ܥܘܼܢܵܝܵܐ ܘܒܵܬܹ̈ܐ ܕܒܹܝܡ ܕܟ݂ܠܵܗ݁ ܫܲܢ݇ܬܵܐ
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܣܘܼܒܵܪܵܐ
ܥܘܼܢܵܝܵܐ: ܒܪܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ: ܗܲܒ݂ܠܲܢ ܚܲܝܹ̈ܐ ܒܡܲܠܟ݁ܘܼܬ݂ܵܟ݂. ܬܢܝܼ. ܒܵܬܹ̈ܐ: ܒܗܵܢܵܐ ܝܵܘܡܵܐ ܩܲܕ݂ܡܵܝܵܐ: ܕܐܝܼܬ݂ܵܘܗܝ ܒܘܼܟ݂ܪܵܐ ܕܝܵܘ̈ܡܵܬ݂ܵܐ. ܬܵܘ ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ: ܕܗ̇ܘ ܒܘܼܟ݂ܪܵܐ ܕܐܲܠܵܗܘܼܬ݂ܵܐ܀
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܣܘܼܒܵܪܵܐ
ܥܘܼܢܵܝܵܐ: ܗܵܐ ܣܲܡ ܚܲܝܹ̈ܐ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ. ܬܢܝܼ. ܒܵܬܹ̈ܐ: ܐܸܢܗ̤ܘ ܕܹܝܢ ܕܲܒ݂ܟ݂ܠ ܝܵܘܡܝܼ̈ܢ. ܦܲܓ݂ܪܹܗ ܕܡܵܪܲܢ ܡܸܬ݂ܦܲܠܲܓ݂. ܒܲܥܪܘܼܒ݂ܬܵܐ ܝܲܬ݁ܝܼܪ ܙܵܕܹܩ̇. ܕܲܒ݂ܝܘܿܡ ܩܸܛܠܹܗ ܡܸܬ݂ܦܲܠܲܓ݂.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܣܘܼܒܵܪܵܐ
ܥܘܼܢܵܝܵܐ: ܕܘܼܨܘ ܥܲܡܡܹ̈ܐ ܩܕ݂ܵܡ ܦܵܪܘܿܩܲܢ. ܕܲܒ݂ܠܲܚܡܹܗ ܒܣܸܡ̣ܬ݁ܘܿܢ ܩܘܼܕ݂ܡܵܘܗܝ: ܬܢܝܼ. ܒܵܬܹ̈ܐ: ܐܵܘܕܵܘ ܥܲܡܡܹ̈ܐ ܠܛܲܝܒ݁ܘܼܬ݂ܵܐ. ܕܡܲܓܵܢ ܚܲܣܝܲܬ̤ ܚܵܘܒܲܝ̈ܟ݁ܘܿܢ. ܘܫܵܘܬܵܦܹ̈ܐ ܒܐ݇ܪܵܙܵܐ ܗ̤ܘܲܝܬܘܿ݁ܢ. ܕܡ̣ܢ ܪ̈ܘܼܚܵܢܹܐ ܡܸܬ݂ܩܲܕܲܫ.
ܥܪܘܼܒ݂ܬܵܐ ܕܬܲܪܬܹ݁ܝܢ ܕܣܘܼܒܵܪܵܐ
ܥܘܼܢܵܝܵܐ: ܒܪܝܼܟܼ ܦܲܓ݂ܪܵܟܼ ܘܲܕ݂ܡܵܟܼ ܡܵܪܲܢ. ܕܚܘܼܣܵܝܵܐ ܠܥܲܡܡܹ̈ܐ ܝܲܗ̣݇ܒ݂ܬܵܝܗܝ. ܘܒܹܗ ܩܲܕܸܫ̣ܬܵܝܗܝ ܠܲܟ݂ܝܵܢܲܢ. ܕܢܸܙܡܲܪ ܫܘܼܒ݂ܚܵܐ ܠܡܵܪܘܼܬܼܵܟ݂. ܒܵܬܹ̈ܐ: ܐܲܝܟܼ ܪܹܫܝܼܬ݂ܵܐ ܕܦܘܼܪܩܵܢܵܐ. ܫ̣ܩܲܠ ܒܵܪܘܿܝܵܐ ܠܲܟ݂ܝܵܢܲܢ. ܘܫܲܝܸܢ ܠܲܢ ܥܲܡ ܪܲܒ݁ܘܼܬܹܗ. ܒܕܸܒ݂ܚܵܐ ܕܦܲܓ݂ܪܹܗ ܕܒܲܪ ܓܸܢܣܲܢ.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܣܘܼܒܵܪܵܐ
ܥܘܼܢܵܝܵܐ: ܢܒ݂ܝܼܹ̈ܐ ܘܡܲܠܟܹ̈ܐ ܐܸܬ݂ܪܲܓ݂ܪܲܓ݂ܘ. ܠܦܲܓ݂ܪܵܟܼ ܘܲܕ݂ܡܵܟܼ ܡܚܲܣܝܵܢܵܐ. ܬܢܝܼ. ܒܵܬܹ̈ܐ: ܐܸܬ݂ܪܲܓ݂ܪܲܓ݂ ܕܵܘܝܼܕ݂ ܘܲܫ̣ܐܸܠ. ܘܠܵܐ ܐܸܫ̣ܬ݁ܝܼ ܡܲܝ̈ܵܐ ܕܲܫ̣ܐܸܠ. ܐܵܘܕܵܘ ܐܲܢ݇ܬ݁ܘܿ݁ܢ ܕܲܫ̣ܘܲܝܬ݁ܘܿ݁ܢ. ܠܡܸܫܬܵܐ ܟܵܣܹܗ ܕܲܡܫܝܼܚܵܐ.
ܥܪܘܼܒ݂ܬܵܐ ܕܲܬ݂ܠܵܬ݂ ܕܣܘܼܒܵܪܵܐ
ܥܘܼܢܵܝܵܐ: ܦܲܓ݂ܪܵܟܼ ܘܲܕ݂ܡܵܟܼ ܐܵܘܟܸ݁ܠ̣ܬܵܢ. ܘܲܠܡܲܠܟ݁ܘܼܬܼܵܟܼ ܙܲܡܸܢ̣ܬܵܢ. ܒܛܲܝܒ݁ܘܼܬܼܵܟܼ ܚܲܣܵܐ ܚܵܘܒܲܝ̈ܢ. ܕܢܵܘܕܸܐ ܠܵܟ݂ ܥܲܠ ܡܵܘܗܲܒ݂ܬ݂ܵܟ݂. ܬܢܝܼ. ܒܵܬܹ̈ܐ: ܐܝܼܬ݂ܝܵܐ ܕܪܲܡ̣ܪܸܡ ܠܲܟ݂ܝܵܢܲܢ. ܒܪܹܫܝܼܬ݂ܵܐ ܕܲܢ̣ܣܲܒ݂ ܡܸܢܲܢ. ܠܵܐ ܬܹܐܚܘܿܕ݂ ܬܲܪܥܵܟܼ ܒܐܲܦܲܝ̈ܢ. ܕܒܲܒ݂ܪܵܟܼ ܘܪܘܼܚܵܟܼ ܐܵܘܕ݁ܝܼܢܲܢ.
ܚܲܕ݂ܒܫܲܒܵܐ ܕܐܲܪܒ݁ܥܵܐ ܕܣܘܼܒܵܪܵܐ
ܥܘܼܢܵܝܵܐ: ܢܵܘܕܸ݁ܐ ܠܹܗ ܒܥܹܕܲܬ݂ ܩܘܼܕ݂ܫܵܐ. ܠܲܡܫܝܼܚܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ. ܬܢܝܼ. ܒܵܬܹ̈ܐ: ܢ̣ܟܲܣ ܥܲܡܵܐ ܐܹܡܲܪ ܚܲܝܹ̈ܐ. ܘܐܸܬ݂ܵܘ ܥܲܡܡܹ̈ܐ ܘܐܸܬ݂ܒܲܣܲܡܘ. ܚ̣ܛܲܦܘ ܘܲܩܛܲܠ̣ܘ ܘܐܲܬ݂ܩܸܢ̣ܘ ܩܘܼܕ݂ܡܲܝܢ. ܠܗܘܿܢ ܕܝܼܢܵܐ ܘܠܲܢ ܒܘܼܣܵܡܵܐ܀ ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ. ܠܲܡܫܝܼܚܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ.
ܥܪܘܼܒ݂ܬܵܐ ܕܐܲܪܒܲܥ ܕܣܘܼܒܵܪܵܐ
ܥܘܼܢܵܝܵܐ: ܦܲܓ݂ܪܵܟܼ ܘܲܕ݂ܡܵܟܼ ܐܵܘܟܸ݁ܠ̣ܬܵܢ. ܘܲܠܡܲܠܟ݁ܘܼܬܼܵܟܼ ܙܲܡܸܢ̣ܬܵܢ. ܒܛܲܝܒ݁ܘܼܬܼܵܟܼ ܚܲܣܵܐ ܚܵܘܒܲܝ̈ܢ. ܕܢܵܘܕܸܐ ܘܢܸܣܓ݁ܘܿܕ݂ ܠܡܵܪܘܼܬܼܵܟ݂. ܒܵܬܹ̈ܐ: ܐܝܼܬ݂ܝܵܐ ܕܪܲܡ̣ܪܸܡ ܠܲܟ݂ܝܵܢܲܢ. ܒܪܹܫܝܼܬ݂ܵܐ ܕܲܢ̣ܣܲܒ݂ ܡܸܢܲܢ. ܠܵܐ ܬܹܐܚܘܿܕ݂ ܬܲܪܥܵܟܼ ܒܐܲܦܲܝ̈ܢ. ܕܒܲܒ݂ܪܵܟܼ ܘܪܘܼܚܵܟܼ ܐܵܘܕ݁ܝܼܢܲܢ.
ܕܥܹܐܕ݂ܵܐ ܕܝܲܠܕܵܐ
ܥܘܼܢܵܝܵܐ: ܦܲܓ݂ܪܵܐ ܘܲܕ݂ܡܵܐ ܡܚܲܣܝܵܢܵܐ ܗܵܐ ܡܸܬ݂ܩܲܪܲܒ݂. ܥܲܠ ܡܲܕ݂ܒ݁ܚܵܐ ܚܲܝܵܐ ܘܡܲܚܝܵܢܵܐ. ܒܓ݂ܵܘ ܥܹܕܲܬ݂ ܩܘܼܕ݂ܫܵܐ ܩܲܕܝܼܫܬܵܐ. ܘܲܥܬ݂ܝܼܕ݂ ܬܘܼܒ݂ ܕܢܸܬ݂ܩܲܒܲܠ ܥܲܠ ܡܲܕ݂ܒ݁ܚܵܐ ܩܲܕܝܼܫܵܐ ܘܲܫܒ݂ܝܼܚܵܐ ܘܪܘܼܚܵܢܵܐ. ܗ̇ܘ ܐܲܝܢܵܐ ܕܐܝܼܬ݂ܵܘܗܝ ܫܲܪܝܼܪܵܐ ܒܲܫܡܲܝܵܐ܀ ܬܵܘ ܐܲܟ݂ܲܚ݇ܕ݂ ܥܲܡܡܹ̈ܐ ܢܸܬ݂ܩܲܪܲܒ݂ ܠܹܗ ܒܩܲܕܝܼܫܘܼܬ݂ܵܐ ܕܦܲܓ݂ܪ̈ܲܝܢ ܘܲܕ݂ܢܲܦ̮ܫ̈ܵܬܲܢ. ܗܵܢܵܐ ܓܹܝܪ ܐܝܼܬܼܵܘܗܝ ܐ݇ܪܵܙܵܐ ܕܲܟ݂ܣܸܐ ܗ݇ܘܵܐ. ܕܐܸܬ݂ܝܼܗܸܒ݂ ܚܠܵܦܲܝܢ ܠܫܘܼܒ݂ܩܵܢܵܐ ܕܲܚܛܵܗܹ̈ܐ: ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܒܵܬܹܐ: ܗܵܐ ܒܬ݂ܘܼܠܬܵܐ ܒܵܛ̇ܢܵܐ ܘܝܵܠ̇ܕܵܐ ܒܪܵܐ. ܘܡܸܬ݂ܩܪܸܐ ܫܡܹܗ ܥܲܡܵܢܘܼܐܹܝܠ܀ ܬܵܘ ܐܲܟ݂ܲܚ݇ܕ݂܀ ܐܸܬ݂ܝܼܠܸܕ݂ ܠܟ݂ܘܿܢ ܓܹܝܪ ܝܵܘܡܵܢܵܐ ܦܵܪܘܿܩܵܐ. ܕܐܝܼܬ݂ܵܘܗܝ ܡܵܪܝܵܐ ܡܫܝܼܚܵܐ ܒܲܡܕ݂ܝܼܢ݇ܬܹ݁ܗ ܕܕ݂ܵܘܝܼܕ݂܀
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܝܲܠܕܵܐ
ܥܘܼܢܵܝܵܐ: ܦܲܓ݂ܪܵܐ ܘܲܕ݂ܡܵܐ ܡܚܲܣܝܵܢܵܐ ܗܵܐ ܡܸܬ݂ܩܲܪܲܒ݂. ܥܲܠ ܡܲܕ݂ܒ݁ܚܵܐ ܚܲܝܵܐ ܘܡܲܚܝܵܢܵܐ. ܒܓ݂ܵܘ ܥܹܕܲܬ݂ ܩܘܼܕ݂ܫܵܐ ܩܲܕܝܼܫܬܵܐ. ܘܲܥܬ݂ܝܼܕ݂ ܬܘܼܒ݂ ܕܢܸܬ݂ܩܲܒܲܠ ܥܲܠ ܡܲܕ݂ܒ݁ܚܵܐ ܩܲܕܝܼܫܵܐ ܘܲܫܒ݂ܝܼܚܵܐ ܘܪܘܼܚܵܢܵܐ. ܗ̇ܘ ܐܲܝܢܵܐ ܕܐܝܼܬ݂ܵܘܗܝ ܫܲܪܝܼܪܵܐ ܒܲܫܡܲܝܵܐ܀ ܬܵܘ ܐܲܟ݂ܲܚ݇ܕ݂ ܥܲܡܡܹ̈ܐ ܢܸܬ݂ܩܲܪܲܒ݂ ܠܹܗ ܒܩܲܕܝܼܫܘܼܬ݂ܵܐ ܕܦܲܓ݂ܪ̈ܲܝܢ ܘܲܕ݂ܢܲܦ̮ܫ̈ܵܬܲܢ. ܗܵܢܵܐ ܓܹܝܪ ܐܝܼܬܼܵܘܗܝ ܐ݇ܪܵܙܵܐ ܕܲܟ݂ܣܸܐ ܗ݇ܘ̣ܵܐ. ܕܐܸܬ݂ܝܼܗܸܒ݂ ܚܠܵܦܲܝܢ ܠܫܘܼܒ݂ܩܵܢܵܐ ܕܲܚܛܵܗܹ̈ܐ: ܗܲܠܸܠܘܼܝܲܗ ܗܲܠܸܠܘܼܝܲܗ܀ ܒܵܬܹ̈ܐ: ܗܵܐ ܒܬ݂ܘܼܠܬܵܐ ܒܵܛ̇ܢܵܐ ܘܝܵܠ̇ܕܵܐ ܒܪܵܐ. ܘܡܸܬ݂ܩܪܸܐ ܫܡܹܗ ܥܲܡܵܢܘܼܐܹܝܠ܀ ܬܵܘ ܐܲܟ݂ܲܚ݇ܕ݂...܀ ܐܸܬ݂ܝܼܠܸܕ݂ ܠܟ݂ܘܿܢ ܓܹܝܪ ܝܵܘܡܵܢܵܐ ܦܵܪܘܿܩܵܐ. ܕܐܝܼܬ݂ܵܘܗܝ ܡܵܪܝܵܐ ܡܫܝܼܚܵܐ ܒܲܡܕ݂ܝܼܢ݇ܬܹ݁ܗ ܕܕ݂ܵܘܝܼܕ݂܀
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܝܲܠܕܵܐ
ܥܘܼܢܵܝܵܐ: ܢܵܘܕܸ݁ܐ ܠܒܲܪ ܡܲܠܟܵܐ ܕܐܸܬ݁ܬܲܚܬ݁ܝܼ ܠܘܵܬܲܢ. ܘܲܠܓܸܢܣܲܢ ܡܵܝܘܿܬ݂ܵܐ ܠܡܵܘܗܲܒ݂ܬ݂ܵܐ ܡܥܲܠܲܝܬܵܐ ܒܛܲܝܒ݁ܘܼܬܹܗ ܐܲܫ̣ܘܝܼ ܠܐ݇ܪ̈ܵܙܹܐ ܕܚܝܼ̈ܠܹܐ. ܟܸܢܫܹ̈ܐ ܕܡܲܠܲܐܟܹ̈ܐ ܒܕܸܚܠܵܐ ܪܲܒܵܐ ܘܒܲܪܬ݂ܹܝܬ݂ܵܐ ܩܵܝ̇ܡܝܼܢ ܘܲܡܩܲܕ݁ܫܝܼܢ ܠܲܫܡܹܗ܀ ܘܲܒ݂ܬ݂ܸܕ݂ܡܘܼܪܬܵܐ ܪܲܒ݁ܬ݂ܵܐ ܥܲܡܲܢ ܩܵܥܹܝ̇ܢ ܟܠܗܘܿܢ ܒܩܵܠܹ̈ܐ ܕܩܲܕܝܼܫܘܼܬ݂ܵܐ ܘܐܵܡ̇ܪܝܼܢ. ܩܲܕܝܼܫ ܡܵܪܝܵܐ. ܩܲܕܝܼܫ ܐܲܠܵܗܵܐ. ܘܲܡܫܲܒܲܚ ܩܲܕܝܼܫܵܐ ܕܡ̣ܢ ܡܬ݂ܘܿܡ ܐܝܼܬܼܵܘܗܝ. ܒܵܬܹ̈ܐ: ܕܵܪܵܐ ܠܕ݂ܵܪܵܐ ܢܸܫܬܲܥܘܿܢ ܥܒ݂ܵܕܲܝ̈ܟ: ܘܓܲܢ݇ܒܵܪܘܼܬܼܵܟܼ ܢܚܵܘܘܿܢ܀ ܘܲܒ݂ܬܸܕ݂ܡܘܼܪܬܵܐ ܪܲܒ݁ܬ݂ܵܐ ....܀ ܘܥܘܼܫܢܵܐ ܕܲܕ݂ܚܝܼܠܘܼܬ݂ܵܟܼ ܢܹܐܡܪܘܼܢ: ܘܪܲܒ݁ܘܼܬܼܵܟܼ ܐܸܫܬܲܥܸܐ܀ ܘܲܒ݂ܬ݂ܸܕ݂ܡܘܼܪܬܵܐ...܀
ܥܪܘܼܒ݂ܬܵܐ ܕܬܲܪܬܹܝܢ ܕܒ݂ܵܬܲܪ ܝܲܠܕܵܐ ܕܘܼܟ݂ܪܵܢܵܐ ܗ݇ܝ̣ ܕܡܵܪܬܝ ܡܲܪܝܲܡ
ܥܘܼܢܵܝܵܐ: ܦܲܓ݂ܪܵܐ ܠܵܐ ܡܸܬ݂ܚܲܒ݁ܠܵܢܵܐ. ܘܟ݂ܵܣܵܐ ܕܲܕ݂ܡܵܐ ܝܲܩܝܼܪܵܐ. ܕܦܵܪܘܿܩܵܐ ܕܟ݂ܠܲܢ ܡܫܝܼܚܵܐ. ܢܸܣܲܒ݂ ܒܲܚܕ݂ܵܐ ܐܵܘܝܘܼܬ݂ܵܐ. ܒܡܵܘܬܹܗ ܗ݇ܘ̣ ܓܹܝܪ ܕܲܚܠܵܦܲܝܢ ܟܠܲܢ ܡܣܲܒ݁ܪܝܼܢܲܢ. ܐܵܦ ܒܲܩܝܵܡܬܹܗ ܕܝܼܠܹܗ ܡܗܲܝܡ̱ܢܝܼܢܲܢ ܘܥܲܡ ܡܲܠܲܐܟܹ̈ܐ ܝܵܐܹܐ ܕܲܢܙܲܡܲܪ ܠܹܗ ܗܲܠܸܠܘܼܝܲܗ܀ ܒܵܬܹ̈ܐ: ܛܘܼܒܲܝܟ݁ܝ ܡܲܪܝܲܡ ܕܢܸܫܹ̈ܐ ܛܲܢ ܒܹܟ݂ܝ: ܘܲܒ݂ܬ݂̈ܘܼܠܵܬ݂ܵܐ ܒܢܵܬ݂̈ ܪܹ̈ܫܵܢܹܐ܀ ܛܘܼܒܲܝܟ݁ܝ ܡܲܪܝܲܡ ܕܲܫܡܹܟ݂ܝ ܕܝܼܠܹܟ݂ܝ: ܪܵܡ ܘܲܡܥܲܠܲܝ ܡܸܛܠ ܝܲܠܕܹ݁ܟ݂ܝ܀ ܛܘܼܒܲܝܟ݁ܝ ܡܲܪܝܲܡ ܕܲܫ̣ܘܲܝܬ݁ܝ ܕܬܸܗܘܹܝܢ ܐܸܡܵܐ ܘܐܲܡܬ݂ܵܐ ܠܒܲܪ ܡܵܪܹܟ݁ܠ܀ ܘܥܲܡ ܡܲܠܲܐܟܹ̈ܐ ܝܵܐܹܐ ܕܲܢܙܲܡܲܪ ܠܹܗ ܗܲܠܸܠܘܼܝܲܗ܀
ܥܹܐܕ݂ܵܐ ܕܕܸܢܚܹܗ ܕܡܵܪܲܢ
ܥܘܼܢܵܝܵܐ: ܬܵܘ ܟܠܲܢ ܫܲܘܝܵܐܝܼܬ݂ ܢܵܘܕܸܐ ܘܢܸܣܓܘܿ݁ܕ݂ ܠܹܗ. ܠܦܵܪܘܿܩܵܐ ܕܓܸܢܣܵܐ ܕܲܒ݂ܢܲܝ̈ܢܵܫܵܐ ܘܲܕ݂ܥܵܠܡܵܐ ܟܠܹܗ ܡ̣ܢ ܒܝܼܫܵܐ: ܗ̇ܘ ܓܹܝܪ ܝܲܗ̣݇ܒ݂ܠܲܢ ܒܛܲܝܒ݁ܘܼܬܹܗ ܡܵܘܗܲܒ݂ܬ݂ܵܐ ܫܡܲܝܵܢܝܼܬ݂ܵܐ ܕܦܲܓ݂ܪܹܗ ܘܲܕ݂ܡܹܗ ܠܚܘܼܣܵܝܵܐ ܕܚܵܘܒܹ̈ܐ܀ ܠܘܵܬܹܗ ܢܸܬ݂ܐ̱ܡܸܢ ܟܠܲܢ...܀ ܒܵܬܹܐ: ܢܸܦܘܿܩ ܚܘܼܛܪܵܐ ܡ̣ܢ ܓܘܼܙܥܹܗ ܕܐܝܼܫܲܝ. ܘܢܲܦܪܲܥ ܢܘܼܪܒܵܐ ܡ̣ܢ ܥܸܩܵܪܹܗ܀ ܠܘܵܬܹܗ ܢܸܬ݂ܐܡܸܢ ܟܠܲܢ...܀
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܒ݂ܵܬܲܪ ܕܸܢܚܵܐ
ܥܘܼܢܵܝܵܐ: ܬܵܘ ܟܠܲܢ ܫܲܘܝܵܐܝܼܬ݂ ܢܵܘܕܸ݁ܐ ܘܢܸܣܓ݁ܘܿܕ݂ ܠܹܗ. ܠܦܵܪܘܿܩܵܐ ܕܓܸܢܣܵܐ ܕܲܒ݂ܢܲܝ̈ܢܵܫܵܐ ܘܲܕ݂ܥܵܠܡܵܐ ܟܠܹܗ ܡ̣ܢ ܒܝܼܫܵܐ. ܗ̤ܘ ܓܹܝܪ ܝܲܗ̣݇ܒ݂ܠܲܢ ܒܛܲܝܒ݁ܘܼܬܹܗ. ܡܵܘܗܲܒ݂ܬ݂ܵܐ ܫܡܲܝܵܢܝܼܬ݂ܵܐ. ܕܦܲܓ݂ܪܹܗ ܘܲܕ݂ܡܹܗ. ܠܚܘܼܣܵܝܵܐ ܕܚܵܘܒܹ̈ܐ ܗܲܠܸܠܘܼܝܲܗ܀ ܠܘܵܬܹܗ ܢܸܬ݂ܐ̱ܡܸܢ ܟܠܲܢ. ܘܲܠܡܵܪܘܼܬܹܗ ܢܸܦܠܘܿܚ ܡ̣ܢ ܟܠܹܗ ܠܸܒܲܢ. ܟܲܕ݂ ܐܵܡ̇ܪܝܼܢܲܢ ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܪܵܚܹ̇ܡ ܐ݇ܢܵܫܵܐ. ܗܲܠܸܠܘܼܝܲܗ܀ ܒܵܬܹ̈ܐ: ܢܸܦܘܿܩ ܚܘܼܛܪܵܐ ܡ̣ܢ ܓܘܼܙܥܹܗ ܕܐܝܼܫܲܝ. ܘܢܲܦܪܲܥ ܢܘܼܪܒܵܐ ܡ̣ܢ ܥܸܩܵܪܹܗ܀ ܠܘܵܬܹܗ ܢܸܬ݂ܐ̱ܡܸܢ ܟܠܲܢ.....܀
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܕܸܢܚܵܐ ܕܘܼܟ݂ܪܵܢܵܐ ܗ݇ܝܼ ܕܡܵܪܝ ܝܘܿܚܲܢܵܢ ܡܲܥܡ̄ܕ݂ܵܢܵܐ
ܥܘܼܢܵܝܵܐ: ܒܗܵܢܵܐ ܥܹܐܕ݂ܵܐ ܩܲܕܝܼܫܵܐ: ܕܝܘܿܚܲܢܵܢ ܡܲܥܡܸܕ݂ ܡܵܪܹܗ. ܬܵܘ ܢܸܨܛܲܒܲܬ݂ ܪܘܼܚܵܢܵܐܝܼܬ݂: ܘܲܢܗܲܠܸܠ ܒܹܗ ܩܲܕܝܼܫܵܐܝܼܬ݂. ܠܗܵܘ ܕܲܒ݂ܚܘܼܒܹ݁ܗ ܐܲܫ̣ܘܝܼ ܠܥܹܕ݁ܬܹܗ: ܠܡܸܣܲܒ݂ ܦܲܓ݂ܪܹܗ ܘܲܕ݂ܡܹܗ ܚܲܝܵܐ ܗܲܠܸܠܘܼܝܲܗ܀ ܒܵܬܹ̈ܐ: ܐܵܘܕܵܝ ܥܹܕ݁ܬܵܐ ܒܟ݂ܠ ܠܸܫܵܢܝܼ̈ܢ: ܒܥܹܐܕܹܗ ܫܒ݂ܝܼܚܵܐ ܕܟ݂ܵܗܢܵܐ ܘܟ݂ܘܼܡܪܵܐ. ܕܐܸܫܬܲܕܲܪ ܗ݇ܘ̣ܵܐ ܩܕ݂ܵܡ ܡܹܐܬ݂ܝܼܬܹܗ: ܕܡܲܠܟܵܐ ܡܫܝܼܚܵܐ ܕܢܲܬ݂ܩܸܢ ܐܘܼܪܚܹܗ. ܘܐܲܟ݂ܪܸܙ ܘܐܲܥ̣ܡܸܕ݂ ܒܝܘܿܪܕܢܵܢ ܢܲܗܪܵܐ: ܡܲܥܡܘܿܕ݂ܝܼܬ݂ܵܐ ܠܚܘܼܣܵܝ ܚܵܘܒܹ̈ܐ. ܗܲܠܸܠܘܼܝܲܗ܀ ܦܲܣ̣ܩܘܼܗܝ ܠܪܹܫܹܗ ܘܣܵܡ̣ܘܼܗܝ ܒܦܝܼܢܟ݂ܵܐ: ܘܝܲܗ̣݇ܒ݁ܘܼܗܝ ܠܒܲܪܬ݂ܵܗ̇ ܕܗܹܪܘܿܕ݂ܝܼܵܐ. ܘܥܸܠܲܬ̤ ܪܸܩܕܲܬ̤ ܙܲܠܝܼܠܵܐܝܼܬ݂: ܩܕ݂ܵܡ ܕܲܣܡܝܼܟ݂ܝܼܢ ܘܫܸܩܠܲܬ̤ ܐܲܓ݂ܪܵܗ̇. ܘܗܵܐ ܡܸܙܕܲܝܲܚ ܝܘܿܡ ܕܘܼܟ݂ܪܵܢܹܗ ܒܐܲܪܒܲܥܦܸܢ̈ܝܵܢ ܒܩܵܠܲܝ̈ ܫܘܼܒ݂ܚܵܐ. ܗܲܠܸܠܘܼܝܲܗ܀
ܒܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ
ܥܘܼܢܵܝܵܐ: ܥܲܡܡܹ̈ܐ ܐܵܘܕܵܘ ܒܥܹܕܲܬ݂ ܩܘܼܕ݂ܫܵܐ: ܠܲܒ݂ܪܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܐܲܠܵܗܘܼܬ݂ܵܐ ܕܟܲܣܝܵܐ ܡ̣ܢ ܟܠ: ܓܠܵܬ̤ ܟܲܣܝܘܼܬ݂ܵܗ̇ ܕܬܲܚܸܐ ܠܟ݂ܠܵܐ: ܠܲܒ݂ܪܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ.
ܬܠܵܬ݂ܒ݁ܫܲܒܵܐ ܕܒ݂ܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ
ܥܘܼܢܵܝܵܐ: ܫܘܼܒ݂ܚܵܐ ܠܪ̈ܲܚܡܹܐ ܕܫܲܠ̣ܚܘܼܟܼ ܨܹܐܕܲܝܢ: ܡܫܝܼܚܵܐ ܕܝܲܗ݂݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܒܗܲܝܟܲܠ ܦܲܓ݂ܪܵܐ ܫܪܵܬ̤ ܐܝܼܬ݂ܘܼܬ݂ܵܐ: ܘܠܵܐ ܣܦܲܩ̣ ܓܸܢܣܲܢ ܢܣܲܝܸܟܼ ܝܵܬ݂ܵܗ̇. ܡܫܝܼܚܵܐ ܕܝܲܗ̣ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ.
ܐܲܪܒܲܥܒ݁ܫܲܒܵܐ ܕܒ݂ܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ
ܥܘܼܢܵܝܵܐ: ܡܵܪܲܢ ܩܲܒܸ݁ܠ ܒܵܥܘܼܬ݂ ܥܹܕܲܬ݂ ܩܘܼܕ݂ܫܵܐ: ܕܲܡܦܝܼܣܵܐ ܠܵܟܼ ܡܸܛܠ ܥܲܡܵܟܼ ܦܪܝܼܩ ܒܲܨܠܝܼܒ݂ܵܟܼ. ܕܗܵܐ ܡܸܬ݂ܝܲܐܲܒ݂ ܠܫܘܼܒ݂ܩܵܢܵܐ. ܐܲܫܘܵܝܗܝ ܡܵܪܝ ܠܦܲܓ݂ܪܵܟܼ ܘܲܕ݂ܡܵܟܼ. ܕܢܸܗܘܸܐ ܥܘܼܡܪܵܐ ܠܐܝܼܩܵܪܵܟ݂. ܘܬܸܬ݁ܢܝܼܚ ܒܹܗ ܐܲܠܵܗܘܼܬܼܵܟ݂. ܕܢܵܘܕܸ݁ܐ ܥܲܠ ܡܵܘܗܲܒ݂ܬܼܵܟ݂. ܒܵܬܹ̈ܐ: ܟܸܢܫܲܢ ܕܣ̇ܵܓܹܕ݂ ܠܐܲܠܵܗܘܼܬܼܵܟ݂. ܐܲܣܓܵܐ ܠܘܵܬܹܗ ܟܠ ܥܘܼܕ݂ܪ̈ܵܢܝܼܢ. ܘܬܸܬ݁ܢܝܼܚ ܒܹܗ ܐܲܠܵܗܘܼܬܼܵܟ݂. ܕܢܵܘܕܸ݁ܐ ܥܲܠ ܡܵܘܗܲܒ݂ܬܼܵܟ݂.
ܚܲܡܫܵܒ݁ܫܲܒܵܐ ܕܒ݂ܵܬܲܪ ܕܸܢܚܵܐ ܕܘܼܟ݂ܪܵܢܵܐ ܗ݇ܘ̣ ܕܡܵܪܝ ܝܘܿܚܲܢܵܢ ܙܵܪܘܿܩܵܐ. ܕܛܲܟ݁ܣܵܗ̇ ܠܒܵܥܘܼܬ݂ܵܐ.
ܫܲܡܸܫ ܚܲܕ݂ ܦܲܪܨܘܿܦܵܐ (ܚܙܝ ܠܬܚܬ)
ܥܪܘܼܒ݂ܬܵܐ ܕܬܲܪܬܹ݁ܝܢ ܕܕܸܢܚܵܐ
ܥܘܼܢܵܝܵܐ ܒܕ݂ܘܼܨܘ ܥܲܡܡܹ̈ܐ: ܒܪܝܼܟܼ ܕܲܒ݂ܢܵܗ̇ ܠܥܹܕܲܬ݂ ܩܘܼܕ݂ܫܵܐ. ܥܲܠ ܟܹܐܦܵܐ ܕܗܲܝܡܵܢܘܼܬ݂ܵܐ. ܘܣ̣ܵܡ ܒܵܗ̇ ܫܠܝܼܚܹ̈ܐ ܘܲܢܒ݂ܝܼܹ̈ܐ. ܘܡܲܠܦܵܢܹ̈ܐ ܝܵܕ݂ܥܲܝ̈ ܫܪܵܪܵܐ. ܒܵܬܹ̈ܐ: ܫܸܡܥܘܿܢ ܪܹܫܵܐ ܕܲܫܠܝܼܚܹ̈ܐ. ܕܦܲܩ̣ܕܹܗ ܡܵܪܹܗ ܘܐܸܡܲܪ ܠܹܗ. ܪܥܝܼ ܠܝܼ ܥܸܪ̈ܒܲܝ ܘܲܢ̈ܩܵܘܵܬ݂ܝ. ܘܢܲܛܲܪ ܐܸܢܘܿܢ ܡ̣ܢ ܒܝܼܫܵܐ܀ ܡ̣ܢ ܫܡܲܝܵܐ ܩ̣ܪܵܝܗܝ ܗ݇ܘ̣ܵܐ ܡܵܪܲܢ. ܠܦܵܘܠܘܿܣ ܓܲܒ݂ܝܵܐ ܘܐܸܡܲܪ ܠܹܗ. ܦܘܿܩ ܬܲܠܡܸܕ݂ ܠܟ݂ܠܗܘܿܢ ܥܲܡܡܹ̈ܐ. ܒܲܫܡܵܐ ܕܲܬ݂ܠܝܼܬ݂ܵܝܘܼܬ݂ܵܐ.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܕܸܢܚܵܐ
ܥܘܼܢܵܝܵܐ: ܥܲܡ ܟܪ̈ܘܿܒܹܐ ܘܲܣܪ̈ܵܦܹܐ ܫܘܼܒ݂ܚܵܐ ܐܲܡܝܼܢܵܐ ܡܲܣܩܝܼܢܲܢ ܡܵܪܝ ܠܐܝܼܩܵܪܵܟܼ ܟܲܕ݂ ܐܵܡ̇ܪܝܼܢܲܢ. ܩܲܕܝܼܫܲܬ݁ ܩܲܕܝܼܫܲܬ݁ ܩܲܕܝܼܫܲܬ݁ ܡܵܪܝܵܐ ܐܲܠܵܗܵܐ: ܦܲܓ݂ܪܹܗ ܕܲܡܫܝܼܚܵܐ ܢܵܣܒ݁ܝܼܢܲܢ ܟܠܲܢ. ܘܲܕ݂ܡܹܗ ܝܲܩܝܼܪܵܐ ܠܚܘܼܣܵܝ ܚܵܘܒܹ̈ܐ: ܘܢܲܣܸܩ ܠܐܲܠܵܗܵܐ ܬܸܫܒ݁ܘܿܚܬܵܐ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܐܘܿ ܝܘܿܚܲܢܵܢ ܕܲܡܫܲܡܸܫ ܗ݇ܘ̣ܵܐ ܒܩܘܼܕ݂ܫܵܐ ܕܲܠܒܲܪ. ܕܲܫ̣ܘܵܐ ܕܢܸܥܘܿܠ ܠܲܩܕ݂ܘܿܫ ܩܘܼܕ݂ܫܹ̈ܐ ܕܠܵܐ ܡܲܦܲܣ ܗ݇ܘ̣ܵܐ: ܘܢܲܣܸܩ ܠܐܲܠܵܗܵܐ ܬܸܫܒ݁ܘܿܚܬܵܐ ܘܢܹܐܡܲܪ ܗܲܠܸܠܘܼܝܲܗ.
ܥܪܘܼܒ݂ܬܵܐ ܕܲܬ݂ܠܵܬ݂ ܕܕܸܢܚܵܐ ܕܘܼܟ݂ܪܵܢܵܐ ܕܐܲܪܒ݁ܥܵܐ ܐܹܘܲܢܓܲܠܸܣ̈ܛܹܐ
ܥܘܼܢܵܝܵܐ: ܬܠ̣ܵܘ ܢܲܨܝܼܚܹ̈ܐ ܥܲܝܢܲܝ̈ܗܘܿܢ ܠܐܲܬ݂ܪܵܐ ܕܢܘܼܗܪܵܐ. ܘܥܲܠ̣ܘ ܘܐܸܬ݂ܒܲܩܝܼܘ ܒܗܵܘ ܒܘܼܣܵܡܵܐ ܕܠܵܐ ܡܸܬ݂ܡܲܠܲܠ. ܕܛܲܝܸܒ݂ ܡܫܝܼܚܵܐ ܒܲܣܒܲܪܬܹܗ. ܠܪ̈ܵܚܡܲܝ ܚܘܼܒܹ݁ܗ. ܕܲܣܒܲܠ̣ܘ ܘܣܲܝܒܲܪܘ ܟܠ ܐܘܼܠܨܵܢܝܼ̈ܢ ܘܟ݂ܠ ܫܸܢܕ̈ܝܼܢ܀ ܒܵܬܹ̈ܐ: ܒܝܼܫܵܐ ܕܚܵܕܹܐ ܗ݇ܘ̣ܵܐ ܒܲܕ݂ܡܵܐ ܕܲܒ݂ܢܲܝ̈ܢܵܫܵܐ: ܚ̣ܙܵܐ ܕܡܵܐ ܕܟܹܐܢܹ̈ܐ ܕܐܸܬ݂ܐ̱ܫܸܕ݂ ܘܐܲܝܠܸܠ̣ ܘܐܸܡܲܪ. ܕܠܲܐܝܟܵܐ ܐܸܥܪܘܿܩ ܡ̣ܢ ܝܼܫܘܿܥ ܘܡ̣ܢ ܬܲܠܡܝܼܕ݂ܵܘ̈ܗܝ. ܕܲܫܡܹܗ ܛܲܪܕܲܢ̣ܝ ܘܲܫܠܝܼܚܵܘ̈ܗܝ ܗܵܐ ܪܵܕ݂ܦܝܼ̇ܢ ܠܝܼ.
ܘܐܸܢ ܥܵܝ݁ܦܝܼܢ ܬܪܹܝܢ ܕܘܼܟ݂ܪ̈ܵܢܹܐ (ܕܘܼܟ݂ܪܵܢܵܐ ܕܦܲܛܪܘܿܣ ܘܦܵܘܠܘܿܣ ܘܕܹܐܘܲܢܓܲܠܸܣܛܹ̈ܐ.) ܐܵܡ̇ܪܝܼܢ: ܛܲܪܕܹ݁ܗ ܪܹܫܵܐ ܕܲܫܠܝܼܚܹ̈ܐ ܡ̣ܢ ܓܵܘ ܪܗ݇ܘܿܡܹܐ. ܐܵܦ ܒܲܪ ܪܲܥܡܵܐ ܒܓ݂ܵܘ ܐܵܦܸܣܘܿܣ ܦܲܪܣ̣ܝܼ ܢܸܟ݂ܠܵܘ̈ܗܝ. ܘܠܘܼܩܵܐ ܒܡܸܨܪܹܝܢ ܥ̣ܩܲܪ ܙܝܼܙܵܢܵܘ̈ܗܝ ܘܬܲܒܲܪ ܢܵܘܣܵܘ̈ܗܝ. ܐܵܦ ܡ̣ܢ ܐܲܪܥܵܐ ܕܲܝܗܘܼܕ݂ ܪܲܕ݂ܦܹܗ ܡܲܬܲܝ ܡܵܟ݂ܣܵܐ.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܕܸܢܚܵܐ
ܥܘܼܢܵܝܵܐ: ܥܲܡ ܐܲܠܦܹ̈ܐ ܕܲܟ݂ܪ̈ܘܿܒܹܐ ܘܪܸ̈ܒ݁ܘܵܬ݂ܵܐ ܕܲܣܪ̈ܵܦܹܐ. ܬܵܘ ܢܸܙܡܲܪ ܫܲܘܝܵܐܝܼܬ݂ ܟܲܕ݂ ܐܵܡ݁ܪܝܼܢܲܢ: ܩܲܕܝܼܫܲܬ݁ ܩܲܕܝܼܫܲܬ݁ ܩܲܕܝܼܫܲܬ݁ ܟܝܵܢܵܐ ܩܲܕܝܼܫܵܐ܀ ܥܲܠ ܐܲܦܲܝ̈ ܡܵܘܗܲܒ݂ܬ݂ܵܐ ܡܥܲܠܲܝܬܵܐ ܕܝܲܗ̣݇ܒ݂ܬ݁ ܠܲܢ. ܦܘܼܡܲܢ ܕܲܢܫܲܒ݁ܚܵܟܼ ܠܵܐ ܣܵܦܹ̇ܩ. ܗܲܒ݂ܠܲܢ ܡܵܪܝ ܕܥܲܡ ܥܝܼܪܹ̈ܐ ܢܝܲܒܸ݁ܒ݂ ܠܵܟܼ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ. ܫܲܒ݁ܚܘܼܗܝ ܒܲܪܩܝܼܥܵܐ ܕܥܘܼܫܢܹܗ܀ ܥܲܠ ܐܲܦܲܝ̈ ܡܵܘܗܲܒ݂ܬ݂ܵܐ ....
ܥܪܘܼܒ݂ܬܵܐ ܕܐܲܪܒܲܥ ܕܕܸܢܚܵܐ ܕܘܼܟ݂ܪܵܢܵܐ ܕܡܵܪܝ ܐܸܣܛܲܦܵܢܘܿܣ ܣܵܗܕܵܐ
ܥܘܼܢܵܝܵܐ: ܒܕ݂ܘܼܟ݂ܪܵܢ ܣܵܗܕܵܐ ܩܲܕܝܼܫܵܐ. ܐܸܣܛܲܦܵܢܘܿܣ ܒܘܼܟ݂ܪܵܐ ܕܣܵܗܕܹ̈ܐ. ܬܵܘ ܢܸܨܛܲܒܲܬ݂ ܪܘܼܚܵܢܵܐܝܼܬ݂. ܒܝܲܕ݂ ܕܘܼܒܵܪܹ̈ܐ ܕܲܡܝܲܬ݁ܪܘܼܬ݂ܵܐ. ܘܢܸܙܡܲܪ ܫܘܼܒ݂ܚܵܐ ܘܢܸܣܲܒ݂ ܦܲܓ݂ܪܹܗ ܕܒܲܪ ܐܲܠܵܗܵܐ. ܘܲܕ݂ܡܹܗ ܚܲܝܵܐ ܕܢܸܬ݂ܚܲܣܸܐ ܒܹܗ ܗܲܠܸܠܘܼܝܲܗ. ܒܵܬܹ̈ܐ: ܣܵܗܕܵܐ ܙܲܗܝܵܐ ܕܥܲܠ̣ ܠܐܵܓ݂ܘܿܢܵܐ. ܘܲܕ݂ܪܲܫ̣ ܘܚܲܝܸܒ݂ ܠܕܹܐܒܹ̈ܐ ܛܲܡܐܹ̈ܐ. ܢ̣ܚܸܬ݂ ܠܐܵܓ݂ܘܿܢܵܐ ܘܲܙ̣ܟ݂ܵܐ ܒܪܘܼܚܵܐ. ܘܲܣ̣ܠܸܩ ܡܸܢܹܗ ܓܲܢ݇ܒܵܪܵܐܝܼܬ݂. ܘܗܵܐ ܡܙܲܝܚܝܼܢ ܠܹܗ ܥܝܼܪܹ̈ܐ ܘܐ݇ܢܵܫܵܐ. ܠܝܘܿܡ ܕܘܼܟ݂ܪܵܢܹܗ ܒܩܵܠܲܝ̈ ܫܘܼܒ݂ܚܵܐ ܗܲܠܸܠܘܼܝܲܗ܀ ܫܩܲܠ̣ܘ ܗ݇ܘ̣ܵܘ ܟܹܐܦܹ̈ܐ ܘܪܵܓ݂ܡ݁ܝܼܢ ܗ݇ܘ̣ܵܘ ܠܹܗ. ܠܐܸܣܛܲܦܵܢܘܿܣ ܒܘܼܟ݂ܪܵܐ ܕܣܵܗܕܹ̈ܐ. ܘܲܡܨܲܠܸܐ ܗ݇ܘ̣ܵܐ ܥܲܠ ܪ̈ܵܓ݂ܘܿܡܵܘܗܝ. ܒܲܕ݂ܡܘܼܬ݂ ܡܵܪܹܗ ܕܲܩ̣ܥܵܐ ܒܩܲܝܣܵܐ. ܕܠܵܐ ܬܩܝܼܡ ܠܗܘܿܢ ܗܵܕܹܐ ܚܛܝܼܬ݂ܵܐ. ܠܵܐ ܓܹܝܪ ܝܵܕ݂ܥ̇ܝܼܢ ܡܵܢܵܐ ܥܵܒ݂ܕ̇ܝܼܢ ܗܲܠܸܠܘܼܝܲܗ.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܕܸܢܚܵܐ
ܥܘܼܢܵܝܵܐ: ܗܵܢܵܘ ܕܸܒ݂ܚܵܐ ܡܚܲܣܝܵܢܵܐ ܕܝܲܗ̣݇ܒ݂ܠܲܢ ܦܵܪܘܿܩܲܢ. ܕܒܹܗ ܢܸܡܪܘܿܩ ܡܘܼܡܹ̈ܐ ܕܦܲܓ݂ܪ̈ܲܝܢ ܘܚܵܘܒܹ̈ܐ ܟܣܲܝ̈ܵܐ ܕܢܲܦ̮̈ܫܵܬܲܢ. ܘܲܢܕܲܟܸ݁ܐ ܬܹܐܪ̈ܵܬܲܢ ܡ̣ܢ ܦܘܼܠܵܓܼܹ̈ܐ܀ ܘܢܸܣܒ݂ܝܼܘܗܝ ܟܠܲܢ ܒܪܸܚܡ̱ܬ݂ܵܐ ܘܐܵܘܝܘܼܬ݂ܵܐ ܘܚܘܼܒܵܐ ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ. ܒܵܬܹ̈ܐ: ܗܵܐ ܡܵܘܗܲܒ݂ܬ݂ܵܐ ܡܚܲܣܝܲܬ݂ ܡܲܓܵܢ. ܣܲܒ݂ܘ ܡܵܝܘܿܬܹ̈ܐ ܘܐܸܬ݂ܚܲܣܵܘ ܒܵܗ̇܀ ܘܢܸܣܒ݂ܝܼܘܗܝ ܟܠܲܢ ܒܪܸܚܡ̱ܬ݂ܵܐ ....
ܥܪܘܼܒ݂ܬܵܐ ܕܚܲܡܸܫ ܕܕܸܢܚܵܐ ܕܘܼܟ݂ܪܵܢܵܐ ܗ݇ܝ̣ ܕܡܲܠܦܵܢܹ̈ܐ ܝܵܘܢܵܝܹ̈ܐ
ܥܘܼܢܵܝܵܐ ܒܥܲܡܡܹ̈ܐ ܙܡܲܪܘ ܫܘܼܒ݂ܚܵܐ: ܒܕ݂ܘܼܟ݂ܪܵܢ ܡܲܠܦܵܢܹ̈ܐ ܕܐܲܟ݂ܪܸܙ̣ܘ ܫܪܵܪܵܐ. ܒܡܸܠܲܝ̈ܗܘܿܢ ܘܐܲܢ̣ܗܲܪܘ ܠܲܒ݂ܪܝܼܬ݂ܵܐ. ܩܪܘܿܒ݂ܘ ܣܲܒ݂ܘ ܡܵܝܘܿܬܹ̈ܐ. ܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܕܗ̤ܘܝܘ̣ ܫܵܒܹܩ̇ ܚܵܘ̈ܒܵܬ݂ܵܐ. ܢܒ݂ܝܼܵܐ ܩܲܕܝܼܫܵܐ ܓܡܘܼܪܬܵܐ ܝܲܗ̣݇ܒ݂ ܠܹܗ ܪܘܼܚܵܢܵܐ. ܘܐܸܬ݂ܚܲܣܝܼܘ ܚܵܘܒܵܘ̈ܗܝ. ܣܲܒ݂ܘ ܐܲܢ݇ܬ݁ܘܿܢ ܠܲܚܡܵܐ ܚܲܝܵܐ. ܘܲܕ݂ܡܵܐ ܫܸܩܝܵܐ ܪܘܼܚܵܢܵܐ܀ ܘܲܙܡܲܪܘ ܠܹܗ ܥܲܡ ܥܝܼܪܹ̈ܐ ܘܪܸ̈ܒ݁ܘܵܬ݂ܵܐ ܕܟܸܢܫܲܝ̈ ܪܵܘܡܵܐ ܗܲܠܸܠܘܼܝܲܗ܀ ܒܵܬܹ̈ܐ: ܡܸܠܬ݂ܵܐ ܕܡ̣ܢ ܐܲܒ݂ܵܐ ܘܒܲܪܢܵܫܵܐ ܓܡܝܼܪܵܐ ܕܡܸܢܲܢ ܐܲܟ݂ܪܸܙ̣ܘ ܫܲܪܝܼܪܹ̈ܐ. ܡܵܪܝ ܕܝܼܘܿܕܘܿܪܘܿܣ ܘܬܹܐܵܕܘܿܪܘܿܣ ܘܢܸܣܛܘܿܪܝܼܣ ܐܲܬ݂ܠܹܝܛܵܘ̈ܗܝ ܕܡܲܠܟܵܐ ܡܫܝܼܚܵܐ. ܚܲܕ݂ ܒܪܵܐ ܫܲܪܝܼܪܵܐ. ܕܐܲܫ̣ܠܸܡ ܢܲܦ̮ܫܹܗ ܥܲܠ ܐܲܦܲܝ̈ܢ ܘܐܲܚ̣ܝܲܢ ܒܡܹܐܬ݂ܝܼܬܹܗ. ܘܝܲܗ̣݇ܒ݂ܠܲܢ ܦܲܓ݂ܪܹܗ ܩܲܕܝܼܫܵܐ. ܘܲܙܡܲܪܘ ܠܹܗ ܥܲܡ ܥܝܼܪܹ̈ܐ܀ ܨܸܡܚܵܐ ܕܡ̣ܢ ܐܲܒ݂ܵܐ ܝܼܫܘܿܥ ܙܲܪܥܹܗ ܕܐܲܒ݂ܪܵܗܵܡ ܐܲܟ݂ܬܸܒ݂ܘ ܫܲܪܝܼܪܹ̈ܐ. ܕܠܲܚܕ݂ܵܐ ܚܕ݂ܵܝܘܼܬ݂ܵܐ ܕܠܵܐ ܡܸܬ݂ܦܲܪܫܵܐ ܐܸܬ݂ܢܲܩܲܦ ܘܠܲܝܬ݁ ܒܵܗ̇ ܣܸܕ݂ܩܹ̈ܐ ܘܦܘܼܠܵܓܹ̈ܐ. ܘܐܲܚ̣ܪܸܡܘ ܒܡܸܠܲܝ̈ܗܘܿܢ ܕܠܵܐ ܢܸܥܘܿܠ ܠܟܸܢܫܵܐ ܕܥܹܕ݁ܬܵܐ ܟܠ ܡܲܢ ܕܠܵܐ ܡܵܘܕܸ݁ܐ. ܕܒܲܪܢܵܫܵܐ ܗ݇ܘ̣ ܝܼܫܘܿܥ ܕܝܼܪܸܒ݂. ܘܩܲܒܸ݁ܠ ܡܵܘܬܵܐ ܚܠܵܦ ܟܠܲܢ܀ ܘܲܙܡܲܪܘ ܠܹܗ ܥܲܡ... ܗܵܕܲܐ ܗ݇ܝ̣ ܬܵܘܕ݁ܝܼܬ݂ܵܐ ܕܐܲܟ݂ܪܸܙ̣ܘ ܒܐܲܪܥܵܐ ܫܲܪܝܼܪܹ̈ܐ ܘܣܵܡ̣ܘ ܒܲܟ݂ܬܼܵܒܲܝ̈ܗܘܿܢ. ܕܒܹܝܬ݂ ܕܝܼܘܿܕܘܿܪܘܿܣ ܘܬܹܐܵܕܘܿܪܘܿܣ ܘܢܸܣܛܘܿܪܝܼܣ ܕܒܲܪܢܵܫܵܐ ܗ݇ܘ̣ ܕܲܗܘ̤ܵܐ ܡܵܪܝܵܐ. ܘܫܲܩ̣ܠܹܗ ܒܵܪܘܿܝܵܐ ܐܲܝܟܼ ܪܹܫܝܼܬ݂ܵܐ ܡ̣ܢ ܓܸܢܣܲܢ ܘܩܲܒ݂ܥܹܗ ܒܲܙܩܝܼܦܵܐ. ܘܝܲܗ̣݇ܒ݂ܠܲܢ ܚܲܝܹ̈ܐ ܕܲܠܥܵܠܲܡ. ܘܲܙܡܲܪܘ ܠܹܗ ܀
ܚܲܕ݂ܒ݁ܫܲܒܵܐ ܕܚܲܡܫܵܐ ܕܕܸܢܚܵܐ
ܥܘܼܢܵܝܵܐ ܒܩܵܠ ܫܘܼܒ݂ܚܵܐ ܠܗ̇ܘ ܚܲܝܠܵܐ: ܥܲܡܡܹ̈ܐ ܙܡܲܪܘ ܫܘܼܒ݂ܚܵܐ ܠܗ̇ܘ ܕܲܒ݂ܪ̈ܲܚܡܵܘܗܝ ܣܲܓܝܼܐܹ̈ܐ ܐܸܬ݂ܵܐ ܡ̣ܢ ܪܵܘܡܵܐ. ܘܐܲܬ݂ܩܸܢ ܒܛܲܝܒ݁ܘܼܬܹܗ ܒܥܹܕ݁ܬܵܐ ܦܵܬ݂ܘܿܪ ܡܲܠܟ݁ܘܼܬ݂ܵܐ ܕܲܡܠܸܐ ܚܲܝܹ̈ܐ ܘܒ݂ܘܼܣܵܡܹ̈ܐ. ܦܲܓ݂ܪܹܗ ܝܲܩܝܼܪܵܐ ܘܲܕ݂ܡܹܗ ܟܵܣܵܐ ܕܦܘܼܪܩܵܢܵܐ. ܝܲܗ̣݇ܒ݂ ܠܲܢ ܒܲܪ ܡܲܠܟܵܐ ܢܸܣܒ݂ܝܼܘܗܝ ܘܢܸܬ݂ܚܲܣܸܐ ܒܹܗ. ܘܥܲܡ ܟܪ̈ܘܿܒܹܐ ܘܲܣܪ̈ܵܦܹܐ ܢܸܩܥܸܐ ܒܩܵܠܹ̈ܐ ܕܬܼܵܘܕܝܼܬ݂ܵܐ ܗܲܠܸܠܘܼܝܲܗ. ܒܵܬܹ̈ܐ: ܡܲܢ̣ܘܼ ܚ̣ܙܵܐ ܐܲܚܲܝ̈ ܡܲܠܟܵܐ ܕܲܥ̣ܒܲܕ݂ ܡܸܫܬ݁ܘܼܬ݂ܵܐ ܠܲܒ݂ܪܹܗ ܚܲܒ݁ܝܼܒ݂ܵܐ. ܘܲܚܠܵܦ ܬܘܼܩܵܢܹ̈ܐ ܠܹܗ ܠܲܒ݂ܪܹܗ ܥ̣ܒܲܕ݂ ܗ̣݇ܘܵܐ ܕܸܒ݂ܚܵܐ ܕܲܢܒܲܣܸܡ ܒܹܗ ܠܲܙܡܝܼܢܵܘ̈ܗܝ. ܗܵܐ ܥܒ݂ܵܕ݂ܵܐ ܚܲܕ݂ܬ݂ܵܐ ܕܠܵܐ ܗܘ̤ܵܐ ܡ̣ܢ ܡܬ݂ܘܿܡ ܐܲܟ݂ܘܵܬܹܗ. ܕܒܲܚܠܘܼܠܹܗ ܕܚܲܬ݂ܢܵܐ ܦܲܓ݂ܪܹܗ ܚܲܝܵܐ ܡܸܬ݂ܦܲܠܲܓ݂܀ ܘܥܲܡ ܟܪ̈ܘܿܒܹܐ ܘܲܣܪ̈ܵܦܹܐ܀ ܠܗܵܕܹܐ ܡܸܫܬ݁ܘܼܬ݂ܵܐ ܕܵܘܝܼܕ݂ ܡܲܠܟܵܐ ܐܸܬ݂ܪܲܓ݂ܪܲܓ݂ ܘܟ݂ܠ ܝܘܿܡ ܙܵܡܲܪ ܗ̣݇ܘܵܐ. ܕܟ݂ܠܹܗ ܫܘܼܒ݂ܚܵܐ ܕܒܲܪ݇ܬ݂ ܡܲܠܟܵܐ ܡ̣ܢ ܠܓ݂ܵܘ ܐܝܼܬܼܵܘܗܝ ܘܲܡܨܲܒ݁ܬ݂ܵܐ ܒܕܲܗܒ݂ܵܐ ܛܵܒ݂ܵܐ. ܫܘܼܦܪܵܗ̇ ܕܡܸܫܬ݁ܘܼܬ݂ܵܐ ܢܒ݂ܝܼܵܐ ܒܐ݇ܪܵܙܵܐ ܚ̣ܵܘܝܼ ܠܲܢ. ܗܵܐ ܕܹܝܢ ܒܲܫܪܵܪܵܐ ܒܹܟ݂ܝ ܥܹܕ݁ܬܵܐ ܗܵܐ ܡܸܬ݂ܦܲܠܲܓ݂܀ ܘܥܲܡ ܟܪ̈ܘܿܒܹܐ ܘܲܣܪ̈ܵܦܹܐ܀
ܬܪܹܝܢܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ
ܥܘܼܢܵܝܵܐ: ܥܲܡܡܹ̈ܐ ܐܵܘܕܵܘ ܒܥܹܕܲܬ݂ ܩܘܼܕ݂ܫܵܐ. ܠܲܒ݂ܪܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܐܲܠܵܗܘܼܬ݂ܵܐ ܕܟܲܣܝܵܐ ܡ̣ܢ ܟܠ. ܓܠܵܬ̤ ܟܲܣܝܘܼܬ݂ܵܗ̇ ܕܬܲܚܸܐ ܠܟ݂ܠܵܐ. ܠܲܒ݂ܪܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ.
ܬܠܵܬ݂ܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ
ܥܘܼܢܵܝܵܐ: ܫܘܼܒ݂ܚܵܐ ܠܪ̈ܲܚܡܹܐ ܕܫܲܠ̣ܚܘܼܟܼ ܨܹܐܕܲܝܢ: ܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܒܗܲܝܟܲܠ ܦܲܓ݂ܪܵܐ ܫܪܵܬ̤ ܐܝܼܬ݂ܘܼܬ݂ܵܐ: ܘܠܵܐ ܣܦܲܩ̣ ܓܸܢܣܲܢ ܢܣܲܝܸܟܼ ܝܵܬ݂ܵܗ̇: ܡܫܝܼܚܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ.
ܐܲܪܒܲܥܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ
ܥܘܼܢܵܝܵܐ: ܡܵܪܲܢ ܩܲܒܸ݁ܠ ܒܵܥܘܼܬ݂ ܥܹܕܲܬ݂ ܩܘܼܕ݂ܫܵܐ: ܕܲܡܦܝܼܣܵܐ ܠܵܟܼ ܡܸܛܠ ܥܲܡܵܟܼ ܦܪܝܼܩ ܒܲܨܠܝܼܒ݂ܵܟܼ. ܕܗܵܐ ܡܸܬ݂ܝܲܐܲܒ݂ ܠܫܘܼܒ݂ܩܵܢܵܐ. ܐܲܫܘܵܝܗܝ ܡܵܪܝ ܠܦܲܓ݂ܪܵܟܼ ܘܲܕ݂ܡܵܟܼ. ܕܢܸܗܘܸܐ ܥܘܼܡܪܵܐ ܠܐܝܼܩܵܪܵܟ݂. ܘܬܸܬ݁ܢܝܼܚ ܒܹܗ ܐܲܠܵܗܘܼܬܼܵܟ݂. ܕܢܵܘܕܸܐ ܠܵܟ݂ ܥܲܠ ܡܵܘܗܲܒ݂ܬܼܵܟ݂. ܒܵܬܹ̈ܐ: ܟܸܢܫܲܢ ܕܣܵܓܹܕ݂ ܠܐܲܠܵܗܘܼܬܼܵܟ݂. ܐܲܣܓܵܐ ܠܘܵܬܹܗ ܟܠ ܥܘܼܕ݂ܪ̈ܵܢܝܼܢ܀ ܘܬܸܬ݁ܢܝܼܚ ܒܹܗ.... ܒܪܵܐ ܕܐܲܠܵܗܵܐ ܚܘܼܣ ܥܲܠ ܥܲܡܵܟܼ. ܕܗܵܐ ܡܸܬ݂ܟܲܫܲܦ ܘܫܵܐܹ̇ܠ ܪ̈ܲܚܡܹܐ܀ ܘܬܸܬ݁ܢܝܼܚ ܒܹܗ.... ܩܲܒܸ݁ܠ ܡܵܪܲܢ ܒܵܥܘܼܬ݂ ܟܠܲܢ. ܕܲܒ݂ܬܲܟ݂ܫܲܦ̮ܬܵܐ ܡܩܲܪܒ݂ܝܼܢܲܢ ܠܵܟ݂܀ ܘܬܸܬ݁ܢܝܼܚ ܒܹܗ....
ܕܚܲܡܫܵܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ ܕܡܸܬ݂ܝܼܕܲܥ ܕܩܘܼܒܵܠܛܲܝܒ݁ܘܼܬ݂ܵܐ
ܥܘܼܢܵܝܵܐ: ܡܵܪܲܢ ܩܲܒܸ݁ܠ ܒܵܥܘܼܬ݂ ܥܹܕܲܬ݂ ܩܘܼܕ݂ܫܵܐ: ܕܲܡܦܝܼܣܵܐ ܠܵܟܼ ܡܸܛܠ ܥܲܡܵܟܼ ܦܪܝܼܩ ܒܲܨܠܝܼܒ݂ܵܟܼ. ܕܗܵܐ ܡܸܬ݂ܝܲܐܲܒ݂ ܠܫܘܼܒ݂ܩܵܢܵܐ. ܐܲܫܘܵܝܗܝ ܡܵܪܝ ܠܦܲܓ݂ܪܵܟܼ ܘܲܕ݂ܡܵܟܼ. ܕܢܸܗܘܸܐ ܥܘܼܡܪܵܐ ܠܐܝܼܩܵܪܵܟ݂܀ ܘܬܸܬ݁ܢܝܼܚ ܒܹܗ ܐܲܠܵܗܘܼܬܼܵܟ݂. ܕܢܵܘܕܸ݁ܐ ܥܲܠ ܡܵܘܗܲܒ݂ܬܼܵܟ݂. ܒܵܬܹ̈ܐ: ܟܸܢܫܲܢ ܕܣܵܓܹܕ݂ ܠܐܲܠܵܗܘܼܬܼܵܟ݂. ܐܲܣܓܵܐ ܠܘܵܬܹܗ ܟܠ ܥܘܼܕ݂ܪ̈ܵܢܝܼܢ܀ ܘܬܸܬ݁ܢܝܼܚ ܒܹܗ܀ ܒܪܵܐ ܕܐܲܠܵܗܵܐ ܚܘܼܣ ܥܲܠ ܥܲܡܵܟܼ. ܕܗܵܐ ܡܸܬ݂ܟܲܫܲܦ ܘܫܵܐܹ̇ܠ ܪ̈ܲܚܡܹܐ܀ ܘܬܸܬ݁ܢܝܼܚ ܒܹܗ܀ ܩܲܒܸ݁ܠ ܡܵܪܲܢ ܒܵܥܘܼܬ݂ ܟܠܲܢ. ܕܲܒ݂ܬܲܟ݂ܫܲܦ̮ܬܵܐ ܡܩܲܪܒ݂ܝܼܢܲܢ ܠܵܟܼ܀ ܘܬܸܬ݁ܢܝܼܚ ܒܹܗ܀
ܥܪܘܼܒ݂ܬܵܐ ܕܫܸܬ݂ ܕܕܸܢܚܵܐ ܕܘܼܟ݂ܪܵܢܵܐ ܕܡܲܠܦܵܢܹ̈ܐ ܐ݇ܣܘܼܪ̈ܝܵܝܹܐ
ܥܘܼܢܵܝܵܐ: ܒܗܵܢܵܐ ܥܹܐܕ݂ܵܐ ܕܕ݂ܘܼܟ݂ܪܵܢܗܘܿܢ. ܕܡܲܠܦܵܢܹ̈ܐ ܕܗܲܝܡܵܢܘܼܬ݂ܵܐ. ܬܵܘ ܢܸܬ݂ܒܲܣܲܡ ܒܐ݇ܪ̈ܵܙܹܐ ܫܒ݂ܝܼܚܹ̈ܐ. ܕܦܲܓ݂ܪܹܗ ܘܲܕ݂ܡܹܗ ܕܒܲܪ ܐܲܠܵܗܵܐ. ܕܢܲܫܘܸܐ ܠܟ݂ܠܲܢ ܠܡܸܙܡܲܪ ܫܘܼܒ݂ܚܵܐ. ܠܲܫܡܹܗ ܪܲܒܵܐ ܒܕ݂ܘܼܟ݂ܪܵܢ ܟܵܗܢܹ̈ܐ ܗܲܠܸܠܘܼܝܲܗ. ܒܵܬܹ̈ܐ: ܓܲܙܵܐ ܕܲܡܠܸܐ ܟܠ ܚܸܟ݂̈ܡܵܬ݂ܵܐ. ܦ̣ܬܲܚ ܪܘܼܚܩܘܼܕ݂ܫܵܐ ܩܕ݂ܵܡ ܡܲܠܦܵܢܹ̈ܐ. ܘܲܢ̣ܣܲܒ݂ ܡܸܢܹܗ ܥܘܼܬ݂ܪܵܐ ܪܲܒܵܐ. ܕܒ݂ܘܼܕܵܩ ܐ݇ܪ̈ܵܙܹܐ ܐܲܠܵܗܵܝܹ̈ܐ. ܘܡ̣ܢ ܣܝܼ̈ܡܵܬ݂ܵܐ ܕܝܘܼܬ݂ܪ̈ܵܢܲܝܗܘܿܢ. ܐܲܥ̣ܬܲܪܘ ܠܲܒ݂ܢܹܝ̈ܗ̇ ܕܥܹܕܲܬ݂ ܩܘܼܕ݂ܫܵܐ. ܗܲܠܸܠܘܼܝܲܗ܀ ܩܪܵܒ݂ܵܐ ܪܲܒܵܐ ܥ̣ܒܲܕ݂ܘ ܡܲܠܦܵܢܹ̈ܐ. ܥܲܡ ܣܵܛܵܢܵܐ ܘܲܒ݂ܢܲܝ̈ ܓܲܒܹ݁ܗ. ܘܒܲܛܸܠ̣ܘ ܣܸܕ݂ܩܹ̈ܐ ܕܗܲܪ̈ܵܛܝܼܩܹܐ. ܘܒܸܕ݂ܝܵܐ ܕܚܲܢܦܹ̈ܐ ܘܕܲܝܗܘܼܕ݂ܵܝܹ̈ܐ. ܘܐܲܟ݂ܪܸܙܘ ܐܝܼܬ݂ܝܵܐ ܕܲܠ̣ܒܸܫ ܦܲܓ݂ܪܲܢ ܘܲܗܘ̤ܵܐ ܡܫܝܼܚܵܐ ܐܲܠܵܗ ܘܒܲܪܢܵܫ. ܗܲܠܸܠܘܼܝܲܗ.
ܚܲܕ݂ܒ݁ܫܲܒܵܐ ܕܸܫܬܵܐ ܕܕܸܢܚܵܐ
ܥܘܼܢܵܝܵܐ ܒܩܵܠ ܗܵܐ ܒܓ݂ܵܘ ܥܹܕ݁ܬܵܐ: ܗܵܐ ܦܵܬ݂ܘܿܪܵܐ ܡܠܸܐ ܛܘܼܒܹ̈ܐ ܒܐ݇ܪܵܙܵܐ ܡܲܬ݂ܩܲܢ. ܥܝܼܪܹ̈ܐ ܒܪܵܘܡܵܐ ܘܟ݂ܵܗܢܹ̈ܐ ܒܥܹܕ݁ܬܵܐ ܡܙܲܝܚܝܼܢ ܠܹܗ ܒܕܸܚܠܵܐ܀ ܡܸܟܹ݁ܝܠ ܐܘܿ ܡܵܝܘܿܬܹ̈ܐ ܛܥܝܼܢܲܝ̈ ܡܵܘܒ݁ܠܹ̈ܐ. ܐܲܢܝܼܚܘ ܡܸܢܟ݂ܘܿܢ ܝܘܼܩܪܵܐ ܕܚܵܘܒܲܝ̈ܟ݁ܘܿܢ. ܣܲܒ݂ܘ ܘܐܸܬ݂ܚܲܣܵܘ ܘܲܩܢܵܘ ܚܲܝܹ̈ܐ. ܘܫܲܒܲܚܘ ܠܲܡܫܝܼܚܵܐ ܘܝܲܒܸ݁ܒ݂ܘ ܘܐܸܡܲܪܘ ܗܲܠܸܠܘܼܝܲܗ. ܒܵܬܹ̈ܐ: ܬܵܘ ܢܵܘܕܸ݁ܐ ܠܹܗ ܠܝܼܫܘܿܥ ܡܲܠܟܲܢ. ܕܐܸܬ݂ܵܐ ܒܚܘܼܒܹܗ ܘܦܲܪܩܹܗ ܠܓܸܢܣܲܢ܀ ܡܸܟܹ݁ܝܠ ܐܘܿ ܡܵܝܘܿܬܹ̈ܐ...܀
ܥܪܘܼܒ݂ܬܵܐ ܕܲܫܒܲܥ ܕܒ݂ܵܬܲܪ ܕܸܢܚܵܐ ܕܘܼܟ݂ܪܵܢܵܐ ܕܚܲܕ݂ ܦܲܪܨܘܿܦܵܐ
ܥܘܼܢܵܝܵܐ: ܫܒ݂ܝܼܚܘܼ ܝܵܘܡܹܗ ܕܕ݂ܘܼܟ݂ܪܵܢܵܟܼ. ܘܲܪܓ݂ܝܼܓ݂ ܝܲܬ݁ܝܼܪ ܥܘܼܢܕܵܢܵܟܼ. ܐܝܼܙܓܲܕܵܐ ܙܵܪܲܥ̇ ܫܲܝܢܵܐ. ܘܟ݂ܵܗܢܵܐ ܪܵܕܹܦ ܚܲܢܦܘܼܬ݂ܵܐ. ܠܵܟܼ ܓܹܝܪ ܗܵܐ ܡܣܲܟܸ݁ܐ ܟܘܼܪܣܲܝ ܫܘܼܒ݂ܚܵܐ ܠܡܸܬܲܒ݂. ܐܲܒ݂ܵܐ ܒܲܡܪ̈ܵܘܡܹܐ. ܘܲܒ݂ܪܵܐ ܘܪܘܼܚܵܐ ܟܠܝܼܠܵܐ ܕܙܵܟ݂ܘܼܬ݂ܵܐ ܓܵܕ݂ܠ̇ܝܼܢ ܠܐܝܼܩܵܪܵܟ݂܀ ܘܟܸܢܫܹ̈ܐ ܕܲܟ݂ܪ̈ܘܿܒܹܐ. ܩܵܥܹܝܢ ܫܲܘܝܵܐܝܼܬ݂. ܫܘܼܒ݂ܚܵܐ ܠܗܵܘ̇ ܕܲܓ݂ܒ݂ܵܟܼ. ܘܐܲܫܠ̱ܛܵܟܼ ܥܲܠ ܓܲܙܹܗ. ܘܐܲܓ݂ܥܸܠ̣ ܠܵܟܼ ܡܵܘܗܲܒ݂ܬܹܗ. ܘܢܸܩܥܸܐ ܠܹܗ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܐܘܿ ܬܲܓܵܪܵܐ ܪܘܼܚܵܢܵܐ. ܕܩܲܒܸ݁ܠ̣ ܟܸܣܦܵܐ ܡ̣ܢ ܡܵܪܹܗ. ܘܐܸܬ݁ܬܲܓܲܪ ܐܲܝܟܼ ܨܸܒ݂ܝܵܢܹܗ. ܘܙܲܡ̣ܢܹܗ ܠܲܓ݂ܢܘܿܢ ܡܲܠܟ݁ܘܼܬܹܗ܀ ܘܟܸܢܫܹ̈ܐ ܕܲܟ݂ܪ̈ܘܿܒܹܐ܀ ܣܝܼܡܵܐ ܣܝܼܡܬ݂ܵܟܼ ܒܲܫܡܲܝܵܐ. ܐܲܝܟܵܐ ܕܣܵܣܵܐ ܠܵܐ ܩܵܪܹܒ݂. ܘܠܵܐ ܡܸܫܬܲܠܛܝܼܢ ܓܲܢܵܒܹ̈ܐ. ܠܡܸܒܲܙ ܥܘܼܬ݂ܪܵܐ ܕܣܝܼ̈ܡܵܬܼܵܟ݂܀ ܘܟܸܢܫܹ̈ܐ ܕܲܟ݂ܪ̈ܘܿܒܹܐ܀ ܠܵܐ ܣܵܟܼ ܕܵܥܹ̇ܟܼ ܠܲܡܦܹܝܕ݂ܵܟ݂. ܕܲܡܠܸܐ ܡܸܫܚܵܐ ܕܚܵܘܣܵܢܵܐ. ܘܠܵܐ ܡܸܬ݁ܬ݁ܚܸܕ݂ ܬܲܪܥܵܐ ܩܕ݂ܵܡܲܝܟ. ܡܵܐ ܕܥܵܐ̇ܠܲܬ݁ ܠܒܹܝܬ݂ ܡܲܠܟ݁ܘܼܬ݂ܵܐ܀ ܘܟܸܢܫܹ̈ܐ ܕܲܟ݂ܪ̈ܘܿܒܹܐ܀
ܐ݇ܚܪܹܢܵܐ ܕܣܵܗܕܵܐ ܒܗܵܐ ܒܓ݂ܵܘ ܥܹܕ݁ܬܵܐ: ܒܕ݂ܘܼܟ݂ܪܵܢ ܣܵܗܕܵܐ ܩܲܕܝܼܫܵܐ. ܩܪܘܿܒ݂ܘ ܣܲܒ݂ܘ ܐܲܚܲܝ̈ ܦܲܓ݂ܪܵܐ ܚܲܝܵܐ ܘܡܲܚܝܵܢܵܐ ܕܒܲܪ ܡܵܪܹܟ݁ܠ. ܕܲܪܫܲܡ̣ ܕܘܼܟ݂ܪܵܢܹܗ ܥܲܠ ܡܲܕ݂ܒ݁ܚܹܗ. ܘܐܲܫ̣ܪܝܼ ܚܲܝܠܹܗ ܟܲܣܝܵܐ ܒܗܲܕܵܡܵܘ̈ܗܝ܀ ܕܢܸܗܘܘܿܢ ܡܲܪܕܹܝܢ ܟܠ ܥܘܼܕ݂ܪ̈ܵܢܝܼܢ ܒܥܹܕܲܬ݂ ܩܘܼܕ݂ܫܵܐ. ܕܒ݂ܵܗ̇ ܙܵܡ̇ܪܝܼܢܲܢ ܗܲܠܸܠܘܼܝܲܗ. ܒܵܬܹ̈ܐ: ܣܵܗܕܵܐ ܕܲܗܘ̤ܵܐ ܓܹܐܙܲܒ݂ܪܵܐ ܪܘܼܚܵܢܵܝܵܐ. ܥܲܕܲܪ ܠܟܸܢܫܲܢ ܒܲܨ̈ܠܵܘܵܬܼܵܟ݂. ܕܲܪܫܲܡ̣ ܕܘܼܟ݂ܪܵܢܵܟܼ ܥܲܠ ܡܲܕ݂ܒ݁ܚܹܗ. ܘܐܲܫ̣ܪܝܼ ܚܲܝܠܹܗ ܟܲܣܝܵܐ ܒܗܲܕܵܡܲܝ̈ܟ. ܕܢܸܗܘܘܿܢ ܡܲܪܕܹܝܢ ܟܠ...܀
ܚܲܕ݂ܒ݁ܫܲܒܵܐ ܕܫܲܒ݂ܥܵܐ
ܥܘܼܢܵܝܵܐ ܒܗܵܘ ܕܕܸܢܚܵܐ: ܬܵܘ ܟܠܲܢ ܢܸܬ݂ܩܲܪܲܒ݂ ܠܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܒܕܸܚܠ̱ܬ݂ܵܐ ܘܒܲܪܬܹܝܬ݂ܵܐ ܘܲܒ݂ܚܘܼܒܵܐ ܢܸܣܒ݂ܝܼܘܗܝ ܘܲܢܫܲܒܲܚ. ܗ̤ܘ ܓܹܝܪ ܒܐ݇ܪܵܙܵܐ ܠܐܹܫܲܥܝܵܐ ܢܒ݂ܝܼܵܐ ܐܸܬ݂ܚܵܘܝܼ ܗ݇ܘ̣ܵܐ. ܓܡܘܼܪܬܵܐ ܝܲܗ̣݇ܒ݂ ܠܹܗ ܪܘܼܚܵܢܵܐ ܘܐܸܬ݂ܚܲܣܝܼܘ ܚܵܘܒܵܘ̈ܗܝ܀ ܠܘܵܬܹܗ ܢܸܣܬܲܪܗܲܒ݂ ܟܠܲܢ. ܘܠܲܐܠܵܗܘܼܬܹܗ ܢܸܣܓ݁ܘܿܕ݂ ܥܲܡ ܟܸܢܫܲܝ̈ ܪܵܘܡܵܐ ܟܲܕ݂ ܐܵܡ̇ܪܝܼܢܲܢ. ܩܲܕܝܼܫܲܬ݁. ܩܲܕܝܼܫܲܬ݁. ܩܲܕܝܼܫܲܬ݁. ܐܝܼܬ݂ܝܵܐ ܓܢܝܼܙܵܐ ܗܲܠܸܠܘܼܝܲܗ. ܒܵܬܹ̈ܐ: ܗܵܢܵܘ ܣܲܒ݂ܪܵܐ ܕܠܹܗ ܡܣܲܟܹ݁ܝܢ ܗ݇ܘ̣ܵܘ ܢܒ݂ܝܼܹ̈ܐ ܒܐ݇ܪܵܙܵܐ. ܝܼܫܘܿܥ ܡܲܠܟܲܢ ܕܲܕ݂ܢܲܚ̣ ܒܚܘܼܒܹ݁ܗ ܡ̣ܢ ܒܹܝܬ݂ ܕܵܘܝܼܕ݂܀ ܠܘܵܬܹܗ ܢܸܣܬܲܪܗܲܒ݂ ܟܠܲܢ....܀
ܥܪܘܼܒ݂ܬܵܐ ܕܲܬ݂ܡܵܢܹܐ ܕܕܸܢܚܵܐ ܕܘܼܟ݂ܪܵܢܐ ܕܐܲܪܒ݁ܥܝܼܢ ܣܵܗܕܹ̈ܐ
ܘܙܵܕܹܩ ܠܵܟܼ ܕܬܸܕܲܥ ܐܘܿ ܡܵܪܝ: ܕܲܒ݂ܫܲܢ݇ܬܵܐ ܕܣܵܠܹ̇ܩ ܥܹܐܕ݂ܵܐ ܕܲܩܝܵܡܬܵܐ ܥܕܲܡܵܐ ܠܥܸܣܪܝܼܢ ܘܐܲܪܒ݁ܥܵܐ ܐܵܘ ܥܸܣܪܝܼܢ ܘܚܲܡܫܵܐ ܒܢܝܼܣܵܢ: ܡܸܣܬ݁ܢܸܩ ܐܲܢ݇ܬ݁ ܗܵܪܟܵܐ ܥܲܠ ܕܘܼܟ݂ܪܵܢܵܐ. ܩܕ݂ܵܡ ܥܪܘܼܒ݂ܬܵܐ ܕܥܲܢܝܼ̈ܕܹܐ ܥܒܸܕ݂ ܕܘܼܟ݂ܪܵܢܵܐ ܕܐܲܪܒ݁ܥܝܼܢ ܣܵܗܕܹ̈ܐ. ܫܲܡܸܫ ܐܲܝܟܼ ܛܲܟ݂ܣܵܐ ܕܲܥܪܘܼܒ݂ܬܵܐ ܕܡܵܘܕܝܵܢܹ̈ܐ ܡܫܲܡ̱ܠܝܵܐܝܼܬ݂. (ܚܙܝ ܠܬܚܬ)
ܚܲܕ݂ܒ݁ܫܲܒܵܐ ܕܲܬ݂ܡܵܢܝܵܐ ܕܕܸܢܚܵܐ
ܥܘܼܢܵܝܵܐ ܒܗܵܘ ܕܐܘܿܫܲܥܢܹ̈ܐ: ܬܵܘ ܟܠܲܢ ܐܲܟܲܚ݇ܕ݂ ܢܙܲܝܚܝܼܘܗܝ ܠܕܸܒ݂ܚܵܐ ܕܦܲܓ݂ܪܹܗ ܕܲܒ݂ܪܵܐ ܡܫܝܼܚܵܐ. ܕܚܲܕ݁ܝܼ ܠܥܝܼܪܹ̈ܐ ܒܝܘܿܡ ܡܵܘܠܵܕܹܗ. ܘܐܲܦܨܲܚ̣ ܠܐܲܪ̈ܥܵܢܹܐ ܒܲܣܒܲܪܬ݂ܵܐ ܕܦܘܼܪܩܵܢܲܢ. ܗܵܢܵܘ ܐ݇ܪܵܙܵܐ ܟܲܣܝܵܐ ܕܐܸܬ݂ܓ݁ܠܝܼ. ܘܲܥ̣ܒܲܕ݂ ܬܲܪܥܘܼܬ݂ܵܐ ܘܫܲܝܸܢ ܠܥܸܠܵܝܹ̈ܐ ܘܲܠܬܲܚܬܵܝܹ̈ܐ ܒܲܙܩܝܼܦܹܗ. ܘܲܒ݂ܝܲܕ݂ ܕܸܒ݂ܚܵܐ ܕܲܩܢܘܿܡܹܗ ܚܲܣ̣ܝܼ ܚܵܘ̈ܒܵܬܲܢ. ܘܥܲܠ ܗܵܕܹܐ ܟܠܲܢ ܫܲܘܝܵܐܝܼܬ݂ ܢܚܲܒ݁ܒ݂ܝܼܘܗܝ ܠܦܲܓ݂ܪܹܗ ܒܙܲܗܝܘܼܬ݂ܵܐ܀ ܘܢܸܩܥܸܐ ܠܹܗ ܥܲܡ ܚܲܝ̈ܠܵܘܵܬ݂ܵܐ ܫܡܲܝܵܢܹ̈ܐ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܢܗܲܠܠܝܼܘܗܝ ܠܲܒ݂ܪܵܐ ܥܲܡ ܪ̈ܘܼܚܵܢܹܐ. ܕܲܥ̣ܒܲܕ݂ ܫܲܝܢܵܐ ܒܪܵܘܡܵܐ ܘܥܘܼܡܩܵܐ܀ ܘܢܸܩܥܸܐ ܠܹܗ ܥܲܡ ܚܲܝ̈ܠܵܘܵܬ݂ܵܐ ܫܡܲܝܵܢܹ̈ܐ ܘܢܹܐܡܲܪ ܗܲܠܸܠܘܼܝܲܗ.
ܥܪܘܼܒ݂ܬܵܐ ܕܲܬ݂ܫܲܥ ܕܕܸܢܚܵܐ ܕܘܼܟ݂ܪܵܢܵܐ ܗ݇ܝ̣ ܕܥܲܢܝܼܕܹ̈ܐ
ܥܘܼܢܵܝܵܐ ܡܸܢܹܗ ܘܠܹܗ: ܒܪܝܼܟܼ ܕܲܒ݂ܩܵܠܹܗ ܡܸܬ݂ܢܲܚܡܝܼܢ: ܥܲܢܝܼܕܹ̈ܐ ܡ̣ܢ ܓܵܘ ܩܲܒ݂ܪܹ̈ܐ. ܘܩܵܝܡ̇ܝܼܢ ܘܝܵܗ̇ܒ݁ܝܼܢ ܬܸܫܒ݁ܘܿܚܬܵܐ: ܠܲܡܢܲܚܡܵܢܵܐ ܕܦܲܓ݂ܪ̈ܲܝܗܘܿܢ܀ ܒܵܬܹ̈ܐ: ܩܵܠܵܐ ܕܡܲܟ݂ܪܸܙ ܦܘܼܪܩܵܢܵܐ: ܫ̣ܡܲܥܘ ܡܵܝܘܿܬܹ̈ܐ ܘܐܸܬ݂ܢܲܚܲܡܘ. ܒܦܲܓ݂ܪܵܐ ܘܲܕ݂ܡܵܐ ܡܸܬ݂ܟܲܪܙܵܐ: ܚܵܝܲܬ݂ ܡܝܼܬܹ̈ܐ ܒܦܲܓ݂ܪ̈ܲܝܗܘܿܢ܀ ܥܸܠܬ݂ܵܐ ܕܦܹܐܪܵܐ ܕܐܝܼܠܵܢܵܐ: ܕܸܪܫܲܬ̤ ܐܘܼܪܚܵܐ ܠܒܹܝܬ݂ ܡܝܼܬܹ̈ܐ. ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ: ܕܪܲܫ̣ ܠܲܢ ܐܘܼܪܚܵܐ ܠܲܫܡܲܝܵܐ܀
ܕܚܲܕ݂ܒ݁ܫܲܒܵܐ ܕܡܲܥܵܠܲܝ̈ ܨܵܘܡܵܐ ܪܲܒܵܐ
ܥܘܼܢܵܝܵܐ ܒܗܵܢܵܘ ܕܸܒ݂ܚܵܐ: ܦܵܬ݂ܘܿܪ ܩܘܼܕ݂ܫܵܐ ܪܘܼܚܵܢܵܐ. ܐܲܬ݂ܩܸܢ ܩܘܼܕ݂ܡܲܝܢ ܡܫܝܼܚܵܐ ܦܵܪܘܿܩܲܢ. ܣܲܒ݂ܘ ܥܲܡܡܹ̈ܐ ܦܲܓ݂ܪܹܗ ܘܲܕ݂ܡܹܗ ܕܲܒ݂ܪܵܐ ܕܛܵܒ݂ܘܼ ܠܲܕ݂ܫܵܩܹܠ ܠܹܗ. ܒܕܸܚܠܵܐ ܘܚܘܼܒܵܐ ܢܸܬ݂ܩܲܪܲܒ݂ ܠܹܗ܀ ܘܢܸܣܓ݁ܘܿܕ݂ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ. ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ. ܒܵܬܹ̈ܐ: ܬܵܘ ܢܸܨܛܲܒܲܬ݂ ܪܘܼܚܵܢܵܐܝܼܬ݂. ܒܨܵܘܡܵܐ ܕܲܟ݂ܝܵܐ ܡܕܲܟܸ݁ܐ ܡܘܼܡܹ̈ܐ܀ ܘܢܸܣܓ݁ܘܿܕ݂ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ. ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܩܲܕ݂ܡܵܝܵܐ ܕܨܵܘܡܵܐ
ܥܘܼܢܵܝܵܐ: ܥܲܡܡܹ̈ܐ ܐܵܘܕܵܘ ܒܥܹܕܲܬ݂ ܩܘܼܕ݂ܫܵܐ: ܠܲܒ݂ܪܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܐܲܠܵܗܘܼܬ݂ܵܐ ܕܟܲܣܝܵܐ ܡ̣ܢ ܟܠ: ܓܠܵܬ̤ ܟܲܣܝܘܼܬ݂ܵܗ̇ ܕܬܲܚܸܐ ܠܟ݂ܠܵܐ.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܩܲܕ݂ܡܵܝܵܐ ܕܨܵܘܡܵܐ
ܥܘܼܢܵܝܵܐ: ܫܘܼܒ݂ܚܵܐ ܠܪ̈ܲܚܡܹܐ ܕܫܲܠܚܘܼܟܼ ܨܹܐܕܲܝܢ: ܡܫܝܼܚܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܒܗܲܝܟܲܠ ܦܲܓ݂ܪܵܐ ܫܪܵܬ̤ ܐܝܼܬ݂ܘܼܬ݂ܵܐ: ܘܠܵܐ ܣܦܲܩ̣ ܓܸܢܣܲܢ ܢܣܲܝܸܟܼ ܝܵܬ݂ܵܗ̇.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܩܲܕ݂ܡܵܝܵܐ ܕܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܲܒ݂ܦܲܓ݂ܪܹܗ ܚܪܘܼܪܹ̈ܐ ܝܲܗ̣݇ܒ݂ ܠܲܢ. ܘܲܥ̣ܛܵܐ ܒܲܕ݂ܡܹܗ ܫܛܵܪ ܚܵܘ̈ܒܵܬܲܢ. ܒܵܬܹ̈ܐ: ܓܲܡ̣ܪܹܗ ܒܚܲܫܵܐ ܠܢܵܘܣܵܐ ܡܠܝܼܠܵܐ. ܘܐܲܚ̣ܝܼ ܒܡܵܘܬܹ݁ܗ ܠܲܒ݂ܢܲܝ̈ ܓܸܢܣܹܗ.
ܕܡܲܓܵܗܲܝ̈ ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܨܵܘܡܵܐ
ܥܘܼܢܵܝܵܐ: ܦܲܓ݂ܪܹܗ ܝܲܗ̣݇ܒ݂ܠܲܢ ܘܒܲܕ݂ܡܹܗ ܦܲܪܩܲܢ. ܘܲܬ݂ܟ݂ܝܼܠܝܼܢܲܢ ܕܗ̤ܘ ܡܢܲܚܸܡ ܠܲܢ. ܒܵܬܹ̈ܐ: ܕܡܝܼܬ݂ ܠܲܚܛܝܼܬ݂ܵܐ ܫܪܵܗ̇ ܠܲܚܛܝܼܬ݂ܵܐ. ܘܒܲܛܸܠ ܠܡܵܘܬܵܐ ܘܐܲܡ̣ܠܸܟܼ ܥܲܠ ܟܠ.
ܕܡܲܓܵܗܲܝ̈ ܫܲܒ݁ܬ݂ܵܐ ܩܲܕ݂ܡܵܝܬܵܐ ܕܨܵܘܡܵܐ
ܥܘܼܢܵܝܵܐ: ܗܵܐ ܣܲܡ ܚܲܝܹ̈ܐ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ: ܬܢܝܼ. ܒܵܬܹ̈ܐ: ܬܵܘ ܣܲܒ݂ܘ ܐܲܚܲܝ̈ ܨܲܝܵܡܹ̈ܐ. ܩܘܼܕ݂ܫܵܐ ܡܩܲܕܸܫ ܠܐܵܟ݂ܘܿܠܵܘ̈ܗܝ. ܕܲܒ݂ܟܲܦܢܵܐ ܘܨܲܗܝܵܐ ܚܲܫ̣ܬ݁ܘܿܢ. ܒܐ݇ܪܵܙܵܐ ܚܲܝܵܐ ܐܸܬ݂ܒܲܣܲܡܘ܀ ܦܲܓ݂ܪܹܗ ܕܡܵܪܲܢ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܨܵܘܡܵܐ
ܒܪܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܗܲܒ݂ܠܲܢ ܚܲܝܹ̈ܐ ܒܡܲܠܟ݁ܘܼܬ݂ܵܟ݂. ܬܢܝܼ. ܒܵܬܹ̈ܐ: ܒܗܵܢܵܐ ܝܵܘܡܵܐ ܩܲܕ݂ܡܵܝܵܐ. ܕܐܝܼܬ݂ܵܘܗܝ ܒܘܼܟ݂ܪܵܐ ܕܝܵܘ̈ܡܵܬ݂ܵܐ. ܬܵܘ ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ. ܕܗܵܘ ܒܘܼܟ݂ܪܵܐ ܕܐܲܠܵܗܘܼܬ݂ܵܐ܀ ܒܗܵܢܵܐ ܝܵܘܡܵܐ ܩܲܕ݂ܡܵܝܵܐ. ܫܡܲܝܵܐ ܕܲܠܥܸܠ ܐܸܬ݂ܒܲܪܝܲܬ̤. ܬܵܘ ܢܸܣܲܒ݂ ܦܲܓ݂ܪܹܗ ܕܲܒ݂ܪܵܐ. ܕܐܸܫܬܲܕܲܪ ܡ̣ܢ ܥܸܠܵܝܵܐ܀ ܒܗܵܢܵܐ ܝܵܘܡܵܐ ܐܸܬ݂ܒܲܪܝܲܬ̤. ܐܲܪܥܵܐ ܕܡܸܢܵܗ̇ ܟܠܡܸܕܸܡ. ܬܵܘ ܢܸܣܲܒ݂ ܦܲܓ݂ܪܹܗ ܕܲܒ݂ܪܵܐ. ܕܐܝܼܬ݂ܵܘܗܝ ܡܵܪܵܐ ܕܟ݂ܠܡܸܕܸ݁ܡ.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܕܲܬ݂ܪܹܝܢ ܕܨܵܘܡܵܐ
ܥܘܼܢܵܝܵܐ: ܥܲܡܡܹ̈ܐ ܐܵܘܕܵܘ ܒܥܹܕ݂ܲܬ݂ ܩܘܼܕ݂ܫܵܐ. ܠܲܒ݂ܪܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܘܵܠܹ̇ܐ ܕܢܹܐܣܘܿܪ ܡܘܼܡܹ̈ܐ ܕܢܲܦ̮ܫܲܢ. ܠܘܵܬ݂ ܗ̇ܘ ܕܲܫ̣ܪܵܢ ܡ̣ܢ ܥܲܒ݂ܕܘܼܬ݂ܵܐ.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܲܬ݂ܪܹܝܢ ܕܨܵܘܡܵܐ
ܥܘܼܢܵܝܵܐ: ܫܘܼܒ݂ܚܵܐ ܠܪ̈ܲܚܡܹܐ ܕܫܲܠ̣ܚܘܼܟܼ ܨܹܐܕܲܝܢ. ܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܙܲܒ݂ܢ̣ܲܢ ܒܲܕ݂ܡܹܗ ܘܝܲܗ̣݇ܒ݂ܠܲܢ ܦܲܓ݂ܪܹܗ. ܘܟܲܣ̣ܝܼ ܨܲܥܪܲܢ ܒܐܸܣܛܲܠ ܫܘܼܒ݂ܚܹܗ.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܲܬ݂ܪܹܝܢ ܕܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܲܒ݂ܦܲܓ݂ܪܹܗ ܚܪܘܼܪܹ̈ܐ ܝܲܗ̣݇ܒ݂ ܠܲܢ. ܘܲܥ̣ܛܵܐ ܒܲܕ݂ܡܹܗ ܫܛܵܪ ܚܵܘ̈ܒܵܬܲܢ. ܒܵܬܹ̈ܐ: ܚܠܘܼܠܵܐ ܛܲܝܸܒ݂ ܠܐܲܪ̈ܥܵܢܵܝܹܐ. ܕܢܸܚܘܿܢ ܒܐܘܼܟ݂ܠܵܐ ܪܘܼܚܵܢܵܝܵܐ.
ܕܡܲܓܵܗܲܝ̈ ܥܪܘܼܒ݂ܬܵܐ ܕܬܲܪܬܹܝܢ ܕܨܵܘܡܵܐ
ܥܘܼܢܵܝܵܐ: ܦܲܓ݂ܪܹܗ ܝܲܗ̣݇ܒ݂ ܠܲܢ ܘܒܲܕ݂ܡܹܗ ܦܲܪ̣ܩܲܢ. ܘܲܬ݂ܟ݂ܝܼܠܝܼܢܲܢ ܕܗ̤ܘ ܡܢܲܚܸܡ ܠܲܢ. ܒܵܬܹ̈ܐ: ܛܲܡ̈ܐܹܐ ܩܲܕܸܫܘ ܪܸ̈ܥܝܵܢܲܝܟ݁ܘܿܢ. ܒܦܲܓ݂ܪܵܐ ܘܲܕ݂ܡܵܐ ܡܕܲܟܸ݁ܐ ܡܘܼܡܹ̈ܐ.
ܕܡܲܓܵܗܲܝ̈ ܫܲܒ݁ܬ݂ܵܐ ܕܬܲܪܬܹܝܢ ܕܨܵܘܡܵܐ
ܥܘܼܢܵܝܵܐ: ܗܵܐ ܣܲܡ ܚܲܝܹ̈ܐ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ. ܬܢܝܼ. ܒܵܬܹ̈ܐ: ܕܨܵܡ̣ܬ݁ܘܿܢ ܡ̣ܢ ܠܲܚܡܵܐ ܕܐܲܪܥܵܐ. ܬܵܘ ܣܲܒ݂ܘ ܠܲܚܡܵܐ ܫܡܲܝܵܢܵܐ. ܘܲܕ݂ܨܵܡ̣ܬ݁ܘܿܢ ܡ̣ܢ ܚܲܡܪ̈ܵܢܹܐ. ܬܵܘ ܣܲܒ݂ܘ ܟܵܣܵܐ ܕܦܘܼܪܩܵܢܵܐ܀ ܦܲܓ݂ܪܹܗ ܕܡܵܪܲܢ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܨܵܘܡܵܐ
ܥܘܼܢܵܝܵܐ: ܕܘܼܨܘ ܥܲܡܡܹ̈ܐ ܩܕ݂ܵܡ ܦܵܪܘܿܩܲܢ. ܕܲܒ݂ܠܲܚܡܹܗ ܒܣܸܡܬ݁ܘܿܢ ܩܘܼܕ݂ܡܵܘܗܝ. ܬܢܝܼ. ܒܵܬܹ̈ܐ: ܐܵܘܕܵܘ ܥܲܡܡܹ̈ܐ ܠܛܲܝܒ݁ܘܼܬ݂ܵܐ. ܕܡܲܓܵܢ ܚܲܣܝܲܬ̤ ܚܵܘܒܲܝ̈ܟ݁ܘܿܢ. ܘܫܵܘܬܵܦܹ̈ܐ ܒܐ݇ܪܵܙܵܐ ܗ̤ܘܲܝܬ݁ܘܿܢ. ܕܡ̣ܢ ܪ̈ܘܼܚܵܢܹܐ ܡܸܬ݂ܩܲܕܲܫ܀ ܒܲܒ݂ܪܵܐ ܙܥܘܿܪܵܐ ܡܬ݂ܝܼܠܝܼܢܲܢ. ܕܒܲܫܟ݂ܵܚܬܹ݁ܗ ܚ̣ܕ݂ܝܼ ܝܵܠܘܿܕܹܗ. ܩܪܘܿܒ݂ܘ ܬܲܝܵܒܹ̈ܐ ܐܸܬ݂ܒܲܣܲܡܘ. ܡ̣ܢ ܕܸܒ݂ܚܵܐ ܐܲܠܵܗܵܝܵܐ܀ ܓܲܠܘܵܝܹ̈ܐ ܒܫܸܒ݂ܝܵܐ ܗ̤ܘܲܝܬ݁ܘܿܢ. ܘܥܲܒ݂ܕ݁ܘܼܬ݂ܵܐ ܠܒ݂ܝܼܫܵܐ ܦܠܲܚ̣ܬ݁ܘܿܢ. ܡܫܝܼܚܵܐ ܒܚܲܫܹܗ ܚܲܪܲܪܟ݂ܘܿܢ. ܣܲܒ݂ܘ ܦܲܓ݂ܪܹܗ ܘܐܲܡܠܸܟ݂ܘ ܥܲܡܹܗ.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܨܵܘܡܵܐ
ܥܘܼܢܵܝܵܐ: ܥܲܡܡܹ̈ܐ ܐܵܘܕܵܘ ܒܥܹܕܲܬ݂ ܩܘܼܕ݂ܫܵܐ. ܠܲܒ݂ܪܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܬܢܝܼ. ܒܵܬܹ̈ܐ: ܟܵܣܵܐ ܕܚܲܝܹ̈ܐ ܡ̣ܙܲܓ݂ ܠܲܢ ܡܵܪܲܢ. ܢܫܝܼܓ݂ ܪܸܥܝܵܢܲܢ ܡ̣ܢ ܣܲܡ ܡܵܘܬܵܐ.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܲܬ݂ܠܵܬ݂ܵܐ ܕܨܵܘܡܵܐ
ܥܘܼܢܵܝܵܐ: ܫܘܼܒ݂ܚܵܐ ܠܪ̈ܲܚܡܹܐ ܕܫܲܠܚ̣ܘܼܟܼ ܨܹܐܕܲܝܢ. ܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܠܵܐ ܢܸܬ݂ܩܲܪܲܒ݂ ܟܲܕ݂ ܛܲܡܐܝܼܢܲܢ. ܠܦܲܓ݂ܪܵܐ ܘܲܕ݂ܡܵܐ ܡܕܲܟܸ݁ܐ ܡܘܼܡܹ̈ܐ.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܲܬ݂ܠܵܬ݂ܵܐ ܕܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܲܒ݂ܦܲܓ݂ܪܹܗ ܚܪܘܼܪܹ̈ܐ ܝܲܗ̣݇ܒ݂ ܠܲܢ. ܘܲܥ̣ܛܵܐ ܒܲܕ݂ܡܹܗ ܫܛܵܪ ܚܵܘ̈ܒܵܬܲܢ. ܒܵܬܹ̈ܐ: ܡܪܘܿܩܘ ܚܲܛܵܝܹ̈ܐ ܪܸ̈ܥܝܵܢܲܝܟ݁ܘܿܢ. ܕܢܸܫܪܘܿܢ ܚܲܝܹ̈ܐ ܒܲܩܢܘܿܡܲܝ̈ܟ݁ܘܿܢ.
ܕܡܲܓܵܗܲܝ̈ ܥܪܘܼܒ݂ܬܵܐ ܕܲܬ݂ܠܵܬ݂ ܕܨܵܘܡܵܐ
ܥܘܼܢܵܝܵܐ: ܦܲܓ݂ܪܹܗ ܝܲܗ̣݇ܒ݂ ܠܲܢ ܘܒܲܕ݂ܡܹܗ ܦܲܪܩܲܢ. ܘܲܬ݂ܟ݂ܝܼܠܝܼܢܲܢ ܕܗ̤ܘ ܡܢܲܚܸܡ ܠܲܢ. ܒܵܬܹ̈ܐ: ܢܘܼܪܵܐ ܘܡܸܠܚܵܐ ܒܦܲܓ݂ܪܵܐ ܘܲܕ݂ܡܵܐ. ܬܵܘ ܦܲܟ݁ܝܼܗܹ̈ܐ ܣܲܒ݂ܘ ܘܐܸܬ݂ܡܲܕܲܟ݂ܘ.
ܕܡܲܓܵܗܲܝ̈ ܫܲܒ݁ܬ݂ܵܐ ܕܲܬ݂ܠܵܬ݂ ܕܨܵܘܡܵܐ
ܥܘܼܢܵܝܵܐ: ܗܵܐ ܣܲܡ ܚܲܝܹ̈ܐ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ. ܬܢܝܼ. ܒܵܬܹ̈ܐ: ܗܵܐ ܒܘܼܣܵܡܵܐ ܠܨܲܝܵܡܵܐ. ܕܥܲܙ̣ܝܼ ܘܩ̣ܵܘܝܼ ܠܥܸܕܵܢܵܐ. ܘܠܵܐ ܫ̣ܪܵܐ ܦܘܼܡܹܗ ܠܲܛܥܘܼܡܹ̈ܐ. ܕܲܛܥܘܼܡܵܐ ܕܚܲܝܹ̈ܐ ܢܸܣܲܒ݂܀ ܦܲܓ݂ܪܹܗ ܕܡܵܪܲܢ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܨܵܘܡܵܐ
ܥܘܼܢܵܝܵܐ: ܢܒ݂ܝܼܹ̈ܐ ܘܡܲܠܟܹ̈ܐ ܐܸܬ݂ܪܲܓ݂ܪܲܓ݂ܘ. ܠܦܲܓ݂ܪܵܟܼ ܘܲܕ݂ܡܵܟܼ ܡܚܲܣܝܵܢܵܐ. ܬܢܝܼ. ܒܵܬܹ̈ܐ: ܐܸܬ݂ܪܲܓ݂ܪܲܓ݂ ܕܵܘܝܼܕ݂ ܘܲܫ̣ܐܸܠ. ܘܠܵܐ ܐܸܫ̣ܬ݁ܝܼ ܡܲܝ̈ܵܐ ܕܲܫ̣ܐܸܠ. ܐܵܘܕܵܘ ܐܲܢ݇ܬ݁ܘܿܢ ܕܲܫ̣ܘܲܝܬ݁ܘܿܢ. ܠܡܸܫܬܵܐ ܟܵܣܹܗ ܕܲܡܫܝܼܚܵܐ܀ ܡ̣ܢ ܩܘܿܩܬ݂ܵܐ ܚܕܲܬܵܐ ܢܸܦܩܲܬ̤. ܡܸܠܚܵܐ ܘܐܲܣܝܲܬ̤ ܡܲܒ݁ܘܼܥܹ̈ܐ. ܦܲܓ݂ܪܵܐ ܕܲܢ̣ܦܲܩ ܡ̣ܢ ܡܲܪܝܲܡ. ܚܒ݂ܵܪ̈ܵܬ݂ܵܐ ܕܥܲܡܡܹ̈ܐ ܐܲܚ̣ܠܸܡ܀ ܢ̣ܚܸܬ݂ ܗ݇ܘ̣ܵܐ ܩܲܝܣܵܐ ܩܲܠܝܼܠܵܐ. ܘܛܵܦ̣ ܗ݇ܘ̣ܵܐ ܝܘܼܩܪܵܐ ܕܛܲܒ݁ܝܼܥܵܐ. ܬܵܘ ܣܲܒ݂ܘ ܩܘܼܕ݂ܫܵܐ ܕܠܵܐܟ݂ܘܿܠܹܗ. ܒܚܲܪܬ݂ܵܐ ܒܐܵܐܲܪ ܡܲܦܪܲܚ ܠܹܗ.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܕܐܲܪܒ݁ܥܵܐ ܕܨܵܘܡܵܐ
ܥܘܼܢܵܝܵܐ: ܪܵܥܝܵܐ ܛܵܒ݂ܵܐ ܕܟܲܢܸܫ̣ ܥܵܢܹ̈ܗ: ܒܦܲܓ݂ܪܵܟܼ ܘܲܕ݂ܡܵܟܼ ܚܲܣܵܐ ܚܵܘܒܲܝ̈ܢ. ܒܵܬܹ̈ܐ: ܐܲܝܢܵܘ ܦܘܼܡܵܐ ܕܣܵܦܹ̇ܩ ܕܢܵܘܕܸ݁ܐ: ܥܲܠ ܛܲܝܒ݁ܘܼܬ݂ܟܼ ܕܲܠܘܵܬ݂ ܓܸܢܣܲܢ.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܦܸܠܓ݁ܘܼܬ݂ ܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܐܲܫ̣ܠܸܡ ܠܵܗ̇ ܠܥܹܕܲܬ݂ ܩܘܼܕ݂ܫܵܐ. ܐ݇ܪܵܙܵܐ ܕܡܵܘܬܹ݁ܗ ܘܲܕ݂ܢܘܼܚܵܡܹܗ. ܒܵܬܹ̈ܐ: ܒܡܲܝ̈ܵܐ ܘܪܘܼܚܵܐ ܐܸܬ݂ܩܲܕܲܫܢܲܢ. ܒܦܲܓ݂ܪܵܟܼ ܘܲܕ݂ܡܵܟܼ ܚܲܝܹ̈ܐ ܩ̣ܢܲܝܢܲܢ.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܐܲܪܒ݁ܥܵܐ ܕܨܵܘܡܵܐ
ܥܘܼܢܵܝܵܐ: ܨܵܘܡܲܢ ܢܸܫܦܲܪ ܠܐܲܠܵܗܘܼܬ݂ܵܟ݂. ܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܬܢܝܼ. ܒܵܬܹ̈ܐ: ܓܡܘܼܪܬܵܐ ܕܢܘܼܪܵܐ ܝܲܗ̣݇ܒ݂ ܠܲܢܒ݂ܝܼܵܐ. ܕܲܟ݂ܣܸܐ ܗ݇ܘ̣ܵܐ ܒܵܗ̇ ܐ݇ܪܵܙܵܐ ܕܡܵܘܬܹ݁ܗ.
ܕܡܲܓܵܗܲܝ̈ ܥܪܘܼܒ݂ܬܵܐ ܕܐܲܪܒܲܥ ܕܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܲܒ݂ܩܸܛܠܹܗ ܩܲܛ̣ܠܹܗ ܠܡܵܘܬܵܐ. ܘܐܲܚ̣ܝܼ ܠܐܵܕ݂ܵܡ ܒܐ݇ܪ̈ܵܙܵܘܗܝ ܫܒ݂ܝܼܚܹ̈ܐ. ܒܵܬܹ̈ܐ: ܕܡܵܐ ܙܲܟܵܝܵܐ ܪܕ݂ܵܐ ܡ̣ܢ ܣܸܛܪܹܗ. ܘܪܲܥ̣ܝܼ ܠܐܲܒ݂ܘܼܗܝ ܥܲܡ ܒܸܪ̈ܝܵܬܹܗ.
ܕܡܲܓܵܗܲܝ̈ ܫܲܒ݁ܬ݂ܵܐ ܕܐܲܪܒܲܥ ܕܨܵܘܡܵܐ
ܥܘܼܢܵܝܵܐ: ܗܵܐ ܣܲܡ ܚܲܝܹ̈ܐ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ: ܬܢܝܼ. ܒܵܬܹ̈ܐ: ܛܘܼܒܲܝܟ݁ܘܿܢ ܐܘܿ ܨܲܝܵܡܹ̈ܐ. ܕܲܬ݂ܪܹܝܢ ܛܘܼܒ݂ܝܼ̈ܢ ܐܝܼܬ݂ ܠܟ݂ܘܿܢ. ܚܲܕ݂ ܛܘܼܒ݂ܵܐ ܕܨܵܘܡܵܐ ܙܲܗܝܵܐ. ܘܲܐ݇ܚܪܹܢܵܐ ܕܐ݇ܪܵܙܵܐ ܚܲܝܵܐ܀ ܦܲܓ݂ܪܹܗ ܕܡܵܪܲܢ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ.
ܚܲܕ݂ܒ݁ܫܲܒܵܐ ܕܚܲܡܫܵܐ ܕܨܵܘܡܵܐ
ܥܘܼܢܵܝܵܐ: ܢܵܘܕܸܐ ܠܹܗ ܒܥܹܕܲܬ݂ ܩܘܼܕ݂ܫܵܐ. ܠܲܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ. ܬܢܝܼ. ܒܵܬܹ̈ܐ: ܢ̣ܟܲܣ ܥܲܡܵܐ ܐܹܡܲܪ ܚܲܝܹ̈ܐ. ܘܐܸܬ݂ܵܘ ܥܲܡܡܹ̈ܐ ܘܐܸܬ݂ܒܲܣܲܡܘ. ܚ̣ܛܲܦܘ ܘܲܩ̣ܛܲܠܘ ܘܐܲܬ݂ܩܸܢ̣ܘ ܩܘܼܕ݂ܡܲܝܢ. ܠܗܘܿܢ ܕܝܼܢܵܐ ܘܠܲܢ ܒܘܼܣܵܡܵܐ܀ ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ܀ ܠܲܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ܀ ܠܵܐ ܣ̣ܪܝܼ ܡܲܢܢܵܐ ܕܲܒ݂ܩܸܣܛܵܐ. ܕܢ̇ܵܛܲܪ ܗ݇ܘ̣ܵܐ ܠܹܗ ܦܘܼܩܕܵܢܵܐ. ܬܵܘ ܣܲܒ݂ܘ ܩܘܼܕ݂ܫܵܐ ܕܒܸܣܡܲܬ̤ ܒܹܗ. ܣܲܪܝܘܼܬ݂ܵܐ ܕܲܫܡܹܗ ܕܐܵܕ݂ܵܡ܀ ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ܀ ܠܲܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ܀
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܕܚܲܡܫܵܐ ܕܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܐܲܫ̣ܠܸܡ ܠܵܗ̇ ܠܥܹܕܲܬ݂ ܩܘܼܕ݂ܫܵܐ. ܐ݇ܪܵܙܵܐ ܕܡܵܘܬܹ݁ܗ ܘܲܕ݂ܢܘܼܚܵܡܹܗ. ܒܵܬܹ̈ܐ: ܘܵܠܹ̇ܐ ܕܢܵܘܕ݁ܘܿܢ ܓܸܢܣܵܐ ܕܐ݇ܢܵܫܵܐ. ܠܗܵܘ̇ ܕܐܸܬ݁ܬܲܚܬ݁ܝܼ ܘܲܦܪܲܩ̣ ܐܸܢܘܿܢ.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܚܲܡܫܵܐ ܕܨܵܘܡܵܐ
ܥܘܼܢܵܝܵܐ: ܪܵܥܝܵܐ ܛܵܒ݂ܵܐ ܕܟܲܢܸܫ̣ ܥܵܢܹ̈ܗ: ܒܦܲܓ݂ܪܵܟܼ ܘܲܕ݂ܡܵܟܼ ܚܲܣܵܐ ܚܵܘܒܲܝ̈ܢ. ܒܵܬܹ̈ܐ: ܙܲܝܢܵܐ ܕܪܘܼܚܵܐ ܩ̣ܢܵܘ ܒܵܟܼ ܥܲܡܡܹ̈ܐ. ܕܢܸܙܟ݁ܘܿܢ ܠܚܲܝܠܹܗ ܕܲܒ݂ܥܸܠܕܲܪܵܐ.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܚܲܡܫܵܐ ܕܨܵܘܡܵܐ
ܥܘܼܢܵܝܵܐ: ܨܵܘܡܲܢ ܢܸܫܦܲܪ ܠܐܲܠܵܗܘܼܬ݂ܟ݂. ܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܚܲܬ݂ܢܵܐ ܕܪܵܘܡܵܐ ܩ̣ܪܵܢ ܠܲܚܠܘܼܠܹܗ. ܬܵܘ ܢܸܨܛܲܒܲܬ݂ ܪܘܼܚܵܢܵܐܝܼܬ݂.
ܕܡܲܓܵܗܲܝ̈ ܥܪܘܼܒ݂ܬܵܐ ܕܚܲܡܸܫ ܕܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܲܒ݂ܩܸܛܠܹܗ ܩܲܛ̣ܠܹܗ ܠܡܵܘܬܵܐ. ܘܐܲܚ̣ܝܼ ܠܐܵܕ݂ܵܡ ܒܐ݇ܪ̈ܵܙܵܘܗܝ ܫܒ݂ܝܼܚܹ̈ܐ. ܒܵܬܹ̈ܐ: ܛܵܒ݂ܵܐ ܕܓܲܒ݂ܠܲܢ ܡ̣ܢ ܕܲܚܝܼܚܵܐ. ܒܦܲܓ݂ܪܵܐ ܘܲܕ݂ܡܵܐ ܚܲܕܸ݁ܬ݂ ܨܲܠܡܲܢ.
ܕܡܲܓܵܗܲܝ̈ ܫܲܒ݁ܬ݂ܵܐ ܕܚܲܡܸܫ ܕܨܵܘܡܵܐ
ܥܘܼܢܵܝܵܐ: ܗܵܐ ܣܲܡ ܚܲܝܹ̈ܐ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ. ܬܢܝܼ. ܒܵܬܹ̈ܐ: ܝܵܐܹ̇ܐ ܦܘܼܡܵܐ ܩܲܕܝܼܫܵܐ. ܕܢܸܣܲܒ݂ ܠܲܚܡܵܐ ܫܡܲܝܵܢܵܐ. ܦܘܼܡܵܐ ܢܟ݂ܝܼܠܵܐ ܢܸܣܬܲܪܲܩ. ܡ̣ܢ ܪܵܡܘܼܬ݂ܵܐ ܘܝܲܥܢܘܼܬ݂ܵܐ܀ ܦܲܓ݂ܪܹܗ ܕܡܵܪܲܢ ܡܸܬ݂ܦܲܠܲܓ݂. ܡܵܝܘܿܬ݂ܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ.
ܚܲܕ݂ܒ݁ܫܲܒܵܐ ܕܸܫܬܵܐ ܕܨܵܘܡܵܐ
ܥܘܼܢܵܝܵܐ: ܢܵܘܕܸ݁ܐ ܠܒܲܪ ܡܲܠܟܵܐ ܕܐܸܬ݁ܬܲܚܬ݁ܝܼ ܠܘܵܬܲܢ. ܘܲܠܓܸܢܣܲܢ ܡܵܝܘܿܬ݂ܵܐ ܠܡܵܘܗܲܒ݂ܬ݂ܵܐ ܡܥܲܠܲܝܬܵܐ. ܒܛܲܝܒ݁ܘܼܬܹܗ ܐܲܫ̣ܘܝܼ ܠܐ݇ܪ̈ܵܙܹܐ ܕܚܝܼ̈ܠܹܐ. ܟܸܢܫܹ̈ܐ ܕܡܲܠܲܐܟܹ̈ܐ ܒܕܸܚܠܵܐ ܪܲܒܵܐ ܘܒܲܪܬܹܝܬ݂ܵܐ ܩܵܝ̇ܡܝܼܢ ܘܲܡܩܲܕ݁ܫܝܼܢ ܠܲܫܡܹܗ܀ ܘܲܒ݂ܬ݂ܸܕ݂ܡܘܼܪܬܵܐ ܪܲܒ݁ܬ݂ܵܐ ܥܲܡܲܢ ܩܵܥܹܝ̇ܢ ܟܠܗܘܿܢ ܒܩܵܠܹ̈ܐ ܕܩܲܕܝܼܫܘܼܬ݂ܵܐ ܘܐܵܡ̇ܪܝܼܢ. ܩܲܕܝܼܫ ܡܵܪܝܵܐ ܩܲܕܝܼܫ ܐܲܠܵܗܵܐ. ܘܲܡܫܲܒܲܚ ܩܲܕܝܼܫܵܐ ܕܡ̣ܢ ܡܬ݂ܘܿܡ ܐܝܼܬ݂ܵܘܗܝ. ܒܵܬܹ̈ܐ: ܕܵܪܵܐ ܠܕ݂ܵܪܵܐ ܢܸܫܬܲܥܘܿܢ ܥܒ݂ܵܕܲܝ̈ܟ. ܘܓܲܢ݇ܒܵܪܘܼܬ݂ܵܟܼ ܢܚܵܘܘܿܢ܀ ܘܲܒ݂ܬܸܕ݂ܡܘܼܪܬܵܐ ܪܲܒ݁ܬ݂ܵܐ ..
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܕܸܫܬܵܐ ܕܨܵܘܡܵܐ
ܥܘܼܢܵܝܵܐ: ܒܪܝܼܟܼ ܕܐܲܫ̣ܠܸܡ ܠܵܗ̇ ܠܥܹܕܲܬ݂ ܩܘܼܕ݂ܫܵܐ. ܐ݇ܪܵܙܵܐ ܕܡܵܘܬܹ݁ܗ ܘܲܕ݂ܢܘܼܚܵܡܹܗ. ܒܵܬܹ̈ܐ: ܟܵܗܢܵܐ ܘܟ݂ܘܼܡܪܵܐ ܕܟܲܗܸܢ ܒܲܕ݂ܡܹܗ. ܒܵܟܼ ܢܸܬ݂ܐܲܣܘܿܢ ܡܘܼܡܹ̈ܐ ܕܢܲܦ̮ܫܲܢ.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܸܫܬܵܐ ܕܨܵܘܡܵܐ
ܥܘܼܢܵܝܵܐ: ܪܵܥܝܵܐ ܛܵܒ݂ܵܐ ܕܟܲܢܸܫ̣ ܥܵܢܹ̈ܗ: ܒܦܲܓ݂ܪܵܟܼ ܘܲܕ݂ܡܵܟܼ ܚܲܣܵܐ ܚܵܘܒܲܝ̈ܢ. ܒܵܬܹ̈ܐ: ܠܲܚܡܵܐ ܕܚܲܝܹ̈ܐ ܐܝܼܬ݂ܵܘܗܝ ܦܲܓ݂ܪܵܟ݂. ܕܟ݂ܠ ܕܐܵܟ̣ܹܠ̇ ܠܹܗ ܙܵܟ̣ܹܐ ܠܡܵܘܬܵܐ.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܸܫܬܵܐ ܕܨܵܘܡܵܐ
ܥܘܼܢܵܝܵܐ: ܨܵܘܡܲܢ ܢܸܫܦܲܪ ܠܐܲܠܵܗܘܼܬ݂ܵܟ݂. ܡܫܝܼܚܵܐ ܕܝܲܗ̣݇ܒ݂ܠܲܢ ܦܲܓ݂ܪܹܗ ܘܲܕ݂ܡܹܗ. ܒܵܬܹ̈ܐ: ܡܲܠܟܵܐ ܕܪܵܘܡܵܐ ܐܸܬ݂ܪܲܥܝܼ ܠܲܢ. ܪ̈ܓ݂ܝܼܙܹܐ ܫܲܝܸܢܘ ܪܸ̈ܥܝܵܢܲܝܟ݁ܘܿܢ.
ܕܡܲܓܵܗܲܝ̈ ܥܪܘܼܒ݂ܬܵܐ ܕܫܸܬ݂ ܕܨܵܘܡܵܐ ܘܡܸܬ݂ܩܲܪܝܵܐ ܕܠܵܥܵܙܲܪ ܐܵܘ ܕܐܲܪܒ݁ܥܝܼܢ
ܥܘܼܢܵܝܵܐ: ܒܪܝܼܟܼ ܕܲܒ݂ܩܸܛܠܹܗ ܩܲܛ̣ܠܹܗ ܠܡܵܘܬܵܐ. ܘܐܲܚ̣ܝܼ ܠܐܵܕ݂ܵܡ ܒܐ݇ܪ̈ܵܙܵܘܗܝ ܫܒ݂ܝܼܚܹ̈ܐ. ܒܵܬܹ̈ܐ: ܢܵܘܣܹ̈ܐ ܕܟܲܝ̈ܵܐ ܥ̣ܲܒ݂ܕܲܢ ܡܵܪܲܢ. ܢܫܝܼܓ݂ ܪܸܥܝܵܢܲܢ ܡ̣ܢ ܣܲܡ ܡܵܘܬܵܐ.
ܕܡܲܓܵܗܲܝ̈ ܫܲܒ݁ܬ݂ܵܐ ܕܫܸܬ݂ ܕܨܵܘܡܵܐ
ܥܘܼܢܵܝܵܐ: ܗܵܐ ܣܲܡ ܚܲܝܹ̈ܐ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ. ܒܵܬܹ̈ܐ: ܠܵܐ ܬܸܣܒ݂ܘܼܢܵܝܗܝ ܪܲܦܝܵܐܝܼܬ݂. ܕܐ݇ܪܵܙܵܐ ܗ݇ܘ̣ ܕܲܟ݂ܣܹܝܢ ܒܹܗ ܚܲܝܹ̈ܐ. ܒܪܘܼܚܩܘܼܕ݂ܫܵܐ ܕܢܸܚܬܲܬ̤ ܥܠܵܘܗܝ. ܐܸܙܕܲܝܲܢܘ ܘܲܩܪܘܿܒ݂ܘ ܨܹܐܕ݂ܵܘܗܝ܀ ܦܲܓ݂ܪܹܗ ܕܡܵܪܲܢ ܡܸܬ݂ܦܲܠܲܓ݂. ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ.
ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܨܵܘܡܵܐ ܥܹܐܕ݂ܵܐ ܗ݇ܘ̣ ܕܐܘܿܫܲܥܢܹ̈ܐ
ܥܘܼܢܵܝܵܐ ܒܩܵܠ ܬܵܘ ܟܠܲܢ ܐܲܟܲܚ݇ܕ݂ ܢܙܲܝܚܝܼܘܗܝ: ܣ̣ܘܲܚܘ ܥܲܡܡܹ̈ܐ ܠܡܸܣܲܒ݂ ܒܗܲܝܡܵܢܘܼܬ݂ܵܐ. ܠܡܵܘܗܲܒ݂ܬ݂ܵܐ ܕܐ݇ܪ̈ܵܙܹܐ ܕܣܝܼܡܵܐ ܩܕ݂ܵܡܲܝܢ. ܦܲܓ݂ܪܵܐ ܗ݇ܘ̣ ܕܐܸܬ݂ܩܨܝܼ ܚܠܵܦ ܦܘܼܪܩܵܢܲܢ. ܘܲܕ݂ܡܵܐ ܗ݇ܘ̣ ܕܲܕ݂ܝܵܬܹܩܹܐ ܕܐܸܬ݂ܐ̱ܫܸܕ݂ ܚܠܵܦܲܝܢ. ܗܵܕܲܐ ܗ݇ܝ̣ ܓܡܘܼܪܬܵܐ ܡܲܚܝܵܢܝܼܬ݂ܵܐ ܕܩܸܪܒܲܬ̤ ܠܲܢܒ݂ܝܼܵܐ. ܘܐܸܬ݂ܚܲܣܝܼ ܒܵܗ̇ ܡ̣ܢ ܚܵܘܒܵܘ̈ܗܝ ܘܲܚܛܵܗܵܘ̈ܗܝ. ܬܵܘ ܟܠܲܢ ܒܲܙܗܝܼܪܘܼܬ݂ܵܐ ܘܲܒ݂ܩܲܕܝܼܫܘܼܬ݂ܵܐ ܢܸܬ݂ܩܲܪܲܒ݂ ܠܹܗ. ܘܥܲܡ ܡܲܠܲܐܟܹ̈ܐ ܪ̈ܘܼܚܵܢܹܐ ܘܲܣܪ̈ܵܦܹܐ ܩܲܕܝܼܫܹ̈ܐ܀ ܒܲܚܕ݂ܵܐ ܒܲܪ݇ܬ݂ ܩܵܠܵܐ ܒܐܵܘܝܘܼܬ݂ܵܐ. ܢܫܲܒܲܚ ܠܹܗ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܢܹܐܣܘܿܪ ܒܲܓ݂ܦܸܬܵܐ ܥܝܼܠܹܗ. ܘܲܒ݂ܫܲܒ݁ܘܼܩܵܐ ܒܲܪ ܐܲܬܵܢܹܗ܀ ܒܲܚܕ݂ܵܐ ܒܲܪ݇ܬ݂ ܩܵܠܵܐ ܒܐܵܘܝܘܼܬ݂ܵܐ. ܢܫܲܒܲܚ ܠܹܗ ܘܢܹܐܡܲܪ ܗܲܠܸܠܘܼܝܲܗ܀ ܢܚܵܘܲܪ ܒܚܲܡܪܵܐ ܠܒ݂ܘܼܫܹܗ. ܘܒܲܕ݂ܡܵܐ ܕܥܸܢܒܹ̈ܐ ܬܲܟ݂ܣܝܼܬܹܗ܀ ܒܲܚܕ݂ܵܐ ܒܲܪ݇ܬ݂ ܩܵܠܵܐ ܒܐܵܘܝܘܼܬ݂ܵܐ. ܢܫܲܒܲܚ ܠܹܗ ܘܢܹܐܡܲܪ ܗܲܠܸܠܘܼܝܲܗ܀ ܙܵܪ̈ܓܵܢ ܥܲܝܢܵܘ̈ܗܝ ܡ̣ܢ ܚܲܡܪܵܐ. ܘܚܸܘܵܪ̈ܵܢ ܫܸܢܵܘ̈ܗܝ ܡ̣ܢ ܚܲܠܒ݂ܵܐ܀ ܒܲܚܕ݂ܵܐ ܒܲܪ݇ܬ݂ ܩܵܠܵܐ ܒܐܵܘܝܘܼܬ݂ܵܐ. ܢܫܲܒܲܚ ܠܹܗ ܘܢܹܐܡܲܪ ܗܲܠܸܠܘܼܝܲܗ.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܐ݇ܚܪܵܝܵܐ ܕܨܵܘܡܵܐ
ܥܘܼܢܵܝܵܐ: ܒܚܲܫܵܐ ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ: ܕܲܒ݂ܪܵܐ ܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ. ܒܵܬܹ̈ܐ: ܐܲܚܲܝ̈ ܩܲܒܸ݁ܠܘ ܦܲܓ݂ܪܹܗ ܕܲܒ݂ܪܵܐ: ܘܐܸܫܬܵܘ ܟܵܣܹܗ ܒܗܲܝܡܵܢܘܼܬ݂ܵܐ. ܕܲܒ݂ܪܵܐ ܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܫܲܒ݂ܥܵܐ ܕܨܵܘܡܵܐ
ܥܘܼܢܵܝܵܐ: ܒܚܲܫܵܐ ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ. ܕܲܒ݂ܪܵܐ ܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ. ܒܵܬܹ̈ܐ: ܒܢܵܘܣܹ̈ܐ ܕܟܲܝ̈ܵܐ ܕܲܩܢܘܿܡܲܝ̈ܟ݁ܘܿܢ. ܬܸܥܘܿܠ ܘܬܸܫܪܸܐ ܐܲܠܵܗܘܼܬ݂ܵܐ.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܦܸܨܚܵܐ
ܥܘܼܢܵܝܵܐ: ܒܚܲܫܵܐ ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ. ܕܲܒ݂ܪܵܐ ܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ. ܒܵܬܹ̈ܐ: ܓܲܙܵܐ ܕܛܘܼܒܹ̈ܐ ܦܬܲܚ̣ܠܲܢ ܡܵܪܲܢ. ܩܪܘܿܒ݂ܘ ܘܐܸܬ݂ܒܲܣܲܡܘ ܡ̣ܢ ܣܝܼ̈ܡܵܬܹܗ܀ ܕܲܒ݂ܪܵܐ ܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ.
ܕܡܲܓܵܗܲܝ̈ ܥܪܘܼܒ݂ܬܵܐ ܕܚܲܫܵܐ ܘܐ݇ܪ̈ܵܙܹܐ ܕܦܸܨܚܵܐ
ܥܘܼܢܵܝܵܐ: ܒܚܲܫܵܐ ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ. ܕܲܒ݂ܪܵܐ ܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ. ܒܵܬܹ̈ܐ: ܛܘܼܒܲܝܟ ܐܵܦ ܠܵܟܼ ܪܲܡܫܵܐ ܐ݇ܚܪܵܝܵܐ. ܕܪܲܡܫܵܐ ܕܡܸܨܪܹܝܢ ܒܵܟܼ ܐܸܫܬܲܡܠܝܼ: ܐ݇ܪܵܙܵܐ ܕܫܲܡܸܫ̣ ܡܘܼܫܹܐ ܒܡܸܨܪܹܝܢ. ܫ̣ܩܲܠ ܫܘܼܠܵܡܵܐ ܒܲܒ݂ܪܵܐ ܡܫܝܼܚܵܐ: ܥܲܡܵܐ ܐܸܟܲܠ̣ ܦܸܨܚܵܐ ܙܥܘܿܪܵܐ. ܘܡܵܪܲܢ ܥ̣ܲܒ݂ܕܹܗ ܦܸܨܚܵܐ ܪܲܒܵܐ: ܒܹܝܬ݂ ܬܪܹܝܢ ܐܸܡܪܹ̈ܐ ܩܵܡ̣ܘ ܬܲܠܡܝܼܕܹ̈ܐ. ܘܲܢ̣ܟܲܣܘ ܐܸܡܪܵܐ ܘܲܩ̣ܨܵܘ ܦܲܓ݂ܪܵܐ.
ܕܐ݇ܪ̈ܵܙܹܐ ܕܪܲܡܫܵܐ ܕܲܩܝܵܡܬܵܐ
ܥܘܼܢܵܝܵܐ: ܠܐ݇ܪ̈ܵܙܹܐ ܫܒ݂ܝܼܚܹ̈ܐ ܘܝܲܩܝܼܪܹ̈ܐ ܘܠܵܐ ܡܵܝܘܿܬܹ̈ܐ. ܕܒܲܡܪܲܚܡܵܢܘܼܬ݂ܵܟܼ ܡܵܪܲܢ ܐܲܫ̣ܘܝܼܬܵܢ ܕܢܸܫܬܵܘܬܲܦ. ܘܠܲܢ ܚܲܛܵܝܹ̈ܐ ܕܠܵܐ ܫܵܘܹܝ̇ܢ ܗ̣݇ܘܲܝܢ ܡܲܓܵܢ ܝܲܗ̣݇ܒ݂ܬ݁ ܐܸܢܘܿܢ܀ ܡܸܛܠ ܗܵܢܵܐ ܡܫܝܼܚܵܐ ܥܲܡ ܡܲܠܲܐܟܹ̈ܐ ܩܵܥܹܝ̇ܢܲܢ. ܩܲܕ݁ܝܼܫ ܘܲܡܫܲܒܲܚ ܚܲܝܠܵܐ ܕܲܬ݂ܠܝܼܬ݂ܵܝܘܼܬ݂ܵܐ. ܫܡܲܝܵܐ ܓܹܝܪ ܘܐܲܪܥܵܐ ܟܠܵܗ̇ ܗܵܐ ܡܠܹܝܢ ܡ̣ܢ ܐܝܼܩܵܪܵܗ̇܀ ܒܵܬܹ̈ܐ: ܐܵܘܕܵܝ ܥܹܕ݁ܬܵܐ ܒܩܸܛܠܹܗ ܕܲܒ݂ܪܵܐ. ܕܲܦܪܲܩ̣ ܝܲܠܕܲܝܟ݁ܝ̈ ܒܐ݇ܪܵܙܵܐ ܕܡܵܘܬܹܗ ܀ ܡܸܛܠ ܗܵܢܵܐ....
ܕܐ݇ܪ̈ܵܙܹܐ ܕܚܲܕ݂ܒ݁ܫܲܒܵܐ ܪܲܒܵܐ ܕܲܩܝܵܡܬܹܗ ܕܡܵܪܲܢ
ܥܘܼܢܵܝܵܐ: ܬܵܘ ܟܠܟ݂ܘܿܢ ܥܲܡܡܹ̈ܐ ܢܙܝܼܥ ܣܸܦ̈ܘܵܬܲܢ ܠܬ݂ܵܘܕܝܼܬ݂ܵܐ. ܡܸܛܠ ܕܩ̣ܵܡ ܠܹܗ ܡܫܝܼܚܵܐ ܦܵܪܘܿܩܵܐ ܕܟ݂ܠܵܐ. ܘܗܵܐ ܝܼܬܸܒ݂ ܡ̣ܢ ܝܲܡܝܼܢܵܐ ܕܐܲܒ݂ܵܐ ܓܢܝܼܙܵܐ ܒܲܡܪ̈ܵܘܡܹܐ: ܢܸܬ݂ܩܲܪܲܒ݂ ܟܠܲܢ ܠܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܒܕܸܚܠ̱ܬ݂ܵܐ ܪܲܒ݁ܬ݂ܵܐ ܘܒܲܪܬܹܝܬ݂ܵܐ. ܠܲܚܡܵܐ ܓܹܝܪ ܫܡܲܝܵܢܵܐ. ܝܲܗ̣݇ܒ݂ ܠܲܢ ܡܵܪܲܢ. ܐ݇ܪܵܙܵܐ ܕܡܵܘܬܹ݁ܗ ܘܕܲܩܝܵܡܬܹ݁ܗ. ܢܸܣܒ݂ܝܼܘܗܝ ܟܠܲܢ ܫܲܘܝܵܐܝܼܬ݂܀ ܘܲܢܫܲܒܲܚ ܠܹܗ ܐܲܟܲܚ݇ܕ݂ ܘܢܹܐܡܲܪ: ܩܲܕܝܼܫܲܬ݁. ܩܲܕܝܼܫܲܬ݁. ܩܲܕܝܼܫܲܬ݁ ܐܘܿ ܡܵܪܹܟ݁ܠ ܗܲܠܸܠܘܼܝܲܗ ܗܲܠܸܠܘܼܝܲܗ܀ ܒܵܬܹ̈ܐ: ܒܝܵܘܡܵܐ ܕܲܩܝܵܡܬܵܟܼ ܐܸܬ݂ܒܲܛܲܠ ܡܵܘܬܵܐ ܘܲܢ̣ܦܲܠ ܣܵܛܵܢܵܐ. ܘܐܲܡ̣ܠܸܟܼ ܥܲܠ ܟܠ ܢܘܼܚܵܡܵܐ܀ ܘܲܢܫܲܒܲܚ ܠܹܗ....
ܬܪܹܝܢܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ
ܥܘܼܢܵܝܵܐ ܒܬ݂ܵܘ ܟܠܲܢ: ܦܲܓ݂ܪܵܐ ܘܲܕ݂ܡܵܐ ܡܚܲܣܝܵܢܵܐ. ܡܸܬ݂ܩܲܪܲܒ݂ ܥܲܠ ܡܲܕ݂ܒܲܚ ܩܘܼܕ݂ܫܵܐ ܚܠܵܦ ܦܘܼܪܩܵܢܲܢ. ܕܐܝܼܬܲܝܗܘܿܢ ܥܘܼܗܕܵܢܵܘ̈ܗܝ ܕܕܸܒ݂ܚܵܐ ܚܲܝܵܐ. ܘܕܲܩܝܵܡܬܹ݁ܗ ܕܦܵܪܘܿܩܲܢ ܕܡ̣ܢ ܒܹܝܬ݂ ܡܝܼܬܹ̈ܐ. ܗܵܘ̇ ܕܥܲܬܸ݁ܕ݂ ܠܲܢ ܒܐܝܼܕ݂ܵܘ̈ܗܝ܀ ܟܠܲܢ ܒܙܲܗܝܘܼܬ݂ܵܐ ܘܲܒ݂ܚܘܼܒܵܐ ܓܡܝܼܪܵܐ. ܢܸܣܲܒ݂ ܐ݇ܪ̈ܵܙܹܐ ܕܚܝܼܠܹ̈ܐ. ܘܥܲܡ ܡܲܠܲܐܟܹ̈ܐ ܢܸܩܥܸܐ ܘܢܹܐܡܲܪ ܬܸܫܒ݁ܘܿܚܬܵܐ ܗܲܠܸܠܘܼܝܲܗ ܗܲܠܸܠܘܼܝܲܗ. ܒܵܬܹ̈ܐ: ܛܘܼܒܲܝܟ݁ܝ ܥܹܕ݁ܬܵܐ ܕܡܵܪܹܟ݂ܝ ܩ̣ܵܡ ܠܹܗ. ܘܐܲܝܬ݁ܝܼ ܥܲܡܹܗ ܚܲܝܹ̈ܐ ܠܲܒ݂ܢܲܝ̈ܟ݁ܝ܀ ܟܠܲܢ ܒܙܲܗܝܘܼܬ݂ܵܐ.....
ܬܠܵܬ݂ܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ
ܥܘܼܢܵܝܵܐ ܒܗܵܘ̇ ܕܡܲܪܝܲܡ: ܕܸܒ݂ܚܵܐ ܠܵܐ ܡܸܬ݂ܡܲܠܠܵܢܵܐ. ܘܩܘܼܪܒܵܢܵܐ ܕܠܲܝܬ݁ ܠܹܗ ܦܸܚܡܵܐ. ܕܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܢܸܣܲܒ݂ ܒܲܚܕ݂ܵܐ ܐܵܘܝܘܼܬ݂ܵܐ. ܒܡܵܘܬܹ݁ܗ ܗ݇ܘ̣ ܓܹܝܪ ܗܘ̤ܵܐ ܠܲܢ ܫܪܵܝܵܐ ܕܟ݂ܠ ܒܝܼ̈ܫܵܢ. ܐܵܦ ܒܲܩܝܵܡܬܹ݁ܗ ܥܲܠ̣ܝܼ ܪܲܡܪ̱ܡܲܢ܀ ܘܥܲܡ ܪ̈ܘܼܚܵܢܹܐ ܙܵܕܹܩ̇ ܕܲܢܝܲܒܸ݁ܒ݂ ܠܹܗ ܗܲܠܸܠܘܼܝܲܗ. ܒܵܬܹ̈ܐ: ܐܵܘܕܵܘ ܟܠܟ݂ܘܿܢ ܥܲܡܡܹ̈ܐ. ܕܲܗܘ̤ܵܘ ܐ݇ܚܝܵܢܹ̈ܐ ܠܐܲܒ݂ܪܵܗܵܡ ܒܗܲܝܡܵܢܘܼܬ݂ܵܐ܀ ܘܥܲܡ ܪ̈ܘܼܚܵܢܹܐ ܙܵܕܹܩ ܕܲܢܝܲܒܸ݁ܒ݂ ܠܹܗ ܗܲܠܸܠܘܼܝܲܗ.
ܕܐܲܪܒܲܥܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ
ܥܘܼܢܵܝܵܐ: ܡܸܢܹܗ ܘܠܹܗ. ܗܵܢܵܘ ܦܲܓ݂ܪܹܗ ܘܲܕ݂ܡܹܗ ܕܡܵܪܲܢ. ܕܫܲܩ̣ܠܘܼܗܝ ܥܲܡܡܹ̈ܐ ܘܗܲܝܡܸܢ̣ܘ ܘܲܚ̣ܝܵܘ. ܒܵܬܹ̈ܐ: ܐܝܼܠܵܢܵܐ ܝܲܗ̣݇ܒ݂ ܠܐܲܒ݂ܪܵܗܵܡ. ܦܹܐܪܵܐ ܕܲܦܥ̣ܵܐ ܘܲܩ̣ܪܵܐ ܠܹܗ. ܨܠܝܼܒ݂ܵܐ ܕܹܝܢ ܝܲܗ̣݇ܒ݂ܠܲܢ ܡܵܪܲܢ. ܕܲܠܟ݂ܠ ܩܵܪܹܐ ܠܡܲܠܟ݁ܘܼܬ݂ܵܐ.
ܚܲܡܫܵܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ
ܥܘܼܢܵܝܵܐ: ܒܗܵܘ̇ ܕܝܘܿܚܲܢܵܢ. ܗܵܢܵܘ ܕܸܒ݂ܚܵܐ ܩܲܕܝܼܫܵܐ. ܕܒܹܗ ܡܸܬ݂ܚܲܣܹܝܢ ܚܲܛܵܝܹ̈ܐ. ܗܵܢܵܘ ܠܲܚܡܵܐ ܫܡܲܝܵܢܵܐ. ܘܫܸܩܝܵܐ ܕܲܪܕ݂ܵܐ ܠܲܢ ܡ̣ܢ ܪܵܘܡܵܐ. ܗܵܢܵܘ ܦܲܓ݂ܪܹܗ ܕܒܲܪ ܐܲܠܵܗܵܐ. ܕܲܒ݂ܝܲܕ݂ ܪ̈ܲܚܡܵܘܗܝ ܩ̣ܨܵܝܗܝ ܥܲܠ ܐܲܦܲܝ̈ܢ. ܗܲܠܸܠܘܼܝܲܗ. ܒܵܬܹ̈ܐ: ܒܪܵܐ ܡܬ݂ܘܿܡܵܝܵܐ ܘܲܕ݂ܡܸܢ ܥܵܠܲܡ. ܝܲܠܕܹ݁ܗ ܕܐܲܒ݂ܵܐ ܘܒܲܪ ܐܝܼܬ݂ܘܼܬܹܗ. ܕܝܲܗ̣݇ܒ݂ ܗ݇ܘ̣ܵܐ ܦܲܓ݂ܪܹܗ ܘܕܲܒ݂ܚ̣ܘܼܗܝ ܒܝܼܫܹ̈ܐ ܥܲܠ ܓܵܓ݂ܘܼܠܬܵܐ ܕܲܠܟ݂ܠ ܢܲܚܸܐ. ܡܝܼܬ݂ ܐܲܝܟܼ ܕܲܨ̣ܒ݂ܵܐ ܚ̣ܝܵܐ ܐܲܝܟܼ ܕܲܒ݂ܥ̣ܵܐ. ܘܦܲܓ݂ܪܹܗ ܘܲܕ݂ܡܹܗ ܝܲܗ̣݇ܒ݂ ܠܵܗ̇ ܠܥܹܕ݁ܬܹ݁ܗ. ܗܲܠܸܠܘܼܝܲܗ.
ܥܪܘܼܒ݂ܬܵܐ ܕܡܵܘܕܝܵܢܹ̈ܐ
ܥܘܼܢܵܝܵܐ ܒܩܵܠ ܗܵܐ ܒܓ݂ܵܘ ܥܹܕܬܵܐ: ܒܕ݂ܘܼܟ݂ܪܵܢ ܣܵܗܕܹ̈ܐ ܩܲܕܝܼܫܹ̈ܐ. ܩܪܘܿܒ݂ܘ ܣܲܒ݂ܘ ܐܲܚܲܝ̈ ܦܲܓ݂ܪܵܐ ܝܲܩܝܼܪܵܐ. ܘܲܕ݂ܡܵܐ ܚܲܝܵܐ ܘܡܲܚܝܵܢܵܐ ܕܒܲܪ ܡܵܪܹܟ݁ܠ. ܕܲܪܫܲܡ̣ ܕܘܼܟ݂ܪܵܢܗܘܿܢ ܥܲܠ ܡܲܕ݂ܒ݁ܚܹܗ. ܘܐܲܫ̣ܪܝܼ ܚܲܝܠܹܗ ܟܲܣܝܵܐ ܒܓܲܪ̈ܡܲܝܗܘܿܢ. ܕܢܸܗܘܘܿܢ ܡܲܪܕܹ݁ܝܢ ܟܠ ܥܘܼܕ݂ܪ̈ܵܢܝܼܢ. ܒܥܹܕܲܬ݂ ܩܘܼܕ݂ܫܵܐ ܕܒ݂ܵܗ̇ ܙܵܡ̇ܪܝܼܢܲܢ ܗܲܠܸܠܘܼܝܲܗ. ܒܵܬܹ̈ܐ: ܣܵܗܕܹ̈ܐ ܕܲܗܘ̤ܵܘ ܓܹܐܙܲܒ݂ܪܹ̈ܐ ܪ̈ܘܼܚܵܢܵܝܹܐ. ܥܲܕܲܪܘ ܠܟܸܢܫܲܢ ܒܲܨܠܵܘܵܬ݂̈ܟ݂ܘܿܢ. ܕܲܪܫܲܡ̣ ܕܘܼܟ݂ܪܵܢܟ݂ܘܿܢ ܥܲܠ ܡܲܕ݂ܒ݁ܚܹܗ. ܘܐܲܫ̣ܪܝܼ ܚܲܝܠܹܗ ܟܲܣܝܵܐ ܒܓܲܪ̈ܡܲܝܟ݁ܘܿܢ. ܕܢܸܗܘܘܿܢ ܡܲܪܕܹ݁ܝܢ ܟܠ ܥܘܼܕ݂ܪ̈ܵܢܝܼܢ. ܒܥܹܕܲܬ݂ ܩܘܼܕ݂ܫܵܐ ܕܒ݂ܵܗ̇ ܙܵܡ̇ܪܝܼܢܲܢ ܗܲܠܸܠܘܼܝܲܗ.
ܕܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܲܩܝܵܡܬܵܐ ܘܡܸܬ݂ܩܪܸܐ ܚܲܕ݂ܬܵܐ
ܥܘܼܢܵܝܵܐ: ܗܵܐ ܒܓ݂ܵܘ ܥܹܕ݁ܬܵܐ ܡܸܬ݂ܦܲܠܲܓ݂ ܣܲܡ ܚܲܝܘܼܬ݂ܵܐ ܕܲܢ̣ܚܸܬ݂ ܡ̣ܢ ܪܵܘܡܵܐ. ܘܲܟ݂ܣܸܐ ܒܐ݇ܪܵܙܵܐ ܒܓ݂ܵܘ ܠܲܚܡܵܐ ܘܚܲܡܪܵܐ܀ ܡܸܟܹ݁ܝܠ ܦܫܘܿܛܘ ܐܝܼܕܲܝ̈ܟ݁ܘܿܢ ܡܵܝܘܿܬܹ̈ܐ ܕܒܲܚܛܵܗܲܝ̈ܗܘܿܢ ܥܘܼܡܪܹ̈ܐ ܠ̣ܒܲܟ݂ܘ ܒܲܫܝܘܿܠ. ܘܣܲܒ݂ܘ ܘܐܸܬ݂ܚܲܣܵܘ ܘܲܩܢܵܘ ܚܲܝܹ̈ܐ. ܘܐܲܡܠܸܟ݂ܘ ܥܲܡ ܡܫܝܼܚܵܐ ܘܝܲܒܸ݁ܒ݂ܘ ܘܐܸܡܲܪܘ ܗܲܠܸܠܘܼܝܲܗ. ܒܵܬܹ̈ܐ: ܗܵܢܵܘ ܐܵܣܝܵܐ ܕܲܢ̣ܚܸܬ݂ ܠܲܫܝܘܿܠ. ܘܐܲܣ̣ܝܼ ܠܕܲܒ݂ܠ̣ܝܼܘ ܒܲܚܛܵܗܲܝ̈ܗܘܿܢ܀ ܡܸܟܹ݁ܝܠ ܦܫܘܿܛܘ..܀
ܥܪܘܼܒ݂ܬܵܐ ܕܬܲܪܬܹ݁ܝܢ ܕܲܩܝܵܡܬܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܕܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܲܩܝܵܡܬܵܐ
ܥܘܼܢܵܝܵܐ ܡܸܢܹܗ ܘܠܹܗ: ܐܲܝܠܹܝܢ ܕܦܲܓ݂ܪܵܟܼ ܫܵܩ݁ܠܝܼܢ ܘܒܲܕ݂ܡܵܟܼ ܚܵܐܹ̇ܝܢ. ܥܲܡ ܡܲܠܲܐܟܹ̈ܐ ܕܒܲܫܡܲܝܵܐ ܠܵܟܼ ܣ̇ܵܓ݂ܕ݁ܝܼܢ ܟܲܕ݂ ܐܵܡ̇ܪܝܼܢ. ܩܲܕ݁ܝܼܫ ܩܲܕ݁ܝܼܫ ܩܲܕ݁ܝܼܫܲܬ݁ ܡܵܪܝܵܐ. ܒܵܬܹ̈ܐ: ܡܲܠܟܹ̈ܐ ܕܬܲܪܫܝܼܫ ܘܲܕ݂ܓ݂ܵܙܪ̈ܵܬ݂ܵܐ ܠܵܟܼ ܣ̇ܵܓ݂ܕ݁ܝܼܢ. ܘܩܘܼܪ̈ܒܵܢܹܐ ܢܲܝܬ݁ܘܿܢ ܠܵܟܼ ܟܲܕ݂ ܐܵܡ̇ܪܝܼܢ. ܩܲܕܝܼܫ ܩܲܕܝܼܫ ܩܲܕܝܼܫܲܬ݁ ܡܵܪܝܵܐ.
ܥܪܘܼܒ݂ܬܵܐ ܕܲܬ݂ܠܵܬ݂ ܕܲܩܝܵܡܬܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܕܘܼܟ݂ܪܵܢܵܐ ܕܡܵܪܝ ܓܝܼܘܲܪܓܝܼܣ ܣܵܗܕܵܐ.
ܥܘܼܢܵܝܵܐ ܒܗܵܘ̇ ܕܡܲܪܝܲܡ: ܒܪܝܼܟ݂ܘܼ ܕܐܵܘܪܸܒ݂ ܒܲܚܢܵܢܹܗ. ܠܝܘܿܡ ܕܘܼܟ݂ܪܵܢܹܗ ܕܩܲܕܝܼܫܵܐ. ܘܢܲܨܝܼܚܵܐ ܡܵܪܝ ܓܝܼܘܲܪܓܝܼܣ. ܒܪܵܘܡܵܐ ܘܥܘܼܡܩܵܐ ܫܲܘܝܵܐܝܼܬ݂. ܘܡܸܛܠ ܗܵܕܹܐ ܐܵܦ ܚܢܲܢ ܟܠܲܢ ܡܫܲܒ݁ܚܝܼܢܲܢ. ܠܗܵܘ̇ ܕܐܲܫ̣ܘ̱ܝܹܗ ܠܗܵܢܵܐ ܫܘܼܒ݂ܚܵܐ܀ ܘܲܒ݂ܚܲܕ݂ܘܼܬ݂ܵܐ ܢܪܲܡܪܸܡ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܬܵܘ ܚܲܒ݁ܝܼܒܲܝ̈ ܢܝܲܩܲܪ ܒܚܘܼܒܵܐ ܠܝܘܿܡ ܕܘܼܟ݂ܪܵܢܹܗ ܕܣܵܗܕܵܐ ܙܲܗܝܵܐ܀ ܣܵܗܕܵܐ ܙܲܗܝܵܐ ܡܵܪܝ ܓܝܼܘܲܪܓܝܼܣ. ܟܡܵܐ ܪܲܒ݁ ܛܘܼܒ݂ܵܐ ܕܲܡܛܲܝܲܒ݂ ܠܵܟܼ܀ ܘܲܒ݂ܚܲܕ݂ܘܼܬ݂ܵܐ ܢܪܲܡܪܸܡ ܘܢܹܐܡܲܪ ܗܲܠܸܠܘܼܝܲܗ.
ܕܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܲܩܝܵܡܬܵܐ
ܥܘܼܢܵܝܵܐ: ܗܵܐ ܦܲܓ݂ܪܵܐ ܘܲܕ݂ܡܵܐ ܚܲܝܵܐ. ܕܲܡܫܝܼܚܵܐ ܫܵܒܹ̇ܩ ܚܵܘܒܹ̈ܐ. ܩܪܘܿܒ݂ܘ ܥܲܡܡܹ̈ܐ ܣܲܒ݂ܘ ܚܘܼܣܵܝܵܐ. ܡ̣ܢ ܦܵܬ݂ܘܿܪܵܐ ܕܡܲܠܟ݁ܘܼܬ݂ܵܐ ܗܲܠܸܠܘܼܝܲܗ.. ܒܵܬܹ̈ܐ: ܝܘܿܢܵܬܲܢ ܕܲܒ݂ܪܹܫ ܚܘܼܛܪܹܗ. ܛ̣ܥܸܡ ܕܸܒ݂ܫܵܐ ܘܲܢܗܲܪ̈ ܥܲܝܢܵܘ̈ܗܝ. ܗܵܐ ܚܲܠܝܘܼܬܹܗ ܕܲܨܠܝܼܒ݂ܵܐ. ܐܲܢܗܲܪܘ ܒܵܗ̇ ܪܸ̈ܥܝܵܢܲܝܟ݁ܘܿܢ ܗܲܠܸܠܘܼܝܲܗ.
ܥܪܘܼܒ݂ܬܵܐ ܕܐܲܪܒܲܥ ܕܲܩܝܵܡܬܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒܫܲܒܵܐ ܕܚܲܡܫܵܐ ܕܲܩܝܵܡܬܵܐ (ܘܕ݂ܘܼܟ݂ܪܵܢܵܐ ܗ݇ܘ̣ ܕܡܵܪܝ ܐܲܕܲܝ ܫܠܝܼܚܵܐ)
ܥܘܼܢܵܝܵܐ: ܒܩܵܠ ܢܵܘܕܸ݁ܐ ܠܒܲܪ ܡܲܠܟܵܐ: ܒܕܲܟ݂ܝܘܼܬ݂ܵܐ ܕܬܹܐܪܬܵܐ ܘܚܘܼܫܵܒܹ̈ܐ ܕܟܲܝ̈ܵܐ ܢ̤ܬ݂ܩܲܪܲܒ݂ ܠܲܓ݂ܡܘܼܪܬ݂ܵܐ ܕܲܒ̣ܪ̈ܲܚܡܹܐ ܡܸܬ݂ܝܲܗ݇ܒܵܐ. ܠܚܘܼܣܵܝܵܐ ܘܲܠܪܲܗܒ݂ܘܿܢܵܐ ܕܚܲܝܹ̈ܐ ܚܲܕ݂ܬܹ̈ܐ. ܟܠܲܢ ܒܪܸܚܡ̱ܬ݂ܵܐ ܢܚܲܒ݁ܒ݂ܝܼܘܗܝ ܠܐ݇ܪܵܙܵܐ. ܘܲܒ݂ܕܸܚ̱ܠܬ݂ܵܐ ܢܸܦܠܘܿܚ ܠܪܲܒ ܟܘܼܡܪܹ̈ܐ ܕܚܲܣ̣ܝܲܢ܀ ܘܥܲܡ ܪ̈ܘܼܚܵܢܹܐ ܢܩܲܕ݁ܫܝܼܘܗܝ ܩܘܼܕܵܫܹ̈ܐ ܬܠܵــܬ݂ܵܐ. ܕܫܵܘܬ݁ܦܹܗ ܠܓܸܢܣܲܢ ܒܐܘܼܟ݂ܠܵܐ ܕܚܲܝܹ̈ܐ ܚܲܕ݂ܬܹ̈ܐ. ܗܵܪܟܵܐ ܒܐ݇ܪܵܙܵܐ ܘܬܲܡܵܢ ܒܲܫܪܵܪܵܐ. ܡܵܐ ܕܕ݂ܵܢ̇ܚܵܐ ܬܸܫܒ݁ܘܿܚܬܵܐ ܕܡܹܐܬ݂ܝܹܗ ܪܲܒܵܐ܀ ܒܵܬܹ̈ܐ: ܒܐ݇ܪܵܙܵܐ ܕܦܲܓ݂ܪܹܗ ܬܲܪܣ̣ܝܼ ܠܡܵܝܘܿܬܹ̈ܐ. ܒܪܵܐ ܕܐܲܠܵܗܵܐ ܒܕܸܢܚܹܗ ܕܲܥܠܲܝܗܘܿܢ܀ ܘܥܲܡ ܪ̈ܘܼܚܵܢܹܐ...܀
ܥܪܘ̣ܒ݂ܬܵܐ ܕܚܲܡܸܫ ܕܲܩܝܵܡܬܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒܫܲܒܵܐ ܕܸܫܬܵܐ ܕܲܩܝܵܡܬܵܐ
ܥܘܼܢܵܝܵܐ ܒܗܵܐ ܦܲܓ݂ܪܵܐ: ܒܪܝܼܟܼ ܪܵܥܝܵܐ ܕܲܚ̣ܙܵܗ̇ ܠܥܵܢܹ̈ܗ. ܕܟܲܦܢܵܐ ܘܲܩ̣ܨܵܐ ܠܵܗ̇ ܦܲܓ݂ܪܹܗ. ܘܲܬ݂ܪܲܥ̣ ܕܲܦܢܹܗ ܠܫܵܩܘܼܬ݂ܵܐ. ܘܐܲܪܕ݁ܝܼ ܠܵܗ̇ ܡܲܝ̈ܵܐ ܚܲܝܹ̈ܐ. ܗܲܠܸܠܘܼܝܲܗ܀ ܒܵܬܹ̈ܐ: ܐܸܢ ܡ̣ܢ ܦܲܓ݂ܪܹܗ ܕܕ݂ܵܢܝܼܐܹܝܠ. ܐܸܣܬܲܪܲܕ݂ܘ ܐܲܪ̈ܝܵܘܵܬ݂ܵܐ. ܟܡܵܐ ܡ̣ܢ ܦܲܓ݂ܪܹܗ ܕܦܵܪܘܿܩܲܢ. ܡܸܣܬܲܪܕ݂ܵܐ ܫܝܘܿܠ ܘܲܚܛܝܼܬ݂ܵܐ. ܗܲܠܸܠܘܼܝܲܗ
ܕܘܼܟ݂ܪܵܢܵܐ ܕܲܫܡܘܿܢܝܼ ܘܕܲܒ݂ܢܹ̈ܝܗ̇
ܥܘܼܢܵܝܵܐ ܒܗ̇ܘ ܕܒܲܩܝܵܡܬܵܐ: ܡܫܝܼܚܵܐ ܡܚܲܕܸܬ݂ ܟܠ ܐܲܢ̣ܗܲܪ ܬܲܪܥܝܼܬܲܢ ܒܝܘܼܠܦܵܢܹܗ. ܡܸܛܠ ܕܲܩ̣ܪܸܒ݂ ܠܹܗ ܙܲܒ݂ܢܵܐ ܕܥܲܠ ܦܘܼܠܚܵܢܵܐ. ܘܗܵܐ ܡܛܲܝܒ݂ܝܼܢܲܢ ܫܲܘܝܵܐܝܼܬ݂ ܠܡܸܩܪܵܐ ܒܣܸܦܪܹ̈ܐ ܕܪܘܼܚ ܩܘܼܕ݂ܫܵܐ. ܢܸܬ݂ܩܲܪܲܒ݂ ܟܠܲܢ ܠܦܲܓ݂ܪܹܗ ܘܲܕ݂ܡܹܗ ܝܲܩܝܼܪܵܐ. ܒܕܸܚܠ̱ܬ݂ܵܐ ܪܲܒ݁ܬ݂ܵܐ ܘܒܲܪܬܹܝܬ݂ܵܐ. ܕܡܵܐ ܓܹܝܪ ܫܡܲܝܵܢܵܐ ܪܕ݂ܵܐ ܡ̣ܢ ܣܸܛܪܹܗ. ܕܲܒ݂ܪܵܐ ܕܐܸܨܛܠܸܒ݂ ܒܓ݂ܵܓ݂ܘܼܠܬܵܐ. ܢܸܣܒ݂ܝܼܘܗܝ ܘܢܸܣܓ݁ܘܿܕ݂ ܘܲܢܫܲܒܲܚ܀ ܘܲܢܝܲܒܸ݁ܒ݂ ܠܹܗ ܐܲܟܲܚ݇ܕ݂ ܘܢܹܐܡܲܪ. ܩܲܕܝܼܫܲܬ݁ ܩܲܕܝܼܫܲܬ݁ ܩܲܕܝܼܫܲܬ݁ ܐܘܿ ܡܵܪܹܟ݁ܠ. ܗܲܠܸܠܘܼܝܲܗ ܗܲܠܸܠܘܼܝܲܗ. ܒܵܬܹ̈ܐ: ܙܡܲܪܘ ܠܡܵܪܝܵܐ ܒܟܸܢܵܪܹ̈ܐ. ܕܲܡܟܲܣܸܐ ܫܡܲܝܵܐ ܒܲܥܢܵܢܹ̈ܐ܀ ܘܲܢܝܲܒܸ݁ܒ݂ ܠܹܗ ܐܲܟܲܚ݇ܕ݂ ܘܢܹܐܡܲܪ...܀
ܥܹܐܕ݂ܵܐ ܩܲܕ݁ܝܼܫܵܐ ܕܣܘܼܠܵܩܹܗ ܕܡܵܪܲܢ
ܥܘܼܢܵܝܵܐ ܡܸܢܹܗ ܘܠܹܗ: ܡ̣ܢ ܡܪ̈ܵܘܡܹܐ ܥܸܠܵܝܹ̈ܐ: ܡܫܝܼܚܵܐ ܡܵܪܲܢ ܘܦܵܪܘܿܩܵܐ ܕܟ̣ܠܵܐ. ܓܲܐܝܘܼܬ݂ܵܐ ܘܫܘܼܒ̣ܚܵܐ ܘܗܸܕ݂ܪܵܐ ܠ̣ܒܸܫ. ܟܲܕ݂ ܝܲܗ̣݇ܒ̣ ܗ݇ܘ̣ܵܐ ܦܘܼܪܩܵܢܵܐ ܠܥܲܡܡܹ̈ܐ. ܘܫܘܼܒ݂ܩܵܢ ܚܵܘ̈ܒܹ݁ܐ ܘܲܚܛܵܗܹ̈ܐ ܠܚܘܼܣܵܝܵܐ ܕܟ݂ܠܵܐ܀ ܠܗܵܢܵܐ ܕܡܵܐ...܀ ܒܵܬܹ̈ܐ: ܐܲܢ݇ܬ݁ܘܿܢ ܕܹܝܢ ܩܵܘܵܘ ܒܐܘܿܪܸܫܠܸܡ ܡܕ݂ܝܼܢ݇ܬܵܐ. ܥܕܲܡܵܐ ܕܬܸܠܒ݁ܫܘܼܢ ܚܲܝܠܵܐ ܡ̣ܢ ܪܵܘܡܵܐ܀ ܠܗܵܢܵܐ ܕܡܵܐ ܝܲܩܝܼܪܵܐ ܘܦܲܓ݂ܪܵܐ ܕܲܢ̣ܣܲܒ݂ܢ ܟܠܲܢ. ܒܬ݂ܵܘܕܝܼܬ݂ܵܐ ܢܫܲܒܲܚ ܠܹܗ ܘܢܹܐܡܲܪ. ܗܲܠܸܠܘܼܝܲܗ ܗܲܠܸܠܘܼܝܲܗ̇܀ ܘܐܲܦܸܩ̣ ܐܸܢܘܿܢ ܥܕܲܡܵܐ ܠܒܹܝܬ݂ ܥܲܢܝܵܐ. ܘܐܲܪܝܼܡ̣ ܐܝܼܕ݂ܵܘ̈ܗܝ ܘܒܲܪܸܟܼ ܐܸܢܘܿܢ܀ ܠܗܵܢܵܐ ܕܡܵܐ...܀ ܘܲܗܘ̤ܵܐ ܕܟܲܕ݂ ܡܒܲܪܸܟܼ ܠܗܘܿܢ. ܐܸܬ݂ܦܪܸܫ ܡܸܢܗܘܿܢ ܘܲܣ̣ܠܸܩ ܠܲܫܡܲܝܵܐ܀
ܥܪܘܼܒ݂ܬܵܐ ܕܒ݂ܵܬܲܪ ܣܘܼܠܵܩܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܒ݂ܵܬܲܪ ܣܘܼܠܵܩܵܐ
ܥܘܼܢܵܝܵܐ ܡܸܢܹܗ ܘܠܹܗ: ܡ̣ܢ ܡܪ̈ܵܘܡܹܐ ܥܸܠܵܝܹ̈ܐ. ܡܫܝܼܚܵܐ ܡܵܪܲܢ ܘܦܵܪܘܿܩܵܐ ܕܟ̣ܠܵܐ. ܓܲܐܝܘܼܬ݂ܵܐ ܘܫܘܼܒ̣ܚܵܐ ܘܗܸܕ݂ܪܵܐ ܠ̣ܒܸܫ. ܟܲܕ݂ ܝܲܗ̣݇ܒ̣ ܗ݇ܘ̣ܵܐ ܦܘܼܪܩܵܢܵܐ ܠܥܲܡܡܹ̈ܐ. ܘܫܘܼܒ݂ܩܵܢ ܚܵܘ̈ܒܹ݁ܐ ܘܲܚܛܵܗܹ̈ܐ ܠܚܘܼܣܵܝܵܐ ܕܟ̣ܠܵܐ܀ ܠܗܵܢܵܐ ܕܡܵܐ ܝܲܩܝܼܪܵܐ ܘܦܲܓ݂ܪܵܐ ܕܲܢ̣ܣܲܒ݂ܢ ܟܠܲܢ. ܒܬ݂ܵܘܕ݁ܝܼܬ݂ܵܐ ܢܫܲܒܲܚ ܠܹܗ ܘܢܹܐܡܲܪ ܗܲܠܸܠܘܼܝܲܗ ܗܲܠܸܠܘܼܝܲܗ܀ ܒܵܬܹ̈ܐ: ܐܲܢ݇ܬ݁ܘܿܢ ܕܹܝܢ ܩܵܘܵܘ ܒܐܘܿܪܸܫܠܸܡ ܡܕ݂ܝܼܢ݇ܬܵܐ. ܥܕܲܡܵܐ ܕܬܸܠܒ݁ܫܘܼܢ ܚܲܝܠܵܐ ܡ̣ܢ ܪܵܘܡܵܐ܀ ܠܗܵܢܵܐ ܕܡܵܐ..܀ ܘܐܲܦܸܩ̣ ܐܸܢܘܿܢ ܥܕܲܡܵܐ ܠܒܹܝܬ݂ ܥܲܢܝܵܐ. ܘܐܲܪܝܼܡ̣ ܐܝܼܕ݂ܵܘ̈ܗܝ ܘܒܲܪܸܟܼ ܐܸܢܘܿܢ܀ ܠܗܵܢܵܐ ܕܡܵܐ ܝܲܩܝܼܪܵܐ....܀ ܘܲܗܘ̤ܵܐ ܕܟܲܕ݂ ܡܒܲܪܸܟܼ ܠܗܘܿܢ. ܐܸܬ݂ܦܪܸܫ ܡܸܢܗܘܿܢ ܘܲܣ̣ܠܸܩ ܠܲܫܡܲܝܵܐ܀
ܥܪܘܼܒ݂ܬܵܐ ܕܬܲܪܬܹܝܢ ܕܒ݂ܵܬܲܪ ܣܘܼܠܵܩܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܦܲܢܛܹܩܘܼܣܛܹܐ
ܥܘܼܢܵܝܵܐ ܒܗܵܐ ܒܓ݂ܵܘ: ܐ݇ܪܵܙܵܐ ܟܲܣܝܵܐ ܕܲܡܫܝܼܚܵܐ ܗܵܐ ܡܸܬ݂ܦܲܠܲܓ݂. ܟܸܢܫܹ̈ܐ ܕܡܲܠܲܐܟܹ̈ܐ ܠܦܵܬ݂ܘܿܪ ܩܘܼܕ݂ܫܵܐ ܪܘܼܚܵܢܵܐ ܡܩܲܕ݁ܫܝܼܢ܀ ܟܠܲܢ ܒܝܲܕ݂ ܛܲܝܒ݁ܘܼܬܹܗ ܕܦܵܪܘܿܩܲܢ. ܒܗܲܝܡܵܢܘܼܬ݂ܵܐ ܠܘܵܬܹܗ ܢܸܬ݂ܩܲܪܲܒ݂. ܘܦܲܓ݂ܪܹܗ ܘܲܕ݂ܡܹܗ ܕܲܒ݂ܪܵܐ ܡܫܝܼܚܵܐ ܢܸܣܲܒ݂ ܘܲܢܫܲܒܲܚ ܟܲܕ݂ ܐܵܡܪܝܼܢܲܢ ܗܲܠܸܠܘܼܝܲܗ. ܒܵܬܹ̈ܐ: ܘܲܗܘ̤ܵܐ ܡ̣ܢ ܫܸܠܝܵܐ ܡ̣ܢ ܫܡܲܝܵܐ. ܩܵܠܵܐ ܐܲܝܟܼ ܕܪܘܼܚܵܐ ܥܲܙܝܼܙܬܵܐ܀ ܟܠܲܢ ܒܝܲܕ݂ ....܀
ܥܪܘܼܒ̣ܬܵܐ ܕܕܲܗܒ̣ܵܐ
ܥܘܼܢܵܝܵܐ: ܒܪܝܼܟܼ ܕܲܒ݂ܢ̣ܵܗ̇ ܠܥܹܕܲܬ݂ ܩܘܼܕ݂ܫܵܐ. ܥܲܠ ܟܹܐܦܵܐ ܕܗܲܝܡܵܢܘܼܬ݂ܵܐ. ܘܣܵܡ̣ ܒܵܗ̇ ܫܠܝܼܚܹ̈ܐ ܘܲܢܒ݂ܝܹ̈ܐ. ܘܡܲܠܦܵܢܹ̈ܐ ܝܵܕ݂ܥܲܝ̈ ܫܪܵܪܵܐ܀ ܒܵܬܹ̈ܐ: ܕܲܗܒ݂ܵܐ ܫܐܸܠ̣ ܗ݇ܘ̣ܵܐ ܗܵܘ̇ ܡܫܲܪܝܵܐ. ܡ̣ܢ ܫܸܡܥܘܿܢ ܘܡ̣ܢ ܝܘܿܚܲܢܵܢ. ܘܗܸܢ̣ܘܿܢ ܝܲܗ̣݇ܒ݂ܘ ܠܹܗ ܚܘܼܠܡܵܢܵܐ. ܒܲܫܡܹܗ ܕܝܼܫܘܿܥ ܢܵܨܪܵܝܵܐ܀
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܲܫܠܝܼܚܹ̈ܐ
ܥܘܼܢܵܝܵܐ: ܐ݇ܪܵܙܵܐ ܟܲܣܝܵܐ ܕܲܡܫܝܼܚܵܐ ܗܵܐ ܡܸܬ݂ܦܲܠܲܓ݂. ܟܸܢܫܹ̈ܐ ܕܡܲܠܲܐܟܹ̈ܐ ܠܦܵܬ݂ܘܿܪ ܩܘܼܕ݂ܫܵܐ ܪܘܼܚܵܢܵܐ ܡܩܲܕ݁ܫܝܼܢ܀ ܟܠܲܢ ܒܝܲܕ݂ ܛܲܝܒ݁ܘܼܬܹܗ ܕܦܵܪܘܿܩܲܢ. ܒܗܲܝܡܵܢܘܼܬ݂ܵܐ ܠܘܵܬܹܗ ܢܸܬ݂ܩܲܪܲܒ݂. ܘܦܲܓ݂ܪܹܗ ܘܲܕ݂ܡܹܗ ܕܲܒ݂ܪܵܐ ܡܫܝܼܚܵܐ. ܢܸܣܲܒ݂ ܘܲܢܫܲܒܲܚ ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ܀ ܒܵܬܹ̈ܐ: ܘܲܗܘ̤ܵܐ ܡ̣ܢ ܫܸܠܝܵܐ ܡ̣ܢ ܫܡܲܝܵܐ. ܩܵܠܵܐ ܕܐܲܝܟܼ ܕܪܘܼܚܵܐ ܥܲܙܝܼܙܬܵܐ܀ ܟܠܲܢ ܒܝܲܕ݂ ܛܲܝܒ݁ܘܼܬܹܗ ܘܫܲܪܟܵܐ܀
ܥܪܘܼܒ݂ܬܵܐ ܕܬܲܪܬܹܝܢ ܕܲܫܠܝܼܚܹ̈ܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒܫܲܒܵܐ ܕܲܬ݂ܠܵܬ݂ܵܐ ܕܲܫܠܝܼܚܹ̈ܐ
ܥܘܼܢܵܝܵܐ: ܬܵܘ ܟܠܲܢ ܢܸܬ݂ܩܲܪܲܒ݂ ܠܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ ܒܕܸܚܠ̱ܬ݂ܵܐ ܘܒܲܪܬܹܝܬ݂ܵܐ. ܘܲܒ݂ܚܘܼܒܵܐ ܢܸܣܒ݂ܝܼܘܗܝ ܘܲܢܫܲܒܲܚ. ܗ̤ܘ ܓܹܝܪ ܒܐ݇ܪܵܙܵܐ ܠܐܹܫܲܥܝܵܐ ܢܒ݂ܝܼܵܐ ܐܸܬ݂ܚܵܘܝܼ ܗ̣݇ܘܵܐ. ܓܡܘܼܪܬܵܐ ܝܲܗ̣݇ܒ݂ ܠܹܗ ܪܘܼܚܵܢܵܐ ܘܐܸܬ݂ܚܲܣܝܼܘ ܚܵܘܒܵܘ̈ܗܝ܀ ܠܘܵܬܹܗ ܢܸܣܬܲܪܗܲܒ݂ ܟܠܲܢ. ܘܠܲܐܠܵܗܘܼܬܹܗ ܢܸܣܓ݁ܘܿܕ݂ ܥܲܡ ܟܸܢܫܲܝ̈ ܪܵܘܡܵܐ. ܟܲܕ݂ ܐܵܡ̇ܪܝܼܢܲܢ ܩܲܕ݁ܝܼܫܲܬ݁. ܩܲܕ݁ܝܼܫܲܬ݁. ܩܲܕ݁ܝܼܫܲܬ݁ ܐܝܼܬ݂ܝܵܐ ܓܢܝܼܙܵܐ ܗܲܠܸܠܘܼܝܲܗ. ܒܵܬܹ̈ܐ: ܗܵܢܵܘ ܣܲܒ݂ܪܵܐ ܕܠܹܗ ܡܣܲܟܹ݁ܝܢ ܗ݇ܘ̣ܵܘ ܢܒ݂ܝܹ̈ܐ ܒܐ݇ܪ̈ܵܙܹܐ. ܝܑܼܫܘܿܥ ܡܲܠܟܲܢ ܕܲܕ݂ܢܲܚ̣ ܒܚܘܼܒܹ݁ܗ ܡ̣ܢ ܒܹܝܬ݂ ܕܵܘܝܼܕ݂܀ ܠܘܵܬܹܗ ܢܸܣܬܲܪܗܲܒ݂ ܟܠܲܢ ...܀ ܗܵܢܵܘ ܕܲܚ̣ܙܵܐ ܢܒ݂ܝܼܵܐ ܕܝܵܬܹܒ݂ ܥܲܠ ܡܲܪܟܲܒ݂ܬ݂ܵܐ. ܘܗܵܫܵܐ ܐܝܼܬ݂ܵܘܗܝ ܡ̣ܢ ܝܲܡܝܼܢܵܐ ܘܒ݂ܵܥܹ̇ܐ ܚܠܵܦܲܝܢ܀ ܠܘܵܬܹܗ ܢܸܣܬܲܪܗܲܒ݂...܀
ܥܪܘܼܒ݂ܬܵܐ ܕܲܬ݂ܠܵܬ݂ ܕܲܫܠܝܼܚܹ̈ܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒܫܲܒܵܐ ܕܐܲܪܒܥܵܐ ܕܲܫܠܝܼܚܹ̈ܐ
ܥܘܼܢܵܝܵܐ: ܥܲܡ ܐܲܠܦܹ̈ܐ ܕܲܟ̣ܪ̈ܘܿܒܹܐ ܘܪܸ̈ܒ݁ܘܵܬ݂ܵܐ ܕܲܣܪ̈ܵܦܹܐ ܬܵܘ ܢܸܙܡܲܪ ܫܲܘܝܵܐܝܼܬ݂. ܟܲܕ݂ ܐܵܡ̇ܪܝܼܢܲܢ ܩܲܕ݁ܝܼܫܲܬ݁ ܩܲܕܝܼܫܲܬ݁ ܩܲܕ݁ܝܼܫܲܬ݁ ܟܝܵܢܵܐ ܩܲܕ݁ܝܼܫܵܐ. ܥܲܠ ܐܲܦܲܝ̈ ܡܵܘܗܲܒ̣ܬ݂ܵܐ ܡܥܲܠܲܝܬܵܐ ܕܝܲܗ̣݇ܒ̣ܬ݁ ܠܲܢ. ܦܘܼܡܲܢ ܕܲܢܫܲܒ݁ܚܵܟܼ ܠܵܐ ܣܵܦܹ̇ܩ܀ ܗܲܒ̣ ܠܲܢ ܡܵܪܝ ܥܲܡ ܥܝܼܪܹ̈ܐ ܢܝܲܒܸ݁ܒ̣ ܠܵܟܼ ܘܢܹܐܡܲܪ ܗܲܠܹܠܘܼܝܵܗ ܗܲܠܹܠܘܼܝܵܗ. ܒܵܬܹ̈ܐ: ܒܲܠܘܝܼܬ݂ ܦܵܘܠܘܿܣ ܡܵܐܢܵܐ ܓܲܒ̣ܝܵܐ ܪܕ݂ܵܘ ܩܲܕ݁ܝܼܫܹ̈ܐ. ܘܡܲܢܲܥ̣ܘ ܠܐܲܬ݂ܪܵܐ ܕܲܡܗܲܠܠܝܼܢ ܒܹܗ ܪܘܼܚܵܢܵܐܝܼܬ݂܀ ܗܲܒ̣ ܠܲܢ ܡܵܪܝ...܀
ܥܪܘܼܒ̣ܬܵܐ ܕܐܲܪܒܲܥ ܕܲܫܠܝܼܚ̈ܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܚܲܡܫܵܐ ܕܲܫܠܝܼܚ̈ܐ
ܥܘܼܢܵܝܵܐ: ܬܠ̣ܵܘ ܢܲܨܝܼܚܹ̈ܐ ܥܲܝܢܲܝ̈ܗܘܿܢ ܠܐܲܬ݂ܪܵܐ ܕܢܘܼܗܪܵܐ. ܘܥܲܠ̣ܘ ܘܐܸܬ݂ܒܲܩܝܼܘ ܒܗܵܘ̇ ܒܘܼܣܵܡܵܐ ܕܠܵܐ ܡܸܬ݂ܡܲܠܲܠ. ܕܛܲܝܸܒ݂ ܡܫܝܼܚܵܐ ܒܲܣܒܲܪܬܹܗ ܠܪ̈ܵܚܡܲܝ ܚܘܼܒܹܗ. ܕܲܣ̣ܒܲܠܘ ܘܣܲܝܒܲܪܘ ܟܠ ܫܸܢ̈ܕܝܼܢ ܘܟ̣ܠ ܐܘܼܠܨܵܢܝܼ̈ܢ. ܒܵܬܹ̈ܐ: ܒܚܲܫܹ̈ܐ ܕܙܲܒ̣ܢܵܐ ܩـ̣ܢܵܘ ܩܲܕܝܼܫܹ̈ܐ ܡܲܠܟ݁ܘܼܬ݂ ܪܵܘܡܵܐ. ܘܠܵܐ ܚ̣ܫܲܒ̣ܘ ܡܸܕܸܡ ܒܲܒ̣ܪܝܼܬ݂ܵܐ ܕܦܵܚܹ̇ܡ ܥܲܡܵܗ̇. ܘܲܚܢܲܢ ܐܲܚܲܝ̈ ܢܸܪܕܸܐ ܒܚܘܼܒܵܐ ܠܚܲܫܹ̈ܐ ܕܲܣܒܲܠ̣ܘ. ܕܢܸܥܘܿܠ ܥܲܡܗܘܿܢ ܠܗܵܝ̇ ܡܲܠܟ݁ܘܼܬ݂ܵܐ ܕܠܵܐ ܡܸܫܬܲܪܝܵܐ.
ܥܪܘܼܒ̣ܬܵܐ ܕܚܲܡܸܫ ܕܲܫܠܝܼܚܹ̈ܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܸܫܬܵܐ ܕܲܫܠܝܼܚܹ̈ܐ
ܥܘܼܢܵܝܵܐ: ܒܩܵܠ ܠܡܵܘܗܲܒ݂ܬ݂ܵܐ: ܠܐ݇ܪܵܙܵܐ ܫܒ݂ܝܼܚܵܐ ܘܝܲܩܝܼܪܵܐ. ܕܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܘܣܲܒ݂ܪܵܐ ܘܚܲܝܹ̈ܐ ܕܒܸܪ̈ܝܵܬ݂ܵܐ. ܣܲܒ݂ܘ ܕܲܟ݂ܝܵܐܝܼܬ݂ ܐܘܿ ܡܵܝ̈ܘܿܬܹܐ. ܕܒܹܗ ܬܸܬ݂ܚܲܣܘܿܢ ܡ̣ܢ ܚܵܘ̈ܒܲܝܟ݁ܘܿܢ. ܘܬܸܗܘܘܿܢ ܝܵܪ̈ܬܹ݁ܐ ܕܚܲܝܹ̈ܐ ܚܲܕ݂ܬܹ̈ܐ. ܗܵܐ ܓܹܝܪ ܥܝܼܪܹ̈ܐ ܒܕܸܚܠܵܐ ܩܵܝ̇ܡܝܼܢ ܩܕ݂ܵܡܵܘܗܝ. ܘܙܵܝܥ̇ܝܼܢ ܕܲܢܚܘܼܪܘܼܢ ܒܥܘܼܙܵܐ ܕܢܘܼܗܪܹܗ. ܘܲܠܟ݂ܘܿܢ ܝܲܗ݇ܒܹ݁ܗ ܒܣܘܿܓ݂ܐܵܐ ܕܪ̈ܲܚܡܵܘܗܝ. ܣܲܒ݂ܘ ܕܲܟ̣ܝܵܐܝܼܬ݂ ܐܘܿ ܡܵܝ̈ܘܿܬܹܐ. ܘܐܵܘܕܵܘ ܠܹܗ ܥܲܠ ܡܵܘܗܲܒ݂ܬܹܗ. ܕܠܵܐ ܣܵܦ̈ܩܵܢ ܠܵܗ̇ ܒܸܪ̈ܝܵܬ݂ܵܐ. ܢܸܨܛܲܒܲܬ݂ ܗܵܟܹܝܠ ܒܲܡܝܲܬ݁ܪܘܼܬ݂ܵܐ ܕܚܲܝܹ̈ܐ ܚܲܕ݂ܬܹ̈ܐ. ܐܲܝܟܼ ܕܲܦܐܸܐ ܠܹܗ ܠܕܲܟ݂ܝܵܐ ܘܪܵܚܹ̇ܡ ܠܲܕ݂̈ܟܲܝܵܐ܀ ܬܵܘ ܟܠܲܢ ܢܵܘܕܸ݁ܐ ܠܹܗ ܠܒܲܪ ܡܲܠܟܵܐ ܕܫܵܘܬܸ݁ܦ ܠܲܢ ܒܒ݂ܘܼܣܵܡܵܐ ܕܐ݇ܪ̈ܵܙܵܘܗܝ. ܘܢܹܐܡܲܪ ܗܲܠܸܠܘܼܝܵܗ. ܒܵܬܹ̈ܐ: ܫܲܒܲܚܘ ܙܲܕ݁ܝܼܩܹ̈ܐ ܠܡܵܪܝܵܐ. ܘܠܲܬ݂ܪ̈ܝܼܨܹܐ ܝܵܐ̇ܝܵܐ ܬܸܫܒ݁ܘܿܚܬܵܐ. ܐܵܘܕܵܘ ܠܹܗ ܒܟܸܢܵܪܵܐ܀ ܬܵܘ ܟܠܲܢ ܢܵܘܕܹ݁ܐ ܠܹܗ....܀
ܥܪܘܼܒ݂ܬܵܐ ܕܫܸܬ݂ ܕܲܫܠܝܼܚܹ̈ܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܫܲܒ̣ܥܵܐ ܕܲܫܠܝܼܚܹ̈ܐ
ܥܘܼܢܵܝܵܐ ܒܲܫܒ݂ܝܼܚܘܼ ܝܵܘܡܹܗ: ܡܠܸܟܼ ܡܲܠܟܹ̈ܐ ܫܡܲܝܵܢܵܐ. ܕܸܒ̣ܚ̱ܬ݂ܵܐ ܚܲܝܬ݂ܵܐ ܘܩܲܕ݁ܝܼܫܬܵܐ. ܠܵܟ̣ܘܼ ܡܩܲܪܒ݂ܝܼܢܲܢ. ܩܲܒܸ݁ܠ ܡ̣ܢ ܥܲܒ̣ܕܲܝ̈ܟ. ܠܵܟܼ ܓܹܝܪ ܗܵܐ ܡܝܲܒܸ݁ܒ݂ ܪܘܼܚܵܦܵܐ ܕܡܲܠܲܐܟܹ̈ܐ. ܘܟܸܢܫܹ̈ܐ ܕܲܟ̣ܪ̈ܘܿܒܹܐ ܐܵܦ ܕܲܣܪ̈ܵܦܹܐ. ܒܩܵܠܹ̈ܐ ܕܠܵܐ ܫܲܠܘܵܐ ܡܩܲܕ݁ܫܝܼܢ ܠܐܝܼܩܵܪܵܟܼ܀ ܘܲܚܢܲܢ ܐܲܪ̈ܥܵܢܹܐ ܣܲܝܒܵܪܬܵܐ ܚܲܝܬ݂ܵܐ. ܢܸܣܲܒ݂ ܘܲܢܫܲܒܲܚ. ܘܲܢܩܲܠܸܣ ܘܲܢܗܲܕܲܪ ܘܲܢܪܲܡܸܪܸܡ ܘܢܹܐܡܲܪ. ܗܲܠܸܠܘܼܝܲܗ. ܒܵܬܹ̈ܐ: ܩܵܐܹ̇ܡ ܟܵܗܢܵܐ ܘܩ̇ܵܪܹܐ ܠܵܗ̇. ܠܪܘܼܚܵܐ ܕܩܘܼܕ݂ܫܵܐ ܟܲܣܝܵܐܝܼܬ݂. ܘܐܵܦ ܗ̤ܝ ܢܵܚ̇ܬܵܐ ܡ̣ܢ ܪܵܘܡܵܐ. ܘܐܵܬ݂̇ܝܵܐ ܠܘܵܬܹܗ ܒܬܸܫܒ݁ܘܿܚܬܵܐ܀ ܘܲܚܢܲܢ ܐܲܪ̈ܥܵܢܹܐ...܀
ܥܪܘܼܒ̣ܬܵܐ ܕܫܘܼܠܵܡ ܫܵܒ̣ܘܿܥܵܐ ܕܲܫܠܝܼܚ̈ܐ ܘܕ݂ܘܼܟ̣ܪܵܢܵܐ ܗ݇ܘ̣ ܕܫܲܒ̣ܥܝܼܢ ܘܲܬ݂ܪܹܝܢ ܬܲܠܡܝܼܕܹ̈ܐ.
ܥܘܼܢܵܝܵܐ: ܒܚܹܝܠ ܥܘܼܕ݂ܪܵܢܵܟܼ ܦܵܪܘܿܩܲܢ. ܢܨܲܚـ̣ܘ ܩܲܕ݁ܝܼܫܹ̈ܐ ܒܐܵܓ݂ܘܿܢܵܐ ܕܕ݂ܘܼܒܵܪ̈ܲܝܗܘܿܢ. ܕܒܲܨܠܝܼܒ̣ܵܟܼ ܐܸܬ݂ܟܲܠܲܠܘ. ܒܕܲܐܪܘܝܼܬ݁ ܐܸܢܘܿܢ ܒܪܸܚ̱ܡܬ݂ܵܟܼ. ܒܝܲܕ݂ ܕܒ݂ܝܼܚܘܼܬܹܗ ܕܲܩܢܘܿܡܵܟܼ܀ ܘܡܸܟܹ݁ܝܠ ܟܠܲܢ ܐܲܟܲܚ݇ܕ݂ ܢܸܙܡܲܪ ܫܘܼܒ̣ܚܵܐ ܒܕ݂ܘܼܟ݂ܪܵܢܗܘܿܢ. ܠܚܲܝܠܵܐ ܕܪܘܼܚ ܩܘܼܕ݂ܫܵܐ ܕܒܹܗ ܢ̣ܣܲـܒ݂ܘ ܟܠܝܼܠܹ̈ܐ ܕܙܵܟ݂ܘܼܬ݂ܵܐ. ܘܢܸܗܘܸܐ ܬܘܼܒ݂ ܝܵܪ̈ܬܹ݁ܐ ܥܲܡܗܘܿܢ. ܒܣܲܒ݂ܪܵܐ ܕܚܲܝܹ̈ܐ ܥܬ݂ܝܼ̈ܕܹܐ. ܒܵܬܹ̈ܐ: ܒܥܘܼܕ݂ܪܵܢ ܡܵܪܲܢ ܢ̣ܚܸܬ݂ܘ ܠܐܵܓ݂ܘܿܢܵܐ. ܘܲܣـ̣ܠܸܩܘ ܡܸܢܹܗ ܓܲܢ݇ܒܵܪܵܐܝܼܬ݂܀ ܘܡܸܟܹ݁ܝܠ ܟܠܲܢ ܐܲܟܲܚ݇ܕ݂ ܢܸܙܡܲܪ..܀
ܚܲܕ݂ܒ݁ܫܲܒܵܐ ܕܫܘܼܠܵܡ ܫܵܒ݂ܘܿܥܵܐ ܕܲܫܠܝܼܚܹ̈ܐ ܘܩܲܕ݂ܡܵܝܵܐ ܗ݇ܘ̣ ܕܩܲܝܛܵܐ ܘܡܸܬܼܩܪܸܐ ܢܘܼܣܲܪܕ݁ܐܹܝܠ ܘܡܸܬ݂ܦܲܫܲܩ ܥܹܐܕܹܗ ܕܐܲܠܵܗܵܐ. ܘܕ݂ܘܼܟ݂ܪܵܢܵܐ ܗ݇ܘ̣ ܕܲܬ݂ܪܸܥܣܲܪ ܫܠܝܼܚܹ̈ܐ
ܥܘܼܢܵܝܵܐ ܒܲܠܐ݇ܪܵܙܵܐ ܫܒ̣ܝܼܚܵܐ: ܠܡܵܘܗܲܒ݂ܬ݂ܵܐ ܪܘܼܚܵܢܵܝܬܵܐ. ܕܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܡܠܸܟܼ ܡܲܠܟܹ݁ܐ ܫܡܲܝܵܢܵܐ. ܩ̣ܪܵܢ ܕܢܸܬ݂ܒܲܣܲܡ ܒܲܚܠܘܼܠܹܗ. ܕܲܢܚܲܕܸ݁ܐ ܠܲܙܡܝܼܢܵܘ̈ܗܝ ܒܥܹܐܕ݂ܵܐ ܦܨܝܼܚܵܐ ܕܲܪ̈ܚܘܼܡܵܘܗܝ. ܗܵܐ ܓܹܝܪ ܡ̣ܢ ܥܲܡܡܹ̈ܐ ܢܘܼܟ̣ܪ̈ܵܝܹܐ ܐܝܼܬܲܝܟ݁ܘܿܢ ܗ̤ܘܲܝܬ݁ܘܿܢ. ܐܸܬ݂ܩܲܪܲܒ݂ܘ ܠܗܵܢܵܐ ܐ݇ܪܵܙܵܐ ܡܚܲܣܝܵܢܵܐ. ܪܲܗܒ݂ܘܿܢܵܐ ܗ݇ܘ̣ ܓܹܝܪ ܕܠܵܐ ܡܵܝܘܿܬ݂ܘܼܬ݂ܵܐ. ܘܡܘܼܠܟܵܢܵܐ ܘܒ̣ܘܼܣܵܡܵܐ ܕܠܵܐ ܫܘܼܠܵܡܵܐ. ܕܒܲܚܢܵܢܹܗ ܐܲܫـ̣ܘܝܼ ܠܲܢ ܕܢܲܡܠܸܟܼ ܥܲܡܹܗ ܒܚܲܝܹ̈ܐ ܚܲܕ݂ܬܹ̈ܐ. ܢܨܲܒܸ݁ܬ݂ ܠܹܗ ܗܵܟܹܝܠ ܢܲܦ̮̈ܫܵܬܲܢ. ܠܲܒ̣ܪܵܐ ܕܝܲܗ̣݇ܒ݂ ܠܲܢ ܡܵܘܗܲܒ݂ܬ݂ܵܐ ܪܲܒ݁ܬ݂ܵܐ. ܕܠܵܐ ܣܵܦ̈ܩܵܢ ܠܵܗ̇ ܒܸܪ̈ܝܵܬ݂ܵܐ. ܬܵܘ ܟܠܲܢ ܢܵܘܕܸ݁ܐ ܠܹܗ܀ ܠܲܡܫܝܼܚܵܐ ܕܐܲܫ̣ܘܝܼ ܠܲܢ ܠܡܵܘܗܲܒ̣ܬ݂ܵܐ ܕܐ݇ܪ̈ܵܙܵܘܗܝ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܫܲܒܲܚܘ ܙܲܕ݁ܝܼܩܹ̈ܐ ܠܡܵܪܝܵܐ܀ ܘܠܲܬ݂ܪ̈ܝܼܨܹܐ ܝܵܐ̇ܝܵܐ ܬܸܫܒ݁ܘܿܚܬܵܐ܀ ܐܵܘܕܵܘ ܠܹܗ ܒܟܸܢܵܪܵܐ܀ ܠܲܡܫܝܼܚܵܐ ܕܐܲܫ̣ܘܝܼ ܠܲܢ...܀
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܫܘܼܪܵܝ ܫܵܒ݂ܘܿܥܵܐ ܕܩܲܝܛܵܐ ܘܕ݂ܘܼܟ݂ܪܵܢܵܐ ܗ݇ܝ̣ ܕܡܵܪܝ ܝܲܥܩܘܿܒ݂ ܕܲܢܨܝܼܒ݂ܝܼܢ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܕܘܼܟ̣ܪܵܢܵܐ ܕܡܵܪܝ ܬܐܘܿܡܵܐ ܫܠܝܼܚܵܐ
ܥܘܼܢܵܝܵܐ: ܫܒ݂ܝܼܚܘܼ ܝܵܘܡܹܗ ܕܕ݂ܘܼܟ݂ܪܵܢܵܟܼ. ܘܲܪܓ݂ܝܼܓ݂ ܝܲܬ݁ܝܼܪ ܥܘܼܢܕܵܢܵܟܼ. ܐܝܼܙܓܲܕܵܐ ܙܵܪܲܥ̇ ܫܲܝܢܵܐ. ܘܟ݂ܵܗܢܵܐ ܪܵܕܹܦ̇ ܚܲܢܦܘܼܬ݂ܵܐ. ܠܵܟܼ ܓܹܝܪ ܗܵܐ ܡܣܲܟܸ݁ܐ ܟܘܼܪܣܲܝ ܫܘܼܒ݂ܚܵܐ ܠܡܸܬܲܒ݂. ܐܲܒ݂ܵܐ ܒܲܡܪ̈ܵܘܡܹܐ ܘܲܒ݂ܪܵܐ ܘܪܘܼܚܵܐ. ܟܠܝܼܠܹ̈ܐ ܕܙܵܟ݂ܘܼܬ݂ܵܐ ܓܵܕ݂ܠ̇ܝܼܢ ܠܐܝܼܩܵܪܵܟܼ܀ ܘܟܸܢܫܹ̈ܐ ܕܲܟ̣ܪ̈ܘܿܒܹܐ ܩܵܥܹ̇ܝܢ ܫܲܘܝܵܐܝܼܬ݂. ܫܘܼܒ݂ܚܵܐ ܠܗܵܘ̇ ܕܲܓ݂ܒ݂ܵܟܼ ܘܐܲܫ̱ܠ̣ܛܵܟܼ ܥܲܠ ܓܲܙܹܗ. ܘܐܲܓ݂ܥܸܠ̣ ܠܵܟܼ ܡܵܘܗܲܒ݂ܬܹܗ. ܘܢܸܩܥܸܐ ܠܹܗ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܐܘܿ ܬܲܓܵܪܵܐ ܪܘܼܚܵܢܵܐ. ܕܩܲܒܸ݁ܠ ܟܸܣܦܵܐ ܡ̣ܢ ܡܵܪܹܗ. ܘܐܸܬ݁ܬܲܓܲܪ ܐܲܝܟܼ ܨܸܒ̣ܝܵܢܹܗ. ܘܙܲܡ̣ܢܹܗ ܠܲܓ݂ܢܘܿܢ ܡܲܠܟ݁ܘܼܬܹܗ܀ ܘܟܸܢܫܹ̈ܐ ܕܲܟ̣ܪ̈ܘܿܒܹܐ ܩܵܥܹ̇ܝܢ ܫܲܘܝܵܐܝܼܬ݂...܀
ܚܲܕ݂ܒܫܲܒܵܐ ܕܲܬ݂ܪܹܝܢ ܕܩܲܝܛܵܐ
ܥܘܼܢܵܝܵܐ ܒܗܵܘ ܕܝܲܠܕܵܐ: ܦܲܓ݂ܪܹܗ ܕܲܡܫܝܼܚܵܐ ܗܵܐ ܡܸܬ݂ܦܲܠܲܓ݂. ܘܲܕ݂ܡܹܗ ܝܲܩܝܼܪܵܐ ܠܚܘܼܣܵܝ ܚܵܘ̈ܒܵܬ݂ܵܐ ܪܲܗܒܼܘܿܢܵܐ ܗ݇ܘ̣ ܕܚܲܝܹ̈ܐ ܚܲܕ݂ܬܹ̈ܐ. ܗܵܢܵܐ ܕܒܹܗ ܗܵܘܹ̇ܐ ܫܪܵܝܵܐ ܓܡܝܼܪܵܐ ܕܡܵܘܬܵܐ ܘܕܲܚܛܝܼܬ݂ܵܐ. ܘܡܲܠܒܸܫ ܠܐܵܟ݂ܘܿܠܵܘ̈ܗܝ ܚܲܝܹ̈ܐ ܕܠܵܐ ܡܵܝܘܿܬ݂ܘܼܬ݂ܵܐ܀ ܢܸܬ݂ܩܲܪܲܒ݂ ܘܢܸܣܒ݂ܝܼܘܗܝ ܟܲܕ݂ ܕܲܟ݂ܝܵܐ ܬܹܐܪܬܲܢ ܡ̣ܢ ܦܘܼܠܵܓܹ̈ܐ. ܢܘܼܪܵܐ ܗ݇ܘ̣ ܒܵܚܘܿܪܵܐ ܟܘܼܪܵܐ ܗ݇ܘ̣ ܨܵܪܘܿܦܵܐ. ܕܲܡܕܲܟܸ݁ܐ ܘܨ̇ܵܪܹܦ ܠܫܘܼܚܬܵܐ ܕܲܚܛܵܗܹ̈ܐ. ܗܲܠܸܠܘܼܝܲܗ ܗܲܠܸܠܘܼܝܲܗ. ܒܵܬܹ̈ܐ: ܬܵܘ ܒܢܲــ̈ܝܵܐ ܫܘܼܡܥܘܼܢܝ܀ ܘܐܲܠܸܦܟ݂ܘܿܢ ܕܸܚܠ̱ܬܹܗ ܕܐܲܠܵܗܵܐ܀ ܢܸܬ݂ܩܲܪܲܒ݂ ܘܢܸܣܒ݂ܝܼܘܗܝ...܀
ܥܪܘܼܒ݂ܬܵܐ ܕܬܲܪܬܹܝܢ ܕܩܲܝܛܵܐ ܘܕ݂ܘܼܟ݂ܪܵܢܵܐ ܗ݇ܘ̣ ܕܡܵܪܝ ܡܵܐܪܝܼ ܫܠܝܼܚܵܐ.
(ܘܐܸܢ ܨܵܒܹܝܬ݁ ܫܲܡܸܫ ܛܲܟ݂ܣܵܐ ܕܡܵܪܝ ܬܐܘܿܡܵܐ ܫܠܝܼܚܵܐ)
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܩܲܝܛܵܐ
ܥܘܼܢܵܝܵܐ ܡܸܢܹܗ ܘܠܹܗ: ܡܫܝܼܚܵܐ ܦܵܪܘܿܩܲܢ ܝܲܗ̣݇ܒ݂ ܠܲܢ ܡܵܘܗܲܒ݂ܬ݂ܵܐ. ܣܝܼܡܬ݂ܵܐ ܗܵܕܹܐ ܡܲܚܝܵܢܝܼܬ݂ܵܐ ܕܦܲܓ݂ܪܹܗ ܘܲܕ݂ܡܹܗ. ܒܕܸܚܠܵܐ ܘܲܒ݂ܗܲܝܡܵܢܘܼܬ݂ܵܐ ܢܸܬ݂ܩܲܪܲܒ݂ ܠܹܗ. ܗ̤ܘ ܓܹܝܪ ܐܝܼܬ݂ܵܘܗܝ ܟܵܗܢܵܐ ܘܟ݂ܘܼܡܪܵܐ. ܘܗ̤ܘܝܘ̣ ܕܲܡܩܲܪܸܒ݂ ܐܵܦ ܕܲܡܩܲܕܸ݁ܫ. ܚܲܝ̈ܠܵܘܵܬ݂ܵܐ ܕܡܲܠܲܐܟܹ̈ܐ ܕܲܡܗܲܠܠܝܼܢ. ܘܲܟ݂ܪ̈ܘܿܒܹܐ ܐܵܦ ܣܪ̈ܵܦܹܐ ܕܲܡܩܲܕ݁ܫܝܼܢ܀ ܘܲܕ݂ܠܵܐ ܫܲܠܘܵܐ ܒܐܵܘܝܘܼܬ݂ܵܐ ܒܩܵܠܲܝ̈ܗܘܿܢ ܡܗܲܠܠܝܼܢ ܟܲܕ݂ ܐܵܡ̇ܪܝܼܢ. ܗܲܠܸܠܘܼܝܲܗ܀ ܒܵܬܹ̈ܐ: ܟܪ̈ܘܿܒܹܐ ܛܥܝܼܢܝܼܢ ܡܲܪܟܲܒ݂ܬܹܗ. ܣܪ̈ܵܦܹܐ ܡܩܲܕ݁ܫܝܼܢ ܠܐܝܼܩܵܪܹܗ܀ ܘܲܕ݂ܠܵܐ ܫܲܠܘܵܐ ܒܐܵܘܝܘܼܬ݂ܵܐ...܀
ܥܪܘܼܒ݂ܬܵܐ ܕܲܬ݂ܠܵܬ݂ ܕܩܲܝܛܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܕܘܼܟ݂ܪܵܢܵܐ ܕܡܵܪܝ ܩܘܼܪܝܵܩܘܿܣ ܘܲܕ݂ܝܘܿܠܹܝܛܹܐ ܐܸܡܹܗ
ܥܘܼܢܵܝܵܐ: ܒܗܵܘ̇ ܕܝܘܿܚܲܢܵܢ. ܒܗܵܢܵܐ ܝܵܘܡܵܐ ܩܲܕ݁ܝܼܫܵܐ. ܕܕ݂ܘܼܟ݂ܪܵܢܗܘܿܢ ܕܣܵܗܕܹ̈ܐ ܙܗܲܝ̈ܵܐ. ܛܲܠܝܵܐ ܫܲܒ݂ܪܵܐ ܡܵܪܝ ܩܘܼܪܝܵܩܘܿܣ. ܘܐܸܡܹܗ ܙܗܝܼܬ݂ܵܐ ܡܵܪܬ݁ܝ ܝܘܿܠܹܝܛܹܐ. ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ ܕܲܒ݂ܪܵܐ. ܘܢܸܙܡܲܪ ܫܘܼܒ݂ܚܵܐ ܠܲܡܢܲܨܚܵܢܗܘܿܢ ܗܲܠܸܠܘܼܝܲܗ. ܒܵܬܹ̈ܐ: ܒܚܲܝܠܵܐ ܕܡܵܪܗܘܿܢ ܐܸܙܕܲܝܲܢܘ ܗ݇ܘ̣ܵܘ. ܠܲܡܒܲܛܵܠܘܼ ܠܫܸܢܕܹ̈ܐ ܕܚܝܼܠܹ̈ܐ. ܘܐܲܒ݂ܗܸܬ݂ܘ ܠܒ݂ܝܼܫܵܐ ܘܚܲܝܠܵܘܵܬܹ̈ܗ. ܘܲܒ݂ܚܘܼܡܣܵܢܗܘܿܢ ܫܩܲܠـ̣ܘ ܙܵܟ݂ܘܼܬ݂ܵܐ. ܘܗܵܐ ܡܙܲܝܚܵܐ ܠܗܘܿܢ ܥܹܕܲܬ݂ ܩܘܼܕ݂ܫܵܐ. ܒܲܙܡܝܼܪ̈ܵܬ݂ܵܐ ܒܩܵܠܲܝ̈ ܫܘܼܒ݂ܚܵܐ. ܗܲܠܸܠܘܼܝܲܗ.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܩܲܝܛܵܐ
ܥܘܼܢܵܝܵܐ: ܗܵܐ ܒܓ݂ܵܘ ܥܹܕ݁ܬܵܐ ܡܸܬ݂ܦܲܠܲܓ݂. ܣܲܡ ܚܲܝܘܼܬ݂ܵܐ ܕܲܢ̣ܚܸܬ݂ ܡ̣ܢ ܪܵܘܡܵܐ ܘܲܟ݂ܣܸܐ ܒܐ݇ܪܵܙܵܐ ܒܓ݂ܵܘ ܠܲܚܡܵܐ ܘܚܲܡܪܵܐ܀ ܡܸܟܹ݁ܝܠ ܦܫܘܿܛܘ ܐܝܼܕܲܝ̈ܟ݁ܘܿܢ ܡܵܝ̈ܘܿܬܹܐ. ܕܒܲܚܛܵܗܲܝ̈ܗܘܿܢ ܥܘܼܡܪܵܐ ܠ̣ܒܲܟ݂ܘ ܒܲܫܝܘܿܠ. ܘܣܲܒ݂ܘ ܘܐܸܬ݂ܚܲܣܵܘ ܘܲܩـܢܵܘ ܚܲܝܹ̈ܐ ܘܐܲܡܠܸܟ݂ܘ ܥܲܡ ܡܫܝܼܚܵܐ. ܘܝܲܒܸ݁ܒ݂ܘ ܘܐܸܡܲܪ ܗܲܠܸܠܘܼܝܲܗ. ܒܵܬܹ̈ܐ: ܗܵܢܵܘ ܠܲܚܡܵܐ ܕܟ݂ܠ ܕܐܵܟܹ̇ܠ ܠܹܗ. ܒܹܗ ܡܸܬ݂ܦܲܨܸܐ ܡ̣ܢ ܓܹܗܲܢܵܐ܀ ܡܸܟܹ݁ܝܠ ܦܫܘܿܛܘ...܀
ܥܪܘܼܒ̣ܬܵܐ ܕܐܲܪܒܲܥ ܕܩܲܝܛܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܥܹܐܕ݂ܵܐ ܩܲܕܝܼܫܵܐ ܕܓܸܠܝܵܢܹܗ ܕܡܵܪܲܢ ܥܲܠ ܛܘܼܪ ܬܵܒ݂ܘܿܪ
(ܕܛܲܟ݁ܣܹܗ ܚܲܣܝܵܐ ܕܐܲܠܵܗܵܐ ܡܵܪܝ ܓܝܼܘܲܪܓܝܼܣ ܡܝܼܛܪܵܦܘܿܠܹܝܛܵܐ ܕܐܵܬ݂ܘܿܪ.)
ܥܘܼܢܵܝܵܐ: ܐ݇ܪܵܙܵܐ ܟܲܣܝܵܐ ܕܲܡܫܝܼܚܵܐ ܗܵܐ ܡܸܬ݂ܦܲܠܲܓ̣. ܟܸܢܫܹ̈ܐ ܕܡܲܠܲܐܟܹ̈ܐ ܠܦܵܬ݂ܘܿܪ ܩܘܼܕ݂ܫܵܐ ܪܘܼܚܵܢܵܐ ܡܩܲܕ݁ܫܝܼܢ܀ ܟܠܲܢ ܒܝܲܕ݂ ܛܲܝܒ݁ܘܼܬ݂ܹܗ ܕܦܵܪܘܿܩܲܢ. ܒܗܲܝܡܵܢܘܼܬ݂ܵܐ ܠܘܵܬܹܗ ܢܸܬ݂ܩܲܪܲܒ݂. ܘܦܲܓ݂ܪܹܗ ܘܲܕ݂ܡܹܗ ܕܲܒ݂ܪܵܐ ܡܫܝܼܚܵܐ ܢܸܣܲܒ݂. ܘܲܢܫܲܒܲܚ ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ܀ ܒܵܬܹ̈ܐ: ܘܲܗܘ̤ܵܐ ܡ̣ܢ ܫܸܠܝܵܐ ܡ̣ܢ ܫܡܲܝܵܐ. ܩܵܠܵܐ ܐܲܝܟܼ ܕܪܘܼܚܵܐ ܥܲܙܝܼܙܬܵܐ܀ ܟܠܲܢ ܒܝܲܕ݂ ܛܲܝܒ݁ܘܼܬ݂ܹܗ...܀
ܚܲܕ݂ܒܫܲܒܵܐ ܕܚܲܡܫܵܐ ܕܩܲܝܛܵܐ
ܥܘܼܢܵܝܵܐ: ܚܲܝ̈ܠܵܘܵܬ݂ܵܐ ܕܲܫܡܲܝܵܐ ܩܵܝ̇ܡܝܼܢ ܥܲܡܲܢ ܒܓ݂ܵܘ ܒܹܝܬ݂ ܩܘܼܕ݂ܫܵܐ. ܘܲܡܙܲܝܚܝܼܢ ܠܹܗ ܠܐܸܡܪܹܗ ܚܲܝܵܐ ܕܐܲܠܵܗܵܐ ܕܲܕ݂ܒ݂ܝܼܚ ܩܘܼܕ݂ܡܲܝܢ܀ ܩܪܘܿܒ݂ܘ ܣܲܒ݂ܘ ܐܲܚܲܝ̈ ܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܘܝܲܒܸܒ݂ܘ ܘܐܸܡܲܪܘ ܗܲܠܸܠܘܼܝܲܗ. ܒܪܝܼܟܼ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ ܕܢܸܬ݂ܚܲܣܸܐ ܒܹܗ܀ ܒܵܬܹ̈ܐ: ܠܗܵܢܵܐ ܐ݇ܪܵܙܵܐ ܠܵܐ ܐ݇ܢܵܫ ܡܸܫܟܲܚ ܕܢܸܫܬܲܥܸܐ ܥܲܠ ܪܲܒ݁ܘܼܬܹܗ. ܕܐܵܦ ܡܲܠܲܐܟܹ̈ܐ ܒܕܸܚܠܵܐ ܩܵܝ̇ܡܝܼܢ ܘܒܲܪܬܹܝܬ݂ܵܐ ܡܵܐ ܕܡܸܬ݂ܩܲܪܲܒ̣܀ ܩܪܘܿܒ݂ ܣܲܒ݂ܘ ...܀ ܠܗܵܢܵܐ ܐ݇ܪܵܙܵܐ ܣܪܵܦܵܐ ܒܐܝܼܕܹܗ ܠܵܐ ܐܲܡܪܲܚ̣ ܠܡܸܬ݂ܩܲܪܵܒ݂ܘܼ. ܘܗܵܫܵܐ ܟܵܗܢܹ̈ܐ ܒܥܹܕ݁ܬܵܐ ܛܥܝܼܢܝܼܢ ܘܲܡܙܲܝܚܝܼܢ ܥܲܠ ܐܝܼܕܲܝ̈ܗܘܿܢ܀ ܩܪܘܿܒ݂ܘ ܣܲܒ݂ܘ..܀ ܐܵܠܹܦ ܐܲܠܦܝܼ̈ܢ ܩܵܝ̇ܡܝܼܢ ܥܲܡܲܢ ܒܹܝܬ݂ ܩܘܼܕ݂ܫܵܐ ܟܪ̈ܘܿܒܹܐ ܘܲܣܪ̈ܵܦܹܐ. ܒܗ̇ܘ ܥܸܕܵܢܵܐ ܕܲܡܩܲܕ݁ܫܝܼܢ ܟܵܗܢܹ̈ܐ ܦܲܓ݂ܪܵܐ ܘܲܕ݂ܡܵܐ ܚܲܝܵܐ܀ ܩܪܘܿܒ݂ܘ ܣܲܒ݂ܘ..܀
ܥܪܘܼܒ݂ܬܵܐ ܕܚܲܡܸܫ ܕܩܲܝܛܵܐ ܘܕ݂ܘܼܟ̣ܪܵܢܵܐ ܗ݇ܝ̣ ܕܲܫܡܘܿܢܝܼ ܘܕܲܒ݂ܢܹ̈ܝܗ̇.
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܸܫܬܵܐ ܕܩܲܝܛܵܐ
ܥܘܼܢܵܝܵܐ: ܘܡܸܬ݂ܩܪܸܐ ܟܲܪܬ݁ܘܵܝܵܐ. ܦܲܓ݂ܪܵܐ ܘܲܕ݂ܡܵܐ ܡܚܲܣܝܵܢܵܐ ܡܸܬ݂ܩܲܪܲܒ݂. ܠܚܘܼܣܵܝ ܚܵܘ̈ܒܹ݁ܐ ܘܲܚܛܵܗܹ̈ܐ. ܬܵܘ ܐܲܚܲܝ̈ ܢܸܬ݂ܩܲܪܲܒ݂ ܠܹܗ܀ ܕܲܡܚܲܣܸܐ ܠܲܢ. ܐ݇ܪܵܙܵܐ ܗ݇ܘ̣ ܕܲܡܟܲܣܲܝ ܗ݇ܘ̣ܵܐ ܡ̣ܢ ܥܵܠܡܹ̈ܐ ܘܕ݂ܵܪܹ̈ܐ. ܢܒ݂ܝܼܹ̈ܐ ܘܡܲܠ̈ܟܹ݁ܐ ܐܸܬ݂ܪܲܓ݂ܪܲܓ݂ܘ ܕܢܸܚܙܘܿܢܵܝܗܝ ܘܠܵܐ ܚ̣ܙܵܐܘܼܗܝ. ܘܗܵܫܵܐ ܟܵܗܢܹ̈ܐ ܒܓ݂ܵܘ ܒܹܝܬ݂ ܩܘܼܕ݂ܫܵܐ. ܛܥܝܼܢܝܼܢ ܠܹܗ ܘܲܡܙܲܝܚܝܼܢ ܠܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ ܗܲܠܸܠܘܼܝܲܗ. ܒܵܬܹ̈ܐ: ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ. ܫܲܒ݁ܚܘܼܗܝ ܒܲܪܩܝܼܥܵܐ ܕܥܘܼܫܢܹܗ܀ ܫܲܒ݁ܚܘܼܗܝ ܒܚܲܝܠ̱ܬ݂ܵܢܘܼܬܹܗ܀ ܕܲܡܚܲܣܸܐ ܠܲܢ. ܐ݇ܪܵܙܵܐ ܗ݇ܘ̣ ܕܲܡܟܲܣܲܝ...܀
ܥܪܘܼܒ݂ܬܵܐ ܕܫܸܬ݂ ܕܩܲܝܛܵܐ ܘܕܘܼܟ݂ܪܵܢܵܐ ܗ݇ܝ̣ ܕܪܲܒܲܢ ܝܵܘܣܸܦ ܒܘܼܣܢܵܝܵܐ: ܬܲܠܡܝܼܕܹܗ ܕܪܲܒܲܢ ܡܘܼܫܹܐ ܕܒܹܝܬ݂ ܨܲܝܵܪܹ̈ܐ. ܘܪܲܒܹܗ ܕܝܘܿܚܲܢܵܢ ܒܲܪ ܟ̣ܲܠܕܘܿܢ. ܘܒ݂ܵܗ̇ ܥܵܒ݂ܕ݁ܝܼܢ ܕܘܼܟ݂ܪܵܢܵܐ ܠܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ.
ܥܘܼܢܵܝܵܐ ܒܗܵܐ ܒܓ݂ܵܘ ܥܹܕܿܬܵܐ: ܒܕ݂ܘܼܟ̣ܪܵܢ ܣܵܗ̈ܕܹܐ ܩܲܕܝܼܫܹ̈ܐ. ܩܪܘܿܒ̣ܘ ܣܲܒ̣ܘ ܐܲܚܲܝ̈. ܦܲܓ݂ܪܵܐ ܝܲܩܝܼܪܵܐ ܘܲܕ݂ܡܵܐ ܚܲܝܵܐ ܘܡܲܚܝܵܢܵܐ ܕܒܲܪ ܡܵܪܹܟ݁ܠ. ܕܲܪܫܲܡ̣ ܕܘܼܟ̣ܪܵܢܗܘܿܢ ܥܲܠ ܡܲܕ݂ܒ݁ܚܹܗ. ܘܐܲܫ̣ܪܝ̣ ܚܲܝܠܹܗ ܟܲܣܝܵܐ ܒܓܲܪ̈ܡܲܝܗܘܿܢ. ܕܡܸܢܗܘܿܢ ܡܲܪܕܹ݁ܝܢ ܟܠ ܥܘܼܕ݂ܪ̈ܵܢܝܼܢ. ܒܥܹܕܲܬ݂ ܩܘܼܕ݂ܫܵܐ ܕܒ݂ܵܗ̇ ܙܵܡ̇ܪܝܼܢ ܗܲܠܸܠܘܼܝܲܗ. ܒܵܬܹ̈ܐ: ܣܵܗ̈ܕܹܐ ܕܲܗܘ̤ܵܘ ܓܹܐܙܲܒ݂ܪܹ̈ܐ ܪ̈ܘܼܚܵܢܵܝܹܐ. ܥܲܕܲܪܘ ܠܟܸܢܫܲܢ ܒܲܨ̈ܠܵܘܵܬ݂ܟ̣ܘܿܢ. ܕܲܪܫܲܡ̣ ܕܘܼܟ̣ܪܵܢܟ݂ܘܿܢ ܥܲܠ ܡܲܕ݂ܒ݁ܚܹܗ. ܘܐܲܫ̣ܪܝ̣ ܚܲܝܠܹܗ ܟܲܣܝܵܐ ܒܓܲܪ̈ܡܲܝܟ݁ܘܿܢ. ܕܢܸܗܘܘܿܢ ܡܲܪܕܹ݁ܝܢ ܟܠ ܥܘܼܕ݂ܪ̈ܵܢܝܼܢ. ܒܥܹܕܲܬ݂ ܩܘܼܕ݂ܫܵܐ ܕܒ݂ܵܗ̇ ܙܵܡ̇ܪܝܼܢܲܢ ܗܲܠܸܠܘܼܝܲܗ.
ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܩܲܝܛܵܐ
ܥܘܼܢܵܝܵܐ ܡܸܢܹܗ ܘܠܹܗ: ܐ݇ܪܵܙܵܐ ܪܲܒܵܐ ܘܲܕ݂ܚܝܼܠܵܐ. ܕܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܒܓ݂ܵܘ ܥܹܕ݁ܬܵܐ ܗܵܐ ܡܸܬ݂ܦܲܠܲܓ݂. ܠܚܘܼܣܵܝܵܐ ܕܚܵܘ̈ܒܹ݁ܐ ܘܲܠܦܘܼܪܩܵܢܵܐ ܕܢܲܦ̮̈ܫܵܬܲܢ܀ ܟܸܢܫܹ̈ܐ ܕܡܲܠܲܐܟܹ̈ܐ ܐܵܦ ܪܸ̈ܒ݁ܘܵܬ݂ܵܐ ܕܲܟ̣ܪ̈ܘܿܒܹܐ. ܥܲܡ ܚܲܝ̈ܠܵܘܵܬ݂ܵܐ ܕܲܣܪ̈ܵܦܹܐ. ܩܵܥܹ̇ܝܢ ܩܲܕ݁ܝܼܫ ܩܲܕ݁ܝܼܫ ܩܲܕ݁ܝܼܫܲܬ݁. ܡܵܪܝܵܐ ܘܐܵܡ̇ܪܝܼܢ ܗܲܠܸܠܘܼܝܲܗ. ܒܵܬܹ̈ܐ: ܦܘܼܡܹ̈ܐ ܕܐ݇ܢܵܫܵܐ ܘܲܕ݂ܡܲܠܲܐܟܹ̈ܐ. ܢܸܩܥܘܿܢ ܫܘܼܒ݂ܚܵܐ ܠܡܲܬ݂ܩܸܢ ܟܠܵܐ܀ ܟܸܢܫܹ̈ܐ ܕܡܲܠܲܐܟܹ̈ܐ...܀
ܥܪܘܼܒ݂ܬܵܐ ܕܫܘܼܠܵܡ ܫܵܒ݂ܘܿܥܵܐ ܕܩܲܝܛܵܐ ܕܘܼܟ݂ܪܵܢܵܐ ܗ݇ܝ̣ ܕܡܵܪܝ ܩܲܪܕܵܓ݂ ܣܵܗܕܵܐ ܢܲܨܝܼܚܵܐ.
ܐܸܢ ܨܵܒܹܝܬ݁ ܫܲܡܸܫ ܛܲܟ݂ܣܵܐ ܕܡܵܪܝ ܓܝܼܘܲܪܓ݁ܝܼܣ ܣܵܗܕܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܐܹܠܝܼܵܐ
ܥܘܼܢܵܝܵܐ: ܡ̣ܢ ܦܵܬ݂ܘܿܪܵܐ ܪܘܼܚܵܢܵܐ ܢܸܩܪܘܿܒ݂ ܘܢܸܣܲܒ݂. ܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ ܠܚܘܼܣܵܝܵܐ ܕܚܵܘܒܹ̈ܐ. ܐ݇ܪܵܙܵܐ ܗ݇ܘ̣ ܪܲܒܵܐ ܕܲܡܠܸܐ ܒܘܼܣܵܡܹ̈ܐ. ܘܪܲܗܒ݂ܘܿܢܵܐ ܗ݇ܘ̣ ܕܚܲܝܹ̈ܐ ܕܠܵܐ ܫܘܼܠܵܡ. ܘܐܲܝܢܵܐ ܕܫܵܩܹ̇ܠ ܠܹܗ ܒܚܘܼܒܵܐ ܡܸܬ݂ܚܲܣܸܐ ܒܹܗ. ܘܗܵܘܹ̇ܐ ܝܵܪܬܵܐ ܒܡܲܠܟ݁ܘܼܬ݂ܵܐ ܐܲܝܟ ܡܸܠܲܬ݂ ܡܵܪܲܢ. ܗܲܠܸܠܘܼܝܲܗ. ܒܵܬܹ̈ܐ: ܐܘܿ ܚܲܛܵܝܹ̈ܐ ܐܸܫܬܵܘܬܲܦܘ ܒܗܵܢܵܐ ܐ݇ܪܵܙܵܐ. ܕܡܸܢܹܗ ܬܸܩܢܘܿܢ ܚܲܝܲܝ̈ܟ݁ܘܿܢ ܘܚܘܼܣܵܝ ܚܵܘܒܲܝ̈ܟ݁ܘܿܢ. ܐ݇ܪܵܙܵܐ ܗ݇ܘ̣ ܪܲܒܵܐ ܕܚܲܝܹ̈ܐ ܛܡܝܼܪܝܼܢ ܒܹܗ. ܘܟ݂ܠ ܛܵܒ݂ܵܬ݂̈ܵܐ ܝܵܗܹ̇ܒ݂ ܠܲܕ݂ܫܵܘܹܝܢ̇ ܠܹܗ. ܒܕܲܟ݂ܝܘܼܬ݂ ܠܸܒܵܐ ܢܸܩܪܘܿܒ݂ ܠܹܗ ܕܢܸܬ݂ܚܲܣܸܐ ܒܹܗ. ܘܒܹܗ ܢܸܬ݂ܡܲܪܩܘܼܢ ܚܘܼܫܵܒܲܝ̈ܢ ܘܡܘܼܡܲܝ̈ܢ ܢܸܬ݂ܐܲܣܘܿܢ. ܗܲܠܸܠܘܼܝܲܗ.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܐܹܠܝܼܵܐ ܘܕ݂ܘܼܟ݂ܪܵܢܵܐ ܗ݇ܝ ܕܡܵܪܝ ܦܵܦܵܐ ܩܵܬ݂ܘܿܠܝܼܩܵܐ. ܫܲܡܸܫ ܕܚܲܕ݂ ܦܲܪܨܘܿܦܵܐ.
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒܫܲܒܵܐ ܕܲܬ݂ܪܹܝܢ ܕܐܹܠܝܼܵܐ
ܥܘܼܢܵܝܵܐ: ܒܥܲܡܡܹ̈ܐ ܙܡܲܪ. ܫܘܼܒ݂ܚܵܐ ܠܗܵܘ̇ ܚܲܝܠܵܐ ܬܠܝܼܬ݂ܵܝܵܐ. ܕܲܫܪܸܐ ܒܢܘܼܗܪܵܐ. ܟܝܵܢܵܐ ܕܠܵܐ ܫܘܼܪܵܝ. ܗܵܘ̇ ܕܡ̣ܢ ܡܬ݂ܘܿܡ ܐܝܼܬ݂ܵܘܗܝ. ܘܠܵܐ ܣܵܦܹܩ ܟܠ ܕܲܥܒ݂ܝܼܕ݂ܵܐ ܗ݇ܘ̣. ܠܡܸܬ݂ܢܵܐ ܩܘܼܕ݂ܫܵܐ ܕܐܝܼܩܵܪܹܗ. ܗܵܘ̇ ܕܐܵܠܹܦ ܐܲܠܦܝܼ̈ܢ ܘܪܸ̈ܒ݁ܘܵܬ݂ܵܐ ܕܟܸܢܫܲܝ̈ ܪܵܘܡܵܐ ܡܩܲܕ݁ܫܝܼܢ ܠܐܝܼܩܵܪܹܗ. ܘܲܒ݂ܕܸܚܠ̱ܬ݂ܵܐ ܘܒܲܪܬܹܝܬ݂ܵܐ܀ ܩܵܥܹܝ̇ܢ ܟܠܗܘܿܢ ܫܲܘܝܵܐܝܼܬ݂. ܩܲܕܝܼܫܲܬ݁ ܩܲܕܝܼܫܲܬ݁ ܩܲܕܝܼܫܲܬ݁ ܐܝܼܬ݂ܝܵܐ ܓܢܝܼܙܵܐ ܗܲܠܸܠܘܼܝܲܗ. ܒܵܬܹ̈ܐ: ܣܸܕ݂ܪܹ̈ܐ ܢܘܼܪ̈ܵܢܹܐ ܘܚܲܝ̈ܠܵܘܵܬ݂ܵܐ ܥܸܠܵܝܹ̈ܐ ܟܪ̈ܘܿܒܹܐ ܘܲܣܪ̈ܵܦܹܐ. ܒܕܸܚܠ̱ܬ݂ܵܐ ܘܒܲܪܬܹܝܬ݂ܵܐ ܘܲܒ݂ܚܘܼܒܵܐ ܘܲܒܼܪܸܚܡ̱ܬ݂ܵܐ. ܡܩܲܕ݁ܫܝܼܢ ܠܹܗ ܕܠܵܐ ܣܲܒ݂ܥܘܼܬ݂ܵܐ. ܘܲܒ݂ܓܸܦܹ̈ܐ ܕܪܘܼܚܵܐ ܡܟܲܣܹܝܢ ܙܝܼܘܵܐ ܕܐܲܦܲܝ̈ܗܘܿܢ ܕܠܵܐ ܢܸܬ݂ܒܲܩܘܿܢ ܒܹܗ. ܒܚܸܙܘܵܐ ܕܚܝܼܠܵܐ ܕܠܵܐ ܡܸܬ݁ܕ݁ܪܸܟܼ܀ ܩܵܥܹܝ̇ܢ ܟܠܗܘܿܢ ܫܲܘܝܵܐܝܼܬ݂...܀
ܥܪܘܼܒ݂ܬܵܐ ܕܬܲܪܬܹܝܢ ܕܐܹܠܝܼܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܐܹܠܝܼܵܐ
ܥܘܼܢܵܝܵܐ ܡܸܢܹܗ ܘܠܹܗ: ܦܲܓ݂ܪܵܐ ܝܲܩܝܼܪܵܐ ܘܲܕ݂ܡܵܐ ܡܚܲܣܝܵܢܵܐ ܡܸܬ݂ܩܲܪܲܒ݂. ܩܪܘܿܒ݂ܘ ܐܲܢ݇ܬ݁ܘܿܢ ܐܲܝܠܹܝܢ ܕܐܸܬ݂ܩܪܝܼܘ ܘܐܸܬ݂ܒܲܣܲܡܘ. ܒܐ݇ܪܵܙܵܐ ܕܲܟ݂ܝܵܐ ܘܩܲܕ݁ܝܼܫܵܐ. ܘܥܲܡ ܚܲܝ̈ܠܵܘܵܬ݂ܵܐ ܥܸܠܵܝܹ̈ܐ. ܬܸܫܒ݁ܘܿܚܬܵܐ ܒܩܵܠܵܐ ܪܵܡܵܐ ܐܸܡܲܪܘ. ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܐܘܿ ܡܵܪܹܟ݁ܠ܀ ܟܸܢܫܹ̈ܐ ܓܹܝܪ ܕܡܲܠܲܐܟܹ̈ܐ ܥܲܡ ܟܪ̈ܘܿܒܹܐ ܘܲܣܪ̈ܵܦܹܐ ܐܵܡ̇ܪܝܼܢ ܗܲܠܸܠܘܼܝܲܗ. ܒܵܬܹ̈ܐ: ܣܪ̈ܵܦܹܐ ܒܗܲܝܟ݁ܠܵܐ ܚ̣ܙܵܐ ܐܹܫܲܥܝܵܐ. ܟܲܕ݂ ܩܵܥܹ̇ܝܢ ܗ݇ܘ̣ܵܘ ܩܲܕ݁ܝܼܫ ܩܲܕ݁ܝܼܫ܀ ܟܸܢܫܹ̈ܐ ܓܹܝܪ ...܀ ܣܸܕ݂ܪܹ̈ܐ ܕܢܘܼܪܵܐ ܘܚܲܝܠܹ̈ܐ ܕܪܘܼܚܵܐ. ܦܵܪܚ̇ܝܼܢ ܘܛܵܝ̇ܣܝܼܢ ܘܩܵܥܹ̇ܝܢ ܩܲܕ݁ܝܼܫ܀ ܣܪ̈ܵܦܹܐ ܕܪܘܼܚܵܐ ܩܵܥܹ̇ܝܢ ܩܲܕ݁ܝܼܫ. ܠܵܟܼ ܩܲܕ݁ܝܼܫܵܐ ܡܩܲܕܸ݁ܫ ܟܠܵܐ܀ ܟܸܢܫܹ̈ܐ ܓܹܝܪ...܀
ܥܪܘܼܒ݂ܬܵܐ ܕܲܬ݂ܠܵܬ݂ ܕܐܹܠܝܼܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܥܹܐܕ݂ܵܐ ܕܲܨܠܝܼܒ݂ܵܐ ܣܓ݂ܝܼܕ݂ܵܐ
ܥܘܼܢܵܝܵܐ ܒܗܵܘ̇ ܕܝܘܿܚܲܢܵܢ: ܒܗܵܢܵܐ ܥܹܐܕ݂ܵܐ ܕܲܫܟ݂ܵܚܬܵܐ. ܕܲܨܠܝܼܒܹܗ ܕܡܲܠܟܵܐ ܡܫܝܼܚܵܐ. ܢܸܙܡܲܪ ܫܘܼܒ݂ܚܵܐ ܥܲܡ ܪ̈ܘܼܚܵܢܹܐ. ܠܗܵܘ̇ ܕܒܲܨܠܝܼܒܹܗ ܫܩܲܠ̣ ܙܵܟ݂ܘܼܬ݂ܵܐ. ܘܲܥ̣ܒܲܕ݂ ܫܲܝܢܵܐ ܒܪܵܘܡܵܐ ܘܥܘܼܡܩܵܐ. ܘܦܲܓ݂ܪܹܗ ܘܲܕ݂ܡܹܗ ܝܲܗ̣݇ܒ݂ ܠܵܗ̇ ܠܥܹܕ݁ܬܹ݁ܗ. ܗܲܠܸܠܘܼܝܲܗ. ܒܵܬܹ̈ܐ: ܨܠܝܼܒ݂ܵܐ ܕܢܘܼܗܪܵܐ ܨܡܲܚ̣ ܒܲܒ݂ܪܝܼܬ݂ܵܐ. ܘܲܪܕܲܦ̣ ܚܸܫܟܵܐ ܕܲܦܬܲܟ݂ܪܘܼܬ݂ܵܐ. ܩܘܼܣܛܲܢܛܝܼܢܘܿܣ ܚ̣ܙܵܝܗܝ ܒܲܫܡܲܝܵܐ. ܕܗܘ̤ܝܘ̣ ܕܡܲܡܠܸܟܼ ܥܲܠ ܟܠ ܕܸܚ̈ܠܵܢ. ܘܗܘ̤ܝܘ̣ ܕܫܲܝܸܢ ܪܵܘܡܵܐ ܘܥܘܼܡܩܵܐ. ܥܲܡ ܫܵܠܘܿܚܹܗ ܕܲܠܘܵܬ݂ ܓܸܢܣܲܢ ܗܲܠܸܠܘܼܝܲܗ.
ܚܲܕ݂ܒ݁ܫܲܒܵܐ. ܐ. ܕܲܨܠܝܼܒ݂ܵܐ. ܕ. ܕܐܹܠܝܼܵܐ
ܥܘܼܢܵܝܵܐ ܒܗܵܘ̇ ܕܝܘܿܚܲܢܵܢ: ܒܗܵܢܵܐ ܥܹܐܕ݂ܵܐ ܕܲܫܟ݂ܵܚܬܵܐ. ܕܲܨܠܝܼܒܹܗ ܕܡܲܠܟܵܐ ܡܫܝܼܚܵܐ. ܢܸܙܡܲܪ ܫܘܼܒ݂ܚܵܐ ܥܲܡ ܪ̈ܘܼܚܵܢܹܐ. ܠܗܵܘ̇ ܕܒܲܨܠܝܼܒܹܗ ܫܩܲܠ̣ ܙܵܟ݂ܘܼܬ݂ܵܐ. ܘܲܥ̣ܒܲܕ݂ ܫܲܝܢܵܐ ܒܪܵܘܡܵܐ ܘܥܘܼܡܩܵܐ. ܘܦܲܓ݂ܪܹܗ ܘܲܕ݂ܡܹܗ ܝܲܗ̣݇ܒ݂ ܠܵܗ̇ ܠܥܹܕ݁ܬܹ݁ܗ. ܗܲܠܸܠܘܼܝܲܗ. ܒܵܬܹ̈ܐ: ܨܠܝܼܒ݂ܵܐ ܕܢܘܼܗܪܵܐ ܨܡܲܚ̣ ܒܲܒ݂ܪܝܼܬ݂ܵܐ. ܘܲܪܕܲܦ̣ ܚܸܫܟܵܐ ܕܲܦܬܲܟ݂ܪܘܼܬ݂ܵܐ. ܩܘܼܣܛܲܢܛܝܼܢܘܿܣ ܚ̣ܙܵܝܗܝ ܒܲܫܡܲܝܵܐ. ܕܗܘ̤ܝܘܼ ܕܡܲܡܠܸܟܼ ܥܲܠ ܟܠ ܕܸܚ̈ܠܵܢ. ܘܗܘ̤ܝܘ̣ ܕܫܲܝܸܢ ܪܵܘܡܵܐ ܘܥܘܼܡܩܵܐ. ܥܲܡ ܫܵܠܘܿܚܹܗ ܕܲܠܘܵܬ݂ ܓܸܢܣܲܢ. ܗܲܠܸܠܘܼܝܲܗ.
ܥܪܘܼܒ݂ܬܵܐ. ܐ. ܕܲܨܠܝܼܒ݂ܵܐ. ܕ. ܕܐܹܠܝܼܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ. ܒ. ܕܲܨܠܝܼܒ݂ܵܐ. ܗ. ܕܐܹܠܝܼܵܐ
ܥܘܼܢܵܝܵܐ: ܬܵܘ ܟܠܲܢ ܢܸܦ̮ܬܲܚ ܦܘܼܡܲܢ ܠܩܘܼܒܵܠܵܐ ܕܡܵܘܗܲܒ݂ܬ݂ܵܐ. ܕܝܵܗ݇ܒܵܐ ܠܲܟ݂ܝܵܢܲܢ ܚܲܝܹ̈ܐ ܚܲܕ݂ܬܹܐ. ܘܲܢܫܝܼܓ݂ ܪܸܥܝܵܢܲܢ ܡ̣ܢ ܒܝܼ̈ܫܵܬ݂ܵܐ. ܘܢܸܣܲܒ݂ ܡ̣ܢ ܡܲܕ݂ܒ݁ܚܵܐ ܡܚܲܣܝܵܢܵܐ ܪܲܗܒ݂ܘܼܢ ܚܲܝܹ̈ܐ. ܗܵܘ̇ ܕܫܲܡܸܫ̣ܘ ܪ̈ܘܼܚܵܢܹܐ܀ ܟܠܲܢ ܒܲܚܕ݂ܵܐ ܐܵܘܝܘܼܬ݂ܵܐ ܕܚܘܼܒܵܐ. ܢܸܣܲܒ݂ ܦܲܓ݂ܪܹܗ ܕܲܡܫܝܼܚܵܐ. ܘܥܲܡ ܪ̈ܘܼܚܵܢܹܐ ܢܸܩܥܸܐ ܘܢܹܐܡܲܪ ܫܲܘܝܵܐܝܼܬ݂. ܗܲܠܸܠܘܼܝܲܗ ܗܲܠܸܠܘܼܝܲܗ. ܒܵܬܹ̈ܐ: ܬܲܗܪܵܐ ܗ݇ܘ̣ ܪܲܒܵܐ ܗܵܢܵܐ ܨܠܝܼܒ݂ܵܐ. ܒܪܵܘܡܵܐ ܘܥܘܼܡܩܵܐ ܫܘܼܒ݂ܚܵܐ ܠܲܫܡܹܗ܀ ܟܠܲܢ ܒܲܚܕ݂ܵܐ ...܀ ܗܵܢܵܘ ܣܲܒ݂ܪܵܐ ܕܠܹܗ ܡܣܲܟܹ݁ܝܢ ܗ݇ܘ̣ܵܘ. ܪܵܘܡܵܐ ܘܥܘܼܡܩܵܐ ܘܟ̣ܠܡܵܐ ܕܲܒ݂ܗܘܿܢ܀ ܟܠܲܢ ܒܲܚܕ݂ܵܐ...܀
ܥܪܘܼܒ݂ܬܵܐ. ܒ. ܕܲܨܠܝܼܒ݂ܵܐ .ܗ. ܕܐܹܠܝܼܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ. ܓ. ܕܲܨܠܝܼܒ݂ܵܐ. ܘ. ܕܐܹܠܝܼܵܐ
ܕܲܩܕ݂ܵܡ ܥܹܐܕ݂ܵܐ ܕܲܨܠܝܼܒ݂ܵܐ. ܥܘܼܢܵܝܵܐ: ܒܕܲܟ݂ܝܘܼܬ݂ܵܐ ܕܬܹܐܪܬܵܐ ܘܚܘܼܫܵܒܹ̈ܐ ܕܟܲܝ̈ܵܐ. ܢܸܬ݂ܩܲܪܲܒ݂ ܠܲܓ݂ܡܝܼܪܘܼܬ݂ܵܐ ܕܲܒ݂ܪ̈ܲܚܡܹܐ ܡܸܬ݂ܝܲܗ݇ܒܵܐ. ܠܚܘܼܣܵܝܵܐ ܘܲܠܪܲܗܒ݂ܘܿܢܵܐ ܕܚܲܝܹܐ ܚܲܕ݂ܬܹ̈ܐ. ܟܠܲܢ ܒܪܸܚ̱ܡܬ݂ܵܐ ܢܚܲܒ݁ܒ݂ܝܼܘܗܝ ܠܐ݇ܪܵܙܵܐ. ܘܲܒ݂ܕܸܚ̱ܠܬ݂ܵܐ ܢܸܦܠܘܿܚ ܠܪܲܒ݁ܟܘܼܡܪܹ̈ܐ ܕܚܲܣ̣ܝܲܢ܀ ܘܥܲܡ ܪ̈ܘܼܚܵܢܹܐ ܢܩܲܕܫܝܼܘܗܝ ܩܘܼܕܵܫܹ̈ܐ ܬܠܵܬ݂ܵܐ. ܕܫܵܘܬ݁ܦܹܗ ܠܓܸܢܣܲܢ ܒܐܘܼܟ݂ܠܵܐ ܕܚܲܝܹ̈ܐ ܚܲܕ݂ܬܹ̈ܐ. ܗܵܪܟܵܐ ܒܐ݇ܪܵܙܵܐ ܘܬܲܡܵܢ ܒܲܫܪܵܪܵܐ. ܡܵܐ ܕܕ݂ܵܢܚܵܐ ܬܸܫܒ݁ܘܿܚܬܵܐ ܕܡܹܐܬ݂ܝܹܗ ܪܲܒܵܐ. ܒܵܬܹ̈ܐ: ܒܐ݇ܪܵܙܵܐ ܕܦܲܓ݂ܪܹܗ ܬܲܪܣ̣ܝܼ ܠܡܵܝܘܿܬܹ̈ܐ. ܒܪܵܐ ܕܐܲܠܵܗܵܐ ܒܕܸܢܚܹܗ ܕܲܥܠܲܝܗܘܿܢ܀ ܘܥܲܡ ܪ̈ܘܼܚܵܢܹܐ ܢܩܲܕܫܝܼܘܗܝ...܀
ܕܒ݂ܵܬܲܪ ܥܹܐܕ݂ܵܐ ܕܲܨܠܝܼܒ݂ܵܐ. ܥܘܼܢܵܝܵܐ: ܗܵܐ ܦܲܓ݂ܪܵܐ ܘܲܕ݂ܡܵܐ ܚܲܝܵܐ. ܕܲܡܫܝܼܚܵܐ ܫܵܒܹ̇ܩ ܚܵܘ̈ܒܹܐ. ܩܪܘܿܒ݂ܘ ܥܲܡܡܹ̈ܐ ܣܲܒ݂ܘ ܚܘܼܣܵܝܵܐ. ܡ̣ܢ ܦܵܬ݂ܘܿܪܵܐ ܕܡܲܠܟ݁ܘܼܬ݂ܵܐ. ܗܲܠܸܠܘܼܝܲܗ. ܒܵܬܹ̈ܐ: ܝܘܿܢܵܬܲܢ ܕܲܒ݂ܪܹܫ ܚܘܼܛܪܹܗ. ܛܥܸܡ̣ ܕܸܒ݂ܫܵܐ ܘܲܢܗܲܪ ܥܲܝܢܵܘ̈ܗܝ. ܗܵܐ ܚܲܠܝܘܼܬܹܗ ܕܲܨܠܝܼܒ݂ܵܐ. ܐܲܢܗܲܪܘ ܒܵܗ̇ ܪܸ̈ܥܝܵܢܲܝܟ݁ܘܿܢ. ܗܲܠܸܠܘܼܝܲܗ.
ܥܪܘ̣ܒ݂ܬܵܐ. ܓ. ܕܲܨܠܝܼܒ݂ܵܐ. ܘܕܹܐܠܝܼܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ. ܕ. ܕܲܨܠܝܼܒ݂ܐ. ܙ. ܕܐܹܠܝܼܵܐ
ܥܘܼܢܵܝܵܐ ܒܥܲܡ ܟܪ̈ܘܿܒܹܐ: ܐ݇ܪܵܙܵܐ ܡܚܲܣܝܵܢܵܐ ܘܲܕ݂ܡܵܐ ܝܲܩܝܼܪܵܐ ܡܸܬ݂ܦܲܠܲܓ݂. ܬܵܘ ܟܠܲܢ ܢܗܲܠܠܝܼܘܗܝ ܟܲܕ݂ ܐܵܡ̇ܪܝܼܢܲܢ. ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܐܘܿ ܡܵܪܹܟ݁ܠ. ܠܲܚܡܵܐ ܓܹܝܪ ܫܡܲܝܵܢܵܐ ܡܸܬ݂ܦܲܠܲܓ݂ ܠܥܲܡܡܹ̈ܐ ܠܚܘܼܣܵܝ ܚܵܘ̈ܒܵܬ݂ܵܐ. ܢܸܩܪܘܿܒ݂ ܘܢܸܣܒ݂ܝܼܘܗܝ܀ ܘܫܘܼܒ݂ܚܵܐ ܥܲܡ ܥܝܼܪܹ̈ܐ ܢܝܲܒܸ݁ܒ݂ ܠܹܗ ܘܢܹܐܡܲܪ ܗܲܠܹܠܘܼܝܵܗ. ܒܵܬܹ̈ܐ: ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ. ܕܲܡܨܹܝܢ ܒܚܲܝܠܵܐ ܘܥܵܒ݂ܕܝܼܢ ܦܘܼܩܕܵܢܵܘ̈ܗܝ܀ ܘܫܘܼܒ݂ܚܵܐ ܥܲܡ ܥܝܼܪܹ̈ܐ ܢܝܲܒܸ̇ܒܼ ܠܹܗ ܘܢܹܐܡܲܪ ܗܲܠܸܠܘܼܝܲܗ.
ܥܪܘܼܒ݂ܬܵܐ ܕܐܲܪܒܲܥ ܕܲܨܠܝܼܒ݂ܵܐ. ܘܲܕ݂ܫܘܼܠܵܡ ܫܵܒܼܘܿܥܵܐ ܕܐܹܠܝܼܵܐ
(ܘܒܼܵܗ̇ ܥܵܒܼܕܝܼܢ ܕܘܼܟ݂ܪܵܢܵܐ ܠܡܵܪܝ ܐܹܠܝܼܵܐ ܢܒ݂ܝܼܵܐ ܬܲܫܒ݁ܝܵܝܵܐ. ܘܒ݂ܵܗ̇ ܫܵܪܹܝܢ ܨܲܝܵܡܹ̈ܐ ܨܵܘܡ̱ܗܘܿܢ.)
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܡܵܪܝ ܡܘܼܫܹܐ
ܥܘܼܢܵܝܵܐ ܒܗܵܐ ܦܲܓ݂ܪܵܐ: ܒܪܝܼܟܼ ܪܵܥܝܵܐ ܕܲܚ̣ܙܵܐ ܠܥܵܢܹ̈ܗ. ܕܟܲܦܢܵܐ ܘܲܩ̣ܨܵܐ ܠܵܗ̇ ܦܲܓ݂ܪܹܗ. ܘܲܬ݂ܪܲܥ̣ ܕܲܦܢܹܗ ܠܫܵܩܘܼܬ݂ܵܐ. ܘܐܲܪܕܝܼ ܠܵܗ̇ ܡܲܝ̈ܵܐ ܚܲܝܹ̈ܐ. ܗܲܠܸܠܘܼܝܲܗ. ܒܵܬܹ̈ܐ: ܐܸܢ ܡ̣ܢ ܦܲܓ݂ܪܹܗ ܕܕ݂ܵܢܝܼܐܹܝܠ. ܐܸܣܬܲܪܲܕ݂ܘ ܐܲܪ̈ܝܵܘܵܬ݂ܵܐ. ܟܡܵܐ ܡ̣ܢ ܦܲܓ݂ܪܹܗ ܕܦܵܪܘܿܩܲܢ. ܡܸܣܬܲܪܕ݂ܵܐ ܫܝܘܿܠ ܘܲܚܛܝܼܬ݂ܵܐ. ܗܲܠܸܠܘܼܝܲܗ.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܡܵܪܝ ܡܘܼܫܹܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܡܵܪܝ ܡܘܼܫܹܐ
ܥܘܼܢܵܝܵܐ ܡܸܢܹܗ ܘܠܹܗ: ܪܲܗܒ݂ܘܿܢܵܐ ܕܚܲܝܹ̈ܐ ܚܲܕ݂ܬܹ̈ܐ. ܗܵܐ ܡܸܬ݂ܦܲܠܲܓ݂ ܒܓ݂ܵܘ ܒܹܝܬ݂ ܩܘܼܕ݂ܫܵܐ܀ ܡܵܝܘܿܬܹ̈ܐ ܒܚܘܼܒܵܐ ܫܲܠܡܵܐ. ܩܪܘܿܒ݂ܘ ܣܲܒ݂ܘ ܘܲܚܝܵܘ ܘܐܸܬ݂ܚܲܣܵܘ ܒܹܗ. ܒܵܬܹ̈ܐ: ܐܲܚܲܝ̈ ܩܲܒܸܠܘ ܦܲܓ݂ܪܹܗ ܕܲܒ݂ܪܵܐ. ܘܐܸܫܬܵܘ ܟܵܣܹܗ ܒܗܲܝܡܵܢܘܼܬ݂ܵܐ܀ ܡܵܝܘܿܬܹܐ ܒܚܘܼܒܵܐ...܀
ܥܪܘܼܒ̣ܬܵܐ ܕܬܲܪܬܹܝܢ ܕܡܵܪܝ ܡܘܼܫܹܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܡܵܪܝ ܡܘܼܫܹܐ
ܥܘܼܢܵܝܵܐ ܡܸܢܹܗ ܘܠܹܗ: ܢܸܬ݂ܩܲܒܲܠ ܗܵܢ ܩܘܼܪܒܵܢܵܐ ܠܥܸܠ ܒܲܡܪ̈ܵܘܡܹܐ. ܥܲܡ ܕܗܵܒܹܝܠ ܘܢܘܿܚ ܘܐܲܒ݂ܪܵܗܵܡ ܒܹܝܬ݂ ܡܲܠܟ݁ܘܼܬ݂ܵܐ. ܒܵܬܹ̈ܐ: ܐܲܚܲܝ̈ ܩܲܒܸ݁ܠܘ ܦܲܓ݂ܪܹܗ ܕܲܒ݂ܪܵܐ ܐܵܡ̇ܪܵܐ ܥܹܕ݁ܬܵܐ. ܘܐܸܫܬܵܘ ܟܵܣܹܗ ܒܗܲܝܡܵܢܘܼܬ݂ܵܐ ܒܹܝܬ݂ ܡܲܠܟ݁ܘܼܬ݂ܵܐ.
ܥܪܘܼܒ݂ܬܵܐ ܕܲܬ݂ܠܵܬ݂ ܕܡܪܝ ܡܘܼܫܹܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܡܵܪܝ ܡܘܼܫܹܐ
ܥܘܼܢܵܝܵܐ: ܗܵܢܵܘ ܕܸܒ݂ܚܵܐ ܡܚܲܣܝܵܢܵܐ ܕܝܲܗ̣݇ܒ݂ ܠܲܢ ܦܵܪܘܿܩܲܢ. ܕܒܹܗ ܢܸܡܪܘܿܩ ܡܘܼܡܹ̈ܐ ܕܦܲܓ݂ܪ̈ܲܝܢ. ܘܚܵܘ̈ܒܹ݁ܐ ܟܣܲܝ̈ܵܐ ܕܢܲܦ̮̈ܫܵܬܲܢ. ܘܲܢܕܲܟܸ݁ܐ ܬܹܐܪ̈ܵܬܲܢ ܡ̣ܢ ܦܘܼܠܵܓܹ̈ܐ܀ ܘܢܸܣܒ݂ܝܼܘܗܝ ܟܠܲܢ ܒܪܸܚܡ̱ܬ݂ܵܐ ܘܒ݂ܵܐܘܝܘܼܬ݂ܵܐ ܕܚܘܼܒܵܐ ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ. ܒܵܬܹ̈ܐ: ܗܵܐ ܡܵܘܗܲܒ݂ܬ݂ܵܐ ܡܚܲܣܝܲܬ݂ ܡܲܓܵܢ. ܣܲܒ݂ܘ ܡܵܝܘܿܬܹܐ ܘܐܸܬ݂ܚܲܣܵܘ ܒܵܗ̇܀ ܘܢܸܣܒ݂ܝܼܘܗܝ ܟܠܲܢ...܀
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܩܘܼܕܵܫ ܥܹܕ݁ܬܵܐ
ܥܘܼܢܵܝܵܐ: ܒܲܫܒ݂ܝܼܚܘܼ ܝܵܘܡܹܗ: ܐܵܘܕܵܝ ܥܹܕ݁ܬܵܐ ܒܦܘܼܡ ܝܲܠܕܲܝ̈ܟ݁ܝ. ܠܲܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܟ݁ܝ. ܘܫܲܟ݂ܠܸܠ̣ ܘܲܒ݂ܢ̣ܵܟ̣ܝ ܥܲܠ ܫܘܿܥܵܐ. ܕܲܫܪܵܪܹܗ ܕܫܸܡܥܘܿܢ ܟܹܐܦܵܐ. ܘܨܲܒ݁ܬܹܟ݂ܝ ܒܟ݂ܵܗܢܹ̈ܐ ܘܡܲܠܦܵܢܹ̈ܐ ܕܲܡܪܲܥܹܝܢ ܠܹܗ. ܘܐܲܬ݂ܩܸܢ ܘܣ̣ܵܡ ܒܓ݂ܵܘܹܟ݂ܝ ܦܵܬ݂ܘܿܪ ܡܲܠܟ݁ܘܼܬ݂ܵܐ. ܦܲܓ݂ܪܹܗ ܘܲܕ݂ܡܹܗ ܝܲܩܝܼܪܵܐ܀ ܘܗܵܐ ܥܝܼܖܹ̈ܐ ܘܐ݇ܢܵܫܵܐ ܙܵܡ̇ܪܝܼܢ ܒܲܚܠܘܿܠܹܟ̣ܝ. ܫܘܼܒ݂ܚܵܐ ܠܲܡܟ݂ܝܼܪܹܟ݂ܝ ܕܐܸܬ݁ܕ݁ܒܲܚ ܥܲܠ ܐܲܦܲܝ̈ܟ݁ܝ. ܘܦܲܓ݂ܪܹܗ ܩ̣ܨܵܐ ܘܝܲܗ̣݇ܒ݂ ܠܹܟ̣ܝ. ܘܢܸܩܥܸܐ ܠܹܗ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ: ܩܲܕܸܡ̣ ܒܲܕܸܩ̣ ܐܹܫܲܥܝܵܐ. ܩܕ݂ܵܡ ܕܵܖܹ̈ܐ ܟܲܕ݂ ܡܸܬ݂ܢܲܒܸܐ. ܕܢܸܗܘܘܿܢ ܬܲܖ̈ܥܲܝܟ݁ܝ ܒܹܖ̈ܘܿܠܹܐ. ܘܲܩܪܘܿܣܛܸܠܘܿܣ ܒܸܢܝܵܢܲܝ̈ܟ݁ܝ܀ ܘܗܵܐ ܥܝܼܖܹ̈ܐ...܀
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܩܘܼܕܵܫ ܥܹܕ݁ܬܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܩܘܼܕܵܫ ܥܹܕ݁ܬܵܐ
ܥܘܼܢܵܝܵܐ: ܡܸܢܹܗ ܘܠܹܗ. ܙܡܝܼܢܹ̈ܐ ܒܢܲܝ̈ ܢܘܼܗܪܵܐ ܩܪܘܿܒ݂ܘ ܘܐܸܬ݂ܒܲܣܲܡܘ ܒܲܚܠܘܿܠܹܗ. ܕܚܲܬ݂ܢܵܐ ܕܙܲܡ̣ܢܲܢ ܠܚܲܝܹ̈ܐ ܚܲܕ݂ܬܹ̈ܐ. ܘܣ̣ܵܡܲܢ ܝܵܪ̈ܬܹ݁ܐ ܒܡܲܠܟ݁ܘܼܬ݂ ܪܵܘܡܵܐ. ܘܦܲܓ݂ܪܹܗ ܝܲܗ̣݇ܒ̣ ܠܲܢ. ܘܫܘܼܒ݂ܚܵܐ ܦܲܐܝܵܐ ܐܲܠ̣ܒܸܫ ܠܥܹܕ݁ܬܹ݁ܗ܀ ܘܥܲܡ ܪ̈ܘܼܚܵܢܹܐ ܢܝܲܒܸܒ݂ ܬܠܝܼܬ݂ܵܐܝܼܬ݂. ܘܢܸܩܥܸܐ ܘܲܢܙܲܡܲܪ ܠܹܗ ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ.
ܒܵܬܹ̈ܐ: ܠܥܸܠ ܡ̣ܢ ܥܝܼܪܹ̈ܐ ܣ̣ܵܡܲܢܝ ܒܢܘܼܗܪܵܐ ܒܐ݇ܪܵܙܵܐ. ܚܲܬ݂ܢܵܐ ܕܡܲܟ݂ܪܲܢܝ ܐܵܡ̇ܪܵܐ ܥܹܕ݁ܬܵܐ. ܒܡܲܝ̈ܵܐ ܘܪܘܼܚܵܐ ܩܲܕ݁ܫܲܢܝ ܒܡܲܥܡܘܿܕ݂ܝܼܬܹܗ. ܘܙܲܡܸܢ ܝܲܠܕܲܝ̈ ܠܚܲܝܹ̈ܐ ܚܲܕ݂ܬܹ̈ܐ܀ ܘܥܲܡ ܪ̈ܘܼܚܵܢܹܐ ...܀
ܥܪܘܼܒ݂ܬܵܐ ܕܬܲܪܬܹ݁ܝܢ ܕܩܘܼܕܵܫ ܥܹܕ݁ܬܵܐ
ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܩܘܼܕܵܫ ܥܹܕ݁ܬܵܐ
ܥܘܼܢܵܝܵܐ: ܒܕ݂ܘܼܨܘ ܥܲܡܡܹ̈ܐ. ܒܪܝܼܟܼ ܕܲܒ݂ܢ̣ܵܗ̇ ܠܥܹܕܲܬ݂ ܩܘܼܕ݂ܫܵܐ. ܥܲܠ ܟܹܐܦܵܐ ܕܗܲܝܡܵܢܘܼܬ݂ܵܐ. ܘܣܵܡ̣ ܒܵܗ̇ ܫܠܝܼܚܹ̈ܐ ܘܲܢܒ݂ܝܼܹ̈ܐ. ܘܡܲܠܦܵܢܹ̈ܐ ܝܵܕ݂ܥܲܝ̈ ܫܪܵܪܵܐ. ܒܵܬܹ̈ܐ: ܛܘܼܒܲܝܟ݁ܝ ܥܹܕ݁ܬܵܐ ܡܗܲܝܡܲܢܬܵܐ. ܟܲܠܬܹܗ ܕܐܲܒ݂ܵܐ ܡܠܸܟܼ ܡܲܠ̈ܟܹ݁ܐ. ܕܐܲܝܟܼ ܒܘܼܕܵܩܵܐ ܕܲܢܒ̣ܝܼܹ̈ܐ. ܐܸܫܬܲܡܠܝܼ ܒܕܲܗܒ݂ܵܐ ܫܘܼܦܪܹܟ݂ܝ.
ܥܪܘܼܒ݂ܬܵܐ ܕܲܬ݂ܠܵܬ݂ ܕܩܘܼܕܵܫ ܥܹܕ݁ܬܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܐ. ܕܣܘܼܒܵܪܵܐ. (ܚܙܝ ܠܥܠ)
ܕܘܼܟ݂ܪܵܢܵܐ ܕܡܵܪܝ ܝܲܥܩܘܿܒ݂ ܡܦܲܣܩܵܐ
ܥܘܼܢܵܝܵܐ: ܛܘܼܒܲܝܟ ܣܵܗܕܵܐ ܘܪܸܒ݁ܘܿ ܛܘܼܒ݂̈ܝܼܢ. ܠܢܲܦ̮ܫܵܟܼ ܕܣܲܝܒ݁ܪܲܬ̤ ܟܠ ܐܘܼܠܨܵܢܝܼ̈ܢ. ܘܦܸܪܚܲܬ̤ ܘܣܸܠܩܲܬ̤ ܠܐܲܬܲܪ ܣܪ̈ܵܦܝܼܢ. ܘܗܵܐ ܡܸܬ݂ܒܲܣܡܵܐ ܠܥܵܠܲܡ ܥܵܠܡܝܼܢ. ܗܲܠܸܠܘܼܝܲܗ. ܒܵܬܹ̈ܐ: ܡܵܪܲܢ ܕܐܵܘܪܸܒ݂ ܝܘܿܡ ܕܘܼܟ݂ܪܵܢܵܟܼ. ܘܫܲܡ̣ܠܝܼ ܪܲܗܛܵܟܼ ܘܣܲܝܥ̣ܵܟܼ ܘܥܲܕ݁ܪܵܟܼ. ܢܚܲܝܸܠ ܠܟܸܢܫܲܢ ܒܲܨ̈ܠܵܘܵܬ݂ܵܟܼ. ܕܲܟ݂ܒܲܪ ܢܡܲܪܸܐ ܒܲܚܦܝܼܛܘܼܬ݂ܵܟܼ. ܗܲܠܸܠܘܼܝܲܗ.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܩܘܼܕܵܫ ܥܹܕ݁ܬܵܐ
ܥܘܼܢܵܝܵܐ: ܒܩܵܠ ܠܐ݇ܪ̈ܵܙܹܐ ܫܒ݂ܝܼܚܹ̈ܐ. ܪܲܒܵܐ ܗ݇ܝ̣ ܡܵܪܲܢ ܡܵܘܗܲܒ݂ܬ݂ܵܟܼ ܕܨܹܝܕ݂ ܡܵܝܘܿܬܹ̈ܐ. ܕܫܵܘܬܸ݁ܦܬܵܝܗܝ ܠܓܸܢܣܲܢ ܒܐ݇ܪܵܙܵܐ ܕܲܟ݂ܣܸܐ ܒܹܗ ܣܲܡ ܚܲܝܹ̈ܐ. ܘܠܲܐܒ݁ܝܼܕ݂ܘܼܬܲܢ ܒܛܲܝܒ݁ܘܼܬ݂ܵܟܼ ܚܵܣ̣ܬ݁ ܘܟܲܢܸܫܬܵܗ̇ ܡ̣ܢ ܛܘܼܥܝܲܝ܀ ܘܥܲܠܗܵܕ݂ ܥܹܕ݁ܬܵܐ ܒܟܸܢܫܹ̈ܝܗ̇. ܩܵܠ ܬܸܫܒ݁ܘܿܚܬܵܐ ܗܵܐ ܪܵܥ̇ܡܵܐ. ܒܥܘܼܗܕܵܢ ܦܸܪܢܝܼܬ݂ܵܐ ܕܝܲܗ̣݇ܒ݂ ܠܵܗ̇ ܒܲܪ ܡܲܠܟܵܐ ܒܚܘܼܒܹ݁ܗ. ܟܵܗܢܹ̈ܐ ܕܹܝܢ ܥܲܡ ܡܲܠܲܐܟܹ̈ܐ ܡܙܲܝܚܝܼܢ ܠܪܲܗܒ݂ܘܿܢ ܚܲܝܹ̈ܐ. ܒܵܬܹ̈ܐ: ܟܠܝܼܠ ܙܵܟ݂ܘܼܬ݂ܵܐ ܝܲܗ̣݇ܒ݂ ܠܵܗ̇ ܠܥܹܕ݁ܬܹ݁ܗ. ܡ̣ܢ ܟܠ ܦܘܼܡܝܼ̈ܢ ܫܘܼܒ݂ܚܵܐ ܠܲܫܡܹܗ܀ ܘܥܲܠ ܗܵܕ݂ ܥܹܕ݁ܬܵܐ...܀
ܥܪܘܼܒ݂ܬܵܐ ܕܐܲܪܒܲܥ ܕܩܘܼܕܵܫ ܥܹܕ݁ܬܵܐ
ܒܹܝܡ ܘܒܵܬܹ̈ܐ: ܗܵܢ̇ܘܿܢ ܕܲܥܪܘܼܒ݂ܬܵܐ. ܒ. ܕܣܘܼܒܵܪܵܐ. (ܚܙܝ ܠܥܠ)