ܣܸܕ݂ܪܵܐ ܡܲܪ̈ܡܝܵܬ݂ܵܐ ܕܐ݇ܪ̈ܵܙܹܐ ܕܟ݂ܠܵܗ݁ ܫܲܢ݇ܬܵܐ
ܕܟ݂ܠܗܘܿܢ ܥܹܐܕܹ̈ܐ ܡܵܪ̈ܵܢܵܝܹܐ ܣܛܲܪ ܡ݂ܢ ܦܲܢܛܹܩܘܼܣܛܹܐ: ܫܲܒܲܚܘ ܠܡܵܪܝܵܐ ܬܸܫܒܘܿܚܬܵܐ ܚܕܲܬܵܐ.
ܕܦܲܢܛܹܩܘܼܣܛܹܐ: ܐܹܪܲܡܸܪܡܵܟ݂ ܡܵܪܝ ܡܲܠܟܵܐ.
ܐܲܩܲܦܬܵܐ ܕܟ݂ܠܗܘܿܢ ܥܹܐܕܹ̈ܐ ܣܛܲܪ ܡ݂ܢ ܓܸܠܝܵܢܵܐ: ܐܵܘܕܸܐ ܠܵܟ݂ ܒܥܹܕܬܵܐ ܪܲܒܬ݂ܵܐ. ܥܘܼܢܵܝܵܐ: ܘܲܒ݂ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟ݂.
ܐܲܩܲܦܬܵܐ ܕܥܹܐܕ݂ܵܐ ܕܓܸܠܝܵܢܵܐ: ܘܲܠܥܹܝܢ ܥܲܡܡܹ̈ܐ ܓܠܵܐ ܙܲܕܝܼܩܘܼܬܹܗ. ܥܘܼܢܵܝܵܐ: ܘܐܸܬܕܟܲܪ ܛܲܝܒܘܼܬܹܗ ܘܗܲܝܡܵܢܘܼܬܹܗ ܠܲܕ݂ܒܹܝܬ݂ ܝܼܣܪܵܝܹܠ.
ܕܚܲܕ݂ܒܫܲܒܹ̈ܐ:
ܡ݂ܢ ܚܲܕ݂ܒܫܲܒܵܐ ܐ ܕܣܘܼܒܵܪܵܐ ܥܲܕ݂ ܠܨܵܘܡܵܐ: ܫܲܒܲܚܘ ܠܡܵܪܝܵܐ ܬܸܫܒܘܿܚܬܵܐ ܚܕܲܬܵܐ.
ܡ݂ܢ ܚܲܕ݂ܒܫܲܒܵܐ ܐ ܕܨܵܘܡܵܐ ܥܲܕ݂ ܠܲܩܝܵܡܬܵܐ: ܐܹܪܲܡܸܪܡܵܟ݂ ܡܵܪܝ ܡܲܠܟܵܐ.
ܐܲܩܲܦܬܵܐ ܕܥܹܐܕ݂ܵܐ ܕܐܘܿܫܲܥܢܹ̈ܐ: ܐܵܘܕܸܐ ܠܵܟ݂ ܒܥܹܕܬܵܐ ܪܲܒܬ݂ܵܐ. ܥܘܼܢܵܝܵܐ: ܘܲܒ݂ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟ݂.
ܐܵܘ: ܘܐܸܢܵܐ ܐܲܝܟ݂ ܙܲܝܬܵܐ ܡܫܲܒܚܵܐ ܒܒܲܝܬܹܐ ܕܐܲܠܵܗܵܐ. ܥܘܼܢܵܝܵܐ: ܣܲܒܪܹܬ݂ ܒܛܲܝܒܘܼܬܹܗ ܕܐܲܠܵܗܵܐ.
ܡ݂ܢ ܚܲܕ݂ܒܫܲܒܵܐ ܚܲܕ݂ܬ݂ܵܐ (ܗ.ܕ. ܒ ܕܲܩܝܵܡܬܵܐ) ܥܲܕ݂ ܠܦܲܢܛܹܩܘܼܣܛܹܐ: ܫܲܒܲܚܘ ܠܡܵܪܝܵܐ ܬܸܫܒܘܿܚܬܵܐ ܚܕܲܬܵܐ.
ܡ݂ܢ ܚܲܕ݂ܒܫܲܒܵܐ ܒ ܕܲܫܠܝܼܚܹ̈ܐ ܥܲܕ݂ ܠܲܫܟ݂ܵܚܬܵܐ: ܐܹܪܲܡܸܪܡܵܟ݂ ܡܵܪܝ ܡܲܠܟܵܐ.
ܡ݂ܢ ܚܲܕ݂ܒܫܲܒܵܐ ܐ ܕܲܫܟ݂ܵܚܬܵܐ ܥܲܕ݂ ܐ ܕܩܘܼܕܵܫܥܹܕܬܵܐ: ܫܲܒܲܚܘ ܠܡܵܪܝܵܐ ܬܸܫܒܘܿܚܬܵܐ ܚܕܲܬܵܐ.
ܡ݂ܢ ܚܲܕ݂ܒܫܲܒܵܐ ܐ ܕܩܘܼܕܵܫܥܹܕܬܵܐ ܥܲܕ݂ ܐ ܕܣܘܼܒܵܪܵܐ: ܫܲܒܲܚܝ ܐܘܿܪܸܫܠܸܡ ܠܡܵܪܝܵܐ.
ܐܲܩܲܦܬܵܐ: ܩܲܕܝܼܫ ܗ݇ܘܼ ܒܹܝܬ݂ ܡܲܫܪܝܹܗ ܕܲܡܪܲܝܡܵܐ. ܥܘܼܢܵܝܵܐ: ܐܲܠܵܗܵܐ ܒܓ݂ܵܘܵܗ݁ ܠܵܐ ܬܙܘܼܥ.
ܕܕ݂ܘܼܟ݂ܪ̈ܵܢܹܐ:
ܕܡܵܪܬܝ ܡܲܪܝܲܡ: ܫܲܒܲܚܘ ܠܡܵܪܝܵܐ ܬܸܫܒܘܿܚܬܵܐ ܚܕܲܬܵܐ. ܐܲܩܲܦܬܵܐ: ܩܲܕܝܼܫܘܼ ܒܹܝܬ݂ ܡܲܫܪܝܹܗ ܕܲܡܪܲܝܡܵܐ. ܥܘܼܢܵܝܵܐ: ܐܲܠܵܗܵܐ ܒܓ݂ܵܘܵܗ݁ ܠܵܐ ܬܙܘܼܥ.
ܕܡܵܪܝ ܝܘܿܚܲܢܵܢ ܡܲܥܡܕ݂ܵܢܵܐ: ܫܡܲܝܵܐ ܡܸܫܬܲܥܹܝܢ ܫܘܼܒ݂ܚܹܗ ܕܐܲܠܵܗܵܐ. ܐܲܩܲܦܬܵܐ: ܡܣܲܟܹܐ ܪܲܫܝܼܥܵܐ ܠܙܲܕܝܼܩܵܐ ܘܒ݂ܵܥܹܐ ܠܡܸܩܛܠܹܗ. ܥܘܼܢܵܝܵܐ: ܘܡܵܪܝܵܐ ܠܵܐ ܢܸܫܒܩܝܼܘܗܝ ܒܐܝܼܕ݂ܵܘ̈ܗܝ.
ܕܡܵܪܝ ܦܲܛܪܘܼܣ ܘܦܵܘܠܘܿܣ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ: ܢܸܦܪܘܼܩ ܡܵܪܝܵܐ ܢܲܦ̮̈ܫܵܬ݂ܵܐ ܕܥܲܒ݂ܕܵܘ̈ܗܝ. ܥܘܼܢܵܝܵܐ: ܘܠܵܐ ܢܸܬ݂ܚܲܝܒ݂ܘܼܢ ܟܠ ܕܲܡܣܲܒܪܝܼܢ ܒܹܗ.
ܕܐܹܘܲܢܓܵܠܸܣ̈ܛܹܐ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ: ܢܸܬ݂ܥܲܫܢܘܼܢ ܒܵܟ݂ ܟܠ ܪ̈ܵܚܡܲܝ ܫܡܵܟ݂. ܥܘܼܢܵܝܵܐ: ܡܛܠ ܕܐܲܢ݇ܬ݁ ܬܒܲܪܸܟ݂ ܠܙܲܕܝܼܩܹ̈ܐ.
ܕܡܵܪܝ ܐܸܣܛܲܦܵܢܘܿܣ: ܫܡܲܝܵܐ ܡܸܫܬܲܥܹܝܢ ܫܘܼܒ݂ܚܹܗ ܕܐܲܠܵܗܵܐ. ܐܲܩܲܦܬܵܐ: ܢܸܚܕܹܐ ܙܲܕܝܼܩܵܐ ܕܚܵܙܹܐ ܦܘܼܪܥܵܢܵܐ. ܥܘܼܢܵܝܵܐ: ܘܢܹܐܡܲܪ ܒܲܪܢܵܫܵܐ ܐܝܼܬ݂ܘܼ ܦܹܐܪܹ̈ܐ ܠܙܲܕܝܼܩܵܐ.
ܕܡܲܠܦܵܢܹ̈ܐ ܝܵܘܢܵܝܹ̈ܐ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ ܘܥܘܼܢܵܝܵܐ: ܒ ܦܸܬ݂ܓ݂ܵܡܹ̈ܐ ܕܚܲܪܬ݂ܵܐ ܕܡܲܪܡܝܼܬ݂ܵܐ.
ܚܲܡܫܵܒܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ: ܨܒܲܝܬ݁ ܡܵܪܝܵܐ ܒܐܲܪܥܵܟ݂. ܐܲܩܲܦܬܵܐ: ܒܪܝܼܟ݂ܘܼ ܡܵܪܝܵܐ ܕܲܫܡܲܥ ܩܵܠܵܐ ܕܒ݂ܵܥܘܼܬ݂ܝ. ܥܘܼܢܵܝܵܐ: ܡܵܪܝܵܐ ܥܵܕ݂ܘ݁ܪܝ ܘܲܡܣܲܝܥܵܢܝ.
ܕܡܲܠܦܵܢܹ̈ܐ ܐ݇ܣܘܼܪ̈ܝܵܝܹܐ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ: ܢܸܚܕܹܐ ܠܸܒܗܘܿܢ ܕܐܲܝܠܹܝܢ ܕܒܵܥܹܝܢ ܠܡܵܪܝܵܐ. ܥܘܼܢܵܝܵܐ: ܒܥܵܘ ܠܡܵܪܝܵܐ ܘܐܸܬ݂ܚܲܝܲܠܘ.
ܕܚܲܕ݂ ܦܲܪܨܘܿܦܵܐ: ܫܡܲܝܵܐ ܡܸܫܬܲܥܹܝܢ ܫܘܼܒ݂ܚܹܗ ܕܐܲܠܵܗܵܐ. ܐܵܘ: ܠܘܵܬ݂ܵܟ݂ ܡܵܪܝܵܐ ܢܲܦ̮ܫܝ ܐܲܪܝܼܡܹܬ݂. ܐܵܘ (ܕܣܵܗܕܵܐ): ܠܐܲܠܵܗܵܐ ܡܣܲܟܝܵܐ ܢܲܦ̮ܫܝ.
ܐܲܩܲܦܬܵܐ: ܙܲܕܝܼܩܵܐ ܐܲܝܟ݂ ܕܸܩܠܵܐ ܢܸܦܪܲܥ. ܥܘܼܢܵܝܵܐ: ܘܐܲܝܟ݂ ܐܲܪ̈ܙܹܐ ܕܠܸܒ݂ܢܵܢ ܢܸܫܘܲܚ.
ܐܲܩܲܦܬܵܐ (ܕܣܵܗܕܵܐ): ܡܣܲܟܹܐ ܪܲܫܝܼܥܵܐ ܠܙܲܕܝܼܩܵܐ ܘܒ݂ܵܥܹܐ ܠܡܸܩܛܠܹܗ. ܥܘܼܢܵܝܵܐ: ܘܡܵܪܝܵܐ ܠܵܐ ܢܸܫܒܩܝܼܘܗܝ ܒܐܝܼܕ݂ܵܘ̈ܗܝ.
ܕܲܥܪܘܼܒ݂ܬܵܐ ܕܥܲܢܝܼܕܹ̈ܐ: ܫܲܬ݂ܐܣܵܘ̈ܗܝ ܒܛܘܼܪܹܗ ܩܲܕܝܼܫܵܐ.
ܐܲܩܲܦܬܵܐ ܕܚܲܡܫܵܒܫܲܒܵܐ ܕܦܸܨܚܵܐ ܘܲܕ݂ܪܲܡܫܵܐ ܕܲܩܝܵܡܬܵܐ: ܐܵܘܕܸܐ ܠܵܟ݂ ܒܥܹܕܬܵܐ ܪܲܒܬ݂ܵܐ. ܥܘܼܢܵܝܵܐ: ܘܲܒ݂ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟ݂.
ܕܲܥܪܘܒ݂ܬܵܐ ܕܡܵܘܕܝܵܢܹ̈ܐ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ: ܐܵܘܕܸܐ ܠܵܟ݂ ܒܥܹܕܬܵܐ ܪܲܒܬ݂ܵܐ. ܥܘܼܢܵܝܵܐ: ܘܲܒ݂ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟ݂.
ܕܡܵܪܝ ܝܘܿܚܲܢܵܢ ܡܲܥܡܕ݂ܵܢܵܐ: ܫܡܲܝܵܐ ܡܸܫܬܲܥܹܝܢ ܫܘܼܒ݂ܚܹܗ ܕܐܲܠܵܗܵܐ. ܐܲܩܲܦܬܵܐ: ܡܣܲܟܹܐ ܪܲܫܝܼܥܵܐ ܠܙܲܕܝܼܩܵܐ ܘܒ݂ܵܥܹܐ ܠܡܸܩܛܠܹܗ. ܥܘܼܢܵܝܵܐ: ܘܡܵܪܝܵܐ ܠܵܐ ܢܸܫܒܩܝܼܘܗܝ ܒܐܝܼܕ݂ܵܘ̈ܗܝ.
ܕܲܫܡܘܿܢܝܼ ܘܕܲܒ݂ܢܹܝ̈ܗ݁: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ: ܐܵܘܕܸܐ ܠܵܟ݂ ܒܥܹܕܬܵܐ ܪܲܒܬ݂ܵܐ. ܥܘܼܢܵܝܵܐ: ܘܲܒ݂ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟ݂.
ܕܲܥܪܘܼܒ݂ܬܵܐ ܕܕܲܗܒ݂ܵܐ ܘܐܵܦ ܥܪܘܼܒ݂ܬܵܐ ܕܫܘܼܠܵܡ ܫܵܒ݂ܘܿܥܵܐ ܕܲܫܠܝܼܚܹ̈ܐ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ: ܢܸܦܪܘܼܩ ܡܵܪܝܵܐ ܢܲܦ̮̈ܫܵܬ݂ܵܐ ܕܥܲܒ݂ܕܵܘ̈ܗܝ. ܥܘܼܢܵܝܵܐ: ܘܠܵܐ ܢܸܬ݂ܚܲܝܒ݂ܘܼܢ ܟܠ ܕܲܡܣܲܒܪܝܼܢ ܒܹܗ.
ܕܡܵܪܝ ܬܐܘܿܡܵܐ: ܠܘܵܬ݂ܵܟ݂ ܡܵܪܝܵܐ ܢܲܦ̮ܫܝ ܐܲܪܝܼܡܹܬ݂. ܐܲܩܲܦܬܵܐ: ܥܲܡܵܐ ܕܠܵܐ ܝܸܕ݂ܥܹܬ݂ ܢܸܦܠܚܘܼܢܵܢܝ. ܥܘܼܢܵܝܵܐ: ܘܡܲܫܡܲܥ ܐܸܕ݂ܢܵܐ ܢܸܫܡܥܘܼܢܵܢܝ.
ܕܡܵܪܝ ܩܘܼܪܝܵܩܘܿܣ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܐܲܩܲܦܬܵܐ: ܐܵܘܕܸܐ ܠܵܟ݂ ܒܥܹܕܬܵܐ ܪܲܒܬ݂ܵܐ. ܥܘܼܢܵܝܵܐ: ܘܲܒ݂ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟ݂.
ܕܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ: ܫܡܲܝܵܐ ܡܸܫܬܲܥܹܝܢ ܫܘܼܒ݂ܚܹܗ ܕܐܲܠܵܗܵܐ. ܐܲܩܲܦܬܵܐ: ܢܸܗܘܹܐ ܐܲܝܟ݂ ܐܝܼܠܵܢܵܐ ܕܲܢܨܝܼܒ݂ ܥܲܠ ܬܲܦܵܐ ܕܡܲܝ̈ܵܐ. ܥܘܼܢܵܝܵܐ: ܕܦܹܐܪ̈ܵܘܗܝ ܝܵܗܹܒ݂ ܘܛܲܪ̈ܦܵܘܗܝ ܠܵܐ ܢܵܬ݂ܪܝܼܢ.
ܡܲܪ̈ܡܝܵܬ݂ܵܐ
ܫܲܒܲܚܘ ܠܡܵܪܝܵܐ ܬܸܫܒ݁ܘܿܚܬܵܐ ܚܕ݂ܲܬܵܐ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ܀ ܫܲܒܲܚܘ ܠܡܵܪܝܵܐ ܘܒܲܪܸܟ݂ܘ ܠܲܫܡܹܗ܀ ܣܲܒܲܪܘ ܡ̣ܢ ܝܘܿܡ ܠܝܘܿܡ ܦܘܼܪܩܵܢܹܗ܀ ܐܸܫܬܲܥܵܘ ܒܥܲܡܡܹ̈ܐ ܐܝܼܩܵܪܹܗ܀ ܘܲܒ݂ܟ݂ܠܗܘܿܢ ܥܲܡܡܹ̈ܐ ܥܒ݂ܵܕ݂ܵܘ̈ܗܝ܀ ܡܸܛܠ ܕܪܲܒ݁ܘܼ ܡܵܪܝܵܐ ܘܲܡܫܲܒܲܚ ܛܵܒ݂܀ ܘܲܕ݂ܚܝܼܠ ܥܲܠ ܟܠܗܘܿܢ ܐܲܠܵܗܹ̈ܐ܀ ܡܸܛܠ ܕܟ݂ܠܗܘܿܢ ܐܲܠܵܗܹ̈ܐ ܕܥܲܡܡܹ̈ܐ ܣܪܝܼܩܝܼܢ ܐܸܢܘܿܢ܀ ܡܵܪܝܵܐ ܫܡܲܝܵܐ ܥ̣ܒܲܕ݂܀ ܙܝܼܘܵܐ ܘܫܘܼܒ݂ܚܵܐ ܩܕ݂ܵܡܵܘܗܝ܀ ܥܘܼܫܢܵܐ ܘܬܸܫܒ݁ܘܿܚܬܵܐ ܒܡܲܩܕ݁ܫܹܗ܀ ܗܲܒ݂ܘ ܠܡܵܪܝܵܐ ܫܲܪ̈ܒ݂ܵܬ݂ܵܐ ܕܥܲܡܡܹ̈ܐ܀ ܗܲܒ݂ܘ ܠܡܵܪܝܵܐ ܬܸܫܒ݁ܘܿܚܬܵܐ ܘܐܝܼܩܵܪܵܐ܀ ܗܲܒ݂ܘ ܠܡܵܪܝܵܐ ܐܝܼܩܵܪܵܐ ܠܲܫܡܹܗ܀ ܫܩܘܿܠܘ ܩܘܼܪ̈ܒܵܢܹܐ ܘܥܘܿܠܘ ܠܕ݂ܵܪ̈ܵܘܗܝ܀ ܣܓ݂ܘܿܕ݂ܘ ܠܡܵܪܝܵܐ ܒܕ݂ܵܪܬܵܐ ܕܩܘܼܕ݂ܫܹܗ܀ ܬܙܘܼܥ ܡ̣ܢ ܩܕ݂ܵܡܵܘܗܝ ܟܠܵܗ̇ ܐܲܪܥܵܐ܀ ܐܸܡܲܪܘ ܒܹܝܬ݂ ܥܲܡܡܹ̈ܐ ܕܡܵܪܝܵܐ ܐܲܡ̣ܠܸܟ݂܀ ܘܐܲܬ݂ܩ̣ܢܵܗ̇ ܠܬܹܒܹܝܠ ܕܠܵܐ ܬܙܘܼܥ܀ ܢܕ݂ܘܼܢ ܠܥܲܡܡܹ̈ܐ ܒܲܬ݂ܪܝܼܨܘܼܬ݂ܵܐ܀ ܢܸܚܕ݁ܘܿܢ ܫܡܲܝܵܐ ܘܲܬ݁ܕ݂ܘܼܨ ܐܲܪܥܵܐ܀ ܢܸܪܘܲܙ ܝܲܡܵܐ ܒܲܡܠܹܐܹܗ܀ ܢܸܬ݂ܥܲܫ̈ܢܵܢ ܚܲܩ̈ܠܵܬ݂ܵܐ ܘܟ݂ܠ ܕܐܝܼܬ݂ ܒܗܹܝܢ܀ ܘܗܵܝܕܹܝܢ ܢܫܲܒ݁ܚܘܼܢ ܟܠܗܘܿܢ ܐܝܼܠܵܢܹ̈ܐ ܕܥܵܒ݂ܵܐ܀ ܩܕ݂ܵܡ ܡܵܪܝܵܐ ܕܐܵܬܹܐ ܠܲܡܕ݂ܵܢܵܗ̇ ܠܐܲܪܥܵܐ܀ ܕܵܐܹ̇ܢ ܬܹܒܹܝܠ ܒܙܲܕ݁ܝܼܩܘܼܬ݂ܵܐ܀ ܘܲܠܥܲܡܡܹ̈ܐ ܒܗܲܝܡܵܢܘܼܬ݂ܵܐ܀
ܐܲܩܸܦ: ܡܵܪܝܵܐ ܐܲܡ̣ܠܸܟܼ ܬܕ݂ܘܼܨ ܐܲܪܥܵܐ܀ ܘܢܸܚ̈ܕ݁ܝܵܢ ܓܵܙܪ̈ܵܬ݂ܵܐ ܣܲܓ݁ܝܼ̈ܐܵܬ݂ܵܐ܀ ܥܢܵܢܹ̈ܐ ܘܥܲܪ̈ܦܸܠܹܐ ܚܕ݂ܵܪ̈ܵܘܗܝ܀ ܒܙܲܕ݁ܝܼܩܘܼܬ݂ܵܐ ܘܲܒ݂ܕ݂ܝܼܢܵܐ ܡܲܬ݂ܩܲܢ ܟܘܼܪܣܝܹܗ܀ ܢܘܼܪܵܐ ܬܹܐܟ݂ܘܿܠ ܩܕ݂ܵܡܵܘܗܝ܀ ܘܬ݂ܵܘܩܸܕ݂ ܠܲܒ݂ܥܸܠܕܒ݂ܵܒ݂ܵܘ̈ܗܝ܀ ܐܲܢ̣ܗܲܪܘ ܒܲܪ̈ܩܵܘܗܝ ܠܬܹܒܹܝܠ܀ ܚܙܵܬ̤ ܘܐܸܬ݁ܕܲܠܚܲܬ̤ ܐܲܪܥܵܐ܀ ܘܛܘܼܪܹ̈ܐ ܐܲܝܟܼ ܫܥܘܿܬ݂ܵܐ ܐܸܬ݂ܦܲܫܲܪܘ܀ ܡ̣ܢ ܩܕ݂ܵܡ ܡܵܪܝܵܐ ܡܵܪܵܐ ܕܟ݂ܠܵܗ̇ ܐܲܪܥܵܐ܀ ܚ̣ܵܘܝܼܘ ܫܡܲܝ̈ܵܐ ܙܲܕ݁ܝܼܩܘܼܬܹܗ܀ ܘܲܚ̣ܙܵܘ ܟܠܗܘܿܢ ܥܲܡܡܹ̈ܐ ܐܝܼܩܵܪܹܗ܀ ܢܸܒ݂ܗ̱ܬ݂ܘܼܢ ܟܠ ܕܥܵܒ݂ܕ݁ܝܼܢ ܦܬܲܟ݂ܪܹ̈ܐ܀ ܘܡܸܫܬܲܒ݂ܗ̱ܪܝܼܢ ܒܲܓ݂ܠܝܼܦܹ̈ܐ܀ ܣܓ݂ܘܿܕ݂ܘ ܠܹܗ ܟܠܗܘܿܢ ܡܲܠܲܐܟ݂ܵܘ̈ܗܝ܀ ܬܸܫܡܲܥ ܘܬܸܚܕܸ݁ܐ ܨܸܗܝܘܿܢ܀ ܘܲܢܕ݂ܘܼ̈ܨܵܢ ܒ̈ܢܵܬ݂ ܝܼܗܘܼܕ݂ܵܐ܀ ܡܸܛܠ ܕܝܼܢܲܝ̈ܟ ܡܵܪܝܵܐ܀ ܡܸܛܠ ܕܐܲܢ݇ܬ݁ܘܼ ܡܵܪܝܵܐ ܡܪܲܝܡܵܐ ܥܲܠ ܟܠܵܗ̇ ܐܲܪܥܵܐ܀ ܘܛܵܒ݂ ܐܸܬ݁ܬ݁ܪܝܼܡܬ݁ ܥܲܠ ܟܠܗܘܿܢ ܐܲܠܵܗܹ̈ܐ܀ ܪ̈ܵܚܡܵܘܗܝ ܕܡܵܪܝܵܐ ܣܵܢܹܝ̇ܢ ܠܒ݂ܝܼܫܬܵܐ܀ ܘܢܵܛܲܪ ܢܲܦ̮̈ܫܵܬ݂ܵܐ ܕܙܲܕ݁ܝܼܩܵܘ̈ܗܝ܀ ܘܡ̣ܢ ܐܝܼܕ݂ܵܐ ܕܪ̈ܲܫܝܼܥܹܐ ܢܦܲܨܸܐ ܐܸܢܘܿܢ܀ ܢܘܼܗܪܵܐ ܕܲܕ݂ܢܲܚ̣ ܠܙܲܕܝܼܩܹ̈ܐ܀ ܘܠܲܬ݂ܪ̈ܝܼܨܲܝ ܠܸܒܵܐ ܚܲܕ݂ܘܼܬ݂ܵܐ܀ ܚܕ݂ܵܘ ܙܲܕܝܼܩܹ̈ܐ ܒܡܵܪܝܵܐ܀ ܘܐܵܘܕܵܘ ܠܕ݂ܘܼܟ݂ܪܵܢܵܐ ܕܩܘܼܕ݂ܫܹܗ܀
ܐܲܩܸܦ: ܫܲܒܲܚܘ ܠܡܵܪܝܵܐ ܬܸܫܒ݁ܘܿܚܬܵܐ ܚܕܲܬܵܐ܀ ܡܸܛܠ ܕܬܸܕ݂ܡܘܼܪܬܵܐ ܥ̣ܒܲܕ݂܀ ܦܪܲܩ̣ܬ݂ܹܗ ܝܲܡܝܼܢܹܗ ܘܲܕ݂ܪܵܥܹܗ ܩܲܕܝܼܫܵܐ܀ ܚ̣ܵܘܝܼ ܡܵܪܝܵܐ ܦܘܼܪܩܵܢܹܗ܀ ܘܲܠܥܹܝܢ ܥܲܡܡܹ̈ܐ ܓܠ̣ܵܐ ܙܲܕܝܼܩܘܼܬܹܗ܀ ܐܸܬ݁ܕ݁ܟܲܪ ܛܲܝܒ݁ܘܼܬܹܗ ܘܗܲܝܡܵܢܘܼܬܹܗ ܠܲܕ݂ܒܹܝܬ݂ ܝܼܣܪܵܝܹܠ܀ ܘܲܚ̣ܙܵܘ ܟܠܗܘܿܢ ܥܸܒ݂ܪܹ̈ܝܗ̇ ܕܐܲܪܥܵܐ ܦܘܼܪܩܵܢܹܗ ܕܐܲܠܵܗܲܢ܀ ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ܀ ܐܸܬ݂ܦܲܨܚ̄ܘ ܘܙܲܡܲܪܘ ܘܫܲܒܲܚܘ܀ ܙܡܲܪܘ ܠܡܵܪܝܵܐ ܒܟܸܢܵܪܹ̈ܐ ܘܲܒ݂ܩܵܠܵܐ ܕܲܙܡܵܪܵܐ܀ ܘܲܒ݂ܩܵܠܵܐ ܕܩܲܪ̈ܢܵܬ݂ܵܐ ܫܲܒܲܚܘ ܩܕ݂ܵܡ ܡܲܠܟܵܐ ܡܵܪܝܵܐ܀ ܢܙܘܼܥ ܝܲܡܵܐ ܒܲܡܠܹܐܹܗ܀ ܬܹܒܹܝܠ ܘܥܵܡܘܿܪܹ̈ܝܗ̇܀ ܢܲܗܪ̈ܵܘܵܬ݂ܵܐ ܢܸܩܫܘܼܢ ܟܲܦܵܐ ܐܲܟ݂ܚ݇ܕ݂ܵܐ܀ ܘܛܘܼܪܹ̈ܐ ܢܫܲܒ݁ܚܘܼܢ ܩܕ݂ܵܡ ܡܵܪܝܵܐ܀ ܕܐܵܬ̣ܹܐ ܠܲܡܕ݂ܵܢܵܗ̇ ܠܐܲܪܥܵܐ܀ ܕܵܐܹ̇ܢ ܬܹܒܹܝܠ ܒܩܘܼܫܬܵܐ܀ ܘܲܠܥܲܡܡܹ̈ܐ ܒܲܬ݂ܪܝܼܨܘܼܬ݂ܵܐ܀ ܫܲܒܲܚ܀ ܥܵܠܲܡ܀ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ.
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܫܡܲܝܵܐ ܡܸܫܬܲܥܹܝܢ ܫܘܼܒ݂ܚܹܗ ܕܐܲܠܵܗܵܐ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܘܲܥܒ݂ܵܕ݂ ܐܝܼܕ݂ܵܘ̈ܗܝ ܡܚܵܘܸܐ ܪܩܝܼܥܵܐ܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ) ܝܵܘܡܵܐ ܠܝܵܘܡܵܐ ܡܲܒܲܥ ܡܹܐܡܪܵܐ܀ ܘܠܸܠܝܵܐ ܠܠܸܠܝܵܐ ܡܚܵܘܸܐ ܡܲܕ݁ܥܵܐ܀ ܠܲܝܬ݁ ܡܹܐܡܪܵܐ ܐܵܦ ܠܵܐ ܡܸܠܹ̈ܐ܀ ܕܠܵܐ ܢܸܫܬ݁ܡܲܥ ܒܩܵܠܗܘܿܢ܀ ܒܟ݂ܠܵܗ̇ ܐܲܪܥܵܐ ܢܸܦܩܲܬ̤ ܣܒܲܪܬ݂ܗܘܿܢ܀ ܘܲܒ݂ܣܵܘ̈ܦܹܝܗ̇ ܕܬܹܒܹܝܠ ܡܸܠܲܝ̈ܗܘܿܢ܀ ܘܥܲܠ ܫܸܡܫܵܐ ܢܩܲܫ̣ ܡܲܫܟ݁ܢܹܗ ܒܗܘܿܢ܀ ܘܗܘ̤ ܐܲܝܟܼ ܚܲܬ݂ܢܵܐ ܕܢܵܦܹ̇ܩ ܡ̣ܢ ܒܹܝܬ݂ ܓܢܘܿܢܵܐ܀ ܢܕ݂ܘܼܨ ܐܲܝܟܼ ܓܲܢ݇ܒܵܪܵܐ ܠܡܸܪܗܲܛ ܐܘܼܪܚܹܗ܀ ܡ̣ܢ ܣܵܘ̈ܦܲܝ ܫܡܲܝܵܐ ܡܲܦܩܹܗ܀ ܘܡܲܣܡ̱ܟܼܹܗ ܥܲܠ ܣܵܘ̈ܦܲܝ ܫܡܲܝܵܐ܀ ܘܠܲܝܬ݁ ܕܛܵܫܹܐ ܡ̣ܢ ܠܲܗܓܹܗ܀ ܢܵܡܘܿܣܹܗ ܕܡܵܪܝܵܐ ܕܠܵܐ ܡܘܼܡ ܘܡܲܦܢܸܐ ܢܲܦ̮ܫܵܐ܀ ܣܵܗܕܘܼܬܹܗ ܕܡܵܪܝܵܐ ܡܗܲܝܡܢܵܐ ܘܲܡܚܲܟ݁ܡܵܐ ܝܲܠܘܼܕܹ̈ܐ܀ ܦܘܼܩܕܵܢܵܘ̈ܗܝ ܕܡܵܪܝܵܐ ܬܪܝܼܨܝܼܢ ܘܲܡܚܲܕܹ݁ܝܢ ܠܸܒܵܐ܀ ܦܘܼܩܕܵܢܹܗ ܕܡܵܪܝܵܐ ܓܒ݂ܸܐ ܘܡܲܢܗܲܪ ܥܲܝܢܹ̈ܐ܀ ܕܸܚܠ̱ܬ݂ܹܗ ܕܡܵܪܝܵܐ ܕܲܟ݂ܝܵܐ ܘܩܲܝܵܡܵܐ ܠܥܵܠܲܡ܀ ܕܝܼܢܵܘ̈ܗܝ ܕܡܵܪܝܵܐ ܒܩܘܼܫܬܵܐ ܘܟܹܐܢܝܼܢ ܒܟ݂ܠ ܡܸܕܸܡ܀ ܘܲܪܓ݂ܝܼܓ݂ܝܼܢ ܡ̣ܢ ܕܲܗܒ݂ܵܐ ܘܡ̣ܢ ܟܹܐܦܹ̈ܐ ܛܵܒ݂̈ܵܬ݂ܵܐ܀ ܘܲܚܠܹܝܢ ܡ̣ܢ ܕܸܒ݂ܫܵܐ ܘܡ̣ܢ ܟܲܟܵܪܝܼܬ݂ܵܐ܀ ܘܐܵܦ ܥܲܒ݂ܕܵܟܼ ܢܸܙܕ݁ܗܲܪ ܒܗܘܿܢ܀ ܐܸܢ ܢܸܛܲܪ ܐܸܢܘܿܢ ܢܸܬ݂ܦܪܲܥ ܣܲܓ݁ܝܼ܀ ܒܫܲܪ̈ܥܵܬ݂ܵܐ ܡܲܢ̣ܘܼ ܡܸܣܬܲܟܲܠ܀ ܘܡ̣ܢ ܛܲܫ̈ܝܵܬ݂ܵܐ ܙܲܟܵܢܝ܀ ܐܵܦ ܡ̣ܢ ܥܵܘܠܵܐ ܚܣܘܿܟܲܝܗܝ ܠܥܲܒ݂ܕܵܟ݂܀ ܕܠܵܐ ܢܸܫܬܲܠܛܘܼܢ ܒܝܼ ܒܝܼܫܹ̈ܐ܀ ܘܐܸܬ݁ܕܲܟܸ݁ܐ ܡ̣ܢ ܚܛܵܗܲܝ̈܀ ܢܸܗ̱ܘ̈ܝܵܢ ܠܨܸܒ݂ܝܵܢܵܟܼ ܡܸܠܵܘ̈ܗܝ ܕܦܘܼܡܝ܀ ܪܸܢܝܹܗ ܕܠܹܒ݁ܝ ܩܕ݂ܵܡܲܝܟ ܡܵܪܝܵܐ ܥܵܕ݂ܘܿܪܝ ܘܦܵܪܘܿܩܝ܀
ܐܲܩܸܦ: ܢܸܥܢܹܝܟܼ ܡܵܪܝܵܐ ܒܝܵܘܡܵܐ ܕܐܘܼܠܨܵܢܵܐ܀ ܘܲܢܥܲܕ݁ܪܵܟܼ ܫܡܹܗ ܕܐܲܠܵܗܹܗ ܕܝܲܥܩܘܿܒ݂܀ ܢܫܲܕܲܪ ܠܵܟܼ ܥܘܼܕ݂ܪܵܢܵܐ ܡ̣ܢ ܡܲܩܕ݁ܫܹܗ܀ ܘܡ̣ܢ ܨܸܗܝܘܿܢ ܢܣܲܝܥܵܟܼ܀ ܢܸܬ݁ܕ݁ܟܲܪ ܠܵܟܼ ܡܵܪܝܵܐ ܟܠܗܘܿܢ ܩܘܼܪ̈ܒܵܢܲܝܟ܀ ܘܝܲܩܕܲܝ̈ܟ ܗ̤ܘ ܢܲܕ݂ܗܸܢ܀ ܢܸܬܸ݁ܠ ܠܵܟܼ ܡܵܪܝܵܐ ܐܲܝܟܼ ܠܸܒܵܟܼ܀ ܘܐܲܝܟܼ ܟܠܵܗ̇ ܬܲܪܥܝܼܬ݂ܵܟܼ ܢܫܲܡܠܸܐ܀ ܘܲܢܫܲܒܲܚ ܒܦܘܼܪܩܵܢܵܟܼ܀ ܘܒܲܫܡܹܗ ܕܐܲܠܵܗܲܢ ܢܸܬ݁ܬ݁ܪܝܼܡ܀ ܢܸܥܒܸܕ݂ ܡܵܪܝܵܐ ܟܠܹܗ ܨܸܒ݂ܝܵܢܵܟܼ܀ ܡܸܟܹ݁ܝܠ ܝܼܕ݂ܝܼܥܵܐ ܗ݇ܝ̣ ܕܲܦ̣ܪܲܩ ܐܲܠܵܗܵܐ ܠܲܡܫܝܼܚܹܗ܀ ܘܲܥ̣ܢܵܝܗܝ ܡ̣ܢ ܫܡܲܝܵܐ ܕܩܘܼܕ݂ܫܹܗ܀ ܒܚܲܝܠܵܐ ܕܦܘܼܪܩܵܢܵܐ ܕܝܲܡܝܼܢܹܗ܀ ܗܵܠܹܝܢ ܒܡܲܪ̈ܟ݁ܒ݂ܵܬ݂ܵܐ ܘܗܵܠܹܝܢ ܒܪ̈ܲܟ݂ܫܵܐ܀ ܘܲܚܢܲܢ ܒܲܫܡܹܗ ܕܡܵܪܝܵܐ ܐܲܠܵܗܲܢ ܢܸܥܫܲܢ܀ ܗܸܢ̣ܘܿܢ ܒܪܲܟ݂ܘ ܘܲܢܦܲܠ̣ܘ܀ ܘܲܚܢܲܢ ܩܵܡ̣ܢ ܘܐܸܬ݁ܛܲܝܲܒ݂ܢ܀ ܡܵܪܝܵܐ ܢܸܦܪܩܲܢ ܘܡܲܠܟܲܢ܀ ܢܸܥܢܹܝܢ ܒܝܵܘܡܵܐ ܕܢܸܩܪܹܝܘܗܝ܀
ܐܲܩܸܦ: ܡܵܪܝܵܐ ܒܚܲܝܠܵܟܼ ܢܸܚܕܸ݁ܐ ܡܲܠܟܵܐ܀ ܘܲܒ݂ܦܘܼܪܩܵܢܵܟܼ ܢܕ݂ܘܼܨ ܪܵܘܪܒ݂ܵܐܝܼܬ݂܀ ܪܸܓ݁ܬ݂ܵܐ ܕܠܸܒܹܗ ܝܲܗ̣݇ܒ݂ܬ݁ ܠܹܗ܀ ܘܛܘܼܝܵܒ݂ܵܐ ܕܣܸܦܘܵܬܹ̈ܗ ܠܵܐ ܟܠܲܝܬܵܝܗܝ܀ ܡܸܛܠ ܕܩܲܕܸܡ̣ܬܵܝܗܝ ܒܘܼܪܟ݁ܬ݂ܵܐ ܛܵܒ݂ܬ݂ܵܐ܀ ܘܣܵܡ̣ܬ݁ ܒܪܹܫܹܗ ܟܠܝܼܠܵܐ ܡܫܲܒ݁ܚܵܐ܀ ܚܲܝܹ̈ܐ ܫܲܐ̣ܠܵܟܼ ܘܝܲܗ̣݇ܒ݂ܬ݁ ܠܹܗ܀ ܢܘܼܓ݂ܪܵܐ ܕܝܵܘ̈ܡܵܬ݂ܵܐ ܠܥܵܠܲܡ ܥܵܠܡܝܼܢ܀ ܝܼܪܸܒ݂ ܫܘܼܒ݂ܚܹܗ ܒܦܘܼܪܩܵܢܵܟܼ܀ ܫܘܼܒ݂ܚܵܐ ܘܙܝܼܘܵܐ ܣܵܡ̣ܬ݁ ܥܠܵܘܗܝ܀ ܡܸܛܠ ܕܲܥ̣ܒܲܕ݁ܬܵܝܗܝ ܒܘܼܪܟ݁ܬ݂ܵܐ ܠܥܵܠܲܡ ܥܵܠܡܝܼܢ܀ ܘܚܲܕ݁ܝܼܬܵܝܗܝ ܒܚܲܕ݂ܘܼܬ݂ܵܐ ܕܦܲܪܨܘܿܦܵܟܼ܀ ܡܸܛܠ ܕܡܲܠܟܵܐ ܡܣܲܒܲܪ ܒܡܵܪܝܵܐ܀ ܒܛܲܝܒ݁ܘܼܬܹܗ ܕܲܡܪܲܝܡܵܐ ܠܵܐ ܢܸܬ݁ܬ݁ܙܝܼܥ܀ ܬܸܫܟܲܚ ܐܝܼܕ݂ܵܟܼ ܠܟ݂ܠܗܘܿܢ ܒܥܸܠܕܒ݂ܵܒܲܝ̈ܟ܀ ܘܝܲܡܝܼܢܵܟܼ ܬܸܫܟܲܚ ܠܣܵܢܐܲܝ̈ܟ܀ ܬܸܥܒܸ݁ܕ݂ ܐܸܢܘܿܢ ܐܲܝܟܼ ܬܲܢܘܼܪܵܐ ܕܢܘܼܪܵܐ ܠܙܲܒ݂ܢܵܐ ܕܪܘܼܓ݂ܙܵܐ܀ ܡܵܪܝܵܐ ܒܪܘܼܓ݂ܙܹܗ ܢܵܘܩܸܕ݂ ܐܸܢܘܿܢ܀ ܘܬܹܐܟ݂ܘܿܠ ܐܸܢܘܿܢ ܢܘܼܪܵܐ܀ ܘܦܹܐܪ̈ܲܝܗܘܿܢ ܡ̣ܢ ܐܲܪܥܵܐ ܬܵܘܒܸ݁ܕ݂܀ ܘܙܲܪܥ̱ܗܘܿܢ ܡ̣ܢ ܒܢܲܝ̈ܢܵܫܵܐ܀ ܡܸܛܠ ܕܲܨ̣ܠܵܘ ܥܠܲܝܟ ܒܝܼܫܬܵܐ܀ ܐܸܬ݂ܚܲܫܲܒ݂ܘ ܬܲܪܥܝܼܬ݂ܵܐ ܘܠܵܐ ܐܸܬ݂ܡܨܝܼܘ ܚܲܝܠܵܐ܀ ܬܣܝܼܡ ܒܗܘܿܢ ܟܘܼܬ݂ܡܵܐ܀ ܘܛܘܼܝܵܒ݂ܵܟܼ ܬܲܬ݂ܩܸܢ ܥܲܠ ܦܲܪ̈ܨܘܿܦܲܝܗܘܿܢ܀ ܐܸܬ݁ܬ݁ܪܝܼܡ ܡܵܪܝܵܐ ܒܥܘܼܫܢܵܟܼ܀ ܢܸܙܡܲܪ ܘܲܢܫܲܒܲܚ ܓܲܢ݇ܒܵܪܘܼܬ݂ܵܟܼ܀
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܫܲܒܲܚܘ ܙܲܕ݁ܝܼܩܹ̈ܐ ܠܡܵܪܝܵܐ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܘܠܲܬ݂ܪ̈ܝܼܨܹܐ ܝܵܐ̇ܝܵܐ ܬܸܫܒ݁ܘܿܚܬܵܐ܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܐܵܘܕܵܘ ܠܹܗ ܒܟܸܢܵܪܵܐ܀ ܘܲܒ݂ܩܝܼܬ݂ܵܪܵܐ ܕܲܥܣܲܪ ܡܸܢܝܼ̈ܢ ܙܲܡܲܪܘ ܠܹܗ܀ ܫܲܒܲܚܘ ܠܹܗ ܬܸܫܒ݁ܘܿܚܬܵܐ ܚܕܲܬܵܐ܀ ܘܐܸܡܲܪܘ ܫܲܦܝܼܪ ܒܩܵܠܵܐ܀ ܡܸܛܠ ܕܲܬ݂ܪܝܼܨ ܗ݇ܘ̣ ܦܸܬ݂ܓ݂ܵܡܹܗ ܕܡܵܪܝܵܐ܀ ܘܟ݂ܠܗܘܿܢ ܥܒ݂ܵܕ݂ܵܘ̈ܗܝ ܒܗܲܝܡܵܢܘܼܬ݂ܵܐ܀ ܪܵܚܹ̇ܡ ܙܲܕ݁ܝܼܩܘܼܬ݂ܵܐ ܘܕ݂ܝܼܢܵܐ܀ ܛܲܝܒ݁ܘܼܬܹܗ ܕܡܵܪܝܵܐ ܡܲܠܝܵܐ ܐܲܪܥܵܐ܀ ܒܡܸܠܬ݂ܹܗ ܕܡܵܪܝܵܐ ܐܸܬ݂ܥ̱ܒܸܕ݂ ܫܡܲܝܵܐ܀ ܘܲܒ݂ܪܘܼܚܵܐ ܕܦܘܼܡܹܗ ܟܠܗܘܿܢ ܚܲܝ̈ܠܵܘܵܬܹܗ܀ ܟܢܲܫ̣ܘ ܐܲܝܟܼ ܕܲܒ݂ܙܸܩܹ̈ܐ ܡܲܝ̈ܵܐ ܕܝܲܡܵܐ܀ ܘܣ̣ܵܡ ܒܐܵܘܨܪܹ̈ܐ ܬܗܘܿܡܹ̈ܐ܀ ܢܸܕ݂ܚܠ̱ܘܼܢ ܡ̣ܢ ܡܵܪܝܵܐ ܟܠܵܗ̇ ܐܲܪܥܵܐ܀ ܘܲܢܙܘܼܥܘܼܢ ܡ̣ܢ ܩܕ݂ܵܡܵܘܗܝ ܟܠܗܘܿܢ ܥܵܡܘܿܪܹ̈ܝܗ̇ ܕܬܹܒܹܝܠ܀ ܡܸܛܠ ܕܗ̤ܘ ܐܸܡܲܪ ܘܲܗ̤ܘܵܘ ܘܗ̤ܘ ܦ̣ܩܲܕ݂ ܘܐܲܩ̣ܝܼܡ܀ ܡܵܪܝܵܐ ܡܒܲܛܸܠ ܡܸܠܟܵܐ ܕܥܲܡܡܹ̈ܐ܀ ܘܲܡܒܲܛܸܠ ܡܵܪܝܵܐ ܡܲܚܫ̈ܒ݂ܵܬ݂ܗܘܿܢ ܕܥܲܡܡܹ̈ܐ܀ ܬܲܪܥܝܼܬ݂ܹܗ ܕܡܵܪܝܵܐ ܠܥܵܠܲܡ ܩܲܝܵܡܵܐ܀ ܘܡܲܚܫܲܒ݂ܬ݂ܵܐ ܕܠܸܒܹ݁ܗ ܠܕ݂ܵܪܕܵܪ̈ܝܼܢ܀ ܛܘܼܒ݂ܵܘܗܝ ܠܥܲܡܵܐ ܕܡܵܪܝܵܐ ܗ݇ܘ̣ ܐܲܠܵܗܹܗ܀ ܥܲܡܵܐ ܕܲܓ݂ܒ݂ܵܐ ܠܹܗ ܠܝܵܪܬ݁ܘܼܬ݂ܵܐ܀ ܡ̣ܢ ܫܡܲܝܵܐ ܐܲܕ݂ܝܼܩ ܡܵܪܝܵܐ܀ ܘܲܚ̣ܙܵܐ ܠܟ݂ܠܗܘܿܢ ܒܢܲܝ̈ܢܵܫܵܐ܀ ܘܡ̣ܢ ܡܵܘܬ݁ܒܹܗ ܚ̣ܙܵܐ ܠܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ܀ ܕܲܓ݂ܒܲܠ̣ ܐܲܟ݂ܚ݇ܕ݂ܵܐ ܠܸܒ݁ܗܘܿܢ܀ ܘܡܸܬ݂ܒܲܝܲܢ ܒܟ݂ܠܗܘܿܢ ܥܒ݂ܵܕܲܝ̈ܗܘܿܢ܀ ܡܲܠܟܵܐ ܠܵܐ ܡܸܬ݂ܦܪܸܩ ܒܣܘܿܓ݂ܐܵܐ ܕܚܲܝܠܵܐ܀ ܘܐܵܦܠܵܐ ܓܲܢ݇ܒܵܪܵܐ ܡܸܬ݂ܦܲܨܸܐ ܒܣܘܿܓ݂ܐܵܐ ܕܚܲܝܠܹܗ܀ ܕܲܓܵܠ ܗ݇ܘ̣ ܦܘܼܪܩܵܢܹܗ ܕܣܘܼܣܝܵܐ܀ ܕܲܒ݂ܣܘܿܓ݂ܐܵܐ ܕܚܲܝܠܹܗ ܠܵܐ ܡܦܲܨܸܐ ܠܪܵܟ݂ܒܹ݁ܗ܀ ܥܲܝܢܵܘ̈ܗܝ ܕܡܵܪܝܵܐ ܥܲܠ ܙܲܕܝܼܩܹ̈ܐ܀ ܕܲܡܣܲܟܹ݁ܝܢ ܠܛܲܝܒ݁ܘܼܬܹܗ܀ ܕܲܡܦܲܨܸܐ ܢܲܦ̮ܫܵܬ݂̈ܗܘܿܢ ܡ̣ܢ ܡܵܘܬܵܐ܀ ܘܢܲܚܸܐ ܐܸܢܘܿܢ ܒܟܲܦܢܵܐ܀ ܢܲܦ̮ܫܲܢ ܣܲܟ݁ܝܲܬ̤ ܠܡܵܪܝܵܐ܀ ܡܸܛܠ ܕܗ̤ܘܝܘ̣ ܡܥܲܕ݁ܪܵܢܲܢ ܘܲܡܣܲܝܥܵܢܲܢ܀ ܘܒܹܗ̤ܘ ܢܸܚܕܸܐ ܠܸܒܲܢ܀ ܕܒܲܫܡܹܗ ܩܲܕܝܼܫܵܐ ܣܲܒܲܪ̄ܢ܀ ܬܸܗܘܸܐ ܛܲܝܒ݁ܘܼܬܼܵܟܼ ܥܠܲܝܢ ܡܵܪܝܵܐ܀ ܐܲܝܟܲܢܵܐ ܕܣܲܟ݁ܝܼܢܲܢ ܠܵܟܼ܀
ܐܲܩܸܦ: ܐܹܒܲܪܸܟܼ ܠܡܵܪܝܵܐ ܒܟ݂ܠܙܒܲܢ܀ ܘܲܒ݂ܟ݂ܠܙܒܲܢ ܬܸܫ̈ܒ݁ܚܵܬܹܗ ܒܦܘܼܡܝ܀ ܒܡܵܪܝܵܐ ܬܸܫܬܲܒ݂ܗܲܪ ܢܲܦ̮ܫܝ܀ ܢܸܫܡ̱ܥܘܼܢ ܡܸܣܟܹܢܹ̈ܐ ܘܢܸܚܕ݁ܘܿܢ܀ ܐܵܘܪܸܒ݂ ܥܲܡܝ ܠܡܵܪܝܵܐ܀ ܘܲܢܪܝܼܡ ܫܡܹܗ ܐܲܟ݂ܚ݇ܕ݂ܵܐ܀ ܒܥܹܝ̇ܬ݂ ܡ̣ܢ ܡܵܪܝܵܐ ܘܲܥ̣ܢܵܢܝ܀ ܘܡ̣ܢ ܟܠܗܘܿܢ ܐܘܼܠܨܵܢܲܝ̈ ܦܲܨܝܲܢ̣ܝ܀ ܚܘܼܪܘ ܠܘܵܬܹܗ ܘܣܲܒܲܪܘ ܒܹܗ܀ ܘܐܲܦܲܝ̈ܟ݁ܘܿ݁ܢ ܠܵܐ ܢܸܚܦܪ̈ܵܢ܀ ܗܵܢܵܐ ܡܸܣܟܹܢܵܐ ܕܲܩ̣ܪܵܝܗܝ ܘܫܲܡ̣ܥܹܗ܀ ܘܡ̣ܢ ܟܠܗܘܿܢ ܐܘܼܠܨܵܢܵܘ̈ܗܝ ܦܲܨ̣ܝܹܗ܀ ܡܲܫܪܝܼܬ݂ܵܐ ܕܡܲܠܲܐܟ݂ܵܘ̈ܗܝ ܕܡܵܪܝܵܐ܀ ܚܕ݂ܝܼܪܵܐ ܠܕ݂ܵܚܠܵܘ̈ܗܝ ܘܲܡܦܲܨܸܐ ܠܗܘܿܢ܀ ܛܥܲܡܘ ܘܲܚܙܵܘ ܕܛܵܒ݂ܘܼ ܡܵܪܝܵܐ܀ ܘܛܘܼܒܲܝܗܘܿܢ ܠܟ݂ܠ ܕܲܬ݂ܟ݂ܝܼܠܝܼܢ ܥܠܵܘܗܝ܀ ܥܲܬ݁ܝܼܪܹ̈ܐ ܐܸܬ݂ܡܲܣܟܲܢܘ ܘܲܟ݂ܦܸܢ̣ܘ܀ ܘܐܲܝܠܹܝܢ ܕܲܠܡܵܪܝܵܐ ܒܵܥܹܝ̇ܢ ܠܵܐ ܬܸܚܣܲܪ ܠܗܘܿܢ ܛܵܒ݂ܬ݂ܵܐ܀ ܬܵܘ ܒܢܲܝ̈ܵܐ ܫܘܼܡܥܘܼܢܝ܀ ܘܐܲܠܸܦܟ݂ܘܿܢ ܕܸܚܠ̱ܬ݂ܹܗ ܕܐܲܠܵܗܵܐ܀ ܐܲܝܢܵܘ ܓܲܒ݂ܪܵܐ ܕܨܵܒܹ̇ܐ ܚܲܝܹ̈ܐ܀ ܘܪܵܚܹ̇ܡ ܝܵܘ̈ܡܵܬ݂ܵܐ ܛܵܒܹ̈ܐ ܠܡܸܚܙܵܐ܀ ܛܲܪ ܠܸܫܵܢܵܟܼ ܡ̣ܢ ܒܝܼܫܬܵܐ܀ ܘܣܸܦ̈ܘܵܬ݂ܵܟܼ ܠܵܐ ܢܡܲܠ̈ܠܵܢ ܢܸܟ݂ܠܵܐ܀ ܥܒܲܪ ܡ̣ܢ ܒܝܼܫܬܵܐ ܘܲܥܒܸܕ݂ ܛܵܒ݂ܬ݂ܵܐ܀ ܒܥܝܼ ܫܠܵܡܵܐ ܘܗܲܪܛ̄ ܒܵܬ݂ܪܹܗ܀ ܥܲܝܢܵܘ̈ܗܝ ܕܡܵܪܝܵܐ ܥܲܠ ܙܲܕܝܼܩܹ̈ܐ܀ ܘܐܸܕ݂ܢܵܘ̈ܗܝ ܠܡܸܫܡܲܥ ܐܸܢܘܿܢ܀ ܐܲܦܵܘ̈ܗܝ ܕܡܵܪܝܵܐ ܥܲܠ ܒܝܼܫܹ̈ܐ܀ ܕܢܸܥܛܸܐ ܡ̣ܢ ܐܲܪܥܵܐ ܕܘܼܟ݂ܪܵܢܗܘܿܢ܀ ܓܥ̣ܵܘ ܙܲܕܝܼܩܹ̈ܐ ܘܡܵܪܝܵܐ ܫ̣ܡܲܥܘ ܐܸܢܘܿܢ ܘܦܲܨ̣ܝܼ ܐܸܢܘܿܢ܀ ܩܲܪܝܼܒ݂ܘܼ ܡܵܪܝܵܐ ܠܲܬ݂ܒ݂ܝܼܪ̈ܲܝ ܠܸܒܵܐ܀ ܘܲܠܡܲܟ݁ܝܼܟܲܝ̈ ܪܘܼܚܵܐ ܦܵܪܹܩ̇܀ ܣܲܓ݁ܝܼ̈ܐܵܢ ܒܝܼ̈ܫܵܬܹܗ ܕܙܲܕ݁ܝܼܩܵܐ܀ ܘܡ̣ܢ ܟܠܗܹܝܢ ܡܦܲܨܸܐ ܠܹܗ ܡܵܪܝܵܐ܀ ܘܢܵܛܲܪ ܠܟ݂ܠܗܘܿܢ ܓܲܪ̈ܡܵܘܗܝ܀ ܕܚܲܕ݂ ܡܸܢܗܘܿܢ ܠܵܐ ܢܸܬ݁ܬ݁ܒܲܪ܀ ܩܵܛ݁ܠܵܐ ܠܪ̈ܲܫܝܼܥܹܐ ܒܝܼܫܬܵܐ܀ ܘܣܵܢܐܵܘ̈ܗܝ ܕܙܲܕ݁ܝܼܩܵܐ ܢܣܘܼܦܘܼܢ܀ ܢܸܦܪܘܿܩ ܡܵܪܝܵܐ ܢܲܦ̮̈ܫܵܬ݂ܵܐ ܕܥܲܒ݂ܕܵܘ̈ܗܝ܀ ܘܠܵܐ ܢܸܬ݂ܚܲܝܒ݂ܘܼܢ ܟܠ ܕܲܡܣܲܒ݁ܪܝܼܢ ܒܹܗ܀
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܨ̣ܒܲܝܬ݁ ܡܵܪܝܵܐ ܒܐܲܪܥܵܟܼ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܘܐܲܦܢ̣ܝܼܬ݁ ܫܒ݂ܝܼܬܹܗ ܕܝܲܥܩܘܿܒ݂܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܫ̣ܒܲܩܬ݁ ܥܵܘ̣ܠܹܗ ܕܥܲܡܵܟܼ܀ ܘܟܲܣ̣ܝܼܬ݁ ܟܠܗܘܿܢ ܚܛܵܗܲܝ̈ܗܘܿܢ܀ ܐܲܥ̣ܒܲܪܬ݁ ܟܠܵܗ̇ ܚܸܡܬܼܵܟ݂܀ ܘܐܲܗ̣ܦܸܟ݂ܬ݁ ܚܸܡܬ݂ܵܐ ܕܪܘܼܓ݂ܙܵܟ݂܀ ܐܲܦܢܵܢ ܐܲܠܵܗܵܐ ܦܵܪܘܿܩܲܢ܀ ܘܒܲܛܸܠ ܪܘܼܓ݂ܙܵܟܼ ܡܸܢܲܢ܀ ܘܠܵܐ ܠܥܵܠܲܡ ܬܸܪܓܲܙ ܥܠܲܝܢ܀ ܘܠܵܐ ܬܸܛܲܪ ܪܘܼܓ݂ܙܵܟܼ ܠܕ݂ܵܪܕܵܪ̈ܝܼܢ܀ ܐܸܠܵܐ ܐܲܢ݇ܬ݁ ܐܲܦܢܵܢ ܘܐܲܚܵܢ ܘܥܲܡܵܟܼ ܢܸܚܕ݁ܘܿܢ ܒܵܟܼ܀ ܚܵܘܵܢ ܡܵܪܝܵܐ ܛܲܝܒ݁ܘܼܬܼܵܟܼ ܘܦܘܼܪܩܵܢܵܟܼ ܗܲܒ݂ܠܲܢ܀ ܕܢܸܫܡܲܥ ܡܵܢܵܐ ܡܡܲܠܸܠ ܡܵܪܝܵܐ ܐܲܠܵܗܲܢ܀ ܕܲܡܡܲܠܸܠ ܫܠܵܡܵܐ ܥܲܠ ܥܲܡܹܗ ܘܥܲܡ ܙܲܕܝܼܩܵܘ̈ܗܝ܀ ܕܠܵܐ ܢܸܗܦܟ݂ܘܿܢ ܠܒܸܣܬܲܪܗܘܿܢ܀ ܩܲܪܝܼܒ݂ ܗ݇ܘܼ ܦܘܼܪܩܵܢܹܗ ܠܕ݂ܵܚܠܵܘ̈ܗܝ܀ ܢܸܫܪܸܐ ܐܝܼܩܵܪܹܗ ܒܐܲܪܥܲܢ܀ ܛܲܝܒ݁ܘܼܬ݂ܵܐ ܘܩܘܼܫܬܵܐ ܐܲܪܥܘܼܢ܀ ܙܲܕܝܼܩܘܼܬ݂ܵܐ ܘܲܫܠܵܡܵܐ ܢܢܲܫܩܘܼܢ܀ ܗܲܝܡܵܢܘܼܬ݂ܵܐ ܬܹܐܥܸܐ ܡ̣ܢ ܐܲܪܥܵܐ܀ ܘܙܲܕܝܼܩܘܼܬ݂ܵܐ ܐܲܕ݂ܝܼܩܲܬ̤ ܡ̣ܢ ܫܡܲܝܵܐ܀ ܘܐܵܦ ܡܵܪܝܵܐ ܢܸܬܸܠ ܛܵܒ݂ܵܬܹ̈ܗ܀ ܘܐܲܪܥܵܐ ܬܸܬܸ݁ܠ ܥܲܠ̈ܠܵܬܼܵܗ̇܀ ܙܲܕ݁ܝܼܩܵܐ ܩܕ݂ܵܡܵܘܗܝ ܢܗܲܠܸܟܼ܀ ܘܲܢܣܝܼܡ ܒܐܲܪܥܵܐ ܗܲܠܟ݂ܵܬܹ̈ܗ܀
ܐܲܩܸܦ: ܨܠܝܼ ܡܵܪܝܵܐ ܐܸܕ݂ܢܵܟܼ ܘܲܥܢܝܼܢܝ܀ ܡܸܛܠ ܕܡܸܣܟܹܢܵܐ ܐ݇ܢܵܐ ܘܒ݂ܵܝܫܵܐ܀ ܢܲܛܲܪ ܠܢܲܦ̮ܫܝ ܡܸܛܠ ܕܛܵܒ݂ ܐܲܢ݇ܬ݁܀ ܦܪܘܿܩ ܠܥܲܒ݂ܕܵܟܼ ܐܲܢ݇ܬ݁ ܐܲܠܵܗܵܐ ܕܲܡܣܲܒܲܪ ܒܵܟܼ܀ ܪܲܚܸܡܥܠܲܝ ܡܵܪܝܵܐ܀ ܡܸܛܠ ܕܲܠܘܵܬ݂ܵܟܼ ܐܸܩܪܸܐ ܒܟ݂ܠܝܘܿܡ܀ ܚܲܕܵܐ ܢܲܦ̮ܫܹܗ ܕܥܲܒ݂ܕܵܟ݂܀ ܡܸܛܠ ܕܲܠܘܵܬ݂ܵܟܼ ܡܵܪܝܵܐ ܐܲܪܝܼܡܹ̇ܬ݂ ܢܲܦ̮ܫܝ܀ ܡܸܛܠ ܕܐܲܢ݇ܬ݁ ܡܵܪܝܵܐ ܛܵܒ݂ ܐܲܢ݇ܬ݁܀ ܘܣܲܓ݁ܝܼܐܵܐ ܗ݇ܝ̣ ܛܲܝܒ݁ܘܼܬ݂ܵܟܼ ܠܟ݂ܠ ܕܩܵܪܹܝ̇ܢ ܠܵܟܼ܀ ܨܘܼܬ݂ ܡܵܪܝܵܐ ܨܠܘܿܬ݂ܝ܀ ܘܲܫܡܲܥ ܒܩܵܠܵܐ ܕܲܓ݂ܥܵܬ݂ܝ܀ ܒܝܵܘܡܵܐ ܕܐܘܼܠܨܵܢܝ ܩܪܹܝ̇ܬ݂ܵܟܼ ܘܲܥ̣ܢܲܝܬܵܢܝ܀ ܠܲܝܬ݁ ܐܲܟ݂ܘܵܬ݂ܵܟܼ ܡܵܪܝܵܐ ܐܲܠܵܗܝ ܘܠܲܝܬ݁ ܐܲܝܟܼ ܥܒ݂ܵܕܲܝ̈ܟ܀ ܟܠܗܘܿܢ ܥܲܡܡܹ̈ܐ ܕܲܥܒܲܕ݁ܬ݁܀ ܢܹܐܬ݂ܘܿܢ ܘܢܸܣܓ݁ܕ݂ܘܼܢ ܠܵܟܼ ܡܵܪܝܵܐ܀ ܘܲܢܫܲܒ݁ܚܘܼܢ ܠܲܫܡܵܟܼ ܡܸܛܠ ܕܪܲܒ݁ ܐܲܢ݇ܬ݁܀ ܥܵܒܹܕ݂ ܐܲܢ݇ܬ݁ ܬܸܕ݂ܡܪ̈ܵܬ݂ܵܐ ܐܲܢ݇ܬ݁ ܐܲܠܵܗܵܐ ܒܲܠܚܘܿܕܲܝܟ܀ ܚܵܘܵܢܝ ܡܵܪܝܵܐ ܐܘܼܪܚܵܟܼ ܘܐܹܗܲܠܸܟܼ ܒܩܘܼܫܬܵܐ܀ ܢܸܚܕܸ݁ܐ ܠܹܒ݁ܝ ܒܐܲܝܠܹܝܢ ܕܕ݂ܵܚ̇ܠܝܼܢ ܠܲܫܡܵܟܼ܀ ܐܵܘܕܸܐ ܠܵܟܼ ܡܵܪܝܵܐ ܐܲܠܵܗܝ ܡ̣ܢ ܟܠܹܗ ܠܹܒ݁ܝ܀ ܘܐܹܫܲܒܲܚ ܫܡܵܟܼ ܠܥܵܠܲܡ܀ ܡܸܛܠ ܕܛܲܝܒ݁ܘܼܬ݂ܵܟܼ ܣܸܓ݂ܝܲܬ̤ ܥܠܲܝ܀ ܘܦܲܨܝܼܬ݁ ܢܲܦ̮ܫܝ ܡ̣ܢ ܫܝܘܿܠ ܬܲܚܬܵܝܬܵܐ܀ ܐܲܠܵܗܵܐ ܥܵܘܵܠܹ̈ܐ ܩܵܡ̣ܘ ܥܠܲܝ܀ ܘܲܟ݂ܢܘܼܫܬܵܐ ܕܥܲܫܝܼܢܹ̈ܐ ܒܥ̣ܵܐܘܼܗ̇ ܠܢܲܦ̮ܫܝ ܘܠܵܐ ܐܸܬ݁ܕܲܟ݂ܪܘܼܟ݂܀ ܘܐܲܢ݇ܬ݁ ܡܵܪܝܵܐ ܐܲܠܵܗܵܐ ܡܪܲܚܡܵܢܵܐ ܘܲܡܪܲܚܦܵܢܵܐ܀ ܢܲܓ݁ܝܼܪ ܪܘܼܚܵܐ ܘܣܲܓ݁ܝܼ ܛܲܝܒ݁ܘܼܬ݂ܵܐ ܘܩܘܼܫܬܵܐ܀ ܐܸܬ݂ܦܲܢ ܥܠܲܝ ܘܪܲܚܸܡ ܥܠܲܝ܀ ܗܲܒ݂ ܚܲܝܠܵܐ ܠܥܲܒ݂ܕܵܟܼ ܘܲܦܪܘܿܩ ܠܒܲܪ ܐܲܡܬ݂ܵܟ݂܀ ܘܲܥܒܸܕ݂ ܥܲܡܝ ܐܵܬ̤ܵܐ ܛܵܒ݂ܬ݂ܵܐ܀ ܕܢܸܚܙܘܿܢ ܣܵܢܐܲܝ̈ ܘܢܸܒ݂ܗ̱ܬ݂ܘܼܢ܀ ܕܐܲܢ݇ܬ݁ ܡܵܪܝܵܐ ܥܲܕܲܪܬܵܢܝ ܘܒܲܝܲܐܬܵܢܝ܀
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܠܘܵܬ݂ܵܟ݂ ܡܵܪܝܵܐ ܢܲܦ̮ܫܝ ܐܲܪܝܼܡܸܬ݂܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܐܲܠܵܗܝ ܒܵܟܼ ܣܲܒ̇ܪܹܬ݂ ܠܵܐ ܐܸܒ݂ܗܲܬ݂܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܠܵܐ ܢܸܫܬܲܒ݂ܗ̱ܪܘܼܢ ܥܠܲܝ ܒܥܸܠܕ̇ܒ݂ܵܒܲܝ̈܀ ܘܐܵܦ ܟܠ ܕܲܡܣܲܒ̇ܪܝܼܢ ܒܵܟܼ ܠܵܐ ܢܸܒ݂ܗ̱ܬ݂ܘܼܢ܀ ܢܸܒ݂ܗ̱ܬ݂ܘܼܢ ܥܲܘܵܠܸ̈ܐ ܒܲܣܪܝܼܩܘܼܬ݂ܗܘܿܢ܀ ܐܘܼܪ̈ܚܵܬ݂ܵܟܼ ܡܵܪܝܵܐ ܚܲܘܵܢܝ܀ ܘܲܫܒ݂ܝܼ̈ܠܲܝܟ ܐܵܘܕܲܥܲܝܢܝ܀ ܕܲܒܲܪܲܝܢܝ ܒܩܘܼܫܬܵܟܼ ܘܐܲܠܸܦܲܝܢܝ܀ ܡܸܛܠ ܕܐܲܢ݇ܬܘܼ ܐܲܠܵܗܝ ܘܦܵܪܘܿܩܝ܀ ܘܠܵܟܼ ܣܲܟ̇ܝܼܬ݂ ܒܟ݂ܠܝܘܿܡ܀ ܐܸܬ݁ܕܲܟ݂ܪ ܡܵܪܝܵܐ ܪ̈ܲܚܡܲܝܟ ܕܡ̣ܢ ܥܵܠܲܡ ܘܛܲܝ̈ܒ݁ܘܵܬ݂ܵܟܼ܀ ܘܣܲܟ݂̈ܠܘܵܬ݂ܵܐ ܕܛܲܠܝܘܼܬ݂ܝ ܠܵܐ ܬܸܬ̇ܕ̇ܟܲܪ ܠܝܼ܀ ܐܸܠܵܐ ܐܲܝܟܼ ܣܘܿܓ݂ܐܵܐ ܕܪ̈ܲܚܡܲܝܟ ܐܸܬ̇ܕܲܟ݂ܪܲܝܢܝ܀ ܡܸܛܠ ܛܲܝܒ̇ܘܼܬ݂ܵܟܼ ܐܲܠܵܗܵܐ܀ ܛܵܒ݂ܘܼ ܘܲܬ݂ܪܝܼܨ ܡܵܪܝܵܐ܀ ܡܸܛܠ ܗܵܢܵܐ ܬܵܪܹܨ ܠܚܲܛܵܝܹ̈ܐ ܒܐܘܼܪܚܵܐ܀ ܘܲܡܕܲܒܲܪ ܠܡܲܟ̇ܝܼܟܹ̈ܐ ܒܕ݂ܝܼܢܵܐ܀ ܘܡܲܠܸܦ ܠܡܸܣܟܹܢܹ̈ܐ ܐܘܼܪܚܹܗ܀ ܟܠܗܹܝܢ ܐܘܼܪ̈ܚܵܬܹܗ ܕܡܵܪܝܵܐ ܛܲܝܒ̇ܘܼܬ݂ܵܐ ܘܩܘܼܫܬܵܐ܀ ܠܐܲܝܠܹܝܢ ܕܢܵܛ݁ܪܝܼܢ ܩܝܵܡܹܗ ܘܣܵܗܕܘܼܬܹܗ܀ ܡܸܛܠ ܫܡܵܟܼ ܡܵܪܝܵܐ ܚܲܣܵܢܝ ܡ̣ܢ ܥܵܘ̣ܠܝ ܕܪܲܒ̇ܘܼ܀ ܡܲܢ̣ܘܼ ܓܲܒ݂ܪܵܐ ܕܕ݂ܵܚܹܠ ܡ݂ܢ ܡܵܪܝܵܐ܀ ܘܢܲܠܦܝܼܘܗܝ ܐܘܼܪܚܵܐ ܕܲܓ݂ܒ݂ܵܐ܀ ܘܢܲܦ̮ܫܹܗ ܬܒ݂ܘܼܬ݂ ܒܛܲܝܒ̇ܘܼܬ݂ܵܐ܀ ܘܙܲܪܥܹܗ ܢܹܐܪܲܬ݂ ܐܲܪܥܵܐ܀ ܬܲܪܥܝܼܬܹܗ ܕܡܵܪܝܵܐ ܥܲܠ ܕܵܚܠܵܘ̈ܗܝ܀ ܘܲܩܝܵܡܹܗ ܐܵܘܕܲܥ ܐܸܢܘܿܢ܀ ܥܲܝ̈ܢܲܝ ܒܟ݂ܠܙܒܲܢ ܠܘܵܬ݂ ܡܵܪܝܵܐ܀ ܡܸܛܠ ܕܗܘ̤ ܡܲܦܸܩ ܡ̣ܢ ܡܨܝܼܕ̇ܬܵܐ ܪܸ̈ܓ݂ܠܲܝ܀ ܐܸܬ݂ܦܲܢ ܥܠܲܝ ܘܪܲܚܸܡܥܠܲܝ܀ ܡܸܛܠ ܕܝܼܚܝܼܕ݂ܵܝܵܐ ܐ݇ܢܵܐ ܘܒ݂ܵܝܫܵܐ܀ ܥܵܩܵܬܹ̈ܗ ܕܠܹܒ̇ܝ ܣܓ݂ܝܼ ܘܡ݂ܢ ܥܵܩܵܬ݂̈ܝ ܐܲܦܸܩܲܝܢܝ܀ ܚܙܝܼ ܫܘܼܥܒܵܕ݂ܝ ܘܥܲܡܠ̱ܝ ܘܲܫܒ݂ܘܿܩ ܠܝܼ ܟܠܵܗ̇ ܚܛܝܼܬ݂ܝ܀ ܘܲܚܙܝܼ ܕܲܣܓ݂ܝܼܘ ܒܥܸܠܕܒ݂ܵܒܲܝ̈܀ ܘܣܸܢܐ̱ܬ݂ܵܐ ܕܥܵܘ̣ܠܵܐ ܣܢܵܐܘܼܢܝ܀ ܛܲܪ ܢܲܦ̮ܫܝ ܘܦܲܨܵܢܝ ܡܸܛܠ ܕܒ݂ܵܟܼ ܣܲܒ̇ܪܹܬ݂܀ ܬܲܡܝܼܡܹ̈ܐ ܘܲܬ݂ܪ̈ܝܼܨܹܐ ܢܩܸܦ̣ܘ ܠܝܼ܀ ܡܸܛܠ ܕܠܵܟܼ ܣܲܟ̇ܝܼܬ݂܀ ܦܪ݂ܲܩ ܐܲܠܵܗܵܐ ܠܝܼܣܪܵܝܹܠ ܡ݂ܢ ܟܠܗܘܿܢ ܐܵܠܘܿܨܵܘ̈ܗܝ.
ܐܲܩܸܦ: ܕܘܼܢ ܠܝܼ ܡܵܪܝܵܐ ܡܸܛܠ ܕܐܸܢܵܐ ܒܬܲܡܝܼܡܘܼܬ݂ܝ ܗܲܠ̇ܟܹܬ݂܀ ܒܡܵܪܝܵܐ ܣܲܒ̇ܪܹܬ݂ ܠܵܐ ܐܹܙܘܼܥ܀ ܒܚܘܿܪܲܝܢܝ ܡܵܪܝܵܐ ܘܢܲܣܵܢܝ܀ ܘܲܒ݂ܩܝܼ ܟܘܿܠ̈ܝܵܬ݂ܝ ܘܠܹܒ̇ܝ܀ ܡܸܛܠ ܕܪ̈ܲܚܡܲܝܟ ܠܘܼܩܒܲܠ ܥܲܝ̈ܢܲܝ܀ ܗܲܠ̇ܟܹܬ݂ ܒܗܲܝܡܵܢܘܼܬ݂ܵܐ܀ ܘܠܵܐ ܝܸܬ݂ܒܹ̇ܬ݂ ܥܲܡ ܒܝܼܫܹ̈ܐ܀ ܘܥܲܡ ܫܵܛܲܝ̈ܵܐ ܠܵܐ ܥܸܠܹ̇ܬ݂܀ ܣ̇ܢܹܝܬ݂ ܟܢܘܼܫܬܵܐ ܕܒ݂ܝܼܫܹ̈ܐ܀ ܘܥܲܡ ܪ̈ܲܫܝܼܥܹܐ ܠܵܐ ܝܸܬ݂ܒܹ̇ܬ݂܀ ܐܲܫ̇ܝܼܓܹܬ݂ ܕܲܟ݂ܝܵܐܝܼܬ݂ ܐܝܼ̈ܕܲܝ܀ ܘܐܸܬ݂ܟܲܪܟܹ̇ܬ݂ ܠܡܲܕ݂ܒ̇ܚܵܟܼ ܡܵܪܝܵܐ܀ ܕܐܲܫܡܲܥ ܩܵܠܹܗ ܕܫܘܼܒ݂ܚܵܟܼ܀ ܘܐܸܫܬܲܥܸܐ ܟܠܗܹܝܢ ܬܸܕ݂ܡܪ̈ܵܬ݂ܵܟܼ܀ ܡܵܪܝܵܐ ܪܸܚܡܹ݁ܬ݂ ܬܸܫܡܸܫܬܹܗ ܕܒܲܝܬܵܟܼ܀ ܘܐܲܬ݂ܪܵܐ ܕܡܲܫܪ̱ܝܹܗ ܕܫܘܼܒ݂ܚܵܟܼ܀ ܠܵܐ ܬܵܘܒܸ̇ܕܲܝܢܝ ܥܲܡ ܚܲܛܵܝܹ̈ܐ܀ ܘܥܲܡ ܓܲܒ݂ܪܹ̈ܐ ܕܲܕ݂ܡܵܐ ܚܲܝܲܝ̈܀ ܕܒ݂ܐܝܼܕ݂ܗܘܿܢ ܢܸܟ݂ܠܵܐ ܘܝܲܡܝܼܢܗܘܿܢ ܡܲܠܝܵܐ ܫܘܼܚܕܵܐ܀ ܐܸܢܵܐ ܕܹܝܢ ܒܬܲܡܝܼܡܘܼܬ݂ܝ ܗܲܠ̇ܟܹܬ݂܀ ܦܪܘܿܩܲܝܢܝ ܘܪܲܚܸܡܥܠܲܝ܀ ܪܸܓ݂ܠ̱ܝ ܩܵܡܲܬ̤ ܒܲܬ݂ܪܝܼܨܘܼܬ݂ܵܐ܀ ܘܲܒ݂ܥܹܕ̇ܬܵܐ ܐܹܒܲܪܸܟܼ ܠܡܵܪܝܵܐ܀
ܐܲܩܸܦ: ܡܵܪܝܵܐ ܢܘܼܗܪ̱ܝ ܘܦܘܼܪܩܵܢܝ ܡ݂ܢ ܡܲܢ ܐܸܕ݂ܚܲܠ܀ ܡܵܪܝܵܐ ܥܘܼܫܢܵܐ ܕܚܲܝܲܝ̈ ܡ݂ܢ ܡܲܢ̣ܘܼ ܙܵܐܲܥ̇ ܐ݇ܢܵܐ܀ ܟܲܕ݂ ܩܪܸܒ݂ܘ ܠܝܼ ܒܝܼܫܹ̈ܐ ܠܡܹܐܟܲܠ ܒܸܣܪ̱ܝ܀ ܒܥܸܠܕ̇ܒ݂ܵܒܲܝ̈ ܘܣܵܢܐܲܝ̈܀ ܐܲܟ݂ܚ݇ܕ݂ܵܐ ܐܸܣܬܲܚܲܦܘ ܘܲܢܦܲܠ݂ܘ܀ ܐܸܢ ܬܸܫܪܸܐ ܥܠܲܝ ܡܲܫܪܝܼܬ݂ܵܐ ܠܵܐ ܕܵܚܹ̇ܠ ܠܹܒ̇ܝ܀ ܘܐܸܢ ܢܩܘܼܡ ܥܠܲܝ ܩܪܵܒ݂ܵܐ ܒܗܵܕܹܐ ܬܟ݂ܝܼܠ ܐ݇ܢܵܐ܀ ܕܲܚܕ݂ܵܐ ܫܸܐ݁ܠܹܬ݂ ܡ݂ܢ ܡܵܪܝܵܐ ܘܠܵܗ̇ ܗܘ̤ ܒܵܥܹ̇ܐ ܐ݇ܢܵܐ܀ ܕܐܸܥܡܲܪ ܒܒܲܝܬܹܗ ܕܡܵܪܝܵܐ ܟܠܗܘܿܢ ܝܲܘ̈ܡܵܬ݂ܵܐ ܕܚܲܝܲܝ̈܀ ܘܐܸܚܙܸܐ ܒܒܲܣܝܼܡܘܼܬܹܗ ܕܡܵܪܝܵܐ ܘܐܸܦܩܘܿܕ݂ ܗܲܝܟ̇ܠܹܗ܀ ܡܸܛܠ ܕܲܢܛܲܫܹܝܢܝ ܒܣܸܬܵܪܹܗ ܒܝܵܘܡܵܐ ܒܝܼܫܵܐ܀ ܘܲܢܛܲܫܹܝܢܝ ܒܛܸܠܵܠܵܐ ܕܡܲܫܟ̇ܢܹܗ ܘܥܲܠ ܫܘܿܥܵܐ ܢܪܝܼܡܲܢܝ܀ ܡ̣ܢ ܗܵܫܵܐ ܢܸܬ̇ܬ̇ܪܝܼܡ ܪܹܫܝ ܥܲܠ ܒܥܸܠܕ̇ܒ݂ܵܒܲܝ̈ ܕܚܲܕ݂ܪܘܼܢܝ܀ ܐܹܕܲܒܲܚ ܒܡܲܫܟ̇ܢܹܗ ܕܸܒ݂ܚܹ̈ܐ ܕܫܘܼܒ݂ܚܵܐ܀ ܐܹܫܲܒܲܚ ܘܐܹܙܲܡܲܪ ܠܡܵܪܝܵܐ܀ ܫܡܲܥ ܡܵܪܝܵܐ ܩܵܠܝ ܡܵܐ ܕܲܩܪܹܝܬ݂ܵܟܼ܀ ܪܲܚܸܡܥܠܲܝ ܘܲܥܢܝܼܢܝ܀ ܠܵܟܼ ܐܵܡܲܪ ܠܹܒܝ ܘܒ݂ܵܥ̈ܝܵܢ ܐܲܦܲܝ̈ ܠܐܲܦܲܝ̈ܟ܀ ܡܵܪܝܵܐ ܠܵܐ ܬܲܗܦܸܟܼ ܐܲܦܲܝ̈ܟ ܡܹܢܝ܀ ܘܠܵܐ ܬܐܲܠܨܝܼܘܗܝ ܒܪܘܼܓ݂ܙܵܐ ܠܥܲܒ݂ܕܵܟܼ܀ ܥܵܕ݂ܘܿܪܝ ܗ̤ܘܲܝܬ̇ ܡܵܪܝܵܐ܀ ܠܵܐ ܬܸܫܕܹ̇ܝܢܝ ܘܠܵܐ ܬܸܫܒ̇ܩܲܢܝ ܐܲܠܵܗܝ ܘܦܵܪܘܿܩܝ܀ ܡܸܛܠ ܕܐܵܒ݂ܝ ܘܐܹܡܝ ܫܲܒ݂ܩܘܼܢܝ ܘܡܵܪܝܵܐ ܚܲܡܠܲܢܝ܀ ܐܲܠܸܦܲܝܢܝ ܡܵܪܝܵܐ ܐܘܼܪܚܵܟܼ܀ ܘܕܲܒܲܪܲܝܢܝ ܒܲܫܒ݂ܝܼܠܲܝ̈ܟ ܬܪ̈ܝܼܨܹܐ܀ ܘܠܵܐ ܬܲܫܠܸܡܲܝܢܝ ܠܲܒ݂ܥܸܠܕ̇ܒ݂ܵܒܲܝ̈܀ ܡܸܛܠ ܕܩܵܡ̣ܘ ܥܠܲܝ ܣܵܗ̈ܕܹ̇ܐ ܕܫܘܼܩܪܵܐ ܘܡܲܠܸܠ̣ܘ ܥܲܘܠܵܐ܀ ܐܸܢܵܐ ܕܹܝܢ ܗܲܝܡ̱ܢܹ̇ܬ݂ ܕܐܸܚܙܸܐ ܒܛܵܒ݂ܵܬܹ̈ܗ ܕܡܵܪܝܵܐ ܒܐܲܪܥܵܐ ܕܚܲܝܹ̈ܐ܀ ܣܲܒܲܪܘ ܒܡܵܪܝܵܐ ܘܢܸܬ݂ܚܲܝܲܠ ܠܸܒ̇ܟ݂ܘܿܢ܀ ܣܲܒܲܪܘ ܒܡܵܪܝܵܐ܀
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܠܐܲܠܵܗܵܐ ܡܣܲܟ݁ܝܵܐ ܢܲܦ̮ܫܝ ܕܡܸܢܹܗ ܗܘ̤ ܦܘܼܪܩܵܢܝ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܘܗܘ̤ܝܘܼ ܐܲܠܵܗܝ ܘܦܵܪܘܿܩܝ܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܘܒܹܝܬ݂ ܓܵܘܣܝ ܪܲܒܵܐ ܕܠܵܐ ܐܹܙܘܼܥ܀ ܥܕܲܡܵܐ ܠܐܸܡܲܬ݂ܝ ܡܸܬ݂ܓܲܪܓ݂ܝܼܢ ܐܢ݇ܬ݁ܘܿܢ ܥܲܠ ܓܲܒ݂ܪܵܐ ܕܬܸܩܛܠܘܼܢ܀ ܐܲܝܟܼ ܐܸܣܬ݂ܵܐ ܕܡܵܛܲܬ̤ ܘܐܲܝܟܼ ܣܝܵܓ݂ܵܐ ܕܲܕ݂ܚܝܼܩ܀ ܐܸܠܵܐ ܐܵܦ ܡ̣ܢ ܐܝܼܩܵܪܹܗ ܐܸܬ݂ܪܲܥܝܼܘ ܠܡܸܕ݂ܚܝܹܗ܀ ܘܲܪܗܸܛ̣ܘ ܒܕܲܓܵܠܘܼܬ݂ܵܐ܀ ܒܦܘܼܡܗܘܿܢ ܡܒܲܪܟ݂ܝܼܢ ܘܲܒ݂ܠܸܒ݁ܗܘܿܢ ܠܵܝ݁ܛܝܼܢ܀ ܠܐܲܠܵܗܵܐ ܣܲܟܵܝ ܢܲܦ̮ܫܝ ܕܡܸܢܹܗ ܗ̤ܘ ܦܘܼܪܩܵܢܝ܀ ܘܗܘ̤ܝܘܼ ܐܲܠܵܗܝ ܘܦܵܪܘܿܩܝ܀ ܘܒܹܝܬ݂ ܓܵܘܣܝ ܕܠܵܐ ܐܹܙܘܼܥ܀ ܒܐܲܠܵܗܵܐ ܗ݇ܘ̣ ܦܘܼܪܩܵܢܝ ܘܐܝܼܩܵܪܝ܀ ܬܘܼܩܦ̄ܝ ܘܥܵܕ݂ܘܿܪܝ ܘܣܲܒ݂ܪ̱ܝ ܐܲܠܵܗܵܐ ܗ݇ܘ̣܀ ܣܲܒܲܪܘ ܒܹܗ ܟܠ ܫܵܥܵܐ ܥܲܡܵܐ܀ ܘܐܲܫܘܿܕ݂ܘ ܩܕ݂ܵܡܵܘܗܝ ܠܸܒ݁ܟ݂ܘܿܢ܀ ܡܸܛܠ ܕܐܲܠܵܗܵܐ ܗ݇ܘ̣ ܣܸܬܵܪܵܐ ܕܝܼܠܲܢ܀ ܘܐܲܝܟܼ ܠܲܗܓܵܐ ܐܸܢܘܿܢ ܟܠܗܘܿܢ ܒܢܲܝ̈ܢܵܫܵܐ ܕܲܓܵܠܹ̈ܐ܀ ܕܲܒ݂ܡܲܣܲܐܬ݂ܵܐ ܡܲܥܠܹܝܢ ܘܲܣܪܝܼܩܝܼܢ ܐܲܟ݂ܚ݇ܕ݂ܵܐ܀ ܠܵܐ ܬܸܬܲܟ݂ܠܘܼܢ ܥܲܠ ܛܠܘܼܡܝܵܐ܀ ܘܲܚܛܘܼܦܝܵܐ ܠܵܐ ܬܸܪܚܡܘܼܢ܀ ܩܸܢܝܵܢܵܐ ܡܵܐ ܕܣܵܓܹܐ ܠܵܐ ܢܸܚܕܸܐ ܒܹܗ ܠܸܒ݁ܟ݂ܘܿܢ܀ ܚܕ݂ܵܐ ܗ݇ܝ̣ ܕܐܸܡܲܪ ܐܲܠܵܗܵܐ܀ ܘܲܕ݁ܬ݂ܲܪܬܹܝܢ ܗܵܠܹܝܢ ܫܸܡ݁ܥܹܬ݂܀ ܡܸܛܠ ܕܥܘܼܫܢܵܐ ܕܐܲܠܵܗܵܐ ܗ݇ܘ̣܀ ܘܠܵܟܼ ܡܵܪܝܵܐ ܛܲܝܒ݁ܘܼܬ݂ܵܐ܀ ܡܸܛܠ ܕܐܲܢ݇ܬ݁ ܦܵܪܲܥ ܐܲܢ݇ܬ݁ ܠܓܲܒ݂ܪܵܐ ܐܲܝܟܼ ܥܒ݂ܵܕ݂ܵܘ̈ܗܝ܀
ܐܲܠܵܗܝ ܐܲܠܵܗܝ ܐܲܢ݇ܬ݁ ܐܹܣܲܟܸ݁ܐ ܠܵܟܼ܀ ܨܲܗܝܵܐ ܗ݇ܝ̣ ܠܵܟܼ ܢܲܦ̮ܫܝ ܘܲܡܣܲܟܸ݁ܐ ܠܵܟܼ ܒܸܣܪ̱ܝ܀ ܐܲܝܟܼ ܐܲܪܥܵܐ ܨܗܝܼܬ݂ܵܐ ܘܲܡܛܲܪܲܦܬܵܐ ܕܒ݂ܵܥ̇ܝܵܐ ܡܲܝ̈ܵܐ܀ ܗܵܟܲܢ ܚ̣ܵܪܬܵܟܼ ܒܩܘܼܫܬܵܐ܀ ܕܐܸܚܙܸܐ ܥܘܼܫܢܵܟܼ ܘܐܝܼܩܵܪܵܟ݂܀ ܡܸܛܠ ܕܛܵܒ݂ܝܼܢ ܪ̈ܲܚܡܲܝܟ ܡ̣ܢ ܚܲܝܹ̈ܐ܀ ܘܣܸܦ̈ܘܵܬ݂ܝ ܢܫܲܒ݁ܚܵܢܵܟܼ܀ ܗܵܟܲܢ ܐܹܒܲܪܟ݂ܵܟܼ ܒܚܲܝܲܝ̈܀ ܘܒܲܫܡܵܟܼ ܐܲܪܝܼܡ ܐܝܼܕܲܝ̈܀ ܐܲܝܟܼ ܫܘܼܡܢܵܐ ܘܐܲܝܟܼ ܬܲܪܒܵܐ ܬܸܕ݂ܗܲܢ ܢܲܦ̮ܫܝ܀ ܘܲܒ݂ܣܸܦ̈ܘܵܬ݂ܵܐ ܕܫܘܼܒ݂ܚܵܐ ܢܫܲܒ݁ܚܵܟܼ ܦܘܼܡܝ܀ ܐܸܬ݁ܕ݁ܟܲܪܬܵܟܼ ܥܲܠ ܬܸܫܘܝܼܬ݂ܝ܀ ܘܲܒ݂ܠܲܝ̈ܠܵܘܵܬ݂ܵܐ ܪܢܹܝ̇ܬ݂ ܒܵܟܼ܀ ܡܸܛܠ ܕܲܗ̤ܘܲܝܬ݁ ܠܝܼ ܡܥܲܕ݁ܪܵܢܵܐ܀ ܘܲܒ݂ܛܸܠܵܠܵܐ ܕܟܸܢܦܲܝ̈ܟ ܐܸܫܬܲܒܲܚ܀ ܢܸܦܩܲܬ̤ ܢܲܦ̮ܫܝ ܒܵܬ݂ܪܵܟܼ ܘܲܥܠܲܝ ܣܸܡܟܲܬ̤ ܝܲܡܝܼܢܵܟܼ܀ ܗܸܢ̣ܘܿܢ ܒܥ̣ܵܘ ܕܢܵܘܒ݁ܕ݂ܘܼܢ ܠܢܲܦ̮ܫܝ܀ ܘܢܸܥܠܘܼܢ ܒܬܲܚ̈ܬܵܝܵܬ݂ܵܗ̇ ܕܐܲܪܥܵܐ܀ ܢܸܫܬܲܠܡܘܼܢ ܠܚܲܪܒܵܐ ܘܡܹܐܟ݂ܘܼܠܬܵܐ ܠܬܲܥܠܹ̈ܐ ܢܸܗܘܘܿܢ܀ ܘܡܲܠܟܵܐ ܢܸܚܕܸܐ ܒܐܲܠܵܗܵܐ܀ ܘܢܸܫܬܲܒ݂ܗܲܪ ܟܠ ܕܝܵܡܹ̇ܐ ܒܹܗ܀ ܡܸܛܠ ܕܢܸܣܬ݁ܟܲܪ ܦܘܼܡܗܘܿܢ ܕܕܲܓܵܠܹ̈ܐ܀
ܫܡܲܥ ܐܲܠܵܗܵܐ ܩܵܠܝ ܟܲܕ݂ ܐܸܬ݂ܟܲܫܲܦ ܠܵܟܼ܀ ܘܡ̣ܢ ܕܸܚܠ̱ܬ݂ܵܐ ܕܲܒ݂ܥܸܠܕܒ݂ܵܒܲܝ̈ ܢܲܛܲܪܲܝܢܝ܀ ܣܲܬܲܪܲܝܢܝ ܡ̣ܢ ܥܵܘܠܹܗ ܕܒ݂ܝܼܫܵܐ܀ ܘܡ̣ܢ ܗܘܼܦܵܟ݂ܵܐ ܕܥܵܒ݂ܕܲܝ̈ ܥܵܘܠܵܐ܀ ܕܲܠܛܲܫ̣ܘ ܠܸܫܵܢܗܘܿܢ ܐܲܝܟܼ ܣܲܝܦܵܐ܀ ܘܡܸܠܲܬ݂ܗܘܿܢ ܐܲܝܟܼ ܓܹܐܪܵܐ܀ ܠܡܸܫܕܵܐ ܒܛܘܼܫܝܵܐ ܒܬܲܡܝܼܡܵܐ܀ ܘܡ̣ܢ ܫܸܠܝܵܐ ܢܸܫܕ݁ܘܿܢ ܒܹܗ ܘܠܵܐ ܢܸܬ݂ܚܙܘܿܢ܀ ܘܐܲܥ̣ܫܸܢܘ ܡܸܠܲܬ݂ܗܘܿܢ ܒܝܼܫܬܵܐ܀ ܘܐܸܬ݂ܚܲܫܲܒ݂ܘ ܠܡܸܛܡܲܪ ܦܲܚܹ̈ܐ܀ ܘܐܸܡܲܪܘ ܕܡܲܢ̣ܘܼ ܚܵܙܹ̇ܐ ܠܲܢ܀ ܐܸܬ݂ܚܲܫܲܒ݂ܘ ܥܵܘܵܠܹ̈ܐ ܘܣܵܦ̣ܘ܀ ܠܡܸܒ݂ܨܵܐ ܥܵܘܠܵܐ ܡ̣ܢ ܓܵܘܹܗ ܕܒܲܪܢܵܫܵܐ܀ ܘܡ̣ܢ ܠܸܒܹ݁ܗ ܥܲܡܝܼܩܵܐ܀ ܢܸܬ݁ܬ݁ܪܝܼܡ ܐܲܠܵܗܵܐ ܘܢܸܫܕܸܐ ܒܗܘܿܢ ܓܹܐܪܵܐ ܡ̣ܢ ܫܸܠܝܵܐ܀ ܘܢܸܬ݂ܟܲܪܗܘܿܢ ܠܸܫܵܢܲܝ̈ܗܘܿܢ܀ ܘܢܸܕ݂ܚܠܘܼܢ ܟܠ ܕܚܵܙܹ̇ܝܢ ܠܗܘܿܢ܀ ܘܢܸܕ݂ܚܠܘܼܢ ܟܠ ܒܢܲܝ̈ܢܵܫܵܐ܀ ܘܲܢܚܵܘܘܿܢ ܥܒ݂ܵܕ݂ܵܘ̈ܗܝ ܕܐܲܠܵܗܵܐ܀ ܘܒܲܥܒ݂ܵܕ݂ ܐܝܼܕ݂ܵܘ̈ܗܝ ܢܚܘܼܪܘܼܢ܀ ܢܸܚܕ݁ܘܿܢ ܙܲܕܝܼܩܹ̈ܐ ܒܡܵܪܝܵܐ ܘܢܸܬ݁ܬܲܟ݂ܠܘܼܢ ܥܠܵܘܗܝ܀ ܘܲܢܫܲܒ݁ܚܘܼܢܵܝܗܝ ܟܠ ܬܪ̈ܝܼܨܲܝ ܠܸܒܵܐ܀
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܫܲܬ݂ܐ̱ܣܵܘ̈ܗܝ ܒܛܘܼܪܹܗ ܩܲܕܝܼܫܵܐ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܪܚܸܡ̣ ܡܵܪܝܵܐ ܠܬܲܪ̈ܥܹܝܗ̇ ܕܨܸܗܝܘܿܢ܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܛܵܒ݂ ܡ̣ܢ ܟܠܗܘܿܢ ܡܲܫܟ݁ܢܵܘ̈ܗܝ ܕܝܲܥܩܘܿܒ݂܀ ܝܲܩܝܼܪ̈ܵܬ݂ܵܐ ܐܸܬ݂ܡܲܠܲܠ ܒܹܟ݂ܝ ܩܪܝܼܬܹܗ ܕܐܲܠܵܗܲܢ܀ ܐܸܬ݁ܕܲܟ݂̄ܪ ܠܪܵܚܵܒ݂ ܘܲܠܒ݂ܵܒܹܠ ܝܵܕ݂ܥܵܬ݂̈ܝ܀ ܗܵܐ ܦܠܸܫܬܵܝܹ̈ܐ ܘܨܘܿܪ ܘܥܲܡܵܐ ܕܟ݂ܘܼܫܵܝܹ̈ܐ܀ ܗܵܢܵܐ ܐܸܬ݂ܝܼܠܸܕ݂ ܬܲܡܵܢ܀ ܘܲܠܨܸܗܝܘܿܢ ܐܸܬ݂ܐ̱ܡܲܪ܀ ܓܲܒ݂ܪܵܐ ܓܲܢ݇ܒܵܪܵܐ ܐܸܬ݂ܝܼܠܸܕ݂ ܒܵܗ̇ ܘܗ̤ܘ ܐܲܬ݂ܩܢ̣ܵܗ̇܀ ܡܵܪܝܵܐ ܢܸܡܢܸܐ ܒܲܟ݂ܬ݂ܵܒ݂ܵܐ ܠܥܲܡܹܗ܀ ܗܵܢܵܐ ܐܸܬ݂ܝܼܠܸܕ݂ ܬܲܡܵܢ܀ ܪܵܘܪ̈ܒ݂ܵܢܹܐ ܕܥܵܡ݁ܪܝܼܢ ܒܹܟ݂ܝ ܢܸܚܕ݁ܘܿܢ܀ ܘܟ݂ܠ ܕܐܸܬ݂ܡܲܟܲܟ݂ܘ ܒܹܟ݂ܝ܀
ܡܵܪܝܵܐ ܐܲܠܵܗܵܐ ܕܦܘܼܪܩܵܢܝ܀ ܒܐܝܼܡܵܡܵܐ ܓܥܹܝ̇ܬ݂ ܘܲܒ݂ܠܸܠܝܵܐ ܩܕ݂ܵܡܲܝܟ܀ ܬܸܥܘܿܠ ܩܕ݂ܵܡܲܝܟ ܨܠܘܿܬ݂ܝ܀ ܘܐܲܪܟܸܢ ܐܸܕ݂ܢܵܟܼ ܠܒ݂ܵܥܘܼܬ݂ܝ܀ ܡܸܛܠ ܕܣܸܒ݂ܥܲܬ̤ ܢܲܦ̮ܫܝ ܒܝܼ̈ܫܵܬ݂ܵܐ܀ ܘܚܲܝܲܝ̈ ܠܲܫܝܘܿܠ ܡܲܛ̣ܝܼܘ܀ ܐܸܬ݂ܚܲܫܒܹ݁ܬ݂ ܥܲܡ ܢܵܚ̈ܬܲܝ ܓܘܼܒܵܐ܀ ܘܲܗܘܹܝ̇ܬ݂ ܐܲܝܟܼ ܓܲܒ݂ܪܵܐ ܕܠܲܝܬ݁ ܠܹܗ ܐܝܼܵܠܵܐ܀ ܒܹܝܬ݂ ܡܝܼܬܹ̈ܐ ܒܲܪ ܚܹܐܪܹ̈ܐ܀ ܐܲܝܟܼ ܩܛܝܼ̈ܠܹܐ ܕܲܫܟ݂ܝܼܒ݂ܝܼܢ ܒܩܲܒ݂ܪܹ̈ܐ܀ ܐܲܝܠܹܝܢ ܕܬ݂ܘܼܒ݂ ܠܵܐ ܐܸܬ݁ܕ݁ܟܲܪܬ݁ ܐܸܢܘܿܢ܀ ܘܗܸܢ̣ܘܿܢ ܡ̣ܢ ܐܝܼܕܲܝ̈ܟ ܐܸܒܲܕ݂ܘ܀ ܐܲܚܸܬ݁ܬܵܢܝ ܠܓ݂ܘܼܒܵܐ ܬܲܚܬܵܝܵܐ܀ ܠܚܸܫܘܿܟ݂ܵܐ ܘܲܠܛܸܠܵܠܲܝ̈ ܡܵܘܬܵܐ܀ ܘܲܥܠܲܝ ܣܡܲܟܼ ܪܘܼܓ݂ܙܵܟ݂܀ ܘܟ݂ܠܗܘܿܢ ܡܲܚܫܘܼܠܲܝ̈ܟ ܐܲܝܬ݁ܝܼܬ݁ ܥܠܲܝ܀ ܐܲܪܚܸܩܬ݁ ܡܹܢܝ ܝܵܕ݂ܥܲܝ̈ ܘܲܥ̣ܒܲܕ݁ܬܵܢܝ ܠܗܘܿܢ ܛܲܡܐܵܐ܀ ܐܸܬ݂ܟ݁ܠܝܼܬ݂ ܕܠܵܐ ܐܸܦܘܿܩ ܘܥܲܝܢܝ ܕܵܒܲܬ̤ ܡ̣ܢ ܡܘܼܟܵܟ݂ܝ܀ ܩܪܹܝ̇ܬ݂ܵܟܼ ܡܵܪܝܵܐ ܒܟ݂ܠܝܘܿܡ܀ ܘܦܸܫ̇ܛܹܬ݂ ܐܝܼܕܲܝ̈ ܠܘܵܬ݂ܵܟ݂܀ ܗܵܐ ܠܡܝܼܬܹ̈ܐ ܥܵܒܹܕ݂ ܐܲܢ݇ܬ݁ ܬܸܕ݂ܡܪ̈ܵܬ݂ܵܐ܀ ܘܓܲܢ݇ܒܵܪܹ̈ܐ ܢܩܘܼܡܘܼܢ ܘܢܵܘܕܘܿܢ ܠܵܟܼ܀ ܘܢܸܫܬܲܥܘܿܢ ܕܲܒ݂ܩܲܒ݂ܪܹ̈ܐ ܛܲܝܒ݁ܘܼܬ݂ܵܟ݂܀ ܘܗܲܝܡܵܢܘܼܬ݂ܵܟܼ ܒܐܲܒ݂ܕܵܢܵܐ܀ ܬܸܬ݂ܝܼܕܲܥ ܒܚܸܫܘܿܟ݂ܵܐ ܬܸܕ݂ܡܘܼܪܬܵܟܼ܀ ܘܙܲܕ݁ܝܼܩܘܼܬ݂ܵܟܼ ܒܐܲܪܥܵܐ ܕܐܸܬ݁ܛܲܥܝܲܬ̤܀ ܘܐܸܢܵܐ ܠܘܵܬ݂ܵܟܼ ܡܵܪܝܵܐ ܓܥܹܝ̇ܬ݂܀ ܘܲܒ݂ܨܲܦܪܵܐ ܨܠܘܿܬ݂ܝ ܬܩܲܕܸܡ ܠܘܵܬ݂ܵܟ݂܀ ܠܵܐ ܬܸܛܥܹܝܗ̇ ܠܢܲܦ̮ܫܝ ܡܵܪܝܵܐ܀ ܘܠܵܐ ܬܲܗܦܸܟܼ ܐܲܦܲܝ̈ܟ ܡܹܢܝ܀ ܒܵܝܫܵܐ ܐ݇ܢܵܐ ܘܠܲܐܝܵܐ ܡ̣ܢ ܛܲܠܝܘܼܬ݂ܝ܀ ܐܸܬ݁ܬ݁ܪܝܼܡܹܬ݂ ܘܐܸܬ݂ܡܲܟ݁ܟܹܬ݂ ܘܬܸܘܪܹܬ݂܀ ܘܲܥܠܲܝ ܥ̣ܒܲܪ ܪܘܼܓ݂ܙܵܟ݂܀ ܘܲܕ݂ܠܘܼܚܝܵܟܼ ܫܲܬ݁ܩܲܢܝ܀ ܐܸܬ݂ܟܲܪܟ݁ܘܼܢܝ ܐܲܝܟܼ ܡܲܝ̈ܵܐ ܟܠܹܗ ܝܵܘܡܵܐ܀ ܘܣܵܡ̣ܘ ܥܠܲܝ ܐܲܟ݂ܚ݇ܕ݂ܵܐ܀ ܐܲܪܚܸܩܬ݁ ܡܹܢܝ ܪ̈ܵܚܡܲܝ ܘܚܲܒ݂ܪ̈ܲܝ܀ ܘܝܵܕ݂ܥܲܝ̈ ܐܲܦܪܸܩܬ݁ ܡܹܢܝ܀
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܐܹܪܲܡܪ̱ܡܵܟܼ ܡܵܪܝ ܡܲܠܟܵܐ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܘܐܹܒܲܪܸܟܼ ܫܡܵܟܼ ܠܥܵܠܲܡ ܥܵܠܡܝܼܢ܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܒܟ݂ܠܝܘܿܡ ܐܹܒܲܪܟ݂ܵܟܼ ܘܐܹܫܲܒܲܚ ܫܡܵܟܼ ܠܥܵܠܲܡ܀ ܪܲܒ݁ܘܼ ܡܵܪܲܢ ܘܲܡܫܲܒܲܚ ܛܵܒ݂܀ ܘܠܲܝܬ݁ ܣܵܟ݂ܵܐ ܠܪܲܒ݁ܘܼܬܹܗ܀ ܕܵܪܵܐ ܠܕ݂ܵܪܵܐ ܢܸܫܬܲܥܘܿܢ ܥܒ݂ܵܕܲܝ̈ܟ܀ ܘܓܲܢ݇ܒܵܪܘܼܬ݂ܵܟܼ ܢܚܵܘܘܿܢ܀ ܘܥܘܼܫܢܵܐ ܕܲܕ݂ܚܝܼܠܘܼܬ݂ܵܟܼ ܢܹܐܡܪܘܼܢ܀ ܘܪܵܘܪ̈ܒ݂ܵܬ݂ܵܟܼ ܢܸܫܬܲܥܘܿܢ܀ ܘܲܕ݂ܚܝܼܠܘܼܬ݂ ܥܘܼܫܢܵܟܼ ܢܹܐܡܪܘܼܢ܀ ܘܪܲܒ݁ܘܼܬ݂ܵܟܼ ܐܸܫܬܲܥܸܐ܀ ܕܘܼܟ݂ܪܵܢܵܐ ܕܛܲܝ̈ܒ݁ܘܵܬ݂ܵܟܼ ܣܲܓ݁ܝܼ̈ܐܵܬ݂ܵܐ܀ ܢܸܒ݂ܥܘܿܢ ܙܲܕܝܼܩܲܝ̈ܟ ܘܢܸܫܟ݁ܚܘܼܢ܀ ܡܪܲܚܡܵܢ ܗ݇ܘ̣ ܡܵܪܝܵܐ ܘܲܡܪܲܚܦܵܢ܀ ܢܲܓ݁ܝܼܪܵܐ ܪܘܼܚܹܗ ܘܣܲܓ݁ܝܼܐܵܐ ܛܲܝܒ݁ܘܼܬܹܗ܀ ܛܵܒ݂ܘܼ ܡܵܪܝܵܐ ܘܪ̈ܲܚܡܵܘܗܝ ܥܲܠ ܟܠܗܘܿܢ ܥܲܒ݂ܕܵܘ̈ܗܝ܀ ܢܵܘܕ݁ܘܿܢ ܠܵܟܼ ܡܵܪܝܵܐ ܥܲܒ݂ܕܲܝ̈ܟ܀ ܘܙܲܕܝܼܩܲܝ̈ܟ ܢܫܲܒ݁ܚܘܼܢܵܟܼ܀ ܘܫܘܼܒ݂ܚܵܐ ܕܡܲܠܟ݁ܘܼܬ݂ܵܟܼ ܢܹܐܡܪܘܼܢ܀ ܘܲܒ݂ܥܘܼܫܢܵܟܼ ܢܡܲܠܠܘܼܢ܀ ܕܲܢܚܵܘܘܿܢ ܠܲܒ݂ܢܲܝ̈ܢܵܫܵܐ ܓܲܢ݇ܒܵܪܘܼܬ݂ܵܟܼ ܘܫܘܼܒ݂ܚܵܐ ܕܡܲܠܟ݁ܘܼܬ݂ܵܟ݂܀ ܡܲܠܟ݁ܘܼܬ݂ܵܟܼ ܡܲܠܟ݁ܘܼܬ݂ ܟܠ ܥܵܠܡܝܼܢ܀ ܘܫܘܼܠܛܵܢܵܟܼ ܒܟ݂ܠ ܕܵܪܕܵܪ̈ܝܼܢ܀ ܡܗܲܝܡܲܢܘܼ ܡܵܪܝܵܐ ܒܡܸܠܵܘ̈ܗܝ܀ ܘܙܲܕܝܼܩ ܒܟ݂ܠܗܘܿܢ ܥܒ݂ܵܕ݂ܵܘ̈ܗܝ܀ ܣܵܡܹ̇ܟܼ ܡܵܪܝܵܐ ܠܟ݂ܠ ܕܢܵܦ̇ܠܝܼܢ܀ ܘܬ݂ܵܪܹܨ ܠܟ݂ܠ ܕܲܟ݂ܦܝܼܦܝܼܢ܀ ܥܲܝܢܹ̈ܐ ܕܟ݂ܠܢܵܫ ܠܘܵܬ݂ܵܟܼ ܬܲܠܝ̈ܵܢ܀ ܕܝܵܗܹ̇ܒ݂ ܐܲܢ݇ܬ݁ ܠܗܘܿܢ ܡܹܐܟ݂ܘܼܠܬܵܐ ܒܙܲܒ݂ܢ̱ܗܘܿܢ܀ ܦܵܬܲܚ̇ ܐܲܢ݇ܬ݁ ܐܝܼܕ݂ܵܟܼ ܘܲܡܣܲܒܲܥ ܐܲܢ݇ܬ݁ ܨܸܒ݂ܝܵܢܵܐ ܕܟ݂ܠ ܕܚܲܝ܀ ܙܲܕܝܼܩ ܗ݇ܘ̣ ܡܵܪܝܵܐ ܒܟ݂ܠܗܹܝܢ ܐܘܼܪ̈ܚܵܬܹܗ܀ ܘܲܡܪܲܚܡܵܢ ܒܟ݂ܠܗܘܿܢ ܥܒ݂ܵܕ݂ܵܘ̈ܗܝ܀ ܩܲܪܝܼܒ݂ ܗ݇ܘܼ ܡܵܪܝܵܐ ܠܐܲܝܠܹܝܢ ܕܩܵܪܹܝ̇ܢ ܠܹܗ ܒܩܘܼܫܬܵܐ܀ ܘܥܵܒܹ݁ܕ݂ ܨܸܒ݂ܝܵܢܵܐ ܕܕ݂ܵܚܠܵܘ̈ܗܝ܀ ܫܵܡܲܥ̇ ܒܵܥܘܼܬ݂ܗܘܿܢ ܘܦܵܪܹܩ̇ ܠܗܘܿܢ܀ ܢܵܛܲܪ ܡܵܪܝܵܐ ܠܟ݂ܠܗܘܿܢ ܕܵܚܠܵܘ̈ܗܝ܀ ܘܲܠܟ݂ܠܗܘܿܢ ܥܵܘܵܠܹ̈ܐ ܡܵܘܒܸܕ݂܀ ܬܸܫܒ݁ܚܵܬܹ̈ܗ ܕܡܵܪܝܵܐ ܐܹܡܲܠܸܠ ܒܦܘܼܡܝ܀ ܘܲܢܒܲܪܟ݂ܘܼܢ ܟܠ ܒܢܲܝ̈ ܒܸܣܪܵܐ܀ ܠܲܫܡܵܐ ܕܩܘܼܕ݂ܫܹܗ ܠܥܵܠܲܡ ܥܵܠܡܝܼܢ܀
ܐܲܩܸܦ: ܫܲܒܲܚܝ ܢܲܦ̮ܫܝ ܠܡܵܪܝܵܐ܀ ܐܹܫܲܒܲܚ ܠܡܵܪܝܵܐ ܒܚܲܝܲܝ̈܀ ܘܐܸܙܡܲܪ ܠܐܲܠܵܗܝ ܥܲܕ݂ ܩܲܝܵܡ ܐ݇ܢܵܐ܀ ܠܵܐ ܬܸܬܲܟ݂ܠܘܼܢ ܥܲܠ ܫܲܠܝܼܛܵܐ ܘܥܲܠ ܒܲܪܢܵܫܵܐ܀ ܕܠܲܝܬ݁ ܒܐܝܼܕܹܗ ܦܘܼܪܩܵܢܵܐ܀ ܕܢܵܦ̇ܩܵܐ ܪܘܼܚܹܗ ܘܗܵܦܹ̇ܟܼ ܠܐܲܪܥܹܗ܀ ܘܲܒ݂ܗ̇ܘ ܝܵܘܡܵܐ ܐܵܒ݂̈ܕܵܢ ܟܠܗܹܝܢ ܡܲܚܫܒ݂ܵܬܹ̈ܗ܀ ܛܘܼܒ݂ܵܘܗܝ ܠܡܲܢ ܕܐܲܠܵܗܹܗ ܕܝܲܥܩܘܿܒ݂ ܒܥܸܕ݂ܪܹܗ܀ ܘܣܲܒ݂ܪܹܗ ܥܲܠ ܡܵܪܝܵܐ ܐܲܠܵܗܵܐ܀ ܕܲܥ̣ܒܲܕ݂ ܫܡܲܝܵܐ ܘܐܲܪܥܵܐ܀ ܘܝܲܡܡܹ̈ܐ ܘܟ݂ܠ ܕܐܝܼܬ݂ ܒܗܘܿܢ܀ ܢܵܛܲܪ ܩܘܼܫܬܵܐ ܠܥܵܠܲܡ܀ ܥ̇ܵܒ݂ܹܕ݂ ܕܝܼܢܵܐ ܠܲܛܠܝܼܡܹ̈ܐ܀ ܝܵܗܹ̇ܒ݂ ܠܲܚܡܵܐ ܠܟ݂ܵܦܢܹ̈ܐ ܡܵܪܝܵܐ܀ ܫܵܪܹܐ ܐܲܣܝܼܪܹ̈ܐ ܡܵܪܝܵܐ܀ ܦܵܬܲܚ̇ ܥܘܝܼܪܹ̈ܐ ܡܵܪܝܵܐ܀ ܬܵܪܹܨ̇ ܟܦܝܼܦܹ̈ܐ ܡܵܪܝܵܐ܀ ܪܵܚܹܡ̇ ܙܲܕܝܼܩܹ̈ܐ ܡܵܪܝܵܐ܀ ܘܲܡܢܲܛܲܪ ܠܡܸܣܟܹܢܹ̈ܐ܀ ܡܬܲܪܣܸܐ ܠܝܲܬ݂ܡܹ̈ܐ ܘܠܲܐܪ̈ܡ̱ܠܵܬ݂ܵܐ܀ ܘܐܘܼܪܚܵܐ ܕܥܵܘܵܠܹ̈ܐ ܡܛܲܒܲܥ܀ ܐܲܡ̣ܠܸܟܼ ܡܵܪܝܵܐ ܠܥܵܠܲܡ܀ ܘܐܲܠܵܗܹܟ݂ܝ ܨܸܗܝܘܿܢ ܠܕ݂ܵܪܕܵܪ̈ܝܼܢ܀
ܐܲܩܸܦ: ܛܵܒ݂ ܠܡܸܙܡܲܪ ܠܐܲܠܵܗܲܢ ܘܒܲܣܝܼܡ܀ ܘܠܹܗ ܗ̤ܘ ܝܵܐ̇ܝܵܐ ܬܸܫܒ݁ܘܿܚܬܵܐ܀ ܒܵܢܹ̇ܐ ܠܐܘܿܪܸܫܠܸܡ ܡܵܪܝܵܐ܀ ܘܠܲܡܒܲܕ݁ܪܹ̈ܐ ܕܝܼܣܪܵܝܹܠ ܡܟܲܢܸܫ܀ ܡܲܐܣܸܐ ܠܲܬ݂ܒ݂ܝܼܪ̈ܲܝ ܠܸܒܵܐ ܘܥܵܨܹ̇ܒ݂ ܟܹܐܒܲܝ̈ܗܘܿܢ܀ ܡ̣ܢܵܐ ܡܸܢܝܵܢܵܐ ܠܟ݂ܵܘܟ݁ܒܹ̈ܐ܀ ܘܲܠܟ݂ܠܗܘܿܢ ܩ̣ܪܵܐ ܫܡܵܗܹ̈ܐ܀ ܪܲܒ݁ܘܼ ܡܵܪܲܢ ܘܥܲܫܝܼܢ ܚܲܝܠܹܗ܀ ܘܠܲܝܬ݁ ܣܵܟ݂ܵܐ ܠܣܘܼܟܵܠܹܗ܀ ܡܪܝܼܡ ܡܵܪܝܵܐ ܠܡܸܣܟܹܢܹ̈ܐ܀ ܘܲܡܡܲܟܸ݁ܟܼ ܠܥܵܘܵܠܹ̈ܐ ܥܕܲܡܵܐ ܠܐܲܪܥܵܐ܀ ܫܲܒܲܚܘ ܠܡܵܪܝܵܐ ܒܫܘܼܒ݂ܚܵܐ܀ ܙܡܲܪܘ ܠܡܵܪܝܵܐ ܒܟܸܢܵܪܹ̈ܐ܀ ܕܲܡܟܲܣܸܐ ܫܡܲܝܵܐ ܒܲܥܢܵܢܹ̈ܐ܀ ܘܝܵܗܹ̇ܒ݂ ܡܸܛܪܵܐ ܥܲܠ ܐܲܪܥܵܐ܀ ܡܵܘܥܸܐ ܥܡܝܼܪܵܐ ܥܲܠ ܛܘܼܪܹ̈ܐ܀ ܝܵܗܹ̇ܒ݂ ܠܲܒ݂ܥܝܼܪܵܐ ܡܹܐܟ݂ܘܼܠܬܵܐ܀ ܘܠܲܒ݂ܢܲܝ̈ ܢܲܥܒ݂ܵܐ ܕܩܵܪܹܝ̇ܢ܀ ܠܵܐ ܨܵܒܹܐ ܡܵܪܝܵܐ ܒܚܲܝܠܹܗ ܕܣܘܼܣܝܵܐ܀ ܐܵܦܠܵܐ ܒܫܵܩܵܘ̈ܗܝ ܕܓܲܢ݇ܒܵܪܵܐ ܨܵܒܹܐ܀ ܐܸܠܵܐ ܨܵܒܹܐ ܡܵܪܝܵܐ ܒܕ݂ܵܚܠܵܘ̈ܗܝ܀ ܘܒܲܐܝܠܹܝܢ ܕܲܡܣܲܟܹܝܢ ܠܛܲܝܒ݁ܘܼܬܹܗ܀
܀ܡܲܪܡܝܼܬ݂ܵܐ ܕܐ݇ܪ̈ܵܙܹܐ܀
ܫܲܒܲܚܝ ܐܘܿܪܸܫܠܸܡ ܠܡܵܪܝܵܐ܀ ܗܲܠܸܠܘܼܝܲܗ. ܗܲܠܸܠܘܼܝܲܗ. ܗܲܠܸܠܘܼܝܲܗ܀
ܫܲܒܲܚܝ ܠܐܲܠܵܗܹܟ݂ܝ ܨܸܗܝܘܿܢ܀ ܗܲܠܸܠܘܼܝܲܗ. (ܘܗܵܟܲܢ ܥܲܡ ܟܠ ܦܸܬ݂ܓ݂ܵܡܵܐ ܐܵܡܪܝܼܢ ܗܲܠܸܠܘܼܝܲܗ)
ܡܸܛܠ ܕܐܲܥܫܸܢ ܡܘܼܟ݂ܠܹ̈ܐ ܕܬܲܪ̈ܥܲܝܟ̇ܝ܀ ܘܒܲܪܸܟ݂ ܠܲܒ݂ܢܲܝ̈ܟ ܒܓ݂ܵܘܹܟ݂ܝ܀ ܘܣܵܡ̣ ܬܚܘܼܡܲܝ̈ܟܝ ܒܲܫܠܵܡܵܐ܀ ܘܲܒ݂ܫܘܼܡܢܵܐ ܕܚܸܛܹ̈ܐ ܣܲܒ̇ܥܹܟ݂ܝ܀ ܡܫܲܕܲܪ ܡܸܠܬܹܗ ܥܲܠ ܐܲܪܥܵܐ܀ ܘܒܲܥܓܲܠ ܪܵܗܹ̇ܛ ܦܸܬ݂ܓ݂ܵܡܹܗ܀ ܝܵܗܹ̇ܒ݂ ܬܲܠܓܵܐ ܐܲܝܟܼ ܥܲܡܪܵܐ܀ ܘܥܲܪܦܸܠܵܐ ܐܲܝܟܼ ܩܸܛܡܵܐ ܡܒܲܕܲܪ܀ ܪܵܡܹ̇ܐ ܓܠܝܼܕ݂ܵܐ ܐܲܝܟ݂ ܦܸܬܹ̈ܐ܀ ܘܲܩܕ݂ܵܡ ܥܲܪܝܹܗ ܡܲܢ̣ܘܼ ܡܸܫܟܲܚ ܠܲܡܩܵܡ܀ ܡܫܲܕܲܪ ܡܸܠܬ݂ܹܗ ܘܲܡܦܲܫܲܪ ܠܗܘܿܢ܀ ܡܲܫܸܒ݂ ܪ̈ܘܼܚܹܐ ܘܡܲܪ̈ܕ̇ܝܵܢ ܡܲܝ̈ܵܐ܀ ܡܚܵܘܸܐ ܡܸܠܬ݂ܹܗ ܒܝܲܥܩܘܿܒ݂܀ ܘܢܵܡܘܿܣܵܘ̈ܗܝ ܘܦܘܼܩܕܵܢܵܘ̈ܗܝ ܒܝܼܣܪܵܝܹܠ܀ ܠܵܐ ܥ̣ܒܲܕ݂ ܗܵܟܲܢܵܐ ܠܟ݂ܠܗܘܿܢ ܥܲܡܡܹ̈ܐ܀ ܘܕ݂ܝܼܢܵܘ̈ܗܝ ܠܵܐ ܚܵܘܝܼ ܐܸܢܘܿܢ܀
ܐܲܩܸܦ: ܫܲܒܲܚܘ ܠܡܵܪܝܵܐ ܡ݂ܢ ܫܡܲܝܵܐ܀ ܫܲܒ̇ܚܘܼܗܝ ܒܲܡܪ̈ܵܘܡܹܐ܀ ܫܲܒ̇ܚܘܼܗܝ ܟܠܗܘܿܢ ܡܲܠܲܐܟ݂ܵܘ̈ܗܝ܀ ܫܲܒ̇ܚܘܼܗܝ ܟܠܗܘܿܢ ܚܲܝ̈ܠܵܘܵܬܹܗ܀ ܫܲܒ̇ܚܘܼܗܝ ܫܸܡܫܵܐ ܘܣܲܗܪܵܐ܀ ܫܲܒ̇ܚܘܼܗܝ ܟܠ ܟܲܘܟ̇ܒܹ̈ܐ ܘܢܘܼܗܪܵܐ܀ ܫܲܒ̇ܚܘܼܗܝ ܫܡܲܝ̈ ܫܡܲܝܵܐ܀ ܡܲܝ̈ܵܐ ܕܲܠܥܸܠ ܡ݂ܢ ܫܡܲܝ̈ܵܐ ܢܫܲܒ̇ܚܘܼܢ ܠܲܫܡܹܗ ܕܡܵܪܝܵܐ܀ ܡܸܛܠ ܕܗܘ̤ ܐܸܡܲܪ ܘܲܗܘ̤ܵܘ ܘܗܘ̤ ܦܩܲܕ݂ ܘܐܸܬ݂ܒ̇ܪܝܼܘ܀ ܘܐܲܩܝܼܡ ܐܸܢܘܿܢ ܠܥܵܠܲܡ ܥܵܠܡܝܼܢ܀ ܢܵܡܘܿܣܵܐ ܝܲܗ̣݇ܒ݂ ܘܠܵܐ ܥܵܒܲܪ܀ ܫܲܒܲܚܘ ܠܡܵܪܝܵܐ ܡ̣ܢ ܐܲܪܥܵܐ܀ ܬܲܢܝܼܢܹ̈ܐ ܘܟ݂ܠܗܘܿܢ ܬܗܘܿܡܹ̈ܐ܀ ܢܘܼܪܵܐ ܘܒܲܪܕ݂ܵܐ ܘܬܲܠܓܵܐ ܘܲܓ݂ܠܝܼܕ݂ܵܐ܀ ܪ̈ܘܼܚܹܐ ܘܥܲܠܥܵܠܹ̈ܐ ܥܒ݂ܵܕ݂ܵܐ ܕܡܸܠܬܹܗ܀ ܛܘܼܪܹ̈ܐ ܘܟ݂ܠܗܹܝܢ ܪ̈ܵܡܵܬ݂ܵܐ܀ ܐܝܼܠܵܢܹ̈ܐ ܕܦܹܐܪܹ̈ܐ ܘܟ݂ܠܗܘܿܢ ܐܲܪ̈ܙܹܐ܀ ܚܲܝܘ̱ܬ݂ܵܐ ܘܟ݂ܠܵܗ̇ ܒܥܝܼܪܵܐ܀ ܪ̈ܲܚܫܵܐ ܘܛܲܝܪܵܐ ܘܦܵܪܲܚܬ݂ܵܐ܀ ܡܲܠ̈ܟܹ̇ܐ ܕܐܲܪܥܵܐ ܘܟ݂ܠܗܹܝܢ ܐܸܡ̈ܘܵܬ݂ܵܐ܀ ܪܵܘ̱ܪ̈ܒ݂ܵܢܹܐ ܘܟ݂ܠܗܘܿܢ ܕܲܝܵܢܹ̈ܐ ܕܐܲܪܥܵܐ܀ ܓܲܕ̇ܘܼܕܹ̈ܐ ܘܲܒ݂ܬ݂ܘܼ̈ܠܵܬ݂ܵܐ܀ ܣܵܒܹ̈ܐ ܘܲܥܠܲܝܡܹ̈ܐ ܢܫܲܒ̇ܚܘܼܢ ܠܲܫܡܹܗ ܕܡܵܪܝܵܐ܀ ܡܸܛܠ ܕܪܲܒ̇ܘܼ ܫܡܹܗ ܒܲܠܚܘܿܕ݂ܵܘܗܝ܀ ܘܫܘܼܒ݂ܚܹܗ ܒܐܲܪܥܵܐ ܘܒܲܫܡܲܝܵܐ܀ ܡܪܝܼܡ ܩܲܪܢܵܐ ܕܥܲܡܹܗ ܘܬܸܫܒ̇ܘܿܚܬܵܐ ܕܟ݂ܠܗܘܿܢ ܙܲܕ̇ܝܼ̈ܩܵܘܗܝ܀ ܠܲܒ݂ܢܲܝ̈ ܝܑܼܣܪܵܝܹܠ ܥܲܡܵܐ ܕܩܲܪܝܼܒ݂ ܠܹܗ܀
ܐܲܩܸܦ: ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ܀ ܬܸܫܒ̇ܘܿܚܬܹܗ ܒܥܹܕ̇ܬܵܐ ܕܙܲܕ̇ܝܼܩܹ̈ܐ܀ ܢܸܚܕܸ̇ܐ ܝܑܼܣܪܵܝܹܠ ܒܥܵܒ݂ܘܿܕܹܗ܀ ܘܲܒ݂ܢܲܝ̈ ܨܸܗܝܘܿܢ ܢܸܪܘ̱ܙܘܼܢ ܒܡܲܠܟ̇ܗܘܿܢ܀ ܘܲܢܫܲܒܲܚܘܼܢ ܠܲܫܡܹܗ ܒܲܦܠܲܓܹ̈ܐ ܘܒܲܪ̈ܒ݂ܝܼܥܹܐ܀ ܘܲܒ݂ܟܸܢܵܪܹ̈ܐ ܢܸܙܡ̱ܪܘܼܢ ܠܹܗ܀ ܡܸܛܠ ܕܲܨܒ݂ܵܐ ܡܵܪܝܵܐ ܒܥܲܡܹܗ܀ ܘܝܲܗ̣݇ܒ݂ ܠܡܸܣܟܹ̇ܢܹ̈ܐ ܦܘܼܪܩܵܢܵܐ܀ ܢܸܬ݂ܥܲܫܢܘܼܢ ܙܲܕ̇ܝܼܩܹ̈ܐ ܒܐܝܼܩܵܪܵܐ܀ ܘܲܢܫܲܒ̇ܚܘܼܢܵܝܗܝ ܥܲܠ ܥܲܪ̈ܣܵܬ݂ܗܘܿܢ܀ ܘܲܢܪܲܡܪ̱ܡܘܼܢ ܠܐܲܠܵܗܵܐ ܒܓܲܓ̇ܪ̈ܵܬ݂ܗܘܿܢ܀ ܣܲܝܦܵܐ ܕܲܬ݂ܪܹܝܢ ܦܘܼܡܵܘ̈ܗܝ ܒܐܝܼܕܲܝ̈ܗܘܿܢ܀ ܠܡܸܥܒܲܕ݂ ܦܘܼܪܥܵܢܵܐ ܡ݂ܢ ܥܲܡܡܹ̈ܐ܀ ܘܡܲܟ̇ܣܵܢܘܼܬ݂ܵܐ ܡ̣ܢ ܐܸܡ̈ܘܵܬ݂ܵܐ܀ ܠܡܹܐܣܲܪ ܡܲܠܟܲܝ̈ܗܘܿܢ ܒܣܘܼܛܡܹ̈ܐ܀ ܘܝܲܩܝܼܪ̈ܲܝܗܘܿܢ ܒܫܸܫ̈ܠܵܬ݂ܵܐ ܕܦܲܪܙܠܵܐ܀ ܠܡܸܥܒܲܕ݂ ܠܗܘܿܢ ܕܝܼܢܵܐ ܕܲܟ݂ܬ݂ܝܼܒ݂܀ ܫܘܼܒ݂ܚܵܐ ܠܟ݂ܠܗܘܿܢ ܙܲܕ̇ܝܼܩܵܘ̈ܗܝ܀
ܐܲܩܸܦ: ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ܀ ܫܲܒ̇ܚܘܼܗܝ ܒܲܪܩܝܼܥܵܐ ܕܥܘܼܫܢܹܗ܀ ܫܲܒ̇ܚܘܼܗܝ ܒܚܲܝܠ̱ܬ݂ܵܢܘܼܬܹܗ܀ ܫܲܒ̇ܚܘܼܗܝ ܒܣܘܿܓ݂ܐܵܐ ܕܪܲܒ̇ܘܼܬܹܗ܀ ܫܲܒ̇ܚܘܼܗܝ ܒܩܵܠܵܐ ܕܩܲܪܢܵܐ܀ ܫܲܒ̇ܚܘܼܗܝ ܒܩܝܼܬ݂ܵܪܹ̈ܐ ܘܲܒ݂ܟܸܢܵܪܹ̈ܐ܀ ܫܲܒ̇ܚܘܼܗܝ ܒܲܦܠܲܓܹ̈ܐ ܘܒܲܪ̈ܒ݂ܝܼܥܹܐ܀ ܫܲܒ̇ܚܘܼܗܝ ܒܡܸܢܹ̈ܐ ܚܲܠ̈ܝܵܬ݂ܵܐ܀ ܫܲܒ̇ܚܘܼܗܝ ܒܨܸܨ̈ܠܲܝ ܫܸܡܥܵܐ ܫܲܒ̇ܚܘܼܗܝ ܒܩܵܠܵܐ ܘܒܲܩܥܵܬ݂ܵܐ܀ ܒܟ݂ܠ ܢܸܫܡܵܐ ܢܫܲܒܲܚ ܠܡܵܪܝܵܐ܀