ܕܨܲܦܪܵܐ

ܡܨܲܠܸܐ ܪܲܒܵܐ ܬܲܪܬܹܝܢ ܨ̈ܠܵܘܵܬ݂ܵܐ ܕܨܲܦܪܵܐ ܕܝܲܠܕܵܐ:

ܕܡܵܪܝ ܐܹܠܝܼܵܐ ܕܪܹܫ ܥܲܝܢܵܐ: ܠܵܟ݂ ܝܲܠܕܵܐ ܓܢܝܼܙܵܐ ܕܡ̣ܢ ܥܵܠܲܡ ܐܸܬ݂ܝܼܠܸܕ݂ ܡ̣ܢ ܐܲܒ݂ܵܐ ܕܠܵܐ ܙܲܒ݂ܢܵܐ: ܬܢܝܼ. ܨܲܠܡܵܐ ܚܲܝܵܐ ܘܝܘܼܩܢܵܐ ܠܵܐ ܡܸܫܬܲܚܠܦܵܢܵܐ ܕܝܵܠܘܿܕܹܗ. ܕܡ̣ܢ ܥܘܼܒܵܐ ܓܢܝܼܙܵܐ ܕܐܲܒ݂ܘܼܗܝ ܝܼܠܝܼܕ݂ ܡܬ݂ܘܡܵܐܝܼܬ݂. ܘܐܸܬ݂ܓܲܫܲܡ ܡ̣ܢ ܟܲܪܣܵܐ ܚܬ݂ܝܼܡܲܬ݂ ܒܲܒ݂̈ܬ݂ܘܼܠܹܐ ܠܵܐ ܡܸܫܬܲܚܠܦܵܢܵܐܝܼܬ݂. ܘܐܸܨܛܲܠܲܡ ܕܡܘܼܬ݂ܵܐ ܥܲܒ݂ܕܵܢܵܝܬܵܐ ܡ̣ܢ ܬܸܓ݂ܡܵܐ ܕܣܘܼܡܛܝܼܩܘܿܢ ܓܫܝܼܡܹ̈ܐ ܘܡܲܠܵܠܹ̈ܐ ܨܸܒ݂ܝܵܢܵܐܝܼܬ݂. ܘܲܦܪܲܩ ܠܲܒ݂ܪܝܼܬ݂ܵܐ ܗܘܼܠܵܢܵܝܬܵܐ ܘܲܪܒ݂ܝܼܥܵܝܲܬ݂ ܐܸܣܛܘܼܟ݂ܣܹ̈ܐ ܡ̣ܢ ܫܘܼܥܒܵܕ݂ܵܗ̇ ܕܲܚܛܝܼܬ݂ܵܐ ܡܪܲܚܡܵܢܵܐܝܼܬ݂. ܗܵܘ̇ ܕܡܲܪܟܲܒ݂ܬ݂ܵܐ ܟܪܘܿܒ݂ܵܝܬܵܐ ܪܵܥ̇ܠܵܐ ܡ̣ܢ ܙܝܼܘܹܗ. ܘܪܲܗܛܵܐ ܕܕ݂ܘܼܒܵܖ̈ܵܘܗܝ ܡܲܪܗܸܒ݂ ܠܲܣܖ̈ܵܦܹܐ. ܘܦܵܪܲܚ ܘܛܵܐܹܣ ܠܵܐ ܡܫܲܢܝܵܢܵܐܝܼܬ݂ ܥܲܠ ܟܸܢܦܹ̈ܐ ܕܢܘܼܪܵܐ ܘܲܕ݂ܪܘܼܚܵܐ. ܘܙܵܝܥܝܼܢ ܡܸܢܹܗ ܫܡܲܝ̈ܵܐ ܘܐܲܪܥܵܐ ܘܟ݂ܠ ܕܲܒ݂ܗܘܿܢ. ܗܵܘ̇ ܕܟ݂ܠܗܘܿܢ ܟܝܵܢܹ̈ܐ ܡܸܬ݂ܝܲܕ݂ܥܵܢܹ̈ܐ ܘܡܸܬ݂ܖ̈ܲܓ݂ܫܵܢܹܐ ܣܵܓ݂ܕܝܼܢ ܠܲܟ݂ܝܵܢ ܐܝܼܬ݂ܘܼܬܹܗ. ܘܛܲܟ̇ܣ̈ܝܼܵܣ ܕܚܲܝܠܲܝ̈ ܥܵܠܲܡ ܒܠܸܥܙܹ̈ܐ ܕܠܵܐ ܩܵܠܵܐ ܡܙܲܝܚܝܼܢ ܠܲܫܟ݂ܝܼܢܬܹ݁ܗ. ܗܵܘ̇ ܕܐܸܫܬ݁ܠܲܚ ܒܐܲܚܪܵܝܲܬ݂ ܙܲܒ݂ܢܹ̈ܐ ܠܦܘܼܪܩܵܢ ܟܝܵܢܲܢ ܕܐܸܬ݂ܥܲܒ̣ܕܲܕ݂ ܠܡܵܘܬܵܐ ܚܛܝܼܬ݂ܵܢܵܝܵܐ. ܐܲܖ̈ܓ̇ܘܵܢܲܝ ܓܢܝܼܙܘܼܬܹܗ ܟܲܕ݂ ܠܥܸܠ ܡ̣ܢ ܗܵܘܦܹ̈ܐ ܘܙܲܒ݂ܢܹ̈ܐ ܘܛܵܘܖܹ̈ܐ ܘܡܸܬ݂ܚܹ̈ܐ ܡܪܲܝܲܡ ܟܝܵܢܵܐ ܦܫܝܼܛܵܐ ܘܠܵܐ ܡܸܬ݁ܬܲܚܡܵܢܵܐ ܕܐܲܠܵܗܘܼܬܹܗ. ܗܵܘ̇ ܕܚܲܬܸܡ ܘܫܲܪܲܪ ܠܡܸܠܹ̈ܐ ܢܒ݂ܝܼܵܝܹ̈ܐ ܒܡܵܘܠܵܕܹܗ ܬܪܲܝܵܢܵܐ. ܘܐܸܣܬ݁ܓܸܕ݂ ܡ̣ܢ ܠܸܓ݂ܝܘܿܢܲܝ̈ ܢܘܼܗܪܵܐ ܒܡܲܥܲܠܬܹ݁ܗ ܠܲܡܕ݂ܝܼܢܲܬ݂ ܬܹܒܹܝܠ. ܘܟܲܢܸܫ̣ ܐܲܟܲܚ݇ܕ݂ ܠܲܡܓ݂ܘܼܫܹ̈ܐ ܘܲܠܖ̈ܵܥܵܘܵܬ݂ܵܐ ܠܣܸܓ݂ܕܲܬ݂ ܬܪܘܿܢܝܼܘܿܢ ܕܐܲܠܵܗܘܼܬܹܗ: ܡܸܬ݂ܟܲܫܦܝܼܢܲܢ ܘܫܵܐܠܝܼܢܲܢ ܘܒ݂ܵܥܹܝܢܲܢ ܡܸܢܵܟ݂: ܐܲܥܛܸܦܲܝܢ ܡܵܪܝ ܕܘܼܒܵܪܵܐ ܩܘܼܕ݂ܫܵܢܵܝܵܐ ܐܲܟ݂ܡܵܐ ܕܲܒ̣ܥܲܙܪܘܼܪܹ̈ܐ ܐܸܬ݂ܥܲܛܲܦܬ݁. ܘܐܲܨܡܲܚ ܥܲܠ ܦܲܖ̈ܨܘܿܦܹܐ ܕܝܼܠܲܢ ܢܘܼܗܪܵܐ ܫܡܲܝܵܢܵܐ. ܐܲܟ݂ܡܵܐ ܕܥܲܠ ܖ̈ܵܥܵܘܵܬ݂ܵܐ ܐܲܨܡܲܚܬ݁. ܘܐܲܕ݂ܢܲܚ ܒܠܸܒܵܘ̈ܵܬܲܢ ܚܲܕ݂ܘܼܬ݂ܵܐ ܐܲܠܵܗܵܝܬܵܐ ܗܵܝ̇ ܕܲܒ݂ܟ݂ܠܹܗ ܥܵܠܡܵܐ ܐܲܕ݂ܢܲܚ̣ܬ݁. ܐܲܝܟܲܢܵܐ ܕܥܲܡ ܓܘܼܕܹ̈ܐ ܡܲܠܲܐܟ݂ܵܝ̈ܵܬ݂ܵܐ ܢܲܙܥܸܩ. ܬܸܫܒ݁ܘܿܚܬܵܐ ܠܐܲܠܵܗܵܐ ܒܲܡܖ̈ܵܘܡܹܐ. ܘܥܲܠ ܐܲܪܥܵܐ ܫܠܵܡܵܐ. ܘܣܲܒ݂ܪܵܐ ܛܵܒ݂ܵܐ ܠܲܒ݂ܢܲܝ̈ܢܵܫܵܐ. ܘܐܲܫܘܵܢ ܕܢܸܥܘܿܠ ܠܲܡܥܲܪܬ݂ܵܐ ܩܘܼܕ݂ܫܵܢܵܝܬܵܐ ܥܲܡ ܖ̈ܵܥܵܘܵܬ݂ܵܐ ܡܝܲܩܖ̈ܲܝ ܡܵܘܠܵܕܵܟ݂. ܘܢܸܪܗܲܛ ܩܲܠܝܼܠܵܐܝܼܬ݂ ܒܖܸ̈ܓ݂ܠܹܐ ܕܚܘܼܫܵܒܲܝ̈ܢ ܠܣܸܓ݂ܕܲܬ݂ ܐܘܿܪܝܵܐ ܫܡܲܝܵܢܵܐ ܡܲܩܕܲܫ ܐܝܼܬ݂ܘܼܬ݂ܵܟ݂. ܟܲܕ݂ ܛܥܝܼܢܝܼܢܲܢ ܥܲܡ ܡܲܠܟܹ̈ܐ ܒܢܲܝ̈ ܦܵܪܹܣ ܦܹܐܖܹ̈ܐ ܡܠܝܼ̈ܠܹܐ ܕܣܸܦ̈ܘܵܬܲܢ. ܘܩܘܼܖ̈ܒܵܢܹܐ ܠܵܐ ܗܘܼܠܵܢܵܝܹ̈ܐ ܠܐܝܼܩܵܪ ܡܲܠܟ݁ܘܼܬ݂ܵܟ݂. ܘܚܲܝܸܠ ܠܲܢ ܕܲܢܥܲܕ݂ܥܸܕ݂ ܥܹܐܕܲܝ̈ܟ. ܘܲܢܚܲܓܸ̇ܐ ܚܲܓܲܝ̈ܟ ܒܐܝܼܩܵܪܵܐ ܕܲܦܐܸܐ ܠܡܵܪܘܼܬ݂ܵܟ݂. ܘܢܸܬ݂ܒܲܣܲܡ ܒܲܛܖ̈ܲܩܠܝܼܢܹܐ ܐܘܿܖܸ̈ܫܠܸܡܵܝܹܐ ܐܲܬ݂ܪܵܐ ܕܲܫܟ݂ܝܼܢܬ݂ܵܟ݂. ܘܲܦܪܘܿܩ ܘܫܵܘܙܸܒ݂ ܠܲܢ ܡ̣ܢ ܚܣܵܡܵܐ ܗܹܪܘܿܕܹܣܵܝܵܐ ܕܣܵܢ̇ܐܲܝ̈ܢ ܟܣܲܝ̈ܵܐ. ܒܥܘܼܕ݂ܪܵܢܵܐ ܕܡܸܫܬܲܟܲܢ ܠܲܢ ܡܸܢܵܟ݂. ܕܲܢܪܲܡܪܸܡ ܠܝܲܠܕܵܟ݂. ܘܢܸܣܓ̇ܘܿܕ݂ ܠܝܵܠܘܿܕ݂ܵܟ݂. ܘܲܢܩܲܠܸܣ ܠܝܵܘܡܵܐ ܕܡܵܘܠܵܕ݂ܵܟ݂. ܘܲܢܢܲܫܸܩ ܒܣܸܦ̈ܘܵܬܲܢ ܠܥܲܙܪܘܼܪܹ̈ܐ ܕܬܲܟ݂ܣܝܼܬ݂ܵܟ݂܀ ܘܬܸܗܘܸܐ ܡܵܪܝ ܬܸܫܡܸܫܬܲܢ ܠܲܢܝܵܚܵܟ݂. ܘܲܨܠܘܿܬܲܢ ܘܫܲܗܪܲܢ ܠܲܦܝܵܣܵܟ݂. ܘܒ݂ܵܥܘܼܬܲܢ ܠܬܲܪܥܘܼܬ݂ܵܟ݂ ܘܬܲܟ݂ܫܲܦ̮ܬܲܢ ܠܐܝܼܩܵܪܵܟ݂. ܘܬܲܚܢܲܢܬܲܢ ܠܲܡܪܲܥܵܝܘܼܬ݂ܵܟ݂. ܘܖ̈ܲܚܡܹܐ ܘܲܚܢܵܢܵܐ ܕܐܲܠܵܗܘܼܬ݂ܵܟ݂. ܢܸܗܘܘܿܢ ܠܚܘܼܣܵܝ ܚܵܘ̈ܒܹܐ ܕܥܲܡܵܟ݂. ܘܲܠܫܘܼܒ݂ܩܵܢ ܚܛܵܗܹ̈ܐ ܕܟ݂ܠܵܗ݁ ܥܵܢ̈ܵܐ ܕܡܲܪܥܝܼܬ݂ܵܟ݂. ܕܲܓ݂ܒܲܝ̣ܬ݁ ܠܵܟ݂ ܒܛܲܝܒ̇ܘܼܬ݂ܵܟ݂ ܘܲܒ݂ܖ̈ܲܚܡܲܝܟ. ܛܵܒ݂ܵܐ ܘܪܵܚܹܡ ܒܢܲܝ̈ܢܵܫܵܐ: ܡܵܪܵܐ ܕܟ݂ܠ.

ܚܒܲܪܬ݂ܵܗ̇ ܕܝܼܠܹܗ: ܠܵܟ݂ ܝܲܠܕܵܐ ܡܬ݂ܘܿܡܵܝܵܐ ܘܙܲܒ݂ܢܵܢܵܝܵܐ. ܕܲܡܬ݂ܘܿܡܵܐܝܼܬ݂ ܩܕ݂ܵܡ ܥܵܠܡܹ̈ܐ ܡ̣ܢ ܐܲܒ݂ܘܼܟ݂ ܐܸܬ݂ܝܼܠܸܕ݂ܬ݁. ܘܙܲܒ݂ܢܵܢܵܐܝܼܬ݂ ܡ̣ܢ ܡܲܪܝܲܡ ܒܬ݂ܘܼܠܲܬ݂ ܥܵܠܲܡ ܘܢܵܛܪܲܬ݂ ܩܘܼܕ݂ܫܹ̈ܐ ܒܬ݂ܘܼܠܵܝܹ̈ܐ ܐܸܬ݂ܚ݇ܙܝܼܬ݁. ܐܲܢ݇ܬ݁ ܕܲܒ݂ܥܲܝܢܵܐ ܕܪܘܼܚܵܐ ܢܲܗܝܼܪܵܐܝܼܬ݂ ܒܒܹܝܬ݂ ܩܘܼܕ݂ܫܵܐ ܚ݂ܙܵܐ ܐܹܫܲܥܝܵܐ ܫܒ݂ܝܼܚܘܼܬ݂ܵܟ݂. ܘܚܲܙܩܝܼܐܹܝܠ ܥܲܠ ܡܲܪܟܲܒ݂ܬܵܐ ܢܘܼܪܵܢܵܝܬܵܐ ܐܸܫܬܵܘܕܲܥ ܓܢܝܼܙܘܼܬ݂ܵܟ݂. ܘܕ݂ܵܢܝܼܐܹܝܠ ܥܲܠ ܥܢܵܢܲܝ̈ ܫܡܲܝܵܐ ܐܲܝܟ݂ ܥܲܬܝܼܩ ܝܵܘ̈ܡܵܬ݂ܵܐ ܚܙܵܐ ܠܲܕ݂ܚܝܼܠܘܼܬ݂ܵܟ݂. ܘܡܲܠܲܐܟ݂ܝܼ ܫܸܡܫܵܐ ܕܙܲܕܝܼܩܘܼܬ݂ܵܐ ܕܐܵܣܝܘܼܬ݂ܵܐ ܩܵܕ݂ܚܵܐ ܡ̣ܢ ܠܸܫܵܢܹܗ ܟܲܢ̣ܝܼ ܐܲܠܵܗܘܼܬ݂ܵܟ݂. ܐܲܢ݇ܬ݇ܘܼ ܕܡ̣ܢ ܫܲܠܗܹܒ݂̈ܝܵܬ݂ܵܐ ܗܵܢܹ݁ܝܢ ܡܠܝܼ̈ܠܵܬ݂ܵܐ ܘܢܲܒ݂ܪ̱̈ܫܵܝܵܬ݂ܵܐ ܐܲܠܵܗܵܝ̈ܵܬ݂ܵܐ ܡܸܬ݂ܗܲܕܪܵܐ ܐܝܼܬ݂ܘܼܬ݂ܵܟ݂. ܘܡ̣ܢ ܠܸܓ݂ܝܘܿܢܹ̈ܐ ܟܪ̈ܘܿܒ݂ܵܝܹܐ ܘܲܣܪ̈ܵܦܵܝܹܐ ܚܲܪ̈ܝܼܦܲܝ ܙܵܘܥܹ̈ܐ ܘܢܲܗܝܼܪ̈ܲܝ ܡܲܕ݂ܥܹ̈ܐ ܡܸܬ݂ܩܲܠܣܵܐ ܪܲܒܘܼܬ݂ܵܟ݂. ܘܡ̣ܢ ܟܠܵܗ݁ ܣܘܼܢܛܲܟ݁ܣܝܼܣ ܕܐܸܩܠܹܣܝܼܣ ܡܸܙܕܲܝܲܚ ܬܪܘܿܢܝܼܘܿܢ ܓܢܝܼܙܵܐ ܕܫܘܼܠܛܵܢ ܡܵܪܘܼܬ݂ܵܟ݂. ܐܲܢ݇ܬ݁ܘܼ ܕܦܲܪ̈ܨܘܿܦܹܐ ܢܒ݂ܝܼܵܝܹ̈ܐ ܒܐ݇ܪܵܙܵܐ ܕܡܸܠܲܝ̈ܗܘܿܢ ܛܘܼܦ̮ܣܵܢܵܐܝܼܬ݂ ܨܵܪܘܼܟ݂. ܘܲܩܢܘܿܡܹ̈ܐ ܫܠܝܼܚܵܝܹ̈ܐ ܒܥܲܝܢܹ̈ܐ ܒܸܣܪ̈ܵܢܵܝܵܬ݂ܵܐ ܬܲܦܢܟ݂ܵܐܝܼܬ݂ ܚ̣ܙܵܐܘܼܟ݂. ܘܲܡܣܲܒܪ̈ܵܢܹܐ ܬܹܒܹܝܠܵܝܹ̈ܐ ܒܟ݂ܠܗܘܿܢ ܣܵܘܦܹ̈ܐ ܒܪ̈ܝܼܬ݂ܵܢܵܝܹܐ ܦܵܪܹܗ݇ܣܝܼܣܬ݂ܵܢܵܐܝܼܬ݂ ܣܲܒ݁ܪܘܼܟ݂. ܡܲܠܦܵܢܹ̈ܐ ܐܲܪ̈ܬܵܕܘܼܟ݁ܣܹܐ ܐܲܠܵܗܵܐܝܼܬ݂ ܘܐ݇ܢܵܫܵܐܝܼܬ݂ ܐܲܟ݂ܪܙܘܼܟ݂. ܐܲܢ݇ܬ݁ ܕܲܒ݂ܡܲܥܒ݁ܕ݂ܵܢܘܼܬ݂ܵܐ ܕܛܲܝܒ݁ܘܼܬ݂ܵܟ݂ ܐܸܬ݂ܓܲܒ݂ܝܲܬ̤ ܘܲܒ݂ܡܲܓ݁ܢܵܢܘܼܬ݂ܵܐ ܕܚܲܝܠܵܟ݂ ܐܸܬ݂ܩܲܕܫܲܬ̤ ܒܬ݂ܘܼܠܬܵܐ ܦܐܝܼܬ݂ܵܐ ܘܦܲܐܝܲܬ݂ ܒ̈ܬ݂ܘܼܠܹܐ ܡܲܪܝܲܡ ܙܗܝܼܬ݂ܵܐ. ܕܡܸܢܵܗ݁ ܕܡܝܼܪܵܐܝܼܬ݂ ܐܸܬ݂ܝܼܠܸܕ݂ܬ݁. ܘܥܲܠ ܒܘܼܪ̈ܟܹ݁ܝܗ݁ ܐܸܡ̈ܗܵܝܵܬ݂ܵܐ ܫܲܒ݂ܪܵܐܝܼܬ݂ ܐܸܬ݂ܪܲܒ݁ܝܼܬ݁. ܗܵܝ݁ ܕܲܗܘ̤ܵܬ݂ ܡܲܪܟܲܒ݂ܬ݂ܵܐ ܒܸܣܪܵܢܵܝܬܵܐ ܠܫܘܼܒ݂ܚܵܟ݂. ܘܲܥܢܵܢܵܐ ܢܘܼܗܪܵܢܵܝܬܵܐ ܠܛܸܠܵܠܵܐ ܕܒܲܣܝܼܡܘܼܬ݂ܵܟ݂. ܘܲܡܥܝܼܢܵܐ ܕܕܲܟ݂ܝܘܼܬ݂ܵܐ. ܘܪܸܕ݂ܝܵܐ ܕܩܲܕ݁ܝܼܫܘܼܬ݂ܵܐ. ܘܛܲܒ݂ܥܵܐ ܕܲܒ݂ܬ݂ܘܼܠܘܼܬ݂ܵܐ. ܘܝܘܼܩܢܵܐ ܕܢܲܟ݂ܦܘܼܬ݂ܵܐ. ܘܗܲܝܟ݁ܠܵܐ ܕܢܘܼܗܪܵܐ. ܘܐܵܘܵܢܵܐ ܕܗܸܕ݂ܪܵܐ. ܘܦܝܼܪܡܵܐ ܡܠܝܼܠܵܐ ܕܲܛܥܝܼܢ ܢܘܼܪܵܐ ܕܐܲܠܵܗܘܼܬ݂ܵܐ. ܘܩܲܛܪܘܼܩܵܐ ܒܸܣܪܵܢܵܝܵܐ ܕܲܡܠܸܐ ܬܲܪܥܘܼܬ݂ܵܐ. ܘܬ݂ܵܓ݂ܵܐ ܗܕ݂ܝܼܪܵܐ ܕܥܹܕ݁ܬܵܐ ܩܲܕ݁ܝܼܫܬܵܐ ܩܵܬ݂ܘܿܠܝܼܩܝܼ. ܘܲܟ݂ܠܝܼܠܵܐ ܢܲܗܝܼܪܵܐ ܕܐܲܪܬܵܕܘܼܟ݁ܣܝܼܵܐ ܬܪܝܼܨܲܬ݂ ܫܘܼܒ݂ܚܵܐ ܐܲܦܘܿܣܛܘܿܠܝܼܩܝܼ. ܗܵܟܲܢܵܐ ܡܵܪܲܢ ܘܐܲܠܵܗܲܢ ܐܲܥܒܲܪ ܘܒܲܛܸܠ ܡܸܢܲܢ. ܫܲܒ݂ܛܹ̈ܐ ܡܢܲܓ݁ܕ݂ܵܢܹܐ. ܘܚܹܐܦܹ̈ܐ ܡܕܲܠܚܵܢܹ̈ܐ. ܘܗܲܒ݂ܠܲܢ ܫܲܝܢܵܐ ܐܲܡܝܼܢܵܐ ܕܠܵܐ ܙܵܐܲܥ. ܘܲܫܠܵܡܵܐ ܢܲܓ݁ܝܼܪܵܐ ܕܠܵܐ ܚܵܐܹܓ݂. ܘܫܲܟܸܢ ܠܲܢ ܚܲܝܹ̈ܐ ܢܲܟ݂ܦܹ̈ܐ ܘܝܵܘ̈ܡܵܬ݂ܵܐ ܡܲܠܝܲܝ̈ ܟܠ ܟܘܼܗܵܢ. ܘܐܲܓ݂ܙܲܪ ܠܥܲܡܵܟ݂ ܘܠܲܡܲܪܥܝܼܬ݂ܵܟ݂ ܫܘܼܟܵܢܲܝ̈ܟ ܛܲܝܒ݁ܘܼܬ݂ܵܢܵܝܹ̈ܐ. ܘܗܲܕܵܐ ܐܸܢܘܿܢ ܠܲܫܒ݂ܝܼܠ ܡܲܠܟ݁ܘܼܬ݂ܵܟ݂ ܒܣܘܼܝܵܥܲܝ̈ܟ ܝܲܡܝܼܢܵܝܹ̈ܐ. ܘܐܲܡܛܲܪ ܥܠܲܝܗܘܿܢ ܡ̣ܢ ܥܢܵܢܵܟ݂ ܩܘܼܕ݂ܫܵܢܵܝܬܵܐ ܡܸܛܖܹ̈ܐ ܨܸܒ݂ܝܵܢܵܝܹ̈ܐ. ܘܬܲܓܸ݁ܓ݂ ܖܹ̈ܫܲܝܗܘܿܢ ܕܲܡܗܲܝܡܢܹ̈ܐ ܒܬ݂ܵܓܹ̈ܐ ܢܘܼܗܖ̈ܵܢܵܝܹܐ ܘܐܲܫܘܵܢ ܕܥܲܡ ܟܖ̈ܘܿܒܲܝ ܢܘܼܗܪܵܐ ܡܙܲܝܚܵܢܲܝ̈ܟ. ܢܲܣܸܩ ܠܵܟ݂ ܬܸܫܒ݁ܘܿܚܬܵܐ ܘܐܝܼܩܵܪܵܐ ܘܬ݂ܵܘܕܝܼܬ݂ܵܐ ܘܣܸܓ݂ܕ݂ܬ݂ܵܐ܀ ܒܵܪܘܿܝܹܗ ܕܢܘܼܗܪܵܐ ܒܛܲܝܒ݁ܘܼܬܹܗ. ܘܲܡܛܲܟܣܵܢܹܗ ܕܚܸܫܘܿܟ݂ܵܐ ܒܲܡܪܲܚܡܵܢܘܼܬܹܗ. ܘܡܲܢܗܪܵܢܵܐ ܕܲܒ݂ܪܝܼܬ݂ܵܐ ܒܚܸܟ݂ܡܬܹܗ. ܘܝܼܕܲܥܬܹܗ ܘܐܲܠܵܗܘܼܬܹܗ ܕܠܵܐ ܡܸܬ݁ܕܲܪܟܵܐ ܡ̣ܢ ܖ̈ܘܼܚܵܢܹܐ ܘܦܲܓ݂ܖ̈ܵܢܹܐ: ܡܵܪܵܐ ܕܟ݂ܠ.

ܘܡܲܩܦܝܼܢ ܡܲܙܡܘܿܖܹ̈ܐ ܕܨܲܦܪܵܐ:

ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ. ܒܪܵܫܝܼܬ݂ ܬܲܩܸܢ ܗ݇ܘ̣ܵܐ ܢܘܼܗܪܵܐ. ܐܲܠܵܗܵܐ ܡܵܪܹܗ ܕܢܘܼܗܪܵܐ. ܒܪܵܐ ܢܘܼܗܪܵܐ ܘܐܲܬ݂ܩܸܢ ܢܘܼܗܪܵܐ. ܫܪܸܐ ܒܢܘܼܗܪܵܐ ܘܥܵـ̇ܡܲܪ ܒܢܘܼܗܪܵܐ. ܬܗܲܪܘ ܡܲܠܲܐܟܹ̈ܐ ܒܗܵܘ̇ ܢܘܼܗܪܵܐ. ܘܲܒ݂ܩܵܠܲܝ̈ܗܘܿܢ ܝܲܒܸ݁ܒ݂ܘ ܗ݇ܘ̣ܵܘ. ܝܵܗܹܒ݂ ܢܘܼܗܪܵܐ ܡܵܪܝܵܐ. ܠܵܟ݂ ܫܘܼܒ݂ܚܵܐ ܡܲܣܩܝܼܢܲܢ. ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ܀ܦܠܘܿܚܘ ܠܡܵܪܝܵܐ ܒܚܲܕ݂ܘܼܬ݂ܵܐ. ܝܵܗܹܒ݂ ܢܘܼܗܪܵܐ ܡܵܪܝܵܐ: ܠܵܟ݂ ܫܘܼܒ݂ܚܵܐ ܡܲܣܩܝܼܢܲܢ܀ ܥܘܿܠܘ ܩܕ݂ܵܡܵܘܗܝ ܒܬܸܫܒ݁ܘܿܚܬܵܐ܀ ܕܲܥܘ ܕܗ̤ܘܼܝܘܼ ܡܵܪܝܵܐ ܐܲܠܵܗܲܢ܀ ܗ̤ܘܼܝܘܼ ܥܲܒ݂ܕܲܢ ܘܠܵܐ ܗ݇ܘ̣ܵܐ ܚܢܲܢ܀ ܥܲܡܹܗ ܚܢܲܢ ܘܥܵܢ̈ܵܐ ܕܡܲܪܥܝܼܬܹܗ܀ ܥܘܿܠܘ ܒܬܲܪ̈ܥܵܘܗܝ ܒܬ݂ܵܘܕ݁ܝܼܬ݂ܵܐ ܘܲܠܕ݂ܵܪ̈ܵܘܗܝ ܒܫܘܼܒ݂ܚܵܐ܀ ܐܵܘܕܵܘ ܠܹܗ ܘܒܲܪܸܟ݂ܘ ܠܲܫܡܹܗ܀ ܡܸܛܠ ܕܛܵܒ݂ ܗ̣݇ܘܼ ܡܵܪܝܵܐ ܘܲܠܥܵܠܲܡ ܛܲܝܒ݁ܘܼܬܹܗ܀ ܘܲܠܕ݂ܵܪܕܵܪ̈ܝܼܢ ܗܲܝܡܵܢܘܼܬܹܗ܀ ܫܲܒܲܚ. ܥܵܠܲܡ. ܒܪܵܫܝܼܬ݂ ܐܝܼܬ݂ܵܘܗܝ ܗ݇ܘ̣ܵܐ ܡܸܠܬ݂ܵܐ. ܠܘܵܬ݂ ܐܲܠܵܗܵܐ ܒܐܝܼܬ݂ܘܼܬ݂ܵܐ. ܘܲܒ݂ܦܲܓ݂ܪܲܢ ܐܸܬ݂ܓ̇ܠܝܼ ܒܚܲܪܬ݂ܵܐ. ܕܠܵܐ ܥܘܼܩܵܒ݂ܵܐ ܘܲܒ݂ܨܵܬ݂ܵܐ. ܐ݇ܖ̈ܵܙܹܐ ܘܛܘܼܦ̮ܣܹ̈ܐ ܘܦܸܠ̈ܐܵܬ݂ܵܐ. ܕܨܵܪܲܬ̤ ܡ̣ܢ ܩܕ݂ܝܼܡ ܢܒ݂ܝܼܘܼܬ݂ܵܐ. ܘܐܸܬ݂ܦܲܫܲܩ ܠܲܢ ܒܲܣܒܲܪܬ݂ܵܐ. ܕܝܲܗ̣݇ܒ݂ܘ ܥܝܼܖܹ̈ܐ ܠܖ̈ܵܥܵܘܵܬ݂ܵܐ. ܥܲܠ ܝܲܠܕܵܐ ܣܓ݂ܝܼܕ݂ܵܐ ܘܚܲܕ݂ܬ݂ܵܐ. ܕܥܘ̤ܠܵܐ ܡܠܸܐ ܐܲܠܵܗܘܼܬ݂ܵܐ. ܘܐܸܬ݂ܝܼܠܸܕ݂ ܠܲܢ ܒܲܡܥܲܪܬ݂ܵܐ. ܒܩܘܼܪܝܲܬ݂ ܕܵܘܝܼܕ݂ ܐܵܦܲܪܬ݂ܵܐ. ܘܐܲܙܝܼܥ̣ ܒܝܲܠܕܹܗ ܠܒܸܖ̈ܝܵܬ݂ܵܐ. ܠܩܘܼܖ̈ܒܵܢܹܐ ܘܲܠܣܸܓ݂ܕ݂ܵܬ̈ܵܐ. ܘܐܲܥܝܼܪ ܠܐܲܪ̈ܒܲܥܦܸܢܝܵܬ݂ܵܐ. ܒܝܲܕ݂ ܬܸܫ̈ܒ݁ܚܵܬ݂ܵܐ ܚܲܕ̈ܬ݂ܵܬ݂ܵܐ. ܕܩܵܠ ܥܝܼܪܹ̈ܐ ܘܖ̈ܵܥܵܘܵܬ݂ܵܐ. ܗܵܢ̇ܘܿܢ ܕܐܲܟ݂ܪܸܙܘ ܚܘܼܕܵܬ݂ܵܐ. ܕܐܸܬ݁ܬ݁ܪܝܼܡ ܢܝܼܪܵܐ ܕܛܵܥ̇ܝܘܼܬ݂ܵܐ. ܘܲܕ݂ܡܵܘܬܵܐ ܡ̣ܢ ܝܵܬܸܒ݂ܬܵܐ. ܘܐܸܬ݂ܚܲܪܲܪ ܟܝܵܢ ܐ݇ܢܵܫܘܼܬ݂ܵܐ. ܡ̣ܢ ܫܘܼܥܒܵܕ݂ܵܐ ܕܲܚܛܝܼܬ݂ܵܐ. ܘܐܲܢ̣ܗܲܪ ܠܓܸܢܣܲܢ ܒܝܼܕܲܥܬ݂ܵܐ. ܘܐܲܨܡ̣ܲܚ ܒܲܢ ܗܲܝܡܵܢܘܼܬ݂ܵܐ. ܝܵܗܹ̇ܒ݂ ܢܘܼܗܪܵܐ ܡܵܪܝܵܐ܀

ܘܲܡܣܲܝܟ݂ܝܼܢ ܐܲܟ݂ܚ݇ܕ݂ܵܐ: ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ. ܝܵܗܹܒ݂ ܢܘܼܗܪܵܐ ܡܵܪܝܵܐ ܠܵܟ݂ ܫܘܼܒ݂ܚܵܐ ܡܲܣܩܝܼܢܲܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ: ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܠܵܟ݂ ܡܵܪܝ ܫܘܼܒ݂ܚܵܐ ܘܬ݂ܵܘܕ̇ܝܼܬ݂ܵܐ ܡܲܣ̈ܩܵܢ: ܟܠܗܹܝܢ ܒܸܪ̈ܝܵܬ݂ܵܐ ܕܲܒ݂ܪܲܝܬ݁: ܕܐܲܢ݇ܬ݁ܘܼ ܠܗܹܝܢ ܢܘܼܗܪܵܐ ܕܲܫܪܵܪܵܐ ܒܲܠܚܘܿܕܲܝܟ: ܘܡܲܢܗܲܪ ܥܵܠܡܹ̈ܐ ܘܒܸܪ̈ܝܵܬ݂ܵܐ ܒܛܲܝܒ݁ܘܼܬܹܗ ܘܲܒ݂ܪ̈ܲܚܡܵܘܗܝ: ܡܵܪܵܐ ܕܟ݂ܠ.

ܘܐܵܡܪܝܼܢ ܡܲܙܡܘܿܪܵܐ ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ ܥܲܡ ܩܵܢܘܿܢܹܗ:

ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ. ܘܲܒ݂ܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ. ܟܲܕ݂ ܬܲܩܢܹܗ ܒܵܪܘܿܝܵܐ ܠܗ̇ܘ ܢܘܼܗܪܵܐ ܬܗܲܪܘ ܒܹܗ ܡܲܠܲܐܟܹ̈ܐ: ܘܡܵܐ ܕܕ݂ܵܢܲܚ ܒܟ݂ܠ ܨܲܦܪ̈ܝܼܢ ܢܫܲܒ݁ܚܘܼܢܵܝܗܝ ܗܸܢܘܿܢ ܐܵܦ ܚܢܲܢ. ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ. ܘܲܒ݂ܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ܀ ܐܸܡܲܪ ܠܡܵܪܝܵܐ ܬܘܼܟ݂ܠܵܢܝ. ܒܹܝܬ݂ ܓܵܘܣܝ ܐܲܠܵܗܵܐ ܕܲܬ݂ܟ݂ܝܼܠ ܐ݇ܢܵܐ ܥܠܵܘܗܝ܀ ܕܗ̤ܘܼ ܢܦܲܨܹܝܟ݂ ܡܸܢ ܦܲܚܵܐ ܕܬ݂ܘܼܩܠ̱ܬ݂ܵܐ. ܘܡܸܢ ܡܲܡܠ̱ܠܵܐ ܕܲܣܪܝܼܩܘܼܬ݂ܵܐ܀ ܒܐܸܒ݂ܪ̈ܵܘܗܝ ܢܦܲܨܹܝܟ݂ ܘܲܬ݂ܚܘܿܬ݂ ܟܸܢܦܵܘ̈ܗܝ ܬܸܣܬܲܬܲܪ. ܙܲܝܢܵܐ ܢܸܚܕܪܵܟ݂ ܩܘܼܫܬܹ݁ܗ܀ ܠܵܐ ܬܸܕ݂ܚܲܠ ܡܸܢ ܕܸܚܠ̱ܬܹܗ ܕܠܸܠܝܵܐ. ܘܡܸܢ ܓܹܐܪܵܐ ܕܦܵܪܲܚ ܒܐܝܼܡܵܡܵܐ܀ ܘܡܸܢ ܡܸܠܬ݂ܵܐ ܕܲܡܗܲܠܟ݂ܵܐ ܒܚܸܫܘܿܟ݂ܵܐ. ܘܡܸܢ ܪܘܼܚܵܐ ܕܫܵܝܕܵܐ ܒܛܲܗܪܵܐ܀ ܢܸܦܠܘܼܢ ܡܸܢ ܣܸܛܪܵܟ݂ ܐܲܠܦܹ̈ܐ. ܘܪܸ̈ܒܘܵܬ݂ܵܐ ܡܸܢ ܝܲܡܝܼܢܵܟ݂܀ ܘܲܠܘܵܬ݂ܵܟ݂ ܠܵܐ ܢܸܬ݂ܩܲܪܒ݂ܘܼܢ. ܐܸܠܵܐ ܒܥܲܝܢܲܝ̈ܟ ܒܲܠܚܘܿܕ݂ ܬܸܚܙܸܐ܀ ܒܦܘܼܪܥܵܢܗܘܿܢ ܕܪ̈ܲܫܝܼܥܹܐ ܬܸܚܙܸܐ. ܡܸܛܠ ܕܐܲܢܬ݁ܘܼ ܡܵܪܝܵܐ ܬܘܼܟ݂ܠܵܢܝ܀ ܕܒܲܡܪܵܘܡܵܐ ܣܵܡܬ݁ ܡܲܥܡ̱ܪܵܟ݂. ܠܵܐ ܬܸܩܪܘܿܒ݂ ܠܵܟ݂ ܒܝܼܫܬܵܐ܀ ܘܲܡܚܘܿܬ݂ܵܐ ܠܵܐ ܬܸܬ݂ܩܲܪܲܒ݂ ܠܡܲܫܟ݁ܢܵܟ݂. ܡܸܛܠ ܕܲܠܡܲܠܲܐܟ݂ܵܘ̈ܗܝ ܢܦܲܩܸܕ݂ ܥܠܲܝܟ܀ ܕܲܢܢܲܛܪܘܼܢܵܟ݂ ܒܟ݂ܠܗܹܝܢ ܐܘܼܪ̈ܚܵܬ݂ܵܟ݂. ܘܥܲܠ ܕܪ̈ܵܥܲܝܗܘܿܢ ܢܸܫܩܠܘܼܢܵܟ݂܀ ܕܠܵܐ ܬܸܬ݁ܩܸܠ ܒܪܸܓ݂ܠܵܟ݂. ܥܲܠ ܓܵܪܣܵܐ ܘܥܲܠ ܚܲܪܡܵܢܵܐ ܬܸܕ݂ܪܘܿܟ݂܀ ܘܲܬ݁ܕ݂ܘܼܫ ܐܲܪܝܵܐ ܘܬܲܢܝܼܢܵܐ. ܡܸܛܠ ܕܠܝܼ ܒܥܵܐ ܐܹܦܲܨܹܝܘܗܝ ܘܐܹܥܲܫܢܝܼܘܗܝ܀ ܡܸܛܠ ܕܝܼܕܲܥ ܫܹܡܝ ܢܸܩܪܹܝܢܝ ܘܐܸܥܢܸܝܘܗܝ. ܥܲܡܹܗ ܐ݇ܢܵܐ ܒܐܘܼܠܨܵܢܵܐ܀ ܐܹܥܲܫܢܝܼܘܗܝ ܘܐܹܝܲܩܪܝܼܘܗܝ. ܢܘܼܓ݂ܪܵܐ ܕܝܵܘ̈ܡܵܬ݂ܵܐ ܐܹܣܲܒ݁ܥܝܼܘܗܝ ܘܐܹܚܵܘܹܝܘܗܝ ܦܘܼܪܩܵܢܝ. ܟܲܕ݂ ܬܲܩܢܹܗ ܒܵܪܘܿܝܵܐ ܠܗ̇ܘ ܢܘܼܗܪܵܐ ܬܗܲܪܘ ܒܹܗ ܡܲܠܲܐܟܹ̈ܐ: ܘܡܵܐ ܕܕ݂ܵܢܲܚ ܒܟ݂ܠ ܨܲܦܪ̈ܝܼܢ ܢܫܲܒ݁ܚܘܼܢܵܝܗܝ ܗܸܢܘܿܢ ܐܵܦ ܚܢܲܢ܀ ܫܲܒܲܚ. ܥܵܠܲܡ. ܟܲܕ݂ ܒܪܲܝܬܵܝܗܝ ܠܗܵܘ̇ ܢܘܼܗܪܵܐ ܐܲܫܝܼܕ݂ܵܐ: ܫܲܒ݁ܚܘܼܟ݂ ܪ̈ܘܼܚܵܢܹܐ: ܘܐܸܬ݂ܡܲܕܲܥܘ ܕܗܵܘ̇ ܕܲܒ݂ܪܵܝܗܝ ܠܗܵܘ̇ ܢܘܼܗܪܵܐ ܗ̤ܘܼܝܘܼ ܒܪ̣ܵܐ ܐܸܢܘܿܢ܀ ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ. ܘܲܒ݂ܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ. ܡܸܢ ܡܲܠܲܐܟܹ̈ܐ ܡܸܫܬܲܒܲܚ ܐܲܢ݇ܬ݁: ܘܡܸܢ ܒܢܲܝ̈ܢܵܫܵܐ ܡܸܬ݂ܩܲܠܲܣ ܐܲܢ݇ܬ݁: ܘܟ݂ܠܗܘܿܢ ܐܲܟܲܚ݇ܕ݂ ܫܲܘܝܵܐܝܼܬ݂ ܩܵܥܹܝܢ ܘܐܵܡܪܝܼܢ: ܒܪܝܼܟ݂ܘܼ ܝܲܠܕܵܟ݂: ܡܫܝܼܚܵܐ ܦܵܪܘܿܩܲܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ: ܫܠܵܡܵܐ ܥܲܡܲܢ.

ܨܠܘܿܬ݂ܵܐ. ܫܒ݂ܝܼܚ ܡܵܪܝ ܬܘܼܟ݂ܠܵܢܵܐ ܪܲܒܵܐ ܕܐܲܠܵܗܘܼܬ݂ܵܟ݂: ܘܪܵܡ ܘܲܡܥܲܠܲܝ ܒܹܝܬ݂ ܓܵܘܣܵܐ ܬܡܝܼܗܵܐ ܕܡܵܪܘܼܬ݂ܵܟ݂: ܘܠܵܐ ܒܵܗܬ݁ܝܼܢ ܟܠ ܕܲܡܣܲܒ݁ܪܝܼܢ ܒܵܟ݂: ܘܲܬ݂ܟ݂ܝܼܠܝܼܢ ܥܠܲܝܟ ܘܩܵܪܹܝܢ ܠܲܫܡܵܟ݂ ܩܲܕ̇ܝܼܫܵܐ ܘܡܸܬ݂ܟܲܫܦܝܼܢ ܠܵܟ݂ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ.

ܘܐܵܡܪܝܼܢ ܡܲܙܡܘܿܪܵܐ: ܒܲܪܸܟ݂ܝ ܢܲܦ̮ܫܝ ܠܡܵܪܝܵܐ. ܠܵܟ݂ ܝܵܐܹܐ ܫܘܼܒ݂ܚܵܐ ܐܲܠܵܗܵܐ. ܒܲܪܸܟ݂ܝ ܢܲܦ̮ܫܝ ܠܡܵܪܝܵܐ܀ ܡܵܪܝܵܐ ܐܲܠܵܗܵܐ ܝܼܪܸܒ݂ܬ݁ ܛܵܒ݂܀ ܙܝܼܘܵܐ ܘܗܸܕ݂ܪܵܐ ܠܒܸܫܬ݁܀ ܘܐܸܬ݂ܟܲܣܝܼܬ݁ ܢܘܼܗܪܵܐ ܐܲܝܟ݂ ܡܲܪܛܘܼܛܵܐ܀ ܡܬܲܚܬ݁ ܫܡܲܝܵܐ ܐܲܝܟ݂ ܝܵܪܝܼܥܬܵܐ܀ ܥܒܲܕ݂ ܒܡܲܝ̈ܵܐ ܡܸܕ݂ܝܵܪ̈ܵܘܗܝ܀ ܘܣܵܡ ܥܲܠ ܥܢܵܢܹ̈ܐ ܡܲܪܟܲܒ݂ܬܹܗ܀ ܘܲܡܗܲܠܸܟ݂ ܥܲܠ ܟܸܢܦܹ̈ܐ ܕܪܘܼܚܵܐ܀ ܥܒܲܕ݂ ܡܲܠܲܐܟ݂ܵܘ̈ܗܝ ܪܘܼܚ܀ ܘܲܡܫܲܡܫܵܢܵܘ̈ܗܝ ܢܘܼܪ ܝܵܩܕܵܐ܀ ܐܲܬ݂ܩܸܢ ܐܲܪܥܵܐ ܥܲܠ ܡܲܬ݂ܩܢܹܝ̈ܗ̇܀ ܕܠܵܐ ܬܙܘܼܥ ܠܥܵܠܲܡ ܥܵܠܡܝܼܢ܀ ܬܗܘܿܡܵܐ ܐܲܝܟ݂ ܡܲܪܛܘܼܛܵܐ ܟܲܣܝܼܬܵܝܗܝ܀ ܘܥܲܠ ܛܘܼܪܹ̈ܐ ܩܵܡܘ ܡܲܝ̈ܵܐ܀ ܡܸܢ ܟܐܵܬ݂ܵܟ݂ ܥܲܪܩܝܼܢ܀ ܘܡܸܢ ܩܵܠܵܐ ܕܪ̈ܲܥܡܲܝܟ ܡܸܬ݂ܪܲܗܒ݁ܝܼܢ܀ ܣܠܸܩܘ ܛܘܼܪܹ̈ܐ ܘܲܢܚܸܬ݂ ܦܲܩ̈ܥܵܬ݂ܵܐ܀ ܒܐܲܬ݂ܪܵܐ ܕܬܲܩܸܢܬ݁ ܠܗܘܿܢ܀ ܬܚܘܼܡܵܐ ܣܵܡܬ݁ ܠܗܘܿܢ܀ ܕܠܵܐ ܢܸܥ̱ܒ݁ܪܘܿܢ ܘܲܢܟܲܣܘܿܢܵܗ̇ ܠܐܲܪܥܵܐ܀ ܫܲܕܲܪܬ݁ ܡܲܒܘܼܥܹ̈ܐ ܒܢܲܚ̈ܠܹܐ܀ ܘܒܲܝܢܵܬ݂ ܛܘܼܪܹ̈ܐ ܡܗܲܠܟ݂ܝܼܢ܀ ܘܡܲܫܩܹܝܢ ܟܠܵܗ̇ ܚܲܝܘܬ݂ܵܐ ܕܕܲܒ݂ܪܵܐ܀ ܘܣܵܒ݂ܥܝܼܢ ܥܪ̈ܵܕܹܐ ܕܲܨܗܹܝܢ܀ ܦܵܪܲܚܬ݂ܵܐ ܕܲܫܡܲܝܵܐ ܥܠܲܝܗܘܿܢ ܫܵܟ݂ܢܵܐ܀ ܘܡܸܢ ܒܲܝܢܵܬ݂ ܛܘܼܪܹ̈ܐ ܝܵܗ݇ܒ݁ܝܼܢ ܩܵܠܵܐ܀ ܡܲܫܩܸܐ ܛܘܼܪܹ̈ܐ ܡܸܢ ܡܸܕ݂ܝܵܪ̈ܵܘܗܝ܀ ܘܡܸܢ ܦܹܐܪ̈ܲܝ ܥܒ݂ܵܕܲܝ̈ܟ ܬܸܣܒܲܥ ܐܲܪܥܵܐ܀ ܡܵܘܥܸܐ ܥܡܝܼܪܵܐ ܠܲܒ݂ܥܝܼܪܵܐ܀ ܘܥܸܣܒܵܐ ܠܦܘܼܠܚܵܢܹܗ ܕܒܲܪܢܵܫܵܐ܀ ܠܡܲܦܵܩܘܼ ܠܲܚܡܵܐ ܡܸܢ ܐܲܪܥܵܐ܀ ܚܲܡܪܵܐ ܡܚܲܕܸ݁ܐ ܠܸܒܹ݁ܗ ܕܒܲܪܢܵܫܵܐ܀ ܘܡܲܦܨܲܚ ܐܲܦܵܘ̈ܗܝ ܒܡܸܫܚܵܐ܀ ܠܲܚܡܵܐ ܣܵܡܹܟ݂ ܠܸܒܹ݁ܗ ܕܒܲܪܢܵܫܵܐ܀ ܢܸܣܒ݁ܥܘܼܢ ܐܝܼܠܵܢܵܘ̈ܗܝ ܕܡܵܪܝܵܐ. ܠܵܟ݂ ܝܵܐܹܐ ܫܘܼܒ݂ܚܵܐ ܐܲܠܵܗܵܐ܀

ܘܡܲܩܦܝܼܢ ܡܲܙܡܘܿܪܵܐ ܗܵܢܵܐ ܕܐܵܬܹܐ ܠܚܘܿܕ݂ ܡܸܬ݂ܐ̱ܡܲܪ ܒܙܵܘܓܹ̈ܐ ܘܒܲܠܒ݂ܵܟ݂ܬܵܐ.

ܫܲܒܲܚܘ ܥܲܒ݂ܕܵܘ̈ܗܝ ܕܡܵܪܝܵܐ. ܬܢܝܼ. ܫܲܒܲܚܘ ܠܲܫܡܹܗ ܕܡܵܪܝܵܐ܀ ܠܵܟ݂ ܝܵܐܹܐ ܫܘܼܒ݂ܚܵܐ ܐܲܠܵܗܵܐ: ܕܐܲܢ݇ܬ݁ܘܼ ܒܵܪܘܿܝܹܗ ܕܢܘܼܗܪܵܐ. ܢܸܗܘܸܐ ܫܡܹܗ ܕܡܵܪܝܵܐ ܡܒܲܪܲܟ݂. ܡܸܢ ܥܵܠܲܡ ܘܲܥܕܲܡܵܐ ܠܥܵܠܲܡ܀ ܡܸܢ ܡܲܕ݂ܢܵܚܵܘ̈ܗܝ ܕܫܸܡܫܵܐ ܘܲܥܕܲܡܵܐ ܠܡܲܥܪ̈ܵܒ݂ܵܘܗܝ. ܪܲܒ݁ܘܼ ܫܡܹܗ ܕܡܵܪܝܵܐ܀ ܘܪܵܡ ܥܲܠ ܟܠܗܘܿܢ ܥܲܡܡܹ̈ܐ ܡܵܪܝܵܐ. ܘܥܲܠ ܫܡܲܝܵܐ ܐܝܼܩܵܪܹܗ܀ ܡܲܢܘܼ ܐܲܝܟ݂ ܡܵܪܝܵܐ ܐܲܠܵܗܲܢ. ܕܝܵܬܹܒ݂ ܒܪܵܘܡܵܐ ܘܚܵܙܹܐ ܒܥܘܼܡܩܵܐ܀ ܕܝܵܬܹܒ݂ ܒܪܵܘܡܵܐ ܘܚܵܙܹܐ ܒܥܘܼܡܩܵܐ. ܒܲܫܡܲܝܵܐ ܘܒܲܐܪܥܵܐ܀ ܡܪܝܼܡ ܡܸܢ ܩܸܩܠ̱ܬ݂ܵܐ ܠܒ݂ܵܝܫܵܐ. ܕܢܵܘܬ݁ܒ݂ܝܼܘܗܝ ܥܲܡ ܪܵܘܪ̈ܒ݂ܵܢܹܐ ܕܥܲܡܵܐ܀ ܡܵܘܬܸ݁ܒ݂ ܥܩܲܪܬ݂ܵܐ ܒܒܲܝܬܵܐ. ܘܐܸܡܵܐ ܕܲܒ݂ܢܲܝ̈ܵܐ ܟܲܕ݂ ܚܵܕ݂ܝܵܐ܀ ܫܲܒܲܚ. ܥܵܠܲܡ܀ ܫܲܒܲܚܘ ܥܲܒ݂ܕܵܘ̈ܗܝ ܕܡܵܪܝܵܐ. ܬܢܝܼ. ܫܲܒܲܚܘ ܠܲܫܡܹܗ ܕܡܵܪܝܵܐ. ܠܵܟ݂ ܝܵܐܹܐ ܫܘܼܒ݂ܚܵܐ ܐܲܠܵܗܵܐ: ܕܐܲܢ݇ܬ݁ܘܼ ܒܵܪܘܿܝܹܗ ܕܢܘܼܗܪܵܐ܀

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ: ܫܠܵܡܵܐ ܥܲܡܲܢ.

ܨܠܘܿܬ݂ܵܐ ܐܲܢܬܘܼ ܡܵܪܝ ܒܵܪܘܿܝܹܗ ܕܢܘܼܗܪܵܐ ܒܲܠܚܘܿܕܲܝܟ: ܘܲܡܛܲܟ̇ܣܵܢܹܗ ܕܚܸܫܘܿܟ݂ܵܐ ܒܚܸܟ݂ܡ̱ܬ݂ܵܟ݂ ܘܲܒ݂ܕ݂ܝܼܢܲܝ̈ܟ: ܘܡܲܢܗ̱ܪܵܢܵܐ ܕܲܒ݂ܪܝܼܬ݂ܵܐ ܒܢܘܼܗܪܵܟ݂ ܫܒ݂ܝܼܚܵܐ ܒܡܸܨܥܵܝܘܼܬ݂ ܫܸܡܫܵܐ ܘܣܲܗܪܵܐ ܠܲܡܦܹܝܕܲܝ̈ܟ: ܘܡ̣ܢ ܢܘܼܗܪܵܟ݂ ܢܲܗܝܼܪܵܐ ܨܲܡܘܼܚܬ݂ܵܢ ܙܲܠܝܼܩܹ̈ܐ ܢܵܗܪܝܼܢ: ܟܠܗܘܿܢ ܢܲܗܝܼܪܹ̈ܐ ܠܲܝܠܵܝܹ̈ܐ ܘܐܝܼܡܵܡܵܝܹ̈ܐ ܥܒ݂ܵܕ݂ ܐܝܼܕܲܝ̈ܟ: ܘܠܵܟ݂ ܡܸܬ݁ܬ݁ܚܝܼܒ݂ܵܐ ܣܸܓ݂ܕ̇ܬ݂ܵܐ ܘܠܵܟ݂ ܙܵܕ݂ܩܵܐ ܬܵܘܕ̇ܝܼܬ݂ܵܐ ܕܠܲܝܬ݁ ܐܲܠܵܗ ܐ݇ܚܪܹܝܢ ܒܸܠܥܵܕܲܝܟ: ܡܵܪܵܐ ܕܟ݂ܠ.

ܘܐܵܡܪܝܼܢ ܡܲܙܡܘܿܪܵܐ: ܡܵܪܝܵܐ ܐܲܡܠܸܟ݂ ܘܓܲܐܝܘܼܬ݂ܵܐ ܠܒܸܫ. ܣܵܓ݂ܕܝܼܢܲܢ ܠܵܟ݂ ܐܝܼܬ݂ܝܵܐ ܕܡܸܢ ܡܬ݂ܘܿܡ܀ ܠܒܸܫ ܡܵܪܝܵܐ ܥܘܼܫܢܵܐ ܘܐܸܬ݂ܥܲܫܲܢ܀ ܘܐܲܬ݂ܩܢܵܗ̇ ܠܬܹܒܹܝܠ ܕܠܵܐ ܬܙܘܼܥ܀ ܡܲܬ݂ܩܲܢܘܼ ܟܘܼܪܣܝܵܟ݂ ܡܸܢ ܩܕ݂ܝܼܡ܀ ܘܡܸܢ ܥܵܠܲܡ ܐܲܢ݇ܬ݁ܘܼ܀ ܐܸܬ݁ܬ݁ܪܝܼܡܘ ܢܲܗܪ̈ܵܘܵܬ݂ܵܐ ܡܵܪܝܵܐ܀ ܘܐܲܪܝܼܡܘ ܢܲܗܪ̈ܵܘܵܬ݂ܵܐ ܩܵܠܗܘܿܢ܀ ܐܸܬ݁ܬ݁ܪܝܼܡܘ ܢܲܗܪ̈ܵܘܵܬ݂ܵܐ ܒܕܲܟ݂ܝܘܼܬ݂ܵܐ܀ ܡܸܢ ܩܵܠܵܐ ܕܡܲܝ̈ܵܐ ܣܲܓ݁ܝܼ̈ܐܹܐ܀ ܥܲܫܝܼܢܝܼܢ ܡܲܚܫܘܼ̈ܠܵܘܗܝ ܕܝܲܡܵܐ܀ ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ܀ ܘܣܵܗ̈ܕ݁ܘܵܬ݂ܵܟ݂ ܛܵܒ݂ ܡܗܲܝ̈ܡܢܵܢ܀ ܘܲܠܒܲܝܬܵܟ݂ ܝܵܐܝܵܐ ܩܲܕ݁ܝܼܫܘܼܬ݂ܵܐ܀ ܡܵܪܝܵܐ ܠܢܘܼܓ݂ܪܵܐ ܕܝܵܘ̈ܡܵܬ݂ܵܐ܀ ܣܵܓ݂ܕܝܼܢܲܢ ܠܵܟ݂ ܐܝܼܬ݂ܝܵܐ ܕܡܸܢ ܡܬ݂ܘܿܡ.

ܐܲܩܸܦ: ܫܲܒܲܚܘ ܠܡܵܪܝܵܐ ܡܸܢ ܫܡܲܝܵܐ܀ ܫܲܒ݁ܚܘܼܗܝ ܒܲܡܪ̈ܵܘܡܹܐ܀ ܫܲܒ݁ܚܘܼܗܝ ܟܠܗܘܿܢ ܡܲܠܲܐܟ݂ܵܘ̈ܗܝ܀ ܫܲܒ݁ܚܘܼܗܝ ܟܠܗܘܿܢ ܚܲܝܠܵܘܵܬܹ̈ܗ܀ ܫܲܒ݁ܚܘܼܗܝ ܫܸܡܫܵܐ ܘܣܲܗܪܵܐ܀ ܫܲܒ݁ܚܘܼܗܝ ܟܠ ܟܵܘܟ݁ܒܹ̈ܐ ܘܢܘܼܗܪܵܐ܀ ܫܲܒ݁ܚܘܼܗܝ ܫܡܲܝ̈ ܫܡܲܝܵܐ܀ ܡܲܝ̈ܵܐ ܕܲܠܥܸܠ ܡܸܢ ܫܡܲܝܵܐ ܢܫܲܒ݁ܚܘܼܢ ܠܲܫܡܹܗ ܕܡܵܪܝܵܐ܀ ܡܸܛܠ ܕܗ̤ܘܼ ܐܸܡܲܪ ܘܲܗܘ̤ܵܘ ܘܗ̤ܘܼ ܦܩܲܕ݂ ܘܐܸܬ݂ܒ݁ܪܝܼܘ܀ ܘܐܲܩܝܼܡ ܐܸܢܘܿܢ ܠܥܵܠܲܡ ܥܵܠܡܝܼܢ܀ ܢܵܡܘܿܣܵܐ ܝܲܗ݇ܒ݂ ܘܠܵܐ ܥܵܒܲܪ܀ ܫܲܒܲܚܘ ܠܡܵܪܝܵܐ ܡܸܢ ܐܲܪܥܵܐ܀ ܬܲܢܝܼܢܹ̈ܐ ܘܟ݂ܠܗܘܿܢ ܬܗܘܿܡܹ̈ܐ܀ ܢܘܼܪܵܐ ܘܒܲܪܕ݂ܵܐ ܘܬܲܠܓܵܐ ܘܲܓ݂ܠܝܼܕ݂ܵܐ܀ ܪ̈ܘܼܚܹܐ ܘܥܲܠܥܵܠܹ̈ܐ ܥܒ݂ܵܕ݂ܵܐ ܕܡܸܠܬܹܗ܀ ܛܘܼܪܹ̈ܐ ܘܟ݂ܠܗܹܝܢ ܪ̈ܵܡܵܬ݂ܵܐ܀ ܐܝܼܠܵܢܹ̈ܐ ܕܦܹܐܪܹ̈ܐ ܘܟ݂ܠܗܘܿܢ ܐܲܪ̈ܙܹܐ܀ ܚܲܝܘܬ݂ܵܐ ܘܟ݂ܠܵܗ̇ ܒܥܝܼܪܵܐ܀ ܪ̈ܲܚܫܵܐ ܘܛܲܝܪܵܐ ܘܦܵܪܲܚܬ݂ܵܐ܀ ܡܲܠܟܹ̈ܐ ܕܐܲܪܥܵܐ ܘܟ݂ܠܗܹܝܢ ܐܸܡ̈ܘܵܬ݂ܵܐ܀ ܪܵܘܪ̈ܒ݂ܵܢܹܐ ܘܟ݂ܠܗܘܿܢ ܕܲܝܵܢܹ̈ܐ ܕܐܲܪܥܵܐ܀ ܓܲܕ݁ܘܼܕܹ̈ܐ ܘܲܒ݂ܬ݂̈ܘܼܠܵܬ݂ܵܐ܀ ܣܵܒܹ̈ܐ ܘܲܥܠܲܝܡܹ̈ܐ ܢܫܲܒ݁ܚܘܼܢ ܠܲܫܡܹܗ ܕܡܵܪܝܵܐ܀ ܡܸܛܠ ܕܪܲܒ݁ ܗ̣݇ܘܼ ܫܡܹܗ ܒܲܠܚܘܿܕ݂ܵܘܗܝ܀ ܘܫܘܼܒ݂ܚܹܗ ܒܐܲܪܥܵܐ ܘܒܲܫܡܲܝܵܐ܀ ܡܪܝܼܡ ܩܲܪܢܵܐ ܕܥܲܡܹܗ ܘܬܸܫܒ݁ܘܿܚܬܵܐ ܕܟ݂ܠܗܘܿܢ ܙܲܕ݁ܝܼܩܵܘ̈ܗܝ܀ ܠܲܒ݂ܢܲܝ̈ ܝܼܣܪܵܝܹܠ ܥܲܡܵܐ ܕܩܲܪܝܼܒ݂ ܠܹܗ܀

ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ܀ ܫܲܒ݁ܚܘܼܗܝ ܒܲܪܩܝܼܥܵܐ ܕܥܘܼܫܢܹܗ܀ ܫܲܒ݁ܚܘܼܗܝ ܒܚܲܝܠ̱ܬ݂ܵܢܘܼܬܹܗ܀ ܫܲܒ݁ܚܘܼܗܝ ܒܣܘܿܓ݂ܐܵܐ ܕܪܲܒ݁ܘܼܬܹܗ܀ ܫܲܒ݁ܚܘܼܗܝ ܒܩܵܠܵܐ ܕܩܲܪܢܵܐ܀ ܫܲܒ݁ܚܘܼܗܝ ܒܩܝܼܬ݂ܵܪܹ̈ܐ ܘܲܒ݂ܟܸܢܵܪܹ̈ܐ܀ ܫܲܒ݁ܚܘܼܗܝ ܒܲܦܠܲܓܹ̈ܐ ܘܒܲܪ̈ܒ݂ܝܼܥܹܐ܀ ܫܲܒ݁ܚܘܼܗܝ ܒܡܸܢܹ̈ܐ ܚܲܠ̈ܝܵܬ݂ܵܐ܀ ܫܲܒ݁ܚܘܼܗܝ ܒܨܸܨܠܲܝ̈ ܫܸܡܥܵܐ ܫܲܒ݁ܚܘܼܗܝ ܒܩܵܠܵܐ ܘܒܲܩ̈ܥܵܬ݂ܵܐ܀ ܒܟ݂ܠ ܢܸܫܡܵܐ ܢܫܲܒܲܚ ܠܡܵܪܝܵܐ܀

ܫܲܒܲܚܘ ܠܡܵܪܝܵܐ ܟܠܟ݂ܘܿܢ ܥܲܡܡܹ̈ܐ܀ ܫܲܒ݁ܚܵܝܗܝ ܟܠܗܹܝܢ ܐܸܡ̈ܘܵܬ݂ܵܐ܀ ܡܸܛܠ ܕܥܸܫܢܲܬ̤ ܥܠܲܝܢ ܛܲܝܒ݁ܘܼܬܹܗ܀ ܫܲܪܝܼܪܵܐܝܼܬ݂ ܡܵܪܝܵܐ ܗ̣݇ܘܼ ܠܥܵܠܲܡ܀ ܫܲܒܲܚ܀ ܥܵܠܲܡ܀

ܘܡܲܩܦܝܼܢ: ܫܲܒܲܚܘ ܠܡܵܪܝܵܐ ܟܠܵܗ݁ ܐܲܪܥܵܐ. ܝܵܗܹܒ݂ ܢܘܼܗܪܵܐ ܡܵܪܝܵܐ: ܠܵܟ݂ ܫܘܼܒ݂ܚܵܐ ܡܲܣܩܝܼܢܲܢ܀

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ: ܫܠܵܡܵܐ ܥܲܡܲܢ.

ܨܠܘܿܬ݂ܵܐ. ܠܵܟ݂ ܡܫܝܼܚܵܐ ܢܘܼܗܪܵܐ ܫܲܪܝܼܪܵܐ: ܨܸܡܚܵܐ ܫܒ݂ܝܼܚܵܐ ܕܡ̣ܢ ܐܲܒ݂ܵܐ: ܕܐܸܬ݂ܓ̇ܠܝܼ ܘܲܕ݂ܢܲܚ ܒܓ݂ܵܘ ܬܹܒܹܝܠ: ܠܚܘܼܕܵܬܹܗ ܘܲܠܦܘܼܪܩܵܢܹܗ ܕܲܟ݂ܝܵܢܲܢ ܒܪܹܫܝܼܬ݂ܵܐ ܕܡܸܢܲܢ: ܡܲܣܩܝܼܢܲܢ ܬܸܫܒ݁ܘܿܚܬܵܐ ܘܐܝܼܩܵܪܵܐ ܘܬ݂ܵܘܕ̇ܝܼܬ݂ܵܐ ܘܣܸܓ݂ܕ݂ܬ݂ܵܐ ܒܟ݂ܠܥܸܕܵܢ: ܡܵܪܵܐ ܕܟ݂ܠ ܠܥܵܠܡܝܼܢ.

ܥܘܿܢܝܼܬ݂ܵܐ ܕܨܲܦܪܵܐ. ܒܐܲܒ݂ܘܼܢ ܕܒܲܫܡܲܝܵܐ. ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ. ܦܠܘܿܚܘ ܠܡܵܪܝܵܐ ܒܚܲܕ݂ܘܼܬ݂ܵܐ. ܫܠܵܡܵܐ ܢܸܣܓܸ̇ܐ ܠܵܟ݂ ܥܲܡܹܗ ܕܐܲܠܵܗܵܐ. ܕܲܡܫܝܼܚܵܐ ܐܸܬ݂ܝܼܠܸܕ݂ ܢܘܼܗܪܹܗ ܕܥܵܠܡܵܐ: ܬܢܝܼ. ܥܘܿܠܘ ܩܕ݂ܵܡܵܘܗܝ ܒܬܸܫܒ݁ܘܿܚܬܵܐ. ܒܪܝܼܟ݂ܘ ܡܫܝܼܚܵܐ ܕܲܒ݂ܝܘܿܡ ܡܵܘܠܵܕܹܗ. ܚܲܕܝܼ ܠܐܲܪܥܵܐ ܘܐܲܦܨܲܚ̣ ܠܲܫܡܲܝܵܐ. ܕܲܥܘ ܕܗܘ̤ܝܘܼ ܡܵܪܝܵܐ ܐܲܠܵܗܲܢ. ܫܠܵܡܵܐ ܒܐܲܪܥܵܐ ܘܫܘܼܒ݂ܚܵܐ ܒܲܫܡܲܝܵܐ. ܘܣܲܒ݂ܪܵܐ ܛܵܒ݂ܵܐ ܠܟ݂ܠܗܹܝܢ ܒܸܖ̈ܝܵܬ݂ܵܐ. ܗܘ̤ܝܘܼ ܥܲܒ݂ܕܲܢ ܘܠܵܐ ܗ݇ܘ̣ܵܐ ܚܢܲܢ. ܚܵܕܹܝܢ ܝܵܘܡܵܢܵܐ ܟܸܢܫܹ̈ܐ ܕܡܲܠܲܐܟܹ̈ܐ. ܘܥܲܡܲܢ ܫܲܘܝܵܐܝܼܬ݂ ܡܲܣܩܝܼܢ ܬܸܫܒ݁ܘܿܚܬܵܐ. ܥܲܡܹܗ ܚܢܲܢ ܘܥܵܢ̈ܵܐ ܕܡܲܪܥܝܼܬܹܗ. ܫܸܡܫܵܐ ܚܲܕ݂ܬ݂ܵܐ ܕܢܲܚ̣ ܠܲܢ ܒܲܡܥܲܪܬ݂ܵܐ. ܘܩܲܒܸܠ ܩܘܼܖ̈ܒܵܢܹܐ ܕܫܲܕܪܲܬ̤ ܡܲܕ݂ܢ̱ܚܵܐ. ܥܘܿܠܘ ܒܬܲܖ̈ܥܵܘܗܝ ܒܬ݂ܵܘܕܝܼܬ݂ܵܐ ܘܲܠܕ݂ܵܖ̈ܵܘܗܝ ܒܫܘܼܒ݂ܚܵܐ. ܝܲܠܕܵܐ ܕܕ݂ܘܼܡܵܪܵܐ ܟܲܢ̣ܝܹܗ ܒܲܪ ܐܵܡܘܿܨ. ܘܲܩ̣ܪܵܝܗܝ ܓܲܢ݇ܒܵܪܵܐ ܘܫܲܡ̣ܗܹܗ ܫܲܠܝܼܛܵܐ. ܐܵܘܕܵܘ ܠܹܗ ܘܒܲܪܸܟ݂ܘ ܠܲܫܡܹܗ. ܒܝܵܘܡܵܐ ܕܡܵܘܠܵܕ݂ܵܟ݂ ܝܼܫܘܿܥ ܦܵܪܘܿܩܲܢ. ܖ̈ܵܘܙܵܢ ܒܸܖ̈ܝܵܬ݂ܵܐ ܕܲܠܥܸܠ ܥܲܡ ܕܲܠܬܲܚܬ݁. ܡܸܛܠ ܕܛܵܒ݂ܘܼ ܡܵܪܝܵܐ ܘܲܠܥܵܠܲܡ ܛܲܝܒ݁ܘܼܬܹܗ. ܢܒ݂ܝܼܹ̈ܐ ܟܠܗܘܿܢ ܗܵܐ ܙܵܡܪܝܼܢ ܫܘܼܒ݂ܚܵܐ. ܕܗܵܐ ܡܲܢܲܥ̣ ܠܹܗ ܚܘܼܬܵܡܗܘܿܢ ܕܐ݇ܖ̈ܵܙܹܐ. ܘܲܠܕܵܪܕܵܖ̈ܝܼܢ ܗܲܝܡܵܢܘܼܬܹܗ. ܥܹܐܕ݂ܵܐ ܗ݇ܘ̣ ܪܲܒܵܐ ܕܥܹܕܬܵܐ ܡܗܲܝܡܲܢܬܵܐ. ܢܝܲܩܪܝܼܘܗܝ ܟܠܲܢ ܒܲܚܕ݂ܵܐ ܐܵܘܝܘܼܬ݂ܵܐ. ܫܲܒܲܚ. ܒܩܲܕ݂ܡܵܝܬܵܐ. ܥܵܠܲܡ. ܐܲܫܦܲܥ ܛܲܝܒ݁ܘܼܬ݂ܵܟ݂ ܡܫܝܼܚܵܐ ܦܵܪܘܿܩܲܢ. ܘܒܲܪܸܟ݂ ܠܟܸܢܫܵܐ ܕܙܲܝܲܚ̣ ܥܲܕ݂ܥܹܕ݂ܵܟ݂.

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ: ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܠܢܘܼܗܪܵܐ ܡܵܪܝ ܫܒ݂ܝܼܚܵܐ ܕܓܸܠܝܵܢܵܟ݂: ܘܲܠܕ݂ܢܚܵܐ ܦܨܝܼܚܵܐ ܕܡܹܐܬ݂ܝܼܬ݂ܵܟ݂: ܗ̇ܘ ܕܠܹܗ ܚܵܝܪ̈ܵܢ ܘܲܡܣܲܒ݁ܪ̈ܵܢ ܘܲܡܣܲـܟ̇ܝܵܢ ܟܠܗܹܝܢ ܒܸܪ̈ܝܵܬ݂ܵܐ ܕܲܒ݂ܪܲܝܬ݁: ܐܲܫܘܵܐ ܠܟ݂ܠܲܢ ܒܛܲܝܒ݁ܘܼܬ݂ܵܟ݂ ܘܲܒ݂ܪ̈ܲܚܡܲܝܟ ܕܒܹܗ ܢܸܚܕܸ̇ܐ ܘܢܸܬ݂ܒܲܣܲܡ ܥܲܡ ܫܲܪܝܼܪܹ̈ܐ ܒܢܲܝ̈ ܐ݇ܪ̈ܵܙܲܝܟ ܒܐܘܿܪܸܫܠܸܡ ܕܲܠܥܸܠ: ܡܵܪܵܐ ܕܟ݂ܠ ܠܥܵܠܡܝܼܢ.

ܘܐܵܡܪܝܼܢ ܬܸܫܒ݁ܘܿܚܬܵܐ ܗܵܕܹܐ: ܕܲܥܒ݂ܝܼܕ݂ܵܐ ܠܩܲܕ݁ܝܼܫܵܐ ܡܵܪܝ ܐܲܦܪܹܝܡ ܡܲܠܦܵܢܵܐ ܐ݇ܣܘܼܪܝܵܝܵܐ: ܥܲܠ ܐܵܬ݂ܘ̈ܵܬ݂ܵܐ ܕܲܫܡܹܗ ܕܝܼܫܘܿܥ ܡܫܝܼܚܵܐ.

ܢܢ. ܢܘܼܗܪܵܐ ܕܢܲܚ ܠܙܲܕ݁ܝܼܩܹ̈ܐ: ܘܠܲܬ݂ܪ̈ܝܼܨܲܝ ܠܸܒܵܐ ܚܲܕ݂ܘܼܬ݂ܵܐ܀ ܝ. ܝܼܫܘܿܥ ܡܵܪܲܢ ܡܫܝܼܚܵܐ: ܕܢܲܚ ܠܲܢ ܡܸܢ ܥܘܼܒܵܐ ܕܐܲܒ݂ܘܼܗܝ. ܐܸܬ݂ܵܐ ܘܐܲܦܩܲܢ ܡܸܢ ܚܸܫܘܿܟ݂ܵܐ: ܘܐܲܢܗܲܪ ܠܲܢ ܒܢܘܼܗܪܹܗ ܓܲܐܝܵܐ܀ ܐ. ܐܝܼܡܵܡܵܐ ܕܢܲܚ ܥܲܠ ܒܢܲܝ̈ܢܵܫܵܐ: ܘܲܥܪܲܩ ܫܘܼܠܛܵܢܹܗ ܕܚܸܫܘܿܟ݂ܵܐ. ܢܘܼܗܪܵܐ ܕܢܲܚ ܠܲܢ ܡܸܢ ܢܘܼܗܪܹܗ: ܘܐܲܢܗܲܪ ܥܲܝܢܲܝ̈ܢ ܚܸܫ̈ܘܿܟ݂ܵܬ݂ܵܐ܀ ܫ. ܫܘܼܒ݂ܚܹܗ ܐܲܕ݂ܢܲܚ ܒܓ݂ܵܘ ܬܹܒܹܝܠ: ܘܐܲܢܗܲܪ ܠܲܬ݂ܗܘܿܡܹ̈ܐ ܬܲܚܬܵܝܹ̈ܐ. ܕܥܸܟ݂ ܡܵܘܬܵܐ ܘܲܥܪܲܩ ܚܸܫܘܿܟ݂ܵܐ: ܘܐܸܬ݁ܬܲܒܲܪܘ ܬܲܪ̈ܥܹܐ ܕܲܫܝܘܿܠ܀ ܘ. ܘܐܲܢܗܲܪ ܠܟ݂ܠܗܹܝܢ ܒܸܪ̈ܝܵܬ݂ܵܐ: ܕܡܸܢ ܩܕ݂ܝܼܡ ܚܸܫ̈ܘܿܟ݂ܵܢ ܗ̣݇ܘܲܝ̈. ܩܵܡܘ ܡܝܼܬܹ̈ܐ ܫܵܟ݂ܒܲܝ̈ ܥܲܦܪܵܐ: ܘܫܲܒܲܚܘ ܕܲܗܘ̤ܵܐ ܠܗܘܿܢ ܦܘܼܪܩܵܢܵܐ܀ ܥ. ܥܒܲܕ݂ ܦܘܼܪܩܵܢܵܐ ܘܝܲܗ݇ܒ݂ ܠܲܢ ܚܲܝܹ̈ܐ: ܘܐܸܬ݂ܥܲܠܝܼ ܠܘܵܬ݂ ܐܲܒ݂ܘܼܗܝ ܠܪܵܘܡܵܐ. ܘܬ݂ܘܼܒ݂ ܐܵܬܹܐ ܒܫܘܼܒ݂ܚܹܗ ܪܲܒܵܐ: ܘܡܲܢܗܲܪ ܥܲܝܢܹ̈ܐ ܕܟ݂ܠ ܕܣܲܟ݁ܝܼܘ ܠܹܗ܀ ܡ: ܡܲܠܟܲܢ ܐܵܬܹܐ ܒܫܘܼܒ݂ܚܹܗ ܪܲܒܵܐ: ܢܲܢܗܲܪ ܫܪ̈ܵܓܲܝܢ ܘܢܸܦܘܿܩ ܠܐܘܼܪܥܹܗ. ܘܢܸܚܕܸ݁ܐ ܒܹܗ ܐܲܝܟ݂ ܕܲܚܕ݂ܝܼ ܒܲܢ: ܘܲܡܚܲܕܸ݁ܐ ܠܲܢ ܒܢܘܼܗܪܹܗ ܓܲܐܝܵܐ܀ ܫ. ܫܘܼܒ݂ܚܵܐ ܢܲܣܸܩ ܠܪܲܒ݁ܘܼܬܹܗ: ܘܟ݂ܠܲܢ ܢܵܘܕܸ݁ܐ ܠܐܲܒ݂ܘܼܗܝ ܪܵܡܵܐ. ܕܲܣܓ݂ܝܼܘ ܪ̈ܲܚܡܵܘܗܝ ܘܫܲܠܚܹܗ ܨܹܐܕܲܝܢ: ܘܲܥܒܲܕ݂ ܠܲܢ ܣܲܒ݂ܪܵܐ ܘܦܘܼܪܩܵܢܵܐ܀ ܝ. ܝܵܘܡܹܗ ܕܵܢܲܚ ܡܸܢ ܫܸܠܝܵܐ: ܘܢܵܦܩܝܼܢ ܠܐܘܼܪܥܹܗ ܩܲܕ݁ܝܼ̈ܫܵܘܗܝ. ܘܡܲܢܗ̱ܪܝܼܢ ܠܲܡܦܹܝܕܲܝ̈ܗܘܿܢ: ܟܠ ܕܲܥܡܲܠܘ ܘܲܠܐܝܼܘ ܘܐܸܬ݁ܛܲܝܲܒ݂ܘ܀ ܚ. ܚܵܕܹܝܢ ܡܲܠܲܐܟܹ̈ܐ ܘܥܝܼܪ̈ܲܝ ܫܡܲܝܵܐ: ܒܫܘܼܒ݂ܚܵܐ ܕܟܹܐܢܹ̈ܐ ܘܲܕ݂ܙܲܕ݁ܝܼܩܹ̈ܐ. ܘܣܵܝܡܝܼܢ ܟܠܝܼ̈ܠܹܐ ܒܪܹ̈ܫܲܝܗܘܿܢ: ܘܐܲܟܲܚ݇ܕ݂ ܡܝܲܒ݁ܒ݂ܝܼܢ ܘܲܡܗܲܠܠܝܼܢ܀ ܐ. ܐܲܚܲܝ̈ ܩܘܼܡܘ ܘܐܸܬ݁ܛܲܝܲܒ݂ܘ: ܕܢܵܘܕܸ݁ܐ ܠܡܲܠܟܲܢ ܘܲܠܦܵܪܘܿܩܲܢ. ܕܐܵܬܹܐ ܒܫܘܼܒ݂ܚܹܗ ܘܲܡܚܲܕܸ݁ܐ ܠܲܢ: ܒܢܘܼܗܪܹܗ ܓܲܐܝܵܐ ܒܹܝܬ݂ ܡܲܠܟ݁ܘܼܬ݂ܵܐ܀

ܘܐܵܡܪܝܼܢ ܣܘܿܓ݂ܝܼܬ݂ܵܐ ܕܝܵܘܡܵܐ: ܕܘܲܪܕܵܐ. ܒܩܵܠ: ܐܝܼܬ݂ ܠܲܢ ܣܲܒ݂ܪܵܐ.

ܒܵܟ݂ ܠܵܟ݂ ܡܸܢܵܟ݂ ܫܵܐܹܠ ܐ݇ܢܵܐ: ܗܲܒ݂ ܠܝܼ ܡܲܕܥܵܐ ܘܠܸܫܵܢܵܐ. ܕܲܥܠܲܝܟ ܡܵܪܝ ܘܐܲܠܵܗܝ ܬܟ݂ܝܼܠ ܐ݇ܢܵܐ: ܕܐܲܢ݇ܬ݁ ܬܸܗܘܸܐ ܠܝܼ ܡܚܲܟ݁ܡܵܢܵܐ܀ ܠܵܘ ܥܲܠ ܝܲܠܕܵܟ݂ ܡܬ݂ܘܿܡܵܝܵܐ: ܒܵܥܹܐ ܕܲܢܡܲܠܸܠ ܕܵܘܝܵܐ. ܐܸܠܵܐ ܥܲܠ ܦܲܓܼܪܵܢܵܝܵܐ: ܟܲܕ݂ ܠܲܝܬ݁ ܠܵܟ݂ ܥܠܲܝ ܣܘܼܢܩܵܢܵܐ܀ ܠܵܐ ܡܸܬ݁ܕܪܸܟ݂ ܐܲܠܵܗܵܝܵܐ: ܕܠܲܝܬ݁ ܐܲܬ݂ܪܵܐ ܘܠܵܐ ܫܘܼܢܵܝܵܐ. ܘܐܵܦ ܠܡܵܘܠܵܕ݂ܵܟ݂ ܐ݇ܢܵܫܵܝܵܐ: ܙܥܘܿܪ ܟܠ ܦܘܼܡܵܐ ܘܠܸܫܵܢܵܐ܀ ܐܘܿ ܕܝܼܠܝܼܕ݂ܝܼܢ ܡ̣ܢ ܡܲܝ̈ܵܐ: ܘܲܗ̤ܘܵܘ ܠܐܲܠܵܗܵܐ ܒܢܲܝ̈ܵܐ: ܦܪܘܿܥܘ ܫܘܼܒ݂ܚܵܐ ܒܩܵܠܹ̈ܐ ܚܠܲܝ̈ܵܐ. ܠܗ̇ܘ ܕܐܸܬ݂ܓ݁ܠܝܼ ܒܝܵܘܡܵܐ ܗܵܢܵܐ܀ ܗܵܐ ܐܵܕ݂ܵܡ ܕܓܲܒ݂ܠܹܗ ܠܐܵܕ݂ܵܡ: ܒܚܘܼܒܹܗ ܢܚܸܬ݂ ܠܡܸܣܥܵܪ ܠܐܵܕ݂ܵܡ. ܘܐܸܬ݂ܒܲܪܢܲܫ ܡ̣ܢ ܒܲܪ݇ܬ݂ ܐܵܕ݂ܵܡ: ܬܲܗܪܵܐ ܠܵܐ ܡܸܬ݂ܡܲܠܠܵܢܵܐ܀ܗܵܐ ܒܬ݂ܘܼܠܬ݂ܵܐ ܒܲܪܬܹܗ ܕܐܵܕ݂ܵܡ: ܝܸܠܕܲܬܸ ܒܪܹܗ ܘܡܵܪܹܗ ܕܐܵܕ݂ܵܡ. ܫܡܲܥܘ ܬܲܗܪܵܐ ܐܘܿ ܒܢܲܝ̈ ܐܵܕ݂ܵܡ: ܘܲܩܥܵܘ ܕܡܵܪܲܢ ܗ݇ܘܼ ܗܵܢܵܐ܀ ܗܵܐ ܨܲܠܡܵܐ ܕܐܲܠܵܗܘܼܬ݂ܵܐ: ܘܗܲܝܟ݁ܠܵܐ ܕܲܬ݂ܠܝܼܬ݂ܵܝܘܼܬ݂ܵܐ. ܕܲܥܠܵܘܗܝ ܡܲܠܠܲܬܸ ܐܝܼܬ݂ܘܼܬ݂ܵܐ: ܟܲܕ݂ ܒܪܵܬܸ ܠܐܵܕ݂ܵܡ ܥܲܦܪܵܢܵܐ܀ ܗܵܐ ܫܸܒ݁ܠܵܐ ܕܚܲܝܹ̈ܐ ܝܼܥܲܬܸ: ܡ̣ܢ ܐܲܪܥܵܐ ܕܠܵܐ ܐܸܙܕܲܪܥܲܬܸ. ܘܲܠܟ݂ܠܹܗ ܓܸܢܣܲܢ ܣܲܒ݁ܥܲܬܸ: ܒܐܘܼܟ݂ܠܵܐ ܠܵܐ ܡܸܬܚܲܒܠܵܢܵܐ܀ ܘܛܘܿܛܝܼܬ݂ܵܐ ܐܲܠܵܗܵܝܬܵܐ: ܡ̣ܢ ܓܦܸܬ݂ܵܐ ܐܵܕ݂ܵܡܵܝܬ݂ܵܐ. ܘܡ̣ܢ ܫܒܸܫܬܵܐ ܡܲܪܝܵܡܲܝܬܵܐ. ܕܒ݂ܵܗ̇ ܪܘܝܼ ܓܸܢܣܲܢ ܥܲܦܪܵܢܵܐ܀ ܐܝܼܠܵܢܵܐ ܕܲܒ݂ܪܹܫ ܛܘܼܪܵܐ: ܟܲܕ݂ ܠܵܐ ܒܛܸܢ ܐܵܘܠܸܕ݂ ܐܸܡܪܵܐ. ܡܲܪܝܲܡ ܐܝܼܬܹܝܗ̇ ܒܲܫܪܵܪܵܐ: ܕܝܸܠܕܲܬܸ ܠܥܵܠܡܵܐ ܡܚܲܪܪܵܢܵܐ܀ ܘܗ̇ܘ ܣܲܢܝܵܐ ܕܡܸܬ݂ܓܵܘܙܲܠ ܗ݇ܘܵܐ: ܒܢܘܼܪܵܐ ܟܲܕ݂ ܠܵܐ ܝܵܩܹܕ݂ ܗ݇ܘܵܐ. ܐ݇ܪܵܙܵܗ̇ ܕܡܲܪܝܲܡ ܨܵܐܲܪ ܗ݇ܘܵܐ: ܕܛܸܥܢܲܬܸ ܒܥܘܼܒܵܐ ܠܡܲܚܝܵܢܵܐ܀ ܘܫܲܒ݂ܛܵܐ ܕܐܲܗܪܘܿܢ ܕܠܵܐ ܢܨܝܼܒ݂ ܗ݇ܘܵܐ: ܛܲܪ̈ܦܹܐ ܥܲܡ ܠܼܘܙܹ̈ܐ ܛܥܲܢ ܗ݇ܘܵܐ . ܣܵܗܕܵܐ ܠܡܲܪܝܲܡ ܐܝܼܬ݂ܵܘܗܝ ܗ̣݇ܘܵܐ: ܕܒܸܛܢܲܬܸ ܗ݇ܘܵܬ݂ ܠܥܸܠ ܡ̣ܢ ܟܝܵܢܵܐ܀ ܘܛܲܠܝܵܐ ܬܘܼܒ݂ ܕܡ̣ܢ ܩܕ݂ܝܼܡ ܝܼܠܝܼܕ݂: ܐܲܟ݂ܡܵܐ ܕܐܸܬܢܲܒ݁ܝܼ ܕܵܘܝܼܕ݂ . ܘܒ݂ܐܝܼܕ݂ܵܘ̈ܗܝ ܟܠܹܗ ܥܵܠܡܵܐ ܥܒ݂ܝܼܕ݂: ܒܒܹܝܬ݂ܠܚܸܡ ܕܢܲܚ ܝܵܘܡܵܢܵܐ܀ ܘܒܸܛܢܲܬܸ ܘܝܸܠܕܲܬܸ ܒܬ݂ܘܼܠܬܵܐ ܒܪܵܐ: ܘܲܫܡܹܗ ܐܸܬ݂ܩܪܝܼ ܕܘܼܡܵܪܵܐ. ܐܵܦ ܐܲܠܵܗܵܐ ܓܲܢ݇ܒܵܪܵܐ: ܥܲܡܵܢܘܼܐܹܝܠ ܚܲܢܵܢܵܐ܀

ܘܡܲܩܦܝܼܢ ܒܥܸܩܒ݂ܵܗ̇ ܬܸܫܒ݁ܘܿܚܬܵܐ ܗܵܕܹܐ ܕܲܥܒ݂ܝܼܕ݂ܵܐ ܠܡܵܪܝ ܢܲܪܣܲܝ ܡܲܠܦܵܢܵܐ.

ܢܘܼܗܪܵܐ ܕܕܸܢܚܹܗ ܕܲܡܫܝܼܚܵܐ: ܚܲܕ݁ܝܼ ܠܐܲܪܥܵܐ ܘܠܲܫܡܲܝܵܐ܀ ܛܘܼܥܝܲܝ ܒܲܕ݂ܡܘܼܬ݂ ܚܸܫܘܿܟ݂ܵܐ: ܦܪܝܼܣܵܐ ܗ݇ܘ̣ܵܬ̤ ܥܲܠ ܒܸܪ̈ܝܵܬ݂ܵܐ. ܘܲܕ݂ܢܲܚ ܢܘܼܗܪܹܗ ܕܲܡܫܝܼܚܵܐ: ܘܲܩܢܵܐ ܥܵܠܡܵܐ ܒܘܼܝܵܢܵܐ܀ ܠܥܸܕܵܢ ܠܸܠܝܵܐ ܕܵܡܹܐ ܗ݇ܘ̣ܵܐ: ܙܲܒ݂ܢܵܐ ܕܡܸܢ ܐܵܕ݂ܵܡ ܘܲܠܟ݂ܵܐ. ܘܝܘܿܡ ܓܸܠܝܵܢܹܗ ܕܲܡܫܝܼܚܵܐ: ܠܪܲܗܛܵܐ ܕܫܵܥܹ̈ܐ ܕܐܝܼܡܵܡܵܐ܀ ܨܲܦܪܵܐ ܟܲܢܝܹܗ ܐܵܦ ܡܵܪܲܢ: ܠܫܘܼܪܵܝܵܐ ܕܟ݂ܵܪܘܿܙܘܼܬܹܗ. ܘܥܸܕܵܢ ܪܲܡܫܵܐ ܠܫܘܼܠܵܡܵܐ: ܕܲܡܢܝܼܚ ܠܥܵܠܡܵܐ ܡܸܢ ܥܲܡܠܹܗ܀ ܠܗܵܢܵܐ ܣܲܒ݂ܪܵܐ ܡܣܲܟܹ݁ܝܢ ܗ݇ܘ̣ܵܘ: ܟܵܗܢܹ̈ܐ ܘܡܲܠܟܹ̈ܐ ܘܲܢܒ݂ܝܼܹ̈ܐ. ܘܐܲܢܝܼܚ ܐܸܢܘܿܢ ܒܵܪܘܿܝܵܐ: ܒܲܠܡܹܐܢܵܐ ܕܝܘܿܡ ܓܸܠܝܵܢܹܗ܀ ܒܓܸܠܝܵܢܹܗ ܢܵܚ ܒܸܪ̈ܝܵܬ݂ܵܐ: ܕܲܫܚܝܼ̈ܩܵܢ ܗ̣݇ܘܲܝ̈ ܒܲܚܛܝܼܬ݂ܵܐ. ܘܫܲܪܝܼ ܥܵܠܡܵܐ ܡܸܬ݂ܗܲܓܸ݁ܐ: ܒܥܸܢܝܵܢܵܐ ܕܲܥܬ݂ܝܼ̈ܕ݂ܵܬ݂ܵܐ܀ ܕܝܵܬܹܩܹܐ ܚܕܲܬܵܐ ܐܲܫܠܸܡ: ܠܲܡܩܲܒ݁ܠܵܢܹ̈ܐ ܕܝܘܼܠܦܵܢܹܗ. ܛܲܒ݂ܥܵܗ̇ ܒܲܕ݂ܡܵܐ ܕܲܩܢܘܿܡܹܗ: ܕܠܵܐ ܢܸܬ݁ܕܲܓ݁ܠܘܼܢ ܫܘܼܘܕܵܝܵܘ̈ܗܝ܀ ܒܫܘܼܘܕܵܝܹ̈ܐ ܕܡܲܠܟ݁ܘܼܬ݂ ܪܵܘܡܵܐ: ܐܲܣܪܹܗ ܠܪܲܗܛܵܐ ܕܲܡܠܝܼܠܹ̈ܐ. ܘܗܵܐ ܡܣܲܟܹ݁ܝܢ ܠܹܗ ܠܓܸܠܝܵܢܹܗ: ܐܲܪ̈ܥܵܢܹܐ ܘܲܫܡܲܝܵܢܹ̈ܐ܀ ܩܪܸܒ݂ ܠܹܗ ܡܸܟܹ݁ܝܠ ܓܸܠܝܵܢܹܗ: ܕܡܲܠܟܵܐ ܕܐܲܡܠܸܟ݂ ܡܸܢ ܓܸܢܣܲܢ. ܬܵܘ ܢܸܬ݁ܛܲܝܲܒ݂ ܠܲܚܙܵܬܹܗ: ܥܲܡ ܟܸܢܫܹ̈ܐ ܕܲܫܡܲܝܵܢܹ̈ܐ܀ ܡܸܫܚܵܐ ܚܘܼܒܵܐ ܢܸܣܲܒ݂ ܠܲܢ: ܠܗ̇ܘ ܝܵܘܡܵܐ ܕܲܡܠܸܐ ܩܸܢܛܵܐ. ܕܠܵܐ ܢܸܫܡܲܥ ܗ̇ܝ ܒܲܪ݇ܬ݂ ܩܵܠܵܐ: ܕܠܵܐ ܝܵܕܲܥ ܐ݇ܢܵܐ ܥܲܡܠܲܝ̈ܟ݁ܘܿܢ܀ ܒܟܲܟ݁ܪܵܐ ܕܡܸܠܲܬ݂ ܝܘܼܠܦܵܢܵܐ: ܢܸܬ݁ܬܲܓܲܪ ܥܲܕ݂ ܚܲܝܝܼܢܲܢ. ܕܢܸܫܬ݁ܘܸܐ ܕܢܸܫܡܲܥ ܗ̇ܘ ܩܵܠܵܐ: ܕܬ݂ܵܘ ܩܲܒܸ݁ܠܘ ܡܘܼܠܟܵܢܲܝ̈ܟ݁ܘܿܢ܀ ܒܣܲܒ݂ܪܵܐ ܕܚܲܝܹ̈ܐ ܕܲܥܬ݂ܝܼܕ݂ܝܼܢ: ܢܹܐܣܪܝܼܗ̇ ܠܐܸܠܦܵܐ ܕܪܸܥܝܵܢܲܢ. ܘܲܒ݂ܚܘܼܒܵܐ ܘܗܲܝܡܵܢܘܼܬ݂ܵܐ ܢܡܲܢܲܥ ܠܲܠܡܹܐܢ ܚܲܕ݂̈ܘܵܬ݂ܵܐ܀

ܘܥܵܛܦܝܼܢ ܘܐܵܡܪܝܼܢ. ܢܘܼܗܪܵܐ ܕܢܲܚ ܠܙܲܕ݁ܝܼܩܹ̈ܐ: ܘܠܲܬ݂ܪ̈ܝܼܨܲܝ ܠܸܒܵܐ ܚܲܕ݂ܘܼܬ݂ܵܐ܀

ܘܡܲܩܦܝܼܢ ܒܥܸܩܒ݂ܵܗ̇ ܬܸܫܒ݁ܘܿܚܬܵܐ ܗܵܕܹܐ ܕܒܹܝܬ݂ ܚܲܢܵܢܝܵܐ. ܘܲܒ݂ܙܵܘܓܹ̈ܐ ܡܸܬ݂ܐܲܡܪܵܐ ܥܲܡ ܓܝܼܘܿܪܵܗ̇ ܕܝܼܠܵܗ̇ ܥܕܲܡܵܐ ܕܫܵܠܡܵܐ.

ܒܲܪܸܟ݂ܘ ܟܠܗܘܿܢ ܥܒ݂ܵܕ݂ܵܘ̈ܗܝ ܕܡܵܪܝܵܐ ܠܡܵܪܝܵܐ. ܒܲܪܸܟ݂ܘ ܫܡܲܝ̈ܵܐ ܕܡܵܪܝܵܐ ܠܡܵܪܝܵܐ. ܣܓ݂ܝܼܕ݂ ܝܲܠܕܵܐ ܕܒ݂ܟ݂ܵܘܟ݁ܒ݂ܵܐ ܩ̣ܪܵܐ. ܠܲܡܓ݂ܘܼܫܹ̈ܐ ܕܢܹܐܬ݂ܘܿܢ ܠܣܸܓ݂ܕܬܹܗ. ܘܩܘܼܖ̈ܒܵܢܹܐ ܛܥܲܢ̣ܘ ܘܐܲܝܬ݁ܝܼܘ ܠܡܵܪܘܼܬܹܗ. ܕܲܗܒ݂ܵܐ ܘܡܘܼܪܵܐ ܘܲܠܒ݂ܘܿܢ݇ܬܵܐ. ܒܲܪܸܟ݂ܘ ܟܠܗܘܿܢ ܥܒ݂ܵܕ݂ܵܘ̈ܗܝ ܕܡܵܪܝܵܐ ܠܡܵܪܝܵܐ. ܒܲܪܸܟ݂ܘ ܫܡܲܝ̈ܵܐ ܕܡܵܪܝܵܐ ܠܡܵܪܝܵܐ. ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܡܲܠܲܐܟ݂ܵܘ̈ܗܝ ܕܡܵܪܝܵܐ ܠܡܵܪܝܵܐ. ܒܲܪܸܟ݂ܘ ܡܲܝ̈ܵܐ ܕܲܠܥܸܠ ܡܸܢ ܫܡܲܝܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܟܠܗܘܿܢ ܚܲܝܠܵܘܵܬܹ̈ܗ ܕܡܵܪܝܵܐ ܠܡܵܪܝܵܐ. ܒܲܪܸܟ݂ܘ ܫܸܡܫܵܐ ܘܣܲܗܪܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܟܵܘܟ݁ܒܹ̈ܐ ܕܒܲܫܡܲܝܵܐ ܠܡܵܪܝܵܐ. ܒܲܪܸܟ݂ܘ ܡܸܛܪܵܐ ܘܛܲܠܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ܀

ܒܲܪܸ̈ܟܹܝܢ ܟܠܗܹܝܢ ܪ̈ܘܼܚܵܬ݂ܵܐ ܠܡܵܪܝܵܐ. ܒܲܪܸܟ݂ܘ ܢܘܼܪܵܐ ܘܚܘܼܡܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܠܸܠܝܵܐ ܘܐܝܼܡܵܡܵܐ ܠܡܵܪܝܵܐ. ܒܲܪܸܟ݂ܘ ܢܘܼܗܪܵܐ ܘܚܸܫܘܿܟ݂ܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܥܲܪܝܵܐ ܘܚܘܼܡܵܐ ܠܡܵܪܝܵܐ. ܒܲܪܸܟ݂ܘ ܬܲܠܓܵܐ ܘܲܓ݂ܠܝܼܕ݂ܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܒܲܪ̈ܩܹܐ ܘܲܥܢܵܢܹ̈ܐ ܠܡܵܪܝܵܐ. ܒܲܪܸܟ݂ܘ ܟܠܵܗ̇ ܐܲܪܥܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܛܘܼܪܹ̈ܐ ܘܪ̈ܵܡܵܬ݂ܵܐ ܠܡܵܪܝܵܐ. ܒܲܪܸܟ݂ܘ ܟܠ ܕܡܵܘܥܸܐ ܥܲܠ ܐܲܪܥܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܝܲܡܡܹ̈ܐ ܘܢܲܗܪ̈ܵܘܵܬ݂ܵܐ ܠܡܵܪܝܵܐ. ܒܲܪܸܟ݂ܘ ܡܲܒ݁ܘܼܥܹ̈ܐ ܕܡܲܝ̈ܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܢܘܼܢܹ̈ܐ ܘܟ݂ܠ ܕܪܵܚܹܫ ܒܡܲܝ̈ܵܐ ܠܡܵܪܝܵܐ. ܒܲܪܸܟ݂ܘ ܟܠܵܗ̇ ܦܵܪܲܚܬ݂ܵܐ ܕܲܫܡܲܝܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܝ ܟܠܵܗ̇ ܚܲܝ̱ܘܬ݂ܵܐ ܘܲܒ݂ܥܝܼܪܵܐ ܠܡܵܪܝܵܐ. ܒܲܪܸܟ݂ܘ ܒܢܲܝ̈ܢܵܫܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܒܢܲܝ̈ܢܵܫܵܐ ܠܡܵܪܝܵܐ. ܒܲܪܸܟ݂ܘ ܕܒܹܝܬ݂ ܝܼܣܪܵܝܹܠ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܟܵܗܢܵܘ̈ܗܝ ܕܡܵܪܝܵܐ ܠܡܵܪܝܵܐ. ܒܲܪܸܟ݂ܘ ܥܲܒ݂ܕܵܘ̈ܗܝ ܕܡܵܪܝܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸ̈ܟܹܝܢ ܟܠܗܹܝܢ ܪ̈ܘܼܚܵܬ݂ܵܐ ܘܢܲܦ̮̈ܫܵܬ݂ܵܐ ܕܙܲܕ݁ܝܼܩܹ̈ܐ ܠܡܵܪܝܵܐ. ܒܲܪܸܟ݂ܘ ܬܲܡܝܼܡܹ̈ܐ ܘܡܲܟ݁ܝܼܟܲܝ̈ ܠܸܒܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܚܲܢܵܢܝܵܐ ܘܥܲܙܲܪܝܵܐ ܘܡܝܼܫܵܐܹܝܠ ܠܡܵܪܝܵܐ. ܒܲܪܸܟ݂ܘ ܫܠܝܼܚܹ̈ܐ ܘܲܢܒ݂ܝܼܹ̈ܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܒܲܪܸܟ݂ܘ ܣܵܗܕܵܘ̈ܗܝ ܕܡܵܪܝܵܐ ܠܡܵܪܝܵܐ. ܒܲܪܸܟ݂ܘ ܟܠ ܕܩܵܝܡܝܼܢ ܒܒܲܝܬܹ݁ܗ ܕܡܵܪܝܵܐ ܠܡܵܪܝܵܐ܀ ܫܲܒ݁ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

ܡܒܲܪܟ݂ܝܼܢܲܢ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ: ܡܫܲܒ݁ܚܝܼܢܲܢ ܘܲܡܪܲܡܪ̱ܡܝܼܢܲܢ: ܠܥܵܠܲܡ ܥܵܠܡܝܼܢ. ܣܓ݂ܝܼܕ݂ ܝܲܠܕܵܐ ܕܒ݂ܟ݂ܵܘܟ݁ܒ݂ܵܐ ܩ̣ܪܵܐ. ܠܲܡܓ݂ܘܼܫܹ̈ܐ ܕܢܹܐܬ݂ܘܿܢ ܠܣܸܓ݂ܕܬܹܗ. ܘܩܘܼܖ̈ܒܵܢܹܐ ܛܥܲܢ̣ܘ ܘܐܲܝܬ݁ܝܼܘ ܠܡܵܪܘܼܬܹܗ. ܕܲܗܒ݂ܵܐ ܘܡܘܼܪܵܐ ܘܲܠܒ݂ܘܿܢ݇ܬܵܐ.

ܫܒܚ. ܥܠܡ. ܫܠܵܡܵܐ ܘܖ̈ܲܚܡܹܐ ܘܛܲܝܒ݁ܘܼܬ݂ܵܐ. ܢܸܣܓܸ̇ܐ ܠܟ݂ܠܗܹܝܢ ܐܸܡ̈ܘܵܬ݂ܵܐ. ܕܐܸܬ݂ܝܼܠܸܕ݂ ܦܵܪܘܿܩܵܐ ܕܒܸܖ̈ܝܵܬ݂ܵܐ. ܘܲܡܫܲܟ݁ܢܵܢܵܐ ܕܛܵܒ݂̈ܵܬ݂ܵܐ܀

ܒܲܪܸܟ݂ܘ ܟܠܗܘܿܢ ܥܒ݂ܵܕ݂ܵܘ̈ܗܝ ܕܡܵܪܝܵܐ ܠܡܵܪܝܵܐ. ܒܲܪܸܟ݂ܘ ܫܡܲܝ̈ܵܐ ܕܡܵܪܝܵܐ ܠܡܵܪܝܵܐ. ܬܸܫܒ݁ܘܿܚܬܵܐ ܠܐܲܒ݂ܵܐ ܒܪܵܘܡܵܐ. ܘܣܲܒ݂ܪܵܐ ܒܐܲܪܥܵܐ ܘܲܫܠܵܡܵܐ. ܕܐܸܬ݂ܝܼܠܸܕ݂ ܦܵܪܘܿܩܵܐ ܕܟ݂ܠ ܥܵܠܡܵܐ. ܘܡܲܚܝܵܢܵܐ ܒܪܹܗ ܕܲܡܪܲܝܡܵܐ.

ܘܡܲܩܦܝܼܢ ܕܲܠܒ݂ܵܟ݂ܬܵܐ. ܒܐܵܡ̇ܪܵܐ ܥܹܕܬܵܐ. ܐܵܡ̇ܪܵܐ ܦܵܪܹܣ ܟܲܕ݂ ܫܲܕ݁ܪܲܬ̤ ܗ݇ܘ̣ܵܬ݂ ܠܲܡܓ݂ܘܼܫܹ̈ܐ ܥܲܡ ܩܘܼܖ̈ܒܵܢܹܐ ܠܐܲܪܥܵܐ ܕܲܝܗܘܼܕ݂: ܙܸܠܘ ܒܲܫܠܵܡܵܐ ܚܙܘܿܩ ܒܲܫܠܵܡܵܐ ܡܛܵܘ ܒܲܫܠܵܡܵܐ. ܫܠܵܡܵܐ ܕܲܡܠܸܐ ܟܠ ܫܠܵܡ̈ܝܼܢ ܒܲܫܠܵܡܵܐ ܢܩܝܼܡܟ݂ܘܿܢ: ܙܸܠܘ ܒܲܫܠܵܡܵܐ ܘܥܘܿܠܘ ܠܐܘܿܪܸܫܠܸܡ ܘܲܫܐܲܠܘ ܒܲܫܠܵܡܵܗ̇. ܘܫܲܐܸܠܘ ܘܥܲܩܸܒ݂ܘ ܥܲܠ ܛܲܠܝܵܐ ܕܝܼܠܝܼܕ݂ ܒܲܬ݂ܚܘܼܡܹܝ̈ܗ̇: ܒܪܘܿܟ݂ܘ ܘܲܣܓ݂ܘܿܕ݂ܘ ܠܹܗ ܘܩܲܪܸܒ݂ܘ ܩܕ݂ܵܡܵܘܗܝ ܩܘܼܖ̈ܒܵܢܲܝܟ݁ܘܿܢ. ܟܲܕ݂ ܬܹܐܡܪܘܼܢ ܠܹܗ ܫܠܵܡ ܠܵܟ݂ ܡܲܠܟܵܐ ܡܠܸܟ݂ ܡܲܠܟܹ̈ܐ ܕܲܠܥܵܠܡܝܼܢ: ܡܲܠܟܲܝ̈ ܦܵܪܹܣ ܘܡܲܠܟܲܝ̈ ܗܸܢܕܘܿ ܥܲܡ ܡܲܠܟܲܝ̈ ܨܝܼܢ. ܟܲܦ̣ܘ ܖܹ̈ܫܲܝܗܘܿܢ ܘܲܣ̣ܓܸܕ݂ܘ ܠܹܗ ܠܡܲܠܟܵܐ ܕܡ̣ܢ ܕܵܘܝܼܕ݂: ܡܲܠܟܹ̈ܐ ܕܬܲܪܫܝܼܫ ܘܕ݂ܓ̣ܵܙܖ̈ܵܬ݂ܵܐ ܖ̈ܲܚܝܼܩܵܬ݂ܵܐ. ܡܲܠܟܹ̈ܐ ܕܲܫܒ݂ܵܐ ܥܲܡ ܕܣܵܒ݂ܵܐ ܛܥܲܢ̣ܘ ܕܲܗܒ݂ܵܐ ܕܐܵܘܦܹܝܪ: ܘܗܵܐ ܝܵܘܡܵܢܵܐ ܪܵܥܹ̇ܡ ܥܹܐܕ݂ܵܐ ܕܝܘܿܡ ܡܵܘܠܵܕܹܗ ܒܐܲܪ̈ܒܲܥܦܸܢܝܵܢ. ܘܡܲܣܩܝܼܢ ܐ݇ܢܵܫ̈ܵܐ ܘܡܲܠܲܐܟܹ̈ܐ ܫܘܼܒ݂ܚܵܐ ܠܫܵܠܘܿܚܹܗ.

ܐ݇ܚܪܹܢܵܐ. ܠܵܘ ܐܝܼܬ݂ܝܵܐ ܝܸܠܕܲܬ̤ ܡܲܪܝܲܡ. ܐܲܝܟ݂ ܕܐܲܪܫܲܥ̣ܘ ܗܲܖ̈ܵܛܝܼܩܘܿ. ܘܠܵܐ ܬܘܼܒ݂ ܝܸܠܕܲܬ̤ ܒܲܪܢܵܫܵܐ. ܐܲܟ݂ܡܵܐ ܕܲܫܓ݂ܵܐ ܐܵܪܝܼܘܿܣ. ܐܸܠܵܐ ܝܸܠܕܲܬ̤ ܠܲܡܫܝܼܚܵܐ. ܐܲܝܟ݂ ܕܐܵܘܕ݁ܝܼ ܡܵܪܝ ܢܸܣܛܘܿܪܝܼܣ. ܒܝܲܠܕܹܗ ܫܒ݂ܝܼܚܵܐ ܕܡ̣ܢ ܡܲܪܝܲܡ. ܚܵܘܝܼ ܚܲܝܠܹܗ ܕܥܸܠܵܝܵܐ. ܡܫܲܒ݁ܚܝܼܢ ܠܹܗ ܟܸܢܫܹ̈ܐ ܕܲܠܥܸܠ. ܘܣܵܓ݂ܕܝܼܢ ܠܹܗ ܐ݇ܢܵܫܵܐ ܕܲܠܬܲܚܬ݁. ܠܟ݂ܵܘܟ݁ܒ݂ܵܐ ܕܲܕ݂ܢܲܚ̣ ܡ̣ܢ ܝܲܥܩܘܿܒ݂.

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ: ܫܠܵܡܵܐ ܥܲܡܲܢ.

ܨܠܘܿܬ݂ܵܐ: ܡܫܲܒ݁ܚܝܼܢܲܢ ܘܲܡܪܲܡܪ̱ܡܝܼܢܲܢ ܘܲܡܗܲܠܠܝܼܢܲܢ ܘܲܡܩܲܠܣܝܼܢܲܢ: ܠܲܟ݂ܝܵܢܵܐ ܟܲܣܝܵܐ ܘܲܓ݂ܢܝܼܙܵܐ: ܘܛܘܼܒ݂ܬ݂ܵܢܵܐ ܘܠܵܐ ܡܸܬ݁ܕܲܪܟܵܢܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ ܒܟ݂ܠܥܸܕܵܢ: ܡܵܪܵܐ ܕܟ݂ܠ.

ܬܸܫܒ݁ܘܿܚܬܵܐ. ܟܵܘܟ݁ܒ݂ܵܐ ܒܪܵܘܡܵܐ ܪܵܕܹܐ ܗ݇ܘܵܐ. ܘܠܲܡܓ݂ܘܼܫܹ̈ܐ ܒܐܲܪܥܵܐ ܪܵܡܹ̇ܙ. ܕܡܲܠܟܵܐ ܡܫܝܼܚܵܐ ܐܸܬ݂ܝܼܠܸܕ݂. ܬܵܘ ܢܸܒ݂ܪܘܿܟ݂ ܘܢܸܣܓ̇ܘܿܕ݂ ܠܹܗ܀ ܟܹܐܦܵܐ ܕܲܚ̣ܙܵܐ ܕܵܢܝܼܐܹܝܠ. ܕܐܸܬ݂ܓܲܙܪܲܬ̤ ܕܠܵܐ ܒܐܝܼܕܲܝ̈ܵܐ. ܗܘ̤ܝܘܼ ܡܫܝܼܚܵܐ ܕܐܸܬ݂ܝܼܠܸܕ݂. ܡ̣ܢ ܒܬ݂ܘܼܠܬܵܐ ܕܠܵܐ ܙܘܼܘܵܓ݂ܵܐ܀ ܐܘܿ ܕܫܲܝܸܢ ܪܵܘܡܵܐ ܘܥܘܼܡܩܵܐ. ܒܝܲܠܕܹܗ ܣܓ݂ܝܼܕ݂ܵܐ ܘܲܫܒ݂ܝܼܚܵܐ. ܫܲܝܸܢ ܡܵܪܝ ܟܵܗܢܹ̈ܐ ܘܡܲܠܟܹ̈ܐ. ܘܥܹܕܬܵܟ݂ ܩܲܝܸܡ ܒܲܚܢܵܢܵܟ݂.

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ: ܫܠܵܡܵܐ ܥܲܡܲܢ.

ܨܠܘܿܬ݂ܵܐ ܕܩܲܕ̇ܝܼܫܵܐ ܐܲܠܵܗܵܐ: ܠܵܟ݂ ܡܵܪܝ ܘܠܲܡܫܝܼܚܵܟ݂ ܘܲܠܪܘܼܚܵܟ݂ ܚܲܝܵܐ ܘܩܲܕ̇ܝܼܫܵܐ ܘܡܲܚܝܵܢܵܐ ܘܐܲܠܵܗܵܝܵܐ: ܡܲܣܩܝܼܢܲܢ ܬܸܫܒ݁ܘܿܚܬܵܐ ܘܐܝܼܩܵܪܵܐ ܘܬ݂ܵܘܕ̇ܝܼܬ݂ܵܐ ܘܣܸܓ݂ܕ̇ܬܵܐ ܒܟ݂ܠܥܸܕܵܢ: ܡܵܪܵܐ ܕܟ݂ܠ.

ܐܵܡܲܪ ܡܫܲܡܫܵܢܵܐ: ܐܲܪܝܼܡܘ ܩܵܠܟ݂ܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.

ܘܐܵܡܪܝܼܢ ܩܲܕ̇ܝܼܫܵܐ ܐܲܠܵܗܵܐ ܒܩܵܠܵܐ ܪܲܒܵܐ ܘܲܒ݂ܓ݂ܘܼܕܹ̈ܐ.

ܘܡܲܩܦܝܼܢ: ܐܲܒ݂ܘܼܢ ܕܒܲܫܡܲܝܵܐ ܒܩܵܠܵܐ ܪܲܒܵܐ ܘܟܲܕ݂ ܡܫܲܒ݁ܚܝܼܢ ܒܵܗ̇ ܥܵܒ݂ܪܝܼܢ ܒܲܫܠܵܡܵܐ.

ܨ̈ܠܵܘܵܬ݂ܵܐ ܕܒܵܬܲܪ ܐܲܒ݂ܘܼܢ ܕܒܲܫܡܲܝܵܐ: ܚܲܢܵܢܵܐ ܕܩܲܕ̇ܝܼܫ ܫܡܹܗ: ܘܩܲܕ̇ܝܼܫ ܡܲܫܪ̱ܝܹܗ: ܘܩܲܕ̇ܝܼܫ ܐܲܬ݂ܪܵܐ ܕܲܫܟ݂ܝܼܢܬܹ݁ܗ: ܘܩܲܕ̇ܝܼܫܝܼܢ ܚܲܝ̈ܠܵܘܵܬ݂ܵܐ ܥܸܠܵܝܹ̈ܐ ܕܲܡܩܲܕ̇ܫܝܼܢ ܠܹܗ ܒܗܘܼܠܵܠܲܝ̈ܗܘܿܢ: ܘܡ̣ܢ ܪ̈ܘܼܚܵܢܹܐ ܘܦܲܓ݂ܪ̈ܵܢܹܐ ܡܸܬ݂ܩܲܕܲܫ ܒܩܵܠܹ̈ܐ ܩܲܕ̇ܝܼܫܹ̈ܐ ܕܠܵܐ ܫܲܠܘܵܐ: ܩܲܕܸ̇ܫ ܡܵܪܲܢ ܘܐܲܠܵܗܲܢ ܗܲܝܟܲܠ ܢܲܦ̮̈ܫܵܬܲܢ: ܘܕܲܟܵܐ ܬܹܐܪ̈ܵܬܲܢ: ܘܚܲܣܵܐ ܚܵܘ̈ܒܵܬܲܢ: ܘܚܵܘܲܪ ܟܘܼ̈ܬ݂ܡܵܬܲܢ: ܘܲܥܒܸܕܲܝܢ ܡܵܪܝ ܢܵܘܣܹ̈ܐ ܕܟܲـܝ̈ܵܐ ܠܐܲܠܵܗܘܼܬ݂ܵܟ݂ ܡܪܲܝܲܡܬܵܐ ܘܗܲܝ̈ܟ̇ܠܹܐ ܡܨܲܒ̈ܬܹܐ ܕܥܵܗܢܝܼܢ ܠܐܝܼܩܵܪ ܬܸܫܡܸܫܬܹ݁ܗ ܕܚܘܼܒܵܟ݂: ܡܩܲܕܸ̇ܫ ܟܠ ܒܚܲܝܠܵܐ ܕܡܸܠܬܹܗ ܘܲܕ݂ܪܘܼܚܹܗ: ܡܵܪܵܐ ܕܟ݂ܠ.

ܚܵܬ݂ܵܗ̇: ܩܲܕܝܼܫܲܬ݁ ܡܵܪܝ ܐܝܼܬ݂ܝܵܐܝܼܬ݂: ܘܲܡܫܲܒܲܚ ܐܲܢ݇ܬ݁ ܡܬ݂ܘܿܡܵܐܝܼܬ݂: ܘܪܵܡ ܐܲܢ݇ܬ݁ ܘܲܡܥܲܠܲܝ ܐܲܢ݇ܬ݁ ܠܥܸܠ ܡ̣ܢ ܟܠ ܠܵܐ ܡܸܬ݁ܕܲܪܟܵܢܵܐܝܼܬ݂: ܘܡܸܣܬ݁ܓܸܕ݂ ܐܲܢ݇ܬ݁ ܡ̣ܢ ܥܝܼܪܹ̈ܐ ܘܐ݇ܢܵܫ̈ܵܐ ܬܠܝܼܬ݂ܵܐܝܼܬ݂ ܘܲܚܕ݂ܵܢܵܐܝܼܬ݂: ܡܲܠܟܵܐ ܪܲܒܵܐ ܕܬܸܫܒ݁ܘܿܚܬܵܐ: ܐܝܼܬ݂ܝܵܐ ܕܐܝܼܬ݂ܵܘܗܝ ܡ̣ܢ ܥܵܠܲܡ: ܡܵܘܕܹ̇ܝܢܲܢ ܘܣܵܓ݂ܕ̇ܝܼܢܲܢ ܘܲܡܫܲܒ݁ܚܝܼܢܲܢ ܒܟ݂ܠܥܸܕܵܢ: ܡܵܪܵܐ ܕܟ݂ܠ.

ܘܲܡܨܲܠܹܝܢ ܨܠܘܿܬ݂ܵܐ ܕܥܘܼܕ݂ܪܵܢܵܐ: ܥܘܼܕ݂ܪܵܢܵܐ ܡܵܪܝ ܕܪ̈ܲܚܡܲܝܟ ܘܣܘܼܝܵܥܵܐ ܪܲܒܵܐ ܕܛܲܝܒ݁ܘܼܬ݂ܵܟ݂: ܘܚܲܝܠܵܐ ܟܲܣܝܵܐ ܘܲܡܫܲܒ݁ܚܵܐ ܕܲܬ݂ܠܝܼܬ݂ܵܝܘܼܬ݂ܵܟ݂ ܡܫܲܒܲܚܬܵܐ: ܘܝܲܡܝܼܢܵܟ݂ ܕܡܲܠܝܵܐ ܪ̈ܲܚܡܹܐ ܘܲܚܢܵܢܵܐ: ܐܲܓܸ̇ܢ ܘܐܲܠܘܵܐ ܠܲܡܚܝܼܠܘܼܬ݂ܵܐ ܕܣܵܓ݂ܘܿܕܲܝ̈ܟ: ܡ̣ܢ ܒܲܝܬܵܟ݂ ܩܲܕ̇ܝܼܫܵܐ ܡܠܸܐ ܟܠ ܥܘܼܕ݂ܪ̈ܵܢܝܼܢ ܘܟ݂ܠ ܛܘܼܒ݂ܝܼ̈ܢ: ܒܲܨܠܘܿܬ݂ ܟܠܗܘܿܢ ܩܲܕ̇ܝܼܫܹ̈ܐ ܡܪ̈ܲܥܝܵܢܲܝܟ: ܡܵܪܵܐ ܕܟ݂ܠ.

ܘܡܲܩܦܝܼܢ: ܒܒ݂ܘܼܪܟ̇ܬ݂ܵܟ݂ ܡܵܪܲܢ ܘܐܲܠܵܗܲܢ ܢܸܬ݂ܒܲܪܟ݂ܘܿܢ ܥܲܒ݂ܕܲܝ̈ܟ: ܘܒܲܒ݂ܛܝܼܠܘܼܬܹܗ ܕܨܸܒ݂ܝܵܢܵܟ݂ ܢܸܬ݂ܢܲܛܪܘܼܢ ܣܵܓ݂ܘܿܕܲܝ̈ܟ: ܘܫܲܝܢܵܐ ܡܵܪܝ ܐܲܡܝܼܢܵܐ ܕܐܲܠܵܗܘܼܬ݂ܵܟ݂ ܘܲܫܠܵܡܵܐ ܢܲܓ̇ܝܼܪܵܐ ܕܡܵܪܘܼܬ݂ܵܟ݂: ܢܲܡܠܸܟ݂ ܒܥܲܡܵܟ݂ ܘܲܒ݂ܥܹܕ݇ܬܵܟ݂ ܟܠܗܘܿܢ ܝܵܘܡܵܬܹ̈ܗ ܕܥܵܠܡܵܐ: ܡܵܪܵܐ ܕܟ݂ܠ.

ܘܐܸܢ ܐܝܼܬ݂ ܟܵܗܢܹ̈ܐ ܣܲܓ̇ܝܼܐܹ̈ܐ: ܟܠܚܲܕ݂ ܘܲܠܦܘܼܬ݂ ܩܲܕ̇ܝܼܡܘܼܬ݂ ܣܝܵܡܝܼܕܹܗ ܢܹܐܡܲܪ ܚܕ݂ܵܐ ܡ̣ܢ ܗܵܠܹܝܢ ܨ̈ܠܵܘܵܬ݂ܵܐ:

ܨܠܘܿܬ݂ܵܐ: ܒܘܼܪܟ̇ܬܹܗ ܕܲܡܒܲܪܸܟ݂ ܟܠ: ܘܫܲܝܢܹܗ ܕܲܡܫܲܝܸܢ ܟܠ: ܘܲܚܢܵܢܹܗ ܕܚܵܐܹܢ ܟܠ: ܘܲܡܢܲܛܪܵܢܘܼܬܹܗ ܕܐܲܠܵܗܲܢ ܣܓ݂ܝܼܕ݂ܵܐ: ܬܸܗܘܸܐ ܥܲܡܲܢ ܘܒܲܝܢܵܬܲܢ ܘܲܚܕ݂ܵܪ̈ܲܝܢ: ܘܲܬ݂ܢܲܛܪܲܢ ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ: ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܒܒ݂ܘܼܪܟ̇ܬ݂ܵܟ݂ ܡܵܪܲܢ ܘܐܲܠܵܗܲܢ ܢܸܬ݂ܒܲܪܲܟ݂: ܘܒܲܒ݂ܛܝܼܠܘܼܬ݂ܵܟ݂ ܢܸܬ݂ܢܛܲܪ: ܘܚܲܝܠܵܟ݂ ܢܹܐܬܸܐ ܠܐܝܼܵܠܲܢ: ܘܥܘܼܕ݂ܪܵܢܵܟ݂ ܢܸܬ݂ܠܵܘܸܐ ܠܲܢ: ܘܝܲܡܝܼܢܵܟ݂ ܬܲܓܸ̇ܢ ܥܠܲܝܢ: ܘܫܲܝܢܵܟ݂ ܢܲܡܠܸܟ݂ ܒܲܝܢܵܬܲܢ: ܘܲܨܠܝܼܒ݂ܵܟ݂ ܫܘܼܪܵܐ ܪܵܡܵܐ ܘܒܹܝܬ݂ ܓܵܘܣܵܐ ܢܸܗܘܸܐ ܠܲܢ: ܘܲܬ݂ܚܹܝܬ݂ ܟܸܢܦܵܘ̈ܗܝ ܢܸܣܬܲܬܲܪ ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܒܪܝܼܟ݂ܝܼܢ ܡܵܪܝ ܪ̈ܲܚܡܹܐ ܕܛܲܝܒ݁ܘܼܬ݂ܵܟ݂: ܘܲܣܓ݂ܝܼܕ݂ܝܼܢ ܫܘܼܘܕܵܝܹ̈ܐ ܕܡܵܪܘܼܬ݂ܵܟ݂: ܕܲܒ݂ܟ݂ܠܙܒܲܢ ܡܲܠܦܝܼܢ ܠܲܢ ܕܲܢܚܘܼܪ ܠܘܵܬ݂ܵܟ݂ ܘܢܸܫܬܲܒ݂ܗܲܪ ܒܵܟ݂. ܘܠܵܐ ܢܸܦܣܘܿܩ ܣܲܒ݂ܪܲܢ ܡܸܢܵܟ݂ ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ.

ܐ݇ܚܪܹܬܵܐ: ܒܘܼܪܟ̇ܬ݂ܵܟ݂ ܡܵܪܲܢ ܘܐܲܠܵܗܲܢ ܥܲܠ ܥܲܡܵܟ݂ ܬܸܬ݁ܢܝܼܚ: ܘܲܥܠܲܝܢ ܡܚܝܼܠܹ̈ܐ ܘܚܲܛܵܝܹ̈ܐ ܚܢܵܢܵܟ݂ ܢܸܗܘܸܐ ܐܲܡܝܼܢܵܐܝܼܬ݂: ܣܲܒ݂ܪܲܢ ܛܵܒ݂ܵܐ: ܘܒܹܝܬ݂ ܓܵܘܣܲܢ ܡܠܸܐ ܪ̈ܲܚܡܹܐ: ܘܫܵܒܹܩ ܚܵܘܒܹ̈ܐ ܘܲܚܛܵܗܹ̈ܐ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܫܲܝܢܹܗ ܕܐܲܒ݂ܵܐ ܥܲܡܲܢ: ܘܚܘܼܒܹ݁ܗ ܕܲܒ݂ܪܵܐ ܒܲܝܢܵܬܲܢ: ܘܪܘܼܚܵܐ ܕܩܘܼܕ݂ܫܵܐ ܡܕܲܒܲܪ ܠܲܢ ܐܲܝܟ݂ ܨܸܒ݂ܝܵܢܹܗ: ܘܲܥܠܲܝܢ ܪ̈ܲܚܡܵܘܗܝ ܘܲܚܢܵܢܹܗ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܫܲܝܢܵܟ݂ ܡܵܪܝ ܢܸܫܪܸܐ ܒܲܢ: ܘܲܫܠܵܡܵܟ݂ ܢܸܫܬܲܠܲܛ ܒܲܢ: ܘܚܘܼܒܵܟ݂ ܢܸܣܓܸ̇ܐ ܒܲܝܢܵܬܲܢ: ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܒܝܲܡܝܼܢܵܟ݂ ܡܵܪܝ ܢܲܛܲܪ ܠܲܢ: ܘܲܬ݂ܚܹܝܬ݂ ܟܸܢܦܲܝ̈ܟ ܣܲܬܲܪ ܠܲܢ: ܘܥܘܼܕ݂ܪܵܢܵܟ݂ ܢܸܬ݂ܠܵܘܸܐ ܠܲܢ: ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܗܲܒ݂ܠܲܢ ܡܵܪܝ ܫܲܝܢܵܐ ܐܲܡܝܼܢܵܐ: ܘܚܘܼܒܵܐ ܘܪܸܚܡܲܬ݂ ܝܘܼܠܦܵܢܵܐ: ܘܚܲܝܹ̈ܐ ܘܛܘܼܒܹ̈ܐ ܘܚܲܕ݂̈ܘܵܬ݂ܵܐ. ܘܡܵܙܘܿܢܵܐ ܕܠܵܐ ܢܸܚܣܲܪ ܠܲܢ: ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܗܘܝܼ ܢܵܛܘܿܪܵܐ ܕܠܵܐ ܕܵܡܹܟ݂: ܠܟܲܪܟ݂ܵܐ ܕܥܵܢ̈ܵܟ݂ ܫܲܪܝܵܐ ܒܹܗ: ܕܠܵܐ ܬܸܬ݂ܢܟܸܐ ܡ̣ܢ ܕܹܐܒܹ̈ܐ ܨܲܗܝܲܝ̈ ܠܲܕ݂ܡܵܐ ܕܲܓ݂ܙܵܪܵܟ݂: ܕܐܲܢ݇ܬ݁ܘܼ ܝܲܡܵܐ ܕܠܵܐ ܚܵܣܲܪ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܒܒ݂ܘܼܪ̈ܟܵܬ݂ܵܟ݂ ܡܵܪܲܢ ܒܲܪܸܟܲܝܢ: ܘܫܘܼܪ ܒܛܝܼܠܘܼܬ݂ܵܟ݂ ܐܲܟ݂ܪܸܟܲܝܢ: ܘܡ̣ܢ ܛܵܒ݂̈ܵܢ ܠܵܐ ܬܲܨܪܸܟܲܝܢ: ܘܒܲܓ݂ܢܘܿܢ ܢܘܼܗܪܵܟ݂ ܐܲܣܡܸܟܲܝܢ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܬܵܐ ܡܵܪܝ ܠܐܝܼܵܠܲܢ ܒܲܚܢܵܢܵܟ݂: ܘܐܸܬ݂ܓܲܠܝܝ ܠܦܘܼܪܩܵܢܲܢ ܒܲܡܪܲܚܡܵܢܘܼܬ݂ܵܟ݂: ܘܲܬ݂ܪܘܿܨ ܗܲܠ̈ܟ݂ܵܬܲܢ ܒܲܫܒ݂ܝܼ̈ܠܹܐ ܕܙܲܕ̇ܝܼܩܘܼܬ݂ܵܐ: ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܬܸܕ݂ܢܲܚ ܠܲܢ ܡܵܪܝ ܛܲܝܒ݁ܘܼܬ݂ܵܟ݂: ܡܵܐ ܕܕ݂ܵܝܢܵܐ ܠܲܢ ܟܹܐܢܘܼܬ݂ܵܟ݂: ܘܪ̈ܲܚܡܲܝܟ ܢܹܐܬ݂ܘܿܢ ܠܐܝܼܵܠܲܢ: ܒܝܵܘܡܵܐ ܕܕ݂ܵܢܚܵܐ ܪܲܒ݁ܘܼܬ݂ܵܟ݂: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܒܘܼܪܟ̇ܬ݂ܵܟ݂ ܘܛܲܝܒ݁ܘܼܬ݂ܵܟ݂ ܘܝܲܡܝܼܢܵܟ݂ ܕܡܲܠܝܵܐ ܪܲܚܡܹܐ ܘܲܚܢܵܢܵܐ: ܐܲܓܸ̇ܢ ܘܐܲܠܘܵܐ ܥܲܠ ܟܸܢܫܵܐ ܕܣܵܓ݂ܘܿܕܲܝ̈ܟ ܕܩܵܪܹܝܢ ܘܡܸܬ݂ܟܲܫܦܝܼܢ ܠܵܟ݂ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܗܘܝܼ ܡܵܪܝ ܥܲܡܲܢ ܒܪ̈ܲܚܡܲܝܟ ܐܲܡܝܼܢܵܐܝܼܬ݂: ܘܕܲܒܲܪ ܠܲܢ ܐܲܝܟ݂ ܨܸܒ݂ܝܵܢܵܐ ܕܐܲܠܵܗܘܼܬ݂ܵܟ݂ ܟܠܗܘܿܢ ܝܵܘ̈ܡܵܬ݂ܵܐ ܕܚܲܝܲܝ̈ܢ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܒܲܪܸܟ݂ܡܵܪܝ ܒܛܲܝܒ݁ܘܼܬ݂ܵܟ݂: ܘܢܲܛܲܪ ܒܲܡܪܲܚܡܵܢܘܼܬ݂ܵܟ݂ ܠܟܸܢܫܵܐ ܕܲܡܗܲܝܡܢܹ̈ܐ: ܕܲܬ݂ܟ݂ܝܼܠܝܼܢ ܥܠܲܝܟ ܘܩܵܪܹܝܢ ܠܲܫܡܵܟ݂ ܩܲܕ̇ܝܼܫܵܐ ܘܡܸܬ݂ܟܲܫܦܝܼܢ ܠܵܟ݂ ܒܟ݂ܠܥܸܕܵܢ: ܡܵܪܵܐ ܕܟ݂ܠ.

ܐ݇ܚܪܹܬ݂ܵܐ: ܒܘܼܪܟ̇ܬ݂ܵܐ ܡܵܪܝ ܕܪ̈ܲܚܡܹܐ: ܡ̣ܢ ܒܹܝܬ݂ ܓܲܙܵܐ ܕܪ̈ܲܚܡܹܐ: ܒܝܲܕ݂ ܡܲܠܲܐܟ݂ܵܐ ܕܪ̈ܲܚܡܹܐ: ܡ̣ܢ ܠܘܵܬ݂ ܐܲܠܵܗܵܐ ܣܲܓ̇ܝܼ ܪ̈ܲܚܡܹܐ: ܬܸܫܬܲܕܲܪ ܘܬܸܫܬܲܦܲܠ ܥܲܠ ܟܸܢܫܹ̈ܐ ܕܲܡܫܲܒ݁ܚܵܢܲܝ̈ܟ: ܕܐܲܡܝܼܢܝܼܢ ܘܩܵܪܹܝܢ ܠܲܫܡܵܟ݂ ܩܲܕ̇ܝܼܫܵܐ: ܘܚܵܝܪܝܼܢ ܘܲܡܣܲܟܹ̇ܝܢ ܠܪ̈ܲܚܡܹܐ: ܘܲܠܦܘܼܪܩܵܢܵܐ ܕܡ̣ܢ ܠܘܵܬ݂ܵܟ݂: ܡܵܪܵܐ ܕܟ݂ܠ.

ܘܡܲܩܦܝܼܢ: ܨܠܘܿܬ݂ܵܗ̇ ܡܵܪܝ ܕܲܒ݂ܬ݂ܘܼܠܬܵܐ ܩܲܕ̇ܝܼܫܬܵܐ ܘܒ݂ܵܥܘܼܬ݂ܵܗ̇ ܕܐܸܡܵܐ ܡܒܲܪܲܟ݂ܬܵܐ: ܘܬܲܟ݂ܫܲܦ̮ܬܵܗ̇ ܘܬܲܚܢܲܢܬܵܗ̇ ܕܡܲܠܝܲܬ݂ ܛܲܝܒ݁ܘܼܬ݂ܵܐ: ܡܵܪܬ݁ܝ ܡܲܪܝܲܡ ܛܘܼܒ݂ܵܢܝܼܬ݂ܵܐ. ܘܚܲܝܠܹܗ ܪܲܒܵܐ ܕܲܨܠܝܼܒ݂ܵܐ ܙܲܟܵܝܵܐ: ܘܥܘܼܕ݂ܪܵܢܵܐ ܐܲܠܵܗܵܝܵܐ: ܘܒ݂ܵܥܘܼܬܹܗ ܕܡܵܪܝ ܝܘܿܚܲܢܵܢ ܡܲܥܡܕ݂ܵܢܵܐ: ܘܕܲܫܠܝܼܚܹ̈ܐ ܛܘܼܒ݂ܵܢܹ̈ܐ: ܘܕܲܐܒ݂ܵܗ̈ܵܬ݂ܵܐ ܢܲܨܝܼܚܹ̈ܐ ܡܣܲܒ݁ܪ̈ܵܢܹܐ ܕܙܲܕ̇ܝܼܩܘܼܬ݂ܵܐ: ܘܙܵܪ̈ܥܲܝ ܫܲܝܢܵܐ ܒܲܒ݂ܪܝܼܬ݂ܵܐ. ܘܕܲܐܒ݂ܘܼܢ ܙܲܗܝܵܐ ܘܩܲܕ̇ܝܼܫܵܐ ܡܵܪܝ ܐܲܒ݂ܵܐ ܩܵܬ݂ܘܿܠܝܼܩܵܐ: ܘܡܵܪܝ ܐܸܣܛܲܦܵܢܘܿܣ ܒܘܼܟ݂ܪܵܐ ܕܣܵܗܕܹ̈ܐ: ܘܲܕ݂ܓܲܢ݇ܒܵܪ ܚܲܝܠܵܐ ܡܵܪܝ ܓܝܼܘܲܪܓܝܼܣ ܣܵܗܕܵܐ ܢܲܨܝܼܚܵܐ: ܘܲܕ݂ܡܵܪܝ (ܦܠܵܢ) ܘܲܕ݂ܡܵܪܝ ܐܵܘܓܹ̇ܝܢ ܛܘܼܒ݂ܵܢܵܐ ܘܲܕ݂ܟ݂ܠܵܗ̇ ܣܝܼܥܬܹ݁ܗ ܪܘܼܚܵܢܵܝܬܵܐ. ܘܕܲܫܡܘܿܢܝܼ ܘܕܲܒ݂ܢܹܝ̈ܗ̇: ܘܲܕ݂ܟ݂ܠܗܘܿܢ ܣܵܗܕܵܘ̈ܗܝ ܘܩܲܕ̇ܝܼ̈ܫܵܘܗܝ ܕܡܵܪܲܢ: ܬܸܗܘܸܐ ܠܲܢ ܐܲܡܝܼܢܵܐܝܼܬ݂: ܫܘܼܪܵܐ ܪܵܡܵܐ ܘܒܹܝܬ݂ ܓܵܘܣܵܐ ܚܲܣܝܼܢܵܐ: ܕܬܸܦܪܘܿܩ ܘܲܬ݂ܦܲܨܸܐ ܘܲܬ݂ܫܵܘܙܸܒ݂ ܘܲܬ݂ܢܲܛܲܪ ܠܦܲܓ݂ܪ̈ܲܝܢ ܘܢܲܦ̮̈ܫܵܬܲܢ ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ ܒܟ݂ܠܗܘܿܢ ܙܲܒ݂ܢܹ̈ܐ ܘܥܸܕܵܢܹ̈ܐ: ܡܵܪܵܐ ܕܟ݂ܠ.

ܘܚܵܬ݂ܡܝܼܢ ܒܗܲܝܟ݁ܠܵܐ ܒܚܲܕ݂ ܡ݂ܢ ܗܵܠܹܝܢ ܚܘܼܬܵܡܹ̈ܐ:

ܬܸܫܒ݁ܘܿܚܬܵܐ ܘܐܝܼܩܵܪܵܐ ܘܬ̣ܵܘܕܝܼܬ̣ܵܐ ܘܣܸܓ݂ܕܬ̣ܵܐ ܘܩܘܼܒܵܠܛܲܝܒ݁ܘܼܬ̣ܵܐ. ܬܢܝܼ. ܠܐܲܠܵܗܵܐ ܡܵܪܹܟ݁ܠ ܡܚܲܝܠܵܢܵܐ ܕܓܸܢܣܵܐ ܕܐ̄ܢܵܫܘܼܬ̣ܵܐ. ܘܲܡܣܲܝܥܵܢܵܐ ܕܲܒ݂ܨܝܼܪܘܼܬܲܢ ܒܛܲܝܒ݁ܘܼܬܹܗ ܐܝܼܬ̣ܝܵܝܬ̣ܵܐ. ܘܲܡܢܲܛܪܵܢܲܢ ܒܢܝܼܫܵܐ ܚܲܝܵܐ ܡ̣ܢ ܡܲܦܘܼܠܬܵܐ ܕܲܚܛܝܼܬ̣ܵܐ. ܘܥܲܠ ܡܕܲܒ݁ܪ̈ܵܢܲܝܢ ܘܪ̈ܵܥܵܘܵܬܲܢ ܘܥܲܠܠܵܢܲܝ̈ܢ ܕܢܸܪܥܘܿܢܲܢ ܒܝܲܨܝܼܦܘܼܬ̣ܵܐ. ܘܥܲܠ ܡܲܠܟܲܢ ܘܫܲܠܝܼܛܵܢܲܝ̈ܢ ܕܲܢܚܘܼܪܘܼܢ ܒܲܢ ܒܥܲܝܢܵܐ ܚܲܝܘܼܣܬ̣ܵܢܝܼܬ̣ܵܐ. ܘܥܲܠ ܟܵܗܢܹ̈ܐ ܡܸܨܥܵܝܹ̈ܐ ܕܒܲܨ̈ܠܵܘܵܬ̣ܗܘܿܢ ܢܲܥܒ݁ܪܘܼܢ ܪܘܼܓ݂ܙܵܐ ܡ̣ܢ ܟܠܵܗ̇ ܝܵܬܸܒ̣ܬܵܐ. ܘܢܸܒ̣ܥܘܿܢ ܠܲܢ ܪ̈ܲܚܡܹܐ ܡ̣ܢ ܐܲܠܵܗܲܢ ܡܵܪܵܗ̇ ܕܟ̣ܠܵܗ̇ ܒܪܝܼܬ̣ܵܐ. ܘܥܲܠ ܥܹܕܬܵܐ ܕܲܬ̣ܩܘܼܡ ܕܠܵܐ ܪܘܼܘܵܛ ܥܕܲܡܵܐ ܠܚܲܪܬ̣ܵܐ. ܘܥܲܠ ܟܸܢܫܲܢ ܘܲܩܝܵܡܲܢ ܕܢܸܫܬܲܪܲܪ ܒܗܲܝܡܵܢܘܼܬ̣ܵܐ ܐܲܪܬ̣ܵܕܘܿܟ݁ܣܵܝܬܵܐ. ܘܥܲܠ ܥܵܠܡܵܐ ܟܠܹܗ ܡ̣ܢ ܣܵܟܹܗ ܕܢܲܡܠܸܟ݂ ܒܹܗ ܫܲܝܢܵܐ ܒܥܘܼܕ݂ܪܵܢܵܐ ܕܛܲܝܒ݁ܘܼܬ̣ܵܐ. ܘܥܲܠ ܥܲܢ̈ܝܼܕܹܐ ܕܲܦ̣ܪܲܫܘ ܥܲܠ ܣܲܒ̣ܪܵܐ ܕܲܩܝܵܡܬܵܐ. ܕܢܸܫܬ̇ܘܘܿܢ ܠܡܲܠܟ݁ܘܼܬ̣ܵܐ ܪܵܡܲܬ̣ ܡ̣ܢ ܡܸܠܬ̣ܵܐ ݂ ܘܥܲܠ ܐܲܒ̣ܵܗܲܝ̈ܢ ܘܐܲܚܲܝ̈ܢ ܘܡܲܠܦܵܢܲܝ̈ܢ ܕܢܸܬ̣ܦܲܨܘܿܢ ܡ̣ܢ ܓܹܗܲܢܵܐ ܡܛܲܠܩܵܢܝܼܬ̣ܵܐ. ܘܥܲܠ ܦܲܓ݂ܪ̈ܲܝܢ ܘܢܲܦ̮̈ܫܵܬܲܢ ܕܢܸܬ̇ܕܲܟ݁ܘܿܢ ܡ̣ܢ ܥܵܘܠܵܐ ܘܲܚܛܝܼܬ̣ܵܐ. ܘܥܲܠ ܡܗܲܝܡܢܹ̈ܐ ܘܲܡܗܲܝܡ̈ܢܵܬ̣ܵܐ ܕܢܸܬ̣ܢܲܛܪܘܼܢ ܒܲܒ̣ܛܝܼܠܘܼܬ̣ܵܐ ܐܲܠܵܗܵܝܬܵܐ. ܘܥܲܠ ܟܪ̈ܝܼܗܹܐ ܕܢܸܬ̣ܚܲܠܡܘܼܢ ܘܲܡܚ̈ܝܼܠܹܐ ܕܢܸܬ̣ܚܲܝܠܘܼܢ ܘܐܲܠܝܼ̈ܨܹܐ ܕܢܸܬ̣ܪܵܘܚܘܼܢ ܘܐܲܒ̣̈ܝܼܠܹܐ ܕܢܸܬ̣ܒܲܝܐܘܼܢ ܘܲܡܥܵܩܹ̈ܐ ܕܢܸܬ̣ܢܲܦܫܘܼܢ ܘܲܥܫܝܼܩܹ̈ܐ ܕܢܸܬ̣ܚܲܪܪܘܼܢ ܒܲܨ̈ܠܵܘܵܬ̣ܵܗ̇ ܕܲܡܒܲܪܲܟ̣ܬܵܐ. ܘܥܲܠ ܪ̈ܵܕ݂ܝܲܝ ܒܝܲܡܡܹ̈ܐ ܕܢܸܫܬܵܘܙܒ̣ܘܼܢ ܘܲܡ̈ܗܲܠܟܲܝ ܒܐܘܼܪ̈ܚܵܬ̣ܵܐ ܕܢܸܬ̣ܢܲܛܪܘܼܢ ܡ̣ܢ ܟܠܗܹܝܢ ܡܥܝܼܩܵܢ̈ܝܵܬ̣ܵܐ ܘܡܵܘܒ̇ܕ݂ܵܢ̈ܝܵܬ̣ܵܐ. ܘܥܲܠ ܒܲܪ̈ܵܝܹܐ ܕܢܸܬ̣ܒܲܝܬ̇ܘܿܢ ܘܪ̈ܲܚܝܼܩܹܐ ܕܢܸܬ̣ܩܲܪܒ̣ܘܼܢ ܘܢܹܐܬ̣ܘܿܢ ܠܲܬ̣ܝܵܒ̣ܘܼܬ̣ܵܐ. ܘܥܲܠ ܐܲܝܠܹܝܢ ܕܫܵܐܠܝܼܢ ܨܠܘܿܬ̣ܵܐ ܡ̣ܢ ܗܲܝܟ݁ܠܵܐ ܗܵܢܵܐ ܡܠܸܐ ܛܲܝܒ̇ܘܼܬ̣ܵܐ. ܕܐܲܠܵܗܵܐ ܡܵܪܹܟ݁ܠ ܢܦܲܢܸܐ ܫܹ̈ܐܠܵܬ̣ܗܘܿܢ ܘܲܢܡܲܠܸܐ ܚܲܣܝܼܪܘܼܬ̣ܗܘܿܢ ܐܲܝܟ݂ ܕܥܵܕ݂ܪܵܐ ܠܗܘܿܢ ܘܫܵܦܪܵܐ ܠܛܲܝܒ̇ܘܼܬ̣ܵܐ. ܘܥܲܠ ܟܠܲܢ ܒܟ̣ܠܲܢ ܒܲܟ̣ܢܝܼܫܘܼܬ̣ܵܐ. ܚܢܵܢܹܗ ܘܪ̈ܲܚܡܵܘܗܝ ܘܐܘܼܟ̣ܦܵܢܹܗ ܢܹܐܬ̣ܘܿܢ ܘܢܲܓ̇ܢܘܿܢ ܘܲܢܩܵܘܘܿܢ ܥܠܲܝܟ݁ܘܿܢ ܘܲܥܠܲܝܢ ܒܐܲܡܝܼܢܘܼܬ̣ܵܐ. ܗܵܫܵܐ ♰ ܘܲܒ݂ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ.

ܐ̄ܚܪܹܢܵܐ: ܬܸܫܒ݁ܘܿܚܬܵܐ ܘܐܝܼܩܵܪܵܐ ܘܬ̣ܵܘܕܝܼܬ̣ܵܐ ܘܪܘܼܡܪܵܡܵܐ ܘܣܸܓ݂ܕܬ̣ܵܐ ܘܟ̣ܠ ܩܘܼܠܵܣܝܼ̈ܢ. ܬܢܝܼ. ܠܐܲܠܵܗܵܐ ܡܵܪܹܟ݁ܠ ܡܚܲܝܠܵܢܵܐ ܕܟ̣ܠ ܕܲܡܚܝܼܠܝܼܢ. ܘܲܡܣܲܝܥܵܢܵܐ ܘܲܡܢܲܨܚܵܢܵܐ ܕܟ̣ܠ ܕܲܨܪܝܼܟ̣ܝܼܢ. ܘܲܡܢܲܛܪܵܢܵܐ ܕܒܲܝܬܵܝܵܘܗ̈ܝ ܕܥܲܠ ܣܲܒ̣ܪܹܗ ܬܟ̣ܝܼܠܝܼܢ. ܘܥܲܠ ܥܹܕܬܵܐ ܩܲܕ݁ܝܼܫܬܵܐ ܘܝܲܠܕܹܝ̈ܗ̇ ܕܬ̣ܵܘܕܝܼܬ̣ܵܐ ܬܪܝܼܨܲܬ̣ ܫܘܼܒ݂ܚܵܐ ܐܲܚܝܼܕ݂ܝܼܢ. ܘܲܒ̣ܗܲܝܡܵܢܘܼܬ̣ܵܐ ܐܲܪܬ̣ܵܕܘܿܟ݁ܣܵܝܬܵܐ ܛܵܦܣܝܼܢ. ܕܢܸܬ̣ܢܲܛܪܘܼܢ ܕܠܵܐ ܙܸܠܡܵܐ ܘܲܕ݂ܠܵܐ ܐܸܠܡܵܐ ܘܢܸܬ̣ܩܲܝܡܘܼܢ ܟܡܵܐ ܕܲܠܦܘܼܩܕܵܢܵܘܗ̈ܝ ܢܵܛܪܝܼܢ ܘܥܲܠ ܥܵܠܡܵܐ ܟܠܹܗ ܡ̣ܢ ܣܵܟܹܗ ܕܛܘܼܟܵܣܵܘܗ̈ܝ ܡܸܛܠ ܚܛܵܗܲܝ̈ܢ ܒܠܝܼܠܝܼܢ. ܕܢܸܬ̣ܩܢܘܼܢ ܒܪܸܡܙܵܟ݂ ܘܢܲܨܠܚܘܼܢ ܒܦܘܼܩܕܵܢܵܟ݂ ܐܲܝܟ݂ ܕܠܵܟ݂ ܫܵܦܪܝܼܢ ܘܠܲܨܪܝܼܟ̣ܘܼܬܲܢ ܡܥܲܕ݁ܪܝܼܢ. ܘܥܲܠ ܟܵܗܢܹ̈ܐ ܘܪܹ̈ܫܲܝ ܟܵܗܢܹ̈ܐ ܕܦܘܼܪ̈ܢܵܣܹܐ ܕܥܹܕܬܵܐ ܘܝܲܠܕܹܝ̈ܗ̇ ܠܒ݂ܝܼܟ̣ܝܼܢ. ܘܥܲܠ ܐܲܒ̣ܵܗܲܝ̈ܢ ܘܐܲܚܲܝ̈ܢ ܘܪ̈ܲܒܵܢܲܝܢ ܕܢܸܬ̣ܦܲܨܘܿܢ ܒܚܹܝܠ ܐܲܠܵܗ ܐܲܠܵܗܝܼ̈ܢ ݂ ܘܢܸܬ̣ܒܲܣܡܘܼܢ ܒܡܲܠܟ݁ܘܼܬ̣ܵܐ ܫܡܲܝܵܢܝܼܬ̣ܵܐ ܥܲܡ ܟܠ ܟܹܐܢ̈ܝܼܢ ܘܙܲܕ݁ܝܼܩ̈ܝܼܢ. ܘܥܲܠ ܟܪ̈ܝܼܗܹܐ ܘܐܲܠܝܼ̈ܨܹܐ ܘܲܡܢܵܘ̈ܠܹܐ ܘܲܡܛܲܪ̈ܦܹܐ ܘܟ̣ܠܗܘܿܢ ܐܲܝܠܹܝܢ ܕܲܫܚܝܼ̈ܩܝܼܢ. ܕܲܢܩܲܒ݁ܠܘܼܢ ܐܵܣܝܘܼܬ̣ܵܐ ܘܢܸܣܒ̣ܘܼܢ ܚܘܼܠܡܵܢܵܐ ܕܡܸܢܵܟ݂ ܘܲܠܘܵܬ̣ܵܟ݂ ܚܵܝܪܝܼܢ. ܘܥܲܠ ܐܲܝܠܹܝܢ ܕܪܵܕܹܝܢ ܒܝܲܡܡܹ̈ܐ ܘܒ̣ܐܘܼܪ̈ܚܵܬ̣ܵܐ ܟܲܕ݂ ܥܲܠ ܪ̈ܲܚܡܲܝܟ ܬܟ̣ܝܼܠܝܼܢ. ܕܢܸܬ̣ܢܲܛܪܘܼܢ ܡ̣ܢ ܓܲܝܵܣܹ̈ܐ ܘܡ̣ܢ ܟܝܼܡܘܿܢܹ̈ܐ ܘܓܲܠܠܹ̈ܐ ܘܡܲܚܫ̈ܘܼܠܹܐ ܘܲܠܒ̣ܵܬܲܝ̈ܗܘܿܢ ܒܥܘܼܬ̣ܪܵܐ ܕܡ̣ܢ ܟܹܐܢܘܼܬ̣ܵܟ݂ ܡܡܲܢܥܝܼܢ. ܘܥܲܠ ܐܲܝܠܹܝܢ ܕܐܝܼܬܲܝܗܘܿܢ ܒܲܬ̣ܪܲܥ ܡܲܠܟܹ̈ܐ ܘܫܲܠܝܼܛܵܢܹ̈ܐ ܕܲܒ̣ܬܸܫܡܸܫܬ̇ܗܘܿܢ ܟܕ݂ܝܼܢܝܼܢ. ܕܬܸܬܸ̇ܠ ܐܸܢܘܿܢ ܒܪ̈ܲܚܡܹܐ ܘܲܩܕ݂ܵܡ ܡܵܪ̈ܲܝܗܘܿܢ ܢܸܗܘܘܿܢ ܪ̈ܚܝܼܡܹܐ ܘܲܒ݂ܟ̣ܠܙܒܲܢ ܙܲܟܵܝܝܼ̈ܢ ܘܲܒ݂ܟ̣ܠܫܵܥ ܡܸܠܟܲܝ̈ܗܘܿܢ ܫܡܝܼܥܝܼܢ. ܘܥܲܠ ܐܲܝܠܹܝܢ ܕܫܵܐܠܝܼܢ ܨܠܘܿܬ̣ܵܐ ܡ̣ܢ ܗܲܝܟ݁ܠܵܐ ܡܠܸܐ ܟܠ ܥܘܼܕ݂ܪ̈ܵܢܝܼܢ. ܕܢܸܣܒ݂ܘܼܢ ܫܹ̈ܐܠܵܬ̣ܗܘܿܢ ܘܦܘܼܢܵܝ ܒܵܥ̈ܘܵܬ̣ܗܘܿܢ ܡ̣ܢ ܫܟ̣ܝܼ̈ܢܵܬ̣ܵܐ ܕܩܲܕ݁ܝܼܫܵܘܗ̈ܝ ܝܵܗܒܲܝ̈ ܟܠ ܚܘܼܠܡܵܢ̈ܝܼܢ. ܘܥܲܠ ܥܲܢ̈ܝܼܕܹܐ ܕܲܦ̣ܪܲܫܘ ܘܫܲܢ̣ܝܼܘ ܡ̣ܢ ܒܲܝܢܵܬ̣ܗܘܿܢ ܕܲܒ݂ܪܘܼܫܡܵܐ ܡܲܚܝܵܢܵܐ ܪܫܝܼܡܝܼܢ. ܘܬܸܢܝܵܢܘܼܬ̣ ܡ̣ܢ ܥܡܵܕ݂ܵܐ ܝܼܠܝܼܕ݂ܝܼܢ. ܘܲܒ̣ܦܲܓ݂ܪܵܐ ܡܲܚܝܵܢܵܐ ܘܲܕ݂ܡܵܐ ܡܚܲܣܝܵܢܵܐ ܡܩܲܕ݁ܫܝܼܢ. ܘܠܵܐܘܵܢܹ̈ܐ ܢܘܼܗܪ̈ܵܢܵܝܹܐ ܒܡܸܠܬ̣ܵܟ݂ ܡܡܲܢܥܝܼܢ. ܘܥܲܡ ܩܲܕ݁ܝܼܫܲܝ̈ܟ ܡܸܬ̣ܒܲܣܡܝܼܢ. ܘܲܒ̣ܥܘܼܒܹ̈ܐ ܐܲܒ̣ܪ̈ܵܗܵܡܵܝܹܐ ܘܠܲܥܵܙܵܪ̈ܵܝܹܐ ܢܸܗܘܘܿܢ ܫܪܹܝܢ ܘܲܡܕܲܝܪܝܼܢ. ܘܬܲܡ̇ܢ ܚܵܕܹܝܢ ܘܕ݂ܵܝܨܝܼܢ ܘܲܡܫܵܘܪܝܼܢ. ܘܥܲܡ ܪ̈ܘܼܚܵܢܹܐ ܫܘܼܒ̣ܚܵܐ ܠܲܫܡܵܟ݂ ܙܵܡ̇ܪܝܼܢ. ܘܥܲܠ ܦܲܓ݂ܪ̈ܲܝܢ ܘܢܲܦ̮̈ܫܵܬܲܢ ܕܲܒ݂ܟ̣ܠ ܟܘܼܬ̣̈ܡܵܬ̣ܵܐ ܡܟܲܬ̇ܡܝܼܢ. ܕܢܸܬ̇ܕܲܟ݁ܘܿܢ ܘܢܸܬ̇ܬ̇ܫܝܼܓ݂ܘܼܢ ܒܡܸܠܬ̣ܵܟ݂ ܡ̣ܢ ܟܠ ܚܛܵܗܝܼ̈ܢ ܕܚܲܕ݂ܬ̣ܝܼܢ ܘܥܲܬ̇ܝܼܩܝܼܢ. ܘܥܲܠ ܟܠܲܢ ܒܟ̣ܠܲܢ ܟܠ ܡܘܼܫ̈ܚܵܢ ܘܟ̣ܠ ܛܲܟ̣ܣܝܼ̈ܢ. ܚܢܵܢܵܟ݂ ܘܪ̈ܲܚܡܲܝܟ ܘܛܲܝܒ̈ܘܵܬ̣ܵܟ݂ ܒܟ̣ܠ ܝܵܘܡ̈ܝܼܢ. ܢܹܐܬ̣ܘܿܢ ܘܢܲܓ̇ܢܘܼܢ ܘܢܲܡܠܟ̣ܘܼܢ ܘܲܢܩܵܘܘܿܢ ܒܟ̣ܠ ܫܵܥ̈ܝܼܢ. ܥܠܲܝܢ ܥܲܡܵܟ݂ ܘܥܵܢ̈ܵܐ ܕܡܲܪܥܝܼܬ̣ܵܟ݂ ܒܟ̣ܠ ܙܲܒ݂ܢ̈ܝܼܢ. ܗܵܫܵܐ ♰ ܘܲܒ݂ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ.

ܘܥܲܡ ܒܲܪ݇ܬ݂ ܩܵܠܵܐ ܕ(ܗܵܫܵܐ) ܪܵܫܹܡ ܨܠܝܼܒ݂ܵܐ ܥܲܠ ܥܲܡܵܐ.

ܘܥܵܢܹܝܢ: ܡܫܝܼܚܵܐ ܢܸܫܡܲܥ ܨ̈ܠܵܘܵܬ݂ܵܟ݂: ܡܫܝܼܚܵܐ ܢܙܲܗܸܐ ܟܵܗܢܘܼܬ݂ܵܟ݂ ܒܡܲܠܟ̇ܘܼܬ݂ܵܐ ܕܲܫܡܲܝܵܐ

ܘܡܲܩܦܝܼܢ ܐܲܟ݂ܚܲܕ݂: ܩܵܢܘܿܢܵܐ ܕܗܲܝܡܵܢܘܼܬ݂ܵܐ

ܒܲܫܪܵܪܵܐ ܓܹܝܪ ܕܠܵܐ ܦܘܼܠܵܓ݂ܵܐ:

ܡܗܲܝܡܢܝܼܢ ܚ݇ܢܲܢ ܒܚܲܕ݂ ܐܲܠܵܗܵܐ: ܐܲܒ݂ܵܐ ܐܲܚܝܼܕ݂ ܟܠ. ܥܵܒ݂ܘܿܕ݂ܵܐ ܕܟ݂ܠܗܹܝܢ: ܐܲܝܠܹܝܢ ܕܡܸܬ݂ܚܲܙ̈ܝܵܢ: ܘܲܕ݂ܠܵܐ ܡܸܬ݂ܚܲܙ̈ܝܵܢ. ܘܲܒ݂ܚܲܕ݂ ܡܵܪܝܵܐ: ܝܼܫܘܿܥ ܡܫܝܼܚܵܐ: ܒܪܹܗ ܕܐܲܠܵܗܵܐ. ܝܼܚܝܼܕ݂ܵܝܵܐ: ܒܘܼܟ݂ܪܵܐ ܕܟ݂ܠܗܹܝܢ ܒܸܪ̈ܝܵܬ݂ܵܐ. ܗ݁ܘ ܕܡܼܢ ܐܲܒ݂ܘܼܗܝ ܐܸܬ݂ܝܼܠܸܕ݂ ܩܕ݂ܵܡ ܟܠܗܘܿܢ ܥܵܠܡܹ̈ܐ: ܘܠܵܐ ܐܸܬ݂ܥܒܸܕ݂. ܐܲܠܵܗܵܐ ܫܲܪܝܼܪܵܐ. ܕܡܼܢ ܐܲܠܵܗܵܐ ܫܲܪܝܼܪܵܐ: ܒܲܪ ܟܝܵܢܵܐ ܕܐܲܒ݂ܘܼܗܝ ܕܒ݂ܐܝܼܕ݂ܵܘܗ̈ܝ ܐܸܬ݁ܬܲܩܲܢܘ ܥܵܠܡܹ̈ܐ: ܘܐܸܬ݂ܒ݁ܪܝܼ ܟܠܡܸܕܸܡ. ܗ݁ܘ ܕܡܸܛܠܵܬܲܢ ܒܢܲܝ̈ܢܵܫܵܐ: ܘܡܸܛܠ ܦܘܼܪܩܵܢܲܢ: ܢܚܸܬ݂ ܡܼܢ ܫܡܲܝܵܐ. ܘܐܸܬ݂ܓܲܫܲܡ ܡܼܢ ܪܘܼܚܵܐ ܕܩܘܼܕ݂ܫܵܐ ܘܲܗܘܵܐ ܒܲܪܢܵܫܵܐ: ܘܐܸܬ݂ܒܛܸܢ ܘܐܸܬ݂ܝܼܠܸܕ ܡܼܢ ܡܲܪܝܲܡ ܒܬ݂ܘܼܠܬܵܐ. ܘܚܲܫ ܘܐܸܙܕܩܸܦ: ܒܝܲܘܡܲܝ̈ ܦܲܢܛܝܼܘܿܣ ܦܝܼܠܵܛܘܿܣ. ܘܐܸܬ݂ܩܒܲܪ: ܘܩܵܡ ܠܲܬ݂ܠܵܬ݂ܵܐ ܝܲܘܡ̈ܝܼܢ ܐܲܝܟ݂ ܕܲܟ݂ܬ݂ܝܼܒ݂. ܘܲܣܠܸܩ ܠܲܫܡܲܝܵܐ: ܘܝܼܬܸܒ݂ ܡܼܢ ܝܲܡܝܼܢܵܐ ܕܐܲܒ݂ܘܼܗܝ. ܘܬ݂ܘܼܒ݂ ܥܬ݂ܝܼܕ݂ ܠܡܹܐܬ݂ܵܐ: ܠܲܡܕ݂ܵܢ ܠܡܝܼ̈ܬܹܐ ܘܲܠܚܲܝܹ̈ܐ. ܘܲܒ݂ܚܲܕ݂ ܪܘܼܚܵܐ ܕܩܘܼܕ݂ܫܵܐ: ܪܘܼܚܵܐ ܕܲܫܪܵܪܵܐ: ܗ݁ܘ ܕܡܼܢ ܐܲܒ݂ܵܐ ܢܵܦܹܩ: ܪܘܼܚܵܐ ܡܲܚܝܵܢܵܐ. ܘܒܲܚܕ݂ܐ ܥܹܕ݇ܬܵܐ ܩܲܕܝܼܫܬܵܐ: ܘܲܫܠܝܼܚܵܝܬܵܐ ܩܵܬ݂ܘܿܠܝܼܩܝܼ. ܘܡܲܘܕܹܝܢܲܢ ܒܲܚܕ݂ܐ ܡܲܥܡܘܿܕ݂ܝܼܬ݂ܵܐ: ܠܫܘܼܒ݂ܩܵܢܵܐ ܕܲܚܛܵܗܹ̈ܐ ܘܒܲܩܝܵܡܬܵܐ ܕܦܲܓ݂ܪ̈ܲܝܢ: ܘܲܒ݂ܚܲܝܹ̈ܐ ܕܲܠܥܵܠܲܡ ܥܵܠܡܝܼܢ: ܐܵܡܹܝܢ܀

ܘܲܡܫܲܪܹܝܢ ܒܛܲܟ݂ܣܵܐ ܕܐ݇ܪܵܙܵܐ