ܩܵܢܘܿܢܵܐ ܕܲܕ݂ܚܝܼܠܲܬ݁ ܕܡܸܬ݂ܐܡܲܪ ܒܥܹܐܕܹ̈ܐ ܡܵܪ̈ܵܢܵܝܹܐ

ܘܡܸܬ݂ܐܡܲܪ ܒܵܬܲܪ ܚܲܕ݂ ܐܲܒ݂ܵܐ ܩܲܕܝܼܫܵܐ ܟܲܕ݂ ܓܵܠ̇ܓ݁ܝܼܢ ܘܹܐܠܹ̈ܐ ܕܡܲܕ݂ܒ݁ܚܵܐ ܘܡܸܣܬܲܕ݂ܪܝܼܢ ܓܘܼܕܹ̈ܐ ܒܩܲܢܟܹ݁ܐ. ܘܲܡܫܲܪܹܝܢ ܗܵܢ̇ܘܿܢ ܕܲܠܓ݂ܵܘ ܢܝܼܚܵܐܝܼܬ݂ ܘܐܵܡ̇ܪܝܼܢ:

ܕܚܝܼܠܲܬ݁ ܐܲܠܵܗܵܐ ܡܪܲܝܡܵܐ ܡ̣ܢ ܡܲܩܕ݁ܫܵܟܼ ܠܥܵܠܲܡ ܥܵܠܡܝܼܢ. ܒܪܝܼܟ݂ܘܼ ܐܝܼܩܵܪܹܗ ܕܡܵܪܝܵܐ ܡ̣ܢ ܐܲܬ݂ܪܹܗ.  ܘܬ݂ܵܢܹܝ̇ܢ ܠܹܗ ܒܩܵܠܵܐ ܪܵܡܵܐ. ܘܥܵܢܸ̇ܐ ܥܲܡܵܐ ܒܗܲܝܟ݁ܠܵܐ ܗ̤ܘ ܟܲܕ݂ ܗ̤ܘ.

ܕܥܹܐܕ݂ܵܐ ܕܝܲܠܕܵܐ:

ܒܵܬܹ̈ܐ. ܒܩܲܢܟܹ݁ܐ ܡܸܬ݂ܐܲܡܪܝܼܢ. ܡܵܪܝܵܐ ܐܸܡܲܪ ܠܝܼ ܕܒܹܪܝ ܐܲܢ݇ܬ݁. ܘܐܸܢܵܐ ܝܵܘܡܵܢܵܐ ܝܼܠܸܕ݁ܬܵܟ݂. ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ. ܘܥܵܢܹܝ̇ܢ ܕܚܝܼܠܲܬ݁.. ܡ̣ܢ ܗܲܝܟ݁ܠܹ̈ܐ ܪܹ̈ܫܵܝܹܐ ܕܲܓ݂ܪܸܡ ܦܝܼܠܵܐ. ܒܢ̈ܵܬ݂ ܡܲܠܟܹ̈ܐ ܢܫܲܒ̈ܚܵܢܵܟܼ ܒܐܝܼܩܵܪܵܐ. ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ. ܘܥܵܢܹܝܢ ܕܚܝܼܠܲܬ݁....܀

ܐܲܩܲܦܬܵܐ. ܠܲܓ݂ܡܘܼܪܬܵܐ ܗ̇ܝ ܕܲܢܒ݂ܝܼܵܐ ܚ̣ܙܵܐ ܡܲܠܲܐܟ݂ܵܐ ܒܟܲܠܒ݁ܬ݂ܵܐ ܠܵܒܹܟܼ ܗ݇ܘ̣ܵܐ. ܘܗܵܫܵܐ ܟܵܗܢܹ̈ܐ ܒܓ݂ܵܘ ܒܹܝܬ݂ ܩܘܼܕ݂ܫܵܐ ܡܙܲܝܚܝܼܢ ܠܵܗ̇ ܥܲܠ ܐܝܼܕܲܝ̈ܗܘܿܢ܀ ܬܵܘ ܐܲܟ݂ܲܚ݇ܕ݂ ܥܲܡܡܹ̈ܐ ܢܸܬ݂ܩܲܪܲܒ݂ ܠܹܗ ܒܩܲܕܝܼܫܘܼܬ݂ܵܐ ܕܦܲܓ݂ܪ̈ܲܝܢ ܘܲܕ݂ܢܲܦ̮ܫ̈ܵܬܲܢ. ܗܵܢܵܐ ܓܹܝܪ ܐܝܼܬܼܵܘܗܝ ܐ݇ܪܵܙܵܐ ܕܲܟ݂ܣܸܐ ܗ݇ܘܵܐ. ܕܐܸܬ݂ܝܼܗܸܒ݂ ܚܠܵܦܲܝܢ ܠܫܘܼܒ݂ܩܵܢܵܐ ܕܲܚܛܵܗܹ̈ܐ: ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀

ܕܥܹܐܕ݂ܵܐ ܕܕܸܢܚܹܗ ܕܡܵܪܲܢ:

ܘܐܵܡܪܝܼܢ ܚܠܵܦ ܕܚܝܼܠܲܬ݁:  ܐܝܼܙܓܲܕܹ̈ܐ ܗܲܠܸܠܘܼܝܲܗ ܗܲܠܸܠܘܼܝܲܗ.

ܒܵܬܹ̈ܐ. ܕܢܲܚ̣ ܠܹܗ ܟܵܘܟ݁ܒ݂ܵܐ ܡ̣ܢ ܝܲܥܩܘܿܒ݂. ܘܩ̣ܵܡ ܪܹܫܵܐ ܡ̣ܢ ܝܼܣܪܵܝܹܠ. ܗܲܠܸܠܘܼܝܲܗ ܗܲܠܸܠܘܼܝܲܗ. ܐܵܠܹܦ ܐܲܠܦܝܼ̈ܢ ܩܵܝܡ̇ܝܼܢ ܩܕ݂ܵܡܵܘܗܝ. ܘܪܸܒ݁ܘܿ ܪܸ̈ܒ݁ܘܵܢ ܡܩܲܕ݁ܫܝܼܢ ܠܲܫܡܹܗ. ܗܲܠܸܠܘܼܝܲܗ ܗܲܠܸܠܘܼܝܲܗ.

ܐܲܩܲܦܬܵܐ. ܩܵܠܵܐ ܗܘ̤ܵܐ ܡ̣ܢ ܫܡܲܝܵܐ ܕܐܵܡܲܪ: ܕܗܵܢܵܘ ܒܹܪܝ ܚܲܒ݁ܝܼܒ݂ܵܐ ܕܒܹܗ ܐܸܨܛܒ݂ܝܼܬ݂: ܠܘܵܬܹܗ ܢܸܬ݂ܐ̱ܡܸܢ ܟܠܲܢ ܘܲܠܡܵܪܘܼܬܹܗ ܢܸܦܠܘܿܚ ܡ̣ܢ ܟܠܹܗ ܠܸܒܲܢ. ܟܲܕ݂ ܐܵܡ̇ܪܝܼܢܲܢ ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܩܲܕ݁ܝܼܫܲܬ݁ ܪܵܚܹ̇ܡ ܐ݇ܢܵܫܵܐ ܗܲܠܸܠܘܼܝܲܗ܀

ܕܥܹܐܕ݂ܵܐ ܕܲܩܝܵܡܬܵܐ:

ܕܐ݇ܪ̈ܵܙܹܐ ܕܪܲܡܫܵܐ ܕܲܩܝܵܡܬܵܐ:

ܕܚܝܼܠܲܬ݁. ܝܵܘܡܵܢܵܐ ܚ̣ܕ݂ܝܼ ܠܹܒ݁ܝ ܘܕ݂ܵܨ̣ ܐܝܼܩܵܪܝ. ܘܐܵܦ ܦܲܓ݂ܪ̱ܝ ܢܲܓܸ݁ܢ ܥܲܠ ܣܲܒ݂ܪܵܐ܀ ܡܸܛܠ ܕܠܵܐ ܫ̣ܒܲܩܬ݁ ܠܢܲܦ̮ܫܝ ܒܲܫܝܘܿܠ. ܘܠܵܐ ܝܲܗ̣݇ܒ݂ܬ݁ ܠܚܲܣܝܵܟܼ ܕܢܸܚܙܸܐ ܚܒ݂ܵܠܵܐ܀

ܐܲܩܲܦܬܵܐ. ܫܡܲܝܵܐ ܘܐܲܪܥܵܐ ܘܟ݂ܠܡܵܐ ܕܲܒ݂ܗܘܿܢ. ܢܵܘܕ݁ܘܿܢ ܥܲܡܲܢ ܒܗܵܢܵܐ ܝܵܘܡܵܐ܀ ܡܸܛܠ ܗܵܢܵܐ ܡܫܝܼܚܵܐ ܥܲܡ ܡܲܠܲܐܟܹ̈ܐ ܩܵܥܹܝ̇ܢܲܢ. ܩܲܕܝܼܫ ܘܲܡܫܲܒܲܚ ܚܲܝܠܵܐ ܕܲܬ݂ܠܝܼܬ݂ܵܝܘܼܬ݂ܵܐ. ܫܡܲܝܵܐ ܓܹܝܪ ܘܐܲܪܥܵܐ ܟܠܵܗ̇ ܗܵܐ ܡܠܹܝܢ ܡ̣ܢ ܐܝܼܩܵܪܵܗ̇܀

ܕܐ݇ܪ̈ܵܙܹܐ ܕܚܲܕ݂ܒ݁ܫܲܒܵܐ ܪܲܒܵܐ ܕܲܩܝܵܡܬܵܐ:

ܕܚܝܼܠܲܬ݁. ܕܘܼܨܘ ܘܐܸܬ݂ܠܲܒܲܒ݂ܘ ܐܘܿ ܡܵܝܘܿܬܹ̈ܐ. ܕܫܘܼܠܛܵܢ ܡܵܘܬܵܐ ܐܸܬ݂ܒܲܛܲܠ ܠܹܗ܀ ܗܵܐ ܡܣܲܟܹ݁ܝܢ ܠܹܗ ܫܡܲܝܵܐ ܘܐܲܪܥܵܐ. ܕܢܹܐܬܸܐ ܢܚܲܕܸܬ݂ ܟܠܡܵܐ ܕܲܒ݂ܗܘܿܢ܀

ܐܲܩܲܦܬܵܐ. ܚܵܕܹܝ̇ܢ ܝܵܘܡܵܢܵܐ ܫܘܼܠܛܵܢܹ̈ܐ ܕܒܲܫܡܲܝܵܐ. ܕܲܚ̣ܙܵܘ ܕܐܸܬ݂ܓܡܲܪ ܒܲܥܒ݂ܵܕ݂ܵܐ. ܣܲܒ݂ܪܵܐ ܕܠܹܗ̤ܘ ܡܣܲܟܹܝ̇ܢ ܗ݇ܘ̣ܵܘ܀ ܘܥܵܢܹܝ̇ܢ: ܕܚܝܼܠܲܬ݁...܀ ܘܲܢܫܲܒܲܚ ܠܹܗ ܐܲܟܲܚ݇ܕ݂ ܘܢܹܐܡܲܪ: ܩܲܕܝܼܫܲܬ݁ ܩܲܕܝܼܫܲܬ݁ ܩܲܕܝܼܫܲܬ݁ ܐܘܿ ܡܵܪܹܟ݁ܠ ܗܲܠܸܠܘܼܝܲܗ ܗܲܠܸܠܘܼܝܲܗ.

ܕܥܹܐܕ݂ܵܐ ܕܣܘܼܠܵܩܵܐ:

ܕܚܝܼܠܲܬ݁. ܣ̣ܠܸܩ ܐܲܠܵܗܵܐ ܒܫܘܼܒ݂ܚܵܐ ܡܵܪܝܵܐ ܒܩܵܠܵܐ ܕܩܲܪܢܵܐ. ܙܡܲܪܘ ܠܐܲܠܵܗܵܐ ܒܫܘܼܒ݂ܚܵܐ ܙܡܲܪܘ ܠܡܲܠܟܲܢ. ܕܚܝܼܠܲܬ݁. ܐܲܡ̣ܠܸܟܼ ܐܲܠܵܗܵܐ ܥܲܠ ܥܲܡܡܹ̈ܐ. ܐܲܠܵܗܵܐ ܝܑܼܬܸܒ݂ ܥܲܠ ܟܘܼܪܣܝܹܗ ܩܲܕܝܼܫܵܐ. ܕܚܝܼܠܲܬ݁. ܓܘܼܕܝܼ̈ܢ ܓܘܼܕܝܼ̈ܢ ܩܵܡ̣ܘ ܪ̈ܘܼܚܵܢܹܐ ܘܙܲܝܚܘܼܗܝ ܠܲܒ݂ܪܵܐ ܒܝܘܿܡ ܣܘܼܠܵܩܹܗ. ܕܚܝܼܠܲܬ݁. ܟܲܕ݂ ܚܵܙܹܝ̇ܢ ܠܹܗ ܕܐܸܣܬܲܠܲܩ. ܘܲܥܢܵܢܵܐ ܩܲܒܹ݁ܠܬ݂ܹܗ ܘܐܸܬ݂ܟܲܣܝܼ ܡ̣ܢ ܥܲܝܢܲܝ̈ܗܘܿܢ. ܕܚܝܼܠܲܬ݁. ܠܗܵܢܵܐ ܕܡܵܐ ܝܲܩܝܼܪܵܐ ܘܦܲܓ݂ܪܵܐ ܕܲܢ̣ܣܲܒ݂ܢ ܟܠܲܢ. ܒܬ݂ܵܘܕܝܼܬ݂ܵܐ ܢܫܲܒܲܚ ܠܹܗ ܘܢܹܐܡܲܪ. ܗܲܠܸܠܘܼܝܲܗ ܗܲܠܸܠܘܼܝܲܗ̇. ܕܚܝܼܠܲܬ݁.

ܕܥܹܐܕ݂ܵܐ ܕܦܲܢܛܹܩܘܼܣܛܹܐ:

ܕܚܝܼܠܲܬ݁. ܠܸܒܵܐ ܕܲܟ̣ܝܵܐ ܒܪܝܼ ܒܝܼ ܐܲܠܵܗܵܐ. ܘܪܘܼܚܵܟܼ ܬܩܲܢܬ݂ܵܐ ܚܲܕܸ݁ܬ݂ ܒܓ̣ܵܘܝ܀ ܦܵܪܲܩܠܹܝܛܵܐ ܢ̣ܚܸܬ݂ ܝܵܘܡܵܢܵܐ. ܘܚܲܟܸ݁ܡ̣ ܠܥܲܒ̣ܕܵܘ̈ܗܝ ܒܝܲܕ݂ ܡܵܘܗ̈ܒ̣ܵܬܹܗ܀

ܐܲܩܲܦܬܵܐ. ܒܥܹܐܕ݂ܵܐ ܕܦܸܨܚܵܐ ܕܒܲܚ̣ ܠܲܩܢܘܿܡܹܗ ܒܛܘܼܦ̮ܣܵܐ ܕܐܸܡܪܵܐ. ܘܲܒ̣ܥܲܕ݂ܥܹܕ݂ܵܐ ܕܦܲܢܛܹܩܘܼܣܛܹܐ ܪܫܲܡ̣ ܙܵܟ̣ܘܼܬܹܗ܀ ܟܠܲܢ ܒܝܲܕ݂ ܛܲܝܒ݁ܘܼܬܹܗ ܕܦܵܪܘܿܩܲܢ. ܒܗܲܝܡܵܢـܘܼܬ݂ܵܐ ܠܘܵܬܹܗ ܢܸܬ݂ܩܲܪܲܒ̣. ܘܦܲܓ̣ܪܹܗ ܘܲܕ݂ܡܹܗ ܕܲܒ̣ܪܵܐ ܡܫܝܼܚܵܐ. ܢܸܣܲܒ̣ ܘܲܢܫܲܒܲܚ ܟܲܕ݂ ܐܵܡ̇ܪܝܼܢܲܢ ܗܲܠܸܠܘܼܝܲܗ܀

ܕܥܹܐܕ݂ܵܐ ܕܓܸܠܝܵܢܵܐ:

ܕܚܝܼܠܲܬ݁. ܙܝܼܘܵܐ ܘܗܸܕ݂ܪܵܐ ܠ̣ܒܸܫܬ݁. ܘܐܸܬ݂ܟܲܣܝܼܬ݁ ܢܘܼܗܪܵܐ ܐܲܝܟܼ ܡܲܪܛܘܼܛܵܐ܀ ܓܠ̣ܵܐ ܦܵܪܘܿܩܲܢ ܥܲܠ ܪܹܫ ܛܘܼܪܵܐ. ܫܘܼܒ݂ܚܵܐ ܪܲܒܵܐ ܕܒܹܗ ܥܬ݂ܝܼܕ݂ ܕܢܹܐܬܸܐ܀

ܐܲܩܲܦܬܵܐ. ܘܩܵܠܵܐ ܗܘ̤ܵܐ ܡ̣ܢ ܫܡܲܝܵܐ ܕܐܵܡܲܪ. ܕܗܵܢܵܘ ܒܹܪܝ ܚܲܒ݁ܝܼܒ݂ܵܐ ܕܒܹܗ ܐܸܨܛܒ݂ܝܼܬ݂.

ܕܥܹܐܕ݂ܵܐ ܕܲܨܠܝܼܒ݂ܵܐ:

ܕܚܝܼܠܲܬ݁. ܨܠܝܼܒ݂ܵܐ ܫܝܼܛܵܐ ܕܲܒ݂ܪܹܫ ܩܲܝܣܵܐ. ܗܵܐ ܡܙܲܝܚܝܼܢ ܠܹܗ ܥܝܼܪܹ̈ܐ ܘܐ݇ܢܵܫܵܐ܀ ܢܦܲܠ ܕܸܚ̈ܠܵܬ݂ܵܐ ܪܥܸܡ ܥܹ̈ܕ݂ܵܬ݂ܵܐ. ܚ̣ܵܒ݂ ܣܵܛܵܢܵܐ ܘܲܙ̣ܟ݂ܵܐ ܨܠܝܼܒ݂ܵܐ.

ܐܲܩܲܦܬܵܐ. ܐܲܚܲܝ̈ ܢܸܩܪܘܿܒ݂ ܘܢܸܚܙܸܐ ܠܕܸܒ݂ܚܵܐ. ܕܦܲܓ݂ܪܹܗ ܘܲܕ݂ܡܹܗ ܕܒܲܪ ܐܲܠܵܗܵܐ. ܕܲܬ݂ܠܸܐ ܒܩܲܝܣܵܐ ܚܠܵܦ ܚܲܛܵܝܹ̈ܐ. ܘܲܕ݂ܒ݂ܝܼܚ ܒܚܘܼܒܹܗ ܡܸܛܠ ܥܹܕ݁ܬܹ݁ܗ. ܬܠܸܐ ܒܲܙܩܝܼܦܵܐ ܐܲܝܟܼ ܚܲܠܵܫܵܐ. ܘܝܵܗܹ̇ܒ݂ ܚܲܝܹ̈ܐ ܐܲܝܟܼ ܐܲܠܵܗܵܐ. ܗܲܠܸܠܘܼܝܲܗ.