ܡܙܡܘܪ̈ܐ ܕܕܘܝܕ

ܣܦܪܐ ܩܕ̄ܡܝܐ

 

 

ܡܙܡܘܪܐ: ܐ

1. ܛܘܼܒܼܵܐ ܠܓܲܒܼܪܵܐ ܕܠܵܐ ܚܕܪܹܗ ܒܪܸܥܝܵܢܵܐ ܕܒܝܼܫܹ̈ܐ: ܘܒܐܘܼܪܚܵܐ ܕܚܲܛܵܝܹ̈ܐ ܠܵܐ ܟܠܸܐܠܹܗ: ܘܒܡܵܘܬܒ̣ܵܐ ܕܡܲܣܚܸܪ̈ܵܢܹܐ ܠܵܐ ܝܬܸܒ̣ܠܹܗ. 2 ܐܸܠܵܐ ܒܢܵܡܘܿܣܹܗ ܕܡܵܪܝܵܐ ܨܸܒܼܝܵܢܹܗ[1]: ܘܒܢܵܡܘܿܣܹܗ ܟܹܐ ܡܗܲܓܹܐ ܐܝܼܡܵܡܵܐ ܘܠܸܠܝܵܐ. 3 ܘܒܸܕ ܗܵܘܹܐ ܐܲܝܟ̣ ܐܝܼܠܵܢܵܐ ܫܬܝܼܠܵܐ ܥܲܠ ܫܵܩܝܵܬ̈ܐ ܕܡ̈ܝܼܵܐ: ܕܦܹܐܪ̈ܵܘܗܝ ܝܵܗܹܒܼ ܒܙܲܒ̣ܢܹܗ: ܘܛܲܪ̈ܦܵܘܗܝ ܠܹܐ ܢܵܬܪܝܼ: ܘܟܠ ܡܵܐ ܕܥܵܒܸܕ ܟܹܐ ܡܲܢܬܹܐ. 4 ܠܵܐ ܗܵܕܟܼܵܐ ܒܝܼܫܹ̈ܐ: ܐܸܠܵܐ ܐܲܝܟ̣ ܬܸܒ̣ܢܵܐ ܕܡܕܲܪܹܐ ܠܹܗ ܦܵܘܚܵܐ. 5 ܒܘܼܕ ܐܵܗܵܐ: ܠܸܐ ܟܵܠܝܼ ܒܝܼܫܹ̈ܐ ܒܕܝܵܢܬܵܐ: ܘܐܵܦ ܠܵܐ ܚܲܛܵܝܹ̈ܐ ܒܟܢܘܼܫܬܵܐ[2] ܕܙܲܕܝܼܩܹ̈ܐ. 6 ܣܲܒܲܒ ܕܟܹܐ ܝܵܕܸܥ ܡܵܪܝܵܐ ܐܘܼܪܚܵܐ ܕܙܲܕܝܼܩܹ̈ܐ: ܘܐܘܼܪܚܵܐ ܕܒܝܼܫܹ̈ܐ ܒܸܕ ܛܵܠܩܵܐ.

 

ܡܙܡܘܪܐ:ܒ

1. ܩܵܡܘܿܕܝܼ ܫܥܸܫܠܗ̄ܘܿܢ ܥܲܡ̈ܡܹܐ: ܘܐܸܡ̈ܘܵܬܐ ܬܘܿܚܡܸܢܘܼܢ ܒܒܲܛܝܼܠܘܼܬ̣ܵܐ. 2 ܩܸܡܠܗ̄ܘܿܢ ܡܲܠܟܹ̈ܐ ܕܐܲܪܥܵܐ: ܘܪܹ̈ܫܵܢܹܐ ܥܒܸܕܠܗ̄ܘܿܢ ܬܲܕܒܲܪܬܵܐ ܡܸܚܕܵܕܹ̈ܐ: ܥܲܠ ܡܵܪܝܵܐ ܘܥܲܠ ܡܫܝܼܚܹܗ. 3 ܩܵܐ ܕܩܵܛܥܚ ܐܝܼܣܘܿܪ̈ܵܝܗܝ: ܘܡܪܲܦܚ ܡܸܢܲܢ ܬܲܣܡܵܝ̈ܗܝ. 4 ܝܵܬܒ̣ܵܢܵܐ ܕܓܵܘ ܫܡܲܝ̈ܐ ܒܓܵܚܸܟ: ܡܵܪܝܵܐ ܒܸܕ ܡܲܣܚܸܪ ܒܝܼܵܝܗܝ. 5 ܗܵܝܓܵܗ ܒܸܕ ܗܲܡܙܸܡ ܥܲܡܵܝܗܝ ܒܟܲܪܒܹܗ: ܘܒܚܸܡܬܹܗ ܒܸܕ ܡܲܪܥܸܠ ܠܗ̄ܘܿܢ. 6 ܘܐܵܢܵܐ ܡܘܼܩܸܡܠܝܼ ܡܲܠܟܝܼ ܥܲܠ ܨܸܗܝܘܿܢ: ܛܘܼܪܵܐ ܕܩܘܼܕܫܝܼ. 7 ܗܵܩܸܢ ܒܘܼܕ ܕܝܼܢܵܐ: ܡܵܪܝܵܐ ܐ̄ܡܸܪܹܗ ܐܸܠܝܼ: ܒܪܘܿܢܝܼ ܝܘܸܬ ܐܲܢ̄ܬ: ܐܵܢܵܐ ܐܸܕܝܘܿܡ ܩܲܡ ܝܵܠܕܸܢܘܿܟ̣. 8 ܛܠܘܿܒ ܡܸܢܝܼ ܘܒܸܕ ܝܵܗ̄ܒܸܢ ܩܵܐ ܠܘܟ̣ ܥܲܡ̈ܡܹܐ ܠܝܵܪܬܘܼܬܘܼܟ̣: ܘܡܘܼܠ̈ܟܵܢܘܼܟ̣ ܡܲܪܙܵܢܹ̈ܐ ܕܐܲܪܥܵܐ. 9 ܒܸܕ ܬܵܒ̣ܪܸܬ ܠܗ̄ܘܿܢ ܒܩܲܛܝܼܥܵܐ ܕܦܪܸܙܠܵܐ: ܐܲܝܟ̣ ܡܵܐܢܵܐ ܕܦܲܚܵܪܵܐ ܒܸܕ ܛܵܒ̣ܚܸܬ ܠܗ̄ܘܿܢ. 10 ܘܐܵܕܝܼܵܐ: ܡܲܠܟܹ̈ܐ: ܗܘܵܘ ܗܵܘܢܵܢܹ̈ܐ: ܗܘܵܘ ܪ̈ܲܕܝܹܐ[3]: ܕܲܝܵܢܹ̈ܐ ܕܐܲܪܥܵܐ. 11 ܦܠܘܿܚܘܼܢ ܠܡܵܪܝܵܐ ܒܙܕܘܼܥܬܵܐ: ܘܦܨܘܿܚܘܼܢ ܒܪܲܬܪܲܬܬܵܐ. 12 ܢܫܘܿܩܘܼܢ ܒܪܘܼܢܵܐ: ܕܠܵܐ ܟܵܪܸܒ: ܘܛܵܠܩܝܼܬܘܿܢ[4] ܐܘܼܪܚܵܐ: ܣܲܒܲܒ ܕܒܸܕ ܝܵܩܕܵܐ ܒܵܬ̄ܪ ܚܲܟ̰ܵܐ ܚܸܡܬܹܗ. ܘܛܘܼܒ̣ܵܐ ܠܟܠܵܝܗܝ ܐܵܢܝܼ ܕܬܵܟ̣ܠܝܼ ܥܲܠܹܗ.

 

 

 

 

ܡܙܡܘܪܐ: ܓ.

ܡܲܙܡܘܿܪܵܐ ܕܕܵܘܝܼܕܼ: ܟܲܕܼ ܥܪܸܩܠܹܐ ܡ̣ܢ ܩܵܕ̄ܡ ܐܲܒ̣ܫܵܠܘܿܡ ܒܪܘܼܢܹܗ.

 1. ܡܵܪܝܵܐ: ܟܡܵܐ ܙܸܕܠܗ̄ܘܿܢ ܡܲܠܝܸܨܵܢܝܼ̈. ܪܵܒܵܐ ܝܢܵܐ ܩܵܝܡܵܢܹ̈ܐ ܥܲܠܝܼ. 2 ܪܵܒܵܐ ܝܢܵܐ ܐܵܡܪ̈ܵܢܹܐ ܠܢܲܦ̮ܫܝܼ ܠܲܝܬ ܠܹܗ ܦܘܼܪܩܵܢܵܐ ܒܐܲܠܵܗܵܐ. 3 ܘܐܲܢ̄ܬ̇ܝ: ܡܵܪܝܵܐ: ܣܲܟܪܵܐ ܝܼܘܸܬ ܠܚܵܕܼܪܘܵܢܝܼ. ܐܝܼܩܵܪܝܼ ܘܡܲܪܡܵܢܵܐ ܕܪܹܫܝܼ. 4 ܒܩܵܠܝܼ ܠܡܵܪܝܵܐ ܟܹܐ ܩܵܪܸܢ: ܘܟܹܐ ܓ̰ܲܘܸܒ ܠܝܼ ܡ̣ܢ ܛܘܼܪܵܐ ܕܩܘܼܕܫܘܼܗܝ. 5 ܐܵܢܵܐ ܕܡܸܟ̣ܠܝܼ ܘܛܠܸܥܠܝܼ: ܪܥܸܫܠܝܼ ܣܲܒܲܒ ܕܡܵܪܝܵܐ ܟܹܐ ܣܵܢܸܕܼ ܠܝܼ. 6 ܠܹܐ ܙܵܕܥܸܢ ܡ̣ܢ ܪܸ̈ܒܘܵܬܹܐ ܕܥܲܡܵܐ: ܕܡܘܿܬܸܒ̣ܠܗ̄ܘܿܢ ܥܲܠܝܼ ܠܚܵܕܼܪ̈ܘܵܢܝܼ. 7 ܩܘܼܡ: ܡܵܪܝܵܐ: ܡܦܲܪܸܩ ܠܝܼ ܐܲܠܵܗܝܼ: ܣܲܒܲܒ ܕܡܚܹܐܠܘܼܟ ܠܟܠܵܝ ܒܥܸܠܕܒܼܵܒܼܝܼ̈ ܥܲܠ ܦܵܬܵܐ: ܟܵܟܹ̈ܐ ܕܒܝܼܫܹ̈ܐ ܬܒܸܪܘܼܟܼ. 8 ܕܡܵܪܝܵܐ ܝܠܹܗ ܦܘܼܪܩܵܢܵܐ: ܥܲܠ ܥܲܡܘܼܟܼ ܒܘܼܪܟܬܘܼܟܼ.

 

ܡܙܡܘܪܐ: ܕ.

ܠܪܹܫܵܐ ܕܙܲܡܵܪܹ̈ܐ: [5] ܒܢܓܝܼܢܘܿܬ. ܡܲܙܡܘܿܪܵܐ ܕܕܵܘܝܼܕܼ.

1. ܒܩܪܵܝܬܝܼ ܓ̰ܲܘܸܒ ܠܝܼ: ܐܲܠܵܗܵܐ ܕܙܲܕܝܼܩܘܼܬܝܼ: ܒܥܹܩܘܼܬܵܐ ܡܘܼܪܘܸܚܠܘܼܟܼ ܩܵܐ ܠܝܼ: ܡܪܲܚܸܡ ܥܲܠܝܼ: ܘܫܡܘܿܥ ܨܠܘܿܬܝܼ. 2 ܒܢܲܝ̈ ܐ̄ܢܵܫܵܐ: ܗܲܠ ܐܝܼܡܲܢ ܐܝܼܩܵܪܝܼ ܗܵܘܹܐ ܢܟܸܦܬܵܐ: ܗܲܠ ܐܝܼܡܲܢ ܡܲܚܸܒܝܼܬ̇ܘܿܢ ܣܪܝܼܩܘܼܬܵܐ: ܘܛܵܥܹܝܬ̇ܘܿܢ ܠܕܲܓܵܠܘܬܵܐ: 3 ܘܝܕܘܿܥܘܿܢ ܕܦܪܸܫܠܹܗ ܡܵܪܝܵܐ ܚܲܣܝܵܐ ܠܢܲܦ̮ܫܹܗ: ܡܵܪܝܵܐ ܒܸܕ ܫܵܡܸܥ ܒܩܪܵܝܬܝܼ ܐܸܠܹܗ. 4 ܪܓܘܿܕܘܼܢ: ܘܠܵܐ ܚܵܛܝܼܬܘܿܢ: ܐܡܘܿܪܘܼܢ ܒܠܸܒܵܟ̣ܘܿܢ ܥܲܠ ܬ̄ܫܘܝܼܬܵܟ̣ܘܿܢ: ܘܫܬܘܿܩܘܼܢ. 5 ܕܒ̣ܘܿܚܘܼܢ ܕܸܒ̣ܚܹ̈ܐ ܕܙܲܕܿܝܼܩܘܼܬܵܐ: ܘܡܣܲܒܪܘܼܢ ܒܡܵܪܝܵܐ. 6 ܪܵܒܵܐ ܝܢܵܐ ܐܵܡܪ̈ܵܢܹܐ: ܡܲܢܝܼ ܡܲܚܙܹܐ ܠܲܢ ܛܵܒ̣ܵܐ: ܡܲܪܸܡ ܥܲܠܲܢ ܒܲܗܪܵܐ ܕܦܵܬܘܼܟܼ: ܝܵܐ ܡܵܪܝܵܐ. 7 ܝܗܸܒܸܠܘܼܟ̣ ܚܲܕܘܼܬܵܐ ܒܠܸܒܝܼ: ܒܘܼܫ ܡ̣ܢ ܙܲܒ̣ܢܵܐ ܕܕܲܚܠܵܝܗܝ ܘܚܲܡܪܵܝܗܝ ܙܸܕܠܗ̄ܘܿܢ. 8 ܒܫܠܵܡܵܐ ܒܸܕ ܕܵܡܟܸܢ ܘܐܵܝܦ ܛܵܠܥܸܢ: ܣܲܒܲܒ ܐܲܢ̄ܬ̇ ܡܵܪܝܵܐ ܒܲܠܚܘܿܕ ܒܐܲܡܝܼܢܘܼܬܵܐ ܒܸܕ ܡܲܬܒܸܕ ܠܝܼ.

 

ܡܙܡܘܪܐ: ܗ.

ܠܪܹܫܵܐ ܕܙܲܡܵܪܹ̈ܐ[6] ܠܢܚܝܼܠܘܿܬ. ܡܲܙܡܘܿܪܵܐ ܕܕܵܘܝܼܕܼ.

1. ܠܗܸܡܸܙܡܲܢܝܼ̈ ܗܲܒܼ[7] ܢܵܬܵܐ ܝܵܐ ܡܵܪܝܵܐ: ܦܲܪܡܝܼ ܢܗܵܓ̰ܬܝܼ. 2 ܡܲܨܝܸܬ ܠܩܵܠܵܐ ܕܨܪܵܚܬܝܼ: ܡܲܠܟܝܼ ܘܐܲܠܵܗܝܼ ܣܲܒܲܒ ܕܒܝܼܘܼܟܼ ܦܲܪܦܘܼܠܹܐ ܝܘܸܢ. 3 ܡܵܪܝܵܐ: ܒܨܲܦܪܵܐ ܒܫܵܡܥܸܬ ܩܵܠܝܼ: ܒܨܲܦܪܵܐ ܒܸܕ ܡܲܪܝܸܙܸܢ ( ܨܠܘܿܬܝܼ) ܐܸܠܘܼܟܼ: ܘܒܸܕ ܩܵܙܕܹܢ. 4 ܣܲܒܲܒ ܠܹܐ ܝܘܸܬ ܐܲܠܵܗܵܐ ܕܒܵܣܡܵܐ ܠܹܗ ܒܒ̣ܝܼܫܬܵܐ ܐܲܢ̄ܬ: ܠܹܐ ܥܵܡܸܪ ܥܲܡܘܼܟܼ ܒܝܼܫܵܐ[8]. 5 ܠܹܐ ܟܵܠܝܼ ܚܬܝܼܪܹ̈ܐ ܩܵܕ̄ܡ ܥܲܝܢܘܼ̈ܟܼ: ܟܹܐ ܣܵܢܹܝܬ ܟܠܵܝ ܦܵܠܚܵܢܹ̈ܐ ܕܥܵܘܠܵܐ. 6 ܟܹܐ ܡܬܲܠܩܸܬ ܠܗܲܡܙܸܡܵܢܹ̈ܐ ܕܕܘܼܓܠܵܐ: ܡ̣ܢ ܐ̄ܢܵܫܵܐ ܕܕܸܡܹ̈ܐ ܘܦܸܠܡܵܐ ܟܹܐ ܓܲܢܓܸܨ ܡܵܪܝܵܐ. 7 ܘܐܵܢܵܐ ܒܪܵܒܵܝܘܼܬܵܐ ܕܛܲܝܒܘܼܬܘܼܟ ܒܸܕ ܥܵܒܼܪܸܢ ܠܒܲܝܬܘܼܟ: ܒܸܕ ܣܵܓ̣ܕܸܢ ܠܗܲܝܟܠܵܐ ܕܩܘܼܕܫܘܼܟ̣ ܒܙܕܘܼܥܬܘܼܟ. 8 ܝܵܐ ܡܵܪܝܵܐ: ܬܲܓܒܸܪܝܼ ܒܙܲܕܝܼܩܘܼܬܘܼܟ ܒܣܲܒܲܒ ܕܒܥܸܠܕܒܼܵܒܼ̈ܐ ܡܲܬܪܸܨ ܩܵܕ̄ܡܝܼ ܐܘܼܪܚܘܼܟܼ. 9 ܣܲܒܲܒ ܕܠܲܝܬ ܒܦܘܼܡܵܝܗܝ ܬܪܝܼܨܘܼܬܵܐ: ܓܵܘܵܝܗܝ ܒܝܼܫܘܼܝܵܬܹ̈ܐ: ܩܲܒ̣ܪܵܐ ܦܬܝܼܚܬܵܐ ܒܵܠܘܿܥܬܵܝܗܝ: ܠܸܫܵܢܵܝܗܝ ܟܹܐ ܡܲܟ̰ܥܝܼ. 10 ܥܒ̣ܘܿܕ ܠܗ̄ܘܿܢ ܚܲܝܵܒܹ̈ܐ[9] ܐܲܠܵܗܵܐ: ܢܵܦܠܝܼ ܡ̣ܢ ܪܸܥܝܵܢܵܝܗܝ: ܒܪܵܒܵܝܘܼܬܵܐ ܕܥܵܘܠܵܝܗܝ ܚܲܪܙܸܦ ܠܗ̄ܘܿܢ: ܣܵܣܵܒ ܕܗ̄ܘܹܠܘܿܢ ܥܵܨܝܹ̈ܐ ܥܲܠܘܼܟ̣. 11 ܘܚܵܕܝܼ ܟܠܵܝܗܝ ܕܡܣܲܒܪܝܼ ܒܝܼܘܼܟ: ܠܥܵܠܲܡ ܡܫܲܒܚܝܼ ܠܘܼܟܼ: ܘܟܵܣܹܝܬ ܥܲܠܵܝ: ܘܦܵܨܚܝܼ ܒܝܼܘܼܟܼ ܡܲܚܸܒܵܢܹ̈ܐ ܕܫܸܡܘܼܟ̣. 12 ܣܲܒܲܒ ܕܐܲܢ̄ܬ̇ ܒܸܕ ܒܵܪܟܸ݂ܬ ܠܙܲܕܝܼܩܵܐ: ܝܵܐ ܡܵܪܝܵܐ: ܐܲܝܟ ܣܲܟܪܵܐ ܚܵܕܪܸܬ ܠܹܗ ܒܣܵܡܬܘܼܟܼ .

 

ܡܙܡܘܪܐ: ܘ.

ܠܪܹܫܵܐ ܕܙܲܡܵܪܹ̈ܐ: [10] ܒܢܓܝܼܢܘܿܬ: ܥܲܠ ܗܲܫܡܝܼܢܝܼܬ ܡܲܙܡܘܿܪܵܐ ܕܕܵܘܝܼܕ.

1. ܡܵܪܝܵܐ: ܠܵܐ ܒܟܲܪܒܘܼܟ ܡܲܢܟܸܣܸܬ ܠܝܼ: ܘܠܵܐ ܒܚܸܡܬܘܼܟ ܬܲܥܠܡܸܬ ܠܝܼ. 2 ܡܪܲܚܡ ܥܲܠܝܼ: ܝܵܐ ܡܵܪܝܵܐ: ܣܲܒܲܒ ܕܡܪܝܼܥܵܐ ܝܘܸܢ: ܒܲܣܸܡ ܠܝܼ: ܝܵܐ ܡܵܪܝܵܐ: ܣܲܒܲܒ ܕܪܥܸܠܘܼܢ ܓܲܪ̈ܡܝܼ. ܘܢܲܦ̮ܫܝܼ ܪܥܸܠܵܗ̇ ܪܵܒܵܐ: ܘܐܲܢ̄ܬ: ܝܵܐ ܡܵܪܝܵܐ: ܗܲܠ ܐܝܼܡܲܢ.4 ܕܥܘܿܪ: ܝܵܐ ܡܵܪܝܵܐ: ܦܲܨܝܼ ܢܲܦ̮ܫܝܼ: ܦܲܪܸܩ ܠܝܼ ܒܚܵܬܸܪ ܕܛܲܝܒܘܼܬܘܼܟܼ. 5 ܣܲܒܲܒ ܕܠܲܝܬ ܒܡܵܘܬܵܐ ܕܟ̣ܵܪܘܼܟ: ܒܫܝܘܿܠ ܡܲܢܝܼ ܫܵܟܸܪܘܼܟ̣.6 ܟܟ̰ܸܚܠܝܼ ܒܬܲܢܲܚܬܝܼ: ܟܹܐ ܡܲܣܚܸܢ ܒܟܠܹܗ ܠܲܝܠܹܐ ܫܘܝܼܬܝܼ: ܒܕܸܡܥܝܼܬܝܼ ܫܘܝܼܬܝܼ ܟܹܐ ܡܲܬܪܸܢ. 7 ܢܘܸܠܵܗ̇ ܡ̣ܢ ܚܲܫܵܐ ܥܲܝܢܝܼ: ܥܘܼܬܩܸܢܵܐ ܒܟܠܵܝ ܕܸܫܡܸܢܝܼ̈. 8 ܦܪܘܿܩܘܼܢ ܡܸܢܝܼ: ܟܠܵܝ ܦܵܠܚܵܢܹ̈ܐ ܕܥܵܘܠܵܐ: ܣܲܒܲܒ ܫܡܸܥܠܹܗ ܡܵܪܝܵܐ ܩܵܠܵܐ ܕܒܸܟ̣ܝܝܼ. 9 ܫܡܸܥܠܹܗ ܡܵܪܝܵܐ ܢܲܘܢܲܝܬܝܼ: ܡܵܪܝܵܐ ܦܲܪܦܲܠܬܝܼ ܒܸܕ ܩܵܒܸ̇ܠ. 10 ܒܸܕ ܢܵܟܼܦܝܼ ܘܪܵܥܠܝܼ ܪܵܒܵܐ ܟܠܵܝ ܕܸܫܡܸܢܝܼ̈: ܒܸܕ ܕܵܥܪܝܼ: ܒܸܕ ܢܵܟܼܦܝܼ ܡܸܢܫܹܠܬܵܢܹ̈ܐ.

 

ܡܙܡܘܪܐ: ܙ.

ܫܸܓܝܘܿܢ ܕܕܵܘܝܼܕ: ܕܙܡܸܪܹܗ ܠܡܵܪܝܵܐ: ܥܲܠ ܚܲܒܪܹ̈ܐ ܕܟܘܼܫ ܒܸܢܝܵܡܹܝܢܵܝܵܐ.

1. ܡܵܪܝܵܐ: ܐܲܠܵܗܝܼ: ܒܝܼܘܼܟ ܣܒܸܪܝܼ: ܦܲܪܸܩ ܠܝܼ ܡ̣ܢ ܟܠܵܝ ܢܵܦܠܵܢܹ̈ܐ ܒܵܬ̄ܪܝܼ: ܘܦܲܨܝܼ ܠܝܼ. 2 ܕܠܵܐ ܐܲܝܟ ܐܲܪܝܵܐ ܦܲܪܦܸܛ ܢܲܦ̮ܫܝܼ: ܘܠܲܝܬ ܡܦܲܨܝܵܢܵܐ.3 ܡܵܪܝܵܐ ܐܲܠܵܗܝܼ: ܐܸܢ ܥܒܸܕܠܝܼ ܐܵܗܵܐ: ܐܸܢ ܐܝܼܬ ܥܵܘܠܵܐ ܒܐܝܼܕܵܬܝܼ̈: 4 ܐܸܢ ܦܪܸܥܠܝܼ ܠܥܵܒ̣ܕܵܢܵܐ ܕܫܠܵܡܵܐ ܥܲܡܝܼ ܒܝܼܫܬܵܐ: ܘܣܠܸܒܠܝܼ ܠܕܸܫܡܸܢܝܼ ܚܘܼܪܵܝܝܼ: 5 ܢܵܦܸܠ ܕܸܫܡܸܢ ܒܵܬ̄ܪ ܢܲܦ̮ܫܝܼ ܘܡܵܛܹܐ ܠܵܗ̇: ܘܕܲܫܕܸܫ ܠܐܲܪܥܵܐ ܚܲܝܝܼ̈: ܘܐܝܼܩܵܪܝܼ ܒܥܲܦܪܵܐ ܡܲܫܪܹܐ. 6 ܩܘܼܡ̄: ܡܵܪܝܵܐ: ܒܚܸܡܬܘܼܟ: ܪܘܼܡ ܥܲܠ ܚܬܵܪ̈ܝܵܬܹܐ ܕܕܸܫܡܸܢܝܼ̈: ܘܪܥܘܿܫ ܐܸܠܝܼ: ܕܝܼܘܵܢ ܦܩܸܕܠܘܼܟ. 7 ܘܓ̰ܵܡܵܥܲܬ ܕܡܸܠܲܬܹ̈ܐ ܓ̰ܵܡܥܵܐ ܚܵܕܸܪ̈ܘܵܢܘܼܟ: ܘܒܘܼ ܕܝܼܵܗ̇ ܠܡܪܵܘܡܵܐ ܕܥܘܿܪ. 8 ܡܵܪܝܵܐ ܟܹܐ ܕܵܝܸܢ ܛܵܝܸܦܹ̈ܐ: ܕܘܼܢܝܼ: ܡܵܪܝܵܐ: ܐܲܝܟ ܙܲܕܝܼܩܘܼܬܝ ܘܐܲܝܟ ܬܲܡܝܼܡܘܼܬܝ ܥܲܠܝܼ. 9 ܬܲܡܸܡ ܠܵܗ̇: ܦܲܪܦܘܼܠܹܐ ܝܘܸܢ: ܒܝܼܫܬܵܐ ܕܒ̣ܝܼܫܹ̈ܐ: ܘܡܲܩܘܸܬ ܙܲܕܝܼܩܵܐ: ܒܵܚܪܵܢܵܐ ܕܠܸܒܵܘܵܬܹ̈ܐ ܘܟܘܼܠܝܵܬܹ̈ܐ (ܝܠܹܐ) ܐܲܠܵܗܵܐ ܙܲܕܝܼܩܵܐ. 10 ܣܲܟܪܝܼ ܠܟܸܣ ܐܲܠܵܗܵܐ: ܦܵܪܩܵܢܵܐ ܕܬܪ̈ܝܼܨܹܐ ܕܠܸܒܵܐ. 11 ܐܲܠܵܗܵܐ ܕܲܝܵܢܵܐ ܙܲܕܝܼܩܵܐ ܝܠܹܗ: ܘܐܲܠܵܗܵܐ ܟܵܪܒܵܢܵܐ ܒܟܠ ܝܘܿܡܵܐ. 12 ܐܸܢ ܠܵܐ ܕܵܥܸܪ: ܣܲܝܦܹܗ ܒܸܕ ܡܲܚܪܸܦ: ܩܸܫܬܹܗ ܡܬܸܚܠܹܗ: ܘܗܘܼܕܪܵܐ ܠܹܗ. 13 ܘܐܸܠܹܗ ܗܘܼܕܸܪܹܗ ܟ̰ܲܟܹ̈ܐ ܕܡܵܘܬܵܐ: ܓܹܐܪ̈ܵܘܗܝ ܠܵܗܝܵܢܹ̈ܐ ܟܹܐ ܥܵܒܸܕ. 14 ܗܵܐ: ܟܹܐ ܕܵܒܸܩ ܚܸܒ̣ܠܹ̈ܐ ܥܵܘܵܠܵܐ: ܘܒܛܸܢܹܗ ܦܸܠܡܵܐ: ܘܝܠܸܕܠܹܗ ܕܘܼܓܠܵܐ. 15 ܒܹܪܵܐ ܘܚܦܸܪܹܗ ܘܚܪܝܼܛܵܐ ܠܗ: ܘܢܦܸܠܹܗ ܒܓܘܼܒܵܐ ܕܬܘܼܪܸܨܠܹܗ. 16 ܒܸܕ ܕܵܥܸܪ ܦܸܠܡܹܗ ܒܪܹܫܹܗ: ܘܥܲܠ ܡܵܘܥܝܼܬܹܗ ܛܠܘܼܡܝܹܗ ܒܸܕ ܨܵܠܹܐ. 17 ܒܸܕ ܫܵܟܪܸܢ ܠܡܵܪܝܵܐ ܐܲܝܟ ܙܲܕܝܼܩܘܼܬܹܗ: ܘܒܸܕ ܙܵܡܪܸܢ ܫܸܡܵܐ ܕܡܵܪܝܵܐ ܥܸܠܵܝܵܐ.

 

ܡܙܡܘܪܐ: ܚ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܓܬܝܼܬ ܡܲܙܡܘܿܪܵܐ ܕܕܵܘܝܼܕܼ.

1. ܡܵܪܝܵܐ ܡܵܪܲܢ: ܟܡܵܐ ܚܩܝܼܪܵܐ ܝܠܹܗ ܫܸܡܘܼܟ ܒܟܠܵܗ̇ ܐܲܪܥܵܐ: ܕܝܸܗ̄ܒ̣ܠܘܼܟ ܚܸܩܪܘܼܟ̣ ܥܲܠ ܫܡܲܝ̈ܵܐ! 2 ܡ̣ܢ ܦܘܼܡܵܐ ܕܝܲܠܘܕ̈ܐ ܘܕܡܵܝܨܵܢ̈ܐ ܫܘܼܬܸܐܣܠܘܼܟ ܚܸܩܪܵܐ: ܒܣܲܒܲܒ ܕܕܲܪ̈ܩܘܼܒܼܠܘܼܟ: ܠܡܲܫܠܘܼܝܹܐ ܕܸܫܡܸܢ ܘܫܵܩܠܵܢܵܐ ܕܬܘܼܥܠܵܐ. 3 ܟܲܕ ܚܵܙܹܝܢ ܫܡܲܝܘܼ̈ܟ: ܦܘܼܠܚܵܢܵܐ ܕܨܸܒܥܵܬܘܼ̈ܟ: ܣܲܗܪܵܐ ܘܟܵܘܟ̣ܒܹ̈ܐ ܕܬܘܼܪܸܨܠܘܼܟ̣: 4 ܡܘܕܝܼ ܝܠܹܐ ܐܢܵܫܵܐ: ܕܕܵܟ̣ܪܹܬ ܠܹܗ: ܘܒܲܪܢܵܫܵܐ: ܕܣܲܚܒܸܪܸܬ ܠܹܗ: 5 ܘܡܘܼܒܸܨܪܘܼܟ̣ ܐܸܠܹܗ ܚܲܕ̄ܟ̰ܵܐ ܡ̣ܢ [11] ܐܲܠܵܗܵܐ: ܘܒܐܝܼܩܵܪܵܐ ܘܚܸܩܪܵܐ ܟܘܿܠܸܠܘܼܟ̣ ܐܸܠܹܗ. 6 ܝܸܗܒ̣ܠܘܼܟ̣ ܫܘܼܠܛܵܢܐ ܐܸܠܹܗ ܥܲܠ ܦܘܼܠܚܵܢܹ̈ܐ ܕܐܝܼܕܵܬܘܼ̈ܟ: ܟܠ ܡܘܼܬܸܒ̣ܠܘܼܟ̣ ܬܚܘܿܬ ܐܲܩܠܵܬܘܼ̈ܗܝ. 7 ܥܸܪ̈ܒܹܐ ܘܬܵܘܪܹ̈ܐ ܟܠܵܝ: ܘܐܵܦ ܚܲܝ̈ܘܵܬܐ ܕܕܲܫܬܵܐ: 8 ܛܲܝܪܹ̈ܐ ܕܫܡܲܝܵܐ: ܘܢܘܼܢܹ̈ܐ ܕܝܲܡܵܐ: ܥܵܒ̣ܪ̈ܵܢܐ ܒܐܘܼܪ̈ܚܵܬܹܐ ܕܝܵܡܵܬܹ̈ܐ: 9 ܡܵܪܝܵܐ: ܡܵܪܲܢ: ܟܡܵܐ ܚܩܝܼܪܵܐ ܝܠܹܐ ܫܸܡܘܼܟ̣ ܒܟܠܵܗ̇ ܐܲܪܥܵܐ:

 

ܡܙܡܘܪܐ: ܛ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܡܵܘܬܵܐ ܕܠܵܒ̣ܵܢ. ܡܲܙܡܘܿܪܵܐ ܕܕܵܘܝܼܕ.

1. ܒܸܕ ܫܵܟܪܸܢ ܠܡܵܪܝܵܐ ܒܟܠܹܗ ܠܸܒܝܼ: ܒܸܕ ܡܗܲܩܸܝܢ ܟܠܵܝ ܥܵܓ̰ܒܸܘܼܝܵܬܘܼ̈ܟ. 2 ܒܸܕ ܚܵܕܸܝܢ ܦܵܨܚܸܢ ܒܝܼܘܼܟ̣: ܒܸܕ ܙܵܡܪܸܢ ܫܸܡܘܼܟ̣: ܥܸܠܵܝܵܐ. 3 ܒܕܥܵܪܬܵܐ ܕܕܸܫܡܸܢܝܼ̈ ܠܵܒܵܬ̄ܪܵܐ: ܟܹܐ ܬܲܪܩܸܠܝܼ ܘܬܵܠܩܝܼ ܡ̣ܢ ܩܵܕ̄ܡܘܼܟ. 4 ܣܲܒܲܒ ܕܥܒܸܕܠܘܼܟ ܦܘܼܪܥܵܢܝܼ ܘܕܝܼܘܵܢܝܼ: ܝܬܸܒ̣ܠܘܼܟ̣ ܥܲܠ ܟܘܼܪܣܝܵܐ ܒܸܕܝܵܢܵܐ ܙܲܕܝܼܩܘܼܬܵܐ. 5 ܢܓ̰ܸܘܠܘܼܟ ܒܛܵܝܸܦܹ̈ܐ: ܬܘܼܠܸܩܠܘܼܟ ܒܝܼܫܵܐ: ܫܸܡܵܝܗܝ ܓܪܸܕܠܘܼܟ ܠܥܵܠܲܡ ܥܵܠܡܝܼܢ.6 ܕܸܫܡܸܢܹ̈ܐ ܬܸܡܠܘܿܢ: ܚܪܸܒܼܠܗ̄ܘܢ ܠܥܵܠܲܡ: ܘܡܕܝܼܢܵܬܹ̈ܐ ܥܩܸܪܘܼܟ: ܬܠܸܩܠܹܗ ܕܟ̣ܵܪܵܝܗܝ. 7 ܘܡܵܪܝܵܐ ܠܥܵܠܲܡ ܒܸܕ ܝܵܬܸܒ̣: ܡܘܼܩܝܸܡܵܐ ܝܠܹܗ ܠܕܝܼܘܵܢ ܟܘܼܪܣܝܹܗ. 8 ܘܗ̇ܘ ܒܸܕ ܕܵܐܹܢ ܒܪܝܼܬܵܐ ܒܙܲܕܝܼܩܘܼܬܵܐ: ܒܸܕ ܥܵܒܸܕ ܕܝܼܘܵܢ ܠܡܸܠܲܬܹ̈ܐ ܒܬܪܘܼܨܘܼܬܵܐ: 9 ܘܒܸܕ ܗܵܘܹܐ ܡܵܪܝܵܐ ܒܸܝܬ ܓܵܘܣܵܐ ܠܒܠܝܼܣܹ̈ܐ: ܒܹܝܬ ܓܵܘܣܵܐ ܒܙܲܒ̣ܢܹ̈ܐ ܕܐܘܼܠܨܵܢܵܐ. 10 ܘܒܸܕ ܦܵܝܫܝܼ ܒܣܲܒܼܪܵܐ ܒܝܼܘܼܟ ܝܵܕܥܵܢܹ̈ܐ ܕܫܸܡܘܼܟ: ܣܲܒܲܒ ܠܵܐ ܫܒܸܩܠܘܼܟ ܠܛܵܥܝܵܢܹ̈ܐ ܐܸܠܘܼܟ: ܡܵܪܝܵܐ. 11 ܙܡܘܿܪܘܼܢ ܠܡܵܪܝܵܐ: ܝܵܬܒ̣ܵܢܵܐ ܒܸܨܗܝܘܿܢ: ܡܲܕܥܘܿܢ ܓܵܘ ܥܲܡܡܹ̈ܐ ܨܸܢ̈ܥܵܬܹܗ. 12 ܣܲܒܲܒ ܕܛܵܥܝܵܢܵܐ ܠܕܸܡܹ̈ܐ: ܐܸܠܵܝܗܝ ܟܹܐ ܕܵܟܸܪ: ܠܹܐ ܢܵܫܹܐ ܡܲܩܘܲܚܬܵܐ ܕܡܘܼܠܝܸܨܹ̈ܐ. 13 ܪܲܚܸܡ ܥܲܠܝܼ: ܝܵܐ ܡܵܪܝܵܐ: ܚܙܝܼ ܫܘܼܥܒܵܕܝܼ ܡ̣ܢ ܣܵܢܝܵܢܝܼ̈: ܝܵܐ ܡܵܪܡܲܢܝܼ ܡ̣ܢ ܬܲܪ̈ܥܵܢܹܐ ܕܡܵܘܬܵܐ: 14 ܩܵܐ ܕܡܗܲܩܹܝܢ ܟܠܵܝ ܬܸܫܒ̇ܘܿܚܝܵܬܘܼ̈ܟ: ܒܬܲܪ̈ܥܢܐ ܕܒܪܵܬܵܐ ܕܨܸܗܝܘܿܢ: ܒܸܕ ܦܵܨܚܸܢ ܒܦܘܼܪܩܵܢܘܼܟ. 15 ܛܒܸ̇ܥܠܗ̄ܘܿܢ ܥܡܡܹ̈ܐ ܒܓܘܼܒܵܐ ܕܥܒܸܕܠܗ̄ܘܿܢ: ܒܓܲܪܕܵܐ ܕܛܘܼܡܸܪܘܼܢ ܦܸܫܠܵܗ̇ ܕܒ̣ܝܼܩܬܵܐ ܐܲܩܠܵܝ. 16 ܦܸܫܠܹܗ ܝܕܝܼܥܵܐ ܡܵܪܝܵܐ: ܕܝܼܘܵܢ ܥܒܸܕܠܹܗ: ܒܦܘܼܠܚܵܢܵܐ ܕܐܝܼܕܵܘ̈ܗܝ ܟܹܐ ܦܵܐܸܫ ܕܒ̣ܝܼܩܵܐ ܒܬ̄ܩܘܼܠܬܵܐ ܒܝܼܫܵܐ. 17 ܒܸܕ ܕܵܥܪܝܼ ܒܝܼܫܹ̈ܐ ܠܫܝܘܿܠ: ܟܠܵܝ ܥܲܡܡܹ̈ܐ ܢܵܫܵܝܵܢܹ̈ܐ ܕܐܲܠܵܗܵܐ. 18 ܣܲܒܲܒ ܕܠܵܐ ܠܥܵܠܲܡ ܦܵܐܹܫ ܢܸܫܝܵܐ ܡܸܣܟܹܢܵܐ: ܣܲܒܼܪܵܐ ܕܡܘܼܠܝܸܨܹ̈ܐ (ܠܹܐ) ܬܵܠܹܩ ܠܥܵܠܲܡ.19 ܩܘܼܡ: ܡܵܪܝܵܐ: ܠܵܐ ܚܲܝܠܸܢ ܒܲܪܢܵܫܵܐ: ܦܵܝܫܝܼ ܕܝܼܢܹܐ ܥܲܡܡܹ̈ܐ ܩܵܕ̄ܡ ܦܵܬܘܼܟ. 20 ܡܲܬܸܒ̣: ܝܵܐ ܡܵܪܝܵܐ: ܨܲܗܡ ܥܲܠܵܝ: ܩܐ ܕܝܵܕܥܝܼ ܥܲܡܡܹ̈ܐ ܕܒܢܲܝܢܵܫܹ̈ܐ ܝܢܵܐ.

 

ܡܙܡܘܪܐ: ܝ.

1. ܩܵܡܘܿܕܝܼ: ܝܵܐ ܡܵܪܝܵܐ: ܟܵܠܹܝܬ ܒܪܸܚܩܵܐ: ܡܛܲܫܹܝܬ ܓܵܐܢܘܼܟ ܒܙܲܒ̣ܢܹ̈ܐ ܕܐܘܼܠܨܵܢܵܐ: 2 ܒܫܘܼܒܼܗܵܪܹܗ ܕܒܝܼܫܵܐ ܟܹܐ ܝܵܩܸܕ ܡܸܣܟܹܢܵܐ: ܟܹܐ ܦܵܝܫܝܼ ܕܒ̣ܝܼܩܹ̈ܐ ܒܬܲܚܡܲܢܬܵܐ ܕܚܫܸܒ̣ܠܗ̄ܘܿܢ. 3 ܣܲܒܲܒ ܕܟܹܐ ܚܵܬܸܪ ܒܝܼܫܵܐ ܒܫܲܗ̄ܘܲܬܝܵܬ̈ܐ ܕܓܵܐܢܹܗ:[12] ܘܓ̰ܵܠܓܵܢܵܐ ܟܹܐ ܦܵܐܹܫ ܒܘܿܪܟܼܵܐ: ܟܹܐ ܡܲܣܠܹܗ ܠܡܵܪܝܵܐ.4 ܒܝܼܫܵܐ ܒܪܵܡܘܼܬܵܐ ܕܦܵܬܹܗ ܠܹܐ ܨܲܚܨܹܐ. ܠܲܝܬ ܐܲܠܵܗܵܐ: ܒܟܠܵܝ ܬܲܚܡܲܢ̈ܝܵܬܘܼܗܝ. 5 ܩܘܼܝܹ̈ܐ ܝܢܵܐ ܐܘܼܪ̈ܚܵܬܘܼܗܝ ܒܟܠ ܙܲܒ̣ܢܵܐ: ܪ̈ܵܡܹܐ ܝܢܵܐ ܕܝܼܘܵܢܘܼ̈ܟ ܡܒܲܪܩܘܼܒ̣ܠܹܗ: ܟܠܵܝ ܕܸܫܡܸܢܘܼ̈ܝܗܝ ܟܹܐ ܢܵܦܸܚ ܒܝܼܵܝܗܝ. 6 ܐܡܸܪܹܗ ܒܠܸܒܹܗ: ܠܹܐ ܫܵܥܫܸܢ: ܠܕܵܘܪܵܐ ܘܕܵܘܪܵܐ ܠܹܐ (ܗܵܘܹܝܢ) ܒܒܝܼܫܬܵܐ.7 ܦܘܼܡܹܗ ܡܸܠܝܵܐ ܝܠܹܗ ܠܵܘܛܬܵܐ: ܘܦܸܠܡܹ̈ܐ: ܘܙܠܘܼܡܝܵܐ: ܬܚܘܿܬ ܠܸܫܵܢܹܗ ܠܹܥ̄ܒܵܐ ܘܥܵܘܠܵܐ. 8 ܟܹܐ ܝܵܬܹܒ̣ ܒܟܡܹܐܢܵܐ ܕܡܵܬܘܵܬܹ̈ܐ: ܒܛܸܫܘܵܐ ܟܹܐ ܩܵܛܸܠ ܠܙܲܕܝܼܩܵܐ: ܥܲܝܢܘܼ̈ܗܝ ܠܟܲܣܝܼܪܹ̈ܐ ܟܹܐ ܡܓܲܫܩܝܼ. 9 ܟܹܐ ܡܵܚܹܐ ܟܡܹܐܢܵܐ ܒܛܸܫܘܵܐ ܐܲܝܟ ܐܲܪܝܵܐ ܒܓܸܦܝܼܬܹܗ: ܟܹܐ ܡܵܚܹܐ ܟܡܹܐܢܵܐ[13] ܠܸܓ̰ܠܵܓܵܐ ܠܡܘܼܠܝܸܨܵܐ: ܟܹܐ [14] ܚܵܛܹܦ ܠܡܘܼܠܝܸܨܵܐ: ܐܝܼܡܲܢ ܕܓܵܪܸܫ ܠܹܗ ܒܓܲܪܕܹܗ: 10 ܘܟܹܐ ܩܵܢܸܙ ܟܹܐ ܟܵܐܹܦ: ܘܟܹܐ ܢܵܦܠܝܼ ܒܙܲܪ̈ܒܵܢܘܼܗܝ ܒܹܐܟ̰ܵܪܹ̈ܐ. 11 ܐܡܸܪܹܗ ܒܠܸܒܹܗ: ܢܫܹܐܠܹܗ ܐܲܠܵܗܵܐ: ܦܬܸܠܠܹܗ ܦܵܬܹܗ: ܠܹܐ ܚܵܙܹܐ ܠܥܵܠܲܡ.12 ܩܘܼܡ̄: ܡܵܪܝܵܐ: ܐܲܠܵܗܵܐ: ܡܲܪܸܡ ܐܝܼܕܘܼܟ: ܠܵܐ ܢܵܫܸܝܬ ܠܡܘܼܠܝܸܨܵܐ. 13 ܩܵܐ ܡܘܼܕܝܼ ܡܲܣܠܹܐ ܒܝܼܫܵܐ ܠܐܲܠܵܗܵܐ: ܐܵܡܸܪ ܒܠܸܒܹܗ: ܠܹܐ ܨܲܚܨܹܝܬ: 14 ܚܙܹܐܠܘܼܟ: ܣܲܒܲܒ ܐܲܢ̄ܬ ܥܲܠ ܓ̰ܸܗܘܵܐ ܘܚܲܫܵܐ ܟܹܐ ܚܵܝܪܸܬ: ܠܝܼܵܗ̄ܒ̣ܵܐ ܒܐܝܼܕܘܼܟ: ܥܲܠܘܼܟ ܟܹܐ ܫܵܒܼܩ ܟܲܣܝܼܪܵܐ: ܠܝܲܬܘܼܡܵܐ ܐܲܢ̄ܬ̇ ܟܹܐ ܗܵܘܹܝܬ ܗܲܝܸܪܵܢܵܐ. 15 ܬܵܒ̣ܪܸܬ ܕܪܵܥܢܵܐ ܕܥܵܘܵܠܵܐ: ܘܒܝܼܫܵܐ: ܛܵܥܹܝܬ ܠܒܝܼܫܬܹܗ:[15] ܠܵܐ ܡܵܫ̄ܟ̰ܚܸܬ. 16 ܡܵܪܝܵܐ ܡܲܠܟܵܐ ܝܠܹܗ ܠܥܵܠܲܡ ܥܵܠܡܝܼܢ: ܬܠܸܩܠܗܘܿܢ ܥܲܡܡܹ̈ܐ ܡ̣ܢ ܐܲܪܥܗ. 17 ܣܲܒܼܪܵܐ ܕܡܸܣܟܹܢܹ̈ܐ ܟܹܐ ܫܵܡܥܸܬ ܡܵܪܝܵܐ: ܘܒܵܥܘܼܬܵܐ ܕܠܸܒܵܝܗܝ: ܟܹܐ ܫܵܡܥܵܐ ܢܵܬܘܼܟ: ܠܸܕ̣ܝܵܢܵܐ ܠܝܲܬܘܼܡܹ̈ܐ ܘܠܟܲܣܝܼܪ̈ܐ: ܕܠܵܐ ܡܲܙܝܸܕ ܡܸܢ̄ܕܪܹܫ ܠܡܛܲܠܘܿܩܹܐ ܒܢܲܝ̈ܢܵܫܵܐ ܡ̣ܢ ܐܲܪܥܵܐ.

 

ܡܙܡܘܪܐ: ܝܐ.

ܠܪܹܫܵܐ ܕܙܵܡܵܪܹ̈ܐ. ܕܕܵܘܝܼܕ.

1. ܒܡܵܪܝܵܐ ܣܒܸܪܝܼ: ܕܵܐܟ̣ܝܼ ܒܐܝܼܡܵܪܵܐ ܝܬ̇ܘܿܢ ܠܢܲܦ̮ܫܝܼ: ܥܪܘܿܩܝ ܠܛܘܼܪ̈ܲܝܟ̣ܘܿܢ: ܐܲܝܟܼ ܨܸܦܪܵܐ: 2 ܣܲܒܲܒ: ܗܵܐ: ܚܲܛܵܝ̈ܐ ܡܠܹܐ ܠܗ̄ܘܢ ܩܸܫܬܵܐ: ܘܬܘܿܪܸܨܠܗ̄ܘܿܢ ܓܹܐܪܵܝܗܝ ܥܲܠ ܝܲܬܪܵܐ: ܠܪܲܦܘܼܝܹܐ ܒܥܲܡܛܵܢܵܐ ܒܬܪ̈ܝܼܨܹܐ ܕܠܸܒܵܐ. 3 ܟܲܕ ܣܛܘܼܢܹ̈ܐ ܦܵܝܫܝܼ ܬܠܝܼܚܹܐ: ܙܲܕܝܼܩܵܐ ܡܘܼܕܝܼ ܥܵܒܸܕ: 4 ܡܵܪܝܵܐ ܒܗܲܝܟܠܵܐ ܕܩܘܼܕܫܘܼܗܝ: ܡܵܪܝܵܐ: ܒܫܡܲܝܵܐ ܬܪܘܿܢܘܿܣܹܗ: ܥܲܝܢܘܼ̈ܗܝ ܟܹܐ ܚܵܙܝܼ: ܬܸܠܦܵܦܵܘܼ̈ܗܝ ܟܹܐ ܒܵܚܪܝܼ ܒܢܲܝ̈ܢܵܫܵܐ. 5 ܡܵܪܝܵܐ ܙܲܕܝܼܩܵܐ ܟܹܐ ܒܵܚܸܪ: ܘܒܝܼܫܵܐ ܘܡܲܚܸܒܵܢܵܐ ܕܙܠܘܼܡܝܵܐ ܟܹܐ ܣܵܢܝܵܐ ܓܵܐܢܹܗ. 6 ܒܸܕ ܡܲܥܪܹܐ ܥܲܠ ܒܝܼܫܹ̈ܐ ܢܸܫܒܹ̈ܐ: ܢܘܼܪܵܐ ܘܟܒܼܪܝܼܬܵܐ ܘܦܵܘܚܵܐ ܚܲܡܝܼܡܵܐ ܣܲܗܡܵܐ ܕܟܵܣܵܝܗܝ. 7 ܣܲܒܲܒ ܙܲܕܝܼܩܵܐ ܝܠܹܗ ܡܵܪܝܵܐ: ܙܲܕܝܼܩܘܼܬ̣ܵܐ ܟܹܐ ܡܲܚܸܒ: ܬܪ̈ܝܼܨܹܐ ܟܹܐ ܚܵܙܝܼ ܦܵܬܘܵܬܹ̈ܗ.

 

ܡܙܡܘܪܐ: ܝܒ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܗܲܫܡܝܼܢܝܼܬ. ܡܲܙܡܘܿܪܵܐ ܕܕܵܘܝܼܕ.

1. ܡܦܲܪܸܩ: ܝܵܐ ܡܵܪܝܵܐ: ܣܲܒܲܒ ܕܬܸܡܠܹܗ ܛܵܒ̣ܵܐ: ܣܲܒܲܒ ܕܦܪܸܩܠܗ̄ܘܿܢ ܡܗܲܝܡܢܹ̈ܐ ܡ̣ܢ ܒܢܲܝ̈ܢܵܫܵܐ. 2 ܣܪܝܼܩܘܼܬ̣ܵܐ ܟܹܐ ܗܲܡܙܸܡܝܼ: ܐܢܵܫܵܐ ܥܲܡ ܚܲܒ̣ܪܹܗ: ܒܣܸܦܬܵܐ ܟ̰ܘܼܥܵܢܬܵܐ: ܒܠܸܒܵܐ ܘܠܸܒܵܐ ܟܹܐ ܗܲܡܙܸܡܝܼ. 3 ܒܸܕ ܩܵܛܸܥ ܡܵܪܝܵܐ ܟܠܵܝܗܝ ܣܸܦܘܵܬܹ̈ܐ ܟ̰ܘܼܥܵܢܹ̈ܐ: ܠܸܫܵܢܵܐ ܕܗܲܡܙܸܡ ܓܘܼܪ̈ܘܼܝܵܬܹܐ: 4 ܕܐܡܸܪܘܼܢ: ܒܠܸܫܵܢܲܢ ܒܸܕ ܙܲܚܡܸܢܵܚ: ܣܸܦ̈ܘܵܬܲܢ ܥܲܡܲܢ ܝܼܢܵܐ: ܡܲܢܝܼ ܝܠܹܗ ܡܵܪܵܐ ܥܲܠܲܢ: 5 ܡ̣ܢ ܙܠܘܼܡܝܵܐ ܕܡܸܣܟܹܢܹ̈ܐ: ܡ̣ܢ ܬܲܢܲܚܬܵܐ ܕܦܲܩܝܼܪܹ̈ܐ: ܐܵܕܝܼܵܐ ܒܸܕ ܩܵܝܡܸܢ: ܒܹܐܡܵܪܵܐ ܝܠܹܗ ܡܵܪܝܵܐ: ܒܸܕ ܡܲܬܒܸܢ ܒܦܵܪܲܩܬܵܐ (ܗܵܘ̇) ܕܢܵܦܚܝܼ ܒܝܹܗ. 6 ܚܲܒ̇ܪܹ̈ܐ ܕܡܵܪܝܵܐ ܚܲܒ̇ܪܹ̈ܐ ܕܸܟ̣ܝܹ̈ܐ ܝܢܵܐ: ܣܹܐܡܵܐ ܨܘܼܪܸܦܵܐ ܒܐܲܬܘܼܢܵܐ ܕܐܲܪܥܵܐ: ܨܘܼܦܝܵܐ ܫܲܒ̣ܥܵܐ ܦܘܼܡܹ̈ܐ. 7 ܐܲܢ̄ܬ̇: ܡܵܪܝܵܐ: ܒܸܕ ܢܵܛܪܸܬ ܠܗ̄ܘܿܢ: ܒܸܕ ܚܵܡܹܝܬ ܠܗ̄ܘܿܢ ܡ̣ܢ ܕܐܵܗܵܐ ܕܵܘܪܵܐ ܠܥܵܠܲܡ. 8 ܚܵܕܸܪ̈ܘܵܢܹܐ ܒܝܼܫܹ̈ܐ ܟܹܐ ܚܵܕܪܝܼ: ܟܲܕ ܪܵܝܡܵܐ ܡܲܣܠܵܝܬܵܐ ܠܒܢܲܝ̈ܢܵܫܵܐ.

 

ܡܙܡܘܪܐ: ܝܓ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕܼ.

1. ܗܲܠ ܐܝܼܡܲܢ: ܝܵܐ ܡܵܪܝܵܐ: ܢܵܫܹܝܬ ܠܝܼ ܠܥܵܠܲܡ: ܗܲܠ ܐܝܼܡܲܢ ܡܛܲܫܹܝܬ ܦܵܬܘܼܟ ܡܸܢܝܼ: 2 ܗܲܠ ܐܝܼܡܲܢ ܡܲܬܒܸܢ ܦܲܫܲܡܬܐ ܒܢܲܦ̮ܫܝܼ: ܘܚܲܫܵܐ ܒܠܸܒܝܼ ܟܠܝܘܿܡ: ܗܲܠ ܐܝܼܡܲܢ ܪܵܝܸܡ ܕܸܫ̰ܡܸܢܝܼ ܥܲܠܝܼ: 3 ܚܘܼܪ: ܓ̰ܲܘܸܒ ܠܝܼ: ܡܵܪܝܵܐ ܐܲܠܵܗܝܼ: ܒܲܗܪܸܢ ܥܲܝܢܝܼ̈: ܠܵܐ ܗ̄ܘ̣ܵܐ ܕܛܵܠܥܸܢ ܠܡܵܘܬܵܐ: 4 ܠܵܐ ܗ̄ܘ̣ܵܐ ܕܐܵܡܸܪ ܕܸܫ̰ܡܸܢܝܼ: ܩܲܡ ܓ̣ܵܠܒܸܢܹܗ: ܡܲܠܝܸܨܵܢܝܼ̈ ܦܵܨܚܝܼ ܟܲܕ ܫܵܥܫܸܢ. 5 ܘܐܵܢܵܐ ܒܛܲܝܒܘܬܘܼܟ ܣܒܸܪܝܼ: ܦܵܨܸܚ ܠܸܒܝܼ ܒܦܘܼܪܩܵܢܘܼܟ: 6 ܒܸܕ ܙܵܡܪܸܢ ܠܡܵܪܝܵܐ: ܣܲܒܲܒ ܕܥܒܸܕܠܹܗ ܟܫܝܼܛܘܼܬܵܐ ܥܲܠܝܼ.

 

ܡܙܡܘܪܐ: ܝܕ.

ܠܪܹܫܵܐ ܕܙܵܡܵܪܹ̈ܐ. ܕܕܵܘܝܼܕ.

1. ܐܡܸܪܹܗ ܣܲܟܼܠܵܐ ܒܠܸܒܹܗ: ܠܲܝܬ ܐܲܠܵܗܵܐ. ܚܪܸܒ̣ܠܗ̄ܘܿܢ: ܥܒܸܕܠܗ̄ܘܼܢ ܦܘܼܠܚܵܢܵܐ ܓܘܼܢܓܸܨܵܐ: ܠܲܝܬ ܕܥܵܒܸܕ ܛܵܒ̣ܬܵܐ.2 ܡܵܪܝܵܐ ܡ̣ܢ ܫܡܲܝܵܐ ܚܸܪܹܗ ܥܲܠ ܒܢܲܝ̈ܢܵܫܵܐ: ܠܸܚܙܵܝܵܐ ܐܸܢ ܐܝܼܬ ܦܲܪܡܝܼܵܢܵܐ: ܛܵܥܝܵܢܵܐ ܠܐܲܠܵܗܵܐ. 3 ܟܠ ܩܠܸܒ̇ܠܗ̄ܘܿܢ: ܡܸܚܕܵܕܹ̈ܐ ܚܪܸܒ̣ܠܗ̄ܘܿܢ: ܠܲܝܬ ܕܥܵܒܸܕ ܛܵܒ̣ܬܵܐ: ܠܲܝܬ ܐܵܦ ܚܲܕ̄. 4 ܗܵܐ: ܠܵܐ ܝܕܸܥܠܗ̄ܘܿܢ ܟܠܵܝܗܝ ܦܵܠܚܵܢܹ̈ܐ ܕܥܵܘܠܵܐ. ܐܵܟ̣ܠܵܢܹ̈ܐ ܕܛܵܝܸܦܝܼ ( ܐܲܝܟ ܕ) ܐ̄ܟܸܠܠܗ̄ܘܿܢ ܠܲܚܡܵܐ: ܠܡܵܪܝܵܐ ܠܵܐ ܩܪܹܐܠܗ̄ܘܿܢ. 5 ܬܵܡܵܐ ܙܕܸܥܠܗ̄ܘܿܢ ܙܕܘܼܥܬܵܐ: ܣܲܒܲܒ ܕܐܲܠܵܗܵܐ ܒܕܵܘܪܵܐ ܕܙܲܕܝܼܩܵܐ ܝܠܹܗ. 6 ܪܸܥܝܵܢܵܐ ܕܡܸܣܟܹܢܵܐ ܟܹܐ ܡܲܢܟܸܦܝܼܬܘܿܢ: ܣܲܒܲܒ ܡܵܪܝܵܐ ܝܠܹܗ ܣܸܬܵܪܹܗ. 7 ܡܲܢܝܼ ܝܵܗ̄ܒܸܠ ܡ̣ܢ ܨܹܗܝܘܿܢ ܦܘܼܪܩܵܢܵܐ ܕܝܼܣܪܵܝܹܠ: ܟܲܕ ܡܲܕܥܸܪ ܡܵܪܝܵܐ ܣܠܵܒܬܵܐ ܕܛܵܝܸܦܹܗ: ܦܵܨܸܚ ܝܲܥܩܘܿܒ̣: ܚܵܕܹܐ ܝܼܣܪܵܝܹܠ.

 

ܡܙܡܘܪܐ: ܝܗ.

ܡܙܡܘܪܐ ܕܕܵܘܝܼܕ.

1. ܡܵܪܝܵܐ: ܡܲܢܝܼ ܥܵܡܸܪ ܒܡܲܫܟܢܘܼܟܼ: ܡܲܢܝܼ ܫܵܪܹܐ ܒܛܘܼܪܵܐ ܕܩܘܼܕܫܘܼܟ: ܚܵܕܪܵܢܵܐ ܬܲܡܝܼܡܵܐ: ܘܥܵܒ̣ܕܵܢܵܐ ܕܙܲܕܝܼܩܘܼܬܵܐ: ܘܗܲܡܙܸܡܵܢܵܐ ܕܣܲܪܲܣܬܘܼܬܵܐ ܒܠܸܒܹܗ. 3 ܠܵܐ ܥܵܒܸܕ ܦܲܢܕܵܐ ܒܠܸܫܵܢܹܗ: ܠܵܐ ܥܵܒܸܕ ܠܚܲܒ̣ܪܹܗ ܒܝܼܫܬܵܐ: ܘܠܵܘܡܵܐ ܠܹܐ ܛܵܥܹܢ ܥܲܠ ܫܒ̣ܵܒܹܗ. 4 ܦܸܫܠܹܗ ܡܘܼܣܠܝܼܵܐ ܒܥܲܝܢܵܘ̈ܗܝ ܡܒܘܿܣܪܵܐ: ܘܠܙܵܕܥܵܢ̈ܐ ܕܡܵܪܝܵܐ ܟܹܐ ܡܝܲܩܸܪ. ܟܹܐ ܝܵܡܹܐ ܠܒܝܼܫܬܵܐ ( ܕܓܵܐܢܹܗ) ܘܠܹܐ ܡܲܚܠܸܦ. 5 ܣܹܐܡܹܗ ܠܹܐ ܝܵܗ̄ܒܸܠ ܒܙܵܘܕܘܿܢܝܵܐ: ܘܫܘܼܚܕܵܐ ܥܲܠ ܙܲܟܵܝܵܐ ܠܹܐ ܫܵܩܸܠ. ܥܵܒ̣ܕܵܢܵܐ ܕܐܲܢܲܝ ܠܹܐ ܫܵܥܸܫ ܠܥܵܠܲܡ.

 

ܡܙܡܘܪܐ: ܝܘ.

ܡܸܟ̣ܬܵܡ ܕܕܵܘܝܼܕܼ.

1. ܢܛܘܿܪܝܼ: ܝܵܐ ܐܲܠܵܗܵܐ: ܣܲܒܲܒ ܕܣܒܸܪܝܼ ܒܝܼܘܼܟ. 2 ܐܡܸܪܝܼ ܠܡܵܪܝܵܐ: ܡܵܪܝܼ ܝܘܸܬ ܐܲܢ̄ܬ̇: ܛܵܒ̣ܘܼܬܝܼ ܠܹܐ ܝܠܵܗ̇ ܠܒܲܪ ܡܸܢܘܿܟ. 3 ܠܩܲܕܝܼܫܹ̈ܐ ܕܒܲܐܪܥܵܐ ܝܢܵܐ: ܘܚܩܝܼܪܹ̈ܐ ܕܟܠܹܗ ܪܸܙܵܝܝܼ ܒܝܼܵܝܗܝ. 4 ܒܸܕ ܙܵܝܕܝܼ ܓ̰ܘܼܢܓ̰ܵܪ̈ܵܝܗܝ ܕܡܲܚܠܸܦܝܼ(ܝܸܗܘܿܘܵܐ) ܠܐܚܹܪ̄ܢܵܐ: ܠܹܐ ܨܲܢܨܹܠܸܢ ܢܘܼܩܵܝܵܝ̈ܗܝ ܕܡ̣ܢ ܕܸܡܵܐ: ܘܠܹܐ ܫܵܩܠܸܢ ܫܸܡܵܢܵܝ̈ ܥܲܠ ܣܸܦܘܵܬܝܼ̈. 5 ܡܵܪܝܵܐ ܣܲܗܡܵܐ ܕܝܘܼܪܬܵܢܝܼ ܘܕܟܵܣܝܼ: ܐܲܢ̄ܬ̇ ܝܼܘܸܬ ܕܵܒ̣ܩܵܢܵܐ ܕܦܸܫܟܝܼ. 6 ܚܲܒ̣ܠܹ̈ܐ ܢܦܸܠܘܼܢ ܐܸܠܝܼ ܒܕܘܼܟܵܢܹ̈ܐ ܒܲܣܝܼܡܹ̈ܐ: ܐܵܦ ܝܵܪܬܘܼܬܝܼ ܫܦܸܪܵܗ̇ ܐܸܠܝܼ. 7 ܒܸܕ ܒܵܪܟܸ݂ܢ ܠܡܵܪܝܵܐ ܕܝܸܗ̄ܒܼܠܹܗ ܪܸܥܝܵܢܵܐ ܩܵܐ ܠܝܼ: ܐܵܦ ܒܠܲܝܠܵܘܵܬܹ̈ܐ ܟܹܐ ܬܲܥܠܡܝܼ ܠܝܼ ܟܘܼܠܝܵܬܝܼ̈ 8 ܡܘܿܘܬܸܒ̣ܠܝܼ ܡܵܪܝܵܐ ܠܒܲܪܩܘܼܒ̣ܠܝܼ ܒܕܵܝܸܡܘܼܬܵܐ: ܣܲܒܲܒ ܕܡ̣ܢ ܝܲܡܝܼܢܝܼ ܝܠܹܗ: ܠܹܐ ܫܵܥܫܸܢ. 9 ܒܘܼܕ ܕܐܵܗܵܐ: ܚܕܸܐܠܹܗ ܠܸܒܝܼ: ܘܦܸܨܚܠܹܗ ܐܝܼܩܵܪܝܼ: ܐܦ ܒܸܣܪܝܼ ܒܸܕ ܫܵܪܹܐ ܒܫܸܠܝܘܼܬܵܐ. 10 ܣܲܒܲܒ ܠܹܐ ܫܵܒ̣ܩܸܬ ܢܲܦ̮ܫܝܼ ܒܫܝܘܿܠ: ܠܹܐ ܝܵܗ̄ܒܸܬ ܩܲܕܝܼܫܘܼܟ ܠܸܚܙܵܝܵܐ ܚܪܵܒ̣ܵܐ. 11 ܒܸܕ ܡܲܕܥܸܬ ܠܝܼ ܐܘܼܪܚܵܐ ܕܚܲܝܹ̈ܐ: ܣܒ̣ܵܥܬܵܐ ܕܚܲܕܘܼܝܵܬܹ̈ܐ ܩܵܕ̄ܡ ܦܵܬܘܼܟ ܝܼܠܵܗ̇: ܒܲܣܝܼܡܘܼܝܵܬ̈ܐ ܒܝܲܡܝܼܢܘܼܟܼ ܠܥܵܠܲܡ.

 

ܡܙܡܘܪܐ: ܝܙ.

ܨܠܘܿܬܵܐ ܕܕܵܘܝܼܕܼ.

1. ܫܡܘܿܥ ܝܵܐ ܡܵܪܝܵܐ ܙܲܕܝܼܩܘܼܬܵܐ: ܨܘܼܬ ܠܡܲܩܘܲܚܬܝܼ: ܗܲܒ̄ܠ ܢܵܬܵܐ ܠܨܠܘܿܬܝܼ: ܒܠܵܐ ܣܸܦܘܵܬܹ̈ܐ ܕܦܸܠܡܵܐ. 2 ܡ̣ܢ ܩܵܕ̄ܡܘܼܟ ܕܝܼܘܵܢܝܼ ܦܵܠܛܵܐ: ܥܲܝܢܘܼ̈ܟ ܚܵܙܝܼ ܠܬܪ̈ܝܼܨܘܼܝܵܬܹܐ. 3 ܒܚܸܪܘܼܟ̣ ܠܸܒܝܼ: ܣܘܼܚܒܸܪܘܼܟ ܒܠܲܝܠܹܐ: ܘܨܘܿܚܨܹܐ ܠܘܿܟ ܐܸܠܝܼ: ܠܹܐ ܡܵܫ̄ܟ̰ܚܸܬ ܡܸܢܕܝܼ: ܩܛܸܥܠܝܼ: ܕܠܹܐ [16] ܥܵܒܸܪ ܦܘܼܡܝܼ. 4 ܥܲܠ ܦܘܼܠܚܵܢܹ̈ܐ ܕܒܲܪܢܵܫܵܐ: ܒܗܸܡܸܙܡܵܢ ܕܣܸܦܘܵܬܘܼ̈ܟ ܐܵܢܵܐ ܢܛܸܪܝܼ ( ܢܲܦ̮ܫܝܼ ܡ̣ܢ) ܐܘܼܪ̈ܚܵܬܹܐ ܕܥܵܘܵܠܵܐ: 5 ܒܸܕܒ̣ܵܩܵܐ ܦܣܵܥܵܬܝܼ̈ ܒܓ̰ܲܕܵܘܵܬܘܼ̈ܟ: ܠܵܐ ܫܥܸܫܠܗ̄ܘܿܢ ܦܵܣܘܿܥܵܬܝܼ̈. 6 ܐܵܢܵܐ ܩܪܹܐܠܝܼ ܐܸܠܘܼܟ: ܣܲܒܲܒ ܟܹܐ ܓ̰ܲܘܸܒܸܬ ܠܝܼ ܐܲܠܵܗܵܐ: ܗܲܒ̄ܠ ܢܵܬܘܼܟ ܐܸܠܝܼ: ܫܡܘܿܥ ܚܲܒ̇ܪܝܼ. 7 ܥܒ̣ܘܿܕ ܥܓ̰ܝܼܒܬܵܐ ܫܵܦܵܩܲܬܘܼܟ: ܝܵܐ ܦܵܪܘܿܩܵܐ ܕܐܵܢܝܼ ܕܦܵܝܫܝܼ ܒܣܲܒܼܪܵܐ ( ܒܝܼܘܼܟ). ܡ̣ܢ ܕܐܵܢܝܼ ܕܩܵܝܡܝܼ ܒܝܲܡܝܼܢܘܼܟ.8 ܢܛܘܼܪܝܼ ܐܲܝܟ ܒܝܼܒܵܐ ܕܥܲܝܢܵܐ: ܒܛܸܠܵܢܝܼܬܵܐ ܕܓܘܼܠܦܵܢܘܼ̈ܟ ܡܛܲܫܹܝܬ ܠܝܼ: 9 ܡ̣ܢ ܩܵܕ̄ܡ ܒܝܼܫܹ̈ܐ ܕܡܲܠܝܘܼܨܝܼ ܝܢܵܐ: ܕܸܫ̰ܡܸܢܝܼ̈ ( ܕܒܟܠܵܗ̇) ܓܵܐܢܵܐ ܚܲܪܕܘܼܝܹܐ ܝܢܵܐ ܥܲܠܝܼ. 10 ܠܸܒܵܝܗܝ ܡܵܪܹܐ ܬܲܪܒܵܐ ܡܘܿܟܸܣܠܗ̄ܘܢ: ܒܦܘܼܡܵܝ ܗܘܼܡܙܸܡܠܘܿܢ ܫܲܒ̣ܗܪܵܢܘܼܬܵܐ. 11 ܦܵܣܘܿܥ̈ܝܵܬܲܢ: ܐܵܕܝܼܵܐ ܚܘܼܪ̈ܕܝܹܚܠܗ̄ܘܿܢ: ܥܲܝܢܵܝ̈ ܡܘܿܘܬܸܒ̣ܠܘܿܢ ܠܸܕܪܵܝܲܢ ܒܐܲܪܥܵܐ. 12 ܟܹܐ ܕܵܡܝܼ ܐܲܪܝܵܐ ܕܫܲܗ̄ܘܸܬ ܠܸܦܪܵܛܵܐ: ܘܐܲܝܟ ܓܘܼܪܝܵܐ ܕܐܲܪܝܵܐ ܒܝܼܬܵܒ̣ܵܐ ܒܛܸܫܘܵܐ. 13 ܩܘܼܡ̄: ܝܵܐ ܡܵܪܝܵܐ: ܡܩܲܕܸܡ ܠܩܵܕ̄ܡܹܗ: ܡܲܟܸܦ ܠܹܗ: ܡܦܲܨܝܼ ܢܲܦ̮ܫܝܼ ܡ̣ܢ ܒܝܼܫܵܐ: ܒܣܲܝܦܘܼܟ: 14 ܡ̣ܢ ܐܢܵܫܹ̈ܐ: ܒܐܝܼܕܘܼܟ: ܝܵܐ ܡܵܪܝܵܐ: ܡ̣ܢ ܐܢܵܫܹ̈ܐ ܡ̣ܢ ܕܘܼܢܝܹܐ: ܣܲܗܡܵܝܗܝ ܒܚܲܝܹ̈ܐ: ܘܒܚܲܙܝܼܢܘܼܟ ܟܹܐ ܡܵܠܹܝܬ ܟܲܪ̄ܣܵܝ: ܟܹܐ ܣܵܒ̣ܥܝܼ ܒܢܘܼܢܹ̈ܐ: ܘܟܹܐ ܫܵܒ̣ܩܝܼ ܣܲܗܡܵܝܗܝ ܦܝܼܫܵܐ ܠܝܲܠܘܼܕܵܝ̈ܗܝ. 15 ܐܵܢܵܐ ܒܙܲܕܝܼܩܘܼܬ̣ܵܐ ܒܸܕ ܚܵܙܹܝܢ ܦܵܬܘܼܟ̣: ܒܸܕ ܣܵܒ̣ܥܸܢ: ܐܝܼܡܲܢ ܕܪܵܥܫܸܢ ܒܨܘܼܪܬܘܼܟ.

 

ܡܙܡܘܪܐ: ܝܚ.

ܠܪܹܫܵܐ ܕܙܵܡܵܪܹ̈ܐ. ܕܥܲܒܼܕܹܗ ܕܡܵܪܝܵܐ: ܕܕܵܘܝܼܕܼ: ܕܗܘܼܡܙܸܡܠܹܗ ܠܡܵܪܝܵܐ ܗܹܡܸܙܡܵܢܹ̈ܐ ܕܐܵܗܵܐ ܙܡܵܪܬܵܐ: ܒܝܘܿܡܵܐ ܕܦܘܿܨܹܐܠܹܗ ܡܵܪܝܵܐ ܡ̣ܢ ܐܝܼܕܵܐ ܕܟܵܠܝܗܝ ܕܸܫ̰ܡܸܢܘܼ̈ܗܝ: ܘܡ̣ܢ ܐܝܼܕܹܗ ܕܫܵܐܘܿܠ ܘܐܸܡܪܹܗ:

1. ܟܹܐ ܡܲܚܸܒܸܢܘܼܟ̣: ܝܵܐ ܡܵܪܝܵܐ: ܚܲܝܠܝܼ. 2 ܡܵܪܝܵܐ ܐܝܼܣܵܪܝܼ ܝܠܹܗ ܘܒܘܼܪܓ̰ܝܼ ܪܵܡܵܐ: ܘܡܦܲܨܝܵܢܝܼ: ܐܲܠܵܗܝܼ: ܐܝܼܣܵܪܝܼ: ܒܸܕ ܣܵܒܪܸܢ ܒܝܹܗ: ܣܲܟܪܝܼ(ܡܵܛܵܠܝܼ): ܘܩܵܪ̄ܢܵܐ ܕܦܘܼܪܩܵܢܝܼ: ܕܘܼܟܬܝܼ ܘܒܹܝܬܓܵܘܣܝܼ ܡܫܘܼܒ̇ܚܵܐ 3 ܒܸܕ ܩܵܪܹܝܢ ܠܡܵܪܝܵܐ: ܘܡ̣ܢ ܕܸܫ̰ܡܸܢܝܼ̈ ܒܸܕ ܦܵܝܫܸܢ ܦܘܼܪܩܵܐ. 4 ܟܪܝܼܟܸ݂ܢܘܿܢ ܚܸܒ̣ܠܹ̈ܐ ܕܡܵܘܬܵܐ: ܘܡܸܠܝܹ̈ܐ ܕܒܸܠܝܲܥܲܠ ܡܘܼܙܕܥܸܢܘܿܢ. 5 ܚܸܒ̣ܠܹ̈ܐ ܕܫܝܘܿܠ ܚܕܝܼܪܸܢܘܿܢ: ܩܕܝܼܡܸܢܘܿܢ ܢܸܫܒܹ̈ܐ ܕܡܵܘܬܵܐ. 6 ܟܲܕ ܥܸܩܠܵܗ̇ ܐܸܠܝܼ ܩܪܸܐܠܝܼ ܠܡܵܪܝܵܐ: ܘܠܲܐܠܵܗܝܼ ܡܘܼܩܘܸܚܠܝܼ: ܫܡܸܥ ܠܹܗ ܡ̣ܢ ܗܲܝܟܠܗ ܩܵܠܝܼ: ܘܓܥܵܝܬܝܼ ܩܵܕ̄ܡܘܼܗܝ ܥܒܸܪܵܗ̇ ܒܢܵܬ̈ܝܵܬܗ. 7 ܘܫܥܸܫܠܵܗ̇ ܘܪܓܸܕܠܵܗ̇ ܐܲܪܥܵܐ: ܘܫܲܬܐܸܣ̈ܐ ܕܛܘܼܪܹ̈ܐ ܓ̰ܘܼܓ̰ܠܗ̄ܘܿܢ: ܘܫܥܸܫܠܗ̄ܘܿܢ: ܣܲܒܲܒ ܕܚܸܡܠܵܗ̇ ܐܸܠܹܗ. 8 ܐܣܸܩܠܹܗ ܬܸܢܵܐ ܡ̣ܢ ܢܲܚܝܼܪܹܗ: ܘܢܘܼܪܵܐ ܡ̣ܢ ܦܘܼܡܹܗ ܐܟܸܠܹܗ: ܓܘܼܡܪܹ̈ܐ ܠܗܹܐܠܘܿܢ ܡܸܢܹܗ. 9 ܘܡܘܼܟܸܦܠܹܗ ܫܡܲـ̈ـܝܵܐ ܘܨܠܹܐܠܹܗ: ܘܥܲܪܦܸܠܵܐ ܬܚܘܿܬ ܐܲܩܠܵܬ̈ܗ. 10 ܘܪܟܸܒ̣ܠܹܗ ܥܲܠ ܟܪܘܿܒ̣ܵܐ ܘܦܪܸܚܠܹܗ: ܘܣܛܸܐܠܹܗ ܥܲܠ ܓܘܼܠܦܵܢܹ̈ܐ ܕܦܵܘܚܵܐ. 11 ܡܘܿܘܬܸܒ̣ܠܹܗ ܚܘܼܒ̣ܝܵܐ ܣܸܬܵܪܹܗ: ܚܵܕܪܘܵܢܗ ܡܲܛܠܠܹܗܝ: ܚܘܼܒ̣ܝܵܐ ܕܡܲـ̈ـܝܵܐ: ܥܲܝܒܹ̈ܐ ܕܪܩܝܼܥܵܐ. 12 ܡ̣ܢ ܠܲܘܓ̰ܵܐ ܕܩܵܕ̄ܡܹܗ ܥܲܝܒ̣ܘܼ̈ܗܝ ܥܒܸܪܘܼܢ: ܒܲܪܕܵܐ ܘܓܘܼܡܪܹ̈ܐ ܕܢܘܼܪܵܐ. 13 ܘܓܘܼܪܓܸܡܠܹܗ ܒܫܡܲܝܵܐ ܡܵܪܝܵܐ: ܘܥܸܠܵܝܵܐ ܝܸܗܒܸܠܹܗ ܩܵܠܹܗ: ܒܲܪܕܵܐ ܘܓܘܼܡܪܹ̈ܐ ܕܢܘܼܪܵܐ. 14 ܘܫܘܼܕܸܪܹܗ ܓܹܐܪ̈ܘܼܗܝ: ܘܒܘܼܪܒܸܙܝܼܠܹܗ: ܘܒܸܪ̈ܩܹܐ ܪܵܒܵܐ: ܘܚܒ̣ܝܼܛܝܼܠܹܗ. 15 ܘܦܸܫܠܗ̄ܘܿܢ ܚܸܙܝܹ̈ܐ ܫܵܩ̈ܝܵܬܐ ܕܡܲـ̈ـܝܵܐ: ܘܦܸܫܠܗ̄ܘܿܢ ܓܸܠܝܹ̈ܐ ܫܲܬܐܸܣ̈ܐ ܕܒܪܝܼܬܵܐ ܡ̣ܢ ܢܓ̰ܵܘܬܘܼܟ: ܝܵܐ ܡܵܪܝܵܐ: ܡ̣ܢ ܢܫܵܡܬܵܐ ܕܦܘܿܚܵܐ ܕܢܲܚܝܼܪܘܼܟ. 16 ܫܘܼܕܸܪܹܗ ܡ̣ܢ ܡܪܵܘܡܵܐ: ܫܩܝܼܠܸܢܹܗ: ܓܪܝܼܫܸܢܹܗ ܡ̣ܢ ܡܲـ̈ـܝܵܐ ܪܵܒܵܐ. 17 ܦܘܼܨܝܼܢܹܗ ܡ̣ܢ ܕܸܫ̰ܡܸܢܝܼ ܙܲܪܒܵܢܵܐ: ܘܡ̣ܢ ܣܵܢܝܵܢܝܼ̈: ܣܲܒܲܒ ܕܙܘܼܪܒܸܢܘܿܢ ܒܘܼܫ ܡܸܢܝܼ 18 ܩܕܝܼܡܸܢܘܿܢ ܒܝܘܿܡܵܐ ܕܥܝܼܩܘܼܝܵܬ̈ܝܼ: ܘܗ̄ܘܹܠܹܐ ܡܵܪܝܵܐ ܠܣܢܵܕܬܵܐ ܐܸܠܝܼ. 19 ܘܦܘܼܠܛܸܢܹܗ ܠܪܘܲܚܬܵܐ: ܦܘܿܪܸܩܠܹܗ ܐܸܠܝܼ: ܣܲܒܲܒ ܕܒܣܸܡܠܵܗ̇ ܠܹܗ ܒܝܼ. 20 ܦܪܸܥܠܹܗ ܩܐ ܠܝܼ ܡܵܪܝܵܐ ܐܲܝܟ ܙܲܕܝܼܩܘܼܬܝܼ: ܐܲܝܟ ܕܸܟ̣ܝܘܼܬܵܐ ܕܐܝܼܕܵܬܝܼ̈ ܡܘܿܕܥܸܪܹܗ ܐܸܠܝܼ. 21 ܣܲܒܲܒ ܕܢܛܸܪܝܼ ܐܘܼܪ̈ܚܵܬܹܗ ܕܡܵܪܝܵܐ: ܘܠܵܐ ܗܘܹܐ ܠܝܼ ܥܵܨܝܵܢܵܐ ܠܐܲܠܵܗܝܼ. 22 ܣܲܒܲܒ ܟܠܵܝܗܝ ܕܝܼܘܵܢܘܼ̈ܗܝ ܠܒܲܪܩܘܼܒ̣ܠܝܼ ܗ̄ܘ̣ܵܘ: ܘܩܵܢܘܿܢܵܘ̈ܗܝ ܠܵܐ ܡܘܼܥܒܸܪܝܼ ܡܸܢܝܼ. 23 ܘܗ̄ܘܹܐܠܝܼ ܬܲܡܝܼܡܵܐ ܥܲܡܹܗ: ܘܢܛܸܪܝܼ ܢܲܦ̮ܫܝܼ ܡ̣ܢ ܥܵܘܠܝܼ. 24 ܘܡܘܿܕܥܸܪܹܗ ܡܵܪܝܵܐ ܐܸܠܝܼ ܐܲܝܟ ܙܲܕܝܼܩܘܼܬܝܼ: ܐܲܝܟ ܕܸܟ̣ܝܘܼܬܵܐ ܕܐܝܼܕܵܬܝܼ̈ ܩܵܕ̄ܡ ܥܲܝܢܵܘ̈ܗܝ. 25 ܥܲܡ ܡܪܲܚܡܵܢܵܐ ܗܵܘܹܝܬ ܡܪܲܚܡܵܢܵܐ: ܥܲܡ ܓܲܒ̣ܪܵܐ ܬܲܡܝܼܡܵܐ ܗܵܘܹܝܬ ܬܲܡܝܼܡܵܐ: 26 ܥܲܡ ܕܸܟ̣ܝܵܐ ܗܵܘܹܝܬ ܕܸܟ̣ܝܵܐ: ܘܥܲܡ ܦܠܝܼܡܵܐ ܗܵܘܹܝܬ ܦܬܝܼܠܵܐ. 27 ܣܲܒܲܒ ܐܲܢ̄ܬ̇: ܥܲܡܵܐ ܡܘܼܠܝܸܨܵܐ ܟܹܐ ܦܵܪܩܸܬ: ܘܥܲܝܢܹ̈ܐ ܪ̈ܵܡܵܢܹܐ ܟܹܐ ܡܲܟܸܦܸܬ. 28 ܣܲܒܲܒ ܐܲܢ̄ܬ ܟܹܐ ܒܲܗܪܸܢܸܬ ܫܪܵܓܼܝܼ: ܡܵܪܝܵܐ ܐܲܠܵܗܝܼ ܟܹܐ ܒܲܗܪܸܢ ܚܸܫܟܝܼ. 29 ܣܲܒܲܒ ܕܒܝܼܘܼܟ ܒܪܵܚܛܸܢ ܥܲܠ ܓܲܝܣܵܐ: ܘܒܲܐܠܵܗܝܼ ܒܫܵܘܪܸܢ ܫܘܼܪܵܐ. 30 ܐܲܠܵܗܵܐ: ܬܲܡܝܼܡܬܵܐ ܝܠܵܗ̇ ܐܘܼܪܚܹܗ. ܚܲܒ̇ܪܹܗ ܕܡܵܪܝܵܐ ܨܘܼܚܨܝܼܵܐ ܝܠܹܗ: ܡܵܛܵܠܵܐ ܝܼܠܹܗ ܠܟܠܵܝ ܡܣܲܬܪ̈ܵܢܐ ܒܝܹܗ. 31 ܣܲܒܲܒ ܡܲܢܝܼ ܝܠܹܗ ܐܹܝܠ ܐܲܠܵܗܵܐ ܫܒ̣ܘܿܩ ܡ̣ܢ ܝܸܗܘܿܘܵܐ: ܘܡܲܢܝܼ ܝܠܹܗ ܐܝܼܣܵܪܵܐ ܫܒ̣ܘܿܩ ܡ̣ܢ ܐܲܠܵܗܲܢ: 32 ܐܲܠܵܗܵܐ ܕܟܹܐ ܩܵܡܹܛ ܠܝܼ ܚܲܝܠܵܐ: ܘܥܒܸܕܠܹܗ ܨܦܝܼܬܵܐ ܐܘܼܪܚܝܼ. 33 ܒܸܥܒ̣ܵܕܵܐ: ܐܲܩܠܵܬܝܼ̈ ܐܲܝܟ ܕܐܲܝܠܵܐ: ܘܥܲܠ ܕܘܼܟܵܢܝܼ̈ ܪ̈ܵܡܹܐ ܟܹܐ ܡܲܟܠܹܐ ܠܝܼ: 34 ܡܲܠܘܼܦܹܐ ܐܝܼܕܵܬܝܼ̈ ܠܸܦܠܵܫܵܐ: ܘܟܹܐ ܡܵܬܚܝܼ ܩܸܫܬܵܐ ܕܢܚܵܫܵܐ ܕܪ̈ܵܥܢܵܢܝܼ. 35 ܘܝܗܸܒܼܠܘܼܟ ܩܵܐ ܠܝܼ ܡܵܛܵܠܵܐ ܕܦܘܼܪܩܵܢܘܼܟ̣: ܘܝܲܡܝܼܢܘܼܟ ܩܲܡ ܣܵܢܕܵܐ ܠܝܼ: ܘܒܲܣܝܼܡܘܼܬܘܼܟ ܩܲܡ ܓܲܪܘܸܣܵܐ ܠܝܼ. 36 ܡܘܼܪܘܸܚܠܘܼܟ̣ ܦܵܣܘܿܥܬܝܼ ܬܚܘܿܬܝܼ: ܘܠܵܐ ܫܥܸܫܠܗ̄ܘܿܢ ܥܸܩܒܹ̈ܐ ܕܐܲܩܠܝܼ̈. 37 ܒܸܕ ܢܵܦܠܸܢ ܒܵܬ̄ܪ ܕܸܫ̰ܡܸܢܝܼ̈ ܘܒܸܕ ܡܵܛܹܝܢܘܿܢ: ܘܠܹܐ ܕܵܥܪܸܢ ܗܲܠ ܬܝܵܡܬܵܝܗܝ. 38 ܛܘܼܚܛܸܚܝܼܠܝܼ: ܘܠܹܐ ܡܵܨܝܼ ܠܸܩܝܵܡܵܐ: ܢܦܸܠܘܼܢ ܬܚܘܿܬ ܐܲܩܠܵܬܝܼ̈. 39 ܘܩܲܡ ܩܵܡܛܸܬ ܠܝܼ ܚܲܝܠܵܐ ܠܦܠܵܫܵܐ: ܒܸܕ ܡܲܒܪܸܟܸ̇ܬ ܩܵܝܡܵܢܹ̈ܐ ܥܲܠܝܼ ܬܚܘܿܬܝܼ. 40 ܘܕܸܫ̰ܡܸܢܝܼ̈: ܝܗܸܒܼܠܘܼܟ ܩܵܐ ܠܝܼ ܩܕܵܠܵܝܗܝ: ܘܣܵܢܝܵܢܝܼ̈: ܕܡܲܫܬܸܩܸܢܘܿܢ. 41 ܨܪܸܚܠܗ̄ܘܿܢ: ܘܠܲܝܬ ܗ̄ܘ̣ܵܐ ܦܵܪܘܿܩܵܐ: ܥܲܠ ܡܵܪܝܵܐ: ܘܠܵܐ ܓ̰ܘܼܘܸܒܝܼܠܹܗ. 42 ܘܕܘܼܩܕܸܩܝܼܠܝܼ ܐܲܝܟ ܥܲܦܪܵܐ ܩܵܕ̄ܡ ܦܵܘܚܵܐ: ܐܲܝܟ ܛܝܼܢܵܐ ܕܥܵܠܘܿܠܵܢܹ̈ܐ ܪܘܼܦܝܼܠܝܼ. 43 ܩܲܡ ܡܦܲܨܹܝܬ ܠܝܼ ܡ̣ܢ ܕܝܼܢ̈ܐ ܕܥܲܡܵܐ: ܩܲܡ ܡܲܬܒܸܬ ܠܝܼ ܠܪܹܫܵܐ ܕܐܸܡ̈ܘܵܬܐ: ܥܲܡܵܐ ܕܠܵܐ ܝܕܸܥܠܝܼ ܒܸܕ ܦܵܠܚܝܼ ܠܝܼ. 44 ܒܫܡܵܥܬܵܐ ܕܢܵܬܵܐ ܒܸܕ ܫܵܡܥܝܼ ܐܸܠܝܼ: ܒܢܲܝ̈ ܢܘܼܟ̣ܪ̈ܵܝܹܐ ܒܸܕ [17] ܫܵܦܪܝܼ ܐܸܠܝܼ. 45 ܒܢܲܝ̈ ܢܘܼܟ̣ܪ̈ܵܝܹܐ ܒܸܕ ܒܵܠܝܼ ܘܒܸܕ ܪܲܬܪܸܬܝܼ ܡ̣ܢ ܕܘܼܟܵܢܵܝ̈ ܥܲܨܝܹ̈ܐ. 46 ܚܲܝܵܐ ܝܠܹܗ ܡܵܪܝܵܐ: ܘܒܪܝܼܟ̣ܵܐ ܝܠܹܗ ܐܝܼܣܵܪܝܼ: ܘܦܵܐܸܫ ܡܘܼܪܡܵܐ ܐܲܠܵܗܵܐ ܕܦܘܼܪܩܵܢܝܼ. 47 ܐܲܠܵܗܵܐ ܫܵܩܠܵܢܵܐ ܕܬܘܿܥܠܝܼ: ܘܙܲܒܛܸܢܵܢܵܐ ܕܥܲܡܡܹ̈ܐ ܬܚܘܿܬܝܼ. 48 ܟܹܐ ܡܦܲܪܸܩ ܠܝܼ ܡ̣ܢ ܕܸܫ̰ܡܸܢܝܼ̈: ܐܦ ܡ̣ܢ ܩܵܝܡܵܢܹ̈ܐ ܥܲܠܝܼ ܟܹܐ ܡܲܪܡܸܬ ܠܝܼ: ܡ̣ܢ ܐܢܵܫܵܐ ܕܙܠܘܼܡܝܵܐ ܟܹܐ ܡܦܲܨܹܝܬ ܠܝܼ. 49 ܒܘܼܕ ܕܐܵܗܵܐ ܒܸܕ ܫܵܟܪܸܢ ܐܸܠܘܼܟ ܒܲܝܢܵܬ ܐܸܡ̈ܘܵܬܐ ܡܵܪܝܵܐ: ܘܸܠܫܸܡܘܼܟ ܒܸܕ ܙܵܡܪܸܢ. 50 ܓܲܪܘܸܣܵܢܵܐ ܝܠܹܗ ܕܦܘܼܪܩܵܢܵܐ ܕܡܲܠܟܹܗ: ܘܥܵܒ̣ܕܵܢܵܐ ܕܛܲܝܒܘܼܬܵܐ ܠܡܫܝܼܚܹܗ: ܠܕܵܘܝܼܕܼ ܘܠܙܲܪܥܹܗ: ܗܲܠ ܥܵܠܲܡ.

 

ܡܙܡܘܪܐ ܝܛ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕܼ.

1. ܫܡܲܝ̈ܵܐ ܗܵܩܘܿܝܹܐ ܝܢܵܐ ܚܸܩܪܵܐ ܕܐܲܠܵܗܵܐ: ܘܦܘܼܠܚܵܢܵܐ ܕܐܝܼܕܵܬܘ̈ܗܝ ܡܲܕܘܼܥܹܐ ܝܠܹܗ ܪܩܝܼܥܵܐ.2 ܐܝܼܡܵܡܵܐ ܠܐܝܼܡܵܡܵܐ ܟܹܐ ܡܲܢܒܸܥ ܚܲܒ̇ܪܵܐ: ܘܠܲܝܠܹܐ ܠܠܲܝܠܹܐ ܟܹܐ ܡܲܚܘܹܐ ܝܕܹܥܬܵܐ. 3 ܠܲܝܬ ܚܲܒ̇ܪܵܐ: ܘܠܲܝܬ ܗܹܡܸܙܡܵܢܹ̈ܐ: ܕܠܹܐ ܦܵܐܸܫ ܫܡܝܼܥܵܐ ܩܵܠܵܝܗܝ. 4 ܒܟܠܵܗ̇ ܐܲܪܥܵܐ ܦܠܸܛܠܵܗ̇ ܡܬܲܢܲܝܬܵܝܗܝ: ܘܒܡܲܪܙܵܐ ܕܒܪܝܼܬܵܐ ܗܸܡܸܙܡܵܢܵܝ̈ܗܝ. ܩܵܐ ܫܸܡܫܵܐ ܡܘܼܬܸܒ̣ܠܹܗ ܡܲܫܟܢܵܐ ܒܓܵܘܵܝܗܝ: ܘܗ̇ܘ ܐܲܝܟ ܚܸܬܢܵܐ ܕܦܵܠܸܛ ܡ̣ܢ ܒܹܝܬ ܓܢܘܼܢܹܗ: ܟܹܐ ܦܵܨܹܚ ܐܲܝܟ ܓܲܢ̄ܒܵܪܵܐ ܠܸܪܚܵܛܵܐ ܐܘܼܪܚܵܐ. 6 ܡ̣ܢ ܡܲܪܙܵܐ ܕܫܡܲܝܵܐ ܦܠܵܛܹܗ: ܘܚܕܵܪܬܹܗ ܥܲܠ ܡܲܪ̈ܙܵܢܵܝܗܝ: ܘܠܲܝܬ ܕܦܵܐܸܫ ܡܛܘܼܫܝܵܐ ܡ̣ܢ ܚܸܡܹܗ. 7 ܢܵܡܘܿܣܹܗ ܕܡܵܪܝܵܐ ܓܡܝܼܪܵܐ ܝܠܹܗ: ܡܲܕܥܪܵܢܵܐ ܕܓܵܐܢܵܐ: ܣܵܗܕܘܼܬܵܐ ܕܡܵܪܝܵܐ ܡܗܲܝܡܲܢܬܵܐ ܝܠܵܗ̇: ܡܚܲܟܡܲܢܬܵܐ ܕܦܫܝܼ̈ܛܹܐ. 8 ܦܘܼܩܕܵܢܹ̈ܐ ܕܡܵܪܝܵܐ ܬܪ̈ܝܼܨܹܐ ܝܢܵܐ: ܡܲܚܕܝܵܢܹ̈ܐ ܕܠܸܒܵܐ: ܦܘܼܩܕܵܢܹܗ ܕܡܵܪܝܵܐ ܕܸܟ̣ܝܵܐ ܝܠܹܗ: ܒܲܗܪܸܢܵܢܵܐ ܕܥܲܝܢܹ̈ܐ. 9 ܙܕܘܼܥܬܵܐ ܕܡܵܪܝܵܐ ܕܟ̣ܝܼܬܵܐ ܝܠܵܗ̇: ܩܲܝܵܡܬܵܐ ܝܼܠܵܗ̇ ܠܥܵܠܲܡ: ܕܝܼܘܵܢܹ̈ܐ ܕܡܵܪܝܵܐ ܣܲܪܲܣܬܘܼܬܵܐ ܝܢܵܐ: ܙܲܕܝܼܩܹ̈ܐ ܝܢܵܐ ܟܠܵܝܗܝ. 10 ܝܲܬܝܼܪ ܪ̈ܓܼܝܼܓܼܐ[18] ܝܢܵܐ ܡ̣ܢ ܕܲܗܒ̣ܵܐ ܘܡ̣ܢ ܐܲܒܪܝܼܙܘܿܢ: ܘܝܲܬܝܼܪ ܚܸܠܝܹ̈ܐ ܝܢܵܐ ܡ̣ܢ ܕܸܒ̣ܫܵܐ ܘܢܛܵܦܬܵܐ ܕܫܵܐܢܵܐ[19].11 ܐܦ ܥܲܒܼܕܘܼܟ ܟܹܐ ܗܵܘܹܐ ܙܗܝܼܪܵܐ ܡܸܢܵܝܗܝ: ܒܢܛܵܪܬܵܝܗܝ ܐܝܼܬ ܦܘܼܪܥܵܢܵܐ ܪܲܒܵܐ. 12 ܓ݂ܸܠܛܹ̈ܐ ܡܲܢܝܼ ܟܹܐ ܪܵܥܹܫ ܒܝܼܵܝܗܝ: ܡ̣ܢ (ܚܛܝܼܵܬܹ̈ܐ) ܛܸܫܝܹ̈ܐ ܥܒ̣ܘܿܕ ܠܝܼ ܙܲܟܵܝܵܐ. 13 ܐܦ ܡ̣ܢ ܚܬܝܼܪܹ̈ܐ ܢܛܘܿܪܹܗ ܥܲܒܼܘܼܟ: ܘܠܵܐ ܡܫܲܠܛܝܼ ܒܝܼܝܼ: ܗ̇ܝܓܵܗ ܒܸܕ ܗܵܘܹܝܢ ܓܡܝܼܪܵܐ: ܘܗܵܘܹܝܢ ܙܲܟܵܝܵܐ ܡ̣ܢ ܥܵܘܠܵܐ ܪܲܒܵܐ. 14 ܗܵܘܝܼ ܚܲܒ̇ܪܹ̈ܐ ܕܦܘܼܡܝܼ: ܘܗܲܓܲܝܬܵܐ ܕܠܸܒܝܼ ܩܒܝܼܠܹ̈ܐ ܩܵܕ̄ܡܘܼܟ ܝܵܐ ܡܵܪܝܵܐ: ܐܝܼܣܵܪܝܼ ܘܦܵܪܘܿܩܝܼ.

 

 

 

 

ܡܙܡܘܪܐ: ܟ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕ.

1. ܫܒܼܘܿܩ ܓ̰ܲܘܸܒ ܠܘܼܟ ܡܵܪܝܵܐ ܒܝܘܿܡܵܐ ܕܐܘܼܠܨܵܢܵܐ: ܫܒܼܘܿܩ ܡܲܪܸܡ ܠܘܼܟ ܫܸܡܹܗ ܕܐܲܠܵܗܵܐ ܕܝܲܥܩܘܿܒ̣. 2 ܫܒܼܘܿܩ ܡܫܲܕܸܪ ܥܘܼܕܪܵܢܵܐ ܡ̣ܢ ܡܲܩܕܫܹܗ: ܘܡ̣ܢ ܨܗܝܘܿܢ ܣܵܢܸܕ ܠܘܼܟܼ.3 ܫܒܼܘܿܩ ܕܵܟܸܪ ܠܟܠܵܝ ܩܘܼܪ̈ܒܵܢܘܼܟܼ: ܘܕܸܒ̣ܚܘܼ̈ܟܼ ܡܘܼܩܕܹ̈ܐ ܚܲܫܒܸܢ ܛܪ̈ܝܼܨܹܐ: 4 ܝܵܗܹܒܼ ܠܘܼܟ ܐܲܝܟ ܠܸܒܘܼܟ: ܘܟܠܵܗ̇ ܬܲܚܡܲܢܬܘܼܟ ܬܲܡܸܡ. 5 ܚܵܕܝܚ ܒܦܘܼܪܩܵܢܘܼܟ: ܘܒܫܸܡܹܗ ܕܐܲܠܵܗܲܢ ܡܲܪܡܸܚ ܐܵܬܲܢ: ܫܒܼܘܿܩ ܬܲܡܸܡ ܡܵܪܝܵܐ ܟܠܿܗ ܨܸܒܼܝܵܢܘܼܟ. 6 ܐܵܕܝܼܵܐ ܝܕܝܼܥܠܝܼ ܕܟܹܐ ܦܵܪܸܩ ܡܵܪܝܵܐ ܠܡܫܝܼܚܹܗ: ܟܹܐ ܓ̰ܲܘܸܒ ܠܹܗ ܡ̣ܢ ܫܡܲܝܵܐ ܕܩܘܼܕܫܹܗ: ܒܓܲܢ̄ܒܵܪܘܼܬܐ ܕܦܘܼܪܩܵܢܵܐ ܕܝܲܡܝܼܢܹܗ. 7 ܐܲܢܲܝ ܒܡܲܪ̈ܟܒܼܬܐ: ܘܐܲܢܲܝ ܒܣܘܼܣܵܘܵܬܹ̈ܐ: ܘܐܲܚܢܲܢ ܫܸܡܹܗ ܕܡܵܪܝܵܐ ܐܲܠܵܗܲܢ ܡܲܕܟܸܪܵܚ.8 ܐܵܢܝܼ ܒܪܸܟ̇ܠܗ̄ܘܿܢ ܘܢܦܸܠܘܼܢ: ܘܐܲܚܢܲܢ ܩܸܡܠܲܢ ܘܬܪܸܨܠܲܢ. 9 ܡܵܪܝܵܐ: ܦܲܪܸܩ: ܫܒܼܘܿܩ ܓ̰ܲܘܸܒ ܠܲܢ ܡܲܠܟܵܐ ܒܝܵܘܡܵܐ ܕܩܵܪܵܚ.

 

ܡܙܡܘܪܐ: ܟܐ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕ.

1. ܝܵܐ ܡܵܪܝܵܐ: ܒܚܲܝܠܘܼܟ ܒܸܕ ܚܵܕܹܐ ܡܲܠܟܵܐ: ܘܒܦܘܼܪܩܵܢܘܼܟ̣ ܟܡܵܐ ܒܸܕ ܦܵܨܸܚ ܪܵܒܵܐ! 2 ܫܲܗ̄ܘܲܬܬܵܐ ܕܠܸܒܹܗ ܝܸܗܒܸܠܘܼܟ̣ ܐܸܠܹܗ: ܘܒܵܥܘܼܬܵܐ ܕܣܸܦܘܵܬܘܼ̈ܗܝ ܠܵܐ ܡܘܼܟܠܹܠܘܼܟ̣. 3 ܣܲܒܲܒ ܟܹܐ ܩܵܕܡܸܬ ܠܹܗ ܒܒܘܼܪ̈ܟܵܬܹܐ ܕܛܵܒ̣ܘܼܬܵܐ: ܟܹܐ ܡܬܒܸܕ ܠܪܹܫܹܗ ܬܵܐܓ̰ ܕܕܲܗܒ̣ܵܐ ܨܸܦܝܵܐ. 4 ܚܲܝܹ̈ܐ ܛܠܸܒܠܹܐ ܡܸܢܘܼܟ: ܝܸܗܒܸܠܘܼܟ ܐܸܠܹܗ: ܝܘܼܪܟ̣ܵܐ ܕܝܘܿܡܵܢܹ̈ܐ ܠܥܵܠܲܡ ܥܵܠܡܝܼܢ. 5 ܓܘܼܪܵܐ ܝܠܹܐ ܐܝܼܩܵܪܹܗ ܒܦܘܼܪܩܵܢܘܼܟ: ܚܸܩܪܵܐ ܘܙܲܪܝܼܦܘܼܬܵܐ ܟܹܐ ܡܲܬܒܸܕ ܥܲܠܘܼܗܝ. 6 ܣܲܒܲܒ ܟܹܐ ܡܲܬܒܸܕ ܠܹܗ ܒܘܼܪ̈ܟܵܬܹܐ ܠܥܵܠܲܡ: ܟܹܐ ܡܲܚܕܸܬ ܠܹܗ ܒܦܨܵܚܬܵܐ ܥܲܡ ܦܵܬܘܼܟ̣. 7 ܣܲܒܲܒ ܡܲܠܟܵܐ ܒܸܣܒܵܪܵܐ ܝܠܹܐ ܒܡܵܪܝܵܐ: ܘܒܫܵܦܵܩܲܬ ܕܥܸܠܵܝܵܐ ܠܹܐ ܫܵܥܸܫ. 8 ܡܵܛܝܵܐ ܐܝܼܕܼܟ̣ ܠܟܠܵܝ ܕܸܫܡܸܢܘܼ̈ܟ: ܝܼܡܝܼܢܘܼܟ ܡܵܫ̄ܟ̰ܚܵܐ ܣܵܢܝܵܢܘܼ̈ܟ. 9 ܥܵܒ̣ܕܸܬ ܠܗ̄ܘܿܢ ܐܲܝܟ ܬܵܢܘܿܪܵܐ ܕܢܘܼܪܵܐ ܠܙܲܒ̣ܢܵܐ ܕܦܵܬܘܼܟ: ܡܵܪܝܵܐ ܒܚܸܡܬܹܗ ܒܲܠܸܥ ܠܗ̄ܘܿܢ: ܘܐܵܟܸܠ ܠܗ̄ܘܿܢ ܢܘܼܪܵܐ. 10 ܛܥܘܼܢܬܵܝ ܡ̣ܢ ܐܲܪܥܵܐ ܬܵܠܩܸܬ: ܘܙܵܪܥܵܝ ܡ̣ܢ ܒܢܲܝ̈ ܐܢܵܫܵܐ. 11 ܣܲܒܲܒ ܕܨܘܼܠܹܠܘܿܢ ܥܲܠܘܼܟ̣ ܒܝܼܫܬܵܐ: ܚܫܸܒ̣ܠܘܿܢ ܦܸܠܡܵܐ: ܠܹܐ ܡܵܨܝܼ. 12 ܣܲܒܲܒ ܕܒܸܕ ܥܲܒ̣ܕܸܬ ܠܗ̄ܘܿܢ [20] ܪܘܼܦ̮ܫܵܐ: ܒܡܸܠܝܵܬܘܼ̈ܟ ܒܸܕ ܗܵܕܪܸܬ ܥܲܠ ܦܵܬܘܵܬܵܝ̈. 13 ܪܘܼܡ: ܡܵܪܝܵܐ: ܒܙܲܪܒܘܼܟ: ܫܵܒܚܵܝ ܘܙܵܡܪܵܚ ܓܲܢ̄ܒܵܪܘܼܬܘܼܟ̣.

 

 

 

 

 

ܡܙܡܘܪܐ: ܟܒ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܐܲܝܠܸܬ ܫܵܚܲܪ. ܡܲܙܡܘܿܪܵܐ ܕܕܵܘܝܼܕܼ.

1. ܐܲܠܗܝܼ: ܐܲܠܵܗܝܼ: ܩܵܡܘܿܕܝܼ ܫܒ̣ܝܼܩܸܢܘܼܟ̣: ܪܸܚܩܵܐ ܡ̣ܢ ܦܘܼܪܩܵܢܝܼ: (ܡ̣ܢ) ܗܹܡܸܙܡܵܢܹ̈ܐ ܕܓܥܝܬܝܼ: 2 ܐܲܠܗܝܼ: ܩܵܪܸܢ ܒܐܝܼܡܵܡܵܐ: ܘܠܹܐ ܓ̰ܲܘܸܒܸܕ: ܘܒܠܲܝܠܹܐ: ܘܠܲܝܬ ܫܬܵܩܵܐ ܐܸܠܝܼ. 3 ܘܐܲܢ̄ܬ̇ ܩܲܕܝܼܫܵܐ ܝܘܸܬ: ܝܵܬܒ̣ܵܢܵܐ ܒܫܘܼܒ̣ܚܹ̈ܐ ܕܝܼܣܪܵܝܹܠ. 4 ܒܝܼܘܼܟ ܣܒܸܪܘܿܢ ܒܵܒܵــ̈ـܘܵܬܲܢ: ܣܒܸܪܘܿܢ: ܘܦܘܼܚܵܠܘܼܟ. 5 ܐܸܠܘܼܟ ܡܘܼܩܘܸܚܠܘܿܢ ܘܦܸܫܠܘܿܢ ܦܘܼܪܩܹܐ: ܒܝܼܘܼܟ ܣܒܸܪܘܿܢ: ܘܠܵܐ ܢܚܸܦܠܘܿܢ. 6 ܘܐܵܢܵܐ: ܬܹܘܸܠܥܵܐ ܘܠܵܐ ܐܢܵܫܵܐ: ܠܵܘܡܵܐ ܕܒܲܪܢܵܫܵܐ: ܘܡܘܼܣܠܝܼܵܐ ܕܛܵܝܸܦܵܐ. 7 ܟܠܵܝ ܚܵܙܝܵܢܝܼ̈ ܟܹܐ ܡܲܣܚܸܪܝܼ ܒܝܼܝܼ: ܟܹܐ ܡܲܦܟ̰ܸܠܝܼ ܣܸܦܬܵܐ: ܟܹܐ ܫܵܥܫܝܼ ܪܹܫܵܐ. 8 ܓܲܢܕܸܪ (ܣܲܒ̣ܪܘܼܗܝ) ܥܲܠ ܡܵܪܝܵܐ: ܚܵܠܸܨ ܠܹܗ: ܦܵܨܹܐ ܠܹܗ: ܣܲܒܲܒ ܕܟܹܐ ܒܵܣܡܵܐ ܠܹܗ ܒܝܹܗ. 9 ܣܲܒܲܒ ܕܐܲܢ̄ܬ̇ ܦܵܠܛܵܢܝܼ ܡ̣ܢ ܒܲܛܢܵܐ: ܡܲܣܒܸܪܵܢܝܼ ܥܲܠ ܒܸܙܵܙܹ̈ܐ ܕܝܸܡܝܼ. 10 ܥܲܠܘܼܟ ܦܸܫܠܝܼ ܕܸܪܝܵܐ ܡ̣ܢ ܡܲܪܒܥܵܐ: ܡ̣ܢ ܒܲܛܢܵܐ ܕܝܸܡܝܼ ܐܲܠܵܗܝܼ ܝܘܸܬ ܐܲܢ̄ܬ. 11 ܠܵܐ ܪܵܚܩܹܬ ܡܸܢܝܼ: ܣܲܒܲܒ ܕܥܹܩܘܼܝ ܩܘܼܪܒܵܐ ܝܠܵܐ: ܣܲܒܲܒ ܠܲܝܬ ܗܲܝܸܪܵܢܵܐ. 12 ܚܘܼܪܕܝܸܢܘܿܢ ܬܵܘܪܹ̈ܐ ܪܵܒܵܐ: ܙܲܪ̈ܒܵܢܹܐ ܕܒܲܝܫܵܢ ܟܪܝܼܟܸܢܘܿܢ. 13 ܦܬܸܚܠܘܿܢ ܥܲܠܝܼ ܦܘܼܡܵܝ: ( ܐܲܝܟ) ܐܲܪܝܵܐ ܦܵܪܘܿܛܵܐ ܘܓܲܪܓܸܡܵܢܵܐ. 14 ܐܲܝܟ ܡ̈ܝܼܵܐ ܦܸܫܠܝܼ ܫܘܼܦܟ̣ܵܐ: ܘܦܪܸܫܠܘܿܢ ܟܠܵܝ ܓܲܪܡܝܼ: ܗ̄ܘܹܠܹܐ ܠܸܒܝܼ ܐܲܝܟ ܫܲܡܲܥ: ܦܫܸܪܹܐ ܒܓܵܘܵܐ ܕܡܲܥܝܝܼ̈. 15 ܒܪܸܙܠܹܐ ܐܲܝܟ ܦܲܚܵܪܵܐ ܚܲܠܝܼ: ܘܠܸܫܵܢܝܼ ܒܸܛܦܝܵܐ ܝܠܹܐ ܒܨܸܢܵܪ̈ܝܼ: ܘܠܥܲܦܪܵܐ ܕܡܵܘܬܵܐ ܡܘܼܬܒܸܢܘܼܟ. 16 ܣܲܒܲܒ ܕܚܘܼܪܕܝܸܢܘܿܢ ܟܲܠܒܹ̈ܐ: ܓ̰ܵܡܵܥܲܬ ܕܒܝܼܫܹ̈ܐ ܟܪܝܼܟܸܢܘܿܢ: ܒܙܸܥܠܘܿܢ ܐܝܼܕܵܬܝܼ̈ ܘܐܲܩܠܵܬܝܼ̈. 17 ܡܵܢܸܢ ܟܠܵܝ ܓܲܪ̈ܡܝܼ: ܐܵܢܝܼ ܚܸܪܘܿܢ ܚܙܹܠܘܿܢ ܒܝܼܝܼ. 18 ܦܘܼܠܹܠܘܿܢ ܓ̰ܘܼܠܝܼ̈ ܒܹܝܠܵܝ: ܘܥܲܠ ܠܒܸܫܬܝܼ ܕܪܸܠܘܿܢ ܦܸܫܟܵܐ. 19 ܘܐܲܢ̄ܬ̇: ܡܵܪܝܵܐ: ܠܵܐ ܪܵܚܩܸܬ: ܝܵܐ ܙܲܪܒܝܼ: ܠܗܲܝܲܪܬܝܼ ܡܲܠܝܸܙ. 20 ܦܵܨܝܼ ܡ̣ܢ ܣܲܝܦܵܐ ܢܲܦ̮ܫܝܼ: ܡ̣ܢ ܐܝܼܕܵܐ ܕܟܲܠܒܵܐ ܝܼܚܝܼܕܘܼܬܝܼ. 21 ܦܵܪܸܩ ܠܝܼ ܡ̣ܢ ܦܘܼܡܵܐ ܕܐܲܪܝܵܐ: ܘܡ̣ܢ ܩܵܪܢܵܢܹܐ ܕܪܲܝܡܹܐ ܓ̰ܘܼܘܸܒܸܢܘܼܟ. 22 ܒܸܕ ܗܵܩܸܢ ܫܸܡܘܼܟ ܠܐܵܚܘܿܢܘܵܬܝܼ̈: ܒܓܵܘܵܐ ܕܟܸܢܫܵܐ ܒܸܕ ܫܵܒܚܸܢܘܼܟ. 23 ܙܸܕܥܝܹ̈ܐ ܕܡܵܪܝܵܐ: ܫܵܒܚܘܿܢ ܠܹܗ: ܟܠܹܗ ܙܲܪܥܵܐ ܕܝܼܥܩܘܿܒ̣: ܡܝܵܩܪܘܿܢ ܠܹܗ: ܘܙܕܸܥܡܘܿܢ ܡܸܢܹܗ: ܟܠܹܗ ܙܲܪܥܵܐ ܕܝܼܣܪܵܝܹܠ. 24 ܣܲܒܲܒ ܕܠܵܐ ܡܘܼܣܠܹܠܹܐ ܘܠܵܐ ܓܘܼܢܓܸܨܠܹܐ ܡ̣ܢ ܐܘܼܠܨܵܢܵܐ ܕܡܘܼܠܝܸܨܵܐ: ܘܠܵܐ ܛܘܼܫܹܠܹܐ ܦܵܬܹܗ ܡܸܢܹܗ: ܘܟܲܕ ܡܘܼܩܘܸܚܠܹܐ ܐܸܠܹܗ ܫܡܸܥܠܹܐ. 25 ܡ̣ܢ ܠܟܸܣܠܘܼܟ ܬܸܫܒܘܿܚܬܝܼ ܒܟܸܢܫܵܐ ܓܘܼܪܵܐ: ܢܸܕܪ̈ܝܼ ܒܸܕ ܬܲܡܸܡܸܢ ܩܵܕ̄ܡ ܙܸܕܥܝܘܼ̈ܗܝ. 26 ܒܸܕ ܐܵܟ̣ܠܝܼ ܡܸܣܟܹܢܹ̈ܐ ܘܣܲܒ̣ܥܝܼ: ܒܸܕ ܫܵܒܚܝܼ ܠܡܵܪܝܵܐ ܛܵܥܝܵܢܹ̈ܐ ܐܸܠܹܗ: ܝܼܚܹܐ ܠܸܒܵܘܟ̣ܘܿܢ ܠܐܵܒܵܕ. 27 ܒܸܕ ܕܵܟ̣ܪܝܼ ܘܕܵܝܪܝܼ ܠܟܸܣ ܡܵܪܝܵܐ ܟܠܵܝ ܡܲܪ̈ܙܵܢܹܐ ܕܐܲܪܥܵܐ: ܘܒܸܕ ܣܵܓ̣ܕܝܼ ܩܵܕ̄ܡܘܼܟ ܟܠܵܝ ܐܘܼ̈ܓ̰ܵܓܹܐ ܕܛܵܝܸܦܹ̈ܐ. 28 ܣܲܒܲܒ ܕܠܡܵܪܝܵܐ ܝܠܵܐ ܡܲܠܟܘܼܬܵܐ: ܘܗܵܟܝܼܡ ܝܼܠܹܐ ܥܲܠ ܛܵܝܸܦܹ̈ܐ. ܘܒܸܕ ܐܵܟ̣ܠܝܼ ܘܒܸܕ ܣܵܓ̣ܕܝܼ ܟܠܵܝ ܛܟ̈ܝܼܨܹܐ ܕܐܲܪܥܵܐ: ܩܵܕ̄ܡܘܼܗܝ ܒܸܕ ܟܵܝܦܝܼ ܟܠܵܝ ܨܵܠܝܵܢܹ̈ܐ ܕܥܲܦܪܵܐ: ܘܗ̇ܘ ܕܓܵܢܘܼܗܝ ܠܹܐ ܚܵܡܹܐ ܚܵܝܬܵܐ. 30 ܙܲܪܥܵܐ ܒܸܕ ܦܵܠܸܚ ܠܹܗ: ܒܸܕ ܦܵܝܸܫ ܚܘܼܫܒܸܢܵܐ ܠܡܵܪܝܵܐ ܠܕܵܘܪܵܐ. 31 ܒܸܕ ܐܵܬܝܼ ܘܡܲܕܥܝܼ ܙܲܕܝܼܩܘܼܬܹܗ ܠܛܵܝܸܦܵܐ ܕܦܵܝܸܫ ܗ̄ܘܝܼܵܐ: ܕܥܒܸܕܠܹܐ.

 

 

 

 

ܡܙܡܘܪܐ: ܟܓ.

ܡܙܡܘܪܵܐ ܕܕܵܘܝܼܕܼ.

1. ܡܵܪܝܵܐ ܪܵܥܝܼ ܝܠܹܐ: ܠܹܐ ܚܵܣܪܸܢ. 2 ܒܟ̰ܝܼܡܵܢܹ̈ܐ ܕܓܸܠܵܐ ܟܹܐ ܡܲܕܡܸܟ ܠܝܼ: ܥܲܠ ܡ̈ܝܼܵܐ ܢܝܼܚܹ̈ܐ ܟܹܐ ܬܲܓܒܸܪܝ. 3 ܢܲܦ̮ܫܝܼ ܟܹܐ ܡܲܕܸܪ: ܟܹܐ ܠܵܒܸܠ ܠܝܼ ܒܓ̰ܵܕܵܘܵܬܹ̈ܐ ܕܙܲܕܝܼܩܘܼܬܵܐ: ܒܘܼܬ ܚܵܬܸܪ ܕܫܸܡܹܗ. 4 ܐܘܼܦ ܟܲܕ ܚܵܕܪܸܢ ܒܪܵܘܘܿܠܵܐ ܕܛܸܠܵܢܝܼܬܵܐ ܕܡܵܘܬܵܐ: ܠܹܐ ܙܵܕܥܸܢ ܡ̣ܢ ܒܝܼܫܬܵܐ: ܣܲܒܲܒ ܕܐܲܢ̄ܬ ܥܲܡܝܼ ܝܘܸܬ: ܩܵܛܝܼܘܼܟ ܘܚܘܼܛܪܘܼܟ: ܐܵܢܝܼ ܟܹܐ ܝܵܗ̄ܒ̣ܝܼ ܠܝܼ ܠܸܒܵܐ. 5 ܟܹܐ ܡܲܪܝܸܙܸܬ ܩܵܕ̄ܡܝܼ ܨܘܼܦܪܵܐ ܠܒܲܪܩܘܼܒ̣ܠ ܕܕܸܫܡܸܢ̈ܝܼ: ܡܫܸܚܠܘܼܟ ܒܡܸܫܚܵܐ ܪܹܫܝܼ: ܟܵܣܝܼ ܫܦܝܼܟ̣ܵܐ ܝܠܹܐ. 6 ܐܲܚܟ̰ܝܼ ܛܵܒ̣ܬܵܐ ܘܫܵܦܵܩܲܬ ܒܸܕ ܐܵܬܝ ܒܵܬ̄ܪܝܼ ܟܠܵܝ ܝܘܿܡܵܢܹ̈ܐ ܕܚܲܝܲܝ̈: ܘܒܸܕ ܝܵܬܒܸܢ ܓܵܘ ܒܲܝܬܵܐ ܕܡܵܪܝܵܐ ܒܝܘܼܪܟ̣ܵܐ ܕܝܘܿܡܵܢܹ̈ܐ.

 

ܡܙܡܘܪܐ: ܟܕ.

ܡܲܙܡܘܪܵܐ ܕܕܵܘܝܼܕ.

1. ܕܡܵܪܝܵܐ ܝܠܵܐ ܐܲܪܥܵܐ ܘܡܸܠܝܘܼܬܘܼܗ̇: ܒܪܝܼܬܵܐ ܘܥܵܡܪ̈ܵܢܹܐ ܓܵܘܘܼܗ̇. 2 ܣܲܒܲܒ ܗ̇ܘ ܥܲܠ ܝܵܡܵܬܹ̈ܐ ܫܘܼܬܸܐܣܵܠܹܐ: ܘܥܲܠ ܢܲܗܪ̈ܘܵܬܹܐ ܡܘܼܩܘܝܼܵܠܹܐ. 3 ܡܲܢܝܼ ܐܵܣܸܩ ܒܛܘܼܪܹܗ ܕܡܵܪܝܵܐ: ܘܡܲܢܝܼ ܟܵܠܹܐ ܒܕܘܼܟܬܵܐ ܕܩܘܼܕܫܹܗ. 4 ܚܵܠܝܼܨ ܕܐܝܼܕܵܬܹ̈ܐ: ܘܕܸܟ̣ܝܵܐ ܕܠܸܒܵܐ: ܕܠܵܐ ܡܘܼܪܸܡܠܹܐ ܠܒܘܼܚܬܵܢ ܓܵܢܹܗ: ܘܠܵܐ ܝܡܹܠܹܐ ܠܦܸܠܡܵܐ. 5 ܒܸܕ ܩܵܒܸ̇ܠ ܒܘܼܪܟܬܵܐ ܡ̣ܢ ܡܵܪܝܵܐ: ܘܙܲܕܝܼܩܘܼܬܵܐ ܡ̣ܢ ܐܲܠܵܗܵܐ ܕܦܘܼܪܩܵܢܹܗ. 6 ܐܵܗܵܐ ܝܠܹܐ ܕܵܘܪܵܐ ܕܐܵܢܝܼ ܕܛܵܥܝܼ ܐܸܠܹܗ: ܒܲܥܝܵܢܹ̈ܐ ܕܦܵܬܘܼܟ: [21] ܝܲܥܩܘܿܒ̣. 7 ܡܵܪܡܘܿܢ: ܕܲܪ̈ܘܵܙܹܐ: ܪܹ̈ܫܵܘܟ̣ܘܿܢ: ܘܦܘܼܫܘܿܢ. ܡܘܼܪܡܹܐ: ܬܲܪ̈ܥܵܢܹܐ ܕܥܵܠܲܡ: ܘܐܵܘܸܪ ܡܲܠܟܵܐ ܕܐܝܼܩܵܪܵܐ. 8 ܡܲܢܝܼ ܝܠܹܐ ܐܵܗܵܐ ܡܲܠܟܵܐ ܕܐܝܼܩܵܪܵܐ: ܡܵܪܝܵܐ ܙܲܪܒܵܢܵܐ ܘܓܲܢ̄ܒܵܪܵܐ: ܡܵܪܝܵܐ ܓܲܢ̄ܒܵܪܵܐ ܕܦܠܵܫܵܐ. 9 ܡܵܪܡܘܿܢ: ܕܲܪ̈ܘܵܙܹܐ: ܪܹ̈ܫܵܘܟ̣ܘܿܢ: ܘܡܵܪܡܘܿܢ: ܬܲܪ̈ܥܵܢܹܐ ܕܥܵܠܲܡ: ܘܐܵܘܸܪ ܡܲܠܟܵܐ ܕܐܝܼܩܵܪܵܐ. 10 ܡܲܢܝܼ ܝܠܹܐ ܐܵܗܵܐ ܡܲܠܟܵܐ ܕܐܝܼܩܵܪܵܐ: ܡܵܪܝܵܐ ܨܒ̣ܵܐܘܼܬ: ܗ̇ܘ ܝܼܠܹܐ ܡܲܠܟܵܐ ܕܐܝܼܩܵܪܵܐ.

 

ܡܙܡܘܪܐ: ܟܗ.

ܕܕܵܘܝܼܕܼ.

1. ܠܟܸܣܠܘܼܟ: ܡܵܪܝܵܐ: ܢܲܦ̮ܫܝܼ ܡܵܪܘܿܡܹܐ ܝܘܸܢ. 2 ܐܲܠܵܗܝܼ: ܒܝܼܘܟ ܣܒܸܪܝܼ: ܠܵܐ ܢܵܚܦܸܢ: ܠܵܐ ܦܵܨܚܝܼ ܕܸܫܡܸܢ̈ܝܼ ܥܲܠܝܼ. 3 ܐܘܼܦ ܟܠܵܝ ܣܵܦܪ̈ܵܢܹܐ ܐܸܠܘܼܟ ܠܹܐ ܢܵܚܦܝ: ܢܵܚܦܝ ܚܵܝܼܢܹ̈ܐ ܕܠܵܐ ܗܲܓ̰ܲܬ. 4 ܐܘܼܪ̈ܚܵܬܘܼܟ: ܡܵܪܝܵܐ: ܡܲܕܥܝܼ ܠܝܼ: ܓ̰ܵܕܵܘܵܬܘܼ̈ܟ ܡܵܠܸܦ ܠܝܼ. 5 ܬܲܓܒܸܪܝܼ ܒܣܲܪ̈ܣܬܘܼܬܘܼܟ: ܘܡܵܠܸܦ ܠܝܼ: ܣܲܒܲܒ ܐܲܢ̄ܬ̇ ܝܼܘܸܬ ܐܲܠܵܗܵܐ ܕܦܘܼܪܩܵܢܝ: ܐܸܠܘܼܟ ܣܦܸܪܝܼ ܟܠܹܗ ܝܘܿܡܵܐ. 6 ܕܟ̣ܘܿܪ ܪ̈ܲܚܡܘܼܟ: ܡܵܪܝܵܐ: ܘܫܵܦܵܩܲܬܘܼܟ: ܣܲܒܲܒ ܡ̣ܢ ܥܵܠܲܡ ܝܼܢܵܐ. 7 ܚܛܵܗܹ̈ܐ ܕܓ̰ܘܲܢܩܘܼܬܝܼ ܘܓܢܵܗܝܼ̈ ܠܵܐ ܕܵܟ̣ܪܸܬ: ܐܲܝܟ ܫܵܦܵܩܲܬܘܼܟ ܕܟ̣ܘܿܪ ܐܸܠܝܼ ܐܲܢ̄ܬ̇: ܒܘܼܬ ܚܵܬܸܪ ܕܛܵܒ̣ܘܼܬܘܼܟ̣: ܡܵܪܝܵܐ. 8 ܛܵܒ̣ܵܐ ܘܬܪܘܼܨܵܐ ܝܠܹܐ ܡܵܪܝܵܐ: ܒܘܼܬ ܕܐܵܗܵܐ ܒܸܕ ܡܵܠܸܦ ܚܲܛܵܝܹ̈ܐ ܒܐܘܼܪܚܵܐ. 9 ܒܸܕ ܬܲܓܒܸܪ ܡܸܣܟܹܢܹ̈ܐ ܒܟ̣ܝܼܘܵܢ. ܘܡܵܠܸܦ ܠܡܸܣܟܹܢܹ̈ܐ ܐܘܼܪܚܘܼܗܝ. 10 ܟܠܵܝ ܐܘܼܪ̈ܚܵܬܹܐ ܕܡܵܪܝܵܐ ܫܵܦܵܩܲܬ ܘܣܲܪܲܣܬܘܼܬܵܐ ܝܢܵܐ: ܠܢܵܛܪ̈ܵܢܹܐ ܕܩܵܘܠܘܼܗܝ ܘܣܵܗܕܘܵܬܘܼ̈ܗܝ. 11 ܒܚܵܬܸܪ ܕܫܸܡܘܼܟ: ܝܵܐ ܡܵܪܝܵܐ: ܫܵܒ̣ܩܸܬ ܓܢܵܗܝܼ: ܣܲܒܲܒ ܓܘܼܪܬܵܐ ܝܠܵܐ. 12 ܡܲܢܝܼ ܝܠܹܐ ܙܸܕܥܝܵܐ ܕܡܵܪܝܵܐ: ܒܸܕ ܡܵܠܸܦ ܠܹܗ ܒܐܘܼܪܚܵܐ ܕܓܵܒܹ̇ܐ. 13 ܓܵܢܹܗ ܒܛܵܒ̣ܬܵܐ ܒܸܕ ܫܵܪܝܵܐ: ܘܙܲܪܥܹܗ ܒܸܕ ܝܵܪܸܬ ܐܲܪܥܵܐ. 14 ܒܸܣܬܵܝܘܼܬ̣ܵܐ ܕܡܵܪܝܵܐ ܠܙܸܕܥܝܘܼ̈ܗܝ: ܘܩܵܘܠܘܼܗܝ ܠܡܲܕܘܼܥܝܵܝ. 15 ܥܲܝܢܝܼ̈ ܒܕܵܝܸܡܘܼܬܵܐ ܠܡܵܪܝܵܐ ܝܢܵܐ: ܣܲܒܲܒ ܕܗ̇ܘ ܒܸܕ ܦܵܠܸܛ ܓܲܪܕܵܐ ܐܲܩܠܵܬܝܼ̈. 16 ܕܘܼܪ ܠܟܸܣܠܝܼ ܘܪܵܚܸܡ ܥܲܠܝܼ: ܣܲܒܲܒ ܒܢܲܦ̮ܫܵܐ ܝܘܸܢ ܘܡܸܣܟܹܢܵܐ. 17 ܥܹܩܘܼ̈ܘܹܐ ܕܠܸܒܝܼ ܡܘܼܪܘܸܚܠܘܿܢ: ܡ̣ܢ ܐܘܼܠܨܵܢܝܼ̈ ܦܵܠܸܛ ܠܝܼ. 18 ܚܙܝܼ ܝܲܠܨܘܼܘܝܼ ܘܓ̰ܵܦܝܼ: ܘܫܒ̣ܘܿܩ ܠܟܠܵܝ ܚܛܵܗܝܼ̈. 19 ܚܙܝܼ ܠܕܸܫܡܸܢܝܼ̈: ܣܲܒܲܒ ܙܸܕܠܘܿܢ: ܘܣܢܵܝܬܵܐ ܕܙܠܘܼܡܝܵܐ ܣܸܢܝܸܢܘܿܢ. 20 ܢܛܘܿܪ ܢܲܦ̮ܫܝܼ: ܘܦܵܨܝܼ ܠܝܼ: ܠܵܐ ܢܵܚܦܸܢ: ܣܲܒܲܒ ܕܣܒܸܪܝܼ ܒܝܼܘܼܟ. 21 ܬܲܡܝܼܡܘܼܬܵܐ ܘܬܪܘܼܨܘܼܬܵܐ ܚܵܡܝܼ ܠܝܼ: ܣܲܒܲܒ ܕܣܦܸܪܝܼ ܥܲܠܘܼܟ. 22 ܦܵܪܸܩ: ܝܵܐ ܐܲܠܵܗܵܐ: ܠܝܼܣܪܵܝܹܠ: ܡ̣ܢ ܟܠܵܝ ܥܹܩܘܼܘܹ̈ܗ.

 

ܡܙܡܘܪܐ: ܟܘ.

ܕܕܵܘܝܼܕ.

1. ܕܘܼܢܝܼ: ܝܵܐ ܡܵܪܝܵܐ: ܣܲܒܲܒ ܐܵܢܵܐ ܒܬܲܡܝܼܡܘܼܬܝܼ ܚܕܸܪܝܼ: ܘܒܡܵܪܝܵܐ ܣܒܸܪܝܼ: ܠܹܐ ܫܵܥܫܸܢ. 2 ܒܵܚܸܪܝܼ: ܡܵܪܝܵܐ: ܘܓ̰ܵܪܸܒ ܠܝܼ: ܨܲܪܸܦ ܟܘܼܠܝܵܬܝܼ̈ ܘܠܸܒܝܼ. 3 ܣܲܒܲܒ ܫܵܦܵܩܲܬܘܼܟ ܠܒܲܪܩܘܼܒ̣ܠ ܕܥܲܝܢܝܼ̈ ܝܠܵܐ: ܘܚܕܸܪܝܼ ܒܣܲܪܲܣܬܘܼܬܘܼܟ. 4 ܠܵܐ ܝܬܸܒ̣ܠܝܼ ܥܲܡ ܐܢܵܫܹ̈ܐ ܕܒܘܼܚܬܵܢ: ܘ ܥܲܡ ܦܠܝܼܡܹ̈ܐ ܠܹܐ ܐܵܘܪܸܢ. 5 ܣܢܹܠܝܼ ܓ̰ܵܡܵܥܲܬ ܕܥܵܒ̣ܕܵܢܹ̈ܐ ܕܒܝܼܫܬܵܐ: ܘܥܲܡ ܪܲܫܝܼܥܹܐ ܠܹܐ ܝܵܬܒܸܢ. 6 ܒܸܕ ܚܲܠܸܠܸܢ ܒܚܵܠܝܼܨܘܼܬܵܐ ܐܝܼܕܵܬܝܼ̈: ܘܚܲܪܕܸܢ ܚܵܕܸܪ̈ܘܵܢܹܐ ܠܡܲܕܒܚܘܼܟ: ܡܵܪܝܵܐ: 7 ܠܡܲܫܡܘܼܥܝܹܐ ܒܩܵܠܵܐ ܕܫܵܟ̣ܪܬܵܐ: ܘܠܗܵܩܘܿܝܹܐ ܟܠܵܝ ܥܵܓ̰ܸܒܘܼܝܵܬܘܼܟ̣. 8 ܝܵܐ ܡܵܪܝܵܐ: ܡܘܼܚܸܒܠܝܼ ܡܲܣܟܵܢ ܕܒܲܝܬܘܼܗܝ: ܘܒܹܝܬ ܡܲܫܪܝܵܐ ܕܐܝܼܩܵܪܘܼܟ̣ 9 ܠܵܐ ܓ̰ܵܡܥܸܬ ܥܲܡ ܚܲܛܵܝܹ̈ܐ ܢܲܦ̮ܫܝܼ: ܘܥܲܡ ܐܢܵܫܹ̈ܐ ܕܕܸܡܵܐ ܚܲܝܝܼ̈: 10 ܕܒܐܝܼܕܵܬܵܝ̈ ܐܝܼܬ ܦܸܠܡܵܐ: ܘܝܲܡܝܼܢܵܝ ܡܠܝܼܬܵܐ ܝܠܵܐ ܪܸܫܘܲܬ. 11 ܘܐܵܢܵܐ ܒܬܲܡܝܼܡܘܼܬܝ ܒܸܕ ܚܵܕܪܸܢ: ܦܵܪܸܩ ܠܝܼ: ܘܪܵܚܸܡ ܥܲܠܝܼ. 12 ܐܲܩܠܝܼ ܟܠܹܠܵܐ ܒܕܘܼܙܘܼܬܵܐ: ܓܵܘ ܓ̰ܵܡܵܥܲܬܹ̈ܐ ܒܸܕ ܒܵܪܟܸܢ ܠܡܵܪܝܵܐ.

 

ܡܙܡܘܪܐ: ܟܙ.

ܕܕܵܘܝܼܕܼ

1. ܡܵܪܝܵܐ ܒܲܗܪܝܼ ܘܦܘܼܪܩܵܢܝܼ: ܡ̣ܢ ܡܲܢܝܼ ܙܵܕܥܸܢ: ܡܵܪܝܵܐ ܩܲܠܥܵܐ ܕܚܲܝܲܝ̈ ܡ̣ܢ ܡܲܢܝܼ ܫܵܥܫܸܢ.2 ܟܲܕ ܩܘܼܪܒܸܢܘܿܢ ܥܲܠܝܼ ܒܝܼܫܹ̈ܐ ܠܐܸܟ̣ܵܠܵܐ ܠܒܸܣܪܝܼ: ܡܲܠܝܸܨܵܢܝܼ̈ ܘܕܸܫܡܸܢܹ̈ܐ ܐܸܠܝܼ: ܐܵܢܝܼ ܬܘܼܪܩܸܠܘܿܢ ܘܢܦܸܠܘܿܢ. 3 ܐܸܢ ܫܵܪܝܵܐ ܥܲܠܝܼ ܐܘܼܪܕܘܼܝ: ܠܹܐ ܙܵܕܸܥ ܠܸܒܝܼ: ܐܸܢ ܩܵܝܸܡ ܥܲܠܝܼ ܦܠܵܫܵܐ: ܒܐܵܗܵܐ ܐܵܢܵܐ ܒܸܣܒܵܪܵܐ ܝܘܸܢ. 4 ܚܕܵܐ ܛܠܸܒܠܝܼ ܡ̣ܢ ܡܵܪܝܵܐ: ܠܗ̇ܝ ܒܸܕ ܛܵܥܸܢ: ܝܬܝܵܒ̣ܝ ܒܒܲܝܬܵܐ ܕܡܵܪܝܵܐ ܟܠܵܝ ܝܘܿܡܵܢܹ̈ܐ ܕܚܲܝܲܝ̈. ܠܸܚܙܵܝܵܐ ܒܒܵܣܝܼܡܘܼܬܵܐ ܕܡܵܪܝܵܐ: ܘܠܨܲܚܨܘܼܝܹܐ ܓܵܘ ܗܲܝܟܠܘܼܗܝ. 5 ܣܲܒܲܒ ܕܒܸܕ ܛܵܫܹܐ ܠܝܼ ܒܡܛܲܠܠܹܗ ܒܝܘܿܡܵܐ ܕܒܝܼܫܬܵܐ: ܒܸܕ ܟܵܣܹܐ ܠܝܼ ܒܣܸܬܵܪܵܐ ܕܡܲܫܟܢܘܼܗܝ: ܥܲܠ ܐܝܼܣܵܪܵܐ ܒܸܕ ܡܵܪܸܡ ܠܝܼ. 6 ܘܐܵܕܝܼܵܐ ܦܵܝܸܫ ܡܘܼܪܡܵܐ ܪܸܫܝܼ ܥܲܠ ܕܸܫܡܸܢܝܼ̈ ܚܵܕܸܪ̈ܘܵܢܝܼ: ܘܒܸܕ ܕܵܒ̣ܚܸܢ ܒܡܲܫܟܢܘܼܗܝ ܕܸܒ̣ܚܹ̈ܐ ܕܩܲܘܲܚܬܵܐ: ܒܸܕ ܬܲܫܒܸܚܸܢ ܘܒܸܕ ܙܵܡܪܸܢ ܠܡܵܪܝܵܐ. 7 ܫܡܥܝܼ: ܡܵܪܝܵܐ: ܩܵܠܝܼ: ܟܲܕ ܩܵܪܸܢ: ܘܪܵܚܸܡ ܥܲܠܝܼ ܘܓ̰ܲܘܸܒ ܠܝܼ. 8 ܐܸܠܘܼܟ ܐܡܸܪܹܐ ܠܸܒܝܼ: [22] ܛܸܥܡܘܿܢ ܠܦܵܬܝܼ: ܠܦܵܬܘܼܟ: ܡܵܪܝܵܐ: ܒܸܕ ܛܵܥܸܢ.9 ܠܵܐ ܛܵܫܸܬ ܦܵܬܘܼܟ ܡܸܢܝܼ: ܠܵܐ ܡܲܩܠܸܒܸ̇ܬ ܒܚܸܡܬܵܐ ܪܸܓܘܼܟ: ܗܝܼܵܪܝܼܝܼ ܗ̄ܘܹܠܘܼܟ: ܠܵܐ ܪܲܦܸܬ ܠܝܼ: ܘܠܵܐ ܫܵܒ̣ܩܸܬ ܠܝܼ: ܐܲܠܵܗܵܐ ܕܦܘܼܪܩܵܢܝܼ. 10 ܣܲܒܲܒ ܕܒܵܒܝܼ ܘܝܸܡܝܼ ܫܒ̣ܝܼܩܸܢܘܿܢ: ܘܡܵܪܝܵܐ ܓ̰ܘܼܡܸܥܝܼܢܹܐ. 11 ܡܵܠܸܦ ܠܝܼ: ܡܵܪܝܵܐ: ܐܘܼܪܚܘܼܟ: ܘܬܲܓܒܸܪܝܼ ܒܓ̰ܵܕܵܐ ܦܫܘܼܩܵܐ: ܒܘܼܬ ܕܸܫܡܸܢܝܼ̈. 12 ܠܵܐ ܣܵܦܸܬ ܠܝܼ ܒܪܸܙܵܝܵܐ ܕܡܲܠܝܸܨܵܢܝܼ̈: ܣܲܒܲܒ ܕܩܸܡܠܘܿܢ ܥܲܠܝܼ ܣܵܗܕܹ̈ܐ ܕܒܘܼܚܬܵܢ ܘܢܵܦܚܵܢܵܐ ܕܙܠܘܼܡܝܵܐ. 13 ܐܸܢ ܠܵܐ ܗܘܼܡܸܢܝܼ ܠܚܸܙܵܝܵܐ ܠܛܵܒ̣ܬܵܐ ܕܡܵܪܝܵܐ ܒܐܲܪܥܵܐ ܕܚܲܝܹ̈ܐ.4 ܣܒܘܿܪ ܒܡܵܪܝܵܐ: ܙܪܒܸܢ: ܘܚܲܠܸܢ ܠܸܒܘܼܟ: ܘܣܒܘܪ ܒܡܵܪܝܵܐ.

 

ܡܙܡܘܪܐ: ܟܚ.

ܕܕܵܘܝܼܕܼ.

1. ܐܸܠܘܼܟ: ܝܵܐ ܡܵܪܝܵܐ: ܒܸܕ ܩܵܪܸܢ: ܩܵܝܝܼ: ܠܵܐ ܫܵܬܩܸܬ ܡܸܢܝܼ: ܠܵܐ ܗ̄ܘ̣ܵܐ ܕܫܵܬܩܸܬ ܡܸܢܝܼ ܘܕܵܡܸܢ ܠܨܵܠܝܵܢܹ̈ܐ ܕܓܘܼܒܵܐ. 2 ܫܡܥܝܼ ܩܵܠܵܐ ܕܢܵܘܢܵܚܵܬܝܼ̈: ܒܓܥܵܝܬܝܼ ܐܸܠܘܼܟ: ܒܡܵܪܲܡܬܵܐ ܕܐܝܼܕܵܬܝܼ̈ ܠܵܒܹܝܬ ܩܘܼܕܫܘܼܟ. 3 ܠܵܐ ܓܵܪܫܸܬ ܠܝܼ ܥܲܡ ܒܝܼܫܹ̈ܐ ܘܥܲܡ ܦܵܠܚܵܢܹ̈ܐ ܕܥܵܘܠܵܐ: ܗܲܡܙܸܡܵܢܹ̈ܐ ܕܫܠܵܡܵܐ ܥܲܡ ܚܲܒ̣ܪ̈ܵܘܵܬܵܝ: ܘܒܝܼܫܬܵܐ ܒܠܸܒܵܝ. 4 ܗܲܒ̄ܠ ܠܗ̄ܘܿܢ ܐܲܝܟ ܦܘܼܠܚܢܵܝ: ܘܐܲܝܟ ܒܝܼܫܘܼܬܵܐ ܕܥܵܡܵܠܵܝ̈: ܐܲܝܟ ܦܘܼܠܚܵܢܵܐ ܕܐܝܼܕܵܬܵܝ̈ ܗܲܒ̄ܠ ܠܗ̄ܘܿܢ: ܡܲܕܸܪ ܦܘܼܪܥܵܢܵܝ ܐܸܠܵܝ. 5 ܣܲܒܲܒ ܕܠܹܐ ܦܲܪܡܝܼ ܠܥܵܡܵـ̈ـܠܹܐ ܕܡܵܪܝܵܐ ܘܠܦܘܼܠܚܵܢܵܐ ܕܐܝܼܕܵܬܘܼ̈ܗܝ: ܒܸܕ ܬܵܠܸܚ ܠܗ̄ܘܿܢ: ܘܠܹܐ ܒܵܢܹܐ ܠܗ̄ܘܿܢ. 6 ܒܪܝܼܟ̣ܵܐ ܝܠܹܐ ܡܵܪܝܵܐ: ܣܲܒܲܒ ܕܫܡܸܥܠܹܐ ܩܵܠܵܐ ܕܢܵܘܢܵܝܵܬܝܼ̈. 7 ܡܵܪܝܵܐ ܙܲܪܒܝܼ ܝܠܹܐ ܘܩܲܠܚܵܢܝܼ: ܒܝܹܗ ܣܒܸܪܸܐ ܠܸܒܝܼ: ܘܦܸܫܠܝܼ ܗܘܼܝܸܪܵܐ: ܘܦܸܨܚܠܹܐ ܠܸܒܝܼ: ܘܒܙܡܵܪܬܝܼ ܒܸܕ ܫܵܟܪܸܢܹܗ. 8 ܡܵܪܝܵܐ ܝܠܹܐ ܙܲܪܒ ܐܸܠܵܝ: ܘܩܲܠܥܵܐ ܕܦܘܼܪ̈ܩܵܢܹܐ ܕܡܫܝܼܚܘܼܗܝ ܗ̇ܘ. 9 ܦܵܪܸܩ ܠܛܵܝܸܦܘܼܟ: ܘܒܵܪܸܟ ܠܝܵܪܬܘܼܬܘܼܟ: ܘܡܲܪܥܝܼ ܠܗ̄ܘܿܢ: ܘܡܵܪܸܡ ܠܗ̄ܘܿܢ: ܗܲܠ ܥܵܠܲܡ.

 

ܡܙܡܘܪܐ: ܟܛ.

ܡܲܙܡܘܿܪܵܐ ܕܕܵܘܝܼܕ.

1. ܗܲܒ̄ܠܘܿܢ ܠܡܵܪܝܵܐ: ܒܢܲܝ̈ ܓܲܢ̄ܒܵܪܹ̈ܐ: ܗܲܒ̄ܠܘܿܢ ܠܡܵܪܝܵܐ ܐܝܼܩܵܪܵܐ ܘܙܲܪܒ. 2 ܗܲܒ̄ܠܘܿܢ ܠܡܵܪܝܵܐ: ܐܝܼܩܵܪܵܐ ܕܫܸܡܹܗ: ܣܓ̣ܘܿܕܘܿܢ ܠܡܵܪܝܵܐ ܒܣܸܩܠܵܐ ܕܩܘܼܕܫܵܐ. 3 ܩܵܠܹܗ ܕܡܵܪܝܵܐ ܥܲܠ ܡ̈ܝܵܐ: ܐܲܠܵܗܵܐ ܕܐܝܼܩܵܪܵܐ ܩܘܼܪܩܸܡܠܹܐ: ܡܵܪܝܵܐ ܥܲܠ ܡ̈ܝܵܐ ܪܵܒܵܐ. 4 ܩܵܠܹܗ ܕܡܵܪܝܵܐ ܒܚܲܝܠܵܐ: ܩܵܠܹܗ ܕܡܵܪܝܵܐ ܒܙܲܪܝܼܦܘܼܬܵܐ. 5 ܩܵܠܹܗ ܕܡܵܪܝܵܐ ܒܸܕܒ̣ܵܪܵܐ ܐܲܪ̈ܙܹܐ: ܘܟܹܐ ܬܵܒܸܪ ܡܵܪܝܵܐ ܠܐܲܪ̈ܙܹܐ ܕܠܸܒ̣ܢܵܢ. 6 ܘܟܹܐ ܡܲܪܩܸܕ ܠܗ̄ܘܿܢ ܐܲܝܟ ܡܘܼܓ̰ܵܐ: ܠܸܒ̣ܢܵܢ ܘܫܸܪܝܘܿܢ ܐܲܝܟ ܒܲܪ ܪ̈ܲܝܡܹܐ. 7 ܩܵܠܹܗ ܕܡܵܪܝܵܐ ܒܸܩܝܵܪܵܐ ܠܵܗܹ̈ܐ ܕܢܘܼܪܵܐ. 8 ܩܵܠܹܗ ܕܡܵܪܝܵܐ ܟܹܐ ܡܲܫܥܸܫ ܒܲܪܝܼܵܐ: ܟܹܐ ܡܲܫܥܸܫ ܡܵܪܝܵܐ ܒܲܪܝܼܵܐ ܕܩܕܸܫ. 9 ܩܵܠܹܗ ܕܡܵܪܝܵܐ ܟܹܐ ܡܲܕܒܸܩ ܚܸܒ̣ܠܹ̈ܐ ܠܐܝ̈ܠܵܬܵܐ: ܘܟܹܐ ܫܵܠܸܚ ܡܲܝܫܵܬܹ̈ܐ: ܘܓܵܘ ܗܲܝܟܠܘܼܗܝ ܟܠܹܗ ܟܹܐ ܐܵܡܸܪ: ܐܝܼܩܵܪܵܐ. 10 ܡܵܪܝܵܐ ܥܲܠ ܛܵܘܦܵܢܵܐ ܟܹܐ ܝܵܬܸܒ̣: ܘܒܸܕ ܝܵܬܸܒ̣ ܡܵܪܝܵܐ ܡܲܠܟܵܐ ܠܥܵܠܲܡ. 11 ܡܵܪܝܵܐ ܙܲܪܒ ܩܵܐ ܛܵܝܸܦܹܗ ܒܸܕ ܝܵܗ̄ܒܸܠ: ܡܵܪܝܵܐ ܒܸܕ ܒܵܪܸܟ ܠܛܵܝܸܦܹܗ ܒܫܠܵܡܵܐ.

 

ܡܙܡܘܪܐ: ܠ.

ܡܲܙܡܘܿܪܵܐ: ܙܡܵܪܬܵܐ ܕܣܝܵܡܬܵܐ ܕܒܲܝܬܵܐ ܕܕܵܘܝܼܕ.

1. ܒܸܕ ܡܵܪܡܸܢܘܼܟ: ܝܵܐ ܡܵܪܝܵܐ: ܣܲܒܲܒ ܕܓܪܝܼܫܸܢܘܼܟ̣: ܘܠܵܐ ܡܘܼܚܕܹܠܘܼܟ ܕܸܫܡܸܢܝܼ̈ ܒܝܼܝܼ. 2 ܡܵܪܝܵܐ ܐܲܠܵܗܝܼ: ܡܘܼܩܘܸܚܠܝܼ ܐܸܠܘܼܟ ܘܒܘܼܣܡܸܢܘܼܟ. 3 ܝܵܐ ܡܵܪܝܵܐ: ܡܘܼܐܣܸܩܠܘܼܟ ܡ̣ܢ ܫܝܘܿܠ ܢܲܦ̮ܫܝܼ: ܡܘܼܚܝܸܢܘܼܟ ܡ̣ܢ ܨܵܠܝܵܢܹ̈ܐ ܕܓܘܼܒܵܐ. 4 ܙܡܘܿܪܘܿܢ ܠܡܵܪܝܵܐ: ܛܵܒ̣ܘܼ̈ܗܝ: ܘܫܵܟܪܘܿܢ ܠܕܟ̣ܵܪܵܐ ܕܩܘܼܕܫܹܗ. 5 ܣܲܒܲܒ ܕܛܲܪܦܲܛܬܵܐ ܝܠܵܐ ܒܚܸܡܬܹܗ: ܚܲܝܹ̈ܐ ܝܢܵܐ ܒܪܸܙܵܝܹܗ: ܒܪܲܡܫܵܐ [23] ܒܵܝܸܬ ܒܸܟ̣ܝܵܐ: ܘܠܨܵܦܪܵܐ ܚܸܕܝܘܼܬܵܐ. 6 ܘܐܵܢܵܐ ܐܡܸܪܝܼ ܒܫܸܠܝܘܼܬܝܼ: ܠܹܐ ܫܵܥܫܸܢ ܠܥܵܠܲܡ. 7 ܝܵܐ ܡܵܪܝܵܐ: ܒܪܸܙܵܝܘܼܟ ܡܘܼܟܠܹܠܘܼܟ ܠܛܘܼܪܝܼ ܙܲܪܒ. ܛܘܼܫܹܠܘܼܟ ܦܵܬܘܼܟ̣: ܗ̄ܘܹܠܝܼ ܫܥܝܼܫܵܐ. 8 ܐܸܠܘܼܟ: ܡܵܪܝܵܐ: ܩܪܹܠܝܼ: ܘܒܡܵܪܝܵܐ ܢܘܼܢܹܠܝܼ: 9 ܡܘܼܕܝܼ ܦܲܝܕܵܐ ܒܕܸܡܝܼ: ܒܨܠܵܝܬܝ ܠܓܘܼܒܵܐ: ܩܵܡܘܿ: ܒܸܕ ܫܵܟܸܪܘܼܟ ܥܵܦܪܵܐ ܒܸܕ ܡܕܸܥ ܣܲܪܲܣܬܘܼܬܘܼܟ: 10 ܫܡܥܝܼ: ܡܵܪܝܵܐ: ܘܪܵܚܸܡ ܥܲܠܝܼ: ܡܵܪܝܵܐ ܗ̄ܘܝܼ ܗܲܝܸܪܵܢܵܐ ܐܸܠܝܼ. 11 ܡܘܼܕܸܪܘܼܟ ܬܵܙܝܼܝܼ ܠܪܸܩܕܵܐ ܐܸܠܝܼ: ܫܪܹܠܘܼܟ ܣܲܩܝܼ: ܘܩܲܡ ܚܵܠܨܸܬ ܠܝܼ ܚܕܘܼܬܵܐ: 12 ܩܵܐ ܕܙܵܡܸܪ ܐܸܠܘܼܟ ܚܸܩܪܵܐ (ܕܝܼܝܼ) ܘܠܵܐ ܫܵܬܸܩ. ܡܵܪܝܵܐ ܐܲܠܵܗܝܼ: ܠܥܵܠܲܡ ܒܸܕ ܫܵܟܪܸܢܘܼܟ.

 

ܡܙܡܘܪܐ: ܠܐ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕ.

1. ܒܝܼܘܼܟ: ܡܵܪܝܵܐ: ܣܒܸܪܝܼ: ܠܵܐ ܢܵܚܦܸܢ ܠܥܵܠܲܡ: ܒܙܲܕܝܼܩܘܼܬܘܼܟ ܚܵܠܸܨ ܠܝܼ. 2 ܡܲܟܸܦ ܐܸܠܝܼ ܢܵܬܘܼܟ: ܡܲܠܝܘܼܙܹܐ ܦܵܨܝܼ ܠܝܼ: ܗ̄ܘܝܼ ܐܸܠܝܼ ܠܐܝܼܣܵܪܵܐ ܕܩܲܠܥܵܐ: ܠܒܹܝܬ ܗܲܨܵܪܹ̈ܐ ܠܦܵܪܘܿܩܝ. 3 ܣܲܒܲܒ ܩܵܝܝܼ ܘܗܲܨܵܪܝܼ ܐܲܢ̄ܬ ܝܼܘܸܬ: ܘܒܚܵܬܸܪ ܕܫܸܡܘܼܟ ܬܲܓܒܸܪܸܬ ܠܝܼ ܘܡܚܕܸܪܸܬ ܠܝܼ. 4 ܦܵܠܛܸܬ ܠܝܼ ܡ̣ܢ ܓܲܪܕܵܐ ܕܛܘܡܸܪܘܿܢ ܩܵܬܝܼ: ܣܲܒܲܒ ܐܲܢ̄ܬ ܝܼܘܸܬ ܩܲܠܥܝܼ. 5 ܒܐܝܼܕܘܼܟ ܣܵܦܘܿܝܹܐ ܝܘܸܢ ܪܘܼܚܝܼ: ܦܘܼܪܸܩܠܘܼܟ ܐܸܠܝܼ: ܡܵܪܝܵܐ: ܐܲܠܵܗܵܐ ܕܣܲܪܲܣܬܘܼܬܵܐ. 6 ܟܹܐ ܣܵܢܹܢ ܠܢܵܛܪ̈ܵܢܹܐ ܕܒܵܛܝܼܠܘܼܝܵܬܹ̈ܐ ܕܘܼܓܠܵܢܹ̈ܐ: ܘܐܵܢܵܐ ܒܡܵܪܝܵܐ ܣܒܸܪܝܼ. 7 ܒܸܕ ܦܵܨܚܸܢ ܘܒܸܕ ܚܵܕܸܢ ܒܫܵܦܵܩܲܬܘܼܟ: ܕܚܙܹܠܘܼܟ ܝܲܠܨܘܼܘܝܼ: ܝܕܸܥܠܘܼܟ ܒܥܹܩܘܼܘܹ̈ܐ ܕܢܲܦ̮ܫܝܼ: 8 ܘܠܵܐ ܚܒ̣ܝܼܫܸܢܘܼܟ ܒܐܝܼܕܵܐ ܕܕܸܫܡܸܢ: ܡܘܼܟܠܹܠܘܼܟ ܒܪܘܵܚܵܢܝܼ ܐܲܩܠܵܬܝܼ̈. 9 ܪܵܚܸܡ ܥܲܠܝܼ: ܝܵܐ ܡܵܪܝܵܐ: ܣܲܒܲܒ ܕܥܸܩܠܵܐ ܐܸܠܝܼ: ܢܘܸܠܵܐ ܒܚܲܫܵܐ ܥܲܝܢܝܼ: ܢܲܦ̮ܫܝܼ ܘܟܹܪܣܝܼ. 10 ܣܲܒܲܒ ܕܬܸܡܠܘܿܢ ܒܕܲܪܕ ܚܲܝܲܝ̈: ܘܫܸܢܝܼ̈ ܒܬܵܢܲܚܬܵܐ: ܒܸܨܪܹܐ ܒܥܵܘܠܝܼ ܚܲܝܠܝܼ: ܘܓܲܪ̈ܡܝܼ ܢܘܸܠܘܿܢ. 11 [24] ܡ̣ܢ ܟܠܵܝ ܕܸܫܡܸܢܝܼ̈ ܗ̄ܘܹܠܝܼ ܠܵܘܡܵܐ: ܘܠܫܒ̣ܵܒ̣ܝܼ̈ ܪܵܒܵܐ: ܘܙܕܘܼܥܬܵܐ ܠܝܲܕܥܵܢܝܼ̈: ܚܵܙܝܵܢܝܼ̈ ܒܥܵܠܘܿܠܵܐ ܥܪܸܩܠܘܿܢ ܡܸܢܝܼ. 12 ܦܸܫܠܝܼ ܢܸܫܝܵܐ ܐܲܝܟ ܡܝܼܬܵܐ ܡ̣ܢ ܠܸܒܵܐ: ܗ̄ܘܹܠܝܼ ܐܲܝܟ ܡܵܐܢܵܐ ܬܠܝܼܩܵܐ. 13 ܣܲܒܲܒ ܕܫܡܸܥܠܝܼ ܩܲܝܒܲܬ ܕܪܵܒܵܐ: ܘܙܕܘܼܥܬܵܐ ܡ̣ܢ ܚܵܕܸܪ̈ܘܵܢܹܐ: ܟܲܕ ܥܒܸܕܠܘܿܢ ܪܵܐܝܝܼ [25] ܡܸܚܕܵܕܹ̈ܐ ܥܲܠܝܼ: ܠܸܫܩܵܠܵܐ ܢܲܦ̮ܫܝܼ ܚܫܸܒ̣ܠܘܿܢ. 14 ܘܐܵܢܵܐ ܒܝܼܘܼܟ ܣܒܸܪܝܼ: ܡܵܪܝܵܐ: ܐܡܸܪܝܼ: ܐܲܠܵܗܝܼ ܐܲܢ̄ܬ̇ ܝܼܘܸܬ. 15 ܒܐܝܼܕܘܼܟ ܝܼܢܵܐ ܙܲܒ̣ܢܝܼ̈: ܦܵܨܝܼ ܠܝܼ ܡ̣ܢ ܐܝܼܕܵܐ ܕܕܸܫܡܸܢܝܼ̈: ܘܡ̣ܢ ܢܵܦܠܵܢܹ̈ܐ ܒܵܬ̄ܪܝܼ. 16 ܒܲܗ̄ܪܸܢ ܦܵܬܘܼܟ ܥܲܠ ܪܸܓܘܼܟ: ܦܵܪܸܩ ܠܝܼ ܒܫܵܦܵܩܲܬܘܼܟ. 17 ܝܵܐ ܡܵܪܝܵܐ: ܠܵܐ ܢܵܚܦܸܢ: ܣܲܒܲܒ ܕܩܪܹܠܝܼ ܐܸܠܘܼܟ̣: ܢܵܚܦܝܼ ܒܝܼܫܹ̈ܐ: ܫܵܬܩܝܼ ܠܫܝܘܿܠ. 18 ܦܵܝܫܝܼ ܡܘܼܥܟ̰ܸܡܹܐ ܣܸܦܘܵܬܹ̈ܐ ܕܕܘܼܓܠܵܐ: ܕܟܹܐ ܗܲܡܙܸܡܝܼ ܥܲܠ ܙܲܕܝܼܩܵܐ ܫܲܒ̣ܗܪܵܢܘܼܬܵܐ ܒܚܬܵܪܬܵܐ ܘܡܲܣܠܵܝܬܵܐ. 19 ܟܡܵܐ ܪܵܒܵܐ ܝܠܵܐ ܛܵܒ̣ܬܘܼܟ: ܕܛܘܼܫܝܵܐ ܝܘܸܬ ܩܵܐ ܙܸܕܥܝܘܼ̈ܟ: ܕܦܠܸܚܠܘܼܟ ܩܵܐ ܣܵܒܪ̈ܵܢܹܐ ܒܝܼܘܼܟ ܩܵܕ̄ܡ ܒܢܲܝ̈ ܐܢܵܫܵܐ. 20 ܟܹܐ ܕܲܠܕܸܢܸܬ ܠܗ̄ܘܿܢ ܒܣܸܬܵܪܵܐ ܕܦܵܬܘܼܟ ܡ̣ܢ ܦܸܬܢܹ̈ܐ ܕܐܢܵܫܹ̈ܐ: ܟܹܐ ܛܵܫܸܬ ܠܗ̄ܘܿܢ ܒܡܛܠܠܵܐ ܡ̣ܢ ܚܒ̣ܘܿܛܘܼܬܵܐ ܕܠܸܫܵܢܹ̈ܐ. 21 ܒܪܝܼܟ̣ܵܐ ܝܼܠܹܐ ܡܵܪܝܵܐ: ܣܲܒܲܒ ܕܥܒܸܕܠܹܐ ܥܓ̰ܝܼܒܬܵܐ ܫܵܦܵܩܲܬܘܼܗܝ ܩܵܬܝܼ ܒܡܕܝܼܢ̄ܬܵܐ ܡܗܘܼܨܸܪܬܵܐ. 22 ܘܐܵܢܵܐ ܐܡܸܪܝܼ ܒܝܠܝܵܙܬܝܼ: ܦܸܫܠܝܼ ܩܸܛܥܝܵܐ ܡ̣ܢ ܩܵܕ̄ܡ ܥܲܝܢܘܼ̈ܟ: ܐܝܼܢܵܐ ܫܡܸܥܠܘܿܟ ܩܵܠܵܐ ܕܢܵܘܢܵܝܵܬܝܼ̈: ܐܝܼܡܲܢ ܕܡܘܼܩܘܸܚܠܝܼ ܐܸܠܘܼܟ. 23 ܡܲܚܸܒܘܿܢ ܠܡܵܪܝܵܐ: ܟܠܵܝ ܛܵܒ̣ܘܼ̈ܗܝ: ܡܗܘܼܡܢܹ̈ܐ ܟܹܐ ܢܵܛܸܪ ܡܵܪܝܵܐ: ܘܟܹܐ ܦܲܪܸܥ ܒܒܘܼܫܵܝܝܼ ܠܥܵܒ̣ܕܵܢܵܐ ܕܚܬܝܼܪܘܼܬܵܐ. 24 ܚܲܠܸܢܘܿܢ: ܘܙܲܪܒܸܢ ܠܸܒܵܘܟ̣ܘܿܢ: ܟܠܵܝ ܣܵܦܪ̈ܵܢܹܐ ܠܡܵܪܝܵܐ.

 

ܡܙܡܘܪܐ: ܠܒ.

ܕܕܵܘܝܼܕܼ: ܡܲܣܟܝܼܠ.

1. ܛܘܼܒ̣ܵܐ ܠܗ̇ܘ ܕܫܒ̣ܝܼܩܬܵܐ ܝܠܵܐ ܓܢܵܗܹܗ: ܡܟܘܼܣܝܼܬܵܐ ܝܠܵܐ ܚܛܝܼܬܹܗ. 2 ܛܘܼܒ̣ܵܐ ܠܐܢܵܫܵܐ ܕܠܵܐ ܚܲܫܒܸܢ ܡܵܪܝܵܐ ܐܸܠܹܗ ܥܵܘܠܵܐ: ܘܠܲܝܬ ܒܪܘܼܚܹܗ ܦܸܠܡܵܐ. 3 ܟܲܕ ܫܬܸܩܠܝܼ: ܒܠܹܠܘܿܢ ܓܲܪ̈ܡܝܼ ܒܓܲܪܓܲܡܬܝܼ ܟܠܹܗ ܝܘܿܡܵܐ. 4 ܣܲܒܲܒ ܕܐܝܼܡܵܡܵܐ ܘܠܲܝܠܹܐ ܝܘܼܩܪܸܢܵܐ ܥܲܠܝܼ ܐܝܼܕܘܼܟ: ܕܸܪܵܐ ܬܲܠܝܼܠܘܼܬܝܼ ܠܒܸܪ̈ܙܹܐ ܕܩܲܝܛܵܐ. 5 ܚܛܝܼܬܝܼ ܒܸܕ ܡܲܕܥܸܢ ܐܸܠܘܼܟ: ܘܥܵܘܠܝܼ ܠܵܐ ܟܘܼܣܹܠܝܼ: ܐܡܸܪܝܼ: ܒܸܕ ܡܵܘܕܸܢ ܥܲܠ ܓܢܵܗܲܝ̈ ܠܡܵܪܝܵܐ: ܘܐܲܢ̄ܬ̇ ܫܒܸܩܠܘܼܟ ܥܵܘܠܵܐ ܕܚܛܝܼܬܝܼ. 6 ܒܘܼܬ ܕܐܵܗܵܐ: ܒܸܕ ܦܲܪܦܸܠ ܟܠ ܛܵܒ̣ܵܐ ܒܝܼܘܼܟ: ܒܙܲܒ̣ܢܵܐ ܕܡܵܫ̄ܟ̰ܚܬܵܐ: ܡܸܓܸܕ: ܒܫܦܵܟ̣ܬܵܐ ܕܡ̈ܝܼܵܐ ܪܵܒܵܐ: ܐܸܠܹܗ ܠܹܗ ܡܵܛܝܼ. 7 ܐܲܢ̄ܬ ܣܸܬܵܪܵܐ ܝܘܸܬ ܩܵܬܝܼ: ܡ̣ܢ ܥܹܩܘܝܼ ܒܸܕ ܚܵܡܸܬ ܠܝܼ: ܒܙܡܵܪ̈ܝܵܬܹܐ ܕܚܠܵܨܬܵܐ ܒܸܕ ܚܲܪܕܸܬ ܠܝܼ. 8 ܒܸܕ ܡܲܦܸܪܡܸܢܘܼܟ ܘܒܸܕ ܡܵܠܦܸܢܘܼܟ ܒܐܘܼܪܚܵܐ ܕܐܵܙܸܠ̄ܬ: ܒܸܕ ܥܵܒ̣ܕܸܢ ܪܵܐܝܝܼ: ܥܲܠܘܼܟ ܥܲܝܢܝܼ. 9 ܠܵܐ ܗܵܘܝܼܬܘܿܢ ܐܲܝܟ ܣܘܼܣܹܐ: ܐܲܝܟ ܟܵܘܸܕܢܵܐ: ܕܠܲܝܬ ܦܲܪܡܵܝܬܵܐ: [26] ܒܠܸܓ̣ܵܒ ܘܠܲܥܡܵܐ ܪܲܚܬܘܼܗܝ ܠܙܲܒܛܘܼܢܹܐ: [27] ܒܠܵܐ ܠܩܲܪܒܘܼܢܹܐ ܐܸܠܘܼܟ. 10 ܪܵܒܵܐ ܝܢܵܐ ܕܲܪ̈ܕܹܐ ܠܒܝܼܫܵܐ: ܘܣܵܒܪܵܢܵܐ ܒܡܵܪܝܵܐ: ܫܵܦܵܩܲܬ ܒܸܕ ܚܲܪܕܝܼܵܐ ܠܹܗ. 11 ܚܕܸܡܘܿܢ ܒܡܵܪܝܵܐ: ܘܦܨܘܿܚܘܿܢ ܙܲܕܝܼܩܹ̈ܐ: ܘܙܡܘܿܪܘܿܢ: ܟܠܵܝ ܬܪ̈ܘܼܨܹܐ ܕܠܸܒܵܐ.

 

ܡܙܡܘܪܐ: ܠܓ.

1. ܚܕܹܡܘܿܢ: ܙܲܕܝܼܩܹ̈ܐ: ܒܡܵܪܝܵܐ: ܩܵܐ ܬܪ̈ܘܼܨܹܐ ܚܫܝܼܚܬܵܐ ܚܠܵܐ ܬܸܫܒܘܚܬܵܐ. 2 ܫܟܪܘܿܢ ܠܡܵܪܝܵܐ ܒܟܸܢܵܪܵܐ: ܒܩܝܼܬܵܪܵܐ ܕܥܸܣܪܵܐ ܙܡܘܿܪܘܿܢ ܐܸܠܹܗ. 3 ܙܡܘܿܪܘܿܢ ܐܸܠܹܗ ܙܡܵܪܬܵܐ ܚܲܕܬܵܐ: ܨܦܵܝܝܼ ܥܒ̣ܘܿܕܘܿܢ ܒܸܡܚܵܝܵܐ ܒܩܲܘܲܚܬܵܐ: 4 ܣܲܒܲܒ ܬܪܝܼܨܵܐ ܝܠܹܐ ܚܲܒ̇ܪܵܐ ܕܡܵܪܝܵܐ: ܘܟܠܹܗ ܦܘܼܠܚܵܢܘܼܗܝ ܒܡܗܘܼܡܢܘܼܬܵܐ. 5 ܟܹܐ ܡܲܚܸܒ̣ ܙܲܕܝܼܩܘܼܬܵܐ ܘܕܝܼܘܵܢ: ܫܵܦܵܩܲܬ ܕܡܵܪܝܵܐ ܡܠܝܼܬܵܐ ܝܠܵܐ ܐܲܪܥܵܐ. 6 ܒܗܸܡܸܙܡܵܢ ܕܡܵܪܝܵܐ ܫܡܲܝܹ̈ܐ ܦܸܫܠܘܿܢ ܥܒ̣ܝܼܕܹܐ: ܘܒܪܘܼܚܵܐ ܕܦܘܼܡܘܼܗܝ ܟܠܹܗ ܚܲܝܠܵܝ. 7 ܟܹܐ ܓ̰ܲܡܸܥ ܐܲܝܟ ܩܘܼܚܵܐ ܡ̈ܝܵܐ ܕܝܵܡܵܐ: ܟܹܐ ܡܲܬܸܒ̣ ܒܐܲܢܒܵܪܹ̈ܐ ܬܗܘܼܡܹ̈ܐ. 8 ܙܵܕܥܝܼ ܡ̣ܢ ܡܵܪܝܵܐ ܟܠܵܗ̇ ܐܲܪܥܵܐ: ܡܸܢܹܗ ܪܲܬܪܸܬܝܼ ܟܠܵܝ ܥܵܡܪ̈ܵܢܹܐ ܕܒܪܝܼܬܵܐ. 9 ܣܲܒܲܒ ܕܗ̇ܘ ܐܡܸܪܹܐ: ܘܗ̄ܘܹܠܵܐ: ܗ̇ܘ ܦܩܸܕܠܹܐ: ܘܟܠܹܠܵܐ. 10 ܡܵܪܝܵܐ ܟܹܐ ܦܲܪܦܸܣ ܪܵܐܝܝܼ ܕܡܸܠܲܬܹ̈ܐ: ܟܹܐ ܒܵܛܸܠ ܚܘܼܫܵܒܹ̈ܐ ܕܛܵܝܸܦܹ̈ܐ. 11 ܪܵܐܝܝܼ ܕܡܵܪܝܵܐ ܠܥܵܠܲܡ ܒܸܕ ܟܵܠܝܵܐ: ܚܘܼܫܵܒܹ̈ܐ ܕܠܸܒܹܗ ܠܕܵܘܪܵܐ ܘܕܵܘܪܵܐ. 12 ܛܘܼܒ̣ܵܐ ܠܡܸܠܲܬ ܕܡܵܪܝܵܐ ܝܠܹܐ ܐܲܠܵܗܘܼܗ̇: ܛܵܝܸܦܵܐ ܕܓܘܼܒܹܠܹܐ ܠܝܵܪܬܘܼܬܵܐ ܩܵܐ ܓܵܢܹܗ. 13 ܡ̣ܢ ܫܡܲܝܵܐ ܚܸܪܹܐ ܡܵܪܝܵܐ: ܚܙܹܠܹܐ ܠܟܠܵܝ ܒܢܲܝ̈ܢܵܫܵܐ. 14 ܡ̣ܢ ܡܲܟܵܢ ܕܡܵܘܬܒ̣ܘܼܗܝ ܚܸܪܹܐ ܥܲܠ ܟܠܵܝ ܥܵܡܪ̈ܵܢܹܐ ܕܐܲܪܥܵܐ: 15 (ܗ̇ܘ) ܕܓܒܸܠܹܐ ܐܲܝܟ ܥܘܕܵܠܹܐ ܠܸܒܵܝ: ܕܟܹܐ ܦܲܪܡܹܐ ܠܟܠܵܝ ܦܘܼܠܚܵܢܵܝ̈. 16 ܠܲܝܬ ܡܲܠܟܵܐ ܕܦܸܫܠܹܐ ܦܘܼܨܝܵܐ ܒܒܘܼܫܵܝܝܼ ܕܥܲܣܟܵܪ: ܓܲܢ̄ܒܵܪܵܐ ܠܹܐ ܦܵܝܸܫ ܦܘܼܨܝܵܐ ܒܒܘܼܫܵܝܝܼ ܕܚܲܝܠܵܐ. 17 ܗܵܒܵܣ ܝܼܠܹܗ ܣܘܼܣܹܐ ܩܵܐ ܦܵܪܲܩܬܵܐ: ܘܒܒܘܼܫܵܝܝܼ ܕܚܲܝܠܘܼܗܝ ܠܹܐ ܚܵܠܸܨ. 18 ܗܵܐܝܼ ܥܲܝܢܵܐ ܕܡܵܪܝܵܐ ܠܙܸܕܥܝܘܼ̈ܗܝ ܝܠܵܐ: ܠܐܵܢܝܼ ܕܣܵܦܪܝܼ ܠܫܵܦܵܩܲܬܘܼܗܝ: 19 ܠܦܵܨܘܿܝܹܐ ܡ̣ܢ ܡܵܘܬܵܐ ܓܵܢܵܝ: ܘܠܡܲܚܘܼܝܵܝ ܒܟܸܦܢܵܐ. 20 ܓܵܢܲܢ ܣܦܸܪܵܐ ܠܡܵܪܝܵܐ: ܗܝܼܵܪܝܲܢ ܘܡܵܛܵܠܲܢ ܗ̇ܘ ܝܼܠܹܐ. 21 ܣܲܒܲܒ ܒܝܹܗ ܒܸܕ ܚܵܕܹܐ ܠܸܒܲܢ: ܣܲܒܲܒ ܕܒܫܸܡܵܐ ܕܩܘܼܕܫܘܼܗܝ ܣܒܸܪܲܢ. 22 ܗܵܘܝܵܐ ܫܵܦܵܩܲܬܘܼܟ: ܝܵܐ ܡܵܪܝܵܐ: ܥܲܠܲܢ: ܕܵܐܟ̣ܝܼ ܕܣܦܸܪܲܢ ܐܸܠܘܼܟ̣.

 

ܡܙܡܘܪܐ: ܠܕ.

ܕܕܵܘܝܼܕ: ܐܝܼܡܲܢ ܕܡܘܼܚܠܸܦܠܹܐ ܛܲܥܡܘܼܗܝ ܩܵܕ̄ܡ ܐܲܒ̣ܝܼܡܲܠܟ: ܘܛܪܸܕܠܹܗ: ܘܪܵܚܸܫܠܹܐ.

1. ܒܸܕ ܒܵܪܟܸܢ ܠܡܵܪܝܵܐ ܒܟܠ ܙܲܒ̣ܢܵܐ: ܒܕܵܝܸܡܘܼܬܵܐ ܬܸܫܒ̇ܘܿܚܬܹܗ ܒܦܘܼܡܝ 2 ܒܡܵܪܝܵܐ ܒܸܕ ܥܵܒ̣ܕܵܐ ܫܘܼܒ̣ܗܵܪܵܐ ܢܲܦ̮ܫܝܼ: ܫܲܡܥܝܼ ܡܸܣܟܹܢܹ̈ܐ ܘܚܵܕܝܼ. 3 ܡܲܓܘܸܪܘܿܢ ܠܡܵܪܝܵܐ ܥܲܡܝܼ: ܘܡܵܪܡܵܚ ܫܸܡܹܗ [28] ܡܸܚܕܵܕܹ̈ܐ. 4 ܛܸܥܠܝܼ ܠܡܵܪܝܵܐ: ܘܓ̰ܘܼܘܸܒܸܢܹܐ. ܘܡ̣ܢ ܟܠܵܝ ܨܵܘܝܼ̈ ܦܘܼܨܝܼܢܹܐ. 5 ܚܸܪܘܿܢ ܐܸܠܹܗ ܘܒܗܸܪܘܿܢ: ܘܦܵܬܘܵܬܝ̈ ܠܹܐ ܦܵܝܫܝܼ ܫܲܪܡܸܣܲܪ. 6 ܐܵܗܵܐ ܡܸܣܟܹܢܵܐ ܩܪܹܠܹܐ: ܘܡܵܪܝܵܐ ܫܡܸܥܠܹܗ: ܘܡ̣ܢ ܟܠܵܝ ܥܹܩܘܼܝܘܼ̈ܗܝ ܦܘܼܪܸܩܠܹܗ. 7 ܟܹܐ ܡܵܚܹܐ ܐܘܼܪܕܘܼܝ ܡܲܠܲܐܟܹܗ ܕܡܵܪܝܵܐ ܚܵܕܼܪ̈ܘܵܢܹܐ ܕܙܹܕܥܝܘܼ̈ܗܝ: ܘܟܹܐ ܦܵܨܹܐ ܠܗ̄ܘܿܢ. 8 ܛܥܘܿܡܘܿܢ ܘܚܙܹܡܘܿܢ ܕܛܵܒ̣ܵܐ ܝܠܹܐ ܡܵܪܝܵܐ: ܛܘܼܒ̣ܵܐ ܠܐܢܵܫܵܐ ܕܣܵܒܸܪ ܒܝܹܗ. 9 ܙܕܸܥܡܘܿܢ ܡ̣ܢ ܡܵܪܝܵܐ: ܩܲܕܝܼܫܘܼ̈ܗܝ: ܣܲܒܲܒ ܕܠܲܝܬ ܚܘܼܣܪܵܢܵܐ ܠܕܸܕܥܝܘܼ̈ܗܝ. 10 ܓܘܼܪ̈ܝܹܐ ܕܐܲܪܝܵܐ ܡܘܼܣܟܸܢܘܿܢ ܘܟܦܸܢܘܿܢ: ܘܐܵܢܝܼ ܕܛܵܥܝܼ ܠܡܵܪܝܵܐ ܠܹܐ ܚܵܣܪܝܼ ܟܠ ܛܵܒ̣ܬܵܐ. 11 ܬܹܐܡܘܿܢ: ܒܢܘܼܢܹ̈ܐ: ܫܡܸܥܡܘܿܢ ܠܝܼ: ܙܕܘܼܥܬܵܐ ܕܡܵܪܝܵܐ ܡܵܠܦܸܢܵܘܟ̣ܘܿܢ. 12 ܡܲܢܝܼ ܝܠܹܐ ܐܢܵܫܵܐ ܕܒܲܥܝܹܐ ܚܲܝܹ̈ܐ: ܡܲܚܸܒܵܢܵܐ ܕܝܘܿܡܵܢܹ̈ܐ ܠܸܚܙܵܝܵܐ ܛܵܒ̣ܬܵܐ. 13 ܢܛܘܿܪ ܠܸܫܵܢܘܼܟ ܡ̣ܢ ܒܝܼܫܬܵܐ: ܘܣܸܦܘܵܬܘܼ̈ܟ ܡ̣ܢ ܗܲܡܙܘܼܡܹܐ ܦܸܠܡܵܐ. 14 ܩܠܘܿܒ ܡ̣ܢ ܒܝܼܫܬܵܐ: ܘܥܒ̣ܘܿܕ ܛܵܒ̣ܬܵܐ: ܛܥܝܼ ܠܫܠܵܡܵܐ: ܘܢܦܘܿܠ ܒܵܬ̄ܪܹܗ. 15 ܥܲܝܢܹ̈ܐ ܕܡܵܪܝܵܐ ܠܙܲܕܝܼܩܹ̈ܐ ܝܢܵܐ: ܘܢܵܬܝܵܬܘܼ̈ܗܝ ܠܓܥܵܝܬܵܝ. 16 ܦܵܬܵܐ ܕܡܵܪܝܵܐ ܥܲܠ ܥܵܒ̣ܕܵܢܹ̈ܐ ܕܒܝܼܫܬܵܐ: ܠܸܩܛܲܥܝܵܐ ܡ̣ܢ ܐܲܪܥܵܐ ܕܟ̣ܵܪܵܝ. 17 ܡܘܼܩܘܸܚܠܘܿܢ: ܘܡܵܪܝܵܐ ܫܡܸܥܠܹܐ: ܘܡ̣ܢ ܟܠܵܝ ܥܹܩܘܼܝܵܝ̈ ܦܘܼܨܝܵܠܹܐ. 18 ܩܘܼܪܒܵܐ ܝܠܹܐ ܡܵܪܝܵܐ ܠܬܒ̣ܝܼܪܹ̈ܐ ܒܠܸܒܵܐ: ܘܠܡܵܟܝܼܟܹ̈ܐ ܒܪܘܼܚܵܐ ܟܹܐ ܦܵܪܸܩ. 19 ܪܵܒܵܐ ܝܢܵܐ ܐܘܼܠܨܵܢܹ̈ܐ ܕܙܲܕܝܼܩܵܐ: ܘܡ̣ܢ ܟܠܵܝ ܟܹܐ ܦܵܨܹܐ ܠܹܗ ܡܵܪܝܵܐ: 20 ܒܸܢܛܵܪܵܐ ܟܠܵܝ ܓܲܪ̈ܡܘܼܗܝ: ܚܵܕ̄ ܡܸܢܵܝ ܠܵܐ ܦܸܫܠܹܐ ܬܒ̣ܝܼܪܵܐ. 21 ܒܸܕ ܡܲܡܝܸܬܵܐ ܠܒ̇ܝܼܫܵܐ ܒܝܼܫܬܵܐ: ܘܣܵܢܝܵܢܹ̈ܐ ܕܙܲܕܝܼܩܵܐ ܒܸܕ ܗܵܘܝܼ ܥܒ̣ܝܼܕܹܐ ܓܘܼܢܵܗܟܵܪ. 22 ܟܹܐ ܦܵܪܸܩ ܡܵܪܝܵܐ ܓܵܢܵܐ ܕܪܹ̈ܓܵܘܵܬܘ̣ܗܝ: ܘܠܹܐ ܗܵܘܝܼ ܥܒ̣ܝܼܕܹܐ ܓܘܼܢܵܗܟܵܪ ܟܠܵܝ ܕܣܵܒܪܝܼ ܒܝܹܗ.

 

ܡܙܡܘܪܐ: ܠܗ.

ܕܕܵܘܝܼܕ.

1. ܥܒ̣ܘܿܕ ܕܲܥܘܝܼ: ܝܵܐ ܡܵܪܝܵܐ: ܕܲܥܘܝܼܟ̰ܝܼܝ̈: ܦܠܘܿܫ ܥܲܡ ܦܵܠܫܵܢܹ̈ܐ ܥܲܡܝܼ. 2 ܕܒ̣ܘܿܩ ܡܵܛܵܠܵܐ ܘܩܲܠܚܵܢ: ܘܩܘܼܡ̄ ܠܗܲܝܲܪܬܝܼ. 3 ܘܓܪܘܿܫ ܪܘܼܡܚܹܐ: ܘܕܒ̣ܘܿܩ ܠܐܘܼܪܚܵܐ ܕܢܵܦܠܵܢܹ̈ܐ ܒܵܬ̄ܪܝܼ: ܐܡܘܿܪ ܠܢܲܦ̮ܫܝܼ: ܦܘܼܪܩܵܢܵܟ̣ܝ ܝܼܘܸܢ ܐܵܢܵܐ. 4 ܢܵܚܦܝܼ ܘܗܵܘܝܼ ܫܲܪܡܲܢܕܵܐ ܛܵܥܝܵܢܹ̈ܐ ܠܢܲܦ̮ܫܝܼ: ܕܝܪܝܼ ܠܵܒܵܬ̄ܪܝܝܼ: ܘܗܵܘܝܼ ܫܲܪܡܸܣܲܪ ܚܵܫܒ̣ܵܢܹ̈ܐ ܕܒܝܼܫܬܝܼ. 5 ܗܵܘܝܼ ܐܲܝܟ ܦܘܼܫܸܟܵܐ ܩܵܕ̄ܡ ܦܵܘܚܵܐ: ܘܡܲܠܲܐܟܹܗ ܕܡܵܪܝܵܐ ܚܲܪܙܘܼܦܹܐ. 6 ܗܵܘܝܵܐ ܐܘܼܪܚܵܝ ܚܸܫܟܵܐ ܘܡܲܓ̰ܪܲܛܝܵܬܹܐ: ܘܡܲܠܲܐܟܹܗ ܕܡܵܪܝܵܐ ܒܸܢܦܵܠܵܐ ܒܵܬ̄ܪܵܝ. 7 ܣܲܒܲܒ ܕܠܵܐ ܗܲܓ̰ܲܬ ܛܘܼܫܹܠܘܿܢ ܐܸܠܝܼ ܓܘܼܒܵܐ ܕܓܲܪܕܵܝ: ܕܠܵܐ ܗܲܓ̰ܲܬ ܚܦܸܪܘܿܢ ܩܵܐ ܢܲܦ̮ܫܝܼ. 8 ܐܵܬܝܵܐ ܥܲܠܘܼܗܝ ܒܲܠܵܐ: ܠܵܐ ܝܲܕܸܥ: ܘܓܲܪܕܘܼܗܝ ܕܛܘܼܫܹܠܹܐ ܕܵܒܸܩ ܠܹܗ: ܒܒܲܠܵܐ ܢܵܦܸܠ ܒܝܹܗ.9 ܘܢܲܦ̮ܫܝܼ ܒܸܕ ܦܵܨܚܵܐ ܒܡܵܪܝܵܐ: ܒܸܕ ܚܵܕܝܵܐ ܒܦܪܲܩܬܘܼܗܝ. 10 ܟܠܵܝ ܓܲܪ̈ܡܝܼ ܒܸܕ ܐܵܡܪܝܼ: ܡܵܪܝܵܐ: ܡܲܢܝܼ ܝܠܹܐ ܐܲܝܟ ܕܝܼܘܼܟ. ܦܵܨܚܵܢܵܐ ܠܡܸܣܟܹܢܵܐ ܡ̣ܢ ܙܲܪܒܵܢܵܐ ܡܸܢܹܗ: ܘܡܸܣܟܹܢܵܐ ܘܦܲܩܝܼܪ ܡ̣ܢ [29] ܟ̰ܵܠܓ̰ܵܢܘܼܗܝ. 11 ܟܹܐ ܩܵܝܡܝܼ ܣܵܗܕܹ̈ܐ ܕܢܵܐܗܲܩ: ܡܸܢܕܝܼ ܕܠܹܐ ܝܲܕܥܸܢ ܟܹܐ ܒܵܩܪܝܼ ܡܸܢܝܼ. 12 ܟܹܐ ܦܲܪܥܝܼ ܠܝܼ ܒܝܼܫܬܵܐ ܡܒܵܕܵܠ ܕܛܵܒ̣ܬܵܐ: ܩܛܵܥܝܬܵܐ ܕܢܲܦ̮ܫܝܼ. 13 ܘܐܵܢܵܐ: ܒܡܪܵܥܝܬܵܝ ܠܒܸܫܬܝܼ ܣܲܩܵܐ ܗ̄ܘ̣ܵܐ: ܡܘܼܠܝܸܨܵܠܝܼ ܒܨܵܘܡܵܐ ܢܲܦ̮ܫܝܼ: ܘܨܠܘܿܬܝܼ ܠܥܘܼܒܝܼ ܕܸܪܵܐ. 14 ܐܲܝܟ ܚܲܒ̣ܪܵܐ: ܐܲܝܟ ܐܵܚܘܿܢܵܐ ܕܝܼܝܼ ܚܕܸܪܝܼ: ܐܲܝܟ ܥܵܒ̣ܕܵܢܵܐ ܕܬܵܙܝܼ ܠܝܸܡܵܐ: ܠܒ̣ܝܼܫܵܐ ܟܘܼܡܵܐ ܟܸܦܠܝܼ. 15 ܘܒܠܲܢܓܲܠܬܝܼ ܚܕܸܠܘܿܢ ܘܓ̰ܡܸܥܠܘܿܢ: ܓ̰ܡܸܥܠܘܿܢ ܥܲܠܝܼ ܡܵܚܝܵܢܹ̈ܐ ܕܩܲܝܒܲܬ: ܘܠܵܐ ܝܕܸܥܠܝܼ: ܟ̰ܘܼܢܟ̰ܸܪܘܿܢ: ܘܠܵܐ ܫܬܸܩܠܘܿܢ: 16 [30] ܓܵܘ ܚܲܢܦܹ̈ܐ ܡܲܣܚܵܪܹ̈ܐ ܕܓܸܪܕܲܝܵܐ ܚܲܪܚܘܼܟ̰ܹܐ ܥܲܠܝܼ ܟܹܟܵܝ̈. 17 ܡܵܪܝܼ: ܟܡܵܐ ܒܸܕ ܚܵܙܸܬ: ܡܲܕܸܪ ܢܲܦ̮ܫܝܼ ܡ̣ܢ ܒܲܠܵܝ̈: ܡ̣ܢ ܓܘܼܪ̈ܝܹܐ ܕܐܲܪܝܵܐ ܝܼܚܝܼܕܘܼܬܝܼ. 18 ܒܸܕ ܫܵܟܪܸܢܘܼܟ ܓܵܘ ܟܸܢܫܵܐ ܪܵܒܵܐ: ܓܵܘ ܛܵܝܸܦܵܐ ܙܲܪܒܵܢܵܐ ܒܸܕ ܫܵܒܚܸܢ ܐܸܠܘܼܟ. 19 ܠܵܐ ܚܵܕܝܼ ܥܲܠܝܼ ܕܸܫܡܸܢܝܼ̈ ܕܕܘܼܓܠܵܐ: ܣܵܢܝܵܢܝܼ̈ ܕܠܵܐ ܗܲܓ̰ܲܬ ܠܵܐ ܠܵܟܙܝܼ ܥܲܝܢܵܐ. 20 ܣܲܒܲܒ ܕܠܵܐ ܫܠܵܡܵܐ ܟܹܐ ܗܲܡܙܸܡܝܼ: ܘܥܲܠ ܫܸܠܝܵܐ ܒܐܲܪܥܵܐ ܫܘܼܠܹ̈ܐ ܕܦܸܠܡܹ̈ܐ ܟܹܐ ܚܵܫܒ̣ܝܼ. 21 ܘܡܘܼܪܘܸܚܠܘܿܢ ܥܲܠܝܼ ܦܘܼܡܵܝ: ܐܡܸܪܘܿܢ: ܐܘܿܚܲܝ: ܐܘܿܚܲܝ: ܚܙܹܠܵܐ ܥܲܝܢܲܢ. 22 ܚܙܹܠܘܼܟ: ܡܵܪܝܵܐ: ܠܵܐ ܫܵܬܩܸܬ: ܡܵܪܝܼ: ܠܵܐ ܪܵܚܩܸܬ ܡܸܢܝܼ. 23 ܪܥܘܿܫ ܘܗ̄ܘܝܼ ܗܸܫܝܵܪ ܠܕܝܼܘܵܢܝܼ: ܐܲܠܵܗܝܼ ܘܡܵܪܝܼ: ܠܪܸܥܘܝܼܝܼ. 24 ܕܘܼܢܝܼ ܐܲܝܟ ܙܲܕܝܼܩܘܼܬܘܼܟ: ܡܵܪܝܵܐ ܐܲܠܵܗܝܼ: ܘܠܵܐ ܚܵܕܝܼ ܒܝܼܝܼ. 25 ܠܵܐ ܐܵܡܪܝܼ ܒܠܸܒܵܝ: ܐܘܿܚܲܝ ܓܵܢܲܢ: ܠܵܐ ܐܵܡܪܝܼ: ܒܠܸܥܠܲܢ ܐܸܠܹܗ. 26 ܢܵܚܦܝܼ ܘܗܵܘܝܼ ܫܲܪܡܸܣܲܪ [31] ܡܸܚܕܵܕܹ̈ܐ ܐܵܢܝܼ ܕܚܵܕܝܼ ܒܒܝܼܫܬܝܼ: ܠܵܒ̣ܫܝܼ ܢܚܸܦܬܵܐ ܘܫܲܪܡܸܣܲܪܘܼܬܵܐ ܡܲܓܘܸܪܵܢܹܐ ܕܓܵܢܵܝ ܥܲܠܝܼ. 27 ܩܲܘܚܝܼ ܘܚܵܕܝܼ ܐܵܢܝܼ ܕܒܵܣܡܵܐ ܠܗ̄ܘܿܢ ܒܙܲܕܝܼܩܘܼܬܝܼ: ܘܐܵܡܪܝܼ ܒܕܵܝܸܡܘܼܬܵܐ: ܗܵܘܹܐ ܓܘܼܪܵܐ ܡܵܪܝܵܐ: ܕܟܹܐ ܒܵܣܡܵܐ ܠܹܗ ܒܫܠܵܡܵܐ ܕܪܸܓܹܗ. 28 ܘܠܸܫܵܢܝܼ ܒܸܕ ܗܲܡܙܸܡ ܙܲܕܝܼܩܘܼܬܘܼܟ: ܟܠܹܗ ܝܘܿܡܵܐ ܬܸܫܒ̇ܘܿܚܬܘܼܟ.

 

ܡܙܡܘܪܐ: ܠܘ.

ܠܪܹܫܵܐ ܕܙܵܡܵܪܹ̈ܐ. ܕܪܹܓܵܐ ܕܡܵܪܝܵܐ: ܕܕܵܘܝܼܕ.

1. ܚܲܒ̇ܪܵܐ ܕܥܵܘܠܵܐ ܠܒܲܝܬܵܐ ܒܓܵܘܵܐ [32] ܕܠܸܒܝܼ: ܠܲܝܬ ܙܕܘܼܥܬܵܐ ܕܐܲܠܵܗܵܐ ܩܵܕ̄ܡ ܥܲܝܢܘܼ̈ܗܝ. 2 ܣܲܒܲܒ ܕܟܹܐ ܥܵܒܸܕ ܟ̰ܘܼܥܝܘܼܬܵܐ ܐܸܠܹܗ ܒܥܲܝܢܘܼ̈ܗܝ: ܠܡܵܫ̄ܟ̰ܘܿܚܹܐ ܓܢܵܗܘܼܗܝ ܠܸܣܢܵܝܵܐ. 3 ܗܹܡܸܙܡܵܢܹ̈ܐ ܕܦܘܼܡܘܼܗܝ ܥܵܘܠܵܐ ܘܦܸܠܡܵܐ: ܫܠܹܠܹܐ ܠܦܲܪܡܘܼܝܹܐ ܠܸܥܒ̣ܵܕܵܐ ܛܵܒ̣ܬܵܐ. 4 ܥܵܘܠܵܐ ܟܹܐ ܚܵܫܸܒ̣ ܥܲܠ ܫܘܝܼܬܹܗ: ܟܹܐ ܡܲܟܠܹܐ ܓܵܢܘܼܗܝ ܥܲܠ ܐܘܼܪܚܵܐ ܠܵܐ ܨܦܵܝܝܼ: ܒܝܼܫܬܵܐ ܠܹܐ ܡܲܣܠܹܐ. 5 ܡܵܪܝܵܐ: ܒܫܡܲܝܹ̈ܐ ܝܢܵܐ ܪ̈ܲܚܡܘܼܟ: ܡܗܘܼܡܢܘܼܬܘܼܟ ܗܲܠ ܥܢܵܢܹ̈ܐ. 6 ܙܲܕܝܼܩܘܼܬܘܼܟ ܐܲܝܟ ܛܘܼܪܵܢܹ̈ܐ ܕܐܲܠܵܗܵܐ: ܕܝܼܘܵܢܘܼ̈ܟ ܥܘܼܡܩܵܐ ܓܘܼܪܵܐ: ܒܲܪܢܵܫܵܐ ܘܗܲܝܘܵܢ ܟܹܐ ܦܵܪܩܸܬ: ܝܵܐ ܡܵܪܝܵܐ. 7 ܟܡܵܐ ܡܝܘܼܩܪܹ̈ܐ ܝܢܵܐ ܪ̈ܲܚܡܘܼܟ: ܐܲܠܵܗܵܐ! ܘܒܢܲܝ̈ܢܵܫܵܐ ܒܛܸܠܵܢܝܼܬܵܐ ܕܓܘܼܠܦܵܢܘܼ̈ܟ ܟܹܐ ܟܵܣܝܼ ܓܵܢܵܝ. 8 ܒܸܕ ܪܵܘܝܼ ܡ̣ܢ ܫܲܡܝܼܢܘܼܬܵܐ ܕܒܲܝܬܘܼܟ: ܘܢܲܗܪܵܐ ܕܒܵܣܝܼܡܘܼܝܵܬܘܼ̈ܟ ܒܸܕ ܡܲܫܬܸܬ ܠܗ̄ܘܿܢ. 9 ܣܲܒܲܒ ܥܲܡܘܼܟ ܝܼܠܹܐ ܡܲܒܘܼܥܵܐ ܕܚܲܝܹ̈ܐ: ܒܒܲܗܪܘܼܟ ܒܸܕ ܚܵܙܵܚ ܒܲܗܪܵܐ. 10 ܡܲܪܝܸܟ ܪ̈ܲܚܡܘܼܟ ܠܝܲܕܥܵܢܘܼ̈ܟ: ܘܙܲܕܝܼܩܘܼܬܘܼܟ ܠܬܪ̈ܘܼܨܹܐ ܕܠܸܒܵܐ. 11 ܠܵܐ ܐܵܬܝܵܐ ܥܲܠܝܼ ܐܲܩܠܵܐ ܕܫܲܒ̣ܗܪܵܢܘܼܬܵܐ: ܘܐܝܼܕܵܐ ܕܒܝܼܫܹ̈ܐ ܠܵܐ ܡܲܓ̰ܘܸܓ̰ܵܐ ܠܝܼ. 12 ܬܵܡܵܐ ܢܦܸܠܘܿܢ ܦܵܠܚܵܢܹ̈ܐ ܕܥܵܘܠܵܐ: ܦܸܫܠܘܿܢ ܚܘܼܪܙܸܦܹܐ: ܘܠܵܐ ܡܹܨܠܘܿܢ ܠܸܩܝܵܡܵܐ.

 

 

 

 

ܡܙܡܘܪܐ: ܠܙ.

ܕܕܵܘܝܼܕ.

1. ܠܵܐ ܚܵܝܡܸܬ ܒܥܵܒ̣ܕܵܢܹ̈ܐ ܕܒܝܼܫܬܵܐ: ܠܵܐ ܒܲܚܸܠܸܬ ܒܥܵܒ̣ܕܵܢܹ̈ܐ ܕܥܵܘܠܵܐ. 2 ܣܲܒܲܒ ܐܲܝܟ ܓܸܠܵܐ ܓ̰ܲܠܕܹܐ ܟܹܐ ܦܵܝܫܝܼ ܦܪܝܼܡܐ: ܘܐܲܝܟ ܝܲܪܩܵܐ ܩܝܼܢܵܐ ܟܹܐ ܟ̰ܵܡܟ̰ܝܼ. 3 ܣܒܘܿܪ ܒܡܵܪܝܵܐ: ܘܥܒ̣ܘܿܕ ܛܵܒ̣ܬܵܐ: ܫܪܝܼ ܒܐܲܪܥܵܐ: ܘܪܥܝܼ ܣܲܪܲܣܬܘܼܬܵܐ. 4 ܘܥܒ̣ܘܿܕ ܒܘܼܣܵܡܵܐ ܒܡܵܪܝܵܐ: ܘܒܸܕ ܝܵܗ̄ܒܸܠ ܠܘܼܟ ܡܲܛܠܲܒܹ̈ܐ ܕܠܸܒܘܼܟ. 5 ܓܲܢܕܸܪ ܥܲܠ ܡܵܪܝܵܐ ܐܘܼܪܚܘܼܟ: ܘܣܒܘܿܪ ܒܝܹܗ: ܘܗ̇ܘ ܒܸܕ ܥܵܒܸܕ. 6 ܘܒܸܕ ܦܵܠܸܛ ܐܲܝܟ ܒܲܗܪܵܐ ܙܲܕܝܼܩܘܼܬܘܼܟ̣: ܘܕܝܼܘܵܢܘܼ̈ܟ ܐܲܝܟ ܦܲܠܓܵܐ ܕܝܘܿܡܵܐ. 7 ܫܠܝܼ ܠܡܵܪܝܵܐ: ܘܦܘܼܫ ܒܗܸܒ̣ܝܼ ܒܝܹܗ: ܠܵܐ ܚܵܝܡܸܬ ܒܡܲܢܬܝܼܵܢܵܐ ܒܐܘܼܪܚܹܗ: ܒܐܢܵܫܵܐ ܥܵܒ̣ܕܵܢܵܐ ܕܦܸܠܡܹ̈ܐ. 8 ܪܦܝܼ ܡ̣ܢ ܟܲܪܒܵܐ: ܘܫܒ̣ܘܿܩ ܚܸܡܬܵܐ: ܠܵܐ ܚܵܝܡܸܬ ܐܲܚܟ̰ܝܼ ܠܥܸܒ̣ܵܕܵܐ ܒܝܼܫܬܵܐ. 9 ܣܲܒܲܒ ܒܝܼܫܹ̈ܐ ܒܸܕ ܦܵܝܫܝܼ ܩܸܛܥܝܹܐ: ܘܣܵܦܪ̈ܵܢܹܐ ܠܡܵܪܝܵܐ: ܐܵܢܝܼ ܒܸܕ ܝܵܪܬܝܼ ܐܲܪܥܵܐ. 10 ܘܗܹܫ ܚܲܟ̰ܵܐ: ܘܠܲܝܬ ܒܝܼܫܵܐ: ܘܬܲܚܡܸܢܸܬ ܥܲܠ ܕܘܼܟܬܘܼܗܝ: ܘܠܲܝܬ ܗ̇ܘ. 11 ܘܡܸܣܟܹܢܹ̈ܐ ܒܸܕ ܝܵܪܬܝܼ ܐܲܪܥܵܐ: ܘܥܵܒ̣ܕܝܼ ܒܘܼܣܵܡܵܐ ܒܒܘܼܫܵܝܝܼ ܕܫܠܵܡܵܐ. 12 ܟܹܐ ܚܵܫܸܒ̣ ܦܸܠܡܵܐ ܒܝܼܫܵܐ ܥܲܠ ܙܲܕܝܼܩܵܐ: ܘܟܹܐ ܚܲܪܚܸܟ ܥܲܠܘܼܗܝ ܟܹܟܘܼ̈ܗܝ. 13 ܡܵܪܝܵܐ ܒܸܕ ܓܵܚܸܟ ܒܝܹܗ: ܣܲܒܲܒ ܚܙܹܠܹܐ ܕܒܸܕ ܐܵܬܹܐ ܝܘܿܡܘܼܗܝ. 14 ܣܲܝܦܵܐ ܓܪܸܫܠܘܿܢ ܒܝܼܫܹ̈ܐ: ܘܡܬܸܚܠܘܿܢ ܩܸܫܬܵܝ: ܠܡܲܢܦܘܼܠܹܐ ܡܸܣܟܹܢܵܐ ܘܦܲܩܝܼܪ: ܠܸܩܛܵܠܵܐ ܠܬܪ̈ܘܼܨܹܐ ܕܐܘܼܪܚܵܐ. 15 ܣܲܝܦܵܝ ܐܵܘܸܪ ܒܠܸܒܵܝ: ܘܩܸܫܬܵܬܵܝ̈ ܦܵܝܫܝܼ ܬܒ̣ܝܼܪܹܐ. 16 ܒܘܼܫ ܨܦܵܝ ܝܠܹܐ ܚܲܟ̰ܵܐ ܕܙܲܕܝܼܩܵܐ ܡ̣ܢ ܒܘܼܫܵܝܝܼ ܕܒܝܼܫܹ̈ܐ ܪܵܒܵܐ. 17 ܣܲܒܲܒ ܕܪܲܥܢܵܢܹܐ ܕܒܝܼܫܹ̈ܐ ܒܸܕ ܦܵܝܫܝܼ ܬܒ̣ܝܼܪܹܐ: ܘܟܹܐ ܣܵܢܸܕ ܠܙܲܕܝܼܩܹ̈ܐ ܡܵܪܝܵܐ. 18 ܟܹܐ ܝܲܕܸܥ ܡܵܪܝܵܐ ܝܘܿܡܵܢܹ̈ܐ ܕܬܲܡܝܼܡܹ̈ܐ: ܡܝܲܪܲܬܓܵܪܘܼܬܵܝ ܠܥܵܠܲܡ ܒܸܕ ܗܵܘܝܵܐ. 19 ܠܹܐ ܢܵܚܦܝܼ ܒܙܲܒ̣ܢܵܐ ܕܒܝܼܫܬܵܐ: ܘܒܝܘܿܡܵܢܹ̈ܐ ܕܟܸܦܢܵܐ ܒܸܕ ܣܲܒ̣ܥܝܼ. 20 ܣܲܒܲܒ ܒܝܼܫܹ̈ܐ ܒܸܕ ܬܵܠܩܝܼ: ܘܕܸܫܡܸܢܹ̈ܐ ܕܡܵܪܝܵܐ: ܐܲܝܟ ܫܵܦܝܼܪܘܼܬܵܐ[33] ܕܦܹܪܹ̈ܐ: ܒܸܕ ܬܵܝܡܝܼ: ܒܬܸܢܵܐ ܒܸܕ ܬܵܝܡܝܼ. 21 ܟܹܐ ܫܵܩܸܠ ܕܵܝܢܵܐ ܒܝܼܫܵܐ: ܘܠܹܐ ܦܲܪܸܥ: ܘܙܲܕܝܼܩܵܐ ܟܹܐ ܪܵܚܸܡ ܘܟܹܐ ܝܵܗ̄ܒܸܠ. 22 ܣܲܒܲܒ ܒܘܼܪ̈ܟ̣ܘܼܗܝ ܒܸܕ ܝܵܪܬܝܼ ܐܲܪܥܵܐ: ܘܠܝܼܛܘܼܗܝ ܒܸܕ ܦܵܝܫܝܼ ܩܸܛܥܝܹܐ. 23 ܡ̣ܢ ܡܵܪܝܵܐ ܦܵܣܘܿܥܝܵܬܹ̈ܐ ܕܐܢܵܫܵܐ ܟܹܐ ܦܵܝܫܝܼ ܡܘܼܩܘܝܹܐ: ܘܒܐܘܼܪܚܘܼܗܝ ܟܹܐ ܒܵܣܡܵܐ ܠܹܗ. 24 ܟܲܕ ܢܵܦܸܠ: ܠܹܐ ܦܵܝܸܫ ܚܘܼܪܙܸܦܵܐ: ܣܲܒܲܒ ܡܵܪܝܵܐ ܟܹܐ ܣܵܢܸܕ ܐܝܼܕܹܗ. 25 ܝܵܠܵܐ ܗ̄ܘܹܠܝܼ: ܐܘܼܦ ܣܸܒ̣ܠܝܼ: ܘܠܵܐ ܚܙܹܠܝܼ ܙܲܕܝܼܩܵܐ ܫܒ̣ܝܼܩܵܐ: ܘܙܲܪܥܹܗ ܒܸܒܲܥܝܵܐ ܠܲܚܡܵܐ. 26 ܟܠܹܗ ܝܘܿܡܵܐ ܡܪܲܚܡܵܢܵܐ ܝܠܹܐ: ܘܟܹܐ ܝܵܗ̄ܒܸܠ ܒܕܵܝܢܵܐ: ܘܙܲܪܥܹܗ ܠܒܘܼܪܟ̣ܬܵܐ. 27 ܩܠܘܿܒ ܡ̣ܢ ܒܝܼܫܬܵܐ ܘܥܒ̣ܘܿܕ ܛܵܒ̣ܬܵܐ: ܘܫܪܝܼ ܠܥܵܠܲܡ. 28 ܣܲܒܲܒ ܡܵܪܝܵܐ ܟܹܐ ܡܲܚܸܒ̣ ܕܝܼܘܵܢ: ܘܠܹܐ ܫܵܒܸܩ ܠܛܵܒ̣ܘܼ̈ܗܝ: ܠܥܵܠܲܡ ܟܹܐ ܦܵܝܫܝܼ ܢܛܝܼܪܹܐ: ܘܙܲܪܥܵܐ ܕܒܝܼܫܹ̈ܐ ܒܸܕ ܦܵܝܸܫ ܩܸܛܥܝܵܐ. 29 ܙܲܕܝܼܩܹ̈ܐ ܒܸܕ ܝܵܪܬܝܼ ܐܲܪܥܵܐ: ܘܒܸܕ ܫܵܪܝܼ ܠܐܵܒܵܕ ܥܲܠܘܼܗ̇. 30 ܦܘܼܡܹܗ ܕܙܲܕܝܼܩܵܐ ܟܹܐ ܗܵܓܹܐ ܥܵܩܸܠܕܵܪܘܼܬܵܐ: ܘܠܸܫܵܢܹܗ ܟܹܐ ܗܲܡܙܸܡ ܕܝܼܘܵܢ. 31 ܢܵܡܘܿܣܹܗ ܕܐܲܠܵܗܘܼܗܝ ܓܵܘ ܠܸܒܹܗ ܝܠܹܐ: ܠܹܐ ܫܵܥܫܝܼ ܦܵܣܘܿܥܵܝܬܘܼ̈ܗܝ. 32 ܟܹܐ ܨܵܝܸܕ ܒܝܼܫܵܐ ܠܙܲܕܝܼܩܵܐ: ܘܟܹܐ ܛܵܥܹܐ ܠܡܲܡܝܘܼܬܹܗ. 33 ܡܵܪܝܵܐ ܠܹܐ ܫܵܒܸܩ ܠܹܗ ܒܐܝܼܕܹܗ: ܘܠܹܐ ܥܵܒܸܕ ܠܹܗ ܓܘܼܢܵܗܟܵܪ ܟܲܕ ܦܵܝܸܫ ܕܝܼܢܵܐ. 34 ܣܦܘܿܪ ܠܡܵܪܝܵܐ: ܘܢܛܘܿܪ ܐܘܼܪܚܘܼܗܝ: ܘܒܸܕ ܡܵܪܸܡ ܠܘܼܟ ܠܸܪܝܵܬܵܐ ܐܲܪܥܵܐ: ܟܲܕܼ ܦܵܝܫܝܼ ܩܸܛܥܝܹܐ ܒܝܼܫܹ̈ܐ ܒܸܕ ܚܵܙܸܬ. 35 ܚܙܹܠܝܼ ܒܝܼܫܵܐ ܙܵܠܝܼܡ: ܘܡܲܦܬܘܼܝܹܐ ܓܵܢܹܗ ܐܲܝܟ ܐܝܼܠܵܢܵܐ ܩܝܼܢܵܐ. 36 ܘܥܒܸܪܹܐ: ܘܗܵܐ ܠܲܝܬ: ܘܛܸܥܠܝܼ ܒܵܬ̄ܪܹܗ: ܘܠܵܐ ܡܫ̄ܟ̰ܸܚܠܹܐ. 37 ܢܛܘܿܪ ܠܬܲܡܝܼܡܵܐ: ܘܚܙܝܼ ܠܬܪܘܼܨܵܐ: ܣܲܒܲܒ ܕܐܝܼܬ ܚܲܪܬܵܐ ܠܐܢܵܫܵܐ ܕܫܠܵܡܵܐ. 38 ܘܥܵܘ̈ܠܹܐ ܒܸܕ ܬܵܠܩܝܼ[34] ܡܸܚܕܵܕܹ̈ܐ: ܚܲܪܬܵܐ ܕܒܝܼܫܹ̈ܐ ܒܸܕ ܦܵܝܫܵܐ ܩܛܥܝܼܬܵܐ. 39 ܘܦܵܪܲܩܬܵܐ ܕܙܲܕܝܼܩܹ̈ܐ ܡ̣ܢ ܡܵܪܝܵܐ ܝܠܵܐ: ܩܲܠܥܵܝ ܒܙܲܒ̣ܢܵܐ ܕܥܹܩܘܼܝ. 40 ܘܟܹܐ ܗܲܝܸܪܘܿܢ ܡܵܪܝܵܐ ܘܟܹܐ ܦܵܨܹܐ ܠܗ̄ܘܿܢ: ܟܹܐ ܦܵܨܹܐ ܠܗ̄ܘܿܢ ܡ̣ܢ ܒܝܼܫܹ̈ܐ: ܘܟܹܐ ܦܵܪܸܩ ܠܗ̄ܘܿܢ: ܣܲܒܲܒ ܕܣܒܸܪܘܿܢ ܒܝܹܗ.

 

ܡܙܡܘܪܐ: ܠܚ.

ܡܲܙܡܘܿܪܐ ܕܕܵܘܝܼܕ: ܠܡܲܕܟ̣ܘܼܪܹܐ.

1. ܝܵܐ ܡܵܪܝܵܐ: ܠܵܐ ܒܟܲܪܒܘܼܟ ܡܲܢܟܸܣܸܬ ܠܝܼ ܘܠܵܐ ܒܚܸܡܬܘܼܟ ܬܲܥܠܡܸܬ ܠܝܼ. 2 ܣܲܒܲܒ ܓܹܐܪ̈ܘܼܟ ܛܥܸܨܠܘܿܢ ܒܝܼܝܼ: ܘܨܠܹܠܵܐ ܥܲܠܝܼ ܐܝܼܕܘܼܟ. 3 ܠܲܝܬ ܨܵܚܘܼܬܵܐ ܒܒܸܣܪܝܼ ܡ̣ܢ ܩܵܕ̄ܡ ܚܸܡܬܘܼܟ: ܠܲܝܬ ܫܠܵܡܵܐ ܒܓܲܪ̈ܡܝܼ ܡ̣ܢ ܩܵܕ̄ܡ ܚܛܝܼܬܝܼ. 4 ܣܲܒܲܒ ܓܢܵܗܝܼ̈ ܥܒܸܪܘܿܢ ܠܪܹܫܝܼ: ܐܲܝܟ ܟܵܪܬܵܐ ܝܵܩܘܿܪܬܵܐ ܝܘܼܩܪܸܢܘܿܢ ܡܸܢܝܼ. 5 ܚܡܸܩܠܘܿܢ: ܓ̰ܪܹܠܘܿܢ ܒܪ̈ܝܼܢܝܼ: ܡ̣ܢ ܩܵܕ̄ܡ ܣܲܟ̣ܠܘܼܬ̣ܝ. 6 ܦܸܫܠܝܼ ܩܘܼܛܪܸܢܵܐ: ܟܸܦܠܝܼ ܪܵܒܵܐ ܪܵܒܵܐ: ܟܠܹܗ ܝܘܿܡܵܐ ܠܒ̣ܝܼܫܵܐ ܟܘܼܡܵܐ ܚܕܸܪܝܼ 7 ܣܲܒܲܒ ܦܘܼܫܬܝܼ̈ ܡܠܹܠܘܿܢ ܝܩܝܼܘܕܵܐ: ܘܠܲܝܬ ܚܘܼܠܡܵܢܵܐ ܒܒܸܣܪܝܼ. 8 ܐܘܼܪܓ̰ܓ̰ܠܝܼ ܘܦܸܫܠܝܼ ܒܠܝܼܣܵܐ ܪܵܒܵܐ ܪܵܒܵܐ: ܓܘܼܪܓܸܡܠܝܼ ܡ̣ܢ ܫܓ̣ܝܼܫܘܼܬܵܐ ܕܠܸܒܝܼ. 9 ܡܵܪܝܵܐ: ܩܵܕ̄ܡܘܼܟ ܝܼܠܵܐ ܟܠܵܗ̇ ܫܲܗ̄ܘܲܬܬܝܼ: ܘܬܵܢܲܚܬܝܼ ܡܸܢܘܼܟ ܠܹܐ ܝܠܵܐ ܛܫܝܼܬܵܐ. 10 ܠܸܒܝܼ ܒܸܪܦܵܬܵܐ ܝܠܹܐ: ܫܒ̣ܝܼܩܸܢܹܐ ܚܲܝܠܝܼ: ܘܒܲܗܪܵܐ ܕܥܲܝܢܝܼ̈: ܐܘܼܦ ܐܵܢܝܼ ܠܲܝܬ ܠܟܸܣܠܝܼ. 11 ܡܲܚܸܒܵܢܲܝ̈ ܘܚܲܒ̣ܪ̈ܵܘܵܬܝܼ ܡܒܲܪܩܘܼܒ̣ܠ ܕܡܚܘܼܬܝܼ ܟܹܐ ܟܵܠܝܼ: ܘܫܒܵܒܝܼ̈ ܡ̣ܢ ܪܸܚܩܵܐ ܟܠܹܠܘܿܢ. 12 ܘܕܪܸܠܘܿܢ ܢܸܫܒܹ̈ܐ ܛܵܥܵܝܵܢܹ̈ܐ ܠܢܲܦ̮ܫܝܼ: ܘܒܲܥܝܵܢܹ̈ܐ ܕܒܝܼܫܬܝܼ ܗܘܼܡܙܸܡܠܘܿܢ ܒܝܼܫܘܼܝܵܬܹ̈ܐ: ܘܦܸܠܡܹ̈ܐ ܟܠܹܗ ܝܘܿܡܵܐ ܟܹܐ ܗܵܓܝܼ. 13 ܘܐܵܢܵܐ ܐܲܝܟ ܟܲܪܵܐ ܠܵܐ ܫܡܸܥܠܝܼ: ܘܐܲܝܟ ܠܲܥܠܵܐ ܕܠܹܐ ܦܵܬܸܚ ܦܘܼܡܘܼܗܝ. 14 ܘܗ̄ܘܹܠܝܼ ܐܲܝܟ ܐܢܵܫܵܐ ܕܠܹܐ ܫܲܡܸܥ: ܘܕܠܲܝܬ ܒܦܘܼܡܘܼܗܝ ܡܲܢܟ̣ܵܣܝܵܬܹ̈ܐ. 15 ܣܲܒܲܒ ܐܸܠܘܼܟ: ܡܵܪܝܵܐ: ܣܦܸܪܝܼ: ܐܲܢ̄ܬ̇ ܒܸܕ ܓ̰ܲܘܸܒܸܕ: ܡܵܪܝܵܐ ܐܲܠܵܗܝܼ. 16 ܣܲܒܲܒ ܕܐܡܸܪܝܼ: ܠܵܐ ܗ̄ܘ̣ܵܐ ܕܚܵܕܝܼ ܥܲܠܝܼ: ܒܓ̰ܪܵܛܬܵܐ ܕܐܲܩܠܝܼ: ܥܲܠܝܼ ܡܘܼܓܘܸܪܘܿܢ ܓܵܢܵܝ. 17 ܣܲܒܲܒ ܐܵܢܵܐ ܠܠܲܢܓܲܠܬܵܐ ܗܕܝܼܪܵܐ ܝܘܸܢ: ܘܕܲܪܕܝܼ ܠܒܲܪܩܘܼܒ̣ܠܝܼ ܝܠܹܐ ܒܕܵܝܸܡܘܼܬܵܐ. 18 ܣܲܒܲܒ ܓܢܵܗܝܼ ܒܸܕ ܡܲܕܥܸܢ: ܒܸܕ ܥܵܒ̣ܕܸܢ ܚܲܫܵܐ ܒܘܼܬ ܚܛܝܼܬܝܼ. 19 ܘܕܸܫܡܸܢܝܼ̈ ܚܵܝܹ̈ܐ ܝܢܵܐ: ܙܘܼܪܒܸܢܘܿܢ: ܘܙܸܕܠܘܿܢ ܣܵܢܝܵܢܝܼ̈ ܕܒܘܼܚܬܵܢ. 20 ܘܦܲܪ̈ܥܵܢܹܐ ܕܒܝܼܫܬܵܐ ܡܒܵܕܵܠ ܕܛܵܒ̣ܬܵܐ ܗ̄ܘܹܠܘܿܢ ܕܲܪܩܘܼܒ̣ܠܝܼ: ܣܲܒܲܒ ܕܐܙܸܠܝܼ ܒܵܬ̄ܪ ܛܵܒ̣ܬܵܐ. 21 ܠܵܐ ܫܵܒ̣ܩܸܬ ܠܝܼ: ܡܵܪܝܵܐ: ܐܲܠܵܗܝܼ: ܠܵܐ ܪܵܚܩܸܬ ܡܸܢܝܼ. 22 ܝܠܘܿܙ ܠܗܲܝܲܪܬܝܼ: ܡܵܪܝܵܐ: ܦܘܼܪܩܵܢܝܼ.

 

 

 

 

ܡܙܡܘܪܐ: ܠܛ.

ܠܪܹܫܵܐ ܕܙܵܡܵܪܹ̈ܐ: ܠܝܲܕܘܬܘܿܢ ܡܲܙܡܘܿܪܵܐ ܕܕܵܘܝܼܕܼ.

1. ܐܡܸܪܝܼ: ܒܸܕ ܢܵܛܪܸܢ ܐܘܼܪ̈ܚܵܬܝܼ ܡ̣ܢ ܠܸܚܛܵܝܵܐ ܒܠܸܫܵܢܝܼ. ܒܸܕ ܢܵܛܪܸܢ ܠܦܘܼܡܝܼ ܝܸܣܘܼܪܵܐ: ܟܡܵܐ ܕܒܝܼܫܵܐ ܠܒܲܪܩܘܼܒ̣ܠܝܼ. 2 ܗ̄ܘܹܠܝܼ ܠܲܥܠܵܐ ܒܫܬܵܩܬܵܐ: ܫܬܸܩܠܝܼ[35] ܡ̣ܢ ܛܵܒ̣ܬܵܐ: ܘܕܲܪܕܝܼ ܦܸܫܠܹܐ ܚܒ̣ܝܼܛܵܐ. 3 ܚܸܡܠܹܐ ܠܸܒܝܼ ܒܓܵܘܝܼ: ܒܗܵܓܵܝܬܝܼ ܬܦܸܠܹܐ ܢܘܼܪܵܐ: ܗܘܼܡܙܸܡܠܝܼ ܒܠܸܫܵܢܝܼ: 4 ܡܲܕܥܝܼ ܠܝܼ: ܡܵܪܝܵܐ: ܚܲܪܬܝܼ: ܘܡܫܘܼܚܬܵܐ ܕܝܘܿܡܲܢܝܼ̈ ܡܘܼܕܝܼ ܝܠܵܐ: ܝܲܕܥܸܢ ܟܡܵܐ ܬܵܝܡܵܢܵܐ ܝܘܸܢ ܐܵܢܵܐ. 5 ܗܵܐ: ܨܝܼܛܹ̈ܐ ܝܸܗܒܸܠܘܼܟ ܝܘܿܡܲܢܝܼ̈: ܘܥܘܿܡܪܝܼ ܐܲܝܟ ܠܵܐ ܡܸܢܕܝܼ ܩܵܕ̄ܡܘܼܟ: ܡܸܓܸܕ ܟܠܵܗ̇ ܢܵܦܵܣ ܝܼܠܹܐ ܟܠ ܒܲܪܢܵܫܵܐ ܟܸܠܝܵܐ. 6 ܡܸܓܸܕ ܒܨܲܠܡܵܐ ܟܹܐ ܚܵܕܸܪ ܐܢܵܫܵܐ: ܡܸܓܸܕ[36] ܗܵܒܵܣܘܼܬܵܐ ܟܹܐ ܫܵܓ̣ܫܝܼ: ܟܹܐ ܥܵܒܸܕ ܩܘܼܚܵܐ: ܘܠܹܐ ܝܲܕܸܥ ܡܲܢܝܼ ܓܲܡܸܥ ܠܗ̄ܘܿܢ. 7 ܘܐܵܕܝܼܵܐ ܠܡܘܼܕܝܼ ܣܵܦܪܸܢ: ܡܵܪܝܵܐ: ܗܹܒ̣ܝܼܝܼ ܐܸܠܘܼܟ ܝܼܠܵܐ. 8 ܡ̣ܢ ܟܠܵܝ ܓܢܵܗܝܼ̈ ܦܵܨܝܼ ܠܝܼ: ܠܵܘܡܵܐ ܕܐܲܗܡܲܩ ܠܵܐ ܡܲܬܒܸܕ ܠܝܼ. 9 ܗ̄ܘܹܠܝܼ ܠܲܥܠܵܐ: ܠܵܐ ܦܬܸܚܠܝܼ ܦܘܼܡܝܼ: ܣܲܒܲܒ ܕܐܲܢ̄ܬ̇ ܥܒܸܕܠܘܼܟ. 10 ܡܲܥܒܸ̇ܪ ܡܥܲܠܝܼ ܡܚܘܿܬܘܼܟ: ܡ̣ܢ ܦܠܵܫܬܵܐ ܕܐܝܼܕܘܼܟ ܐܵܢܵܐ ܬܸܡܠܝܼ. 11 ܒܡܲܢܟܲܣܝܵܬܹ̈ܐ ܥܲܠ ܓܢܵܗܵܐ ܟܹܐ ܬܲܥܠܡܸܬ ܐܢܵܫܵܐ: ܘܟܹܐ ܡܲܦܫܸܪܸܬ ܐܲܝܟ ܐܸܟ̣ܠܵܐ ܫܲܗ̄ܘܲܬܬܘܼܗܝ. ܡܸܓܸܕ[37] ܗܵܒܵܣܘܼܬܵܐ ܝܠܹܐ ܟܠ ܒܲܪܢܵܫܵܐ. 12 ܫܡܥܝܼ ܨܠܘܿܬܝܼ: ܝܵܐ ܡܵܪܝܵܐ: ܘܠܓܥܵܝܬܝܼ ܗܲܒ̄ܠ ܢܵܬܵܐ: ܠܕܸܡܥܝܼܬܝܼ ܠܵܐ ܫܵܬܩܸܬ: ܣܲܒܲܒ ܡܵܫܵܚܲܛ ܝܼܘܸܢ ܐܵܢܵܐ ܥܲܡܘܼܟ: ܥܵܡܪܵܢܵܐ ܐܲܝܟ ܟܠܵܝ ܒܵܒܵܘܵܬܝܼ̈. 13 ܦܪܘܿܩ ܡܸܢܝܼ ܘܚܵܕܸܢ: ܡܩܵܕ̄ܡ ܕܐܵܙܸܠ̄ܢ ܘܠܲܝܬ ܐܵܢܵܐ.

 

ܡܙܡܘܪܐ: ܡ.

ܠܪܹܫܵܐ ܕܙܵܡܵܪܹ̈ܐ. ܕܕܵܘܝܼܕܼ: ܡܲܙܡܘܿܪܵܐ.

1. ܣܦܵܪܵܐ ܣܦܸܪܝܼ ܠܡܵܪܝܵܐ: ܘܩܠܸܒ̇ܠܹܐ ܠܟܸܣܠܝܼ: ܘܫܡܸܥܠܹܐ ܓܥܵܝܬܝܼ. 2 ܘܡܘܼܐܣܩܸܢܹܐ ܡ̣ܢ ܓܘܼܒܵܐ ܕܚܪܵܒ̣ܵܐ: ܡ̣ܢ ܛܝܼܢܵܐ ܕܙܸܢܵܐ: ܘܡܘܼܩܸܡܠܹܐ ܥܲܠ ܩܵܝܵܐ ܐܲܩܠܵܬܝܼ̈: ܡܲܩܘܘܼܝܹܐ ܦܵܣܘܿܥܝܵܬܝܼ̈ 3 ܘܡܘܼܬܸܒ̣ܠܹܐ ܒܦܘܼܡܝܼ ܙܡܵܪܬܵܐ ܚܲܕܬܵܐ: ܬܸܫܒ̇ܘܿܚܬܵܐ. ܠܐܲܠܵܗܲܢ:

ܒܸܕ ܚܵܙܝܼ ܪܵܒܵܐ ܘܒܸܕ ܙܵܕܥܝܼ: ܘܒܸܕ ܣܵܒܪܝܼ ܒܡܵܪܝܵܐ. 4 ܛܘܼܒ̣ܵܐ ܠܐܢܵܫܵܐ ܕܡܲܬܸܒ̣ ܡܵܪܝܵܐ ܣܲܒ̣ܪܘܼܗܝ: ܘܠܵܐ ܕܸܪܹܐ ܠܟܸܣ ܚܬܝܼܪܹ̈ܐ ܘܩܵܠܒܵܢܹ̈ܐ ܠܕܘܼܓܠܵܐ. 5 ܪܵܒܵܐ ܥܒܸܕܠܘܼܟ ܐܲܢ̄ܬ̇: ܡܵܪܝܵܐ ܐܲܠܵܗܝܼ: ܥܵܓ̰ܸܒܘܼܝܵܬܘܼ̈ܟ ܘܚܘܼܫܵܒ̣ܘܼ̈ܟ ܐܸܠܲܢ: ܠܲܝܬ ܠܡܲܪܝܘܼܙܹܐ ܐܸܠܘܼܟ: ܡܲܕܥܸܢ ܗ̄ܘ̣ܵܐ ܘܗܲܡܙܸܡܸܢ ܗ̄ܘ̣ܵܐ: ܙܘܼܪܒܸܢܘܿܢ ܡ̣ܢ ܠܸܡܢܵܝܵܐ. 6 ܒܕܸܒ̣ܚܵܐ ܘܩܘܼܪܒܵܢܵܐ ܠܵܐ ܒܣܸܡܠܵܐ ܠܘܼܟ: ܢܵܬܝܵܬܹ̈ܐ ܒܙܸܥܠܘܼܟ ܩܵܬܝܼ: ܕܸܒ̣ܚܵܐ ܡܘܼܩܕܵܐ ܘܩܘܼܪܒܵܢܵܐ ܕܚܛܝܼܬܵܐ ܠܵܐ ܛܠܸܒܠܘܼܟ. 7 ܗ̇ܝܓܵܗ ܐܡܸܪܝܼ: ܕܘܼ ܝܘܸܢ ܐܬܹܠܝܼ: ܒܟܸܪܟ̣ܵܐ ܕܟܬܵܒ̣ܵܐ ܟܬܝܼܒ̣ܵܐ ܝܠܹܐ ܒܵܗ̄ܣܝܼ: 8 ܠܸܥܒ̣ܵܕܵܐ ܪܸܙܵܝܘܼܟ: ܐܲܠܵܗܝܼ: ܒܣܸܡܠܵܐ ܠܝܼ: ܘܢܵܡܘܿܣܘܼܟ ܓܵܘ ܡܲܥܝܝܼ̈ ܝܠܹܐ. 9 ܡܘܼܫܚܸܕܠܝܼ ܙܲܕܝܼܩܘܼܬܵܐ ܒܟܸܢܫܵܐ ܓܘܼܪܵܐ: ܗܵܐ: ܣܸܦܘܵܬܝܼ̈ ܠܹܐ ܡܲܟ̇ܠܸܢ: ܡܵܪܝܵܐ: ܐܲܢ̄ܬ̇ ܟܹܐ ܝܲܕܥܸܬ. 10 ܙܲܕܝܼܩܘܼܬܘܼܟ ܠܵܐ ܟܘܼܣܹܠܝܼ ܓܵܘ ܠܸܒܝܼ: ܡܗܘܼܡܢܘܼܬܘܼܟ ܘܦܘܼܪܩܵܢܘܿܟ ܐܡܸܪܝܼ: ܠܵܐ ܛܘܼܫܹܠܝܼ ܫܵܦܵܩܲܬܘܼܟ ܘܣܲܪܲܣܬܘܼܬܘܼܟ̣ ܡ̣ܢ ܟܸܢܫܵܐ ܓܘܼܪܵܐ. 11 ܐܲܢ̄ܬ̇: ܡܵܪܝܵܐ: ܠܹܐ ܡܲܟ̇ܠܸܬ ܪܲܚܡܘܼܟ ܡܸܢܝܼ: ܫܵܦܵܩܲܬܘܼܟ ܘܣܲܪܲܣܬܘܼܬܘܼܟ̣ ܒܕܵܝܸܡܘܼܬܵܐ ܢܵܛܪܝܼ ܠܝܼ. 12 ܣܲܒܲܒ ܕܚܕܸܪܘܿܢ ܥܲܠܝܼ ܒܝܼܫܵܬܹ̈ܐ ܗܲܠ ܕܠܵܐ ܡܸܢܝܵܢܵܐ: ܡܸܛܝܸܢܘܿܢ ܓܢܵܗܝܼ̈: ܘܠܵܐ ܡܹܨܠܝܼ ܠܸܚܙܵܝܵܐ: ܙܘܼܪܒܸܢܘܿܢ ܡ̣ܢ ܣܲܥܪܵܐ ܕܪܸܫܝܼ: ܘܠܸܒܝܼ ܫܒ̣ܝܼܩܸܢܹܐ. 13 ܒܵܣܡܵܐ ܠܘܼܟ: ܡܵܪܝܵܐ: ܠܦܵܨܘܿܝܝܼ: ܡܵܪܝܵܐ ܠܗܲܝܲܪܬܝܼ ܝܠܘܿܙ. 14 ܢܵܚܦܝܼ ܘܗܵܘܝܼ ܫܲܪܡܲܢܕܵܐ ܡܸܚܕܵܕܹ̈ܐ ܛܵܥܵܝܵܢܹ̈ܐ ܠܢܲܦ̮ܫܝܼ ܠܬܵܠܘܿܩܘܼܗ̇: ܕܵܝܪܝܼ ܠܵܒܵܬ̄ܪܵܝܝܼ: ܘܗܵܘܝܼ ܫܲܪܡܸܣܲܪ ܐܵܢܝܼ ܕܒܵܣܡܵܐ ܠܗ̄ܘܿܢ ܒܒܝܼܫܬܝܼ. 15 ܦܵܝܫܝܼ ܡܵܐܬ ܒܣܲܒܲܒ ܕܢܚܸܦܬܵܝ: ܕܟܹܐ ܐܵܡܪܝܼ ܐܸܠܝܼ: ܐܘܿܚܲܝ: ܐܘܿܚܲܝ. 16 ܚܵܕܝܼ ܘܦܵܨܚܝܼ ܒܝܼܘܼܟ ܟܠܵܝ ܛܵܥܝܵܢܹ̈ܐ ܐܸܠܘܼܟ: ܐܵܡܪܝܼ ܒܕܵܝܸܡܘܼܬܵܐ ܡܲܚܸܒܵܢܹ̈ܐ ܕܦܘܼܪܩܵܢܘܼܟ̣: ܗܵܘܹܐ ܓܘܼܪܵܐ ܡܵܪܝܵܐ. 17 ܘܐܵܢܵܐ ܡܸܣܟܹܢܵܐ ܝܘܸܢ ܘܦܲܩܝܼܪ: ܡܵܪܝܵܐ ܟܹܐ ܚܵܫܸܒ̣ ܒܘܼܬ ܕܝܼܝܼ: ܗܲܝܲܪܬܝܼ ܘܚܵܠܨܵܢܝܼ ܐܲܢ̄ܬ̇ ܝܼܘܸܬ: ܐܲܠܵܗܝܼ: ܠܵܐ ܥܲܪܩܸܠܸܬ.

 

ܡܙܡܘܪܐ: ܡܐ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܪܐ ܕܕܵܘܝܼܕ.

1. ܛܘܼܒ̣ܵܐ ܠܗ̇ܘ ܕܬܲܚܡܸܢ ܥܲܠ ܡܸܣܟܹܢܵܐ: ܒܝܘܿܡܵܐ ܕܒܝܼܫܬܵܐ ܒܸܕ ܚܵܠܸܨ ܠܹܗ ܡܵܪܝܵܐ. 2 ܡܵܪܝܵܐ ܒܸܕ ܢܵܛܸܪܹܗ ܘܡܲܚܹܐ ܠܹܗ: ܒܸܕ ܦܵܝܸܫ ܒܘܼܪܟ̣ܵܐ ܒܐܲܪܥܵܐ: ܘܠܹܐ ܣܵܦܸܬ ܠܹܗ ܒܪܸܙܵܝܵܐ ܕܕܸܫܡܸܢܘܼ̈ܗܝ. 3 ܡܵܪܝܵܐ ܒܸܕ ܣܵܢܸܕ ܠܹܗ ܥܲܠ ܫܘܝܼܬܵܐ ܕܕܲܪܕ: ܟܠܵܗ̇ ܫܘܝܼܬܹܗ ܡܘܼܕܸܪܘܼܟ ܒܡܲܪܥܘܼܗܝ. 4 ܐܵܢܵܐ ܐܡܸܪܝܼ: ܝܵܐ ܡܵܪܝܵܐ: ܪܵܚܸܡ ܥܲܠܝܼ: ܒܵܣܸܡ ܢܲܦ̮ܫܝܼ: ܕܚܛܸܠܝܼ ܥܲܠܘܼܟ. 5 ܕܸܫܡܸܢܝܼ̈ ܟܹܐ ܐܵܡܪܝܼ ܣܪܝܼܬܵܐ ܥܲܠܝܼ: ܐܝܼܡܲܢ ܒܸܕ ܡܵܝܸܬ: ܘܬܵܠܸܩ ܫܸܡܹܗ: 6 ܘܐܸܢ ܐܵܬܹܐ ܠܸܚܙܵܝܵܐ (ܐܸܠܝܼ): ܕܘܼܓܠܵܐ ܟܹܐ ܗܲܡܙܸܡ: ܠܸܒܹܗ ܟܹܐ ܓ̰ܲܡܸܥ ܥܵܘܠܵܐ ܩܵܐ ܓܵܢܹܗ: ܟܹܐ ܦܵܠܸܛ ܠܒܲܕܲܪ ܟܹܐ ܗܲܡܙܸܡ. 7 [38] ܡܸܚܕܵܕܹ̈ܐ ܥܲܠܝܼ ܟܹܐ ܦܲܛܦܸܛܝܼ ܟܠܵܝ ܣܵܢܝܵܢܝܼ̈: ܥܲܠܝܼ ܟܹܐ ܚܵܫܒ̣ܝܼ ܒܝܼܫܬܵܐ ܐܸܠܝܼ. 8 ܩܸܨܲܬ ܕܒܸܠܝܲܥܲܠ ܛܦܝܼܬܵܐ ܝܠܵܐ ܒܝܹܗ: ܘܟܲܕ ܕܵܡܸܟ: ܠܹܐ ܡܲܙܝܸܕ ܠܸܩܝܵܡܵܐ. 9 ܐܘܼܦ ܐܢܵܫܵܐ ܕܫܠܵܡܝܼ ܕܦܸܫܠܝܼ ܒܗܸܒ̣ܝܼ ܒܝܹܗ: ܐܵܟ̣ܠܵܢܵܐ ܕܠܲܚܡܝܼ: ܡܘܼܪܸܡܠܹܐ ܥܲܠܝܼ ܥܸܩܒܵܐ. 10 ܘܐܲܢ̄ܬ: ܝܵܐ ܡܵܪܝܵܐ: ܪܵܚܸܡ ܥܲܠܝܼ: ܘܡܲܩܸܡ ܠܝܼ: ܘܦܲܪܥܸܢܘܿܢ. 11 ܒܐܵܗܵܐ ܝܕܸܥܠܝܼ ܕܟܹܐ ܒܵܣܡܵܐ ܠܘܼܟ ܒܝܼ: ܣܲܒܲܒ ܕܠܹܐ ܡܵܪܸܡ ܩܵܠܵܐ ܕܸܫܡܸܢܝܼ ܥܲܠܝܼ. 12 ܘܐܵܢܵܐ ܒܬܲܡܝܼܡܘܼܬ̣ܝ ܣܢܝܼܕܸܢܘܼܟ: ܘܡܘܼܩܸܡܸܢܘܼܟ ܩܵܕ̄ܡܘܼܟ ܠܥܵܠܲܡ. 13 ܒܪܝܼܟ̣ܵܐ ܝܠܹܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡ̣ܢ ܥܵܠܲܡ ܘܗܲܠ ܥܵܠܲܡ.

ܐܵܡܹܝܢ: ܘܐܵܡܹܝܢ.

ܣܦܪܐ ܕܬܪܝ.

 

 

ܡܙܡܘܪܐ: ܡܒ.

ܠܪܹܫܵܐ ܕܙܵܡܵܪܹ̈ܐ: ܡܲܣܟ̇ܝܼܠ ܠܒܢܘܼܢܹ̈ܐ ܕܩܘܿܪܚ.

1. ܐܲܝܟ ܐܲܝܠܵܐ ܕܡܲܚܢܹܐ ܡ̣ܢ ܫܵܩܵܝܵܬܹ̈ܐ ܕܡ̈ܝܵܐ: ܗܲܕܟ̣ܵܐ ܢܲܦ̮ܫܝܼ ܡܲܚܢܘܼܝܹܐ ܝܠܵܐ ܡܸܢܘܼܟ: ܐܲܠܵܗܵܐ. 2 ܨܗ̄ܝܼܬܵܐ ܝܠܵܐ ܢܲܦ̮ܫܝܼ ܠܐܲܠܵܗܵܐ: ܠܐܲܠܵܗܵܐ ܚܵܝܵܐ: ܐܝܼܡܲܢ ܐܵܬܸܢ ܘܦܵܝܫܸܢ ܚܸܙܝܵܐ ܩܵܕ̄ܡ ܐܲܠܵܗܵܐ: 3 ܗ̄ܘܹܠܵܐ ܐܸܠܝܼ ܕܸܡܥܝܼܬܝܼ ܠܲܚܡܵܐ: ܐܝܼܡܵܡܵܐ ܘܠܲܝܠܹܐ: ܒܐܡܵܪܬܵܐ ܐܸܠܝܼ ܟܠܹܗ ܝܘܿܡܵܐ: ܐܲܝܟܵܐ ܝܠܹܐ ܐܲܠܵܗܘܼܟ: 4 ܐܲܢܹܐ ܕܵܟ̣ܪܸܢ: ܘܫܦܸܟ̣ܠܵܐ ܥܲܠܝܼ ܢܲܦ̮ܫܝܼ: ܕܥܒܸܪܝܼ ܓܵܘ ܓ̰ܵܡܵܥܲܬ: ܚܕܸܪܝܼ ܥܲܡܵܝ ܗܲܠ ܒܲܝܬܵܐ ܕܐܲܠܵܗܵܐ: ܒܩܵܠܵܐ ܕܬܸܫܒ̇ܘܿܚܬܵܐ ܘܬܵܘܕܝܼܬܵܐ: ܟܸܢܫܵܐ ܕܵܒ̣ܩܵܢܵܐ ܕܥܹܐܕܵܐ. 5 ܩܵܡܘܿܕܝܼ ܡܘܼܟܸܦܬܵܐ ܝܘܲܬܝ: ܢܲܦ̮ܫܝܼ: ܘܫܓ̣ܝܼܫܬܵܐ ܝܘܲܬܝ ܥܲܠܝܼ. ܣܦܘܿܪܝ ܠܐܲܠܵܗܵܐ: ܣܲܒܲܒ ܕܡܸܕܪܸܐ ܒܸܕ ܫܵܟܪܸܢܹܗ: ܦܘܼܪ̈ܩܵܢܹܐ ܕܦܵܬܘܼܗܝ. 6 ܝܵܐ ܐܲܠܵܗܝܼ: ܥܲܠܝܼ ܢܲܦ̮ܫܝܼ ܡܘܼܟܸܦܬܵܐ ܝܠܵܐ: ܒܘܼܬ ܕܐܵܗܵܐ ܒܸܕ ܕܵܟ̣ܪܸܢܘܼܟ ܡ̣ܢ ܐܲܪܥܵܐ ܕܝܘܿܪܕܢܵܢ: ܘܚܸܪ̈ܡܘܿܢܵܝܹܐ: ܡ̣ܢ ܛܘܼܪܵܐ ܕܡܸܨܥܲܪ. 7 ܬܗܘܿܡܵܐ ܠܬܗܘܼܡܵܐ ܟܹܐ ܩܵܪܹܐ ܒܩܵܠܵܐ ܕܫܲܪܫܵܘܪ̈ܘܼܟ: ܟܠܵܝ ܡܲܚܫܘܼܠܘܼ̈ܟ ܘܠܲܦܘܼ̈ܟ ܥܲܠܝܼ ܥܒܸܪܘܿܢ. 8 ܒܐܝܼܡܵܡܵܐ ܒܸܕ ܦܵܩܸܕ ܡܵܪܝܵܐ ܫܵܦܵܩܲܬܘܼܗܝ: ܘܒܠܲܝܠܹܐ ܬܸܫܒܘܿܚܬܘܼܗܝ ܥܲܡܝܼ: ܨܠܘܿܬܵܐ ܠܐܲܠܵܗܵܐ ܕܚܲܝܲܝ̈.

9 ܒܸܕ ܐܵܡܪܸܢ ܠܐܲܠܵܗܵܐ ܩܵܝܝܼ: ܩܵܡܘܿܕܝܼ ܢܸܫܝܸܢܘܼܟ: ܩܵܡܘܿܕܝܼ ܠܒ̣ܝܼܫܵܐ ܟܘܼܡܵܐ ܚܵܕܪܸܢ ܒܡܲܠܝܲܨܬܵܐ ܕܕܸܫܡܸܢ. 10 ܒܬܒ̣ܵܪܵܐ ܒܓܲܪ̈ܡܝܼ ܟܹܐ ܠܵܝܡܝܼ ܠܝܼ ܡܲܠܝܸܨܵܢܝܼ̈: ܒܐܡܵܪܬܵܝ ܟܠܝܘܿܡ: ܐܲܝܟܵܐ ܝܠܹܐ ܐܲܠܵܗܘܼܟ. 11 ܩܵܡܘܿܕܝܼ: ܡܘܼܟܸܦܬܵܐ ܝܘܲܬܝ: ܢܲܦ̮ܫܝܼ: ܘܩܵܡܘܿܕܝܼ ܫܓ̣ܝܼܫܬܵܐ ܝܘܲܬܝ ܥܲܠܝܼ: ܣܦܘܿܪܝ ܠܐܲܠܵܗܵܐ: ܣܲܒܲܒ ܡܸܕܪܹܐ ܒܸܕ ܫܵܟܪܸܢܹܗ: ܦܘܼܪ̈ܩܵܢܹܐ ܕܦܵܬ̣ܝ ܘܐܲܠܵܗܝܼ.

 

ܡܙܡܘܪܐ: ܡܓ.

1. ܕܘܼܢܝܼ: ܐܲܠܵܗܵܐ: ܘܥܒ̣ܘܿܕ ܕܲܥܘܝܼܝܼ ܡ̣ܢ ܛܵܝܸܦܵܐ ܠܵܐ ܡܪܲܚܡܵܢܵܐ: ܡ̣ܢ ܐܢܵܫܵܐ ܕܦܸܾܡܵܐ ܘܥܵܘܠܵܐ ܦܵܨܸܬ ܠܝܼ. 2 ܣܲܒܲܒ ܐܲܢ̄ܬ̇ ܝܼܘܸܬ ܐܲܠܵܗܵܐ ܕܚܲܠܝܼ: ܩܵܡܘܿܕܝܼ ܟ̰ܘܼܡܟ̰ܸܡܸܢܘܼܟ: ܩܵܡܘܿܕܝܼ ܠܒ̣ܝܼܫܵܐ ܟܘܼܡܵܐ ܚܵܕܪܸܢ ܒܡܲܠܝܲܨܬܵܐ ܕܕܸܫܡܸܢ: 3 ܫܵܕܸܪ ܒܲܗܪܘܼܟ̣ ܘܣܲܪܲܣܬܘܼܬܘܼܟ̣: ܐܵܢܝܼ ܬܓܒܸܪܝܼ ܠܝܼ: ܡܲܝܬ̄ܝܝܼ ܠܝܼ ܠܛܘܼܪܵܐ ܕܩܘܼܕܫܘܼܟ ܘܠܡܵܫܸܟܢܘܼ̈ܟ. 4 ܘܒܸܕ ܐܵܬܸܢ ܠܡܲܕܒܚܵܐ ܕܐܲܠܵܗܵܐ: ܠܟܸܣ ܐܲܠܵܗܵܐ ܚܲܕܘܼܬܵܐ ܕܦܨܵܚܬܝܼ: ܘܒܸܕ ܫܵܟ̣ܪܸܢܘܿܟ ܒܟܸܢܵܪܵܐ: ܐܲܠܵܗܵܐ: ܐܲܠܵܗܝܼ. 5 ܩܵܡܘܿܕܝܼ ܡܘܼܟܸܦܬܵܐ ܝܘܲܬܝ: ܢܲܦ̮ܫܝܼ: ܘܩܵܡܘܿܕܝܼ ܫܓ̣ܝܼܫܬܵܐ ܝܘܲܬܝ ܥܲܠܝܼ: ܣܦܘܿܪܝ ܠܐܲܠܵܗܵܐ: ܣܲܒܲܒ ܡܸܕܪܹܐ ܒܸܕ ܫܵܟܪܸܢܹܗ: ܦܘܼܪ̈ܩܵܢܹܐ ܕܦܵܬܝܼ ܘܐܲܠܵܗܝܼ.

 

ܡܙܡܘܪܐ: ܡܕ.

ܠܪܹܫܵܐ ܕܙܵܡܵܪܹ̈ܐ: ܠܒܢܲܝ̈ ܩܘܿܪܚ: ܡܲܣܟܝܼܠ.

1. ܝܵܐ ܐܲܠܵܗܵܐ: ܒܢܵܬܝܵܬܲܢ ܫܡܸܥܠܲܢ: ܒܵܒܵܘܵܬܲܢ ܗܘܼܩܹܠܘܿܢ ܐܸܠܲܢ: ܦܘܼܠܚܵܢܵܐ ܕܦܠܸܚܠܘܼܟ ܒܝܘܿܡܵܢܵܝ̈: ܒܝܘܿܡܵܢܹ̈ܐ ܕܩܵܕܝܼܡܝܼ. 2 ܐܲܢ̄ܬ̇ ܒܐܝܼܕܘܼܟ ܛܵܝܸܦܹ̈ܐ ܦܘܼܠܸܛܠܘܼܟ: ܘܢܨܝܼܒ̣ܵܠܘܼܟ: ܥܒܸܕܠܘܼܟ ܣܪܝܼܬܵܐ ܠܡܸܠܲܬܹ̈ܐ: ܘܡܘܼܪܘܸܚܵܠܘܼܟ. 3 ܣܲܒܲܒ ܠܵܐ ܒܣܲܝܦܵܝ ܝܪܸܬܠܘܿܢ ܐܲܪܥܵܐ: ܘܕܪܲܥܢܵܝ ܠܵܐ ܦܘܼܪܸܩܠܹܐ ܐܸܠܵܝ: ܐܸܠܵܐ ܝܲܡܝܼܢܘܼܟ ܘܕܪܲܥܢܘܼܟ: ܘܒܲܗܪܵܐ ܕܦܵܬܘܼܟ: ܣܲܒܲܒ ܕܒܣܸܡܠܵܐ ܠܘܼܟ ܒܝܼܵܝ. 4 ܐܲܢ̄ܬ ܝܼܘܸܬ: ܡܲܠܟܝܼ: ܐܲܠܵܗܵܐ: ܦܵܩܸܕ ܦܘܼܪ̈ܩܵܢܹܐ ܕܝܲܥܩܘܿܒ̣. 5 ܒܝܼܘܼܟ ܠܡܲܠ̈ܝܸܨܵܢܲܢ ܒܸܕ ܢܲܩܵܚ: ܒܫܸܡܘܼܟ ܒܸܕ ܕܲܫܕܸܫܵܚ ܠܩܵܝܡܵܢܹ̈ܐ ܥܲܠܲܢ. 6 ܣܲܒܲܒ ܠܵܐ ܒܩܸܫܬܝܼ ܒܸܕ ܦܵܝܫܸܢ ܒܗܸܒ̣ܝܼ: ܘܣܲܝܦܝܼ ܠܹܐ ܦܵܪܸܩ ܠܝܼ. 7 ܣܲܒܲܒ ܕܐܲܢ̄ܬ̇ ܦܘܼܪܩܵܚܠܘܼܟ ܡ̣ܢ ܡܲܠ̈ܝܸܨܵܢܲܢ: ܘܣܵܢܝܵܢܲܢ ܡܘܼܢܚܸܦܵܝܠܘܼܟ. 8 ܒܐܲܠܵܗܵܐ ܚܩܸܪܲܢ ܟܠܹܗ ܝܘܿܡܵܐ: ܘܠܫܸܡܘܼܟ ܠܥܵܠܲܡ ܒܸܕ ܫܵܟܪܵܚ. 9 ܐܝܼܢܵܐ ܟ̰ܘܼܡܟ̰ܸܡܠܘܼܟ ܘܡܘܼܢܚܸܦܵܚܠܘܼܟ: ܘܠܹܐ ܦܵܠܛܸܬ ܒܚܲܝܠܵܘܵܬܲܢ. 10 ܡܘܼܕܸܪܵܚܠܘܼܟ ܠܵܒܵܬ̄ܪܵܐ ܡ̣ܢ ܕܸܫܡܸܢ: ܘܣܵܢܝܵـ̈ـܢܲܢ ܣܠܸܒܠܘܿܢ ܩܵܐ ܓܵܢܵܝ. 11 ܟܹܐ ܝܵܗ̄ܒܸܕ ܠܲܢ ܐܲܝܟ ܥܸܪ̈ܒܹܐ ܡܹܐܟ̣ܘܼܠܬܵܐ: ܘܓܵܘ ܛܵܝܸܦܹ̈ܐ ܩܲܡ ܒܲܪܒܸܙܸܬ ܠܲܢ. 12 ܟܹܐ ܙܵܒܢܸܬ ܛܵܝܸܦܘܿܟ ܒܠܵܐ ܡܵܐܠ: ܘܠܵܐ ܡܘܼܙܝܸܕܠܘܼܟ ܒܛܝܼܡܵܝ̈. 13 ܟܹܐ ܥܵܒ̣ܕܸܬ ܠܲܢ ܠܵܘܡܵܐ ܠܫܒ̣ܵܒܲܢ: ܡܲܣܚܲܪܬܵܐ ܘܠܵܘܡܵܐ ܠܐܵܢܝܼ ܕܝܼܢܵܐ ܚܵܕܼܪ̈ܘܵܢܲܢ. 14 ܟܹܐ ܥܵܒ̣ܕܸܬ ܠܲܢ ܡܵܣܵܠܵܐ ܓܵܘ ܛܵܝܸܦܹ̈ܐ: ܫܝܵܥܫܬܵܐ ܕܪܹܫܵܐ ܓܵܘ ܡܸܠܲܬܹ̈ܐ. 15 ܟܠܹܗ ܝܘܿܡܵܐ ܫܲܪܡܸܣܲܪܘܼܬܝܼ ܩܵܕ̄ܡܝܼ ܝܠܵܐ: ܘܢܚܸܦܬܵܐ ܕܦܵܬܝܼ ܟܘܼܣܝܸܢܵܐ: 16 ܡ̣ܢ ܩܵܠܵܐ ܕܠܵܝܡܵܢܵܐ ܘܓܵܕܦܵܢܵܐ: ܡ̣ܢ ܩܵܕ̄ܡ ܕܸܫܡܸܢ ܘܫܵܩܠܵܢܵܐ ܕܬܘܼܥܠܵܐ. 17 ܟܠܵܗ̇ ܐܵܗܵܐ ܐܬܹܠܵܐ ܥܲܠܲܢ: ܘܠܵܐ ܢܫܹܠܲܢ ܐܸܠܘܼܟ: ܘܠܵܐ ܕܘܼܓܸܠܲܢ ܒܩܵܘܠܘܼܟ. 18 ܠܵܐ ܕܸܪܹܐ ܠܵܒܵܬ̄ܪܵܝܝܼ ܠܸܒܲܢ: ܘ (ܠܵܐ) ܩܠܸܒ̇ܠܵܐ ܦܵܣܘܿܥܬܲܢ ܡ̣ܢ ܐܘܼܪܚܘܼܟ: ܕܛܒ̣ܝܼܚܵܠܘܼܟ ܒܕܘܼܟܬܵܐ ܕܟ̰ܲܩܵܠܹ̈ܐ: ܘܡܘܼܟܸܣܠܘܼܟ ܥܲܠܲܢ ܒܛܸܠܵܢܝܼܬܵܐ ܕܡܵܘܬܵܐ. 20 ܐܸܢ ܢܫܹܠܲܢ ܫܸܡܹܗ ܕܐܲܠܵܗܲܢ: ܘܦܪܸܣܠܲܢ ܐܝܼ̈ܕܵܬܲܢ ܠܟܸܣ ܐܲܠܵܗܵܐ ܢܘܼܟ̣ܪܵܝܵܐ: 21 ܐܲܠܵܗܵܐ ܠܹܐ ܬܲܦ̮ܬܸܫ ܐܵܗܵܐ: ܣܲܒܲܒ ܗ̇ܘ ܟܹܐ ܝܲܕܸܥ ܛܵܫܵܝܵܬܹ̈ܐ ܕܠܸܒܵܐ. 22 ܣܲܒܲܒ ܕܒܘܼܬ ܕܝܼܘܼܟ ܦܝܵܫܵܐ ܝܘܵܚ ܩܛܝܼܠܹܐ ܟܠܹܗ ܝܘܿܡܵܐ: ܦܸܫܠܲܢ ܚܘܼܫܒܸܢܹܐ ܐܲܝܟ ܥܸܪ̈ܒܹܐ ܕܦܪܵܡܬܵܐ. 23 ܪܥܘܿܫ: ܩܵܡܘܿܕܝܼ ܛܲܠܸܬ: ܡܵܪܝܵܐ: ܦܘܼܫ ܪܥܝܼܫܵܐ: ܠܵܐ ܟ̰ܲܡܟ̰ܸܡܸܬ ܗܲܠ ܐܵܒܵܕ. 24 ܩܵܡܘܿܕܝܼ ܦܵܬܘܼܟ ܕܲܠܕܸܢܸܬ: ܢܵܫܸܬ ܝܲܠܨܘܼ̈ܘܲܢ ܘܥܹܩܘܼ̈ܘܲܢ. 25 ܣܲܒܲܒ ܕܟܸܦܠܵܐ ܠܥܲܦܪܵܐ ܓܵܢܲܢ: ܛܦܸܠܵܐ ܠܐܲܪܥܵܐ ܟܸܪܣܲܢ. 26 ܩܘܼܡ̄ ܠܗܲܝܲܪܬܵܐ ܐܸܠܲܢ: ܘܦܵܪܸܩ ܠܲܢ ܒܚܵܬܸܪ ܕܫܵܦܵܩܲܬܘܼܟ.

 

ܡܙܡܘܪܐ: ܡܗ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܫܘܼܫܲܢܝܼܡ: ܠܒܢܲܝ̈ ܩܘܿܪܚ: ܡܲܣܟ̇ܝܠ.

ܙܡܵܪܬܵܐ ܕܡܲܚܲܒܝܵـ̈ـܬܵܐ.

1. ܡܲܢܒ̣ܘܼܥܝܹܐ ܝܠܹܐ ܠܸܒܝܼ ܚܲܒ̇ܪܵܐ ܛܵܒ̣ܵܐ: [39] ܒܹܐܡܵܪܵܐ ܝܘܸܢ ܐܵܢܵܐ ܥܵܡܵܠܝܼ ܠܡܲܠܟܵܐ: ܠܸܫܵܢܝܼ ܩܵܠܵܡܵܐ ܝܠܹܐ ܕܣܵܦܪܵܐ ܡܗܝܼܪܵܐ. 2 ܒܘܼܫ ܫܵܦܝܼܪܵܐ ܝܘܸܬ ܡ̣ܢ ܒܢܲܝ̈ ܐܢܵܫܵܐ: ܨܘܼܢܨܹܠܬܵܐ ܝܠܵܐ ܫܵܦܵܩܲܬ ܒܣܸܦܘܵܬܘܼ̈ܟ: ܒܘܼܬ ܕܐܵܗܵܐ ܒܘܼܪܟܸܬ ܠܹܐ ܐܲܠܵܗܵܐ ܠܥܵܠܲܡ. 3 ܚܠܘܿܨ ܣܲܝܦܘܼܟ ܥܲܠ ܥܸܛܡܵܐ: ܓܲܢ̄ܒܵܪܵܐ: ܚܸܩܪܘܼܟ ܘܙܲܪܝܼܦܘܼܬܘܼܟ. ܘܒܙܲܪܝܼܦܘܼܬܘܼܟ ܡܲܢܬܝܼ: ܪܟܘܿܒ̣: ܒܘܼܬ ܗܲܓ̰ܲܬ ܕܣܲܪܲܣܬܘܼܬܵܐ ܘܡܵܟܝܼܟ̣ܘܼܬܵܐ ܘܙܲܕܝܼܩܘܼܬܵܐ: ܘܒܸܕ ܡܵܠܦܵܐ ܠܘܼܟ ܣܲܗܡܵܢܘܼܝܵܬܹ̈ܐ ܝܲܡܝܼܢܘܼܟ. 5 ܓܹܐܪ̈ܘܼܟ ܚܵܪ̈ܝܼܦܹܐ ܝܢܵܐ: ܛܵܝܸܦܹ̈ܐ ܬܚܘܿܬܘܼܟ ܟܹܐ ܢܵܦܠܝܼ: ܒܠܸܒܵܐ ܕܕܸܫܡܸܢܹ̈ܐ ܕܡܲܠܟܵܐ. ܬܪܘܿܢܘܿܣܘܼܟ: ܐܲܠܵܗܵܐ: ܠܥܵܠܲܡ ܥܵܠܡܝܼܢ: ܩܵܛܝܼܵܐ ܕܕܘܼܙܘܼܬܵܐ ܩܵܛܝܼܵܐ ܕܡܲܠܟܘܼܬܘܼܟ. 7 ܡܘܼܚܸܒ̣ܠܘܼܟ ܙܲܕܝܼܩܘܼܬܵܐ: ܘܣܢܹܠܘܼܟ ܒܝܼܫܘܼܬܵܐ: ܒܘܼܬ ܕܐܵܗܵܐ ܡܫܝܼܚܸܬܠܹܐ ܐܲܠܵܗܵܐ: ܐܲܠܵܗܘܼܟ: ܒܡܸܫܚܵܐ ܕܚܲܕܘܼܬܵܐ ܙܵܘܕܵܐ ܡ̣ܢ ܚܲܒ̣ܪ̈ܵܘܵܬܘܼܟ. 8 ܡܘܼܪܵܐ: ܘܐܲܗܵܠܘܼܬ: ܩܲܣܝܵܐ: ܟܠܵܝ ܠܒ̣ܘܼܫܘܼ̈ܟ: ܡ̣ܢ ܗܲܝܟ̇ܠܹ̈ܐ ܕܠܪܲܡܦܝܼܠܵܐ[40] ܕܡܸܢܹ̈ܐ ܩܲܡ ܡܲܚܕܝܼ ܠܘܼܟ. 9 ܒܢܵܬܹ̈ܐ ܕܡܲܠܟܹ̈ܐ ܓܵܘ ܡܝܲܩܪ̈ܵܬܵܐ ܕܝܼܘܼܟ ܝܼܢܵܐ: ܟܠܝܼܬܵܐ ܝܠܵܐ ܡܲܠܟܬܵܐ ܒܝܲܡܝܼܢܘܼܟ ܒܕܲܗܒ̣ܵܐ ܕܐܵܘܦܹܝܪ. 10 ܫܡܥܝܼ: ܒܪܵܬܵܐ: ܘܚܙܝܼ: ܘܡܲܟܸܦܝ ܢܵܬܵܟ̣ܝ: ܘܢܫܝܼ ܛܵܝܸܦܵܟ̣ܝ: ܘܒܹܝܬ ܒܵܒܵܟ̣ܝ: 11 ܕܫܲܗ̄ܘܸܬ ܡܲܠܟܵܐ ܠܫܘܼܦܪܵܟ̣ܝ: ܣܲܒܲܒ ܕܗ̇ܘ ܝܼܠܹܐ ܡܵܪܵܟ̣ܝ: ܘܣܓ̣ܘܿܕܝ ܐܸܠܹܗ. 12 ܘܒܪܵܬܵܐ ܕܨܘܿܪ (ܒܸܕ ܐܵܬܝܵܐ) ܒܦܲܫܟܵܫ: ܦܵܬܵܟ̣ܝ ܒܸܕ ܒܲܥܝܝܼ ܕܵܘܠܲܬܡܲܢܕܹ̈ܐ ܕܛܵܝܸܦܵܐ. 13 ܟܠܵܗ̇ ܚܩܝܼܪܬܵܐ ܝܠܵܐ ܒܪܵܬܵܐ ܕܡܲܠܟܵܐ ܠܓܵܘܵܝܝܼ: ܡ̣ܢ ܙܩܘܼܪܹ̈ܐ ܕܕܲܗܒ̣ܵܐ ܠܒܸܫܬܘܼܗ̇. 14 ܒܓ̰ܘܼܠܹ̈ܐ ܕܠܲܩܛܵܐ ܡܢܘܼܩܫܹ̈ܐ ܒܸܕ ܦܝܵܫܵܐ ܠܘܼܒܸܠܝܵܐ ܠܡܲܠܟܵܐ. ܒܬܘܼܠܵܬܹ̈ܐ ܕܒܵܬ̄ܪܘܼܗ̇: ܚܲܒ̣ܪܵܘܵܬܘܼܗ̇: ( ܒܸܕ ܦܵܝܫܝܼ) ܡܘܼܬ̄ܝܹܐ ܐܸܠܘܼܟ. 15 ܟܹܐ ܦܵܝܫܝܼ ܠܘܼܒܠܹܐ ܒܚܲܕܘܼܬܵܐ ܘܦܵܨܚܬܵܐ: ܒܸܕ ܦܵܝܫܝܼ ܐܵܘܪܝܼ ܓܵܘ ܥܵܡܵܪܲܬ ܕܡܲܠܟܵܐ. 16 ܡܒܵܕܵܠ ܕܒܵܒܵܘܵܬܘܼ̈ܟ ܒܸܕ ܗܵܘܝܼ ܒܢܘܼܢܘܼ̈ܟ: ܡܲܬܒܸܕ ܠܗ̄ܘܿܢ ܠܪܹ̈ܫܵܢܹܐ ܒܟܠܵܗ̇ ܐܲܪܥܵܐ. 17 ܒܸܕ ܡܲܕܟܸܪܸܢ ܫܸܡܘܼܟ ܒܟܠ ܕܵܘܪܵܐ ܘܕܵܘܪܵܐ: ܒܘܼܬ ܕܐܵܗܵܐ: ܛܵܝܸܦܹ̈ܐ ܒܸܕ ܫܵܟܪܝܼ ܠܘܼܟ ܠܥܵܠܲܡ ܥܵܠܡܝܼܢ.

 

ܡܙܡܘܪܐ: ܡܘ.

ܠܪܹܫܵܐ ܕܙܵܡܵܪܹ̈ܐ: ܠܒܢܲܝ̈ ܩܘܿܪܚ: ܥܲܠ ܥܲܠܵܡܘܿܬ. ܙܡܵܪܬܵܐ.

1. ܐܲܠܵܗܵܐ ܝܠܹܐ ܐܸܠܲܢ ܒܹܝܬ ܓܵܘܣܵܐ ܘܙܲܪܒ: ܗܲܝܲܪܬܵܐ ܒܥܹܩܘܼܘܹ̈ܐ ܡܫ̄ܟ̰ܸܚܠܹܐ: ܪܵܒܵܐ. 2 ܒܘܼܬ ܕܐܵܗܵܐ ܠܹܐ ܙܵܕܵܥܝܝ: ܟܲܕ ܫܲܚܠܸܦܵܐ ܐܲܪܥܵܐ: ܘܟܲܕ ܫܵܥܫܝܼ ܛܘܼܪ̈ܵܢܹܐ ܒܠܸܒܵܐ ܕܝܵܡܵܬܹ̈ܐ: 3 ܒܲܪܒܸܥܪܝܼ ܘܓܲܒܓܸܒܝܼ ܡܝܼܘܼ̈ܗ̇: ܪܲܬܪܸܬܝܼ ܛܘܼܪ̈ܵܢܹܐ ܒܪܝܵܡܬܘܼܗ̇. 4 ܢܲܗܪܵܐ (ܐܝܬ): ܫܵܩܝܼܵܬܘܼ̈ܗܝ ܟܹܐ ܡܲܚܟ̣ܝܼ ܠܡܕܝܼܢ̄ܬܵܐ ܕܐܲܠܵܗܵܐ: ܩܘܼܕܫܵܐ ܕܡܵܫܸܟܢܹ̈ܐ ܕܥܸܠܵܝܵܐ. 5 ܐܲܠܵܗܵܐ ܒܓܵܘܘܼܗ̇ ܝܠܹܐ: ܠܹܐ ܫܵܥܫܵܐ: ܒܸܕ ܗܲܝܸܪܵܗ̇ ܐܲܠܵܗܵܐ ܒܕܝܵܪܬܵܐ ܕܨܲܦܪܵܐ. 6 ܒܘܼܪܒܸܥܪܘܿܢ ܛܵܝܸܦܹ̈ܐ: ܫܥܸܫܠܘܿܢ ܡܲܠܟܘܵܬܹ̈ܐ: ܝܸܗܒܸܠܹܐ ܩܵܠܘܼܗܝ: ܦܫܸܪܵܐ ܐܲܪܥܵܐ. 7 ܡܵܪܝܵܐ ܨܒ̣ܵܐܘܼܬ ܥܲܡܲܢ ܝܼܠܹܐ: ܒܘܼܪܓ̰ܵܐ ܪܵܡܵܐ ܐܸܠܲܢ ܐܲܠܵܗܵܐ ܕܝܲܥܩܘܿܒ̣. 8 ܬܹܡܘܿܢ ܚܙܹܡܘܿܢ ܦܘܼܠܚܵܢܹ̈ܐ ܕܡܵܪܝܵܐ: ܕܡܘܼܬܸܒ̣ܠܹܐ ܚܵܪ̈ܵܒܝܹܐ ܒܐܲܪܥܵܐ. 9 ܟܹܐ ܡܲܫܠܹܐ ܦܠܵܫܹ̈ܐ ܗܲܠ ܡܲܪܙܵܐ ܕܐܲܪܥܵܐ: ܩܸܫܬܵܐ ܟܹܐ ܬܵܒܸܪ: ܘܟܹܐ ܩܲܛܸܠ ܪܘܼܡܚܵܐ: ܥܵܪ̈ܒܵܢܹܐ ܟܹܐ ܡܵܩܸܕ ܒܢܘܼܪܵܐ. 10 ܫܠܹܡܘܿܢ ܘܝܕܼܥܡܘܿܢ ܕܐܵܢܵܐ ܝܘܸܢ ܐܲܠܵܗܵܐ: ܒܸܕ ܦܵܝܫܸܢ ܡܘܼܪܡܵܐ ܓܵܘ ܛܵܝܸܦܹ̈ܐ: ܒܸܕ ܦܵܝܫܸܢ ܡܘܼܪܡܵܐ ܒܐܲܪܥܵܐ. 11 ܡܵܪܝܵܐ ܨܒ̣ܵܐܘܼܬ ܥܲܡܲܢ ܝܼܠܹܐ: ܒܘܼܪܓ̰ܵܐ ܪܵܡܵܐ ܐܸܠܲܢ ܐܲܠܵܗܵܐ ܕܝܲܥܩܘܿܒ̣.

 

ܡܙܡܘܪܐ: ܡܙ.

ܠܪܹܫܵܐ ܕܙܵܡܵܪܹ̈ܐ: ܠܒܢܘܼܢܹ̈ܐ ܕܩܘܿܪܚ: ܡܲܙܡܘܿܪܵܐ.

1. ܟܠܵܝ ܛܵܝܸܦܹ̈ܐ: ܡܚܹܡܘܿܢ ܟ̰ܲܦܹ̈ܐ: ܩܲܘܸܚܘܿܢ ܠܐܲܠܵܗܵܐ ܒܩܵܠܵܐ ܕܫܘܼܒ̣ܚܵܐ. 2 ܣܲܒܲܒ ܡܵܪܝܵܐ ܥܸܠܵܝܵܐ ܣܲܗܡܵܢܵܐ ܝܠܹܐ: ܡܲܠܟܵܐ ܓܘܼܪܵܐ ܥܲܠ ܟܠܵܗ̇ ܐܲܪܥܵܐ. 3 [41] ܒܸܕ ܙܲܒܛܸܢ ܛܵܝܸܦܹ̈ܐ ܬܚܘܿܬܲܢ: ܘܡܸܠܲܬܹ̈ܐ ܬܚܘܿܬ ܐܲܩ̈ܠܵܬܲܢ. 4 [42] ܒܸܕ ܓܵܒܹ̇ܐ ܩܵܬܲܢ ܡܝܼܪܲܬܓܵܪܘܼܬܲܢ: ܪܵܡܘܼܬܵܐ ܕܝܲܥܩܘܿܒ̣ ܕܡܘܼܚܸܒܠܹܐ. 5 ܐܣܸܩܠܹܐ ܐܲܠܵܗܵܐ ܒܩܲܘܲܚܬܵܐ: ܡܵܪܝܵܐ ܒܩܵܠܵܐ ܕܫܝܼܦܘܿܪܵܐ. 6 ܙܡܘܿܪܘܿܢ ܠܐܲܠܵܗܵܐ: ܙܡܘܿܪܘܿܢ: ܙܡܘܿܪܘܿܢ ܠܡܲܠܟܲܢ: ܙܡܘܿܪܘܿܢ. 7 ܣܲܒܲܒ ܕܡܲܠܟܵܐ ܕܟܠܵܗ̇ ܐܲܪܥܵܐ ܐܲܠܵܗܵܐ ܝܠܹܐ: ܙܡܘܿܪܘܿܢ[43] ܡܲܣܟܝܼܠ. 8 ܒܸܥܒ̣ܵܕܵܐ ܝܠܹܐ ܡܲܠܟܘܼܬܵܐ ܐܲܠܵܗܵܐ ܥܲܠ ܛܵܝܸܦܹ̈ܐ: ܐܲܠܵܗܵܐ ܝܬܝܼܒ̣ܵܐ ܝܠܹܐ ܥܲܠ ܬܪܘܿܢܘܿܣ ܕܩܘܼܕܫܘܼܗܝ. 9 ܡܲܥܩܘܼ̈ܠܹܐ ܕܛܵܝܸܦܹ̈ܐ ܓ̰ܸܡܥܝܹܐ ܝܢܵܐ: ܛܵܝܸܦܵܐ ܕܐܲܠܵܗܵܐ ܕܐܲܒ̣ܪܵܗܵܡ: ܣܲܒܲܒ ܕܐܲܠܵܗܵܐ ܝܢܵܐ ܩܲܠܚܵܢܹ̈ܐ ܕܐܲܪܥܵܐ: ܪܵܒܵܐ ܪܝܼܡܵܐ ܝܠܹܐ.

 

ܡܙܡܘܪܐ: ܡܚ.

ܙܡܵܪܬܵܐ: ܡܲܙܡܘܿܪܵܐ ܠܒܢܘܼܢܹ̈ܐ ܕܩܘܿܪܚ.

1. ܓܘܼܪܵܐ ܝܠܹܐ ܡܵܪܝܵܐ: ܘܡܫܘܼܒܚܵܐ ܪܵܒܵܐ ܓܵܘ ܡܕܼܝܼܢ̄ܬܵܐ ܕܐܲܠܵܗܲܢ: ܛܘܼܪܵܐ ܕܩܘܼܕܫܘܼܗܝ. 2 ܫܵܦܝܼܪܵܐ ܒܪܵܡܘܼܬܵܐ: ܚܲܕܘܼܬܵܐ ܕܟܠܵܗ̇ ܐܲܪܥܵܐ: ܛܘܼܪܵܐ ܕܨܸܗܝܘܿܢ: ܓܹܒܵܢܹ̈ܐ ܕܓܲܪܒܝܵܐ: ܡܕܝܼܢ̄ܬܵܐ ܕܡܲܠܟܵܐ ܓܘܼܪܵܐ. 3 ܐܲܠܵܗܵܐ ܒܥܵܡܵܪܲܬܘܼܗ̇ ܡܘܼܕܸܥܝܵܠܹܐ ܓܵܢܘܼܗܝ ܠܒܘܼܪܓ̰ܵܐ ܪܵܡܵܐ. ܣܲܒܲܒ ܗܵܐ: ܡܲܠܟܹ̈ܐ ܓ̰ܡܸܥܠܘܿܢ: ܥܒܸܪܘܿܢ[44] ܡܸܚܕܵܕܹ̈ܐ. 5 ܐܵܢܝܼ ܚܙܹܠܘܿܢ: ܗܲܕܟ̣ܵܐ ܦܸܫܠܘܿܢ ܡܵܐܬ: ܫܥܸܫܠܘܿܢ: ܝܠܸܙܠܘܿܢ ܠܸܥܪܵܩܵܐ. ܪܲܬܪܲܬܬܵܐ ܕܒ̣ܝܼܩܵܝܠܵܐ ܬܵܡܵܐ: ܚܸܒ̣ܠܹ̈ܐ ܐܲܝܟ ܝܵܠܸܕܬܵܐ. 7 ܒܦܵܘܚܵܐ ܕܡܲܕܼܢܚܵܐ ܟܹܐ ܬܵܒ̣ܪܸܬ ܓܵܡ̈ܝܹܐ ܕܬܲܪܫܝܼܫ. 8 ܕܵܐܟ̣ܝܼ ܕܫܡܸܥܠܲܢ ܗܲܕܟ̣ܵܐ ܚܙܹܠܲܢ: ܓܵܘ ܡܕܝܼܢ̄ܬܵܐ ܕܡܵܪܝܵܐ ܨܒ̣ܵܐܘܼܬ: ܓܵܘ ܡܕܝܼܢ̄ܬܵܐ ܕܐܲܠܵܗܲܢ: ܐܲܠܵܗܵܐ ܒܸܕ ܡܲܩܘܹܐ ܠܵܗ̇ ܗܲܠ ܥܵܠܲܡ. 9 ܬܘܼܚܡܸܢܲܢ: ܝܵܐ ܐܲܠܵܗܵܐ: ܫܵܦܵܩܲܬܘܼܟ ܒܓܵܘܵܐ ܕܗܲܝܟܠܘܼܟ. 10 ܐܲܝܟ ܫܸܡܘܼܟ: ܐܲܠܵܗܵܐ: ܗܲܕܟ̣ܵܐ ܝܠܵܐ ܬܸܫܒ̇ܘܿܚܬܘܼܟ ܥܲܠ ܡܲܪ̈ܙܵܢܹܐ ܕܐܲܪܥܵܐ: ܙܲܕܝܼܩܘܼܬܵܐ ܡܠܝܼܬܵܐ ܝܠܵܐ ܝܲܡܝܼܢܘܼܟ. 11 ܚܵܕܹܐ ܛܘܼܪܵܐ ܕܨܹܗܝܘܿܢ: ܦܵܨܚܝܼ ܒܢܵܬܹ̈ܐ ܕܝܼܗܘܼܕܵܐ: ܒܘܼܬ ܕܝܼܘܵܢܘܼ̈ܟ. 12 ܚܕܘܿܪܘܿܢ ܠܚܵܕܼܪܘܵܢܹܐ ܕܨܸܗܝܘܿܢ ܘܚܲܪܕܸܡܘܿܢ ܠܵܗ̇: ܡܢܹܡܘܿܢ ܒܘܼܪ̈ܓ̰ܘܼܗ̇. 13 ܡܲܬܒ̣ܘܿܢ ܠܸܒܵܘܟ̣ܘܿܢ ܠܫܘܼܪ̈ܘܼܗ̇: ܦܵܟܪܘܿܢ ܒܥܵܡܵܪܲܬܘܼܗ̇: ܩܵܐ ܕܗܵܩܝܼܬܘܿܢ ܠܕܵܘܪܵܐ ܐܚܹܪܢܵܐ. 14 ܣܲܒܲܒ ܐܵܗܵܐ ܐܲܠܵܗܵܐ ܐܲܠܵܗܲܢ ܝܼܠܹܐ ܠܥܵܠܲܡ ܥܵܠܡܝܼܢ: ܗ̇ܘ ܒܸܕ ܬܲܓܒܸܪܲܢ ܗܲܠ ܡܵܘܬܵܐ.

 

ܡܙܡܘܪܐ: ܡܛ.

ܠܪܹܫܵܐ ܕܙܵܡܵܪܹ̈ܐ: ܠܒܢܘܼܢܹ̈ܐ ܕܩܘܿܪܚ: ܡܲܙܡܘܿܪܵܐ.

1. ܫܡܸܥܡܘܿܢ ܐܵܗܵܐ: ܟܠܵܝ ܛܵܝܸܦܹ̈ܐ: ܗܲܒ̄ܠܘܿܢ ܢܵܬܵܐ ܟܠܵܝ ܥܵܡܪ̈ܵܢܹܐ ܕܒܪܝܼܬܵܐ. 2 ܐܘܼܦ ܒܢܲܝ̈ ܐܵܕܵܡ ܐܘܼܦ ܒܢܲܝ̈ ܐܢܵܫܵܐ: [45] ܡܸܚܕܵܕܹ̈ܐ ܕܵܘܠܲܬܡܲܢܕ ܘܡܸܣܟܹܢܵܐ. 3 ܦܘܼܡܝܼ ܒܸܕ ܗܲܡܙܸܡ ܥܵܩܸܠܕܵܪ̈ܘܼܝܵܬܹܐ: ܘܗܵܓܵܝܬܵܐ ܕܠܸܒܝܼ ܦܲܪ̈ܡܵܝܵܬܹܐ.

4 ܒܸܕ ܨܵܠܸܢ ܠܡܵܣܵܠܵܐ ܢܬܝܼ: ܘܦܵܬܚܸܢ ܒܟܸܢܵܪܵܐ ܩܸܣܸܡܬܝܼ. 5 ܩܵܡܘܿܕܝܼ ܙܵܕܥܸܢ ܒܝܘܿܡܵܢܹ̈ܐ ܕܒܝܼܫܬܵܐ: ( ܟܲܕ) ܥܵܘܠܵܐ (ܕܨܵܝܕܵܢܹ̈ܐ) ܕܥܸܩܒܝܼ̈ ܚܲܪܕܹܐ ܠܝܼ: 6 ܐܵܢܝܼ ܕܦܵܝܫܝܼ ܒܗܸܒ̣ܝܼ ܒܡܵܐܠܵܝ: ܘܒܒܘܼܫܵܝܝܼ ܕܕܵܘܸܠܬܵܝ ܟܹܐ ܫܲܒ̣ܗܸܪܝܼ: 7 ܠܐܵܚܘܿܢܵܐ ܦܵܪܘܿܩܹܐ ܠܹܐ ܦܵܪܸܩ ܐܢܵܫܵܐ: ܠܹܐ ܝܵܗ̄ܒܸܠ ܠܐܲܠܵܗܵܐ ܦܘܼܚܵܠܘܼܗܝ: 8 [46] ܘܡܝܘܼܩܪܵܐ ܝܠܹܐ ܦܘܼܪܩܵܢܵܐ ܕܓܵܢܵܝ: ܘܟܹܐ ܫܵܠܹܐ ܠܥܵܠܲܡ: 9 ܘܚܲܝܹܐ ܡܸܕܪܹܐ ܠܐܵܒܵܕ: ܠܵܐ ܚܵܙܹܐ ܚܪܵܒ̣ܵܐ. 10 ܣܲܒܲܒ ܕܟܹܐ ܚܵܙܹܐ ܥܵܩܸܠܕܵܪܹ̈ܐ ܟܹܐ ܡܵܝܬܝܼ: ܡܸܚܕܵܕܹ̈ܐ ܢܲܙܵܢ ܘܐܲܗܡܲܩ ܬܵܠܩܝܼ: ܘܫܵܒ̣ܩܝܼ ܠܐܚܹܪܢܹܐ ܡܵܐܠܵܝ. 11 ܒܠܸܒܵܝ: ܒܵܬܝܼ̈ ܠܥܵܠܲܡ ܝܼܢܵܐ: ܒܸܝܬ ܡܲܥܡܪܵܝ ܠܕܵܘܪܵܐ ܘܕܵܘܪܵܐ: ܩܪܹܠܘܿܢ ܒܫܸܡܵܢܵܝ̈ ܠܐܲܪ̈ܥܵܬܹܐ. 12 ܘܒܲܪܢܵܫܵܐ ܒܐܝܼܩܵܪܵܐ ܠܹܐ ܥܲܪܩܸܠ: ܟܹܐ ܦܵܝܸܫ ܕܘܼܡܝܵܐ ܠܗܲܝܘܵܢܹ̈ܐ ܕܬܵܠܩܝܼ. 13 ܐܵܗܵܐ ܐܘܼܪܚܵܝ: ܐܲܗܡܲܩܘܼܬܵܐ ܝܠܵܐ ܐܸܠܵܝ: ܘܐܚܵܪ̈ܵܝܵܝ ܟܹܐ ܪܵܕܝܼ ܒܗܹܡܸܙܡܵܢܵܝ̈. 14 ܐܲܝܟ ܥܸܪ̈ܒܹܐ ܠܫܝܘܿܠ ܡܘܼܬܒܹܐ ܝܢܵܐ: ܡܵܘܬܵܐ ܒܸܕ ܡܲܪܥܹܐ ܠܗ̄ܘܿܢ: ܘܒܸܕ ܗܵܟܡܝܼ ܒܝܼܵܝ ܬܪ̈ܘܼܨܹܐ ܒܨܲܦܪܵܐ: ܘܨܘܼܪܬܵܝ ܠܡܲܒܠܵܝܬܵܐ ܕܫܝܘܿܠ: ܡ̣ܢ ܥܡܵܪܬܵܐ ܐܸܠܘܼܗ̇. 15 ܐܲܚܟ̰ܝܼ ܐܲܠܵܗܵܐ ܒܸܕ ܦܵܪܸܩ ܢܲܦ̮ܫܝܼ ܡ̣ܢ ܐܝܼܕܵܐ ܕܫܝܘܿܠ: ܣܲܒܲܒ ܕܒܸܕ ܩܵܒܸ̇ܠ ܠܝܼ. 16 ܠܵܐ ܙܵܕܥܸܬ ܟܲܕܼ ܗܵܘܹܐ ܕܵܘܠܲܬܡܲܢܕ ܐܢܵܫܵܐ: ܟܲܕܼ ܙܵܝܸܕ ܐܝܼܩܵܪܵܐ ܕܒܲܝܬܘܼܗܝ: 17 ܣܲܒܲܒ ܕܒܡܵܘܬܘܼܗܝ ܠܹܐ ܫܵܩܸܠ ܟ̰ܘ ܡܸܢܕܝܼ: ܠܹܐ ܨܵܠܹܐ ܒܵܬ̄ܪܘܼܗܝ ܐܝܼܩܵܪܘܼܗܝ. 18 ܟܲܕ ܠܓܵܢܘܼܗܝ ܒܚܲܝܘܼ̈ܗܝ ܟܹܐ ܒܵܪܸܟ ܗ̄ܘ̣ܵܐ: ܘܟܹܐ ܫܵܟܪܝܼ ܠܘܼܟ ܟܲܕ ܡܲܛܐܸܒܸܕ ܠܓܵܢܘܼܟ: 19 ܐܵܬܸܬ ܗܲܠ ܕܵܘܪܵܐ ܕܒܵܒܵܘܵܬܘܼ̈ܗܝ: ܗܲܠ ܐܵܒܵܕ ܠܹܐ ܚܵܙܝܼ ܒܲܗܪܵܐ. 20 ܒܲܪܢܵܫܵܐ ܒܐܝܼܩܵܪܵܐ: ܘܠܵܐ ܦܲܪܡܹܐ: ܟܹܐ ܕܵܡܹܐ ܠܗܲܝܘܵܢܹ̈ܐ ܕܬܵܠܩܝܼ.

 

ܡܙܡܘܪܐ: ܢܢ.

ܡܲܙܡܘܿܪܵܐ ܕܐܵܣܵܦ.

1. ܐܹܝܠ ܐܲܠܵܗܵܐ ܡܵܪܝܵܐ: ܗܘܼܡܙܸܡܠܹܐ: ܘܩܪܹܠܹܐ ܠܐܲܪܥܵܐ ܡ̣ܢ ܙܪܵܩܵܐ ܕܫܸܡܫܵܐ ܗܲܠ ܓܢܵܝܹܗ. 2 ܡ̣ܢ ܨܸܗܝܘܿܢ: ܬܲܡܵܡܵܬܘܼܬܵܐ ܕܫܘܼܦܪܵܐ: ܐܲܠܵܗܵܐ ܠܘܼܓ̰ܠܸܓ̰ܠܹܐ. 3 ܒܸܕ ܐܵܬܹܐ ܐܲܠܵܗܲܢ ܘܠܹܐ ܫܵܬܸܩ: ܢܘܼܪܵܐ ܩܵܕ̄ܡܘܼܗܝ ܒܸܕ ܐܵܟܸܠ: ܘܚܵܕܸܪܘܵܢܘܼܗܝ ܒܸܕ ܗܵܘܝܵܐ ܒܘܼܪܵܢ ܪܵܒܵܐ. 4 ܒܸܕ ܩܵܪܹܐ ܠܫܡܲܝܵܐ ܡܥܸܠܸܠ.ܘܠܲܐܪܥܵܐ: ܠܸܟ̣ܝܵܢܵܐ ܛܵܝܸܦܹܗ: 5 ܓ̰ܲܡܸܥܡܘܿܢ ܠܟܸܣܠܝܼ ܛܵܒ̣ܝܼ̈: ܩܲܛܥܵܢܹ̈ܐ ܕܩܵܘܠܝܼ ܥܲܠ ܕܸܒ̣ܚܵܐ. 6 ܘܡܲܕܥܝܼ ܫܡܲܝܹ̈ܐ ܙܲܕܝܼܩܘܼܬܘܼܗܝ: ܣܲܒܲܒ ܐܲܠܵܗܵܐ ܕܲܝܵܢܵܐ ܝܠܹܐ ܒܓܵܢܘܼܗܝ. 7 ܫܡܥܝܼ: ܛܵܝܸܦܝܼ: ܘܒܸܕ ܗܲܡܙܸܡܸܢ: ܝܼܣܪܵܝܹܠ: ܘܒܸܕ ܣܲܗܸܕܸܢ ܒܝܼܘܼܟ: ܐܲܠܵܗܵܐ: ܐܲܠܵܗܘܼܟ: ܐܵܢܵܐ ܝܘܸܢ. 8 ܒܘܼܬ ܕܸܒ̣ܚܘܼ̈ܟ ܠܹܐ ܡܲܢܟܸܣܸܢܘܼܟ: ܘܕܸܒ̣ܚܘܼ̈ܟ ܡܘܼܩܕܹ̈ܐ ܠܒܲܪܩܘܼܒ̣ܠܝܼ ܕܵܝܸܡ. 9 ܠܹܐ ܫܵܩܠܸܢ ܡ̣ܢ ܒܲܝܬܘܼܟ ܬܵܘܪܵܐ: ܡ̣ܢ ܓܘܼܡܵܢܘܼ̈ܟ ܢܹܐܪ̈ܝܹܐ. 10 ܣܲܒܲܒ ܕܝܼܝܼ ܝܢܵܐ ܟܠܵܝ ܗܲܝܘܵܢܹ̈ܐ ܕܡܲܝܫܵܐ: ܪܸ̈ܣܩܹܐ ܒܛܘܼܪ̈ܵܢܹܐ ܕܐܲܠܦܵܐ. 11 ܟܹܐ ܝܲܕܥܸܢ ܟܠܵܗ̇ ܦܵܪܲܚܬܵܐ ܕܛܘܼܪܵܢܹܐ: ܘܓ̰ܵܘܓ̰ܵܢܹ̈ܐ ܕܕܸܫܸܬܵܐ ܥܲܡܝܼ ܝܢܵܐ. 12 ܐܸܢ ܟܵܦܢܸܢ: ܠܹܐ ܐܵܡܪܝܼܢ ܐܸܠܘܼܟ: ܣܲܒܲܒ ܕܝܼܝܼ ܝܠܵܐ ܒܪܝܼܬܵܐ ܘܡܸܠܝܘܼܬܘܼܗ̇. 13 ܒܸܕ ܐܵܟ̣ܠܸܢ ܒܸܣܪܵܐ ܕܡܘܼ̈ܓ̰ܹܐ: ܘܕܸܡܵܐ ܕܢܹܐܪ̈ܝܹܐ ܒܸܕ ܫܵܬܸܢ: 14 ܕܒ̣ܘܿܚ ܠܐܲܠܵܗܵܐ ܫܵܟܲܪܬܵܐ: ܘܬܲܡܸܡ ܠܥܸܠܵܝܵܐ ܢܸܕܪ̈ܘܼܟ: 15 ܘܩܪܝܼ ܐܸܠܝܼ ܒܝܘܿܡܵܐ ܕܝܲܠܨܘܝܼ: ܒܸܕ ܡܚܵܠܨܸܢܘܼܟ: ܘܡܝܵܩܪܸܬ ܠܝܼ. 16 ܘܠܒ̇ܝܼܫܵܐ ܒܹܐܡܵܪܵܐ ܝܠܹܐ ܐܲܠܵܗܵܐ: ܡܵܐ ܠܘܼܟ ܠܗܵܩܘܿܝܹܐ ܩܵܢܘܿܢܝܼ̈: ܘܫܵܩܠܸܬ ܩܵܘܠܝܼ ܒܦܘܼܡܘܼܟ: 17 ܘܐܲܢ̄ܬ̇ ܣܢܹܠܘܼܟ ܬܲܥܠܲܡܬܵܐ: ܘܪܘܼܦܹܠܘܿܟ ܗܹܡܹܙܡܲܢܝܼ̈ ܒܵܬ̄ܪܘܼܟ. 18 ܐܸܢ ܚܙܹܠܘܼܟ ܓܹܢܵܒ̣ܵܐ: ܪܚܸܛܠܘܼܟ ܥܲܡܹܗ: ܘܥܲܡ ܩܲܗܒܹ̈ܐ ܣܵܡܘܼܟ. 19 ܦܘܼܡܘܼܟ ܝܸܗܒܸܠܘܼܟ ܒܒܝܼܫܬܵܐ: ܘܠܸܫܵܢܘܼܟ ܟܹܐ ܡܲܠܚܸܡ ܦܸܠܡܵܐ. 20 ܟܹܐ ܝܵܬܒܸܕ: ܥܲܠ ܐܵܚܘܿܢܘܼܟ ܗܲܡܙܸܡܸܬ: ܥܲܠ ܒܪܘܼܢܵܐ ܕܝܸܡܘܼܟ ܟܹܐ ܝܵܗ̄ܒܸܕ ܚܲܪܙܲܦܬܵܐ. 21 ܐܲܢܹܐ ܥܒܸܕܠܘܼܟ: ܘܫܬܸܩܠܝܼ: ܚܫܸܒ̣ܠܘܼܟ ܗܘܵܝܵܐ ܒܸܕ ܗܵܘܸܢ ܐܲܝܟ ܕܝܼܙܼܟ: ܒܸܕ ܡܲܢܟܸܣܸܢܘܼܟ ܘܒܸܕ ܡܲܪܝܸܙܸܢ ܩܵܕ̄ܡ ܥܲܝܢܘܼ̈ܟ. 22 ܕܹܐ ܦܲܪܡܹܡܘܿܢ ܐܵܗܵܐ: ܢܵܫܵܝܵܢܹ̈ܐ ܕܐܲܠܵܗܵܐ: ܠܵܐ ܗ̄ܘܹܐ ܕܦܲܪܦܸܛܸܢ: ܘܠܵܐ ܗܵܘܹܐ ܦܵܨܝܵܢܵܐ. 23 ܕܵܒ̣ܚܵܢܵܐ ܕܫܵܟܲܪܬܵܐ: ܟܹܐ ܡܝܵܩܸܪܝܼ: ܘܡܲܬܒ̣ܵܢܵܐ ܕܐܘܼܪܚܵܐ: ܒܸܕ ܡܲܚܙܹܢܹܗ ܦܘܼܪܩܵܢܵܐ ܕܐܲܠܵܗܵܐ.

 

ܡܙܡܘܪܐ: ܢܐ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕ: ܐܝܼܡܲܢ ܕܬܹܐܠܹܐ ܠܟܸܣܠܹܗ ܢܵܬܵܢ ܢܒ̣ܝܼܵܐ: ܟܲܕ ܐܘܸܪܸܐ ܠܟܸܣ ܒܲܬܫܒܲܥ.

1. ܪܵܚܸܡ ܥܲܠܝܼ: ܐܲܠܵܗܵܐ: ܐܲܝܟ ܫܵܦܵܩܲܬܘܼܟ̣: ܐܲܝܟ ܒܘܼܫܵܝܝܼ ܕܪܲܚܡܘܼܟ ܓܪܘܿܕܼ ܓܢܵܗܝܼ̈. 2 ܡܲܙܝܸܕ ܚܲܠܸܠ ܠܝܼ ܡ̣ܢ ܥܵܘܠܝܼ: ܘܡ̣ܢ ܚܛܝܼܬܝܼ ܕܵܟ̣ܝܼ ܠܝܼ. 3 ܣܲܒܲܒ ܓܢܵܗܝܼ̈ ܐܵܢܵܐ ܒܝܼܕܲܥܝܵܐ ܝܘܸܢ: ܘܚܛܝܼܬܝܼ ܠܒܲܪܩܘܼܒ̣ܠܝܼ ܝܠܵܐ ܕܵܝܸܡ. 4 ܥܲܠܘܼܟ ܒܢܲܦ̮ܫܘܼܟ ܚܛܸܠܝܼ: ܘܒܝܼܫܘܼܬܵܐ ܩܵܕ̄ܡ ܥܲܝܢܘܼ̈ܟ ܥܒܸܕܠܝܼ: ܩܵܐ ܕܗܵܘܸܬ ܙܲܕܝܼܩܵܐ ܒܗܹܡܸܙܡܵܢܘܼܟ: ܗܵܘܸܬ ܕܸܟ̣ܝܵܐ ܒܕܝܼܘܵܢܘܿܟ. 5 ܗܵܐ: ܒܥܵܘܠܵܐ ܦܸܫܠܝܼ ܝܠܝܼܕܵܐ: ܘܒܚܛܝܼܬܵܐ ܒܛܝܼܢܸܢܵܐ ܝܸܡܝܼ. 6 ܗܵܐ: ܣܲܪܲܣܬܘܼܬܵܐ ܒܣܸܡܠܵܐ ܠܘܼܟ ܒܟܘܼܠܝܵܬܹ̈ܐ: ܘܒܛܸܫܘܵܐ ܥܵܩܸܠܕܵܪܘܼܬܵܐ ܡܲܕܥܸܬ ܠܝܼ. 7 ܬܲܡܸܙܸܬ ܠܝܼ ܒܙܘܿܦܵܐ: ܘܒܸܕ ܗܵܘܹܢ ܕܸܟ̣ܝܵܐ: ܚܲܠܸܠܸܬ ܠܝܼ: ܘܡ̣ܢ ܬܲܠܓܵܐ ܒܸܕ ܗܵܘܹܝܢ ܚܘܵܪܵܐ. 8 ܡܲܫܡܸܥܬ ܠܝܼ ܦܨܵܚܬܵܐ ܘܚܲܕܘܼܬܵܐ: ܦܵܨܚܝܼ ܓܲܪ̈ܡܹܐ ܕܛܒܸܚܠܘܼܟ. 9 ܛܵܫܝܼ ܦܵܬܘܼܟ ܡ̣ܢ ܚܛܝܼܵܬܝܼ̈: ܘܟܠܵܝ ܥܵܘܠܝܼ̈ ܓܪܘܿܕܼ. 10 ܠܸܒܵܐ ܕܸܟ̣ܝܵܐ ܒܪܝܼ ܒܝܼܝܼ: ܐܲܠܵܗܵܐ: ܘܪܘܼܚܵܐ ܩܘܝܼܬܵܐ ܚܲܕܸܬ ܒܓܵܘܝܼ. 11 ܠܵܐ ܪܲܦܸܬ ܠܝܼ ܡܩܵܕ̄ܡܘܼܟ: ܘܪܘܼܚܵܐ ܕܩܘܼܕܫܘܼܟ ܠܵܐ ܫܵܩܠܸܬ ܡܸܢܝܼ. 12 ܡܲܕܸܪ ܐܸܠܝܼ ܦܨܵܚܬܵܐ ܕܦܘܼܪܩܵܢܘܼܟ: ܘܒܪܘܼܚܵܐ ܕܪܵܙܝܼܘܼܬܵܐ ܣܵܢܕܸܬ ܠܝܼ. 13 ܒܸܕ ܡܵܠܦܸܢ ܠܥܵܘܠܹܐ ܐܘܼܪ̈ܚܵܬܘܼܟ: ܘܚܲܛܵܝܹ̈ܐ ܠܟܸܣܠܘܼܟ ܒܸܕ ܕܵܝܪܝܼ. 14 ܦܵܨܝܼ ܠܝܼ ܡ̣ܢ ܕܸܡܹ̈ܐ: ܐܲܠܵܗܵܐ: ܕܦܘܼܪܩܵܢܝܼ: ܒܸܕ ܙܵܡܸܪ ܠܸܫܵܢܝܼ ܙܲܕܝܼܩܘܼܬܘܼܟ. 15 ܝܵܐ ܡܵܪܝܵܐ: ܣܸܦܘܵܬܝܼ̈ ܦܵܬܚܸܬ: ܘܦܘܼܡܝܼ ܒܸܕ ܡܲܕܸܥ ܬܸܫܒܘܿܚܬܘܼܟ. 16 ܣܲܒܲܒ ܠܹܐ ܒܵܣܡܵܐ ܠܘܼܟ ܒܕܸܒ̣ܚܵܐ: ܘܝܵܗ̄ܒܸܢ ܗ̄ܘ̣ܵܐ: ܕܸܒ̣ܚܵܐ ܡܘܼܩܕܵܐ ܠܹܐ ܪܵܕܸܬ. 17 ܕܸܒ̣ܚܵܐ ܕܐܲܠܵܗܵܐ ܪܘܼܚܵܐ ܬܒ̣ܝܼܪܬܵܐ ܝܠܵܐ: ܠܸܒܵܐ ܬܒ̣ܝܼܪܵܐ ܘܡܵܟܝܼܟ̣ܵܐ: ܐܲܠܵܗܵܐ: ܠܹܐ ܡܲܣܠܸܬ. 18 ܥܒ̣ܘܿܕ ܛܵܒ̣ܬܵܐ ܒܪܸܙܵܝܘܼܟ ܠܨܸܗܝܘܿܢ: ܒܵܢܸܬ ܫܘܼܪܹ̈ܐ ܕܐܘܿܪܸܫܠܸܡ. 19 ܗ̇ܝܓܵܗ ܒܸܕ ܒܵܣܡܵܐ ܠܘܼܟ ܒܕܸܒ̣ܚܹ̈ܐ ܕܙܲܕܝܼܩܘܼܬܵܐ: ܒܕܸܒ̣ܚܵܐ ܡܘܼܩܕܵܐ ܘܬܲܡܵܡ: ܗ̇ܝܓܵܗ ܒܸܕ ܡܵܐܣܩܝܼ ܥܲܠ ܡܲܕܒܚܘܼܟ ܬܵܘܪܹ̈ܐ.

 

 

 

 

 

ܡܙܡܘܪܐ: ܢܒ.

ܠܪܹܫܵܐ ܕܙܵܡܵܪܹ̈ܐ. ܡܲܣܟ̇ܝܼܠ ܕܕܵܘܝܼܕܼ: ܐܝܼܡܲܢ ܕܬܹܐܠܹܐ ܕܘܼܐܵܓ̣ ܐܲܕܘܿܡܵܝܵܐ ܘܡܘܼܕܸܥܠܹܐ ܠܫܵܐܘܿܠ: ܘܐܡܸܪܹܐ ܐܸܠܹܗ: ܐܬܹܠܹܐ ܕܵܘܝܼܕ ܠܒܲܝܬܵܐ ܕܐܲܚܡܲܠܟ.

1. ܩܵܡܘܿܕܝܼ ܫܲܒ̣ܗܘܼܪܹܐ ܝܘܸܬ ܒܒܝܼܫܬܵܐ: ܓܲܢ̄ܒܵܪܵܐ: ܫܵܦܵܩܲܬ ܕܐܲܠܵܗܵܐ ܟܠ ܝܘܿܡܵܐ (ܝܠܵܐ). 2 ܒܝܼܫܘܼܝܵܬܹ̈ܐ ܒܸܚܫܵܒ̣ܵܐ ܝܠܹܐ ܠܸܫܵܢܘܼܟ: ܐܲܝܟ ܡܲܓܪܲܥܬܵܐ ܡܘܼܚܪܸܦܬܵܐ: ܒܸܥܒ̣ܵܕܵܐ ܦܸܠܡܵܐ. 3 ܡܘܼܚܸܒܠܘܼܟ ܒܝܼܫܬܵܐ ܒܘܼܫ ܡ̣ܢ ܛܵܒ̣ܬܵܐ: ܕܵܓܵܠܘܼܬܵܐ ܡ̣ܢ ܠܗܲܡܙܘܼܡܹܐ ܙܲܕܝܼܩܘܼܬܵܐ. 4 ܡܘܼܚܸܒܠܘܼܟ ܟܠܵܝ ܗܹܡܸܙܡܵܢܹ̈ܐ ܕܒܠܵܥܝܬܵܐ: ܠܸܫܵܢܵܐ ܕܦܸܠܡܵܐ. 5 ܐܘܼܦ ܐܲܠܵܗܵܐ ܒܸܕ ܣܵܬܸܪܘܼܟ ܠܐܵܒܵܕ: ܒܸܕ ܛܲܚܛܸܚ ܠܘܼܟ: ܘܒܸܕ ܢܵܟ̰ܸܠ ܠܘܼܟ ܡ̣ܢ ܡܲܫܟܢܵܐ: ܘܥܵܩܸܪܘܼܟ̣ ܡ̣ܢ ܐܲܪܥܵܐ ܕܚܲܝܹ̈ܐ. 6 ܘܒܸܕ ܚܵܙܝܼ ܙܲܕܝܼܩܹ̈ܐ ܘܒܸܕ ܙܵܕܥܝܼ: ܘܥܲܠܘܼܗܝ ܒܸܕ ܓܵܚܟܝܼ: (ܒܹܐܡܵܪܵܐ): 7 ܗܵܐ: ܓܲܒ̣ܪܵܐ ܕܠܵܐ ܡܘܼܬܸܒ̣ܠܹܐ ܐܲܠܵܗܵܐ ܩܲܠܥܘܼܗܝ: ܘܦܸܫܠܹܐ ܒܗܹܒ̣ܝܼ ܒܒܘܼܫܵܝܝܼ ܕܕܵܘܸܠܬܹܗ: ܘܚܘܼܠܢܹܐ ܒܥܵܘܠܘܼܗܝ. 8 ܘܐܵܢܵܐ ܐܲܝܟ ܙܲܝܬܵܐ ܩܝܼܢܬܵܐ ܓܵܘ ܒܲܝܬܵܐ ܕܐܲܠܵܗܵܐ: ܣܒܸܪܝܼ ܒܫܵܦܵܩܲܬ ܕܐܲܠܵܗܵܐ ܠܥܵܠܲܡ ܥܵܠܡܝܼܢ. 9 ܒܸܕ ܫܵܟܪܸܢܘܼܟ ܠܥܵܠܲܡ: ܣܲܒܲܒ ܕܥܒܸܕܠܘܼܟ: ܘܒܸܕ ܣܵܒܪܸܢ ܒܫܸܡܘܼܟ: ܣܲܒܲܒ ܕܛܵܒ̣ܵܐ ܝܠܹܐ: ܠܒܲܪܩܘܼܒ̣ܠ ܕܙܲܕܝܼܩܘܼ̈ܟ.

 

ܡܙܡܘܪܐ: ܢܓ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܡܲܚܠܲܬ ܡܲܣܟ̇ܝܼܠ ܕܕܵܘܝܼܕ.

1. ܐܡܸܪܹܐ ܫܹܐܕܵܢܵܐ ܒܠܸܒܹܗ: ܠܲܝܬ ܐܲܠܵܗܵܐ: ܡܘܼܚܪܸܒ̣ܠܘܿܢ: ܘܟ̰ܘܼܦܠܸܢܘܿܢ ܒܥܵܘܠܵܐ: ܠܲܝܬ ܥܵܒ̣ܕܵܢܵܐ ܕܛܵܒ̣ܬܵܐ. 2 ܐܲܠܵܗܵܐ ܡ̣ܢ ܫܡܲܝܵܐ ܚܸܪܹܐ ܥܲܠ ܒܢܲܝ̈ܢܵܫܵܐ: ܠܸܚܙܵܝܵܐ ܐܸܢ ܐܝܼܬ̣ ܦܲܪܡܝܼܵܢܵܐ: ܒܲܥܝܵܢܵܐ ܠܐܲܠܵܗܵܐ. 3 ܟܠܵܝ ܩܠܸܒ̇ܠܘܿܢ:[47] ܡܸܚܕܵܕܹ̈ܐ ܟ̰ܘܼܦܠܸܢܘܿܢ: ܠܲܝܬ ܥܵܒ̣ܕܵܢܵܐ ܕܛܵܒ̣ܬܵܐ: ܠܲܝܬ ܐܘܼܦ ܚܵܕ̄. 4 ܗܵܐ: ܠܵܐ ܝܕܸܥܠܘܿܢ ܦܵܠܚܵܢܹ̈ܐ ܕܥܵܘܠܵܐ: ܐܵܟ̣ܠܵܢܹ̈ܐ ܕܛܵܝܸܦܝܼ (ܐܲܝܟ ܕ) ܐܵܟ̣ܠܝܼ ܠܲܚܡܵܐ: ܠܐܲܠܵܗܵܐ ܠܵܐ ܩܪܹܠܘܿܢ. 5 ܬܵܡܵܐ ܙܕܸܥܠܘܿܢ ܙܕܘܼܥܬܵܐ: ܠܵܐ ܗ̄ܘܹܠܵܐ ܙܕܘܼܥܬܵܐ: ܣܲܒܲܒ ܕܐܲܠܵܗܵܐ ܒܘܼܪܒܸܙܠܹܐ ܓܲܪ̈ܡܹܐ ܕܡܵܚܝܵܢܵܐ ܕܐܘܼܪܕܘܝܼ ܥܲܠܘܼܟ: ܡܘܼܢܚܸܦܠܘܼܟ: ܣܲܒܲܒ ܕܐܲܠܵܗܵܐ ܡܘܼܣܠܝܼܵܝܠܹܐ. 6 ܡܲܢܝܼ ܝܵܗ̄ܒܸܠ ܡ̣ܢ ܨܸܗܝܘܿܢ ܦܘܼܪ̈ܩܵܢܹܐ ܕܝܼܣܪܵܝܹܠ: ܟܲܕܼ ܡܲܕܸܪ ܐܲܠܵܗܵܐ ܚܲܣܝܼܪܘܼܬܵܐ ܕܛܵܝܸܦܹܗ: ܦܵܨܸܚ ܝܲܥܩܘܿܒ̣: ܚܵܕܹܐ ܝܼܣܪܵܝܹܠ.

 

ܡܙܡܘܪܐ: ܢܕ.

ܠܪܹܫܵܐ ܕܙܵܡܵܪܹ̈ܐ: ܒܢܓܝܼܢܘܿܬ ܡܲܣܟ̇ܝܼܠ ܕܕܵܘܝܼܕ: ܐܝܼܡܲܢ ܕܐܬܹܠܘܿܢ ܙܝܼܦܵܝܹ̈ܐ ܘܐܡܸܪܘܿܢ ܠܫܵܐܘܿܠ: ܗܵܐ: ܠܹܐ ܝܠܹܐ ܕܵܘܝܼܕ ܛܘܼܫܝܘܼܗ̇ ܓܵܢܘܼܗܝ ܠܟܸܣܠܲܢ.

1. ܝܵܐ ܐܲܠܵܗܵܐ: ܒܫܸܡܘܼܟ ܦܵܪܸܩ ܠܝܼ: ܘܒܓܲܢ̄ܒܵܪܘܼܬܘܼܟ ܕܵܝܢܸܬ ܠܝܼ. 2 ܐܲܠܵܗܵܐ: ܫܡܥܝܼ ܨܠܘܿܬܝܼ: ܗܲܒ̄ܠ ܢܵܬܵܐ ܠܚܲܒ̇ܪܹ̈ܐ ܕܦܘܼܡܝܼ. 3 ܣܲܒܲܒ ܢܘܼܟ̣ܪ̈ܵܝܹܐ ܩܸܡܠܘܿܢ ܥܲܠܝܼ: ܘܙܵܠܝܼܡܹ̈ܐ ܛܸܥܠܘܿܢ ܠܢܲܦ̮ܫܝܼ: ܠܵܐ ܡܘܼܬܸܒ̣ܠܘܿܢ ܐܲܠܵܗܵܐ ܠܒܲܪܩܘܼܒ̣ܠܵܝ. 4 ܗܵܐ: ܐܲܠܵܗܵܐ ܗܲܝܸܪܵܢܵܐ ܝܠܹܐ ܐܸܠܝܼ: ܡܵܪܝܵܐ ܓܵܘ ܣܵܢܕܵܢܹ̈ܐ ܕܢܲܦ̮ܫܝܼ. 5 ܒܸܕ ܡܲܕܸܪ ܒܝܼܫܬܵܐ ܥܲܠ ܕܸܫܡܸܢܝܼ̈: ܒܣܲܪܲܣܬܘܼܬܘܼܟ̣ ܡܲܫܬܸܩ ܠܗ̄ܘܿܢ. 6 ܒܩܘܼܪܒܵܢܵܐ ܕܪܸܙܵܝܵܐ ܒܸܕ ܕܵܒ̣ܚܸܢ ܐܸܠܘܼܟ: ܒܸܕ ܫܵܟܪܸܢ ܠܫܸܡܘܼܟ: ܡܵܪܝܵܐ: ܣܲܒܲܒ ܕܛܵܒ̣ܵܐ ܝܠܹܐ. 7 ܣܲܒܲܒ ܕܡ̣ܢ ܟܠ ܥܹܩܘܼܝ ܦܘܼܨܝܼܢܹܐ: ܘܒܕܸܫܡܸܢܝܼ̈ ܚܙܹܠܵܐ ܥܲܝܢܝܼ.

 

ܡܙܡܘܪܐ: ܢܗ.

ܠܪܹܫܵܐ ܕܙܵܡܵܪܹ̈ܐ: ܒܢܓܝܼܢܘܿܬ ܡܲܣܟ̇ܝܼܠ ܕܕܵܘܝܼܕ.

1. ܗܲܒ̄ܠ ܢܵܬܵܐ: ܐܲܠܵܗܵܐ: ܠܨܠܘܿܬܝܼ: ܘܠܵܐ ܛܵܫܸܬ ܓܵܢܘܼܟ ܡ̣ܢ ܢܵܘܢܵܝܬܝܼ. 2 ܡܲܨܝܸܬ ܐܸܠܝܼ ܘܓ̰ܲܘܸܒ ܠܝܼ: ܢܲܟܢܘܼܟܹܐ ܝܘܸܢ ܒܬܵܢܲܚܬܝܼ: ܘܒܸܢܵܗ̄ܝܵܐ: 3 ܡ̣ܢ ܩܵܠܵܐ ܕܕܸܫܡܸܢ: ܡ̣ܢ ܩܵܕ̄ܡ ܥܹܩܘܼܝ ܕܒܝܼܫܵܐ: ܣܲܒܲܒ ܕܟܹܐ ܕܵܪܝܼ ܥܲܠܝܼ ܥܵܘܠܵܐ: ܘܒܚܸܡܬܵܐ ܟܹܐ ܨܵܝܕܝܼ ܠܝܼ. 4 ܠܸܒܝܼ ܟܹܐ ܡܲܪܸܥ ܒܓܵܘܝܼ: ܘܨܵܘܹ̈ܐ ܕܡܵܘܬܵܐ ܢܦܸܠܘܿܢ ܥܲܠܝܼ. 5 ܙܕܘܼܥܬܵܐ ܘܪܲܬܪܲܬܬܵܐ ܐܘܸܪܘܿܢ ܒܝܼܝܼ: ܘܟܘܼܣܝܸܢܹܐ ܪܓܘܼܕܵܐ. 6 ܘܐܡܸܪܝܼ: ܛܘܼܒܵܐ ܕܗܵܘܹܐ ܠܝܼ ܓܘܼܠܦܵܐ ܐܲܝܟ ܝܵܘܢܵܐ: ܦܵܪܚܸܢ ܗ̄ܘ̣ܵܐ: ܘܫܵܪܸܢ. 7 ܗܵܐ: ܒܸܕ ܪܵܚܩܸܢ ܗ̄ܘ̣ܵܐ ܠܥܸܪܵܩܵܐ: ܦܵܝܫܸܢ ܗ̄ܘ̣ܵܐ ܒܠܲܝܠܹܐ ܓܵܘ ܒܲܪܝܼܵܐ. 8 ܒܸܕ ܡܲܠܝܸܙܹܢ ܗ̄ܘ̣ܵܐ ܚܠܵܨܬܝܼ ܡ̣ܢ ܦܵܘܚܵܐ ܙܲܪܒܵܢܵܐ: ܡ̣ܢ ܒܘܼܪܵܢ. 9 ܛܲܒ̇ܥܝܼ: ܝܵܐ ܡܵܪܝܵܐ: ܦܲܠܝܼ ܠܸܫܵܢܵܝ: ܣܲܒܲܒ ܕܚܙܹܠܝܼ ܢܵܐܗܲܩ ܘܡܲܩܲܪܵܨܘܼܬܵܐ ܓܵܘ ܡܕܝܼܢ̄ܬܵܐ. 10 ܐܝܼܡܵܡܵܐ ܘܠܲܝܠܹܐ ܟܹܐ ܚܵܕܪܝܼ ܠܵܗ̇ ܥܲܠ ܫܘܼܪܘܼܗ̇: ܘܥܵܘܠܵܐ ܘܓ̰ܵܦܵܐ ܒܓܵܘܘܼܗ̇ ܝܢܵܐ. 11 ܒܝܼܫܘܼܝܵܬܹ̈ܐ ܒܓܵܘܘܼܗ̇: ܘܠܹܐ ܦܵܪܩܝܼ ܡ̣ܢ ܥܵܠܘܿܠܘܼܗ̇ ܙܠܘܼܡܝܵܐ ܘܦܸܠܡܵܐ. 12 ܣܲܒܲܒ ܠܹܐ ܗ̄ܘ̣ܵܐ ܕܸܫܡܸܢ ܕܠܝܼܡܸܢܹܐ: ܘܩܵܒ̇ܠܸܢ ܗ̄ܘ̣ܵܐ:

ܠܹܐ ܗ̄ܘ̣ܵܐ ܣܵܢܝܵܢܝܼ ܥܲܠܝܼ ܕܡܘܼܓܘܸܪܹܐ ܓܵܢܘܼܗܝ: ܘܕܲܠܕܸܢܸܢ ܗ̄ܘ̣ܵܐ ܢܲܦ̮ܫܝܼ ܡܸܢܹܗ: 13 ܐܝܼܢܵܐ ܐܲܢ̄ܬ̇: ܐܢܵܫܵܐ ܐܲܝܟ ܪܸܐܙܝܼ: ܚܲܒ̣ܪܝܼ: ܘܝܕܸܥܝܝܼ: 14 [48] ܕܡܸܚܕܵܕܹ̈ܐ ܥܒܸܕܠܲܢ ܚܠܝܼܬܵܐ ܨܵܘܗܒܲܬ: ܓܵܘ ܒܲܝܬܵܐ ܕܐܲܠܵܗܵܐ ܟܹܐ ܚܵܕܪܵܚ ܗ̄ܘ̣ܵܘ ܒܓ̰ܵܡܵܥܲܬ. 15 ܐܵܬܹܐ ܡܵܘܬܵܐ ܥܲܠܵܝ: ܨܵܠܝܼ ܠܫܝܘܿܠ ܚܵܝܹ̈ܐ: ܣܲܒܲܒ ܕܒܝܼܫܘܼܝܵܬܹ̈ܐ ܐܝܼܬ ܓܵܘ ܒܹܝܬ ܡܲܥܡܪܵܝ: ܒܓܵܘܵܝ. 16 ܐܵܢܵܐ: ܠܐܲܠܵܗܵܐ ܒܸܕ ܩܵܪܸܢ: ܘܡܵܪܝܵܐ ܒܸܕ ܦܵܪܸܩ ܠܝܼ. 17 ܪܲܡܫܵܐ ܘܨܲܦܪܵܐ ܘܦܲܠܓܵܐ ܕܝܘܿܡܵܐ ܒܸܕ ܗܵܓܸܢ ܘܢܲܗ̄ܝܸܢ: ܘܒܸܕ ܫܲܡܸܥ ܩܵܠܝ. 18 ܦܘܼܪܸܩܠܹܐ ܒܫܠܵܡܵܐ ܢܲܦ̮ܫܝܼ ܡ̣ܢ ܦܠܵܫܵܐ ܥܲܠܝܼ: ܣܲܒܲܒ ܕܪܵܒܵܐ ܗ̄ܘ̣ܵܘ ܕܲܪܩܘܼܒ̣ܠܝܼ. 19 ܒܸܕ ܫܲܡܸܥ ܐܲܠܵܗܵܐ ܘܡܲܠܝܸܨ ܠܗ̄ܘܿܢ: ܝܵܬܒ̣ܵܢܵܐ ܡ̣ܢ ܩܵܕܝܼܡܝܼ: ܠܐܵܢܝܼ ܕܠܲܝܬ ܠܗ̄ܘܿܢ ܡܲܚܠܲܦܝܵܬܹ̈ܐ: ܘܠܹܐ ܙܵܕܥܝܼ ܡ̣ܢ ܐܲܠܵܗܵܐ. 20 ܦܘܼܫܸܛܠܹܐ ܐܝܼܕܵܬܘܼ̈ܗܝ ܥܲܠ ܕܐܵܢܝܼ ܕܝܼܢܵܐ ܒܫܠܵܡܵܐ ܥܲܡܹܗ: ܫܚܸܡܠܹܐ ܩܵܘܠܘܼܗܝ. 21 ܟ̰ܘܼܥܝܵܐ ܐܲܝܟ ܟܲܪܥܵܐ ܦܘܼܡܹܗ: ܘܦܠܵܫܵܐ ܒܠܸܒܹܗ: ܪܲܟ̇ܝܼܟܹܐ ܝܢܵܐ ܗܹܡܸܙܡܵܢܘܼ̈ܗܝ ܡ̣ܢ ܡܸܫܚܵܐ: ܘܣܲܝܦܹ̈ܐ ܓܪ̈ܝܼܫܹܐ ܝܢܵܐ. 22 ܕܪܝܼ ܥܲܠ ܡܵܪܝܵܐ ܩܸܣܡܲܬܘܼܟ: ܘܗ̇ܘ ܒܸܕ ܬܲܪܣܹܐ ܠܘܼܟ: ܠܹܐ ܝܵܗ̄ܒܸܠ ܠܥܵܠܲܡ ܫܝܵܥܫܬܵܐ ܠܙܲܕܝܼܩܵܐ. 23 ܘܐܲܢ̄ܬ̇: ܐܲܠܵܗܵܐ ܒܸܕ ܡܲܨܠܸܬ ܠܗ̄ܘܿܢ ܠܓܘܼܒܵܐ ܕܚܪܵܒ̣ܵܐ: ܐܢܵܫܵܐ ܕܕܸܡܵܐ ܘܦܸܠܡܵܐ ܠܹܐ ܬܲܡܸܡܝܼ ܦܲܠܓܵܐ ܕܝܘܿܡܵܢܵܝ̈: ܘܐܵܢܵܐ ܒܸܕ ܣܵܒܪܸܢ ܒܝܼܘܼܟ.

 

 

ܡܙܡܘܪܐ: ܢܘ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܝܵܘܢܲܬ ܐܹܠܸܡ ܪܚܘܿܩܝܼܡ. ܕܕܵܘܝܼܕ: ܡܸܟ̣ܬܵܡ: ܐܝܼܡܲܢ ܕܕܒܸܩܠܘܿܢ ܐܸܠܹܗ ܦܠܸܫܬܵܝܹ̈ܐ ܒܓܵܬ.

1. ܪܵܚܸܡ ܥܲܠܝܼ: ܐܲܠܵܗܵܐ: ܣܲܒܲܒ ܕܣܪܝܼܦܸܢܹܐ ܐܢܵܫܵܐ: ܟܠܹܗ ܝܘܿܡܵܐ ܒܸܦܠܵܫܵܐ ܟܹܐ ܡܲܠܝܸܨ ܠܝܼ. 2 ܣܪܸܦܠܘܿܢ ܕܸܫܡܸܢܝܼ̈ ܟܠ ܝܘܿܡܵܐ: ܣܲܒܲܒ ܕܪܵܒܵܐ ܝܢܵܐ ܕܒܸܦܠܵܫܵܐ ܝܢܵܐ ܥܲܡܝܼ: ܒܪܵܡܘܼܬܵܐ. 3 ܝܘܿܡܵܐ ܕܙܵܕܸܥܢ ܐܵܢܵܐ: ܒܝܼܘܼܟ ܒܸܕ ܣܵܒܪܸܢ. 4 ܒܐܲܠܵܗܵܐ ܒܸܕ ܚܵܩܪܸܢ ܗܹܡܸܙܡܵܢܘܼ̈ܗܝ: ܒܐܲܠܵܗܵܐ ܣܒܸܪܝܼ: ܠܹܐ ܙܵܕܥܸܢ: ܡܘܼܕܝܼ ܥܵܒܸܕ ܒܸܣܪܵܐ ܐܸܠܝܼ. 5 ܟܠܹܗ ܝܘܿܡܵܐ ܗܹܡܸܙܡܲܢܝܼ̈ ܟܹܐ ܡܲܦܟ̰ܸܠܝܼ: ܥܲܠܝܼ ܟܠܵܝ ܚܘܼܫܵܒ̣ܵܝ̈ ܠܒ̇ܝܼܫܬܵܐ. 6 ܓ̰ܡܸܥܠܘܿܢ: ܛܘܼܫܝܵܠܘܿܢ ܓܵܢܵܝ ܐܵܢܝܼ: ܥܸܩܒܝܼ̈ ܢܛܸܪܘܿܢ: ܟܲܕ ܣܦܸܪܘܿܢ ܠܢܲܦ̮ܫܝܼ. 7 ܒܥܵܘܠܵܐ ܚܠܵܨܵܐ ܐܸܠܵܝ: ܒܚܸܡܬܵܐ ܛܵܝܸܦܹ̈ܐ ܡܲܨܠܝܼ: ܝܵܐ ܐܲܠܵܗܵܐ. 8 ܥܪܵܩܝܼ ܡܢܹܠܘܼܟ ܐܲܢ̄ܬ̇: ܡܲܬܸܒ̣ ܕܸܡܥ̱ܬܝܼ ܒܓܘܼܕܘܼܟ. ܗܵܐ: ܠܹܐ ܝܠܵܐ ܒܟܬܵܒ̣ܘܼܟ: 9 ܗ̇ܝܓܵܗ ܒܸܕ ܕܵܝܪܝܼ ܕܸܫܡܸܢܝܼ̈ ܠܵܒܵܬ̄ܪܵܐ ܒܝܘܿܡܵܐ ܕܩܵܪܸܢ. ܐܵܗܵܐ ܝܕܸܥܠܝܼ: ܕܐܲܠܵܗܵܐ ܩܵܬܝܼ ܝܠܹܐ. 10 ܒܐܲܠܵܗܵܐ ܒܸܕ ܚܵܩܪܸܢ ܗܸܡܸܙܡܵܢ: ܒܡܵܪܝܵܐ ܒܸܕ ܚܵܩܪܸܢ ܗܹܡܸܙܡܵܢ. 11 ܒܐܲܠܵܗܵܐ ܣܒܸܪܝܼ: ܠܹܐ ܙܵܕܥܸܢ: ܡܘܼܕܝܼ ܥܵܒܸܕ ܒܲܪܢܵܫܵܐ ܐܸܠܝܼ: 12 ܥܲܠܝܼ: ܐܲܠܵܗܵܐ: ܢܸܕܪ̈ܘܼܟ: ܒܸܕ ܬܲܡܸܡܸܢ ܫܵܟܲܪ̈ܝܵܬܹܐ ܐܸܠܘܼܟ. 13 ܣܲܒܲܒ ܕܦܘܼܨܠܘܼܟ ܢܲܦ̮ܫܝܼ ܡ̣ܢ ܡܵܘܬܵܐ: ܗܵܐ: ܠܵܐ ܐܲܩܠܵܬܝܼ̈ ܡ̣ܢ ܚܲܪܙܲܦܬܵܐ: ܠܸܚܕܵܪܵܐ ܩܵܕ̄ܡ ܐܲܠܵܗܵܐ ܒܒܲܗܪܵܐ ܕܚܲܝܹ̈ܐ:

 

ܡܙܡܘܪܐ: ܢܙ.

ܠܪܹܫܵܐ ܕܙܵܡܵܪܹ̈ܐ: ܐܲܠܬܲܫܚܸܬ. ܕܕܵܘܝܼܕܼ: ܡܸܟ̣ܬܵܡ: ܐܝܼܡܲܢ ܕܥܪܸܩܠܹܐ ܡ̣ܢ ܩܵܕ̄ܡ ܫܵܐܘܿܠ ܓܵܘ ܓܸܦܝܼܬܵܐ.

1. ܪܵܚܸܡ ܥܲܠܝܼ: ܐܲܠܵܗܵܐ: ܪܵܚܸܡ ܥܲܠܝܼ: ܣܲܒܲܒ ܕܒܝܼܘܼܟ ܒܸܣܦܵܪܵܐ ܝܠܵܐ ܢܲܦ̮ܫܝܼ: ܘܒܛܸܠܵܢܝܼܬܵܐ ܕܓܘܼܠܦܵܢܘܼ̈ܟ ܒܸܕ ܣܵܒܪܸܢ: ܗܲܠ ܕܥܵܒ̣ܪܝܼ ܒܝܼܫܘܼܝܵܬܹ̈ܐ. 2 ܒܸܕ ܩܵܪܸܢ ܠܐܲܠܵܗܵܐ ܥܸܠܵܝܵܐ: ܠܐܲܠܵܗܵܐ ܕܟܹܐ ܬܲܡܸܡ ܩܵܬܝܼ. 3 ܒܸܕ ܫܵܕܸܪ ܡ̣ܢ ܫܡܲܝܵܐ ܘܦܵܪܸܩ ܠܝܼ: ܟܲܕ ܠܵܝܸܡ ܣܵܪܦܵܢܝܼ: ܒܸܕ ܫܵܕܸܪ ܐܲܠܵܗܵܐ ܫܵܦܵܩܲܬܘܼܗܝ ܘܣܲܪܲܣܬܘܼܬܘܼܗܝ. 4 ܢܲܦ̮ܫܝܼ ܓܵܘܵܐ ܕܐܲܪ̈ܝܹܐ: ܟܹܐ ܕܵܡܟܸܢ ܓܵܘܵܐ ܕܠܲܗ̄ܝܵܢܹ̈ܐ: ܒܢܲܝ̈ܢܵܫܵܐ: ܟܹܟܵܝ̈ ܪܘܼܡܚܵܐ ܘܓܹܐܪܹ̈ܐ: ܘܠܸܫܵܢܵܝ ܣܲܝܦܵܐ ܚܵܪܝܼܦܵܐ. 5 ܪܘܼܡ ܥܲܠ ܫܡܲܝܵܐ: ܐܲܠܵܗܵܐ: ܥܲܠ ܟܠܵܗ̇ ܐܲܪܥܵܐ ܐܝܼܩܵܪܘܼܟ. 6 ܓܲܪܕܵܐ ܬܘܼܪܸܨܠܘܿܢ ܩܵܐ ܦܵܣܘܿܥܝܵܬܝܼ̈: ܟܸܦܠܵܐ ܢܲܦ̮ܫܝܼ: ܚܦܸܪܘܿܢ ܩܵܕ̄ܡܝܼ ܓܘܼܒܵܐ: ܢܦܸܠܘܿܢ ܒܓܵܘܘܼܗ̇. 7 ܩܘܼܝܵܐ ܝܠܹܐ ܠܸܒܝܼ: ܐܲܠܵܗܵܐ: ܩܘܼܝܵܐ ܝܠܹܐ ܠܸܒܝܼ: ܒܸܕ ܫܵܒܚܸܢ ܘܙܵܡܪܸܢ. 8 ܪܥܘܿܫ: ܐܝܼܩܵܪܝܼ: ܪܥܘܿܫܝ ܩܝܼܬܵܪܵܐ ܘܟܸܢܵܪܵܐ: ܒܸܕ ܪܵܥܫܸܢ ܒܡܵܘܪܹܫܵܐ. 9 ܒܸܕ ܫܵܟܪܸܢܘܼܟ ܓܵܘ ܛܵܝܸܦܹ̈ܐ: ܝܵܐ ܡܵܪܝܵܐ: ܒܸܕ ܙܵܡܪܸܢ ܐܸܠܘܼܟ ܓܵܘ ܡܸܠܲܬܹ̈ܐ. 10 ܣܲܒܲܒ ܓܘܼܪܬܵܐ ܝܠܵܐ ܗܲܠ ܫܡܲܝܹ̈ܐ ܫܵܦܵܩܲܬܘܼܟ: ܘܗܲܠ ܥܢܵܢܹ̈ܐ ܣܲܪܲܣܬܘܼܬܘܼܟ. 11 ܪܘܼܡ ܥܲܠ ܫܡܲܝܵܐ: ܐܲܠܵܗܵܐ: ܥܲܠ ܟܠܵܗ̇ ܐܲܪܥܵܐ ܐܝܼܩܵܪܘܼܟ.

 

 

 

 

ܡܙܡܘܪܐ: ܢܚ.

ܠܪܹܫܵܐ ܕܙܵܡܵܪܹ̈ܐ: ܐܲܠܬܲܫܚܸܬ. ܕܕܵܘܝܼܕ: ܡܸܟ̣ܬܵܡ.

1. ܗܵܐ: ܡܸܓ̰ܸܕ: ܙܲܕܝܼܩܘܼܬܵܐ ܠܲܥܠܹܐ ܟܹܐ ܗܲܡܙܸܡܝܼܬ̇ܘܿܢ: ܒܬܪܘܼܨܘܼܬܵܐ ܕܵܝܢܝܼܬܘܿܢ: ܝܵܐ ܒܢܲܝ̈ܢܵܫܵܐ:2 ܗܹܐ: ܒܠܸܒܵܐ ܥܵܘܠܹ̈ܐ ܟܹܐ ܦܵܠܚܝܼܬܘܿܢ: ܒܐܲܪܥܵܐ ܟܹܐ ܬܵܩܠܝܼܬ̇ܘܿܢ ܢܵܐܗܲܩ ܕܐܝܼܕܵܬܵܘ̈ܟ̣ܘܿܢ. 3 ܢܘܼܟ̣ܪܸܢܘܿܢ ܒܝܼܫܹ̈ܐ ܡ̣ܢ ܡܲܪܒ̇ܥܵܐ: ܚܠܸܛܠܘܿܢ ܡ̣ܢ ܒܲܛܢܵܐ: ܗܲܡܙܸܡܵܢܹ̈ܐ ܕܕܘܼܓܠܵܐ. 4 ܚܸܡܬܵܝ ܐܲܝܟ ܕܡܘܼܬܵܐ ܕܚܸܡܬܵܐ ܕܚܘܼܘܹܐ: ܐܲܝܟ ܦܲܬܢܵܐ ܟܲܪܵܐ ܕܥܵܟ̰ܸܡ ܢܵܬܘܼܗܝ: 5 ܕܠܹܐ ܫܲܡܸܥ ܩܵܠܵܐ ܕܦܲܛܦܸܛܵܢܹ̈ܐ: ܥܵܒ̣ܕܵܢܹ̈ܐ ܕܐܲܦ̮ܣܘܼܢܟ̰ܝܼܘܼܝܵܬܹ̈ܐ ܥܵܩܸܠܕܵܪܹ̈ܐ. 6 ܝܵܐ ܐܲܠܵܗܵܐ: ܛܒ̣ܘܿܚ ܟܹܟܵܝ̈ ܒܦܘܼܡܵܝ: ܢܝܼܒܹ̈ܐ ܕܓܘܼܪ̈ܝܹܐ ܕܐܲܪ̈ܝܹܐ ܥܩܘܿܪ: ܝܵܐ ܡܵܪܝܵܐ. 7 ܦܵܫܪܝܼ ܐܲܝܟ ܡ̈ܝܵܐ: ܐܵܙܠ̄ܝܼ ܐܵܢܝܼ: ܡܵܬܸܚ ܓܹܐܪ̈ܘܼܗܝ: ܐܲܝܟ ܕܗܵܘܝܼ ܩܘܼܛܩܸܛܥܹܐ. 8 ܐܲܝܟ ܚܲܠܵܙܘܿܢܵܐ ܒܦܫܵܪܬܵܐ ܐܵܙܸܠ: ( ܐܲܝܟ) ܡܘܼܪܚܸܫܵܐ ܕܒܲܟ̣ܬܵܐ: ܠܵܐ ܚܙܹܠܘܿܢ ܫܸܡܫܵܐ. 9 ܡ̣ܢ ܩܵܕ̄ܡ ܕܦܲܪܡܝܼ ܡܵܪܸ̈ܓܠܵܘܟ̣ܘܿܢ ܟܸܬܘܵܐ: ܐܲܝܟ ܚܵܝܵܐ ܗܲܕܟ̣ܵܐ ܝܩܝܼܕܵܐ: ܒܸܕ ܡܵܚܹܐ ܠܹܗ ܒܒܘܼܪܵܢ. 10 ܒܸܕ ܚܵܕܹܐ ܙܲܕܝܼܩܵܐ ܟܲܕܼ ܚܙܹܠܹܐ ܬܘܼܥܠܵܐ: ܐܲܩܠܵܬܘܼ̈ܗܝ ܒܸܕ ܚܲܠܸܠ ܒܕܸܡܵܐ ܕܒܝܼܫܵܐ. 11 ܘܒܸܕ ܐܵܡܸܪ ܐܢܵܫܵܐ: ܡܸܓ̰ܸܕ ܐܝܼܬ[49] ܛܥܘܼܢܝܵܬܹ̈ܐ ܠܙܲܕܝܼܩܵܐ: ܡܸܓ̰ܸܕ ܐܝܼܬ ܐܲܠܵܗܵܐ ܕܟܹܐ ܕܵܝܸܢ ܒܐܲܪܥܵܐ.

 

ܡܙܡܘܪܐ: ܢܛ.

ܠܪܹܫܵܐ ܕܙܵܡܵܪܹ̈ܐ: ܐܲܠܬܲܫܚܸܬ. ܕܕܵܘܝܼܕ: ܡܸܟ̣ܬܵܡ: ܐܝܼܡܲܢ ܕܫܘܼܕܸܪܹܐ ܫܵܐܘܿܠ: ܘܢܛܸܪܘܿܢ ܒܲܝܬܵܐ ܠܸܩܛܵܠܹܗ.

1. ܦܵܨܝܼ ܠܝܼ ܡ̣ܢ ܕܸܫܡܸܢܝܼ̈: ܐܲܠܵܗܝܼ: ܡ̣ܢ ܩܵܝܡܵܢܹ̈ܐ ܥܲܠܝܼ ܡܵܪܡܸܬ ܠܝܼ. 2 ܦܵܨܝܼ ܠܝܼ ܡ̣ܢ ܦܵܠܚܵܢܹ̈ܐ ܕܥܵܘܠܵܐ: ܘܡ̣ܢ ܐܢܵܫܹ̈ܐ ܕܕܸܡܵܐ ܦܵܪܸܩ ܠܝܼ. 3 ܣܲܒܲܒ ܗܵܐ: ܡܚܹܠܘܿܢ ܒܘܼܨܵܐ ܠܢܲܦ̮ܫܝܼ: ܓ̰ܡܸܥܠܘܿܢ ܥܲܠܝܼ ܙܲܪ̈ܒܵܢܹܐ: ܒܠܵܐ ܓܢܵܗܝܼ ܘܒܠܵܐ ܚܛܝܼܬܝܼ: ܝܵܐ ܡܵܪܝܵܐ. 4 ܒܠܵܐ ܓܢܵܗܵܐ ܟܹܐ ܪܵܚܛܝܼ ܘܗܵܕܪܝܼ ܓܵܢܵܝ: ܪܥܘܿܫ ܠܸܬܦܵܩܝܼ ܘܚܙܝܼ. 5 ܘܐܲܢ̄ܬ̇: ܝܹܗܘܿܘܵܐ: ܐܲܠܵܗܵܐ ܨܒ̣ܵܐܘܼܬ: ܐܲܠܵܗܵܐ ܕܝܼܣܪܵܝܹܠ: ܪܥܘܿܫ ܠܸܦܪܲܥܝܵܐ ܟܠܵܝ ܛܵܝܸܦܹ̈ܐ: ܠܵܐ ܪܵܚܡܸܬ ܠܟܠܵܝ ܚܵܝܼܢܹ̈ܐ ܕܥܵܘܠܵܐ. 6 ܒܸܕ ܕܵܝܪܝܼ ܒܪܲܡܫܵܐ: ܙܵܘܙܝܼ ܐܲܝܟ ܟܲܠܒܵܐ: ܘܚܵܕܪܝܼ ܚܵܕܸܪܘܵܢܹܐ ܕܡܕܝܼܢ̄ܬܵܐ. 7 ܗܵܐ: ܟܹܐ ܓܲܒܓܸܒܝܼ ܒܦܘܼܡܵܝ: ܣܲܝܦܹ̈ܐ ܒܣܸܦܘܵܬܵܝ̈: ܣܲܒܲܒ ܡܲܢܝܼ ܒܸܫܡܲܥܝܵܐ ܝܠܹܐ: 8 ܘܐܲܢ̄ܬ: ܡܵܪܝܵܐ: ܒܸܕ ܓܵܚܟܸܬ ܒܝܼܵܝ: ܒܸܕ ܡܲܣܚܸܪܸܬ ܒܟܠܵܝ ܛܵܝܸܦܹ̈ܐ. 9 ܚܲܝܠܝܼ: ܐܸܠܘܼܟ ܒܸܕ ܢܵܛܪܸܢ: ܣܲܒܲܒ ܕܐܲܠܵܗܵܐ ܝܠܹܐ ܕܘܼܟܬܝܼ ܪܵܡܬܵܐ. 10 ܐܲܠܵܗܵܐ ܕܫܵܦܵܩܲܬܝܼ ܒܸܕ ܩܵܕܸܡ ܠܝܼ: ܐܲܠܵܗܵܐ ܒܸܕ ܡܲܚܙܹܐ ܠܝܼ ܥܲܠ ܕܸܫܡܸܢܝܼ̈. 11 ܠܵܐ ܩܵܛܠܸܬ ܠܗ̄ܘܿܢ: ܠܵܐ ܗ̄ܘܹܐ ܕܢܵܫܝܼ ܛܵܝܸܦܝܼ: ܡܲܚܕܸܪܘܿܢ ܒܚܲܝܠܘܼܟ: ܘܡܲܨܠܝܼ ܠܗ̄ܘܿܢ: ܩܲܠܚܵܢܲܢ: ܡܵܪܝܵܐ. 12 ܚܛܝܼܬܵܐ ܕܦܘܼܡܵܝ: ܗܹܡܸܙܡܵܢ ܕܣܸܦܘܵܬܵܝ̈: ܦܵܝܫܝܼ ܕܒ̣ܝܼܩܹܐ ܒܫܘܼܒ̣ܗܵܪܵܝ: ܘܡ̣ܢ ܠܵܘܛܬܵܐ ܘܡ̣ܢ ܕܵܓܵܠܘܼܬܵܐ (ܕ) ܟܹܐ ܗܵܩܝܼ. 13 ܬܘܼܡ ܒܚܸܡܬܵܐ: ܬܘܼܡ: ܘܠܵܐ ܗܵܘܝܼ ܘܝܲܕܥܝܼ ܕܐܲܠܵܗܵܐ ܗܵܟܘܿܡܹܐ ܝܠܹܐ ܒܝܲܥܩܘܿܒ̣: ܗܲܠ ܡܲܪ̈ܙܵܢܹܐ ܕܐܲܪܥܵܐ. 14 ܘܕܵܝܪܝܼ ܒܪܲܡܫܵܐ: ܙܵܘܙܝ ܐܲܝܟ ܟܲܠܒܵܐ: ܘܚܲܪܕܝܼ ܠܡܕܝܼܢ̄ܬܵܐ. 15 ܐܵܢܝܼ ܒܸܕ ܚܵܕܪܝܼ ܠܹܐܟ̣ܵܠܵܐ: ܐܸܢ ܠܵܐ ܣܲܒ̣ܥܝܼ: ܦܵܝܫܝܼ ܒܠܲܝܠܹܐ. 16 ܘܐܵܢܵܐ ܒܸܕ ܙܵܡܪܸܢ ܚܲܝܠܘܼܟ: ܘܒܸܕ ܫܵܒ̣ܚܸܢ ܒܨܲܦܪܵܐ ܫܵܦܵܩܲܬܘܼܟ: ܣܲܒܲܒ ܕܗ̄ܘܹܠܘܼܟ ܒܘܼܪܓ̰ܵܐ ܪܵܡܵܐ ܩܵܬܝܼ: ܘܒܹܝܬ ܓܵܘܣܵܐ ܒܝܘܿܡܵܐ ܕܥܹܩܘܼܘܝܼ. 17 ܝܵܐ ܚܲܝܠܝܼ: ܐܸܠܘܼܟ ܒܸܕ ܙܵܡܪܸܢ: ܣܲܒܲܒ ܕܐܲܠܵܗܵܐ ܒܘܼܪܓ̰ܝܼ ܪܵܡܵܐ ܝܠܹܐ: ܐܲܠܵܗܵܐ ܕܫܦܲܩܬܝܼ.

 

ܡܙܡܘܪܐ: ܣ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܫܘܼܫܲܢ ܥܹܕܘܿܬ. ܡܸܟ̣ܬܵܡ ܕܕܵܘܝܼܕܼ: ܠܡܵܠܘܿܦܹܐ: ܐܝܼܡܲܢ ܕܦܠܸܫܠܹܐ ܥܲܡ ܐܵܪܵܡ. ܢܲܗܪ̈ܝܼܢ: ܘܥܲܡ ܐܵܪܵܡ. ܨܘܼܒܵܐ: ܘܕܸܪܹܐ ܝܘܿܐܵܒ̣ ܘܡܚܹܠܹܐ ܠܐܲܕܘܿܡ ܓܵܘ ܪܘܘܿܠܵܐ ܕܡܸܠܚܵܐ ܬܪܸܥܣܲܪ ܐܲܠܦܹ̈ܐ.

1. ܝܵܐ ܐܲܠܵܗܵܐ ܟ̰ܘܼܡܟ̰ܡܵܚܠܘܼܟ: ܒܘܼܪܒܸܙܵܚܠܘܼܟ: ܟܪܸܒܠܘܼܟ: ܡܲܕܸܪܸܬ ܠܲܢ. 2 ܡܘܼܫܥܸܫܠܘܼܟ ܠܐܲܪܥܵܐ: ܦܬܝܼܚܵܠܘܼܟ: ܒܵܣܸܡ ܬܒ̣ܵܪܘܼܗ̇: ܣܲܒܲܒ ܕܫܘܼܩܫܸܩܠܵܐ. 3 ܡܘܼܚܙܹܠܘܼܟ ܠܛܵܝܸܦܘܼܟ ܩܸܫܝܘܼܬܵܐ: ܩܲܡ ܡܲܫܬܸܬ ܠܲܢ ܚܲܡܪܵܐ ܕܪܥܘܼܠܵܐ. 4 ܝܸܗܒܸܠܘܼܟ ܩܵܐ ܙܸܕܥܝܘܼ̈ܟ ܒܲܝܕܵܓ̣: ܠܸܦܝܵܫܵܐ ܡܘܼܪܸܡܬܵܐ ܣܲܒܲܒ ܕܣܲܪܲܣܬܘܼܬܵܐ. 5 ܩܵܐ ܕܚܵܠܨܝܼ ܣܵܘܓܘܿܠܘܼ̈ܟ: ܦܵܪܸܩ ܒܝܲܡܝܼܢܘܼܟ: ܘܓ̰ܲܘܸܒ ܠܝܼ. 6 ܐܲܠܵܗܵܐ ܗܘܼܡܙܸܡܠܹܐ ܒܩܘܼܕܫܘܼܗܝ: ܒܸܕ ܦܵܨܚܸܢ: ܒܸܕ ܦܲܠܸܢ ܠܫܟܹܝܡ: ܘܥܘܼܡܩܵܐ ܕܣܵܟܘܼܬ ܒܸܕ ܡܵܫܚܸܢ. 7 ܕܝܼܝܼ ܝܠܹܐ ܓܸܠܥܵܕ: ܘܕܝܼܝܼ ܝܠܹܐ ܡܢܲܫܹܐ: ܘܐܲܦܪܹܝܡ ܩܲܠܥܵܐ ܕܪܹܫܝܼ: ܝܼܗܘܼܕܵܐ ܚܘܼܛܪܝܼ. 8 ܡܘܼܐܵܒ̣ ܡܵܪܸܓܠܵܐ ܕܚܲܠܲܠܬܝܼ: ܥܲܠ ܐܲܕܘܿܡ ܒܸܕ ܪܲܦܸܢ ܨܵܘܸܠܬܝܼ: ܥܲܠܝܼ: ܝܵܐ ܦܠܫܬ: ܩܲܘܸܚܝ. 9 ܡܲܢܝܼ ܒܸܕ ܠܵܒܸܠ ܠܝܼ ܠܡܕܝܼܢ̄ܬܵܐ ܡܗܘܼܨܸܪܬܵܐ: ܡܲܢܝܼ ܬܲܓܒܸܪܝܼ ܗܲܠ ܐܲܕܘܿܡ: 10 ܗܵܐ: ܠܵܐ ܐܲܢ̄ܬ̇: ܐܲܠܵܗܵܐ: ܕܟ̰ܘܼܡܟ̰ܸܡܵܚܠܘܼܟ: ܘܠܹܐ ܦܵܠܛܸܬ: ܐܲܠܵܗܵܐ: ܒܚܲܝܠܵܘ̈ܬܲܢ: 11 ܗܲܒ̄ܠ ܠܲܢ ܗܝܼܵܪܝܼ ܡ̣ܢ ܕܸܫܡܸܢ: ܘܗܵܟܵܣ ܝܼܠܵܐ ܦܵܪܲܩܬܵܐ ܕܒܲܪܢܵܫܵܐ. 12 ܒܐܲܠܵܗܵܐ ܒܸܕ ܥܵܒ̣ܕܵܚ ܚܲܝܠܵܐ: ܘܗ̇ܘ ܒܸܕ ܕܲܫܕܸܫ ܠܕܸܫ̈ܡܸܢܲܢ.

 

ܡܙܡܘܪܐ: ܣܐ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܢܓܝܼܢܘܼܬ. ܕܕܵܘܝܼܕ.

1. ܫܡܥܝܼ: ܝܵܐ ܐܲܠܵܗܵܐ: ܡܲܩܘܲܚܬܝܼ: ܡܲܨܝܸܬ ܠܨܠܘܿܬܝܼ. 2 ܡ̣ܢ ܡܲܪܙܵܐ ܕܐܲܪܥܵܐ ܐܸܠܘܼܟ ܒܸܕ ܩܵܪܸܢ: ܒܕܲܪܕܲܫܬܵܐ ܕܠܸܒܝܼ: ܠܐܝܼܣܵܪܵܐ ܕܒܘܼܫ ܪܵܡܵܐ ܡܸܢܝܼ ܬܲܓܒܸܪܸܬ ܠܝܼ. 3 ܣܲܒܲܒ ܕܗ̄ܘܹܠܘܼܟ ܒܹܝܬ ܓܵܘܣܵܐ ܐܸܠܝܼ: ܒܘܼܪܓ̰ܵܐ ܙܲܪܒܵܢܵܐ ܡ̣ܢ ܩܵܕ̄ܡ ܕܸܫܡܸܢ. 4 ܒܸܕ ܗܵܡܪܸܢ ܓܵܘ ܡܲܫܟܢܘܼܟ ܠܥܵܠܡܝܼܢ: ܒܸܕ ܣܵܒܪܸܢ ܒܣܸܬܵܪܵܐ ܕܓܘܼܠܦܵܢܘܼ̈ܟ. 5 ܣܲܒܲܒ ܐܲܢ̄ܬ̇: ܐܲܠܵܗܵܐ: ܫܡܸܥܠܘܼܟ ܢܸܕܪ̈ܝܼ: ܝܸܗܒܸܠܘܼܟ ܝܘܼܪܬܵܢܵܐ ܕܙܸܕܥܝܹ̈ܐ ܕܫܸܡܘܼܟ. 6 ܝܘܿܡܵܢܹ̈ܐ ܥܲܠ ܝܘܿܡܵܢܹ̈ܐ ܕܡܲܠܟܵܐ ܒܸܕ ܡܲܙܝܸܕܸܬ: ܫܸܢܘܼ̈ܗܝ ܐܲܝܟ ܕܵܘܪܵܐ ܘܕܵܘܪܵܐ. 7 ܒܸܕ ܝܵܬܸܒ̣ ܠܥܵܠܲܡ ܩܵܕ̄ܡ ܐܲܠܵܗܵܐ: ܫܵܦܵܩܲܬ ܘܣܲܪܲܣܬܘܼܬܵܐ ܦܵܩܸܕ: ܢܵܛܪܝܼ ܠܹܗ. 8 ܗܲܕܟ̣ܵܐ ܒܸܕ ܙܵܡܪܸܢ ܫܸܡܘܼܟ ܠܥܵܠܡܝܼܢ: ܩܵܐ ܕܬܲܡܸܡܸܢ ܢܸܕܪ̈ܝܼ ܝܘܿܡܵܐ ܒܝܘܿܡܵܐ.

 

 

 

 

 

ܡܙܡܘܪܐ: ܣܒ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܝܲܕܘܼܬܘܿܢ: ܡܲܙܡܘܿܪܵܐ ܕܕܵܘܝܼܕ.

1. ܐܲܚܟ̰ܝܼ ܠܐܲܠܵܗܵܐ ܣܵܦܪܵܢܬܵܐ ܝܠܵܐ ܢܲܦ̮ܫܝܼ: ܡܸܢܹܗ ܝܠܹܐ ܦܘܼܪܩܵܢܝܼ. 2 ܐܲܚܟ̰ܝܼ ܗ̇ܘ ܝܼܠܹܐ ܐܝܼܨܵܪܝܼ ܘܦܘܼܪܩܵܢܝܼ: ܒܘܼܪܓ̰ܝܼ ܪܵܡܵܐ: ܠܹܐ ܫܵܥܫܸܢ ܪܵܒܵܐ. 3 ܗܲܠ ܐܝܼܡܲܢ ܬܲܪܥܝܼܬܘܿܢ ܥܲܠ ܐܢܵܫܵܐ: ܩܵܛܠܝܼܬܘܿܢ: ܟܠܵܘܟ̣ܘܿܢ: ܐܲܝܟ ܓܘܼܕܵܐ ܓܸܢܝܵܐ: ܫܘܼܪܵܐ ܫܘܼܟܫܸܟܵܐ: 4 ܐܲܚܟ̰ܝܼ ܡ̣ܢ ܪܵܡܘܼܬܘܼܗܝ ܥܒܸܕܠܘܿܢ ܪܵܐܝܝܼ ܠܚܲܪܙܘܼܦܹܐ: ܟܹܐ ܒܵܣܡܵܐ ܠܗ̄ܘܿܢ ܒܕܘܼܓܠܵܐ: ܒܦܘܼܡܵܝ ܟܹܐ ܒܵܪܟ̣ܝܼ: ܘܒܓܵܘܵܝ ܟܹܐ ܠܵܝܛܝܼ. 5 ܐܲܚܟ̰ܝܼ ܠܐܲܠܵܗܵܐ ܫܬܘܿܩܝ: ܝܵܐ ܢܲܦ̮ܫܝܼ: ܣܲܒܲܒ ܡܸܢܹܗ ܝܠܵܐ ܗܹܒ̣ܝܼ. 6 ܐܲܚܟ̰ܝܼ ܗ̇ܘ ܝܼܠܹܐ ܐܝܼܨܵܪܝܼ ܘܦܘܼܪܩܵܢܝܼ: ܒܘܼܪܓ̰ܝܼ ܪܵܡܵܐ: ܠܹܐ ܫܵܥܫܸܢ. 7 ܥܲܠ ܐܲܠܵܗܵܐ ܝܠܹܐ ܦܘܼܪܩܵܢܝܼ ܘܐܝܼܩܵܪܝܼ: ܐܝܼܣܵܪܵܐ ܕܙܲܪܒܝܼ: ܒܹܝܬ ܓܵܘܣܝܼ ܒܐܲܠܵܗܵܐ ܝܠܹܐ. 8 ܣܒܘܿܪܘܿܢ ܒܝܹܗ ܒܟܠ ܙܲܒ̣ܢܵܐ: ܝܵܐ ܛܵܝܸܦܵܐ: ܫܵܦܟ̣ܘܿܢ ܩܵܕ̄ܡܘܼܗܝ ܠܸܒܵܘܟ̣ܘܿܢ: ܐܲܠܵܗܵܐ ܒܹܝܬ ܓܵܘܣܵܐ ܝܠܹܐ ܩܵܬܲܢ. 9 ܡܸܓܸܕ[50] ܗܵܒܵܣܘܼܬܵܐ ܝܢܵܐ ܒܢܲܝ̈ ܐܵܕܵܡ: ܕܘܼܓܠܵܐ ܝܢܵܐ ܒܢܲܝ̈ ܐܢܵܫܵܐ: ܓܵܘ ܡܲܣܲܐܬܵܐ ܒܹܐܣܵܩܵܐ: ܐܵܢܝܼ[51] ܡܸܚܕܵܕܹ̈ܐ ܒܘܼܫ (ܩܵܠܘܼܠܹ̈ܐ) ܡ̣ܢ [52] ܗܵܒܵܣܘܼܬܵܐ. 10 ܠܵܐ ܦܵܝܫܝܼܬܘܿܢ ܒܗܹܒ̣ܝܼ ܒܙܠܘܼܡܝܵܐ: [53] ܘܒܟ̰ܠܵܓ̰ܵܐ ܠܵܐ ܥܵܒ̣ܕܝܼܬܘܿܢ ܗܵܒܵܣܘܼܬܵܐ: ܡܵܐܠ ܟܲܕ ܙܵܝܸܕ: ܠܵܐ ܡܲܬܒ̣ܝܼܬܘܿܢ ܠܸܒܵܐ (ܥܲܠܘܼܗܝ). 11 ܚܕܵܐ ܗܘܼܡܙܸܡܠܹܐ ܐܲܠܵܗܵܐ: ܬܲܪ̈ܬܹܝ: ܐܵܗܵܐ ܫܡܸܥܠܝܼ: ܕܚܲܝܠܵܐ ܠܐܲܠܵܗܵܐ ܝܠܹܐ: 12 ܘܕܝܼܘܼܟ ܝܼܠܵܐ: ܡܵܪܝܵܐ: ܫܵܦܵܩܲܬ: ܣܲܒܲܒ ܕܐܲܢ̄ܬ̇ ܟܹܐ ܦܲܪܥܸܬ ܠܐܢܵܫܵܐ ܐܲܝܟ ܦܘܼܠܚܵܢܘܼܗܝ.

 

ܡܙܡܘܪܐ: ܣܓ.

ܡܲܙܡܘܿܪܵܐ ܕܕܵܘܝܼܕ: ܐܝܼܡܲܢ ܕܝܼܗ̄ܘܵܐ ܓܵܘ ܒܲܪܝܼܵܐ ܕܝܼܗܘܼܕܵܐ.

1. ܐܲܠܵܗܵܐ: ܐܲܠܵܗܝܼ ܐܲܢ̄ܬ ܝܼܘܸܬ: ܒܸܕ ܛܵܥܸܢ ܐܸܠܘܼܟ[54] ܒܨܲܦܪܵܐ: ܨܹܗ̄ܠܵܐ ܐܸܠܘܼܟ ܢܲܦ̮ܫܝܼ: ܫܲܗ̄ܘܘܼܬܹܐ ܝܠܹܐ ܐܸܠܘܼܟ ܒܸܣܪܝܼ: ܒܐܲܪܥܵܐ ܨܗ̄ܝܼܬܵܐ ܘܟܟ̰ܝܼܚܵܐ: ܒܠܵܐ ܡ̈ܝܼܵܐ. 2 ܗܲܕܟ̣ܵܐ ܓܵܘ ܡܲܩܕܫܵܐ ܩܲܡ ܚܵܙܸܢܘܼܟ: ܠܸܚܙܵܝܵܐ ܚܲܝܠܘܼܟ ܘܐܝܼܩܵܪܘܼܟ.3 ܣܲܒܲܒ ܕܨܦܵܝ ܝܠܵܐ ܫܵܦܵܩܲܬܘܼܟ ܡ̣ܢ ܚܲܝܹ̈ܐ: ܣܸܦܘܵܬܝܼ̈ ܒܸܕ ܫܵܒܚܝܼ ܠܘܼܟ. 4 ܗܲܕܟ̣ܵܐ ܒܸܕ ܒܵܪܟܸܢܘܼܟ ܒܚܲܝܲܝ̈: ܒܫܸܡܘܼܟ ܒܸܕ ܡܵܪܡܸܢ ܐܝܼܕܵܬܝܼ̈. 5 ܐܲܝܟ ܒܬܲܪܒܵܐ ܘܛܪܝܼܨܘܼܬܵܐ ܒܸܕ ܣܲܒ̣ܥܵܐ ܢܲܦ̮ܫܝܼ: ܘܒܣܸܦܘܵܬܹ̈ܐ ܕܩܲܘܲܚܝܵܬܹ̈ܐ ܒܸܕ ܫܵܒܸܚ ܦܘܼܡܝܼ. 6 ܟܲܕ ܕܵܟ̣ܪܸܢܘܼܟ ܥܲܠ ܫܘܝܼ̈ܬܝܼ̈: ܒܒܲܕܠܹ̈ܐ ܒܸܕ ܗܵܓܸܢ ܒܝܘܼܟ. 7 ܣܲܒܲܒ ܕܗ̄ܘܹܠܘܼܟ ܗܝܼܵܪܝܼ ܐܸܠܝܼ: ܘܒܛܸܠܵܢܝܼܬܵܐ ܕܓܘܼܠܦܵܢܘܼ̈ܟ ܒܸܕ ܚܵܕܸܢ. 8 ܬܒܸܥܠܵܐ ܢܲܦ̮ܫܝܼ ܒܵܬ̄ܪܘܼܟ: ܐܸܠܝܼ ܣܢܸܕܠܵܐ ܝܲܡܝܼܢܘܼܟ. 9 ܘܐܵܢܝܼ ܠܬܠܵܩܵܐ ܟܹܐ ܛܵܥܝܼ ܠܢܲܦ̮ܫܝܼ: ܒܸܕ ܐܵܘܪܝܼ ܒܬܲܚ̈ܬܵܝܵܬܵܐ ܕܐܲܪܥܵܐ. 10 [55] ܒܸܕ ܣܵܦܝܼ ܠܹܗ ܒܐܝܼܕܵܬܹ̈ܐ ܕܣܲܝܦܵܐ: ܣܵܡܵܐ ܕܬܲܥ̈ܠܹܐ ܒܸܕ ܗܵܘܝܼ. 11 ܘܡܲܠܟܵܐ ܒܸܕ ܚܵܕܹܐ ܒܐܲܠܵܗܵܐ: ܒܸܕ ܥܵܒܸܕ ܫܘܼܒ̣ܗܵܪܵܐ ܟܠ ܕܝܵܡܹܐ ܒܝܹܗ: ܣܲܒܲܒ ܕܒܸܕ ܦܵܝܸܫ ܥܟ̰ܝܼܡܵܐ ܦܘܼܡܵܐ ܕܗܲܡܙܸܡܵܢܹ̈ܐ ܕܕܘܼܓܠܵܐ.

 

ܡܙܡܘܪܐ: ܣܕ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕܼ.

1.ܫܡܥܝܼ: ܝܵܐ ܐܲܠܵܗܵܐ: ܩܵܠܝܼ ܒܩܒ̣ܵܠܬܝܼ: ܡ̣ܢ ܙܕܘܼܥܬܵܐ ܕܕܸܫܡܸܢ ܢܵܛܪܸܬ ܚܲܝܝܼ̈. 2 ܛܵܫܸܬ ܠܝܼ ܡ̣ܢ ܪܵܐܝܝܼ ܕܥܵܒ̣ܕܵܢܹ̈ܐ ܕܒܝܼܫܬܵܐ: ܡ̣ܢ ܫܓ̣ܘܼܫܝܵܐ ܕܦܵܠܚܵܢܹ̈ܐ ܕܥܵܘܠܵܐ: ܕܡܘܼܚܪܸܦܠܘܿܢ ܐܲܝܟ ܣܲܝܦܵܐ ܠܸܫܵܢܵܝ: ܡܬܸܚܠܘܿܢ ܓܹܐܪܵܝ: ܚܲܒ̇ܪܵܐ ܡܲܪܝܼܪܵܐ: ܠܪܲܦܘܼܝܹܐ ܒܛܸܫ̈ܘܹܐ ܒܬܲܡܝܼܡܵܐ: ܡܸܢܫܹܠܬܵܢܹ̈ܐ ܟܹܐ ܪܲܦܝܼ ܒܝܹܗ: ܘܠܹܐ ܙܵܕܥܝܼ. 5 ܟܹܐ ܚܲܠܸܢܝܼ ܩܵܐ ܓܵܢܵܝ ܚܲܒ̇ܪܵܐ ܒܝܼܫܵܐ: ܟܹܐ ܗܵܩܝܼ ܠܛܵܡܘܿܪܹܐ ܟ̰ܘܼܪܸ̈ܬܡܹܐ: ܐܡܸܪܘܿܢ: ܡܲܢܝܼ ܒܸܕ ܚܵܙܹܐ ܠܗ̄ܘܿܢ. 6 ܟܹܐ ܬܲܦ̮ܬܸܫܝܼ ܥܵܘܠܹ̈ܐ: ܬܘܼܡܸܡܠܲܢ ܬܲܦ̮ܬܵܫܬܵܐ ܬܘܼܦ̮ܬܸܫܬܵܐ: ܘܓܵܘܵܐ ܕܐܢܵܫܵܐ: ܘܠܸܒܵܐ: ܥܲܡܩܘܼ ܝܠܹܐ. 7 ܘܒܸܕ ܪܲܦܹܐ ܒܝܼܵܝ ܐܲܠܵܗܵܐ ܓܹܐܪܵܐ: ܡܸܢܫܸܠܬܵܢܹ̈ܐ: ܒܸܕ ܗܵܘܝܼ ܡܲܚܘܵܬܵܝ̈. 8 ܘܒܸܕ ܡܲܢܦܸܠܝܼ ܠܹܗ: ܥܲܠܵܝ ܠܸܫܵܢܵܝ: ܒܸܕ ܡܲܫܥܸܫܝܼ ܪܹܫܵܐ ܟܠ ܚܵܝܪܵܢܵܐ ܒܝܼܵܝ. 9 ܘܒܸ̇ܬ ܙܵܕܥܝܼ ܟܠܵܝ ܐܢܵܫܹ̈ܐ: ܘܡܲܕܥܝܼ ܦܘܼܠܚܵܢܵܐ ܕܐܲܠܵܗܵܐ: ܘܥܒ̣ܵܕܘܼܗܝ ܒܸܕ ܦܲܪܡܝܼ. 10 ܒܸܕ ܚܵܕܹܐ ܙܲܕܝܼܩܵܐ ܒܡܵܪܝܵܐ: ܘܣܵܒܸܪ ܒܝܹܗ: ܘܒܸܕ ܥܵܒ̣ܕܝܼ ܫܘܼܒ̣ܗܵܪܵܐ ܟܠܵܝ ܬܪ̈ܘܼܨܹܐ ܕܠܸܒܵܐ.

 

ܡܙܡܘܪܐ: ܣܗ.

ܠܪܹܫܵܐ ܕܙܵܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕ. ܙܡܵܪܬܵܐ.

1. ܐܸܠܘܼܟ ܟܹܐ ܣܵܦܪܵܐ ܬܸܫܒܘܿܚܬܵܐ: ܐܲܠܵܗܵܐ: ܒܨܸܗܝܘܢ: ܘܐܸܠܘܼܟ ܒܸܕ ܦܵܝܸܫ ܦܸܪܥܝܵܐ ܢܸܕܪܵܐ. 2 ܝܵܐ ܫܲܡܥܵܢܵܐ ܕܨܠܘܼܬܵܐ: ܠܟܸܣܠܘܼܟ ܟܠ ܒܸܣܪܵܐ ܒܸܕ ܐܵܬܝܼ. 3 ܫܘܼ̈ܠܹܐ ܕܥܵܘ̈ܠܹܐ ܙܘܼܪܒܸܢܘܿܢ ܡܸܢܝܼ: ܓܢܵܗܲܢ: ܐܲܢ̄ܬ̇ ܦܵܠܚܸܬ ܠܗ̄ܘܿܢ. 4 ܛܘܼܒ̣ܵܐ ܠܗ̇ܘ ܕܓܵܒܸ̇ܬ: ܘܩܲܪܒܸܢܸܬ: ܒܸܕ ܫܵܪܹܐ ܒܕܵܪܬܘܼܟ: ܣܲܒ̣ܥܵܚ ܒܛܵܒ̣ܬܵܐ ܕܒܲܝܬܘܼܟ: ܡܲܩܕܫܵܐ ܕܗܲܝܟܠܘܼܟ. 5 ܡܸܢܕܝܵܢܹ̈ܐ ܣܲܗܡܵܢܹ̈ܐ ܒܙܲܕܝܼܩܘܼܬܵܐ ܟܹܐ ܓ̰ܘܸܒܸܕ ܠܲܢ: ܝܵܐ ܐܲܠܵܗܵܐ ܕܦܘܼܪܩܵܢܲܢ: ܗܹܒ̣ܝܼ ܕܟܠܵܝ ܡܲܪ̈ܙܵܢܹܐ ܕܐܲܪܥܵܐ: ܘܝܵܡܵܐ: ܪܸ̈ܚܩܹܐ: 6 ܡܲܩܘܝܼܵܢܵܐ ܕܛܘܼܪܹ̈ܐ ܒܚܲܝܠܹܗ: ܚܠܝܼܨܵܐ ܒܓܲܢ̄ܒܵܪܘܼܬܵܐ: 7 ܡܲܫܬܸܩܵܢܵܐ ܕܫܓ̣ܘܼܫܝܵܐ ܕܝܵܡܵܬܹ̈ܐ: ܫܓ̣ܘܼܫܝܵܐ ܕܠܲܦܵܝ̈: ܘܚܒ̣ܵܛܵܐ ܕܡܸܠܲܬܹ̈ܐ. 8 ܘܟܹܐ ܙܵܕܥܝܼ ܥܵܡܪ̈ܵܢܹܐ ܕܡܲܪ̈ܙܵܢܹܐ ܡ̣ܢ ܢܝܼܫܲܢܩܘܼ̈ܟ: ܦܠܵܛܵܐ ܕܨܲܦܪܵܐ ܘܕܪܲܡܫܵܐ ܟܹܐ ܡܲܙܡܸܪܸܬ. 9 ܣܘܼܚܒܸܪܘܼܟ ܠܐܲܪܥܵܐ ܘܡܘܼܫܦܸܟ̣ܵܠܘܼܟ: ܒܒܘܼܫܵܝܝܼ ܟܹܐ ܥܵܒ̣ܕܸܬ ܠܵܗ̇ ܕܵܘܠܲܬܡܲܢܕ: ܫܲܩܝܼܬܵܐ ܕܐܲܠܵܗܵܐ ܡܠܝܼܬܵܐ ܝܠܵܐ ܡ̈ܝܵܐ: ܟܹܐ ܬܵܪܨܸܬ ܕܲܚܠܵܝ: ܣܲܒܲܒ ܗܲܕܟ̣ܵܐ ܟܹܐ ܗܲܕܪܸܬ ܠܵܗ̇. 10 ܟܪ̈ܝܼܒ̣ܵܢܘܼܗ̇ ܟܹܐ ܡܲܪܘܸܬ: ܟܹܐ ܡܲܫܘܸܬ ܚܲܝܘܼ̈ܗ̇: ܒܩܲܫܩܲܫܝܵܬܹ̈ܐ ܟܹܐ ܡܲܪܟܸܟܸܬ ܠܵܗ̇: ܡܲܓ̰ܲܢܬܘܼܗ̇ ܟܹܐ ܒܵܪܟܸܬ. 11 ܒܘܼܢܦܸܪܘܼܟ ܫܸܢ̄ܬܵܐ ܒܛܵܒ̣ܬܘܼܟ: ܘܓ̰ܵܕܵܘܵܬܘܼ̈ܟ ܟܹܐ ܡܲܢܛܸܦܝܼ ܛܪܝܼܨܘܼܬܵܐ. 12 ܟܹܐ ܡܲܢܛܸܦܝܼ ܡܲܣܟܵܢܹ̈ܐ ܕܒܲܪܝܼܵܐ: ܘܦܨܵܚܵܐ ܪ̈ܘܼܡܝܵܬܹܐ ܚܠܝܼܨܹܐ ܝܢܵܐ. 13 ܠܒ̣ܝܼܫܹܐ ܝܢܵܐ ܡܲܪܸ̈ܥܝܹܐ ܦܸܣܩܵܐ: [56] ܘܥܘܼܡܩܹ̈ܐ ܟܘܼܣܝܹܐ ܝܢܵܐ ܒܪܸܚܠܵܐ: ܟܹܐ ܩܲܘܸܚܝܼ: ܐܘܼܦ ܟܹܐ ܙܵܡܪܝܼ.

 

ܡܙܡܘܪܐ: ܣܘ.

ܠܪܹܫܵܐ ܕܙܵܡܵܪܹ̈ܐ. ܙܡܵܪܬܵܐ: ܡܲܙܡܘܿܪܵܐ.

1. ܩܲܘܸܚܘܿܢ ܠܐܲܠܵܗܵܐ ܟܠܵܗ̇ ܐܲܪܥܵܐ. 2 ܙܡܘܿܪܘܿܢ ܐܝܼܩܵܪܵܐ ܕܫܸܡܹܗ: ܡܲܬܒ̣ܘܿܢ ܐܝܼܩܵܪܵܐ ܬܸܫܒܘܿܚܬܘܼܗܝ. 3 ܐܡܘܿܪܘܿܢ ܠܐܲܠܵܗܵܐ: ܟܡܵܐ ܣܲܗܡܵܢܹ̈ܐ ܝܢܵܐ ܦܘܼܠܚܵܢܘܼ̈ܟ: ܒܒܘܼܫܵܝܝܼ ܕܙܲܪܒܘܼܟ ܒܸܕ[57] ܫܵܦܪܝܼ ܐܸܠܘܼܟ ܕܸܫܡܸܢܘܼ̈ܟ. 4 ܟܠܵܗ̇ ܐܲܪܥܵܐ ܒܸܕ ܣܵܓ̣ܕܝܼ ܐܸܠܘܼܟ: ܘܒܸܕ ܙܵܡܪܝܼ ܐܸܠܘܼܟ: ܒܸܕ ܙܵܡܪܝܼ ܫܸܡܘܼܟ. 5 ܬܹܡܘܿܢ ܘܚܙܹܡܘܿܢ ܦܘܼܠܚܵܢܹ̈ܐ ܕܐܲܠܵܗܵܐ: ܣܲܗܡܵܢܵܐ ܒܦܘܼܠܚܵܢܵܐ ܥܲܠ ܒܢܲܝ̈ܢܵܫܵܐ. 6 ܡܘܼܕܸܪܹܐ ܝܵܡܵܐ ܠܒܸܪܙܵܐ: ܒܢܲܗܪܵܐ ܒܸܕ ܚܵܕܵܚ ܒܝܹܗ. 7 ܗܵܟܘܿܡܹܐ ܒܓܲܢ̄ܒܵܪܘܼܬܘܼܗܝ ܠܥܵܠܲܡ: ܥܲܝܢܘܼ̈ܗܝ ܒܛܵܝܸܦܹ̈ܐ ܟܹܐ ܚܵܝܪܝܼ: ܝܵܓ̣̈ܝܹܐ ܠܵܐ ܡܵܪܡܝܼ ܓܵܢܵܝ. 8 ܒܵܪܟ̣ܘܿܢ: ܛܵܝܸܦܹ̈ܐ: ܠܐܲܠܵܗܲܢ: ܘܡܲܫܡܸܥܡܘܼܢ ܩܵܠܵܐ ܕܬܸܫܒ̇ܘܿܚܬܘܼܗܝ: 9 ܕܡܘܼܬܸܒ̣ܠܹܐ ܓܵܢܲܢ ܒܚܲܝܹ̈ܐ: ܘܠܵܐ ܝܸܗܒܸܠܹܐ ܠܫܸܥܵܫܵܐ ܐܲܩܠܲܢ. 10 ܣܲܒܲܒ ܕܩܲܡ ܒܵܚܪܸܬ ܠܲܢ: ܐܲܠܵܗܵܐ: ܩܲܡ ܨܲܪܦܸܬ ܠܲܢ ܐܲܝܟ ܨܲܪܲܦܬܵܐ ܕܣܹܐܡܵܐ. 11 ܩܲܡ ܡܲܐܘܸܪܸܬ ܠܲܢ ܓܵܘ ܓܲܪܕܵܐ: ܡܘܼܬܸܒ̣ܾܘܼܟ ܟܵܪܬܵܐ ܥܲܠ ܚܵܨܲܢ. 12 ܡܘܼܪܟܸܒ̣ܠܘܼܟ ܐܢܵܫܵܐ ܥܲܠ ܪܹܫܲܢ: ܐܘܸܪܲܢ ܒܢܘܼܪܵܐ ܘܒܡ̈ܝܼܵܐ: ܘܩܲܡ ܦܵܠܛܸܬ ܠܲܢ ܠܦܸܪܝܘܼܬܵܐ. 13 ܒܸܕ ܐܵܘܪܸܢ ܠܒܲܝܬܘܼܟ ܒܕܸܒ̣ܚܹ̈ܐ ܡܘܼܩܕܹ̈ܐ: ܒܸܕ ܦܲܪܥܸܢ ܐܸܠܘܼܟ ܢܸܕܪ̈ܝܼ: 14 ܐܲܝܢܝܼ ܕܦܬܸܚܠܘܿܢ ܣܸܦܘܵܬܝܼ̈: ܘܗܘܼܡܙܸܡܠܹܐ ܦܘܼܡܝ: ܟܲܕ ܥܸܩܠܵܐ ܐܸܠܝܼ. 15 ܕܸܒ̣ܚܹ̈ܐ ܡܘܼܩܕܹ̈ܐ ܕܛܪ̈ܝܼܨܹܐ ܒܸܕ ܡܵܐܣܩܸܢ ܐܸܠܘܼܟ: ܥܲܡ ܒܸܣܡܵܐ ܕܒܲܪ̈ܥܵܢܹܐ: ܒܸܕ ܥܵܒ̣ܕܸܢ ܬܵܘܪܹ̈ܐ ܥܲܡ ܢܹܐܪ̈ܝܹܐ: 16 ܬܹܡܘܿܢ ܫܡܸܥܡܘܿܢ: ܘܗܵܩܸܢ: ܟܠܵܝ ܙܸܕܥܝܹ̈ܐ ܟܠܵܝ ܙܸܕܥܝܹ̈ܐ ܕܐܲܠܵܗܵܐ: ܡܸܢܕܝܼ ܕܥܒܸܕܠܹܐ ܩܵܐ ܢܲܦ̮ܫܝܼ. 17 ܐܸܠܹܗ ܒܦܘܼܡܝܼ ܩܪܹܠܝܼ: ܘܦܸܫܠܹܐ ܡܘܼܪܡܵܐ ܬܚܘܿܬ ܠܸܫܵܢܝܼ. 18 ܥܵܘܠܵܐ ܐܸܢ ܚܙܹܠܝܼ ܒܠܸܒܝܼ: ܠܹܐ ܫܲܡܸܥ ܡܵܪܝܵܐ. 19 ܡܸܓܸܕ ܫܡܸܥܠܹܐ ܐܲܠܵܗܵܐ: ܡܘܼܨܝܸܬ ܠܹܐ ܠܩܵܠܵܐ ܕܦܲܪܦܲܠܬܝܼ. 20 ܒܪܝܼܟ̣ܵܐ ܝܠܹܐ ܐܲܠܵܗܵܐ ܕܠܵܐ ܡܘܼܥܒܸܪܹܐ ܦܲܪܦܲܠܬܝܼ ܘܫܵܦܵܩܲܬܘܼܗܝ ܡܸܢܝܼ.

 

ܡܙܡܘܪܐ: ܣܙ.

ܠܪܹܫܵܐ ܕܙܵܡܵܪܹ̈ܐ: ܒܢܓܝܼܢܘܿܬ. ܡܲܙܡܘܿܪܵܐ: ܙܡܵܪܬܵܐ.

1. ܐܲܠܵܗܵܐ ܪܵܚܸܡ ܥܲܠܲܢ ܘܒܵܪܸܟ ܠܲܢ: ܒܲܗܪܸܢ ܦܵܬܘܼܗܝ ܠܟܸܣܠܲܢ: 2 ܠܦܝܵܫܵܐ ܝܕܥܝܼܬܵܐ ܒܐܲܪܥܵܐ ܐܘܼܪܚܘܼܟ: ܒܟܠܵܝ ܛܵܝܸܦܹ̈ܐ ܦܘܼܪܩܵܢܘܿܟ. 3 ܫܵܟܪܝܼ ܠܘܼܟ ܛܵܝܸܦܹ̈ܐ: ܐܲܠܵܗܵܐ: ܫܵܟܪܝܼ ܠܘܼܟ ܛܵܝܸܦܹ̈ܐ ܟܠܵܝ. 4 ܚܵܕܝܼ ܘܫܵܒܚܝܼ ܡܸܠܲܬܹ̈ܐ: ܣܲܒܲܒ ܕܟܹܐ ܕܵܝܢܸܬ ܛܵܝܸܦܹ̈ܐ ܒܬܪܘܼܨܘܼܬܵܐ: ܘܡܸܠܲܬܹ̈ܐ ܒܐܲܪܥܵܐ ܟܹܐ ܬܲܓܒܸܪܸܬ ܠܗ̄ܘܿܢ. 5 ܫܵܟܪܝܼ ܠܘܼܟ ܛܵܝܸܦܹ̈ܐ: ܐܲܠܵܗܵܐ: ܫܵܟܪܝܼ ܠܘܼܟ ܛܵܝܸܦܹ̈ܐ ܟܠܵܝ. 6 ܐܲܪܥܵܐ: ܝܸܗܒܸܠܵܐ ܡܲܗܨܘܼܠܘܼܗ̇: ܒܵܪܸܟ ܠܲܢ ܐܲܠܵܗܵܐ ܐܲܠܵܗܲܢ. 7 ܒܵܪܸܟ ܠܲܢ ܐܲܠܵܗܵܐ: ܘܙܵܕܥܝܼ ܡܸܢܹܗ ܟܠܵܝ ܡܲܪ̈ܙܵܢܹܐ ܕܐܲܪܥܵܐ.

 

ܡܙܡܘܪܐ: ܣܚ.

ܠܪܹܫܵܐ ܕܙܵܡܵܪܹ̈ܐ. ܕܕܵܘܝܼܕ: ܡܲܙܡܘܿܪܵܐ: ܙܡܵܪܬܵܐ.

1. ܟܹܐ ܩܵܝܸܡ ܐܲܠܵܗܵܐ: ܟܹܐ ܒܲܪܒܸܙܝܼ ܕܫܸܡܸܢܘܼ̈ܗܝ: ܘܥܵܪܩܝܼ ܣܵܢܝܵܢܘܼ̈ܗܝ ܡ̣ܢ ܩܵܕ̄ܡܘܼܗܝ. 2 ܐܲܝܟ ܕܦܵܝܸܫ ܒܘܼܪܒܸܢܵܐ ܬܸܢܵܐ ܒܲܪܒܸܙܸܬ ܠܗ̄ܘܿܢ: ܐܲܝܟ ܕܦܵܫܪܵܐ ܫܲܡܲܥ ܡ̣ܢ ܩܵܕ̄ܡ ܢܘܼܪܵܐ: ܬܵܠܩܝܼ ܒܝܼܫܹ̈ܐ ܡ̣ܢ ܩܵܕ̄ܡ ܐܲܠܵܗܵܐ. 3 ܘܙܲܕܝܼܩܹ̈ܐ ܚܵܕܝܼ: ܦܵܨܚܝܼ ܩܵܕ̄ܡ ܐܲܠܵܗܵܐ: ܘܗܵܘܝܼ ܦܨܝܼܚܹ̈ܐ ܒܚܲܕܘܼܬܵܐ. 4 ܫܵܒܚܘܿܢ ܠܐܲܠܵܗܵܐ: ܙܡܘܿܪܘܿܢ ܫܸܡܹܗ: ܡܵܪܡܘܿܢ ܠܪܵܟܵܒ̣ܵܐ ܒܚܵܪܒ̣ܝܹܐ: ܒܝܵܗ ܫܸܡܹܗ: ܘܦܨܘܼܚܘܿܢ ܩܲܕ̄ܡܘܼܗܝ. 5 ܒܵܒܵܐ ܕܝܵܬܘܿܡܹ̈ܐ: ܘܕܲܝܵܢܵܐ ܕܐܲܪ̈ܡܸܠܝܵܬܹܐ: ܐܲܠܵܗܵܐ ܒܡܲܥܡܪܵܐ ܕܩܘܼܕܫܘܼܗܝ. 6 ܐܲܠܵܗܵܐ ܟܹܐ ܡܲܬܸܒ̣ ܝܼܚܝܼܕܵܝܹ̈ܐ ܒܒܲܝܬܵܐ: ܟܹܐ ܦܵܠܸܛ ܐܣܝܼܪܹ̈ܐ ܒܡܲܢܬܵܝܬܵܐ: ܐܝܼܢܵܐ ܥܵܨ̈ܝܹܐ ܟܹܐ ܫܵܪܝܼ ܒܕܘܼܟܬܵܐ ܨܗ̄ܝܬܵܐ. 7 ܐܲܠܵܗܵܐ: ܒܦܠܵܛܬܘܼܟ ܩܵܕ̄ܡ ܛܵܝܸܦܘܼܟ: ܒܦܣܵܥܝܬܘܼܟ ܓܵܘ ܒܲܪܝܼܵܐ: 8 ܐܲܪܥܵܐ ܫܥܸܫܠܵܐ. ܐܘܼܦ ܫܡܲܝܹ̈ܐ ܡܘܼܢܛܸܦܠܘܿܢ ܡ̣ܢ ܩܵܕ̄ܡ ܐܲܠܵܗܵܐ: ܐܵܗܵܐ ܣܝܼܢܲܝ: ܡ̣ܢ ܩܵܕ̄ܡ ܐܲܠܵܗܵܐ: ܐܲܠܵܗܹܗ ܕܝܼܣܪܵܝܹܠ. 9 ܡܸܛܪܵܐ[58] ܕܪܸ̈ܙܵܝܹܐ ܡܘܼܪܝܸܣܠܘܼܟ: ܐܲܠܵܗܵܐ: ܠܝܵܪܬܘܼܬܘܿܟ: ܟܲܕ ܟܟ̰ܸܚܠܵܐ: ܐܲܢ̄ܬ̇ ܡܘܼܩܘܝܼܵܠܘܼܟ. 10 [59] ܚܲܝܵܘ̈ܬܵܐ ܕܝܼܘܼܟ ܝܬܸܒ̣ܠܘܿܢ ܓܵܘܘܼܗ̇: ܗܘܼܕܵܪܘܼܟ ܒܛܵܒ̣ܘܼܬܘܼܟ ܩܵܐ ܡܸܣܟܹܢܹ̈ܐ: ܐܲܠܵܗܵܐ. 11 ܡܵܪܝܵܐ ܟܹܐ ܝܵܗ̄ܒܸܠ ܚܲܒ̇ܪܵܐ: ܡܲܫܚܸܕܵܢܝܵܬܹ̈ܐ (ܕܝܹܗ) ܥܲܣܟܵܪ ܓܘܼܪܬܵܐ. 12 ܡܲܠܟܹ̈ܐ ܕܚܲܝܠܵܘܵܬܹ̈ܐ ܟܹܐ ܥܵܪܩܝܼ: ܟܹܐ ܥܵܪܩܝܼ: ܘܥܵܡܪܵܢܬܵܐ ܕܒܲܝܬܵܐ ܟܹܐ ܦܲܠܝܼܵܐ ܣܠܵܒܬܵܐ. 13 [60] ܒܸܕ ܕܵܡܟ̣ܝܼܬܘܿܢ ܒܹܝܠ ܓܘܼܡܵܢܹ̈ܐ: [61] ܓܘܼܠܦܵܢܹ̈ܐ ܕܝܵܘܢܵܐ ܩܪܝܼܡܹܐ ܒܣܹܐܡܵܐ: ܘܦܲܪ̈ܘܼܗ̇ ܒܕܲܗܒ̣ܵܐ ܙܲܪܕܵܐ: 14 ܟܲܕ ܒܘܼܪܒܸܙܠܹܐ ܐܹܝܠܫܲܕܲܝ ܡܲܠܟܹ̈ܐ ܓܵܘܘܼܗ̇: ܬܘܼܠܓܸܢܵܐ ܓܵܘ ܨܲܠܡܘܿܢ. 15 ܛܘܼܪܵܐ ܕܐܲܠܵܗܵܐ: ܛܘܼܪܵܐ ܕܒܲܝܫܵܢ: ܛܘܼܪܵܐ ܡܵܪܹܐ ܓܒ̣ܝܼܢܹ̈ܐ: ܛܘܼܪܵܐ ܕܒܲܝܫܵܢ. 16 ܩܵܡܘܿܕܝܼ ܚܵܝܪܝܼܬܘܿܢ ܦܟ̰ܝܼܠܵܐ: ܛܘܼܪܵܢܹܐ ܡܵܪܹ̈ܐ ܓܒ̣ܝܼܢܹ̈ܐ: ܠܛܘܼܪܵܐ ܕܒܣܸܡܠܵܐ ܠܹܗ ܐܲܠܵܗܵܐ ܠܸܬܝܵܒ̣ܵܐ ܓܵܘܘܼܗܝ: ܐܘܼܦ ܡܵܪܝܵܐ ܒܸܕ ܫܵܪܹܐ (ܓܵܘܘܲܗܝ) ܠܥܵܠܲܡ. 17 ܟܵܠܸܣܟܹ̈ܐ ܕܐܲܠܵܗܵܐ ܬܲܪ̈ܬܹܝ ܪܸ̈ܒܘܵܬܹܐ ܝܢܵܐ: ܐܲܠܦܹ̈ܐ ܬܸܢܝܹܐ: ܡܵܪܝܵܐ ܓܵܘܵܝ ܝܠܹܐ: ܣܝܼܢܲܝ ܒܩܘܼܕܫܵܐ. 18 ܐܣܸܩܠܘܼܟ ܠܡܪܵܘܡܵܐ: ܠܘܼܒܸܠܘܼܟ ܝܲܚܣܝܼܪ ܝܲܚܣܝܼܪܘܼܬܵܐ: ܫܩܸܠܘܼܟ ܚܲܠܥܲܬܹ̈ܐ ܓܵܘ ܒܢܲܝ̈ܢܵܫܵܐ: ܘܐܘܼܦ ܥܵܨ̈ܝܹܐ: ܩܵܐ ܕܫܵܪܹܐ ܝܵܗ ܐܲܠܵܗܵܐ (ܓܵܘܵܝ). 19 ܒܪܝܼܟ̣ܵܐ ܝܠܹܐ ܡܵܪܝܵܐ ܝܘܿܡܵܐ ܒܝܘܿܡܵܐ: ܟܹܐ ܛܵܥܸܢ ܐܸܠܲܢ: ܐܲܠܵܗܵܐ ܦܘܼܪܩܵܢܲܢ ܝܼܠܹܐ. 20 ܐܲܠܵܗܵܐ ܐܸܠܲܢ ܐܲܠܵܗܵܐ ܕܦܘܼܪ̈ܩܵܢܹܐ ܝܠܹܐ: ܘܕܡܵܪܝܵܐ ܐܲܠܵܗܵܐ ܝܢܵܐ ܦܠܵܛܹ̈ܐ ܕܡܵܘܬܵܐ. 21 ܡܸܓ̰ܸܕ ܐܲܠܵܗܵܐ ܒܸܕ ܒܵܠܸܣ ܪܹܫܵܐ ܕܕܸܫܡܸܢܘܼ̈ܗܝ: ܟܵܟܘܿܠܬܵܐ ܕܣܲܥܪܵܐ ܕܚܵܕܪܵܢܵܐ ܒܓܢܵܗܘܼ̈ܗܝ. 22 ܐܡܸܪܹܐ ܡܵܪܝܵܐ: ܡ̣ܢ ܒܲܝܫܵܢ ܒܸܕ ܡܲܕܸܪܸܢ: ܒܸܕ ܡܲܕܸܪܸܢ ܡ̣ܢ ܥܘܼܡܩܹ̈ܐ ܕܝܵܡܵܐ: 23 ܩܵܐ ܕܛܵܡܫܸܬ: ܐܲܩܠܘܼܟ ܒܕܸܡܵܐ: ܠܸܫܵܢܵܐ ܕܟܲܠܒܘܼ̈ܟ: ܡ̣ܢ ܕܸܫܡܸܢܹ̈ܐ ܣܵܡܘܼܗܝ. 24 ܚܙܹܠܘܿܢ ܚܕܵܪܝܵܬܘܼܟ: ܐܲܠܵܗܵܐ: ܚܕܵܪ̈ܝܵܬܹܐ ܕܐܲܠܵܗܝܼ: ܡܲܠܟܝܼ: ܒܡܲܩܕܫܵܐ. 25 ܩܘܼܕܸܡܠܘܿܢ ܙܵܡܵܪܹ̈ܐ: ܒܵܬ̄ܪܵܝ ܡܘܼܣܝܼܩܘܿܪܹ̈ܐ: ܒܓܘܵܐ ܕܚܵܡܵܬܹ̈ܐ ܡܵܚܝܵܢܹ̈ܐ ܕܬܲܦ. 26 ܓܵܘ ܓ̰ܵܡܵܥܲܬܹ̈ܐ ܒܵܪܟ̣ܘܿܢ ܠܐܲܠܵܗܵܐ: ܠܡܵܪܝܵܐ: (ܐܲܚܬܘܿܢ ܕ) ܡ̣ܢ ܡܲܒܘܼܥܵܐ ܕܝܼܣܪܵܝܹܠ. 27 ܬܵܡܵܐ ܝܠܹܐ ܒܸܢܝܵܡܹܝܢ ܙܥܘܿܪܵܐ ܗܵܟܝܼܡܵܝ: ܓܘܼܪ̈ܵܢܹܐ ܕܝܼܗܘܼܕܵܐ: ܕܲܣܬܵܝ: ܓܘܼܪ̈ܵܢܹܐ ܕܙܒ̣ܘܿܠܘܿܢ: ܓܘܼܪ̈ܵܢܹܐ ܕܢܲܦ̮ܬܵܠܝܼ. 28 ܦܩܸܕܠܹܐ ܐܲܠܵܗܘܼܟ ܚܲܝܠܘܼܟ: ܚܲܠܸܢ: ܐܲܠܵܗܵܐ: ܐܵܗܵܐ ܕܦܠܸܚܠܘܼܟ ܩܵܬܲܢ. 29 ܡ̣ܢ ܗܲܝܟܠܘܼܟ ܥܲܠ ܐܘܿܪܸܫܠܸܡ: ܩܵܬܘܼܟ ܒܸܕ ܡܲܝܬ̄ܝܝܼ ܡܲܠܟܹ̈ܐ ܦܲܫܟܵܫܹ̈ܐ. 30 ܢܓ̣ܘܿ ܒܗܲܝܘܵܢ ܕܙܹܠܵܐ: ܓ̰ܵܡܵܥܲܬ ܕܒܘܼ̈ܓܹܐ: ܒܡܘܼ̈ܓ̰ܹܐ ܕܛܵܝܸܦܹ̈ܐ: ܪܲܦܘܼܝܹܐ ܓܵܢܘܼܗܝ ܒܩܸܛܥܵܛܹ̈ܐ ܕܣܹܐܡܵܐ: ܒܲܪܒܸܙ ܛܵܝܸܦܹ̈ܐ ܕܒܦܠܵܫܹ̈ܐ ܟܹܐ ܒܵܣܡܵܐ ܠܗ̄ܘܿܢ. 31 ܒܸܕ ܐܵܬܝܼ ܓܘܼܪ̈ܵܢܹܐ ܡ̣ܢ ܡܸܨܪܹܝܢ: ܟܘܼܫ ܒܸܕ ܡܲܪܚܸܛܵܐ ܐܝܼܕܵܬܘܼ̈ܗ̇ ܠܐܲܠܵܗܵܐ. 32 ܝܵܐ ܡܲܠܟܘܵܬܹ̈ܐ ܕܐܲܪܥܵܐ: ܫܵܒܚܘܿܢ ܠܐܲܠܵܗܵܐ: ܙܡܘܿܪܘܿܢ ܠܡܵܪܝܵܐ: 33 ܠܪܵܟܒ̣ܵܢܵܐ ܒܫܡܲܝ̈ ܫܡܲܝܹ̈ܐ: ܩܵܕܝܼܡܝܼ: ܗܵܐ: ܟܹܐ ܝܵܗ̄ܒܸܠ ܒܩܵܠܹܗ: ܩܵܠܵܐ ܙܲܪܒܵܢܵܐ. 34 ܗܲܒ̄ܠܘܿܢ ܚܲܝܠܵܐ ܠܐܲܠܵܗܵܐ: ܥܲܠ ܝܼܣܪܵܝܹܠ ܪܵܡܘܼܬܘܼܗܝ: ܘܚܲܝܠܘܼܗܝ ܒܪܩܝܼܥܵܐ. 35 ܣܲܗܡܵܢܵܐ ܝܘܸܬ: ܐܲܠܵܗܵܐ: ܡ̣ܢ ܡܲܩܕܫܘܼ̈ܟ: ܐܲܠܵܗܵܐ ܕܝܼܣܪܵܝܹܠ: ܗ̇ܘ ܟܹܐ ܝܵܗ̄ܒܸܠ ܩܘܼܘܲܬ ܘܚܲܝ̈ܠܹܐ ܠܛܵܝܸܦܵܐ. ܒܪܝܼܟ̣ܵܐ ܝܠܹܐ ܐܲܠܵܗܵܐ.

 

ܡܙܡܘܪܐ: ܣܛ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܫܘܼܫܲܢܝܼܡ. ܕܕܵܘܝܼܕ.

1. ܦܵܪܸܩ ܠܝܼ: ܐܲܠܵܗܵܐ: ܣܲܒܲܒ ܕܐܬܹܐܠܘܿܢ ܡ̈ܝܼܵܐ ܗܲܠ ܓܵܢܵܐ. 2 ܛܒܸ̇ܥܠܝܼ ܒܛܝܼܢܵܐ ܕܥܘܼܡܩܵܐ: ܘܠܲܝܬ ܕܘܼܟܬܵܐ ܕܟܠܵܝܬܵܐ: ܐܘܸܪܝܼ ܒܥܘܼܡܩܹ̈ܐ ܕܡ̈ܝܼܵܐ: ܘܣܵܝܠܵܒ̣ ܟܘܼܪܦܸܫܸܢܵܐ. 3 ܟܟ̣ܸܚܠܝܼ ܒܩܪܵܝܬܝܼ: ܚܪܸܟ̣ܠܵܐ ܒܵܠܘܿܥܬܝܼ: ܙܠܸܩܠܘܿܢ ܥܲܝܢܝܼ̈ ܒܸܣܦܵܪܵܐ ܠܐܲܠܵܗܝܼ. 4 ܪܵܒܵܐ ܝܢܵܐ ܡ̣ܢ ܡܸܙܝܵܬܹ̈ܐ ܕܪܹܫܝܼ ܣܵܢܝܵܢܝܼ̈ ܕܠܵܐ ܗܲܓ̰ܲܬ: ܚܘܼܠܸܢܘܿܢ ܬܵܠܩܵܢܝܼ̈: ܕܸܫܡܸܢܝܼ̈ ܕܒܘܼܚܬܵܢ: ܡܸܢܕܝܼ ܕܠܵܐ[62] ܟ̰ܠܸܓ̰ܠܝܼ ܗ̇ܝܓܵܗ ܡܘܼܕܸܪܝܼ. 5 ܝܵܐ ܐܲܠܵܗܵܐ: ܐܲܢ̄ܬ ܟܹܐ ܝܲܕܥܸܬ ܢܲܙܵܢܘܼܬܝܼ: ܘܓܢܵܗܝܼ̈ ܡܸܢܘܼܟ ܠܹܐ ܝܢܵܐ ܛܘܼܫܝܹܐ. 6 ܠܵܐ ܢܵܚܦܝܼ ܒܝܼܝܼ ܣܵܦܪ̈ܵܢܹܐ ܐܸܠܘܼܟ: ܝܵܐ ܡܵܪܝܵܐ: ܐܲܠܵܗܵܐ ܨܒ̣ܵܐܘܼܬ: ܠܵܐ ܦܵܝܫܝܼ ܫܲܪܡܸܣܲܪ ܒܝܼܝܼ ܛܵܥܵܝܵܢܹ̈ܐ ܐܸܠܘܼܟ: ܐܲܠܵܗܵܐ ܕܝܼܣܪܵܝܹܠ. 7 ܣܲܒܲܒ ܕܒܘܼܬ ܕܝܼܘܼܟ ܩܘܼܒܸܠܝܼ ܠܵܘܡܵܐ: ܟܘܼܣܸܠܵܐ ܫܲܪܡܸܣܲܪܘܼܬܵܐ ܦܵܬܝܼ. 8 ܩܵܪܝܼܒܵܝܵܐ ܗ̄ܘܹܠܝܼ ܠܐܵܚܘܿܢܘܵܬܝܼ̈: ܘܢܘܼܟ̣ܪܵܝܵܐ ܠܒܢܘܼܢܹ̈ܐ ܕܝܸܡܝܼ. 9 ܣܲܒܲܒ ܩܲܝܪܲܬ ܕܒܲܝܬܘܼܟ ܐܟ̣ܝܼܠܸܢܵܐ: ܘܠܵܘܡܹ̈ܐ ܕܠܵܝܡܵܢܘܼ̈ܟ ܢܦܸܠܘܿܢ ܥܲܠܝܼ. 10 ܘܒܟܸܠܝܼ: ܒܨܵܘܡܵܐ ܢܲܦ̮ܫܝܼ: ܘܗ̄ܘܹܠܵܐ ܠܠܵܘܡܹ̈ܐ ܐܸܠܝܼ. 11 ܘܥܒܸܕܠܝܼ ܠܒܸܫܬܝܼ ܣܲܩܵܐ: ܘܗ̄ܘܹܠܝܼ ܐܸܠܵܝ ܠܡܵܣܵܠܵܐ.12 ܟܹܐ ܗܲܡܙܸܡܝܼ ܒܵܗ̄ܣܝܼ ܝܵܬܒ̣ܵܢܹ̈ܐ ܒܕܲܪܘܵܙܵܐ: (ܘܗ̄ܘܹܠܝܼ) ܙܡܵܪ̈ܝܵܬܹܐ ܕܫܵܬܝܵܢܹ̈ܐ ܕܫܲܟ̣ܪܵܐ. 13 ܘܐܵܢܵܐ: ܨܠܘܿܬܝܼ ܐܸܠܘܼܟ: ܝܵܐ ܡܵܪܝܵܐ: ܒܙܲܒ̣ܢܵܐ ܩܘܼܒ̇ܠܵܐ: ܐܲܠܵܗܵܐ: ܒܒܘܼܫܵܝܝܼ ܕܫܵܦܵܩܲܬܘܼܟ: ܓܲܘܸܒ ܠܝܼ ܒܣܲܪܲܣܬܘܼܬܵܐ ܕܦܘܼܪܩܵܢܘܼܟ. 14 ܦܵܨܝܼ ܠܝܼ ܡ̣ܢ ܛܝܼܢܵܐ: ܘܠܵܐ ܛܲܒ̇ܥܸܢ: ܦܵܝܫܸܢ ܦܘܼܨܝܵܐ ܡ̣ܢ ܣܵܢܝܵܢܝܼ̈: ܘܡ̣ܢ ܥܘܼܡܩܹ̈ܐ ܕܡ̈ܝܼܵܐ. 15 ܠܵܐ ܟܲܪܦܸܫܵܐ ܠܝܼ ܣܵܝܠܵܒ̣ ܕܡ̈ܝܼܵܐ: ܘܠܵܐ ܒܲܠܸܥ ܠܝܼ ܥܘܼܡܩܵܐ: ܘܠܵܐ ܥܵܟܸܡ ܥܲܠܝܼ ܒܹܪܵܐ ܦܘܼܡܘܼܗܝ. 16 ܓ̰ܲܘܸܒ ܠܝܼ: ܡܵܪܝܵܐ: ܣܲܒܲܒ ܕܨܦܵܝܝܼ ܝܠܵܐ ܫܵܦܵܩܲܬܘܼܟ: ܐܲܝܟ ܒܘܼܫܵܝܝܼ ܕܪܲܚܡܘܼܟ ܕܘܼܪ ܠܟܸܣܠܝܼ. 17 ܘܠܵܐ ܛܵܫܸܬ ܦܵܬܘܼܟ ܡ̣ܢ ܪܸܓܘܼܟ: ܣܲܒܲܒ ܕܥܸܩܠܵܐ ܠܝܼ: ܡܲܠܝܸܙ ܓ̰ܲܘܸܒ ܠܝܼ. 18 ܩܲܪܒܸܢ ܠܟܸܣ ܢܲܦ̮ܫܝܼ: ܦܵܨܝܼ ܠܵܗ̇: ܣܲܒܲܒ ܕܕܸܫܡܸܢܝܼ̈ ܦܵܪܸܩ ܠܝܼ. 19 ܐܲܢ̄ܬ ܟܹܐ ܝܲܕܥܸܬ ܠܵܘܡܝܼ: ܘܢܚܸܦܬܝܼ: ܘܫܲܪܡܸܣܲܪܘܼܬܝܼ: ܩܵܕ̄ܡܘܼܟ ܝܼܢܵܐ ܟܠܵܝ ܕܸܫܡܸܢܝܼ̈. 20 ܠܵܘܡܵܐ ܬܒܸܪܹܐ ܠܠܸܒܝܼ: ܘܡܪܸܥܠܝܼ: ܘܣܦܸܪܝܼ ܠܟܲܪܝܵܢܵܐ (ܥܲܠܝܼ): ܘܠܲܝܬ: ܘܠܝܵܗ̄ܒܵܢܹ̈ܐ ܕܠܸܒܵܐ: ܘܠܵܐ ܡܘܼܫܟ̣ܸܚܠܝܼ. 21 ܘܝܸܗ̄ܒܸܠܘܿܢ ܒܘܼܬ ܡܹܐܟ̣ܘܼܠܬܝܼ ܡܪܵܪܹ̈ܐ: ܘܒܨܵܗ̄ܘܝܼ ܩܲܡ ܡܲܫܬܝܼ ܠܝܼ ܚܵܠܵܐ. 22 ܗܵܘܹܐ ܨܘܼܦܪܵܝ ܩܵܕ̄ܡܵܝ ܠܢܸܫܒ̣ܵܐ: ܘܠܵܐܢܝܼ ܕܒܫܠܵܡܹ̈ܐ ܠܬ̄ܩܘܼܠܬܵܐ. 23 ܚܵܒ̣ܝܼ ܥܲܝܢܵܝ̈ ܡ̣ܢ ܚܙܵܝܵܐ: ܘܚܵܨܵܝ̈ ܒܕܵܝܸܡܘܼܬܵܐ ܡܲܪܥܸܠ. 24 ܫܵܦܸܟ ܥܲܠܵܝ ܡܚܘܼܬܘܼܟ: ܘܚܸܡܬܵܐ ܕܟܲܪܒܘܼܟ ܡܵܛܝܵܐ ܠܗܘܿܢ. 25 ܗܵܘܹܐ ܒܹܝܬ ܗܡܵܪܵܝ ܚܵܪܒܵܐ: ܓܵܘ ܡܲܫܟܢܝܼ ܠܵܐ ܗܵܘܹܐ ܥܵܡܪܵܢܵܐ. 26 ܣܲܒܲܒ ܠܗ̇ܘ ܕܡܚܹܠܘܼܟ ܐܲܢ̄ܬ̇ ܛܪܸܕܠܘܿܢ: ܘܥܲܠ ܕܲܪܕ ܕܒܪܝܼܢܕܵܪ̈ܘܼܟ ܟܹܐ ܗܵܩܝܼ. 27 ܗܲܒ̄ܠ ܥܵܘܠܵܐ ܥܲܠ ܥܵܘܠܵܝ: ܘܠܵܐ ܐܵܘܪܝܼ ܒܙܲܕܝܼܩܘܼܬܘܼܟ. 28 ܦܵܝܫܝܼ ܓܪܝܼܕܹܐ ܡ̣ܢ ܟܬܵܒ̣ܵܐ ܕܚܲܝܹ̈ܐ: ܘܥܲܡ ܙܲܕܝܼܩܹ̈ܐ ܠܵܐ ܦܵܝܫܝܼ ܟܬܝܼܒܹܐ: 29 ܘܐܵܢܵܐ: ܡܸܣܟܹܢܵܐ ܝܘܸܢ ܘܕܘܼܪܕܫܵܐ: ܦܘܼܪܩܵܢܘܼܟ: ܝܵܐ ܐܲܠܵܗܵܐ: ܡܵܪܸܡ ܠܝܼ.30 ܒܸܕ ܫܵܒܚܸܢ ܠܫܸܡܹܗ ܕܐܲܠܵܗܵܐ ܒܙܡܵܪܬܵܐ: ܘܒܸܕ ܡܲܓܘܸܪܢܹܗ ܒܫܵܟܲܪܬܵܐ. 31 ܘܒܸܕ ܫܵܦܪܵܐ ܠܡܵܪܝܵܐ ܒܘܼܫ ܡ̣ܢ ܬܵܘܪܵܐ: ܡܘܼܓ̰ܵܐ ܡܵܪܹܐ ܩܵܪ̈̄ܢܵܢܹܐ ܡܵܪܹܐ ܣܸܡܵܬܹ̈ܐ. 32 ܚܙܹܠܘܿܢ ܡܸܣܟܹܢܹ̈ܐ: ܚܕܸܠܘܿܢ: ܛܵܥܝܵܢܹ̈ܐ ܠܐܲܠܵܗܵܐ: ܚܲܝܹܐ ܠܸܒܵܘܟ̣ܘܿܢ. 33 ܣܲܒܲܒ ܕܟܹܐ ܫܲܡܸܥ ܠܡܸܣܟܹܢܹ̈ܐ ܡܵܪܝܵܐ: ܘܐܣܝܼܪ̈ܘܼܗܝ ܠܵܐ ܡܘܼܣܠܹܠܹܐ. 34 ܫܵܒܚܝܼ ܠܹܗ ܫܡܲܝܵܐ ܘܐܲܪܥܵܐ: ܝܵܡܵܬܹ̈ܐ ܘܟܠ ܕܪܵܚܸܫ ܓܵܘܵܚ. 35 ܣܲܒܲܒ ܕܐܲܠܵܗܵܐ ܒܸܕ ܦܵܪܸܩ ܠܨܸܗܝܘܿܢ: ܘܒܵܢܹܐ ܡܕܝܼܢܵܬܹ̈ܐ ܕܝܼܗܘܼܕܵܐ: ܘܒܸܕ ܝܵܬܒ̣ܝܼ ܬܵܡܵܐ: ܘܒܸܕ ܝܵܪܬܝܼ ܠܵܗ̇. 36 ܘܙܲܪܥܵܐ ܕܪܸ̈ܓܵܘܵܬܘܼܗܝ ܒܸܕ ܝܵܪܬܝܼ ܠܵܗ̇: ܘܡܲܚܸܒܵܢܹ̈ܐ ܕܫܸܡܹܗ ܒܸܕ ܫܵܪܝܼ ܓܵܘܘܼܗ̇.

 

ܡܙܡܘܪܐ: ܥ.

ܠܪܹܫܵܐ ܕܙܵܡܵܪܹ̈ܐ. ܕܕܵܘܝܼܕ: ܠܡܲܕܟ̣ܘܼܪܹܐ.

1. ܝܵܐ ܐܲܠܵܗܵܐ: ܠܦܵܨܘܿܝܝܼ: ܝܵܐ ܡܵܪܝܵܐ ܠܗܲܝܲܪܬܝܼ: ܡܲܠܝܸܙ. 2 ܢܵܚܦܝܼ ܘܗܵܘܝܼ ܫܲܪܡܲܢܕܵܐ ܛܵܥܝܵܢܹ̈ܐ ܠܢܲܦ̮ܫܝܼ: ܕܵܝܪܝܼ ܠܵܒܵܬ̄ܪܵܐ: ܘܗܵܘܝܼ ܫܲܪܡܸܣܲܪ ܐܵܢܝܼ ܕܒܵܣܡܵܐ ܠܗ̄ܘܿܢ ܒܒܝܼܫܬܝܼ. 3 ܕܵܝܪܝܼ ܒܣܲܒܲܒ ܕܢܚܸܦܬܵܝ: ܐܵܢܝܼ ܕܟܹܐ ܐܵܡܪܝܼ: ܐܘܿܚܲܝ: ܐܘܿܚܲܝ. 4 ܚܵܕܝܼ ܘܦܵܨܚܝܼ ܒܝܼܘܼܟ ܟܠܵܝ ܛܵܥܝܵܢܹ̈ܐ ܐܸܠܘܼܟ̣: ܘܐܵܡܪܝܼ ܒܕܵܝܸܡܘܼܬܵܐ ܡܲܚܸܒܵܢܹ̈ܐ ܕܦܘܼܪܩܵܢܘܼܟ: ܗܵܘܹܐ ܓܘܼܪܵܐ ܐܲܠܵܗܵܐ. 5 ܘܐܵܢܵܐ ܡܸܣܟܹܢܵܐ ܝܘܸܢ ܘܦܲܩܝܼܪ: ܝܵܐ ܐܲܠܵܗܵܐ: ܡܲܠܝܸܙ ܐܸܠܝܼ: ܗܲܝܲܪܬܝܼ ܘܚܵܠܨܵܢܝܼ ܐܲܢ̄ܬ̇ ܝܼܘܸܬ: ܝܵܐ ܡܵܪܝܵܐ: ܠܵܐ ܥܲܪܩܸܠܸܬ.

 

ܡܙܡܘܪܐ: ܥܐ.

1. ܒܝܼܘܼܟ: ܝܵܐ ܡܵܪܝܵܐ: ܣܒܸܪܝܼ: ܠܵܐ ܢܵܚܦܸܢ ܠܥܵܠܲܡ. 2 ܒܙܲܕܝܼܩܘܼܬܘܼܟ ܦܵܨܸܬ ܠܝܼ ܘܚܵܠܨܸܬ ܠܝܼ: ܡܲܟܸܣ ܐܸܠܝܼ ܢܵܬܘܼܟ ܘܦܵܪܸܩ ܠܝܼ. 3 ܗ̄ܘܝܼ ܐܸܠܝܼ ܠܐܝܼܣܵܪܵܐ ܕܡܲܥܡܪܵܐ: ܠܐܹܘܵܪܵܐ ܒܕܵܝܸܡܘܼܬܵܐ: ܦܩܕܠܘܼܟ ܠܦܵܪܘܿܩܹܐ ܐܸܠܝܼ: ܣܲܒܲܒ ܕܩܵܝܝܼ ܘܗܲܨܵܪܝܼ ܐܲܢ̄ܬ ܝܼܘܸܬ. 4 ܐܲܠܵܗܝܼ: ܦܵܨܝܼ ܠܝܼ ܡ̣ܢ ܐܝܼܕܵܐ ܕܒܝܼܫܵܐ: ܡ̣ܢ ܟ̰̇ܢܓܵܐ ܕܥܵܘܵܠܵܐ ܘܙܵܠܝܼܡ. 5 ܣܲܒܲܒ ܐܲܢ̄ܬ ܝܼܘܸܬ ܗܹܒ̣ܝܼܝܼ: ܡܵܪܝܵܐ ܐܲܠܵܗܵܐ: ܣܲܒ̣ܪܝܼ ܡ̣ܢ ܓ̰ܘܲܢܩܘܼܬܝ. 6 ܥܲܠܘܼܟ ܣܢܸܕܠܝܼ ܡ̣ܢ ܒܲܛܢܵܐ: ܡ̣ܢ ܡܲܥܝܹ̈ܐ ܕܝܸܡܝܼ ܐܲܢ̄ܬ ܝܼܘܸܬ[63] ܡܕܲܒܪܵܢܝܼ: ܒܝܼܘܼܟ ܝܼܠܵܐ ܬܸܫܒ̇ܘܿܚܬܝܼ ܒܕܵܝܸܡܘܼܬܵܐ. 7 ܐܲܝܟ ܢܝܼܫܲܢܩܵܐ ܗ̄ܘܹܠܝܼ ܠܪܵܒܵܐ: ܘܐܲܢ̄ܬ ܣܸܬܵܪܝܼ ܙܲܪܒܵܢܵܐ ܝܘܸܬ. 8 ܒܸܕ ܦܵܝܸܫ ܡܸܠܝܵܐ ܦܘܼܡܝܼ ܬܸܫܒ̇ܘܿܚܬܘܼܟ: ܟܠܹܗ ܝܘܿܡܵܐ ܙܲܪܝܼܦܘܼܬܘܼܟ. 9 ܠܵܐ ܪܲܦܸܬ ܠܝܼ ܒܙܲܒ̣ܢܵܐ ܕܣܲܝܒܘܼܬܵܐ: ܟܲܕ ܬܵܝܸܡ ܚܲܝܠܝܼ ܠܵܐ ܫܵܒ̣ܩܸܬ ܠܝܼ. 10 ܣܲܒܲܒ ܕܐܸܡܪܘܿܢ ܕܸܫܡܸܢܝܼ̈ ܐܸܠܝܼ: ܘܢܵܛܪ̈ܵܢܹܐ ܕܢܲܦ̮ܫܝܼ ܥܒܸܕܠܘܿܢ ܪܵܐܝܝܼ[64] ܡܸܚܕܵܕܹ̈ܐ: 11 ܒܐܹܡܵܪܵܐ: ܐܲܠܵܗܵܐ ܩܲܡ ܫܵܒܸܩ ܠܹܗ: ܢܦܘܿܠܘܿܢ ܒܵܬ̄ܪܹܗ ܘܕܒ̣ܘܿܩܘܿܢ ܠܹܗ: ܣܲܒܲܒ ܕܠܲܝܬ ܦܵܨܝܵܢܵܐ. 12 ܝܵܐ ܐܲܠܵܗܵܐ: ܠܵܐ ܪܵܚܩܸܬ ܡܸܢܝܼ: ܐܲܠܗܝܼ: ܠܗܲܝܲܪܬܝܼ ܡܲܠܝܸܙ. 13 ܢܵܚܦܝܼ: ܬܵܝܡܝܼ ܥܵܒ̣ܕܵܢܹ̈ܐ ܕܕܲܪܩܘܼܒ̣ܠܘܼܬܵܐ ܠܢܲܦ̮ܫܝܼ: ܩܵܛܘܝܼ ܠܵܘܡܵܐ ܘܫܲܪܡܸܣܲܪܘܼܬܵܐ ܛܵܥܝܵܢܹ̈ܐ ܠܒ̇ܝܼܫܬܝܼ. 14 ܘܐܵܢܵܐ ܒܕܵܝܸܡܘܼܬܵܐ ܒܸܕ ܣܵܦܪܸܢ: ܘܡܲܙܝܸܕܸܢ ܥܲܠ ܟܠܵܗ̇ ܬܸܫܒ̇ܘܿܚܬܘܼܟ. 15 ܦܘܼܡܝܼ ܒܸܕ ܗܵܩܹܐ ܙܲܕܝܼܩܘܼܬܘܼܟ: ܟܠܹܗ ܝܘܿܡܵܐ ܦܘܼܪܩܵܢܘܼܟ: ܣܲܒܲܒ ܕܠܵܐ ܝܕܸܥܠܝܼ ܚܸܫܒܘܼܢܹ̈ܐ. 16 ܒܸܕ ܐܵܘܪܸܢ ܒܓܲܢ̄ܒܵܪ̈ܘܼܝܵܬܹܐ ܕܡܵܪܝܵܐ ܐܲܠܵܗܵܐ: ܒܸܕ ܡܲܕܟܸܪܸܢ ܙܲܕܝܼܩܘܼܬܘܼܟ: ܒܢܲܦ̮ܫܘܼܟ̣. 17 ܝܵܐ ܐܲܠܵܗܵܐ: ܩܲܡ ܡܵܠܦܸܬ ܠܝܼ ܡ̣ܢ ܝܵܠܘܼܬܝܼ: ܘܗܲܠ ܠܲܐܟ̣ܵܐ ܡܘܼܕܸܥܠܝܼ ܥܵܓ̰ܸܒܘܼܝܵܬܘܼ̈ܟ. 18 ܘܐܘܼܦ ܗܲܠ ܚܘܵܪܕܸܩܢܘܼܬܵܐ ܘܣܲܝܒܘܼܬܵܐ: ܐܲܠܵܗܵܐ: ܠܵܐ ܫܵܒ̣ܩܸܬ ܠܝܼ: ܗܲܠ ܕܡܲܕܥܸܢ ܕܪܲܥܢܘܼܟ ܠܕܵܘܪܵܐ: ܠܟܠ ܕܐܵܬܹܐ ܓܲܢ̄ܒܵܪܘܼܬܘܼܟ: 19 ܘܙܲܕܝܼܩܘܼܬܘܼܟ̣: ܐܲܠܵܗܵܐ: ܗܲܠ ܡܪܵܘܡܵܐ: ܐܲܢ̄ܬ ܕܥܒܸܕܠܘܼܟ ܫܘܼܠܹ̈ܐ ܠܘܼܪܹ̈ܐ: ܐܲܠܵܗܵܐ: ܡܵܢܝ ܝܠܹܐ ܐܲܝܟ ܕܝܼܘܼܟ: 20 ܐܲܢ̄ܬ ܕܩܲܡ ܡܲܚܙܸܬ[65] ܠܝܼ ܥܹܩܘܼܘܹ̈ܐ ܠܘܼܪܹ̈ܐ ܘܒܝܼܫܹ̈ܐ: ܒܸܕ ܕܵܝܪܸܬ ܡܲܚܸܬ [66] ܠܝܼ: ܘܡ̣ܢ ܥܘܼܡܩܹ̈ܐ ܕܐܲܪܥܵܐ ܒܸܕ ܕܵܝܪܸܬ ܡܵܐܣܩܸܬ [67] ܠܝܼ 21 ܡܲܙܝܸܕܸܬ ܓܘܼܪܘܼܬܝܼ: ܘܕܵܝܪܸܬ ܝܵܗ̄ܒܸܕ ܠܝܼ ܠܸܒܵܐ. 22 ܐܘܼܦ ܐܵܢܵܐ ܒܸܕ ܫܵܟܪܸܢܘܼܟ ܒܐܲܣܒܵܒܹ̈ܐ ܕܩܝܼܬܵܪܵܐ: ܠܣܲܪܲܣܬܘܼܬܘܼܟ: ܝܵܐ ܐܲܠܵܗܝܼ. ܒܸܕ ܙܵܡܪܸܢ ܐܸܠܘܼܟ ܒܟܸܢܵܪܵܐ: ܝܵܐ ܩܲܕܝܼܫܵܐ ܕܝܼܣܪܵܝܹܠ. 23 ܒܸܕ ܫܵܒܚܝܼ ܣܸܦܘܵܬܝܼ̈ ܟܲܕ ܙܵܡܪܸܢ ܐܸܠܘܼܟ: ܘܢܲܦ̮ܫܝܼ ܕܦܘܼܪܸܩܠܘܼܟ. 24 ܐܘܼܦ ܠܸܫܵܢܝܼ ܟܠܹܗ ܝܘܿܡܵܐ ܒܸܕ ܗܲܡܙܸܡ ܙܲܕܝܼܩܘܼܬܘܼܟ: ܣܲܒܲܒ ܕܢܚܸܦܠܘܿܢ: ܣܲܒܲܒ ܕܦܸܫܠܘܿܢ ܫܲܪܡܲܢܕܵܐ ܛܵܥܝܵܢܹ̈ܐ ܠܒ̇ܝܼܫܬܝܼ.

 

ܡܙܡܘܪܐ: ܥܒ.

ܠܫܠܝܡܘܢ.

1. ܝܵܐ ܐܲܠܵܗܵܐ: ܕܝܘܵܢܘܼܟ ܠܡܲܠܟܵܐ ܗܲܒ̄ܠ: ܘܙܲܕܝܼܩܘܼܬܘܼܟ ܠܒܪܘܼܢܹܗ ܕܡܲܠܟܵܐ. 2 ܒܸܕ ܕܵܝܸܢ ܛܵܝܸܦܘܼܟ ܒܙܲܕܝܼܩܘܼܬܵܐ: ܘܡܸܣܟܹܢܘܼ̈ܟ ܒܕܝܼܘܵܢ. 3 ܒܸܕ ܛܵܥܢܝܼ ܛܘܼܪܹ̈ܐ ܫܠܵܡܵܐ ܠܛܵܝܸܦܵܐ: ܘܪ̈ܘܼܡܝܵܬܹܐ ܒܙܲܕܝܼܩܘܼܬܵܐ. 4 ܒܸܕ ܕܵܝܸܢ ܡܸܣܟܹܢܹ̈ܐ ܕܛܵܝܸܦܵܐ: ܒܸܕ ܦܵܪܸܩ ܠܒܢܘܼܢܹ̈ܐ ܕܦܲܩܝܼܪ: ܘܒܸܕ ܒܵܠܸܣ ܠܙܵܠܝܼܡ. 5 ܒܸܕ ܙܵܕܥܝܼ ܡܸܢܘܼܟ ܥܲܡ ܫܸܡܫܵܐ: ܘ ܩܵܕ̄ܡ ܣܲܗܪܵܐ: ܕܵܘܪܵܐ ܕܕܵܘܪܹ̈ܐ. 6 ܒܸܕ ܨܵܠܹܐ ܐܲܝܟ ܡܸܛܪܵܐ ܥܲܠ (ܫܵܘܦܵܐ ܕ) ܓܸܠܵܐ ܚܨܝܼܕܵܐ: ܐܲܝܟ ܩܲܫܩܲܫܝܵܬܹ̈ܐ: ܫܦܵܟ̣ܬܵܐ (ܥܲܠ) ܐܲܪܥܵܐ. 7 ܒܸܕ ܡܲܓ̰ܝܸܢ ܒܝܘܿܡܵܢܘܼ̈ܗܝ ܙܲܕܝܼܩܵܐ: ܘܒܘܼܫܵܝܝܼ ܕܫܠܵܡܵܐ: ܗܲܠ ܕܠܲܝܬ ܣܲܗܪܵܐ. 8 ܘܒܸܕ ܗܵܟܸܡ ܡ̣ܢ ܝܵܡܵܐ ܗܲܠ ܝܵܡܵܐ: ܘܡ̣ܢ ܢܲܗܪܵܐ ܗܲܠ ܡܲܪ̈ܙܵܢܹܐ ܕܐܲܪܥܵܐ. 9 ܩܵܕ̄ܡܘܼܗܝ ܒܸܕ ܟܵܝܦܝܼ ܥܵܡܪ̈ܵܢܹܐ ܕܒܲܪܝܼܵܐ: ܘܕܸܫܡܸܢܘܼ̈ܗܝ ܥܲܦܪܵܐ ܒܸܕ ܠܵܟܚܝܼ. 10 ܡܲܠܟܹ̈ܐ ܕܬܲܪܫܝܼܫ ܘܕܓܵܙܪܵܬܹܐ ܦܲܫܟܵܫ ܒܸܕ ܡܲܕܸܪܝܼ: ܡܲܠܟܹ̈ܐ ܕܫܒ̣ܵܐ ܘܕܣܵܒ̣ܵܐ ܕܝܼܵܪܝܼ ܒܸܕ ܡܲܩܪܸܒ̣ܝܼ. 11 ܘܒܸܕ ܡܲܟܸܦܝܼ ܪܹܫܵܐ ܐܸܠܹܗ ܟܠܵܝ ܡܲܠܟܹ̈ܐ: ܟܠܵܝ ܛܵܝܸܦܹ̈ܐ ܒܸܕ ܦܵܠܚܝܼ ܠܹܗ. 12 ܣܲܒܲܒ ܕܒܸܕ ܦܵܨܹܐ ܦܲܩܝܼܪ ܕܥܵܒܸܕ ܗܵܘܵܪ: ܘܡܸܣܟܹܢܵܐ: ܘܕܠܲܝܬ ܗܲܝܸܪܵܢܵܐ ܐܸܠܹܗ. 13 ܒܸܕ ܥܵܒܸܕ ܪܲܚܡܹܐ ܥܲܠ ܡܸܣܟܹܢܵܐ ܘܦܲܩܝܼܪ: ܘܓܵܢܵܬܹ̈ܐ ܕܦܲܩܝܼܪܹ̈ܐ ܒܸܕ ܦܵܪܸܩ. 14 ܡ̣ܢ ܙܠܘܼܡܝܵܐ ܘܡ̣ܢ ܢܵܐܗܲܩ ܒܸܕ ܦܵܪܸܩ ܓܵܢܵܝ: ܘܒܸܕ ܗܵܘܹܐ ܡܵܪܹܐ ܛܝܼܡܵܐ ܕܸܡܵܝ ܒܥܲܝܢܘܼ̈ܗܝ: 15 ܘܒܸܕ ܚܲܝܹܐ: ܘܒܸܕ ܝܵܗ̄ܒܸܠ ܐܸܠܹܗ ܡ̣ܢ ܕܲܗܒ̣ܵܐ ܕܫܒ̣ܵܐ: ܘܒܸܕ ܨܵܠܹܐ ܒܘܼܬ ܕܝܹܗ ܒܕܵܝܸܡܘܼܬܵܐ: ܟܠܹܗ ܝܘܿܡܵܐ ܒܸܕ ܒܵܪܸܟ ܠܹܗ. 16 ܒܸܕ ܗܵܘܝܵܐ ܒܘܼܫܵܝܝܼ ܕܕܲܚܠܵܐ ܒܐܲܪܥܵܐ ܒܪܹܫܵܐ ܕܛܘܼܪ̈ܵܢܹܐ: ܒܸܕ ܫܵܥܫܵܐ ܐܲܝܟ ܠܸܒ̣ܢܵܢ ܛܥܘܼܢܬܘܼܗܝ: ܘܒܸܕ ܦܵܩܚܝܼ ܡ̣ܢ ܡܕܝܼܢ̄ܬܵܐ ܐܲܝܟ ܓܸܠܵܐ ܕܐܲܪܥܵܐ. 17 ܒܸܕ ܗܵܘܹܐ ܫܸܡܹܗ ܠܥܵܠܲܡ: ܩܵܕ̄ܡ ܫܸܡܫܵܐ ܒܸܕ ܡܲܓ̰ܝܸܢ ܫܸܡܹܗ: ܘܒܸܕ ܦܵܝܫܝܼ ܒܘܼܪܟܹܐ ܒܝܹܗ: ܟܠܵܝ ܛܵܝܸܦܹ̈ܐ ܒܸܕ ܝܵܗܒ̣ܝܼ ܠܹܗ ܛܘܼܒ̣ܵܐ. 18 ܒܪܝܼܟ̣ܵܐ ܝܠܹܐ ܡܵܪܝܵܐ ܐܲܠܵܗܵܐ: ܐܲܠܵܗܵܐ ܕܝܼܣܪܵܝܹܠ: ܥܵܒ̣ܕܵܢܵܐ ܕܥܵܓ̰ܸܒܘܼܝܵܬܹ̈ܐ ܒܢܲܦ̮ܫܹܗ. 19 ܘܒܪܝܼܟ̣ܵܐ ܝܠܹܐ ܫܸܡܵܐ ܕܐܝܼܩܵܪܹܗ ܠܥܵܠܲܡ: ܘܦܵܝܫܵܐ ܡܠܝܼܬܵܐ ܟܠܵܗ̇ ܐܲܪܥܵܐ ܐܝܼܩܵܪܹܗ: ܐܵܡܹܝܢ: ܘܐܵܡܹܝܢ.

20 ܬܸܡܠܘܿܢ ܨܠܵܘܵܬܹ̈ܐ ܕܕܵܘܝܼܕ ܒܪܘܼܢܵܐ ܕܐܝܼܫܲܝ.

ܣܦܪܐ ܕܬܠܬ̄ܐ.

 

ܡܙܡܘܪܐ: ܥܓ.

ܡܲܙܡܘܿܪܵܐ ܕܐܵܣܵܦ.

1. ܡܸܓ̰ܸܕ ܛܵܒ̣ܵܐ ܝܠܹܐ ܠܝܼܣܪܵܝܹܠ ܐܲܠܵܗܵܐ: ܠܕܸܟ̣ܝܹ̈ܐ ܕܠܸܒܵܐ. 2 ܘܐܵܢܵܐ: ܚܲܟ̰ܵܐ ܦܸܫܠܵܐ ܕܩܠܸܒ̇ܠܘܿܢ ܐܲܩܠܵܬܝܼ̈: ܚܲܟ̰ܵܐ ܦܸܫܠܵܐ ܕܫܦܸܟ̣ܠܘܿܢ ܦܵܣܘܿܥܝܵܬܝܼ̈. 3 ܣܲܒܲܒ ܕܒܘܼܚܸܠܝܼ ܒܚܬܝܼܪܹ̈ܐ: ܫܠܵܡܵܐ ܕܒܝܼܫܹ̈ܐ ܚܙܹܠܝܼ. 4 ܣܲܒܲܒ ܠܲܝܬ ܚܸܒ̣ܠܹ̈ܐ ܠܡܵܘܬܵܝ: ܘܛܪܝܼܨܵܐ ܝܠܹܐ ܚܲܝܠܵܝ. 5 ܒܓ̰ܵܦܵܐ ܕܐܢܵܫܹ̈ܐ ܠܹܐ ܝܢܵܐ ܐܵܢܝܼ: ܘܥܲܡ ܒܲܪܢܵܫܵܐ ܠܹܐ ܦܵܝܫܝܼ ܡܸܚܹܐ ܒܩܲܙܵܒ. ܒܘܼܬ ܕܐܵܗܵܐ: ܗ̄ܘܹܠܹܐ ܬܵܘܩܵܐ ܐܸܠܵܝ ܫܘܼܒ̣ܗܵܪܵܐ: ܟܹܐ ܟܵܣܹܐ ܠܗ̄ܘܿܢ ܓ̰ܘܼܠܵܐ ܕܢܵܐܗܲܩ. 7 ܟܹܐ ܦܵܠܛܵܐ ܡ̣ܢ ܬܲܪܒܵܐ ܥܲܝܢܵܝ: ܥܒܸܪܘܿܢ ܦܸܟܝܼܪܹ̈ܐ ܕܠܸܒܵܐ. 8 ܟܹܐ ܡܲܣܚܸܪܝܼ: ܘܟܹܐ ܗܲܡܙܸܡܝܼ ܒܒܝܼܫܬܵܐ ܙܠܘܼܡܝܵܐ: ܡ̣ܢ ܪܵܡܘܼܬܵܐ ܟܹܐ ܗܲܡܙܸܡܝܼ. 9 ܟܹܐ ܡܲܬܒ̣ܝܼ ܒܫܡܲܝܵܐ ܦܘܼܡܵܝ: ܘܠܸܫܵܢܵܝ ܟܹܐ ܚܵܕܸܪ ܒܐܲܪܥܵܐ. 10 ܒܘܼܬ ܕܐܵܗܵܐ: ܒܸܕ ܕܵܝܸܧ ܛܵܝܸܦܹܗ ܠܐܲܟ̣ܵܐ: ܘܡ̈ܝܼܵܐ ( ܕܟܵܣܵܐ) ܡܸܠܝܵܐ ܒܸܕ ܦܵܝܫܝܼ ܠܡܝܼܨܹܐ ܡܸܢܵܝ. 11 ܘܟܹܐ ܐܵܡܪܝܼ: ܕܐܵܟ̣ܝܼ ܟܹܐ ܝܲܕܸܥ ܐܲܠܵܗܵܐ. ܘܐܝܼܬ ܝܕܸܥܬܵܐ ܒܥܸܠܵܝܵܐ: 12 ܗܵܐ: ܐܲܢܹܐ ܝܢܵܐ ܒܝܼܫܹ̈ܐ: ܘܐܲܡܝܼܢܵܝܝܼ ܕܥܵܠܲܡ: ܟܹܐ ܡܲܙܝܸܕܝܼ ܡܵܐܠ. 13 ܗܲܪ ܗܵܒܵܣ ܕܘܼܟܹܠܝܼ ܠܸܒܝܼ: ܘܚܘܼܠܸܠܝܼ ܒܚܵܠܸܨܘܼܬܵܐ ܐܝܼܕܵܬܝܼ̈: 14 ܘܗ̄ܘܹܠܝܼ ܡܸܚܝܵܐ ܒܩܲܙܵܒ ܟܠܹܗ ܝܘܿܡܵܐ: ܘܡܲܢܟܲܣܬܝܼ ܠܡܵܘܪܹ̈ܫܵܢܹܐ. 15 ܐܸܢ ܐܡܸܪܝܼ: ܒܸܕ ܗܵܩܸܢ ܗܲܕܟ̣ܵܐ: ܗܵܐ: ܠܕܵܘܪܵܐ ܕܒܢܘܼܢܘܼ̈ܟ ܒܸܕ ܥܵܒ̣ܕܸܢ ܗ̄ܘ̣ܵܐ ܚܵܝܸܢܘܼܬܵܐ. 16 ܘܚܫܸܒ̣ܠܝܼ ܠܝܼܪܸܥܝܵܐ ܐܵܗܵܐ: ܓ̰ܵܦܵܐ ܗ̄ܘ̣ܵܐ ܒܥܲܝܢܝܼ̈: 17 ܗܲܠ ܕܐܘܸܪܝܼ ܠܡܲܩܕܫܵܐ ܕܐܲܠܵܗܵܐ: ܦܘܼܪܡܹܠܝܼ ܠܚܲܪܬܵܝ. 18 ܗܲܪ ܒܓ̰ܪ̈ܵܛܝܵܬܹܐ ܟܹܐ ܡܲܬܒܸܕ ܠܗ̄ܘܿܢ: ܟܹܐ ܡܲܢܦܸܠܸܬ ܠܗ̄ܘܿܢ ܠܚܵܪܒܝܹܐ. 19 ܕܵܐܟ̣ܝܼ ܗ̄ܘܹܠܘܿܢ ܠܘܲܝܪܵܢ ܐܲܝܟ ܬܲܪܦܲܬܬܵܐ: ܦܢܸܠܘܿܢ: ܬܸܡܠܘܿܢ ܡ̣ܢ ܒܲܠܹ̈ܐ. 20 ܐܲܝܟ ܚܸܠܡܵܐ ܡܒܵܬ̄ܪ ܪܥܝܵܫܬܵܐ: ܝܵܐ ܡܵܪܝܵܐ: ܒܚܸܡܬܵܐ ܨܲܠܡܵܝ ܡܲܣܠܸܬ. 21 ܣܲܒܲܒ ܕܦܸܫܠܹܐ ܫܓ̣ܝܼܫܵܐ ܠܸܒܝܼ: ܘܟܘܼܠܝܵܬܝܼ̈ ܦܸܫܠܘܿܢ ܟ̰ܪܝܼܙܹܐ. 22 ܘܐܵܢܵܐ ܐܲܗܡܲܩ ܝܼܘܸܢ ܗ̄ܘ̣ܵܐ ܘܠܵܐ ܝܕܸܥܠܝܼ: ܗܲܝܘܵܢ ܗ̄ܘܹܠܝܼ ܠܟܸܣܠܘܼܟ. 23 ܘܐܵܢܵܐ ܒܕܵܝܸܡܘܼܬܵܐ ܥܲܡܘܼܟ ܝܼܘܸܢ: ܕܒܸܩܠܘܼܟ ܒܐܝܼܕܵܐ ܕܝܲܡܝܼܢܝܼ. 24 ܒܪܵܐܝܘܼܟ ܒܸܕ ܬܲܓܒܸܪܸܬ ܠܝܼ: ܘܒܵܬ̄ܪ ܗܵܕܵܐ ܒܐܝܼܩܵܪܵܐ ܩܵܒ̇ܠܸܬ ܠܝܼ. 25 ܡܲܢܝܼ ܐܝܼܬ ܠܝܼ ܒܫܡܲܝܵܐ: [68] ܘܥܲܡܘܼܟ: ܠܹܐ ܒܵܣܡܵܐ ܠܝܼ ܒܐܲܪܥܵܐ. 26 ܬܸܡܠܹܐ ܒܸܣܪܝܼ ܘܠܸܒܝܼ: ܐܝܼܣܵܪܵܐ ܕܠܸܒܝܼ ܘܣܵܡܝܼ ܐܲܠܵܗܵܐ ܝܠܹܐ ܠܥܵܠܲܡ. 27 ܣܲܒܲܒ ܕܗܵܐ: ܐܵܢܝܼ ܕܝܼܢܵܐ ܪܸܚܩܵܐ ܡܸܢܘܼܟ ܒܸܕ ܬܵܠܩܝܼ: ܦܘܼܢܸܠܘܼܟ ܟܠ ܙܲܢܵܝܵܐ ܡ̣ܢ ܠܟܸܣܠܘܼܟ. 28 ܘܐܵܢܵܐ: ܩܲܪܒܲܢܬܵܐ ܠܐܲܠܵܗܵܐ ܩܵܬܝܼ ܨܦܵܝܝܼ ܝܠܵܐ: ܡܘܼܬܸܒ̣ܠܝܼ ܒܡܵܪܝܵܐ ܐܲܠܵܗܵܐ ܒܹܝܬ ܓܵܘܣܝܼ: ܠܗܵܩܘܿܝܹܐ ܟܠܵܝ ܦܘܼܠܚܵܢܘܼ̈ܟ.

 

ܡܙܡܘܪܐ: ܥܕ.

ܡܲܣܟ̇ܝܼܠ ܕܐܵܣܵܦ.

1. ܩܵܡܘܿܕܝܼ: ܐܲܠܵܗܵܐ: ܟ̰ܘܼܡܟ̰ܸܡܠܘܼܟ ܠܐܵܒܵܕ: ܬܲܢܬܘܼܢܹܐ ܝܠܵܐ ܚܸܡܬܘܼܟ ܥܲܠ ܥܸܪ̈ܒܹܐ ܕܡܲܪܥܝܼܬܘܼܟ: 2 ܕܟ̣ܘܿܪ ܓ̰ܵܡܵܥܲܬܘܼܟ ܕܙܒܸܢܘܼܟ ܡ̣ܢ ܩܵܕ̄ܡܵܝܬܵܐ: ܦܘܼܪܸܩܠܘܼܟ ܩܵܛܝܼܵܐ ܕܝܵܪܬܘܼܬܘܼܟ: ܛܘܼܪܵܐ ܕܨܸܗܝܘܿܢ ܐܵܗܵܐ ܕܫܪܹܠܘܼܟ ܓܵܘܘܼܗܝ. 3 ܡܵܪܸܡ ܦܵܣܘܿܥܝܵܬܘܼ̈ܟ ܠܚܵܪ̈ܒ̣ܝܹܐ ܕܐܵܒܵܕ: ܟܠ ܒܝܼܫܬܵܐ ܕܥܒܸܕܠܹܐ ܕܸܫܡܸܢ ܒܡܲܩܕܫܵܐ. 4 ܓܘܼܪܓܸܡܠܘܿܢ ܕܸܫܡܸܢܘܼ̈ܟ ܒܓܵܘܵܐ ܕܓ̰ܵܡܵܥܲܬܘܼܟ: ܡܘܼܬܸܒ̣ܠܘܿܢ ܢܝܼܫܲܢܩܵܝ̈ ܢܝܼܫܲܢܩܹ̈ܐ. 5 [69] ܦܝܵܫܵܐ ܝܠܹܐ ܝܕܸܥܝܵܐ ܐܲܝܟ ܡܵܪܡܵܢܵܐ ܕܥܲܪ̈ܥܹܐ ܒܥܵܡܘܿܪܘܼܬܵܐ ܕܐܝܼܠܵܢܹ̈ܐ. 6 ܘܐܵܕܝܼܵܐ ܩܝܵܪ̈ܬܘܼܗ̇[70] ܡܸܚܕܵܕܹ̈ܐ ܒܢܲܪܥܵܐ ܘܩܵܙܡܹ̈ܐ ܟܹܐ ܦܲܪܦܸܣܝܼ. 7 ܕܪܸܠܘܿܢ ܒܢܘܼܪܵܐ ܡܲܩܕܫܘܼܟ: ܗܲܠ ܐܲܪܥܵܐ ܫܚܸܡܠܘܿܢ ܡܵܫܸܟܢܵܐ ܕܫܸܡܘܼܟ. 8 ܐܡܸܪܘܿܢ ܒܠܸܒܵܝ: ܬܵܠܩܵܚ ܠܗ̄ܘܿܢ[71] ܡܸܚܕܵܕܹ̈ܐ: ܡܘܼܩܸܕܠܘܿܢ ܟܠܵܝ ܓ̰ܵܡܵܥܲܬܹ̈ܐ ܕܐܲܠܵܗܵܐ ܒܐܲܪܥܵܐ. 9 ܢܝܼܫܲܢ̈ܩܲܢ ܠܵܐ ܚܙܹܠܲܢ: ܠܲܝܬ ܡܸܕܪܹܐ ܢܒ̣ܝܼܵܐ: ܘܠܲܝܬ ܥܲܡܲܢ ܕܝܲܕܸܥ ܗܲܠ ܐܝܼܡܲܢ. 10 ܗܲܠ ܐܝܼܡܲܢ: ܐܲܠܵܗܵܐ: ܠܵܝܸܡ ܡܲܠܝܸܨܵܢܵܐ: ܡܲܣܚܸܪ ܕܸܫܡܸܢ ܒܫܸܡܘܼܟ ܠܐܵܒܵܕ: 11 ܩܵܡܘܿܕܝܼ ܡܲܕܘܼܪܹܐ ܝܘܸܬ ܐܝܼܕܘܼܟ ܘܝܲܡܝܼܢܘܼܟ: ܡ̣ܢ ܓܵܘ ܥܘܼܒܘܼܟ ( ܦܵܠܸܛ ܠܵܗ): ܬܲܡܸܡ. 12 ܘܐܲܠܵܗܵܐ ܡܲܠܟܝܼ ܝܠܹܐ ܡ̣ܢ ܩܵܕܝܼܡܝܼ: ܦܵܠܚܵܢܵܐ ܕܦܘܼܪ̈ܩܵܢܹܐ ܒܓܵܘܵܐ ܕܐܲܪܥܵܐ. 13 ܐܲܢ̄ܬ ܬܪܸܥܠܘܼܟ ܒܙܲܪܒܘܼܟ ܝܵܡܵܐ: ܬܒܸܪܘܼܟ ܪܹ̈ܫܵܢܹܐ ܕܬܵܢܝܼܢܹ̈ܐ ܓܵܘ ܡ̈ܝܼܵܐ. 14 ܐܲܢ̄ܬ ܒܠܸܣܠܘܼܟ ܪܹ̈ܫܵܢܹܐ ܕܠܹܘܵܝܵܬܵܢ: ܒܸܕ ܝܵܗ̄ܒܸܕ ܠܹܗ ܡܹܐܟ̣ܘܼܠܬܵܐ ܠܛܵܝܸܦܵܐ: ܠܥܵܡܪ̈ܵܢܹܐ ܕܒܲܪܝܼܵܐ. 15 ܐܲܢ̄ܬ ܡܘܼܦܩܸܥܠܘܼܟ ܥܲܝܢܵܐ ܘܪܵܘܘܿܠܵܐ: ܐܲܢ̄ܬ ܡܘܼܒܪܸܙܠܘܼܟ ܢܲܗܪ̈ܵܘܵܬܹܐ ܙܲܪ̈ܒܵܢܹܐ. 16 ܕܝܼܘܼܟ ܝܼܠܹܐ ܝܘܿܡܵܐ: ܐܘܼܦ ܕܝܼܘܼܟ ܝܼܠܹܐ ܠܲܝܠܹܐ: ܐܲܢ̄ܬ ܗܘܼܕܸܪܘܼܟ ܒܲܗܪܵܐ ܘܫܸܡܫܵܐ. 17 ܐܲܢ̄ܬ ܡܘܼܬܸܒ̣ܠܘܼܟ ܟܠܷܵ ܬܸܚܘܼܒܹ̈ܐ ܕܐܲܪܥܵܐ: ܩܲܝܛܵܐ ܘܣܸܬܘܵܐ ܐܲܢ̄ܬ ܬܘܼܪܨܵܝܠܘܼܟ. 18 ܕܟ̣ܘܿܪ ܐܵܗܵܐ: ܕܕܸܫܡܸܢ ܠܸܡܠܹܐ: ܝܵܐ ܡܵܪܝܵܐ: ܘܛܵܝܸܦܵܐ ܫܹܐܕܵܢܵܐ ܡܘܼܣܚܸܪܘܿܢ ܒܫܸܡܘܼܟ. 19 ܠܵܐ ܝܵܗ̄ܒܸܕ ܠܚܲܝܘܬܵܐ ܓܵܢܵܐ ܕܓܘܼܪܓܘܼܡܘܼܟ: ܚܲܝܹ̈ܐ ܕܡܸܣܟܹܢܘܼ̈ܟ ܠܵܐ ܢܵܫܸܬ ܠܐܵܒܵܕ. 20 ܚܘܼܪ ܠܩܵܘܠܵܐ: ܣܲܒܲܒ ܕܡܠܹܠܘܿܢ ܕܘܼܟܵܢܹ̈ܐ ܚܘܼܒ̣ܝܵܢܹ̈ܐ ܕܐܲܪܥܵܐ ܡܲܣܟܵܢܹ̈ܐ ܕܢܵܐܗܲܩ. 21 ܠܵܐ ܕܵܝܸܪ ܡܘܼܠܝܸܨܵܐ ܢܚܝܼܦܵܐ: ܡܸܣܟܹܢܵܐ ܘܦܲܩܝܼܪ ܫܵܒܚܝܼ ܠܫܸܡܘܼܟ. 22 ܩܘܼܡ̄: ܝܵܐ ܐܲܠܵܗܵܐ: ܕܘܼܢ ܕܲܥܘܝܼܘܼܟ: ܕܟ̣ܘܿܪ ܠܵܘܡܘܼܟ ܡ̣ܢ ܫܹܐܕܵܢܵܐ ܟܠܹܗ ܝܘܿܡܵܐ. 23 ܠܵܐ ܢܵܫܸܬ ܩܵܠܵܐ ܕܕܸܫܡܸܢܘܼ̈ܟ: ܫܓ̣ܘܼܫܝܵܐ ܕܩܵܝܡܵܢܹ̈ܐ ܠܕܲܪܩܘܼܒ̣ܠܘܼܟ ܒܹܐܣܵܩܵܐ ܒܕܵܝܸܡܘܼܬܵܐ.

 

 

ܡܙܡܘܪܐ: ܥܗ.

ܠܪܹܫܵܐ ܕܙܵܡܵܪܹ̈ܐ: ܐܲܠܬܲܫܚܸܬ. ܡܲܙܡܘܪܵܐ ܕܐܵܣܵܦ: ܙܡܵܪܬܵܐ.

1. ܫܵܟܘܿܪܹܐ ܝܘܵܚ ܐܸܠܘܼܟ: ܐܲܠܵܗܵܐ: ܫܵܟܘܿܪܹܐ ܝܘܵܚ: ܘܩܘܼܪܒܵܐ ܝܠܹܐ ܫܸܡܘܼܟ: ܗܘܼܩܹܠܘܿܢ ܥܵܓ̰ܸܒܘܼܝܵܬܘܼ̈ܟ. 2 ܟܲܕ ܫܵܩܠܸܢ ܘܲܥܕܵܐ: ܐܵܢܵܐ ܒܬܪܘܼܨܘܼܬܵܐ ܒܸܕ ܕܵܝܸܢܢ. 3 ܦܫܝܼܪܹܐ ܝܢܵܐ ܐܲܪܥܵܐ ܘܟܠܵܝ ܥܵܡܪ̈ܵܢܘܼܗ̇: ܐܵܢܵܐ ܡܘܼܩܸܡܠܝܼ ܣܛܘܼܢܘܼ̈ܗ̇. 4 ܐܡܸܪܝܼ ܠܚܬܝܼܪܹ̈ܐ: ܠܵܐ ܚܵܬܪܝܼܬܘܿܢ: ܘܠܒ̇ܝܼܫܹ̈ܐ: ܠܵܐ ܡܵܪܡܝܼܬܘܿܢ ܩܵܪ̄ܢܵܐ: 5 ܠܵܐ ܡܵܪܡܝܼܬܘܿܢ ܠܡܪܵܘܡܵܐ ܩܵܪ̄ܢܵܘܟ̣ܘܿܢ: ܗܲܡܙܸܡܝܼܬܘܿܢ ܒܩܕܵܠܵܐ ܩܸܫܝܵܐ. 6 ܣܲܒܲܒ ܠܵܐ ܡ̣ܢ ܡܲܕܢܚܵܐ: ܠܵܐ ܡ̣ܢ ܡܲܥܪܒ̣ܵܐ: ܘܠܵܐ ܡ̣ܢ ܒܲܪܝܼܵܐ[72] ܡܪܲܡܬܵܐ. 7 ܐܸܠܵܐ ܐܲܠܵܗܵܐ ܕܲܝܵܢܵܐ ܝܠܹܐ: ܐܵܗܵܐ ܟܹܐ ܡܲܟܸܦ: ܘܐܵܗܵܐ ܟܹܐ ܡܵܪܸܡ. 8 ܣܲܒܲܒ ܕܟܵܣܵܐ ܐܝܼܬ ܒܐܝܼܕܵܐ ܕܡܵܪܝܵܐ: ܘܚܲܡܪܵܐ [73] ܡܲܣܡܘܼܩܹܐ ܝܠܹܐ: ܡܸܠܝܵܐ ܝܠܹܐ ܡܙܵܓ̣ܬܵܐ: ܘܟܹܐ ܕܵܪܹܐ ܡ̣ܢ ܕܐܵܗܵܐ: ܡܸܓ̰ܸܕ ܕܘܼܪܕܘܼܗ̇ ܒܸܕ ܠܵܡܨܝܼ: ܒܸܕ ܫܵܬܝܼ: ܟܠܵܝ ܒܝܼܫܹ̈ܐ ܕܐܲܪܥܵܐ. 9 ܘܐܵܢܵܐ ܒܸܕ ܡܲܕܥܸܢ ܠܥܵܠܲܡ: ܒܸܕ ܙܵܡܪܸܢ ܠܐܲܠܵܗܵܐ ܕܝܲܥܩܘܿܒ̣. 10 ܘܟܠܵܝ ܩܵܪ̄ܢܵܢܹܐ ܕܒܝܼܫܹ̈ܐ ܒܸܕ ܩܲܛܥܸܢ: ܒܸܕ ܦܵܝܫܝܼ ܡܘܼܪܡܹܐ ܩܵܪ̄ܢܵܢܹܐ ܕܙܲܕܝܼܩܵܐ.

 

ܡܙܡܘܪܐ: ܥܘ.

ܠܪܹܫܵܐ ܕܙܵܡܵܪܹ̈ܐ: ܒܢܓܝܼܢܘܿܬ. ܡܲܙܡܘܿܪܵܐ ܕܐܵܣܵܦ: ܙܡܵܪܬܵܐ:

1. ܦܸܫܠܹܐ ܝܕܸܥܝܵܐ ܒܝܼܗܘܼܕܵܐ ܐܲܠܵܗܵܐ: ܒܝܼܣܪܵܝܹܠ ܓܘܼܪܵܐ ܝܠܹܐ ܫܸܡܹܗ. 2 ܘܗ̄ܘܹܠܵܐ ܒܫܵܠܝܼܡ ܘܛܲܠܠܘܼܗܝ: ܘܒܹܝܬ ܡܲܥܡܪܘܼܗܝ ܒܨܸܗܝܘܿܢ. 3 ܬܵܡܵܐ ܬܒܸܪܹܐ ܓܹܐܪܹ̈ܐ ܡܲܒܪܸ̈ܩܵܢܹܐ ܕܩܸܫܬܵܐ: ܡܵܛܵܠܵܐ: ܘܣܲܝܦܵܐ: ܘܦܠܵܫܵܐ. 4 ܫܲܦ̮ܩܵܢܵܐ ܝܘܸܬ ܐܲܢܬ: ܙܲܪܝܼܦ ܡ̣ܢ ܛܘܼܪܹ̈ܐ ܕܦܪܵܛܵܐ. 5 ܦܸܫܠܘܿܢ ܣܠܝܼܒܹܐ ܙܲܪ̈ܒܵܢܹܐ ܕܠܸܒܵܐ: ܢܸܡܠܘܿܢ ܫܸܢܬܵܝ: ܘܠܵܐ ܡܘܼܫ̄ܟ̰ܸܚܠܘܿܢ ܟܠܵܝ ܐܢܵܫܹ̈ܐ ܕܚܲܝܠܵܐ ܐܝܼܕܵܬܵܝ̈. 6 ܡ̣ܢ ܢܓ̰ܵܘܬܘܼܟ: ܝܵܐ ܐܲܠܵܗܵܐ ܕܝܲܥܩܘܼܒ̣: ܛܠܹܠܘܿܢ ܩܘܼܝܵܐ ܗܲܡ ܟܵܠܸܣܟܵܐ ܘܣܘܼܣܹܐ. 7 ܐܲܢ̄ܬ ܝܼܘܸܬ ܣܲܗܡܵܢܵܐ: ܐܲܢ̄ܬ: ܘܡܲܢܝܼ ܒܸܕ ܟܵܠܹܐ ܩܵܕ̄ܡܘܼܟ ܡ̣ܢ ܙܲܒ̣ܢܵܐ ܕܚܸܡܬܘܼܟ. 8 ܡ̣ܢ ܫܡܲܝܵܐ ܡܘܼܫܡܸܥܠܘܿܟ ܕܝܼܘܵܢ: ܐܲܪܥܵܐ ܙܕܸܥܠܵܐ ܘܫܠܹܠܵܐ: 9 ܟܲܕ ܩܸܡܠܹܐ ܠܕܝܼܘܵܢ ܐܲܠܵܗܵܐ: ܠܦܵܪܘܿܩܹܐ ܟܠܵܝ ܡܸܣܟܹܢܹ̈ܐ ܕܐܲܪܥܵܐ. 10 ܣܲܒܲܒ ܚܸܡܬܵܐ ܕܐܢܵܫܵܐ ܒܸܕ ܫܵܟܪܵܐ ܠܘܼܟ: ܣܵܡܵܐ ܦܝܼܫܵܐ ܕܚܸܡܝܵܬܹ̈ܐ ܒܸܕ[74] ܡܲܟ̇ܠܸܬ. 11 ܢܕܘܿܪܘܿܢ: ܘܬܲܡܸܡܘܿܢ ܠܡܵܪܝܵܐ ܐܲܠܵܗܵܘܟ̣ܘܿܢ: ܟܠܵܝ ܕܚܵܕܸܪ̈ܘܵܢܘܼܗܝ ܠܵܒܠܝܼ ܕܝܼܵܪ̈ܝܹܐ ܠܣܲܗܡܵܢܵܐ. 12 ܒܸܕ ܩܲܛܸܥ ܪܘܼܚܵܐ ܕܗܵܟܝܼܡܹ̈ܐ: ܣܲܗܡܵܢܵܐ ܝܠܹܐ ܥܲܠ ܡܲܠܟܹ̈ܐ ܕܐܲܪܥܵܐ.

 

ܡܙܡܘܪܐ: ܥܙ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܝܲܕܘܼܬܘܿܢ. ܕܐܵܣܵܦ: ܡܲܙܡܘܿܪܵܐ.

1. ܩܵܠܝܼ ܠܟܸܣ ܐܲܠܵܗܵܐ: ܘܒܸܕ ܡܲܩܘܸܚܸܢ: ܩܵܠܝܼ ܠܟܸܣ ܐܲܠܵܗܵܐ: ܘܒܸܕ ܝܵܗܒܸܠ ܢܵܬܵܐ ܐܸܠܝܼ. 2 ܒܝܘܿܡܵܐ ܕܥܹܩܘܼܘܝܼ ܠܡܵܪܝܵܐ ܛܸܥܠܝܼ: ܐܝܼܕܝܼ ܒܠܲܝܠܹܐ ܦܸܫܠܵܐ ܦܘܼܫܸܛܬܵܐ ܘܠܵܐ ܬܘܸܢܵܐ: ܡܘܼܚܦܸܠܵܐ ܠܸܫܩܵܠܵܐ ܠܸܒܵܐ ܢܲܦ̮ܫܝܼ. 3 ܟܹܐ ܕܵܟ̣ܪܸܢ ܠܐܲܠܵܗܵܐ: ܘܟܹܐ ܢܲܟܢܸܟܸܢ: ܟܹܐ ܗܵܓܸܢ: ܘܦܸܫܠܵܐ ܕܘܼܪܕܸܫܬܵܐ ܪܘܼܚܝܼ. ܕܒܸܩܠܘܼܟ ܛܸܠܦܵܦܹ̈ܐ ܕܥܲܝܢܝܼ̈: ܦܸܫܠܝܼ ܫܓ̣ܝܼܫܵܐ: ܘܠܹܐ ܗܲܡܙܸܡܸܢ. 5 ܬܘܼܚܡܸܢܝܼ ܠܝܘܿܡܵܢܹ̈ܐ ܕܡ̣ܢ ܩܵܕܝܼܡܝܼ: ܫܸܢܹ̈ܐ ܕܥܵܠܡܝܼܢ. 6 ܟܹܐ ܕܵܟ̣ܪܸܢ ܙܡܵܪܬܝܼ ܒܠܲܝܠܹܐ: ܒܠܸܒܝܼ ܟܹܐ ܗܵܓܸܢ: ܘܟܹܐ ܨܲܚܨܝܼܵܐ ܪܘܼܚܝܼ. 7 ܗܵܐ: ܠܥܵܠܡܝܼܢ ܒܸܕ ܪܲܦܹܐ ܡܵܪܝܵܐ: ܘܠܹܐ ܡܲܙܝܸܕ ܠܸܗܘܵܝܵܐ ܪܵܙܝܼ ܡܸܕܪܸܐ: 8 ܗܵܐ: ܫܠܹܠܵܐ ܠܐܵܒܵܕ ܫܵܦܵܩܲܬܘܼܗܝ: ܬܸܡܠܹܐ ܚܲܒ̇ܪܵܐ ܠܕܵܘܪܵܐ ܘܕܵܘܪܵܐ: 9 ܗܵܐ: ܢܫܹܠܹܐ ܠܡܪܵܚܘܿܡܹܐ ܐܲܠܵܗܵܐ: ܝܼܢ ܕܒܸܩܠܹܐ ܒܚܸܡܬܵܐ ܪܲܚܡܘܼܗܝ: 10 ܘܐܡܸܪܝܼ: ܙܲܒܘܸܢܘܼܬܝܼ ܐܵܗܵܐ: ܚܠܵܦܬܵܐ ܕܝܲܡܝܼܢܵܐ ܕܥܸܠܵܝܵܐ. 11 ܒܸܕ ܡܲܕܟܸܪܸܢ ܦܘܼܠܚܵܢܹ̈ܐ. ܕܡܵܪܝܵܐ: ܣܲܒܲܒ ܕܒܸܕ ܕܵܟ̣ܪܸܢ ܡ̣ܢ ܩܵܕܝܼܡܝܼ ܥܵܓ̰ܸܒܘܼܬܘܼܟ. 12 ܘܒܸܕ ܗܵܓܸܢ ܒܟܠܹܗ ܦܘܼܠܚܵܢܘܼܟ: ܘܒܥܵܡܵܠܘܼ̈ܟ ܒܸܕ ܬܲܚܡܸܢܸܢ. 13 ܝܵܐ ܐܲܠܵܗܵܐ: ܒܩܘܼܕܫܵܐ ܐܘܼܪܚܘܼܟ: ܡܲܢܝܼ ܝܠܹܐ ܐܲܠܵܗܵܐ ܓܘܼܪܵܐ ܐܲܝܟ ܐܲܠܵܗܵܐ: 14 ܐܲܢ̄ܬ ܝܼܘܸܬ ܐܲܠܵܗܵܐ ܥܵܒ̣ܕܵܢܵܐ ܕܥܵܓ̰ܸܒܘܼܬܵܐ: ܡܘܼܕܸܥܠܘܼܟ ܓܵܘ ܛܵܝܸܦܹ̈ܐ ܚܲܝܠܘܼܟ. 15 ܦܘܼܪܸܩܠܘܼܟ ܒܕܪܲܥܢܵܐ ܛܵܝܸܦܘܼܟ: ܒܢܘܼܢܹ̈ܐ ܕܝܲܥܩܘܿܒ̣ ܘܕܝܵܘܣܸܦ. 16 ܩܲܡ ܚܵܙܝܼ ܠܘܼܟ ܡ̈ܝܼܵܐ: ܝܵܐ ܐܲܠܵܗܵܐ: ܩܲܡ ܚܵܙܝܼ ܠܘܼܟ ܡ̈ܝܼܵܐ: ܙܕܸܥܠܘܿܢ: ܐܘܼܦ ܪܓܸܕܠܘܿܢ ܥܘܼܡܩܹ̈ܐ. 17 ܫܘܼܦܸܟ̣ܠܘܿܢ ܡ̈ܝܼܵܐ ܥܲܝܒܹ̈ܐ: ܩܵܠܵܐ ܝܸܗܒܸܠܘܿܢ ܫܡܲܝܹ̈ܐ: ܐܘܼܦ ܓܹܐܪ̈ܘܼܟ ܚܕܸܪܘܿܢ.18 ܩܵܠܵܐ ܕܪܲܥܡܘܼܟ ܒܓܵܪܕܵܒܘܼܠܹ̈ܐ: ܒܘܼܗ̄ܪܸܢܘܿܢ ܒܸܪ̈ܩܹܐ ܠܒܪܝܼܬܵܐ: ܪܓܸܕܠܵܐ ܘܪܘܼܬܪܸܬܠܵܐ ܐܲܪܥܵܐ. 19 ܒܝܵܡܵܐ ܐܘܼܪܚܘܼܟ: ܘܓ̰ܵܕܵܘܵܬܘܼ̈ܟ ܒܡ̈ܝܼܵܐ ܪܵܒܵܐ: ܘܫܵܘܦܵܦܹ̈ܐ ܕܐܲܩܠܘܼ̈ܟ ܠܵܐ ܦܸܫܠܘܿܢ ܝܕܸܥܝܹܐ. 20 ܬܘܼܓܒܸܪܘܼܟ ܐܲܝܟ ܥܸܪ̈ܒܹܐ ܛܵܝܸܦܘܼܟ: ܒܐܝܼܕܵܐ ܕܡܘܼܫܹܐ ܘܕܲܐܗܪܘܿܢ.

 

ܡܙܡܘܪܐ: ܥܚ.

ܡܲܣܟ̇ܝܼܠ ܕܐܵܣܵܦ.

1. ܗܲܒ̄ܠ ܢܵܬܵܐ: ܛܵܝܸܦܝܼ: ܠܢܵܡܘܿܣܝܼ: ܡܲܕܸܪܘܿܢ ܢܵܬܵܘܟ̣ܘܿܢ ܠܚܲܒ̇ܪܹ̈ܐ ܕܦܘܼܡܝܼ. 2 ܒܸܕ ܦܵܬܚܸܢ ܒܡܵܣܵܠܵܐ ܦܘܼܡܝܼ: ܒܸܕ ܡܲܢܒܸܥܢ ܩܸܣܸܡܝܵܬܹ̈ܐ ܡ̣ܢ ܩܵܕܝܼܡܝܼ: 3 ܐܵܢܝܼ ܕܫܡܸܥܠܲܢ ܘܝܕܸܥܝܵܝܠܲܢ: ܘܒܵܒܵܘ̈ܬܲܢ ܗܘܼܩܹܠܘܿܢ ܐܸܠܲܢ. 4 ܠܹܐ ܛܵܫܵܚ (ܠܗ̄ܘܿܢ) ܡ̣ܢ ܒܢܘܼܢܵܝ̈: ܠܕܵܘܪܵܐ ܐܚܹܪ̄ܢܵܐ ܗܵܩܘܿܝܹܐ ܬܸܫܒ̇ܘܿܚܝܵܬܹ̈ܐ ܕܡܵܪܝܵܐ: ܘܚܲܝܠܘܼܗܝ: ܘܥܵܓ̰ܒܘܼܝܵܬܘܼ̈ܗܝ ܕܥܒܸܕܠܹܐ. 5 ܘܡܘܼܩܸܡܠܹܐ ܣܵܗܕܘܼܬܵܐ ܓܵܘ ܝܲܥܩܘܿܒ̣: ܘܢܵܡܘܿܣܵܐ ܡܘܼܬܸܒ̣ܠܹܐ ܓܵܘ ܝܼܣܪܵܝܹܠ: ܕܦܩܸܕܠܹܐ ܠܒܵܒܵܘ̈ܬܲܢ: ܠܡܲܕܘܼܥܝܵܝ ܠܒܢܘܼܢܵܝ̈: 6 ܩܵܐ ܕܝܲܕܥܝܼ ܕܵܘܪܵܐ ܐܚܹܪ̄ܢܵܐ: ܒܢܘܼܢܹ̈ܐ ܕܦܵܝܫܝܼ ܝܠܝܼܕܹܐ: ܩܵܝܡܝܼ ܘܗܵܩܝܼ ܠܒܢܘܼܢܵܝ̈: 7 ܘܡܲܬܒ̣ܝܼ ܒܐܲܠܵܗܵܐ ܗܹܒ̣ܝܼܵܝ: ܘܠܵܐ ܢܵܫܝܼ ܦܘܼܠܚܵܢܹ̈ܐ ܕܐܲܠܵܗܵܐ: ܘܦܘܼܩܕܵܢܘܼ̈ܗܝ ܢܵܛܪܝܼ. 8 ܘܠܵܐ ܗܵܘܝܼ ܐܲܝܟ ܒܵܒܵܘܵܬܵܝ̈: ܕܵܘܪܵܐ ܩܸܫܝܵܐ ܘܥܵܨܝܼ: ܕܵܘܪܵܐ ܕܠܵܐ ܬܘܼܪܸܨܠܹܐ ܠܸܒܹܗ: ܘܠܵܐ ܗ̄ܘܹܠܵܐ ܡܗܘܼܡܸܢܬܵܐ ܒܐܲܠܵܗܵܐ ܪܘܼܚܹܗ. 9 ܒܢܲܝ̈ ܐܲܦܪܹܝܡ: ܟ̰ܘܼܟܒܸܢܹ̈ܐ: ܕܵܪ̈ܝܵܢܹܐ ܒܩܸܫܬܵܐ: ܕܸܪܘܿܢ ܒܝܘܿܡܵܐ ܕܦܠܵܫܵܐ. 10 ܠܵܐ ܢܛܸܪܘܿܢ ܩܵܘܠܹܗ ܕܐܲܠܵܗܵܐ: ܘܒܢܵܡܘܿܣܹܗ ܡܘܼܚܦܸܠܘܿܢ ܠܸܚܕܵܪܵܐ. 11 ܘܢܫܹܠܘܿܢ ܦܘܼܠܚܵܢܘܼ̈ܗܝ: ܘܥܵܓ̰ܸܒܘܼܝܵܬܘܼ̈ܗܝ ܕܡܘܼܚܙܝܼܵܝܠܹܐ. 12 ܩܵܕ̄ܡ ܒܵܒܵܘܵܬܵܝ̈ ܥܒܸܕܠܹܐ ܥܵܓ̰ܸܒܘܼܬܵܐ: ܒܐܲܪܥܵܐ ܕܡܸܨܪܹܝܢ: ܒܕܸܫܬܵܐ ܕܨܘܿܥܵܢ. 13 ܬܪܸܥܠܹܐ ܝܵܡܵܐ ܘܡܘܼܥܒܸܪܵܝܠܹܐ: ܘܡܘܼܟܠܹܠܹܐ ܡ̈ܝܼܵܐ ܐܲܝܟ ܩܘܼܚܵܐ. 14 ܘܬܘܼܓܒܸܪܵܝܠܹܐ ܒܥܢܵܢܵܐ ܐܝܼܡܵܡܵܐ: ܘܟܠܹ̈ ܠܲܝܠܹܐ ܒܒܲܗܪܵܐ ܕܢܘܼܪܵܐ. 15 ܡܘܼܦܩܸܥܠܹܐ ܐܝܼܨܵܪܹ̈ܐ ܓܵܘ ܒܲܪܝܼܵܐ: ܘܡܘܼܫܬܹܠܹܐ ܐܲܝܟ (ܡ̣ܢ) ܥܘܼܡܩܹ̈ܐ ܓܘܼܪܹ̈ܐ. 16 ܘܦܘܼܠܸܛܠܹܐ ܓ̰ܵܪ̈ܝܵܢܹܐ ܡ̣ܢ ܩܵܝܵܐ: ܘܡܘܼܨܠܹܠܹܐ ܐܲܝܟ ܢܲܗܪ̈ܵܘܵܬܹܐ ܡ̈ܝܼܵܐ. 17 ܘܡܘܼܙܝܸܕܠܘܿܢ ܡܸܕܪܹܐ ܠܸܚܛܵܝܵܐ ܥܲܠܘܼܗܝ: ܠܸܥܒ̣ܵܕܵܐ ܥܵܨܝܘܼܬܵܐ ܥܲܠ ܥܸܠܵܝܵܐ ܒܒܲܪܝܼܵܐ. 18 ܘܓ̰ܘܼܪܸܒܠܘܿܢ ܠܐܲܠܵܗܵܐ ܒܠܸܒܵܝ: ܠܸܛܠܵܒܵܐ ܡܹܐܟ̣ܘܼܠܬܵܐ ܠܢܲܦ̮ܣܵܝ. 19 ܘܗܘܼܡܙܸܡܠܘܿܢ ܥܲܠ ܐܲܠܵܗܵܐ:

ܐܡܸܪܘܿܢ: ܗܵܐ: ܟܹܐ ܡܵܨܹܐ ܐܲܠܵܗܵܐ ܠܡܲܪܝܘܼܙܹܐ ܨܘܼܦܪܵܐ ܓܵܘ ܒܲܪܝܼܵܐ.

20 ܗܵܐ ܡܚܹܠܹܐ ܠܐܝܼܣܵܪܵܐ: ܘܓ̰ܪܹܠܘܿܢ ܡ̈ܝܼܵܐ: ܘܫܵܩܝܵܬܹ̈ܐ ܫܦܸܟ̣ܠܘܿܢ. ܗܵܐ: ܐܘܼܦ ܠܲܚܡܵܐ ܟܹܐ ܡܵܨܹܐ ܠܝܼܵܗ̄ܒ̣ܵܐ: ܝܲܢ ܗܵܕܸܪ ܒܸܣܪܵܐ ܩܵܐ ܛܵܝܸܦܹܗ: 21 ܒܘܼܬ ܕܐܵܗܵܐ: ܫܡܸܥܠܹܐ ܡܵܪܝܵܐ: ܘܟܪܸܒܠܹܐ: ܘܢܘܼܪܵܐ ܬܦܸܠܹܐ ܒܝܲܥܩܘܿܒ̣: ܘܐܘܼܦ ܟܲܪܒܵܐ ܐܣܸܩܠܵܐ ܒܝܼܣܪܵܝܹܠ. 22 ܣܲܒܲܒ ܕܠܵܐ ܗܘܼܡܸܢܘܿܢ ܒܐܲܠܵܗܵܐ: ܘܠܵܐ ܣܒܸܪܘܿܢ ܒܦܘܼܪܩܵܢܹܗ. 23 ܘܦܩܸܕܠܹܐ ܠܥܲܝܒܹ̈ܐ ܡܥܸܠܸܠ: ܘܬܲܪ̈ܥܵܢܹܐ ܕܫܡܲܝܵܐ ܦܬܸܚܠܹܐ: 24 ܘܡܘܼܥܪܹܠܹܐ ܥܲܠܵܝ ܡܲܢܢܵܐ ܠܐܹܟ̣ܵܠܵܐ: ܘܪܸܚܠܵܐ ܕܫܡܲܝܵܐ ܝܸܗܒܸܠܹܐ ܐܸܠܵܝ. 25 ܠܲܚܡܵܐ ܕܙܲܪ̈ܒܵܢܹܐ ܐܟܸܠܹܐ ܐܢܵܫܵܐ: ܙܘܵܕܹ̈ܐ ܫܘܼܕܸܪܹܐ ܐܸܠܵܝ ܠܸܣܒܲܥܝܵܐ. 26 ܡܘܼܡܚܹܠܹܐ ܦܵܘܚܵܐ ܕܡܲܕܢܚܵܐ ܒܫܡܲܝܵܐ: ܘܬܘܼܓܒܸܪܹܐ ܒܚܲܝܠܘܼܗܝ ܦܵܘܚܵܐ ܕܬܲܝܡܢܵܐ. 27 ܘܡܘܼܥܪܸܠܹܐ ܥܲܠܵܝ ܐܲܝܟ ܥܲܦܪܵܐ ܒܸܣܪܵܐ: ܘܐܲܝܟ ܣܹܠܵܐ ܕܝܵܡܵܬܹ̈ܐ ܛܲܝܪܵܐ ܕܓܘܼܠܦܵܐ: 28 ܘܡܘܼܢܦܸܠܹܐ ܒܓܵܘܵܐ ܕܐܘܼܪܕܘܼܝܹܗ: ܚܵܕܸܪ̈ܘܵܢܹܐ ܕܡܵܫܸܟܢܘܼ̈ܗܝ. 29 ܘܐܟܸܠܘܿܢ ܘܣܒܸܥܠܘܿܢ ܪܵܒܵܐ: ܘܫܲܗ̄ܘܲܬܬܵܝ ܡܘܼܬ̄ܝܹܠܹܐ ܐܸܠܵܝ. 30 ܠܵܐ ܢܘܼܟ̣ܪܸܢܘܿܢ ܡ̣ܢ ܫܲܗ̄ܘܲܬܬܵܝ: ܗܹܫ ܡܹܐܟ̣ܘܼܠܬܵܝ ܒܦܘܼܡܵܝ: 31 ܘܟܲܪܒܵܐ ܕܐܲܠܵܗܵܐ ܐܣܸܩܠܵܐ ܒܝܼܵܝ: ܘܩܛܸܠܵܐ ܡ̣ܢ ܛܪ̈ܝܼܨܵܝ: ܘܠܓܘܼܒܝܹ̈ܐ ܕܝܼܣܪܵܝܹܠ ܡܘܼܟܸܦܠܵܐ. 32 ܒܟܠܵܗ̇ ܐܵܗܵܐ: ܚܛܹܠܘܿܢ ܡܸܕܪܹܐ: ܘܠܵܐ ܗܘܼܡܸܢܘܿܢ ܒܥܵܓ̰ܘܼܒܘܼܝܵܬܘܼ̈ܗܝ. 33 ܘܬܸܡܠܹܐ ܒܒܵܛܝܼܠܘܼܬܵܐ ܝܘܿܡܵܢܵܝ̈: ܘܫܸܢܵܝ̈ ܒܨܵܘ. 34 ܐܸܢ ܩܛܝܼܠܵܝܠܹܐ: ܛܸܥܠܘܿܢ ܐܸܠܹܗ: ܘܕܸܪܘܿܢ ܘܨܘܼܚܨܹܠܘܿܢ ܓ̰ܲܠܕܹܐ ܠܐܲܠܵܗܵܐ. 35 ܘܕܟܸܪܘܿܢ ܕܐܲܠܵܗܵܐ ܗ̄ܘ̣ܵܐ ܐܝܼܨܵܪܵܝ: ܘܐܲܠܵܗܵܐ ܥܸܠܵܝܵܐ ܦܵܪܩܵܢܵܝ. 36 ܘܫܘܼܕܸܠܘܿܢ ܐܸܠܹܗ ܒܦܘܼܡܵܝ: ܘܒܠܸܫܵܢܵܝ ܕܘܼܓܸܠܘܿܢ ܒܝܹܗ. 37 ܘܠܸܒܵܝ ܠܹܐ ܗ̄ܘ̣ܵܐ ܩܘܼܝܵܐ ܥܲܡܹܗ: ܘܠܵܐ ܗ̄ܘܹܠܘܿܢ ܡܗܘܼܡܢܹ̈ܐ ܒܩܵܘܠܘܼܗܝ. 38 ܘܗ̇ܘ: ܡܪܲܚܡܵܢܵܐ: ܟܹܐ ܦܵܚܸܠ ܥܵܘܠܵܐ: ܘܠܹܐ ܡܲܚܪܸܒ̣: ܘܟܹܐ ܡܲܙܝܸܕ ܠܡܲܕܘܼܪܹܐ ܟܲܪܒܹܗ: ܘܠܹܐ ܡܲܪܥܸܫ ܟܠܵܗ̇ ܚܸܡܬܹܗ. 39 ܘܕܟܸܪܹܐ ܕܒܸܣܪܵܐ ܗ̄ܘ̣ܵܘ ܐܵܢܝܼ: ܪܘܼܚܵܐ ܕܟܹܐ ܐܵܙܵܠ̄ܐ: ܘܠܹܐ ܕܵܝܪܵܐ. 40 ܟܡܵܐ ܥܒܸܕܠܘܿܢ ܥܵܨܝܘܼܬܵܐ ܐܸܠܹܗ ܓܵܘ ܒܲܪܝܼܵܐ: ܩܲܡ ܡܲܟܪܸܒ̇ܝܼ ܠܹܗ ܓܵܘ ܒܲܝܒܵܢ. 41 ܘܕܸܪܘܿܢ ܘܓ̰ܘܼܪܸܒܠܘܿܢ ܠܐܲܠܵܗܵܐ: ܘܠܩܲܕܝܼܫܵܐ ܕܝܼܣܪܵܝܹܠ ܡܘܼܦܫܸܡܠܘܿܢ. 42 ܠܵܐ ܕܟܸܪܘܿܢ ܐܝܼܕܹܗ: ܝܘܿܡܵܐ ܕܦܘܼܪܩܵܝܠܹܐ ܡ̣ܢ ܡܲܠܝܸܨܵܢܵܐ. 43 ܕܡܘܼܬܸܒ̣ܠܹܐ ܒܡܸܨܪܹܝܢ ܢܝܼܫܲܢܩܘܼ̈ܗܝ: ܘܥܵܓ̰ܸܒܘܼܝܵܬܘܼ̈ܗܝ ܓܵܘ ܕܸܫܬܵܐ ܕܨܘܿܥܵܢ. 44 ܘܡܘܼܕܸܪܹܐ ܠܕܸܡܵܐ ܢܲܗܪ̈ܵܘܵܬܵܝ: ܘܓ̰ܵܪ̈ܝܵܢܵܝ: ܕܠܵܐ ܫܵܬܝܼ. 45 ܫܘܼܕܸܪܹܐ ܥܲܠܵܝ ܕܸܒܘܼܪܬܵܐ: ܘܐܟ̣ܝܼܠܵܝܠܵܐ: ܘܦܸܩܵܐ: ܘܡܘܼܚܪܸܒ̣ܵܝܠܵܐ. 46 ܘܝܸܗܒܸܠܹܐ ܠܬܸܪܬܸܪܵܐ ܡܲܗܨܘܼܠܵܝ: ܘܓ̰ܵܦܵܝ ܠܩܲܡܨܵܐ. 47 ܩܛܸܠܹܐ ܒܒܲܪܕܵܐ ܓܸܦܬܵܝ: ܘܫܲܩܡܵܝ̈ ܒܣܸܠܘܼܪ. 48 ܘܣܘܼܦܹܠܹܐ ܠܒܲܪܕܵܐ ܪܸܣܩܵܝ: ܘܩܸܢܝܵܢܵܝ̈ ܠܒܸܪ̈ܩܹܐ. 49 ܘܫܘܼܕܸܪܹܐ ܓܵܘܵܝ ܚܸܡܬܵܐ ܕܟܲܪܒܘܼܗܝ ܡܚܘܼܬܵܐ ܘܓ̰ܸܓܪܵܐ ܘܥܹܩܘܝܼ: ܫܵܕܲܪܬܵܐ ܕܡܲܠܲܐܟܹ̈ܐ ܒܝܼܫܹ̈ܐ. 50 ܡܘܼܫܘܹܠܹܐ ܓ̰ܵܕܵܐ ܠܟܲܪܒܘܼܗܝ: ܠܵܐ ܚܣܸܟ̣ܠܹܐ ܡ̣ܢ ܡܵܘܬܵܐ ܓܵܢܵܝ: ܘܚܲܝܵܝ̈ ܠܡܵܘܬܵܢܵܐ ܣܘܼܦܹܠܹܐ. 51 ܘܡܚܹܠܹܐ ܟܠ ܒܘܼܟ̣ܪܵܐ ܓܵܘ ܡܸܨܪܹܝܢ: ܪܹܫܵܐ ܕܙܲܪ̈ܒܹܐ ܓܵܘ ܡܲܫܟܢܵܐ ܕܚܵܡ. 52 ܘܡܘܼܟܘܸܟ̰ܠܹܐ ܐܲܝܟ ܥܸܪ̈ܒܹܐ ܛܵܝܸܦܹܗ: ܘܬܘܼܓܒܸܪܵܝܠܹܐ ܐܲܝܟ ܦܸܣܩܵܐ ܓܵܘ ܒܲܪܝܼܵܐ. 53 ܘܬܘܼܓܒܸܪܵܝܠܹܐ ܒܐܲܡܝܼܢܵܝܝܼ: ܘܠܵܐ ܙܕܸܥܠܘܿܢ: ܘܠܕܸܫܡܸܢܵܝ̈ ܟܘܼܣܹܠܵܐ ܝܵܡܵܐ. 54 ܘܡܘܼܬ̄ܚܵܠܹܐ ܠܬܸܚܘܼܒ ܕܩܘܼܕܫܘܼܗܝ: ܐܵܗܵܐ ܛܘܼܪܵܐ ܕܩܢܹܠܵܐ ܝܲܡܝܼܢܹܗ. 55 ܘܛܪܸܕܠܹܐ ܡ̣ܢ ܩܵܕ̄ܡܵܝ ܛܵܝܸܦܹ̈ܐ: ܘܦܘܼܠܹܠܹܐ ܐܸܠܵܝ ܡܝܼܪܲܬܓܵܪܘܼܬܵܐ ܒܚܲܒ̣ܠܵܐ: ܘܡܘܼܫܪܹܠܹܐ ܒܡܲܫܟܢܵܝ̈ ܫܲܒ̣ܛܹ̈ܐ ܕܝܼܣܪܵܝܹܠ. 56 ܘܓ̰ܘܼܪܸܒܠܘܿܢ ܘܥܒܸܕܠܘܿܢ ܥܵܨܝܘܼܬܵܐ ܥܲܠ ܐܲܠܵܗܵܐ ܥܸܠܵܝܵܐ: ܘܣܵܗܕܘܵܬܘܼ̈ܗܝ ܠܵܐ ܢܛܸܪܘܿܢ: 57 ܘܩܠܸܒ̇ܠܘܿܢ ܘܥܒܸܕܠܘܿܢ ܚܵܢܲܬܘܼܬܵܐ ܐܲܝܟ ܒܵܒܵܘܵܬܵܝ̈: ܕܸܪܘܿܢ ܐܲܝܟ ܩܸܫܬܵܐ ܦܠܝܼܡܬܵܐ. 58 ܘܡܘܼܟܪܸܒ̇ܠܘܿܢ ܐܸܠܹܗ ܒܕܘܼܟܵܢܵܝ̈ ܪܵܡܹܐ: ܘܒܨܲܠܡܵܝ̈ ܦܘܼܣܠܹ̈ܐ ܩܲܡ ܡܲܐܘܸܪܝܼ ܠܹܗ ܒܩܲܝܪܲܬ. 59 ܫܡܸܥܠܹܐ ܐܲܠܵܗܵܐ ܘܟܪܸܒܠܹܐ: ܘܡܘܼܣܠܹܠܹܐ ܪܵܒܵܐ ܠܝܼܣܪܵܝܹܠ. 60 ܘܫܒܸܩܠܹܐ ܡܵܫܸܟܢܵܐ ܕܫܝܼܠܘܿ: ܟ̰ܲܕܪܵܐ ܕܡܘܼܫܪܹܠܹܐ ܓܵܘ ܐܢܵܫܹ̈ܐ. 61 ܘܝܸܗܒܸܠܹܐ ܠܝܲܚܣܝܼܪܘܼܬܵܐ ܚܲܝܠܘܼܗܝ: ܘܙܲܪܝܼܦܘܼܬܘܼܗܝ ܒܐܝܼܕܵܐ ܕܕܸܫܡܸܢ. 62 ܘܣܘܼܦܹܠܹܐ ܠܣܲܝܦܵܐ ܛܵܝܸܦܹܗ: ܘܥܲܠ ܝܵܪܬܘܼܬܘܼܗܝ ܟܪܸܒܠܹܐ. 63 ܓ̰ܘܲܢܩܘܼ̈ܗܝ ܐܟܸܠܹܐ ܢܘܼܪܵܐ: ܘܒܬܘܼܠܵܬܘܼ̈ܗܝ ܠܵܐ ܦܸܫܠܘܿܢ ܚܩܝܼܪܹܐ. 64 ܟܵܗܢܘܼ̈ܗܝ ܒܣܲܝܦܵܐ ܢܦܸܠܘܿܢ: ܘܐܲܪ̈ܡܸܠܝܵܬܘܼܗܝ ܠܵܐ ܒܟܹܠܘܿܢ. 65 ܘܪܥܸܫܠܹܐ ܐܲܝܟ ܛܸܠܝܵܐ ܡܵܪܝܵܐ: ܐܲܝܟ ܓܲܢ̄ܒܵܪܵܐ ܕܩܲܘܸܚ ܡ̣ܢ ܚܲܡܪܵܐ. 66 ܘܡܚܹܠܹܐ ܕܸܫܡܸܢܘܼ̈ܗܝ ܠܵܒܵܬ̄ܪܵܐ: ܠܵܘܡܵܐ ܕܥܵܠܲܡ ܝܸܗܒܸܠܹܐ ܐܸܠܵܝ. 67 ܘܡܘܼܣܠܹܠܹܐ ܠܡܲܫܟܢܵܐ ܕܝܵܘܣܸܦ: ܘܠܫܲܒ̣ܛܵܐ ܕܐܲܦܪܹܝܡ ܠܵܐ ܓܘܼܒܹܠܹܐ. 68 ܘܓܘܼܒܹܠܹܐ ܠܫܲܒ̣ܛܵܐ ܕܝܼܗܘܼܕܵܐ: ܠܛܘܼܪܵܐ ܕܨܸܗܝܘܿܢ ܕܡܘܼܚܸܒܠܹܐ. 69 ܘܒܢܹܠܹܐ ܐܲܝܟ ܪܵܘܡܹܐ ܡܲܩܕܫܘܼܗܝ: ܐܲܝܟ ܐܲܪܥܵܐ ܕܫܘܼܬܸܐܣܵܠܹܐ ܠܥܵܠܲܡ. 70 ܘܓܘܼܒܹܠܹܐ ܠܕܵܘܝܼܕ ܪܹܓܹܗ: ܘܩܲܡ ܫܵܩܸܠ ܠܹܗ ܡ̣ܢ ܓܘܼܡܵܢܹ̈ܐ ܕܥܸܪ̈ܒܹܐ: 71 ܡ̣ܢ ܒܵܬ̄ܪ ( ܘܲܥܢܹ̈ܐ) ܡܲܡܸܨܵܢܵܝ̈ܬܵܐ ܩܲܡ ܡܲܝܬ̄ܝܹܐ ܠܹܗ: ܠܡܲܪܘܼܥܝܹܐ ܠܝܲܥܩܘܿܒ̣ ܛܵܝܸܦܹܗ: ܘܠܝܼܣܪܵܝܹܠ ܝܵܪܬܘܼܬܘܼܗܝ. 72 ܘܡܘܼܪܥܝܼܵܝܠܹܐ ܐܲܝܟ ܨܸܦܝܘܼܬܵܐ ܕܠܸܒܹܗ: ܘܒܥܵܘܩܸܒ ܕܐܝܼܕܵܬܘܼ̈ܗܝ ܬܘܼܓܒܸܪܵܝܠܹܐ.

 

ܡܙܡܘܪܐ: ܥܛ.

ܡܲܙܡܘܿܪܵܐ ܕܐܵܣܵܦ.

1. ܝܵܐ ܐܲܠܵܗܵܐ ܐܘܸܪܘܿܢ ܛܵܝܸܦܹ̈ܐ ܓܵܘ ܝܵܪܬܘܼܬܘܼܟ: ܛܘܼܡܹܐܠܘܿܢ ܠܗܲܝܟܠܵܐ ܕܩܘܼܕܫܘܼܟ: ܥܒܸܕܠܘܿܢ ܐܘܿܪܸܫܠܸܡ ܠܚܵܪ̈ܒܝܹܐ. 2 ܝܸܗܒܸܠܘܿܢ ܫܲܠܕܵܐ ܕܪܸ̈ܓܵܘܵܬܘܼܟ ܡܹܐܟ̣ܘܼܠܬܵܐ ܠܦܵܪܲܚܬܵܐ ܕܫܡܲܝܵܐ: ܒܸܣܪܵܐ ܕܙܲܕܝܼܩܘܼ̈ܟ ܠܚܲܝܘܬܵܐ ܕܐܲܪܥܵܐ. 3 ܫܘܼܦܸܟ̣ܠܘܿܢ ܕܸܡܵܝ ܐܲܝܟ ܡ̈ܝܼܵܐ ܚܵܕܼܪ̈ܘܵܢܹܐ ܕܐܘܿܪܸܫܠܸܡ: ܘܠܲܝܬ ܗ̄ܘ̣ܵܐ ܩܵܒ̣ܪܵܢܵܐ. 4 ܗ̄ܘܹܠܲܢ ܠܘܡܵܐ ܠܫ̈ܒ̣ܵܒܲܢ: ܡܲܣܚܲܪܬܵܐ ܘܡܲܣܠܵܝܬܵܐ ܠܐܵܢܝܼ ܕܝܼܢܵܐ ܚܵܕܼܪ̈ܘܵܢܲܢ. 5 ܗܲܠ ܐܝܼܡܲܢ: ܝܵܐ ܡܵܪܝܵܐ: ܟܵܪܒܸܕ ܠܐܵܒܵܕ: ܠܲܗ̄ܝܵܐ ܐܲܝܟ ܢܘܼܪܵܐ ܩܲܝܪܲܬܘܼܟ: 6 ܫܵܦܸܟ ܚܸܡܬܘܼܟ ܥܲܠ ܛܵܝܸܦܹ̈ܐ ܕܠܵܐ ܩܲܡ ܝܲܕܥܝܼ ܠܘܼܟ: ܘܥܲܠ ܡܲܠܟܘܵܬܹ̈ܐ ܕܒܫܸܡܘܼܟ ܠܵܐ ܩܪܹܠܘܿܢ. 7 ܣܲܒܲܒ ܕܐܟܸܠܘܿܢ ܠܝܲܥܩܘܿܒ̣: ܘܠܡܲܣܟܵܢܘܼܗܝ ܡܘܼܚܪܸܒ̣ܠܘܿܢ. 8 ܠܵܐ ܕܵܟ̣ܪܸܬ ܥܲܠܲܢ ܥܵܘܠܹ̈ܐ ܕܩܵܕܝܼܡ̈ܝܹܐ: ܡܲܠܝܸܙ ܩܵܕܡܝܼ ܠܲܢ ܪ̈ܲܚܡܘܼܟ: ܣܲܒܲܒ ܕܦܸܫܠܲܢ ܡܘܼܟܸܦܹܐ ܪܵܒܵܐ. 9 ܗܲܝܸܪܲܢ: ܐܲܠܵܗܵܐ ܕܦܘܼܪܩܵܢܲܢ: ܒܘܼܬ ܗܲܓ̰ܲܬ ܕܐܝܼܩܵܪܵܐ ܕܫܸܡܘܼܟ: ܘܦܵܨܝܼ ܠܲܢ: ܘܥܒ̣ܘܿܕ ܥܲܠ ܚܛ̈ܝܼܵܬܲܢ ܒܝܵܬܸܪ ܕܫܸܡܘܼܟ. 10 ܩܵܡܘܿܕܝܼ ܐܵܡܪܝܼ ܛܵܝܸܦܹ̈ܐ: ܐܲܝܟܵܐ ܝܠܹܐ ܐܲܠܵܗܵܝ: ܦܵܝܸܫ ܝܕܸܥܝܵܐ: ܓܵܘ ܛܵܝܸܦܹ̈ܐ ܩܵܕ̄ܡ ܥܲܝ̈ܢܲܢ: ܬܘܼܥܠܵܐ ܕܕܸܡܵܐ ܕܪܸ̈ܓܵܘܵܬܘܼܟ ܕܦܸܫܠܹܐ ܫܘܼܦܟ̣ܵܐ. 11 ܐܵܘܪܵܐ ܩܲܕ̄ܡܘܼܟ ܬܵܢܲܚܬܵܐ ܕܐܣܝܼܪܵܐ: ܐܲܝܟ ܓܘܼܪܘܼܬܵܐ ܕܕܪܲܥܢܘܼܟ ܫܒ̣ܘܿܩ ܒܢܘܼܢܹ̈ܐ ܕܡܵܘܬܵܐ: 12 ܘܡܲܕܸܪ ܠܫ̈ܒ̣ܵܒܲܢ ܫܲܒܲܥ ܓܵܗܹ̈ܐ ܓܵܘ ܥܘܼܒܵܝ ܠܵܘܡܵܝ: ܕܠܸܡܠܘܿܢ ܐܸܠܘܼܟ: ܡܵܪܝܵܐ. 13 ܘܐܲܚܢܲܢ ܛܵܝܸܦܘܼܟ: ܘܥܸܪ̈ܒܹܐ ܕܡܲܪܥܝܼܬܘܼܟ: ܒܸܕ ܫܵܟܪܵܚ ܠܘܼܟ ܠܥܵܠܲܡ: ܠܕܵܘܪܵܐ ܘܕܵܘܪܵܐ ܒܸܕ ܗܵܩܵܚ ܬܸܫܒ̇ܘܿܚܬܘܼܟ.

 

ܡܙܡܘܪܐ: ܦ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܫܘܼܫܲܢܝܼܡ ܥܹܕܘܼܬ. ܕܐܵܣܵܦ ܡܲܙܡܘܿܪܵܐ.

1. ܝܵܐ ܪܵܥܝܵܐ ܕܝܼܣܪܵܝܹܠ: ܗܲܒ̄ܠ ܢܵܬܵܐ: ܕܟܹܐ ܬܲܓܒܸܪ ܐܲܝܟ ܥܸܪ̈ܒܹܐ ܠܝܵܘܣܸܦ: ܝܵܬܒ̣ܵܢܵܐ ܒܟܪ̈ܘܼܒܹܐ: ܒܲܗ̄ܪܸܢ. 2 ܩܵܕ̄ܡ ܐܲܦܪܹܝܡ ܘܒܸܢܝܵܡܹܝܢ ܘܡܢܲܫܹܐ: ܡܲܪܥܸܫ ܓܲܢ̄ܒܵܪܘܼܬܘܼܟ: ܘܬܵܐ ܠܦܘܼܪܩܵܢܲܢ. 3 ܝܵܐ ܐܲܠܵܗܵܐ: ܡܲܕܸܪܸܢ: ܘܒܲܗ̄ܪܸܢ ܦܵܬܘܼܟ: ܘܦܵܝܫܵܚ ܦܘܼܪܩܹܐ. 4 ܡܵܪܝܵܐ: ܐܲܠܵܗܵܐ ܨܒ̣ܵܐܘܼܬ: ܗܲܠ ܐܝܼܡܲܢ ܬܢܬܸܢܬ (ܒܟܲܪܒܵܐ) ܥܲܠ ܨܠܘܿܬܵܐ ܕܛܵܝܸܦܘܼܟ. 5 ܡܘܼܐܟ̣ܠܵܝܠܘܼܟ ܠܲܚܡܵܐ ܕܕܸܡܥ̱ܬܵܐ: ܘܡܘܼܫܬܵܝܼܵܝܠܘܼܟ ܕܸܡܥܹ̈ܐ ܒܟܝܼܘܼܠܵܐ. 6 ܥܒܕܵܚܠܘܼܟ ܡܲܩܲܪܵܨܘܼܬܵܐ ܠܫ̈ܒ̣ܵܒܲܢ: ܘܕܸܫ̈ܡܸܢܲܢ ܡܘܼܣܚܸܪܘܿܢ ܠܟܸܣ ܓܵܢܵܝ. 7 ܐܲܠܵܗܵܐ ܨܒ̣ܵܐܘܼܬ: ܡܲܕܸܪܸܢ: ܘܒܲܗ̄ܪܸܢ ܦܵܬܘܼܟ ܘܦܵܝܫܵܚ ܦܘܼܪܩܹܐ. 8 ܓܸܦܬܵܐ ܡ̣ܢ ܡܸܨܪܹܝܢ ܡܘܼܟܘܸܟ̰ܠܘܼܟ: ܛܪܸܕܠܘܼܟ ܠܛܵܝܸܦܹ̈ܐ ܘܢܨܝܼܒ̣ܵܠܘܼܟ. 9 ܗܘܼܕܸܪܘܿܟ ܩܵܕ̄ܡܘܼܗ̇: ܘܕܒܸܩܠܵܐ ܟܵܘܟܘܼ̈ܗ̇: ܘܡܠܹܠܵܐ ܐܲܪܥܵܐ. 10 ܦܸܫܠܘܿܢ ܡܘܼܟܣܹܐ ܛܘܼܪ̈ܵܢܹܐ ܡ̣ܢ ܛܸܠܵܢܝܼܬܘܼܗ̇: ܘܦܲܥܘܵܢܘܼ̈ܗ̇: ܐܲܪ̈ܙܹܐ ܕܐܲܠܵܗܵܐ. 11 ܦܘܼܫܸܛܠܵܐ ܦܲܥܘܵܢܘܼ̈ܗ̇ ܗܲܠ ܝܵܡܵܐ: ܘܠܢܲܗܪܵܐ ܓܘܼܕܵܪ̈ܘܼܗ̇. 12 ܩܵܡܘܿܕܝܼ ܬܪܸܥܠܘܼܟ ܣܝܵܓ̣ܵܘܼܗ̇: ܘܫܠܛܵܠܘܿܢ ܟܠܵܝ ܥܲܒ̣ܪ̈ܵܢܹܐ ܕܐܘܼܪܚܵܐ: 13 ܡܲܚܪܘܼܒ̣ܘܼܗ̇ ܝܠܹܐ ܚܙܘܼܪܵܐ ܡܢ ܡܲܝܫܵܐ: ܘܕܵܒܹ̈ܐ ܕܕܸܫܬܵܐ ܒܸܪܲܥܝܘܼܗ̇ ܝܢܵܐ. 14 ܝܵܐ ܐܲܠܵܗܵܐ ܨܒ̣ܵܐܘܼܬ: ܕܘܼܪ: ܦܲܪܦܘܼܠܹܐ ܝܘܵܚ: ܚܘܼܪ ܡ̣ܢ ܫܡܲܝܵܐ ܘܚܙܝܼ: ܘܣܲܚܒܸܪ ܠܐܵܗܵܐ ܓܸܦܬܵܐ: 15 ܘܢܛܘܿܪ ܗ̇ܘ ܕܢܸܨܒ̣ܠܵܐ ܝܲܡܝܼܢܘܼܟ: ܘܠܒܪܘܼܢܵܐ ܕܚܘܼܠܸܢܘܼܟ ܩܵܬܘܼܟ. 16 ܡܘܼܩܸܕܬܵܐ ܝܠܵܐ ܒܢܘܼܪܵܐ: ܦܪܝܼܡܬܵܐ: ܡ̣ܢ ܢܓ̰ܵܘܬܵܐ ܕܦܵܬܘܼܟ ܟܹܐ ܬܵܠܩܝܼ. 17 ܗܵܘܝܵܐ ܐܝܼܕܘܼܟ ܥܲܠ ܐܢܵܫܵܐ ܕܝܲܡܝܼܢܘܼܟ: ܥܲܠ ܒܪܘܼܢܵܐ ܕܐܢܵܫܵܐ ܕܚܘܼܠܸܢܘܼܟ ܩܵܬܘܼܟ. 18 ܘܠܹܐ ܩܵܠܒ̇ܝܼ ܡܸܢܘܼܟ: ܡܲܚܸܬ ܠܲܢ: ܘܒܫܸܡܘܼܟ ܒܸܕ ܩܵܪܵܚ. 19 ܝܵܐ ܡܵܪܝܵܐ: ܐܲܠܵܗܵܐ ܨܒ̣ܵܐܘܬ: ܡܲܕܸܪܲܢ: ܒܲܗ̄ܪܸܢ ܦܵܬܘܼܟ: ܘܦܵܝܫܵܚ ܦܘܼܪܩܹܐ.

 

ܡܙܡܘܪܐ: ܦܐ.

ܠܪܹܫܵܐ ܕܙܵܡܵܪܹܐ: ܥܲܠ ܓܬܝܼܬ. ܕܐܵܣܵܦ.

1. ܡܵܪܡܘܿܢ ܩܵܠܵܐ ܠܐܲܠܵܗܵܐ ܙܲܪܒܲܢ: ܩܲܘܸܚܘܿܢ ܠܐܲܠܵܗܵܐ ܕܝܲܥܩܘܿܒ̣. 2 ܡܵܪܡܘܿܢ ܙܡܵܪܬܵܐ: ܘܗܲܒ̄ܠܘܿܢ ܬܲܦ: ܟܸܢܵܪܵܐ ܒܵܣܝܼܡܬܵܐ ܥܲܡ ܩܝܼܬܵܪܵܐ. 3 ܡܵܚܝܼܬܘܿܢ ܒܪܹܫ ܝܲܪܚܵܐ ܫܝܼܦܘܿܪܵܐ: ܒܒܲܕܪܝܼ: ܒܝܘܿܡܵܐ ܕܥܹܐܕܲܢ. 4 ܣܲܒܲܒ ܕܩܵܢܘܿܢܵܐ ܝܠܹܐ ܠܝܼܣܪܵܝܹܠ: ܕܝܼܘܵܢ ܠܐܲܠܵܗܵܐ ܕܝܲܥܩܘܿܒ̣. 5 ܣܵܗܕܘܼܬܵܐ ܒܝܵܘܣܸܦ ܡܘܼܬܒ̣ܵܠܹܐ: ܟܲܕ ܦܠܸܛܠܹܐ ܥܲܠ ܐܲܪܥܵܐ ܕܡܸܨܪܹܝܢ: ܠܸܫܵܢܵܐ ܕܠܵܐ ܝܕܸܥܠܝܼ ܫܡܸܥܠܝܼ. 6 ܡܘܼܥܒܸܪܝܼ ܡ̣ܢ ܟܵܪܬܵܐ ܪܘܼܦ̮ܫܹܗ: ܐܝܼܕܵܬܘܼ̈ܗܝ ܡ̣ܢ ܩܸܪܛܵܠܵܐ ܥܒܸܪܘܿܢ. 7 ܒܥܹܩܘܼܝ ܩܪܹܠܘܼܟ: ܘܚܘܼܠܨܬܠܝܼ: ܓ̰ܘܼܘܸܒܸܕ ܠܝܼ ܒܣܸܬܵܪܵܐ ܕܪܲܥܡܵܐ: ܒܘܼܚܪܸܬ ܠܝܼ ܥܲܠ ܡ̈ܝܼܵܐ ܕܡܪܝܼܒ̣ܵܐ. 8 ܫܡܥܝܼ: ܛܵܝܸܦܝܼ: ܘܣܵܗܕܸܢ ܥܲܠܘܼܟ: ܝܼܣܪܵܝܹܠ: ܐܸܢ ܫܲܡܥܸܬ ܗ̄ܘ̣ܵܐ ܐܸܠܝܼ. 9 ܠܵܐ ܗܵܘܹܐ ܓܵܘܘܼܟ ܐܲܠܵܗܵܐ ܩܵܪܝܼܒ̣ܵܝܵܐ: ܘܠܵܐ ܣܲܓ̣ܕܸܬ ܠܐܲܠܵܗܵܐ ܢܘܼܟ̣ܪܵܝܵܐ. 10 ܐܵܢܵܐ ܝܘܸܢ ܡܵܪܝܵܐ ܐܲܠܵܗܘܼܟ: ܡܵܐܣܩܵܢܘܼܟ ܡ̣ܢ ܐܲܪܥܵܐ ܕܡܸܨܪܹܝܢ: ܡܲܦܬܝܼ ܦܘܼܡܘܼܟ: ܘܒܸܕ ܡܵܠܸܢܹܗ. 11 ܘܠܵܐ ܫܡܸܥܠܹܐ ܛܵܝܸܦܝܼ ܠܩܵܠܝܼ: ܘܝܼܣܪܵܝܹܠ ܠܵܐ ܡܘܼܨܝܸܬܠܹܐ ܐܸܠܝܼ. 12 ܘܪܘܼܦܵܚܠܝܼ ܒܥܵܨܝܘܼܬܵܐ ܕܠܸܒܵܝ: ܚܕܼܪܘܿܢ ܒܪܵܐܝܼܵܝ. 13 ܛܘܼܒ̣ܵܐ ܕܛܵܝܸܦܝܼ ܫܲܡܸܥ ܗ̄ܘ̣ܵܐ ܐܸܠܝܼ: ܝܼܣܪܵܝܹܠ ܒܐܘܼܪ̈ܚܵܬܝܼ ܚܵܕܪܝܼ ܗ̄ܘ̣ܵܐ. ܒܵܬ̄ܪ ܚܲܟ̰ܵܐ: ܕܸܫܡܸܢܵܝ̈ ܒܸܕ ܙܲܒܛܸܢܢ ܗ̄ܘ̣ܵܐ: ܘܥܲܠ ܡܲܠܝܸܨܵܢܵܝ̈ ܒܸܕ ܡܲܕܸܪܸܢ ܗ̄ܘ̣ܵܐ ܐܝܼܕܝܼ. 15 ܣܵܢܝܵܢܹ̈ܐ ܕܡܵܪܝܵܐ ܒܸܕ[75] ܫܵܦܪܝܼ ܗ̄ܘ̣ܵܘ ܐܸܠܹܗ: ܘܒܸܕ ܗܵܘܹܐ ܗ̄ܘ̣ܵܐ ܙܲܒ̣ܢܵܝ ܠܥܵܠܲܡ. 16 ܘܒܸܕ ܡܵܐܟܸܠ ܗ̄ܘ̣ܵܐ ܠܹܗ ܡ̣ܢ ܛܪܝܼܨܘܼܬܵܐ ܕܚܸܛܹ̈ܐ: ܘܡ̣ܢ ܩܵܝܵܐ ܕܸܒ̣ܫܵܐ ܒܸܕ ܡܲܣܒܸܥܢ ܗ̄ܘ̣ܵܐ ܠܘܿܟ.

 

 

 

 

ܡܙܡܘܪܐ: ܦܒ.

ܡܲܙܡܘܿܪܵܐ ܕܐܵܣܵܦ.

1. ܐܲܠܵܗܵܐ ܟܸܠܝܵܐ ܝܠܹܐ ܓܵܘ ܓ̰ܵܡܵܥܲܬ ܕܐܲܠܵܗܵܐ: ܒܓܵܘܵܐ ܕܐܲܠܵܗܹ̈ܐ ܒܸܕܝܵܢܵܐ ܝܠܹܐ. 2 ܗܲܠ ܐܝܼܡܲܢ ܪܲܝܢܝܼܬܘܿܢ ܥܵܘܠܵܐ: ܘܦܵܬܘܵܬܹ̈ܐ ܕܒܝܼܫܹ̈ܐ ܩܵܒ̇ܠܝܼܬܘܿܢ: 3 ܕܘܼܢܘܿܢ ܦܲܩܝܼܪ ܘܝܵܬܘܿܡܵܐ: ܠܡܵܟܝܼܟ̣ܵܐ ܘܡܸܣܟܹܢܵܐ ܥܒ̣ܘܿܕܘܿܢ ܗܵܩܘܼܬܵܐ. 4 ܚܵܠܨܘܿܢ ܦܲܩܝܼܪ ܘܡܸܣܟܹܢܵܐ: ܡ̣ܢ ܐܝܼܕܵܐ ܕܒܝܼܫܹ̈ܐ ܦܵܨܡܘܿܢ. 5 ܠܹܐ ܝܲܕܥܝܼ: ܘܠܹܐ ܦܲܪܡܝܼ: ܒܚܘܼܒ̣ܝܵܐ ܟܹܐ ܚܵܕܪܝܼ: ܒܸܫܥܵܫܵܐ ܝܢܵܐ ܟܠܵܝ ܒܸܢܝܲܬܹ̈ܐ ܕܐܲܪܥܵܐ. 6 ܐܵܢܵܐ ܐܡܸܪܝܼ: ܐܲܠܵܗܹ̈ܐ ܝܬܘܿܢ: ܘܒܢܘܼܢܹ̈ܐ ܕܥܸܠܵܝܵܐ ܟܠܵܘܟ̣ܘܿܢ. 7 ܡܸܓ̰ܸܕ ܐܲܝܟ ܒܲܪܢܵܫܵܐ ܒܸܕ ܡܵܝܬܝܼܬܘܿܢ: ܘܐܲܝܟ ܚܵܕ̄ ܡ̣ܢ ܓܘܼܪ̈ܵܢܹܐ ܒܸܕ ܢܵܦܠܝܼܬܘܿܢ. 8 ܩܘܼܡ̄: ܝܵܐ ܐܲܠܵܗܵܐ: ܕܘܼܢ ܐܲܪܥܵܐ: ܣܲܒܲܒ ܕܐܲܢ̄ܬ ܒܸܕ ܝܵܪܬܸܬ ܓܵܘ ܟܠܵܝ ܛܵܝܸܦܹ̈ܐ.

 

ܡܙܡܘܪܐ: ܦܓ.

ܙܡܵܪܬܵܐ: ܡܲܙܡܘܿܪܵܐ ܕܐܵܣܵܦ.

1. ܐܲܠܵܗܵܐ: ܠܵܐ ܗܵܘܝܵܐ ܫܠܵܝܬܵܐ ܐܸܠܘܼܟ: ܠܵܐ ܫܵܬܩܸܬ: ܘܠܵܐ ܗܵܘܸܬ ܣܵܟܸܬ: ܐܲܠܵܗܵܐ. 2 ܣܲܒܲܒ: ܗܵܐ: ܕܸܫܡܸܢܘܼ̈ܟ ܒܸܫܓ̣ܵܫܵܐ ܝܢܵܐ. ܘܣܵܢܝܵܢܘܼܟ ܡܘܼܪܸܡܠܘܿܢ ܪܹܫܵܐ. 3 ܥܲܠ ܛܵܝܸܦܘܼܟ ܥܒܸܕܠܘܿܢ ܒܠܹܐܒܵܐ ܬܲܕܒܝܼܪ: ܘܥܒܸܕܠܘܿܢ ܪܵܐܝܝܼ ܥܲܠ ܛܘܼܫܝܘܼ̈ܟ. 4 ܐܡܸܪܘܿܢ: ܬܹܡܘܿܢ ܘܬܵܠܩܵܚ ܠܗ̄ܘܿܢ ܡ̣ܢ ܠܸܗܘܵܝܵܐ ܛܵܝܸܦܵܐ: ܘܠܵܐ ܦܵܝܸܫ ܕܟ̣ܝܼܪܵܐ ܫܸܡܵܐ ܕܝܼܣܪܵܝܹܠ ܡܸܕܪܹܐ. 5 ܣܲܒܲܒ ܕܥܒܸܕܠܘܿܢ ܪܵܐܝܝܼ ܒܠܸܒܵܐ ܡܸܚܕܵܕܹ̈ܐ: ܥܲܠܘܼܟ ܩܵܘܠܵܐ ܩܛܸܥܠܘܿܢ. 6 ܡܲܫܟܢܹ̈ܐ ܕܐܲܕܘܿܡ: ܘܐܝܼܫܡܲܥܠܵܝܹ̈ܐ: ܡܘܼܐܵܒ̣: ܘܗܵܓܲܪ̈ܝܹܐ: 7 ܓܒܲܠ: ܘܥܲܡܘܿܢ: ܘܥܡܵܠܹܝܩ: ܦܠܸܫܬ ܥܲܡ ܥܵܡܪ̈ܵܢܹܐ ܕܨܘܿܪ: 8 ܐܘܼܦ ܐܵܬܘܿܪ ܙܘܼܘܸܓܠܵܐ ܥܲܡܵܝ: ܗ̄ܘܹܠܘܿܢ ܕܪܲܥܢܵܐ ܠܒܢܘܼܢܹ̈ܐ ܕܠܘܿܛ. 9 ܥܒ̣ܘܿܕ ܐܸܠܵܝ ܐܲܝܟ ܠܡܸܕܝܲܢ: ܐܲܝܟ ܠܣܝܼܣܪܵܐ: ܐܲܝܟ ܠܝܵܒ̣ܝܼܢ: ܓܵܘ ܪܵܘܘܿܠܵܐ ܕܩܝܼܫܘܿܢ. 10 ܦܸܫܠܘܿܢ ܬܘܿܠܩܹܐ ܒܥܝܼܢܕܘܿܪ: ܗ̄ܘܹܠܘܿܢ ܙܸܒܠܵܐ ܠܐܲܪܥܵܐ. 11 ܥܒ̣ܘܿܕ ܠܗ̄ܘܿܢ ܓܘܼܪܵܢܵܝ ܐܲܝܟ ܥܘܿܪܝܼܒ̣ ܘܐܲܝܟ ܙܝܼܒ: ܘܐܲܝܟ ܙܵܒ̣ܵܚ ܘܐܲܝܟ ܨܲܠܡܢܲܥ ܟܠܵܝ ܡܝܼܪ̈ܵܝ: 12 ܕܐܡܸܪܘܿܢ: ܝܵܪܬܵܚ ܠܲܢ ܡܲܣܟܵܢܹ̈ܐ ܕܐܲܠܵܗܵܐ. 13 ܝܵܐ ܐܲܠܵܗܝܼ: ܥܒ̣ܘܿܕ ܠܗܘܿܢ ܐܲܝܟ ܦܘܼܫܸܟܵܐ ܦܘܼܪܬܸܠܵܐ ( ܒܓܵܪܕܵܒܘܼܠܹ̈ܐ): ܐܲܝܟ ܟܘܼܠܵܫ ܩܵܕ̄ܡ ܦܵܘܚܵܐ. 14 ܐܲܝܟ ܢܘܼܪܵܐ ܕܡܵܩܸܕ ܡܲܝܫܵܐ: ܘܐܲܝܟ ܠܵܗܵܐ ܕܡܲܠܗܹܐ ܛܘܼܪܵܢܹܐ: 15 ܗܲܕܟ̣ܵܐ ܢܵܦܠܸܬ ܒܵܬ̄ܪܵܝ ܒܒܵܘܓܵܪܘܼܟ: ܘܒܒܘܼܪܵܢܘܼܟ ܡܲܪܓܸܕܸܬ ܠܗ̄ܘܿܢ. 16 ܡܠܝܼ ܦܵܬܘܵܬܵܝ̈ ܒܹܨܘܼܪܘܼܬܵܐ: ܘܛܵܥܝܼ ܠܫܸܡܘܼܟ: ܝܵܐ ܡܵܪܝܵܐ. 17 ܢܵܚܦܝܼ ܘܦܵܝܫܝܼ ܚܒ̣ܝܼܛܹܐ ܗܲܠ ܥܵܠܲܡ: ܘܦܵܝܫܝܼ ܫܲܪܡܲܢܕܵܐ ܘܬܵܠܩܝܼ: 18 ܘܝܲܕܥܝܼ ܕܐܲܢ̄ܬ: ܫܸܡܘܼܟ ܝܹܗܘܿܘܵܐ: ܒܢܲܦ̮ܫܘܼܟ: ܥܸܠܵܝܵܐ ܝܘܸܬ ܥܲܠ ܟܠܵܗ̇ ܐܲܪܥܵܐ.

 

ܡܙܡܘܪܐ: ܦܕ.

ܠܪܹܫܵܐ ܕܙܵܡܵܪܹ̈ܐ: ܥܲܠ ܓܬܝܼܬ. ܠܒܢܘܼܢܹ̈ܐ ܕܩܘܿܪܚ ܡܲܙܡܘܿܪܵܐ.

1. ܟܡܵܐ ܡܘܼܚܸܒܹ̈ܐ ܝܢܵܐ ܡܵܫܟܢܘܼ̈ܟ: ܡܵܪܝܵܐ ܨܒ̣ܵܐܘܼܬ! 2 ܡܘܼܚܢܹܠܵܐ: ܘܐܘܼܦ ܬܸܡܠܵܐ ܢܲܦ̮ܫܝܼ ܠܕܵܪ̈ܬܹܐ ܕܡܵܪܝܵܐ: ܠܸܒܝܼ ܘܒܸܣܪܝܼ ܟܹܐ ܫܵܒܚܝܼ ܠܐܲܠܵܗܵܐ ܚܵܝܵܐ. 3 ܐܘܼܦ ܨܸܦܪܵܐ ܡܘܼܫ̄ܟ̰ܸܚܠܵܐ ܒܝܬܵܐ: ܘܣܢܘܼܢܝܼܬܵܐ ܩܸܢܵܐ ܩܵܬܘܼܗ̇: ܕܡܲܬܒ̣ܵܐ ܙܲܥܝܘܼ̈ܗ̇ܝ ܠܟܸܣ ܡܲܕܒܚܘܼ̈ܟ: ܡܵܪܝܵܐ ܨܒ̣ܵܐܘܼܬ: ܡܲܠܟܝܼ ܘܐܲܠܵܗܝܼ. 4 ܛܘܼܒ̣ܵܐ ܠܥܵܡܪ̈ܵܢܹܐ ܕܒܝܬܘܼܟ: ܡܸܕܪܹܐ ܒܸܕ ܫܵܒܚܝܼ ܠܘܼܟ. 5 ܛܘܼܒ̣ܵܐ ܠܗ̇ܘ ܐܢܵܫܵܐ ܕܚܲܝܠܹܗ ܒܝܼܘܼܟ ܝܼܠܹܐ: ܓ̰ܵܕܵܘܵܬܹ̈ܐ (ܕܨܸܗܝܘܿܢ)[76] ܒܠܸܒܵܝ. 6 ܥܵܒ̣ܪ̈ܵܢܹܐ ܒܪܵܘܘܿܠܵܐ ܕܒܟ̣ܵܬܵܐ: ܕܘܼܟܬܵܐ ܕܥܲܝܢܵܬܹ̈ܐ ܟܹܐ ܥܵܒ̣ܕܝܼ ܠܹܗ: ܐܘܼܦ ܒܘܼܪ̈ܟܵܬܹܐ ܟܹܐ ܩܵܛܘܵܐ ܡܸܛܪܵܐ[77] ܗܵܪܵܘܵܫ. 7 ܟܹܐ ܐܵܙܠ̄ܝܼ ܡ̣ܢ ܚܲܝܠܵܐ ܠܚܲܝܠܵܐ: ܟܹܐ ܦܵܝܸܫ ܚܸܙܝܵܐ ܠܐܲܠܵܗܵܐ ܓܵܘ ܨܸܗܝܘܿܢ. ܝܸܗܘܿܘܵܐ: ܐܲܠܵܗܵܐ ܨܒ̣ܵܐܘܼܬ: ܫܡܥܝܼ ܨܠܘܿܬܝܼ: ܗܲܒ̄ܠ ܢܵܬܵܐ: ܝܵܐ ܐܲܠܵܗܵܐ ܕܝܲܥܩܘܿܒ̣. 9 ܡܵܛܵܠܲܢ: ܐܲܠܵܗܵܐ: ܚܙܝܼ: ܘܚܘܼܪ ܠܦܵܬܵܐ ܕܡܫܝܼܚܘܼܟ. 10 ܣܲܒܲܒ ܨܦܵܝܝܼ ܝܠܹܐ ܚܵܕ̄ ܝܘܿܡܵܐ ܓܵܘ ܕܵܪ̈ܬܘܼܟ ܡ̣ܢ ܐܲܠܦܵܐ: ܓܘܼܒܹܠܝܼ ܠܸܗܘܵܝܵܐ ܒܣܩܘܼܦܬܵܐ ܓܵܘ ܒܲܝܬܹܗ ܕܐܲܠܵܗܝܼ: ܡ̣ܢ ܠܸܥܡܵܪܵܐ ܓܵܘ ܡܲܫܟܢܹ̈ܐ ܕܒܝܼܫܵܐ. 11 ܣܲܒܲܒ ܫܸܡܫܵܐ ܘܡܵܛܵܠܵܐ ܝܠܹܐ ܡܵܪܝܵܐ ܐܲܠܵܗܵܐ: ܫܵܦܵܩܲܬ ܘܐܝܼܩܵܪܵܐ ܒܸܕ ܝܵܗ̄ܒܸܠ ܡܵܪܝܵܐ: ܠܹܐ ܡܲܟܠܹܐ ܛܵܒ̣ܬܵܐ ܡ̣ܢ ܕܐܵܢܝܼ ܕܚܵܕܪܝܼ ܒܬܲܡܝܼܡܘܼܬܵܐ. 12 ܡܵܪܝܵܐ ܨܒ̣ܵܐܘܼܬ: ܛܘܼܒ̣ܵܐ ܠܐ̄ܢܵܫܵܐ ܕܣܵܒܸܪ ܒܝܼܘܼܟ.

 

ܡܙܡܘܪܐ: ܦܗ.

ܠܪܹܫܵܐ ܕܙܵܡܵܪܹ̈ܐ. ܠܒܢܘܼܢܹ̈ܐ ܕܩܘܿܪܚ ܡܲܙܡܘܿܪܵܐ.

1. ܒܣܸܡܠܵܐ ܠܘܼܟ: ܡܵܪܝܵܐ: ܒܐܲܪܥܘܼܟ: ܡܘܼܕܸܪܘܼܟ ܚܲܣܝܼܪܘܼܬܵܐ ܕܝܲܥܩܘܿܒ̣. 2 ܫܒܸܩܠܘܼܟ ܥܵܘܠܵܐ ܕܛܵܝܸܦܘܼܟ: ܟܘܣܹܠܘܿܟ ܟܠܵܗ̇ ܚܛܝܼܬܵܝ. 3 ܓ̰ܘܼܡܸܥܠܘܼܟ ܟܠܵܗ̇ ܡܚܘܼܬܘܼܟ: ܡܘܼܕܸܪܵܠܘܼܟ ܓܵܢܘܿܟ ܡ̣ܢ ܚܸܡܬܵܐ ܕܟܲܪܒܘܼܟ. 4 ܡܲܕܸܪܸ̈ܢ: ܐܲܠܵܗܵܐ ܕܦܘܼܪܩܵܢܲܢ: ܘܒܵܛܸܠ ܡܚܘܼܬܘܼܟ ܠܟܸܣܠܲܢ. 5 ܗܲܠ ܥܵܠܲܡ ܟܵܪܒܸܕ ܥܲܠܲܢ: ܡܲܓܪܸܫܬ ܚܸܡܬܘܼܟ ܠܕܵܘܪܵܐ ܘܕܵܘܪܵܐ: 6 ܐܲܢ̄ܬ ܠܹܐ ܕܵܝܪܸܬ ܡܲܚܸܬ ܠܲܢ: ܘܛܵܝܸܦܘܼܟ ܚܵܕܝܼ ܒܝܼܘܼܟ: 7 ܡܲܚܙܝܼ ܠܲܢ: ܡܵܪܝܵܐ: ܫܵܦܵܩܲܬܘܼܟ: ܘܦܘܼܪܩܵܢܘܼܟ ܝܵܗ̄ܒܸܕ ܠܲܢ. ܒܸܕ ܫܲܡܥܸܢ ܡܘܼܕܝܼ ܗܲܡܙܸܡ ܐܲܠܵܗܵܐ ܡܵܪܝܵܐ: ܣܲܒܲܒ ܕܒܸܕ ܗܲܡܙܸܡ ܫܠܵܡܵܐ ܥܲܡ ܛܵܝܸܦܹܗ: ܘܥܲܡ ܙܲܕܝܼܩܘܼ̈ܗܝ: ܘܠܵܐ ܕܵܝܪܝܼ ܠܐܲܗܡܲܩܘܼܬܵܐ. 9 ܗܲܪ ܩܘܼܪܒܵܐ ܝܠܹܐ ܠܙܸܕܥܝܘܼ̈ܗܝ ܦܘܼܪܩܵܢܹܗ: ܠܸܫܪܵܝܵܐ ܐܝܼܩܵܪܵܐ ܒܐܲܪܥܲܢ. 10 ܫܵܦܵܩܲܬ ܘܣܲܪܲܣܬܘܼܬܵܐ ܬܦܸܩܠܘܿܢ: ܙܲܕܝܼܩܘܼܬܵܐ ܘܫܠܵܡܵܐ ܢܫܸܩܠܘܿܢ. 11 ܣܲܪܲܣܬܘܼܬܵܐ ܡ̣ܢ ܐܲܪܥܵܐ ܟܹܐ ܡܲܓ̰ܝܸܢܵܐ: ܘܙܲܕܝܼܩܘܼܬܵܐ ܡ̣ܢ ܫܡܲܝܵܐ ܚܸܪܵܐ. 12 ܐܘܼܦ ܡܵܪܝܵܐ ܒܸܕ ܝܵܗ̄ܒܸܠ ܛܵܒ̣ܬܵܐ: ܘܐܲܪܥܲܢ ܒܸܕ ܝܵܗ̄ܒ̣ܵܐ ܡܲܗܨܘܼܠܘܗ̇. 13 ܙܲܕܝܼܩܘܼܬܵܐ ܩܵܕ̄ܡܘܼܗܝ ܒܸܕ ܐܵܙܵܠ̄ܐ: ܘܒܸܕ ܡܲܬܸܒ̣ ܠܐܘܼܪܚܵܐ ܦܵܣܘܿܥܝܵܬܘܼ̈ܗܝ.

 

ܡܙܡܘܪܐ: ܦܘ.

ܨܠܘܬܐ ܕܕܵܘܝܼܕ.

1. ܡܲܟܸܣ: ܡܵܪܝܵܐ: ܢܵܬܘܼܟ: ܓ̰ܲܘܸܒ ܠܝܼ: ܣܲܒܲܒ ܡܸܣܟܹܢܵܐ ܝܘܸܢ ܘܦܲܩܝܼܪ ܐܵܢܵܐ. 2 ܢܛܘܿܪ ܢܲܦ̮ܫܝܼ: ܣܲܒܲܒ ܕܟܫܝܼܛܵܐ ܝܘܸܢ ܐܵܢܵܐ. ܦܵܪܸܩ ܪܹܓܘܼܟ ܐܲܢ̄ܬ̇: ܝܵܐ ܐܲܠܵܗܝܼ: ܕܒܸܣܒܵܪܵܐ ܝܠܹܐ ܒܝܼܘܼܟ. 3 ܪܵܚܸܡ ܥܲܠܝܼ: ܡܵܪܝܵܐ: ܣܲܒܲܒ ܕܐܹܠܘܼܟ ܟܹܐ ܩܵܪܸܢ ܟܠܹܗ ܝܘܿܡܵܐ. 4 ܡܲܚܕܝܼ ܓܵܢܵܐ ܕܪܸܓܘܼܟ: ܣܲܒܲܒ ܕܐܸܠܘܼܟ: ܡܵܪܝܵܐ: ܢܲܦ̮ܫܝܼ ܡܵܪܘܿܡܹܐ ܝܘܸܢ. 5 ܣܲܒܲܒ ܕܐܲܢ̄ܬ: ܡܵܪܝܵܐ: ܛܵܒ̣ܵܐ ܝܘܸܬ: ܘܫܵܒ̣ܩܵܢܵܐ: ܘܪܵܒܵܐ ܒܫܵܦܵܩܲܬ: ܠܟܠܵܝ ܕܩܵܪܝܼ ܠܘܼܟ. 6 ܗܲܒ̄ܠ ܢܵܬܵܐ: ܡܵܪܝܵܐ: ܠܨܠܘܿܬܝܼ: ܘܡܲܨܝܸܬ ܠܩܵܠܵܐ ܕܢܵܘܢܵܝܵܬܝܼ̈. 7 ܒܝܘܿܡܵܐ ܕܥܹܩܘܘܼܝܼ ܒܸܕ ܩܵܪܸܢܘܼܟ: ܣܲܒܲܒ ܕܒܸܕ ܓ̰ܲܘܸܒܬ ܠܝܼ. 8 ܠܲܝܬ ܐܲܝܟ ܕܝܼܘܼܟ ܓܵܘ ܐܲܠܵܗܹ̈ܐ. ܡܵܪܝܵܐ: ܘܠܲܝܬ ܐܲܝܟ ܦܘܼܠܚܵܢܘܼ̈ܟ. 9 ܟܠܵܝ ܛܵܝܸܦܹ̈ܐ ܕܥܒܸܕܠܘܼܟ ܒܸܕ ܐܵܬܝܼ ܘܣܵܓ̣ܕܝܼ ܩܵܕ̄ܡܘܼܟ: ܡܵܪܝܵܐ: ܘܒܸܕ ܡܝܵܩܪܝܼ ܠܫܸܡܘܼܟ. 10 ܣܲܒܲܒ ܕܓܘܼܪܵܐ ܝܘܸܬ ܐܲܢ̄ܬ: ܘܥܵܒ̣ܕܵܢܵܐ ܕܥܵܓ̰ܒܘܼܝܵܬܹ̈ܐ: ܐܲܢ̄ܬ ܝܼܘܸܬ ܐܲܠܵܗܵܐ ܒܢܲܦ̮ܫܘܼܟ. 11 ܡܵܠܸܦ ܠܝܼ: ܡܵܪܝܵܐ: ܐܘܼܪܚܘܼܟ: ܒܸܕ ܚܵܕܪܸܢ ܒܣܲܪܲܣܬܘܼܬܵܐ: ܥܒ̣ܘܿܕ ܠܹܗ ܠܸܒܝܼ ܚܵܕ̄ ܠܸܙܕܲܥܝܵܐ ܡ̣ܢ ܫܸܡܘܼܟ. 12 ܒܸܕ ܫܵܟܪܸܢܘܼܟ: ܡܵܪܝܵܐ ܐܲܠܵܗܝܼ: ܒܟܠܹܗ ܠܸܒܝܼ: ܘܒܸܕ ܡܝܵܩܪܸܢ ܠܫܸܡܘܼܟ ܠܥܵܠܲܡ. 13 ܣܲܒܲܒ ܫܵܦܵܩܲܬܘܼܟ ܓܘܼܪܬܵܐ ܝܠܵܐ ܥܲܠܝܼ: ܘܦܘܼܨܹܠܘܼܟ ܢܲܦ̮ܫܝܼ ܡ̣ܢ ܫܝܘܿܠ ܬܲܚܬܵܝܬܵܐ. 14 ܝܵܐ ܐܲܠܵܗܵܐ: ܚܬܝܼܪܹ̈ܐ ܩܸܡܠܘܿܢ ܥܲܠܝܼ: ܘܓ̰ܵܡܵܥܲܬ ܕܙܲܪ̈ܒܵܢܹܐ ܛܸܥܠܘܿܢ ܠܢܲܦ̮ܫܝܼ: ܘܠܵܐ ܩܲܡ ܡܲܬܒ̣ܝܼ ܠܘܼܟ ܒܲܪܩܘܼܒ̣ܠܵܝ. 15 ܘܐܲܢ̄ܬ: ܡܵܪܝܵܐ: ܐܲܠܵܗܵܐ ܡܪܲܚܡܵܢܵܐ ܘܚܲܢܵܢܵܐ ܝܘܸܬ: ܝܵܪܝܼܟ̣ܬܵܐ ܒܸܢܹܗ: ܘܪܵܒܵܐ ܒܫܵܦܵܩܲܬ ܘܒܣܲܪܲܣܬܘܼܬܵܐ. 16 ܕܘܼܪ ܠܟܸܣܠܝܼ ܘܪܵܚܸܡ ܥܲܠܝܼ: ܞܲܒ̄ܠ ܙܲܪܒܘܼܟ ܠܪܹܓܘܼܟ: ܘܦܵܪܸܩ ܠܒܪܘܼܢܵܐ ܕܚܸܕܲܡܬܘܼܟ. 17 ܥܒ̣ܘܿܕ ܥܲܡܝܼ ܢܝܼܫܲܢܩܵܐ ܠܛܵܒ̣ܬܵܐ: ܘܚܵܙܝܼ ܣܵܢܝܵܢܝܼ̈ ܘܢܵܚܦܝܼ: ܣܲܒܲܒ ܕܐܲܢ̄ܬ̇: ܡܵܪܝܵܐ: ܗܘܼܝܸܪܸܢܘܼܟ: ܘܝܘܼܗܒܸܢܘܼܟ ܠܸܒܵܐ.

 

ܡܙܡܘܪܐ: ܦܙ.

ܠܒܢܘܼܢܹ̈ܐ ܕܩܘܿܪܚ ܡܲܙܡܘܿܪܵܐ: ܙܡܵܪܬܵܐ.

1. ܒܸܢܝܲܬܘܼܗܝ ܒܛܘܼܪܹ̈ܐ ܕܩܘܼܕܫܵܐ. 2 ܟܹܐ ܡܲܚܸܒ̣ ܡܵܪܝܵܐ ܕܲܪ̈ܘܵܙܹܐ ܕܨܹܗܝܘܿܢ ܒܘܼܫ ܡ̣ܢ ܟܠܵܝ ܡܵܫܸܟܢܹ̈ܐ ܕܝܲܥܩܘܿܒ̣. 3 ܚܲܒ̇ܪܹ̈ܐ ܡܝܘܼܩܪܹ̈ܐ ܗܘܼܡܸܙܡܹܐ ܝܢܵܐ ܒܘܼܬ ܕܝܼܵܟ̣ܝ: ܡܕܝܼܢ̄ܬܵܐ ܕܐܲܠܵܗܵܐ. 4 ܒܸܕ ܡܲܕܟܸܪܸܢ ܪܵܚܵܒ̣ ܘܒܵܒܹܠ ܓܵܘ ܝܲܕܥܵܢܝܼ̈: ܗܵܐ ܦܠܸܫܬ: ܘܨܘܿܪ: ܥܲܡ ܟܘܼܫ: ܐܵܗܵܐ ܦܸܫܠܹܐ ܝܠܝܼܕܵܐ ܬܵܡܵܐ. 5 ܘܠܨܸܗܝܘܿܢ ܒܸܕ ܦܵܝܸܫ ܐܡܝܼܪܵܐ: ܐܢܵܫܵܐ ܘܐܢܵܫܵܐ ܦܸܫܠܹܐ ܝܠܝܼܕܵܐ ܓܵܘܘܼܗ̇: ܘܗ̇ܘ ܥܸܠܵܝܵܐ: ܒܸܕ ܡܲܩܘܹܐ ܠܵܗ̇. 6 ܡܵܪܝܵܐ ܒܸܕ ܡܵܢܹܐ: ܐܝܼܡܲܢ ܕܟܵܬܸܒ̣ ܛܵܝܸܦܹ̈ܐ: ܐܵܗܵܐ ܦܸܫܠܹܐ ܝܠܝܼܕܵܐ ܬܵܡܵܐ. 7 ܙܵܡܵܪܹ̈ܐ ܥܲܡ ܡܘܼܣܝܼܩܘܿܪܹ̈ܐ: ܟܠܵܝ ܥܲܝܢܵܬܝܼ̈ ܓܵܘܵܟ̣ܝ ܝܢܵܐ.

 

ܡܙܡܘܪܐ: ܦܚ.

ܙܡܵܪܬܵܐ: ܡܲܙܡܘܿܪܵܐ ܠܒܢܘܼܢܹ̈ܐ ܕܩܘܿܪܚ: ܠܪܹܫܵܐ ܕܙܵܡܵܪܹ̈ܐ: ܥܲܠ ܡܲܚܠܸܬ ܠܥܲܢܘܿܬ. ܡܣܟ̇ܝܼܠ ܕܗܝܼܡܵܢ ܐܲܙܪܵܚܵܝܵܐ.

1. ܡܵܪܝܵܐ: ܐܲܠܵܗܵܐ ܕܦܘܼܪܩܵܢܝܼ: ܐܝܼܡܵܡܵܐ ܡܘܼܩܘܸܚܠܝܼ: ܘܒܠܲܝܠܹܐ: ܩܵܕ̄ܡܘܼܟ: 2 ܐܵܘܪܵܐ ܩܲܕ̄ܡܘܼܟ ܨܠܘܿܬܝܼ: ܡܵܟܸܦ ܢܵܬܘܼܟ ܠܡܲܩܘܿܚܬܝܼ: 3 ܣܲܒܲܒ ܕܣܒܸܥܠܵܐ ܒܒܝܼܫܵܬܹ̈ܐ ܢܲܦ̮ܫܝܼ: ܘܨܲܝܝܼ̈ ܠܫܝܘܿܠ ܡܛܸܠܘܿܢ. 4 ܦܸܫܠܝܼ ܚܘܼܫܒܸܢܵܐ ܥܲܡ ܨܵܠܝܵܢܹ̈ܐ ܕܓܘܼܒܵܐ: ܗ̄ܘܹܠܝܼ ܐܲܝܟ ܓܲܒ̣ܪܵܐ ܕܠܵܐ ܩܘܿܘܬ: 5 ܒܓܵܘܵܐ ܕܡܝܼܬܹ̈ܐ ܪܘܼܦܝܵܐ: ܐܲܝܟ ܩܛܝܼܠܹ̈ܐ: ܕܵܡܟ̣ܵܢܹ̈ܐ ܕܩܲܒ̣ܪܵܐ: ܕܠܵܐ ܕܟ̣ܝܼܪܵܝܠܘܼܟ ܐܚܹܪ̄ܢܵܐ: ܘܐܵܢܝܼ ܡ̣ܢ ܐܝܼܕܘܼܟ ܦܸܫܠܘܿܢ ܩܸܛܥܝܹܐ. 6 ܡܘܼܬܒܸܢܘܼܟ ܒܓܘܼܒܵܐ ܬܲܚܬܵܝܬܵܐ: ܒܕܘܼܟܵܢܹ̈ܐ ܚܸܫܟܵܢܹ̈ܐ: ܒܥܘܼܡܩܹ̈ܐ. 7 ܥܲܠܝܼ ܣܢܸܕܠܵܐ ܚܸܡܬܘܼܟ: ܘܒܟܠܵܝ ܠܲܦܘܼ̈ܟ ܡܘܼܠܸܨܠܘܼܟ (ܐܸܠܝܼ). 8 ܡܘܼܪܚܸܩܠܘܼܟ ܝܲܕܥܵܢܝܼ̈ ܡܸܢܝܼ: ܥܒ̣ܝܼܕܸܢܘܼܟ ܛܲܡܐܘܼܬܵܐ ܐܸܠܵܝ: ܡܘܼܟ̇ܠܝܼܵܐ ܝܘܸܢ ܘܠܹܐ ܦܵܠܛܸܢ. 9 ܥܲܝܢܝܼ ܦܫܸܪܵܐ ܡ̣ܢ ܐܘܼܠܨܵܢܵܐ: ܩܪܹܠܝܼ ܐܸܠܘܼܟ: ܡܵܪܝܵܐ: ܒܟܠ ܝܘܿܡܵܐ: ܦܘܼܫܸܛܠܝܼ ܠܟܸ̇ܣܠܘܼܟ ܐܝܼܕܵܬܝ̈. 10 ܗܵܐ: ܠܡܝܼܬܹ̈ܐ ܥܵܒ̣ܕܸܬ ܥܵܓ̰ܸܒܘܼܬܵܐ. ܝܼܢ ܥܵܡܪ̈ܵܢܹܐ ܕܫܝܘܿܠ ܩܵܝܡܝܼ ܫܵܟܪܝܼ ܠܘܼܟ. 11 ܦܵܝܫܵܐ ܗܘܼܩܝܼܬܵܐ ܒܩܲܒ̣ܪܵܐ ܫܵܦܵܩܲܬܘܼܟ: ܡܗܘܼܡܢܘܼܬܘܼܟ ܒܐܲܒ̣ܕܵܢܵܐ: 12 ܦܵܝܫܵܐ ܝܕܥܝܼܬܵܐ ܒܚܘܼܒ̣ܝܵܐ ܥܵܓ̰ܸܒܘܼܬܘܼܟ. ܘܙܲܕܝܼܩܘܼܬܘܼܟ ܒܐܲܪܥܵܐ ܕܢܫܵܝܬܵܐ. 13 ܘܐܵܢܵܐ ܠܟܸܣܠܘܼܟ: ܝܵܐ ܡܵܪܝܵܐ: ܡܘܼܩܘܸܚܠܝܼ: ܘܒܨܲܦܪܵܐ ܨܠܘܿܬܝܼ ܟܹܐ ܩܵܕܡܵܐ ܠܘܼܟ. 14 ܩܵܡܘܿܕܝܼ: ܡܵܪܝܵܐ: ܟ̰ܲܡܟ̰ܸܡܸܬ ܢܲܦ̮ܫܝܼ: ܛܵܫܸܬ ܦܵܬܘܼܟ ܡܸܢܝܼ: 15 ܡܘܼܠܝܸܨܵܐ ܝܘܸܢ ܐܵܢܵܐ ܘܒܸܦܠܵܛܵܐ ܢܲܦ̮ܫܝܼ ܡ̣ܢ ܝܠܘܼܬܵܐ: ܩܘܼܒܸܠܝܼ ܣܲܗܡܘܼܟ: ܦܸܫܠܝܼ ܚܒ̣ܝܼܛܵܐ. 16 ܥܲܠ ܥܒܸܪܘܿܢ ܟܲܪ̈ܒܘܼܟ: ܙܕܘܼܥܝܵܬܘܼ̈ܟ ܩܲܡ ܡܲܫܬܸܩܝܼ ܠܝܼ. 17 ܩܲܡ ܚܲܪܕܝܼ ܠܝܼ ܐܲܝܟ ܡ̈ܝܼܵܐ ܟܠܹܗ ܝܘܿܡܵܐ: ܚܕܸܪܘܿܢ ܥܲܠܝܼ ܡܥܘܼܕܵܠܹܐ. 18 ܡܘܼܪܚܸܩܠܘܼܟ ܡܸܢܝܼ ܡܲܚܸܒܵܢܵܐ ܘܕܵܘܣܬ: ܝܲܕܥܵܢܝܼ̈ ܒܚܘܼܒ̣ܝܵܐ (ܝܢܵܐ).

 

ܡܙܡܘܪܐ: ܦܛ.

ܡܲܣܟ̇ܝܼܠ ܕܐܝܼܬܵܢ ܐܲܙܪܵܚܵܝܵܐ.

1. ܫܵܦܵܩܲܬܘܵܬܹ̈ܐ ܕܡܵܪܝܵܐ ܠܥܵܠܲܡ ܒܸܕ ܙܵܡܪܸܢ: ܠܕܵܘܪܵܐ ܘܕܵܘܪܵܐ ܒܸܕ ܡܲܕܥܸܢ ܡܗܘܼܡܢܘܼܬܘܼܟ ܒܦܘܼܡܝܼ. 2 ܣܲܒܲܒ ܕܐܸܡܪܝܼ: ܠܥܵܠܲܡ ܫܵܦܵܩܲܬ ܒܸܕ ܦܵܝܫܵܐ ܒܢܝܼܬܵܐ: ܫܡܲܝܹ̈ܐ: ܒܸܕ ܡܲܩܘܸܬ ܡܗܘܼܡܢܘܼܬܘܼܟ ܓܵܘܵܝ. 3 ܩܛܸܥܠܝܼ ܩܵܘܠܵܐ ܠܓܘܼܒܝܼ: ܝܡܹܠܝܼ ܠܕܵܘܝܼܕ ܪܸܓܝܼ: 4 ܗܲܠ ܥܵܠܲܡ ܒܸܕ ܡܲܩܘܸܢ ܙܲܪܥܘܼܟ: ܘܒܸܕ ܒܵܢܸܢ ܠܕܵܘܪܵܐ ܘܕܵܘܪܵܐ ܟܘܼܪܣܝܘܼܟ. 5 ܘܒܸܕ ܫܵܟܪܝܼ ܫܡܲܝܹ̈ܐ ܥܵܓ̰ܸܒܘܼܬܘܼܟ: ܝܵܐ ܡܵܪܝܵܐ: ܐܘܼܦ ܡܗܘܼܡܢܘܼܬܘܼܟ ܒܟܸܢܫܵܐ ܕܩܲܕܝܼܫܹ̈ܐ. 6 ܣܲܒܲܒ ܡܲܢܝܼ ܒܫܡܲܝܵܐ ܗܵܘܹܐ ܒܵܪܒܵܪ ܠܡܵܪܝܵܐ ܡܲܢܝܼ ܕܵܡܹܐ ܠܡܵܪܝܵܐ ܓܵܘ ܒܢ̈ܝ ܐܲܠܵܗܹ̈ܐ. 7 ܐܲܠܵܗܵܐ ܣܲܗܡܵܢܵܐ ܝܠܹܐ ܓܵܘ ܓ̰ܵܡܵܥܲܬ ܕܩܲܕܝܼܫܹ̈ܐ: ܪܵܒܵܐ: ܘܡܲܙܕܸܥܝܵܢܵܐ ܥܲܠ ܟܠܵܝ ܚܵܕܸܪ̈ܘܵܢܹܗ. 8 ܡܵܪܝܵܐ ܐܲܠܵܗܵܐ ܨܒ̣ܵܐܘܼܬ: ܡܲܢܝܼ ܝܠܹܐ ܐܲܝܟ ܕܝܼܘܼܟ: ܚܲܝܠܬܵܢܵܐ: ܝܵܗ: ܘܲܡܗܘܼܡܢܘܼܬܘܼܟ ܚܵܕܸܪ̈ܘܵܢܘܼܟ. 9 ܐܲܢ̄ܬ ܗܵܟܘܿܡܹܐ ܝܘܸܬ ܥܲܠ ܪܵܡܘܼܬܵܐ ܕܝܵܡܵܐ: ܒܪܝܵܡܬܵܐ ܕܠܲܦܘܼ̈ܗ̇ ܐܲܢ̄ܬ ܟܹܐ ܡܲܫܬܸܩܸܬ ܠܗ̄ܘܿܢ. 10 ܐܲܢ̄ܬ ܛܒܸܚܠܘܼܟ ܐܲܝܟ ܩܛܝܼܠܵܐ ܪܵܚܵܒ̣: ܒܕܪܲܥܢܵܐ ܕܙܲܪܒܘܼܟ ܒܘܼܪܒܸܙܠܘܼܟ ܕܸܫܡܸܢܘܼ̈ܟ. 11 ܕܝܼܘܼܟ ܝܼܢܵܐ ܫܡܲܝܹ̈ܐ: ܐܘܼܦ ܕܝܼܘܼܟ ܝܼܠܵܐ ܐܲܪܥܵܐ: ܒܪܝܼܬܵܐ ܘܡܸܠܝܘܼܬܘܼܗ̇: ܐܲܢ̄ܬ ܫܘܼܬܸܐܣܵܝܠܘܼܟ. 12 ܓܲܪܒܝܵܐ ܘܬܲܝܡܢܵܐ: ܐܲܢ̄ܬ ܒܸܪܚܵܠܘܼܟ: ܬܵܒ̣ܘܿܪ ܘܚܸܪܡܘܿܢ ܒܫܸܡܘܼܟ ܟܹܐ ܚܵܕܝܼ. 13 ܕܝܼܘܼܟ ܝܼܠܹܐ ܕܪܲܥܢܵܐ ܥܲܡ ܓܲܢ̄ܒܵܪܘܼܬܵܐ: ܟܹܐ ܚܲܠܸܢܵܐ ܐܝܼܕܘܼܟ: ܟܹܐ ܪܵܝܡܵܐ ܝܲܡܝܼܢܘܼܟ. 14 ܙܲܕܝܼܩܘܼܬܵܐ[78] ܘܕܝܼܘܵܢ ܡܲܟܵܢ ܕܟܘܼܪܣܝܘܼܟ: ܫܵܦܵܩܲܬ ܘܣܲܪܲܣܬܘܼܬܵܐ ܟܹܐ ܩܵܕܡܝܼ ܦܵܬܘܼܟ. 15 ܛܘܼܒ̣ܵܐ ܠܛܵܝܸܦܵܐ ܕܝܲܕܥܝܼ ܩܲܘܲܚܬܵܐ ܕܚܲܕܘܼܬܵܐ: ܡܵܪܝܵܐ: ܒܒܲܗܪܵܐ ܕܦܵܬܘܼܟ ܟܹܐ ܚܵܕܪܝܼ. 16 ܒܫܸܡܘܼܟ ܟܹܐ ܦܵܨܚܝܼ ܟܠܹܗ ܝܘܿܡܵܐ. ܘܒܙܲܕܝܼܩܘܼܬܘܼܟ ܟܹܐ ܪܵܝܡܝܼ. 17 ܣܲܒܲܒ ܙܲܪܝܼܦܘܼܬܵܐ ܕܙܲܪܒܵܝ ܐܲܢ̄ܬ ܝܼܘܸܬ: ܘܒܪܸܙܵܝܘܼܟ ܒܸܕ ܪܵܝܡܵܐ ܩܵܪ̄ܢܲܢ. 18 ܣܲܒܲܒ ܕܠܡܵܪܝܵܐ ܝܠܵܐ ܡܵܛܵܠܲܢ: ܘܠܩܲܕܝܼܫܵܐ ܕܝܼܣܪܵܝܹܠ ܡܲܠܟܲܢ. 19 ܗ̇ܝܓܵܗ ܗܘܼܡܙܸܡܠܘܼܟ ܒܚܸܙܘܵܐ ܥܲܡ[79] ܙܲܕܝܼܩܘܼܟ: ܘܐܡܸܪܘܼܟ: ܡܘܼܬܸܒ̣ܠܝܼ ܗܲܝܲܪܬܵܐ ܥܲܠ ܓܲܢ̄ܒܵܪܵܐ: ܡܘܼܪܸܡܠܝܼ ܓܘܿܒ̇ܝܵܐ ܡ̣ܢ ܛܵܝܸܦܵܐ. 20 ܡܘܼܫ̄ܟ̰ܸܚܠܝܼ ܠܕܵܘܝܼܕ ܪܸܓܝܼ: ܒܡܸܫܚܵܐ ܕܩܘܼܕܫܝܼ ܩܲܡ ܡܵܫܚܸܢܹܗ: 21 ܕܐܝܼܕܝܼ ܒܸܕ ܩܵܘܝܵܐ ܥܲܡܹܗ: ܐܘܼܦ ܕܪܲܥܢܝܼ ܒܸܕ ܚܲܠܸܢܹܗ. 22 ܠܹܐ ܥܵܒܸܕ ܚܲܝܠܵܐ ܕܸܫܡܸܢ ܥܲܠܘܼܗܝ: ܘܒܪܘܼܢܵܐ ܕܥܵܘܠܵܐ ܠܑܹ ܡܲܠܝܸܨ ܠܹܗ. 23 ܘܒܸܕ ܛܵܪܦܸܢ ܠܐܲܪܥܵܐ ܡ̣ܢ ܩܵܕ̄ܡܘܼܗܝ ܕܸܫܡܸܢܘܼ̈ܗܝ: ܘܣܵܢܝܵܢܘܼ̈ܗܝ ܒܸܕ ܡܵܚܸܢ. 24 ܘܡܗܘܼܡܢܘܼܬܝܼ ܘܫܵܦܵܩܲܬܝܼ ܥܲܡܹܗ (ܒܬ ܗܵܘܝ): ܘܒܫܸܡܝܼ ܒܸܕ ܪܵܚܡܵܐ ܩܵܪ̄ܢܹܗ. 25 ܘܒܸܕ ܡܲܬܒܸܢ ܒܝܵܡܵܐ ܐܝܼܕܹܗ: ܘܒܢܲܗܪ̈ܵܘܵܬܹܐ ܝܲܡܝܼܢܹܗ. 26 ܗ̇ܘ ܒܸܕ ܩܵܪܹܐ ܠܝܼ: ܒܵܒܝܼ ܝܘܸܬ ܐܲܢ̄ܬ: ܐܲܠܵܗܝܼ: ܘܐܝܼܣܵܪܵܐ ܕܦܘܼܪܩܵܢܝܼ: 27 ܐܘܼܦ ܐܵܢܵܐ ܒܘܼܟ̣ܪܵܐ ܒܸܕ ܥܵܒ̣ܕܸܢܹܗ: ܥܸܠܵܝܵܐ ܥܲܠ ܡܲܠܟܹ̈ܐ ܕܐܲܪܥܵܐ. 28 ܠܥܵܠܲܡ ܒܸܕ ܢܵܛܪܸܢ ܩܵܐ ܕܝܹܗ ܫܵܦܵܩܲܬܝܼ: ܘܩܵܘܠܝܼ ܒܸܕ ܗܵܘܹܐ ܡܘܼܩܘܝܼܵܐ ܐܸܠܹܗ. 29 ܘܒܸܕ ܡܲܬܒܸܢ ܠܐܵܒܵܕ ܙܲܪܥܹܗ: ܘܟܘܼܪܣܝܹܗ ܐܲܝܟ ܝܘܿܡܵܢܹ̈ܐ ܕܫܡܲܝܵܐ. 30 ܐܸܢ ܫܵܒ̣ܩܝܼ ܒܢܘܼܢܘܼ̈ܗܝ ܢܵܡܘܿܣܝܼ: ܘܒܕܝܼܘܵܢܝܼ̈ ܠܵܐ ܚܵܕܪܝܼ: 31 ܐܸܢ ܩܵܢܘܿܢܝܼ̈ ܫܵܚܡܝܼ: ܘܦܘܼܩܕܵܢܝܼ̈ ܠܵܐ ܢܵܛܪܝܼ: 32 ܒܸܕ ܦܵܩܕܸܢ ܒܩܵܛܝܼܵܐ ܓܢܵܗܵܝ: ܘܒܡܲܚܘܵܬܹ̈ܐ ܥܵܘܠܵܝ. 33 ܘܫܵܦܵܩܲܬܝܼ ܠܹܐ ܩܵܛܥܸܢ ܡ̣ܢ ܠܟܸܣܠܹܗ:ܘܠܹܐ ܕܵܓܠܸܢ ܒܡܗܘܼܡܢܘܼܬܝܼ. 34 ܠܑܹ ܫܵܚܡܸܢ ܩܵܘܠܝܼ: ܘܡܸܢܕܝܼ ܕܦܠܸܛܠܹܐ ܡ̣ܢ ܣܸܦܘܵܬܝܼ̈ ܠܹܐ ܫܲܚܠܸܦܸܢ. 35 ܚܕܵܐ ܝܡܹܠܝܼ ܒܩܘܼܕܫܝܼ: ܐܸܢ ܠܕܵܘܝܼܕ ܕܵܓܠܸܢ: 36 ܙܲܪܥܹܗ ܠܥܵܠܲܡ ܒܸܕ ܗܵܘܹܐ: ܘܟܘܼܪܣܝܹܗ ܐܲܝܟ ܫܸܡܫܵܐ ܠܒܲܪܩܘܼܒ̣ܠܝܼ. 37 ܐܲܝܟ ܣܲܗܪܵܐ ܒܸܕ ܩܵܘܹܐ ܠܥܵܠܲܡ: ܘ (ܐܝܟ) ܣܵܗܕܵܐ ܒܫܡܲܝܵܐ ܡܗܘܼܡܢܵܐ. 38 ܘܐܲܢ̄ܬ ܪܘܼܦܹܠܘܼܟ ܘܡܘܼܣܠܹܠܘܼܟ: ܟܪܸܒܠܘܼܟ ܥܲܡ ܡܫܝܼܚܘܼܟ. 39 ܡܘܼܣܠܹܠܘܼܟ ܩܵܘܠܵܐ ܕܪܹܓܘܼܟ: ܫܚܸܡܠܘܼܟ ܠܐܲܪܥܵܐ ܒܸܢܦܵܪܘܼܗܝ. 40 ܬܪܸܥܠܘܼܟ ܟܠܵܝ ܣܝܵܓܘܼ̈ܗܝ: ܥܒܸܕܠܘܼܟ ܗܲܨܵܪ̈ܘܼܗܝ ܚܵܪܒܵܐ. 41 ܣܠܸܒܠܘܿܢ ܐܸܠܹܗ ܟܠܵܝ ܥܲܒ̣ܪ̈ܵܢܹܐ ܕܐܘܼܪܚܵܐ: ܗ̄ܘܹܠܹܐ ܠܵܘܡܵܐ ܠܫܒ̣ܵܒ̣ܘܼ̈ܗܝ. 42 ܡܘܼܪܸܡܠܘܼܟ ܝܲܡܝܼܢܵܐ ܕܡܲܠܸܨܵܢܘܼ̈ܗܝ: ܡܘܼܚܕܹܠܘܼܟ ܟܠܵܝ ܕܸܫܡܸܢܘܼ̈ܗܝ. 43 ܐܘܼܦ ܡܘܼܕܸܪܘܼܟ ܚܸܪܦܵܐ ܕܣܲܝܦܹܗ: ܘܠܵܐ ܩܲܡ ܡܲܩܸܡܸܬ ܠܹܗ ܒܦܠܵܫܵܐ. 44 ܡܘܼܟ̇ܠܹܠܘܼܟ ܡ̣ܢ ܫܵܘܩܹܗ: ܘܟܘܼܪܣܝܹܗ ܠܐܲܪܥܵܐ ܚܘܼܪܙܸܦܠܘܿܟ. 45 ܡܘܼܟܪܹܠܘܿܟ ܝܘܿܡܵܢܹ̈ܐ ܕܓ̰ܘܲܢܩܘܼܬܹܗ: ܡܘܼܟܸܣܠܘܼܟ ܥܲܠܘܼܗܝ ܢܚܸܦܬܵܐ. 46 ܗܲܠ ܐܝܼܡܲܢ: ܡܵܪܝܵܐ: ܛܵܫܸܬ ܓܵܢܘܼܟ ܠܐܵܒܵܕ: ܠܲܗ̄ܝܵܐ ܐܲܝܟ ܢܘܼܪܵܐ ܚܸܡܬܘܼܟ: 47 ܕܟ̣ܘܿܪ: ܐܵܢܵܐ: ܡܘܼܕܝܼ ܝܠܹܐ ܥܘܿܡܪܝܼ: ܒܘܼܬ ܡܘܼܕܝܼ ܗܵܒܵܣܘܼܬܵܐ ܒܪܹܠܘܿܟ ܟܠܵܝ ܒܢܲܝ̈ܢܵܫܵܐ: 48 ܡܲܢܝܼ ܝܠܹܐ ܓܲܒ̣ܪܵܐ ܕܚܲܝܹܐ: ܘܠܵܐ ܚܵܙܹܐ ܡܵܘܬܵܐ: ܕܚܵܠܸܨ ܓܵܢܹܗ ܡ̣ܢ ܐܝܼܕܵܐ ܕܫܝܘܿܠ: 49 ܐܲܝܟܵܐ ܝܢܵܐ ܫܵܦܵܩܲܬܘܵܬܘܼ̈ܟ ܩܲܕܝܼܡ̈ܝܹܐ: ܡܵܪܝܵܐ: ܕܝܡܹܠܘܼܟ ܠܕܵܘܝܼܕ ܒܡܗܘܼܡܢܘܼܬܘܼܟ: 50 ܕܟ̣ܘܿܪ: ܡܵܪܝܵܐ: ܠܵܘܡܵܐ ܕܪܹ̈ܓܵܘܵܬܘܼܟ: ܩܵܒܲܠܬܝܼ ܓܵܘ ܥܘܼܒܝܼ ܟܠܵܝ ܛܵܝܸܦܹ̈ܐ ܪܵܒܵܐ: 51 ܕܠܸܡܠܘܿܢ ܕܸܫܡܸܢܘܼ̈ܟ: ܡܵܪܝܵܐ: ܕܠܸܡܠܘܿܢ ܦܵܣܘܿܥܝܵܬܹ̈ܐ ܕܡܫܝܼܚܘܼܟ. 52 ܒܪܝܼܟ̣ܵܐ ܝܠܹܐ ܡܵܪܝܵܐ ܠܥܵܠܲܡ: ܐܵܡܹܝܢ: ܘܐܵܡܹܝܢ.

ܣܦܪܐ ܕܐܪܒܥܐ

 

ܡܙܡܘܪܐ: ܨ.

ܨܠܘܿܬܵܐ ܕܡܘܼܫܹܐ ܐܢܵܫܹܗ ܕܐܲܠܵܗܵܐ.

1. ܡܵܪܝܵܐ: ܒܹܝܬ ܡܲܥܡܪܵܐ ܐܲܢ̄ܬ̇ ܗ̄ܘܹܠܘܼܟ ܐܸܠܲܢ ܒܕܵܘܪܵܐ ܘܕܵܘܪܵܐ. 2 ܗܹܫ ܛܘܼܪܹ̈ܐ ܠܵܐ ܦܸܫܠܘܿܢ ܝܠܝܼܕܹܐ: ܘܬܘܼܪܨܹܠܘܿܟ ܐܲܪܥܵܐ ܘܒܪܝܼܬܵܐ: ܘܡ̣̤ ܥܵܠܲܡ ܗܲܠ ܥܵܠܲܡ ܐܲܢ̄ܬ ܝܼܘܸܬ ܐܲܠܵܗܵܐ. 3 ܟܹܐ ܡܲܕܸܪܸܬ ܐܢܵܫܵܐ ܗܲܠ ܕܲܩܕܲܩܬܵܐ: ܘܟܹܐ ܐܵܡܪܸܬ: ܕܘܼܪܘܿܢ: ܒܢܲܝ̈ܢܵܫܵܐ. 4 ܣܲܒܲܒ ܐܲܠܦܵܐ ܫܸܢܹ̈ܐ ܒܥܲܝܢܘܼ̈ܟ ܐܲܝܟ ܝܘܿܡܵܐ ܕܬܸܡܸܠ ܝܼܢܵܐ ܟܲܕ ܥܒܸܪܹܐ: ܘܒܲܕܠܵܐ ܒܠܲܝܠܹܐ. 5 ܫܘܼܦܢܵܝܠܘܼܟ (ܒܣܲܝܠ): ܫܸܢܬܵܐ ܗ̄ܘܹܠܘܿܢ: ܒܨܲܦܪܵܐ ܐܲܝܟ ܓܸܠܵܐ ܕܡܲܩܝܸܢ. 6 ܒܨܲܦܪܵܐ ܟܹܐ ܡܲܓ̰ܝܸܢ ܘܟܹܐ ܡܲܩܝܸܢ: ܒܪܲܡܫܵܐ ܟܹܐ ܦܵܝܸܫ ܩܸܛܥܝܵܐ ܘܟܹܐ ܒܵܪܸܙ. 7 ܣܲܒܲܒ ܕܬܸܡܠܲܢ ܒܟܲܪܒܘܼܟ: ܘܒܚܸܡܬܘܼܟ ܦܸܫܠܲܢ ܚܒ̣ܝܼܛܹܐ. 8 ܡܘܼܬܸܒ̣ܠܘܼܟ ܓܢܵܗܲܢ ܠܒܲܪܩܘܼܒ̣ܠܘܼܟ: ܛܸܫ̈ܝܲܢ ܒܒܲܗܪܵܐ ܕܦܵܬܘܼܟ.9 ܣܲܒܲܒ ܟܠܵܝ ܝܵܘ̈ܡܵܢܲܢ ܕܸܪܘܿܢ ܒܟܲܪܒܘܼܟ: ܬܘܼܡܸܡܠܲܢ ܫܸܢܲܢ ܐܲܝܟ ܓܲܡܓܲܡܬܵܐ. 10 ܝܘܿܡܵܢܹ̈ܐ ܕܫܸـ̈ـܢܲܢ: ܒܝܼܵܝ ܫܲܒ̣ܥܝܼ ܫܸܢܹ̈ܐ ܝܢܵܐ: ܘܐܸܢ ܒܓܲܢ̄ܒܵܪܘܼܬܵܐ: ܬܡܲܢܝܼ ܫܸܢܹ̈ܐ: ܐܝܼܢܵܐ ܫܬܲܒ̣ܗܪܵܢܘܼܬܵܝ ܓ̰ܵܦܵܐ ܘܕܲܪܕ: ܣܲܒܲܒ ܕܟܹܐ ܥܵܒ̣ܪܝܼ ܓ̰ܲܠܕܹܐ: ܘܟܹܐ ܦܵܪܚܵܚ. 11 ܡܲܢܝܼ ܟܹܐ ܝܲܕܸܥ ܙܲܪܒ ܕܚܸܡܬܘܼܟ: ܘܐܲܝܟ ܙܕܘܼܥܬܘܼܟ ܟܲܪܒܘܼܟ: 12 ܠܸܡܢܵܝܵܐ ܝ̈ܘܿܡܵܢܲܢ ܗܲܕܟ̣ܵܐ ܡܲܕܥܝܼ(ܠܲܢ): ܕܡܵܛܵܚ ܠܠܸܒܵܐ ܕܥܵܩܸܠܕܵܪܘܼܬܵܐ. 13 ܕܘܼܪ: ܡܵܪܝܵܐ: ܗܲܠ ܐܝܼܡܲܢ: ܘܦܫܘܿܡ ܥܲܠ ܪܹ̈ܓܵܘܵܬܘܼܟ. 14 ܡܲܣܒ̣ܥܝܼ ܠܲܢ ܒܨܲܦܪܵܐ ܫܵܦܵܩܲܬܘܼܟ: ܘܫܵܒܚܵܚ ܘܚܵܕܵܚ ܒܟܠܵܝ ܝܵܘ̈ܡܵܢܲܢ. 15 ܡܲܚܕܝܼ ܠܲܢ ܐܲܝܟ ܝܘܿܡܵܢܹ̈ܐ ܕܡܘܼܠܝܸܨܵܚܠܘܼܟ: ܫܸܢܹ̈ܐ ܕܚܙܹܠܲܢ ܒܝܼܫܬܵܐ. 16 ܦܵܝܸܫ ܚܸܙܝܵܐ ܠܪܹܓܵܘܵܬܘܼܟ ܦܘܼܠܚܵܢܘܼܟ: ܘܙܲܪܝܼܦܘܼܬܘܼܟ ܥܲܠ ܒܢܘܼܢܵܝ̈. 17 ܘܗܵܘܝܵܐ ܒܵܣܝܼܡܘܼܬܵܐ ܕܡܵܪܝܵܐ ܐܲܠܵܗܲܢ ܥܲܠܲܢ: ܘܦܘܼܠܚܵܢܵܐ ܕܐܝܼ̈ܕܵܬܲܢ ܡܲܩܘܝܼ ܥܲܠܲܢ: ܘܦܘܼܠܚܵܢܵܐ ܕܐܝܼ̈ܕܵܬܲܢ ܡܲܩܘܝܼ ܠܹܗ.

 

ܡܙܡܘܪܐ: ܨܐ.

1. ܗ̇ܘ ܕܝܵܬܸܒ̣ ܒܣܸܬܵܪܵܐ ܕܥܸܠܵܝܵܐ: ܒܛܸܠܵܢܝܼܬܵܐ ܕܡܹܨܐ ܟܠ ܒܸܕ ܥܲܪܩܸܠ. 2[80] ܒܸܕ ܐܵܡܸܪ ܒܘܼܢ ܡܵܪܝܵܐ: ܒܹܝܬ ܓܵܘܣܝܼ ܘܗܲܨܵܪܝܼ: ܐܲܠܵܗܝܼ: ܒܸܕ ܣܵܒܪܸܢ ܒܝܹܗ. 3 ܣܲܒܲܒ ܕܗ̇ܘ ܒܸܕ ܦܵܨܹܐ ܠܘܼܟ ܡ̣ܢ ܢܸܫܒ̣ܵܐ ܕܨܲܝܕܵܐ: ܡ̣ܢ ܡܵܘܬܵܢܵܐ ܕܒ̈ܠܹܐ. 4 ܒܦܲܪ̈ܘܼܗܝ ܒܸܕ ܟܵܣܹܐ ܠܘܼܟ: ܘܬܚܘܿܬ ܓܘܼܠܦܵܢܘܼ̈ܗܝ ܒܸܕ ܥܵܪܩܸܬ: ܩܲܠܚܵܢ ܝܼܠܵܐ ܘܡܵܛܵܠܵܐ ܣܲܪܲܣܬܘܼܬܹܗ. 5 ܠܹܐ ܙܵܕܥܸܬ ܡ̣ܢ ܙܕܘܼܥܬܵܐ ܕܠܲܝܠܹܐ: ܡ̣ܢ ܓܹܐܪܵܐ ܕܦܵܪܸܚ ܒܐܝܼܡܵܡܵܐ: 6 ܡ̣ܢ ܡܵܘܬܵܢܵܐ ܕܒܚܸܫܟܵܐܪ ܟܹܐ ܚܵܕܸܪ: ܡ̣ܢ ܦܘܼܢܵܝܢܵܐ ܕܬܵܠܸܩ[81] ܒܛܲܗܪܵܐ. 7 ܟܲܕ ܢܵܦܠܝܼ ܡ̣ܢ ܕܸܦܢܘܼܟ ܐܲܠܦܵܐ: ܘܪܸܒܘܼܬܵܐ ܡ̣ܢ ܝܲܡܝܼܢܘܼܟ: ܠܟܸܣܠܘܼܟ ܠܹܐ ܩܲܪܒܸܢ. 8 ܐܲܚܟ̰ܝܼ ܒܥܲܝܢܘܼ̈ܟ ܒܸܕ ܚܵܝܪܸܬ: ܘܦܘܼܪܥܵܢܵܐ ܕܒܝܼܫܹ̈ܐ ܒܸܕ ܚܵܙܸܬ. 9 ܣܲܒܲܒ ܕܐܲܢ̄ܬ ܝܼܘܸܬ: ܡܵܪܝܵܐ: ܒܹܝܬ ܓܵܘܣܝܼ: ܥܸܠܵܝܵܐ ܡܘܼܬܸܒ̣ܠܘܼܟ ܡܲܣܟܵܢܘܼܟ. 10 ܠܹܐ ܬܵܦܩܵܐ ܒܝܼܘܼܟ ܒܝܼܫܬܵܐ: ܘܡܚܘܿܬܵܐ ܠܹܐ ܩܲܪܒܸܢܵܐ ܠܡܲܫܟܢܘܼܟ. 11 ܣܲܒܲܒ ܕܡܲܠܲܐܟ̣ܘܼ̈ܗܝ ܒܸܕ ܦܵܩܸܕ ܒܘܼܬ ܕܝܼܘܼܟ: ܕܢܵܛܪܝܼ ܠܘܼܟ ܒܟܠܵܝ ܐܘܼܪ̈ܚܵܬܘܼܟ. 12 ܥܲܠ ܐܝܼܕܵܬܹ̈ܐ ܒܸܕ ܫܵܩܠܝܼ ܠܘܼܟ: ܕܠܵܐ ܡܵܚܸܬ ܒܟܹܐܦܵܐ ܐܲܩܠܘܼܟ. 13 ܥܲܠ ܐܲܪܝܵܐ ܘܦܲܬܝܵܐ ܒܸܕ ܦܲܣܥܸܬ: ܒܸܕ ܕܲܫܕܸܫܸܬ ܓܘܼܪܝܵܐ ܕܐܲܪܝܵܐ ܘܬܵܢܝܼܢܵܐ. 14 ܣܲܒܲܒ ܕܐܸܠܝܼ ܬܒܸܥܠܹܐ: ܒܸܕ ܦܵܨܸܢܹܗ: ܒܸܕ ܡܵܪܡܸܢܹܗ: ܣܲܒܲܒ ܕܝܕܥܸܠܹܐ ܫܸܡܝܼ. 15 ܒܸܕ ܩܵܪܹܐ ܠܝܼ ܘܒܸܕ ܓ̰ܲܘܸܒܸܢܹܗ: ܥܲܡܹܗ ܝܘܸܢ ܐܵܢܵܐ ܒܥܹܩܘܝܼ: ܒܸܕ ܚܵܠܨܸܢܹܗ ܘܡܝܵܩܪܸܢܹܗ. 16 ܝܘܼܪܟ̣ܵܐ ܕܝܘܿܡܵܢܹ̈ܐ ܒܸܕ ܡܲܣܒܸܥܢܹܗ: ܘܒܸܕ ܡܲܚܙܸܢ ܐܸܠܹܗ ܦܘܼܪܩܵܢܝܼ.

 

ܡܙܡܘܪܐ: ܨܒ.

ܡܲܙܡܘܿܪܵܐ: ܙܡܵܪܬܵܐ ܩܵܐ ܝܘܿܡܵܐ ܕܫܲܒܵܬ.

1. ܨܦܵܝܝܼ ܝܠܵܐ ܠܫܵܟܘܿܪܹܐ ܠܡܵܪܝܵܐ: ܘܠܸܙܡܵܪܵܐ ܠܫܸܡܘܼܟ: ܥܸܠܵܝܵܐ. 2 ܠܡܲܕܘܼܥܝܹܐ ܒܨܲܦܪܵܐ ܫܵܦܵܩܲܬܘܼܟ: ܘܡܗܘܼܡܢܘܼܬܘܼܟ ܒܠܲܝܠܵܘܵܬܹ̈ܐ: 3 ܥܲܠ (ܣܵܐܙ) ܕܥܸܣܪܵܐ ܣܹܐܡܹ̈ܐ: ܘܥܲܠ ܩܝܼܬܵܪܵܐ: ܥܲܠ ܗܓܵܝܘܿܢ ܒܟܸܢܵܪܵܐ. 4 ܣܲܒܲܒ ܕܡܘܼܚܟ̣ܕܝܼܢܘܼܟ: ܡܵܪܝܵܐ: ܒܦܘܼܠܚܵܢܘܼܟ: ܒܦܘܼܠܚܵܢܹ̈ܐ ܕܐܝܼܕܵܬܘܼ̈ܟ ܒܸܕ ܫܵܒܚܸܢ. 5 ܟܡܵܐ ܓܘܸܪܘܿܢ ܦܘܼܠܚܵܢܘܼ̈ܟ: ܡܵܪܝܵܐ! ܪܵܒܵܐ ܥܲܡܩܘܼ ܝܢܵܐ ܚܘܼܫܵܒ̣ܘܼ̈ܟ. 6 ܐܢܵܫܵܐ ܐܲܗܡܲܩ ܠܹܐ ܝܲܕܸܥ: ܘܢܲܙܵܢ ܠܹܐ ܦܲܪܡܹܐ ܐܵܗܵܐ. 7 ܐܝܼܡܲܢ ܕܒܲܪܛܸܢܝܼ ܒܝܼܫܹ̈ܐ ܐܝܟ ܓܸܠܵܐ: ܘܦܵܩܚܝܼ ܟܠܵܝ ܦܵܠܚܵܢܹ̈ܐ ܕܥܵܘܠܵܐ: ( ܐܵܗܵܐ ܝܠܵܐ): ܩܵܐ ܕܦܵܝܫܝܼ ܬܘܼܠܩܹܐ ܗܲܠ ܐܵܒܵܕ. 8 ܘܐܲܢ̄ܬ ܪܵܡܵܐ ܝܘܸܬ ܠܥܵܠܲܡ: ܡܵܪܝܵܐ. 9 ܣܲܒܲܒ: ܗܵܐ: ܕܸܫܡܸܢܘܼ̈ܟ: ܡܵܪܝܵܐ: ܣܲܒܲܒ: ܗܵܐ: ܕܸܫܡܸܢܘܼ̈ܟ ܒܸܕ ܬܵܠܩܝܼ: ܒܸܕ ܦܵܝܫܝܼ ܒܘܼܪܒܸܙܹܐ ܟܠܵܝ ܦܵܠܚܵܢܹ̈ܐ ܕܥܵܘܠܵܐ. 10 ܘܡܘܼܪܸܡܠܘܼܟ ܐܲܝܟ ܪܲܝܡܵܐ ܩܵܕ̄ܢܝܼ: ܦܸܫܠܝܼ ܡܫܝܼܚܵܐ ܒܡܸܫܚܵܐ ܬܵܙܵܐ. 11 ܘܚܙܹܠܵܐ ܥܲܝܢܝܼ ܒܕܸܫܡܸܢܝܼ̈: ܩܵܝܡܵܢܹ̈ܐ ܥܲܠܝܼ: ܥܵܒ̣ܕܵܢܹ̈ܐ ܕܒܝܼܫܬܵܐ: ܫܡܸܥܠܘܿܢ ܢܵܬܝܵܬܝܼ̈. 12 ܙܲܕܝܼܩܵܐ ܐܲܝܟ ܐܝܼܠܵܢܵܐ ܕܚܘܼܪܡܵܐ ܒܸܕ ܒܲܪܛܸܢ: ܐܲܝܟ ܐܲܪܙܵܐ ܓܵܘ ܠܸܒ̣ܢܵܢ ܒܸܕ ܓܲܪܘܸܣ. 13 ܐܵܢܝܼ ܕܝܼܢܵܐ ܫܬܝܼܠܹܐ ܒܒܲܝܬܵܐ ܕܡܵܪܝܵܐ: ܒܕܵܪ̈ܬܹܐ ܕܐܲܠܵܗܲܢ ܒܸܕ ܒܲܪܛܸܢܝܼ. 14 ܡܸܕܪܹܐ ܒܸܕ ܡܲܝܬ̄ܝܝܼ ܛܥܘܼܢܬܵܐ ܒܣܲܝܒܘܼܬܵܐ: ܛܪ̈ܝܼܨܹܐ ܘܬܵܙܹ̈ܐ ܒܸܕ ܗܵܘܝܼ: 15 ܠܡܲܕܘܼܥܝܹܐ ܕܫܲܪܝܼܪܵܐ ܝܠܹܐ ܡܵܪܝܵܐ: ܩܵܝܝܼ: ܘܠܲܝܬ ܥܵܘܠܵܐ ܒܝܹܗ.

 

ܡܙܡܘܪܐ: ܨܓ.

1. ܡܵܪܝܵܐ ܒܸܥܒ̣ܵܕܵܐ ܝܠܹܐ ܡܲܠܟܘܼܬܵܐ: ܙܲܪܝܼܦܘܼܬܵܐ ܠܒ̣ܝܼܫܵܐ ܝܠܹܐ: ܠܒ̣ܝܼܫܵܐ ܝܠܹܐ ܡܵܪܝܵܐ ܙܲܪܒ: ܚܠܝܼܨܵܐ ܝܠܹܐ ܓܵܢܘܼܗܝ: ܐܘܼܦ ܡܘܼܩܘܝܼܬܵܐ ܝܠܵܐ ܒܪܝܼܬܵܐ: ܕܠܵܐ ܫܵܥܫܵܐ. 2 ܡܘܼܩܘܝܼܵܐ ܝܠܹܐ ܬܪܘܿܢܘܿܣܘܼܟ ܡ̣ܢ ܗ̇ܝܓܵܗ: ܡ̣ܢ ܥܵܠܲܡ ܐܲܢ̄ܬ̇ ܝܼܘܸܬ. 3 ܡܘܼܪܸܡܠܘܿܢ ܢܲܗܪ̈ܵܘܵܬܹܐ: ܡܵܪܝܵܐ: ܡܘܼܪܸܡܠܘܿܢ ܢܲܗܪ̈ܵܘܵܬܹܐ ܩܵܠܵܝ: ܟܹܐ ܡܵܪܡܝܼ ܢܲܗܪ̈ܵܘܵܬܹܐ ܒܲܪܒܲܥܪܬܵܝ. 4 ܡ̣ܢ ܩܵܠܹ̈ܐ ܕܡ̈ܝܼܵܐ ܪܵܒܵܐ. ܙܲܪܒܵܢܹܐ: ܠܲܦܹ̈ܐ ܕܝܵܡܵܐ: ܒܘܼܫ ܙܲܪܒܵܢܵܐ ܝܠܹܐ ܒܡܪܵܘܡܵܐ ܡܵܪܝܵܐ. 5 ܣܲܗܕܘܵܬܘܼ̈ܟ ܫܲܪܝܼܪܹ̈ܐ ܪܵܒܵܐ: ܠܒܲܝܬܘܼܟ ܟܹܐ ܠܵܚܡܵܐ ܩܲܕܝܼܫܘܼܬܵܐ: ܝܵܐ ܡܵܪܝܵܐ: ܠܝܘܼܪܟ̣ܵܐ ܕܝܘܿܡܵܢܹ̈ܐ.

 

ܡܙܡܘܪܐ: ܨܕ.

1. ܝܵܐ ܐܲܠܵܗܵܐ ܕܬܘܼܥ̈ܠܹܐ: ܡܵܪܝܵܐ: ܝܵܐ ܐܲܠܵܗܵܐ ܕܬܘܼܥ̈ܠܹܐ: ܠܲܓ̰ܠܸܓ̰. 2 ܦܘܼܫ ܪܝܼܡܵܐ: ܝܵܐ ܕܲܝܵܢܵܐ ܕܐܲܪ̈ܥܵܐ: ܡܲܕܸܪ ܦܘܼܪܥܵܢܵܐ ܥܲܠ ܚܬܝܼܪܹ̈ܐ. 3 ܗܲܠ ܐܝܼܡܲܢ ܒܝܼܫܹ̈ܐ: ܡܵܪܝܵܐ: ܗܲܠ ܐܝܼܡܲܢ ܒܝܼܫܹ̈ܐ ܦܵܨܚܝܼ: 4 ܟܹܐ ܓܲܒܓܸܒܝܼ: ܗܲܡܙܸܡܝܼ ܒܝܼܫܘܼܬܵܐ: ܟܹܐ ܚܵܬܪܝܼ ܒܓܵܢܵܝ ܟܠܵܝ ܦܵܠܚܵܢܹ̈ܐ ܕܥܵܘܠܵܐ. 5 ܠܛܵܝܸܦܘܼܟ: ܡܵܪܝܵܐ: ܟܹܐ ܕܲܩܕܸܩܝܼ: ܘܝܵܪܬܘܼܬܘܼܟ ܡܲܠܝܸܨܝܼ. 6 ܐܲܪܡܸܠܬܵܐ ܘܡܵܫܵܚܲܛ ܟܹܐ ܩܵܛܠܝܼ: ܘܝܵܬܘܿܡܹ̈ܐ ܡܲܡܝܸܬܝܼ. 7 ܘܟܹܐ ܐܵܡܪܝܪ: ܠܹܐ ܚܵܙܹܐ ܡܵܪܝܵܐ: ܘܠܹܐ ܦܲܪܡܹܐ ܐܲܠܵܗܵܐ ܕܝܲܥܩܘܿܒ̣. 8 ܦܲܪܡܹܡܘܿܢ: ܝܵܐ ܐܲܗܡܲܩܹ̈ܐ ܓܵܘ ܛܵܝܸܦܵܐ: ܘܢܲܙܢܹ̈ܐ: ܐܝܼܡܲܢ ܒܸܕ ܗܵܘܝܼܬܘܿܢ ܗܵܘܢܵܢܹ̈ܐ: 9 ܗ̇ܘ ܕܢܵܨܸܒ̣ ܢܵܬܵܐ: ܠܹܐ ܫܲܡܸܥ: ܝܲܢ ܗ̇ܘ ܕܓܵܒܸܠ ܥܲܝܢܵܐ: ܗܵܐ: ܠܹܐ ܚܵܙܹܐ: 10 ܗ̇ܘ ܕܟܹܐ ܬܲܥܠܸܡ ܛܵܝܸܦܹ̈ܐ: ܠܹܐ ܡܲܢܟܸܣ: ܕܟܹܐ ܡܵܠܸܦ ܠܒܲܪܢܵܫܵܐ ܝܕܼܥܬܵܐ: 11 ܡܵܪܝܵܐ ܟܹܐ ܝܲܕܸܥ ܚܘܼܫܵܒܹ̈ܐ ܕܐܢܵܫܵܐ: [82] ܕܗܵܒܵܣ ܝܼܢܵܐ. 12 ܛܘܼܒ̣ܵܐ ܠܓܲܒ̣ܪܵܐ ܕܬܲܥܠܡܸܬ ܠܹܗ: ܡܵܪܝܵܐ: ܘܡ̣ܢ ܢܵܡܘܿܣܘܼܟ ܡܵܠܦܸܬ ܠܹܗ. 13 ܠܡܲܢܝܘܼܚܹܗ ܡ̣ܢ ܝܘܿܡܵܢܹ̈ܐ ܕܒܝܼܫܬܵܐ: ܗܲܠ ܕܦܵܝܫܵܐ ܚܦܝܼܪܬܵܐ ܩܵܐ ܒܝܼܫܵܐ ܓܘܼܒܵܐ. 14 ܣܲܒܲܒ ܕܠܹܐ ܪܲܦܹܐ ܡܵܪܝܵܐ ܛܵܝܸܦܹܗ: ܘܝܵܪܬܘܼܬܹܗ ܠܹܐ ܫܵܒܸܩ. 15 ܣܲܒܲܒ ܕܗܲܠ ܙܲܕܝܼܩܘܼܬܵܐ ܒܸܕ ܕܵܝܪܵܐ ܕܝܼܘܵܢ: ܘܒܵܬ̄ܪܘܼܗ̇ ܟܠܵܝ ܬܪ̈ܘܼܨܹܐ ܒܠܸܒܵܐ. 16 ܡܲܢܝܼ ܩܵܝܸܡ ܥܲܡ ܥܵܒ̣ܕܵܢܹ̈ܐ ܕܒܝܼܫܬܵܐ: ܡܲܢܝܼ ܟܵܠܹܐ ܩܵܬܝܼ ܥܲܡ ܦܵܠܚܵܢܹ̈ܐ ܕܥܵܘܠܵܐ: 17 ܐܸܢ ܠܵܐ ܗܵܘܹܐ ܗ̄ܘ̣ܵܐ ܡܵܪܝܵܐ ܗܲܝܲܪܬܵܐ ܐܸܠܝܼ: ܒܵܬ̄ܪ ܚܲܟ̰ܵܐ ܒܸܕ ܫܵܪܝܵܐ ܗ̄ܘ̣ܵܐ ܒܫܬܵܩܬܵܐ ܢܲܦ̮ܫܝܼ. 18 ܐܸܢ ܐܡܸܪܝܼ: ܓ̰ܪܸܛܠܵܐ ܐܲܩܠܝܼ: ܫܵܦܵܩܲܬܘܼܟ: ܡܵܪܝܵܐ: ܣܢܝܼܕܢܵܐ. 19 ܒܒܘܼܫܵܝܝܼ ܕܚܘܼܫܵܒܲܝ̈ ܒܓܵܘܝܼ: ܝܵܗ̄ܒܲܠܝܵܬܘܼ̈ܟ ܕܠܸܒܵܐ ܟܹܐ ܡܲܚܕܝܼ ܢܲܦ̮ܫܝܼ. 20 ܗܵܐ: ܒܸܕ ܥܵܒܸܕ ܚܲܒ̣ܪܵܘܵܝܘܼܬܵܐ ܥܲܡܘܼܟ ܟܘܼܪܣܝܵܐ ܕܒܝܼܫܘܼܬܵܐ: ܕܟܹܐ ܓܵܒܸܠ ܥܵܘܠܵܐ ܒܩܵܢܘܿܢܵܐ: 21 ܟܹܐ ܬܲܪܥܝܼ ܥܲܠ ܓܵܢܵܐ ܕܙܲܕܝܼܩܵܐ: ܘܕܸܡܵܐ ܙܲܟܵܝܵܐ ܟܹܐ ܥܵܒ̣ܕܝܼ ܓܘܼܢܵܗܟܵܪ. 22 ܘܗ̄ܘܹܠܹܐ ܡܵܪܝܵܐ ܐܸܠܝܼ ܒܘܼܪܓ̰ܵܐ ܪܵܡܵܐ: ܘܐܲܠܵܗܝܼ ܐܝܼܣܵܪܵܐ ܕܒܹܝܬ ܓܵܘܣܝܼ. 23 ܘܒܸܕ ܡܲܕܸܪ ܥܲܠܵܝ ܥܵܘܠܵܝ: ܘܒܒܝܼܫܘܼܬܵܝ ܒܸܕ ܬܵܠܸܩ ܠܗ̄ܘܿܢ: ܒܸܕ ܬܵܠܸܩ ܠܗ̄ܘܿܢ ܡܵܪܝܵܐ ܐܲܠܵܗܲܢ.

 

ܡܙܡܘܪܐ: ܨܗ.

1. ܬܹܡܘܿܢ ܫܵܒܚܵܚ ܠܡܵܪܝܵܐ: ܩܲܘܸܚܵܚ ܠܐܝܼܣܵܪܵܐ ܕܦܘܼܪܩܵܢܲܢ. 2 ܩܵܕܡܵܚ ܠܵܗ̇ ܦܵܬ̣ܘܼܗܝ ܒܫܵܟܲܪܬܵܐ: ܒܙܡܵܪ̈ܝܵܬܹܐ ܩܵܘܸܚܵܚ ܐܸܠܹܗ. 3 ܣܲܒܲܒ ܐܲܠܵܗܵܐ ܓܘܼܪܵܐ ܝܠܹܐ ܝܹܗܘܿܘܵܐ: ܘܡܲܠܟܵܐ ܓܘܼܪܵܐ ܥܲܠ ܟܠܵܝ ܐܲܠܵܗܹ̈ܐ: 4 ܕܒܐܝܼܕܹܗ ܝܢܵܐ ܥܘܼܡܩܹ̈ܐ ܕܐܲܪܥܵܐ: ܘܪܵܘܡܹܐ ܕܛܘܼܪ̈ܵܢܹܐ ܕܝܹܗ ܝܢܵܐ. 5 ܕܝܹܗ ܝܠܵܐ ܝܵܡܵܐ: ܘܗ̇ܘ ܥܒ̣ܝܼܕܵܠܹܐ: ܘܒܸܪܙܵܐ ܐܝܼܕܵܬܘܼ̈ܗܝ ܓܒܸܠܘܿܢ. 6 ܬܹܡܘܿܢ: ܣܵܓ̣ܕܵܚ ܘܟܵܝܦܵܚ: ܒܵܪܟܵܚ ܩܵܕ̄ܡ ܡܵܪܝܵܐ ܒܵܪܝܵܢܲܢ: 7 ܣܲܒܲܒ ܗ̇ܘ ܝܼܠܹܐ ܐܲܠܵܗܲܢ: ܘܐܲܚܢܲܢ ܛܵܝܸܦܵܐ ܕܡܲܪܥܝܼܬܹܗ: ܘܥܸܪ̈ܒܹܐ ܕܐܝܼܕܹܗ. ܐܸܕܝܘܼ: ܐܸܢ ܒܩܵܠܘܼܗܝ ܫܲܡܥܝܼܬܘܿܢ: 8 ܠܵܐ ܡܲܩܫܝܼܬܘܿܢ ܠܸܒܵܘܟ̣ܘܿܢ: ܐܲܝܟ ܓܵܘ ܡܪܝܼܒ̣ܵܐ: ܐܲܝܟ ܝܘܿܡܵܐ ܕܡܲܣܵܐ ܓܵܘ ܒܲܪܝܼܵܐ: 9 ܕܓ̰ܘܼܪܒܸܢܘܿܢ ܒܵܒܵܘܵܬܵܘ̈ܟ̣ܘܿܢ: ܨܘܼܚܨܝܼܢܘܿܢ: ܐܘܼܦ ܚܙܹܠܘܿܢ ܦܘܼܠܚܵܢܝܼ. 10 ܐܲܪܒܥܝܼ ܫܸܢܹ̈ܐ ܣܩܸܕܠܝܼ ܒܗ̇ܘ ܕܵܘܪܵܐ: ܘܐܡܸܪܝܼ: ܛܵܝܸܦܵܐ ܚܵܠܛܵܢܵܐ ܒܠܸܒܵܐ: ܘܐܵܢܝܼ ܠܵܐ ܝܕܸܥܠܘܿܢ ܐܘܼܪ̈ܚܵܬܝܼ: 11 ܕܝܡܹܠܝܼ ܒܟܲܪܒܝܼ: ܐܸܢ ܐܵܘܪܝܼ ܠܢܚܵܝܬܝܼ.

 

ܡܙܡܘܪܐ: ܨܘ.

1. ܙܡܘܿܪܘܿܢ ܠܡܵܪܝܵܐ ܙܡܵܪܬܵܐ ܚܲܕܬܵܐ: ܙܡܘܿܪܘܿܢ ܠܡܵܪܝܵܐ ܟܠܵܗ̇ ܐܲܪܥܵܐ. 2 ܙܡܘܿܪܘܿܢ ܠܡܵܪܝܵܐ: ܒܵܪܟ̣ܘܿܢ ܠܫܸܡܹܗ: ܡܲܫܚܸܕܘܿܢ ܡ̣ܢ ܝܘܿܡܵܐ ܠܝܘܿܡܵܐ ܦܘܼܪܩܵܢܘܼܗܝ. 3 ܗܵܩܹܡܘܿܢ ܓܵܘ ܡܸܠܲܬܹ̈ܐ ܐܝܼܩܵܪܘܼܗܝ: ܓܵܘ ܟܠܵܝ ܛܵܝܸܦܹ̈ܐ ܥܵܓ̰ܸܒܘܼܝܵܬܘܼ̈ܗܝ. 4 ܣܲܒܲܒ ܓܘܼܪܵܐ ܝܠܹܐ ܡܵܪܝܵܐ ܘܡܫܘܼܒܚܵܐ ܪܵܒܵܐ: ܣܲܗܡܵܢܵܐ ܝܠܹܐ ܟܠܵܝ ܐܲܠܵܗܹ̈ܐ. 5 ܣܲܒܲܒ ܕܟܠܵܝ ܐܲܠܵܗܹ̈ܐ ܕܛܵܝܸܦܹ̈ܐ ܨܵܢܲܡܹ̈ܐ ܝܢܵܐ: ܘܡܵܪܝܵܐ ܫܡܲܝܵܐ ܥܒܸܕܠܹܐ. 6 ܚܸܩܪܵܐ ܘܙܲܪܝܼܦܘܼܬܵܐ ܩܵܕ̄ܡܘܼܗܝ: ܙܲܪܒ ܘܣܸܩܠܵܐ ܓܵܘ ܡܲܩܕܫܘܼܗܝ. 7 ܗܲܒ̄ܠܘܿܢ ܠܡܵܪܝܵܐ: ܝܵܐ ܐܘܼ̈ܓ̰ܵܓܹܐ ܕܛܵܝܸܦܹ̈ܐ: ܗܲܒ̄ܠܘܿܢ ܠܡܵܪܝܵܐ ܐܝܼܩܵܪܵܐ ܘܙܲܪܒ. 8 ܗܲܒ̄ܠܘܿܢ ܠܡܵܪܝܵܐ ܐܝܼܩܵܪܵܐ ܕܫܸܡܹܗ: ܫܩܘܿܠܘܿܢ ܩܘܼܪܒܵܢܵܐ ܘܐܘܘܿܪܘܿܢ ܠܕܵܪܵܬܘܼܗܝ. 9 ܣܓ̣ܘܿܕܘܿܢ ܠܡܵܪܝܵܐ ܒܣܸܩܠܵܐ ܕܩܘܼܕܫܵܐ: ܪܓܘܿܕܘܿܢ ܡ̣ܢ ܩܵܕ̄ܡܘܼܗܝ ܟܠܵܗ̇ ܐܲܪܥܵܐ. 10 ܐܡܘܿܪܘܿܢ ܓܵܘ ܛܵܝܸܦܹ̈ܐ: ܡܵܪܝܵܐ ܒܸܥܒ̣ܵܕܵܐ ܝܠܹܐ ܡܲܠܟܘܼܬܵܐ: ܐܘܼܦ ܡܘܼܩܘܝܼܬܵܐ ܝܠܵܐ ܒܪܝܼܬܵܐ: ܕܠܵܐ ܫܵܥܫܵܐ: ܒܸܕ ܕܵܝܸܢ ܛܵܝܸܦܹ̈ܐ ܒܕܘܼܙܘܼܬܵܐ. 11 ܚܵܕܝܼ ܫܡܲܝܹ̈ܐ: ܘܦܵܨܚܵܐ ܐܲܪܥܵܐ: ܒܲܪܒܸܥܪܵܐ ܝܵܡܵܐ ܘܡܸܠܝܘܼܬܘܼܗ̇: 12 ܦܵܨܚܵܐ ܕܸܫܬܵܐ ܘܟܠ ܕܐܝܼܬ ܓܵܘܘܼܗ̇: ܗܵܝܓܵܗ ܒܸܕ ܩܲܘܸܚ ܟܠܵܝ ܐܝܼܠܵܢܹ̈ܐ ܕܡܲܝܫܵܐ: 13 ܩܵܕ̄ܡ ܡܵܪܝܵܐ: ܣܲܒܲܒ ܕܒܹܐܬܵܝܵܐ ܝܠܹܐ: ܣܲܒܲܒ ܕܒܹܬܵܝܵܐ ܝܠܹܐ ܠܸܕܝܵܢܵܐ ܐܲܪܥܵܐ: ܒܸܕ ܕܵܝܸܢ ܒܪܝܼܬܵܐ ܒܙܲܕܝܼܩܘܼܬܵܐ: ܘܛܵܝܸܦܹ̈ܐ ܒܡܗܘܼܡܢܘܼܬܹܗ.

 

ܡܙܡܘܪܐ: ܨܙ.

1. ܡܵܪܝܵܐ ܒܸܥܒ̣ܵܕܵܐ ܝܠܹܐ ܡܲܠܟܘܼܬܵܐ: ܦܵܨܚܵܐ ܐܲܪܥܵܐ: ܚܵܕܝܼ ܓܵܙܪ̈ܵܬܹܐ ܪܵܒܵܐ. 2 ܥܢܵܢܵܐ ܘܥܲܪܦܸܠܵܐ ܚܵܕܸܪ̈ܘܵܢܘܼܗܝ: ܙܲܕܝܼܩܘܼܬܵܐ[83] ܘܕܝܼܘܵܢ ܡܲܟܵܢ ܕܟܘܼܪܣܝܹܗ. 3 ܢܘܼܪܵܐ ܩܵܕ̄ܡܘܼܗܝ ܟܹܐ ܐܵܙܸܠ: ܘܟܹܐ ܡܵܩܸܕ ܕܸܫܡܸܢܘܼ̈ܗܝ ܕܚܵܕܼܪ̈ܘܵܢܹܐ. 4 ܒܘܼܗ̄ܪܸܢܘܿܢ ܒܸܪ̈ܩܘܼܗܝ ܠܒܪܝܼܬܵܐ: ܚܙܹܠܵܐ ܘܫܥܸܫܠܵܐ ܐܲܪܥܵܐ. 5 ܛܘܼܪܵܢܹ̈ܐ ܐܲܝܟ ܫܲܡܲܥ ܦܫܸܪܘܿܢ ܡ̣ܢ ܩܵܕ̄ܡ ܡܵܪܝܵܐ: ܡ̣ܢ ܩܵܕ̄ܡ ܡܵܪܵܐ ܕܟܠܵܗ̇ ܐܲܪܥܵܐ. 6 ܟܹܐ ܡܲܕܥܝܼ ܫܡܲܝܹ̈ܐ ܙܲܕܝܼܩܘܼܬܘܼܗܝ: ܘܚܙܹܠܘܿܢ ܟܠܵܝ ܛܵܝܸܦܹ̈ܐ ܐܝܼܩܵܪܘܼܗܝ. 7 ܢܵܚܦܝܼ ܟܠܵܝ ܦܵܠܚܵܢܹ̈ܐ ܕܨܲܠܡܵܐ ܦܘܼܣܠܵܐ: ܥܵܒ̣ܕܵܢܹ̈ܐ ܕܫܘܼܒ̣ܗܵܪܵܐ ܒܨܵܢܲܡܹ̈ܐ. ܣܓ̣ܘܿܕܘܿܢ ܠܹܗ: ܟܠܵܝ ܐܲܠܵܗܹ̈ܐ. 8 ܫܡܸܥܠܵܐ ܘܚܕܹܠܵܐ ܨܸܗܝܘܿܢ: ܘܦܨܸܚܠܘܿܢ ܒܢܵܬܹ̈ܐ ܕܝܼܗܘܼܕܵܐ: ܒܘܼܬ ܕܝܼܘܵܢܘܼ̈ܟ: ܡܵܪܝܵܐ. 9 ܣܲܒܲܒ ܕܐܲܢ̄ܬ: ܡܵܪܝܵܐ: ܥܸܠܵܝܵܐ (ܝܘܸܬ) ܥܲܠ ܟܠܵܗ̇ ܐܲܪܥܵܐ: ܪܵܒܵܐ ܪܝܼܡܵܐ ܝܘܸܬ ܥܲܠ ܟܠܵܝ ܐܲܠܵܗܹ̈ܐ. 10 ܡܲܚܸܒܵܢܹ̈ܐ ܕܡܵܪܝܵܐ: ܣܢܹܡܘܿܢ ܒܝܼܫܬܵܐ: ܟܹܐ ܢܵܛܸܪ ܓܵܢܵܬܹ̈ܐ ܕܙܲܕܝܼܩܘܼ̈ܗܝ: ܡ̣ܢ ܐܝܼܕܵܐ ܕܒܝܼܫܹ̈ܐ ܟܹܐ ܦܵܨܹܐ ܠܗ̄ܘܿܢ. 11 ܒܲܗܪܵܐ ܙܸܪܥܝܵܐ ܝܠܹܐ ܩܵܐ ܙܲܕܝܼܩܵܐ: ܘܠܬܪ̈ܘܼܨܹܐ ܒܠܸܒܵܐ ܚܲܕܘܼܬܵܐ. 12 ܚܕܹܡܘܿܢ: ܙܲܕܝܼܩܹ̈ܐ: ܒܡܵܪܝܵܐ: ܘܫܵܟܪܘܿܢ ܠܕܟ̣ܵܪܵܐ ܕܩܘܼܕܫܘܼܗܝ.

 

ܡܙܡܘܪܐ: ܨܚ.

ܡܲܙܡܘܿܪܵܐ.

1. ܙܡܘܿܪܘܿܢ ܠܡܵܪܝܵܐ ܙܡܵܪܬܵܐ ܚܲܕܬܵܐ: ܣܲܒܲܒ ܕܥܵܓ̰ܸܒܘܼܝܵܬܹ̈ܐ ܥܒܸܕܠܹܐ: ܦܘܼܪܸܩܠܵܐ ܐܸܠܹܗ ܝܲܡܝܼܢܹܗ: ܘܕܪܲܥܢܵܐ ܕܩܘܼܕܫܘܼܗܝ. 2 ܡܘܼܕܸܥܠܹܐ ܡܵܪܝܵܐ ܦܘܼܪܩܵܢܘܼܗܝ: ܩܵܕ̄ܡ ܥܲܝܢܹ̈ܐ ܕܛܵܝܸܦܹ̈ܐ ܓܠܹܠܹܐ ܙܲܕܝܼܩܘܼܬܘܼܗܝ. ܕܟܸܪܹܐ ܫܵܦܵܩܲܬܘܼܗܝ ܘܡܗܘܼܡܢܘܼܬܘܼܗܝ ܠܒܹܝܬ ܝܼܣܪܵܝܹܠ: ܚܙܹܠܘܿܢ ܟܠܵܝ ܡܲܪ̈ܙܵܢܹܐ ܕܐܲܪܥܵܐ ܦܘܼܪܩܵܢܵܐ ܕܐܲܠܵܗܲܢ. ܩܲܘܸܚܘܿܢ ܠܡܵܪܝܵܐ ܟܠܵܗ̇ ܐܲܪܥܵܐ: ܦܨܘܿܚܘܿܢ: ܘܫܵܒܚܘܿܢ: ܘܙܡܘܿܪܘܿܢ. 5 ܙܡܘܿܪܘܿܢ ܠܡܵܪܝܵܐ ܒܟܸܢܵܪܵܐ: ܒܟܸܢܵܪܵܐ ܘܩܵܠܵܐ ܕܙܵܡܵܪܵܐ: 6 ܒܢܵܦܝܼܪܹ̈ܐ ܘܩܵܠܵܐ ܕܫܝܼܦܘܿܪܵܐ: ܩܲܘܸܚܘܿܢ ܩܵܕ̄ܡ ܡܲܠܟܵܐ: ܡܵܪܝܵܐ. 7 ܒܲܪܒܸܥܪܵܐ ܝܵܡܵܐ ܘܡܸܠܝܘܼܬܘܼܗ̇: ܒܪܝܬܵܐ ܘܥܵܡܪ̈ܵܢܹܐ ܓܵܘܘܼܗ̇: 8 ܢܲܗܪ̈ܵܘܵܬܹ ܡܵܚܝܼ ܟ̰ܲܦܹ̈ܐ:[84] ܡܥܘܼܕܵܠܹܐ ܛܘܼܪ̈ܵܢܹܐ ܩܲܘܹܚܝܼ. 9 ܩܵܕ̄ܡ ܡܵܪܝܵܐ: ܣܲܒܲܒ ܕܒܸܐܬܵܝܵܐ ܝܠܸܐ ܠܸܕܝܵܢܵܐ ܐܲܪܥܵܐ: ܒܸܕ ܕܵܝܸܢ ܒܪܝܼܬܵܐ ܒܙܲܕܝܼܩܘܼܬܵܐ: ܘܛܵܝܸܦܹ̈ܐ ܒܬܪܘܼܨܘܼܬܵܐ.

 

ܡܙܡܘܪܐ: ܨܛ.

1. ܡܵܪܝܵܐ ܒܸܥܒ̣ܵܕܵܐ ܝܠܹܐ ܡܲܠܟܘܼܬܵܐ: ܪܵܓܕܝܼ ܛܵܝܸܦܹ̈ܐ: ܒܸܕܝܵܒ̣ܵܐ[85] ܓܵܘ ܟܪ̈ܘܿܒܹܐ: ܪܲܬܪܹܬܵܐ ܐܲܪܥܵܐ. 2 ܡܵܪܝܵܐ ܓܵܘ ܨܸܗܝܘܿܢ ܓܘܼܪܵܐ ܝܠܹܐ: ܘܪܵܡܵܐ ܝܠܹܐ ܥܲܠ ܟܠܵܝ ܛܵܝܸܦܹ̈ܐ. 3 ܫܵܟܪܝܼ ܠܫܸܡܘܼܟ ܓܘܼܪܵܐ ܘܣܲܗܡܵܢܵܐ: ܩܲܕܝܼܫܵܐ ܝܠܹܐ ܗ̇ܘ. 4 ܘܙܲܪܒ ܕܡܲܠܟܵܐ[86] ܠܕܝܼܘܵܢ ܟܹܐ ܡܲܚܸܒ: ܐܲܢ̄ܬ ܡܘܼܩܘܹܠܘܼܟ ܬܪܘܼܨܘܼܬܵܐ. [87] ܕܝܼܘܵܢ ܘܙܲܕܝܼܩܘܼܬܵܐ ܓܵܘ ܝܲܥܩܘܿܒ̣ ܐܲܢ̄ܬ ܥܒܸܕܠܘܼܟ. 5 ܡܵܪܡܘܿܢ ܠܡܵܪܝܵܐ ܐܲܠܵܗܲܢ: ܘܣܓ̣ܘܿܕܘܿܢ ܠܟܘܼܒ̣ܫܵܐ ܕܐܲܩܠܵܬܘܼ̈ܗܝ: ܩܲܕܝܼܫܵܐ ܝܠܹܐ ܗ̇ܘ. 6 ܡܘܼܫܹܐ ܘܐܲܗܪܘܿܢ ܓܵܘ ܟܵܗܢܘܼ̈ܗܝ: ܘܫܡܘܼܐܹܝܠ ܓܵܘ ܩܲܪ̈ܝܵܢܹܐ ܕܫܸܡܹܗ: ܒܸܩܪܵܝܵܐ ܠܡܵܪܝܵܐ: ܘܗ̇ܘ ܓ̰ܘܼܘܸܒܵܝܠܹܐ. 7 ܒܣܛܘܼܢܵܐ ܕܥܢܵܢܵܐ ܗܘܼܡܙܸܡܠܹܐ ܥܲܡܵܝ: ܢܛܸܪܘܿܢ ܣܵܗܕܘܼܬܘܼ̈ܗܝ ܘܩܵܢܘܿܢܵܐ ܕܝܸܗܒܠܹܐ ܐܸܠܵܝ. 8 ܡܵܪܝܵܐ ܐܲܠܵܗܲܢ: ܐܲܢ̄ܬ ܓ̰ܘܼܘܸܒܵܠܘܼܟ: ܐܲܠܵܗܵܐ ܫܵܒ̣ܩܵܢܵܐ ܗ̄ܘܹܠܘܼܟ ܐܸܠܵܝ: ܘܫܵܩܠܵܢܵܐ ܕܬܘܼܥܠܵܐ ܥܲܠ ܦܘܼܠܚܵܢܵܝ̈. 9 ܡܵܪܡܘܿܢ ܠܡܵܪܝܵܐ ܐܲܠܵܗܲܢ: ܘܣܓ̣ܘܿܕܘܿܢ ܠܛܘܼܪܵܐ ܕܩܘܼܕܫܘܼܗܝ: ܣܲܒܲܒ ܕܩܲܕܝܼܫܵܐ ܝܠܹܐ ܡܵܪܝܵܐ ܐܲܠܵܗܲܢ.

 

ܡܙܡܘܪܐ: ܩ.

ܡܲܙܡܘܿܪܵܐ ܕܫܵܟܲܪܬܵܐ.

1. ܩܲܘܸܚܘܿܢ ܠܡܵܪܝܵܐ: ܟܠܵܗ̇ ܐܲܪܥܵܐ. 2 ܦܠܘܿܚܘܿܢ ܠܡܵܪܝܵܐ ܒܚܲܕܘܼܬܵܐ: ܬܹܡܘܿܢ ܩܵܕ̄ܡܘܼܗܝ ܒܬܸܫܒ̇ܘܿܚܬܵܐ. 3 ܝܕܸܥܡܘܿܢ ܕܡܵܪܝܵܐ ܝܠܹܐ ܐܲܠܵܗܵܐ: ܗ̇ܘ ܩܲܡ ܒܵܪܹܐ ܠܲܢ: ܘܠܵܐ ܐܲܚܢܲܢ: ܛܵܝܸܦܹܗ ܘܥܸܪ̈ܒܹܐ ܕܡܲܪܥܝܼܬܹܗ. 4 ܐܘܿܪܘܿܢ ܒܕܲܪ̈ܘܵܙܘܼܗܝ ܒܫܵܟܲܪܬܵܐ: ܠܕܵܪ̈ܬܘܼܗܝ ܒܫܘܼܒ̣ܚܵܐ: ܫܵܟܪܘܿܢ ܐܸܠܹܗ: ܒܵܪܟ̣ܘܿܢ ܠܫܸܡܹܗ. 5 ܣܲܒܲܒ ܕܛܵܒ̣ܵܐ ܝܠܹܐ ܡܵܪܝܵܐ: ܠܥܵܠܲܡ ܫܵܦܵܩܲܬܹܗ: ܘܗܲܠ ܕܵܘܪܵܐ ܘܕܵܘܪܵܐ ܡܗܘܼܡܢܘܼܬܹܗ.

 

ܡܙܡܘܪܐ: ܩܐ.

ܡܲܙܡܘܿܪܵܐ ܕܕܵܘܝܼܕ.

1. ܫܵܦܵܩܲܬ ܘܕܝܼܘܵܢ ܒܸܕ ܫܵܒܚܸܢ: ܐܸܠܘܼܟ: ܡܵܪܝܵܐ: ܒܸܕ ܙܵܡܪܸܢ. 2 ܒܸܕ ܗܵܘܸܢ ܗܵܘܢܵܢܵܐ ܒܐܘܼܪܚܵܐ ܬܲܡܝܼܡܬܵܐ: ܐܝܼܡܲܢ ܒܸܕ ܐܵܬܸܬ ܠܟܸܣܠܝܼ: ܒܸܕ ܚܵܕܪܸܢ ܒܬܲܡܝܼܡܘܼܬܵܐ ܕܠܸܒܝܼ ܒܓܵܘܵܐ ܕܒܲܝܬܝܼ. 3 ܠܹܐ ܡܲܬܒܸܢ ܠܒܲܪܩܘܼܒܠ ܕܥܲܝܢܝܼ̈ ܫܘܼܠܵܐ ܕܥܵܘܠܵܐ: ܠܥܒ̣ܵܕܵܐ ܕܩܵܠܒܵܢܹ̈ܐ ܣܢܹܠܝܼ: ܠܹܐ ܛܵܦܹܐ ܒܝܼܝܼ. 4 ܠܸܒܵܐ ܦܟ̰ܝܼܠܵܐ ܒܸܕ ܥܵܒܸܪ ܡܸܢܝܼ: ܒܝܼܫܬܵܐ ܠܹܐ ܝܲܕܥܸܢ. 5 ܡܵܚܝܵܢܵܐ ܕܲܪܗܲܩ ܕܚܲܒ̣ܪܹܗ ܒܛܸܫܘܵܐ: ܐܸܠܹܗ ܒܹܬ ܬܵܠܩܸܢ: ܗ̇ܘ ܕܝܼܢܵܐ ܪܵܡܵܐ ܥܲܝܢܘܼ̈ܗܝ ܘܪܘܝܼܚܵܐ ܠܸܒܹܗ: ܐܸܠܹܗ ܠܹܐ ܡܵܨܸܢ (ܩܵܒ̇ܠܸܢ). 6 ܥܲܝܢܝܼ̈ ܥܲܠ ܡܗܘܼܡܢܹ̈ܐ ܕܐܲܪܥܵܐ: ܠܸܬܝܵܒ̣ܵܐ ܥܲܡܝܼ: ܗ̇ܘ ܕܚܵܕܸܪ ܒܐܘܼܪܚܵܐ ܬܲܡܝܼܡܬܵܐ: ܗ̇ܘ ܒܸܕ ܥܵܒܸܕ ܠܝܼ ܚܸܠܡܲܬ. 7 ܠܹܐ ܝܵܬܸܒ̣ ܒܓܵܘܵܐ ܕܒܲܝܬܝܼ ܥܵܒ̣ܕܵܢܵܐ ܕܦܸܠܡܵܐ: ܗܲܡܙܸܡܵܢܵܐ ܕܕܘܼܓܠܹ̈ܐ ܠܹܐ ܩܵܘܹܐ ܩܵܕ̄ܡ ܥܲܝܢܝܼ̈. 8 ܨܲܦܪܵܐ ܒܨܲܦܪܵܐ ܒܸܕ ܬܵܠܩܸܢ ܟܠܵܝ ܒܝܼܫܹ̈ܐ ܕܐܲܪܥܵܐ: ܠܸܩܛܲܥܝܵܐ ܡ̣ܢ ܡܕܝܼܢ̄ܬܵܐ ܕܡܵܪܝܵܐ ܟܠܵܝ ܦܵܠܚܵܢܹ̈ܐ ܕܥܵܘܠܵܐ.

 

ܡܙܡܘܪܐ: ܩܒ.

ܨܠܘܬܐ ܩܵܐ ܡܘܼܠܝܸܨܵܐ: ܟܲܕ ܦܵܝܸܫ ܟܘܼܣܝܵܐ (ܒܚܲܫܵܐ): ܘܩܵܕ̄ܡ ܡܵܪܝܵܐ ܕܵܪܹܐ ܩܒ̣ܵܠܬܹܗ.

1. ܝܵܐ ܡܵܪܝܵܐ ܫܡܥܝܼ ܨܠܘܿܬܝܼ: ܘܓܥܵܝܬܝܼ ܠܟܸܣܠܘܼܟ ܐܵܘܪܵܐ. 2 ܠܵܐ ܛܵܫܸܬ ܦܵܬܘܼܟ ܡܸܢܝܼ ܒܝܘܿܡܵܐ ܕܥܵܝܩܵܐ ܐܸܠܝܼ: ܡܲܟܸܦ ܐܸܠܝܼ ܢܵܬܘܼܟ: ܒܝܘܿܡܵܐ ܕܩܵܪܸܢ ܡܲܠܝܸܙ ܓ̰ܲܘܸܒ ܠܝܼ. 3 ܣܲܒܲܒ ܕܬܸܡܠܘܿܢ ܒܬܸܢܵܐ ܝܘܿܡܲܢܝܼ̈: ܘܓܲܪ̈ܡܝܼ ܐܲܝܟ ܝܲܩܕܵܢܵܐ ܝܩܸܕܠܘܿܢ. 4 ܦܸܫܠܹܐ ܡܸܚܝܵܐ ܐܲܝܟ ܓܸܠܵܐ ܘܒܪܸܙܠܹܐ ܠܸܒܝܼ: ܣܲܒܲܒ ܕܢܫܹܠܝܼ ܡ̣ܢ ܠܐܹܟ̣ܵܠܵܐ ܠܲܚܡܝܼ. 5 ܡ̣ܢ ܩܵܠܵܐ ܕܬܵܢܲܚܬܝܼ. ܛܦܹܠܹܐ ܓܲܪܡܝܼ ܠܒܸܣܪܝܼ. 6 ܕܡܹܠܝܼ ܠܩܵܩܵܐ ܕܒܲܪܝܼܵܐ: ܗ̄ܘܹܠܝܼ ܐܲܝܟ ܩܘܼܦܕܵܐ ܕܚܵܪ̈ܒܝܹܐ. 7 ܫܘܼܗܸܪܝܼ: ܘܗ̄ܘܹܠܝܼ ܐܲܝܟ ܛܲܝܪܵܐ ܒܢܲܦ̮ܫܵܐ ܥܲܠ ܐܓܵܪܹܐ. 8 ܟܠܹܗ ܝܘܿܡܵܐ ܠܝܼܡܸܢܘܿܢ ܕܸܫܡܸܢܝܼ̈: ܐܵܢܝܼ ܕܝܼܢܵܐ ܫܘܼܕܸܢܹܐ ܥܲܠܝܼ: ܒܝܼܝܼ ܝܡܹܠܘܿܢ. 9 ܣܲܒܲܒ ܩܸܛܡܵܐ ܐܲܝܟ ܠܲܚܡܵܐ ܐܟܸܠܝܼ: ܘܫܬܵܝܬܝܼ ܒܒܸܟ̣ܝܵܐ ܡܙܸܓ̣ܠܝܼ. 10 ܡ̣ܢ ܩܵܕ̄ܡ ܟܲܪܒܘܼܟ ܘܩܲܙܲܒܘܼܟ: ܣܲܒܲܒ ܕܡܘܼܪܡܸܢܘܼܟ: ܘܪܘܼܦܝܸܢܘܼܟ. 11 ܝܘܿܡܲܢܝܼ̈ ܐܲܝܟ ܛܸܠܵܢܝܼܬܵܐ ܟܵܝܦܵܢܬܵܐ ܝܢܵܐ: ܘܐܵܢܵܐ ܐܲܝܟ ܓܸܠܵܐ ܒܪܸܙܠܝܼ. 12 ܘܐܲܢ̄ܬ: ܡܵܪܝܵܐ: ܠܥܵܠܲܡ ܟܹܐ ܝܵܬܒܸܕ: ܘܕܵܟ̣ܵܪܘܼܟ ܠܕܵܘܪܵܐ ܘܕܵܘܪܵܐ. 13 ܐܲܢ̄ܬ ܒܸܕ ܩܵܝܡܸܬ: ܒܸܕ ܪܵܚܡܸܬ ܥܲܠ ܨܸܗܝܘܿܢ: ܣܲܒܲܒ ܕܙܲܒ̣ܢܵܐ ܝܠܹܐ ܠܡܪܵܚܘܿܡܹܐ ܥܲܠܘܼܗ̇: ܣܲܒܲܒ ܕܐܬܹܐܠܹܐ ܘܲܥܕܵܐ. 14 ܣܲܒܲܒ ܕܟܹܐ ܒܵܣܡܵܐ ܠܗ̄ܘܿܢ ܪܸ̈ܓܵܘܵܬܘܼܟ ܒܟܹܐܦܘܼ̈ܗ̇: ܘܥܲܠ ܥܲܦܪܘܼܗ̇ ܟܹܐ ܡܪܵܚܡܝܼ. 15 ܘܒܸܕ ܙܵܕܥܝܼ ܛܵܝܸܦܹ̈ܐ ܡ̣ܢ ܫܸܡܹܗ ܕܡܵܪܝܵܐ: ܘܟܠܵܝ ܡܲܠܟܹ̈ܐ ܕܐܲܪܥܵܐ ܡ̣ܢ ܐܝܼܩܵܪܘܼܟ: 16 ܣܲܒܲܒ ܕܒܢܹܠܹܐ ܡܵܪܝܵܐ ܠܨܸܗܝܘܿܢ: ܦܸܫܠܹܐ ܚܸܙܝܵܐ ܒܐܝܼܩܵܪܘܼܗܝ: 17 ܕܸܪܹܐ ܠܨܠܘܿܬܵܐ ܕܡܸܣܟܹܢܵܐ: ܘܠܵܐ ܡܘܼܣܠܹܠܹܐ ܠܨܠܘܿܬܵܝ. 18 ܒܸܕ ܦܵܝܫܵܐ ܟܬܝܼܒ̣ܬܵܐ ܐܵܗܵܐ ܠܕܵܘܪܵܐ ܐܚܹܪ̄ܢܵܐ: ܘܛܵܝܸܦܵܐ ܕܦܵܝܸܫ ܒܸܪܝܵܐ ܒܸܕ ܫܵܒܸܚ ܠܡܵܪܝܵܐ. 19 ܣܲܒܲܒ ܕܚܸܪܹܐ ܡ̣ܢ ܡܪܵܘܡܵܐ ܕܩܘܼܕܫܘܼܗܝ: ܡܵܪܝܵܐ ܡ̣ܢ ܫܡܲܝܵܐ ܥܲܠ ܐܲܪܥܵܐ ܩܘܼܙܸܕܠܹܐ: 20 ܠܸܫܡܲܥܝܵܐ ܫܲܦܠܲܦܬܵܐ ܕܐܲܣܝܼܪܵܐ: ܠܸܫܪܵܝܵܐ ܒܢܘܼܢܹ̈ܐ ܕܡܵܘܬܵܐ: 21 ܠܗܵܩܘܿܝܹܐ ܓܵܘ ܨܸܗܝܘܿܢ ܫܸܡܹܗ ܕܡܵܪܝܵܐ: ܘܬܸܫܒܘܿܚܬܹܗ ܓܵܘ ܐܘܿܪܸܫܠܸܡ: 22 ܟܲܕ ܓ̰ܲܡܥܝܼ ܛܵܝܸܦܹ̈ܐ[88] ܡܸܚܕܵܕܹ̈ܐ: ܘܡܲܠܟܘܵܬܹ̈ܐ ܠܸܦܠܵܚܵܐ ܠܡܵܪܝܵܐ. 23 ܡܘܼܡܟܸܟ̣ܠܹܐ ܒܐܘܼܪܚܵܐ ܚܲܝܠܝܼ: ܡܘܼܟܪܹܠܹܐ ܝܘܿܡܲܢܝܼ̈. 24 ܒܸܕ ܐܵܡܪܸܢ: ܐܲܠܵܗܝܼ: ܠܵܐ ܡܵܐܣܩܸܬ ܠܝܼ ܒܦܲܠܓܵܐ ܕܝܘܿܡܲܢܝܼ̈: ܒܕܵܘܪܵܐ ܕܕܵܘܪܹ̈ܐ ܫܸܢܘܼ̈ܟ. 25 ܡܩܵܕܝܼܡܝܼ ܐܲܪܥܵܐ ܫܘܼܬܸܐܣܵܠܘܼܟ: ܘܦܘܼܠܚܵܢܵܐ ܕܐܝܼܕܵܬܘܼ̈ܟ ܝܼܢܵܐ ܫܡܲܝܹ̈ܐ. 26 ܐܵܢܝܼ ܒܸܕ ܬܵܠܩܝܼ: ܘܐܲܢ̄ܬ ܩܵܝܲܡ ܒܸܕ ܗܵܘܸܬ: ܘܟܠܵܝ ܐܲܝܟ ܓ̰ܘܼܠܵܐ ܒܸܕ ܒܵܠܝܼ: ܐܲܝܟ ܠܒܸܫܬܵܐ ܒܸܕ ܡܲܚܠܸܦܸܬ ܠܗ̄ܘܿܢ: ܘܒܸܕ ܦܵܝܫܝܼ ܡܘܼܚܠܸܦܹܐ: 27 ܘܐܲܢ̄ܬ ܗ̇ܘ ܝܼܘܸܬ: ܘܫܸܢܘܼ̈ܟ ܠܹܐ ܬܵܝܡܝܼ. 28 ܒܢܘܼܢܹ̈ܐ ܕܪܹ̈ܓܵܘܵܬܘܼܟ ܒܸܕ ܫܵܪܝܼ: ܘܙܪܥܵܝ ܩܲܕ̄ܡܘܼܟ ܒܸܕ ܩܵܘܹܐ.

 

ܡܙܡܘܪܐ: ܩܓ.

ܕܕܵܘܝܼܕ.

1. ܒܵܪܸܟ̣ܝ: ܝܵܐ ܢܲܦ̮ܫܝܼ: ܠܡܵܪܝܵܐ: ܘܟܠܹܗ ܓܵܘܝܼ ܠܫܸܡܵܐ ܕܩܘܼܕܫܹܗ. ܒܵܪܸܟ̣ܝ: ܝܵܐ ܢܲܦ̮ܫܝܼ: ܠܡܵܪܝܵܐ: ܘܠܵܐ ܢܵܫܝܲܬܝ ܟܠܵܝ ܛܵܒ̣ܵܬܘܼ̈ܗܝ: ܕܟܹܐ ܫܵܒܸܩ ܟܠܹܗ ܥܵܘܠܵܟ̣ܝ: ܕܟܹܐ ܒܵܣܸܡ ܟܠܵܝ ܡܲܪ̈ܥܵܟ̣ܝ: ܕܟܹܐ ܦܵܪܸܩ ܡ̣ܢ ܓܘܼܒܵܐ ܚܲܝܵܟ̣ܝ̈: ܕܟܹܐ ܒܲܢܦܸܪܵܟ̣ܝ ܒܫܵܦܵܩܲܬ ܘܪ̈ܲܚܡܹܐ: ܕܟܹܐ ܡܲܣܒܸܥ ܒܛܵܒ̣ܬܵܐ ܥܘܿܡܪܵܟ̣ܝ: ܕܦܵܝܫܵܐ ܚܘܼܕܸܬܬܵܐ ܐܲܝܟ ܢܸܫܪܵܐ ܚܵܡܘܼܬܵܟ̣ܝ. ܟܹܐ ܥܵܒܸܕ ܙܲܕܝܼܩܘܼܝܵܬܹ̈ܐ ܡܵܪܝܵܐ: ܘܕܝܼܘܵܢܹ̈ܐ ܠܟܠܵܝ ܙܠܝܼܡܹ̈ܐ. 7 ܡܘܼܕܸܥܠܹܐ ܐܘܼܪ̈ܚܵܬܘܼܗܝ ܠܡܘܼܫܹܐ: ܠܒܢܲܝ̈ ܝܼܣܪܵܝܹܠ ܦܘܼܠܚܵܢܘܼ̈ܗܝ. 8 ܡܪܲܚܡܵܢܵܐ ܝܠܹܐ ܘܚܲܢܵܢܵܐ ܡܵܪܝܵܐ: ܝܵܪܝܼܟ̣ܬܵܐ ܝܠܵܐ ܒܹܢܘܼܗܝ ܘܪܵܒܵܐ ܫܵܦܵܩܲܬܘܼܗܝ. 9 ܠܐܵܒܵܕ ܠܹܐ ܥܵܒܸܕ ܕܲܥܘܝܼ: ܘܠܵܐ ܠܥܵܠܲܡ ܢܵܛܸܪ (ܟܲܪܒܘܼܗܝ). 10 ܠܵܐ ܐܲܝܟ ܚ̈ܛܵܗܲܢ ܥܒܸܕܠܹܐ ܐܸܠܲܢ: ܘܠܵܐ ܐܲܝܟ ܓܢܵܗܲܢ ܦܪܸܥܠܹܐ ܥܲܠܲܢ. 11 ܣܲܒܲܒ ܐܲܝܟ ܕܪܵܡܬܵܐ ܝܠܵܐ ܫܡܲܝܵܐ ܥܲܠ ܐܲܪܥܵܐ: ܙܘܼܪܒܸܢܵܐ ܫܵܦܵܩܲܬܘܼܗܝ ܥܲܠ ܙܸܕܥܝܘܼ̈ܗܝ. 12 ܐܲܝܟ ܕܪܸܚܩܵܐ ܝܠܹܐ ܡܲܕܢܚܵܐ ܡ̣ܢ ܡܲܥ̱ܪܒ̣ܵܐ: ܡܘܼܪܚܸܩܠܹܐ ܡܸܢܲܢ ܥܵܘ̈ܠܲܢ. 13 ܐܲܝܟ ܕܪܵܚܸܡ ܒܵܒܵܐ ܥܲܠ ܒܢܘܼܢܹ̈ܐ: ܟܹܐ ܪܵܚܸܡ ܡܵܪܝܵܐ ܥܲܠ ܙܸܕܥܝܘܼ̈ܗܝ. 14 ܣܲܒܲܒ ܗ̇ܘ ܟܹܐ ܝܲܕܸܥ ܓܒ̣ܝܼܠܬܲܢ: ܟܹܐ ܕܵܟܸܪ ܕܥܲܦܪܵܐ ܝܘܵܚ ܐܲܚܢܲܢ. 15 ܐܢܵܫܵܐ: ܐܲܝܟ ܓܸܠܵܐ ܝܢܵܐ ܝܘܿܡܵܢܘܼ̈ܗܝ: ܐܲܝܟ ܦܸܩܚܵܐ ܕܕܸܫܬܵܐ ܗܕܟ̣ܵܐ ܟܹܐ ܦܵܩܸܚ. 16 ܣܲܒܲܒ ܦܵܘܚܵܐ ܟܹܐ ܥܵܒܸܪ ܥܲܠܘܼܗܝ: ܘܠܲܝܬ ܗ̇ܘ: ܘܠܹܐ ܝܼܕܥܵܐ ܠܹܗ ܐܚܹܪ̄ܢܵܐ ܕܘܼܟܬܹܗ. 17 ܘܫܵܦܵܩܲܬ ܕܡܵܪܝܵܐ ܡ̣ܢ ܥܵܠܲܡ ܝܼܠܵܐ ܘܗܲܠ ܥܵܠܲܡ ܥܲܠ ܙܸܕܥܝܘܼ̈ܗܝ: ܘܙܲܕܝܼܩܘܼܬܹܗ ܠܒܢܘܼܢܹ̈ܐ ܕܒܢܘܼܢܹ̈ܐ: 18 ܠܢܵܛܪ̈ܵܢܹܐ ܕܩܵܘܠܘܼܗܝ: ܘܠܕܵܟ̣ܪ̈ܵܢܹܐ ܕܦܵܩܲܕܝܵܬܘܼ̈ܗܝ: ܠܸܥܒ̣ܵܕܵܝ. 19 ܡܵܪܝܵܐ ܒܫܡܲܝܵܐ ܡܘܼܩܘܹܠܹܐ ܟܘܼܪܣܝܹܗ: ܘܡܲܠܟܘܼܬܹܗ ܒܟܠ ܟܹܐ ܗܵܟܡܵܐ. 20 ܒܵܪܟ̣ܘܿܢ ܠܡܵܪܝܵܐ: ܝܵܐ ܡܲܠܲܐܟ̣ܘܼ̈ܗܝ: ܓܲܢ̄ܒܵܪ̈ܲܝ ܚܲܝܠܵܐ: ܥܵܒ̣ܕܵܢܹ̈ܐ ܕܚܲܒ̇ܪܹܗ: ܠܸܫܡܲܥܝܵܐ ܒܩܵܠܵܐ ܕܗܹܡܸܙܡܵܢܘܼ̈ܗܝ. 21 ܒܵܪܟ̣ܘܿܢ ܠܡܵܪܝܵܐ: ܟܠܵܝ ܚܲܝܠܵܘܵܬܘܼ̈ܗܝ: ܚܸܠܡܲܬܟܵܪ̈ܘܗܝ: ܥܵܒ̣ܕܵܢܹ̈ܐ ܕܪܸܙܵܝܹܗ. 22 ܒܵܪܟ̣ܘܿܢ ܠܡܵܪܝܵܐ: ܟܠܵܝ ܦܘܼܠܚܵܢܘܼ̈ܗܝ: ܒܟܠܵܝ ܕܘܼܟܵܢܹ̈ܐ ܕܗܵܟܲܡܬܹܗ. ܒܵܪܸܟ̣ܝ: ܝܵܐ ܢܲܦ̮ܫܝܼ: ܠܡܵܪܝܵܐ.

 

ܡܙܡܘܪܐ: ܩܕ.

1. ܒܵܪܸܟ̣ܝ: ܝܵܐ ܢܲܦ̮ܫܝܼ: ܠܡܵܪܝܵܐ. ܡܵܪܝܵܐ ܐܲܠܵܗܝܼ: ܓܘܼܪܵܐ ܝܘܸܬ ܪܵܒܵܐ: ܫܵܦ̮ܩܵܐ ܘܙܲܪܝܼܦܘܼܬܵܐ ܠܒܸܫܠܘܼܟ. 2 ܟܹܐ ܩܵܛܸܘ ܒܲܗܪܵܐ ܐܲܝܟ ܥܵܒܵܝܵܐ: ܟܹܐ ܡܵܬܸܚ ܫܡܲܝܹ̈ܐ ܐܲܝܟ ܦܲܪܕܵܐ: 3 ܕܟܹܐ ܬܵܪܸܨ ܒܡ̈ܝܼܵܐ ܒܵܠܵܚܵܢܘܼ̈ܗܝ: ܕܟܹܐ ܥܵܒܸܕ ܥܲܝܒܹ̈ܐ ܟܵܠܸܣܟܘܼܗܝ: ܕܟܹܐ ܚܕܸܪ ܥܲܠ ܓܘܼܠܦܵܢܹ̈ܐ ܕܦܵܘܚܵܐ:: 4 ܕܟܹܐ ܥܵܒܸܕ ܡܲܠܲܐܟ̣ܘܼ̈ܗܝ ܦܵܘܚܹ̈ܐ: ܚܸܠܡܲܬܟܵܪ̈ܘܼܗܝ ܢܘܼܪܵܐ ܠܲܗ̄ܝܵܢܵܐ: 5 ܫܘܼܬܸܐܣܠܹܐ ܐܲܪܥܵܐ ܥܲܠ ܒܸܢܝܲܬܘܼܗ̇: ܠܹܐ ܫܵܥܫܵܐ ܠܥܵܠܲܡ ܥܵܠܡܝܼܢ. 6 ܥܘܼܡܩܵܐ ܐܲܝܟ ܠܒܸܫܬܵܐ ܟܘܼܣܹܠܘܼܟ ܐܸܠܹܗ: ܥܲܠ ܛܘܼܪ̈ܵܢܹܐ ܟܠܹܠܘܿܢ ܡ̈ܝܼܵܐ. 7 ܡ̣ܢ ܢܓ̰ܵܘܬܘܼܟ ܥܪܸܩܠܘܿܢ: ܡ̣ܢ ܩܵܠܵܐ ܕܪܲܥܡܘܼܟ ܝܠܸܙܠܘܿܢ. 8 ܐܣܸܩܠܘܿܢ ܛܘܼܪ̈ܵܢܹܐ: ܨܠܹܠܘܿܢ ܪܵܘܘܿܠܹܐ: ܠܐܵܗܵܐ ܕܘܼܟܬܵܐ ܕܫܘܼܬܸܐܣܠܘܼܟ ܐܸܠܵܝ.9 ܬܸܚܘܒ ܡܘܼܬ̣ܒܸܠܘܼܟ ܕܠܵܐ ܥܵܒ̣ܪܝܼ: ܠܵܐ ܕܵܝܪܝ ܠܟ̇ܣܘܿܝܹܐ ܠܐܲܪܥܵܐ. 10 ܟܹܐ ܫܵܕܸܪ ܥܲܝܢܵܬܹ̈ܐ ܓܵܘ ܪ̈ܘܘܿܠܹܐ. ܒܹܝܠ ܛܘܼܪ̈ܵܢܹܐ ܟܹܐ ܐܵܙܠ̄ܝܼ: 11 ܟܹܐ ܡܲܫܬܝܼ ܟܠܵܗ̇ ܗܲܝܘܵܢ ܕܕܸܫܬܵܐ: ܟܹܐ ܬܵܒ̣ܪܝܼ ܚܡܵܪܹ̈ܐ ܕܒܲܪܝܼܵܐ ܨܵܗ̄ܘܵܝ. 12 ܥܠܵܝ ܛܲܝܪܹ̈ܐ ܕܫܡܲܝܵܐ ܟܹܐ ܫܵܪܝܼ: ܡ̣ܢ ܒܹܝܠ ܦܲܥܘܵܢܹ̈ܐ ܟܹܐ ܝܵܗ̄ܒ̣ܝܼ ܩܵܠܵܐ. 13 ܟܹܐ ܡܲܫܬܹܐ ܛܘܼܪ̈ܵܢܹܐ ܡ̣ܢ ܒܵܠܵܚܵܢܘܼ̈ܗܝ: ܡ̣ܢ ܛܥܘܼܢܝܵܬܹ̈ܐ ܕܦܘܼܠܚܵܢܘܼ̈ܟ ܒܸܕ ܣܲܒ̣ܥܵܐ ܐܲܪܥܵܐ. 14 ܟܹܐ ܡܲܓ̰ܝܸܢ ܓܸܠܵܐ ܩܵܐ ܪܸܣܩܵܐ: ܘܚܲܪܩܵܐ ܩܵܐ ܡܲܦܠܲܚܬܵܐ ܕܒܲܪܢܵܫܵܐ: ܠܦܵܠܘܿܛܹܐ ܠܲܚܡܵܐ ܡ̣ܢ ܐܲܪܥܵܐ: 15 ܘܚܲܡܪܵܐ ܕܟܹܐ ܡܲܚܕܹܐ ܠܸܒܹܗ ܕܐܢܵܫܵܐ: ܠܡܲܒܪܘܼܩܹܐ ܦܵܬܘܵܬܹ̈ܐ ܡ̣ܢ ܡܸܫܚܵܐ: ܘܠܲܚܡܵܐ ܕܠܸܒܹܗ ܕܐܢܵܫܵܐ ܟܹܐ ܣܵܢܸܕ. 16 ܟܹܐ ܣܲܒ̣ܥܝܼ ܐܝܼܠܵܢܹ̈ܐ ܕܡܵܪܝܵܐ: ܐܲܪ̈ܙܹܐ ܕܠܸܒ̣ܢܵܢ ܕܢܸܨܒ̣ܠܹܐ: 17 ܕܬܵܡܵܐ ܛܲܝܪܹ̈ܐ ܬܵܪܨܝܼ ܩܸܢܵܬܹ̈ܐ: ܠܲܩܠܵܩ: ܫܲܪ̈ܘܲܝܢܹܐ ܒܲܝܬܘܼܗ̇ ܝܢܵܐ. 18 ܛܘܼܪ̈ܵܢܹܐ ܪ̈ܵܡܹܐ ܩܵܐ ܕܲܝܨܹ̈ܐ: ܩܵܝܹ̈ܐ ܬܸܣܪܵܐ ܠܝܲܪ̈ܒܘܼܥܹܐ. 19 ܥܒܸܕܠܹܗ ܣܲܗܪܵܐ ܠܘܲܥܕܹ̈ܐ: ܫܸܡܫܵܐ ܟܹܐ ܝܲܕܸܥ ܓܢܵܝܬܹܗ. 20 ܟܹܐ ܡܲܬܒܸܕ ܚܘܼܒ̣ܝܵܐ ܘܟܹܐ ܗܵܘܹܐ ܠܲܝܠܹܐ: ܒܝܹܗ ܟܹܐ ܪܵܚܫܵܐ ܟܠܵܗ̇ ܗܲܝܘܵܢ ܕܡܝܫܵܐ. 21 ܓܘܼܪ̈ܝܹܐ ܕܐܲܪ̈ܝܹܐ ܟܹܐ ܓܲܪܓܸܡܝܼ ܠܦܪܵܛܵܐ: ܘܠܸܛܠܵܒܵܐ ܡ̣ܢ ܐܲܠܵܗܵܐ ܡܹܐܟ̣ܘܼܠܬܵܝ. 22 ܙܵܪܸܩ ܫܸܡܫܵܐ: ܟܹܐ ܓ̰ܵܡܥܝܼ: ܘܓܵܘ ܡܲܣܟܵܢܵܝ̈ ܟܹܐ ܕܵܡܟ̣ܝܸ. 23 ܟܹܐ ܦܵܠܸܛ ܒܲܪܢܵܫܵܐ ܠܦܘܼܠܚܵܢܘܼܗܝ: ܘܠܚܸܠܡܲܬܘܼܗܝ ܗܲܠ ܪܲܡܫܵܐ. 24 ܟܡܵܐ ܪܵܒܵܐ ܝܢܵܐ ܥܒ̣ܵܕܘܼ̈ܟ: ܡܵܪܝܵܐ: ܟܠܵܝ ܒܥܵܩܸܠܕܵܪܘܼܬܵܐ ܥܒܸܕܠܘܼܟ: ܡܠܹܠܵܐ ܐܲܪܥܵܐ ܡܵܐܠܘܼ̈ܟ. 25 ܐܵܗܵܐ ܝܵܡܵܐ ܓܘܼܪܬܵܐ ܘܪܘܝܼܚܬܵܐ ܒܓܹܒܵܢܹ̈ܐ: ܬܵܡܵܐ ܐܝܼܬ ܪܲܚܫܵܐ: ܘܕܠܵܐ ܡܸܢܝܵܢܵܐ: ܚܲܝܵܘ̈ܬܵܐ ܙܥܘܿܪܹ̈ܐ ܥܲܡ ܓܘܼܪܹ̈ܐ. 26 ܬܵܡܵܐ ܓܵܡ̈ܝܹܐ ܟܹܐ ܐܵܙܠ̄ܝ݂: ܠܹܘܝܵܬܵܢ: ܐܵܗܵܐ ܕܒܪܹܠܘܼܟ ܠܛܵܒ̣ܘܼܠܵܐ ܒܝܹܗ. 27 ܟܠܵܝ ܐܸܠܘܼܟ ܟܹܐ ܣܵܦܪܝܼ: ܠܝܲܗ̄ܒ̣ܵܐ ܡܹܐܟ̣ܘܼܠܬܵܝ ܒܙܲܒ̣ܢܘܼܗ̇. 28 ܟܹܐ ܝܵܗ̄ܒܸܕ ܐܸܠܵܝ: ܟܹܐ ܓ̰ܵܡܥܝܼ: ܟܹܐ ܦܵܬܚܸܬ ܐܝܼܕܘܼܟ: ܟܹܐ ܣܲܒ̣ܥܝܼ ܛܵܒ̣ܬܵܐ. 29 ܟܹܐ ܛܵܫܸܬ ܦܵܬܘܼܟ: ܟܹܐ ܦܵܝܫܝܼ ܚܒ̣ܝܼܛܹܐ: ܟܹܐ ܫܵܩܠܸܬ ܪܘܼܚܵܝ: ܟܹܐ ܡܵܝܬܝܼ: ܘܠܥܵܦܪܵܝ ܟܹܐ ܕܵܝܪܝܼ. 30 ܟܹܐ ܫܵܕܪܸܬ ܪܘܼܚܘܼܟ: ܟܹܐ ܦܵܝܫܝܼ ܒܸܪܝܹܐ: ܘܟܹܐ ܚܲܕܸܬܬ ܦܵܬܵܐ ܕܐܲܪܥܵܐ. 31 ܗܵܘܹܐ ܐܝܼܩܵܪܵܐ ܕܡܵܪܝܵܐ ܠܥܵܠܲܡ: ܚܵܕܹܐ ܡܵܪܝܵܐ ܒܦܘܼܠܚܵܢܘܼ̈ܗܝ: 32 ܕܟܸܐ ܚܵܝܹܪ ܒܐܲܪܥܵܐ: ܘܟܹܐ ܪ̈ܲܬܪܸܬܐ: ܟܹܐ ܕܵܩܸܪ ܒܛܘܼܪ̈ܵܢܹܐ: ܘܟܹܐ ܬܲܢܬܸܢܝܼ. 33 ܒܸܕ ܫܵܒܚܸܢ ܠܡܵܪܝܵܐ ܒܚܲܝܝܼ̈: ܒܸܕ ܙܵܡܪܸܢ ܠܐܲܠܵܗܝܼ ܟܡܵܐ ܕܩܵܝܲܡ ܝܼܘܸܢ. 34 ܒܸܕ ܗܵܘܝܵܐ ܒܵܣܝܼܡܬܵܐ ܐܸܠܹܗ ܗܵܓܵܝܬܝܼ: ܐܵܢܵܐ ܒܸܕ ܚܵܕܸܢ ܒܡܵܪܝܵܐ. 35 ܒܸܕ ܬܵܝܡܝܼ ܚܲܛܵܝܹ̈ܐ ܡ̣ܢ ܐܲܪܥܵܐ: ܘܒܝܼܫܹ̈ܐ: ܐܚܹܪ̄ܢܵܐ ܠܹܐ ܗܵܘܝܼ. ܒܵܪܸܟ̣ܝ: ܝܵܐ ܢܲܦ̮ܫܝܼ: ܠܡܵܪܝܵܐ. ܗܲܠܸܠܘܼܝܵܐ.

 

ܡܙܡܘܪܐ: ܩܗ.

1. ܫܵܟܪܘܿܢ ܠܡܵܪܝܵܐ: ܩܪܹܡܘܿܢ ܒܫܸܡܹܗ: ܡܲܕܸܥܡܘܿܢ ܓܵܘ ܛܵܝܸܦܹ̈ܐ ܦܘܼܠܚܵܢܘܼ̈ܗܝ . 2 ܫܵܒܚܘܿܢ ܐܸܠܹܗ: ܙܡܘܿܪܘܿܢ ܐܸܠܹܗ: ܗܵܓܹܡܘܿܢ ܒܟܠܵܝ ܥܵܓ̰ܸܒܘܼܝܵܬܘܼ̈ܗܝ. 3 ܫܵܒܚܘܿܢ ܒܫܸܡܵܐ ܕܩܘܼܕܫܘܼܗܝ: ܚܵܕܹܐ ܠܸܒܵܐ ܕܛܵܥܝܵܢܹ̈ܐ ܠܡܵܪܝܵܐ. 4 ܒܸܥܡܘܿܢ ܠܡܵܪܝܵܐ ܘܙܲܪܒܹܗ: ܛܸܥܡܘܿܢ ܠܦܵܬܹܗ ܒܕܵܝܸܡܘܼܬܵܐ. 5 ܕܟ̣ܘܿܪܘܿܢ ܥܵܓ̰ܸܒܘܼܝܵܬܘܼ̈ܗܝ ܕܥܒܸܕܠܹܐ: ܢܝܼܫܲܢܩܘܼ̈ܗܝ: ܘܕܝܼܘܵܢܹ̈ܐ ܕܦܘܼܡܹܗ: 6 ܝܵܐ ܙܲܪܥܵܐ ܕܐܲܒ̣ܪܵܗܵܡ ܪܹܓܹܗ: ܒܢܲܝ̈ ܝܲܥܩܘܿܒ̣: ܓܘܼܒܝܼܘ̈ܗܝ. 7 ܗ̇ܘ ܝܼܠܹܐ ܡܵܪܝܵܐ ܐܲܠܵܗܲܢ: ܒܟܠܵܗ̇ ܐܲܪܥܵܐ ܕܝܘܼܵܢܘܼ̈ܗܝ.8 ܕܟܸܪܹܐ ܠܥܵܠܲܡ ܩܵܘܠܘܼܗܝ: ܗܹܡܸܙܡܵܢ ܕܦܩܸܕܠܹܐ ܠܐܲܠܦܵܐ ܕܵܘܪܹ̈ܐ: 9 ܕܩܛܸܥܠܹܐ ܥܲܡ ܐܲܒ̣ܪܵܗܵܡ: ܘܡܵܘܬܘܼܗܝ ܠܐܝܼܣܚܵܩ: 10 ܘܡܘܼܩܘܹܠܹܗ ܠܝܲܥܩܘܿܒ̣ ܠܩܵܢܘܿܢܵܐ: ܠܝܼܣܪܵܝܹܠ ܩܵܘܠܵܐ ܕܥܵܠܲܡ: 11 ܒܹܐܡܵܪܵܐ: ܐܸܠܘܼܟ ܒܸܕ ܝܵܗ̄ܒܸܢ ܐܲܪܥܵܐ ܕܟ̣ܢܲܥܢ: ܚܲܒ̣ܠܵܐ ܕܝܵܪܬܘܼܬܵܘܟ̣ܘܿܢ: 12 ܟܲܕ ܝܼܗ̄ܘܵܘ ܚܲܟ̰ܵܐ ܒܡܸܢܝܵܢܵܐ: ܐܲܝܟ ܚܲܟ̰ܵܐ: ܘܡܵܫܵܚܲܛܹ̈ܐ ܓܵܘܘܼܗ̇: 13 ܘܪܚܸܫܠܘܿܢ ܡ̣ܢ ܛܵܝܸܦܵܐ ܠܛܵܝܸܦܵܐ: ܡ̣ܢ ܡܲܠܟܘܼܬܵܐ ܠܛܵܝܸܦܵܐ ܐܚܪ̄ܢܵܐ. 14 ܠܵܐ ܫܒܸܩܠܹܐ ܒܲܪܢܵܫܵܐ ܠܚܲܙܕܘܼܓܵܝ: ܘܡܘܼܢܟܸܣܠܹܐ ܒܘܼܬ ܕܝܵܝ ܡܲܠܟܹ̈ܐ: ܠܵܐ ܕܵܩܪܝܼܬܘܿܢ ܒܡܫܝܼܚܝܼ̈: ܘܠܢܒ̣ܝܼܝܼ̈ ܠܵܐ ܥܵܒ̣ܕܝܼܬܘܿܢ ܒܝܼܫܬܵܐ. ܘܩܪܹܠܑܹ ܟܸܦܢܵܐ ܥܲܠ ܐܲܪܥܵܐ: ܟܠܹܗ ܚܘܼܛܪܵܐ ܕܠܲܚܡܵܐ ܬܒܸܪܹܐ. 17 ܫܘܼܕܸܪܹܐ ܩܵܕ̄ܡܵܝ ܐܢܵܫܵܐ: ܠܪܹܓܵܐ ܦܸܫܠܹܐ ܙܘܼܒܢܵܐ ܝܵܘܣܸܦ: 18 ܥܘܼܓ̰ܸܙܠܘܿܢ ܒܩܵܘܕܹ̈ܐ ܐܲܩܠܵܬܘܼ̈ܗܝ: ܒܦܪܸܙܠܵܐ ܐܘܸܪܵܐ ܓܵܢܘܼܗܝ: 19 ܗܲܠ ܙܲܒ̣ܢܵܐ ܕܐܬܹܠܹܐ ܚܲܒ̇ܪܹܗ: ܐܡܵܪܬܵܐ ܕܡܵܪܝܵܐ ܩܲܡ ܨܲܪܸܦܵܐ ܠܹܗ. 20 ܫܘܼܕܸܪܹܐ ܡܲܠܟܵܐ ܘܩܲܡ ܫܵܪܹܐ ܠܹܗ. ܗܵܟܝܼܡ ܕܛܵܝܸܦܹ̈ܐ: ܘܥܒܸܕܠܹܗ ܐܵܙܵܕ. 21 ܩܲܡ ܡܲܬܸܒ̣ ܠܹܗ ܡܵܪܵܐ ܠܒܲܝܬܹܗ: ܘܗܵܟܝܼܡ ܥܲܠ ܟܠܹܗ ܡܵܐܠܹܗ: 22 ܠܐܹܣܵܪܵܐ ܓܘܼܪܵܢܘܼܗܝ ܒܪܸܙܵܝܹܗ: ܘܚܘܵܪܕܸܩܢܘܼܗܝ ܥܲܩܠܸܢ ܗ̄ܘ̣ܵܐ. 23 ܘܐܘܸܪܸܐ ܝܼܣܪܵܝܹܠ ܠܡܸܨܪܹܝܢ: ܘܝܲܥܩܘܿܒ̣ ܡܘܼܫܚܸܛܠܹܐ ܒܐܲܪܥܵܐ ܕܚܲܡ. 24 ܘܡܘܼܦܪܹܠܹܐ ܛܵܝܸܦܹܗ ܪܵܒܵܐ: ܘܩܲܡ ܙܲܪܒܸܢܹܗ ܒܘܼܫ ܡ̣ܢ ܕܸܫܡܸܢܘܼ̈ܗܝ. 25 ܡܘܼܕܸܪܹܐ ܠܸܒܵܝ ܠܸܣܢܵܝܵܐ ܛܵܝܸܦܹܗ: ܠܸܥܒ̣ܵܕܵܐ ܦܸܠܡܵܐ ܒܪܹ̈ܓܵܘܵܬܘܼܗܝ. 26 ܫܘܼܕܸܪܹܐ ܡܘܼܫܹܐ ܪܹܓܹܗ: ܐܲܗܪܘܿܢ ܕܩܲܡ ܓܵܒܹ̇ܐ ܠܹܗ. 27 ܥܒܸܕܠܘܿܢ ܓܵܘܵܝ ܫܘܼܠܹ̈ܐ ܕܢܝܼܫܲܢܩܘܼ̈ܗܝ: ܘܥܵܓ̰ܸܒܘܼܝܵܬܹ̈ܐ ܓܵܘ ܐܲܪܥܵܐ ܕܚܵܡ. 28 ܫܘܼܕܸܪܹܐ ܚܘܼܒ̣ܝܵܐ ܘܡܘܼܚܒܹܠܹܐ: ܘܠܵܐ ܥܒܸܕܠܘܿܢ ܥܵܨܝܼܘܼܬܐ ܠܗܹܡܸܙܡܵܢܘܼ̈ܗܝ. 29 ܡܘܼܕܸܪܹܐ ܡܝܼܵܝ̈ ܠܕܸܡܵܐ: ܘܡܘܼܡܝܸܬܠܹܐ ܠܢܘܼܢܵܝ̈. 30 ܡܘܼܫܪܸܨܠܵܐ ܐܲܪܥܵܝ ܦܸܩܵܩܹ̈ܐ: ܓܵܘ ܐܵܘ̈ܬܵܓܹܐ ܕܡܲܠܟܵܝ̈. 31 ܐܡܸܪܹܐ: ܘܬܹܐܠܹܐ ܕܸܒܘܼܪܬܵܐ. ܩܲܠܡܵܐ ܓܵܘ ܟܠܹܗ ܬܸܚܘܼܒܵܝ. 32 ܝܸܗܒܸܠܹܐ ܡܸܛܪ̈ܵܝ ܒܲܪܕܵܐ: ܢܘܼܪܵܐ ܠܵܗܵܢܵܐ ܒܐܲܪܥܵܝ. 33 ܘܡܚܹܠܹܐ ܠܓܸܦܬܵܝ ܘܠܬܹܐܢܵܝ: ܘܛܘܼܚܛܸܚܠܹܐ ܠܐܲܝܼܠܵܢܵܐ ܕܬܸܚܘܼܒܵܝ 34 ܐܡܸܪܹܐ: ܘܬܹܐܠܹܐ ܩܲܡܨܵܐ: ܘܙܵܚܠܵܐ: ܘܕܠܐ ܡܸܢܝܵܢܵܐ: 35 ܘܐܟܸܠܹܐ ܟܠ ܓܸܠܵܐ ܓܵܘ ܐܲܪܥܵܝ: ܘܐܟܸܠܹܐ ܛܥܘܼܢܬܵܐ ܕܐܲܪܥܵܝ. 36 ܘܡܚܹܠܹܐ ܟܠ ܒܘܼܟ̣ܪܵܐ ܓܵܘ ܐܲܪܥܵܝ: ܪܹܫܝܼܬܵܐ ܕܟܠܹܗ ܙܲܪܒܵܝ. 37 ܘܦܘܼܠܛܵܝܠܹܐ ܒܣܹܐܡܵܐ ܘܕܲܗܒ̣ܵܐ: ܘܠܲܝܬ ܗ̄ܘ̣ܵܐ ܒܫܲܒ̣ܛܘܼ̈ܗܝ ܬܲܪܩܸܠܵܢܵܐ. 38 ܚܕܹܠܹܐ ܡܸܨܪܹܝܢ ܒܦܠܵܛܬܵܝ: ܣܲܒܲܒ ܕܢܦܸܠܵܐ ܙܕܘܼܥܬܵܝ ܥܲܠܵܝ. 39 ܦܪܸܣܠܹܐ ܥܢܵܢܵܐ ܠܟܵܣܵܝܬܵܐ: ܘܢܘܼܪܵܐ ܠܒܲܗ̄ܪܘܼܢܹܐ ܒܠܲܝܠܹܐ. 40 ܛܠܸܒܠܹܐ: ܘܡܘܼܬ̄ܝܠܹܐ ܩܘܼܦܫܝܼܢܹ̈ܐ: ܘܠܲܚܡܵܐ ܕܫܡܲܝܵܐ ܡܘܼܣܒܸܥܝܵܝܠܹܐ. 41 ܦܬܸܚܠܹܐ ܐܝܼܣܵܪܵܐ: ܘܓ̰ܪܹܠܘܿܢ ܡ̈ܝܼܵܐ: ܪܚܸܫܠܘܿܢ ܒܕܘܼܟܵܢܹ̈ܐ ܨܹܗ̄ܝܹ̈ܐ: ܢܲܗܪܵܐ. 42 ܣܲܒܲܒ ܕܕܟܸܪܹܐ ܠܗܹܡܸܙܡܵܢ ܕܩܘܼܕܫܘܼܗܝ: ܠܐܲܒ̣ܪܵܗܵܡ ܪܹܓܹܗ. 43 ܘܦܘܼܠܸܛܠܹܐ ܛܵܝܸܦܹܗ ܒܚܲܕܘܼܬܵܐ: ܒܩܲܘܲܚܬܵܐ ܠܓܘܼܒܝܘܼ̈ܗܝ. 44 ܘܝܸܗܒܸܠܹܐ ܐܸܠܵܝ ܐܲܪ̈ܥܵܬܹܐ ܕܛܵܝܸܦܹ̈ܐ: ܘܓ̰ܵܦܵܐ ܕܡܸܠܲܬܹ̈ܐ ܝܪܸܬܠܘܿܢ: 45 ܩܵܐ ܕܢܵܛܪܝܼ ܗ̄ܘ̣ܵܘ ܩܵܢܘܿܢܘܼ̈ܗܝ: ܘܢܵܡܘܿܣܹܗ ܚܵܡܝܼ ܗ̄ܘ̣ܵܘ. ܗܲܠܸܠܘܼܝܵܐ.

 

ܡܙܡܘܪܐ: ܩܘ.

ܗܲܠܸܠܘܼܝܵܐ.

1. ܫܵܟܪܘܿܢ ܠܡܵܪܝܵܐ: ܣܲܒܲܒ ܕܛܵܒ̣ܵܐ ܝܠܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 2 ܡܲܢܝܼ ܗܲܡܙܸܡ ܓܲܢ̄ܒܵܪ̈ܘܼܝܵܬܹܐ ܕܡܵܪܝܵܐ: ܡܲܫܡܸܥ ܟܠܵܗ̇ ܬܸܫܒ̇ܘܿܚܬܹܗ: 3 ܛܘܼܒ̣ܵܐ ܠܢܵܛܪ̈ܵܢܹܐ ܕܕܝܼܘܵܢ: ܥܵܒ̣ܕܵܢܵܐ ܕܙܲܕܝܼܩܘܼܬܵܐ ܒܟܠ ܙܲܒ̣ܢܵܐ. 4 ܕܟ̣ܘܿܪܝܼ: ܝܵܐ ܡܵܪܝܵܐ: ܒܪܸܙܵܝܵܐ ܕܛܵܝܸܦܘܼܟ: ܣܲܚܒܸܪܝܼ ܒܦܘܼܪܩܵܢܘܼܟ: 5 ܩܵܐ ܕܚܵܙܹܢ ܒܛܵܒ̣ܬܵܐ ܕܓܘܼܒܝܘܼ̈ܟ: ܩܵܐ ܕܚܵܕܸܢ ܒܚܲܕܘܼܬܵܐ ܕܛܵܝܸܦܘܼܟ: ܩܵܐ ܕܚܵܩܪܸܢ ܥܲܡ ܝܵܪܬܘܼܬܘܼܟ. 6 ܚܛܹܠܲܢ ܥܲܡ ܒܵܒܵـ̈ـܘܵܬܲܢ: ܥܒܸܕܠܲܢ ܓܢܵܗܵܐ: ܥܒܸܕܠܲܢ ܒܝܼܫܘܼܬܵܐ. 7 ܒܵܒܵـ̈ـܘܵܬܲܢ ܓܵܘ ܡܸܨܪܹܝܢ ܠܵܐ ܦܘܼܪܡܹܠܘܿܢ ܥܵܓ̰ܸܒܘܼܝܵܬܘܼ̈ܟ: ܠܵܐ ܕܟܸܪܘܿܢ ܠܒܘܼܫܵܝܝܼ ܕܫܵܦܵܩܲܬܘܵܬܘܼ̈ܟ: ܘܥܒܸܕܠܘܿܢ ܥܵܨܝܘܼܬܵܐ ܥܲܠ ܝܵܡܵܐ: ܒܝܵܡܵܐ ܕܣܘܿܦ. 8 ܘܦܘܼܪܩܵܝܠܹܐ ܒܘܼܬ ܚܵܬܸܪ ܕܫܸܡܹܗ: ܠܡܲܕܘܼܥܝܹܐ ܓܲܢ̄ܒܵܪܘܼܬܘܼܗܝ. 9 ܘܢܓ̰ܸܘܠܹܐ ܒܝܵܡܵܐ ܕܣܘܿܦ: ܘܒܪܸܙܠܵܐ: ܘܡܘܼܚܕܸܪܵܝܠܹܐ ܓܵܘ ܥܘܼܡܩܹ̈ܐ ܐܲܝܟ ܒܲܪܝܼܵܐ. 10 ܘܦܘܼܪܩܵܝܠܹܐ ܡ̣ܢ ܐܝܼܕܵܐ ܕܣܵܢܝܵܢܵܐ: ܘܦܘܼܨܚܵܠܹܐ ܡ̣ܢ ܐܝܼܕܵܐ ܕܕܸܫܡܸܢ. 11 ܘܟܘܼܣܹܠܘܿܢ ܡ̈ܝܼܵܐ ܠܡܲܠܝܸܨܵܢܵܝ̈: ܚܵܕ̄ ܡܸܢܵܝ ܠܵܐ ܦܸܫܠܹܐ ܫܒ̣ܝܼܩܵܐ. 12 ܘܗܘܼܡܸܢܘܿܢ ܒܗܹܡܸܙܡܵܢܘܼ̈ܗܝ: ܙܡܸܪܘܿܢ ܬܸܫܒܘܿܚܬܘܼܗܝ: 13 ܝܠܸܙܠܘܿܢ: ܢܫܹܠܘܿܢ ܦܘܼܠܚܵܢܘܼ̈ܗܝ: ܠܵܐ ܣܦܸܪܘܿܢ ܠܪܵܐܝܘܼܗܝ. 14 ܘܫܘܼܗ̄ܘܸܬܠܘܿܢ ܫܲܗ̄ܘܲܬܬܵܐ ܓܵܘ ܒܲܪܝܼܵܐ: ܘܓ̰ܘܼܪܸܒܠܘܿܢ ܠܐܲܠܵܗܵܐ ܓܵܘ ܒܲܝܵܒܵܢ. 15 ܘܝܸܗܒܸܠܹܐ ܐܸܠܵܝ ܡܲܛܠܲܒܵܝ: ܘܫܘܼܕܸܪܹܐ ܒܵܓܝܼܪܘܼܬܵܐ ܒܓܵܢܵܝ. 16 ܘܒܘܼܚܸܠܘܿܢ ܒܡܘܼܫܹܐ ܓܵܘ ܐܘܼܪܕܘܝ: ܒܐܲܗܪܘܿܢ: ܩܲܕܝܼܫܵܐ ܕܡܵܪܝܵܐ. 17 ܦܬܸܚܠܹܐ ܐܲܪܥܵܐ: ܘܒܠܸܥܠܵܐ ܠܕܵܬܵܢ: ܘܟܘܼܣܹܠܵܐ ܥܲܠ ܓ̰ܵܡܵܥܲܬ ܕܐܲܒ̣ܝܼܪܵܡ. 18 ܘܬܦܸܠܹܐ ܢܘܼܪܵܐ ܓܵܘ ܓ̰ܵܡܵܥܲܬܵܝ: ܠܵܗܵܐ ܠܒܸܚܠܹܐ ܒܒܝܼܫܹ̈ܐ. 19 ܬܘܼܪܸܨܠܘܿܢ ܡܘܼܓ̰ܵܐ ܓܵܘ ܚܘܿܪܝܼܒ̣: ܘܣܓܸܕܠܘܿܢ ܠܨܲܠܡܵܐ ܪܸܡܝܵܐ: 20 ܘܡܘܼܚܠܸܦܠܘܿܢ ܐܝܼܩܵܪܵܝ. ܒܕܘܼܡܝܵܐ ܕܬܵܘܪܵܐ ܐܵܟ̣ܠܵܢܵܐ ܕܓܸܠܵܐ. 31 ܢܫܹܠܘܿܢ ܠܐܲܠܵܗܵܐ ܦܵܪܘܿܩܵܝ: ܥܵܒ̣ܕܵܢܵܐ ܕܫܘܼܠܹ̈ܐ ܓܘܼܪܹ̈ܐ ܓܵܘ ܡܸܨܪܹܝܢ: 22 ܥܵܓ̰ܸܒܘܼܝܵܬܹ̈ܐ ܓܵܘ ܐܲܪܥܵܐ ܕܚܵܡ: ܣܲܗܡܵܢܘܼܝܵܬܹ̈ܐ ܥܲܠ ܝܵܡܵܐ ܕܣܘܿܦ. 23 ܘܐܡܸܪܹܐ ܠܬܵܠܘܿܩܵܝ: ܐܸܢ ܠܵܐ ܡܘܼܫܹܐ ܓܘܼܒ̇ܝܹܗ ܟܵܠܹܐ ܗ̄ܘ̣ܵܐ ܒܬܪܵܥܝܬܵܐ ܩܵܕ̄ܡܘܼܗܝ: ܠܡܲܕܘܼܪܹܐ ܚܸܡܬܹܗ ܡ̣ܢ ܡܲܚܪܘܼܒܹܐ. 24 ܘܡܘܼܣܠܹܠܘܿܢ ܠܐܲܪܥܵܐ ܫܘܼܗ̄ܘܸܬܬܵܐ: ܠܵܐ ܗܘܼܡܸܢܘܿܢ ܠܚܲܒ̇ܪܹܗ. 25 ܘܛܘܼܪܛܸܡܠܘܿܢ ܓܵܘ ܡܲܫܟܢܵܝ̈: ܠܵܐ ܫܡܸܥܠܘܿܢ ܒܩܵܠܵܐ ܕܡܵܪܝܵܐ. 26 ܘܡܘܼܪܸܡܠܹܐ ܐܝܼܕܹܗ ܥܲܠܵܝ: ܠܡܲܢܦܘܼܠܵܝ ܓܵܘ ܒܲܪܝܼܵܐ: 27 ܘܲܠܡܲܢܦܘܼܠܹܐ ܙܲܪܥܵܝ ܓܵܘ ܛܵܝܸܦܹ̈ܐ: ܘܠܒܲܪܒܘܼܙܵܝ ܓܵܘ ܐܲܪ̈ܥܵܬܹܐ. 28 ܘܬܒܸܥܠܘܿܢ ܠܒܥܸܠ ܦܥܘܿܪ: ܘܐܟܸܠܘܿܢ ܕܸܒ̣ܚܹ̈ܐ ܕܡܝܼܬܹ̈ܐ. 29 ܘܡܘܼܟܪܸܒ̇ܠܘܿܢ ܒܥܵܡܵܠܵܝ̈: ܘܬܪܸܥܠܵܐ ܒܝܼܵܝ ܡܚܘܿܬܵܐ. 30 ܘܟܠܹܠܹܐ ܦܝܼܢܚܸܣ: ܘܥܒܸܕܠܹܐ ܕܝܼܘܵܢ: ܘܦܸܫܠܹܐ ܡܘܼܟܠܝܼܬܵܐ ܡܚܘܿܬܵܐ. 31 ܘܦܸܫܠܹܐ ܚܘܼܫܒܸܢܬܵܐ ܐܸܠܹܗ ܠܙܲܕܝܼܩܘܼܬܵܐ: ܠܕܵܘܪܵܐ ܘܕܵܘܪܵܐ ܗܲܠ ܥܵܠܲܡ. 32 ܘܡܘܼܟܪܸܒ̇ܠܘܿܢ ܥܲܠ ܡ̈ܝܼܵܐ ܕܡܪܝܼܒ̣ܵܐ: ܘܗ̄ܘܹܠܵܐ ܣܪܝܼܬܵܐ ܠܡܘܼܫܹܐ ܒܘܼܬ ܕܝܼܵܝ. 33 ܣܲܒܲܒ ܕܥܒܸܕܠܘܿܢ ܕܲܪܩܘܼܒ̣ܠܘܼܬܵܐ ܠܪܘܼܚܘܼܗܝ: ܘܒܘܼܠܒܸܥܠܹܐ ܒܣܸܦܘܵܬܘܼ̈ܗܝ. 34 ܠܵܐ ܬܘܼܠܸܩܠܘܿܢ ܠܛܵܝܸܦܹ̈ܐ ܕܐܡܸܪܹܐ ܡܵܪܝܵܐ ܐܸܠܵܝ: 35 ܘܦܸܫܠܘܿܢ ܚܒ̣ܝܼܛܹܐ ܒܛܵܝܸܦܹ̈ܐ: ܘܝܠܸܦܠܘܿܢ ܠܥܒ̣ܵܕܵܝ̈: 36 ܘܦܠܸܚܠܘܿܢ ܠܨܵܢܲܡܵܝ̈: ܘܗ̄ܘܹܠܘܿܢ ܐܸܠܵܝ ܠܢܸܫܒ̣ܵܐ. 37 ܘܕܒܸܚܠܘܿܢ ܒܢܘܼܢܵܝ̈ ܘܒܢܵܬܵܝ̈ ܠܫܹܐܕܹ̈ܐ: 38 ܘܫܘܼܦܸܟ̣ܠܘܿܢ ܕܸܡܵܐ ܙܲܟܵܝܵܐ: ܕܸܡܵܐ ܕܒܢܘܼܢܵܝ̈ ܘܕܒܢܵܬܵܝ̈: ܕܕܒܸܚܠܘܿܢ ܠܨܵܢܲܡܹ̈ܐ ܕܟܢܲܥܢ: ܘܦܸܫܠܹܐ ܡܛܘܼܡܐܝܼܬܵܐ ܐܲܪܥܵܐ ܒܕܸܡܹ̈ܐ. 39 ܘܗ̄ܘܹܠܘܿܢ ܛܲܡܹ̈ܐܐ ܒܥܒ̣ܵܕܵܝ̈: ܘܙܢܹܠܘܿܢ ܒܥܵܡܵܠܵܝ̈. 40 ܘܚܸܡܠܵܐ ܟܲܪܒܵܐ ܕܡܵܪܝܵܐ ܥܲܠ ܛܵܝܸܦܹܗ: ܘܓܘܼܢܓܸܨܠܹܐ ܡ̣ܢ ܝܵܪܬܘܼܬܹܗ. 41 ܘܣܘܼܦܵܚܠܹܐ ܒܐܝܼܕܵܐ ܕܡܸܠܲܬܹ̈ܐ: ܘܗܘܼܟܸܡܠܘܿܢ ܒܝܼܵܝ ܣܵܢܝܵܢܵܝ̈. 42 ܘܡܘܼܠܝܸܨܵܝܠܘܿܢ ܕܸܫܡܸܢܵܝ̈: ܘܦܸܫܠܘܿܢ ܙܘܼܒܛܸܢܹܐ ܬܚܘܿܬ ܐܝܼܕܵܝ. 43 ܙܲܒ̣ܢܹ̈ܐ ܪܵܒܵܐ ܦܘܼܨܚܵܠܹܐ: ܘܐܵܢܝܼ ܥܒܸܕܠܘܿܢ ܥܵܨܝܼܘܼܬܵܐ ܒܪܵܐܝܼܝ: ܘܦܸܫܠܘܿܢ ܡܘܼܟܸܦܹܐ ܒܓܢܵܗܵܝ̈. 44 ܘܚܙܹܠܹܐ: ܟܲܕ ܥܸܩܠܵܐ ܐܸܠܵܝ: ܟܲܕ ܫܡܸܥܠܹܐ ܠܓܥܵܝܬܵܝ. 45 ܘܕܟܸܪܹܐ ܩܵܬܵܝ ܩܵܘܠܘܼܗܝ: ܘܦܫܸܡܠܹܐ ܐܲܝܟ ܒܘܼܫܵܝܝܼ ܕܫܵܦܵܩܲܬܘܼܗܝ. 46 ܘܝܘܼܗ̄ܒ̣ܵܝܠܹܐ ܠܪ̈ܲܚܡܹܐ. ܩܵܕ̄ܡ ܟܠܵܝ ܠܵܒܠܵܢܝܼ̈ ܝܲܚܣܝܼܪ. 47 ܦܵܪܸܩ ܠܲܢ: ܡܵܪܝܵܐ ܐܲܠܵܗܲܢ: ܘܓ̰ܵܡܥܝܼ ܠܲܢ ܡ̣ܢ ܛܵܝܸܦܹ̈ܐ: ܠܫܵܟܘܿܪܹܐ ܠܫܸܡܵܐ ܕܩܘܼܕܫܘܼܟ: ܠܫܵܒܘܿܚܹܐ ܒܬܸܫܒܘܿܚܬܘܼܟ. 48 ܒܪܝܼܟ̣ܵܐ ܝܠܹܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡ̣ܢ ܥܵܠܲܡ ܘܗܲܠ ܥܵܠܲܡ. ܘܐܵܡܸܪ ܟܠܹܗ ܛܵܝܸܦܵܐ: ܐܵܡܹܝܢ. ܗܲܠܸܠܘܼܝܵܐ.

ܣܦܪܐ ܕܚܡܫܐ.

 

ܡܙܡܘܪܐ: ܩܙ.

1. ܫܵܟܪܘܿܢ ܠܡܵܪܝܵܐ: ܣܲܒܲܒ ܕܛܵܒ̣ܵܐ ܝܠܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 2 ܐܵܡܪܝܼ ܦܪ̈ܝܼܩܹܐ ܕܡܵܪܝܵܐ: ܕܦܘܼܪܩܵܝܠܹܐ ܡ̣ܢ ܐܝܼܕܵܐ ܕܡܲܠܝܸܨܵܢܵܐ: 3 ܘܡ̣ܢ ܐܲܪ̈ܥܵܬܹܐ ܓ̰ܘܼܡܸܥܝܵܝܠܹܐ: ܡ̣ܢ ܡܲܕܢܚܵܐ ܘܡ̣ܢ ܡܲܥ̱ܪܒ̣ܵܐ: ܡ̣ܢ ܓܲܪܒ̇ܝܵܐ: ܘܡ̣ܢ ܝܵܡܵܐ. 4 ܚܠܸܛܠܘܿܢ ܓܵܘ ܒܲܪܝܼܵܐ: ܓܵܘ ܒܲܝܵܒܵܢ ܐܘܼܪܚܵܐ: ܡܕܝܼܢ̄ܬܵܐ ܕܝܬܝܵܒ̣ܵܐ ܠܵܐ ܡܘܼܫ̄ܟܸܚܠܘܿܢ. 5 ܟܦܝܼܢܹ̈ܐ: ܐܘܼܦ ܨܹܗ̄ܝܹ̈ܐ: ܓܵܢܵܝ ܒܓܵܘܵܝ ܕܘܼܪܕܸܫܠܵܐ. 6 ܘܡܘܼܩܘܸܚܠܘܿܢ ܠܡܵܪܝܵܐ: ܟܲܕ ܥܸܩܠܵܐ ܐܸܠܵܝ: ܡ̣ܢ ܐܘܼܠܨܵܢܵܝ̈ ܦܘܼܨܚܵܠܹܐ. 7 ܘܠܘܼܒܠܵܝܠܹܐ ܒܐܘܼܪܚܵܐ ܕܘܼܙ. ܠܹܐܙܵܠܵܐ ܠܡܕܝܼܢ̄ܬܵܐ ܕܝܬܝܼܵܒ̣ܵܐ. 8 ܫܵܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܘܼܗܝ: ܘܥܵܓ̰ܸܒܘܼܝܵܬܘܼ̈ܗܝ ܠܒܢܲܝ̈ܢܵܫܵܐ! 9 ܣܲܒܲܒ ܕܟܹܐ ܡܲܣܒܸܥ ܓܵܢܵܐ ܗܲܣܪܲܬ: ܘܓܵܢܵܐ ܟܦܝܼܢܬܵܐ ܟܹܐ ܡܵܠܹܐ ܛܵܒ̣ܬܵܐ. 10 ܝܵܬܒ̣ܵܢܵܐ ܒܚܘܼܒ̣ܝܵܐ ܘܛܸܠܵܢܝܼܬܵܐ ܕܡܵܘܬܵܐ: ܐܣܝܼܪܹܐ ܒܝܲܠܨܘܼܝ ܘܦܪܸܙܠܵܐ: 11 ܣܲܒܲܒ ܕܥܒܸܕܠܘܿܢ ܥܵܨܝܘܼܬܵܐ ܥܲܠ ܗܹܡܸܙܡܵܢܹ̈ܐ ܕܐܲܠܵܗܵܐ: ܘܪܵܐܝܝܼ ܕܥܸܠܵܝܵܐ ܡܘܼܣܠܹܠܘܿܢ: 12 ܘܡܘܼܟܸܦܠܹܐ ܒܓ̰ܵܦܵܐ ܠܸܒܵܐ: ܦܘܼܢܒܸܠܘܿܢ ܘܠܲܝܬ ܗ̄ܘ̣ܵܐ ܗܲܝܸܪܵܢܵܐ. 13 ܘܡܘܼܩܘܸܚܠܘܿܢ ܠܡܵܪܝܵܐ: ܟܲܕ ܥܸܩܠܵܐ ܐܸܠܵܝ: ܡ̣ܢ ܐܘܼܠܨܵܢܵܝ̈ ܦܘܼܪܩܵܝܠܹܐ. 14 ܦܘܼܠܛܵܝܠܹܐ ܡ̣ܢ ܚܘܼܒ̣ܝܵܐ ܘܛܸܠܵܢܝܼܬܵܐ ܕܡܘܼܬܵܐ: ܘܝܸܣܘܼܪܵܝ ܩܛܸܥܠܹܐ. 15 ܫܵܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܘܼܗܝ: ܘܥܵܓ̰ܸܒܘܼܝܵܬܘܼ̈ܗܝ ܠܒܢܲܝ̈ܢܵܫܵܐ! 16 ܣܲܒܲܒ ܕܬܒܸܪܹܐ ܬܲܪ̈ܥܵܢܹܐ ܕܢܚܵܫܵܐ: ܘܕܵܒ̣ܪܹ̈ܐ ܕܦܪܸܙܠܵܐ ܩܛܸܥܠܹܐ. 17 ܫܹܐܕܵܢܹ̈ܐ ܡ̣ܢ ܐܘܼܪܚܵܐ ܕܓܢܵܗܵܝ: ܘܡ̣ܢ ܥܵܘܠܵܝ: ܟܹܐ ܦܵܝܫܝܼ ܡܘܼܠܝܸܨܹܐ. 18 ܡ̣ܢ ܟܠ ܡܹܐܟ̣ܘܼܠܬܵܐ ܟܹܐ ܓܲܢܓܸܨܵܐ ܓܵܢܵܝ: ܘܟܹܐ ܩܲܪܒܸܢܝܼ ܗܲܠ ܕܲܪ̈ܘܵܙܹܐ ܕܡܵܘܬܵܐ. 19 ܘܟܹܐ ܡܲܩܘܸܚ ܠܡܵܪܝܵܐ: ܟܲܕ ܥܵܝܩܵܐ ܐܸܠܵܝ: ܡ̣ܢ ܐܘܼܠܨܵܢܵܝ̈ ܟܹܐ ܦܵܪܸܩ ܠܗ̄ܘܿܢ. 20 ܟܹܐ ܫܵܕܸܪ ܗܹܡܸܙܡܵܢܘܼ̈ܗܝ ܘܟܹܐ ܒܵܣܸܡ ܠܗ̄ܘܿܢ: ܘܟܹܐ ܚܵܠܸܨ ܠܗ̄ܘܿܢ ܡ̣ܢ ܚܪܵܒ̣ܵܝ: 21 ܫܵܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܘܼܗܝ: ܘܥܵܓ̰ܸܒܘܼܝܵܬܘܼ̈ܗܝ ܠܒܢܲܝ̈ܢܵܫܵܐ! 22 ܘܕܵܒ̣ܝܝܼ ܕܸܒ̣ܚܹ̈ܐ ܕܫܵܟܲܪܬܵܐ: ܘܗܵܩܝܼ ܦܘܼܠܚܵܢܘܼ̈ܗܝ ܒܩܲܘܲܚܬܵܐ. 23 ܨܵܠܝܵܢܹ̈ܐ ܕܝܵܡܵܐ ܒܓܵܡ̈ܝܹܐ: ܥܵܒ̣ܕܵܢܹ̈ܐ ܕܦܘܼܠܚܵܢܵܐ ܒܡܲܝܵܐ ܪܵܒܵܐ: 24 ܐܵܢܝܼ ܟܹܐ ܚܵܙܝܼ ܦܘܼܠܚܵܢܹ̈ܐ ܕܡܵܪܝܵܐ: ܘܥܵܓ̰ܸܒܘܼܝܵܬܘܼ̈ܗܝ ܓܵܘ ܥܘܼܡܩܵܐ. 25 ܟܹܐ ܐܵܡܸܪ: ܘܟܹܐ ܡܲܩܸܡ ܦܵܘܚܵܐ ܕܒܘܿܪܵܢ: ܘܟܹܐ ܡܵܪܸܡ ܠܲܦܘܼ̈ܗ̇. 26 ܟܹܐ ܐܵܣܩܝܼ ܠܫܡܲܝܵܐ: ܟܹܐ ܨܵܠܝ ܠܥܘܼܡܩܹ̈ܐ: ܓܵܢܵܝ ܒܒܝܼܫܬܵܐ ܦܫܸܪܵܐ. 27 ܟܹܐ ܦܲܢܒܸܠܝܼ ܘܟܹܐ ܚܵܕܪܝܼ ܐܲܝܟ ܪܵܘܵܝܵܐ: ܘܟܠܵܗ̇ ܥܵܩܸܠܕܵܪܘܼܬܵܝ ܟܹܐ ܒܲܠܥܝܼ. 28 ܘܟܹܐ ܡܲܩܘܸܚܝܼ ܠܡܵܪܝܵܐ: ܟܲܕ ܥܵܝܩܵܐ ܐܸܠܵܝ: ܘܡ̣ܢ ܐܘܼܠܨܵܢܵܝ̈ ܟܹܐ ܦܵܠܸܛ ܠܗ̄ܘܿܢ. 29 ܟܹܐ ܡܲܟܠܹܐ ܒܘܼܪܵܢ ܠܫܬܵܩܬܵܐ: ܘܗ̄ܘܹܠܘܿܢ ܫܸܠܝܵܐ ܠܲܦܵܝ̈. 30 ܘܟܹܐ ܚܵܕܝܼ ܟܲܕ ܫܵܬܩܝܼ: ܘܟܹܐ ܬܲܓܒܸܪܘܿܢ ܠܠܡܹܐܢܵܐ ܕܪܸܙܵܝܵܝ. 31 ܫܵܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܘܼܗܝ: ܘܥܵܓ̰ܸܒܘܼܝܵܬܘܼ̈ܗܝ ܠܒܢܲܝ̈ܢܵܫܵܐ! 32 ܘܡܵܪܡܝܼ ܠܹܗ ܒܟܸܢܫܵܐ ܕܛܵܝܸܦܵܐ: ܘܓܵܘ ܓ̰ܵܡܵܥܲܬ ܕܚܘܵܪ̈ܕܸܩܢܹܐ ܚܵܩܪܝܼ ܠܹܗ. 33 ܟܹܐ ܥܵܒܸܕ ܢܲܗܪ̈ܵܘܵܬܹܐ ܠܒܲܪܝܼܵܐ: ܘܦܠܵܛܹ̈ܐ ܕܡ̈ܝܼܵܐ ܠܕܘܼܟܬܵܐ ܨܗ̄ܝܼܬܵܐ: 34 ܐܲܪܥܵܐ ܕܛܥܘܼܢܝܵܬܹ̈ܐ ܠܐܲܪܥܵܐ ܡܵܠܘܿܚܬܵܐ: ܡ̣ܢ ܒܝܼܫܬܵܐ ܕܥܵܡܪܵܢܹܐ ܓܵܘܘܼܗ̇. 35 ܟܹܐ ܥܵܒܸܕ ܒܲܪܝܼܵܐ ܠܢܸܡܙܵܐ ܕܡ̈ܝܼܵܐ: ܘܐܲܪܥܵܐ ܨܗ̄ܝܼܬܵܐ ܠܦܠܵܛܹ̈ܐ ܕܡ̈ܝܼܵܐ. 36 ܘܟܹܐ ܡܲܬܝܸܒ̣ ܬܵܡܵܐ ܟܦܝܼܢܹ̈ܐ: ܘܟܹܐ ܗܵܕܪܝܼ ܡܕܝܼܢ̄ܬܵܐ ܕܝܬܝܵܒ̣ܵܐ: 37 ܘܙܲܪܥܝܼ ܚܲܩܠܵܢܹ̈ܐ: ܘܢܵܨܒ̣ܝܼ ܟܲܪ̈ܡܵܢܹܐ: ܘܥܵܒ̣ܕܝܼ ܛܥܘܼܢܝܵܬܹ̈ܐ ܕܡܲܗܨܘܼܠ. 38 ܘܟܹܐ ܒܵܪܹܟ ܠܗ̄ܘܿܢ ܘܟܹܐ ܙܵܝܕܝܼ ܪܵܒܵܐ: ܘܪܸܣܩܵܝ ܠܹܐ ܡܲܒܨܪ. 39 ܘܚܨܸܪܘܿܢ ܘܦܸܫܠܘܿܢ ܡܘܼܟܸܦܹܐ ܡ̣ܢ ܙܠܘܼܡܝܵܐ: ܒܝܼܫܬܵܐ: ܘܕܲܪܕ. 40 ܟܹܐ ܫܵܦܸܟ ܡܲܣܠܵܝܬܵܐ ܥܲܠ ܢܵܓ̰ܝܼܒܹ̈ܐ: ܘܟܹܐ ܡܲܚܠܸܛ ܠܗ̄ܘܿܢ ܒܚܪܵܒܵܐ ܠܵܐ ܐܘܼܪܚܵܐ. 41 ܘܟܹܐ ܡܵܪܸܡ ܡܸܣܟܹܢܵܐ ܡ̣ܢ ܝܲܠܨܘܼܝ: ܘܟܹܐ ܥܵܒܸܕ ܐܲܝܟ ܥܸܪ̈ܒܹܐ ܐܘܼ̈ܓ̰ܵܓܹܐ. 42 ܒܸܕ ܚܵܙܝܼ ܬܪ̈ܘܼܨܹܐ ܘܒܸܕ ܚܵܕܝܼ: ܘܟܠܹܗ ܥܵܘܠܵܐ ܒܸܕ ܥܵܟ̰ܸܡ ܦܘܼܡܘܼܗܝ. 43 ܡܲܢܝܼ ܝܠܹܐ ܥܵܩܸܠܕܵܪ ܘܢܵܛܸܪ ܐܲܢܹܐ: ܘܦܲܪܡܝܼ ܪ̈ܲܚܡܹܐ ܕܡܵܪܝܵܐ.

 

ܡܙܡܘܪܐ: ܩܚ.

ܙܡܵܪܬܵܐ: ܡܲܙܡܘܿܪܵܐ ܕܕܵܘܝܼܕ.

1. ܡܘܼܩܘܼܝܼܵܐ ܝܠܹܐ ܠܸܒܝܼ: ܐܲܠܵܗܵܐ: ܒܸܕ ܫܵܒܚܸܢ ܘܒܸܕ ܙܵܡܪܸܢ ܐܘܼܦ ܒܐܝܼܩܵܪܝܼ. 2 ܪܥܘܿܫܝ: ܩܝܼܬܵܪܵܐ ܘܟܸܢܵܪܵܐ: ܒܸܕ ܪܵܥܫܸܢ ܒܨܲܦܪܵܐ. 3 ܒܸܕ ܫܵܟܪܸܢ ܐܸܠܘܼܟ ܓܵܘ ܛܵܝܸܦܹ̈ܐ: ܡܵܪܝܵܐ: ܘܒܸܕ ܙܵܡܪܸܢ ܐܸܠܘܼܟ ܓܵܘ ܡܸܠܲܬܹ̈ܐ. 4 ܣܲܒܲܒ ܓܘܼܪܬܵܐ ܝܠܵܐ ܡܥܲܠܐ ܫܡܲܝܵܐ ܫܵܦܵܩܲܬܘܼܟ: ܘܗܲܠ ܪܩܝܼܥܵܐ ܣܲܪܲܣܬܘܼܬܘܼܟ. 5 ܪܘܼܡ ܥܲܠ ܫܡܲܝܵܐ: ܐܲܠܵܗܵܐ: ܘܥܲܠ ܟܠܵܗ̇ ܐܲܪܥܵܐ ܐܝܼܩܵܪܘܼܟ 6 ܩܵܐ ܕܚܵܠܨܝܼ ܣܵܘܓܘܿܠܘܼ̈ܟ: ܦܵܪܸܩ ܒܝܲܡܝܼܢܘܼܟ ܘܓ̰ܲܘܸܒ ܠܝܼ. 7 ܐܲܠܵܗܵܐ ܗܘܼܡܙܸܡܠܹܐ ܒܩܘܼܕܫܘܼܗܝ: ܒܸܕ ܦܵܨܚܸܢ: ܒܸܕ ܦܲܠܸܢ ܠܫܟܹܝܡ: ܘܥܘܼܡܩܵܐ ܕܣܵܟܘܼܬ ܒܸܕ ܡܵܫܚܸܢ. 8 ܕܝܼܝܼ ܝܠܹܐ ܓܸܠܥܵܕ: ܕܝܼܝܼ ܡܢܲܫܹܐ: ܘܐܲܦܪܹܝܡ ܩܲܠܥܵܐ ܕܪܹܫܝܼ. ܝܼܗܘܼܕܵܐ ܩܵܛܝܼܝܼ. 9 ܡܘܼܐܵܒ̣ ܡܵܪܸܓܠܵܐ ܕܚܲܠܲܠܬܝܼ: ܥܲܠ ܐܲܕܘܿܡ ܒܸܕ ܪܲܦܸܢ ܨܵܘܸܠܬܝܼ: ܥܲܠ ܦܠܸܫܬ ܒܸܕ ܩܲܘܸܚܸܢ. 10 ܡܲܢܝܼ ܒܸܕ ܠܵܒܸܠ ܠܝܼ ܠܡܕܝܼܢ̄ܬܵܐ ܡܗܘܼܨܸܪܬܵܐ: ܡܲܢܝܼ ܬܲܓܒܸܪܝܼ ܗܲܠ ܐܲܕܘܿܡ: 11 ܗܵܐ: ܠܵܐ ܐܲܠܵܗܵܐ: ܕܟ̰ܘܼܡܟ̰ܸܡܵܚܠܘܼܟ: ܘܠܹܐ ܦܵܠܛܸܬ: ܐܲܠܵܗܵܐ: ܒܚܲܝܠܵܘܵܬܲܢ: 12 ܗܲܒ̄ܠ ܠܲܢ ܗܝܼܵܪܝܼ ܡ̣ܢ ܕܸܫܡܸܢ: ܘܗܵܒܵܣ ܝܼܠܵܐ ܦܪܲܩܬܵܐ ܕܒܲܪܢܵܫܵܐ. 13 ܒܐܲܠܵܗܵܐ ܒܸܕ ܥܵܒ̣ܕܵܚ ܚܲܝܠܵܐ: ܘܗ̇ܘ ܒܸܕ ܕܲܫܕܸܫ ܠܕܸܫ̈ܡܸܢܲܢ.

 

ܡܙܡܘܪܐ: ܩܛ.

ܠܪܹܫܵܐ ܕܙܵܡܵܪܹ̈ܐ: ܡܲܙܡܘܿܪܵܐ ܕܕܵܘܝܼܕ.

1. ܐܲܠܵܗܵܐ ܕܬܸܫܒ̇ܘܿܚܬܝܼ: ܠܵܐ ܫܵܬܩܸܬ: 2 ܣܲܒܲܒ ܦܘܼܡܵܐ ܕܒܝܼܫܵܐ: ܘܦܘܼܡܵܐ ܦܵܠܘܿܡܵܐ: ܥܲܠܝܼ ܦܬܸܚܠܘܿܢ: ܗܘܼܡܙܸܡܠܘܿܢ ܥܲܡܝܼ ܒܠܸܫܵܢܵܐ ܕܵܓܵܠܵܐ: 3 ܘܒܗܸܡܸܙܡܵܢܹ̈ܐ ܕܣܵܢܵܝܬܵܐ ܚܘܼܪܕܝܸܢܘܿܢ: ܘܦܸܫܠܘܿܢ ܥܲܡܝܼ ܕܠܵܐ ܗܲܓ̰ܲܬ. ܡܒܵܕܵܠ ܕܡܲܚܲܒܬܝܼ ܗ̄ܘܹܠܘܿܢ ܕܲܪܩܘܼܒ̣ܠܝܼ: ܘܐܵܢܵܐ (ܒܸܕ ܨܵܠܸܢ) ܨܠܘܿܬܵܐ. 5 ܘܡܘܼܬܸܒ̣ܠܘܿܢ ܥܲܠܝܼ ܒܝܼܫܬܵܐ ܡܒܵܕܵܠ ܕܛܵܒ̣ܬܵܐ: ܘܣܢܵܝܬܵܐ ܡܒܵܕܵܠ ܕܡܲܚܲܒܬܝܼ. 6 ܦܵܩܕܸܬ ܥܲܠܘܼܗܝ ܒܝܼܫܵܐ: ܘܩܵܝܡܵܢܵܐ ܠܕܲܪܩܘܼܒ̣ܠ ܟܵܠܹܐ ܥܲܠ ܝܲܡܝܼܢܹܗ: 7 ܒܕܝܵܢܬܵܐ ܐܸܠܹܗ: ܦܵܠܸܛ ܓܘܼܢܵܗܟܵܪ: ܘܨܠܘܿܬܘܼܗܝ ܗܵܘܝܵܐ ܠܚܛܝܼܬܵܐ. 8 ܗܵܘܝܼ ܝܘܿܡܵܢܘܼ̈ܗܝ ܚܲܟ̰ܵܐ: ܡܲܢܨܵܒܘܼܗܝ ܫܵܩܸܠ ܚܵܕ̄ ܐܚܹܪ̄ܢܵܐ. 9 ܗܵܘܝܼ ܒܢܘܼܢܘܼ̈ܗܝ ܝܵܬܘܿܡܹ̈ܐ: ܘܒܲܟ̣ܬܹܗ ܐܲܪܡܸܠܬܵܐ. 10 ܘܚܕܵܪܵܐ ܚܵܕܪܝܼ ܒܢܘܼܢܘܼ̈ܗܝ: ܘܓܵܒܝܼ: ܘܛܵܠܒܝܼ ܡ̣ܢ ܚܵܪ̈ܒܝܼܵܝ. 11 ܕܵܪܹܐ ܢܸܫܒ̣ܵܐ ܡܵܪܵܐ ܕܕܵܝܢܵܐ ܠܟܠ ܕܐܝܼܬ ܠܹܗ: ܘܣܵܠܒܝܼ ܢܘܼܟ̣ܪ̈ܵܝܹܐ ܓ̰ܵܦܘܼܗܝ. 12 ܠܵܐ ܗܵܘܹܐ ܐܸܠܹܗ ܡܲܪܝܸܟ̣ܵܢܵܐ ܕܪܲܚܡܹܐ: ܘܠܵܐ ܗܵܘܹܐ ܡܪܲܚܡܵܢܵܐ ܠܝܵܬܘܿܡܘܼ̈ܗܝ. 13 ܗܵܘܹܐ ܗ̇ܘ ܕܒܵܬ̄ܪܹܗ ܠܩܛܵܥܝܬܵܐ: ܒܕܵܘܪܵܐ ܐܚܹܕ̄ܢܵܐ ܗܵܘܹܐ ܓܪܝܼܕܵܐ ܫܸܡܵܝ. 14 ܦܵܝܸܫ ܕܟ̣ܝܼܪܵܐ ܥܵܘܠܵܐ ܕܒܵܒܵܘܵܬܘܼ̈ܗܝ ܠܟܸܣ ܡܵܪܝܵܐ: ܘܚܛܝܼܬܵܐ ܕܝܸܡܹܗ ܠܵܐ ܗܵܘܝܵܐ ܓܪܝܼܕܬܵܐ. 15 ܗܵܘܝܼ ܩܵܕ̄ܡ ܡܵܪܝܵܐ ܒܕܵܝܸܡܘܼܬܵܐ: ܘܩܲܛܸܥ ܡ̣ܢ ܐܲܪܥܵܐ ܕܟ̣ܵܪܵܝ. 16 ܣܲܒܲܒ ܠܵܐ ܕܟܸܪܹܐ ܠܸܥܒ̣ܵܕܵܐ ܪ̈ܲܚܡܹܐ: ܘܢܸܦܠܹܐ ܒܵܬ̄ܪ ܐܢܵܫܵܐ ܡܸܣܟܹܢܵܐ ܘܦܲܩܝܼܪ: ܘܕܘܼܪܕܸܫܵܐ ܒܠܸܒܵܐ: ܠܡܲܡܝܘܼܬܹܐ. 17 ܘܡܘܼܚܸܒܠܹܐ ܠܵܘܛܬܵܐ: ܘܐܬܹܠܹܐ ܥܲܠܘܼܗܝ: ܘܠܵܐ ܒܣܸܡܠܵܐ ܠܹܗ ܒܒܘܼܪܟܬܵܐ: ܘܪܚܸܩܠܵܐ ܡܸܢܹܗ. 18 ܘܠܒܸܫܠܹܐ ܠܵܘܛܬܵܐ ܐܲܝܟ ܠܒܸܫܬܹܗ: ܘܐܘܸܪܵܐ ܐܲܝܟ ܡ̈ܝܼܵܐ ܒܓܵܘܘܼܗܝ: ܘܐܲܝܟ ܡܸܫܚܵܐ ܒܓܲܪܡܘܼܗܝ. 19 ܗܵܘܝܵܐ ܐܸܠܹܗ ܐܲܝܟ ܓ̰ܘܼܠܵܐ ܕܩܵܛܸܘ ܓܵܢܹܗ: ܘܩܵܐ ܚܵܨܵܐ ܒܕܵܝܸܡܘܼܬܵܐ ܐܲܣܪܹܗ. 20 ܐܵܗܵܐ ܝܠܹܐ ܗܵܩܵܐ ܕܕܲܪ̈ܩܘܼܒ̣ܠܵܝܼ ܡ̣ܢ ܠܟܸܣ ܡܵܪܝܵܐ: ܘܕܗܲܡܙܸܡܵܢܹ̈ܐ ܕܒܝܼܫܬܵܐ ܥܲܠ ܢܲܦ̮ܫܝܼ. 21 ܘܐܲܢ̄ܬ: ܡܵܪܝܵܐ ܐܲܠܵܗܵܐ: ܥܒ̣ܘܿܕ ܥܲܡܝܼ ܒܘܼܬ ܚܵܬܸܪ ܕܫܸܡܘܼܟ: ܣܲܒܲܒ ܕܨܵܦܵܝܝܼ ܝܠܵܐ ܫܵܦܵܩܲܬܘܼܟ: ܘܦܵܨܝܼ ܠܝܼ: 22 ܣܲܒܲܒ ܡܣܟܹܢܵܐ ܝܘܸܢ ܘܦܲܩܝܼܪ ܐܵܢܵܐ: ܘܠܸܒܝܼ ܡܪܸܥܠܹܐ ܒܓܵܘܝܼ. 23 ܐܲܝܟ ܛܸܠܵܢܝܼܬܵܐ ܐܝܼܡܲܢ ܕܟܵܝܦܵܐ ܪܲܚܝܼܩܵܐ ܝܘܸܢ: ܦܸܫܠܝܼ ܢܦܝܼܨܵܐ ܐܲܝܟ ܩܲܡܨܵܐ. 24 ܒܘܼܪ̈ܟܵܟܝܼ ܪܥܸܠܘܿܢ ܡ̣ܢ ܨܵܘܡܵܐ: ܘܒܸܣܪܝܼ ܢܘܸܠܹܐ ܡ̣ܢ ܡܸܫܚܵܐ. 25 ܘܐܵܢܵܐ ܗ̄ܘܹܠܝܼ ܠܵܘܡܵܐ ܐܸܠܵܝ: ܟܹܐ ܚܵܙܝܼ ܠܝܼ: ܟܹܐ ܫܵܥܫܝܼ ܪܹܫܵܝ. 26 ܗܲܝܸܪܝܼ: ܡܵܪܝܵܐ ܐܲܠܵܗܝܼ: ܦܵܪܸܩ ܠܝܼ ܐܲܝܟ ܫܵܦܵܩܲܬܘܼܟ: 27 ܘܝܲܕܥܝܼ ܕܐܝܼܕܘܼܟ ܝܼܠܵܐ ܐܵܗܵܐ: ܐܲܢ̄ܬ: ܡܵܪܝܵܐ: ܥܒ̣ܝܼܕܵܠܘܼܟ. 28 ܠܵܝܛܝܼ ܐܵܢܝܼ: ܘܐܲܢܬ ܒܵܪܟܸܬ: ܩܸܡܠܘܿܢ: ܘܢܚܸܦܠܘܿܢ: ܘܪܸܓܘܼܟ ܒܸܕ ܚܵܕܹܐ. 29 ܠܵܒ̣ܫܝܼ ܕܲܪ̈ܩܘܼܒ̣ܠܵܝܝܼ ܫܲܪܡܸܣܲܪܘܼܬܵܐ. ܘܩܵܛܘܝܼ ܐܲܝܟ ܥܵܒܵܝܵܐ ܢܚܸܦܬܵܝ. 30 ܒܸܕ ܫܵܟܪܸܢ ܠܡܵܪܝܵܐ ܪܵܒܵܐ ܒܦܘܼܡܝܼ: ܘܒܓܵܘܵܐ ܕܪܵܒܵܐ ܒܸܕ ܫܵܒ̣ܚܸܢܹܗ. 31 ܣܲܒܲܒ ܒܸܕ ܟܵܠܹܐ ܠܝܲܡܝܼܢܵܐ ܕܦܲܩܝܼܪ: ܠܦܵܪܘܿܩܵܐ ܡ̣ܢ ܕܲܝܵܢܹ̈ܐ ܕܓܵܢܹܗ.

 

ܡܙܡܘܪܐ: ܩܝ.

ܡܲܙܡܘܪܐ ܕܕܵܘܝܼܕ.

1. ܐܡܸܪܹܐ ܡܵܪܝܵܐ ܠܡܵܪܝܼ: ܝܬܘܿܒ̣ ܠܝܲܡܝܼܢܝܼ: ܗܲܠ ܕܡܲܬܒܸܢ ܕܸܫܡܸܢܘܼ̈ܟ ܟܘܼܒ̣ܫܵܐ ܠܐܲܩܠܘܼ̈ܟ. 2 ܚܘܼܛܪܵܐ ܕܙܲܪܒܘܼܟ ܒܸܕ ܫܵܕܸܪ ܡܵܪܝܵܐ ܡ̣ܢ ܨܸܗܝܘܿܢ: ܗܵܟܸܡ ܒܓܵܘܵܐ ܕܕܸܫܡܸܢܘܼ̈ܟ. 3 ܛܵܝܸܦܘܼܟ ܩܘܼܪ̈ܒܵܢܹܐ ܕܪܸܙܵܝܵܐ ܝܢܵܐ ܒܝܘܿܡܵܐ ܕܚܲܝܠܘܼܟ: ܒܣܸܩ̈ܠܹܐ ܕܩܘܼܕܫܵܐ: ܡ̣ܢ ܡܲܪܒ̇ܥܵܐ ܕܡܵܘܪܹܫܵܐ: ܕܝܼܘܼܟ ܝܼܠܹܐ ܛܠܘܼܠܵܐ ܕܝܵܠܘܼܬܘܼܟ. 4 ܝܡܹܠܹܐ ܡܵܪܝܵܐ ܘܠܹܐ ܦܵܫܸܡ: ܐܲܢ̄ܬ ܝܼܘܸܬ ܟܵܗܢܵܐ ܠܥܵܠܲܡ[89] ܒܩܸܨܲܬܹ̈ܐ ܕܡܲܠܟܝܼܙܕܸܩ. 5 ܡܵܪܝܵܐ ܥܲܠ ܝܲܡܝܼܢܘܼܟ. ܛܒܸܚܠܹܐ ܡܲܠܟܹ̈ܐ ܒܝܘܿܡܵܐ ܕܚܸܡܬܹܗ. 6 ܒܸܕ ܕܵܝܸܢ ܓܵܘ ܛܵܝܸܦܹ̈ܐ: ܡܠܹܠܹܐ ܫܠܲܕܹ̈ܐ: ܛܒܸܚܠܹܐ ܪܹܫܵܐ ܥܲܠ ܐܲܪܥܵܐ ܪܵܒܵܐ. 7 ܡ̣ܢ ܢܲܗܪܵܐ ܒܐܘܼܪܚܵܐ ܒܸܕ ܫܵܬܹܐ: ܒܘܼܬ ܕܐܵܗܵܐ ܒܸܕ ܡܵܪܸܡ ܪܹܫܵܐ.

 

ܡܙܡܘܪܐ: ܩܝܐ.

ܗܲܠܸܠܘܼܝܵܐ.

1. ܒܸܕ ܫܵܟܪܸܢ ܠܡܵܪܝܵܐ ܒܟܠܹܗ ܠܸܒܵܐ: ܓܵܘ ܡܲܨܠܵܗܲܬ ܕܬܪ̈ܘܼܨܹܐ ܘܓ̰ܵܡܵܥܲܬ. 2 ܓܘܼܪܹ̈ܐ ܝܢܵܐ ܦܘܼܠܚܵܢܹܐ ܕܡܵܪܝܵܐ: ܨܘܼܚܨܝܹܐ ܝܢܵܐ ܠܟܠܵܝ ܕܒܵܣܡܵܐ ܠܗ̄ܘܿܢ ܒܝܼܵܝ. 3 ܙܲܪܝܼܦܘܼܬܵܐ ܘܣܸܩܠܵܐ ܝܠܹܐ ܦܘܼܠܚܵܢܘܼܗܝ: ܘܙܲܕܝܼܩܘܼܬܹܗ ܩܵܝܲܡ ܝܼܠܵܐ ܠܥܵܠܲܡ. 4 ܕܟ̣ܵܪܵܐ ܥܒܸܕܠܹܐ ܠܥܵܓ̰ܸܒܘܼܝܵܬܘܼ̈ܗܝ: ܚܲܢܵܢܵܐ ܘܡܪܲܚܡܵܢܵܐ ܝܠܹܐ ܡܵܪܝܵܐ. 5 ܡܹܐܟ̣ܘܼܠܬܵܐ ܝܸܗ̄ܒܸܠܹܐ ܠܙܸܕܥܝܘܼ̈ܗܝ: ܒܸܕ ܕܵܟܸܪ ܠܥܵܠܲܡ ܩܵܘܠܹܗ. 6 ܚܲܝܠܵܐ ܕܦܘܼܠܚܵܢܘܼ̈ܝ ܡܘܼܕܸܥܠܹܐ ܠܛܵܝܸܦܹܗ: ܠܝܼܵܗ̄ܒ̣ܵܐ ܐܸܠܵܝ ܝܵܬܘܼܬܵܐ ܕܡܸܠܲܬܹ̈ܐ. 7 ܦܘܿܠܚܵܢܹ̈ܐ ܕܐܝܼܕܵܬܘܼ̈ܗܝ ܣܲܪܲܣܬܘܼܬܵܐ ܝܢܵܐ[90] ܘܕܝܼܘܵܢ: ܡܗܘܼܡܢܹ̈ܐ ܝܢܵܐ ܟܠܵܝ ܦܵܩܲܕܝܵܬܘܼ̈ܗܝ. 8 ܣܢܝܼܕܹܐ ܝܢܵܐ ܠܥܵܠܲܡ ܥܵܠܡܝܼܢ: ܥܒ̣ܝܼܕܹܐ ܝܢܵܐ ܒܣܲܪܲܣܬܘܼܬܵܐ ܘܬܪܝܼܨܘܼܬܵܐ. 9 ܦܘܼܪܩܵܢܵܐ ܫܘܼܕܸܪܹܐ ܩܵܐ ܛܵܝܸܦܹܗ: ܦܩܸܕܠܹܐ ܠܥܵܠܲܡ ܩܵܘܠܹܗ: ܩܲܕܝܼܫܵܐ ܝܠܹܐ ܘܣܲܗܡܵܢܵܐ ܫܸܡܹܗ. 10 ܪܹܫܵܐ ܕܥܵܩܸܠܕܲܪܘܼܬܵܐ ܙܕܘܼܥܬܹܗ ܕܡܵܪܝܵܐ ܝܠܵܐ: ܦܲܪܡܵܝܬܵܐ ܨܦܵܝܝ( ܐܝܬ) ܠܟܠܵܝ ܥܵܒ̣ܕܵܢܵܝ̈: ܬܸܫܒܘܿܚܬܹܗ ܩܵܝܲܡ ܝܼܠܵܐ ܠܐܵܒܵܕ.

 

ܡܙܡܘܪܐ: ܩܝܒ.

ܗܲܠܸܠܘܼܝܵܐ.

1. ܛܘܼܒ̣ܵܐ ܠܐܢܵܫܵܐ ܕܙܵܕܸܥ ܡ̣ܢ ܡܵܪܝܵܐ: ܒܦܘܼܩܕܵܢܘܼ̈ܗܝ ܒܵܣܡܵܐ ܠܹܗ ܪܵܒܵܐ. 2 ܓܲܢ̄ܒܵܪܵܐ ܒܐܲܪܥܵܐ ܒܸܕ ܗܵܘܹܐ ܙܲܪܥܹܗ: ܕܵܘܪܵܐ ܕܬܪ̈ܘܼܨܹܐ ܒܸܕ ܦܵܝܸܫ ܒܘܼܪܟ̣ܵܐ. 3 ܡܵܐܠ ܘܕܵܘܸܠܬܵܐ ܓܵܘ ܒܲܝܬܹܗ: ܘܙܲܕܝܼܩܘܼܬܹܗ ܩܲܝܵܡ ܝܼܠܵܐ ܠܥܵܠܲܡ. 4 ܙܪܸܩܠܹܐ ܒܚܘܼܒ̣ܝܵܐ ܒܲܗܪܵܐ ܠܬܪ̈ܘܼܨܹܐ: ܚܲܢܵܢܵܐ ܝܠܹܐ ܘܡܪܲܚܡܵܢܵܐ ܘܙܲܕܝܼܩܵܐ. 5 ܛܘܼܒ̣ܵܢܵܐ ܝܠܹܐ ܐܢܵܫܵܐ ܕܟܹܐ ܡܪܵܚܸܡ ܘܟܹܐ ܝܵܗ̄ܒܸܠ ܒܕܵܝܢܵܐ: ܟܹܐ ܚܵܡܹܐ ܫܘܼܠܘܼܗܝ[91] ܒܕܝܼܘܵܢ. 6 ܣܲܒܲܒ ܕܠܥܵܠܲܡ ܠܹܐ ܫܵܥܸܫ: ܠܕܟ̣ܵܪܵܐ ܕܥܵܠܲܡ ܒܸܕ ܗܵܘܹܐ ܙܲܕܝܼܩܵܐ. 7 ܡ̣ܢ ܒܵܗܣ ܒܝܼܫܬܵܐ ܠܐܹ ܙܵܕܸܥ: ܡܘܼܩܘܝܼܬܵܐ ܝܠܹܐ ܠܸܒܹܗ: ܒܗܹܒ̣ܝܼ ܝܠܹܐ ܒܡܵܪܝܵܐ. 8 ܣܢܝܼܕܵܐ ܝܠܹܐ ܠܸܒܹܗ: ܠܹܐ ܙܵܕܸܥ: ܗܲܠ ܕܚܵܙܹܐ ܒܕܸܫܡܸܢܘܼ̈ܗܝ. 9 ܒܘܼܪܒܸܙܠܹܐ: ܝܸܗܒܸܠܹܐ ܠܡܸܣܟܹܢܹ̈ܐ: ܙܲܕܝܼܩܘܼܬܹܗ ܩܵܝܲܡ ܝܼܠܵܐ ܠܐܵܒܵܕ: ܩܵܪ̄ܢܘܼܗܝ ܒܸܕ ܪܵܝܡܵܐ ܒܐܝܼܩܵܪܵܐ. 10 ܒܝܼܫܵܐ ܒܸܕ ܚܵܙܹܐ ܘܟܵܪܸܒ̇: ܟܹܟܘܼ̈ܗܝ ܒܸܕ ܚܲܪܚܸܟ ܘܦܵܫܸܪ: ܫܲܗܘܲܬܬܵܐ ܕܒܝܼܫܹ̈ܐ ܒܸܕ ܬܵܠܩܵܐ.

 

ܡܙܡܘܪܐ: ܩܝܓ.

ܗܲܠܸܠܘܼܝܵܐ.

1. ܫܵܒܚܘܿܢ: ܪܸ̈ܓܵܘܵܬܐ ܕܡܵܪܝܵܐ: ܫܵܒܚܘܿܢ ܠܫܸܡܹܗ ܕܡܵܪܝܵܐ. 2 ܗܵܘܹܐ ܫܸܡܹܗ ܕܡܵܪܝܵܐ ܒܘܼܪܟ̣ܵܐ: ܡ̣̤ ܐܵܕܝܼܵܐ ܘܗܲܠ ܥܵܠܲܡ. 3 ܡ̣ܢ ܙܪܵܩܹܗ ܕܫܸܡܫܵܐ ܗܲܠ ܓܢܵܝܹܗ ܦܵܝܸܫ ܫܘܼܒ̣ܚܵܐ ܫܸܡܹܗ ܕܡܵܪܝܵܐ. 4 ܪܵܡܵܐ ܝܠܹܐ ܥܲܠ ܟܠܵܝ ܛܵܝܸܦܹ̈ܐ ܡܵܪܝܵܐ: ܥܲܠ ܫܡܲܝܵܐ ܐܝܼܩܵܪܹܗ: 5 ܡܲܢܝܼ ܝܠܹܐ ܐܲܝܟ ܡܵܪܝܵܐ ܐܲܠܵܗܲܢ: ܡܵܪܘܿܡܹܐ (ܓܵܢܹܗ) ܠܸܬܝܵܒ̣ܵܐ: 6 ܡܲܟܘܼܦܹܐ (ܓܵܢܹܗ) ܠܸܚܙܵܝܵܐ ܒܫܡܲܝܵܐ ܘܒܲܐܪܥܵܐ. 7 ܟܹܐ ܡܲܩܸܡ ܡ̣ܢ ܥܲܦܪܵܐ ܡܸܣܟܹܢܵܐ: ܡ̣ܢ ܣܘܼܠܬܵܐ ܟܹܐ ܡܵܪܸܡ ܦܲܩܝܼܪ: 8 ܠܡܲܬܝܘܼܒ̣ܘܼܗܝ ܥܲܡ ܡܲܥܩܘܼܠܹ̈ܐ: ܥܲܡ ܡܲܥܩܘܼܠܹ̈ܐ ܕܛܵܝܸܦܹܗ. 9 ܟܹܐ ܡܲܬܝܸܒ̣ ܥܩܲܪܬܵܐ ܒܒܲܝܬܵܐ ܝܸܡܵܐ ܕܒܢܘܼܢܹ̈ܐ ܚܕܝܼܬܵܐ. ܗܲܠܸܠܘܼܝܵܐ.

 

ܡܙܡܘܪܐ: ܩܝܕ.

1. ܟܲܕ ܦܠܸܛܠܹܐ ܝܼܣܪܵܝܹܠ ܡ̣ܢ ܡܸܨܪܹܝܢ: ܒܹܝܬ ܝܲܥܩܘܿܒ̣ ܡ̣ܢ ܛܵܝܸܦܵܐ ܕܠܸܫܵܢܵܐ ܦܪܝܼܫܵܐ: 2 ܗ̄ܘܹܠܹܐ ܝܼܗܘܼܕܵܐ ܩܘܼܕܫܘܼܗܝ: ܝܼܣܪܵܝܹܠ ܗܵܟܝܼܡܘܼܬܘܼܗܝ. 3 ܝܵܡܵܐ ܚܙܹܠܹܐ ܘܥܪܸܩܠܵܐ: ܝܘܿܪܕܢܵܢ ܕܸܪܹܐ ܠܵܒܵܬ̄ܪܵܐ. 4 ܛܘܼܪ̈ܵܢܹܐ ܪܩܸܕܠܘܿܢ ܐܲܝܟ ܒܲܪ̈ܥܵܢܹܐ: ܪ̈ܘܼܡܝܵܬܹܐ ܐܲܝܟ ܦܹܪܹ̈ܐ ܕܥܸܪ̈ܒܹܐ. 5 ܡܵܐ ܠܹܟ̣ܝ: ܝܵܡܵܐ: ܕܥܵܪܩܲܬܝ: ܝܘܿܪܕܢܵܢ: ܕܟ̣ܵܝܪܸܬ ܠܵܒܵܬ̄ܪܵܐ: 6 ܛܘܼܪ̈ܵܢܹܐ: ܕܪܵܩܕܝܼܬܘܼܢ ܐܲܝܟ ܒܲܪ̈ܥܵܢܹܐ: ܪ̈ܘܼܡܝܵܬܹܐ: ܐܲܝܟ ܦܹܪܹ̈ܐ ܕܥܸܪ̈ܒܹܐ: 7 ܡ̣ܢ ܩܵܕ̄ܡ ܡܵܪܝܵܐ ܫܥܘܿܫܝ: ܝܵܐ ܐܲܪܥܵܐ: ܡ̣ܢ ܩܵܕ̄ܡ ܐܲܠܵܗܵܐ ܕܝܲܥܩܘܿܒ̣: 8 ܕܡܘܼܕܸܪܑܹ ܩܵܝܵܐ ܠܢܸܡܙܵܐ ܕܡ̈ܝܼܵܐ: ܣܸܡܛܵܐ ܠܥܲܝܢܵܐ ܕܡ̈ܝܼܵܐ.

 

ܡܙܡܘܪܐ: ܩܝܗ.

1. ܠܵܐ ܐܸܠܲܢ: ܝܵܐ ܡܵܪܝܵܐ: ܠܵܐ ܐܸܠܲܢ: ܐܝܼܢܵܐ ܠܫܸܡܘܼܟ ܗܲܒ̄ܠ ܐܝܼܩܵܪܵܐ: ܒܘܼܬ ܫܵܦܵܩܲܬܘܼܟ: ܒܘܼܬ ܣܲܪܲܣܬܘܼܬܘܼܟ. 2 ܩܵܡܘܿܕܝܼ ܐܵܡܪܝܼ ܡܸܠܲܬܹ̈ܐ: ܒܲܣ ܐܲܝܟܵܐ ܝܠܹܐ ܐܲܠܵܗܵܝ: 3 ܘܐܲܠܵܗܲܢ ܒܫܡܲܝܵܐ ܝܠܹܐ: ܟܠ ܕܒܣܸܡܠܵܐ ܠܹܗ ܥܒܸܕܠܹܐ. 4 ܨܵܢܲܡܵܝ̈ ܣܹܐܡܵܐ ܘܕܲܗܒ̣ܵܐ ܝܢܵܐ: ܦܘܼܠܚܵܢܵܐ ܕܐܝܼܕܲܬܹ̈ܐ ܕܒܲܪܢܵܫܵܐ. 5 ܦܘܼܡܵܐ ܐܝܼܬ ܠܗ̄ܘܿܢ: ܘܠܹܐ ܗܲܡܙܸܡܝܼ: ܥܲܝܢܹ̈ܐ ܐܝܼـ ܠܗ̄ܘܿܢ: ܘܠܹܐ ܚܵܙܝܼ. 6 ܢܵܬܝܵܬܹ̈ܐ ܐܝܼܬ ܠܗ̄ܘܿܢ: ܘܠܹܐ ܫܲܡܥܝܼ:

ܢܵܚܝܼܪܹ̈ܐ ܐܝܼܬ ܠܗ̄ܘܿܢ: ܘܠܹܐ ܫܵܩܠܝܼ ܪܹܝܚܵܐ: 7 ܐܝܼܕܵܬܵܝ̈: ܘܠܹܐ ܦܲܠܬܸܫܝܼ: ܐܲܩܠܵܬܵܝ̈: ܘܠܹܐ ܚܵܕܪܝܼ: ܘܠܹܐ ܗܲܡܙܸܡܝܼ ܒܒܵܠܘܿܥܬܵܝ. 8 ܐܲܝܟ ܕܝܼܵܝ[92] ܗܵܘܝܼ ܬܵܪ̈ܨܵܢܵܝ: ܟܠ ܕܦܵܝܸܫ ܝܗܹܒ̣ܝ ܒܝܼܵܝ. 9 ܝܼܣܪܵܝܹܠ: ܦܘܼܫ ܒܗܹܒ̣ܝܼ ܒܡܵܪܝܵܐ: ܗܝܼܵܪܝܼܵܝ ܘܩܲܠܚܵܢܵܝ ܗ̇ܘ ܝܼܠܹܐ. 10 ܒܹܝܬ ܐܲܗܪܘܿܢ: ܣܒܘܿܪܘܿܢ ܒܡܵܪܝܵܐ: ܗܝܼܵܪܝܼܵܝ ܘܩܲܠܚܵܢܵܝ ܗ̇ܘ ܝܼܠܹܐ. 11 ܝܵܐ ܙܸܕܥܝܹ̈ܐ ܕܡܵܪܝܵܐ: ܣܒܘܿܪܘܿܢ ܒܡܵܪܝܵܐ: ܗܝܼܵܪܝܼܵܝ ܘܩܲܠܚܵܢܵܝ ܗ̇ܘ ܝܼܠܹܐ. 12 ܡܵܪܝܵܐ ܩܲܡ ܕܵܟܸܪܲܢ: ܒܸܕ ܒܵܪܹܟ: ܒܸܕ ܒܵܪܸܟ ܠܒܹܝܬ ܝܼܣܪܵܝܹܠ: ܒܸܕ ܒܵܪܸܟ ܠܒܹܝܬ ܐܲܗܪܘܿܢ. 13 ܒܸܕ ܒܵܪܸܟ ܠܙܸܕܥܝܹ̈ܐ ܕܡܵܪܝܵܐ: ܙܥܘܿܪܹ̈ܐ ܥܲܡ ܓܘܼܪܹ̈ܐ. 14 ܒܸܕ ܡܲܙܝܸܕ ܡܵܪܝܵܐ ܥܲܠܵܘܟ̣ܘܿܢ: ܥܲܠܵܘܟ̣ܘܿܢ ܘܥܲܠ ܒܢܘܼܢܵܘ̈ܟ̣ܘܿܢ. 15 ܒܪ̈ܝܼܟܹܐ ܝܬܘܿܢ ܠܡܵܪܝܵܐ: ܥܵܒ̣ܕܵܢܵܐ ܕܫܡܲܝܵܐ ܘܐܲܪܥܵܐ. 16 ܫܡܲܝܹ̈ܐ ܫܡܲܝܹ̈ܐ ܕܡܵܪܝܵܐ ܝܢܵܐ: ܘܐܲܪܥܵܐ ܝܸܗܒܸܠܹܐ ܠܒܢܲܝ̈ܢܵܫܵܐ. 17 ܡܝܼܬܹ̈ܐ ܠܹܐ ܫܵܒܚܝܼ ܠܡܵܪܝܵܐ: ܘܠܵܐ ܟܠܵܝ ܨܵܠܝܵܢܹ̈ܐ ܠܫܬܵܩܬܵܐ. 18 ܘܐܲܚܢܲܢ ܒܸܕ ܒܵܪܟ̣ܵܚ ܠܡܵܪܝܵܐ: ܡ̣ܢ ܐܵܕܝܼܵܐ ܘܗܲܠ ܥܵܠܲܡ. ܗܲܠܹܠܘܼܝܵܐ.

 

ܡܙܡܘܪܐ: ܩܝܘ.

1. ܡܘܼܚܒܸܠܝܼ ܠܡܵܪܝܵܐ: ܣܲܒܲܒ ܕܫܡܸܥܠܹܐ ܩܵܠܝܼ: ܢܵܘܢܵܝܵܬܝܼ̈. 2 ܣܲܒܲܒ ܕܡܘܼܟܸܦܠܹܐ ܢܵܬܘܼܗܝ ܐܸܠܝܼ: ܒܝܘܿܡܲܢܝܼ̈ ܒܸܕ ܩܵܪܸܢ. 3 ܟܪܝܼܟܸܢܘܿܢ ܚܸܒ̣ܠܹ̈ܐ ܕܡܵܘܬܵܐ: ܘܐܘܼܠܨܵܢܹ̈ܐ ܕܫܝܘܿܠ ܡܘܼܫ̄ܟ̰ܸܚܸܢܘܿܢ: ܥܹܩܘܼܝ ܘܕܲܪܕ ܡܘܼܫ̄ܟ̰ܸܚܠܝܼ. 4 ܘܒܫܸܡܹܗ ܕܡܵܪܝܵܐ ܩܪܹܠܝܼ: ܦܲܪܦܘܼܠܹܐ ܝܘܸܢ: ܝܵܐ ܡܵܪܝܵܐ: ܦܵܨܝܼ ܢܲܦ̮ܫܝܼ. 5 ܚܲܢܵܢܵܐ ܝܠܹܐ ܡܵܪܝܵܐ ܘܙܲܕܝܼܩܵܐ: ܘܐܲܠܵܗܲܢ ܡܪܲܚܡܵܢܵܐ ܝܠܹܐ: 6 ܟܹܐ ܢܵܛܸܪ ܠܢܲܙܵܢܹ̈ܐ ܡܵܪܝܵܐ: ܦܸܫܠܝܼ ܡܘܼܟܸܦܵܐ: ܘܐܸܠܝܼ ܦܘܼܪܸܩܠܹܐ. 7 ܕܘܼܪܝ: ܢܲܦ̮ܫܝܼ: ܠܢܝܵܚܬܵܟ̣ܝ: ܣܲܒܲܒ ܕܡܵܪܝܵܐ ܥܒܸܕܠܑܹ ܟܫܝܼܛܘܼܬܵܐ ܥܲܠܵܟ̣ܝ. 8 ܣܲܒܲܒ ܕܚܘܼܠܸܨܠܘܼܟ ܢܲܦ̮ܫܝܼ ܡ̣ܢ ܡܵܘܬܵܐ: ܥܲܝܢܝܼ ܡ̣ܢ ܕܸܡܥ̱ܬܵܐ: ܐܲܩܠܝܼ ܡ̣ܢ ܓ̰ܪܵܛܬܵܐ. 9 ܒܸܕ ܚܵܕܪܸܢ ܩܵܕ̄ܡ ܡܵܪܝܵܐ ܒܐܲܪ̈ܥܵܬܹܐ ܕܚܵܝܹ̈ܐ. 10 ܗܘܼܡܸܢܝܼ: ܟܲܕ ܗܘܼܡܙܸܡܠܝܼ: ܐܵܢܵܐ ܦܸܫܠܝܼ ܡܘܼܠܝܸܨܵܐ ܪܵܒܵܐ. 11 ܐܵܢܵܐ ܐܡܸܪܝܼ ܒܚܓ̰ܵܠܬܝܼ: ܟܠ ܒܲܪܢܵܫܵܐ ܕܵܓܵܠܵܐ ܝܠܹܐ. 12 ܡܘܼܕܝܼ ܡܲܕܸܪܸܢ ܠܡܵܪܝܵܐ: ܒܘܼܬ ܟܠܵܝ ܦܘܼܪܥܵܢܘܼܗܝ ܥܲܠܝܼ: 13 ܟܵܣܵܐ ܕܦܘܼܪ̈ܩܵܢܹܐ ܒܸܕ ܫܵܩܠܸܢ: ܘܒܫܸܡܹܗ ܕܡܵܪܝܵܐ ܒܸܕ ܩܵܪܸܢ. 14 ܢܸܕܪ̈ܝܼ ܠܡܵܪܝܵܐ ܒܸܕ ܬܲܡܸܡܸܢ: ܠܒܲܪܩܘܼܒ̣ܠ ܕܟܠܹܗ ܛܵܝܸܦܹܗ. 15 ܡܵܪܹܐ ܛܝܼܡܵܐ ܝܠܹܐ ܒܥܲܝܢܹ̈ܐ ܕܡܵܪܝܵܐ ܡܵܘܬܵܐ ܕܙܲܕܝܼܩܘܼ̈ܗܝ. 16 ܦܲܪܦܘܼܠܹܐ ܝܘܸܢ: ܝܵܐ ܡܵܪܝܵܐ: ܣܲܒܲܒ ܕܐܵܢܵܐ ܪܸܓܘܼܟ ܝܼܘܸܢ: ܪܸܓܘܼܟ ܝܼܘܸܢ: ܒܪܘܼܢܵܐ ܕܚܹܪܡܬܘܼܟ: ܫܪܹܠܘܼܟ ܝܸܣܘܼܪܝܼ. 17 ܐܸܠܘܼܟ ܒܸܕ ܕܵܒ̣ܚܸܢ ܕܸܒ̣ܚܵܐ ܕܫܵܟܲܪܬܵܐ: ܘܒܫܸܡܹܗ ܕܡܵܪܝܵܐ ܒܸܕ ܩܵܪܸܢ. 18 ܢܸܕܪ̈ܝܼ ܠܡܵܪܝܵܐ ܒܸܕ ܬܲܡܸܡܸܢ: ܠܒܲܪܩܘܼܒ̣ܠ ܕܟܠܹܗ ܛܵܝܸܦܹܗ. 19 ܓܵܘ ܕܵܪ̈ܬܹܐ ܕܒܲܝܬܹܗ ܕܡܵܪܝܵܐ: ܓܵܘܵܟ̣ܝ: ܝܵܐ ܐܘܿܪܸܫܠܸܡ.

ܗܲܠܸܠܘܼܝܵܐ.

 

ܡܙܡܘܪܐ: ܩܝܙ.

1. ܫܵܒܚܘܿܢ ܠܡܵܪܝܵܐ: ܟܠܵܝ ܛܵܝܸܦܹ̈ܐ: ܫܵܒܚܘܿܢ ܠܹܗ: ܟܠܵܝ ܡܸܠܲܬܹ̈ܐ. 2 ܣܲܒܲܒ ܕܙܘܼܪܒܸܢܵܐ ܥܲܠܲܢ ܫܵܦܵܩܲܬܘܼܗܝ: ܘܣܲܪܲܣܬܘܼܬܵܐ ܕܡܵܪܝܵܐ ܠܥܵܠܲܡ ܝܼܾܵܐ. ܗܲܠܸܠܘܼܝܵܐ.

 

ܡܙܡܘܪܐ: ܩܝܚ.

1. ܫܵܟܪܘܿܢ ܠܡܵܪܝܵܐ: ܣܲܒܲܒ ܕܛܵܒ̣ܵܐ ܝܠܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 2 ܐܵܡܸܪ ܝܼܣܪܵܝܹܠ: ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 3 ܐܵܡܪܝܼ ܒܹܝܬ ܐܲܗܪܘܿܢ: ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 4 ܐܵܡܪܝܼ ܙܸܕܥܝܹ̈ܐ ܕܡܵܪܝܵܐ: ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 5 ܡ̣ܢ ܥܹܩܘܝ ܩܪܹܠܝܼ ܠܡܵܪܝܵܐ: ܓ̰ܘܼܘܸܒܸܢܹܐ (ܘܡܘܼܬܒ̣ܢܹܐ) ܒܪܘܿܚܵܢܝܼ ܡܵܪܝܵܐ. 6 ܡܵܪܝܵܐ ܕܝܼܝܼ ܝܠܹܐ: ܠܹܐ ܙܵܕܸܥܢ: ܡܘܼܕܝܼ ܥܵܒܸܕ ܐܸܠܝܼ ܒܲܪܢܵܫܵܐ: 7 ܡܵܪܝܵܐ ܕܝܼܝܼ ܝܠܹܐ ܓܵܘ ܗܲܝܸܪܵܢܝܼ: ܘܐܵܢܵܐ ܒܸܕ ܚܵܙܸܢ ܒܣܵܢܝܵܢܝܼ̈. 8 ܨܦܵܝܝܼ ܝܠܵܐ ܠܸܣܒܵܪܵܐ ܒܡܵܪܝܵܐ: ܡ̣ܢ ܠܸܕܪܵܝܵܐ ܗܹܒ̣ܝܼ ܒܒܲܪܢܵܫܵܐ. 9 ܨܦܵܝܝܼ ܝܠܵܐ ܠܸܣܒܵܪܵܐ ܒܡܵܪܝܵܐ: ܡ̣ܢ ܠܸܕܪܵܝܵܐ ܗܹܒ̣ܝܼ ܒܡܲܥܩܘܼܠܹ̈ܐ. 10 ܟܠܵܝ ܛܵܝܸܦܹ̈ܐ ܟܪܝܼܟܸܢܘܿܢ: ܒܫܸܡܹܗ ܕܡܵܪܝܵܐ ܒܸܕ ܩܲܛܥܸܢܘܿܢ. 11 ܟܪܝܼܟܸܢܘܿܢ: ܐܘܼܦ ܟܪܸܟ̣ܠܘܿܢ ܚܵܕܸܪ̈ܘܵܢܝܼ: ܒܫܸܡܹܗ ܕܡܵܪܝܵܐ ܒܸܕ ܩܲܛܥܸܢܘܿܢ. 12 ܟܪܝܼܟܸܢܘܿܢ ܐܲܝܟ ܕܵܒܵܫܹ̈ܐ: ܕܥܸܟ̣ܠܘܿܢ ܐܲܝܟ ܢܘܼܪܵܐ ܕܟܸܬܘܹ̈ܐ: ܒܫܸܡܹܗ ܕܡܵܪܝܵܐ ܒܸܕ ܩܲܛܥܸܢܘܿܢ. 13 ܚܲܪܙܘܼܦܹܐ ܚܘܼܪܙܸܦܢܘܿܟ ܠܸܢܦܵܠܵܐ: ܘܡܵܪܝܵܐ ܗܘܼܝܸܪܸܢܹܐ. 14 ܙܲܪܒܝܼ ܝܠܹܐ ܘܙܡܵܪܬܵܐ ܡܵܪܝܵܐ: ܘܗ̄ܘܹܠܹܐ ܐܸܠܝܼ ܦܘܼܪܩܵܢܵܐ. 15 ܩܵܠܵܐ ܕܫܘܼܒ̣ܚܵܐ ܘܕܦܘܼܪܩܵܢܵܐ ܓܵܘ ܡܲܫܟܢܹ̈ܐ ܕܙܲܕܝܼܩܹ̈ܐ: ܝܼܡܝܼܢܹܗ ܕܡܵܪܝܵܐ ܥܵܒ̣ܕܵܢܬܵܐ ܕܚܲܝܠܵܐ. 16 ܝܲܡܝܼܢܹܗ ܕܡܵܪܝܵܐ ܪܝܼܡܬܵܐ ܝܠܵܐ: ܝܲܡܝܼܢܹܗ ܕܡܵܪܝܵܐ ܥܵܒ̣ܕܵܢܬܵܐ ܕܚܲܝܠܵܐ. 17 ܠܹܐ ܡܵܝܬܸܢ: ܣܲܒܲܒ ܕܒܸܕ ܚܲܝܸܢ: ܘܒܸܕ ܗܵܩܸܢ ܦܘܼܠܚܵܢܹ̈ܐ ܕܡܵܪܝܵܐ. 18 ܬܲܥܠܘܼܡܹܐ ܬܘܼܥܠܡܸܢܹܐ ܡܵܪܝܵܐ: ܐܝܼܢܵܐ ܠܡܵܘܬܵܐ ܠܵܐ ܣܘܼܦܝܼܢܹܐ. 19 ܦܬܘܿܚܘܿܢ ܐܸܠܝܼ ܬܲܪ̈ܥܵܢܹܐ ܕܙܲܕܝܼܩܘܼܬܵܐ: ܒܸܕ ܐܵܘܪܸܢ ܒܝܼܵܝ ܘܫܵܟܪܸܢ ܠܡܵܪܝܵܐ. 20 ܐܵܗܵܐ ܕܲܪܘܵܙܵܐ ܕܡܵܪܝܵܐ: ܙܲܕܝܼܩܹ̈ܐ ܒܸܕ ܐܵܘܪܝܼ ܒܝܹܗ. 21 ܒܸܕ ܫܵܟܪܸܢܘܼܟ: ܣܲܒܲܒ ܕܓ̰ܘܼܘܸܒܸܢܘܼܟ: ܘܗ̄ܘܹܠܘܿܟ ܐܸܠܝܼ ܦܘܼܪܩܵܢܵܐ. 22 ܟܹܐܦܵܐ ܕܡܘܼܣܠܹܠܘܿܢ ܒܲܢܹ̈ܐ ܗ̄ܘܹܠܵܐ ܠܪܹܫܵܐ ܕܩܸܪܢܝܼܬܵܐ. 23 ܡ̣ܢ ܠܟܸܣ ܡܵܪܝܵܐ ܗ̄ܘܹܠܵܐ ܐܵܗܵܐ: ܗ̇ܝ ܥܵܓ̰ܸܒܘܼܬܵܐ ܝܠܵܐ ܒܥܲܝ̈ܢܲܢ. 24 ܐܵܗܵܐ ܝܠܹܐ ܝܘܿܡܵܐ ܕܥܒܸܕܠܹܐ ܡܵܪܝܵܐ: ܦܵܨܚܵܚ ܘܚܵܕܵܚ ܒܝܹܗ. 25 ܦܲܪܦܘܼܠܹܐ ܝܘܸܢ: ܝܵܐ ܡܵܪܝܵܐ: ܦܵܪܸܩ: ܦܲܪܦܘܼܠܹܐ ܝܘܸܢ: ܝܵܐ ܡܵܪܝܵܐ: ܡܲܢܬܝܼ. 26 ܒܪܝܼܟ̣ܵܐ ܝܠܹܐ ܗ̇ܘ ܕܒܹܐܬܵܝܵܐ ܝܠܹܐ ܒܫܸܡܹܗ ܕܡܵܪܝܵܐ: ܩܲܡ ܒܵܪܟ̣ܵܚ ܠܵܘܟ̣ܘܿܢ ܡ̣ܢ ܒܲܝܬܹܗ ܕܡܵܪܝܵܐ. 27 ܐܲܠܵܗܵܐ ܡܵܪܝܵܐ ܝܠܹܐ: ܘܒܘܼܗ̄ܪܸܢܹܐ ܐܸܠܲܢ: ܐܣܘܿܪܘܿܢ ܕܸܒ̣ܚܵܐ ܒܚܲܒ̣ܠܹ̈ܐ: ܗܲܠ ܩܵܪ̈ܢܵܢܹܐ ܕܡܲܕܒܚܵܐ. 28 ܐܲܠܵܗܝܼ ܐܲܢ̄ܬ ܝܼܘܸܬ: ܘܒܸܕ ܫܵܟܪܸܢܘܼܟ: ܐܲܠܵܗܝܼ: ܒܸܕ ܡܵܪܡܸܢܘܿܟ. 29 ܫܵܟܪܘܿܢ ܠܡܵܪܝܵܐ: ܣܲܒܲܒ ܕܛܵܒ̣ܵܐ ܝܠܹܐ: ܣܲܒܲܒܩ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ.

ܡܙܡܘܪܐ: ܩܝܛ.

ܐ.

1. ܛܘܼܒ̣ܵܐ ܠܬܲܡܝܼܡܹ̈ܐ ܒܐܘܼܪܚܵܐ: ܕܟܹܐ ܚܵܕܪܝܼ ܒܢܵܡܘܿܣܹܗ ܕܡܵܪܝܵܐ. 2 ܛܘܼܒ̣ܵܐ ܠܢܵܛܪ̈ܵܢܹܐ ܕܣܵܗܕܘܵܬܘܼ̈ܗܝ: ܕܒܟܠܹܗ ܠܸܒܵܐ ܛܵܥܝܼ ܐܸܠܹܗ. 3 ܐܘܼܦ ܠܹܐ ܦܵܠܚܝܼ ܥܵܘܠܵܐ: ܒܐܘܼܪ̈ܚܵܬܘܼܗܝ ܟܹܐ ܚܵܕܪܝܼ. 4 ܐܲܢ̄ܬ ܦܘܼܩܸܕܠܘܼܟ ܦܵܩܲܕܝܵܬܘܼ̈ܟ: ܠܸܦܝܵܫܵܐ ܢܛܝܼܪܹܐ ܪܵܒܵܐ. 5 ܛܘܼܒ̣ܵܐ ܕܩܵܘܝܼ ܐܘܼܪ̈ܚܵܬܝܼ. ܠܸܢܛܵܪܵܐ ܩܵܢܘܿܢܘܼ̈ܟ! 6 ܗ̇ܝܓܵܗ ܠܹܐ ܢܵܚܦܸܢ ܟܲܕ ܚܵܝܪܸܢ ܠܟܠܵܝ ܦܘܼܩܕܵܢܘܼ̈ܟ. 7 ܒܸܕ ܫܵܟܪܸܢܘܼܟ ܒܬܪܘܼܨܘܼܬܵܐ ܕܠܸܒܵܐ: ܟܲܕ ܝܵܠܦܸܢ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ. 8 ܩܵܢܘܿܢܘܼ̈ܟ ܒܸܕ ܢܵܛܪܸܢ: ܠܵܐ ܫܵܒ̣ܩܸܬ ܠܝܼ ܬܲܡܵܡ.

ܒ.

9 ܒܡܘܼܕܝܼ ܕܵܟܹܐ ܓ̰ܘܲܢܩܵܐ ܐܘܼܪܚܘܼܗܝ. ܒܢܛܵܪܬܵܐ (ܐܸܠܵܗ̇) ܐܲܝܟ ܚܲܒ̇ܪܘܼܟ. 10 ܒܟܠܹܗ ܠܸܒܝܼ ܛܥܸܠܝܼ ܐܸܠܘܼܟ: ܠܵܐ ܡܲܚܠܸܛܸܬ ܠܝܼ ܡ̣ܢ ܦܘܼܩܕܵܢܘܼ̈ܟ. 11 ܒܠܸܒܝܼ ܛܘܼܫܹܠܝܼ ܗܹܡܸܙܡܵܢܘܼܟ: ܩܵܐ ܕܠܵܐ ܚܵܛܸܢ ܥܲܠܘܼܟ. 12 ܒܪܝܼܟ̣ܵܐ ܝܘܸܬ: ܡܵܪܝܵܐ: ܡܵܠܸܦ ܠܝܼ ܩܵܢܘܿܢܘܼ̈ܟ. 13 ܒܣܸܦܘܵܬܝܼ̈ ܗܘܼܩܹܠܝܼ ܟܠܵܝ ܕܝܼܘܵܢܹ̈ܐ ܕܦܘܼܡܘܼܟ. 14 ܒܐܘܼܪܚܵܐ ܕܣܵܗܕܘܵܬܘܼ̈ܟ ܦܨܸܚܠܝܼ: ܐܲܝܟ ܒܟܠܵܗ̇ ܕܵܘܸܠܬܵܐ. 15 ܒܦܵܩܲܕܝܵܬܘܼ̈ܟ ܒܸܕ ܗܵܓܸܢ: ܘܒܸܕ ܚܵܝܪܸܢ ܒܐܘܼܪ̈ܚܵܬܘܼܟ. 16 ܒܩܵܢܘܿܢܘܼ̈ܟ ܒܸܕ ܡܲܒܣܸܡܸܢ ܢܲܦ̮ܫܝܼ: ܠܹܐ ܢܵܫܸܢ ܚܲܒ̇ܪܘܼܟ.

ܓ.

17 ܥܒ̣ܘܿܕ ܟܫܝܼܛܘܼܬܵܐ ܠܪܹܓܘܼܟ: ܕܚܲܝܸܢ: ܘܒܸܕ ܢܵܛܪܸܢ ܚܲܒ̇ܪܘܼܟ. 18 ܓܵܠܝܼ ܥܲܝܢܝܼ̈ ܘܚܵܙܹܢ ܥܵܓ̰ܸܒܘܼܝܵܬܹ̈ܐ ܡ̣ܢ ܢܵܡܘܿܣܘܼܟ. 19 ܡܵܫܵܚܲܛ ܝܼܘܸܢ ܐܵܢܵܐ ܒܐܲܪܥܵܐ: ܠܵܐ ܛܵܫܸܬ ܡܸܢܝܼ ܦܘܼܩܕܵܢܘܼ̈ܟ. 20 ܛܚܝܼܢܬܵܐ ܝܠܵܐ ܢܲܦ̮ܫܝܼ ܒܫܲܗ̄ܘܲܬܬܵܐ ܠܕܝܼܘܵܢܘܼ̈ܟ ܒܟܠ ܙܲܒ̣ܢܵܐ. 21 ܢܓܘܸܠܘܼܟ ܒܫܲܒ̣ܗܪ̈ܵܢܹܐ: ܠܝܼܛܹ̈ܐ: ܐܵܢܝܼ ܕܚܵܠܛܝܼ ܡ̣ܢ ܦܘܼܩܕܵܢܘܼ̈ܟ. 22 ܡܲܥܒܸܪ ܡܥܲܠܝܼ ܠܵܘܡܵܐ ܘܡܲܣܠܵܝܬܵܐ: ܣܲܒܲܒ ܕܣܵܗܕܘܵܬܘܼ̈ܟ ܢܛܝܼܪܵܐ ܝܼܘܸܢ. 23 ܐܘܼܦ ܝܬܸܒ̣ܠܘܿܢ ܓܘܼܪ̈ܵܢܹܐ: ܥܲܠܝܼ ܗܘܼܡܙܸܡܠܘܿܢ: ܪܹܓܘܼܟ ܗܘܼܓܹܠܹܐ ܒܩܵܢܘܿܢܘܼ̈ܟ. 24 ܐܘܼܦ ܣܵܗܕܘܵܬܘܼ̈ܟ ܒܵܣܝܼܡܘܼܬܝܼ ܝܢܵܐ: ܐܢܵܫܹ̈ܐ ܕܪܵܐܝܼܝܼ.

ܕ.

25 ܬܒܸܥܠܹܐ ܠܥܲܦܪܵܐ ܢܲܦ̮ܫܝܼ: ܡܲܚܝܼ ܠܝܼ ܐܲܝܟ ܚܲܒ̇ܪܘܿܟ. 26 ܐܘܼܪ̈ܚܵܬܝܼ ܗܘܼܩܹܠܝܼ: ܘܓ̰ܘܼܘܼܒܸܢܘܼܟ: ܡܵܠܸܦ ܠܝܼ ܩܵܢܘܿܢܘܼ̈ܟ. 27 ܐܘܼܪܚܵܐ ܕܦܵܩܲܕܝܵܬܘܼ̈ܟ ܡܲܦܪܸܡ ܠܝܼ: ܘܒܸܕ ܗܵܓܸܢ ܒܥܵܓ̰ܸܒܘܼܝܵܬܘܼ̈ܟ. 28 ܕܘܼܡܥܸܢܵܐ ܢܲܦ̮ܫܝܼ ܡ̣ܢ ܕܵܪܕ: ܡܲܩܘܝܼ ܠܝܼ ܐܲܝܟ ܚܲܒ̇ܪܘܼܟ. 29 ܐܘܼܪܚܵܐ ܕܕܘܼܓܠܵܐ ܡܲܥܒܸܪ ܡܸܢܝܼ: ܘܢܵܡܘܿܣܘܼܟ ܡܲܚܠܥܝܼ ܐܸܠܝܼ. 30 ܐܘܼܪܚܵܐ ܕܡܗܘܼܡܢܘܼܬܵܐ ܓܘܼܒܹܠܝܼ: ܕܝܼܘܵܢܘܼ̈ܟ ܡܘܼܬܸܒ̣ܠܝܼ (ܠܒܲܪܩܘܼܒ̣ܠܝܼ). 31 ܬܒܸܥܠܝܼ ܒܣܵܗܕܘܵܬܘܼ̈ܟ: ܡܵܪܝܵܐ: ܠܵܐ ܡܲܢܚܦܸܬ ܠܝܼ. 32 ܒܐܘܼܪܚܵܐ ܕܦܘܼܩܕܵܢܘܼ̈ܟ ܒܸܕ ܪܵܚܛܸܢ: ܟܲܕ ܡܲܪܘܸܚܸܬ ܠܸܒ̇ܝܼ.

ܗ.

33 ܡܵܠܸܦ ܠܝܼ: ܡܵܪܝܵܐ: ܐܘܼܪܚܵܐ ܕܩܵܢܘܿܢܘܼ̈ܟ: ܘܒܸܕ ܢܵܛܪܸܢܵܗ̇ ܠܚܲܪܬܵܐ. 34 ܡܲܦܪܸܡ ܠܝܼ: ܘܕܵܒ̣ܩܸܢ ܢܵܡܘܿܣܘܼܟ: ܘܢܵܛܪܸܢܹܗ ܒܟܠܹܗ ܠܸܒܵܐ. 35 ܡܲܚܕܸܪܝܼ ܒܓ̰ܵܕܵܐ ܕܦܘܼܩܕܵܢܘܼ̈ܟ: ܣܲܒܲܒ ܕܒܝܹܗ ܒܣܸܡܠܵܐ ܠܝܼ. 36 ܡܲܩܠܸܒ̇ ܠܸܒܝܼ ܠܣܵܗܕܘܵܬܘܼ̈ܟ: ܘܠܵܐ ܠܟ̰ܠܵܓ̰ܬܵܐ. 37 ܡܲܥܒܸܪ ܥܲܝܢܝܼ̈ ܡ̣ܢ ܠܸܚܙܵܝܵܐ ܗܵܒܵܣܘܼܬܵܐ: ܒܐܘܼܪܚܘܼܟ ܡܲܚܝܼ ܠܝܼ. 38 ܡܲܩܘܝܼ ܠܪܹܓܘܼܟ ܚܲܒ̇ܪܘܼܟ: ܕܝܼܠܹܐ ܠܙܕܘܼܥܬܘܼܟ. 39 ܡܲܥܒܸܪ ܠܵܘܡܝܼ ܕܙܕܸܥܠܝܼ: ܣܲܒܲܒ ܕܕܝܼܘܵܢܘܼ̈ܟ ܛܵܒܹ̈ܐ ܝܢܵܐ. 40 ܗܵܐ: ܫܘܼܗ̄ܘܸܬܠܝܼ ܠܦܵܩܲܕܝܵܬܘܼ̈ܟ: ܒܙܲܕܝܼܩܘܼܬܘܼܟ ܡܲܚܝܼ ܠܝܼ.

ܘ.

41 ܘܐܵܬܝܼ ܥܲܠܝܼ ܪܲܚܡܘܼܟ: ܡܵܪܝܵܐ: ܦܘܼܪܩܵܢܘܼܟ: ܐܲܝܟ ܚܲܒ̇ܪܘܼܟ. 42 ܘܒܸܕ ܓ̰ܲܘܒܸܢ ܠܠܵܝܡܲܢܝܼ ܚܲܒ̇ܪܵܐ: ܣܲܒܲܒ ܕܣܒܸܪܝܼ ܒܚܲܒ̇ܪܘܼܟ. 43 ܘܠܵܐ ܫܵܩܠܸܬ ܡ̣ܢ ܦܘܼܡܝ ܗܹܡܸܙܡܵܢ ܕܣܲܪܲܣܬܘܼܬܵܐ ܬܲܡܵܡ: ܣܲܒܲܒ ܕܒܕܝܼܘܵܢܘܼ̈ܟ ܦܸܫܠܝܼ ܒܗܸܒ̣ܝܼ. 44 ܘܒܸܕ ܢܵܛܪܸܢ ܢܵܡܘܿܣܘܼܟ ܒܕܵܝܸܡܘܼܬܵܐ ܠܥܵܠܲܡ ܥܵܠܡܝܼܢ. 45 ܘܒܸܕ ܚܵܕܪܸܢ ܒܪܘܼܚܵܢܝܼ: ܣܲܒܲܒ ܕܠܦܵܩܲܕܝܵܬܘܼ̈ܟ ܛܸܥܠܝܼ. 46 ܘܒܸܕ ܗܲܡܙܸܡܸܢ ܒܣܵܗܕܘܵܬܘܼ̈ܟ ܩܵܕ̄ܡ ܡܲܠܟܹ̈ܐ: ܘܠܹܐ ܢܵܚܦܸܢ. ܘܒܸܕ ܡܲܝܣܸܡܸܢ ܢܲܦ̮ܫܝܼ ܒܦܘܼܩܕܵܢܘܼ̈ܟ ܕܡܘܼܚܸܒܠܝܼ. ܘܒܸܕ ܗܵܓܸܢ ܒܩܵܢܘܿܢܘܼ̈ܟ.

ܙ.

49 ܕܟ̣ܘܿܪ ܚܲܒ̇ܪܵܐ ܠܪܹܓ̇ܘܼܟ: ܣܲܒܲܒ ܕܩܲܡ ܥܵܒ̣ܕܸܬ ܠܝܼ ܒܗܸܒ̣ܝܼ. 50 ܐܵܗܵܐ ܝܠܵܐ ܝܵܗ̄ܒܲܠܬܵܐ ܕܠܸܒܝܼ ܒܝܲܠܨܘܼܘܝܼ: ܣܲܒܲܒ ܕܗܹܡܸܙܡܵܢܘܼܟ ܩܲܡ ܡܲܚܝܼܵܐ ܠܝܼ. 51 ܫܲܒ̣ܗܪ̈ܵܢܹܐ ܡܘܼܣܚܸܪܘܼܢ ܒܝܼܝܼ ܟ̰ܸܡ ܪܵܒܵܐ: ܡ̣ܢ ܢܵܡܘܿܣܘܼܟ ܠܵܐ ܩܠܸܒ̇ܠܝܼ. 52 ܕܟܸܪܝܼ ܕܝܼܘܵܢܘܼ̈ܟ ܡ̣ܢ ܥܵܠܲܡ: ܡܵܪܝܵܐ: ܘܦܸܫܠܝܼ ܝܘܼܗ̄ܒ̣ܵܐ ܠܸܒܵܐ. 53 ܚܸܡܬܵܐ ܩܲܡ ܕܵܒ̣ܩܵܐ ܠܝܼ ܡ̣ܢ ܒܝܼܫܹ̈ܐ ܫܵܒ̣ܩܵܢܹ̈ܐ ܕܢܵܡܘܿܣܘܼܟ. 54 ܙܡܵܪ̈ܝܵܬܹܐ ܗ̄ܘܹܠܘܿܢ ܐܸܠܝܼ ܩܵܢܘܿܢܘܼ̈ܟ ܓܵܘ ܒܲܝܬܵܐ ܕܡܵܫܵܚܲܛܘܼܬܝܼ. 55 ܕܟܸܪܝܼ ܒܠܲܝܠܹܐ ܫܸܡܘܼܟ: ܡܵܪܝܵܐ: ܘܢܛܸܪܝܼ ܢܵܡܘܿܣܘܼܟ. 56 ܐܵܗܵܐ ܗ̄ܘܹܠܵܐ ܐܸܠܝܼ: ܣܲܒܲܒ ܕܦܵܩܲܕܝܵܬܘܼ̈ܟ ܢܛܸܪܝܼ.

ܚ.

57 ܣܵܡܝܼ ܡܵܪܝܵܐ ܝܠܹܐ: ܐܡܸܪܝܼ ܠܸܢܛܵܪܵܐ ܚܲܒ̇ܪ̈ܘܼܟ. 58 ܦܘܼܪܦܸܠܝܼ ܒܦܵܬܘܼܟ ܒܟܠܹܗ ܠܸܒܵܐ: ܪܵܚܸܡ ܥܲܠܝܼ ܐܲܝܟ ܗܹܡܸܙܡܵܢܘܼܟ. 59 ܬܘܼܚܡܸܢܝܼ ܒܐܘܼܪ̈ܚܵܬܝܼ: ܘܡܘܼܕܸܪܝܼ ܐܲܩܠܵܬܝܼ̈ ܠܣܵܗܕܘܵܬܘܼ̈ܟ. 60 ܝܠܸܙܠܝܼ: ܘܠܵܐ ܥܘܼܪܩܸܠܝܼ: ܠܸܢܛܵܪܵܐ ܦܘܼܩܕܵܢܘܼ̈ܟ. 61 ܚܲܒ̣ܠܹ̈ܐ ܕܒܝܼܫܹ̈ܐ ܚܘܼܪܕܝܸܢܘܿܢ: ܢܵܡܘܿܣܘܼܟ ܠܵܐ ܢܫܹܠܝܼ. 62 ܦܲܠܓܵܐ ܕܠܲܝܠܹܐ ܒܸܕ ܩܵܝܡܸܢ ܠܫܵܟܘܿܪܹܐ ܐܸܠܘܼܟ: ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ. 63 ܚܲܒ̣ܪܵܐ ܝܘܸܢ ܐܵܢܵܐ ܠܟܠܵܝ ܙܵܕܥܝܵܢܹ̈ܐ ܡܸܢܘܼܟ: ܘܠܢܵܛܪ̈ܵܢܹܐ ܕܦܵܩܲܕܝܵܬܘܼ̈ܟ. 64 ܫܵܦܵܩܲܬܘܼܟ: ܡܵܪܝܵܐ: ܡܠܹܠܵܐ ܐܲܪܥܵܐ: ܩܵܢܘܿܢܘܼ̈ܟ ܡܵܠܸܦ ܠܝܼ.

ܛ.

65 ܛܵܒ̣ܬܵܐ ܥܒܸܕܠܘܼܟ ܥܲܡ ܪܹܓܘܼܟ: ܡܵܪܝܵܐ: ܐܲܝܟ ܚܲܒ̇ܪܘܼܟ. 66 ܨܦܵܝܝܼ ܦܲܪܡܵܝܬܵܐ ܘܝܕܸܥܬܵܐ ܡܵܠܸܦ ܠܝܼ: ܣܲܒܲܒ ܕܒܦܘܼܩܕܵܢܘܼ̈ܟ ܗܘܼܡܸܢܝܼ. 67 ܡ̣ܢ ܩܵܕ̄ܡ ܕܦܸܫܠܝܼ ܡܘܼܠܝܸܨܵܐ ܐܵܢܵܐ ܚܠܸܛܠܝܼ: ܘܐܵܕܝܼܵܐ ܗܹܡܸܙܡܵܢܘܼ̈ܟ ܢܛܸܪܝܼ. 68 ܛܵܒ̣ܵܐ ܝܘܸܬ ܐܲܢ̄ܬ̇: ܘܥܵܒ̣ܕܵܢܵܐ ܕܛܵܒ̣ܬܵܐ: ܡܵܠܸܦ ܠܝܼ ܩܵܢܘܿܢܘܼ̈ܟ. 69 ܥܘܼܪܹܠܘܿܢ ܥܲܠܝܼ ܒܘܼܚܬܵܢ ܫܲܒ̣ܗܪ̈ܵܢܹܐ: ܐܵܢܵܐ ܒܟܠܹܗ ܠܸܒܵܐ ܒܸܕ ܢܵܛܪܸܢ ܦܵܩܲܕܝܵܬܘܼ̈ܟ. 70 ܛܪܸܨܠܹܐ ܐܲܝܟ ܬܲܪܒܵܐ ܠܸܒܵܝ: ܐܵܢܵܐ ܒܢܵܡܘܿܣܘܼܟ ܥܒܸܕܠܝܼ ܒܘܼܣܵܡܵܐ. 71 ܨܦܵܝܝܼ ܝܠܵܐ ܩܵܬܝܼ ܕܦܸܫܠܝܼ ܡܘܼܠܝܸܨܵܐ: ܩܵܐ ܕܝܵܠܦܸܢ ܩܵܢܘܿܢܘܼ̈ܟ.72 ܨܦܵܝܝܼ ܝܠܹܐ ܩܵܬܝܼ ܢܵܡܘܿܣܵܐ ܕܦܘܼܡܘܼܟ: ܡ̣ܢ ܐܲܠܦܹ̈ܐ ܕܕܲܗܒ̣ܵܐ ܘܣܹܐܡܵܐ.

ܝ.

73 ܐܝܼܕܵܬܘܼ̈ܟ ܥܒ̣ܝܼܕܸܢܘܿܢ ܘܬܘܼܪܨܸܢܘܿܢ: ܡܲܦܪܸܡ ܠܝܼ: ܘܒܸܕ ܝܵܠܦܸܢ ܦܘܼܩܕܵܢܘܼ̈ܟ. 74 ܙܸܕܥܝܘܼ̈ܟ ܒܸܕ ܚܵܙܝܼ ܠܝܼ ܘܒܸܕ ܚܵܕܝܼ: ܣܲܒܲܒ ܕܒܚܲܒ̇ܪܘܼܟ ܦܸܫܠܝܼ ܒܗܹܒ̣ܝܼ. 75 ܝܕܸܥܠܝܼ: ܡܵܪܝܵܐ: ܕܙܲܕܝܼܩܘܼܬܵܐ ܝܢܵܐ ܕܝܼܘܵܢܘܼ̈ܟ: ܘܒܡܗܘܼܡܢܘܼܬܘܼܟ ܡܘܼܠܝܸܨܢܘܼܟ. 76 ܗܵܘܝܵܐ: ܦܲܪܦܘܼܠܹܐ ܝܘܸܢ: ܫܵܦܵܩܲܬܘܼܟ ܠܝܼܵܗ̄ܒ̣ܝܼ ܠܸܒܵܐ: ܐܲܝܟ ܗܹܡܸܙܡܵܢܘܼܟ ܠܪܹܓܘܼܟ. 77 ܐܵܬܝܼ ܥܲܠܝܼ ܪ̈ܲܚܡܘܼܟ: ܘܒܸܕ ܚܲܝܸܢ: ܣܲܒܲܒ ܢܵܡܘܿܣܘܼܟ ܒܵܣܝܼܡܘܼܬܝܼ ܝܠܵܐ. 78 ܢܵܚܦܝܼ ܫܲܒ̣ܗܪ̈ܵܢܹܐ: ܣܲܒܲܒ ܒܒܘܼܚܬܵܢ ܡܘܼܢܦܸܠܢܘܿܢ: ܐܵܢܵܐ ܒܸܕ ܗܵܓܸܢ ܒܦܩܲܕܝܵܬܘܼ̈ܟ. 79 ܕܵܝܪܝܼ ܠܟܸܣܠܝܼ ܙܸܕܥܝܘܼ̈ܟ: ܘܝܲܕܥܵܢܹ̈ܐ ܕܣܵܗܕܘܵܬܘܼ̈ܟ. 80 ܗܵܘܹܐ ܠܸܒܝܼ ܬܲܡܵܡ ܒܩܵܢܘܿܢܘܼ̈ܟ: ܩܵܐ ܕܠܵܐ ܢܵܚܦܸܢ.

ܟ.

81 ܬܸܡܠܵܐ ܠܦܘܼܪܩܵܢܘܼܟ ܢܲܦ̮ܫܝܼ: ܠܚܲܒ̇ܪܘܼܟ ܦܸܫܠܝܼ ܒܗܹܒ̣ܝܼ. 82 ܙܠܸܩܠܘܿܢ ܥܲܝܢܝܼ̈ ܠܗܹܡܸܙܡܵܢܘܼܟ: ܒܹܐܡܵܪܵܐ: ܐܝܼܡܲܢ ܒܸܕ ܝܵܗ̄ܒܸܕ ܠܝܼ ܠܸܒܵܐ: 83 ܣܲܒܲܒ ܕܗ̄ܘܹܠܝܼ ܐܲܝܟ ܓܘܼܕܵܐ ܬܸܢܵܐ: ܩܵܢܘܿܢܘܼ̈ܟ ܠܵܐ ܢܫܹܠܝܼ. 84 ܟܡܵܐ ܝܼܢܵܐ ܝܘܿܡܵܢܹ̈ܐ ܕܪܹܓܘܼܟ. ܐܝܼܡܲܢ ܒܸܕ ܥܵܒ̣ܕܸܬ ܕܝܼܘܵܢ ܥܲܠ ܢܵܦܠܵܢܹ̈ܐ ܒܵܬ̄ܪܝܼ: 85 ܚܦܸܪܘܿܢ ܫܲܒ̣ܗܪ̈ܵܢܹܐ ܓܘܼܒܵܬܹ̈ܐ ܩܵܬܝܼ: ܕܠܹܐ ܝܢܵܐ ܐܲܝܟ ܢܵܡܘܿܣܘܼܟ. 86 ܟܠܵܝ ܦܘܼܩܕܵܢܘܼ̈ܟ ܫܲܪܝܼܪܹ̈ܐ ܝܢܵܐ: ܒܒܘܼܚܬܵܢ ܢܦܸܠܘܿܢ ܒܵܬ̄ܪܝܼ: ܗܲܝܸܪܝܼ. 87 ܚܲܟ̰ܵܐ ܦܸܫܠܵܐ ܕܬܵܝܡܝܼ ܗ̄ܘ̣ܵܘ ܠܝܼ ܒܐܲܪܥܵܐ: ܘܐܵܢܵܐ ܠܵܐ ܫܒܸܩܠܝܼ ܦܵܩܲܕܝܵܬܘܼ̈ܟ. 88 ܐܲܝܟ ܫܵܦܵܩܲܬܘܼܟ ܡܲܚܝܼ ܠܝܼ: ܘܢܵܛܪܸܢ ܣܵܗܕܘܵܬܹ̈ܐ ܕܦܘܼܡܘܼܟ.

ܠ.

89 ܠܥܵܠܲܡ: ܝܵܐ ܡܵܪܝܵܐ: ܚܲܒ̇ܪܘܼܟ ܩܵܝܲܡ ܝܼܠܹܐ ܒܫܡܲܝܵܐ. 90 ܠܕܵܘܪܵܐ ܘܕܵܘܪܵܐ ܡܗܘܼܡܢܘܼܬܘܼܟ: ܡܘܼܩܘܝܼܵܠܘܼܟ ܐܲܪܥܵܐ ܘܟܠܹܠܵܐ. 91 ܠܕܝܼܘܵܢܘܼ̈ܟ: ܟܠܹܠܘܿܢ ܐܸܕܝܘܼ: ܣܲܒܲܒ ܟܠܵܝ ܪܹ̈ܓܵܘܵܬܘܼܟ ܝܼܢܵܐ. 92 ܐܸܢ ܠܵܐ ܗܵܘܹܐ ܗ̄ܘ̣ܵܐ ܢܵܡܘܿܣܘܼܟ ܒܵܣܝܼܡܘܼܬܝܼ: ܗ̇ܝܓܵܗ ܒܸܕ ܬܵܠܩܸܢ ܗ̄ܘ̣ܵܐ ܒܝܲܠܨܘܼܘܝܼ. 93 ܠܥܵܠܲܡ ܠܹܐ ܢܵܫܸܢ ܦܵܩܲܕܝܵܬܘܼ̈ܟ: ܣܲܒܲܒ ܕܒܝܼܵܝ ܩܲܡ ܡܲܚܸܬ ܠܝܼ. 94 ܕܝܼܘܼܟ ܝܼܘܸܢ ܐܵܢܵܐ: ܦܵܪܸܩ ܠܝܼ: ܣܲܒܲܒ ܕܠܦܵܩܲܕܝܵܬܘܼ̈ܟ ܛܸܥܠܝܼ. 95 ܐܸܠܝܼ ܣܦܸܪܘܿܢ ܒܝܼܫܹ̈ܐ ܠܬܵܠܘܿܩܝܼ: ܣܵܗܕܘܵܬܘܼ̈ܟ ܒܸܕ ܦܲܪܡܸܢ. 96 ܠܟܠ ܬܲܡܵܡܵܬܘܼܬܵܐ ܚܙܹܠܝܼ ܚܲܪܬܵܐ: ܪܘܝܼܚܵܐ ܝܠܹܐ ܦܘܼܩܕܵܢܘܼܟ ܪܵܒܵܐ.

ܡ.

97 ܟܡܵܐ ܟܹܐ ܡܲܚܸܒܸܢ ܠܢܵܡܘܿܣܘܼܟ: ܟܠܹܗ ܝܘܿܡܵܐ ܗ̇ܘ ܝܼܠܹܐ ܗܵܓܵܝܬܝܼ. 98 ܒܘܼܫ ܡ̣ܢ ܕܸܫܡܸܢܝܼ̈ ܥܘܼܩܠܸܢܸܢܘܿܢ ܦܘܼܩܕܵܢܘܼ̈ܟ: ܣܲܒܲܒ ܕܠܥܵܠܲܡ ܝܼܢܵܐ ܐܸܠܝܼ. 99 ܡ̣ܢ ܟܠܷܵ ܡܲܠܦܵܢܝܼ̈ ܒܘܼܫ ܥܵܩܸܠܕܵܪ ܗ̄ܘܹܠܝܼ: ܣܒܵܒ ܕܣܵܗܕܘܵܬܘܼ̈ܟ ܗܵܓܵܝܬܵܐ ܝܢܵܐ ܐܸܠܝܼ. 100 ܒܘܼܫ ܡ̣ܢ ܚܘܵܪܕܸܩܢܹܐ ܟܹܐ ܦܲܪܡܸܢ: ܣܲܒܲܒ ܕܦܵܩܲܕܝܵܬܘܼ̈ܟ ܢܛܸܪܝܼ. 101 ܡܢ ܟܠ ܐܘܼܪܚܵܐ ܒܝܼܫܬܵܐ ܡܘܼܟܠܹܠܝܼ ܐܲܩܠܵܬܝܼ̈: ܩܵܐ ܕܢܵܛܪܸܢ ܚܲܒ̇ܪܘܼܟ. 102 ܡ̣ܢ ܕܝܼܘܵܢܘܼܟ ܠܵܐ ܩܠܸܒ̇ܠܝܼ: ܣܲܒܲܒ ܕܐܲܢ̄ܬ ܡܘܼܠܦܸܢܘܼܟ. 103 ܟܡܵܐ ܚܸܠܝܹ̈ܐ ܝܢܵܐ ܠܫܵܡܵܟܝܼ̈ ܗܹܡܸܙܡܵܢܘܼ̈ܟ: ܒܘܼܫ ܡ̣ܢ ܕܸܒ̣ܫܵܐ ܠܦܘܼܡܝܼ. 104 ܡ̣ܢ ܦܵܩܲܕܝܵܬܘܼ̈ܟ ܟܹܐ ܦܲܪܡܸܢ: ܒܘܼܬ ܕܐܵܗܵܐ ܣܢܹܠܝܼ ܟܠ ܐܘܼܪܚܵܐ ܕܕܘܼܓܠܵܐ.

ܢܢ.

105 ܫܪܵܝܵܐ ܝܠܹܐ ܠܐܲܩܠܝܼ ܚܲܒ̇ܪܘܼܟ: ܘܒܲܗܪܵܐ ܠܓ̰ܵܕܝܼ. 106 ܝܡܹܠܝܼ: ܘܒܸܕ ܡܲܩܘܸܢ: ܠܸܢܛܵܪܵܐ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ. 107 ܦܸܫܠܝܼ ܡܘܼܠܝܸܨܵܐ ܪܵܒܵܐ ܪܵܒܵܐ: ܝܵܐ ܡܵܪܝܵܐ: ܡܲܚܝܼ ܠܝܼ ܐܲܝܟ ܚܲܒ̇ܪܘܼܟ. 108 ܩܘܼܪ̈ܒܵܢܹܐ ܕܪܸܙܵܝܵܐ ܕܦܘܼܡܝܼ ܩܵܒܸ̇ܠ: ܦܲܪܦܘܼܠܹܐ ܝܘܸܢ: ܝܵܐ ܡܵܪܝܵܐ: ܘܕܝܼܘܵܢܘܼ̈ܟ ܡܵܠܸܦ ܠܝܼ. 109 ܢܲܦ̮ܫܝܼ ܒܐܝܼܕܝܼ ܝܠܵܐ ܒܕܵܝܸܡܘܼܬܵܐ: ܘܢܵܡܘܿܣܘܼܟ ܠܵܐ ܢܫܹܠܝܼ. 110 ܡܘܼܬܸܒ̣ܠܘܿܢ ܒܝܼܫܹ̈ܐ ܢܸܫܒ̣ܵܐ ܐܸܠܝܼ: ܘܡ̣ܢ ܦܵܩܲܕܝܵܬܘܼ̈ܟ ܠܵܐ ܚܠܸܛܠܝܼ. 111 ܝܪܸܬܠܝܼ ܣܵܗܕܘܵܬܘܼ̈ܟ ܠܥܵܠܲܡ: ܣܲܒܲܒ ܕܚܲܕܘܼܬܵܐ ܕܠܸܒܝܼ ܝܢܵܐ. 112 ܡܘܼܩܠܸܒܠܝܼ ܠܸܒܝܼ ܠܸܥܒ̣ܵܕܵܐ ܩܵܢܘܿܢܘܼ̈ܟ: ܠܥܵܠܲܡ: ܠܚܲܪܬܵܐ.

ܣ.

113 ܠܕܘܼܒܲܪܹ̈ܐ ܒܚܝܼܵܠ ܟܹܐ ܣܵܢܸܢ: ܘܠܢܵܡܘܿܣܘܼܟ ܟܹܐ ܡܲܚܸܒܸܢ. 114 ܣܸܬܵܪܝܼ ܘܡܵܛܵܠܝܼ ܐܲܢ̄ܬ ܝܼܘܸܬ: ܠܚܲܒ̇ܪܘܼܟ ܟܹܐ ܣܵܦܪܸܢ. 115 ܩܠܘܿܒ̇ܘܿܢ ܡܸܢܝܼ: ܒܝܼܫܹ̈ܐ. ܘܢܵܛܪܸܢ ܦܘܼܩܕܵܢܹ̈ܐ ܕܐܲܠܵܗܝܼ. 116 ܣܢܘܿܕ ܠܝܼ ܐܲܝܟ ܚܲܒ̇ܪܘܼܟ: ܘܚܲܝܸܢ: ܘܠܵܐ ܡܲܢܚܸܦܸܬ ܠܝܼ ܡ̣ܢ ܗܹܒ̣ܝܼܝܼ. 117 ܣܢܘܿܕ ܠܝܼ ܘܦܵܝܫܸܢ ܦܘܼܪܩܵܐ: ܘܒܸܕ ܚܵܝܪܸܢ ܥܲܠ ܩܵܢܘܿܢܘܼ̈ܟ ܒܕܵܝܸܡܘܼܬܵܐ. 118 ܡܘܼܣܠܹܠܘܼܟ ܟܠܵܝ ܚܵܠܛܵܢܹ̈ܐ ܡ̣ܢ ܩܵܢܘܿܢܘܼ̈ܟ: ܣܲܒܲܒ ܕܕܘܼܓܠܵܐ ܝܠܹܐ ܦܸܠܡܵܝ. 119 (ܐܲܝܟ) ܚܸܠܛ ܡܘܼܥܒܸܪܘܼܟ ܟܠܵܝ ܒܝܼܫܹ̈ܐ ܕܐܲܪܥܵܐ: ܒܘܼܬ ܕܐܵܗܵܐ ܡܘܼܚܒܸܠܝܼ ܣܵܗܕܘܵܬܘܼ̈ܟ. 120 ܪܘܼܬܪܸܬܠܹܐ ܡ̣ܢ ܣܲܗܡܘܼܟ ܒܸܣܪܝܼ: ܘܡ̣ܢ ܕܝܼܘܵܘܵܢܘܼ̈ܟ ܒܸܙܕܲܥܝܵܐ ܝܘܸܢ.

ܥ.

121 ܥܒܸܕܠܝܼ ܕܝܼܘܵܢ ܘܙܲܕܝܼܩܘܼܬܵܐ: ܠܵܐ ܫܵܒ̣ܩܸܬ ܠܝܼ ܠܙܵܠܡܲܢܝܼ̈. 122 ܗ̄ܘܝܼ ܙܵܡܝܼܢ ܕܪܹܓܘܼܟ ܠܛܵܒ̣ܬܵܐ: ܠܵܐ ܙܵܠܡܝܼ ܐܸܠܝܼ ܫܲܒ̣ܗܪ̈ܵܢܹܐ. 123 ܥܲܝܢܝܼ̈ ܙܠܸܩܠܘܿܢ ܠܦܘܼܪܩܵܢܘܼܟ: ܘܠܗܸܡܸܙܡܵܢ ܕܙܲܕܝܼܩܘܼܬܘܼܟ. 124 ܥܒ̣ܘܿܕ ܥܲܡ ܪܹܓܘܼܟ ܐܲܝܟ ܫܵܦܵܩܲܬܘܼܟ: ܘܩܵܢܘܿܢܘܼ̈ܟ ܡܵܠܸܦ ܠܝܼ. 125 ܪܹܓܘܼܟ ܝܼܘܸܢ ܐܵܢܵܐ: ܡܲܦܪܸܡ ܠܝܼ ܘܝܲܕܥܸܢ ܣܵܗܕܘܵܬܘܼ̈ܟ. 126 ܙܲܒ̣ܢܵܐ ܝܠܹܐ ܠܡܵܪܝܵܐ ܠܸܥܒ̣ܵܕܵܐ: ܒܘܼܛܸܠܘܿܢ ܢܵܡܘܿܣܘܼܟ. 127 ܒܘܼܬ ܕܐܵܗܵܐ ܟܹܐ ܡܲܚܸܒܸܢ ܦܘܼܩܕܵܢܘܼ̈ܟ ܒܘܼܫ ܡ̣ܢ ܕܲܗܒ̣ܵܐ: ܘܡ̣ܢ ܕܲܗܒ̣ܵܐ ܨܸܦܝܵܐ.128 ܒܘܼܬ ܕܐܵܗܵܐ ܟܠܵܝ[93] ܦܵܩܲܕܝܵܬܹ̈ܐ ܒܘܼܬ ܟܠ ܬܪ̈ܘܼܨܹܐ ܟܹܐ ܚܵܫܒܸܢ: ܟܠܵܗ̇ ܐܘܼܪܚܵܐ ܕܕܘܼܓܠܵܐ ܣܢܹܠܝܼ.

ܦ.

129 ܥܓ̰ܝܼܒܹ̈ܐ ܝܢܵܐ ܣܵܗܕܘܵܬܘܼ̈ܟ: ܒܘܼܬ ܕܐܵܗܵܐ ܢܛܝܼܪܵܝܠܵܐ ܢܲܦ̮ܫܝܼ. 130 ܦܬܵܚܵܐ ܕܚܲܒ̇ܪ̈ܘܼܟ ܟܹܐ ܒܲܗ̄ܪܸܢܵܐ: ܟܹܐ ܡܲܦܪܸܡܵܐ ܠܦܫܝܼܛܹ̈ܐ. 131 ܦܘܼܡܝܼ ܦܬܸܚܠܝܼ ܘܡܘܼܠܗܸܕܠܝܼ: ܣܲܒܲܒ ܕܠܦܘܼܩܕܵܢܘܼ̈ܟ ܫܘܼܗ̄ܘܸܬܠܝܼ. 132 ܕܘܼܪ ܠܟܸܣܠܝܼ ܘܡܪܵܚܸܡ ܥܲܠܝܼ: ܐܲܝܟ ܩܵܢܘܿܢܵܐ ܠܡܲܚܸܒܵܢܹ̈ܐ ܕܫܸܡܘܼܟ. 133 ܦܵܣܘܿܥܝܵܬܝܼ̈ ܡܲܩܘܝܼ ܒܗܹܡܸܙܡܵܢܘܼܟ: ܘܠܵܐ ܗܵܟܸܡ ܒܝܼܝܼ ܟܠ ܥܵܘܠܵܐ. 134 ܦܵܪܸܩ ܠܝܼ ܡ̣ܢ ܙܠܘܿܡܝܵܐ ܕܐܢܵܫܵܐ: ܘܢܵܛܪܸܢ ܦܵܩܲܕܝܵܬܘܼ̈ܟ. 135 ܦܵܬܘܼܟ ܒܲܗܪܸܢ ܥܲܠ ܪܹܓܘܼܟ: ܘܡܵܠܸܦ ܠܝܼ ܩܵܢܘܿܢܘܼ̈ܟ. 136 ܫܵܩܝܼܵܬܹ̈ܐ ܕܡ̈ܝܼܵܐ ܡܘܼܓ̰ܪܹܠܘܿܢ ܥܲܝܢܝܼ̈: ܣܲܒܲܒ ܕܠܵܐ ܢܛܸܪܘܿܢ ܢܵܡܘܿܣܘܼܟ.

ܨ.

137 ܙܲܕܝܼܩܵܐ ܝܘܸܬ: ܝܵܐ ܡܵܪܝܵܐ: ܘܬܪ̈ܘܼܨܹܐ ܝܢܵܐ ܕܝܼܘܵܢܘܼ̈ܟ. 138 ܦܩܸܕܠܘܼܟ ܣܵܗܕܘܵܬܘܼ̈ܟ ܒܙܲܕܝܼܩܘܼܬܵܐ: ܘܡܗܘܼܡܢܘܼܬܵܐ ܪܵܒܵܐ. 139 ܩܲܡ ܩܲܛܥܵܐ ܠܝܼ ܩܲܝܪܲܬܝܼ: ܣܲܒܲܒ ܕܢܫܹܠܘܿܢ ܚܲܒ̇ܪ̈ܘܼܟ ܕܸܫܡܸܢܝܼ̈: 140 ܨܘܼܪܸܦܬܵܐ ܝܠܵܐ ܗܹܡܸܙܡܵܢܘܼܟ ܪܵܒܵܐ: ܘܪܹܓܘܼܟ ܟܹܐ ܡܲܚܸܒ̣ ܠܵܗ̇. 141 ܙܥܘܿܪܵܐ ܝܘܸܢ ܐܵܢܵܐ ܘܡܘܼܣܠܝܼܵܐ: ܦܵܩܲܕܝܵܬܘܼ̈ܟ ܠܵܐ ܢܫܹܠܝܼ. 142 ܙܲܕܝܼܩܘܼܬܘܼܟ ܙܲܕܝܼܩܘܼܬܵܐ ܕܠܥܵܠܲܡ ܝܼܠܵܐ: ܘܢܵܡܘܿܣܘܼܟ ܣܲܪܲܣܬܘܼܬܵܐ ܝܠܹܐ. 143 ܥܹܩܘܼܝ ܘܐܘܼܠܨܵܢܵܐ ܡܘܼܫ̄ܟ̰ܸܚܸܢܘܿܢ: ܦܘܼܩܕܵܢܘܼ̈ܟ ܒܵܣܝܼܡܘܼܬܝܼ ܝܢܵܐ. 144 ܙܲܕܝܼܩܘܼܬܵܐ ܝܢܵܐ ܣܵܗܕܘܵܬܘܼ̈ܟ ܠܥܵܠܲܡ: ܡܲܦܪܸܡ ܠܝܼ: ܘܚܲܝܸܢ.

ܩ.

145 ܩܪܹܠܝܼ ܒܟܠܹܗ ܠܸܒܵܐ: ܓ̰ܲܘܸܒ ܠܝܼ: ܝܵܐ ܡܵܪܝܵܐ: ܩܵܢܘܿܢܘܼ̈ܟ ܒܸܕ ܢܵܛܪܸܢ. 146 ܩܪܹܠܝܼ ܐܸܠܘܼܟ: ܦܵܪܸܩ ܠܝܼ: ܘܢܵܛܪܸܢ ܣܵܗܕܘܵܬܘܼ̈ܟ. 147 ܩܘܼܕܸܡܠܝܼ ܒܨܲܦܪܵܐ ܘܓܸܥܠܝܼ: ܠܚܲܒ̇ܪ̈ܘܼܟ ܣܦܸܪܝܼ. 148 ܩܘܼܕܸܡܠܘܿܢ ܥܲܝܢܝܼ̈ ܠܒܲܕܠܹ̈ܐ: ܠܗܵܓܘܿܝܹܐ ܒܗܹܡܸܙܡܵܢܘܼܟ. 149 ܩܵܠܝܼ ܫܡܥܝܼ ܐܲܝܟ ܫܵܦܵܩܲܬܘܼܟ: ܝܵܐ ܡܵܪܝܵܐ: ܐܲܝܟ ܕܝܼܘܵܢܘܼܟ ܡܲܚܝܼ ܠܝܼ. 150 ܩܘܼܪܒܸܢܘܿܢ ܢܵܦܠܵܢܹ̈ܐ ܒܵܬ̄ܪ ܥܵܘܠܵܐ: ܡ̣ܢ ܢܵܡܘܿܣܘܼܟ ܪܚܸܩܠܘܿܢ. 151 ܩܘܼܪܒܵܐ ܝܘܸܬ ܐܲܢ̄ܬ: ܡܵܪܝܵܐ: ܘܟܠܵܝ ܦܘܼܩܕܵܢܘܼ̈ܟ ܣܲܪܲܣܬܘܼܬܵܐ ܝܢܵܐ. 152 ܩܵܕ̄ܡܵܝܬܵܐ ܝܕܸܥܠܝܼ ܡ̣ܢ ܣܵܗܕܘܵܬܘܼ̈ܟ: ܕܠܥܵܠܲܡ ܡܘܼܬܸܒ̣ܠܘܼܟ ܒܸܢܝܲܬܵܝ.

ܪ.

153 ܚܙܝܼ ܝܲܠܨܘܼܘܝܼ: ܘܦܵܨܝܼ ܠܝܼ: ܣܲܒܲܒ ܕܢܵܡܘܿܣܘܼܟ ܠܵܐ ܢܫܹܠܝܼ. 154 ܕܘܼܢ ܕܝܼܘܵܢܝܼ ܘܦܵܪܸܩ ܠܝܼ: ܠܗܹܡܸܙܡܵܢܘܼܟ ܡܲܚܝܼ ܠܝܼ. 155 ܪܸܚܩܵܐ ܝܠܹܐ ܡ̣ܢ ܒܝܼܫܹ̈ܐ ܦܘܼܪܩܵܢܵܐ: ܣܲܒܲܒ ܕܠܩܵܢܘܿܢܘܼ̈ܟ ܠܵܐ ܛܸܥܠܘܿܢ. 156 ܪܲܚܡܘܼܟ ܪܵܒܵܐ ܝܢܵܐ: ܡܵܪܝܵܐ: ܐܲܝܟ ܕܝܼܘܵܢܘܼ̈ܟ ܡܲܚܝܼ ܠܝܼ. 157 ܪܵܒܵܐ ܝܢܵܐ ܢܵܦܠܵܢܹ̈ܐ ܒܵܬ̄ܪܝܼ ܘܕܸܫܡܸܢܝܼ̈: ܡ̣ܢ ܣܵܗܕܘܵܬܘܼ̈ܟ ܠܵܐ ܩܠܸܒܠܝܼ. 158 ܚܙܹܠܝܼ ܥܵܘ̈ܠܹܐ ܘܓܘܼܢܓܸܨܠܝܼ: ܕܗܹܡܸܙܡܵܢܘܼܟ ܠܵܐ ܢܛܸܪܘܿܢ. 159 ܚܙܝܼ ܕܦܵܩܲܕܝܵܬܘܼ̈ܟ ܡܘܼܚܸܒܠܝܼ: ܝܵܐ ܡܵܪܝܵܐ: ܐܲܝܟ ܫܵܦܵܩܲܬܘܼܟ ܡܲܚܝܼ ܠܝܼ. 160 ܪܹܫܵܐ ܕܚܲܒܪ̈ܘܼܟ ܣܲܪܲܣܬܘܼܬܵܐ ܝܠܹܐ: ܘܠܥܵܠܲܡ ܟܠܵܗ̇ ܕܝܼܘܵܢ ܕܙܲܕܝܼܩܘܼܬܘܼܟ.

ܫ.

161 ܓܘܼܪ̈ܵܢܹܐ ܢܦܸܠܘܿܢ ܒܵܬ̄ܪܝܼ ܕܠܵܐ ܣܲܒܲܒ: ܡ̣ܢ ܚܲܒ̇ܪ̈ܘܼܟ ܙܕܸܥܠܹܐ ܠܸܒܝܼ. 162 ܒܸܦܨܵܚܵܐ ܝܘܸܢ ܐܵܢܵܐ ܒܘܼܬ ܗܹܡܸܙܡܵܢܘܼܟ: ܐܲܝܟ ܡܵܫ̄ܟ̣ܚܵܢܵܐ ܕܣܠܵܒܬܵܐ ܪܵܒܵܐ.163 ܒܘܼܚܬܵܢ ܣܢܹܠܝܼ ܘܓܘܼܢܓܸܨܠܝܼ: ܢܵܡܘܿܣܘܼܟ ܡܘܼܚܸܒܠܝܼ. 164 ܫܲܒܲܥ ܓܵܗܹ̈ܐ ܒܝܘܿܡܵܐ ܫܘܼܒ̇ܚܘܼܟ ܝܼܘܸܢ: ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ. 165 ܫܠܵܡܵܐ ܪܵܒܵܐ ܐܝܼܬ ܠܡܲܚܸܒܵܢܹ̈ܐ ܕܢܵܡܘܿܣܘܼܟ: ܘܠܲܝܬ ܐܸܠܵܝ ܬܘܼܪܩܵܠܵܐ. 166 ܣܦܸܪܝܼ ܠܦܘܼܪܩܵܢܘܼܟ: ܡܵܪܝܵܐ: ܘܦܘܼܩܕܵܢܘܼ̈ܟ ܥܒܸܕܠܝܼ. 167 ܢܛܸܪܵܐ ܢܲܦ̮ܫܝܼ ܣܵܗܕܘܵܬܘܼ̈ܟ: ܘܟܹܐ ܡܲܚܸܒܸܢܘܿܢ ܪܵܒܵܐ. 168 ܢܛܸܪܝܼ ܦܵܩܲܕܝܵܬܘܼ̈ܟ ܘܣܵܗܕܘܵܬܘܼ̈ܟ: ܣܲܒܲܒ ܕܟܠܵܝ ܐܘܼܪ̈ܚܵܬܝܼ ܩܵܕ̄ܡܘܼܟ ܝܼܢܵܐ.

ܬ.

169 ܩܲܪܒܸܢ ܫܘܼܒ̣ܚܝܼ ܩܵܕ̄ܡܘܼܟ: ܝܵܐ ܡܵܪܝܵܐ: ܐܲܝܟ ܚܲܒ̇ܪܘܼܟ ܡܲܦܪܸܡ ܠܝܼ. 170 ܐܵܘܪܵܐ ܢܵܘܢܵܝܬܝܼ ܩܵܕ̄ܡܘܼܟ: ܐܲܝܟ ܗܹܡܸܙܡܵܢܘܼܟ ܦܵܨܝܼ ܠܝܼ. 171 ܡܲܢܒ̣ܥܝܼ ܣܸܦܘܵܬܝܸ̈ ܬܸܫܒ̇ܘܿܚܬܵܐ: ܣܲܒܲܒ ܕܟܹܐ ܡܵܠܦܸܬ ܠܝܼ ܩܵܢܘܼܢܘܼ̈ܟ. 172 ܙܵܡܸܪ ܠܸܫܵܢܝܼ ܗܹܡܸܙܡܵܢܘܼܟ: ܣܲܒܲܒ ܟܠܵܝ ܦܘܼܩܕܵܢܘܼ̈ܟ ܙܲܕܝܼܩܘܼܬܵܐ ܝܢܵܐ. 173 ܗܵܘܝܵܐ ܐܝܼܕܘܼܟ ܠܗܲܝܘܼܪܝܼ: ܣܲܒܲܒ ܦܵܩܲܕܝܵܬܘܼ̈ܟ ܓܘܼܒܹ̇ܠܝܼ. 174 ܫܘܼܗ̄ܘܸܬܠܝܼ ܠܦܘܼܪܩܵܢܘܼܟ: ܝܵܐ ܡܵܪܝܵܐ: ܘܢܵܡܘܿܣܘܼܟ ܒܵܣܝܼܡܘܼܬܝܼ ܝܠܹܐ. 175 ܚܲܝܵܐ ܢܲܦ̮ܫܝܼ: ܘܫܵܒ̇ܚܵܐ ܠܘܼܟ: ܘܕܝܼܘܵܢܘܼ̈ܟ ܗܲܝܸܪܝܼ ܠܝܼ. 176 ܚܠܸܛܠܝܼ ܐܲܝܟ ܥܸܪܒܵܐ ܬܠܝܼܩܵܐ: ܛܥܝܼ ܒܵܬ̄ܪ ܪܹܓܘܼܟ: ܣܲܒܲܒ ܕܦܘܼܩܕܵܢܘܼ̈ܟ ܠܵܐ ܢܫܹܠܝܼ.

 

ܡܙܡܘܪܐ: ܩܟ.

ܙܡܵܪܬܵܐ ܕܕܵܪ̈ܓܹܐ.

1. ܠܡܵܪܝܵܐ ܒܥܹܩܘܼܝ ܩܪܹܠܝܼ: ܘܓ̰ܘܼܘܸܒܸܢܹܐ. 2 ܡܵܪܝܵܐ: ܦܵܨܝܼ ܢܲܦ̮ܫܝܼ ܡ̣ܢ ܣܸܦܬܵܐ ܕܕܘܼܓܠܵܐ: ܡ̣ܢ ܠܸܫܵܢܵܐ ܕܦܸܠܡܵܐ. 3 ܡܘܼܕܝܼ ܒܸܕ ܝܵܗ̄ܒܸܠ ܠܘܼܟ: ܘܡܘܼܕܝܼ ܒܸܕ ܡܲܙܝܸܕ ܠܘܼܟ: ܠܸܫܵܢܵܐ ܕܦܸܠܡܵܐ. 4 ܓܹܐܪܹ̈ܐ ܕܓܲܢ̄ܒܵܪܵܐ ܚܵܪ̈ܝܼܦܹܐ: ܥܲܡ ܓܘܼܡܪܹ̈ܐ ܕܪ̈ܬܵܡܹܐ. 5 ܫܵܪܹܐ ܐܸܠܝܼ ܕܥܡܸܪܝܼ ܓܵܘ ܡܸܫܲܟ: ܫܪܹܠܝܼ ܠܟܸܣ ܡܲܫܟܢܹ̈ܐ ܕܩܹܕܲܪ. 6 ܪܵܒܵܐ ܫܪܹܠܵܐ ܢܲܦ̮ܫܝܼ ܥܲܡ ܣܵܢܝܵܢܵܐ ܕܫܠܵܡܵܐ. 7 ܐܵܢܵܐ: ܫܠܵܡܵܐ: ܘܐܝܼܡܲܢ ܕܗܲܡܙܸܡܸܢ: ܐܵܢܝܼ ܠܦܠܵܫܵܐ.

ܡܙܡܘܪܐ: ܩܟܐ.

ܙܡܵܪܬܵܐ ܕܕܵܪ̈ܓܹܐ.

1. ܒܸܕ ܡܵܪܡܸܢ ܥܲܝܢܝܼ̈ ܠܛܘܼܪ̈ܵܢܹܐ. ܘܐܲܝܟܵܐ ܒܸܕ ܐܵܬܹܐ ܗܝܼܵܪܝܼܝܼ. 2 ܗܝܼܵܪܝܼܝܼ ܡ̣ܢ ܠܟܸܣ ܡܵܪܝܵܐ ܝܠܹܐ: ܒܵܪܝܵܢܵܐ ܕܫܡܲܝܵܐ ܘܐܲܪܥܵܐ. 3 ܠܹܐ ܝܵܗ̄ܒܸܠ ܠܓܸܪܵܛܵܐ ܐܲܩܠܘܼܟ: ܠܹܐ ܢܵܝܸܡ ܢܵܛܘܿܪܘܼܟ. 4 ܗܵܐ: ܠܹܐ ܢܵܝܸܡ ܘܠܹܐ ܛܲܠܹܐ ܢܵܛܘܿܪܹܗ ܕܝܼܣܪܵܝܹܠ. 5 ܡܵܪܝܵܐ ܢܵܛܘܿܪܘܼܟ ܝܼܠܹܐ: ܡܵܪܝܵܐ ܛܸܠܵܢܝܼܬܘܼܟ ܥܲܠ ܐܝܼܕܵܐ ܕܝܲܡܝܼܢܘܼܟ. 6 ܒܐܝܼܡܵܡܵܐ ܫܸܡܫܵܐ ܠܹܐ ܡܵܚܹܐ ܠܘܼܟ: ܘܣܲܗܪܵܐ ܒܠܲܝܠܹܐ. 7 ܡܵܪܝܵܐ ܒܸܕ ܢܵܛܸܪܘܼܟ ܡ̣ܢ ܟܠ ܒܝܼܫܬܵܐ: ܒܸܕ ܢܵܛܸܪ ܓܵܢܘܼܟ. 8 ܡܵܪܝܵܐ ܒܸܕ ܢܵܛܸܪ ܦܠܵܛܘܼܟ ܘܐܘܿܪܘܼܟ: ܡ̣ܢ ܐܵܕܝܼܵܐ ܘܗܲܠ ܥܵܠܲܡ.

 

ܡܙܡܘܪܐ: ܩܟܒ.

ܙܡܵܪܬܵܐ ܕܕܵܪ̈ܓܹܐ: ܕܕܵܘܝܼܕ.

1. ܚܕܹܠܝܼ ܟܲܕ ܐܡܸܪܘܿܢ ܐܸܠܝܼ: ܠܒܲܝܬܹܗ ܕܡܵܪܝܵܐ ܐܵܙܵܠ̄ܚ. 2 ܒܸܟܠܵܝܵܐ ܗ̄ܘ̣ܵܘ ܐܲܩ̈ܠܵܬܲܢ ܒܕܲܪ̈ܘܵܙܵܟ̣ܝ: ܝܵܐ ܐܘܿܪܸܫܠܸܡ. 3 ܐܘܿܪܸܫܠܸܡ: ܒܢܝܼܬܵܐ ܐܲܝܟ ܡܕܝܼܢ̄ܬܵܐ ܕܩܕܝܼܚܬܵܐ ܝܠܵܐ ܒܸܚܕܵܕܹ̈ܐ: 4 ܕܬܵܡܵܐ ܐܣܸܩܠܘܿܢ ܫܲܒ̣ܛܹ̈ܐ: ܕܡܵܪܝܵܐ: ܣܵܗܕܘܼܬܵܐ ܠܝܼܣܪܵܝܹܠ: ܠܫܵܟܘܿܪܹ̈ܐ ܠܫܸܡܹܗ ܕܡܵܪܝܵܐ. 5 ܣܲܒܲܒ ܬܵܡܵܐ ܝܬܸܒ̣ܠܘܿܢ ܟܘܼܪ̈ܣܝܹܐ ܠܕܝܼܘܵܢ: ܟܘܼܪ̈ܣܝܹܐ ܕܒܹܝܬ ܕܵܘܝܼܕ. 6 ܛܠܘܿܒܘܿܢ ܫܠܵܡܵܐ ܕܐܘܿܪܸܫܠܸܡ: ܒܸܕ ܡܲܢܬܝܼ ܡܲܚܸܒܵܢܵܟ̣ܝ̈. 7 ܗܵܘܹܐ ܫܠܵܡܵܐ ܒܫܘܼܪ̈ܵܟ̣ܝ: ܫܸܠܝܘܼܬܵܐ ܒܥܵܡܵܪܲܬܵܟ̣ܝ. 8 ܒܚܵܬܸܪ ܕܐܵܚܘܿܢܘܵܬܝܼ̈ ܘܕܵܘܣܬܝܼ̈: ܗܲܪ ܗܲܡܙܸܡܸܢ ܫܠܵܡܵܐ ܓܵܘܵܟ̣ܝ. 9 ܒܚܵܬܸܪ ܕܒܲܝܬܹܗ ܕܡܵܪܝܵܐ ܐܲܠܵܗܲܢ: ܒܸܕ ܒܲܥܝܸܢ ܛܵܒ̣ܬܵܐ ܩܵܬܵܟ̣ܝ.

 

ܡܙܡܘܪܐ: ܩܟܓ.

ܙܡܵܪܬܵܐ ܕܕܵܪ̈ܓܹܐ.

1. ܠܟܸܣܠܘܼܟ ܡܘܼܪܸܡܠܝܼ ܥܲܝܢܝܼ̈: ܝܵܐ ܝܵܬܒ̣ܵܢܵܐ ܓܵܘ ܫܡܲܝܵܐ. 2 ܗܵܐ: ܐܲܝܟ ܥܲܝܢܹ̈ܐ ܕܪܹ̈ܓܵܘܵܬܹܐ ܠܐܝܼܕܵܐ ܕܡܵܪ̈ܘܵܬܵܝ: ܐܲܝܟ ܥܲܝܢܹ̈ܐ ܕܚܹܕܲܡܬܵܐ ܠܐܝܼܕܵܐ ܕܡܵܪܬܘܼܗ̇: ܗܲܕܟ̣ܵܐ ܝܢܵܐ ܥܲܝ̈ܢܲܢ ܠܡܵܪܝܵܐ ܐܲܠܵܗܲܢ: ܗܲܠ ܕܪܵܚܸܡ ܥܲܠܲܢ. 3 ܪܵܚܸܡ ܥܲܠܲܢ: ܝܵܐ ܡܵܪܝܵܐ: ܪܵܚܸܡ ܥܠܲܢ: ܣܲܒܲܒ ܕܪܵܒܵܐ ܣܒܸܥܠܲܢ ܡܲܣܠܵܝܬܵܐ. 4 ܪܵܒܵܐ ܣܒܸܥܠܵܐ ܓܵܢܲܢ ܡܲܣܚܵܪܘܼܬܵܐ ܕܪ̈ܵܗܲܬܹܐ: ܡܲܣܠܵܝܬܵܐ ܕܫܲܒ̣ܗܪܵܢܹܐ.

 

ܡܙܡܘܪܐ: ܩܟܕ.

ܙܡܵܪܬܵܐ ܕܕܵܪܓܹܐ: ܕܕܵܘܝܼܕ.

1. ܐܸܢ ܠܵܐ ܗܵܘܹܐ ܗ̄ܘ̣ܵܐ ܡܵܪܝܵܐ ܕܗ̄ܘܹܠܹܐ ܩܵܬܲܢ: ܚܘܼܫ ܐܵܡܸܪ ܝܼܣܪܵܝܹܠ: 2 ܐܸܢ ܠܵܐ ܗܵܘܹܐ ܗ̄ܘ̣ܵܐ ܡܵܪܝܵܐ ܕܗ̄ܘܹܠܹܐ ܩܵܬܲܢ: ܟܲܕ ܩܸܡܠܘܿܢ ܥܲܠܲܢ ܐܢܵܫܹ̈ܐ: 3 ܗ̇ܝܓܵܗ ܚܵܝܹ̈ܐ ܒܸܕ ܒܲܠܥܝܼ ܗ̄ܘ̣ܵܘ ܠܲܢ: ܒܚܵܡܬܵܐ ܕܟܲܪܒܵܝ ܥܲܠܲܢ. 4 ܗ̇ܝܓܵܗ ܡ̈ܝܼܵܐ ܒܸܕ ܫܵܦܟ̣ܝܼ ܗ̄ܘ̣ܵܘ ܥܲܠܲܢ: ܢܲܗܪܵܐ ܒܸܕ ܥܵܒܸܪ ܗ̄ܘ̣ܵܐ ܥܲܠ ܓܵܢܲܢ. 5 ܗ̇ܝܓܵܗ ܒܸܕ ܥܵܒ̣ܪܝܼ ܗ̄ܘ̣ܵܘ ܥܲܠ ܓܵܢܲܢ ܡ̈ܝܼܵܐ ܓܲܒ̇ܓܸܒܵܢܹ̈ܐ. 6 ܒܪܝܼܟ̣ܵܐ ܝܠܹܐ ܡܵܪܝܵܐ: ܕܠܵܐ ܩܲܡ ܝܵܗܒܸܠ ܠܲܢ[94] ܟ̰ܠܵܓ̰ܬܵܐ ܠܟܹܟܵܝ̈. 7 ܓܵܢܲܢ ܐܲܝܟ ܛܲܝܪܵܐ ܚܠܸܨܠܵܐ ܡ̣ܢ ܢܸܫܒ̣ܵܐ ܕܨܲܝܵܕܹ̈ܐ: ܢܸܫܒ̣ܵܐ ܩܛܸܥܠܵܐ: ܘܐܲܚܢܲܢ ܚܠܸܨܠܲܢ. 8 ܗܲܝܲܪܬܲܢ ܒܫܸܡܵܐ ܕܡܵܪܝܵܐ ܝܠܵܐ: ܒܵܪܝܵܢܵܐ ܕܫܡܲܝܵܐ ܘܐܲܪܥܵܐ.

 

ܡܙܡܘܪܐ: ܩܟܗ.

ܙܡܵܪܬܵܐ ܕܕܵܪ̈ܓܹܐ.

1. ܐܵܢܝܼ ܕܣܵܒܪܝܼ ܒܡܵܪܝܵܐ: ܐܲܝܟ ܕܨܗܝܘܿܢ: ܕܠܹܐ ܫܵܥܸܫ: ܠܥܵܠܲܡ ܟܹܐ ܝܵܬܸܒ̣. 2 ܐܘܿܪܸܫܠܸܡ: ܛܘܼܪ̈ܵܢܹܐ ܟܪܝܼܟ̣ܘܼܗ̇ ܝܢܵܐ: ܘܡܵܪܝܵܐ ܚܵܕܸܪ̈ܘܵܢܹܐ ܕܛܵܝܸܦܹܗ ܝܠܹܐ: ܡ̣ܢ ܐܵܕܝܼܵܐ ܘܗܲܠ ܥܵܠܲܡ. 3 ܣܲܒܲܒ ܕܠܹܐ ܫܵܪܹܐ ܚܘܼܛܪܵܐ ܕܒܝܼܫܵܐ ܥܲܠ ܦܸܫܟܵܐ ܕܙܲܕܝܼܩ̈ܐ: ܩܵܐ ܕܠܵܐ ܦܵܫܛܝܼ ܙܲܕܝܼܩܹ̈ܐ ܒܥܵܘܠܵܐ ܐܝܼܕܵܬܵܝ̈. ܥܒ̣ܘܿܕ ܛܵܒ̣ܬܵܐ: ܡܵܪܝܵܐ: ܠܛܵܒܹ̈ܐ: ܘܠܬܪ̈ܘܼܨܹܐ ܒܠܸܒܵܘܵܬܵܝ̈. 5 ܘܩܵܠܒܵܢܹ̈ܐ ܠܐܘܼܪ̈ܚܵܬܵܝ ܦܟ̰ܝܼ̈ܠܹܐ: ܒܸܕ ܠܵܒܸܠ ܠܗ̄ܘܿܢ ܡܵܪܝܵܐ ܥܲܡ ܦܵܠܚܵܢܹ̈ܐ ܕܥܵܘܠܵܐ. ܫܠܵܡܵܐ ܥܲܠ ܝܼܣܪܵܝܹܠ.

 

ܡܙܡܘܪܐ: ܩܟܘ.

ܙܡܵܪܬܵܐ ܕܕܵܪ̈ܓܹܐ.

1. ܟܲܕ ܡܘܼܕܸܪܹܐ ܡܵܪܝܵܐ ܝܲܚܣܝܼܪܘܼܬܵܐ ܕܨܸܗܝܘܿܢ: ܗ̄ܘܹܠܲܢ ܐܲܝܟ ܚܵܠܡܵܢܹ̈ܐ. 2 ܗ̇ܝܓܵܗ ܡܠܹܠܹܐ ܓܸܚܟܵܐ ܦܘܼܡܲܢ: ܘܠܸܫܵܢܲܢ ܙܡܵܪܬܵܐ: ܝ̇ܝܓܵܗ ܐܡܸܪܘܿܢ ܓܵܘ ܛܵܝܸܦܹ̈ܐ: ܡܘܼܓܘܸܪܹܐ ܡܵܪܝܵܐ ܠܸܥܒ̣ܵܕܵܐ ܥܲܡ ܕܐܲܢܹܐ. 3 ܡܘܼܓܘܸܪܸܐ ܡܵܪܝܵܐ ܠܸܥܒ̣ܵܕܵܐ ܥܲܡܲܢ: ܗ̄ܘܹܠܲܢ ܚܸܕܝܹ̈ܐ. 4 ܡܲܕܸܪ: ܝܵܐ ܡܵܪܝܵܐ: ܝܲܚܣܝܼܪܘܼܬܲܢ: ܐܲܝܟ ܫܵܩܝܼܵܬܹ̈ܐ ܒܬܲܝܡܢܵܐ. 5 ܐܵܢܝܼ ܕܙܲܪܥܝܼ ܒܕܸܡܥ̱ܬܵܐ: ܒܩܲܘܲܚܬܵܐ ܕܚܲܕܘܼܬܵܐ ܒܸܕ ܚܵܨܕܝܼ. 6 ܗ̇ܘ ܕܚܕܵܪܵܐ ܚܵܕܸܪ ܘܒܵܟܹܐ: ܛܥܝܼܢܵܐ ܒܙܵܩܬܵܐ ܕܒܲܪܙܲܪܥܵܐ: ܐܬܵܝܵܐ ܒܸܕ ܐܵܬܹܐ ܒܫܘܼܒ̣ܚܵܐ: ܛܥܝܼܢܵܐ ܕܲܪ̈ܙܘܼܗܝ.

 

ܡܙܡܘܪܐ: ܩܟܙ.

ܙܡܵܪܬܵܐ ܕܕܵܪ̈ܓܹܐ: ܕܫܠܹܝܡܘܿܢ.

1. ܐܸܢ ܡܵܪܝܵܐ ܠܵܐ ܒܵܢܹܐ ܒܲܝܬܵܐ: ܗܵܒܵܣ ܟܹܐ ܐܵܟ̣ܠܝܼ ܓ̰ܵܦܵܐ ܒܵܢܝܵܢܘܼ̈ܗܝ ܒܝܹܗ. ܐܸܢ ܡܵܪܝܵܐ ܠܵܐ ܢܵܛܸܪ ܡܕܝܼܢ̄ܬܵܐ: ܗܵܒܵܣ ܟܹܐ ܥܵܒܸܕ ܫܵܗܲܪܬܵܐ ܢܵܛܘܿܪܵܐ. 2 ܗܵܒܵܣ ܝܼܠܵܐ ܩܵܬܵܘܟ̣ܘܿܢ: ܩܵܕܡܵܢܹ̈ܐ ܠܸܩܝܵܡܵܐ: ܥܲܪ̈ܩܸܠܵܢܹܐ ܠܸܬܝܵܒ̣ܵܐ: ܐܵܟ̣ܠܵܢܹ̈ܐ ܕܠܲܚܡܵܐ ܕܓ̰ܵܦܹ̈ܐ: ܗܲܕܟ̣ܵܐ ܟܹܐ ܝܵܗ̄ܒܸܠ ܠܣܵܘܓܘܿܠܹܗ ܫܸܢܬܵܐ. 3 ܗܵܐ: ܝܵܪܬܘܼܬܵܐ ܕܡܵܪܝܵܐ ܒܢܘܼܢܹ̈ܐ ܝܢܵܐ: ܗܵܩܵܐ (ܐܸܠܹܗ) ܛܥܘܼܢܝܵܬܹ̈ܐ ܕܡܲܪܒܥܵܐ. 4 ܐܲܝܟ ܓܹܐܪܹ̈ܐ ܒܐܝܼܕܹܗ ܕܓܲܢ̄ܒܵܪܵܐ: ܗܲܕܟ̣ܵܐ ܝܢܵܐ ܒܢܘܼܢܹ̈ܐ ܕܓ̰ܘܲܢܩܘܼܬܵܐ. 5 ܛܘܼܒ̣ܵܐ ܠܓܲܒ̣ܪܵܐ ܕܡܠܹܠܹܐ ܡܵܐܢܵܐ ܕܓܹܐܪ̈ܘܼܗܝ ܡܸܢܵܝ: ܠܹܐ ܢܵܚܦܝܼ: ܟܲܕ ܗܲܡܙܸܡܝܼ ܥܲܡ ܕܸܫܡܸܢܹ̈ܐ ܒܕܲܪܘܵܙܵܐ.

 

ܡܙܡܘܪܐ: ܩܟܚ.

ܙܡܵܪܬܵܐ ܕܕܵܪ̈ܓܹܐ.

1. ܛܘܼܒ̣ܵܐ ܠܟܠ ܕܙܵܕܸܥ ܡ̣ܢ ܡܵܪܝܵܐ: ܕܚܵܕܸܪ ܒܐܘܼܪ̈ܚܵܬܘܼܗܝ. 2 ܓ̰ܵܦܵܐ ܕܐܝܼܕܵܬܘܼ̈ܟ ܟܲܕ ܐܵܟ̣ܠܸܬ: ܛܘܼܒ̣ܵܐ ܐܸܠܘܼܟ: ܘܛܵܒ̣ܬܵܐ ܐܸܠܘܼܟ. 3 ܒܲܟ̣ܬܘܼܟ ܐܲܝܟ ܓܸܦܬܵܐ ܡܵܪܹܐ ܛܥܘܼܢܬܵܐ ܒܓܸܒܵܢܹ̈ܐ ܕܒܲܝܬܘܼܟ: ܒܢܘܼܢܘܼ̈ܟ ܐܲܝܟ ܫܸܬܠܹ̈ܐ ܕܙܲܝܬܹ̈ܐ ܚܵܕܸܪ̈ܘܵܢܹܐ ܕܨܘܼܦܪܘܼܟ. 4 ܗܵܐ: ܕܗܲܕܟ̣ܵܐ ܒܸܕ ܦܵܝܸܫ ܒܘܼܪܟ̣ܵܐ ܓܲܒ̣ܪܵܐ ܕܙܵܕܸܥ ܡ̣ܢ ܡܵܪܝܵܐ. 5 ܒܵܪܸܟ ܠܘܼܟ ܡܵܪܝܵܐ ܡ̣ܢ ܨܗܝܘܿܢ: ܘܚܵܙܸܬ ܒܛܵܒ̣ܬܵܐ ܕܐܘܿܪܸܫܠܸܡ ܟܠܵܝ ܝܘܿܡܵܢܹ̈ܐ ܕܚܲܝܘܼ̈ܟ. 6 ܘܚܵܙܸܬ ܒܢܘܼܢܹ̈ܐ ܠܒܢܘܼܢܘܼ̈ܟ. ܫܠܵܡܵܐ ܥܲܠ ܝܼܣܪܵܝܹܠ.

 

ܡܙܡܘܪܐ: ܩܟܛ.

ܙܡܵܪܬܵܐ ܕܕܵܪ̈ܓܹܐ.

1. ܪܵܒܵܐ ܡܘܼܠܝܸܨܸܢܘܿܢ ܡ̣ܢ ܝܵܠܘܼܬܝܼ: ܚܘܼܫ ܐܵܡܸܪ ܝܼܣܪܵܝܹܠ: 2 ܪܵܒܵܐ ܡܘܼܠܝܸܨܢܘܿܢ ܡ̣ܢ ܝܵܠܘܼܬܝܼ: ܐܘܼܦ ܠܵܐ ܡܸܨܠܘܿܢ ܒܝܼܝܼ. 3 ܥܲܠ ܚܵܨܝܼ[95] ܟܪܸܒ̣ܠܘܿܢ ܟܵܪ̈ܒ̣ܵܢܹܐ: ܡܘܼܪܝܸܟ̣ܠܘܿܢ ܚܵܝܵܝ̈. 4 ܡܵܪܝܵܐ ܙܲܕܝܼܩܵܐ ܝܠܹܐ: ܩܛܸܥܠܹܐ ܚܲܒ̣ܠܵܐ ܕܒܝܼܫܹ̈ܐ. 5 ܢܵܚܦܝܼ ܘܕܵܝܪܝܼ ܠܵܒܵܬ̄ܪܵܐ ܟܠܵܝ ܣܵܢܝܵܢܹ̈ܐ ܕܨܸܗܝܘܿܢ. 6 ܗܵܘܝܼ ܐܲܝܟ ܓܸܠܵܐ ܕܐܓܵܪ̈ܘܵܬܹܐ: ܕܡ̣ܢ ܩܵܕ̄ܡ ܕܦܵܝܸܫ ܢܟ̰ܝܼܠܵܐ ܟܹܐ ܒ̇ܪܸܙ: 7 ܕܠܹܐ ܡܵܠܹܐ ܐܝܼܕܹܗ ܚܵܨܵܕܵܐ: ܘܠܵܐ ܚܦܵܩܹܗ ܐܵܣܪܵܢܵܐ ܕܕܲܪ̈ܙܹܐ. 8 ܘܠܹܐ ܐܵܡܪܝܼ ܥܵܒ̣ܪ̈ܵܢܹܐ: ܒܘܼܪܟܬܵܐ ܕܡܵܪܝܵܐ ܥܲܠܵܘܟ̣ܘܿܢ: ܒܵܪܟ̣ܵܚ ܠܵܘܟ̣ܘܿܢ ܒܫܸܡܹܗ ܕܡܵܪܝܵܐ.

 

ܡܙܡܘܪܐ: ܩܠ.

ܙܡܵܪܬܵܐ ܕܕܵܪ̈ܓܹܐ.

1. ܡ̣ܢ ܥܘܼܡܩܹ̈ܐ ܩܪܹܠܝܼ ܐܸܠܘܼܟ: ܝܵܐ ܡܵܪܝܵܐ. 2 ܡܵܪܝܵܐ: ܫܡܥܝܼ ܒܩܵܠܝܼ: ܗܵܘܝܼ ܢܵܬܝܵܬܘܼ̈ܟ ܡܲܨܝܘܼܬܹܐ ܠܩܵܠܵܐ ܕܢܵܘܢܵܝܵܬܝܼ̈. 3 ܐܸܢ ܓܢܵܗܹ̈ܐ ܢܵܛܪܸܬ: ܝܵܐ ܡܵܪܝܵܐ: ܡܵܪܝܵܐ: ܡܲܢܝܼ ܟܵܠܹܐ: 4 ܣܲܒܲܒ ܕܐܝܼܬ ܥܲܡܘܼܟ ܫܒ̣ܵܩܵܐ: ܩܵܐ ܕܙܵܕܥܝܼ ܡܸܢܘܼܟ. 5 ܣܦܸܪܝܼ ܠܡܵܪܝܵܐ: ܣܦܸܪܵܐ ܢܲܦ̮ܫܝܼ: ܘܒܚܲܒ̇ܪܹܗ ܣܒܸܪܝܼ: 6 ܢܲܦ̮ܫܝܼ (ܒܸܣܦܵܪܵܐ ܝܠܵܐ) ܠܡܵܪܝܵܐ: ܒܘܼܫ ܡ̣ܢ ܢܵܛܪ̈ܵܢܹܐ ܠܡܵܘܪܸܫܵܐ: ܢܵܛܪ̈ܵܢܹܐ ܠܡܵܘܪܹܫܵܐ. 7 ܣܒܘܿܪ: ܝܼܣܪܵܝܹܠ: ܒܡܵܪܝܵܐ: ܣܲܒܲܒ ܕܥܲܡ ܡܵܪܝܵܐ ܐܝܼܬ ܫܵܦܵܩܲܬ: ܘܪܵܒܵܐ ܐܝܼܬ ܥܲܡܹܗ ܦܘܼܪ̈ܩܵܢܹܐ. 8 ܘܗ̇ܘ ܒܸܕ ܦܵܪܸܩ ܠܝܼܣܪܵܝܹܠ ܡ̣ܢ ܟܠܵܝ ܥܵܘܠܘܼܗܝ.

 

ܡܙܡܘܪܐ: ܩܠܐ.

ܙܡܵܪܬܵܐ ܕܕܵܪ̈ܓܹܐ: ܕܕܵܘܝܼܕ.

1. ܝܵܐ ܡܵܪܝܵܐ: ܠܵܐ ܗ̄ܘܹܠܹܐ ܪܵܡܵܐ ܠܸܒܝܼ: ܘܠܵܐ ܪܸܡܠܘܿܢ ܥܲܝܢܝܼ̈: ܘܠܵܐ ܚܕܸܪܝܼ ܒܫܘܼܠܹܐ ܓܘܼܪܹ̈ܐ ܘܒܫܘܼܠܹܐ ܥܓ̰ܝܼܒܹ̈ܐ ܡܸܢܝܼ. 2 ܐܸܠܵܐ ܡܘܼܫܠܹܠܝܼ ܘܡܫܘܼܬܸܩܠܝܼ ܠܢܝܼ ܐܲܝܟ ܚܣܝܼܠܵܐ ܥܲܠ ܝܸܡܹܗ: ܐܲܝܟ ܚܣܝܼܠܵܐ ܥܲܠܝܼ (ܝܠܵܐ) ܠܵܢܝܼ. 3 ܣܒܘܿܪ ܝܼܣܪܵܝܹܠ: ܒܡܵܪܝܵܐ: ܡܵܐܕܝܼܵܐ ܘܗܲܠ ܥܵܠܲܡ.

 

ܡܙܡܘܪܐ: ܩܠܒ.

ܙܡܵܪܬܵܐ ܕܕܵܪ̈ܓܹܐ.

1. ܕܟ̣ܘܿܪ: ܝܵܐ ܡܵܪܝܵܐ: ܠܕܵܘܝܼܕ: ܠܟܠܵܝ ܝܲܠܨܘܼܘܗ̈ܗܝ: 2 ܕܝܡܹܠܹܐ ܠܡܵܪܝܵܐ: ܢܕܸܪܹܐ ܠܙܲܪܒܵܢܵܐ ܕܝܲܥܩܘܿܒ̣: 3 ܐܸܢ ܐܵܘܪܸܢ ܓܵܘ ܡܲܫܟܢܵܐ ܕܒܲܝܬܝܼ: ܐܸܢ ܐܵܣܩܸܢ ܥܲܠ ܫܘܝܼܬܝܼ ܕܫܘܼܘܝܼܬܵܐ: 4 ܐܸܢ ܝܵܗ̄ܒܸܢ ܫܸܢܬܵܐ ܠܥܲܝܢܝܼ̈: ܠܛܸܠܦܵܦܝܼ̈ ܢܵܘܡܵܐ: 5 ܗܲܠ ܕܡܵܫ̄ܟ̰ܚܸܢ ܕܘܼܟܬܵܐ ܩܵܐ ܡܵܪܝܵܐ: ܡܲܫܸܟܢܹ̈ܐ ܩܵܐ ܙܲܪܒܵܢܵܐ ܕܝܲܥܩܘܿܒ̣. 6 ܗܵܐ: ܫܡܸܥܠܲܢ ܒܵܗܣܘܼܗ̇ ܓܵܘ ܐܵܦܲܪܬܵܐ: ܡܘܼܫ̄ܟ̰ܚܵܠܲܢ ܓܵܘ ܚܲܩܠܵܢܹ̈ܐ ܕܡܵܝܫܵܐ. 7 ܐܵܘܪܵܚ ܠܡܵܫܸܟܢܘܼ̈ܗܝ: ܒܸܕ ܣܵܓ̣ܕܵܚ ܠܟܘܼܒ̣ܫܵܐ ܕܐܲܩܠܵܬܘܼ̈ܗܝ. 8 ܩܘܼܡ̄: ܡܵܪܝܵܐ: ܠܢܚܵܝܬܘܼܟ: ܐܲܢ̄ܬ ܘܩܹܒ̣ܘܼܬܵܐ ܕܙܲܪܒܘܼܟ. 9 ܟܵܗܢܘܼ̈ܟ ܠܵܒ̣ܫܝܼ ܙܲܕܝܼܩܘܼܬܵܐ: ܘܙܲܕܝܼܩܘܼ̈ܟ ܩܲܘܸܚܝܼ. 10 ܒܚܵܬܸܪ ܕܕܵܘܝܼܕ ܪܹܓܘܼܟ: ܠܵܐ ܡܲܕܸܪܸܬ ܦܵܬܵܐ ܕܡܫܝܼܚܘܼܟ. 11 ܝܡܹܠܹܐ ܡܵܪܝܵܐ ܠܕܵܘܝܼܕ ܒܣܲܪܲܣܬܘܼܬܵܐ: ܠܹܐ ܕܵܝܸܪ ܡܸܢܵܗ̇: ܡ̣ܢ ܛܥܘܼܢܝܵܬܹ̈ܐ ܕܟܹܪ̄ܣܘܼܟ ܒܸܕ ܡܲܬܒܸܢ ܥܲܠ ܟܘܼܪܣܝܘܼܟ. 12 ܐܸܢ ܢܵܛܪܝܼ ܒܢܘܼܢܘܼ̈ܟ ܩܵܘܠܝܼ. ܘܣܵܗܕܘܼܬܝܼ ܐܵܗܵܐ ܕܡܵܠܦܸܢܘܿܢ: ܐܘܼܦ ܒܢܘܼܢܵܝ̈ ܠܥܵܠܲܡ ܒܸܕ ܝܵܬܒ̣ܝܼ ܥܲܠ ܟܘܼܪܣܝܘܼܟ. 13 ܣܲܒܲܒ ܕܓܘܼܒܹ̇ܠܹܐ ܡܵܪܝܵܐ ܠܨܸܗܝܘܿܢ: ܫܘܼܗ̄ܘܸܬܠܹܐ (ܐܸܠܵܗ̇) ܠܡܲܣܟܵܢܘܼܗܝ. 14 ܐܵܗܵܐ ܝܠܵܐ ܢܝܵܚܬܝܼ ܗܲܠ ܥܵܠܲܡ: ܠܐܲܟ̣ܵܐ ܒܸܕ ܝܵܬܒܸܢ: ܣܲܒܲܒ ܕܫܘܼܗ̄ܘܸܬܠܝܼ ܐܸܠܘܼܗ̇. 15 ܡܹܐܟ̣ܘܼܠܬܘܼܗ̇ ܒܵܪܘܿܟܹܐ ܒܸܕ ܒܵܪܟܸܢ: ܡܸܣܟܹܢܘܼ̈ܗ̇ ܒܸܕ ܡܲܣܒܸܥܢ ܠܲܚܡܵܐ. 16 ܘܟܵܗܢܘܼ̈ܗ̇ ܒܸܕ ܡܲܠܒܸܫܸܢ ܦܘܼܪܩܵܢܵܐ: ܘܙܲܕܝܼܩܘܼ̈ܗ̇ ܩܲܘܲܚܬܵܐ ܒܸܕ ܩܲܘܸܚܝܼ. 17 ܬܵܡܵܐ ܒܸܕ ܡܲܓ̰ܝܢܸܢ ܩܵܪ̄ܢܵܐ ܠܕܵܘܝܼܕ: ܡܘܼܪܝܸܙܠܝܼ ܫܪܵܝܵܐ ܩܵܐ ܡܫܝܼܚܝܼ. 18 ܕܸܫܡܸܢܘܼ̈ܗܝ ܒܸܕ ܡܲܠܒܸܫܸܢ ܢܚܸܦܬܵܐ: ܘܥܲܠܘܼܗܝ ܒܸܕ ܦܵܩܸܚ ܬܵܐܓ̰ܘܗܝ.

 

ܡܙܡܘܪܐ: ܩܠܓ.

ܙܡܵܪܬܵܐ ܕܕܵܪ̈ܓܹܐ: ܕܕܵܘܝܼܕ.

1. ܗܵܐ: ܟܡܵܐ ܨܦܵܝܝܼ ܝܠܵܐ: ܘܟܡܵܐ ܒܵܣܝܼܡܬܵܐ: ܝܬܝܵܒ̣ܬܵܐ ܕܐܵܚܘܿܢܘܵܬܹ̈ܐ ܐܘܼܦ[96] ܡܸܚܕܵܕܹ̈ܐ.2 ܐܲܝܟ ܡܸܫܚܵܐ ܨܦܵܝܝܼ ܥܲܠ ܪܹܫܵܐ: ܕܨܵܠܹܐ ܥܲܠ ܕܸܩܢܵܐ: ܕܸܩܢܵܐ ܕܐܲܗܪܘܿܢ: ܕܒܸܨܠܵܝܵܐ ܗ̄ܘ̣ܵܐ ܥܲܠ ܦܘܼܡܵܐ ܕܠܒ̣ܘܼܫܘܼ̈ܗܝ: ܐܲܝܟ ܛܠܘܼܠܵܐ ܕܚܸܪܡܘܿܢ: ܕܟܹܐ ܨܵܠܹܐ ܥܲܠ ܛܘܼܪ̈ܵܢܹܐ ܕܨܸܗܝܘܿܢ: ܣܲܒܲܒ ܕܬܵܡܵܐ ܦܩܸܕܠܹܐ ܡܵܪܝܵܐ ܒܘܼܪܟܬܵܐ: ܚܲܝܹ̈ܐ ܗܲܠ ܥܵܠܲܡ.

 

ܡܙܡܘܪܐ: ܩܠܕ.

ܙܡܵܪܬܵܐ ܕܕܵܪ̈ܓܹܐ.

1. ܗܵܐ: ܒܵܪܟ̣ܘܿܢ ܠܡܵܪܝܵܐ: ܟܠܵܝ ܪܹ̈ܓܵܘܵܬܹܐ ܕܡܵܪܝܵܐ: ܟܵܠܝܵܢܹ̈ܐ ܒܒܲܝܬܹܗ ܕܡܵܪܝܵܐ ܒܠܲܝܠܵܘܵܬܹ̈ܐ. 2 ܡܵܪܡܘܿܢ ܐܝܼܕܵܘܟ̣ܘܿܢ ܠܡܲܩܕܫܵܐ: ܘܒܵܪܟ̣ܘܿܢ ܠܡܵܪܝܵܐ. 3 ܒܵܪܸܟ ܠܘܼܟ ܡܵܪܝܵܐ ܡ̣ܢ ܨܸܗܝܘܿܢ: ܒܵܪܝܵܢܵܐ ܕܫܡܲܝܵܐ ܘܐܲܪܥܵܐ.

 

ܡܙܡܘܪܐ: ܩܠܗ.

ܗܲܠܸܠܘܼܝܵܐ.

1. ܫܵܒܚܘܿܢ ܠܫܸܡܹܗ ܕܡܵܪܝܵܐ: ܫܵܒܚܘܿܢ ܪܹ̈ܓܵܘܵܬܹܐ ܕܡܵܪܝܵܐ: 2 ܕܟܹܐ ܟܵܠܝܼ ܒܒܲܝܬܹܗ ܕܡܵܪܝܵܐ: ܒܕܵܪ̈ܬܹܐ ܕܒܲܝܬܹܗ ܕܐܲܠܵܗܲܢ. 3 ܫܵܒܚܘܿܢ ܠܡܵܪܝܵܐ: ܣܲܒܲܒ ܕܛܵܒ̣ܵܐ ܝܠܹܐ ܡܵܪܝܵܐ: ܙܡܘܿܪܘܿܢ ܠܫܸܡܹܗ: ܣܲܒܲܒ ܕܒܵܣܝܼܡܵܐ ܝܠܹܐ. 4 ܣܲܒܲܒ ܕܠܝܲܥܩܘܿܒ̣ ܝܘܼܒܹܠܹܐ ܩܵܐ ܓܵܢܹܗ ܡܵܪܝܵܐ: ܝܼܣܪܵܝܹܠ ܠܡܵܐܠ ܕܓܵܢܹܗ. 5 ܣܲܒܲܒ ܕܐܵܢܵܐ ܟܹܐ ܝܲܕܥܸܢ ܕܓܘܼܪܵܐ ܝܠܹܐ ܡܵܪܝܵܐ: ܘܡܵܪܲܢ ܡ̣ܢ ܟܠܵܝ ܐܲܠܵܗܹ̈ܐ. 6 ܟܠ ܕܒܣܹܡܠܵܐ ܠܹܗ ܡܵܪܝܵܐ: ܥܒܸܕܠܹܐ ܒܫܡܲܝܵܐ ܘܒܲܐܪܥܵܐ ܒܝܵܡܵܬܹ̈ܐ ܘܟܠܵܝ ܥܘܼܡܩܹ̈ܐ. 7 ܟܹܐ ܡܵܐܣܸܩ ܗܸܠܡܹ̈ܐ ܡ̣ܢ ܡܲܪܙܵܐ ܕܐܲܪܥܵܐ: ܒܸܪ̈ܩܹܐ ܠܡܸܛܪܵܐ ܥܒܸܕܠܹܐ: ܟܹܐ ܦܵܠܸܛ ܦܵܘܚܵܐ ܡ̣ܢ ܐܲܢܒܵܪ̈ܘܼܗܝ. 8 ܕܡܚܹܠܹܐ ܒܘܼܟ̣ܪܹ̈ܐ ܕܡܸܨܪܹܝܢ: ܡ̣ܢ ܒܲܪܢܵܫܵܐ ܗܲܠ ܪܸܣܩܵܐ. 9 ܫܘܼܕܸܪܹܐ ܢܝܼܫܲܢܩܹ̈ܐ ܘܥܵܓ̰ܸܒܘܼܝܵܬܹ̈ܐ ܓܵܘܵܟ̣ܝ: ܡܸܨܪܝܼܢ: ܒܦܸܪܥܘܿܢ ܘܒܟܠܵܝ ܪܹ̈ܓܵܘܵܬܘܼܗܝ. 10 ܕܡܚܹܠܹܐ ܛܵܝܸܦܹ̈ܐ ܪܵܒܵܐ: ܘܩܛܸܠܹܐ ܡܲܠܟܹ̈ܐ ܙܲܪ̈ܒܵܢܹܐ. 11 ܠܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ: ܘܠܥܘܿܓ̣ ܡܲܠܟܵܐ ܕܒܲܝܫܵܢ: ܘܠܟܠܵܝ ܡܲܠܟܘܵܬܹ̈ܐ ܕܟܢܲܥܢ: 12 ܘܝܸܗܒܸܠܹܐ ܐܲܪܥܵܝ ܠܝܵܪܬܘܼܬܵܐ: ܝܵܪܬܘܼܬܵܐ ܠܝܼܣܪܵܝܹܠ ܛܵܝܸܦܹܗ. 13 ܝܵܐ ܡܵܪܝܵܐ: ܫܸܡܘܼܟ ܠܥܵܠܲܡ ܝܼܠܹܐ: ܝܵܐ ܡܵܪܝܵܐ: ܕܟ̣ܵܪܘܼܟ ܠܕܵܘܪܵܐ ܘܕܵܘܪܵܐ. 14 ܣܲܒܲܒ ܕܒܸܕ ܕܵܝܸܢ ܡܵܪܝܵܐ ܛܵܝܸܦܹܗ: ܘܥܲܠ ܪܹ̈ܓܵܘܵܬܘܼܗܝ ܒܸܕ ܦܵܫܸܡ. 15 ܨܵܢܲܡܹ̈ܐ ܕܛܵܝܸܦܹ̈ܐ ܣܹܐܡܵܐ ܘܕܲܗܒ̣ܵܐ ܝܢܵܐ: ܦܘܼܠܚܵܢܵܐ ܕܐܝܼܕܵܬܹ̈ܐ ܕܒܲܪܢܵܫܵܐ. 16 ܦܘܼܡܵܐ ܐܝܼܬ ܠܗ̄ܘܿܢ: ܘܠܹܐ ܗܲܡܙܸܡܝܼ: ܥܲܝܢܹ̈ܐ ܐܝܼܬ ܠܗ̄ܘܿܢ: ܘܠܹܐ ܚܵܙܝܼ. 17 ܢܵܬܝܵܬܹ̈ܐ ܐܝܼܬ ܠܗ̄ܘܿܢ: ܘܠܹܐ ܝܵܗܒ̣ܝܼ ܢܵܬܵܐ. ܐܘܼܦ ܠܲܝܬ ܪܘܼܚܵܐ ܒܦܘܼܡܵܝ. 18 ܐܲܝܟ ܕܝܼܵܝ[97] ܗܵܘܝܼ ܬܵܪ̈ܨܵܢܵܝ: ܟܠ ܕܦܵܝܸܫ ܒܗܹܒ̣ܝܼ ܒܝܼܵܝ. 19 ܒܹܝܬ ܝܼܣܪܵܝܹܠ: ܒܵܪܟ̣ܘܿܢ ܠܡܵܪܝܵܐ: ܒܹܝܬ ܐܲܗܪܘܿܢ: ܒܵܪܟ̣ܘܿܢ ܠܡܵܪܝܵܐ. 20 ܒܹܝܬ ܠܹܘܝܼ: ܒܵܪܟ̣ܘܿܢ ܠܡܵܪܝܵܐ: ܙܸܕܥܝܹ̈ܐ ܕܡܵܪܝܵܐ: ܒܵܪܟ̣ܘܿܢ ܠܡܵܪܝܵܐ. 21 ܒܘܼܪܟ̣ܵܐ ܗܵܘܹܐ ܡܵܪܝܵܐ ܡ̣ܢ ܨܸܗܝܘܿܢ: ܥܵܡܪܵܢܵܐ ܕܐܘܿܪܸܫܠܸܡ. ܗܲܠܸܠܘܼܝܵܐ.

 

ܡܙܡܘܪܐ: ܩܠܘ.

1. ܫܵܟܪܘܿܢ ܠܡܵܪܝܵܐ: ܣܲܒܲܒ ܕܛܵܒ̣ܵܐ ܝܠܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 2 ܫܵܟܪܘܿܢ ܠܐܲܠܵܗܵܐ ܕܐܲܠܵܗܹ̈ܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 3 ܫܵܟܪܘܿܢ ܠܡܵܪܵܐ ܕܡܵܪ̈ܵܘܵܬܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 4 ܠܥܵܒ̣ܕܵܢܵܐ ܕܥܵܓܸܒܘܼܝܵܬܹ̈ܐ ܓܘܼܪܹ̈ܐ ܒܢܲܦ̮ܫܹܗ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 5 ܠܗ̇ܘ ܕܥܒܸܕܠܹܐ ܫܡܲܝܵܐ ܒܦܲܪܡܵܝܬܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 6 ܠܗ̇ܘ ܕܪܸܩܥܠܹܐ ܐܲܪܥܵܐ ܥܲܠ ܡ̈ܝܼܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 7 ܠܗ̇ܘ ܕܥܒܸܕܠܹܐ ܢܲܗܝܼܪܹ̈ܐ ܓܘܼܪܹ̈ܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 8 ܫܸܡܫܵܐ ܠܗܵܟܲܡܬܵܐ ܒܐܝܼܡܵܡܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 9 ܣܲܗܪܵܐ ܘܟܵܘܟܒܹ̈ܐ: ܠܗܲܟܲܡܬܵܐ ܒܠܲܝܠܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 10 ܠܗ̇ܘ ܕܡܚܹܠܹܐ ܡܸܨܪܹܝܢ ܒܒܘܼܟ̣ܪ̈ܵܝ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 11 ܘܦܘܼܠܸܛܠܹܐ ܝܼܣܪܵܝܹܠ ܡ̣ܢ ܓܵܘܵܝ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 12 ܒܐܝܼܕܵܐ ܙܲܪܒܵܢܬܵܐ: ܘܒܕܪܲܥܢܵܐ ܦܘܼܫܛܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 13 ܠܗ̇ܘ ܕܦܘܼܠܹܠܹܐ ܝܵܡܵܐ ܕܣܘܿܦ ܠܦܲܠܝܵܬܹ̈ܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 14 ܘܡܘܼܥܒܸܪܹܐ ܝܼܣܪܵܝܹܠ ܒܓܵܘܘܼܗ̇: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 15 ܘܛܪܸܦܠܹܐ ܦܸܪܥܘܿܢ ܘܥܲܣܟܵܪܘܼܗܝ ܒܝܵܡܵܐ ܕܣܘܿܦ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 16 ܠܗ̇ܘ ܕܠܘܼܒܸܠܹܐ ܛܵܝܸܦܹܗ ܓܵܘ ܒܲܪܝܼܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 17 ܠܗ̇ܘ ܕܡܚܹܠܹܐ ܡܲܠܟܹ̈ܐ ܓܘܼܪܹ̈ܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 18 ܘܩܛܹܠܹܐ ܡܲܠܟܹ̈ܐ ܙܲܪ̈ܒܵܢܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 19 ܠܣܝܼܚܘܿܢ: ܡܲܠܟܵܐ ܕܐܵܡܘܿܪ̈ܵܝܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 20 ܘܠܥܘܿܓ̣: ܡܲܠܟܵܐ ܕܒܲܝܫܵܢ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 21 ܘܝܸܗܒ̣ܵܠܹܐ ܐܲܪܥܵܝ ܠܝܵܪܬܘܼܬܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ: 22 ܝܵܪܬܘܼܬܵܐ ܠܝܼܣܪܵܝܹܠ ܪܹܓܹܗ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 23 ܕܒܟܘܼܦܘܼܬܲܢ ܕܟ̣ܝܼܪܵܚܠܹܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 24 ܘܦܘܼܪܩܵܚܠܹܐ ܡ̣ܢ ܕܸܫ̈ܡܸܢܲܢ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 25 ܟܹܐ ܝܵܗ̄ܒܸܠ ܠܲܚܡܵܐ ܠܟܠ ܒܸܣܪܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ. 26 ܫܵܟܪܘܿܢ ܠܐܲܠܵܗܵܐ ܕܫܡܲܝܵܐ: ܣܲܒܲܒ ܕܠܥܵܠܲܡ ܝܼܠܵܐ ܫܵܦܵܩܲܬܘܼܗܝ.

 

ܡܙܡܘܪܐ: ܩܠܙ.

1. ܥܲܠ ܢܲܗܪ̈ܵܘܵܬܹܐ ܕܒܵܒܹܠ: ܬܵܡܵܐ ܝܬܸܒ̣ܠܲܢ: ܐܘܼܦ ܒܟܹܠܲܢ: ܟܲܕ ܕܟ̣ܝܼܪܵܠܲܢ ܨܸܗܝܘܿܢ. 2 ܥܲܠ ܚܵܝܠܵܦܹ̈ܐ ܓܵܘܘܼܗ̇ ܬܠܹܠܲܢ ܟܸܢܵܪ̈ܲܢ. 3 ܣܲܒܲܒ ܕܬܵܡܵܐ ܛܠܸܒܠܘܿܢ ܡܸܢܲܢ ܠܵܒ̈ܠܵܢܲܢ ܒܚܲܣܝܼܪ ܗܹܡܸܙܡܵܢܹ̈ܐ ܕܙܡܵܪܬܵܐ: ܘܓ̰ܲܢܓ̰ܸܪܵܢܲܢ ܚܲܕܘܼܬܵܐ: (ܒܹܐܡܵܪܵܐ): ܙܡܘܿܪܘܿܢ ܐܸܠܲܢ ܡ̣ܢ ܙܡܵܪܬܵܐ ܕܨܸܗܝܘܿܢ. 4 ܕܵܐܟ̣ܝܼ ܙܵܡܪܵܚ ܠܙܡܵܪܬܵܐ ܕܡܵܪܝܵܐ ܥܲܠ ܐܲܪܥܵܐ ܢܘܼܟ̣ܪܵܝܬܵܐ. 5 ܐܸܢ ܢܵܫܸܢܵܟ̣ܝ: ܐܘܿܪܸܫܠܸܡ: ܢܵܫܝܵܐ ܝܲܡܝܼܢܝܼ ܥܵܘܩܸܒܘܼܗ̇. 6 ܛܵܦܹܐ ܠܸܫܵܢܝܼ ܠܫܵܡܵܟܝܼ: ܐܸܢ ܠܵܐ ܕܵܟ̣ܪܸܢܵܟ̣ܝ: ܐܸܢ ܠܵܐ ܡܵܐܣܩܸܢ ܐܘܿܪܸܫܠܸܡ ܥܲܠ ܪܹܫܵܐ ܕܚܲܕܘܼܬܝܼ. 7 ܕܟ̣ܘܿܪ: ܝܵܐ ܡܵܪܝܵܐ: ܠܒܢܲܝ̈ ܐܲܕܘܿܡ ܒܝܘܿܡܵܐ ܕܐܘܿܪܸܫܠܸܡ: ܕܐܵܡܪܝܼ: ܓܵܠܹܡܘܿܢ: ܓܵܠܹܡܘܿܢ: ܗܲܠ ܒܸܢܝܲܬ ܕܓܵܘܘܼܗ̇. 8 ܝܵܐ ܒܪܵܬܵܐ ܕܒܵܒܹܠ: ܡܘܼܚܪܸܒ̣ܬܵܐ: ܛܘܼܒ̣ܵܐ ܠܗ̇ܘ ܕܦܲܪܸܥ ܠܵܟ̣ܝ ܥܵܡܵܠܵܟ̣ܝ ܕܦܠܸܚܠܵܟ̣ܝ ܐܸܠܲܢ. 9 ܛܘܼܒ̣ܵܐ ܠܗ̇ܘ ܕܕܵܒܸܩ ܘܢܵܦܸܨ ܝܵܠܵܟ̣ܝ̈ ܥܲܠ ܩܵܝܵܐ.

 

ܡܙܡܘܪܐ: ܩܠܚ.

ܕܕܵܘܝܼܕ.

1. ܒܸܕ ܫܵܟܪܸܢܘܼܟ ܒܟܠܹܗ ܠܸܒܝܼ: ܩܵܕ̄ܡ ܐܲܠܵܗܹ̈ܐ ܒܸܕ ܙܵܡܪܸܢ ܐܸܠܘܼܟ. 2 ܒܸܕ ܣܵܓ̣ܕܸܢ ܠܵܗܲܝܟܠܵܐ ܕܩܘܼܕܫܘܼܟ: ܘܒܸܕ ܫܵܟܪܸܢ ܠܫܸܡܘܼܟ: ܒܘܼܬ ܫܵܦܵܩܲܬܘܼܟ ܘܒܘܼܬ ܣܲܪܲܣܬܘܼܬܘܼܟ: ܣܲܒܲܒ ܕܡܘܼܓܘܸܪܘܼܟ ܗܹܡܸܙܡܵܢܘܼܟ ܥܲܠ ܟܠܹܗ ܫܸܡܘܼܟ. 3 ܒܝܘܿܡܵܐ ܕܩܪܹܠܝܼ ܓ̰ܘܼܘܸܒܸܢܘܼܟ: ܡܘܼܪܕܸܢܢܘܼܟ ܒܚܲܝܠܵܐ ܓܵܘ ܢܲܦ̮ܫܝܼ. 4 ܒܸܕ ܫܵܟܪܝܼ ܠܘܼܟ: ܡܵܪܝܵܐ: ܟܠܵܝ ܡܲܠܟܹ̈ܐ ܕܐܲܪܥܵܐ: ܣܲܒܲܒ ܕܫܡܸܥܠܘܿܢ ܗܹܡܸܙܡܵܢܹ̈ܐ ܕܦܘܼܡܘܼܟ. 5 ܘܒܸܕ ܙܵܡܪܝܼ ܒܐܘܼܪ̈ܚܵܬܹܐ ܕܡܵܪܝܵܐ: ܣܲܒܲܒ ܕܓܘܼܪܵܐ ܝܠܹܐ ܐܝܼܩܵܪܵܐ ܕܡܵܪܝܵܐ. 6 ܣܲܒܲܒ ܕܪܵܡܵܐ ܝܠܹܐ ܡܵܪܝܵܐ: ܘܠܟܘܼܦܵܐ ܟܹܐ ܚܵܙܹܐ: ܘܠܪܵܡܵܢܵܐ ܡ̣ܢ ܪܸܚܩܵܐ ܟܹܐ ܝܲܕܸܥ. 7 ܐܸܢ ܚܵܕܪܸܢ ܒܓܵܘܵܐ ܕܥܹܩܘܼܝ: ܒܸܕ ܡܲܚܸܬ ܠܝܼ: ܥܲܠ ܟܲܪܒܵܐ ܕܕܸܫܡܸܢܝܼ̈ ܒܸܕ ܦܵܫܛܸܬ ܐܝܼܕܘܼܟ: ܘܒܸܕ ܦܵܪܩܵܐ ܠܝܼ ܝܲܡܝܼܢܘܼܟ. 8 ܡܵܪܝܵܐ ܒܸܕ ܬܲܡܸܡ ܒܘܼܬ ܕܝܼܝܼ: ܡܵܪܝܵܐ: ܫܵܦܵܩܲܬܘܼܟ ܠܥܵܠܲܡ ܝܼܠܵܐ: ܦܘܠܚܵܢܹ̈ܐ ܕܐܝܼܕܵܬܘܼ̈ܟ ܠܵܐ ܪܲܦܸܬ.

 

ܡܙܡܘܪܐ: ܩܠܛ.

ܠܪܹܫܵܐ ܕܙܵܡܵܪܹ̈ܐ: ܡܲܙܡܘܿܪܵܐ ܕܕܵܘܝܼܕ.

1. ܝܵܐ ܡܵܪܝܵܐ: ܨܘܼܚܨܝܸܢܘܼܟ ܘܝܕܸܥܠܘܼܟ. 2 ܐܲܢܬ ܟܹܐ ܝܲܕܥܸܬ ܝܬܝܵܒ̣ܝܼ ܘܩܝܵܡܝܼ: ܦܘܼܪܡܹܠܘܼܟ ܚܘܼܫܵܒ̣ܝܼ ܡ̣ܢ ܪܹܚܩܵܐ. 3 ܐܘܼܪܚܝܼ ܘܕܡܵܟ̣ܝܼ ܬܘܼܦ̮ܬܸܫܠܘܼܟ: ܘܒܟܠܵܝ ܐܘܼܪ̈ܚܵܬܝܼ ܫܘܼܪܸܙܠܘܼܟ. 4 ܣܲܒܲܒ ܕܠܲܝܬ ܗܹܡܸܙܡܵܢ ܒܠܸܫܵܢܝܼ: ܗܵܐ: ܝܵܐ ܡܵܪܝܵܐ: ܟܹܐ ܝܲܕܥܸܬ ܟܠܵܗ̇. 5 ܒܵܬ̄ܪܵܐ ܘܩܵܕ̄ܡܵܐ ܚܘܪܕܝܼܢܘܼܟ: ܘܡܘܼܬܸܒ̣ܠܘܼܟ ܥܲܠܝܼ ܐܝܼܕܘܼܟ. 6 ܥܓ̰ܝܼܒܬܵܐ ܝܠܵܐ ܝܕܸܥܬܵܐ ܡܸܢܝܼ: ܪܵܡܬܵܐ ܝܠܵܐ: ܠܹܐ ܡܵܨܸܢ ܐܸܠܵܗ̇. 7 ܠܐܲܝܟܵܐ ܐܵܙܸܠ̄ܢ ܡ̣ܢ ܪܘܼܚܘܼܟ: ܘܠܲܐܝܟܵܐ ܡ̣ܢ ܩܵܕ̄ܡܘܼܟ ܥܵܪܩܸܢ: 8 ܐܸܢ ܐܵܣܩܸܢ ܠܫܡܲܝܵܐ: ܬܵܡܵܐ ܝܘܸܬ ܐܲܢ̄ܬ: ܘܫܵܘܸܢ ܫܘܝܼܬܝܼ ܓܵܘ ܫܝܘܿܠ: ܗܵܐ: ܐܲܢ̄ܬ. ܫܵܩܠܸܢ ܓܘܼܠܦܵܢܹ̈ܐ ܕܡܵܘܪܹܫܵܐ: ܫܵܪܸܢ ܒܚܲܪܬܵܐ ܕܝܵܡܵܐ: 10 ܐܘܼܦ ܬܵܡܵܐ ܐܝܼܕܘܼܟ ܒܸܕ ܬܲܓܒܸܪܵܐ ܠܝܼ: ܘܕܵܒ̣ܩܵܐ ܠܝܼ ܝܲܡܝܼܢܘܼܟ. 11 ܘܐܵܡܪܸܢ: ܐܲܚܟ̰ܝܼ ܚܘܼܒ̣ܝܵܐ ܒܸܕ ܫܵܦܸܟ ܥܲܠܝܼ: ܘܠܲܝܠܹܐ ܒܲܗܪܵܐ ܝܠܹܐ ܥܲܠܝܼ: 12 ܐܘܼܦ ܚܘܼܒ̣ܝܵܐ ܠܹܐ ܥܵܒܸܕ ܚܘܼܒ̣ܝܵܐ ܡܸܢܘܼܟ: ܘܠܲܝܠܹܐ ܐܲܝܟ ܐܝܼܡܵܡܵܐ ܟܹܐ ܒܲܗ̄ܪܸܢ: ܐܲܝܟ ܚܘܼܒ̣ܝܵܐ ܗܲܕܟ̣ܵܐ ܒܲܗܪܵܐ. 13 ܣܲܒܲܒ ܕܐܲܢ̄ܬ ܬܘܼܪܸܨܠܘܼܟ ܟܘܼܠܝܵܬܝܼ̈: ܩܲܡ ܙܵܩܪܸܬ ܠܝܼ ܒܒܲܛܢܵܐ ܕܝܸܡܝܼ. 14 ܒܸܕ ܫܵܟܪܸܢܘܼܟ: ܣܲܒܲܒ ܕܣܲܗܡܵܢܵܐ ܘܥܓ̰ܝܼܒܵܐ ܦܸܫܠܝܼ ܥܒ̣ܝܼܕܵܐ: ܥܓ̰ܝܼܒܹ̈ܐ ܝܢܵܐ ܦܘܼܠܚܵܢܘܼ̈ܟ: ܘܢܲܦ̮ܫܝܼ ܟܹܐ ܝܲܕܥܵܐ ܪܵܒܵܐ. 15 ܠܵܐ ܦܸܫܠܹܐ ܛܸܫܝܵܐ ܓܘܼܫܡܝܼ ܡܸܢܘܼܟ: ܕܦܸܫܠܝܼ ܥܒ̣ܝܼܕܵܐ ܒܣܸܬܵܪܵܐ: ܦܸܫܠܝܼ ܡܢܘܼܩܫܵܐ ܓܵܘ ܬܲܚܬܵܝܵܬܹ̈ܐ ܕܐܲܪܥܵܐ. 16 ܓܒ̣ܝܼܠܬܝܼ ܚܙܹܠܘܿܢ ܥܲܝܢܘܼ̈ܟ: ܘܥܲܠ ܟܬܵܒ̣ܘܼܟ ܟܠܵܝ ܦܸܫܠܘܿܢ ܟܬܝܼܒܹܐ: ܝܘܿܡܵܢܹ̈ܐ ܦܸܫܠܘܿܢ ܥܒ̣ܝܼܕܹܐ ܨܘܼܪܬܵܐ. ܘܗܹܫ ܠܲܝܬ ܗ̄ܘ̣ܵܐ ܚܵܕ̄ ܡܸܢܵܝ. 17 ܘܐܸܠܝܼ ܟܡܵܐ ܡܝܘܼܩܪܹ̈ܐ ܝܢܵܐ ܚܘܼܫܵܒ̣ܘܼ̈ܟ: ܝܵܐ ܐܲܠܵܗܵܐ: ܟܡܵܐ ܙܘܼܪܒܸܢܘܿܢ ܡܸܢܝܵܢܵܝ̈! 18 ܡܵܢܸܢܘܿܢ: ܡ̣ܢ ܣܹܠܵܐ ܒܸܕ ܙܵܝܟ̣ܝܼ: ܪܵܥܫܸܢ: ܘܗܹܫ ܐܵܢܵܐ ܥܲܡܘܼܟ ܝܼܘܸܢ. 19 [98] ܐܸܢ ܒܸܕ ܩܵܛܠܸܬ: ܝܵܐ ܐܲܠܵܗܵܐ: ܠܒ̇ܝܼܫܵܐ: ܐܢܵܫܹ̈ܐ ܕܕܸܡܹ̈ܐ: ܩܠܘܿܒ̇ܘܿܢ ܡܸܢܝܼ. 20 ܣܲܒܲܒ[99] ܕܟܹܐ ܗܲܡܙܸܡܝܼ ܒܵܗܣܘܼܟ ܒܥܵܘܠܵܐ: ܠܸܫܩܵܠܵܐ ܠܗܵܒܵܣܘܼܬܵܐ: ܕܸܫܡܸܢܘܼ̈ܟ. 21 ܗܵܐ: ܠܣܵܢܝܵܢܘܼ̈ܟ: ܝܵܐ ܡܵܪܝܵܐ: ܠܹܐ ܣܵܢܹܢ: ܘܡ̣ܢ ܩܵܝܡܵܢܹ̈ܐ ܠܕܲܪܩܘܼܒ̣ܠܘܼܟ ܓܲܢܓܸܨܸܢ: 22 ܣܢܵܝܬܵܐ ܬܲܡܵܡ ܣܸܢܝܵܝܠܝܼ: ܠܕܸܫܡܸܢܹ̈ܐ ܗ̄ܘܹܠܘܿܢ ܐܸܠܝܼ: 23 ܨܲܚܨܝܼ ܠܝܼ: ܝܵܐ ܐܲܠܵܗܵܐ: ܘܝܕ̄ܥܝܼ ܠܸܒܝܼ: ܬܲܦ̮ܬܸܫ ܠܝܼ: ܘܝ̄ܕܥܝܼ ܦܸܟܝܼܪ̈ܝܼ: 24 ܘܚܙܝܼ ܐܘܼܪܚܵܐ ܕܥܲܙܵܒ ܐܝܼܬ ܒܝܼܝܼ: ܘܬܲܓܒܸܪܝܼ ܒܐܘܼܪܚܵܐ ܕܥܵܠܲܡ.

 

ܡܙܡܘܪܐ: ܩܡ.

ܠܪܹܫܵܐ ܕܙܵܡܵܪܹ̈ܐ: ܡܲܙܡܘܿܪܵܐ ܕܕܵܘܝܼܕ.

1. ܚܵܠܸܨ ܠܝܼ: ܝܵܐ ܡܵܪܝܵܐ: ܡ̣ܢ ܐܢܵܫܵܐ ܒܝܼܫܵܐ: ܡ̣ܢ ܐܢܵܫܵܐ ܙܵܠܝܼܡ ܢܵܛܪܸܬ ܠܝܼ: 2 ܕܚܫܸܒ̣ܠܘܿܢ ܒܝܼܫܵܬܹ̈ܐ ܒܠܸܒܵܐ: ܟܠ ܝܘܿܡܵܐ ܟܹܐ ܚܵܒ̇ܛܝܼ ܦܠܵܫܹ̈ܐ. 3 ܡܘܼܚܪܸܦܠܘܿܢ ܠܸܫܵܢܵܝ ܐܲܝܟ ܚܘܼܘܹܐ: ܚܸܡܬܵܐ ܕܐܸܣܦܸܣ ܬܚܘܿܬ ܣܸܦܘܵܬܵܝ̈. 4 ܢܛܘܿܪܝܼ: ܝܵܐ ܡܵܪܝܵܐ: ܡ̣ܢ ܐܝܼܕܵܬܹ̈ܐ ܕܒܝܼܫܵܐ: ܡ̣ܢ ܐܢܵܫܵܐ ܙܵܠܝܼܡ ܚܵܡܸܬ ܠܝܼ: ܕܚܫܸܒ̣ܠܘܿܢ ܠܚܲܪܙܘܼܦܹܐ ܦܵܣܘܿܥܝܵܬܝܼ̈. 5 ܛܘܼܡܸܪܘܿܢ ܫܲܒ̣ܗܪ̈ܵܢܹܐ ܢܸܫܒ̣ܵܐ ܐܸܠܝܼ: ܘܚܲܒ̣ܠܹ̈ܐ: ܦܪܸܣܠܘܿܢ ܓܲܪܕܵܐ ܠܟܸܣ ܓ̰ܵܕܵܐ: ܟ̰ܘܼܪܸ̈ܬܡܹܐ ܡܘܼܬܸܒ̣ܠܘܿܢ ܐܸܠܝܼ. 6 ܐܡܸܪܝܼ ܠܡܵܪܝܵܐ: ܐܲܠܵܗܝܼ ܝܘܸܬ ܐܲܢ̄ܬ: ܗܲܒ̄ܠ ܢܵܬܵܐ: ܝܵܐ ܡܵܪܝܵܐ: ܠܩܵܠܵܐ ܕܢܵܘܢܵܬܝܼ. 7 ܡܵܪܝܵܐ ܐܲܠܵܗܵܐ: ܙܲܪܒ ܕܦܘܼܪܩܵܢܝܼ: ܟܘܼܣܹܠܘܼܟ ܪܹܫܝܼ ܒܝܘܿܡܵܐ[100] ܕܟ̰ܲܟܵܐ. 8 ܠܵܐ ܝܵܗ̄ܒܸܕ: ܡܵܪܝܵܐ: ܫܲܗ̄ܘܲܬܝܵܬܹ̈ܐ ܕܒܝܼܫܵܐ: ܦܲܢܕܘܼܗܝ ܠܵܐ ܦܵܠܛܸܬ (ܒܪܹܫܵܐ): ܕܪܵܝܡܝܼ. 9 ܪܹܫܵܐ ܕܚܲܪ̈ܕܝܼܵܢܝܼ: ܦܸܠܡܵܐ ܕܣܸܦܘܵܬܵܝ̈ ܟܵܣܹܐ ܠܗ̄ܘܿܢ. 10 ܨܵܠܝܼ ܥܲܠܵܝ ܓܘܼܡܪܹ̈ܐ: ܓܵܘ ܢܘܼܪܵܐ ܦܵܝܫܝܼ ܡܘܼܢܦܸܠܹܐ: ܓܵܘ ܥܘܼܡܩܹ̈ܐ: ܕܠܵܐ ܩܵܝܡܝܼ. 11 ܐܢܵܫܵܐ ܠܸܫܵܢܵܢܵܐ ܠܹܐ ܩܵܘܹܐ ܒܐܲܪܥܵܐ: ܐܢܵܫܵܐ ܙܵܠܝܼܡ ܒܝܼܫܬܵܐ ܒܸܕ ܨܵܝܕܵܐ ܠܹܗ ܒܝܠܝܵܙܬܵܐ. 12 ܟܹܐ ܝܲܕܥܸܢ ܕܒܸܕ ܥܵܒܸܕ ܡܵܪܝܵܐ ܕܝܼܢܵܐ ܕܡܘܼܠܝܸܨܵܐ: ܕܝܼܘܵܢ ܕܡܸܣܟܹܢܹ̈ܐ. 13 ܡܸܓ̰ܸܕ ܙܲܕܝܼܩܹ̈ܐ ܒܸܕ ܫܵܟܪܝܼ ܠܫܸܡܘܼܟ: ܒܸܕ ܝܵܬܒ̣ܝܼ ܬܪ̈ܘܼܨܹܐ ܩܵܕ̄ܡܘܼܟ.

ܡܙܡܘܪܐ: ܩܡܐ.

ܡܲܙܡܘܿܪܐ ܕܕܵܘܝܼܕ.

1. ܝܵܐ ܡܵܪܝܵܐ: ܩܪܹܠܝܼ ܐܸܠܘܼܟ: ܡܲܠܝܸܙ ܠܟܸܣܠܝܼ: ܗܲܒ̄ܠ ܢܵܬܵܐ ܠܩܵܠܝܼ ܟܲܕ ܩܵܪܸܢ ܐܸܠܘܼܟ. 2 ܗܵܘܝܵܐ ܡܘܼܪܝܸܙܬܵܐ ܨܠܘܿܬܝ (ܐܲܝܟ) ܒܸܣܡܵܐ ܩܵܕ̄ܡܘܼܟ: ܡܵܪܲܡܬܵܐ ܕܐܝܼܕܵܬܝܼ̈ ܩܘܼܪܒܵܢܵܐ ܕܪܲܡܫܵܐ. 3 ܡܲܬܸܒ̣: ܝܵܐ ܡܵܪܝܵܐ: ܢܛܵܪܬܵܐ ܠܦܘܼܡܝܼ: ܢܛܘܿܪ ܠܬܲܪܥܵܐ ܕܣܸܦܘܵܬܝܼ̈. 4 ܠܵܐ ܡܲܩܠܒܸ̇ܬ ܠܸܒܝܼ ܠܫܘܼܠܵܐ ܒܝܼܫܵܐ: ܠܸܦܠܵܚܵܐ ܦܘܼܠܚܵܢܹ̈ܐ ܒܒܝܼܫܘܼܬܵܐ ܥܲܡ ܐܢܵܫܹ̈ܐ ܦܵܠܚܵܢܹ̈ܐ ܕܥܵܘܠܵܐ: ܘܠܵܐ ܐܵܟ̣ܠܸܢ ܒܠܲܙܬܵܝ̈. 5 ܡܵܚܹܐ ܠܝܼ ܙܲܕܝܼܩܵܐ: ܫܵܦܵܩܲܬ ܝܼܠܵܐ: ܘܡܲܢܟܸܣ ܠܝܼ: ܡܸܫܚܵܐ ܕܪܹܫܵܐ ܝܠܹܐ: ܠܵܐ ܡܲܚܦܸܠ ܪܹܫܝܼ: ܣܲܒܲܒ ܕܡܸܕܪܹܐ ܘܨܠܘܿܬܝܼ ܒܒܝܼܫܵܬܵܝ̈ 6 ܦܸܫܠܘܿܢ ܪܘܼܦܝܹܐ ܒܡܲܪ̈ܙܵܢܹܐ ܕܩܵܝܵܐ ܕܲܝܵܢܵܝ̈: ܘܒܸܕ ܫܲܡܥܝܼ ܗܹܡܸܙܡܲܢܝܼ̈: ܣܲܒܲܒ ܕܒܵܣܝܼܡܹ̈ܐ ܝܢܵܐ. 7 ܐܲܝܟ ܛܵܪܝܵܢܵܐ ܕܦܕܵܢܵܐ[101] ܘܨܵܪܝܵܢܵܐ ܒܐܲܪܥܵܐ: ܦܸܫܠܘܿܢ ܒܘܼܪܒܸܙܹܐ ܓܲܪ̈ܡܲܢ ܒܦܘܼܡܵܐ ܕܩܲܒ̣ܪܵܐ. 8 ܣܲܒܲܒ ܕܐܸܠܘܼܟ ܝܼܢܵܐ: ܡܵܪܝܵܐ ܐܲܠܵܗܵܐ: ܥܲܝܢܝܼ̈: ܒܝܼܘܼܟ ܦܸܫܠܝܼ ܒܗܹܒ̣ܝܼ: ܠܵܐ ܪܲܦܸܬ ܢܲܦ̮ܫܝܼ. 9 ܢܛܘܿܪܝܼ ܡ̣ܢ ܐܝܼܕܵܬܹ̈ܐ ܕܢܸܫܒ̣ܵܐ ܕܨܘܼܠܹܠܘܿܢ ܐܸܠܝܼ: ܘܟ̰ܘܼܪܸ̈ܬܡܹܐ ܕܦܵܠܚܵܢܹ̈ܐ ܕܥܵܘܠܵܐ. 10 ܢܵܦܠܝܼ ܒܓܲܪܕܵܝ ܒܝܼܫܹ̈ܐ[102] ܡܸܚܕܵܕܹ̈ܐ: ܗܲܠ ܕܐܵܢܵܐ ܥܵܒ̣ܪܸܢ.

 

ܡܙܡܘܪܐ: ܩܡܒ.

ܡܲܣܟ̇ܝܼܠ ܕܕܵܘܝܼܕ: ܐܝܼܡܲܢ ܕܝܼܗ̄ܘܵܐ ܓܵܘ ܓܸܦܝܼܬܵܐ: ܨܠܘܿܬܵܐ.

1. ܒܩܵܠܝܼ ܠܡܵܪܝܵܐ ܡܲܩܘܸܚܸܢ: ܒܩܵܠܝܼ ܒܡܵܪܝܵܐ ܢܵܘܢܸܢ. 2 ܕܵܪܸܢ ܩܵܕ̄ܡܘܼܗܝ ܩܒ̣ܵܠܬܝܼ: ܥܹܩܘܼܘܝܼ ܩܵܕ̄ܡܘܼܗܝ ܡܲܕܥܸܢ. 3 ܟܲܕ ܕܘܼܪܕܸܫܠܵܐ ܒܓܵܘܝܼ ܪܘܼܚܝܼ: ܘܐܲܢ̄ܬ ܝܕܸܥܠܘܼܟ ܓ̰ܵܟ̣ܝܼ: ܒܗ̇ܝ ܐܘܼܪܚܵܐ ܕܚܵܕܪܸܢ: ܛܘܼܡܸܪܘܿܢ ܢܸܫܒ̣ܵܐ ܩܵܬܝܼ. 4 ܚܘܼܪ ܠܝܲܡܝܼܢܵܐ: ܘܚܙܝܼ: ܘܠܲܝܬ ܠܝܼ ܝܲܕܥܵܢܵܐ: ܬܠܸܩܠܵܐ ܕܘܼܟܬܵܐ ܕܥܪܵܩܬܵܐ ܡܸܢܝܼ: ܠܲܝܬ ܒܵܩܪܵܢܵܐ ܠܢܲܦ̮ܫܝܼ. 5 ܡܘܼܩܘܸܚܠܝܼ ܠܟܸܣܠܘܼܟ: ܡܵܪܝܵܐ: ܐܡܸܪܝ: ܐܲܢ̄ܬ ܝܼܘܸܬ ܒܹܝܬ ܓܵܘܣܝܼ: ܣܵܡܝܼ ܒܐܲܪܥܵܐ ܕܚܲܝܹ̈ܐ. 6 ܡܲܨܝܸܬ ܠܡܲܩܘܲܚܬܝܼ: ܣܲܒܲܒ ܕܦܸܫܠܝܼ ܡܘܼܟܸܦܵܐ ܪܵܒܵܐ: ܦܵܨܝܼ ܠܝܼ ܡ̣ܢ ܢܵܦܠܵܢܹ̈ܐ ܒܵܬ̄ܪܝܼ: ܣܲܒܲܒ ܕܙܘܼܪܒܸܢܘܿܢ ܡܸܢܝܼ. 7 ܦܵܠܸܛ ܡ̣ܢ ܒܹܝܬ ܚܒ̣ܘܼܫܝܵܐ ܢܲܦ̮ܫܝܼ ܠܫܵܟܘܿܪܹܐ ܠܫܸܡܘܼܟ. ܒܝܼܝܼ ܒܸܕ ܒܲܢܦܪܝܼ ܓܵܢܵܝ ܙܲܕܝܼܩܹ̈ܐ: ܣܲܒܲܒ ܕܒܸܕ ܥܵܒ̣ܕܸܬ ܟܫܝܼܛܘܼܬܵܐ ܥܲܠܝܼ.

 

ܡܙܡܘܪܐ: ܩܡܓ.

ܡܲܙܡܘܿܪܵܐ ܕܕܵܘܝܼܕ.

1. ܝܵܐ ܡܵܪܝܵܐ: ܫܡܥܝܼ ܨܠܘܿܬܝܼ: ܗܲܒ̄ܠ ܢܵܬܵܐ ܠܢܵܘܢܵܝܬܝܼ: ܒܡܗܘܼܡܢܘܼܬܵܟ ܓ̰ܲܘܸܒ ܠܝܼ: ܒܙܲܕܝܼܩܘܼܬܘܼܟ. 2 ܘܠܵܐ ܐܵܘܪܸܬ ܒܕܝܼܘܵܢ ܥܲܡ ܪܹܓܘܼܟ: ܣܲܒܲܒ ܕܠܹܐ ܗܵܘܹܐ ܙܲܕܝܼܩܵܐ ܩܵܕ̄ܡܘܼܟ ܟܠ ܚܵܝܵܐ. ܣܲܒܲܒ ܕܢܦܸܠܹܐ ܕܸܫܡܸܢ ܒܵܬ̄ܪ ܢܲܦ̮ܫܝܼ: ܡܚܹܠܹܐ ܠܐܲܪܥܵܐ ܚܲܝܝܼ̈: ܡܘܼܬܝܸܒܸܢܹܐ ܒܕܘܼܟܵܢܹ̈ܐ ܚܘܼܒ̣ܝܵܢܹ̈ܐ ܐܲܝܟ ܡܝܼܬܹ̈ܐ ܕܥܵܠܲܡ. 4 ܘܕܘܼܪܕܸܫܬܵܐ ܝܠܵܐ ܒܓܵܘܝܼ ܪܘܼܚܝܼ: ܒܓܵܘܝܼ ܢܘܸܠܹܐ ܠܸܒܝܼ. 5 ܕܟܸܪܝܼ ܝܘܿܡܵܢܹ̈ܐ ܕܡ̣ܢ ܩܵܕ̄ܡܵܝܬܵܐ: ܗܘܼܓܹܠܝܼ ܒܟܠܵܝ ܦܘܼܠܚܵܢܘܼ̈ܟ: ܒܦܘܼܠܚܵܢܵܐ ܕܐܝܼܕܵܬܘܼ̈ܟ ܬܘܼܚܡܸܢܝܼ. 6 ܦܪܸܣܠܝܼ ܐܝܼܕܵܬܝܼ̈ ܠܟܸܣܠܘܼܟ: ܢܲܦ̮ܫܝܼ ܐܲܝܟ ܐܲܪܥܵܐ ܟܟ̰ܝܼܚܵܐ (ܨܗ̄ܝܼܬܵܐ) ܝܠܵܐ ܐܸܠܘܼܟ. 7 ܡܲܠܝܸܙ ܓ̰ܲܘܸܒ ܠܝܼ: ܝܵܐ ܡܵܪܝܵܐ: ܬܸܡܠܵܐ ܪܘܼܚܝܼ: ܠܵܐ ܛܵܫܸܬ ܦܵܬܘܼܟ ܡܸܢܝܼ: ܘܦܵܝܫܸܢ ܕܘܼܡܝܵܐ ܥܲܡ ܨܵܠܝܵܢܹ̈ܐ ܕܓܘܼܒܵܐ. ܡܲܫܡܥܝܼ ܠܝܼ ܒܨܲܦܪܵܐ ܫܵܦܵܩܲܬܘܼܟ: ܣܲܒܲܒ ܕܒܝܘܼܟ ܣܒܸܪܝܼ: ܡܲܕܥܝܼ ܠܝܼ ܐܘܼܪܚܵܐ ܕܐܵܙܹܠ̄ܢ: ܣܲܒܲܒ ܕܐܸܠܘܼܟ ܡܘܼܪܸܡܠܝܼ ܢܲܦ̮ܫܝܼ. 9 ܦܵܨܝܼ ܠܝܼ ܡ̣ܢ ܕܸܫܡܸܢܝܼ̈: ܝܵܐ ܡܵܪܝܵܐ: ܠܟܸܣܠܘܼܟ ܛܘܼܫܹܠܝܼ ܢܲܦ̮ܫܝܼ. 10 ܡܲܠܸܦ ܠܝܼ ܠܸܥܒ̣ܵܕܵܐ ܪܹܙܵܝܘܼܟ: ܣܲܒܲܒ ܕܐܲܢ̄ܬ ܝܼܘܸܬ ܐܲܠܵܗܝܼ: ܪܘܼܚܘܼܟ ܛܵܒ̣ܬܵܐ ܬܲܓܒܸܪܵܐ ܠܝܼ ܒܐܲܪܥܵܐ ܕܬܪܘܼܨܘܼܬܵܐ. 11 ܒܚܵܬܸܪ ܕܫܸܡܘܼܟ: ܝܵܐ ܡܵܪܝܵܐ: ܡܲܚܸܬ ܠܝܼ: ܒܙܲܕܝܼܩܘܼܬܘܼܟ ܦܵܠܛܸܬ ܡ̣ܢ ܥܹܩܘܝܼ ܢܲܦ̮ܫܝܼ. 12 ܘܒܫܵܦܵܩܲܬܘܼܟ ܡܲܫܬܸܩܸܬ ܕܸܫܡܸܢܝܼ̈: ܘܬܵܠܩܸܬ ܟܠܵܝ ܡܲܠܝܸܨܵܢܹ̈ܐ ܕܢܲܦ̮ܫܝܼ: ܣܲܒܲܒ ܕܐܵܢܵܐ ܪܸܓܘܼܟ ܝܼܘܸܢ.

 

ܡܙܡܘܪܐ: ܩܡܕ.

ܕܕܵܘܝܼܕ.

1. ܒܪܝܼܟ̣ܵܐ ܝܠܹܐ ܡܵܪܝܵܐ: ܐܝܼܨܵܪܝܼ: ܕܡܘܼܠܸܦܠܹܐ ܐܝܼܕܵܬܝܼ̈ ܠܪܸܥܘܝܼ: ܨܸܒܥܵܬܝܼ̈ ܠܦܠܵܫܵܐ: 2 ܫܵܦܵܩܲܬܝܼ: ܘܗܲܨܵܪܝܼ: ܕܘܼܟܬܝܼ ܪܵܡܬܵܐ ܘܚܵܠܨܵܢܵܐ ܐܸܠܝܼ: ܡܵܛܵܠܝܼ: ܘܒܝܹܗ ܦܸܫܠܝܼ ܒܗܸܒ̣ܝܼ: ܙܲܒܛܸܢܵܢܵܐ ܕܛܵܝܸܦ ܬܚܘܿܬܝܼ. 3 ܡܵܪܝܵܐ: ܡܘܼܕܝܼ ܝܠܹܐ ܐܢܵܫܵܐ: ܘܝܲܕܥܸܬ ܠܹܗ: ܒܲܪܢܵܫܵܐ: ܘܚܵܫܒܸܕ ܠܹܗ: 4 ܐܢܵܫܵܐ ܠܗܵܒܵܣܘܼܬܵܐ ܟܹܐ ܕܵܡܹܐ: ܝܘܿܡܵܢܘܼ̈ܗܝ ܐܲܝܟ ܛܸܠܵܢܝܼܬܵܐ ܥܵܒ̣ܪܵܢܬܵܐ. 5 ܝܵܐ ܡܵܪܝܵܐ: ܡܲܟܸܦ ܫܡܲܝܘܼ̈ܟ ܘܨܵܠܸܬ: ܕܩܘܿܪ ܒܛܘܼܪ̈ܵܢܹܐ ܘܬܲܢܬܸܢܝܼ. 6 ܡܲܒܪܸܩ ܒܸܪܩܵܐ: ܘܒܲܪܒܸܙܬ ܠܗ̄ܘܿܢ: ܫܵܕܸܪ ܓܹܐܪ̈ܘܼܟ: ܘܚܵܒ̣ܛܸܬ ܠܗ̄ܘܿܢ. 7 ܦܵܫܸܛ ܐܝܼܕܘܼ̈ܟ ܡ̣ܢ ܡܪܵܘܡܵܐ: ܦܵܨܝܼ ܠܝܼ ܘܚܵܠܸܨ ܠܝܼ ܡ̣ܢ ܡ̈ܝܼܵܐ ܪܵܒܵܐ: ܡ̣ܢ ܐܝܼܕܵܐ ܕܢܘܼܟ̣ܪ̈ܵܝܹܐ: 8 ܕܦܘܼܡܵܝ ܟܹܐ ܗܲܡܙܸܡ ܒܵܛܝܼܠܘܼܬܵܐ: ܘܝܲܡܝܼܢܵܝ ܝܲܡܝܼܢܵܐ ܕܕܘܼܓܠܵܐ ܝܠܵܐ. 9 ܝܵܐ ܐܲܠܵܗܵܐ: ܙܡܵܪܬܵܐ ܚܲܕܬܵܐ ܒܸܕ ܫܵܒܚܸܢ ܐܸܠܘܼܟ: ܒܩܝܼܬܵܪܵܐ ܕܥܸܣܪܵܐ ܣܹܐܡܹ̈ܐ ܒܸܕ ܙܵܡܪܸܢ ܐܸܠܘܼܟ. 10 ܗ̇ܘ ܕܟܹܐ ܝܵܗ̄ܒܸܠ ܦܘܼܪܩܵܢܵܐ ܠܡܲܠܟܹ̈ܐ: ܕܟܹܐ ܦܵܨܹܐ ܠܕܵܘܝܼܕ ܪܹܓܹܗ ܡ̣ܢ ܣܲܝܦܵܐ ܒܝܼܫܵܐ. 11 ܦܵܨܝܼ ܠܝܼ ܘܚܵܠܸܨ ܠܝܼ ܡ̣ܢ ܐܝܼܕܵܐ ܕܢܘܼܟ̣ܪ̈ܵܝܹܐ: ܕܦܘܼܡܵܝ ܟܹܐ ܗܲܡܙܸܡ ܒܵܛܝܼܠܘܼܬܵܐ: ܘܝܲܡܝܼܢܵܝ ܝܲܡܝܼܢܵܐ ܕܕܘܼܓܠܵܐ. 12 ܟܲܕ ܒܢܘܼ̈ܢܲܢ ܐܲܝܟ ܢܨܵܒ̣ܝܵܬܹ̈ܐ ܓܘܼܪܘܸܣܹܐ ܒܝܵܠܘܼܬܵܝ: ܒܢܵـ̈ـܬܲܢ ܐܲܝܟ ܩܸܪ̈ܢܝܵܬܹܐ ܦܪ̈ܝܼܡܹܐ: ܒܕܘܼܡܝܵܐ ܕܗܲܝܟܠܵܐ: 13 ܐܲܢܒܵܪ̈ܲܢ ܡܸܠܝܹ̈ܐ: ܦܵܠܘܿܛܹܐ ܡ̣ܢ ܬܵܗܵܪ ܠܬܵܗܵܪ: ܥܸܪ̈ܒܲܢ ܝܕܝܼܠܹܐ ܐܲܠܦܹ̈ܐ: ܙܝܼܕܹܐ ܒܪܸ̈ܒܘܵܬܹܐ ܒܥܵܠܘܿܠܵܢܲܢ: 14 ܬܵܘܪܲܢ ܡܘܼܛܥܸܢܹܐ: ܠܲܝܬ ܬܪܵܥܝܬܵܐ: ܘܠܲܝܬ ܦܠܵܛܬܵܐ: ܘܠܲܝܬ ܡܲܩܘܲܚܬܵܐ ܒܟܘܼ̈ܟ̰ܵܢܲܢ: 15 ܛܘܼܒ̣ܵܐ ܠܛܵܝܸܦܵܐ ܕܐܲܝܟ ܕܐܵܗܵܐ ܝܠܵܐ ܐܸܠܹܗ: ܛܘܼܒ̣ܵܐ ܠܛܵܝܸܦܵܐ ܕܡܵܪܝܵܐ ܝܠܹܐ ܐܵܠܵܗܹܗ.

 

ܡܙܡܘܪܐ: ܩܡܗ.

ܫܵܒܲܚܬܵܐ ܕܕܵܘܝܼܕ.

1. ܒܸܕ ܡܵܪܡܸܢܘܼܟ: ܐܲܠܵܗܝܼ: ܡܲܠܟܵܐ: ܘܒܸܕ ܒܵܪܟܸܢ ܫܸܡܘܼܟ ܠܥܵܠܲܡ ܥܵܠܡܝܼܢ: 2 ܒܟܠ ܝܘܿܡܵܐ ܒܸܕ ܒܵܪܟܸܢܘܼܟ: ܘܒܸܕ ܫܵܒܚܸܢ ܠܫܸܡܘܼܟ ܠܥܵܠܲܡ ܥܵܠܡܝܼܢ. 3 ܓܘܼܪܵܐ ܝܠܹܐ ܡܵܪܝܵܐ: ܘܡܫܘܼܒܚܵܐ ܪܵܒܵܐ: ܘܠܓܘܼܪܘܼܬܹܗ ܠܲܝܬ ܨܲܚܨܵܝܬܵܐ. 4 ܕܵܘܪܵܐ ܠܕܵܘܪܵܐ ܒܸܕ ܫܵܒܸܚ ܦܘܼܠܚܵܢܘܼ̈ܟ: ܘܓܲܢ̄ܒܵܪ̈ܘܼܝܵܬܘܼܟ ܒܸܕ ܡܲܕܥܝܼ. 5 ܣܸܩܠܵܐ ܕܐܝܼܩܵܪܵܐ ܕܙܲܪܝܼܦܘܼܬܘܼܟ: ܘܚܲܒ̇ܪܹ̈ܐ ܕܥܵܓ̰ܸܒܘܼܝܵܬܘܼ̈ܟ ܒܸܕ ܗܵܩܸܢ. 6 ܘܙܲܪܒ ܕܣܲܗܡܵܢܘܼܝܵܬܘܼ̈ܟ ܒܸܕ ܐܵܡܪܝܼ: ܘܫܘܼܠܘܼ̈ܟ ܓܘܼܪܹ̈ܐ ܒܸܕ ܗܵܩܸܢ. 7 ܕܟ̣ܵܪܵܐ ܕܒܘܼܫܵܝܝܼ ܕܛܵܒ̣ܘܼܬܘܼܟ ܒܸܕ ܡܲܢܒ̣ܥܝܼ: ܘܙܲܕܝܼܩܘܼܬܘܼܟ ܒܸܕ ܫܵܒܚܝܼ. 8 ܚܲܢܵܢܵܐ ܝܠܹܐ ܘܡܪܲܚܡܵܢܵܐ ܡܵܪܝܵܐ: ܝܵܪܝܼܟ̣ܬܵܐ ܒܹܢܹܗ: ܘܓܘܼܪܬܵܐ ܫܵܦܵܩܲܬܹܗ. 9 ܛܵܒ̣ܵܐ ܝܠܹܐ ܡܵܪܝܵܐ ܠܟܠܵܝ: ܘܪ̈ܲܚܡܘܼܗܝ ܥܲܠ ܟܠܵܝ ܦܘܼܠܚܵܢܘܼ̈ܗܝ. 10 ܒܸܕ ܫܵܟܪܝܼ ܠܘܼܟ: ܡܵܪܝܵܐ: ܟܠܵܝ ܦܘܼܠܚܵܢܘܼ̈ܟ: ܘܙܲܕܝܼܩܘܼ̈ܟ ܒܸܕ ܒܵܪܟ̣ܝܼ ܠܘܼܟ. 11 ܚܸܩܪܵܐ ܕܡܲܠܟܘܼܬܘܼܟ ܒܸܕ ܐܵܡܪܝܼ: ܘܓܲܢ̄ܒܵܪܘܼܬܘܼܟ ܒܸܕ ܗܲܡܙܸܡܝܼ: 12 ܠܡܲܕܘܼܥܝܹܐ ܠܒܢܲܝ̈ܢܵܫܵܐ ܓܲܢ̄ܒܵܪܘܼܬܹܗ: ܘܚܸܩܪܵܐ ܕܣܸܩܠܵܐ ܕܡܲܠܟܘܼܬܹܗ. 13 ܡܲܠܟܘܼܬܘܼܟ ܡܲܠܟܘܼܬܵܐ ܕܟܠܵܝ ܥܵܠܡܹ̈ܐ ܝܠܵܐ: ܘܗܵܟܲܡܬܘܼܟ ܒܟܠ ܕܵܘܪܵܐ ܘܕܵܘܪܵܐ. 14 ܟܹܐ ܣܵܢܸܕ ܡܵܪܝܵܐ ܠܟܠܵܝ ܢܵܦܠܵܢܹ̈ܐ: ܘܟܹܐ ܡܲܩܸܡ ܠܟܠܵܝ ܟܝܼܦܹ̈ܐ. 15 ܥܲܝܢܹ̈ܐ ܕܟܠܵܝ ܐܸܠܘܼܟ ܟܹܐ ܣܵܦܪܝܼ: ܘܐܲܢ̄ܬ ܟܹܐ ܝܵܗ̄ܒܸܕ ܠܗ̄ܘܿܢ ܡܹܐܟ̣ܘܼܠܬܵܝ ܒܙܲܒ̣ܢܘܼܗ̇. 16 ܟܹܐ ܦܵܬܚܸܬ ܐܝܼܕܘܼܟ: ܘܟܹܐ ܡܲܣܒܸܥܬ ܠܟܠ ܚܵܝܵܐ ܪܸܙܵܝܵܐ. 17 ܙܲܕܝܼܩܵܐ ܝܠܹܐ ܡܵܪܝܵܐ ܒܟܠܵܝ ܐܘܼܪ̈ܚܵܬܘܼܗܝ: ܘܡܪܲܚܡܵܢܵܐ ܒܟܠܵܝ ܦܘܼܠܚܵܢܘܼ̈ܗܝ. 18 ܩܘܼܪܒܵܐ ܝܠܹܐ ܡܵܪܝܵܐ ܠܟܠܵܝ ܩܵܪ̈ܝܵܢܘܼܗܝ: ܠܟܠܵܝ ܕܩܵܪܝܼ ܠܹܗ ܒܣܲܪܲܣܬܘܼܬܵܐ. 19 ܪܸܙܵܝܵܐ ܕܙܸܕܥܝܘܼ̈ܗܝ ܟܹܐ ܥܵܒܸܕ: ܘܡܲܩܘܲܚܬܵܝ ܟܹܐ ܫܲܡܸܥ: ܘܟܹܐ ܦܵܪܸܩ ܠܗ̄ܘܿܢ. 20 ܟܹܐ ܢܵܛܸܪ ܡܵܪܝܵܐ ܠܟܠܵܝ ܡܲܚܸܒܵܢܘܼ̈ܗܝ: ܘܠܟܠܵܝ ܒܝܼܫܹ̈ܐ ܒܸܕ ܬܵܠܸܩ. 21 ܬܸܫܒ̇ܘܿܚܬܹܗ ܕܡܵܪܝܵܐ ܒܸܕ ܗܲܡܙܸܡ ܦܘܼܡܝܼ: ܘܒܵܪܸܟ ܟܠ ܒܸܣܪܵܐ ܫܸܡܵܐ ܕܩܘܼܕܫܹܗ ܠܥܵܠܲܡ ܥܵܠܡܝܼܢ.

 

ܡܙܡܘܪܐ: ܩܡܘ.

1. ܗܲܠܸܠܘܼܝܵܐ. ܫܵܒܸܚ: ܢܲܦ̮ܫܝܼ: ܠܡܵܪܝܵܐ. 2 ܒܸܕ ܫܵܒܚܸܢ ܠܡܵܪܝܵܐ ܒܚܲܝܲܝ̈: ܒܸܕ ܙܵܡܪܸܢ ܠܐܲܠܵܗܝܼ ܟܡܵܐ ܕܝܼܘܸܢ. 3 ܠܵܐ ܣܵܒܪܝܼܬܘܿܢ ܒܡܲܥܩܘܼ̈ܠܹܐ: ܒܒܲܪܢܵܫܵܐ: ܕܠܲܝܬ ܠܹܗ ܦܲܪܲܩܬܵܐ. 4 ܟܹܐ ܦܵܠܛܵܐ ܪܘܼܚܹܗ: ܟܹܐ ܕܵܝܸܪ ܠܥܲܦܪܹܗ: ܒܗ̇ܘ ܝܘܿܡܵܐ ܟܹܐ ܬܵܠܩܝܼ ܦܸܟܝܼܪ̈ܘܼܗܝ. 5 ܛܘܼܒ̣ܵܐ ܠܗ̇ܘ ܕܐܲܠܵܗܵܐ ܕܝܲܥܩܘܿܒ̣ ܠܗܝܼܵܪܝܼܘܗܝ: ܣܲܒ̣ܪܘܼܗܝ ܥܲܠ ܡܵܪܝܵܐ ܐܲܠܵܗܘܼܗܝ: 6 ܥܵܒ̣ܕܵܢܵܐ ܕܫܡܲܝܵܐ ܘܐܲܪܥܵܐ: ܝܵܡܵܐ ܘܟܠ ܕܐܝܼܬ ܓܵܘܵܝ: ܢܵܛܪܵܢܵܐ ܕܣܲܪܲܣܬܘܼܬܵܐ ܠܥܵܠܲܡ: 7 ܥܵܒ̣ܕܵܢܵܐ ܕܕܝܼܘܵܢ ܠܙܠܝܼܡܹ̈ܐ: ܝܵܗ̄ܒ̣ܵܢܵܐ ܕܠܲܚܡܵܐ ܠܟܦܝܼܢܹ̈ܐ: ܡܵܪܝܵܐ ܫܵܪܝܵܢܵܐ ܕܐܣܝܼܪܹ̈ܐ: 8 ܡܵܪܝܵܐ ܦܵܬܚܵܢܵܐ (ܕܥܲܝܢܹ̈ܐ) ܕܣܸܡܝܹ̈ܐ: ܡܵܪܝܵܐ ܡܲܩܸܡܵܢܵܐ ܕܟܝܼܦܹ̈ܐ: ܡܵܪܝܵܐ ܡܲܚܸܒܵܢܵܐ ܕܙܲܕܝܼܩܹ̈ܐ: 9 ܡܵܪܝܵܐ ܝܠܹܐ ܢܵܛܪܵܢܵܐ ܠܡܵܫܵܚܲܛܹ̈ܐ: ܝܵܬܘܿܡܵܐ ܘܐܲܪܡܸܠܬܵܐ ܟܹܐ ܡܵܪܸܡ: ܘܐܘܼܪܚܵܐ ܕܒܝܼܫܹ̈ܐ ܟܹܐ ܡܲܦܟܸܠ. 10 ܒܸܕ ܥܵܒܸܕ ܡܲܠܟܘܼܬܵܐ ܡܵܪܝܵܐ ܠܥܵܠܲܡ: ܐܲܠܵܗܵܟ̣ܝ: ܝܵܐ ܨܸܗܝܘܿܢ: ܠܕܵܘܪܵܐ ܘܕܵܘܪܵܐ. ܗܲܠܸܠܘܼܝܵܐ.

 

ܡܙܡܘܪܐ: ܩܡܙ.

1. ܗܲܠܸܠܘܼܝܵܐ: ܣܲܒܲܒ ܕܨܦܵܝܝܼ ܝܠܵܐ ܠܸܙܡܵܪܵܐ ܠܐܲܠܵܗܲܢ: ܣܲܒܲܒ ܕܒܵܣܝܼܡܵܐ ܝܠܹܐ: ܟܹܐ ܠܵܚܡܵܐ ܬܸܫܒ̇ܘܿܚܬܵܐ. 2 ܒܸܒܢܵܝܵܐ ܝܠܹܐ ܠܐܘܿܪܸܫܠܸܡ ܡܵܪܝܵܐ: ܟ̰ܘܼܡܟ̰ܸܡܹ̈ܐ ܕܝܼܣܪܵܝܹܠ ܟܹܐ ܓ̰ܲܡܸܥ: 3 ܕܟܹܐ ܒܵܣܸܡ ܠܬܒ̣ܝܼܪܹ̈ܐ ܕܠܸܒܵܐ: ܘܟܹܐ ܐܵܣܸܪ ܒܪ̈ܝܼܢܵܝ. 4 ܟܹܐ ܡܵܢܹܐ ܡܸܢܝܵܢܵܐ ܕܟܵܘܟ̣ܒܹ̈ܐ: ܠܟܠܵܝ ܫܸܡܵܢܹ̈ܐ ܟܹܐ ܩܵܪܹܐ. 5 ܓܘܼܪܵܐ ܝܠܹܐ ܡܵܪܲܢ ܘܓܘܼܪܵܐ ܒܚܲܝܠܵܐ: ܠܦܲܪܡܵܝܬܘܼܗܝ ܠܲܝܬ ܩܲܝܵܣ. 6 ܟܹܐ ܡܵܪܸܡ ܡܸܣܟܹܢܹ̈ܐ ܡܵܪܝܵܐ: ܟܹܐ ܡܲܟܸܦ ܒܝܼܫܹ̈ܐ ܗܲܠ ܐܲܪܥܵܐ. 7 ܓ̰ܲܘܸܒܘܿܢ ܠܡܵܪܝܵܐ ܒܫܵܟܲܪܬܵܐ: ܙܡܘܿܪܘܿܢ ܠܐܲܠܵܗܵܐ ܒܟܸܢܵܪܵܐ: 8 ܕܟܹܐ ܟܵܣܹܐ ܫܡܲܝܹ̈ܐ ܒܥܲܝܒܹ̈ܐ: ܟܹܐ ܗܵܕܸܪ ܩܵܐ ܐܲܪܥܵܐ ܡܸܛܪܵܐ: ܕܟܹܐ ܡܲܓ̰ܝܸܢ ܥܲܠ ܛܘܼܪ̈ܵܢܹܐ ܓܸܠܵܐ. 9 ܟܹܐ ܝܵܗ̄ܒܸܠ ܠܪܸܣܩܵܐ ܠܲܚܡܘܼܗܝ: ܠܙܲܥܝܹ̈ܐ ܕܥܘܼܪܒ̣ܵܐ ܕܩܵܪܝܼ. 10 ܠܵܐ ܒܓܲܢ̄ܒܵܪܘܼܬܵܐ ܕܣܘܼܣܹܐ ܟܹܐ ܒܵܣܡܵܐ ܠܹܗ: ܠܵܐ ܒܫܵܩܵܢܹ̈ܐ ܕܐܢܵܫܵܐ ܥܵܒܸܕ ܗܲܙ. 11 ܟܹܐ ܗܵܘܹܐ ܪܵܙܝܼ ܡܵܪܝܵܐ ܒܙܸܕܥܝܘܼ̈ܗܝ: ܒܐܵܢܝܼ ܕܣܵܒܪܝܼ ܒܫܵܦܵܩܲܬܘܼܗܝ. 12 ܫܵܒܸܚ: ܝܵܐ ܐܘܿܪܸܫܠܸܡ: ܠܡܵܪܝܵܐ: ܡܵܐܣܸܩ ܗܲܠܸܠܘܼܝܵܐ ܠܐܲܠܵܗܵܟ̣ܝ: ܝܵܐ ܨܗܝܘܿܢ. 13 ܣܲܒܲܒ ܕܙܘܼܪܒܸܢܹܐ ܕܵܒ̣ܪܹ̈ܐ ܕܕܲܪ̈ܘܵܙܵܟ̣ܝ: ܒܘܼܪܸܟ̣ܠܹܐ ܒܢܘܼܢܵܟ̣ܝ̈ ܒܓܵܘܵܟ̣ܝ. 14 ܟܹܐ ܡܲܬܸܒ̣ ܬܸܚܘܼܒܵܟ̣ܝ ܫܠܵܡܵܐ: ܛܪܝܼܨܘܼܬܵܐ ܕܚܸܛܹ̈ܐ ܟܹܐ ܡܲܣܒܸܥ ܠܵܟ̣ܝ. 15 ܟܹܐ ܫܵܕܸܪ ܗܹܡܸܙܡܵܢܘܼܗܝ ܥܲܠ ܐܲܪܥܵܐ: ܟ̰ܸܡ ܓ̰ܲܠܕܹܐ ܟܹܐ ܪܵܚܸܛ ܚܲܒ̇ܪܹܗ. 16 ܟܹܐ ܝܵܗ̄ܒܸܠ ܬܲܠܓܵܐ ܐܲܝܟ ܥܲܡܪܵܐ: ܣܸܠܘܼܪ ܐܲܝܟ ܩܸܛܡܵܐ ܟܹܐ ܒܲܪܒܸܙ. 17 ܟܹܐ ܕܵܪܹܐ ܓܕܝܼܠܘܼܗܝ ܐܲܝܟ ܩܸܛܥܵܛܹ̈ܐ: ܩܵܕ̄ܡ ܩܲܪܬܘܼܗܝ ܡܲܢܝܼ ܟܵܠܹܐ: 18 ܟܹܐ ܫܵܕܸܪ ܗܹܡܸܙܡܵܢܘܼܗܝ ܘܟܹܐ ܦܵܫܸܪܘܿܢ: ܟܹܐ ܡܵܚܹܐ ܦܵܘܚܘܼܗܝ: ܟܹܐ ܓ̰ܵܪܝܼ ܡ̈ܝܼܵܐ. 19 ܟܹܐ ܡܲܕܸܥ ܗܹܡܸܙܡܵܢܘܼ̈ܗܝ ܠܝܲܥܩܘܿܒ̣: ܩܵܢܘܿܢܘܼ̈ܗܝ ܘܕܝܼܘܵܢܘܼ̈ܗܝ ܠܝܼܣܪܵܝܹܠ. 20 ܠܵܐ ܥܒܸܕܠܹܐ ܗܲܕܟ̣ܵܐ ܠܟܠ ܛܵܝܸܦܵܐ: ܘܕܝܼܘܵܢܹ̈ܐ (ܕܝܹܗ) ܠܵܐ ܝܕܸܥܵܚܠܘܿܢ. ܗܲܠܸܠܘܼܝܵܐ.

 

ܡܙܡܘܪܐ: ܩܡܚ.

1. ܗܲܠܸܠܘܼܝܵܐ. ܫܵܒܚܘܿܢ ܠܡܵܪܝܵܐ ܡ̣ܢ ܫܡܲܝܹ̈ܐ: ܫܵܒܚܘܿܢ ܠܹܗ ܒܡܪܵܘܡܹܐ: 2 ܫܵܒܚܘܿܢ ܠܹܗ: ܟܠܵܝ ܡܲܠܲܐܟ̣ܘܼ̈ܗܝ: ܫܵܒܚܘܿܢ ܠܹܗ: ܟܠܵܝ ܚܲܝܠܵܘܵܬܘܼ̈ܗܝ. 3 ܫܵܒܚܘܿܢ ܠܹܗ: ܫܸܡܫܵܐ ܘܣܲܗܪܵܐ: ܫܵܒܚܘܿܢ ܠܹܗ: ܟܠܵܝ ܟܵܘܟ̣ܒܹ̈ܐ ܕܒܲܗܪܵܐ. 4 ܫܵܒܚܘܿܢ ܠܹܗ: ܫܡܲܝ̈ ܫܡܲܝܹ̈ܐ: ܘܡ̈ܝܼܵܐ ܕܝܼܢܵܐ ܠܥܸܠܸܠ ܡ̣ܢ ܫܡܲܝܹ̈ܐ. 5 ܫܵܒܚܝܼ ܠܫܸܡܹܗ ܕܡܵܪܝܵܐ: ܣܲܒܲܒ ܕܗ̇ܘ ܦܩܸܕܠܹܐ: ܘܦܸܫܠܘܿܢ ܒܸܪܝܹܐ. 6 ܘܡܘܼܩܘܝܼܵܝܠܹܐ ܠܥܵܠܲܡ ܥܵܠܡܝܼܢ: ܩܵܢܘܿܢܵܐ ܝܸܗܒܸܠܹܐ ܘܠܹܐ ܥܵܒܸܪ. 7 ܫܵܒܚܘܿܢ ܠܡܵܪܝܵܐ ܡ̣ܢ ܐܲܪܥܵܐ: ܬܵܢܝܼܢܹ̈ܐ ܘܟܠܵܝ ܬܗܘܿܡܹ̈ܐ: 8 ܢܘܼܪܵܐ ܘܒܲܪܕܵܐ: ܬܲܠܓܵܐ ܘܗܵܘܓܵܐ: ܦܵܘܚܵܐ ܕܒܘܼܪܵܢ ܥܵܒ̣ܕܵܢܵܐ ܕܚܲܒ̇ܪܘܼܗܝ: 9 ܛܘܼܪ̈ܵܢܹܐ ܘܟܠܵܝ ܪ̈ܘܼܡܝܵܬܹܐ: ܐܝܼܠܵܢܵܐ ܕܛܥܘܼܢܬܵܐ ܘܟܠܵܝ ܐܲܪ̈ܙܹܐ: 10 ܚܲܝܘܼܬܵܐ ܘܟܠ ܪܸܣܩܵܐ: ܪܸܓ̰ܒܵܐ: ܘܛܲܝܪܵܐ ܡܵܪܹܐ ܓܘܼܠܦܵܐ: 11 ܡܲܠܟܹ̈ܐ ܕܐܲܪܥܵܐ ܘܟܠܵܝ ܡܸܠܲܬܹ̈ܐ: ܓܘܼܪ̈ܵܢܹܐ: ܘܟܠܵܝ ܕܲܝܵܢܹ̈ܐ ܕܐܲܪܥܵܐ. 12 ܓ̰ܘܲܢܩܹ̈ܐ ܘܐܘܼܦ ܒܬܘܼܠܵܬܹ̈ܐ: ܣܵܒܹ̈ܐ ܥܲܡ ܝܵܠܹ̈ܐ: 13 ܫܵܒܚܝܼ ܠܫܸܡܹܗ ܕܡܵܪܝܵܐ: ܣܲܒܲܒ ܕܪܝܼܡܵܐ ܝܠܹܐ ܫܸܡܹܗ ܒܢܲܦ̮ܫܹܗ: ܙܲܪܝܼܦܘܼܬܹܗ ܥܲܠ ܐܲܪܥܵܐ ܘܫܡܲܝܵܐ. 14 ܘܡܘܼܪܸܡܠܹܐ ܩܵܪ̄ܢܵܐ ܕܛܵܝܸܦܹܗ: ܬܸܫܒܘܿܚܬܵܐ ܕܟܠܵܝ ܙܲܕܝܼܩܘܼ̈ܗܝ: ܕܒܢܲܝ̈ ܝܼܣܪܵܝܹܠ: ܛܵܝܸܦܵܐ ܩܘܼܪܒܵܐ ܐܸܠܹܗ. ܗܲܠܸܠܘܼܝܵܐ.

 

ܡܙܡܘܪܐ: ܩܡܛ.

1. ܗܲܠܸܠܘܼܝܵܐ. ܙܡܘܿܪܘܿܢ ܠܡܵܪܝܵܐ ܙܡܵܪܬܵܐ ܚܲܕܬܵܐ: ܬܸܫܒܘܿܚܬܹܗ ܓܵܘ ܓ̰ܵܡܵܥܲܬ ܕܙܲܕܝܼܩܹ̈ܐ. 2 ܚܵܕܹܐ ܝܼܣܪܵܝܹܠ ܒܥܵܒ̣ܘܿܕܘܼܗܝ: ܒܢܲܝ̈ ܨܸܗܝܘܿܢ ܦܵܨܚܝܼ ܒܡܲܠܟܵܝ. 3 ܫܵܒܚܝܼ ܠܫܸܡܹܗ: ܒܪܩܵܕܵܐ: ܒܬܲܦ ܘܟܸܢܵܪܵܐ ܙܵܡܪܝܼ ܐܸܠܹܗ. 4 ܣܲܒܲܒ ܕܟܹܐ ܒܵܣܡܵܐ ܠܹܗ ܡܵܪܝܵܐ ܒܛܵܝܸܦܹܗ: ܟܹܐ ܡܲܫܦܸܪ ܡܸܣܟܹܢܹ̈ܐ ܒܦܘܼܪܩܵܢܵܐ. 5 ܦܵܨܚܝܼ ܙܲܕܝܼܩܹ̈ܐ ܒܐܝܼܩܵܪܵܐ: ܡܲܩܘܸܚܝܼ ܥܲܠ ܫܘܝܼܵܬܵܝ̈. 6 ܪ̈ܵܡܘܼܝܵܬܹܐ ܕܐܲܠܵܗܵܐ ܒܒܵܠܘܿܥܬܵܝ: ܘܣܲܝܦܵܐ ܕܬܪܲܝ ܦܘܼܡܵܢܹ̈ܐ ܒܐܝܼܕܵܝ: 7 ܠܸܥܒ̣ܵܕܵܐ ܬܘܼܥܠܵܐ ܒܛܵܝܦܹ̈ܐ: ܬܲܥܠܲܡܝܵܬܹ̈ܐ ܒܡܸܠܲܬܹ̈ܐ: 8 ܠܐܹܣܵܪܵܐ ܡܲܠܟܵܝ̈ ܒܫܹܫܹܠܝܵܬܹ̈ܐ ܕܡܲܥܩܘܼܠܵܝ̈ ܒܩܵܘܕܹ̈ܐ ܕܦܪܸܙܠܵܐ: 9 ܠܸܥܒ̣ܵܕܵܐ ܒܝܼܵܝ ܕܝܼܘܵܢ ܕܝܼܠܵܐ ܟܬܝܼܒ̣ܬܵܐ: ܣܸܩܠܵܐ ܝܠܹܐ ܠܟܠܵܝ ܙܲܕܝܼܩܘܼ̈ܗܝ. ܗܲܠܸܠܘܼܝܵܐ.

 

ܡܙܡܘܪܐ: ܩܢ.

1. ܗܲܠܸܠܘܼܝܵܐ. ܫܵܒܚܘܿܢ ܠܐܲܠܵܗܵܐ ܒܩܘܼܕܫܹܗ: ܫܵܒܚܘܿܢ ܠܹܗ ܒܪܩܝܼܥܵܐ ܕܙܲܪܒܹܗ. 2 ܫܵܒܚܘܿܢ ܠܹܗ ܒܓܲܢ̄ܒܵܪ̈ܘܼܝܵܬܘܼܗܝ: ܫܵܒܚܘܿܢ ܠܹܗ ܐܲܝܟ ܒܘܼܫܵܝܝܼ ܕܓܘܼܪܘܼܬܹܗ. 3 ܫܵܒܚܘܿܢ ܠܹܗ ܒܩܲܘܲܚܬܵܐ ܕܫܝܼܦܘܿܪܵܐ: ܫܵܒܚܘܿܢ ܠܹܗ ܒܩܝܼܬܵܪܵܐ ܘܟܸܢܵܪܵܐ. 4 ܫܵܒܚܘܿܢ ܠܹܗ ܒܬܲܦ ܘܪܩܵܕܵܐ: ܫܵܒܚܘܿܢ ܠܹܗ ܒܣܹܐܡܹ̈ܐ: ܘܫܲܒܝ̣ܒܵܐ. 5 ܫܵܒܚܘܿܢ ܠܹܗ ܒܟ̰ܲܢ̈ܓܹܐ ܕܫܡܵܥܝܬܵܐ: ܫܵܒܚܘܿܢ ܠܹܗ ܒܟ̰ܲܢ̈ܓܹܐ ܕܩܲܘܲܚܬܵܐ. 6 ܟܠ ܢܵܦܵܣ ܫܵܒܚܵܐ ܠܡܵܪܝܵܐ. ܗܲܠܸܠܘܼܝܵܐ.


[1] ܪܸܙܵܝܹܗ

[2] ܓ̰ܵܡܵܥܲܬ

[3] ܬܘܿܥܠܸܡ̈ܐ

[4] ܝܢ: ܒܐܘܼܪܚܵܐ.

[5] ܝܢ: ܒܐܲܣܒܵܒܹ̈ܐ ܕܣܹܐܡܹ̈ܐ.

[6] ܝܢ: ܒܐܲܣܒܵܒܹ̈ܐ ܕܦܵܘܚܵܐ.

[7] ܗܲܒ̄ܠ

[8] ܝܢ: ܒܝܼܫܬܵܐ.

[9] ܓܘܼܢܵܗܟܵܪ̈ܐ

[10] ܝܢ ܒܐܲܣܒܵܒܹ̈ܐ ܕܣܹܐܡܹ̈ܐ.

[11]  ܓܵܘ ܐܲܨܲܚܬܵܐ ܕܫܲܒ̣ܥܝܼ: ܡܲܠܲܐܟܹ̈ܐ.

[12]  ܝܢ: ܚܵܛܘܿܦܵܐ: ܝܢ: ܠܚܵܛܘܿܦܵܐ.

[13]  ܝܢ: ܠܸܚܛܵܦܵܐ.

[14]  ܝܢ: ܚܵܛܸܦ.

[15]  ܝܢ: ( ܗܲܠ ܕ) ܠܵܐ ܡܵܫ̄ܟ̰ܚܸܬ.

[16]  ܝܢ: ܚܵܠܸܛ.

[17]  ܝܢ: ܗܵܘܝܼ ܙܲܒܛ.

[18] ܒܘܼܫ ܫܘܼܗܘܸܬܹ̈ܐ ܝܢܵܐ

[19] ܕܸܒܼܫܵܐ ܓܵܘ ܫܲܡܥܹܗ

[20]  ܝܢ: ܕܡܲܕܸܪܝܼ ܪܘܼܦ̮ܫܵܐ.

[21]  ܝܢ: ܐܲܝܟ ܣܘܪܝܵܐܝܼܬ̣: ܐܲܠܵܗܹܗ ܕܝܲܥܩܘܿܒ̣.

[22]  ܝܲܢ: ( ܟܲܕ ܐܡܸܪܘܼܟ): ܛܸܥܡܘܿܢ ܠܦܵܬܝܼ.

[23]  ܝܢ: ܫܵܪܹܐ.

[24]  ܝܢ: ܡܣܲܒܲܒ ܕܟܠܵܝ.

[25]  ܝܢ: ܡܥܘܼܕܵܠܹܐ.

[26]  ܝܢ: ܒܕܲܗܢܵܐ.

[27]  ܝܢ: (ܝܲܢ) ܠܹܐ ܩܲܪܒܸܢܝܼ ܐܸܠܘܼܟ.

[28]  ܝܢ: ܡܥܘܼܕܵܠܹܐ.

[29]  ܝܢ: ܚܵܛܦܵܢܵܐ ܐܸܠܹܗ.

[30]  ܝܢ: ܓܵܘܵܐ ܕܟܵܦܘܿܪܹ̈ܐ ܡܲܣܚܵܪܹ̈ܐ ܕܨܘܼܦܪܵܐ.

[31]  ܝܢ: ܡܥܘܼܕܵܠܹܐ.

[32]  ܝܢ: ܕܠܸܒܹܗ.

[33]  ܝܢ: ܕܡܲܪܸ̈ܥܝܹܐ.

[34]  ܝܢ: ܡܥܘܼܕܵܠܹܐ.

[35]   ܝܢ: ܕܠܵܐ.

[36]  ܝܢ: ܣܪܝܼܩܘܼܬܵܐ.

[37]  ܝܢ: ܣܪܝܼܩܘܼܬܵܐ.

[38]  ܝܢ: ܡܥܘܼܕܵܠܹܐ.

[39]  ܝܢ: ܒܐܸܡܵܪܵܐ ܝܘܸܢ ܐܵܢܵܐ: ܥܵܡܵܠܝܼ ܩܵܐ ܡܲܠܟܵܐ.

[40]  ܝܢ: ܣܹܐܡܹ̈ܐ.

[41]  ܝܢ: ܟܹܐ.

[42]  ܝܢ: ܟܹܐ.

[43]  ܝܢ: ܒܙܡܵܪܬܵܐ ܡܵܪܹܐ ܥܵܘܩܸܒ.

[44]  ܝܢ: ܡܥܘܼܕܵܠܹܐ.

[45]  ܝܢ: ܡܥܘܼܕܵܠܹܐ.

[46]  ܝܢ: ܘܛܝܼܡܵܢܵܐ.

[47]  ܝܢ: ܡܥܘܼܕܵܠܹܐ.

[48]  ܝܢ: ܡܥܘܼܕܵܠܹܐ.

[49]  ܦܘܼܪܥܵܢܵܐ.

[50]  ܝܢ: ܢܵܦܵܣ.

[51]  ܝܢ: ܡܥܘܼܕܵܠܹܐ.

[52]  ܝܢ: ܢܵܦܵܣ.

[53]  ܝܢ: ܘܒܚܛܘܼܦܝܵܐ.

[54]  ܝܢ: ܒܚܵܒܵܛܘܼܬܵܐ.

[55]  ܝܢ: ܒܸܕ ܒܵܝܫܝܼ ܣܘܼܦܝܹܐ.

[56]  ܝܢ: ܘܓܲܠ̈ܝܹܐ.

[57]  ܝܢ: ܗܵܘܝܼ ܙܲܒܛ.

[58]  ܝܢ: ܕܦܸܪܝܘܼܬܵܐ.

[59]  ܝܢ: ܓ̰ܲܡܵܥܲܬܘܼ̈ܟ.

[60]  ܝܢ: ܟܲܕ.

[61]  ܝܢ: (ܝܼܠܵܐ ܐܲܝܟ) ܓܘܼܠܦܵܢܹ̈ܐ... ܒܕܲܗܒ̣ܵܐ ܙܲܪܕܵܐ.

[62]  ܝܢ: ܚܛܸܦܠܝܼ.

[63]  ܝܢ: ܦܵܠܛܵܢܝ.

[64]  ܝܢ: ܡܥܘܼܕܵܠܹܐ.

[65]  ܝܢ: ܠܲܢ.

[66]  ܝܢ: ܠܲܢ.

[67]  ܝܢ: ܠܝܼ.

[68]  ܝܢ: ܘܫܒ̣ܘܿܩ ܡܸܢܘܼܟ.

[69]  ܝܢ: ܟܹܐ ܡܲܒܝܸܢ ܐܲܝܟ.

[70]  ܝܢ: ܡܥܘܼܕܵܠܹܐ.

[71]  ܝܢ: ܡܥܘܼܕܵܠܹܐ.

[72]  ܝܢ: ܕܛܘܼܪܵܢܹܐ.

[73]  ܝܢ: ܒܸܪܬܵܚܵܐ ܝܠܹܐ.

[74]  ܝܢ: ܐܵܣܪܸܬ ܥܲܠܘܼܟ.

[75]  ܝܢ: ܗܵܘܝ ܗ̄ܘ̣ܵܘ ܙܒܛ.

[76]  ܝܢ: ܒܠܸܒܹܗ.

[77]  ܝܢ: ܩܵܕ̄ܡܵܝܬܵܐ.

[78]  ܝܢ: ܘܗܵܩܘܬܵܐ.

[79]  ܝܢ: ܙܲܕܝܼܩܘܼ̈ܟ.

[80]  ܝܢ: ܒܸܕ ܐܵܡܪܸܢ.

[81]  ܝܢ: ܒܟܵܘܸܬܪܵܐ.

[82]  ܝܢ: ܕܢܵܦܵܣ.

[83]  ܝܢ: ܘܗܵܩܘܼܬܵܐ.

[84]  ܝܢ: ܡܸܚܕܵܕܹ̈ܐ.

[85]  ܝܢ: ܒܹܝܠܝ.

[86]  ܝܢ: ܠܗܵܩܘܼܬܵܐ.

[87]  ܝܢ: ܗܵܩܘܼܬܵܐ.

[88]  ܝܢ: ܡܥܘܼܕܵܠܹܐ.

[89]  ܝܢ: ܒܕܡܘܼܬܹܗ.

[90]  ܝܢ: ܘܗܵܩܘܼܬܵܐ.

[91]  ܝܢ: ܒܗܵܩܘܼܬܵܐ.

[92]  ܝܢ: ܝܢܵܐ.

[93]  ܝܢ: ܦܵܩܲܕܝܵܬܘܼ̈ܟ.

[94]  ܝܢ: ܚܛܘܼܦܝܵܐ:

[95]  ܝܢ: ܛܪܹܠܘܿܢ ܦܕܵܢܵܐ ܛܵܪ̈ܝܵܢܹܐ ܕܦܕܵܢܵܐ.

[96]  ܝܢ: ܡܥܘܼܕܵܠܹܐ.

[97]  ܝܢ: ܝܢܵܐ.

[98]  ܝܢ: ܗܲܪ.

[99]  ܝܢ: ܕܟܹܐ ܥܵܨܝܼ ܥܲܠܘܼܟ.

[100]  ܝܢ: ܕܦܠܵܫܵܐ.

[101]  ܝܢ: ܘܟ̰ܵܠܦܵܢܵܐ.

[102]  ܝܢ: ܡܥܘܼܕܵܠܹܐ.