ܗܘܼܠܵܠܹ̈ܐ ܕܠܸܠܝܵܐ ܕܚܲܕܼܒܫܲܒܵܐ ܕܩܲܕܼܡܵܝܹ̈ܐ

ܫܲܒܼܥܵܐ ܗܘܼܠܵܠܹ̈ܐ ܡ̣ܢ: ܗܘܼܠܠܵܐ ܕܚܲܡܫܵܐ (ܠܵܐ ܬܸܚܣܲܡ ܒܪ̈ܲܫܝܼܥܹܐ) ܥܲܕܼ: ܚܘܼܬܵܡܵܐ ܕܗܘܼܠܵܠܵܐ ܕܚܲܕܼܥܣܲܪ (ܐܲܠܵܗܵܐ ܩܵܡ ܒܟܸܢܫܵܐ ܕܡܲܠܲܐܟܹ̈ܐ).

ܘܗܘܼܠܵܠܵܐ ܕܚܲܕܼܥܣܲܪ (ܥܲܡܝ ܬܘܼܬ݂ܘ ܢܵܡܘܿܣܝ ܘܐܸܬ̇ܛܦܝܼܣܘ)، ܐܵܡܪܝܼܢ ܥܲܡ ܟܠ ܦܸܬ݂ܓ݂ܵܡ ܗܲܠܸܠܘܼܝܵܗ܀

ܘܡܲܙܡܘܿܪܵܐ (ܫܲܒܲܚ ܠܐܲܠܵܗܵܐ ܡܥܲܫܢܵܢܲܢ)، ܐܵܡܪܝܼܢ ܠܹܗ ܒܩܵܠܵܐ ܪܲܒܵܐ.

ܓܝܼܘܪܹ̈ܐ ܕܹܝܢ ܘܲܨ̈ܠܵܘܵܬܼܵܐ ܕܡܲܪ̈ܡܝܵܬܼܵܐ ܠܵܐ ܡܸܬܼܐܲܡܪܝܼܢ، ܘܒܹܝܬ݂ ܗܘܼܠܵܠܵܐ ܠܗܘܼܠܵܠܵܐ: ܡܲܩܦܝܼܢ ܒܩܵܠܵܐ ܕܲܙܡܵܪܵܐ: ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ܀

ܗܘܼܠܵܠܵܐ ܗ:

ܨܠܘܿܬ݂ܵܐ: ܠܵܟܼ ܛܵܒ݂ܵܐ ܘܒܲܣܝܼܡܵܐ ܘܚܲܢܵܢܵܐ ܘܲܡܠܸܐ ܪ̈ܲܚܡܹܐ ܡܲܠܟܵܐ ܪܲܒܵܐ ܕܬܸܫܒ̇ܘܿܚܬܵܐ ܐܝܼܬ݂ܝܵܐ ܕܐܝܼܬ݂ܵܘܗܝ ܡ݂ܢ ܥܵܠܲܡ ܡܲܘܕܹ̇ܝܢܲܢ ܘܣܵܓ݂ܕ̇ܝܼܢܲܢ ܘܲܡܫܲܒ̇ܚܝܼܢܲܢ ܒܟ݂ܠܥܸܕܵܢ ܡܵܪܵܐ ܕܟܼܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܲܡܫܲܪܹܝܢ:

ܠܵܐ ܬܸܚܣܲܡ ܒܪ̈ܲܫܝܼܥܹܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܠܵܐ ܬܸܚܣܲܡ ܒܪ̈ܲܫܝܼܥܹܐ܀ ܘܠܵܐ ܬܸܛܲܢ ܒܥܵܒ݂ܕܲܝ̈ ܥܲܘܠܵܐ܀ ܡܸܛܠ ܕܐܲܝܟܼ ܓܸܠܹ̈ܐ ܒܲܥܓܲܠ ܝܵܒ݂ܫܝܼ݁ܢ܀ ܘܐܲܝܟܼ ܝܘܼܪܵܩܵܐ ܕܥܸܣܒܵܐ ܚܵܡܹܝ݁ܢ܀ ܣܲܒܲܪ ܒܐܲܠܵܗܵܐ ܘܲܥܒܸܕܼ ܛܵܒ݂ܬ݂ܵܐ܀ ܥܡܲܪ ܒܐܲܪܥܵܐ ܘܲܒ݂ܥܝܼ ܗܲܝܡܵܢܘܼܬ݂ܵܐ܀ ܣܲܒܲܪ ܒܡܵܪܝܵܐ ܘܢܸܬܸ̇ܠ ܠܵܟܼ ܫܸܐܠܬܹܗ ܕܠܸܒܵܟܼ܀ ܬܪܘܿܨ ܩܕܼܵܡ ܡܵܪܝܵܐ ܐܘܼܪܚܵܟ ܘܣܲܒܲܪ ܒܹܗ܀ ܘܗܘ̤ ܥܵܒܹܕܼ ܘܡܲܦܸܩ ܐܲܝܟܼ ܢܘܼܗܪܵܐ ܙܲܕܝܼܩܘܼܬ݂ܵܟܼ܀ ܘܕܼܝܼܢܲܝ̈ܟ ܐܲܝܟܼ ܛܲܗܪܵܐ܀ ܒܥܝܼ ܡ݂ܢ ܡܵܪܝܵܐ ܘܨܲܠܵܐ ܩܕܼܵܡܵܘܗܝ܀ ܘܠܵܐ ܬܸܚܣܲܡ ܒܓܲܒ݂ܪܵܐ ܕܥܵܒܹܕܼ ܥܲܘܠܵܐ ܘܡܲܨܠ̱ܚܵܐ ܐܘܼܪܚܹܗ܀ ܐܸܬ̇ܬ̇ܢܝܼܚ ܡ݂ܢ ܚܸܡܬ݂ܵܐ ܘܐܸܬ̇ܬ̇ܢܝܼܚ ܡ݂ܢ ܪܘܼܓ݂ܙܵܐ܀ ܘܠܵܐ ܬܸܚܣܲܡ ܠܡܸܥܒܲܕܼ ܒܝܼܫܬܵܐ܀ ܡܸܛܠ ܕܒ݂ܝܼܫܹ̈ܐ ܣܵܝܦ݁ܝܼܢ܀ ܘܐܲܝܠܹܝܢ ܕܲܡܣܲܒ̇ܪܝܼܢ ܒܡܵܪܝܵܐ ܝܵܪܬܝܼܢ ܐܲܪܥܵܐ܀ ܒܙܲܒ݂ܢܵܐ ܙܥܘܿܪܵܐ ܒܵܥܹܐ݁ ܐܲܢ݇ܬ ܠܹܗ ܠܪܲܫܝܼܥܵܐ ܘܠܲܝܬܵܘܗܝ܀ ܘܚܵܐܲܪ ܐܲܢ݇ܬ ܒܕܼܘܼܟ݂ܬܹܗ ܘܠܵܐ ܡܸܫܬ̇ܟܲܚ܀ ܘܡܸܣܟܹܢܹ̈ܐ ܝܵܪܬܝܼܢ ܐܲܪܥܵܐ܀ ܘܡܸܬ݂ܒܲܣܡܝܼܢ ܒܲܫܠܵܡܵܐ ܣܲܓܝܼܐܵܐ܀ ܡܸܬ݂ܚܲܡܲܬ݂ ܪܲܫܝܼܥܵܐ ܥܲܠ ܙܲܕܝܼܩܵܐ܀ ܘܲܡܚܲܪܸܩ ܫܸܢܵܘ̈ܗܝ ܥܠܵܘܗܝ܀ ܘܡܵܪܝܵܐ ܢܸܓ݂ܚܲܟܼ ܥܠܵܘܗܝ܀ ܡܸܛܠ ܕܝܼܕܲܥ ܕܲܡܛܵܐ ܝܲܘܡܹܗ܀ ܣܲܝܦܵܐ ܫܡܲܛܘ ܪ̈ܲܫܝܼܥܹܐ ܘܲܡܬܲܚܘ ܩܸܫܬܵܐ܀ ܕܢܸܩܛܠܘܼܢ ܠܡܸܣܟܹܢܹ̈ܐ ܘܲܠܒ݂ܵܝܫܹ̈ܐ ܘܠܲܐܝܠܹܝܢ ܕܲܬ݂ܪ̈ܝܼܨܵܢ ܐܘܼܪ̈ܚܵܬ݂ܗܘܿܢ܀ ܣܲܝܦܗܘܿܢ ܢܸܥܘܿܠ ܒܠܸܒ̇ܗܘܿܢ܀ ܘܩܸܫ̈ܬܵܬ݂ܗܘܿܢ ܢܸܬ̇ܬܲܒ̇ܪ̈ܵܢ܀ ܦܲܩܵܚ ܩܲܠܝܼܠ ܠܙܲܕܝܼܩܵܐ܀ ܡ݂ܢ ܩܸܢܝܵܢܵܐ ܣܲܓܝܼܐܵܐ ܕܪ̈ܲܫܝܼܥܹܐ܀ܡܸܛܠ ܕܲܕܼܪ̈ܵܥܲܝܗܘܿܢ ܕܪ̈ܲܫܝܼܥܹܐ ܢܸܬ̇ܬܲܒ̇ܪܘܼܢ܀ ܡܣܲܡܸܟܼ ܠܙܲܕܝܼܩܹ̈ܐ ܡܵܪܝܵܐ܀ ܘܝܵܕܲܥ ܡܵܪܝܵܐ ܝܲܘ̈ܡܵܬ݂ܗܘܿܢ ܕܬܲܡܝܼܡܹ̈ܐ܀ ܘܝܵܪܬ̇ܘܼܬ݂ܗܘܿܢ ܠܥܵܠܲܡ ܬܸܗܘܸܐ܀ ܘܠܵܐ ܢܸܒ݂ܗ̱ܬ݂ܘܼܢ ܒܫܵܥܬ݂ܵܐ ܒܝܼܫܬܵܐ܀ ܘܲܒ݂ܝܲܘ̈ܡܵܬ݂ܵܐ ܕܟܲܦܢܵܐ ܢܸܣܒ̇ܥܘܼܢ܀ ܡܸܛܠ ܕܪ̈ܲܫܝܼܥܹܐ ܐܵܒ݂ܕ̇ܝܼܢ܀ ܘܲܒ݂ܥܸܠܕܒ݂ܵܒܵܘ̈ܗܝ ܕܡܵܪܝܵܐ ܡܦܲܛܡܹ̈ܐ ܓܵܡܪܝܼܢ ܘܐܲܝܟܼ ܬܸܢܵܢܵܐ ܣܵܝܦܝܼܢ܀ ܝܵܙܹܦ ܪܲܫܝܼܥܵܐ ܘܠܵܐ ܦܵܪܲܥ܀ ܘܙܲܕܝܼܩܵܐ ܡܪܲܚܸܡ ܘܝܵܗܹܒ݂܀

ܡܸܛܠ ܕܒ݂ܵܪ̈ܟܵܘܗܝ ܕܡܵܪܝܵܐ ܝܵܪܬ̇ܝܼܢ ܐܲܪܥܵܐ܀ ܘܠܵܝܛܵܘ̈ܗܝ ܢܣܘܼܦܘܼܢ܀ ܡ݂ܢ ܩܕܼܵܡ ܡܵܪܝܵܐ ܡܲܬ݂ܩ̈ܢܵܢ ܗܲܠ̈ܟ݂ܵܬܹܗ ܕܓܲܒ݂ܪܵܐ܀ ܘܐܘܼܪܚܹܗ ܗܘ̤ ܡܲܬ݂ܩܸܢ܀ ܡܸܛܠ ܕܐܸܢ ܢܵܦܹܠ ܠܵܐ ܡܲܗܲܪ܀ ܕܡܵܪܝܵܐ ܐܲܚܝܼܕܼ ܒܐܝܼܕܹܗ܀ ܛܠܸܐ ܗ݇ܘܹ̇ܝܬ݂ ܘܣܹܐ݁ܒܹܬ݂ ܘܠܵܐ ܚܙܹ݁ܝܬ݂ ܙܲܕܝܼܩܵܐ ܕܐܸܫܬ̇ܒܸܩ܀ ܘܐܵܦܠܵܐ ܙܲܪܥܹܗ ܕܲܒ݂ܥܵܐ ܠܲܚܡܵܐ܀ ܐܸܠܵܐ ܟܠܹܗ ܝܲܘܡܵܐ ܡܪܲܚܸܡ ܘܡܲܘܙܸܦ܀ ܘܙܲܪܥܹܗ ܡܸܬ݂ܒܲܪܲܟܼ܀ ܥܒܲܪ ܡ݂ܢ ܒܝܼܫܬܵܐ ܘܲܥܒܸܕܼ ܛܵܒ݂ܬ݂ܵܐ܀ ܐܸܬ̇ܬ̇ܢܝܼܚ ܠܥܵܠܲܡ ܡܸܛܠ ܕܡܵܪܝܵܐ ܕܝܼܢܵܐ ܪܵܚܹ̇ܡ܀ ܘܠܵܐ ܫܵܒܹ݁ܩ ܠܙܲܕܝܼܩܵܘ̈ܗܝ܀ ܐܸܠܵܐ ܠܥܵܠܲܡ ܡܢܲܛܲܪ ܠܗܘܿܢ܀ ܘܙܲܪܥܗܘܿܢ ܕܪ̈ܲܫܝܼܥܹܐ ܡܲܘܒܸܕܼ܀ ܘܙܲܕܝܼܩܹ̈ܐ ܝܵܪܬ̇ܝܼܢ ܐܲܪܥܵܐ܀ ܘܫܵܪܹܝ݁ܢ ܥܠܹܝܗ̇ ܠܥܵܠܲܡ܀ ܚܸܟ݂ܡܬ݂ܵܐ ܪܵܢܹ̇ܐ ܦܘܼܡܹܗ ܕܙܲܕܝܼܩܵܐ܀ ܘܠܸܫܵܢܹܗ ܡܡܲܠܸܠ ܕܝܼܢܵܐ܀ ܢܵܡܘܿܣܹܗ ܕܐܲܠܵܗܵܐ ܒܠܸܒܹܗ ܘܠܵܐ ܙܵܝ̈ܥܵܢ ܕܘܼܪ̈ܟܵܬܹܗ܀ ܡܣܲܟܸ̇ܐ ܪܲܫܝܼܥܵܐ ܠܙܲܕܝܼܩܵܐ ܘܒ݂ܵܥܹܐ݁ ܠܡܸܩܛܠܹܗ܀ ܘܡܵܪܝܵܐ ܠܵܐ ܢܸܫܒ̇ܩܝܼܘܗܝ ܒܐܝܼ̈ܕܼܵܘܗܝ܀ ܐܸܠܵܐ ܢܚܲܝܒ݂ܝܼܘܗܝ ܒܕܼܝܼܢܵܐ܀ ܣܲܒܲܪ ܒܡܵܪܝܵܐ ܘܛܲܪ ܐܘܼܪܚܹܗ܀ ܘܲܢܪܝܼܡܵܟܼ ܠܡܹܐܪܲܬ݂ ܐܲܪܥܵܐ܀ ܡܵܐ ܕܣܵܝܦ݁ܝܼܢ ܪ̈ܲܫܝܼܥܹܐ ܬܸܚܙܸܐ܀ ܡܸܛܠ ܕܲܚܙܹ݁ܝܬ݂ ܪ̈ܲܫܝܼܥܹܐ ܕܡܸܫܬܲܒ݂ܗ̱ܪܝܼܢ܀ ܘܡܸܬ̇ܬ̇ܪܝܼܡܝܼܢ ܐܲܝܟܼ ܐܝܼܠܵܢܹ̈ܐ ܕܥܵܒ݂ܵܐ܀ ܟܲܕܼ ܥܸܒ݂ܪܹܬ݂ ܠܲܝܬܵܘܗܝ܀ ܘܲܒ݂ܥܹܝܬ݂ܹܗ ܘܠܵܐ ܐܸܫܟܲܚܬܹ̇ܗ܀ ܛܲܪ ܬܲܡܝܼܡܘܼܬ݂ܵܐ ܘܲܓ݂ܒ݂ܝܼ ܬܪܝܼܨܘܼܬ݂ܵܐ܀ ܡܸܛܠ ܕܐܝܼܬ݂ ܚܲܪܬ݂ܵܐ ܛܵܒ݂ܬ݂ܵܐ ܠܓܲܒ݂ܪܹ̈ܐ ܕܲܫܠܵܡܵܐ܀ ܘܚܲܛܵܝܹ̈ܐ ܢܣܘܼܦܘܼܢ ܐܲܟ݂ܚ݇ܕܼܵܐ܀ ܘܚܲܪܬ݂ܵܐ ܕܪ̈ܲܫܝܼܥܹܐ ܠܐܲܒ݂ܕܵܢܵܐ܀ ܦܵܪܘܿܩܵܐ ܕܙܲܕܝܼܩܹ̈ܐ ܡܵܪܝܵܐ܀ ܘܲܡܥܲܕܲܪ ܠܗܘܿܢ ܒܙܲܒ݂ܢܹ̈ܐ ܕܥܵܩܬ݂ܵܐ܀ ܡܥܲܕܲܪ ܠܗܘܿܢ ܡܵܪܝܵܐ ܘܲܡܦܲܨܸܐ ܠܗܘܿܢ܀ ܘܲܡܦܲܨܸܐ ܠܗܘܿܢ ܡ݂ܢ ܪ̈ܲܫܝܼܥܹܐ܀ ܘܦܵܪܹ݁ܩ ܠܗܘܿܢ ܡܸܛܠ ܕܣܲܒܲܪܘ ܒܹܗ܀

ܡܵܪܝܵܐ ܠܵܐ ܒܪܘܼܓ݂ܙܵܟܼ ܬܲܟ̇ܣܲܢܝ܀ ܘܐܵܦܠܵܐ ܒܚܸܡܬ݂ܵܟܼ ܬܸܪܕܹ̇ܝܢܝ܀ ܡܸܛܠ ܕܓܹܐܪ̈ܲܝܟ ܐܸܬ݂ܩܲܒܲܥܘ ܒܝܼ܀ ܘܐܸܬ̇ܬ̇ܢܝܼܚܲܬ̤ ܐܝܼܕܼܵܟܼ ܥܠܲܝ܀ ܠܲܝܬ̇ ܫܠܵܡܵܐ ܠܒܸܣܪ̱ܝ ܡ݂ܢ ܩܕܼܵܡ ܚܸܡܬ݂ܵܟܼ܀ ܘܠܲܝܬ̇ ܫܠܵܡܵܐ ܠܓܲܪ̈ܡܲܝ ܡ݂ܢ ܩܕܼܵܡ ܚܛܵܗܲܝ̈܀ ܡܸܛܠ ܕܣܲܟ݂̈ܠܘܵܬ݂ܝ ܥܒ݂ܲܪ ܠܪܹܫܝ܀ ܘܐܲܝܟܼ ܡܲܘܒ̇ܠܵܐ ܝܲܩܝܼܪܬܵܐ ܝܑܼܩܲܪ ܠܝܼ܀ ܣܪ݂ܝܼ ܘܐܸܬ݂ܡ̱ܣܝܼ ܚܒ݂ܵܪ̈ܵܬ݂ܝ܀ ܡ݂ܢ ܩܕܼܵܡ ܣܲܟ݂̈ܠܘܵܬ݂ܝ ܙܵܥܹ̇ܬ݂ ܛܵܒ݂܀ ܘܟ݂ܠܹܗ ܝܲܘܡܵܐ ܒܲܟ݂ܡܝܼܪܘܼܬ݂ܵܐ ܗܲܠ̇ܟܹܬ݂܀ ܡܸܛܠ ܕܩܘܼܪ̈ܨܠܲܝ ܐܸܬ݂ܡܠܝܼܘ ܙܲܘܥ̱ܬ݂ܵܐ܀ ܘܠܲܝܬ̇ ܫܠܵܡܵܐ ܠܒܸܣܪ̱ܝ܀ ܙܵܥܹ̇ܬ݂ ܘܐܸܬ̇ܕ̇ܘܝܼܬ݂ ܛܵܒ݂܀ ܘܢܵܗܹ݁ܓ݂ ܗ݇ܘܹ̇ܝܬ݂ ܡ݂ܢ ܢܸܗܡ̱ܬܹܗ ܕܠܹܒ̇ܝ܀ ܡܵܪܝܵܐ ܩܕܼܵܡܲܝܟ ܗ݇ܝ݂ ܟܠܵܗ̇ ܪܸܓܲܬ݂ܝ܀ ܘܬܸܢ̈ܚܵܬ݂ܝ ܡܸܢܵܟܼ ܠܵܐ ܡܛܲܫ̈ܝܵܢ܀ ܠܹܒ̇ܝ ܐܸܬ݂ܗ̱ܦܸܟ ܘܚܲܝܠ̱ܝ ܫܲܒ݂ܩܲܢܝ܀ ܘܢܘܼܗܪܵܐ ܕܥܲܝܢܲܝ̈ ܠܵܐ ܗ݇ܘܵܐ ܠܘܵܬ݂ܝ܀ ܪ̈ܵܚܡܲܝ ܘܚܲܒ݂ܪ̈ܲܝ ܠܘܼܩܒܲܠ ܟܹܐܒ݂ܝ ܩܵܡܘ܀ ܘܩܲܪ̈ܝܼܒܲܝ ܒܪܘܼܚܩܵܐ ܩܵܝܡ݁ܝܼܢ ܗ݇ܘܵܘ܀ ܘܐܲܚܕ̇ܘܼܢܝ ܐܲܝܠܹܝܢ ܕܒ݂ܵܥܹܝ݁ܢ ܠܢܲܦ̮ܫܝ ܘܨܵܒܹܝ݁ܢ ܠܒ݂ܝܼܫܬܝ܀ ܘܡܲܠܸܠܘ ܫܘܼܩܪܵܐ ܘܢܸܟ݂ܠܵܐ܀ ܝܲܘܡܵܐ ܟܠܹܗ ܪܵܢܹܝ݁ܢ ܗ݇ܘܵܘ܀ ܐܸܢܵܐ ܐܲܝܟܼ ܚܲܪܫܵܐ ܠܵܐ ܫܵܡܲ݁ܥ ܗ݇ܘܹ̇ܝܬ݂܀ ܘܐܲܝܟܼ ܕܘܼܓܵܐ ܠܵܐ ܦܸܬ݂ܚܹ݁ܬ݂ ܦܘܼܡܝ܀ ܘܲܗܘܹ̇ܝܬ݂ ܐܲܝܟܼ ܓܲܒ݂ܪܵܐ ܕܠܵܐ ܫܵܡܲ݁ܥ܀ ܘܠܲܝܬ̇ ܡܲܟ̇ܣܵܢܘܼܬ݂ܵܐ ܒܦܘܼܡܹܗ܀ ܡܸܛܠ ܕܠܵܟܼ ܣܲܟ̇ܝܼܬ݂ ܡܵܪܝܵܐ܀ ܘܲܥܢܲܝܬܵܢܝ ܡܵܪܝܵܐ ܐܲܠܵܗܝ܀ ܡܸܛܠ ܕܐܸܡ݁ܪܹܬ݂ ܕܠܵܐ ܢܸܚܕ̇ܘܿܢ ܠܝܼ܀ ܘܠܵܐ ܢܸܬ̇ܬ̇ܪܝܼܡܘܼܢ ܥܠܲܝ ܒܙܲܘܥ̱ܬ݂ܵܐ ܕܪܸ̈ܓ݂ܠܲܝ܀ ܡܸܛܠ ܕܐܸܢܵܐ ܠܚܲܫܵܐ ܡܛܲܝܲܒ݂ ܐ݇ܢܵܐ܀ ܘܟܹܐܒ݂ܝ ܠܘܼܩܒܲܠܝ ܒܟ݂ܠܙܒܲܢ܀ ܡܸܛܠ ܕܐܹܚܲܘܹܝܟܼ ܣܲܟ݂̈ܠܘܵܬ݂ܝ܀ ܘܐܸܬ̇ܕܲܟܸ̇ܐ ܡ݂ܢ ܚܛܵܗܲܝ̈܀ ܒܥܸܠܕ̇ܒ݂ܵܒܲܝ̈ ܐܸܬ݂ܥܲܫܲܢܘ ܘܲܚܙ݂ܵܘ܀ ܘܲܣܓ݂ܝܼܘ ܣܵܢ̈ܐܲܝ ܕܫܘܼܩܪܵܐ܀ ܦܲܪܥܘܼܢܝ ܒܝܼܫܬܵܐ ܚܠܵܦ ܛܵܒ݂ܬ݂ܵܐ܀ ܘܣܲܩܪܘܼܢܝ ܥܲܠ ܕܲܒ݂ܥܹܝ݁ܬ݂ ܛܵܒ݂ܬ݂ܵܐ܀ ܠܵܐ ܬܸܫܒ̇ܩܲܢܝ ܡܵܪܝܵܐ ܐܲܠܵܗܝ ܘܠܵܐ ܬܲܪܚܸܩ ܡܹܢܝ܀ ܐܸܠܵܐ ܟܲܬܲܪ ܠܥܘܼܕܼܪܵܢܝ ܘܲܦܪܘܿܩܲܝܢܝ܀

ܐܸܡ݁ܪܹܬ݂ ܕܐܸܛܲܪ ܐܘܼܪܚܝ ܘܠܵܐ ܐܸܚܛܸܐ ܒܠܸܫܵܢܝ܀ ܐܸܛܲܪ ܦܘܼܡܝ ܡ݂ܢ ܥܲܘܠܵܐ ܡܸܛܠ ܪ̈ܲܫܝܼܥܹܐ ܕܠܘܼܩܒܲܠܝ܀ ܚܸܪܫܹ݁ܬ݂ ܘܐܸܬ݂ܟܲܡܪܹܬ݂ ܘܐܸܬ̇ܕܘܝܼܬ݂ ܡ݂ܢ ܛܵܒ݂ܬ݂ܵܐ ܘܟܹܐܒ݂ܝ ܐܸܬ݂ܚܲܕܲܬ݂܀ ܚܲܡ݂ ܠܹܒܝ ܒܓ݂ܵܘܝ ܘܲܒ݂ܓ݂ܘܼܫܡܝ ܐܸܚܕܲܬ̤ ܢܘܼܪܵܐ܀ ܪܢܹܝ݁ܬ݂ ܒܠܸܫܵܢܝ ܘܚܲܘܝܲܢܝ ܡܵܪܝܵܐ ܚܲܪܬ݂ܝ܀ ܘܲܡܫܘܼܚܬ݂ܵܐ ܕܝܲܘ̈ܡܲܝ ܡܵܢܲܐ ܗ݇ܝ݂܀ ܕܐܸܕܲܥ ܠܡܵܢܵܐ ܦܵܐܹܫ ܐܢܵܐ܀ ܕܗܵܐ ܒܲܡܫܘܼܚܬ݂ܵܐ ܝܲܗ݇ܒ݂ܬ̇ ܝܲܘ̈ܡܲܝ܀ ܘܦܲܘܫܝ ܐܲܝܟܼ ܠܵܐ ܡܸܕܸܡ ܗ݇ܘ݂ ܩܕܼܵܡܲܝܟ܀ ܡܸܛܠ ܕܟ݂ܠܗܘܿܢ ܒܢܲܝ̈ܢܵܫܵܐ ܐܲܝܟܼ ܠܲܗܓܵܐ ܐܸܢܘܿܢ ܩܵܝܡ݁ܝܼܢ܀ ܡܸܛܠ ܕܲܒ݂ܨܲܠܡܵܐ ܡܗܲܠܸܟܼ ܓܲܒ݂ܪܵܐ ܘܐܲܝܟܼ ܠܲܗܓܵܐ ܚܵܡܹܐ݁܀ ܣܵܐܹܡ݁ ܣܝܼ̈ܡܵܬ݂ܵܐ ܘܠܵܐ ܝܵܕܲ݁ܥ ܡܲܢ݂ܘܼ ܚܵܡܹܠ݁ ܠܗܹܝܢ܀ ܡܸܟܹܝܠ ܡܲܢ݂ܘܼ ܣܲܒ݂ܪ̱ܝ ܐܸܠܵܐ ܐܸܢ ܐܲܢ݇ܬ̇ ܡܵܪܝܵܐ܀ ܡ݂ܢ ܟܠܗܹܝܢ ܣܲܟ݂̈ܠܘܵܬ݂ܝ ܦܲܨܵܢܝ܀ ܚܸܣܕܵܐ ܠܥܲܘܵܠܹ̈ܐ ܠܵܐ ܬܹܥܒ̇ܕܲܢܝ܀ ܚܸܪܫܹ݁ܬ݂ ܘܠܵܐ ܦܸܬ݂ܚܹ݁ܬ݂ ܦܘܼܡܝ ܡܸܛܠ ܕܐܲܢ݇ܬ̇ ܥܒܲܕ̇ܬ̇܀ ܐܲܥܒܲܪ ܡܹܢܝ ܢܸܓ݂ܕܵܟܼ ܘܡܹܢܝ ܡܚܘܿܬ݂ܵܐ ܕܐܝܼ̈ܕܲܝܟ܀ ܓܸܡ݁ܪܹܬ݂ ܒܡܲܟ̇ܣܵܢܘܼܬ݂ܵܐ ܕܥܲܠ ܐܲܦܲܝ̈ ܚܛܵܗܲܝ̈܀ ܪܕܲܝܬ݂̇ ܓܲܒ݂ܪܵܐ ܘܐܲܥܒܲܪܬ̇ ܐܲܝܟܼ ܚܲܒ̇ܬ݂ܵܐ ܪ̈ܓ݂ܝܼܓ݂ܵܬܹܗ܀ ܘܐܲܝܟܼ ܠܲܗܓܵܐ ܐܸܢܘܿܢ ܟܠܗܘܿܢ ܒܢܲܝ̈ܢܵܫܵܐ܀ ܫܡܲܥ ܡܵܪܝܵܐ ܨܠܘܿܬ݂ܝ ܘܒ݂ܵܥܘܼܬ݂ܝ ܘܨܘܼܬ݂ ܠܕܸܡܥܲܬ݂ܝ܀ ܘܠܵܐ ܬܸܫܬ̇ܘܿܩ ܡܸܛܠ ܕܥܵܡܘܿܪܵܐ ܐ݇ܢܵܐ ܥܲܡܵܟܼ܀ ܘܬܲܘܬܵܒ݂ܵܐ ܐܲܝܟܼ ܟܠܗܘܿܢ ܐܲܒ݂ܵܗܲܝ̈܀ ܦܪܘܿܩܲܝܢܝ ܘܐܸܬ̇ܬ̇ܢܝܼܚ܀ ܥܲܕܼܠܵܐ ܐܵܙܹܠ݁ ܐ݇ܢܵܐ ܘܬ݂ܘܼܒ݂ ܠܵܐ ܐܝܼܬܲܝ܀

ܡܣܲܒܵܪܘܼ ܣܲܒ̇ܪܹܬ݂ ܒܡܵܪܝܵܐ܀ ܘܐܸܬ݂ܦܢܝܼ ܠܘܵܬ݂ܝ ܘܲܫܡܲܥ ܒܵܥܘܼܬ݂ܝ܀ ܘܐܲܣܩܲܢܝ ܡ݂ܢ ܓܘܼܒܵܐ ܕܕܼܵܘܘܿܢܵܐ܀ ܘܡ݂ܢ ܣܝܵܢܵܐ ܕܲܚܒ݂ܵܠܵܐ܀ ܐܲܩܝܼܡ ܥܲܠ ܫܘܿܥܵܐ ܪܸ̈ܓ݂ܠܲܝ ܘܐܲܬ݂ܩܸܢ ܗܲܠ̈ܟ݂ܵܬ݂ܝ܀ ܝܲܗ݇ܒ݂ ܒܦܘܼܡܝ ܬܸܫܒ̇ܘܿܚܬܵܐ ܚܕܲܬܵܐ ܬܸܫܒ̇ܘܿܚܬܵܐ ܠܐܲܠܵܗܵܐ܀ ܕܢܸܚܙܘܿܢ ܣܲܓܝܼ̈ܐܹܐ ܘܢܸܚܕܘܿܢ܀ ܘܲܢܣܲܒ̇ܪܘܼܢ ܒܡܵܪܝܵܐ܀ ܛܘܼܒ݂ܵܘܗܝ ܠܒܲܪܢܵܫܵܐ ܕܥܲܠ ܫܡܹܗ ܕܡܵܪܝܵܐ ܬܟ݂ܝܼܠ܀ ܘܠܵܐ ܦܵܢܹ̇ܐ ܠܲܣܪܝܼܩܘܼܬ݂ܵܐ܀ ܘܐܵܦܠܵܐ ܠܡܲܡܠܠܵܐ ܕܲܓܵܠܵܐ܀ ܣܲܓܝܼـ̈ܐܵܢ ܐܸܢܹܝܢ ܕܲܥ݂ܒܲܕ̇ܬ̇ ܡܵܪܝܵܐ ܐܲܠܵܗܲܢ܀ ܬܸܕܼܡܪ̈ܵܬ݂ܵܟܼ ܘܡܲܚܫ̈ܒ݂ܵܬ݂ܵܟܼ ܥܠܲܝܢ ܘܠܲܝܬ̇ ܐܲܟ݂ܘܵܬ݂ܵܟܼ܀ ܚܲܘ݁ܝܼܬ݂ ܘܐܹܡ݁ܪܹܬ݂ ܘܣܲܓܝܼ̈ܐܵܢ ܐܸܢܹܝܢ ܡ݂ܢ ܡܸܢܝܵܢܵܐ܀ ܒܕܸܒ݂ܚܹ̈ܐ ܘܩܘܼܪ̈ܒܵܢܹܐ ܠܵܐ ܨܒ݂ܲܝܬ̇܀ ܐܸܕܼܢܹ̈ܐ ܕܹܝܢ ܢܲܩܸܒ݂ܬ̇ ܠܝܼ܀ ܘܝܲܩ̈ܕܹ̇ܐ ܫܲܠܡܹ̈ܐ ܕܲܚܠܵܦ ܚܛܵܗܹ̈ܐ ܠܵܐ ܫܐܸܠ݂ܬ̇܀ ܗܵܝܕܹܝܢ ܐܸܡ݁ܪܹܬ݂ ܕܗܵܐ ܐܸܬܹܝ݁ܬ݂܀ ܕܲܒ݂ܪܹܫ ܟܬ݂ܵܒܹ̈ܐ ܟܬ݂ܝܼܒ݂ ܥܠܲܝ܀ ܠܡܸܥܒܲܕܼ ܨܸܒ݂ܝܵܢܵܟܼ ܐܲܠܵܗܵܐ ܨܒܹ݁ܝܬ݂܀ ܘܢܵܡܘܿܣܵܟܼ ܒܓ݂ܵܘ ܟܲܪܣܝ܀ ܣܲܒ̇ܪܹܬ݂ ܙܲܕܝܼܩܘܼܬ݂ܵܟܼ ܒܥܹܕ݇ܬܵܐ ܪܲܒ̇ܬ݂ܵܐ܀ ܘܣܸܦ̈ܘܵܬ݂ܝ ܠܵܐ ܟܠܹ݁ܝܬ݂܀ ܡܵܪܝܵܐ ܐܲܢ݇ܬ̇ ܝܵܕܲܥ ܐܲܢ݇ܬ̇܀ ܕܠܵܐ ܛܲܫ݁ܝܼܬ݂ ܙܲܕܝܼܩܘܼܬ݂ܵܟܼ ܒܓ݂ܵܘ ܠܹܒܝ܀ ܐܸܠܵܐ ܦܘܼܪܩܵܢܵܟܼ ܘܗܲܝܡܵܢܘܼܬ݂ܵܟܼ ܐܸܡ݁ܪܹܬ݂܀ ܘܠܵܐ ܛܲܫܝܼ݁ܬ݂ ܛܲܝܒ̇ܘܼܬ݂ܵܟܼ ܘܗܲܝܡܵܢܘܼܬ݂ܵܟܼ ܡ݂ܢ ܥܹܕ݇ܬܵܐ ܪܲܒܬ݂ܵܐ܀ ܐܵܦ ܐܲܢ݇ܬ ܡܵܪܝܵܐ ܠܵܐ ܬܸܟ݂ܠܸܐ ܡܹܢܝ ܪ̈ܲܚܡܲܝܟ܀ ܐܸܠܵܐ ܪ̈ܲܚܡܲܝܟ ܘܗܲܝܡܵܢܘܼܬ݂ܵܟܼ ܒܟ݂ܠܙܒܲܢ ܢܢܲܛܪܘܼܢܵܢܝ܀ ܡܸܛܠ ܕܚܲܕܼܪ̈ܵܢܝ ܒܝܼ̈ܫܵܬ݂ܵܐ ܕܠܵܐ ܡܸܢܝܵܢ܀ ܘܐܲܕܼܪ̱ܟ݂ܘܼܢܝ ܚܛܵܗܲܝ̈ ܘܠܵܐ ܐܸܫܟ݁ܚܹܬ݂ ܠܡܸܚܙܵܐ܀ ܘܲܥ݂ܫܸܢܘ ܡ݂ܢ ܣܲܥܪܵܐ ܕܪܹܫܝ ܘܠܹܒ̇ܝ ܫܲܒ݂ܩܲܢܝ܀ ܨܒ݂ܝܼ ܡܵܪܝܵܐ ܠܲܡܦܲܨܵܝܘܼܬ݂ܵܢܝ܀ ܡܵܪܝܵܐ ܠܥܘܼܕܼܪܵܢܝ ܟܲܬܲܪ܀ ܢܸܒ݂ܗ̱ܬ݂ܘܼܢ ܘܢܸܚܦܪܘܼܢ ܐܲܝܠܹܝܢ ܕܒ݂ܵܥܹܝ݁ܢ ܠܡܸܩܛܲܠ ܠܢܲܦ̮ܫܝ܀ ܢܸܗܦܟ݂ܘܼܢ ܠܒܸܣܬܲܪܗܘܿܢ ܘܢܸܚܦܪܘܼܢ܀ ܐܲܝܠܹܝܢ ܕܨܵܒܹܝ݁ܢ ܠܒ݂ܝܼܫܬܝ܀ ܢܸܬ݂ܡ̱ܗܘܼܢ ܒܬܸܢܝܵܐ ܕܒܸܗܬܲܬ݂ܗܘܿܢ܀ ܐܲܝܠܹܝܢ ܕܐܸܡܲܪ݂ܘ ܥܠܲܝ ܐܹܗܹܐ ܐܹܗܹܐ܀ ܢܸܚܕ̇ܘܿܢ ܒܵܟܼ ܟܠ ܕܒ݂ܵܥܹܝ݁ܢ ܠܵܟܼ܀ ܘܢܹܐܡܪܘܼܢ ܒܟ݂ܠܙܒܲܢ ܕܪܲܒ̇ܘܼ ܐܲܠܵܗܵܐ܀ ܐܲܝܠܹܝܢ ܕܪܵܚܡ݁ܝܼܢ ܦܘܼܪܩܵܢܵܟܼ܀ ܘܐܸܢܵܐ ܡܸܣܟܹ̇ܢܵܐ ܐ݇ܢܵܐ ܘܒ݂ܵܝܫܵܐ܀ ܡܵܪܝ ܐܸܬ݂ܚܲܫܲܒ݂ܘ ܥܠܲܝ܀ ܡܥܲܕ̇ܪܵܢܝ ܐܲܢ݇ܬ̇ ܘܲܡܦܲܨܝܵܢܝ ܐܲܠܵܗܝ ܠܵܐ ܬܲܘܚܲܪ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܘܲܥܕܼܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ܀

ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ܀

ܗܘܼܠܵܠܵܐ ܘ:

ܨܠܘܿܬ݂ܵܐ: ܠܵܟܼ ܥܲܬ̇ܝܼܪܵܐ ܒܚܘܼܒܹ̇ܗ ܘܲܫܦܝܼܥܵܐ ܒܲܚܢܵܢܹܗ ܘܒܲܣܝܼܡܵܐ ܒܛܵܒ݂ܘܼܬܹܗ ܘܠܵܐ ܡܸܬ݂ܡܲܠܠܵܢܵܐ ܒܫܘܼܒ݂ܚܹܗ ܡܲܠܟܵܐ ܪܲܒܵܐ ܕܬܸܫܒ̇ܘܿܚܬܵܐ ܐܝܼܬ݂ܝܵܐ ܕܐܝܼܬ݂ܵܘܗܝ ܡ݂ܢ ܥܵܠܲܡ ܡܲܘܕܹ̇ܝܢܲܢ ܘܣܵܓ݂ܕ̇ܝܼܢܲܢ ܘܲܡܫܲܒ̇ܚܝܼܢܲܢ ܒܟ݂ܠܥܸܕܵܢ ܡܵܪܵܐ ܕܟܼܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܹܢ:

ܛܘܼܒ݂ܵܘܗܝ ܠܡܲܢ ܕܚܵܐܲܪ ܒܡܸܣܟܹ̇ܢܵܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܛܘܼܒ݂ܵܘܗܝ ܠܡܲܢ ܕܚܵܐܲܪ ܒܡܸܣܟܹ̇ܢܵܐ܀ ܒܝܲܘܡܵܐ ܕܒ݂ܝܼܫܬܵܐ ܢܦܲܠܛܝܼܘܗܝ ܡܵܪܝܵܐ܀ ܡܵܪܝܵܐ ܢܢܲܛܪܝܼܘܗܝ ܘܢܲܚܹܝܘܗܝ ܘܢܲܛܐܸܒ݂ ܠܹܗ ܒܐܲܪܥܵܐ܀ ܘܠܵܐ ܢܲܫܠ̱ܡܝܼܘܗܝ ܠܲܒ݂ܥܸܠܕ̇ܒ݂ܵܒ݂ܵܘ̈ܗܝ܀ ܡܵܪܝܵܐ ܢܣܲܡܟ݂ܝܼܘܗܝ ܥܲܠ ܥܲܪܣܵܐ ܕܟܹܐܒ݂ܵܘ̈ܗܝ܀ ܘܟ݂ܠܹܗ ܡܲܫܟ̇ܒܹܗ ܗܦܲܟܼ ܒܟ݂ܘܼܪܗܵܢܹܗ܀ ܐܸܢܵܐ ܐܸܡܪܹܬ݂ ܕܐܲܢ݇ܬܘܼ ܡܵܪܝ ܪܲܚܸܡܥܠܲܝ܀ ܘܐܲܣܵܗ̇ ܠܢܲܦ̮ܫܝ ܡܸܛܠ ܕܲܚܛܹܝܬ݂ ܠܵܟܼ܀ ܒܥܸܠܕ̇ܒ݂ܵܒܲܝ̈ ܐܸܡܲܪܘ ܥܠܲܝ ܒܝܼܫܬܵܐ܀ ܐܸܡܲܬ݂ܝ ܕܹܝܢ ܡ݂ܝܼܬ݂ ܘܐܸܒܲܕܼ ܫܡܹܗ܀ ܘܐܸܡܲܬ݂ܝ ܕܐܵܬܹܝ݁ܢ ܗ݇ܘ݂ܵܘ ܠܡܸܚܙܝܲܢܝ܀ ܕܲܓܵܠܘܼܬ݂ܵܐ ܡܡܲܠܠܝܼܢ ܗ݇ܘ݂ܵܘ܀ ܘܲܒ݂ܠܸܒ̇ܗܘܿܢ ܚܵܫܠ݁ܝܼܢ ܗ݇ܘܼܵܘ ܒܝܼܫܬܵܐ܀ ܢܵܦܩܝܼ݁ܢ ܗ݇ܘ݂ܵܘ ܠܫܘܼܩܵܐ ܘܲܡܡܲܠܠܝܼܢ܀ ܐܸܬ݂ܠܲܚܲܫܘ ܥܠܲܝ ܐܲܟ݂ܚ݇ܕܼܵܐ ܟܠܗܘܿܢ ܣܵܢ̈ܐܲܝ܀ ܘܐܸܬ݂ܚܲܫܲܒ݂ܘ ܥܠܲܝ ܒܝܼܫܬܵܐ܀ ܒܡܸܠܬ݂ܵܐ ܕܥܲܘܠܵܐ ܪܵܢܹܝ݁ܢ ܗ݇ܘ݂ܵܘ܀ ܡܸܟܹ̇ܝܠ ܕܲܫܟ݂ܸܒ݂ ܠܵܐ ܡܲܘܣܸܦ ܠܲܡܩܵܡ܀ ܐܵܦ ܓܲܒ݂ܪܵܐ ܫܵܐܹ݁ܠ ܫܠܵܡܝ ܕܲܬ݂ܟ݂ܝܼܠ ܐ݇ܢܵܐ ܥܠܵܘܗܝ܀ ܐܵܟܹܠ݁ ܠܲܚܡܝ ܕܲܬ݂ܟ݂ܝܼܠ ܐ݇ܢܵܐ ܥܠܵܘܗܝ ܣܲܓܝܼ ܐܸܬ݂ܢܟܸܠ ܥܠܲܝ܀ ܘܐܲܢ݇ܬ̇ ܡܵܪܝܵܐ ܪܲܚܸܡܥܠܲܝ܀ ܘܐܲܩܝܼܡܲܝܢܝ ܘܐܸܦܪܘܿܥ ܐܸܢܘܿܢ܀ ܒܗܵܕܹܐ ܝܸܕܼܥܥ̇ܬ݂ ܕܨܵܒܹܐ ܐܲܢ݇ܬ̇ ܒܝܼ܀ ܡܸܛܠ ܕܠܵܐ ܡܲܒ݂ܐܸܫ ܠܝܼ ܒܥܸܠܕ̇ܒ݂ܵܒ݂ܝ܀ ܠܝܼ ܕܹܝܢ ܒܬܲܡܝܼܡܘܼܬ݂ܝ ܣܲܡܸܟ݂ܬܵܢܝ܀ ܘܐܲܩܝܼܡܬܵܢܝ ܩܕܼܵܡܲܝܟ ܠܥܵܠܲܡ܀ ܒܪܝܼܟ݂ܘܼ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ܀ ܡ݂ܢ ܥܵܠܲܡ ܘܲܥܕܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀

ܐܲܝܟܼ ܐܲܝܠܵܐ ܕܓܼܵܥܹܐ݁ ܥܲܠ ܦܨܝܼܕܼܵܐ ܕܡܲܝ̈ܵܐ܀ ܗܵܟܲܢ ܐܵܦ ܢܲܦ̮ܫܝ ܓܵܥ̇ܝܵܐ ܠܘܵܬ݂ܵܟܼ ܡܵܪܝܵܐ܀ ܨܲܗܝܵܐ ܗ݇ܝ݂ ܠܵܟܼ ܢܲܦ̮ܫܝ ܐܲܠܵܗܵܐ ܚܲܝܵܐ܀ ܕܐܸܡܲܬ݂ܝ ܐܹܬܸܐ ܘܐܸܚܙܸܐ ܐܲܦܲܝ̈ܟ܀ ܐܲܠܵܗܵܐ ܗ̤ܘܵܬ݂ ܠܝܼ ܕܸܡܥܲܬ݂ܝ ܡܹܐܟ݂ܘܼܠܬܵܐ܀ ܒܐܝܼܡܵܡܵܐ ܘܲܒ݂ܠܸܠܝܵܐ܀ ܟܲܕܼ ܐܵܡܪܝܼܢ ܗ݇ܘ݂ܵܘ ܟܠܝܘܿܡ ܐܲܝܟܵܘ ܐܲܠܵܗܵܟܼ܀ ܗܵܠܹܝܢ ܐܸܬ̇ܕܲܟ݂ܪܹܬ݂ ܘܐܸܬ̇ܛܲܪܦܲܬ̤ ܢܲܦ̮ܫܝ܀ ܡܸܛܠ ܕܐܸܥܒܲܪ ܒܣܸܬܵܪܵܟܼ ܥܲܫܝܼܢܵܐ܀ ܥܕܲܡܵܐ ܠܒܲܝܬܹܗ ܐܲܠܵܗܵܐ܀ ܒܩܵܠܵܐ ܕܬܸܫܒ̇ܘܿܚܬܵܐ ܘܲܕ̇ܬ݂ܲܘܕܝܼܬ݂ܵܐ ܣܲܓܝܼ̈ܐܹܐ ܚܵܕܹܝ݁ܢ܀ ܠܡܵܢܵܐ ܡܸܬ̇ܛܲܪܦܲܬ̇ܝ ܢܲܦ̮ܫܝ ܘܲܠܡܵܢܵܐ ܬܲܡܝܼܗܲܬ̇ܝ܀ ܣܲܟܵܝ ܠܐܲܠܵܗܵܐ ܡܸܛܠ ܕܬ݂ܘܼܒ݂ ܐܲܘܕܸ̇ܐ ܠܹܗ܀ ܠܦܵܪܘܿܩܵܐ ܕܐܲܦܲܝ̈ ܘܐܲܠܵܗܝ܀ ܥܠܲܝ ܢܲܦ̮ܫܝ ܐܸܬ̇ܛܲܪܦܲܬ̤܀ ܡܸܛܠ ܗܵܢܵܐ ܐܸܬ̇ܕ̇ܟܲܪܬܵܟܼ ܡ݂ܢ ܐܲܪܥܵܐ ܕܝܘܿܪܕܢܲܢ܀ ܡ݂ܢ ܚܸܪܡܘܿܢ ܘܡ݂ܢ ܛܘܼܪܵܐ ܙܥܘܿܪܵܐ܀ ܬܗܘܿܡܵܐ ܠܲܬ݂ܗܘܿܡܵܐ ܩܵــ݁ܪܹܐ܀ ܩܵܠܵܐ ܠܩܵܠܵܐ ܕܡܲـ̈ܝܵܐ ܕܢܵܣܟܲܝ̈ܟ܀ ܟܠܗܘܿܢ ܡܲܚܫܘܼܠܲܝ̈ܟ ܘܓܲܠܠܲܝ̈ܟ ܥܠܲܝ ܥܒܲܪ݂ܘ܀ ܒܐܝܼܡܵܡܵܐ ܢܸܦܩܘܿܕܼ ܡܵܪܝܵܐ ܪ̈ܲܚܡܵܘܗܝ܀ ܘܲܒ݂ܠܸܠܝܵܐ ܬܸܫ̈ܒ̇ܚܵܬܹܗ܀ ܥܲܡܝ ܨܠܘܿܬ݂ܵܐ ܠܐܲܠܵܗܵܐ ܚܲܝܵܐ܀ ܐܸܡܪܹܬ݂ ܠܐܲܠܵܗܵܐ ܕܲܠܡܵܢܵܐ ܛܥܲܝܬܵܢܝ܀ ܘܲܠܡܵܢܵܐ ܡܗܲܠܸܟܼ ܐ݇ܢܵܐ ܟܡܝܼܪܵܐܝܼܬ݂܀ ܒܐܘܼܠܨܵܢܵܐ ܕܲܒ݂ܥܸܠܕ̇ܒ݂ܵܒܲܝ̈܀ ܒܲܬ݂ܒ݂ܵܪܵܐ ܕܓܲܪ̈ܡܲܝ ܚܲܣܕܼܘܼܢܝ ܒܥܸܠܕ̇ܒ݂ܵܒܲܝ̈܀ ܘܐܵܡ̇ܪܝܼܢ ܗ݇ܘܵܘ ܠܝܼ ܟܠܝܘܿܡ ܐܲܝܟܵܘ ܐܲܠܵܗܵܟܼ܀ ܠܡܵܢܵܐ ܡܸܬ̇ܛܲܪܦܲܬ̇ܝ ܢܲܦ̮ܫܝ ܘܲܠܡܵܢܵܐ ܬܲܡܝܼܗܲܬ̇ܝ܀ ܣܲܟܵܝ ܠܐܲܠܵܗܵܐ ܡܸܛܠ ܕܬ݂ܘܼܒ݂ ܐܲܘܕܸ̇ܐ ܠܹܗ܀ ܠܦܵܪܘܿܩܵܐ ܕܐܲܦܲܝ̈ ܘܐܲܠܵܗܝ܀

ܕܘܼܢ ܐܲܠܵܗܵܐ ܕܝܼܢܝ ܘܲܬ݂ܒܲܥ ܬܒܲܥܬ݂ܝ܀ ܡ݂ܢ ܥܲܡܵܐ ܕܠܵܐ ܡܪܲܚܡܵܢ܀ ܘܡ݂ܢ ܓܲܒ݂ܪܹ̈ܐ ܥܲܘܵܠܹ̈ܐ ܘܢܲܟܘܼܠܬ݂ܵܢܹ̈ܐ ܦܲܨܵܢܝ܀ ܡܸܛܠ ܕܐܲܢ݇ܬܘܼ ܐܲܠܵܗܵܐ ܕܚܲܝܠܝ ܘܲܠܡܵܢܵܐ ܛܥܲܝܬܵܢܝ܀ ܘܲܠܡܵܢܵܐ ܡܗܲܠܸܟܼ ܐ݇ܢܵܐ ܟܡܝܼܪܵܐܝܼܬ݂܀ ܒܐܘܼܠܨܵܢܵܐ ܕܲܒ݂ܥܸܠܕܒ݂ܵܒܲܝ̈܀ ܫܲܕܲܪ ܢܘܼܗܪܵܟܼ ܘܗܲܝܡܵܢܘܼܬ݂ܵܟܼ ܘܲܢܒܲܝܐܘܼܢܵܢܝ܀ ܘܢܲܝܬ̇ܘܿܢܵܢܝ ܠܛܘܼܪܵܟܼ ܩܲܕܝܼܫܵܐ ܘܲܠܡܲܫܟܢܵܟܼ܀ ܘܐܹܬܸܐ ܠܘܵܬ݂ ܡܲܕܼܒ̇ܚܹܗ ܕܐܲܠܵܗܵܐ܀ ܘܲܠܘܵܬ݂ ܐܲܠܵܗܵܐ ܕܲܡܚܲܕܸ̇ܐ ܛܲܠܝܘܼܬ݂ܝ܀ ܐܲܘܕܸܐ ܠܵܟܼ ܒܟܸܢܵܪܵܐ ܐܲܠܵܗܵܐ ܐܲܠܵܗܝ܀ ܠܡܵܢܵܐ ܡܸܬܛܲܪܦܲܬ̇ܝ ܢܲܦ̮ܫܝ ܘܲܠܡܵܢܵܐ ܟܲܪܝܵܐ ܠܹܟ݂ܝ܀ ܣܲܟܵܝ ܠܐܲܠܵܗܵܐ ܡܸܛܠ ܕܬ݂ܘܼܒ݂ ܐܲܘܕܸܐ ܠܹܗ܀ ܠܦܵܪܘܿܩܵܐ ܕܐܲܦܲܝ̈ ܘܐܲܠܵܗܝ܀

ܐܲܠܵܗܵܐ ܫܡܲܥ݂ܢܲܢ ܒܐܸܕܼܢܲܝ̈ܢ܀ ܘܐܵܦ ܐܲܒ݂ܗܲܝ̈ܢ ܐܸܫܬܲܥܝܼܘ ܠܲܢ܀ ܡܸܕܸ̇ܡ ܕܲܥܒܲܕ̇ܬ̇ ܒܝܵܘ̈ܡܲܝܗܘܿܢ܀ ܒܝܵܘ̈ܡܵܬ݂ܵܐ ܩܲܕܼܡܵܝܹ̈ܐ܀ ܐܝܼܕܼܵܟܼ ܐܲܘܒ̇ܕܲܬ̤ ܠܥܲܡܡܹ̈ܐ ܘܲܢܨ݂ܲܒ݂ܬ̇ ܐܸܢܘܿܢ܀ ܘܐܲܒ݂ܐܸܫܬ̇ ܠܡܲܠ̈ܟ̇ܘܵܬ݂ܵܐ ܘܫܲܪܲܪܬ̇ ܐܸܢܘܿܢ܀ ܡܸܛܠ ܕܠܵܐ ܗ݇ܘ݂ܵܐ ܒܚܲܪܒ̇ܗܘܿܢ ܝܑܼܪܸܬ݂ܘ ܐܲܪܥܵܐ܀ ܘܐܵܦܠܵܐ ܕܪܵܥܗܘܿܢ ܦܪܲܩ ܐܸܢܘܿܢ܀ ܐܸܠܵܐ ܝܲܡܝܼܢܵܟܼ ܘܲܕܼܪܵܥܵܟܼ܀ ܘܢܘܼܗܪܵܐ ܕܐܲܦܲܝ̈ܟ ܕܲܨܒܲܝܬ̇ ܒܗܘܿܢ܀ ܐܲܢ݇ܬܘܼ ܐܲܠܵܗܵܐ ܡܲܠܟܝ܀ ܕܲܦܩܲܕ̇ܬ̇ ܥܲܠ ܦܘܼܪܩܵܢܹܗ ܕܝܲܥܩܘܿܒ݂܀ ܒܵܟܼ ܢܕܲܩܲܪ ܠܲܒ݂ܥܸܠܕ̇ܒ݂ܵܒܲܝ̈ܢ܀ ܘܡܸܛܠ ܫܡܵܟܼ ܢܕܼܘܼܫ ܠܣܵܢܐܲܝ̈ܢ܀ ܡܸܛܠ ܕܠܵܐ ܗ݇ܘ݂ܵܐ ܥܲܠ ܩܸܫ̈ܬܵܬܲܢ ܬܟ݂ܝܼܠܝܼܢܲܢ܀ ܘܐܵܦܠܵܐ ܥܲܠ ܙܲܝܢܲܢ ܕܢܸܦܪܩܲܢ܀ ܐܲܢ݇ܬ̇ܘܼ ܦܪܲܩܬܵܢ ܡ݂ܢ ܣܵܢ̈ܐܲܝܢ܀ ܘܐܲܒ݂ܗܸܬ̇ܬ̇ ܠܲܒ݂ܥܸܠܕܒ݂ܵܒܲܝ̈ܢ܀ ܫܲܒܲܚܢܵܢ ܐܲܠܵܗܵܐ ܟܠܹܗ ܝܲܘܡܵܐ܀ ܘܠܲܫܡܵܟܼ ܠܥܵܠܲܡ ܢܲܘܕܸ̇ܐ܀ ܘܗܵܫܵܐ ܛܥܲܝܬܵܢ ܘܐܲܒ݂ܗܸܬ̇ܬܵܢ܀ ܘܠܵܐ ܢܵܦܹܩ ܐܲܢ݇ܬ̇ ܒܚܲܝܠܲܢ܀ ܐܸܠܵܐ ܐܲܗܦܸܟ݂ܬܵܢ ܠܒܸܣܬܪܲܢ ܘܒܲܙܘܼܢ ܒܥܸܠܕܒ݂ܵܒܲܝ̈ܢ܀ ܝܲܗ݇ܒ݂ܬܵܢ ܐܲܝܟܼ ܥܵـ̈ܢܵܐ ܠܡܹܐܟ݂ܘܼܠܬܵܐ܀ ܘܒܲܕܲܪܬܵܢ ܒܹܝܬ݂ ܥܲܡܡܹ̈ܐ܀ ܙܲܒܸܢܬ̇ ܠܥܲܡܵܟܼ ܕܠܵܐ ܕܡܲـ̈ܝܵܐ܀ ܘܠܵܐ ܐܲܣܓ̇ܝܼܬ̇ ܚܘܼܠܵܦܗܘܿܢ܀ ܥܒܲܕ̇ܬܵܢ ܚܸܣܕܵܐ ܠܲܫܒ݂ܵܒܲܝ̈ܢ܀ ܘܡܘܼܝܵܩܵܐ ܘܒ݂ܘܼܙܵܚܵܐ ܠܐܲܝܠܹܝܢ ܕܲܚܕܼܵܪܲܝܢ ܐܸܢܘܿܢ܀ ܥܒܲܕ̇ܬܵܢ ܠܡܲܬ݂ܠܵܐ ܒܹܝܬ݂ ܥܲܡܡܹ̈ܐ܀ ܘܲܢܝܵܕܼܵܐ ܕܪܹܫܵܐ ܒܐܸܡ̈ܘܵܬ݂ܵܐ܀ ܟܠܹܗ ܝܲܘܡܵܐ ܒܸܗܬܲܬ݂ܝ ܩܕܼܵܡܲܝ ܗ݇ܝ݂܀ ܘܒܸܗܬ̇ܬ݂ܵܐ ܕܐܲܦܲܝ̈ ܟܲܣܝܵܬܲܢܝ܀ ܡ݂ܢ ܩܵܠܵܐ ܕܲܡܚܲܣܸܕܼ ܘܲܡܓܲܕܸܦ܀ ܘܡ݂ܢ ܩܕܼܵܡ ܒܥܸܠܕ̇ܒ݂ܵܒ݂ܵܐ ܕܡܸܬ݂ܢܲܩܲܡ܀ ܗܵܠܹܝܢ ܟܠܗܹܝܢ ܓܕܲܫ ܠܲܢ ܘܠܵܐ ܛܥܲܝܢܵܟܼ܀ ܘܠܵܐ ܕܲܓܸܠܢܲܢ ܒܲܩܝܵܡܵܟܼ܀ ܘܠܵܐ ܗܦܲܟ݂ܢ ܠܒܸܣܬ̇ܪܲܢ܀ ܘܠܵܐ ܐܲܗܦܸܟ݂ܢ ܫܒ݂ܝܼ̈ܠܲܝܢ ܡ݂ܢ ܐܘܼܪܚܵܟܼ܀ ܡܸܛܠ ܕܡܲܟܸܟ݂ܬܵܢ ܒܐܲܬ݂ܪܵܐ ܬܸܢܝܵܢܵܐ܀ ܘܟܲܣܝܼܬܵܢ ܒܛܸܠܵܠܲܝ̈ ܡܲܘܬܵܐ܀ ܘܠܵܐ ܛܥܲܝܢ ܫܡܹܗ ܕܐܲܠܵܗܲܢ܀ ܘܠܵܐ ܦܫܲܛܢ ܐܝܼ̈ܕܲܝܢ ܠܘܵܬ݂ ܐܲܠܵܗܹ̈ܐ ܢܘܼܟ݂ܪ̈ܵܝܹܐ܀ ܐܲܠܵܗܵܐ ܗ݇ܘ݂ ܒܵܨܹ̇ܐ ܠܵܗ̇ ܠܗܵܕܹܐ܀ ܡܸܛܠ ܕܗ̤ܘ ܝܵܕܲܥ ܡܲܚܫ̈ܒ݂ܵܬܹܗ ܕܠܸܒܵܐ܀ ܡܸܛܠܵܬ݂ܵܟܼ ܐܸܬ݂ܩܲܛܠ̱ܢ ܟܠܝܘܿܡ܀ ܘܐܸܬ݂ܚܫܸܒ݂ܢ ܐܲܝܟܼ ܥܵـ̈ܢܵܐ ܠܢܸܟ݂ܣܬ݂ܵܐ܀ ܐܸܬ̇ܬ̇ܥܝܼܪ ܘܠܵܐ ܬܸܕܼܡܲܟܼ ܡܵܪܝܵܐ܀ ܥܗܲܕܲܝܢ ܘܠܵܐ ܬܸܛܥܹܝܢ܀ ܘܠܵܐ ܬܲܗܦܸܟܼ ܐܲܦܲܝ̈ܟ ܡܸܢܲܢ܀ ܘܠܵܐ ܬܸܛܥܸܐ ܡܘܼܟܵܟܲܢ ܘܐܘܼܠܨܵܢܲܝ̈ܢ܀ ܡܸܛܠ ܕܡܸܟܲܬ̤ ܥܲܠ ܥܲܦܪܵܐ ܢܲܦ̮ܫܲܢ܀ ܘܕܸܒ݂ܩܲܬ̤ ܟܲܪܣܲܢ ܠܐܲܪܥܵܐ܀ ܩܘܼܡ ܥܲܕܲܪܲܝܢ ܘܲܦܪܘܿܩܲܝܢ ܡܸܛܠ ܪ̈ܲܚܡܲܝܟ܀

ܐܲܒܲܥ ܠܹܒ̇ܝ ܦܸܬ݂ܓ݂ܵܡܹ̈ܐ ܛܵܒܹ̈ܐ܀ ܘܐܹܡܲܪ ܥܒ݂ܵܕܲܝ̈ ܠܡܲܠܟܵܐ܀ ܠܸܫܢܵܝ ܩܲܢܝܹܗ ܕܣܵܦܪܵܐ ܡܗܝܼܪܵܐ܀ ܫܲܦܝܼܪ ܒܚܸܙܘܹܗ ܡ݂ܢ ܒܢܲܝ̈ܢܵܫܵܐ܀ ܐܸܬ݂ܢܣܸܟ݂ܘ ܪ̈ܲܚܡܹܐ ܥܲܠ ܣܸܦ̈ܘܵܬ݂ܵܟܼ܀ ܡܸܛܠ ܗܵܢܵܐ ܒܲܪܟ݂ܵܟܼ ܐܲܠܵܗܵܐ ܠܥܵܠܲܡ܀ ܐܲܪܡܵܐ ܣܲܝܦܵܐ ܒܚܲܨܲܝ̈ܟ ܓܲܢ݇ܒܵܪܵܐ܀ ܗܸܕܼܪܵܟܼ ܘܫܘܼܒ݂ܚܵܟܼ ܘܫܘܼܒ݂ܚܵܟܼ ܙܵܟܹܐ܀ ܪܟܲܒ݂ ܥܲܠ ܡܸܠܬ݂ܵܐ ܕܩܘܼܫܬܵܐ ܘܡܘܼܟܵܟ݂ܵܐ ܕܙܲܕ̇ܝܼܩܘܼܬ݂ܵܐ܀ ܢܵܡܘܿܣܵܟܼ ܒܕܸܚܠܬ݂ܵܐ ܕܝܲܡܝܼܢܵܟܼ܀ ܓܹܐܪ̈ܲܝܟ ܫܢܝܼܢܝܼܢ ܘܥܲܡܡܹ̈ܐ ܢܸܦܠܘܼܢ ܬܚܘܿܬܲܝܟ܀ ܒܠܸܒܵܐ ܕܲܒ݂ܥܸܠܕ̇ܒ݂ܵܒ݂ܵܘ̈ܗܝ ܕܡܲܠܟܵܐ܀ ܟܘܼܪܣܝܵܟܼ ܐܲܠܵܗܵܐ ܠܥܵܠܲܡ ܥܵܠܡܝܼܢ܀ ܫܲܒ݂ܛܵܐ ܦܫܝܼܛܵܐ ܫܲܒ݂ܛܵܐ ܕܡܲܠܟ̇ܘܼܬ݂ܵܟܼ܀ ܪܚܸܡ݂ܬ݁ ܙܲܕ̇ܝܼܩܘܼܬ݂ܵܐ ܘܲܣܼܢܲܝܬ݁ ܥܲܘܠܵܐ܀ ܡܸܛܠ ܗܵܢܵܐ ܡܲܫܚܵܟܼ ܐܲܠܵܗܵܐ ܐܲܠܵܗܵܟܼ܀ ܡܸܫܚܵܐ ܕܚܲܕܼܘܼܬ݂ܵܐ ܝܲܬ݁ܝܼܪ ܡ݂ܢ ܚܲܒ݂ܪ̈ܲܝܟ܀ ܡܘܼܪܵܐ ܘܩܲܣܝܵܐ ܘܐܸܣܛܲܩܛܹ̈ܐ܀ ܡܒܲܣܡܝܼܢ ܟܠܗܘܿܢ ܠܒ݂ܘܼܫܲܝ̈ܟ܀ ܡ݂ܢ ܗܲܝܟ̇ܠܵܐ ܪܹܫܵܝܵܐ ܡ݂ܢ ܠܘܵܬ݂ܝ ܚܲܕ̇ܝܘܼܟܼ܀ ܒܲܪ݇ܬ݂ ܡܲܠܟܵܐ ܒܫܘܼܒ݂ܚܵܐ ܩܵܡܲܬ݀܀ ܘܡܲܠܟ̇ܬ݂ܵܐ ܡ݂ܢ ܝܲܡܝܼܢܵܟܼ܀ ܒܲܠܒ݂ܘܼܫܵܐ ܕܕܲܗܒ݂ܵܐ ܕܐܲܘܦܹܝܪ܀ ܫܡܲܥܝ ܒܪܲܬ݂ܝ ܘܲܚܙܵܝ ܘܲܨܠܵܝ ܐܸܕܼܢܹܟ݂ܝ܀ ܘܲܛܥܵܝ ܥܲܡܹܟ݂ܝ ܘܒܹܝܬ݂ ܐܲܒ݂ܘܼܟ݂ܝ܀ ܕܢܸܬ݂ܪܲܓ݂ܪܲܓ݂ ܡܲܠܟܵܐ ܠܫܘܼܦܪܹܟ݂ܝ܀ ܡܸܛܠ ܕܗܘ݀ܝܘܼ ܡܵܪܹܟ݂ܝ ܣܓ݂ܘܿܕܼܝ ܠܹܗ܀ ܘܒܲܪ݇ܬ݂ ܨܘܿܪ ܬܸܣܓ̇ܘܿܕܼ ܠܹܗ܀ ܒܩܘܼܖ̈ܒܵܢܹܐ ܐܲܦܲܝ̈ܟ̇ ܢܸܒ݂ܥܘܿܢ ܥܲܬ̇ܝܼܖ̈ܵܘܗܝ ܕܥܲܡܵܐ܀ ܟܠܹܗ ܫܘܼܒ݂ܚܵܗ̇ ܕܒܲܪ݇ܬ݂ ܡܲܠܟܵܐ ܡ݂ܢ ܠܓ݂ܵܘ܀ ܘܲܡܨܲܒܲܬ݂ ܠܒ݂ܘܼܫܵܗ̇ ܒܕܲܗܒ݂ܵܐ ܛܵܒ݂ܵܐ܀ ܒܩܘܼܖ̈ܒܵܢܹܐ ܬܹܐܙܲܠ ܠܡܲܠܟܵܐ܀ ܘܢܲܘܒ̇ܠܘܼܢ ܒܬ݂ܘܼ̈ܠܵܬ݂ܵܐ ܚܲܒ݂ܖ̈ܵܬ݂ܵܗ̇ ܒܵܬ݂ܪܵܗ̇܀ ܘܢܹ̈ܐܙܵܠ݇ܢ ܒܚܲܕܼܘܼܬ݂ܵܐ ܘܲܒ݂ܒܲܣܝܼܡܘܼܬ݂ܵܐ܀ ܘܢܸܥ̈ܠܵܢ ܠܗܲܝܟ̇ܠܹܗ ܕܡܲܠܟܵܐ܀ ܚܠܵܦ ܐܲܒ݂ܵܗܲܝ̈ܟ̇ܝ ܢܸܗܘܘܿܢ ܒܢܲܝ̈ܟ̇ܝ܀ ܥܒܸܕܼ ܐܸܢܘܿܢ ܫܲܠܝܼܛܹ̈ܐ ܒܟ݂ܠܵܗ̇ ܐܲܪܥܵܐ܀ ܕܢܸܬ̇ܕ̇ܟܲܪ ܫܡܵܟܼ ܒܟ݂ܠ ܕܵܪ ܘܕܼܵܪ܀ ܡܸܛܠ ܗܵܢܵܐ ܢܲܘܕ̇ܘܿܢ ܠܵܟܼ ܥܲܡܡܹ̈ܐ ܠܥܵܠܲܡ ܥܵܠܡܝܼܢ܀

ܐܲܠܵܗܲܢ ܒܹܝܬ݂ ܓܲܘܣܲܢ ܥܲܫܝܼܢܵܐ܀ ܘܲܡܥܲܕ̇ܪܵܢܲܢ ܒܙܲܒ݂ܢܹ̈ܐ ܕܐܘܼܠܨܵܢܵܐ܀ ܐܸܫܬ̇ܟܲܚܬ̇ ܠܲܢ ܒܟ݂ܠܙܒܲܢ܀ ܡܸܛܠ ܗܵܢܵܐ ܠܵܐ ܕܵܚܠ݁ܝܼܢܲܢ܀ ܡܵܐ ܕܙܵܝ݁ܥܵܐ ܐܲܪܥܵܐ ܘܙܵܝ݁ܥܝܼܢ ܛܘܼܖܹ̈ܐ ܒܠܸܒܵܐ ܕܝܲܡܡܹ̈ܐ܀ ܢܸܬ̇ܕܲܠܚܘܼܢ ܡܲܝܲܝ̈ܗܘܿܢ ܘܢܸܬ݂ܗܲܦܟ̇ܘܼܢ܀ ܘܲܢܙܘܼܥܘܼܢ ܛܘܼܖܹ̈ܐ ܒܥܘܼܫܢܹܗ܀ ܬܲܦܹ̈ܐ ܕܢܲܗܖ̈ܵܘܵܬ݂ܵܐ ܢܚܲܕ̇ܘܼܢ ܒܲܡܕܼܝܼܢ݇ܬܹ̇ܗ ܕܐܲܠܵܗܲܢ܀ ܩܲܕܝܼܫܘܼ ܒܹܝܬ݂ ܡܲܫܪܝܹܗ ܕܲܡܪܲܝܡܵܐ܀ ܐܲܠܵܗܵܐ ܒܓ݂ܵܘܵܗ̇ ܠܵܐ ܬܙܘܼܥ܀ ܢܥܲܕ̇ܪܝܼܗ̇ ܐܲܠܵܗܵܐ ܒܥܸܕܵܢ ܨܲܦܪܵܐ܀ ܐܸܫܬ̇ܓܸܫܘ ܥܲܡܡܹ̈ܐ ܘܙܵܥ݂ ܡܲܠ̈ܟ̇ܘܵܬ݂ܵܐ܀ ܐܲܪܝܼܡ ܩܵܠܹܗ ܘܙܵܥܲܬ݀ ܐܲܪܥܵܐ܀ ܡܵܪܝܵܐ ܚܲܝܠ̱ܬ݂ܵܢܵܐ ܥܲܡܲܢ܀ ܘܲܡܥܲܕ̇ܪܵܢܲܢ ܐܲܠܵܗܹܗ ܕܝܲܥܩܘܿܒ݂܀ ܬܵܘ ܚܙܵܘ ܥܒ݂ܵܕܼܵܘ̈ܗܝ ܕܐܲܠܵܗܵܐ܀ ܕܥܵܒܸ݁ܕܼ ܬܸܕܼܡܖ̈ܵܬ݂ܵܐ ܒܐܲܪܥܵܐ܀ ܘܲܡܒܲܛܸܠ ܩܖ̈ܵܒܹܐ ܡ݂ܢ ܣܲܘ̈ܦܹܝܗ̇ ܕܐܲܪܥܵܐ܀ ܩܸܫ̈ܬܵܬ݂ܵܐ ܡܬܲܒܲܪ ܘܲܡܬܲܒܲܪ ܢܲܝܙܟܹ̈ܐ܀ ܘܡܲܖ̈ܟ̇ܒ݂ܵܬ݂ܵܐ ܡܲܘܩܸܕܼ ܒܢܘܼܪܵܐ܀ ܐܸܬ݂ܦܢܵܘ ܘܕܲܥܘ ܕܐܸܢܵܐ ܐ݇ܢܵܐ ܐܲܠܵܗܵܐ܀ ܐܸܬ̇ܬ̇ܪܝܼܡܹ݁ܬ݂ ܒܥܲܡܡܹ̈ܐ ܘܐܸܬ̇ܬ̇ܪܝܼܡܹ݁ܬ݂ ܒܐܲܪܥܵܐ܀ ܡܵܪܝܵܐ ܚܲܝܠ̱ܬ݂ܵܢܵܐ ܥܲܡܲܢ܀ ܘܲܡܥܲܕ̇ܪܵܢܲܢ ܐܲܠܵܗܹܗ ܕܝܲܥܩܘܿܒ݂܀

ܟܠܟ݂ܘܿܢ ܥܲܡܡܹ̈ܐ ܩܘܿܫܘ ܟܲܦܵܐ܀ ܘܫܲܒܲܚܘ ܠܐܲܠܵܗܵܐ ܒܩܵܠܵܐ ܕܫܘܼܒ݂ܚܵܐ܀ ܡܸܛܠ ܕܡܵܪܝܵܐ ܡܪܲܝܡܵܐ ܘܲܕܼܚܝܼܠܵܐ܀ ܗܘ݀ܝܘܼ ܡܲܠܟܵܐ ܪܲܒܵܐ ܥܲܠ ܟܠܵܗ̇ ܐܲܪܥܵܐ܀ ܕܫܲܥܒܸ̇ܕܼ ܠܲܢ ܥܲܡܡܹ̈ܐ ܬܚܘܿܬܲܝܢ܀ ܘܐܸܡ̈ܘܵܬ݂ܵܐ ܬܚܘܿܬ݂ ܖܸ̈ܓ݂ܠܲܝܢ܀ ܐܲܓ݂ܒ̇ܝܲܢ ܝܵܪܬ̇ܘܼܬܹܗ ܘܐܝܼܩܵܪܹܗ ܕܝܲܥܩܘܿܒ݂ ܕܲܪܚܸܡ݂܀ ܣܠܸܩ݂ ܐܲܠܵܗܵܐ ܒܫܘܼܒ݂ܚܵܐ ܡܵܪܝܵܐ ܒܩܵܠܵܐ ܕܩܲܪܢܵܐ܀ ܙܡܲܪܘ ܠܐܲܠܵܗܵܐ ܒܫܘܼܒ݂ܚܵܐ ܙܡܲܪܘ ܠܡܲܠܟܲܢ܀ ܡܸܛܠ ܕܡܲܠܟܵܐ ܕܟ݂ܠܵܗ̇ ܐܲܪܥܵܐ ܐܲܠܵܗܵܐ ܗ݇ܘ݂ ܙܡܲܪܘ ܠܹܗ ܫܘܼܒ݂ܚܵܐ܀ ܐܲܡܠܸܟܼ ܐܲܠܵܗܵܐ ܥܲܠ ܥܲܡܡܹ̈ܐ܀ ܐܲܠܵܗܵܐ ܝܑܼܬܸܒ݂ ܥܲܠ ܟܘܼܪܣܝܹܗ ܩܲܕ̇ܝܼܫܵܐ܀ ܫܲܠܝܼܛܵܢܹ̈ܐ ܕܥܲܡܡܹ̈ܐ ܐܸܬ݂ܦܢܵܘ ܠܘܵܬ݂ ܐܲܠܵܗܹܗ ܕܐܲܒ݂ܪܵܗܵܡ܀ ܡܸܛܠ ܕܕܲܐܠܵܗܵܐ ܐܸܢܘܿܢ ܐܘܼܚ̈ܕܵܢܹܝܗ̇ ܕܐܲܪܥܵܐ ܘܛܵܒ݂ ܐܸܬ̇ܬ̇ܪܝܼܡ܀

ܪܲܒܘܼ ܡܵܪܲܢ ܘܲܡܫܲܒܲܚ ܪܲܘܪܒ݂ܵܐܝܼܬ݂܀ ܒܲܩܪܝܼܬܹܗ ܕܐܲܠܵܗܲܢ܀ ܘܲܒ݂ܛܘܼܪܹܗ ܩܲܕܝܼܫܵܐ ܘܲܡܫܲܒ̇ܚܵܐ܀ ܚܲܕܼܘܼܬ݂ܵܐ ܒܟ݂ܠܵܗ̇ ܐܲܪܥܵܐ܀ ܛܘܼܪܵܐ ܕܨܸܗܝܘܿܢ ܕܒܲܫܦܘܿܠܲܝ̈ ܓܲܪܒ̇ܝܵܐ܀ ܩܪܝܼܬܹܗ ܗ݇ܝ݂ ܕܡܲܠܟܵܐ ܪܲܒܵܐ܀ ܐܲܠܵܗܵܐ ܒܣܵܚܖ̈ܵܬ݂ܵܗ̇ ܡܲܘܕܲܥ ܥܘܼܫܢܹܗ܀ ܡܸܛܠ ܕܗܵܐ ܡܲܠ̈ܟܹ̇ܐ ܐܸܬ̇ܛܲܝܲܒ݂ܘ ܘܲܥܒܲܪ݂ܘ ܐܲܟ݂ܚ݇ܕܼܵܐ܀ ܗܸܢܘܿܢ ܚܙ݂ܵܘ ܘܲܬ݂ܡܲܗ݂ܘ ܘܙܵܥ݂ܘ ܘܲܪܬܹܝܬ݂ܵܐ ܐܸܚܲܕܼ ܐܸܢܘܿܢ܀ ܘܚܸܒ݂ܠܹ̈ܐ ܐܲܝܟܼ ܕܝܵܠܹܕ̇ܬܵܐ܀ ܒܪܘܼܚܵܐ ܥܲܫܝܼܢܬܵܐ ܢܸܬ̇ܬܲܒ̇ܖ̈ܵܢ ܐܸܠܦܹ̈ܐ ܕܬܲܪܫܝܼܫ܀ ܐܲܝܟܼ ܕܲܫܡܲܥܢ ܗܵܟܲܢܵܐ ܚ݂ܙܲܝܢ܀ ܒܲܩܪܝܼܬܹܗ ܕܡܵܪܝܵܐ ܚܲܝܠ̱ܬ݂ܵܢܵܐ܀ ܒܲܩܪܝܼܬܹܗ ܕܐܲܠܵܗܲܢ܀ ܐܲܠܵܗܵܐ ܢܲܬ݂ܩܢܝܼܗ̇ ܥܕܲܡܵܐ ܠܥܵܠܲܡ܀ ܣܲܒܲܪܢ ܐܲܠܵܗܵܐ ܠܛܲܝܒ̇ܘܼܬ݂ܵܟܼ ܒܓ݂ܵܘܹܗ ܕܗܲܝܟ̇ܠܵܟܼ܀ ܐܲܝܟܼ ܫܡܵܟܼ ܐܲܠܵܗܵܐ ܗܵܟܲܢܵܐ ܬܸܫ̈ܒܚܵܬ݂ܵܟܼ܀ ܥܕܲܡܵܐ ܠܣܲܘܦܹ̈ܝܗ̇ ܕܐܲܪܥܵܐ ܙܲܕܝܼܩܘܼܬ݂ܵܐ ܡܲܠܝܵܐ ܝܲܡܝܼܢܵܟܼ܀ ܢܸܚܕܸ̇ܐ ܛܘܼܪܵܐ ܕܨܸܗܝܘܿܢ ܘܲܢܕܼܘܼ̈ܨܵܢ ܒ̈ܢܵܬ݂ ܝܼܗܘܼܕܼܵܐ܀ ܡܸܛܠ ܕܝܼܢܲܝ̈ܟ ܡܵܪܝܵܐ܀ ܐܸܬ݂ܟ̇ܘܼܪܟ̇ܘܼܗ̇ ܠܨܸܗܝܘܿܢ ܘܚܘܼܕܼܪܘܼܗ̇ ܘܲܡܢܵܘ ܡܲܓ݂ܕ̇ܠܹܝ̈ܗ̇܀ ܣܝܼܡܘ ܠܸܒ̇ܟ݂ܘܿܢ ܥܲܠ ܚܲܝܠܵܗ̇ ܘܲܥܩܘܿܪܘ ܣܵܚܖ̈ܵܬ݂ܵܗ̇܀ ܕܬܸܫܬܲܥܘܿܢ ܠܕܼܵܪܵܐ ܐ݇ܚܪܹܢܵܐ܀ ܕܗܵܢܵܘ ܐܲܠܵܗܵܐ ܐܲܠܵܗܲܢ܀ ܠܥܵܠܲܡ ܘܲܠܥܵܠܲܡ ܥܵܠܡܝܼܢ܀ ܕܗܘ݀ ܢܕܲܒ̇ܪܲܢ ܠܥܸܠ ܡ݂ܢ ܡܲܘܬܵܐ܀

ܫܡܲܥܘ ܗܵܕܹܐ ܟܠܟ݂ܘܿܢ ܥܲܡܡܹ̈ܐ܀ ܘܨܘܼܬ݂ܘ ܟܠ ܝܵܬ݂ܒܲܝ̈ ܐܲܪܥܵܐ܀ ܒܢܲܝ̈ ܐܲܪܥܵܐ ܘܲܒ݂ܢܲܝ̈ܢܵܫܵܐ܀ܐܲܟ݂ܚ݇ܕܼܵܐ ܥܲܬܝܼܖܹ̈ܐ ܘܡܸܣܟܹ̇ܢܹ̈ܐ܀ ܦܘܼܡܝ ܢܡܲܠܸܠ ܚܸܟ݂ܡܬ݂ܵܐ܀ ܘܪܸܢܝܹܗ ܕܠܹܒ̇ܝ ܣܘܼܟܵܠܵܐ܀ ܐܸܨܠܸܐ ܐܸܕܼܢܲܝ̈ ܠܡܲܬ݂ܠܹ̈ܐ܀ ܘܐܹܡܲܠܸܠ ܒܟܸܢܵܪܵܐ ܐܘܼ̈ܚܕܵܬ݂ܝ܀ ܠܵܐ ܕܵܚܹܠ݁ ܐ݇ܢܵܐ ܒܝܲܘ̈ܡܵܬ݂ܵܐ ܒܝܼܫܹ̈ܐ܀ ܥܲܘܠܵܐ ܕܲܒ݂ܥܸܠܕ̇ܒ݂ܵܒܲܝ̈ ܟܲܪܟܲܢܝ܀ ܟܠ ܕܲܬ݂ܟ݂ܝܼܠܝܼܢ ܥܲܠ ܚܲܝܠ̱ܗܘܿܢ܀ ܘܡܸܫܬܲܒ݂ܗ̱ܪܝܼܢ ܒܣܘܿܓ݂ܐܵܐ ܕܥܘܼܬ݂ܪܗܘܿܢ܀ ܐܲܚܵܐ ܠܵܐ ܦܵܪܸܩ̇܀ ܘܓܲܒ݂ܪܵܐ ܠܵܐ ܝܵܗܹ̇ܒ݂ ܠܐܲܠܵܗܵܐ ܦܘܼܪܩܵܢܹܗ܀ ܝܲܩܝܼܪܘܼ ܦܘܼܪܩܵܢܵܐ ܕܢܲܦ̮ܫܗܘܿܢ܀ ܠܐܝܼ ܠܥܵܠܲܡ ܘܬܸܚܸܐ ܠܥܵܠܲܡ ܥܵܠܡܝܼܢ܀ ܘܠܵܐ ܬܸܚܙܸܐ ܚܒ݂ܵܠܵܐ܀ ܟܲܕܼ ܬܸܚܙܸܐ ܚܲܟܝܼܡܹ̈ܐ ܕܡܵܝܬ̇ܝܼܢ܀ ܐܲܟ݂ܚ݇ܕܼܵܐ ܣܲܟ݂ܠܹ̈ܐ ܘܚܲܣܝܼܪ̈ܲܝ ܪܸܥܝܵܢܵܐ ܕܐܵܒ݂ܕ̇ܝܼ݁ܢ܀ ܘܫܵܒ݂ܩܝܼ݁ܢ ܩܸܢܝܵܢܗܘܿܢ ܠܲܐ݇ܚܖ̈ܵܢܹܐ܀ ܩܲܒ݂ܪ̈ܲܝܗܘܿܢ ܒܵܬܲܝ̈ܗܘܿܢ ܠܥܵܠܲܡ܀ ܘܡܲܥܡܲܪܗܘܿܢ ܠܕܼܵܪܕܵܖ̈ܝܼܢ܀ ܘܩܵܪܹܝ݁ܢ ܫܡܵܗܹ̈ܐ ܒܐܲܪܥܵܐ܀ ܒܲܪܢܵܫܵܐ ܒܐܝܼܩܵܪܹܗ ܠܵܐ ܐܸܬ݂ܒܲܝܲܢ܀ ܐܸܠܵܐ ܐܸܫܬ̇ܠܸܡ ܠܲܒ݂ܥܝܼܪܵܐ ܘܐܸܬ̇ܕܲܡܝܼ ܠܵܗ̇܀ ܗܵܢܵܘ ܫܒ݂ܝܼܠܗܘܿܢ ܬܘܼܩܠ̱ܬ݂ܵܐ ܠܢܲܦ̮ܫܗܘܿܢ܀ ܘܲܐ݇ܚܪܵܝܑܬ݂ ܒܦܘܼܡܗܘܿܢ ܢܸܪܥܘܿܢ܀ ܐܲܝܟܼ ܥܵܢ̈ܵܐ ܠܲܫܝܘܿܠ ܢܸܫܬܲܠܡܘܼܢ ܘܡܲܘܬܵܐ ܢܸܪܥܸܐ ܐܸܢܘܿܢ܀ ܘܢܸܫܬܲܠܛܘܼܢ ܒܗܘܿܢ ܬܖ̈ܝܼܨܹܐ ܒܨܲܦܪܵܐ܀ ܘܨܘܼܪܬܗܘܿܢ ܬܒܲܠܸܐ ܫܝܘܿܠ܀ ܘܡ݂ܢ ܬܸܫ̈ܒܚܵܬ݂ܗܘܿܢ ܢܸܬ̇ܕܲܚܩܘܼܢ܀ ܐܲܠܵܗܵܐ ܢܸܦܪܩܝܼܗ̇ ܠܢܲܦ̮ܫܝ܀ ܘܡ݂ܢ ܐܝܼܕܼܵܐ ܕܲܫܝܘܿܠ ܢܲܣܩܲܢܝ܀ ܠܵܐ ܬܸܕܼܚܲܠ ܡܵܐ ܕܥܵܬܲ݁ܪ ܓܲܒ݂ܪܵܐ܀ ܘܣܵܓܹܐ݁ ܐܝܼܩܵܪܵܐ ܕܒܲܝܬܹ̇ܗ܀ ܡܸܛܠ ܕܠܵܐ ܢܵܣܹܒ݂ ܡܸܕܸ̇ܡ ܒܡܲܘܬܹܗ܀ ܘܐܵܦܠܵܐ ܢܵܚܹܬ݂ ܒܵܬ݂ܪܹܗ ܫܘܼܒ݂ܚܹܗ܀ ܡܸܛܠ ܕܢܲܦ̮ܫܹܗ ܗܘ݀ ܡܒܲܪܸܟܼ ܒܚܲܝܵܘ̈ܗܝ܀ ܘܢܲܘܕܸ̇ܐ ܠܵܟܼ ܟܲܕܼ ܬܲܛܐܸܒ݂ ܠܹܗ܀ ܘܲܬ݂ܡܲܛܹܝܘܗܝ ܥܕܲܡܵܐ ܠܕܼܵܪܵܐ ܕܐܲܒ݂ܵܗܵܘ̈ܗܝ܀ ܥܕܲܡܵܐ ܠܥܵܠܲܡ ܠܵܐ ܢܸܚܙܘܿܢ ܡܲܘܬܵܐ܀ ܒܲܪܢܵܫܵܐ ܒܐܝܼܩܵܪܹܗ ܠܵܐ ܐܸܬ݂ܒܲܝܲܢ܀ ܐܸܠܵܐ ܐܸܫܬ̇ܠܸܡ ܠܚܲܝܘ̱ܬ݂ܵܐ ܘܐܸܬ̇ܕܲܡܝܼ ܠܵܗ̇܀

ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ܀

ܗܘܼܠܵܠܵܐ ܙ:

ܨܠܘܿܬ݂ܵܐ: ܠܵܟܼ ܐܲܠܵܗ ܐܲܠܵܗܝܼ̈ܢ ܘܡܵܪܹܐ ܡܵܪ̈ܵܘܵܢ ܡܲܠܟܵܐ ܪܲܒܵܐ ܕܬܸܫܒ̇ܘܿܚܬܵܐ ܐܝܼܬ݂ܝܵܐ ܕܐܝܼܬ݂ܵܘܗܝ ܡ݂ܢ ܥܵܠܲܡ ܡܲܘܕܹ̇ܝܢܲܢ ܘܣܵܓ݂ܕ̇ܝܼ݁ܢܲܢ ܘܲܡܫܲܒ̇ܚܝܼܢܲܢ ܒܟ݂ܠܥܸܕܵܢ ܡܵܪܵܐ ܕܟܼܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ:

ܐܲܠܵܗ ܐܲܠܵܗܝܼ̈ܢ ܡܵܪܝܵܐ ܡܲܠܸܠ܀ ܘܲܩܪܵܗ̇ ܠܐܲܪܥܵܐ ܡ݂ܢ ܡܲܕܼܢܵܚܵܘ̈ܗܝ ܕܫܸܡܫܵܐ ܘܲܥܕܲܡܵܐ ܠܡܲܥܖ̈ܵܒ݂ܵܘܗܝ܀ ܡ݂ܢ ܨܸܗܝܘܿܢ ܟܠܝܼܠܵܐ ܡܫܲܒ̇ܚܵܐ ܐܲܠܵܗܵܐ ܚܲܘܝܼ܀ ܢܹܐܬܸܐ ܐܲܠܵܗܵܐ ܘܠܵܐ ܢܸܫܬ̇ܘܿܩ܀ ܘܢܘܼܪܵܐ ܬܹܐܟ݂ܘܿܠ ܩܕܼܵܡܵܘܗܝ܀ ܘܲܚܕܼܵܪܵܘܗܝ ܬܸܬ݂ܓܲܘܙܲܠ ܛܵܒ݂܀ ܢܸܩܪܸܐ ܠܲܫܡܲܝܵܐ ܡ݂ܢ ܠܥܸܠ܀ ܘܐܲܪܥܵܐ ܠܲܡܕܼܵܢ ܥܲܡܹܗ܀ ܐܸܬ݂ܟܲܢܲܫܘ ܠܘܵܬܹܗ ܓܒ݂ܵܘ̈ܗܝ܀ ܕܲܡܩܝܼܡܝܼܢ ܩܝܵܡܹܗ ܥܲܠ ܕܸܒ݂ܚ̱ܬ݂ܵܐ܀ ܢܚܲܘܘܿܢ ܫܡܲܝܵܐ ܙܲܕܝܼܩܘܼܬܹܗ܀ ܡܸܛܠ ܕܐܲܠܵܗܵܐ ܗ݇ܘ݂ ܕܲܝܵܢܵܐ܀ ܫܡܲܥ ܥܲܡܝ ܘܐܹܡܲܪ ܠܵܟܼ܀ ܘܝܼܣܪܵܝܹܠ ܐܹܣܲܗܕܼܵܟܼ܀ ܐܸܢܵܐ ܐ݇ܢܵܐ ܐܲܠܵܗܵܐ ܐܲܠܵܗܵܟܼ܀ ܠܵܐ ܥܲܠ ܕܸܒ݂ܚܲܝ̈ܟ ܐܲܟ̇ܣܵܟܼ܀ ܘܲܥ̈ܠܵܘܵܬ݂ܵܟܼ ܠܘܼܩܒܲܠܝ ܐܸܢܹܝܢ ܒܟ݂ܠܙܒܲܢ܀ ܠܵܐ ܐܸܣܲܒ݂ ܡ݂ܢ ܒܲܝܬܵܟܼ ܬܲܘܖܹ̈ܐ܀ ܘܐܵܦܠܵܐ ܡ݂ܢ ܓܙܵܪܵܟܼ ܓܕܲܝ̈ܵܐ܀ ܡܸܛܠ ܕܕܼܝܼܠܝ ܗ݇ܝ݂ ܟܠܵܗ̇ ܚܲܝܘ̱ܬ݂ܵܐ ܕܕܲܒ݂ܪܵܐ܀ ܘܲܒ݂ܥܝܼܪܵܐ ܕܲܒ݂ܛܘܼܖܹ̈ܐ ܘܬܲܘܖܹ̈ܐ܀ ܝܵܕܲܥ ܐ݇ܢܵܐ ܟܠܵܗ̇ ܦܵܪܲܚܬ݂ܵܐ ܕܲܫܡܲܝܵܐ܀ ܘܚܲܝܘ̱ܬ݂ܵܐ ܕܕܲܒ݂ܪܵܐ ܕܝܼܠܝ ܗ݇ܝ݂܀ ܐܸܢ ܟܵܦܹܢ ܐ݇ܢܵܐ ܠܵܐ ܐܹܡܲܪ ܠܵܟܼ܀ ܡܸܛܠ ܕܕܼܝܼܠܝ ܗ݇ܝ݂ ܬܹܒܹܝܠ ܒܲܡܠܹܐܵܗ̇܀ ܠܵܐ ܐܵܟܹܠ݁ ܐ݇ܢܵܐ ܒܸܣܪܵܐ ܕܐܲܖ̈ܘܵܢܹܐ܀ ܘܲܕܼܡܵܐ ܕܲܓ݂̈ܕܲܝܵܐ ܠܵܐ ܫܵܬܹܐ ܐ݇ܢܵܐ܀ ܕܲܒܲܚ ܠܐܲܠܵܗܵܐ ܬܲܘܕ̇ܝܼܬ݂ܵܐ܀ ܘܫܲܠܸܡ ܠܲܡܪܲܝܡܵܐ ܢܸܕܼܖ̈ܲܝܟ܀ ܘܲܩܪܝܼܢܝ ܒܝܲܘܡܵܐ ܕܐܘܼܠܨܵܢܵܐ܀ ܐܹܥܲܫܢܵܟܼ ܘܲܬ݂ܫܲܒܚܲܢܝ܀ ܠܚܲܛܵܝܵܐ ܐܵܡܲܪ ܠܹܗ ܐܲܠܵܗܵܐ܀ ܡܵܐ ܠܵܟܼ ܘܠܲܟ݂ܬ݂ܵܒܹ̈ܐ ܕܦܘܼܩ̈ܕܵܢܲܝ܀ ܕܲܫܩܲܠܬ̇ ܩܝܵܡܝ ܒܦܘܼܡܵܟܼ܀ ܐܲܢ݇ܬ̇ ܕܹܝܢ ܣܢܲܝܬ̇ ܡܲܪܕ̇ܘܼܬ݂ܝ܀ ܘܲܫܕܲܝܬ̇ ܡܸܠܲܝ ܠܒܸܣܬ̇ܪܵܟܼ܀ ܐܸܢ ܚܵܙܹܐ݁ ܗ݇ܘܲܝܬ̇ ܓܲܢܵܒ݂ܵܐ ܪܵܗܹܛ݁ ܗ݇ܘܲܝܬ̇ ܥܲܡܹܗ܀ ܘܥܲܡ ܓܲܝܵܪܵܐ ܡܢܵܬ݂ܵܟܼ ܣܵܐܹܡ݁ ܗ݇ܘܲܝܬ̇܀ ܦܘܼܡܵܟܼ ܡܲܠܸܠ ܗ݇ܘ݂ܵܐ ܒܝܼܫܬܵܐ܀ ܘܠܸܫܵܢܵܟܼ ܡܡܲܠܸܠ ܢܸܟ݂ܠܵܐ܀ ܝܵܬܹ݁ܒ݂ ܗ݇ܘܲܝܬ̇ ܘܪܵܢܹܐ݁ ܒܐܲܚܘܼܟܼ܀ ܘܲܒ݂ܒܲܪ ܐܸܡܵܟܼ ܡܡܲܝܸܩ ܗ݇ܘܲܝܬ̇܀ ܗܵܠܹܝܢ ܟܠܗܹܝܢ ܥܒܲܕ̇ܬ̇ ܘܫܸܬ݂ܩܹ̇ܬ݂ ܠܵܟܼ܀ ܣܒܲܪܬ̇ ܥܲܘܵܠܵܐ ܕܐܲܟ݂ܘܵܬ݂ܵܟ ܐܸܗܘܸܐ܀ ܐܲܟ̇ܣܵܟܼ ܕܹܝܢ ܘܐܸܣܕ̇ܘܿܪ ܐܸܢܹܝܢ ܠܥܹܢܲܝܟ܀ ܘܐܸܣܬܲܟܲܠܘ ܒܗܵܕܹܐ ܐܲܝܠܹܝܢ ܕܛܵܥܹܝ݁ܢ ܠܐܲܠܵܗܵܐ܀ ܕܲܠܡܵܐ ܢܸܬ݂ܒܲܪܟ݂ܘܼܢ ܘܠܲܝܬ̇ ܕܲܡܦܲܨܸܐ܀ ܐܲܝܢܵܐ ܕܕܼܵܒܲܚ݁ ܬܲܘܕ̇ܝܼܬ݂ܵܐ ܗܘ̤ ܢܫܲܒܚܲܢܝ܀ ܘܬܲܡܵܢ ܐܹܚܲܘܹܝܘܗܝ ܐܘܼܪܚܵܐ ܕܦܘܼܪܩܵܢܹܗ ܕܐܲܠܵܗܲܢ܀

ܪܲܚܸܡܥܠܲܝ ܐܲܠܵܗܵܐ ܐܲܝܟܼ ܛܲܝܒ̇ܘܼܬ݂ܵܟܼ܀ ܘܐܲܝܟܼ ܣܘܿܓ݂ܐܵܐ ܕܪ̈ܲܚܡܲܝܟ ܥܛܝܼ ܚܛܵܗܲܝ̈܀ ܐܲܣܓܵܐ ܐܲܫܝܼܓܲܝܢܝ ܡ݂ܢ ܥܲܘܠܝ܀ ܘܡ݂ܢ ܚܛܵܗܲܝ̈ ܕܲܟܵܢܝ܀ ܡܸܛܠ ܕܣܲܟܼ̈ܠ̱ܘܵܬ݂ܝ ܝܵܕܲܥ ܐ݇ܢܵܐ܀ ܘܲܚܛܵܗܲܝ̈ ܠܘܼܩܒܲܠܝ ܐܸܢܘܿܢ ܒܟ݂ܠܙܒܲܢ܀ ܠܵܟܼ ܒܲܠܚܘܿܕܲܝܟ ܚܛܹ݁ܝܬ݂܀ ܘܒ݂ܝܼ̈ܫܵܬ݂ܵܐ ܩܕܼܵܡܲܝܟ ܥܸܒ݂݁ܕܹ̇ܬ݂܀ ܡܸܛܠ ܕܬܸܙܕܲܕܲܩ ܒܡܸܠܬ݂ܵܟܼ ܘܬܸܙܟܹ̇ܐ ܒܕܼܝܼܢܲܝ̈ܟ܀ ܡܸܛܠ ܕܲܒ݂ܥܲܘܠܵܐ ܐܸܬ݂ܒܲܛܢܹܬ݂ ܘܒܲܚܛܵܗܹ̈ܐ ܒܛܸܢܬܲܢܝ ܐܹܡܝ܀ ܐܲܢ݇ܬ̇ ܕܹܝܢ ܒܩܘܼܫܬܵܐ ܨܒܲܝܬ̇܀ ܘܟܲܣ̈ܝܵܬ݂ܵܐ ܕܚܸܟ݂ܡܬ݂ܵܟܼ ܐܲܘܕܲܥܬܵܢܝ܀ ܪܘܿܣ ܥܠܲܝ ܒܙܘܿܦܵܐ ܘܐܸܬ̇ܕܲܟܸܐ܀ ܚܲܠܸܠܲܝܢܝ ܒܹܗ ܡ݂ܢ ܬܲܠܓܵܐ ܐܸܚܘܲܪ܀ ܐܲܣܒܲܥܲܝܢܝ ܒܘܼܣܵܡܵܟܼ ܘܚܲܕܼܘܼܬ݂ܵܟܼ܀ ܘܢܸܚܕ̇ܘܿܢ ܓܲܖ̈ܡܲܝ ܡܲܟ̇ܝܼܟܹ̈ܐ܀ ܐܲܗܦܸܟܼ ܐܲܦܲܝ̈ܟ ܡ݂ܢ ܚܛܵܗܲܝ̈܀ ܘܟ݂ܠܗܹܝܢ ܣܲܟ݂ܠ̱ܘܵܬ݂ܝ ܥܛܝܼ܀ ܠܸܒܵܐ ܕܲܟ݂ܝܵܐ ܒܪܝܼ ܒܝܼ ܐܲܠܵܗܵܐ܀ ܘܪܘܼܚܵܟܼ ܬܩܲܢܬ݂ܵܐ ܚܲܕܸ̇ܬ݂ ܒܓ݂ܵܘܝ܀ ܠܵܐ ܬܸܫܕܹ̇ܝܢܝ ܡ݂ܢ ܩܕܼܵܡܲܝܟ܀ ܘܪܘܼܚܵܟܼ ܩܲܕܝܼܫܵܐ ܠܵܐ ܬܸܣܲܒ݂ ܡܹܢܝ܀ ܐܸܠܵܐ ܐܲܗܦܸܟܼ ܠܝܼ ܒܘܼܣܵܡܵܟܼ ܘܦܘܼܪܩܵܢܵܟܼ܀ ܘܪܘܼܚܵܟܼ ܡܫܲܒܲܚܬܵܐ ܬܣܲܡܟܲܢܝ܀ ܕܐܲܠܸܦ ܠܥܲܘܵܠܹ̈ܐ ܐܘܼܪܚܵܟܼ܀ ܘܚܲܛܵܝܹ̈ܐ ܠܘܵܬ݂ܵܟܼ ܢܸܬ݂ܦܢܘܿܢ܀ ܦܲܨܵܢܝ ܡ݂ܢ ܕܡܵܐ ܐܲܠܵܗܝ ܐܲܠܵܗܵܐ ܕܙܲܕ̇ܝܼܩܘܼܬ݂ܝ܀ ܘܲܢܫܲܒܲܚ ܠܸܫܵܢܝ ܙܲܕ̇ܝܼܩܘܼܬ݂ܵܟܼ܀ ܡܵܪܝܵܐ ܦܬܲܚ ܠܝܼ ܣܸܦ̈ܘܵܬ݂ܝ܀ ܘܦܘܼܡܝ ܢܲܦܸܩ ܬܸܫ̈ܒܚܵܬ݂ܵܟ݂܀ ܡܸܛܠ ܕܠܵܐ ܨܒ݂ܲܝܬ̇ ܒܕܸܒ݂ܚܹ̈ܐ܀ ܘܐܵܦܠܵܐ ܒܝܲܩ̈ܕܹ̇ܐ ܫܲܠܡܹ̈ܐ ܐܸܬ݂ܪܲܥܝܼܬ̇܀ ܕܸܒ݂ܚܵܘ̈ܗܝ ܕܐܲܠܵܗܵܐ ܪܘܼܚܵܐ ܗ݇ܝ݂ ܡܲܟ̇ܝܼܟ݂ܬܵܐ܀ ܠܸܒܵܐ ܫܚܝܼܩܵܐ ܐܲܠܵܗܵܐ ܠܵܐ ܡܲܣܠܸܐ܀ ܐܲܛܐܸܒ݂ ܒܨܸܒ݂ܝܵܢܵܟܼ ܠܨܸܗܝܘܿܢ܀ ܘܲܒ݂ܢܝܼ ܫܘܼܖܹ̈ܝܗ̇ ܕܐܘܿܪܸܫܠܸܡ܀ ܗܵܝܕܹ̇ܝܢ ܬܸܨܛܒܸܐ ܒܕܸܒ݂ܚܹ̈ܐ ܕܩܘܼܫܬܵܐ ܘܲܒ݂ܝܲܩ̈ܕܹ̇ܐ ܫܲܠܡܹ̈ܐ܀ ܘܗܵܝܕܹ̇ܝܢ ܢܲܣܩܘܼܢ ܬܲܘܖܹ̈ܐ ܥܲܠ ܡܲܕܼܒܚܵܟܼ܀

ܠܡܵܢܵܐ ܡܸܫܬܲܒ݂ܗܲܪ ܐܲܢ݇ܬ̇ ܒܒ݂ܝܼܫܬܵܐ ܓܲܢ݇ܒܵܪܵܐ܀ ܘܥܲܠ ܡܚܲܣܝܵܐ ܟܠܝܘܿܡ ܥܲܘܠܵܐ ܡܸܬ݂ܚܲܫܲܒ݂ ܠܸܫܵܢܵܟܼ܀ ܘܐܲܝܟܼ ܡܕܲܟ̇ܝܵܐ ܕܲܠܛܝܼܫ ܥܒ݂ܲܕ̇ܬ̇ ܢܸܟ݂ܠܵܐ܀ ܪܚܸܡ݂ܬ̇ ܒܝܼ̈ܫܵܬ݂ܵܐ ܡ݂ܢ ܛܵܒ݂ܵـ̈ـܬ݂ܵܐ܀ ܘܕܲܓܵܠܘܼܬ݂ܵܐ ܡ݂ܢ ܡܲܡܠ̱ܠܵܐ ܕܙܲܕ̇ܝܼܩܘܼܬ݂ܵܐ܀ ܪܚܸܡ݂ܬ̇ ܠܟ݂ܠ ܕܲܡܡܲܠܠܝܼܢ ܥܲܘܠܵܐ܀ ܘܲܠܠܸܫܵܢܹ̈ܐ ܢܲܟ̇ܘܼܠܬ݂ܵܢܹ̈ܐ܀ ܡܸܛܠ ܗܵܢܵܐ ܐܲܠܵܗܵܐ ܢܸܥܩܪܵܟܼ܀ ܘܢܸܣܚܦܵܟܼ ܠܥܵܠܲܡ ܡ݂ܢ ܡܲܫܟ̇ܢܵܟܼ܀ ܘܥܸܩܵܪܵܟܼ ܡ݂ܢ ܐܲܪܥܵܐ ܕܚܲܝܹ̈ܐ܀ ܕܢܸܚܙܘܿܢ ܙܲܕ̇ܝܼܩܹ̈ܐ ܘܢܸܚܕ̇ܘܿܢ܀ ܘܲܢܣܲܒ̇ܪܘܼܢ ܒܡܵܪܝܵܐ܀ ܘܢܹܐܡܪܘܼܢ ܕܗܵܢܵܘ ܓܲܒ݂ܪܵܐ ܕܠܵܐ ܥܒ݂ܲܕܼ ܠܐܲܠܵܗܵܐ ܬܘܼܟ݂ܠܵܢܹܗ܀ ܐܸܠܵܐ ܐܸܬ̇ܬ̇ܟܸܠ ܥܲܠ ܣܘܿܓ݂ܐܵܐ ܕܥܘܼܬ݂ܪܹܗ ܘܐܸܬ̇ܬ̇ܪܝܼܡ ܒܩܸܢܝܵܢܹܗ܀ ܘܐܸܢܵܐ ܐܲܝܟܼ ܙܲܝܬܵܐ ܡܫܲܒ̇ܚܵܐ ܒܒܲܝܬܹ̇ܗ ܕܐܲܠܵܗܵܐ ܣܲܒ̇ܪܹܬ݂ ܒܛܲܝܒ̇ܘܼܬܹܗ ܕܐܲܠܵܗܵܐ܀ ܠܥܵܠܲܡ ܘܲܠܥܵܠܲܡ ܥܵܠܡܝܼܢ܀ ܐܲܘܕܸ̇ܐ ܠܵܟܼ ܠܥܵܠܲܡ ܕܲܥܒܲܕ̇ܬ̇܀ ܘܐܹܣܲܒܲܪ ܫܡܵܟܼ ܠܕܼܵܪܕܵܪܝܼܢ ܠܘܼܩܒܲܠ ܙܲܕ̇ܝܼܩܲܝ̈ܟ܀

ܐܵܡܲ݁ܪ ܥܵܘܵܠܵܐ ܒܠܸܒܹܗ ܕܠܲܝܬ̇ ܐܲܠܵܗܵܐ܀ ܐܸܬ݂ܚܲܒܲܠܘ ܘܐܸܬ̇ܛܲܢܲܦܘ ܒܥܲܘܠ̱ܗܘܿܢ܀ ܘܠܲܝܬ̇ ܕܥܵܒܸ݁ܕܼ ܛܵܒ݂ܬ݂ܵܐ܀ ܐܲܠܵܗܵܐ ܐܲܕܼܝܼܩ ܡ݂ܢ ܫܡܲܝܵܐ ܥܲܠ ܒܢܲܝ̈ܢܵܫܵܐ܀ ܕܢܸܚܙܸܐ ܐܸܢ ܐܝܼܬ݂ ܕܣܲܟ̇ܘܼܠܬ݂ܵܢ ܘܒ݂ܵܥܹܐ݁ ܠܐܲܠܵܗܵܐ܀ ܟܠܗܘܿܢ ܣܛ݂ܵܘ ܐܲܟ݂ܚ݇ܕܼܵܐ ܘܐܸܬ̇ܛܲܢܲܦܘ܀ ܘܠܲܝܬ̇ ܕܥܵܒܸ݁ܕܼ ܛܵܒ݂ܬ݂ܵܐ ܐܵܦܠܵܐ ܚܲܕܼ܀ ܘܠܵܐ ܝܼܕܲܥ݂ܘ ܟܠ ܥܵܒ݂ܕܲܝ ܥܲܘܠܵܐ܀ ܐܲܝܠܹܝܢ ܕܐܵܟ݂ܠ݁ܝܼܢ ܗ݇ܘ݂ܵܘ ܠܥܲܡܝ ܡܹܐܟ݂ܘܼܠܬܵܐ ܕܠܲܚܡܵܐ܀ ܘܠܲܐܠܵܗܵܐ ܠܵܐ ܩܪ݂ܵܘ܀ ܬܲܡܵܢ ܕܚܸܠ݂ܘ ܕܸܚܠ̱ܬ݂ܵܐ܀ ܐܲܬܲܪ ܕܠܲܝܬ̇ ܗ݇ܘܵܐ ܕܸܚܠ̱ܬ݂ܵܐ܀ ܡܸܛܠ ܕܐܲܠܵܗܵܐ ܢܒܲܕܲܪ ܓܲܖ̈ܡܲܝܗܘܿܢ܀ ܕܐܲܝܠܹܝܢ ܕܫܵܦ̇ܪܝܼܢ ܠܲܒ݂ܢܲܝܢܵܫܵܐ܀ ܒܗܸܬ݂ܘ ܡܸܛܠ ܕܐܲܠܵܗܵܐ ܐܲܣܠܝܼ ܐܸܢܘܿܢ܀ ܡܲܢ ܢܸܬܸ̇ܠ ܡ݂ܢ ܨܸܗܝܘܿܢ ܦܘܼܪܩܵܢܵܐ ܠܝܼܣܪܵܝܹܠ܀ ܡܵܐ ܕܡܲܗܦܸܟܼ ܡܵܪܝܵܐ ܫܒ݂ܝܼܬ݂ܵܐ ܕܥܲܡܡܹ̈ܐ܀ ܢܕܼܘܼܨ ܝܲܥܩܘܿܒ݂ ܘܢܸܚܕܸ̇ܐ ܝܑܼܣܪܵܝܹܠ܀

ܐܲܠܵܗܵܐ ܒܲܫܡܵܟܼ ܦܪܘܿܩܲܝܢܝ܀ ܘܲܒ݂ܓܲܢ݇ܒܵܪܘܼܬ݂ܵܟܼ ܕܘܼܢ ܠܝܼ܀ ܐܲܠܵܗܵܐ ܫܡܲܥ ܨܠܘܿܬ݂ܝ܀ ܘܨܘܼܬ݂ ܐܸܢܹܝܢ ܠܡܸܠܵܘ̈ܗܝ ܕܦܘܼܡܝ܀ ܡܸܛܠ ܕܢܘܼܟ݂ܖ̈ܵܝܹܐ ܩܵܡ݂ܘ ܥܠܲܝ܀ ܘܥܲܫܝܼܢܹ̈ܐ ܒܥܵܐܘܼܗ̇ ܠܢܲܦ̮ܫܝ܀ ܘܠܵܐ ܚܲܫܒ̇ܘܼܟܼ ܐܲܠܵܗܵܐ܀ ܐܲܠܵܗܵܐ ܡܥܲܕ̇ܪܵܢܝ ܡܵܪܝܵܐ ܡܣܲܡܟ݂ܵܢܵܗ̇ ܕܢܲܦ̮ܫܝ܀ ܐܲܝܬܵܐ ܒܝܼܫܬܵܐ ܥܲܠ ܒܥܸܠܕ̇ܒ݂ܵܒܲܝ̈܀ ܘܲܒ݂ܩܘܼܫܬܵܟܼ ܫܲܬܸ̇ܩ ܐܸܢܘܿܢ܀ ܘܐܸܢܵܐ ܒܦܘܼܪܫܵܢܵܐ ܐܹܕܲܒܲܚ ܠܵܟܼ܀ ܘܐܲܘܕܸ̇ܐ ܠܲܫܡܵܟܼ ܡܵܪܝܵܐ ܕܛܵܒ݂ܘܼ܀ ܕܡ݂ܢ ܟܠ ܥܵـ̈ـܩܵܢ ܦܲܨܝܼܬܵܢܝ܀ ܘܒܲܒ݂ܥܸܠܕ̇ܒ݂ܵܒܲܝ̈ ܚܙܵܬ̤ ܥܲܝܢܝ܀

ܨܘܼܬ݂ ܐܲܠܵܗܵܐ ܨܠܘܿܬ݂ܝ ܘܠܵܐ ܬܲܗܡܸܐ ܡ݂ܢ ܒܵܥܘܼܬ݂ܝ܀ ܫܡܲܥܲܝܢܝ ܘܲܥܢܝܼܢܝ ܘܐܸܬ݂ܦܲܢ ܠܲܓ݂ܥܵܬ݂ܝ ܘܲܫܡܲܥܲܝܢܝ܀ ܡܸܛܠ ܒܥܸܠܕ̇ܒ݂ܵܒܲܝ̈ ܘܡܸܛܠ ܐܘܼܠܨܵܢܹܗ ܕܥܲܘܵܠܵܐ܀ ܡܸܛܠ ܕܲܨܠ݂ܵܘ ܥܠܲܝ ܥܲܘܵܠܹ̈ܐ ܘܣܲܩܪܘܼܢܝ܀ ܘܢܸܦܠܲܬ̤ ܒܝܼ ܕܸܚܠ̱ܬ݂ܵܐ܀ ܘܟܲܣܝܘܼܢܝ ܛܸܠܵܠܲܝ̈ ܡܲܘܬܵܐ܀ ܐܸܡ̇ܪܹܬ݂ ܡܲܢ ܕܹܝܢ ܝܲܗ݇ܒ݂ ܠܝܼ ܓܸܦܹ̈ܐ ܐܲܝܟܼ ܕܝܲܘܢܵܐ܀ ܘܦܸܪܚܹ̇ܬ݂ ܘܫܸܟ݂ܢܹ݁ܬ݂ ܘܐܲܪܚܩܹ݁ܬ݂܀ ܘܦܸܪܚܹ̇ܬ݂ ܘܲܫܪܹܝ݁ܬ݂ ܒܡܲܕܼܒ̇ܪܵܐ܀ ܘܟܲܬ̇ܪܹܬ݂ ܠܡܲܢ ܕܲܡܦܲܨܸܐ ܠܝܼ ܡ݂ܢ ܪܘܼܚܵܐ ܕܥܲܠܥܵܠܵܐ܀ ܛܲܒܲܥ ܡܵܪܝ ܗܘܼܦܵܟ݂ܵܐ ܕܠܸܫܵܢܲܝ̈ܗܘܿܢ܀ ܡܸܛܠ ܕܲܚܙܹ̇ܝܬ݂ ܚܸܪܝܵܢܵܐ ܘܕܼܝܼܢܵܐ ܒܲܩܪܝܼܬ݂ܵܐ܀ ܒܐܝܼܡܵܡܵܐ ܘܲܒ݂ܠܸܠܝܵܐ ܟܪܝܼܟ݂ܝܼܢ ܠܫܘܼܪܹ̈ܝܗ̇܀ ܥܲܘܠܵܐ ܘܫܘܼܩܪܵܐ ܒܓ݂ܵܘܵܗ̇ ܘܥܸܬܵܐ܀ ܘܠܵܐ ܥܵܢܹ̇ܕܼ ܡ݂ܢ ܫܘܼܩܹ̈ܝܗ̇ ܬܘܼܟܵܐ ܘܢܸܟ݂ܠܵܐ܀ ܠܵܐ ܗ݇ܘ݂ܵܐ ܓܹܝܪ ܒܥܸܠܕ̇ܒ݂ܵܒ݂ܝ ܚܲܣܕܲܢܝ ܕܐܹܣܲܝܒܲܪ܀ ܘܐܵܦܠܵܐ ܣܲܢܐ̱ܝ ܐܸܬ̇ܬ̇ܪܝܼܡ ܥܠܲܝ ܕܐܸܛܫܸܐ ܡܸܢܹܗ܀ ܐܲܢ݇ܬ̇ܘܼ ܒܲܪܢܵܫܵܐ ܕܐܲܟ݂ܘܵܬ݂ܝ܀ ܩܲܪܝܼܒ݂ܝ ܘܪܵܚܹܡܝ܀ ܕܐܲܟ݂ܚ݇ܕܼܵܐ ܠܥܸܣܢ ܫܵܪܘܼܬ݂ܵܐ ܒܒܲܝܬܹ̇ܗ ܕܐܲܠܵܗܵܐ܀ ܟܲܕܼ ܡܗܲܠܟ݂ܝܼܢ ܗ݇ܘܲܝܢ ܒܐܵܘܝܘܼܬ݂ܵܐ܀ ܐܲܝܬܵܐ ܥܠܲܝܗܘܿܢ ܡܲܘܬܵܐ܀ ܘܢܸܚܬ݂ܘܼܢ ܟܲܕܼ ܚܲܝܝܼܢ ܠܲܫܝܘܿܠ܀ ܡܸܛܠ ܕܒ݂ܝܼܫܬܵܐ ܐܝܼܬ݂ ܒܓ݂ܵܘܗ̱ܘܿܢ܀ ܐܸܢܵܐ ܕܹܝܢ ܠܐܲܠܵܗܵܐ ܐܸܩܪܸܐ ܘܐܲܠܵܗܵܐ ܢܸܦ̱ܪܩܲܢܝ܀ ܒܪܲܡܫܵܐ ܘܲܒ݂ܨܲܦܪܵܐ ܘܲܒ݂ܛܲܗܪܵܐ܀ ܐܸܪܢܸܐ ܘܐܹܡܲܪ ܘܐܲܫܡܲܥ ܩܵܠܝ܀ ܦܲܨܵܗ̇ ܠܢܲܦ̮ܫܝ ܡ݂ܢ ܐܲܝܠܹܝܢ ܕܚܵܟ݂ܡܝܼܢ ܠܝܼ܀ ܡܸܛܠ ܕܲܒ݂ܚܸܪܝܵܢܵܐ ܗܘ݀ܵܘ ܥܲܡܝ܀ ܢܸܫܡܲܥ ܐܲܠܵܗܵܐ ܘܲܢܡܲܟܸ̇ܟܼ ܐܸܢܘܿܢ܀ ܗܵܘ̇ ܕܐܝܼܬ݂ܵܘܗܝ ܡ݂ܢ ܩܕܼܵܡ ܥܵܠܡܹ̈ܐ܀ ܠܲܝܬ̇ ܠܗܘܿܢ ܬܲܚܠܘܼܦܵܐ ܘܠܵܐ ܕܚܸܠ݂ܘ ܡ݂ܢ ܐܲܠܵܗܵܐ܀ ܐܲܘܫܸܛܘ ܐܝܼܕܼܵܐ ܥܲܠ ܩܲܪܝܼܒܹܗ ܘܛܲܘܸܫܘ ܩܝܵܡܹܗ܀ ܐܸܬ̇ܕܲܠܲܚܘ ܡ݂ܢ ܪܘܼܓ݂ܙܵܐ ܕܐܲܦܵܘ̈ܗܝ ܘܡ݂ܢ ܚܸܡܬ݂ܵܐ ܕܠܸܒܹ̇ܗ܀ ܪ̈ܲܟ̇ܝܼܟ݂ܵܢ ܡܸܠܵܘ̈ܗܝ ܡ݂ܢ ܡܸܫܚܵܐ ܘܗܸܢܹܝܢ ܠܘܿܠ̈ܝܵܬ݂ܵܐ܀ ܫܕܼܝܼ ܨܸܦܬ݂ܵܟܼ ܥܲܠ ܡܵܪܝܵܐ ܘܗܘ̤ ܢܬܲܪܣܹܝܟܼ܀ ܘܠܵܐ ܢܸܬܸ̇ܠ ܠܥܵܠܲܡ ܙܲܘܥ̱ܬ݂ܵܐ ܠܙܲܕ̇ܝܼܩܵܘ̈ܗܝ܀ ܐܲܢ݇ܬ̇ ܕܹܝܢ ܐܲܠܵܗܵܐ ܐܲܚܸܬ݂ ܐܸܢܘܿܢ ܠܓ݂ܘܼܒܵܐ ܕܐܲܒ݂ܕܵܢܵܐ܀ ܠܓܲܒ݂ܪܹ̈ܐ ܐܵܫܕܲܝ̈ ܕܡܵܐ ܘܢܵܟ݂ܠܲܝ̈ ܢܸܟ݂ܠܵܐ܀ ܘܠܵܐ ܢܫܲܠܡܘܼܢ ܝܲܘܡܵܬ݂̈ܗܘܿܢ ܘܐܸܢܵܐ ܐܹܣܲܒܲܪ ܒܵܟܼ܀

ܪܲܚܸܡܥܠܲܝ ܐܲܠܵܗܵܐ ܡܸܛܠ ܕܕܼܵܫܲܢܝ ܒܲܪܢܵܫܵܐ܀ ܝܲܘܡܵܐ ܟܠܹܗ ܩܪܲܒ݂ܬ݂ܵܢܵܐ ܐܲܠܨܲܢܝ܀ ܕܵܫܘܼܢܝ ܒܥܸܠܕ̇ܒ݂ܵܒܲܝ̈ ܟܠܹܗ ܝܲܘܡܵܐ܀ ܡܸܛܠ ܕܣܘܿܓ݂ܐܵܐ ܕܲܩܪ̈ܲܒ݂ܬ݂ܵܢܹܐ ܐܸܬ̇ܬ̇ܪܝܼܡܘ ܥܠܲܝ܀ ܒܐܝܼܡܵܡܵܐ ܠܵܐ ܐܸܕܼܚܲܠ ܡܸܛܠ ܕܲܥܠܲܝܟܘܼ ܬܟ݂ܝܼܠ ܐ݇ܢܵܐ܀ ܒܐܲܠܵܗܵܐ ܐܸܫܬܲܒܲܚ ܒܐܲܠܵܗܵܐ ܣܲܒ݁ܪܹܬ݂ ܠܵܐ ܐܸܕܼܚܲܠ܀ ܡܵܢܵܐ ܥܵܒܸ݁ܕܼ ܠܝܼ ܒܲܪܢܵܫܵܐ܀ ܟܠܹܗ ܝܲܘܡܵܐ ܡܸܬ݂ܡܲܠܟ݂ܝܼܢ ܗ݇ܘ݂ܵܘ ܥܠܲܝ܀ ܘܡܸܬ݂ܚܲܫܒ݂ܝܼܢ ܗ݇ܘ݂ܵܘ ܥܠܲܝ ܒܝܼܫܬܵܐ܀ ܢܸܛܫܘܼܢ ܘܢܸܥܡܪܘܼܢ ܘܗܸܢ݂ܘܿܢ ܥܸܩܒܲܝ̈ ܢܸܛܪܘܼܢ܀ ܐܲܝܟܼ ܕܣܲܟ̇ܝܼܘ ܠܢܲܦ̮ܫܝ ܘܐܸܡܲܪ݂ܘ܀ ܕܠܲܝܬ̇ ܠܹܗ ܡܦܲܨܝܵܢܵܐ܀ ܒܪܘܼܓ݂ܙܵܐ ܕܥܲܡܡܹ̈ܐ ܕܘܼܢ ܐܸܢܘܿܢ܀ ܐܲܠܵܗܵܐ ܬܲܘܕ̇ܝܼܬ݂ܝ ܚܲܘܝܼܬܵܟܼ܀ ܣܝܼܡ ܕܸܡܥܲܝ̈ ܩܕܼܵܡܲܝܟ ܘܲܒ݂ܣܸܦܪܵܟܼ܀ ܗܵܝܕܹ̇ܝܢ ܢܸܗܦܟ݂ܘܼܢ ܒܥܸܠܕ̇ܒ݂ܵܒܲܝ̈ ܠܒܸܣܬܲܪܗܘܿܢ܀ ܘܐܸܕܲܥ ܕܐܲܠܵܗܵܐ ܐܝܼܬ݂ ܠܝܼ܀ ܠܡܸܠܬܹܗ ܕܐܲܠܵܗܵܐ ܐܹܫܲܒܲܚ܀ ܒܐܲܠܵܗܵܐ ܬܟ݂ܝܼܠ ܐ݇ܢܵܐ ܠܵܐ ܐܸܕܼܚܲܠ܀ ܡܵܢܵܐ ܥܵܒܸ݁ܕܼ ܠܝܼ ܒܲܪܢܵܫܵܐ܀ ܠܵܟܼ ܐܲܠܵܗܵܐ ܐܹܫܲܠܸܡ ܢܸܕܼܪ̈ܲܝ܀ ܘܲܒ݂ܬܲܘܕ̇ܝܼܬ݂ܵܐ ܐܹܕܲܒܲܚ ܠܵܟܼ܀ ܡܸܛܠ ܕܦܲܨܝܼܬ̇ ܢܲܦ̮ܫܝ ܡ݂ܢ ܡܲܘܬܵܐ܀ ܘܪܸ̈ܓܠܲܝ ܡ݂ܢ ܫܲܪ̈ܥܵܬ݂ܵܐ܀ ܕܐܸܫܦܲܪ ܩܕܼܵܡܲܝܟ ܐܲܠܵܗܵܐ ܒܐܲܪܥܵܐ ܕܚܲܝܹ̈ܐ܀

ܪܲܚܸܡܥܠܲܝ ܐܲܠܵܗܵܐ ܡܸܛܠ ܕܒ݂ܵܟ݂ܘܼ ܡܣܲܒ̇ܪܵܐ ܢܲܦ̮ܫܝ܀ ܘܲܒܸܛܸܠܵܠܵܐ ܕܟܸܢܦܲܝ̈ܟ ܐܸܣܬܲܬܲܪ܀ ܥܕܲܡܵܐ ܕܢܸܥܒܲܪ ܕܠܘܼܚܝܵܐ܀ ܐܸܩܪܸܐ ܠܐܲܠܵܗܵܐ ܡܪܲܝܡܵܐ ܘܠܲܐܠܵܗܵܐ ܦܵܪܘܿܩܝ܀ ܕܫܲܕܲܪ ܡ݂ܢ ܫܡܲܝܵܐ ܘܦܲܪܩܲܢܝ܀ ܘܚܲܣܸܕܼ ܠܲܒ݂ܥܸܠܕ̇ܒ݂ܵܒܲܝ̈܀ ܫܲܕܲܪ ܐܲܠܵܗܵܐ ܛܲܝܒ̇ܘܼܬܹܗ ܘܩܘܼܫܬܹܗ܀ ܘܲܦܪ݂ܲܩ ܢܲܦ̮ܫܝ ܡ݂ܢ ܟܲܠܒܹ̈ܐ܀ ܕܕܸܡ̇ܟܹ̇ܬ݂ ܟܲܕܼ ܕܠܝܼܚ ܐ݇ܢܵܐ܀ ܒܢܲܝ̈ܢܵܫܵܐ ܫܸܢܲܝ̈ܗܘܿܢ ܢܲܝܙܟܹ̈ܐ ܘܓܹܐܪܹ̈ܐ܀ ܘܠܸܫܵܢܗܘܿܢ ܐܲܝܟܼ ܣܲܝܦܵܐ ܚܲܪܝܼܦܵܐ܀ ܐܸܬ̇ܬ̇ܪܝܼܡ ܥܲܠ ܫܡܲܝܵܐ ܐܲܠܵܗܵܐ܀ ܘܥܲܠ ܟܠܵܗ̇ ܐܲܪܥܵܐ ܐܝܼܩܵܪܵܟܼ܀ ܡܨܝܼܕ̇ܬܵܐ ܬܲܩܸܢܘ ܠܪܸ̈ܓ݂ܠܲܝ܀ ܘܓ݂ܘܼܡܵܨܵܐ ܚ݂ܦܲܪܘ ܠܢܲܦ̮ܫܝ ܘܲܢܦܲܠܘ݂ ܒܓ݂ܵܘܹܗ܀ ܡܲܬ݂ܩܲܢܘܼ ܠܹܒ̇ܝ ܐܲܠܵܗܵܐ ܡܲܬ݂ܩܲܢܘܼ ܠܹܒ̇ܝ܀ ܐܹܫܲܒܲܚ ܘܐܹܙܲܡܲܪ܀ ܐܸܬ̇ܬ̇ܥܝܼܪ ܟܸܢܵܪܝ ܐܸܬ̇ܬ̇ܥܝܼܪܘ ܩܝܼܬ݂ܵܪܵܐ ܘܟܸܢܵܪܵܐ܀ ܘܐܸܢܵܐ ܐܸܬ̇ܬ̇ܥܝܼܪ ܒܨܲܦܪܵܐ܀ ܐܲܘܕܸ̇ܐ ܠܵܟܼ ܒܥܲܡܡܹ̈ܐ ܐܲܠܵܗܵܐ܀ ܘܠܲܫܡܵܟܼ ܐܹܙܲܡܲܪ ܒܐܸܡ̈ܘܵܬ݂ܵܐ܀ ܡܸܛܠ ܕܐܸܬ̇ܬ̇ܪܝܼܡܲܬ̤ ܥܕܲܡܵܐ ܠܲܫܡܲܝܵܐ ܛܲܝܒ̇ܘܼܬ݂ܵܟܼ܀ ܘܲܥܕܲܡܵܐ ܠܲܫܡܲܝ̈ ܫܡܲܝܵܐ ܗܲܝܡܵܢܘܼܬ݂ܵܟܼ܀ ܐܸܬ̇ܬ̇ܪܝܼܡ ܥܲܠ ܫܡܲܝܵܐ ܐܲܠܵܗܵܐ܀ ܘܥܲܠ ܟܠܵܗ̇ ܐܲܪܥܵܐ ܐܝܼܩܵܪܵܟܼ܀

ܐܹܝܢ ܫܲܪܝܼܪܵܐܝܼܬ݂ ܙܲܕ̇ܝܼܩܘܼܬ݂ܵܐ ܡܡܲܠܠܝܼܢ ܐ݇ܢܬ̇ܘܿܢ܀ ܘܲܬ݂ܪܝܼܨܘܼܬ݂ܵܐ ܕܵܝ̇ܢܝܼܢ ܐ݇ܢܬ̇ܘܿܢ ܒܢܲܝ̈ܢܵܫܵܐ܀ ܗܵܐ ܟܠܟ݂ܘܿܢ ܥܲܘܠܵܐ ܡܡܲܠܠܝܼܢ ܐ݇ܢܬ̇ܘܿܢ ܒܐܲܪܥܵܐ܀ ܘܲܒ݂ܥܲܘܠܵܐ ܡܥܲܪ̈ܙܠܵܢ ܐܝܼܕܲܝ̈ܟ̇ܘܿܢ܀ ܐܸܬ݂ܦܪܸܫܘ ܥܲܘܵܠܹ̈ܐ ܡ݂ܢ ܟܲܪܣܵܐ܀ ܘܲܛܥ݂ܵܘ ܡ݂ܢ ܡܲܪܒ̇ܥܵܐ ܕܲܡܡܲܠܠܝܼܢ ܕܲܓܵܠܘܼܬ݂ܵܐ܀ ܚܸܡܬ݂ܗܘܿܢ ܐܲܝܟܼ ܕܚܸܘܝܵܐ ܚܲܪܡܵܢܵܐ܀ ܘܐܲܝܟܼ ܕܐܸܣܦܸܣ ܚܲܪܫܬ݂ܵܐ܀ ܕܲܡܣܲܟ̇ܪܵܐ ܐܸܕܼܢܹ̈ܝܗ̇ ܕܠܵܐ ܬܸܫܡܲܥ܀ ܩܵܠܵܐ ܕܠܵܚܘܿܫܵܐ ܘܲܕܼܚܲܒܵܪܵܐ ܘܲܕܼܚܲܟ̇ܝܼܡܵܐ܀ ܐܲܠܵܗܵܐ ܢܬܲܒܲܪ ܫܸܢܲܝ̈ܗܘܿܢ ܒܦܘܼܡܗܘܿܢ܀ ܘܢܝܼܒܲܝ̈ܗܘܿܢ ܕܐܲܪ̈ܝܵܘܵܬ݂ܵܐ ܥܵܩܲܪ ܡܵܪܝܵܐ܀ ܢܸܣܬ̇ܠܘܼܢ ܐܲܝܟܼ ܡܲܝ̈ܵܐ ܕܡܸܬ݂ܐܲܫܕ̇ܝܼܢ܀ ܘܢܸܫܕܸ̇ܐ ܓܹܐܪ̈ܵܘܗܝ ܥܕܲܡܵܐ ܕܲܢܣܘܼܦܘܼܢ܀ ܐܲܝܟܼ ܫܥܘܿܬ݂ܵܐ ܕܡܸܬ݂ܦܲܫܪܵܐ ܘܢܵܦ݁ܠܵܐ ܡ݂ܢ ܩܕܼܵܡ ܢܘܼܪܵܐ ܢܸܬ݂ܚܲܪܒ̇ܘܼܢ܀ ܢܸܦܠܲܬ̤ ܢܘܼܪܵܐ ܘܠܵܐ ܚܙ݂ܵܘ ܫܸܡܫܵܐ ܘܠܵܐ ܐܸܣܬܲܟܲܠܘ܀ ܢܸܗܘܘܿܢ ܟܘܼܒܲܝ̈ܗܘܿܢ ܗܲܛܛܹ̈ܐ܀ ܘܪܘܼܓ݂ܙܵܐ ܢܕܲܠܲܚ ܐܸܢܘܿܢ܀ ܢܸܚܕܸ̇ܐ ܙܲܕ̇ܝܼܩܵܐ ܕܚܵܙܹ̇ܐ ܦܘܼܪܥܵܢܵܐ܀ ܘܐܝܼܕܼܵܘ̈ܗܝ ܢܫܝܼܓ݂ ܒܲܕܼܡܹܗ ܕܪܲܫܝܼܥܵܐ܀ ܘܢܹܐܡܲܪ ܒܲܪܢܵܫܵܐ ܐܝܼܬ݂ ܗ݇ܘ݂ ܦܹܐܪܹ̈ܐ ܠܙܲܕ̇ܝܼܩܵܐ܀ ܘܐܝܼܬ݂ ܐܲܠܵܗܵܐ ܕܲܢܕܼܘܼܢ ܐܸܢܘܿܢ ܒܐܲܪܥܵܐ܀

ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ܀

ܗܘܼܠܵܠܵܐ ܚ:

ܨܠܘܿܬ݂ܵܐ: ܦܲܨܵܐ ܠܲܢ ܡܵܪܲܢ ܘܐܲܠܵܗܲܢ ܡ݂ܢ ܢܸܟ݂ܠܹ̈ܐ ܘܲܟ݂ܡܹܐܢܹ̈ܐ ܕܲܒ݂ܥܸܠܕܲܪܵܐ ܡܵܪܘܿܕܼܵܐ ܒܚܲܝܠܵܟܼ ܪܲܒܵܐ ܘܬܲܩܝܼܦܵܐ ܘܒܲܕܼܪܵܥܵܟܼ ܪܵܡܵܐ ܘܠܵܐ ܡܸܙܕܲܟ݂ܝܵܢܵܐ ܛܵܒ݂ܵܐ ܕܲܥܠܵܘܗܝ ܣܝܼܡ ܬܘܼܟ݂ܠܵܢܲܢ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟܼܠ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ:

ܦܲܨܵܢܝ ܡ݂ܢ ܒܥܸܠܕ̇ܒ݂ܵܒܲܝ̈ ܐܲܠܵܗܵܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܦܲܨܵܢܝ ܡ݂ܢ ܒܥܸܠܕ̇ܒ݂ܵܒܲܝ̈ ܐܲܠܵܗܵܐ܀ ܘܡ݂ܢ ܐܲܝܠܹܝܢ ܕܩܵܝ̇ܡܝܼܢ ܥܠܲܝ ܐܲܪܝܼܡܲܝܢܝ܀ܦܲܨܵܢܝ ܡ݂ܢ ܥܵܒ݂ܕܲܝ̈ ܫܘܼܩܪܵܐ܀ ܘܡ݂ܢ ܓܲܒ݂ܪܹ̈ܐ ܐܵܫܕܲܝ̈ ܕܡܵܐ ܦܪܘܿܩܲܝܢܝ܀ ܡܸܛܠ ܕܗܸܢ݂ܘܿܢ ܟܡܸܢ݂ܘ ܠܢܲܦ̮ܫܝ܀ ܘܐܲܥܫܸܢܘ ܥܠܲܝ ܒܝܼܫܘܼܬ݂ܗܘܿܢ܀ ܠܵܐ ܒܣܲܟ݂̈ܠ̱ܘܵܬ݂ܝ ܘܠܵܐ ܒܲܚܛܵܗܲܝ̈ ܡܵܪܝ܀ ܕܠܵܐ ܒܣܲܟ݂ܠܘܼܬ݂ܵܐ ܪܗܸܛ݂ܘ ܥܠܲܝ ܘܐܸܬ̇ܛܲܝܲܒ݂ܘ ܥܠܲܝ܀ ܐܸܬ̇ܬ̇ܥܝܼܪ ܘܲܚܙܝܼ ܐܲܢ݇ܬ̇ ܡܵܪܝܵܐ ܐܲܠܵܗܵܐ ܚܲܝܠ̱ܬ݂ܵܢܵܐ܀ ܐܲܠܵܗܹܗ ܕܝܼܣܪܵܝܹܠ ܐܸܬ̇ܬ̇ܥܝܼܪ܀ ܘܲܦܩܘܿܕܼ ܠܟ݂ܠܗܘܿܢ ܥܲܡܡܹ̈ܐ܀ ܠܵܐ ܬܸܫܒ̇ܘܿܩ ܠܟ݂ܠܗܘܿܢ ܥܲܘܵܠܹ̈ܐ܀ ܢܸܗܦܟ݂ܘܿܢ ܒܪܲܡܫܵܐ ܘܲܢܥܲܘܘܿܢ ܐܲܝܟܼ ܟܲܠ̈ܒܹ̇ܐ܀ ܘܢܸܬ݂ܟܲܪܟ̇ܘܼܢ ܡܕܼܝܼܢ݇ܬܵܐ܀ ܡܹܐܡܪܵܐ ܕܦܘܼܡܗܘܿܢ ܣܲܦ̮ܣܹܪܵܐ ܒܣܸܦ̈ܘܵܬ݂ܗܘܿܢ܀ ܘܐܵܡ̇ܪܝܼܢ ܡܲܢ݂ܘܼ ܫܵܡܲ݁ܥ܀ ܘܐܲܢ݇ܬ̇ ܡܵܪܝܵܐ ܓܚܲܟܼ ܥܠܲܝܗܘܿܢ܀ ܘܡܲܝܸܩ ܥܲܠ ܟܠܗܘܿܢ ܥܲܡܡܹ̈ܐ܀ ܐܲܠܵܗܵܐ ܠܵܟܼ ܐܹܫܲܒܲܚ܀ ܡܸܛܠ ܕܐܲܢ݇ܬ̇ܘܼ ܒܹܝܬ݂ ܓܲܘܣܝ܀ ܐܲܠܵܗܵܐ ܛܲܝܒ̇ܘܼܬ݂ܵܟܼ ܬܩܲܕ̇ܡܲܢܝ܀ ܐܲܠܵܗܵܐ ܚܲܘܵܢܝ ܒܲܒ݂ܥܸܠܕ̇ܒ݂ܵܒܲܝ̈܀ ܠܵܐ ܬܸܩܛܘܿܠ ܐܸܢܘܿܢ ܕܠܵܐ ܢܲܛܥܘܿܢ ܠܥܲܡܝ܀ ܐܸܠܵܐ ܐܲܙܝܼܥ ܐܸܢܘܿܢ ܒܚܲܝܠܵܟܼ ܘܐܲܢܝܼܕܼ ܐܸܢܘܿܢ ܡܵܪܝܵܐ ܬܘܼܟ݂ܠܵܢܝ܀ ܚܛܝܼܬ݂ܵܐ ܕܦܘܼܡܗܘܿܢ ܡܲܠܸܠ ܣܸܦ̈ܘܵܬ݂ܗܘܿܢ܀ ܢܸܬ̇ܬܲܚܕ̇ܘܼܢ ܒܫܘܼܒ݂ܗܵܪܗܘܿܢ܀ ܡܸܛܠ ܕܠܲܘܛܬ݂ܵܐ ܘܕܲܓܵܠܘܼܬ݂ܵܐ ܡܸܫܬܲܥܹܝܢ܀ ܐܲܘܒܸ̇ܕܼ ܐܸܢܘܿܢ ܒܪܘܼܓ݂ܙܵܟܼ ܐܲܘܒܸ̇ܕܼ ܐܸܢܘܿܢ ܘܠܵܐ ܢܸܫܬܲܟ݂ܚܘܼܢ܀ ܕܢܸܕ̇ܥܘܼܢ ܕܐܲܠܵܗܵܐ ܫܲܠܝܼܛ ܥܲܠ ܝܲܥܩܘܿܒ݂ ܘܥܲܠ ܥܸܒ݂ܪܹ̈ܝܗ̇ ܕܐܲܪܥܵܐ܀ ܢܸܗܦܟ݂ܘܼܢ ܒܪܲܡܫܵܐ ܘܲܢܥܲܘܘܿܢ ܐܲܝܟܼ ܟܲܠ̈ܒܹ̇ܐ܀ ܘܢܸܬ݂ܟܲܪܟ̇ܘܼܢ ܡܕܼܝܼܢ݇ܬܵܐ܀ ܢܸܒ݂ܥܘܿܢ ܠܡܹܐܟܲܠ ܘܠܵܐ ܢܸܣܒ̇ܥܘܼܢ ܘܠܵܐ ܢܒ݂ܘܼܬ݂ܘܼܢ܀ ܘܐܸܢܵܐ ܐܹܫܲܒܲܚ ܠܚܲܝܠܵܟܼ܀ ܘܐܹܫܲܒܲܚ ܒܨܲܦܪܵܐ ܠܛܲܝܒ̇ܘܼܬ݂ܵܟܼ܀ ܡܸܛܠ ܕܲܗ݀ܘܲܝܬ̇ ܠܝܼ ܒܹܝܬ݂ ܓܲܘܣܵܐ܀ ܘܲܡܦܲܨܝܵܢܵܐ ܒܝܲܘܡܵܐ ܕܐܘܼܠܨܵܢܵܐ܀ ܐܲܠܵܗܵܐ ܠܵܟܼ ܐܹܙܲܡܲܪ܀ ܡܸܛܠ ܕܐܲܢ݇ܬ̇ܘܼ ܐܲܠܵܗܵܐ ܕܒܹܝܬ݂ ܓܲܘܣܝ ܘܐܲܠܵܗܵܐ ܕܛܲܝܒ̇ܘܼܬ݂ܝ܀

ܐܲܠܵܗܵܐ ܛܥܲܝܬܵܢ ܘܲܕܼܚܲܩܬܵܢ ܘܲܪܓܸܙ݂ܬ̇ ܥܠܲܝܢ܀ ܘܐܲܙܝܼܥܬܵܗ̇ ܠܐܲܪܥܵܐ ܘܲܦܬܲܚܬܵܗ̇܀ ܥܨܘܿܒ݂ ܬܒ݂ܵܪܵܗ̇ ܡܸܛܠ ܕܐܸܬ݂ܟܲܪܗܲܬ݀܀ ܚܲܘܝܼܬ̇ ܐܸܢܘܿܢ ܠܥܲܡܵܟܼ ܩܲܫ̈ܝܵܬ݂ܵܐ܀ ܘܐܲܫܩܝܼܬ̇ ܐܸܢܘܿܢ ܚܲܡܪܵܐ ܬܛܝܼܪܵܐ܀ ܝܲܗ݇ܒ݂ܬ̇ ܠܕܼܵܚ̈ܠܲܝܟ ܐܵܬ݂ܵܐ܀ ܕܠܵܐ ܢܸܥܪ̱ܩܘܼܢ ܡ݂ܢ ܩܕܼܵܡ ܩܸܫܬܵܐ܀ ܡܸܛܠ ܕܢܸܙܕܲܝܢܘܼܢ ܚܲܒ̇ܝܼܒܲܝ̈ܟ܀ ܦܪܘܿܩܲܝܢܝ ܒܝܲܡܝܼܢܵܟܼ ܘܲܥܢܝܼܢܝ܀ ܐܲܠܵܗܵܐ ܡܲܠܸܠ ܒܩܘܼܕܼܫܹܗ܀ ܐܸܬ݂ܚܲܝܲܠ ܐܸܢܵܐ ܘܐܹܦܲܠܸܓ݂ ܠܲܫܟܹܝܡ܀ ܘܲܠܥܘܼܡܩܵܐ ܕܣܵܟ݂ܘܼܬ݂ ܐܸܡܫܘܿܚ܀ ܕܝܼܠܝ ܗ݇ܘ݂ ܓܸܠܥܵܕܼ ܘܕܼܝܼܠܝ ܗ݇ܘ݂ ܡܢܲܫܸܐ܀ ܘܐܲܦܪܹܝܡ ܡܥܲܫܢܵܢܹܗ ܕܪܹܫܝ܀ ܝܑܼܗܘܼܕܼܵܐ ܡܲܠܟ̇ܝ ܘܡܘܼܐܵܒ݂ ܫܝܵܓ݂ܬܵܐ ܕܪܸܓ݂ܠܲܝ܀ ܥܲܠ ܐܲܕܼܘܿܡ ܐܸܫܪܸܐ ܡܣܵܢܲܝ̈ ܘܥܲܠ ܦܠܸܫܬ̇ ܐܸܩܥܸܐ܀ ܡܲܢ݂ܘܼ ܢܕܲܒ̇ܪܲܢܝ ܥܕܲܡܵܐ ܠܐܲܕܼܘܿܡ܀ ܘܡܲܢ݂ܘܼ ܢܲܘܒ̇ܠܲܢܝ ܠܲܩܪܝܼܬ݂ܵܐ ܥܲܫܝܼܢܬܵܐ܀ ܕܗܵܐ ܐܲܢ݇ܬ̇ ܐܲܠܵܗܵܐ ܛܥܲܝܬܵܢ ܘܠܵܐ ܢܵܦܹܩ ܐܲܢ݇ܬ̇ ܒܚܲܝܠܲܢ܀ ܗܲܒ݂ܠܲܢ ܥܘܼܕܼܪܵܢܵܐ ܥܲܠ ܒܥܸܠܕ̇ܒ݂ܵܒܲܝ̈ܢ܀ ܡܸܛܠ ܕܕܲܓܵܠ ܗ݇ܘ݂ ܦܘܼܪܩܵܢܹܗ ܕܒܲܪܢܵܫܵܐ܀

ܫܡܲܥ ܐܲܠܵܗܵܐ ܨܠܘܿܬ݂ܝ ܘܨܘܼܬ݂ ܠܒ݂ܵܥܘܼܬ݂ܝ܀ ܡ݂ܢ ܣܲܘ̈ܦܹܝܗ̇ ܕܐܲܪܥܵܐ ܠܵܟ݂ܘܼ ܩܵܪܹܐ ܐ݇ܢܵܐ ܒܛܘܼܪܵܦܹܗ ܕܠܹܒ̇ܝ܀ ܕܥܲܠ ܟܹܐܦܵܐ ܐܲܪܝܼܡܬܵܢܝ ܘܒܲܝܲܐܬܵܢܝ܀ܡܸܛܠ ܕܲܗ݀ܘܲܝܬ̇ ܠܝܼ ܒܹܝܬ݂ ܓܲܘܣܵܐ܀ ܘܡܲܓ݂ܕ̇ܠܵܐ ܪܵܡܵܐ ܡ݂ܢ ܩܕܼܵܡ ܒܥܸܠܕ̇ܒ݂ܵܒܲܝ̈܀ ܕܐܸܥܡܲܪ ܒܡܲܫܟ̇ܢܵܟܼ ܠܥܵܠܡܝܼܢ܀ ܘܐܸܣܬܲܬܲܪ ܒܛܸܠܵܠܵܐ ܕܟܸܢܦܲܝ̈ܟ܀ ܡܸܛܠ ܕܐܲܢ݇ܬ̇ ܐܲܠܵܗܵܐ ܫܡܲܥ݂ܬ̇ ܢܸܕܼܪ̈ܲܝ܀ ܘܝܲܗ݇ܒ݂ܬ̇ ܝܘܼܪܬܵܢܵܐ ܠܕܼܵܚܠܲܝ̈ ܫܡܵܟܼ܀ ܐܲܘܣܸܦܬ̇ ܝܲܘ̈ܡܵܬ݂ܵܐ ܥܲܠ ܝܲܘ̈ܡܵܬܹܗ ܕܡܲܠܟܵܐ܀ ܘܲܫܢܵܘ̈ܗܝ ܠܕܼܵܪܕܵܪܝܼܢ܀ ܢܸܬ݂ܩܲܝܲܡ ܠܥܵܠܲܡ ܩܕܼܵܡ ܐܲܠܵܗܵܐ܀ ܛܲܝܒ̇ܘܼܬ݂ܵܐ ܘܩܘܼܫܬܵܐ ܡܲܢ݂ܘܼ ܢܸܛܪܝܼܗ̇܀ ܗܵܟܲܢ ܐܸܙܡܲܪ ܠܲܫܡܵܟܼ ܠܥܵܠܲܡ ܥܵܠܡܝܼܢ܀ ܟܲܕܼ ܐܹܫܲܠܸܡ ܢܸܕܼܪ̈ܲܝ ܝܘܿܡ ܡ݂ܢ ܝܘܿܡ܀

ܠܐܲܠܵܗܵܐ ܡܣܲܟ̇ܝܵܐ ܢܲܦ̮ܫܝ ܕܡܸܢܹܗ ܗܘ݀ ܦܘܼܪܩܵܢܝ܀ ܘܗܘ݀ܝܘܼ ܐܲܠܵܗܝ ܘܦܵܪܘܿܩܝ܀ ܘܒܹܝܬ݂ ܓܲܘܣܝ ܪܲܒܵܐ ܕܠܵܐ ܐܹܙܘܼܥ܀ ܥܕܲܡܵܐ ܠܐܸܡܲܬ݂ܝ ܡܸܬ݂ܓܲܪܓ݂ܝܼܢ ܐܢ݇ܬ̇ܘܿܢ ܥܲܠ ܓܲܒ݂ܪܵܐ ܕܬܸܩܛܠܘܼܢ܀ ܐܲܝܟܼ ܐܸܣܬ݂ܵܐ ܕܡܵܛܲܬ݀ ܘܐܲܝܟܼ ܣܝܵܓ݂ܵܐ ܕܲܕܼܚܝܼܩ܀ ܐܸܠܵܐ ܐܵܦ ܡ݂ܢ ܐܝܼܩܵܪܹܗ ܐܸܬ݂ܪܲܥܝܼܘ ܠܡܸܕܼܚܝܹܗ܀ ܘܲܪܗܸܛ݂ܘ ܒܕܲܓܵܠܘܼܬ݂ܵܐ܀ ܒܦܘܼܡܗܘܿܢ ܡܒܲܪܟ݂ܝܼܢ ܘܲܒ݂ܠܸܒ̇ܗܘܿܢ ܠܵܝܛ݁ܝܼܢ܀ ܠܐܲܠܵܗܵܐ ܣܲܟܵܝ ܢܲܦ̮ܫܝ ܕܡܸܢܹܗ ܗܘ݀ ܦܘܼܪܩܵܢܝ܀ ܘܗܘ݀ܝܘܼ ܐܲܠܵܗܝ ܘܦܵܪܘܿܩܝ܀ ܘܒܹܝܬ݂ ܓܲܘܣܝ ܕܠܵܐ ܐܹܙܘܼܥ܀ ܒܐܲܠܵܗܵܐ ܗ݇ܘ݂ ܦܘܼܪܩܵܢܝ ܘܐܝܼܩܵܪܝ܀ ܬܘܼܩܦܝ ܘܥܵܕܼܘܿܪܝ ܘܣܲܒ݂ܪܝ ܐܲܠܵܗܵܐ ܗ݇ܘ݂܀ ܣܲܒܲܪܘ ܒܹܗ ܟܠ ܫܵܥܵܐ ܥܲܡܵܐ܀ ܘܐܲܫܘܿܕܼܘ ܩܕܼܵܡܵܘܗܝ ܠܸܒ̇ܟ݂ܘܿܢ܀ ܡܸܛܠ ܕܐܲܠܵܗܵܐ ܗ݇ܘ݂ ܣܸܬܵܪܵܐ ܕܝܼܠܲܢ܀ ܘܐܲܝܟܼ ܠܲܗܓܵܐ ܐܸܢܘܿܢ ܟܠܗܘܿܢ ܒܢܲܝ̈ܢܵܫܵܐ ܕܲܓܵܠܹ̈ܐ܀ ܕܲܒ݂ܡܲܐܣܲܬ݂ܵܐ ܡܲܥܠܹܝܢ ܘܲܣܪܝܼܩܝܼܢ ܐܲܟ݂ܚ݇ܕܼܵܐ܀ ܠܵܐ ܬܸܬܲܟ݂ܠܘܼܢ ܥܲܠ ܛܠܘܼܡܝܵܐ܀ ܘܲܚܛܘܼܦܝܵܐ ܠܵܐ ܬܸܪܚܡܘܼܢ܀ ܩܸܢܝܵܢܵܐ ܡܵܐ ܕܣܵܓܹܐ݁ ܠܵܐ ܢܸܚܕܸ̇ܐ ܒܹܗ ܠܸܒ̇ܟ݂ܘܿܢ܀ ܚܕܼܲܐ ܗ݇ܝ݂ ܕܐܸܡܲܪ ܐܲܠܵܗܵܐ܀ ܘܲܕ̇ܬܲܪܬܹܿܝܢ ܗܵܠܹܝܢ ܫܸܡܥܹ̇ܬ݂܀ ܡܸܛܠ ܕܥܘܼܫܢܵܐ ܕܐܲܠܵܗܵܐ ܗ݇ܘ݂܀ ܘܠܵܟܼ ܡܵܪܝܵܐ ܛܲܝܒ̇ܘܼܬ݂ܵܐ܀ ܡܸܛܠ ܕܐܲܢ݇ܬ̇ ܦܵܪܲܥ ܐܲܢ݇ܬ̇ ܠܓܲܒ݂ܪܵܐ ܐܲܝܟܼ ܥܒ݂ܵܕܼܵܘ̈ܗܝ܀

ܐܲܠܵܗܝ ܐܲܠܵܗܝ ܐܲܢ݇ܬ̇ ܐܹܣܲܟܸ̇ܐ ܠܵܟܼ܀ ܨܲܗܝܵܐ ܗ݇ܝ݂ ܠܵܟܼ ܢܲܦ̮ܫܝ ܘܲܡܣܲܟܸ̇ܐ ܠܵܟܼ ܒܸܣܪ̱ܝ܀ ܐܲܝܟܼ ܐܲܪܥܵܐ ܨܗܝܼܬ݂ܵܐ ܘܲܡܛܲܪܲܦܬܵܐ ܕܒ݂ܵܥܝܵܐ ܡܲܝ̈ܵܐ܀ ܗܵܟܲܢ ܚܵܪܬܵܟܼ ܒܩܘܼܫܬܵܐ܀ ܕܐܸܚܙܸܐ ܥܘܼܫܢܵܟܼ ܘܐܝܼܩܵܪܵܟܼ܀ ܡܸܛܠ ܕܛܵܒ݂ܝܼܢ ܪ̈ܲܚܡܲܝܟ ܡ݂ܢ ܚܲܝܹ̈ܐ܀ ܘܣܸܦ̈ܘܵܬ݂ܝ ܢܫܲܒ̈ܿܚܵܢܵܟܼ܀ ܗܵܟܲܢ ܐܹܒܲܪܟ݂ܵܟܼ ܒܚܲܝܲܝ̈܀ ܘܒܲܫܡܵܟܼ ܐܲܪܝܼܡ ܐܝܼ̈ܕܲܝ܀ ܐܲܝܟܼ ܫܘܼܡܢܵܐ ܘܐܲܝܟܼ ܬܲܪܒܵܐ ܬܸܕܼܗܲܢ ܢܲܦ̮ܫܝ܀ ܘܲܒ݂ܣܸܦ̈ܘܵܬ݂ܵܐ ܕܫܘܼܒ݂ܚܵܐ ܢܫܲܒ̇ܚܵܟܼ ܦܘܼܡܝ܀ ܐܸܬ̇ܕ̇ܟܲܪܬܵܟܼ ܥܲܠ ܬܸܫܘܝܼܬ݂ܝ܀ ܘܲܒ݂ܠܲܝ̈ܠܵܘܵܬ݂ܵܐ ܪܢܹܝܬ݂ ܒܵܟܼ܀ ܡܸܛܠ ܕܲܗܘܲܝܬ̇ ܠܝܼ ܡܥܲܕ̇ܪܵܢܵܐ܀ ܘܲܒ݂ܛܸܠܵܠܵܐ ܕܟܸܢܦܲܝ̈ܟ ܐܸܫܬܲܒܲܚ܀ ܢܸܦܩܲܬ݀ ܢܲܦ̮ܫܝ ܒܵܬ݂ܪܵܟܼ ܘܲܥܠܲܝ ܣܸܡܟܲܬ݀ ܝܲܡܝܼܢܵܟܼ܀ ܗܸܢ݂ܘܿܢ ܒܥܵܘ ܕܢܲܘܒ̇ܕܼܘܼܢ ܠܢܲܦ̮ܫܝ܀ ܘܢܸܥܠܘܼܢ ܒܬܲܚ̈ܬܵܝܵܬ݂ܵܗ̇ ܕܐܲܪܥܵܐ܀ ܢܸܫܬܲܠܡܘܼܢ ܠܚܲܪܒܵܐ ܘܡܹܐܟ݂ܘܼܠܬܵܐ ܠܬܲܥܠܹ̈ܐ ܢܸܗܘܘܿܢ܀ ܘܡܲܠܟܵܐ ܢܸܚܕܸ̇ܐ ܒܐܲܠܵܗܵܐ܀ ܘܢܸܫܬܲܒ݂ܗܲܪ ܟܠ ܕܝܵܡܹ̇ܐ ܒܹܗ܀ ܡ݂ܛܠ ܕܢܸܣܬ̇ܟܲܪ ܦܘܼܡܗܘܿܢ ܕܕܲܓܵܠܹ̈ܐ܀

ܫܡܲܥ ܐܲܠܵܗܵܐ ܩܵܠܝ ܟܲܕܼ ܐܸܬ݂ܟܲܫܲܦ ܠܵܟܼ܀ ܘܡ݂ܢ ܕܸܚܠ̱ܬ݂ܵܐ ܕܲܒ݂ܥܸܠܕ̇ܒ݂ܵܒܲܝ̈ ܢܲܛܲܪܲܝܢܝ܀ ܣܲܬܲܪܲܝܢܝ ܡ݂ܢ ܥܲܘܠܹܗ ܕܒ݂ܝܼܫܵܐ܀ ܘܡ݂ܢ ܗܘܼܦܵܟ݂ܵܐ ܕܥܵܒܼ̈ܕܲܝ ܥܲܘܠܵܐ܀ ܕܲܠܛܲܫܘ ܠܸܫܵܢܗܘܿܢ ܐܲܝܟܼ ܣܲܝܦܵܐ܀ ܘܡܸܠܲܬ݂ܗܘܿܢ ܐܲܝܟܼ ܓܹܐܪܵܐ܀ ܠܡܸܫܕܵܐ ܒܛܘܼܫܝܵܐ ܒܬܲܡܝܼܡܵܐ܀ ܘܡ݂ܢ ܫܸܠܝܵܐ ܢܸܫܕ̇ܘܿܢ ܒܹܗ ܘܠܵܐ ܢܸܬ݂ܚܙܘܿܢ܀ ܘܐܲܥܫܸܢܘ ܡܸܠܲܬ݂ܗܘܿܢ ܒܝܼܫܬܵܐ܀ ܘܐܸܬ݂ܚܲܫܲܒ݂ܘ ܠܡܸܛܡܲܪ ܦܲܚܹ̈ܐ܀ ܘܐܸܡܲܪܘ ܕܡܲܢ݂ܘܼ ܚܵܙܹܐ ܠܲܢ܀ ܐܸܬ݂ܚܲܫܲܒ݂ܘ ܥܲܘܵܠܹ̈ܐ ܘܣܵܦ݂ܘ܀ ܠܡܸܒ݂ܨܵܐ ܥܲܘܠܵܐ ܡ݂ܢ ܓܵܘܹܗ ܕܒܲܪܢܵܫܵܐ܀ ܘܡ݂ܢ ܠܸܒܹ̇ܗ ܥܲܡܝܼܩܵܐ܀ ܢܸܬ̇ܬ̇ܪܝܼܡ ܐܲܠܵܗܵܐ ܘܢܸܫܕܸ̇ܐ ܒܗܘܿܢ ܓܹܐܪܵܐ ܡ݂ܢ ܫܸܠܝܵܐ܀ ܘܢܸܬ݂ܟܲܪܗܘܿܢ ܠܸܫܵܢܲܝܗܘܿܢ܀ ܘܢܸܕܼܚܠܘܼܢ ܟܠ ܕܚܵܙܹ̇ܝܢ ܠܗܘܿܢ܀ ܘܢܸܕܼܚܠܘܼܢ ܟܠ ܒܢܲܝ̈ܢܵܫܵܐ܀ ܘܲܢܚܲܘܘܿܢ ܥܒ݂ܵܕܼܵܘ̈ܗܝ ܕܐܲܠܵܗܵܐ܀ ܘܒܲܥܒ݂ܵܕܼ ܐܝܼܕܼܵܘ̈ܗܝ ܢܚܘܼܪܘܼܢ܀ ܢܸܚܕ̇ܘܿܢ ܙܲܕ̇ܝܼܩܹ̈ܐ ܒܡܵܪܝܵܐ ܘܢܸܬ̇ܬܲܟ݂ܠܘܼܢ ܥܠܵܘܗܝ܀ ܘܲܢܫܲܒ̇ܚܘܼܢܵܝܗܝ ܟܠ ܬܪ̈ܝܼܨܲܝ ܠܸܒܵܐ܀

ܠܵܟܼ ܝܵܐ̇ܝܵܐ ܬܸܫܒ̇ܘܿܚܬܵܐ ܐܲܠܵܗܵܐ ܒܨܸܗܝܘܿܢ܀ ܘܠܵܟܼ ܡܸܬ݂ܦܪܲܥ ܢܸܕܼܪܵܐ ܫܡܲܥ ܨܠܘܿܬ݂ܝ܀ ܠܘܵܬ݂ܵܟܼ ܟܠ ܒܣܲܪ ܢܹܐܬܸܐ܀ ܡܸܠܹ̈ܐ ܕܥܲܘܵܠܹ̈ܐ ܥܫܸܢܹ̈ܝܢ ܡܹܢܝ܀ ܘܲܚܛܵܗܲܝ̈ ܐܲܢ݇ܬ̇ ܬܚܲܣܸܐ ܐܸܢܘܿܢ܀ ܛܘܼܒ݂ܵܘܗܝ ܠܡܲܢ ܕܨܵܒܹ̇ܐ ܐܲܢ݇ܬ̇ ܒܹܗ܀ ܘܲܡܩܲܪܸܒ݂ ܐܲܢ݇ܬ̇ ܠܹܗ ܕܢܸܥܡܲܪ ܒܕܲܝܪܵܟܼ܀ ܘܢܸܣܒܲܥ ܡ݂ܢ ܛܵܒ݂ܵܬܹ̈ܗ ܕܒܲܝܬܵܟܼ܀ ܘܡ݂ܢ ܩܲܕ̇ܝܼܫܘܼܬܹܗ ܕܗܲܝܟ̇ܠܵܟܼ܀ ܘܡ݂ܢ ܙܲܕ̇ܝܼܩܘܼܬ݂ܵܟܼ ܕܚܝܼܠܬܵܐ܀ ܥܢܝܼܢ ܐܲܠܵܗܵܐ ܦܵܪܘܿܩܲܢ܀ ܣܲܒ݂ܪܵܐ ܕܟ݂ܠܗܘܿܢ ܣܲܘܦܹ̈ܝܗ̇ ܕܐܲܪܥܵܐ܀ ܘܲܕܼܥܲܡܡܹ̈ܐ ܪ̈ܲܚܝܼܩܹܐ܀ ܡܲܬ݂ܩܸܢ ܛܘܼܪܹ̈ܐ ܒܚܲܝܠܹܗ ܘܡܸܬ݂ܥܲܫܲܢ ܒܓܲܢ݇ܒܵܪܘܼܬܹܗ܀ ܡܫܲܬܸ̇ܩ ܡܲܚܫܘܼܠܵܐ ܕܝܲܡܡܹ̈ܐ ܘܩܵܠܵܐ ܕܓܲܠܠܲܝ̈ܗܘܿܢ܀ ܢܸܬ̇ܕܲܠܚܘܼܢ ܥܲܡܡܹ̈ܐ ܘܢܸܕܼܚܠܘܼܢ ܥܵܡܘܿܪܹ̈ܝܗ̇ ܕܐܲܪܥܵܐ܀ ܡ݂ܢ ܐܵܬ݂ܘܵܬ݂ܵܟܼ ܘܡ݂ܢ ܡܲܦܵܩܲܝ̈ ܨܲܦܪܵܐ ܘܪܲܡܫܵܐ܀ ܒܫܘܼܒ݂ܚܵܐ ܐܸܬ̇ܕ̇ܟܲܪܬܵܗ̇ ܠܐܲܪܥܵܐ܀ ܐܲܫܠܝܼܬܵܗ̇ ܘܲܒ݂ܣܘܿܓ݂ܐܵܐ ܐܲܥܬܲܪܬܵܗ̇܀ ܬܲܦܹ̈ܐ ܕܐܲܠܵܗܵܐ ܡܠܹܝܢ ܡܲܝ̈ܵܐ܀ ܛܲܝܸܒ݂ܬ̇ ܡܹܐܟ݂ܘܼܠܬ̇ܗܘܿܢ ܟܲܕܼ ܬܲܩܸܢܬܵܗ̇܀ ܟܪ̈ܵܒܹܝܗ̇ ܐܲܪܘܝܼܬ̇ ܕܢܸܬ݂ܪܲܒ̇ܘܼܢ ܦܹܐܪܹ̈ܝܗ̇܀ ܒܲܪ̈ܣܝܼܣܹܐ ܬܸܬ݂ܪܲܒܸ̇ܐ ܡܲܘܥܝܼܬ݂ܵܗ̇ ܘܬܸܬ݂ܒܲܪܲܟܼ܀ ܒܲܪܸܟܼ ܟܠܝܼܠܵܐ ܕܫܲܢ݇ܬܵܐ ܒܛܲܝܒ̇ܘܼܬ݂ܵܟܼ܀ ܘܥܸܓ݂ܠܲܝ̈ܟ ܢܸܣܒ̇ܥܘܼܢ ܬܸܕܼܐܵܐ܀ ܘܢܸܣܒ̇ܥܘܼܢ ܡ݂ܢ ܕܲܝܪܹ̈ܐ ܕܲܒ݂ܡܲܕܼܒ̇ܪܵܐ܀ ܒܫܘܼܒ݂ܚܵܐ ܪ̈ܵܡܵܬ݂ܵܐ ܢܸܬ݂ܚܲܙ̈ܩܵܢ܀ ܘܢܸܠܒ̇ܫܘܼܢ ܫܲܡܝܼܢܹ̈ܐ ܕܥܵܢ̈ܵܐ܀ ܘܥܘܼܡܩܹ̈ܐ ܢܸܬ݂ܡ̱ܠܘܿܢ ܥܒ݂ܘܼܪܵܐ܀ ܢܸܪܘ̱ܙܘܼܢ ܘܲܢܫܲܒ̇ܚܘܼܢ܀

ܫܲܒܲܚܘ ܠܐܲܠܵܗܵܐ ܟܠܵܗ̇ ܐܲܪܥܵܐ܀ ܙܡܲܪܘ ܠܐܝܼܩܵܪܵܐ ܕܲܫܡܹܗ ܙܡܲܪܘ ܠܐܝܼܩܵܪܵܐ ܕܬܸܫܒ̇ܘܿܚܬܹ̇ܗ܀ ܐܸܡܲܪܘ ܠܐܲܠܵܗܵܐ ܡܵܐ ܕܚܝܼܠܝܼܢ ܥܒ݂ܵܕܲܝ̈ܟ܀ ܒܣܘܿܓ݂ܐܵܐ ܕܥܘܼܫܢܵܟܼ ܢܸܬ݂ܟܲܕ̇ܒ݂ܘܼܢ ܠܵܟܼ ܒܥܸܠܕ̇ܒ݂ܵܒܲܝ̈ܟ܀ ܒܟ݂ܠܵܗ̇ ܐܲܪܥܵܐ ܢܸܣܓ̇ܕܼܘܼܢ ܠܵܟܼ ܘܲܢܙܲܡܪܘܼܢ ܠܵܟܼ܀ ܘܲܢܫܲܒ̇ܚܘܼܢ ܠܲܫܡܵܟܼ ܠܥܵܠܡܝܼܢ܀ ܘܢܹܐܡܪܘܼܢ ܕܬ݂ܵܘ ܚܙܵܘ ܥܒ݂ܵܕܼܵܘ̈ܗܝ ܕܐܲܠܵܗܵܐ܀ ܕܣܲܓ̇ܝܼ̈ܐܵܢ ܬܸܕܼܡ̱ܪܵܬܹܗ ܥܲܠ ܒܢܲܝ̈ܢܵܫܵܐ܀ ܕܲܗܦܲܟܼ ܝܲܡܵܐ ܠܝܲܒ݂ܫܵܐ܀ ܘܲܠܢܲܗܪܵܐ ܥܲܒ݂ܪܘܼܗܝ ܡ݂ܢ ܪܓܸܠ܀ ܬܲܡܵܢ ܢܸܚܕܸ̇ܐ ܒܹܗ ܒܡܲܢ ܕܫܲܠܝܼܛ ܒܓܲܢ݇ܒܵܪܘܼܬܹܗ ܠܥܵܠܲܡ܀ ܥܲܝܢܵܘ̈ܗܝ ܒܥܲܡܡܹ̈ܐ ܚܵܝܪ̈ܵܢ܀ ܘܡܵܪ̈ܘܿܕܹܐ ܠܵܐ ܢܸܬ̇ܬ̇ܪܝܼܡܘܼܢ ܠܥܵܠܲܡ܀ ܒܲܪܸܟ݂ܘ ܥܲܡܡܹ̈ܐ ܠܐܲܠܵܗܵܐ܀ ܘܐܲܫܡܲܥܘ ܩܵܠܵܐ ܕܫܘܼܒ݂ܚܹܗ܀ ܕܣ݂ܵܡ ܢܲܦ̮ܫܲܢ ܒܚܲܝܹ̈ܐ ܘܠܵܐ ܝܲܗ݂݇ܒ݂ ܪܸܓ݂ܠܲܢ ܠܙܲܘܥ̱ܬ݂ܵܐ܀ ܡܸܛܠ ܕܲܒ݂ܚܲܪܬܵܢ ܐܲܠܵܗܵܐ ܘܲܒ݂ܩܲܝܬܵܢ܀ ܐܲܝܟܼ ܕܒ݂ܵܩܹ̇ܝܢ ܠܣܹܐܡܵܐ܀ ܐܲܥܸܠܬܵܢ ܒܲܡܨܝܼܕ̇ܬܵܐ ܘܲܥܒܲܕ̇ܬ̇ ܐܼܘܠܨܵܢܵܐ ܒܚܲܨܲܝ̈ܢ܀ ܘܐܲܪܟܸ̇ܒ݂ܬ̇ ܒܲܪܢܵܫܵܐ ܥܲܠ ܪܹܫܲܢ܀ ܐܲܥܸܠܬܵܢ ܒܢܘܼܪܵܐ ܘܲܒ݂ܡܲܝ̈ܵܐ܀ ܘܐܲܦܸܩܬܵܢ ܠܲܪܘܲܚܬ݂ܵܐ܀ ܐܹܬܹܐ ܠܒܲܝܬܵܟܼ ܒܐܝܼܩܵܪܵܐ ܘܐܸܦܪ̱ܥܵܟܼ ܢܸܕܼܪ̈ܲܝ܀ ܡܸܕܸ̇ܡ ܕܲܦܬܲܚ ܣܸܦ̈ܘܵܬ݂ܝ ܘܡܲܡܠ̱ܠܹܗ ܕܦܘܼܡܝ ܒܐܘܼܠܨܵܢܵܐ܀ ܝܲܩ̈ܕܹ̇ܐ ܫܲܡܝܼܢܹ̈ܐ ܐܲܣܸܩ ܠܵܟܼ ܥܲܡ ܣܘܵܬ݂ܵܐ ܕܕܸܟ݂ܪܹ̈ܐ܀ ܘܐܸܥܒܸܿܕܼ ܬܲܘܪܹ̈ܐ ܘܲܓ݂̈ܕܲܝܵܐ܀ ܬܵܘ ܫܡܲܥܘ ܘܐܸܫܬܲܥܸܐ ܠܟ݂ܘܿܢ܀ ܟܠܟ݂ܘܿܢ ܥܲܒ݂ܕܵܘ̈ܗܝ ܕܐܲܠܵܗܵܐ܀ ܡܸܕܸ̇ܡ ܕܲܥܒ݂ܲܕܼ ܠܢܲܦ̮ܫܝ܀ ܒܦܘܼܡܝ ܩܪܹܝܬܹܗ ܘܲܥܢܵܢܝ ܘܪܲܡܪܸܡܬܹ̇ܗ ܒܠܸܫܵܢܝ܀ ܥܲܘܠܵܐ ܐܸܢ ܚܙܲܝܬ̇ ܒܠܹܒ̇ܝ ܠܵܐ ܬܸܦܪܘܿܩܲܝܢܝ ܡܵܪܝܵܐ܀ ܗܵܝܕܹ̇ܝܢ ܫ݂ܡܲܥ ܐܲܠܵܗܵܐ ܩܵܠܵܐ ܕܒ݂ܵܥܘܼܬ݂ܝ܀ ܒܪܝܼܟ݂ܘܼ ܡܵܪܝܵܐ܀ ܕܠܵܐ ܐܲܥܒܲܪ ܨܠܘܿܬ݂ܝ ܘܛܲܝܒ̇ܘܼܬܹܗ ܡܹܢܝ܀

ܐܲܠܵܗܲܢ ܢܪܲܚܸܡ ܥܠܲܝܢ܀ ܢܒܲܪܟܲܢ ܘܢܲܢܗܲܪ ܐܲܦܵܘ̈ܗܝ ܒܲܢ܀ ܕܢܸܕܲܥ ܒܐܲܪܥܵܐ ܐܘܼܪ̈ܚܵܬܹܗ܀ ܘܲܒ݂ܟ݂ܠܗܘܿܢ ܥܲܡܡܹ̈ܐ ܦܘܼܪܩܵܢܹܗ܀ ܢܲܘܕ̇ܘܼܢ ܠܵܟܼ ܥܲܡܡܹ̈ܐ ܐܲܠܵܗܵܐ܀ ܢܲܘܕ̇ܘܿܢ ܠܵܟܼ ܥܲܡܡܹ̈ܐ ܟܠܗܘܿܢ܀ ܢܸܚ̈ܕ̇ܝܵܢ ܘܲܢܫܲܒ̈ܚܵܢ ܡܲܠ̈ܟ̇ܘܵܬ݂ܵܐ܀ ܕܕܼܵܐܹ̇ܢ ܐܲܢ݇ܬ̇ ܠܥܲܡܡܹ̈ܐ ܬܪܝܼܨܵܐܝܼܬ݂܀ ܘܲܠܡܲܠ̈ܟ̇ܘܵܬ݂ܵܐ ܡܕܲܒܲܪ ܐܲܢ݇ܬ̇ ܒܐܲܪܥܵܐ܀ ܢܲܘܕ̇ܘܼܢ ܠܵܟܼ ܥܲܡܡܹ̈ܐ ܐܲܠܵܗܵܐ܀ ܢܲܘܕ̇ܘܼܢ ܠܵܟܼ ܥܲܡܡܹ̈ܐ ܟܠܗܘܿܢ܀ ܐܲܪܥܵܐ ܝܸܗ݇ܒܲܬ̤ ܦܹܐܪܹ̈ܝܗ̇܀ ܢܒܲܪܟܲܢ ܐܲܠܵܗܵܐ ܐܲܠܵܗܲܢ ܘܲܢܒܲܪܟܲܢ ܐܲܠܵܗܵܐ܀ ܘܢܸܕܼܚܠܘܼܢ ܡܸܢܹܗ ܟܠܗܘܿܢ ܥܸܒ݂ܪܹ̈ܝܗ̇ ܕܐܲܪܥܵܐ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܘܲܥܕܼܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ܀

ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ܀

ܗܘܼܠܵܠܵܐ ܛ:

ܨܠܘܿܬ݂ܵܐ: ܢܓ݂ܘܼܠܘܼܢ ܡܵܪܲܢ ܘܐܲܠܵܗܲܢ ܪ̈ܲܚܡܹܐ ܡܬ݂ܘܿܡܵܝܹ̈ܐ ܕܲܬ݂ܠܝܼܬ݂ܵܝܘܼܬ݂ܵܟܼ ܡܫܲܒܲܚܬܵܐ ܥܲܠ ܚܲܛܵܝܹ̈ܐ ܘܲܡܚܝܼ̈ܠܹܐ ܥܲܒ݂ܕܲܝ̈ܟ ܕܩܵܪܹܝܢ ܘܡܸܬ݂ܟܲܫܦܝܼܢ ܠܵܟܼ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟ݂ܠ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ:

ܢܩܘܼܡ ܐܲܠܵܗܵܐ ܘܢܸܬ݂ܒܲܕ̇ܪܘܼܢ ܟܠܗܘܿܢ ܒܥܸܠܕ̇ܒ݂ܵܒ݂ܵܘ̈ܗܝ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܢܩܘܼܡ ܐܲܠܵܗܵܐ ܘܢܸܬ݂ܒܲܕ̇ܪܘܼܢ ܟܠܗܘܿܢ ܒܥܸܠܕ̇ܒ݂ܵܒ݂ܵܘ̈ܗܝ܀ ܘܢܸܥܪ̱ܩܘܼܢ ܣܵܢܐܵܘ̈ܗܝ ܡ݂ܢ ܩܕܼܵܡܵܘܗܝ܀ ܐܲܝܟܼ ܕܡܸܬ̇ܛܲܠܲܩ ܬܸܢܵܢܵܐ ܢܸܬ̇ܛܲܠܩܘܼܢ܀ ܘܐܲܝܟܼ ܕܡܸܬ݂ܦܲܫܪܵܐ ܫܥܘܿܬ݂ܵܐ ܡ݂ܢ ܩܕܼܵܡ ܢܘܼܪܵܐ܀ ܢܹܐܒ݂ܕ̇ܘܼܢ ܪ̈ܵܫܝܼܥܹܐ ܡ݂ܢ ܩܕܼܵܡ ܐܲܠܵܗܵܐ܀ ܘܙܲܕ̇ܝܼܩܹ̈ܐ ܢܸܚܕ̇ܘܿܢ ܘܢܸܬ݂ܥܲܫܢܘܼܢ ܩܕܼܵܡ ܐܲܠܵܗܵܐ܀ ܘܢܸܚܕ̇ܘܼܢ ܒܒ݂ܘܼܣܵܡܹܗ܀ ܙܡܲܪܘ ܠܐܲܠܵܗܵܐ ܘܫܲܒܲܚܘ ܠܲܫܡܹܗ܀ ܫܲܒܲܚܘ ܠܕܲܪܟ݂ܝܼܒ݂ ܠܡܲܥܪ̱ܒ݂ܵܐ ܡܵܪܝܵܐ ܫܡܹܗ܀ ܐܸܬ݂ܥܲܫܲܢܘ ܩܕܼܵܡܵܘܗܝ ܕܐܲܒ݂ܵܐ ܕܝܲܬ݂ܡܹ̈ܐ܀ ܘܕܲܝܵܢܵܐ ܕܐܲܪ̈ܡ̱ܠܵܬ݂ܵܐ܀ ܐܲܠܵܗܵܐ ܒܡܲܥܡ̱ܪܹܗ ܩܲܕ̇ܝܼܫܵܐ܀ ܐܲܠܵܗܵܐ ܡܲܘܬܸ̇ܒ݂ ܝܑܼܚܝܼܕܼܵܝܵܐ ܒܒܲܝܬܵܐ܀ ܘܡܲܦܸܩ ܐܲܣܝܼܪܹ̈ܐ ܒܟܲܫܝܼܪܘܼܬ݂ܵܐ܀ ܘܡܵܪ̈ܘܿܕܹܐ ܢܸܫܪܘܿܢ ܒܹܝܬ݂ ܩܒ݂ܘܼܪܹ̈ܐ܀ ܐܲܠܵܗܵܐ ܟܲܕܼ ܢܦܲܩ݂ܬ̇ ܩܕܼܵܡ ܥܲܡܵܟܼ܀ ܘܟܲܕܼ ܥܒ݂ܲܪܬ̇ ܒܐܲܫܝܼܡܘܿܢ ܐܲܪܥܵܐ ܙܵܥܲܬ̤܀ ܘܐܵܦ ܫܡܲܝܵܐ ܢܲܛܸܦܘ܀ ܡ݂ܢ ܩܕܼܵܡ ܐܲܠܵܗܵܐ ܗܵܢܵܐ ܛܘܼܪܵܐ ܕܣܝܼܢܲܝ܀ ܡ݂ܢ ܩܕܼܵܡ ܐܲܠܵܗܵܐ ܐܲܠܵܗܹܗ ܕܝܼܣܪܵܝܹܠ܀ ܡܸܛܪܵܐ ܕܨܸܒ݂ܝܵܢܵܐ ܝܲܗ݇ܒ݂ܬ̇ ܐܲܠܵܗܵܐ ܠܝܵܪܬ̇ܘܼܬ݂ܵܟܼ܀ ܐܸܬ݂ܟܲܪܗܲܬ̤ ܘܐܲܢ݇ܬ̇ ܬܲܩܸܢܬܵܗ̇܀ ܘܚܲܝ̈ܘܵܬ݂ܵܟܼ ܥܡܲܪܹ̈ܝܢ ܒܵܗ̇܀ ܬܲܩܸܦܬ̇ ܒܛܲܝܒ̇ܘܼܬ݂ܵܟܼ ܠܒ݂ܵܝܫܹ̈ܐ ܐܲܠܵܗܵܐ܀ ܡܵܪܝܵܐ ܢܸܬܸ̇ܠ ܡܸܠܬ݂ܵܐ ܕܲܣܒܲܪܬ݂ܵܐ ܒܚܲܝܠܵܐ ܪܲܒܵܐ܀ ܡܲܠ̈ܟܹ̇ܐ ܕܚܲܝ̈ܠܵܘܵܬ݂ܵܐ ܢܸܬ݂ܟܲܢܫܘܼܢ܀ ܘܫܘܼܦܪܹܗ ܕܒܲܝܬܵܟܼ ܢܦܲܠܸܓ݂ ܒܸܙܬ݂ܵܐ܀ ܐܸܢ ܬܸܕܼܡ̱ܟ݂ܘܼܢ ܒܹܝܬ݂ ܫܦܵܝܹ̈ܐ܀ ܓܸܦܹ̈ܐ ܕܝܲܘܢܵܐ ܕܲܩܪܝܼܡܝܼܢ ܒܟܸܣܦܵܐ܀ ܘܐܸܒ݂ܪܹ̈ܝܗ̇ ܒܕܲܗܒ݂ܵܐ ܣܢܝܼܢܵܐ܀ ܟܲܕܼ ܦܪܲܫ ܐܲܠܵܗܵܐ ܡܲܠܟܵܐ ܒܹܗ ܐܲܬ݂ܠ̱ܓܲܬ̤܀ ܒܨܲܠܡܘܼܢ ܛܘܼܪܹܗ ܕܐܲܠܵܗܵܐ܀ ܛܘܼܪܹ̈ܐ ܕܒܲܝܫܵܢ ܛܘܼܪܹ̈ܐ ܕܲܓ݂ܒܸܢܝܲܡ܀ ܛܘܼܪܹ̈ܐ ܕܒܲܝܫܵܢ ܡܵܢܵܐ ܨܵܒܹ̇ܝܢ ܐܢ݇ܬ̇ܘܿܢ ܛܘܼܪܹ̈ܐ ܕܲܓ݂ܒܸܢܝܲܡ܀ ܛܘܼܪܵܐ ܕܲܓ݂ܒ݂ܵܐ ܠܹܗ ܐܲܠܵܗܵܐ ܠܡܸܬܲܒ݂ ܒܹܗ܀ ܡܵܪܝܵܐ ܢܸܫܪܸܐ ܒܹܗ ܠܥܵܠܲܡ܀ ܪܟܸܒ݂ ܐܲܠܵܗܵܐ ܒܪܸ̈ܒ̇ܘܵܬ݂ܵܐ ܘܒܲܐܠܦܹ̈ܐ ܕܚܲܝܠܵܐ܀ ܡܵܪܝܵܐ ܒܗܘܿܢ ܣܝܼܢܲܝ ܒܩܘܼܕܼܫܹܗ܀

ܣܠܸܩܬ̇ ܠܲܡܪܲܘܡܵܐ ܘܲܫܒܲܝܬ̇ ܫܒ݂ܝܼܬ݂ܵܐ܀ ܘܲܢܣܲܒ݂ܬ̇ ܡܲܘ̈ܗ̱ܒ݂ܵܬ݂ܵܐ ܠܲܒ݂ܢܲܝ̈ܢܵܫܵܐ܀ ܐܵܦ ܡܵܪ̈ܘܿܕܹܐ ܠܵܐ ܢܸܥܡ̱ܪܘܼܢ ܩܕܼܵܡ ܐܲܠܵܗܵܐ܀ ܒܪܝܼܟ݂ܘܼ ܡܵܪܝܵܐ ܒܟ݂ܠܝܘܿܡ ܕܐܲܓ݂ܒ̇ܝܲܢ ܝܵܪܬ̇ܘܼܬܹܗ܀ ܐܲܠܵܗܵܐ ܦܵܪܘܿܩܲܢ ܐܲܠܵܗܵܐ ܡܦܲܨܝܵܢܲܢ܀ ܡܵܪܝܵܐ ܐܲܠܵܗܵܐ ܡܵܪܹܗ ܕܡܵܘܬܵܐ ܘܡܲܦܩܵܢܵܐ܀ ܒܪܲܡ ܐܲܠܵܗܵܐ ܢܸܦܣܘܿܩ ܪܹܫܵܐ ܕܲܒ݂ܥܸܠܕ̇ܒ݂ܵܒ݂ܵܘ̈ܗܝ܀ ܒܹ̈ܥܵܬ݂ܵܐ ܕܣܲܥܪܵܐ ܕܐܲܝܠܹܝܢ ܕܲܡܗܲܠܟ݂ܝܼܢ ܒܲܚܛܵܗܲܝ̈ܗܘܿܢ܀ ܐܸܡܲܪ݂ ܡܵܪܝܵܐ ܕܡ݂ܢ ܒܹܝܬ݂ ܫܸܢܹ̈ܐ ܐܲܗܦܸܟܼ܀ ܘܐܲܗܦܸܟܼ ܡ݂ܢ ܥܘܼܡܩܵܘ̈ܗܝ ܕܝܲܡܵܐ܀ ܡܸܛܠ ܕܬܸܨܛܒܲܥ ܪܸܓ݂ܠܵܟܼ ܒܲܕܼܡܵܐ܀ ܘܠܸܫܵܢܵܐ ܕܟܲܠܒܲܝ̈ܟ ܡ݂ܢ ܒܥܸܠܕ̇ܒ݂ܵܒܲܝ̈ܟ܀ ܚܙ݂ܵܘ ܗܲܠ̈ܟ݂ܵܬ݂ܵܟܼ ܐܲܠܵܗܵܐ܀ ܗܲܠ̈ܟ݂ܵܬܹܗ ܕܐܲܠܵܗܝ ܘܲܕܼܡܲܠܟ̇ܝ ܩܲܕ̇ܝܼܫܵܐ܀ ܩܲܕܸ̇ܡܘ ܪܲܘ̱ܪ̈ܒ݂ܵܢܹܐ ܒܵܬܲܪ ܡܫܲܒ̇ܚܵܢܹ̈ܐ܀ ܒܲܝܢܵܬ݂ ܥܠܲܝ̈ܡܵܬ݂ܵܐ ܕܢܵܩ̈ܫܵܢ ܒܲܦ̈ܠܲܓܹܐ ܒܲܟ݂ܢܘܼ̈ܫܵܬ݂ܵܐ܀ ܒܲܪܸܟ݂ܘ ܠܡܵܪܝܵܐ ܡ݂ܢ ܡܲܒܘܼܥܵܐ ܕܝܼܣܪܵܝܹܠ܀ ܬܲܡܵܢ ܒܸܢܝܵܡܹܝܢ ܙܥܘܿܪܵܐ ܒܫܸܠܝܵܐ܀ ܪܲܘ̱ܪ̈ܒ݂ܵܢܹܐ ܕܲܝܗܘܼܕܼܵܐ ܘܫܲܠܝܼܛܵܢܲܝ̈ܗܘܿܢ܀ ܪܲܘ̱ܪ̈ܒ݂ܵܢܹܐ ܕܲܙܒ݂ܘܿܠܘܿܢ ܘܪܲܘ̱ܪ̈ܒ݂ܵܢܹܐ ܕܢܲܦ̮ܬܵܠܝܼ܀ ܦܩܘܿܕܼ ܐܲܠܵܗܵܐ ܥܘܼܫܢܵܟܼ܀ ܘܐܲܥܫܸܢ ܐܲܠܵܗܵܐ ܠܗܵܕܹܐ ܕܥܲܬܸ̇ܕ̇ܬ̇ ܠܲܢ܀ ܡ݂ܢ ܗܲܝܟ̇ܠܵܟܼ ܠܐܘܿܪܸܫܠܸܡ܀ ܠܵܟܼ ܢܲܝܬ̇ܘܿܢ ܡܲܠ̈ܟܹ̇ܐ ܩܘܼܪ̈ܒܵܢܹܐ܀ ܟܐܝܼ ܒܚܲܝܘ̱ܬ݂ܵܐ ܕܕܲܒ݂ܪܵܐ ܟܢܘܼܫܬܵܐ ܕܐܲܪ̈ܘܵܢܹܐ܀ ܥܸܓ݂ܠܹ̈ܐ ܕܥܲܡܡܹ̈ܐ ܕܲܩܪܝܼܡܝܼܢ ܒܣܹܐܡܵܐ܀ ܒܲܕܲܪ ܥܲܡܡܹ̈ܐ ܕܨܵܒܹܝ݁ܢ ܩܪܵܒ݂ܵܐ܀ ܢܹܐܬ݂ܘܿܢ ܐܝܼ̈ܙܓܲܕܹ̇ܐ ܡ݂ܢ ܡܸܨܪܹܝܢ܀ ܘܟ݂ܘܼܫ ܬܲܫܠܸܡ ܐܝܼܕܼܵܐ ܠܐܲܠܵܗܵܐ܀ ܡܲܠ̈ܟ̇ܘܵܬ݂ܵܐ ܕܐܲܪܥܵܐ ܫܲܒܲܚܹ̈ܝܢ ܠܐܲܠܵܗܵܐ܀ ܙܡܲܪܘ ܠܡܵܪܝܵܐ ܕܲܪܟ݂ܝܼܒ݂ ܒܲܫܡܲܝ̈ ܫܡܲܝܵܐ܀ ܡ݂ܢ ܡܲܕܼܢ̱ܚܵܐ ܝܲܗ݂݇ܒ݂ ܩܵܠܹܗ ܩܵܠܵܐ ܥܲܫܝܼܢܵܐ܀ ܗܲܒ݂ܘ ܬܸܫܒ̇ܘܿܚܬܵܐ ܠܐܲܠܵܗܵܐ܀ ܘܠܝܼܣܪܵܝܹܠ ܪܲܒ̇ܘܼܬ݂ ܝܵܐܝܘܼܬ݂ܵܐ܀ ܕܥܘܼܫܢܹܗ ܒܲܫܡܲܝ̈ ܫܡܲܝܵܐ܀ ܕܚܝܼܠܲܬ̇ ܐܲܠܵܗܵܐ ܡ݂ܢ ܡܲܩܕ̇ܫܵܟܼ܀ ܐܲܠܵܗܹܗ ܕܝܼܣܪܵܝܹܠ܀ ܗܘ̤ ܢܸܬܸ̇ܠ ܚܲܝܠܵܐ ܘܥܘܼܫܢܵܐ ܠܥܲܡܹܗ ܒܪܝܼܟ݂ܘܼ ܐܲܠܵܗܵܐ܀

ܦܪܘܿܩܲܝܢܝ ܐܲܠܵܗܵܐ ܡܸܛܠ ܕܲܡܛܵܘ ܡܲܝ̈ܵܐ ܥܕܲܡܵܐ ܠܢܲܦ̮ܫܵܐ܀ ܛܸܒ݂ܥܹܬ݂ ܒܗܲܘܬ݂ܵܐ ܥܲܡܝܼܩܬܵܐ ܘܠܲܝܬ̇ ܒܵܗ̇ ܒܹܝܬ݂ ܩܝܵܡܵܐ܀ ܥܸܠܹ̇ܬ݂ ܠܥܘܼܡܩܵܐ ܕܡܲܝ̈ܵܐ ܘܨܵܡܲܪܬܵܐ ܛܲܒܲܥܬܲܢܝ܀ ܠܐܝܼܬ݂ ܒܲܩܪܵܝܝ ܘܚܸܪܲܬ̤ ܓܲܓܲܪܬ̇ܝ܀ ܓ݂ܵܙ ܥܲܝ̈ܢܲܝ ܟܲܕܼ ܡܣܲܟܸܐ ܐ݇ܢܵܐ ܠܐܲܠܵܗܝ܀ ܣܓ݂ܝܼܘ ܡ݂ܢ ܣܲܥܪܵܐ ܕܪܹܫܝ ܒܥܸܠܕ̇ܒ݂ܵܒܲܝ̈ ܕܡܲܓܵܢ܀ ܘܲܥ݂ܫܸܢܘ ܡ݂ܢ ܓܲܪ̈ܡܲܝ ܒܥܸܠܕ̇ܒ݂ܵܒܲܝ̈ ܕܫܘܼܩܪܵܐ܀ ܡܸܕܸܡ ܕܠܵܐ ܛܸܠܡܹ̇ܬ݂ ܡܦܲܢܸܐ ܗ݇ܘܹܝܬ݂܀ ܐܲܠܵܗܵܐ ܐܲܢ݇ܬ̇ ܝܵܕܲܥ ܐܲܢ݇ܬ̇ ܣܲܟ݂̈ܠ̱ܘܵܬ݂ܝ܀ ܘܲܚܛܵܗܲܝ̈ ܡܸܢܵܟܼ ܠܵܐ ܐܸܬ݂ܟܲܣܝܼܘ܀ ܠܵܐ ܢܸܒ݂ܗ̱ܬ݂ܘܼܢ ܒܝܼ ܐܲܝܠܹܝܢ ܕܲܡܣܲܒ̇ܪܝܼܢ ܒܵܟܼ܀ ܡܵܪܝܵܐ ܐܲܠܵܗܵܐ ܚܲܝܠ̱ܬ݂ܵܢܵܐ܀ ܠܵܐ ܢܸܚܦܪܘܼܢ ܒܝܼ ܐܲܝܠܹܝܢ ܕܒ݂ܵܥܹܝܢ ܠܵܟܼ ܐܲܠܵܗܹܗ ܕܝܼܣܪܵܝܹܠ܀ ܡܸܛܠܵܬ݂ܵܟܼ ܩܲܒ̇ܠܹ̇ܬ݂ ܚܸܣܕܵܐ܀ ܘܟܲܣܝܲܬ̤ ܒܸܗܬ̇ܬ݂ܵܐ ܠܐܲܦܲܝ̈܀ ܢܘܼܟ݂ܪܵܝܵܐ ܗ̤ܘܹܝܬ݂ ܠܐܲܚܲܝ̈܀ ܘܐܲܟ݂ܣܢܵܝܵܐ ܠܲܒ݂ܢܲܝ̈ ܐܹܡܝ܀ ܡܸܛܠ ܕܲܛܢܵܢܹܗ ܕܒܲܝܬܵܟܼ ܐܲܟ݂ܠܲܢܝ܀ ܘܚܸܣܕܵܐ ܕܲܡܚܲܣܕܼܵܢܲܝ̈ܟ ܢܦܲܠ ܥܠܲܝ܀ ܡܲܟ̇ܟܹ̇ܬ݂ ܢܲܦ̮ܫܝ ܒܨܲܘܡܵܐ ܘܲܗ̤ܘܹܝܬ݂ ܠܗܘܿܢ ܠܚܸܣܕܵܐ܀ ܥܸܒܼ̇ܕܹ̇ܬ݂ ܠܒ݂ܘܼܫܝ ܣܲܩܵܐ ܘܲܗ̤ܘܹܝܬ݂ ܠܗܘܿܢ ܠܡܲܬ݂ܠܵܐ܀ ܘܲܪܢܵܘ݂ ܒܝܼ ܐܲܝܠܹܝܢ ܕܝܵܬ݂ܒ̇ܝܼܢ ܒܬܲܪܥܵܐ܀ ܘܲܪܢܵܘ݂ ܒܝܼ ܐܲܝܠܹܝܢ ܕܫܵܬܹܝ݁ܢ ܫܲܟ݂ܪܵܐ܀ ܘܐܸܢܵܐ ܨܲܠܝܼ̇ܬ݂ ܩܕܼܵܡܲܝܟ ܡܵܪܝܵܐ ܒܙܲܒ݂ܢܵܐ ܡܩܲܒ̇ܠܵܐ܀ ܐܲܠܵܗܵܐ ܒܣܘܿܓ݂ܐܵܐ ܕܛܲܝܒ̇ܘܼܬ݂ܵܟܼ ܥܢܝܼܢܝ܀ ܘܲܒ݂ܣܘܿܓ݂ܐܵܐ ܕܦܘܼܪܩܵܢܵܟܼ ܦܲܨܵܢܝ܀ ܡ݂ܢ ܣܝܵܢܵܐ ܕܠܵܐ ܐܸܛܒܲܥ܀ ܘܐܸܬ݂ܦܲܨܸܐ ܡ݂ܢ ܣܵܢ̈ܐܲܝ ܘܡ݂ܢ ܥܘܼܡܩܵܐ ܕܡܲܝ̈ܵܐ܀ ܕܠܵܐ ܬܛܲܒ̇ܥܲܢܝ ܨܵܡܲܪܬܵܐ ܕܡܲܝ̈ܵܐ܀ ܘܠܵܐ ܬܸܒ݂ܠ̱ܥܲܢܝ ܗܲܘܬ݂ܵܐ܀ ܘܠܵܐ ܬܹܐܚܘܿܕܼ ܥܠܲܝ ܒܹܪܵܐ ܦܘܼܡܵܗ̇܀ ܥܢܝܼܢܝ ܡܵܪܝܵܐ ܡܸܛܠ ܕܛܵܒܲܐ ܗ݇ܝ݂ ܛܲܝܒ̇ܘܼܬ݂ܵܟܼ܀ ܘܲܒ݂ܣܘܿܓ݂ܐܵܐ ܕܪ̈ܲܚܡܲܝܟ ܐܸܬ݂ܦܲܢ ܥܠܲܝ܀ ܘܠܵܐ ܬܲܗܦܸܟܼ ܐܲܦܲܝ̈ܟ ܡ݂ܢ ܥܲܒ݂ܕܵܟܼ܀ ܡܸܛܠ ܕܥܵܩܲܬ̤ ܠܝܼ ܒܲܥܓܲܠ ܥܢܝܼܢܝ܀ ܘܩܲܪܸܒ݂ ܢܲܦ̮ܫܝ ܠܦܘܼܪܩܵܢܵܟܼ܀ ܡܸܛܠ ܒܥܸܠܕ̇ܒ݂ܵܒܲܝ̈ ܦܪܘܿܩܲܝܢܝ܀ ܐܲܢ݇ܬ̇ ܝܵܕܲܥ ܐܲܢ݇ܬ̇ ܚܸܣܕ̇ܝ܀ ܘܒܸܗܬܲܬ݂ܝ ܠܘܼܩܒܲܠ ܟܠܗܘܿܢ ܒܥܸܠܕ̇ܒ݂ܵܒܲܝ̈܀

ܐܲܣܵܐ ܬܒ݂ܵܪܹܗ ܕܠܹܒ̇ܝ ܘܲܥܨܘܿܒ݂܀ ܣܲܟ̇ܝܼܬ݂ ܠܡܲܢ ܕܬܸܟ݂ܪܸܐ ܠܹܗ ܘܠܲܝܬ̇܀ ܘܠܲܡܒܲܝܐܵܢܵܐ ܘܠܵܐ ܐܸܫܟ̇ܚܹܬ݂܀ ܝܲܗ݂݇ܒ݂ܘ ܡܹܐܟ݂ܘܼܠܬ̇ܝ ܡܪܵܪܹ̈ܐ܀ ܘܲܠܨܲܗܝܝ ܚܲܠܵܐ ܐܲܫܩܝܘܼܢܝ܀ ܢܸܗܘܸܐ ܦܵܬ݂ܘܿܪܗܘܿܢ ܩܕܼܵܡܲܝܗܘܿܢ ܦܲܚܵܐ܀ ܘܦܘܼܪܥܵܢܗܘܿܢ ܠܬ݂ܘܼܩܠ̱ܬ݂ܵܐ܀ ܢܸܚܫ̈ܟ݂ܵܢ ܥܲܝܢܲܝ̈ܗܘܿܢ ܕܠܵܐ ܢܸܚܙܘܿܢ܀ ܘܚܲܨܗܘܿܢ ܒܟ݂ܠܙܒܲܢ ܢܸܗܘܸܐ ܟܦܝܼܦ܀ ܐܲܫܘܿܕܼ ܥܠܲܝܗܘܿܢ ܪܘܼܓ݂ܙܵܟܼ܀ ܘܚܸܡܬ݂ܵܐ ܕܪܘܼܓ݂ܙܵܟܼ ܬܲܕܼܪܸܟܼ ܐܸܢܘܿܢ܀ ܢܸܗܘܸܐ ܒܹܝܬ݂ ܡܲܥܡܲܪܗܘܿܢ ܚܪܸܒ݂܀ ܘܲܒ݂ܡܲܫܟ̇ܢܲܝ̈ܗܘܿܢ ܠܵܐ ܢܸܗܘܸܐ ܕܥܵܡܲܪ܀ ܡܸܛܠ ܕܲܠܡܲܢ ܕܐܲܢ݇ܬ̇ ܡ݂ܚܲܝܬ̇ ܪܕܲܦ݂ܘ܀ ܘܐܲܘܣܸܦܘ ܥܲܠ ܟܹܐܒܹܗ ܕܲܩܛܝܼܠܵܐ܀ ܗܲܒ݂ܘ ܥܲܘܠܵܐ ܥܲܠ ܥܲܘܠ̱ܗܘܿܢ܀ ܕܠܵܐ ܢܸܥܠܘܼܢ ܒܙܲܕ̇ܝܼܩܘܼܬ݂ܵܟܼ܀ ܘܢܸܬ݂ܥ̱ܛܘܿܢ ܡ݂ܢ ܣܸܦܪܵܟܼ ܕܚܲܝܹ̈ܐ܀ ܘܥܲܡ ܙܲܕ̇ܝܼܩܲܝ̈ܟ ܠܵܐ ܢܸܬ݂ܟܲܬ݂ܒ̇ܘܼܢ܀ ܘܐܸܢܵܐ ܡܸܣܟܹܢܵܐ ܐ݇ܢܵܐ ܘܡܲܟ݂ܐ̱ܒ݂ܵܐ܀ ܦܘܼܪܩܵܢܵܟܼ ܐܲܠܵܗܵܐ ܥܲܕ̇ܪܲܢܝ܀ ܐܹܫܲܒܲܚ ܫܡܹܗ ܕܐܲܠܵܗܵܐ ܒܬܸܫܒ̇ܘܿܚܬܵܐ܀ ܘܐܲܘܪ̱ܒ݂ܝܼܘܗܝ ܒܬ݂ܵܘܕ̇ܝܼܬ݂ܵܐ܀ ܐܸܫܦܲܪ ܠܡܵܪܝܵܐ ܡ݂ܢ ܬܲܘܪܹ̈ܐ ܡܦܲܛܡܹ̈ܐ܀ ܩܲܪ̈ܢܵܢܹܐ ܘܦܲܪ̈ܣܵܢܹܐ܀ ܚܙܵܘ ܡܸܣܟܹ̇ܢܹ̈ܐ ܘܲܚܕܼܵܘ ܘܢܸܚܸܐ ܠܸܒ̇ܟ݂ܘܿܢ܀ ܡܸܛܠ ܕܫܵܡܲ݁ܥ ܡܵܪܝܵܐ ܠܡܸܣܟܹ̇ܢܹ̈ܐ܀ ܘܠܲܐܣܝܼܪ̈ܵܘܗܝ ܠܵܐ ܫܵܐܹ̇ܛ܀ ܢܫܲܒ̇ܚܘܼܢܵܝܗܝ ܫܡܲܝܵܐ ܘܐܲܪܥܵܐ܀ ܘܝܲܡܡܹ̈ܐ ܘܟ݂ܠ ܕܪܵܚܹܫ ܒܗܘܿܢ܀ ܡܸܛܠ ܕܐܲܠܵܗܵܐ ܦܵܪܸܩ ܠܨܸܗܝܘܿܢ܀ ܘܲܡܒܲܢܸܐ ܠܩܘܼܪ̈ܝܵܐ ܕܲܝܗܘܼܕܼܵܐ܀ ܕܢܸܬ̇ܒ݂ܘܼܢ ܒܵܗ̇ ܥܲܒ݂ܕܵܘ̈ܗܝ ܘܢܹܐܪܬ̇ܘܼܢܵܗ̇܀ ܘܪ̈ܲܚܡܲܝ ܫܡܹܗ ܢܸܫܪܘܼܢ ܒܵܗ܀

ܐܲܠܵܗܵܐ ܦܲܨܵܢܝ ܡܵܪܝܵܐ ܠܥܘܼܕܼܪܵܢܝ ܟܲܬܲܪ܀ ܢܸܒ݂ܗ̱ܬ݂ܘܼܢ ܘܢܸܚܦܪܘܼܢ ܐܲܝܠܹܝܢ ܕܒ݂ܵܥܹܝܢ ܠܢܲܦ̮ܫܝ܀ ܢܸܗܦܟ݂ܘܼܢ ܠܒܸܣܬܲܪܗܘܿܢ ܘܢܸܚܦܪܘܿܢ ܐܲܝܠܹܝܢ ܕܨܵܒܹܝܢ ܠܒ݂ܝܼܫܬ̇ܝ܀ ܢܸܬ݂ܡ̱ܗܘܿܢ ܒܬܸܢܝܸܐ ܕܒܸܗܬܲܬ݂ܗܘܿܢ܀ ܐܲܝܠܹܝܢ ܕܐܸܡܲܪܘ ܥܠܲܝ ܐܹܗܹܐ ܐܹܗܹܐ܀ ܢܸܚܕ̇ܘܿܢ ܒܵܟܼ ܟܠ ܕܒ݂ܵܥܹܝܢ ܠܵܟܼ܀ ܘܢܹܐܡܪܘܼܢ ܒܟ݂ܠܙܒܲܢ ܕܪܲܒ̇ܘܼ ܐܲܠܵܗܵܐ܀ ܐܲܝܠܹܝܢ ܕܪܵܚܡ̇ܝܼܢ ܦܘܼܪܩܵܢܵܟܼ܀ ܘܐܸܢܵܐ ܡܸܣܟܹ̇ܢܵܐ ܐ݇ܢܵܐ ܘܒ݂ܵܝܫܵܐ܀ ܐܲܠܵܗܵܐ ܟܲܬܲܪ ܠܝܼ܀ ܡܥܲܕ̇ܪܵܢܝ ܐܲܢ݇ܬ̇ ܘܲܡܦܲܨܝܵܢܝ ܡܵܪܝܵܐ ܠܵܐ ܬܲܘܚܲܪ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܘܲܥܕܼܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ܀

ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ܀

ܗܘܼܠܵܠܵܐ ܝ:

ܨܠܘܿܬ݂ܵܐ: ܒܵܟܼ ܡܵܪܝ ܡܣܲܒ̇ܒܪܝܼܢܲܢ، ܘܥܲܠ ܪ̈ܲܚܡܲܝܟ ܬܟ݂ܝܼܠܝܼܢܲܢ، ܘܡ݂ܢ ܛܲܝܒ̇ܘܼܬ݂ܵܟܼ ܒܵܥܹܝ݁ܢܲܢ. ܗܘ̤ܝܼ ܠܵܗ̇ ܡܵܪܝ ܐܝܼܵܠܵܐ ܠܲܡܚܝܼܠܘܼܬܲܢ ܘܒܹܝܬ݂ ܓܲܘܣܵܐ ܠܲܡܛܲܪܦܘܼܬܲܢ ܘܙܵܝܘܿܢܵܐ ܠܲܣܢܝܼܩܘܼܬܲܢ ܘܲܡܟܲܢܫܵܢܵܐ ܠܲܡܒܲܕ̇ܪܘܼܬܲܢ ܘܦܵܪܘܿܩܵܐ ܠܐܲܠܝܼܨܘܼܬܲܢ ܘܲܡܚܲܣܝܵܢܵܐ ܠܚܲܛܵܝܘܼܬܲܢ ܘܠܵܐ ܬܲܗܦܸܟܼ ܡ݂ܢ ܩܵܠ ܬܲܟ݂ܫܲܦ̮ܬܲܢ ܛܵܒ݂ܵܐ ܕܲܥܠܵܘܗܝ ܣܝܼܡ ܬܘܼܟ݂ܠܵܢܲܢ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟܼܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ:

ܒܵܟ ܡܵܪܝܵܐ ܣܲܒ̇ܪܹܬ݂ ܠܵܐ ܐܸܒ݂ܗܲܬ݂ ܠܥܵܠܲܡ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܒܵܟ ܡܵܪܝܵܐ ܣܲܒ̇ܪܹܬ݂ ܠܵܐ ܐܸܒ݂ܗܲܬ݂ ܠܥܵܠܲܡ܀ ܘܲܒ݂ܙܲܕ̇ܝܼܩܘܼܬ݂ܵܟܼ ܦܲܨܵܢܝ܀ ܨܠܝܼ ܠܝܼ ܐܸܕܼܢܵܟܼ ܘܲܦܪܘܿܩܲܝܢܝ܀ ܗܘ݀ܝܼ ܠܝܼ ܒܹܝܬ݂ ܡܲܥܡ̱ܪܵܐ ܕܐܸܥܘܿܠ ܠܹܗ ܒܟ݂ܠܙܒܲܢ܀ ܘܲܦܩܘܿܕܼ ܠܡܸܦܪ̱ܩܲܢܝ܀ ܡܸܛܠ ܕܐܲܢ݇ܬ̇ܘܼ ܒܹܝܬ݂ ܓܲܘܣܝ ܘܒܹܝܬ݂ ܡܸܪܕ̇ܝ܀ ܐܲܠܵܗܵܐ ܦܲܨܵܢܝ ܡ݂ܢ ܐܝܼܕܹܗ ܕܪܲܫܝܼܥܵܐ܀ ܘܡ݂ܢ ܐܝܼܕܹܗ ܕܥܲܘܵܠܵܐ ܒܝܼܫܵܐ܀ ܡܸܛܠ ܕܐܲܢ݇ܬ̇ܘܼ ܣܲܒ݂ܪܝ ܡܵܪܝܵܐ܀ ܐܲܠܵܗܵܐ ܬܘܼܟ݂ܠܵܢܝ ܕܡ݂ܢ ܛܲܠܝܘܼܬ݂ܝ܀ ܥܠܲܝܟ ܐܸܣܬܲܡܟܹ̇ܬ݂ ܡ݂ܢ ܡܲܪܒ̇ܥܵܐ܀ ܘܡ݂ܢ ܡܥܹܝ̈ܗ̇ ܕܐܹܡܝ ܐܲܢ݇ܬ̇ܘܼ ܬܘܼܟ݂ܠܵܢܝ܀ ܠܵܟܼ ܫܲܒ̇ܚܹܬ݂ ܒܟ݂ܠܙܒܲܢ܀ ܕܘܼܡܵܪܵܐ ܗ̤ܘܹܝܬ݂ ܠܣܲܓ̇ܝܼ̈ܐܹܐ܀ ܕܐܲܢ݇ܬ̇ܘܼ ܬܘܼܟ݂ܠܵܢܝ ܥܲܫܝܼܢܵܐ܀ ܢܸܬ݂ܡ̱ܠܸܐ ܦܘܼܡܝ ܬܸܫܒ̇ܘܿܚܬܵܟܼ܀ ܘܟ݂ܠܹܗ ܝܲܘܡܵܐ ܪܲܒ̇ܘܼܬ݂ܵܟܼ܀ ܠܵܐ ܬܸܫܕܹ̇ܝܢܝ ܒܙܲܒ݂ܢܵܐ ܕܣܲܝܒ̇ܘܼܬ݂ܵܐ܀ ܘܡܵܐ ܕܲܓ݂ܡܲܪ ܚܲܝܠܝ ܠܵܐ ܬܸܫܒ̇ܩܲܢܝ܀ ܡܸܛܠ ܕܐܸܡܲܪ݂ܘ ܥܠܲܝ ܒܥܸܠܕ̇ܒ݂ܵܒܲܝ̈܀ ܐܲܝܠܹܝܢ ܕܢܵܛܪܝܼܢ ܠܢܲܦ̮ܫܝ܀ ܐܸܬ݂ܡܲܠܲܟ݂ܘ ܐܲܟ݂ܚ݇ܕܼܵܐ ܘܐܸܡܲܪ݂ܘ܀ ܐܲܠܵܗܵܐ ܫܲܒ݂ܩܹܗ ܪܘܼܕܼܦܘܼܗܝ ܘܐܘܼܚܕ̇ܘܼܗܝ܀ ܡܸܛܠ ܕܠܲܝܬ̇ ܠܹܗ ܡܦܲܨܝܵܢܵܐ܀ ܐܲܠܵܗܵܐ ܠܵܐ ܬܲܪܚܸܩ ܡܹܢܝ܀ ܐܲܠܵܗܵܐ ܠܥܘܼܕܼܪܵܢܝ ܟܲܬܲܪ܀ ܢܸܒ݂ܗ̱ܬ݂ܘܼܢ ܘܢܸܚܦܪܘܼܢ ܐܲܝܠܹܝܢ ܕܣܵܩܪܝܼܢ ܠܢܲܦ̮ܫܝ܀ ܢܸܬ݂ܥܲܛܦܘܼܢ ܒܸܗܬ̇ܬ݂ܵܐ ܐܲܝܠܹܝܢ ܕܨܵܒܹܝ݁ܢ ܠܒ݂ܝܼܫܬ̇ܝ܀ ܐܸܢܵܐ ܕܹܝܢ ܒܟ݂ܠܙܒܲܢ ܐܹܨܲܠܸܐ ܘܐܲܘܣܸܦ ܥܲܠ ܬܸܫ̈ܒ̇ܚܵܬ݂ܵܟܼ܀ ܘܦܘܼܡܝ ܢܣܲܒܲܪ ܙܲܕ̇ܝܼܩܘܼܬ݂ܵܟܼ܀ ܘܟ݂ܠܹܗ ܝܲܘܡܵܐ ܒܬܸܫ̈ܒ̇ܚܵܬ݂ܵܟܼ܀ ܡܸܛܠ ܕܠܵܐ ܝܸܕܼܥܹ̇ܬ݂ ܣܵܦܪܘܼܬ݂ܵܐ܀ ܕܐܸܥܘܿܠ ܒܓܲܢ݇ܒܵܪܘܼܬܹܗ ܕܡܵܪܝܵܐ܀ ܘܐܸܥܗܲܕܼ ܙܲܕ̇ܝܼܩܘܼܬ݂ܵܐ ܒܲܠܚܘܿܕܲܝ܀ ܐܲܠܵܗܵܐ ܝܘܼܠܦܵܢܝ ܕܡ݂ܢ ܛܲܠܝܘܼܬ݂ܝ ܘܲܥܕܲܡܵܐ ܠܗܵܫܵܐ܀ ܕܐܹܚܵܘܸܐ ܬܸܕܼܡ̱ܪܵܬ݂ܵܟܼ܀ ܥܕܲܡܵܐ ܠܣܲܝܒ̇ܘܼܬ݂ܵܐ ܘܲܠܩܲܫܝܼܫܘܼܬ݂ܵܐ ܠܵܐ ܬܸܫܒ̇ܩܲܢܝ܀ ܥܕܲܡܵܐ ܕܐܹܚܵܘܸܐ ܕܪܵܥܵܟܼ ܘܓܲܢ݇ܒܵܪܘܼܬ݂ܵܟܼ ܠܕܼܵܪܵܐ ܕܐܵܬܹܐ܀ ܙܲܕ̇ܝܼܩܘܼܬ݂ܵܟܼ ܐܲܠܵܗܵܐ ܥܕܲܡܵܐ ܠܲܡܪܲܘܡܵܐ܀ ܘܪܲܘ̱ܪ̈ܒ݂ܵܬ݂ܵܐ ܕܲܥܒܲܕ̇ܬ̇ ܐܲܠܵܗܵܐ ܡܲܢ݂ܘܼ ܐܲܟ݂ܘܵܬ݂ܵܟܼ܀ ܕܚܲܘܝܼܬܵܢܝ ܐܘܼܠܨܵܢܵܐ ܣܲܓ̇ܝܼܐܵܐ ܘܒ݂ܝܼܫܬܵܐ܀ ܘܲܗܦܲܟ݂ܬ̇ ܘܐܲܚܝܼܬܵܢܝ܀ ܐܵܦ ܡ݂ܢ ܬܗܘܿܡܹ̈ܐ ܕܐܲܪܥܵܐ ܬܲܗܦܸܟܼ ܬܲܣܩܲܢܝ܀ ܐܲܣܓ̇ܝܼܬ̇ ܪܲܒ̇ܘܼܬ݂ܝ ܘܲܗ݂ܦܲܟ݂ܬ̇ ܘܒܲܝܲܐܬܵܢܝ܀ ܘܐܵܦ ܐܸܢܵܐ ܐܲܘܕܸ̇ܐ ܠܵܟܼ ܒܟܸܢܵܪܵܐ ܘܲܠܩܘܼܫܬܵܟܼ ܐܸܙܡܲܪ܀ ܐܲܠܵܗܵܐ ܐܸܙܡܲܪ ܠܵܟܼ ܒܟܸܢܵܪܵܐ ܩܲܕ̇ܝܼܫܵܐ ܕܝܼܣܪܵܝܹܠ܀ ܘܲܢ̈ܫܲܒܵܚܢ ܣܸܦ̈ܘܵܬ݂ܝ ܟܲܕܼ ܐܸܙܡܲܪ ܠܵܟܼ ܘܢܲܦ̮ܫܝ ܕܲܦܪܲܩ݂ܬ̇܀ ܠܸܫܵܢܝ ܟܠܹܗ ܝܲܘܡܵܐ ܢܲܘܕܸ̇ܐ ܒܙܲܕ̇ܝܼܩܘܼܬ݂ܵܟܼ܀ ܡܸܛܠ ܕܢܸܒ݂ܗ̱ܬ݂ܘܼܢ ܘܢܸܚܦܪܘܼܢ܀ ܐܲܝܠܹܝܢ ܕܨܵܒܹ̇ܝܢ ܠܒ݂ܝܼܫܬ̇ܝ܀

ܐܲܠܵܗܵܐ ܗܲܒ݂ ܕܝܼܢܵܟܼ ܠܡܲܠܟܵܐ܀ ܘܙܲܕ̇ܝܼܩܘܼܬ݂ܵܟܼ ܠܒܲܪ ܡܲܠܟܵܐ܀ ܕܲܢܕܼܘܼܢ ܠܥܲܡܵܟܼ ܒܙܲܕ̇ܝܼܩܘܼܬ݂ܵܐ܀ ܘܲܠܡܸܣܟܹ̇ܢܲܝ̈ܟ ܒܕܼܝܼܢܵܐ܀ ܢܸܫܩܠܘܼܢ ܛܘܼܪܹ̈ܐ ܫܠܵܡܵܐ ܠܥܲܡܵܟܼ܀ ܘܪ̈ܵܡܵܬ݂ܵܐ ܙܲܕ̇ܝܼܩܘܼܬ݂ܵܟܼ܀ ܕܲܢܕܼܘܼܢ ܠܡܸܣܟܹ̇ܢܹ̈ܐ ܕܥܲܡܵܐ܀ ܘܢܸܦܪܘܿܩ ܠܲܒ݂ܢܲܝ̈ ܒܵܝܫܹ̈ܐ܀ ܘܲܢܡܲܟܸ̇ܟܼ ܠܛܵܠܘܿܡܹ̈ܐ܀ ܢܸܕܼܚܠܘܼܢ ܠܵܟܼ ܥܲܡ ܫܸܡܫܵܐ܀ ܘܲܩܕܼܵܡ ܣܲܗܪܵܐ ܠܕܼܵܪܕܵܪ̈ܝܼܢ܀ ܢܸܚܘܿܬ݂ ܐܲܝܟܼ ܡܸܛܪܵܐ ܥܲܠ ܓܸܙܬ݂ܵܐ܀ ܘܐܲܝܟܼ ܪ̈ܣܝܼܣܹܐ ܕܢܵܚܬ̇ܝܼܢ ܥܲܠ ܐܲܪܥܵܐ܀ ܢܸܫܘܲܚ ܒܝܵܘ̈ܡܵܬܹܗ ܙܸܕܼܩܵܐ܀ ܘܣܘܿܓ݂ܐܵܐ ܕܲܫܠܵܡܵܐ ܥܕܲܡܵܐ ܕܢܸܥܒܲܪ ܣܲܗܪܵܐ܀ ܢܹܐܚܘܿܕܼ ܡ݂ܢ ܝܲܡܵܐ ܠܝܲܡܵܐ܀ ܘܡ݂ܢ ܢܲܗܪ̈ܵܘܵܬ݂ܵܐ ܥܕܲܡܵܐ ܠܣܲܘܦܹ̈ܝܗ̇ ܕܐܲܪܥܵܐ܀ ܩܕܼܵܡܵܘܗܝ ܢܸܒ݂ܪ̈ܟ݂ܵܢ ܓܵܙܪ̈ܵܬ݂ܵܐ܀ ܘܲܒ݂ܥܸܠܕ̇ܒ݂ܵܒ݂ܵܘ̈ܗܝ ܥܲܦܪܵܐ ܢܸܠܚܟ݂ܘܼܢ܀ ܡܲܠ̈ܟܹ̇ܐ ܕܬܲܪܫܝܼܫ ܘܲܕܼܓ݂ܵܙܪ̈ܵܬ݂ܵܐ܀ ܩܘܼܪ̈ܒܵܢܹܐ ܢܲܝܬ̇ܘܿܢ ܠܹܗ܀ ܡܲܠ̈ܟܹ̇ܐ ܕܲܫܒ݂ܵܐ ܘܲܕܼܣܵܒ݂ܵܐ܀ ܩܘܼܪ̈ܒܵܢܹܐ ܢܩܲܪܒ݂ܘܼܢ܀ ܢܸܣܓ̇ܕܼܘܼܢ ܠܹܗ ܟܠܗܘܿܢ ܡܲܠ̈ܟܹ̇ܐ܀ ܘܟ݂ܠܗܘܿܢ ܥܲܡܡܹ̈ܐ ܢܸܦܠ̱ܚܘܼܢܵܝܗܝ܀ ܡܸܛܠ ܕܲܡܦܲܨܸܐ ܠܒ݂ܵܝܫܵܐ ܡ݂ܢ ܡܲܢ ܕܥܲܫܝܼܢ ܡܸܢܹܗ܀ ܘܲܠܡܸܣܟܹ̇ܢܵܐ ܕܠܲܝܬ̇ ܠܹܗ ܡܥܲܕ̇ܪܵܢܵܐ܀ ܚܵܐܹ̇ܣ ܥܲܠ ܡܸܣܟܹ̇ܢܹ̈ܐ ܘܥܲܠ ܒܵܝܫܹ̈ܐ܀ ܘܲܢܦ̮̈ܫܵܬ݂ܵܐ ܕܡܸܣܟܹ̇ܢܹ̈ܐ ܦܵܪܹܩ܀ ܡ݂ܢ ܬܘܼܟܵܐ ܘܡ݂ܢ ܥܲܘܠܵܐ ܦܵܪܹܩ ܢܲܦ̮̈ܫܵܬ݂ܗܘܿܢ܀ ܝܲܩܝܼܪܘܼ ܕܸܡܗܘܿܢ ܒܥܲܝܢܵܘ̈ܗܝ܀ ܢܸܚܸܐ ܘܢܸܬ݂ܝܼܗܸܒ݂ ܠܹܗ ܡ݂ܢ ܕܲܗܒ݂ܵܐ ܕܲܫܒ݂ܵܐ܀ ܘܲܢܨܲܠܸܐ ܥܠܵܘܗܝ ܒܟ݂ܠܙܒܲܢ܀ ܘܟ݂ܠܹܗ ܝܲܘܡܵܐ ܢܒܲܪܟ݂ܝܼܘܗܝ܀ ܢܸܗܘܸܐ ܐܲܝܟܼ ܣܘܿܓ݂ܐܵܐ ܕܲܥܒ݂ܘܼܪܵܐ ܒܐܲܪܥܵܐ܀ ܘܲܒ݂ܪܹܫܵܐ ܕܛܘܼܪܹ̈ܐ ܢܲܫܘܲܚ ܦܹܐܪ̈ܵܘܗܝ ܐܲܝܟܼ ܕܠܸܒ݂ܢܵܢ܀ ܢܲܘܥܸܐ ܡ݂ܢ ܡܕܼܝܼܢ݇ܬܹ̇ܗ ܐܲܝܟܼ ܥܸܣܒܵܐ ܕܐܲܪܥܵܐ܀ ܘܢܸܗܘܸܐ ܫܡܹܗ ܠܥܵܠܲܡ܀ ܘܲܩܕܼܵܡ ܫܸܡܫܵܐ ܐܝܼܬ݂ܵܘܗܝ ܫܡܹܗ܀ ܢܸܬ݂ܒܲܪܟ݂ܘܼܢ ܒܹܗ ܟܠܗܘܿܢ ܥܲܡܡܹ̈ܐ܀ ܘܟ݂ܠܗܘܿܢ ܢܫܲܒ̇ܚܘܼܢܵܝܗܝ܀ ܒܪܝܼܟ݂ܘܼ ܡܵܪܝܵܐ ܐܲܠܵܗܵܐ ܕܝܼܣܵܪܝܹܠ܀ ܕܲܥ݂ܒܲܕܼ ܬܸܕܼܡ̱ܪ̈ܵܬ݂ܵܐ ܪܲܘ̱ܪ̈ܒ݂ܵܬ݂ܵܐ ܒܲܠܚܘܿܕܼܵܘܗܝ܀ ܘܲܒ݂ܪܝܼܟ݂ܘܼ ܫܡܵܐ ܕܐܝܼܩܵܪܹܗ ܠܥܵܠܲܡ܀ ܬܸܬ݂ܡ̱ܠܸܐ ܐܝܼܩܵܪܹܗ ܟܠܵܗ̇ ܐܲܪܥܵܐ ܐܵܡܹܝܢ ܘܐܵܡܹܝܢ܀

ܐܲܠܵܗܵܐ ܛܵܒ݂ ܠܝܼܣܪܵܝܹܠ ܘܠܲܒ݂ܪܝܼܪ̈ܲܝ ܠܸܒܵܐ܀ ܘܐܸܢܵܐ ܥܲܕܼ ܩܲܠܝܼܠ ܡܸܨܛܲܠ̈ܝܵܢ ܗ݂݇ܘܲܝ̈ ܪܸ̈ܓ݂ܠܲܝ܀ ܘܐܲܝܟܼ ܠܵܐ ܡܸܕܸ̇ܡ ܡܸܬ݂ܐܲܫ̈ܕܵܢ ܗ݂݇ܘܲܝ̈ ܗܲܠ̈ܟ݂ܵܬ݂ܝ܀ ܡܸܛܠ ܕܛܸܢܹ̇ܬ݂ ܒܥܲܘܵܠܹ̈ܐ܀ ܟܲܕܼ ܚܵܙܹ݁ܐ ܗ݇ܘܹ̇ܝܬ݂ ܫܠܵܡܵܐ ܕܪ̈ܲܫܝܼܥܹܐ܀ ܡܸܛܠ ܕܠܲܝܬ̇ ܣܵܟ݂ܵܐ ܠܡܲܘܬ̇ܗܘܿܢ܀ ܘܣܲܓ̇ܝܼܐܵܐ ܗ݇ܝ݂ ܫܵܛܝܘܼܬ݂ܗܘܿܢ܀ ܒܥܲܡܠܵܐ ܕܐ݇ܢܵܫܵܐ ܠܲܝܬ̇ ܐܸܢܘܿܢ܀ ܘܥܲܡ ܒܢܲܝ̈ܢܵܫܵܐ ܠܵܐ ܡܸܬ݂ܢܲܓ̇ܕܼܝܼܢ܀ ܡܸܛܠ ܗܵܢܵܐ ܐܸܚܕܲܬ݀ ܐܸܢܘܿܢ ܡܒܲܣܪܵܢܘܼܬ݂ܵܐ܀ ܐܸܬ݂ܟܲܣܝܼܘ ܥܲܘܠ̱ܗܘܿܢ ܘܪܘܼܫܥ̱ܗܘܿܢ܀ ܘܲܢܦ݂ܲܩ ܐܲܝܟܼ ܬܲܪܒܵܐ ܥܲܘܠ̱ܗܘܿܢ܀ ܘܲܥܒ݂ܲܕܼ ܐܲܝܟܼ ܬܲܪܥܝܼܬ݂ܵܐ ܕܠܸܒܵܐ܀ ܐܸܬ݂ܚܲܫܲܒ݂ܘ ܘܡܲܠܸܠܘ ܒܝܼܫܬܵܐ܀ ܘܲܛܠܘܼܡܝܵܐ ܥܲܠ ܡܪܲܝܡܵܐ ܡܲܠܸܠܘ܀ ܣܵܡ݂ܘ ܦܘܼܡܗܘܿܢ ܒܲܫܡܲܝܵܐ܀ ܘܠܸܫܵܢܗܘܿܢ ܡܗܲܠܸܟܼ ܒܐܲܪܥܵܐ܀ ܡܸܛܠ ܗܵܢܵܐ ܢܸܗܦܘܿܟܼ ܥܲܡܝ ܠܗܵܪܟܵܐ܀ ܘܡܲܠܝܵܐܝܼܬ݂ ܢܸܫܟ̇ܚܘܼܢ ܠܗܘܿܢ܀ ܘܢܹܐܡܪܘܼܢ ܐܲܝܟܼܲܢ ܝܵܕܲܥ̇ ܐܲܠܵܗܵܐ܀ ܘܐܝܼܬ݂ ܝܼܕܲܥܬ݂ܵܐ ܒܲܡܪܲܝܡܵܐ܀ ܕܗܵܐ ܗܵܠܹܝܢ ܪ̈ܲܫܝܼܥܹܐ ܟܲܗܝܼܢܝܼܢ ܒܥܵܠܡܵܐ܀ ܘܥܲܫܝܼܢܝܼܢ ܒܚܲܝܠܵܐ܀ ܘܐܸܢܵܐ ܒܲܠܚܘܿܕܲܝ ܕܲܟ̇ܝܼ̇ܬ݂ ܠܹܒ̇ܝ܀ ܘܐܲܫܝܼܓܹ̇ܬ݂ ܐܝܼ̈ܕܲܝ ܒܕܲܟ݂ܝܼܘܼܬ݂ܵܐ܀ ܘܲܗ̤ܘܹܝܬ݂ ܠܲܡܚܘܿܬ݂ܵܐ ܟܠܹܗ ܝܲܘܡܵܐ܀ ܘܡܲܟ̇ܣܵܢܘܼܬ݂ܝ ܠܨܲܦܪܵܐ܀ ܐܸܢ ܐܸܡ̇ܪܹܬ ܕܐܸܥܒܸ̇ܕܼ ܐܲܟ݂ܘܵܬ݂ܗܘܿܢ ܥܲܘܠܵܐ ܗ݇ܘ݂ ܒܥܲܝܢܲܝ̈܀ ܥܕܲܡܵܐ ܕܐܸܥܘܿܠ ܠܡܲܩܕ̇ܫܹܗ ܕܐܲܠܵܗܵܐ܀ ܘܐܸܬ݂ܒܲܝܲܢ ܒܚܲܪܬ݂ܗܘܿܢ܀ ܐܲܝܟܼ ܢܸܟ݂ܠܗܘܿܢ ܬܣܝܼܡ ܠܗܘܿܢ܀ ܘܬܲܪܡܸܐ ܐܸܢܘܿܢ ܟܲܕܼ ܢܸܬ̇ܬ̇ܪܝܼܡܘܼܢ܀ ܐܲܝܟܼܲܢ ܗܘ̤ܵܘ ܠܬܸܡܗܵܐ ܡ݂ܢ ܫܸܠܝܵܐ܀ ܘܣܵܦܘ ܘܲܓ݂ܡܲܪܘ ܡ݂ܢ ܕܠܘܼܚܝܵܐ܀ ܐܲܝܟܼ ܗܵܘ̇ ܕܡܸܬ̇ܬ̇ܥܝܼܪ ܡܵܐ ܕܲܚܙ݂ܵܐ ܚܸܠܡܵܐ܀ ܡܵܪܝܵܐ ܒܲܩܪܝܼܬ݂ܵܐ ܨܲܠܡ̱ܗܘܿܢ ܬܫܘܼܛ܀ ܘܐܸܢܵܐ ܐܸܬ̇ܕܲܠܲܚ ܠܹܒ̇ܝ ܘܟ݂ܘܿܠ̈ܝܵܬ݂ܝ ܐܸܫܬܲܢܝܼ܀ ܘܐܸܢܵܐ ܒܪܝܼܪ ܗ݇ܘܹ̇ܝܬ݂ ܘܠܵܐ ܝܵܕܲܥ̇܀ ܘܲܒ݂ܥܝܼܪܵܐ ܗ݇ܘܹ̇ܝܬ݂ ܥܲܡܵܟܼ܀ ܒܬܲܪܥܝܼܬ݂ܵܟܼ ܒܲܝܲܐܲܝܢܝ܀ ܘܒ݂ܵܬܲܪ ܐܝܼܩܵܪܵܟܼ ܕܲܒܲܪܲܝܢܝ܀ ܡܵܢܵܐ ܐܝܼܬ݂ ܠܝܼ ܒܲܫܡܲܝܵܐ ܥܲܡܵܟܼ܀ ܘܡܵܢܵܐ ܨܒܹ̇ܝܬ݂ ܒܐܲܪܥܵܐ܀ ܕܐܸܚܲܕ̇ܬ̇ ܐܝܼܕܼܝ ܕܝܲܡܝܼܢܵܐ܀ ܘܲܓ݂ܡܲܪ ܠܹܒ̇ܝ ܘܒܸܣܪ̱ܝ ܘܥܘܼܫܢܹܗ ܕܠܹܒ̇ܝ܀ ܡܢܵܬ݂ܝ ܒܐܲܠܵܗܵܐ ܗ݇ܝ݂ ܠܥܵܠܲܡ܀ ܡܸܛܠ ܕܗܵܐ ܪ̈ܲܚܝܼܩܲܝܟ ܢܹܐܒ݂ܕ̇ܘܼܢ܀ ܘܬܲܘܒܸ̇ܕܼ ܠܟ݂ܠ ܕܛܵܥܹ̇ܝܢ ܡܸܢܵܟܼ ܠܥܵܠܲܡ܀ ܘܐܸܢܵܐ ܨܒܹ̇ܝܬ݂ ܕܐܸܬ݂ܩܲܪܲܒ݂ ܠܐܲܠܵܗܵܐ܀ ܛܐܸܒ݂ ܠܝܼ ܫܡܵܟܼ ܡܵܪܝܵܐ ܬܘܼܟ݂ܠܵܢܝ܀ ܘܐܸܫܬܲܥܸܐ ܟܠܗܹܝܢ ܬܸܕܼܡ̱ܪ̈ܵܬ݂ܵܟܼ܀

ܐܲܠܵܗܵܐ ܠܡܵܢܵܐ ܛܥܲܝܬܵܢܝ ܠܥܵܠܲܡ܀ ܘܐܲܥܫܸܢܬ̇ ܪܘܼܓ݂ܙܵܟܼ ܒܥܵܢ̈ܵܐ ܕܡܲܪܥܝܼܬ݂ܵܟܼ܀ ܐܸܬ̇ܕܲܟ݂ܪ ܥܹܕ݇ܬܵܟܼ ܕܲܩܢܲܝܬ̇ ܡ݂ܢ ܩܕܼܝܼܡ܀ ܘܲܦܪܲܩܬ̇ ܫܲܒ݂ܛܵܐ ܕܝܵܪܬ̇ܘܼܬ݂ܵܟܼ܀ ܛܘܼܪܵܐ ܕܨܸܗܝܘܿܢ ܗܵܢܵܐ ܕܲܫܪܲܝܬ̇ ܒܹܗ܀ ܐܲܪܝܼܡ ܥܲܒ݂ܕܲܝ̈ܟ ܥܲܠ ܐܲܝܠܹܝܢ ܕܡܸܫܬܲܩܠܝܼܢ ܒܥܘܼܫܢܵܐ܀ ܟܠ ܕܡܲܒ݂ܐܸܫ ܒܥܸܠܕ̇ܒ݂ܵܒ݂ܵܐ ܠܩܘܼܕܼܫܵܟܼ܀ ܐܸܫܬܲܒ݂ܗܲܪܘ ܒܥܸܠܕ̇ܒ݂ܵܒܲܝ̈ܟ ܒܓ݂ܵܘ ܥܹܐܕܼܵܟܼ܀ ܥܒܲܕܼܘ ܐܵܬ݂ܘܵܬ݂̈ܗܘܿܢ ܐܵܬ݂ܵܘܵܬ݂ܵܐ܀ ܘܝܼܕܲܥܬ̇ ܐܲܝܟܼ ܡܥܲܠܝܵܐ ܕܲܠܥܸܠ܀ ܐܲܝܟܼ ܥܵܒ݂ܵܐ ܕܩܲܝܣܹ̈ܐ ܒܢܵܪ̈ܓܹ̇ܐ ܨܲܠܲܚܘ ܬܲܪ̈ܥܹܐ܀ ܐܲܟ݂ܚ݇ܕܼܵܐ ܒܦܸܠܩܹ̈ܐ ܘܲܒ݂ܟ݂ܘܼܠܒܹ̈ܐ܀ ܐܲܪܡܝܼܘ ܘܐܲܘܩܸܕܼܘ ܒܢܘܼܪܵܐ ܡܲܩܕ̇ܫܵܟܼ܀ ܘܛܲܘܸܫܘ ܒܐܲܪܥܵܐ ܡܲܫܟ̇ܢܵܐ ܕܲܫܡܵܟܼ܀ ܘܐܸܡܲܪ݂ܘ ܒܠܸܒ̇ܗܘܿܢ ܕܢܲܘܒܸ̇ܕܼ ܐܸܢܘܿܢ ܐܲܟ݂ܚ݇ܕܼܵܐ܀ ܘܢܲܘܒܸ̇ܕܼ ܟܠܗܘܿܢ ܥܲܕܼܥܹܕܼܵܘ̈ܗܝ ܕܐܲܠܵܗܵܐ ܡ݂ܢ ܐܲܪܥܵܐ܀ ܐܵܬ݂ܘܵܬ݂̈ܗܘܿܢ ܠܵܐ ܚܙ݂ܵܘ܀ ܠܲܝܬ̇ ܬܘܼܒ݂ ܢܒ݂ܝܼܵܐ ܘܐܵܦܠܵܐ ܐܝܼܬ݂ ܥܲܡܲܢ ܚܲܟ̇ܝܼܡܵܐ܀ ܥܕܲܡܵܐ ܠܐܸܡܲܬ݂ܝ ܐܲܠܵܗܵܐ܀ ܡܚܲܣܸܕܼ ܒܥܸܠܕ̇ܒ݂ܵܒ݂ܵܐ ܘܡܲܪܓܸ̇ܙ ܠܲܫܡܵܟܼ ܠܥܵܠܲܡ܀ ܠܡܵܢܵܐ ܐܲܗܦܸܟ݂ܬ̇ ܐܝܼܕܼܵܟܼ ܘܝܲܡܝܼܢܵܟܼ ܡ݂ܢ ܓܵܘ ܥܹܐܕܼܵܟܼ܀ ܐܲܠܵܗܲܢ ܡܲܠܟܵܐ ܗ݇ܘ݂܀ ܕܲܦܩܲܕ̇ܬ̇ ܡ݂ܢ ܩܕܼܝܼܡ ܥܲܠ ܦܘܼܪܩܵܢܹܗ ܕܝܲܥܩܘܿܒ݂܀ ܐܲܢ݇ܬ̇ ܒܥܘܼܫܢܵܟܼ ܦܪܲܫܬ̇ ܝܲܡܵܐ܀ ܘܬܲܒܲܪܬ̇ ܪܹ̈ܫܲܝܗܘܿܢ ܕܬܲܢܝܼܢܹ̈ܐ ܒܡܲܝ̈ܵܐ܀ ܐܲܢ݇ܬ̇ ܪܲܨܸܨܬ̇ ܪܹ̈ܫܵܘܗܝ ܕܠܹܘܝܵܬܲܢ܀ ܘܝܲܗ݇ܒ݂ܬܵܝܗܝ ܡܹܐܟ݂ܘܼܠܬܵܐ ܠܥܲܡܵܐ ܥܲܫܝܼܢܵܐ܀ ܐܲܢ݇ܬ̇ ܒܲܙܲܥܬ̇ ܡܲܒ̇ܘܼܥܹ̈ܐ ܒܢܲܚܠܹ̈ܐ܀ ܐܲܢ݇ܬ̇ ܐܲܘܒܸ̇ܫܬ̇ ܢܲܗܪ̈ܵܘܵܬ݂ܵܐ ܥܲܫܝܼܢܹ̈ܐ܀ ܕܝܼܠܵܟ ܗ݇ܘ݂ ܐܝܼܡܵܡܵܐ ܘܕܼܝܼܠܵܟܼ ܗ݇ܘ݂ ܠܸܠܝܵܐ܀ ܐܲܢ݇ܬ̇ ܬܲܩܸܢܬ̇ ܢܘܼܗܪܵܐ ܕܫܸܡܫܵܐ܀ ܐܲܢ݇ܬ̇ ܐܲܩܝܼܡܬ̇ ܟܠܗܘܿܢ ܬܚܘܼܡܹ̈ܐ ܕܐܲܪܥܵܐ܀ ܩܲܝܛܵܐ ܘܣܲܬ݂ܘܵܐ ܐܲܢ݇ܬ̇ ܒܪܲܝܬ̇ ܐܸܢܘܿܢ܀ ܐܸܬ̇ܕܲܟ݂ܪ ܡܵܪܝܵܐ ܚܸܣܕܹܗ ܕܲܒ݂ܥܸܠܕ̇ܒ݂ܵܒ݂ܵܐ܀ ܥܲܡܵܐ ܣܲܟ݂ܠܵܐ ܐܲܪܓܸ̇ܙ ܠܲܫܡܵܟܼ܀ ܠܵܐ ܬܸܬܸ̇ܠ ܠܲܬ݂ܒ݂ܵܪܵܐ ܢܲܦ̮ܫܵܐ ܕܡܲܘܕܝܵܐ ܠܵܟܼ܀ ܘܢܲܦ̮̈ܫܵܬ݂ܵܐ ܕܡܸܣܟܹ̇ܢܲܝ̈ܟ ܠܵܐ ܬܸܛܥܸܐ ܠܥܵܠܲܡ܀ ܚܘܼܪ ܡܵܪܝܵܐ ܒܲܩܝܵܡܵܟܼ܀ ܡܸܛܠ ܕܐܸܬ݂ܡ̱ܠܝܼ ܕܲܝܪܹ̈ܝܗ̇ ܕܐܲܪܥܵܐ ܚܸܫܘܿܟ݂ܵܐ ܘܥܲܘܠܵܐ܀ ܠܵܐ ܢܸܬܸ̇ܒ݂ ܡܸܣܟܹ̇ܢܵܐ ܟܲܕܼ ܒܲܗܝܼܬ݂܀ ܒܵܝܫܹ̈ܐ ܘܡܸܣܟܹ̇ܢܹ̈ܐ ܢܫܲܒ̇ܚܘܼܢ ܠܲܫܡܵܟܼ܀ ܩܘܼܡ ܐܲܠܵܗܵܐ ܘܕܼܘܼܢ ܕܝܼܢܲܝ̈ܟ܀ ܐܸܬ̇ܕܲܟ݂ܪ ܚܸܣܕܵܟܼ ܕܡ݂ܢ ܣܲܟ݂ܠܹ̈ܐ ܕܟ݂ܠܝܘܿܡ܀ ܘܠܵܐ ܬܸܛܥܸܐ ܩܵܠܵܐ ܕܲܒ݂ܥܸܠܕ̇ܒ݂ܵܒܲܝ̈ܟ܀ ܘܲܕܼܠܘܼܚܝܵܐ ܕܐܲܝܠܹܝܢ ܕܩܵܝܡܝܼܢ ܥܠܲܝܟ܀ ܕܣܵܠܹ̇ܩ ܒܟ݂ܠܙܒܲܢ܀

ܐܲܘܕ̇ܝܼܢܲܢ ܠܵܟܼ ܐܲܠܵܗܵܐ܀ ܐܲܘܕ̇ܝܼܢܲܢ ܠܵܟܼ ܘܲܩ݂ܪܲܝܢ ܫܡܵܟܼ܀ ܘܐܸܫܬܲܥܝܼܢ ܟܠܗܹܝܢ ܬܸܕܼܡ̱ܪ̈ܵܬ݂ܵܟܼ܀ ܡܸܛܠ ܕܐܸܣܲܒ݂ ܙܲܒ݂ܢܵܐ ܘܐܸܢܵܐ ܒܲܬ݂ܪܝܼܨܘܼܬ݂ܵܐ ܐܹܕ̇ܘܼܢ܀ ܬܸܬ݂ܡܲܟܲܟܼ ܐܲܪܥܵܐ ܘܟ݂ܠܗܘܿܢ ܥܵܡܘܿܪܹ̈ܝܗ̇܀ ܐܲܢ݇ܬ̇ ܬܲܩܸܢܬ̇ ܠܥܵܡܘܿܪܹ̈ܝܗ̇܀ ܐܲܢ݇ܬ̇ ܐܸܡܲܪ݂ܬ̇ ܠܫܵܛܲܝ̈ܵܐ ܕܠܵܐ ܬܸܫܛܘܼܢ܀ ܘܲܠܪ̈ܲܫܝܼܥܹܐ ܕܠܵܐ ܬܪܝܼܡܘܼܢ ܩܲܪܢܵܐ܀ ܘܠܵܐ ܬܪܝܼܡܘܼܢ ܠܲܡܪܲܘܡܵܐ ܩܲܪܢ̱ܟ݂ܘܿܢ܀ ܘܲܬ݂ܡܲܠܠܘܼܢ ܒܨܲܘܪܵܐ ܪܵܡܵܐ܀ ܡܸܛܠ ܕܠܵܐ ܡܲܦܩܵܐ ܡ݂ܢ ܡܲܥܪ̱ܒ݂ܵܐ܀ ܘܐܵܦܠܵܐ ܡ݂ܢ ܡܲܕܼܒܪܵܐ ܕܛܘܼܪܹ̈ܐ܀ ܡܸܛܠ ܕܐܲܠܵܗܵܐ ܗ݇ܘ݂ ܕܲܝܵܢܵܐ܀ ܠܗܵܢܵܐ ܡܫܲܦܸܠ ܘܲܠܗܵܢܵܐ ܡܪܝܼܡ܀ ܡܸܛܠ ܕܟ݂ܵܣܵܐ ܒܐܝܼܕܹܗ ܕܡܵܪܝܵܐ܀ ܘܲܡܠܸܐ ܡܙܵܓ݂ܵܐ ܕܚܲܡܪܵܐ ܬܛܝܼܪܵܐ܀ ܐܲܪܟܸ̇ܢ ܡ݂ܢ ܗܵܢܵܐ ܠܗܵܢܵܐ܀ ܬܸܛܪܹܗ ܢܲܡܨܘܼܢ ܘܢܸܫܬ̇ܘܿܢ ܟܠܗܘܿܢ ܪ̈ܲܫܝܼܥܹܐ ܕܐܲܪܥܵܐ܀ ܘܐܸܢܵܐ ܐܸܚܸܐ ܠܥܵܠܲܡ܀ ܘܐܸܙܡܲܪ ܠܐܲܠܵܗܹܗ ܕܝܲܥܩܘܿܒ݂܀ ܟܠܗܹܝܢ ܩܲܪ̈ܢܵܬ݂ܵܐ ܕܪ̈ܲܫܝܼܥܹܐ ܐܹܓܲܕܸ̇ܡ܀ ܘܢܸܬ̇ܬ̇ܪ̈ܝܼܡܵܢ ܩܲܪ̈ܢܵܬ݂ܗܘܿܢ ܕܙܲܕ̇ܝܼܩܹ̈ܐ܀

ܝܑܼܕܼܝܼܥ ܒܲܝܗܘܼܕܼܵܐ ܐܲܠܵܗܵܐ܀ ܘܒ݂ܝܼܣܪܵܝܹܠ ܪܲܒ̇ ܫܡܹܗ܀ ܢܸܗܘܸܐ ܒܫܵܠܝܼܡ ܡܲܛܠܠܹܗ܀ ܘܡܲܥܡ̱ܪܹܗ ܒܨܸܗܝܘܿܢ܀ ܬܲܡܵܢ ܬܲܒܲܪ ܕܪ̈ܵܥܹܐ ܕܩܸܫ̈ܬܵܬ݂ܵܐ܀ ܙܲܝܢܵܐ ܘܣܲܝܦܵܐ ܒܲܩܪܵܒ݂ܵܐ܀ ܢܲܗܝܼܪ ܐܲܢ݇ܬ̇ ܘܲܫܒ݂ܝܼܚ ܡ݂ܢ ܛܘܼܪܵܟܼ ܥܲܫܝܼܢܵܐ܀ ܐܸܬ̇ܕܲܠܲܚܘ ܟܠܗܘܿܢ ܣܲܟܼ̈ܠܲܝ ܠܸܒܵܐ܀ ܘܲܕܼܡܸܟ݂ܘ ܫܸܢܵܬ݂ܗܘܿܢ ܓܲܒ݂ܪܹ̈ܐ ܚܲܝܠ̱ܬ݂ܵܢܹ̈ܐ܀ ܘܠܵܐ ܐܸܫܟܲܚܘ ܐܝܼܕܲܝ̈ܗܘܿܢ ܡ݂ܢ ܟܐܵܬ݂ܵܟܼ ܐܲܠܵܗܹܗ ܕܝܲܥܩܘܿܒ݂܀ ܢܵܡ݂ܘ ܪ̈ܵܟ݂ܒܲܝ ܪ̈ܲܟ݂ܫܵܐ ܘܐܲܢ݇ܬ̇ ܕܚܝܼܠ ܐܲܢ݇ܬ̇܀ ܡܲܢ݂ܘܼ ܢܩܘܼܡ ܩܕܼܵܡܲܝܟ ܒܗܵܢܵܐ ܪܘܼܓ݂ܙܵܐ܀ ܡ݂ܢ ܫܡܲܝܵܐ ܫܡܲܥܬ̇ ܕܝܼܢܵܐ܀ ܐܲܪܥܵܐ ܚܙܵܬ̤ ܘܕܸܚܠܲܬ̤܀ ܡܵܐ ܕܩܵܐܹ̇ܡ ܐܲܠܵܗܵܐ ܠܲܡܕܼܵܢ܀ ܘܲܠܡܸܦܪܲܩ ܠܟ݂ܠܗܘܿܢ ܡܸܣܟܹ̇ܢܹ̈ܐ ܕܐܲܪܥܵܐ܀ ܡܸܛܠ ܕܬܲܪܥܝܼܬܹܗ ܕܒܲܪܢܵܫܵܐ ܬܲܘܕܸ̇ܐ ܠܵܟܼ܀ ܘܫܲܪܟܵܐ ܕܚܸܡܬܹܗ ܬܲܦܪܸܩ ܪܘܼܓ݂ܙܵܐ܀ ܢܕܼܘܿܪܘ ܘܫܲܠܸܡܘ ܠܡܵܪܝܵܐ ܐܲܠܵܗܟ݂ܘܿܢ܀ ܟܠ ܕܲܚܕܼܝܼܪܝܼܢ ܠܹܗ ܢܲܘܒ̇ܠܘܼܢ ܩܘܼܪ̈ܒܵܢܹܐ ܠܲܕܼܚܝܼܠܵܐ܀ ܕܲܡܡܲܟܸ̇ܟܼ ܪܘܼܚܵܐ ܕܫܲܠܝܼܛܵܢܹ̈ܐ܀ ܘܲܕܼܚܝܼܠ ܥܲܠ ܡܲܠ̈ܟܹ̇ܐ ܕܐܲܪܥܵܐ܀

ܒܩܵܠܝ ܠܘܵܬ݂ ܐܲܠܵܗܵܐ ܩܪܹܝ݁ܬ݂ ܘܫܲܡܥܲܢܝ܀ ܘܐܲܪܝܼܡܹ̇ܬ݂ ܩܵܠܝ ܠܘܵܬܹܗ ܘܲܥܢܵܢܝ܀ ܒܝܲܘܡܵܐ ܕܐܘܼܠܨܵܢܝ ܠܡܵܪܝܵܐ ܒܥܹܝܬ݂܀ ܘܐܝܼܕܹܗ ܒܠܸܠܝܵܐ ܢܲܓܸ̇ܕܼܬܲܢܝ ܘܠܵܐ ܫܠܹ̇ܝܬ݂܀ ܘܠܲܝܬ̇ ܡܒܲܝܐܵܢܵܐ ܠܢܲܦ̮ܫܝ܀ ܐܸܬ̇ܕܲܟ݂ܪܹܬ݂ ܐܲܠܵܗܵܐ ܘܐܸܬ̇ܕܲܠܚܹ̇ܬ݂܀ ܘܲܪܢܹܝ݁ܬ݂ ܘܐܸܬ̇ܛܲܪܦܲܬ̤ ܪܘܼܚܝ܀ ܘܐܲܚܕ̇ܘܼܢܝ ܨܲܘܪ̈ܵܢܹܐ ܒܥܲܝܢܲܝ̈܀ ܚܸܪܫܹ̇ܬ ܘܠܵܐ ܡܲܠܠܹ݁ܬ݂܀ ܚܸܫ̇ܒܹ̇ܬ ܝܲܘ̈ܡܲܝ ܕܡ݂ܢ ܩܕܼܝܼܡ܀ ܘܲܫ̈ܢܲܝܵܐ ܕܡ݂ܢ ܥܵܠܡܝܼܢ ܐܸܬ̇ܕܲܟ݂ܪܹܬ݂܀ ܪܢܹܝ݁ܬ݂ ܒܠܸܠܝܵܐ ܘܲܒ݂ܠܹܒ̇ܝ ܪܢܹܝ݁ܬ݂܀ ܘܲܒ݂ܨܹܝ݁ܬ݂ ܪܘܼܚܝ ܘܐܸܡ̇ܪܹܬ݂܀ ܕܲܠܥܵܠܲܡ ܛܥܵܢܝ ܡܵܪܝܵܐ܀ ܘܠܵܐ ܡܲܘܣܸܦ ܬܘܼܒ݂ ܠܡܸܨܛܒ݂ܵܝܘܼ ܒܝܼ܀ ܐܵܘܕܲܠܡܵܐ ܠܥܵܠܲܡ ܡܲܥܒܲܪ ܛܲܝܒ̇ܘܼܬܹܗ܀ ܘܲܡܫܲܠܸܡ ܡܸܠܬܹܗ ܠܕܼܵܪܕܵܪ̈ܝܼܢ܀ ܐܵܘܛܵܥܹܐ݁ ܐܲܠܵܗܵܐ ܠܲܡܪܲܚܵܡܘܼ܀ ܐܵܘܚܵܡܹ̇ܠ ܪ̈ܲܚܡܵܘܗܝ ܒܪܘܼܓ݂ܙܹܗ܀ ܐܸܡ̇ܪܹܬ݂ ܕܲܟ݂ܪܝܼܗܘܼܬ݂ܝܼ ܗ݇ܝ݂܀ ܘܬܸܢܝܵܐ ܐܸܢܹܝܢ ܕܝܲܡܝܼܢܵܐ ܕܥܸܠܵܝܵܐ܀ ܡܸܛܠ ܕܐܸܬ̇ܕܲܟ݂ܪܹܬ݂ ܡ݂ܢ ܩܕܼܝܼܡ ܬܸܕܼܡ̱ܪ̈ܵܬ݂ܵܟܼ܀ ܘܲܪܢܹܝ݁ܬ݂ ܒܟ݂ܠܗܘܿܢ ܥܒ݂ܵܕܲܝ̈ܟ܀ ܘܲܒ݂ܨܸܢ̈ܥܵܬ݂ܵܟܼ ܪܢܹܝ݁ܬ݂܀ ܐܲܠܵܗܵܐ ܐܘܼܪܚܵܟܼ ܩܲܕ̇ܝܼܫܵܐ ܗ݇ܝ݂܀ ܘܠܲܝܬ̇ ܕܪܲܒ̇ ܐܲܝܟܼ ܐܲܠܵܗܲܢ ܐܲܢ݇ܬ̇ܘܼ ܐܲܠܵܗܵܐ ܕܲܥܒܲܕ̇ܬ̇ ܬܸܕܼܡ̱ܪ̈ܵܬ݂ܵܐ܀ ܘܚܲܘܝܼܬ̇ ܒܥܲܡܡܹ̈ܐ ܥܘܼܫܢܵܟܼ܀ ܘܲܦܪܲܩܬ̇ ܒܲܕܼܪܵܥܵܟܼ ܠܥܲܡܵܟܼ܀ ܠܲܒ݂ܢܲܝ̈ ܝܲܥܩܘܿܒ݂ ܘܝܲܘܣܸܦ܀ ܚܙܵܐܘܼܟܼ ܡܲܝ̈ܵܐ ܐܲܠܵܗܵܐ ܚܙܵܐܘܼܟܼ ܡܲܝ̈ܵܐ ܘܲܕܼܚܸܠ݂ܘ܀ ܐܵܦ ܬܗܘܿܡܹ̈ܐ ܙܵܥ݂ܘ ܘܲܥܢܵܢܹ̈ܐ ܪܙܲܦ݂ ܡܲܝ̈ܵܐ܀ ܝܲܗ݂݇ܒ݂ܘ ܩܵܠܵܐ ܫܡܲܝ̈ ܫܡܲܝܵܐ܀ ܐܵܦ ܓܹܐܪ̈ܲܝܟ ܦܵܪܚܝܼܢ܀ ܘܩܵܠܵܐ ܕܪ̈ܲܥܡܲܝܟ ܒܓ݂ܝܼܓ݂ܠܹ̈ܐ܀ ܐܲܢܗܲܪܘ ܒܲܪ̈ܩܲܝܟ ܠܬܹܒܹܝܠ܀ ܐܸܬ̇ܕܲܠܚܲܬ̤ ܘܙܵܥܲܬ݀ ܐܲܪܥܵܐ܀ ܒܝܲܡܵܐ ܐܘܼܪܚܵܟܼ ܘܲܫܒ݂ܝܼ̈ܠܲܝܟ ܒܡܲܝ̈ܵܐ ܣܲܓ̇ܝܼ̈ܐܹܐ܀ ܘܥܸܩ̈ܒ݂ܵܬ݂ܵܟܼ ܠܵܐ ܐܸܬ݂ܝܼܕܲܥ܀ ܕܲܒܲܪܬ̇ ܠܥܲܡܵܟܼ ܐܲܝܟܼ ܥܵܢ̈ܵܐ܀ ܒܐܝܼܕܼܵܐ ܕܡܘܼܫܹܐ ܘܕܲܐܗܪܘܿܢ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܘܲܥܕܼܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ܀

ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ܀

ܗܘܼܠܵܠܵܐ ܝܐ:

ܘܐܵܡܪܝܼܢ ܥܲܡ ܟܠܗܘܢ ܦܸܬ݂ܓ݂ܵܡܵܘ̈ܗܝ: ܗܲܠܸܠܘܼܝܵܗ

ܘܡܲܙܡܘܿܪܵܐ (ܫܲܒܲܚ ܠܐܲܠܵܗܵܐ ܡܥܲܫܢܵܢܲܢ)، ܐܵܡܪܝܼܢ ܠܹܗ ܒܩܵܠܵܐ ܪܲܒܵܐ.

ܨܠܘܿܬ݂ܵܐ: ܠܵܟܼ ܡܕܲܒ̇ܪܵܢܵܐ ܚܲܟ̇ܝܼܡܵܐ ܘܝܵܨܘܿܦܵܐ ܬܲܡܝܼܡܵܐ ܕܒܲܝܬܵܝܵܘ̈ܗܝ ܓܲܙܵܐ ܪܲܒܵܐ ܡܲܪܕܸ̇ܐ ܟܠ ܥܘܼܕܼܪ̈ܵܢܝܼܢ ܘܟ݂ܠ ܛܘܼܒ݂ܝܼ̈ܢ ܒܲܡܪܲܚܡܵܢܘܼܬܹܗ ܡܸܬ݂ܟܲܫܦܝܼܢܲܢ ܐܸܬ݂ܦܲܢ ܡܵܪܝ ܘܚܘܼܣ ܘܪܲܚܸܡܥܠܲܝܢ ܐܲܝܟܼ ܕܲܡܥܵܕܲܬ̇ ܒܟ݂ܠܥܸܕܵܢ ܡܵܪܵܐ ܕܟܼܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ:

ܥܲܡܝ ܨܘܼܬ݂ܘ ܢܵܡܘܿܣܝ ܘܐܸܬ̇ܛܦܝܼܣܘ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܥܲܡܝ ܨܘܼܬ݂ܘ ܢܵܡܘܿܣܝ ܘܐܸܬ̇ܛܦܝܼܣܘ. ܗܲܠܸܠܘܼܝܵܗ܀ ܘܲܨܠܵܘ ܐܸܕܼܢܲܝ̈ܟ̇ܘܿܢ ܠܡܸܠܵܘ̈ܗܝ ܕܦܘܼܡܝ. ܗܲܠܸܠܘܼܝܵܗ܀ ܗܵܐ ܓܹܝܪ ܐܸܦ̮ܬܲܚ ܦܘܼܡܝ ܒܡܲܬ݂ܠܹ̈ܐ. ܗܲܠܸܠܘܼܝܵܗ܀ ܘܐܹܡܲܪ ܦܸܠ̈ܐܵܬ݂ܵܐ ܕܡ݂ܢ ܩܕܼܝܼܡ. ܗܲܠܸܠܘܼܝܵܗ܀ ܐܲܝܠܹܝܢ ܕܲܫܡ݂ܥܲܢ ܝܑܼܕܲܥܢ ܐܸܢܹܝܢ. ܗܲܠܸܠܘܼܝܵܗ܀ ܘܐܵܦ ܐܲܝܠܹܝܢ ܕܐܲܒ݂ܵܗܲܝ̈ܢ ܐܸܫܬܲܥܝܼܘ ܠܲܢ. ܗܲܠܸܠܘܼܝܵܗ܀ ܕܠܵܐ ܢܟܲܣܹܐ ܡ݂ܢ ܒܢܲܝ̈ܗܘܿܢ. ܗܲܠܸܠܘܼܝܵܗ܀ ܐܸܠܵܐ ܠܕܼܵܪܵܐ ܐ݇ܚܪܹܢܵܐ ܢܸܫܬܲܥܸܐ. ܗܲܠܸܠܘܼܝܵܗ܀ ܬܸܫ̈ܒ̇ܚܵܬܹܗ ܕܡܵܪܝܵܐ ܘܚܲܝܠܹܗ. ܗܲܠܸܠܘܼܝܵܗ܀ ܘܬܸܕܼܡ̱ܪ̈ܵܬܹܗ ܕܲܥܒ݂ܲܕܼ. ܗܲܠܸܠܘܼܝܵܗ܀ ܕܐܲܩܝܼܡ ܣܵܗܕ̇ܘܼܬܹܗ ܒܝܲܥܩܘܿܒ݂. ܗܲܠܸܠܘܼܝܵܗ܀ ܘܢܵܡܘܿܣܹܗ ܣܵܡ ܒܝܼܣܪܵܝܹܠ. ܗܲܠܸܠܘܼܝܵܗ܀ ܐܲܝܟܼ ܕܦܲܩܸܕܼ ܠܐܲܒ݂ܵܗܲܝ̈ܢ. ܗܲܠܸܠܘܼܝܵܗ܀ ܕܢܲܘܕ̇ܥܘܼܢ ܠܲܒ݂ܢܲܝ̈ܗܘܿܢ. ܗܲܠܸܠܘܼܝܵܗ܀ ܕܢܸܕ̇ܥܘܼܢ ܕܵܪܵܐ ܐ݇ܚܪܹܢܵܐ. ܗܲܠܸܠܘܼܝܵܗ܀ ܒܢܲܝ̈ܵܐ ܕܡܸܬ݂ܝܲܠܕ̇ܝܼܢ ܘܩܵܝܡ݁ܝܼܢ. ܗܲܠܸܠܘܼܝܵܗ܀ ܕܢܸܫܬܲܥܘܼܢ ܠܲܒ݂ܢܲܝ̈ܗܘܿܢ. ܗܲܠܸܠܘܼܝܵܗ܀ ܕܢܸܗܘܸܐ ܣܲܒ݂ܪܗܘܿܢ ܒܐܲܠܵܗܵܐ. ܗܲܠܸܠܘܼܝܵܗ܀ ܘܠܵܐ ܢܸܛܥܘܿܢ ܥܒ݂ܵܕܼܵܘ̈ܗܝ ܕܐܲܠܵܗܵܐ. ܗܲܠܸܠܘܼܝܵܗ܀ ܘܦܘܼܩܕܵܢܵܘ̈ܗܝ ܢܸܛܪܘܼܢ. ܗܲܠܸܠܘܼܝܵܗ܀ ܘܠܵܐ ܢܸܗܘܘܿܢ ܐܲܝܟܼ ܐܲܒ݂ܵܗܲܝ̈ܗܘܿܢ. ܗܲܠܸܠܘܼܝܵܗ܀ ܕܵܪܵܐ ܒܝܼܫܵܐ ܘܲܡܡܲܪܡ̱ܪܵܢܵܐ. ܗܲܠܸܠܘܼܝܵܗ܀ ܕܵܪܵܐ ܕܠܵܐ ܐܲܬ݂ܩܸܢ ܠܸܒܹ̇ܗ. ܗܲܠܸܠܘܼܝܵܗ܀ ܘܠܵܐ ܗܲܝܡܸܢ ܒܐܲܠܵܗܵܐ ܕܪܘܼܚܹܗ. ܗܲܠܸܠܘܼܝܵܗ܀ ܒܢܵܘ̈ܗܝ ܕܐܲܦܪܹܝܡ ܕܲܡܬܲܚ݂ܘ ܝܲܬ݂ܪܵܐ ܘܲܫ݂ܕܼܵܘ ܒܩܸܫܬܵܐ. ܗܲܠܸܠܘܼܝܵܗ܀ ܘܲܗܦܲܟ݂ܘ ܒܝܲܘܡܵܐ ܕܲܩܪܵܒ݂ܵܐ. ܗܲܠܸܠܘܼܝܵܗ܀ ܥܲܠ ܕܠܵܐ ܢܛܲܪ݂ܘ ܩܝܵܡܹܗ ܕܐܲܠܵܗܵܐ. ܗܲܠܸܠܘܼܝܵܗ܀ ܘܲܒ݂ܢܵܡܘܿܣܹܗ ܠܵܐ ܨ݂ܒ݂ܵܘ ܠܲܡܗܲܠܵܟ݂ܘܼ. ܗܲܠܸܠܘܼܝܵܗ܀ ܘܲܛܥ݂ܵܘ ܥܒ݂ܵܕܼܵܘ̈ܗܝ ܘܬܸܕܼܡ̱ܪ̈ܵܬܹܗ. ܗܲܠܸܠܘܼܝܵܗ܀ ܕܚܲܘܝܼ ܐܸܢܘܿܢ ܩܕܼܵܡ ܐܲܒ݂ܵܗܲܝ̈ܗܘܿܢ. ܗܲܠܸܠܘܼܝܵܗ܀ ܕܲܥܒ݂ܲܕܼ ܬܸܕܼܡ̱ܪ̈ܵܬ݂ܵܐ ܒܐܲܪܥܵܐ ܕܡܸܨܪܹܝܢ. ܗܲܠܸܠܘܼܝܵܗ܀ ܘܲܒ݂ܚܲܩ̈ܠܵܬ݂ܵܐ ܕܨܵܥܵܢ. ܗܲܠܸܠܘܼܝܵܗ܀ ܬܪ݂ܲܥ ܝܲܡܵܐ ܘܐܲܥܒܲܪ ܐܸܢܘܿܢ. ܗܲܠܸܠܘܼܝܵܗ܀ ܘܐܲܩܝܼܡ ܡܲܝ̈ܵܐ ܐܲܝܟܼ ܕܲܒ݂ܙܸܩܹ̈ܐ. ܗܲܠܸܠܘܼܝܵܗ܀ ܕܲܒܲܪ ܐܸܢܘܿܢ ܒܐܝܼܡܵܡܵܐ ܒܲܥܢܵܢܵܐ. ܗܲܠܸܠܘܼܝܵܗ܀ ܘܟ݂ܠܹܗ ܠܸܠܝܵܐ ܒܙܲܗܪܵܐ ܕܢܘܼܪܵܐ. ܗܲܠܸܠܘܼܝܵܗ܀ ܬܪ݂ܲܥ ܛܲܪܵܢܵܐ ܒܡܲܕܼܒ̇ܪܵܐ. ܗܲܠܸܠܘܼܝܵܗ܀ ܘܐܲܫܩܝܼ ܐܸܢܘܿܢ ܐܲܝܟܼ ܕܡ݂ܢ ܬܗܘܿܡܵܐ ܪܲܒܵܐ. ܗܲܠܸܠܘܼܝܵܗ܀ ܐܲܦܸܩ ܪ̈ܵܕܲܝܵܐ ܡ݂ܢ ܟܹܐܦܵܐ. ܗܲܠܸܠܘܼܝܵܗ܀ ܘܲܪܕܼܵܘ ܡܲܝ̈ܵܐ ܐܲܝܟܼ ܢܲܗܪ̈ܵܘܵܬ݂ܵܐ. ܗܲܠܸܠܘܼܝܵܗ܀ ܘܐܲܘܣܸܦ ܬܘܼܒ݂ ܥܲܡܵܐ ܠܡܸܚܛܵܐ. ܗܲܠܸܠܘܼܝܵܗ܀ ܘܠܲܡܡܲܪܡܵܪܘܼ ܠܲܡܪܲܝܡܵܐ ܒܨܲܗܝܵܐ. ܗܲܠܸܠܘܼܝܵܗ܀ ܘܢܲܣܝܼܘ ܠܐܲܠܵܗܵܐ ܒܠܸܒ̇ܗܘܿܢ. ܗܲܠܸܠܘܼܝܵܗ܀ ܠܡܸܫܐܲܠ ܡܹܐܟ݂ܘܼܠܬܵܐ ܠܢܲܦ̮ܫܗܘܿܢ. ܗܲܠܸܠܘܼܝܵܗ܀ ܘܲܪܛܲܢ݂ܘ ܥܲܠ ܐܲܠܵܗܵܐ ܘܐܸܡܲܪ݂ܘ. ܗܲܠܸܠܘܼܝܵܗ܀ ܕܲܠܡܵܐ ܡܸܫܟܲܚ ܐܲܠܵܗܵܐ ܠܡܸܣܕܲܪ ܠܲܢ ܦܵܬ݂ܘܿܪܹ̈ܐ ܒܡܲܕܼܒ̇ܪܵܐ. ܗܲܠܸܠܘܼܝܵܗ܀ ܐܸܢ ܡ݂ܚܵܐ ܠܛܲܪܵܢܵܐ ܘܲܪ݂ܕܼܵܘ ܡܲܝ̈ܵܐ ܘܪܸ̈ܓ݂ܠܵܬ݂ܵܐ ܐܲܪܕ̇ܝܼ. ܗܲܠܸܠܘܼܝܵܗ܀ ܕܲܠܡܵܐ ܐܵܦ ܠܲܚܡܵܐ ܡܸܫܟܲܚ ܠܡܸܬܲܠ ܠܲܢ. ܗܲܠܸܠܘܼܝܵܗ܀ ܐܵܘܡܛܲܝܸܒ݂ ܡܹܐܟ݂ܘܼܠܬܵܐ ܠܥܲܡܹܗ. ܗܲܠܸܠܘܼܝܵܗ܀ ܡܸܛܠ ܗܵܢܵܐ ܫܡ݂ܲܥ ܡܵܪܝܵܐ ܘܲܪܓܸܙ݂. ܗܲܠܸܠܘܼܝܵܗ܀ ܘܢܘܼܪܵܐ ܐܸܚܕܲܬ̤ ܒܝܲܥܩܘܿܒ݂. ܗܲܠܸܠܘܼܝܵܗ܀ ܘܐܵܦ ܪܘܼܓ݂ܙܵܐ ܣܠܸܩ݂ ܒܝܼܣܪܵܝܹܠ. ܗܲܠܸܠܘܼܝܵܗ܀ ܥܲܠ ܕܠܵܐ ܗܲܝܡܸܢܘ ܒܐܲܠܵܗܵܐ. ܗܲܠܸܠܘܼܝܵܗ܀ ܘܠܵܐ ܣܲܒܲܪܘ ܠܦܘܼܪܩܵܢܹܗ. ܗܲܠܸܠܘܼܝܵܗ܀

ܘܲܦܩ݂ܲܕܼ ܠܲܥܢܵܢܹ̈ܐ ܡ݂ܢ ܠܥܸܠ. ܗܲܠܸܠܘܼܝܵܗ܀ ܘܬܲܪ̈ܥܹܐ ܕܲܫܡܲܝܵܐ ܐܸܬ݂ܦܲܬܲܚܘ. ܗܲܠܸܠܘܼܝܵܗ܀ ܐܲܚܸܬ݂ ܠܗܘܿܢ ܡܲܢܵܐ ܠܡܹܐܟܲܠ. ܗܲܠܸܠܘܼܝܵܗ܀ ܘܠܲܚܡܵܐ ܕܲܫܡܲܝܵܐ ܝܲܗ݂݇ܒ݂ ܠܗܘܿܢ. ܗܲܠܸܠܘܼܝܵܗ܀ ܠܲܚܡܵܐ ܕܡܲܠܲܐܟܹ̈ܐ ܐܸܟܲܠ݂ ܒܲܪܢܵܫܵܐ. ܗܲܠܸܠܘܼܝܵܗ܀ ܘܨܲܝܕܵܐ ܫܲܕܲܪ ܠܗܘܿܢ ܠܡܸܣܒܲܥ. ܗܲܠܸܠܘܼܝܵܗ܀ ܐܲܫܸܒ݂ ܪ̈ܘܼܚܹܐ ܒܲܫܡܲܝܵܐ. ܗܲܠܸܠܘܼܝܵܗ܀ ܘܕܲܒܲܪ ܒܥܘܼܫܢܹܗ ܠܬܲܝܡ̱ܢܵܐ. ܗܲܠܸܠܘܼܝܵܗ܀ ܐܲܚܸܬ݂ ܠܗܘܿܢ ܒܸܣܪܵܐ ܐܲܝܟܼ ܥܲܦܪܵܐ. ܗܲܠܸܠܘܼܝܵܗ܀ ܘܐܲܝܟܼ ܚܵܠܵܐ ܕܝܲܡܡܹ̈ܐ ܦܵܪܲܚܬ݂ܵܐ ܕܓܸܦܵܐ. ܗܲܠܸܠܘܼܝܵܗ܀ ܘܲܢܦܲܠܘ ܒܡܲܫ̱ܪ̈ܝܵܬ݂ܗܘܿܢ ܚܕܼܵܪ̈ܲܝ ܡܲܫܟ̇ܢܲܝ̈ܗܘܿܢ. ܗܲܠܸܠܘܼܝܵܗ܀ ܘܐܸܟܲܠ݂ܘ ܘܲܣܒܲܥ݂ܘ ܛܵܒ݂ ܘܲܪ̈ܓ݂ܝܼܓ݂ܵܬ݂ܗܘܿܢ ܝܲܗ݂݇ܒ݂ ܠܗܘܿܢ. ܗܲܠܸܠܘܼܝܵܗ܀ ܘܠܵܐ ܦܪܲܩܘ݂ ܡ݂ܢ ܪ̈ܓ݂ܝܼܓ݂ܵܬ݂ܗܘܿܢ. ܗܲܠܸܠܘܼܝܵܗ܀ ܘܥܲܕܼ ܡܹܐܟ݂ܘܼܠܬ̇ܗܘܿܢ ܒܦܘܼܡܗܘܿܢ. ܗܲܠܸܠܘܼܝܵܗ܀ ܪܘܼܓ݂ܙܹܗ ܕܐܲܠܵܗܵܐ ܣܠܸ݂ܩ ܒܗܘܿܢ. ܗܲܠܸܠܘܼܝܵܗ܀ ܘܩܲܛܸܠ ܡ݂ܢ ܥܲܬ̇ܝܼܪ̈ܲܝܗܘܿܢ. ܗܲܠܸܠܘܼܝܵܗ܀ ܘܠܲܓܼ̈ܒܲܝܵܐ ܕܝܼܣܪܵܝܹܠ ܐܲܒ݂ܪܸܟܼ. ܗܲܠܸܠܘܼܝܵܗ܀ ܒܗܵܠܹܝܢ ܟܠܗܹܝܢ ܚܛ݂ܵܘ. ܗܲܠܸܠܘܼܝܵܗ܀ ܘܬ݂ܘܼܒ݂ ܠܵܐ ܗܲܝܡܸܢܘ ܒܬܸܕܼܡ̱ܪ̈ܵܬܹܗ. ܗܲܠܸܠܘܼܝܵܗ܀ ܓܲܡܲܪܘ ܒܲܣܪܝܼܩܘܼܬ݂ܵܐ ܝܲܘܡܲܝ̈ܗܘܿܢ. ܗܲܠܸܠܘܼܝܵܗ܀ ܘܲܫ̈ܢܲܝܗܘܿܢ ܡܣܲܪܗ̱ܒ݂ܵܐܝܼܬ݂. ܗܲܠܸܠܘܼܝܵܗ܀ ܡܵܐ ܕܩܵܛܸ݁ܠ ܗ݇ܘܵܐ ܠܗܘܿܢ ܒܵܥܹܝ݁ܢ ܗ݇ܘܵܘ ܠܹܗ. ܗܲܠܸܠܘܼܝܵܗ܀ ܘܗܵܦ̇ܟ̇ܝܼܢ ܗ݇ܘܵܘ ܘܲܡܩܲܕ̇ܡܝܼܢ ܠܘܵܬܹܗ. ܗܲܠܸܠܘܼܝܵܗ܀ ܥܗ݂ܲܕܼܘ ܕܐܲܠܵܗܵܐ ܗ݇ܘ݂ ܥܵܕܼܘܿܪܗܘܿܢ. ܗܲܠܸܠܘܼܝܵܗ܀ ܘܐܲܠܵܗܵܐ ܡܪܲܝܡܵܐ ܦܵܪܘܿܩܗܘܿܢ. ܗܲܠܸܠܘܼܝܵܗ܀ ܪܲܚܡܘܼܗܝ ܒܦܘܼܡܗܘܿܢ ܘܲܒ݂ܠܸܫܵܢܗܘܿܢ ܟܲܕܸܒ݂ܘ ܒܹܗ. ܗܲܠܸܠܘܼܝܵܗ܀ ܠܸܒ̇ܗܘܿܢ ܠܵܐ ܐܲܬ݂ܩܸܢܘ ܥܲܡܹܗ ܘܠܵܐ ܗܲܝܡܸܢܘ ܒܲܩܝܵܡܹܗ. ܗܲܠܸܠܘܼܝܵܗ܀ ܘܗܘ݀ ܡܪܲܚܡܵܢ ܘܫܵܒܸܩ݁ ܚܛܵܗܹ̈ܐ ܘܠܵܐ ܡܚܲܒܸܠ. ܗܲܠܸܠܘܼܝܵܗ܀ ܡܲܣܓܸ̇ܐ ܠܡܲܗܦܵܟ݂ܘܼ ܪܘܼܓ݂ܙܹܗ ܘܠܵܐ ܡܥܝܼܪ ܟܠܵܗ ܚܸܡܬܹܗ. ܗܲܠܸܠܘܼܝܵܗ܀ ܘܐܸܬ̇ܕ̇ܟܲܪ ܕܒܸܣܪܵܐ ܐܸܢܘܿܢ. ܗܲܠܸܠܘܼܝܵܗ܀ ܪܘܼܚܵܐ ܕܐܵܙܵܠ݇ܐ ܘܠܵܐ ܗܵܦ̇ܟܵܐ. ܗܲܠܸܠܘܼܝܵܗ܀ ܗܸܢܘܿܢ ܡܲܪܡ̱ܪܘܼܗܝ ܒܡܲܕܼܒ̇ܪܵܐ. ܗܲܠܸܠܘܼܝܵܗ܀ ܘܐܲܪܓ̇ܙܘܼܗܝ ܒܐܲܫܝܼܡܘܿܢ. ܗܲܠܸܠܘܼܝܵܗ܀ ܘܲܗܦ݂ܲܟ݂ܘ ܘܢܲܣܝܼܘ ܠܐܲܠܵܗܵܐ. ܗܲܠܸܠܘܼܝܵܗ܀ ܘܲܠܩܲܕ̇ܝܼܫܵܐ ܕܝܼܣܪܵܝܹܠ ܓܲܪܸܓ݂ܘ. ܗܲܠܸܠܘܼܝܵܗ܀ ܘܠܵܐ ܐܸܬ̇ܕ̇ܟܲܪܘ ܐܝܼܕܹܗ ܝܲܘܡܵܐ ܕܲܦܪ݂ܲܩ ܐܸܢܘܿܢ ܡ݂ܢ ܐܵܠܘܿܨܵܐ. ܗܲܠܸܠܘܼܝܵܗ܀ ܕܲܥܒܲܕܼ ܒܡܸܨܪܝܹܢ ܐܵܬܼ̈ܘܵܬܹܗ. ܗܲܠܸܠܘܼܝܵܗ܀ ܘܬܸܕܼܡ̱ܪ̈ܵܬܹܗ ܒܚܲܩ̈ܠܵܬ݂ܵܐ ܕܨܵܥܵܢ. ܗܲܠܸܠܘܼܝܵܗ܀ ܕܲܗܦ݂ܲܟܼ ܢܲܗܪ̈ܵܘܵܬ݂ܗܘܿܢ ܠܲܕܼܡܵܐ. ܗܲܠܸܠܘܼܝܵܗ܀ ܘܪ̈ܵܕܲܝܗܘܿܢ ܕܠܵܐ ܢܸܫܬ̇ܘܿܢ ܡܲܝ̈ܵܐ. ܗܲܠܸܠܘܼܝܵܗ܀ ܫܲܕܲܪ ܥܠܲܝܗܘܿܢ ܚܲܠܘܼܛܵܐ ܘܐܸܟܲܠ݂ ܐܸܢܘܿܢ. ܗܲܠܸܠܘܼܝܵܗ܀ ܘܐܘܼܪ̈ܕ̇ܥܹܐ ܘܚܲܒܸܠ ܐܸܢܘܿܢ. ܗܲܠܸܠܘܼܝܵܗ܀ ܝܲܗ݂݇ܒ݂ ܠܩܲܡܨܵܐ ܥܲܠ̈ܠܵܬ݂ܗܘܿܢ. ܗܲܠܸܠܘܼܝܵܗ܀ ܘܠܹܐܘܲܬ݂ܗܘܿܢ ܠܙܵܚܠܵܐ. ܗܲܠܸܠܘܼܝܵܗ܀ ܬܒܲܪ݂ ܒܒܲܪܕܼܵܐ ܓܘܼܦܢܲܝ̈ܗܘܿܢ. ܗܲܠܸܠܘܼܝܵܗ܀ ܘܬܹܐܢܲܝ̈ܗܘܿܢ ܒܲܓ݂ܠܝܼܕܼܵܐ. ܗܲܠܸܠܘܼܝܵܗ܀ ܐܲܫܠܸܡ ܠܒܲܪܕܼܵܐ ܒܥܝܼܪܗܘܿܢ. ܗܲܠܸܠܘܼܝܵܗ܀ ܘܩܸܢܝܵܢܗܘܿܢ ܠܝܲܩܕܵܢܵܐ. ܗܲܠܸܠܘܼܝܵܗ܀ ܫܲܕܲܪ ܥܠܲܝܗܘܿܢ ܚܸܡܬ݂ܵܐ ܕܪܘܼܓ݂ܙܹܗ. ܗܲܠܸܠܘܼܝܵܗ܀ ܚܸܡܬ݂ܵܐ ܘܪܘܼܓ݂ܙܵܐ ܘܐܘܼܠܨܵܢܵܐ. ܗܲܠܸܠܘܼܝܵܗ܀ ܫܲܕܲܪ ܒܝܲܕܼ ܡܲܠܲܐܟ݂ܵܐ ܒܝܼܫܵܐ. ܗܲܠܸܠܘܼܝܵܗ܀ ܘܲܬ݂ܪܲܥ ܫܒ݂ܝܼܠܹ̈ܐ ܒܝܼܫܹ̈ܐ. ܗܲܠܸܠܘܼܝܵܗ܀ ܘܠܵܐ ܚ݂ܣܲܟܼ ܡ݂ܢ ܡܲܘܬܵܐ ܢܲܦ̮̈ܫܵܬ݂ܗܘܿܢ. ܗܲܠܸܠܘܼܝܵܗ܀ ܘܚܲܝ̈ܘܵܬ݂ܗܘܿܢ ܠܡܲܘܬܵܐ ܐܲܫܠܸܡ. ܗܲܠܸܠܘܼܝܵܗ܀ ܩܲܛܸܠ ܟܠ ܒܘܼܟ݂ܪܹ̈ܐ ܕܡܸܨܪܹܝܢ. ܗܲܠܸܠܘܼܝܵܗ܀ ܪܹܫ ܟܠܹܗ ܝܲܠܕ̇ܗܘܿܢ ܒܡܲܫܟ̇ܢܵܐ ܕܚܵܡ. ܗܲܠܸܠܘܼܝܵܗ܀

ܐܲܫܩܸܠ ܠܥܲܡܹܗ ܐܲܝܟܼ ܥܵܢ̈ܵܐ. ܗܲܠܸܠܘܼܝܵܗ܀ ܘܕܲܒܲܪ ܐܸܢܘܿܢ ܐܲܝܟܼ ܓܙܵܪܵܐ ܒܡܲܕܼܒ̇ܪܵܐ. ܗܲܠܸܠܘܼܝܵܗ܀ ܐܲܫܪܝܼ ܐܸܢܘܿܢ ܒܣܲܒ݂ܪܵܐ ܘܠܵܐ ܕܚܸܠ݂ܘ. ܗܲܠܸܠܘܼܝܵܗ܀ ܘܠܲܒ݂ܥܸܠܕ̇ܒ݂ܵܒܲܝ̈ܗܘܿܢ ܟܲܣܝܼ ܝܲܡܵܐ. ܗܲܠܸܠܘܼܝܵܗ܀ ܐܲܝܬ̇ܝܼ ܐܸܢܘܿܢ ܠܲܬ݂ܚܘܼܡܵܐ ܕܩܘܼܕܼܫܹܗ. ܗܲܠܸܠܘܼܝܵܗ܀ ܠܗܵܢܵܐ ܛܘܼܪܵܐ ܕܲܩܢܵܬ݀ ܝܲܡܝܼܢܹܗ. ܗܲܠܸܠܘܼܝܵܗ܀ ܐܲܘܒܸ̇ܕ ܡ݂ܢ ܩܕܼܵܡܲܝܗܘܿܢ ܥܲܡܡܹ̈ܐ. ܗܲܠܸܠܘܼܝܵܗ܀ ܘܐܲܪܡܝܼ ܐܸܢܘܿܢ ܒܚܲܒ݂ܠܹ̈ܐ ܕܝܵܪܬ̇ܘܼܬܹܗ. ܗܲܠܸܠܘܼܝܵܗ܀ ܘܲܫܪ݂ܵܘ ܒܡܲܫܟ̇ܢܲܝ̈ܗܘܿܢ ܫܲܒ݂ܛܹ̈ܐ ܕܝܼܣܪܵܝܹܠ. ܗܲܠܸܠܘܼܝܵܗ܀ ܢܲܣܝܼܘ ܘܡܲܪܡܲܪܘ ܠܐܲܠܵܗܵܐ ܡܪܲܝܡܵܐ. ܗܲܠܸܠܘܼܝܵܗ܀ ܘܣܵܗ̈ܕ̇ܘܵܬܹܗ ܠܵܐ ܢܛܲܪܘ. ܗܲܠܸܠܘܼܝܵܗ܀ ܘܲܗܦܲܟ݂ܘ ܘܕܲܓܸ̇ܠܘ ܐܲܝܟܼ ܐܲܒ݂ܵܗܲܝ̈ܗܘܿܢ. ܗܲܠܸܠܘܼܝܵܗ܀ ܘܐܸܬ݂ܗ̱ܦܸܟ݂ܘ ܐܲܝܟܼ ܩܸܫܬܵܐ ܢܟ݂ܝܼܠܬܵܐ. ܗܲܠܸܠܘܼܝܵܗ܀ ܐܲܪܓ̇ܙܘܼܗܝ ܒܲܥ̈ܠܵܘܵܬ݂ܗܘܿܢ ܘܒܲܦܬܲܟ݂ܪ̈ܲܝܗܘܿܢ ܐܲܛܢܘܼܗܝ. ܗܲܠܸܠܘܼܝܵܗ܀ ܘܲܫܡܲܥ݂ ܐܲܠܵܗܵܐ ܘܐܸܬ݂ܚܲܡܲܬ݂. ܗܲܠܸܠܘܼܝܵܗ܀ ܘܲܪܓܸܙ݂ ܛܵܒ݂ ܥܲܠ ܝܑܼܣܪܵܝܹܠ. ܗܲܠܸܠܘܼܝܵܗ܀ ܘܲܛܥ݂ܵܐ ܠܡܲܫܟ̇ܢܵܐ ܕܫܝܼܠܘܿ. ܗܲܠܸܠܘܼܝܵܗ܀ ܡܲܫܟ̇ܢܵܐ ܕܲܫܪ݂ܵܐ ܒܹܝܬ݂ ܒܢܲܝ̈ܢܵܫܵܐ. ܗܲܠܸܠܘܼܝܵܗ܀ ܝܲܗ݂݇ܒ݂ ܠܲܫܒ݂ܝܼܬ݂ܵܐ ܥܲܡܹܗ ܘܬܸܫܒ̇ܘܿܚܬܹܗ ܒܐܝܼܕܼܵܐ ܕܐܵܠܘܿܨܵܐ. ܗܲܠܸܠܘܼܝܵܗ܀ ܐܲܫܠܸܡ ܥܲܡܹܗ ܠܚܲܪܒܵܐ ܘܐܲܗܡܝܼ ܡ݂ܢ ܝܵܪܬ̇ܘܼܬܹܗ. ܗܲܠܸܠܘܼܝܵܗ܀ ܠܓܲܕ̇ܘܼܕܲܝ̈ܗܘܿܢ ܐܸܟ݂ܠܲܬ݀ ܢܘܼܪܵܐ. ܗܲܠܸܠܘܼܝܵܗ܀ ܘܲܒ݂ܬ݂ܘܼ̈ܠܵܬ݂ܗܘܿܢ ܐܸܬ̇ܛܲܪܲܦ. ܗܲܠܸܠܘܼܝܵܗ܀ ܟܵܗܢܲܝ̈ܗܘܿܢ ܢܦܲܠ݂ܘ ܒܚܲܪܒܵܐ. ܗܲܠܸܠܘܼܝܵܗ܀ ܘܐܲܪ̈ܡ̱ܠܵܬ݂ܗܘܿܢ ܠܵܐ ܐܸܬ݂ܒܲܟ̇ܝܼ. ܗܲܠܸܠܘܼܝܵܗ܀ ܐܸܬ̇ܬ̇ܥܝܼܪ ܡܵܪܝܵܐ ܐܲܝܟܼ ܕܲܡܟܵܐ. ܗܲܠܸܠܘܼܝܵܗ܀ ܘܐܲܝܟܼ ܓܲܒ݂ܪܵܐ ܕܢܲܦܨܹܗ ܚܲܡܪܹܗ. ܗܲܠܸܠܘܼܝܵܗ܀ ܡܚ݂ܵܐ ܠܲܒ݂ܥܸܠܕ̇ܒ݂ܵܒ݂ܵܘ̈ܗܝ ܠܒܸܣܬ̇ܪܹܗ. ܗܲܠܸܠܘܼܝܵܗ܀ ܘܚܸܣܕܵܐ ܕܥܵܠܡܵܐ ܝܲܗ݂݇ܒ݂ ܠܗܘܿܢ. ܗܲܠܸܠܘܼܝܵܗ܀ ܐܲܣܠܝܼ ܠܡܲܫܟܢܵܐ ܕܝܲܘܣܸܦ. ܗܲܠܸܠܘܼܝܵܗ܀ ܘܲܒ݂ܫܲܒ݂ܛܵܐ ܕܐܲܦܪܹܝܡ ܠܵܐ ܐܸܬ݂ܪܲܥܝܼ. ܗܲܠܸܠܘܼܝܵܗ܀ ܓ݂ܒ݂ܵܐ ܠܫܲܪܒ̇ܬ݂ܵܐ ܕܲܝܗܘܼܕܼܵܐ. ܗܲܠܸܠܘܼܝܵܗ܀ ܠܛܘܼܪܵܐ ܕܨܸܗܝܘܿܢ ܕܲܪܚܸܡ݂. ܗܲܠܸܠܘܼܝܵܗ܀ ܒܢ݂ܵܐ ܥܲܠ ܪܲܘܡܵܐ ܡܲܩܕ̇ܫܹܗ. ܗܲܠܸܠܘܼܝܵܗ܀ ܘܒܲܐܪܥܵܐ ܐܲܬ݂ܩܢܹܗ ܠܥܵܠܲܡ. ܗܲܠܸܠܘܼܝܵܗ܀ ܘܲܓ݂ܒ݂ܵܐ ܠܕܼܵܘܝܼܕܼ ܥܲܒ݂ܕܹ̇ܗ. ܗܲܠܸܠܘܼܝܵܗ܀ ܘܕܲܒ݂ܪܹܗ ܡ݂ܢ ܓܙܵܪܵܐ ܕܥܵܢ̈ܵܐ. ܗܲܠܸܠܘܼܝܵܗ܀ ܘܡ݂ܢ ܒܸܣܬܲܪ ܥܵܢ̈ܵܐ ܕܡܲܝ̈ܢ̱ܩܵܢ. ܗܲܠܸܠܘܼܝܵܗ܀ ܠܡܸܪܥܵܐ ܠܝܲܥܩܘܿܒ݂ ܥܲܡܹܗ ܘܠܝܼܣܪܵܝܹܠ ܝܵܪܬ̇ܘܼܬܹܗ. ܗܲܠܸܠܘܼܝܵܗ܀ ܘܲܪܥ݂ܵܐ ܐܸܢܘܿܢ ܒܬܲܡܝܼܡܘܼܬ݂ܵܐ ܕܠܸܒܹ̇ܗ. ܗܲܠܸܠܘܼܝܵܗ܀ ܘܲܒ݂ܣܘܼܟܵܠܵܐ ܕܐܝܼ̈ܕܼܵܘܗܝ ܕܲܒܲܪ ܐܸܢܘܿܢ. ܗܲܠܸܠܘܼܝܵܗ܀

ܐܲܠܵܗܵܐ ܥܲܠ ܥܲܡܡܹ̈ܐ ܠܝܵܪܬ̇ܘܼܬ݂ܵܟܼ. ܗܲܠܸܠܘܼܝܵܗ܀ ܘܛܲܡܐܘܼܗܝ ܠܗܲܝܟ̇ܠܵܟܼ ܩܲܕ̇ܝܼܫܵܐ. ܗܲܠܸܠܘܼܝܵܗ܀ ܘܥܲܒ݂ܕ̇ܘܼܗ̇ ܠܐܘܿܪܸܫܠܸܡ ܚܲܪܒ̇ܬ݂ܵܐ. ܗܲܠܸܠܘܼܝܵܗ܀ ܝܲܗ݂݇ܒ݂ܘ ܫ̈ܠܲܕܹ̇ܐ ܕܥܲܒ݂ܕܲܝ̈ܟ ܡܹܐܟ݂ܘܼܠܬܵܐ ܠܦܵܪܲܚܬ݂ܵܐ ܕܲܫܡܲܝܵܐ. ܗܲܠܸܠܘܼܝܵܗ܀ ܘܒܸܣܪܵܐ ܕܙܲܕ̇ܝܼܩܲܝ̈ܟ ܠܚܲܝܘ̱ܬ݂ܵܐ ܕܐܲܪܥܵܐ. ܗܲܠܸܠܘܼܝܵܗ܀ ܐܸܫܲܕܼܘ ܕܸܡܗܘܿܢ ܐܲܝܟܼ ܡܲܝ̈ܵܐ ܚܕܼܵܪܹܝܗ̇ ܕܐܘܿܪܸܫܠܸܡ ܘܠܲܝܬ̇ ܕܩܵܒܲܪ. ܗܲܠܸܠܘܼܝܵܗ܀ ܗ݀ܘܲܝܢ ܚܸܣܕܵܐ ܠܲܫܒ݂ܵܒܲܝ̈ܢ. ܗܲܠܸܠܘܼܝܵܗ܀ ܘܡܘܼܝܵܩܵܐ ܘܒ݂ܘܼܙܵܚܵܐ ܠܐܲܝܠܹܝܢ ܕܲܚܕܼܵܪܲܝܢ ܐܸܢܘܿܢ. ܗܲܠܸܠܘܼܝܵܗ܀ ܥܕܲܡܵܐ ܠܐܸܡܲܬ݂ܝ ܪܵܓܸܙ݁ ܐܲܢ݇ܬ̇ ܡܵܪܝܵܐ. ܗܲܠܸܠܘܼܝܵܗ܀ ܘܝܵܩܸܕܼ݁ ܐܲܝܟܼ ܢܘܼܪܵܐ ܪܘܼܓ݂ܙܵܟܼ. ܗܲܠܸܠܘܼܝܵܗ܀ ܐܲܫܘܿܕܼ ܪܘܼܓ݂ܙܵܟܼ ܥܲܠ ܥܲܡܡܹ̈ܐ ܐܲܝܠܹܝܢ ܕܠܵܐ ܝܲܕܼܥܘܼܟܼ. ܗܲܠܸܠܘܼܝܵܗ܀ ܘܥܲܠ ܡܲܠ̈ܟ̇ܘܵܬ݂ܵܐ ܐܲܝܠܹܝܢ ܕܒܲܫܡܵܟܼ ܠܵܐ ܩܪ̈ܲܝ. ܗܲܠܸܠܘܼܝܵܗ܀ ܡܸܛܠ ܕܐܲܟ݂ܠܘܼܗܝ ܠܝܲܥܩܘܿܒ݂ ܘܲܠܕܲܝܪܹܗ ܚܪ݂ܲܒ݂ܘ. ܗܲܠܸܠܘܼܝܵܗ܀ ܠܵܐ ܬܸܬ̇ܕ̇ܟܲܪ ܠܲܢ ܚܛܵܗܲܝ̈ܢ ܩܲܕܼܡܵܝܹ̈ܐ. ܗܲܠܸܠܘܼܝܵܗ܀ ܒܲܥܓܲܠ ܢܩܲܕ̇ܡܘܼܢܵܢ ܪ̈ܲܚܡܲܝܟ. ܗܲܠܸܠܘܼܝܵܗ܀ ܡܸܛܠ ܕܐܸܬ݂ܡܲܟܲܟ݂ܢ ܛܵܒ݂. ܗܲܠܸܠܘܼܝܵܗ܀ ܥܲܕܲܪܲܝܢ ܐܲܠܵܗܵܐ ܦܵܪܘܿܩܲܢ. ܗܲܠܸܠܘܼܝܵܗ܀ ܡܸܛܠ ܐܝܼܩܵܪܵܐ ܕܲܫܡܵܟܼ. ܗܲܠܸܠܘܼܝܵܗ܀ ܚܲܣܵܢ ܘܦܲܨܵܢ ܡ݂ܢ ܚܛܵܗܲܝ̈ܢ ܡܸܛܠ ܫܡܵܟܼ. ܗܲܠܸܠܘܼܝܵܗ܀ ܕܠܵܐ ܢܹܐܡܪܘܼܢ ܥܲܡܡܹ̈ܐ ܐܲܝܟܵܘ ܐܲܠܵܗܗܘܿܢ. ܗܲܠܸܠܘܼܝܵܗ܀ ܬܸܬ݂ܝܼܕܲܥ ܒܥܲܡܡܹ̈ܐ ܠܥܹܢܲܝܢ. ܗܲܠܸܠܘܼܝܵܗ܀ ܬܒܲܥܬ݂ܵܐ ܕܲܕܼܡܵܐ ܕܥܲܒ݂ܕܲܝ̈ܟ ܕܐܸܬ݂ܐ̱ܫܸܕܼ. ܗܲܠܸܠܘܼܝܵܗ܀ ܬܸܥܘܿܠ ܩܕܼܵܡܲܝܟ ܐܸܢܲܩܬܹܗ ܕܐܲܣܝܼܪܵܐ. ܗܲܠܸܠܘܼܝܵܗ܀ ܒܪܲܒ̇ܘܼܬ݂ܵܐ ܕܲܕܼܪܵܥܵܟܼ ܫܪܝܼ ܒܢܲܝ̈ܵܐ ܡ݂ܢ ܡܲܘܬܵܐ. ܗܲܠܸܠܘܼܝܵܗ܀ ܘܲܦܪܘܿܥ ܠܲܫܒ݂ܵܒܲܝ̈ܢ ܚܲܕܼ ܒܫܲܒ݂ܥܵܐ ܒܥܘܼܒ̇ܗܘܿܢ. ܗܲܠܸܠܘܼܝܵܗ܀ ܚܸܣܕܵܐ ܕܚܲܣܕ̇ܘܼܟܼ ܡܵܪܝܵܐ. ܗܲܠܸܠܘܼܝܵܗ܀ ܘܲܚܢܲܢ ܥܲܡܵܟܼ ܘܥܵܢ̈ܵܐ ܕܡܲܪܥܝܼܬ݂ܵܟܼ. ܗܲܠܸܠܘܼܝܵܗ܀ ܢܲܘܕܸ̇ܐ ܠܵܟܼ ܠܥܵܠܲܡ. ܗܲܠܸܠܘܼܝܵܗ܀ ܘܲܠܕܼܵܪܕܵܪ̈ܝܼܢ ܢܸܫܬܲܥܸܐ ܬܸܕܼܡ̱ܪ̈ܵܬ݂ܵܟܼ. ܗܲܠܸܠܘܼܝܵܗ܀

ܪܵܥܝܹܗ ܕܝܼܣܪܵܝܹܠ ܨܘܼܬ݂. ܗܲܠܸܠܘܼܝܵܗ܀ ܘܕܲܒܲܪ ܐܲܝܟܼ ܥܵܢ̈ܵܐ ܠܝܲܘܣܸܦ. ܗܲܠܸܠܘܼܝܵܗ܀ ܝܵܬܹܒ݂݁ ܥܲܠ ܟܪ̈ܘܿܒܹܐ ܐܸܬ݂ܓܲܠܝܝ. ܗܲܠܸܠܘܼܝܵܗ܀ ܩܕܼܵܡ ܐܲܦܪܹܝܡ ܘܒܸܢܝܵܡܹܝܢ ܘܲܡܢܲܫܹܐ. ܗܲܠܸܠܘܼܝܵܗ܀ ܚܲܘܵܐ ܓܲܢ݇ܒܵܪܘܼܬ݂ܵܟܼ ܘܬ݂ܵܐ ܠܦܘܼܪܩܵܢܲܢ. ܗܲܠܸܠܘܼܝܵܗ܀ ܐܲܠܵܗܵܐ ܚܲܝܠ̱ܬ݂ܵܢܵܐ ܐܲܦܢܵܢ. ܗܲܠܸܠܘܼܝܵܗ܀ ܘܐܲܢܗܲܪ ܐܲܦܲܝ̈ܟ ܘܢܸܬ݂ܦܪܸܩ. ܗܲܠܸܠܘܼܝܵܗ܀ ܡܵܪܝܵܐ ܐܲܠܵܗܵܐ ܚܲܝܠ̱ܬ݂ܵܢܵܐ. ܗܲܠܸܠܘܼܝܵܗ܀ ܥܕܲܡܵܐ ܠܐܸܡܲܬ݂ܝ ܪܵܓܹܙ݁ ܐܲܢ݇ܬ̇ ܥܲܠ ܨܠܘܿܬܹܗ ܕܥܲܒ݂ܕܵܟܼ. ܗܲܠܸܠܘܼܝܵܗ܀ ܐܲܘܟܸ̇ܠܬ̇ ܐܸܢܘܿܢ ܠܲܚܡܵܐ ܒܕܸܡܥ̱ܬ݂ܵܐ. ܗܲܠܸܠܘܼܝܵܗ܀ ܘܐܲܫܩܝܼܬ̇ ܐܸܢܘܿܢ ܒܕܸܡܥ̱ܬ݂ܵܐ. ܗܲܠܸܠܘܼܝܵܗ܀ ܥܒܲܕ̇ܬܵܢ ܪܸܢܝܵܐ ܠܲܫܒ݂ܵܒܲܝ̈ܢ. ܗܲܠܸܠܘܼܝܵܗ܀ ܘܲܒ݂ܥܸܠܕ̇ܒ݂ܵܒܲܝ̈ܢ ܡܲܝܸܩܘ ܒܲܢ. ܗܲܠܸܠܘܼܝܵܗ܀ ܐܲܠܵܗܵܐ ܚܲܝܠܬ݂ܵܢܵܐ ܐܲܦܢܵܢ. ܗܲܠܸܠܘܼܝܵܗ܀ ܘܐܲܢܗܲܪ ܐܲܦܲܝ̈ܟ ܘܢܸܬ݂ܦܪܸܩ. ܗܲܠܸܠܘܼܝܵܗ܀ ܓܦܸܬܵܐ ܐܲܦܸܩܬ̇ ܡ݂ܢ ܡܸܨܪܹܝܢ. ܗܲܠܸܠܘܼܝܵܗ܀ ܘܐܲܘܒܸ̇ܕ̇ܬ̇ ܥܲܡܡܹ̈ܐ ܘܲܢܨܲܒ݂ܬܵܗ̇. ܗܲܠܸܠܘܼܝܵܗ܀ ܚܵܪܬ̇ ܒܵܗ̇ ܘܲܢܨܲܒ݂ܬ̇ ܥܸܩܵܪܵܗ̇. ܗܲܠܸܠܘܼܝܵܗ܀ ܘܲܡܠܵܬ̤ ܐܲܪܥܵܐ ܡܸܢܵܗ̇. ܗܲܠܸܠܘܼܝܵܗ܀ ܘܐܸܬ݂ܟܲܣܝܼܘ ܛܘܼܪܹ̈ܐ ܡ݂ܢ ܛܸܠܵܠܵܗ̇. ܗܲܠܸܠܘܼܝܵܗ܀ ܘܥܲܘ̈ܦܹܝܗ̇ ܥܲܠ ܐܲܪ̈ܙܵܘܗܝ ܕܐܲܠܵܗܵܐ. ܗܲܠܸܠܘܼܝܵܗ܀ ܫܕܼܵܬ̤ ܓܝܵܕܹܝ̈ܗ̇ ܥܕܲܡܵܐ ܠܝܲܡܵܐ. ܗܲܠܸܠܘܼܝܵܗ܀ ܘܥܲܠ ܢܲܗܪ̈ܵܘܵܬ݂ܵܐ ܥܢܵܩܹ̈ܝܗ̇. ܗܲܠܸܠܘܼܝܵܗ܀ ܠܡܵܢܵܐ ܬܪܲܥ݂ܬ̇ ܣܝܵܓ݂ܵܗ̇. ܗܲܠܸܠܘܼܝܵܗ܀ ܘܕܼܵܫܘܼܗ̇ ܟܠ ܥܵܒ݂ܪ̈ܲܝ ܐܘܼܪܚܵܐ. ܗܲܠܸܠܘܼܝܵܗ܀ ܘܐܲܟ݂ܠܵܗ̇ ܚܙܝܼܪܵܐ ܕܥܵܒ݂ܵܐ. ܗܲܠܸܠܘܼܝܵܗ܀ ܘܚܲܝ̈ܘܵܬ݂ܵܐ ܕܒܲܪܵܐ ܪ̈ܥܲܝܵܗ̇. ܗܲܠܸܠܘܼܝܵܗ܀ ܐܲܠܵܗܵܐ ܚܲܝܠܬ݂ܵܢܵܐ ܐܸܬ݂ܦܲܢ. ܗܲܠܸܠܘܼܝܵܗ܀ ܘܚܘܼܪ ܡ݂ܢ ܫܡܲܝܵܐ ܘܲܚܙܝܼ. ܗܲܠܸܠܘܼܝܵܗ܀ ܘܲܦܩܘܿܕܹܝܗ̇ ܠܲܓ݂ܦܸܬܵܐ ܗܵܕܹܐ. ܗܲܠܸܠܘܼܝܵܗ܀ ܘܲܠܣܲܬܵܐ ܕܢܸܨܒܲܬ݀ ܝܲܡܝܼܢܵܟܼ. ܗܲܠܸܠܘܼܝܵܗ܀ ܘܲܠܒܲܪܢܵܫܵܐ ܕܚܲܝܸܠܬ̇ ܠܵܟܼ. ܗܲܠܸܠܘܼܝܵܗ܀ ܐܲܘܩܸܕܼ ܒܢܘܼܪܵܐ ܫܲܒ̇ܘܼܩܹ̈ܝܗ̇. ܗܲܠܸܠܘܼܝܵܗ܀ ܡ݂ܢ ܟܐܵܬ݂ܵܐ ܕܐܲܦܲܝ̈ܟ ܢܹܐܒ݂ܕ̇ܘܼܢ. ܗܲܠܸܠܘܼܝܵܗ܀ ܬܸܗܘܸܐ ܐܝܼܕܼܵܟܼ ܕܝܲܡܝܼܢܵܐ ܥܲܠ ܓܲܒ݂ܪܵܐ. ܗܲܠܸܠܘܼܝܵܗ܀ ܘܥܲܠ ܒܲܪܢܵܫܵܐ ܕܚܲܝܸܠܬ̇ ܠܵܟܼ. ܗܲܠܸܠܘܼܝܵܗ܀ ܘܠܵܐ ܢܸܗܦܘܿܟܼ ܡܸܢܵܟܼ. ܗܲܠܸܠܘܼܝܵܗ܀ ܐܸܠܵܐ ܐܲܚܵܢ ܘܒܲܫܡܵܟܼ ܢܸܩܪܸܐ. ܗܲܠܸܠܘܼܝܵܗ܀ ܡܵܪܝܵܐ ܐܲܠܵܗܵܐ ܚܲܝܠ̱ܬ݂ܵܢܵܐ ܐܲܦܢܵܢ. ܗܲܠܸܠܘܼܝܵܗ܀ ܘܐܲܢܗܲܪ ܐܲܦܲܝ̈ܟ ܘܢܸܬ݂ܦܪܸܩ. ܗܲܠܸܠܘܼܝܵܗ܀

ܫܲܒܲܚܘ ܠܐܲܠܵܗܵܐ ܡܥܲܫܢܵܢܲܢ. ܗܲܠܸܠܘܼܝܵܗ܀ ܘܲܩܥܵܘ ܠܐܲܠܵܗܹܗ ܕܝܲܥܩܘܿܒ݂. ܗܲܠܸܠܘܼܝܵܗ܀ ܫܩܘܿܠܘ ܦܠܲــ̈ـܓܹ̇ܐ ܘܟܸܢܵܪܹ̈ܐ. ܗܲܠܸܠܘܼܝܵܗ܀ ܒܲܣܝܼܡܹ̈ܐ ܥܲܡ ܩܝܼܬ݂ܵܪܹ̈ܐ. ܗܲܠܸܠܘܼܝܵܗ܀ ܩܪܵܘ ܩܲܪ̈ܢܵܬ݂ܵܐ ܒܪܹܫ ܝܲܪ̈ܚܹܐ. ܗܲܠܸܠܘܼܝܵܗ܀ ܘܲܒ݂ܟܸܣ̈ܐܹܐ ܒܝܲܘ̈ܡܵܬ݂ܵܐ ܕܥܲܕܼܥܹ̈ܕܹܐ. ܗܲܠܸܠܘܼܝܵܗ܀ ܡܸܛܠ ܕܢܵܡܘܿܣܵܐ ܗ݇ܘ݂ ܠܝܼܣܪܵܝܹܠ. ܗܲܠܸܠܘܼܝܵܗ܀ ܘܕܼܝܼܢܵܐ ܠܐܲܠܵܗܹܗ ܕܝܲܥܩܘܿܒ݂. ܗܲܠܸܠܘܼܝܵܗ܀ ܣܵܗܕ̇ܘܼܬܹܗ ܒܝܲܘܣܸܦ ܣܵܡܵܗ̇. ܗܲܠܸܠܘܼܝܵܗ܀ ܟܲܕܼ ܢܦܲܩ ܠܐܲܪܥܵܐ ܕܡܸܨܪܹܝܢ. ܗܲܠܸܠܘܼܝܵܗ܀ ܠܸܫܵܢܵܐ ܕܠܵܐ ܝܵܕܲܥ ܗ݇ܘ݂ܵܐ ܫܡܲܥ݂. ܗܲܠܸܠܘܼܝܵܗ܀ ܐܲܥܒ̇ܪܹܬ݂ ܢܝܼܪܵܐ ܡ݂ܢ ܟܲܬ݂ܦܹܗ. ܗܲܠܸܠܘܼܝܵܗ܀ ܘܐܝܼ̈ܕܼܵܘܗܝ ܡ݂ܢ ܐܲܣܘܼܪܝܵܐ ܫܪܹܝ݁ܬ݂. ܗܲܠܸܠܘܼܝܵܗ܀ ܒܐܘܼܠܨܵܢܵܐ ܩܪܵܢܝ ܘܦܲܨܝܼܬܹ̇ܗ. ܗܲܠܸܠܘܼܝܵܗ܀ ܘܟܲܣܝܼܬܹ̇ܗ ܒܣܸܬܵܪܵܐ ܕܝܼܠܝ ܡܫܲܒ̇ܚܵܐ. ܗܲܠܸܠܘܼܝܵܗ܀ ܘܲܒ݂ܚܲܪܬܹ̇ܗ ܒܡܲܝ̈ܵܐ ܕܚܸܪܝܵܢܵܐ. ܗܲܠܸܠܘܼܝܵܗ܀ ܫܡܲܥ ܥܲܡܝ ܘܐܹܡܲܠܸܠ. ܗܲܠܸܠܘܼܝܵܗ܀ ܘܝܼܣܪܵܝܹܠ ܐܹܣܲܗܸܕܼ ܒܵܟܼ. ܗܲܠܸܠܘܼܝܵܗ܀ ܐܸܢ ܬܸܫܡܥܲܢܝ ܠܵܐ ܢܸܗܘܸܐ ܠܵܟܼ ܐܲܠܵܗ ܢܘܼܟ݂ܪܵܝ. ܗܲܠܸܠܘܼܝܵܗ܀ ܘܠܵܐ ܬܸܣܓ̇ܘܿܕܼ ܠܕܸܚܠܵܐ ܐ݇ܚܪܹܢܝܵܐ. ܗܲܠܸܠܘܼܝܵܗ܀ ܐܸܢܵܐ ܐ݇ܢܵܐ ܡܵܪܝܵܐ ܐܲܠܵܗܵܟܼ. ܗܲܠܸܠܘܼܝܵܗ܀ ܕܐܲܣܸܩܬܵܟܼ ܡ݂ܢ ܐܲܪܥܵܐ ܕܡܸܨܪܹܝܢ. ܗܲܠܸܠܘܼܝܵܗ܀ ܦܬܲܚ ܦܘܼܡܵܟܼ ܘܐܸܡܠܹܝܘܗܝ. ܗܲܠܸܠܘܼܝܵܗ܀ ܘܥܲܡܝ ܠܵܐ ܫܡܲܥ݂ ܒܩܵܠܝ. ܗܲܠܸܠܘܼܝܵܗ܀ ܘܝܼܣܪܵܝܹܠ ܠܵܐ ܐܸܬ̇ܛܦܝܼܣܘ ܡܹܢܝ. ܗܲܠܸܠܘܼܝܵܗ܀ ܘܗܲܠܸܟ݂ܘ ܒܨܸܒ݂ܝܵܢܵܐ ܕܠܸܒ̇ܗܘܿܢ. ܗܲܠܸܠܘܼܝܵܗ܀ ܘܲܒ݂ܬܲܪܥܝܼܬ݂ܵܐ ܕܢܲܦ̮ܫܗܘܿܢ. ܗܲܠܸܠܘܼܝܵܗ܀ ܐܸܠܘܼ ܥܲܡܝ ܫܲܡܥܲܢܝ ܘܝܼܣܪܵܝܹܠ ܒܐܘܼܪܚܵܬ݂ܝ ܗܲܠܸܟ݂ܘ. ܗܲܠܸܠܘܼܝܵܗ܀ ܥܲܕܼ ܩܲܠܝܼܠ ܡܲܘܒܸ̇ܕܼ ܗ݇ܘܹܝܬ݂ ܠܲܒ݂ܥܸܠܕ̇ܒ݂ܵܒܲܝ̈ܗܘܿܢ. ܗܲܠܸܠܘܼܝܵܗ܀ ܘܥܲܠ ܣܵܢܐܲܝ̈ܗܘܿܢ ܡܲܗܦܸܟܼ ܗ݇ܘܹܝܬ݂ ܐܝܼܕܼܝ. ܗܲܠܸܠܘܼܝܵܗ܀ ܣܵܢܐܵܘ̈ܗܝ ܕܡܵܪܝܵܐ ܟܲܕܸ̇ܒ݂ܘ ܒܹܗ. ܗܲܠܸܠܘܼܝܵܗ܀ ܘܲܗܘܵ݀ܐ ܙܲܘܥ̱ܗܘܿܢ ܠܥܵܠܲܡ. ܗܲܠܸܠܘܼܝܵܗ܀ ܐܲܘܟ̇ܠܹܗ ܡ݂ܢ ܫܘܼܡܢܵܐ ܕܚܸܛܬ݂ܵܐ. ܗܲܠܸܠܘܼܝܵܗ܀ ܘܡ݂ܢ ܟܹܐܦܵܐ ܕܸܒ݂ܫܵܐ ܣܲܒ̇ܥܹܗ. ܗܲܠܸܠܘܼܝܵܗ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ. ܗܲܠܸܠܘܼܝܵܗ܀ ܡܸܢ ܥܵܠܲܡ ܘܲܥܕܼܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ. ܗܲܠܸܠܘܼܝܵܗ܀

ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒ݂ܚܵܐ ܠܵܟ݂ ܐܲܠܵܗܵܐ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ.