܿܢ ܐܲܝܠܹܝܢ ܕܡܸܛܠܵܬ̣ܗܘܿܢ ܡܸܬ̣ܩܲܪܲܒ̣ ܩܘܼܪܒܵܢܵܐ ܗܵܢܵܐ: ܕܢܸܫܟ̇ܚܘܼܢ ܩܕܼܵܡܲܝܟ ܪ̈ܲܚܡܹܐ ܘܲܚܢܵܢܵܐ ܘܢܸܚܘܿܢ܀ ܘܲܚܠܵܦ ܦܹܐܪܹ̈ܐ ܕܐܲܪܥܵܐ ܘܡܘܼܙܵܓ̣ܵܘܗ̈ܝ ܕܐܵܐܲܪ ܕܢܸܬ̣ܒܲܪܲܟ ܟܠܝܼܠܵܐ ܕܫܲܢ݇ܬܵܐ ܒܛܲܝܒ̇ܘܼܬ̣ܵܟ̣. ܬܢܝܼ ܓ ܙܲܒ̣ܢܝܼ̈ܢ܀ ܘܲܚܠܵܦ ܟܠܹܗ ܓܸܢܣܵܐ ܕܲܒ̣ܢܲܝ̈ܢܵܫܵܐ: ܐܲܝܠܹܢ ܕܒܲܚܛܝܼܬ̣ܵܐ ܘܲܒ̣ܛܘܼܥܝܲܝ ܐܝܼܬܲܝܗܘܿܢ. ܕܲܒ̣ܛܲܝܒ̇ܘܼܬ̣ܵܟ̣ ܡܵܪܝ ܬܲܫܘܸܐ ܐܸܢܘܿܢ ܠܝܼܕܲܥܬ̣ܵܐ ܕܲܫܪܵܪܵܐ ܘܲܠܣܸܓ̣ܕܼܬ̣ܵܐ ܕܡܵܪܘܼܬ̣ܵܟ̣. ܕܢܸܕܥܘܼܢܵܟ̣ ܕܐܲܢ݇ܬ̇ ܐܲܢ݇ܬ̇ ܐܲܠܵܗܵܐ ܐܲܒ̣ܵܐ ܕܲܫܪܵܪܵܐ ܒܲܠܚܘܿܕܲܝܟ: ܛܵܒ̣ܵܐ ܕܨܵܒܹܐ ܐܲܢ݇ܬ̇ ܕܟ̣ܠܗܘܿܢ ܒܢܲܝ̈ܢܵܫܵܐ ܢܸܚܘܿܢ ܘܢܸܬ̣ܦܢܘܿܢ ܠܝܼܕܲܥܬ̣ܵܐ ܕܲܫܪܵܪܵܐ. ܘܲܕܼܢܸܕܥܘܼܢ ܕܐܲܢ݇ܬ̇ܘܼ ܡܵܪܝܵܐ ܕܡ̣ܢ ܡܬ̣ܘܿܡ ܘܡ̣ܢ ܥܵܠܲܡ.ܟܝܵܢܵܐ ܐܲܠܵܗܵܝܵܐ ܕܠܵܐ ܥܒ̣ܝܼܕܼ. ܥܵܒ̣ܘܿܕܼܵܐ ܕܟ̣ܠ ܡܸܕܸܡ. ܐܲܒ̣ܵܐ ܘܲܒ̣ܪܵܐ ܘܪܘܼܚܵܐ ܕܩܘܼܕܼܫܵܐ. ܗ̇ܘ ܕܡܸܛܠܵܬܲܢ ܒܢܲܝ̈ܢܵܫܵܐ ܘܡܸܛܠ ܦܘܼܪܩܵܢܲܢ: ܒܪܵܐ ܕܐܲܠܵܗܵܐ: ܐܲܠܵܗܵܐ ܡܸܠܬ̣ܵܐ: ܠܒܸܫ ܒܲܪܢܵܫܵܐ ܡܫܲܠܡܵܢܵܐ ܡܵܪܲܢ ܝܑܼܫܘܿܥ ܡܫܝܼܚܵܐ. ܘܐܸܬ̣ܓܡܲܪ ܘܐܸܙܕܲܕܲܩ ܒܚܲܝܠܵܐ ܕܐܲܠܵܗܵܐ ܘܲܒ̣ܪܘܼܚܵܐ ܕܩܘܼܕܼܫܵܐ. ܘܐܝܼܬ̣ܵܘܗܝ ܡܸܨܥܵܝܵܐ ܕܐܲܠܵܗܵܐ ܘܕܲܒ̣ܢܲܝ̈ܢܵܫܵܐ. ܘܝܵܗܘܿܒ̣ܵܐ ܕܚܲܝܹ̈ܐ ܕܲܠܥܵܠܲܡ ܥܵܠܡܝܼܢ. ܠܟ̣ܠܗܘܿܢ ܐܲܝܠܹܝܢ ܕܡܸܬ̣ܩܲܪܒ̣ܝܼܢ ܒܐܝܼܕܹܗ ܠܐܲܠܵܗܵܐ ܐܲܒ̣ܵܐ. ܗ̇ܘ ܕܠܹܗ ܬܸܫ̈ܒܚܵܢ ܘܒ̣ܘܼܪ̈ܟܵܢ ܠܥܵܠܲܡ ܥܵܠܡܝܼܢ: ܐܵܡܹܝܢ܀ ܐܹܝܢ ܡܵܪܲܢ ܘܐܲܠܵܗܲܢ. ܬܢܝܼ. ܩܲܒܸܠ ܡܸܢܲܢ ܒܛܲܝܒܘܼܬ̣ܵܟ̣ ܕܸܒ̣ܚܵܐ ܗܵܢܵܐ ܕܬ̣ܵܘܕܼܝܼܬ̣ܵܐ: ܕܐܝܼܬ̣ܵܘܗܝ ܦܹܐܪܹ̈ܐ ܡܠܝܼܠܹ̈ܐ ܕܣܸܦ̈ܘܵܬܲܢ. ܕܢܸܗܘܸܐ ܩܕܼܵܡܲܝܟ ܕܘܼܟ̣ܪܵܢܵܐ ܛܵܒ̣ܵܐ: ܠܙܲܕܝܼ̈ܩܹܐ ܩܲܕܼܡܵܝܹ̈ܐ: ܘܠܲܢܒ̣ܝܼـܹ̈ܐ ܩܲܕܼܝܼܫܹ̈ܐ: ܘܠܲܫܠܝܼܚܹ̈ܐ ܛܘܼܒ̣ܵܢܹ̈ܐ: ܘܲܠܣܵܗ̈ܕܹܐ ܘܲܠܡܵܘܕܝܵܢܹ̈ܐ: ܘܠܐܲܦܸܣܩ̈ܘܿܦܹܐ ܘܲܠܡܲܠܦܵܢܹ̈ܐ: ܘܲܠܩܲܫܝܼܫܹ̈ܐ ܘܠܲܡܫܲܡܫܵܢܹ̈ܐ: ܘܲܠܟ̣ܠܗܘܿܢ ܒܢܹܝ̈ܗ̇ ܕܥܹܕܬܵܐ ܩܲܕܝܼܫܬܵܐ ܩܵܬ̣ܘܿܠܝܼܩܝܼ : ܐܲܝܠܹܝܢ ܕܲܒ̣ܗܲܝܡܵܢܘܼܬ̣ܵܐ ܕܲܫܪܵܪܵܐ ܥܢܲܕܼܘ ܡ̣ܢ ܥܵܠܡܵܐ ܗܵܢܵܐ܀ ܗܵܪܟܵܐ ܪܵܫܹܡ: ܠܲܬ݂ܪܘܿܢܘܿܣ ܡܼܢ ܠܬܲܚܬ ܠܥܸܠ: ܘܡܼܢ ܝܲܡܝܼܢܵܐ ܠܣܸܡܵܠܵܐ: ܟܲܕ݂ ܗܸܘܼ ܓܗܝܼܢ ܘܛܵܦܲܚ ܥܲܠ ܐܲܦܵܘܗ̈ܝ. (ܘܐܵܡܲܪ ܡܫܲܡܫܵܢܵܐ ܒܩܵܠܵܐ ܫܡܝܼܥܵܐ: ܬܸܗܘܹܐ ܛܲܝܒܘܼܬ݂ܵܟ݂ ܥܠܲܝܢ ܡܵܪܝܵܐ ܐܲܝܟܲܢܵܐ ܕܣܲܟܝܼܢܲܢ ܠܵܟ݂.) ܕܲܒ̣ܛܲܝܒܘܼܬ̣ܵܟ̣ ܡܵܪܝ ܬܚܲܣܸܐ ܐܸܢܘܿܢ: ܠܟ̣ܠܗܘܿܢ ܚܛܵܗܹ̈ܐ ܘܣܲܟ̣ـ̈ܠܘܵܬ̣ܵܐ: ܐܲܝܠܹܝܢ ܕܲܒ̣ܥܵܠܡܵܐ ܗܵܢܵܐ ܒܦܲܓ̣ܪܵܐ ܡܵܝܘܿܬ̣ܵܐ ܘܲܒ̣ܢܲܦ̮ܫܵܐ ܡܸܫܬܲܚܠܦܵܢܝܼܬ̣ܵܐ: ܚܛܵܘ ܘܐܲܣܟܸ̇ܠܘ ܩܕܼܵܡܲܝܟ܀ ܕܠܲܝܬ ܒܲܪܢܵܫܵܐ ܕܠܵܐ ܚܵܛܹܐ: ܘܠܵܐ ܣܢܝܼܩ ܥܲܠ ܪ̈ܲܚܡܹܐ ܘܚܵܘܣܵܢܵܐ ܕܡ̣ܢ ܠܘܵܬ̣ܵܟ̣. ܬܢܝܼ. ܘܒ̣ܵܥܹܢܲܢ ܡܸܢܵܟ̣ ܡܵܪܝ: ܘܡܸܬ̣ܟܲܫܦܝܼܢܲܢ ܠܵܟ̣: ܘܣܵܓ̣ܕܝܼܢܲܢ ܠܵܟ̣: ܘܲܡܦܝܼܣܝܼܢܲܢ ܠܵܟ̣: ܕܬܸܨܛ݇ܒܸܐ ܡܵܪܝ ܐܲܠܵܗܘܼܬ̣ܵܟ̣ ܣܓ̣ܝܼܕܬܵܐ ܘܲܡܪܲܚܡܵܢܘܼܬ̣ܵܟ̣: ܘܬ̣ܐܬ̣ܐ ܥܠܲܝܢ ܘܥܲܠ ܩܘܼܪܒܵܢܵܐ ܗܵܢܵܐ ܛܲܝܒܘܼܬ̣ܵܐ ܕܪܘܼܚܵܐ ܕܩܘܼܕܼܫܵܐ. ܘܬܸܫܪܸܐ ܘܬܲܓܸ̇ܢ ܥܲܠ ܠܲܚܡܵܐ ܗܵܢܵܐ: ܘܥܲܠ ܟܵܣܵܐ ܗܵܢܵܐ. ܘܲܬ̣ܒܲܪܲܟ ܘܲܬ̣ܩܲܕܸܿܫ ܘܲܬ̣ܚܲܬܸ̇ܡ ܐܸܢܘܿܢ:ܒܫܸܡ ܐܲܒ̣ܵܐ ܘܲܒ̣ܪܵܐ ܘܪܘܼܚܵܐ ܕܩܘܼܕܼܫܵܐ. ܘܢܸܗܘܸܐ ܒܚܲܝܠܵܐ ܕܲܫܡܵܟ̣ ܠܲܚܡܵܐ ܗܵܢܵܐ: ܦܲܓ̣ܪܹܗ ܩܲܕܝܼܫܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ. ܘܟ̣ܵܣܵܐ ܗܵܢܵܐ ܕܡܹܗ ܝܲܩܝܼܪܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ. ܘܟ̣ܠ ܡ̇ܢ ܕܲܒ̣ܗܲܝܡܵܢܘܼܬ̣ܵܐ ܕܲܫܪܵܪܵܐ ܐܵܟܹܠ ܡ̣ܢ ܠܲܚܡܵܐ ܗܵܢܵܐ: ܘܫܵܬܹܐ ܡ̣ܢ ܟܵܣܵܐ ܗܵܢܵܐ: ܢܸܗܘܘܿܢ ܠܹܗ ܡܵܪܝ ܠܚܘܼܣܵܝܵܐ ܕܚܵܘܒܹ̈ܐ: ܘܲܠܫܘܼܒ̣ܩܵܢܵܐ ܕܲܚܛܵܗܹ̈ܐ: ܘܲܠܣܲܒ̣ܪܵܐ ܪܲܒܵܐ ܕܲܩܝܵܡܬܵܐ ܕܡ̣ܢ ܒܹܝܬ̣ ܡܝܼܬܹ̈ܐ: ܘܲܠܦܘܼܪܩܵܢܵܐ ܕܦܲܓ̣ܪܹܗ ܘܲܕܼܢܲܦ̮ܫܹܗ: ܘܲܠܚܲܝܹ̈ܐ ܘܲܠܬܸܫܒܘܿܚܬܵܨܐ ܕܲܠܥܵܠܲܡ ܥܵܠܡܝܼܢ. ܘܐܲܫܘܵܐ ܠܟ̣ܠܲܢ ܒܛܲܝܒܘܼܬܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ: ܕܥܲܡ ܟܠܗܘܿܢ ܐܲܝܠܹܝܢ ܕܲܫܦܲܪܘ ܠܨܸܒ̣ܝܵܢܵܟ̣: ܘܐܸܬ̇ܕܲܒܲܪܘ ܐܲܝܟ̣ ܦܘܼܩܕܵܢܲܝ̈ܟ. ܢܸܬ̣ܒܲܣܲܡ ܒܡܲܠܟܘܼܬ̣ܵܐ ܕܲܫܡܲܝܵܐ ܒܛܵـ̈ܒ̣ܵܬ̣ܵܐ ܕܲܥ̈ܬ̣ܝܼܕܼܵܢ ܘܠܵܐ ܥܵܒ̣ܪ̈ܵܢ. ܬܢܝܼ.

ܘܡܵܐ ܕܐܵܡܲܪ ܟܵܗܢܵܐ ܘܬܸܐܬܸܐ ܥܠܲܝܢ. ܐܵܡܲܪ ܡܫܲܡܫܵܢܵܐ: ܒܫܸܠܝܵܐ ܘܲܒ̣ܕܸܚܠ̱ܬ̣ܵܐ ܗ̤ܘܲܝܬܘܿܢ ܩܵܝܡܝܼܢ ܘܲܡܨܲܠܹܝܢ: ܫܠܵܡܵܐ ܥܲܡܲܢ.

܀ ܩܢܘܢܐ ܀

ܘܗܵܪܟܵܐ ܘܬܲܡ̇ܢ ܟܠܲܢ ܐܲܟ̣ܚܲܕܼ ܫܲܘܝܵܐܝܼܬ̣. ܢܵܘܕܸܿܐ ܘܢܸܣܓܘܿܕܼ ܘܲܢܫܲܒܲܚ. ܠܐܲܒ̣ܵܐ ܘܲܒ̣ܪܵܐ ܘܪܘܼܚܵܐ ܕܩܘܼܕܼܫܵܐ. ܗܵܫܵܐ ܘܲܒ̣ܟ̣ܠ ܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܐܪܵ̈ܙܹܐ. ܘܥܵܢܹܝܢ: ܐܵܡܹܝܢ.

ܘܲܡܩܲܪܸܒ݂ ܡܵܛܘܿܢܝܼܵܐ ܩܕ݂ܵܡ ܡܲܕ݂ܒܚܵܐ ܟܲܕ݂ ܠܵܐ ܡܵܛܹܐ ܪܹܫܹܗ ܠܐܲܪܥܵܐ: ܟܲܕ݂ ܡܸܬ݂ܚܲܫܲܚ ܒܦܸܬ݂ܓ݂ܵܡܹ̈ܐ ܕܪܲܚܸܡܥܠܲܝ: ܘܦܝܼܪܡܵܐ ܡܼܢ ܝܲܡܝܼܢܹܗ: ܘܡܸܬ݂ܟܲܫܲܦ ܒܟ݂ܘܼܫܵܦܹ̈ܐ ܟܵܗܢܵܝܹ̈ܐ. ܘܠܵܐ ܢܣܝܼܡ ܒܘܼܪܟܵܐ. ܘܡܲܩܸܦ:

ܡܫܝܼܚܵܐ ܫܠܵܡܵܐ ܕܥܸܠܵܝܹ̈ܐ: ܘܫܲܝܢܵܐ ܪܲܒܵܐ ܕܬܲܚܬܵܝܹ̈ܐ: ܐܲܫܪܵܐ ܡܵܪܝ ܫܲܝܢܵܟ݂ ܘܲܫܠܵܡܵܟ݂ ܒܐܲܪܒܲܥܦܸܢ̈ܝܵܬܹܗ ܕܥܵܠܡܵܐ: ܘܝܲܬܝܼܪܵܐܝܼܬ݂ ܒܥܹܕ݇ܬܵܟ݂ ܩܲܕܝܼܫܬܵܐ ܩܵܬ݂ܘܿܠܝܼܩܝܼ. ܘܫܲܝܸܢ ܟܵܗܢܘܼܬ݂ܵܐ ܥܲܡ ܡܲܠܟܘܼܬ݂ܵܐ. ܘܒܲܛܸܠ ܩܪ̈ܵܒܹܐ ܡܸܢ ܣܲܘܦܹܝ̈ܗ݁ ܕܐܲܪܥܵܐ. ܘܒܲܕܲܪ ܥܲܡ̈ܡܹܐ ܦܠܝܼ̈ܓܹܐ ܕܨܵܒܹܝܢ ܩܪܵܒ݂ܵܐ: ܕܥܘܼܡܪܵܐ ܫܲܠܝܵܐ ܘܢܝܼܚܵܐ ܢܸܥܡܲܪ: ܒܟ݂ܠܵܗ݁ ܢܲܟ݂ܦܘܼܬ݂ܵܐ ܘܕ݂ܚܠܲܬ݂ ܐܲܠܵܗܵܐ.

ܘܡܲܩܸܦ: ܡܲܘܕܸ݁ܐ ܐܢܵܐ ܠܵܟ݂ ܐܵܒ݂ܝ: ܡܵܪܵܐ ܕܲܫܡܲܝܵܐ ܘܕ݂ܲܐܪܥܵܐ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ. ܕܟܲܕ݂ ܚܲܛܵܝܵܐ ܐܝܼܬܲܝ ܘܲܒ݂ܨܝܼܪܵܐ: ܡܸܛܠ ܣܘܿܓ݂ܐܵܐ ܕܲܡܪܲܚܡܵܢܘܼܬ݂ܵܟ݂: ܐܲܫܘܝܼܬܵܢܝ ܒܛܲܝܒܘܼܬ݂ܵܟ݂ ܠܲܡܩܲܪܵܒ݂ܘ ܩܕ݂ܵܡܲܝܟ ܐܪ̈ܵܙܹܐ ܗܵܠܹܝܢ ܕܚ̈ܝܼܠܹܐ ܘܩܲܕܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ: ܕܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܟ݂: ܕܐܹܫܲܡܸܫ ܠܥܲܡܵܟ݂ ܘܥܵܢ̈ܵܐ ܕܡܲܪܥܝܼܬ݂ܵܟ݂: ܚܘܼܣܵܝܵܐ ܕܚܲܘܒܲܝ̈ܗܘܿܢ: ܘܫܘܼܒ݂ܩܵܢܵܐ ܕܲܚܛܵܗܲܝ̈ܗܘܿܢ: ܘܦܘܼܪܩܵܢܵܐ ܕܢܲܦ̮ܫܵܬ݂̈ܗܘܿܢ ܘܬܲܪܥܘܼܬ݂ܵܐ ܕܟ݂ܠܹܗ ܥܵܠܡܵܐ ܘܫܲܝܢܵܐ ܘܲܫܠܵܡܵܐ ܕܟ݂ܠܗܹܝܢ ܥܹ̈ܕ݂ܵܬ݂ܵܐ.

ܘܡܲܩܸܦ: ܪܲܚܸܡܥܠܲܝ ܐܲܠܵܗܵܐ ܐܲܝܟ݂ ܛܲܝܒ݁ܘܼܬ݂ܵܟ݂. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܐܲܝܟ݂ ܣܘܿܓ݂ܐܵܐ ܕܪ̈ܲܚܡܲܝܟ ܥܛܝܼ ܚܛܵܗܲܝ̈. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܐܲܣܓܵܐ ܐܲܫܝܼܓܲܝܢܝ ܡܸܢ ܥܲܘܠܝ. ܡܲܠܟܵܐ ܡܫܝܼܚܵܐ ܪܲܚܸܡ ܥܠܲܝ܀

ܘܡܸܢ ܚܛܵܗܲܝ̈ ܕܲܟܵܢܝ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܡܸܛܠ ܕܣܲܟ݂ܠܘܵܬ݂ܝ̈ ܝܵܕܲܥ ܐܢܵܐ. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܲܚܛܵܗܲܝ̈ ܠܘܼܩܒܲܠܝ ܐܸܢܘܿܢ ܒܟ݂ܠܙܒܲܢ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܠܵܟ݂ ܒܲܠܚܘܿܕܲܝܟ ܚܛܹܝܬ݂. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܒ݂ܝܼ̈ܫܵܬ݂ܵܐ ܩܕ݂ܵܡܲܝܟ ܥܸܒ݂ܕܹ݁ܬ݂. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܡܸܛܠ ܕܬܸܙܕܲܕܲܩ ܒܡܸܠܬ݂ܵܟ݂ ܘܬܸܼܙܟܸ݁ܐ ܒܕ݂ܝܼܢܲܝ̈ܟ. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܡܸܛܠ ܕܲܒ݂ܥܲܘܠܵܐ ܐܸܬ݂ܒܲܛܢܹܬ݂ ܘܒܲܚܛܵܗܹ̈ܐ ܒܛܸܢܬܲܢܝ ܐܹܡܝ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܐܲܢ݇ܬ ܕܹܝܢ ܒܩܘܼܫܬܵܐ ܨܒܲܝܬ݁. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܟܲܣ̈ܝܵܬ݂ܵܐ ܕܚܸܟ݂ܡܬ݂ܵܟ݂ ܐܲܘܕܲܥܬܵܢܝ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܪܘܿܣ ܥܠܲܝ ܒܙܘܿܦܵܐ ܘܐܸܬ݁ܕܲܟܸ݁ܐ. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܚܲܠܸܠܲܝܢܝ ܒܹܗ ܘܡܸܢ ܬܲܠܓܵܐ ܐܸܚܘܲܪ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܐܲܣܒܲܥܲܝܢܝ ܒܘܼܣܵܡܵܟ݂ ܘܚܲܕ݂ܘܼܬ݂ܵܟ݂. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܢܸܚܕ݁ܘܿܢ ܓܲܪ̈ܡܲܝ ܡܲܟܝܼܟܹ̈ܐ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܐܲܗܦܸܟ݂ ܐܲܦܲܝ̈ܟ ܡܸܢ ܚܛܵܗܲܝ̈. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܟ݂ܠܗܹܝܢ ܣܲܟ݂ܠܘܵܬ݂ܝ̈ ܥܛܝܼ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܠܸܒܵܐ ܕܲܟ݂ܝܵܐ ܒܪܝܼ ܒܝܼ ܐܲܠܵܗܵܐ. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܪܘܼܚܵܟ݂ ܬܩܲܢܬ݂ܵܐ ܚܲܕܸ݁ܬ݂ ܒܓ݂ܵܘܝ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܠܵܐ ܬܸܫܕܹ݁ܝܢܝ ܡܸܢ ܩܕ݂ܵܡܲܝܟ. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܪܘܼܚܵܟ݂ ܩܲܕܝܼܫܵܐ ܠܵܐ ܬܸܣܲܒ݂ ܡܹܢܝ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܐܸܠܵܐ ܐܲܗܦܸܟ݂ ܠܝܼ ܒܘܼܣܵܡܵܟ݂ ܘܦܘܼܪܩܵܢܵܟ݂. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܪܘܼܚܵܟ݂ ܡܫܲܒܲܚܬܵܐ ܬܣܲܡܟܲܢܝ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܕܐܲܠܸܦ ܠܥܵܘܵܠܹ̈ܐ ܐܘܼܪܚܵܟ݂. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝ܀

ܘܚܲܛܵܝܹ̈ܐ ܠܘܵܬܼܵܟ݂ ܢܸܬ݂ܦܢܘܿܢ. ܡܲܠܟܵܐ ܡܫܝܼܚܵܐ ܫܘܼܒ݂ܚܵܐ ܠܲܫܡܵܟ݂܀

ܘܟܸܢ: ܠܘܵܬ݂ܵܟ݂ ܐܲܪܝܼܡܹܬ݂ ܥܲܝܢܲܝ̈ ܥܵܡܘܿܪܵܐ ܕܲܫܡܲܝܵܐ܀ ܐܲܝܟ݂ ܥܲܝܢܹ̈ܐ ܕܥܲܒ݂ܕܹ̈ܐ ܠܘܵܬ݂ ܡܵܪ̈ܲܝܗܘܿܢ܀ ܘܐܲܝܟ݂ ܥܲܝܢܹ̈ܐ ܕܐܲܡܬ݂ܵܐ ܠܘܵܬ݂ ܡܵܪܬܵܗ݁܀ ܗܵܟܲܢ ܥܲܝܢܲܝ̈ܢ ܠܘܵܬ݂ܵܟ݂ ܡܵܪܝܵܐ ܐܲܠܵܗܲܢ܀ ܥܕ݂ܲܡܵܐ ܕܲܬ݂ܪܲܚܸܡܥܠܲܝܢ܀ ܪܲܚܸܡܥܠܲܝܢ ܡܵܪܝܵܐ ܪܲܚܸܡܥܠܲܝܢ܀ ܐܲܫܝܼܓܹܬ݂ ܕܲܟ݂ܝܵܐܝܼܬ݂ ܐܝܼܕ݂ܲܝ̈܀ ܘܐܸܬ݂ܟܲܪܟܹ݁ܬ݂ ܠܡܲܕ݂ܒܚܵܟ݂ ܡܵܪܝܵܐ܀

ܘܪܵܡܹܐ ܒܸܣܡܹ̈ܐ ܒܦܝܼܪܡܵܐ ܘܐܵܡܲܪ ܨܠܘܿܬ݂ܵܐ ܕܒܸܣܡܹ̈ܐ: ܬܸܒ݂ܣܲܡ ܠܵܟ݂ ܡܵܪܲܢ ܘܐܲܠܵܗܲܢ ܨܠܘܿܬܲܢ ܘܒ݂ܵܥܘܼܬܲܢ. ܘܥܸܛܪܹܗ ܕܦܝܼܪܡܲܢ ܒܲܣܝܼܡܵܐ ܢܸܗܘܸܐ ܠܲܢܝܵܚܵܟ݂. ܐܲܝܟ݂ ܦܝܼܪܡܹܗ ܕܐܲܗܪܘܿܢ ܟܵܗܢܵܐ ܒܓ݂ܵܘ ܡܲܫܟܲܢܙܲܒ݂ܢܵܐ. ܘܚܲܕܸܬ݂ ܢܲܦ̮̈ܫܵܬܲܢ ܥܲܡ ܦܲܓ݂ܪ̈ܲܝܢ. ܘܐܸܬ݂ܪܲܥܵܐ ܠܲܒ݂ܪܝܼܬ݂ܵܟ݂ ܡܸܛܠ ܪ̈ܲܚܡܲܝܟ ܣܲܓܝܼ̈ܐܹܐ. ܒܵܪܘܿܝܵܐ ܕܥܸܩܵܪܹ̈ܐ ܒܲܣܝܼܡܹ̈ܐ: ܘܲܕ݂ܗܹܪ̈ܘܿܡܹܐ ܗܲܢܝܼ̈ܐܹܐ. ܡܵܪܵܐ ܕܟ݂ܠ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܲܡܫܲܪܸܐ ܒܛܲܟ݂ܣܵܐ ܕܪܘܼܫܡܵܐ ܘܕܲܩܨܵܝܵܐ: ܒܲܣܸܡ ܡܵܪܲܢ ܘܐܲܠܵܗܲܢ ܪܹܝܚܵܐ ܕܛܲܡܐܘܼܬܲܢ ܘܲܕ݂ܣܲܪܝܘܼܬܲܢ: ܒܪܹܝܚܵܐ ܗܲܢܝܼܐܵܐ ܕܒܲܣܝܼܡܘܼܬܹܗ ܕܚܘܼܒܵܟ݂. ܘܚܲܠܸܠܲܝܢ ܒܹܗ ܡܸܢ ܟܘܼܬ݂̈ܡܵܬ݂ܵܐ ܕܲܚܛܝܼܬ݂ܵܐ: ܪܵܥܝܵܐ ܛܵܒ݂ܵܐ ܕܲܢܦܲܩ ܒܲܒ݂ܥܵܬܲܢ: ܘܐܸܫܟܲܚ ܠܐܲܒܝܼܕ݂ܘܼܬܲܢ: ܘܨܵܒܹܐ ܒܡܸܬ݂ܦܲܢܝܵܢܘܼܬܲܢ. ܚܲܣܵܐ ܠܝܼ ܚܲܘܒܲܝ̈ ܘܲܚܛܵܗܲܝ̈: ܐܲܝܠܹܝܢ ܕܟܲܕ݂ ܝܵܕܲܥ ܐܢܵܐ ܘܟܲܕ݂ ܠܵܐ ܝܵܕܲܥ ܐܢܵܐ ܒܛܲܝܒ݁ܘܼܬ݂ܵܟ݂ ܘܲܒ݂ܪ̈ܲܚܡܲܝܟ. ܬܢܝܼ ܓ ܙܲܒ݂ܢܝܼ̈ܢ܀

ܘܐܵܡܲܪ: ܒܲܪܸܟ݂ܡܵܪܝ: ܒܲܪܸܟ݂ܡܵܪܝ: ܒܲܪܸܟ݂ܡܵܪܝ܀ ܡܩܲܪܒ݂ܵܐ ܠܲܢ ܡܵܪܲܢ ܘܐܲܠܵܗܲܢ ܡܪܲܚܡܵܢܘܼܬ݂ܵܐ ܕܛܲܝܒܘܼܬ݂ܵܟ݂: ܨܹܝܕ݂ ܐ݇ܪ̈ܵܙܹܐ ܗܵܠܹܝܢ ܫܒ݂ܝܼܚܹ̈ܐ ܘܩܲܕܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ: ܟܲܕ݂ ܠܵܐ ܫܵܘܹܝܢܲܢ. ܬܢܝܼ ܓ ܙܲܒ݂ܢܝܼ̈ܢ.

ܘܲܡܫܲܡܫܵܢܵܐ ܥܵܢܹܐ ܠܹܗ: ܒܲܫܪܵܪܵܐ ܡܵܪܝ ܠܵܐ ܫܵܘܹܝܢܲܢ. ܚܘܼܢܲܝܢ ܡܵܪܝ ܟܲܕ݂ ܠܵܐ ܫܵܘܹܝܢܲܢ: ܕܲܒ݂ܝܲܕ݂ ܚܲܠܵܫܘܼܬܲܢ: ܘܡܸܛܠ ܚܛܵܗܲܝ̈ܢ ܣܲܓܝܼ̈ܐܹܐ.

ܘܲܒ݂ܫܘܼܠܵܡ ܟܠ ܙܒܲܢ݇ܬܵܐ ܕܐܵܡܲܪ ܡܩܲܪܒ݂ܵܐ ܠܲܢ ܦܵܟܲܪ ܐܝܼܕ݂ܵܘ̈ܗܝ ܥܲܠ ܚܲܕ݂ܝܹܗ ܒܛܘܼܦ̮ܣܵܐ ܕܲܨܠܝܼܒ݂ܵܐ. ܘܢܵܫܹܩ ܠܲܡܨܲܥܬܹܗ ܕܡܲܕ݂ܒܚܵܐ ܘܲܕ݂ܝܲܡܝܼܢܵܐ: ܘܲܕ݂ܣܸܡܵܠܵܐ. ܘܫܵܩܹܠ ܠܒ݂ܘܼܟ݂ܪܵܐ ܥܸܠܵܝܵܐ ܕܒܲܡܨܲܥܬܹܗ ܕܦܝܼܠܵܣܵܐ ܒܬܲܪ̈ܬܲܝܗܹܝܢ ܐܝܼܕ݂ܵܘ̈ܗܝ ܘܲܡܪܝܼܡ ܠܹܗ ܒܐܵܐܲܪ ܟܡܵܐ ܕܦܵܫ̈ܛܵܢ ܘܠܵܘ ܟܲܕ݂ ܦܟ݂ܝܼܪ̈ܵܢ: ܘܚܵܐܲܪ ܠܥܸܠ ܘܐܵܡܲܪ: ܬܸܫܒܘܿܚܬܵܐ ܠܲܫܡܵܟ݂ ܩܲܕܝܼܫܵܐ ܡܵܪܲܢ ܝܼܫܘܿܥ ܡܫܝܼܚܵܐ. ܘܣܸܓ݂ܕ݁ܬ݂ܵܐ ܠܡܵܪܘܼܬ݂ܵܟ݂ ܒܟ݂ܠܥܸܕܵܢ ܠܥܵܠܡܝܼܢ ܐܵܡܹܝܢ܀ ܠܲܚܡܵܐ ܓܹܝܪ ܚܲܝܵܐ ܘܡܲܚܝܵܢܵܐ: ܕܲܢܚܸܬ݂ ܡܼܢ ܫܡܲܝܵܐ: ܘܝܵܗܹܒ݂ ܚܲܝܹ̈ܐ ܠܥܵܠܡܵܐ ܟܠܹܗ ܡܸܢ ܣܵܟܹܗ: ܕܐܵܟ݂ܘܿܠܵܘܗ̈ܝ ܠܵܐ ܡܵܝܬ݁ܝܼܢ: ܘܢܵܣܘܿܒ݂ܵܘ̈ܗܝ ܒܹܗ ܡܸܬ݂ܦܲܪܩܝܼܢ ܘܡܸܬ݂ܚܲܣܹܝܢ ܘܚܵܐܹܝܢ ܒܹܗ ܠܥܵܠܡܝܼܢ: ܐܵܡܹܝܢ. ܘܥܵܢܹܝܢ: ܐܵܡܹܝܢ.

ܘܢܵܫܹܩ ܠܒ݂ܘܼܟ݂ܪܵܐ ܨܠܝܼܒ݂ܵܐܝܼܬ݂ ܟܲܕ݂ ܠܵܐ ܩܵܪܹܒ݂ ܠܣܸܦ̈ܘܵܬܹܗ ܐܸܠܵܐ ܛܘܼܦ̮ܣܵܢܵܐܝܼܬ݂ ܘܡܲܟ݂ܪܸܟ݂ ܠܹܗ ܥܲܠ ܥܲܝܢܵܘܗ̈ܝ: ܠܥܸܠ ܘܲܠܬܲܚܬ: ܘܲܠܝܲܡܝܼܢܵܐ ܘܲܠܣܸܡܵܠܵܐ. ܘܐܵܡܲܪ: ܫܘܼܒ݂ܚܵܠܵܟ݂ ܡܵܪܝ: ܫܘܼܒ݂ܚܵܠܵܟ݂ ܡܵܪܝ: ܫܘܼܒ݂ܚܵܠܵܟ݂ ܡܵܪܝ: ܥܲܠ ܐܲܦܲܝ̈ ܡܲܘܗܲܒ݂ܬ݂ܵܟ݂ ܕܲܠܘܵܬܲܢ ܕܠܵܐ ܡܸܬ݂ܡܲܠܠܵܐ ܠܥܵܠܡܝܼܢ: ܐܵܡܹܝܢ. ܘܥܵܢܹܝܢ: ܐܵܡܹܝܢ.

ܘܚܵܐܹܨ ܒܬܲܪ̈ܬܲܝܗܹܝܢ ܐܝܼܕ݂ܵܘ̈ܗܝ ܥܲܠ ܒܘܼܟ݂ܪܵܐ ܘܐܵܡܲܪ: ܩܵܪܒ݁ܝܼܢ ܚ݇ܢܲܢ ܡܵܪܝ ܒܗܲܝܡܵܢܘܼܬ݂ܵܐ ܕܲܫܪܵܪܵܐ ܕܲܫܡܵܟ݂: ܠܘܵܬ݂ ܐܪ̈ܵܙܹܐ ܗܵܠܹܝܢ ܩܲܕܝܼܫܹ̈ܐ: ܘܩܵܨܹܝܢ ܚ݇ܢܲܢ ܒܲܚܢܵܢܵܟ݂. ܘܪܵܫܡܝܼܢܲܢ ܒܲܡܪܲܚܡܵܢܘܼܬ݂ܵܟ݂ ܦܲܓ݂ܪܹܗ ܘܲܕ݂ܡܹܗ ܕܚܲܒܝܼܒ݂ܵܟ݂ ܡܵܪܲܢ ܝܼܫܘܿܥ ܡܫܝܼܚܵܐ. ܒܫܸܡ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ܀

ܘܥܵܢܹܝܢ: ܐܵܡܹܝܢ܀ ܘܥܲܡ ܫܘܼܡܵܗܵܐ ܕܲܬ݂ܠܝܼܬ݂ܵܝܘܼܬ݂ܵܐ ܩܵܨܹܐ ܠܒ݂ܘܼܟ݂ܪܵܐ ܕܒ݂ܐܝܼܕ݂ܵܘܗ̈ܝ ܡܗܲܘܢܵܐܝܼܬ݂ ܒܲܬ݂ܪܹܝܢ ܦܸܠ̈ܓܹ݁ܐ. ܘܙܵܕܹܩ ܕܬܸܕܲܥ ܕܗܵܠܹܝܢ ܪ̈ܘܼܫܡܹܐ ܐܲܝܟ݂ ܪܸܥܝܵܢܵܐ ܕܡܵܪܝ ܐܹܠܝܼܵܐ ܕܲܢܨܝܼܒ݂ܝܼܢ ܡܫܲܘܙܒ݂ܝܼܢ ܠܲܢ ܡܼܢ ܕܲܠܡܲܥܵܠܘܼ ܪܒ݂ܝܼܥܵܝܘܼܬ݂ܵܐ ܒܲܩܨܵܝܲܢ.

ܐ݇ܢܵܫܝܼ̈ܢ ܕܹܝܢ ܪܵܫܡܝܼܢ ܗܵܪܟܵܐ ܒܲܟ݂ܪܵܬ݂ܗܘܿܢ ܠܲܦܪܝܼܣܬܵܐ ܒܥܸܕܵܢܵܐ ܕܲܩܨܵܝܵܐ: ܐܲܢ݇ܬ݁ ܕܹܝܢ ܐܸܙܕܲܗܪ ܡܸܢ ܡܲܪܵܚܘܼܬ݂ܵܐ ܗܵܕ݂ܐ. ܒܲܕ݂ܠܵܐ ܣܢܝܼܩ ܗܵܪܟܵܐ ܕܢܸܪܫܘܿܡ: ܐܸܠܵܐ ܕܢܸܩܨܸܐ ܒܫܘܼܡܵܗܵܐ ܕܲܬ݂ܠܝܼܬ݂ܵܝܘܼܬ݂ܵܐ ܟܲܕ݂ ܠܒ݂ܝܼܟ݂ ܠܗܘܿܢ ܒܬܲܪ̈ܬܲܝܗܹܝܢ ܐܝܼܕ݂ܵܘܗ̈ܝ. ܘܣܵܐܹܡ ܠܦܸܠܓܵܐ ܗ݁ܘ ܕܒ݂ܐܝܼܕܹܗ ܕܣܸܡܵܠܵܐ ܒܕ݂ܘܼܟܬܹܗ: ܠܵܘ ܐܲܝܟ݂ ܣܝܵܡܹܗ ܩܲܕ݂ܡܵܝܵܐ: ܐܸܠܵܐ ܡܫܲܚܠܦܵܐܝܼܬ݂. ܟܲܕ݂ ܡܛܲܟܸ݁ܣ ܠܹܗ ܠܲܩܨܵܝܵܐ ܠܐܲܦܲܝ̈ ܟܵܣܵܐ. ܘܲܒ݂ܦܸܠܓܵܐ ܕܒ݂ܐܝܼܕܹܗ ܕܝܲܡܝܼܢܵܐ: ܪܵܫܹܡ ܠܲܕ݂ܡܵܐ ܕܲܒ݂ܟ݂ܵܣܵܐ: ܡܸܢ ܡܲܕ݂ܢܚܵܐ ܠܡܲܥܪܒ݂ܵܐ: ܘܡܸܢ ܓܲܪܒ݁ܝܵܐ ܠܬܲܝܡܢܵܐ: ܟܲܕ݂ ܡܛܲܒܲܥ ܬܘܼܠܬ݂ܵܐ ܕܦܸܠܓܵܐ ܕܒ݂ܐܝܼܕ݂ܗ ܒܟ݂ܵܣܵܐ. ܗܵܢܵܘ ܕܹܝܢ: ܬܘܼܠܬ݂ܵܐ ܕܬܲܪ̈ܬܲܝܗܹܝܢ ܡ̈ܢܵܘܵܬ݂ܵܐ. ܘܪܵܫܹܡ ܕܹܝܢ ܠܟ݂ܵܣܵܐ ܒܦܸܠܓܵܐ ܗܵܘ ܕܡܸܢ ܒܘܼܟ݂ܪܵܐ: ܘܠܵܘ ܒܓܲܒܹ݁ܗ ܥܸܠܵܝܵܐ ܘܲܒ݂ܣܸܦܬܹܗ ܐܲܟ݂ܡܵܐ ܕܲܐ݇ܚܪ̈ܵܢܹܐ ܡܥܵܕ݂ܝܼܢ ܠܡܸܥܒܲܕ݂: ܐܸܠܵܐ ܒܕ݂ܘܼܟܬܼܵܐ ܕܲܩܨܵܝܵܐ. ܟܲܕ݂ ܚܵܐܲܪ ܦܲܪܨܘܿܦ ܦܸܠܓܵܐ: ܡܵܐ ܕܡܸܢ ܡܲܕ݂ܢܚܵܐ ܐܵܬܹܐ ܠܡܲܥܪܒ݂ܵܐ ܘܐܵܡܲܪ:

ܡܸܬ݂ܪܫܸܡ ܕܡܵܐ ܝܲܩܝܼܪܵܐ ܒܦܲܓ݂ܪܵܐ ܡܲܚܝܵܢܵܐ ܕܡܵܪܲܢ ܝܼܫܘܿܥ ܡܫܝܼܚܵܐ: ܒܫܸܡ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ܀

ܗܵܢܵܘ ܕܹܝܢ: ܐܲܒ݂ܵܐ ܘܲܒ݂ܪܵܐ ܡܼܢ ܡܲܕ݂ܢܚܵܐ ܠܡܲܥܪܒ݂ܵܐ ܠܘܵܬܹܗ. ܘܪܘܼܚܵܐ ܕܩܘܼܕ݂ܫܵܐ: ܡܸܢ ܓܲܪܒܝܵܐ ܠܬܲܝܡܢܵܐ ܠܘܵܬ݂ ܦܵܬ݂ܘܿܪܵܐ. ܘܗܵܟܲܢܵܐ ܪܵܫܹܡ ܠܦܲܓ݂ܪܵܐ ܕܲܒ݂ܦܵܬ݂ܘܿܪܵܐ: ܒܹܗ ܒܲܙܢܵܐ: ܘܒܹܗ ܒܦܸܠܓܵܐ ܕܒ݂ܐܝܼܕܹܗ. ܘܐܵܡܲܪ:

ܡܸܬ݂ܪܫܸܡ ܦܲܓ݂ܪܵܐ ܩܲܕܝܼܫܵܐ ܒܲܕ݂ܡܵܐ ܡܚܲܣܝܵܢܵܐ ܕܡܵܪܲܢ ܝܼܫܘܿܥ ܡܫܝܼܚܵܐ. ܒܫܸܡ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ܀ ܘܥܵܢܹܝܢ ܐܵܡܹܝܢ܀

ܘܠܵܒܹܟ݂ ܠܦܸܠܓܹ̈ܐ ܬܪܲܝܗܘܿܢ ܒܬܲܪ̈ܬܲܝܗܹܝܢ ܐܝܼܕ݂ܵܘܗ̈ܝ: ܘܲܡܚܲܝܸܕ݂ ܠܗܘܿܢ ܒܲܚܕ݂ܵܕܹ̈ܐ ܐܲܝܟ݂ ܗ݁ܘ ܕܠܵܐ ܐܸܬ݂ܩܨܝܼܘ: ܘܢܸܗܘ̈ܝܵܢ ܨܸܒ݂̈ܥܵܬܹܗ ܕܲܠܘܵܬ݂ ܟܪ̈ܵܘܵܬܹܗ ܩܛܝܼܪ̈ܵܢ ܚܕ݂ܵܪ̈ܲܝ ܦܸܠ̈ܓܹ݁ܐ ܐܲܝܟ݂ ܓܝܼܓ݂ܠܵܐ. ܘܐܵܡܲܪ:

ܐܸܬ݂ܦܪܸܫܘ ܘܐܸܬ݂ܩܲܕܲܫܘ ܘܐܸܬ݂ܓܡܲܪܘ ܘܐܫܸܬܲܡܠܝܼܘ ܘܐܸܬ݂ܚܲܝܲܕ݂ܘ ܘܐܸܬ݂ܚܲܠܲܛܘ ܘܐܸܬ݂ܢܲܩܲܦܘ ܘܐܸܬ݂ܚܲܬܲܡܘ: ܐܪ̈ܵܙܹܐ ܗܵܠܹܝܢ ܫܒ݂ܝܼܚܹ̈ܐ ܘܩܲܕܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ: ܚܲܕ݂ ܒܚܲܕ݂. ܒܲܫܡܵܐ ܣܓ݂ܝܼܕ݂ܵܐ ܘܲܡܫܲܒܚܵܐ ܕܲܬ݂ܠܝܼܬ݂ܵܝܘܼܬ݂ܵܐ ܡܫܲܒܲܚܬܵܐ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ. ܕܢܸܗܘܘܿܢ ܠܲܢ ܡܵܪܝ ܠܚܘܼܣܵܝܵܐ ܕܚܲܘܒܹ̈ܐ: ܘܲܠܫܘܼܒ݂ܩܵܢܵܐ ܕܲܚܛܵܗܹ̈ܐ: ܘܲܠܣܲܒ݂ܪܵܐ ܪܲܒܵܐ ܕܲܩܝܵܡܬܵܐ ܕܡܼܢ ܒܹܝܬ݂ ܡܝܼ̈ܬܹܐ: ܘܲܠܚܲܝܹ̈ܐ ܚܲܕ݂ܬܹ̈ܐ ܒܡܲܠܟܘܼܬ݂ܵܐ ܕܲܫܡܲܝܵܐ: ܠܲܢ ܘܲܠܥܹܕ݇ܬܹ݁ܗ ܩܲܕܝܼܫܬܵܐ ܕܲܡܫܝܼܚܵܐ ܡܵܪܲܢ: ܕܲܬ݂ܢܵܢ ܘܕ݂ܲܒ݂ܟ݂ܠ ܐܲܬܲܪ. ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ܀

ܘܥܲܡ ܗܵܫܵܐ ܬܵܪܲܥ ܬܘܼܪܥܬܼܵܐ ܒܲܟ݂ܪܵܬܹܗ: ܒܕ݂ܘܼܟܬ݂ܵܐ ܗ݁ܝ ܕܐܸܨܛܲܒ݂ܥܲܬܸ ܒܲܕ݂ܡܵܐ. ܘܟܸܢ ܣܵܐܹܡ ܠܦܸܠܓܹ̈ܐ ܒܦܵܬ݂ܘܿܪܵܐ ܚܲܕ݂ ܥܲܠ ܚܲܒ݂ܪܹܗ ܨܠܝܼܒ݂ܵܐܝܼܬ݂. ܟܲܕ݂ ܩܨܵܝܹܗ ܕܬܲܚܬܵܝܵܐ ܕܲܠܒ݂ܝܼܟ݂ ܗ݇ܘܵܐ ܒܣܸܡܵܠܵܐ ܚܵܐܲܪ ܠܐܲܦܲܝ̈ ܟܵܣܵܐ. ܘܲܩܨܵܝܹܗ ܕܥܸܠܵܝܵܐ ܕܲܠܒ݂ܝܼܟ݂ ܗ݇ܘܵܐ ܒܝܲܡܝܼܢܵܐ ܚܵܐܲܪ ܠܡܲܥܪܒ݂ܵܐ ܠܐܲܦܲܝ̈ ܟܵܗܢܵܐ. ܐܲܝܟ݂ ܕܬܸܗܘܸܐ ܬܘܼܪܥܬ݂ܵܐ ܕܒܹܗ ܠܐܲܦܲܝ̈ ܟܵܣܵܐ: ܛܘܼܦ̮ܣܵܐ ܕܬ݂ܘܼܪܥܬ݂ܵܐ ܕܕܲܦܢܹܗ ܕܡܵܪܲܢ ܝܲܡܝܼܢܵܝܬܵܐ. ܘܲܡܟܲܦܲܪ ܐܝܼܕ݂ܵܘܗ̈ܝ ܛܵܒ݂ܵܐܝܼܬ݂. ܘܪܵܫܹܡ ܢܲܦ̮ܫܹܗ ܒܹܝܬ݂ ܥܲܝܢܵܘ̈ܗܝ: ܒܲܟ݂ܪܵܬܹܗ ܒܐܵܬ݂ܵܐ ܕܲܨܠܝܼܒ݂ܵܐ. ܘܟܸܢ ܠܗܵܢܘܿܢ ܡܫܲܡܫܵܢܹ̈ܐ ܕܲܚܕ݂ܵܪ̈ܵܘܗܝ: ܘܐܵܡܲܪ: ܡܫܝܼܚܵܐ ܢܩܲܒܸ݁ܠ ܬܸܫܡܸܫܬܵܟ݂. ܡܫܝܼܚܵܐ ܢܙܲܗܸܐ ܦܲܪܨܘܿܦܵܟ݂ ܡܫܝܼܚܵܐ ܢܢܲܛܲܪ ܚܲܝܲܝ̈ܟ. ܡܫܝܼܚܵܐ ܢܪܲܒܸ݁ܐ ܛܲܠܝܘܼܬ݂ܵܟ݂.

ܘܢܸܫܪܸܐ ܠܫܘܿܫܸܦܵܐ ܕܲܟ݂ܪܝܼܟ݂ ܚܕ݂ܵܪ̈ܲܝ ܦܵܬ݂ܘܿܪܵܐ ܘܟ݂ܵܣܵܐ. ܘܐܵܡܲܪ: ܫܘܼܒ݂ܚܵܐ ܠܵܟ݂ ܡܵܪܲܢ ܝܼܫܘܿܥ ܡܫܝܼܚܵܐ: ܕܲܒ݂ܪܲܝܬܵܢܝ ܒܛܲܝܒܘܼܬ݂ܵܟ݂: ܫܘܼܒ݂ܚܵܐ ܠܵܟ݂ ܡܵܪܲܢ ܕܲܩܪܲܝܬܵܢܝ ܒܲܡܪܲܚܡܵܢܘܼܬ݂ܵܟ݂: ܫܘܼܒ݂ܚܵܐ ܠܵܟ݂ ܡܵܪܲܢ ܕܟܲܕ݂ ܠܵܐ ܫܵܘܹܐ ܐܢܵܐ ܣܵܡܬܵܢܝ ܒܛܲܝܒܘܼܬ݂ܵܟ݂ ܡܫܲܡܫܵܢܵܐ ܘܡܸܨܥܵܝܵܐ ܕܡܲܘܗܲܒ݂ܬ݂ܵܟ݂ ܘܲܕ݂ܐܪ̈ܵܙܲܝܟ ܫܒ݂ܝܼܚܹ̈ܐ ܘܩܲܕܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ: ܒܛܲܝܒܘܼ ܕܲܚܢܵܢܵܟ݂ ܐܲܫܘܵܢܝ ܠܚܘܼܣܵܝܵܐ ܕܚܲܘܒܹ̈ܐ: ܘܲܠܫܘܼܒ݂ܩܵܢܵܐ ܕܲܚܛܵܗܹ̈ܐ. ܘܥܲܠ ܐܲܦܲܝ̈ ܟܠܗܘܿܢ ܦܘܼܪ̈ܢܵܣܲܝܟ ܫܦܝܼܥܹ̈ܐ ܕܲܠܘܵܬ݂ ܚܲܠܵܫܘܼܬ݂ܝ: ܢܲܣܸܩ ܠܵܟ݂ ܬܸܫܒܘܿܚܬܵܐ ܘܐܝܼܩܵܪܵܐ ܘܬ݂ܵܘܕܝܼܬ݂ܵܐ ܘܣܸܓ݂ܕ݁ܬ݂ܵܐ ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ.

ܘܟܸܢ: ܫܘܼܒ݂ܚܵܐ ܠܵܟ݂ ܐܲܠܵܗܵܐ ܫܘܼܒ݂ܚܵܐ ܠܵܟ݂ ܒܪܵܐ ܡܬ݂ܘܿܡܵܝܵܐ. ܫܘܼܒ݂ܚܵܐ ܠܵܟ݂ ܪܘܼܚܵܐ ܕܩܘܼܕ݂ܫܵܐ: ܡܩܲܕܸܫ ܟܠ ܠܥܵܠܡܝܼܢ܀ ܘܥܵܢܹܝܢ. ܐܵܡܹܝܢ.

ܘܗܵܝܕܹܝܢ ܣܵܓܹܕ݂ ܩܕ݂ܵܡ ܡܲܕ݂ܒܚܵܐ ܘܩܵܐܹܡ ܘܢܵܫܹܩ ܠܲܡܨܲܥܬܹܗ. ܘܡܲܙܥܸܩ ܐܲܝܟ݂ ܗ݁ܘ ܕܝܵܗܹܒ݂ ܣܒܲܪܬ݂ܵܐ ܘܐܵܡܲܪ:

܀ܩܢܘܢܐ܀

ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܘܚܘܼܒܹ݁ܗ ܕܐܲܠܵܗܵܐ ܐܲܒ݂ܵܐ: ܘܫܲܘܬܵܦܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ: ܬܸܗܘܸܐ ܥܲܡ ܟܠܲܢ. ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ܀

ܘܥܵܢܹܝܢ ܐܵܡܹܝܢ. ܘܪܵܫܹܡ ܥܲܠ ܩܢܘܿܡܹܗ ܟܲܕ݂ ܡܪܝܼܡ ܐܝܼܕ݂ܵܘ̈ܗܝ ܩܲܠܝܼܠ ܠܥܸܠ: ܡܸܢ ܗܵܢܵܐ ܓܲܒܵܐ ܘܡܸܢ ܗܵܢܵܐ ܓܲܒܵܐ ܟܲܕ݂ ܡܸܬ݂̈ܚܲܙܝܵܢ ܨܸܒ݂̈ܥܵܬܹܗ ܩܲܠܝܼܠ. ܡܸܛܠ ܕܪܘܼܫܡܵܐ ܗܵܢܵܐ ܥܲܠ ܥܲܡܵܐ ܡܸܬ݂ܢܣܸܒ݂: ܐܵܦܸܢ ܥܲܠ ܩܢܘܿܡܹܗ ܪܵܫܹܡ ܠܹܗ ܟܵܗܢܵܐ܀

ܘܡܲܟ݂ܪܸܙ ܡܫܲܡܫܵܢܵܐ ܟܵܪܘܿܙܘܼܬ݂ܵܐ: ܟܠܲܢ ܒܕ݂ܚܠܬ݂ܵܐ ܘܒ݂ܐܝܼܩܵܪܵܐ ܢܸܩܪܘܿܒ݂ ܠܐ݇ܪܵܙܵܐ ܕܦܲܓ݂ܪܹܗ ܘܲܕ݂ܡܹܗ ܝܲܩܝܼܪܵܐ ܕܦܵܪܘܿܩܲܢ. ܒܠܸܒܵܐ ܕܲܟ݂ܝܵܐ ܘܲܒ݂ܗܲܝܡܵܢܘܼܬ݂ܵܐ ܫܲܪܝܼܪܬܵܐ: ܢܸܬ݁ܕ݁ܟܲܪ ܚܲܫܹܗ ܘܢܸܬ݂ܒܲܝܲܢ ܒܲܩܝܵܡܬܹܗ. ܡܸܛܠܵܬܲܢ ܓܹܝܪ ܝܼܚܝܼܕ݂ܵܝܹܗ ܕܐܲܠܵܗܵܐ: ܦܲܓ݂ܪܵܐ ܡܵܝܘܿܬ݂ܵܐ: ܘܢܲܦ̮ܫܵܐ ܡܠܝܼܠܬܵܐ ܘܝܲܕܘܼܥܬ݂ܵܢܝܼܬ݂ܵܐ ܘܠܵܐ ܡܵܝܘܿܬ݁ܬܵܐ: ܡܸܢ ܒܢܲܝ̈ܢܵܫܵܐ ܢܣܲܒ݂. ܘܲܒ݂ܢܵܡܘܿܣܵܘ̈ܗܝ ܡܲܚܝܵܢܹ̈ܐ: ܘܲܒ݂ܦܘܼܩܕܵܢܵܘ̈ܗܝ ܩܲܕܝܼܫܹ̈ܐ: ܡܸܢ ܛܵܥܝܘܼܬ݂ܵܐ ܠܝܼܕ݂ܲܥܬܼܵܐ ܕܲܫܪܵܪܵܐ ܩܲܪܒܲܢ. ܘܒ݂ܵܬܲܪ ܟܠܵܗ݁ ܡܕ݂ܒܪܵܢܘܼܬܹܗ ܕܲܚܠܵܦܲܝܢ: ܪܹܫܝܼܬܹܗ ܕܲܟ݂ܝܵܢܲܢ: ܒܲܙܩܝܼܦܵܐ ܐܸܬ݂ܢܲܣܝܼ: ܘܡܸܢ ܒܹܝܬ݂ ܡܝܼ̈ܬܹܐ ܩܵܡ: ܘܠܲܫܡܲܝܵܐ ܐܸܣܬܲܠܲܩ. ܘܐܲܫܠܸܡ ܠܲܢ ܐ݇ܪ̈ܵܙܵܘܗܝ ܩܲܕܝܼܫܹ̈ܐ: ܕܲܒ݂ܗܘܿܢ ܢܸܬ݁ܕ݁ܟܲܪ ܟܠܵܗ݁ ܛܲܝܒܘܼܬܹܗ ܕܲܠܘܵܬܲܢ. ܚܢܲܢ ܗܵܟܹܝܠ ܒܚܘܼܒܵܐ ܫܦܝܼܥܵܐ: ܘܲܒ݂ܨܸܒ݂ܝܵܢܵܐ ܡܲܟܝܼܟ݂ܵܐ ܢܩܲܒܸ݁ܠ ܡܲܘܗܲܒ݂ܬ݂ܵܐ ܕܚܲܝܹ̈ܐ ܕܲܠܥܵܠܲܡ. ܘܒܲܨܠܘܿܬ݂ܵܐ ܕܟ݂ܝܼܬ݂ܵܐ ܘܲܒ݂ܚܲܫܵܐ ܕܦܘܼܪܫܵܢܵܐ: ܢܸܫܬܲܘܬܲܦ ܒܐ݇ܪ̈ܵܙܹܐ ܕܥܹܕ݇ܬܵܐ ܒܣܲܒ݂ܪܵܐ ܕܲܬ݂ܝܵܒ݂ܘܼܬ݂ܵܐ. ܟܲܕ݂ ܡܸܬ݂ܦܢܹܝܢ݇ ܚ݇ܢܲܢ ܡܸܢ ܣܲܟ݂̈ܠܘܵܬܲܢ: ܘܚܵܐܫܝܼܢܲܢ ܥܲܠ ܚܛܵܗܲܝ̈ܢ: ܘܫܵܐܠܝܼܢܲܢ ܪ̈ܲܚܡܹܐ ܘܫܘܼܒ݂ܩܵܢܵܐ ܡܸܢ ܐܲܠܵܗܵܐ ܡܵܪܹܟܠ.

ܘܡܲܪܬܸ݁ܡ ܟܵܗܢܵܐ ܒܠܸܒܹ݁ܗ ܘܐܵܡܲܪ: ܡܒܲܪܲܟ݂ ܐܲܢ݇ܬ݁ ܡܵܪܝܵܐ ܐܲܠܵܗܵܐ ܕܐܲܒ݂ܵܗ̈ܵܬܲܢ: ܘܲܡܪܲܡܪܲܡ ܘܲܡܫܲܒܲܚ ܫܡܵܟ݂ ܠܥܵܠܲܡ: ܡܸܛܠ ܕܠܵܐ ܗ݇ܘܵܐ ܐܲܝܟ݂ ܚܛܵܗܲܝ̈ܢ ܥܒܲܕ݁ܬ݁ ܠܲܢ. ܐܸܠܵܐ ܒܣܘܿܓ݂ܐܵܐ ܕܪ̈ܲܚܡܲܝܟ ܦܲܨܝܼܬܵܢ ܡܸܢ ܫܘܼܠܛܵܢܹܗ ܕܚܸܫܘܿܟ݂ܵܐ: ܘܙܲܡܸܢܬܵܢ ܠܡܲܠܟܘܼܬܹܗ ܕܲܒ݂ܪܵܟ݂ ܚܲܒܝܼܒ݂ܵܐ ܡܵܪܲܢ ܝܼܫܘܿܥ ܡܫܝܼܚܵܐ. ܘܒܹܗ ܫܪܲܝܬ݁ ܘܒܲܛܸܠܬ݁ ܫܘܼܠܛܵܢܹܗ ܕܡܲܘܬܵܐ. ܘܝܲܗ݇ܒ݂ܬ݁ ܠܲܢ ܚܲܝܹ̈ܐ ܕܲܠܥܵܠܲܡ ܕܠܵܐ ܡܸܬ݂ܚܲܒ݁ܠܝܼܢ. ܘܐܵܦ ܗܵܫܵܐ ܕܐܲܫܘܝܼܬܵܢ ܕܲܢܩܘܼܡ ܩܕ݂ܵܡ ܡܲܕ݂ܒܚܵܟ݂ ܕܲܟ݂ܝܵܐ ܘܩܲܕܝܼܫܵܐ: ܘܲܢܩܲܪܸܒ݂ ܠܵܟ݂ ܕܸܒ݂ܚܬ݂ܵܐ ܗܵܕܹܐ ܚܲܝܬܼܵܐ ܘܩܲܕܝܼܫܬܵܐ ܘܲܕ݂ܠܵܐ ܕܡܵܐ. ܐܲܫܘܵܢ ܒܲܡܪܲܚܡܵܢܘܼܬ݂ܵܟ݂ ܕܲܒ݂ܟ݂ܠܵܗ݁ ܕܲܟ݂ܝܘܼܬ݂ܵܐ ܘܩܲܕܝܼܫܘܼܬ݂ܵܐ ܢܩܲܒܠܝܼܗ݁ ܠܡܲܘܗܲܒ݂ܬ݂ܵܟ݂ ܗܵܕܹܐ. ܘܠܵܐ ܬܸܗܘܸܐ ܠܲܢ ܠܕ݂ܝܼܢܵܐ ܘܠܵܐ ܠܲܬ݂ܒܲܥܬ݂ܵܐ: ܐܸܠܵܐ ܠܪ̈ܲܚܡܹܐ ܘܲܠܫܘܼܒ݂ܩܵܢܵܐ ܕܲܚܛܵܗܹ̈ܐ. ܘܠܲܩܝܵܡܬܵܐ ܕܡܸܢ ܒܹܝܬ݂ ܡܝܼܬܹܼ̈ܐ ܘܲܠܚܲܝܹ̈ܐ ܕܲܠܥܵܠܲܡ. ܘܢܸܗܘܸܐ ܟܠܲܢ ܡܫܲܡܠܝܵܢܹ̈ܐ ܕܫܘܼܒ݂ܚܵܟ݂ ܘܢܲܘ̈ܣܹܐ ܕܟܲܝ̈ܵܐ ܘܗܲܝ̈ܟܠܹܐ ܩܲܕܝܼܫܹ̈ܐ ܠܡܲܫܪܝܵܟ݂. ܕܡܵܐ ܕܐܸܬ݂ܢܲܩܲܦܢܲܢ ܠܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܟ݂: ܢܸܨܡܲܚ ܥܲܡ ܟܠܗܘܿܢ ܩܲܕܝܼܫܲܝ̈ܟ ܒܕܸܢܚܹܗ ܪܲܒܵܐ ܘܲܫܒ݂ܝܼܚܵܐ. ܕܠܵܟ݂ ܘܠܹܗ ܘܲܠܪܘܼܚܵܐ ܕܩܘܼܕ݂ܫܵܐ ܫܘܼܒ݂ܚܵܐ: ܘܐܝܼܩܵܪܵܐ ܘܬܲܘܕܝܼܬ݂ܵܐ ܘܣܸܓ݂ܕ݁ܬ݂ܵܐ. ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ.

ܘܥܲܕ݂ ܡܸܬ݂ܐܲܡܪܵܐ: ܩܵܨܹܐ ܟܵܗܢܵܐ ܠܦܲܓ݂ܪܵܐ. ܘܟܸܢ ܨܵܒܲܥ ܓܡܘܼܪܬܵܐ ܡܸܛܠ ܛܠܵܝܹ̈ܐ.܀

ܘܲܒ݂ܥܸܩܒ݂ܵܗ݁ ܕܟ݂ܵܪܘܿܙܘܼܬ݂ܵܐ ܡܲܩܸܦ ܡܫܲܡܫܵܢܵܐ: ܡܲܪܦܹܝܢܲܢ ܣܲܟ݂̈ܠܘܵܬ݂ܵܐ ܠܲܟ݂̈ܢܵܘܵܬܲܢ.