ܬܘܒ̣ ܚܘܬܡ̈ܐ ܕܥܠ ܬܪܥ ܩܢܟ̇ܐ

ܕܲܥܒ̣ܝܼܕ݂ܝܼܢ ܠܡܵܪܝ ܥܲܒ̣ܕܝܼܫܘܿܥ ܡܝܼܛܪܵܦܘܿܠܹܝܛܵܐ ܕܨܘܼܒ̣ܵܐ ܘܕܐܲܪܡܵܢܝܼܵܐ:

ܩܲܕ݂ܡܵܝܑܼܬ̣: ܒܲܩܪܵܝܬ݂ܵܐ ܕܐܲܪܒܲܥ

ܐ ܐܲܠܵܗ ܐܲܠܵܗܝܼ̈ܢ ܡܵܪܝܵܐ: ܫܡܲܥ ܨܠܘܿܬܲܢ ܘܗܲܒ̣ ܦܘܼܢܵܝܵܐ. ܘܫܲܟܸ̇ܢ ܠܐܲܣܝܼܪܹ̈ܐ ܫܪܵܝܵܐ: ܘܲܠܚܲܛܵܝܹ̈ܐ ܚܘܼܣܵܝܵܐ. ܒ ܒܲܚܢܵܢܵܟ ܕܝܼܠܵܢܵܝܵܐ: ܗܲܒ̣ ܒܐܲܬ̣ܪܲܢ ܫܲܝܢܵܐ ܐܵܘܝܵܐ. ܘܒܲܛܸܠ ܩܪ̈ܵܒܹܐ ܘܲܫܓ̣ܘܼܫܝܵܐ: ܘܐܲܥܒܲܪ ܡ̣ܢ ܥܲܡܵܟ ܕܠܘܼܚܝܵܐ. ܓ ܓܲܢ݇ܒܵܪܵܐ ܕܠܵܐ ܡܸܙܕܲܟ̣ܝܵܐ: ܚܲܝܠܬ̣ܵܢܘܼܬܹܗ ܘܠܵܐ ܫܵܗܝܵܐ. ܙܓ̣ܘܿܪ ܠܛܵܠܘܿܡܹ̈ܐ ܘܛܵـ̈ܥܲܝܵܐ: ܕܠܵܐ ܢܲܗܪܘܼܢܲܢ ܒܫܘܼܥܠܵܝܵܐ. ܕ ܕܲܒܲܪܲܝܢ ܒܐܲܝܕܵܐ ܕܦܲܐܝܵܐ: ܘܗܲܒ̣ܠܲܢ ܐܲܬܕܵܐ ܕܡܸܬ̣ܒܲܥܝܵܐ. ܘܲܕ݂ܚܘܿܩ ܡܸܢܲܢ ܟܠ ܣܲܢܝܵܐ: ܘܫܲܟܸ̇ܢ ܠܲܢ ܫܠܵܡܵܐ ܘܫܸܠܝܵܐ. ܗ ܗܘ̤ܝܼ ܠܲܢ ܒܹܝܬ̣ ܓܵܘܣܵܐ ܓܲܠܝܵܐ: ܘܢܲܛܲܪ ܠܲܢ ܒܟܸܣܝܵܐ ܘܓܸܠܝܵܐ. ܡ̣ܢ ܒܸܙܬ̣ܵܐ ܘܟܲܦܢܵܐ ܘܫܸܒ̣ܝܵܐ: ܘܡ̣ܢ ܐܘܼܠܨܵܢܵܐ ܘܲܛܠܘܼܡܝܵܐ. ܘ ܘܠܵܐ ܬܲܗܡܸܐ ܡܸܢܲܢ ܐܝܼܬ̣ܝܵܐ: ܕܲܥܠܲܝܟ ܬܟ̣ܝܼܠ ܟܝܵܢܲܢ ܪܲܦܝܵܐ. ܘܲܡܚܝܼܠܘܼܬܲܢ ܠܵܟ̣ ܩܵܪܝܵܐ: ܕܬܸܥܢܹܝܢ ܒܐܝܼܡܵܡܵܐ ܘܠܸܠܝܵܐ. ܙ ܙܪܘܿܥ ܫܲܝܢܵܐ ܒܥܵܠܡܵܐ ܡܓܲܪܕܝܵܐ: ܐܲܝܟ̣ ܕܢܸܥܡܲܪ ܥܘܼܡܪܵܐ ܫܲܠܝܵܐ. ܘܲܦܬܲܚ ܬܲܪ̈ܥܹܐ ܕܲܫܡܲܝܵܐ: ܘܐܲܚܸܬ̣ ܒܘܼܪܟ̇ܬ̣ܵܐ ܒܲܪ ܟܲܣܝܵܐ. ܚ ܚܲܟܸ̇ܡ ܒܪܝܼܪܹ̈ܐ ܘܠܵܐ ܪ̈ܕܲܝܵܐ: ܘܚܲܝܸܠ ܡܚܝܼܠܹ̈ܐ ܘܲܪ̈ܦܲܝܵܐ. ܘܐܲܩܝܼܡ ܢܲܦܠܹ̈ܐ ܘܲܪ̈ܡܲܝܵܐ: ܘܐܲܚܠܸܡ ܟܪ̈ܝܼܗܹܐ ܘܕ݂ܵܘܲܝܵـ̈ܐ. ܛ ܛܲܪ ܠܟܸܢܫܲܢ ܒܢܝܼܫܵܟ̣ ܚܲܝܵܐ: ܡ̣ܢ ܨܸܡܕ݂ܵܐ ܕܚܲܫܹ̈ܐ ܣܢܲـ̈ܝܵܐ. ܘܲܗܘ̤ܝܼ ܢܵܛܘܿܪܵܐ ܘܪܵܥܝܵܐ: ܠܡܲܪܥܝܼܬ̣ܵܟ̣ ܕܠܵܟ̣ܘܼ ܡܣܲܟ̇ܝܵܐ. ܝ ܝܲܡܝܼܢܵܟ ܕܪ̈ܲܚܡܹܐ ܡܲܠܝܵܐ: ܐܲܓܸ̇ܢ ܥܠܲܝܢ ܒܲܪ ܒܵܪܘܿܝܵܐ. ܘܐܲܥܒܲܪ ܡܸܢܲܢ ܒܘܼܠܗܵܝܵܐ: ܘܲܪܗܝܼܒ̣ܘܼܬ̣ܵܐ ܕܡܲܕ݂ܘ̱ܝܵܐ. ܟ ܟܵܗܢܲܝ̈ܟ ܪܲܡܪܸܡ ܘܲܚ̈ܣܲܝܵܐ: ܘܢܸܬ̣ܥܲܛܦܘܼܢ ܒܫܘܼܒ̣ܚܵܐ ܦܲܐܝܵܐ. ܘܲܒ̣ܝܲܕ݂ ܕܘܼܒܵܪܹ̈ܐ ܙܗܲܝܵـ̈ܐ: ܢܸܬ̣ܢܲܨܚܘܼܢ ܒܚܲܣܝܘܼܬ̣ ܙܢܲܝܵـ̈ܐ. ܠ ܠܕܲܝܵܢܹ̈ܐ ܒܐܲܝܕܵܐ ܕܘܵܠܝܵܐ: ܕܲܒܲܪ ܒܐܘܼܪܚܵܐ ܕܗܘܼܕܵܝܵܐ. ܘܲܠܪܹ̈ܫܵܢܹܐ ܗܲܒ̣ ܚܢܵܝܵܐ: ܠܢܝܼܫܵܐ ܕܝܘܼܬ̣ܪܵܢ ܟܠ ܒܲܪܝܵܐ. ܡ ܡܵܪܵܐ ܕܨܵܒܹܐ ܒܚܲܛܵܝܵܐ: ܕܢܸܦܢܸܐ ܡ̣ܢ ܥܵܘܠܹܗ ܣܲܢܝܵܐ. ܨܒ̣ܝܼ ܒܚܲܝܲܝ̈ܢ ܘܗܲܒ̣ ܕܘܼܟܵܝܵܐ: ܠܟ̣ܘܼ̈ܬ̣ܡܵܬܲܢ ܒܙܘܿܦܵܟ̣ ܕܲܟ̣ܝܵܐ. ܢܢ ܢܦܹܐܫܵܐ ܫܲܟܸ̇ܢ ܥܸܠܵܝܵܐ: ܠܲܡܛܲܪܦܘܼܬܲܢ ܕܡܲܕ݂ܘ̱ܝܵܐ. ܘܐܲܕ݂ܢܲܚ ܠܲܢ ܨܸܡܚܵܐ ܦܲܐܝܵܐ: ܕܦܘܼܪܩܵܢܵܐ ܐܲܠܵܗܵܝܵܐ. ܣ ܣܲܒܲܥ ܟܲܦܢܹ̈ܐ ܒܬ̣ܘܼܪܣܵܝܵܐ: ܕܡ̣ܢ ܓܲܙܵܟ̣ ܫܦܝܼܥܵܐ ܘܡܲܠܝܵܐ. ܘܲܠܡܲܟ̇ܝܼܟܹ̈ܐ ܥܘܼܠܵܝܵܐ: ܗܲܒ̣ ܘܠܲܕ݂ܚܲܣܝܼܪ ܫܘܼܡܠܵܝܵܐ. ܥ ܥܹܕܬܵܟ ܡܵܪܝ ܬܸܗܘܸܐ ܚܲܕ݂ܝܵܐ: ܒܫܲܝܢܵܐ ܕܡܸܢܵܟ̣ ܟܲܕ݂ ܡܵܘܕܝܵܐ. ܘܲܠܝܲܠܕܹܝ̈ܗ̇  ܥܒܸܕ݂ ܦܘܼܨܵܝܵܐ: ܡ̣ܢ ܫܘܼܥܒܵܕ݂ܵܐ ܒܲܪܒ̇ܪܵܝܵܐ. ܦ ܦܵܛܪܘܿܣ ܢܸܗܘܸܐ ܒܲܥܵܝܵܐ: ܕܢܸܫܬܲܡܠܸܐ ܩܝܵܡܵܟ̣ ܚܲܣܝܵܐ. ܘܲܠܬܲܪ̈ܥܹܐ ܕܲܫܝܘܿܠ ܘܥܸܠܵܝܵܐ: ܬܸܙܟܸ̇ܐ ܟܲܕ݂ ܠܵܐ ܡܸܙܕܲܟ̣ܝܵܐ. ܨ ܨܠܝܼܒ̣ܵܐ ܕܲܙܟ̣ܵܐ ܠܫܲܒܵܝܵܐ: ܢܨܲܝܸܒ̣ ܠܲܢ ܙܲܒ̣ܢܵܐ ܚܲܠܝܵܐ. ܕܢܸܦܪ̱ܥܵܟ̣ ܒܠܸܒܵܐ ܫܲܦܝܵܐ: ܘܢܸܚܕܸܿܐ ܒܛܵܒ̣ܬ̣ܵܐ ܕܠܲܢ ܐܵܬ̣ܝܵܐ. ܩ ܩܘܼܡ ܥܲܕܲܪܲܝܢ ܢܵܨܪܵܝܵܐ: ܒܙܲܒ̣ܢܵܐ ܒܠܝܼܠܵܐ ܘܲܡܓܲܙܝܵܐ. ܘܐܲܣܓܵܐ ܠܘܵܬܲܢ ܣܘܼܟܵܝܵܐ: ܘܲܗܘ̤ܝܼ ܠܟ̣ܘܼܪ̈ܗܵܢܲܝܢ ܐܵܣܝܵܐ. ܪ ܪܲܚܸܡ ܥܲܠ ܥܵܢܵـ̈ܟ̣ ܕܓ̣ܵܥܝܵܐ: ܡ̣ܢ ܠܸܙܬ̣ܵܐ ܕܚܲܪܡܵܐ ܛܵܥܝܵܐ. ܘܗܲܒ̣ ܚܘܫܪܵܪܵܐ ܘܦܘܼܨܵܝܵܐ: ܠܲܕ݂ܩܵܪܹܝܢ ܠܵܟ̣ ܥܲܡ ܒܸܟ̣ܝܵܐ. ܫ ܫܠܵܡܵܟ̣ ܩܲܕܝܼܫܵܐ ܘܙܲܗܝܵܐ: ܢܩܵܘܸܐ ܒܲܢ ܕܠܵܐ ܫܘܼܢܵܝܵܐ. ܘܢܸܥܒܸܕ݂ ܨܸܒ̣ܝܵܢܵܟ̣ ܕܲܟ̣ܝܵܐ: ܒܚܲܝܠܵܐ ܕܪܘܼܚܵܐ ܒܲܝܬܵܝܵܐ. ܬ ܬܸܫܒ̇ܘܿܚܬܵܐ ܘܣܸܓ̣ܕܬ̣ܵܐ ܕܝܵܐܝܵܐ: ܘܬܵܘܕܝܼܬ̣ܵܐ ܠܲܡܬ̣ܘܿܡܵܝܵܐ. ܘܪ̈ܲܚܡܵܘܗܝ ܘܲܚܢܵܢܹܗ ܕܐܝܼܬ̣ܝܵܐ: ܢܸܗܘܘܿܢ ܥܠܲܝܢ ܥܲܕ݂ ܠܡܘܫܠܵܝܵܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܐܚܪܹܝܢܵܐ ܒܹܗ ܒܩܵܠܵܐ. ܡܫܝܼܚܵܐ ܫܠܵܡܵܐ ܕܥܸܠܵܝܹ̈ܐ: ܘܣܲܒ̣ܪܵܐ ܛܵܒ̣ܵܐ ܕܬܲܚܬܵܝܹ̈ܐ. ܚܲܣܵܐ ܚܵܘܒܹ̈ܐ ܕܚܲܛܵܝܹ̈ܐ: ܡ̣ܢ ܬܸܓ̣ܡܹ̈ܐ ܥܹܕܬܵܢܵܝܹ̈ܐ܀ ܡܫܝܼܚܵܐ ܩܕ݂ܵܡܲܝܟ ܩܵܝܡ̇ܝܼܢܲܢ: ܒܗܵܢ ܥܸܕܵܢܵܐ ܘܣܵܓ̣ܕܝܼܢܲܢ. ܘܥܘܼܗܕܵܢ ܚܲܫܵܟ̣ ܡܥܲܗܕܝܼܢܲܢ: ܘܥܲܠ ܡܲܕ݂ܒ̇ܚܵܟ̣ ܠܹܗ ܡܩܲܪܒ̣ܝܼܢܲܢ܀ ܡܫܝܼܚܵܐ ܒܪ̈ܲܚܡܲܝܟ ܐܲܢ݇ܬ̇ ܩܲܒܸ̇ܠ: ܗܵܢ ܩܘܼܪܒܵܢܵܐ ܐܲܝܟ̣ ܕܗܵܒܹܝܠ. ܘܐܲܒ̣ܪܵܡ ܘܐܝܼܣܚܵܩ ܘܝܼܣܪܵܝܹܠ: ܘܡܘܼܫܹܐ ܘܐܲܗܪܘܿܢ ܘܕ݂ܵܢܝܼܐܹܝܠ܀ ܡܫܝܼܚܵܐ ܚܘܼܪ ܒܲܢ ܒܲܚܢܵܢܵܟ̣: ܘܲܫܡܲܥ ܨܠܘܿܬܲܢ ܒܚܵܘܣܵܢܵܟ̣. ܘܩܲܕܸܿܫ ܦܘܼܡܲܢ ܒܥܘܼܕ݂ܪܵܢܵܟ̣: ܕܲܢܩܲܪܸܒ̣ ܠܵܟ̣ ܩܘܼܪܒܵܢܵܟ̣܀ ܡܫܝܼܚܵܐ ܐܲܫܪܵܐ ܒܹܗ ܒܥܵܠܡܵܐ: ܫܲܝܢܵܐ ܒܗܝܼܠܵܐ ܘܲܫܠܵܡܵܐ. ܘܐܵܘܝܘܼܬ̣ܵܐ ܘܚܘܼܒܵܐ ܫܲܠܡܵܐ: ܘܝܲܬ̇ܝܼܪܵܐܝܼܬ̣ ܒܗܵܢ ܥܲܡܵܐ܀ ܡܫܝܼܚܵܐ ܢܲܛܲܪ ܠܲܩܪܝܼܬ̣ܵܐ (ܐܵܘ ܠܲܡܕ݂ܝܼܢ݇ܬܵܐ): ܕܲܫܪܹܝܢܲܢ ܒܵܗ̇ ܒܬ̣ܵܘܣܲܦܬܵܐ. ܘܨܘܿܒ̣ ܒܵܗ̇ ܠܲܡ ܒܗܵܕܹܐ ܥܹܕܬܵܐ: ܕܡܲܣܩܵܐ ܠܲܫܡܵܟ̣ ܬܸܫܒ̇ܘܿܚܬܵܐ܀ ܡܫܝܼܚܵܐ ܩܲܝܸܡ ܠܥܹ̈ܕ݂ܵܬ̣ܵܟ̣: ܘܩܲܕܸܿܫ ܐܸܢܹܝܢ ܒܛܲܝܒ̇ܘܼܬ̣ܵܟ̣. ܘܗܲܒ̣ ܠܗܹܝܢ ܡܵܪܲܢ ܡ̣ܢ ܠܘܵܬ̣ܵܟ̣: ܡܸܕܸܡ ܕܲܡܠܲܟ̣ܬ̇ ܒܲܣܒܲܪܬ̣ܵܟ̣܀ ܡܫܝܼܚܵܐ ܓܲܢ݇ܒܲܪ ܠܡܲܠܟ̇ܘܼܬ̣ܵܐ: ܘܲܙܪܘܿܥ ܒܵܗ̇ ܡܪܲܚܡܵܢܘܼܬ̣ܵܐ. ܘܚܘܼܒܵܐ ܐܲܟ̣ܚ݇ܕ݂ ܘܐܵܘܝܘܼܬ̣ܵܐ: ܠܥܲܡܵܐ ܕܲܟ̣ܪܸܣܛܝܵܢܘܼܬ̣ܵܐ܀ ܡܫܝܼܚܵܐ ܟܲܢܸܫ ܠܕܲܡܒܲܕܪܝܼܢ: ܘܐܲܦܢܵܐ ܬܘܼܒ̣ ܠܐܲܝܠܹܝܢ ܕܛܵܥܹܝܢ. ܘܲܒܥܝܼ ܘܐܸܫܟܲܚ ܠܕܲܐܒ̇ܝܼܕܝܼܢ. ܘܩܲܪܸܒ̣ ܠܐܲܝܠܹܝܢ ܕܪܲܚܝܼܩܝܼܢ܀ ܡܫܝܼܚܵܐ ܕܲܡܠܸܐ ܛܵܒ̣ܘܼܬ̣ܵܐ: ܫܲܡܠܵܐ ܢܸܕ݂ܪܹ̈ܐ ܘܙܸܕ݂ܩܵـ̈ܬ̣ܵܐ. ܘܲܥ̈ܒ̣ܵܕܹܐ ܕܙܲܕܝܼܩܘܼܬ̣ܵܐ: ܘܣܘܼܥܪ̈ܵܢܹܐ ܕܲܡܝܲܬ̇ܪܘܼܬ̣ܵܐ܀ ܡܫܝܼܚܵܐ ܒܲܪܸܟ̣ ܠܟ̣ܠ ܦܹܐܪ̈ܝܼܢ: ܘܟ̣ܠ ܥܲـܠ̈ܠܵܬ̣ܵܐ ܘܐܲܒܒܵܢܝܼܢ. ܘܚܲܕ݂ ܢܸܗܘܸܐ ܠܲܡܵܐܐ ܟܘܿܪ̈ܝܼܢ: ܘܸܫܬܝܼܢ ܐܲܟ̣ܚ݇ܕ݂ ܘܲܬ̣ܠܵܬ̣ܝܼܢ܀ ܡܫܝܼܚܵܐ ܡܲܠܵܐ ܠܕܲܣܢܝܼܩܝܼܢ: ܘܦܲܪܢܸܣ ܠܐܲܝܠܹܝܢ ܕܡܸܣܟܹ̇ܢ̈ܝܼܢ. ܘܣܲܒܲܥ ܐܸܢܘܿܢ ܠܲܕ݂ܟܲܦܢܝܼܢ: ܘܙܘܼܢ ܡܵܙܘܿܢܵܐ ܠܕܲܨܪܝܼܟ̣ܝܼܢ܀ ܡܫܝܼܚܵܐ ܚܲܝܸܠ ܠܕܲܡܚܝܼܠܝܼܢ: ܘܲܫܪܝܼ ܠܐܲܝܠܹܝܢ ܕܐܲܣܝܼܪܝܼܢ. ܘܐܲܣܵܐ ܠܐܲܝܠܹܝܢ ܕܲܟ̣ܪܝܼܗܝܼܢ: ܘܢܲܛܲܪ ܐܸܢܘܿܢ ܠܕܲܡܚܝܼܠܝܼܢ܀ ܡܫܝܼܚܵܐ ܠܕܲܚܙܲܩܘ ܒܐܘܼܪ̈ܚܵܬ̣ܵܐ: ܘܝܲܡܡܹ̈ܐ ܬܘܼܒ̣ ܘܢܲܗܪ̈ܵܘܵܬ̣ܵܐ. ܐܲܗܦܸـܟ̣ ܐܸܢܘܿܢ ܒܚܲܕ݂ܘܼܬ̣ܵܐ: ܠܒ̣ܵܬܲܝ̈ܗܘܿܢ ܒܲܦܨܝܼܚܘܼܬ̣ܵܐ܀ ܡܫܝܼܚܵܐ ܢܲܚܸܡ ܠܥܲܢ̈ܝܼܕܹܐ: ܡܗܲܝܡܢܹ̈ܐ ܕܲܫܟܸܒ̣ܘ ܘܲܥܡܝܼ̈ܕܹܐ. ܘܒܲܣܸܡ ܠܗܘܿܢ ܒܛܘܼܒܹ̈ܐ ܥܬ̣ܝܼ̈ܕܹܐ: ܕܐܵܘܕܝܼܘ ܒܲܟ̣ܝܵܢܲܝ̈ܟ ܣܓ̣ܝܼ̈ܕܹܐ܀ ܡܫܝܼܚܵܐ ܕܲܒܲܪ ܠܟ̣ܠ ܬܸܓ̣ܡ̈ܝܼܢ: ܠܢܵܨܪ̈ܵܝܹܐ ܕܲܒ̣ܟ̣ܠ ܥܸܒ̣ܪ̈ܝܼܢ. ܘܲܒ̣ܦܸܢ̈ܝܵܬ̣ܵܐ ܘܲܬ̣ܚܘܼܡ̈ܝܼܢ: ܕܒܲܙܩܝܼܦܘܼܬ̣ܵܐ ܡܸܫܬܲܒ̣ܗܪܝܼܢ܀ ܡܫܝܼܚܵܐ ܕܲܚܢܲܢ ܥܠܲܝܟ̣ ܬܟ̣ܝܼܠܝܼܢ: ܘܲܒ̣ܬܲܟ̣ܫܲܦ̮ܬܵܐ ܡܸܬ̣ܓܵܘܣܝܼܢ. ܚܘܼܢܲܝܢ ܒܪ̈ܲܚܡܲܝܟ ܕܲܫܦܝܼܥܝܼܢ: ܡܸܟܹ̇ܝܠ ܘܲܠܥܵܠܲܡ ܥܵܠܡܝܼܢ. ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬ̣ܵܡܵܐ ܐܚܪܹܢܵܐ ܕܐܪ̈ܵܙܹܐ. ܒܹܗ ܒܩܵܠܵܐ.

ܡܫܝܼܚܵܐ ܣܲܒ̣ܪܵܐ ܕܟ̣ܠ ܥܲܡܡܝܼ̈ܢ: ܘܲܡܣܲܝܥܵܢܵܐ ܕܟ̣ܠ ܬܸܓ̣ܡܝܼ̈ܢ. ܐܲܫܪܵܐ ܫܠܵܡܵܟ ܒܟ̣ܠ ܣܵܘܦܝܼ̈ܢ: ܘܫܲܝܢܵܟ̣ ܪܲܒܵܐ ܒܟ̣ܠ ܥܸܒ̣ܪ̈ܝܼܢ܀ ܠܡܲܠܟܹ̈ܐ ܕܲܒ̣ܟ̣ܠ ܐܘܼܚܕܵܢ̈ܝܼܢ: ܘܟ̣ܠ ܕܲܬ̣ܚܘܿܬܲܝܗܘܿܢ ܟܕ݂ܝܼܢܝܼܢ. ܚܲܕܵܐ ܐܸܢܘܿܢ ܒܟ̣ܠ ܫܵܥ̈ܝܼܢ: ܕܲܢܫܲܒ̇ܚܘܼܢܵܟ̣ ܟܲܕ݂ ܪܵܘܙܝܼܢ܀ ܠܥܹܕܬܵܐ ܓܒ̣ܝܼܬ̣ܵܐ ܒܟ̣ܠ ܥܸܒ̣ܪ̈ܝܼܢ: ܗ̤ܝ ܥܲܡ ܝܲܠܕܹܝ̈ܗ̇ ܠܵܟ ܡܩܲܠܣܝܼܢ. ܢܲܛܲܪܹܝܗ̇ ܒܟ̣ܠ ܥܸܕܵܢܝܼ̈ܢ: ܐܲܝܟ̣ ܫܘܼܘܕܵܝܵܟ ܕܡ̣ܢ ܠܩܘܼܕ݂ܡܝܼܢ܀ ܠܥܲܠܠܵܢܹ̈ܐ ܕܲܒ̣ܟ̣ܠ ܩܠܹܝܡܝܼ̈ܢ: ܘܲܒ̣ܟ̣ܠ ܦܸܢ̈ܝܵܬ̣ܵܐ ܡܛܲܟ̇ܣܝܼܢ. ܗܲܒ̣ ܠܗܘܿܢ ܐܝܼܕ݂ܵܐ ܕܥܘܼܕ݂ܪܵܢܝܼܢ: ܕܢܸܪܥܘܿܢ ܠܥܵܢܵـ̈ܟ̣ ܘܲܡܕܲܒ̇ܪܲܢ܀ ܠܟ̣ܵܗܢܹ̈ܐ ܕܒܹܝܬ̣ ܩܘܼܕܫܵܟ̣ ܡܟܲܗܢܝܼܢ: ܘܲܚܠܵܦܲܝܢ ܕܸܒ̣ܚܹ̈ܐ ܡܩܲܪܒ̣ܝܼܢ. ܐܲܫܘܵܐ ܐܸܢܘܿܢ ܒܟ̣ܠ ܙܲܒ̣ܢ̈ܝܼܢ: ܕܢܸܬ̇ܠܘܼܢ ܠܵܟ̣ ܦܹܐܪܹ̈ܐ ܕܙܵܕ݂ܩܝܼܢ܀ ܘܠܲܡܫܲܡܫܵܢܹ̈ܐ ܕܲܚܕ݂ܝܼܪܝܼܢ: ܠܡܲܕ݂ܒ̇ܚܵܐ ܙܲܗܝܵܐ ܘܲܡܩܲܕܫܝܼܢ. ܐܲܢܗܲܪ ܠܸܒ̇ܗܘܿܢ ܒܟ̣ܠ ܢܘܼܗܪ̈ܝܼܢ: ܕܲܢܫܲܡܫܘܼܢ ܐܲܝܟ̣ ܕܲܦܩܝܼܕ݂ܝܼܢ܀ ܘܲܠܡܲܠܦܵܢܹ̈ܐ ܕܲܡܙܲܡܪܝܼܢ: ܠܡܵܪܘܫܬ̣ܵܟ ܒܟ̣ܠ ܗܘܼܠܵܠܝܼ̈ܢ. ܚܠܘܿܛ ܩܵܠܲܝ̈ܗܘܿܢ ܥܲܡ ܕܥܝܼܪܝܼܢ: ܐܲܝܠܹܝܢ ܕܲܩܕ݂ܵܡܲܝܟ ܩܵܝܡ̇ܝܼܢ܀ ܘܠܲܡܗܲܝܡܢܹ̈ܐ ܕܒܲܫܡܵܟ̣ ܥܡܝܼܕ݂ܝܼܢ: ܘܲܒ̣ܓ̣ܵܘ ܥܹܕܬܵܟ̣ ܗܵܐ ܟܢܝܼܫܝܼܢ. ܐܲܠܘܵܐ ܠܗܘܿܢ ܟܠ ܥܘܼܕ݂ܪ̈ܵܢܝܼܢ: ܘܐܲܩܸܠ ܡܸܢܗܘܿܢ ܟܠ ܝܘܼܩܪ̈ܝܼܢ܀ ܡܫܝܼܚܵܐ ܚܲܝܸܠ ܠܕܲܡܚܝܼܠܘܼܬܲܢ: ܡܫܝܼܚܵܐ ܐܲܣܵܐ ܠܕܲܟ̣ܪܝܼܗܝܼܢ. ܡܫܝܼܚܵܐ ܦܲܪܢܸܣ ܠܕܲܣܢܝܼܩܝܼܢ ܘܗܲܒ̣ ܒܘܼܝܵܐܵܐ ܠܕܲܡܥܵܩܝܼܢ܀ ܘܠܝܼ ܕܵܘܝܵܐ ܡܠܸܐ ܟܠ ܚܛܵܗܲܝܼ̈ܢ: ܘܚܲܠܫܵܐ ܘܲܣܟܲܠ ܐ݇ܢܵܫܝܼ̈ܢ. ܚܲܣܵܐ ܠܝܼ ܟܠ ܣܘܼܪ̈ܚܵܢܝܼܢ: ܒܝܵܘܡܵܐ ܕܟܹܐܢܹ̈ܐ ܡܸܬ̣ܦܲܪܥܝܼܢ܀ ܘܟ̣ܠܲܢ ܐܲܟ̣ܚ݇ܕ݂ ܒܟ̣ܠ ܩܵܠܝܼ̈ܢ: ܢܲܣܸܩ ܫܘܼܒ̣ܚܵܐ ܒܟ̣ܠ ܦܘܼܡܝܼ̈ܢ. ܠܐܲܒ̣ܵܐ ܕܟ̣ܠ ܠܹܗ̤ܘ ܣܵܓ̣ܕܝܼܢ: ܘܠܲܒ̣ܪܵܐ ܘܪܘܼܚܩܘܼܕ݂ܫܵܐ ܠܥܵܠܡܝܼܢ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬ̣ܵܡܵܐ ܐܚܪܹܢܵܐ ܕܥܹܐ̈ܕܹܐ: ܒܹܗ ܒܩܵܠܵܐ.

ܗ̇ܘ ܕܒܲܪܟܲܢ ܒܟ̣ܠ ܒܘܼܪ̈ܟܵܬ̣ܵܐ: ܒܲܫܡܲܝܵܐ ܒܒܲܪܢܵܫܘܼܬ̣ܵܐ. ܘܙܲܡܸܢ ܘܲܩܪܵܐ ܠܡܲܠܟ̇ܘܼܬ̣ܵܐ: ܒܘܼܣܵܡܵܐ ܒܐܲܡܝܼܢܘܼܬ̣ܵܐ܀ ܘܥܲܡ ܟܸܢܫܵܐ ܕܲܫܠܝܼܚܘܫܬ̣ܵܐ: ܥܒܲܕ݂ ܗ݇ܘ̣ܵܐ ܡܸܫܬܵܘܕܝܵܢܘܼܬ̣ܵܐ. ܘܐܵܦ ܒܐܵܡܹܝܢ ܚܲܬ̇ܡܵܗ̇ ܠܡܸܠܬ̣ܵܐ: ܕܠܵܐ ܢܸܗܘܸܐ ܒܵܗ̇ ܦܠܝܼܓ̣ܘܼܬ̣ܵܐ܀ ܐܵܡܹܝܢ ܐܵܡܹܝܢ ܐܵܡܲܪ ܐܢܵܐ܆ ܘܒ̣ܐܵܡܹܝܢ ܠܡܸܠܲܝ̈ ܡܚܲܬܸܡ ܐܢܵܐ. ܕܟ̣ܠ ܕܐܵܟܹܠ ܦܲܓ̣ܪܝ ܡܲܚܝܵܢܵܐ: ܘܫܵܬܹܐ ܕܹܡܝ ܟܵܣ ܦܘܫܪܩܵܢܵܐ܀ ܚܵܘܒܵܘ̈ܗܝ ܟܠܗܘܿܢ ܫܵܒܹܩ ܐܢܵܐ: ܚܛܵܗܵܘܗܝ ܟܠܗܘܿܢ ܥܵܛܹܐ ܐܢܵܐ. ܘܲܠܡܲܠܟ̇ܘܼܬ̣ܝ ܠܹܗ ܩܵܪܹܐ ܐܢܵܐ: ܘܲܒ̣ܛܘܼܒܲܝ̈ ܠܹܗ ܡܒܲܣܸܡ ܐܢܵܐ܀ ܗ̤ܘ ܒܛܲܝܒ̇ܘܼܬܹܗ ܢܒܲܪܸܟ̣ܟ̣ܘܿܢ: ܘܢܸܙܪܘܿܥ ܫܲܝܢܹܗ ܒܲܝܢܵܬ̣ܟ̣ܘܿܢ. ܘܡ̣ܢ ܥܵܩ̈ܬ̣ܵܐ ܢܦܲܨܹܝܟ̣ܘܿܢ: ܘܡ̣ܢ ܬܘܼܩ̈ܠܵܬ̣ܵܐ ܢܫܵܘܙܸܒ̣ܟ̣ܘܿܢ܀ ܢܒܲܪܸܟ̣ ܙܲܪ̈ܥܹܐ ܕܐܲܪ̈ܥܵܬ̣ܟ̣ܘܿܢ: ܢܒܲܪܸܟ ܦܹܐܪܹ̈ܐ ܕܐܝܼܢܟ̣ܘܿܢ. ܢܲܣܓܹ̇ܐ ܢܒܲܪܸܟ ܩܸܢܝܵܢܟ̣ܘܿܢ: ܘܢܵܘܪܸܟ̣ ܒܚܘܼܒܹ̇ܗ ܚܲܝܲܝ̈ܟ̇ܘܿܢ܀ ܐܲܠܵܗܵܐ ܡܵܪܹܗ ܕܐܢܵـ̈ܫܵܐ: ܗ̤ܘ ܢܒܲܪܸܟ̣ ܠܟ̣ܠܹܗ ܟܸܢܫܵܐ. ܘܢܸܬܸ̇ܠ ܚܲܝܠܵܐ ܠܚܲܠܵܫܵܐ: ܕܗܵܐ ܡܫܲܪܸܐ ܐܢܵܐ ܡ̣ܢ ܪܹܫܵܐ܀ ܒܢܝܼܫܹܗ ܚܲܝܵܐ ܕܲܡܫܝܼܚܵܐ: ܢܸܬ̣ܒܲܪܲܟ ܟܘܼܪܣܝܵܐ ܫܒ̣ܝܼܚܵܐ. ܕܩܵܬ̣ܘܿܠܝܼܩܘܿܣ ܕܡܲܕ݂ܢ̱ܚܵܐ: ܕܙܲܕܝܼܩܘܼܬ̣ܵܐ ܒܹܗ ܨܵܡܚܵܐ܀ ܐܲܒ̣ܵܐ ܕܲܡܠܸܐ ܙܲܗܝܘܫܬ̣ܵܐ: ܪܵܥܝܵܐ ܘܡܵܪܹܐ ܡܲܪܥܝܼܬ̣ܵܐ. ܡܵܪܝ ܦܠܵܢ ܡܠܸܐ ܢܲܟ̣ܦܘܼܬ̣ܵܐ: ܢܸܬ̣ܢ̱ܛܲܪ ܡ̣ܢ ܒܝܼܫܘܼܬ̣ܵܐ܀ ܒܲܪܸܟ̣ ܠܟ̣ܵܗܢܹ̈ܐ ܩܲܕܝܼܫܹ̈ܐ: ܘܠܲܩܠܹܝܪ̈ܝܼܩܹܐ ܘܫܲܡܵܫܹ̈ܐ. ܕܢܸܬ̣ܚܲܣܟ̇ܘܼܢ ܡ̣ܢ ܡܲܟ̣ܬܵܫܹ̈ܐ: ܘܡ̣ܢ ܫܹܐ̈ܕܹܐ ܘܐܢܵـ̈ܫܵܐ ܒܝܼܫܹ̈ܐ܀ ܘܲܠܥܲܬ̇ܝܼܩܲܝ̈ ܝܵـܘ̈ܡܵܬ̣ܵܐ: ܣܵܒܹ̈ܐ ܗܕ݂ܝܼܪ̈ܲܝ ܣܲܝ̈ܒܵܬ̣ܵܐ. ܢܸܥܒܸ̇ܕ݂ ܠܗܘܿܢ ܚܲܪܬ̣ܵܐ ܛܵܒ̣ܬ̣ܵܐ: ܘܢܸܩܪܸܐ ܐܸܢܘܿܢ ܠܡܲܠܟ̇ܘܼܬ̣ܵܐ܀ ܘܲܠܫܲܦܝܼܪ̈ܲܝ ܩܵܘ̈ܡܵܬ̣ܵܐ: ܥܠܲܝܡܹ̈ܐ ܩܵܢܝܲܝ̈ ܥܠܲܝܡܘܼܬ̣ܵܐ. ܢܪܲܒܸ̇ܐ ܐܸܢܘܿܢ ܒܙܲܗܝܘܼܬ̣ܵܐ: ܘܢܸܡܠܸܐ ܐܸܢܘܿܢ ܢܲܟ̣ܦܘܼܬ̣ܵܐ܀ ܟܝܵܢܵܐ ܪܲܦܝܵܐ ܕܢܸܩ̈ܒ̣ܵܬ̣ܵܐ: ܒܬ̣ܘܼ̈ܠܵܬ̣ܵܐ ܘܲܒ̣ܥ̈ܝܼܠܵܬ̣ܵܐ. ܢܸܬ̣ܢܲܛܪ̈ܵܢ ܡ̣ܢ ܡܲܦ̈ܠܵܬ̣ܵܐ: ܘܡ̣ܢ ܦܲܚܹ̈ܐ ܘܡ̣ܢ ܬܘܼܩ̈ܠܵܬ̣ܵܐ܀ ܝܵܬܹܒ̣ ܒܲܫܡܲܝܵܐ ܡܵܪܝܵܐ: ܢܸܬܸ̇ܠ ܠܲܢ ܫܲܝܢܵܐ ܫܲܠܝܵܐ. ܘܲܫܠܵܡܵܐ ܛܵܒ̣ܵܐ ܘܚܲܠܝܵܐ: ܕܢܸܚܕܸܐ ܐܝܼܡܵܡܵܐ ܘܠܸܠܝܵܐ܀ ܢܫܲܟܸ̇ܢ ܠܟ̣ܘܿܢ ܙܲܒ̣ܢܹ̈ܐ ܢܝܼܚܹ̈ܐ: ܕܬܸܗܘܘܿܢ ܒܐܲܡܝܼܢܘܼܦܨܝܼܚܹ̈ܐ. ܠܵܐ ܫܓ̣ܝܼܫܹ̈ܐ ܐܵܦܠܵܐ ܕܠܝܼܚܹ̈ܐ: ܐܸܠܵܐ ܒܝܲܕ݂ ܚܘܼܒܵܐ ܚܘܝܼܚܹ̈ܐ܀ ܘܕ݂ܐܸܬ̣ܟܲܢܲܫܬ̇ܘܿܢ ܝܵܘܡܵܢܵܐ: ܠܙܘܼܝܵܚ ܩܘܼܪܒܵܢܵܐ ܗܵܢܵܐ. ܨܠܝܼܒܹܗ ܕܡܲܠܟܵܐ ܡܲܚܝܵܢܵܐ: ܗ̤ܘ ܢܸܗܘܸܐ ܠܟ̣ܘܿܢ ܡܢܲܛܪܵܢܵܐ܀ ܢܩܲܒܸ̇ܠ ܡܵܪܝܵܐ ܩܘܼܪܒܵܢܟ̣ܘܿܢ: ܘܕܸܒ̣ܚܲܝ̈ܟ̇ܘܿܢ ܘܲܨ̈ܠܵܘܵܬ̣ܟ̣ܘܿܢ. ܘܬܸܬ̇ܢܝܼܚ ܪܘܼܚܹܗ ܒܙܸܕ݂̈ܩܵܬ̣ܟ̣ܘܿܢ: ܘܬܸܥܘܿܠ ܩܕܵܡܵܘܗܝ ܒܵܥܘܼܬ̣ܟ̣ܘܿܢ܀ ܢܲܨܝܼܚ ܒܟܸܢܫܵܐ ܕܩܲܕܝܼܫܹ̈ܐ: ܡܵܪܝ ܦܠܵܢ ܙܲܗܝܵܐ ܩܕ݂ܘܿܫ ܩܘܸܕ݂ܫܹ̈ܐ. ܢܢܲܛܲܪܟ̣ܘܿܢ ܡ̣ܢ ܡܲܟ̣ܬܵܫܹ̈ܐ: ܘܡ̣ܢ ܫܹܐ̈ܕܹܐ ܘܐܢܵܫܵܐ ܒܝܼܫܹ̈ܐ܀ ܘܲܢܨܲܠܸܐ ܐܵܦ ܥܲܠ ܟܸܢܫܵܐ: ܕܵܘܝܵܐ ܘܡܵܣܟܹܢܵܐ ܘܒ̣ܵܝܫܵܐ. ܬܲܠܡܝܼܕ݂ܵܘܗ̈ܝ ܕܗܵܢ ܩܲܕܝܼܫܵܐ: ܕܢܸܬ̣ܚܲܣܟ̇ܘܼܢ ܡ̣ܢ ܡܲܟ̣ܬܵܫܵܐ܀ ܘܐܲܝܠܹܝܢ ܕܲܠܐܝܼܘ ܒܙܲܗܝܘܼܬ̣ܵܐ: ܘܲܦܠܲܚܘ ܗ̣݇ܘܵܘ ܒܬܲܡܝܼܡܘܼܬ̣ܵܐ. ܒܗܵܢܵܐ ܥܵܠܡܵܐ ܒܟܹܐܢܘܼܬ̣ܵܐ: ܢܸܬ̣ܢܲܛܪܘܼܢ ܡ̣ܢ ܒܝܼܫܘܼܬ̣ܵܐ܀ ܘܐܲܝܠܹܝܢ ܕܐܝܼܬ̣ ܒܲܢ ܕܢܘܼܟ̣ܪ̈ܵܝܝܼܢ: ܘܡ̣ܢ ܒܵܬܲܝ̈ܗܘܿܢ ܪܲܚܝܼܩܝܼܢ. ܡܲܠܟܵܐ ܕܲܠܥܵܠܲܡ ܥܵܠܡܝܼܢ: ܢܲܦܢܸܐ ܐܸܢܘܿܢ ܒܲܫܠܵܡ̈ܝܼܢ܀ ܗܵܢ ܥܹܐܕ݂ܵܐ ܢܸܗܘܸܐ ܒܪܝܼܟ̣ܵܐ: ܥܠܲܝܟ̇ܘܿܢ ܥܲܡܵܐ ܡܲܟ̇ܝܼܟ̣ܵܐ: ܘܡܵܪܝܵܐ ܢܸܗܘܸܐ ܣܵܡܘܿܟ̣ܵܐ: ܘܒ̣ܐܲܬ̣ܪܵܐ ܛܵܒ̣ܵܐ ܡܵܠܘܿܟ̣ܵܐ܀ ܗܵܫܵܐ ܕܹܝܢ ܘܲܠܗܵܫ ܗܵܫ̈ܝܼܢ: ܘܲܒ̣ܟ̣ܠ ܙܲܒ̣ܢܝܼ̈ܢ ܘܥܸܕܵܢ̈ܝܼܢ. ܘܠܲܝ̈ܠܵܘܵܢ ܐܵܦ ܐܝܼܡܵܡ̈ܝܼܢ: ܘܲܥܕܲܡܵܐ ܠܥܵܠܲܡ ܥܵܠܡܝܼܢ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬ̣ܵܡܵܐ ܐܚܪܹܢܵܐ ܕܕ݂ܘܼܟ̣ܪܵܢܵܐ ܕܩܲܕܝܼܫܹ̈ܐ܀

ܐܝܼܬ̣ܝܵܐ ܕܒܲܪܟܲܢ ܒܟ̣ܠ ܒܘܼܪ̈ܟܵܢ: ܒܝܼܫܘܿܥ ܡܵܪܲܢ ܘܐܲܠܵܗܲܢ. ܘܡ̣ܢ ܛܘܼܥܝܲܝ ܒܪ̈ܲܚܡܵܘܗܝ ܦܲܪܩܲܢ: ܘܠܝܼܕܲܥܬ̣ܵܐ ܕܲܫܪܵܪ ܩܲܪܒܲܢ܀ ܒܛܲܝܒ̇ܘܼܬܹܗ ܠܟܸܢܫܲܢ ܢܒܲܪܸܟ̣: ܘܫܲܝܢܵܐ ܒܓ̣ܵܘ ܥܹܕܬܹ̇ܗ ܢܲܡܠܸܟ̣. ܘܠܲܒ̣ܥܸܠܕܒ̣ܵܒܹܝ̈ܗ̇ ܬܘܼܒ̣ ܢܒܲܪܸܟ: ܘܲܠܟ̣ܠ ܣܵܩܘܿܪܹ̈ܝܗ̇ ܢܡܲܟܸ̇ـܟ̣܀ ܘܢܸܥܢܸܐ ܒܪ̈ܲܚܡܵܘܗܝ ܠܥܲܝܝܼܩܹ̈ܐ: ܘܲܠܡܸܣܟܹ̇ܢܹ̈ܐ ܘܲܣܢܝܼܩܹ̈ܐ. ܘܢܸܦܪܘܿܩ ܐܸܢܘܿܢ ܡ̣ܢ ܫܚܵܩܹ̈ܐ: ܘܡ̣ܢ ܕܵܘܘܿܢܹ̈ܐ ܘܬܲܫܢܝܼܩܹ̈ܐ܀ ܘܢܸܥܢܸܐ ܐܵܦ ܠܗܵܢܵܐ ܟܸܢܫܵܐ: ܕܩܵܪܹܐ ܠܲܫܡܹܗ ܩܲܕܝܼܫܵܐ. ܘܲܢܚܲܝܸܠ ܠܝܼ ܠܚܲܠܵܫܨܐ: ܕܗܵܐ ܡܫܲܪܸܐ ܐ݇ܢܵܐ ܡ̣ܢ ܪܹܫܵܐ܀ ܒܲܪܸܟ ܒܛܲܝܒ̇ܘܼܬ̣ܵܟ̣ ܡܫܝܼܚܵܐ: ܠܪܹܫ ܥܹܕܬܵܟ̣ ܬܪܝܼܨܲܬ̣ ܫܘܼܒ̣ܚܵܐ. ܡܵܪܝ ܦܠܵܢ ܕܹܝܢ ܢܲܨܝܼܚܵܐ: ܦܵܛܲܪܝܵܪܟ̇ܝܼܣ ܕܡܲܕ݂ܢ̱ܚܵܐ܀ ܘܡܵܪܝ ܦܠܵܢ ܐܲܦܸܣܩܘܿܦܵܐ: ܦܫܘܿܛ ܠܹܗ ܕܪܵܥܵܟ̣ ܬܲܩܝܼܦܵܐ. ܗܲܒ̣ ܠܹܗ ܡܵܪܝ ܥܘܼܫܢܵܐ ܘܬ̣ܘܼܩܦܵܐ: ܒܲܕ݂ܡܘܼܬܹܗ ܕܫܸܡܥܘܿܢ ܟܹܐܦܵܐ܀ ܒܲܪܸܟ̣ ܡܵܪܝ ܠܟ̣ܵܗܢܹ̈ܐ ܙܗܲܝܵـ̈ܐ: ܐܵܦ ܠܲܡܫܲܡܫܵܢܹ̈ܐ ܕܟܲـ̈ܝܵܐ. ܘܢܲܛܲܪ ܠܲܡܗܲܝܡܢܹ̈ܐ ܓܒܲـ̈ܝܵܐ: ܡ̣ܢ ܫܘܼܠܛܵܢܹ̈ܐ ܛܵܥܲـ̈ܝܵܐ܀ ܒܲܪܸܟ ܡܵܪܝ ܠܲܒ̣ܬ̣ܘܼ̈ܠܵܬ̣ܵܐ: ܘܠܲܥܠܲܝ̈ܡܹܐ ܘܠܲܥܠܲܝ̈ܡܵܬ̣ܵܐ. ܘܐܲܥܒܲܪ ܡܸܢܗܘܿܢ ܡܲܪ̈ܕܘܵܬ̣ܵܐ: ܘܟ̣ܠ ܡܲܚ̈ܘܵܬ̣ܵܐ ܒܝܼ̈ܫܵܬ̣ܵܐ܀ ܒܲܪܸܟ ܒܛܲܝܒ̇ܘܼܬ̣ܵܟ ܠܥܲܡܲܢ: ܘܢܲܛܲܪ ܠܟܸܢܫܲܢ ܘܠܲܩܝܵܡܲܢ. ܘܙܲܒ̣ܢܹ̈ܐ ܕܲܢܝܵܚܵܐ ܗܲܒ̣ܠܲܢ: ܕܢܸܬ̣ܦܢܸܐ ܠܝܼܕܲܥܬ̣ܵܟ̣ ܟܠܲܢ܀ ܘܐܲܫܘܵܢ ܡܵܪܝ ܠܗ̇ܘ ܫܘܼܘܕܵܝܵܐ: ܕܐܸܡܲܪܬ̇ ܠܟܸܢܫܵܐ ܫܠܝܼܚܵܝܵܐ. ܕܟ̣ܠ ܕܐܵܟܹܠ ܡ̣ܢ ܦܲܓ̣ܪܝ ܚܲܝܵܐ: ܘܫܵܬܹܐ ܡ̣ܢ ܕܹܡܝ ܙܲܟܵܝܵܐ܀ ܫܵܒܹܩ ܐܢܵܐ ܚܵܘܒܹ̈ܐ ܕܲܣܥܲܪ: ܘܥܵܛܹܐ ܐܢܵܐ ܚܛܵܗܵܘܗ̈ܝ ܒܲܫܪܵܪ. ܘܲܒ̣ܙܘܿܦ ܪ̈ܲܚܡܲܝ ܡܸܬ̣ܚܵܘܲܪ: ܡ̣ܢ ܣܲܢ̈ܝܵܬ̣ܵܐ ܡܟܲܬ̇ܡܲܝܥ ܦܓܲܪ܀ ܟܠ ܕܐܵܟܹܠ ܡ̣ܢ ܦܲܓ̣ܪܝ ܚܵܝܹܐ: ܐܸܡܲܪ ܗܦܘ ܝܵܗܹܒ̣ ܚܲܝܹ̈ܐ. ܘܡܵܐ ܕܐܹܬܸܐ ܨܹܝܕ݂ ܬܲܚܬܵܝܹ̈ܐ: ܐܸܡܢܹܝܘܗܝ ܥܲܡ ܝܲܡܝܼܢܵܝܹ̈ܐ܀ ܡܸܠܬ̣ܵܐ ܗܵܕܹܐ ܐܵܡܲܪ ܐܢܵܐ: ܐܸܢܵܐ ܕܵܘܝܵܐ ܘܡܸܣܟܹ̇ܢܵܐ. ܠܟ̣ܘܿܢ ܐܘܿ ܟܸܢܫܵܐ ܟܪܸܣܛܝܵܢܵܐ: ܦܪܝܼܩ ܒܲܨܠܝܼܒ̣ܵܐ ܡܲܚܝܵܢܵܐ܀ ܗܵܢ ܦܲܓ̣ܪܵܐ ܢܘܼܗܪܵܐ ܗ݇ܘ̣ ܘܢܘܼܪܵܐ: ܕܡܵܘܩܸܕ݂ ܠܲܚܛܵܗܵܘܗ̈ܝ ܕܦܲܓ̣ܪܵܐ. ܘܲܠܗܵܘܢܵܐ ܡܲܢܗܲܪ ܒܢܘܼܗܪܵܐ: ܕܠܵܐ ܢܗܲܠܸܟ̣ ܒܚܸܫܟܵܐ ܟܡܝܼܪܵܐ܀ ܟܠ ܕܢܹܐܟ̣ܠܝܼܘܗܝ ܒܲܙܗܝܼܪܘܼܬ̣ܵܐ: ܘܡܲܦܸܩ ܡ̣ܢ ܠܸܒܹܗ ܐܲܟ̇ܬ̣ܵܐ. ܥܵܒܹܕ݂ ܠܹܗ ܚܲܪܬ̣ܵܐ ܛܵܒ̣ܬ̣ܵܐ: ܘܡܵܘܪܸܬ̣ ܠܹܗ ܓܢܘܿܢ ܡܲܠܟ̇ܘܼܬ̣ܵܐ܀ ܘܐܲܝܢܵܐ ܕܢܵܣܹܒ̣ ܠܗܵܢܵܐ ܦܓܲܪ: ܕܠܵܐ ܦܘܼܪܫܵܢ ܘܟ̣ܠ ܕܒ̣ܝܼܫ ܣܵܥܲܪ. ܘܚܘܼܝܵܒ̣ܵܐ ܢܵܣܹܒ̣ ܒܲܫܪܵܪ: ܘܲܠܝܲܩܕܵܢܵܐ ܡܸܫܬܲܡܲܪ܀ ܗܵܢܵܐ ܦܲܓ̣ܪܵܐ ܕܢܵܣܒ̇ܝܼܬ̇ܘܿܢ: ܠܚܘܼܣܵܝܵܐ ܕܲܚܛܵܗܲܝ̈ܟ̇ܘܒܢ. ܢܘܼܪܵܐ ܗ݇ܘ̣ ܕܲܚܠܝܼܛ ܒܓܲܪ̈ܡܲܝܟ̇ܘܿܢ: ܘܡܵܘܩܸܕ݂ ܠܟ̣ܠܗܘܿܢ ܚܛܵܗܲܝ̈ܟ̇ܘܿܢ܀ ܗܵܢܵܘ ܕܡܲܐܣܸܐ ܟܠ ܡܘܼܡ̈ܝܼܢ: ܘܲܡܚܲܣܸܐ ܚܛܵܗ̈ܝܼܢ ܘܚܵܘܒ̇ܝܼ̈ܢ. ܘܥܵܨܹܒ̣ ܟܹܐܒ̣ܝܼ̈ܢ ܘܟ̣ܘܼܪ̈ܗܵܢܝܼܢ: ܘܡܲܚܠܸܡ ܦܲܓ̣ܪ̈ܝܼܢ ܘܗܲܕܵܡ̈ܝܼܢ܀ ܛܲܪܘ ܐܲܚܲܝ̈ ܒܲܙܗܝܼܪܘܼܬ̣ܵܐ:ܦܲܓ̣ܪܵܐ ܘܲܕ݂ܡܵܐ ܒܫܲܘܝܘܫܬ̣ܵܐ. ܕܢܵܘܓܸ̇ܐ ܡܸܢܟ̣ܘܿܢ ܥܵـ̈ܩܵܬ̣ܵܐ: ܝܑܼܫܘܿܥ ܡܵܪܵܐ ܕܒܸܪ̈ܝܵܬ̣ܵܐ܀ ܘܩܵܘܵܘ ܒܚܘܼܒܵܐ ܘܐܵܘܝܘܫܬ̣ܵܐ: ܐܘܿ ܒܢܲܝ̈ ܥܹܕܬܵܐ ܩܲܕܝܼܫܬܵܐ. ܘܲܨܠܘܿܬ̣ܟ̣ܘܒܢ ܬܸܗܘܸܐ ܕܟ̣ܝܫܬ̣ܵܐ: ܘܬܸܬ̣ܩܲܒܲܠ ܩܕ݂ܵܡ ܪܲܒ̇ܘܼܬ̣ܵܐ܀ ܨܠܘܿܬ̣ܵܐ ܩܠܝܼܕ݂ܵܐ ܗ݇ܝܼ ܕܲܒ̣ܪܝܼܬ̣ܵܐ: ܕܗ̤ܝ ܦܵܬܚܵܐ ܬܪܲܥ ܡܲܠܟ̇ܘܫܬ̣ܵܐ. ܘܒ̣ܵܗ̇ ܡܸܬ̣ܦܲܢ̈ܝܵܢ ܫܹ̈ܐܠܵܬ̣ܵܐ: ܡ̣ܢ ܓܲܙܵܐ ܕܒܲܣܝܼܡܘܼܬ̣ܵܐ܀ ܒܵܗ̇ ܠܡܵܪܲܢ ܡܸܬ̣ܟܲܫܦܝܼܢܲܢ: ܘܡ̣ܢ ܛܲܝܒ̇ܘܼܬܹܗ ܒܵܥܹܝܢܲܢ. ܕܩܲܡܨܵܐ ܦܵܪܚܵܐ ܠܵܐ ܢܕ݂ܘܼܫ ܠܲܢ: ܘܨܲܪܨܘܼܪܵܐ ܢܲܥܒܲܪ ܡܸܢܲܢ܀ ܒܲܨܠܘܿܬ̣ ܒܬ̣ܘܼܠܬ̣ܵܐ ܩܲܕܝܼܫܬܵܐ: ܡܲܪܝܲܡ ܐܸܡܵܐ ܡܒܲܪܲܟ̣ܬܵܐ. ܢܸܬ̣ܢܲܛܪܘܼܢ ܝܲܠܕܹܝ̈ܗ̇ ܕܥܹܕܬܵܐ: ܡ̣ܢ ܥܵـ̈ܩܵܬ̣ܵܐ ܘܡܲܪ̈ܕܘܵܬ̣ܵܐ܀ ܒܲܨܠܘܿܬ̣ ܢܒ̣ܝܼ̈ـܹܐ ܘܲܫܠܝܼܚܹ̈ܐ: ܘܣܵܗ̈ܕܹܐ ܙܗܲܝܵـ̈ܐ ܘܢܲܨܝܼܚܹ̈ܐ. ܗܲܒ̣ܠܲܢ ܡܵܪܝ ܙܲܒ̣ܢܹ̈ܐ ܢܝܼܚܹ̈ܐ: ܕܢܸܗܘܸܐ ܒܐܲܡܝܼܢܘܼ ܦܨܝܫܚܵܐ܀ ܒܲܨ̈ܠܵܘܵܬܹܗ ܕܛܘܼܒܵܢܵܐ: ܡܵܪܝ ܝܘܿܚܲܢܵܢ ܡܲܥܡ̄ܕ݂ܵܢܵܐ. ܢܲܥܒܲܪ ܡܸܢܲܢ ܚܲܢܵܢܵܐ: ܫܲܒ̣ܛܵܐ ܕܪܘܼܓ̣ܙܵܐ ܡܵܘܒ̇ܕ݂ܵܢܵܐ܀ ܒܲܨܠܘܿܬ̣ ܡܵܪܝ ܡܵܐܪܝܼ ܫܠܝܼܚܵܐ: ܡܬܲܠܡܕ݂ܵܢ ܦܢܝܼܬ̣ܵܐ ܕܡܲܕܢ̱ܚܵܐ. ܐܲܪܚܸܩ ܡ̣ܢ ܥܲܒ̣ܕܲܝ̈ܟ ܡܫܝܼܚܵܐ: ܡܵܘܬܵܢܵܐ ܘܩܲܡܨܵܐ ܦܵܪܚܵܐ܀ ܒܲܨܠܘܿܬܹܗ ܕܣܵܗܕܵܐ ܡܟܲܠܠܵܐ: ܓܝܼܘܲܪܓܝܼܣ ܓܲܢ݇ܒܵܪ ܚܲܝܠܵܐ. ܩܪ̈ܵܒܹܐ ܘܲܫܓ̣ܘܼܫ̈ܝܹܐ ܫܲܠܵܐ: ܘܐܲܥܒܲܪ ܡܸܢܲܢ ܟܠ ܕܸܚܠܵܐ܀ ܒܲܨܠܘܿܬܹܗ ܕܡܵܪܝ ܐܵܘܓܹ̇ܝܢ: ܝܲܡܝܼܢ ܪ̈ܲܚܡܲܝܟ ܡܵܪܝ ܐܲܓܸ̇ܢ. ܥܲܠ ܗܵܢ ܟܸܢܫܵܐ ܕܲܡܒܲܓܸ̇ܢ: ܩܕ݂ܵܡ ܪ̈ܲܚܡܲܝܟ ܕܫܘܼܒ̣ܩܵܢ ܡܲܣܓܹܝܢ܀ ܒܲܨܠܘܿܬܹܗ ܕܡܵܪܝ ܫܲܠܝܼܛܵܐ: ܦܵܥܠܵܐ ܙܪܝܼܙܵܐ ܘܲܚܦܝܼܛܵܐ. ܚܘܼܣ ܡܵܪܝ ܥܲܠ ܟܸܢܫܲܢ ܫܝܼܛܵܐ: ܘܡ̣ܢ ܙܲܪ̈ܥܲܝܢ ܕܚܘܿܩ ܡܵܫܘܿܛܵܐ܀ ܒܲܨܠܵܘܵܬܹ̈ܗ ܕܐܲܬ̣ܠܹܝܛܵܐ: ܡܵܪܝ ܟܘܼܕܵܐܗܘܝܼ ܢܘܼܟ̣ܪܹܝܛܵܐ. ܐܲܥܒܲܪ ܡܸܢܲܢ ܟܠ ܩܸܢܛܵܐ: ܘܲܟ̣ܠܝܼ ܡܸܢܲܢ ܫܲܪܥܘܼܛܵܐ܀ ܒܲܨܠܘܿܬ̣ ܩܲܕܝܼܫܵܘ̈ܗܝ ܕܡܵܪܲܢ: ܡܵܪܝ ܐܲܚܵܐ ܘܡܵܪܝ ܝܘܿܚܲܢܵܢ. ܐܲܥܒܲܪ ܡܲܪ̈ܕܘܵܬ̣ܵܐ ܡܸܢܲܢ: ܡܫܝܼܚܵܐ ܡܲܠܟܲܢ ܘܡܲܚܝܵܢܲܢ܀ ܒܚܹܝܠ ܡܵܪܝ ܙܲܝܥܵܐ ܛܘܼܒ̣ܵܢܵܐ: ܐܲܥܒܲܪ ܡܸܢܲܢ ܚܲܢܵܢܵܐ. ܒܲܪܕܵܐ ܘܟܲܦܢܵܐ ܘܡܵܘܬܵܢܵܐ: ܘܩܲܡܨܵܐ ܘܙܲܚܠܵܐ ܘܝܲܪܩܵܢܵܐ ܀ ܒܲܨܠܘܿܬ̣ ܪܲܒܲܢ ܒܲܪ ܥܹܕܬܵܐ: ܒܲܪܸܟ ܡܵܪܝ ܠܲܟ̣ܠܝܼܠ ܫܲܢ݇ܬܵܐ. ܘܗܲܒ̣ܠܲܢ ܙܲܒ̣ܢܹ̈ܐ ܕܲܢܝܵܚܬܵܐ: ܘܲܥܩܘܿܪ ܡ̣ܢ ܠܸܒܲܢ ܥܸܬܵܐ܀ ܒܲܨܠܘܿܬ̣ܵܐ ܕܓܲܒ̣ܝܹܗ ܕܡܵܪܝܵܐ: ܪܲܒܲܢ ܗܘܿܪܡܝܼܙܕ ܥܵܓ̣ܵܡܵܝܵ. ܢܸܬ̣ܢܲܛܪܘܼܢ ܡܗܲܝܡܢܹ̈ܐ ܓـ̈ܒܲܝܵܐ: ܡ̣ܢ ܐܵܟܸܕ݂ܢܵܐ ܘܡ̣ܢ ܚܸܘܝܵܐ܀ ܒܲܨ̈ܠܵܘܵܬܹܗ ܕܩܲܕܝܼܫܵܐ: ܪܲܒܲܢ ܡܵܪܝ ܦܸܬ̣ܝܘܿܢ ܪܹܫܵܐ. ܢܸܬ̇ܛܲܪܕ݂ܘܼܢ ܟܹܐܒ̣ܵܘ̈ܗܝ ܕܒ̣ܝܼܫܵܐ: ܡ̣ܢ ܓܸܢܣܵܐ ܕܲܒ̣ܢܲܝ̈ܢܵܫܵܐ܀ ܒܲܨ̈ܠܵܘܵܬܹܗ ܕܡܵܪܝ ܡܵܡܵܐ: ܢܢܲܛܲܪ ܦܵܪܘܿܩܹܗ ܕܥܵܠ݂ܵܐ. ܠܗܵܢ ܟܸܢܫܵܐ ܡ̣ܢ ܟܠ ܡܘܼܡܵܐ: ܘܡ̣ܢ ܫܘܼܠܛܵܢܵܐ ܛܵܠܘܿܡܵܐ܀ ܒܲܨܠܘܿܬ̣ ܡܵܪܝ ܣܵܒ̣ܵܐ ܐܵܣܝܵܐ: ܢܸܬ̣ܐܲܣܘܿܢ ܟܪ̈ܝܼܗܹܐ ܪ̈ܡܲܝܵܐ. ܒܥܲܪ̈ܣܵܬ̣ܵܐ ܐܲܝܟ̣ ܡܫܲܪ̈ܲܝܵܐ: ܡ̣ܢ ܪ̈ܘܼܚܹܐ ܘܟܹܐܒܹ̈ܐ ܩܫܲـ̈ܝܵܐ܀ ܒܲܨܠܘܿܬܹܗ ܕܡܵܪܝ ܐܹܠܝܼܵܐ: ܐܲܒ̣ܘܼܢ ܩܲܕܝܼܫܵܐ ܘܙܲܓܝܵܐ. ܐܲܥܒܲܪ ܡ̣ܢ ܥܲܒ̣ܕܲܝ̈ܟ ܡܵܪܝܵܐ: ܟܹܐܒܹ̈ܐ ܟ̈ܣܲܝܵܐ ܘܲܓ̣ܠܲܝܵـ̈ܐ܀ ܒܲܨܠܘܿܬܹܗ ܕܡܵܪܝ ܡܝܼܟ̣ܵܐܹܝܠ: ܚܲܒ̣ܪܵܐ ܕܡܲܠܲܐܟܹ̈ܐ ܕܲܠܥܸܠ. ܢܫܲܕܲܪ ܡܵܪܝܵܐ ܥܘܼܕ݂ܪܵܢ ܘܚܹܝܠ: ܠܲܕ݂ܡܵܘܕܝܲܝ̈ ܡܥܲܡܵܢܘܼܐܹܝܠ܀ ܒܲܨܠܘܿܬܹܗ ܕܡܵܪܝ ܒܲܪ ܩܘܼܣܪܹ̈ܐ: ܕܲܫܗܲܪ ܒܥܲܡܠܹ̈ܐ ܘܲܒ̣ܟ̣ܘܼܫܪܹ̈ܐ. ܡܫܝܼܚܵܐ ܡܲܠܟܲܢ ܪܲܒ̇ܟ̇ܘܼܡܪܹ̈ܐ: ܢܲܛܲܪ ܠܪܵܘܪ̈ܒܹܐ ܘܠܲܙܥܘܿܪܹ̈ܐ܀ ܒܲܨܠܘܿܬܹܗ ܕܡܵܪܝ ܩܘܿܪܝܵܩܘܿܣ: ܪܵܚܡܹܗ ܕܲܡܫܝܼܚܵܐ ܝܘܿܣܛܘܿܣ. ܐܸܬ̣ܦܲܢ ܡܵܪܝ ܥܲܠ ܥܲܒ̣ܕܲܝ̈ܟ ܘܚܘܼܣ: ܘܲܒ̣ܛܝܼܠܘܼܬ̣ܵܟ ܥܠܲܝܢ ܦܪܘܿܣ܀ ܒܲܨܠܘܿܬ̣ ܡܵܪܝ ܝܲܥܩܘܿܒ̣ ܡܦܲܣܩܵܐ: ܕܲܨܠܘܿܬܹܗ ܠܒ̣ܝܼܫܵܐ ܕܵܚܩܵܐ. ܐܲܥܒܲܪ ܡܸܢܲܢ ܦܵܪܘܿܩܵܐ: ܒܲܪܕ݂ܵܐ ܘܟܲܦܢܵܐ ܘܲܫܚܵܩܵܐ܀ ܒܲܨܠܘܿܬ̣ܵܐ ܕܣܵܗܕܵܐ ܙܲܗܝܵܐ: ܡܵܪܝ ܛܲܗܡܲܙܓܲܪܕ ܡܓ̣ܘܼܫܵܝܵܐ. ܟܲܢܸܫ ܡܵܪܝ ܠܥܲܡܵܢ ܛܵܥܝܵܐ: ܕܐܸܬ̣ܒܲܕܲܪ ܒܟ̣ܠ ܦܢܝܼ ܘܩܘܼܪ̈ܝܵܐ܀ ܒܲܨܠܘܿܬܹܗ ܕܐܲܒ̣ܵܐ ܬܐܘܿܡܵܐ: ܡܫܝܼܚܵܐ ܐܵܣܝܵܐ ܚܲܟ̇ܝܼܡܵܨܐ. ܕܚܘܿܩ ܡ̣ܢ ܥܲܒ̣ܕܲܝ̈ܟ ܟܠ ܡܘܼܡܵܐ: ܘܕܲܟܵܐ ܠܲܢ ܡ̣ܢ ܟܠ ܟܘܼܬ̣ܡܵܐ܀ ܒܲܨܠܘܿܬܹܗ ܕܡܵܪܝ ܚܲܙܩܝܼܐܹܝܠ: ܐܲܬ̣ܠܹܝܛܹܗ ܕܥܲܡܵܢܘܼܐܹܝܠ. ܗܲܒ̣ ܠܣܵܓ̣ܘܿܕܲܝ̈ܟ ܥܘܼܕ݂ܪܵܢ ܘܚܹܝܠ: ܘܐܵܦ ܠܲܡܚܝܼܠܘܫܬܲܢ ܚܲܝܸܠ܀ ܒܲܨܠܘܿܬ̣ ܫܡܘܿܢܝܼ ܢܲܨܝܼܚܬܵܐ: ܘܫܲܒ̣ܥܵܐ ܒܢܹܝ̈ܗ̇ ܣܝܼܥܬܵܐ ܒܪܝܼܟ̣ܬܵܐ. ܢܲܛܲܪ ܡܵܪܲܢ ܠܗܵܕ݂ ܩܪܝܼܬ̣ܵܐ: ܘܐܲܫܦܲܥ ܥܠܹܝܗ̇ ܟܠ ܒܘܼܪ̈ܟܵܬ̣ܵܐ܀ ܒܲܨܠܘܿܬ̣ ܫܡܘܿܢܝܼ ܥܲܡ ܓܲܕܲܝ: ܘܚܸܒ̣ܪܘܿܢ ܘܚܸܒ̣ܨܘܿܢ ܥܲܡ ܡܲܩܒܲܝ. ܘܒ̣ܵܟ̇ܘܿܣ ܘܝܘܿܢܵܕܵܒ̣ ܘܬܲܪܣܲܝ: ܗܲܒ̣ ܡܵܪܝ ܠܫܹ̈ܐܠܵܬܲܢ ܦܘܼܢܵܝ܀ ܒܲܨܠܘܿܬ̣ ܟܠܗܘܿܢ ܩܲܕܝܼܫܹ̈ܐ: ܢܸܬ̣ܢܲܛܪܘܼܢ ܓܲܒ̣ܪܹ̈ܐ ܘܢܸܫܹ̈ܐ. ܡ̣ܢ ܫܹܐ̈ܕܹܐ ܘܐܢܵܫܵܐ ܒܝܼܫܹ̈ܐ: ܘܡ̣ܢ ܕܵܘܘܿܢܹ̈ܐ ܘܡ̣ܢ ܚܲܫܹ̈ܐ܀ ܗܵܫܵܐ ܘܲܒ̣ܟ̣ܠ ܗܵܫ ܗܵܫ̈ܝܼܢ: ܘܲܒ̣ܟ̣ܠ ܙܲܒ̣ܢܝܼ̈ܢ ܘܥܸܕܵܢ̈ܝܼܢ. ܘܠܲܝ̈ܠܵܘܵܢ ܐܵܦ ܐܝܼܡܵܡ̈ܝܼܢ: ܘܲܥܕܲܡܵܐ ܠܥܵܠܲܡ ܥܵܠܡܝܼܢ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬܵܡܵܐ ܐܚܪܹܝܹܵܐ ܒܹܗ ܒܩܵܠܵܐ. ܕܲܬ̣ܠܵܬ̣ܒܫܲܒܵܐ ܕܒ̣ܵܥܘܼܬ̣ܵܐ܀

ܫܘܼܒ̣ܚܵܐ ܠܐܝܼܬ̣ܝܵܐ ܕܡ̣ܢ ܥܵܠܲܡ: ܕܒ̣ܐܝܼܬ̣ܘܼܬܹܗ ܡ̣ܢ ܟܠ ܡܪܲܝܲܡ. ܘܫܘܼܠܛܵܢ ܡܵܪܘܼܬܹܗ ܩܲܝܸܡ: ܘܪܵܡ ܘܲܡܥܲܠܲܝ ܡ̣ܢ ܟܠ ܪܵܡ܀ ܘܡ̣ܢ ܪ̈ܘܼܚܵܢܹܐ ܡܸܬ̣ܪܲܡܪܲܡ: ܘܡܸܣܬ̇ܓܸܕ݂ ܡ̣ܢ ܟܠ ܐܸܡ̈ܘܵܢ ܘܥܲܡ. ܕܣ̣ܵܡ ܢܵܡܘܿܣܵܐ ܠܒܲܪ ܥܲܡܪܲܡ: ܘܫܲܡܠܝܼ ܒܝܼܫܘܿܥ ܒܲܪ ܡܲܪܝܲܡ܀ ܘܬ̣ܵܘܕܝܼܬ̣ܵܐ ܒܸܠܥܵܕ݂ ܥܘܼܩܵܡ: ܘܐܝܼܩܵܪܵܐ ܕܠܲܝܬ̇ ܠܹܗ ܙܘܼܠܵܡ. ܢܲܣܸܩ ܠܹܗ ܠܸܠܲܝ ܐܝܼܡܵܡ: ܠܗ̇ܘ ܕܠܲܝܬ̇ ܠܹܗ ܫܘܼܪܵܝ ܐܫܘܼܠܵܡ܀ ܕܲܒ̣ܪܵܐ ܥܵܠܡܵܐ ܡ̣ܢ ܠܘܼܩܕ݂ܵܡ: ܟܲܕ݂ ܒܟ̣ܠ ܛܘܼܟܵܣܝܼܢ ܩܲܝܸܡ. ܘܟ̣ܠܡܸܕܸܡ ܒܝܵܬܹܗ ܡܠܲܚܲܡ: ܘܟ̣ܠ ܟܝܵܢ ܒܕܝܼܠܵܝܬܹ̇ܗ ܡܬܲܚܲܡ܀ ܢܦܝܼܣܝܼܘܗܝ ܟܲܕ݂ ܦܘܼܡܲܢ ܨܲܝܵܡ: ܕܢܲܥܒܲܪ ܡܸܢܲܢ ܟܠ ܚܲܣܵܡ. ܘܡ̣ܢ ܫܹܐܕ݂ܵܐ ܒܝܼܫܵܐ ܡܕܲܪܲܡ: ܘܡ̣ܢ ܐܢܵܫܵܐ ܣܵܢܐܵܐ ܡܥܲܪܲܡ܀ ܕܒܲܚܢܵܢܹܗ ܕܠܲܝܬ̇ ܠܹܗ ܦܘܼܚܵܡ: ܢܫܝܼܓ̣ ܨܵܐܬܲܢ ܡ̣ܢ ܟܠ ܟܘܼܬܵܡ. ܘܢܸܬܸ̇ܠ ܠܲܟ̣ܪ̈ܝܼܗܲܝܢ ܣܘܼܡܣܵܡ: ܘܢܸܥܒܸ̇ܕ݂ ܠܥܲܢܝܼܕܲܝ̈ܢ ܢܘܼܚܵܡ܀ ܘܲܠܗܵܠ ܢܲܫܘܸܐ ܠܗܘܿܢ ܠܒ̣ܘܼܣܵܡ: ܓܹـ̈ܐܘܵܬ̣ܵܐ ܕܠܲܝܬ̇ ܠܗܹܝܢ ܫܘܼܠܵܡ. ܘܢܸܩܥܘܿܢ ܫܘܼܒ̣ܚܵܐ ܥܲܡ ܪܘܼܡܪܵܡ: ܡ̣ܢ ܥܵܠܲܡ ܥܕܲܡܵܐ ܠܥܵܠܲܡ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬ̣ܵܡܵܐ ܒܹܗ ܒܩܵܠܵܐ. ܕܐܲܪܒܲܥܒ̇ܫܲܒܵܐ ܕܒ̣ܵܥܘܼܬ̣ܵܐ.

ܐ ܐܲܠܵܗܵܐ ܕܫܵܡܲܥ ܘܥܵܢܹܐ: ܫܡܲܥ ܨܠܘܿܬ̣ܵܐ ܕܡܸܬ̣ܟܲܫܦܵܢܹ̈ܐ. ܐ ܐܲܓܸ̇ܢ ܪ̈ܲܚܡܲܝܟ ܐܲܡܝܼܢܹ̈ܐ: ܒܐܲܬ̣ܪ̈ܵܘܵܬ̣ܵܐ ܘܒܲܡܕ݂ܝܼܢܹ̈ܐ܀ ܒ ܒܲܪܸܟ̣ ܠܥܹܕܬܵܐ ܘܲܠܟ̣ܵܗܢܹ̈ܐ: ܕܲܢܪܲܥܘܼܢܵܟ̣ ܒܩܘܼܪ̈ܒܵܢܹܐ. ܒ ܒܲܪܸܟ̣ ܠܥܵـ̈ܢܵܐ ܘܥܲܠܠܵܢܹ̈ܐ: ܕܲܢܗܲܠܟ̣ܘܼܢ ܐܲܝܟ̣ ܦܘܼܩܕܵܢܹ̈ܐ܀ ܓ ܓܲܢ݇ܒܲܪ ܠܡܲܠܟܹ̈ܐ ܘܕܲܝܵܢܹ̈ܐ: ܕܲܢܕ݂ܘܼܢܘܼܢ ܕܝܼܢܹ̈ܐ ܟܹܐܢܹ̈ܐ. ܓ ܓܡܝܼܪܹ̈ܐ ܢܸܬ̣ܚ݇ܙܘܼܢ ܡܲܠܦܵܢܹ̈ܐ: ܕܢܲܠܦܘܼܢ ܣܸܦܪܹ̈ܐ ܡܲܚܝܵܢܹ̈ܐ܀ ܕ ܕܚܘܿܩ ܣܵܢ̈ܐܹܐ ܕܲܡܫܲܡܫܵܢܹ̈ܐ: ܘܛܲܪ ܐܸܢܘܿܢ ܡ̣ܢ ܢܸܟ̣ܝܵܢܹ̈ܐ. ܕ ܕܘܼܢ ܒܲܝܢܲܝܢ ܠܲܡܚܲܒ̇ܠܵܢܹ̈ܐ: ܕܕܹܐܒܹ̈ܐ ܐܸܢܘܿܢ ܟܲܡܵܢܹ̈ܐ܀ ܗ ܗܲܒ̣ ܚܲܝܠܵܐ ܠܣܵܒܹ̈ܐ ܬܲܩܢܹ̈ܐ: ܕܢܲܝܬ̇ܘܿܢ ܠܵܟ̣ ܢܸܕ݂ܪܹ̈ܐ ܘܕܲܫܢܹ̈ܐ. ܗ ܗܲܕܲܪ ܒܫܘܼܦܪܹ̈ܐ ܪ̈ܘܼܚܵܢܹܐ: ܠܲܥܠܲܝܡܹ̈ܐ ܘܠܲܛܠܝܘܿܢܹ̈ܐ܀ ܘܹܐܠ ܚܸܫܟܵܐ ܩܦܘܿܠ ܡ̣ܢ ܡܗܲܝܡܢܹ̈ܐ: ܕܢܵܘܕܘܿܢ ܠܵܟ̣ ܒܟ̣ܠ ܥܸܕܵܢܹ̈ܐ. ܘ ܘܲܠܟܲـܠ̈ܠܵܬ̣ܵܐ ܘܲܠܚܲܬ̣ܢܹ̈ܐ: ܐܲܦܨܲܚ ܒܦܹܐܪܹ̈ܐ ܡܚܲܕܝܵܢܹ̈ܐ܀ ܙ ܙܪܘܿܥ ܒܘܼܪܟ̇ܬ̣ܵܐ ܒܟ̣ܠ ܙܲܪ̈ܥܘܿܢܹܐ: ܕܢܹܟ̣ܠܘܼܢ ܘܲܕ݂ܢܸܣܒ̇ܥܘܼܢ ܟܲܦܢܹ̈ܐ܀ ܚܲܕܵܐ ܡܵܪܲܢ ܠܲܟ̣ܡܝܼܪܹ̈ܐ: ܒܲܥܢܵܢܹ̈ܐ ܡܲܚ̈ܬ̣ܵܬ̣ ܡܸܛܪܵܐ. ܚ ܚܘܼܣ ܡܵܪܲܢ ܥܲܠ ܐܲܟ̣ܪܹ̈ܐ: ܕܢܲܝܬ̇ܘܿܢ ܠܒܲܝܬܵܟ̣ ܒܲܟܵܪܹ̈ܐ܀ ܛ ܛܲܪ ܡܵܪܝ ܥܘܼܬ̣ܪܵܐ ܕܥܲܬ̇ܝܼܪܹ̈ܐ: ܕܢܵܘܣܦܘܼܢ ܐܲܓ̣ܪܵܐ ܕܐܲܓ̣ܝܼܪܹ̈ܐ. ܛ ܛܝܵܪ̈ܲܝܟ ܢܸܗܘܘܿܢ ܣܸܬܵܪܹ̈ܐ: ܠܥܵـ̈ܢܵܟ̣ ܡܠܝܼܠܬܵܐ ܘܠܲܓ̣ܙܵܪܹ̈ܐ܀ ܝ ܝܵܗܹܒ̣ ܥܲܝܢܹ̈ܐ ܠܲܥܘܝܼܪܹ̈ܐ: ܒܢܘܼܗܪܵܟ̣ ܡܵܪܝ ܢܸܚܙܸܐ ܢܘܼܗܪܹ̈ܐ. ܝ ܝܲܡܝܼܢܵܟ̣ ܬܲܐܣܸܐ ܚܲܓ̣ܝܼܪܹ̈ܐ: ܘܬܸܫܪܸܐ ܚܒ̣ܝܼܫܹ̈ܐ ܘܐܲܣܝܼܪܹ̈ܐ܀ ܟ ܟܐܝܼ ܒܣܵܢ̈ܐܹܐ ܘܲܒ̣ܣܵܩܘܿܪܹ̈ܐ: ܕܲܟ̣ܡܝܼܢܝܼܢ ܠܲܢ ܐܲܝܟ̣ ܢܸܡܪܸ̈ܐ ܠ ܠܲܒܸ̇ܒ̣ ܣܲܝܲܥ ܠܲܡܝܲܬ̇ܪܹ̈ܐ: ܘܲܦܬܲܚ ܠܸܒܵܐ ܕܲܒ̣ܪܝܼܪܹ̈ܐ܀ ܡ ܡܲܟܸ̇ܟ̣ ܚܘܼܬ̣ܪܵܐ ܕܲܚܬ̣ܝܼܪܹ̈ܐ: ܕܠܵܐ ܢܚܲܦܘܿܢ ܫܪܵܪ ܫܲܪܝܼܪܹ̈ܐ. ܢܢ ܢܸܫܬܲܪܬ̇ܚܘܼܢ ܙܲܪ̈ܥܹܐ ܘܦܹܐܪܹ̈ܐ: ܕܢܹܐܟ̣ܠܘܼܢ ܪܵܘܪ̈ܒܹܐ ܘܲܙܥܘܿܪܹ̈ܐ܀ ܣ ܣܲܝܲܥ ܡܵܪܝ ܠܝܵܬ̣ܒܲܝ̈ ܥܘܼܡܪܹ̈ܐ: ܕܢܸܗܘܘܿܢ ܠܵܟ̣ ܥܲܒ̣ـ̈ܕܹܐ ܥܝܼܪܹ̈ܐ. ܥ ܥܒܸܕ݂ ܡܵܪܝ ܛܵܒ̣ܬ̣ܵܐ ܥܲܡ ܒܘܼܪܹ̈ܐ: ܐܲܝܟ̣ ܕܲܥܒܲܕܬ̇ ܒܟ̣ܠܗܘܿܢ ܕܵܪܹ̈ܐ܀ ܦ ܦܲܢܵܐ ܫܹ̈ܐܠܵܬ̣ ܟܠ ܕܩܵܪܹܐ: ܐܲܝܟ̣ ܡܘܼܠܟܵܢܲܝ̈ܟ ܫܲܦܝܼܪܹ̈ܐ. ܨ ܨܠܘܿܬܲܢ ܬܸܗܘܸܐ ܐܲܝܟ̣ ܥܸܛܪܹ̈ܐ: ܩܕ݂ܵܡܲܝܟ ܒܪ̈ܲܡܫܹܐ ܘܲܒ̣ܨܲܦܪܹ̈ܐ܀ ܩ ܩܲܒܸ̇ܠ ܒܵܥܘܼܬ̣ ܟܲܫܝܼܪܹ̈ܐ: ܕܫܵܗ̇ܪܝܼܢ ܒܠܸܠܝܵܐ ܥܲܡ ܥܝܼܪܹ̈ܐ. ܪ ܪܲܡܪܸܡ ܩܵܠܵܐ ܕܐܵܡܘܿܪܹ̈ܐ: ܕܲܢܫܲܒ̇ܚܘܼܢܵܟ̣ ܒܡܲܙܡܘܿܪܹ̈ܐ܀ ܫ ܫܲܝܸܢ ܟܲܢܸܫ ܠܲܡܒܲܕܪܹ̈ܐ: ܕܲܢܩܘܼܡܘܼܢ ܒܥܹܕܬܵܟ̣ ܣܸܕ݂ܪܹ̈ܐ. ܬ ܬܹܐܬܸܐ ܡܲܠܟ̇ܘܼܬ̣ܵܟ̣ ܘܬܸܫܪܸܤܐ: ܒܓ̣ܵܘ ܥܲܡܵܟ̣ ܘܥܲܒ̣ܕܲܝ̈ܟ ܡܚܲܪܪܹ̈ܐ܀ ܠܵܟ̣ ܫܘܼܒ̣ܚܵܐ ܡ̣ܢ ܟܠ ܕܲܒ̣ܪܸܐ: ܐܵܣܲܪ ܚܲܨܵܐ ܕܓܲܢ݇ܒܵܪܹ̈ܐ. ܘܲܠـ̈ܬ̣ܵܓܹܐ ܕܡܲܠܟܹ̈ܐ ܫܵܪܸܐ: ܐܵܡܹܝܢ ܘܐܵܡܹܝܢ ܒܟ̣ܠ ܛܵܘܪܹ̈ܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܕܲܥܪܘܼܒ̣ܬܵܐ ܕܥܲܢܝܼ̈ܕܹܐ: ܕܝܫܠܹܗ ܕܩܲܫܝܼܫܵܐ ܝܼܣܪܵܝܹܠ ܐܲܠܩܘܿܫܵܝܵܐ.

ܡܫܝܼܚܵܐ ܨܸܡܚܵܐ ܕܡ̣ܢ ܐܲܒ̣ܵܐ: ܕܠܲܟ̣ܝܵܢܲܢ ܢܣܲܒ̣ ܘܒܹܗ ܨܒ̣ܵܐ ܗ݇ܘ̣ܵܐ. ܝܵܘܡܵܢ ܠܟ̣ܠ ܡܝܼܬܹ̈ܐ ܕܓ̣ܵܘܵܐ: ܥܒܸܕ݂ ܠܗܘܿܢ ܕܘܼܟ̣ܪܵܢܵܐ ܛܵܒ̣ܵܐ܀ ܡܫܝܼܚܵܐ ܕܫܵܘܬܸܦ ܠܐܲܪ̈ܥܵܢܹܐ: ܥܲܡܗܘܿܢ ܕܬܸܓ̣ܡܹ̈ܐ ܫܡܲܝܵܢܹ̈ܐ. ܠܲܣܵܐ ܚܵܘܒܹ̈ܐ ܘܚܸܛܝܵܢܹ̈ܐ: ܕܟ̣ܠ ܥܲܢܝܼ̈ܕܹܐ ܟܪܸ̈ܣܛܝܵܢܹܐ܀ ܡܫܝܼܚܵܐ ܫܠܵܡܵܐ ܕܥܸܠܵܝܹ̈ܐ: ܘܫܲܝܢܵܐ ܪܲܒܵܐ ܕܬܲܚܬܵܝܹ̈ܐ. ܒܪ̈ܲܚܡܲܝܟ ܐܲܓ̣ܙܲܪ ܚܘܼܣܵܝܹ̈ܐ: ܠܟ̣ܠ ܥܲܢ̈ܝܼܕܹܐ ܡܫܝܼܚܵܝܹ̈ܐ܀ ܡܫܝܼܚܵܐ ܪܹܫܵܐ ܕܬܲܠܡܝܼ̈ܕܹܐ: ܘܝܵܗܘܿܒ̣ܵܐ ܕܚܲܝܹ̈ܐ ܥܬ̣ܝܼ̈ܕܹܐ. ܒܪ̈ܲܚܡܲܝܟ ܚܲܣܵܐ ܠܥܲܢܝܼ̈ܕܹܐ: ܕܐܝܼܬܲܝܗܘܿܢ ܒܲܫܡܵܟ̣ ܥܡܝܼ̈ܕܹܐ܀ ܡܫܝܼܚܵܐ ܕܪ̈ܲܚܡܵܘܗܝ ܛܵܒ̣ ܫܦܝܼܥܝܼܢ: ܥܲܠ ܙܲܕܝܼܩܝܼܢ ܘܪܲܫܝܼܥܝܼܢ. ܩܵܠܲܝ̈ܢ ܩܕ݂ܵܡܲܝܟ ܢܗܘܿܢ ܫܡܝܼܥܝܼ̈ܢ: ܘܚܲܣܵܐ ܠܕܲܒ̣ܪܘܼܫܡܵܟ̣ ܛܒ̣ܝܼܥܝܼܢ܀ ܡܫܝܼܚܵܐ ܬܘܼܩܦܵܐ ܕܟ̣ܠ ܫܝܼܡ̈ܝܼܢ: ܘܬ̣ܵܒ̣ܘܿܥܵܐ ܟܹܝܬ̣ ܕܲܥܫܝܼܡܝܼܢ. ܘܚܲܝ ܪ̈ܘܼܚܵܢܝܼܢ ܘܲܓ̣ܫܝܼܡܝܼܢ: ܚܲܣܵܐ ܠܕܲܒ̣ܢܝܼܫܵܟ̣ ܪܫܝܼܡܝܼܢ܀ ܡܫܝܼܚܵܐ ܐܲܦܢܵܐ ܠܐܲܒ̇ܝܼܕܲܝ̈ܢ: ܘܐܸܬ̣ܪܲܚܲܡ ܥܲܠ ܝܲܕܝܼܕܲܝ̈ܢ. ܘܩܲܒܸ̇ܠ ܕܸܒ̣ܚܲܝ̈ܢ ܡ̣ܢ ܐܝܼܕܲܝ̈ܢ: ܘܚܲܣܵܐ ܚܛܵܗܹ̈ܐ ܕܥܲܢܝܼ̈ܕܲܝܢ܀ ܡܫܝܼܚܵܐ ܩܲܒܸ̇ܠ ܩܘܼܪ̈ܒܵܢܲܝܢ: ܘܫܲܪܬܲܚ ܦܹܐܪ̈ܲܝܢ ܘܐܲܒ̇ܒܵܢܲܝ̈ܢ. ܘܚܘܼܣ ܠܣܵܢܐܲܝ̈ܢ ܘܠܲܡܚܲܒ̇ܒ̣ܵܢܲܝ̈ܢ: ܘܪܲܚܸܡ ܠܬ̣ܵܪ̈ܐܲܝܢ ܘܪ̈ܒܵܢܲܝܢ܀ ܡܫܝܼܚܵܐ ܐܲܣܵܐ ܠܲܟ̣ܪ̈ܝܼܗܲܝܢ: ܘܒܲܣܦܲܪ ܚܲܝܹ̈ܐ ܟܬ̣ܘܿܒ̣ ܫܡܵܗܲܝ̈ܢ. ܘܲܫܒ̣ܘܿܩ ܚܵܘܒܲܝ̈ܢ ܘܲܚܛܵܗܲܝ̈ܢ: ܘܐܲܢܝܼܚ ܠܐܲܚܲܝ̈ܢ ܘܠܲܐܒ̣ܵܗܲܝ̈ܢ܀ ܡܫܝܼܚܵܐ ܚܘܼܣ ܥܲܠ ܟܠ ܡܗܲܕܡܵܟ̣: ܕܐܸܟܲܠ ܦܲܓ̣ܪܵܟ̣ ܘܐܸܫܬܝܼ ܕܡܵܟ. ܘܐܸܬ̇ܛܒܲܥ ܒܵܟ̣ ܘܩܲܒܸ̇ܠ ܪܘܼܫܡܵܟ̣: ܘܗܲܝܡܸܢ ܒܵܟ ܘܐܵܘܕܝܼ ܒܲܫܡܵܟ̣܀ ܡܫܝܼܚܵܐ ܒܪ̈ܲܚܡܹܐ ܕܛܲܝܒ̇ܘܼܬ̣ܵܟ̣: ܘܒܲܚܢܵܢܵܐ ܕܐܲܠܵܗܘܼܬ̣ܵܟ̣. ܒܲܣܸܡ ܐܸܢܘܿܢ ܒܡܲܠܟ̇ܘܼܬ̣ܵܟ̣: ܠܕ݂ܐܘܕܝܼܘ ܒܲܬ̣ܠܝܼܬ̣ܵܝܘܼܬ̣ܵܟ̣܀ ܡܫܝܼܚܵܐ ܒܲܪܸܟܲܝܗܝ ܠܟܸܢܫܲܢ: ܘܢܲܛܲܪܲܝܗܝ ܡ̣ܢ ܟܠ ܒܝܼ̈ܫܵܢ. ܘܫܲܝܸܢ ܬܲܪ̈ܥܝܵܬܲܢ ܫܓ̣ܝܼ̈ܫܵܢ: ܕܲܠܘܲܥܕܵܟ̣ ܚܵܐܲܪ ܢܝܼܫܲܢ܀ ܡܫܝܼܚܵܐ ܝܲܡܵܐ ܕܚܵܘܣܵܢܵܐ: ܣܥܘܿܪܲܝܗܝ ܠܕ݂ܵܘܝܵܐ ܡܪܲܟܒ̣ܵܢܵܐ. ܪܲܒܲܬ̣ ܚܛܵܐ ܝܵܗ ܚܲܢܵܢܵܐ: ܠܲܚܛܵܗܵܘ̈ܗܝ ܗ̤ܘܝܼ ܡܚܲܣܝܵܢܵܐ܀ ܡܫܝܼܚܵܐ ܐܲܫܘܵܢ ܒܛܲܝܒ̇ܘܼܬ̣ܵܟ: ܕܢܵܘܕܸܐ ܘܢܸܣܓܘܿܕ݂ ܠܡܵܪܘܼܬ̣ܵܟ. ܘܲܢܫܲܒܲܚ ܠܐܲܠܵܗܘܼܬ̣ܵܟ: ܗܪܸܟ̣ ܒܥܹܕܬܵܟ̣ ܘܲܒ̣ܡܲܠܟ̇ܘܼܬ̣ܵܟ̣܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬܵܡܵܐ ܕܐܪ̈ܵܙܹܐ ܕܚܲܕ݂ܒ̇ܫܲܒܹ̈ܐ ܕܨܵܘܡܵܐ.

ܐܝܼܬ̣ܝܵܐ ܚܲܝܵܐ ܘܒܲܪ ܚܲܝܵܐ: ܕܐܸܬ̣ܒܲܪܢܲܫ ܒܦܲܓ̣ܪܵܐ ܓܲܠܝܵܐ. ܘܲܦܪܲܩ ܠܓܸܢܣܵܐ ܐܢܵܫܵܝܵܐ: ܘܝܲܗ̣݇ܒ̣ ܠܬܲܠܡܝܼܕ݂ܵܘ̈ܗܝ ܫܘܼܘܕܵܝܵܐ܀ ܘܗܵܟܲܢܵܐ ܠܗܘܿܢ ܥ̣ܢܵܐ ܘܐܸܡܲܪ: ܘܒ̣ܵܐܡܹܝܢ ܠܵܗ̇ ܠܡܸܠܬܹܗ ܫܲܪܲܪ. ܕܟ̣ܠ ܕܐܵܟܹܠ ܦܲܓ̣ܪܝ ܒܝܲܕ݂ ܙܘܼܗܵܪ: ܐܵܦ ܘܲܠܕܹܡܝ ܢܸܫܬܸ̇ܐ ܒܫܘܼܪܵܪ܀ ܚܵܘܒܵܘ̈ܗܝ ܕܝܼܠܹܗ ܫܵܒܹܩ ܐܢܵܐ: ܘܲܚܛܵܗܵܘ̈ܗܝ ܬܘܼܒ̣ ܥܵܛܹܐ ܐܢܵܐ. ܘܡ̣ܢ ܡܵܘܬܵܐ ܠܹܗ ܡܫܲܢܸܐ ܐܢܵܐ: ܘܚܲܝ ܥܵܠܲܡ ܠܹܗ ܡܵܘܪܸܬ̣ ܐܢܵܐ܀ ܗ̤ܘ ܒܛܲܝܒ̇ܘܼܬܹܗ ܢܒܲܪܸܟ̣ܟ̣ܘܿܢ: ܘܢܲܫܪܸܐ ܫܲܝܢܹܗ ܒܲܝܢܵܬ̣ܟ̣ܘܿܢ. ܘܨܵܘܡܲܝ̈ܟ̇ܘܿܢ ܘܲܨܠܵܘܬ̣̈ܟ̣ܘܿܢ: ܢܸܫܦܪܘܼܢ ܩܕ݂ܵܡܵܘܗܝ ܘܙܸܕ݂ܩܵܬ̣ܟ̣ܘܿܢ܀ ܨܵܘܡܟ̣ܘܿܢ ܢܩܲܒܸ̇ܠ ܐܲܝܟ̣ ܕܡܘܼܫܹܐ: ܘܲܢܙܲܗܸܐ ܠܕ݂ܝܼܠܟ̣ܘܿܢ ܪܸ̈ܓ̣ܫܹܐ. ܘܲܢܦܲܨܹܝܟ̣ܘܿܢ ܡܚܹ ܓܸܕ݂ܫܹ̈ܐ: ܘܢܲܛܲܪܟ̣ܘܿܢ ܒܨܲܦܪܹ̈ܐ ܘܪ̈ܲܡܫܹܐ܀ ܨܠܘܿܬ̣ܟ̣ܘܿܢ ܕܡܘܼܬ̣ ܦܝܼܢܚܸܣ ܟܵܗܢܵܐ: ܢܸܫܡܥܝܼܗ̇ ܐܹܝܠ ܚܲܢܵܢܵܐ. ܘܢܸܪܕܘܿܦ ܡܸܢܟ̣ܘܿܢ ܡܵܘܬܵܢܵܐ: ܘܒܲܪܕ݂ܵܐ ܘܩܲܡܨܵܐ ܘܝܲܪܩܵܢܵܐ܀ ܘܨܵܘܡܟ̣ܘܿܢ ܬܘܼܒ̣ ܒܲܕ݂ܡܘܼܬ̣ ܕܵܘܝܼܕ݂: ܢܸܫܡܲܥ ܗܵܘ̇ ܕܟ̣ܠ ܒܐܝܼܕܹܗ ܥܒ̣ܝܼܕ݂. ܘܕ݂ܘܼܒܵܪܟ̣ܘܿܢ ܢܗܸܐ ܩܕ݂ܵܡܵܘܗܝ ܥܗܝܼܕ݂: ܘܢܲܫܘܹܝܟ̣ܘܿܢ ܠܛܘܼܒ̣ܵܐ ܕܲܣܗܝܼܕ݂܀ ܘܲܨܠܘܿܬ̣ܟ̣ܘܿܢ ܒܲܕ݂ܡܘܼܬ̣ ܫܡܘܼܐܹܝܠ: ܢܸܫܡܲܥ ܐܝܼܬ̣ܝܵܐ ܘܲܢܒܲܛܸܠ. ܡܸܢܟ̣ܘܿܢ ܐܘܼܠܨܵܢܵܐ ܕܡܲܪܥܸܠ: ܘܲܠܟ̣ܠܟ̣ܘܿܢ ܒܪ̈ܲܚܡܵܘܗܝ ܢܚܲܝܸܠ܀ ܘܨܵܘܡܟ̣ܘܿܢ ܢܩܲܒ̇ܠܝܼܘܗܝ ܐܹܝܠ ܚܲܢܲܢ: ܒܲܕ݂ܡܘܼܬ̣ ܐܹܠܝܼܵܐ ܛܲܢܵܢ. ܘܢܲܫܦܲܥ ܥܠܲܝܟ̇ܘܿܢ ܚܢܵܢ ܘܚܵܘܣܵܢ: ܘܲܢܦܲܨܸܐ ܠܟ̣ܘܿܢ ܡ̣ܢ ܡܲܪ̈ܕܘܵܢ܀ ܘܲܨܠܘܿܬ̣ܟ̣ܘܿܢ ܢܸܫܡܲܥ ܡܵܪܝܵܐ: ܒܲܕ݂ܡܘܼܬ̣ ܨܠܘܿܬܹܗ ܕܚܹܙܲܩܝܵܐ. ܘܲܒ̣ܥܸܠܕܒ̣ܵܒܲܝ̈ܟ̇ܘܿܢ ܣܪ̈ܲܝܵܐ: ܢܣܝܼܦ ܐܸܢܘܿܢ ܒܚܲܝܠܹܗ ܟܲܣܝܵܐ܀ ܨܵܘܡܟ̣ܘܿܢ ܒܲܕ݂ܡܘܼܬ̣ ܕܵܢܝܼܐܹܝܠ: ܢܐܲܒܸ̇ܠ ܒܲܚܢܵܢܹܗ ܝܵܗ ܐܹܝܠ. ܘܪܘܼܓ̣ܙܵܐ ܕܲܠܚܝܫܡ ܗ̤ܘ ܢܒܲܛܸܠ: ܕܟ̣ܠ ܦܘܼܡ ܬܸܫܒ̇ܚܵܬܹ̈ܗ ܢܡܲܠܸܠ܀ ܨܠܘܿܬ̣ܟ̣ܘܿܢ ܢܩܲܒ̇ܠܝܼܗ̇ ܚܲܢܵܢܵܐ: ܒܲܕ݂ܡܘܼܬ̣ ܛܠܵܝܹ̈ܐ ܕܒܲܐܬ̇ܘܿܢܵܐ. ܘܢܸܬܸ̇ܠ ܠܟ̣ܘܿܢ ܐܵܬ̤ܵܐ ܕܫܲܝܢܵܐ: ܘܢܲܚܕܲܪ ܠܟ̣ܘܿܢ ܫܘܼܪ ܦܘܼܪܩܵܢܵܐ܀ ܘܲܠܨܵܘܡܟ̣ܘܿܢ ܢܩܲܒ̇ܠܝܼܘܗܝ ܡܫܝܼܚܵܐ: ܘܲܢܚܲܠܛܝܼܘܗܝ ܒܨܵܘܡܹܗ ܫܒ̣ܝܼܚܵܐ. ܘܢܸܫܬ̇ܟܲܚ ܩܕ݂ܵܡܵܘܗܝ ܐܲܝܟ̣ ܕܸܒ̣ܚܵܐ: ܡܩܲܒ̣ܠܵܐ ܐܵܦ ܒܲܣܝܼܡ ܪܹܝܚܵܐ܀ ܘܲܨ̈ܠܵܘܵܬ̣ܟ̣ܘܿܢ ܘܨܵܘܡܲܝ̈ܟ̇ܘܿܢ: ܕܡܘܼܬ̣ ܫܠܝܼܚܹ̈ܐ ܡܬܲܠܡܕ݂ܵܢܲܝ̈ܟ̇ܘܿܢ. ܢܸܫܡܲܥ ܘܟ̣ܠ ܡܲܟܝܵܢܲܝ̈ܟ̇ܘܿܢ: ܢܒܲܕܲܪ ܘܠܲܒ̣ܥܸܠܕܒ̣ܵܒܲܝ̈ܟ̇ܘܿܢ܀ ܠܟ̣ܘܿܢ ܛܘܼܒܲܝܟ̇ܘܿܢ ܨܲܝܵܡܹ̈ܐ: ܕܨܵܘܡܟ̣ܘܿܢ ܢ̣ܣܲܒ̣ ܕܘܼܡܝܵܐ ܒܦܸܚܡܹ̈ܐ. ܕܨܵܘܡܵܐ ܕܟ̣ܠ ܟܹܐܢܹ̈ܐ ܩܲܕ݂ܡܹ̈ܐ: ܡܵܪܲܢ ܢܲܫܘܹܝܟ̣ܘܿܢ ܠܪ̈ܲܚܡܹܐ܀ ܢܒܲܪܸܟ̣ ܘܲܢܢܲܛܲܪ ܡܫܝܼܚܵܐ: ܠܪܹܫ ܥܹܕܬܹ̇ܗ ܬܪܝܼܨܲܬ̣ ܫܘܼܒ̣ܚܵܐ. ܡܵܪܝ ܦܠܵܢ ܕܹܝܢ ܢܲܨܝܼܚܵܐ: ܦܵܛܲܪܝܵܪܟܵܐ ܕܡܲܕ݂ܢ̱ܚܵܐ܀ ܘܲܢܩܲܒܸ̇ܠ ܡܵܪܲܢ ܨܵܘܡܹܗ: ܘܢܸܫܡܲܥ ܒܪ̈ܲܚܡܵܘܗܝ ܨܠܵܘܵܬܹ̈ܗ. ܘܢܸܬ̣ܢܲܛܪ̈ܲܢ ܐܵܦ ܡܲܪ̈ܥܝܵܬܹܗ: ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܀ ܘܲܢܩܲܒܸ̇ܠ ܡܫܝܼܚܵܐ ܡܵܪܝܵܐ: ܨܵܘܡܵܐ ܕܟ̣ܵܗܢܹ̈ܐ ܡܥܲܠܲـ̈ܝܵܐ. ܕܗܵܐ ܫܵܗ̇ܪܝܼܢ ܒܐܝܼܡܵܡ ܘܠܸܠܝܵܐ: ܒܥܹܕܬܵܐ ܒܛܘܼܟܵܣܵܐ ܦܲܐܝܵܐ܀ ܘܲܨܠܘܿܬ̣ܗܘܿܢ ܬܸܗܘܸܐ ܫܡܝܼܥܬܵܐ: ܐܲܝܟ ܨܠܘܿܬ̣ܵܐ ܕܲܬ̣ܪܸܥܣܲܪܬܵܐ. ܚܠܵܦ ܡܲܪ̈ܥܹܐ ܕܢܸܫܟ̇ܚܘܼܢ ܢܝܵܚܬܵܐ: ܘܲܚܠܵܦ ܟܘܼܗܵܢܵܐ ܕܫܲܢ݇ܬܵܐ܀ ܘܢܸܨܛܒܸܐ ܡܵܪܵܐ ܕܩܲܕܝܼܫܹ̈ܐ: ܒܨܵܘܡܵܐ ܦܲܐܝܵܐ ܕܫܲܡܵܫܹ̈ܐ. ܘܲܨܠܘܿܬ̣ܗܘܿܢ ܫܘܼܪܵܐ ܕܲܩܫܸܐ: ܬܸܗܘܸܐ ܠܟܸܢܫܲܢ ܡ̣ܢ ܓܸ̇ܕ݂ܫܹ̈ܐ܀ ܘܲܢܩܲܒܸܠ ܨܵܘܡܵܐ ܕܣܵܒܹ̈ܐ: ܕܥܵܒ̣ܕܝܼܢ ܠܥܹܕܬܵܐ ܨܘܼܝܵܒܹ̈ܐ. ܘܣܲܝܒܘܼܬ̣ܗܘܿܢ ܢܲܩܝܲܬ̣ ܠܟܹܐܒܹ̈ܐ: ܢܣܲܡܸܟ̣ ܝܵܬܹܒ̣ ܥܲܠ ܟܪ̈ܘܿܒܹܐ܀ ܘܲܢܩܲܒܸܠ ܨܵܘܡܵܐ ܕܓܲܒ̣ܪܹ̈ܐ: ܕܲܡܨܲܠܹܝܢ ܒܪ̈ܲܡܫܹܐ ܘܨܲܦܪܹ̈ܐ. ܘܢܲܚܸܬ̣ ܠܲܢ ܡܵܪܝܵܐ ܡܸܛܪܹ̈ܐ: ܢܝܼܚܹ̈ܐ ܕܢܸܬ̣ܡ̱ܠܘܿܢ ܐܸܕ݂ܪܹ̈ܐ܀ ܢܩܲܒܸ̇ܠ ܨܵܘܡܵܐ ܕܬܲܓܵܪܹ̈ܐ: ܘܲܕ݂ܪܹ̈ܫܵܢܹܐ ܘܥܲܬ̇ܝܼܪܹ̈ܐ. ܕܗܵܐ ܚܕ݂ܝܼܪܝܼܢ ܥܲܠ ܦܵܬ̣ܘܿܪܹ̈ܐ: ܕܝܼܠܗܘܿܢ ܝܲܬ̣ܡܹ̈ܐ ܘܚܵܕ݂ܘܿܪܹ̈ܐ܀ ܘܲܢܩܲܒܸ̇ܠ ܨܵܘܡܵܐ ܕܢܸܫܹ̈ܐ: ܘܲܢܪܲܟܸ̇ܟ ܚܘܼܨܦܗܹܝܢ ܕܲܩܫܸܐ. ܕܢܸܬ̈ܠܵܢ ܠܝܲܬ̣ܡܹ̈ܐ ܘܲܠܒ̣ܵܝܫܹ̈ܐ: ܘܲܢ̈ܙܲܕܩܵܢ ܒܢܝܼܫܹ̈ܐ ܦܪ̈ܝܼܫܹܐ܀ ܢܩܲܒܸ̇ܠ ܨܵܘ݂ܵܐ ܕܲܥܠܲܝܡܹ̈ܐ: ܘܕܲܛܠܵܝܹ̈ܐ ܘܟ̣ܠܗܘܿܢ ܬܸܓ̣ܡܹ̈ܐ. ܘܢܸܫܬܵܘܙܒ̣ܘܼܢ ܡ̣ܢ ܡܲܚܪ̱̈ܡܹܐ: ܘܥܲܝܢܵܐ ܒܝܼܫܬܵܐ ܕܚܲܣܵܡܹ̈ܐ܀ ܘܕܐܸܫܬܵܘܬܲܦܬ̇ܘܿܢ ܝܵܘܡܵܢܵܐ: ܒܡܲܣܒ̣ܵܐ ܕܩܘܼܪܒܵܢܨܐ ܗܵܢܵܐ. ܨܠܝܼܒܹܗ ܕܝܼܫܘܿܥ ܡܲܚܝܵܢܵܐ: ܗ̤ܘ ܢܸܗܘܸܐ ܠܟ̣ܘܿܢ ܡܢܲܛܪܵܢܵܐ܀ ܢܢܲܛܲܪ ܒܢܲܝ̈ܟ̇ܘܿܢ ܘܲܒ̣ܢܵܬ̣̈ܟ̣ܘܿܢ: ܘܦܹܐܪܹ̈ܐ ܒܪ̈ܝܼܟܹܐ ܕܐܲܪ̈ܥܵܬ̣ܟ̣ܘܿܢ. ܘܲܢܒܲܪܸܟ̣ ܐܵܦ ܚܲܩ̈ܠܵܬ̣ܟ̣ܘܿܢ: ܕܬܸܚܕܘܿܢ ܒܙܲܒ̣ܹܢܹ̈ܐ ܕܲܚܨܵܕ݂ܟ̣ܘܿܢ܀ ܘܢܸܚܬ̣ܘܼܢ ܠܟ̣ܘܿܢ ܡܸܛܪܹ̈ܐ ܢܝܼܚܹ̈ܐ: ܕܬܸܗܘܘܿܢ ܒܐܲܡܝܼܢܘܼ ܦܨܝܼܚܹ̈ܐ. ܘܢܲܥܒܲܪ ܡܸܢܟ̣ܘܿܢ ܕܵܠܘܿܚܹ̈ܐ: ܘܐܢܵܫܵܐ ܒܝܼܫܹ̈ܐ ܘܣܵܪ̈ܘܿܚܹܐ܀ ܢܒܲܪܸܟ̣ ܡܵܪܲܢ ܟܠܝܼܠ ܫܲܢ݇ܬܵܐ: ܘܬܸܗܘܸܐ ܒܲܙܢܹ̈ܝܗ̇ ܡܡܲܙܲܓ̣ܬܵܐ. ܘܲܥܠܲܠܬܵܐ ܬܗܸܐ ܡܫܲܪܬܲܚܬܵܐ: ܒܲܨܠܘܿܬ̣ ܡܵܪܬ̇ܝ ܡܲܪܝܲܡ ܒܬ̣ܘܼܠܬܵܐ܀ ܢܫܵܘܙܸܒ̣ܟ̣ܘܿܢ ܡ̣ܢ ܒܥܸܠܕܒ̣ܵܒܹ̈ܐ: ܕܡܸܬ̇ܕܲܡܹܝܢ ܠܢܸܡܪܹ̈ܐ ܪ̈ܗܝܼܒܹܐ. ܘܡ̣ܢ ܒܝܼܫܘܼܬ̣ܵܐ ܕܲܫܒ̣ܵܒܹ̈ܐ: ܕܲܡܓܲܪܓ̣ܝܼܢ ܥܲܡܟ̣ܘܿܢ ܩܪ̈ܵܒܹܐ܀ ܘܕܲܗܘ̤ܵܬ̣ ܠܟ̣ܘܿܢ ܡܣܲܝܒ̇ܪܵܢܘܼܬ̣ܵܐ: ܒܣܵܘܡܵܐ ܒܬܲܪܥܝܼܬ̣ܵܐ ܫܦܝܼܬ̣ܵܐ. ܢܡܲܢܲܥܟ̣ܘܿܢ ܒܲܦܨܝܼܚܘܼܬ̣ܵܐ: ܠܨܲܦܪܵܐ ܦܨܝܼܚܵܐ ܕܲܩܝܵܡܬܵܐ܀ ܫܠܵܡܹܗ ܕܪܲܒ̇ ܡ̣ܢ ܟܠ ܫܠܵܡܝܼ̈ܢ: ܢܒܲܣܸܡܟ̣ܘܿܢ ܒܛܘܼܒܲܝ̈ ܥܵܠܡܝܼܢ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬ̣ܵܡܵܐ ܕܩܘܼܪܒܵܢܵܐ ܕܓܲܒ̣ܪܹ̈ܐ:

ܕܲܥܒ̣ܝܼܕ ܠܩܲܫܝܼܫܵܐ ܝܼܣܪܵܝܹܠ ܐܲܠܩܘܿܫܵܝܵܐ ܕܥܲܒ̣ܕܹܗ ܡ̣ܢ ܬܵܘ ܠܐܵܠܲܦ.

ܬ ܬܹܐܘܿܢ ܐܝܼܬ̣ܝܵܐ ܚܲܢܵܢܵܐ: ܝܲܡܵܐ ܫܦܝܼܥܵܐ ܕܲܚܢܵܢܵܐ. ܬ ܬܗܘܿܡܵܐ ܕܲܡܠܸܐ ܚܵܘܣܵܢܵܐ: ܩܲܒܸ̇ܠ ܩܘܼܪܒܵܢܵܐ ܗܵܢܵܐ܀ ܬ ܬܡܝܼܗ ܒܲܥܒ̣ܵܕ݂ܵܘܗ̈ܝ ܚܲܝܠܬ̣ܵܢܵܐ: ܟܣܸܐ ܡ̣ܢ ܒܨܵܬ̣ܵܐ ܘܒ̣ܘܼܚܵܢܵܐ. ܬ ܬܠܝܼܬ̣ܵܝ ܩܢܘܿܡ ܚܕ݂ܵܢܵܝ ܟܝܵܢܵܐ܆ ܐܸܨܛܲܒ̣ܝ݇ܝ ܡܵܪܝ ܒܕܸܒ̣ܚܵܐ ܗܵܢܵܐ܀ ܫ ܫܸܡܫܵܐ ܠܵܐ ܡܸܬ̣ܚܲܦܝܵܢܵܐ: ܟܝܵܢܵܐ ܠܵܐ ܡܸܬ̣ܚܲܙܝܵܢܵܐ. ܫ ܫܡܲܥ ܒܩܵܠܹܗ ܕܲܡܩܲܪܒ̣ܵܢܵܐ: ܘܩܲܒܸ̇ܠܲܝܗܝ ܠܗܵܢ ܩܘܼܪܒܵܢܵܐ܀ ܪ  ܪܵܚܹܡ ܐܢܵܫܵܐ ܡܪܲܚܡܵܢܵܐ: ܡܪܲܚܡܵܢܵܐ ܘܲܡܪܲܚܦܵܢܵܐ. ܪܲܚܸܡ ܥܲܠ ܥܲܒ̣ܕܵܟ̣ ܗܵܢܵܐ: ܘܲܠܚܵܘܒܵܘ̈ܗܝ ܗ̤ܘܝܼ ܡܚܲܣܝܵܢܵܐ܀ ܩ ܩܲܕܝܼܫܵܐ ܘܲܡܩܲܕܫܵܢܵܐ: ܕܝܲܗ݇ܒ̣ ܠܟ̣ܠ ܡܸܠܬ̣ܵܐ ܘܠܸܫܵܢܵܐ. ܩ ܩܲܕܸܿܫ ܕܥܲܒ̣ܕܲܝ̈ܟ ܦܘܼܪܫܵܢܵܐ: ܘܒܲܝܲܐ ܠܠܸܒ̇ܗܘܿܢ ܚܲܫܵܢܵܐ܀ ܨ ܨܵܒܹܐ ܒܛܵܒ̣ܘܼܬ̣ ܨܸܒ̣ܝܵܢܵܐ: ܘܲܒ̣ܫܲܦܝܘܼܬ̣ܵܐ ܕܪܸܥܝܵܢܵܐ. ܨ ܨܒ̣ܝܼ ܒܲܨܠܘܿܬ̣ ܥܲܡܵܐ ܗܵܢܵܐ: ܕܲܒ̣ܒܲܝܬܵܟ̣ ܡܸܨܛܲܝܒ̣ܵܢܵܐ܀ ܦ ܦܬܲܚ ܬܪܲܥ ܪ̈ܲܚܡܲܝܟ ܪܲܚܡܵܢܵܐ: ܘܩܘܼܪܒܵܢܗܘܿܢ ܗ̤ܘܝܼ ܡܩܲܒ̇ܠܵܢܵܐ. ܦ ܦܩܘܿܕ݂ ܠܡܝܼܬܲܝ̈ܗܘܿܢ ܫܘܼܒ̣ܩܵܢܵܐ: ܡܵܐ ܕܥܵܒ̣ܕܲܬ̇ ܠܟ̣ܠ ܒܘܼܚܪܵܢܵܐ܀ ܥ ܥܲܠ ܣܲܒ̣ܪܵܟ̣ ܣܵܡ̣ܘ ܬܘܼܟ̣ܠܵܢܵܐ: ܠܲܡܕܲܒܵܚܘܼ ܝܵܘܡܵܢܵܐ. ܥ ܥܵܕ݂ܘܿܪܗܘܿܢ ܘܲܡܣܲܝܥܵܢܵܐ: ܗ̤ܘܝܼ ܒܫܘܼܡܠܵܝ ܗܵܢ ܣܘܼܥܪܵܢܵܐ܀ ܣ ܣܲܟ̣ܠܘܵܬ̣ܗܘܿܢ ܚܲܝܘܼܣܬ̣ܵܢܵܐ: ܠܚܝܼ ܐܸܢܹܝܢ ܒܝܲܕ݂ ܥܸܛܝܵܢܵܐ. ܣ ܣܡܘܿܟ̣ ܐܸܢܘܿܢ ܒܚܹܝܠ ܥܘܼܕ݂ܪܵܢܵܐ: ܕܡܸܢܵܟ̣ ܢܸܩܢܘܿܢ ܚܘܼܠܡܵܢܵܐ. ܢܢ ܢܩܲܒ̇ܠܘܼܢ ܐܲܓ̣ܪܵܐ ܘܦܘܼܪܥܵܢܵܐ: ܥܲܡ ܗܵܒܹܝܠ ܘܢܘܿܚ ܛܘܼܒ̣ܵܢܵܐ. ܢܢ ܢܸܩܦܘܼܢ ܠܐܲܒ̣ܪܵܗܵܡ ܡܗܲܝܡܢܵܐ: ܘܠܐܝܼܣܚܵܩ ܗ̇ܘ ܒܲܪ ܡܘܼܠܟܵܢܵܐ܀ ܡ ܡܢܝܼ ܠܗܘܿܢ ܥܲܡ ܐܝܼܘܿܒ̣ ܟܹܐܢܵܐ: ܘܥܲܡ ܐܹܠܝܼܵܐ ܛܲܢܵܢܵܐ. ܡ ܡܲܠܟܵܐ ܡܫܝܼܚܵܐ ܡܢܲܚܡܵܢܵܐ: ܕܓܸܢܣܹܗ ܕܐܵܕ݂ܵܡ ܥܲܦܪܵܢܵܐ܀ ܠ ܠܘܵܬ̣ܵܟ̣ ܢܸܦܪܚܘܼܢ ܒܲܥܢܵܢܵܐ: ܘܢܹܐܪܬ̣ܘܼܢ ܛܘܼܒ̣ܵܐ ܫܡܲܝܵܢܵܐ . ܠ ܠܥܵܠܲܡ ܥܵܠܡܝܼܢ ܡܩܵܘܝܵܢܵܐ: ܒܐܲܬ̣ܪܵܐ ܫܒ̣ܝܼܚܵܐ ܘܛܘܼܒ̣ܬ̣ܵܢܵܐ܀ ܟ ܟܠܝܼ ܡܸܢܹܗ ܟܠ ܢܸܟ̣ܝܵܢܵܐ: ܕܣܵܢܐܵܐ ܒܝܼܫܵܐ ܘܣܵܛܵܢܵܨܐ. ܟ ܟܠ ܡܗܲܝܡܢܵܐ ܘܲܟ̣ܪܸܣܛܝܵܢܵܐ: ܕܒܲܫܡܵܟ̣ ܗܵܘܹܐ ܡܵܘܕܝܵܢܵܐ܀ ܟ ܟܪܝܼܣܛܘܿܣ ܗ̤ܘܝܼ ܠܹܗ ܡܢܲܛܪܵܢܵܐ: ܕܲܢܫܲܒ̇ܚܵܟ̣ ܒܟ̣ܠ ܥܸܕܵܢܵܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܐܚܪܹܢܵܐ ܕܢܸܫܹ̈ܐ: ܕܩܲܫܝܼܫܵܐ ܝܼܣܪܵܝܹܠ܀

ܝ ܝܵܗ ܐܝܼܬ̣ܝܵܐ ܕܲܒ̣ܪܵܐ ܒܪܝܼܬ̣ܵܐ: ܩܲܒܸ̇ܠ ܕܸܒ̣ܚܬܲܢ ܕܟ̣ܝܼܬ̣ܵܐ. ܝ ܝܵܘܡܵܢ ܘܚܲܣܵܐ ܟܠ ܚܛܝܼܬ̣ܵܐ: ܕܐܲܡܬ̣ܵܟ̣ ܗܵܕܹܐ ܕܵܘܝܼܬ̣ܵܐ܀ ܛ ܛܵܒ̣ܵܐ ܕܛܵܒ̣ܘܼܬܹܗ ܓܠܝܼܬ̣ܵܐ: ܒܬܹܒܹܝܠ ܘܡ̣ܢ ܗܸܕ݂ܪܹܗ ܡܠܝܼܬ̣ܵܐ. ܛ ܛܵܒ̣ܬ̣ܵܟ̣ ܬܸܥܒ̇ܕ݂ܝܼܗ̇ ܝܵܐܝܼܬ̣ܵܐ: ܠܐܲܡܬ̣ܵܟ̣ ܕܥܲܠ ܣܲܒ̣ܪܵܟ̣ ܡܝܼܬ̣ܵܐ܀ ܚ ܚܲܠܸܠܹܝܗ̇ ܡ̣ܢ ܟܘܼܬ̣ܡܵـ̈ܬ̣ܵܐ: ܘܡ̣ܢ ܚܛܵܗ̈ܢܐ ܘܣܲܟ̣ܠ̱ـ̈ܘܵܬ̣ܵܐ. ܚ ܚܲܠܸܛܹܝܗ̇ ܥܲܡ ܒܬ̣ܘܼ̈ܠܵܬ̣ܵܐ: ܚܲܟ̇ܝܼ̈ܡܵܬ̣ܵܐ ܘܬܲܩ̈ܢܵܬ̣ܵܐ܀ ܙ ܙܲܗܵܐ ܩܢܘܿܡܵܗ̇ ܒܢܲܟ̣ܦܘܼܬ̣ܵܐ: ܘܩܲܕܸܫܹܝܗ̇ ܒܩܲܕܝܼܫܘܼܬ̣ܵܐ. ܙ ܙܝܼܘܵܟ̣ ܢܲܩܢܹܝܗ̇ ܕܲܟ̣ܝܘܼܬ̣ܵܐ: ܘܙܲܗܝܘܼܬ̣ܵܐ ܘܲܫܒ̣ܝܼܚܘܼܬ̣ܵܐ܀ ܘ ܘܡܵܐ ܕܲܒ̣ܚܲܪܬ̣ܵܐ ܕܝܵـܘ̈ܡܵܬ̣ܵܐ: ܡܩܝܼܡܲܬ̇ ܠܟ̣ܠ ܒܲܪܗܝܼܒ̣ܘܼܬ̣ܵܐ. ܘ ܘܕ݂ܵܐܹܢ ܐܲܢ݇ܬ̇ ܒܲܬ̣ܪܝܼܨܘܼܬ̣ܵܐ: ܠܛܘܼܗܡܹ̈ܐ ܘܕ݂ܵܪܹ̈ܐ ܘܫܲܪ̈ܒ̣ܵܬ̣ܵܐ܀ ܗ ܗܲܒ̣ܠܵܗ̇ ܕܒܲܐܦܹ̈ܐ ܓܲܠ̈ܝܵܬ̣ܵܐ: ܬܸܦܘܿܩ ܠܐܘܼܪܥܵܟ̣ ܒܗ̇ܝ ܫܵܥܬ̣ܵܐ. ܗ ܗܵܕܹܐ ܐܲܡܬ̣ܵܟ̣ ܡܸܣܟܹ̇ܢܬܵܐ: ܕܕ݂ܘܼܟ̣ܪܵܢܵܗ̇ ܥܗܲܕ݂ܢܲܢ ܒܥܹܕܬܵܐ܀ ܕ ܕܟ̣ܝܼܬ̣ܵܐ ܬܸܬ̣ܚ̄ܙܸܐ ܘܲܫܦܝܼܬ̣ܵܐ: ܘܲܥܗܵܢܬ̣ܵܐ ܟܹܝܬ̣ ܘܲܫܘܝܼܬ̣ܵܐ. ܕ ܕܬܸܗܘܸܐ ܡܸܬ̣ܩܲܒ̇ܠܵܢܝܼܬ̣ܵܐ: ܥܲܡܵܗ̇ ܕܡܲܪܝܲܡ ܙܵܢܝܼܬ̣ܵܐ܀ ܓ ܓܸܠܝܵܢܵܟ̣ ܡܠܸܐ ܬܡܝܼ̈ܗܵܬ̣ܵܐ: ܬܸܩܢܸܐ ܒܹܗ ܫܒ̣ܝܼܚܘܼܬ̣ ܝܵܬ̣ܵܐ. ܓ ܓܲܐܝܘܼܬ̣ܵܟ ܡܨܲܒ̇ܬ̣ܵܢܝܼܬ̣ܵܐ: ܬܗܸܐ ܠܵܗ̇ ܒܟ̣ܠܵܗ̇ ܦܲܐܝܘܼܬ̣ܵܐ܀ ܒ ܒܒ̣ܘܼܣܵܡܹ̈ܐ ܕܒܹܝܬ̣ ܡܲܠܟ̇ܘܼܬ̣ܵܐ: ܬܸܬ̣ܒܲܣܲܡ ܒܐܲܡܼܢܘܼܬ̣ܵܐ. ܒ ܒܲܝܢܵܬ̣ ܣܸܕ݂ܪܹ̈ܐ ܕܢܲܟ̣ـ̈ܦܵܬ̣ܵܐ: ܘܲܙܢܵܓܹ̈ܐ ܕܩܲܕܝܼ̈ܫܵܬ̣ܵܐ܀ ܐ ܐܸܡܲܬ̣ܝ ܕܠܲܓ̣ܢܘܿܢ ܚܲـ̈ܕ݂ܘܵܬ̣ܵܐ: ܥܵܐܠܝܼܢ ܥܲܡ ܚܲܬ̣ܢܵܐ ܘܟܲܠܬ̣ܵܐ. ܐ ܐܲܝܠܹܝܢ ܕܲܩܢܹܝܢ ܡܨܲܒ̇ܬ̣ܘܼܬ̣ܵܐ: ܒܢܲܚܬܹ̈ܐ ܕܫܵܘܹܝܢ ܠܡܸܫܬ̇ܘܼܬ̣ܵܐ܀ ܐ ܐܲܫܘܵܗ̇ ܡܵܪܝ ܠܗܵܕܹܐ ܡܝܼܬܬܵܐ: ܕܒܲܫܡܵܟ̣ ܐܝܼܬܹܝܗ̇ ܗ݇ܘܵܬ̣ ܥܡܝܼܕ݂ܬܵܐ. ܐ ܐܵܦ ܗ̤ܝ ܕܬܲܡ̇ܢ ܬܗܸܐ ܚܠܝܼܛܬܵܐ: ܒܗ̇ܝ ܣܝܼܥܬܵܐ ܙܗܝܼܬ̣ܵܐ ܣܗܝܼܕܬܵܐ܀ ܝܑܼܫܘܿܥ ܣܘܼܟܵܝ ܒܸܪ̈ܝܵܬ̣ܵܐ: ܪܚܸܡ ܥܲܠ ܡܠܸܐ ܣܵܢ̈ܝܵܬ̣ܵܐ: ܝܼܚܛܵܐ ܕܲܡܦܲܠܦܲܠ ܒܨܵܐܬ̣ܵܐ. ܠܲܚܛܵܗܵܘ̈ܝ ܫܒ̣ܘܿܩ ܕܠܵܐ ܒܨܵܬ̣ܵܐ܀ ܪܲܫܝܼܥ ܘܲܢܕ݂ܝܼܕ݂ ܒܛܲܢ̈ܦܘܵܬ̣ܵܐ܆ ܟܬ̣ܝܼܡ ܒܡܘܼܡܹ̈ܐ ܘܲܚܒ̣ܵܪ̈ܵܬ̣ܵܐ ܒܵܟ̣ ܠܵܟ ܢܫܲܒܲܚ ܒܬܸܫ̈ܒ̇ܚܵܬ̣ܵܐ: ܗ ܗܪܸܟ̣ ܘܬܲܡ̇ܢ ܒܟ̣ܠ ܫܵܥܵـܬ̣ܵܐ܀ ܘܟ̣ܠܲܢ ܒܟ̣ܠܲܢ ܒܫܲܘܝܘܼܬ̣ܵܐ: ܢܲܣܸܩ ܠܲܬ̣ܠܝܼܬ̣ܵܝܘܼܬ̣ܵܟ. ܫܘܼܒ̣ܚܵܐ ܘܐܝܼܩܵܪܵܐ ܘܣܸܓ̣ܕܬ̣ܵܐ: ܒܟ̣ܠ ܥܸܕܵܢ ܕܠܵܐ ܣܲܒ̣ܥܘܼܬ̣ܵܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܕܩܘܼܪܒܵܢܵܐ ܕܲܛܠܵܝܹ̈ܐ ܕܲܥܒ̣ܝܼܕ݂ ܠܩܲܫܝܼܫܵܐ ܓܝܼܘܲܪܓܝܼܣ ܐܲܠܩܘܿܫܵܝܵܐ.

ܐ ܐܝܼܬ̣ܝܵܐ ܚܕܸܵܢܝ ܒܐܝܼܬ̣ܘܼܬ̣ܵܐ: ܕܲܒ̣ܚܘܼܒܹ̇ܗ ܠܒܸܫ ܐܢܵܫܘܼܬ̣ܵܐ. ܚܘܼܢ ܠܥܲܒ̣ܕܵܟ̣ ܒܲܪ ܛܲܠܝܘܼܬ̣ܵܐ: ܘܐܲܫܘܵܝܗܝ ܒܪ̈ܲܚܡܲܝܟ ܠܡܲܠܟ̇ܘܼܬ̣ܵܐ܀ ܒܲܪܸܟ̣ ܠܕܸܒ̣ܚܬܲܢ ܕܟ̣ܝܼܬ̣ܵܐ: ܘܩܲܒܸ̇ܠܹܝܗ ܐܲܝܟ̣ ܡܵܘܗܲܒ̣ܬ̣ܵܐ. ܘܚܲܣܵܐ ܚܛܵܗܹ̈ܐ ܘܚܵܘ̈ܒܵܬ̣ܵܐ: ܠܕܲܡܩܲܪܒ̣ܝܼܢ ܒܬܹܐܪܬܵܐ  ܫܦܝܼܬ̣ܵܐ܀ ܓ ܓܲܢ݇ܒܵܪܵܐ ܕܠܲܫܠܝܫܚܘܼܬ̣ܵܐ: ܝܲܗ݇ܒ̣ ܫܘܼܠܛܵܢ ܘܦܵܩܘܿܕ݂ܘܼܬ̣ܵܐ. ܦܩܘܿܕ݂ ܢܘܼܚܵܡܵܐ ܘܚܘܼܕܵܬ̣ܵܐ: ܠܥܲܒ̣ܕܵܟ̣ ܕܲܥܢܲܕ݂ ܒܛܲܠܝܘܼܬ̣ܵܐ܀ ܕ ܕܲܝܵܢܵܐ ܡܠܸ ܟܹܐܢܘܼܬ̣ܵܐ: ܕܢܲܚܸܡ ܠܲܒ̣ܪܵܗ̇ ܕܐܲܪܡܲܠܬܵܐ. ܒܲܣܸܡ ܠܥܲܒ̣ܕܵܟ̣ ܒܡܲܠܟ̇ܘܼܬ̣ܵܐ: ܘܐܵܘܪܸܬ̣ ܠܹܗ ܓܢܘܿܢ ܚܲـ̈ܕ݂ܘܵܬ̣ܵܐ܀ ܗ ܗܲܒ̣ܠܹܗ ܡܵܪܲܢ ܒܫܲܘܝܘܼܬ̣ܵܐ: ܕܥܲܡ ܛܠܵܝܹ̈ܐ ܕܒ̣ܐܘܿܫܲܥܢܘܼܬ̣ܵܐ. ܢܸܦܪܘܿܥ ܠܲܫܡܵܟ̣ ܬܵܘܕܝܼܬ̣ܵܐ: ܘܥܲܡܗܘܿܢ ܢܸܗܘܸܐ ܒܲܪ ܠܘܝܼܬ̣ܵܐ܀ ܘ ܘܐܲܝܟ̣ ܕܩܲܒܸ̇ܠܬ̇ ܠܗ̇ܝ ܫܲܒ̣ܪܘܼܬ̣ܵܐ: ܥܲܠ ܐܝܼܕܲܝ̈ܟ ܩܲܕܝܼ̈ܫܵܬ̣ܵܐ. ܩܲܒܸ̇ܠ ܡܵܪܝ ܗܵܕ݂ ܕܸܒ̣ܚܬ̣ܵܐ: ܕܛܲܠܝܵܐ ܒܲܪ ܡܲܥܡܘܿܕܝܼܬ̣ܵܐ܀ ܘ ܘܐܲܝܟ̣ ܕܸܒ̣ܚܹܗ ܕܒܲܪ ܥܲܩܪܘܼܬ̣ܵܐ: ܕܝܲܗ̣݇ܒ̣ܬ̇ ܚܠܵܦܵܘܗܝ ܐܸܡܕܹ̈ܐ ܠܢܸܟ̣ܣ̄ܬ̣ܵܐ. ܩܲܒܸ̇ܠ ܠܕܸܒ̣ܚܬܲܢ ܙܗܝܼܬ̣ܵܐ: ܘܗܲܒ̣ ܒܵܗ̇ ܛܲܥܡܵܐ ܘܛܲܝܒ̇ܘܼܬ̣ܵܐ܀ ܙ ܙܲܕܸܿܩ ܘܫܲܟܸ̇ܢ ܒܛܲܝܒ̇ܘܼܬ̣ܵܐ: ܘܗܲܒ̣ܠܗܘܿܢ ܐܲܦܹ̈ܐ ܦܨܝܼ̈ܚܵܬ̣ܵܐ. ܠܥܲܒ̣ܕܲܝ̈ܟ ܕܲܒ̣ܬܹܐܪܬܵܐ ܫܦܝܼܬ̣ܵܐ: ܩܘܼܪܒܵܢܗܘܿܢ ܩܲܪܸܒ̣ܘ ܒܥܹܕܬܵܐ܀ ܚ ܚܛܵܗܹ̈ܐ ܘܡܸܬ̣ܥܲܒ̣ܪ̈ܵܢܘܵܬ̣ܵܐ: ܕܲܣܥܲܪܘ ܠܗܘܿܢ ܒܠܵܐ ܝܑܼܕܲܥܬ̣ܵܐ. ܠܚܝܼ ܐܸܢܘܿܢ ܒܡܸܠܬ̣ܵܐ ܚܲܝܬ̣ܵܐ: ܘܲܥܒܸܕ݂ ܠܗܘܿܢ ܚܲܪܬ̣ܵܐ ܛܵܒ̣ܬ̣ܵܐ܀ ܛ ܛܲܝܒ̇ܘܼܬ̣ܵܟ̣ ܬܫܝܼܓ̣ ܨܵܐܘܼܬ̣ܵܐ: ܕܟ̣ܠ ܕܲܡܗܲܝܡܢܝܼܢ ܒܵܟ̣ ܒܩܘܼܫܬܵܐ. ܘܩܲܒܸ̇ܠ ܢܸܕ݂ܪܹ̈ܐ ܘܙܸܕ݂̈ܩܵܬ̣ܵܐ: ܕܠܵܟ ܦܵܪܫܝܼܢ ܒܐܲܡܝܼܢܘܼܬ̣ܵܐ܀ ܝ ܝܲܡܵܐ ܫܵܦܥ ܒܘܼܪ̈ܟܵܬ̣ܵܐ: ܘܲܬ̣ܗܘܿܡܵܐ ܕܒܲܣܝܼܡܘܼܬ̣ܵܐ. ܠܡܝܼܬܲܝ̈ܗܘܿܢ ܦܩܘܿܕ݂ ܠܗܘܿܢ ܢܝܵܚܬܵܐ: ܘܲܥܠܲܝܗܘܿܢ ܣܘܿܟ̣ ܒܘܼܪ̈ܟܵܬ̣ܵܐ܀ ܘܡܵܐ ܕܲܒ̣ܚܲܪܬ̣ܵܐ ܕܝܵـܘ̈ܡܵܬ̣ܵܐ: ܓܸܠܝܵܢܵܟ̣ ܙܵܐܲܚ ܠܡܹܐܬ̣ܵܐ. ܥܲܡ ܟܹܐܢܹ̈ܐ ܥܒܸܕ݂ ܠܗܘܿܢ ܡܢܵܬ̣ܵܐ: ܕܠܵܟ̣ ܢܫܲܒ̇ܚܘܼܢ ܒܐܲܡܝܼܢܘܼܬ̣ܵܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܬܡ̈ܐ ܒܩܪܝܬܐ ܕܬܪܬܝܢ.

ܕܲܥܒ̣ܝܼܕ݂ܝܼܢ ܠܡܵܪܝ ܥܲܒ̣ܕܝܼܫܘܿܥ ܕܨܘܼܒ̣ܵܐ ܘܕܐܲܪܡܵܢܝܼܵܐ.

ܐ ܐܹܝܠ ܓܲܢ݇ܒܵܪܵܐ ܕܟ̣ܠ ܠܲܚܢܵܢܹܗ ܡܣܲܟܸ̇ܐ ܘܚܵܐܲܪ: ܫܡܲܥ ܠܲܨܠܘܿܬܲܢ ܘܲܠܡܘܼܙܵܓ̣ܵܘ̈ܗܝ ܫܲܝܸܢ ܕܐܵܐܲܪ. ܒ ܒܪܵܐ ܕܐܸܬ̇ܬܲܚܬ̇ܝܼ ܘܲܦܪܲܩ ܥܵܠܡܹ̈ܐ ܘܚܲܝܹ̈ܐ ܣܲܒܲܪ: ܟܠ ܒܝܼ̈ܫܵܬ̣ܵܐ ܘܡܲܟ̇ܝܵܢ̈ܝܵܬ̣ܵܐ ܡܸܢܲܢ ܐܲܥܒܲܪ܀ ܓ ܓܡܝܼܪܵܐ ܘܛܵܒ̣ܵܐ ܥܲܠ ܒܝܼܫܘܼܬܲܢ ܪܘܼܚܵܟ̣ ܐܲܓܲܪ: ܘܐܲܫܘܵܢ ܥܘܫܬ̣ܪܵܐ ܕܲܬ̣ܪܹܝܢ ܥܵܠܡܝܼ̈ܢ ܒܵܟ̣ ܢܸܬ̇ܬܲܓܲܪ. ܕ ܕܲܩܪܲܝܢܲܢ ܠܵܟ̣ ܫܘܼܪ ܒܛܝܼܠܘܼܬ̣ܵܟ̣ ܠܟܸܢܫܲܢ ܐܲܚܕܲܪ: ܘܠܲܡܚܝܼܠܘܼܬܲܢ ܚܹܝܠ ܥܘܼܕ݂ܪܵܢܵܐ ܕܪ̈ܲܚܡܲܝܟ ܫܲܕܲܪ܀ ܗ ܗܲܒ̣ܠܲܢ ܕܢܸܗܘܸܐ ܕܝܼܠܵܟ̣ ܘܲܥܠܲܝܢ ܐܲܦܲܝ̈ܟ ܐܲܢܗܲܪ: ܕܲܡܨܹܝܬ̇ ܠܡܸܦܪܲܩ ܒܲܥܓܲܠ ܠܐܲܝܢܵܐ ܕܒ̣ܵܟ̣ ܡܸܫܬܲܒ̣ܗܲܪ. ܘ ܘܲܠܟ̣ܘܼ̈ܬ̣ܡܵܬܲܢ ܒܙܘܿܦܵܐ ܕܪ̈ܲܚܡܲܝܟ ܕܲܟܵܐ ܘܚܵܘܲܪ: ܕܲܬ̣ܟ̣ܝܼܠܝܼܢܲܢ ܕܒ̣ܵܟ̣ ܐܲܠܵܗܵܐ ܫܘܼܪܵܐ ܢܸܫܘܲܪ܀ ܙ ܙܵܐܹܢ ܥܵܠܡܹ̈ܐ ܡܵܙܘܿܢ ܙܲܒ̣ܢܵܐ ܠܟ̣ܠܲܢ ܐܲܓ̣ܙܲܪ: ܘܣܲܒ̣ܪܵܐ ܕܚܲܝܹ̈ܐ ܐܲܝܟ̣ ܕܲܠܡܲܪܝܲܡ ܥܲܠ ܠܲܥܵܙܲܪ. ܚ ܚܲܝܠܵܟ̣ ܢܹܐܬܸܐ ܘܲܢܥܲܕܲܪܠܲܢ ܟܲܕ݂ ܠܵܐ ܡܵܘܚܲܪ: ܘܛܲܝܒ̇ܘܼ ܕܝܼܠܵܟ̣ ܡ̣ܢ ܣܢܝܼܩܘܼܬܲܢ ܠܵܐ ܬܸܫܬܲܘܚܲܪ܀ ܛ ܛܵܒ̣ܵܐ ܕܐܲܛܐܸܒ̣ ܠܟܹܐܢܹ̈ܐ ܩܲܕ݂ܡܹ̈ܐ ܘܒܲܪܸܟ̣ ܘܢܲܛܲܪ: ܢܸܗܘܸܐ ܥܲܡܟ̣ܘܿܢ ܘܟ̣ܠ ܐܲܩܡܲܝ̈ܟܘܿܢ ܒܚܲܝܠܹܗ ܢܢܲܛܲܪ. ܝ ܝܑܼܫܘܿܥ ܕܐܸܬܚܵܐ ܠܦܘܼܪܩܵܢ ܟܠܵܗ̇ ܠܘܵܬ̣ܵܟ̣ ܬܠܸܐ ܚܝܵܪ: ܫܡܲܥ ܒܵܥܘܼܬܲܢ ܘܐܲܫܘܵܢ ܕܥܲܡܵܟ̣ ܒܢܘܼܗܪܵܐ ܢܕܲܝܲܪ܀ ܟ ܟܠ ܕܩܵܪܹܐ ܠܵܟ̣ ܪ̈ܲܚܡܹܐ ܢܸܫܟܲܚ ܘܕܲܫܡܵܟ̣ ܡܲܕ݂ܟܲܪ: ܡ̣ܢ ܐܘܼܠܨܵܢܵܐ ܠܫܲܝܢܵܐ ܢܸܦܘܿܩ ܘܠܵܐ ܢܸܬ̣ܥܲܟܲܪ. ܠ ܠܵܐ ܡܵܪܝ ܢܸܚܙܸܐ ܡ̇ܢ ܕܡܵܘܕܸܐ ܒܵܟ̣ ܐܘܼܠܨܵܢ ܩܘܼܠܵܪ: ܒܲܨܠܘܿܬ̣ ܡܲܪܝܲܡ ܘܡܵܪܝ ܝܘܿܚܲܢܵܢ ܡܲܠܲܐܟ̣ ܛܒܸܠܵܪ܀ ܡ ܡܲܠܟܹ̈ܐ ܫܲܝܸܢ ܕܥܘܼܡܪܵܐ ܫܲܠܝܵܐ ܘܢܝܼܚܵܐ ܢܸܥܡܲܪ: ܟܵܗܢܹ̈ܐ ܩܲܝܸܡ ܕܲܒ̣ܗܘܿܢ ܥܹܕܬܵܟ̣ ܒܫܘܼܦܪܹ̈ܐ ܬܸܬ̣ܓ̇ܡܲܪ. ܢܢ ܢܝܵܚܵܐ ܘܫܲܝܢܵܐ ܫܲܟܸ̇ܢ ܠܥܲܡܵܟ̣ ܕܢܸܩܘܿܫ ܟܸܢܵܪ: ܫܘܼܒ̣ܚܵܟ̣ ܒܚܲܕ݂ܘܵܐ ܘܐܲܪܝܼܡ ܘܐܲܨܠܲܚ ܠܕܸܐܣܲܪ ܙܘܼܢܵܪ܀ ܣܲܟ̣ܠܹ̈ܐ ܚܲܟܸ̇ܡ ܡܬ̣ܵܘܫܹ̈ܐ ܗܲܕܵܐ ܒܲܨܠܘܿܬ̣ ܬܪܸܥܣܲܪ: ܕܡܸܛܠ ܟܪ̈ܝܼܗܹܐ ܘܐܢܵـ̈ܫܵܐ ܢܲܦ̈ܠܹܐ ܐܸܬ̣ܓ̇ܠܝܼܬ̇ ܒܲܒ̣ܣܲܪ. ܥ ܥܠܝܼܒܹ̈ܐ ܚܲܪܲܪ ܡܚܝܼܠܹ̈ܐ ܥܲܕܲܪ ܬܟ̣ܘܿܣ ܠܕܲܡܨܲܥܲܪ: ܒܲܝܲܐ ܡܥܵܩܹ̈ܐ ܣܲܡܵܟ̣ ܠܣܵܒܹ̈ܐ ܘܲܨܒ̣ܝܼ ܠܡܸܣܥܲܪ܀ ܦ ܦܪܘܿܩ ܠܐܲܣܝܼܪܹ̈ܐ ܘܙܘܼܢ ܠܚܲܣܝܼܪܹ̈ܐ ܘܕܸܡܥܹ̈ܐ ܟܲܦܲܪ: ܘܒܸܢܝܵܢ ܥܵܠܡܵܐ ܘܥܹܕܬܵܟ ܒܲܣܒ̣ܪܵܟ̣ ܠܵܐ ܡܵܪܝ ܬܲܚܦܲܪ. ܨ ܨܠܘܿܬܲܢ ܩܲܒܸ̇ܠ ܘܨܵܐܬܲܢ ܚܲܠܸܠ ܘܐܸܨܛܲܒ̣ܝܝ݇ ܠܲܡܨܵܪ: ܨܠܸܡ ܙܵܟ̣ܘܼܬ̣ܵܟ ܒܲܪܝܵܡ ܪܹܫܲܢ ܘܠܵܐ ܢܸܬ̣ܒܲܨܲܪ܀ ܩ ܩܲܪܸܒ̣ ܠܐܲܝܠܹܝܢ ܕܐܲܪܚܸܩ ܡܸܢܵܟ̣ ܒܝܼܫܵܐ ܕܣܵܩܲܪ: ܘܐܸܣܛܠܵܐ ܦܐܝܼܬ̣ܵܐ ܕܲܦܪܝܼܣ ܢܘܼܗܪܵܟ̣ ܠܟ̣ܠܲܢ ܬܸܙܕܩܲܪ. ܪ ܪܲܚܸܡ ܘܚܲܣܵܐ ܚܛܵܗܹ̈ܐ ܕܥܲܒ̣ܕܲܝ̈ܟ ܕܐܵܘܕܝܼܘ ܒܲܫܪܵܪ: ܗܲܝܡܵܢܘܼܬ̣ܵܟ̣ ܘܚܲܝܸܠ ܘܥܲܕܲܪ ܘܙܲܕܸܿܩ ܘܫܲܪܲܪ܀ ܫ ܫܘܼܘܕܵܝ ܡܸܠܲܝ̈ܟ ܕܥܲܡܲܢ ܐܝܼܬܲܝܟ ܠܘܵܬܲܢ ܐܲܫܲܪ: ܘܕ݂ܐܸܬ̣ܠܲܒܲܒ̣ܘ ܐܢܵܐ ܙܟܹܝܬܹܗ ܠܥܵܠܡܵܐ ܒܙܲܒ̣ܢܲܢ ܐܲܫܲܪ. ܬ ܬܸܫܒ̇ܘܿܚܬܵܐ ܡܵܪܝ ܘܣܸܓ̣ܕܬܵܐ ܘܬ̣ܵܘܕܝܼ ܠܵܟ̣ ܬܸܬ̣ܝܲܬܲܪ: ܘܲܥܠܲܝܢ ܪ̈ܲܚܡܲܝܟ ܘܚܹܝܠ ܛܲܝܒ̈ܘܵܬ̣ܵܟ̣ ܠܟ̣ܠܲܢ ܢܲܥܬܲܪ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬ݂ܵܡܵܐ ܐܚܪܹܢܵܐ ܕܝܼܠܹܗ ܒܹܗ ܒܩܵܠܵܐ.

ܫܠܵܡ ܠܹܗ ܠܥܲܡܵܐ ܕܲܒ̣ܕܸܚܠ̱ܬܹܗ ܕܡܵܪܝܵܐ ܡܲܢܗܲܪ: ܘܲܒ̣ܕ݂ܘܼܒܵܪܹ̈ܐ ܡܪ̈ܲܥܝܲܝ ܠܲܫܡܹܗ ܡܲܒ̣ܪܸܩ ܘܡܲܙܗܲܪ. ܫܠܵܡ ܠܹܗ ܠܥܲܡܵܐ ܕܡ̣ܢ ܟܠ ܥܲܡܡ̈ܝܼܢ ܓܒܸܐ ܘܲܡܝܲܬܲܪ: ܕܲܠܡܘܼܠܟܵܢܵܘ̈ܗܝ ܡܲܠܝܲܝ̈ ܣܲܒ̣ܪܵܐ ܗܲܝܡܸܢ ܘܐܲܫܲܪ܀ ܫܠܵܡ ܠܹܗ ܠܥܲܡܵܐ ܕܒ̣ܝܼܫܘܿܥ ܡܫܝܼܚܵܐ ܚܲܬ̣ܝܼܪ ܘܡܸܫܬܲܒ̣ܗܲܪ: ܘܡܸܛܠܵܬܹܗ ܚܸܣܕܵܐ ܘܨܲܥܪܵܐ ܟܠܝܘܿܡ ܡܣܲܝܒܲܪ. ܐܘܿ ܒܲܪ ܟܲܣܝܵܐ ܕܲܠܟ̣ܠ ܐܲܚܝܼܕ݂ ܘܲܠܟ̣ܠ ܡܕܲܒܲܪ: ܒܲܪܸܟ ܠܥܲܡܲܢ ܕܢܸܣܓܸ̇ܐ ܘܢܸܬ̣ܩܲܦ ܐܵܦ ܢܸܬ̣ܝܲܬܲܪ܀ ܒܚܹܝܠ ܥܘܼܕ݂ܪܵܢܵܟ̣ ܠܲܒ̣ܥܸܠܕܒ̣ܵܒ̣ܵܘ̈ܗܝ ܢܸܕ݂ܚܘܿܩ ܢܸܬ̣ܒܲܪ: ܘܲܠܣܵܩܘܿܪ̈ܵܘܗܝ ܕܵܠܚܲܝ̈ ܫܲܝܢܹܗ ܢܕ݂ܘܼܫ ܘܲܢܕܲܩܲܪ. ܐܲܝܢܵܐ ܕܪܵܗܹܒ̣ ܘܗܵܡܹܣ ܠܒ̣ܝܼܬܹܗ ܒܚܲܝܠܵܟ̣ ܢܸܙܕܓܲܪ: ܘܲܕ݂ܫܵܓܹܫ ܬܘܼܒ̣ ܘܲܡܕ݂ܵܘܸܕ݂ ܠܹܗ ܒܵܟ̣ ܢܸܬ̣ܟܲܐܲܪ܀ ܕܡܲܩܫܸܐ ܢܝܼܪܹܗ ܘܒܲܛܪܘܿܢܘܼܬ̣ܵܐ ܥܠܵܘܗܝ ܢܸܬ̣ܒܲܥܪܲܪ: ܒܵܟ̣ ܢܸܫܬܲܝܲܢ ܘܐܲܟ̇ܬ̣ܵܐ ܒܠܸܒܹܗ ܥܠܵܘܗܝ ܠܵܐ ܢܸܛܲܪ. ܐܝܼܕܲܝ̈ ܒܝܼܫܹ̈ܐ ܡܲܩܪ̈ܒܲܝ ܥܲܡܹܗ ܣܲܛܸܡ ܘܲܦܟܲܪ: ܘܐܵܦ ܥܲܢܵܬܹ̈ܐ ܡܙܲܛܡܲܝ̈ ܫܪܵܪܹܗ ܦܘܼܡܗܘܿܢ ܢܸܣܬ̇ܟܲܪ܀ ܠܵܐ ܢܸܗܘܸܐ ܣܵܟ̣ ܒܙܲܪܥܹܗ ܒܪܝܼܟ̣ܵܐ ܕܥܲܩܪܵܐ ܘܕܲܥܩܲܪ: ܐܸܠܵܐ ܒܦܹܐܪܹ̈ܐ ܕܥܵܗ̇ܢܝܼܢ ܠܫܘܼܒ̣ܚܵܟ̣ ܢܸܣܓܸܐ ܘܢܸܟ̣ܒܲܪ. ܒܫܲܝܢܵܐ ܢܸܫܪܸܐ ܒܫܸܠܝܵܐ ܢܸܬ̇ܬ̇ܢܝܼܚ ܒܢܵܘܚܵܐ ܢܸܥܡܲܪ: ܘܡ̣ܢ ܥܵܩܵܬܹ̈ܗ ܕܥܵܠܡܵܐ ܢܸܬ̣ܦܪܸܩ ܐܵܦ ܢܸܬ̣ܚܲܪܲܪ܀ ܠܟ̣ܵܗܢܹ̈ܐ ܣܢܹܐܓ̣ܪ̈ܵܘܗܝ ܒܩܲܕܝܼܫܘܼܬ̣ܵܐ ܨܲܒܸ̇ܬ̣ ܘܗܲܕܲܪ: ܕܢܸܗܘܘܿܢ ܕܟܲـ̈ܝܵܐ ܘܲܕ݂ܠܵܐ ܡܘܼܡܵܐ ܒܲܢܦܸܫ ܘܒܲܦܓܲܪ. ܘܲܠܠܹܘܵܝܹ̈ܐ ܕܦܘܼܠܚܵܢ ܡܲܩܕ̄ܫܵܟ̣ ܒܗܘܿܢ ܐܸܬ̣ܐ̱ܣܲܪ: ܐܝܼܩܵܪ ܛܲܟ̣ܣܗܘܿܢ ܡ̣ܢ ܓܵܘ ܥܲܡܵܟ̣ ܣܵܟ̣ ܠܵܐ ܢܸܙܥܲܪ܀ ܘܠܝܼܚܝܼܕ݂ܵܝܹ̈ܐ ܕܫܵܛܘܼܗܝ ܠܥܵܠܡܵܐ ܘܒ̣ܵܟ̣ ܠܚܘܿܕ݂ ܣܲܒܲܪܘ: ܦܲܣܸܩ ܢܸܫܒܵܘ̈ܗܝ ܕܐܵܟܹܠܩܲܪܨܵܐ ܕܲܠܗܘܿܢ ܛܵܡܲܪ. ܘܲܠܡܲܠܦܵܢܹ̈ܐ ܡܲܠܦܲܝ̈ ܫܪܵܪܵܟ̣ ܒܢܘܼܗܪܵܟ̣ ܐܲܢܗܲܪ: ܘܲܒ̣ܣܘܼ̈ܟܵܠܹܐ ܐܲܠܵܗܵܝܹ̈ܐ ܠܠܸܒ̇ܗܘܿܢ ܐܲܥܬܲܪ܀ ܘܲܠܝܵܠܘܿܦܹ̈ܐ ܕܲܠܝܘܼܠܦܵܢܵܟ̣ ܢܲܦ̮ܫܗܘܿܢ ܐܵܘܓܲܪܘ: ܒܩܘܼܫܬܵܟ̣ ܕܲܪܸܫ ܘܲܒ̣ܚܸܟ̣ܡ̱ܬ̣ܵܟ ܢܲܦܸܩ ܘܢܲܗܲܪ. ܠܣܵܒܹ̈ܐ ܣܲܡܸܟ̣ ܐܵܦ ܠܲܥܠܲܝܡܹ̈ܐ ܒܚܲܝܠܵܟ̣ ܥܲܕܲܪ: ܘܲܠܓܲܕܘܼ̈ܕܹܐ ܚܣܘܿܟ̣ ܡ̣ܢ ܥܵܘ̣ܠܵܐ ܒܪ̈ܲܚܡܲܝܟ ܘܚܲܪܲܪ܀ ܛܠܵܝܹ̈ܐ ܘܫܲܒ̣ܪܹ̈ܐ ܥܲܡ ܝܲܠܘܼ̈ܕܹܐ ܫܵܘܫܸܛ ܘܓܲܢ݇ܒܲܪ: ܘܲܠܟ̣ܠ ܐܲܩ̈ܡܝܼܢ ܥܲܡ ܟܠ ܡܘܼܫ̈ܚܵܢ ܒܲܪܸܟ̣ ܘܢܲܛܲܪ. ܒܲܪܸܟ̣ ܙܲܪ̈ܥܹܐ ܫܲܪܬܲܚ ܦܹܐܪܹ̈ܐ ܡܲܙܸܓ̣ ܐܵܐܲܪ: ܙܪܘܿܥ ܐܵܘܝܘܼܬ̣ܵܐ ܘܚܘܼܒܵܐ ܘܫܲܝܢܵܐ ܒܲܝܢܵܬ̣ ܟܠܒ̇ܣܲܪ܀ ܩܪ̈ܵܒܹܐ ܘܩܹܐܪ̈ܣܹܐ ܬܟ̣ܘܿܣ ܒܲܚܢܵܢܵܟ̣ ܡ̣ܢ ܟܠ ܐܲܬܲܪ: ܘܲܠܕ݂ܵܠܘܿܚܹ̈ܐ ܕܫܵܓ̣ܫܝܼܢ ܠܐܲܪܥܵܐ ܛܲܠܸܩ ܘܒܲܕܲܪ. ܘܐܲܫܘܵܐ ܠܟ̣ܠܲܢ ܕܫܲܦܝܼܪ ܢܸܚܸܐ ܐܵܦ ܢܸܬ̇ܕܲܒܲܪ: ܘܲܒ̣ܦܘܼܩܕܵܢܲܝ̈ܟ ܡܲܠܝܲܝ̈ ܚܲܝܹ̈ܐ ܢܚܲܡܣܸܢ ܘܢܸܙܕܗܲܪ܀ ܘܲܒ̣ܗܘܼܦܵܟܲܝ̈ܢ ܒܟ̣ܠܗܘܿܢ ܚܲܝܲܝ̈ܢ ܢܲܨܠܲܚ ܘܢܲܟ̣ܫܲܪ: ܘܲܠܡܵܪܘܼܬ̣ܵܟ̣ ܒܝܲܕ݂ ܕܘܼܒܵܪ̈ܲܝܢ ܢܪܲܥܸܐ ܘܢܸܫܦܲܪ. ܘܚܲܝܹ̈ܐ ܒܗܝܼ̈ܠܹܐ ܒܕܸܚܠܲܬ̣ ܩܘܼܫܬܵܐ ܠܥܲܒ̣ܕܲܝ̈ܟ ܐܲܓ̣ܙܲܪ: ܘܫܘܼܪܵܐ ܪܵܡܵܐ ܨܠܝܼܒ̣ܵܟ̣ ܚܲܝܵܐ ܠܟܸܢܫܲܢ ܐܲܚܕܲܪ܀ ܘܢܸܗܘܸܐ ܚ̈ܕ݂ܘܿܓܹܐ ܒܗ̇ܘ ܒܘܼܣܵܡܵܐ ܕܠܵܐ ܣܵܟ̣ ܦܵܛܲܪ: ܘܩܵܠܹ̈ܐ ܕܫܘܼܒ̣ܚܵܐ ܠܐܲܠܵܗܘܼܬ̣ܵܟ̣ ܟܠܫܵܥ ܢܸܙܡܲܪ. ܘܲܠܥܲܢ̈ܝܼܕܲܝܢ ܕܡ̣ܢ ܗܵܢ ܥܵܠܡܵܐ ܫܲܢܝܼܘ ܘܲܦܛܲܪܘ: ܒܲܣܸܡ ܐܸܢܘܿܢ ܥܲܡ ܩܲܕܝܼܫܲܝ̈ܟ ܒܛܘܼܒ̣ ܕܲܡܟܲܬܲܪ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܚܘܼܬ̣ܵܡܵܐ ܕܥܹܐ̈ܕܹܐ ܡܵܪ̈ܵܢܵܝܹܐ ܒܹܗ ܒܩܵܠܵܐ.

ܐ ܐܘܿ ܒܵܪܘܿܝܵܐ ܕܲܫܡܲܝܵܢܹ̈ܐ ܐܵܦ ܕܐܲܪ̈ܥܵܢܹܐ: ܐܲܫܘܵܐ ܠܥܲܒ̣ܕܲܝ̈ܟ ܕܲܢܫܲܒ̇ܚܘܼܢܵܟ ܥܲܡ ܪ̈ܘܼܚܵܢܹܐ. ܒ ܒܪܵܐ ܕܡܸܬ̇ܬܵܘܕܹܐ ܚܲܕ݂ ܦܲܪܨܘܿܦܵܐ ܘܲܬ̣ܪܹܝܢ ܟܝܵܢܹ̈ܐ: ܒܲܪܸܟ ܠܥܲܒ̣ܕܲܝ̈ܟ ܘܫܵܘܙܸܒ̣ ܐܸܢܘܿܢ ܡ̣ܢ ܢܸܟ̣ܝܵܢܹ̈ܐ܀ ܓ ܓܲܙܵܐ ܪܲܒܵܐ ܕܡ̣ܢ ܡܵܘܗܒ̣ܵܬܹ̈ܗ ܥܬܲܪܘ ܥܲܦܪ̈ܵܢܹܐ: ܐܲܥܬܲܪ ܠܟܸܢܫܲܢ ܒܕܲܗܒ̣ܵܐ ܘܣܹܐܡܵܐ ܘܥܘܼܬ̣ܪܵܐ ܘܡܵܐܢܹ̈ܐ. ܕ ܕܸܢܚܵܐ ܫܒ̣ܝܼܚܵܐ ܕܐܲܢܗܲܪ ܒܢܘܼܗܪܹܗ ܠܡܸܬ̣ܥܲܡܛܵܢܹ̈ܐ: ܗ̤ܘ ܢܨܲܝܸܒ̣ ܠܟ̣ܘܿܢ ܙܲܒ̣ܢܹ̈ܐ ܢܝܼܚܹ̈ܐ ܘܲܡܚܲܕܝܵܢܹ̈ܐ܀ ܗ ܗ̤ܘܝܼ ܥܲܡ ܥܲܒ̣ܕܲܝ̈ܟ ܐܲܝܟ̣ ܕܥܲܡ ܫܠܝܼܚܲܝ̈ܟ ܓܒܲܝ̈ܟ ܡܬܲܠܡ̱ܕ݂ܵܢܹ̈ܐ: ܘܫܵܘܙܸܒ̣ ܐܸܢܘܿܢ ܡ̣ܢ ܣܲܩܘܼ̈ܒ̣ܠܹܐ ܘܡ̣ܢ ܢܸܟ̣ܝܵܢܹ̈ܐ. ܘ ܘܲܒ̣ܗ̇ܘ ܝܵܘܡܵܐ ܕܐܵܬܹܝܬ̇ ܒܙܵܘܚܵܐ ܕܲܫܡܲܝܵܢܹ̈ܐ: ܢܸܦܩܘܼܢ ܠܐܘܼܪܥܵܟ̣ ܘܲܢܙܲܡܪܘܼܢ ܠܵܟ̣ ܒܩܵܠ ܐܘܿܫܲܥܢܹ̈ܐ܀ ܙ ܙܪܘܿܥ ܡܵܪܝ ܫܠܵܡܵܐ ܘܫܲܝܢܵܐ ܘܚܘܼܒܵܐ ܒܲܝܢܵܬ̣ ܟܵܗܢܹ̈ܐ: ܘܒܲܪܸܟ̣ ܠܟ̣ܠܲܢ ܓܲܒ̣ܪܹ̈ܐ ܘܢܸܫܹ̈ܐ ܥܲܡ ܡܫܲܡܫܵܢܹ̈ܐ. ܚ ܚܲܬ̣ܢܵܐ ܫܒ̣ܝܼܚܵܐ ܕܐܸܬ̣ܵܐ ܕܢܸܦܪܘܿܩ ܠܥܲܡܡܹ̈ܐ ܡܗܲܝܡܢܹ̈ܐ: ܫܲܪܲܪ ܟܘܼܪܣܝܹܗ ܕܐܲܒ̣ܘܼܢ ܙܲܗܝܵܐ ܒܟ̣ܠ ܢܸܨܚܵܢܹ̈ܐ܀ ܛ ܛܲܪ ܫܘܼܘܕܵܝܵܟ̣ ܕܲܠܘܵܬ̣ ܥܹܕܬܵܟ̣ ܪܲܒ̇ ܥܲܠܠܵܢܹ̈ܐ: ܕܬܲܪ̈ܥܹܝܗ̇ ܕܲܫܝܘܿܠ ܠܵܐ ܢܸܚܣ̄ܢܘܼܢܵܗ̇ ܘܠܵܐ ܟܝܼܡܘܿܢܹ̈ܐ. ܝ ܝܲܡܵܐ ܪܲܒܵܐ ܘܢܸܒ̣ܥܵܐ ܚܲܠܝܵܐ ܣܲܓ̇ܝܼ ܚܢܵܢܹ̈ܐ: ܐܲܡܛܲܪ ܠܥܲܒ̣ܕܲܝ̈ܟ ܡܸܛܪܹ̈ܐ ܢܝܼܚܹ̈ܐ ܒܟ̣ܠ ܥܸܕܵܢܹ̈ܐ܀ ܟ ܟܠܝܼ ܡܵܪܝ ܪ̈ܘܼܓ̣ܙܹܐ ܐܵܦ ܚܸܪ̈ܝܵܢܹܐ ܡ̣ܢ ܓܵܘ ܡܗܲܝܡܢܹ̈ܐ: ܘܢܲܛܲܪ ܐܸܢܘܿܢ ܒܟܸܣܝܵܐ ܘܓܸܠܝܵܐ ܡ̣ܢ ܣܘܼܓ̣ܦܵܢܹ̈ܐ. ܠ ܠܵܐ ܡܵܪܝ ܬܸܣܲܩ ܠܪܹܫ ܪܸܓܲܬ̣ܗܘܿܢ ܕܢܲܟܘܼܠܬ̣ܵܢܹ̈ܐ: ܣܵܢ̈ܐܹܐ ܕܥܲܡܲܢ ܐܵܦ ܒܥܸܠܕܒ̣ܵܒܲܝ̈ܢ ܡܲܒ̣ܐ̱ܫܵܢܹ̈ܐ܀ ܡ ܡܲܠܟܵܐ ܕܡܲܠܟܹ̈ܐ ܐܵܘܪܸܟ̣ ܠܲܫܢܵܘܗ̈ܝ ܘܗܲܒ̣ܠܹܗ ܥܘܼܫܢܹ̈ܐ: ܠܐܲܒ̣ܘܼܢ ܙܲܗܝܵܐ ܡܵܪܝ ܦܠܵܢ ܥܛܝܼܦ ܢܸܨܚܵܢܹ̈ܐ. ܢܢ ܢܸܗܘܸܐ ܥܹܐܕ݂ܵܐ ܒܪܝܼܟ̣ܵܐ ܥܠܲܝܟ̇ܘܿܢ ܐܘܿ ܟܪܸ̈ܣܛܝܵܢܹܐ: ܘܬܸܗܘܘܿܢ ܪ̈ܚܝܼܡܹܐ ܒܥܲܝܢܲܝ̈ ܡܲܠܟܹ̈ܐ ܐܵܦ ܕܕܲܝܵܢܹ̈ܐ܀ ܣ ܣܲܒ̣ܪܵܐ ܛܵܒ̣ܵܐ ܐܵܦ ܒܹܝܬ̣ ܓܵܘܣܵܐ ܕܟ̣ܠܗܘܿܢ ܬܲܩܢܹ̈ܐ: ܛܪܘܿܕ݂ ܡ̣ܢ ܥܲܒ̣ܕܲܝ̈ܟ ܐܢܵـ̈ܫܵܐ ܒܝܼܫܹ̈ܐ ܘܫܹܐ̈ܕܹܐ ܛܪ̈ܘܼܢܹܐ. ܥ ܥܒ̣ܘܼܪܵܐ ܫܲܪܬܲܚ ܒܟ̣ܠ ܛܵـ̈ܒ̣ܵܬ̣ܵܐ ܕܟ̣ܠ ܙܲܪ̈ܥܘܿܢܹܐ: ܘܢܸܬ̣ܡܠܸܐ ܒܲܝܬ̇ܟ̣ܘܿܢ ܩܲܡܚܵܐ ܘܡܸܫܚܵܐ ܥܲܡ ܚܲܡܪ̈ܵܢܹܐ܀ ܦ ܦܹܐܪܹ̈ܐ ܕܚܲܨܟ̣ܘܿܢ ܢܸܗܘܘܿܢ ܟܵܗܢܹ̈ܐ ܘܲܡܕܲܒ̇ܪ̈ܵܢܹܐ: ܘܡ̣ܢ ܦܵܬ̣ܘܿܪܟ̣ܘܿܢ ܢܹܐܟ̣ܠܘܼܢ ܘܢܸܣܒ̇ܥܘܼܢ ܣܢܝܼܩܹ̈ܐ ܘܟ̣ܵܦܢܹ̈ܐ. ܨ ܨܠܘܿܬ̣ܵܐ ܕܨܲܠܝܼ ܡܘܼܫܹܐ ܒܣܝܼܢܲܝ ܛܘܼܪ ܓܸܠܝܵܢܹ̈ܐ: ܬܸܗܘܸܐ ܫܘܼܪܵܐ ܐܵܦ ܒܹܝܬ̣ ܓܵܘܣܵܐ ܠܟ̣ܠܗܘܿܢ ܡܗܲܝܡܢܹ̈ܐ܀ ܩ ܩܵܠܵܐ ܕܲܨܒܲܩ ܠܗ̇ܝ ܚܲܛܵܝܬܵܐ ܟܠ ܚܸܛܝܵܢܹ̈ܐ: ܢܸܫܒ̣ܘܿܩ ܚܵܘܒܹ̈ܐ ܐܵܦ ܚܛܵܗܹ̈ܐ ܕܡܸܬ̣ܥܲܒ̣ܪ̈ܵܢܹܐ. ܪ ܪܵܡܵܐ ܡܥܲܠܝܵܐ ܕܫܲܚܠܸܦ ܡܲـ̈ܝܵܐ ܠܚܲܡܪܵܐ ܒܩܲܛܢܹܐ: ܢܸܪܕܘܿܦ ܡܸܢܟ̣ܘܿܢ ܩܲܡܨܵܐ ܘܒܲܪܕ݂ܵܐ ܥܲܡ ܡܵܘܬܵܢܹ̈ܐ܀ ܫ ܫܒ̣ܝܼܚܵܐ ܕܫܘܼܒ̣ܚܹܗ ܠܵܐ ܡܸܣܬܲܝܲܟ̣ ܡ̣ܢ ܒܸܣܪ̈ܵܢܹܐ: ܗܲܒ̣ ܫܹ̈ܐܠܵܬܲܢ ܡ̣ܢ ܒܹܝܬ̣ ܓܲܙܵܟ̣ ܡܠܸܐ ܚܵܘܣܵܢܹ̈ܐ. ܬ ܬܸܫܒ̇ܘܿܚܬܵܐ ܠܵܟ̣ ܡ̣ܢ ܟܠ ܦܘܼܡܹ̈ܐ ܘܟ̣ܠ ܠܸܫܵܢܹ̈ܐ: ܘܥܲܠ ܗܵܢ ܟܸܢܫܵܐ ܐܲܫܦܲܥ ܪ̈ܲܚܡܲܝܟ ܡܵܪܝ ܐܲܡܝܼܢܹ̈ܐ܀ ܓܡܘܿܪ ܫܘܼܘܕܵܝܵܟ̣ ܕܲܠܘܵܬ̣ ܦܵܛܪܘܿܣ ܪܲܒ̇ ܥܲܠܠܵܢܹ̈ܐ: ܐܵܦ ܡܘܼܠܟܵܢܲܝ̈ܟ ܕܲܠܘܵܬ̣ ܟܸܢܫܵܐ ܕܡܸܬ̇ܬܲܠܡܕ݂ܵܢܹ̈ܐ.܀ ܕܟ̣ܠ ܡ̇ܢ ܕܐܵܟܹܠ ܦܲܓ̣ܪܵܐ ܘܲܕ݂ܡܵܐ ܕܹܝܢ ܡܚܲܣܝܵܢܹ̈ܐ: ܢܸܗܘܘܿܢ ܠܹܗ ܟܹܝܬ̣ ܠܚܲܝܹ̈ܐ ܚܲܕ݂ܬܹ̈ܐ ܘܲܡܩܵܘܝܵܢܹ̈ܐ܀ ܗ̤ܘ ܒܝܼ ܡܩܵܘܸܐ ܘܐܸܢܵܐ ܠܲܡ ܒܹܗ ܠܫܘܼܠܵܡ ܙܲܒ̣ܢܹ̈ܐ: ܘܐܹܫܲܢܹܝܘܗܝ ܕܹܝܢ ܠܚܲܝܹ̈ܐ ܡܠܝܼܟܹ̈ܐ ܘܡܸܣܬܲܟ̇ܝܵܢܹ̈ܐ܀ ܘܥܲܡܝ ܢܸܬ̣ܒܲܣܲܡ ܒܓ̣ܵܘ ܡܸܫܬ̇ܘܼܬ̣ܵܐ ܥܲܡ ܟܠ ܙܡܝܼܢܹ̈ܐ: ܐܵܦ ܢܸܬ̣ܓܲܐܸܐ ܒܓ̣ܵܘ ܡܲܠܟ̇ܘܼܬ̣ܵܐ ܠܥܵܠܲܡ ܙܲܒ̣ܢܹ̈ܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܐܚܪܹܢܵܐ ܒܹܗ ܒܩܵܠܵܐ. ܕܝܼܠܹܗ܀

ܐ ܐܝܼܬ̣ܝܵܐ ܕܒܲܪܟܲܢ ܒܟ̣ܠ ܒܘܼܪ̈ܟܵܬ̣ܵܐ ܒܲܒ̣ܪܹܗ ܚܲܝܵܐ: ܕܲܠܦܘܼܪܩܵܢܲܢ ܬܲܚܬܝܼ ܝܵܬܹܗ ܡ̣ܢ ܫܡܲܝ̈ ܫܡܲܝܵܐ. ܒ ܒܦܲܓ̣ܪܲܢ ܐܲܓܸ̇ܢ ܘܝܲܗ݇ܒ̣ܠܲܢ ܦܲܓ̣ܪܹܗ ܝܑܼܫܘܿܥ ܡܵܪܝܵܐ: ܘܲܡܙܲܓ̣ ܒܲܕ݂ܡܲܢ ܕܡܹܗ ܝܲܩܝܼܪܵܐ ܐܪܵܙ ܚܘܼܣܵܝܵܐ܀ ܓ ܓܠܵܐ ܒܲܢ ܚܲܝܠܹܗ ܘܚܵܘܝܼ ܫܘܼܒ̣ܚܹܗ ܒܗܸܕ݂ܪܵܐ ܦܲܐܝܵܐ: ܘܨܵܪ ܒܲܢ ܨܲܠܡܹܗ ܘܚܲܣܝܲܢ ܘܩܲܕܫܲܢ ܒܚܲܝܠܵܐ ܟܲܣܝܵܐ. ܕ ܕܲܟ̇ܝܼ ܡܸܢܲܢ ܠܲܦܠܝܼܓ̣ܘܼܬ̣ܵܐ ܒܗܵܢ ܫܘܼܘܕܵܝܵܐ: ܕܟ̣ܠ ܕܐܵܟܹܠ ܦܲܓ̣ܪܝ ܘܫܵܬܹܐ ܡ̣ܢ ܕܹܡܝ ܒܠܸܒܵܐ ܕܲܟ̣ܝܵܐ܀ ܗ ܗ̤ܘ ܡܩܵܘܸܐ ܒܝܼ ܘܐܸܢܵܐ ܠܲܡ ܒܹܗ ܒܝܵܘܡܵܐ ܐܚܪܵܝܵܐ: ܘܲܒ̣ܝܘܿܡ ܕܝܼܢܵܐ ܣܵܟ̣ ܠܵܐ ܡܸܬ̇ܬ̇ܕܝܼܢ ܐܲܝܟ̣ ܚܲܛܵܝܵܐ. ܘ ܘܲܠܥܸܠ ܒܐܵܐܲܪ ܡܥܲܠܸܐ ܐܢܵܐ ܠܹܗ ܐܲܝܟ̣ ܙܲܟܵܝܵܐ: ܘܡܵܘܪܸܬ̣ ܐܢܵܐ ܠܹܗ ܡܲܠܟ̇ܘܼܬ̣ ܫܡܲܝܵܐ ܕܠܵܐ ܡܸܫܬܲܪܝܵܐ܀ ܙ ܙܪܘܿܥܘ ܬܵܘܕܝܼܬܹܗ ܒܠܸܒܵܘܵܬ̣̈ܟ̣ܘܿܢ ܕܗܵܟܲܢ ܦܲܐܝܵܐ: ܘܗܲܝܡܵܢܘܼܬܹܗ ܒܪܸ̈ܥܝܵܢܲܝܟ̇ܘܿܢ ܕܠܵܐ ܡܸܬ̣ܠܲܚܝܵܐ. ܚ ܚܲܝܠܵܐ ܕܐܲܓܸ̇ܢ ܥܲܠ ܬܲܠܡܝܼ̈ܕܹܐ ܫܠܝܼܚܹ̈ܐ ܓܒܲـ̈ܝܵܐ: ܢܲܓܸ̇ܢ ܥܠܲܝܟ̇ܘܿܢ ܘܲܢܣܲܝܲܥܟ̣ܘܿܢ ܒܟܸܣܝܵܐ ܘܓܸܠܝܵܐ܀ ܛ ܛܸܒܹ̈ܐ ܒܝܼܫܹ̈ܐ ܠܵܐ ܬܸܫܡ̱ܥܘܼܢ ܕܥܵܩܬ̣ܵܐ ܘܪܸܢܝܵܐ: ܘܡ̣ܢ ܟܠ ܬܘܼܩ̈ܠܵܢ ܢܫܲܟܸ̇ܢ ܠܟ̣ܘܿܢ ܥܓܲܠ ܦܘܼܨܵܝܵܐ. ܝ ܝܵܘܡܲܝ̈ ܛܵܒ̣ܬ̣ܵܐ ܢܹܐܪܥܘܼܢܵܟ̣ܘܿܢ ܒܚܹܝܠ ܥܸܠܵܝܵܐ: ܘܚܹܝܠ ܡܵܘܗܲܒ̣ܬܹܗ ܢܲܓܸ̇ܢ ܥܠܲܝܟ̇ܘܿܢ ܥܲܕ݂ ܠܫܘܼܡܠܵܝܵܐ܀ ܟ ܟܪܝܼܣܛܘܿܣ ܕܙܲܒܢܵܗ̇ ܠܥܵܢܹ̈ܗ ܒܲܕ݂ܡܹܗ ܘܣܲܝܒܲܪ ܛܠܘܼܡܝܵܐ: ܗ̤ܘ ܢܫܵܘܙܸܒ̣ܟ̣ܘܿܢ ܡ̣ܢ ܣܵܩܘܿܪܵܐ ܘܡ̣ܢ ܫܲܒܵܝܵܐ. ܠ ܠܪ̈ܵܥܵܘܵܬ̣ܵܐ ܢܚܲܝܸܠ ܚܲܝܠܹܗ ܕܠܵܐ ܩܢܸܐ ܓܡܘܼܪܝܵܐ: ܕܢܸܪܥܘܿܢ ܠܥܵܢ̈ܗܘܿܢ ܐܲܝܟ̣ ܒܲܪ ܝܘܿܢܵܐ ܘܛܲܪܣܘܿܣܵܝܵܐ܀ ܡ ܡܟܲܗܢܲܝ̈ ܫܲܦܝܼܪ ܒܓ̣ܵܘ ܒܹܝܬ̣ ܩܘܼܕ݂ܫܵܐ ܟܵܗܢܹ̈ܐ ܙܗܲܝܵـ̈ܐ: ܢܸܫܬ̇ܘܘܿܢ ܠܡܸܥܲܠ ܠܗ̇ܝ ܡܲܠܟ̇ܘܼܬ̣ܵܐ ܕܠܵܐ ܡܸܫܬܲܪܝܵܐ. ܢܢ ܢܫܲܡܫܘܼܢ ܩܕ݂ܵܡܵܘܗܝ ܡܫܲܡܫܲܝ̈ ܫܲܦܝܼܪ ܒܐܲܬ̣ܪܹܗ ܡܥܲܠܝܵܐ: ܚܠܵܦ ܬܸܫܡܸܫܬܵܐ ܕܗܵܪܟܵܐ ܫܲܡܸܫܘ ܕܠܵܐ ܬܘܼܗܝܵܐ܀ ܣ ܣܵܒܹ̈ܐ ܗܕ݂ܝܼܪܹ̈ܐ ܕܲܥܬܸܩܘ ܘܲܣܐܸܒ̣ܘ ܘܥܲܠ̣ܘ ܒܲܫ̈ܢܲܝܵܐ: ܢܣܲܡܸܟ̣ ܐܸܢܘܿܢ ܥܲܠ ܝܲܕ݂ ܚܘܼܛܪܵܐ ܕܫܲܝܢܵܐ ܘܫܸܠܝܵܐ. ܥ ܥܠܲܝܡܹ̈ܐ ܕܲܒ̣ܟܘܿܢ ܢܸܬ̣ܩܲܣܡ̱ܣܘܼܢ ܒܗܸܕ݂ܪܵܐ ܦܲܐܝܵܐ: ܘܲܒ̣ܕ݂ܘܼܒܵܪܹ̈ܐ ܕܲܡܝܲܬܪܘܼܬ̣ܵܐ ܢܸܫܦܪܘܼܢ ܠܡܵܪܝܵܐ܀ ܦ ܦܘܼܡ ܫܲܒ̣ܪ̈ܲܝܟ̇ܘܿܢ ܢܒܲܟܲܪ ܒܫܘܼܒ̣ܚܵܐ ܒܩܵܠܹ̈ܐ ܚ̈ܠܲܝܵܐ: ܐܵܦ ܢܸܫܲܝ̈ܟ̇ܘܿܢ ܒܝܲܕ݂ ܬܲܚܡܲܨܬܵܐ ܕܠܵܐ ܡܸܬ̣ܪܲܫܝܵܐ. ܨ ܨܠܘܿܬ̣ܟ̣ܘܿܢ ܬܸܗܘܸܐ ܐܲܝܟ̣ ܕܕ݂ܵܢܝܼܐܹܝܠ ܟܹܐܢܵܐ ܢܒ̣ܝܼܵܐ: ܘܬܸܥܘܿܠ ܩܕ݂ܵܡܵܘܗܝ ܕܲܠܣܲܟ̣ܠ̱ܘܵܬ̣̈ܟ̣ܘܿܢ ܬܲܓ̣ܙܲܪ ܫܪܵܝܵܐ܀ ܩ ܩܝܵܡܬܵܐ ܢܸܥܒܸܕ݂ ܠܥܲܢ̈ܝܼܕܲܝܟ̇ܘܿܢ ܒܝܵܘܡܵܐ ܐܚܪܵܝܵܐ: ܘܢܲܫܘܸܐ ܐܸܢܘܿܢ ܠܗ̇ܝ ܡܲܠܟ̇ܘܼܬ̣ܵܐ ܕܠܵܐ ܡܸܫܬܲܪܝܵܐ. ܪ ܪܘܼܚܵܐ ܕܩܘܼܕ݂ܫܵܐ ܗ̇ܝ ܕܲܠܒܸܫܬ̇ܘܿܢ ܡ̣ܢ ܗܵܘ ܡܲـ̈ܝܵܐ: ܕܒ̣ܵܗ̇ ܩܲܒܸ̇ܠܬ̇ܘܿܢ ܕܲܪܓ̣ܵܐ ܡܥܲܠܝܵܐ ܕܣܝܼܡܲܬ̣ ܒܢܲـ̈ܝܵܐ܀ ܫ ܫܠܵܡܵܐ ܘܫܲܝܢܵܐ ܘܣܲܒ̣ܪܵܐ ܘܚܘܼܒܵܐ ܛܵܒ̣ܵܐ ܘܕܲܟ̣ܝܵܐ: ܢܗܸܐ ܒܲܝܢܵܬ̣ܟ̣ܘܿܢ ܘܲܒ̣ܒܵܬܲܝ̈ܟ̇ܘܿܢ ܥܲܕ݂ ܠܫܘܼܡܠܵܝܵܐ. ܬ ܬܸܫܒ̇ܘܿܚܬܵܐ ܠܹܗ ܡ̣ܢ ܟܠ ܦܘܼܡܝܼ̈ܢ ܠܝܼܫܘܿܥ ܡܵܪܝܵܐ: ܥܲܠ ܡܵܘܗܲܒ̣ܬܹܗ ܕܠܵܐ ܡܸܬ̣ܡܲܠܠܵܐ ܒܠܸܫܵܢ ܒܪ̈ܲܝܵܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܐܚܪܹܢܵܐ ܕܝܼܠܹܗ ܒܹܗ ܒܩܵܠܵܐ܀

ܐ ܐܝܼܬ̣ܝܵܐ ܕܐܲܚܝܼܕ݂ ܒܪܸܡܙܵܐ ܕܚܲܝܠܹܗ ܠܥܵܠܡܹ̈ܐ ܘܲܒ̣ܪܵܐ: ܩܲܒܸ̇ܠ ܨܠܘܿܬܲܢ ܘܨܘܿܒ̣ ܘܫܲܪܲܪ ܒܲܢ ܚܘܼܒܵܐ ܘܣܲܒ̣ܪܵܐ. ܒ ܒܘܼܪܟܵܬ̣ܵܐ ܕܲܫܪܵܬ̤ ܒܒ̣ܵܬܹ̈ܐ ܕܟܹܐܢܹ̈ܐ ܗ̤ܝ ܡܵܪܝ ܐܲܫܪܵܐ: ܒܒ̣ܵܬܹ̈ܐ ܕܥܲܒ̣ܕܲܝ̈ܟ ܘܩܸܢܝܵܢܲܝ̈ܗܘܿܢ ܐܲܟ̣ܒܲܪ ܘܐܲܦܪܵܐ܀ ܓ ܓܲܙܵܟ̣ ܐܲܦܠܸܓ̣ ܠܲܣܢܝܼܩܘܼܬܲܢ ܕܠܵܟ̣ܘܼ ܚܵܝܪܵܐ: ܘܚܘܼܢ ܡܵܪܝ ܘܚܲܣܵܐ ܘܚܲܝܸܠ ܘܐܲܣܵܢ ܒܢܲܦ̮ܫܵܐ ܘܦܲܓ̣ܪܵܐ. ܕ ܕܪܘܿܫ ܠܲܢ ܐܘܼܪܚܵܐ ܕܲܠܘܵܬ̣ ܚܲܝܹ̈ܐ ܘܲܠܘܵܬ̣ ܫܪܵܪܵܐ: ܘܫܵܘܙܸܒ̣ ܘܦܲܨܵܢ ܡ̣ܢ ܢܸܟ̣ܝܵܢܹ̈ܐ ܕܲܒ̣ܥܸܠܕܲܪܵܐ܀ ܗ ܗܲܒ̣ܠܲܢ ܠܲܚܡܵܐ ܥܲܡ ܣܘܼܢܩܵܢܵܐ ܕܚܲܝܹ̈ܐ ܕܒܸܣܪܵܐ: ܘܲܫܒ̣ܘܿܩ ܚܵܘܒܲܝ̈ܢ ܕܠܵܟ̣ ܢܸܫܬܵܘܕܲܥ ܐܲܒ̣ܵܐ ܘܡܵܪܵܐ. ܘ ܘܲܥܒܸܕ݂ ܥܲܡܲܢ ܐܵܬ̤ܵܐ ܛܵܒ̣ܬ̣ܵܐ ܘܲܕ݂ܚܘܼܪܵܪܵܐ: ܕܡ̣ܢ ܥܲܒ̣ܕܘܼܬ̣ܵܐ ܕܒ̣ܝܼܫܵܐ ܘܦܲܠܚܵܘ̈ܗܝ ܩܲܫܝܲܝ̈ ܢܝܼܪܵܐ܀ ܙ ܙܟ̣ܝܼ ܠܐܵܠܘܿܨܲܝ̈ܢ ܘܐܲܪܘܲܚ ܠܸܒܲܝ̈ܢ ܡ̣ܢ ܡܘܼܪܡܵܪܵܐ: ܘܢܸܕ݂ܢܲܚ ܒܐܲܦܲܝ̈ܢ ܨܸܡܚܵܐ ܕܙܝܼܘܵܟ̣ ܗ̇ܘ ܢܲܗܝܼܪܵܐ. ܚ ܚܘܼܪ ܡ̣ܢ ܫܡܲܝܵܐ ܐܲܝܟ̣ ܪܲܚܡܵܢܵܐ ܘܲܚܙܝܼ ܨܲܥܪܵܐ: ܕܡܸܛܠ ܫܪܵܪܵܟ̣ ܡܲܫܩܹܝܢ ܠܥܲܡܵܟ̣ ܣܵܗܕܲܝ̈ ܫܘܼܩܪܵܐ܀ ܛ ܛܵܒ̣ܵܐ ܕܐܲܥܬܲܪ ܠܐܲܒ̣ܘܼܢ ܐܲܒ̣ܪܵܡ ܒܢܸܟ̣ـ̈ܣܹܐ ܘܥܘܼܬ̣ܪܵܐ: ܗ̤ܘ ܢܲܥܬܲܪܟ̣ܘܿܢ ܒܣܹܐܡܵܐ ܘܕܲܗܒ̣ܵܐ ܘܫܲܝܢܵܐ ܕܢܘܼܓ̣ܪܵܐ. ܝ ܝܵܘܡܲܝ̈ ܫܢܲܝ̈ܟ̇ܘܿܢ ܢܵܘܪܸܟ ܥܲܡܹܗ ܕܫܸܡܫܵܐ ܘܣܲܗܪܹ̈ܐ: ܘܲܠܙܲܪܥ̱ܟ̣ܘܿܢ ܢܲܬ̣ܩܸܢ ܒܐܲܪܥܵܐ ܒܫܘܼܒ̣ܚܵܐ ܘܗܸܕ݂ܪܵܐ܀ ܟ ܟܠܝܼܠܵܐ ܕܫܲܢ݇ܬܵܐ ܒܲܪܸܟ̣ ܒܪ̈ܲܚܡܲܝܟ ܚܠܝܼܛܲܝ̈ ܒܡܸܛܪܵܐ: ܘܐܲܣܓܵܐ ܦܹܐܪܹ̈ܐ ܥܲܡ ܐܲܒ̇ܒܵܢܹ̈ܐ ܘܚܸܛܹ̈ܐ ܘܚܲܡܪܵܐ. ܠ ܠܡܲܠܟܲܢ ܟܹܐܢܵܐ ܗܲܒ̣ ܙܵܟ̣ܘܼܬ̣ܵܐ ܐܲܝܟ̣ ܓܲܢ݇ܒܵܪܵܐ: ܕܲܒ̣ܚܵܘܣܵܢܵܐ ܘܪ̈ܲܚܡܹܐ ܢܲܦܢܸܐ ܠܘܵܬܲܢ ܚܝܵܪܵܐ܀ ܡ ܡܫܝܼܚܵܐ ܩܲܝܸܡ ܥܹܕܬܵܟ ܒܲܫܡܵܟ ܘܡܲܟܸ̇ـܟ̣ ܚܘܼܬ̣ܪܵܐ: ܕܲܡܫܲܥ̈ܠܲܝܵܐ ܕܕ݂ܵܒ̣ܪܼ݀ܢ ܝܲܠܕܹܝ̈ܗ̇ ܒܟ̣ܠܹܗ ܩܛܝܼܪܵܐ. ܢܢ ܢܲܛܲܪ ܠܟ̣ܘܼܡܪܹ̈ܝܗ̇ ܘܲܡܕܲܒܪܵܢܹܝܗ̇ ܘܲܗ̤ܘܝܼ ܫܘܼܪܵܐ: ܠܟܸܢܫܹ̈ܐ ܕܝܲܠܕܹܝ̈ܗ̇ ܕܠܵܐ ܢܸܬ̣ܢܹܟ̣ܘܿܢ ܡ̣ܢ ܣܵܩܘܿܪܵܐ܀ ܣ ܣܢܝܼܩܹ̈ܐ ܬܲܪܣܵܐ ܟܪ̈ܝܼܗܹܐ ܐܲܣܵܐ ܗ̤ܘܝܼ ܢܵܛܘܿܪܵܐ: ܡܚܲܝܒܹ̈ܐ ܚܲܣܵܐ ܡܚܝܼܠܹ̈ܐ ܣܵܘܣܵܐ ܒܚܲܝܠܵܟ̣ ܬܗܝܼܪܵܐ. ܥ ܥܠܝܼܒܹ̈ܐ ܫܵܘܙܸܒ̣ ܒܵܝܫܹ̈ܐ ܐܲܛܐܸܒ̣ ܐܲܢ݇ܬ̇ ܓܵܡܘܿܪܵܐ: ܘܐܲܓܸ̇ܢ ܐܝܼܕ݂ܵܟ̣ ܘܐܲܫܦܲܥ ܪ̈ܲܚܡܹܐ ܥܲܠ ܗܵܢ ܐܲܬ̣ܪܵܐ܀ ܦ ܦܪܼ݀ܫܵܐܝܼܬ̣ ܕܹܝܢ ܠܗܵܕܹܐ ܩܪܝܼܬ̣ܵܐ ܗ̤ܘܝܼ ܢܵܛܘܿܪܵܐ: ܘܐܲܣܓܵܐ ܒܓ̣ܵܘܵܗ̇ ܡܵܙܘܿܢ ܙܲܒ̣ܢܵܐ ܘܫܲܝܢܵܐ ܡܫܲܪܪܵܐ. ܨ ܨܠܘܿܬܲܢ ܩܲܒܸ̇ܠ ܘܬܸܗܘܸܐ ܩܕ݂ܵܡܲܝܟ ܒܲܕ݂ܡܘܼܬ̣ ܥܸܛܪܵܐ: ܘܚܲܣܵܐ ܘܐܲܢܝܼܚ ܠܟ̣ܠ ܥܲܢܝܼ̈ܕܲܝܢ ܒܲܓ̣ܢܘܿܢ ܢܘܼܗܪܵܐ܀ ܩ ܩܪ̈ܵܒܹܐ ܒܲܛܸܠ ܘܲܥܠܲܝܢ ܐܲܛܸܠ ܗ̤ܘܝܼ ܣܸܬܵܪܵܐ: ܘܢܲܛܲܪ ܠܟܸܢܫܲܢ ܕܲܡܣܲܒܲܪ ܒܵܟ̣ ܒܪܲܡܫܵܐ ܘܨܲܦܪܵܐ.ܪ ܪܲܚܸܡ ܡܵܪܝܵܐ ܘܚܘܼܣ ܥܲܠ ܥܲܡܵܟ̣ ܓܙܵܪܵܐ ܙܥܘܿܪܵܐ: ܘܐܲܪܝܼܡ ܪܹܫܲܢ ܘܐܲܚܘܿܕ݂ ܒܥܸܕ݂ܪܲܢ ܙܲܝܢܵܐ ܘܣܲܟ̇ܪܵܐ܀ ܫ ܫܲܠܸܡ ܨܹܐܕܲܝܢ ܚܹܝܠ ܫܘܼܘܕܵܝܵܟ̣ ܗ̇ܘ ܫܲܪܝܼܪܵܐ: ܕܠܵܐ ܬܸܫܬܲܒ̣ܩܘܼܢ ܝܲܬ̣ܡܹ̈ܐ ܒܐܲܪܥܵܐ ܕܠܵܐ ܣܵܥܘܿܪܵܐ. ܬ ܬܵܘܕܝܼ ܠܐܲܒ̣ܘܼܟ̣ ܘܣܸܓ̣ܕܬ̣ܵܐ ܠܪܘܼܚܵܐ ܘܠܵܟ̣ ܝܲܩܝܼܪܵܐ: ܫܘܼܒ̣ܚܵܐ ܘܲܥܠܲܝܢ ܚܢܵܢܵܟ̣ ܘܪ̈ܲܚܡܲܝܟ ܒܲܪ ܥܲܬ̇ܝܼܪܵܐ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܐܚܪܹܢܵܐ ܕܝܼܠܹܗ ܒܹܗ ܒܩܵܠܵܐ܀

ܐ ܐܹܝܠ ܐܲܠܵܗܵܐ ܪܲܒ̇ ܫܘܼܡܵܗܵܐ ܕܟ̣ܠ ܒܹܗ ܬܵܐܲܪ: ܨܘܼܬ̣ ܠܲܨܠܘܿܬܲܢ ܘܒܲܪܸܟ̣ ܠܟܸܢܫܲܢ ܘܐܲܥܬܲܪ ܒܬ̣ܘܼܐܵܪ. ܒ ܒܪܵܐ ܕܡ̣ܢ ܥܝܼܪܵܐ ܒܲܛܢܹܗ ܬܗܝܼܪܵܐ ܟܲܕ݂ ܐܸܣܬܲܒܲܪ: ܫܠܵܡܵܐ ܒܗܝܼܠܵܐ ܠܓܸܢܣܲܢ ܡܚܝܼܠܵܐ ܐܲܟ̣ܪܸܙ ܘܣܲܒܲܪ܀ ܓ ܓܲܢ݇ܒܵܪ ܥܵܠܡܹ̈ܐ ܘܒ̣ܵܚܲܪ ܬܗܘܿܡܹ̈ܐ ܗܲܒ̣ܠܲܢ ܕܢܵܘܓܲܪ: ܢܲܦ̮ܫܲܢ ܒܦܘܼܠܚܵܢ ܟܲܪܡܵܟ̣ ܪܘܼܚܵܢ ܘܒܹܗ ܢܸܬ̇ܬܲܓܲܪ. ܕ ܕܘܼܢ ܠܲܛܠܝܼܡܹ̈ܐ ܦܪܘܿܩ ܠܲܥܫܝܼܡܹ̈ܐ ܘܐܵܣܝܘܼ ܫܲܕܲܪ: ܠܡܸܬ̣ܢܵܘܠܵܢܹ̈ܐ ܘܲܠܟܹܐܒ̣ܬ̣ܵܢܹ̈ܐ ܐܲܚܠܸܡ ܘܥܲܕܲܪ܀ ܗ ܗܓ̣ܘܿܡ ܫܵܓ̣ܘܿܫܹ̈ܐ ܕܚܘܿܩ ܡܲܟ̣ܬܵܫܹ̈ܐ ܕܠܵܐ ܢܸܬ̇ܬܲܗܲܪ: ܥܲܡܵܟ̣ ܓܲܒ̣ܝܵܐ ܡ̣ܢ ܫܲܒܵܝܵܐ ܒܝܼܫܵܐ ܕܡܲܗܲܪ. ܘ ܘܲܠܟ̣ܘܼܬ̣ܡܵـ̈ܬܲܢ ܘܠܲܚܒ̣ܵܪ̈ܵܬܲܢ ܒܙܘܿܦܵܟ̣ ܚܵܘܲܪ: ܘܲܠܫܘܼܪ ܒܝܼܫܵܐ ܣܵܢܐܵܐ ܟܬ̣ܝܼܫܵܐ ܒܚܲܝܠܵܟ̣ ܢܸܫܘܲܪ܀ ܙ ܙܘܼܢ ܡܸܣܟܹܢܹ̈ܐ ܘܲܠܡܲܣܟ̇ܠܵܢܹ̈ܐ ܫܵܘܙܸܒ̣ ܡ̣ܢ ܓܙܵܪ: ܕܝܼܢܲܝ̈ܟ ܟܹܐܢܹ̈ܐ ܘܲܠܟ̣ܠ ܟܕ݂ܝܼܢܹ̈ܐ ܚܘܼܪܵܪ ܐܲܓ̣ܙܲܪ. ܚ ܚܘܼܢ ܠܐܲܠܝܼ̈ܨܹܐ ܘܪܲܡܪܸܡ ܬܪ̈ܝܼܨܹܐ ܘܠܵܐ ܢܸܫܬܵܘܚܲܪ: ܚܹܝܠ ܥܘܼܕ݂ܪ̈ܵܢܲܝܟ ܡ̣ܢ ܣܵܓ̣ܘܿܕܲܝ̈ܟ ܕܠܲܚܢܵܢܵܟ̣ ܚܵܪܘ܀ ܛ ܛܵܒ̣ܵܐ ܕܠܲܓ̣ܒ̣ܵܘܗ̈ܝ ܐܵܦ ܘܲܠܕ݂ܵܚܠܵܘܗ̈ܝ ܩܝܵܡܵܐ ܢܵܛܲܪ: ܠܢܸܫܹ̈ܐ ܘܓܲܒ̣ܪܹ̈ܐ ܛܠܵܝܹ̈ܐ ܘܫܲܒ̣ܪܹ̈ܐ ܒܪ̈ܲܚܡܲܝܟ ܢܲܛܲܪ. ܝ ܝܑܼܫܘܿܥ ܡܵܪܲܢ ܕܲܒ̣ܓ̣ܵܘ ܦܲܓ̣ܪܲܢ ܥܡܲܪ ܐܵܦ ܕܲܝܲܪ: ܠܛܵܥܝܲܝ̈ ܒܬ̣ܵܘܫܵܐ ܒܐܘܼܪܲܚ ܒܝܼܫܵܐ ܐܲܗܦܸـܟ̣ ܠܲܛܝܵܪ܀ ܟ ܟܠ ܕܩܵܪܹܐ ܠܵܟ̣ ݂ܵܪܲܢ ܘܠܲܫܡܵܟ̣ ܡܲܕܟܲܪ ܒܟ̣ܠ ܟܲܪ: ܫܡܲܝ ܒܵܥܘܼܬܹܗ ܘܗܲܒ̣ܫܹ̈ܐܠܵܬܹܗ ܥܓܲܠ ܕܠܵܐ ܥܘܼܟܵܪ. ܠ ܠܪ̈ܵܥܵܘܵܬ̣ܵܐ ܕܟ̣ܠ ܡܲܪ̈ܥܝܵܬ̣ܵܐ ܐܲܝܟ̣ ܒܲܪ ܠܵܘܠܵܪ: ܢܲܨܲܚ ܐܸܢܘܿܢ ܘܲܕ݂ܚܘܿܩ ܡܸܢܗܘܿܢ ܫܘܼܢܵܕ݂ ܛܘܼܠܵܪ܀ ܡ ܡܲܠܟܵܐ ܡܫܝܼܚܵܐ ܥܘܼܡܪܵܐ ܢܝܼܚܵܐ ܗܲܒ̣ܠܲܢ ܕܢܸܥܡܲܪ: ܒܥܵܠܡܵܐ ܗܵܢܵܐ ܘܡܵܙܘܿܢ ܙܲܒ̣ܢܵܐ ܠܲܢ ܠܵܐ ܢܸܓܡܲܪ. ܢܢ ܢܒܲܥ ܚܵܘܣܵܢܵܐ ܘܲܡܥܝܼܢ ܚܢܵܢܵܐ ܨܘܼܕ݂ ܘܐܸܨܛܲܢܲܪ: ܠܨܵܐܹܕ݂ ܢܲܦ̮ܫܲܢ ܘܥܲܡ ܓܒܲܝ̈ܟ ܐܲܫܘܵܢ ܠܡܸܣܲܒ̣ ܕܹܝܢܵܪ܀ ܣ ܣܘܿܟ̣ ܡܵܪܝ ܛܵـ̈ܒ̣ܵܢ ܒܟ̣ܠ ܐܲܬ̣ܪ̈ܵܘܵܢ ܕܢܸܣܒܲܥ ܟܠܒ̇ܣܲܪ: ܕܲܠܚܵܕ݂ܘܿܪܹ̈ܐ ܘܲܠܥܵܡܘܿܪܹ̈ܐ ܥܒ̣ܘܼܪܲܢ ܢܥܲܣܲܪ. ܥ ܥܢܝܼ ܡܵܪܝ ܘܥܲܕܲܪ ܠܥܲܒ̣ܕܲܝ̈ܟ ܘܒܲܕܲܪ ܠܟ̣ܠ ܡ̇ܢ ܕܓ̣ܵܥܲܪ: ܒܟܸܢܫܵܟ̣ ܦܪܝܼܩܵܐ ܕܲܒ̣ܟ̣ܠ ܙܸܕ݂ܩܵܐ ܠܥܹܕܬܵܟ̣ ܣܵܥܲܪ܀ ܦ ܦܲܪܢܸܣ ܕܥܲܡܵܟ̣ ܕܗܲܝܡܸܢ ܒܲܫܡܵܟ̣ ܒܟ̣ܠ ܡܵܐ ܕܫܵܦܲܪ: ܘܗܲܒ̣ܠܹܗ ܚܲܝܠܵܐ ܥܲܡ ܚܘܼܝܵܠܵܐ ܕܠܵܟ̣ ܒܟ̣ܠ ܢܸܫܦܲܪ. ܨ ܨܠܘܿܬܲܢ ܩܲܒܸ̇ܠ ܘܨܵܐܬܲܢ ܚܲܠܸܠ ܘܠܵܐ ܢܸܬ̣ܒܲܨܲܪ: ܐܝܼܩܵܪ ܟܵܗܢܲܝ̈ܢ ܘܝܵܘܡܲܝ̈ ܚܲܝܲܝ̈ܢ ܠܵܐ ܬܘܼܒ̣ ܬܒܲܨܲܪ܀ ܩ ܩܲܝܸܡ ܡܲܠܟܲܝ̈ܢ ܘܚܸܡܬ̣ܗܘܿܢ ܕܲܥܠܲܝܢ ܫܲܗܵܐ ܘܐܲܩܲܪ: ܘܲܒ̣ܫܲܘܝܘܼܬ̣ܗܘܿܢ ܗܲܒ̣ܠܲܢ ܕܲܠܗܘܿܢ ܢܸܦܪܘܿܥ ܐܝܼܩܵܪ. ܪ ܪܵܥܝܵܐ ܪܲܒܵܐ ܣܲܒ̣ܪܵܐ ܘܚܘܼܒܵܐ ܘܗܘܼܝܡܵܢ ܫܲܪܲܪ: ܒܠܸܒ̇ ܡܲܪܥܝܼܬ̣ܵܟ̣ ܕܲܡܣܲܟ̇ܝܵܐ ܠܵܟ̣ ܘܠܵܐ ܬܸܬ̣ܒܲܥܪܲܪ܀ ܫ ܫܘܼܘܕܵܝ ܡܸܠܲܝ̈ܟ ܨܹܝܕ݂ ܒܲܝܬܵܝܲܝ̈ܟ ܒܪ̈ܲܚܡܲܝܟ ܐܲܫܲܪ: ܕܢܵܣܒ̇ܝܼܢ ܐܪ̈ܵܙܲܝܟ ܬܚܲܕܸܐ ܒܛܘܼܒܲܝ̈ܟ ܥܲܡ ܕܐܸܬ̣ܟܲܫܲܪܘ. ܬ ܬܩܵܘܸܐ ܠܘܵܬܲܢ ܡܢܲܛܪܵܢܝܼܬܲܢ ܘܒ̣ܵܗ̇ ܠܲܢ ܣܲܬܲܪ: ܗ̤ܝ ܒܛܝܼܠܘܼܬ̣ܵܟ̣ ܐܵܦ ܛܲܝܒ̇ܘܼܬ̣ܵܟ̣ ܒܲܢ ܬܸܬ̣ܝܲܬܲܪ܀ ♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܐܚܪܹܢܵܐ ܕܩܲܫܝܼܫܵܐ ܝܑܼܣܪܵܝܹܠ ܐܲܠܩܘܿܫܵܝܵܐ. ܘܐܝܼܬ̣ܵܘܗܝ ܥܲܠ ܣܸܕ݂ܪܵܐ ܕܐܵܬ̣̈ܘܵܬ̣ܵܐ ܕܐܵܠܲܦ ܒܹܝܬ̣. ܟܲܕ݂ ܒܟ̣ܠ ܬܲܪܥܵܐ ܡܣܲܝ̈ܟ̣ܵܢ ܒܹܗ ܬܲܪܬܲܥܸܣܪܹ̈ܐ ܐܵܬ̣̈ܘܵܢ. ܒܩܲܕ݂ܡܵܝܬܹ̇ܗ ܗܵܟܹܝܠ ܐܲܪܒܲܥ ܘܲܒ̣ܚܲܪܬܹܗ ܬܡܵܢܹܐ.

ܐ ܐܘܿ ܡܵܪܹܟܠ ܕܟܲܕ݂ ܟܣܸܐ ܡ̣ܢ ܟܠ ܒܝܵܬܹܗ ܓܵܐܹ̇ܐ:

ܐ ܐܲܠܸܦܲܝܢ ܣܟ̣ܘܿܠܝ݇ ܘܒܲܪܸܟܲܝܢ ܒܟ̣ܠ ܡܵܐ ܕܠܵܟ̣ ܝܵܐܹ̇ܐ.

ܐ ܐܘܿ ܥܵܕ݂ܘܿܪ ܟܠ ܘܲܡܕܲܒܲܪ ܟܠ ܕܣܵܟ̣ ܠܵܐ ܠܵܐܹ̇ܐ:

ܐ ܐܲܪܸܫ ܠܲܡܟ̣ܘܼܠ ܣܵܢܐܲܢ ܢܵܟ̣ܘܿܠ ܡܠܸܐ ܛܘܼܡܵܐܹ̈ܐ܀

ܒ ܒܵܪܝܲܢ ܛܵܒ̣ܵܐ ܫܦܝܼܥ ܚܘܼܒܵܒ̣ܵܐ ܠܲܒ̣ܪ̈ܲܝܟ ܚܲܒܸ̇ܒ̣܆

ܒ ܒܲܒ̣ܪܵܟ̣ ܐܲܒ̣ܵܐ ܥܲܡ̇ܢ ܐܵܘܵܐ ܘܕܸܚܠܲܢ ܠܲܒܸ̇ܒ̣.

ܒ ܒܪܘܼܚܵܟ̣ ܠܓ̣ܵܘܵܐ ܥܲܠ ܛܠܸܐ ܘܣܵܒ̣ܵܐ ܪ̈ܲܚܡܲܝܟ ܫܲܒܸ̇ܒ̣܆

ܒ ܒܲܢ ܡܵܪܝ ܚܵܘܵܐ ܛܵܒ̣ܬ̣ܵܟ̣ ܕܛܵܒ̣ܵܐ ܕܫܘܼܒ̣ܚܵܟ̣ ܢܝܲܒܸ̇ܒ̣܀

ܓ ܓܵܡܘܿܪ ܓܡܝܼܪܹ̈ܐ ܠܫܘܼܦܪ̈ܲܝܟ ܗܕ݂ܝܼܪܹ̈ܐ ܗܵܘܢܲܢ ܪܲܓܸ̇ܓ̣܆

 ܓ ܓܢܝܼܙ ܡ̣ܢ ܥܝܼܪܹ̈ܐ ܠܒ̣ܝܼܫܹ̈ܐ ܨܥܝܼܪܹ̈ܐ ܡܸܢܲܢ ܕܲܓܸ̇ܓ̣.

 ܓ ܓܸܠܝܵܢ ܬܐܝܼܪܹ̈ܐ ܐ݇ܪ̈ܵܙܲܝܟ ܬܗܝܼܪܹ̈ܐ ܥܠܵܘܗܝ ܠܲܢ ܦܲܕ݂ܓܸ̇ܓ̣܆

ܓ ܓܢܘܿܢܲܝ̈ܟ ܩܛܝܼܪܹ̈ܐ ܕܲܒ̣ܪܘܿܡ ܢܛܝܼܪܹ̈ܐ ܒܗܘܿܢ ܠܲܢ ܬܲܓܸ̇ܓ̣܀

ܕ ܕܵܓܹܠ ܡܲܕܥܲܝ̈ܢ ܪܲܚܸܡ ܥܠܲܝܢ ܘܠܵܐ ܢܸܬ̣ܓܲܕܲܕ݂܆

ܕ ܕܘܼܒܵܪ ܚܲܝܲܝ̈ܢ ܘܟ̣ܠܗܘܿܢ ܝܵܘܡܲܝ̈ܢ ܥܠܲܝܟ ܢܸܬ̣ܝܲܕܲܕ݂.

ܕ ܕܲܟܵܐ ܡܘܼܡܲܝ̈ܢ ܘܐܲܢܗܲܪ ܙܵܘ̈ܥܲܝܢ ܕܒ̣ܵܟ̣ ܢܸܨܛܲܕܲܕ݂܆

ܕ ܕܚܘܿܩ ܠܣܵܩܘܿܪ̈ܲܝܢ ܒܟ̣ܠ ܙܢܲܝ̈ܢ ܛܵܟ̣ ܢܸܬ̣ܦܲܕܲܕ݂܀

ܗ ܗܲܕܲܪ ܠܟܸܢܫܲܢ ܟܲܣܝܵܐ ܠܲܒ̣ܫܲܢ ܕܪܲܒ̇ ܫܘܼܡܵܗܹܗ܆

ܗ ܗܒ̣ܠܹܗ ܕܢܸܥܫܲܢ ܣܲܒ̣ܪܹܗ ܡܸܥܫܲܢ ܒܫܘܼܒ̣ܩܵܢ ܚܛܵܗܹܗ.

ܗ ܗܘ̤ܝܼ ܠܹܗ ܡܕܲܪܫܵܢ ܕܢܸܕܲܥ ܒܦܘܼܪܫܵܢ ܕܐܲܢ݇ܬ̇ ܐܲܠܵܗܹܗ܆

ܗ ܗܲܕܸܿܣ ܢܲܦ̮ܫܲܢ ܥܠܵܘܗܝ ܡ̣ܢ ܡܬ̣ܵܘܫܵܢ ܦܩܘܿܕ݂ ܟܠ ܓܵܗܹܗ܀

ܘ ܘܥܸܕ݂ ܨܹܐܕܲܝܟ ܢܵܣܒܲܝ̈ ܐܪ̈ܵܙܲܝܟ ܕܲܠܡܸܚ̄ܙܝܵܟ̣ ܣ̣ܘܵܘ܆

ܘ ܘܐܲܢܗܲܪ ܐܲܦܲܝ̈ܟ ܥܲܠ ܣܵܓ̣ܘܿܕܲܝ̈ܟ ܕܠܲܣܒܲܪܬ̣ܵܟ̣ ܠ̣ܘܵܘ.

ܘ ܘܲܒ̣ܝܲܕ ܪ̈ܲܚܡܲܝܟ ܡܢܝܼ ܠܗܘܿܢ ܒܪ̈ܲܚܡܲܝܟ ܕܲܠܛܘܼܒ̣ܵܟ̣ ܫ̣ܘܵܘ܆

ܘ ܘܢܸܥܬ̄ܪܘܼܢ ܒܓܲܙܲܝ̈ܟ ܐܲܝܟ̣ ܟܵܪ̈ܘܿܙܲܝܟ ܕܠܵܟ̣ ܡܬܲܠ̈ܡ̄ܕܹܐ ܗܘ̤ܵܘ܀

ܙ ܙܪܘܿܥ ܒܚܘܼܫܵܒܲܢ ܙܪܲܥ ܟܠ ܛܵܒ̣ܵـ̈ܢ ܕܠܵܐ ܢܸܬ̣ܒܲܙܲܙ܆

ܙ ܙܝܼܘܵܟ̣ ܒܓ̣ܵܘܲܢ ܐܲܕ݂ܢܲܚ ܘܓ̣ܵܘܵܢ ܕܒ̣ܵܟ̣ ܢܸܬ̣ܥܲܙܲܙ.

ܙ ܙܲܝܢܵܟ̣ ܚܵܘܵܢ ܕܢܸܙܟܸ̇ܐ ܠܚܵܘܲܢ ܘܠܵܐ ܢܸܬ̇ܬܲܙܲܙ܆

 ܙ ܙܲܝܲܥ ܠܫܵܒܲܢ ܕܗ̤ܘ ܒܲܢܫܵܒܲܢ ܢܸܫܬ̇ܟܲܚ ܡܠܲܙܲܙ܀

ܚ ܚܲܣܵܐ ܚܛܝܼܬܲܢ ܐܘܿ ܪܹܫܝܼܬܲܢ ܘܲܪܫܘܿܡ ܒܲܨܚܵܚ܆

ܚ ܚܘܼܬܵܬ̣ ܓܒ̣ܝܼܬܲܢ ܒܦܵܐ݇ܢ ܬܵܘܕܝܼܬܲܢ ܕܢܸܗܘܸܐ ܡܨܲܚܲܚ.

ܚ ܚܪܘܿܒ̣ ܠܲܡܡܝܼܬ̣ܵܢ ܥܣܘܿܣ ܕܐܲܡܝܼܬܲܢ ܕܢܸܬ̣ܚ݇ܙܸܐ ܡܦܲܚܲܚ܆

ܚ ܚܪܘܿܓ̣ ܬܲܨܒ̇ܝܼܬܲܢ ܕܚܘܿܩ ܬܲܟ̣ܪܝܼܬܲܢ ܩܕ݂ܵܡ ܕܢܸܬ̇ܕܲܚܲܚ܀

ܛ ܛܲܒ̣ܥܵܟ̣ ܪܘܼܚܲܢ ܒܕܲܕ݂ܠܸܒ̇ ܠܘܼܚܲܢ ܪܲܫܸܡ ܝܲܛܸܛ܆

ܛ ܛܲܗܪܵܟ̣ ܫܘܼܒ̣ܚܲܢ ܠܦܲܓ̣ܪܲܢ ܘܪܘܼܚܲܢ ܢܲܥܛܸܦ ܢܡܲܪܛܸܛ.

 ܛ ܛܲܥܡܵܟ̣ ܒܡܘܼܚܲܢ ܣܝܼܡ ܕܣܵܪܘܿܚܲܢ ܠܲܢ ܠܵܐ ܢܗܲܛܸܛ܆

ܛ ܛܲܠܸܩ ܠܕ݂ܵܠܚܵܢ ܡ̣ܢ ܓܵܘ ܟܘܼܪܚܲܢ ܘܥܲܝܢܵܘܗ̈ܝ ܚܛܸܛ܀

ܝ ܝܵܗ ܒܚܵܘܣܵܢܵܟ̣ ܐܲܦܢܵܢ ܠܦܵܐܢܵܟ̣ ܡ̣ܢ ܫܒ̣ܝܼܠ ܛܘܼܥܝܲܝ܆

ܝ ܝܘܿܣܛܘܿܣ ܠܥܵـ̈ܢܵܟ̣ ܛܲܪ ܒܐܘܼܟ̣ܦܵܢܵܟ̣ ܒܓܸܠܝܵܐ ܘܛܘܼܫܝܲܝ.

ܝ ܝܑܼܫܘܿܥ ܚܢܵܢܵܟ̣ ܒܝܘܿܡ ܒܘܼܚܪܵܢܵܟ̣ ܢܸܥܒ̇ܕܲܢ ܩܵܢ̈ܝܲܝ܆

ܝ ܝܵܪܬ̇ܘܼܬ̣ ܓܢܘܿܢܵܟ̣ ܘܡ̣ܢ ܝܲܡܝܼܢܵܟ̣ ܢܩܘܼܡ ܥܲܡ ܬܲܫܒ̇ܝܵܝ܀

ܟ ܟܪܝܼܣܛܘܿܣ ܡܓܲܢܣܵܐ ܒܕ݂ܝܼܠܲܢ ܓܸܢܣܵܐ ܠܕܲܥܠܲܝܢ ܡܬܲܟܲܟ̣܆

ܟ ܟܐܝܼ ܒܹܗ ܘܦܲܪܣܵܐ ܢܟܸܠ ܕܒܹܗ ܘܦܘܼܪܣܵܐ ܕܢܸܬ̇ܬ̇ܕܝܼܩ ܡܦܲܟܲܟ̣.

ܟ ܟܠ ܢܲܣܝܼܣܵܐ ܕܒ̣ܵܟ ܗ̣݇ܘ ܓܵܘܣܵܐ ܐܵܚܹܕ݂ ܒܡܘܼܟܵܟ̣܆

ܟ ܟܹܐܒ̣ܵܘܗ̈ܝ ܐܲܣܵܐ ܘܚܵܘܒܵܘܗ̈ܝ ܚܲܣܵܐ ܘܲܥܲܠܵܝܗܝ ܡ̣ܢ ܡܟ̣ܵܟ̣܀

ܠ ܠܥܹܕܬܵܟ̣ ܣܲܬܲܪ ܒܟܸܢܦܲܝ̈ܟ ܣܸܬܵܪ ܘܲܥܠܹܝܗ̇ ܛܲܠܸܠ܆

ܠ ܠܪܵܥܝܵܗ̇ ܢܲܛܲܪ ܘܨܹܐܕܲܝܟ ܐܲܝܟ̣ ܥܛܲܪ ܨܠܘܿܬܹܗ ܥܲܠܸܠ.

ܠ ܠܝܲܠܕܹܝ̈ܗ̇ ܐܲܟ̣ܒܲܪ ܘܚܸܣܕܗܘܿܢ ܐܲܥܒܲܪ ܘܝܵܬ̣ܗܘܿܢ ܨܲܠܸܠ܆

ܠ ܠܣܵܢܐܹܝ̈ܗ̇ ܒܟ̣ܠ ܕܵܪ ܛܲܠܸܩ ܘܒܲܕܲܪ ܘܲܠܗܘܿܢ ܠܲܠܸܠ܀

ܡ ܡܲܠܟܵܐ ܕܡ̣ܢ ܡܬ̣ܘܿܡ ܚܘܼܒܹܗ ܐܲܝܟ̣ ܬܗܘܿܡ ܫܦܝܼܥ ܘܲܡܝܲܡܲܡ܆

ܡ ܡܪܲܝܡܵܐ ܕܡ̣ܢ ܪܘܿܡ ܡܣܝܼܩ ܪܹܝܚ ܗܹܪܘܿܡ ܠܲܕ݂ܒܹܗ ܡܬܲܡܲܡ.

ܡ ܡܫܲܒ̇ܚܵܐ ܕܠܵܐ ܬܚܘܼܡ ܕܫܘܼܒ̣ܚܹܗ ܒܩܘܼܪ ܘܚܘܼܡ ܒܦܘܼܡ ܟܠ ܡܠܲܡܲܡ:

ܡ ܡܸܢܲܢ ܙܓ̣ܘܿܪ ܩܛܘܿܡ ܠܕܹܐ݇ܒ̣ ܕܣ̣ܵܡ ܒܲܢ ܟܬ̣ܘܿܡ ܘܒ̣ܵܟ̣ ܢܸܨܛܲܡܲܡ܀

ܢܢ ܢܸܩܦܘܿܠ ܢܘܼܗܪܵܟ̣ ܘܨܸܡܚܲܝ̈ ܙܲܗܪܵܟ̣ ܥܲܡܛܵܢ ܗܵܘܢܲܢ܆

ܢܢ ܢܦܲܪܢܸܣ ܪܸܡܙܵܟ̣ ܡ̣ܢ ܒܹܝܬ̣ ܓܲܙܵܟ̣ ܡܵܙܘܿܢ ܙܲܒ̣ܢܲܢ.

ܢܢ ܢܲܫܦܲܪ ܫܘܼܦܪܵܟ̣ ܒܲܨܦܵܚ ܨܲܦܪܵܟ̣ ܟܲܡܗܘܼܬ̣ ܓܵܘܢܲܢ܆

ܢܢ ܢܸܫܒܘܿܩ ܚܢܵܢܵܟ̣ ܒܝܘܿܡ ܓܸܠܝܵܢܵܟ ܡܵܐ ܕܠܵܟ̣ ܚܵܒ̣ܢܲܢ܀

ܣ ܣܒܲܪ ܙܲܕܝܼܩܝܼ̈ܢ ܥܲܠ ܕܲܣܢܝܼܩܝܼܢ ܪ̈ܲܚܡܲܝܟ ܪܲܣܸܣ܆

ܣ ܣܲܝܲܥ ܦܪܝܼܩܝܼܢ ܒܵܟ̣ ܕܠܵܟ̣ ܠܗܝܼܩܝܼܢ ܥܲܠ ܕܲܡܥܲܣܸܣ.

ܣ ܣܥܘܿܪ ܠܲܥܫܝܼܩܝܼܢ ܐܵܦ ܠܕܲܕ݂ܢܝܼܩܝܼܢ ܓܗܵܝܵܐ ܦܲܣܸܣ܆

ܣ ܣܲܝܸܢ ܩܪ̈ܝܼܩܝܼܢ ܕܲܒ̣ܬܲܫܢܝܼ̈ܩܝܼܢ ܠܗܘܿܢ ܗ̤ܘ ܣܲܣܸܣ܀

ܥ ܥܵܢܹܐ ܠܟ̣ܠ ܡܠܝܼܠ ܣܲܒ̣ܪܲܢ ܕܲܬ̣ܟ̣ܝܼܠ ܥܠܲܝ̤ ܘܒ̣ܵܟ̣ ܡܫܲܥܲܥ܆

ܥ ܥܣܘܿܣܵܐ ܕܲܢܟ̣ܝܼܠ ܠܲܢ ܢܚܵܘܹܝܘܗܝ ܚܠܝܼܠ ܬܩܘܿܦ ܘܲܡܪܲܥܲܥ.

ܥ ܥܵܒ̣ܘܿܕ݂ ܕܠܹܗ ܕܓ̣ܝܼܠ ܟܠ ܩܕ݂ܵܡ ܕܠܹܗ ܓܒ̣ܝܼܠ ܠܥܲܡܲܢ ܡܦܲܥܲܥ܆

ܥ ܥܵܝܹܗ ܐܲܓ̣ܝܼܠ ܕܲܫܦܸܐ ܘܲܨܠܝܼܠ ܢܸܦܘܿܩ ܡ̣ܢ ܨܥܵܥ܀

 ܦ ܦܲܓ̣ܪܵܟ̣ ܘܲܕ݂ܡܵܟ̣ ܢܚܲܣܘܿܢ ܥܲܡܵܟ̣ ܘܲܥܠܲܝܢ ܥܲܦܸܦ܆

ܦ ܦܘܼܪܢܵܣ ܦܸܣܛܡܵܟ̣ ܘܪܸܕ݂ܝܝ݇ ܪܘܼܚܵܡܵܟ̣ ܨܹܐܕܲܝܢ ܬܲܦܸܦ.

ܦ ܦܵܪܩܲܢ ܒܲܫܡܵܟ̣ ܦܪܘܿܩ ܠܟ̣ܠ ܡܪܲܫܡܵܟ̣ ܘܫܸܦܠܲܢ ܓܲܦܸܦ܆

ܦ ܦܩܘܿܕܲܝܢ ܒܝܵܘܡܵܟ̣ ܡܵܐ ܕܒܲܡܪܵܘܡܵܟ̣ ܠܲܓ̣ܒܲܝ̈ܟ ܬܦܲܦܸܦ܀

ܨ ܨܒ̣ܝܼ ܒܲܨܠܘܿܬܲܢ ܘܲܠܢܵܟ̣ܘܿܬܲܢ ܕܒܲܛܟ̣ܘܿܢ ܡܢܲܨܸܨ܆

ܨ ܨܹܝܕ݂ ܕܵܘܝܘܼܬܲܢ ܒܚܲܝܠܵܟ̣ ܕܚܲܝܠܬ̣ܵܢ ܪܹ̈ܫܵܘܗܝ ܪܲܨܸܨ.

ܨ ܨܠܝܼܒ̣ܵܟ̣ ܡܚܲܕ݂ܬ̣ܵܢ ܥܲܬ̇ܝܼܩܘܼܬܲܢ ܕܲܡܩܲܒܲܥ ܒܨܹܨ܆

ܨ ܨܵܐ݇ܬ̣ ܨܲܥܠܘܼܬܲܢ ܢܫܝܼܓ̣ ܕܣܲܢܝܘܼܬܲܢ ܠܲܢ ܠܵܐ ܬܒܲܨܸܨ܀

ܩ ܩܲܒܸ̇ܠ ܨܵܘܡܲܢ ܘܲܕ݂ܚܘܿܩ ܠܗܵܘ̇ ܡ̇ܢ ܕܲܥܠܲܝܢ ܡܦܲܩܸܩ܆

ܩ ܩܲܕܸܿܫ ܦܘܼܡܲܢ ܘܲܠܟ̣ܵܬ̣ܘܿܡܲܢ ܫܲܚܸܩ ܘܕܲܩܸܩ.

ܩ ܩܲܣܡܸܣ ܫܘܼܦܪܲܢ ܘܒܲܫܒ̣ܘܿܚ ܨܵܘܪܲܢ ܝܲܩܢܸܕ ܘܥܲܩܸܩ܆

ܪ ܪܘܼܚܵܟ ܠܟܸܢܫܲܢ ܢܸܗܘܸܐ ܡܫܲܪܫܵܢ ܥܲܠ ܫܪܵܪ ܒܫܘܼܪܵܪ܆

ܪ ܪܘܼܫܡܵܟ ܢܩܲܕܫܲܢ ܒܓ̣ܵܘ ܒܹܝܬ̣ ܩܘܼܕ݂ܫܲܢ ܘܐܲܥܛܦܲܢ ܐܘܼܪܵܪ.

ܪ ܪܸܬ̣ܝܵܟ ܢܟܲܢܫܲܢ ܡ̣ܢ ܫܒ̣ܝܼܠ ܬܵܘܫܲܢ ܘܒܹܗ ܢܸܨܛܲܪܲܪ܆

ܪ ܪܸܬ̣ܡܵܟ̣ ܢܕܲܪܫܲܢ ܒܟ̣ܠ ܙܸܢ ܡܦܲܪܫܵܢ ܕܡ̣ܢ ܙܠܸܡ ܡܚܲܪܲܪ܀

ܫ ܫܡܲܥ ܡܵܪܝ ܒܩܵܠܲܢ ܘܬ̣ܵܐ ܠܐܝܼܵܠܲܢ ܕܠܲܢ ܠܵܐ ܢܢܲܫܸܩ܆

ܫ ܫܹܐܕ݂ܵܐ ܡܲܗܠܵܢ ܕܲܠܚܘܼܒܵܠܲܢ ܒܲܢ ܗ̤ܘ ܡܲܫܸܫ.

ܫ ܫܘܼܦܪܵܟ ܢܚܲܠܠܲܢ ܘܡ̣ܢ ܝܲܡ ܓܲܠܠܲܢ ܛܒ̣ܵܥܲܢ ܫܲܫܸܫ܆

ܫ ܫܘܼܒ̣ܚܵܟ̣ ܢ̈ܡܲܠܠܵܢ ܣܸܦـ̈ܘܵܬ̣ ܟܠܲܢ ܘܒܹܗ ܠܲܢ ܩܲܫܸܫ܀

ܬ ܬܸܫܪܸܐ ܒܓ̣ܵܘܟ̣ܘܿܢ ܛܲܝܒ̇ܘܼܬ̣ ܡܵܪܟ̣ܘܿܢ ܠܥܵܠܲܡ ܒܚܘܼܬܵܬ̣܆

ܬ ܬܢܲܛܲܪ ܠܟ̣ܠܟ̣ܘܿܢ ܡ̣ܢ ܡܲܟ̇ܝܵܢܟ̣ܘܿܢ ܒܝܼܫܵܐ ܡܢܲܬܲܬ̣.

ܬ ܬܫܲܪܲܪ ܒܠܸܒ̇ܟ̣ܘܿܢ ܗܲܝܡܵܢܘܼܬ̣ܟ̣ܘܿܢ ܕܬܸܩܢܘܿܢ ܣܘܼܬܵܬ̣܆

ܬ ܬܲܕ݂ܢܲܚ ܥܠܲܝܟ̇ܘܿܢ ܢܗܘܿܪ ܐܲܠܵܗܟ̣ܘܿܢ ܕܡܸܢܹܗ ܡܕܲܬܲܬ̣܀

♰ ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܥܲܡܵܐ.

ܫܠܸܡܘ ܚܘܼܬ̣ܵܡܹ̈ܐ ܕܥܲܠ ܬܪܲܥ ܩܲܢܟܹ̇ܐ:

ܘܠܐܲܠܵܗܵܐ ܫܘܼܒ̣ܚܵܐ ܐܲܡܝܼܢܵܐ ܐܵܡܹܝܢ