ܪܲܡܫܵܐ ܕܲܥܪܘܼܒ݂ܬܵܐ

ܡܫܲܪܸܐ ܟܵܗܢܵܐ: ܒܫܸܡ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܬܸܫܒܘ݁ܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ(ܓ: ܙܲܒ݂ܢ̈ܝܼܢ) ܘܥܲܠ ܐܲܪܥܵܐ ܫܠܵܡܵܐ ܘܣܲܒ݂ܪܵܐ ܛܵܒ݂ܵܐ ܠܲܒ݂ܢܲܝ̈ܢܵܫܵܐ: ܒܟ݂ܠܥܸܕܵܢ ܠܥܵܠܡܝܼܢ ܐܵܡܹܝܢ.

ܟܵܗܢܵܐ ܘܫܲܡܵܫܹ̈ܐ ܘܥܲܡܵܐ:

ܐܲܒ݂ܘܼܢ ܕܒ݂ܲܫܡܲܝܵܐ ܢܸܬ݂ܩܲܕܲܫ ܫܡܵܟ݂ ܬܹܐܬ݂ܸܐ ܡܲܠܟܘܼܬ݂ܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁: ܐܲܒ݂ܘܼܢ ܕܒ݂ܲܫܡܲܝܵܐ ܕܲܡܠܹܝܢ ܫܡܲܝܵܐ ܘܐܲܪܥܵܐ ܪܲܒܘܼܬ݂ ܫܘܼܒ݂ܚܵܟ݂: ܥܝܼܪܹ̈ܐ ܘܐ݇ܢܵܫܵܐ ܩܵܥܹܝܢ ܠܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁:

ܐܲܒ݂ܘܼܢ ܕܒ݂ܲܫܡܲܝܵܐ ܢܸܬ݂ܩܲܕܲܫ ܫܡܵܟ݂ ܬܹܐܬ݂ܸܐ ܡܲܠܟܘܼܬ݂ܵܟ݂ ܢܸܗܘܸܐ ܨܸܒ݂ܝܵܢܵܟ݂: ܐܲܝܟܲܢܵܐ ܕܒ݂ܲܫܡܲܝܵܐ ܐܵܦ ܒܐܲܪܥܵܐ. ܗܲܒ݂ܠܲܢ ܠܲܚܡܵܐ ܕܣܘܼܢܩܵܢܲܢ ܝܲܘܡܵܢܵܐ: ܘܲܫܒ݂ܘ݁ܩ ܠܲܢ ܚܲܘ̈ܒܲܝܢ، ܐܲܝܟܲܢܵܐ ܕܐܵܦ ܚܢܲܢ ܫܒ݂ܲܩܢ ܠܚܲܝܵܒ݂ܲܝ̈ܢ. ܘܠܵܐ ܬܲܥܠܲܢ ܠܢܸܣܝܘ݁ܢܵܐ: ܐܸܠܵܐ ܦܲܨܵܢ ܡܸܢ ܒܝܼܫܵܐ: ܡܸܛܠ ܕܕܼܝܼܠܵܟ݂ ܗ݇ܝܼ ܡܲܠܟܘܼܬ݂ܵܐ ܘܚܲܝܠܵܐ ܘܬ݂ܸܫܒ݁ܘ݁ܚܬܵܐ، ܠܥܵܠܲܡ ܥܵܠܡܝܼܢ: ܐܵܡܹܝܢ.

ܟܵܗܢܵܐ: ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.

ܟܵܗܢܵܐ ܘܫܲܡܵܫܹ̈ܐ ܘܥܲܡܵܐ:

ܐܲܒ݂ܘܼܢ ܕܒ݂ܲܫܡܲܝܵܐ ܢܸܬ݂ܩܲܕܲܫ ܫܡܵܟ݂: ܬܹܐܬ݂ܸܐ ܡܲܠܟܘܼܬ݂ܵܟ݂. ܩܲܕܝܼܫ ܩܲܕܝܼܫ ܩܲܕܝܼܫܲܬ: ܐܲܒ݂ܘܼܢ ܕܒ݂ܲܫܡܲܝܵܐ ܕܲܡܠܹܝܢ ܫ̈ܡܲܝܵܐ ܘܐܲܪܥܵܐ ܪܲܒܘܼܬ݂ ܫܘܼܒ݂ܚܵܟ݂: ܥܝܼܪܹ̈ܐ ܘܐ݇ܢܵܫܵܐ ܩܵܥܹܝܢ ܠܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁.

ܫܲܡܵܫܵܐ: ܢܨܲܠܸܐ ܫܠܵܡܵܐ ܥܲܡܲܢ

ܡܨܲܠܹܐ ܟܵܗܢܵܐ ܨܠܘ݁ܬ݂ܵܐ ܕܲܩܕܼܵܡ ܡܲܪܡܝܼܬ݂ܵܐ: ܢܵܘܕܹܐ ܡܵܪܝ ܠܐܲܠܵܗܘܼܬܼܵܟܼ ܘܢܸܣܓܘܿܕܼ ܠܡܵܪܘܼܬܼܵܟܼ: ܘܫܘܼܒܼܚܵܐ ܐܲܡܝܼܢܵܐ ܕܠܵܐ ܫܲܠܘܵܐ ܢܲܣܸܩ ܠܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ ܒܟܼܠܥܸܕܵܢ: ܡܵܪܵܐ ܕܟܼܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ

ܘܐܵܡܪܝܢ ܡܲܪ̈ܡܝܵܬ݂ܵܐ:

ܡܲܪܡܝܼܬܼܵܐ ܩܲܕܡܵܝܬܼܵܐ:

ܨܒ݂ܲܝܬ̇ ܡܵܪܝܵܐ ܒܐܲܪܥܵܟܼ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܨܒ݂ܲܝܬ̇ ܡܵܪܝܵܐ ܒܐܲܪܥܵܟܼ܀ ܘܐܲܦܢܝܼܬ̇ ܫܒ݂ܝܼܬܹܗ ܕܝܲܥܩܘܿܒ݂܀ ܫܒ݂ܲܩܬ̇ ܥܲܘܠܹܗ ܕܥܲܡܵܟܼ܀ ܘܟܲܣܝܼܬ̇ ܟܠܗܘܿܢ ܚܛܵܗܲܝ̈ܗܘܿܢ܀ ܐܲܥܒܲܪܬ̇ ܟܠܵܗ̇ ܚܸܡܬ݂ܵܟܼ܀ ܐܲܦܢܵܢ ܐܲܠܵܗܵܐ ܦܵܪܘܿܩܲܢ܀ ܘܒܲܛܸܠ ܪܘܼܓ݂ܙܵܟܼ ܡܸܢܲܢ܀ ܘܠܵܐ ܠܥܵܠܲܡ ܬܸܪܓܲܙ ܥܠܲܝܢ܀ ܘܠܵܐ ܬܸܛܲܪ ܪܘܼܓ݂ܙܵܟܼ ܠܕܼܵܪܕܵܪ̈ܝܼܢ܀ ܐܸܠܵܐ ܐܲܢ݇ܬ̇ ܐܲܦܢܵܢ ܘܐܲܚܵܢ ܘܥܲܡܵܟܼ ܢܸܚܕ̇ܘܿܢ ܒܵܟܼ܀ ܚܲܘܵܢ ܡܵܪܝܵܐ ܛܲܝܒ̇ܘܼܬ݂ܵܟܼ ܘܦܘܼܪܩܵܢܵܟܼ ܗܲܒ݂ܠܲܢ܀ ܕܢܸܫܡܲܥ ܡܵܢܵܐ ܡܡܲܠܸܠ ܡܵܪܝܵܐ ܐܲܠܵܗܲܢ܀ ܕܲܡܡܲܠܸܠ ܫܠܵܡܵܐ ܥܲܠ ܥܲܡܹܗ ܘܥܲܡ ܙܲܕ̇ܝܼ̈ܩܵܘܗܝ܀ ܕܠܵܐ ܢܸܗܦܟ݂ܘܼܢ ܠܒܸܣܬܲܪܗܘܿܢ܀ ܩܲܪܝܼܒ݂ܘܼ ܦܘܼܪܩܵܢܹܗ ܠܕܼܵܚܠܵܘ̈ܗܝ܀ ܢܸܫܪܸܐ ܐܝܼܩܵܪܹܗ ܒܐܲܪܥܲܢ܀ ܛܲܝܒ̇ܘܼܬ݂ܵܐ ܘܩܘܼܫܬܵܐ ܐܲܪܥܘܼܢ܀ ܙܲܕ̇ܝܼܩܘܼܬ݂ܵܐ ܘܲܫܠܵܡܵܐ ܢܢܲܫܩܘܼܢ܀ ܗܲܝܡܵܢܘܼܬ݂ܵܐ ܬܹܐܥܸܐ ܡ݂ܢ ܐܲܪܥܵܐ܀ ܘܙܲܕ̇ܝܼܩܘܼܬ݂ܵܐ ܐܲܕܼܝܼܩܲܬ݀ ܡ݂ܢ ܫܡܲܝܵܐ܀ ܘܐܵܦ ܡܵܪܝܵܐ ܢܸܬܸ̇ܠ ܛܵܒ݂ܵܬܹ̈ܗ܀ ܘܐܲܪܥܵܐ ܬܸܬܸ̇ܠ ܥܲܠ̈ܠܵܬ݂ܵܗ̇܀ ܙܲܕ̇ܝܼܩܵܐ ܩܕܼܵܡܵܘܗܝ ܢܗܲܠܸܟܼ܀ ܘܲܢܣܝܼܡ ܒܐܲܪܥܵܐ ܗܲܠ̈ܟ݂ܵܬܹܗ܀

ܨܠܝܼ ܡܵܪܝܵܐ ܐܸܕܼܢܵܟܼ ܘܲܥܢܝܼܢܝ܀ ܡܸܛܠ ܕܡܸܣܟܹ̇ܢܵܐ ܐ݇ܢܵܐ ܘܒ݂ܵܝܫܵܐ܀ ܢܲܛܲܪ ܠܢܲܦ̮ܫܝ ܡܸܛܠ ܕܛܵܒ݂ ܐܲܢ݇ܬ̇܀ ܦܪܘܿܩ ܠܥܲܒ݂ܕܵܟܼ ܐܲܢ݇ܬ̇ ܐܲܠܵܗܵܐ ܕܲܡܣܲܒܲܪ ܒܵܟܼ܀ ܪܲܚܸܡܥܠܲܝ ܡܵܪܝܵܐ܀ ܡܸܛܠ ܕܲܠܘܵܬ݂ܵܟܼ ܐܸܩܪܸܐ ܒܟ݂ܠܝܘܿܡ܀ ܚܲܕܵܐ ܢܲܦ̮ܫܹܗ ܕܥܲܒ݂ܕܵܟܼ܀ ܡܸܛܠ ܕܲܠܘܵܬ݂ܵܟܼ ܡܵܪܝܵܐ ܐܲܪܝܼܡܹ̇ܬ݂ ܢܲܦ̮ܫܝ܀ ܡܸܛܠ ܕܐܲܢ݇ܬ̇ ܡܵܪܝܵܐ ܛܵܒ݂ ܐܲܢ݇ܬ̇܀ ܘܣܲܓ̇ܝܼܐܵܐ ܗ݇ܝ݂ ܛܲܝܒ̇ܘܼܬ݂ܵܟܼ ܠܟ݂ܠ ܕܩܵܪܹܝܢ ܠܵܟܼ܀ ܨܘܼܬ݂ ܡܵܪܝܵܐ ܨܠܘܿܬ݂ܝ܀ ܘܲܫܡܲܥ ܒܩܵܠܵܐ ܕܲܓ݂ܥܵܬ݂ܝ܀ ܒܝܲܘܡܵܐ ܕܐܘܼܠܨܵܢܝ ܩܪܹܝܬ݂ܵܟܼ ܘܲܥܢܲܝܬܵܢܝ܀ ܠܲܝܬ̇ ܐܲܟ݂ܘܵܬ݂ܵܟܼ ܡܵܪܝܵܐ ܐܲܠܵܗܝ ܘܠܲܝܬ̇ ܐܲܝܟܼ ܥܒ݂ܵܕܲܝ̈ܟ܀ ܟܠܗܘܿܢ ܥܲܡܡܹ̈ܐ ܕܲܥܒܲܕ̇ܬ̇܀ ܢܹܐܬ݂ܘܿܢ ܘܢܸܣܓ̇ܕܼܘܼܢ ܠܵܟܼ ܡܵܪܝܵܐ܀ ܘܲܢܫܲܒ̇ܚܘܼܢ ܠܲܫܡܵܟܼ ܡܸܛܠ ܕܪܲܒ̇ ܐܲܢ݇ܬ̇܀ ܥܵܒܸܕܼ ܐܲܢ݇ܬ̇ ܬܸܕܼܡ̱ܪ̈ܵܬ݂ܵܐ ܐܲܢ݇ܬ̇ ܐܲܠܵܗܵܐ ܒܲܠܚܘܿܕܲܝܟ܀ ܚܲܘܵܢܝ ܡܵܪܝܵܐ ܐܘܼܪܚܵܟܼ ܘܐܹܗܲܠܸܟܼ ܒܩܘܼܫܬܵܐ܀ ܢܸܚܕܸ̇ܐ ܠܹܒ̇ܝ ܒܐܲܝܠܹܝܢ ܕܕܼܵܚܠܝܼܢ ܠܲܫܡܵܟܼ܀ ܐܲܘܕܸ̇ܐ ܠܵܟܼ ܡܵܪܝܵܐ ܐܲܠܵܗܝ ܡ݂ܢ ܟܠܹܗ ܠܹܒ̇ܝ܀ ܘܐܹܫܲܒܲܚ ܫܡܵܟܼ ܠܥܵܠܲܡ܀ ܡܸܛܠ ܕܛܲܝܒ̇ܘܼܬ݂ܵܟܼ ܣܸܓ݂ܝܲܬ݀ ܥܠܲܝ܀ ܘܦܲܨܝܼܬ̇ ܢܲܦ̮ܫܝ ܡ݂ܢ ܫܝܘܿܠ ܬܲܚܬܵܝܬܵܐ܀ ܐܲܠܵܗܵܐ ܥܲܘܵܠܹ̈ܐ ܩܵܡ݂ܘ ܥܠܲܝ܀ ܘܲܟ݂ܢܘܼܫܬܵܐ ܕܥܲܫܝܼܢܹ̈ܐ ܒܥܵܐܘܼܗ̇ ܠܢܲܦ̮ܫܝ ܘܠܵܐ ܐܸܬ̇ܕܲܟ݂ܪܘܼܟܼ܀ ܘܐܲܢ݇ܬ̇ ܡܵܪܝܵܐ ܐܲܠܵܗܵܐ ܡܪܲܚܡܵܢܵܐ ܘܲܡܪܲܚܦܵܢܵܐ܀ ܢܲܓ̇ܝܼܪ ܪܘܼܚܵܐ ܘܣܲܓ̇ܝܼ ܛܲܝܒ̇ܘܼܬ݂ܵܐ ܘܩܘܼܫܬܵܐ܀ ܐܸܬ݂ܦܲܢ ܥܠܲܝ ܘܪܲܚܸܡ ܥܠܲܝ܀ ܗܲܒ݂ ܚܲܝܠܵܐ ܠܥܲܒ݂ܕܵܟܼ ܘܲܦܪܘܿܩ ܠܒܲܪ ܐܲܡܬ݂ܵܟܼ܀ ܘܲܥܒܸܕܼ ܥܲܡܝ ܐܵܬ݂ܵܐ ܛܵܒ݂ܬ݂ܵܐ܀ ܕܢܸܚܙܘܿܢ ܣܵܢܐܲܝ̈ ܘܢܸܒ݂ܗ̱ܬ݂ܘܼܢ܀ ܕܐܲܢ݇ܬ̇ ܡܵܪܝܵܐ ܥܲܕܲܪܬܵܢܝ ܘܒܲܝܲܐܬܵܢܝ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܘܲܥܕܼܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ.

ܡܲܪܡܝܼܬܼܵܐ ܕܬܲܪܬܹܝܢ:

ܫܲܬ݂ܐܸܣܵܘ̈ܗܝ ܒܛܘܼܪܹܗ ܩܲܕ̇ܝܼܫܵܐ܀ ܪܚܸܡ݂ ܡܵܪܝܵܐ ܠܬܲܪ̈ܥܹܝܗ̇ ܕܨܸܗܝܘܿܢ܀ ܛܵܒ݂ ܡ݂ܢ ܟܠܗܘܿܢ ܡܲܫܟ̇ܢܵܘ̈ܗܝ ܕܝܲܥܩܘܿܒ݂܀ ܝܲܩܝܼܪ̈ܵܬ݂ܵܐ ܐܸܬ݂ܡܲܠܲܠ ܒܹܟ݂ܝ ܩܪܝܼܬܹܗ ܕܐܲܠܵܗܲܢ܀ ܐܸܬ̇ܕܲܟ݂ܪ ܠܪܵܚܵܒ݂ ܘܲܠܒ݂ܵܒܹܠ ܝܵܕܼܥܵܬ݂̈ܝ܀ ܗܵܐ ܦܠܸܫܬܵܝܹ̈ܐ ܘܨܘܿܪ ܘܥܲܡܵܐ ܕܟ݂ܘܼܫܵܝܹ̈ܐ܀ ܗܵܢܵܐ ܐܸܬ݂ܝܼܠܸܕܼ ܬܲܡܵܢ ܘܲܠܨܸܗܝܘܿܢ ܐܸܬ݂ܐ̱ܡܲܪ܀ ܓܲܒ݂ܪܵܐ ܓܲܢ݇ܒܵܪܵܐ ܐܸܬ݂ܝܼܠܸܕܼ ܒܵܗ̇ ܘܗܘ݀ ܐܲܬ݂ܩܢܵܗ̇܀ ܡܵܪܝܵܐ ܢܸܡܢܸܐ ܒܲܟ݂ܬ݂ܵܒ݂ܵܐ ܠܥܲܡܹܗ܀ ܗܵܢܵܐ ܐܸܬ݂ܝܼܠܸܕܼ ܬܲܡܵܢ܀ ܪܲܘ̱ܪ̈ܒ݂ܵܢܹܐ ܕܥܵܡ̇ܪܝܼܢ ܒܹܟ݂ܝ ܢܸܚܕ̇ܘܿܢ܀ ܘܟ݂ܠ ܕܐܸܬ݂ܡܲܟܲܟ݂ܘ ܒܹܟ݂ܝ܀

ܡܵܪܝܵܐ ܐܲܠܵܗܵܐ ܕܦܘܼܪܩܵܢܝ܀ ܒܐܝܼܡܵܡܵܐ ܓܥܹܝ݁ܬ݂ ܘܲܒ݂ܠܸܠܝܵܐ ܩܕܼܵܡܲܝܟ܀ ܬܸܥܘܿܠ ܩܕܼܵܡܲܝܟ ܨܠܘܿܬ݂ܝ܀ ܘܐܲܪܟܸ̇ܢ ܐܸܕܼܢܵܟܼ ܠܒ݂ܵܥܘܼܬ݂ܝ܀ ܡܸܛܠ ܕܣܸܒ݂ܥܲܬ݀ ܢܲܦ̮ܫܝ ܒܝܼ̈ܫܵܬ݂ܵܐ܀ ܘܚܲܝܲܝ̈ ܠܲܫܝܘܿܠ ܡܲܛܝܼܘ܀ ܐܸܬ݂ܚܲܫܒܹ̇ܬ݂ ܥܲܡ ܢܵܚܬܲܝ̈ ܓܘܼܒܵܐ܀ ܘܲܗܘܹܝܬ݂ ܐܲܝܟܼ ܓܲܒ݂ܪܵܐ ܕܠܲܝܬ̇ ܠܹܗ ܐܝܼܵܠܵܐ܀ ܒܹܝܬ݂ ܡܝܼ̈ܬܹܐ ܒܲܪ ܚܹܐܪܹ̈ܐ܀ ܐܲܝܟܼ ܩܛܝܼܠܹ̈ܐ ܕܲܫܟ݂ܝܼܒ݂ܝܼܢ ܒܩܲܒ݂ܪܹ̈ܐ܀ ܐܲܝܠܹܝܢ ܕܬ݂ܘܼܒ݂ ܠܵܐ ܐܸܬ̇ܕ̇ܟܲܪܬ̇ ܐܸܢܘܿܢ܀ ܘܗܸܢ݂ܘܿܢ ܡ݂ܢ ܐܝܼ̈ܕܲܝܟ ܐܸܒܲܕܼܘ܀ ܐܲܚܸܬ̇ܬܵܢܝ ܠܓ݂ܘܼܒܵܐ ܬܲܚܬܵܝܵܐ܀ ܠܚܸܫܘܿܟ݂ܵܐ ܘܲܠܛܸܠܵܠܲܝ̈ ܡܲܘܬܵܐ܀ ܘܲܥܠܲܝ ܣܡ݂ܵܟܼ ܪܘܼܓ݂ܙܵܟܼ܀ ܘܟ݂ܠܗܘܿܢ ܡܲܚܫܘܼܠܲܝ̈ܟ ܐܲܝܬ̇ܝܼܬ̇ ܥܠܲܝ܀ ܐܲܪܚܸܩܬ̇ ܡܹܢܝ ܝܵܕܼܥܲܝ̈ ܘܲܥܒܲܕ̇ܬܵܢܝ ܠܗܘܿܢ ܛܲܡܐܵܐ܀ ܐܸܬ݂ܟ̇ܠܝܼܬ̇ ܕܠܵܐ ܐܸܦܘܿܩ ܘܥܲܝܢܝ ܕܵܒܲܬ݀ ܡ݂ܢ ܡܘܼܟܵܟ݂ܝ܀ ܩܪܹܝܬ݂ܵܟܼ ܡܵܪܝܵܐ ܒܟ݂ܠܝܘܿܡ܀ ܘܦܸܫܛܹ݁ܬ݂ ܐܝܼ̈ܕܲܝ ܠܘܵܬ݂ܵܟܼ܀ ܗܵܐ ܠܡܝܼ̈ܬܹܐ ܥܵܒܹ̇ܕܼ ܐܲܢ݇ܬ̇ ܬܸܕܼܡ̱ܪ̈ܵܬ݂ܵܐ܀ ܘܓܲܢ݇ܒܵܪܹ̈ܐ ܢܩܘܼܡܘܼܢ ܘܢܲܘܕ̇ܘܼܢ ܠܵܟܼ܀ ܘܢܸܫܬܲܥܘܼܢ ܕܲܒ݂ܩܲܒ݂ܪܹ̈ܐ ܛܲܝܒ̇ܘܼܬ݂ܵܟܼ܀ ܘܗܲܝܡܵܢܘܼܬ݂ܵܟܼ ܒܐܲܒ݂ܕܵܢܵܐ܀ ܬܸܬ݂ܝܼܕܲܥ ܒܚܸܫܘܿܟ݂ܵܐ ܬܸܕܼܡܘܼܪܬܵܟܼ܀ ܘܙܲܕ̇ܝܼܩܘܼܬ݂ܵܟܼ ܒܐܲܪܥܵܐ ܕܐܸܬ̇ܛܲܥܝܲܬ݀܀ ܘܐܸܢܵܐ ܠܘܵܬ݂ܵܟܼ ܡܵܪܝܵܐ ܓܥܹܝ݁ܬ݂܀ ܘܲܒ݂ܨܲܦܪܵܐ ܨܠܘܿܬ݂ܝ ܬܩܲܕܸܡ ܠܘܵܬ݂ܵܟܼ܀ ܠܵܐ ܬܸܛܥܹܝܗ̇ ܠܢܲܦ̮ܫܝ ܡܵܪܝܵܐ܀ ܘܠܵܐ ܬܲܗܦܸܟܼ ܐܲܦܲܝ̈ܟ ܡܹܢܝ܀ ܒܵܝܫܵܐ ܐ݇ܢܵܐ ܘܠܲܐܝܵܐ ܡ݂ܢ ܛܲܠܝܘܼܬ݂ܝ܀ ܐܸܬ̇ܬ̇ܪܝܼܡܹ̇ܬ݂ ܘܐܸܬ݂ܡܲܟ̇ܟܹܬ݂ ܘܬܸܘܪܹܬ݂܀ ܘܲܥܠܲܝ ܥܒ݂ܲܪ ܪܘܼܓ݂ܙܵܟܼ܀ ܘܲܕܼܠܘܼܚܝܵܟܼ ܫܲܬ̇ܩܲܢܝ܀ ܐܸܬ݂ܟܲܪܟ̇ܘܼܢܝ ܐܲܝܟܼ ܡܲܝ̈ܵܐ ܟܠܹܗ ܝܲܘܡܵܐ܀ ܘܣܵܡ݂ܘ ܥܠܲܝ ܐܲܟ݂ܚ݇ܕܼܵܐ܀ ܐܲܪܚܸܩܬ̇ ܡܹܢܝ ܪ̈ܵܚܡܲܝ ܘܚܲܒ݂ܪ̈ܲܝ܀ ܘܝܵܕܼܥܲܝ̈ ܐܲܦܪܸܩܬ̇ ܡܹܢܝ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܘܲܥܕܼܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ.

ܗܲܠܸܠܘܼܝܵܗ ܫܘܼܒܼܚܵܐ ܠܵܟܼ ܐܲܠܵܗܵܐ: ܗܲܠܸܠܘܼܝܵܗ ܫܘܼܒܼܚܵܐ ܠܵܟܼ ܐܲܠܵܗܵܐ: ܗܲܠܸܠܘܼܝܵܗ ܫܘܼܒܼܚܵܐ ܠܵܟܼ ܐܲܠܵܗܵܐ: ܡܵܪܝܵܐ ܪܲܚܸܡܥܠܲܝܢ.

ܘܐܵܡܲܪ ܡܫܲܡܫܵܢܵܐ: ܫܠܵܡܵܐ ܥܲܡܲܢ

ܘܟܸܢ ܐܵܡܲܪ ܟܵܗܢܵܐ ܨܠܘܿܬ݂ܵܐ ܕܠܵܟ݂ܘܼܡܵܪܵܐ: ܘܥܲܠ ܐܲܦܲܝ̈ ܟܠܗܘܿܢ ܥܘܼܕܼܪ̈ܵܢܲܝܟ ܘܛܲܝܒ̇ـ̈ـܘܵܬ݂ܵܟ݂ ܕܲܠܘܵܬܲܢ ܕܠܵܐ ܡܸܬ݂ܦܲܪܥܝܼܢ: ܢܵܘܕܸ݁ܐ ܠܵܟ݂ ܘܲܢܫܲܒ݁ܚܵܟ݂ ܕܠܵܐ ܫܲܠܘܵܐ ܒܥܹܕ̄ܬܵܟ݂ ܡܟܲܠܲܠܬܵܐ ܡܲܠܝܲܬ݂ ܟܠ ܥܘܼܕܼܪ̈ܵܢܝܼܢ ܘܟ݂ܠ ܛܘܼܒ݂ܝܼ̈ܢ: ܕܐܲܢ̄ܬ݁ܘܼ ܡܵܪܵܐ ܘܒ݂ܵܪܘܿܝܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܐܵܡܪܝܼܢ: ܠܵܟ݂ܘܼܡܵܪܵܐ ܕܟ݂ܠܵܐ ܡܵܘܕܹ݁ܝܢܲܢ: ܘܠܵܟ݂ ܝܑܼܫܘܿܥ ܡܫܝܼܚܵܐ ܡܫܲܒ݁ܚܝܼܢܲܢ: ܕܐܲܢ̄ܬ݁ܘܼ ܡܢܲܚܡܵܢܵܐ ܕܦܲܓ݂ܪ̈ܲܝܢ: ܘܐܲܢ̄ܬ݁ܘܼ ܦܵܪܘܿܩܵܐ ܕܢܲܦ̮̈ܫܵܬܲܢ܀

ܚܕܼܝܼܬ݂ ܟܲܕܼ ܐܵܡܪܝܼܢ ܗ̄ܘ̣ܵܘ ܠܝܼ ܠܒܲܝܬܹ݁ܗ ܕܡܵܪܝܵܐ ܐܵܙܠ̄ܝܼܢܲܢ (ܠܒܲܪ ܡ̣ܢ ܥܹܕ̄ܬܵܐ: ܒܟ݂ܠܕ݁ܘܼܟ ܐܝܼܬܲܝܟ ܐܲܠܵܗܵܐ ܩܲܒܸ݁ܠ ܬܲܟ݂ܫܲܦ̮ܬܲܢ): ܠܵܟ݂ܘܼܡܵܪܵܐ ܕܟ݂ܠܵܐ ܡܵܘܕܹ݁ܝܢܲܢ: ܘܠܵܟ݂ ܝܑܼܫܘܿܥ ܡܫܝܼܚܵܐ ܡܫܲܒ݁ܚܝܼܢܲܢ: ܕܐܲܢ̄ܬ݁ܘܼ ܡܢܲܚܡܵܢܵܐ ܕܦܲܓ݂ܪ̈ܲܝܢ: ܘܐܲܢ̄ܬ݁ܘܼ ܦܵܪܘܿܩܵܐ ܕܢܲܦ̮̈ܫܵܬܲܢ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ: ܠܵܟ݂ܘܼܡܵܪܵܐ ܕܟ݂ܠܵܐ ܡܵܘܕܹ݁ܝܢܲܢ: ܘܠܵܟ݂ ܝܑܼܫܘܿܥ ܡܫܝܼܚܵܐ ܡܫܲܒ݁ܚܝܼܢܲܢ: ܕܐܲܢ̄ܬ݁ܘܼ ܡܢܲܚܡܵܢܵܐ ܕܦܲܓ݂ܪ̈ܲܝܢ: ܘܐܲܢ̄ܬ݁ܘܼ ܦܵܪܘܿܩܵܐ ܕܢܲܦ̮̈ܫܵܬܲܢ܀

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܐܲܢ̄ܬ݁ܘܼ ܡܵܪܝ ܫܲܪܝܼܪܵܐܝܼܬ݂ ܡܢܲܚܡܵܢܵܐ ܕܦܲܓ݂ܪ̈ܲܝܢ: ܘܐܲܢ̄ܬ݁ܘܼ ܦܵܪܘܿܩܵܐ ܛܵܒ݂ܵܐ ܕܢܲܦ̮̈ܫܵܬܲܢ: ܘܲܡܢܲܛܪܵܢܵܐ ܐܲܡܝܼܢܵܐ ܕܚܲܝܲܝ̈ܢ: ܘܠܵܟ݂ ܡܵܪܝ ܚܲܝܵܒ݂ܝܼܢܲܢ ܕܢܵܘܕܸ݁ܐ ܘܢܸܣܓܿܘܿܕܼ ܘܲܢܫܲܒܲܚ ܒܟ݂ܠܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܫܘܼܪܵܝܵܐ ܕܲܩܕܼܵܡ:

ܕܲܥܪܘܼܒ݂ܬܵܐ ܕܩܲܕܼܡܵܝܹ̈ܐ	ܕܲܥܪܘܼܒ݂ܬܵܐ ܕܡܸܨܥܵܝܹ̈ܐ	ܕܲܥܪܘܼܒ݂ܬܵܐ ܕܲܐܚܪ̈ܵܝܹܐ
ܐܵܘܕ̇ܝܼܢܲܢ ܠܵܟܼ ܐܲܠܵܗܵܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܐܵܘܕ̇ܝܼܢܲܢ ܠܵܟܼ ܐܲܠܵܗܵܐ܀ ܐܲܘܕ̇ܝܼܢܲܢ ܠܵܟܼ ܘܲܩ݂ܪܲܝܢ ܫܡܵܟܼ܀ ܘܐܸܫܬܲܥܝܼܢ ܟܠܗܹܝܢ ܬܸܕܼܡ̱ܪ̈ܵܬ݂ܵܟܼ܀ ܡܸܛܠ ܕܐܸܣܲܒ݂ ܙܲܒ݂ܢܵܐ ܘܐܸܢܵܐ ܒܲܬ݂ܪܝܼܨܘܼܬ݂ܵܐ ܐܹܕ̇ܘܼܢ܀ ܬܸܬ݂ܡܲܟܲܟܼ ܐܲܪܥܵܐ ܘܟ݂ܠܗܘܿܢ ܥܵܡܘܿܪܹ̈ܝܗ̇܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ܀ ܐܹܗܲܠܸܠܘܼܝܵܗ܀	ܬܵܘ ܢܫܲܒܲܚ ܠܡܵܪܝܵܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܬܵܘ ܢܫܲܒܲܚ ܠܡܵܪܝܵܐ܀ ܘܢܸܙܡܲܪ ܠܐܲܠܵܗܲܢ ܦܵܪܘܿܩܵܐ܀ ܢܩܲܕܸ̇ܡ ܐܲܦܵܘ̈ܗܝ ܒܬܲܘܕ̇ܝܼܬ݂ܵܐ܀ ܘܒܲܙܡܝܼܪ̈ܵܬ݂ܵܐ ܢܫܲܒ̇ܚܝܼܘܗܝ܀ ܡܸܛܠ ܕܐܲܠܵܗܵܐ ܗ݇ܘ݂ ܪܲܒܵܐ ܡܵܪܝܵܐ܀ ܡܲܠܟܵܐ ܕܪܲܒ̇ ܥܲܠ ܟܠܗܘܿܢ ܐܲܠܵܗܹ̈ܐ܀ ܕܒ݂ܐܝܼܕܼܵܘ̈ܗܝ ܐܸܢܹܝܢ ܫܲܬ݂ܐܸܣܹܝ̈ܗ̇ ܕܐܲܪܥܵܐ ܘܪܲܘܡܵܐ ܕܛܘܼܪܹ̈ܐ܀ ܕܝܼܠܹܗ ܗܘ݀ ܝܲܡܵܐ ܘܗܘ݀ ܥܲܒ݂ܕܹ̇ܗ܀ ܘܝܲܒ̇ܝܼܫܬܵܐ ܐܝܼܕܼܵܘ̈ܗܝ ܓܒܲܠ݂܀ ܬܵܘ ܢܸܒ݂ܪܘܿܟܼ ܘܢܸܣܓ̇ܘܿܕܼ ܠܹܗ܀ ܘܲܢܒܲܪܟ݂ܝܼܘܗܝ ܠܡܵܪܝܵܐ ܕܥܲܒ݂ܕܲܢ܀ ܡܸܛܠ ܕܗܘ݀ܝܘܼ ܐܲܠܵܗܲܢ܀ ܘܲܚܢܲܢ ܥܲܡܵܐ ܕܝܼܠܹܗ ܘܥܵܢ̈ܵܐ ܕܡܲܪܥܝܼܬܹܗ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ܀ ܐܹܗܲܠܸܠܘܼܝܵܗ܀	ܐܹܪܲܡܪ̱ܡܵܟܼ ܡܵܪܝ ܡܲܠܟܵܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܐܹܪܲܡܪ̱ܡܵܟܼ ܡܵܪܝ ܡܲܠܟܵܐ܀ ܘܐܹܒܲܪܸܟܼ ܫܡܵܟܼ ܠܥܵܠܲܡ ܥܵܠܡܝܼܢ܀ ܒܟ݂ܠܝܘܿܡ ܐܹܒܲܪܟ݂ܵܟܼ ܘܐܹܫܲܒܲܚ ܫܡܵܟܼ ܠܥܵܠܲܡ܀ ܪܲܒ̇ܘܼ ܡܵܪܲܢ ܘܲܡܫܲܒܲܚ ܛܵܒ݂܀ ܘܠܲܝܬ̇ ܣܵܟ݂ܵܐ ܠܪܲܒ̇ܘܼܬܹܗ܀ ܕܵܪܵܐ ܠܕܼܵܪܵܐ ܢܸܫܬܲܥܘܿܢ ܥܒ݂ܵܕܲܝ̈ܟ܀ ܘܓܲܢ݇ܒܵܪܘܼܬ݂ܵܟܼ ܢܚܲܘܘܿܢ܀ ܘܥܘܼܫܢܵܐ ܕܲܕܼܚܝܼܠܘܼܬ݂ܵܟܼ ܢܹܐܡܪܘܼܢ܀ ܘܪܲܘ̱ܪ̈ܒ݂ܵܬ݂ܵܟܼ ܢܸܫܬܲܥܘܿܢ܀ ܘܲܕܼܚܝܼܠܘܼܬ݂ ܥܘܼܫܢܵܟܼ ܢܹܐܡܪܘܼܢ܀ ܘܪܲܒ̇ܘܼܬ݂ܵܟܼ ܐܸܫܬܲܥܸܐ܀ ܕܘܼܟ݂ܪܵܢܵܐ ܕܛܲܝ̈ܒ̇ܘܵܬ݂ܵܟܼ ܣܲܓ̇ܝܼ̈ܐܵܬ݂ܵܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ܀ ܐܹܗܲܠܸܠܘܼܝܵܗ܀
ܥܘܿܢ̈ܝܵܬ݂ܵܐ ܕܲܩܕܼܵܡ: ܒܩܵܠ: ܬܲܠܡܝܼܕܼܵܘ̈ܗܝ ܕܲܡܫܝܼܚܵܐ. ܐܵܘܕܵܘ ܠܹܗ ܘܒܲܪܸܟ݂ܘ ܠܲܫܡܹܗ: ܐܵܘܕܵܘ ܠܹܗ ܡܵܝܘܿܬܹ̈ܐ ܠܲܒ݂ܪܵܐ ܕܦܲܪܩܲܢ: ܡ̣ܢ ܫܘܼܥܒܵܕܹܗ ܕܡܵܘܬܵܐ: ܕܐܲܚܝܼܕܼ ܗ̄ܘ̣ܵܐ ܠܲܢ ܒܲܚܛܵܗܲܝܢ. ܟܠܹܗ ܓܹܝܪ ܕܲܢܚܸܬ݂ ܠܲܫܝܘܿܠ: ܕܢܲܚܹܐ ܡܝܼܬܹ̈ܐ ܡ̣ܢ ܩܲܒ݂ܪܹ̈ܐ: ܡܲܢܘܼ ܡܨܹܐ ܦܵܪܲܥ ܛܲܝܒ̇ܘܼܬ݂ܵܐ: ܕܲܗܘܵܬ̤ ܒܹܗ ܒܓܸܢܣܵܐ ܕܡܵܝܘܿܬܹ̈ܐ܀ ܦܘܼܡܝ ܢܡܲܠܸܠ ܚܸܟ݂ܡ̱ܬ݂ܵܐ: ܐܸܬ݂ ܓܵܘܲܣܘ ܚܵܛܵܝܹܐ ܒܲܬ݂ܝܵܒ݂ܘܼܬ݂ܵܐ: ܕܩܲܠܝܼܠ ܗ̄ܘ̣ ܓܹܝܪ ܙܲܒ݂ܢܵܐ: ܡܗܲܒܸ̇ܒ݂ ܥܵܠܡܵܐ ܘܥܵܒܲܪ ܠܹܗ. ܛܘܼܒ݂ܵܐ ܠܬܲܝܵܒܹ̈ܐ ܘܕܼܝܼܢܵܐ ܠܥܵܘܵܠܹ̈ܐ ܕܠܵܐ ܐܸܙܕܲܕܲܩܘ: ܕܐܸܢ ܡܵܪܝ ܟܹܐܢܵܐܝܼܬ݂ ܕܵܐܸܢ ܐܲܢ̄ܬ̇: ܡܲܢܘܼ ܡܨܹܐ ܙܵܟܹܐ ܒܹܝܬ݂ܕܝܼܢܵܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܠܛܲܝܒ̇ܘܼܬ݂ܵܟ݂ ܡܲܠܟܵܐ ܡܫܝܼܚܵܐ ܡܦܝܼܣܝܼܢܲܢ: ܕܠܵܐ ܬܸܬ̇ܕ̇ܟܲܪ ܣܲܟ݂ܠ̱ܘܵܬ݂ܵܐ ܕܥܲܒ݂ܕܲܝ̈ܟ: ܕܲܫܩܲܠܘ ܐ̄ܪܵܙ ܦܲܓܼܪܵܟ݂. ܘܗܝܼ ܬܩܘܼܡ ܒܐܲܦܲܝ̈ܗܘܿܢ ܒܝܘܿܡ ܢܘܼܚܵܡܵܐ: ܘܡ̣ܢ ܓܹܗܲܢܵܐ ܢܸܬ݂ܦܲܨܘܿܢ: ܘܥܲܡ ܥܝܼܪܹ̈ܐ ܠܐܘܼܪܥܵܟ݂ ܢܸܬ݂ܥܲܠܘܿܢ: ܒܫܘܼܒ݂ܚܵܐ ܪܲܒܵܐ ܠܪܵܘܡܵܐ ܕܲܫܡܲܝܵܐ܀	ܥܘܿܢ̈ܝܵܬ݂ܵܐ ܕܲܩܕܼܵܡ: ܒܩܵܠ: ܫܠܝܼܚܹ̈ܐ ܩܲܕ̇ܝܼܫܹ̈ܐ. ܬܵܘ ܢܫܲܒܲܚ ܠܡܵܪܝܵܐ: ܬܵܘ ܡܵܝܘܿܬܹ̈ܐ ܢܵܘܕܹ̇ܐ ܘܲܢܫܲܒܲܚ: ܠܗ̇ܘ ܕܲܒ݂ܡܵܘܬܹ̇ܗ ܒܲܛܸܠ ܫܘܼܠܛܵܢ ܡܵܘܬܵܐ. ܘܲܡܠܲܟ݂ ܚܲܝܹ̈ܐ ܘܢܘܼܚܵܡܵܐ: ܠܓܸܢܣܵܐ ܟܠܹܗ ܕܡܵܝܘܿܬܹ̈ܐ܀ ܬܵܘ ܢܸܒ݂ܪܘܿܟ݂ ܘܢܸܣܓ̇ܘܿܕܼ ܠܹܗ: ܠܵܟ݂ ܣܵܓܼܕ̇ܝܼܢܲܢ ܡܫܝܼܚܵܐ ܦܵܪܘܿܩܲܢ: ܕܐܲܢ̄ܬ̇ܘܼ ܡܢܲܚܡܵܢܵܐ ܘܦܵܪܘܿܩܵܐ ܕܟ݂ܠܗܘܿܢ ܥܲܢܝܼܕܹ̈ܐ. ܐܲܝܠܹܝܢ ܕܲܥܡܲܕܼܘ ܒܲܫܡܵܟܼ: ܘܐܵܘܕ̇ܝܼܘ ܒܲܨܠܝܼܒ݂ܵܟ݂ ܘܲܒ݂ܡܵܘܬܵܟ݂܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܠܵܟ݂ ܫܘܼܒ݂ܚܵܐ ܕܒܲܩܝܵܡܬܵܟ݂ ܐܸܫܬܵܘܕ̇ܝܼܬ̇: ܚܲܝܹ̈ܐ ܘܢܘܼܚܵܡܵܐ ܠܓܸܢܣܵܐ ܟܠܹܗ ܕܡܵܝܘܿܬܹ̈ܐ: ܘܠܵܟ݂ ܢܵܘܕܲܐ ܘܲܢܫܲܒܲܚ: ܕܐܲܢ̄ܬ̇ܘܼ ܡܢܲܚܡܵܢܵܐ ܕܥܲܢܝܼܕܹ̈ܐ܀	ܥܘܿܢ̈ܝܵܬ݂ܵܐ ܕܲܩܕܼܵܡ: ܒܩܵܠ: ܛܘܼܒܹܝܗ̇ ܠܪܘܼܚܵܟ݂ ܐܹܪܲܡܪ̱ܡܵܟ݂ ܡܵܪܝ ܡܲܠܟܵܐ: ܡܲܠܟܵܐ ܡܫܝܼܚܵܐ ܦܵܪܘܿܩܲܢ: ܒܝܘܿܡ ܡܹܐܬ݂ܝܼܬ݂ܵܟ݂ ܢܲܚܸܡܲܝܢܝ. ܘܐܲܩܝܼܡܲܝܢܝ ܡ̣ܢ ܝܲܡܝܼܢܵܟ݂: ܒܝܵܘܡܵܐ ܕܕܼܵܢܚܵܐ ܪܲܒ̇ܘܼܬ݂ܵܟ݂܀ ܐܲܠܵܗܝ ܒܵܟ݂ ܣܲܒ̇ܪܹܬ݂ ܠܵܐ ܐܸܒ݂ܗܲܬ݂: ܣܵܓܼܕ̇ܝܼܢܲܢ ܡܵܪܝ ܠܲܨܠܝܼܒ݂ܵܟ: ܕܒܹܗ ܩܝܵܡܬܲܢ ܘܒܹܗ ܢܘܼܚܵܡܲܢ. ܘܒܹܗ ܡܸܬ݂ܢܲܚܡܝܼܢ ܥܲܢܝܼܕܲܝ̈ܢ: ܘܠܵܒ݂ܫܝܼܢ ܫܘܼܒ݂ܚܵܐ ܦܲܓܼܪ̈ܲܝܗܘܿܢ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܐܲܠܵܗܵܐ ܐܲܒ݂ܵܐ ܐܲܚܵܢܝ: ܒܪܵܐ ܡܫܝܼܚܵܐ ܢܲܚܸܡ ܡܝܼܬ݂ܘܼܬ݂ܝ. ܘܪܘܼܚܩܘܼܕܼܫܵܐ ܦܵܪܲܩܠܹܝܛܵܐ: ܡܲܢܲܥܲܝܢܝ ܠܐܲܬ݂ܪܵܐ ܕܢܘܼܗܪܵܐ܀

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܠܲܡܪܲܚܡܵܢܘܼܬ݂ܵܟ݂ ܡܵܪܲܢ ܘܐܲܠܵܗܲܢ: ܘܠܲܒ݂ܛܝܼܠܘܼܬܹܗ ܕܨܸܒ݂ܝܵܢܵܟ݂ ܕܲܥܠܲܝܢ: ܚܲܝܵܒ݂ܝܼܢܲܢ ܕܢܵܘܕܸ݁ܐ ܘܢܸܣܓܿܘܿܕܼ ܘܲܢܫܲܒܲܚ ܒܟ݂ܠܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܐܵܡܪܝܼܢ:

ܡܵܪܝܵܐ ܩܪܹܝܬ݂ܵܟ݂ ܐܲܢ̄ܬ݁ ܥܢܝܼܢܝ. ܨܘܼܬ݂ ܡܸܠܲܝ̈ ܘܩܲܒܸ݁ܠ ܨܠܘܼܬ݂ܝ. ܡܵܪܝܵܐ ܩܪܹܝܬ݂ܵܟ݂ ܐܲܢ̄ܬ݁ ܥܢܝܼܢܝ܀ ܨܘܼܬ݂ ܡܸܠܲܝ̈ ܘܩܲܒܸ݁ܠ܀ ܨܠܘܼܬ݂ܝ ܐܲܝܟ݂ ܥܸܛܪܵܐ ܩܕܼܵܡܲܝܟ܀ ܩܘܼܪܒܵܢܵܐ ܕܐܝܼܕܲܝ̈ ܐܲܝܟ݂ ܩܘܼܪܒܵܢܹܗ ܕܪܲܡܫܵܐ܀ ܐܲܩܝܼܡ ܡܵܪܝܵܐ ܢܵܛܘܿܪܵܐ ܠܦܘܼܡܝ ܘܢܵܛܘܿܪܵܐ ܠܣܸܦ̈ܘܵܬ݂ܝ܀ ܕܠܵܐ ܢܸܣܛܸܐ ܠܹܒ݁ܝ ܠܡܸܠܬ݂ܵܐ ܒܝܼܫܬܵܐ܀ ܘܐܸܥܒܸ݁ܕܼ ܥܒ݂ܵܕܹ̈ܐ ܕܥܵܘܠܵܐ܀ ܥܲܡ ܓܲܒ݂ܪܹ̈ܐ ܪ̈ܲܫܝܼܥܹܐ ܠܵܐ ܐܸܬ݂ܡܲܠܲܚ ܥܲܡܗܘܿܢ܀ ܢܲܠܦܲܢܝ ܙܲܕ݁ܝܼܩܵܐ ܘܢܲܟ݁ܣܲܢܝ܀ ܡܸܫܚܵܐ ܕܪ̈ܲܫܝܼܥܹܐ ܠܪܹܫܝ ܠܵܐ ܢܲܕܼܗܸܢ܀ ܡܸܛܠ ܕܲܨܠܘܿܬ݂ܝ ܥܲܠ ܒܝܼܫܘܼܬ݂ܗܘܿܢ܀ ܘܐܸܬ݂ܟ݁ܠܝܼܘ ܒܐܝܼܕܼܵܐ ܕܟܹܐܦܵܐ ܕܲܝܵܢܲܝ̈ܗܘܿܢ܀ ܘܲܫ̣ܡܲܥܘ ܡܸܠܲܝ̈ ܕܒܲܣܡܝܼ̈ܡܵܢ܀ ܐܲܝܟ݂ ܣܸܟ݁ܬ݂ܵܐ ܕܨܵܪܝܵܐ ܐܲܪܥܵܐ܀ ܐܸܬ݂ܒܲܕܲܪܘ ܓܲܪ̈ܡܲܝܗܘܿܢ ܥܲܠ ܦܘܼܡܵܗ̇ ܕܲܫܝܘܿܠ܀ ܘܐܸܢܵܐ ܠܘܵܬ݂ܵܟ݂ ܡܵܪܝܵܐ ܐܲܪܝܼܡܸܬ݂ ܥܲܝܢܲܝ̈: ܘܲܥܠܲܝܟ ܐܸܬ݁ܬܲܟ݂ܠܸܬ݂ ܠܵܐ ܬܸܫܕܹ݁ܝܗ̇ ܠܢܲܦ̮ܫܝ܀ ܢܲܛܲܪܲܝܢܝ ܡ̣ܢ ܐܝܼܕܼܵܐ ܕܫܲܒ݂ܗ̱ܪ̈ܵܢܹܐ܀ ܕܲܛ̣ܡܲܪܘ ܠܝܼ ܦܲܚܹ̈ܐ܀ ܢܸܦܠܘܼܢ ܥܵܘܵܠܹ̈ܐ ܐܲܟ݂ܚ̄ܕܼܵܐ ܒܲܡܨܝܼ̈ܕܼܵܬ݂ܗܘܿܢ܀ ܥܕܲܡܵܐ ܕܐܸܥܒܲܪ ܐܸܢܵܐ܀

ܒܩܵܠܝ ܠܡܵܪܝܵܐ ܩ̇ܪܹܝܬ݂ ܒܩܵܠܝ ܠܡܵܪܝܵܐ ܐܸܬ݂ܟܲܫܦܹܬ݂܀ ܘܐܲܪܡܝܼܬ݂ ܩܕܼܵܡܵܘܗܝ ܬܲܟ݂ܫܲܦ̮ܬ݁ܝ܀ ܘܐܘܼܨܵܢܝ ܩܕܼܵܡܵܘܗܝ ܚܵܘܝܼܬ݂܀ ܟܲܕܼ ܐܸܬ݁ܛܲܪܦܲܬ̤ ܪܘܼܚܝ ܐܲܢ̄ܬ݁ ܝܵܕܲܥ ܐܲܢ̄ܬ݁ ܫܒ݂ܝܼ̈ܠܲܝ܀ ܒܐܘܼܪܚܵܐ ܕܗܲܠܟ݂ܵܬ݂ܝ̈ ܛ̣ܡܲܪܘ ܠܝܼ ܦܲܚܹ̈ܐ܀ ܚܵܪܹܬ݂ ܠܝܲܡܝܼܢܵܐ ܘܲܚ̇ܙܹܝܬ݂ ܘܠܲܝܬ݁ ܕܚܵܟܹܡ̇ ܠܝܼ܀ ܐܸܒܲܕܼ ܡܹܢܝ ܒܹܝܬ݂ ܡܲܥܪ̱ܩܵܐ ܘܠܲܝܬ݁ ܬܵܒ݂ܘܿܥܵܐ ܠܢܲܦ̮ܫܝ܀ ܘܲܓ݂ܥܹ̇ܝܬ݂ ܠܘܵܬ݂ܵܟ݂ ܡܵܪܝܵܐ ܘܐܸܡ̇ܪܹܬ݂܀ ܕܐܲܢ̄ܬ݁ܘܼ ܣܲܒ݂ܪܝ ܘܲܡܢܵܬ݂ܝ ܒܐܲܪܥܵܐ ܕܚܲܝܹ̈ܐ܀ ܨܘܼܬ݂ ܠܒ݂ܵܥܘܼܬ݂ܝ ܡܸܛܠ ܕܐܸܬ݂ܡܲܟ̇ܟܹܬ݂ ܛܵܒ݂܀ ܦܲܨܵܢܝ ܡ̣ܢ ܪ̈ܵܕܼܘܿܦܲܝ ܡܸܛܠ ܕܲܥܫܸܢܘ ܢܹܡܝ܀ ܐܲܩܸܦ ܢܲܦ̮ܫܝ ܡ̣ܢ ܒܹܝܬ݂ ܚܒ݂ܘܼܫܝܵܐ ܕܐܵܘܕܹ̇ܐ ܠܲܫܡܵܟ݂܀ ܠܝܼ ܢܣܲܟ̇ܘܿܢ ܙܲܕ̇ܝܼܩܲܝ̈ܟ ܟܲܕܼ ܬܸܦܪ̱ܥܲܢܝ܀

ܫܪܵܓ݂ܵܐ ܗ̄ܝ̣ ܡܸܠܬ݂ܵܟ݂ ܠܪܸ̈ܓ݂ܠܲܝ ܘܢܘܼܗܪܵܐ ܠܲܫܒ݂ܝܼ̈ܠܲܝ܀ ܝܼܡܝܼܬ݂ ܘܐܲܫܪܸܬ݂ ܕܐܸܛܲܪ ܕܝܼܢܹ̈ܐ ܕܙܲܕ̇ܝܼܩܘܼܬ݂ܵܟ݂܀ ܐܸܬ݂ܡܲܟ̇ܟܹܬ݂ ܪܵܘܪܒ݂ܵܐܝܼܬ݂ ܡܵܪܝܵܐ ܐܲܚܵܢܝ ܐܲܝܟ݂ ܡܸܠܬ݂ܵܟ݂܀ ܒܡܸܠܵܘ̈ܗܝ ܕܦܘܼܡܝ ܨܒ݂ܝܼ ܡܵܪܝܵܐ ܘܡ̣ܢ ܕܝܼܢܲܝ̈ܟ ܐܲܠܸܦܲܝܢܝ܀ ܢܲܦ̮ܫܝ ܒܐܝܼܕܲܝ̈ܟ ܗ̄ܝ̣ ܒܟ݂ܠܙܒܲܢ ܘܢܵܡܘܿܣܵܟ݂ ܠܵܐ ܛܥܹܝܬ݂܀ ܣܵܡܘ ܠܝܼ ܚܲܛܵܝܹ̈ܐ ܦܲܚܹ̈ܐ ܘܡ̣ܢ ܦܘܼܩܕܵܢܲܝ̈ܟ ܠܵܐ ܣܛܹܝܬ݂܀ ܝܸܪܬܹ̇ܬ݂ ܣܵܗܕ̇ܘܼܬ݂ܵܟ݂ ܠܥܵܠܲܡ ܡܸܛܠ ܕܒ݂ܘܼܣܵܡܵܐ ܗ̄ܝ̣ ܕܠܹܒ̇ܝ܀ ܐܲܦܢܝܼܬ݂ ܠܹܒ̇ܝ ܕܐܸܥܒܸ̇ܕܼ ܦܘܼܩܕܵܢܲܝ̈ܟ ܠܥܵܠܲܡ ܒܲܫܪܵܪܵܐ܀

ܫܲܒܲܚܘ ܠܡܵܪܝܵܐ ܟܠܟ݂ܘܿܢ ܥܲܡܡܹ̈ܐ܀ ܘܫܲܒ̇ܚܵܗ̈ܝ ܟܠܗܹܝܢ ܐܸܡܘܵܬ݂ܵܐ܀ ܡܸܛܠ ܕܥܸܫܢܲܬ̤ ܥܠܲܝܢ ܛܲܝܒ̇ܘܼܬܹܗ܀ ܫܲܪܝܼܪܵܐܝܼܬ݂ ܡܵܪܝܵܐ ܗ̄ܘܼ ܠܥܵܠܲܡ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܡܵܪܝܵܐ ܩܪܹܝܬ݂ܵܟ݂ ܐܲܢ̄ܬ̇ ܥܢܝܼܢܝ: ܨܘܼܬ݂ ܡܸܠܲܝ̈ ܘܩܲܒܸ̇ܠ ܨܠܘܿܬ݂ܝ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܫܡܲܥ ܡܵܪܲܢ ܘܐܲܠܵܗܲܢ ܨܠܘܿܬ݂ܵܐ ܕܥܲܒ݂ܕܲܝ̈ܟ ܒܲܚܢܵܢܵܟ݂: ܘܩܲܒܸ̇ܠ ܒܵܥܘܼܬ݂ܵܐ ܕܣܵܓ݂ܘܿܕܲܝ̈ܟ ܒܲܡܪܲܚܡܵܢܘܼܬ݂ܵܟ݂: ܘܚܘܼܢ ܠܚܲܛܵܝܘܼܬܲܢ ܒܛܲܝܒ̇ܘܼܬ݂ܵܟ݂ ܘܲܒ݂ܪ̈ܲܚܡܲܝܟ: ܐܵܣܝܵܐ ܕܦܲܓ݂ܪ̈ܲܝܢ ܘܣܲܒ݂ܪܵܐ ܛܵܒ݂ܵܐ ܕܢܲܦ̮̈ܫܵܬܲܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܫܘܼܪܵܝܵܐ ܕܒ݂ܵܬܲܪ:

ܕܲܥܪܘܼܒ݂ܬܵܐ ܕܩܲܕܼܡܵܝܹ̈ܐ	ܕܲܥܪܘܼܒ݂ܬܵܐ ܕܡܸܨܥܵܝܹ̈ܐ	ܕܲܥܪܘܼܒ݂ܬܵܐ ܕܲܐܚܪ̈ܵܝܹܐ
ܐܲܠܵܗܵܐ ܩܵܡ݂ ܒܟܸܢܫܵܐ ܕܡܲܠܲܐܟܹ̈ܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܐܲܠܵܗܵܐ ܩܵܡ݂ ܒܟܸܢܫܵܐ ܕܡܲܠܲܐܟܹ̈ܐ܀ ܘܲܒ݂ܓ݂ܵܘ ܡܲܠܲܐܟܹ̈ܐ ܢܕܼܘܼܢ܀ ܥܕܲܡܵܐ ܠܐܸܡܲܬ݂ܝ ܕܵܝ̇ܢܝܼܢ ܐܢ݇ܬ̇ܘܿܢ ܥܲܘܠܵܐ܀ ܘܒܲܐܦܹ̈ܐ ܕܪ̈ܲܫܝܼܥܹܐ ܢܵܣܒ̇ܝܼܢ ܐܢ݇ܬ̇ܘܿܢ܀ ܕܘܼܢܘ ܠܝܲܬ݂ܡܹ̈ܐ ܘܲܠܒ݂ܵܝܫܹ̈ܐ܀ ܘܲܠܡܸܣܟܹ̇ܢܹ̈ܐ ܘܲܠܡܲܟ̇ܝܼܟܹ̈ܐ ܙܲܟܵܘ܀ ܦܲܨܵܘ ܠܡܸܣܟܹ̇ܢܹ̈ܐ ܘܲܠܒ݂ܵܝܫܹ̈ܐ ܡܸܢ ܐܝܼܕܼܵܐ ܕܪ̈ܲܫܝܼܥܹܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ܀ ܐܹܗܲܠܸܠܘܼܝܵܗ܀	ܡܵܪܝܵܐ ܒܨܲܝܬܵܢܝ ܘܝܼܕܲܥܬܵܢܝ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܡܵܪܝܵܐ ܒܨܲܝܬܵܢܝ ܘܝܼܕܲܥܬܵܢܝ܀ ܐܲܢ݇ܬ̇ ܝܵܕܲܥ̇ ܐܲܢ݇ܬ̇ ܡܲܘܬܲܒ݂ܝ ܘܲܡܩܵܡܝ܀ ܐܸܣܬܲܟܲܠܬ̇ ܡܲܚܫ̈ܒ݂ܵܬ݂ܝ ܡ݂ܢ ܪܲܘܡܵܐ܀ ܐܘܼܪܚܝ ܘܲܫܒ݂ܝܼ̈ܠܲܝ ܝܵܕܲܥ̇ ܐܲܢ݇ܬ̇܀ ܘܟ݂ܠܗܹܝܢ ܐܘܼܪ̈ܚܵܬ݂ܝ ܥܲܩܸܒ݂ܬ̇܀ ܐܸܢ ܐܝܼܬ݂ ܫܘܼܚܠܵܦܵܐ ܒܠܸܫܵܢܝ ܐܲܢ݇ܬ̇ ܡܵܪܝܵܐ ܝܵܕܲܥ̇ ܐܲܢ݇ܬ̇܀ ܟܠܗܹܝܢ ܕܡ݂ܢ ܩܕܼܝܼܡ ܘܲܠܚܲܪܬ݂ܵܐ܀ ܓܒܲܠܬܵܢܝ ܘܣܵܡ݂ܬ̇ ܥܠܲܝ ܐܝܼܕܼܵܟܼ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ܀ ܐܹܗܲܠܸܠܘܼܝܵܗ܀	ܩܲܪܝܼܒ݂ܘܼ ܡܵܪܝܵܐ ܠܐܲܝܠܹܝܢ ܕܩܵܪܹܝܢ ܠܹܗ ܒܩܘܼܫܬܵܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܩܲܪܝܼܒ݂ܘܼ ܡܵܪܝܵܐ ܠܐܲܝܠܹܝܢ ܕܩܵܪܹܝܢ ܠܹܗ ܒܩܘܼܫܬܵܐ܀ ܘܥܵܒܹ̇ܕܼ ܨܸܒ݂ܝܵܢܵܐ ܕܕܼܵܚܠܵܘ̈ܗܝ܀ ܫܵܡܲܥ݁ ܒܵܥܘܼܬ݂ܗܘܿܢ ܘܦܵܪܸܩ̇ ܠܗܘܿܢ܀ ܢܵܛܲ݁ܪ ܡܵܪܝܵܐ ܠܟ݂ܠܗܘܿܢ ܕܵܚܠܵܘ̈ܗܝ܀ ܘܲܠܟ݂ܠܗܘܿܢ ܥܲܘܵܠܹ̈ܐ ܡܲܘܒܸ̇ܕܼ܀ ܬܸܫ̈ܒ̇ܚܵܬܹܗ ܕܡܵܪܝܵܐ ܐܹܡܲܠܸܠ ܒܦܘܼܡܝ܀ ܘܲܢܒܲܪܟ݂ܘܼܢ ܟܠ ܒܢܲܝ̈ ܒܸܣܪܵܐ܀ ܠܲܫܡܵܐ ܕܩܘܼܕܼܫܹܗ ܠܥܵܠܲܡ ܥܵܠܡܝܼܢ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ܀ ܐܹܗܲܠܸܠܘܼܝܵܗ܀
ܥܘܿܢܝܵܬ݂ܵܐ ܕܒ݂ܵܬܲܪ: ܒܩܵܠ: ܦܘܼܫ ܒܲܫܠܵܡܵܐ. ܐܹܒܲܪܸܟ݂ ܠܡܵܪܝܵܐ ܒܟ݂ܠܙܒܲܢ: ܒܪܝܼܟ݂ܘܼ ܝܵܘܡܵܟ݂ ܒܲܪ ܡܵܪܹܟ̇ܠ: ܕܐܵܬܹܐ ܘܣܵܕܹܩ ܥܘܼܒܵܗ̇ ܕܲܫܝܘܿܠ. ܫܒ݂ܝܼܚ ܢܘܼܚܵܡܵܟ݂ ܕܲܡܣܲܟܹܝܢ ܠܹܗ: ܕܵܪܹ̈ܐ ܕܲܥܒܲܪܘ ܘܲܕܼܩܲܝܵܡܝܼܢ܀ ܗܸܢܘܿܢ ܥܵܒ݂ܪܝܼܢ ܘܐܲܢ̄ܬ̇ ܩܲܝܵܡ ܐܲܢ̄ܬ̇: ܥܵܠܡܵܐ ܗܵܢܵܐ ܗܵܐ ܥܵܒܲܪ ܠܹܗ: ܘܒ݂ܵܛ̈ܠܵܢ ܟܠܗܹܝܢ ܪ̈ܓ݂ܝܼܓܼܵܬܹܗ. ܘܛܘܼܒ݂ܵܘܗܝ ܠܐܲܝܢܵܐ ܕܛܲܝܸܒ݂ ܠܹܗ: ܙܘܵܕܹ̈ܐ ܠܥܵܠܡܵܐ ܗ̇ܘ ܕܠܵܐ ܥܵܒܲܪ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܠܲܝܬ̇ ܠܲܢ ܣܲܒ݂ܪܵܐ ܕܢܸܫܬܲܒ݂ܗܲܪ ܒܹܗ: ܐܸܠܵܐ ܨܠܝܼܒ݂ܵܟ݂ ܡܚܲܣܹܐ ܚܵܘܒܲܝ̈ܢ. ܕܗ̤ܘ ܐܝܼܬ݂ܵܘܗܝ ܠܲܢ ܫܘܼܪܵܐ ܪܵܡܵܐ: ܘܲܡܦܲܨܹܐ ܠܲܢ ܡ̣ܢ ܢܸܟ݂ܝܵܢܹ̈ܐ܀	ܥܘܿܢܝܵܬ݂ܵܐ ܕܒ݂ܵܬܲܪ: ܒܩܵܠ: ܐܝܼܬ݂ܝܵܐ ܕܲܒ݂ܪܸܡܙܹܗ ܓܒܲܠܬܵܢܝ ܘܣܵܡܬ̇ ܥܠܲܝ ܐܝܼܕܼܵܟ݂: ܒܲܥܪܘܼܒ݂ܬܵܐ ܒܪܵܫܝܼܬ݂ ܓܲܒ݂ܠܹܗ ܐܲܠܵܗܵܐ ܠܐܵܕܼܵܡ ܡ̣ܢ ܥܲܦܪܵܐ: ܘܲܢܦܲܚ ܒܹܗ ܪܘܼܚܵܐ ܘܥܲܒ݂ܕܹ̇ܗ ܡܲܠܵܠܵܐ ܕܢܸܙܡܲܪ ܠܹܗ ܫܘܼܒ݂ܚܵܐ܀ ܥܲܡܵܐ ܣܲܟ݂ܠܵܐ ܘܠܵܐ ܗܘ̣ܵܐ ܚܲܟ̇ܝܼܡܵܐ: ܒܲܥܪܘܼܒ݂ܬܵܐ ܨܲܠܒ݂ܘܼܗܝ ܝܗ̄ܘܼܕܼܵܝܹ̈ܐ ܠܡܵܪܲܢ ܥܲܠ ܪܸܫ ܓܵܓ݂ܘܼܠܬܵܐ: ܘܒܲܥܪܘܿܒ݂ܬܵܐ ܩܲܛܠܹܗ ܠܡܵܘܬܵܐ ܩܵܛܘܿܠܵܐ ܘܢܲܚܡܹܗ ܠܲܟ݂ܝܵܢܲܢ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܢܸܒ݂ܥܸܐ ܒܬܲܚܢܲܢܬܵܐ ܘܢܸܬ݂ܟܲܫܲܦ ܠܪ̈ܲܚܡܹܐ ܘܢܸܫܐܲܠ ܫܘܼܒ݂ܩܵܢܵܐ: ܡ̣ܢ ܗ̇ܘ ܚܲܢܵܢܵܐ: ܕܲܦܬ݂ܝܼܚܘܼ ܬܲܪܥܹܗ ܠܟ݂ܠ ܕܬ݂ܵܝܒ̇ܝܼܢ ܠܘܵܬܹܗ܀	ܥܘܿܢܝܵܬ݂ܵܐ ܕܒ݂ܵܬܲܪ: ܒܩܵܠ: ܢܸܬ̇ܛܲܝܲܒ݂ ܒܕܸܚܠ̱ܬ݂ܵܐ. ܩܲܪܝܼܒ݂ ܗ̄ܘ̣ ܦܘܼܪܩܵܢܹܗ ܠܕܼܵܚܠܵܘ̈ܗܝ: ܩܪܒ݂ ܙܲܒ݂ܢܵܐ ܕܥܵܠܡܵܐ ܗܵܢܵܐ ܥܵܒܲܪ ܠܹܗ: ܘܡܸܫܬܲܪ̈ܝܵܢ ܘܒ݂ܵܛ̈ܠܵܢ ܟܠܗܹܝܢ ܪ̈ܓ݂ܝܼܓܼܵܬܹܗ. ܫܡܲܥܘ ܡܵܝܘܿܬܹ̈ܐ ܘܩܲܪܸܒ݂ܘ ܬܝܵܒ݂ܘܼܬ݂ܵܐ: ܥܲܕܼܠܵܐ ܢܹܐܬܹܐ ܝܵܘܡܹܗ ܕܥܘܼܢܕܵܢܵܐ: ܘܢܸܬ݂ܦܪܲܥ ܟܠܢܵܫ ܐܲܝܟ݂ ܕܲܣܥܲܪ ܒܹܝܬ݂ ܕܝܼܢܵܐ ܕܚܝܼܠܵܐ܀ ܐܲܝܟ݂ ܐܲܪܝܵܐ ܕܢܵܗܸܡ ܘܚܵܛܹܦ: ܟܲܕܼ ܡܵܘܬܵܐ ܦܪܝܼܣ ܥܲܠ ܟܠܢܵܫ ܘܒ݂ܵܠܲܥ ܠܹܗ: ܘܡܵܐ ܕܲܡܛܵܢܝ ܙܵܥܹܬ݂ ܣܲܓ̇ܝܼ ܘܐܸܬ݂ܪܲܗܒܹ̇ܬ݂. ܒܕܲܡܦܵܣ ܐ̄ܢܵܐ ܒܚܵܘܒܲܝ̈ ܕܠܵܘ ܐܲܝܟ݂ ܕܫܲܪܟܵܐ ܐܝܼܬܲܝܗܘܿܢ: ܐܸܠܵܐ ܕܲܚܙܵܢܝ ܕܲܡܢܵܬܹܗ ܐܝܼܬܲܝ: ܐܝܼܠܵܢܝ ܐܲܢ̄ܬ̇ܘܼ ܦܵܪܘܿܩܝ ܘܠܵܟ݂ܘܼ ܡܣܲܟܸܐ ܐܢܵܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܫܘܼܒ݂ܚܵܐ ܠܵܟ݂ ܝܑܼܫܘܿܥ ܡܲܠܟܲܢ ܙܲܟܵܝܵܐ: ܕܒܲܨܠܝܼܒ݂ܵܟ݂ ܦܪܲܩܬܵܝܗܝ ܠܓܸܢܣܲܢ ܡ̣ܢ ܛܘܼܥܝܲܝ. ܚܲܝܠܵܟ݂ ܪܲܒܵܐ ܢܚܲܕܸ̇ܬ݂ ܠܲܓ݂ܒܼܝܼܠܬܲܢ: ܘܢܸܒ݂ܛܲܠ ܡܵܘܬܵܐ ܘܢܲܡܠܸܟ݂ ܢܘܼܚܵܡܵܐ: ܘܢܸܫܬ̇ܘܸܐ ܠܪ̈ܲܚܡܹܐ ܒܝܲܕܼ ܪܸܡܙܵܟܼ ܡܲܠܟܵܐ ܡܢܲܚܡܵܢܵܐ܀

ܘܪܵܡܹܐ ܡܫܲܡܫܵܢܵܐ ܐܘܼܪܵܪܵܐ: ܘܐܵܣܲܪ ܙܘܼܢܵܪܵܐ: ܘܩܵܐܹܡ ܩܕܼܵܡ ܫܟ݂ܝܼܢܬܵܐ ܡܛܲܟ̇ܣܵܐܝܼܬ݂ ܘܐܵܡܲܪ ܟܵܪܘܿܙܘܼܬ݂ܵܐ:

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ ܘܒܲܚܦܝܼܛܘܼܬܼܵܐ ܢܸܒ݂ܥܹܐ ܘܢܹܐܡܲܪ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܘܥܵܢܹܐ ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܐܲܒ݂ܵܐ ܕܪ̈ܲܚܡܹܐ ܘܐܲܠܵܗܵܐ ܕܟ݂ܠܹܗ ܒܘܼܝܵܐܵܐ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ:ܦܵܪܘܿܩܲܢ ܘܝܲܨܘܼܦܬ݂ܵܢܲܢ ܘܲܡܦܲܪܢ̱ܣܵܢܵܐ ܕܟ݂ܠ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܥܲܠ ܫܲܝܢܵܐ ܘܐܵܘܝܘܼܬ݂ܵܐ ܘܩܘܼܝܵܡܵܐ ܕܟ݂ܠܹܗ ܥܵܠܡܵܐ ܘܲܕܼܟ݂ܠܗܹܝܢ ܥܹܕܼܵܬ݂ܵܐ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܥܲܠ ܐܲܬ݂ܪܲܢ ܘܥܲܠ ܟܠ ܐܲܬ݂ܪ̈ܵܘܵܢ: ܘܥܲܠ ܐܲܝܠܹܝܢ ܕܲܒ݂ܗܲܝܡܵܢܘܼܬ݂ܵܐ ܥܵܡܪܝܼܢ ܒܗܘܿܢ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܥܲܠ ܡܘܼܙܵܓ݂ܵܘ̈ܗܝ ܕܐܵܐܲܪ ܘܟܲܗܝܼܢܘܼܬ݂ܵܐ ܕܫܲܢ̄ܬܵܐ ܘܥܲܠܠܵܬ݂ܵܐ ܕܦܹܐܪܹ̈ܐ ܘܥܲܠ ܬܘܼܩܵܢܵܐ ܕܟ݂ܠܹܗ ܥܵܠܡܵܐ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܥܲܠ ܚܘܼܠܡܵܢܵܐ ܕܐܲܒ݂ܵܗܲܝ̈ܢ ܩܲܕ̇ܝܼܫܹ̈ܐ: ܡܵܪܝ ܕܸܢܚܵܐ ܩܵܬ݂ܘܿܠܝܼܩܵܐ ܦܵܛܪܝܼܵܪܟܵܐ: ܘܡܵܪܝ ܦܠܵܢ ܡܝܼܛܪܵܦܘܿܠܹܝܛܵܐ: ܘܡܵܪܝ ܦܠܢ ܐܲܦܸܣܩܘܿܦܵܐ: ܘܥܲܠ ܟܠܗܘܿܢ ܒܢܲܝ̈ ܬܸܫܡܸܫܬ̇ܗܘܿܢ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܐܲܠܵܗܵܐ ܡܪܲܚܡܵܢܵܐ ܗ̇ܘ ܕܲܒ݂ܪ̈ܲܚܡܹܐ ܡܕܲܒܲܪ ܠܟ݂ܠ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܗ̇ܘ ܕܥܲܬ̇ܝܼܪ ܒܪ̈ܲܚܡܵܘܗܝ ܘܲܫܦܝܼܥ ܒܲܚܢܵܢܹܗ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܗ̇ܘ ܕܒܲܟ݂ܝܵܢܹܗ ܐܝܼܬ݂ܵܘܗܝ ܛܵܒ݂ܵܐ ܘܝܵܗܘܿܒ݂ܵܐ ܕܟ݂ܠܗܹܝܢ ܛܵܒ݂ܵـ̈ـܬ݂ܵܐ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܗ̇ܘ ܕܒܲܫܡܲܝܵܐ ܡܸܫܬܲܒܲܚ ܘܒܲܐܪܥܵܐ ܡܸܣܬ̇ܓܸܕܼ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܗ̇ܘ ܕܠܹܗ̤ܘ ܟܝܵܢܵܐܝܼܬ݂ ܐܝܼܬ݂ ܠܵܐ ܡܵܝܘܿܬ݂ܘܼܬ݂ܵܐ ܘܥܵܡܲܪ ܒܢܘܼܗܪܵܐ ܓܲܐܝܵܐ: ܒܵܥܹܝܢܲܢ ܡܸܢܵܟ݂܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܦܪܘܿܩ ܠܟ݂ܠܲܢ ܡܫܝܼܚܵܐ ܡܵܪܲܢ ܒܛܲܝܒ̇ܘܼܬ݂ܵܟ݂: ܘܐܲܣܓܵܐ ܥܲܡܲܢ ܫܲܝܢܵܟ݂ ܘܲܫܠܵܡܵܟ݂: ܘܐܸܬ݂ܪܲܚܲܡܥܠܲܝܢ܀

ܥܲܡܵܐ: ܡܵܪܲܢ ܐܸܬ݂ܪܲܚܲܡܥܠܲܝܢ.

ܡܫܲܡܫܵܢܵܐ: ܢܲܦ̮̈ܫܵܬܲܢ ܘܕܲܚܕܼܵܕܹ̈ܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ ܢܲܓ݂ܥܸܠ.

ܥܲܡܵܐ: ܠܵܟ݂ ܡܵܪܝܵܐ ܐܲܠܵܗܲܢ

ܨܠܘܿܬ݂ܵܐ: ܠܵܟ݂ ܡܵܪܝܵܐ ܐܲܠܵܗܵܐ ܚܲܝܠ̱ܬ݂ܵܢܵܐ ܡܲܓ݂ܥ̱ܠܝܼܢܲܢ ܦܲܓ݂ܪ̈ܲܝܢ ܘܢܲܦ̮̈ܫܵܬܲܢ: ܘܡܸܢܵܟ݂ ܡܵܪܲܢ ܘܐܲܠܵܗܲܢ ܫܵܐܠܝܼܢܲܢ ܫܘܼܒ݂ܩܵܢܵܐ ܕܚܵܘܒܹ̈ܐ ܘܕܲܚܛܵܗܹ̈ܐ: ܗܲܒ݂ܠܲܢ ܒܛܲܝܒ̇ܘܼܬ݂ܵܟ݂ ܘܲܒ݂ܪ̈ܲܚܡܲܝܟ ܐܲܝܟ݂ ܕܲܡܥܵܕܲܬ̇ ܒܟ݂ܠܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܲܪ ܡܫܲܡܫܵܢܵܐ ܕܐܲܟ݂ܪܸܙ ܟܵܪܘܿܙܘܼܬ݂ܵܐ: ܐܲܪܝܼܡܘ ܩܵܠܟ݂ܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.

ܘܥܵܢܹܝܢ: ܩܲܕ̇ܝܼܫܵܐ ܐܲܠܵܗܵܐ: ܩܲܕܝܼܫܵܐ ܚܲܝܠ̱ܬ݂ܵܢܵܐ: ܩܲܕ̇ܝܼܫܵܐ ܠܵܐ ܡܵܝܘܿܬ݂ܵܐ: ܐܸܬ݂ܪܲܚܲܡܥܠܲܝܢ.

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܩܲܕܝܼܫܵܐ ܐܲܠܵܗܵܐ: ܩܲܕܝܼܫܵܐ ܚܲܝܠ̱ܬ݂ܵܢܵܐ: ܩܲܕܝܼܫܵܐ ܠܵܐ ܡܵܝܘܿܬ݂ܵܐ: ܐܸܬ݂ܪܲܚܲܡܥܠܲܝܢ

ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ: ܩܲܕܝܼܫܵܐ ܐܲܠܵܗܵܐ: ܩܲܕܝܼܫܵܐ ܚܲܝܠ̱ܬ݂ܵܢܵܐ: ܩܲܕܝܼܫܵܐ ܠܵܐ ܡܵܝܘܿܬ݂ܵܐ: ܐܸܬ݂ܪܲܚܲܡܥܠܲܝܢ

ܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܩܲܕܝܼܫܵܐ ܘܲܫܒ݂ܝܼܚܵܐ ܘܚܲܝܠ̱ܬ݂ܵܢܵܐ ܘܠܵܐ ܡܵܝܘܿܬ݂ܵܐ: ܕܲܒ݂ܩܲܕܝܼܫܹ̈ܐ ܥܵܡܲܪ ܘܡܸܬ̇ܬ̇ܢܝܼܚ ܨܸܒ݂ܝܵܢܹܗ: ܡܸܬ݂ܟܲܫܦܝܼܢܲܢ ܐܸܬ݂ܦܲܢ ܡܵܪܝ: ܘܚܘܼܣ ܘܪܲܚܸܡ ܥܠܲܝܢ ܐܲܝܟ݂ ܕܲܡܥܵܕܲܬ̇ ܒܟ݂ܠܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܲܪ ܡܫܲܡܫܵܢܵܐ ܕܐܲܟ݂ܪܸܙ: ܒܲܪܸܟ݂ ܡܵܪܝ. ܐܲܪܟܸ̇ܢܘ ܪܹ̈ܫܲܝܟ̇ܘܿܢ ܠܲܣܝܵܡܝܼܕܼܵܐ ܘܩܲܒܸ̇ܠ ܒܘܼܪܟ̇ܬ݂ܵܐ.

ܨܠܘܿܬ݂ܵܐ: ܡܫܝܼܚܵܐ ܢܙܲܗܹܐ ܬܸܫܡܸܫܬܵܟ݂ ܒܡܲܠܟ̇ܘܼܬ݂ܵܐ ܕܲܫܡܲܝܵܐ. ܘܟܲܕܼ ܫܵܠ̈ܡܵܢ ܢܲܦ̮̈ܫܵܬܲܢ ܠܲܚܕܼܵܐ ܗܲܝܡܵܢܘܼܬ݂ܵܐ ܓܡܝܼܪܬܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ: ܟܠܲܢ ܒܲܚܕܼܵܐ ܐܵܘܝܘܼܬ݂ܵܐ ܕܚܘܼܒܵܐ: ܢܸܫܬ̇ܘܸܐ ܕܢܲܣܸܩ ܠܵܟ݂ ܬܸܫܒ̇ܘܿܚܬܵܐ ܘܐܝܼܩܵܪܵܐ ܘܬ݂ܵܘܕ̇ܝܼܬ݂ܵܐ ܘܣܸܓ݂ܕ̇ܬ݂ܵܐ ܒܟ݂ܠܥܸܕܵܢ: ܡܵܪܵܐ ܕܟ݂ܠ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܥܘܿܢܝܼܬ݂ܵܐ ܕܪܲܡܫܵܐ:

ܕܲܥܪܘܼܒ݂ܬܵܐ ܕܩܲܕܼܡܵܝܹ̈ܐ	ܕܲܥܪܘܼܒ݂ܬܵܐ ܕܡܸܨܥܵܝܹ̈ܐ	ܕܲܥܪܘܼܒ݂ܬܵܐ ܕܲܐܚܪ̈ܵܝܹܐ
ܒܩܵܠ: ܐܲܠܵܗܵܐ ܡܸܠܬ݂ܵܐ. ܥܲܠ ܛܲܝܒ̇ܘܼܬ݂ܵܟ݂ ܘܥܲܠ ܩܘܼܫܬܵܟ݂: ܡܲܢܘܼ ܣܵܦܸܩ ܥܵܒ݂ܘܿܕܲܢ ܕܢܵܘܕܹ̇ܐ ܚܠܵܦܲܝܢ ܠܲܡܪܲܚܡܵܢܘܼܬ݂ܵܟ݂: ܕܲܒ݂ܫܘܼܪܵܝܵܐ ܒܨܲܠܡܵܟ݂ ܝܲܩܝܼܪܵܐ ܐܲܬ݂ܩܸܢܬܵܢ: ܘܲܒ݂ܚܲܪܬ݂ܵܐ ܕܙܲܒ݂ܢܹ̈ܐ ܠܒܸܫܬܵܢ ܘܐܲܦܢܝܼܬܵܢ ܠܝܼܕܲܥܬ݂ܵܟ݂: ܡܵܘܪܸܒ݂ ܓܸܢܣܲܢ ܫܘܼܒ݂ܚܵܐ ܠܵܟ݂܀ ܡܲܢܘܼ ܐܲܟ݂ܘܵܬ݂ܵܟ݂ ܡܵܪܝܵܐ ܘܡܲܢܘܼ ܐܲܝܟ݂ ܥܒ݂ܵܕܲܝ̈ܟ: ܡܲܢܘܼ ܣܵܦܸܩ ܥܵܒ݂ܘܿܕܲܢ ܕܢܵܘܕܹ̇ܐ ܚܠܵܦܲܝܢ ܠܲܡܪܲܚܡܵܢܘܼܬ݂ܵܟ݂: ܕܲܒ݂ܫܘܼܪܵܝܵܐ ܒܨܲܠܡܵܟ݂ ܝܲܩܝܼܪܵܐ ܐܲܬ݂ܩܸܢܬܵܢ: ܘܲܒ݂ܚܲܪܬ݂ܵܐ ܕܙܲܒ݂ܢܹ̈ܐ ܠܒܸܫܬܵܢ ܘܐܲܦܢܝܼܬܵܢ ܠܝܼܕܲܥܬ݂ܵܟ݂: ܡܵܘܪܸܒ݂ ܓܸܢܣܲܢ ܫܘܼܒ݂ܚܵܐ ܠܵܟ݂܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܡܲܢܘܼ ܣܵܦܸܩ ܥܵܒ݂ܘܿܕܲܢ ܕܢܵܘܕܹ̇ܐ ܚܠܵܦܲܝܢ ܠܲܡܪܲܚܡܵܢܘܼܬ݂ܵܟ݂: ܕܲܒ݂ܫܘܼܪܵܝܵܐ ܒܨܲܠܡܵܟ݂ ܝܲܩܝܼܪܵܐ ܐܲܬ݂ܩܸܢܬܵܢ: ܘܲܒ݂ܚܲܪܬ݂ܵܐ ܕܙܲܒ݂ܢܹ̈ܐ ܠܒܸܫܬܵܢ ܘܐܲܦܢܝܼܬܵܢ ܠܝܼܕܲܥܬ݂ܵܟ݂: ܡܵܘܪܸܒ݂ ܓܸܢܣܲܢ ܫܘܼܒ݂ܚܵܐ ܠܵܟ݂܀	ܒܩܵܠ: ܠܵܐ ܒܵܗܬ̇ܝܼܢܲܢ ܡܲܢܘܼ ܐܲܟ݂ܘܵܬ݂ܵܟ݂ ܡܵܪܝܵܐ ܘܡܲܢܘܼ ܐܲܝܟ݂ ܥܒ݂ܵܕܲܝ̈ܟ:. ܡܲܢܘܼ ܣܵܦܸܩ ܕܲܢܬܲܢܸܐ ܬܸܕܼܡ̱ܪ̈ܵܬ݂ܵܟ݂ ܡܲܠܟܵܐ ܡܫܝܼܚܵܐ ܦܵܪܘܿܩܲܢ: ܡܸܛܠ ܕܐܲܢ̄ܬ̇ ܫܒ݂ܝܼܚ ܡ̣ܢ ܟܠ: ܒܪܹܫܝܼܬ݂ܵܐ ܕܡܸܢܲܢ ܐܸܬ݂ܓ̇ܠܝܼܬ̇. ܗܵܟܲܢܵܐ ܓܹܝܪ ܐܸܨܛܒ݂ܝܼܬ̇ ܕܬܸܦܪܘܿܩ ܠܐܲܝܠܹܝܢ ܕܗܲܝܡܸܢܘ ܒܵܟ݂: ܘܲܕܼܡܘܼܬ݂ܵܐ ܕܥܲܒ݂ܕܵܐ ܬܸܣܲܩ: ܘܒܲܦܓܲܪ ܬܸܬ݂ܚܙܸܐ ܒܥܵܠܡܵܐ܀ ܡܲܢܘܼ ܢܸܫܬܲܥܸܐ ܬܸܕܼܡܪ̈ܵܬܹܗ ܕܡܵܪܝܵܐ: ܡܲܢܘܼ ܣܵܦܸܩ ܕܲܢܬܲܢܸܐ ܬܸܕܼܡ̱ܪ̈ܵܬ݂ܵܟ݂ ܡܲܠܟܵܐ ܡܫܝܼܚܵܐ ܦܵܪܘܿܩܲܢ: ܡܸܛܠ ܕܐܲܢ̄ܬ̇ ܫܒ݂ܝܼܚ ܡ̣ܢ ܟܠ: ܒܪܹܫܝܼܬ݂ܵܐ ܕܡܸܢܲܢ ܐܸܬ݂ܓ̇ܠܝܼܬ̇. ܗܵܟܲܢܵܐ ܓܹܝܪ ܐܸܨܛܒ݂ܝܼܬ̇ ܕܬܸܦܪܘܿܩ ܠܐܲܝܠܹܝܢ ܕܗܲܝܡܸܢܘ ܒܵܟ݂: ܘܲܕܼܡܘܼܬ݂ܵܐ ܕܥܲܒ݂ܕܵܐ ܬܸܣܲܩ: ܘܒܲܦܓܲܪ ܬܸܬ݂ܚܙܸܐ ܒܥܵܠܡܵܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܡܲܢܘܼ ܣܵܦܸܩ ܕܲܢܬܲܢܸܐ ܬܸܕܼܡ̱ܪ̈ܵܬ݂ܵܟ݂ ܡܲܠܟܵܐ ܡܫܝܼܚܵܐ ܦܵܪܘܿܩܲܢ: ܡܸܛܠ ܕܐܲܢ̄ܬ̇ ܫܒ݂ܝܼܚ ܡ̣ܢ ܟܠ: ܒܪܹܫܝܼܬ݂ܵܐ ܕܡܸܢܲܢ ܐܸܬ݂ܓ̇ܠܝܼܬ̇. ܗܵܟܲܢܵܐ ܓܹܝܪ ܐܸܨܛܒ݂ܝܼܬ̇ ܕܬܸܦܪܘܿܩ ܠܐܲܝܠܹܝܢ ܕܗܲܝܡܸܢܘ ܒܵܟ݂: ܘܲܕܼܡܘܼܬ݂ܵܐ ܕܥܲܒ݂ܕܵܐ ܬܸܣܲܩ: ܘܒܲܦܓܲܪ ܬܸܬ݂ܚܙܸܐ ܒܥܵܠܡܵܐ܀	ܒܩܵܠ: ܐ̄ܪܵܙܵܐ ܪܲܒܵܐ. ܣܲܒ݂ܪܵܐ ܕܟ݂ܠܗܘܿܢ ܣܵܘܦܹ̈ܝܗ̇ ܕܐܲܪܥܵܐ: ܣܒܲܪܬ݂ܵܐ ܕܫܲܝܢܵܐ ܘܲܕܼܚܘܼܒܵܐ ܒܪ̈ܲܚܡܹܐ ܐܸܬ݂ܟܲܪܙܲܬ̤ ܠܲܢ: ܒܕܸܢܚܹܗ ܫܒܼܝܼܚܵܐ ܕܲܡܫܝܼܚܵܐ: ܘܒ݂ܵܗ̇ ܝܑܼܠܦܸܢܲܢ ܕܐܸܬ݂ܪܲܥܝܼ ܠܲܢ ܒܵܪܘܿܝܵܐ. ܘܦܲܢܝܼ ܝܲܗ̄ܒ݂ ܠܲܢ ܨܲܠܡܹܗ ܫܒ݂ܝܼܚܵܐ ܕܐܵܘܒܸ̇ܕܼܢܵܝܗܝ: ܒܕܲܢܣܲܒ݂ ܡܸܢܲܢ ܪܹܫܝܼܬ݂ܵܐ: ܘܫܵܘܬ̇ܦܹܗ ܠܲܟ݂ܝܵܢܲܢ: ܒܐܝܼܩܵܪܵܐ ܥܲܡ ܪܲܒ̇ܘܼܬܹܗ܀ ܐܲܢ̄ܬ̇ܘܼ ܦܪܲܩܬܵܢ ܡ̣ܢ ܣܵܢܐܲܝ̈ܢ: ܣܒܲܪܬ݂ܵܐ ܕܫܲܝܢܵܐ ܘܲܕܼܚܘܼܒܵܐ ܒܪ̈ܲܚܡܹܐ ܐܸܬ݂ܟܲܪܙܲܬ̤ ܠܲܢ: ܒܕܸܢܚܹܗ ܫܒܼܝܼܚܵܐ ܕܲܡܫܝܼܚܵܐ: ܘܒ݂ܵܗ̇ ܝܑܼܠܦܸܢܲܢ ܕܐܸܬ݂ܪܲܥܝܼ ܠܲܢ ܒܵܪܘܿܝܵܐ. ܘܦܲܢܝܼ ܝܲܗ̄ܒ݂ ܠܲܢ ܨܲܠܡܹܗ ܫܒ݂ܝܼܚܵܐ ܕܐܵܘܒܸ̇ܕܼܢܵܝܗܝ: ܒܕܲܢܣܲܒ݂ ܡܸܢܲܢ ܪܹܫܝܼܬ݂ܵܐ: ܘܫܵܘܬ̇ܦܹܗ ܠܲܟ݂ܝܵܢܲܢ: ܒܐܝܼܩܵܪܵܐ ܥܲܡ ܪܲܒ̇ܘܼܬܹܗ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܣܒܲܪܬ݂ܵܐ ܕܫܲܝܢܵܐ ܘܲܕܼܚܘܼܒܵܐ ܒܪ̈ܲܚܡܹܐ ܐܸܬ݂ܟܲܪܙܲܬ̤ ܠܲܢ: ܒܕܸܢܚܹܗ ܫܒܼܝܼܚܵܐ ܕܲܡܫܝܼܚܵܐ: ܘܒ݂ܵܗ̇ ܝܑܼܠܦܸܢܲܢ ܕܐܸܬ݂ܪܲܥܝܼ ܠܲܢ ܒܵܪܘܿܝܵܐ. ܘܦܲܢܝܼ ܝܲܗ̄ܒ݂ ܠܲܢ ܨܲܠܡܹܗ ܫܒ݂ܝܼܚܵܐ ܕܐܵܘܒܸ̇ܕܼܢܵܝܗܝ: ܒܕܲܢܣܲܒ݂ ܡܸܢܲܢ ܪܹܫܝܼܬ݂ܵܐ: ܘܫܵܘܬ̇ܦܹܗ ܠܲܟ݂ܝܵܢܲܢ: ܒܐܝܼܩܵܪܵܐ ܥܲܡ ܪܲܒ̇ܘܼܬܹܗ܀

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܢܲܚܸܡ ܡܵܪܝ ܥܲܢܝܼܕܲܝ̈ܢ ܒܲܚܢܵܢܵܟ݂: ܘܐܲܩܝܼܡ ܐܸܢܘܿܢ ܡ̣ܢ ܝܲܡܝܼܢܵܟ݂: ܘܐܲܠܒܸ̇ܫ ܐܸܢܘܿܢ ܫܘܼܒ݂ܚܵܐ ܦܲܐܝܵܐ ܒܡܲܠܟ̇ܘܼܬ݂ܵܟ݂: ܘܚܲܠܸܛ ܐܸܢܘܿܢ ܥܲܡ ܟܹܐܢܹ̈ܐ ܘܙܲܕ̇ܝܼܩܹ̈ܐ ܓܵܡܪ̈ܲܝ ܨܸܒ݂ܝܵܢܵܟ݂ ܒܐܘܿܪܸܫܠܸܡ ܕܲܠܥܸܠ: ܡܵܪܵܐ ܕܡܵܘܬܲܢ ܘܲܕܼܚܲܝܲܝ̈ܢ: ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܫܘܼܪܵܝܵܐ ܐܲܝܟ݂ ܕܲܒ݂ܟܵܫܟ̇ܘܿܠ: ܘܐܸܢ ܠܲܝܬ̇ ܐܵܡܪܝܼܢ:

ܕܲܥܪܘܼܒ݂ܬܵܐ ܕܩܲܕܼܡܵܝܹ̈ܐ	ܕܲܥܪܘܼܒ݂ܬܵܐ ܕܡܸܨܥܵܝܹ̈ܐ	ܕܲܥܪܘܼܒ݂ܬܵܐ ܕܲܐܚܪ̈ܵܝܹܐ
ܡܵܢܵܐ ܐܸܦܪܘܿܥ ܠܡܵܪܝܵܐ ܕܟ݂ܠܗܘܿܢ ܦܘܼܪ̈ܥܵܢܵܘܗܝ ܥܠܲܝ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܡܵܢܵܐ ܐܸܦܪܘܿܥ ܠܡܵܪܝܵܐ ܕܟ݂ܠܗܘܿܢ ܦܘܼܪ̈ܥܵܢܵܘܗܝ ܥܠܲܝ܀ ܟܵܣܵܐ ܕܦܘܼܪܩܵܢܵܐ ܐܹܩܲܒܸ̇ܠ܀ ܘܒܲܫܡܹܗ ܕܡܵܪܝܵܐ ܐܸܩܪܸܐ܀ ܢܸܕܼܪ̈ܲܝ ܠܡܵܪܝܵܐ ܐܸܦܪܘܿܥ܀ ܩܕܼܵܡ ܟܠܹܗ ܥܲܡܵܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ܀	ܚܵܘܝܼܬ݂ ܘܐܸܡܪܹܬ݂ ܘܣܲܓܝܼ̈ܐܵܢ ܐܸܢܹܝܢ ܡ݂ܢ ܡܸܢܝܵܢܵܐ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܚܵܘܝܼܬ݂ ܘܐܸܡܪܹܬ݂ ܘܣܲܓܝܼ̈ܐܵܢ ܐܸܢܹܝܢ ܡ݂ܢ ܡܸܢܝܵܢܵܐ܀ ܒܕܸܒ݂ܚܹ̈ܐ ܘܩܘܼܪ̈ܒܵܢܹܐ ܠܵܐ ܨܒ݂ܲܝܬ̇܀ ܐܸܕܼܢܹ̈ܐ ܕܹܝܢ ܢܲܩܸܒ݂ܬ̇ ܠܝܼ܀ ܘܝܲܩ̈ܕܹ̇ܐ ܫܲܠܡܹ̈ܐ ܕܲܚܠܵܦ ܚܛܵܗܹ̈ܐ ܠܵܐ ܫܐܸܠ݂ܬ̇܀ ܗܵܝܕܹܝܢ ܐܸܡ݁ܪܹܬ݂ ܕܗܵܐ ܐܸܬܹܝ݁ܬ݂܀ ܕܲܒ݂ܪܹܫ ܟܬ݂ܵܒܹ̈ܐ ܟܬ݂ܝܼܒ݂ ܥܠܲܝ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ܀	ܡܵܐ ܣܲܓܝܼܐܵܐ ܛܲܝܒܘܼܬ݂ܵܟܼ ܕܢܵܛܲܪ ܐܲܢ݇ܬ̇ ܠܕܼܵܚ̈ܠܲܝܟ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ ܡܵܐ ܣܲܓܝܼܐܵܐ ܛܲܝܒܘܼܬ݂ܵܟܼ ܕܢܵܛܲܪ ܐܲܢ݇ܬ̇ ܠܕܼܵܚ̈ܠܲܝܟ܀ ܠܕܲܡܣܲܒ̇ܪܝܼܢ ܒܵܟܼ ܩܕܼܵܡ ܒܢܲܝ̈ܢܵܫܵܐ܀ ܬܟܲܣܸܐ ܐܸܢܘܿܢ ܒܣܸܬܵܪܹܗ ܕܦܲܪܨܘܿܦܵܟܼ܀ ܡܸܢ ܕܠܘܼܚܝܵܐ ܕܲܒ݂ܢܲܝ̈ܢܵܫܵܐ܀ ܬܟܲܣܸܐ ܐܸܢܘܿܢ ܒܛܸܠܵܠܵܟܼ ܡܸܢ ܚܸܪܝܵܢܵܐ܀ ܒܪܝܼܟ݂ܘܼ ܡܵܪܝܵܐ ܕܲܓ݂ܒ݂ܵܐ ܠܹܗ ܓܒܲܝ̈ܵܐ ܒܲܩܪܝܼܬ݂ܵܐ ܥܲܫܝܼܢܬܵܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܗܲܠܸܠܘܼܝܵܗ ܗܲܠܸܠܘܼܝܵܗ ܐܹܗܲܠܸܠܘܼܝܵܗ܀

ܘܡܲܩܦܝܼܢ ܐܲܟܼܚܲܕܼ ܐܲܒܼܘܿܢ ܕܒܲܫܡܲܝܵܐ ܒܩܵܢܘܿܢܵܐ:

ܐܲܒ݂ܘܼܢ ܕܒ݂ܲܫܡܲܝܵܐ ܢܸܬ݂ܩܲܕܲܫ ܫܡܵܟ݂ ܬܹܐܬ݂ܸܐ ܡܲܠܟܘܼܬ݂ܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁: ܐܲܒ݂ܘܼܢ ܕܒ݂ܲܫܡܲܝܵܐ ܕܲܡܠܹܝܢ ܫܡܲܝܵܐ ܘܐܲܪܥܵܐ ܪܲܒܘܼܬ݂ ܫܘܼܒ݂ܚܵܟ݂: ܥܝܼܪܹ̈ܐ ܘܐ݇ܢܵܫܵܐ ܩܵܥܹܝܢ ܠܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁:

ܐܲܒ݂ܘܼܢ ܕܒ݂ܲܫܡܲܝܵܐ ܢܸܬ݂ܩܲܕܲܫ ܫܡܵܟ݂ ܬܹܐܬ݂ܸܐ ܡܲܠܟܘܼܬ݂ܵܟ݂ ܢܸܗܘܸܐ ܨܸܒ݂ܝܵܢܵܟ݂: ܐܲܝܟܲܢܵܐ ܕܒ݂ܲܫܡܲܝܵܐ ܐܵܦ ܒܐܲܪܥܵܐ. ܗܲܒ݂ܠܲܢ ܠܲܚܡܵܐ ܕܣܘܼܢܩܵܢܲܢ ܝܲܘܡܵܢܵܐ: ܘܲܫܒ݂ܘ݁ܩ ܠܲܢ ܚܲܘ̈ܒܲܝܢ، ܐܲܝܟܲܢܵܐ ܕܐܵܦ ܚܢܲܢ ܫܒ݂ܲܩܢ ܠܚܲܝܵܒ݂ܲܝ̈ܢ. ܘܠܵܐ ܬܲܥܠܲܢ ܠܢܸܣܝܘ݁ܢܵܐ: ܐܸܠܵܐ ܦܲܨܵܢ ܡܸܢ ܒܝܼܫܵܐ: ܡܸܛܠ ܕܕܼܝܼܠܵܟ݂ ܗ݇ܝܼ ܡܲܠܟܘܼܬ݂ܵܐ ܘܚܲܝܠܵܐ ܘܬ݂ܸܫܒ݁ܘ݁ܚܬܵܐ، ܠܥܵܠܲܡ ܥܵܠܡܝܼܢ: ܐܵܡܹܝܢ.

ܟܵܗܢܵܐ: ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.

ܟܵܗܢܵܐ ܘܫܲܡܵܫܹ̈ܐ ܘܥܲܡܵܐ: ܐܲܒ݂ܘܼܢ ܕܒ݂ܲܫܡܲܝܵܐ ܢܸܬ݂ܩܲܕܲܫ ܫܡܵܟ݂: ܬܹܐܬ݂ܸܐ ܡܲܠܟܘܼܬ݂ܵܟ݂. ܩܲܕܝܼܫ ܩܲܕܝܼܫ ܩܲܕܝܼܫܲܬ: ܐܲܒ݂ܘܼܢ ܕܒ݂ܲܫܡܲܝܵܐ ܕܲܡܠܹܝܢ ܫ̈ܡܲܝܵܐ ܘܐܲܪܥܵܐ ܪܲܒܘܼܬ݂ ܫܘܼܒ݂ܚܵܟ݂: ܥܝܼܪܹ̈ܐ ܘܐ݇ܢܵܫܵܐ ܩܵܥܹܝܢ ܠܵܟ݂: ܩܲܕܝܼܫ ܩܲܕܝܼܫ ܩܲܕܝܼܫܲܬ݁.

ܫܲܡܵܫܵܐ: ܢܨܲܠܸܐ ܫܠܵܡܵܐ ܥܲܡܲܢ

ܨ̈ܠܵܘܵܬܼܵܐ ܕܒܼܵܬܲܪ ܐܲܒܼܘܼܢ ܕܒܲܫܡܲܝܵܐ:

ܨܠܘܿܬܼܵܐ ܩܲܕܼܡܵܝܬܼܵܐ: ܫܡܵܟܼ ܡܵܪܲܢ ܘܐܲܠܵܗܲܢ ܩܲܕܝܼܫܵܐ ܢܸܫܬܲܒܲܚ: ܘܐܲܠܵܗܘܼܬܼܵܟܼ ܬܸܣܬܓܸܕܼ: ܘܡܵܪܘܼܬܼܵܟܼ ܬܸܬܼܝܲܩܲܪ: ܘܪܲܒܘܼܬܼܵܟܼ ܬܲܬܼܢܲܨܲܚ: ܘܐܝܼܬܼܘܼܬܼܵܟܼ ܬܸܬܼܪܲܡܪܲܡ: ܘܥܲܠ ܥܲܡܵܟܼ ܘܥܵܢ̈ܵܐ ܕܡܲܪܥܝܼܬܼܵܟܼ: ܢܓܼܘܼܠܘܼܢ ܪ̈ܲܚܡܹܐ ܡܬܘܿܡܵܝܹ̈ܐ ܕܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ ܒܟܼܠܥܕܵܢ: ܡܵܪܵܐ ܕܟܼܠ، ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܚܵܬܼܵܗܿ: ܒܲܫܡܲܝܵܐ ܘܒܐܲܪܥܵܐ: ܒܪܝܼܟܼܵܐ ܡܵܪܝ ܐܲܠܵܗܘܼܬܼܵܟܼ: ܘܲܣܓܼܝܼܕܼܵܐ ܡܵܪܘܼܬܼܵܟܼ: ܩܲܕܝܼܫ ܘܲܫܒܼܝܼܚ ܘܲܡܫܲܒܲܚ: ܘܪܵܡ ܘܲܡܥܲܠܲܝ ܫܡܵܐ ܣܓܼܝܼܕܼܵܐ ܘܲܡܫܲܒܚܵܐ ܕܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ ܒܟܼܠܥܕܵܢ، ܡܵܪܵܐ ܕܟܼܠ، ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܐܵܡܪܝܢ ܥܘܿܢ̈ܝܵܬܼܵܐ ܕܣܵܗܕܹ̈ܐ ܕܲܥܒ݂ܝܼܕܼܝܼܢ ܠܡܵܪܝ ܡܵܪܘܼܬ݂ܵܐ ܐܲܦܸܣܩܘܿܦܵܐ ܕܡܝܼܦܲܪܩܲܛ.

ܗܵܠܹܝܢ ܟܠܗܹܝܢ ܓܕܲܫ̈ ܠܲܢ ܘܠܵܐ ܛܥܲܝܢܵܟ݂: ܡܫܝܼܚܵܐ ܦܵܪܘܿܩܹܗ ܕܥܵܠܡܵܐ: ܡܲܠܟܵܐ ܪܲܒܵܐ ܕܬܸܫܒ̇ܘܿܚܬܵܐ: ܣܵܗܕܹ̈ܐ ܕܪܲܚܡܘܼܗܝ ܘܗܲܝܡܸܢܘ ܒܹܗ: ܠܐܵܟܹܠܩܲܪܨܵܐ ܐܲܒ݂ܗܸܬ݂ܘ ܗ̄ܘ̣ܵܘ. ܘܥܲܡ ܡܲܠܲܐܟܹ̈ܐ ܚܵܕܹܝܢ ܒܲܡܪ̈ܵܘܡܹܐ: ܘܲܩܕܼܵܡ ܐܲܠܵܗܵܐ ܩܵܝܡܝܼܢ: ܘܠܲܒ݂ܥܸܠܕܲܪܵܐ ܘܲܠܚܲܝܠܹܗ: ܬܚܘܿܬ݂ ܪܸ̈ܓ݂ܠܲܝܗܘܿܢ ܫܲܥܒܸܕܼܘ ܗ̄ܘ̣ܵܘ.

ܘܠܵܐ ܕܲܓܸ̇ܠܢܲܢ ܒܲܩܝܵܡܵܟ݂: ܡܫܝܼܚܵܐ ܦܵܪܘܿܩܹܗ ܕܥܵܠܡܵܐ: ܕܚܲܫ ܥܲܠ ܐܲܦܲܝ̈ܢ ܒܛܲܝܒ̇ܘܼܬܹܗ: ܘܲܕܼܪܲܫ ܐܘܼܪܚܵܐ ܠܡܲܠܟ̇ܘܼܬ݂ܵܐ: ܘܲܒ݂ ܥܸܩܒ݂ܵܬܹ̈ܗ ܪܕܼܵܘ ܣܵܗܕܹ̈ܐ. ܘܝܲܗ̄ܒ݂ܘ ܓܘܼܫܡ̱ܗܘܿܢ ܠܲܣܪ̈ܵܩܹܐ: ܘܲܠܝܲܩܕܵܢܵܐ ܘܲܠܫܸܢܕܹ̈ܐ: ܘܲܩܢܵܘ ܒܲܕܼܡܵܐ ܕܨܵܘܪ̈ܲܝܗܘܿܢ: ܚܲܝܹ̈ܐ ܡܠܝܼܟܹ̈ܐ ܕܲܠܥܵܠܲܡ.

ܩܵܠܵܐ ܕܫܘܼܒ݂ܚܵܐ ܘܲܕܼܦܘܼܪܩܵܢܵܐ ܒܡܲܫܟ̇ܢܵܐ ܕܙܲܕ̇ܝܼܩܹ̈ܐ: ܠܩܵܠܗܘܿܢ ܕܣܵܗܕܹ̈ܐ ܩܲܕ̇ܝܼܫܹ̈ܐ: ܙܵܪ̈ܥܲܝ ܫܲܝܢܵܐ ܒܲܒ݂ܪܝܼܬ݂ܵܐ: ܛܵܝܣܝܼܢ ܘܢܵܚܬ̇ܝܼܢ ܪ̈ܘܼܚܵܢܹܐ: ܠܓܼܵܘ ܒܹܝܬ݂ܩܘܼܕܼܫܵܐ ܙܲܗܝܵܐܝܼܬ݂. ܘܩܵܥܝܵـ̈ـܢ ܓܘܼܕܹ̈ܐ ܕܪ̈ܘܼܚܵܢܹܐ: ܥܲܡܗܘܿܢ ܕܣܵܗܕܹ̈ܐ ܒܬܸܫܒ̇ܘܿܚܬܵܐ: ܩܲܕ̇ܝܼܫܲܬ̇ ܐܘܿ ܡܵܪܹܟ̇ܠ: ܕܪܲܡܪܸܡܬ̇ ܠܓܸܢܣܵܐ ܕܡܵܝܘܿܬܹ̈ܐ.

ܡܸܛܠ ܕܬܸܕܼܡܘܼܪܬܵܐ ܥܒܲܕܼ: ܬܸܕܼܡܘܼܪܬܵܐ ܪܲܒ̇ܬܼܵܐ ܣܵܡܘ ܠܲܢ: ܐܲܬ݂ܠܝܼܛܹ̈ܐ ܙܗܲܝܵܐ ܘܣܵܗܕܹ̈ܐ: ܕܲܚܙܵܘ ܠܣܲܝܦܹ̈ܐ ܟܲܕܼ ܡܲܒ݂ܪ̱ܩܝܼܢ: ܘܲܠܩܵܛܘܿܠܹ̈ܐ ܕܡܸܬ݂ܠܲܚܡܝܼܢ. ܘܠܵܐ ܙܵܥ ܘܐܲܫܦܸܠ ܪܸܥܝܵܢܗܘܿܢ: ܡ̣ܢ ܚܘܼܒܹ̇ܗ ܪܲܒܵܐ ܕܡܵܪܗܘܿܢ: ܘܩܲܒܸ̇ܠܘ ܡܵܘܬܵܐ ܐܲܝܟ݂ ܡܵܘܗܲܒ݂ܬܵܐ: ܘܲܠܬ݂ܵܘܕ̇ܝܼܬܹܗ ܠܵܐ ܐܲܪܦܝܘܼܗ̇.

ܘܠܵܐ ܚܣܲܟ݂ܘ ܡ̣ܢ ܡܵܘܬܵܐ ܢܲܦ̮ܫܵܬ݂̈ܗܘܿܢ: ܩܛܝܼܠܹ̈ܐ ܕܲܪܚܸܡܘ ܒܵܪܘܿܝܗܘܿܢ: ܘܩܲܒܸ̇ܠܘ ܡܵܘܬܵܐ ܒܨܸܒ݂ܝܵܢܗܘܿܢ: ܘܲܗܘ̤ܵܘ ܕܸܒ݂ܚܹ̈ܐ ܡܪ̈ܲܥܝܵܢܹܐ: ܠܡܲܠܟܵܐ ܡܫܝܼܚܵܐ ܡܟܲܠܠܵܢܗܘܿܢ. ܩܲܪܸܒ݂ܘ ܥܲܡܲܢ ܒܵܥܘܼܬ݂ܵܐ: ܒܝܵܘܡܵܐ ܪܲܒܵܐ ܕܒ݂ܘܼܚܪܵܢܵܐ: ܕܢܸܫܬܵܘܙܲܒ݂ ܡ̣ܢ ܬܲܫܢܝܼܩܵܐ: ܘܢܹܐܪܲܬ݂ ܚܲܝܹ̈ܐ ܕܲܠܥܵܠܲܡ.

ܕܲܒܲܚܘ ܠܹܗ ܕܸܒ݂ܚܹ̈ܐ ܕܫܘܼܒ݂ܚܵܐ: ܣܵܗܕܹ̈ܐ ܕܸܒ݂ܚܹ̈ܐ ܡܪ̈ܲܥܝܵܢܹܐ: ܕܪܲܥܝܼܘ ܠܡܵܪܗܘܿܢ ܒܲܩܢܘܿܡܗܘܿܢ: ܘܒܲܕܼܡܵܐ ܕܐܲܪܕ̇ܝܼܘ ܨܵܘܪ̈ܲܝܗܘܿܢ: ܩܢܵܘ ܡܲܠܟ̇ܘܼܬ݂ܵܐ ܕܠܵܐ ܥܵܒ݂ܪܵܐ. ܐܲܦܝܼܣܘ ܘܲܒ݂ܥܵܘ ܡ̣ܢ ܡܵܪܝܵܐ: ܥܲܠ ܚܲܛܵܝܹ̈ܐ ܕܠܵܐ ܢܹܐܒ݂ܕ̇ܘܼܢ: ܕܒܲܨܠܵـ̈ـܘܵܬ݂ܟ݂ܘܿܢ ܡܸܬ݂ܓܵܘܣܝܼܢ: ܫܠܵܡܵܐ ܘܫܲܝܢܵܐ ܢܸܣܓܹ̇ܐ ܠܗܘܿܢ.

ܫܲܕܲܪ ܡܸܠܬܹܗ ܘܐܲܣܝܼ ܐܸܢܘܿܢ: ܐܵܣܵܘܵܬ݂ܵܐ ܫܲܪܝܼܪܹ̈ܐ ܣܵܗܕܹ̈ܐ ܗܘ̤ܵܘ ܒܵܗ̇ ܒܲܒ݂ܪܝܼܬ݂ܵܐ: ܘܐܲܚܠܸܡܘ ܘܐܲܣܝܼܘ ܢܲܦ̮ܫܵܬ݂ܵܐ: ܕܲܡܟܲـ̈ـܬ̇ܡܵܢ ܗ̄ܘܲܝ̈ ܒܲܚܛܝܼܬ݂ܵܐ. ܬܵܘܕ̇ܝܼ ܠܡܵܪܵܐ ܕܲܓ݂ܒ݂ܵܟܼܘܿܢ: ܘܐܲܫܪܝܼ ܚܲܝܠܹܗ ܒܓܲܪ̈ܡܲܝܟ̇ܘܿܢ: ܕܬܸܗܘܘܿܢ ܠܓܸܢܣܵܐ ܕܡܵܝܘܿܬܹ̈ܐ: ܠܡܹܐܢܹ̈ܐ ܕܫܲܝܢܵܐ ܒܓܼܵܘ ܥܵܠܡܵܐ.

ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨܒ݂ܵܘ: ܠܡܹܐܢܵܐ ܪܓ݂ܝܼܓܼܵܐ ܘܲܡܝܲܬ̇ܪܵܐ: ܣܝܼܡܲܬ݂ ܓܲܪ̈ܡܹܐ ܕܩܲܕ̇ܝܼܫܹ̈ܐ: ܡܥܝܼܢܵܐ ܕܪ̈ܲܚܡܹܐ ܘܕܼܵܐܣܝܘܼܬ݂ܵܐ: ܣܵܡܵܗ̇ ܪܸܡܙܵܟ݂ ܦܵܪܘܿܩܲܢ. ܘܚܲܝܠܵܐ ܕܢܵܚܹܬ݂ ܡ̣ܢ ܪܵܘܡܵܐ: ܘܣܵܥܲܪ ܟܠܫܵܥ ܓܲܪ̈ܡܲܝܗܘܿܢ: ܢܢܲܛܲܪ ܠܟܸܢܫܵܐ ܕܣܵܓܼܘܿܕܲܝ̈ܟ: ܡ̣ܢ ܨܸܢܥܵܬܹ̈ܗ ܕܲܢܟ݂ܝܼܠܵܐ.

ܐܹܪܲܡܪ̱ܡܵܟ݂ ܡܵܪܝ ܡܲܠܟܵܐ: ܡܲܠܟܵܐ ܕܪܵܘܡܵܐ ܥܲܡ ܦܵܠܚܵܘ̈ܗܝ: ܣܲܝܲܥ ܠܓܼܘܼܕܵܐ ܕܲܡܗܲܝܡܢܹ̈ܐ: ܢܦܲܩ ܦܘܼܩܕܵܢܵܐ ܕܢܸܬ݂ܩܲܛܠܘܼܢ: ܣܵܗܕܹ̈ܐ ܟܹܐܢܹ̈ܐ ܒܝܲܕܼ ܣܲܝܦܵܐ. ܬܗܲܪܘ ܟܲܠܕܵܝܹ̈ܐ ܟܲܕܼ ܩܵܝܡܝܼܢ: ܘܲܙܩܲܦܘ ܨܸܒ݂ܥܵܐ ܟܲܕܼ ܐܵܡܪܝܼܢ: ܕܪܲܒ̇ ܐܲܠܵܗܗܘܿܢ ܕܲܡܗܲܝܡܢܹ̈ܐ: ܕܟܲܕܼ ܠܵܐ ܡܸܬ݂ܚܙܹܐ ܦܵܪܹܩ ܠܗܘܿܢ.

ܡܲܠܟܵܐ ܕܪܲܒ̇ ܥܲܠ ܟܠܗܘܿܢ ܐܲܠܵܗܹ̈ܐ: ܡܲܠܟܵܐ ܕܪ̈ܵܘܡܹܐ ܥܸܠܵܝܹ̈ܐ: ܒܝܼܪܬܵܐ ܒܢܵܐ ܠܹܗ ܒܲܫܡܲܝܵܐ: ܘܟܲܢܝܼ ܠܵܗ̇ ܫܡܵܐ ܐܘܿܪܸܫܠܸܡ: ܕܒ݂ܘܼܟ݂ܪܹ̈ܐ ܟܬ݂ܝܼܒܲܝ̈ ܒܲܫܡܲܝܵܐ. ܣܸܒ̇ܠܲܬ݂ ܚܲܝܹ̈ܐ ܒܥܹܕ̄ܬܹܗ ܩܒܲܥ: ܘܢܵܓܹܕܼ ܘܡܲܣܸܩ ܠܒܲܝ̈ܬܵܝܵܘܗܝ: ܠܥܘܼܡܪܵܐ ܦܲܐܝܵܐ ܕܲܫܡܲܝܵܐ: ܕܢܸܗܘܘܿܢ ܝܵܪ̈ܬܹ̇ܐ ܒܡܲܠܟ̇ܘܼܬ݂ܵܐ.

ܐܲܚܘܿܕܼ ܙܲܝܢܵܐ ܘܣܲܟ̇ܪܵܐ ܘܩܘܼܡ ܒܥܘܼܕܼܪܵܢܝ: ܙܲܝܢܵܐ ܕܪܘܼܚܵܐ ܩܲܕ̇ܝܼܫܵܐ: ܠܒܸܫܘ ܗ̄ܘ̣ܵܘ ܣܵܗܕܹ̈ܐ ܒܐܵܓ݂ܘܿܢܗܘܿܢ: ܟܲܕܼ ܐܲܪܟܸ̇ܢܘ ܗ̄ܘ̣ܵܘ ܨܵܘܪ̈ܲܝܗܘܿܢ: ܩܕܼܵܡ ܣܲܝܦܹ̈ܐ ܕܪ̈ܵܕܼܘܿܦܲܝܗܘܿܢ. ܘܐܲܡܣܲܪܘ ܥܲܠ ܢܸܓܼܕܹ̈ܐ ܘܫܸܢܕܹ̈ܐ: ܡܸܛܠ ܚܘܼܒܹ̇ܗ ܕܲܡܫܝܼܚܵܐ: ܘܝܼܪܸܬ݂ܘ ܒܲܕܼܡܵܐ ܕܨܵܘܪ̈ܲܝܗܘܿܢ: ܡܲܠܟ̇ܘܼܬ݂ܵܐ ܕܠܵܐ ܡܸܫܬܲܪܝܵܐ.

ܒܲܪ̄ܬ݂ ܡܲܠܟܵܐ ܒܫܘܼܒ݂ܚܵܐ ܩܵܡܲܬ̤: ܕܵܡܝܵܐ ܥܹܕ̄ܬܵܐ ܠܐܵܪܘܿܢܘܿܣ: ܘܡܲܕܼܒܲܚ ܩܘܼܕܼܫܵܐ ܠܲܬ݂ܪܘܿܢܘܿܣ: ܘܣܵܗܕܹ̈ܐ ܠܣܸܕܼܪܹ̈ܐ ܕܒܹܝܬ݂ ܐܲܪܟ̇ܘܿܣ: ܕܲܡܫܲܡܫܝܼܢ ܠܹܗ ܠܲܟ݂ܪܝܼܣܛܘܿܣ. ܒܲܢܝܵܐ ܒܟܹܐܦܹ̈ܐ ܕܐܝܼܵܣܦܘܿܢ: ܘܣܲܦܝܼܠܵܐ ܘܲܩܪܘܿܣܛܸܠܘܿܣ: ܐܲܪ̈ܕܸ̇ܟ݂ܠܹܐ ܦܵܛܪܘܿܣ ܘܦܵܘܠܘܿܣ: ܘܬܹܐܵܕ̇ܘܿܪܘܿܣ ܘܢܸܣܛܘܿܪܝܼܣ.

ܘܐܹܡܲܠܸܠ ܥܠܲܝܟ̇ܝ ܫܠܵܡܵܐ: ܫܠܵܡ ܠܵܟ݂ ܣܵܗܕܵܐ ܩܘܿܪܝܵܩܘܿܣ: ܐܲܬ݂ܠܝܼܛܹܗ ܕܡܲܠܟܵܐ ܡܫܝܼܚܵܐ: ܫܠܵܡܵܐ ܢܸܗܘܹܐ ܠܲܫܟ݂ܝܼܢܬܵܟ݂: ܕܝܵܗܒܵܐ ܚܘܼܠܡܵܢ ܠܲܟ݂ܪ̈ܝܼܗܹܐ: ܫܠܵܡܵܐ ܢܸܗܘܹܐ ܠܗܲܕܵܡܲܝ̈ܟ: ܕܡܸܢܗܘܿܢ ܢܵܒ݂ܥܝܼܢ ܥܘܼܕܼܪ̈ܵܢܹܐ: ܫܠܵܡ ܠܵܟ݂ ܘܲܫܠܵܡ ܠܵܗ̇ ܠܐܸܡܵܟ݂: ܘܬ݂ܵܘܕ̇ܝܼܬ݂ܵܐ ܠܲܡܢܲܨܚܵܢܵܟ݂.

ܒܥܝܼ ܡ̣ܢ ܡܵܪܝܵܐ ܘܨܲܠܵܐ ܩܕܼܵܡܵܘܗܝ: ܐܹܝܘ ܬܲܓܵܪܵܐ ܪܘܼܚܵܢܵܐ: ܣܵܗܕܵܐ ܙܲܗܝܵܐ ܡܵܪܝ ܣܲܪܓܝܼܣ: ܡܲܪܓܵܢܝܼܬ݂ܵܐ ܕܠܵܐ ܡܘܼܡܵܐ: ܢܘܼܗܪܵܐ ܒܢܲܦ̮ܫܵܟ݂ ܐܲܙܠ̱ܓܲܬ̤. ܙܒܲܢܬܵܗ̇ ܒܲܕܼܡܵܟ݂ ܘܲܥܬܲܪܬ̇ ܒܵܗ̇: ܘܲܩܢܲܝܬ̇ ܥܘܼܬ݂ܪܵܐ ܕܠܵܐ ܡܸܫܬ̇ܪܸܐ: ܫܐܲܠ ܠܵܗ̇ ܠܥܹܕ̄ܬܵܐ ܘܲܠܝܲܠܕܹ̇ܝ̈ܗ̇: ܚܘܼܒܵܐ ܘܫܲܝܢܵܐ ܘܐܵܘܝܘܼܬ݂ܵܐ.

ܐܲܪܡܵܐ ܣܲܝܦܵܐ ܒܚܲܨܲܝ̈ܟ ܓܲܢ̄ܒܵܪܵܐ: ܓܲܢ̄ܒܵܪ ܚܲܝܠܵܐ ܡܵܪܝ ܓܝܼܘܲܪܓ̇ܝܼܣ: ܕܫܵܛ ܗ̄ܘ̣ܵܐ ܠܡܵܘܬܵܐ ܘܲܠܣܲܝܦܵܐ: ܘܲܠܦܘܼܣܵܩܹ̈ܐ ܡܲܪܝܼܪܹ̈ܐ: ܘܲܠܢܸܓ݂ܕܹ̈ܐ ܕܟ݂ܠ ܐܸܣܟܹ̇ܝܡܝܼ̈ܢ. ܘܲܣܥܲܪ ܚܲܝܠܹ̈ܐ ܘܬܸܕܼܡ̱ܪ̈ܵܬ݂ܵܐ: ܘܐܲܦܢܝܼ ܠܟ݂ܠܢܵܫ ܠܲܫܪܵܪܵܐ: ܒܪܝܼܟ݂ܘܼ ܕܢܲܨܚܹܗ ܠܐܲܬ݂ܠܹܝܛܵܐ: ܕܲܒ݂ܚܲܝܠܹܗ ܢܸܙܟܸ̇ܐ ܠܛܘܼܥܝܲܝ.

ܗܵܝܕܹܝܢ ܢܹܐܡܪܘܿܢ ܒܹܝܬ݂ ܥܲܡܡܹ̈ܐ: ܛܘܼܒܲܝܟ̇ܝ ܒܬ݂ܘܼܠܬܵܐ ܩܲܕ̇ܝܼܫܬܵܐ: ܛܘܼܒܲܝܟ̇ܝ ܐܸܡܹܗ ܕܲܡܫܝܼܚܵܐ: ܛܘܼܒܲܝܟ̇ܝ ܕܕܼܵܪܹ̈ܐ ܘܫܲܪ̈ܒ݂ܵܬ݂ܵܐ: ܟܠܗܹܝܢ ܛܘܼܒ݂ܵܐ ܠܹܟ݂ܝ ܝܵܗܒܵـ̈ـܢ. ܛܘܼܒܲܝܟ̇ܝ ܕܲܨܒ݂ܵܐ ܒܹܟ݂ܝ ܐܲܒ݂ܵܐ: ܛܘܼܒܲܝܟ̇ܝ ܕܲܥܡܲܪ ܒܹܟ݂ܝ ܒܘܼܟ݂ܪܵܐ: ܛܘܼܒܲܝܟ̇ܝ ܕܪܘܼܚܵܐ ܩܲܕ̇ܝܼܫܵܐ: ܢܲܨܲܚ ܠܲܫܡܹܟ݂ܝ ܒܲܒ݂ܪܝܼܬ݂ܵܐ܀

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕܼܫܵܐ: ܫܘܼܒ݂ܚܵܐ ܠܐܲܒ݂ܵܐ ܕܲܓ݂ܒ݂ܵܟ݂ܘܿܢ: ܣܵܗܕܹ̈ܐ ܙܗܲܝܵܐ ܘܩܲܕ̇ܝܼܫܹ̈ܐ: ܫܘܼܒ݂ܚܵܐ ܠܲܒ݂ܪܵܐ ܕܲܒ݂ܚܲܝܠܹܗ: ܚܠܵܦܵܘܗܝ ܒܐܵܓ݂ܘܿܢܵܐ ܩܵܡܬ̇ܘܿܢ. ܫܘܼܒ݂ܚܵܐ ܠܪܘܼܚܵܐ ܩܲܕ̇ܝܼܫܵܐ: ܕܲܟ݂ܠܝܼܠܲܝ̈ܟ̇ܘܿܢ ܨܲܒܸ̇ܬ݂ ܓܕܲܠ: ܨܠܘܿܬ݂ܟ݂ܘܿܢ ܫܘܼܪܵܐ ܬܸܗܘܹܐ ܠܲܢ: ܥܕܲܡܵܐ ܠܫܘܼܠܵܡܹܗ ܕܥܵܠܡܵܐ܀

ܡܸܢ ܥܵܠܲܡ ܥܕܼܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ: ܐܲܒ݂ܘܼܢ ܕܲܢܨܲܚܬ̇ ܒܐܵܓ݂ܘܿܢܵܐ: ܗܵܐ ܒܲܫܡܲܝܵܐ ܦܘܼܪܥܵܢܵܟ݂: ܡܫܝܼܚܵܐ ܕܨܲܒܸ̇ܬ̇ܬ̇ ܠܹܗ ܩܢܘܿܡܵܟ݂: ܒܥܹܕ̄ܬܹ̇ܗ ܐܵܘܪܸܒ݂ ܕܘܼܟ݂ܪܵܢܵܟ݂. ܦܝܼܪܡܵܐ ܕܲܟ݂ܝܵܐ ܚܘܼܒܵܟ݂ ܗܘ̤ܵܐ: ܘܪܲܥܝܼܬ̇ ܠܡܵܪܵܟ݂ ܒܝܲܕܼ ܥܲܡܠܲܝ̈ܟ: ܐܲܦܝܼܣ ܥܲܡܲܢ ܡܵܐ ܕܡܸܬ݂ܓ̇ܠܹܐ: ܒܫܘܼܒ݂ܚܹܗ ܪܲܒܵܐ ܢܪܲܚܸܡܥܠܲܝܢ܀

ܢܹܐܡܲܪ ܟܠܹܗ ܥܲܡܵܐ ܐܵܡܹܝܢ ܘܐܵܡܹܝܢ: ܡܲܠܟܵܐ ܕܡܲܠܟܹ̈ܐ ܐܝܼܵܠܲܢ: ܐܲܢ̄ܬ̇ܘܼ ܡܫܝܼܚܵܐ ܦܵܪܘܿܩܲܢ: ܚܘܼܣ ܥܲܠ ܥܲܒ݂ܕܲܝ̈ܟ ܕܩܵܪܹܝܢ ܠܵܟ݂: ܒܗܵܠܹܝܢ ܙܲܒ݂ܢܹ̈ܐ ܕܐܘܼܠܨܵܢܵܐ. ܕܗܵܐ ܚܕܼܝܼܪܝܼܢ ܠܲܢ ܕܵܘܘܿܢܹ̈ܐ: ܘܣܘܼܪ̈ܵܕܹܐ ܡ̣ܢ ܟܠ ܓܲܒ̇ܝܼ̈ܢ: ܒܲܥܓܲܠ ܢܩܲܕ̇ܡܘܼܢܵܢ ܪ̈ܲܚܡܲܝܟ: ܘܐܲܢܗܲܪ ܐܲܦܲܝ̈ܟ ܘܲܦܪܘܿܩܲܝܢ܀

ܚܲܢܵܢܵܐ ܐܲܢ̄ܬ̇ ܡ̣ܢ ܥܵܠܲܡ: ܘܲܡܪܲܚܡܵܢܲܬ̇ ܠܕܼܵܪܕܵܪ̈ܝܼܢ: ܡܵܢܵܘ ܥܵܘܠܵܗ̇ ܕܲܒ݂ܪܝܼܬ݂ܵܐ: ܠܪ̈ܲܚܡܹܐ ܫܦܝܼܥܹ̈ܐ ܕܛܲܝܒ̇ܘܼܬ݂ܵܟ݂. ܪܘܿܣ ܠܹܗ ܒܐܲܦܵܘ̈ܗܝ ܕܲܟ݂ܝܵܢܲܢ: ܛܲܠܵܐ ܕܪ̈ܲܚܡܹܐ ܘܚܵܘܣܵܢܵܐ: ܘܫܵܘܙܸܒܲܝܢ ܡ̣ܢ ܝܲܕܼ ܒܝܼܫܵܐ: ܘܡ̣ܢ ܙܝܼܙܵܢܹ̈ܐ ܒܢܲܝ̈ ܛܘܼܥܝܲܝ܀

ܐܵܕܼܵܡ ܘܡܲܫܪܝܼܬ݂ܵܐ ܕܟܹܐܢܹ̈ܐ: ܡܘܼܫܹܐ ܘܚܲܒ݂ܠܵܐ ܕܲܢܒ݂ܝܹ̈ܐ: ܦܵܛܪܘܿܣ ܘܣܝܼܥܬܵܐ ܕܲܫܠܝܼܚܹ̈ܐ: ܐ̄ܣܛܲܦܵܢܘܿܣ ܘܟ݂ܠܗܘܿܢ ܣܵܗܕܹ̈ܐ. ܘܐܲܦܪܹܝܡ ܘܟܸܢܫܵܐ ܕܡܲܠܦܵܢܹ̈ܐ: ܘܐܲܢܛܘܿܢܝܼܣ ܘܝܼܚܝܼܕܼܵܝܹ̈ܐ: ܢܦܝܼܣܘܿܢܵܟ݂ ܡܵܪܲܢ ܝܑܼܫܘܿܥ: ܕܬܸܥܒܸ̇ܕܼ ܪ̈ܲܚܡܹܐ ܥܲܠ ܥܵܠܡܵܐ܀

ܥܲܢܝܼܕܹ̈ܐ ܕܠܲܒ݂ܫܘܼܟ݂ ܡܵܪܲܢ: ܡ̣ܢ ܡܲـ̈ـܝܵܐ ܕܡܲܥܡܘܿܕܼܝܼܬ݂ܵܐ: ܒܵܟ݂ ܢܸܬ݂ܚܵܘܪܘܿܢ ܦܲܓܼܪ̈ܲܝܗܘܿܢ: ܡܸܢ ܟܘܼܬ݂ܡܵܬ݂ܵܐ ܕܲܚܛܝܼܬ݂ܵܐ. ܥܲܢܝܼܕܹ̈ܐ ܕܐܸܟܲܠܘ ܦܲܓ݂ܪܵܟ݂: ܘܒܲܕܼܡܵܟ݂ ܚܲܝܵܐ ܐܸܬ݂ܒܲܣܲܡܘ: ܥܒܸܕܼ ܡܵܪܲܢ ܕܘܼܟ݂ܪ̈ܵܢܲܝܗܘܿܢ: ܒܐܲܬ݂ܪܵܐ ܕܟܹܐܢܹ̈ܐ ܡܕܲܝܪܝܼܢ ܒܹܗ܀

ܫܲܡܵܫܵܐ: ܢܨܲܠܸܐ ܫܠܵܡܵܐ ܥܲܡܲܢ

ܨܠܵܘܵܬ݂ܵܐ ܕܒ݂ܵܬܲܪ ܣܵܗܕܹ̈ܐ:

ܠܵܟ݂ ܡܵܘܪܒ݂ܵܢܵܐ ܕܥܹܕ̄ܬܹܗ: ܘܲܡܟܲܠܠܵܢܵܐ ܕܪܵܚܡܵܘܗܝ: ܘܲܡܢܲܨܚܵܢܵܐ ܕܐܲܬ݂ܠܹܝܛܵܘ̈ܗܝ: ܘܲܡܣܲܝܥܵܢܵܐ ܕܩܲܕ̇ܝܼܫܵܘ̈ܗܝ: ܒܐܵܓ݂ܘܿܢܲܝ̈ܗܘܿܢ ܫܒ݂ܝܼܚܹ̈ܐ ܘܩܲܕ̇ܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ: ܡܸܬ݂ܟܲܫܦܝܼܢܲܢ ܐܸܬ݂ܦܲܢ ܡܵܪܝ: ܘܚܘܼܣ ܘܪܲܚܸܡܥܠܲܝܢ ܐܲܝܟ݂ ܕܲܡܥܵܕܲܬ̇ ܒܟ݂ܠܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܚܒܲܪܬ݂ܵܗ̇: ܒܲܨܠܘܿܬ݂ ܩܲܕ̇ܝܼܫܲܝ̈ܟ ܡܵܪܲܢ ܘܐܲܠܵܗܲܢ ܐܸܬ݂ܪܲܥܵܐ ܠܲܢ: ܘܲܒ݂ܒ݂ܵܥܘܼܬ݂ܗܘܿܢ ܕܫܲܪܝܼܪ̈ܲܝܟ ܐܲܥܒܲܪ ܚܛܵܗܲܝ̈ܢ: ܘܚܲܣܵܐ ܒܘܼܨܵܪ̈ܲܝܢ: ܘܫܲܝܸܢ ܒܥܸܠܕ̇ܒ݂ܵܒܲܝ̈ܢ: ܘܢܲܚܸܡ ܥܲܢܝܼܕܲܝ̈ܢ: ܘܐܲܫܘܵܐ ܠܲܢ ܠܫܘܼܒ݂ܚܵܐ ܦܲܐܝܵܐ ܕܡܲܠܟ̇ܘܼܬ݂ܟ݂: ܥܲܡ ܟܹܐܢܹ̈ܐ ܘܙܲܕ̇ܝܼܩܹ̈ܐ ܓܵܡܪ̈ܲܝ ܨܸܒ݂ܝܵܢܵܟ݂ ܒܐܘܿܪܸܫܠܸܡ ܕܲܠܥܸܠ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܘܡܲܩܦܝܼܢ ܨܠܘܿܬ݂ܵܐ ܕܥܘܼܕܼܪܵܢܵܐ ܕܒܲܠܚܘܿܕܼ ܒܥܹܕ̄ܬܵܐ ܡܸܬ݂ܐܲܡܪܵܐ:

ܥܘܼܕܼܪܵܢܵܐ ܡܵܪܝ ܕܪ̈ܲܚܡܲܝܟ ܘܣܘܼܝܵܥܵܐ ܪܲܒܵܐ ܕܛܲܝܒ̇ܘܼܬ݂ܵܟ݂: ܘܚܲܝܠܵܐ ܟܲܣܝܵܐ ܘܲܡܫܲܒ̇ܚܵܐ ܕܲܬ݂ܠܝܼܬܼܵܝܘܼܬ݂ܵܟ݂ ܡܫܲܒܲܚܬܵܐ: ܘܝܲܡܝܼܢܵܟ݂ ܕܡܲܠܝܵܐ ܪ̈ܲܚܡܹܐ ܘܲܚܢܵܢܵܐ: ܐܲܓܸ̇ܢ ܘܐܲܠܘܵܐ ܠܲܡܚܝܼܠܘܼܬ݂ܵܐ ܕܣܵܓܼܘܿܕܲܝ̈ܟ: ܡ̣ܢ ܒܲܝܬܵܟ݂ ܩܲܕ̇ܝܼܫܵܐ ܡܠܹܐ ܟܠ ܥܘܼܕܼܪ̈ܵܢܝܼܢ ܘܟ݂ܠ ܛܘܼܒ݂ܝܼ̈ܢ: ܒܲܨܠܘܿܬ݂ ܟܠܗܘܿܢ ܩܲܕ̇ܝܼܫܹ̈ܐ ܡܪ̈ܲܥܝܵܢܲܝܟ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܘܡܲܩܦܝܼܢ. ܒܒ݂ܘܼܪܟ̇ܬ݂ܵܟ݂ ܡܵܪܲܢ ܘܐܲܠܵܗܲܢ ܢܸܬ݂ܒܲܪܟ݂ܘܿܢ ܥܲܒ݂ܕܲܝ̈ܟ: ܘܒܲܒ݂ܛܝܼܠܘܼܬܹܗ ܕܨܸܒ݂ܝܵܢܵܟ݂ ܢܸܬ݂ܢܲܛܪܘܼܢ ܣܵܓ݂ܘܿܕܲܝ̈ܟ: ܘܫܲܝܢܵܐ ܡܵܪܝ ܐܲܡܝܼܢܵܐ ܕܐܲܠܵܗܘܼܬܼܵܟ݂ ܘܲܫܠܵܡܵܐ ܢܲܓ̇ܝܼܪܵܐ ܕܡܵܪܘܼܬ݂ܵܟ݂: ܢܲܡܠܸܟ݂ ܒܥܲܡܵܟ݂ ܘܲܒ݂ܥܸܕ̄ܬܵܟ݂ ܟܠܗܘܿܢ ܝܵܘܡܵܬܹ̈ܗ ܕܥܵܠܡܵܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

(ܘܐܸܢ ܐܝܼܬ݂ ܟܵܗܢܹ̈ܐ ܣܲܓ̇ܝܼܐܹ̈ܐ: ܟܠܚܲܕܼ ܢܹܐܡܲܪ ܚܕܼܵܐ ܡ̣ܢ ܗܵܠܹܝܢ ܠܦܘܼܬ݂ ܩܲܕ̇ܝܼܡܘܼܬ݂ ܣܝܵܡܐܝܼܕܹܗ).

ܐ̄ܚܪܹܬ݂ܵܐ: ܒܘܼܪܟ̇ܬܹܗ ܕܲܡܒܲܪܸܟ݂ ܟܠ: ܘܫܲܝܢܹܗ ܕܲܡܫܲܝܸܢ ܟܠ: ܘܲܚܢܵܢܹܗ ܕܚܵܐܹܢ ܟܠ: ܘܲܡܢܲܛܪܵܢܘܼܬܹܗ ܕܐܲܠܵܗܲܢ ܣܓ݂ܝܼܕܼܵܐ: ܬܸܗܘܹܐ ܥܲܡܲܢ ܘܒܲܝܢܵܬܲܢ ܘܲܚܕܼܵܪ̈ܲܝܢ: ܘܲܬ݂ܢܲܛܪܲܢ ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ: ܒܟ݂ܠܗܘܿܢ ܙܲܒ݂ ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܒܒ݂ܘܼܪܟ̇ܬ݂ܵܟ݂ ܡܵܪܲܢ ܘܐܲܠܵܗܲܢ ܢܸܬ݂ܒܲܪܲܟ݂: ܘܒܲܒ݂ܛܝܼܠܘܼܬ݂ܵܟ݂ ܢܸܬ݂ܢ̱ܛܲܪ: ܘܚܲܝܠܵܟ݂ ܢܹܐܬܹܐ ܠܐܝܼܵܠܲܢ: ܘܥܘܼܕܼܪܵܢܵܟ݂ ܢܸܬ݂ܠܵܘܸܐ ܠܲܢ: ܘܝܲܡܝܼܢܵܟ݂ ܬܲܓܸ̇ܢ ܥܠܲܝܢ: ܘܫܲܝܢܵܟ݂ ܢܲܡܠܸܟ݂ ܒܲܝܢܵܬܲܢ: ܘܲܨܠܝܼܒ݂ܵܟ݂ ܫܘܼܪܵܐ ܪܵܡܵܐ ܘܒܹܝܬ݂ ܓܵܘܣܵܐ ܢܸܗܘܹܐ ܠܲܢ: ܘܲܬ݂ܚܹܝܬ݂ ܟܸܢܦܵܘ̈ܗܝ ܢܸܣܬܲܬܲܪ ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܲܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܒܪܝܼܟ݂ܝܼܢ ܡܵܪܝ ܪ̈ܲܚܡܹܐ ܕܛܲܝܒ̇ܘܼܬ݂ܵܟ݂: ܘܲܣܓ݂ܝܼܕܼܝܼܢ ܕܡܵܪܘܼܬ݂ܵܟ݂: ܕܲܒ݂ܟ݂ܠܙܒܲܢ ܡܲܠܦܝܼܢ ܠܲܢ ܕܲܢܚܘܼܪ ܠܘܵܬ݂ܵܟ݂ ܘܢܸܫܬܲܒ݂ܗܲܪ ܒܵܟ݂. ܘܠܵܐ ܢܸܦܣܘܿܩ ܣܲܒ݂ܪܲܢ ܡܸܢܵܟ݂ ܟܠܗܘܿܢ ܝܵܘܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬܵܐ: ܒܘܼܪܟ̇ܬ݂ܵܟܼ ܡܵܪܲܢ ܘܐܲܠܵܗܲܢ ܥܲܠ ܥܲܡܵܟ݂ ܬܸܬ̇ܢܝܼܚ: ܘܲܥܠܲܝܢ ܡܚܝܼܠܹ̈ܐ ܘܚܲܛܵܝܹ̈ܐ ܚܢܵܢܵܟ݂ ܢܸܗܘܹܐ ܐܲܡܝܼܢܵܐܝܼܬ݂: ܣܲܒ݂ܪܲܢ ܛܵܒ݂ܵܐ: ܘܒܹܝܬ݂ ܓܵܘܣܲܢ ܡܠܸܐ ܪ̈ܲܚܡܹܐ: ܘܫܵܒܹܩ ܚܵܘܒܹ̈ܐ ܘܲܚܛܵܗܹ̈ܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܫܲܝܢܹܗ ܕܐܲܒ݂ܵܐ ܥܲܡܲܢ: ܘܚܘܼܒܹ̇ܗ ܕܲܒ݂ܪܵܐ ܒܲܝܢܵܬܲܢ: ܘܪܘܼܚܵܐ ܕܩܘܼܕܼܫܵܐ ܡܕܲܒܲܪ ܠܲܢ ܐܲܝܟ݂ ܨܸܒ݂ܝܵܢܹܗ: ܘܲܥܠܲܝܢ ܪ̈ܲܚܡܵܘܗܝ ܘܲܚܢܵܢܹܗ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܫܲܝܢܵܟ݂ ܡܵܪܝ ܢܸܫܪܸܐ ܒܲܢ: ܘܲܫܠܵܡܵܟ݂ ܢܸܫܬܲܠܲܛ ܒܲܢ: ܘܚܘܼܒܵܟ݂ ܢܸܣܓܹ̇ܐ ܒܲܝܢܵܬܲܢ: ܟܠܗܘܿܢ ܝܵܘܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܒܝܲܡܝܼܢܵܟ݂ ܡܵܪܝ ܢܲܛܲܪ ܠܲܢ: ܘܲܬ݂ܚܹܝܬ݂ ܟܸܢܦܲܝ̈ܟ ܣܲܬܲܪ ܠܲܢ: ܘܥܘܼܕܼܪܵܢܵܟ݂ ܢܸܬ݂ܠܵܘܸܐ ܠܲܢ: ܟܠܗܘܿܢ ܝܵܘܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܗܲܒ݂ ܠܲܢ ܡܵܪܝ ܫܲܝܢܵܐ ܐܲܡܝܼܢܵܐ: ܘܚܘܼܒܵܐ ܘܪܸܚܡܲܬ݂ ܝܘܼܠܦܵܢܵܐ: ܘܚܲܝܹ̈ܐ ܘܛܘܼܒܹ̈ܐ ܘܚܲܕܼܘܵܬ݂ܵܐ. ܘܡܵܙܘܿܢܵܐ ܕܠܵܐ ܢܸܚܣܲܪ ܠܲܢ: ܟܠܗܘܿܢ ܝܵܘܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܗܘܝܼ ܢܵܛܘܿܪܵܐ ܕܠܵܐ ܕܵܡܸܟ݂: ܠܟܲܪܟ݂ܵܐ ܕܥܵܢܵـ̈ـܟ݂ ܫܲܪܝܵܐ ܒܹܗ: ܕܠܵܐ ܬܸܬ݂ܢ̱ܟܸܐ ܡ̣ܢ ܕܹܐܒܹ̈ܐ ܨܲܗܝܲܝ̈ ܠܲܕܼܡܵܐ ܕܲܓ݂ܙܵܪܵܟ݂: ܕܐܲܢ̄ܬ̇ܘܼ ܝܲܡܵܐ ܕܠܵܐ ܚܵܣܲܪ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܒܒ݂ܘܼܪ̈ܟܵܬ݂ܵܟ݂ ܡܵܪܲܢ ܒܲܪܸܟܲܝܢ: ܘܫܘܼܪ ܒܛܝܼܠܘܼܬ݂ܵܟ݂ ܐܲܟ݂ܪܸܟܲܝܢ: ܘܡ̣ܢ ܛܵܒ݂̈ܵܢ ܠܵܐ ܬܲܨܪܸܟܲܝܢ: ܘܒܲܓ݂ܢܘܿܢ ܢܘܼܗܪܵܟ݂ ܐܲܣܡܸܟܲܝܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܬܵܐ ܡܵܪܝ ܠܐܝܼܵܠܲܢ ܒܲܚܢܵܢܵܟ݂: ܘܐܸܬ݂ܓܲܠܝ ܠܦܘܼܪܩܵܢܲܢ ܒܲܡܪܲܚܡܵܢܘܼܬ݂ܵܟ݂: ܘܲܬ݂ܪܘܿܨ ܗܲܠ̈ܟܼܵܬܲܢ ܒܲܫܒ݂ܝܼܠܹ̈ܐ ܕܙܲܕ̇ܝܼܩܘܼܬ݂ܵܐ: ܟܠܗܘܿܢ ܝܵܘܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܬܸܕܼܢܲܚ ܠܲܢ ܡܵܪܝ ܛܲܝܒ̇ܘܼܬ݂ܵܟ݂: ܡܵܐ ܕܕܼܵܝܢܵܐ ܠܲܢ ܟܹܐܢܘܼܬܼܵܟ݂: ܘܪܲܚܡܲܝܟ ܢܹܐܬ݂ܘܿܢ ܠܐܝܼܠܲܢ: ܒܝܵܘܡܵܐ ܕܕܼܵܢܚܵܐ ܪܲܒ̇ܘܼܬ݂ܵܟ݂: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܒܘܼܪܟ̇ܬ݂ܵܟܼ ܘܛܲܝܒ̇ܘܼܬ݂ܵܟ݂ ܘܝܲܡܝܼܢܵܟ݂ ܕܡܲܠܝܵܐ ܪܲܚܡܹܐ ܘܲܚܢܵܢܵܐ: ܐܲܓܸ̇ܢ ܘܐܲܠܘܵܐ ܥܲܠ ܟܸܢܫܵܐ ܕܣܵܓ݂ܘܿܕܲܝ̈ܟ ܕܩܵܪܹܝܢ ܘܡܸܬ݂ܟܲܫܦܝܼܢ ܠܵܟ݂ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܒܲܪܸܟ݂ ܡܵܪܝ ܒܛܲܝܒ̇ܘܼܬ݂ܵܟ݂: ܘܢܲܛܲܪ ܒܲܡܪܲܚܡܵܢܘܼܬ݂ܵܟ݂ ܠܟܸܢܫܵܐ ܕܲܡܗܲܝܡܢܹ̈ܐ: ܕܲܬ݂ܟ݂ܝܼܠܝܼܢ ܥܠܲܝܟ ܘܩܵܪܹܝܢ ܠܲܫܡܵܟ݂ ܩܲܕ̇ܝܼܫܵܐ ܘܡܸܬ݂ܟܲܫܦܝܼܢ ܠܵܟ݂ ܒܟ݂ܠܥܸܕܵܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܗܘܝܼ ܡܵܪܝ ܥܲܡܲܢ ܒܪ̈ܲܚܡܲܝܟ ܐܲܡܝܼܢܵܐܝܼܬ݂: ܘܕܲܒܲܪ ܠܲܢ ܐܲܝܟ݂ ܨܸܒ݂ܝܵܢܵܐ ܕܐܲܠܵܗܘܼܬ݂ܵܟ݂ ܟܠܗܘܿܢ ܝܵܘܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܐ̄ܚܪܹܬ݂ܵܐ: ܒܘܼܪܟ̇ܬ݂ܵܐ ܡܵܪܝ ܕܪ̈ܲܚܡܹܐ: ܡ̣ܢ ܒܹܝܬ݂ ܓܲܙܵܐ ܕܪ̈ܲܚܡܹܐ: ܒܝܲܕܼ ܡܲܠܲܐܟ݂ܵܐ ܕܪ̈ܲܚܡܹܐ: ܡ̣ܢ ܠܘܵܬ݂ ܐܲܠܵܗܵܐ ܣܲܓ̇ܝܼ ܪ̈ܲܚܡܹܐ: ܬܸܫܬܲܕܲܪ ܘܬܸܫܬܲܦܲܠ ܥܲܠ ܟܸܢܫܹ̈ܐ ܕܲܡܫܲܒ̇ܚܵܢܲܝ̈ܟ: ܕܐܲܡܝܼܢܝܼܢ ܘܩܵܪܹܝܢ ܠܲܫܡܵܟ݂ ܩܲܕ̇ܝܼܫܵܐ: ܘܚܵܝܪܝܼܢ ܘܲܡܣܲܟܹ̇ܝܢ ܠܪ̈ܲܚܡܹܐ: ܘܲܠܦܘܼܪܩܵܢܵܐ ܕܡ̣ܢ ܠܘܵܬ݂ܵܟ݂: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܘܡܲܩܸܦ ܟܵܗܢܵܐ:

ܨܠܘܿܬ݂ܵܗ̇ ܡܵܪܝ ܕܲܒ݂ܬ݂ܘܼܠܬܵܐ ܩܲܕ̇ܝܼܫܬܵܐ ܘܒ݂ܵܥܘܼܬ݂ܵܗ̇ ܕܐܸܡܵܐ ܡܒܲܪܲܟ݂ܬܵܐ: ܘܬܲܟ݂ܫܲܦ̮ܬܵܗ̇ ܘܬܲܚܢܲܢܬܵܗ̇ ܕܡܲܠܝܲܬ݂ ܛܲܝܒ̇ܘܼܬ݂ܵܐ: ܡܵܪܬ̇ܝ ܡܲܪܝܲܡ ܛܘܼܒ݂ܵܢܝܼܬ݂ܵܐ. ܘܚܲܝܠܹܗ ܪܲܒܵܐ ܕܲܨܠܝܼܒ݂ܵܐ ܙܲܟܵܝܵܐ: ܘܥܘܼܕܼܪܵܢܵܐ ܐܲܠܵܗܵܝܵܐ: ܘܒ݂ܵܥܘܼܬܹܗ ܕܡܵܪܝ ܝܘܿܚܲܢܵܢ ܡܲܥܡܕܼܵܢܵܐ: ܘܕܲܫܠܝܼܚܹ̈ܐ ܛܘܼܒ݂ܵܢܹ̈ܐ: ܘܕܲܐܒ݂ܵܗܵܬ݂ܵܐ ܢܲܨܝܼܚܹ̈ܐ ܡܣܲܒ̇ܪ̈ܵܢܹܐ ܕܙܲܕ̇ܝܼܩܘܼܬ݂ܵܐ: ܘܙܵܪ̈ܥܲܝ ܫܲܝܢܵܐ ܒܲܒ݂ܪܝܼܬ݂ܵܐ. ܘܕܲܐܒ݂ܘܼܢ ܙܲܗܝܵܐ ܘܩܲܕ̇ܝܼܫܵܐ ܡܵܪܝ ܐܲܒ݂ܵܐ ܩܵܬ݂ܘܿܠܝܼܩܵܐ: ܘܡܵܪܝ ܐܸܣܛܲܦܵܢܘܿܣ ܒܘܼܟ݂ܪܵܐ ܕܣܵܗܕܹ̈ܐ: ܘܲܕܼܓܲܢ̄ܒܵܪ ܚܲܝܠܵܐ ܡܵܪܝ ܓܝܼܘܲܪܓܝܼܣ ܣܵܗܕܵܐ ܢܲܨܝܼܚܵܐ: ܘܲܕܼܡܵܪܝ ܦܠܵܢ: ܘܲܕܼܡܵܪܝ ܐܵܘܓܹ̇ܝܢ ܛܘܼܒ݂ܵܢܵܐ ܘܲܕܼܟ݂ܠܵܗ̇ ܣܝܼܥܬܹ̇ܗ ܪܘܼܚܵܢܵܝܬܵܐ. ܘܕܲܫܡܘܿܢܝܼ ܘܕܲܒ݂ܢܹܝ̈ܗ̇: ܘܲܕܼܟ݂ܠܗܘܿܢ ܣܵܗܕܵܘ̈ܗܝ ܘܩܲܕ̇ܝܼ̈ܫܵܘܗܝ ܕܡܵܪܲܢ: ܬܸܗܘܹܐ ܠܲܢ ܐܲܡܝܼܢܵܐܝܼܬ݂: ܫܘܼܪܵܐ ܪܵܡܵܐ ܘܒܹܝܬ݂ ܓܵܘܣܵܐ ܚܲܣܝܼܢܵܐ: ܕܬܸܦܪܘܿܩ ܘܲܬ݂ܦܲܨܹܐ ܘܲܬ݂ܫܵܘܙܸܒ݂ ܘܲܬ݂ܢܲܛܲܪ ܠܦܲܓ݂ܪ̈ܲܝܢ ܘܢܲܦ̮̈ܫܵܬܲܢ ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ. ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ

ܘܢܵܣܹܒ݂ ܟܵܗܢܵܐ ܨܠܝܼܒ݂ܵܐ ܒܐܝܼܕܹܗ: ܘܩܵܐܹܡ ܒܓܲܒܵܐ ܬܲܝܡ̱ܢܵܝܵܐ ܘܡܲܗܦܸܟ݂ ܐܲܦܵܘ̈ܗܝ ܠܥܲܡܵܐ ܘܐܵܡܲܪ: ܒܲܪܸܟ݂ ܡܵܪܝ ܒܦܘܼܩܕܵܢܟ݂ܘܿܢ.

ܘܥܵܢܹܝܢ: ܒܦܘܼܩܕܵܢܹܗ ܕܲܡܫܝܼܚܵܐ ܡܵܪܲܢ: ܘܫܘܼܒ݂ܚܵܐ ܠܲܫܡܹܗ ܩܲܕ̇ܝܼܫܵܐ.

ܘܡܲܪܟ̇ܢܝܼܢ ܥܲܡܵܐ ܪܹ̈ܫܲܝܗܘܿܢ. ܘܐܵܡܲܪ ܟܵܗܢܵܐ ܚܲܕܼ ܡܸܢ ܗܸܢܘܿܢ ܚܘܼܬܵܡܹ̈ܐ:

ܫܘܼܒ݂ܚܵܐ ܠܵܟ݂ ܝܑܼܫܘܿܥ ܡܲܠܟܲܢ ܙܲܟܵܝܵܐ: ܨܸܡܚܹܗ ܕܐܲܒ݂ܵܐ ܡܬ݂ܘܿܡܵܝܵܐ: ܝܑܼܠܝܼܕܼܵܐ ܕܠܵܐ ܫܘܼܪܵܝܵܐ: ܠܥܸܠ ܡ̣ܢ ܙܲܒ݂ܢܹ̈ܐ ܘܲܗܘܲܝܵـ̈ـܐ: ܕܠܲܝܬ̇ ܠܲܢ ܣܲܒ݂ܪܵܐ ܘܣܘܼܟܵܝܵܐ: ܐܸܠܵܐ ܐܸܢ ܐܲܢ̄ܬ̇ ܒܵܪܘܿܝܵܐ. ܒܲܨܠܘܿܬ݂ ܟܹܐܢܹ̈ܐ ܘܲܓ݂ܒܲـ̈ـܝܵܐ: ܕܲܫܦܲܪܘ ܠܵܟ݂ ܡ̣ܢ ܫܘܼܪܵܝܵܐ: ܥܒܸܕܼ ܠܲܚܛܵܗܲܝ̈ܢ ܚܘܼܣܵܝܵܐ: ܘܲܠܣܲܟ݂ܠ̱ـ̈ـܘܵܬܲܢ ܫܪܵܝܵܐ: ܘܲܠܥܵܩܵـ̈ـܬܲܢ ܦܘܼܨܵܝܵܐ: ܘܲܠܫܹܐܠܵـ̈ـܬܲܢ ܦܘܼܢܵܝܵܐ. ܘܡܲܢܲܥܲܝܢ ܠܢܘܼܗܪܵܟ݂ ܓܲܐܝܵܐ: ܘܢܲܛܲܪܲܝܢ ܒܢܝܼܫܵܟ݂ ܚܲܝܵܐ: ܡ̣ܢ ܟܠ ܢܸܟ݂ܝܵܢܝܼ̈ܢ ܟܣܲܝܵـ̈ـܐ ܘܲܓ݂ܠܲܝܵـ̈ـܐ: ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܬܸܬ݂ܩܲܒܲܠ ܡܵܪܲܢ ܘܐܲܠܵܗܲܢ ܨܠܘܿܬ݂ܵܐ ܕܥܲܒ݂ܕܲܝ̈ܟ ܚܲܠܵܫܹ̈ܐ: ܩܕܼܵܡ ܒܹܝܡܵܐ ܕܐܲܠܵܗܘܼܬ݂ܵܟ݂: ܘܬܸܗܘܹܐ ܟܢܝܼܫܘܼܬܲܢ ܗܵܕܹܐ ܠܲܢܝܵܚ ܨܸܒ݂ܝܵܢ ܡܵܪܘܼܬ݂ܵܟ݂: ܠܡܸܣܲܒ݂ ܡܸܢܵܟ݂ ܒܛܲܝܒ̇ܘܼ ܚܘܼܠܡܵܢܵܐ ܕܦܲܓ݂ܪܵܐ: ܘܢܘܼܛܵܪܵܐ ܕܢܲܦ̮ܫܵܐ: ܘܫܘܼܪܬܵܚܵܐ ܕܡܵܙܘܿܢܵܐ: ܘܫܲܝܢܵܐ ܡܵܪܝ ܐܲܡܝܼܢܵܐ: ܘܲܫܠܵܡܵܐ ܢܲܓ̇ܝܼܪܵܐ: ܘܐܵܘܝܘܼܬ݂ܵܐ ܕܚܘܼܒܵܐ ܕܠܵܐ ܥܵܒ݂ܪܵܐ ܘܠܵܐ ܡܸܫܬܲܪܝܵܐ ܡ̣ܢ ܒܲܝܢܵܬܲܢ: ܒܟ݂ܠܹܗ ܙܲܒ݂ܢܵܐ ܕܩܵܐܹܡ ܒܹܗ ܥܵܠܡܵܐ ܗܵܢܵܐ: ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܒܪܝܼܟ݂ ܐܲܠܵܗܵܐ ܠܥܵܠܡܝܼܢ: ܘܲܡܫܲܒܲܚ ܫܡܹܗ ܩܲܕ̇ܝܼܫܵܐ ܠܕܼܵܪܕܵܪ̈ܝܼܢ: ܕܡܸܢܹܗ ܒܵܥܹܝܢܲܢ: ܘܲܠܝܲܡܵܐ ܫܦܝܼܥܵܐ ܕܲܡܪܲܚܡܵܢܘܼܬܹܗ ܡܸܬ݂ܟܲܫܦܝܼܢܲܢ: ܕܗ̤ܘ ܢܲܫܘܸܐ ܠܲܢ ܠܫܘܼܒ݂ܚܵܐ ܦܲܐܝܵܐ ܕܡܲܠܟ̇ܘܼܬܹܗ: ܘܲܠܒ݂ܘܼܣܵܡܵܐ ܕܥܲܡ ܡܲܠܲܐܟ݂ܵܘ̈ܗܝ ܩܲܕ̇ܝܼܫܹ̈ܐ: ܘܲܠܓܲܠܝܘܼܬ݂ ܐܲܦܹ̈ܐ ܕܲܩܕܼܵܡܵܘܗܝ: ܘܲܠܩܵܘܡܵܐ ܕܡ̣ܢ ܝܲܡܝܼܢܹܗ ܒܐܘܿܪܸܫܠܸܡ ܕܲܠܥܸܠ: ܒܛܲܝܒ̇ܘܼܬܹܗ ܘܲܒ݂ ܪ̈ܲܚܡܵܘܗܝ: ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܐܲܠܵܗܵܐ ܡܵܪܹܟ̇ܠ ܕܐܸܬ݂ܟܲܢܲܫܢܲܢ ܒܒܲܝܬܹ̇ܗ: ܘܨܲܠܝܼܢܲܢ ܩܕܼܵܡ ܪܲܒ̇ܘܼܬܹܗ: ܥܲܠ ܣܲܒ݂ܪܵܐ ܪܲܒܵܐ ܕܲܡܪܲܚܡܵܢܘܼܬܹܗ: ܗ̤ܘ ܢܸܫܡܲܥ ܨܠܘܿܬܲܢ ܒܲܚܢܵܢܹܗ: ܘܲܢܩܲܒܸ̇ܠ ܒܵܥܘܼܬܲܢ ܒܚܵܘܣܵܢܹܗ: ܘܲܢܫܝܼܓ݂ ܘܢܸܡܪܘܿܩ ܨܵܐܬ݂ܵܐ ܕܚܵܘܒܲܝ̈ܢ ܘܕܲܚܛܵܗܲܝ̈ܢ ܒܙܘܿܦܵܐ ܫܦܝܼܥܵܐ ܕܚܲܝܘܼܣܬ݂ܵܢܘܼܬܹܗ: ܘܲܢܢܝܼܚ ܢܲܦ̮ܫܵܬ݂ܵܐ ܕܥܲܢܝܼܕܲܝ̈ܢ ܒܐܵܘܵܢܹ̈ܐ ܫܒ݂ܝܼܚܹ̈ܐ ܕܡܲܠܟ̇ܘܼܬܹܗ: ܘܢܸܪܘܿܣ ܥܲܠ ܟܠܲܢ ܛܲܠܵܐ ܕܒܲܣܝܼܡܘܼܬܹܗ: ܘܲܥܠܲܝܢ ܘܥܲܠ ܟܠ ܒܸܪ̈ܝܵܢ ܬܲܓܸ̇ܢ ܝܲܡܝܼܢܵܐ ܕܲܒ݂ܛܝܼܠܘܼܬܹܗ: ܒܛܲܝܒ̇ܘܼܬܹܗ ܘܲܒ݂ܪ̈ܲܚܡܵܘܗܝ: ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܐܲܠܵܗܵܐ ܡܵܪܹܟܸ̇ܠ ܕܝܲܗ̄ܒ݂ ܬܸܫܒ̇ܚܵܬܹ̈ܗ ܒܦܘܼܡܲܢ: ܘܲܙܡܝܼܪ̈ܵܬܹܗ ܒܠܸܫܵܢܲܢ: ܘܩܝܼܢܵܬܹ̈ܗ ܒܓܲܓ̇ܪ̈ܵܬܲܢ: ܘܬ݂ܵܘܕ̇ܝܼܬܹܗ ܒܣܸܦ̈ܘܵܬܲܢ: ܘܗܲܝܡܵܢܘܼܬܹܗ ܒܠܸܒܵـ̈ـܘܵܬܲܢ: ܗ̤ܘ ܢܸܫܡܲܥ ܨܠܵـ̈ـܘܵܬܲܢ: ܘܲܢܩܲܒܸ̇ܠ ܒܵܥ̈ܘܵܬܲܢ: ܘܢܸܬ݂ܪܲܥܹܐ ܒܬܲܟ݂ܫ̈ܦܵܬܲܢ: ܘܲܢܦܲܢܸܐ ܠܲܢ ܫܹܐܠܵـ̈ـܬܲܢ ܫܲܦܝܼܪ̈ܵܬ݂ܵܐ ܠܵܐ ܥܕܼܝܼܠܵܬ݂ܵܐ. ܘܡ̣ܢ ܒܹܝܬ݂ ܓܲܙܵܐ ܪܲܒܵܐ ܕܲܡܪܲܚܡܵܢܘܼܬܹܗ ܢܲܫܦܲܥ ܪ̈ܲܚܡܵܘܗܝ ܘܲܚܢܵܢܹܗ: ܥܠܲܝܢ ܘܥܲܠ ܥܵܠܡܵܐ ܟܠܹܗ ܡ̣ܢ ܣܵܟܹܗ: ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܢܸܫܬܲܒܲܚ ܫܡܹܗ ܕܐܲܠܵܗܵܐ ܡܵܪܹܟܸ̇ܠ ܒܲܝܢܵܬܲܢ: ܡܛܲܟ̇ܣܵܢܗܘܿܢ ܕܙܲܒ݂ܢܹ̈ܐ ܘܥܸܕܵܢܹ̈ܐ. ܘܲܥܠܲܝܢ ܡܚܝܼܠܹ̈ܐ ܘܚܲܛܵܝܹ̈ܐ: ܘܥܲܠ ܥܵܠܡܵܐ ܟܠܹܗ ܡ̣ܢ ܣܵܟܹܗ. ܘܥܲܠ ܥܹܕ̄ܬܵܐ ܩܲܕ̇ܝܼܫܬܵܐ ܘܝܲܠܕܹܝ̈ܗ̇: ܘܥܲܠ ܐܲܒ݂ܵـ̈ـܗܲܝܢ ܘܪܲܒܵܢܲܝܢ ܘܡܲܠܦܵܢܲܝ̈ܢ ܘܥܲܢܝܼܕܲܝ̈ܢ: ܘܥܲܢܝܼܕܹ̈ܐ ܕܲܦܪܲܫܘ ܘܫܲܢܝܼܘ ܡ̣ܢ ܒܲܝܢܵܬܲܢ: ܘܥܲܠ ܟܠܵܗ̇ ܐܲܚܘܼܬܲܢ ܕܒܲܡܫܝܼܚܵܐ: ܬܲܓܸ̇ܢ ܝܲܡܝܼܢܵܐ ܕܲܒ݂ܛܝܼܠܘܼܬܹܗ ܘܕܲܡܪܲܚܡܵܢܘܼܬܹܗ: ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܠܐܲܠܵܗܵܐ ܫܘܼܒ݂ܚܵܐ ܘܲܠܡܲܠܲܐܟܹ̈ܐ ܐܝܼܩܵܪܵܐ: ܘܲܠܣܵܛܵܢܵܐ ܒܸܗܬ̇ܬ݂ܵܐ: ܘܠܲܨܠܝܼܒ݂ܵܐ ܣܸܓ݂ܕ̇ܬܵܐ: ܘܲܠܥܹܕ̄ܬܵܐ ܪܘܼܡܪܵܡܵܐ: ܘܲܠܥܲܢܝܼܕܹ̈ܐ ܢܘܼܚܵܡܵܐ: ܘܲܠܬܲܝܵܒܹ̈ܐ ܩܘܼܒܵܠܵܐ: ܘܠܲܐܣܝܼܪܹ̈ܐ ܫܪܵܝܵܐ: ܘܲܠܡܲܪ̈ܥܹܐ ܘܲܟ݂ܪ̈ܝܼܗܹܐ ܚܘܼܠܡܵܢܵܐ ܘܐܵܣܝܘܼܬ݂ܵܐ: ܘܠܲܐܪܒܲܥܦܸܢܝܵܬܹ̈ܗ ܕܥܵܠܡܵܐ ܫܲܝܢܵܐ ܪܲܒܵܐ ܘܲܫܠܵܡܵܐ. ܘܐܵܦ ܥܠܲܝܢ ܕܐܝܼܬܲܝܢ ܡܚܝܼܠܹ̈ܐ ܘܚܲܛܵܝܹ̈ܐ: ܚܢܵܢܹܗ ܘܪ̈ܲܚܡܵܘܗܝ ܕܐܲܠܵܗܲܢ ܣܓ݂ܝܼܕܼܵܐ ܢܹܐܬ݂ܘܿܢ ܘܢܲܓ̇ܢܘܼܢ ܘܢܸܫܬܲܦܥܘܼܢ ܘܲܢܩܵܘܘܿܢ ܘܢܲܡ̱ܠܟ݂ܘܼܢ ܒܐܲܡܝܼܢܘܼܬ݂ܵܐ: ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܒܝܲܡܝܼܢ ܡܵܪܘܼܬ݂ܵܟ݂ ܐܲܒ݂ܘܼܢ ܕܒܲܫܡܲܝܵܐ ܒܲܪܸܟ݂ ܡܵܪܝ ܠܟ݂ ܠܲܢ: ܘܢܲܛܲܪ ܠܟ݂ܠܲܢ: ܘܥܲܕܲܪ ܠܟ݂ܠܲܢ: ܘܣܲܝܲܥ ܘܣܲܬܲܪ ܠܟ݂ܠܲܢ: ܘܢܲܚܸܡ ܥܲܢܝܼܕܹ̈ܐ ܕܟ݂ܠܲܢ: ܘܐܲܓܸ̇ܢ ܝܲܡܝܼܢܵܟ݂ ܥܲܠ ܟܠܲܢ: ܘܪ̈ܲܚܡܲܝܟ ܘܲܚܢܵܢܵܟ݂ ܢܸܫܬܲܦܥܘܼܢ ܥܲܠ ܟܠܲܢ: ܘܬܸܫܒ̇ܘܿܚܬܵܐ ܘܐܝܼܩܵܪܵܐ ܘܬ݂ܵܘܕ̇ܝܼܬ݂ܵܐ ܘܣܸܓ݂ܕ̇ܬ݂ܵܐ ܘܩܘܼܒܵܠܛܲܝܒ̇ܘܼܬ݂ܵܐ ܐܲܡܝܼܢܬܵܐ ܬܸܣܲܩ ܠܵܟ݂ ܡ̣ܢ ܦܘܼܡ ܟܠܲܢ ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܐܵܘ: ܐܲܠܵܗܵܐ ܡܵܪܹܟ̇ܠ ܢܒܲܪܸܟ݂ ܠܟܸܢܫܲܢ ܒܛܲܝܒ̇ܘܼܬܹܗ: ܘܲܢܢܲܛܲܪ ܠܲܩܝܵܡܲܢ ܒܣܘܿܓ݂ܵܐܐ ܫܦܝܼܥܵܐ ܕܲܡܪܲܚܡܵܢܘܼܬܹܗ: ܘܲܢܦܲܢܸܐ ܫܹܐܠܵـ̈ـܬܲܢ ܡ̣ܢ ܒܹܝܬ݂ ܓܲܙܹܗ: ܘܥܲܠ ܥܵܠܡܵܐ ܟܠܹܗ ܡ̣ܢ ܣܵܟܹܗ: ܘܥܲܠ ܥܹܕ̄ܬܵܐ ܩܲܕ̇ܝܼܫܬܵܐ ܘܝܲܠܕܹܝ̈ܗ̇: ܘܥܲܠ ܐܲܬ݂ܪܵܐ ܗܵܢܵܐ ܘܥܵܡܘܿܪ̈ܵܘܗܝ: ܘܥܲܠ ܥܘܼܡܪܵܐ ܗܵܢܵܐ ܘܝܲܬܵܒ݂ܵܘ̈ܗܝ: ܘܥܲܠ ܟܠܲܢ ܒܟ݂ܠܲܢ ܟܢܝܼܫܵܐܝܼܬ݂: ܚܢܵܢܹܗ ܘܪܲܚܡܵܘܗܝ ܕܐܵܠܵܗܲܢ ܛܵܒ݂ܵܐ: ܢܹܐܬ݂ܘܿܢ ܘܢܸܫܬܲܦܥܘܼܢ ܒܐܲܡܝܼܢܘܼ. ܡܫܝܼܚܵܐ ܣܲܒ݂ܪܹܗ ܕܲܟ݂ܝܵܢܲܢ، ܗܵܫܵܐ ܘܲܒ݂ܟ݂ܠܙܒܲܢ ܘܲܠܥܵܠܲܡ ܥܵܠܡܝܼܢ. (ܪܵܫܸܡ ܨܠܝܼܒ݂ܵܐ ܥܲܠ ܥܲܡܵܐ)

ܘܥܵܢܹܝܢ: ܡܫܝܼܚܵܐ ܢܸܫܡܲܥ ܨ̈ܠܵܘܵܬܼܵܟܼ، ܡܫܝܼܚܵܐ ܢܙܲܗܹܐ ܟܵܗܢܘܼܬܼܵܟܼ ܒܡܲܠܟܘܼܬܼܵܐ ܕܲܫܡܲܝܵܐ.

ܘܡܲܩܦܝܼܢ ܗܲܝܡܵܢܘܼܬ݂ܵܐ ܕܲܬ݂ܠܵܬ݂ܡܵܐܐ ܘܲܬ݂ܡܲܢܬܲܥܣܲܪ ܐܲܒ݂ܵܗܵܬ݂ܵܐ ܕܐܸܬ݂ܟܲܢܲܫܘ ܒܢܝܼܩܝܼܵܐ ܡܕܼܝܼܢ̄ܬܵܐ ܕܒܸܬ݂ܘܼܢܝܼܵܐ: ܒܙܲܒ݂ܢܵܐ ܕܩܘܼܣܛܲܢܛܝܼܢܘܿܣ ܡܲܠܟܵܐ ܙܲܟܵܝܵܐ ܡܸܛܠ ܪܘܼܫܥܹܗ ܕܐܵܪܝܼܘܿܣ:

ܡܗܲܝܡܢܝܼܢ ܚ݇ܢܲܢ ܒܚܲܕܼ ܐܲܠܵܗܵܐ: ܐܲܒ݂ܵܐ ܐܲܚܝܼܕܼ ܟܠ. ܥܵܒ݂ܘ݁ܕܼܵܐ ܕܟ݂ܠܗܹܝܢ: ܐܲܝܠܹܝܢ ܕܡܸܬ݂ܚܲܙܝܵ̈ܢ: ܘܲܕܼܠܵܐ ܡܸܬ݂ܚܲܙܝܵ̈ܢ. ܘܲܒ݂ܚܲܕܼ ܡܵܪܝܵܐ: ܝܼܫܘ݁ܥ ܡܫܝܼܚܵܐ: ܒܪܹܗ ܕܐܲܠܵܗܵܐ. ܝܼܚܝܼܕܼܵܝܵܐ: ܒܘܼܟ݂ܪܵܐ ܕܟ݂ܠܗܹܝܢ ܒܸܪ̈ܝܵܬ݂ܵܐ. ܗ݁ܘ ܕܡܼܢ ܐܲܒ݂ܘܼܗܝ ܐܸܬ݂ܝܼܠܸܕܼ ܩܕܼܵܡ ܟܠܗܘ݁ܢ ܥܵܠܡܹ̈ܐ: ܘܠܵܐ ܐܸܬ݂ܥܒ݂ܸܕܼ. ܐܲܠܵܗܵܐ ܫܲܪܝܼܪܵܐ. ܕܡܼܢ ܐܲܠܵܗܵܐ ܫܲܪܝܼܪܵܐ: ܒܲܪ ܟܝܵܢܵܐ ܕܐܲܒ݂ܘܼܗܝ ܕܒ݂ܐܝܼܕܼܵܘܗ̈ܝ ܐܸܬ݁ܬܲܩܲܢܘ ܥܵܠܡܹ̈ܐ: ܘܐܸܬ݂ܒ݁ܪܝܼ ܟܠܡܸܕܸܡ. ܗ݁ܘ ܕܡܸܛܠܵܬܼܲܢ ܒܢܲܝ̈ܢܵܫܵܐ: ܘܡܸܛܠ ܦܘܼܪܩܵܢܲܢ: ܢܚܸܬ݂ ܡܼܢ ܫܡܲܝܵܐ. ܘܐܸܬ݂ܓܲܫܲܡ ܡܼܢ ܪܘܼܚܵܐ ܕܩܘܼܕܼܫܵܐ ܘܲܗܘܵܐ ܒܲܪܢܵܫܵܐ: ܘܐܸܬ݂ܒܛܸܢ ܘܐܸܬ݂ܝܼܠܸܕ ܡܼܢ ܡܲܪܝܲܡ ܒܬ݂ܘܼܠܬܵܐ. ܘܚܲܫ ܘܐܸܙܕܩܸܦ: ܒܝܲܘܡܲܝ̈ ܦܲܢܛܝܼܘ݁ܣ ܦܝܼܠܵܛܘ݁ܣ. ܘܐܸܬ݂ܩܒ݂ܲܪ: ܘܩܵܡ ܠܲܬ݂ܠܵܬ݂ܵܐ ܝܲܘܡ̈ܝܼܢ ܐܲܝܟ݂ ܕܲܟ݂ܬ݂ܝܼܒ݂. ܘܲܣܠܸܩ ܠܲܫܡܲܝܵܐ: ܘܝܼܬܸܼܒ݂ ܡܼܢ ܝܲܡܝܼܢܵܐ ܕܐܲܒ݂ܘܼܗܝ. ܘܬ݂ܘܼܒ݂ ܥܬ݂ܝܼܕܼ ܠܡܹܐܬ݂ܵܐ: ܠܲܡܕܼܵܢ ܠܡܝܼܬܹܼ̈ܐ ܘܲܠܚܲܝܹ̈ܐ. ܘܲܒ݂ܚܲܕܼ ܪܘܼܚܵܐ ܕܩܘܼܕܼܫܵܐ: ܪܘܼܚܵܐ ܕܲܫܪܵܪܵܐ: ܗ݁ܘ ܕܡܼܢ ܐܲܒ݂ܵܐ ܢܵܦܹܩ: ܪܘܼܚܵܐ ܡܲܚܝܵܢܵܐ. ܘܒ݂ܲܚܕܼܵܐ ܥܹܕ݇ܬܵܐ ܩܲܕܝܼܫܬܵܐ: ܘܲܫܠܝܼܚܵܝܬܵܐ ܩܵܬ݂ܘ݁ܠܝܼܩܝܼ. ܘܡܲܘܕܹܝܢܲܢ ܒܲܚܕܼܵܐ ܡܲܥܡܘ݁ܕܼܝܼܬ݂ܵܐ: ܠܫܘܼܒ݂ܩܵܢܵܐ ܕܲܚܛܵܗܹ̈ܐ ܘܒ݂ܲܩܝܵܡܬܵܐ ܕܦܲܓܼܪ̈ܲܝܢ: ܘܲܒ݂ܚܲܝܹ̈ܐ ܕܲܠܥܵܠܲܡ ܥܵܠܡܝܼܢ: ܐܵܡܹܝܢ܀