ܥܘܿܢ̈ܝܵܬ݂ܵܐ ܕܐ݇ܪ̈ܵܙܹܐ ܕܟ݂ܠܵܗ݁ ܫܲܢ݇ܬܵܐ
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܣܘܼܒܵܪܵܐ ܒܣܵܗܕܹ̈ܐ ܒܪ̈ܝܼܟܹܐ.
ܡܣܲܒܵܪܘܼ ܣܲܒ݁ܪܹܬ݂ ܒܡܵܪܝܵܐ. ܢܹܐܟ݂ܠܘܼܢ ܡܸܣܟܹܢܹ̈ܐ ܘܢܸܣܒ݁ܥܘܼܢ. ܛܘܼܒ݂ܵܘܗܝ ܠܥܲܡܵܐ ܕܗܵܟܲܢܵܐ ܐܝܼܬ݂ ܠܹܗ. ܕܨܘܼܪܬܵܐ. ܗ̇ܘ ܕܒܹܗ ܐܝܼܬ݂ ܠܲܢ ܦܘܼܪܩܵܢܵܐ ܘܫܘܼܒ݂ܩܵܢܵܐ ܕܲܚܛܵܗܹ̈ܐ. ܦܲܓ݂ܪܹܗ ܕܲܡܫܝܼܚܵܐ ܘܲܕ݂ܡܹܗ ܝܲܩܝܼܪܵܐ ܥܲܠ ܡܲܕ݂ܒܲܚ ܩܘܼܕ݂ܫܵܐ. ܒܕܸܚܠ̱ܬ݂ܵܐ ܘܲܒ݂ܪܸܚܡ̱ܬ݂ܵܐ ܟܠܲܢ ܢܸܬ݂ܩܲܪܲܒ݂ ܠܹܗ. ܘܥܲܡ ܡܲܠܲܐܟܼܹ̈ܐ ܢܝܲܒܸܒ݂ ܠܹܗ: ܩܲܕܝܼܫ ܩܲܕܝܼܫ ܩܲܕܝܼܫ ܡܵܪܝܵܐ ܐܲܠܵܗܵܐ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܣܘܼܒܵܪܵܐ ܪܹܫ ܩܵܠܵܐ.
ܩܪܹܝܬܼܵܟܼ ܡܵܪܝܵܐ ܒܟ݂ܠܝܘܿܡ. ܥܕܲܡܵܐ ܕܲܬ݂ܪܲܚܸܡ ܥܠܲܝܢ. ܠܵܟ݂ܘܼ ܩܵܪܹܝ̇ܢܲܢ. ܐܸܬ݂ܪܲܚܲܡ ܥܠܲܝܢ ܡܫܝܼܚܵܐ ܦܵܪܘܿܩܲܢ. ܬܢܝܼ . ܫܲܒܲܚ: ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܣܘܼܒܵܪܵܐ ܪܹܫ ܩܵܠܵܐ.
ܡܛܲܝܲܒ݂ ܗ݇ܘ̣ ܠܹܒ݁ܝ ܐܲܠܵܗܵܐ ܡܛܲܝܲܒ݂ ܗ݇ܘ̣ ܠܹܒ݁ܝ: ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ: ܐܲܪܝܼܡܘ ܐܝܼܕܲܝ̈ܟ݁ܘܿ݁ܢ ܠܩܘܼܕ݂ܫܵܐ ܘܒܲܪܸܟ݂ܘ ܠܡܵܪܝܵܐ. ܕܨܘܼܪܬܵܐ. ܟܲܕ݂ ܪܣܝܼܣܝܼܢ ܠܸܒܵܘ̈ܵܬܲܢ ܘܲܕ݂ܟܹܝܢ ܡ̣ܢ ܬܹܐܪܬܵܐ ܒܝܼܫܬܵܐ. ܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ ܘܲܒ݂ܪܸܚܡ̱ܬ݂ܵܐ ܠܡܵܘܗܲܒ݂ܬ݂ܵܐ ܕܚܝܼܠܬܵܐ ܕܐ݇ܪ̈ܵܙܵܘܗܝ ܕܲܡܫܝܼܚܵܐ. ܘܲܠܢܲܦ̮̈ܫܵܬܲܢ ܒܲܥܒ݂ܵܕܹ̈ܐ ܢܨܲܒܸ݁ܬ݂. ܕܲܒ݂ܗܘܿܢ ܢܪܲܥܹܝܘܗܝ ܠܕܲܝܵܢܵܐ ܕܟ݂ܠܵܐ. ܕܲܢܚܘܼܣ ܥܠܲܝܢ ܡܵܐ ܕܕ݂ܵܐܹ̇ܢ ܫܲܪ̈ܒ݂ܵܬܹܗ ܕܥܵܠܡܵܐ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܬܲܪܬܹ݁ܝܢ ܕܣܘܼܒܵܪܵܐ ܒܠܵܟ݂ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ݂ܠܙܒܲܢ. ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܪܲܒ݁ܟ݁ܘܼܡܪܹ̈ܐ ܕܚܲܣ̣ܝܼ ܚܵܘ̈ܒܵܬܲܢ ܒܕܸܒ݂ܚܵܐ ܕܲܩܢܘܿܡܹܗ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܣܘܼܒܵܪܵܐ ܒܲܫܒ݂ܝܼܚ ܗ̣݇ܘܵܐ ܘܲܦܐܸܐ.
ܟܘܼܪܣܝܵܟܼ ܐܲܠܵܗܵܐ ܠܥܵܠܲܡ ܥܵܠܡܝܼܢ: ܟܠ ܕܲܚܕ݂ܝܼܪܝܼܢ ܠܹܗ ܢܵܘܒ݁ܠܘܼܢ ܩܘܼܪ̈ܒܵܢܹܐ ܠܲܕ݂ܚܝܼܠܵܐ. ܕܨܘܼܪܬܵܐ. ܐܵܠܹܦ ܐܲܠܦܝܼ̈ܢ ܘܪܸܒ݁ܘܿ ܪܸ̈ܒ݁ܘܵܢ ܟܪܝܼܟ݂ܝܼܢ ܠܹܗ. ܠܟ݂ܘܼܪܣܝܵܐ ܕܚܝܼܠܵܐ ܕܬܸܫܒ݁ܘܿ݁ܚܬܵܟܼ ܡܵܪܝܵܐ ܚܲܝܠ̱ܬܼܵܢܵܐ. ܡܲܠܲܐܟܹ̈ܐ ܟܪܝܼܟ݂ܝܼܢ ܠܹܗ. ܘܲܩܕ݂ܵܡ ܪܲܒ݁ܘܼܬܼܵܟܼ ܡܫܝܼܚܵܐ ܣܪ̈ܵܦܹܐ ܒܕܸܚܠ̱ܬ݂ܵܐ ܩܵܝ̇ܡܝܼܢ ܠܐܝܼܩܵܪܵܟ݂. ܘܕܲܢܚܘܼܪܘܼܢ ܒܵܟܼ ܠܵܐ ܡܲܡܪ̱ܚܝܼܢ. ܒܩܵܠܹ̈ܐ ܕܹܝܢ ܕܠܵܐ ܫܲܠܘܵܐ ܩܵܥܹܝ̇ܢ ܫܲܘܝܵܐܝܼܬ݂ ܘܐܵܡ̇ܪܝܼܢ. ܩܲܕܝܼܫ ܩܲܕܝܼܫ ܩܲܕܝܼܫܲܬ݁ ܪܵܚܹܡܢܵܫܵܐ ܫܘܼܒ݂ܚܵܐ ܠܵܟܼ. ܬܢܝܼ. ܘܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܣܘܼܒܵܪܵܐ ܒܠܵܟ݂ܘܼ ܩܵܪܹܝ̇ܢܲܢ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ. ܡ̣ܢ ܦܘܼܡܵܐ ܕܲܥܠܲܝܡܹ̈ܐ ܘܕܲܛܠܵܝܹ̈ܐ. ܫܘܼܒ݂ܚܵܐ ܘܬ݂ܵܘܕ݁ܝܼܬ݂ܵܐ. ܢܲܣܸܩ ܠܹܗ ܠܲܒ݂ܪܵܐ. ܕܦܲܪܩܲܢ ܒܲܨܠܝܼܒܹܗ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒܫܲܒܵܐ ܕܐܲܪܒ݁ܥܵܐ ܕܣܘܼܒܵܪܵܐ ܪܹܫ ܩܵܠܵܐ.
ܐܹܡܲܠܸܠ ܥܠܲܝܟ݁ܝ ܫܠܵܡܵܐ: ܢܸܗܘܸܐ ܫܠܵܡܵܐ ܒܚܲܝܠܹܟ݂ܝ. ܕܨܘܼܪܬܵܐ. ܘܡܸܬ݂ܚܲܫܒ݂ܵܐ ܗ݇ܘ̣ܵܬ݂ ܕܡܵܢܵܘ ܫܠܵܡܵܐ ܗܵܢܵܐ. ܒܝܲܕ݂ ܫܠܵܡܵܐ ܕܐܸܡܲܪ ܥܝܼܪܵܐ ܡܲܪܝܲܡ ܐܸܬ݂ܪܲܗܒܲܬ̤. ܒܗ̇ܝ ܕܠܵܐ ܚܟ݂ܝܼܡ ܗ݇ܘ̣ܵܐ ܠܵܗ̇ ܓܲܒ݂ܪܵܐ ܒܚܹܝܠ ܪܘܼܚܵܐ ܒܸܛܢܲܬ̤. ܫܠܵܡܵܐ ܒܐܲܪܥܵܐ ܘܫܘܼܒ݂ܚܵܐ ܒܲܫܡܲܝܵܐ. ܘܣܲܒ݂ܪܵܐ ܛܵܒ݂ܵܐ ܠܟ݂ܠܗܹܝܢ ܒܸܪ̈ܝܵܬ݂ܵܐ. ܒܪܝܼܟ݂ܘܼ ܝܼܚܝܼܕ݂ܵܝܹܗ ܕܐܲܒ݂ܵܐ ܕܲܒ݂ܐ݇ܢܵܫܘܼܬܲܢ ܕܢܲܚ̣. ܘܝܲܗ̣݇ܒ݂ ܠܘܼܒܵܒ݂ܵܐ ܠܓܸܢܣܵܐ ܕܡܵܝܘܿܬܹ̈ܐ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܐܲܪܒܲܥ ܕܣܘܼܒܵܪܵܐ ܒܒܲܠܡܹܐܢܹܗ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ. ܫܲܒ݁ܚܘܼܗܝ ܘܲܙܡܲܪܘ ܠܹܗ. ܒܣܘܼܒܵܪܹܗ ܕܲܡܫܝܼܚܵܐ ܥܲܡ ܡܲܠܲܐܟܹ̈ܐ ܢܫܲܒ݁ܚܝܼܘܗܝ. ܠܐܲܒ݂ܵܐ ܕܫܲܠ̣ܚܹܗ ܘܲܠܪܘܼܚܵܐ ܕܚܲܕܸܬ݂ ܒܹܗ ܨܲܠܡܲܢ ܕܲܒ݂ܠ̣ܝܼ. ܬܢܝܼ. ܫܲܒܲܚ. ܒܵܗ̇.
ܕܥܹܐܕ݂ܵܐ ܕܝܲܠܕܵܐ ܪܹܫ ܩܵܠܵܐ.
ܫܲܒܲܚܘ ܠܡܵܪܝܵܐ ܬܸܫܒ݁ܘܿܚܬܵܐ ܚܕܲܬܵܐ. ܬܹܒܹܝܠ ܘܟ݂ܠܗܘܿܢ ܥܵܡܘܿܪܹ̈ܝܗ̇. ܚܲܕ݂ܘܼܬ݂ܵܐ ܒܟ݂ܠܵܗ̇ ܐܲܪܥܵܐ. ܕܨܘܼܪܬܵܐ. ܘܬܸܫܒ݁ܘܿ݁ܚܬܹܗ ܕܡܵܪܝܵܐ ܐܲܢ̣ܗܪܲܬ̤ ܥܠܲܝܗܘܿܢ. ܬܸܫܒ݁ܘܿܚܬܵܐ ܘܚܲܕ݂ܘܼܬ݂ܵܐ ܪܲܒ݁ܬ݂ܵܐ. ܬܹܒܹܝܠ ܟܠܵܗ̇ ܐܸܬ݂ܡܲܠܝܲܬ̤ ܡ̣ܢ ܣܵܟ݂ܵܗ̇. ܒܡܵܘܠܵܕܹܗ ܕܡܲܠܟܵܐ ܡܫܝܼܚܵܐ. ܚܲܝ̈ܠܵܘܵܬ݂ܵܐ ܘܟܸܢܫܹ̈ܐ ܕܡܲܠܲܐܟܹ̈ܐ. ܥܲܡܲܢ ܫܲܘܝܵܐܝܼܬ݂ ܩܵܥܹܝ̇ܢ ܘܐܵܡ̇ܪܝܼܢ. ܬܸܫܒ݁ܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ. ܘܲܫܠܵܡܵܐ ܘܫܲܝܢܵܐ ܥܲܠ ܐܲܪܥܵܐ. ܕܝܼܚܝܼܕܹܗ ܒܲܒ݂ܣܲܪ ܠܲܢ ܐܸܬ݂ܓ݁ܠܝܼ. ܘܐܸܬ݂ܟ݁ܪܸܙ ܚܲܝܠܹܗ ܒܹܝܬ݂ ܥܲܡܡܹ̈ܐ. ܘܐܸܣܬܲܠܲܩ ܒܫܘܼܒ݂ܚܵܐ ܠܘܵܬ݂ ܐܲܒ݂ܘܼܗܝ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܝܲܠܕܵܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ. ܡܸܛܠ ܐܝܼܩܵܪܵܐ ܕܲܫܡܵܟܼ: ܠܲܫܡܵܐ ܕܩܘܼܕ݂ܫܹܗ ܠܥܵܠܲܡ ܥܵܠܡܝܼܢ. ܝܵܐܹ̇ܐ ܘܙܵܕܹܩ̇ ܡܵܪܝܵܐ ܕܲܢܫܲܒܲܚ ܠܲܡܪܲܚܡܵܢܘܼܬ݂ܵܐ ܕܛܲܝܒ݁ܘܼܬ݂ܵܟ݂. ܡܸܛܠ ܕܝܲܗ̣݇ܒ݂ܬ݁ ܠܲܢ ܒܲܚܢܵܢܵܟܼ ܐ݇ܪ̈ܵܙܹܐ ܫܒ݂ܝܼܚܹ̈ܐ. ܗܵܢ̇ܘܿܢ ܕܒܲܕ݂ܚܝܼܠܘܼܬ݂ܗܘܿܢ ܡܲܠܲܐܟܹ̈ܐ ܪܓ݂ܝܼܓ݂ܝܼܢ ܕܲܢܚܘܼܪܘܼܢ. ܘܐܲܫ̣ܘܝܼܬܵܢ ܒܛܲܝܒ݁ܘܼܬܼܵܟܼ ܕܡܵܐ ܕܡܸܬ݂ܩܲܪܲܒ݂ ܠܵܟܼ ܕܸܒ݂ܚܵܐ ܕܲܟ݂ܝܵܐ ܘܩܲܕܝܼܫܵܐ. ܢܸܚܙܹܝܘܗܝ ܟܠܲܢ ܒܓܲܠܝܘܼܬ݂ ܐܲܦܹ̈ܐ ܠܫܘܼܒ݂ܚܵܐ ܦܲܐܝܵܐ ܕܪܲܒ݁ܘܼܬܼܵܟ݂. ܘܢܸܩܥܸܐ ܬܘܼܒ݂ ܥܲܡ ܚܲܝ̈ܠܵܘܵܬ݂ܵܐ ܫܡܲܝܵܢܹ̈ܐ ܘܢܹܐܡܲܪ. ܩܲܕܝܼܫ ܩܲܕܝܼܫ ܩܲܕܝܼܫܲܬ݁ ܐܲܠܵܗܵܐ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܒ݂ܵܬܲܪ ܝܲܠܕܵܐ ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܬܵܘ ܢܫܲܒܲܚ ܠܡܵܪܝܵܐ. ܢܵܘܕܸ݁ܐ ܠܵܟܼ ܠܥܵܠܲܡ. ܬܵܘ ܢܸܪܥܲܡ ܝܵܘܡܵܢܵܐ ܒܩܵܠ ܬܵܘܕ݁ܝܼܬ݂ܵܐ. ܘܢܸܬ݂ܩܲܪܲܒ݂ ܠܕܸܒ݂ܚܵܐ ܚܲܝܵܐ ܘܲܡܠܝܼܠܵܐ. ܕܐܸܬ݂ܝܼܗܸܒ݂ ܠܲܢ ܡܲܒ݁ܘܼܥܵܐ ܕܥܘܼܕ݂ܪ̈ܵܢܹܐ. ܨܲܠܡܹܗ ܕܐܲܒ݂ܵܐ ܘܝܘܼܩܢܵܐ ܕܝܼܚܝܼܕܹܗ. ܘܢܵܘܣܵܐ ܦܲܐܝܵܐ ܕܪܘܼܚܩܘܼܕ݂ܫܵܐ. ܟܝܵܢܵܐ ܕܠܵܐ ܡܸܬ݁ܕ݁ܪܸܟ݂. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܝܲܠܕܵܐ ܒܲܠ̣ܒܸܫܘ ܠܵܐ ܡܸܬ݂ܚܲܒ݁ܠܵܢܘܼܬ݂ܵܐ.
ܫܲܒܲܚܘ ܠܡܵܪܝܵܐ ܡ̣ܢ ܫܡܲܝܵܐ. ܢܸܚܕ݁ܘܿ݁ܢ ܫܡܲܝܵܐ ܘܲܬ݁ܕ݂ܘܼܨ ܐܲܪܥܵܐ. ܢܫܲܒ݁ܚܘܼܢܵܝܗܝ ܫܡܲܝܵܐ ܘܐܲܪܥܵܐ. ܫܡܲܝܵܐ ܘܐܲܪܥܵܐ ܐܸܬ݂ܚܲܕܲܬ݂ܘ. ܒܝܲܕ݂ ܝܲܠܕܵܐ ܫܒ݂ܝܼܚܵܐ ܕܡ̣ܢ ܒܬ݂ܘܼܠܬܵܐ ܐܸܬ݂ܚܙܝܼ. ܘܡ̣ܢ ܗܵܝܕܹܝܢ ܟܲܕ݂ ܡܲܠܲܐܟܹ̈ܐ ܫܠܵܡܵܐ ܐܲܟ݂ܪܸܙܘ ܗ݇ܘ̣ܵܘ. ܒܪܝܼܬ݂ܵܐ ܐܸܬ݂ܡܲܠܝܲܬ̤ ܣܲܒ݂ܪܵܐ ܛܵܒ݂ܵܐ ܒܩܵܠܲܝ̈ܗܘܿܢ. ܘܠܵܐ ܡܸܟܹܝܠ ܒܦܘܼܠܚܵܢܵܐ ܬܥܝܼܫܵܐ ܕܲܚܛܝܼܬ݂ܵܐ ܡܸܬ݂ܗܲܦܟܵܐ. ܐܸܬ݂ܚܙܝܼ ܓܹܝܪ ܒܒܹܝܬ݂ܠܚܸܡ ܐܲܝܢܵܐ ܕܢܵܣܹ̇ܒ݂ ܡܸܨܛܲܠܝܵܢܘܼܬ݂ܵܐ. ܘܠܵܐ ܡܸܟܹ݁ܝܠ ܒܲܚܒ݂ܵܠܹܗ ܕܡܵܘܬܵܐ ܡܸܫܬܲܒ݂ܩܵܐ. ܐܸܠܵܐ ܚܵܕ݂ܝܵܐ ܘܕ݂ܵܝ̇ܨܵܐ ܒܦܘܼܪܩܵܢܵܐ. ܕܲܥ̣ܒܲܕ݂ ܒܚܘܼܒܹ݁ܗ ܒܵܪܘܿܝܵܐ. ܒܡܸܨܥܵܝܵܐ ܕܲܢ̣ܣܲܒ݂ ܠܓܸܠܝܵܢܵܐ ܕܟܲܣܝܘܼܬܹܗ. ܚܵܕܹܝ̇ܢ ܪܵܘܡܵܐ ܘܥܘܼܡܩܵܐ ܒܝܘܿܡ ܝܲܠܕܵܟܼ ܦܵܪܘܿܩܲܢ ܫܘܼܒ݂ܚܵܐ ܠܵܟ݂. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܬܲܪܬܹܝܢ ܕܒ݂ܵܬܲܪ ܝܲܠܕܵܐ ܕܘܼܟ݂ܪܵܢܵܐ ܗ݇ܝ̣ ܕܡܵܪܬܝ ܡܲܪܝܲܡ ܒܬܵܘ ܒܲܝܬܵܝܹ̈ܐ.
ܫܲܒܲܚܘ ܠܡܵܪܝܵܐ ܬܸܫܒ݁ܘܿܚܬܵܐ ܚܕܲܬܵܐ: ܚܲܕ݂ܬܹ̈ܐ ܐܸܢܘܿܢ ܕܗܵܟܹܝܠ ܐܸܬ݂ܥ̱ܒܸܕ݂ܘ. ܕܨܘܼܪܬܵܐ. ܟܠ ܡܸܕܸܡ ܗܘ̤ܵܐ ܚܲܕ݂ܬ݂ܵܐ ܡ̣ܢ ܐܲܠܵܗܵܐ. ܚܲܕ݂ܬ݂ܝܼܢ ܐ݇ܪ̈ܵܙܹܐ ܕܲܡܕܲܒ݁ܪܵܢܘܼܬܼܵܟܼ ܡܵܪܝܵܐ. ܥܸܠ̈ܠܵܬ݂ܵܐ ܓܹܝܪ ܕܲܗ̤ܘܲܝ̈ ܠܲܚܛܝܼܬ݂ܵܐ ܥܸܠܬ݂ܵܐ ܕܦܘܼܪܩܵܢܵܐ ܚܵܘܝܼܬ݁ ܐܸܢܹܝܢ. ܒܝܲܕ݂ ܐܲܢ݇ܬ݁ܬ݂ܵܐ ܐܵܕ݂ܵܡ ܩܲܕ݂ܡܵܝܵܐ ܐܸܬ݂ܥ̱ܒܲܪ. ܒܝܲܕ݂ ܒܬ݂ܘܼܠܬܵܐ ܡ̣ܢ ܚܒ݂ܵܠܵܐ ܒܲܡܫܝܼܚܵܐ ܐܸܬ݂ܚܲܕܲܬ݂. ܒܝܲܕ݂ ܟܵܘܟ݁ܒܹܐ ܡܓ݂ܘܼܫܹ̈ܐ ܫܲܪܪܘܼܗ̇ ܠܛܵܥܝܘܼܬ݂ܗܘܿܢ. ܒܝܲܕ݂ ܟܵܘܟ݁ܒ݂ܵܐ ܝܲܠܦ̣ܘܼܗܝ ܡܸܢܵܟܼ ܠܲܫܪܵܪܵܐ. ܘܒܲܒ݂ܣܲܪ ܡܸܛܠ ܒܢܲܝ̈ܢܵܫܵܐ ܒܥܵܠܡܵܐ ܐܸܬ݂ܚܙܝܼܬ݁. ܘܲܠܟܹܐܒ݂ܵܘ̈ܗܝ ܕܲܟ݂ܝܵܢܲܢ ܐܵܣܝܵܐ ܐܸܬ݂ܓ݁ܠܝܼܬ݁. ܪܵܘܪ̈ܒ݂ܝܼܢ ܐ݇ܪ̈ܵܙܹܐ ܕܲܡܕܲܒ݁ܪܵܢܘܼܬܼܵܟܼ ܡܵܪܝܵܐ ܫܘܼܒ݂ܚܵܐ ܠܵܟܼ. ܬܢܝܼ. ܫܲܒܲܚ. ܒܵܗ̇.
ܥܹܐܕ݂ܵܐ ܕܕܸܢܚܹܗ ܕܡܵܪܲܢ ܒܡܵܪܵܐ ܕܟ݂ܠܵܐ.
ܫܲܒܲܚܘ ܠܡܵܪܝܵܐ ܬܸܫܒ݁ܘܿܚܬܵܐ ܚܕܲܬܵܐ. ܬܹܒܹܝܠ ܘܟ݂ܠܗܘܿܢ ܥܵܡܘܿܪܹ̈ܝܗ̇. ܕܨܘܼܪܬܵܐ. ܕܐܵܦ ܗ̤ܝ ܒܪܝܼܬ݂ܵܐ ܬܸܬ݂ܚܲܪܲܪ ܡ̣ܢ ܥܲܒ݂ܕ݁ܘܼܬ݂ܵܐ ܕܲܚܒ݂ܵܠܵܐ. ܒܪܝܼܬ݂ܵܐ ܒܡܵܪܵܗ̇ ܐܸܬ݂ܚܲܕ݁ܬܲܬ̤. ܘܲܠܦܵܪܘܿܩܵܗ̇ ܐܸܫܬܵܘܕܥܲܬ̤. ܕܲܥ̣ܡܲܕ݂ ܘܲܓ݂ܠ̣ܵܐ ܠܵܗ̇ ܒܝܘܿܪܕܢܵܢ. ܬܵܘܕ݁ܝܼܬ݂ܵܐ ܕܲܬ݂ܠܝܼܬܼܵܝܘܼܬ݂ܵܐ. ܐܲܒ݂ܵܐ ܕܡܲܙܥܸܩ ܘܩܵܥܹ̇ܐ: ܕܗܵܢܵܘ ܚܲܒ݁ܝܼܒ݂ܝ ܕܒܹܗ ܐܸܨܛܒ݂ܝܼܬ݂. ܘܪܘܼܚܵܐ ܕܐܸܬ݂ܵܐ ܘܩ̣ܵܘܝܼ ܥܠܵܘܗܝ. ܘܐܵܘܕܲܥ̣ ܫܘܼܒ݂ܚܹܗ ܩܕ݂ܵܡ ܥܵܠܡܹ̈ܐ. ܬܢܝܼ. ܫܲܒܲܚ. ܒܫܘܼܚܠܵܦ. ܣܵܗܕܵܘ̈ܗܝ ܕܲܒ݂ܪܵܐ. ܘܒ݂ܵܗ̇ ܡܸܬ݂ܝܼܕܲܥ ܪܘܼܟܵܒ݂ܵܗ̇. ܬܵܘ ܡܗܲܝܡ̱ܢܹ̈ܐ ܚܙܵܘ ܘܲܬ݂ܗܲܪܘ. ܒܥܹܐܕ݂ܵܐ ܗܵܢܵܐ ܩܲܕܝܼܫܵܐ. ܐ݇ܪܵܙܵܐ ܕܚܝܼܠܵܐ ܘܲܡܫܲܡܠ̱ܝܵܐ. ܕܥܵܡܹ̇ܕ݂ ܒܝܘܿܪܕܢܵܢ ܒܪܵܐ ܕܐܝܼܬܼܵܘܗܝ ܕܠܵܐ ܚܛܵܗܹ̈ܐ. ܘܲܠܡܲܥܡ̄ܕ݂ܵܢܵܐ ܟܲܕ݂ ܡܸܫܬ݁ܐܸܠ ܡܸܢܹܗ. ܘܒ݂ܵܥܹܐ ܘܐܵܡܲܪ. ܕܐܸܢܵܐ ܣܢܝܼܩ ܐ݇ܢܵܐ ܕܡܸܢܵܟܼ ܕܝܼܠܵܟܼ ܡܵܪܝ ܐܸܬ݂ܥ̱ܡܸܕ݂. ܛܝܼܢܵܐ ܓܹܝܪ ܠܵܐ ܩܵܪܹܒ݂ ܠܢܸܒ݂ܥܵܐ. ܐܵܦܠܵܐ ܫܪܵܓ݂ܵܐ ܡܨܸܐ ܡܲܢܗܲܪ ܠܫܸܡܫܵܐ. ܐܸܠܵܐ ܡܸܛܠ ܕܲܫ̣ܦܲܪ ܠܵܟܼ ܕܬܲܪܟܸ݁ܢ ܪܹܫܵܟܼ ܩܕ݂ܵܡܲܝ. ܡܲܡܪܲܚ ܐ݇ܢܵܐ ܕܐܹܣܝܼܡ ܝܲܡܝܼܢܝ ܥܠܲܝܟ ܒܦܘܼܩܕܵܢܵܟܼ. ܡܸܛܠ ܦܘܼܪܩܵܢܵܐ ܕܓܸܢܣܵܐ ܕܲܒ݂ܢܲܝ̈ܢܵܫܵܐ.
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܒ݂ܵܬܲܪ ܕܸܢܚܵܐ ܪܹܫ ܩܵܠܵܐ.
ܡܵܪܝܵܐ ܐܲܡ̣ܠܸܟܼ ܘܓܲܐܝܘܼܬ݂ܵܐ ܠ̣ܒܸܫ܀ ܒܢܲܝ̈ܵܐ ܕܡܸܬ݂ܝܲܠܕ݁ܝܼܢ ܘܩܵܝ݁ܡܝܼܢ. ܠ̣ܒܸܫܘ ܠܵܐ ܡܸܬ݂ܚܲܒ݁ܠܵܢܘܼܬ݂ܵܐ. ܡ̣ܢ ܡܲܝ̈ܵܐ ܘܪܘܼܚܵܐ ܚܘܼܕܵܬ݂ܵܐ ܡܗܲܝܡܢܹ̈ܐ. ܘܡ̣ܢ ܗܵܝܕܹܝܢ ܟܲܕ݂ ܦܵܪܘܿܩܲܢ ܒܝܘܿܪܕܢܵܢ ܐܸܬ݂ܥ̱ܡܸܕ݂. ܟܝܵܢܵܐ ܕܡܲܒ݁ܘܼܥܹ̈ܐ ܩܲܕܝܼܫܘܼܬ݂ܵܐ ܐܸܬ݂ܡ̱ܠܝܼ. ܘܠܵܐ ܡܸܟܹܝܠ ܒܪܝܼܬ݂ܵܐ ܒܝܲܕ݂ ܡܲܝ̈ܵܐ ܕܛܵܘܦܵܢܵܐ ܡܸܬ݂ܚܲܒ݁ܠܵܐ. ܐܸܬ݂ܚܙܝܼ ܓܹܝܪ ܒܓ݂ܵܘ ܝܘܿܪܕܢܵܢ. ܐܲܝܢܵܐ ܕܫܵܪܹܐ ܡܸܬ݂ܥܲܒ݂ܪܵܢܘܼܬ݂ܵܐ. ܘܠܵܐ ܡܸܟܹ݁ܝܠ ܚܲܛܵܝܹ̈ܐ ܒܝܲܡܵܐ ܡܸܬ݁ܛܲܒ݁ܥܝܼܢ. ܐܸܠܵܐ ܒܘܲܙܢܵܐ ܥܵܡ݁ܕ݁ܝܼܢ ܘܡܸܬ݂ܦܲܪܩܝܼܢ. ܠܒܲܫܘ ܠܵܐ ܡܸܬ݂ܚܲܒ݁ܠܵܢܘܼܬ݂ܵܐ ܒܝܲܕ݂ ܡܲܝ̈ܵܐ ܘܪܘܼܚܵܐ ܚܘܼܕܵܬ݂ܵܐ ܡܗܲܝܡܢܹ̈ܐ. ܟܲܕ݂ ܩܵܥܹܝ̇ܬ݁ܘܿܢ ܡܫܝܼܚܵܐ ܡܲܥܬ݁ܪܵܢܵܐ ܕܢܲܦ̮̈ܫܵܬܲܢ ܫܘܼܒ݂ܚܵܐ ܠܵܟܼ܀ ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܕܸܢܚܵܐ ܕܘܼܟ݂ܪܵܢܵܐ ܗ݇ܝܼ ܕܡܵܪܝ ܝܘܿܚܲܢܵܢ ܡܲܥܡ̄ܕ݂ܵܢܵܐ ܒܡܵܪܵܐ ܕܟ݂ܠܵܐ.
ܬܵܘ ܚܙܵܘ ܥܒ݂ܵܕ݂ܵܘ̈ܗܝ ܕܐܲܠܵܗܵܐ: ܙܲܕ݁ܝܼܩܵܐ ܘܲܬ݂ܪܝܼܨܵܐ. ܚ̣ܙܵܐ ܟܵܪܘܿܙܵܐ ܠܡܵܪܵܐ ܕܟ݂ܠ. ܕܐܲܪܟܸܢ ܪܹܫܹܗ ܠܲܥܡܵܕ݂ܵܐ. ܘܲܩ̣ܥܵܐ ܒܙܵܘܥܵܐ ܟܲܕ݂ ܐܵܡܲܪ. ܕܠܵܐ ܫܵܘܹ̇ܐ ܐ݇ܢܵܐ ܡܵܪܝ ܕܐܲܥܡ̱ܕ݂ܵܟ݂. ܘܠܲܒ݁ܒ݂ܹܗ ܡܵܪܹܗ ܘܐܸܡܲܪ ܠܹܗ. ܩܪܘܿܒ݂ ܐܲܥܡܸܕܲܝܢܝ ܘܠܵܐ ܬܸܬ݂ܚܪܸܐ. ܕܡܲܥܡܘܿܕ݂ܝܼܬ݂ܵܐ ܠܝܼ ܚܵܝ̇ܪܵܐ. ܘܐܸܢܵܐ ܨܒ݂ܹܝ̇ܬ݂ ܕܡܸܢܵܟܼ ܐܸܬ݂ܥ̱ܡܸܕ݂. ܬܢܝܼ. ܫܲܒܲܚ. ܒܒܲܡܨܲܥܬ݂ܵܐ ܕܲܬ݂ܪܹܝܢ ܓܲܝܵܣܹ̈ܐ. ܬܵܘ ܡܗܲܝܡܢܹ̈ܐ ܚܙܵܘ ܘܲܬ݂ܗܲܪܘ. ܒܥܹܐܕ݂ܵܐ ܗܵܢܵܐ ܩܲܕܝܼܫܵܐ. ܐ݇ܪܵܙܵܐ ܕܚܝܼܠܵܐ ܘܲܡܫܲܡܠ̱ܝܵܐ. ܕܥܵܡܹ̇ܕ݂ ܒܝܘܿܪܕܢܵܢ ܒܪܵܐ ܕܐܝܼܬܼܵܘܗܝ ܕܠܵܐ ܚܛܵܗܹ̈ܐ. ܘܲܠܡܲܥܡ̄ܕ݂ܵܢܵܐ ܟܲܕ݂ ܡܸܫܬ݁ܐܸܠ ܡܸܢܹܗ. ܘܒ݂ܵܥܹ̇ܐ ܘܐܵܡܲܪ. ܕܐܸܢܵܐ ܣܢܝܼܩ ܐ݇ܢܵܐ ܕܡܸܢܵܟܼ ܕܝܼܠܵܟܼ ܡܵܪܝ ܐܸܬ݂ܥ̱ܡܸܕ݂. ܛܝܼܢܵܐ ܓܹܝܪ ܠܵܐ ܩܵܪܹܒ݂ ܠܢܸܒ݂ܥܵܐ. ܐܵܦܠܵܐ ܫܪܵܓ݂ܵܐ ܡܨܸܐ ܡܲܢܗܲܪ ܠܫܸܡܫܵܐ. ܐܸܠܵܐ ܡܸܛܠ ܕܲܫ̣ܦܲܪ ܠܵܟܼ ܕܬܲܪܟܸ݁ܢ ܪܹܫܵܟܼ ܩܕ݂ܵܡܲܝ. ܡܲܡܪܲܚ ܐ݇ܢܵܐ ܕܐܹܣܝܼܡ ܝܲܡܝܼܢܝ ܥܠܲܝܟ ܒܦܘܼܩܕܵܢܵܟܼ. ܡܸܛܠ ܦܘܼܪܩܵܢܵܐ ܕܓܸܢܣܵܐ ܕܲܒ݂ܢܲܝ̈ܢܵܫܵܐ.
ܒܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ. ܘܲܡܥܲܕ݁ܪܵܢܲܢ ܒܙܲܒ݂ܢܹ̈ܐ ܕܐܘܼܠܨܵܢܵܐ. ܙܲܒ݂ܢܵܐ ܐܝܼܬ݂ܵܘܗܝ ܕܦܘܼܪܩܵܢܵܐ ܠܲܡܣܲܒܵܪܘܼ ܒܐܲܠܵܗܵܐ: ܘܲܕ݂ܢܸܬ݂ܦܲܨܸܐ ܡ̣ܢ ܚܛܵܗܹ̈ܐ ܘܫܲܪ̈ܥܵܬ݂ܵܐ ܕܲܒ݂ܥܵܠܡܵܐ ܗܵܢܵܐ ܣ̣ܥܲܪܢܲܢ: ܠܲܡܩܲܒܵܠܘܼ ܫܘܼܒ݂ܩܵܢܵܐ ܕܲܚܛܵܗܹ̈ܐ. ܬܢܝܼ. ܫܲܒܲܚ ܒܵܗ̇.
ܬܠܵܬ݂ܒ݁ܫܲܒܵܐ ܕܒ݂ܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܛܘܼܒ݂ܵܘܗܝ ܠܡܲܢ ܕܨܵܒܹܐ ܐܲܢ݇ܬ݁ ܒܹܗ: ܐܲܫܘܿܕ݂ܘ ܩܕ݂ܵܡܵܘܗܝ ܠܸܒ݁ܟ݂ܘܿܢ. ܒܲܨܠܘܿܬ݂ܵܐ ܘܨܵܘܡܵܐ ܘܲܒ݂ܚܲܫܵܐ ܢܸܬ݂ܟܲܫܲܦ ܠܹܗ ܠܲܡܫܝܼܚܵܐ. ܡܩܲܒܸ݁ܠ ܗ݇ܘ̣ ܓܹܝܪ ܠܟ݂ܠ ܐܲܝܠܹܝܢ ܕܬ݂ܵܝܒ݁ܝܼܢ. ܘܦܵܪܹܩ̇ ܐܲܝܟܼ ܪܵܚܹܡܢܵܫܵܐ. ܘܝܵܗܹ̇ܒ݂ ܒܪ̈ܲܚܡܵܘܗܝ ܫܘܼܒ݂ܩܵܢܵܐ ܕܲܚܛܵܗܹ̈ܐ. ܬܢܝܼ. ܫܲܒܲܚ. ܒܵܗ̇.
ܐܲܪܒܲܥܒ݁ܫܲܒܵܐ ܕܒ݂ܵܥܘܼܬ݂ܵܐ ܕܲܒ݂ܬ݂ܘܼܠܵܬ݂̈ܵܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ: ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ. ܠܡܹܐܢܵܐ ܐܝܼܬܹܝܗ̇ ܘܒܹܝܬ݂ ܓܵܘܣܵܐ ܥܹܕ݁ܬܹܗ ܕܲܡܫܝܼܚܵܐ. ܘܲܡܩܲܒ݁ܠܵܐ ܠܲܒ݂ܢܲܝ̈ܢܵܫܵܐ ܕܒܲܚܛܵܗܹ̈ܐ ܪܵܕܹܝ̇ܢ ܐܲܝܟܼ ܕܲܒ݂ܝܲܡܵܐ. ܘܗ̤ܝ ܦܵܪܩܵܐ ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ . ܬܢܝܼ. ܫܲܒܲܚ. ܒܵܗ̇.
ܚܲܡܫܵܒ݁ܫܲܒܵܐ ܕܒ݂ܵܬܲܪ ܕܸܢܚܵܐ ܕܘܼܟ݂ܪܵܢܵܐ ܗ݇ܘ̣ ܕܡܵܪܝ ܝܘܿܚܲܢܵܢ ܙܵܪܘܿܩܵܐ. ܕܛܲܟ݁ܣܵܗ̇ ܠܗܵܕܹܐ ܒܵܥܘܼܬ݂ܵܐ. ܫܲܡܸܫ ܚܲܕ݂ ܦܲܪܨܘܿܦܵܐ (ܚܙܝ ܠܬܚܬ)
ܥܪܘܼܒ݂ܬܵܐ ܕܬܲܪܬܹ݁ܝܢ ܕܕܸܢܚܵܐ ܒܣܵܗܕܹ̈ܐ ܒܪ̈ܝܼܟܹܐ.
ܪܲܒ݁ ܗ݇ܘ̣ ܡܵܪܲܢ ܘܲܡܫܲܒܲܚ ܛܵܒ݂. ܘܠܲܝܬ݁ ܣܵܟ݂ܵܐ ܠܪܲܒ݁ܘܼܬܹܗ. ܪܲܒ݁ ܗ݇ܘ̣ ܐ݇ܪܵܙܵܐ ܕܲܕ݂ܢܲܚ̣ ܡ̣ܢ ܪܵܘܡܵܐ: ܫܠܝܼܚܵܐ ܩܵܥܹ̇ܐ ܠܲܢ. ܐ݇ܪܵܙܵܐ ܗ݇ܘ̣ ܓܹܝܪ ܐܲܠܵܗܵܝܵܐ: ܕܲܓ݂ܒ݂ܵܝܗܝ ܠܦܲܓ݂ܪܲܢ ܘܲܥ̣ܡܲܪ ܒܹܗ. ܘܥܲܒ݂ܕܹܗ ܕܢܸܗܘܸܐ ܚܲܕ݂ ܥܲܡܹܗ: ܒܫܵܘܬܵܦܘܼܬ݂ܵܐ ܕܐܝܼܩܵܪܹܗ. ܕܠܲܢ ܢܲܫܘܸܐ ܠܚܲܝܹ̈ܐ ܕܲܠܥܵܠܲܡ. ܬܢܝܼ. ܘܫܲܒܲܚ ܒܵܗ̇.
ܕܘܼܟ݂ܪܵܢܵܐ ܕܡܵܪܝ ܦܲܛܪܘܿܣ ܘܡܵܪܝ ܦܵܘܠܘܿܣ ܒܬܵܘ ܢܸܬ݁ܕܲܡܲܪ.
ܐܹܪܲܡܪ̱ܡܵܟܼ ܡܵܪܝ ܡܲܠܟܵܐ: ܐܸܬ݂ܟܲܢܲܫܘ ܠܘܵܬܹܗ ܓܒ݂ܵܘ̈ܗܝ. ܕܨܘܼܪܬܵܐ. ܟܠܗܘܿܢ ܥܲܡܡܹ̈ܐ ܢܸܬ݂ܟܲܢܫܘܼܢ ܐܲܟ݂ܚ݇ܕ݂ܵܐ ܘܢܸܬ݂ܟܲܢ̈ܫܵܢ ܐܸܡ̈ܘܵܬ݂ܵܐ. ܡܫܝܼܚܵܐ ܕܙܲܡܸܢ ܠܣܵܓ݂ܘܿܕ݂ܵܘ̈ܗܝ. ܠܥܹܐܕ݂ܵܐ ܦܨܝܼܚܵܐ ܕܲܪ̈ܚܘܼܡܵܘܗܝ. ܦܲܛܪܘܿܣ ܪܹܫܵܐ ܕܲܬ݂ܪܸܥܣܲܪܬܵܐ. ܘܦܵܘܠܘܿܣ ܡܵܐܢܵܐ ܕܲܫܒ݂̈ܝܼܚܵܬ݂ܵܐ. ܗܵܐ ܫܡܲܝܵܢܹ̈ܐ ܘܟܸܢܫܹ̈ܐ ܕܬܲܚܬܵܝܹ̈ܐ. ܚܵܕܹܝ̇ܢ ܝܵܘܡܵܢܵܐ ܒܕ݂ܘܼܟ݂ܪܵܢ ܟܵܪ̈ܘܿܙܲܝܟ. ܘܲܒ݂ܪܸܚܡ̱ܬ݂ܵܐ ܡܦܝܼܣܝܼܢ. ܕܫܲܝܢܵܟܼ ܢܲܡܠܸܟܼ ܥܲܠ ܥܹܕ݁ܬܵܟ݂. ܘܒܲܛܸܠ ܡ̣ܢ ܓܵܘܵܗ̇ ܩܪ̈ܵܒ݂ܵܘܗܝ ܕܲܢܟ݂ܝܼܠܵܐ. ܘܐܲܫܘܵܐ ܠܲܢ ܡܵܪܝ ܕܥܲܡ ܩܲܕܝܼܫܲܝ̈ܟ. ܢܸܙܡܲܪ ܠܵܟܼ ܒܲܓ݂ܢܘܿܢ ܡܲܠܟ݁ܘܼܬܼܵܟܼ ܫܘܼܒ݂ܚܵܐ ܠܵܟܼ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܕܸܢܚܵܐ ܒܡܵܪܵܐ ܕܟ݂ܠܵܐ. ܘܲܡܫܲܚ̱ܠܦܵܐ.
ܡܸܛܠ ܕܡܲܒ݁ܘܼܥܵܐ ܕܚܲܝܹ̈ܐ ܥܲܡܵܟܼ ܗ݇ܘ̣: ܘܡ̣ܢ ܢܲܚܠܵܐ ܒܲܣܝܼܡܵܐ ܬܲܫܩܸܐ ܐܸܢܘܿܢ. ܕܨܘܼܪܬܵܐ. ܕܢܸܗܘܘܿܢ ܒܹܗ ܡܥܝܼܢܵܐ ܕܡܲܝ̈ܵܐ ܕܢܵܒ݂ܥ̇ܝܼܢ ܠܚܲܝܹ̈ܐ ܕܲܠܥܵܠܲܡ. ܡܥܝܼܢܵܐ ܕܛܵܒ݂̈ܵܬ݂ܵܐ ܘܲܠܡܹܐܢܵܐ ܡܫܲܝܢܵܐ. ܒܲܥܡܵܕ݂ܵܟܼ ܡܫܝܼܚܵܐ ܛܲܝܸܒ݂ܬ݁ ܠܲܢ. ܘܡ̣ܢ ܦܸܗܝܵܐ ܣܪܝܼܩܵܐ ܕܛܵܥܝܘܼܬ݂ܵܐ ܕܲܦܬܲܟ݂ܪܹ̈ܐ ܓܠܝܼܦܹ̈ܐ ܠܘܵܬܼܵܟܼ ܐܲܦܢ̣ܝܼܬܵܢ. ܘܐܲܫ̣ܠܸܡܬ݁ ܠܲܢ ܝܼܕܲܥܬ݂ܵܐ ܓܡܝܼܪܬܵܐ ܕܲܩܢܘܿܡܹ̈ܐ ܡܫܲܒ݁ܚܹ̈ܐ ܕܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ. ܟܝܵܢܵܐ ܐܲܠܵܗܵܝܵܐ. ܘܡܸܟܹ݁ܝܠ ܟܠܲܢ ܒܡܲܙܡܘܿܪܹ̈ܐ ܘܲܒ݂ܬܸܫ̈ܒ݁ܚܵܬ݂ܵܐ ܢܫܲܒܲܚ ܠܵܟܼ ܛܵܒ݂ܵܐ ܒܲܠܚܘܿܕܲܝܟ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܕܸܢܚܵܐ ܒܣܵܗܕܹ̈ܐ ܒܪ̈ܝܼܟܹܐ.
ܪܲܒ݁ܘܼ ܡܵܪܲܢ ܘܲܡܫܲܒܲܚ ܪܵܘܪܒ݂ܵܐܝܼܬ݂: ܗܵܘ̇ ܕܐܝܼܬܼܵܘܗܝ ܡ̣ܢ ܩܕ݂ܵܡ ܥܵܠܡܹ̈ܐ. ܐ݇ܪܵܙܵܐ ܕܲܟ݂ܣܸܐ ܗ݇ܘ̣ܵܐ ܡ̣ܢ ܥܵܠܡܹ̈ܐ ܘܕ݂ܵܪܹ̈ܐ ܒܨܸܒ݂ܝܵܢ ܒܵܪܘܿܝܵܐ. ܒܕܸܢܚܹܗ ܕܲܡܫܝܼܚܵܐ ܝܲܠ̣ܦܘܼܗܝ ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ. ܘܫܲܪܝܼܘ ܐ݇ܢܵܫ̈ܵܐ ܘܡܲܠܲܐܟܹ̈ܐ. ܠܡܸܬ݂ܢܵܐ ܩܘܼܕ݂ܫܵܐ ܕܐܝܼܩܵܪܹܗ. ܬܠܝܼܬ݂ܵܐܝܼܬ݂ ܚܕ݂ܵܐ ܐܲܠܵܗܘܼܬ݂ܵܐ. ܬܢܝܼ. ܫܲܒܲܚ. ܒܵܗ̇.
ܕܘܼܟ݂ܪܵܢܵܐ ܕܐܲܪܒ݁ܥܵܐ ܐܹܘܲܢܓܲܠܸܣ̈ܛܹܐ ܒܲܟ݂ܝܵܢܵܐ ܡܵܝܘܿܬ݂ܵܐ.
ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ: ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ. ܕܨܘܼܪܬܵܐ. ܡܸܛܠ ܕܬܲܟ݂ܬ݁ܘܼܫܗܘܿܢ ܠܵܐ ܗ݇ܘ̣ܵܐ ܥܲܡ ܒܸܣܪܵܐ ܘܲܕ݂ܡܵܐ. ܒܕ݂ܘܼܒܵܪܹ̈ܐ ܕܡܲܠܲܐܟܹ̈ܐ ܛܲܢ̣ܬܘܿ݁ܢ ܠܲܡܕܲܡܵܝܘܼ ܫܠܝܼܚܹ̈ܐ ܩܲܕܝܼܫܹ̈ܐ. ܘܥܲܡ ܪ̈ܘܼܚܹܐ ܒܝܼ̈ܫܵܬ݂ܵܐ ܐܵܦ ܡܲܟ݁ܝܵܢ̈ܝܵܬ݂ܵܐ ܕܲܪܵܐ ܘܬܲܟ݂ܬ݁ܘܼܫܵܐ ܗܘ̤ܵܐ ܠܟ݂ܘܿܢ. ܘܲܥܠܲܝܗܹܝܢ ܒܚܲܝܠܵܐ ܐܸܬ݂ܓܲܢ݇ܒܲܪܬܘܿ݁ܢ. ܘܥܲܠ ܗܵܕ݂ ܒܥܹܐܕ݂ܵܐ ܦܨܝܼܚܵܐ ܕܕ݂ܘܼܟ݂ܪܵܢܟ݂ܘܿܢ. ܗܵܐ ܡܝܲܒ݁ܒ݂ܝܼܢܲܢ ܟܲܕ݂ ܐܵܡ̇ܪܝܼܢܲܢ. ܕܬܸܒ݂ܥܘܿܢ ܪ̈ܲܚܡܹܐ ܥܲܠ ܢܲܦ̮̈ܫܵܬܲܢ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܕܸܢܚܵܐ ܒܣܵܗܕܹ̈ܐ ܒܪ̈ܝܼܟܹܐ.
ܪܲܒ݁ܘܼ ܡܵܪܲܢ ܘܲܡܫܲܒܲܚ ܪܵܘܪܒ݂ܵܐܝܼܬ݂: ܘܠܲܝܬ݁ ܣܵܟ݂ܵܐ ܠܪܲܒ݁ܘܼܬܹܗ. ܕܨܘܼܪܬܵܐ. ܫܬܵܐ ܫܬܵܐ ܓܸܦܝܼ̈ܢ ܠܚܲܕ݂ ܡܸܢܗܘܿܢ. ܪܲܒ݁ܘܼ ܐ݇ܪܵܙܵܐ ܕܲܚ̣ܙܵܐ ܐܹܫܲܥܝܵܐ. ܥܲܠ ܡܲܕ݂ܒܲܚ ܩܘܼܕ݂ܫܵܐ. ܚ̣ܙܵܐ ܣܪ̈ܵܦܹܐ ܕܠܵܐ ܡܸܢܝܵܢܵܐ. ܟܲܕ݂ ܩܵܥܹܝ̇ܢ ܩܲܕܝܼܫ ܩܲܕܝܼܫ. ܩܲܕܝܼܫ ܡܵܪܝܵܐ ܐܲܠܵܗܵܐ. ܕܡܲܠܝܵܐ ܐܲܪܥܵܐ ܡ̣ܢ ܫܘܼܒ݂ܚܹܗ. ܘܲܫܡܲܝܵܐ ܡܟܲܣܲܝ ܡ̣ܢ ܙܝܼܘܹܗ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܐܲܪܒܲܥ ܕܕܸܢܚܵܐ ܒܠܵܟ݂ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ݂ܠܙܒܲܢ: ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܐܲܠܵܗܵܐ. ܕܫܲܕܲܪ ܚܲܒ݁ܝܼܒ݂ܹܗ. ܘܦܲܪܩܹܗ ܠܲܟ݂ܝܵܢܵܢ. ܬܢܝܼ. ܫܲܒܲܚ. ܒܵܗ̇.
ܕܘܼܟ݂ܪܵܢܵܐ ܕܡܵܪܝ ܐܸܣܛܲܦܵܢܘܿܣ ܣܵܗܕܵܐ ܒܡܵܪܵܐ ܕܟ݂ܠܵܐ.
ܘܐܵܦ ܐܸܢܵܐ ܒܘܼܟ݂ܪܵܐ ܐܸܥܒ݁ܕ݂ܝܼܘܗܝ: ܒܥܝܼ ܡ̣ܢ ܡܵܪܝܵܐ ܘܨܲܠܵܐ ܩܕ݂ܵܡܵܘܗܝ. ܕܨܘܼܪܬܵܐ. ܙܲܕܝܼܩܵܐ ܘܲܬ݂ܪܝܼܨܵܐ ܘܡܲܟ݁ܝܼܟ݂ܵܐ. ܣܵܗܕܵܐ ܙܲܗܝܵܐ ܘܩܲܕܝܼܫܵܐ. ܐܸܣܛܲܦܵܢܘܿܣ ܒܘܼܟ݂ܪܵܐ ܕܣܵܗܕܹ̈ܐ. ܕܗ̤ܘ ܩܲܕ݂ܡܵܝܲܬ݂ ܐܸܬ݂ܟܲܠܲܠ. ܘܠܲܓ݂ܢܘܿܢ ܢܘܼܗܪܵܐ ܐܸܙܕܲܡܲܢ. ܗ̤ܘܝܼ ܒܲܥܵܝܵܐ ܡ̣ܢ ܡܵܪܵܟ݂. ܕܢܲܫܪܸܐ ܫܲܝܢܹܗ ܒܲܒ݂ܪܝܼܬ݂ܵܐ. ܘܒܲܨ̈ܠܵܘܵܬܼܵܟܼ ܢܸܬ݂ܥܲܕܲܪ. ܘܥܲܡܵܟܼ ܒܢܘܼܗܪܵܐ ܢܸܬ݂ܒܲܣܲܡ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܕܸܢܚܵܐ ܒܣܵܗܕܹ̈ܐ ܒܪ̈ܝܼܟܹܐ.
ܩܲܕ݁ܝܼܫܘܼ ܘܲܕ݂ܚܝܼܠ ܫܡܹܗ: ܐܲܥܸܠ̣ܬܵܢ ܒܢܘܼܪܵܐ ܘܲܒ݂ܡܲܝ̈ܵܐ. ܕܨܘܼܪܬܵܐ. ܕܪܲܒ݁ ܐܲܢ݇ܬ݁ ܘܪܲܒ݁ ܫܡܵܟܼ ܒܓܲܢ݇ܒܵܪܘܼܬܼܵܐ. ܥܡܵܕ݂ܵܟܼ ܕܲܒ݂ܡܲܝ̈ܵܐ ܩܲܕܸܫ ܢܲܦ̮̈ܫܵܬܲܢ. ܘܐܲܟ݂ܪܸܙ ܢܘܼܚܵܡܲܢ. ܪ̈ܘܼܚܵܢܹܐ ܥܲܡ ܝܘܿܚܲܢܵܢ. ܒܬܲܗܪܵܐ ܪܲܒܵܐ ܩܵܝܡ݁ܝܼܢ ܗ݇ܘ̣ܵܘ. ܡܩܲܕܸܫ ܥܲܡܡܹ̈ܐ ܒܲܥܡܵܕܹܗ. ܥܡܵܕ݂ܵܐ ܩܲܒܸܠ ܡ̣ܢ ܥܲܒ݂ܕܹܗ. ܕܲܢܚܲܪܲܪ ܠܓܸܢܣܵܐ ܕܡܵܝܘܿܬܹ̈ܐ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܚܲܡܸܫ ܕܕܸܢܚܵܐ ܒܠܵܟ݂ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ݂ܠܙܒܲܢ: ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܕܐܸܬ݁ܬܲܚܬ݁ܝܼ ܘܦܲܪܩܹܗ ܠܲܟ݂ܝܵܢܲܢ ܡ̣ܢ ܡܵܘܬܵܐ ܝܲܥܢܵܐ. ܬܢܝܼ. ܫܲܒܲܚ. ܒܵܗ̇.
ܕܘܼܟ݂ܪܵܢܵܐ ܗ݇ܝ̣ ܕܡܲܠܦܵܢܹ̈ܐ ܝܵܘܢܵܝܹ̈ܐ ܒܲܒ݂ܝܲܕ݂ ܫܠܵܡܵܐ.
ܛܘܼܒܲܝܗܘܿܢ ܠܐܲܝܠܹܝܢ ܕܲܕ݂ܠܵܐ ܡܘܼܡ ܐܸܢܘܿܢ ܒܐܘܼܪܚܵܐ: ܩܲܕܸܡ̣ܘ ܪܵܘܪ̈ܒ݂ܵܢܹܐ ܒܵܬܲܪ ܡܫܲܒ݁ܚܵܢܹ̈ܐ. ܕܨܘܼܪܬܵܐ. ܗܵܐ ܐܸܢܵܐ ܡܫܲܕܲܪ ܐ݇ܢܵܐ ܠܟ݂ܘܿܢ ܐܲܝܟܼ ܐܸܡܪܹ̈ܐ ܒܲܝܢܲܝ ܕܹܐܒܹ̈ܐ. ܒܥܸܩ̈ܒ݂ܵܬ݂ܵܐ ܕܲܬ݂ܪܸܥܣܲܪܬܹ݁ܗ ܕܲܡܚܲܕ݁ܬ݂ܵܢܵܐ ܕܟ݂ܠ. ܪܕ݂ܵܘ ܐܲܒ݂ܵܗܲܝ̈ܢ ܪ̈ܘܼܚܵܢܹܐ ܕܘܼܟ݂ܪܵܢܗܘܿܢ ܠܒ݂ܘܼܪܟ݁ܬ݂ܵܐ. ܕܝܼܘܿܕܘܿܪܘܿܣ ܕܒܲܛܸܠ̣ ܕܸܚ̈ܠܵܬ݂ܵܐ. ܘܬܹܐܵܕܘܿܪܘܿܣ ܕܦܲܫܸܩ̣ ܠܲܟ݂ܬ݂ܵܒܹ̈ܐ. ܐܵܦ ܩܲܕܝܼܫܵܐ ܢܸܣܛܘܿܪܝܼܣ ܕܲܚܠܵܦ ܥܹܕܬܵܐ ܥ̣ܡܲܠ. ܒܗܲܝܡܵܢܘܼܬ݂ܵܐ ܘܚܘܼܒܵܐ ܘܐܵܘܝܘܼܬ݂ܵܐ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒ݁ܫܲܒܵܐ ܕܚܲܡܫܵܐ ܕܕܸܢܚܵܐ ܒܡܵܪܵܐ ܕܟ݂ܠܵܐ.
ܫܲܒܲܚܘ ܠܡܵܪܝܵܐ ܬܸܫܒ݁ܘܿܚܬܵܐ ܚܕܲܬܵܐ. ܬܹܒܹܝܠ ܘܟ݂ܠܗܘܿܢ ܥܵܡܘܿܪܹ̈ܝܗ̇. ܕܨܘܼܪܬܵܐ. ܘܟ݂ܠ ܡܸܕܸܡ ܗܘ̤ܵܐ ܚܲܕ݂ܬ݂ܵܐ ܡ̣ܢ ܐܲܠܵܗܵܐ. ܒܪܝܼܬ݂ܵܐ ܚܕܲܬܵܐ ܬܲܗܪܵܐ ܚܙܵܬ̤. ܥܡܵܕ݂ܵܐ ܚܲܕ݂ܬ݂ܵܐ ܕܲܒ݂ܝܘܿܪܕܢܵܢ. ܫܡܲܝܵܐ ܕܲܠܥܸܠ ܟܲܕ݂ ܡܸܬ݂ܦܬܲܚ. ܘܲܠܝܘܿܚܲܢܵܢ ܟܲܕ݂ ܡܸܬ݂ܪ̱ܗܸܒ݂. ܐܸܡܪܵܐ ܚܲܝܵܐ ܟܲܕ݂ ܡܸܬ݂ܥ̱ܡܸܕ݂. ܘܪܘܼܚܵܐ ܕܐܸܬ݂ܵܐ ܘܩ̣ܵܘܝܼ ܥܠܵܘܗܝ. ܘܐܲܒ݂ܵܐ ܕܚܲܬܸ݁ܡ ܒܝܲܕ݂ ܡܸܠܬܹܗ. ܕܗܵܢܵܘ ܚܲܒ݁ܝܼܒ݂ܝ ܕܒܹܗ ܐܸܨܛܒ݂ܝܼܬ݂. ܬܢܝܼ. ܫܲܒܲܚ. ܒܵܗ̇.
ܬܪܹܝܢܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ. ܘܲܡܥܲܕ݁ܪܵܢܲܢ ܒܙܲܒ݂ܢܹ̈ܐ ܕܐܘܼܠܨܵܢܵܐ. ܙܲܒ݂ܢܵܐ ܐܝܼܬܼܵܘܗܝ ܕܦܘܼܪܩܵܢܵܐ ܠܲܡܣܲܒܵܪܘܼ ܒܐܲܠܵܗܵܐ. ܘܲܕ݂ܢܸܬ݂ܦܲܨܸܐ ܡ̣ܢ ܚܛܵܗܹ̈ܐ ܘܫܲܪ̈ܥܵܬ݂ܵܐ ܕܲܒ݂ܥܵܠܡܵܐ ܗܵܢܵܐ ܣ̣ܥܲܪܢܲܢ. ܠܲܡܩܲܒܵܠܘܼ ܫܘܼܒ݂ܩܵܢܵܐ ܕܲܚܛܵܗܹ̈ܐ. ܬܢܝܼ. ܫܲܒܲܚ. ܒܵܗ̇.
ܬܠܵܬ݂ܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܛܘܼܒ݂ܵܘܗܝ ܠܡܲܢ ܕܐܸܫܬ݁ܒܸܩ ܠܹܗ ܥܵܘ̣ܠܹܗ: ܐܲܫܘܿܕ݂ܘ ܩܕ݂ܵܡܵܘܗܝ ܠܸܒ݁ܟ݂ܘܿܢ. ܒܲܨܠܘܿܬ݂ܵܐ ܘܨܵܘܡܵܐ ܘܲܒ݂ܚܲܫܵܐ. ܢܸܬ݂ܟܲܫܲܦ ܠܹܗ ܠܲܡܫܝܼܚܵܐ. ܡܩܲܒܸ݁ܠ ܗ݇ܘ̣ ܓܹܝܪ ܠܟ݂ܠ ܐܲܝܠܹܝܢ ܕܬܼܵܝܒ݁ܝܼܢ. ܘܦܵܪܹܩ̇ ܐܲܝܟܼ ܪܵܚܹܡ̇ܢܵܫܵܐ. ܘܝܵܗܹ̇ܒ݂ ܒܪ̈ܲܚܡܵܘܗܝ ܫܘܼܒ݂ܩܵܢܵܐ ܕܲܚܛܵܗܹ̈ܐ. ܬܢܝܼ. ܫܲܒܲܚ. ܒܵܗ̇.
ܐܲܪܒܲܥܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ. ܘܲܠܡܸܣܟܹܢܵܐ ܕܠܲܝܬ݁ ܠܹܗ ܡܥܲܕ݁ܪܵܢܵܐ: ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ: ܕܨܘܼܪܬܵܐ. ܡܲܛ̣ܝܼܢ ܠܕ݂ܘܼܟ݁ܬ݂ܵܐ ܕܡܸܬ݂ܩܲܪܝܵܐ ܠܡܹܐܢܹ̈ܐ ܫܲܦܝܼܪܹ̈ܐ. ܠܡܹܐܢܵܐ ܐܝܼܬܹܝܗ̇ ܘܒܹܝܬ݂ ܓܵܘܣܵܐ ܥܹܕ݁ܬܹܗ ܕܲܡܫܝܼܚܵܐ. ܘܲܡܩܲܒ݁ܠܵܐ ܠܲܒ݂ܢܲܝ̈ܢܵܫܵܐ ܕܒܲܚܛܵܗܹ̈ܐ ܪܵܕܹܝ̇ܢ ܐܲܝܟܼ ܕܲܒ݂ܝܲܡܵܐ. ܘܗ̤ܝ ܦܵܪܩܵܐ ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ . ܬܢܝܼ. ܫܲܒܲܚ. ܒܩܵܠ ܪܵܥܝܵܐ ܫܡܲܝܵܢܵܐ. ܒܪܝܼܟ݂ܘܼ ܡܵܘܪܒ݂ܵܢܟ݂ܘܿܢ ܟܵܗܢܹ̈ܐ ܩܲܕܝܼܫܹ̈ܐ. ܒܪܝܼܟ݂ܘܼ ܡܢܲܨܚܵܢܟ݂ܘܿܢ ܐܲܬ݂ܠܹܝܛܹ̈ܐ ܕܩܘܼܫܬܵܐ. ܣܓ݂ܝܼܕ݂ ܪܘܼܚ ܩܘܼܕ݂ܫܵܐ ܕܲܒ݂ܚܲܝܠܹܗ ܫܲܦܸܠܬ݁ܘܿܢ ܟܠ ܗܹܪܹ̈ܣܝܼܵܣ: ܘܟܲܢܸܫ̣ܬ݁ܘܿܢܵܗ̇ ܠܥܵܢܹ̈ܗ ܡܠܝܼܠܬܵܐ ܕܝܼܫܘܿܥ ܦܵܪܘܿܩܲܢ. ܗܵܝ ܕܲܩ̣ܢܵܗ̇ ܒܲܕ݂ܡܹܗ ܝܲܩܝܼܪܵܐ ܥܲܠ ܓܵܓ݂ܘܼܠܬܵܐ܀ ܡܵܪܝ ܐܲܓ݂ܢܵܛܝܼܣ ܘܦܘܿܠܝܼܩܲܪܦܘܿܣ ܘܐܵܬܼܵܢܵܣܝܼܣ ܘܐܹܘܣܛܵܬ݂ܝܼܣ. ܘܡܝܼܠܹܛܘܿܣ ܘܐܲܦܠܹܘܝܵܢܘܿܣ. ܘܲܓ݂ܪܝܼܓ݂ܘܿܪܝܼܘܿܣ ܘܒ݂ܵܣܝܼܠܸܣ. ܘܲܓ݂ܪܝܼܓ݂ܘܿܪܝܼܘܿܣ ܘܐܲܡܒ݁ܪܘܿܣܝܼܣ. ܘܕ݂ܝܼܘܿܕܘܿܪܘܿܣ ܘܝܘܿܐܵܢܝܼܣ. ܘܬܹܐܵܕܘܿܪܘܿܣ ܝܲܡܵܐ ܕܚܸܟ݂̈ܡܵܬ݂ܵܐ. ܘܡܵܪܝ ܢܸܣܛܘܿܪܝܼܣ ܣܵܗܕܵܐ ܪܕ݂ܝܼܦܵܐ. ܘܐܲܠܸܟ݂ܣܲܢܕܪܘܿܣ ܢܲܨܝܼܚܵܐ. ܐܲܪ̈ܕܸܟ݂ܠܹܐ ܕܥܹܕܲܬ݂ ܩܘܼܕ݂ܫܵܐ ܘܪ̈ܲܒܲܝ ܒܵܬܹ̈ܐ ܕܐ݇ܪ̈ܵܙܵܘܗܝ ܕܐܲܠܵܗܵܐ. ܘܡܲܠܦܵܢܹ̈ܐ ܕܕܸܚܠܲܬ݂ ܩܘܼܫܬܵܐ. ܨܠܵܘܵܬ݂̈ܟ݂ܘܿܢ ܫܘܼܪܵܐ ܢܸܗܘ̈ܝܵܢ ܠܲܢ.
ܕܚܲܡܫܵܒ݁ܫܲܒܵܐ ܕܒ݂ܵܥܘܼܬ݂ܵܐ ܕܢܝܼܢܘܵܝܹ̈ܐ ܕܡܸܬ݂ܝܼܕܲܥ ܕܩܘܼܒܵܠܛܲܝܒ݁ܘܼܬ݂ܵܐ ܒܬܲܠܡܝܼܕ݂ܵܘ̈ܗܝ ܕܲܡܫܝܼܚܵܐ.
ܕܐܲܢ݇ܬ݁ܘܼ ܟܘܼܡܪܵܐ ܠܥܵܠܲܡ. ܘܲܡܚܲܣܸܐ ܥܲܠ ܐܲܪܥܹܗ ܘܥܲܠ ܥܲܡܹܗ. ܪܲܒ݁ ܟܘܼܡܪܹ̈ܐ ܕܬܼܵܘܕܝܼܬܲܢ ܘܲܡܚܲܣܝܵܢܲܢ: ܡܫܝܼܚܵܐ ܕܲܗܘ̤ܵܐ ܚܠܵܦܲܝܢ. ܕܸܒ݂ܚܵܐ ܡܩܲܒ݁ܠܵܐ ܕܠܵܐ ܡܘܼܡܵܐ. ܡܸܢܵܟܼ ܫܵܐ̇ܠܝܼܢܲܢ ܫܘܼܒ݂ܩܵܢ ܚܵܘܒܹ̈ܐ. ܡܵܐ ܕܬ݂ܵܩܹ̇ܢ ܟܘܼܪܣܲܝ ܕܝܼܢܵܐ. ܡܦܵܣܲܬ݁ ܓܹܝܪ ܒܚܲܫܵܘ̈ܗܝ ܕܲܟ݂ܝܵܢܲܢ. ܕܒܹܗ ܚܲܫ̣ܬ݁ ܘܐܸܬ݂ܢܲܣܝܼܬ݁ ܡܸܛܠ ܦܘܼܪܩܵܢܲܢ. ܬܢܝܼ. ܫܲܒܲܚ. ܒܬ݂ܵܘ ܢܸܬ݁ܕܲܡܲܪ. ܟܠܲܢ ܡܗܲܝܡܢܹ̈ܐ ܒܚܲܕ݂ܬ݂ܘܼܬ݂ܵܐ ܕܪܘܼܚܵܐ. ܬܵܘ ܢܵܘܕܸ݁ܐ ܠܹܗ ܕܠܵܐ ܦܘܼܠܵܓ݂ܵܐ. ܕܚܵܙܹܝ̇ܢܲܢ ܥܲܠ ܡܲܕ݂ܒ݁ܚܵܐ ܩܲܕܝܼܫܵܐ. ܠܐܸܡܪܹܗ ܕܐܲܠܵܗܵܐ. ܕܟ݂ܠ ܝܵܘ̈ܡܵܬ݂ܵܐ ܗܵܐ ܡܸܬ݁ܕ݁ܒܲܚ ܐ݇ܪܵܙܵܢܵܐܝܼܬ݂. ܘܟܲܕ݂ ܚܲܝ ܗ݇ܘܼ ܠܥܵܠܡܝܼܢ. ܡܸܬ݂ܦܲܠܲܓ݂ ܠܟ݂ܠܢܵܫ. ܟܲܕ݂ ܠܵܐ ܡܵܘܦܸܐ ܐܵܘ ܚܵܣܲܪ. ܘܥܲܠ ܗܵܕ݂ ܒܕܸܚܠܵܐ ܘܒܲܪܬܹܝܬ݂ܵܐ. ܢܸܩܥܸܐ ܟܠܲܢ ܩܲܕܝܼܫ ܩܲܕܝܼܫ ܩܲܕܝܼܫܲܬ݁ ܡܵܪܝܵܐ. ܕܲܡܠܹܝܢ ܫܡܲܝܵܐ ܘܐܲܪܥܵܐ ܡ̣ܢ ܬܸܫܒ݁ܚܵܬܹ̈ܗ.
ܥܪܘܼܒ݂ܬܵܐ ܕܫܸܬ݂ ܕܕܸܢܚܵܐ ܒܣܵܗܕܹ̈ܐ ܒܪ̈ܝܼܟܹܐ.
ܪܲܒ݁ܘܼ ܡܵܪܲܢ ܘܲܡܫܲܒܲܚ ܪܵܘܪ̱ܒ݂ܵܐܝܼܬ݂. ܡܵܐ ܪܵܘܪ̱ܒ݂ܝܼܢ ܥܒ݂ܵܕܲܝ̈ܟ ܡܵܪܝܵܐ. ܪܲܒܵܐ ܗ݇ܝ̣ ܡܵܘܗܲܒ݂ܬܼܵܟܼ ܕܲܠܘܵܬ݂ ܡܵܝܘܿܬܹ̈ܐ ܡܵܪܵܐ ܡܪܲܚܡܵܢܵܐ. ܒܡܲܝ̈ܵܐ ܪܘܼܚܵܟܼ ܐܲܠܒܸ݁ܫ̣ܬܵܢ. ܒܠܲܚܡܵܐ ܦܲܓ݂ܪܵܟܼ ܐܵܘܟܸܠ̣ܬܵܢ. ܘܒܲܕ݂ܡܵܟܼ ܚܲܝܵܐ ܩܲܕܸܫ̣ܬܵܢ. ܘܥܲܡ ܪ̈ܘܼܚܵܢܹܐ ܚܲܠܸܛ̣ܬܵܢ. ܘܡ̣ܢ ܐܲܪܥܵܐ ܠܪܵܘܡܵܐ ܐܲܣܸܩ̣ܬܵܢ. ܬܢܝܼ. ܫܲܒܲܚ. ܒܵܗ̇.
ܕܘܼܟ݂ܪܵܢܵܐ ܕܡܲܠܦܵܢܹ̈ܐ ܐ݇ܣܘܼܪ̈ܝܵܝܹܐ ܪܹܫ ܩܵܠܵܐ.
ܪܵܡ ܒܟ݂ܠܵܗ̇ ܐܲܪܥܵܐ: ܒܐܝܼܩܵܪܵܐ ܘܲܒ݂ܫܘܼܒ݂ܚܵܐ ܐܲܥ̣ܛܸܦܬܵܝܗܝ. ܡܲܕ݂ܒ݁ܚܵܟܼ ܡܵܪܝܵܐ ܚܲܝܠ̱ܬ݂ܵܢܵܐ ܒܬܸܫܒ݁ܘܼܚܬܵܐ ܪܲܡܪܸܡ̣ܬܵܝܗܝ. ܘܲܠܫܲܪܝܼܪܹ̈ܐ ܕܲܒ݂ܥܹܕ݁ܬܵܟ݂. ܟܲܠܸܠ̣ܬ݁ ܐܸܢܘܿܢ ܒܐܝܼܩܵܪܵܐ. ܫܲܝܢܵܐ ܘܲܫܠܵܡܵܐ ܢܲܓ݁ܝܼܪܵܐ. ܢܸܣܓܸܐ ܠܹܗ ܠܥܲܡܵܟܼ ܕܝܼܠܵܟܼ ܡܵܪܝܵܐ. ܬܢܝܼ. ܫܲܒܲܚ. ܒܵܗ̇.
ܚܲܕ݂ܒ݁ܫܲܒܵܐ ܕܸܫܬܵܐ ܕܕܸܢܚܵܐ ܒܡܵܪܵܐ ܕܟ݂ܠܵܐ.
ܠܘܵܬܼܵܟܼ ܡܵܪܝܵܐ ܢܲܦ̮ܫܝ ܐܲܪܝܼܡܹܬ݂. ܠܘܵܬܼܵܟܼ ܟܠ ܒܣܲܪ ܢܹܐܬܸܐ. ܥܲܝܢܹ̈ܐ ܕܟ݂ܠܢܵܫ ܠܘܵܬܼܵܟܼ ܬܲܠܝ̈ܵܢ. ܠܘܵܬܼܵܟܼ ܡܵܪܝ ܢܹܐܬܸܐ ܟܠ ܒܣܲܪ. ܕܫܘܼܒ݂ܩܵܢ ܚܵܘܒܹ̈ܐ ܠܟ݂ܠ ܝܵܗ݇ܒܲܬ݁. ܒܙܘܿܦܵܐ ܕܝܼܠܵܟܼ ܢܸܬ݂ܚܵܘܪܘܼܢ. ܦܲܓ݂ܪܹ̈ܐ ܕܲܚܛܝܼܬ݂ܵܐ ܟܲܬ݁ܡܲܬ̤. ܬܵܘ ܡܵܝܘܿܬܹ̈ܐ ܛܥܝܼܢܲܝ̈ ܡܵܘܒ݁ܠܹ̈ܐ. ܐܲܢܝܼܚܘ ܝܘܼܩܪܵܐ ܕܚܵܘܒܲܝ̈ܟ݁ܘܿܢ. ܘܣܲܒ݂ܘ ܘܐܸܬ݂ܚܲܣܵܘ ܡ̣ܢ ܡܲܕ݂ܒ݁ܚܵܐ. ܓܡܘܼܪܬܵܐ ܕܠܲܢܒ݂ܝܼܵܐ ܚܲܣܝܲܬ̤. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܲܫܒܲܥ ܕܒ݂ܵܬܲܪ ܕܸܢܚܵܐ ܒܠܵܟ݂ܘܼ ܩܵܪܹܝܢܲܢ.
ܐܹܒܲܪܸܟܼ ܠܡܵܪܝܵܐ ܒܟ݂ܠܙܒܲܢ: ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܕܲܡܫܵܘܬܸܦ. ܠܲܟ݂ܝܵܢ ܡܵܝܘܿܬܹ̈ܐ. ܒܐ݇ܪ̈ܵܙܵܘܗܝ ܩܲܕܝܼܫܹ̈ܐ. ܬܢܝܼ. ܫܲܒܲܚ. ܒܵܗ̇.
ܕܘܼܟ݂ܪܵܢܵܐ ܕܚܲܕ݂ ܦܲܪܨܘܿܦܵܐ ܒܡܲܕ݂ܒ݁ܚܵܟܼ ܡܵܪܝܵܐ.
ܕܘܼܟ݂ܪܵܢܵܐ ܠܥܵܠܲܡ ܢܸܗܘܸܐ ܠܙܲܕܝܼܩܵܐ: ܢܸܬ݂ܩܲܝܲܡ ܠܥܵܠܲܡ ܩܕ݂ܵܡ ܐܲܠܵܗܵܐ. ܢܸܬ݁ܕ݁ܟܲܪ ܫܡܵܟܼ ܒܟ݂ܠ ܕܵܪ ܘܕ݂ܵܪ. ܕܘܼܟ݂ܪܵܢܵܟܼ ܐܘܿ ܐܲܒ݂ܘܼܢ ܒܕ݂ܘܼܟ݂ܪܵܢܹܗ ܕܲܡܫܝܼܚܵܐ. ܐܸܫܬܲܡܠܝܼ ܒܗܲܝܟܲܠ ܩܘܼܕ݂ܫܵܐ. ܕܲܛܥܲܢܼܬ݁ ܨܠܝܼܒܹܗ ܒܡܘܼܟܵܟ݂ܵܐ. ܘܲܪܕܲܝܬ݁ ܒܵܬ݂ܪܹܗ ܒܫܘܼܡܠܵܝܵܐ ܕܦܘܼܩܕܵܢܵܘ̈ܗܝ. ܕܲܒ݂ܪ̣ܵܟܼ ܠܘܵܬܹܗ ܕܬܸܗܘܸܐ ܥܲܡܹܗ ܠܥܵܠܲܡ. ܬܢܝܼ. ܫܲܒܲܚ. ܡ̣ܢ ܒܢܲܝ̈ܟ ܐܘܿ ܐܲܒ݂ܘܼܢ. ܘܡ̣ܢ ܟܠܵܗ̇ ܡܲܪܥܝܼܬ݂ܵܟܼ ܕܘܼܟ݂ܪܵܢܵܟܼ ܡܸܬ݂ܪܲܡܪܲܡ. ܒܕ݂ܘܼܒܵܪܹ̈ܐ ܘܲܒ݂ܥܲܡ̈ܠܹܐ ܘܲܒ݂ܢܲܟ݂ܦܘܼܬ݂ܵܐ. ܘܙܲܗܝܘܼܬ݂ܵܐ ܡܨܲܒܲܬ݂ ܗ̣݇ܘܲܝܬ݁. ܕܲܒ݂ܪܘܼܟܼ ܥܝܼܪܹ̈ܐ ܠܘܵܬ݂ ܐܲܠܵܗܵܐ ܒܐܝܼܩܵܪܵܐ.
ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܙܲܕܝܼܩܵܐ ܘܲܬ݂ܪܝܼܨܵܐ. ܢܘܼܪܵܐ ܒܲܓ݂ܡܘܼܪܬܵܐ ܢܲܫܸܩ̣ ܐܹܫܲܥܝܵܐ: ܠܵܐ ܝܩܸܕ݂ ܣܸܦܘܵܬܹ̈ܗ ܘܥܵܘܠܹܗ ܐܸܬ݂ܚܲܣܝܼ. ܢܘܼܪܵܐ ܒܓ݂ܵܘ ܠܲܚܡܵܐ ܢܵܣܒ݁ܝܼܢ ܡܵܝܘܿܬܹ̈ܐ: ܢܵܛ̇ܪܵܐ ܦܲܓ݂ܪ̈ܲܝܗܘܿܢ ܘܚܵܘܒܲܝ̈ܗܘܿܢ ܝܵܩ̇ܕ݁ܝܼܢ. ܬܢܝܼ. ܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܬ݂ܡܵܢܹܐ ܕܕܸܢܚܵܐ ܘܕܘܼܟ݂ܪܵܢܐ ܕܐܲܪܒ݁ܥܝܼܢ ܣܵܗܕܹ̈ܐ
ܫܲܡܸܫ ܐܲܝܟܼ ܛܲܟ݂ܣܵܐ ܕܲܥܪܘܼܒ݂ܬܵܐ ܕܡܵܘܕܝܵܢܹ̈ܐ ܡܫܲܡ̱ܠܝܵܐܝܼܬ݂ (ܚܙܝ ܠܬܚܬ)
ܚܲܕ݂ܒ݁ܫܲܒܵܐ ܕܲܬ݂ܡܵܢܝܵܐ ܕܕܸܢܚܵܐ ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܐܲܠܵܗܵܐ ܬܘܼܟ݂ܠܵܢܝ ܕܡ̣ܢ ܛܲܠܝܘܼܬ݂ܝ. ܐܸܢܵܐ ܕܹܝܢ ܥܠܲܝܟ ܡܵܪܝܵܐ ܐܸܬ݁ܬܲܟ݂ܠܹܬ݂. ܬܘܼܟ݂ܠܵܢܵܐ ܕܐܝܼܬ݂ ܠܲܢ ܡܵܪܲܢ ܥܲܠ ܪ̈ܲܚܡܲܝܟ. ܡܓܲܪܸܓ݂ ܠܲܢ ܕܢܸܫܐܲܠ ܡܸܢܵܟܼ ܫܘܼܒ݂ܩܵܢܵܐ. ܠܵܐ ܗ݇ܘ̣ܵܐ ܕܲܚܢܲܢ ܫܵܘܹܝ̇ܢܲܢ ܡܵܪܝܵܐ. ܐܸܠܵܐ ܕܐܲܢ݇ܬ݁ܘܼ ܡܙܲܕܸܩ ܐܲܢ݇ܬ݁ ܡܲܓܵܢ. ܠܲܕ݂ܩܵܪܹܝ̇ܢ ܠܵܟܼ ܒܪ̈ܲܚܡܹܐ ܫܦܝܼܥܹ̈ܐ ܕܛܲܝܒ݁ܘܼܬܼܵܟ݂. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܲܬ݂ܫܲܥ ܕܕܸܢܚܵܐ ܕܘܼܟ݂ܪܵܢܵܐ ܗ݇ܝ̣ ܕܥܲܢܝܼܕܹ̈ܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܛܘܼܒ݂ܵܘܗܝ ܠܡܲܢ ܕܨܵܒܹܐ ܐܲܢ݇ܬ݁ ܒܹܗ. ܠܲܝܬ݁ ܡܹܐܡܪܵܐ ܐܵܦ ܠܵܐ ܡܸܠܹ̈ܐ. ܩܕ݂ܵܡ ܒܹܝܡ ܕܝܼܠܵܟܼ ܕܚܝܼܠܬܵܐ. ܐܲܝܟܵܐ ܕܟ݂ܠܲܢ ܥܬ݂ܝܼܕ݂ܝܼܢܲܢ ܠܲܡܩܵܡ. ܕܢܸܬ݂ܦܪܲܥ ܬܲܡܵܢ ܚܲܕ݂ ܚܲܕ݂ ܡܸܢܲܢ ܒܦܲܓ݂ܪܵܐ ܕܲܩܢܘܿܡܹܗ. ܒܗܵܘ ܒܘܼܚܪܵܢܵܐ ܕܚܝܼܠܵܐ ܕܟܹܐܢܘܼܬܼܵܟ݂. ܐܲܝܟܼ ܡܸܕܸܡ ܕܲܣ̣ܥܲܪ ܐܸܢ ܕܛܵܒ݂ ܘܐܸܢ ܕܒ݂ܝܼܫ. ܚܘܼܣ ܥܲܠ ܐܲܝܠܹܝܢ ܕܫܵܩ̇ܠܝܼܢ ܦܲܓ݂ܪܵܟܼ ܘܲܕ݂ܡܵܟܼ ܡܵܪܝܵܐ. ܬܢܝܼ. ܫܲܒܲܚ. ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ. ܡܸܢܵܟܼ ܫܵܐ̇ܠܝܼܢܲܢ ܡܫܝܼܚܵܐ ܦܵܪܘܿܩܲܢ. ܗܵܘ ܕܡܸܬ݂ܪܲܡܪܲܡ ܡ̣ܢ ܥܝܼܪܹ̈ܐ. ܘܡ̣ܢ ܟܪ̈ܘܿܒܹܐ ܘܲܣܪ̈ܵܦܹܐ ܡܸܬ݂ܩܲܕܲܫ. ܠܲܡܩܲܒܵܠܘܼ ܫܘܼܒ݂ܩܵܢܵܐ ܕܚܵܘܒܹ̈ܐ ܘܕܲܚܛܵܗܹ̈ܐ. ܡ̣ܢ ܠܘܵܬܼܵܟܼ ܪܵܚܹܡܢܵܫܵܐ.
ܕܚܲܕ݂ܒ݁ܫܲܒܵܐ ܕܡܲܥܵܠܲܝ̈ ܨܵܘܡܵܐ ܪܲܒܵܐ ܪܹܫ ܩܵܠܵܐ.
ܐܸܙܕܲܗ̱ܪܘ ܘܠܵܐ ܬܸܚܛܘܿܢ. ܘܲܒ݂ܢܵܘ̈ܗܝ ܕܲܡܪܲܝܡܵܐ ܟܠܟ݂ܘܿܢ. ܕܨܘܼܪܬܵܐ. ܕܲܠܡܵܐ ܓܹܝܪ ܢܢܲܣܹܝܟ݂ܘܿܢ ܡܢܲܣܝܵܢܵܐ ܘܢܸܗܘܸܐ ܥܲܡܠܲܢ ܣܪܝܼܩܵܐ: ܠܵܐ ܬܲܪܡܘܿܢ ܡܲܪ̈ܓܵܢܝܵܬ݂ܟ݂ܘܿܢ ܩܕ݂ܵܡ ܚܙܝܼܪܹ̈ܐ: ܚܙܵܘ ܗܵܟܹܝܠ ܐܲܝܟܲܢܵܐ ܬܗܲܠܟ݂ܘܼܢ ܙܲܗܝܵܐܝܼܬ݂. ܬܲܠܡܝܼܕ݂ܵܘ̈ܗܝ ܕܲܡܫܝܼܚܵܐ ܘܲܒ݂ܢܲܝ̈ ܐ݇ܪܵܙܹܗ: ܐܸܙܕܲܗ̱ܪܘ ܡ̣ܢ ܚܘܼܠܛܵܢܵܐ ܕܥܲܡ ܚܲܢܦܹ̈ܐ ܘܥܲܡ ܟܵܦܘܿܪܹ̈ܐ. ܕܲܠܡܵܐ ܬܸܣܬܲܪܲܩ ܗܲܝܡܵܢܘܼܬ݂ܟ݂ܘܿܢ ܘܡܲܥܡܘܿܕ݂ܝܼܬ݂ܵܐ ܕܲܢܣܲܒ݂ܬ݁ܘܿܢ. ܒܲܥܝܵܕܹ̈ܐ ܕܩܵܢܹܝ̇ܬ݁ܘܿܢ ܡܸܢܗܘܿܢ: ܡܚܲܒ݁ܠܵܢܹ̈ܐ ܕܦܲܓ݂ܪܵܐ ܘܲܕ݂ܢܲܦ̮ܫܵܐ. ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܩܲܕ݂ܡܵܝܵܐ ܕܨܵܘܡܵܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ. ܘܲܡܥܲܕ݁ܪܵܢܲܢ ܒܙܲܒ݂ܢܹ̈ܐ ܕܐܘܼܠܨܵܢܵܐ. ܙܲܒ݂ܢܵܐ ܐܝܼܬ݂ܵܘܗܝ ܕܦܘܼܪܩܵܢܵܐ ܠܲܡܣܲܒܵܪܘܼ ܒܐܲܠܵܗܵܐ: ܘܲܕ݂ܢܸܬ݂ܦܲܨܸܐ ܡ̣ܢ ܚܛܵܗܹ̈ܐ ܘܫܲܪ̈ܥܵܬ݂ܵܐ. ܕܲܒ݂ܥܵܠܡܵܐ ܗܵܢܵܐ ܣ̣ܥܲܪܢܲܢ. ܠܲܡܩܲܒܵܠܘܼ ܫܘܼܒ݂ܩܵܢܵܐ ܕܲܚܛܵܗܹ̈ܐ. ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܩܲܕ݂ܡܵܝܵܐ ܕܨܵܘܡܵܐ ܒܲܟ݂ܪܝܼܗ ܐ݇ܢܵܐ ܒܲܚܛܵܗܲܝ̈.
ܛܘܼܒ݂ܵܘܗܝ ܠܡܲܢ ܕܐܸܫܬ݁ܒܸܩ ܠܹܗ ܥܵܘ̣ܠܹܗ: ܐܲܫܘܿܕ݂ܘ ܩܕ݂ܵܡܵܘܗܝ ܠܸܒ݁ܟ݂ܘܿܢ. ܒܲܨܠܘܿܬ݂ܵܐ ܘܨܵܘܡܵܐ ܘܲܒ݂ܚܲܫܵܐ ܢܸܬ݂ܟܲܫܲܦ ܠܹܗ ܠܲܡܫܝܼܚܵܐ. ܡܩܲܒܸ݁ܠ ܗ݇ܘ̣ ܓܹܝܪ ܠܟ݂ܠ ܐܲܝܠܹܝܢ ܕܬ݂ܵܝܒ݁ܝܼܢ. ܘܦܵܪܹܩ̇ ܐܲܝܟܼ ܪܵܚܹܡܢܵܫܵܐ. ܘܝܵܗܹ̇ܒ݂ ܒܪ̈ܲܚܡܵܘܗܝ ܫܘܼܒ݂ܩܵܢܵܐ ܕܲܚܛܵܗܹ̈ܐ. ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܩܲܕ݂ܡܵܝܵܐ ܕܨܵܘܡܵܐ ܒܐ݇ܪܵܙܵܐ ܪܲܒܵܐ.
ܬܵܘ ܢܫܲܒܲܚ ܠܡܵܪܝܵܐ. ܡܲܠܸܦ ܠܡܸܣܟܹ݁ܢܹ̈ܐ ܐܘܼܪܚܹܗ. ܒܡܲܠܦܵܢܘܼܬܹܗ ܕܦܵܪܘܿܩܲܢ ܩܲܒܸ݁ܠ̣ܢܲܢ ܟܠܲܢ ܛܘܼܦ̮ܣܵܐ. ܕܨܵܘܡܵܐ ܙܲܗܝܵܐ ܘܩܲܕܝܼܫܵܐ. ܢܨܲܒܸ݁ܬ݂ ܢܲܦ̮ܫܲܢ ܒܲܥܒ݂ܵܕܹ̈ܐ ܕܫܵܘܹܝ̇ܢ ܠܐܝܼܩܵܪܹܗ. ܘܢܵܘܕܸ݁ܐ ܘܢܸܣܓ݁ܘܿܕ݂ ܠܡܲܠܟܵܐ ܡܫܝܼܚܵܐ ܦܵܪܘܿܩܲܢ. ܗܵܘ ܕܲܒ݂ܣܘܿܓ݂ܐܵܐ ܕܛܲܝܒ݁ܘܼܬܹܗ. ܠܟ݂ܠܗܘܿܢ ܚܲܛܵܝܹ̈ܐ ܦܬܲܚ̣ ܬܲܪܥܵܐ ܕܲܬ݂ܝܵܒ݂ܘܼܬ݂ܵܐ. ܬܢܝܼ. ܘܫܲܒܲܚ. ܒܵܗ̇.
ܕܡܲܓܵܗܲܝ̈ ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܨܵܘܡܵܐ ܒܐ݇ܪܵܙܵܐ ܪܲܒܵܐ.
ܬܵܘ ܒܢܲܝ̈ܵܐ ܫܘܼܡܥܘܼܢܝ. ܡܸܛܠ ܗܵܢܵܐ ܬܵܪܹܨ̇ ܠܚܲܛܵܝܹ̈ܐ ܒܐܘܼܪܚܵܐ: ܘܚܲܛܵܝܹ̈ܐ ܠܘܵܬ݂ܵܟܼ ܢܸܬ݂ܦܢܘܿܢ. ܙܲܒ݂ܢܵܐ ܗܵܢܵܐ ܒܝܲܕ݂ ܨܵܘܡܵܐ ܡܫܝܼܚܵܐ. ܩܵܪܹܐ ܠܟ݂ܠܗܘܿܢ ܚܲܛܵܝܹ̈ܐ ܠܲܬ݂ܝܵܒ݂ܘܼܬ݂ܵܐ. ܬܵܘ ܗܵܟܹܝܠ ܟܠܲܢ ܐܲܟܲܚ݇ܕ݂. ܢܲܩܒܸ݁ܠ ܐܲܦܵܘ̈ܗܝ ܕܐܲܠܵܗܲܢ. ܒܬ݂ܲܘܕܝܼܬ݂ܵܐ ܘܲܒ݂ܡܲܙܡܘܿܪܹ̈ܐ ܘܒܲܡܪܲܚܡܵܢܘܼܬ݂ܵܐ ܕܲܠܘܵܬ݂ ܡܸܣܟܹ݁ܢܹ̈ܐ. ܡܪܲܚܡܵܢܵܐ ܗ݇ܘ̣ ܓܹܝܪ ܐܵܦ ܚܲܢܵܢܵܐ ܐܝܼܬ݂ܵܘܗܝ ܡܵܪܝܵܐ. ܘܲܠܟ݂ܠ ܐ݇ܢܵܫ ܨܵܒܹ̇ܐ ܠܡܲܚܵܝܘܼ. ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܫܲܒ݁ܬ݂ܵܐ ܩܲܕ݂ܡܵܝܬܵܐ ܕܨܵܘܡܵܐ ܒܐ݇ܪܵܙܵܐ ܪܵܒܵܐ.
ܬܵܘ ܢܫܲܒܲܚ ܠܡܵܪܝܵܐ: ܘܲܠܡܲܟ݁ܝܼܟܲܝ̈ ܪܘܼܚܵܐ ܦܵܪܹܩ̇. ܨܵܘܡܵܐ ܕܡܸܛܠ ܐܲܠܵܗܵܐ ܗܵܘܹ̇ܐ. ܡܥܲܟ݁ܪܵܢܵܐ ܗ݇ܘ̣ ܕܲܪ̈ܓ݂ܝܼܓ݂ܵܬ݂ܵܐ. ܘܢܵܒ݂̈ܗܵܢ ܒܲܢ ܢܲܟ݂ܦܘܼܬ݂ܵܐ ܘܙܲܗܝܘܼܬ݂ܵܐ. ܘܚܘܼܫܵܒܹ̈ܐ ܬܘܼܒ݂ ܕܟܹܐܢܘܼܬ݂ܵܐ. ܟܵܠܹ̇ܐ ܚܹܐܦܵܐ ܕܝܲܥܢܘܼܬ݂ܵܐ ܕܐܵܣܘܿܛܹ̈ܐ. ܘܒ݂ܐܘܼܪܚܹܗ ܕܡܵܪܝܵܐ ܕܓܲܒ݂ܝܵܐ ܘܲܬ݂ܪܝܼܨܵܐ ܡܲܠܸܦ ܠܲܢ ܕܢܸܪܕܸܐ. ܬܢܝܼ. ܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܨܵܘܡܵܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ. ܫܘܼܒ݂ܚܹܗ ܒܐܲܪܥܵܐ ܘܒܲܫܡܲܝܵܐ. ܐ݇ܪܵܙܹܗ ܕܲܨܠܝܼܒ݂ܵܐ ܡܸܬ݂ܡܲܠܲܠ. ܘܟ݂ܠ ܒܸܪ̈ܝܵܬ݂ܵܐ ܡܸܬ݂ܦܲܨ̈ܚܵܢ. ܕܡܲܠܟܵܐ ܡܫܝܼܚܵܐ ܡܸܬ݂ܟ݁ܪܸܙ. ܘܥܵܠܡܵܐ ܟܠܹܗ ܡܸܬ݂ܩܲܕܲܫ. ܬܢܝܼ. ܫܲܒܲܚ. ܒܵܗ̇.
ܕܡܲܓܵܗܲܝ̈ ܫܲܒ݁ܬ݂ܵܐ ܕܬܲܪܬܹܝܢ ܕܨܵܘܡܵܐ ܪܹܫ ܩܵܠܵܐ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ: ܚܢܲܢ ܕܹܝܢ ܢܒܲܪܸܟܼ ܠܡܵܪܝܵܐ. ܘܲܚܢܲܢ ܩ̣ܵܡ̱ܢ ܘܐܸܬ݁ܛܲܝܲܒ݂ܢ. ܡܵܐ ܕܲܫ̣ܡܲܥܢܲܢ ܩܵܠܹ̈ܐ ܕܚܝܼ̈ܠܹܐ. ܕܐ݇ܪ̈ܵܙܵܘܗܝ ܩܲܕܝܼܫܹ̈ܐ ܕܲܡܫܝܼܚܵܐ. ܒܗܵܘ ܥܸܕܵܢܵܐ ܕܡܲܣܸܩ ܟܵܗܢܵܐ ܩܘܼܪܒܵܢܵܐ ܠܐܲܠܵܗܵܐ. ܢܸܒ݂ܪܘܿܟܼ ܟܠܲܢ ܒܕܸܚܠ̱ܬ݂ܵܐ ܩܕ݂ܵܡ ܡܵܪܝܵܐ. ܘܢܹܐܡܲܪ ܐܸܬ݂ܪܲܥܵܐ ܠܥܲܒ݂ܕܲܝ̈ܟ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܨܵܘܡܵܐ ܒܡܵܐ ܕܲܫܡܲܥ̣ܢܲܢ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ. ܒܲܫܡܲܝܵܐ ܘܒܲܐܪܥܵܐ. ܕܨܘܼܪܬܵܐ. ܚܲܕ݂ܘܼ ܘܠܲܝܬ݁ ܐ݇ܚܪܹܝܢ ܠܒܲܪ ܡܸܢܹܗ. ܚܲܕ݂ܘܼ ܚܲܝܠܵܐ ܕܡܸܫܬܲܒܲܚ ܒܲܫܡܲܝܵܐ ܘܒܲܐܪܥܵܐ. ܕܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ. ܬܢܝܼ. ܫܲܒܲܚ ܒܵܗ̇.
ܕܡܲܓܵܗܲܝ̈ ܫܲܒ݁ܬ݂ܵܐ ܕܲܬ݂ܠܵܬ݂ ܕܨܵܘܡܵܐ ܒܲܟ݂ܪܝܼܗܢܵܐ ܒܲܚܛܵܗܲܝ̈.
ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ. ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ: ܕܨܘܼܪܬܵܐ. ܡܲܛ̣ܝܼܢ ܠܕ݂ܘܼܟ݁ܬ݂ܵܐ ܕܡܸܬ݂ܩܲܪܝܵܐ ܠܡܹܐܢܹ̈ܐ ܫܲܦܝܼܪܹ̈ܐ. ܠܡܹܐܢܵܐ ܐܝܼܬܹܝܗ̇ ܘܒܹܝܬ݂ ܓܵܘܣܵܐ ܥܹܕ݁ܬܹܗ ܕܲܡܫܝܼܚܵܐ. ܘܲܡܩܲܒ݁ܠܵܐ ܠܲܒ݂ܢܲܝ̈ܢܵܫܵܐ ܕܒܲܚܛܵܗܹ̈ܐ ܪܵܕܹܝ̇ܢ ܐܲܝܟܼ ܕܲܒ݂ܝܲܡܵܐ. ܘܗ̤ܝ ܦܵܪܩܵܐ ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܨܵܘܡܵܐ ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܝܲܗ̣݇ܒ݂ܬ݁ ܠܕ݂ܵܚܠܲܝ̈ܟ ܐܵܬ̤ܵܐ. ܠܐܲܝܠܹܝܢ ܕܲܬ݂ܪܝܼܨܝܼܢ ܒܠܸܒ݁ܗܘܿܢ. ܡܵܘܗܲܒ݂ܬ݂ܵܐ ܕܚܲܝܹ̈ܐ ܚܲܕ݂ܬܹ̈ܐ ܡܸܬ݂ܝܲܗ݇ܒܵܐ. ܠܡܵܝܘܿܬܹ̈ܐ ܒܓ݂ܵܘ ܒܹܝܬ݂ ܩܘܼܕ݂ܫܵܐ ܪܘܼܚܵܢܵܐ. ܘܐܲܝܢܵܐ ܕܩܲܛ̣ܠܹܗ ܡܵܘܬܵܐ ܕܲܚܛܝܼܬ݂ܵܐ. ܢܸܩܪܘܿܒ݂ ܘܢܸܣܲܒ݂ ܐ݇ܪ̈ܵܙܹܐ ܡܲܚܝܵܢܹ̈ܐ ܕܲܒ݂ܗܘܿܢ ܚܵܐܹ̇ܒ݂ ܣܵܛܵܢܵܐ ܒܥܸܠܕܲܪܹܗ ܕܓܸܢܣܲܢ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܕܐܲܪܒ݁ܥܵܐ ܕܨܵܘܡܵܐ ܒܐ݇ܪܵܙܵܐ ܪܲܒܵܐ.
ܬܹܒܹܝܠ ܘܟ݂ܠܗܘܿܢ ܥܵܡܘܿܪܹ̈ܝܗ̇. ܡ̣ܢ ܡܲܕ݂ܢܵܚܵܘ̈ܗܝ ܕܫܸܡܫܵܐ ܘܲܥܕܲܡܵܐ ܠܡܲܥܪ̈ܵܒ݂ܵܘܗܝ. ܟܠܵܗ̇ ܒܪܝܼܬ݂ܵܐ ܡ̣ܢ ܣܵܟ݂ܵܗ̇ ܬܸܙܡܲܪ ܫܘܼܒ݂ܚܵܐ ܘܬ݂ܵܘܕܝܼܬ݂ܵܐ. ܠܗܵܘ̇ ܕܲܒ݂ܝܲܕ݂ ܨܵܘܡܹܗ ܫܒ݂ܝܼܚܵܐ ܦܲܪܩ̣ܵܗ̇ ܡ̣ܢ ܛܘܼܥܝܲܝ. ܘܲܢ̣ܦܲܩ ܠܕܲܒ݂ܪܵܐ ܠܲܩܪܵܒ݂ܵܐ ܕܥܲܡ ܣܵܛܵܢܵܐ. ܘܲܙ̣ܟ݂ܵܐ ܘܙܲܟ݁ܝܼ ܠܟ݂ܠܹܗ ܟܝܵܢܵܐ ܕܡܵܝܘܿܬܹ̈ܐ. ܘܗܵܐ ܐܝܼܬ݂ܵܘܗܝ ܝܵܘܡܵܢ ܠܥܸܠ. ܘܒ݂ܵܥܹ̇ܐ ܚܠܵܦ ܟܠܲܢ ܡ̣ܢ ܐܲܒ݂ܵܐ ܕܫܲܠ̣ܚܹܗ ܨܹܐܕܲܝܢ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܦܸܠܓ݁ܘܼܬ݂ ܨܵܘܡܵܐ ܒܐ݇ܪܵܙܵܐ ܪܲܒܵܐ.
ܢܩܲܕܸܡ ܐܲܦܵܘ̈ܗܝ ܒܬ݂ܵܘܕܝܼܬ݂ܵܐ: ܐܲܫܘܿܕ݂ܘ ܩܕ݂ܵܡܵܘܗܝ ܠܸܒ݁ܟ݂ܘܿܢ. ܦܹܐܪܹ̈ܐ ܙܗܲܝ̈ܵܐ ܕܲܬ݂ܝܵܒ݂ܘܼܬ݂ܵܐ. ܢܩܲܪܸܒ݂ ܟܠܲܢ ܠܲܡܫܝܼܚܵܐ. ܕܐܝܼܬ݂ܵܘܗܝ ܐܲܠܵܗܵܐ ܥܲܠ ܟܠ. ܘܲܒ݂ܝܲܕ݂ ܨ̈ܠܵܘܵܬ݂ܵܐ ܘܨܵܘܡܵܐ ܘܙܸܕ݂̈ܩܵܬ݂ܵܐ. ܘܲܡܪܲܚܡܵܢܘܼܬ݂ܵܐ ܕܲܠܘܵܬ݂ ܡܸܣܟܹ݁ܢܹ̈ܐ. ܢܸܒ݂ܥܸܐ ܪ̈ܲܚܡܹܐ ܡ̣ܢ ܕܲܝܵܢܵܐ ܕܟܹܐܢܘܼܬ݂ܵܐ. ܕܲܒ݂ܣܘܿܓ݂ܐܵܐ ܕܪ̈ܲܚܡܵܘܗܝ ܢܸܫܬ݁ܘܸܐ ܕܢܲܣܸܩ ܫܘܼܒ݂ܚܵܐ ܠܡܵܪܘܼܬܹܗ. ܕܗ̤ܘ ܫܵܒܹܩ݁ ܠܲܢ ܚܵܘܒܲܝ̈ܢ ܘܲܚܛܵܗܲܝ̈ܢ: ܬܢܝܼ ܘܫܲܒܲܚ ܒܵܗ̇.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܐܲܪܒ݁ܥܵܐ ܕܨܵܘܡܵܐ ܒܣܵܗܕܹ̈ܐ ܒܪ̈ܝܼܟܹܐ.
ܡܲܢ ܕܚܲܟ݁ܝܼܡ ܢܸܛܲܪ ܗܵܠܹܝܢ: ܬܵܘ ܒܢܲܝ̈ܵܐ ܫܘܼܡܥܘܼܢܝ. ܠܦܲܓ݂ܪܵܐ ܘܲܠܢܲܦ̮ܫܵܐ ܙܵܕܹܩ̇ ܕܲܢܨܘܼܡܘܼܢ ܬܪ̈ܲܝܗܘܿܢ ܫܲܘܝܵܐܝܼܬ݂. ܕܡܵܐ ܕܨܵܡ̣ ܦܲܓ݂ܪܵܐ ܡ̣ܢ ܠܲܚܡܵܐ. ܬܨܘܼܡ ܢܲܦ̮ܫܵܐ ܡ̣ܢ ܒܝܼ̈ܫܵܬ݂ܵܐ. ܣܪܝܼܩ ܗ݇ܘ̣ ܨܵܘܡܵܐ ܕܡ̣ܢ ܠܲܚܡܵܐ. ܐܸܢ ܢܲܦ̮ܫܵܐ ܠܵܐ ܡܸܬ݂ܟܲܠܝܵܐ. ܡ̣ܢ ܗܸܪܓܵܐ ܣܲܢܝܵܐ ܕܒ݂ܝܼ̈ܫܵܬ݂ܵܐ: ܬܢܝܼ. ܫܲܒܲܚ. ܒܨܵܘܡܵܐ ܕܡ̣ܢ ܠܲܚܡܵܐ ܚܬ݂ܝܼܪܝܼܢ ܫܵܛܲܝ̈ܵܐ ܒܪܸܥܝܵܢܵܐ ܣܲܟ݂ܠܵܐ. ܘܲܢܒ݂ܝܼܵܐ ܒܦܘܼܩܕܵܢ ܡܵܪܹܗ. ܐܲܟ݂ܪܸܙ ܘܐܸܡܲܪ ܒܹܝܬ݂ ܥܲܡܡܹ̈ܐ. ܕܠܵܘ ܗܵܢܵܘ ܨܵܘܡܵܐ ܕܲܓ݂ܒ݂ܹܝ̇ܬ݂. ܕܡ̣ܢ ܠܲܚܡܵܐ ܘܚܲܡܪܵܐ ܢܨܘܼܡܘܼܢ ܒܢܲܝ̈ܢܵܫܵܐ. ܐܸܠܵܐ ܡ̣ܢ ܥܵܘ̣ܠܵܐ.
ܕܡܲܓܵܗܲܝ̈ ܥܪܘܼܒ݂ܬܵܐ ܕܐܲܪܒܲܥ ܕܨܵܘܡܵܐ ܒܣܵܗܕܹ̈ܐ ܒܪ̈ܝܼܟܹܐ.
ܣܲܒܲܪܘ ܒܵܟܼ ܘܦܲܨܝܼܬ݁ ܐܸܢܘܿܢ. ܠܘܵܬ݂ܵܟܼ ܓܥ̣ܵܘ ܘܐܸܬ݂ܦܲܨܝܼܘ. ܒܨܵܘܡܵܐ ܢܝܼܢܘܵܝܹ̈ܐ ܪܲܥ̣ܝܘܼܟܼ ܦܵܪܘܿܩܲܢ. ܘܲܫܒܲܩ̣ܬ݁ ܚܵܘܒܲܝ̈ܗܘܿܢ. ܨܵܡ̣ܘ ܝܲܠܘܼܕܹ̈ܐ ܡ̣ܢ ܚܲܠܒ݂ܵܐ. ܘܝܲܠܵܕ݂ܵܬ݂̈ܵܐ ܒܕܸܡܥܲܝ̈ܗܹܝܢ. ܘܕܲܚ̣ܙܲܝܬ݁ ܨܵܘܡܵܐ ܕܡ̣ܢ ܠܸܒܵܐ. ܘܲܨܠܘܿܬ݂ܵܐ ܡ̣ܢ ܬܲܪܥܝܼܬ݂ܵܐ. ܓܵܠ̣ܘ ܪ̈ܲܚܡܲܝܟ ܪܵܚܹ̇ܡ ܬܲܝܵܒ̣ܹ̈ܐ: ܬܢܝܼ. ܫܲܒܲܚ. ܡܵܐ ܩܲܛܝܼܢ ܬܲܪܥܵܐ ܘܐܲܠܝܼܨܵܐ ܐܘܼܪܚܵܐ ܕܡܵܘܒ݁ܠܵܐ ܠܲܫܡܲܝܵܐ. ܘܐܲܝܢܵܐ ܕܨܵܒܹ̇ܐ ܕܢܸܪܕܸܐ ܒܵܗ̇. ܙܗܝܼܪܘܼܬ݂ܵܐ ܡܸܬ݂ܒܲܥܝܵܐ ܠܹܗ. ܘܐܸܢ ܗ̤ܘ ܕܡܸܬ݂ܪܲܦܸܐ ܩܲܠܝܼܠ. ܫܒ݂ܝܼܠܵܐ ܕܬ݂ܵܘܫܵܐ ܢܵܬܹܦ̇ ܠܹܗ. ܘܗ̤ܘ ܡܵܘܒܸ݁ܕ݂ ܢܲܦ̮ܫܹܗ ܒܨܸܒ݂ܝܵܢܹܗ.
ܕܡܲܓܵܗܲܝ̈ ܫܲܒ݁ܬ݂ܵܐ ܕܐܲܪܒܲܥ ܕܨܵܘܡܵܐ ܒܡܵܪܵܐ ܕܟ݂ܠܵܐ.
ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ. ܘܐܸܡܲܪ ܕܬ݂ܘܼܒ݂ܘ ܒܢܲܝ̈ܢܵܫܵܐ. ܒܟ݂ܵܪܘܿܙܘܼܬܹܗ ܕܲܢܒ݂ܝܼܵܐ. ܒܨܵܘܡܵܐ ܐܸܬ݂ܦܲܪܩܲܬ̤ ܢܝܼܢܘܹܐ. ܘܲܒ݂ܒ݂ܵܥܘܼܬ݂ܵܐ ܘܲܨܠܘܿܬ݂ܵܐ. ܡܲܠܲܐܟܼ ܡܵܘܬܵܐ ܡܸܢܵܗ̇ ܟܠ̣ܵܐ. ܒܚܲܫܵܐ ܘܕܸܡܥܹ̈ܐ ܕܲܬ݂ܝܵܒ݂ܘܼܬ݂ܵܐ. ܢܹܐܚܘܿܕ݂ ܓܵܘܣܵܐ ܒܓ݂ܵܘ ܗܲܝܟ݁ܠܵܐ. ܘܢܸܩܪܸܐ ܠܪ̈ܲܚܡܹܐ ܠܥܘܼܕ݂ܪܵܢܲܢ. ܥܲܕ݂ ܠܵܐ ܢܸܚܫܲܟܼ ܢܲܗܝܼܪܵܐ. ܬܢܝܼ. ܫܲܒܲܚ. ܗܵܐ ܒܲܟ݂ܬ݂ܵܒܹ̈ܐ ܩܲܕܝܼܫܹ̈ܐ. ܕܪܝܼܫܵܐ ܐܘܼܪܚܵܐ ܠܡܲܠܟ݁ܘܬ݂ܵܐ. ܘܕ݂ܝܼܠܲܢ ܦܵܗܹ̇ܐ ܪܸܥܝܵܢܲܢ. ܒܲܣܪ̈ܝܼܩܵܬ݂ܵܐ ܕܠܵܐ ܝܘܼܬ݂ܪܵܢ. ܠܵܐ ܓܹܝܪ ܡܲܗܢܸܐ ܠܲܢ ܥܘܼܬ݂ܪܹܗ. ܕܥܵܠܡܵܐ ܗܵܢܵܐ ܥܵܒ݂ܘܿܪܵܐ. ܐܸܠܵܐ ܨܵܘܡܵܐ ܘܲܨܠܘܿܬ݂ܵܐ. ܕܲܒ݂ܗܘܿܢ ܐܸܬ݂ܦܲܪܩܲܬ̤ ܢܝܼܢܘܹܐ.
ܚܲܕ݂ܒ݁ܫܲܒܵܐ ܕܚܲܡܫܵܐ ܕܨܵܘܡܵܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܢܵܘܕܸ݁ܐ ܠܵܟܼ ܠܥܵܠܲܡ. ܥܲܠ ܛܲܝܒ݁ܘܼܬ݂ܵܟܼ ܘܥܲܠ ܩܘܼܫܬܵܟ݂. ܓܸܢܣܵܐ ܕܐ݇ܢܵܫܘܼܬܲܢ ܢܵܘܕܸܐ ܠܵܟܼ ܡܵܪܲܢ. ܕܠܲܐܝܕܵܐ ܡܵܘܗܲܒ݂ܬ݂ܵܐ ܐܲܫ̣ܘܝܼܬܵܝܗܝ ܒܲܚܢܵܢܵܟܼ. ܘܥܲܡ ܟܸܢܫܹ̈ܐ ܪ̈ܘܼܚܵܢܹܐ ܢܩܲܕܸܫ ܠܐܝܼܩܵܪܵܟ݂. ܘܢܸܣܲܒ݂ ܦܲܓ݂ܪܵܟܼ ܡܲܚܝܵܢܵܐ ܕܡܝܼܬ݂ܘܼܬܲܢ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܫܲܒ݁ܬ݂ܵܐ ܕܚܲܡܸܫ ܕܨܵܘܡܵܐ ܒܫܘܼܪܵܝ ܣܒܲܪܬ݂ܵܐ ܕܫܲܝܢܵܐ.
ܬܵܘ ܢܫܲܒܲܚ ܠܡܵܪܝܵܐ. ܠܸܒܵܐ ܕܲܟ݂ܝܵܐ ܒܪܝܼ ܒܝܼ ܐܲܠܵܗܵܐ. ܢܕܲܟܸ݁ܐ ܟܠܲܢ ܚܘܼܫܵܒܹ̈ܐ ܕܬܲܪܥܝܼܬܲܢ. ܘܲܒ݂ܕܸܡܥܹ̈ܐ ܕܲܬ݂ܝܵܒ݂ܘܼܬ݂ܵܐ ܨܵܐܬ݂ܵܐ ܕܲܚܛܵܗܲܝ̈ܢ ܢܚܲܠܸܠ ܘܢܸܡܪܘܿܩ. ܘܲܢܩܲܪܸܒ݂ ܠܹܗ ܠܲܡܫܝܼܚܵܐ ܕܸܒ݂ܚܵܐ ܡܩܲܒ݁ܠܵܐ ܕܠܵܐ ܡܘܼܡܵܐ. ܪܘܼܚܵܐ ܡܡܲܟܲܟ݂ܬܵܐ ܘܢܲܦ̮ܫܵܐ ܫܚܝܼܩܲܬ݂ ܒܲܬ݂ܘܵܬ݂ܵܐ. ܕܡܵܐ ܕܬ݂ܵܩܹ݁ܢ ܟܘܼܪܣܲܝ ܕܝܼܢܵܐ ܕܚܝܼܠܵܐ. ܢܸܥܒܸܕ݂ ܪ̈ܲܚܡܹܐ ܥܲܠ ܢܲܦ̮̈ܫܵܬܲܢ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܸܫܬܵܐ ܕܨܵܘܡܵܐ ܒܡܲܕ݂ܒ݁ܚܵܟܼ ܡܵܪܝܵܐ.
ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ. ܡܫܲܡܫܵܢܵܘ̈ܗܝ ܕܥܵܒ݂ܕ݁ܝܼܢ ܨܸܒ݂ܝܵܢܹܗ. ܡ̣ܢ ܟܪ̈ܘܿܒܹܐ ܩܲܕܝܼܫܹ̈ܐ ܘܲܣܪ̈ܵܦܹܐ ܪ̈ܘܼܚܵܢܹܐ. ܕܠܵܐ ܫܲܠܘܵܐ ܡܸܬ݂ܪܲܡܪܲܡ ܐܲܢ݇ܬ݁. ܡܲܠܟܵܐ ܕܟ݂ܠܗܘܿܢ ܥܵܠܡܹ̈ܐ. ܕܒܲܡܪܲܚܡܵܢܘܼܬ݂ܵܟܼ ܘܲܒ݂ܣܘܿܓ݂ܐܵܐ ܕܛܲܝܒ݁ܘܼܬ݂ܵܟܼ ܦ̇ܵܪܩܲܬ݁. ܠܟ݂ܠܹܗ ܓܸܢܣܵܐ ܕܲܒ݂ܢܲܝ̈ܢܵܫܵܐ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܫܲܒ݁ܬ݂ܵܐ ܕܫܸܬ݂ ܕܨܵܘܡܵܐ ܒܐ݇ܪܵܙܵܐ ܪܲܒܵܐ.
ܬܵܘ ܢܫܲܒܲܚ ܠܡܵܪܝܵܐ. ܢܩܲܕܸ݁ܡ ܐܲܦܵܘ̈ܗܝ ܒܬ݂ܵܘܕ݁ܝܼܬ݂ܵܐ. ܒܨܵܘܡܵܐ ܕܲܟ݂ܝܵܐ ܘܩܲܕ݁ܝܼܫܵܐ. ܢܨܲܒܸ݁ܬ݂ ܦܲܓ݂ܪ̈ܲܝܢ ܘܢܲܦ̮̈ܫܵܬܲܢ. ܘܢܸܫܦܲܪ ܠܐܝܼܬ݂ܝܵܐ ܥܵܒ݂ܘܿܕܲܢ. ܘܢܸܡܪܘܿܩ ܡ̣ܢ ܦܲܓ݂ܪ̈ܲܝܢ ܟܠ ܚܲܫ̈ܝܼܢ ܕܲܪ̈ܓ݂ܝܼܓ݂ܵܬ݂ܵܐ. ܐܵܦ ܡ̣ܢ ܢܲܦ̮ܫܲܢ ܗܸܪܓܵܐ ܣܲܢܝܵܐ ܕܒ݂ܝܼ̈ܫܵܬ݂ܵܐ. ܘܢܲܥܢܸܐ ܐܸܢܘܿܢ ܠܲܬ݂ܪ̈ܲܝܗܘܿܢ ܒܕ݂ܘܼܒܵܪܹ̈ܐ ܬܲܩܢܹ̈ܐ ܘܲܒ݂ܗܸܪ̈ܓܹܐ ܕܪ̈ܘܼܚܵܢܝܵܬ݂ܵܐ: ܬܢܝܼ. ܫܲܒܲܚ. ܒܡܲܒ݁ܘܼܥ ܚܲܝܹ̈ܐ. ܪܵܘܒܵܐ ܪܲܒܵܐ ܗܘ̤ܵܐ ܒܹܝܬ݂ ܡܝܼܬܹ̈ܐ. ܒܗܵܘ̇ ܥܸܕܵܢܵܐ ܕܩ̣ܵܡ ܠܵܥܵܙܲܪ ܡ̣ܢ ܓܵܘ ܩܲܒ݂ܪܵܐ. ܫܩܘܿܠܘ ܟܹܐܦܵܐ ܡ̣ܢ ܦܘܼܡ ܩܲܒ݂ܪܵܐ ܐܸܡܲܪ݂ ܡܵܪܲܢ. ܘܲܚܙܵܘ ܚܲܝܠܹܗ ܕܐܲܠܵܗܵܐ ܕܪܵܡ ܘܲܡܥܲܠܲܝ܀ ܐܵܡ̇ܪܵܐ ܗ݇ܘ̣ܵܬ݂ ܡܵܪܬܵܐ ܚܵܬܹܗ. ܡܵܪܝ ܡ̣ܢ ܟܲܕܘܼ ܣ̣ܪܝܼ ܘܐܸܬ݂ܚܲܒܲܠ. ܐܲܪܒ݁ܥܵܐ ܠܹܗ ܓܹܝܪ ܝܵܘܡܝܼ̈ܢ ܒܩܲܒ݂ܪܵܐ. ܘܐ݇ܢܵܫ ܠܵܐ ܡܸܫܟܲܚ ܕܢܸܬ݂ܩܲܪܲܒ݂ ܠܹܗ. ܦܲܢ̣ܝܼ ܨܹܐܕܹܝܗ̇ ܗܵܘ̇ ܝܵܕܲܥ̇ ܟܠ. ܕܟܲܬܲܪܝ ܘܬܸܚܙܹܝܢ ܫܘܼܒ݂ܚܹܗ ܕܡܵܪܝܵܐ. ܘܲܬ݂ܠ̣ܵܐ ܚܝܵܪܹܗ ܠܐܲܦܲܝ̈ ܪܵܘܡܵܐ. ܘܲܡܦܝܼܣ ܗ݇ܘ̣ܵܐ ܠܹܗ ܠܐܲܒ݂ܵܐ ܕܫܲܠ̣ܚܹܗ. ܐܵܒ݂ܝ ܠܲܡ ܫ̣ܡܲܥܬܵܢܝ ܘܬ݂ܘܼܒ݂ ܝܵܕܲܥ̇ ܐ݇ܢܵܐ. ܕܲܒ݂ܟ݂ܠܥܸܕܵܢ ܫܵܡܲܥ̇ ܐܲܢ݇ܬ݁ ܠܝܼ. ܚܵܘܵܐ ܚܲܝܠܵܟܼ ܕܢܸܚܙܸܐ ܟܠܢܵܫ. ܘܲܢܗܲܝܡܸܢ ܒܵܟܼ ܕܐܲܢ݇ܬ݁ ܫܲܕܲܪܬܵܢ̣ܝ. ܩ̣ܪܸܒ݂ ܨܹܝܕ݂ ܩܲܒ݂ܪܵܐ ܟܲܕ݂ ܨܵܒܹ̇ܐ ܗ݇ܘ̣ܵܐ. ܕܢܵܘܕܲܥ ܫܘܼܒ݂ܚܹܗ ܠܘܵܬ݂ ܬܲܠܡܝܼܕ݂ܵܘ̈ܗܝ. ܠܵܥܵܙܲܪ ܦܘܿܩ ܡ̣ܢ ܩܲܒ݂ܪܵܐ. ܘܲܫܪܝܼ ܡܸܢܵܟܼ ܦܟ݂ܵܪ̈ܵܘܗܝ ܕܡܵܘܬܵܐ. ܢ̣ܦܲܩ ܠܵܥܵܙܲܪ ܡ̣ܢ ܓܵܘ ܩܲܒ݂ܪܵܐ. ܟܲܕ݂ ܐܲܣܝܼܪ̈ܵܢ ܐܝܼܕ݂ܵܘ̈ܗܝ ܘܪܸ̈ܓ݂ܠܵܘܗܝ. ܘܲܪܗܝܼܒ݂ ܗ݇ܘ̣ܵܐ ܛܵܒ݂ ܘܲܡܕ݂ܵܘܲܕ݂ ܗ݇ܘ̣ܵܐ. ܘܲܡܙܝܼܥ ܗ݇ܘ̣ܵܐ ܠܹܗ ܩܵܠܵܐ ܕܲܩ̣ܪܵܝܗܝ܀ ܐܹܝܘ ܠܬܸܕ݂ܡܘܼܪܬܵܐ ܕܲܣ̣ܥܲܪ ܡܵܪܲܢ. ܒܚܲܝܠܹܗ ܪܲܒܵܐ ܘܬܲܩܝܼܦܵܐ ܠܹܗ ܬܸܫܒ݁ܘܿܚܬܵܐ.
ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܨܵܘܡܵܐ ܘܥܹܐܕ݂ܵܐ ܗ݇ܘ̣ ܕܐܘܿܫܲܥܢܹ̈ܐ ܪܹܫ ܩܵܠܵܐ.
ܡܵܪܝܵܐ ܡܵܪܲܢ ܡܵܐ ܡܫܲܒܲܚ ܫܡܵܟܼ ܒܟ݂ܠܵܗ̇ ܐܲܪܥܵܐ. ܘܠܸܫܵܢܗܘܿܢ ܐܲܝܟܼ ܣܲܝܦܵܐ ܚܲܪܝܼܦܵܐ. ܕܢܸܫܬܲܥܘܿܢ ܒܨܸܗܝܘܿܢ ܫܡܹܗ ܕܡܵܪܝܵܐ. ܟܲܕ݂ ܫܲܒ݂ܪܹ̈ܐ ܕܥܸܒ݂ܪ̈ܵܝܹܐ ܠܥܸܠ ܡ̣ܢ ܟܝܵܢܵܐ ܡܲܠܸܠ̣ܘ. ܘܲܠܠܵܐ ܗܲܝܡܵܢܘܼܬ݂ܵܐ ܕܐܲܒ݂ܵܗܲܝ̈ܗܘܿܢ ܡܲܟ݁ܣܝܼܢ ܗ݇ܘ̣ܵܘ. ܘܲܠܗܵܘ̇ ܕܥܲܠ ܥܝܼܠܵܐ ܝܵܬܹܒ݂ ܗ݇ܘ̣ܵܐ. ܐܲܝܟܼ ܗܵܘ̇ ܕܥܲܠ ܬܪܘܿܢܘܿܣ ܡܸܙܕܲܝܲܚ ܗ݇ܘ̣ܵܐ. ܒܬܸܕ݂ܡܘܼܪܬܵܐ ܡܩܲܠܣܝܼܢ ܗ݇ܘ̣ܵܘ. ܘܥܲܡܗܘܿܢ ܐܵܦ ܚܢܲܢ ܗܵܐ ܩܵܥܹܝ̇ܢܲܢ. ܐܘܿܫܲܥܢܵܐ ܒܲܡܪ̈ܵܘܡܹܐ. ܡܒܲܪܲܟܼ ܗ݇ܘ̣ ܗܵܘ̇ ܕܐܸܬ݂ܵܐ ܘܲܥܬ݂ܝܼܕ݂ ܕܢܹܐܬܸܐ ܒܲܫܡܹܗ ܕܡܵܪܝܵܐ ܒܫܘܼܒ݂ܚܵܐ ܪܲܒܵܐ. ܘܢܸܦܪܘܿܩ ܢܲܦ̮̈ܫܵܬ݂ܵܐ ܕܟ݂ܠܲܢ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܬܠܵܬ݂ܒ݁ܫܲܒܵܐ ܐ݇ܚܪܵܝܵܐ ܕܨܵܘܡܵܐ ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܨܠܝܼ ܡܵܪܝܵܐ ܐܸܕ݂ܢܵܟܼ ܘܲܥܢܝܼܢܝ. ܡܲܠܟ݁ܘܼܬܹܗ ܒܟ݂ܠ ܫܲܠܝܼܛܵܐ. ܒܪܵܐ ܡܫܝܼܚܵܐ ܕܡܲܠܟ݁ܘܼܬܹܗ ܠܵܐ ܡܸܬ݁ܬ݁ܙܝܼܥܵܐ. ܘܟ݂ܘܼܡܪܘܼܬܹܗ ܠܵܐ ܥܵܒ݂ܪܵܐ ܘܠܵܐ ܡܸܫܬܲܪܝܵܐ. ܫܲܝܸܢ ܒܲܨܠܝܼܒ݂ܵܟܼ ܟܵܗܢܘܼܬ݂ܵܐ ܘܡܲܠܟ݁ܘܼܬ݂ܵܐ. ܕܒ݂ܵܐܘܝܘܼܬ݂ܵܐ ܢܕܲܒ݁ܪ̈ܵܢ ܐܘܼܚܕܵܢܲܝ̈ܗܹܝܢ. ܟܲܕ݂ ܢܵܛܪ̈ܵܢ ܕܠܵܐ ܡܘܼܡܵܐ ܬܵܘܕܝܼܬ݂ܵܐ ܓܡܝܼܪܬܵܐ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܐܲܪܒܲܥܒ݁ܫܲܒܵܐ ܕܫܲܒ݂ܥܵܐ ܕܨܵܘܡܵܐ ܒܒܲܒ݂ܛܝܼܠܘܼܬܹܗ.
ܬܵܘ ܢܫܲܒܲܚ ܠܡܵܪܝܵܐ. ܢܩܲܕܸܡ ܐܲܦܵܘ̈ܗܝ ܒܬ݂ܵܘܕܝܼܬ݂ܵܐ. ܠܲܡܗܲܝܡܢܹ̈ܐ ܢܵܛܲܪ ܡܵܪܝܵܐ. ܒܗܲܝܡܵܢܘܼܬ݂ܵܐ ܢܸܪܗܲܛ ܘܢܸܬ݂ܓܵܘܲܣ. ܘܲܒ݂ܨܵܘܡܵܐ ܘܲܒ݂ܡܲܙܡܘܿܪܹ̈ܐ ܟܲܕ݂ ܡܗܲܠܠܝܼܢܲܢ ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ. ܠܲܚܕ݂ܵܐ ܬܠܝܼܬ݂ܵܝܘܼܬ݂ܵܐ ܕܠܵܐ ܡܸܬ݁ܕܲܪܟܵܐ. ܘܲܡܣܲܟܹ݁ܝܢܲܢ ܠܲܡܩܲܒܵܠܘܼ ܠܲܩܝܵܡܬܹ݁ܗ ܕܡܲܠܟܵܐ ܡܫܝܼܚܵܐ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܚܲܡܫܵܒ݁ܫܲܒܵܐ ܕܦܸܨܚܵܐ ܒܲܝܗܘܼܕ݂ܵܐ ܥܵܒܲــ̇ـܪ ܢܵܡܘܿܣܵܐ.
ܕܘܼܟ݂ܪܵܢܵܐ ܕܛܲܝ̈ܒ݁ܘܵܬ݂ܵܟܼ ܣܲܓ݁ܝܼ̈ܐܵܬ݂ܵܐ. ܡܵܪܝܵܐ ܫܡܵܟܼ ܠܥܵܠܲܡ. ܥܘܼܗܕܵܢܹܗ ܕܚܲܫܵܟܼ ܝܲܩܝܼܪܵܐ. ܕܲܚܠܵܦ ܦܘܼܪܩܵܢܲܢ ܐܸܬ݂ܓ݁ܡܲܪ. ܥܵܒ݂̇ܕܵܐ ܥܹܕ݁ܬܵܟܼ ܦܵܪܘܿܩܲܢ. ܢܲܛܲܪ ܝܲܠܕܹܝ̈ܗ̇ ܡ̣ܢ ܢܸܟ݂ܝܵܢܹ̈ܐ: ܬܢܝܼ. ܘܫܲܒܲܚ ܒܵܗ̇.
ܕܡܲܓܵܗܲܝ̈ ܥܪܘܼܒ݂ܬܵܐ ܕܚܲܫܵܐ ܘܐ݇ܪ̈ܵܙܹܐ ܕܦܸܨܚܵܐ ܒܐ݇ܪܵܙܵܐ ܪܲܒܵܐ.
ܬܵܘ ܢܫܲܒܲܚ ܠܡܵܪܝܵܐ. ܚܘܼܪܘ ܠܘܵܬܹܗ ܘܣܲܒܲܪܘ ܒܹܗ. ܒܥܲܝܢܵܐ ܕܬܲܪܥܝܼܬ݂ܵܐ ܘܲܕ݂ܚܘܼܒܵܐ. ܢܸܚܙܹܝܘܗܝ ܟܠܲܢ ܠܲܡܫܝܼܚܵܐ. ܒܝܲܕ݂ ܐ݇ܪ̈ܵܙܹܐ ܘܛܘܼܦ̮ܣܹ̈ܐ ܕܐܲܫ̣ܠܸܡ ܠܲܢ. ܟܲܕ݂ ܡܸܬ݁ܕܒܲܪ ܠܚܲܫܹܗ ܕܲܨܠܝܼܒ݂ܵܐ. ܘܥܲܠ ܡܲܕ݂ܒܲܚ ܩܘܼܕ݂ܫܵܐ ܡܸܬ݁ܬ݁ܣܝܼܡ ܕܸܒ݂ܚܵܐ ܚܲܝܵܐ. ܘܐܲܝܟܼ ܡܲܠܲܐܟܹ̈ܐ ܡܙܲܝܚܝܼܢ ܟܵܗܢܹ̈ܐ ܠܥܘܼܗܕܵܢܵܐ ܕܡܵܘܬܹ݁ܗ. ܒܩܵܠܹ̈ܐ ܕܬ݂ܵܘܕܝܼܬ݂ܵܐ ܘܐܵܡ̇ܪܝܼܢ. ܫܘܼܒ݂ܚܵܐ ܠܹܗ ܥܲܠ ܡܵܘܗܲܒ݂ܬ݂ܹܗ ܕܠܵܐ ܡܸܬ݂ܡܲܠܠܵܐ: ܬܢܝܼ. ܘܫܲܒܲܚ ܒܵܗ̇.
ܕܐ݇ܪ̈ܵܙܹܐ ܕܪܲܡܫܵܐ ܕܲܩܝܵܡܬܵܐ ܒܚܵܒܹ݁ܬ݂ ܩܲܪܢܵܐ.
ܚܲܕ݂ܘܼܬ݂ܵܐ ܒܟ݂ܠܵܗ̇ ܐܲܪܥܵܐ: ܬܸܬ݂ܡܠܸܐ ܐܝܼܩܵܪܹܗ ܟܠܵܗ̇ ܐܲܪܥܵܐ ܐܵܡܹܝܢ ܘܐܵܡܹܝܢ. ܕܨܘܼܪܬܵܐ. ܗܵܐ ܓܹܝܪ ܡܣܲܒܲܪ ܐ݇ܢܵܐ ܠܟ݂ܘܿܢ ܚܲܕ݂ܘܼܬ݂ܵܐ ܪܲܒ݁ܬ݂ܵܐ ܕܬܸܗܘܸܐ ܠܟ݂ܠܹܗ ܥܵܠܡܵܐ. ܚܲܕ݂ܘܼܬ݂ܵܐ ܘܣܲܒ݂ܪܵܐ ܘܦܘܼܪܩܵܢܵܐ ܐܸܬ݂ܡܲܠܝܲܬ̤ ܟܠܵܗ̇ ܒܪܝܼܬ݂ܵܐ. ܢܘܼܓ݂ܪܵܐ ܓܹܝܪ ܐܸܬ݂ܐܲܠܨܲܬ̤ ܡ̣ܢ ܛܘܼܥܝܲܝ. ܘܗܵܫܵܐ ܡܕܲܒ݁ܪܵܢܵܐ ܛܵܒ݂ܵܐ ܐܸܫܟ݁ܚܲܬ̤. ܘܲܠܥܸܪ̈ܒܹܐ ܐܲܒ݁ܝܼܕܹ̈ܐ ܕܛܵܥܹܝ̇ܢ ܗ݇ܘ̣ܵܘ. ܪܵܥܝܵܐ ܫܡܲܝܵܢܵܐ ܐܲܦܢ̣ܝܼ ܐܸܢܘܿܢ. ܘܲܒ݂ܥܸܠܕܲܪܵܐ ܗܵܐ ܡܒܲܓܸ݁ܢ ܟܲܕ݂ ܐܵܡܲܪ. ܕܐܸܬ݁ܬ݁ܕܝܼܫ ܘܲܒ݂ܛܸܠ̣ ܟܠܹܗ ܚܲܝܠܵܐ ܕܫܘܼܠܛܵܢܝ. ܕܲܡܫܝܼܚܵܐ ܩܵܡ̣ ܡ̣ܢ ܒܹܝܬ݂ ܡܝܼܬܹ̈ܐ. ܘܐܲܢ̣ܗܲܪ ܠܥܵܠܡܵܐ ܡ̣ܢ ܣܵܟܹܗ: ܬܢܝܼ. ܘܫܲܒܲܚ ܒܵܗ̇.
ܕܐ݇ܪ̈ܵܙܹܐ ܕܚܲܕ݂ܒ݁ܫܲܒܵܐ ܪܲܒܵܐ ܕܲܩܝܵܡܬܹܗ ܕܡܵܪܲܢ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ: ܗ̤ܝ ܗܘ̤ܵܬ݂ ܠܪܹܫܹܗ ܕܒܸܢܝܵܢܵܐ. ܕܨܘܼܪܬܵܐ. ܫܘܼܒ݂ܚܵܐ ܗ݇ܝ̣ ܕܟ݂ܠܗܹܝܢ ܡܲܠܟ̈ܘܵܬ݂ܵܐ ܕܐܲܪܥܵܐ. ܩܝܵܡܬܵܟܼ ܡܵܪܲܢ ܪܹܫܝܼܬ݂ܵܐ ܕܚܲܝܲܝ̈ܢ. ܫܘܼܒ݂ܚܵܐ ܘܥܘܼܬ݂ܪܵܐ ܗܘ̤ܵܐ ܒܒܲܝܬܵܟܼ ܩܲܕܝܼܫܵܐ. ܗܵܐ ܓܹܝܪ ܥܹܕ݁ܬܵܟܼ ܕܲܒ݂ܟ݂ܠ ܦܸܢ̈ܝܵܢ. ܗܵܝ݁ ܕܲܩܢܲܝܬܵܗ̇ ܒܲܕ݂ܡܵܟܼ ܝܲܩܝܼܪܵܐ. ܐܲܝܟܼ ܟܲܠܬ݂ܵܐ ܒܵܟܼ ܗ݇ܘ̣ ܡܨܲܒ݁ܬ݂ܵܐ. ܘܒܲܕ݂ܡܘܼܬ݂ ܐܸܡܵܐ ܥܲܡ ܒܢܲܝ̈ܵܐ ܒܵܟܼ ܚܵܕ݂ܝܵܐ. ܢܲܛܲܪܹܝܗ̇ ܡܵܪܝ ܡ̣ܢ ܢܸܟ݂ܝܵܢܹ̈ܐ. ܘܠܲܢ ܦܪܘܿܩܲܝܢ ܕܲܒ݂ܓ݂ܵܘܵܗ̇ ܡܫܲܒ݁ܚܝܼܢܲܢ ܠܵܟܼ ܘܪܲܚܸܡ ܥܠܲܝܢ: ܬܢܝܼ. ܘܫܲܒܲܚ ܒܵܗ̇.
ܬܪܹܝܢܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ: ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ. ܠܘܲܥܕܹܗ ܕܲܠܡܹܐܢܵܐ ܕܚܲܝܹ̈ܐ ܡܲܢܲܥ̣ܢܲܢ ܠܲܩܝܵܡܬܹܗ ܫܒ݂ܝܼܚܬܵܐ ܕܲܡܫܝܼܚܵܐ ܦܵܪܘܿܩܲܢ. ܕܗ̤ܘܝܘܼ ܡܕܲܒ݁ܪܵܢܵܐ ܕܒܸܪ̈ܝܵܬ݂ܵܐ ܘܣܵܥܘܿܪܵܐ ܕܐܲܝܠܹܝܢ ܕܐܲܠܝܼܨܝܼܢ. ܘܗ̤ܘ ܐܲܫ̣ܘܝܼ ܠܲܢ ܒܛܲܝܒ݁ܘܼܬܹܗ. ܕܢܸܚܙܹܝܘܗܝ ܠܠܸܠܝܵܐ ܕܬܸܕ݂ܡܘܼܪܬܵܐ. ܕܒܹܗ̤ܘ ܟܵܘܟ݁ܒܹ̈ܐ ܒܢܘܼܗܪܵܐ ܡܲܒ݂ܪ̱ܩܝܼܢ. ܡ̣ܢ ܓܵܘ ܡܲܝ̈ܵܐ ܪܘܼܚܵܢܵܐܝܼܬ݂: ܬܢܝܼ. ܘܫܲܒܲܚ ܒܵܗ̇.
ܬܠܵܬ݂ܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܚܲܕ݂ܘܼܬ݂ܵܐ ܒܟ݂ܠܵܗ̇ ܐܲܪܥܵܐ: ܐܲܡ̣ܠܸܟܼ ܐܲܠܵܗܵܐ ܥܲܠ ܥܲܡܡܹ̈ܐ. ܒܝܵܘܡܵܐ ܕܲܩܝܵܡܬܵܟܼ ܡܵܪܲܢ ܝܼܫܘܿܥ ܠܐܲܪܥܵܐ ܥܼܒܲܕ݁ܬܵܗ̇ ܫܡܲܝܵܐ ܒܲܚܢܵܢܵܟܼ. ܨܠܝܼܒ݂ܵܐ ܓܹܝܪ ܐܲܡ̣ܠܸܟܼ ܥܲܠ ܟܠܵܗ̇ ܬܹܒܹܝܠ. ܘܲܒ݂ܙܲܗܪܵܐ ܕܙܲܠܝܼܩܵܘ̈ܗܝ ܠܵܐ ܡܸܫܬܲܠܲܛ ܠܸܠܝܵܐ. ܟܵܘܟ݁ܒܹ̈ܐ ܕܹܝܢ ܡܲܠܵܠܹ̈ܐ ܒܐܝܼܡܵܡܵܐ ܗܵܐ ܡܲܒ݂ܪ̱ܩܝܼܢ. ܘܲܥܢܵܢܵܐ ܕܚܵܘܒܹ̈ܐ ܠܵܐ ܡܟܲܣܝܵܐ ܠܐܲܝܠܹܝܢ ܕܲܣ̣ܠܸܩܘ ܡ̣ܢ ܡܲܥܡܘܿܕ݂ܝܼܬ݂ܵܐ. ܠܗܘܿܢ ܢܲܛܲܪ ܡܵܪܲܢ. ܘܠܲܢ ܦܪܘܿܩܲܝܢ ܘܪܲܚܸܡ ܥܠܲܝܢ: ܬܢܝܼ. ܫܲܒܲܚ ܒܵܗ̇.
ܕܐܲܪܒܲܥܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ ܒܩܵܠܵܐ ܪܲܒܵܐ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ: ܕܲܢܚܵܘܸܐ ܓܲܢ݇ܒܵܪܘܼܬܹܗ. ܩܵܡ̣ ܠܹܗ ܡܫܝܼܚܵܐ ܡ̣ܢ ܒܹܝܬ݂ ܡܝܼܬܹ̈ܐ. ܘܲܫ̣ܪܵܐ ܥܵܩܬ݂ܵܐ ܘܟܲܒ݂ܠܹ̈ܐ ܕܡܵܘܬܵܐ ܝܲܥܢܵܐ. ܘܐܲܩ̣ܝܼܡ ܬܘܼܒ݂ ܥܲܡܹܗ ܠܗܵܢ̇ܘܿܢ ܕܲܢܦܲܠ̣ܘ ܒܲܚܒ݂ܵܠܵܐ. ܟܠ ܗܵܟܹܝܠ ܕܐܸܫܬ݁ܘܝܼ ܥܲܡܹܗ ܕܢܸܥܡܲܕ݂ ܒܹܗ. ܒܙܵܟ݂ܘܼܬ݂ܵܐ ܪܲܒ݁ܬ݂ܵܐ ܕܥܲܠ ܫܝܘܿܠ. ܒܥܲܕ݂ܥܹܕ݂ܵܐ ܦܨܝܼܚܵܐ. ܗܵܕܹܐ ܢܸܩܥܸܐ ܘܢܹܐܡܲܪ. ܩܲܕ݁ܝܼܫܲܬ݁ ܐܲܠܵܗܵܐ. ܩܲܕ݁ܝܼܫܲܬ݁ ܚܲܝܠ̱ܬ݂ܢܵܐ. ܩܲܕ݁ܝܼܫܲܬ݁ ܠܵܐ ܡܵܝܘܿܬ݂ܵܐ ܐܸܬ݂ܪܲܚܲܡ ܥܠܲܝܢ: ܬܢܝܼ. ܫܲܒܲܚ. ܒܵܗ̇.
ܚܲܡܫܵܒ݁ܫܲܒܵܐ ܕܫܲܒܲܬ݂ ܫܲܒܹ̈ܐ ܒܠܵܐ ܒܵܗ̇ܬ݁ܝܼܢܲܢ.
ܬܵܘ ܢܫܲܒܲܚ ܠܡܵܪܝܵܐ: ܟܠܟ݂ܘܿܢ ܥܲܒ݂ܕܵܘ̈ܗܝ ܕܐܲܠܵܗܵܐ. ܟܠܟ݂ܘܿܢ ܐܲܝܠܹܝܢ ܕܲܠܛܲܝܒ݁ܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ ܐܸܫܬ݁ܘܝܼܘ. ܬܵܘ ܢܫܲܒܲܚ ܠܐܲܠܵܗܵܐ ܕܐܲܣ̣ܓ݁ܝܼ ܐܲܚ̣ܒܲܢ. ܗ̤ܘ ܓܹܝܪ ܒܲܚܢܵܢܹܗ ܒܢܲܝ̈ܵܐ ܕܢܘܼܗܪܵܐ ܩ̣ܪܵܐ ܠܟ݂ܠܲܢ. ܘܝܵܪ̈ܬܹ݁ܐ ܒܡܲܠܟ݁ܘܼܬ݂ܵܐ ܫܲܡܲܗ ܠܲܢ. ܒܗܲܝܡܵܢܘܼܬ݂ܵܐ ܘܲܒ݂ܚܘܼܒܵܐ ܘܲܒ݂ܠܸܒܵܐ ܕܲܟ݂ܝܵܐ ܘܩܲܕܝܼܫܵܐ. ܢܸܬ݂ܩܲܪܲܒ݂ ܠܗܵܘ̇ ܕܐܲܫ̣ܘܝܼ ܠܲܢ ܒܝܲܕ݂ ܪ̈ܲܚܡܵܘܗܝ. ܠܡܵܘܗܲܒ݂ܬ݂ܵܐ ܕܚܲܝܹ̈ܐ ܘܐ݇ܪ̈ܵܙܹܐ ܩܲܕܝܼܫܹ̈ܐ: ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܡܵܘܕܝܵܢܹ̈ܐ ܒܐܲܠܵܗܵܐ ܡܸܠܬ݂ܵܐ.
ܕܲܢܨܝܼܒ݂ܝܼܢ ܒܒܲܝܬܹ݁ܗ ܕܡܵܪܝܵܐ: ܐܲܪ̈ܙܹܐ ܕܠܸܒ݂ܢܵܢ ܕܲܢ̣ܨܲܒ݂ܬ݁. ܐܲܝܟܼ ܕܲܒ݂ܦܲܪܕܲܝܣܵܐ ܒܓ݂ܵܘ ܥܹܕܲܬ݂ ܩܘܼܕ݂ܫܵܐ. ܦܸܩܚܹ̈ܐ ܪ̈ܓ݂ܝܼܓ݂ܹܐ ܡܲܠܝܲܝ̈ ܥܘܼܕ݂ܪ̈ܵܢܹܐ. ܐܲܢ݇ܬ݁ܘܿܢ ܐܝܼܬܲܝܟ݁ܘܿܢ ܐܲܬ݂ܠܹܝܛܵܘ̈ܗܝ ܕܲܡܫܝܼܚܵܐ. ܘܲܒ݂ܝܲܕ݂ ܪܹܝܚܵܐ ܒܲܣܝܼܡܵܐ ܕܢܸܨܚܵܢܲܝ̈ܟ݁ܘܿܢ. ܟܠ ܕܘܼܟܵܐ ܗܵܐ ܒܟ݂ܘܿܢ ܡܸܬ݂ܩܲܕ݁ܫܵܐ. ܕܲܚܠܵܦ ܡܫܝܼܚܵܐ ܐܸܬ݂ܩܲܛܲܠܬ݁ܘܿܢ. ܘܒܹܗ ܐܵܣܝܘܼܬ݂ܵܐ ܠܟ݂ܠ ܟܹܐܒ݂̈ܝܼܢ ܗܵܐ ܡܲܣܪܚܝܼܬ݁ܘܿܢ. ܐܸܠܵܐ ܡܵܐ ܕܒܲܟ݂ܠܝܼܠܹ̈ܐ ܕܚܲܫܲܝ̈ܟ݁ܘܿܢ ܒܫܘܼܒ݂ܚܵܐ ܡܲܦܪܓ݂ܝܼܬ݁ܘܿܢ. ܒܥܵܘ ܘܐܸܬ݂ܟܲܫܲܦܘ ܡ̣ܢ ܡܵܪܵܐ ܕܟ݂ܠܵܐ ܕܢܸܚܘܿܢ ܢܲܦ̮̈ܫܵܬܲܢ: ܬܢܝܼ. ܘܫܲܒܲܚ ܒܵܗ̇.
ܕܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܲܩܝܵܡܬܵܐ ܘܡܸܬ݂ܩܪܸܐ ܚܲܕ݂ܬܵܐ ܒܲܡܫܝܼܚܵܐ ܕܐܲܦ̣ܢܝܼ ܠܥܵܢܹ̈ܗ.
ܐܸܬ݂ܚܲܝܲܠܘ ܘܢܸܬ݂ܥܲܫܲܢ ܠܸܒ݁ܟ݂ܘܿܢ: ܐܸܙܕܲܗ̄ܪܘ ܘܠܵܐ ܬܸܚܛܘܿܢ. ܕܨܘܼܪܬܵܐ. ܠܵܐ ܬܸܕ݂ܚܠܘܼܢ ܡ̣ܢ ܐܲܝܠܹܝܢ ܕܩܵܛ̇ܠܝܼܢ ܦܲܓ݂ܪܵܐ. ܢܲܦ̮ܫܵܐ ܕܹܝܢ ܠܵܐ ܡܸܫܟ݁ܚܝܼܢ ܠܡܸܩܛܲܠ. ܐܵܦܸܢ ܫܵܠܚ̇ܝܼܬ݁ܘܿܢ ܢܲܚܬܲܝ̈ܟ݁ܘܿܢ ܗܵܢ݁ܘܿܢ ܒܲܪ̈ܵܝܹܐ. ܐܸܠܵܐ ܠܵܐ ܬܸܫܠ̱ܚܘܼܢ ܐܸܣܛܲܠܟ݂ܘܿܢ ܓܵܘܵܝܬܵܐ ܥܡܝܼܕܹ̈ܐ. ܐܸܢ ܕܹܝܢ ܠܗܵܢܵܐ ܙܲܝܢܵܐ ܟܲܣܝܵܐ ܠܒ݂ܝܼܫܝܼܬ݁ܘܿܢ. ܡܲܚܫܘܼܠܵܐ ܕܢܸܣܝܘܿܢܹ̈ܐ ܣܲܓ݁ܝܼܐܹ̈ܐ ܠܵܐ ܢܸܚܣܲܢܟ݂ܘܿܢ. ܝܵܕ݂ܥ̇ܝܼܬ݁ܘܿܢ ܗ݇ܘ̣ ܐܲܝܠܹܝܢ ܡܸܠܹ̈ܐ ܫ̣ܡܲܥܬ݁ܘܿܢ. ܝܵܕ݂ܥ̇ܝܼܬ݁ܘܿܢ ܗ݇ܘ̣ ܕܡ̣ܢ ܕܸܒ݂ܚܵܐ ܚܲܝܵܐ ܐܸܟܲܠ̣ܬ݁ܘܿܢ. ܐܸܙܕܲܗ̄ܪܘ ܡ̣ܢ ܒܝܼܫܵܐ ܕܕܲܠܡܵܐ ܢܲܫܪܲܥܟ݂ܘܿܢ ܐܲܝܟܼ ܕܐܵܦ ܠܐܵܕ݂ܵܡ. ܘܢܘܼܟ݂ܪ̈ܵܝܹܐ ܢܸܥܒܸ݁ܕ݂ܟ݂ܘܿܢ ܠܗܵܝ݁ ܡܲܠܟ݁ܘܼܬ݂ܵܐ ܫܒ݂ܝܼܚܬܵܐ. ܠܗܵܘ̇ ܓܹܝܪ ܢܲܟ݂ܪܝܼ ܡ̣ܢ ܦܲܪܕܲܝܣܵܐ. ܘܠܲܢ ܬܘܼܒ݂ ܨܵܒܹܐ ܠܲܡܢܲܟ݂ܪܵܝܘܼ. ܘܥܲܠ ܗܵܕܹܐ ܓܥܵܘ ܥܲܡܲܢ ܠܘܵܬ݂ ܡܫܝܼܚܵܐ. ܕܲܒ݂ܪܘܼܚܹܗ ܩܲܕܝܼܫܵܐ ܢܫܲܪܲܪ ܢܲܦ̮̈ܫܵܬ݂ܵܐ ܕܟ݂ܠܲܢ. ܬܢܝܼ. ܫܲܒܲܚ. ܒܵܗ̇.
ܥܪܘܼܒ݂ܬܵܐ ܕܬܲܪܬܹ݁ܝܢ ܕܲܩܝܵܡܬܵܐ ܒܠܵܟ݂ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ݂ܠܙܒܲܢ. ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܕܒܲܩܝܵܡܬܹ݁ܗ ܐܲܩ̣ܢܝܼ ܠܘܼܒܵܒ݂ܵܐ ܠܓܸܢܣܵܐ ܕܡܵܝܘܿܬܹ̈ܐ: ܬܢܝܼ. ܫܲܒܲܚ ܒܵܗ̇.
ܕܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܲܩܝܵܡܬܵܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ: ܕܲܢܚܵܘܸܐ ܓܲܢ݇ܒܵܪܘܼܬܹܗ. ܕܨܘܼܪܬܵܐ. ܕܲܡܫܝܼܚܵܐ ܡ̣ܝܼܬ݂ ܥܲܠ ܐܲܦܲܝ̈ ܚܛܵܗܲܝ̈ܢ ܐܲܝܟܲܢܵܐ ܕܲܟ݂ܬ݂ܝܼܒ݂. ܚܢܲܢ ܕܹܝܢ ܡܲܟ݂ܪܙܝܼܢܲܢ ܡܫܝܼܚܵܐ ܟܲܕ݂ ܙܩܝܼܦ. ܡܫܝܼܚܵܐ ܐܸܨܛܠܸܒ݂ ܘܡ̣ܝܼܬ݂ ܘܐܸܬ݂ܩܒܲܪ. ܘܩ̣ܵܡ ܘܐܸܬ݂ܢܲܚܲܡ ܡܲܠܟܵܐ ܪܲܒܵܐ ܕܬܸܫܒ݁ܘܿܚܬܵܐ. ܘܲܣ̣ܠܸܩ ܠܲܫܡܲܝܵܐ ܘܐܲܡ̣ܠܸܟܼ ܠܥܸܠ ܡ̣ܢ ܟܠ. ܘܲܥܬ݂ܝܼܕ݂ ܕܢܹܐܬܸܐ ܕܲܢܕ݂ܘܼܢ ܠܚܲܝܹ̈ܐ ܐܵܦ ܠܡܝܼܬܹ̈ܐ: ܬܢܝܼ. ܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܲܩܝܵܡܬܵܐ ܒܣܵܗܕܹ̈ܐ ܒܪ̈ܝܼܟܹܐ.
ܘܒܹܗ̤ܘ ܢܸܚܕܸܐ ܠܸܒܲܢ: ܡ̣ܚܵܐ ܠܲܒ݂ܥܸܠܕܒ݂ܵܒ݂ܵܘ̈ܗܝ ܠܒܸܣܬ݁ܪܹܗ. ܨܠܝܼܒܹܗ ܕܲܡܫܝܼܚܵܐ ܩܲܛ̣ܠܵܗ̇ ܠܲܚܛܝܼܬ݂ܵܐ ܕܩܸܛܠܲܬ̤ ܠܲܟ݂ܝܵܢܲܢ. ܘܲܬ݂ܗܲܪܘ ܟܸܢܫܹ̈ܐ ܕܚܲܙܵܝܹ̈ܐ. ܒܙܵܟ݂ܘܼܬ݂ܵܐ ܕܲܒ݂ܪܹܫ ܩܲܝܣܵܐ. ܕܲܙ̣ܟ݂ܵܐ ܠܲܬ݂ܪܹܝܢ ܚܲܣܝܼܢܝܼ̈ܢ. ܓܲܒ݂ܪܵܐ ܕܐܸܬ݁ܬ݁ܠܝܼ ܒܲܙܩܝܼܦܵܐ. ܠܣܵܛܵܢܵܐ ܘܡܵܘܬܵܐ ܡܚܲܒ݁ܠܵܢܵܐ. ܬܢܝܼ. ܫܲܒܲܚ. ܒܵܗ̇.
ܕܘܼܟ݂ܪܵܢܵܐ ܕܡܵܪܝ ܓܝܼܘܲܪܓܝܼܣ ܣܵܗܕܵܐ. ܒܣܵܗܕܹ̈ܐ ܒܪ̈ܝܼܟܹܐ.
ܬܵܘ ܢܫܲܒܲܚ ܠܡܵܪܝܵܐ: ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ. ܒܡܸ̈ܠܹܐ ܕܬܸܫ̈ܒ݁ܚܵܬ݂ܵܐ. ܙܥܘܿܪܹ̈ܐ ܥܲܡ ܪ̈ܵܘܪ̱ܒܹܐ. ܟܠܲܢ ܒܕܸܚܠ̱ܬ݂ܵܐ ܢܝܲܩܪܝܼܘܗܝ ܚܦܝܼܛܵܐܝܼܬ݂ ܠܝܵܘܡܵܐ ܕܕ݂ܘܼܟ݂ܪܵܢܹܗ. ܕܣܵܗܕܵܐ ܙܲܗܝܵܐ ܘܩܲܕܝܼܫܵܐ. ܡܵܪܝ ܓܝܼܘܲܪܓܝܼܣ ܢܲܨܝܼܚܵܐ. ܕܲܗܘ̤ܵܐ ܕܸܒ݂ܚܵܐ ܠܐܲܠܵܗܵܐ. ܘܩܘܼܪܒܵܢܵܐ ܕܲܟ݂ܝܵܐ ܕܠܵܐ ܡܘܼܡ. ܒܲܨܠܘܿܬܹܗ ܢܸܗܘܘܿܢ ܥܠܲܝܢ ܪ̈ܲܚܡܹܐ: ܬܢܝܼ. ܫܲܒܲܚ. ܒܩܵܠ. ܗ̇ܘ ܕܒ݂ܐܝܼܬ݂ܘܼܬ݂ܹܗ. ܬܸܓ݂ܡܹ̈ܐ ܘܛܲܟ݂ܣܹ̈ܐ ܕܪ̈ܘܼܚܵܢܹܐ: ܥܲܡܗܘܿܢ ܕܟ݂ܵܗܢܹ̈ܐ ܒܥܹܕ݁ܬܵܐ ܗܵܐ ܙܵܡ̇ܪܝܼܢ ܬܸܫܒ݁ܘܿܚܬܵܐ ܒܕ݂ܘܼܟ݂ܪܵܢ ܣܵܗܕܵܐ ܩܲܕ݁ܝܼܫܵܐ: ܡܵܪܝ ܓܝܼܘܲܪܓܝܼܣ ܕܲܢ̣ܨܲܚ ܘܲܙ̣ܟ݂ܵܐ ܘܐܸܬ݂ܟܲܠܲܠ܀ ܘܣܲܝܒܲܪ ܚܲܫܹ̈ܐ ܘܐܘܼܠܨܵܢܹ̈ܐ: ܢܘܼܪܵܐ ܘܣܲܝܦܵܐ ܘܲܪܓ݂ܘܼܡܝܵܐ. ܘܫܸܢܕܹ̈ܐ ܕܲܙܢܝܼ̈ܢ ܙܢܝܼ̈ܢ: ܡܲܣܒ̇ܠܝܼܢ ܗ̄ܘ̣ܵܘ ܠܹܗ ܪ̈ܵܕ݂ܘܿܦܹܐ. ܘܐܲܒ݂ܗܸܬ݂ ܠܡܲܠܟܵܐ ܪܲܫܝܼܥܵܐ: ܕܪܵܕܹܦ ܗ݇ܘ̣ܵܐ ܠܥܲܒ݂ܕܹ̈ܐ ܛܵܒܹ̈ܐ. ܘܒܲܣܲܪ ܠܐܝܼܩܵܪ ܫܘܼܠܛܵܢܹܗ: ܐܵܦ ܠܐܲܠܵܗܹ̈ܐ ܕܣܵܓܹܕ݂ ܗ݇ܘ̣ܵܐ. ܙܝܼܘܿܣ ܘܐܵܦܲܠܘܿ ܘܐܲܪܛܹܡܝܼܣ: ܥܒ݂ܵܕ݂ ܐܝܼ̈ܕܲܝܵܐ ܕܒܲܪܢܵܫܵܐ: ܘܲܩ̣ܥܵܐ ܓܲܢ݇ܒܵܪ ܚܲܝܠܵܐ ܡܵܪܝ ܓܝܼܘܲܪܓܝܼܣ: ܘܐܸܡܲܪ ܠܪܵܘܪ̈ܒ݂ܵܢܲܝ ܡܲܠܟܵܐ. ܕܠܵܐ ܠܲܡ ܬܸܣܓ݁ܕ݂ܘܼܢ ܠܲܦܬܲܟ݂ܪܹ̈ܐ: ܓܠܝܼܦܹ̈ܐ ܡܪ̈ܲܟ݁ܒܲܝ ܠܐܘܼܡܵܢܹ̈ܐ. ܕܗܵܐ ܡܫܝܼܚܵܐ ܡܲܠܟܵܐ ܕܡܲܠܟܹ̈ܐ: ܘܡܵܪܵܐ ܕܟ݂ܠܗܘܿܢ ܐܲܠܵܗܹ̈ܐ. ܡܵܘܪܸܬ݂ ܠܟ݂ܠܗܘܿܢ ܕܵܚܠܵܘ̈ܗܝ: ܓܢܘܿܢܵܐ ܘܛܘܼܒ݂ܵܐ ܕܠܵܐ ܥܵܒܲܪ. ܘܡܲܠܒܸ݁ܫ ܫܘܼܒ݂ܚܵܐ ܒܡܲܠܟ݁ܘܼܬܹܗ: ܠܣܵܗܕܹ̈ܐ ܙܗܲܝ̈ܵܐ ܕܗܲܝܡܸܢ̣ܘ ܒܹܗ܀ ܘܟܲܕ݂ ܒܲܪܝܼܟܼ ܗ݇ܘ̣ܵܐ ܒܲܨܠܘܿܬ݂ܵܐ: ܩܕ݂ܵܡ ܡܵܪܹܗ ܘܡܸܬ݂ܟܲܫܲܦ ܗ݇ܘ̣ܵܐ ܘܒ݂ܵܥܹ̇ܐ ܘܐܵܡܲܪ. ܕܟ݂ܠ ܐܲܝܢܵܐ ܕܲܡܥܲܗܸܕ݂ ܠܹܗ: ܠܝܵܘܡܵܐ ܗܵܢܵܐ ܕܲܪܕ݂ܝܼܦܘܼܬ݂ܝ. ܐܲܥܒܲܪ ܡܸܢܹܗ ܒܛܲܝܒ݁ܘܼܬ݂ܵܟ݂: ܒܲܪܕ݂ܵܐ ܘܟܲܦܢܵܐ ܘܡܵܘܬܵܢܵܐ. ܘܩܲܡܨܵܐ ܘܙܵܚܠܵܐ ܘܨܲܪܨܘܼܪܵܐ: ܘܫܵܘܒܵܐ ܡܚܲܒܸ݁ܠ ܚܲܩ̈ܠܵܬ݂ܵܐ. ܘܕܸܚܠ̱ܬ݂ܵܐ ܕܠܲܝ̈ܠܵܘܵܬ݂ܵܐ: ܘܟ݂ܠ ܡܲܪ̈ܕܘܵܬ݂ܵܐ ܒܝܼ̈ܫܵܬ݂ܵܐ. ܘܢܲܛܲܪ ܠܟܼܠܵܗ̇ ܥܵܡܲܪܬܵܐ. ܒܚܲܝܠܵܐ ܪܲܒܵܐ ܕܐܲܠܵܗܘܼܬ݂ܵܟܼ ܀
ܕܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܲܩܝܵܡܬܵܐ ܒܐ݇ܪܵܙܵܐ ܪܲܒܵܐ.
ܐܲܢ݇ܬ݁ܘܼ ܦܪܲܩ̣ܬܵܢ ܡ̣ܢ ܣܵܢܐܲܝ̈ܢ: ܘܲܦܪܲܩ̣ܬܵܢ ܡܵܪܝܵܐ ܐܲܠܵܗܵܐ ܕܩܘܼܫܬܵܐ: ܕܨܘܼܪܬܵܐ. ܐܲܒ݂ܗܸܬ݂ ܐܸܢܘܿܢ ܓܲܠܝܵܐܝܼܬ݂ ܒܲܩܢܘܿܡܹܗ. ܗܵܘ̇ ܕܐܲܚܼܒ݂ܲܢ ܘܝܲܗ̣݇ܒ݂ ܢܲܦ̮ܫܹܗ ܚܠܵܦܲܝܢ. ܝܼܫܘܿܥ ܡܲܠܟܲܢ ܙܲܟܵܝܵܐ ܕܐܸܬ݂ܵܐ ܘܦܲܪܩܲܢ ܒܲܨܠܝܼܒܹܗ. ܘܒܲܛܸܠ̣ ܫܘܼܠܛܵܢܹܗ ܕܡܵܘܬܵܐ. ܕܐܲܚܝܼܕ݂ ܗ݇ܘ̣ܵܐ ܠܲܢ ܒܲܚܛܵܗܲܝ̈ܢ. ܘܲܠܣܵܛܵܢܵܐ ܘܲܠܚܲܝܠܹܗ ܐܲܒ݂ܗܸܬ݂ ܐܸܢܘܿܢ ܓܲܠܝܵܐܝܼܬ݂. ܒܵܥܹܝ̇ܢܲܢ ܡܸܢܵܟܼ ܢܲܛܲܪ ܠܲܢ ܒܲܚܢܵܢܵܟܼ. ܘܐܲܫܘܵܐ ܠܟ݂ܠܲܢ ܠܡܵܘܗܲܒ݂ܬ݂ܵܐ ܕܚܝܼܠܬܵܐ ܕܐ݇ܪ̈ܵܙܲܝܟ ܩܲܕܝܼܫܹ̈ܐ. ܒܛܲܝܒ݁ܘܼܬ݂ܵܟܼ ܡܵܪܝ ܝܲܗ̣݇ܒ݂ܬ݁ ܠܲܢ ܡܵܘܗܲܒ݂ܬ݂ܵܐ. ܠܚܘܼܣܵܝܵܐ ܕܚܵܘܒܲܝ̈ܢ ܘܲܠܦܘܼܪܩܵܢܵܐ ܕܢܲܦ̮̈ܫܵܬܲܢ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܐܲܪܒܲܥ ܕܲܩܝܵܡܬܵܐ ܒܡܵܪܵܐ ܕܟ݂ܠܵܐ.
ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ: ܥܲܠ ܕܠܵܐ ܢ̣ܛܲܪ ܩܝܵܡܹܗ ܕܐܲܠܵܗܵܐ. ܓܸܢܣܵܐ ܕܐ݇ܢܵܫܵܐ ܚܲܝܵܒܼ ܗ̣݇ܘܵܐ. ܕܝܼܢܵܐ ܕܡܵܘܬܵܐ ܘܲܕ݂ܠܵܘܛܬ݂ܵܐ. ܡܫܝܼܚܵܐ ܒܚܘܼܒܹܗ ܨ̣ܒ݂ܵܐ ܘܐܸܨܛܠܸܒܼ. ܕܲܢܚܲܪܲܪ ܟܠ ܡ̣ܢ ܠܵܘܛܬ݂ܵܐ. ܝܲܗ̣݇ܒܼ ܗ݇ܘ̣ܵܐ ܢܲܦ̮ܫܹܗ ܠܐܵܚܘܿܕ݂ܵܘ̈ܗܝ. ܝܲܡܵܐ ܕܪ̈ܲܚܡܹܐ ܕܠܵܐ ܡܸܬ݁ܬ݁ܟ̣ܝܼܠ. ܘܡܵܘܬܵܐ ܕܙܲܒܼܢܵܐ ܦܲܓ݂ܪܹܗ ܛ̣ܥܸܡ. ܘܲܫ̣ܪܵܐ ܠܡܵܘܬܵܐ ܘܲܠܠܵܘܛܬ݂ܵܐ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܚܲܡܫܵܐ ܕܲܩܝܵܡܬܵܐ (ܘܕ݂ܘܼܟ݂ܪܵܢܵܐ ܗ݇ܘ̣ ܕܡܵܪܝ ܐܲܕܲܝ ܫܠܝܼܚܵܐ) ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܕܘܼܟ݂ܪܵܢܵܐ ܕܛܲܝ̈ܒ݁ܘܵܬ݂ܵܟܼ ܣܲܓܝܼ̈ܐܵܬ݂ܵܐ܀ ܚܢܲܢ ܥܲܡܵܟܼ ܘܥܵܢ̈ܵܐ ܕܡܲܪܥܝܼܬ݂ܵܟܼ. ܕܨܘܼܪܬܵܐ. ܠܵܐ ܢ̤ܒ̣ܛܲܠ ܕܘܼܟ̣ܪܵܢܵܟܼ ܠܥܵܠܲܡ. ܥܕܲܡܵܐ ܠܡܘܼܠܵܝܵܐ ܕܙܲܒ݂ܢܹ̈ܐ. ܗܵܟܲܢܵܐ ܗ̤ܘܲܝܬ݁ܘܿܢ ܥܵܒ݂ܕ݁ܝܼܢ ܠܕ݂ܘܼܟ݂ܪܵܢܝ. ܕܘܼܟ̣ܪܵܢܹܗ ܕܲܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ. ܥܵܒ݂ܕܝܼܢܲܢ ܒܠܲܚܡܵܐ ܘܚܲܡܪܵܐ ܐܲܝܟܼ ܕܲܟ݂ܬ݂ܝܼܒ݂. ܢܩܲܕܸܫ ܦܲܓ݂ܪ̈ܲܝܢ ܘܲܢܕܲܟܸܐ ܬܹܐܪ̈ܵܬܲܢ. ܡ̣ܢ ܚܘܼܫܵܒܹ̈ܐ ܦܠܝܼܓܹ̈ܐ ܘܲܢܟ݂ܝܼܠܹ̈ܐ. ܕܠܵܐ ܢܸܬ݂ܩܲܛܪܲܓ݂ ܡܵܐ ܕܐܵܬܹ̇ܐ ܘܕ݂ܵܐܹ̇ܢ ܠܹܗ ܠܥܵܠܡܵܐ. ܬܢܝܼ. ܘܫܲܒܲܚ ܒܵܗ̇.
ܥܪܘ̣ܒ݂ܬܵܐ ܕܚܲܡܸܫ ܕܲܩܝܵܡܬܵܐ ܒܡܵܪܵܐ ܕܟ݂ܠܵܐ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ. ܗܝ̤ ܗܘ̤ܵܬ݂ ܠܪܹܫܹܗ ܕܒܸܢܝܵܢܵܐ. ܩܝܵܡܬܵܟܼ ܡܵܪܲܢ ܚܲܝܹ̈ܐ ܗܘ̤ܵܬ݂. ܠܓܸܢܣܵܐ ܕܐ݇ܢܵܫܵܐ ܕܐܲܒ݁ܝܼܕ݂ ܗ݇ܘ̣ܵܐ. ܕܩܵܡ̣ܘ ܘܐܸܬ݂ܢܲܚܲܡܘ ܘܚܲܝܹ̈ܐ ܩ̣ܢܵܘ. ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ. ܘܲܫܠܲـ̣ܚܘ ܘܲܫـ̣ܕ݂ܵܘ ܚܲܢܦܘܼܬ݂ܵܐ. ܘܛܘܼܥܝܲܝ ܟܠܵܗ̇ ܕܲܦܬܲܟ̣ܪܹ̈ܐ. ܘܲܒ݂ܪܲܟ݂ܘ ܘܲܣ̣ܓܸܕ݂ܘ ܠܚܲܕ݂ ܐܝܼܬ݂ܝܵܐ. ܕܒܲܒ݂ܪܹܗ ܚܲܝܵܐ ܦـ̣ܪܲܩ ܥܵܠܡܹ̈ܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܸܫܬܵܐ ܕܲܩܝܵܡܬܵܐ ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܬܵܘ ܢܫܲܒܲܚ ܠܡܵܪܝܵܐ: ܠܐܲܝܠܹܝܢ ܕܲܬ݂ܪܝܼܨܝܼܢ ܒܠܸܒ݁ܗܘܿܢ. ܕܨܘܼܪܬܵܐ. ܗܵܢܵܘ ܠܲܚܡܵܐ ܕܝܲܗ̣݇ܒ݂ ܡܵܪܝܵܐ ܠܡܹܐܟܲܠ. ܗܵܢܵܐ ܐ݇ܪܵܙܵܐ ܪܲܒ݁ܘܼ. ܗܵܐ ܐ݇ܪܵܙܵܐ ܫܡܲܝܵܢܵܐ ܛܲܝܸܒ݂ ܠܟ̣ܘܿܢ. ܗܵܘ̇ ܪܵܥܝܵܐ ܫܲܪܝܼܪܵܐ ܕܚܲܫ̣ ܥܲܠ ܐܲܦܲܝ̈ܢ. ܥܸܪ̈ܒܹܐ ܡܠܝܼܠܹ̈ܐ ܦܪ̈ܝܼܩܲܝ ܒܲܨܠܝܼܒ݂ܵܐ. ܩܪܘܿܒ݂ܘ ܘܐܸܬ݂ܒܲܣܲܡܘ ܒܐ݇ܪ̈ܵܙܹܐ ܡܲܚܝܵܢܹ̈ܐ. ܘܐܸܫܬܵܘ ܟܵܣܵܐ ܕܦܘܼܪܩܵܢܵܐ ܕܗܘ̤ ܡܫܝܼܚܵܐ ܡ̣ܙܲܓ݂ ܠܟ݂ܘܿܢ: ܬܢܝܼ. ܘܫܲܒܲܚ ܒܵܗ̇.
ܕܘܼܟ݂ܪܵܢܵܐ ܕܲܫܡܘܿܢܝܼ ܘܕܲܒ݂ܢܹ̈ܝܗ̇ ܒܡܲܢܘܼ ܣܵܦܹܩ̇.
ܕܲܢܨܝܼܒ݂ܝܼܢ ܒܒܲܝܬܹܗ ܕܡܵܪܝܵܐ: ܠܵܐ ܢܙܘܼܥܘܼܢ ܐܸܠܵܐ ܠܥܵܠܲܡ ܢܸܬ݁ܒ݂ܘܼܢ. ܐܲܝܟܼ ܕܲܒ݂ܦܲܪܕܲܝܣܵܐ ܒܓ݂ܵܘ ܥܹܕܲܬ݂ ܩܘܼܕ݂ܫܵܐ ܦܸܩܚܹ̈ܐ ܪ̈ܓ݂ܝܼܓܹܐ ܡܲܠܝܲܝ̈ ܥܘܼܕ݂ܪ̈ܵܢܹܐ. ܐܲܢ݇ܬ݁ܘܿܢ ܐܝܼܬܲܝܟ݁ܘܿܢ ܐܲܬ݂ܠܹܝܛܵܘ̈ܗܝ ܕܲܡܫܝܼܚܵܐ. ܘܲܒ݂ܝܲܕ݂ ܪܹܝܚܵܐ ܒܲܣܝܼܡܵܐ ܕܢܸܨܚܵܢܲܝ̈ܟ݁ܘܿܢ. ܟܠ ܕܘܼܟܵܐ ܗܵܐ ܒܟ݂ܘܿܢ ܡܸܬ݂ܩܲܕ݁ܫܵܐ ܕܲܚܠܵܦ ܡܫܝܼܚܵܐ ܐܸܬ݂ܩܲܛܲܠܬ݁ܘܿܢ. ܘܒܹܗ ܐܵܣܝܘܼܬ݂ܵܐ ܠܟ݂ܠ ܟܹܐܒ݂ܝܼ̈ܢ ܗܵܐ ܡܲܣܪ̱ܚܝܼܬ݁ܘܿܢ. ܐܸܠܵܐ ܡܵܐ ܕܒܲܟ݂ܠܝܼܠܹ̈ܐ ܕܚܲܫܲܝ̈ܟ݁ܘܿܢ ܒܫܘܼܒ݂ܚܵܐ ܡܲܦܪ̱ܓ݂ܝܼܬ݁ܘܿܢ. ܒܥܵܘ ܘܐܸܬ݂ܟܲܫܲܦܘ ܡ̣ܢ ܡܵܪܵܐ ܕܟ݂ܠܵܐ ܕܢܸܚܘܿܢ ܢܲܦ̮̈ܫܵܬܲܢ: ܬܢܝܼ. ܘܫܲܒܲܚ ܒܵܗ̇.
ܥܹܐܕ݂ܵܐ ܩܲܕ݁ܝܼܫܵܐ ܕܣܘܼܠܵܩܹܗ ܕܡܵܪܲܢ ܒܒܲܒ݂ܛܝܼܠܘܼܬܹܗ.
ܡܵܐ ܛܵܒ݂ ܘܡܵܐ ܫܲܦܝܼܪ. ܛܵܒ̣ ܡ̣ܢ ܟܠܗܘܿܢ ܡܲܫܟ݁ܢܵܘ̈ܗܝ ܕܝܲܥܩܘܿܒ̣. ܕܨܘܼܪܬܵܐ. ܗܵܘ̇ ܕܲܩ̣ܒܲܥ ܐܲܠܵܗܵܐ ܘܠܵܐ ܒܲܪܢܵܫܵܐ. ܡܲܫܟ݁ܢܵܐ ܕܠܵܐ ܙܵܐܲܥ̇. ܡܲܫܟ݁ܢܵܐ ܕܥܲܠ̣ ܠܹܗ ܦܵܪܘܿܩܲܢ ܠܵܐ ܕܵܡܹ̇ܐ. ܠܗܵܘ̇ ܕܲܥ̣ܒܲܕ݂ ܡܘܼܫܹܐ ܡ̣ܢ ܩܕ݂ܝܼܡ. ܕܪܲܒ݁ܟ݁ܘܼܡܪܹ̈ܐ ܒܲܠܚܘܿܕ݂ ܦܩܝܼܕ݂ ܗ݇ܘ̣ܵܐ ܕܢܸܥܘܿܠ ܠܹܗ. ܐܸܠܵܐ ܠܗܘܿܢ ܠܲܫܡܲܝ̈ܵܐ ܥܲܠ̣ ܕܲܢܟܲܗܸܢ. ܘܲܢܛܲܝܸܒ̣ ܡܲܠܟ݁ܘܼܬ݂ܵܐ ܕܠܵܐ ܥܵܒ݂̇ܪܵܐ. ܘܟܲܕ݂ ܗܘ̤ ܠܲܓ݂ܡܵܪ ܠܵܐ ܫܵܘܹ̇ܐ ܗ݇ܘ̣ܵܐ ܕܲܢܡܘܼܬ݂. ܢܲܦ̮ܫܹܗ ܝܲܗ̣݇ܒ̣ ܚܠܵܦܲܝܢ ܕܲܒ݂ܡܵܘܬܹ݁ܗ ܢܸܙܕܲܕܲܩ. ܒܪܝܼܟ̣ܘܼ ܕܢܲܣܒܹ݁ܗ ܡܸܢܲܢ ܘܲܥ̣ܡܲܪ ܒܹܗ ܘܥ̣ܲܒ݂ܕܹ݁ܗ ܪܹܫܵܐ ܘܡܵܪܵܐ ܘܕܲܝܵܢܵܐ ܐܝܼܬ݂ܝܵܐ ܕܥܵܡܲܪ ܒܲܡܪ̈ܵܘܡܹܐ. ܫܘܼܒ̣ܚܵܐ ܠܵܟ: ܬܢܝܼ܀ ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܒ݂ܵܬܲܪ ܣܘܼܠܵܩܵܐ ܒܣܵܗ̈ܕܹܐ ܒܪ̈ܝܼܟܹܐ.
ܡܵܪܝܵܐ ܐܲܡ̣ܠܸܟܼ ܬܕ݂ܘܼܨ ܐܲܪܥܵܐ: ܢܸܚܕ݁ܘܿܢ ܫܡܲܝ̈ܵܐ ܘܲܬ݁ܕ݂ܘܼܨ ܐܲܪܥܵܐ. ܡܵܪܲܢ ܡܫܝܼܚܵܐ ܐܲܡ̣ܠܸܟܼ ܘܐܸܬ݂ܝܲܩܲܪ. ܬܕ݂ܘܼܨ ܐܲܪܥܵܐ ܟܠܵܗ̇. ܟܝܵܢܵܐ ܫܝܼܛܵܐ ܕܒܹܝܬ݂ ܐܵܕ݂ܵܡ. ܗܵܐ ܡܙܲܝܚܝܼܢ ܠܹܗ ܪ̈ܘܼܚܵܢܹ̈ܐ. ܢܸܚܕܸܐ ܟܝܵܢܲܢ ܚܲܠܵܫܵܐ. ܒܒܲܪ ܓܸܢܣܲܢ ܕܲܗܘ̤ܵܐ ܡܲܠܟܵܐ. ܘܐܸܣܬܲܠܲܩ ܒܫܘܼܒ݂ܚܵܐ ܠܲܫܡܲܝܵܐ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܒ݂ܵܬܲܪ ܣܘܼܠܵܩܵܐ ܒܣܵܗܕܹ̈ܐ ܒܪ̈ܝܼܟܹܐ.
ܟܘܼܪܣܝܵܟܼ ܐܲܠܵܗܵܐ ܠܥܵܠܲܡ ܥܵܠܡܝܼܢ: ܐܲܠܵܗܵܐ ܝܼܬܸܒ̣ ܥܲܠ ܟܘܼܪܣܝܹܗ ܩܲܕ݁ܝܼܫܵܐ. ܥܲܠ ܟܘܼܪܣܲܝ ܫܘܼܒ̣ܚܵܐ ܝܼܬܸܒ݂ ܒܲܪ ܡܲܠܟܵܐ. ܘܫܲܝܸܢ ܠܥܸܠ ܘܲܠܬܲܚܬ݁. ܬܵܘ ܢܲܣܸܩ ܠܹܗ ܬܸܫܒ݁ܘܿܚܬܵܐ. ܕܪܲܡ̣ܪܸܡ ܠܓܸܢܣܲܢ ܒܣܘܼܠܵܩܹܗ. ܘܪܲܥ̣ܝܼ ܠܲܢ ܥܲܡ ܫܵܠܘܿܚܹܗ. ܕܪܲܓ݁ܝܼܙ ܗ݇ܘ̣ܵܐ ܡܸܛܠ ܥܵܘܠܲܢ. ܘܲܡ̣ܠܲܟܼ ܠܲܢ ܚܲܝܹ̈ܐ ܕܲܠܥܵܠܲܡ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܬܲܪܬܹܝܢ ܕܒ݂ܵܬܲܪ ܣܘܼܠܵܩܵܐ ܒܣܵܗ̈ܕܹܐ ܒܪ̈ܝܼܟܹܐ.
ܚܲܕ݂ܘܼܬ݂ܵܐ ܒܟ̣ܠܵܗ̇ ܐܲܪܥܵܐ܀ ܗܸܢ̣ܘܿܢ ܚ̣ܙܵܘ ܘܲܬ݂ܡܲܗܘ ܘܙܵܥ̣ܘ ܘܲܪܬܹܝܬ݂ܵܐ ܐܸܚܲܕ݂ ܐܸܢܘܿܢ. ܒܝܵܘܡܵܐ ܕܐܸܣܬܲܠܲܩ ܒܲܪ ܡܲܠܟܵܐ ܫܡܲܝܵܢܵܐ ܒܫܘܼܒ̣ܚܵܐ ܠܘܵܬ݂ ܐܲܒ̣ܘܼܗܝ. ܚܲܕ݂ܘܼܬ݂ܵܐ ܗ̤ܘܵܬ݂ ܒܲܫܡܲܝܵܐ. ܘܟܲܪܝܘܼܬ݂ܵܐ ܒܹܝܬ݂ ܬܲܠܡܝܼ̈ܕܹܐ. ܘܩܵܠ ܥܝܼܪܹ̈ܐ ܕܲܡܝܲܒ݁ܒ̣ܝܼܢ ܗ݇ܘ̣ܵܘ ܒܫܝܼܦܘܿܪܹ̈ܐ ܪ̈ܘܼܚܵܢܵܝܹܐ. ܕܲܦـ̣ܢܵܐ ܠܹܗ ܝܵܪܬܵܐ ܠܒܹܝܬ݂ ܐܲܒ̣ܘܼܗܝ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܦܲܢܛܹܩܘܼܣܛܹܐ ܒܲܒ݂ܪܝܼܟܼ ܚܲܝܠܵܐ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ: ܠܲܫܡܵܐ ܕܩܘܼܕ݂ܫܹܗ ܠܥܵܠܲܡ ܥܵܠܡܝܼܢ. ܬܵܘ ܢܫܲܒܲܚ ܠܡܵܪܝܵܐ. ܕܨܘܼܪܬܵܐ ܘܬܸܫ̈ܒ݁ܚܵܬܹܗ ܢܫܲܒܲܚ ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ ܒܒܲܝܬܹ݁ܗ ܕܡܵܪܝܵܐ. ܡܸܛܠ ܕܚܲܝܠܵܐ ܗ݇ܘ̣ ܕܐܲܠܵܗܵܐ. ܡܫܲܒ݁ܚܝܼܢܲܢ ܠܚܲܝܠܹܗ ܪܲܒܵܐ ܘܲܣܓ̣ܝܼܕ݂ܵܐ ܕܐܲܒ݂ܵܐ ܘܲܒ݂ܪܵܐ ܘܪܘܼܚ ܩܘܼܕ݂ܫܵܐ. ܫܘܼܠܛܵܢܹܗ ܡܵܘܕܹ݁ܝܢܲܢ ܘܲܡܩܲܠܣܝܼܢܲܢ. ܠܗܵܘ̇ ܕܠܵܐ ܡܸܣܬܲܝܲܟܼ. ܐܲܠܵܗܘܼܬ݂ܵܐ ܕܠܵܐ ܡܸܬ݁ܕܲܪܟܵܐ. ܬܠܝܼܬ݂ܵܝܘܼܬ݂ܵܐ ܚܲܕ݂ ܟܝܵܢܵܐ. ܡܲܡܠܸܟܼ ܫܘܼܠܛܵܢܹܗ. ܡ̣ܢ ܥܵܠܲܡ ܥܕܲܡܵܐ ܠܥܵܠܲܡ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ̣ܬܵܐ ܕܕܲܗܒ̣ܵܐ ܪܹܫ ܩܵܠܵܐ.
ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ: ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ. ܒܲܠܡܹܐܢܹܗ ܕܲܡܫܝܼܚܵܐ ܟܠܲܢ ܐܸܬ݂ܓܵܘܲܣܢܲܢ. ܫܲܝܢܵܐ ܘܲܫܠܵܡܵܐ ܢܲܓ݁ܝܼܪܵܐ ܒܪܘܼܚܵܐ ܕܩܘܼܕ݂ܫܵܐ ܐܸܫ̣ܟܲܚܢܲܢ: ܬܢܝܼ. ܘܫܲܒܲܚ ܒܵܗ̇܀
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܲܫܠܝܼܚܹ̈ܐ ܒܲܒ݂ܝܲܕ݂ ܫܠܵܡܵܐ.
ܐܲܬ݂ܩܸܢ ܐܲܪܥܵܐ ܥܲܠ ܡܲܬ݂ܩܢܹ̈ܝܗ̇. ܗܵܘ̇ ܕܐܝܼܬ݂ܵܘܗܝ ܡ̣ܢ ܩܕ݂ܵܡ ܥܵܠܡܹ̈ܐ. ܕܨܘܼܪܬܵܐ. ܡܵܪܝܵܐ ܥ̣ܒܲܕ݂ ܐܲܪܥܵܐ ܒܚܲܝܠܹܗ. ܘܐܲܬ݂ܩܸܢ ܬܹܒܹܝܠ ܒܚܸܟ݂ܡ̱ܬܹܗ. ܒܪܸܡܙܹܗ ܥ̣ܒܲܕ݂ ܒܪܝܼܬ݂ܵܐ ܟܠܵܗ̇ ܐܝܼܬ݂ܝܵܐ ܕܲܩܕ݂ܵܡ ܟܠ. ܘܠܲܚ̣ܡܵܗ̇ ܒܣܘܿܓ݂ܐܵܐ ܕܛܲܝܒ݁ܘܼܬܹܗ ܕܗ̤ܝ ܒܵܗ̇ ܬܹܐܠܲܦ ܥܠܵܘܗܝ. ܡܸܢܵܗ̇ ܥܲܒ݂ܕܵܗ̇ ܡܸܬ̣ܚܲܙܝܵܢܝܼܬ݂ܵܐ. ܡܢܵܬ݂ܵܐ ܐ݇ܚܪܹܬ݂ܵܐ ܡܸܬ݂ܝܲܕ݂ܥܵܢܝܼܬ݂ܵܐ. ܘܐܲܣ̣ܪܵܗ̇ ܠܟ̣ܠܵܗ̇ ܒܒܲܪܢܵܫܵܐ ܕܬ݂ܵܘܕܸ݁ܐ ܕܚܲܕ݂ܘܼ ܒ̣ܪܵܗ̇. ܕܲܒ݂ܝܲܕ݂ ܚܘܼܒܹܗ ܢܵܘܕܲܥ ܥܲܠ ܝܵܬܹܗ: ܬܢܝܼ. ܫܲܒܲܚ ܒܵܗ̇.
ܥܪܘܼܒ݂ܬܵܐ ܕܬܲܪܬܹܝܢ ܕܲܫܠܝܼܚܹ̈ܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܐܲܝܢܵܐ ܕܕܲܟܼ̈ܝܵܢ ܐܝܼܕ݂ܵܘ̈ܗܝ ܘܲܓ݂ܒܸܐ ܒܠܸܒܹ̇ܗ: ܠܵܐ ܝܵܡܹ̇ܐ ܒܢܲܦ̮ܫܹܗ ܒܕܲܓܵܠܘܼܬ݂ܵܐ ܘܠܵܐ ܝܵܡܹ̇ܐ ܒܢܸܟ݂ܠܵܐ. ܒܥܸܕܵܢܵܐ ܕܥܵܐܹ̇ܠ ܟܵܗܢܵܐ ܠܒܹܝܬ݂ ܩܘܼܕ݂ܫܵܐ. ܓܘܼܕܹ̈ܐ ܕܪ̈ܘܼܚܵܢܹܐ ܠܥܸܠ ܡܸܢܹܗ ܩܵܝ̈ܡܵܢ. ܘܚܵܝܪ̈ܵܢ ܒܹܗ ܒܟ݂ܵܗܢܵܐ ܕܩܵܨܹ̇ܐ ܘܲܡܦܲܠܸܓ݂. ܦܲܓ݂ܪܹܗ ܕܲܡܫܝܼܚܵܐ ܠܚܘܼܣܵܝܵܐ ܕܚܵܘܒܹ̈ܐ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܲܬ݂ܠܵܬ݂ܵܐ ܕܲܫܠܝܼܚܹ̈ܐ ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܬܵܘ ܢܫܲܒܲܚ ܠܡܵܪܝܵܐ܀ ܬܵܘ ܒܢܲܝ̈ܵܐ ܫܘܼܡܥܘܼܢܝ. ܙܥܘܿܪܹ̈ܐ ܥܲܡ ܪܵܘܪ̱̈ܒܹܐ. ܕܨܘܼܪܬܵܐ. ܬܵܘ ܢܹܐܙܲܠ ܢܨܲܠܸܐ ܩܕ݂ܵܡ ܡܵܪܝܵܐ. ܬܵܘ ܟܠܲܢ ܢܹܐܚܘܿܕ݂ ܓܵܘܣܵܐ ܒܲܨܠܘܿܬ݂ܵܐ. ܕܗ̤ܝ ܐܝܼܬܹܝܗ̇ ܩܠܝܼܕ݂ܵܐ ܕܓܲܙܵܐ ܫܡܲܝܵܢܵܐ. ܘܐܲܟܼܡܵܐ ܕܚܲܠ̈ܝܵܢ ܢܸܥ̈ܡܵܬ݂ܵܐ ܕܩܵܠܲܝ̈ܢ. ܗܵܟܲܢ ܢܸܗܘܘܿܢ ܕܘܼܒܵܪ̈ܲܝܢ ܩܕ݂ܵܡܵܘܗܝ. ܕܲܒ݂ܝܲܕ݂ ܡܸܠܹ̈ܐ ܘܒܲܥܒ݂ܵܕܹ̈ܐ. ܢܸܫܦܲܪ ܠܹܗ ܠܡܵܪܝܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܲܫܠܝܼܚܹ̈ܐ ܒܒܲܠܡܹܐܢܹܗ.
ܘܲܢܫܲܒ݁ܚܘܼܢ ܠܲܫܡܵܟܼ ܠܥܵܠܡܝܼܢ: ܢܫܲܒ݁ܚܘܼܢܵܟܼ ܠܥܵܠܲܡ. ܠܵܟܼ ܫܘܼܒ݂ܚܵܐ ܕܲܒ݂ܡܵܘܬܵܟܼ ܝܲܗ̣݇ܒ݂ܬ݁ ܠܲܢ ܦܲܓ݂ܪܵܟܼ ܘܲܕ݂ܡܵܟܼ. ܘܲܥ̣ܒܲܕ݁ܬ݁ ܠܲܢ ܣܲܒ݂ܪܵܐ ܘܦܘܼܪܩܵܢܵܐ ܒܡܹܐܬ݂ܝܼܬ݂ܵܟܼ ܕܲܠܘܵܬ݂ ܓܸܢܣܲܢ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܐܲܪܒܥܵܐ ܕܲܫܠܝܼܚܹ̈ܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ: ܐܲܢ݇ܬ݁ܘܼ ܦܪܲܩ̣ܬܵܢ ܡ̣ܢ ܣܵܢܐܲܝ̈ܢ. ܕܨܘܼܪܬܵܐ. ܡܲܢ ܠܵܐ ܢܸܕ݂ܚܲܠ ܠܵܟܼ ܡܲܠܟܵܐ ܕܥܵܠܡܹ̈ܐ. ܡܲܠܟ݁ܘܼܬܹܗ ܡܲܠܟ݁ܘܼܬ݂ ܥܵܠܲܡ ܘܫܘܼܠܛܵܢܹܗ ܠܕ݂ܵܪܕܵܪ̈ܝܼܢ. ܡܲܠܟܵܐ ܡܫܝܼܚܵܐ ܐܲܢ݇ܬ݁ܘܼ ܕܲܠܥܹܕܲܬ݂ ܩܘܼܕ݂ܫܵܐ ܒܲܕ݂ܡܵܟܼ ܝܲܩܝܼܪܵܐ ܦܪܲܩ̣ܬܵܗ̇ ܡ̣ܢ ܛܘܼܥܝܲܝ. ܗܲܒ݂ ܠܲܢ ܒܲܚܢܵܢܵܟܼ ܕܲܒ݂ܟ̣ܠܙܒܲܢ ܢܸܫܬ݁ܘܸܐ ܠܡܸܥܒܲܕ݂ ܨܸܒ݂ܝܵܢܵܟܼ. ܘܲܒ̣ܠܸܒܵܐ ܕܲܟ̣ܝܵܐ ܙܲܗܝܵܐܝܼܬ݂. ܩܘܼܪܒܵܢܵܐ ܢܩܲܪܸܒ̣ ܠܐܲܠܵܗܘܼܬ݂ܵܟܼ. ܘܥܲܡ ܟܸܢܫܹ̈ܐ ܕܡܲܠܲܐܟܹ̈ܐ. ܢܲܣܸܩ ܠܵܟܼ ܬܸܫܒ݁ܘܿܚܬܵܐ ܒܕܸܚ̱ܠܬ݂ܵܐ ܟܲܕ݂ ܐܵܡ̇ܪܝܼܢܲܢ. ܩܲܕ݁ܝܼܫ ܩܲܕ݁ܝܼܫ ܩܲܕ݁ܝܼܫܲܬ݁ ܡܵܪܝܵܐ ܐܲܠܵܗܵܐ ܦܵܪܘܿܩܲܢ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ̣ܬܵܐ ܕܐܲܪܒܲܥ ܕܲܫܠܝܼܚ̈ܐ ܒܠܵܟ̣ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ̣ܠܙܒܲܢ: ܘܲܒ̣ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܕܐܲܫ̣ܘܝܼ ܠܲܢ ܕܲܢܩܲܕܸ݁ܫ ܠܲܫܡܹܗ ܥܲܡ ܟܸܢܫܲܝ̈ ܪܵܘܡܵܐ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܚܲܡܫܵܐ ܕܲܫܠܝܼܚ̈ܐ ܒܲܒ̣ܝܲܕ݂ ܫܠܵܡܵܐ.
ܛܘܼܒܲܝܗܘܿܢ ܠܐܲܝܠܹܝܢ ܕܲܕ݂ܠܵܐ ܡܘܼܡ ܐܸܢܘܿܢ ܒܐܘܼܪܚܵܐ܀ ܕܘܼܢܘ ܠܝܲܬ݂ܡܹ̈ܐ ܘܲܠܒ݂ܵܝܫܹ̈ܐ. ܕܨܘܼܪܬܵܐ. ܠܵܐ ܬܸܗܘܘܿܢ ܕܵܝܢ̇ܝܼܢ ܒܡܲܣܲܒ݂ ܒܐܲܦܹ̈ܐ. ܘܠܵܐ ܢܸܦܘܿܩ ܛܠܘܼܡܝܵܐ ܡ̣ܢ ܦܘܼܡܟ̣ܘܿܢ. ܪ̈ܲܒܲܝ ܒܵܬܹ̈ܐ ܚܲܟ݁ܝܼܡܹ̈ܐ ܡܕܲܒ݁ܪ̈ܵܢܹܐ ܕܥܹܕ݁ܬܵܐ. ܦܲܪܢܸܣܘ ܥܘܼܬ݂ܪܵܐ ܕܛܲܝܒ݁ܘܼܬ݂ܵܐ ܕܐܸܬ݂ܗܲܝܡܲܢܬ݁ܘܿܢ ܥܠܵܘܗܝ. ܒܫܲܘܝܘܼ ܦܲܠܸܓ݂ܘ ܕܠܵܐ ܡܲܣܲܒ݂ ܒܐܲܦܹ̈ܐ. ܕܘܼܢܘ ܟܹܐܢܘܼܬ݂ܵܐ ܘܥܲܩܸܒ݂ܘ ܬܪܝܼܨܘܼܬ݂ܵܐ. ܘܲܗܘ̤ܵܘ ܕܵܡܹ̇ܝܢ ܠܥܲܒ݂ܕܹ̈ܐ ܕܲܡܣܲܟܹ݁ܝܢ ܠܡܵܪܗܘܿܢ. ܕܒܲܙܗܝܼܪܘܼܬ݂ܵܐ ܢܵܛ̇ܪܝܼܢ ܦܘܼܩܕܵܢܵܘ̈ܗܝ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ̣ܬܵܐ ܕܚܲܡܸܫ ܕܲܫܠܝܼܚܹ̈ܐ ܒܠܵܟ̣ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ̣ܠܙܒܲܢ: ܘܲܒ݂ܪܝܼܟ݂ܘ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܒܲܪ ܛܵܒ݂ܵܐ ܕܲܒ݂ܝܲܕ݂ ܕܒ݂ܝܼܚܘܼܬܹܗ ܦܲܪܩܹܗ ܠܲܟ݂ܝܵܢܲܢ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܸܫܬܵܐ ܕܲܫܠܝܼܚܹ̈ܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܫܡܲܥܘ ܗܵܕܹܐ ܟܠܟ̣ܘܿܢ ܥܲܡܡܹ̈ܐ: ܘܲܒ̣ܢܵܘ̈ܗܝ ܕܲܡܪܲܝܡܵܐ ܟܠܟ̣ܘܿܢ: ܢܵܘܣܸܦ ܥܠܲܝܟ݁ܘܿܢ ܡܵܪܝܵܐ. ܕܨܘܼܪܬܵܐ. ܐܲܚܹ̈ܐ ܩܲܕ݁ܝܼܫܹ̈ܐ ܘܲܡܗܲܝܡܢܹ̈ܐ ܒܝܼܫܘܿܥ ܡܫܝܼܚܵܐ. ܚܘܼܒܵܐ ܕܐܲܚܹ̈ܐ ܢܟܲܬܲܪ ܒܟ̣ܘܿܢ. ܐܲܚܹ̈ܐ ܕܒܲܡܫܝܼܚܵܐ ܗ݀ܘܲܝܬ݁ܘܿܢ ܒܲܥܡܵܕ݂ܵܐ. ܘܫܵܘܬܵܦܹ̈ܐ ܒܐ݇ܪܵܙܵܐ ܕܡܵܘܬܵܐ ܘܕܲܩܒ̣ܘܼܪܬܵܐ. ܥܪܘܿܩܘ ܡ̣ܢ ܟܵܦܘܿܪܹ̈ܐ ܘܐܲܪܚܸܩܘ ܡ̣ܢ ܚܲܢܦܹ̈ܐ. ܕܬܸܗܘܘܿܢ ܫܵܘܬܵܦܹ̈ܐ ܘܝܵܪ̈ܬܹ݁ܐ ܒܡܲܠܟ݁ܘܼܬ݂ܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܫܸܬ݂ ܕܲܫܠܝܼܚܹ̈ܐ ܒܚܲܕ݂ܘܼ ܚܲܝܠܵܐ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ: ܩܲܕ݁ܝܼܫ ܗ݇ܘ̣ ܘܲܕ݂ܚܝܼܠ ܫܡܹܗ. ܩܲܕ݁ܝܼܫܵܐ ܕܲܒ̣ܩܲܕ݁ܝܼܫܹ̈ܐ ܨܸܒ̣ܝܵܢܹܗ ܡܸܬ݁ܬ݁ܢܝܼܚ. ܚܲܣܵܐ ܡܵܪܝ ܣܲܟ݂ܠ̈ܘܵܬ݂ܵܐ ܘܲܚܛܵܗܹ̈ܐ ܕܥܲܒ݂ܕܲܝ̈ܟ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܫܲܒ̣ܥܵܐ ܕܲܫܠܝܼܚܹ̈ܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܐܲܝܢܵܐ ܕܕܲܟ̣̈ܝܵܢ ܐܝܼ̈ܕ݂ܵܘܗܝ ܘܲܓ݂ܒܸܐ ܒܠܸܒܹ݁ܗ܀ ܕܡܵܪܝܵܐ ܐܲܚܝܼܕ݂ ܒܐܝܼܕܹܗ. ܕܲܕ݂ܠܵܐ ܡܘܼܡ ܥܒ̣ܵܕ݂ܵܘ̈ܗܝ. ܕܨܘܼܪܬܵܐ. ܩܘܼܪܒܵܢܵܐ ܡܩܲܪܸܒ݂ ܠܐܲܠܵܗܵܐ. ܘܟ݂ܠܹܗ ܚܲܝܠܵܐ ܕܲܫܡܲܝܵܐ ܩܵܐܹ̇ܡ ܠܥܸܠ ܡܸܢܹܗ. ܟܵܗܢܵܐ ܡܵܐ ܕܥܵܐܹ̇ܠ ܩܕ݂ܵܡ ܡܲܕ݂ܒܲܚ ܩܘܼܕ݂ܫܵܐ. ܐܝܼܕ݂ܵܘ̈ܗܝ ܕܲܟ݂ܝܵܐܝܼܬ݂ ܦܵܫܹ̇ܛ ܠܲܫܡܲܝܵܐ. ܘܲܡܙܲܡܸܢ ܠܪܘܼܚܵܐ ܘܢܵܚ̇ܬܵܐ ܡ̣ܢ ܪܵܘܡܵܐ. ܘܲܡܩܲܕ݁ܫܵܐ ܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ̣ܬܵܐ ܕܫܘܼܠܵܡ ܫܵܒ̣ܘܿܥܵܐ ܕܲܫܠܝܼܚ̈ܐ ܘܕ݂ܘܼܟ̣ܪܵܢܵܐ ܗ݇ܘ̣ ܕܫܲܒ̣ܥܝܼܢ ܘܲܬ݂ܪܹܝܢ ܬܲܠܡܝܼܕܹ̈ܐ. ܒܥܲܕ݂ܠܵܐ ܬܲܝܬܹ݁ܝܢ (ܒܲܟܼܝܵܢܵܐ ܡܵܝܘܿܬ݂ܵܐ).
ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ: ܘܐܲܦܲܝ̈ܟ݁ܘܿܢ ܠܵܐ ܢܸܚܦܪ̈ܵܢ. ܒܕ݂ܘܼܒܵܪܹ̈ܐ ܕܡܲܠܲܐܟܹ̈ܐ ܛܲـ̣ܢܬ݁ܘܿܢ ܠܲܡܕܲܡܵܝܘܼ ܫܠܝܼܚܹ̈ܐ ܩܲܕ݁ܝܼܫܹ̈ܐ. ܘܥܲܡ ܪ̈ܘܼܚܹܐ ܒܝܼ̈ܫܵܬ݂ܵܐ ܐܵܦ ܡܲܟ݁ܝܵܢ̈ܝܵܬ݂ܵܐ ܕܲܪܵܐ ܘܬܲܟ̣ܬ݁ܘܼܫܵܐ ܗܘ̤ܵܐ ܠܟ̣ܘܿܢ. ܘܲܥܠܲܝܗܹܝܢ ܒܚܲܝܠܵܐ ܐܸܬ݂ܓܲܢ݇ܒܲܪܬ݁ܘܿܢ. ܘܥܲܠ ܗܵܕ݂ ܒܥܹܐܕ݂ܵܐ ܦܨܝܼܚܵܐ ܕܕ݂ܘܼܟ݂ܪܵܢܟ݂ܘܿܢ. ܗܵܐ ܡܝܲܒ݁ܒ݂ܝܼܢܲܢ ܟܲܕ݂ ܐܵܡ̇ܪܝܼܢܲܢ. ܕܬܸܒ݂ܥܘܿܢ ܪ̈ܲܚܡܹܐ ܥܲܠ ܢܲܦ̮̈ܫܵܬܲܢ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܫܘܼܠܵܡ ܫܵܒ݂ܘܿܥܵܐ ܕܲܫܠܝܼܚܹ̈ܐ ܘܩܲܕ݂ܡܵܝܵܐ ܗ݇ܘ̣ ܕܩܲܝܛܵܐ ܘܡܸܬܼܩܪܸܐ ܢܘܼܣܲܪܕ݁ܐܹܝܠ ܘܡܸܬ݂ܦܲܫܲܩ ܥܹܐܕܹܗ ܕܐܲܠܵܗܵܐ. ܘܕ݂ܘܼܟ݂ܪܵܢܵܐ ܗ݇ܘ̣ ܕܲܬ݂ܪܸܥܣܲܪ ܫܠܝܼܚܹ̈ܐ ܪܹܫܩܵܠܵܐ.
ܪܵܡ ܒܟ݂ܠܵܗ̇ ܐܲܪܥܵܐ: ܒܐܝܼܩܵܪܵܐ ܘܲܒ݂ܫܘܼܒ݂ܚܵܐ ܐܲܥ̣ܛܸܦܬܵܝܗܝ. ܕܨܘܼܪܬܵܐ . ܡܪܲܝܡܵܐ ܘܩܲܕ݁ܝܼܫ ܡܲܫ̱ܪܝܹܗ: ܗܵܘ̇ ܕܒܹܗ ܐܝܼܬ݂ ܠܲܢ ܦܵܪܹܗ݇ܣܝܼܵܐ. ܡܲܕ݂ܒ݁ܚܵܟܼ ܡܵܪܝܵܐ ܚܲܝܠ̱ܬ݂ܵܢܵܐ ܒܬܸܫܒ݁ܘܿܚܬܵܐ ܪܲܡܪܸܡ̣ܬܵܝܗܝ. ܘܲܠܫܲܪܝܼܪܹ̈ܐ ܕܲܒ̣ܥܹܕ݁ܬܵܟܼ ܟܲܠܸܠ̣ܬ݁ ܐܸܢܘܿܢ ܒܐܝܼܩܵܪܵܐ. ܫܲܝܢܵܐ ܘܲܫܠܵܡܵܐ ܢܲܓ݁ܝܼܪܵܐ. ܢܸܣܓܸ݁ܐ ܠܹܗ ܠܥܲܡܵܟ݂ ܕܝܼܠܵܟܼ ܡܵܪܝܵܐ: ܬܢܝܼ. ܫܲܒܲܚ. ܒܩܵܠ ܒܕܸܚ̱ܠܬ݂ܵܐ ܘܲܒ݂ܚܲܕ݂ܘܼܬ݂ܵܐ. ܐ. ܐܵܘܕܵܘ ܐܲܚܲܝ̈ ܘܫܲܒܲܚܘ ܠܐܲܠܵܗ ܟܠܵܐ. ܒܕ݂ܘܼܟ݂ܪܵܢ ܫܠܝܼܚܹ̈ܐ ܘܐܲܒ݂ܵܗ̈ܵܬ݂ܵܐ ܬܹܒܹܝܠܵܝܹ̈ܐ. ܡܓ݂ܵܘ̈ܝܲܝ ܒܐ݇ܪ̈ܵܙܹܐ ܫܡܲܝܵܢܹ̈ܐ܀ ܒ. ܒܚܝܼܪܹ̈ܐ ܬܠܵܬ݂ܡܐܵܐ ܘܲܬ݂ܡܵܢܬܲܥܣܲܪ. ܕܲܓ݂ܒ݂ܵܐ ܐܸܢܘܿܢ ܨܸܒ݂ܝܵܢ ܟܲܣܝܵܐ. ܠܡܸܓ݂ܠܵܐ ܫܪܵܪܹܗ ܒܓ̣ܵܘ ܥܵܠܡܵܐ܀ ܓ. ܓܲܢ݇ܒܵܪܵܐܝܼܬ݂ ܩܵܡ̣ܘ ܒܐܵܓ݂ܘܿܢܵܐ. ܘܲܚ̣ܣܲܢܘ ܘܲܙ̣ܟ݂ܵܘ ܠܟ݂ܠ ܗܹܪܹ̈ܣܝܼܵܣ܀ ܕ. ܕܲܟ݁ܝܘܼܗ̇ ܠܥܹܕ݁ܬܵܐ ܡ̣ܢ ܕܘܼܓ݂ܡܹܛܹ̈ܐ. ܣܪ̈ܝܼܩܹܐ ܘܛܲܡ̈ܐܹܐ ܕܣܝܼܡܘܿܢ ܘܡܲܪܩܝܘܿܢ. ܘܡܵܐܢܵܐ ܕܛܵܥܝܘܼܬ݂ܵܐ ܡܵܐܢܝܼ܀ ܗ. ܗܲܝܡܵܢܘܼܬ݂ܵܐ ܐܵܘܚܸܕ݂ ܐܸܢܘܿܢ. ܡܲܠܟܵܐ ܕܥܲܠ ܟܠ ܒܲܕ݂ܡܘܼܬ݂ ܙܲܝܢܵܐ܀ ܘ. ܘܒ̣ܵܗ̇ ܐܸܬ݂ܟܲܬܲܫܘ ܥܲܡ ܟܠ ܕܸܚ̈ܠܵܢ. ܘܡܲܟܸ݁ܟ݂ܘ ܪܵܘܡܵܐ ܕܟ݂ܠܡܵܐ ܕܐܸܬ݁ܬ݁ܪܝܼܡ. ܠܘܼܩܒܲܠ ܝܼܕܲܥܬܹܗ ܕܡܵܪܝܵܐ܀ ܙ. ܙܵܥـ̣ܘ ܡ̣ܢ ܩܵܠܵܐ ܕܛܲܢܵܢܘܼܬ݂ܗܘܿܢ. ܫܹܐܕܹ̈ܐ ܛܪ̈ܘܼܢܹܐ ܘܐ݇ܢܵܫܵܐ ܒܝܼ̈ܫܹܐ܀ ܚ. ܚܲܝܸܒ݂ܘ ܪܘܼܫܥܵܐ ܕܒܹܝܬ݂ ܐܵܪܝܼܘܿܣ. ܘܩܲܦܲܚ̣ܘ ܪܘܼܥܵܐ (ܗ: ܕ: ܒܸܕ݂ܝܹ̈ܐ) ܕܐܵܦܘܿܠܝܼܢܵܪܝܼܣ. ܥܲܛ̈ܠܹܐ ܕܲܛـ̣ܥܵܘ ܡ̣ܢ ܐܘܼܪܚܵܐ܀ ܛ. ܛܪܲܕ݂ܘ ܡ̣ܢ ܓܵܘܵܗ̇ ܠܫܸܚܪ̈ܵܘܗܝ ܕܦܵܘܠܹܐ. ܘܢܲܟ݂ܪܝܼܘ ܠܦܘܼܚܪ̈ܵܘܗܝ ܕܣܹܒ݂ܵܠܝܼܘܿܣ܀ ܝ. ܝܲܗ̣݇ܒ݂ܘ ܒܘܼܝܵܐܵܐ ܠܐܲܪ̈ܬܵܕ݁ܘܿܟ݁ܣܹܐ. ܘܒܸܗܬܲܬ݂ ܐܲܦܹ̈ܐ ܠܗܲܪ̈ܵܛܝܼܩܹܐ. ܒܐܲܝܠܹܝܢ ܕܲܣ̣ܥܲܪܘ ܚܠܵܦ ܫܪܵܪܵܐ܀ ܟ. ܟܲܦـ̣ܘ ܠܗܘܿܢ ܪܹܫܵܐ ܦܠܝܼ̈ܓܼܹܐ ܟܠܗܘܿܢ. ܘܟܲܕ݂ ܠܵܐ ܨܵܒܹ̇ܝܢ ܫ̣ܠܸܡܘ ܠܲܫܪܵܪܗܘܿܢ܀ ܠ. ܠܵܐ ܡܨܸܐ ܦܘܼܡܵܐ ܠܡܸܬ݂ܢܵܐ ܫܲܪܒܵܐ ܕܢܸܨܚܵܢܲܝ̈ܗܘܿܢ. ܐܵܦܠܵܐ ܡܲܡܪܲܚ ܗܵܘܢܵܐ ܟܲܣܝܵܐ. ܠܡܸܚܙܲܩ ܒܲܫܒ݂ܝܼܠ ܥܲܡܠܲܝ̈ܗܘܿܢ܀ ܡ. ܡܲܒ݁ܘܼܥ ܚܲܝܹ̈ܐ ܦܬܲܚ̣ܘ ܗ݇ܘ̣ܵܘ ܩܘܼܕ݂ܡܲܝܢ. ܒܝܲܕ݂ ܝܘܼܠܦܵܢܹ̈ܐ ܕܐܲܣܪܲܚ̣ܘ ܨܹܐܕܲܝܢ܀ ܢܢ. ܢܘܼܗܪܵܐ ܘܡܸܠܚܵܐ ܗܘ̤ܵܘ ܢܲܨܝܼܚܹ̈ܐ. ܘܐܲܢ̣ܗܲܪܘ ܥܲܛ̈ܠܹܐ ܘܬܲܪܸܨܘ ܡܥܲܩܡܹ̈ܐ. ܘܡܲܕܸܟ̣ܘ ܛܲܥܡܵܐ ܕܦܲܟ݁ܝܼܗܹ̈ܐ܀ ܣ. ܣܵܡ̣ܘ ܩܵܢܘܿܢܹ̈ܐ ܕܠܵܐ ܡܸܬ݂ܥܲܒ݂ܪܝܼܢ. ܘܬܲܚܸܡ̣ܘ ܛܲܟ݂ܣܹ̈ܐ ܕܠܵܐ ܡܸܬ݂ܚܲܠܦܝܼܢ܀ ܥ. ܥܝܵܪܬܵܐ ܕܚܲܫܹ̈ܐ ܕܲܣܒܲـ̣ܠܘ ܚܠܝܼܨܹ̈ܐ. ܡ̣ܢ ܡܲܪ̈ܵܚܹܐ ܕܒܹܝܬ݂ ܐܵܪܝܼܘܿܣ. ܬܲܒ݂ܥ̣ܘܼܗ̇ ܟܹܐܢܹ̈ܐ ܒܣܲܝܦܵܐ ܕܡܸܠܲܬ݂ ܐܲܠܵܗܵܐ܀ ܦ. ܦܐܸܐ ܗ݇ܘ̣ܵܐ ܩܵܠܗܘܿܢ ܟܲܕ݂ ܬܵܢܹ̇ܝܢ ܗ݇ܘ̣ܵܘ. ܗܲܝܡܵܢܘܼܬ݂ܵܐ ܬܪܝܼܨܲܬ݂ ܫܘܼܒ̣ܚܵܐ܀ ܨ. ܨܸܒ̣ܝܵܢ ܐܲܒ݂ܵܐ ܒܗܘܿܢ ܐܸܫܬܲܡܠܝܼ. ܘܲܫܪܵܪ ܝܲܠܕܹ݁ܗ ܒܗܘܿܢ ܐܸܬ݂ܚܵܘܝܼ. ܘܚܹܝܠ ܪܘܼܚܩܘܼܕ݂ܫܵܐ ܒܗܘܿܢ ܐܸܬ݂ܓ݁ܠܝܼ܀ ܩ. ܩܕ݂ܵܡ ܥܲܝܢܲܝ̈ܗܘܿܢ ܨܝܼܪ ܗ݇ܘ̣ܵܐ ܡܫܝܼܚܵܐ. ܘܒܹܗ ܡܲܩܲܬ݂ ܗ݇ܘ̣ܵܐ ܚܝܵܪܗܘܿܢ ܟܠܫܵܥ܀ ܪ. ܪܲܒ݁ܘܼ ܫܪܵܪܗܘܿܢ ܥܡܝܼܠ ܐܵܓ݂ܘܿܢܗܘܿܢ. ܫܒ݂ܝܼܚ ܒܘܼܣܵܡܵܐ ܕܠܹܗ ܐܸܙܕܲܡܲܢܘ. ܒܗܵܝ̇ ܡܲܠܟ݁ܘܼܬ݂ܵܐ ܕܠܵܐ ܥܵܒ݂ܪܵܐ܀ ܫ. ܫܡܲܝܵܐ ܘܐܲܪܥܵܐ ܘܟ݂ܠܡܵܐ ܕܲܒ̣ܗܘܿܢ. ܒܝܘܿܡ ܕܘܼܟ̣ܪܵܢܗܘܿܢ ܚܵܕܹܝ̇ܢ ܘܕ݂ܵܝ̇ܨܝܼܢ. ܘܒܲܚܕ݂ܵܐ ܫܲܘܝܘܼ ܩܵܥܹ̇ܝܢ ܘܐܵܡ̇ܪܝܼܢ܀ ܬ. ܬܸܫܒ݁ܘܿܚܬܵܐ ܠܐܝܼܬ݂ܝܵܐ ܟܣܸܐ ܡ̣ܢ ܟܠ. ܕܪܲܡ̣ܪܸܡ ܠܪ̈ܵܚܡܵܘܗܝ.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܫܘܼܪܵܝ ܫܵܒ݂ܘܿܥܵܐ ܕܩܲܝܛܵܐ ܘܕ݂ܘܼܟ݂ܪܵܢܵܐ ܗ݇ܝ̣ ܕܡܵܪܝ ܝܲܥܩܘܿܒ݂ ܕܲܢܨܝܼܒ݂ܝܼܢ ܒܠܵܟ݂ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ݂ܠܙܒܲܢ: ܘܲܢܒܲܪܟ݂ܝܼܘܗܝ ܠܡܵܪܝܵܐ ܕܥܲܒ݂ܕܲܢ. ܒܪܝܼܟ݂ܘܼ ܐܲܠܵܗܵܐ ܕܫܲܕܲܪ ܚܲܒ݁ܝܼܒܹܗ ܘܦܲܪܩܹܗ ܠܲܟ݂ܝܵܢܲܢ. ܬܢܝܼ. ܘܫܲܒܲܚ ܒܵܗ̇.
ܕܘܼܟ̣ܪܵܢܵܐ ܕܡܵܪܝ ܬܐܘܿܡܵܐ ܫܠܝܼܚܵܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܛܘܼܒܲܝܟ ܘܛܵܒ݂ܬ݂ܵܐ ܠܢܲܦ̮ܫܵܟܼ: ܙܲܕ݁ܝܼܩܵܐ ܘܲܬ݂ܪܝܼܨܵܐ. ܛܘܼܒܲܝܟ ܠܵܟܼ ܬܐܘܿܡܵܐ ܫܠܝܼܚܵܐ ܛܘܼܒ݂ܵܢܵܐ ܕܓܲܫ̈ ܗ݇ܘܲܝ̈ ܨܸܒ݂̈ܥܵܬ݂ܵܟܼ ܕܘܼܟܲܬ݂ ܫܘܼ̈ܡܵܬ݂ܵܐ. ܕܦܲܓ݂ܪܹܗ ܕܲܡܫܝܼܚܵܐ ܡ̣ܢ ܒܵܬܲܪ ܩܝܵܡܬܹ݁ܗ. ܘܐܵܘܕ݁ܝܼܬ݁ ܘܐܸܡܲܪܬ݁ ܕܡܵܪܝܵܐ ܗ݇ܘ̣ ܘܐܲܠܵܗܵܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܲܬ݂ܪܹܝܢ ܕܩܲܝܛܵܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܛܘܼܒ݂ܵܘ̈ܗܝ ܠܡܲܢ ܕܐܸܫܬ݁ܒܸܩ ܠܹܗ ܥܵܘܠܹܗ: ܠܲܝܬ݁ ܡܹܐܡܪܵܐ ܐܵܦܠܵܐ ܡܸܠܹ̈ܐ. ܕܨܘܼܪܬܵܐ. ܘܟ݂ܠ ܐ݇ܢܵܫ ܐܲܝܟܼ ܥܲܡܠܹܗ ܐܲܓ݂ܪܹܗ ܡܩܲܒܸܠ. ܟܠܲܢ ܓܹܝܪ ܥܬ݂ܝܼܕ݂ܝܼܢܲܢ ܠܲܡܩܵܡ ܩܕ݂ܵܡ ܒܹܝܡ ܕܲܡܫܝܼܚܵܐ. ܩܕ݂ܵܡ ܒܹܝܡ ܕܝܼܠܵܟܼ ܕܚܝܼܠܬܵܐ. ܐܲܝܟܵܐ ܕܟ݂ܠܲܢ ܥܬ݂ܝܼܕ݂ܝܼܢܲܢ ܠܲܡܩܵܡ. ܕܢܸܬ݂ܦܪܲܥ ܬܲܡܵܢ ܚܲܕ݂ ܚܲܕ݂ ܡܸܢܲܢ ܒܦܲܓ݂ܪܵܐ ܕܲܩܢܘܿܡܹܗ ܒܗܵܘ̇ ܒܘܼܚܪܵܢܵܐ ܕܚܝܼܠܵܐ ܕܟܹܐܢܘܼܬ݂ܵܟܼ. ܐܲܝܟܼ ܡܸܕܸܡ ܕܲܣ̣ܥܲܪ ܐܸܢ ܕܛܵܒ݂ ܘܐܸܢ ܕܒ݂ܝܼܫ. ܚܘܼܣ ܥܲܠ ܐܲܝܠܹܝܢ ܕܫܵܩ̇ܠܝܼܢ ܦܲܓ݂ܪܵܟܼ ܘܲܕ݂ܡܵܟܼ ܡܵܪܝܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܬܲܪܬܹܝܢ ܕܩܲܝܛܵܐ ܘܕ݂ܘܼܟ݂ܪܵܢܵܐ ܗ݇ܘ̣ ܕܡܵܪܝ ܡܵܐܪܝܼ ܫܠܝܼܚܵܐ. ܒܠܵܟ݂ܘܼ ܩܵܪܹܝ̇ܢܲܢ.
ܕܲܒܲܚܘ ܠܹܗ ܕܹܒ݂ܚܹ̈ܐ ܕܫܘܼܒ݂ܚܵܐ: ܠܵܟܼ ܐܹܕܲܒܲܚ ܕܸܒ݂ܚܹ̈ܐ ܕܫܘܼܒ݂ܚܵܐ. ܠܵܟܼ ܕܸܒ݂ܚܵܐ ܚܲܝܵܐ ܘܠܲܚܡܵܐ ܫܡܲܝܵܢܵܐ ܢܵܘܕܸ݁ܐ ܒܟ݂ܠܥܸܕܵܢ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܩܲܝܛܵܐ ܒܬܲܠܡܝܼܕ݂ܵܘ̈ܗܝ ܕܲܡܫܝܼܚܵܐ.
ܕܐܲܢ݇ܬ݁ܘܼ ܟܘܼܡܪܵܐ ܠܥܵܠܲܡ: ܘܲܡܚܲܣܸܐ ܥܲܠ ܐܲܪܥܹܗ ܘܥܲܠ ܥܲܡܹܗ. ܕܨܘܼܪܬܵܐ. ܕܐܲܝܟܼ ܗܵܢܵܐ ܓܹܝܪ ܟܘܼܡܪܵܐ ܐܵܦ ܙܵܕܹܩ̇ ܗ݇ܘ̣ܵܐ ܠܲܢ. ܗܵܘ̇ ܕܐܲܚ̣ܒܲܢ ܘܝܲܗ̣݇ܒ݂ ܢܲܦ̮ܫܹܗ ܚܠܵܦܲܝܢ. ܪܲܒ݁ ܟܘܼܡܪܹ̈ܐ ܕܬ݂ܵܘܕ݁ܝܼܬܲܢ ܘܲܡܚܲܣܝܵܢܲܢ. ܡܫܝܼܚܵܐ ܕܲܗܘ̤ܵܐ ܚܠܵܦܲܝܢ ܕܸܒ̣ܚܵܐ ܡܩܲܒ݁ܠܵܐ ܕܠܵܐ ܡܘܼܡܵܐ. ܡܸܢܵܟܼ ܫܵܐ̇ܠܝܼܢܲܢ ܫܘܼܒ̣ܩܵܢ ܚܵܘ̈ܒܹ݁ܐ. ܡܵܐ ܕܬ݂ܵܩܹ̇ܢ ܟܘܼܪܣܲܝ ܕܝܼܢܵܐ. ܡܦܵܣܲܬ݁ ܓܹܝܪ ܒܚܲܫܵܘ̈ܗܝ ܕܲܟ݂ܝܵܢܲܢ. ܕܒܹܗ ܚܲـ̣ܫܬ݁ ܘܐܸܬ݂ܢܲܣܝܼܬ݁ ܡܸܛܠ ܦܘܼܪܩܵܢܲܢ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܩܲܝܛܵܐ ܒܒܲܠܡܹܐܢܹܗ.
ܕܐܲܢ݇ܬ݁ܘܼ ܟܘܼܡܪܵܐ ܠܥܵܠܲܡ: ܘܲܡܚܲܣܸܐ ܥܲܠ ܐܲܪܥܹܗ ܘܥܲܠ ܥܲܡܹܗ. ܪܲܒ݁ ܟܘܼܡܪܹ̈ܐ ܕܬ݂ܵܘܕ݁ܝܼܬܲܢ ܝܑܼܫܘܿܥ ܡܲܠܟܵܐ ܪܲܒܵܐ. ܕܲܒ݂ܝܲܕ݂ ܦܲܓ݂ܪܹܗ ܩܲܕ݁ܝܼܫܵܐ ܘܒܲܕ݂ܡܹܗ ܚܲܣ̣ܝܼ ܚܵܘ̈ܒܵܬܲܢ. ܬܢܝܼ. ܘܫܲܒܲܚ ܒܵܗ̇.
ܕܘܼܟ݂ܪܵܢܵܐ ܕܡܵܪܝ ܩܘܼܪܝܵܩܘܿܣ ܘܲܕ݂ܝܘܿܠܹܝܛܹܐ ܐܸܡܹܗ ܒܡܵܪܵܐ ܕܟ̣ܠܵܐ.
ܢܸܚܕ݁ܘܿܢ ܫܡܲܝܵܐ ܘܲܬ݁ܕ݂ܘܼܨ ܐܲܪܥܵܐ: ܐܲܝܠܹܝܢ ܕܩܵܝܡ̇ܝܼܢ ܒܒܲܝܬܹ݁ܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ. ܚܵܕܹܝ̇ܢ ܬܸܓ̣ܡܹ̈ܐ ܕܥܸܠܵܝܹ̈ܐ. ܘܪܵܘܙ̇ܝܼܢ ܟܸܢܫܹ̈ܐ ܕܬܲܚܬܵܝܹ̈ܐ. ܒܥܹܐܕ݂ܵܐ ܫܒ݂ܝܼܚܵܐ ܕܕ݂ܘܼܟ݂ܪܵܢܗܘܿܢ. ܕܡܵܪܝ ܩܘܼܪܝܵܩܘܿܣ ܘܝܘܿܠܹܝܛܹܐ. ܘܩܵܥܹ̇ܝܢ ܫܘܼܒ݂ܚܵܐ ܠܲܡܫܝܼܚܵܐ. ܕܢܲܨܲܚ ܠܣܵܗܕܵܘ̈ܗܝ ܒܟ݂ܠ ܦܸܢ̈ܝܵܢ. ܕܲܨ̈ܠܵܘܵܬ݂ܗܘܿܢ ܢܸܗܘ̈ܝܵܢ ܠܲܢ. ܫܘܼܪܵܐ ܪܵܡܵܐ ܕܠܵܐ ܡܸܬ݂ܚܣܸܢ: ܬܢܝܼ. ܫܲܒܲܚ. ܩܛܝܼܠܹ̈ܐ ܕܲܪܚܸܡ̣ܘ ܒܵܪܘܿܝܗܘܿܢ. ܘܩܲܒܸܠ̣ܘ ܡܵܘܬܵܐ ܒܨܸܒ݂ܝܵܢܗܘܿܢ. ܘܲܗܘ̤ܵܘ ܕܸܒܼܚܹ̈ܐ ܡܪ̈ܲܥܝܵܢܹܐ. ܠܡܲܠܟܵܐ ܡܫܝܼܚܵܐ ܡܟܲܠܠܵܢܗܘܿܢ. ܩܲܪܸܒ݂ܘ ܥܲܡܲܢ ܒܵܥܘܼܬ݂ܵܐ. ܒܝܵܘܡܵܐ ܪܲܒܵܐ ܕܒ݂ܘܼܚܪܵܢܵܐ. ܕܢܸܫܬܵܘܙܲܒ݂ ܡ̣ܢ ܬܲܫܢܝܼܩܵܐ. ܘܢܹܐܪܲܬ݂ ܚܲܝܹ̈ܐ ܕܲܠܥܵܠܲܡ.
ܕܒܹܝܡ. ܥܘܼܢܵܝܵܐ. ܒܗܵܘ̇ ܕܝܘܿܚܲܢܵܢ. ܒܗܵܢܵܐ ܝܵܘܡܵܐ ܩܲܕ݁ܝܼܫܵܐ. ܕܕ݂ܘܼܟ݂ܪܵܢܗܘܿܢ ܕܣܵܗܕܹ̈ܐ ܙܗܲܝ̈ܵܐ. ܛܲܠܝܵܐ ܫܲܒ݂ܪܵܐ ܡܵܪܝ ܩܘܼܪܝܵܩܘܿܣ. ܘܐܸܡܹܗ ܙܗܝܼܬ݂ܵܐ ܡܵܪܬ݁ܝ ܝܘܿܠܹܝܛܹܐ. ܢܸܣܲܒ݂ ܦܲܓ݂ܪܹܗ ܘܲܕ݂ܡܹܗ ܕܲܒ݂ܪܵܐ. ܘܢܸܙܡܲܪ ܫܘܼܒ݂ܚܵܐ ܠܲܡܢܲܨܚܵܢܗܘܿܢ ܗܲܠܸܠܘܼܝܲܗ.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܩܲܝܛܵܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܚܙܵܘ ܗܵܟܹܝܠ ܕܐܸܢܵܐ ܐ݇ܢܵܐ: ܢܹܐܟ݂ܠܘܼܢ ܡܸܣܟܹ݁ܢܹ̈ܐ ܘܢܸܣܒ݁ܥܘܼܢ: ܐܲܝܢܵܘ ܓܲܒ̣ܪܵܐ ܕܨܵܒܹ̇ܐ ܚܲܝܹ̈ܐ. ܕܨܘܼܪܬܵܐ. ܐܸܢܵܐ ܐ݇ܢܵܐ ܠܲܚܡܵܐ ܚܲܝܵܐ ܕܡ̣ܢ ܫܡܲܝܵܐ ܢܸܚ̇ܬܹ݁ܬ݂. ܗܵܢܵܘ ܠܲܚܡܵܐ ܚܲܝܵܐ ܕܲܢـ̣ܚܸܬ݂ ܡ̣ܢ ܫܡܲܝܵܐ. ܐܸܢܵܐ ܐ݇ܢܵܐ ܠܲܚܡܵܐ ܕܢܸـܚ̇ܬܹ݁ܬ݂ ܡ̣ܢ ܪܵܘܡܵܐ. ܐܸܡܲܪ ܦܵܪܘܿܩܲܢ ܒܐ݇ܪܵܙܵܐ ܠܬܲܠܡܝܼܕ݂ܵܘ̈ܗܝ. ܟܠ ܡܲܢ ܕܲܒ݂ܚܘܼܒܵܐ ܩܵܪܹܒ݂ ܘܢܵܣܹ̇ܒ݂ ܠܝܼ. ܚܵܝܹ̇ܐ ܒܝܼ ܠܥܵܠܲܡ ܘܝܵܪܹܬ݂ ܡܲܠܟ݁ܘܼܬ݂ܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ̣ܬܵܐ ܕܐܲܪܒܲܥ ܕܩܲܝܛܵܐ ܒܠܵܟ݂ܘܼ ܩܵܪܹܝ̇ܢܲܢ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ: ܡ̣ܢ ܦܘܼܡܵܐ ܕܲܥܠܲܝܡܹ̈ܐ ܘܕܲܛܠܵܝܹ̈ܐ. ܫܘܼܒ݂ܚܵܐ ܠܗܵܘ̇ ܚܲܝܠܵܐ ܕܡܸܬ݂ܟ݁ܪܸܙ ܬܠܝܼܬ݂ܵܐܝܼܬ݂ ܘܡܸܣܬ݁ܓܸܕ݂ ܫܒ݂ܝܼܚܵܐܝܼܬ݂. ܬܢܝܼ. ܘܫܲܒܲܚ ܒܵܗ̇.
ܥܹܐܕ݂ܵܐ ܩܲܕܝܼܫܵܐ ܕܓܸܠܝܵܢܹܗ ܕܡܵܪܲܢ ܥܲܠ ܛܘܼܪ ܬܵܒ݂ܘܿܪ (ܕܛܲܟ݁ܣܹܗ ܚܲܣܝܵܐ ܕܐܲܠܵܗܵܐ ܡܵܪܝ ܓܝܼܘܲܪܓܝܼܣ ܡܝܼܛܪܵܦܘܿܠܹܝܛܵܐ ܕܐܵܬ݂ܘܿܪ.) ܪܹܫܩܵܠܵܐ.
ܡܸܛܠ ܕܡܲܒ݁ܘܼܥܵܐ ܕܚܲܝܹ̈ܐ ܥܲܡܵܟܼ ܗ݇ܘ̣: ܘܡ̣ܢ ܢܲܚܠܵܟܼ ܒܲܣܝܼܡܵܐ ܬܲܫܩܸܐ ܐܸܢܘܿܢ. ܡܥܝܼܢܵܐ ܕܛܵܒ݂ܵܬ݂̈ܵܐ ܘܲܠܡܹܐܢܵܐ ܡܫܲܝܢܵܐ ܒܓܸܠܝܵܢܵܟܼ ܡܫܝܼܚܵܐ ܛܲܝܸܒ݂ܬ݁ ܠܲܢ. ܘܡ̣ܢ ܦܸܗܝܵܐ ܣܪܝܼܩܵܐ ܕܛܵܥܝܘܼܬ݂ܵܐ ܕܲܦܬܲܟ̣ܪܹ̈ܐ ܓܠܝܼܦܹ̈ܐ ܠܘܵܬ݂ܵܟܼ ܐܲܦܢ̣ܝܼܬܵܢ. ܘܐܲܫ̣ܠܸܡܬ݁ ܠܲܢ ܝܼܕܲܥܬ݂ܵܐ ܓܡܝܼܪܬܵܐ ܕܲܩܢܘܿܡܹ̈ܐ ܡܫܲܒ݁ܚܹ̈ܐ. ܕܐܲܒ̣ܵܐ ܘܲܒ̣ܪܵܐ ܘܪܘܼܚܵܐ ܕܩܘܼܕ݂ܫܵܐ. ܟܝܵܢܵܐ ܐܲܠܵܗܵܝܵܐ. ܡܸܟܹܝܠ ܟܠܲܢ ܒܡܲܙܡܘܿܪܹ̈ܐ ܘܲܒ̣ܬܸܫ̈ܒ݁ܚܵܬ݂ܵܐ ܢܫܲܒܲܚ ܠܵܟܼ ܛܵܒ̣ܵܐ ܒܲܠܚܘܿܕܲܝܟ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܚܲܡܫܵܐ ܕܩܲܝܛܵܐ ܒܡܲܕ݂ܒ݁ܚܵܟܼ ܡܵܪܝܵܐ.
ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ: ܡܫܲܡܫܵܢܵܘ̈ܗܝ ܕܥܵܒ݂ܕ݁ܝܼܢ ܨܸܒ݂ܝܵܢܹܗ. ܕܨܘܼܪܬܵܐ. ܚܲܝ̈ܠܵܘܵܬ݂ܵܐ ܣܲܓܝܼܐܹ̈ܐ ܕܲܫܡܲܝܵܐ ܟܲܕ݂ ܡܫܲܒ݁ܚܝܼܢ. ܚܵܕܹܝ̇ܢ ܗ݇ܘ̣ܵܘ ܘܲܡܫܲܒ݁ܚܝܼܢ ܠܐܲܠܵܗܵܐ. ܚܲܝ̈ܠܵܘܵܬ݂ܵܐ ܕܡܲܠܲܐܟܹܐ ܒܵܪܟ݁ܝܼܢ ܘܣܵܓ݂ܕ݁ܝܼܢ ܘܲܡܫܲܒ݁ܚܝܼܢ. ܠܲܚܕ݂ܵܐ ܬܠܝܼܬ݂ܵܝܘܼܬ݂ܵܐ. ܘܠܲܟ݂ܝܵܢܵܐ ܣܓ݂ܝܼܕ݂ܵܐ ܫܘܼܒ݂ܚܵܐ ܐܲܡܝܼܢܵܐ ܡܲܣܩܝܼܢ. ܒܩܵܠܹ̈ܐ ܩܲܕܝܼܫܹ̈ܐ ܟܠܗܘܿܢ ܡܗܲܠܠܝܼܢ. ܠܚܲܕ݂ ܚܲܝܠܵܐ ܟܲܣܝܵܐ ܕܐܝܼܬ݂ܘܼܬ݂ܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܚܲܡܸܫ ܕܩܲܝܛܵܐ ܘܕ݂ܘܼܟ̣ܪܵܢܵܐ ܗ݇ܝ̣ ܕܲܫܡܘܿܢܝܼ ܘܕܲܒ݂ܢܹ̈ܝܗ̇. ܒܠܵܟ݂ܘܼ ܩܵܪܹܝ̇ܢܲܢ.
ܟܵܗܢܲܝ̈ܟ ܢܸܠܒ݁ܫܘܼܢ ܙܲܕܝܼܩܘܼܬ݂ܵܐ ܘܙܲܕܝܼܩܲܝ̈ܟ ܫܘܼܒ݂ܚܵܐ: ܐܸܙܕܲܗ̄ܪܘ ܘܠܵܐ ܬܸܚܛܘܿܢ. ܟܵܗܢܹ̈ܐ ܩܲܕܝܼܫܹ̈ܐ ܐܲܫܝܼܓ݂ܘ ܬܹܐܪ̈ܵܬ݂ܟ݂ܘܿܢ. ܡ̣ܢ ܨܵܐܬ݂ܵܐ ܕܥܵܘ̣ܠܵܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܸܫܬܵܐ ܕܩܲܝܛܵܐ ܒܐܵܘܕܵܘ ܠܹܗ.
ܡܲܐܣܸܐ ܠܲܬ݂ܒ݂ܝܼܪ̈ܲܝ ܠܸܒܵܐ ܘܥܵܨܹܒ݂ ܟܹܐܒܲܝ̈ܗܘܿܢ: ܝܲܗ̣݇ܒ݂ ܠܗܘܿܢ ܫܸܐ̈ܠܵܬ݂ܗܘܿܢ. ܕܨܘܼܪܬܵܐ. ܘܐܸܢ ܣܲܡܵܐ ܕܡܵܘܬܵܐ ܢܸܫܬ݁ܘܿܢ ܠܵܐ ܢܲܗܲܪ ܐܸܢܘܿܢ. ܘܐܝܼܕܲܝ̈ܗܘܿܢ ܢܣܝܼܡܘܼܢ ܥܲܠ ܟܪ̈ܝܼܗܹܐ ܘܢܸܬ݂ܚܲܠܡܘܼܢ. ܣܲܡܵܐ ܕܲܬ݂ܝܵܒ݂ܘܼܬ݂ܵܐ ܝܲܗ̣݇ܒ݂ ܗ݇ܘ̣ܵܐ ܡܵܪܲܢ. ܠܐܵܣܵܘܵܬ݂̈ܵܐ ܡܗܝܼܪܹ̈ܐ ܕܐܝܼܬܲܝܗܘܿܢ ܟܵܗܢܹ̈ܐ ܕܥܹܕ݁ܬܵܐ. ܘܐܲܝܢܵܐ ܕܲܡ̣ܚܵܝܗܝ ܣܵܛܵܢܵܐ ܒܟܹܐܒܹ̈ܐ ܕܥܵܘ̣ܠܵܐ. ܢܹܐܬ݂ܸܐ ܢܚܵܘܸܐ ܚܒ݂ܵܪ̈ܵܬܹܗ. ܠܬܲܠܡܝܼܕ݂ܵܘ̈ܗܝ ܕܐܵܣܝܵܐ ܚܲܟ݁ܝܼܡܵܐ. ܘܗܸܢ̣ܘܿܢ ܡܲܐܣܹܝܢ ܠܹܗ ܒܣܲܡܵܐ ܪܘܼܚܵܢܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܫܸܬ݂ ܕܩܲܝܛܵܐ ܘܕܘܼܟ݂ܪܵܢܵܐ ܗ݇ܝ̣ ܕܪܲܒܲܢ ܝܵܘܣܸܦ ܒܘܼܣܢܵܝܵܐ: ܬܲܠܡܝܼܕܹܗ ܕܪܲܒܲܢ ܡܘܼܫܹܐ ܕܒܹܝܬ݂ ܨܲܝܵܪܹ̈ܐ. ܘܪܲܒܹܗ ܕܝܘܿܚܲܢܵܢ ܒܲܪ ܟ̣ܲܠܕܘܿܢ. ܘܒ݂ܵܗ̇ ܥܵܒ݂ܕ݁ܝܼܢ ܕܘܼܟ݂ܪܵܢܵܐ ܠܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ. ܒܒܲܠܡܹܐܢܹܗ.
ܬܵܘ ܢܫܲܒܲܚ ܠܡܵܪܝܵܐ: ܡܸܛܠ ܕܥܸܫܢܲܬ̤ ܥܠܲܝܢ ܛܲܝܒ݁ܘܼܬܹܗ. ܡ̣ܢ ܦܘܼܡܵܐ ܕܲܥܠܲܝܡܹ̈ܐ ܘܕܲܛܠܵܝܹ̈ܐ. ܢܵܘܕܸ݁ܐ ܠܹܗ ܠܲܡܫܝܼܚܵܐ ܕܝܲܗ̣݇ܒ̣ ܠܲܢ ܦܲܓ݂ܪܹܗ ܘܲܕ݂ܡܹܗ. ܘܐܲܫ̣ܘܝ̣ ܠܲܢ ܒܛܲܝܒ݁ܘܼܬܹܗ. ܠܡܵܘܗܲܒ݂ܬܹܗ ܕܲܠܘܵܬ̣ ܓܸܢܣܲܢ: ܬܢܝܼ. ܫܲܒܲܚ. ܐܵܦܸܢ ܫܵܠܚ̇ܝܼܬܘܿܢ ܢܲܚܬܲܝ̈ܟ݁ܘܿܢ ܗܵܢ̇ܘܿܢ ܒܲܪ̈ܵܝܹܐ. ܐܸܠܵܐ ܠܵܐ ܬܸܫܠ̱ܚܘܼܢ ܐܸܣܛܲܠܟ̣ܘܿܢ ܓܵܘܵܝܬܵܐ ܥܡܝܼܕܹ̈ܐ. ܐܸܢ ܕܹܝܢ ܠܗܵܢܵܐ ܙܲܝܢܵܐ ܟܲܣܝܵܐ ܠܒ݂ܝܼܫܝܼܬ݁ܘܿܢ. ܡܲܚܫܘܼܠܵܐ ܕܢܸܣܝܘܿܢܹ̈ܐ ܣܲܓ݁ܝܼܐܹ̈ܐ ܠܵܐ ܢܸܚܣܲܢܟ̣ܘܿܢ. ܝܵܕ݂ܥܝܼܬ݁ܘܿܢ ܗ݇ܘ̣ ܐܲܝܠܹܝܢ ܡܸܠܹ̈ܐ ܫ̣ܡܲܥܬܘܿܢ. ܝܵܕ݂ܥܝܼܬܘܿܢ ܗ݇ܘ̣ ܕܡ̣ܢ ܕܸܒ݂ܚܵܐ ܚܲܝܵܐ ܐܸܟܲܠ̣ܬ݁ܘܿܢ. ܐܸܙܕܲܗ̄ܪܘ ܡ̣ܢ ܒܝܼܫܵܐ. ܕܕܲܠܡܵܐ ܢܲܫܪܲܥܟ̣ܘܿܢ. ܐܲܝܟܼ ܕܐܵܦ ܠܐܵܕ݂ܵܡ. ܘܢܘܼܟ̣ܪ̈ܵܝܹܐ ܢܸܥܒܸܕ݂ܟ̣ܘܿܢ ܠܗܵܝ̇ ܡܲܠܟ݁ܘܼܬ݂ܵܐ ܫܒ݂ܝܼܚܬܵܐ. ܠܗܵܘ̇ ܓܹܝܪ ܢܲܟ̣ܪܝ̣ ܡ̣ܢ ܦܲܪܕܲܝܣܵܐ. ܘܠܲܢ ܬܘ̣ܒ̣ ܨܵܒܹ̇ܐ ܠܲܡܢܲܟ̣ܪܵܝܘܼ. ܘܥܲܠ ܗܵܕܹܐ ܓܥܵܘ ܥܲܡܲܢ ܠܘܵܬ̣ ܡܫܝܼܚܵܐ. ܕܲܒ݂ܪܘܼܚܹܗ ܩܲܕܝܼܫܵܐ ܢܫܲܪܲܪ ܢܲܦ̮̈ܫܵܬ݂ܵܐ ܕܟ̣ܠܲܢ.
ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܩܲܝܛܵܐ ܒܲܡܫܝܼܚܵܐ ܐܸܬ݂ܝܼܠܸܕ݂.
ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ: ܡܫܲܡ̈ܫܵܢܵܘܗܝ ܕܥܵܒ݂ܕ݁ܝܼܢ ܨܸܒ̣ܝܵܢܹܗ. ܕܨܘܼܪܬܵܐ. ܘܲܣܪ̈ܵܦܝܼܢ ܩܵܝ̇ܡܝܼܢ ܠܥܸܠ ܡܸܢܹܗ. ܘܟ݂ܠܹܗ ܚܲܝܠܵܐ ܕܲܫܡܲܝܵܐ ܩܵܐܹ̇ܡ ܠܥܸܠ ܡܸܢܹܗ. ܟܪ̈ܘܿܒܹܐ ܘܲܣܪ̈ܵܦܹܐ ܘܪ̈ܲܒܲܝ ܡܲܠܲܐܟܹ̈ܐ. ܒܕܸܚܠܵܐ ܘܒܲܪܬ݂ܹܝܬ݂ܵܐ ܩܵܝ̇ܡܝܼܢ ܩܕ݂ܵܡ ܡܲܕ݂ܒ݁ܚܵܐ. ܘܚܵܝ̇ܪܝܼܢ ܒܹܗ ܒܟ݂ܵܗܢܵܐ ܕܩܵܨܹ̇ܐ ܘܲܡܦܲܠܸܓ݂. ܦܲܓ݂ܪܹܗ ܕܲܡܫܝܼܚܵܐ ܠܚܘܼܣܵܝܵܐ ܕܚܵܘ̈ܒܹܐ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܫܘܼܠܵܡ ܫܵܒ݂ܘܿܥܵܐ ܕܩܲܝܛܵܐ ܕܘܼܟ݂ܪܵܢܵܐ ܗ݇ܝ̣ ܕܡܵܪܝ ܩܲܪܕܵܓ݂ ܣܵܗܕܵܐ ܢܲܨܝܼܚܵܐ. ܒܠܵܟ݂ܘܼ ܩܵܪܹܝ̇ܢܲܢ.
ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ: ܡܫܲܡܫܵܢܵܘ̈ܗܝ ܕܥܵܒ݂ܕ݁ܝܼܢ ܨܸܒ݂ܝܵܢܹܗ. ܟܸܢܫܹ̈ܐ ܕܡܲܠܲܐܟܹ̈ܐ ܡܫܲܒ݁ܚܝܼܢ ܒܐܵܘܝܘܼܬ݂ܵܐ ܠܲܟ݂ܝܵܢܵܐ ܣܓ݂ܝܼܕܵܐ. ܬܢܝܼ. ܘܫܲܒܲܚ ܒܵܗ̇
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܐܹܠܝܼܵܐ ܪܹܫܩܵܠܵܐ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ: ܐܲܪܝܼܡܘ ܐܝܼܕܲܝ̈ܟ݁ܘܿܢ ܠܩܘܼܕ݂ܫܵܐ ܘܒܲܪܸܟ݂ܘ ܠܡܵܪܝܵܐ. ܒܢܲܝ̈ܟ ܐܲܝܟܼ ܢܸܨܒ݁ܬ݂ܵܐ ܕܙܲܝܬܵܐ ܟܪܝܼܟ݂ܝܼܢ ܠܦܵܬ݂ܘܿܪܵܟܼ. ܕܨܘܼܪܬܵܐ. ܟܠ ܡܸܕܸܡ ܡܛܲܝܲܒ݂ ܬܵܘ ܠܡܸܫܬ݁ܘܼܬ݂ܵܐ. ܐܸܬ݂ܒܲܣܲܡܘ ܥܲܡܡܹ̈ܐ ܥܲܡ ܥܲܡܹܗ. ܗܵܐ ܦܵܬ݂ܘܿܪܵܐ ܡܲܬ݂ܩܲܢ ܒܲܩܕ݂ܘܿܫ ܩܘܼܕ݂ܫܹ̈ܐ. ܘܟ݂ܵܗܢܹ̈ܐ ܫܒ݂ܝܼܚܹ̈ܐ ܟܪܝܼܟ݂ܝܼܢ ܠܹܗ ܒܛܘܼܦ̮ܣܵܐ ܕܲܣܪ̈ܵܦܹܐ. ܘܩܵܪܹܐ ܟܵܗܢܵܐ ܠܪܘܼܚܵܐ ܘܢܵܚ̇ܬܵܐ ܘܫܵܪܝܵܐ. ܒܠܲܚܡܵܐ ܘܡܸܬ݂ܡܲܙܓ݂ܵܐ ܒܟ݂ܵܣܵܐ ܘܗܵܘܹܐ ܣܲܡ ܚܲܝܹ̈ܐ. ܘܩܵܪܒ݁ܝܼܢ ܘܢܵܣܒ݁ܝܼܢ ܡܵܝܘܿܬܹ̈ܐ. ܚܘܼܣܵܝܵܐ ܕܩܵܛܹܠ ܠܲܚܛܝܼܬ݂ܵܐ. ܘܩܵܥܹܝ̇ܢ ܠܹܗ ܩܲܕܝܼܫ ܩܲܕܝܼܫ ܩܲܕܝܼܫ ܡܲܚܝܵܢܲܢ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܐܹܠܝܼܵܐ ܘܕ݂ܘܼܟ݂ܪܵܢܵܐ ܗ݇ܝ ܕܡܵܪܝ ܦܵܦܵܐ ܩܵܬ݂ܘܿܠܝܼܩܵܐ. ܒܠܵܟ݂ܘܼ ܩܵܪܹܝ̇ܢܲܢ.
ܡܵܐ ܛܵܒ݂ ܘܡܵܐ ܫܲܦܝܼܪ: ܘܲܥܒܸܕ݂ ܥܲܡܝ ܐܵܬ̤ܵܐ ܛܵܒ݂ܬ݂ܵܐ. ܫܒ݂ܝܼܚܘܼ ܚܘܼܕܵܬ݂ܵܐ ܕܲܥ̣ܒܲܕ݂ ܦܵܪܘܿܩܲܢ ܠܓܸܢܣܵܐ ܕܡܵܝܘܿܬܹ̈ܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܲܬ݂ܪܹܝܢ ܕܐܹܠܝܼܵܐ ܒܫܘܼܪܵܝ. ܬܵܘ ܢܸܬ݁ܕܲܡܲܪ.
ܫܲܒܲܚܘ ܠܡܵܪܝܵܐ ܡ̣ܢ ܫܡܲܝܵܐ: ܡܫܲܡܫܵܢܵܘ̈ܗܝ ܕܥܵܒ݂ܕ݁ܝܼܢ ܨܸܒ݂ܝܵܢܹܗ: ܬܲܡܵܢ ܕܚܸܠ̣ܘ ܕܸܚܠ̱ܬ݂ܵܐ. ܕܨܘܼܪܬܵܐ. ܡ̣ܢ ܩܕ݂ܵܡ ܕܸܚܠ̱ܬܹܗ ܕܡܵܪܝܵܐ ܘܡ̣ܢ ܗܸܕ݂ܪܵܐ ܕܥܘܼܫܢܹܗ. ܕܸܚܠ̱ܬ݂ܵܐ ܗ݇ܝ̣ ܪܲܒ݁ܬ݂ܵܐ ܠܡܸܦܲܠ ܒܐܝܼܕ݂ܵܘ̈ܗܝ ܕܐܲܠܵܗܵܐ ܚܲܝܵܐ. ܒܕܸܚܠ̱ܬ݂ܵܐ ܘܲܒ݂ܚܲܕ݂ܘܼܬ݂ܵܐ ܩܵܝ̇ܡܝܼܢ. ܟܸܢܫܹ̈ܐ ܟܠܗܘܿܢ ܕܲܫܡܲܝܵܢܹ̈ܐ ܘܕܲܐܪ̈ܥܵܢܵܝܹܐ. ܡܵܐ ܕܡܸܬ݂ܩܲܪܲܒ݂ ܕܸܒ݂ܚܵܐ ܕܲܚܠܵܦ ܚܲܝܵܘ̈ܗܝ ܕܥܵܠܡܵܐ. ܘܟܲܕ݂ ܓܸܦܲܝ̈ܗܘܿܢ ܦܪܝܼܣܝܼܢ. ܩܕ݂ܵܡ ܥܲܝܢܲܝ̈ܗܘܿܢ ܕܠܵܐ ܢܸܬ݂ܒܲܩܘܿܢ. ܒܚܸܙܘܵܐ ܕܚܝܼܠܵܐ ܕܠܵܐ ܡܸܬ݁ܕ݁ܪܸܟܼ. ܘܲܒ݂ܩܵܠܲܝ̈ܗܘܿܢ ܡܝܲܒ݁ܒ݂ܝܼܢ. ܘܠܸܫܵܢܲܝ̈ܗܘܿܢ ܩܵܥܹܝܢ ܘܐܵܡ̇ܪܝܼܢ. ܩܲܕܝܼܫ ܩܲܕܝܼܫ ܩܲܕܝܼܫܲܬ݁ ܡܵܪܝܵܐ. ܘܥܲܠ ܐܲܦܲܝ̈ ܡܵܘܗܲܒ݂ܬ݂ܵܐ ܗܵܕܹܐ ܕܚܝܼܠܬܵܐ ܕܝܲܗ݇ܒ݂ܬ݁ ܠܲܢ. ܕܢܸܬ݂ܚܲܣܸܐ ܒܵܗ̇ ܡ̣ܢ ܚܵܘܒܲܝ̈ܢ. ܗܲܒ݂ܠܲܢ ܡܵܪܝ ܒܲܚܢܵܢܵܟܼ. ܘܐܲܫܘܵܐ ܠܲܢ ܒܛܲܝܒ݁ܘܼܬ݂ܵܟܼ. ܕܢܵܘܕܸ݁ܐ ܠܵܟܼ ܥܲܠ ܐܲܦܹܝ̈ܗ̇ ܘܢܹܐܡܲܪ ܫܘܼܒ݂ܚܵܐ ܠܵܟ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܬܲܪܬܹܝܢ ܕܐܹܠܝܼܵܐ ܒܠܵܟ݂ܘܼ ܩܵܪܹܝ̇ܢܲܢ.
ܪܘܿܣܥܠܲܝ ܒܙܘܿܦܵܐ ܘܐܸܬ݁ܕܲܟܸܐ: ܚܲܠܸܠܲܝܢܝ ܒܹܗ ܘܡ̣ܢ ܬܲܠܓܵܐ ܐܸܚܘܲܪ. ܛܲܠܵܐ ܡܦܲܝܓ݂ܵܢܵܐ ܕܪ̈ܲܚܡܹܐ ܕܛܲܝܒ݁ܘܼܬ݂ܵܟܼ ܫܲܕܲܪ ܠܥܘܼܕ݂ܪܵܢܲܢ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܐܹܠܝܼܵܐ ܒܕܸܚ̱ܠܬ݂ܵܐ ܘܲܒ݂ܚܲܕ݂ܘܼܬ݂ܵܐ.
ܬܵܘ ܢܫܲܒܲܚ ܠܡܵܪܝܵܐ: ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹ݁ܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ: ܥܲܡܵܐ ܕܲܓ݂ܒ݂ܵܐ ܠܹܗ ܠܝܵܪܬ݁ܘܼܬ݂ܵܐ. ܕܨܘܼܪܬܵܐ. ܩܪ̈ܲܝܵܐ ܘܩܲܕ݁ܝܼܫܹ̈ܐ ܕܒ݂ܝܼܫܘܿܥ ܡܫܝܼܚܵܐ ܡܩܲܕ݁ܫܝܼܢ. ܚܢܲܢ ܕܗܵܪܟܵܐ ܚܢܲܢ ܝܵܘܡܵܢܵܐ ܘܟ݂ܠܲܢ ܚܲܝܝܼܢܲܢ. ܟܠܲܢ ܐܲܝܠܹܝܢ ܕܐܸܬ݂ܩܪܝܼܢ ܠܡܸܬ݂ܒܲܣܵܡܘܼ ܒܐ݇ܪ̈ܵܙܹܐ ܫܒ݂ܝܼܚܹ̈ܐ ܘܐܲܠܵܗܵܝܹ̈ܐ. ܢܵܘܕܸ݁ܐ ܘܢܸܣܓ݁ܘܿܕ݂ ܒܕܸܚܠܵܐ ܘܚܘܼܒܵܐ ܠܡܵܪܵܐ ܕܟ݂ܠܵܐ. ܘܲܒ݂ܪܸܚܡ̱ܬ݂ܵܐ ܘܗܲܝܡܵܢܘܼܬ݂ܵܐ ܢܸܣܲܒ݂ ܦܲܓ݂ܪܹܗ ܕܲܒ݂ܪܵܐ ܡܫܝܼܚܵܐ. ܕܲܚܠܵܦ ܚܲܝܲܝ̈ܢ ܐܸܬ݁ܕ݁ܒܲܚ. ܘܚܲܣ̣ܝܼ ܚܵܘܒܲܝ̈ܢ. ܘܪܲܥ̣ܝܹܗ ܠܐܲܒ݂ܘܼܗܝ ܥܲܡܲܢ ܒܝܲܕ݂ ܫܘܼܦܵܥ ܕܡܹܗ. ܘܗܵܐ ܡܸܙܕܲܝܲܚ ܥܲܠ ܡܲܕ݂ܒ݁ܚܵܐ. ܘܡ̣ܢ ܝܲܡܝܼܢܵܐ ܕܐܲܒ݂ܵܐ ܕܫܲܠ̣ܚܹܗ. ܘܟܲܕ݂ ܚܲܕ݂ ܐܝܼܬ݂ܵܘܗܝ ܘܠܵܐ ܡܸܬ݂ܦܲܠܲܓ݂. ܠܥܸܠ ܘܲܒ݂ܥܹܕ݁ܬܵܐ ܟܠܝܘܿܡ ܡܸܬ݁ܕ݁ܒܲܚ ܚܠܵܦ ܚܵܘܒܲܝ̈ܢ ܟܲܕ݂ ܠܵܐ ܚܵܐܹ̇ܫ. ܬܵܘ ܢܸܬ݂ܩܲܪܲܒ݂ ܙܲܗܝܵܐܝܼܬ݂. ܠܕܸܒ݂ܚܵܐ ܕܦܲܓ݂ܪܹܗ ܡܩܲܕܸ݁ܫ ܟܠܵܐ. ܘܢܸܩܥܸܐ ܠܹܗ ܟܠܲܢ ܐܲܟܲܚ݇ܕ݂ ܘܢܹܐܡܲܪ ܫܘܼܒ݂ܚܵܐ ܠܵܟܼ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܐܹܠܝܼܵܐ ܒܒܲܠܡܹܐܢܹܗ.
ܝܲܗ݇ܒ݂ܬ݁ ܠܕ݂ܵܚܠܲܝ̈ܟ ܐܵܬ̤ܵܐ: ܡܹܐܟ݂ܘܼܠܬܵܐ ܝܲܗ̣݇ܒ݂ ܠܕ݂ܵܚܠܵܘ̈ܗܝ. ܡܵܘܗܲܒ݂ܬ݂ܵܐ ܡܥܲܠܲܝܬܵܐ ܝܲܗ̣݇ܒ݂ ܠܲܢ ܡܵܪܲܢ ܝܑܼܫܘܿܥ. ܢܩܲܕܸ݁ܫ ܦܲܓ̣ܪ̈ܲܝܢ ܘܢܲܦ̮̈ܫܵܬܲܢ. ܕܲܒ݂ܓܲܠܝܘܼܬ݂ ܐܲܦܹ̈ܐ ܢܸܣܒ݂ܝܼܗ̇: ܬܢܝܼ. ܘܫܲܒܲܚ ܒܵܗ̇.
ܥܹܐܕ݂ܵܐ ܕܲܨܠܝܼܒ݂ܵܐ ܣܓ݂ܝܼܕ݂ܵܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ: ܫܘܼܒ݂ܚܹܗ ܒܐܲܪܥܵܐ ܘܒܲܫܡܲܝܵܐ. ܕܨܘܼܪܬܵܐ. ܫܲܪܝܼܪܵܐܝܼܬ݂ ܪܲܒ݁ܘܼ ܐ݇ܪܵܙܵܐ ܗܵܢܵܐ ܕܟܹܐܢܘܼܬ݂ܵܐ. ܘܒܲܫܡܹܗ ܥܲܡܡܹ̈ܐ ܢܣܲܒ݁ܪܘܼܢ. ܐ݇ܪܵܙܹܗ ܕܲܨܠܝܼܒ݂ܵܐ ܡܸܬ݂ܡܲܠܲܠ. ܘܟ݂ܠ ܒܸܪ̈ܝܵܬ݂ܵܐ ܡܸܬ݂ܦܲܨ̈ܚܵܢ. ܕܡܲܠܟܵܐ ܡܫܝܼܚܵܐ ܡܸܬ݂ܟ݁ܪܸܙ. ܘܥܵܠܡܵܐ ܟܠܹܗ ܡܸܬ݂ܩܲܕܲܫ: ܬܢܝܼ. ܫܲܒܲܚ. ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ. ܬܵܘ ܟܠܲܢ ܢܸܟ݁ܘܿܦ ܒܘܼܪ̈ܟܲܝܢ ܒܲܨܠܘܿܬ݂ܵܐ. ܩܕ݂ܵܡ ܨܠܝܼܒ݂ܵܐ ܕܐܝܼܬ݂ܵܘܗܝ ܓܲܙܵܐ ܕܥܘܼܕ݂ܪ̈ܵܢܹܐ. ܢܸܫܟܲܚ ܪ̈ܲܚܡܹܐ ܘܫܘܼܒ݂ܩܵܢܵܐ ܕܚܵܘܒܹ̈ܐ. ܡܵܐ ܕܟ݂ܠ ܣܵܘ̈ܦܝܼܢ ܢܵܗ̇ܪܝܼܢ ܒܙܲܠܝܼܩܵܘ̈ܗܝ. ܘܟܲܕ݂ ܠܵܐ ܨܵܒܹ̇ܝܢ ܣܵܩܘܿܪ̈ܵܘܗܝ. ܣܵܓ݂ܕ݁ܝܼܢ ܠܡܵܪܘܼܬܹܗ.
ܚܲܕ݂ܒ݁ܫܲܒܵܐ. ܐ. ܕܲܨܠܝܼܒ݂ܵܐ. ܕ. ܕܐܹܠܝܼܵܐ ܒܣܵܗ̈ܕܹ݁ܐ ܒܪ̈ܝܼܟܹܐ.
ܪܵܡ ܒܟ݂ܠܵܗ̇ ܐܲܪܥܵܐ: ܪܲܒ݁ ܘܲܕ݂ܚܝܼܠ ܥܲܠ ܟܠܗܘܿܢ ܕܲܚܕ݂ܵܪ̈ܵܘܗܝ: ܡܵܐ ܛܵܒ݂ ܘܡܵܐ ܫܲܦܝܼܪ. ܕܨܘܼܪܬܵܐ. ܢܸܗܘܸܐ ܡܲܕ݂ܒ݁ܚܵܐ ܩܕ݂ܘܿܫ ܩܘܼܕ݂ܫܝܼ̈ܢ. ܠܲܡܡܲܠܵܠܘܼ ܐ݇ܪܵܙܹܗ ܕܲܡܫܝܼܚܵܐ. ܡܲܕ݂ܒ݁ܚܵܐ ܐ݇ܪܵܙܵܐ ܗ݇ܘ̣ ܕܩܲܒ݂ܪܵܐ ܕܒܹܗ ܐܸܬ݁ܬ݁ܣܝܼܡ ܦܲܓ݂ܪܹܗ ܕܦܵܪܘܿܩܲܢ. ܘܠܲܚܡܵܐ ܘܚܲܡܪܵܐ ܕܲܣܕ݂ܝܼܪܝܼܢ. ܛܘܼܦ̮ܣܹܗ ܕܡܵܪܲܢ ܕܲܒ݂ܩܲܒ݂ܪܵܐ. ܘܟ̣ܵܗܢܵܐ ܐܲܝܟܼ ܢܲܦ̮ܫܹܗ ܕܝܼܫܘܿܥ. ܩܪܵܒ݂ܵܐ ܥܵܒܹ̇ܕ݂ ܥܲܡ ܒܝܼܫܵܐ. ܘܟܸܢ ܨܵܐܲܪ ܛܘܼܦ̮ܣܵܐ ܕܢܘܼܚܵܡܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ. ܐ. ܕܲܨܠܝܼܒ݂ܵܐ. ܕ. ܕܐܹܠܝܼܵܐ ܒܠܵܟ݂ܘܼ ܩܵܪܹܝ̇ܢܲܢ.
ܘܲܢܫܲܒ݁ܚܘܼܢ ܠܲܫܡܵܟܼ ܠܥܵܠܡܝܼܢ: ܡ̣ܢ ܦܘܼܡܵܐ ܕܲܥܠܲܝܡܹ̈ܐ ܘܕܲܛܠܵܝܹ̈ܐ. ܫܘܼܒ݂ܚܵܐ ܠܡܲܚܸܐ ܟܠ ܕܲܒ݂ܝܲܕ݂ ܕܒ݂ܝܼܚܘܼܬܹܗ ܦܲܪܩܹܗ ܠܲܟ݂ܝܵܢܲܢ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ. ܒ. ܕܲܨܠܝܼܒ݂ܵܐ. ܗ. ܕܐܹܠܝܼܵܐ ܒܫܘܼܪܵܝ ܬܵܘ ܢܸܬ݁ܕܲܡܲܪ.
ܬܵܘ ܢܫܲܒܲܚ ܠܡܵܪܝܵܐ: ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹ݁ܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ: ܠܲܡܗܲܝܡܢܹ̈ܐ ܢܵܛܲܪ ܡܵܪܝܵܐ. ܕܨܘܼܪܬܵܐ. ܕܲܢܫܲܡܸܫ ܡܸܟܹ݁ܝܠ ܒܚܲܕ݂ܬ݂ܘܼܬ݂ܵܐ ܕܪܘܼܚܵܐ. ܢܸܚܸܐ ܗܵܟܹܝܠ ܒܪܘܼܚܵܐ ܘܲܠܪܘܼܚܵܐ ܢܸܫܠܲܡ. ܟܠܲܢ ܡܗܲܝܡܢܹ̈ܐ ܒܚܲܕ݂ܬ݂ܘܼܬ݂ܵܐ ܕܪܘܼܚܵܐ. ܬܵܘ ܢܵܘܕܸ݁ܐ ܕܠܵܐ ܦܘܼܠܵܓ݂ܵܐ. ܕܚܵܙܹ̇ܝܢܲܢ ܥܲܠ ܡܲܕ݂ܒ݁ܚܵܐ ܩܲܕ݁ܝܼܫܵܐ. ܠܐܸܡܪܹܗ ܕܐܲܠܵܗܵܐ ܕܟ݂ܠ ܝܵܘ̈ܡܵܬ݂ܵܐ. ܗܵܐ ܡܸܬ݁ܕ݁ܒܲܚ ܐ݇ܪܵܙܵܢܵܐܝܼܬ݂. ܘܟܲܕ݂ ܚܲܝ ܗ݇ܘ̣ ܠܥܵܠܡܝܼܢ ܡܸܬ݂ܦܲܠܲܓ݂ ܠܟ݂ܠܢܵܫ. ܟܲܕ݂ ܠܵܐ ܡܵܘܦܸܐ ܐܵܘ ܚܵܣܲܪ. ܘܥܲܠ ܗܵܕ݂ ܒܕܸܚܠܵܐ ܘܒܲܪܬܹܝܬ݂ܵܐ. ܢܸܩܥܸܐ ܟܠܲܢ ܩܲܕ݁ܝܼܫ ܩܲܕ݁ܝܼܫ ܩܲܕ݁ܝܼܫܲܬ݁ ܡܵܪܝܵܐ. ܕܲܡܠܹܝܢ ܫܡܲܝܵܐ ܘܐܲܪܥܵܐ ܡ̣ܢ ܬܸܫ̈ܒ݁ܚܵܬܹܗ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ. ܒ. ܕܲܨܠܝܼܒ݂ܵܐ .ܗ. ܕܐܹܠܝܼܵܐ ܒܠܵܟ̣ܘܼ ܩܵܪܹܝ̇ܢܲܢ.
ܒܝܵܘ̈ܡܵܬ݂ܵܐ ܩܲܕ݂ܡܵܝܹ̈ܐ: ܘܐܹܡܲܪ ܦܸܠ̈ܐܵܬ݂ܵܐ ܕܡ̣ܢ ܩܕ݂ܝܼܡ. ܐ݇ܪܵܙܵܐ ܕܨ̣ܵܪ ܝܵܘܢܵܢ ܒܥܘܼܡܩܵܘ̈ܗܝ ܕܲܬ݂ܗܘܿܡܵܐ ܫܩܲܠ̣ ܗ݇ܘ̣ܵܐ ܫܘܼܠܵܡܵܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ. ܓ. ܕܲܨܠܝܼܒ݂ܵܐ. ܘ. ܕܐܹܠܝܼܵܐ ܒܗܵܐ ܦܵܬ݂ܘܿܪܵܐ.
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ: ܐܲܪܝܼܡܘ ܐܝܼܕܲܝ̈ܟ݁ܘܿܢ ܠܩܘܼܕ݂ܫܵܐ ܘܒܲܪܸܟ݂ܘ ܠܡܵܪܝܵܐ. ܕܨܘܼܪܬܵܐ. ܘܟ݂ܠ ܡܸܕܸ݁ܡ ܡܛܲܝܲܒ݂ ܬܵܘ ܠܡܸܫܬ݁ܘܼܬ݂ܵܐ. ܗܵܐ ܡܙܲܡܢܝܼܬܘܿܢ ܠܚܲܝܹ̈ܐ ܚܲܕ݂ܬܹ̈ܐ. ܕܦܲܓ݂ܪܵܐ ܘܲܕ݂ܡܵܐ ܡܚܲܣܝܵܢܵܐ ܨܲܒܸܬ݂ܘ ܩܢܘܿܡܲܝ̈ܟ݁ܘܿܢ. ܘܒܲܙܡܝܼܪ̈ܵܬ݂ܵܐ ܕܪܘܼܚܵܐ ܫܲܒܲܚܘ ܘܐܵܘܕܵܘ. ܠܒܲܪ ܡܲܠܟܵܐ ܕܲܢ̣ܚܸܬ݂ ܨܹܐܕܲܝܢ ܘܦܲܪܩܲܢ ܒܲܨܠܝܼܒܹܗ. ܘܝܲܗ̣݇ܒ݂ ܠܲܢ ܦܲܓ݂ܪܹܗ ܘܲܕ݂ܡܹܗ. ܕܒܹܗ ܪܵܘܙ̇ܝܼܢ ܟܠܗܘܿܢ ܩܲܕܝܼܫܹ̈ܐ. ܘܩܵܥܹܝܢ ܠܹܗ ܩܲܕ݁ܝܼܫ ܩܲܕ݁ܝܼܫ ܩܲܕ݁ܝܼܫ ܡܲܚܸܐ ܟܠ. ܬܢܝܼ. ܘܫܲܒܲܚ ܒܵܗ̇.
ܥܪܘ̣ܒ݂ܬܵܐ. ܓ. ܕܲܨܠܝܼܒ݂ܵܐ. ܘܕܹܐܠܝܼܵܐ ܒܠܵܟ݂ܘܼ ܩܵܪܹܝ̇ܢܲܢ.
ܡܵܪܝܵܐ ܪ̈ܲܚܡܲܝܟ ܠܥܵܠܲܡ: ܐܸܬ݂ܦܲܢ ܥܠܲܝ ܘܪܲܚܸܡܥܲܠܝ. ܒܪ̈ܲܚܡܹܐ ܕܛܲܝܒ݁ܘܼܬ݂ܵܟܼ ܚܲܪܲܪ ܢܲܦ̮̈ܫܵܬܲܢ ܡ̣ܢ ܡܵܘܬܵܐ ܝܲܥܢܵܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ. ܕ. ܕܲܨܠܝܼܒ݂ܐ. ܙ. ܕܐܹܠܝܼܵܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈: ܡܸܛܠ ܕܡ̣ܢ ܠܘܵܬ݂ܵܟܼ ܗ݇ܘ̣ ܫܘܼܒ݂ܩܵܢܵܐ. ܕܨܘܼܪܬܵܐ. ܡܸܛܠ ܕܝܵܘ̈ܡܵܬ݂ܵܐ ܐܸܢܘܿܢ ܗܵܠܹܝܢ ܕܲܬ݂ܒܲܥܬ݂ܵܐ. ܘܲܫܒ݂ܘܿܩ ܠܲܢ ܚܵܘ̈ܒܲܝܢ ܘܲܚܛܵܗܲܝ̈ܢ. ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ. ܡܸܢܵܟܼ ܫܵܐ̇ܠܝܼܢܲܢ ܡܫܝܼܚܵܐ ܦܵܪܘܿܩܲܢ. ܗܵܘ̇ ܕܡܸܬ݂ܪܲܡܪܲܡ ܡ̣ܢ ܥܝܼܪܹ̈ܐ. ܘܡ̣ܢ ܟܪ̈ܘܿܒܹܐ ܘܲܣܪ̈ܵܦܹܐ ܡܸܬ݂ܩܲܕܲܫ. ܠܲܡܩܲܒܵܠܘܼ ܫܘܼܒ݂ܩܵܢܵܐ ܕܚܵܘ̈ܒܹܐ ܘܕܲܚܛܵܗܹ̈ܐ. ܡ̣ܢ ܠܘܵܬ݂ܵܟܼ ܪܵܚܹ̇ܡ ܐ݇ܢܵܫܵܐ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܐܲܪܒܲܥ ܕܲܨܠܝܼܒ݂ܵܐ. ܘܲܕ݂ܫܘܼܠܵܡ ܫܵܒܼܘܿܥܵܐ ܕܐܹܠܝܼܵܐ ܘܒܼܵܗ̇ ܥܵܒܼܕܝܼܢ ܕܘܼܟ݂ܪܵܢܵܐ ܠܡܵܪܝ ܐܹܠܝܼܵܐ ܢܒ݂ܝܼܵܐ ܬܲܫܒ݁ܝܵܝܵܐ. ܘܒ݂ܵܗ̇ ܫܵܪܹܝܢ ܨܲܝܵܡܹ̈ܐ ܨܵܘܡ̱ܗܘܿܢ. ܒܠܵܟ݂ܘܼ ܩܵܪܹܝ̇ܢܲܢ.
ܟܠܗܹܝܢ ܕܡ̣ܢ ܩܕ݂ܝܼܡ ܘܲܠܚܲܪܬ݂ܵܐ: ܬܹܒܹܝܠ ܘܟ̣ܠܗܘܿܢ ܥܵܡܘܿܪܹ̈ܝܗ̇. ܟܠܗܹܝܢ ܒܸܪ̈ܝܵܬ݂ܵܐ ܡܫܲܒ̈ܚܵܢ ܠܐܝܼܬ݂ܘܼܬ݂ܵܟܼ ܟܝܵܢܵܐ ܕܠܵܐ ܫܘܼܪܵܝ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܡܵܪܝ ܡܘܼܫܹܐ ܒܒܲܠܡܹܐܢܹܗ.
ܡܪܲܚܡܵܢ ܐܲܢ݇ܬ݁ ܡܵܪܝܵܐ ܘܙܲܕܝܼܩ: ܐܲܠܵܗܵܐ ܐܲܢ݇ܬ݁ ܡܪܲܚܡܵܢܵܐ. ܕܨܘܼܪܬܵܐ. ܡܸܛܠ ܕܐܲܠܵܗܵܐ ܐܲܢ݇ܬ݁ ܡܪܲܚܡܵܢܵܐ ܘܲܡܪܲܚܦܵܢܵܐ. ܐܲܢ݇ܬ݁ ܐܲܢ݇ܬ݁ ܐܲܠܵܗܵܐ ܒܲܠܚܘܿܕܲܝܟ. ܐܲܢ݇ܬ݁ ܐܲܒ݂ܵܐ ܡܪܲܚܡܵܢܵܐ ܙܲܡܸܢ̣ܬܵܢ ܠܡܲܠܟ݁ܘܼܬ݂ܵܟܼ. ܘܐܲܫ̣ܘܝܼܬܵܢ ܒܛܲܝܒ݁ܘܼܬ݂ܵܟܼ ܠܦܵܬ݂ܘܿܪ ܩܘܼܕ݂ܫܵܐ ܪܘܼܚܵܢܵܐ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܡܵܪܝ ܡܘܼܫܹܐ ܒܠܵܟ̣ܘܼ ܩܵܪܹܝ̇ܢܲܢ.
ܐܹܒܲܪܸܟܼ ܠܡܵܪܝܵܐ ܒܟ̣ܠܙܒܲܢ: ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ. ܒܪܝܼܟ݂ܘܼ ܦܵܪܘܿܩܲܢ ܕܫ̣ܵܘܙܒܹܗ ܠܲܟ݂ܝܵܢܲܢ ܡ̣ܢ ܡܵܘܬܵܐ ܝܲܥܢܵܐ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܡܵܪܝ ܡܘܼܫܹܐ ܒܢܸܬ݁ܛܲܝܲܒ݂ ܒܕܸܚܠ̱ܬ݂ܵܐ.
ܬܵܘ ܢܫܲܒܲܚ ܠܡܵܪܝܵܐ: ܬܵܘ ܒܢܲܝ̈ܵܐ ܫܡܥܘܼܢܝ. ܕܨܘܼܪܬܵܐ. ܚܢܲܢ ܕܹܝܢ ܟܠܲܢ ܒܐܲܦܹ̈ܐ ܓܲܠ̈ܝܵܬ݂ܵܐ: ܐܸܠܵܐ ܛܲܝܸܒ݂ܘ ܢܲܦ̮ܫܟ݂ܘܿܢ ܠܐܲܠܵܗܵܐ. ܬܵܘ ܟܠܲܢ ܢܛܲܝܸܒ݂ ܢܲܦ̮ܫܲܢ ܥܲܡ ܦܲܓ݂ܪ̈ܲܝܢ. ܠܡܵܘܗܲܒ݂ܬ݂ܵܐ ܕܚܝܼܠܬܵܐ ܕܐ݇ܪ̈ܵܙܹܐ ܡܲܚܝܵܢܹ̈ܐ. ܕܗܸܢ̣ܘܿܢ ܦܵܪܩ̇ܝܼܢ ܠܲܢ ܡ̣ܢ ܡܵܘܬܵܐ ܘܲܚܒ݂ܵܠܵܐ. ܘܝܵܗ݇ܒ݁ܝܼܢ ܚܲܝܹ̈ܐ ܠܡܵܝ̈ܘܿܬܹܐ ܒܥܘܼܡܪܵܐ ܕܲܫܡܲܝܵܐ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ̣ܬܵܐ ܕܬܲܪܬܹܝܢ ܕܡܵܪܝ ܡܘܼܫܹܐ ܒܚܸܕ݂ܝܲܬ̤ ܡܲܪܝܲܡ.
ܐܲܠܵܗܲܢ ܒܹܝܬ݂ ܓܲܘܣܲܢ ܥܲܫܝܼܢܵܐ: ܥܕܲܡܵܐ ܠܒܲܝܬܹܗ ܕܐܲܠܵܗܵܐ. ܠܒܹܝܬ݂ ܓܵܘܣܵܐ ܕܥܹܕ݁ܬܵܟܼ ܡܵܪܲܢ. ܪܵܗܛ̇ܝܼܢ ܟܠܗܘܿܢ ܣܵܓ݂ܘܿܕܲܝ̈ܟ. ܕܢܸܣܒ݂ܘܼܢ ܐ݇ܪ̈ܵܙܲܝܟ ܩܲܕ݁ܝܼܫܹ̈ܐ. ܕܢܸܗܘܘܿܢ ܠܚܘܼܣܵܝ ܚܵܘܒܲܝ̈ܗܘܿܢ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܡܵܪܝ ܡܘܼܫܹܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܫܲܒܲܚܘ ܠܡܵܪܝܐ ܒܩܘܼܕ݂ܫܹܗ: ܐܲܝܢܵܐ ܕܕܲܟ݂̈ܝܵܢ ܐܝܼܕ݂ܵܘ̈ܗܝ ܘܲܓ݂ܒܸܐ ܒܠܸܒܹ݁ܗ: ܠܐܲܝܠܹܝܢ ܕܲܬ݂ܪܝܼܨܝܼܢ ܒܠܸܒ݁ܗܘܿܢ. ܡܲܬ݂ܩܸܢ ܐܲܢ݇ܬ݁ ܩܕ݂ܵܡܲܝܢ ܦܵܬ݂ܘܿܪܵܐ ܠܚܘܼܣܵܝܵܐ. ܠܐܲܝܢܵܐ ܕܐܝܼܬ݂ܵܘܗܝ ܙܲܟܵܝܵܐ. ܕܕܲܟ݂̈ܝܵܢ ܐܝܼܕ݂ܵܘ̈ܗܝ ܘܲܓ݂ܒܸܐ ܒܠܸܒܹ݁ܗ. ܘܲܒ݂ܙܲܗܝܘܼܬ݂ܵܐ ܡܸܬ݂ܩܲܪܲܒ݂. ܩܘܼܪܒܵܢܵܐ ܠܚܲܛܵܝܹ̈ܐ ܝܲܗ̣݇ܒ݂ܬܵܝܗܝ ܐܲܠܵܗܵܐ ܫܘܼܒ݂ܚܵܐ ܠܵܟܼ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܡܪܝ ܡܘܼܫܹܐ ܒܲܒ݂ܝܲܕ݂ ܫܠܵܡܵܐ.
ܘܒܸܛܠܲܬ̤ ܗܲܝܡܵܢܘܼܬ݂ܵܐ ܡ̣ܢ ܐܲܪܥܵܐ: ܦܪܘܿܩ ܡܵܪܝܵܐ ܡܸܛܠ ܕܲܓ݂ܡܲܪ݂ ܛܵܒ̣ܵܐ. ܐܸܒ݂ܕܲܬ̤ ܠܵܗ̇ ܗܲܝܡܵܢܘܼܬ݂ܵܐ ܡܸܢܗܘܿܢ ܕܲܡܗܲܝܡܢܹ̈ܐ. ܘܒܸܐܣܟܹ݁ܡܵܐ ܗ݇ܘ̣ ܒܲܠܚܘܿܕ݂ ܡܚܵܘܹܝ̇ܢ ܠܹܗ ܠܢܝܼܫܵܐ ܕܲܫܪܵܪܗܘܿܢ. ܡܵܪܲܢ ܡܵܪܲܢ ܩܵܪܹܝ̇ܢ ܒܣܸܦ̈ܘܵܬ݂ܗܘܿܢ. ܘܲܒ݂ܓ݂ܵܘ ܠܸܒ݁ܗܘܿܢ ܟܡܹܐܢܹ̈ܐ ܘܦܘܼܠܵܓܹ̈ܐ. ܐܵܬܹ̇ܐ ܡܵܘܬܵܐ ܡ̣ܢ ܫܸܠܝܵܐ ܘܕ݂ܵܒܲܪ ܢܲܦ̮̈ܫܵܬ݂ܗܘܿܢ. ܐܸܬ݁ܕܲܟ̣ܪ̄ܘ ܐܲܚܲܝ̈ ܕܕ݂ܝܼܢܵܐ ܣܝܼܡ ܩܘܼܕ݂ܡܲܝܢ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܡܵܪܝ ܡܘܼܫܹܐ ܒܲܒ݂ܝܲܕ݂ ܫܠܵܡܵܐ.
ܗܵܘ̇ ܕܐܝܼܬ݂ܵܘܗܝ ܡ̣ܢ ܩܕ݂ܵܡ ܥܵܠܡܹ̈ܐ: ܗܘ̤ܝܘ̣ ܡܵܪܝܵܐ ܐܲܠܵܗܲܢ. ܐܲܠܵܗܵܐ ܐܝܼܬ݂ܝܵܐ ܚܲܕ݂ܘܼ ܕܠܲܓ݂ܡܵܪ ܠܵܐ ܡܸܬ݁ܕ݁ܪܸܟܼ. ܘܐܝܼܬ݂ܵܘܗܝ ܒܲܬ݂ܠܵܬ݂ܵܐ ܩܢܘܿܡܹ̈ܐ ܕܫܘܼܪܵܝܵܐ ܠܲܝܬ݁ ܠܗܘܿܢ. ܐܲܒ݂ܵܐ ܕܡ̣ܢ ܡܬ݂ܘܿܡ ܕܐܲܒ݂ܵܐ ܠܲܝܬ݁ ܠܹܗ. ܘܲܒ݂ܪܵܐ ܕܡܸܢܹܗ ܕܲܒ݂ܪܵܐ ܠܵܐ ܩܢܸܐ. ܘܪܘܼܚܵܐ ܕܩܘܼܕ݂ܫܵܐ ܢܵܦܘܿܩܵܐ ܟܝܵܢܵܐ ܗ݇ܘ̣ ܕܐܲܚܝܼܕ݂ ܠܟ݂ܠ. ܠܹܗ ܬܸܫܒ݁ܘܿܚܬܵܐ ܒܗܲܝܟܲܠ ܐ݇ܢܵܫܘܼܬܲܢ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܐܲܪܒܲܥ ܕܡܵܪܝ ܡܘܼܫܹܐ ܒܣܵܗ̈ܕܹ݁ܐ ܒܪ̈ܝܼܟܹܐ.
ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ: ܐܲܝܢܵܐ ܕܕܲܟ݂̈ܝܵܢ ܐܝܼܕ݂ܵܘ̈ܗܝ ܘܲܓ݂ܒܸܐ ܒܠܸܒܹ݁ܗ. ܒܥܸܕܵܢܵܐ ܕܥܵܐܹ̇ܠ ܟܵܗܢܵܐ ܠܒܹܝܬ݂ ܩܘܼܕ݂ܫܵܐ. ܕܢܸܓ݂ܡܘܿܪ ܘܲܢܫܲܡܠܸܐ. ܐ݇ܪܵܙܵܐ ܕܡܵܘܬܹ݁ܗ ܘܕܲܩܝܵܡܬܹ݁ܗ. ܕܝܼܫܘܿܥ ܦܵܪܘܿܩܵܐ ܕܟ݂ܠܵܐ. ܠܥܸܠ ܢܸܗܘܘܿܢ ܪܸ̈ܥܝܵܢܲܝܟ݁ܘܿܢ. ܒܢܲܝ̈ ܐ݇ܪܵܙܵܐ ܕܗܲܝܡܵܢܘܼܬ݂ܵܐ. ܕܲܬ݂ܩܲܒ݁ܠܘܼܢ ܡܸܢܹܗ ܡܵܘܗܲܒ݂ܬ݂ܵܐ. ܬܢܝܼ. ܘܫܲܒܲܚ ܒܵܗ̇.
ܚܲܕܒ݁ܫܲܒܵܐ ܕܚܲܡܫܵܐ ܕܡܵܪܝ ܡܘܼܫܹܐ ܒܫܘܼܪܵܝ ܙܵܥܲܬ̤ ܐܲܪܥܵܐ.
ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ݂ܵܘ: ܙܡܲܪܘ ܠܡܵܪܝܵܐ ܒܟܸܢܵܪܹ̈ܐ ܘܲܒ݂ܩܵܠܵܐ ܕܲܙܡܵܪܵܐ. ܕܨܘܼܪܬܵܐ. ܥܕܲܡܵܐ ܠܗܵܪܟܵܐ ܣܵܘܦܵܗ̇ ܕܡܸܠܬ݂ܵܐ. ܠܲܠܡܹܐܢܵܐ ܕܐ݇ܪ̈ܵܙܹܐ ܠܵܐ ܡܸܬ݂ܡܲܠܠܵܢܹ̈ܐ. ܡܲܢܲܥ̣ܢ ܕܢܸܣܲܒ݂. ܘܢܸܫܬ݁ܘܸܐ ܟܠܲܢ ܕܲܢܫܝܼܓ݂ ܨܵܐܘܼܬ݂ܵܐ ܡ̣ܢ ܢܲܦ̮ܫܲܢ. ܘܢܸܩܪܘܿܒ݂ ܠܕܸܒ݂ܚܵܐ ܕܲܟ݂ܝܵܐ ܕܠܵܐ ܡܘܼܡܵܐ. ܘܢܹܐܪܲܬ݂ ܚܲܝܹ̈ܐ ܕܲܠܥܵܠܲܡ ܕܠܵܐ ܡܵܝܬ݁ܝܼܢ. ܐܲܝܟܼ ܕܐܸܫܬܵܘܕ݁ܝܼ ܡܫܝܼܚܵܐ ܡܲܠܟܲܢ ܠܪ̈ܵܚܡܵܘܗܝ. ܘܢܲܩܒܸܠ ܐܲܦܵܘ̈ܗܝ ܕܐܲܠܵܗܲܢ ܒܗܘܼܠܵܠܹ̈ܐ ܕܬ݂ܵܘܕܝܼܬ݂ܵܐ. ܘܥܲܡ ܐܲܠܦܹ̈ܐ ܕܲܟ݂ܪ̈ܘܿܒܹܐ ܘܪܸ̈ܒ݁ܘܵܬ݂ܵܐ ܕܲܣܪ̈ܵܦܹܐ ܫܲܘܝܵܐܝܼܬ݂ ܢܹܐܡܲܪ. ܩܲܕܝܼܫ ܩܲܕܝܼܫ ܩܲܕܝܼܫܲܬ݁. ܡܲܠܟܵܐ ܓܲܐܝܵܐ ܕܬܸܫܒ݁ܘܿܚܬܵܐ ܪܲܚܸܡܥܠܲܝܢ: ܬܢܝܼ. ܫܲܒܲܚ. ܒܲܡܫܝܼܚܵܐ ܐܸܬ݂ܝܼܠܸܕ݂. ܠܥܹܕ݁ܬܵܟܼ ܦܵܪܘܿܩܲܢ ܩܲܕܸܫ ܒܲܚܢܵܢܵܟܼ. ܘܐܲܫܪܵܐ ܛܲܝܒܘܼܬ݂ܵܟܼ ܒܗܲܝܟ݁ܠܵܐ ܕܲܦܪܝܼܫ ܠܐܝܼܩܵܪܵܟܼ. ܘܲܬ݂ܪܘܿܨ ܒܓ݂ܵܘܹܗ ܡܲܕ݂ܒ݁ܚܵܟܼ ܙܲܗܝܵܐ. ܕܲܥܠܵܘܗܝ ܡܸܙܕܲܝܲܚ ܦܲܓ݂ܪܵܟܼ ܘܲܕ݂ܡܵܟܼ ܡܵܪܝܵܐ.
ܥܪܘܼܒ݂ܬܵܐ ܕܚܲܡܸܫ ܕܡܵܪܝ ܡܘܼܫܹܐ ܒܲܠܡܹܐܢܹܗ.
ܝܲܗ̣݇ܒ݂ܬ݁ ܠܕ݂ܵܚܠܲܝ̈ܟ ܐܵܬ̤ܵܐ. ܡܹܐܟ݂ܘܼܠܬܵܐ ܝܲܗ̣݇ܒ݂ ܠܕ݂ܵܚܠܵܘ̈ܗܝ. ܣܲܡ ܚܲܝܹ̈ܐ ܠܡܝܼܬ݂ܘܼܬܲܢ ܒܐ݇ܪ̈ܵܙܵܘܗܝ ܝܲܗ̣݇ܒ݂ܠܲܢ ܡܵܪܲܢ. ܘܗܵܐ ܒܓ݂ܵܘ ܥܹܕ݁ܬܵܐ ܡܸܬ݂ܦܲܠܲܓ݂ ܡܵܝܘܿܬܹ̈ܐ ܩܪܘܿܒ݂ܘ ܣܲܒ݂ܘ ܘܲܚܝܵܘ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒܫܲܒܵܐ ܕܸܫܬܵܐ ܕܡܵܪܝ ܡܘܼܫܹܐ ܒܡܵܪܵܐ ܕܟ݂ܠܵܐ.
ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ: ܘܐܲܢ݇ܬ݁ ܡܵܪܝܵܐ ܬܸܛܲܪ ܐܸܢܘܿܢ. ܩܠܝܼܕܹ̈ܐ ܕܓܲܙܵܐ ܫܡܲܝܵܢܵܐ. ܠܒ݂ܝܼܟ݂ܝܼܢ ܟܵܗܢܹ̈ܐ ܒܐܝܼܕܲܝ̈ܗܘܿܢ. ܘܝܵܗ݇ܒ݁ܝܼܢ ܚܲܝܹ̈ܐ ܠܡܵܝܘܿܬܹ̈ܐ. ܒܓ݂ܵܘ ܒܹܝܬ݂ ܩܘܼܕ݂ܫܵܐ ܪܘܼܚܵܢܵܐ. ܘܚܲܝܠܵܐ ܢܵܚܹܬ݂ ܡܼܢ ܪܵܘܡܵܐ. ܘܓ݂ܵܡܲܪ ܒܲܥܓܲܠ ܡܸܠܲܝ̈ܗܘܿܢ. ܘܝܵܩܹܕ݂ ܝܲܥܪܵܐ ܕܲܚܛܝܼܬ݂ܵܐ. ܒܚܲܝܠܵܐ ܕܪܘܼܚܵܐ ܩܲܕܝܼܫܵܐ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒܼܬܵܐ ܕܫܸܬ݂ ܕܡܵܪܝ ܡܘܼܫܹܐ ܒܠܵܟ݂ܘܼ ܩܵܪܹܝ̇ܢܲܢ.
ܟܵܗܢܲܝ̈ܟ ܢܸܠܒ݁ܫܘܼܢ ܙܲܕܝܼܩܘܼܬ݂ܵܐ ܘܙܲܕܝܼܩܲܝ̈ܟ ܫܘܼܒܼܚܵܐ: ܐܸܙܕܲܗ̄ܪܘ ܘܠܵܐ ܬܸܚܛܘܿܢ. ܟܵܗܢܹ̈ܐ ܕܲܫ̣ܘܲܝܬ݁ܘܿܢ ܕܬܸܗܘܘܿܢ ܡܲܠܲܐܟܹ̈ܐ. ܐܸܙܕܲܗ̄ܪܘ ܡ̣ܢ ܥܵܘ̣ܠܵܐ: ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܫܲܒ݂ܥܵܐ ܕܡܵܪܝ ܡܘܼܫܹܐ ܡܫܝܼܚܵܐ ܐܸܬ݂ܝܼܠܸܕ݂.
ܐܲܝܢܵܐ ܕܕܲܟ݂̈ܝܵܢ ܐܝܼܕ݂ܵܘ̈ܗܝ ܘܲܓ݂ܒܸܐ ܒܠܸܒܹܗ: ܘܠܸܫܵܢܹܗ ܡܡܲܠܸܠ ܕܝܼܢܵܐ. ܩܵܪܹܐ ܠܵܗ̇ ܟܵܗܢܵܐ ܠܪܘܼܚܵܐ ܟܲܣܝܵܐܝܼܬ݂. ܘܢܵܚ̇ܬܵܐ ܡ̣ܢ ܪܵܘܡܵܐ ܘܥܵܒ݂ܕܵܐ ܨܸܒ݂ܝܵܢܹܗ. ܘܲܡܩܲܕ݁ܫܵܐ ܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ: ܘܫܵܩ̇ܠܝܼܢ ܠܹܗ ܥܲܡܡܹ̈ܐ ܘܚܵܝܹܝܢ ܒܹܗ ܠܥܵܠܲܡ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܫܒܲܥ ܕܡܵܪܝ ܡܘܼܫܹܐ ܒܚܸܕ݂ܝܲܬ̤ ܡܲܪܝܲܡ.
ܒܲܪܸܟ݂ܘ ܠܡܵܪܝܵܐ ܡܲܠܲܐܟ݂ܵܘ̈ܗܝ: ܡܫܲܡܫܵܢܵܘ̈ܗܝ ܕܥܵܒ݂ܕ݁ܝܼܢ ܨܸܒܼܝܵܢܹܗ. ܟܸܢܫܹ̈ܐ ܫܒ݂ܝܼܚܹ̈ܐ ܕܡܲܠܲܐܟܹ̈ܐ. ܪܓ݂ܝܼܓ݂ܝܼܢ ܠܐ݇ܪ̈ܵܙܹܐ ܕܫܵܩ̇ܠܝܼܢܲܢ. ܒܕܸܚܠܵܐ ܩܵܝ̇ܡܝܼܢ ܒܲܪܬܹܝܬ݂ܵܐ. ܒܩܘܼܕܵܫܹܗ ܕܐ݇ܪܵܙܵܐ ܚܲܝܵܐ: ܬܢܝܼ. ܫܲܒܲܚ. ܐ݇ܪܵܙܵܐ ܕܨ̣ܵܪ ܗ̣݇ܘܵܐ ܒܲܪ ܡܲܬܲܝ. ܒܓ݂ܵܘ ܢܘܼܢܵܐ ܕܲܒ݂ܓ݂ܵܘ ܝܲܡܵܐ. ܫ̣ܩܲܠ ܫܘܼܠܵܡܵܐ ܫܲܪܝܼܪܵܐ. ܒܲܩܝܵܡܬܹܗ ܕܡܲܠܟܵܐ ܡܫܝܼܚܵܐ.
ܚܲܕ݂ܒ݁ܫܲܒܵܐ ܩܲܕ݂ܡܵܝܵܐ ܕܩܘܼܕܵܫ ܥܹܕ݁ܬܵܐ ܒܫܘܼܪܵܝ ܗܵܘ ܕܒ݂ܐܝܼܬ݂ܘܼܬܹܗ.
ܐܸܬ݂ܦܲܨܚ̄ܘ ܘܙܲܡܲܪܘ ܘܫܲܒܲܚܘ: ܫܡܲܥܝ ܒܪܲܬ݂ܝ ܘܲܚܙܵܝ ܘܲܨܠܵܝ ܐܸܕ݂ܢܹܟ݂ܝ. ܕܨܘܼܪܬܵܐ. ܕܘܼܨܹܝ̈ܢ ܘܫܲܒܲܚܹܝ̈ܢ ܐܲܟ݂ܚ݇ܕ݂ܵܐ ܚܲܪ̈ܒ݂ܵܬ݂ܵܐ ܕܐܘܿܪܸܫܠܸܡ. ܕܘܼܨܝ ܘܲܚܕ݂ܵܝ ܥܹܕ݁ܬܵܐ ܡܗܲܝܡܲܢܬܵܐ ܒܲܪ݇ܬ݂ ܡܲܠܟܵܐ ܕܥܵܠܡܹ̈ܐ. ܒܚܲܬ݂ܢܵܐ ܕܡܲܟ݂ܪܹܟ݂ܝ ܘܐܲܥܠܹܟ݂ܝ ܠܩܲܝܛܘܿܢܹܗ. ܘܲܚܠܵܦ ܦܸܪܢܝܼܬ݂ܵܐ ܝܲܗ̣݇ܒ݂ ܠܹܟ̣ܝ ܦܲܓ݂ܪܹܗ ܘܲܕ݂ܡܹܗ ܝܲܩܝܼܪܵܐ. ܘܲܒ݂ܝܲܕ݂ ܕܸܒ݂ܚܵܐ ܕܲܩܢܘܿܡܹܗ ܚܲܣ̣ܝܹܟ݂ܝ ܘܩܲܕܫܹܟ݂ܝ ܘܥܲܒ݂ܕܹܟ݂ܝ ܠܹܗ ܟܲܠܬ݂ܵܐ ܡܨܲܒܲܬ݁ܬܵܐ. ܘܲܡ̣ܙܲܓ݂ ܒܓ݂ܵܘܹܟ݂ܝ ܫܸܩܝܵܐ ܪܘܼܚܵܢܵܐ. ܠܟ݂ܠܗܘܿܢ ܝܲܠܕܲܝ̈ܟ݁ܝ. ܘܗܵܐ ܡܸܬ݂ܒܲܣܡܝܼܢ ܒܓ݂ܵܘ ܒܹܝܬ݂ ܩܘܼܕ݂ܫܵܐ. ܟܲܕ݂ ܪܵܘܙ̇ܝܼܢ. ܘܥܲܡܗܘܿܢ ܐܵܦ ܚܢܲܢ ܢܸܩܥܸܐ ܘܢܹܐܡܲܪ ܫܘܼܒ݂ܚܵܐ ܠܵܟܼ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܩܲܕ݂ܡܵܝܬܵܐ ܕܩܘܼܕܵܫ ܥܹܕ݁ܬܵܐ ܒܚܸܕ݂ܝܲܬ̤ ܡܲܪܝܲܡ.
ܐܲܠܵܗܲܢ ܒܹܝܬ݂ ܓܵܘܣܲܢ ܥܲܫܝܼܢܵܐ: ܐܲܟ݂ܚ݇ܕ݂ܵܐ ܥܲܬ݁ܝܼܖܹ̈ܐ ܘܡܸܣܟܹܢܹ̈ܐ. ܠܒܹܝܬ݂ ܓܵܘܣܵܐ ܕܥܹܕ݁ܬܵܟܼ ܡܵܪܲܢ. ܪܵܗܛ̇ܝܼܢ ܟܠܗܘܿܢ ܣܵܓ݂ܘܿܕܲܝ̈ܟ. ܕܢܸܣܒ݂ܘܼܢ ܐ݇ܖ̈ܵܙܲܝܟ ܩܲܕܝܼܫܹ̈ܐ. ܕܢܸܗܘܘܿܢ ܠܚܘܼܣܵܝ ܚܵܘܒܲܝ̈ܗܘܿܢ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܪܹܝܢ ܕܩܘܼܕܵܫ ܥܹܕ݁ܬܵܐ ܒܐܲܝܠܹܝܢ ܕܐܸܬ݁ܬ݁ܚܸܕ݂ܘ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ: ܐܲܢ݇ܬ݁ܘܼ ܦܪܲܩ̣ܬܵܢ ܡ̣ܢ ܣܵܢܐܲܝ̈ܢ. ܕܨܘܼܪܬܵܐ. ܡܲܠܟ݁ܘܼܬܹܗ ܡܲܠܟ݁ܘܼܬ݂ ܥܵܠܲܡ: ܡܲܢ ܠܵܐ ܢܸܕ݂ܚܲܠ ܠܵܟܼ ܡܲܠܟܵܐ ܕܟܼܠܗܘܿܢ ܥܵܠܡܹ̈ܐ. ܡܲܠܟܵܐ ܡܫܝܼܚܵܐ ܐܲܢ݇ܬ݁ܘܼ ܕܲܠܥܹܕܲܬ݂ ܩܘܼܕ݂ܫܵܐ ܒܲܕ݂ܡܵܟܼ ܝܲܩܝܼܪܵܐ ܦ̣ܪܲܩ̣ܬܵܗ̇ ܡ̣ܢ ܛܘܼܥܝܲܝ. ܗܲܒ݂ܠܲܢ ܒܲܚܢܵܢܵܟܼ ܕܲܒ݂ܟ݂ܠܙܒܲܢ ܢܸܫܬ݁ܘܸܐ ܠܡܸܥܒܲܕ݂ ܨܸܒ݂ܝܵܢܵܟܼ. ܘܲܒ݂ܠܸܒܵܐ ܕܲܟ݂ܝܵܐ ܙܲܗܝܵܐܝܼܬ݂ ܩܘܼܪܒܵܢܵܐ ܢܩܲܪܸܒ݂ ܠܐܲܠܵܗܘܼܬ݂ܵܟܼ. ܘܥܲܡ ܟܸܢܫܹ̈ܐ ܕܡܲܠܲܐܟܹ̈ܐ ܢܲܣܸܩ ܠܵܟܼ ܬܸܫܒ݁ܘܿܚܬܵܐ ܒܕܸܚܠ̱ܬ݂ܵܐ ܟܲܕ݂ ܐܵܡ̇ܪܝܼܢܲܢ. ܩܲܕ݁ܝܼܫ ܩܲܕ݁ܝܼܫ ܩܲܕ݁ܝܼܫܲܬ݁ ܡܵܪܝܵܐ ܐܲܠܵܗܵܐ ܦܵܪܘܿܩܲܢ: ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܬܲܪܬܹ݁ܝܢ ܕܩܘܼܕܵܫ ܥܹܕ݁ܬܵܐ ܒܲܒ݂ܝܲܕ݂ ܫܠܵܡܵܐ.
ܦܪܘܿܩ ܡܵܪܝܵܐ ܡܸܛܠ ܕܲܓ݂ܡܲܪ ܛܵܒ̣ܵܐ: ܘܒܸܛܠܲܬ̤ ܗܲܝܡܵܢܘܼܬ݂ܵܐ ܡ̣ܢ ܐܲܪܥܵܐ. ܐܸܒ݂ܕܲܬ̤ ܠܵܗ̇ ܗܲܝܡܵܢܘܼܬ݂ܵܐ ܡܸܢܗܘܿܢ ܕܲܡܗܲܝܡܢܹ̈ܐ. ܘܒܸܐܣܟܹ݁ܡܵܐ ܗ݇ܘ̣ ܒܲܠܚܘܿܕ݂ ܡܚܵܘܹܝܢ ܠܹܗ ܠܢܝܼܫܵܐ ܕܲܫܪܵܪܗܘܿܢ. ܡܵܪܲܢ ܡܵܪܲܢ ܩܵܪܹܝ̇ܢ ܒܣܸܦ̈ܘܵܬ݂ܗܘܿܢ. ܘܲܒ݂ܓ݂ܵܘ ܠܸܒ݁ܗܘܿܢ ܟܡܹܐܢܹ̈ܐ ܘܦܘܼܠܵܓܹ̈ܐ. ܐܵܬܹ݁ܐ ܡܵܘܬܵܐ ܡ̣ܢ ܫܸܠܝܵܐ ܘܕ݂ܵܒܲܪ ܢܲܦ̮̈ܫܵܬ݂ܗܘܿܢ. ܐܸܬ݁ܕܲܟ݂̄ܪܘ ܐܲܚܲܝ̈ ܕܕ݂ܝܼܢܵܐ ܣܝܼܡ ܩܘܼܕ݂ܡܲܝܢ. ܬܢܝܼ. ܘܫܲܒܲܚ ܒܵܗ̇.
ܚܲܕ݂ܒ݁ܫܲܒܵܐ ܕܲܬ݂ܠܵܬ݂ܵܐ ܕܩܘܼܕܵܫ ܥܹܕ݁ܬܵܐ ܒܐܲܒ̣ܘܼܢ ܓܢܝܼܙܵܐ.
ܡܵܐ ܚܲܒ݁ܝܼܒ݂ܝܼܢ ܡܲܫܟ݁ܢܲܝ̈ܟ ܡܵܪܝܵܐ ܚܲܝܠ̱ܬ݂ܵܢܵܐ: ܢܸܥܘܿܠ ܠܡܲܫܟ݁ܢܹܗ ܘܢܸܣܓ݁ܘܿܕ݂ ܠܟ݂ܘܼܒ݂ܫܵܐ ܕܪܸ̈ܓ݂ܠܵܘܗܝ: ܝܲܩܝܼܪ̈ܵܬ݂ܵܐ ܐܸܬ݂ܡܲܠܲܠ ܒܹܟ̣ܝ ܩܪܝܼܬܹܗ ܕܐܲܠܵܗܲܢ. ܕܨܘܼܪܬܵܐ. ܡܸܛܠ ܕܪܲܒ݁ܘܼ ܕܲܒ݂ܓ݂ܵܘܹܟ݂ܝ ܩܲܕ݁ܝܼܫܵܐ ܕܝܼܣܪܵܝܹܠ. ܡܵܪܝܵܐ ܒܓ݂ܵܘܹܟ̣ܝ ܬܘܼܒ݂ ܠܵܐ ܬܸܚܙܹܝܢ ܒܝܼܫܬܵܐ. ܒܡܲܫܟ݁ܢܲܝ̈ܟ݁ܝ ܥܹܕ݁ܬܵܐ ܡܗܲܝܡܲܢܬܵܐ. ܐܲܝܟܼ ܕܲܒ̣ܐ݇ܪܵܙܵܐ ܗܵܐ ܚܵܙܹܝܢܲܢ. ܠܐܸܡܪܹܗ ܚܲܝܵܐ ܕܐܲܠܵܗܵܐ. ܟܲܕ݂ ܡܸܙܕܲܝܲܚ ܥܲܠ ܡܲܕ݂ܒ݁ܚܹܟ݂ܝ ܙܲܗܝܵܐ. ܘܲܕ݂ܢܵܩܹ̇ܦ ܠܹܗ ܒܪܸܚܡ̱ܬ݂ܵܐ܀ ܗܵܘܹ̇ܐ ܥܲܡܹܗ ܒܲܚܕ݂ܵܐ ܪܘܼܚܵܐ. ܒܗܵܝ̇ ܡܲܠܟ݁ܘܼܬ݂ܵܐ ܕܠܵܐ ܡܸܫܬܲܪܝܵܐ. ܘܢܵܣܹ̇ܒ݂ ܡܸܢܹܗ ܟܠܝܼܠܵܐ ܦܲܐܝܵܐ. ܘܐܸܣܛܲܠ ܫܘܼܒ݂ܚܵܐ ܕܠܵܐ ܡܸܬ݂ܚܲܒ݁ܠܵܐ. ܘܒ݂ܐܝܼܕܹܗ ܠܐܲܒ݂ܵܐ ܡܸܬ݂ܩܲܪܲܒ݂. ܐܲܝܟܼ ܗܲܕܵܡܵܐ ܥܲܠ ܪܹܫ ܓܘܼܫܡܵܐ. ܘܗܘ̤ܝܘ̣ ܪܹܫܵܐ ܫܲܪܝܼܪܵܐ. ܘܲܚܢܲܢ ܦܲܓ݂ܪܵܐ ܠܹܗ ܝܲܩܝܼܪܵܐ܀ ܒܪܘܿܟ݂ܝ ܘܲܣܓ݂ܘܿܕ݂ܝ ܠܹܗ ܒܕܸܚܠܵܐ ܘܲܒ݂ܚܘܼܒܵܐ. ܥܲܠ ܐܲܦܲܝ̈ ܗܵܕܹܐ ܛܲܝܒ݁ܘܼܬ݂ܵܐ: ܡܸܛܠ ܕܗܘ̤ܝܘ̣ ܡܵܪܹܟ݂ܝ. ܡܫܝܼܚܵܐ ܡܲܠܟܵܐ ܕܬܸܫܒ݁ܘܿܚܬܵܐ. ܠܹܗ ܐܸܬ݂ܟܲܫܲܦܝ ܘܲܒ݂ܥܵܝ ܕܲܢܚܘܼܣ ܥܠܲܝܟ݁ܝ. ܬܢܝܼ. ܘܫܲܒܲܚ ܒܵܗ̇.
ܥܪܘܼܒ݂ܬܵܐ ܕܲܬ݂ܠܵܬ݂ ܕܩܘܼܕܵܫ ܥܹܕ݁ܬܵܐ ܒܣܵܗܕܹ̈ܐ ܒܪ̈ܝܼܟܹܐ.
ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ: ܐܲܝܢܵܐ ܕܕܲܟ݂̈ܝܵܢ ܐܝܼ̈ܕ݂ܵܘܗܝ ܘܲܓ݂ܒܸܐ ܒܠܸܒܹ݁ܗ. ܒܥܸܕܵܢܵܐ ܕܥܵܐܹ̇ܠ ܟܵܗܢܵܐ ܠܒܹܝܬ݂ ܩܘܼܕ݂ܫܵܐ. ܕܢܸܓ݂ܡܘܿܪ ܘܲܢܫܲܡܠܸܐ. ܐ݇ܪܵܙܵܐ ܕܡܵܘܬܹ݁ܗ ܘܕܲܩܝܵܡܬܹܗ. ܕܝܼܫܘܿܥ ܦܵܪܘܿܩܵܐ ܕܟ݂ܠܵܐ. ܠܥܸܠ ܢܸܗܘܘܿܢ ܪܸ̈ܥܝܵܢܲܝܟ݁ܘܿܢ. ܒܢܲܝ̈ ܐ݇ܪܵܙܵܐ ܕܗܲܝܡܵܢܘܼܬ݂ܵܐ. ܕܲܬ݂ܩܲܒ݁ܠܘܼܢ ܡܸܢܹܗ ܡܵܘܗܲܒ݂ܬ݂ܵܐ. ܬܢܝܼ. ܘܫܲܒܲܚ ܒܵܗ̇.
ܕܘܼܟ݂ܪܵܢܵܐ ܕܡܵܪܝ ܝܲܥܩܘܿܒ݂ ܡܦܲܣܩܵܐ ܒܣܵܗܕܹ̈ܐ ܒܪ̈ܝܼܟܹܐ.
ܬܵܘ ܢܸܒ̣ܪܘܿܟܼ ܘܢܸܣܓ݁ܘܿܕ݂ ܠܹܗ: ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹ݁ܗ ܕܡܵܪܝܵܐ ܒܠܲܝ̈ܠܵܘܵܬ݂ܵܐ. ܬܵܘ ܟܹܝܬ݂ ܚܲܒ݁ܝܼܒܲܝ̈ ܢܸܚܬ݁ܘܿܡ ܒܲܚܦܝܼܛܘܼ ܠܝܵܘܡܵܐ ܕܕ݂ܘܼܟ݂ܪܵܢܹܗ. ܕܣܵܗܕܵܐ ܙܲܗܝܵܐ ܘܩܲܕ݁ܝܼܫܵܐ. ܡܵܪܝ ܝܲܥܩܘܿܒ̣ ܕܡ̣ܢ ܒܹܝܬ݂ ܠܵܦܵܛ. ܘܢܸܫܐܲܠ ܪ̈ܲܚܡܹܐ ܒܲܨܠܘܿܬܹܗ. ܡ̣ܢ ܡܵܪܵܐ ܕܚܲܝܸܠ ܠܥܲܒ̣ܕܹ݁ܗ. ܕܲܢܫܵܘܬ݁ܦܲܢ ܥܲܡܹܗ ܒܡܲܠܟ݁ܘܼܬ݂ܵܐ: ܬܢܝܼ. ܫܲܒܲܚ. ܚܘܼܬܵܡܵܐ ܕܚܲܝܹ̈ܐ ܒܥܘܼܢܕܵܢܵܐ ܢܝܼܚܵܐ ܘܡܵܘܬܵܐ ܕܲܒܼܙܸܕ݂ܩܵܐ. ܐܲܓ݂ܙܲܪ ܠܲܢ ܡܵܪܲܢ ܝܼܫܘܿܥ. ܒܲܨܠܘܿܬ݂ ܡܵܪܝ ܝܲܥܩܘܿܒܼ ܡܦܲܣܩܵܐ. ܘܢܸܫܬ݁ܘܸܐ ܠܡܸܚܙܵܐ ܦܲܪܨܘܿܦܵܟܼ. ܥܲܡܹܗ ܒܐܲܬܲܪ ܦܘܼܢܵܩܵܐ. ܘܢܸܫܬܵܘܙܲܒ݂ ܡܼܢ ܥܘܼܙ ܬܲܫܢܝܼܩܵܐ.
ܚܲܕ݂ܒ݁ܫܲܒܵܐ ܕܐܲܪܒ݁ܥܵܐ ܕܩܘܼܕܵܫ ܥܹܕ݁ܬܵܐ ܒܫܘܼܪܵܝ ܙܵܥܲܬ̤ ܐܲܪܥܵܐ.
ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨܒ݂ܵܘ: ܙܡܲܪܘ ܠܡܵܪܝܵܐ ܒܟܸܢܵܪܹ̈ܐ ܘܲܒ݂ܩܵܠܵܐ ܕܲܙܡܵܪܵܐ. ܕܨܘܼܪܬܵܐ. ܥܕܲܡܵܐ ܠܗܵܪܟܵܐ ܣܵܘܦܵܗ̇ ܕܡܸܠܬ݂ܵܐ. ܠܲܠܡܹܐܢܵܐ ܕܐ݇ܪ̈ܵܙܹܐ ܠܵܐ ܡܸܬ݂ܡܲܠܠܵܢܹ̈ܐ. ܡܲܢܲܥ̣ܢ ܕܢܸܣܲܒ݂. ܘܢܸܫܬ݁ܘܸܐ ܟܠܲܢ ܕܲܢܫܝܼܓ݂ ܨܵܐܘܼܬ݂ܵܐ ܡ̣ܢ ܢܲܦ̮ܫܲܢ. ܘܢܸܩܪܘܿܒ݂ ܠܕܸܒ݂ܚܵܐ ܕܲܟ݂ܝܵܐ ܕܠܵܐ ܡܘܼܡܵܐ. ܘܢܹܐܪܲܬ݂ ܚܲܝܹ̈ܐ ܕܲܠܥܵܠܲܡ ܕܠܵܐ ܡܵܝ̇ܬ݁ܝܼܢ. ܐܲܝܟ ܕܐܸܫܬܵܘܕ݁ܝܼ ܡܫܝܼܚܵܐ ܡܲܠܟܲܢ ܠܪ̈ܵܚܡܵܘܗܝ. ܘܢܲܩܒܸ݁ܠ ܐܲܦܵܘ̈ܗܝ ܕܐܲܠܵܗܲܢ ܒܗܘܼ̈ܠܵܠܹܐ ܕܬ݂ܵܘܕ݁ܝܼܬ݂ܵܐ. ܘܥܲܡ ܐܲܠܦܹ̈ܐ ܕܲܟ݂ܪ̈ܘܿܒܹܐ ܘܪܸ̈ܒ݁ܘܵܬ݂ܵܐ ܕܲܣܪ̈ܵܦܹܐ ܫܲܘܝܵܐܝܼܬ݂ ܢܹܐܡܲܪ. ܩܲܕ݁ܝܼܫ ܩܲܕ݁ܝܼܫ ܩܲܕ݁ܝܼܫܲܬ݁. ܡܲܠܟܵܐ ܓܲܐܝܵܐ ܕܬܸܫܒ݁ܘܿܚܬܵܐ ܪܲܚܸܡ ܥܠܲܝܢ: ܬܢܝܼ. ܫܲܒܲܚ. ܒܲܡܫܝܼܚܵܐ ܐܸܬ݂ܝܼܠܸܕ݂. ܠܥܹܕ݁ܬܵܟܼ ܦܵܪܘܿܩܲܢ ܩܲܕܸܫ ܒܲܚܢܵܢܵܟܼ. ܘܐܲܫܪܵܐ ܛܲܝܒ݁ܘܼܬ݂ܵܟܼ ܒܗܲܝܟ݁ܠܵܐ ܕܲܦܪܝܼܫ ܠܐܝܼܩܵܪܵܟܼ. ܘܲܬ݂ܪܘܿܨ ܒܓ݂ܵܘܹܗ ܡܲܕ݂ܒ݁ܚܵܟܼ ܙܲܗܝܵܐ. ܕܲܥܠܵܘܗܝ ܡܸܙܕܲܝܲܚ. ܦܲܓ݂ܪܵܟܼ ܘܲܕ݂ܡܵܟܼ ܡܵܪܝܵܐ.
ܥܪܘܼܒ݂ܬܵܐ ܕܐܲܪܒܲܥ ܕܩܘܼܕܵܫ ܥܹܕ݁ܬܵܐ ܒܒܲܠܡܹܐܢܹܗ.
ܡܹܐܟ݂ܘܼܠܬܵܐ ܝܲܗ̣݇ܒ݂ ܠܕ݂ܵܚܠܵܘ̈ܗܝ: ܝܲܗ̣݇ܒ݂ܬ݁ ܠܕ݂ܵܚܠܲܝ̈ܟ ܐܵܬ̤ܵܐ. ܣܲܡ ܚܲܝܹ̈ܐ ܠܡܝܼܬ݂ܘܼܬܲܢ ܒܐ݇ܪ̈ܵܙܵܘܗܝ ܝܲܗ̣݇ܒ݂ܠܲܢ ܡܵܪܲܢ. ܘܗܵܐ ܒܓ݂ܵܘ ܥܹܕ݁ܬܵܐ ܡܸܬ݂ܦܲܠܲܓ݂ ܡܵܝ̈ܘܿܬܹܐ ܩܪܘܿܒ݂ܘ ܣܲܒ݂ܘ ܘܲܚܝܵܘ: ܬܢܝܼ. ܘܫܲܒܲܚ ܒܵܗ̇.