ܥܘܿܢ̈ܝܵܬ݂ܵܐ ܕܩܲܢܟܹ̈ܐ ܕܟ݂ܠܵܗ݁ ܫܲܢ݇ܬܵܐ

ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܣܘܼܒܵܪܵܐ. ܒܩܵܠ: ܡܫܝܼܚܵܐ ܐܸܬ݂ܝܼܠܸܕ݂.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܙܲܕ݁ܝܼܩܵܐ ܘܲܬ݂ܪܝܼܨܵܐ. ܥܝܼܪܵܐ ܓܲܒ݂ܪܝܹܠ ܐܸܡܲܪ ܠܲܙܟܲܪܝܵܐ. ܕܲܒ݂ܪܵܐ ܗܵܘܹ̇ܐ ܠܵܟ݂ ܘܝܘܿܚܲܢܵܢ ܡܸܬ݂ܩܪܸܐ. ܘܗ̤ܘ ܢܸܕ݂ܪܘܿܫ ܐܘܼܪܚܵܐ ܩܕ݂ܵܡܵܘܗܝ ܕܒܲܪ ܡܲܠܟܵܐ. ܕܐܵܬ̣ܹܐ ܒܬܸܫܒ݁ܘܿܚܬܵܐ ܠܦܘܼܪܩܵܢ ܟܠܗܹܝܢ ܒܸܪ̈ܝܵܬ݂ܵܐ. ܬܢܝܼ. ܫܲܒܲܚ. ܨܠܝܼܒ݂ܵܐ ܕܲܗܘ̤ܵܐ ܠܲܢ ܥܸܠܲܬ݂ ܛܵܒ݂̈ܵܬ݂ܵܐ. ܘܒܹܗ̤ܘ ܐܸܬ݂ܚܲܪܲܪ ܓܸܢܣܲܢ ܡܵܝܘܿܬ݂ܵܐ. ܗ̤ܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ݁ܝܘܗܝ ܠܒ݂ܝܼܫܵܐ ܘܟ݂ܠܗܹܝܢ ܨܸܢܥܵܬܹ̈ܗ.

ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܣܘܼܒܵܪܵܐ. ܒܩܵܠ: ܒܝܲܕ݂ ܫܠܵܡܵܐ.

ܡܲܫܸܒ݂ ܪ̈ܘܼܚܹܐ ܘܡܲܪ̈ܕ݁ܝܵܢ ܡܲܝ̈ܵܐ. ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܒܟ݂ܵܢܘܿܢ ܝܲܪܚܵܐ ܕܒܹܗ ܐܲܪܥܵܐ ܦܹܐܪܹ̈ܐ ܠܵܐ ܝܵܗ̇ܒܵܐ. ܒܹܗ ܨ̣ܒ݂ܵܐ ܡܵܪܝܵܐ ܕܲܢܚܵܘܸܐ ܦܹܐܪܵܐ ܒܲܒ݂ܬ݂ܘܼܠܬܵܐ. ܕܐܝܼܬ݂ܵܘܗܝ ܥܸܠܬ݂ܵܐ ܕܟ݂ܠܗܹܝܢ ܛܵܒ݂̈ܵܬ݂ܵܐ. ܘܣܲܒ݂ܪܵܐ ܛܵܒ݂ܵܐ ܕܟ݂ܠܗܹܝܢ ܒܸܪ̈ܝܵܬ݂ܵܐ. ܘܗܘ̤ܝܘ̣ ܢܘܼܗܪܵܐ ܫܲܪܝܼܪܵܐ ܡܫܝܼܚܵܐ ܡܵܪܵܐ ܕܟ݂ܠ. ܣܓ݂ܝܼܕ݂ ܥܲܡ ܐܲܒ݂ܘܼܗܝ ܘܪܘܼܚܹܗ ܩܲܕܝܼܫܵܐ. ܬܢܝܼ. ܫܲܒܲܚ. ܥܝܼܪܵܐ ܕܐܸܬ݂ܵܐ ܠܦܘܼܪܩܵܢܲܢ ܘܲܫ̣ܗܲܪ ܥܲܠ ܐܲܦܲܝ̈ܢ. ܬܸܗܘܸܐ ܨܠܘܿܬܲܢ ܘܒ݂ܵܥܘܼܬܲܢ ܠܲܢܝܵܚ ܨܸܒ݂ܝܵܢܵܟܼ. ܘܐܲܝܟ݂ ܕܲܒ݂ܣܸܡ̣ ܠܵܟ݂ ܪܹܝܚ ܦܝܼܪܡܹܗ ܕܐܲܗܪܘܿܢ. ܟܵܗܢܵܐ ܙܲܗܝܵܐ ܒܓ݂ܵܘ ܡܲܫܟܲܢܙܲܒ݂ܢܵܐ. ܬܸܒ݂ܣܲܡ̣ ܠܵܟ݂ ܡܵܪܝ ܨܠܘܿܬܲܢ ܒܟ݂ܠܗܘܿܢ ܥܸܕܵܢܹ̈ܐ. ܘܲܥܒܸܕ݂ ܫܲܝܢܵܐ ܘܪ̈ܲܚܡܹܐ ܒܲܒ݂ܪܝܼܬ݂ܵܐ.

ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܣܘܼܒܵܪܵܐ. ܒܩܵܠ: ܒܝܲܕ݂ ܫܠܵܡܵܐ.

ܣܲܒܲܪܘ ܡ̣ܢ ܝܘܿܡ ܠܝܘܿܡ ܦܘܼܪܩܵܢܹܗ. ܘܐܸܫܬܲܥܵܘ ܒܥܲܡܡܹ̈ܐ ܐܝܼܩܵܪܹܗ. ܣܘܼܒܵܪܵܐ ܕܩܲܒ݁ܠܲܬ̤ ܡܲܪܝܲܡ ܟܠ ܦܘܼܪܩܵܢܝܼ̈ܢ ܡܠܸܐ. ܕܠܵܐ ܙܲܪܥܵܐ ܘܫܵܘܬܵܦܘܼܬ݂ܵܐ ܠܲܡܫܝܼܚܵܐ ܒܸܛܢܲܬ̤. ܕܲܥܠܹܝܗ̇ ܒܲܠܚܘܿܕ݂ ܢܸܚܬܲܬ̤ ܪܘܼܚ ܩܘܼܕ݂ܫܵܐ. ܘܲܥܠܹܝܗ̇ ܐܲܓܸܢ ܚܲܝܠܹܗ ܕܥܸܠܵܝܵܐ. ܘܗ̤ܝ ܗ݇ܝ̣ ܡܒܲܪܲܟ݂ܬܵܐ ܒܢܸܫܹ̈ܐ ܕܣܲܒ݂ܪܵܐ ܐܸܬ݂ܡܲܠܝܲܬ̤. ܣܓ݂ܝܼܕ݂ ܒܵܪܘܿܝܵܐ ܕܚ̣ܵܢܹܗ ܠܲܟ݂ܝܵܢܲܢ. ܬܢܝܼ. ܫܲܒܲܚ. ܒܲܨܠܝܼܒ݂ܵܟ݂ ܡܵܪܲܢ ܝܼܫܘܿܥ ܬܸܬ݂ܢܛܲܪ ܥܹܕ݁ܬܵܟ݂. ܘܒܲܛܸܠ ܡܸܢܵܗ̇ ܒܵܙܘܿܙܹ̈ܐ ܘܕܹܐܒܹ̈ܐ ܡܚܲܒ݁ܠܵܢܹ̈ܐ. ܘܲܡܠܝܼܗ̇ ܫܘܼܒ݂ܚܵܟ݂ ܘܗܸܕ݂ܪܵܐ ܕܐܝܼܩܵܪܵܟ݂. ܕܬܸܗܘܸܐ ܠܡܹܐܢܵܐ ܕܐܲܝܠܹܝܢ ܕܐܲܠܝܼܨܝܼܢ. ܘܛܲܪ ܠܵܗ̇ ܫܠܵܡܵܐ ܢܲܓ݁ܝܼܪܵܐ ܐܝܼܬ݂ܝܵܐ ܕܲܠܥܵܠܡܝܼܢ. ܘܲܬ݂ܚܹܝܬ݂ ܟܸܢܦܲܝ̈ܟ ܢܸܣܬܲܬ݁ܪܘܼܢ ܝܲܠܕܹܝ̈ܗ̇.

ܚܲܕ݂ܒܫܲܒܵܐ ܕܐܲܪܒ݁ܥܵܐ ܕܣܘܼܒܵܪܵܐ. ܒܩܵܠ: ܒܝܲܕ݂ ܫܠܵܡܵܐ.

ܚܲܕ݂ܬܹ̈ܐ ܐܸܢܘܿܢ ܕܗܵܟܹܝܠ ܐܸܬ݂ܥܒܸܕ݂ܘ. ܘܐܵܦ ܡܵܪܝܵܐ ܢܸܬܸܠ ܛܵܒ݂ܵܬܹ̈ܗ. ܒܚܲܕ݂̈ܬ݂ܵܬ݂ܵܐ ܕܐܸܡܲܪ ܥܝܼܪܵܐ ܡܲܪܝܲܡ ܐܸܬ݂ܪܲܗܒܲܬ̤. ܒܗ̇ܝ ܕܠܵܐ ܚܟ݂ܝܼܡ ܗ݇ܘ̣ܵܐ ܠܵܗ̇ ܓܲܒ݂ܪܵܐ ܒܚܹܝܠ ܪܘܼܚܵܐ ܒܸܛܢܲܬ̤. ܗ̇ܘ ܕܲܒ݂ܪܵܝܗܝ ܗ݇ܘ̣ܵܐ ܠܐܵܕ݂ܵܡ ܡ̣ܢ ܥܲܦܪܵܐ. ܘܲܓ݂ܒܲܠ̣ ܡܸܢܹܗ ܠܚܵܘܵܐ ܕܠܵܐ ܙܲܪܥܵܐ. ܗ̇ܘ ܕܐܲܦ̣ܪܝܼ ܠܣܲܪܵܐ ܥܩܲܪܬ݂ܵܐ ܘܪܲܦܩܵܐ ܡ̣ܢ ܒܵܬ݂ܪܵܗ̇. ܗ̤ܘ ܒܐܹܠܝܼܫܒܲܥ ܫܲܪܪܵܗ̇ ܠܲܒ݂ܬ݂ܘܼܠܬܵܐ. ܬܢܝܼ. ܫܲܒܲܚ. ܒܲܨܠܝܼܒ݂ܵܟ݂ ܡܵܪܲܢ ܝܼܫܘܿܥ ܓܸܢܣܲܢ ܐܸܬ݂ܚܲܕܲܬ݂. ܘܒܲܨܠܝܼܒ݂ܵܟ݂ ܚܲܝܹ̈ܐ ܩ̣ܢܲܝܢܲܢ ܘܡܵܘܬܵܐ ܒܹܗ ܐܸܫܬ݁ܪܝܼ. ܒܹܗ ܒܲܨܠܝܼܒ݂ܵܟ݂ ܢܲܛܲܪ ܠܣܵܓ݂ܘܿܕܲܝ̈ܟ. ܡ̣ܢ ܨܸܢܥܵܬܹ̈ܗ ܕܒ݂ܝܼܫܵܐ ܒܥܸܠܕܲܪܵܐ. ܘܲܨܠܝܼܒ݂ܵܟ݂ ܢܸܗܘܸܐ ܫܘܼܪܵܐ ܠܟܸܢܫܲܢ ܡ̣ܢ ܣܵܟܹܗ. ܕܢܵܘܕܸ݁ܐ ܘܢܸܣܓ݁ܘܿ݁ܕ݂ ܠܚܲܝܠܹܗ ܕܲܨܠܝܼܒ݂ܵܐ.

ܕܥܹܐܕ݂ܵܐ ܕܝܲܠܕܵܐ. ܒܩܵܠ: ܫܘܼܚܠܵܦ ܠܵܐ ܒܵܗܬ݁ܝܼܢܲܢ.

ܡ̣ܢ ܩܕ݂ܝܼܡ ܠܵܟ݂ ܛܲܠܝܵܐ ܝܼܠܸܕ݁ܬܵܟ݂. ܘܲܩܕ݂ܵܡ ܫܸܡܫܵܐ ܐܝܼܬܼܵܘܗܝ ܫܡܹܗ. ܕܨܘܼܪܬܵܐ. ܗܵܘ ܕܲܟ݂ܣܸܐ ܗ݇ܘ̣ܵܐ ܡ̣ܢ ܥܵܠܡܹ̈ܐ ܒܐܲܠܵܗܵܐ ܕܟ݂ܠ ܒ̣ܪܵܐ. ܟܣܸܐ ܗ݇ܘ̣ܵܐ ܗܵܢܵܐ ܝܲܠܕܵܐ ܡ̣ܢ ܚܲܝ̈ܠܵܘܵܬ݂ܵܐ ܕܒܲܡܪ̈ܵܘܡܹܐ ܕܲܡܫܲܡܫܝܼܢ ܠܵܟ݂ ܡܵܪܝܵܐ. ܘܟܲܕ݂ ܡ̣ܢ ܐܲܬ݂ܪܵܐ ܕܲܠܓ݂ܵܘ ܡ̣ܢ ܟܪ̈ܘܿܒܹܐ ܠܵܐ ܫܲܢ̣ܝܼܬ݁. ܡ̣ܠܲܝܬܵܗ̇ ܠܐܲܪܥܵܐ ܦܵܪܘܿܩܵܐ ܕܟ݂ܠܵܐ. ܡ̣ܢ ܓܸܠܝܵܢܵܟ݂ ܕܒܲܒ݂ܣܲܪ. ܘܡܸܛܠ ܗܵܕܹܐ ܥܲܡ ܡܲܠܲܐܟܹ̈ܐ ܡܝܲܒ݁ܒ݂ܝܼܢܲܢ ܫܘܼܒ݂ܚܵܐ ܠܐܲܠܵܗܵܐ ܒܲܡܪ̈ܵܘܡܹܐ. ܘܬ݂ܘܼܒ݂ ܥܲܡ ܪ̈ܵܥܵܘܵܬ݂ܵܐ ܗܵܢ̇ܘܿܢ ܕܐܲܟ݂ܪܸܙ̣ܘ ܘܐܸܡܲܪܘ ܫܠܵܡܵܐ ܥܲܠ ܐܲܪܥܵܐ. ܒܵܥܹܝ̇ܢܲܢ ܡܸܢܵܟ݂ ܣܲܒ݂ܪܵܐ ܛܵܒ݂ܵܐ ܕܢܲܦ̮̈ܫܵܬܲܢ ܚܘܼܣ ܘܐܸܬ݂ܪܲܚܲܡܥܠܲܝܢ. ܬܢܝܼ. ܫܲܒܲܚ. ܒܝܲܕ݂ ܨܠܝܼܒ݂ܵܟ݂ ܩܲܕܝܼܫܵܐ ܦܵܪܘܿܩܲܢ. ܚܕ݂ܵܐ ܡܲܪܥܝܼܬ݂ܵܐ ܗܘ̤ܵܬ݂ ܡܲܠܲܐܟܹ̈ܐ ܘܲܒ݂ܢܲܝ̈ܢܵܫܵܐ. ܘܲܚܕ݂ܵܐ ܥܹܕ݁ܬܵܐ ܩܲܕܝܼܫܬܵܐ. ܫܡܲܝܵܢܹ̈ܐ ܘܐܲܪ̈ܥܵܢܹܐ ܗܵܐ ܚܵܕܹܝ̇ܢ. ܘܟ݂ܠܗܹܝܢ ܒܸܪ̈ܝܵܬ݂ܵܐ ܗܵܐ ܩܵܥ̈ܝܵܢ ܡܵܪܹܟ݁ܠ ܫܘܼܒ݂ܚܵܐ ܠܵܟܼ.

ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܝܲܠܕܵܐ. ܒܩܵܠ: ܡܫܝܼܚܵܐ ܐܸܬ݂ܝܼܠܸܕ݂.

ܕܲܡܡܲܟܸ݁ܟ݂ ܪܘܼܚܵܐ ܕܫܲܠܝܼܛܵܢܹ̈ܐ. ܐܸܫܬ݁ܓܸܫܘ ܥܲܡܡܹ̈ܐ ܘܙܵܥ ܡܲܠܟ݁ܘ̈ܵܬ݂ܵܐ. ܝܲܠܕܵܐ ܕܡ̣ܢ ܡܲܪܝܲܡ. ܐܲܙܝܼܥ̣ ܠܗܹܪܘܿܕܸܣ. ܘܒܸܟ݂ܝܵܗ̇ ܕܪܵܚܹܝܠ ܫ̣ܩܲܠ ܗ݇ܘ̣ܵܐ ܫܘܼܠܵܡܵܐ. ܥܲܠ ܪܵܡܬ݂ܵܐ ܩܸܛܠܵܐ ܘܫܘܼܦܵܥ ܕܡܵܐ ܕܫܲܒ݂ܪܹ̈ܐ. ܘܝܵܘܡܵܢ ܠܘܵܬܲܢ ܦܘܼܪܩܵܢ ܟܠܗܹܝܢ ܒܸܪ̈ܝܵܬ݂ܵܐ. ܬܢܝܼ. ܫܲܒܲܚ. ܨܠܝܼܒ݂ܵܐ ܕܲܗܘ̤ܵܐ ܠܲܢ ܥܸܠܲܬ݂ ܛܵܒ݂̈ܵܬ݂ܵܐ. ܘܒܹܗ̤ܘ ܐܸܬ݂ܚܲܪܲܪ ܓܸܢܣܲܢ ܡܵܝܘܿܬ݂ܵܐ. ܗ̤ܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ݁ܝܘܗܝ ܠܒ݂ܝܼܫܵܐ ܘܟ݂ܠܗܹܝܢ ܨܸܢܥܵܬܹ̈ܗ.

ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܝܲܠܕܵܐ. ܒܩܵܠ: ܚܲܢܵܢܵܐ ܕܲܦܬ݂ܝܼܚ.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܡܸܟܹ݁ܝܠ ܫܲܒܲܚܘ ܥܲܡܡܹ̈ܐ ܥܲܡܹܗ. ܥܲܡܡܹ̈ܐ ܘܐܸܡ̈ܘܵܬ݂ܵܐ ܬܵܘ ܢܸܙܡܲܪ ܫܘܼܒ݂ܚܵܐ. ܠܲܡܫܝܼܚܵܐ ܝܼܫܘܿܥ ܕܦܲܪܩܹܗ ܠܲܟ݂ܝܵܢܲܢ. ܘܐܲܦܢ̣ܝܼ ܥܲܛܠܘܼܬܲܢ ܠܢܘܼܗܪܵܐ ܕܝܼܕܲܥܬܹܗ. ܘܝܲܗ̣݇ܒ݂ ܠܲܢ ܒܛܲܝܒ݁ܘܼܬܹܗ ܚܲܝܹ̈ܐ ܕܲܠܥܵܠܲܡ. ܬܢܝܼ. ܫܲܒܲܚ. ܨܠܝܼܒ݂ܵܐ ܕܲܗܘ̤ܵܐ ܠܲܢ ܥܸܠܲܬ݂ ܛܵܒ݂̈ܵܬ݂ܵܐ. ܘܒܹܗ̤ܘ ܐܸܬ݂ܚܲܪܲܪ ܓܸܢܣܲܢ ܡܵܝܘܿܬ݂ܵܐ. ܗ̤ܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ݁ܝܘܗܝ ܠܒ݂ܝܼܫܵܐ ܘܟ݂ܠܗܹܝܢ ܨܸܢܥܵܬܹ̈ܗ.

ܥܪܘܼܒ݂ܬܵܐ ܕܬܲܪܬܹܝܢ ܕܒ݂ܵܬܲܪ ܝܲܠܕܵܐ. ܕܘܼܟ݂ܪܵܢܵܐ ܗ݇ܝ̣ ܕܡܵܪܬܝ ܡܲܪܝܲܡ. ܪܹܫ ܩܵܠܵܐ.

ܟܠܗܹܝܢ ܕܡ̣ܢ ܩܕ݂ܝܼܡ ܘܲܠܚܲܪܬ݂ܵܐ. ܡܸܛܠ ܐܝܼܩܵܪܵܐ ܕܲܫܡܵܟܼ. ܡܵܪܵܐ ܕܟ݂ܠܵܐ ܠܵܟ݂ ܡܵܘ̈ܕ݁ܝܵܢ. ܩܲܕܝܼ̈ܫܵܬ݂ܵܐ ܕܐܲܚܸܒ݂ ܫܡܵܟܼ. ܕܲܓ݂ܒܲܝܬ݁ ܠܡܲܪܝܲܡ ܡ̣ܢ ܓܸܢܣܗܹܝܢ. ܘܐ݇ܪܵܙ ܟܲܣܝܘܼܬܼܵܟ݂ ܐܲܫ̣ܪܝܼܬ݁ ܒܵܗ̇. ܕܲܒ݂ܚܹܝܠ ܪܘܼܚܵܐ ܡܸܢܵܗ̇ ܕܢܲܚ̣. ܡܫܝܼܚܵܐ ܦܵܪܘܿܩܹܗ ܕܥܵܠܡܵܐ. ܘܥܹܕܲܬ݂ ܩܘܼܕ݂ܫܵܐ ܗܵܐ ܡܙܲܝܚܵܐ. ܠܝܘܿܡ ܕܘܼܟ݂ܪܵܢܵܐ ܕܲܒ݂ܬ݂ܘܼܠܬܵܐ. ܬܢܝܼ. ܫܲܒܲܚ. ܡܲܪܝܲܡ ܒܬ݂ܘܼܠܬܵܐ ܩܲܕܝܼܫܬܵܐ. ܐܲܦܝܼܣܝ ܘܲܒ݂ܥܵܝ ܠܲܡܫܝܼܚܵܐ. ܕܢܸܥܒܸܕ݂ ܪ̈ܲܚܡܹܐ ܥܲܠ ܥܵܠܡܵܐ. ܕܐܲܚܝܼܕ݂ ܓܵܘܣܵܐ ܒܲܨܠܘܿܬܹܟ݂ܝ. ܘܥܹܕ݁ܬܵܐ ܬܸܚܕܸܐ ܒܥܲܕ݂ܥܹܕܹܟ݂ܝ. ܘܝܲܠܕܹܝ̈ܗ̇ ܒܓ݂ܵܘܵܗ̇ ܢܸܬ݂ܢܲܛܪܘܼܢ. ܡ̣ܢ ܢܸܟ݂ܝܵܢܹ̈ܐ ܘܣܲܩܘܼܒ݂̈ܠܹܐ. ܕܐܵܟܹܠܩܲܪܨܵܐ ܡܵܪܘܿܕ݂ܵܐ.

ܥܹܐܕ݂ܵܐ ܕܕܸܢܚܹܗ ܕܡܵܪܲܢ. ܒܩܵܠ: ܬܵܘ ܢܸܬ݁ܕܲܡܲܪ.

ܐܹܪܲܡܪ̱ܡܵܟ݂ ܡܵܪܝ ܡܲܠܟܵܐ. ܟܘܼܪܣܝܵܟ݂ ܐܲܠܵܗܵܐ ܠܥܵܠܲܡ ܥܵܠܡܝܼܢ. ܕܨܘܼܪܬܵܐ. ܐܵܠܹܦ ܐܲܠܦܝܼ̈ܢ ܘܪܸܒ݁ܘܿ ܪܸ̈ܒ݁ܘܵܢ ܟܪܝܼܟ݂ܝܼܢ ܠܹܗ. ܠܟ݂ܘܼܪܣܝܵܐ ܕܚܝܼܠܵܐ ܕܪܲܒ݁ܘܼܬܼܵܟ݂. ܟܪ̈ܘܿܒܹܐ ܟܪܝܼܟ݂ܝܼܢ ܠܹܗ ܡܵܪܝܵܐ. ܘܲܒ݂ܕܸܚܠ̱ܬ݂ܵܐ ܒܝܲܕ݂ ܓܸܦܲܝ̈ܗܘܿܢ. ܒܙܵܘܥܵܐ ܡܟܲܣܹܝ̇ܢ ܦܲܪ̈ܨܘܿܦܲܝܗܘܿܢ. ܒܲܕ݂ ܠܵܐ ܡܸܫܟ݁ܚܝܼܢ ܠܡܸܬ݂ܠܵܐ ܥܲܝܢܲܝ̈ܗܘܿܢ. ܘܲܠܡܸܚܙܵܐ ܢܘܼܪܵܐ ܗ̇ܝ ܕܐܲܠܵܗܘܼܬܼܵܟ݂. ܘܐܲܢ݇ܬ݁ ܗܵܟܲܢܵܐ ܫܒ݂ܝܼܚܲܬ݁. ܥܵܡܲܪ ܐܲܢ݇ܬ݁ ܒܲܒ݂ܢܲܝ̈ܢܵܫܵܐ. ܠܵܐ ܠܡܵܘܩܵܕ݂ܘܼ: ܐܸܠܵܐ ܠܡܲܢܗܵܪܘܼ. ܪܲܒܵܐ ܗ݇ܝ̣ ܡܵܪܝ ܡܪܲܚܡܵܢܘܼܬܼܵܟ݂ ܘܛܲܝܒ݁ܘܼܬܼܵܟ݂ ܕܲܣ̣ܥܲܪܬ݁ ܨܹܝܕ݂ ܓܸܢܣܲܢ ܫܘܼܒ݂ܚܵܐ ܠܵܟܼ. ܬܢܝܼ. ܫܲܒܲܚ. ܠܚܲܝܹ̈ܐ ܘܛܘܼܒܹ̈ܐ ܐܲܡܝܼܢܹ̈ܐ. ܡܣܲܟܹ݁ܝܢ ܥܲܒ݂ܕܲܝ̈ܟ ܦܵܪܘܿܩܲܢ. ܘܐܵܚ̇ܕ݁ܝܼܢ ܓܵܘܣܵܐ ܒܗܲܝܡܵܢܘܼܬ݂ܵܐ ܘܛܵܦܣ̇ܝܼܢ ܒܟܸܢܦܵܘ̈ܗܝ ܕܲܨܠܝܼܒ݂ܵܐ. ܢܲܛܲܪ ܒܲܚܢܵܢܵܟ݂ ܠܟܸܢܫܵܐ ܕܣܵܓ݂ܘܿܕܲܝ̈ܟ. ܘܫܲܡܠܵܐ ܨܹܐܕܲܝܗܘܿܢ ܫܘܼܘܕܵܝ ܡܘܼܠܟܵܢܲܝ̈ܟ. ܕܐܸܡܲܪܬ݁ ܠܪ̈ܵܚܡܲܝܟ ܒܲܣܒܲܪܬ݂ܵܟ݂. ܕܟ݂ܠ ܐܲܝܢܵܐ ܕܲܡܗܲܝܡܸܢ ܒܝܼ. ܝ̇ܵܪܹܬ݂ ܡܲܠܟ݁ܘܼܬ݂ܵܐ ܘܚܲܝܹ̈ܐ ܕܲܠܥܵܠܲܡ. ܐܲܫܘܵܐ ܠܲܢ ܡܵܪܝ ܕܥܲܡ ܩܲܕ݁ܝܼܫܲܝ̈ܟ. ܢܸܙܡܲܪ ܠܵܟ݂ ܒܲܓ݂ܢܘܿܢ ܡܲܠܟ݁ܘܼܬܼܵܟ݂ ܫܘܼܒ݂ܚܵܐ ܠܵܟܼ.

ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܒ݂ܵܬܲܪ ܕܸܢܚܵܐ. ܒܩܵܠ: ܡܵܪܵܐ ܕܟ݂ܠܵܐ.

ܐܹܪܲܡܪ̱ܡܵܟ݂ ܡܵܪܝܵܐ ܕܐܲܪܝܼܡ̣ܬܵܢܝ. ܚ̣ܵܘܝܼܬ݁ ܒܥܲܡܡܹ̈ܐ ܥܘܼܫܢܵܟܼ. ܒܕܸܢܚܵܟ݂ ܡܵܪܲܢ ܚܲܪܲܪܬ݁ ܠܲܢ. ܡ̣ܢ ܫܘܼܥܒܵܕ݂ܵܗ̇ ܕܲܚܛܝܼܬ݂ܵܐ. ܘܢܸܗܪܲܬ̤ ܬܹܒܹܝܠ ܕܲܬ݂ܫܲܒ݁ܚܵܟܼ. ܚܠܵܦ ܦܘܼܪܩܵܢܵܐ ܕܲܣ̣ܥܲܪܬ݁ ܒܵܗ̇. ܘܢܸܩܥܸܐ ܟܠܲܢ ܫܲܘܝܵܐܝܼܬ݂. ܒܩܵܠܵܐ ܪܵܡܵܐ ܕܬܸܫܒ݁ܘܿܚܬܵܐ. ܒܪܝܼܟ݂ܘܼ ܡܫܝܼܚܵܐ ܕܒܲܥܡܵܕܹܗ. ܦܲܪܩܹܗ ܠܓܸܢܣܲܢ ܡ̣ܢ ܠܵܘܛܬ݂ܵܐ. ܬܢܝܼ. ܫܲܒܲܚ. ܨܠܝܼܒ݂ܵܐ ܕܢܘܼܗܪܵܐ ܕܐܸܬ݂ܚܵܘܝܼ ܠܩܘܿܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹ̇ܠ ܗ݇ܘ̣ܵܐ ܒܪܹܫ ܡܲܫܪܝܼܬܹܗ ܠܲܩܪܵܒ݂ܵܐ. ܘܙܵܥ ܘܐܸܬ݂ܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ݂ܕܲܝ̈ ܠܒܸܪ̈ܝܵܬ݂ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬ݂ܵܐ. ܘܲܣ̣ܓܸܕ݂ܘ ܠܲܨܠܝܼܒ݂ܵܐ ܘܝܲܩ̣ܪܘܼܗܝ.

ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܕܸܢܚܵܐ. ܕܘܼܟ݂ܪܵܢܵܐ ܗ݇ܝܼ ܕܡܵܪܝ ܝܘܿܚܲܢܵܢ ܡܲܥܡ̄ܕ݂ܵܢܵܐ. ܒܩܵܠ: ܒܝܲܕ݂ ܫܠܵܡܵܐ.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܒܗܸܕ݂ܪ̈ܲܝ ܩܘܼܕ݂ܫܵܐ ܡ̣ܢ ܡܲܪܒ݁ܥܵܐ. ܡܣܲܪܩܘܼܬ݂ܵܐ ܥܲܡ ܣܘܼܡܥܵܠܵܐ ܡ̣ܢ ܛܲܠܝܘܼܬܹܗ ܩ̣ܢܵܐ. ܝܘܿܚܲܢܵܢ ܒܪܵܗ̇ ܕܲܥܩܲܪܬ݂ܵܐ ܕܥܲܡ ܚܲܝ̈ܘܵܬ݂ܵܐ ܪܒ݂ܵܐ. ܘܲܠܗ̇ܘ ܥܲܡܵܐ ܝܲܗ̣݇ܒ݂ ܡܲܥܡܘܿܕ݂ܝܼܬ݂ܵܐ. ܕܲܬ݂ܝܵܒ݂ܘܼܬ݂ܵܐ ܠܡܲܬ݂ܩܵܢܘܼ ܐܘܼܪܚܵܐ. ܩܕ݂ܵܡܵܘܗܝ ܕܲܡܫܝܼܚܵܐ ܡܵܪܲܢ ܐܸܡܪܹܗ ܕܲܡܪܲܝܡܵܐ. ܫܵܩܹ̇ܠ ܚܛܝܼܬ݂ܹܗ ܕܥܵܠܡܵܐ ܥܵܒ݂ܘܿܪܵܐ. ܬܢܝܼ. ܫܲܒܲܚ. ܒܥܸܕܵܢܵܐ ܕܩܘܼܕ݂ܫܵܐ ܢܵܘܕܸܐ ܘܢܸܣܓ݁ܘܿ݁ܕ݂ ܘܲܢܫܲܒܲܚ. ܠܲܡܫܝܼܚܵܐ ܡܲܠܟܲܢ ܕܐܸܬ݂ܵܐ ܘܦܲܪܩܲܢ ܒܲܨܠܝܼܒܹܗ. ܘܩܲܛ̣ܠܹܗ ܠܡܵܘܬܵܐ ܕܩܲܛ̣ܠܹܗ ܠܲܟ݂ܝܵܢܲܢ. ܒܕܸܒ݂ܚܵܐ ܕܦܲܓ݂ܪܹܗ ܕܐܸܬ݁ܕ݁ܒܲܚ ܚܠܵܦ ܟܠܲܢ. ܘܐܸܫܬܵܘܕ݁ܝܼ ܠܲܢ ܒܘܼܣܵܡܵܐ ܒܐܘܿܪܸܫܠܸܡ ܕܲܠܥܸܠ. ܐܲܝܟܵܐ ܕܢܵܣܒ݁ܝܼܢ ܟܹܐܢܹ̈ܐ ܟܠܝܼܠܲܝ̈ܗܘܿܢ.

ܒܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ ܘܡܸܬ݂ܝܲܕ݂ܥܵܐ ܕܲܥܕ݂ܵܐܪܹ̈ܐ ܕܛܲܟ݁ܣܵܗ̇ ܡܵܪܝ ܝܘܿܚܲܢܵܢ ܐܲܠܐܲܙܪܲܩ ܐܲܦܸܣܩܘܿܦܵܐ ܕܚܝܼܪܬܵܐ ܕܗܵܘ̇ܝܵܐ ܒܲܬ݂ܪܹܝܢܒ݁ܫܲܒܵܐ ܩܲܕ݂ܡܵܝܵܐ ܕܕܸܢܚܵܐ. ܒܩܵܠ: ܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.

ܬܵܘ ܢܫܲܒܲܚ ܠܡܵܪܝܵܐ: ܐܲܝܠܹܝܢ ܕܩܵܝܡ̇ܝܼܢ ܒܒܲܝܬܹܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ: ܐܲܟ݂ܚ݇ܕ݂ܵܐ ܥܲܬ݁ܝܼܪܹ̈ܐ ܘܡܸܣܟܹ݁ܢܹ̈ܐ. ܬܵܘ ܟܠܲܢ ܢܹܐܚܘܿܕ݂ ܓܵܘܣܵܐ ܒܲܨܠܘܿܬ݂ܵܐ: ܕܗ̤ܝ ܐܝܼܬܹܝܗ̇ ܩܠܝܼܕ݂ܵܐ ܕܓܲܙܵܐ ܫܡܲܝܵܢܵܐ. ܘܲܟ݂ܡܵܐ ܕܚܲܠܝ̈ܵܢ ܢܸܥ̈ܡܵܬ݂ܵܐ ܕܩܵܠܲܝ̈ܢ: ܗܵܟܲܢ ܢܸܗܘܘܿܢ ܕܘܼܒܵܪ̈ܲܝܢ ܩܕ݂ܵܡܵܘܗܝ: ܕܲܒ݂ܝܲܕ݂ ܡܸܠܹ̈ܐ ܘܲܥܒ݂ܵܕܹ̈ܐ ܢܸܫܦܲܪ ܠܹܗ ܠܡܵܪܝܵܐ. ܬܢܝܼ. ܫܲܒܲܚ. ܒܪܵܐ ܡܫܝܼܚܵܐ ܕܡܲܠܟ݁ܘܼܬܹܗ ܠܵܐ ܡܸܬ݁ܬ݁ܙܝܼܥܵܐ: ܘܟ݂ܘܼܡܪܘܼܬܹܗ ܠܵܐ ܥܵܒ݂݁ܪܵܐ ܘܠܵܐ ܡܸܫܬܲܪܝܵܐ: ܫܲܝܸܢ ܒܲܨܠܝܼܒ݂ܵܟ݂ ܟܵܗܢܘܼܬ݂ܵܐ ܘܡܲܠܟ݁ܘܼܬ݂ܵܐ: ܕܒ݂ܵܐܘܝܘܼܬ݂ܵܐ ܢܕܲܒ݁ܪ̈ܵܢ ܐܘܼܚܕܵܢܲܝ̈ܗܹܝܢ: ܟܲܕ݂ ܢܵܛܪ̈ܵܢ ܕܠܵܐ ܡܘܼܡܵܐ ܬܵܘܕ݁ܝܼܬ݂ܵܐ ܓܡܝܼܪܬܵܐ.

ܬܠܵܬ݂ܒ݁ܫܲܒܵܐ ܕܒ݂ܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ. ܒܩܵܠ: ܠܵܐ ܡܸܬ݁ܛܲܠܡܝܼܢ.

ܡ̣ܢ ܥܵܩܵܬ݂̈ܗܘܿܢ ܐܲܦܸܩ ܐܸܢܘܿܢ. ܐܸܢܵܐ ܕܹܝܢ ܥܠܲܝܟ ܡܵܪܝܵܐ ܐܸܬ݁ܬܲܟ݂ܠܹܬ݂. ܠܵܟ݂ܘܼ ܩܵܪܹܝ̇ܢ ܕܐܲܠܝܼܨܝܼܢ ܚܲܢܵܢܵܐ. ܘܒ݂ܵܟ݂ ܡܸܬ݂ܓܵܘܣܝܼܢ ܕܲܡܥܵܩܝܼܢ ܪܵܚܹܡܢܵܫܵܐ. ܗ̤ܘܝܼ ܢܵܛܘܿܪܵܐ ܠܚܲܝܲܝ̈ܗܘܿܢ ܒܲܚܢܵܢܵܟܼ. ܘܫܵܘܙܸܒ݂ ܐܸܢܘܿܢ ܡ̣ܢ ܒܝܼܫܵܐ ܕܠܵܟ݂ܘܼ ܡܣܲܟܹܝܢ. ܬܢܝܼ. ܫܲܒܲܚ. ܐܲܠܵܗܵܐ ܕܚ̣ܵܣ ܥܲܠ ܢܝܼܢܘܹܐ ܚܘܼܣܥܠܲܝܢ. ܘܠܵܐ ܬܲܗܡܸܐ ܚܝܵܪܵܟ݂ ܡܸܢܹܗ ܕܕ݂ܵܪܲܢ ܒܝܼܫܵܐ. ܘܐܸܢ ܬܹܐܚܘܿܕ݂ ܬܲܪܥܵܟ݂ ܒܐܲܦܲܝ̈ܢ ܚܲܛܵܝܹ̈ܐ. ܒܲܬ݂ܪܲܥ ܡܲܢ ܢܹܐܙܲܠ ܢܸܩܘܿܫ ܪܵܚܹܡܢܵܫܵܐ.

ܐܲܪܒܲܥܒ݁ܫܲܒܵܐ ܕܒ݂ܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ. ܒܩܵܠ: ܡܵܪܵܐ ܕܟ݂ܠܵܐ.

ܦܘܼܪܩܵܢܵܐ ܫܲܕܲܪ ܠܥܲܡܡܹ̈ܐ. ܚ̣ܵܘܝܼ ܡܵܪܝܵܐ ܦܘܼܪܩܵܢܹܗ. ܒܲܨܠܘܿܬ݂ ܚܲܣܝܵܐ ܝܘܿܚܲܢܵܢ. ܦܘܼܪܩܵܢ ܡܵܪܝܵܐ ܐܸܫܬܲܕܲܪ. ܠܲܒ݂ܬ݂ܘܼܠܵܬ݂̈ܵܐ ܢܲܟ݂̈ܦܵܬ݂ܵܐ. ܘܠܵܐ ܐܸܬ݁ܛܲܡܐܲܬ̤ ܕܲܟ݂ܝܘܼܬ݂ܗܹܝܢ. ܘܲܚܢܲܢ ܢܸܫܐܲܠ ܡ̣ܢ ܡܵܪܝܵܐ. ܕܬܸܥܘܿܠ ܩܕ݂ܵܡܵܘܗܝ ܒܵܥܘܼܬܲܢ. ܘܲܒ݂ܝܲܕ݂ ܪ̈ܲܚܡܵܘܗܝ ܢܸܫܬܵܘܙܲܒ݂. ܡ̣ܢ ܡܲܪ̈ܵܚܹܐ ܕܠܵܐ ܪ̈ܲܚܡܹܐ. ܬܢܝܼ. ܫܲܒܲܚ. ܒܟ݂ܵܪܘܿܙܘܼܬܹܗ ܕܲܢܒ݂ܝܼܵܐ: ܒܨܵܘܡܵܐ ܐܸܬ݂ܦܲܪܩܲܬ̤ ܢܝܼܢܘܹܐ: ܘܲܒ݂ܒ݂ܵܥܘܼܬ݂ܵܐ ܘܒܲܨܠܘܿܬ݂ܵܐ: ܡܲܠܲܐܟ݂ ܡܵܘܬܵܐ ܡܸܢܵܗ̇ ܟܠ̣ܵܐ. ܒܚܲܫܵܐ ܘܕܸܡܥܹ̈ܐ ܕܲܬ݂ܝܵܒ݂ܘܼܬ݂ܵܐ: ܢܹܐܚܘܿܕ݂ ܓܵܘܣܵܐ ܒܓ݂ܵܘ ܗܲܝܟ݁ܠܵܐ: ܘܢܸܩܪܸܐ ܠܪ̈ܲܚܡܹܐ ܠܥܘܼܕ݂ܪܵܢܲܢ: ܥܲܕ݂ܠܵܐ ܢܸܚܫܲܟ݂ ܢܲܗܝܼܪܵܐ. ܥܵܠܲܡ. ܡܲܠܟܵܐ ܕܡܲܠܟܹ̈ܐ ܐܝܼܵܠܲܢ: ܐܲܢ݇ܬ݁ܘܼ ܡܫܝܼܚܵܐ ܦܵܪܘܿܩܲܢ: ܚܘܼܣ ܥܲܠ ܥܲܒ݂ܕܲܝ̈ܟ ܕܩܵܪܹܝ̇ܢ ܠܵܟ݂: ܒܗܵܠܹܝܢ ܙܲܒ݂ܢܹ̈ܐ ܕܐܘܼܠܨܵܢܵܐ. ܕܗܵܐ ܚܕ݂ܝܼܪܝܼܢ ܠܲܢ ܕܵܘܘܿܢܹ̈ܐ: ܘܣܘܼܪ̈ܵܕܹܐ ܡ̣ܢ ܟܠ ܓܲܒ݁ܝܼ̈ܢ. ܒܲܥܓܲܠ ܢܩܲܕ݁ܡܘܼܢܵܢ ܪ̈ܲܚܡܲܝܟ: ܘܐܲܢܗܲܪ ܐܲܦܲܝ̈ܟ ܘܲܦܪܘܿܩܲܝܢ.

ܚܲܡܫܵܒ݁ܫܲܒܵܐ ܕܒ݂ܵܬܲܪ ܕܸܢܚܵܐ ܕܘܼܟ݂ܪܵܢܵܐ ܗ݇ܘ̣ ܕܡܵܪܝ ܝܘܿܚܲܢܵܢ ܙܵܪܘܿܩܵܐ. ܕܛܲܟ݁ܣܵܗ̇ ܠܒܵܥܘܼܬ݂ܵܐ ܕܲܒ݂ܬ̈ܘܼܠܵܬ݂ܵܐ.

ܫܲܡܸܫ ܚܲܕ݂ ܦܲܪܨܘܿܦܵܐ (ܚܙܝ ܠܬܲܚܬ)

ܥܪܘܼܒ݂ܬܵܐ ܕܬܲܪܬܹ݁ܝܢ ܕܕܸܢܚܵܐ. ܕܘܼܟ݂ܪܵܢܵܐ ܕܡܵܪܝ ܦܲܛܪܘܿܣ ܘܡܵܪܝ ܦܵܘܠܘܿܣ. ܒܩܵܠ: ܣܵܗܕܵܘ̈ܗܝ ܕܲܒ݂ܪܵܐ.

ܙܲܕܝܼܩܵܐ ܘܲܬ݂ܪܝܼܨܵܐ. ܡܲܠܸܦ ܠܡܸܣܟܹ݁ܢܹ̈ܐ ܐܘܼܪܚܹܗ. ܦܵܘܠܘܿܣ ܩܲܪܝܵܐ ܘܲܫܠܝܼܚܵܐ. ܒܚܝܼܪܵܐ ܘܓܲܒ݂ܝܵܐ ܕܐܲܠܵܗܵܐ. ܟܵܪܘܿܙܵܐ ܕܡܲܠܟ݁ܘܼܬ݂ ܪܵܘܡܵܐ. ܕܬܲܠ̣ܡܸܕ݂ ܘܐܲܥ̣ܡܸܕ݂ ܠܲܒ݂ܪܝܼܬ݂ܵܐ. ܒܚܲܝܠܵܐ ܕܩܲܒܸ݁ܠ̣ ܡ̣ܢ ܡܵܪܹܗ. ܗ̤ܘܝܼ ܒܲܥܵܝܵܐ ܚܠܵܦ ܟܠܲܢ. ܬܢܝܼ. ܫܲܒܲܚ. ܡܵܐ ܝܵܐܹ݁ܐ ܠܲܡܫܲܒܵܚܘܼ ܒܒܲܝܬܵܐ ܗܵܢܵܐ ܩܲܕܝܼܫܵܐ. ܕܐܝܼܬ݂ ܒܹܗ ܢܒ݂ܝܼܹ̈ܐ ܘܲܫܠܝܼܚܹ̈ܐ. ܘܣܵܗܕܹ̈ܐ ܘܟ݂ܵܗܢܹ̈ܐ ܘܡܲܠܦܵܢܹ̈ܐ. ܘܡܲܬ݂ܩܲܢ ܒܹܗ ܦܵܬ݂ܘܿܪ ܩܘܼܕ݂ܫܵܐ. ܠܚܘܼܣܵܝܵܐ ܕܝܲܠܕܵܘ̈ܗܝ ܕܐܵܕ݂ܵܡ.

ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܕܸܢܚܵܐ. ܒܩܵܠ: ܣܵܗܕܹ̈ܐ ܒܪ̈ܝܼܟܹܐ.

ܪܲܒ݁ܘܼ ܡܵܪܲܢ ܘܲܡܫܲܒܲܚ ܪܵܘܪܒ݂ܵܐܝܼܬ݂: ܪܲܒ݁ ܘܲܕ݂ܚܝܼܠ ܥܲܠ ܟܠܗܘܿܢ ܕܲܚܕ݂ܵܪ̈ܵܘܗܝ. ܪܲܒ݁ܘܼ ܐ݇ܪܵܙܵܐ ܕܲܕ݂ܢܲܚ̣ ܡ̣ܢ ܪܵܘܡܵܐ. ܫܠܝܼܚܵܐ ܩܵܥܹ̇ܐ ܠܲܢ. ܐ݇ܪܵܙܵܐ ܗ݇ܘ̣ ܓܹܝܪ ܐܲܠܵܗܵܝܵܐ. ܕܲܓ݂ܒ݂ܵܝܗܝ ܠܦܲܓ݂ܪܲܢ ܘܲܥ̣ܡܲܪ ܒܹܗ. ܘܥܲܒ݂ܕܹܗ ܕܢܸܗܘܸܐ ܚܲܕ݂ ܥܲܡܹܗ. ܒܫܵܘܬܵܦܘܼܬ݂ܵܐ ܕܐܝܼܩܵܪܹܗ. ܕܠܲܢ ܢܲܫܘܸܐ ܠܚܲܝܹ̈ܐ ܕܲܠܥܵܠܲܡ. ܬܢܝܼ.  ܫܲܒܲܚ. ܡܫܝܼܚܵܐ ܕܫܲܝܸܢ ܒܲܕ݂ܡܵܐ ܕܲܩܢܘܿܡܹܗ. ܪܵܘܡܵܐ ܥܲܡ ܥܘܼܡܩܵܐ. ܫܲܝܸܢ ܡܵܪܝ ܟܵܗܢܹ̈ܐ ܘܡܲܠܟܹ̈ܐ. ܘܥܹܕܬܵܟ݂ ܩܲܝܸܡ ܒܲܚܢܵܢܵܟܼ. ܘܚܲܕ݂ ܢܝܼܫܵܐ ܕܗܲܝܡܵܢܘܼܬ݂ܵܐ. ܢܲܡܠܸܟ݂ ܒܟ݂ܠܵܗ̇ ܥܵܡܲܪܬܵܐ. ܒܛܲܝܒ݁ܘܼܬܼܵܟ݂ ܡܵܪܵܐ ܡܪܲܚܡܵܢܵܐ.

ܥܪܘܼܒ݂ܬܵܐ ܕܲܬ݂ܠܵܬ݂ ܕܕܸܢܚܵܐ. ܕܘܼܟ݂ܪܵܢܵܐ ܕܐܲܪܒ݁ܥܵܐ ܐܹܘܲܢܓܲܠܸܣ̈ܛܹܐ. ܒܩܵܠ: ܡܵܪܵܐ ܕܟ݂ܠܵܐ.

ܘܐܸܡܵܐ ܕܲܒ݂ܢܲܝ̈ܵܐ ܟܲܕ݂ ܚܵܕ݂ܝܵܐ. ܢܸܚܕܸܐ ܠܸܒ݁ܗܘܿܢ ܕܐܲܝܠܹܝܢ ܕܒ݂ܵܥܹܝ̇ܢ ܠܡܵܪܝܵܐ. ܒܕ݂ܘܼܟ݂ܪܵܢ ܫܠܝܼܚܹ̈ܐ ܗܵܐ ܚܵܕ݂ܝܵܐ. ܥܹܕ݁ܬܵܐ ܫܒ݂ܝܼܚܬܵܐ ܘܩܲܕܝܼܫܬܵܐ. ܕܲܚܠܵܦ ܥܲܡܘܼܕܹ̈ܐ ܩܵܡ̣ܘ ܒܵܗ̇. ܕܢܸܗܘܘܿܢ ܡܲܠܦܵܢܹ̈ܐ ܡ̣ܢ ܒܢܹܝ̈ܗ̇. ܒܟ݂ܠ ܕܵܪ ܢܵܨܲܚ̇ ܝܘܼܠܦܵܢܗܘܿܢ. ܘܗܲܝܡܵܢܘܼܬ݂ܗܘܿܢ ܫܲܪܝܼܪܬܵܐ. ܒܕܲܐܟܸܣ̣ܘ ܠܡܲܠܟܹ̈ܐ ܘܠܵܐ ܐܸܙܕ݁ܟ݂ܝܼܘ. ܡ̣ܢ ܠܘܼܚܵܡܵܐ ܕܒ݂ܝܼܫܘܼܬ݂ܗܘܿܢ.  ܬܢܝܼ.  ܫܲܒܲܚ. ܫܠܝܼܚܹ̈ܐ ܓܒܲܝ̈ܵܐ ܘܩܲܕܝܼܫܹ̈ܐ. ܨܲܠܵܘ ܘܲܒ݂ܥܵܘ ܡ̣ܢ ܡܵܪܝܵܐ. ܕܢܸܗܘܸܐ ܫܲܝܢܵܐ ܒܲܒ݂ܪܝܼܬ݂ܵܐ. ܘܢܸܫܠܘܿܢ ܩܪ̈ܵܒܹܐ ܘܬܲܟ݂ܬ݁ܘܼܫܹ̈ܐ. ܠܟ݂ܵܗܢܹ̈ܐ ܬܸܗܘܸܐ ܐܵܘܝܘܼܬ݂ܵܐ. ܠܡܲܠܟܹ̈ܐ ܬܸܣܓܸ݁ܐ ܬܲܪܥܘܼܬ݂ܵܐ. ܘܠܲܐܪ̈ܒܲܥܦܸܢܝܵܬܹܗ ܕܥܵܠܡܵܐ. ܫܲܝܢܵܐ ܪܲܒܵܐ ܘܲܫܠܵܡܵܐ.

ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܕܸܢܚܵܐ. ܒܩܵܠ: ܣܵܗܕܹ̈ܐ ܒܪ̈ܝܼܟܹܐ.

ܗܵܘ ܕܐܝܼܬܼܵܘܗܝ ܡ̣ܢ ܩܕ݂ܵܡ ܥܵܠܡܹ̈ܐ: ܚ̣ܵܘܝܼ ܡܵܪܝܵܐ ܦܘܼܪܩܵܢܹܗ. ܐ݇ܪܵܙܵܐ ܕܲܟ݂ܣܸܐ ܗ݇ܘ̣ܵܐ ܡ̣ܢ ܥܵܠܡܹ̈ܐ ܘܕ݂ܵܪܹ̈ܐ ܒܨܸܒ݂ܝܵܢ ܒܵܪܘܿܝܵܐ. ܒܕܸܢܚܹܗ ܕܲܡܫܝܼܚܵܐ ܝܲܠ̣ܦܘܼܗܝ ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ. ܘܫܲܪܝܼܘ ܐ݇ܢܵܫ̈ܵܐ ܘܡܲܠܲܐܟܹ̈ܐ. ܠܡܸܬ݂ܢܵܐ ܩܘܼܕ݂ܫܵܐ ܕܐܝܼܩܵܪܹܗ. ܬܠܝܼܬ݂ܵܐܝܼܬ݂ ܚܕ݂ܵܐ ܐܲܠܵܗܘܼܬ݂ܵܐ. ܬܢܝܼ. ܫܲܒܲܚ. ܡܫܝܼܚܵܐ ܕܫܲܝܸܢ ܒܲܕ݂ܡܵܐ ܕܲܩܢܘܿܡܹܗ. ܪܵܘܡܵܐ ܥܲܡ ܥܘܼܡܩܵܐ. ܫܲܝܸܢ ܡܵܪܝ ܟܵܗܢܹ̈ܐ ܘܡܲܠܟܹ̈ܐ. ܘܥܹܕ݁ܬܵܟ݂ ܩܲܝܸܡ ܒܲܚܢܵܢܵܟܼ. ܘܚܲܕ݂ ܢܝܼܫܵܐ ܕܗܲܝܡܵܢܘܼܬ݂ܵܐ. ܢܲܡܠܸܟ݂ ܒܟ݂ܠܵܗ̇ ܥܵܡܲܪܬܵܐ. ܒܛܲܝܒ݁ܘܼܬܼܵܟ݂ ܡܵܪܵܐ ܡܪܲܚܡܵܢܵܐ.

ܥܪܘܼܒ݂ܬܵܐ ܕܐܲܪܒܲܥ ܕܕܸܢܚܵܐ. ܕܘܼܟ݂ܪܵܢܵܐ ܕܡܵܪܝ ܐܸܣܛܲܦܵܢܘܿܣ ܣܵܗܕܵܐ. ܒܩܵܠ: ܣܵܗܕܵܘ̈ܗܝ ܕܲܒ݂ܪܵܐ.

ܘܐܵܦ ܐܸܢܵܐ ܒܘܼܟ݂ܪܵܐ ܐܸܥܒ݁ܕ݂ܝܼܘܗܝ. ܕܡܲܬ݂ܩܲܢ ܠܸܒܹ݁ܗ ܬܟ݂ܝܼܠ ܥܲܠ ܐܲܠܵܗܵܐ. ܪܹܫܵܐ ܕܣܵܗܕܹ̈ܐ ܐܸܣܛܲܦܵܢܘܿܣ ܕܒܲܪܓ݂ܘܼܡܝܵܐ ܐܸܬ݂ܟܲܠܲܠ ܗ݇ܘ̣ܵܐ. ܡ̣ܢ ܝܗ݇ܘܼܕ݂ܵܝܹ̈ܐ ܛܵܠܘܿܡܹ̈ܐ. ܘܲܬ݂ܠ̣ܵܐ ܥܲܝܢܵܘ̈ܗܝ ܠܲܫܡܲܝܵܐ. ܘܲܚ̣ܙܵܐ ܫܘܼܒ݂ܚܹܗ ܕܲܡܫܝܼܚܵܐ. ܘܐܸܬ݂ܚܲܝܲܠ ܘܩܲܒܸ݁ܠ̣ ܡܵܘܬܵܐ.  ܬܢܝܼ.  ܫܲܒܲܚ. ܗܵܝ݁ ܛܲܝܒ݁ܘܼܬ݂ܵܐ ܕܲܢ̣ܛܲܪܬ݂ܹܗ. ܠܕ݂ܵܘܝܼܕ݂ ܛܲܠܝܵܐ ܡ̣ܢ ܫܵܐܘܿܠ. ܗ̤ܝ ܬܢܲܛܲܪ ܠܥܹܕ݁ܬܵܐ ܘܝܲܠܕܹܝ̈ܗ̇. ܠܟ݂ܵܗܢܹ̈ܐ ܬܸܗܘܸܐ ܐܵܘܝܘܼܬ݂ܵܐ. ܠܡܲܠܟܹ̈ܐ ܬܸܣܓܸ݁ܐ ܬܲܪܥܘܼܬ݂ܵܐ. ܘܲܠܣܵܗܕܹ̈ܐ ܟܠܝܼܠ ܬܵܘܕܝܼܬ݂ܵܐ.

ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܕܸܢܚܵܐ. ܒܩܵܠ: ܠܵܟ݂ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ: ܘܲܒ݂ܟ݂ܠܙܒܲܢ ܬܸܫܒ݁ܚܵܬܹ̈ܗ ܒܦܘܼܡܝ. ܒܪܝܼܟ݂ܘܼ ܐܲܠܵܗܵܐ. ܕܫܲܕܲܪ ܚܲܒ݁ܝܼܒܹܗ. ܘܦܲܪܩܹܗ ܠܲܟ݂ܝܵܢܵܢ. ܬܢܝܼ.  ܫܲܒܲܚ ܒܵܗ̇

ܥܪܘܼܒ݂ܬܵܐ ܕܚܲܡܸܫ ܕܕܸܢܚܵܐ. ܕܘܼܟ݂ܪܵܢܵܐ ܗ݇ܝ̣ ܕܡܲܠܦܵܢܹ̈ܐ ܝܵܘܢܵܝܹ̈ܐ. ܒܩܵܠ: ܒܝܲܕ݂ ܫܠܵܡܵܐ.

ܐܸܬ݂ܦܲܨܚ̄ܘ ܘܙܲܡܲܪܘ ܘܫܲܒܲܚܘ. ܒܲܪ݇ܬ݂ ܡܲܠܟܵܐ ܒܫܘܼܒ݂ܚܵܐ ܩܵܡܲܬ̤. ܕܘܼܨܝ ܘܲܚܕ݂ܵܝ ܥܹܕܲܬ݂ ܩܘܼܕ݂ܫܵܐ ܒܟ݂ܵܗܢܹ̈ܐ ܕܲܢܨܲܚ̣ܘ ܒܹܟ݂ܝ. ܓܲܒ݂ܪܹ̈ܐ ܬܠܵܬ݂ܵܐ ܕܬܸܕ݂ܡܘܼܪܬܵܐ ܢܵܘܣܹ̈ܐ ܕܪܘܼܚܩܘܼܕ݂ܫܵܐ. ܥܡܝܼܠ ܒܲܕ݂ܪܵܫܵܐ ܢܲܟ݂ܦܵܐ ܕܝܼܘܿܕܘܿܪܘܿܣ ܘܬܹܐܵܕܘܿܪܘܿܣ ܕܦܲܫܸܩ̣ ܠܲܟ݂ܬ݂ܵܒܹ̈ܐ. ܘܦܵܥܠܵܐ ܙܪܝܼܙܵܐ ܢܸܣܛܘܿܪܝܼܣ ܦܵܠܚܵܐ ܕܠܵܐ ܒܸܗܬ݁ܬ݂ܵܐ. ܕܫܲܠܸܡ̣ ܪܲܗܛܹܗ ܒܚܲܫܵܘ̈ܗܝ ܕܲܡܫܝܼܚܵܐ.  ܬܢܝܼ.  ܫܲܒܲܚ. ܒܵܗ̇.

ܚܲܕ݂ܒ݁ܫܲܒܵܐ ܕܚܲܡܫܵܐ ܕܕܸܢܚܵܐ. ܒܩܵܠ: ܠܵܟ݂ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ: ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܕܐܸܬ݁ܬܲܚܬ݁ܝܼ. ܘܦܲܪܩܹܗ ܠܲܟ݂ܝܵܢܲܢ. ܡ̣ܢ ܡܵܘܬܵܐ ܝܲܥܢܵܐ. ܬܢܝܼ.  ܫܲܒܲܚ ܒܵܗ̇

ܬܪܹܝܢܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ. ܒܩܵܠ: ܡܵܪܵܐ ܕܟ݂ܠܵܐ.

ܪܵܥܝܹܗ ܕܝܼܣܪܵܝܹܠ ܨܘܼܬ݂: ܪܥܝܼ ܐܸܢܘܿܢ ܘܕܲܒܲܪ ܐܸܢܘܿܢ ܥܕܲܡܵܐ ܠܥܵܠܲܡ. ܪܵܥܝܵܐ ܛܵܒ݂ܵܐ ܕܢܲܦ̮̈ܫܵܬܲܢ. ܥܵܕ݂ܘܿܪܵܐ ܘܦܵܪܘܿܩܵܐ ܕܟ݂ܠ. ܕܲܒܲܪ ܠܲܢ ܐܲܝܟ݂ ܨܸܒ݂ܝܵܢܵܟܼ. ܬܚܹܝܬ݂ ܛܸܠܵܠܵܐ ܕܝܲܡܝܼܢܵܟܼ. ܘܩܲܒܸ݁ܠ ܦܹܐܪܹ̈ܐ ܡܠܝܼ̈ܠܹܐ ܕܣܸܦ̈ܘܵܬܲܢ. ܕܲܒ݂ܬܼܵܘܕܝܼܬ݂ܵܐ ܡܩܲܪܒ݂ܝܼܢܲܢ ܠܵܟܼ. ܘܗܲܒ݂ܠܲܢ ܪ̈ܲܚܡܹܐ ܘܲܚܢܵܢܵܐ. ܡ̣ܢ ܒܹܝܬ݂ ܓܲܙܵܟ݂ ܥܲܬ݁ܝܼܪܵܐ.  ܬܢܝܼ. ܫܲܒܲܚ. ܚܲܢܵܢܵܐ ܐܲܢ݇ܬ݁ ܡ̣ܢ ܥܵܠܲܡ. ܘܲܡܪܲܚܡܵܢܲܬ݁ ܠܕ݂ܵܪܕܵܪ̈ܝܼܢ. ܡܵܢܵܘ ܥܵܘܠܵܗ̇ ܕܲܒ݂ܪܝܼܬ݂ܵܐ. ܠܪ̈ܲܚܡܹܐ ܫܦܝܼܥܹ̈ܐ ܕܛܲܝܒ݁ܘܼܬܼܵܟ݂. ܪܘܿܣ ܠܹܗ ܒܐܲܦܵܘ̈ܗܝ ܕܲܟ݂ܝܵܢܲܢ. ܛܲܠܵܐ ܕܪ̈ܲܚܡܹܐ ܘܚܵܘܣܵܢܵܐ. ܘܫܵܘܙܸܒܲܝܢ ܡ̣ܢ ܝܲܕ݂ ܒܝܼܫܵܐ. ܘܡ̣ܢ ܙܝܼܙܵܢܹ̈ܐ ܒܢܲܝ̈ ܛܘܼܥܝܲܝ.

ܬܠܵܬ݂ܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ. ܒܩܵܠ: ܡܵܪܵܐ ܕܟ݂ܠܵܐ.

ܠܘܵܬܼܵܟ݂ ܟܠ ܒܣܲܪ ܢܹܐܬܸܐ. ܠܘܵܬܼܵܟ݂ ܡܵܪܝܵܐ ܢܲܦ̮ܫܝ ܐܲܪܝܼܡܹܬ݂. ܠܘܵܬܼܵܟ݂ ܡܵܪܝ ܢܹܐܬܸܐ ܟܠ ܒܣܲܪ. ܕܫܘܼܒ݂ܩܵܢ ܚܵܘܒܹ̈ܐ ܠܟ݂ܠ ܝܵܗ݇ܒܲܬ݁. ܒܙܘܿܦܵܐ ܕܝܼܠܵܟ݂ ܢܸܬ݂ܚܵܘܪܘܼܢ. ܦܲܓ݂ܪܹ̈ܐ ܕܲܚܛܝܼܬ݂ܵܐ ܟܲܬ݁ܡܲܬ̤. ܬܵܘ ܡܵܝܘܿܬܹ̈ܐ ܛܥܝܼܢܲܝ̈ ܡܵܘܒ݁ܠܹ̈ܐ. ܐܲܢܝܼܚܘ ܝܘܼܩܪܵܐ ܕܚܵܘܒܲܝ̈ܟ݁ܘܿܢ. ܘܣܲܒ݂ܘ ܘܐܸܬ݂ܚܲܣܵܘ ܡ̣ܢ ܡܲܕ݂ܒ݁ܚܵܐ. ܓܡܘܼܪܬܵܐ ܕܠܲܢܒ݂ܝܼܵܐ ܚܲܣܝܲܬ̤. ܬܢܝܼ. ܫܲܒܲܚ. ܡܲܠܟܵܐ ܕܡܲܠܟܹ̈ܐ ܐܝܼܵܠܲܢ. ܐܲܢ݇ܬ݁ܘܼ ܡܫܝܼܚܵܐ ܦܵܪܘܿܩܲܢ. ܚܘܼܣ ܥܲܠ ܥܲܒ݂ܕܲܝ̈ܟ ܕܩܵܪܹܝ̇ܢ ܠܵܟܼ. ܒܗܵܠܹܝܢ ܙܲܒ݂ܢܹ̈ܐ ܕܐܘܼܠܨܵܢܵܐ. ܕܗܵܐ ܚܕ݂ܝܼܪܝܼܢ ܠܲܢ ܕܵܘܘܿܢܹ̈ܐ. ܘܣܘܼܪ̈ܵܕܹܐ ܡ̣ܢ ܟܠ ܓܲܒ݁ܝܼ̈ܢ. ܒܲܥܓܲܠ ܢܩܲܕ݁ܡܘܼܢܵܢ ܪ̈ܲܚܡܲܝܟ. ܘܐܲܢܗܲܪ ܐܲܦܲܝ̈ܟ ܘܲܦܪܘܿܩܲܝܢ.

ܐܲܪܒܲܥܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ. ܒܩܵܠ: ܡܵܪܵܐ ܕܟ݂ܠܵܐ.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܘܐܸܡܲܪ ܕܬ݂ܘܼܒ݂ܘ ܒܢܲܝ̈ܢܵܫܵܐ. ܒܟ݂ܵܪܘܿܙܘܼܬܹܗ ܕܲܢܒ݂ܝܼܵܐ. ܒܨܵܘܡܵܐ ܐܸܬ݂ܦܲܪܩܲܬ̤ ܢܝܼܢܘܹܐ. ܘܲܒ݂ܒ݂ܵܥܘܼܬ݂ܵܐ ܘܲܨܠܘܿܬ݂ܵܐ. ܡܲܠܲܐܟ݂ ܡܵܘܬܵܐ ܡܸܢܵܗ̇ ܟܠ̣ܵܐ. ܒܚܲܫܵܐ ܘܕܸܡܥܹ̈ܐ ܕܲܬ݂ܝܵܒ݂ܘܼܬ݂ܵܐ. ܢܹܐܚܘܿܕ݂ ܓܵܘܣܵܐ ܒܓ݂ܵܘ ܗܲܝܟ݁ܠܵܐ. ܘܢܸܩܪܸܐ ܠܪ̈ܲܚܡܹܐ ܠܥܘܼܕ݂ܪܵܢܲܢ. ܥܲܕ݂ ܠܵܐ ܢܸܚܫܲܟ݂ ܢܲܗܝܼܪܵܐ. ܬܢܝܼ. ܫܲܒܲܚ. ܗܵܐ ܒܲܟ݂ܬܼܵܒܹ̈ܐ ܩܲܕܝܼܫܹ̈ܐ. ܕܪܝܼܫܵܐ ܐܘܼܪܚܵܐ ܠܡܲܠܟ݁ܘܬ݂ܵܐ. ܘܕ݂ܝܼܠܲܢ ܦܵܗܹ̇ܐ ܪܸܥܝܵܢܲܢ. ܒܲܣܪ̈ܝܼܩܵܬ݂ܵܐ ܕܠܵܐ ܝܘܼܬ݂ܪܵܢ. ܠܵܐ ܓܹܝܪ ܡܲܗܢܸܐ ܠܲܢ ܥܘܼܬ݂ܪܹܗ. ܕܥܵܠܡܵܐ ܗܵܢܵܐ ܥܵܒ݂ܘܿܪܵܐ. ܐܸܠܵܐ ܨܵܘܡܵܐ ܘܲܨܠܘܿܬ݂ܵܐ. ܕܲܒ݂ܗܘܿܢ ܐܸܬ݂ܦܲܪܩܲܬ̤ ܢܝܼܢܘܹܐ.

ܕܚܲܡܫܵܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ ܕܡܸܬ݂ܝܼܕܲܥ ܕܩܘܼܒܵܠܛܲܝܒ݁ܘܼܬ݂ܵܐ. ܒܩܵܠ: ܠܵܐ ܡܸܬ݁ܛܲܠܡܝܼܢ.

ܐܸܬ݂ܦܲܢ ܥܠܲܝܢ ܘܪܲܚܸܡܥܠܲܝܢ. ܡܪܲܚܡܵܢ ܐܲܢ݇ܬ݁ ܡܵܪܝܵܐ ܘܙܲܕܝܼܩ. ܐܲܠܵܗܵܐ ܕܚ̣ܵܣ ܥܲܠ ܢܝܼܢܘܹܐ ܚܘܼܣ ܥܠܲܝܢ. ܘܠܵܐ ܬܲܗܡܸܐ ܚܝܵܪܵܟ݂ ܡܸܢܹܗ ܕܕ݂ܵܪܲܢ ܒܝܼܫܵܐ. ܘܐܸܢ ܬܹܐܚܘܿܕ݂ ܬܲܪܥܵܟ݂ ܒܐܲܦܲܝ̈ܢ ܚܲܛܵܝܹ̈ܐ. ܒܲܬ݂ܪܲܥ ܡܲܢ ܢܹܐܙܲܠ ܢܸܩܘܿܫ ܪܵܚܹܡܢܵܫܵܐ. ܬܢܝܼ. ܫܲܒܲܚ. ܩ̣ܪܵܟ݂ ܝܵܘܢܵܢ ܡ̣ܢ ܓܵܘ ܢܘܼܢܵܐ ܘܲܥ̣ܢܲܝܬܵܝܗܝ. ܕܒܹܝܬ݂ ܚܲܢܲܢܝܵܐ ܒܐܲܬ݁ܘܿܢܵܐ ܘܦܲܨ̣ܝܼܬ݁ ܐܸܢܘܿܢ. ܘܟ݂ܠܵܗ̇ ܒܪܝܼܬ݂ܵܐ ܩܵܪܝܵܐ ܠܵܟ݂ ܒܲܚܢܲܓ݂ܬ݂ܵܐ. ܚܘܼܣܥܠܹܝܗ̇ ܘܪܲܚܸܡܥܠܹܝܗ̇ ܐܲܝܟ݂ ܕܲܡܥܵܕܲܬ݁.

ܥܪܘܼܒ݂ܬܵܐ ܕܫܸܬ݂ ܕܕܸܢܚܵܐ ܕܘܼܟ݂ܪܵܢܵܐ ܕܡܲܠܦܵܢܹ̈ܐ ܐ݇ܣܘܼܪ̈ܝܵܝܹܐ. ܒܩܵܠ: ܡܵܪܵܐ ܕܟ݂ܠܵܐ.

ܘܐܸܡܵܐ ܕܲܒ݂ܢܲܝ̈ܵܐ ܟܲܕ݂ ܚܵܕ݂ܝܵܐ. ܒܲܪ݇ܬ݂ ܡܲܠܟܵܐ ܒܫܘܼܒ݂ܚܵܐ ܩܵܡܲܬ̤. ܒܕ݂ܘܼܟ݂ܪܵܢ ܟܵܗܢܹ̈ܐ ܗܵܐ ܚܵܕ݂ܝܵܐ. ܥܹܕ݁ܬܵܐ ܫܒ݂ܝܼܚܬܵܐ ܘܩܲܕܝܼܫܬܵܐ. ܕܲܚܠܵܦ ܥܲܡܘܼܕܹ̈ܐ ܩܵܡ̣ܘ ܒܵܗ̇. ܕܢܸܗܘܘܿܢ ܡܲܠܦܵܢܹ̈ܐ ܡ̣ܢ ܒܢܹܝ̈ܗ̇. ܒܟ݂ܠ ܕܵܪ ܢܵܨܲܚ̇ ܝܘܼܠܦܵܢܗܘܿܢ. ܘܗܲܝܡܵܢܘܼܬ݂ܗܘܿܢ ܫܲܪܝܼܪܬܵܐ. ܒܕܲܐܟܸ݁ܣ̣ܘ ܠܡܲܠܟܹ̈ܐ ܘܠܵܐ ܐܸܙܕ݁ܟ݂ܝܼܘ. ܡ̣ܢ ܠܘܼܚܵܡܵܐ ܕܒ݂ܝܼܫܘܼܬ݂ܗܘܿܢ.  ܬܢܝܼ.  ܫܲܒܲܚ. ܠܟܸܢܫܲܢ ܒܲܪܸܟ݂ ܦܵܪܘܿܩܲܢ. ܘܐܲܫܪܵܐ ܒܓ݂ܵܘܹܗ ܛܲܝܒ݁ܘܼܬܼܵܟ݂. ܘܗܲܒ݂ܠܲܢ ܚܲܝܠܵܐ ܕܲܢܫܲܒ݁ܚܵܟܼ. ܟܸܢܫܹ̈ܐ ܕܲܠܥܸܠ ܥܲܡ ܕܲܠܬܲܚܬ݁. ܘܢܲܚܸܒ݂ ܟܠܲܢ ܠܲܚܕ݂ܵܕܹ̈ܐ. ܘܢܸܩܢܸܐ ܚܘܼܒܵܐ ܘܐܵܘܝܘܼܬ݂ܵܐ. ܐܲܟ݂ܡܵܐ ܕܲܩܢܹܝܢ ܪ̈ܘܼܚܵܢܹܐ. ܚܲܕ݂ ܨܸܒ݂ܝܵܢܵܐ ܕܠܵܟ݂ ܢܸܫܦܪܘܼܢ.

ܚܲܕ݂ܒ݁ܫܲܒܵܐ ܕܸܫܬܵܐ ܕܕܸܢܚܵܐ. ܒܩܵܠ: ܣܵܗܕܹ̈ܐ ܒܪ̈ܝܼܟܹܐ.

ܝܲܗ̣݇ܒ݂ܬ݁ ܠܕ݂ܵܚܠܲܝ̈ܟ ܐܵܬ̤ܵܐ: ܪܲܒ݁ܘܼ ܡܵܪܲܢ ܘܲܡܫܲܒܲܚ ܪܵܘܪ̱ܒ݂ܵܐܝܼܬ݂. ܪܲܒܵܐ ܗ݇ܝ̣ ܡܵܘܗܲܒ݂ܬܼܵܟ݂ ܕܲܠܘܵܬ݂ ܡܵܝܘܿܬܹ̈ܐ ܡܵܪܵܐ ܡܪܲܚܡܵܢܵܐ. ܒܡܲܝ̈ܵܐ ܪܘܼܚܵܟ݂ ܐܲܠ̣ܒܸ݁ܫܬܵܢ. ܒܠܲܚܡܵܐ ܦܲܓ݂ܪܵܟ݂ ܐܵܘܟܸܠ̣ܬܵܢ. ܘܒܲܕ݂ܡܵܟ݂ ܚܲܝܵܐ ܩܲܕܸܫ̣ܬܵܢ. ܘܥܲܡ ܪ̈ܘܼܚܵܢܹܐ ܚܲܠܸܛ̣ܬܵܢ. ܘܡ̣ܢ ܐܲܪܥܵܐ ܠܪܵܘܡܵܐ ܐܲܣܸܩ̣ܬܵܢ. ܬܢܝܼ. ܫܲܒܲܚ. ܨܠܝܼܒܹܗ ܕܲܡܫܝܼܚܵܐ ܩܲܛ̣ܠܵܗ̇ ܠܲܚܛܝܼܬ݂ܵܐ ܕܩܸܛܠܲܬ̤ ܠܲܟ݂ܝܵܢܲܢ. ܘܲܬ݂ܗܲܪܘ ܟܸܢܫܹ̈ܐ ܕܚܲܙܵܝܹ̈ܐ. ܒܙܵܟ݂ܘܼܬ݂ܵܐ ܕܲܒ݂ܪܹܫ ܩܲܝܣܵܐ. ܕܲܙܟ݂ܵܐ ܠܲܬ݂ܪܹܝܢ ܚܲܣܝܼܢܝܼ̈ܢ. ܓܲܒ݂ܪܵܐ ܕܐܸܬ݁ܬ݁ܠܝܼ ܒܲܙܩܝܼܦܵܐ. ܠܣܵܛܵܢܵܐ ܘܡܵܘܬܵܐ ܡܚܲܒ݁ܠܵܢܵܐ.

ܥܪܘܼܒ݂ܬܵܐ ܕܲܫܒܲܥ ܕܒ݂ܵܬܲܪ ܕܸܢܚܵܐ ܕܘܼܟ݂ܪܵܢܵܐ ܕܚܲܕ݂ ܦܲܪܨܘܿܦܵܐ. ܒܩܵܠ: ܣܵܗܕܵܘ̈ܗܝ ܕܲܒ݂ܪܵܐ.

ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ. ܕܒܲܡܪܵܘܡܵܐ ܣܵܡ̣ܬ݁ ܡܲܥܡ̱ܪܵܟ݂. ܠܥܸܠ ܒܲܡܪ̈ܵܘܡܹܐ ܨܹܝܕ݂ ܥܝܼܪܹ̈ܐ. ܪܫܝܼܡ ܕܘܼܟ݂ܪܵܢܵܟ݂ ܐܘܿ ܐܲܒ݂ܘܼܢ. ܥܲܡ ܟܹܐܢܹ̈ܐ ܕܲܢܨܲܚ̣ܘ ܘܲܙܟ݂ܵܘ. ܐܵܦ ܥܲܡ ܣܵܗܕܹ̈ܐ ܕܐܸܬ݂ܟܲܠܲܠܘ. ܓܢܘܿܢܵܐ ܒܪܵܘܡܵܐ ܡܵܘܪܸܬ݂ ܠܵܟܼ. ܡܲܠܟܵܐ ܡܫܝܼܚܵܐ ܕܲܪܚܸܡ̣ܬܵܝܗܝ. ܬܢܝܼ.  ܫܲܒܲܚ. ܨܠܘܿܬ݂ܵܟ݂ ܣܵܗܕܵܐ ܬܸܗܘܸܐ ܠܲܢ. ܫܘܼܪܵܐ ܪܵܡܵܐ ܘܒܹܝܬ݂ ܓܵܘܣܵܐ. ܕܓܹܐܪ̈ܵܘܗܝ ܕܒ݂ܝܼܫܵܐ ܢܸܫܬܲܗܘܿܢ. ܕܠܵܐ ܢܸܒ݂ܪܘܿܨ ܒܲܢ ܠܘܿܠܝܼܬܹܗ. ܣܵܢܐܹܗ ܕܓܸܢܣܲܢ ܒܥܸܠܕܲܪܵܐ. ܕܨܵܒܹ݁ܐ ܟܠܫܵܥ ܒܐܲܒ݂ܕܵܢܲܢ.

ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܕܸܢܚܵܐ. ܒܩܵܠ. ܠܵܟ݂ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ: ܘܲܒ݂ܟ݂ܠܙܒܲܢ ܬܸܫܒ݁ܚܵܬܹ̈ܗ ܒܦܘܼܡܝ. ܒܪܝܼܟ݂ܘܼ ܕܲܡܫܵܘܬܸܦ. ܠܲܟ݂ܝܵܢ ܡܵܝܘܿܬܹ̈ܐ. ܒܐ݇ܪ̈ܵܙܵܘܗܝ ܩܲܕܝܼܫܹ̈ܐ. ܬܢܝܼ. ܫܲܒܲܚ ܒܵܗ

ܥܪܘܼܒ݂ܬܵܐ ܕܲܬ݂ܡܵܢܹܐ ܕܕܸܢܚܵܐ. ܒܩܵܠ: ܡܫܝܼܚܵܐ ܐܸܬ݂ܝܼܠܸܕ݂.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܬܵܘ ܫܡܲܥܘ ܘܐܸܫܬܲܥܸܐ ܠܟ݂ܘܿܢ. ܓܡܘܼܪܬܵܐ ܩܲܪܸܒ݂ ܗ݇ܘ̣ܵܐ ܣܪܵܦܵܐ ܠܲܢܒ݂ܝܼܵܐ: ܦܲܓ݂ܪܹܗ ܐܸܬ݂ܩܲܕܲܫ ܘܥܵܘܠܹܗ ܐܸܬ݂ܚܲܣܝܼ. ܒܐ݇ܪ̈ܵܙܹܐ ܡܲܚܝܵܢܹ̈ܐ ܩܪܘܿܒ݂ܘ ܥܲܡܡܹ̈ܐ ܘܕܲܟܵܘ: ܡܘܼܡܹ̈ܐ ܕܦܲܓ݂ܪ̈ܲܝܟ݁ܘܿܢ ܘܚܵܘܒܹ̈ܐ ܕܢܲܦ̮̈ܫܵܬ݂ܟ݂ܘܿܢ. ܬܢܝܼ.  ܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ ܕܲܬ݂ܡܵܢܝܵܐ ܕܕܸܢܚܵܐ. ܒܩܵܠ: ܡܫܝܼܚܵܐ ܐܸܬ݂ܝܼܠܸܕ݂.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܬܵܘ ܚܙܵܘ ܥܒ݂ܵܕ݂ܵܘ̈ܗܝ ܕܐܲܠܵܗܵܐ. ܓܡܘܼܪܬܵܐ ܩܲܪܸܒ݂ ܗ̣݇ܘܵܐ ܣܪܵܦܵܐ ܠܲܢܒ݂ܝܼܵܐ: ܦܲܓ݂ܪܹܗ ܐܸܬ݂ܩܲܕܲܫ ܘܥܵܘܠܹܗ ܐܸܬ݂ܚܲܣܝܼ. ܒܐ݇ܪ̈ܵܙܹܐ ܡܲܚܝܵܢܹ̈ܐ ܩܪܘܿܒ݂ܘ ܥܲܡܡܹ̈ܐ ܘܕܲܟܵܘ: ܡܘܼܡܹ̈ܐ ܕܦܲܓ݂ܪ̈ܲܝܟ݁ܘܿܢ ܘܚܵܘܒܹ̈ܐ ܕܢܲܦ̮̈ܫܵܬ݂ܟ݂ܘܿܢ. ܬܢܝܼ.  ܫܲܒܲܚ. ܨܠܝܼܒ݂ܵܐ ܕܲܗܘ̤ܵܐ ܠܲܢ ܥܸܠܲܬ݂ ܛܵܒ݂̈ܵܬ݂ܵܐ. ܘܒܹܗ̤ܘ ܐܸܬ݂ܚܲܪܲܪ ܓܸܢܣܲܢ ܡܵܝܘܿܬ݂ܵܐ. ܗ̤ܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ݁ܝܘܗܝ ܠܒ݂ܝܼܫܵܐ ܘܟ݂ܠܗܹܝܢ ܨܸܢܥܵܬܹ̈ܗ.

ܥܪܘܼܒ݂ܬܵܐ ܕܲܬ݂ܫܲܥ ܕܕܸܢܚܵܐ ܕܘܼܟ݂ܪܵܢܵܐ ܗ݇ܝ̣ ܕܥܲܢܝܼܕܹ̈ܐ

ܕܐܲܢ݇ܬ݁ܘܼ ܟܘܼܡܪܵܐ ܠܥܵܠܲܡ. ܒܲܕ݂ܡܘܼܬܹܗ ܕܡܲܠܟ݁ܝܼܙܕܸܩ. ܪܲܒ݁ ܟܘܼܡܪܹ̈ܐ ܕܬ݂ܵܘܕܝܼܬܲܢ ܘܲܡܚܲܣܝܵܢܲܢ: ܡܫܝܼܚܵܐ ܕܲܗܘ̤ܵܐ ܚܠܵܦܲܝܢ: ܕܸܒ݂ܚܵܐ ܡܩܲܒ݁ܠܵܐ ܕܠܵܐ ܡܘܼܡܵܐ. ܡܸܢܵܟ݂ ܫܵܐ̇ܠܝܼܢܲܢ ܫܘܼܒ݂ܩܵܢ ܚܵܘܒܹ̈ܐ: ܡܵܐ ܕܬ݂ܵܩܹ̇ܢ ܟܘܼܪܣܲܝ ܕܝܼܢܵܐ. ܡܦܵܣܲܬ݁ ܓܹܝܪ ܒܚܲܫܵܘ̈ܗܝ ܕܲܟ݂ܝܵܢܲܢ: ܕܒܹܗ ܚܲܫ̣ܬ݁ ܘܐܸܬ݂ܢܲܣܝܼܬ݁ ܡܸܛܠ ܦܘܼܪܩܵܢܲܢ. ܬܢܝܼ.  ܫܲܒܲܚ. ܠܛܲܝܒ݁ܘܼܬܼܵܟ݂ ܡܲܠܟܵܐ ܡܫܝܼܚܵܐ ܡܦܝܼܣܝܼܢܲܢ. ܕܠܵܐ ܬܸܬ݁ܕ݁ܟܲܪ ܣܲܟ݂̈ܠ̱ܘܵܬ݂ܵܐ ܕܥܲܒ݂ܕܲܝ̈ܟ ܕܲܫ̣ܩܲܠܘ ܐ݇ܪܵܙ ܦܲܓ݂ܪܵܟ݂. ܘܗ̤ܝ ܬܩܘܼܡ ܒܐܲܦܲܝ̈ܗܘܿܢ ܒܝܘܿܡ ܢܘܼܚܵܡܵܐ. ܘܡ̣ܢ ܓܹܗܲܢܵܐ ܢܸܬ݂ܦܲܨܘܿܢ. ܘܥܲܡ ܥܝܼܪܹ̈ܐ ܠܐܘܼܪܥܵܟ݂ ܢܸܬ݂ܥܲܠܘܿܢ. ܒܫܘܼܒ݂ܚܵܐ ܪܲܒܵܐ ܠܪܵܘܡܵܐ ܕܲܫܡܲܝܵܐ.

ܕܚܲܕ݂ܒ݁ܫܲܒܵܐ ܕܡܲܥܵܠܲܝ̈ ܨܵܘܡܵܐ ܪܲܒܵܐ. ܒܩܵܠ. ܬܲܠܡܝܼܕ݂ܵܘ̈ܗܝ ܕܲܡܫܝܼܚܵܐ.

ܟܠܟ݂ܘܿܢ ܥܲܒ݂ܕܵܘ̈ܗܝ ܕܐܲܠܵܗܵܐ. ܬܵܘ ܒܢܲܝ̈ܵܐ ܫܘܼܡܥܘܼܢܝ. ܬܵܘ ܟܠܟ݂ܘܿܢ ܥܲܡܡܹ̈ܐ ܦܪ̈ܝܼܩܲܝ ܒܲܨܠܝܼܒ݂ܵܐ. ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ. ܘܲܒ݂ܢܲܟ݂ܦܘܼܬ݂ܵܐ ܘܙܲܗܝܘܼܬ݂ܵܐ ܘܩܲܕܝܼܫܘܼܬ݂ܵܐ. ܢܨܲܒܸ݁ܬ݂ ܦܲܓ݂ܪ̈ܲܝܢ ܘܢܲܦ̮̈ܫܵܬܲܢ. ܕܠܵܐ ܢܸܗܘܸܐ ܡܘܼܡܵܐ ܒܬܸܫܡܸܫܬܲܢ. ܘܢܸܬ݂ܚܲܝܲܒ݂ ܬܲܡܵܢ ܩܕ݂ܵܡ ܒܹܝܡ ܕܲܡܫܝܼܚܵܐ. ܬܢܝܼ. ܫܲܒܲܚ. ܒܣܵܗܕܹ̈ܐ ܒܪ̈ܝܼܟܹܐ. ܢܛܲܝܸܒ݂ ܬܲܪܥܝܼܬܲܢ ܘܢܸܡܪܘܿܩ ܚܘܼܫܵܒܲܝ̈ܢ ܡ̣ܢ ܐܲܟ݁ܬ݂ܵܐ ܘܥܵܘܠܵܐ. ܘܢܸܒ݂ܣܘܿܪ ܘܢܸܫܕܸ݁ܐ ܣܲܢ̈ܝܵܬܲܢ. ܘܢܸܬ݂ܩܲܪܲܒ݂ ܠܲܓ݂ܡܝܼܪܘܼܬ݂ܵܐ. ܘܢܸܬ݂ܒܲܩܸܐ ܒܙܵܘܥܲܝ̈ ܢܲܦ̮ܫܵܐ. ܒܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ. ܕܗ̤ܘ ܐܝܼܬ݂ܵܘܗܝ ܫܵܒܹܩ̇ ܚܵܘ̈ܒܵܬ݂ܵܐ.

ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܨܵܘܡܵܐ. ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.

ܐܸܢܵܐ ܕܹܝܢ ܥܠܲܝܟ ܡܵܪܝܵܐ ܐܸܬ݁ܬܲܟ݂ܠܹܬ݂. ܟܠ ܕܲܡܣܲܒ݁ܪܝܼܢ ܒܡܵܪܝܵܐ. ܬܘܼܟ݂ܠܵܢܵܐ ܕܐܝܼܬ݂ ܠܲܢ ܡܵܪܲܢ ܥܲܠ ܪ̈ܲܚܡܲܝܟ. ܡܓܲܪܸܓ݂ ܠܲܢ ܕܢܸܫܐܲܠ ܡܸܢܵܟ݂ ܫܘܼܒ݂ܩܵܢܵܐ. ܠܵܐ ܗ݇ܘ̣ܵܐ ܕܲܚܢܲܢ ܫܵܘܹܝ̇ܢܲܢ ܡܵܪܝܵܐ. ܐܸܠܵܐ ܕܐܲܢ݇ܬ݁ܘܼ ܡܙܲܕܸܩ ܐܲܢ݇ܬ݁ ܡܲܓܵܢ. ܠܲܕ݂ܩܵܪܹܝ̇ܢ ܠܵܟ݂ ܒܪ̈ܲܚܡܹܐ ܫܦܝܼܥܹ̈ܐ ܕܛܲܝܒ݁ܘܼܬ݂ܵܟ݂. ܬܢܝܼ. ܫܲܒܲܚ. ܬܵܘ ܟܠܲܢ ܢܸܟ݁ܘܿܦ ܒܘܼܪ̈ܟܲܝܢ ܒܲܨܠܘܿܬ݂ܵܐ. ܩܕ݂ܵܡ ܨܠܝܼܒ݂ܵܐ ܕܐܝܼܬ݂ܵܘܗܝ ܓܲܙܵܐ ܕܥܘܼܕ݂ܪ̈ܵܢܹܐ. ܕܢܸܫܟܲܚ ܪ̈ܲܚܡܹܐ ܘܫܘܼܒ݂ܩܵܢܵܐ ܕܚܵܘܒܹ̈ܐ. ܡܵܐ ܕܟ݂ܠ ܣܵܘܦܝܼ̈ܢ ܢܵܗ̇ܪܝܼܢ ܒܙܲܠܝܼܩܵܘ̈ܗܝ. ܘܟܲܕ݂ ܠܵܐ ܨܵܒܹܝ̇ܢ ܣܵܩܘܿܪ̈ܵܘܗܝ ܣ̇ܵܓ݂ܕ݁ܝܼܢ ܠܡܵܪܘܼܬܹܗ.

ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܨܵܘܡܵܐ. ܒܚܲܢܵܢܵܐ ܕܲܦܬ݂ܝܼܚ.

ܕܐܵܬ̣ܹܐ ܠܲܡܕ݂ܵܢܵܗ̇ ܠܐܲܪܥܵܐ: ܡܹܐܬ݂ܵܐ ܐܵܬ̣ܹܐ ܒܚܲܕ݂ܘܼܬ݂ܵܐ. ܕܲܝܵܢܵܐ ܟܹܐܢܵܐ ܐܵܬ̣ܹܐ ܒܫܘܼܠܵܡܵܐ. ܘܒ݂̇ܵܚܲܪ ܟܲܣ̈ܝܵܬ݂ܵܐ ܕܡܸܠܲܝ̈ܢ ܘܲܥܒ݂ܵܕܲܝ̈ܢ. ܢܸܕ݂ܚܲܠ ܡ̣ܢ ܕܝܼܢܹܗ ܕܠܵܐ ܢܵܣܹ̇ܒ݂ ܒܐܲܦܹ̈ܐ. ܕܐܵܣܝܵܐ ܗ݇ܘ̣ ܚܲܟ݁ܝܼܡܵܐ ܕܡܲܐܣܸܐ ܚܒ݂ܵܪ̈ܵܬܲܢ. ܬܢܝܼ. ܫܲܒܲܚ. ܨܠܝܼܒ݂ܵܐ ܕܲܗܘ̤ܵܐ ܠܲܢ ܥܸܠܲܬ݂ ܛܵܒ݂̈ܵܬ݂ܵܐ. ܘܒܹܗ̤ܘ ܐܸܬ݂ܚܲܪܲܪ ܓܸܢܣܲܢ ܡܵܝܘܿܬ݂ܵܐ. ܗ̤ܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ݁ܝܘܗܝ ܠܒ݂ܝܼܫܵܐ ܘܟ݂ܠܗܹܝܢ ܨܸܢܥܵܬܹ̈ܗ.

ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܨܵܘܡܵܐ. ܒܲܒ݂ܝܲܕ݂ ܫܠܵܡܵܐ.

ܐܲܬ݂ܩܸܢ ܐܲܪܥܵܐ ܥܲܠ ܡܲܬ݂ܩܢܹܝ̈ܗ̇: ܗܵܘ̇ ܕܐܝܼܬ݂ܵܘܗܝ ܡ̣ܢ ܩܕ݂ܵܡ ܥܵܠܡܹ̈ܐ. ܒܪܸܡܙܹܗ ܥ̣ܒܲܕ݂ ܒܪܝܼܬ݂ܵܐ ܟܠܵܗ̇ ܐܝܼܬ݂ܝܵܐ ܕܲܩܕ݂ܵܡ ܟܠ. ܘܠܲܚ̣ܡܵܗ̇ ܒܣܘܿܓ݂ܐܵܐ ܕܛܲܝܒ݁ܘܼܬܹܗ ܕܗ̤ܝ ܒܵܗ̇ ܬܹܐܠܲܦ ܥܠܵܘܗܝ. ܡܸܢܵܗ̇ ܥ̣ܲܒ݂ܕܵܗ̇ ܡܸܬ݂ܚܲܙܝܵܢܝܼܬ݂ܵܐ. ܡܢܵܬ݂ܵܐ ܐ݇ܚܪܹܬ݂ܵܐ ܡܸܬ݂ܝܲܕ݂ܥܵܢܝܼܬ݂ܵܐ. ܘܐܲܣ̣ܪܵܗ̇ ܠܟ݂ܠܵܗ̇ ܒܒܲܪܢܵܫܵܐ ܕܬ݂ܵܘܕܸ݁ܐ ܕܚܲܕ݂ܘܼ ܒ̣ܪܵܗ̇.  ܕܲܒ݂ܝܲܕ݂ ܚܘܼܒܹ݁ܗ ܢܵܘܕܲܥ ܥܲܠ ܝܵܬܹܗ. ܬܢܝܼ. ܫܲܒܲܚ. ܐܲܠܵܗܵܐ ܡܵܪܵܐ ܛܵܒ݂ܵܐ ܒܵܪܘܿܝܹܗ ܕܥܵܠܡܵܐ. ܒ̣ܪܵܐ ܗ̣݇ܘܵܐ ܘܐܲܬ݂ܩܸܢ ܒܛܲܝܒ݁ܘܼܬܹܗ ܐܸܣܛܘܼܟ݂ܣܹ̈ܐ ܐܲܪܒ݁ܥܵܐ. ܢܘܼܪܵܐ ܘܡܲܝܵܐ ܘܐܲܪܥܵܐ ܥܲܡ ܐܵܐܲܪ. ܘܲܒ݂ܡܘܼܙܵܓ݂ܗܘܿܢ ܝܲܗ̣݇ܒ݂ ܚܲܝܹ̈ܐ ܠܟ݂ܠ ܒܣܲܪ. ܘܲܒ݂ܗܘܿܢ ܫ̣ܵܘܕܲܥ ܪܲܒ݁ܘܼܬܹܗ ܘܚܲܝܠܵܐ ܕܚܸܟ݂ܡ̱ܬܹܗ. ܕܲܒ݂ܣܲܩܘܼܒ݂̈ܠܹܐ ܡܩܲܝܸܡ ܠܲܒ݂ܪܝܼܬܹܗ. ܥܵܠܲܡ. ܒܚܲܕ݂ܒ݁ܫܲܒܵܐ ܝܵܘܡܵܐ ܪܲܒܵܐ ܐܸܬ݂ܒ݁ܪܝܼ ܒܹܗ ܢܘܼܗܪܵܐ. ܘܒܲܬ݂ܪܹܝܢ ܪܩܝܼܥܵܐ. ܘܒܲܬ݂ܠܵܬ݂ܵܐ ܐܝܼܠܵܢܹ̈ܐ ܕܟ݂ܠ ܓܢܸܣ. ܘܒܲܐܪܒܲܥܒ݁ܫܲܒܵܐ ܒ̣ܪܵܐ ܫܸܡܫܵܐ ܘܣܲܗܪܵܐ. ܒܚܲܡܫܵܒ݁ܫܲܒܵܐ ܛܲܝܪܵܐ ܘܦܵܪܲܚܬ݂ܵܐ. ܘܒܲܥܪܘܼܒ݂ܬܵܐ ܓܲܒ݂ܠܹܗ ܠܐܵܕ݂ܵܡ ܘܲܩ̣ܪܵܝܗܝ ܫܸܡ ܨܲܠܡܹܗ. ܒܫܲܒ݁ܬ݂ܵܐ ܐܸܬ݁ܬ݁ܢܝܼܚ ܡܵܪܝܵܐ ܡ̣ܢ ܥܲܡܠܹܗ.

ܚܲܕ݂ܒ݁ܫܲܒܵܐ ܕܚܲܡܫܵܐ ܕܨܵܘܡܵܐ. ܒܩܵܠ: ܟܪܝܼܗܢܵܐ ܒܲܚܛܵܗܲܝ̈.

ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ. ܘܲܡܥܲܕ݁ܪܵܢܲܢ ܒܙܲܒ݂ܢܹ̈ܐ ܕܐܘܼܠܨܵܢܵܐ. ܙܲܒ݂ܢܵܐ ܐܝܼܬ݂ܵܘܗܝ ܕܦܘܼܪܩܵܢܵܐ ܠܲܡܣܲܒܵܪܘܼ ܒܐܲܠܵܗܵܐ. ܘܲܕ݂ܢܸܬ݂ܦܲܨܸܐ ܡ̣ܢ ܚܛܵܗܹ̈ܐ ܘܫܲܪ̈ܥܵܬ݂ܵܐ. ܕܲܒ݂ܥܵܠܡܵܐ ܗܵܢܵܐ ܣ̣ܥܲܪܢܲܢ. ܠܲܡܩܲܒܵܠܘܼ ܫܘܼܒ݂ܩܵܢܵܐ ܕܲܚܛܵܗܹ̈ܐ: ܬܢܝܼ. ܫܲܒܲܚ. ܒܡܲܕ݂ܢܵܚܲܝ̈ ܨܲܦܪܵܐ. ܒܟ݂ܠܙܒܲܢ ܗܘ̤ܵܘ ܥܝܼܪܝܼܢ ܟܲܕ݂ ܐܲܣܝܼܪܝܼܢ ܚܲܨܲܝ̈ܟ݁ܘܿܢ. ܘܢܵܗ̇ܪܝܼܢ ܟܠܫܵܥ ܫܪ̈ܵܓܹܐ ܕܕܸܠܩܲܝ̈ܟ݁ܘܿܢ. ܕܬܸܫܬ݁ܘܘܿܢ ܠܗܵܘ̇ ܛܘܼܒ݂ܵܐ. ܕܲܡ̣ܠܲܟ݂ ܗ݇ܘ̣ܵܐ ܠܥܲܒ݂ܕܹ̈ܐ ܛܵܒܹ̈ܐ. ܕܐܸܬ݂ܵܐ ܘܐܸܫ̣ܟܲܚ ܐܸܢܘܿܢ ܟܲܕ݂ ܥܝܼܪܝܼܢ.

ܚܲܕ݂ܒ݁ܫܲܒܵܐ ܕܸܫܬܵܐ ܕܨܵܘܡܵܐ. ܒܡܲܢ̣ܘܼ ܣܵܦܹ̇ܩ.

ܒܪܲܡܫܵܐ ܘܲܒ݂ܨܲܦܪܵܐ ܘܲܒ݂ܛܲܗܪܵܐ. ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ. ܐܲܫܘܵܢ ܡܵܪܲܢ ܒܲܚܢܵܢܵܟ݂ ܕܢܸܦܠܘܿܚ ܒܟܲܪܡܵܐ ܕܲܣܒܲܪܬ݂ܵܟ݂. ܘܢܸܣܲܒ݂ ܟܲܟ݁ܪܹ̈ܐ ܕܝܘܼܠܦܵܢܵܐ ܡ̣ܢ ܓܲܙܵܐ ܕܣܸܦܪ̈ܲܝܟ. ܘܢܲܪܡܸܐ

ܡܸܫܚܵܐ ܒܠܲܡܦܹܝܕܲܝ̈ܢ. ܕܲܠܣܲܟ݂̈ܠܵܬ݂ܵܐ ܠܵܐ ܢܸܕ݂ܡܸܐ. ܚܲܬ݂ܢܵܐ ܕܪܵܘܡܵܐ ܐܲܫܘܵܢ ܠܲܓ݂ܢܘܿܢܵܟܼ: ܬܢܝܼ.  ܫܲܒܲܚ. ܨܠܘܿܬܲܢ ܩܲܒܸ݁ܠ ܦܵܪܘܿܩܲܢ ܘܦܲܢܵܐ ܒܪ̈ܲܚܡܲܝܟ ܫܸܐ̈ܠܵܬܲܢ. ܘܲܨܠܝܼܒ݂ܵܟ݂ ܢܸܗܘܸܐ ܫܘܼܪܵܐ ܠܟܸܢܫܲܢ ܡ̣ܢ ܒܝܼܫܵܐ ܘܚܲܝܠܹܗ. ܘܢܸܗܘܸܐ ܠܵܟ݂ ܥܲܒ݂ܕܹ̈ܐ ܛܵܒܹ̈ܐ. ܘܢܲܣܸܩ ܫܘܼܒ݂ܚܵܐ ܠܡܵܪܘܼܬ݂ܵܟ݂. ܫܵܘܹ̇ܐ ܠܫܘܼܒ݂ܚܵܐ ܡ̣ܢ ܟܠ ܦܘܼܡ̈ܝܼܢ.

ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܨܵܘܡܵܐ ܘܥܹܐܕ݂ܵܐ ܗ݇ܘ̣ ܕܐܘܿܫܲܥܢܹ̈ܐ. ܪܹܫ ܩܵܠܵܐ.

ܛܘܼܒܲܝܗܘܿܢ ܠܐܲܝܠܹܝܢ ܕܲܕ݂ܠܵܐ ܡܘܼܡ ܐܸܢܘܿܢ ܒܐܘܼܪܚܵܐ. ܠܐܲܝܠܹܝܢ ܕܲܬ݂ܪܝܼܨܝܼܢ ܒܠܸܒ݁ܗܘܿܢ. ܛܘܼܒ݂ܵܐ ܠܝܲܠܘܼܕܹ̈ܐ ܕܲܫ̣ܘܵܘ ܕܢܸܚܙܘܿܢ ܠܲܡܫܝܼܚܵܐ. ܟܲܕ݂ ܥܵܐܹ̇ܠ ܗ݇ܘ̣ܵܐ ܠܐܘܿܪܸܫܠܹܡ. ܘܲܪܟ݂ܝܼܒ݂ ܥܲܠ ܥܝܼܠܵܐ ܘܲܛܠܵܝܹ̈ܐ ܒܣܵܘܟܲܝ̈ ܙܲܝܬܵܐ. ܡܫܲܒ݁ܚܝܼܢ ܩܕ݂ܵܡܵܘܗܝ ܟܲܕ݂ ܐܵܡ̇ܪܝܼܢ. ܐܘܿܫܲܥܢܵܐ ܒܪܵܘܡܵܐ. ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ: ܬܢܝܼ. ܫܲܒܲܚ. ܛܠܵܝܹ̈ܐ ܛ̣ܥܲܢܘ ܣܵܘܟܹ̈ܐ. ܘܲܥܠܲܝ̈ܡܵܬ݂ܵܐ ܟܸܢܵܪܹ̈ܐ. ܘܲܩܕ݂ܵܡ ܒܲܪ ܕܵܘܝܼܕ݂ ܙܵܡ̇ܪܝܼܢ. ܘܲܫ̣ܡܲܥܘ ܪ̈ܘܼܚܵܢܹܐ. ܩܵܠ ܝܘܼܒܵܒ݂ܗܘܿܢ ܕܝܲܠܘܼܕܹ̈ܐ. ܘܲܩ̣ܥܵܘ ܟܠܗܘܿܢ ܟܲܕ݂ ܐܵܡ݁ܪܝܼܢ. ܐܘܿܫܲܥܢܵܐ ܒܪܵܘܡܵܐ. ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ.

ܕܡܲܓܵܗܲܝ̈ ܥܪܘܼܒ݂ܬܵܐ ܕܚܲܫܵܐ ܘܐ݇ܪ̈ܵܙܹܐ ܕܦܸܨܚܵܐ. ܒܲܝܗܘܼܕ݂ܵܐ ܥܵܒܲــ̇ـܪ ܢܵܡܘܿܣܵܐ.

ܕܘܼܟ݂ܪܵܢܵܐ ܕܛܲܝ̈ܒ݁ܘܵܬ݂ܵܟ݂ ܣܲܓ݁ܝܼ̈ܐܵܬ݂ܵܐ. ܕܢܸܬ݁ܕ݁ܟܲܪ ܫܡܵܟ݂ ܒܟ݂ܠ ܕܵܪ ܘܕ݂ܵܪ. ܥܘܼܗܕܵܢܹܗ ܕܚܲܫܵܟ݂ ܝܲܩܝܼܪܵܐ. ܕܲܚܠܵܦ ܦܘܼܪܩܵܢܲܢ ܐܸܬ݂ܓ݁ܡܲܪ. ܥܵܒ݂̇ܕܵܐ ܥܹܕ݁ܬܵܟ݂ ܦܵܪܘܿܩܲܢ. ܢܲܛܲܪ ܝܲܠܕܹ݁ܝ̈ܗ̇ ܡ̣ܢ ܢܸܟ݂ܝܵܢܹ̈ܐ: ܬܢܝܼ. ܫܲܒܲܚ. ܡܫܝܼܚܵܐ ܕܒܲܨܠܝܼܒ݂ܵܟ݂ ܝܲܩܝܼܪܵܐ. ܦܪܲܩ̣ܬܵܝܗܝ ܠܓܸܢܣܲܢ ܡ̣ܢ ܛܘܼܥܝܲܝ. ܥܹܕ݁ܬܵܟ݂ ܚܲܫܵܟ݂ ܗܵܐ ܓܵܡ̇ܪܵܐ. ܐܲܫܘܵܗ̇ ܕܬܸܚܕܸ݁ܐ ܒܲܩܝܵܡܬܵܟ݂.

ܕܐ݇ܪ̈ܵܙܹܐ ܕܪܲܡܫܵܐ ܕܲܩܝܵܡܬܵܐ. ܒܩܵܠ: ܟܲܪܡܵܟ݂ ܟܲܢܝܼܬܵܝܗܝ.

ܫܲܒܲܚܘ ܠܡܵܪܝܵܐ ܟܠܟ݂ܘܿܢ ܥܲܡܡܹ̈ܐ. ܟܠܟ݂ܘܿܢ ܥܲܒ݂ܕܵܘ̈ܗܝ ܕܐܲܠܵܗܵܐ. ܟܠܟ݂ܘܿܢ ܐܲܝܠܹܝܢ ܕܒܲܡܫܝܼܚܵܐ ܥ̣ܡܲܕ݁ܬ݁ܘܿܢ ܠܲܡܫܝܼܚܵܐ ܠ̣ܒܸܫܬ݁ܘܿܢ ܡ̣ܢ ܡܲܝ̈ܵܐ ܘܪܘܼܚܵܐ. ܕܥܲܡܹܗ ܬܲܡܠ̱ܟ݂ܘܿܢ ܒܥܘܼܡܪܵܐ ܕܲܫܡܲܝܵܐ: ܬܢܝܼ. ܫܲܒܲܚ. ܒܚܲܕ݂ ܪܘܼܚܵܐ ܥ̣ܡܲܕ݁ܬ݁ܘܿܢ ܠܚܲܕ݂ ܪܘܼܚܵܐ ܠ̣ܒܸܫܬ݁ܘܿܢ. ܠܚܲܕ݂ ܡܵܪܝܵܐ ܝܼܕܲܥ̣ܬ݁ܘܿܢ ܕܒܲܫܡܹܗ ܬܸܬ݂ܩܪܘܿܢ. ܘܥܲܡܹܗ ܬܸܬ݂ܒܲܣܡܘܼܢ ܒܥܘܼܡܪܵܐ ܡܠܸܐ ܛܘܼܒܹ̈ܐ.

ܕܐ݇ܪ̈ܵܙܹܐ ܕܚܲܕ݂ܒ݁ܫܲܒܵܐ ܪܲܒܵܐ ܕܲܩܝܵܡܬܹܗ ܕܡܵܪܲܢ. ܒܡܵܪܵܐ ܕܟ݂ܠܵܐ.

ܡܵܪܝܵܐ ܐܲܡ̣ܠܸܟ݂ ܬܕ݂ܘܼܨ ܐܲܪܥܵܐ. ܐܸܬ݂ܦܲܨܚ̄ܘ ܘܙܲܡܲܪܘ ܘܫܲܒܲܚܘ. ܕܘܼܨܘ ܘܐܸܬ݂ܠܲܒܲܒ݂ܘ ܡܵܝܘܿܬܹ̈ܐ. ܕܫܘܼܠܛܵܢܹܗ ܕܡܵܘܬܵܐ ܐܸܫܬ݁ܪܝܼ. ܡܫܝܼܚܵܐ ܒܚܲܫܹܗ ܠܡܵܘܬܵܐ ܙ̣ܟ݂ܵܐ. ܘܲܡ̣ܠܲܟ݂ ܚܲܝܹ̈ܐ ܒܲܩܝܵܡܬܹ݁ܗ. ܫܡܲܝܵܐ ܘܐܲܪܥܵܐ ܗܵܐ ܚܵܕܹܝ̇ܢ. ܘܟܸܢܫܹ̈ܐ ܕܡܲܠܲܐܟܹ̈ܐ ܡܝܲܒ݁ܒ݂ܝܼܢ. ܫܘܼܒ݂ܚܵܐ ܠܕܲܐܚ̣ܝܼ ܒܲܩܝܵܡܬܹ݁ܗ. ܠܓܸܢܣܵܐ ܕܐ݇ܢܵܫܵܐ ܕܐܲܒ݁ܝܼܕ݂ ܗ݇ܘ̣ܵܐ: ܬܢܝܼ. ܫܲܒܲܚ. ܠܟܸܢܫܲܢ ܒܲܪܸܟ݂ ܦܵܪܘܿܩܲܢ. ܘܐܲܫܪܵܐ ܒܓ݂ܵܘܹܗ ܛܲܝܒ݁ܘܼܬ݂ܵܟ݂. ܘܗܲܒ݂ܠܲܢ ܚܲܝܠܵܐ ܕܲܢܫܲܒ݁ܚܵܟܼ. ܟܸܢܫܹ̈ܐ ܕܲܠܥܸܠ ܥܲܡ ܕܲܠܬܲܚܬ݁. ܘܢܲܚܸܒ݂ ܟܠܲܢ ܠܲܚܕ݂ܵܕܹ̈ܐ. ܘܢܸܩܢܸܐ ܚܘܼܒܵܐ ܘܐܵܘܝܘܼܬ݂ܵܐ. ܐܲܟ݂ܡܵܐ ܕܲܩܢܹܝܢ ܪ̈ܘܼܚܵܢܹܐ. ܚܲܕ݂ ܨܸܒ݂ܝܵܢܵܐ ܕܠܵܟ݂ ܢܸܫܦܪܘܼܢ.

ܬܪܹܝܢܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ. ܒܠܵܟ݂ܘܼ ܩܵܪܹܝܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ. ܘܲܒ݂ܟ݂ܠܙܒܲܢ ܬܸܫ̈ܒ݁ܚܵܬܹܗ ܒܦܘܼܡܝ. ܒܪܝܼܟ݂ܘܼ ܕܒܲܩܝܵܡܬܹ݁ܗ ܐܲܩ̣ܢܝܼ ܠܘܼܒܵܒ݂ܵܐ ܠܓܸܢܣܵܐ ܕܡܵܝܘܿܬܹ̈ܐ: ܬܢܝܼ. ܫܲܒܲܚ. ܫܘܼܒ݂ܚܵܐ ܘܬ݂ܵܘܕܝܼܬ݂ܵܐ ܢܲܣܸܩ ܠܹܗ ܠܲܒ݂ܪܵܐ ܕܦܲܪܩܲܢ ܒܲܨܠܝܼܒܹܗ.

ܬܠܵܬ݂ܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ. ܒܠܵܟ݂ܘܼ ܩܵܪܹܝ̇ܢܲܢ.

ܡܵܐ ܛܵܒ݂ ܘܡܵܐ ܫܲܦܝܼܪ. ܘܠܹܗ̤ܘ ܝܵܐ݁ܝܵܐ ܬܸܫܒ݁ܘܿܚܬܵܐ. ܫܒ݂ܝܼܚܘܼ ܚܘܼܕܵܬ݂ܵܐ ܕܲܥ̣ܒܲܕ݂ ܦܵܪܘܿܩܲܢ ܠܓܸܢܣܵܐ ܕܡܵܝܘܿܬܹ̈ܐ: ܬܢܝܼ. ܫܲܒܲܚ. ܫܘܼܒ݂ܚܵܐ ܘܬ݂ܵܘܕܝܼܬ݂ܵܐ ܢܲܣܸܩ ܠܹܗ ܠܲܒ݂ܪܵܐ ܕܦܲܪܩܲܢ ܒܲܨܠܝܼܒܹܗ.

ܕܐܲܪܒܲܥܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ. ܒܡܵܪܵܐ ܕܟ݂ܠܵܐ.

ܗܝ̤ ܗܘ̤ܵܬ݂ ܠܪܹܫܹܗ ܕܒܸܢܝܵܢܵܐ. ܚܲܝܹ̈ܐ ܫܲܐܠܵܟ݂ ܘܝܲܗ̣݇ܒ݂ܬ݁ ܠܹܗ. ܩܝܵܡܬܵܟ݂ ܡܵܪܲܢ ܚܲܝܹ̈ܐ ܗܘ̤ܵܬ݂. ܠܓܸܢܣܵܐ ܕܐ݇ܢܵܫܵܐ ܕܐܲܒ݁ܝܼܕ݂ ܗ݇ܘ̣ܵܐ. ܕܩܵܡ̣ܘ ܘܐܸܬ݂ܢܲܚܲܡܘ ܘܚܲܝܹ̈ܐ ܩ̣ܢܵܘ. ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ. ܘܲܫ̣ܠܲܚܘ ܘܲܫ̣ܕ݂ܵܘ ܚܲܢܦܘܼܬ݂ܵܐ. ܘܛܘܼܥܝܲܝ ܟܠܵܗ̇ ܕܲܦܬܲܟ݂ܪܹ̈ܐ. ܘܲܒ݂ܪܲܟ݂ܘ ܘܲܣ̣ܓܸܕ݂ܘ ܠܚܲܕ݂ ܐܝܼܬ݂ܝܵܐ. ܕܒܲܒ݂ܪܹܗ ܚܲܝܵܐ ܦܪܲܩ̣ ܥܵܠܡܹ̈ܐ: ܬܢܝܼ. ܫܲܒܲܚ. ܨܠܝܼܒ݂ܵܐ ܕܢܘܼܗܪܵܐ ܕܐܸܬ݂ܚܵܘܝܼ. ܠܩܘܼܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹܠ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ݂ܵܐ. ܘܙܵܥ ܘܐܸܬ݂ܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ݂ܕܲܝ̈ ܠܒܸܪ̈ܝܵܬ݂ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬ݂ܵܐ. ܘܲܣܓܸܕ݂ܘ ܠܲܨܠܝܼܒ݂ܵܐ ܘܝܲܩ̣ܪܘܼܗܝ.

ܚܲܡܫܵܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ. ܒܩܵܠ: ܡܵܪܵܐ ܕܟ݂ܠܵܐ.

ܥܲܠ ܕܠܵܐ ܢ̣ܛܲܪܘ ܩܝܵܡܹܗ ܕܐܲܠܵܗܵܐ. ܫܲܬ݂ܐܸܣܹ̈ܐ ܕܛܘܼܪܹ̈ܐ ܙܵܥ ܘܐܸܬ݁ܬܲܠܲܚ. ܓܸܢܣܵܐ ܕܐ݇ܢܵܫܵܐ ܚܲܝܵܒ݂ ܗ݇ܘ̣ܵܐ. ܕܝܼܢܵܐ ܕܡܵܘܬܵܐ ܘܲܕ݂ܠܵܘܛܬ݂ܵܐ. ܡܫܝܼܚܵܐ ܒܚܘܼܒܹ݁ܗ ܨ̣ܒ݂ܵܐ ܘܐܸܨܛܠܸܒ݂. ܕܲܢܚܲܪܲܪ ܟܠ ܡ̣ܢ ܠܵܘܛܬ݂ܵܐ. ܘܝܲܗ̣݇ܒ݂ ܗ݇ܘ̣ܵܐ ܢܲܦ̮ܫܹܗ ܠܐܵܚܘܿܕ݂ܵܘ̈ܗܝ. ܝܲܡܵܐ ܕܪ̈ܲܚܡܹܐ ܕܠܵܐ ܡܸܬ݁ܬ݁ܟ݂ܝܼܠ. ܘܡܵܘܬܵܐ ܕܙܲܒ݂ܢܵܐ ܦܲܓ݂ܪܹܗ ܛ̣ܥܸܡ. ܘܲܫ̣ܪܵܐ ܠܡܵܘܬܵܐ ܘܲܠܠܵܘܛܬ݂ܵܐ: ܬܢܝܼ. ܫܲܒܲܚ. ܨܠܝܼܒ݂ܵܐ ܕܢܘܼܗܪܵܐ ܕܐܸܬ݂ܚܵܘܝܼ. ܠܩܘܼܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹܠ̇ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ݂ܵܐ. ܘܙܵܥ ܘܐܸܬ݂ܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ݂ܕܲܝ̈ ܠܒܸܪ̈ܝܵܬ݂ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬ݂ܵܐ. ܘܲܣܓܸܕ݂ܘ ܠܲܨܠܝܼܒ݂ܵܐ ܘܝܲܩ̣ܪܘܼܗܝ.

ܥܪܘܼܒ݂ܬܵܐ ܕܡܵܘܕܝܵܢܹ̈ܐ. ܒܣܵܗܕܵܘ̈ܗܝ ܕܲܒ݂ܪܵܐ.

ܬܵܘ ܫܡܲܥܘ ܘܐܸܫܬܲܥܸܐ ܠܟ݂ܘܼܢ. ܟܠܟ݂ܘܿܢ ܥܲܒ݂ܕܵܘ̈ܗܝ ܕܐܲܠܵܗܵܐ. ܐܸܫܬܲܥܵܐ ܠܲܢ ܕܵܢܝܼܐܹܝܠ. ܛܲܠܝܵܐ ܪܓ݂ܝܼܓ݂ܵܐ ܕܐܲܠܵܗܵܐ. ܕܐܲܝܟܲܢܵܐ ܚ̣ܙܲܝܬܵܝܗܝ ܠܲܒ݂ܪܵܐ. ܚܙܹܝ݁ܬܹܗ ܕܦܵܪܲܚ̇ ܒܲܥܢܵܢܹ̈ܐ. ܘܕ݂ܵܡܹ̇ܐ ܠܥܲܬ݁ܝܼܩ ܝܵܘ̈ܡܵܬ݂ܵܐ. ܕܫܘܼܠܛܵܢܹܗ ܫܡܲܝܵܐ ܘܐܲܪܥܵܐ: ܬܢܝܼ. ܫܲܒܲܚ. ܡܵܐ ܝܵܐܹ݁ܐ ܠܲܡܫܲܒܵܚܘܼ ܒܒܲܝܬܵܐ ܗܵܢܵܐ ܩܲܕܝܼܫܵܐ. ܕܐܝܼܬ݂ ܒܹܗ ܢܒ݂ܝܹ̈ܐ ܘܲܫܠܝܼܚܹ̈ܐ. ܘܣܵܗܕܹ̈ܐ ܘܟ݂ܵܗܢܹ̈ܐ ܘܡܲܠܦܵܢܹ̈ܐ. ܘܡܲܬ݂ܩܲܢ ܒܹܗ ܦܵܬ݂ܘܿܪ ܩܘܼܕ݂ܫܵܐ. ܠܚܘܼܣܵܝܵܐ ܕܝܲܠܕ݂ܵܘ̈ܗܝ ܕܐܵܕ݂ܵܡ.

ܕܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܲܩܝܵܡܬܵܐ ܘܡܸܬ݂ܩܪܸܐ ܚܲܕ݂ܬܵܐ. ܒܡܵܪܵܐ ܕܟ݂ܠܵܐ.

ܗܝ̤ ܗܘ̤ܵܬ݂ ܠܪܹܫܹܗ ܕܒܸܢܝܵܢܵܐ. ܚܲܝܹ̈ܐ ܫܲܐܠܵܟ݂ ܘܝܲܗ̣݇ܒ݂ܬ݁ ܠܹܗ. ܩܝܵܡܬܵܟ݂ ܡܵܪܲܢ ܚܲܝܹ̈ܐ ܗܘ̤ܵܬ݂. ܠܓܸܢܣܵܐ ܕܐ݇ܢܵܫܵܐ ܕܐܲܒ݁ܝܼܕ݂ ܗ݇ܘ̣ܵܐ. ܕܩܵܡ̣ܘ ܘܐܸܬ݂ܢܲܚܲܡܘ ܘܚܲܝܹ̈ܐ ܩ̣ܢܵܘ. ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ. ܘܲܫ̣ܠܲܚܘ ܘܲܫ̣ܕ݂ܵܘ ܚܲܢܦܘܼܬ݂ܵܐ. ܘܛܘܼܥܝܲܝ ܟܠܵܗ̇ ܕܲܦܬܲܟ݂ܪܹ̈ܐ. ܘܲܒ݂ܪܲܟ݂ܘ ܘܲܣ̣ܓܸܕ݂ܘ ܠܚܲܕ݂ ܐܝܼܬ݂ܝܵܐ. ܕܒܲܒ݂ܪܹܗ ܚܲܝܵܐ ܦ̣ܪܲܩ ܥܵܠܡܹ̈ܐ: ܬܢܝܼ. ܫܲܒܲܚ. ܨܠܝܼܒ݂ܵܐ ܕܢܘܼܗܪܵܐ ܕܐܸܬ݂ܚܵܘܝܼ. ܠܩܘܼܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹܠ̇ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ݂ܵܐ. ܘܙܵܥ ܘܐܸܬ݂ܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ݂ܕܲܝ̈ ܠܒܸܪ̈ܝܵܬ݂ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬ݂ܵܐ. ܘܲܣ̣ܓܸܕ݂ܘ ܠܲܨܠܝܼܒ݂ܵܐ ܘܝܲܩ̣ܪܘܼܗܝ.

ܕܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܲܩܝܵܡܬܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ. ܘܲܒ݂ܟ݂ܠܙܒܲܢ ܬܸܫ̈ܒ݁ܚܵܬܹܗ ܒܦܘܼܡܝ. ܒܪܝܼܟ݂ܘܼ ܕܒܲܩܝܵܡܬܹ݁ܗ ܐܲܩ̣ܢܝܼ ܠܘܼܒܵܒ݂ܵܐ ܠܓܸܢܣܵܐ ܕܡܵܝܘܿܬܹ̈ܐ: ܬܢܝܼ. ܫܲܒܲܚ. ܫܘܼܒ݂ܚܵܐ ܘܬ݂ܵܘܕܝܼܬ݂ܵܐ ܢܲܣܸܩ ܠܹܗ ܠܲܒ݂ܪܵܐ ܕܦܲܪܩܲܢ ܒܲܨܠܝܼܒܹܗ.

ܕܘܼܟ݂ܪܵܢܵܐ ܕܡܵܪܝ ܓܝܼܘܲܪܓܝܼܣ ܣܵܗܕܵܐ ܕܗܵܘܹ̇ܐ (ܟܕ) ܒܢܝܼܣܵܢ ܝܲܪܚܵܐ. ܒܩܵܠ: ܣܵܗܕܵܘ̈ܗܝ ܕܲܒ݂ܪܵܐ.

ܢܸܬܸ݁ܠ ܠܵܟ݂ ܡܵܪܝܵܐ ܐܲܝܟ݂ ܠܸܒܵܟܼ. ܙܲܕ݁ܝܼܩܵܐ ܘܲܬ݂ܪܝܼܨܵܐ. ܡܵܪܝ ܓܝܼܘܲܪܓܝܼܣ ܛܘܼܒ݂ܵܢܵܐ. ܣܵܗܕܵܐ ܙܲܗܝܵܐ ܘܩܲܕ݁ܝܼܫܵܐ. ܕܩܲܒܸ݁ܠ ܡܵܘܬܵܐ ܚܠܵܦ ܡܵܪܹܗ. ܘܲܙܟ݂ܵܐ ܠܟ݂ܠܵܗ̇ ܒܝܼܫܘܼܬ݂ܗܘܿܢ. ܘܲܠܨܸܢ̈ܥܵܬ݂ܗܘܿܢ ܕܪ̈ܲܫܝܼܥܹܐ. ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ: ܬܢܝܼ. ܫܲܒܲܚ. ܨܠܘܿܬ݂ܵܟ݂ ܣܵܗܕܵܐ ܬܸܗܘܸܐ ܠܲܢ. ܫܘܼܪܵܐ ܪܵܡܵܐ ܘܒܹܝܬ݂ ܓܵܘܣܵܐ. ܘܓܹܐܪ̈ܵܘܗܝ ܕܒ݂ܝܼܫܵܐ ܢܸܫܬܲܗܘܿܢ. ܕܠܵܐ ܢܸܒ݂ܪܘܿܨ ܒܲܢ ܠܘܿܠܝܼܬܹܗ. ܣܵܢ݁ܐܹܗ ܕܓܸܢܣܲܢ ܒܥܸܠܕܲܪܵܐ. ܕܨܵܒܹܐ ܟܠܫܵܥ ܒܐܲܒ݂ܕܵܢܲܢ.

ܕܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܲܩܝܵܡܬܵܐ. ܒܣܵܗܕܹ̈ܐ ܒܪ̈ܝܼܟܹܐ.

ܐܹܪܲܡ̱ܪܡܵܟ݂ ܡܵܪܝ ܡܲܠܟܵܐ. ܢܸܫܡ̱ܥܘܼܢ ܡܸܣܟܹ݁ܢܹ̈ܐ ܘܢܸܚܕ݁ܘܿܢ. ܨܠܝܼܒܹܗ ܕܲܡܫܝܼܚܵܐ ܩܲܛ̣ܠܵܗ̇ ܠܲܚܛܝܼܬ݂ܵܐ ܕܩܸܛܠܲܬ̤ ܠܲܟ݂ܝܵܢܲܢ. ܘܲܬ݂ܗܲܪܘ ܟܸܢܫܹ̈ܐ ܕܚܲܙܵܝܹ̈ܐ. ܒܙܵܟ݂ܘܼܬ݂ܵܐ ܕܲܒ݂ܪܹܫ ܩܲܝܣܵܐ. ܕܲܙܟ݂ܵܐ ܠܲܬ݂ܪܹܝܢ ܚܲܣܝܼܢܝܼ̈ܢ. ܓܲܒ݂ܪܵܐ ܕܐܸܬ݁ܬ݁ܠܝܼ ܒܲܙܩܝܼܦܵܐ. ܠܣܵܛܵܢܵܐ ܘܡܵܘܬܵܐ ܡܚܲܒ݁ܠܵܢܵܐ: ܬܢܝܼ. ܫܲܒܲܚ. ܡܫܝܼܚܵܐ ܕܫܲܝܸܢ ܒܲܕ݂ܡܵܐ ܕܲܩܢܘܿܡܹܗ. ܪܵܘܡܵܐ ܥܲܡ ܥܘܼܡܩܵܐ. ܫܲܝܸܢ ܡܵܪܝ ܟܵܗܢܹ̈ܐ ܘܡܲܠܟܹ̈ܐ. ܘܥܹܕ݁ܬܵܟ݂ ܩܲܝܸܡ ܒܲܚܢܵܢܵܟܼ. ܘܚܲܕ݂ ܢܝܼܫܵܐ ܕܗܲܝܡܵܢܘܼܬ݂ܵܐ. ܢܲܡܠܸܟ݂ ܒܟ݂ܠܵܗ̇ ܥܵܡܲܪܬܵܐ. ܒܛܲܝܒ݁ܘܼܬ݂ܵܟ݂ ܡܵܪܵܐ ܡܪܲܚܡܵܢܵܐ.

ܚܲܕ݂ܒܫܲܒܵܐ ܕܚܲܡܫܵܐ ܕܲܩܝܵܡܬܵܐ ܘܕ݂ܘܼܟ݂ܪܵܢܵܐ ܗ݇ܘ̣ ܕܡܵܪܝ ܐܲܕܲܝ ܫܠܝܼܚܵܐ. ܒܡܵܪܵܐ ܕܟ݂ܠܵܐ.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ: ܥܲܠ ܕܠܵܐ ܢ̣ܛܲܪܘ ܩܝܵܡܹܗ ܕܐܲܠܵܗܵܐ. ܓܸܢܣܵܐ ܕܐ݇ܢܵܫܵܐ ܚܲܝܵܒ݂ ܗ݇ܘܵܐ. ܕܝܼܢܵܐ ܕܡܵܘܬܵܐ ܘܲܕ݂ܠܵܘܛܬ݂ܵܐ. ܡܫܝܼܚܵܐ ܒܚܘܼܒܹܗ ܨ̣ܒ݂ܵܐ ܘܐܸܨܛܠܸܒ݂. ܕܲܢܚܲܪܲܪ ܟܠ ܡ̣ܢ ܠܵܘܛܬ݂ܵܐ. ܝܲܗ̣݇ܒ݂ ܗ݇ܘ̣ܵܐ ܢܲܦ̮ܫܹܗ ܠܐܵܚܘܿܕ݂ܵܘ̈ܗܝ. ܝܲܡܵܐ ܕܪ̈ܲܚܡܹܐ ܕܠܵܐ ܡܸܬ݁ܬ݁ܟ݂ܝܼܠ. ܘܡܵܘܬܵܐ ܕܙܲܒ݂ܢܵܐ ܦܲܓ݂ܪܹܗ ܛ̣ܥܸܡ. ܘܲܫ̣ܪܵܐ ܠܡܵܘܬܵܐ ܘܲܠܠܵܘܛܬ݂ܵܐ: ܬܢܝܼ. ܫܲܒܲܚ. ܨܠܝܼܒ݂ܵܐ ܕܢܘܼܗܪܵܐ ܕܐܸܬ݂ܚܵܘܝܼ. ܠܩܘܿܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹ̇ܠ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ݂ܵܐ. ܘܙܵܥ ܘܐܸܬ݂ܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ݂ܕܲܝ̈ ܠܒܸܪ̈ܝܵܬ݂ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬ݂ܵܐ. ܘܲܣ̣ܓܸܕ݂ܘ ܠܲܨܠܝܼܒ݂ܵܐ ܘܝܲܩ̣ܪܘܼܗܝ܀

ܚܲܕ݂ܒܫܲܒܵܐ ܕܸܫܬܵܐ ܕܲܩܝܵܡܬܵܐ. ܒܡܵܪܵܐ ܕܟ݂ܠܵܐ.

ܐܹܪܲܡ̱ܪܡܵܟ݂ ܡܵܪܝ ܡܲܠܟܵܐ. ܗܝ̤ ܗܘ̤ܵܬ݂ ܠܪܹܫܹܗ ܕܒܸܢܝܵܢܵܐ. ܩܝܵܡܬܵܟ݂ ܡܵܪܲܢ ܚܲܝܹ̈ܐ ܗܘ̤ܵܬ݂. ܠܓܸܢܣܵܐ ܕܐ݇ܢܵܫܵܐ ܕܐܲܒ݁ܝܼܕ݂ ܗ݇ܘ̣ܵܐ. ܕܩܵܡ̣ܘ ܘܐܸܬ݂ܢܲܚܲܡܘ ܘܚܲܝܹ̈ܐ ܩـ̣ܢܵܘ. ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ. ܘܲܫـ̣ܠܲܚܘ ܘܲܫـ̣ܕ݂ܵܘ ܚܲܢܦܘܼܬ݂ܵܐ. ܘܛܘܼܥܝܲܝ ܟܠܵܗ̇ ܕܲܦܬܲܟ݂ܪܹ̈ܐ. ܘܲܒ̣ܪܲܟ݂ܘ ܘܲܣ̣ܓܸܕ݂ܘ ܠܚܲܕ݂ ܐܝܼܬ݂ܝܵܐ. ܕܒܲܒ݂ܪܹܗ ܚܲܝܵܐ ܦܪܲܩ̣ ܥܵܠܡܹ̈ܐ: ܬܢܝܼ. ܫܲܒܲܚ. ܨܠܝܼܒ݂ܵܐ ܕܢܘܼܗܪܵܐ ܕܐܸܬ݂ܚܵـܘܝܼ. ܠܩܘܼܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹ̇ܠ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ̣ܵܐ. ܘܙܵܥ ܘܐܸܬ݂ܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ݂ܕܲܝ̈ ܠܒܸܪ̈ܝܵܬ݂ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬ݂ܵܐ. ܘܲܣ̣ܓܸܕ݂ܘ ܠܲܨܠܝܼܒ݂ܵܐ ܘܝܲܩ̣ܪܘܼܗܝ܀

ܕܘܼܟ݂ܪܵܢܵܐ ܕܲܫܡܘܿܢܝܼ ܘܕܲܒ݂ܢܹ̈ܝܗ̇. ܒܣܵܗܕܵܘ̈ܗܝ ܕܲܒ݂ܪܵܐ.

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ܀ ܙܲܕܝܼܩܵܐ ܘܲܬ݂ܪܝܼܨܵܐ. ܐܸܫܬܲܥܵܐ ܠܲܢ ܕܵܢܝܼܐܹܝܠ. ܛܲܠܝܵܐ ܪܓ݂ܝܼܓ݂ܵܐ ܕܐܲܠܵܗܵܐ. ܕܐܲܝܟܲܢܵܐ ܚ̣ܙܲܝܬܵܝܗܝ ܠܲܒ݂ܪܵܐ. ܚܙܹܝ̇ܬܹܗ ܕܦܵܪܲܚ̇ ܒܲܥܢܵܢܹ̈ܐ. ܘܕ݂ܵܡܹ̇ܐ ܠܥܲܬ݁ܝܼܩ ܝܵܘ̈ܡܵܬ݂ܵܐ. ܕܫܘܼܠܛܵܢܹܗ ܫܡܲܝܵܐ ܘܐܲܪܥܵܐ. ܬܢܝܼ. ܫܲܒܲܚ. ܡܵܐ ܝܵܐܹ̇ܐ ܠܲܡܫܲܒܵܚܘܼ. ܒܒܲܝܬܵܐ ܗܵܢܵܐ ܩܲܕܝܼܫܵܐ. ܕܐܝܼܬ݂ ܒܹܗ ܢܒ̣ܝܼܹ̈ܐ ܘܲܫܠܝܼܚܹ̈ܐ. ܘܣܵܗ̈ܕܹܐ ܘܟ̣ܵܗܢܹ̈ܐ ܘܡܲܠܦܵܢܹ̈ܐ. ܘܡܲܬ݂ܩܲܢ ܒܹܗ ܦܵܬ݂ܘܿܪ ܩܘܼܕ݂ܫܵܐ. ܚܘܼܣܵܝܵܐ ܠܝܲܠܕܵܘ̈ܗܝ ܕܐܵܕ݂ܵܡ܀

ܥܹܐܕ݂ܵܐ ܩܲܕ݁ܝܼܫܵܐ ܕܣܘܼܠܵܩܹܗ ܕܡܵܪܲܢ. ܒܬ݂ܵܘ ܢܸܬ݁ܕܲܡܲܪ.

ܟܘܼܪܣܝܵܟ݂ ܐܲܠܵܗܵܐ ܠܥܵܠܲܡ ܥܵܠܡܝܼܢ. ܡܵܪܝܵܐ ܒܲܫܡܲܝܵܐ ܡܲܬ݂ܩܲܢ ܟܘܼܪܣܝܹܗ. ܠܟ݂ܘܼܪܣܝܵܐ ܕܚܝܼܠܵܐ ܕܪܲܒ݁ܘܼܬ݂ܵܟܼ. ܟܪ̈ܘܿܒܹܐ ܟܪܝܼܟ̣ܝܼܢ ܠܹܗ ܡܵܪܝܵܐ. ܘܲܒ݂ܕܸܚ̱ܠܬ݂ܵܐ ܒܝܲܕ݂ ܓܸܦܲܝ̈ܗܘܿܢ. ܒܙܵܘܥܵܐ ܡܟܲܣܹܝܢ ܦܲܪ̈ܨܘܿܦܲܝܗܘܿܢ. ܒܲܕ݂ܠܵܐ ܡܸܫܟ݁ܚܝܼܢ ܠܡܸܬ݂ܠܵܐ ܥܲܝܢܲܝ̈ܗܘܿܢ. ܘܲܠܡܸܚܙܵܐ ܢܘܼܪܵܐ ܗܵܝ ܕܐܲܠܵܗܘܼܬ݂ܵܟܼ܀ ܘܐܲܢ݇ܬ݁ ܕܗܵܟܲܢܵܐ ܫܒ݂ܝܼܚܲܬ݁. ܥܵܡܲܪ ܐܲܢ݇ܬ݁ ܒܲܒ݂ܢܲܝ̈ܢܵܫܵܐ. ܠܵܐ ܠܡܵܘܩܵܕ݂ܘܼ. ܐܸܠܵܐ ܠܡܲܢܗܵܪܘܼ. ܪܲܒܵܐ ܗ݇ܝ̣ ܡܵܪܝ ܡܪܲܚܡܵܢܘܼܬ݂ܵܟ݂ ܘܛܲܝܒ݁ܘܼܬ݂ܵܟ݂ ܕܲܣ̣ܥܲܪܬ݁ ܨܹܝܕ݂ ܓܸܢܣܲܢ ܫܘܼܒ݂ܚܵܐ ܠܵܟ: ܬܢܝܼ. ܫܲܒܲܚ. ܠܚܲܝܹ̈ܐ ܘܛܘܼܒܹ̈ܐ ܐܲܡܝܼܢܹ̈ܐ. ܡܣܲܟܹܝܢ ܥܲܒ݂ܕܲܝ̈ܟ ܦܵܪܘܿܩܲܢ. ܘܐܵܚ̇ܕ݁ܝܼܢ ܓܵܘܣܵܐ ܒܗܲܝܡܵܢܘܼܬ݂ܵܐ ܘܛܵܦܣ̇ܝܼܢ ܒܟܸܢܦܵܘ̈ܗܝ ܕܲܨܠܝܼܒ݂ܵܐ. ܢܲܛܲܪ ܒܲܚܢܵܢܵܟ݂ ܠܟܸܢܫܵܐ ܕܣܵܓ݂ܘܿܕܲܝ̈ܟ. ܘܫܲܡܠܵܐ ܨܹܐܕܲܝܗܘܿܢ ܫܘܼܘܕܵܝ ܡܘܼܠܟܵܢܲܝ̈ܟ. ܕܐܸܡܲܪܬ݁ ܠܪ̈ܵܚܡܲܝܟ ܒܲܣܒܲܪܬ݂ܵܟ݂ ܕܟ̣ܠ ܐܲܝܢܵܐ ܕܲܡܗܲܝܡܸܢ ܒܝܼ. ܝܵܪܹܬ݂ ܡܲܠܟ݁ܘܼܬ݂ܵܐ ܘܚܲܝܹ̈ܐ ܕܲܠܥܵܠܲܡ. ܐܲܫܘܵܐ ܠܲܢ ܡܵܪܝ ܕܥܲܡ ܩܲܕ݁ܝܼܫܲܝ̈ܟ. ܢܸܙܡܲܪ ܠܵܟ݂ ܒܲܓ݂ܢܘܿܢ ܡܲܠܟ݁ܘܼܬ݂ܵܟ݂ ܫܘܼܒ݂ܚܵܐ ܠܵܟܼ܀

ܚܲܕ݂ܒ݁ܫܲܒܵܐ ܕܒ݂ܵܬܲܪ ܣܘܼܠܵܩܵܐ. ܒܣܵܗ̈ܕܹܐ ܒܪ̈ܝܼܟܹܐ.

ܡܵܪܝܵܐ ܐܲܡ̣ܠܸܟ݂ ܬܕ݂ܘܼܨ ܐܲܪܥܵܐ: ܢܸܚܕܘܿܢ ܫܡܲܝ̈ܵܐ ܘܲܬ݁ܕ݂ܘܼܨ ܐܲܪܥܵܐ. ܡܵܪܲܢ ܡܫܝܼܚܵܐ ܐܲܡ̣ܠܸܟ݂ ܘܐܸܬ݂ܝܲܩܲܪ. ܬܕ݂ܘܼܨ ܐܲܪܥܵܐ ܟܠܵܗ̇. ܟܝܵܢܵܐ ܫܝܼܛܵܐ ܕܒܹܝܬ݂ ܐܵܕ݂ܵܡ. ܗܵܐ ܡܙܲܝܚܝܼܢ ܠܹܗ ܪ̈ܘܼܚܵܢܹ̈ܐ. ܢܸܚܕܸܐ ܟܝܵܢܲܢ ܚܲܠܵܫܵܐ. ܒܒܲܪ ܓܸܢܣܲܢ ܕܲܗܘ̤ܵܐ ܡܲܠܟܵܐ. ܘܐܸܣܬܲܠܲܩ ܒܫܘܼܒ݂ܚܵܐ ܠܲܫܡܲܝܵܐ: ܬܢܝܼ. ܫܲܒܲܚ. ܨܠܝܼܒܹܗ ܕܲܡܫܝܼܚܵܐ ܩܲܛ̣ܠܵܗ̇ ܠܲܚܛܝܼܬ݂ܵܐ. ܕܩܸܛܠܲܬ̤ ܠܲܟ̣ܝܵܢܲܢ. ܘܲܬ݂ܗܲܪܘ ܟܸܢܫܹ̈ܐ ܕܚܲܙܵܝܹ̈ܐ. ܒܙܵܟ̣ܘܼܬ݂ܵܐ ܕܲܒ݂ܪܹܫ ܩܲܝܣܵܐ. ܕܲܙ̣ܟ݂ܵܐ ܠܲܬ݂ܪܹܝܢ ܚܲܣܝܼܢܝܼ̈ܢ. ܓܲܒ݂ܪܵܐ ܕܐܸܬ݁ܬ݁ܠܝܼ ܒܲܙܩܝܼܦܵܐ. ܠܣܵܛܵܢܵܐ ܘܡܲܘܬܵܐ ܡܚܲܒ݁ܠܵܢܵܐ܀

ܚܲܕ݂ܒ݁ܫܲܒܵܐ ܕܦܲܢܛܹܩܘܼܣܛܹܐ. ܒܣܵܗ̈ܕܵܘܗܝ ܕܲܒ݂ܪܵܐ.

ܬܵܘ ܢܫܲܒܲܚ ܠܡܵܪܝܵܐ܀ ܘܲܒ݂ܩܵܠܵܐ ܕܩܲܪ̈ܢܵܬ݂ܵܐ ܫܲܒܲܚܘ ܩܕ݂ܵܡ ܡܲܠܟܵܐ ܡܵܪܝܵܐ. ܒܩܵܠܵܐ ܪܵܡܵܐ ܕܬܸܫܒ݁ܘܿܚܬܵܐ. ܢܫܲܒܲܚ ܟܠܲܢ ܠܒ݂ܵܪܘܿܝܵܐ. ܚܲܝܠܵܐ ܪܲܒܵܐ ܘܬܲܩܝܼܦܵܐ. ܕܝܲܗ̣݇ܒ݂ ܠܲܢ ܕܢܸܕ݁ܥܝܼܘܗܝ ܚܲܕ݂ ܟܝܵܢܵܐ. ܘܚܲܕ݂ ܚܲܝܠܵܐ ܕܠܵܐ ܡܸܣܬܲܝܲܟܼ. ܐܲܒ݂ܵܐ ܘܲܒ݂ܪܵܐ ܘܪܘܼܚ ܩܘܼܕ݂ܫܵܐ: ܬܢܝܼ. ܫܲܒܲܚ. ܡܵܐ ܝܵܐܹ̇ܐ ܠܲܡܫܲܒܵܚܘܼ. ܒܒܲܝܬܵܐ ܗܵܢܵܐ ܩܲܕܝܼܫܵܐ. ܕܐܝܼܬ݂ ܒܹܗ ܢܒ݂ܝܼܹ̈ܐ ܘܲܫܠܝܼܚܹ̈ܐ. ܘܣܵܗ̈ܕܹܐ ܘܟ̣ܵܗܢܹ̈ܐ ܘܡܲܠܦܵܢܹ̈ܐ. ܘܡܲܬ݂ܩܲܢ ܒܹܗ ܦܵܬ݂ܘܿܪ ܩܘܼܕ݂ܫܵܐ. ܠܚܘܼܣܵܝܵܐ ܕܝܲܠܕܵܘ̈ܗܝ ܕܐܵܕ݂ܵܡ.

ܥܪܘܼܒ̣ܬܵܐ ܕܕܲܗܒ̣ܵܐ. ܒܢܸܬ݁ܛܲܝܲܒ̣ ܒܕܸܚܠ̱ܬ݂ܵܐ.

ܫܡܲܥܘ ܗܵܕܹܐ ܟܠܟ̣ܘܿܢ ܥܲܡܡܹ̈ܐ: ܬܵܘ ܚܙܵܘ ܥܒ̣ܵܕ݂ܵܘ̈ܗܝ ܕܐܲܠܵܗܵܐ. ܒܲܥܪܘܼܒ̣ܬܵܐ ܣ̣ܠܸـܩܘ ܗ݇ܘ̣ܵܘ ܫܸܡܥܘܿܢ ܘܝܘܿܚܲܢܵܢ. ܕܲܢܨܲܠܘܿܢ ܒܗܲܝܟܲܠ ܩܘܼܕ݂ܫܵܐ ܐܲܝܟ݂ ܕܲܟ̣ܬ݂ܝܼܒ̣. ܘܐܸܫܟܲـ̣ܚܘ ܠܲܡܫܲܪܝܵܐ ܥܲܠ ܬܲܪܥܵܐ ܫܲܦܝܼܪܵܐ. ܘܐܵܘܕ݁ܝܼܘ ܘܐܸܡܲܪܘ ܕܕܲܗܒ̣ܵܐ ܘܣܹܐܡܵܐ ܠܵܐ ܩܢܹܝܢܲܢ. ܒܲܫܡܹܗ ܕܝܼܫܘܿܥ ܩܘܼܡ ܗܲܠܸܟܼ. ܘܐܵܘܕܵܐ ܠܹܗ ܕܐܲܚܠ̱ܡܵܟܼ: ܬܢܝܼ. ܫܲܒܲܚ. ܬܵܘ ܟܠܲܢ ܢܸܟ݁ܘܿܦ ܒܘܼܪ̈ܟܲܝܢ ܒܲܨܠܘܿܬ݂ܵܐ. ܩܕ݂ܵܡ ܨܠܝܼܒ̣ܵܐ ܕܐܝܼܬ݂ܵܘܗܝ ܓܲܙܵܐ ܕܥܘܼܕ݂ܪ̈ܵܢܹܐ. ܕܢܸܫܟܲܚ ܪ̈ܲܚܡܹܐ ܘܫܘܼܒ݂ܩܵܢܵܐ ܕܚܵܘ̈ܒܹ݁ܐ. ܡܵܐ ܕܟ̣ܠ ܣܵܘ̈ܦܝܼܢ. ܢܵܗ̇ܪܝܼܢ ܒܙܲܠܝܼܩܵܘ̈ܗܝ. ܘܟܲܕ݂ ܠܵܐ ܨܵܒܹ̇ܝܢ ܣܵܩܘܿܪ̈ܵܘܗܝ. ܣܵܓ̣ܕ݁ܝܼܢ ܠܡܵܪܘܼܬܹܗ܀

ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܲܫܠܝܼܚܹ̈ܐ. ܪܹܫ ܩܵܠܵܐ.

ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ: ܒܚܲܝܠܵܐ ܕܦܘܼܪܩܵܢܵܐ ܕܝܲܡܝܼܢܹܗ. ܒܲܠܡܹܐܢܹܗ ܕܲܡܫܝܼܚܵܐ ܟܠܲܢ ܐܸܬ݂ܓܵܘܲܣܢܲܢ. ܫܲܝܢܵܐ ܘܲܫܠܵܡܵܐ ܢܲܓ݁ܝܼܪܵܐ. ܒܪܘܼܚܵܐ ܕܩܘܼܕ݂ܫܵܐ ܐܸܫ̣ܟܲܚܢܲܢ: ܬܢܝܼ. ܫܲܒܲܚ. ܫܒ̣ܝܼܚ ܡ̣ܢ ܟܠ ܘܪܵܡ ܡ̣ܢ ܟܠ ܘܲܡܥܲܠܲܝ ܠܥܸܠ ܡ̣ܢ ܟܠܵܐ. ܢܲܛܲܪ ܥܹܕ݁ܬܵܟ݂ ܒܲܚܢܵܢܵܟ݂ ܘܲܠܝܲܠܕܹ݁ܝ̈ܗ̇ ܦܪܘܿܩ ܒܲܨܠܝܼܒ̣ܵܟܼ܀

ܚܲܕ݂ܒܫܲܒܵܐ ܕܲܬ݂ܠܵܬ݂ܵܐ ܕܲܫܠܝܼܚܹ̈ܐ. ܒܲܡܫܝܼܚܵܐ ܐܸܬ݂ܝܼܠܸܕ݂.

ܐܲܝܢܵܐ ܕܕܲܟܼ̈ܝܵܢ ܐܝܼܕ݂ܵܘ̈ܗܝ ܘܲܓ݂ܒܸܐ ܒܠܸܒܹ݁ܗ. ܠܵܐ ܝܵܡܹ̇ܐ ܒܢܲܦ̮ܫܹܗ ܒܕܲܓܵܠܘܼܬ݂ܵܐ ܘܠܵܐ ܝܵܡܹ̇ܐ ܒܢܸܟ̣ܠܵܐ. ܒܥܸܕܵܢܵܐ ܕܥܵܐܹ̇ܠ ܟܵܗܢܵܐ ܠܒܹܝܬ݂ ܩܘܼܕ݂ܫܵܐ. ܓܘܼܕܹ̈ܐ ܕܪ̈ܘܼܚܵܢܹܐ ܠܥܸܠ ܡܸܢܹܗ ܩܵܝ̈ܡܵܢ. ܘܚܵܝܪ̈ܵܢ ܒܹܗ ܒܟ̣ܵܗ̇ܢܵܐ ܕܩܵܨܹ̇ܐ ܘܲܡܦܲܠܸܓ݂. ܦܲܓ̣ܪܹܗ ܕܲܡܫܝܼܚܵܐ ܠܚܘܼܣܵܝܵܐ ܕܚܵܘܒܹ̈ܐ: ܬܢܝܼ. ܫܲܒܲܚ. ܨܠܝܼܒ݂ܵܐ ܕܲܗܘ̤ܵܐ ܠܲܢ ܥܸܠܲܬ݂ ܛܵܒ̣ܵـ̈ܬ݂ܵܐ. ܘܒܹܗ̤ܘ ܐܸܬ݂ܚܲܪܲܪ ܓܸܢܣܲܢ ܡܵܝܘܿܬ݂ܵܐ. ܗ̤ܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢ̤ܙܟܹܝܘܗܝ ܠܒ̣ܝܼܫܵܐ ܘܟ̣ܠܗܹܝܢ ܨܸܢ̈ܥܵܬܹܗ.

ܚܲܕ݂ܒܫܲܒܵܐ ܕܐܲܪܒܥܵܐ ܕܲܫܠܝܼܚܹ̈ܐ. ܒܒܲܠܡܹܐܢܹܗ.

ܘܲܢܫܲܒܚܘܼܢ ܠܲܫܡܵܟ݂ ܠܥܵܠܡܝܼܢ: ܢܫܲܒܚܘܼܢܵܟ݂ ܠܥܵܠܲܡ. ܠܵܟ݂ ܫܘܼܒ݂ܚܵܐ ܕܲܒܼܡܵܘܬܵܟ݂ ܝܲܗ̣݇ܒ݂ܬ݁ ܠܲܢ ܦܲܓ݂ܪܵܟ݂ ܘܲܕ݂ܡܵܟܼ. ܘܲܥ̣ܒܲܕ݁ܬ݁ ܠܲܢ ܣܲܒ݂ܪܵܐ ܘܦܘܼܪܩܵܢܵܐ ܒܡܹܐܬ݂ܝܼܬ݂ܵܟ݂ ܕܲܠܘܵܬ݂ ܓܸܢܣܲܢ: ܬܢܝܼ. ܫܲܒܲܚ. ܫܒ݂ܝܼܚ ܡ̣ܢ ܟܠ ܘܪܵܡ ܡ̣ܢ ܟܠ ܘܲܡܥܲܠܲܝ ܠܥܸܠ ܡ̣ܢ ܟܠܵܐ. ܢܲܛܲܪ ܠܥܹܕ݁ܬܵܟ݂ ܒܲܚܢܵܢܵܟ݂ ܘܲܠܝܲܠܕܹܝ̈ܗ̇ ܦܪܘܿܩ ܒܲܨܠܝܼܒ݂ܵܟܼ܀

ܚܲܕ݂ܒ݁ܫܲܒܵܐ ܕܚܲܡܫܵܐ ܕܲܫܠܝܼܚ̈ܐ. ܒܠܵܟ̣ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ̣ܠܙܒܲܢ. ܘܲܒ̣ܪܝܼܟ̣ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ̣ܘܼ ܕܐܲܫ̣ܘܝܼ ܠܲܢ ܕܲܢܩܲܕܸܫ ܠܲܫܡܹܗ ܥܲܡ ܟܸܢܫܲܝ̈ ܪܵܘܡܵܐ: ܬܢܝܼ. ܫܲܒܲܚ. ܫܘܼܒ̣ܚܵܐ ܘܬ݂ܵܘܕ݁ܝܼܬ݂ܵܐ ܢܲܣܸܩ ܠܹܗ ܠܲܒ̣ܪܵܐ ܕܦܲܪܩܲܢ ܒܲܨܠܝܼܒܹܗ.

ܚܲܕ݂ܒ݁ܫܲܒܵܐ ܕܸܫܬܵܐ ܕܲܫܠܝܼܚܹ̈ܐ. ܒܠܵܟ̣ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ܀ ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ̣ܘܼ ܒܲܪ ܛܵܒ̣ܵܐ ܕܲܒ݂ܝܲܕ݂ ܕܒ݂ܝܼܚܘܼܬܹܗ ܦܲܪܩܹܗ ܠܲܟ݂ܝܵܢܲܢ: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ ܕܫܲܒ̣ܥܵܐ ܕܲܫܠܝܼܚܹ̈ܐ. ܒܚܲܕ݂ܘܼ ܚܲܝܠܵܐ.

ܩܕ݂ܵܡ ܟܠܹܗ ܥܲܡܵܐ: ܩܲܕ݁ܝܼܫܘܼ ܘܲܕ݂ܚܝܼܠ ܫܡܹܗ. ܩܲܕ݁ܝܼܫܵܐ ܕܲܒ̣ܩܲܕ݁ܝܼܫܹ̈ܐ ܨܸܒ̣ܝܵܢܹܗ ܡܸܬ݁ܬ݁ܢܝܼܚ. ܚܲܣܵܐ ܡܵܪܝ ܣܲܟ݂ܠ̈ܘܵܬ݂ܵܐ ܘܲܚܛܵܗܹ̈ܐ ܕܥܲܒ݂ܕܲܝ̈ܟ: ܬܢܝܼ. ܫܲܒܲܚ. ܚܲܕ݂ܘܼ ܚܲܝܠܵܐ ܕܡܸܫܬܲܒܲܚ ܒܲܫܡܲܝܵܐ ܘܒܲܐܪܥܵܐ. ܕܐܲܒ݂ܵܐ ܘܲܒ݂ܪܵܐ ܘܲܕ݂ܪܘܼܚܩܘܼܕ݂ܫܵܐ.

ܥܪܘܼܒ̣ܬܵܐ ܕܫܘܼܠܵܡ ܫܵܒ̣ܘܿܥܵܐ ܕܲܫܠܝܼܚ̈ܐ ܘܕ݂ܘܼܟ̣ܪܵܢܵܐ ܗ݇ܘ̣ ܕܫܲܒ̣ܥܝܼܢ ܘܲܬ݂ܪܹܝܢ ܬܲܠܡܝܼܕܹ̈ܐ. ܒܡܵܪܵܐ ܕܟ̣ܠܵܐ.

ܘܐܸܡܵܐ ܕܲܒ݂ܢܲܝ̈ܵܐ ܟܲܕ݂ ܚܵܕ݂ܝܵܐ: ܒܲܝܢܵܬ݂ ܥܠܲܝ̈ܡܵܬ݂ܵܐ ܕܢܵܩ̈ܫܵܢ ܒܲܦܠܲܓܹ̈ܐ ܒܲܟ̣ܢܘܼ̈ܫܵܬ݂ܵܐ. ܒܕ݂ܘܼܟ̣ܪܵܢ ܫܠܝܼܚܹ̈ܐ ܗܵܐ ܚܵܕ݂ܝܵܐ. ܥܹܕ݁ܬܵܐ ܫܒ݂ܝܼܚܬܵܐ ܘܩܲܕ݁ܝܼܫܬܵܐ. ܕܲܚܠܵܦ ܥܲܡܘܼ̈ܕܹܐ ܩܵܡ̣ܘ ܒܵܗ̇. ܕܢܸܗܘܘܿܢ ܡܲܠܦܵܢܹ̈ܐ ܡ̣ܢ ܒܢܹܝ̈ܗ̇. ܒܟ̣ܠܕ݂ܵܪ ܢܵܨܲܚ̇ ܝܘܼܠܦܵܢܗܘܿܢ. ܘܗܲܝܡܵܢܘܼܬ݂ܗܘܿܢ ܫܲܪܝܼܪܬܵܐ. ܒܕܲܐܟܸ݁ܣܘ ܠܡܲܠܟܹ̈ܐ ܘܠܵܐ ܐܸܙܕ݁ܟ݂ܝܼܘ. ܡ̣ܢ ܠܘܼܚܵܡܵܐ ܕܒ݂ܝܼܫܘܼܬ݂ܗܘܿܢ: ܬܢܝܼ. ܫܲܒܲܚ. ܨܠܝܼܒ̣ܵܐ ܕܢܘܼܗܪܵܐ ܕܐܸܬ݂ܚܵܘܝܼ. ܠܩܘܼܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹ̇ܠ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ̣ܵܐ. ܘܙܵܥ ܘܐܸܬ݂ܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ̣ܕܲܝ̈ ܠܒܸܪ̈ܝܵܬ݂ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬ݂ܵܐ. ܘܲܣ̣ܓܸܕ݂ܘ ܠܲܨܠܝܼܒ̣ܵܐ ܘܝܲܩ̣ܪܘܼܗܝ.

ܚܲܕ݂ܒ݁ܫܲܒܵܐ ܕܫܘܼܠܵܡ ܫܵܒ݂ܘܿܥܵܐ ܕܲܫܠܝܼܚܹ̈ܐ ܘܩܲܕ݂ܡܵܝܵܐ ܗ݇ܘ̣ ܕܩܲܝܛܵܐ ܘܡܸܬܼܩܪܸܐ ܢܘܼܣܲܪܕ݁ܐܹܝܠ ܘܡܸܬ݂ܦܲܫܲܩ ܥܹܐܕܹܗ ܕܐܲܠܵܗܵܐ. ܘܕ݂ܘܼܟ݂ܪܵܢܵܐ ܗ݇ܘ̣ ܕܲܬ݂ܪܸܥܣܲܪ ܫܠܝܼܚܹ̈ܐ. ܒܣܵܗܕܹ̈ܐ ܒܪ̈ܝܼܟܹܐ.

ܒܟ̣ܠܵܗ̇ ܐܲܪܥܵܐ ܢܸܦܩܲܬ̤ ܣܒܲܪܬ݂ܗܘܿܢ: ܘܲܒ̣ܣܵܘܦܹܝ̈ܗ̇ ܕܬܹܒܹܝܠ ܡܸܠܲܝ̈ܗܘܿܢ. ܫܠܝܼܚܹ̈ܐ ܩܲܕ݁ܝܼܫܹ̈ܐ ܢܦܲܩ̣ܘ ܘܐܲܟ݂ܪܸܙ̣ܘ ܩܘܼܫܬܵܐ ܒܐܲܪܒܲܥ ܦܸܢ̈ܝܵܬ݂ܵܐ. ܘܩܲܪܸܒ݂ܘ ܥܲܡܡܹ̈ܐ ܠܝܼܕܲܥܬ݂ܵܐ ܕܲܫܪܵܪܵܐ ܕܗܲܝܡܵܢܘܼܬ݂ܗܘܿܢ. ܘܩܲܒܸܠܘ ܗܸܢ̣ܘܿܢ ܝܘܼܠܦܵܢܵܐ. ܕܢܸܗܘܘܿܢ ܣܵܗ̈ܕܹܐ ܫܲܪܝܼܪܹ̈ܐ. ܥܲܠ ܩܝܵܡܬܹܗ ܕܝܼܫܘܿܥ ܦܵܪܘܿܩܲܢ: ܬܢܝܼ. ܫܲܒܲܚ. ܨܠܝܼܒܹܗ ܕܲܡܫܝܼܚܵܐ ܩܲܛ̣ܠܵܗ̇ ܠܲܚܛܝܼܬ݂ܵܐ ܕܩܸܛܠܲܬ̤ ܠܲܟ̣ܝܵܢܲܢ. ܘܲܬ݂ܗܲܪܘ ܟܸܢܫܹ̈ܐ ܕܚܲܙܵܝܹ̈ܐ. ܒܙܵܟ̣ܘܼܬ݂ܵܐ ܕܲܒ݂ܪܹܫ ܩܲܝܣܵܐ. ܕܲܙ̣ܟ݂ܵܐ ܠܲܬ݂ܪܹܝܢ ܚܲܣܝܼܢܝܼ̈ܢ. ܓܲܒ݂ܪܵܐ ܕܐܸܬ݁ܬ݁ܠܝܼ ܒܲܙܩܝܼܦܵܐ. ܠܣܵܛܵܢܵܐ ܘܡܵܘܬܵܐ ܡܚܲܒ݁ܠܵܢܵܐ.

ܕܘܼܟ̣ܪܵܢܵܐ ܕܡܵܪܝ ܬܐܘܿܡܵܐ ܫܠܝܼܚܵܐ. ܒܠܵܐ ܡܸܬ݁ܛܲܠܡܝܼܢ.

ܡܵܐ ܛܵܒ̣ ܘܡܵܐ ܫܲܦܝܼܪ: ܕܡܵܪܝܵܐ ܐܲܚܝܼܕ݂ ܒܐܝܼܕ݂ܹܗ. ܡܵܐ ܫܲܦܝܼܪ ܠܹܗ ܠܲܬ݂ܐܘܿܡܵܐ ܛܘܼܒ̣ܵܢܵܐ. ܟܲܕ݂ ܬܲܠ̣ܡܸܕ݂ ܚܲܬ݂ܢܹ̈ܐ ܚܲܕ݂ܬܹ̈ܐ ܒܐܲܪܥܵܐ ܕܗܸܢܕ݁ܘܿ. ܘܲܒ݂ܢ̣ܵܐ ܠܹܗ ܡܲܠܟܵܐ ܒܝܼܪܬܵܐ ܒܲܫܡܲܝܵܐ. ܕܢܸܬ݂ܒܲܣܲܡ ܒܛܘܼܒܹ̈ܐ ܪ̈ܓ݂ܝܼܓܹܐ ܕܠܵܐ ܫܘܼܠܵܡܵܐ: ܬܢܝܼ. ܫܲܒܲܚ. ܒܲܨ̈ܠܵܘܵܬ݂ܵܟ݂ ܐܘܿ ܫܠܝܼܚܵܐ ܡܵܪܝ ܬܐܘܿܡܵܐ. ܒܲܪܸܟ݂ ܘܢܲܛܲܪ ܠܲܡܗܲܝܡܢܹ̈ܐ ܕܙܲܝܲܚܘ ܥܹܐܕ݂ܵܟܼ. ܘܡܵܐ ܕܐܵܬܹ̇ܐ ܡܵܪܵܟ݂ ܠܲܡܕ݂ܵܢ ܟܠ ܒܸܪ̈ܝܵܢ. ܥܲܡܵܟ݂ ܢܸܗܘܸܐ ܘܢܸܬ݂ܒܲܣܲܡ ܒܲܓ݂ܢܘܿܢ ܢܘܼܗܪܵܐ.

ܚܲܕ݂ܒܫܲܒܵܐ ܕܲܬ݂ܪܹܝܢ ܕܩܲܝܛܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ: ܘܲܢܒܲܪܟ݂ܝܼܘܗܝ ܠܡܵܪܝܵܐ ܕܥ̣ܲܒ݂ܕܲܢ. ܒܪܝܼܟ݂ܘܼ ܐܲܠܵܗܵܐ ܕܫܲܕܲܪ ܚܲܒ݁ܝܼܒܹܗ ܘܦܲܪܩܹܗ ܠܲܟ݂ܝܵܢܲܢ. ܬܢܝܼ. ܫܲܒܲܚ. ܫܘܼܒ݂ܚܵܐ ܘܬ݂ܵܘܕ݁ܝܼܬ݂ܵܐ ܢܲܣܸܩ ܠܹܗ ܠܲܒ݂ܪܵܐ ܕܦܲܪܩܲܢ ܒܲܨܠܝܼܒܹܗ.

ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܩܲܝܛܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܕܲܒܲܚܘ ܠܹܗ ܕܸܒ݂ܚܹ̈ܐ ܕܫܘܼܒ݂ܚܵܐ: ܠܵܟ݂ ܐܹܕܲܒܲܚ ܕܸܒ݂ܚܹ̈ܐ ܕܫܘܼܒ݂ܚܵܐ. ܠܵܟ݂ ܕܸܒ݂ܚܵܐ ܚܲܝܵܐ ܘܠܲܚܡܵܐ ܫܡܲܝܵܢܵܐ ܢܵܘܕܸ݁ܐ ܒܟ̣ܠܥܸܕܵܢ: ܬܢܝܼ. ܘܫܲܒܲܚ ܒܵܗ̇.

ܕܘܼܟ݂ܪܵܢܵܐ ܕܡܵܪܝ ܩܘܼܪܝܵܩܘܿܣ ܘܲܕ݂ܝܘܿܠܹܝܛܹܐ ܐܸܡܹܗ. ܒܣܵܗܕܵܘ̈ܗܝ ܕܲܒ̣ܪܵܐ.

ܬܵܘ ܚܙܵܘ ܥܒ݂ܵܕ݂ܵܘ̈ܗܝ ܕܐܲܠܵܗܵܐ: ܡܸܛܠ ܕܬܸܕ݂ܡܘܼܪܬܵܐ ܥ̣ܒܲܕ݂. ܬܸܕ݂ܡܘܼܪܬܵܐ ܗܵܝ ܕܐܸܣܬܲܥܪܲܬ̤. ܡ̣ܢ ܣܵܘ̈ܦܹܝܗ̇ ܠܣܵܘܦܹܝ̈ܗ̇ ܕܐܲܪܥܵܐ. ܒܛܲܠܝܵܐ ܪܓ݂ܝܼܓ݂ܵܐ ܩܘܼܪܝܵܩܘܿܣ. ܕܒܲܡܫܘܼܚܬ݂ܵܐ ܕܲܬ݂ܠܵܬ݂ ܫܢܝܼ̈ܢ. ܐܲܓ݁ܢܲܬ̤ ܥܠܵܘܗܝ ܛܲܝܒ݁ܘܼܬ݂ܵܐ. ܘܐܸܬ݂ܚܲܝܲܠ ܒܗܲܝܡܵܢܘܼܬ݂ܵܐ: ܬܢܝܼ. ܫܲܒܲܚ. ܡܵܐ ܝܵܐܹ̇ܐ ܠܲܡܫܲܒܵܚܘܼ ܒܒܲܝܬܵܐ ܗܵܢܵܐ ܩܲܕ݁ܝܼܫܵܐ. ܕܐܝܼܬ݂ ܒܹܗ ܢܒ̣ܝܹ̈ܐ ܘܲܫܠܝܼܚܹ̈ܐ. ܘܣܵܗܕܹ̈ܐ ܘܟ̣ܵܗܢܹ̈ܐ ܘܡܲܠܦܵܢܹ̈ܐ. ܘܡܲܬ݂ܩܲܢ ܒܹܗ ܦܵܬ݂ܘܿܪ ܩܘܼܕ݂ܫܵܐ. ܠܚܘܼܣܵܝܵܐ ܕܝܲܠܕܵܘ̈ܗܝ ܕܐܵܕ݂ܵܡ.

ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܩܲܝܛܵܐ. ܒܒܲܠܡܹܐܢܹܗ.

ܕܐܲܢ݇ܬ݁ܘܼ ܟܘܼܡܪܵܐ ܠܥܵܠܲܡ: ܒܲܕ݂ܡܘܼܬܹܗ ܕܡܲܠܟ݁ܝܼܙܕܸ݁ܩ. ܪܲܒ݁ ܟܘܼܡܪܹ̈ܐ ܕܬ݂ܵܘܕ݁ܝܼܬܲܢ ܝܑܼܫܘܿܥ ܡܲܠܟܵܐ ܪܲܒܵܐ. ܕܲܒ݂ܝܲܕ݂ ܦܲܓ݂ܪܹܗ ܩܲܕ݁ܝܼܫܵܐ ܘܲܕ݂ܡܹܗ ܚܲܣ̣ܝܼ ܚܵܘ̈ܒܵܬܲܢ: ܬܢܝܼ. ܫܲܒܲܚ. ܫܒ݂ܝܼܚ ܡ̣ܢ ܟܠ ܘܪܵܡ ܡ̣ܢ ܟܠ ܘܲܡܥܲܠܲܝ ܠܥܸܠ ܡ̣ܢ ܟܠܵܐ. ܢܲܛܲܪ ܥܹܕ݁ܬܵܟ݂ ܒܲܚܢܵܢܵܟ݂ ܘܲܠܝܲܠܕܹ݁ܝ̈ܗ̇ ܦܪܘܿܩ ܒܲܨܠܝܼܒ݂ܵܟܼ.

ܥܹܐܕ݂ܵܐ ܩܲܕܝܼܫܵܐ ܕܓܸܠܝܵܢܹܗ ܕܡܵܪܲܢ ܥܲܠ ܛܘܼܪ ܬܵܒ݂ܘܿܪ (ܕܛܲܟ݁ܣܹܗ ܚܲܣܝܵܐ ܕܐܲܠܵܗܵܐ ܡܵܪܝ ܓܝܼܘܲܪܓܝܼܣ ܡܝܼܛܪܵܦܘܿܠܹܝܛܵܐ ܕܐܵܬ݂ܘܿܪ.) ܒܣܵܗܕܵܘ̈ܗܝ ܕܲܒ݂ܪܵܐ.

ܬܵܘ ܢܕ݂ܘܼܨ ܘܢܸܚܕܸ݁ܐ ܒܹܗ: ܢܸܚܕܸ݁ܐ ܠܸܒ݁ܗܘܿܢ ܕܐܲܝܠܹܝܢ ܕܒ̣ܵܥܹ̇ܝܢ ܠܡܵܪܝܵܐ. ܒܗܵܢܵܐ ܝܵܘܡܵܐ ܩܲܕ݁ܝܼܫܵܐ. ܨ̣ܒ݂ܵܐ ܦܵܪܘܿܩܲܢ ܕܲܢܚܵܘܸܐ. ܫܘܼܒ݂ܚܵܐ ܪܲܒܵܐ ܕܓܸܠܝܵܢܹܗ. ܘܥܲܠ ܛܘܼܪ ܬܵܒ݂ܘܿܪ ܐܸܫܬܲܚܠܲܦ. ܘܲܢܗܲܪ ܐܲܦܵܘ̈ܗܝ ܥܲܡ ܢܲܚ̈ܬܵܘܗܝ. ܫܘܼܒ݂ܚܵܐ ܠܹܗ ܥܲܠ ܦܘܼܪ̈ܢܵܣܵܘܝ: ܬܢܝܼ. ܫܲܒܲܚ. ܐܸܫܬܲܥܵܐ ܠܲܢ ܕܵܢܝܼܐܹܝܠ. ܛܲܠܝܵܐ ܪܓ݂ܝܼܓ݂ܵܐ ܕܐܲܠܵܗܵܐ. ܕܐܲܝܟܲܢܵܐ ܚـ̣ܙܲܝܬܵܝܗܝ ܠܲܒ̣ܪܵܐ. ܚܙܹ̇ܝܬ݂ܹܗ ܕܦܵܪܲܚ̇ ܒܲܥܢܵܢܹ̈ܐ. ܘܕ݂ܵܡܹ̇ܐ ܠܥܲܬ݁ܝܼܩ ܝܵܘ̈ܡܵܬ݂ܵܐ. ܕܫܘܼܠܛܵܢܹܗ ܫܡܲܝܵܐ ܘܐܲܪܥܵܐ.

ܚܲܕ݂ܒܫܲܒܵܐ ܕܚܲܡܫܵܐ ܕܩܲܝܛܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ: ܘܲܢܫܲܒ݁ܚܘܼܢ ܠܲܫܡܵܟ݂ ܠܥܵܠܡܝܼܢ. ܫܘܼܒ݂ܚܵܐ ܠܗܵܘ̇ ܚܲܝܠܵܐ ܕܡܸܬ݂ܟ݁ܪܸܙ ܬܠܝܼܬ݂ܵܐܝܼܬ݂ ܘܡܸܣܬ݁ܓܸܕ݂ ܫܒ݂ܝܼܚܵܐܝܼܬ݂: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ ܕܸܫܬܵܐ ܕܩܲܝܛܵܐ. ܒܠܵܟ݂ ܗ݇ܘ̣ ܩܵܪܹܝ̇ܢܲܢ.

ܟܵܗܢܲܝ̈ܟ ܢܸܠܒ݁ܫܘܼܢ ܙܲܕ݁ܝܼܩܘܼܬ݂ܵܐ ܘܙܲܕ݁ܝܼܩܲܝ̈ܟ ܫܘܼܒ̣ܚܵܐ: ܐܸܙܕܲܗ݇ܪܘ ܘܠܵܐ ܬܸܚܛܘܿܢ. ܟܵܗܢܹ̈ܐ ܩܲܕ݁ܝܼܫܹ̈ܐ ܐܲܫܝܼܓ݂ܘ ܬܹܐܪ̈ܵܬ݂ܟ݂ܘܿܢ. ܡ̣ܢ ܨܵܐܬ݂ܵܐ ܕܥܵܘ̣ܠܵܐ: ܬܢܝܼ. ܘܫܲܒܲܚ ܒܵܗ̇.

ܥܪܘܼܒ݂ܬܵܐ ܕܫܸܬ݂ ܕܩܲܝܛܵܐ ܘܕ݂ܘܼܟ݂ܪܵܢܵܐ ܗ݇ܝ̣ ܕܪܲܒܲܢ ܝܵܘܣܸܦ ܒܘܼܣܢܵܝܵܐ: ܬܲܠܡܝܼܕܹܗ ܕܪܲܒܲܢ ܡܘܼܫܹܐ ܕܒܹܝܬ݂ ܨܲܝܵܪܹ̈ܐ. ܘܪܲܒܹܗ ܕܝܘܿܚܲܢܵܢ ܒܲܪ ܟ̣ܲܠܕܘܿܢ. ܘܒ݂ܵܗ̇ ܥܵܒ݂ܕ݁ܝܼܢ ܕܘܼܟ݂ܪܵܢܵܐ ܠܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ. ܒܣܵܗ̈ܕܵܘܗܝ ܕܲܒ݂ܪܵܐ.

ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ: ܕܒܲܡܪܵܘܡܵܐ ܣܵܡ̣ܬ݁ ܡܲܥܡ̱ܪܵܟܼ. ܠܥܸܠ ܒܲܡܪ̈ܵܘܡܹܐ ܨܹܝܕ݂ ܥܝܼܪܹ̈ܐ ܕܘܼܟ݂ܪܵܢܵܟ݂ ܐܘܿ ܐܲܒ݂ܘܼܢ. ܥܲܡ ܟܹܐܢܹ̈ܐ ܕܲܢܨܲܚ̣ܘ ܘܲܙ̣ܟ݂ܵܘ. ܐܵܦ ܥܲܡ ܣܵܗ̈ܕܹ݁ܐ ܕܐܸܬ݂ܟܲܠܲܠܘ. ܓܢܘܿܢܵܐ ܒܪܵܘܡܵܐ ܡܵܘܪܸܬ݂ ܠܵܟܼ. ܡܲܠܟܵܐ ܡܫܝܼܚܵܐ ܕܲܪܚܸܡ̣ܬܵܝܗܝ: ܬܢܝܼ. ܫܲܒܲܚ. ܣܵܗܕܹ̈ܐ ܙ̈ܗܲܝܵܐ ܘܩܲܕܝܼܫܹ̈ܐ. ܐܲܬ݂ܠܹܝܛܹ̈ܐ ܕܗܲܝܡܵܢܘܼܬ݂ܵܐ. ܒܥܵܘ ܪ̈ܲܚܡܹܐ ܡ̣ܢ ܐܲܠܵܗܵܐ. ܕܲܢܫܲܕܲܪ ܠܲܢ ܥܘܼܕ݂ܪܵܢܵܐ. ܘܲܢܚܲܝܸܠ ܠܲܡܚܝܼܠܘܼܬܲܢ. ܒܪ̈ܲܚܡܹܐ ܫܦܝܼܥܹ̈ܐ ܕܛܲܝܒ݁ܘܼܬܹܗ.

ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܩܲܝܛܵܐ. ܒܒܲܠܡܹܐܢܹܗ.

ܢܵܘܕܸ݁ܐ ܠܵܟ݂ ܠܥܵܠܲܡ: ܥܲܠ ܛܲܝܒ݁ܘܼܬ݂ܵܟ݂ ܘܥܲܠ ܩܘܼܫܬܵܟܼ. ܢܵܘܕܸ݁ܐ ܠܹܗ ܠܲܡܫܝܼܚܵܐ ܕܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ. ܘܐܲܫ̣ܘܝܼ ܠܲܢ ܒܛܲܝܒ݁ܘܼܬܹܗ ܠܡܵܘܗܲܒ݂ܬ݂ܹܗ ܕܲܠܘܵܬ݂ ܓܸܢܣܲܢ: ܬܢܝܼ. ܫܲܒܲܚ. ܫܒ݂ܝܼܚ ܡ̣ܢ ܟܠ ܘܪܵܡ ܡ̣ܢ ܟܠ ܘܲܡܥܲܠܲܝ ܠܥܸܠ ܡ̣ܢ ܟܠܵܐ. ܢܲܛܲܪ ܥܹܕ݁ܬܵܟ݂ ܒܲܚܢܵܢܵܟ݂ ܘܲܠܝܲܠܕܹܝ̈ܗ̇ ܦܪܘܿܩ ܒܲܨܠܝܼܒ݂ܵܟܼ.

ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܐܹܠܝܼܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ: ܘܲܢܫܲܒ݁ܚܘܼܢ ܠܲܫܡܵܟ݂ ܠܥܵܠܡܝܼܢ. ܟܸܢܫܹ̈ܐ ܕܡܲܠܲܐܟܹ̈ܐ ܡܫܲܒ݁ܚܝܼܢ ܒܐܵܘܝܘܼܬ݂ܵܐ ܠܲܟ݂ܝܵܢܵܐ ܣܓ݂ܝܼܕ݂ܵܐ: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒܫܲܒܵܐ ܕܲܬ݂ܪܹܝܢ ܕܐܹܠܝܼܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܘܲܢܫܲܒ݁ܚܘܼܢ ܠܲܫܡܵܟ݂ ܠܥܵܠܡܝܼܢ: ܡܵܐ ܛܵܒ݂ ܘܡܵܐ ܫܲܦܝܼܪ. ܫܒ݂ܝܼܚܘܼ ܚܘܼܕܵܬ݂ܵܐ ܕܲܥ̣ܒܲܕ݂ ܦܵܪܘܿܩܲܢ ܠܓܸܢܣܵܐ ܕܡܵܝ̈ܘܿܬܹܐ: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܐܹܠܝܼܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܪܘܿܣܥܠܲܝ ܒܙܘܿܦܵܐ ܘܐܸܬ݁ܕܲܟܸܐ: ܚܲܠܸܠܲܝܢܝ ܒܹܗ ܘܡ̣ܢ ܬܲܠܓܵܐ ܐܸܚܘܲܪ. ܛܲܠܵܐ ܡܦܲܝܓ݂ܵܢܵܐ ܕܪ̈ܲܚܡܹܐ ܕܛܲܝܒ݁ܘܼܬ݂ܵܟ݂ ܫܲܕܲܪ ܠܥܘܼܕ݂ܪܵܢܲܢ: ܬܢܝܼ. ܘܫܲܒܲܚ ܒܵܗ̇.

ܥܹܐܕ݂ܵܐ ܕܲܨܠܝܼܒ݂ܵܐ ܣܓ݂ܝܼܕ݂ܵܐ. ܒܡܵܪܵܐ ܕܟ݂ܠܵܐ.

ܡ̣ܢ ܥܲܡܵܐ ܕܠܵܐ ܡܪܲܚܡܵܢ: ܐܲܢ̣ܗܲܪܘ ܒܲܪ̈ܩܵܘܗܝ ܠܬܹܒܹܝܠ. ܨܠܝܼܒ݂ܵܟ݂ ܡܵܪܲܢ ܕܐܸܬ݂ܚܲܦܝܼ. ܡ̣ܢ ܒܝܼܫܘܼܬ݂ܗܘܿܢ ܕܙܵܩܘܿܦܹ̈ܐ. ܦ̣ܪܲܚܘ ܙܲܠܝܼܩܵܘ̈ܗܝ ܒܲܒ݂ܪܝܼܬ݂ܵܐ. ܠܐܲܪܒܲܥ ܦܸܢ̈ܝܵܬܹܗ ܕܥܵܠܡܵܐ. ܘܗܵܐ ܡܙܲܝܚܝܼܢ ܠܹܗ ܒܥܹ̈ܕ݂ܵܬ݂ܵܐ. ܟܵܗܢܹ̈ܐ ܕܲܓ݂ܒܲܝܬ݁ ܠܐܝܼܩܵܪܵܟܼ. ܘܲܥܒ݂ܝܼܕ݂ ܪܘܼܫܡܵܐ ܠܲܡܗܲܝܡܢܹ̈ܐ. ܕܢܸܦܪܘܿܩ ܐܸܢܘܿܢ ܡ̣ܢ ܠܵܘܛܬ݂ܵܐ: ܬܢܝܼ. ܫܲܒܲܚ. ܓܲܙܵܐ ܘܥܘܼܬ݂ܪܵܐ ܫܡܲܝܵܢܵܐ. ܛܥܝܼܢܵܐ ܥܹܕ݁ܬܵܟ݂ ܦܵܪܘܿܩܲܢ. ܒܐ݇ܪ̈ܵܙܹܐ ܘܛܘܼܦ̮ܣܹ̈ܐ ܕܐܲܫ̣ܠܸܡܬ݁ ܠܵܗ̇. ܠܒ݂ܝܼܟ݂ܵܐ ܓܵܘܣܵܐ ܘܲܡܣܲܒ݁ܪܵܐ. ܟܬ݂ܵܒ݂ܵܐ ܪܲܒܵܐ ܕܲܣܒܲܪܬ݂ܵܟܼ. ܘܩܲܝܣܵܐ ܣܓ݂ܝܼܕ݂ܵܐ ܕܲܨܠܝܼܒ݂ܵܟܼ. ܘܝܘܼܩܢܵܐ ܦܲܐܝܵܐ ܕܐ݇ܢܵܫܘܼܬ݂ܵܟ. ܪܵܘܪ̱ܒ݂ܝܼܢ ܐ݇ܪ̈ܵܙܹܐ ܕܦܘܼܪܩܵܢܵܗ̇.

ܚܲܕ݂ܒ݁ܫܲܒܵܐ. ܐ. ܕܲܨܠܝܼܒ݂ܵܐ. ܕ. ܕܐܹܠܝܼܵܐ. ܒܚܸܕ݂ܝܲܬ̤ ܡܲܪܝܲܡ.

ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ: ܡܒܲܛܸܠ ܩܪ̈ܵܒܹܐ ܡ̣ܢ ܣܵܘܦܹܝ̈ܗ̇ ܕܐܲܪܥܵܐ. ܨܠܝܼܒ݂ܵܐ ܕܥܵܡܲܪ ܒܲܡܪ̈ܵܘܡܹܐ. ܫܲܝܸܢ ܠܥܘܼܡܩܹ̈ܐ ܬܲܚܬܵܝܹ̈ܐ. ܕܪܵܘܡܵܐ ܠܵܐ ܣܢܝܼܩ ܥܲܠ ܫܲܝܢܵܐ. ܫܲܝܸܢ ܡܵܪܝ ܠܲܒ݂ܢܲܝ̈ܢܵܫܵܐ: ܬܢܝܼ. ܫܲܒܲܚ. ܒܕ݂ܵܪ̈ܲܝܟ ܩܵܝ̇ܡܝܼܢ ܣܵܓ݂ܘܿܕܲܝ̈ܟ. ܘܐܵܚ̇ܕܝܼܢ ܓܵܘܣܵܐ ܒܲܨܠܘܿܬ݂ܵܐ. ܙܵܘܸܕ݂ ܐܸܢܘܿܢ ܒܘܼܪ̈ܟܵܬ݂ܵܐ. ܡ̣ܢ ܒܲܝܬܵܟ݂ ܡܠܸܐ ܥܘܼܕ݂ܪ̈ܵܢܹܐ.

ܚܲܕ݂ܒ݁ܫܲܒܵܐ. ܒ. ܕܲܨܠܝܼܒ݂ܵܐ. ܗ. ܕܐܹܠܝܼܵܐ. ܒܠܵܟ݂ܘܼ ܩܵܪܹܝ̇ܢܲܢ.

ܘܲܢܫܲܒ݁ܚܘܼܢ ܠܲܫܡܵܟ݂ ܠܥܵܠܡܝܼܢ: ܡ̣ܢ ܦܘܼܡܵܐ ܕܲܥܠܲܝܡܹ̈ܐ ܘܕܲܛܠܵܝܹ̈ܐ. ܫܘܼܒ݂ܚܵܐ ܠܡܲܚܸܐ ܟܠ ܕܲܒ݂ܝܲܕ݂ ܕܒ݂ܝܼܚܘܼܬܹܗ ܦܲܪܩܹܗ ܠܲܟ݂ܝܵܢܲܢ: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ. ܓ. ܕܲܨܠܝܼܒ݂ܵܐ. ܘ. ܕܐܹܠܝܼܵܐ. ܒܠܵܟ݂ܘ ܩܵܪܹܝ̇ܢܲܢ.

ܘܐܹܡܲܪ ܦܸܠ̈ܐܵܬ݂ܵܐ ܕܡ̣ܢ ܩܕ݂ܝܼܡ: ܙܲܕܝܼܩܵܐ ܘܲܬ݂ܪܝܼܨܵܐ. ܐ݇ܪܵܙܵܐ ܕܨ̣ܵܪ ܝܵܘܢܵܢ ܒܥܘܼܡܩܵܘ̈ܗܝ ܕܲܬ݂ܗܘܿܡܵܐ. ܫܩܲܠ̣ ܗ݇ܘ̣ܵܐ ܫܘܼܠܵܡܵܐ: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ. ܕ. ܕܲܨܠܝܼܒ݂ܐ. ܙ. ܕܐܹܠܝܼܵܐ. ܒܠܵܟ݂ ܗ݇ܘ̣ ܩܵܪܹܝ̇ܢܲܢ.

ܡܸܛܠ ܕܛܵܒ݂ܝܼܢ ܪ̈ܲܚܡܲܝܟ ܡ̣ܢ ܚܲܝܹ̈ܐ: ܡܵܪܝܵܐ ܪ̈ܲܚܡܲܝܟ ܠܥܵܠܲܡ. ܒܪ̈ܲܚܡܹܐ ܕܛܲܝܒ݁ܘܼܬ݂ܵܟ݂ ܚܲܪܲܪ ܢܲܦ̮̈ܫܵܬܲܢ ܡ̣ܢ ܡܵܘܬܵܐ ܝܲܥܢܵܐ: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܡܵܪܝ ܡܘܼܫܹܐ. ܒܠܵܟ݂ܘܼ ܩܵܪܹܝ̇ܢܲܢ.

ܟܠܗܹܝܢ ܕܡ̣ܢ ܩܕ݂ܝܼܡ ܘܲܠܚܲܪܬ݂ܵܐ: ܬܹܒܹܝܠ ܘܟ݂ܠܗܘܿܢ ܥܵܡܘܿܪܹ̈ܝܗ̇. ܟܠܗܹܝܢ ܒܸܪ̈ܝܵܬ݂ܵܐ ܡܫܲܒ̈ܚܵܢ ܠܐܝܼܬ݂ܘܼܬ݂ܵܟ݂ ܟܝܵܢܵܐ ܕܠܵܐ ܫܘܼܪܵܝ: ܬܢܝܼ. ܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܡܵܪܝ ܡܘܼܫܹܐ. ܒܠܵܟ݂ܘܼ ܩܵܪܹܝ̇ܢܲܢ.

ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ: ܘܲܒ݂ܟ݂ܠܙܒܲܢ ܬܸܫ̈ܒܚܵܬܹܗ ܒܦܘܼܡܝ. ܒܪܝܼܟ݂ܘܼ ܦܵܪܘܿܩܲܢ ܕܫ̣ܵܘܙܒܹܗ ܠܲܟ݂ܝܵܢܲܢ ܡ̣ܢ ܡܵܘܬܵܐ ܝܲܥܢܵܐ: ܬܢܝܼ. ܘܫܲܒܲܚ ܒܵܗ̇.

ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܡܵܪܝ ܡܘܼܫܹܐ. ܒܚܲܕ݂ܘܼ ܚܲܝܠܵܐ.

ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ: ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ. ܠܒܹܝܬ݂ ܓܵܘܣܵܐ ܕܥܹܕ݁ܬܵܟ݂ ܡܵܪܲܢ. ܪܵܗܛ̇ܝܼܢ ܟܠܗܘܿܢ ܣܵܓ݂ܘܿܕܲܝ̈ܟ. ܕܢܸܣܒ݂ܘܼܢ ܐ݇ܪ̈ܵܙܲܝܟ ܩܲܕ݁ܝܼܫܹ̈ܐ. ܕܢܸܗܘܘܿܢ ܠܚܘܼܣܵܝ ܚܵܘܒܲܝ̈ܗܘܿܢ: ܬܢܝܼ. ܫܲܒܲܚ. ܨܠܝܼܒ݂ܵܐ ܕܥܵܡܲܪ ܒܲܡܪ̈ܵܘܡܹܐ. ܫܲܝܸܢ ܠܥܘܼܡܩܹ̈ܐ ܬܲܚܬܵܝܹ̈ܐ. ܕܪܵܘܡܵܐ ܠܵܐ ܣܢܝܼܩ ܥܲܠ ܫܲܝܢܵܐ. ܫܲܝܸܢ ܡܵܪܝ ܠܲܒ݂ܢܲܝ̈ܢܵܫܵܐ.

ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܡܵܪܝ ܡܘܼܫܹܐ. ܒܲܒ݂ܝܲܕ݂ ܫܠܵܡܵܐ.

ܘܒܸܛܠܲܬ̤ ܗܲܝܡܵܢܘܼܬ݂ܵܐ ܡ̣ܢ ܐܲܪܥܵܐ: ܦܪܘܿܩ ܡܵܪܝܵܐ ܡܸܛܠ ܕܲܓ݂ܡܲܪ݂ ܛܵܒ̣ܵܐ. ܐܸܒ݂ܕܲܬ̤ ܠܵܗ̇ ܗܲܝܡܵܢܘܼܬ݂ܵܐ ܡܸܢܗܘܿܢ ܕܲܡܗܲܝܡܢܹ̈ܐ. ܘܒܸܐܣܟܹ݁ܡܵܐ ܗ݇ܘ̣ ܒܲܠܚܘܿܕ݂ ܡܚܵܘܹܝ̇ܢ ܠܹܗ ܠܢܝܼܫܵܐ ܕܲܫܪܵܪܗܘܿܢ. ܡܵܪܲܢ ܡܵܪܲܢ ܩܵܪܹܝ̇ܢ ܒܣܸܦ̈ܘܵܬ݂ܗܘܿܢ. ܘܲܒ݂ܓ݂ܵܘ ܠܸܒ݁ܗܘܿܢ ܟܡܹܐܢܹ̈ܐ ܘܦܘܼܠܵܓܹ̈ܐ. ܐܵܬܹ̇ܐ ܡܵܘܬܵܐ ܡ̣ܢ ܫܸܠܝܵܐ ܘܕ݂ܵܒܲܪ ܢܲܦ̮̈ܫܵܬ݂ܗܘܿܢ. ܐܸܬ݂ܕܲܟ̣ܪ̄ܘ ܐܲܚܲܝ̈ ܕܕ݂ܝܼܢܵܐ ܣܝܼܡ ܩܘܼܕ݂ܡܲܝܢ: ܬܢܝܼ. ܘܫܲܒܲܚ ܒܵܗ

ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܩܘܼܕܵܫ ܥܹܕ݁ܬܵܐ. ܒܲܟ݂ܣܸܐ ܗ݇ܘ̣ܵܐ.

ܡܲܬ݂ܩ̄ܢܵܐ ܠܡܵܘܬ݁ܒ݂ܵܟ݂ ܥ̣ܒܲܕ݁ܬ݁ ܡܵܪܝܵܐ ܡܲܩܕ݁ܫܵܟܼ. ܡܵܪܝܵܐ ܬܲܩܸܢܲܝܗܝ ܒܐܝܼܕܲܝ̈ܟ. ܠܡܹܐܢܵܐ ܕܫܲܝܢܵܐ ܡܫܝܼܚܵܐ ܐܲܬ݂ܩܸܢ̣ܬ݁ ܒܐܲܪܥܵܐ ܠܲܡܫܲܒ݁ܚܵܢܲܝ̈ܟ. ܒܛܘܼܦ̮ܣܹܗ ܕܥܘܼܡܪܵܟ݂ ܫܡܲܝܵܢܵܐ. ܘܟܲܕ݂ ܡ̣ܢ ܝܲܡܝܼܢ ܐܲܒ݂ܵܐ ܒܲܡܪ̈ܵܘܡܹܐ ܝܵܬܹ̇ܒ݂ ܗ̣݇ܘܲܝܬ݁. ܡ̣ܠܲܝܬܵܗ̇ ܠܥܹܕ݁ܬܵܟ݂ ܡܲܠܟܵܐ ܕܬܸܫܒ݁ܘܿܚܬܵܐ. ܗܸܕ݂ܪܹܗ ܘܫܘܼܦܪܹܗ ܕܲܨܠܝܼܒ݂ܵܟܼ. ܘܡܸܛܠ ܗܵܕܹܐ ܥܝܼܪܹ̈ܐ ܘܐ݇ܢܵܫܵܐ ܚܵܕܹܝ̇ܢ ܒܵܗ̇. ܘܫܘܼܒ݂ܚܵܐ ܙܵܡ̇ܪܝܼܢ ܒܩܘܼܕܵܫܵܗ̇. ܕܐܲܒ݂ܵܐ ܣܵܡ̣ ܫܲܬ݂ܐܸܣܹܝ̈ܗܝ. ܘܲܒ݂ܪܵܐ ܫܲܟ݂ܠܸܠ̣ ܘܲܒ݂ܢ̣ܵܗ̇. ܘܪܘܼܚܵܐ ܢ̣ܚܸܬ݂ ܘܩܲܕ݁ܫܵܗ̇. ܒܵܥܹܝ̇ܢܲܢ ܡܸܢܵܟ݂ ܫܘܼܪܵܐ ܗܘ̤ܝܼ ܠܵܗ̇ ܚܲܣܝܼܢܵܐ. ܘܛܲܪ ܠܵܗ̇ ܫܠܵܡܵܐ ܢܲܓ݁ܝܼܪܵܐ. ܬܢܝܼ. ܫܲܒܲܚ. ܒܝܲܕ݂ ܨܠܝܼܒ݂ܵܟ݂ ܩܲܕ݁ܝܼܫܵܐ ܦܵܪܘܿܩܲܢ. ܚܕ݂ܵܐ ܡܲܪܥܝܼܬ݂ܵܐ ܗܘ̤ܵܬ݂ ܡܲܠܲܐܟܹ̈ܐ ܘܲܒ݂ܢܲܝ̈ܢܵܫܵܐ. ܘܲܚܕ݂ܵܐ ܥܹܕ݁ܬܵܐ ܩܲܕ݁ܝܼܫܬܵܐ ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ ܗܵܐ ܚܵܕܹܝ̇ܢ. ܘܟ݂ܠܗܹܝܢ ܒܸܪ̈ܝܵܬ݂ܵܐ ܗܵܐ ܩܵܥ̈ܝܵܢ ܡܵܪܹܟܠ ܫܘܼܒ݂ܚܵܐ ܠܵܟܼ.

ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܩܘܼܕܵܫ ܥܹܕ݁ܬܵܐ. ܒܚܸܕ݂ܝܲܬ̤ ܡܲܪܝܲܡ.

ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ: ܐܲܟ݂ܚ݇ܕ݂ܵܐ ܥܲܬ݁ܝܼܖܹ̈ܐ ܘܡܸܣܟܹ݁ܢܹ̈ܐ. ܠܒܹܝܬ݂ ܓܵܘܣܵܐ ܕܥܹܕ݁ܬܵܟ݂ ܡܵܪܲܢ. ܪܵܗܛ̇ܝܼܢ ܟܠܗܘܿܢ ܣܵܓ݂ܘܿܕܲܝ̈ܟ. ܕܢܸܣܒ݂ܘܼܢ ܐ݇ܖ̈ܵܙܲܝܟ ܩܲܕܝܼܫܹ̈ܐ. ܕܢܸܗܘܘܿܢ ܠܚܘܼܣܵܝ ܚܵܘܒܲܝ̈ܗܘܿܢ: ܬܢܝܼ.

ܫܲܒܲܚ. ܚܲܕ݂ܘܼ ܚܲܝܠܵܐ ܕܡܸܫܬܲܒܲܚ. ܒܲܫܡܲܝܵܐ ܘܒܲܐܪܥܵܐ. ܕܐܲܒ݂ܵܐ ܘܲܒ݂ܪܵܐ ܘܲܕ݂ܪܘܼܚܵܐ ܕܩܘܼܕ݂ܫܵܐ.

ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܩܘܼܕܵܫ ܥܹܕ݁ܬܵܐ. ܒܟܲܕ݂ ܫܲܒ̣ܪܹ̈ܐ.

ܡܵܪܝܵܐ ܡܲܢ̣ܘܼ ܢܸܥܡܲܪ ܒܡܲܫܟ݁ܢܵܟܼ: ܘܡܲܢ̣ܘܼ ܢܸܫܪܸܐ ܒܛܘܼܪܵܟ݂ ܩܲܕ݁ܝܼܫܵܐ. ܐܲܒ݂ܵܐ ܕܐܲܫ̣ܪܝܼ ܫܟ݂ܝܼܢܬܹ݁ܗ ܒܛܘܼܪ ܣܝܼܢܲܝ. ܘܲܡ̣ܠܵܝܗܝ ܩܘܼܕ݂ܫܵܐ ܕܐܝܼܩܵܪܹܗ. ܡܠܝܼܘܗܝ ܬܸܫܒ݁ܘܿܚܬܵܐ ܠܗܵܢ ܗܲܝܟ݁ܠܵܐ ܕܲܦܪܝܼܫ ܠܐܝܼܩܵܪܵܟܼ. ܘܠܲܚܠܘܿܠ ܚܘܼܒܵܟ݂ ܘܠܐܝܼܩܵܪ ܫܘܼܒ݂ܚܵܟܼ. ܢܸܗܘܸܐ ܠܡܹܐܢܵܐ ܘܒܹܝܬ݂ ܓܵܘܣܵܐ ܠܟ̣ܠ ܕܐܲܠܝܼܨܝܼܢ. ܘܒܹܗ ܬܸܫܬܲܒܲܚ ܐܲܢ݇ܬ݁ ܘܲܒ݂ܪܵܟ݂ ܘܪܘܼܚܵܐ ܕܩܘܼܕ݂ܫܵܐ. ܠܵܟ݂ ܬܸܫܒ݁ܘܿܚܬܵܐ ܡ̣ܢ ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ ܒܟ̣ܠ ܥܸܕܵܢܝܼ̈ܢ: ܬܢܝܼ. ܫܲܒܲܚ. ܠܲܨܠܝܼܒ̣ܵܟ݂ ܦܵܪܘܿܩܲܢ ܣܵܓ̣ܼܕ݁ܝܼܢ ܥܝܼܪܹ̈ܐ ܘܐ݇ܢܵܫܵܐ. ܘܲܡܙܲܝܚܝܼܢ ܠܹܗ ܥܲܠ ܐܝܼܕ݂ܲܝ̈ܗܘܿܢ ܘܙܵܡ̇ܪܝܼܢ ܫܘܼܒ݂ܚܵܐ. ܕܲܥ̣ܒܲܕ݂ ܫܲܝܢܵܐ ܒܲܒ݂ܪܝܼܬ݂ܵܐ. ܘܒܲܛܸܠ̣ ܩܪ̈ܵܒܹܐ ܘܬܲܟ݂ܬ݁ܘܼܫܹ̈ܐ. ܘܫܲܝܸܢ ܥܲܡܵܐ ܥܲܡ ܥܲܡܡܹ̈ܐ. ܕܒܲܚܕ݂ܵܐ ܥܹܕ݁ܬܵܐ ܠܹܗ ܢܸܬ݂ܟܲܫܦܘܼܢ. ܘܢܵܘܕ݁ܘܿܢ ܘܢܸܣܓ݁ܕ݂ܘܼܢ ܠܡܵܪܘܼܬܹܗ. ܘܢܸܩܥܘܿܢ ܒܩܵܠܹ̈ܐ ܩܲܕ݁ܝܼܫܹ̈ܐ. ܫܘܼܒ݂ܚܵܐ ܠܒܲܪ ܡܲܠܟܵܐ ܫܡܲܝܵܢܵܐ. ܕܲܒ݂ܝܲܕ݂ ܪ̈ܲܚܡܵܘܗܝ ܣܲܓ݁ܝܼ̈ܐܹܐ ܚܲܣ̣ܝܼ ܚܵܘ̈ܒܲܝܢ. ܘܲܥ̣ܛܵܐ ܥܵܘ̣ܠܲܢ ܒܡܲܥܡܘܿܕ݂ܝܼܬܹܗ. ܘܝܲܗ̣݇ܒ݂ ܠܲܢ ܐ݇ܪ̈ܵܙܵܘܗܝ ܪܲܗܒ݂ܘܿܢܵܐ.

ܕܘܼܟ݂ܪܵܢܵܐ ܕܡܵܪܝ ܝܲܥܩܘܿܒ݂ ܡܦܲܣܩܵܐ. ܒܣܵܗܕܵܘ̈ܗܝ ܕܲܒ݂ܪܵܐ.

ܙܲܕܝܼܩܵܐ ܘܲܬ݂ܪܝܼܨܵܐ: ܒܥܝܼ ܡ̣ܢ ܡܵܪܝܵܐ ܘܨܲܠܵܐ ܩܕ݂ܵܡܵܘܗܝ. ܣܵܗܕܵܐ ܙܲܗܝܵܐ ܡܵܪܝ ܝܲܥܩܘܿܒ݂. ܕܐܸܬ݂ܦܲܣܲܩ ܗܲܕܵܡ ܗܲܕܵܡ. ܡܸܛܠ ܚܘܼܒܹܗ ܕܲܡܫܝܼܚܵܐ. ܐܲܦܝܼܣ ܘܲܒ݂ܥܝܼ ܡ̣ܢ ܡܵܪܵܟܼ. ܠܟܸܢܫܵܐ ܕܙܲܝܲܚ̣ ܕܘܼܟ݂ܪܵܢܵܟܼ. ܕܢܸܫܬ݁ܘܸܐ ܠܲܓ݂ܢܘܿܢ ܡܲܠܟ݁ܘܼܬ݂ܵܐ: ܬܢܝܼ. ܫܲܒܲܚ. ܡܵܐ ܩܲܫܝܵܐ ܗܵܝ̇ ܠܘܿܠܝܼܬ݂ܵܐ. ܕܲܡ̣ܚܵܐ ܒܠܸܒܹ݁ܗ ܕܣܵܛܵܢܵܐ. ܡܵܪܝ ܝܲܥܩܘܿܒ݂ ܕܡ̣ܢ ܒܹܝܬ݂ ܠܵܦܵܛ. ܟܲܕ݂ ܚ̣ܙܵܐ ܕܦܲܓ݂ܪܹܗ ܡܸܬ݂ܦܲܣܲܩ. ܠܥܸܣܪܝܼܢ ܘܲܬ݂ܡܵܢܹܐ ܡ̈ܢܵܘܵܢ. ܘܗܘ̤ ܪܵܘܹ̇ܙ ܘܡܵܘܕܸ݁ܐ ܠܡܵܪܝܵܐ.

ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܩܘܼܕܵܫ ܥܹܕ݁ܬܵܐ. ܒܡ̇ܢ ܕܚܲܟ݁ܝܼܡ.

ܐܸܬ݁ܕܲܟ݂̄ܪ ܥܹܕ݁ܬܵܟ݂ ܕܲܩ̣ܢܲܝܬ݁ ܡ̣ܢ ܩܕ݂ܝܼܡ: ܛܲܪ ܪ̈ܲܚܡܲܝܟ ܠܩܲܪ̈ܝܼܒܲܝܟ. ܡܵܪܲܢ ܒܪ̈ܲܚܡܲܝܟ ܢܲܛܲܪ ܥܹܕ݁ܬܵܟ݂ ܕܲܓ݂ܒܲܝܬ݁. ܘܫܲܪܲܪܬ݁ ܡ̣ܢ ܩܕ݂ܝܼܡ. ܘܒܲܛܸܠ ܡܸܢܵܗ̇ ܩܪ̈ܵܒܹܐ ܘܬܲܟ݂ܬ݁ܘܼܫܹ̈ܐ. ܘܐܲܣܘܿܪ ܝܲܠܕܹܝ̈ܗ̇ ܒܚܘܼܒܵܐ ܘܐܵܘܝܘܼܬ݂ܵܐ. ܟܵܗܢܹܝ̈ܗ̇ ܢܸܗܘܘܿܢ ܒܲܫܠܵܡܵܐ. ܘܗܲܝܡܵܢܘܼܬ݂ܵܐ ܕܲܫܪܵܪܵܐ. ܠܪܵܥܝܵܗ̇ ܢܲܛܲܪ ܒܲܚܢܵܢܵܟܼ. ܕܢܸܗܘܸܐ ܣܢܹܐܓ݂ܪܵܐ: ܘܢܸܫܐܲܠ ܡܸܢܵܟ݂ ܒܟ݂ܠܙܒܲܢ ܫܲܝܢܵܐ ܠܡܲܪܥܝܼܬܹܗ: ܬܢܝܼ. ܫܲܒܲܚ. ܒܪܵܐ ܡܫܝܼܚܵܐ ܕܐܸܬ݂ܵܐ ܠܦܘܼܪܩܵܢܲܢ. ܐܸܬ݁ܕܲܟ݂̄ܪ ܥܹܕ݁ܬܵܟ݂ ܕܲܩ̣ܢܲܝܬ݁ ܡ̣ܢ ܩܕ݂ܝܼܡ. ܘܫܲܥܒܸ݁ܕ݂ ܩܘܼܕ݂ܡܹܝܗ̇ ܥܲܡܡܹ̈ܐ ܕܨܵܒܹܝ̇ܢ ܩܪܵܒ݂ܵܐ. ܐܲܝܟ݂ ܕܐܸܫܬܵܘܕ݁ܝܼܬ݁ ܠܦܲܛܪܘܿܣ ܢܵܨܘܿܒ݂ܵܗ̇. ܕܬܲܪ̈ܥܹܝܗ̇ ܕܲܫܝܘܿܠ ܘܲܛܪ̈ܘܿܢܹܝܗ̇. ܠܵܐ ܚܵܣ̇ܢܝܼܢ ܠܵܗ̇ ܠܕ݂ܵܪܕܵܪ̈ܝܼܢ. ܐܲܫܲܪ ܠܵܗ̇ ܡܸܠܬ݂ܵܟ݂ ܦܵܪܘܿܩܲܢ. ܕܐܲܢ݇ܬ݁ܘܼ ܡܲܠܟܵܗ̇. ܘܲܡܕܲܒ݁ܪܵܢܵܐ ܕܝܲܠܕܹ݁ܝ̈ܗ̇. ܘܫܘܼܒ̣ܗܵܪܵܐ ܕܥܵܡܘܿܪܹ̈ܝܗ̇.