ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܓܠܝܢܐ ܕܝܘܚܢܢ ܐܘܢܓܠܣܛܐ

ܩܦܠܐܘܢ: ܐ

1 ܓܸܠܝܵܢܵܐ ܕܝܼܫܘܿܥ ܡܫܝܼܚܵܐ: ܗ̇ܘ ܕܩܲܡ ܝܵܗ݇ܒܸܠ ܠܹܗ ܐܲܠܵܗܵܐ ܠܡܲܕܘܼܥܝܹܐ ܠܪܹ̈ܓܵܘܵܬܘܼܗܝ: ܐܢܝܼ ܡܸܢܕܝܼܵܢܹ̈ܐ ܕܘܵܓ̰ܸܒ ܝܼܢܵܐ ܠܸܗܘܵܝܵܐ ܓ̰ܲܠܕܹܐ. ܘܡܘܼܕܸܥܠܹܗ: ܟܲܕ ܫܘܼܕܸܪܹܐ ܒܝܼܸܕ ܡܲܠܐܲܟ݂ܹܐ ܠܪܹܓܵܐ ܕܝܼܹܗ: ܝܘܿܚܲܢܵܢ. 2 ܗ̇ܘ ܕܣܗܸܕܠܹܐ ܠܗܹܡܸܙܡܵܢ ܕܐܲܠܵܗܵܐ ܘܠܣܵܗܕܘܼܬܵܐ ܕܝܼܫܘܿܥ ܡܫܝܼܚܵܐ: ܟܠܵܝ ܕܚܙܹܠܹܐ. 3 ܛܘܼܒ݂ܵܢܵܐ ܝܠܹܐ ܗ̇ܘ ܕܩܵܪܹܐ: ܘܐܵܢܝܼ ܕܫܲܡܥܝܼ ܠܗܹܡܸܙܡܵܢܹ̈ܐ ܕܐܵܗܵܐ ܢܒ݂ܝܼܘܼܬܵܐ: ܘܢܵܛܪܝܼ ܠܐܲܢܹܐ ܕܝܼܢܵܐ ܟܬܝܼܒ݂ܹܐ ܓܵܘܵܗ̇: ܣܵܒܵܒ ܙܲܒ݂ܢܵܐ ܩܘܼܪܒܵܐ ܝܠܹܐ.

4 ܝܘܿܚܲܢܲܢ ܠܫܲܒܲܥ ܥܹܕܵܬܹ̈ܐ ܕܝܼܢܵܐ ܓܵܘ ܐܵܣܝܼܵܐ: ܫܵܦܵܩܲܬ ܐܸܠܵܘܟ݂ܘܿܢ ܘܫܲܝܢܵܐ ܡ̣ܢ ܕܗ̇ܘ ܕܝܼܗ݇ܘܵܐ: ܘܗ̇ܘ ܕܐܵܬܹܐ: ܘܡ̣ܢ ܫܲܒܲܥ ܪ̈ܘܼܚܹܐ ܕܝܼܢܵܐ ܩܵܕ݇ܡ ܬܪܘܿܢܘܿܣ ܕܝܼܹܗ: 5 ܘܡ̣ܢ ܝܼܫܘܿܥ ܡܫܝܼܚܵܐ: ܗ̇ܘ ܣܵܗܕܵܐ ܡܗܘܼܡܢܵܐ: ܗ̇ܘ ܒܘܼܟ݂ܪܵܐ ܕܡܝܼܬܹ̈ܐ: ܘܪܹܫܵܐ ܕܡܲܠܟܹ̈ܐ ܕܐܲܪܥܵܐ: ܗ̇ܘ ܕܟܹܐ ܡܲܚܸܒ ܠܲܢ ܘܩܲܡ ܫܵܪܹܐ ܠܲܢ ܡ̣ܢ ܚܛ̈ܝܼܵܬܲܢ ܒܕܸܡܵܐ ܕܓܵܢܹܗ: 6 ܘܥܒ݂ܝܼܕܵܚܠܹܐ ܡܲܠܟܘܼܬܵܐ ܘܟܵܗܢܹ̈ܐ ܠܐܲܠܵܗܵܐ ܘܒܵܒܹܗ: ܐܸܠܹܗ ܬܸܫܒܘܿܚܬܵܐ: ܘܗܘܼܟܡܵܐ: ܠܥܵܠܡܹ̈ܐ ܕܥܵܠܡܹ̈ܐ: ܐܵܡܹܝܢ. 7 ܗܵܐ: ܒܹܐܬܵܝܵܐ ܝܠܹܐ ܥܲܡ ܥܢܵܢܹ̈ܐ: ܘܒܸܬ ܚܵܙܝܼ ܠܹܗ ܟܠܵܝ ܥܲܝܢܹ̈ܐ: ܘܐܘܼܦ ܐܵܢܝܼ ܕܟ̰ܪܸܙܠܘܿܢ ܐܸܠܹܗ: ܒܸܬ ܥܵܒ݂ܕܝܼ ܬܵܙܝܼ ܥܲܠܘܼܗܝ ܟܠܵܝ ܐܘܼ̈ܓ̰ܵܓܹܐ ܕܐܲܪܥܵܐ. ܗܹܐ: ܐܵܡܹܝܢ.

8 ܐܵܢܵܐ ܝܘܸܢ ܐܵܠܲܦ ܐܘܼܦ ܬܵܘ: ܒܹܐܡܵܪܵܐ ܝܠܹܐ ܡܵܪܝܵܐ ܐܲܠܵܗܵܐ: ܗ̇ܘ ܕܝܼܠܹܐ: ܘܗ̇ܘ ܕܝܼܗ݇ܘܵܐ ܘܗ̇ܘ ܕܐܵܬܹܐ: ܗ̇ܘ ܐܲܚܝܼܕ ܟܠ.

9 ܐܵܢܵܐ ܝܘܿܚܲܢܵܢ: ܐܵܚܘܿܢܵܘܟ݂ܘܿܢ ܘܫܵܪܝܼܟܵܐ ܕܝܼܵܘܟ݂ܘܿܢ ܒܐܘܼܠܨܵܢܵܐ ܘܒܡܲܠܟܘܼܬܵܐ ܘܒܚܡܵܠܬܵܐ ܕܒܝܼܫܘܿܥ ܡܫܝܼܚܵܐ: ܒܓܵܙܲܪܬܵܐ ܝܘܸܢ ܗ݇ܘܵܐ ܕܝܼܠܵܐ ܩܪܝܼܬܵܐ ܦܵܛܲܐܡܘܿܢ: ܒܚܵܬܸܪ ܕܗܹܡܸܙܡܵܢ ܕܐܲܠܵܗܵܐ: ܘܒܚܵܬܸܪ ܕܣܵܗܕܘܼܬܵܐ ܕܝܼܫܘܿܥ ܡܫܝܼܚܵܐ. 10 ܒܪܘܼܚܵܐ ܗ݇ܘܹܠܝܼ ܒܝܘܿܡܵܐ ܡܵܪܵܢܵܝܵܐ: ܘܫܡܸܥܠܝܼ ܡ̣ܢ ܒܵܬܪܝܼ ܩܵܠܵܐ ܓܘܼܪܵܐ ܐܲܝܟ݂ ܫܝܼܦܘܼܪܵܐ: ܕܐܵܡܸܪ: 11 ܗ̇ܘ ܡܸܢܕܝܼ ܕܚܵܙܸܬ ܟܬܘܿܒ݂ ܒܟܬܵܒ݂ܵܐ: ܘܫܵܕܸܪ ܠܐܲܢܹܐ ܫܒ݂ܲܥ ܥܹܕܵܬܹ̈ܐ ܠܐܵܦܸܣܘܿܣ: ܘܠܣܡܘܿܪܢܵܐ: ܘܠܦܲܪܓܵܡܘܿܣ: ܘܠܬܹܐܘܿܛܝܼܪܵܐ: ܘܠܣܲܪܕܝܼܣ: ܘܠܦܝܼܠܝܼܕܲܠܦܝܼܵܐ ܘܠܠܵܕܝܼܩܝܼܵܐ. 12 ܘܕܸܪܝܼ ܠܸܚܙܵܝܵܐ ܠܩܵܠܵܐ: ܗ̇ܘ ܕܗܲܡܙܘܼܡܹܐ ܗ݇ܘܵܐ ܥܲܡܝܼ. ܘܟܲܕ ܕܸܪܝܼ: ܓܙܹܠܝܼ ܫܲܒ݂ܥܵܐ ܩܲܢܕܝܼ̈ܠܹܐ ܕܕܲܗܒ݂ܵܐ: 13 ܘܒܒܹܝܦܲܠܓܵܐ ܕܐܵܢܝܼ ܫܲܒ݂ܥܵܐ ܩܲܢܕܝܼ̈ܠܹܐ: ܚܵܕ݇ ܕܕܵܡܹܐ ܠܒܪܘܼܢܹܗ ܕܐ݇ܢܵܫܵܐ: ܕܠܒ݂ܝܼܫܵܐ ܠܒ݂ܸܫܬܵܐ ܗܲܠ ܐܵܩܠܵܐ: ܘܐܣܝܼܪܵܐ ܠܟܸܣ ܒܸܙܵܙܘܼ̈ܗܝ ܗܵܡܵܝܹܠ ܕܕܲܗܒ݂ܵܐ: 14 ܘܪܹܫܹܗ ܘܣܲܥܪܵܐ ܕܝܼܹܗ ܚܘܵܪܹ̈ܐ ܗ݇ܘܵܘ: ܐܲܝܟ݂ ܥܲܡܪܵܐ ܚܘܵܪܵܐ: ܐܲܝܟ݂ ܬܲܠܓܵܐ: ܘܥܲܝܢܘܼ̈ܗܝ ܐܲܝܟ݂ ܠܵܗܵܐ ܕܢܘܼܪܵܐ: 15 ܘܐܲܩܠܘܼ̈ܗܝ ܕܕܵܡܝܼ ܗ݇ܘܵܘ ܠܢܚܵܫܵܐ ܡܘܼܒܪܸܩܵܐ: ܐܲܝܟ݂ ܕܨܘܼܪܸܦܵܐ ܓܵܘ ܐܲܬܘܿܢܵܐ: ܘܩܵܠܹܗ ܐܲܝܟ݂ ܩܵܠܵܐ ܕܡ̈ܝܼܵܐ ܪܵܒܵܐ. 16 ܘܐܝܼܬ ܗ݇ܘܵܐ ܠܹܗ ܒܐܝܼܕܹܗ ܕܝܲܡܝܼܢܵܐ ܫܲܒ݂ܥܵܐ ܟܵܘܟ݂ܒ݂ܹ̈ܐ: ܘܡ̣ܢ ܦܘܼܡܹܗ ܣܲܝܦܵܐ ܚܵܪܝܼܦܵܐ ܕܬܪܲܝ ܦܘܼܡܵܢܹ̈ܐ ܒܸܦܠܵܛܵܐ: ܘܦܵܬܹܗ ܐܲܝܟ݂ ܫܸܡܫܵܐ ܒܲܗ݇ܪܘܼܢܹܐ ܒܚܲܝܠܹܗ. 17 ܘܟܲܕ ܩܲܡ ܚܵܙܹܢܹܗ: ܢܦܸܠܝܼ ܠܟܸܣ ܐܲܩܠܘܼ̈ܗܝ ܐܲܝܟ݂ ܡܝܼܬܵܐ. ܘܡܘܼܬܸܒ݂ܠܹܐ ܥܲܠܝܼ ܐܝܼܕܹܗ ܕܝܲܡܝܼܢܵܐ: ܒܹܐܡܵܪܵܐ: ܠܵܐ ܙܵܕܥܹܬ: ܐܵܢܵܐ ܝܘܸܢ ܗ̇ܘ ܩܵܕ݇ܡܵܝܵܐ ܘܗ̇ܘ ܐܚܵܪܵܝܵܐ: 18 ܘܗ̇ܘ ܕܚܵܝܵܐ: ܘܗ݇ܘܹܠܝܼ ܡܝܼܬܵܐ: ܘܗܵܐ: ܚܵܝܵܐ ܝܘܸܢ ܠܥܵܠܡܹ̈ܐ ܕܥܵܠܡܹ̈ܐ: ܘܐܝܼܬ ܠܝܼ ܩܕܝܼ̈ܠܹܐ ܕܡܵܘܬܵܐ ܘܕܫܝܘܿܠ. 19 ܟܬܘܿܒ݂ ܗܲܕܟ݂ܵܐ ܡܸܢܕܝܼܵܢܹ̈ܐ ܕܚܙܹܠܘܼܟ݂: ܘܐܲܢܹܐ ܕܝܼܢܵܐ: ܘܐܵܢܝܼ ܕܝܼܢܵܐ ܗܕܝܼܪܹܐ ܠܸܗܘܵܝܵܐ ܒܵܬ݇ܪ ܐܲܢܹܐ: 20 ܠܣܸܪ ܕܫܲܒ݂ܥܵܐ ܟܵܘܟ݂ܒ݂ܹ̈ܐ ܕܚܙܹܠܘܼܟ݂ ܒܝܲܡܝܼܢܝܼ: ܘܠܫܲܒ݂ܥܵܐ ܩܲܢܕܝܼ̈ܠܹܐ ܕܕܲܗܒ݂ܵܐ. ܐܵܢܝܼ ܫܲܒ݂ܥܵܐ ܟܵܘܟ݂ܒ݂ܹ̈ܐ ܡܲܠܲܐܟ݂ܹ̈ܐ ܕܫܲܒ݂ܲܥ ܥܹܕܵܬܹ̈ܐ ܝܢܵܐ: ܘܐܲܢܹܐ ܫܲܒ݂ܥܵܐ ܩܲܢܕܝܼ̈ܠܹܐ ܫܲܒ݂ܲܥ ܥܹܕܵܬܹ̈ܐ ܝܢܵܐ.

ܩܦܠܐܘܢ: ܒ

1 ܠܡܲܠܲܐܟ݂ܵܐ ܕܥܹܕܬܵܐ ܕܓܵܘ ܐܵܦܸܣܘܿܣ: ܟܬܘܿܒ݂: ܐܲܢܹܐ ܒܹܐܡܵܪܵܐ ܝܠܹܐ ܗ̇ܘ ܕܕܵܒ݂ܸܩ ܠܐܵܢܝܼ ܫܲܒ݂ܥܵܐ ܟܵܘܟ݂ܒ݂ܹ̈ܐ ܒܝܲܡܝܼܢܹܗ: ܗ̇ܘ ܕܒܸܚܕܵܪܵܐ ܝܠܹܐ ܒܒܹܝܦܲܠܓܵܐ ܕܐܲܢܹܐ ܫܲܒ݂ܥܵܐ ܩܲܢܕܝܼ̈ܠܹܐ ܕܕܲܗܒ݂ܵܐ: 2 ܒܝܼܕܲܥܝܵܐ ܝܘܸܢ ܠܦܘܼܠܚܵܢܹ̈ܐ ܕܝܼܘܼܟ݂: ܘܠܓ̰ܵܦܵܐ ܘܠܚܡܵܠܬܵܐ ܕܝܼܘܼܟ݂: ܘܕܠܹܐ ܡܵܨܸܬ ܠܩܵܒ݁ܘܿܠܹܐ ܠܒ݁ܝܼܫܹ̈ܐ: ܘܓ̰ܘܼܪܸܒܠܘܼܟ݂ ܠܐܵܢܝܼ ܕܒܓܵܢܵܝ ܒܹܐܡܵܪܵܐ ܝܢܵܐ ܕܫܠܝܼܚܹ̈ܐ ܝܢܵܐ: ܘܠܹܐ ܝܢܵܐ: ܘܡܘܼܫ̄ܟ̰ܚܵܝܠܘܼܟ݂ ܕܵܓܵܠܹ̈ܐ. 3 ܘܚܡܵܠܬܵܐ ܐܝܼܬ ܠܘܼܟ݂ ܘܩܘܼܒܸܠܘܼܟ݂ ܕܫܸܡܝܼ: ܘܠܵܐ ܣܩܸܕܠܘܼܟ݂. 4 ܐܸܠܵܐ ܐܝܼܬ ܠܝܼ ܡܸܢܕܝܼ ܥܲܠܘܼܟ݂: ܕܚܘܼܒܵܐ ܕܝܼܘܼܟ݂: ܗ̇ܘ ܩܵܕ݇ܡܵܝܵܐ: ܫܩܸܠܘܼܟ݂. 5 ܒܲܣ ܕܟ݂ܘܿܪ ܡ̣ܢ ܐܲܝܟܵܐ ܢܦܸܠܘܼܟ݂: ܘܬܵܘܸܒ: ܘܠܦܘܼܠܚܵܢܹ̈ܐ ܩܵܕ݇ܡܵܝܹ̈ܐ ܥܒ݂ܘܿܕ. ܘܐܸܢ ܠܵܐ: ܒܹܐܬܵܝܵܐ ܝܘܸܢ ܥܲܠܘܼܟ݂: ܘܒܸܬ ܡܲܫܥܸܫܸܢ ܩܲܢܕܝܼܠܘܼܟ݂ ܡ̣ܢ ܕܘܼܟܬܹܗ: ܐܸܢ ܠܵܐ ܬܲܘܸܒܸܬ. 6 ܐܸܠܵܐ ܐܵܗܵܐ ܐܝܼܬ ܠܘܼܟ݂: ܕܒܸܣܢܵܝܵܐ ܝܘܸܬ ܠܦܘܼܠܚܵܢܹ̈ܐ ܕܢܝܼܩܠܝܼ̈ܛܘܿ: ܠܐܲܢܹܐ ܕܐܘܼܦ ܐܵܢܵܐ ܒܸܣܢܵܝܵܐ ܝܘܸܢ. 7 ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܐ ܠܥܹܕܵܬܹ̈ܐ. ܠܗ̇ܘ ܕܓ݂ܵܠܸܒ: ܒܸܬ ܝܵܗ݇ܒ݂ܸܢ ܐܸܠܹܐ ܠܹܐܟ݂ܵܠܵܐ ܡ̣ܢ ܐܝܼܠܵܢܵܐ ܕܚܲܝܹ̈ܐ: ܗ̇ܘ ܕܝܼܠܹܐ ܓܵܘ ܦܲܪܕܲܝܣܵܐ ܕܐܲܠܵܗܵܐ.

8 ܘܠܡܲܠܲܐܟ݂ܵܐ ܕܥܹܕܬܵܐ ܕܓܵܘ ܣܡܘܿܪܢܵܐ: ܟܬܘܿܒ݂: ܐܲܢܹܐ ܒܹܐܡܵܪܵܐ ܝܠܹܐ ܗ̇ܘ ܩܵܕ݇ܡܵܝܵܐ ܘܗ̇ܘ ܐ݇ܚܵܪܵܝܵܐ: ܗ̇ܘ ܕܡܝܼܬܵܐ ܗ݇ܘܵܐ ܘܚܹܝܠܹܐ: 9 ܒܝܼܕܲܥܝܵܐ ܝܘܸܢ ܠܐܘܼܠܨܵܢܵܐ ܘܠܡܸܣܟܹܢܘܼܬܵܐ ܕܝܼܘܼܟ݂: ܐܝܼܢܵܐ ܕܵܘܠܲܬܡܲܢܕ ܝܼܘܸܬ ـ: ܘܠܓܘܼܕܵܦܵܐ ܕܐܵܢܝܼ ܕܒܹܐܡܵܪܵܐ ܝܢܵܐ ܒܵܗ݇ܣ ܓܵܢܵܝ ܕܝܗ݇ܘܼܕܵܝܹ̈ܐ ܝܢܵܐ: ܘܠܹܐ ܝܢܵܐ: ܐܸܠܵܐ ܟܢܘܼܫܬܵܐ ܕܣܵܛܵܢܵܐ ܝܢܵܐ. 10 ܙܵܕܥܸܬ ܡ̣ܢ ܕܐܲܢܹܐ ܕܗܕܝܼܪܵܐ ܝܘܸܬ ܠܩܵܒܘܿܠܹܐ ܚܲܫܵܐ. ܗܵܐ: ܗܕܝܼܪܵܐ ܝܠܹܐ ܐܵܟ݂ܹܠܩܲܪܨܵܐ ܠܸܕܪܵܝܵܐ ܡܸܢܵܘܟ݂ܘܿܢ ܓܵܘ ܒܹܝܬ ܢܛܘܼܪܬܵܐ: ܕܦܵܝܫܝܼܬܘܿܢ ܓ̰ܘܼܪܒܹܐ: ܘܒܸܬ ܗܵܘܹܐ ܠܵܘܟ݂ܘܿܢ ܐܘܼܠܨܵܢܵܐ ܥܸܣܪܵܐ ܝܘܿܡܵܢܹ̈ܐ. ܗ݇ܘܝܼ ܡܗܘܼܡܢܵܐ ܗܲܠ ܡܵܘܬܵܐ: ܘܒܸܬ ܝܵܗ݇ܒ݂ܸܢܘܼܟ݂ ܬܵܐܓ̰ ܕܚܲܝܹ̈ܐ. 11 ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܐ ܠܥܹܕܵܬܹ̈ܐ: ܗ̇ܘ ܕܓ݂ܵܠܸܒ ܠܹܐ ܦܵܝܸܫ ܙܠܝܼܡܵܐ ܡ̣ܢ ܕܗ̇ܘ ܡܵܘܬܵܐ ܕܬܪܲܝ.

12 ܘܠܡܲܠܲܐܟ݂ܵܐ ܕܥܹܕܬܵܐ ܕܓܵܘ ܦܲܪܓܵܡܘܿܣ: ܟܬܘܿܒ݂: ܐܲܢܹܐ ܒܹܐܡܵܪܵܐ ܝܠܹܐ ܗ̇ܘ ܕܐܝܼܬ ܠܹܗ ܣܲܝܦܵܐ ܗ̇ܘ ܚܵܪܝܼܦܵܐ ܕܬܪܲܝ ܦܘܼܡܵܢܹ̈ܐ: 13 ܒܝܼܕܲܥܝܵܐ ܝܘܸܢ ܐܲܝܟܵܐ ܟܹܐ ܥܵܡܪܸܬ: ܐܲܝܟܵܐ ܕܝܼܠܹܐ ܬܪܘܿܢܘܿܣ ܕܣܵܛܵܢܵܐ: ܘܕܒ݂ܝܼܩܵܐ ܝܘܸܬ ܒܫܸܡܵܐ ܕܝܼܝܼ: ܘܠܵܐ ܣܪܸܒ݂ܠܘܼܟ݂ ܠܗܲܝܡܵܢܘܼܬܝܼ ܒܐܲܢܹܐ ܝܘܿܡܵܢܹ̈ܐ ܕܒܝܼܵܝ ܗ݇ܘܵܐ ܗ̇ܘ ܐܲܢܛܝܼܦܘܿܣ ܣܵܗܕܵܐ ܕܝܼܝܼ: ܗ̇ܘ ܡܗܘܼܡܢܵܐ ܕܝܼܝܼ: ܗ̇ܘ ܕܦܸܫܠܹܐ ܩܛܝܼܠܵܐ ܠܟܸܣܠܵܘܟ݂ܘܿܢ: ܐܲܝܟܵܐ ܕܟܹܐ ܥܵܡܸܪ ܣܵܛܵܢܵܐ. 14 ܐܸܠܵܐ ܐܝܼܬ ܠܝܼ ܥܲܠܘܼܟ݂ ܚܲܟ̰ܵܐ. ܣܵܒܵܒ ܕܐܝܼܬ ܠܘܼܟ݂ ܬܵܡܵܐ ܐܵܢܝܼ ܕܝܼܢܵܐ ܕܒ݂ܝܼܩܹܐ ܠܡܲܠܦܵܢܘܼܬܵܐ ܕܒܸܠܥܵܡ: ܕܡܘܼܠܸܦܠܹܐ ܠܒܵܠܵܩ ܠܸܕܪܵܝܵܐ ܬܘܼܪܩܵܠܵܐ ܩܵܕ݇ܡ ܒܢܲܝ̈ ܝܼܣܪܵܝܹܠ: ܠܹܐܟ݂ܵܠܵܐ ܕܸܒ݂ܚܹ̈ܐ ܕܨܲܢܲܡܹ̈ܐ: ܘܠܸܙܢܵܝܵܐ. 15 ܗܲܕܟ݂ܵܐ ܐܝܼܬ ܠܘܼܟ݂ ܐܘܼܦ ܐܲܢ݇ܬ ܐܵܢܝܼ ܕܝܼܢܵܐ ܕܒ݂ܝܼܩܹܐ ܠܡܲܠܦܵܢܘܼܬܵܐ ܕܢܝܼܩܠܝܼ̈ܛܘܿ ܗܲܪ ܒܐܵܗܵܐ ܬܵܗܵܪ. 16 ܒܲܣ ܬܲܘܸܒ: ܘܐܸܢ ܠܵܐ: ܒܸܬ ܐܵܬܸܢ ܥܲܠܘܼܟ݂ ܓ̰ܲܠܕܹܐ: ܘܒܸܬ ܦܵܠܫܸܢ ܥܲܡܵܝ ܒܣܲܝܦܵܐ ܕܦܘܼܡܝܼ. 17 ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܐ ܠܥܹܕܵܬܹ̈ܐ. ܠܗ̇ܘ ܕܓ݂ܵܠܸܒ: ܒܸܬ ܝܵܗ݇ܒ݂ܸܢܹܗ ܡ̣ܢ ܡܲܢܢܵܐ ܗ̇ܘ ܕܝܼܠܹܐ ܛܸܫܝܵܐ: ܘܒܸܬ ܝܵܗ݇ܒ݂ܸܢܹܗ ܟܹܐܦܵܐ ܚܘܵܪܵܐ: ܘܥܲܠ ܟܹܐܦܵܐ ܫܸܡܵܐ ܚܵܕ݇ܬܵܐ ܟܬܝܼܒ݂ܵܐ: ܗ̇ܘ ܕܐ݇ܢܵܫܵܐ ܠܹܐ ܝܲܕܸܥ ܫܒ݂ܘܿܩ ܡ̣ܢ ܗ̇ܘ ܕܫܵܩܸܠ.

18 ܘܠܡܲܠܲܐܟ݂ܵܐ ܕܥܹܕܬܵܐ ܕܓܵܘ ܬܹܐܘܿܛܝܼܪܵܐ: ܟܬܘܿܒ݂: ܐܲܢܹܐ ܒܹܐܡܵܪܵܐ ܝܠܹܐ ܒܪܘܼܢܹܗ ܕܐܲܠܵܗܵܐ: ܗ̇ܘ ܕܐܝܼܬ ܠܹܗ ܥܲܝܢܹ̈ܐ ܐܲܝܟ݂ ܠܵܗܵܐ ܕܢܘܼܪܵܐ: ܘܐܲܩܠܘܼ̈ܗܝ ܟܹܐ ܕܵܡܝܼ ܠܢܚܵܫܵܐ ܡܘܼܒܪܸܩܵܐ: 19 ܒܝܼܕܲܥܝܵܐ ܝܘܸܢ ܠܦܘܼܠܚܵܢܹ̈ܐ ܕܝܼܘܼܟ݂: ܘܠܚܘܼܒܵܐ ܘܠܗܲܝܡܵܢܘܼܬܵܐ ܘܠܚܸܠܡܲܬ ܘܐܘܼܦ ܠܚܡܵܠܬܵܐ ܕܝܼܘܼܟ݂: ܕܦܘܼܠܚܵܢܘܼ̈ܟ݂ ܐܚܵܪ̈ܵܝܹܐ ܪܵܒܵܐ ܝܢܵܐ ܡ̣ܢ ܩܵܕ݇ܡܵܝܹ̈ܐ. 20 ܐܸܠܵܐ ܐܝܼܬ ܠܝܼ (ܡܸܢܕܝܼ) ܥܲܠܘܼܟ݂: ܣܵܒܵܒ ܕܫܒ݂ܸܩܠܘܼܟ݂ ܠܗ̇ܝ ܒܲܟ݂ܬܵܐ ܐܝܼܙܒܸܠ: ܗ̇ܝ ܕܐܵܡܪܵܐ ܒܵܗ݇ܣ ܕܓܵܢܘܼܗ̇ ܢܒ݂ܝܼܬܵܐ: ܘܟܹܐ ܡܵܠܦܵܐ ܘܡܲܚܠܸܛܵܐ ܠܪܹ̈ܓܵܘܵܬܹܐ ܕܝܼܲܝ ܠܸܙܢܵܝܵܐ ܘܠܹܐܟ݂ܵܠܵܐ ܕܸܒ݂ܚܹ̈ܐ ܕܨܵܢܲܡܹ̈ܐ. 21 ܘܝܸܗ݇ܒ݂ܸܠܝܼ ܐܸܠܵܗ̇ ܙܲܒ݂ܢܵܐ ܕܬܲܘܸܒܵܐ ܗ݇ܘܵܐ: ܘܠܹܐ ܝܠܵܐ ܒܸܒܲܥܝܵܐ ܠܬܲܘܘܼܒܹܐ ܡ̣ܢ ܙܵܢܝܘܼܬܘܼܗ̇. 22 ܗܵܐ: ܒܸܬ ܕܵܪܸܢܵܗ̇ ܒܫܘܝܼܬܵܐ: ܘܠܵܐܢܝܼ ܕܥܵܒ݂ܕܝܼ ܩܲܗܒܘܼܬܵܐ ܥܲܡܵܗ̇: ܒܐܘܼܠܨܵܢܵܐ ܓܘܼܪܵܐ: ܐܸܢ ܠܵܐ ܬܲܘܸܒܝܼ ܡ̣ܢ ܦܘܼܠܚܵܢܘܼ̈ܗ̇: 23 ܘܠܒܢܘܼܢܘܼ̈ܗ̇ܒܸܬ ܩܵܛܠܸܢ ܒܡܵܘܬܵܐ: ܘܒܸܬ ܝܲܕܥܝܼ ܟܠܵܝ ܥܹܕܵܬܹ̈ܐ ܕܐܵܢܵܐ ܝܘܸܢ ܬܲܦ̮ܬܸܫܵܢܵܐ ܕܟܘܼܠܝܵܬܹ̈ܐ ܘܠܸܒܵܘܵܬܹ̈ܐ. ܘܒܸܬ ܝܵܗ݇ܒ݂ܸܢܵܘܟ݂ܘܿܢ ܠܟܠ ܚܵܕ݇ ܐܲܝܟ݂ ܦܘܼܠܚܵܢܵܘ̈ܟ݂ܘܿܢ. 24 ܐܝܼܢܵܐ ܐܸܠܵܘܟ݂ܘܿܢ ܒܹܐܡܵܪܵܐ ܝܘܸܢ: ܘܠܵܐܢܝܼ ܐܚܹܪ̈݇ܢܹܐ ܕܓܵܘ ܬܹܐܘܿܛܝܼܪܵܐ: ܟܠܵܝ ܐܵܢܝܼ ܕܠܲܝܬ ܠܗ݇ܘܿܢ ܐܵܗܵܐ ܡܲܠܦܵܢܘܼܬܵܐ: ܘܐܵܢܝܼ ܕܠܵܐ ܝܕܸܥܠܘܿܢ ܫܘܼܠܹ̈ܐ ܥܵܡܘܿܩܹ̈ܐ ܕܣܵܛܵܢܵܐ: ܐܲܝܟ݂ ܕܒܹܐܡܵܪܵܐ ܝܢܵܐ: ܝܘܼܩܪܵܐ ܐܚܹܪ݇ܢܵܐ ܠܹܐ ܕܵܪܸܢ ܥܲܠܵܘܟ݂ܘܿܢ. 25 ܐܝܼܢܵܐ ܗ̇ܘ ܕܐܝܼܬ ܠܵܘܟ݂ܘܿܢ: ܕܒ݂ܘܿܩܘܿܢ ܗܲܠ ܕܐܵܬܸܢ ܐܵܢܵܐ. 26 ܘܗ̇ܘ ܕܓ݂ܵܠܸܒ: ܘܗ̇ܘ ܕܢܵܛܸܪ ܗܲܠ ܚܲܪܬܵܐ ܠܦܘܼܠܚܵܢܹ̈ܐ ܕܝܼܝܼ: ܒܸܬ ܝܵܗ݇ܒ݂ܸܢ ܐܸܠܹܗ ܗܘܼܟܡܵܐ ܥܲܠ ܛܵܝܸܦܹ̈ܐ: 27 ܘܒܸܬ ܡܲܪܥܹܐ ܠܗ݇ܘܿܢ ܒܚܘܼܛܪܵܐ ܕܦܪܸܙܠܵܐ: ܘܐܲܝܟ݂ ܡܵܐܢܵܐ ܕܦܲܚܪܵܐ ܒܸܬ ܦܵܝܫܝܼ ܛܘܼܚܛܸܚܹܐ: ܐܲܝܟ݂ ܕܐܘܼܦ ܐܵܢܵܐ ܩܘܼܒܸܠܝܼ ܡ̣ܢ ܒܵܒܝܼ. 28 ܘܒܸܬ ܝܵܗ݇ܒ݂ܸܢ ܐܸܠܹܗ ܠܟܵܘܟ݂ܒ݂ܵܐ ܕܨܲܦܪܵܐ. 29 ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܐ ܠܥܹܕܵܬܹ̈ܐ.

ܩܦܠܐܘܢ: ܓ

1 ܘܠܡܲܠܲܐܟ݂ܵܐ ܕܥܹܕܬܵܐ ܕܓܵܘ ܣܲܪܕܝܼܣ: ܟܬܘܿܒ݂: ܐܲܢܹܐ ܒܹܐܡܵܪܵܐ ܝܠܹܐ ܗ̇ܘ ܕܐܝܼܬ ܠܹܗ ܫܲܒ݂ܲܥ ܪ̈ܘܼܚܹܐ ܕܐܲܠܵܗܵܐ: ܘܐܵܢܝܼ ܫܲܒ݂ܥܑܵ ܟܵܘܟ݂ܒ݂ܹ̈ܐ: ܒܝܼܕܲܥܝܵܐ ܝܘܸܢ ܠܦܘܼܠܚܵܢܘܼܟ݂: ܕܫܸܡܵܐ ܐܝܼܬ ܠܘܼܟ݂ ܕܚܵܝܵܐ ܝܘܸܬ: ܘܡܝܼܬܵܐ ܝܘܸܬ. 2 ܥܒ݂ܘܿܕ ܫܵܗܲܪܬܵܐ: ܘܢܛܘܿܪ ܠܐܲܢܹܐ ܡܸܢܕܝܵܢܹ̈ܐ ܐܚܹܪ̈݇ܢܹܐ: ܐܵܢܝܼ ܕܗܵܙܸܪ ܝܼܗ݇ܘܵܘ ܠܸܡܝܵܬܵܐ: ܣܵܒܵܒ ܠܵܐ ܡܘܼܫ̄ܟ̰ܸܚܠܝܼ ܠܦܘܼܠܚܵܢܘܼ̈ܟ݂ ܕܬܘܼܡܸܡܹܐ ܩܵܕ݇ܡ ܐܲܠܵܗܵܐ ܕܝܼܝܼ. 3 ܒܲܣ ܕܟ݂ܘܿܪ ܕܐܵܟ݂ܝܼ ܫܩܸܠܘܼܟ݂ ܘܫܡܸܥܠܘܼܟ݂: ܘܢܛܘܿܪ ܘܬܲܘܸܒ. ܘܐܸܢ ܗܲܕܟ݂ܵܐ ܠܵܐ ܥܵܒ݂ܕܸܬ ܫܲܗܲܪܬܵܐ: ܒܸܬ ܐܵܬܸܢ ܥܲܠܘܼܟ݂ ܐܲܝܟ݂ ܓܹܢܵܒ݂ܵܐ: ܘܠܹܐ ܝܲܕܥܸܬ ܐܲܝܢܝܼ ܣܵܥܲܬ ܒܸܬ ܐܵܬܸܢ ܥܲܠܘܼܟ݂. 4 ܐܸܠܵܐ ܐܝܼܬ ܠܘܼܟ݂ ܚܲܟ̰ܵܐ ܫܸܡܵܢܹ̈ܐ ܐܘܼܦ ܓܵܘ ܣܲܪܕܝܼܣ: ܐܵܢܝܼ ܕܠܵܐ ܛܘܼܡܐܸܢܘܿܢ ܠܠܒ݂ܘܼܫܵܝ̈: ܘܒܸܬ ܚܵܕܪܝܼ ܥܲܡܝܼ ܒܚܘܵܪܹ̈ܐ: ܣܵܒܵܒ ܕܚܫܝܼܚܹܐ ܝܢܵܐ. 5 ܗ̇ܘ ܕܓ݂ܵܠܸܒ ܗܲܕܟ݂ܵܐ ܒܸܬ ܦܵܝܸܫ ܡܘܼܠܒ݂ܸܫܵܐ ܚܘܵܪܹ̈ܐ: ܘܠܹܐ ܓܵܪܕܸܢ ܫܸܡܹܗ ܡ̣ܢ ܕܗ̇ܘ ܟܬܵܒ݂ܵܐ ܕܚܲܝܹ̈ܐ: ܘܒܸܬ ܡܵܘܕܸܢ ܒܫܸܡܹܗ ܩܵܕ݇ܡ ܒܵܒܝܼ: ܘܩܵܕ݇ܡ ܡܲܠܲܐܟ݂ܘܼ̈ܗܝ. 6 ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܐ ܠܥܹܕܵܬܹ̈ܐ.

7 ܘܠܡܲܠܲܐܟ݂ܵܐ ܕܥܹܕܬܵܐ ܕܓܵܘ ܦܝܼܠܕܲܠܦܝܼܵܐ: ܟܬܘܿܒ݂: ܐܲܢܹܐ ܒܹܐܡܵܪܵܐ ܝܠܹܐ: ܗ̇ܘ ܩܲܕܝܼܫܵܐ: ܗ̇ܘ ܫܲܪܝܼܪܵܐ: ܗ̇ܘ ܕܐܝܼܬ ܠܹܗ ܩܕܝܼܠܵܐ ܕܕܵܘܝܼܕ: ܗ̇ܘ ܕܟܹܐ ܦܵܬܸܚ ܘܐ݇ܢܵܫܵܐ ܠܹܐ ܕܵܒ݂ܸܪ: ܘܟܹܐ ܕܵܒ݂ܸܪ ܘܐ݇ܢܵܫܵܐ ܠܹܐ ܦܵܬܸܚ: 8 ܒܝܼܕܲܥܝܵܐ ܝܘܸܢ ܠܦܘܼܠܚܵܢܘܼ̈ܟ݂ ـ ܗܵܐ: ܝܸܗܒ݂ܸܠܝܼ ܩܵܕ݇ܡܘܼܟ݂ ܬܲܪܥܵܐ ܦܬܝܼܚܵܐ: ܗ̇ܘ ܕܐ݇ܢܵܫܵܐ ܠܹܐ ܡܵܨܹܐ ܠܸܕܒ݂ܵܪܘܼܗܝ ـ: ܕܚܲܟ̰ܵܐ ܚܲܝܠܵܐ ܐܝܼܬ ܠܘܼܟ݂: ܘܢܛܸܪܘܼܟ݂ ܠܗܹܡܸܙܡܵܢܝܼ: ܘܠܵܐ ܣܪܸܒ݂ܠܘܼܟ݂ ܠܫܸܡܝܼ. 9 ܗܵܐ: ܒܝܼܗ݇ܒ݂ܵܐ ܝܘܸܢ ܡ̣ܢ ܟܢܘܼܫܬܵܐ ܕܣܵܛܵܢܵܐ ܡܐܵܢܝܼ ܕܒܹܐܡܵܪܵܐ ܝܢܵܐ ܒܵܗ݇ܣ ܓܵܢܵܝ ܕܝܗ݇ܘܼܕܵܝܹ̈ܐ ܝܢܵܐ: ܘܠܹܐ ܝܢܵܐ: ܐܸܠܵܐ ܕܵܓܘܿܠܹܐ ܝܢܵܐ: ܗܵܐ: ܒܸܬ ܥܵܒ݂ܕܸܢܘܿܢ ܕܐܵܬܝܼ ܘܣܵܓ݂ܕܝܼ ܩܵܕ݇ܡ ܐܲܩܠܘܼ̈ܟ݂: ܘܝܲܕܥܝܼ ܕܐܵܢܵܐ ܩܲܡ ܡܲܚܸܒܸܢܘܼܟ݂. 10 ܣܵܒܵܒ ܕܢܛܸܪܘܼܟ݂ ܠܗܹܡܸܙܡܵܢ ܕܚܡܵܠܬܝܼ: ܐܘܼܦ ܐܵܢܵܐ ܒܸܬ ܢܵܛܪܸܢܘܼܟ݂ ܡ̣ܢ ܣܵܥܲܬ ܕܓ̰ܘܼܪܵܒܵܐ ܕܝܼܠܹܐ ܗܕܝܼܪܵܐ ܠܹܐܬܵܝܵܐ ܥܲܠ ܟܠܵܗ̇ ܒܪܝܼܬܵܐ: ܠܓ̰ܵܪܘܿܒܹܐ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ. 11 ܗܵܐ: ܒܹܐܬܵܝܵܐ ܝܘܸܢ ܓ̰ܲܠܕܹܐ. ܕܒ݂ܘܿܩ ܗ̇ܘ ܡܸܢܕܝܼ ܕܐܝܼܬ ܠܘܼܟ݂: ܕܐ݇ܢܵܫܵܐ ܠܵܐ ܫܵܩܸܠ ܬܵܐܓ̰ܘܼܟ݂. 12 ܗ̇ܘ ܕܓ݂ܵܠܸܒ: ܒܸܬ ܥܵܒ݂ܕܸܢܹܗ ܫܛܘܼܢܵܐ ܒܗܲܝܟܠܵܐ ܕܐܲܠܵܗܝܼ: ܘܡܸܕܪܹܐ ܠܹܐ ܦܵܠܸܛ ܠܒ݂ܲܕܲܪ: ܘܒܸܬ ܟܵܬܒ݂ܸܢ ܥܲܠܘܼܗܝ ܫܸܡܵܐ ܕܐܲܠܵܗܝܼ: ܘܫܸܡܵܐ ܘܡܕܝܼܢ݇ܬܵܐ ܕܐܲܠܵܗܝܼ: ܐܘܿܪܸܫܠܸܡ ܚܲܕܬܵܐ: ܗܚܝ ܕܒܸܨܠܵܝܵܐ ܝܠܵܐ ܡ̣ܢ ܫܡܲܝܵܐ ܡ̣ܢ ܐܲܠܵܗܝܼ: ܘܠܫܸܡܵܐ ܕܝܼܝܼ ܗ̇ܘ ܚܵܕ݇ܬܵܐ. 13 ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܐ ܠܥܹܕܵܬܹ̈ܐ.

14 ܘܠܡܲܠܲܐܟ݂ܵܐ ܕܥܹܕܬܵܐ ܕܓܵܘ ܠܵܕܝܼܩܝܼܵܐ ܟܬܘܿܒ݂: ܐܲܢܹܐ ܒܹܐܡܵܪܵܐ ܝܠܹܐ ܗ̇ܘ ܐܵܡܹܝܢ: ܗ̇ܘ ܣܵܗܕܵܐ ܡܗܘܼܡܢܵܐ ܘܫܲܪܝܼܪܵܐ: ܗ̇ܘ ܫܘܼܪܵܝܵܐ ܕܒܪܝܼܬܵܐ ܕܐܲܠܵܗܵܐ: 15 ܒܝܼܕܲܥܝܵܐ ܝܘܸܢ ܠܦܘܼܠܚܵܢܘܼ̈ܟ݂: ܕܠܵܐ ܚܲܝܡܵܐ ܝܘܸܬ ܘܠܵܐ ܩܲܝܪܵܐ. ܛܘܼܒ݂ܵܐ ܕܗܵܘܸܬ ܗ݇ܘܵܐ ܩܲܝܪܵܐ ܝܲܢ ܚܲܝܡܵܐ. 16 ܒܲܣ ܣܵܒܵܒ ܕܦܲܫܘܼܥܵܐ ܝܘܸܬ: ܘܠܵܐ ܚܲܝܡܵܐ ܘܠܵܐ ܩܲܝܪܵܐ: ܒܸـ ܓܵܣܸܢܘܼܟ݂ ܡ̣ܢ ܦܘܼܡܝܼ. 17 ܣܵܒܵܒ ܕܒܹܐܡܵܪܵܐ ܝܘܸܬ: ܕܵܘܠܲܬܡܲܢܕ ܝܼܘܸܢ ܘܙܝܼܕܵܐ ܝܘܸܢ: ܘܥܲܠ ܡܸܢܕܝܼ ܣܘܼܢܩܵܢܵܐ ܠܲܝܬ ܠܝܼ: ܘܠܹܐ ܝܘܸܬ ܒܝܼܕܲܥܝܵܐ ܕܐܲܢ݇ܬ ܝܼܘܸܬ ܙܲܒܘܼܢ: ܘܫܲܩܝܼ: ܘܡܸܣܟܹܢܵܐ: ܘܣܸܡܝܵܐ: ܘܫܘܼܠܚܵܝܵܐ: 18 ܒܸܥܒ݂ܵܕܵܐ ܝܘܸܢ ܪܵܐܝܝܼ ܐܸܠܘܼܟ݂ ܠܸܙܒ݂ܵܢܵܐ ܡܸܢܝܼ ܕܲܗܒ݂ܵܐ ܕܝܼܠܹܐ ܨܘܼܪܸܦܵܐ ܡ̣ܢ ܢܘܼܪܵܐ: ܕܗܵܘܸܬ ܕܵܘܠܲܬܡܲܢܕ: ܘܠܒ݂ܘܼܫܹ̈ܐ ܚܘܵܪܹ̈ܐ: ܕܦܵܝܫܸܬ ܡܘܼܠܒ݂ܸܫܵܐ: ܘܠܵܐ ܦܵܝܫܵܐ ܚܙܝܼܬܵܐ ܢܚܸܦܬܵܐ ܕܫܘܼܠܚܵܝܘܼܬܘܼܟ݂: ܘܡܲܠܗܵܡ ܠܸܫܝܵܦܵܐ ܥܲܠ ܥܲܝܢܘܼܟ݂: ܕܗܵܘܸܬ ܒܸܚܙܵܝܵܐ. 19 ܐܵܢܵܐ ܠܟܠܵܝ ܕܐܵܢܝܼ ܕܡܲܚܸܒܸܢ ܟܹܐ ܡܲܢܟ݂ܸܣܸܢ: ܘܟܹܐ ܬܲܥܠܡܸܢ. ܒܲܣ ܐܘܘܿܪ ܒܩܲܝܪܲܬ: ܘܬܲܘܸܒ. 20 ܗܵܐ: ܒܸܟܠܵܝܵܐ ܝܘܸܢ ܩܵܕ݇ܡ ܬܲܪܥܵܐ: ܘܬܲܩܬܘܼܩܹܐ ܝܘܸܢ. ܐܸܢ ܐ݇ܢܵܫܵܐ ܫܲܡܸܥ ܠܩܵܠܝܼ: ܘܦܵܬܸܚ ܬܲܪܥܵܐ: ܒܸܬ ܐܵܘܕܸܢ ܠܟܸܣܠܹܗ: ܘܒܸܬ ܐܵܟ݂ܠܸܢ ܚܵܕܲܡܫܵܐ ܥܲܡܹܗ: ܘܗ̇ܘ ܥܲܡܝܼ. 21 ܗ̇ܘ ܕܓ݂ܵܠܸܒ݁ ܒܸܬ ܝܵܗ݇ܒ݂ܸܢܹܗ ܠܸܬܝܵܒ݂ܵܐ ܥܲܡܝܼ ܥܲܠ ܬܪܘܿܢܘܿܣ: ܕܵܐܟ݂ܝܼ ܕܐܘܼܦ ܐܵܢܵܐ ܓ݂ܠܸܒܠܝܼ: ܘܝܬܸܒ݂ܠܝܼ ܥܲܡ ܒܵܒܝܼ ܥܲܠ ܬܪܘܿܢܘܿܣܹܗ. 22 ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܐ ܠܥܹܕܵܬܹ̈ܐ.

ܩܦܠܐܘܢ: ܕ

1 ܒܵܬ݇ܪ ܐܲܢܹܐ ܚܙܹܠܝܼ: ܘܗܵܐ: ܬܲܪܥܵܐ ܦܬܝܼܚܵܐ ܒܫܡܲܝܵܐ: ܘܩܵܠܵܐ ܩܵܕ݇ܡܵܝܵܐ ܗ̇ܘ ܕܫܡܸܥܠܝܼ: ܐܲܝܟ݂ ܢܵܦܝܼܪܵܐ ܕܗܲܡܙܘܼܡܹܐ ܗ݇ܘܵܐ ܥܲܡܝܼ: ܐܵܡܸܪ ܗ݇ܘܵܐ: ܐܣܘܿܩ ܠܲܐܟ݂ܵܐ: ܘܒܸܬ ܡܲܚܙܸܢܘܼܟ݂ ܐܵܢܝܼ ܡܸܢܕܝܼܵܢܹ̈ܐܕܝܼܢܵܐ ܘܵܓ̰ܸܒ ܠܸܗܘܵܝܵܐ ܒܵܬ݇ܪ ܐܲܢܹܐ. 2 ܕܲܪܣܵܥܲܬ ܗ݇ܘܹܠܝܼ ܒܪܘܼܚܵܐ: ܘܗܵܐ: ܬܪܘܿܢܘܿܣ ܡܘܼܬܒ݂ܵܐ ܗ݇ܘܵܐ ܒܫܡܲܝܵܐ: ܘܥܲܠ ܬܪܘܿܢܘܿܣ ܚܵܕ݇ ܝܬܝܼܒ݂ܵܐ ܗ݇ܘܵܐ. 3 ܘܗ̇ܘ ܕܝܬܝܼܒ݂ܵܐ ܗ݇ܘܵܐ ܒܸܕܡܵܝܵܐ ܗ݇ܘܵܐ ܠܚܸܙܘܵܐ ܕܟܹܐܦܵܐ ܕܐܝܼܵܣܦܘܿܢ ܘܕܣܲܪܕܝܼܘܿܢ: ܘܩܸܫܬܵܐ ܕܥܢܵܢܹ̈ܐ ܡ̣ܢ ܚܵܕܸܪ̈ܘܵܢܹܐ ܕܬܪܘܿܢܘܿܣ ܒܕܡܘܼܬܵܐ ܠܚܙܵܝܬܵܐ ܕܙܸܡܪܘܼܕ. 4 ܡ̣ܢ ܚܵܕܸܪ̈ܘܵܢܹܐ ܕܬܪܘܿܢܘܿܣ: ܥܸܣܪܝܼ ܘܐܲܪܒܥܵܐ ܬܪ̈ܘܿܢܘܿܣܹܐ: ܘܥܲܠ ܐܵܢܝܼ ܬܪ̈ܘܿܢܘܿܣܹܐ ܚܙܹܠܝܼ ܥܸܣܪܝܼ ܘܐܲܪܒܥܵܐ ܚܘܵܪ̈ܕܸܩܢܹܐ ܝܬܝܼܒ݂ܹܐ: ܡܘܼܠܒܸܫܹܐ ܒܠܒ݂ܘܼܫܹ̈ܐ ܚܘܵܪܹ̈ܐ: ܘܐܝܼܬ ܗ݇ܘܵܘ ܠܗ݇ܘܿܢ ܥܲܠ ܪܹ̈ܫܵܝ ܬܵܐܓ̰ܹ̈ܐ ܕܕܲܗܒ݂ܵܐ. 5 ܘܡ̣ܢ ܬܪܘܿܢܘܿܣ ܒܸܦܠܵܛܵܐ ܗ݇ܘܵܘ ܒܸܪ̈ܩܹܐ ܘܩܵܠܹ̈ܐ ܘܪ̈ܲܥܡܹܐ: ܘܫܲܒ݂ܥܵܐ ܠܲܡܦܹܝܕܹ̈ܐ ܕܢܘܼܪܵܐ ܒܸܠܗܵܝܵܐ ܩܵܕ݇ܡ ܬܪܘܿܢܘܿܣ ܕܝܼܹܗ: ܐܲܢܹܐ ܕܝܼܢܵܐ ܫܲܒ݂ܲܥ ܪ̈ܘܼܚܹܐ ܕܐܲܠܵܗܵܐ. 6 ܘܩܵܕ݇ܡ ܬܪܘܿܢܘܿܣ ܝܵܡܵܐ ܕܫܘܼܫܵܐ ܕܕܵܡܹܐ ܗ݇ܘܵܐ ܠܩܪܸܣܛܸܠܘܿܣ: ܘܒܒܹܝܦܲܠܓܵܐ ܕܬܪܘܿܢܘܿܣ: ܘܚܵܕܸܪ̈ܘܵܢܹܐ ܕܬܪܘܿܢܘܿܣ: ܐܲܪܒܲܥ ܚܲܝܘ̈ܵܬܵܐ ܕܡܸܠܝܹܐ ܡ̣ܢ ܥܲܝܢܹ̈ܐ ܡ̣ܢ ܩܵܕ݇ܡܵܝ ܘܡ̣ܢ ܒܵܬ݇ܪܵܝ. 7 ܘܚܲܝܘܬܵܐ ܩܵܕ݇ܡܵܝܬܵܐ ܟܹܐ ܕܵܡܝܵܐ ܠܐܲܪܝܵܐ: ܘܚܲܝܘܬܵܐ ܕܬܲܪ̈ܬܹܝ ܟܹܐ ܕܵܡܝܵܐ ܠܡܘܼܓ̰ܵܐ: ܘܚܲܝܘܬܵܐ ܕܬܠܵܬ݇ ܐܝܼܬ ܠܵܗ̇ ܦܵܬܵܐ ܐܲܝܟ݂ ܒܲܪܢܵܫܵܐ: ܘܚܲܝܘܬܵܐ ܕܐܲܪܒܲܥ ܟܹܐ ܕܵܡܝܵܐ ܠܢܸܫܪܵܐ ܕܦܵܪܸܚ. 8 ܘܐܲܪܒܲܥܢܬܵܝ ܚܲܝܘ̈ܵܬܵܐ: ܟܠ ܚܕܵܐ ܚܕܵܐ ܡܸܢܵܝ ܐܝܼܬ ܠܵܗ̇ ܐܸܫܬܵܐ ܓܘܼܠܦܵܢܹ̈ܐ: ܠܚܵܕܸܪ̈ܘܵܢܹܐ ܘܡ̣ܢ ܠܓܵܘܵܝܝܼ ܡܸܠܝܹܐ ܝܢܵܐ ܥܲܝܢܹ̈ܐ: ܘܢܝܵܚܵܐ ܠܲܝܬ ܠܗ݇ܘܿܢ ܐܝܼܡܵܡܵܐ ܘܠܲܝܠܹܐ ܡ̣ܢ ܕܐܵܡܪܝܼ: ܩܲܕܝܼܫ: ܩܲܕܝܼܫ: ܩܲܕܝܼܫ: ܡܵܪܝܵܐ ܐܲܠܵܗܵܐ: ܗ̇ܘ ܐܲܚܝܼܕ ܟܠ: ܗ̇ܘ ܕܝܼܗ݇ܘܵܐ: ܘܗ̇ܘ ܕܝܼܠܹܐ: ܘܗ̇ܘ ܕܐܵܬܹܐ. 9 ܘܐܝܼܡܲܢ ܕܝܵܗ݇ܒ݂ܝܼ ܐܲܢܹܐ ܚܲܝܘ̈ܵܬܵܐ ܬܸܫܒܘܿܚܬܵܐ ܘܐܝܼܩܵܪܵܐ ܘܫܵܟܲܪܬܵܐ ܠܗ̇ܘ ܕܝܬܝܼܒ݂ܵܐ ܝܠܹܐ ܥܲܠ ܬܪܘܿܢܘܿܣ: ܠܗ̇ܘ ܕܚܵܝܵܐ ܝܠܹܐ ܠܥܵܠܡܹ̈ܐ ܕܥܵܠܡܹ̈ܐ: 10 ܟܹܐ ܢܵܦܠܝܼ ܐܵܢܝܼ ܥܸܣܪܝܼ ܘܐܲܪܒܥܵܐ ܚܘܵܪ̈ܕܸܩܢܹܐ ܩܵܕ݇ܡ ܕܗ̇ܘ ܕܝܬܝܼܒ݂ܵܐ ܝܠܹܐ ܥܲܠ ܬܪܘܿܢܘܿܣ: ܘܟܹܐ ܣܵܓ݂ܕܝܼ ܠܗ̇ܘ ܕܚܵܝܵܐ ܝܠܹܐ ܠܥܵܠܡܹ̈ܐ ܕܥܵܠܡܹ̈ܐ: ܘܟܹܐ ܕܵܪܝܼ ܬܵܐܓ̰ܵܝ̈ ܩܵܕ݇ܡ ܬܪܘܿܢܘܿܣ: ܒܹܐܡܵܪܵܐ: 11 ܟܹܐ ܚܵܫܚܸܬ: ܡܵܪܝܵܐ ܘܐܲܠܵܗܵܐ ܕܝܼܲܢ: ܠܸܫܩܵܠܵܐ ܬܸܫܒܘܿܚܬܵܐ: ܘܐܝܼܩܵܪܵܐ: ܘܚܲܝܠܵܐ: ܣܵܒܵܒ ܐܲܢ݇ܬ ܒܪܹܠܘܼܟ݂ ܠܟܠ: ܘܣܵܒܵܒ ܕܪܸܙܵܝܘܼܟ݂ ܗ݇ܘܹܠܘܿܢ: ܘܦܸܫܠܘܿܢ ܒܸܪܝܹܐ.

ܩܦܠܐܘܢ: ܗ

1 ܘܚܙܹܠܝܼ ܥܲܠ ܝܲܡܝܼܢܹܗ ܕܗ̇ܘ ܕܝܬܝܼܒ݂ܵܐ ܗ݇ܘܵܐ ܥܲܠ ܬܪܘܿܢܘܿܣ: ܟܬܵܒ݂ܵܐ ܗ݇ܘܵܐ ܡ̣ܢ ܠܓܵܘܵܝܝܼ ܘܡ̣ܢ ܒܵܬ݇ܪܹܗ: ܕܡܸܚܝܵܐ ܗ݇ܘܵܐ ܡܵܘܗܪ ܒܫܲܒ݂ܲܥ ܡܵܘܗܪܹ̈ܐ. 2 ܘܚܙܹܠܝܼ ܡܲܠܲܐܟ݂ܵܐ ܚܲܝܠܵܢܵܐ ܕܡܲܟܪܘܼܙܹܐ ܒܩܵܠܵܐ ܓܘܼܪܵܐ: ܡܵܢܝܼ ܝܠܹܐ ܕܚܵܫܸܚ ܠܸܦܬܵܚܵܐ ܠܟܬܵܒ݂ܵܐ: ܘܠܸܫܪܵܝܵܐ ܡܵܘܗܪܹ̈ܐ ܕܝܼܹܗ: 3 ܘܠܵܐ ܐ݇ܢܵܫܵܐ ܡܵܨܹܐ ܗ݇ܘܵܐ ܒܫܡܲܝܵܐ: ܘܠܵܐ ܥܲܠ ܐܲܪܥܵܐ: ܘܠܵܐ ܠܸܐܠܬܸܚ ܡ̣ܢ ܐܲܪܥܵܐ: ܠܸܦܬܵܚܵܐ ܠܟܬܵܒ݂ܵܐ: ܘܠܵܐ ܠܸܚܵܪܵܐ ܒܝܼܹܗ. 4 ܘܒܟܹܠܝܼ ܪܵܒܵܐ: ܣܵܒܵܒ ܐ݇ܢܵܫܵܐ ܠܵܐ ܡܫ̄ܟ̰ܸܚܠܹܐ ܕܚܵܫܸܚ ܗ݇ܘܵܐ ܠܸܦܬܵܚܵܐ ܠܟܬܵܒ݂ܵܐ: ܘܠܵܐ ܠܸܚܝܵܪܵܐ ܒܝܼܹܗ. 5 ܘܚܵܪ݇ ܡܐܵܢܝܼ ܚܘܵܪ̈ܕܸܩܢܹܐ ܐܡܸܪܹܐ ܐܸܠܝܼ: ܠܵܐ ܒܵܟ݂ܸܬ: ܗܵܐ: ܓ݂ܠܸܒܠܹܐ ܐܲܪܝܵܐ ܕܡ̣ܢ ܐܘܼܓ̰ܵܓ݂ ܕܝܼܗܘܼܕܵܐ: ܥܸܩܪܵܐ ܕܕܵܘܝܼܕ: ܠܸܦܬܵܚܵܐ ܠܟܬܵܒ݂ܵܐ ܘܠܫܲܒ݂ܲܥ ܡܵܘܗܪܹ̈ܐ ܕܝܼܹܗ. 6 ܘܚܙܹܠܝܼ ܒܒܹܝܦܲܠܓܵܐ ܕܬܪܘܿܢܘܿܣ ܘܕܲܐܪܒܲܥ ܚܲܝܘ̈ܵܬܵܐ: ܘܒܒܹܦܲܠܓܵܐ ܕ܆ܚܘܵܪ̈ܕܸܩܢܹܐ: ܦܹܪܵܐ ܕܟܸܠܝܵܐ ܐܲܝܟ݂ ܦܪܝܼܡܵܐ: ܕܐܝܼܬ ܠܹܗ ܫܲܒ݂ܲܥ ܩܵܪ̈݇ܢܵܢܹܐ ܘܫܲܒ݂ܲܥ ܥܲܝܢܹ̈ܐ: ܐܵܢܝܼ ܕܝܼܢܵܐ ܫܲܒ݂ܲܥ ܪ̈ܘܼܚܹܐ ܕܐܲܠܵܗܵܐ: ܐܵܢܝܼ ܕܦܸܫܠܘܿܢ ܫܘܼܕܪܹܐ ܠܟܠܵܗ̇ ܐܲܪܥܵܐ. 7 ܘܐܬܹܠܹܐ: ܘܫܩܸܠܹܐ ܟܬܵܒ݂ܵܐ ܡ̣ܢ ܝܲܡܝܼܢܹܗ ܕܗ̇ܘ ܕܝܬܝܼܒ݂ܵܐ ܗ݇ܘܵܐ ܥܲܠ ܬܪܘܿܢܘܿܣ. 8 ܘܟܲܕ ܫܩܸܠܹܐ ܠܟܬܵܒ݂ܵܐ: ܐܵܢܝܼ ܐܲܪܒܲܥ ܚܲܝܘ̈ܵܬܵܐ: ܘܐܵܢܝܼ ܥܸܣܪܝܼ ܘܐܲܪܒܥܑܵ ܚܘܵܪ̈ܕܸܩܢܹܐ: ܢܦܸܠܘܿܢ ܩܵܕ݇ܡ ܦܹܪܵܐ: ܟܲܕ ܐܝܼܬ ܗ݇ܘܵܐ ܠܟܠ ܚܵܕ݇ ܚܵܕ݇ ܡܸܢܵܝ ܩܝܼܬܵܪܵܐ: ܘܦܵܝܼܠܲܐܣ̈ ܕܕܲܗܒ݂ܵܐ ܕܡܸܠܝܹܐ ܡ̣ܢ ܒܸܣܡܹ̈ܐ: ܐܲܢܹܐ ܕܝܼܢܵܐ ܨܠܵܘܵܬܹ̈ܐ ܕܩܲܕܝܼܫܹ̈ܐ. 9 ܘܫܵܒܘܿܚܹܐ ܗ݇ܘܵܘ ܬܸܫܒܘܿܚܬܵܐ ܚܲܕܬܵܐ: ܟܲܕ ܒܹܐܡܵܪܵܐ: ܟܹܐ ܚܵܫܚܸܬ ܠܸܫܩܵܠܵܐ ܠܟܬܵܒ݂ܵܐ: ܘܠܸܦܬܵܚܵܐ ܠܡܵܘܗܪ̈ܘܼܗܝ: ܣܵܒܵܒ ܕܦܸܫܠܘܼܟ݂ ܦܪܝܼܡܵܐ: ܘܙܒܸܢܘܼܟ݂ ܠܐܲܠܵܗܵܐ ܒܕܸܡܘܼܟ݂ ܡ̣ܢ ܟܠ ܐܘܼܓ̰ܵܓ݂: ܘܠܸܫܵܢܵܐ: ܘܛܵܝܸܦܵܐ: ܘܡܸܠܲܬ: 10 ܘܥܒ݂ܝܼܕܵܝܠܘܼܟ݂ ܠܐܲܠܵܗܵܐ ܕܝܼܲܢ ܡܲܠܟܘܼܬܵܐ ܘܟܵܗܢܹ̈ܐ: ܘܒܸܬ ܥܵܒ݂ܕܝܼ ܡܲܠܟܘܼܬܵܐ ܥܲܠ ܐܲܪܥܵܐ. 11 ܘܚܙܹܠܝܼ: ܘܫܡܸܥܠܝܼ ܩܵܠܵܐ ܕܡܲܠܲܐܟ݂ܹ̈ܐ ܪܵܒܵܐ ܚܵܕܸܪ̈ܘܵܢܹܐ ܕܬܪܘܿܢܘܿܣ: ܘܕܚܲܝܘ̈ܵܬܵܐ: ܘܕܚܘܵܪ̈ܕܸܩܢܹܐ: ܘܚܸܫܒܘܼܢܵܝ ܝܼܗ݇ܘܵܐ: ܪܸܒܘܼ ܪܸ̈ܒܘܵܢ: ܘܐܲܠܦܵܐ ܐܲܠܦܹ̈ܐ: 12 ܒܹܐܡܵܪܵܐ ܒܩܵܠܵܐ ܓܘܼܪܵܐ: ܕܟܹܐ ܚܵܫܸܚ ܗ̇ܘ ܦܹܪܵܐ ܦܪܝܼܡܵܐ ܠܸܫܩܵܠܵܐ ܚܲܝܠܵܐ: ܘܕܵܘܸܠܬܵܐ: ܘܥܵܩܸܠܕܵܪܘܼܬܵܐ: ܘܙܲܪܒ: ܘܐܝܼܩܵܪܵܐ: ܘܬܸܫܒ݁ܘܿܚܬܵܐ: ܘܒܘܼܪܟܬܵܐ. 13 ܘܟܠ ܒܪܝܼܬܵܐ ܕܝܼܠܵܐ ܒܫܡܲܝܵܐ: ܘܥܲܠ ܐܲܪܥܵܐ: ܘܠܸܐܠܬܸܚ ܡ̣ܢ ܐܲܪܥܵܐ: ܘܒܝܵܡܵܐ: ܘܟܠܵܝ ܐܵܢܝܼ ܕܓܵܘܵܝ: ܫܡܸܥܠܝܼ ܕܐܵܡܪܝܼ: ܠܗ̇ܘ ܕܝܼܠܹܐ ܝܬܝܼܒ݂ܵܐ ܥܲܠ ܬܪܘܿܢܘܿܣ ܘܠܦܹܪܵܐ: ܒܘܼܪܟܬܵܐ: ܘܐܝܼܩܵܪܵܐ: ܘܬܸܫܒ݁ܘܿܚܬܵܐ: ܘܗܘܼܟܡܵܐ: ܠܥܵܠܲܡ ܥܵܠܡܝܼܢ. 14 ܘܐܲܢܹܐ ܐܲܪܒܲܥ ܚܲܝܘ̈ܵܬܵܐ ܐܵܡܪܝܼ ܗ݇ܘܵܘ: ܐܵܡܹܝܢ. ܘܐܵܢܝܼ ܚܘܵܪ̈ܕܸܩܢܹܐ ܢܦܸܠܘܿܢ ܘܣܓܸܕܠܘܿܢ.

ܩܦܠܐܘܢ: ܘ

1 ܘܚܙܹܠܝܼ ܟܲܕ ܦܬܸܚܠ. ܐ ܦܹܪܵܐ ܠܚܕܵܐ ܡ̣ܢ ܫܲܒ݂ܲܥ ܡܵܘܗܪܹ̈ܐ: ܘܫܡܸܥܠܝܼ ܠܚܕܵܐ ܡܐܲܢܹܐ ܐܲܪܒܲܥ ܚܲܝܘ̈ܵܬܵܐ ܕܒܹܐܡܵܪܵܐ: ܐܲܝܟ݂ ܒܩܵܠܵܐ ܕܪܲܥܡܵܐ: ܬܵܐ: ܘܚܙܝܼ. 2 ܘܚܙܹܠܝܼ: ܘܗܵܐ: ܣܘܼܣܹܐ ܚܘܵܪܵܐ: ܘܗ̇ܘ ܕܝܼܗ݇ܘܵܐ ܪܟܝܼܒ݂ܵܐ ܥܲܠܘܼܗܝ ܐܝܼܬ ܗ݇ܘܵܐ ܠܹܗ ܩܸܫܬܵܐ: ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܬܵܐܓ̰ܵܐ: ܘܦܠܸܛܠܹܐ ܟܲܕ ܒܸܓ̣ܠܵܒܵܐ ܘܕܓ݂ܵܠܸܒ.

3 ܘܟܲܕ ܦܬܸܚܠܹܐ ܠܡܵܘܗܪ ܗ̇ܝ ܕܬܲܪ̈ܬܹܝ: ܫܡܸܥܠܝܼ ܠܚܲܝܘܬܵܐ ܕܬܲܪ̈ܬܹܝ ܕܒܹܐܡܵܪܵܐ: ܬܵܐ: ܚܙܝܼ. 4 ܘܦܠܸܛܠܹܐ ܚܵܕ݇ ܣܘܼܣܹܐ ܐܚܹܪ݇ܢܵܐ ܣܡܘܼܩܵܐ: ܘܠܗ̇ܘ ܕܝܼܗ݇ܘܵܐ ܪܟܝܼܒ݂ܵܐ ܥܲܠܘܼܗܝ ܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܠܸܫܩܵܠܵܐ ܫܲܝܢܵܐ ܡ̣ܢ ܐܲܪܥܵܐ: ܕܵܐܟ݂ܝܼ ܕܚܵܕ݇ ܠܗ̇ܘ ܐܚܹܪ݇ܢܵܐ ܩܵܛܠܝܼ: ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܣܲܝܦܵܐ ܓܘܼܪܵܐ.

5 ܘܟܲܕ ܦܬܸܚܠܹܐ ܠܡܵܘܗܪ ܗ̇ܝ ܕܬܠܵܬ݇: ܫܡܸܥܠܝܼ ܠܚܲܝܘܬܵܐ ܕܬܠܵܬ݇ ܕܒܹܐܡܵܪܵܐ: ܬܵܐ: ܘܚܙܝܼ. ܘܚܙܹܠܝܼ: ܘܗܵܐ: ܣܘܼܣܹܐ ܟܘܼܡܵܐ: ܘܗ̇ܘ ܕܝܼܗ݇ܘܵܐ ܝܬܝܼܒ݂ܵܐ ܥܲܠܘܼܗܝ ܐܝܼܬ ܗ݇ܘܵܐ ܠܹܗ ܡܲܣܲܐܬܵܐ ܒܐܝܼܕܹܗ. 6 ܘܫܡܸܥܠܝܼ ܩܵܠܵܐ ܒܒܹܝܦܲܠܓܵܐ ܕܐܲܪܒܲܥܢܬܵܝ ܚܲܝܘ̈ܵܬܵܐ ܕܒܹܐܡܵܪܵܐ: ܟܘܼܢܝܼܩܘܿܣ ܕܚܸܛܹ̈ܐ ܒܕܹܝܢܵܪܵܐ: ܘܬܠܵܬ݇ܐ ܟܘܼܢܝܼ̈ܩܘܿ ܕܣܲܥܪܹ̈ܐ ܒܕܹܝܢܵܪܵܐ: ܘܠܡܸܫܚܵܐ ܘܠܚܲܡܪܵܐ ܠܵܐ ܚܲܙܕܸܓܸܬ.

7 ܘܟܲܕ ܦܬܸܚܠܹܐ ܠܡܵܘܗܪ ܗ̇ܝ ܕܐܲܪܒܲܥ: ܫܡܸܥܠܝܼ ܩܵܠܵܐ ܕܚܲܝܘܬܵܐ ܕܐܲܪܒܲܥ ܕܒܹܐܡܵܪܵܐ: ܬܵܐ: ܘܚܙܝܼ. 8 ܘܚܙܹܠܝܼ: ܘܗܵܐ: ܣܘܼܣܹܐ ܝܘܿܪܝܼܩܵܐ: ܘܗ̇ܘ ܕܝܼܗ݇ܘܵܐ ܝܬܝܼܒ݂ܵܐ ܥܲܠܘܼܗܝ: ܫܸܡܹܗ ܡܵܘܬܵܐ ܗ݇ܘܵܐ: ܘܫܝܘܿܠ ܒܹܐܙܵܠܵܐ ܗ݇ܘܵܐ ܒܵܬ݇ܪܹܗ: ܘܦܸܫܠܹܐ ܝܘܼܗ݇ܒ݂ܵܐ ܐܸܠܵܝ ܗܘܼܟܡܵܐ ܥܲܠ ܚܵܕ݇ ܡ̣ܢ ܐܲܪܒܥܵܐ ܣܵܡܹ̈ܐ ܕܐܲܪܥܵܐ: ܠܸܩܛܵܠܵܐ ܒܣܲܝܦܵܐ: ܘܒܟܸܦܢܵܐ: ܘܒܡܵܘܬܵܐ: ܘܒܝܼܸܕ ܕܵܒ݂ܹ̈ܐ ܕܐܲܪܥܵܐ.

9 ܘܟܲܕ ܦܬܸܚܠܹܐ ܠܡܵܘܗܪ ܗ̇ܝ ܕܚܲܡܸܫ: ܚܙܹܠܝܼ ܠܸܐܠܬܸܚ ܡ̣ܢ ܡܲܕܒܚܵܐ ܠܓܵܢܵܬܹ̈ܐ ܕܐܵܢܝܼ ܕܝܼܢܵܐ ܩܛܝܼܠܹܐ ܣܵܒܵܒ ܕܗܹܡܸܙܡܵܢ ܕܐܵܠܵܗܵܐ: ܘܣܵܒܵܒ ܕܣܵܗܕܘܼܬܵܐ: ܗ̇ܝ ܕܐܝܼܬ ܗ݇ܘܵܐ ܠܗ݇ܘܿܢ. 10 ܘܡܲܩܘܸܚܝܼ ܗ݇ܘܵܘ ܒܩܵܠܵܐ ܓܘܼܪܵܐ: ܟܲܕ ܐܵܡܪܝܼ: ܗܲܠ ܐܝܼܡܲܢ: ܝܵܐ ܡܵܪܝܵܐ: ܩܲܕܝܼܫܵܐ ܘܫܲܪܝܼܪܵܐ: ܠܹܐ ܕܵܝܢܸܬ ܘܫܵܩܠܸܬ ܬܘܼܥܠܵܐ ܕܕܸܡܵܐ ܕܝܼܲܢ ܡ̣ܢ ܕܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ: 11 ܘܦܸܫܠܵܐ ܝܸܗܒ݂ܸܠܬܵܐ ܠܟܠ ܚܵܕ݇ ܚܵܕ݇ ܡܸܢܵܝ ܐܸܣܛܠܵܐ ܚܘܵܪܬܵܐ: ܘܦܸܫܠܹܐ ܐܡܝܼܪܵܐ ܐܸܠܵܝ ܕܡܲܢܝܸܚܝܼ ܡܸܕܪܹܐ ܚܲܟ̰ܵܐ ܙܲܒ݂ܢܵܐ: ܗܲܠ ܕܬܲܡܸܡܝܼ ܗ݇ܘܵܘ ܐܘܼܦ ܚܲܒ݂ܪ̈ܵܘܵܬܵܝ ܒܚܸܠܡܲܬ ܘܐܵܚܘܿܢܘܵܬܵܝ̈: ܐܲܢܹܐ ܕܝܼܢܵܐ ܗܕܝܼܪܹܐ ܠܸܦܝܵܫܵܐ ܩܛܝܼܠܹܐ ܐܲܝܟ݂ ܕܐܘܼܦ ܐܵܢܝܼ.

12 ܘܚܙܹܠܝܼ ܟܲܕ ܦܬܸܚܠܹܐ ܠܡܵܘܗܪ ܗ̇ܝ ܕܐܸܫܸܬ: ܘܪܵܘܕܵܢܵܐ ܓܘܼܪܵܐ ܗ݇ܘܹܠܹܐ: ܘܫܸܡܫܵܐ ܗ݇ܘܹܠܹܐ ܟܘܼܡܵܐ ܐܲܝܟ݂ ܣܲܩܵܐ ܕܣܲܥܪܵܐ: ܘܟܠܹܗ ܣܲܗܪܵܐ ܗ݇ܘܹܠܹܐ ܐܲܝܟ݂ ܕܸܡܵܐ. 13 ܘܟܵܘܟ݂ܒ݂ܹ̈ܐ ܕܫܡܲܝܵܐ ܢܦܸܠܘܿܢ ܒܐܲܪܥܵܐ ܐܲܝܟ݂ ܐܝܼܠܵܢܵܐ ܕܬܹܐܢܵܐ ܕܪܲܦܹܐ ܛܥܘܼܢܝܵܬܘܼ̈ܗܝ ܟܵܐܠ: ܟܲܕ ܡ̣ܢ ܦܵܘܚܵܐ ܓܘܼܪܵܐ ܦܵܝܸܫ ܡܘܼܫܥܸܫܵܐ. 14 ܘܫܡܲܝܵܐ ܦܸܫܠܘܿܢ ܦܪܝܼܫܹܐ: ܐܲܝܟ݂ ܟܸܪܟ݂ܵܐ ܕܦܵܝܸܫ ܟܘܼܪܡܸܟ݂ܵܐ: ܘܟܠܵܝ ܛܘܼܪ̈ܵܢܹܐ ܘܓܵܙܪ̈ܵܬܵܐ ܡ̣ܢ ܕܘܼܟܵܢܵܝ̈ ܦܸܫܠܘܿܢ ܡܘܼܓ̰ܘܸܓ̰ܹܐ. 15 ܘܡܲܠܟܹ̈ܐ ܕܐܲܪܥܵܐ: ܘܓܘܼܪ̈ܵܢܹܐ: ܘܪܹ̈ܫܵܢܹܐ ܕܐܲܠܦܹ̈ܐ: ܘܕܵܘܠܲܬܡܲܢܕܹ̈ܐ: ܘܚܲܝܠܵܢܹ̈ܐ: ܘܟܠ ܪܹܓܵܐ ܘܟܠ ܐܵܙܵܕ: ܛܘܼܫܝܵܠܘܿܢ ܓܵܢܵܝ ܒܓܸܦܝܼܵܬܹ̈ܐ ܘܒܐܝܼܨܵܪܹ̈ܐ ܕܛܘܼܪܹ̈ܐ: 16 ܘܐܵܡܪܝܼ ܠܛܘܼܪܹ̈ܐ ܘܠܐܝܼܨܵܪܹ̈ܐ: ܢܦܘܿܠܘܿܢ ܥܲܠܲܢ: ܘܛܵܫܹܡܘܿܢ ܠܲܢ ܡ̣ܢ ܦܵܬܹܗ ܕܗ̇ܘ ܕܝܼܠܹܐ ܝܬܝܼܒ݂ܵܐ ܥܲܠ ܬܪܘܿܢܘܿܣ: ܘܡ̣ܢ ܟܲܪܒܹܗ ܕܦܹܪܵܐ. 17 ܣܵܒܵܒ ܕܐܬܹܠܹܐ ܗ̇ܘ ܝܘܼܡܵܐ ܓܘܼܪܵܐ ܕܟܲܪܒܵܝ: ܘܡܵܢܝܼ ܡܵܨܹܐ ܠܸܟܠܵܝܵܐ:

ܩܦܠܐܘܢ: ܙ

1 ܘܒܵܬ݇ܪ ܐܲܢܹܐ ܚܙܹܠܝܼ ܐܲܪܒܥܵܐ ܡܲܠܲܐܟ݂ܹ̈ܐ ܕܟܸܠܝܹܐ ܥܲܠ ܐܲܪܒܲܥ ܩܘܼܢܓ̰ܝܼܵܬܹ̈ܐ ܕܐܲܪܥܵܐ: ܘܕܒ݂ܝܼܩܹܐ ܠܐܲܪܒܥܵܐ ܦܵܘܚܹ̈ܐ ܕܐܲܪܥܵܐ: ܕܠܵܐ ܡܵܚܹܐ ܦܵܘܚܵܐ ܥܲܠ ܐܲܪܥܵܐ: ܘܠܵܐ ܥܲܠ ܝܵܡܵܐ: ܘܠܵܐ ܥܲܠ ܟ̰ܘܼ ܐܝܼܠܵܢܵܐ. 2 ܘܚܙܹܠܝܼ ܚܵܕ݇ ܡܲܠܲܐܟ݂ܵܐ ܐܚܹܪ݇ܢܵܐ: ܘܐܣܸܩܠܹܐ ܡ̣ܢ ܙܪܵܩܵܐ ܕܫܸܡܫܵܐ: ܕܐܝܼܬ ܗ݇ܘܵܐ ܠܹܗ ܡܵܘܗܪ ܕܐܲܠܵܗܵܐ ܚܲܝܵܐ: ܘܡܘܼܩܘܸܚܠܹܐ ܒܩܵܠܵܐ ܓܘܼܪܵܐ ܠܐܲܪܒܥܵܐ ܡܲܠܲܐܟ݂ܹ̈ܐ ܐܵܢܝܼ ܕܦܸܫܠܹܐ ܝܘܼܗ݇ܒ݂ܵܐ ܐܸܠܵܝ ܕܚܲܙܕܸܓܝܼ ܠܐܲܪܥܵܐ ܘܠܝܵܡܵܐ: ܟܲܕ ܐܵܡܸܪ: 3 ܠܵܐ ܚܲܙܕܸܓܝܼܬܘܿܢ ܠܐܲܪܥܵܐ: ܘܠܵܐ ܠܝܵܡܵܐ: ܐܘܼܦ ܠܐܵ ܠܐܝܼܠܵܢܹ̈ܐ: ܗܲܠ ܕܡܵܚܵܚ ܡܵܘܗܪ ܠܪܹ̈ܓܵܘܵܬܹܐ ܕܐܲܠܵܗܵܐ ܕܝܼܲܢ ܥܲܠ ܩܸܨܵܝ. 4 ܘܫܡܸܥܠܝܼ ܡܸܢܝܵܢܵܐ ܕܐܵܢܝܼ ܕܦܸܫܠܘܿܢ ܡܸܚܝܹܐ ܡܵܘܗܪ: ܡܵܐܐ ܘܐܲܪܒܥܝܼ ܘܐܲܪܒܥܵܐ ܐܲܠܦܹ̈ܐ: ܡܸܚܝܹܐ ܡܵܘܗܪ ܡ̣ܢ ܟܠ ܐܘܼܓ̰ܵܓ݂ ܕܒܢܲܝ̈ ܝܼܣܪܵܝܹܠ. 5 ܡ̣ܢ ܐܘܼܓ̰ܵܓ݂ ܕܝܼܗܘܼܕܵܐ ܡܸܚܝܹܐ ܡܵܘܗܪ ܬܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܪܘܼܒܸܢ ܬܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܓܵܕ ܬܪܸܥܣܲܤܪ ܐܲܠܦܹ̈ܐ: 6 ܡ̣ܢ ܐܘܼܓ̰ܵܓ݂ ܕܐܵܫܹܝܪ ܬܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܢܲܦ̮ܬܵܠܝܼ ܬܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܡܢܲܫܹܐ ܐܪܸܥܣܲܪ ܐܲܠܦܹ̈ܐ: 7 ܡ̣ܢ ܐܘܼܓ̰ܵܓ݂ ܕܫܸܡܥܘܿܢ ܬܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܠܹܘܝܼ ܬܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܐܝܼܣܵܟ݂ܵܪ ܬܪܸܥܣܲܪ ܐܲܠܦܹ̈ܐ: 8 ܡ̣ܢ ܐܘܼܓ̰ܵܓ݂ ܕܙܒܘܿܠܘܿܢ ܐܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܝܵܘܣܸܦ ܬܪܸܥܣܲܪ ܐܲܠܦܹ̈ܐ: ܡ̣ܢ ܐܘܼܓ̰ܵܓ݂ ܕܒܸܢܝܵܡܹܝܢ ܬܪܸܥܣܲܪ ܐܲܠܦܹ̈ܐ.

9 ܒܵܬ݇ܪ ܐܲܢܹܐ ܚܙܹܠܝܼ: ܟܸܢܫܵܐ ܪܵܒܵܐ: ܗ̇ܘ ܕܠܸܡܢܵܝܹܗ ܐ݇ܢܵܫܵܐ ܠܹܐ ܡܵܨܹܐ ܗ݇ܘܵܐ: ܡ̣ܢ ܟܠ ܛܵܝܸܦܵܐ: ܘܛܵܝܸܦܹ̈ܐ: ܘܐܘܼ̈ܓ̰ܵܓ݂ܹܐ: ܘܠܸܫܵܢܹ̈ܐ: ܕܟܸܠܝܹܐ ܩܵܕ݇ܡ ܬܪܘܿܢܘܿܣ ܘܩܵܕ݇ܡ ܦܹܪܵܐ: ܟܲܕ ܠܒ݂ܝܼܫܹܐ ܐܸܣܛ̈ܠܹܐ ܚܘܵܪܹ̈ܐ: ܘܩܲܝܣܹ̈ܐ ܕܚܘܼܪ̈ܡܹܐ ܒܐܝܼܕܵܝ̈: 10 ܘܩܲܘܸܚܝܼ ܗ݇ܘܵܘ ܒܩܵܠܵܐ ܓܘܼܪܵܐ ܟܲܕ ܒܹܐܡܵܪܵܐ: ܦܘܼܪܩܵܢܵܐ ܠܐܲܠܵܗܵܐ ܕܝܼܲܢ: ܠܗ̇ܘ ܕܝܼܠܹܐ ܝܬܝܼܒ݂ܵܐ ܥܲܠ ܬܪܘܿܢܘܿܣ: ܘܠܦܹܪܵܐ. 11 ܘܟܠܵܝ ܐܵܢܝܼ ܡܲܠܲܐܟ݂ܹ̈ܐ ܟܸܠܝܹܐ ܗ݇ܘܵܘ ܚܵܕܸܪ̈ܘܵܢܹܐ ܕܬܪܘܿܢܘܿܣ: ܘܚܵܕܸܪ̈ܘܵܢܹܐ ܕܐܵܢܝܼ ܚܘܵܪ̈ܕܸܩܢܹܐ: ܘܕܵܐܢܝܼ ܐܲܪܒܲܥ ܚܲܝܘ̈ܵܬܵܐ: ܘܢܦܸܠܘܿܢ ܩܵܕ݇ܡ ܬܪܘܿܢܘܿܣ ܥܲܠ ܦܵܬܘܵܬܵܝ̈: ܘܣܓ݂ܸܕܠܘܿܢ ܠܐܲܠܵܗܵܐ: 12 ܟܲܕ ܒܹܐܡܵܪܵܐ: ܐܵܡܹܝܢ: ܒܘܼܪܟܬܵܐ: ܘܬܸܫܒܘܿܚܬܵܐ: ܘܥܵܩܸܠܕܵܪܘܼܬܵܐ: ܘܫܵܟܲܪܬܵܐ: ܘܐܝܼܩܵܪܵܐ: ܘܚܲܝܠܵܐ: ܘܙܲܪܒ: ܠܐܲܠܵܗܵܐ ܕܝܼܲܢ: ܠܥܵܠܲܡ ܥܵܠܡܝܼܢ: ܐܵܡܹܝܢ. 13 ܘܓ̰ܘܼܘܸܒܠܹܐ ܚܵܕ݇ ܡ̣ܢ ܚܘܵܪ̈ܕܸܩܢܹܐ ܘܐܡܸܪܹܐ ܐܸܠܝܼ: ܐܲܢܹܐ ܕܝܼܢܵܐ ܩܛܝܼܘܹܐ ܐܲܢܹܐ ܐܸܣܛܠܹ̈ܐ ܚܘܵܪܹ̈ܐ: ܡܵܢܝܼ ܝܢܵܐ: ܘܡ̣ܢ ܐܲܝܟܵܐ ܐܬܝܼܹܐ ܝܢܵܐ: 14 ܘܐܡܸܪܝܼ ܐܸܠܹܗ: ܡܵܪܝ: ܐܲܢ݇ܬ ܟܹܐ ܝܲܕܥܸܬ. ܘܐܡܸܪܹܐ ܐܸܠܝܼ: ܐܲܢܹܐ ܝܢܵܐ ܐܵܢܝܼ ܕܝܼܢܵܐ ܒܹܐܬܵܝܵܐ ܡ̣ܢ ܐܘܼܠܨܵܢܵܐ ܓܘܼܪܵܐ: ܘܚܘܼܠܸܠܘܿܢ ܐܸܣܛܠܵܝ̈ ܘܡܘܼܚܘܸܪܵܝܠܘܿܢ ܒܕܸܡܹܗ ܕܦܹܪܵܐ. 15 ܣܵܒܵܒ ܕܐܵܗܵܐ ܩܵܕ݇ܡ ܬܪܘܿܢܘܿܣ ܕܐܲܠܵܗܵܐ ܝܢܵܐ: ܘܒܸܥܒ݂ܵܕܵܐ ܝܢܵܐ ܚܸܠܡܲܬ ܐܸܠܹܗ ܐܝܼܡܵܡܵܐ ܘܠܲܝܠܹܐ ܓܵܘ ܗܲܝܟܠܵܐ ܕܝܼܹܗ: ܘܗ̇ܘ ܕܝܼܠܹܐ ܝܬܝܼܒ݂ܵܐ ܥܲܠ ܬܪܘܿܢܘܿܣ ܒܸܬ ܫܵܪܹܐ ܥܲܠܵܝ: 16 ܠܹܐ ܟܵܦܢܝܼ ܡܸܕܪܹܐ ܘܠܹܐ ܨܲܗ݇ܝܝܼ ܡܸܕܪܹܐ: ܘܠܹܐ ܢܵܦܸܠ ܥܲܠܵܝ ܫܸܡܫܵܐ ܘܠܵܐ ܟ̰ܘܼ ܚܸܡܵܐ. 17 ܣܵܒܵܒ ܕܦܹܪܵܐ ܕܝܼܠܹܐ ܒܒܹܝܦܲܠܓܵܐ ܕܬܪܘܿܢܘܿܣ ܒܸܬ ܡܲܪܥܹܐ ܠܗ݇ܘܿܢ: ܘܒܸܬ ܬܲܓܒܸܪܘܿܢ ܥܲܠ ܥܲܝܢܵܬܹ̈ܐ ܕܡ̈ܝܼܵܐ ܕܚܲܝܹ̈ܐ: ܘܒܸܬ ܡܵܫܹܐ ܐܲܠܵܗܵܐ ܟܠ ܕܸܡܥ̱ܬܵܐ ܡ̣ܢ ܥܲܝܢܵܝ̈.

ܩܦܠܐܘܢ: ܚ

1 ܘܟܲܕ ܦܬܸܚܠܹܐ ܠܡܵܘܗܪ ܗ̇ܝ ܕܫܲܒ݂ܲܥ: ܗ݇ܘܹܠܵܐ ܫܬܵܩܬܵܐ ܓܵܘ ܫܡܲܝܵܐ ܐܲܝܟ݂ ܦܲܠܓܵܐ ܕܣܵܥܲܬ. 2 ܘܚܙܹܠܝܼ ܠܐܵܢܝܼ ܫܲܒ݂ܥܵܐ ܡܲܠܲܐܟ݂ܹ̈ܐ: ܐܵܢܝܼ ܕܩܵܕ݇ܡ ܬܪܘܿܢܘܿܣ ܕܐܲܠܵܗܵܐ ܟܸܠܝܹܐ ܗ݇ܘܵܘ: ܘܦܸܫܠܘܿܢ ܝܘܼܗ݇ܒ݂ܹܐ ܐܸܠܵܝ ܫܲܒ݂ܥܵܐ ܫܝܼܦܘܿܪܹ̈ܐ.

3 ܘܡܲܠܲܐܟ݂ܵܐ ܐܚܹܪ݇ܢܵܐ ܐܬܹܠܹܐ ܘܟܠܹܠܹܐ ܥܲܠ ܡܲܕܒܚܵܐ: ܘܐܝܼܬ ܗ݇ܘܵܐ ܠܹܗ ܦܝܼܪܡܵܐ ܕܕܲܗܒ݂ܵܐ: ܘܦܸܫܠܘܿܢ ܝܘܼܗ݇ܒ݂ܹܐ ܐܸܠܹܗ ܒܸܣܡܹ̈ܐ ܪܵܒܵܐ: ܕܝܵܗ݇ܒ݂ܸܠ ܠܗ݇ܘܿܢ ܠܨܠܵܘܵܬܹ̈ܐ ܕܟܠܵܝ ܩܲܕܝܼܫܹ̈ܐ ܥܲܠ ܡܲܕܒܚܵܐ ܕܕܲܗܒ݂ܵܐ ܕܩܵܕ݇ܡ ܬܪܘܿܢܘܿܣ. 4 ܘܐܣܸܩܠܹܐ ܬܸܢܵܐ ܕܒܸܣܡܹ̈ܐ: ܥܲܡ ܨܠܵܘܵܬܹ̈ܐ ܕܩܲܕܝܼܫܹ̈ܐ: ܡ̣ܢ ܐܝܼܕܹܗ ܕܡܲܠܲܐܟ݂ܵܐ ܩܵܕ݇ܡ ܐܲܠܵܗܵܐ. 5 ܘܫܩܸܠܹܐ ܡܲܠܲܐܟ݂ܵܐ ܠܦܝܼܪܡܵܐ: ܘܡܠܹܠܹܗ ܡ̣ܢ ܢܘܼܪܵܐ ܕܡܲܕܒܚܵܐ: ܘܕܪܹܠܹܐ ܒܐܲܪܥܵܐ: ܘܗ݇ܘܹܠܘܿܢ ܪ̈ܲܥܡܹܐ: ܘܒܸܪ̈ܩܹܐ: ܘܩܵܠܹ̈ܐ: ܘܪܵܘܕܵܢܵܐ.

6 ܘܐܵܢܝܼ ܫܲܒ݂ܥܵܐ ܡܲܠܲܐܟ݂ܹ̈ܐ: ܐܵܢܝܼ ܕܐܝܼܬ ܗ݇ܘܵܘ ܠܗ݇ܘܿܢ ܫܲܒ݂ܥܵܐ ܫܝܼܦܘܿܪܹ̈ܐ: ܗܘܼܕܸܪܘܿܢ ܓܵܢܵܝ ܕܥܵܒ݂ܕܝܼ ܩܵܠܵܐ.

7 ܘܗ̇ܘ ܩܵܕ݇ܡܵܝܵܐ ܥܒ݂ܸܕܠܹܐ ܩܵܠܵܐ: ܘܗ݇ܘܹܠܹܐ ܒܲܪܕܵܐ ܘܢܘܼܪܵܐ ܚܒ݂ܝܼܛܹܐ ܒܕܸܡܵܐ: ܘܦܸܫܠܘܿܢ ܕܸܪܝܹܐ ܒܐܲܪܥܵܐ: ܘܚܵܕ݇ ܬܠܝܼܬܵܝܵܐ ܕܐܲܪܥܵܐ ܝܩܸܕܠܹܐ: ܘܚܵܕ݇ ܬܠܝܼܬܵܝܵܐ ܕܐܝܼܠܵܢܹ̈ܐ ܝܩܸܕܠܘܿܢ: ܘܟܠܹܗ ܓܸܠܵܐ ܩܝܼܢܵܐ ܝܩܸܕܠܹܐ.

8 ܘܡܲܠܲܐܟ݂ܵܐ ܗ̇ܘ ܕܬܪܲܝ ܥܒ݂ܸܕܠܹܐ ܩܵܠܵܐ: ܘܐܲܝܟ݂ ܛܘܼܪܵܐ ܓܘܼܪܵܐ ܟܲܕ ܒܸܠܗܵܝܵܐ ܒܢܘܼܪܵܐ ܦܸܫܠܹܐ ܕܸܪܝܵܐ ܓܵܘ ܝܵܡܵܐ: ܘܗ݇ܘܹܠܹܐ ܚܵܕ݇ ܬܠܝܼܬܵܝܵܐ ܕܝܵܡܵܐ ܕܸܡܵܐ. 9 ܘܡܸܬܠܹܐ ܚܵܕ݇ ܬܠܝܼܬܵܝܵܐ ܕܒܸܪ̈ܝܹܐ ܕܓܵܘ ܝܵܡܵܐ: ܐܲܢܹܐ ܕܐܝܼܬ ܗ݇ܘܵܘ ܠܗ݇ܘܿܢ ܓܵܢܵܬܹ̈ܐ: ܘܚܵܕ݇ ܬܠܝܼܬܵܝܵܐ ܕܓܵܡ̈ܝܼܹܐ ܚܪܸܒ݂ܠܘܿܢ.

10 ܘܡܲܠܲܐܟ݂ܵܐ ܗ̇ܘ ܕܬܠܵܬ݇ܐ ܥܒܸܕܠܹܐ ܩܵܠܵܐ: ܘܢܦܸܠܹܐ ܡ̣ܢ ܫܡܲܝܵܐ ܚܵܕ݇ ܟܵܘܟ݂ܒ݂ܵܐ ܠܘܼܪܵܐ: ܒܸܩܝܵܕܵܐ ܐܲܝܟ݂ ܡܲܫܲܥܠ: ܘܢܦܸܠܹܐ ܥܲܠ ܚܵܕ݇ ܬܠܝܼܬܵܝܵܐ ܘܢܲܗܪ̈ܵܘܵܬܹܐ ܘܥܲܠ ܥܲܝܢܵܬܹ̈ܐ ܕܡ̈ܝܼܵܐ. 11 ܘܫܸܡܹܗ ܕܗ̇ܘ ܟܵܘܟ݂ܒ݂ܵܐ ܦܵܝܸܫ ܗ݇ܘܵܐ ܐ݇ܡܝܼܪܵܐ ܐܲܦܣܸܢܬܘܿܣ: ܘܗ݇ܘܹܠܹܐ ܚܵܕ݇ ܬܠܝܼܬܵܝܵܐ ܕܡ̈ܝܼܵܐ ܠܐܲܦܣܝܼܢܬܵܢ: ܘܪܵܒܵܐ ܒܢܲܝ̈ܢܵܫܵܐ ܡܸܬܠܘܿܢ ܡ̣ܢ ܡ̈ܝܼܵܐ: ܣܵܒܵܒ ܕܡܪܸܠܘܿܢ.

12 ܘܡܲܠܲܐܟ݂ܵܐ ܗ̇ܘ ܕܐܲܪܒܥܵܐ ܥܒ݂ܸܕܠܹܐ ܩܵܠܵܐ ܘܦܸܫܠܹܐ ܡܸܚܝܵܐ ܚܵܕ݇ ܬܠܝܼܬܵܝܵܐ ܕܫܸܡܫܵܐ: ܘܚܵܕ݇ ܬܠܝܼܬܵܝܵܐ ܕܣܲܗܪܵܐ: ܘܚܵܕ݇ ܬܠܝܼܬܵܝܵܐ ܕܟܵܘܟ݂ܒ݂ܹ̈ܐ: ܕܐܵܟ݂ܝܼ ܕܚܵܒܹܐ ܗ݇ܘܵܐ ܚܵܕ݇ ܬܠܝܼܬܵܝܵܐ ܕܝܼܵܝ: ܘܝܘܿܡܵܐ ܠܵܐ ܒܲܗ݇ܪܲܢ ܗ݇ܘܵܐ ܚܵܕ݇ ܬܠܝܼܬܵܝܵܐ ܕܝܼܹܗ: ܘܐܘܼܦ ܠܲܝܠܹܐ ܗܲܪ ܒܗ̇ܘ ܬܵܗܵܪ. 13 ܘܚܙܹܠܝܼ: ܘܫܡܸܥܠܝܼ ܠܚܵܕ݇ ܢܸܫܪܵܐ: ܕܒܸܦܪܵܚܵܐ ܒܒܹܦܲܠܓܵܐ ܕܫܡܲܝܵܐ: ܟܲܕ ܐܵܡܸܪ ܒܩܵܠܵܐ ܓܘܼܪܵܐ: ܘܵܝ: ܘܵܝ: ܘܵܝ: ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ: ܡ̣ܢ ܩܵܠܹ̈ܐ ܐܚܹܪ̈݇ܢܹܐ ܕܫܝܼܦܘܿܪܹ̈ܐ ܕܐܵܢܝܼ ܬܠܵܬ݇ܐ ܡܲܠܲܐܟ݂ܹ̈ܐ: ܐܵܢܝܼ ܕܝܼܢܵܐ ܗܕܝܼܪܹܐ ܠܸܥܒ݂ܵܕܵܐ ܩܵܠܵܐ.

ܩܦܠܐܘܢ: ܛ

1 ܘܡܲܠܲܐܟ݂ܵܐ ܗ̇ܘ ܕܚܲܡܫܵܐ ܥܒ݂ܸܕܠܹܐ ܩܵܠܵܐ: ܘܚܙܹܠܝܼ ܟܵܘܟ݂ܒ݂ܵܐ ܕܢܦܝܼܠܵܐ ܡ̣ܢ ܫܡܲܝܵܐ ܥܲܠ ܐܲܪܥܵܐ: ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܩܕܝܼܠܵܐ ܕܒܹܪܵܐ ܕܬܗܘܿܡܵܐ. 2 ܘܦܬܸܚܠܹܐ ܠܒܹܪܵܐ ܕܬܗܘܿܡܵܐ: ܘܐܣܸܩܠܹܐ ܬܸܢܵܐ ܡ̣ܢ ܒܹܪܵܐ: ܐܲܝܟ݂ ܬܸܢܵܐ ܕܐܲܬܘܿܢܵܐ ܓܘܼܪܵܐ: ܘܚܒܹܠܘܿܢ ܫܸܡܫܵܐ ܘܗܵܘܵܐ ܡ̣ܢ ܬܸܢܵܐ ܕܒܹܪܵܐ. 3 ܘܡ̣ܢ ܬܸܢܵܐ ܦܠܸܛܠܘܿܢ ܩܲܡܨܹ̈ܐ ܥܲܠ ܐܲܪܥܵܐ: ܘܦܸܫܠܹܐ ܝܘܼܗ݇ܒ݂ܵܐ ܐܸܠܵܝ ܗܘܼܟܡܵܐ: ܐܲܝܟ݂ ܕܐܝܼܬ ܠܗ݇ܘܿܢ ܗܘܼܟܡܵܐ ܥܵܩܸܪ̈ܒ݂ܹܐ ܕܐܲܪܥܵܐ. 4 ܘܦܸܫܠܹܐ ܐܡܝܼܪܵܐ ܐܸܠܵܝ ܕܠܵܐ ܚܲܙܕܸܓܝܼ ܠܓܸܠܵܐ ܕܐܲܪܥܵܐ: ܘܠܵܐ ܠܟܠ ܩܝܼܢܘܼܬܵܐ: ܘܐܘܼܦ ܠܵܐ ܠܟܠ ܐܝܼܠܵܢܵܐ: ܐܸܠܵܐ ܐܸܢ ܠܒܢܲܝ̈ܢܵܫܵܐ ܒܢܲܦ̮ܫܵܝ ܐܵܢܝܼ ܕܠܲܝܬ ܡܵܘܗܪ ܕܐܲܠܵܗܵܐ ܥܲܠ ܩܸܨܵܝ. 5 ܘܦܸܫܠܹܐ ܣܘܼܦܝܵܐ ܒܝܼܵܝ ܕܠܵܐ ܩܵܛܠܝܼ ܠܗ݇ܘܿܢ: ܐܸܠܵܐ ܕܦܵܝܫܝܼ ܓ̰ܘܼܢܓ̰ܸܪܹܐ ܚܲܡܫܵܐ ܝܲܪ̈ܚܹܐ: ܘܓ̰ܘܼܢܓ̰ܵܪܵܐ ܕܝܼܵܝ ܐܲܝܟ݂ ܓ̰ܘܼܢܓ̰ܵܪܵܐ ܕܥܵܩܸܪܒ݂ܵܐ ܐܝܼܡܲܢ ܕܢܵܨܵܐ ܠܐ݇ܢܵܫܵܐ. 6 ܘܒܵܐܢܝܼ ܝܘܿܡܵܢܹ̈ܐ ܒܸܬ ܛܵܥܝܼ ܒܢܲܝ̈ܢܵܫܵܐ ܠܡܵܘܬܵܐ ܘܠܹܐ ܡܵܫ̄ܟ̰ܚܝܼ ܠܹܗ: ܘܒܸܬ ܫܲܗ̄ܘܸܬܝܼ ܠܸܡܝܵܬܵܐ: ܘܒܸܬ ܥܵܪܸܩ ܡܵܘܬܵܐ ܡܸܢܵܝ. 7 ܘܕܘܼܡܝܵܐ ܕܐܵܢܝܼ ܩܲܡܨܹ̈ܐ ܟܹܐ ܕܵܡܹܐ ܗ݇ܘܵܐ ܐܲܝܟ݂ ܕܡܘܼܬܵܐ ܕܣܘܼܣܵܘܵܬܹ̈ܐ ܗܘܼܕܪܹܐ ܠܦܠܵܫܵܐ: ܘܥܲܠ ܪܹ̈ܫܵܝ ܐܲܝܟ݂ ܬܵܐܓ̰ܹ̈ܐ ܒܸܕܡܵܝܵܐ ܠܕܲܗܒ݂ܵܐ: ܘܦܵܬܘܵܬܵܝ̈ ܐܲܝܟ݂ ܦܵܬܘܵܬܹ̈ܐ ܕܒܢܲܝ̈ܢܵܫܵܐ. 8 ܘܐܝܼܬ ܗ݇ܘܵܐ ܠܗ݇ܘܿܢ ܣܲܥܪܵܐ ܐܲܝܟ݂ ܟܵܘܣܵܐ ܕܒܲܟ݂ܬܵܬܹ̈ܐ: ܘܟܹܟܵܝ̈ ܐܲܝܟ݂ ܕܐܲܪ̈ܝܵܘܵܬܵܐ ܗ݇ܘܵܘ. 9 ܘܐܝܼܬ ܗ݇ܘܵܘ ܠܗ݇ܘܿܢ ܓܲܝܸܡܟ̰ܵܪܹ̈ܐ: ܐܲܝܟ݂ ܓܲܝܸܡܟ̰ܵܪܹ̈ܐ ܕܦܪܸܙܠܵܐ: ܘܩܵܠܵܐ ܕܓܘܼܠܦܵܢܵܝ̈ ܐܲܝܟ݂ ܩܵܠܵܐ ܕܐܵܪ̈ܒܵܢܹܐ: ܕܣܘܼܣܵܘܵܬܹ̈ܐ ܪܵܒܵܐ ܕܪܵܚܛܝܼ ܠܦܠܵܫܵܐ. 10 ܘܐܝܼܬ ܗ݇ܘܵܘ ܠܗ݇ܘܿܢ ܛܘܼܦܪܹ̈ܐ ܕܟܹܐ ܕܵܡܝܼ ܗ݇ܘܵܘ ܠܥܵܩܸܪ̈ܒ݂ܹܐ: ܘܢܸܟܣܹ̈ܐ: ܘܒܛܘܼܦܪ̈ܵܝ ܐܝܼܬ ܗ݇ܘܵܐ ܗܘܼܟܡܵܐ ܠܚܲܙܕܘܼܓܹܐ ܠܒܢܲܝ̈ܢܵܫܵܐ ܚܲܡܫܵܐ ܝܲܪ̈ܚܹܐ. 11 ܘܐܝܼܬ ܠܗ݇ܘܿܢ ܥܲܠܵܝ ܡܲܠܟܵܐ: ܡܲܠܲܐܟ݂ܵܐ ܕܬܗܘܿܡܵܐ: ܕܫܸܡܹܗ ܝܠܹܐ ܒܠܸܪܫܵܢܵܐ ܕܥܸܒ݂ܪ̈ܵܝܹܐ: ܐܲܒܲܕܘܿܢ: ܐܝܼܢܵܐ ܒܕܝܵܘܢܵܝܹ̈ܐ ܐܝܼܬ ܠܹܗ ܫܸܡܵܐ: ܐܵܦܘܿܠܘܿܢ.

12 ܗ̇ܘ ܚܵܕ݇ ܘܵܝܵܐ ܐܙܹܠܹܐ: ܗܵܐ: ܒܹܐܬܵܝܵܐ ܝܢܵܐ ܡܸܕܪܹܐ ܬܪܲܝ ܘܵܝܹ̈ܐ ܒܵܬ݇ܪ ܐܲܢܹܐ.

13 ܘܡܲܠܲܐܟ݂ܵܐ ܗ̇ܘ ܕܐܸܫܬܵܐ ܥܒܸܕܠܹܐ ܩܵܠܵܐ: ܘܫܡܸܥܠܝܼ ܚܵܕ݇ ܩܵܠܵܐ ܡ̣ܢ ܩܵܪ̈݇ܢܵܢܹܐ ܕܡܲܕܒܚܵܐ ܕܕܲܗܒ݂ܵܐ: ܗ̇ܘ ܕܩܵܕ݇ܡ ܐܲܠܵܗܵܐ: 14 ܕܒܹܐܡܵܪܵܐ ܠܡܲܠܲܐܟ݂ܵܐ ܕܐܸܫܬܵܐ: ܗ̇ܘ ܕܐܝܼܬ ܗ݇ܘܵܐ ܠܹܗ ܫܝܼܦܘܿܪܵܐ: ܫܪܝܼ ܠܐܵܢܝܼ ܐܲܪܒܥܵܐ ܡܲܠܲܐܟ݂ܹ̈ܐ: ܐܵܢܝܼ ܕܝܼܢܵܐ ܐܣܝܼܪܹܐ ܥܲܠ ܢܲܗܪܵܐ ܓܘܼܪܵܐ ܦܪܵܬ. 15 ܘܦܸܫܠܘܿܢ ܫܸܪܝܹܐ ܐܵܢܝܼ ܐܲܪܒܥܵܐ ܡܲܠܲܐܟ݂ܹ̈ܐ: ܐܵܢܝܼ ܕܝܼܗ݇ܘܵܘ ܗܘܼܕܪܹܐ ܠܣܵܥܲܬ ܘܠܝܘܿܡܵܐ ܘܠܝܲܪܚܵܐ ܘܠܫܹܢ݇ܬܵܐ: ܕܩܵܛܠܝܼ ܠܚܵܕ݇ ܬܠܝܼܬܵܝܵܐ ܕܒܢܲܝ̈ܢܵܫܵܐ. 16 ܘܡܸܢܝܵܢܵܐ ܕܥܲܣܟܵܪ̈ܘܵܬܹܐ ܕܪܵܟܵܒ݂ܘܼܬܵܐ: ܬܲܪ̈ܬܹܝ ܪܸܒܘܼ ܪܸ̈ܒܘܵܢ: ܫܡܸܥܠܝܼ ܡܸܢܝܵܢܵܐ ܕܝܼܵܝ. 17 ܘܗܲܕܟ݂ܵܐ ܚܙܹܠܝܼ ܠܐܲܢܹܐ ܣܘܼܣܵܘܵܬܹ̈ܐ ܒܚܸܙܘܵܐ: ܘܠܵܐܢܝܼ ܕܝܼܗ݇ܘܵܘ ܝܬܝܼܒ݂ܹܐ ܥܲܠܵܝ: ܕܐܝܼܬ ܓܲܝܸܡܟ̰ܵܪܹ̈ܐ ܢܘܼܪ̈ܵܢܵܝܹܐ ܘܝܵܩܘܿܢܕܵܝܹ̈ܐ ܘܟܸܒܪ̈ܝܼܬܵܝܹܐ: ܘܪܹ̈ܫܹܐ ܕܣܘܼܣܵܘܵܬܹ̈ܐ ܐܲܝܟ݂: ܪܹ̈ܫܹܐ ܕܐܲܪ̈ܝܵܘܵܬܵܐ: ܘܡ̣ܢ ܦܘܼܡܵܝ ܒܸܦܠܵܛܵܐ ܢܘܼܪܵܐ ܘܬܸܢܵܐ ܘܟܸܒܪܝܼܬ. 18 ܡܐܲܢܹܐ ܬܠܵܬ݇ܐ ܦܸܫܠܘܿܢ ܩܛܝܼܠܹܐ ܚܵܕ݇ ܬܠܝܼܬܵܝܵܐ ܕܒܢܲܝ̈ܢܵܫܵܐ: ܡ̣ܢ ܢܘܼܪܵܐ ܘܡ̣ܢ ܬܸܢܵܐ ܘܡ̣ܢ ܟܸܒܪܝܼܬ: ܐܲܢܹܐ ܕܦܵܠܛܝܼ ܡ̣ܢ ܦܘܼܡܵܝ. 19 ܣܵܒܵܒ ܗܘܼܟܡܵܐ ܕܣܘܼܣܵܘܵܬܹ̈ܐ ܒܦܘܼܡܵܝ ܝܠܹܐ ܘܒܛܘܼܦܪ̈ܵܝ: ܣܵܒܵܒ ܕܛܘܼܦܪ̈ܵܝ ܟܹܐ ܕܵܡܝܼ ܠܚܘܼܘܵܘܵܬܹ̈ܐ ܕܐܝܼܬ ܠܗ݇ܘܿܢ ܪܹ̈ܫܵܢܹܐ: ܘܒܝܼܵܝ ܟܹܐ ܚܲܙܕܸܓܝܼ. 20 ܘܣܵܡܵܐ ܦܝܼܫܵܐ ܕܒܲܢܝ̈ܢܵܫܵܐ: ܐܵܢܝܼ ܕܠܵܐ ܦܸܫܠܘܿܢ ܩܛܝܼܠܹܐ ܒܐܲܢܹܐ ܡܲܚܘܵܬܹ̈ܐ: ܠܵܐ ܬܘܼܘܸܒܠܘܿܢ ܡ̣ܢ ܦܘܼܠܚܵܢܹ̈ܐ ܕܐܝܼܕܵܬܵܝ̈: ܕܐܵܟ݂ܝܼ ܕܠܵܐ ܣܵܓ݂ܕܝܼ ܠܕܲܝܘܹ̈ܐ ܘܠܨܵܢܲܡܹ̈ܐ ܕܕܲܗܒ݂ܵܐ: ܘܠܕܣܹܐܡܵܐ: ܘܠܕܢܚܵܫܵܐ: ܘܠܕܟܹܐܦܵܐ: ܘܠܕܩܲܝܣܵܐ: ܐܲܢܹܐ ܕܐܘܼܦ ܠܵܐ ܠܸܚܙܵܝܵܐ ܡܵܨܝܼ: ܘܠܵܐ ܠܸܫܡܲܥܝܵܐ: ܘܠܵܐ ܠܸܚܕܵܪܵܐ: 21 ܘܠܵܐ ܬܘܼܘܸܒܠܘܿܢ ܡ̣ܢ ܩܸܛܠܵܝ̈: ܘܠܵܐ ܡ̣ܢ ܚܸܪ̈ܫܵܝ: ܘܠܵܐ ܡ̣ܢ ܙܵܢܝܘܼܬܵܝ: ܘܠܵܐ ܡ̣ܢ ܓܹܢܵܒ݂ܘܼܝܵܬܵܝ̈.

ܩܦܠܐܘܢ: ܝ

1 ܘܚܙܹܠܝܼ ܡܲܠܲܐܟ݂ܵܐ ܐܚܹܪ݇ܢܵܐ ܚܲܝܠܵܐ ܒܸܨܠܵܝܵܐ ܡ̣ܢ ܫܡܲܝܵܐ: ܕܩܛܝܼܘܵܐ ܗ݇ܘܵܐ ܥܢܵܢܵܐ: ܘܩܸܫܬܵܐ ܕܥܢܵܢܵܐ ܥܲܠ ܪܹܫܹܗ: ܘܦܵܬܹܗ ܐܲܝܟ݂ ܫܸܡܫܵܐ: ܘܐܲܩܠܘܼ̈ܗܝ ܐܲܝܟ݂ ܣܛܘܼܢܹ̈ܐ ܕܢܘܼܪܵܐ. 2 ܘܐܝܼܬ ܗ݇ܘܵܐ ܠܹܗ ܒܐܝܼܕܹܗ ܟܬܵܒ݂ܘܿܢܵܐ ܦܬܝܼܚܵܐ: ܘܡܘܼܬܒ݂ܵܠܹܐ ܐܲܩܠܹܗ ܕܝܲܡܝܼܢܵܐ ܥܲܠ ܝܵܡܵܐ: ܘܗ̇ܝ ܕܣܸܡܠܵܐ ܥܲܠ ܐܲܪܥܵܐ. 3 ܘܩܘܼܘܸܚܠܹܐ ܒܩܵܠܵܐ ܓܘܼܪܵܐ ܕܐܵܟ݂ܝܼ ܕܣܲܪܣܸܪ ܐܲܪܝܵܐ: ܘܟܲܕ ܩܘܼܘܸܚܠܹܐ: ܝܸܗܒ݂ܸܠܘܿܢ ܐܵܢܝܼ ܫܲܒ݂ܥܵܐ ܪܲܥܡܹܐ ܩܵܠܹ̈ܐ ܕܝܼܵܝ. 4 ܘܟܲܕ ܝܸܗܒ݂ܸܠܘܿܢ ܩܵܠܵܝ ܐܵܢܝܼ ܫܲܒ݂ܥܵܐ ܪܲܥܡܹܐ: ܗܕܝܼܪܵܐ ܝܘܸܢ ܗ݇ܘܵܐ ܠܸܟܬܵܒ݂ܵܐ: ܘܫܡܸܥܠܝܼ ܩܵܠܵܐ ܡ̣ܢ ܫܡܲܝܵܐ ܒܹܐܡܵܪܵܐ: ܚܬܘܿܡ ܐܲܢܹܐ ܕܗܘܼܡܙܸܡܠܘܿܢ ܐܵܢܝܼ ܫܲܒ݂ܥܵܐ ܪܲܥܡܹܐ: ܘܠܲܐܢܹܐ ܠܵܐ ܟܵܬܒܸܬ. 5 ܘܗ̇ܘ ܡܲܠܲܐܟ݂ܵܐ ܕܚܙܹܠܝܼ ܟܸܠܝܵܐ ܥܲܠ ܝܵܡܵܐ ܘܥܲܠ ܐܲܪܥܵܐ: ܡܘܼܪܸܡܠܹܐ ܐܝܼܕܹܗ ܠܫܡܲܝܵܐ: 6 ܘܝܡܹܠܹܐ ܒܗ̇ܘ ܕܝܼܠܹܐ ܚܲܝܵܐ ܠܥܵܠܲܡ ܥܵܠܡܝܼܢ: ܗ̇ܘ ܕܒܪܹܠܹܐ ܠܫܡܲܝܵܐ ܘܠܵܐܢܝܼ ܕܒܝܼܵܗ̇: ܘܠܲܐܪܥܵܐ ܘܠܵܢܝܼ ܕܒܝܼܵܗ̇: ܘܠܝܵܡܵܐ ܘܠܵܐܢܝܼ ܕܓܵܘܵܗ̇: ܕܙܲܒ݂ܢܵܐ ܠܹܐ ܗܵܘܹܐ ܐܚܹܪ݇ܢܵܐ: 7 ܐܸܠܵܐ ܒܝܘܿܡܵܢܹ̈ܐ ܕܩܵܠܹܗ ܕܡܲܠܲܐܟ݂ܵܐ ܕܫܲܒ݂ܥܵܐ: ܐܝܼܡܲܢ ܕܗܕܝܼܪܵܐ ܝܠܹܐ ܒܠܸܥܒ݂ܵܕܵܐ ܩܵܠܵܐ: ܦܝܵܫܵܐ ܝܠܹܐ ܬܘܼܡܸܡܵܐ ܣܸܪܹܗ ܕܐܲܠܵܗܵܐ ܐܲܝܟ݂ ܕܡܘܼܫܚܸܕܠܹܐ ܠܪܹ̈ܓܵܘܵܬܘܼܗܝ: ܠܢܒ݂̈ܝܼܹܐ. 8 ܘܗ̇ܘ ܩܵܠܵܐ ܕܫܡܸܥܠܝܼ ܡ̣ܢ ܫܡܲܝܵܐ: ܡܸܕܪܹܐ (ܫܡܸܥܠܝܼ) ܗܲܡܙܘܼܡܹܐ ܥܲܡܝܼ ܘܒܹܐܡܵܪܵܐ: ܙܹܠ݇ܐ: ܫܩܘܿܠ ܠܟܬܵܒ݂ܘܿܢܵܐ ܕܝܼܠܹܐ ܦܬܝܼܚܵܐ ܒܐܝܼܕܹܗ ܕܡܲܠܲܐܟ݂ܵܐ ܕܝܼܠܹܐ ܟܸܠܝܵܐ ܥܲܠ ܝܵܡܵܐ ܘܥܲܠ ܐܲܪܥܵܐ. 9 ܘܐܙܸܠܝܼ ܠܟܸܣ ܡܲܠܲܐܟ݂ܵܐ: ܟܲܕ ܐܵܡܪܸܢ ܐܸܠܹܗ ܕܝܵܗ݇ܒ݂ܸܠ ܠܝܼ ܠܟܬܵܒ݂ܘܿܢܵܐ. ܘܐܡܸܪܹܐ ܐܸܠܝܼ: ܫܩܘܿܠ ܘܐܟ݂ܘܿܠ ܠܹܗ: ܘܒܸܬ ܡܲܡܪܸܠ ܠܵܗ̇ ܟܹܪܣܘܼܟ݂: ܐܸܠܵܐ ܓܵܘ ܦܘܼܡܘܼܟ݂ ܒܸܬ ܗܵܘܹܐ ܚܸܠܝܵܐ ܐܲܝܟ݂ ܕܸܒ݂ܫܵܐ. 10 ܘܫܩܸܠܝܼ ܠܟܬܵܒ݂ܘܿܢܵܐ ܡ̣ܢ ܐܝܼܕܹܗ ܕܡܲܠܲܐܟ݂ܵܐ ܘܐܟ݂ܸܠܝܼ: ܘܒܦܘܼܡܝܼ ܚܸܠܝܵܐ ܗ݇ܘܵܐ ܐܲܝܟ݂ ܕܸܒ݂ܫܵܐ: ܘܟܲܕ ܐܟ݂ܸܠܝܼ: ܡܪܹܠܵܐ ܟܹܪ݇ܣܝܼ. 11 ܘܐܡܸܪܹܐ ܐܸܠܝܼ: ܘܵܓ̰ܸܒ ܝܼܠܵܐ ܕܡܸܕܪܹܐ ܢܵܒܸܬ ܥܲܠ ܛܵܝܸܦܹ̈ܐ ܘܡܸܠܲܬܹ̈ܐ ܘܠܸܫܵܢܹ̈ܐ ܘܡܲܠܟܹ̈ܐ ܪܵܒܵܐ.

ܩܦܠܐܘܢ: ܝܐ

1 ܘܦܸܫܠܹܐ ܝܘܼܗ݇ܒ݂ܵܐ ܐܸܠܝܼ ܕܕܵܡܹܐ ܗ݇ܘܵܐ ܠܚܘܼܛܪܵܐ: ܘܐܡܸܪܹܐ (ܩܵܠܵܐ): ܩܘܼܡ݇ ܘܡܫܘܿܚ ܠܗܲܝܟܠܵܐ ܕܐܲܠܵܗܵܐ: ܘܠܡܲܕܒܚܵܐ: ܘܠܲܐܢܹܐ ܕܣܵܓ݂ܕܝܼ ܓܵܘܹܗ. 2 ܘܠܕܵܪܬܵܐ ܕܠܒܲܕܲܪ ܡ̣ܢ ܗܲܝܟܠܵܐ ܦܵܒܸܛ ܠܒ݂ܲܕܲܪ: ܘܠܵܐ ܡܵܫܚܸܬ ܠܵܗ̇: ܣܵܒܵܒ ܕܦܸܫܠܵܐ ܝܸܗܒ݂ܸܠܬܵܐ ܠܛܵܝܸܦܹ̈ܐ: ܘܠܡܕܝܼܢ݇ܬܵܐ ܩܲܕܝܼܫܬܵܐ ܒܸܬ ܕܵܝܫܝܼ ܐܲܪܒܥܝܼ ܘܬܪܲܝ ܝܲܪ̈ܚܹܐ. 3 ܘܒܸܬ ܝܵܗ݇ܒܸܢ ܠܬܪܲܝ ܣܵܗܕܹ̈ܐ ܕܝܼܝܼ: ܘܒܸܬ ܢܵܒܝܼ ܐܲܠܦܵܐ ܘܬܪ̈ܲܝܡܵܐܐ ܘܐܸܫܬܝܼ ܝܘܿܡܵܢܹ̈ܐ ܟܲܕ ܡܘܼܠܒܸܫܹܐ ܣܲܩܹ̈ܐ. 4 ܐܲܢܹܐ ܝܢܵܐ ܬܪܲܝ ܙܲܝܬܹ̈ܐ ܘܬܪܲܝ ܩܲܢܕܝܼܠܹ̈ܐ: ܐܲܢܹܐ ܕܩܵܕ݇ܡ ܐܲܠܵܗܵܐ ܕܐܲܪܒܥܵܐ ܟܸܠܝܹܐ ܝܢܵܐ. 5 ܘܐܸܢ ܐ݇ܢܵܫܵܐ ܒܲܥܝܹܐ ܠܚܲܙܕܘܼܓܵܝ: ܢܘܼܪܵܐ ܟܹܐ ܦܵܠܸܛ ܡ̣ܢ ܦܘܼܡܵܝ: ܘܟܹܐ ܐܵܟ݂ܸܠ ܠܕܸܫܡܸܢܵܝ̈: ܘܐܸܢ ܐ݇ܢܵܫܵܐ ܒܲܥܝܹܐ ܠܚܲܙܕܘܼܓܵܝ: ܗܲܕܟ݂ܵܐ ܘܵܓ̰ܸܒ ܝܼܠܵܐ ܕܦܵܝܸܫ ܩܛܝܼܠܵܐ. 6 ܐܵܢܝܼ ܐܝܼܬ ܠܗ݇ܘܿܢ ܗܘܼܟܡܵܐ ܕܕܵܒ݂ܩܝܼ ܠܫܡܲܝܵܐ: ܕܡܸܛܪܵܐ ܠܵܐ ܥܵܪܝܵܐ ܒܝܘܿܡܵܢܹ̈ܐ ܕܢܒ݂ܝܼܘܼܬܵܝ. ܘܗܘܼܟܡܵܐ ܐܝܼܬ ܠܗ݇ܘܿܢ ܥܲܠ ܡ̈ܝܼܵܐ ܕܡܲܕܸܪܝܼ ܠܗ݇ܘܿܢ ܠܕܸܡܵܐ: ܘܠܸܡܚܵܝܵܐ ܠܐܲܪܥܵܐ ܒܟܠ ܡܚܘܼܬܵܐ ܟܡܵܐ ܓܵܗܹ̈ܐ ܕܒܵܣܡܵܐ ܠܗ݇ܘܿܢ. 7 ܘܐܝܼܡܲܢ ܘܬܲܡܸܡܝܼ ܣܵܗܕܘܼܬܵܝ: ܕܵܒܵܐ ܗ̇ܘ ܕܐܵܣܸܩ ܡ̣ܢ ܬܗܘܿܡܵܐ: ܒܸܬ ܥܵܒܸܕ ܥܲܡܵܝ ܦܠܵܫܵܐ: ܘܒܸܬ ܓ݂ܵܠܸܒ ܠܗ݇ܘܿܢ ܘܩܵܛܸܠ ܠܗ݇ܘܿܢ. 8 ܘܫܠܲܕܵܝ̈ ܓܵܘ ܥܵܠܘܿܠܵܐ ܦܸܬܝܵܐ ܕܗ̇ܝ ܡܕܝܼܢ݇ܬܵܐ ܓܘܼܪܬܵܐ: ܗ̇ܝ ܕܦܵܝܫܵܐ ܩܪܝܼܬܵܐ ܪܘܼܚܵܢܵܐܝܼܬ ܣܕܘܿܡ ܘܡܸܨܪܹܝܢ: ܐܲܝܟܵܐ ܕܝܼܵܝ ܦܸܫܠܹܐ ܙܩܝܼܦܵܐ. 9 ܘܒܸܬ ܚܵܙܝܼ ܡ̣ܢ ܛܵܝܸܦܹ̈ܐ ܘܐܘܼ̈ܓ̰ܵܓ݂ܹܐ ܘܡܸܠܲܬܹ̈ܐ ܘܠܸܫܵܢܹ̈ܐ ܠܫܠܲܕܵܝ̈: ܬܠܵܬ݇ܐ ܝܘܿܡܵܢܹ̈ܐ ܘܦܲܠܓܹܐ: ܘܠܫܠܲܕܵܝ̈ ܠܹܐ ܫܵܒ݂ܩܝܼ ܠܸܦܝܵܫܵܐ ܡܘܼܬܒ݂ܹܐ ܒܩܲܒ݂ܪܵܐ. 10 ܘܐܲܢܹܐ ܕܥܵܡܪܝܼ ܥܲܠ ܐܲܪܥܵܐ ܒܸܬ ܚܵܕܝܼ ܥܲܠܵܝ: ܘܒܸܬ ܥܵܒ݂ܕܝܼ ܒܘܼܣܵܡܵܐ: ܘܚܲܠܲܥܬܹ̈ܐ ܒܸܬ ܫܵܕܪܝܼ ܠܸܚܕܵܪܹ̈ܐ: ܣܵܒܵܒ ܕܐܵܢܝܼ ܬܪܲܝ ܢܒ݂̈ܝܹܐ ܓ̰ܘܼܢܓ̰ܸܪܘܿܢ ܠܐܲܢܹܐ ܕܒܸܥܡܵܪܵܐ ܝܢܵܐ ܐܲܪܥܵܐ. 11 ܘܒܵܬ݇ܪ ܐܲܢܹܐ ܬܠܵܬ݇ܐ ܝܘܿܡܵܢܹ̈ܐ ܘܦܲܠܓܹܐ: ܪܘܼܚܵܐ ܕܚܲܝܹ̈ܐ ܡ̣ܢ ܐܲܠܵܗܵܐ ܐܘܸܪܵܐ ܒܝܼܵܝ: ܘܩܸܡܠܘܿܢ ܥܲܠ ܐܲܩܠܵܝ̈: ܘܙܕܘܼܥܬܵܐ ܓܘܼܪܬܵܐ ܢܦܸܠܵܐ ܥܲܠ ܕܐܵܢܝܼ ܕܒܸܚܙܵܝܵܝ ܗ݇ܘܵܘ. 12 ܘܫܡܸܥܠܘܿܢ ܠܩܵܠܵܐ ܓܘܼܪܵܐ ܡ̣ܢ ܫܡܲܝܵܐ ܕܒܹܐܡܵܪܵܐ ܐܸܠܵܝ: ܐܣܘܿܩܘܿܢ ܠܲܐܟ݂ܵܐ. ܘܐܣܸܩܠܘܿܢ ܠܫܡܲܝܵܐ ܒܥܢܵܢܵܐ: ܘܚܸܘܝܵܝܠܘܿܢ ܕܸܫܡܸܢܵܝ̈. 13 ܘܒܗ̇ܝ ܣܵܥܲܬ ܗܥܘܹܠܹܐ ܪܵܘܕܵܢܵܐ ܓܘܼܪܵܐ: ܘܚܵܕ݇ ܡ̣ܢ ܥܸܣܪܵܐ ܕܡܕܝܼܢ݇ܬܵܐ ܢܦܸܠܹܐ: ܘܦܸܫܠܘܿܢ ܩܛܝܼܠܹܐ ܒܪܵܘܕܵܢܵܐ ܫܸܡܵܢܹ̈ܐ ܕܒܢܲܝ̈ܢܵܫܵܐ ܫܲܒ݂ܥܵܐ ܐܲܠܦܹ̈ܐ. ܘܐܵܢܝܼ ܐܚܹܪ̈݇ܢܹܐ ܗ݇ܘܹܠܘܿܢ ܙܸܕܥܝܹ̈ܐ: ܘܝܸܗܒ݂ܸܠܘܿܢ ܬܸܫܒܘܿܚܬܵܐ ܠܐܲܠܵܗܵܐ ܕܫܡܲܝܵܐ.

14 ܗ̇ܘ ܘܵܝܵܐ ܕܬܪܲܝ ܐܙܸܠܹܐ: ܘܗܵܐ: ܗ̇ܘ ܘܵܝܵܐ ܕܬܠܵܬ݇ܐ ܠܹܐܬܵܝܵܐ ܓ̰ܲܠܕܹܐ.

15 ܘܡܲܠܲܐܟ݂ܵܐ ܗ̇ܘ ܕܫܲܒ݂ܥܵܐ ܥܒܸܕܠܹܐ ܩܵܠܵܐ: ܘܗ݇ܘܹܠܘܿܢ ܩܵܠܹ̈ܐ ܓܘܼܪܹ̈ܐ ܒܫܡܲܝܵܐ: ܕܒܹܐܡܵܪܵܐ: ܗ݇ܘܹܠܵܐ ܡܲܠܟܘܼܬܵܐ ܕܥܵܠܡܵܐ ܕܡܵܪܝܵܐ ܕܝܼܲܢ: ܘܕܡܫܝܼܚܵܐ ܕܝܼܹܗ: ܘܒܸܬ ܥܵܒ݂ܸܕ ܡܲܠܟܘܼܬܵܐ ܠܥܵܠܲܡ ܥܵܠܡܝܼܢ. 16 ܘܐܵܢܝܼ ܥܸܣܪܝܼ ܘܐܲܪܒܥܵܐ ܚܘܵܪ̈ܕܸܩܢܹܐ: ܐܲܢܹܐ ܕܝܵܬܒ݂ܝܼ ܩܵܕ݇ܡ ܐܲܠܵܗܵܐ ܥܲܠ ܬܪ̈ܘܿܢܘܿܣܵܝ: ܢܦܸܠܘܿܢ ܥܲܠ ܦܵܬܘܵܬܵܝ̈ ܘܣܓܸܕܠܘܿܢ ܠܐܲܠܵܗܵܐ: 17 ܟܲܕ ܒܹܐܡܵܪܵܐ: ܫܵܟܘܿܪܹ̈ܐ ܝܘܵܚ ܐܸܠܘܼܟ݂: ܝܵܐ ܡܵܪܝܵܐ ܐܲܠܵܗܵܐ ܐܲܚܝܼܕ ܟܠ: ܗ̇ܘ ܕܝܼܠܹܐ ܘܗ̇ܘ ܕܝܼܗ݇ܘܵܐ: ܣܵܒܵܒ ܕܫܩܸܠܘܼܟ݂ ܚܲܝܠܘܼܟ݂ ܓܘܼܪܵܐ ܘܥܒܸܕܠܘܼܟ݂ ܡܲܠܟܘܼܬܵܐ. 18 ܘܛܵܝܸܦܹ̈ܐ ܟܪܸܒ݁ܠܘܿܢ: ܘܐܬܹܠܵܐ ܟܲܪܒܘܼܟ݂: ܘܙܲܒ݂ܢܵܐ ܕܡܝܼܬܹ̈ܐ ܠܸܦܝܵܫܵܐ ܕܝܼܢܹܐ: ܘܠܝܵܗ݇ܒ݂ܵܐ ܗܵܩܵܐ ܠܪܹ̈ܓܵܘܵܬܘܼܟ݂ ܢܒ݂̈ܝܹܐ ܘܠܩܲܕܝܼܫܹ̈ܐ: ܘܠܵܐܢܝܼ ܕܒܸܙܕܲܥܝܵܐ ܝܢܵܐ ܡ̣ܢ ܫܸܡܘܼܟ݂: ܠܙܥܘܿܪܹ̈ܐ ܘܠܓܘܼܪܹ̈ܐ: ܘܠܡܲܚܪܘܼܒ݂ܹܐ ܠܐܵܢܝܼ ܕܡܘܼܚܪܸܒ݂ܠܘܿܢ ܠܐܲܪܥܵܐ.

19 ܘܦܸܫܠܹܐ ܦܬܝܼܚܵܐ ܗܲܝܟܠܹܗ ܕܐܲܠܵܗܵܐ ܓܵܘ ܫܡܲܝܵܐ: ܘܦܸܫܠܵܐ ܚܙܝܼܬܵܐ ܩܹܒ݂ܘܼܬܵܐ ܕܕܝܵܬܹܩܹܗ ܓܵܘ ܗܲܝܟܠܹܗ: ܘܗ݇ܘܹܠܘܿܢ ܒܸܪ̈ܩܹܐ: ܘܪ̈ܲܥܡܹܐ: ܘܩܵܠܹ̈ܐ: ܘܪܵܘܕܵܢܵܐ: ܘܒܲܪܕܵܐ ܓܘܼܪܵܐ.

ܩܦܠܐܘܢ: ܝܒ

1 ܘܢܝܼܫܲܢܩܵܐ ܓܘܼܪܵܐ ܦܸܫܠܹܐ ܚܸܙܝܵܐ ܒܫܡܲܝܵܐ: ܒܲܟ݂ܬܵܐ ܕܠܒ݂ܝܼܫܬܵܐ ܫܸܡܫܵܐ: ܘܣܲܗܪܵܐ ܬܚܘܿܬ ܐܲܩܘܼ̈ܗ̇: ܘܥܲܠ ܪܹܫܘܼܗ̇ ܬܵܐܓ̰ ܕܬܪܸܥܣܲܪ ܟܵܘܟ݂ܒ݂ܹ̈ܐ: 2 ܘܒܸܛܝܼܢܬܵܐ ܗ݇ܘܵܐ. ܘܡܲܩܘܸܚܵܐ ܗ݇ܘܵܐ: ܟܲܕ ܓܵܪܫܵܐ ܗ݇ܘܵܐ ܚܸܒ݂ܠܹ̈ܐ: ܘܓ̰ܲܢܓ̰ܸܪܵܐ ܗ݇ܘܵܐ ܠܝܼܠܵܕܵܐ.

3 ܘܦܸܫܠܹܐ ܚܸܙܝܵܐ ܢܝܼܫܲܢܩܵܐ ܐܚܹܪ݇ܢܵܐ ܒܫܡܲܝܵܐ: ܘܗܵܐ ܬܵܢܝܼܢܵܐ ܓܘܼܪܵܐ ܣܡܘܼܩܵܐ: ܕܐܝܼܬ ܠܹܗ ܫܲܒ݂ܥܵܐ ܪܹ̈ܫܵܢܹܐ ܘܥܸܣܪܵܐ ܩܲܪ̈ܢܵܢܹܐ: ܘܥܲܠ ܪܹ̈ܫܵܢܘܼܗܝ ܫܲܒ݂ܥܵܐ ܬܵܐܓ̰ܹ̈ܐ. 4 ܘܛܘܼܦܪܹܗ ܒܸܓܪܵܫܵܐ ܠܚܵܕ݇ ܬܠܝܼܬܵܝܵܐ ܕܟܵܘܟ݂ܒ݂ܹ̈ܐ ܕܫܡܲܝܵܐ: ܕܕܸܪܵܝܝܠܹܐ ܒܐܲܪܥܵܐ. ܘܗ̇ܘ ܬܵܢܝܼܢܵܐ ܟܸܠܝܵܐ ܗ݇ܘܵܐ ܩܵܕ݇ܡ ܒܲܟ݂ܬܵܐ: ܗ̇ܝ ܕܗܲܕܝܼܪܬܵܐ ܗ݇ܘܵܐ ܠܝܼܠܵܕܵܐ: ܕܐܝܼܡܲܢ ܕܝܵܠܕܵܐ ܐܵܟ݂ܸܠ ܗ݇ܘܵܐ ܠܹܗ ܝܵܠܘܼܗ̇. 5 ܘܝܠܸܕܠܵܐ ܝܠܵܐ ܐܘܼܪܙܵܐ: ܗ̇ܘ ܕܗܕܝܼܪܵܐ ܝܠܹܐ ܠܡܲܪܥܘܼܝܹܐ ܠܟܠܵܝ ܛܵܝܸܦܹ̈ܐ ܒܚܘܼܛܪܵܐ ܕܦܪܸܙܠܵܐ: ܘܦܸܫܠܹܐ ܓ̰ܢܝܼܘܵܐ ܝܵܠܘܼܗ̇ ܠܟܸܣ ܐܲܠܵܗܵܐ: ܘܠܟܸܣ ܬܪܘܿܢܘܿܣ ܕܝܼܹܗ. 6 ܘܒܟ݂ܬܵܐ ܥܪܸܩܠܵܐ ܠܒܲܪܝܼܵܐ: ܐܲܝܟܵܐ ܕܐܝܼܬ ܗ݇ܘܵܐ ܠܵܗ̇ ܕܘܼܟܬܵܐ ܕܗܘܼܕܸܪܬܵܐ ܡ̣ܢ ܐܲܠܵܗܵܐ: ܕܬܵܡܵܐ ܬܲܪܣܝܼ ܠܵܗ̇ ܐܲܠܦܵܐ ܘܬܪܲܝܡܵܐܐ ܘܐܸܫܬܝܼ ܝܘܿܡܵܢܹ̈ܐ.

7 ܘܗ݇ܘܹܠܹܐ ܦܠܵܫܵܐ ܒܫܡܲܝܵܐ: ܡܝܼܟ݂ܵܐܹܝܠ ܘܡܲܠܲܐܟ݂ܘܼ̈ܗܝ ܠܦܠܵܫܵܐ ܥܲܡ ܬܵܢܝܼܢܵܐ: ܘܬܵܢܝܼܢܵܐ ܘܡܲܠܲܐܟ݂ܘܼ̈ܗܝ ܦܠܸܫܠܘܿܢ: 8 ܘܠܵܐ ܡܨܹܠܘܿܢ ܒܝܼܵܝ: ܘܕܘܼܟܬܵܝ ܡܸܕܪܹܐ ܠܵܐ ܡܫ̄ܟ̰ܚܠܵܐ ܒܫܡܝܵܐ. 9 ܘܦܸܫܠܹܐ ܪܘܼܦܝܵܐ ܗ̇ܘ ܬܵܢܝܼܢܵܐ ܓܘܼܪܵܐ: ܗ̇ܘ ܚܘܼܘܹܐ ܥܵܬܝܼܩܵܐ: ܗ̇ܘ ܕܦܝܵܫܵܐ ܝܠܹܐ ܩܸܪܝܵܐ: ܐܵܟ݂ܹܠܩܲܪܨܵܐ ܘܣܵܛܵܢܵܐ: ܡܚܠܸܛܵܢܵܐ ܕܟܠܵܗ̇ ܒܪܝܼܬܵܐ: ܦܸܫܠܹܐ ܪܘܼܦܝܵܐ ܥܲܠ ܐܲܪܥܵܐ: ܘܡܲܠܲܐܟ݂ܘܼ̈ܗܝ ܥܡܹܗ ܦܸܫܠܘܿܢ ܪܘܼܦܝܹܐ. 10 ܘܫܡܸܥܠܝܼ ܩܵܠܵܐ ܓܘܼܪܵܐ ܒܫܡܲܝܵܐ ܕܒܹܐܡܵܪܵܐ: ܐܵܕܝܼܵܐ ܗ݇ܘܹܠܹܐ ܦܘܼܪܩܵܢܵܐ ܘܚܲܝܠܵܐ ܘܡܲܠܟܘܼܬܵܐ ܕܐܲܠܵܗܵܐ ܕܝܼܲܢ: ܘܗܘܼܟܡܵܐ ܕܡܫܝܼܚܵܐ ܕܝܼܹܗ: ܣܵܒܵܒ ܕܦܸܫܠܹܐ ܡܘܼܢܦܸܠܵܐ ܗ̇ܘ ܡܵܚܝܵܢܵܐ ܕܕܲܪܗܲܩ ܕܐܵܚܘܿܢ̈ܘܵܬܲܢ: ܗ̇ܘ ܕܡܵܚܹܐ ܗ݇ܘܵܐ ܕܲܪܗܩܵܝ ܩܵܕ݇ܡ ܐܲܠܵܗܵܐ ܕܝܼܲܢ ܐܝܼܡܵܡܵܐ ܘܠܲܝܠܹܐ. 11 ܘܐܲܢܹܐ ܓ݂ܠܸܒܠܘܿܢ ܐܸܠܹܗ ܣܵܒܵܒ ܕܕܸܡܹܗ ܕܦܹܪܵܐ: ܘܣܵܒܵܒ ܕܗܹܡܸܙܡܵܢ ܕܣܵܗܕܘܼܬܵܝ: ܘܠܵܐ ܡܘܼܚܸܒܠܘܿܢ ܓܵܢܵܝ ܗܲܠ ܡܵܘܬܵܐ. 12 ܣܵܒܵܒ ܕܐܵܗܵܐ ܥܒ݂ܘܿܕܘܿܢ ܒܘܼܣܵܡܵܐ: ܝܵܐ ܫܡܲܝܵܐ: ܘܐܵܢܝܼ ܕܒܝܼܵܝ ܫܸܪܝܹܐ ܝܢܵܐ. ܘܵܝ ܠܐܲܪܥܵܐ ܘܠܝܵܡܵܐ: ܣܵܒܵܒ ܕܨܸܠܝܵܐ ܝܠܹܐ ܐܵܟ݂ܹܠܩܲܪܨܵܐ ܠܟܸܣܠܵܘܟ݂ܘܿܢ: ܕܐܝܼܬ ܠܹܗ ܟܲܪܒܵܐ ܓܘܼܪܬܵܐ: ܟܲܕ ܝܕܸܥܠܹܐ ܕܚܲܟ̰ܵܐ ܙܲܒ݂ܢܵܐ ܐܝܼܬ ܠܹܗ.

13 ܘܟܲܕ ܚܙܹܠܹܐ ܬܵܢܝܼܢܵܐ ܕܦܸܫܠܹܐ ܪܘܼܦܝܵܐ ܥܲܠ ܐܲܪܥܵܐ: ܛܪܸܕܠܹܐ ܠܒܲܟ݂ܬܵܐ ܗ̇ܝ ܕܝܠܸܕܠܵܐ ܠܐܘܿܪܙܵܐ. 14 ܘܦܸܫܠܘܿܢ ܝܘܼܗ݇ܒ݂ܹܐ ܠܒܲܟ݂ܬܵܐ ܬܪܲܝ ܓܘܼܠܦܵܢܹ̈ܐ ܕܢܸܫܪܵܐ ܓܘܼܪܵܐ: ܕܦܵܪܚܵܐ ܗ݇ܘܵܐ ܠܒܲܪܝܼܵܐ ܠܕܘܼܟܬܘܼܗ̇: ܐܲܝܟܵܐ ܕܦܵܝܫܵܐ ܬܘܼܪܣܝܼܬܵܐ ܬܵܡܵܐ ܥܕܵܢܵܐ ܘܥܕܵܢܹ̈ܐ ܘܦܲܠܓܵܐ ܕܥܕܵܢܵܐ: ܡ̣ܢ ܦܵܬܵܐ ܕܚܘܼܘܹܐ. 15 ܘܕܪܹܠܹܐ ܗ̇ܘ ܚܘܼܘܹܐ ܡ̣ܢ ܦܘܼܡܵܐ ܕܝܼܹܗ ܒܵܬ݇ܪ ܒܲܟ݂ܬܵܐ ܡ̈ܝܼܵܐ ܐܲܝܟ ܢܲܗܪܵܐ: ܕܥܵܒܸܕ ܗ݇ܘܵܐ ܠܵܗ̇ ܕܦܵܝܫܵܐ ܠܘܼܒܸܠܬܵܐ ܡ̣ܢ ܢܲܗܪܵܐ. 16 ܘܗܘܼܝܸܪܵܐ ܐܲܪܥܵܐ ܠܒ݂ܟ݂ܬܵܐ: ܘܦܬܸܚܠܵܐ ܐܲܪܥܵܐ ܦܘܼܡܘܼܗ̇: ܘܒܠܸܥܠܵܐ ܠܢܲܗܪܵܐ ܕܕܸܪܝܘܼܗܝ ܗ݇ܘܵܐ ܬܵܢܝܼܢܵܐ ܡ̣ܢ ܦܘܼܡܹܗ. 17 ܘܟܪܸܒ݁ܠܹܐ ܬܵܢܝܼܢܵܐ ܥܲܠ ܒܲܟ݂ܬܵܐ: ܘܐܙܸܠܹܐ ܠܸܥܒ݂ܵܕܵܐ ܦܠܵܫܵܐ ܥܲܡ ܕܐܵܢܝܼ ܐܚܹܪ̈݇ܢܹܐ ܕܙܲܪ̈ܥܘܼܗ̇: ܐܲܢܹܐ ܕܢܵܛܪܝܼ ܠܦܘܼܩܕܵܢܹ̈ܐ ܕܐܲܠܵܗܵܐ: ܘܐܝܼܬ ܠܗ݇ܘܿܢ ܣܵܗܕܘܼܬܵܐ ܕܝܼܫܘܿܥ ܡܫܝܼܚܵܐ.

ܩܦܠܐܘܢ: ܝܓ

1 ܘܟܠܹܠܹܐ ܥܲܠ ܣܹܠܵܐ ܕܝܵܡܵܐ.

ܘܚܙܹܠܝܼ ܕܐܣܸܩܠܹܐ ܕܵܒܵܐ ܡ̣ܢ ܝܵܡܵܐ: ܕܐܝܼܬ ܠܹܗ ܥܸܣܪܵܐ ܩܵܪ̈݇ܢܵܢܹܐ: ܘܫܲܒ݂ܥܵܐ ܪܹ̈ܫܵܢܹܐ: ܘܥܲܠ ܩܵܪ̈݇ܢܵܢܘܼܗܝ ܥܸܣܪܵܐ ܬܵܐܓ̰ܹ̈ܐ: ܘܥܲܠ ܪܹ̈ܫܵܢܘܼܗܝ ܫܸܡܵܢܹ̈ܐ ܕܓܘܼܕܵܦܵܐ. 2 ܘܕܵܒܵܐ: ܗ̇ܘ ܕܚܙܹܠܝܼ: ܟܹܐ ܕܵܡܹܐ ܗ݇ܘܵܐ ܠܢܸܡܪܵܐ: ܘܐܲܩܠܘܼ̈ܗܝ ܐܲܝܟ݂ ܕܕܸܒܵܐ: ܘܦܘܼܡܹܗ ܐܲܝܟ݂ ܦܘܼܡܵܐ ܕܐܲܪܝܵܐ: ܘܝܸܗܒ݂ܸܠܹܐ ܐܸܠܹܗ ܗ̇ܘ ܬܵܢܝܼܢܵܐ ܚܲܝܠܹܗ ܘܬܪܘܿܢܘܿܣܹܗ ܘܗܘܼܟܡܵܐ ܓܘܼܪܵܐ. 3 ܘܚܙܹܠܝܼ ܚܵܕ݇ ܡ̣ܢ ܪܹ̈ܫܵܢܹܐ ܕܝܼܹܗ ܐܲܝܟ݂ ܦܪܝܼܡܵܐ ܠܡܵܘܬܵܐ: ܘܡܚܘܼܬܵܐ ܕܡܵܘܬܵܐ ܕܝܼܹܗ ܒܣܸܡܠܵܐ. ܘܥܓ̰ܸܒܠܵܐ ܟܠܵܗ̇ ܐܲܪܥܵܐ ܒܵܬ݇ܪ ܕܗ̇ܘ ܕܵܒܵܐ: ܘܣܓܸܕܠܘܿܢ ܠܬܵܢܝܼܢܵܐ: ܣܵܒܵܒ ܕܝܼܗܒ݂ܸܠܹܗ ܗܘܼܟܡܵܐ ܠܗ̇ܘ ܕܵܒܵܐ: ܘܣܓܸܕܠܘܿܢ ܠܗ̇ܘ ܕܵܒܵܐ ܟܲܕ ܐܵܡܪܝܼ: ܡܵܢܝܼ ܟܹܐ ܕܵܡܹܐ ܠܕܵܒܵܐ: ܡܵܨܹܐ ܠܸܦܠܵܫܵܐ ܥܲܡܹܗ: 5 ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܦܘܼܡܵܐ ܕܗܲܡܙܸܡ ܫܘܼܠܹ̈ܐ ܓܘܼܪܹ̈ܐ ܘܓܘܼܕܵܦܹ̈ܐ: ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܗܘܼܟܡܵܐ ܠܸܥܒ݂ܵܕܵܐ ܐܲܪܥܝܼ ܘܬܪܲܝ ܝܲܪ̈ܚܹܐ. 6 ܘܦܬܸܚܠܹܐ ܦܘܼܡܹܗ ܠܓܘܼܕܵܦܵܐ ܥܲܠ ܐܲܠܵܗܵܐ: ܠܸܓܕܵܦܵܐ ܠܫܸܡܹܗ: ܘܠܡܵܫܸܟܢܹܗ: ܘܠܲܐܢܹܐ ܕܒܫܡܲܝܵܐ ܫܵܪܝܼ. 7 ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܗܘܼܟܡܵܐ ܥܲܠ ܟܠ ܐܘܼܓ̰ܵܓ݂: ܘܛܵܝܸܦܵܐ: ܘܠܸܫܵܢܵܐ: ܘܸܠܲܬ. ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܠܸܥܒ݂ܵܕܵܐ ܦܠܵܫܵܐ ܥܲܠ ܩܲܕܝܼܫܹ̈ܐ ܘܠܸܓ݂ܠܵܒܵܝ. 8 ܘܒܸܬ ܣܵܓ݂ܕܝܼ ܐܸܠܹܗ ܟܠܵܝ ܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ: ܐܵܢܝܼ ܕܠܹܐ ܝܠܹܐ ܟܬܝܼܒ݂ܵܐ ܫܸܡܵܝ ܓܵܘ ܟܬܵܒ݂ܵܐ ܕܚܲܝܹ̈ܐ ܕܗ̇ܘ ܦܹܪܵܐ ܦܪܝܼܡܵܐ ܡ̣ܢ ܒܸܢܝܲܬܹ̈ܗ ܕܥܵܠܡܵܐ. 9 ܐܸܢ ܐ݇ܢܵܫܵܐ ܐܝܼܬ ܠܹܗ ܢܵܬܝܵܬܹ̈ܐ: ܫܲܡܸܥ. 10 ܐܸܢ ܐ݇ܢܵܫܵܐ ܒܣܠܵܒܵܐ ܠܵܒܸܠ: ܒܣܠܵܒܵܐ ܒܸܬ ܐܵܙܸܠ: ܐܸܢ ܐ݇ܢܵܫܵܐ ܒܣܲܝܦܵܐ ܩܵܛܸܠ: ܘܵܓ̰ܸܒ ܝܼܠܵܐ ܕܒܣܲܝܦܵܐ ܦܵܝܸܫ ܩܛܝܼܠܵܐ. ܠܲܐܟ݂ܵܐ ܝܠܵܐ ܚܡܵܠܬܵܐ ܘܗܲܝܡܵܢܘܼܬܵܐ ܕܩܲܕܝܼܫܹ̈ܐ.

11 ܘܚܙܹܠܝܼ ܚܵܕ݇ ܕܵܒܵܐ ܐܚܹܪ݇ܢܵܐ ܕܒܹܐܣܵܩܵܐ ܡ̣ܢ ܐܲܪܥܵܐ: ܘܐܝܼܬ ܗ݇ܘܵܘ ܠܹܗ ܬܲܪ̈ܬܹܝ ܩܵܪ̈݇ܢܵܢܹܐ ܕܕܵܡܝܼ ܗ݇ܘܵܘ ܠܐܵܢܝܼ ܕܚܵܕ݇ ܦܹܪܵܐ: ܘܗܲܡܙܸܡ ܗ݇ܘܵܐ ܐܲܝܟ݂ ܬܵܢܝܼܢܵܐ. 12 ܘܒܸܥܒ݂ܵܕܵܐ ܝܠܹܐ ܩܵܕ݇ܡܘܼܗܝ ܟܠܹܗ ܗܘܼܟܡܵܐ ܕܕܵܒܵܐ ܩܵܕ݇ܡܵܝܵܐ: ܘܒܸܥܒ݂ܵܕܵܐ ܝܠܹܐ ܠܐܲܪܥܵܐ ܘܠܵܐܢܝܼ ܕܒܸܥܡܵܪܵܐ ܝܢܵܐ ܓܵܘܵܗ̇ ܕܣܵܓ݂ܕܝܼ ܠܕܵܒܵܐ ܩܵܕ݇ܡܵܝܵܐ: ܗ̇ܘ ܕܒܣܸܡܠܵܐ ܡܚܘܼܬܵܐ ܕܡܵܘܬܹܗ. 13 ܒܸܥܒ݂ܵܕܵܐ ܝܠܹܐ ܢܝܼܫܲܢܩܹ̈ܐ ܓܘܼܪܹ̈ܐ: ܕܵܐܟ݂ܝܼ ܕܐܘܼܦ ܢܘܼܪܵܐ ܒܸܬ ܥܵܒܸܕ ܠܸܨܠܵܝܵܐ ܡ̣ܢ ܫܡܲܝܵܐ ܥܲܠ ܐܲܪܥܵܐ ܩܵܕ݇ܡ ܒܢܲܝ̈ܢܵܫܵܐ. 14 ܘܟܹܐ ܡܲܚܠܸܛ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ ܣܵܒܵܒ ܕܥܵܓ̰ܸܒܘ̈ܵܬܵܐ ܕܦܸܫܠܘܿܢ ܝܘܼܗ݇ܒ݂ܹܐ ܐܸܠܹܗ ܠܸܥܒ݂ܵܕܵܐ ܩܵܕ݇ܡ ܕܵܒܵܐ: ܒܹܐܡܵܪܵܐ ܠܐܵܢܝܼ ܕܥܵܡܪܝܼ ܥܲܠ ܐܲܪܥܵܐ: ܕܥܵܒ݂ܕܝܼ ܨܲܠܡܵܐ ܠܗ̇ܘ ܕܵܒܵܐ ܕܐܝܼܬ ܗ݇ܘܵܐ ܠܹܗ ܡܚܘܼܬܵܐ ܕܣܲܝܦܵܐ: ܘܚܹܝܠܹܐ. 15 ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܠܝܼܵܗ݇ܒ݂ܵܐ ܢܵܦܵܣ ܠܨܲܠܡܵܐ ܕܕܵܒܵܐ: ܕܨܠܡܵܐ ܕܕܵܒܵܐ ܐܘܼܦ ܗܲܡܙܸܡ ܘܐܘܼܦ ܥܵܒܸܕ ܕܟܠܵܝ ܐܵܢܝܼ ܕܠܵܐ ܣܵܓ݂ܕܝܼ ܠܗ̇ܘ ܨܲܠܡܵܐ ܕܕܵܒܵܐ: ܦܵܝܫܝܼ ܩܛܝܼܠܹܐ. 16 ܘܒܸܬ ܥܵܒܸܕ ܠܟܠܵܝ: ܠܙܥܘܿܪܹ̈ܐ ܘܠܓܘܼܪܹ̈ܐ: ܘܠܕܵܘܠܲܬܡܲܢܕܹ̈ܐ ܘܠܡܸܣܟܹܢܹ̈ܐ: ܘܠܵܐܙܵܕܹ̈ܐ ܘܠܩܘܼ̈ܠܹܐ: ܕܦܵܝܸܫ ܝܘܼܗ݇ܒ݂ܵܐ ܐܸܠܵܝ ܪܘܼܫܡܵܐ ܥܲܠ ܐܝܼܕܵܝ̈ ܕܝܲܡܝܼܢܵܐ: ܝܲܢ ܥܲܠ ܩܸܨܵܝ̈. 17 ܘܕܐ݇ܢܵܫܵܐ ܠܵܐ ܡܵܨܹܐ ܙܵܒ݂ܸܢܢ ܘܙܵܒܸ݁ܢ: ܐܸܠܵܐ ܗ̇ܘ ܕܐܝܼܬ ܠܹܗ ܪܘܼܫܡܵܐ ܫܸܡܵܐ ܕܗ̇ܘ ܕܵܒܵܐ: ܝܲܢ ܡܸܢܝܵܢܵܐ ܕܫܸܡܹܗ. 18 ܠܲܐܟ݂ܵܐ ܐܝܼܬ ܥܵܩܸܠܕܵܪܘܼܬܵܐ. ܗ̇ܘ ܕܐܝܼܬ ܠܹܗ ܗܵܘܢܵܐ: ܚܲܫܒܸܢ ܠܡܸܢܝܵܢܵܐ ܕܕܵܒܵܐ: ܣܵܒܵܒ ܡܸܢܝܵܢܵܐ ܕܒܲܪܢܵܫܵܐ ܝܠܹܐ. ܘܡܸܢܝܵܢܹܗ: ܐܸܫܸܬܡܵܐܐ ܘܐܸܫܬܝܼ ܘܐܸܫܬܵܐ ܝܠܹܐ.

ܩܦܠܐܘܢ: ܝܕ

1 ܘܚܙܹܠܝܼ: ܘܗܵܐ: ܗ̇ܘ ܦܹܪܵܐ ܟܸܠܝܵܐ ܥܲܠ ܛܘܼܪܵܐ ܕܨܸܥܝܘܿܢ: ܘܥܲܡܹܗ ܡܵܐܐ ܘܐܲܪܒܥܝܼ ܘܐܲܪܒܥܵܐ ܐܲܠܦܹ̈ܐ: ܕܐܝܼܬ ܠܗ݇ܘܿܢ ܫܸܡܵܐ ܕܝܼܹܗ ܘܫܸܡܵܐ ܕܒܵܒܹܗ ܟܬܝܼܒ݂ܵܐ ܥܲܠ ܩܸܨܵܝ̈. 2 ܘܫܡܸܥܠܝܼ ܩܵܠܵܐ ܡ̣ܢ ܫܡܲܝܵܐ: ܐܲܝܟ݂ ܩܵܠܵܐ ܕܡ̈ܝܼܵܐ ܪܵܒܵܐ: ܘܐܲܝܟ݂ ܩܵܠܵܐ ܕܪܲܥܡܵܐ ܓܘܼܪܵܐ: ܘܩܵܠܵܐ ܕܫܡܸܥܠܝܼ ܐܲܝܟ݂ ܕܡܵܚܝܵܢܹ̈ܐ ܕܩܝܼܬܵܪܹ̈ܐ ܗ݇ܘܵܐ ܕܡܵܚܝܼ ܒܩܝܼܬܵܪ̈ܝ: 3 ܘܫܵܒܘܿܚܹܐ ܬܸܫܒܘܿܚܬܵܐ ܚܲܕܬܵܐ ܩܵܕ݇ܡ ܬܪܘܿܢܘܿܣ: ܘܩܵܕ݇ܡ ܕܐܲܢܹܐ ܚܲܝܘ̈ܵܬܵܐ ܘܕܵܐܢܝܼ ܚܘܵܪ̈ܕܸܩܢܹܐ: ܘܠܵܐ ܐ݇ܢܵܫܵܐ ܡܵܨܹܐ ܗ݇ܘܵܐ ܠܸܠܝܵܦܵܐ ܠܗ̇ܝ ܬܸܫܒܘܿܚܬܵܐ ܫܒ݂ܘܿܩ ܡܐܲܢܹܐ ܡܵܐܐ ܘܐܲܪܒܥܝܼ ܘܐܲܪܒܥܵܐ ܐܲܠܦܹ̈ܐ: ܐܵܢܝܼ ܕܙܒ݂ܝܼܢܹܐ ܡ̣ܢ ܐܲܪܥܵܐ. 4 ܐܵܢܝܼ ܝܢܵܐ ܐܲܢܹܐ ܕܥܲܡ ܒܲܟ݂ܬܵܬܹ̈ܐ ܠܵܐ ܦܸܫܠܘܿܢ ܟ̰ܘܼܦܠܸܢܹܐ: ܣܵܒܵܒ ܕܒܬܘܼܠܹ̈ܐ ܝܢܵܐ. ܐܵܢܝܼ ܝܢܵܐ ܐܲܢܹܐ ܕܬܒܸܥܠܘܿܢ ܠܦܹܪܵܐ ܠܟܠ ܕܘܼܟܵܐ ܕܐܵܙܸܠ. ܐܵܢܝܼ ܦܸܫܠܘܿܢ ܙܒ݂ܝܼܢܹܐ ܡ̣ܢ ܒܢܲܝ̈ܢܵܫܵܐ ܪܹܫܝܼܬܵܐ ܠܐܲܠܵܗܵܐ ܘܠܦܹܪܵܐ. 5 ܘܒܦܘܼܡܵܝ ܠܵܐ ܡܫ̄ܟ̰ܸܚܠܵܐ ܕܵܓܵܠܘܼܬܵܐ: ܣܵܒܵܒ ܕܠܵܐ ܡܘܼܡܹ̈ܐ ܝܢܵܐ.

6 ܘܚܙܹܠܝܼ ܡܲܠܲܐܟ݂ܵܐ ܐܚܹܪ݇ܢܵܐ ܟܲܕ ܒܸܦܪܵܚܵܐ ܒܒܹܝܦܲܠܓܵܐ ܕܫܡܲܝܵܐ: ܕܐܝܼܬ ܠܹܗ ܐܹܘܵܢܓܵܠܝܼܘܿܢ ܕܠܥܵܠܲܡ: ܠܡܲܫܚܘܼܕܹܐ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ: ܘܥܲܠ ܟܠ ܡܸܠܲܬ ܘܐܘܼܓ̰ܵܓ݂ ܘܠܸܫܵܢܵܐ ܘܛܵܝܸܦܵܐ: 7 ܕܒܹܐܡܵܪܵܐ ܒܩܵܠܵܐ ܓܘܼܪܵܐ: ܙܕܸܥܡܘܿܢ ܡ̣ܢ ܐܲܠܵܗܵܐ: ܘܗܲܒ݇ܠܘܿܢ ܠܹܗ ܬܸܫܒܘܿܚܬܵܐ: ܣܵܒܵܒ ܕܐܬܹܠܵܐ ܣܵܥܲܬ ܕܕܝܼܘܵܢܹܗ: ܘܣܓ݂ܘܿܕܘܿܢ ܠܗ̇ܘ ܕܒܪܹܠܹܐ ܠܫܡܲܝܵܐ ܘܠܲܐܪܥܵܐ ܘܠܝܵܡܵܐ ܘܠܥܲܝܢܵܬܹ̈ܐ ܕܡ̈ܝܼܵܐ.

8 ܘܡܲܠܲܐܟ݂ܵܐ ܐܚܹܪܢܵܐ: ܕܬܪܲܝ: ܬܒܸܥܠܹܐ ܐܸܠܹܗ ܟܲܕ ܒܹܐܡܵܪܵܐ: ܢܦܸܠܵܐ: ܢܦܸܠܵܐ: ܒܵܒܹܠ ܗ̇ܝ ܡܕܝܼܢ݇ܬܵܐ ܓܘܼܪܬܵܐ: ܗ̇ܝ ܕܡ̣ܢ ܚܲܡܪܵܐ ܕܚܸܡܬܵܐ ܕܙܵܢܝܘܼܬܘܼܗ̇ ܡܘܼܫܬܹܠܵܐ ܠܟܠܵܝ ܛܵܝܸܦܹ̈ܐ.

9 ܘܡܲܠܲܐܟ݂ܵܐ ܐܚܹܪ݇ܢܵܐ: ܕܬܠܵܬ݇ܐ: ܬܒܸܥܠܹܐ ܐܸܠܵܝ: ܟܲܕ ܒܹܐܡܵܪܵܐ ܒܩܵܠܵܐ ܓܘܼܪܵܐ: ܐܸܢ ܐ݇ܢܵܫܵܐ ܣܵܓܸܕ ܠܕܵܒܵܐ ܘܠܨܲܠܡܹܗ: ܘܩܵܒܸ݁ܠ ܪܘܼܫܡܹܗ ܥܲܠ ܩܸܨܹܗ ܝܲܢ ܥܲܠ ܐܝܼܕܹܗ: 10 ܐܘܼܦ ܗ̇ܘ ܒܸܬ ܫܵܬܹܐ ܡ̣ܢ ܚܲܡܪܵܐ ܕܚܸܡܬܵܐ ܕܐܲܠܵܗܵܐ: ܕܝܼܠܹܐ ܡܙܝܼܓ݂ܵܐ ܚܵܠܝܼܨ ܒܟܵܣܵܐ ܕܟܲܪܒܹܗ: ܘܒܸܬ ܦܵܝܸܫ ܓ̰ܘܼܢܓ̰ܸܪܵܐ ܒܢܘܼܪܵܐ ܘܟܸܒܪܝܼܬ: ܩܵܕ݇ܡ ܡܲܠܲܐܟ݂ܹ̈ܐ ܩܲܕܝܼܫܹ̈ܐ: ܘܩܵܕ݇ܡ ܦܹܪܵܐ. 11 ܘܬܸܢܵܐ ܕܓ̰ܘܼܢܓ̰ܵܪ̈ܝ ܠܥܵܠܡܹ̈ܐ ܕܥܵܠܡܹ̈ܐ ܒܹܐܣܵܩܵܐ ܝܠܹܐ: ܘܠܲܝܬ ܠܗ݇ܘܿܢ ܢܝܵܚܵܐ ܐܝܼܡܵܡܵܐ ܘܠܲܝܠܹܐ: ܠܐܵܢܝܼ ܕܣܵܓ݂ܕܝܼ ܠܗ̇ܘ ܕܵܒܵܐ ܘܠܨܲܠܡܹܗ: ܘܟܠ ܐ݇ܢܵܫܵܐ ܕܩܵܒܸ݁ܠ ܪܘܼܫܡܵܐ ܕܫܸܡܹܗ. 12 ܠܲܐܟ݂ܵܐ ܝܠܵܐ ܚܡܵܠܬܵܐ ܕܩܲܕܝܼܫܹ̈ܐ: ܐܵܢܝܼ ܕܢܵܛܪܝܼ ܠܦܘܼܩܕܵܢܹ̈ܐ ܕܐܲܠܵܗܵܐ ܘܠܗܲܝܡܵܢܘܼܬܵܐ ܕܝܼܫܘܿܥ.

13 ܘܫܡܸܥܠܝܼ ܩܵܠܵܐ ܡ̣ܢ ܫܡܲܝܵܐ ܕܒܹܐܡܵܪܵܐ: ܟܬܘܿܒ݂: ܛܘܼܒ݂ܵܢܹ̈ܐ ܝܢܵܐ ܐܵܢܝܼ ܡܝܼܬܹ̈ܐ ܕܒܡܵܪܝܵܐ ܡܵܝܬܝܼ ܡ̣ܢ ܐܵܕܝܼܵܐ ܗܹܐ: ܒܹܐܡܵܪܵܐ ܝܠܹܐ ܪܘܼܚܵܐ: ܕܡܲܢܝܸܚ ܡ̣ܢ ܓ̰ܵܦܵܝ̈: ܘܦܘܼܠܚܵܢܵܝ̈ ܒܸܬܒܲܥܝܵܐ ܝܢܵܐ ܥܲܡܵܝ.

14 ܘܚܸܪܝܼ: ܘܗܵܐ: ܥܢܵܢܵܐ ܚܘܵܪܬܵܐ: ܘܥܲܠ ܥܢܵܢܵܐ ܝܬܝܼܒ݂ܵܐ ܕܒܸܕܡܵܝܵܐ ܗ݇ܘܵܐ ܠܒܪܘܼܢܹܗ ܕܐ݇ܢܵܫܵܐ: ܕܐܝܼܬ ܗ݇ܘܵܐ ܠܹܗ ܥܲܠ ܪܹܫܹܗ ܬܵܐܓ̰ ܕܕܲܗܒ݂ܵܐ: ܘܒܐܝܼܕܹܗ ܡܲܓܠܵܐ ܚܵܪܝܼܦܵܐ. 15 ܘܡܲܠܲܐܟ݂ܵܐ ܐܚܹܪ݇ܢܵܐ ܦܠܸܛܠܹܐ ܡ̣ܢ ܗܲܝܟܠܵܐ: ܟܲܕ ܡܲܩܘܘܼܚܹܐ ܒܩܵܠܵܐ ܓܘܼܪܵܐ ܠܗ̇ܘ ܕܝܼܗ݇ܘܵܐ ܝܬܝܼܒ݂ܵܐ ܥܲܠ ܥܢܵܢܵܐ: ܕܪܝܼ ܡܲܓܠܘܼܟ݂ ܘܚܨܘܿܕ: ܣܵܒܵܒ ܕܐܬܹܠܵܐ ܣܵܥܲܬ ܕܚܸܨܕܵܐ: ܣܵܒܵܒ ܕܚܸܨܕܵܐ ܕܐܲܪܥܵܐ ܡܸܛܝܵܐ ܝܠܹܐ. 16 ܘܗ̇ܘ ܕܝܼܗ݇ܘܵܐ ܝܬܝܼܒ݂ܵܐ ܥܲܠ ܥܢܵܢܵܐ ܕܪܹܠܹܐ ܡܲܓܠܵܐ ܕܝܼܹܗ ܥܲܠ ܐܲܪܥܵܐ: ܘܦܸܫܠܵܐ ܚܨܝܼܕܬܵܐ ܐܲܪܥܵܐ.

17 ܘܡܲܠܲܐܟ݂ܵܐ ܐܚܹܪ݇ܢܵܐ ܦܠܸܛܠܹܐ ܡ̣ܢ ܗܲܝܟܠܵܐ ܕܒܫܡܲܝܵܐ: ܕܐܝܼܬ ܗ݇ܘܵܐ ܠܹܗ ܐܘܼܦ ܗ̇ܘ ܡܲܓܠܵܐ ܚܵܪܝܼܦܵܐ. 18 ܘܡܲܠܲܐܟ݂ܵܐ ܐܚܹܪ݇ܢܵܐ ܦܠܸܛܠܹܐ ܡ̣ܢ ܡܲܕܒܚܵܐ: ܗ̇ܘ ܕܐܝܼܬ ܠܹܗ ܗܘܼܟܡܵܐ ܥܲܠ ܢܘܼܪܵܐ: ܘܡܘܼܩܘܸܚܠܹܐ ܒܡܲܩܘܲܚܬܵܐ ܓܘܼܪܬܵܐ ܠܗ̇ܘ ܕܐܝܼܬ ܗ݇ܘܵܐ ܠܹܗ ܡܲܓܠܵܐ ܚܵܪܝܼܦܵܐ: ܟܲܕ ܒܹܐܡܵܪܵܐ: ܕܪܝܼ ܡܲܓܠܘܼܟ݂ ܚܵܪܝܼܦܵܐ: ܘܩܛܘܿܦ ܠܩܘܼܢܛܵܝܦܹ̈ܐ ܕܐܲܪܥܵܐ: ܣܵܒܵܒ ܕܡܛܹܠܘܿܢ ܥܲܢܒ݂ܘܼ̈ܗ̇. 19 ܘܕܪܹܠܹܐ ܡܲܠܲܐܟ݂ܵܐ ܡܲܓܠܹܗ ܒܐܲܪܥܵܐ: ܘܩܛܸܦܠܹܐ ܠܓܸܦܬܵܐ ܕܐܲܪܥܵܐ: ܘܕܪܹܠܹܐ ܓܵܘ ܡܲܥܨܲܪܬܵܐ ܓܘܼܪܬܵܐ ܕܚܸܡܬܹܗ ܕܐܲܠܵܗܵܐ. 20 ܘܦܸܫܠܵܐ ܡܪܥܝܼܟ̰ܬܵܐ ܡܲܥܨܲܪܬܵܐ ܠܒ݂ܲܕܲܪ ܡ̣ܢ ܡܕܝܼܢ݇ܬܵܐ: ܘܦܠܸܛܠܹܐ ܕܸܡܵܐ ܡ̣ܢ ܡܲܥܨܵܪܬܵܐ ܗܲܠ ܠܵܥܡܹ̈ܐ ܕܣܘܼܣܵܘܵܬܹ̈ܐ: ܡ̣ܢ ܐܸܣܛ̈ܕܵܘܵܬܵܐ ܐܲܠܦܵܐ ܘܐܸܫܸܬܡܵܐܐ.

ܩܦܠܐܘܢ: ܝܗ

1 ܘܚܙܹܠܝܼ ܢܝܼܫܲܢܩܵܐ ܐܚܹܪ݇ܢܵܐ ܒܫܡܲܝܵܐ: ܓܘܼܪܵܐ ܘܥܓ̰ܝܼܒܵܐ: ܫܲܒ݂ܥܵܐ ܡܲܠܲܐܟ݂ܹ̈ܐ ܕܐܝܼܬ ܗ݇ܘܵܘ ܠܗܥܘܿܢ ܫܲܒ݂ܲܥ ܡܲܚܘܵܬܹ̈ܐ: ܐܲܢܹܐ ܐܚܵܪ̈ܵܝܹܐ: ܣܵܒܵܒ ܕܒܝܼܵܝ ܦܸܫܠܵܐ ܬܘܼܡܸܡܬܵܐ ܚܸܡܬܹܗ ܕܐܲܠܵܗܵܐ.

2 ܘܚܙܹܠܝܼ ܐܲܝܟ݂ ܝܵܡܵܐ ܕܫܘܼܫܵܐ ܚܒ݂ܝܼܛܬܵܐ ܒܢܘܼܪܵܐ: ܘܠܵܐܢܝܼ ܕܓ݂ܠܸܒܠܘܿܢ ܠܗ̇ܘ ܕܵܒܵܐ ܘܠܨܲܠܡܹܗ ܘܠܡܸܢܝܵܢܵܐ ܕܫܸܡܹܗ: ܟܲܕ ܟܸܠܝܹܐ ܥܲܠ ܝܵܡܵܐ ܕܫܘܼܫܵܐ: ܘܐܝܼܬ ܠܗܥܘܿܢ ܩܝܼܬܵܪܹ̈ܐ ܕܐܲܠܵܗܵܐ: ܘܫܵܒܘܿܚܹܐ ܬܸܫܒܘܿܚܬܵܐ ܕܡܘܼܫܹܐ ܗ̇ܘ ܪܹܓܹܗ ܕܲܐܠܵܗܵܐ: ܘܬܸܫܒܘܿܚܬܵܐ ܕܦܹܪܵܐ: ܟܲܕ ܒܹܐܡܵܪܵܐ: ܓܘܼܪܹ̈ܐ ܝܢܵܐ ܘܥܓ̰ܝܼܒܹ̈ܐ ܦܘܼܠܚܵܢܘܼ̈ܟ݂: ܡܵܪܝܵܐ ܐܲܠܵܗܵܐ ܐܲܚܝܼܕ ܟܠ. ܟܹܐܢܹ̈ܐ ܝܢܵܐ ܘܫܲܪܝܼܪܹ̈ܐ ܝܢܵܐ ܐܘܼܪܚܵܬܘܼܟ݂: ܡܲܠܟܵܐ ܕܥܵܠܡܹܐ. 4 ܡܵܢܝܼ ܠܹܐ ܙܵܕܸܥ ܡܸܢܘܼܟ݂: ܡܵܪܝܵܐ: ܘܫܵܒܸܚ ܠܫܸܡܘܼܟ݂: ܣܵܒܵܒ ܕܐܲܢ݇ܬ ܝܼܘܸܬ ܒܢܲܦ̮ܫܘܼܟ݂ ܕܸܟ݂ܝܵܐ: ܣܵܒܵܒ ܕܟܠܵܝ ܛܵܝܸܦܹ̈ܐ ܒܸܬ ܐܵܬܝܼ ܘܒܸܬ ܣܵܓ݂ܕܝܼ ܩܵܕ݇ܡܘܼܟ݂: ܕܫܘܼܠܹ̈ܐ ܙܲܕܝܼܩܹ̈ܐ ܕܝܼܘܼܟ݂ ܦܸܫܠܘܿܢ ܓܸܠܝܹܐ.

5 ܘܒܵܬ݇ܪ ܐܲܢܹܐ ܚܙܹܠܝܼ: ܘܗܵܐ: ܦܸܫܠܹܐ ܦܬܝܼܚܵܐ ܗܲܝܟܠܵܐ ܕܡܵܫܢܵܐ ܕܣܵܗܕܘܼܬܵܐ ܕܒܫܡܲܝܵܐ. 6 ܘܦܠܸܛܠܘܿܢ ܐܵܢܝܼ ܫܲܒ݂ܥܵܐ ܡܲܠܲܐܟ݂ܹ̈ܐ: ܐܵܢܝܼ ܕܐܝܼܬ ܠܗ݇ܘܿܢ ܫܲܒ݂ܲܥ ܡܲܚܘܵܬܹ̈ܐ: ܡ̣ܢ ܗܲܝܟܠܵܐ: ܠܒ݂ܝܼܫܹܐ ܟܸܬܵܢ ܬܲܡܝܼܙ ܡܲܒܪܸܩܵܢܵܐ: ܘܐܣܝܼܪܹܐ ܠܟܸܣ ܨܲܕܪܵܝ ܟܵܡܵܪܹ̈ܐ ܕܕܲܗܒ݂ܵܐ. 7 ܘܚܕܵܐ ܡ̣ܢ ܐܲܪܒܲܥ ܚܲܝܘ̈ܵܬܵܐ ܝܸܥܒ݂ܸܠܵܐ ܠܐܵܢܝܼ ܫܲܒ݂ܥܵܐ ܡܲܠܲܐܟ݂ܹ̈ܐ ܫܲܒ݂ܥܵܐ ܦܝܼܠܲܐܣ̈ ܕܕܲܗܒ݂ܵܐ: ܕܡܸܠܝܹܐ ܡ̣ܢ ܚܸܡܬܹܗ ܕܐܲܠܵܗܵܐ: ܗ̇ܘ ܕܚܵܝܵܐ ܝܠܹܐ ܠܥܵܠܡܵܐ ܕܥܵܠܡܹ̈ܐ. 8 ܘܦܸܫܠܹܐ ܡܸܠܝܵܐ ܗܲܝܟܠܵܐ ܡ̣ܢ ܬܸܢܵܐ ܡ̣ܢ ܬܸܫܒܘܿܚܬܹܗ ܕܐܲܠܵܗܵܐ: ܘܡ̣ܢ ܚܲܝܠܹܗ: ܘܠܵܐ ܐ݇ܢܵܫܵܐ ܡܵܨܹܐ ܗ݇ܘܵܐ ܠܹܐܘܵܪܵܐ ܠܗܲܝܟܠܵܐ: ܗܲܠ ܕܦܵܝܫܝܼ ܬܘܼܡܸܡܹܐ ܐܲܢܹܐ ܫܲܒ݂ܲܥ ܡܲܚܘܵܬܹ̈ܐ ܕܐܵܢܝܼ ܫܲܒ݂ܥܵܐ ܡܲܠܲܐܟ݂ܹ̈ܐ.

ܩܦܠܐܘܢ: ܝܘ

1 ܘܫܡܸܥܠܝܼ ܩܵܠܵܐ ܓܘܼܪܵܐ ܡ̣ܢ ܗܲܝܟܠܵܐ ܕܒܹܐܡܵܪܵܐ ܠܐܵܢܝܼ ܫܲܒ݂ܥܵܐ ܡܲܠܲܐܟ݂ܹ̈ܐ: ܙܹܠ݇ܡܘܿܢ ܘܫܵܦܟ݂ܘܿܢ ܠܦܝܼܵܠܲܐܣ̈ ܕܚܸܡܬܹܗ ܕܐܲܠܵܗܵܐ ܒܐܲܪܥܵܐ.

2 ܘܐܙܹܠܹܐ ܗ̇ܘ ܩܵܕ݇ܡܵܝܵܐ: ܘܫܘܼܦܸܟ݂ܠܹܐ ܠܦܝܼܵܠܵܐ ܕܝܼܹܗ ܒܐܲܪܥܵܐ: ܘܗ݇ܘܹܠܵܐ ܕܲܪܒܵܐ ܚܸܪܒܵܐ ܘܡܲܡܪܸܥܝܵܢܬܵܐ ܥܲܠ ܒܢܲܝ̈ܢܵܫܵܐ: ܐܵܢܝܼ ܕܐܝܼܬ ܗ݇ܘܵܘ ܠܗ݇ܘܿܢ ܠܪܘܼܫܡܵܐ ܕܕܵܒ݂ܵܐ: ܘܐܵܢܝܼ ܕܣܵܓ݂ܕܝܼ ܠܨܲܠܡܹܗ.

3 ܘܗ̇ܘ ܬܪ̈ܲܝܵܢܵܐ ܫܘܼܦܸܟ݂ܠܹܐ ܠܦܝܼܵܠܵܐ ܕܝܼܹܗ ܒܝܵܡܵܐ: ܘܗ݇ܘܹܠܹܐ ܕܸܡܵܐ ܐܲܝܟ݂ ܕܡܝܼܬܵܐ: ܘܟܠ ܓܵܢܵܐ ܚܵܝܬܵܐ ܡܸܬܠܵܐ ܓܵܘ ܝܵܡܵܐ.

4 ܘܗ̇ܘ ܬܠܝܼܬܵܝܵܐ ܫܘܼܦܸܟ݂ܠܹܐ ܠܦܝܼܵܠܵܐ ܕܝܼܹܗ ܒܢܲܗܪ̈ܵܘܵܬܹܐ ܘܒܥܲܝܢܵܬܹ̈ܐ ܕܡ̈ܝܼܵܐ: ܘܗ݇ܘܹܠܘܿܢ ܕܸܡܵܐ. 5 ܘܫܡܸܥܠܝܼ ܠܡܲܠܲܐܟ݂ܵܐ ܕܡ̈ܝܼܵܐ ܕܒܹܐܡܵܪܵܐ: ܙܲܕܝܼܩܵܐ ܝܘܸܬ: ܗ̇ܘ ܕܝܼܠܹܐ: ܘܗ̇ܘ ܕܝܼܗ݇ܘܵܐ: ܐܲܢ݇ܬ ܩܲܕܝܼܫܵܐ: ܣܵܒܵܒ ܠܐܲܢܹܐ ܕܸܢܘܼܟ݂. 6 ܣܵܒܵܒ ܕܸܡܵܐ ܕܩܲܕܝܼܫܹ̈ܐ ܘܕܢܒ݂̈ܝܼܹܐ ܫܘܼܦܸܟ݂ܠܘܿܢ: ܘܕܸܡܵܐ ܝܸܗܒ݂ܸܠܘܼܟ݂ ܐܸܠܵܝ ܠܸܫܬܵܝܵܐ: ܕܚܫܝܼܚܹܐ ܝܢܵܐ. 7 ܘܫܡܸܥܠܝܼ ܠܡܲܕܒܚܵܐ ܒܹܐܡܵܪܵܐ: ܗܹܐ: ܡܵܪܝܵܐ ܐܲܠܵܗܵܐ ܐܲܚܝܼܕ ܟܠ: ܫܲܪܝܼܪܹ̈ܐ ܝܢܵܐ ܘܙܲܕܝܼܩܹ̈ܐ ܕܝܘܵܢܘܼ̈ܟ݂.

8 ܘܗ̇ܘ ܪܒ݂ܝܼܥܵܝܵܐ ܫܘܼܦܸܟ݂ܠܹܐ ܠܦܝܼܵܠܵܐ ܕܝܼܹܗ ܥܲܠ ܫܸܡܫܵܐ: ܘܦܸܫܠܹܐ ܝܘܼܗ݇ܒ݂ܵܐ ܐܸܠܹܗ ܠܡܲܚܘܼܡܹܐ ܠܒܢܲܝ̈ܢܵܫܵܐ ܒܢܘܼܪܵܐ. 9 ܘܦܸܫܠܘܿܢ ܡܘܼܚܝܼܡܹܐ ܒܢܲܝ̈ܢܵܫܵܐ ܚܸܡܵܐ ܓܘܼܪܵܐ: ܘܓܕܸܦܠܘܿܢ ܠܫܸܡܵܐ ܕܐܲܠܵܗܵܐ ܕܐܝܼܬ ܠܹܗ ܗܘܼܟܡܵܐ ܥܲܠ ܐܲܢܹܐ ܡܲܚܘܵܬܹ̈ܐ: ܘܠܵܐ ܬܘܼܘܸܒܠܘܿܢ ܠܝܼܵܗ݇ܒ݂ܵܐ ܬܸܫܒܘܿܚܬܵܐ.

10 ܘܗ̇ܘ ܚܡܝܼܫܵܝܵܐ ܫܘܼܦܸܟ݂ܠܹܐ ܠܦܝܼܵܠܵܐ ܕܝܼܹܗ ܥܲܠ ܬܪܘܿܢܘܿܣ ܕܗ̇ܘ ܕܵܒܵܐ: ܘܗ݇ܘܹܠܵܐ ܡܲܠܟܘܼܬܹܗ ܚܘܼܒ݂ܝܵܢܬܵܐ: ܘܠܲܨܠܸܨܝ ܗ݇ܘܵܘ ܠܸܫܵܢܵܝ̈ ܡ̣ܢ ܕܲܪܕ: 11 ܘܓܕܸܦܠܘܿܢ ܠܐܲܠܵܗܵܐ ܕܫܡܲܝܵܐ ܡ̣ܢ ܕܲܪ̈ܕܵܝ ܘܡ̣ܢ ܕܲܪ̈ܒܵܬܵܝ: ܘܠܵܐ ܬܘܼܘܸܒܠܘܿܢ ܡ̣ܢ ܦܘܼܠܚܵܢܵܝ̈.

12 ܘܗ̇ܘ ܫܬܝܼܬܵܝܵܐ ܫܘܼܦܸܟ݂ܠܹܐ ܠܦܝܼܵܠܵܐ ܕܝܼܹܗ ܥܲܠ ܕܗ̇ܘ ܢܲܗܪܵܐ ܓܘܼܪܵܐ: ܦܪܵܬ: ܘܠܪܸܙܠܘܿܢ ܡܝܼܘ̈ܗܝ ܕܐܵܟ݂ܝܼ ܕܦܵܝܫܵܐ ܗܘܼܕܸܪܬܵܐ ܐܘܼܪܚܵܐ ܕܡܲܠܟܹ̈ܐ ܕܡ̣ܢ ܙܪܵܩܵܐ ܕܫܸܡܫܵܐ. 13 ܘܚܙܹܠܝܼ ܡ̣ܢ ܦܘܼܡܹܗ ܕܬܵܢܝܼܢܵܐ: ܘܡ̣ܢ ܦܘܼܡܹܗ ܕܗ̇ܘ ܕܵܒܵܐ: ܘܡ̣ܢ ܦܘܼܡܹܗ ܕܗ̇ܘ ܢܒ݂ܝܼܵܐ ܕܵܓܵܠܵܐ: ܬܠܵܬ݇ ܪ̈ܘܼܚܵܬܹܐ ܟ̰ܲܦܵܠܹ̈ܐ ܐܲܝܟ݂ ܦܸܩܵܩܹ̈ܐ. 14 ܣܵܒܵܒ ܪ̈ܘܼܚܵܬܹܐ ܝܢܵܐ ܕܕܲܝܘܹ̈ܐ ܕܒܸܥܒ݂ܵܕܵܐ ܝܢܵܐ ܢܝܼܫܲܢܩܹ̈ܐ: ܕܒܹܐܙܵܠܵܐ ܝܢܵܐ ܥܲܠ ܡܲܠܟܹ̈ܐ ܕܟܠܵܗ̇ ܒܪܝܼܬܵܐ ܠܓ̰ܲܡܘܼܥܝܵܝ ܠܦܠܵܫܵܐ ܕܗ̇ܘ ܝܘܿܡܵܐ ܓܘܼܪܵܐ ܕܐܲܠܵܗܵܐ ܐܲܚܝܼܕ ܟܠ. 15 ܘܗܵܐ: ܒܹܐܬܵܝܵܐ ܝܘܸܢ ܐܲܝܟ݂ ܓܹܢܵܒ݂ܵܐ. ܛܘܼܒ݂ܵܢܵܐ ܝܠܹܐ ܗ̇ܘ ܕܝܼܠܹܐ ܪܥܝܼܫܵܐ ܘܢܵܛܸܪ ܓ̰ܘܼܠܘܼ̈ܗܝ: ܕܠܵܐ ܚܵܕܸܪ ܫܘܼܠܚܵܝܵܐ: ܘܚܵܙܝܼ ܢܚܸܦܬܹܗ. 16 ܘܓ̰ܘܼܡܸܥܝܵܝܠܘܿܢ ܠܗ̇ܝ ܕܘܼܟܬܵܐ ܕܦܝܵܫܵܐ ܝܠܵܐ ܩܪܝܼܬܵܐ ܒܠܸܫܵܢܵܐ ܕܥܸܒ݂ܪ̈ܵܝܹܐ: ܐܲܪܡܵܓܸܕܘܿܢ.

17 ܘܗ̇ܘ ܫܒ݂ܝܼܥܵܝܵܐ ܫܘܼܦܸܟ݂ܠܹܐ ܠܦܝܼܵܠܵܐ ܕܝܼܹܗ ܥܲܠ ܗܵܘܵܐ: ܘܦܠܸܛܠܹܐ ܩܵܠܵܐ ܓܘܼܪܵܐ ܡ̣ܢ ܗܲܝܟܠܵܐ: ܡ̣ܢ ܬܪܘܿܢܘܿܣ: ܒܹܐܡܵܪܵܐ: ܗ݇ܘܹܠܵܐ. 18 ܘܗ݇ܘܹܠܘܿܢ ܒܸܪ̈ܩܹܐ: ܘܩܵܠܹ̈ܐ: ܘܪ̈ܲܥܡܹܐ: ܘܪܵܘܕܵܢܵܐ ܓܘܼܪܵܐ ܗ݇ܘܹܠܹܐ: ܕܐܲܝܟ݂ ܠܵܐ ܗ݇ܘܹܠܹܐ ܡ̣ܢ ܕܗ݇ܘܹܠܘܿܢ ܒܢܲܝ̈ܢܵܫܵܐ ܥܲܠ ܐܲܪܥܵܐ: ܕܐܲܝܟ݂ ܕܐܵܗܵܐ ܪܵܘܕܵܢܵܐ ܗܲܕܟ݂ܵܐ ܓܘܼܪܵܐ. 19 ܘܗ݇ܘܹܠܵܐ ܡܕܝܼܢ݇ܬܵܐ ܗ̇ܝ ܓܘܼܪܬܵܐ ܠܬܠܵܬ݇ܐ ܣܵܡܹ̈ܐ: ܘܡܕܝܼܢܵܬܹ̈ܐ ܕܛܵܝܸܦܹ̈ܐ ܢܦܸܠܘܿܢ: ܘܒܵܒܹܠ ܗ̇ܝ ܓܘܼܪܬܵܐ ܦܸܫܠܵܐ ܕܟ݂ܝܼܪܬܵܐ ܩܵܕ݇ܡ ܐܲܠܵܗܵܐ: ܠܝܼܵܗ݇ܒ݂ܵܐ ܐܸܠܵܗ̇ ܟܵܣܵܐ ܕܚܲܡܪܵܐ ܕܚܸܡܬܵܐ ܕܟܲܪܒܹܗ. 20 ܘܟܠ ܓܵܙܲܪܬܵܐ ܥܪܸܩܠܵܐ: ܘܛܘܼܪܹ̈ܐ ܠܵܐ ܦܸܫܠܘܿܢ ܡܘܼܫ̄ܟ̰ܚܹܐ. 21 ܘܒܲܪܕܵܐ ܓܘܼܪܵܐ: ܐܲܝܟ݂ ܟܲܟܪܵܐ ܒܬܩܘܼܠܬܘܼܗܝ: ܨܠܹܠܹܐ ܡ̣ܢ ܫܡܲܝܵܐ ܥܲܠ ܒܢܲܝ̈ܢܵܫܵܐ: ܘܓܕܸܦܠܘܿܢ ܒܢܲܝ̈ܢܵܫܵܐ ܠܐܲܠܵܗܵܐ ܡ̣ܢ ܡܚܘܿܬܵܐ ܕܒܲܪܕܵܐ: ܣܵܒܵܒ ܕܓܘܼܪܬܵܐ ܗ݇ܘܵܐ ܡܚܘܿܬܹܗ ܪܵܒܵܐ.

ܩܦܠܐܘܢ: ܝܙ

1 ܘܐܬܹܠܹܐ ܚܵܕ݇ ܡ̣ܢ ܕܐܵܢܝܼ ܫܲܒ݂ܥܵܐ ܡܲܠܲܐܟ݂ܹ̈ܐ ܕܐܝܼܬ ܗ݇ܘܵܘ ܠܗ݇ܘܿܢ ܫܲܒ݂ܥܵܐ ܦܝܼܵܠܲܐܣ̈: ܘܗܘܼܡܙܸܡܠܹܐ ܥܲܡܝܼ: ܟܲܕ ܒܹܐܡܵܪܵܐ: ܬܵܐ ܒܸܬ ܡܲܚܙܸܢܘܼܟ݂ ܠܕܵܝܼܘܵܢ ܕܗ̇ܝ ܙܵܢܝܼܬܵܐ ܓܘܼܪܬܵܐ: ܗ̇ܝ ܕܒܸܬܝܵܒ݂ܵܐ ܝܠܵܐ ܥܲܠ ܡ̈ܝܼܵܐ ܪܵܒܵܐ: 2 ܕܥܲܡ ܕܗ̇ܝ ܙܢܹܠܘܿܢ ܡܲܠܟܹ̈ܐ ܕܐܲܪܥܵܐ: ܘܪܘܹܠܘܿܢ ܐܵܢܝܼ ܕܒܸܥܡܵܪܵܐ ܝܢܵܐ ܒܐܲܪܥܵܐ ܡ̣ܢ ܚܲܡܪܵܐ ܕܙܵܢܝܘܙܼܬܘܼܗ̇. 3 ܘܠܘܼܒܠܸܢܹܐ ܠܒܲܪܝܼܵܐ ܒܪܘܼܚܵܐ: ܘܚܙܹܠܝܼ ܠܒܲܟ݂ܬܵܐ ܟܲܕ ܝܬܝܼܒ݂ܬܵܐ ܥܲܠ ܕܵܒܵܐ ܣܡܘܼܩܵܐ: ܕܡܸܠܝܵܐ ܫܸܡܵܢܹ̈ܐ ܕܓܘܼܕܵܦܵܐ: ܕܐܝܼܬ ܗ݇ܘܵܘ ܠܹܗ ܫܲܒ݂ܥܵܐ ܪܹ̈ܫܹܐ ܘܥܸܣܲܪ ܩܵܪ̈݇ܢܵܢܹܐ. 4 ܘܗ̇ܝ ܒܲܟ݂ܬܵܐ ܡܘܼܠܒܸܫܬܵܐ ܗ݇ܘܵܐ ܒܣܡܘܼܩܵܐ ܘܩܸܪܡܝܼܙ: ܘܡܘܼܫܩܸܠܬܵܐ ܗ݇ܘܵܐ ܒܪܸܗܒ݂ܵܐ ܘܟܹܐܦܹ̈ܐ ܛܝܼܡܵܢܹ̈ܐ ܘܡܲܪ̈ܓܵܢܝܵܬܹܐ: ܕܐܝܼܬ ܗ݇ܘܵܐ ܠܵܗ̇ ܟܵܣܵܐ ܕܕܲܗܒ݂ܵܐ ܒܐܝܼܕܘܼܗ̇ ܕܝܼܗ݇ܘܵܐ ܡܸܠܝܵܐ ܡ̣ܢ ܛܲܡܐܵܘ̈ܬܵܐ ܘܠܵܐ ܕܸܟ݂ܝܘܼܬܵܐ ܕܙܵܢܝܘܼܬܘܼܗ̇. 5 ܘܥܲܠ ܩܸܨܘܼܗ̇ ܫܸܡܵܐ ܟܬܝܼܒ݂ܵܐ: ܣܪ: ܒܒܠ ܗ̇ܝ ܓܘܼܪܬܵܐ: ܝܡܐ ܕܙܢܝܬ̈ܐ ܘܕܟ̰ܦܠܘܝܬ̈ܐ ܕܐܲܪܥܵܐ. 6 ܘܚܙܹܠܝܼ ܠܒܲܟ݂ܵܬܵܐ ܪܘܝܼܬܵܐ ܡ̣ܢ ܕܸܡܵܐ ܕܩܲܕܝܼܫܹ̈ܐ: ܘܡ̣ܢ ܕܸܡܵܐ ܕܣܵܗܕܹ̈ܐ ܕܝܼܫܘܿܥ. ܘܥܘܼܓ̰ܸܒܠܝܼ: ܟܲܕ ܚܸܙܝܵܠܝܼ: ܥܘܼܓ̰ܵܒܵܐ ܓܘܼܪܵܐ. 7 ܘܐܡܸܪܹܐ ܐܸܠܝܼ ܗ̇ܘ ܡܲܠܲܐܟ݂ܵܐ: ܣܵܒܵܒ ܡܘܼܕܝܼ ܥܘܼܓ̰ܸܒܠܘܼܟ݂: ܐܵܢܵܐ ܒܸܬ ܐܵܡܪܸܢܘܼܟ݂ ܠܣܸܪ ܕܒܲܟ݂ܬܵܐ: ܘܕܕܵܒܵܐ ܕܝܼܠܹܐ ܛܥܝܼܢܘܼܗ̇: ܗ̇ܘ ܕܐܝܼܬ ܠܹܗ ܐܵܢܝܼ ܫܲܒ݂ܥܵܐ ܪܹ̈ܫܹܐ ܘܐܵܢܝܼ ܥܸܣܪܵܐ ܩܵܪ̈݇ܢܵܢܹܐ. 8 ܕܵܒܵܐ ܗ̇ܘ ܕܚܙܹܠܘܼܟ݂: ܝܼܗ݇ܘܵܐ: ܘܠܹܵܐ ܝܠܹܐ: ܘܗܕܝܼܪܵܐ ܝܠܹܐ ܠܹܐܣܵܩܵܐ ܡ̣ܢ ܬܗܘܿܡܵܐ: ܘܠܹܐܙܵܠܵܐ ܠܐܲܒ݂ܕܵܢܵܐ. ܘܒܸܬ ܥܵܓ̰ܒܝܼ ܐܵܢܝܼ ܕܥܵܡܪܝܼ ܥܲܠ ܐܲܪܥܵܐ: ܐܵܢܝܼ ܕܠܹܐ ܝܠܹܐ ܟܬܝܼܒ݂ܵܐ ܫܸܡܵܝ ܒܟܬܵܒ݂ܵܐ ܕܚܲܝܹ̈ܐ ܡ̣ܢ ܒܸܢܝܲܬܹ̈ܗ ܕܥܵܠܡܵܐ: ܟܲܕ ܚܵܙܝܼ ܠܗ̇ܘ ܕܵܒܵܐ: ܕܐܵܟ݂ܝܼ ܕܝܼܗ݇ܘܵܐ ܘܠܹܐ ܝܠܹܐ: ܘܗܲܪ ܝܼܠܹܐ. 9 ܠܲܐܟ݂ܵܐ ܝܠܹܐ ܗܵܘܢܵܐ ܕܐܝܼܬ ܠܹܗ ܥܵܩܸܠܕܵܪܘܼܬܵܐ. ܐܲܢܹܐ ܫܲܒ݂ܥܵܐ ܪܹ̈ܫܹܐ ܫܲܒ݂ܥܵܐ ܛܘܼܪܹ̈ܐ ܝܢܵܐ: ܐܲܝܟܵܐ ܕܗ̇ܝ ܒܲܟ݂ܬܵܐ ܝܬܝܼܒ݂ܬܵܐ ܝܠܵܐ ܥܲܠܵܝ. 10 ܘܡܲܠܲܐܟ݂ܹ̈ܐ ܫܲܒ݂ܥܵܐ ܝܢܵܐ: ܚܲܡܫܵܐ ܡܸܢܵܝ ܢܦܸܠܘܿܢ: ܘܚܵܕ݇ ܝܼܠܹܐ: ܘܗ̇ܘ ܐܚܹܪ݇ܢܵܐ ܗܹܫ ܠܹܐ ܝܠܹܐ ܐܬܝܼܵܐ: ܘܐܝܼܡܲܢ ܕܐܬܹܠܹܐ: ܘܵܓ̰ܸܒ ܝܼܠܵܐ ܕܚܲܟ̰ܵܐ ܥܲܪܩܸܠ. 11 ܘܕܵܒܵܐ ܕܝܼܗ݇ܘܵܐ ܘܠܹܐ ܝܠܹܐ: ܐܘܼܦ ܐܵܗܵܐ ܬܡܝܼܢܵܝܵܐ ܝܠܹܐ: ܘܡ̣ܢ ܫܲܒ݂ܥܵܐ ܝܠܹܐ: ܘܠܲܐܒ݂ܕܵܢܵܐ ܒܹܐܙܵܠܵܐ ܝܠܹܐ. 12 ܘܥܸܣܲܪ ܩܵܪ̈݇ܢܵܢܹܐ ܐܲܢܹܐ ܕܚܙܹܠܘܼܟ݂: ܥܸܣܪܵܐ ܡܲܠܟܹ̈ܐ ܝܢܵܐ: ܐܵܡܢܝܼ ܕܗܹܫ ܡܲܠܟܘܼܬܵܐ ܠܵܐ ܩܘܼܒܸܠܘܿܢ: ܐܸܠܵܐ ܗܘܼܟܡܵܐ ܐܲܝܟ݂ ܡܲܠܟܹ̈ܐ ܚܕܵܐ ܣܵܥܲܬ ܒܸܩܒܵܠܵܐ ܝܢܵܐ ܥܲܡ ܕܵܒܵܐ. 13 ܐܵܢܝܼ ܚܵܕ݇ ܪܸܙܵܝܵܐ ܐܝܼܬ ܠܗ݇ܘܿܢ: ܘܚܲܝܠܵܐ ܘܗܘܼܟܡܵܐ ܕܝܼܵܝ ܠܕܵܒܵܐ ܟܹܐ ܝܵܗ݇ܒ݂ܝܼ. 14 ܐܵܢܝܼ ܥܲܡ ܕܗ̇ܘ ܦܹܪܵܐ ܒܸܬ ܦܵܠܫܝܼ: ܘܦܹܪܵܐ ܒܸܬ ܓ݂ܵܠܸܒ ܠܗ݇ܘܿܢ: ܣܵܒܵܒ ܡܵܪܵܐ ܕܡܵܪ̈ܵܘܵܬܹܐ ܝܠܹܐ: ܘܡܲܠܟܵܐ ܕܡܲܠܟܹ̈ܐ: ܘܐܲܢܹܐ ܕܥܲܡܹܗ (ܒܸܬ ܓ݂ܵܠܒܝܼ): ܩܸܪ̈ܝܹܐ ܘܓܘܼܒܝܹ̈ܐ ܘܡܗܘܼܡܢܹ̈ܐ. 15 ܘܐܡܸܪܹܐ ܐܸܠܝܼ: ܡ̈ܝܼܵܐ ܐܲܢܹܐ ܕܚܙܹܠܘܼܟ݂: ܐܲܝܟܵܐ ܕܗ̇ܝ ܙܵܢܝܼܬܵܐ ܝܬܝܼܒ݂ܬܵܐ ܝܠܵܐ: ܛܵܝܸܦܹ̈ܐ ܘܟܸܢܫܹ̈ܐ ܝܢܵܐ: ܘܡܸܠܲܬܹ̈ܐ ܘܠܸܫܵܢܹ̈ܐ. 16 ܘܥܸܣܲܪ ܩܵܪ̈݇ܢܵܢܹܐ ܕܚܙܹܠܘܼܟ݂: ܘܕܵܒܵܐ: ܐܵܢܝܼ ܒܸܬ ܣܵܢܝܼ ܠܗ̇ܝ ܙܵܢܝܼܬܵܐ ܘܒܸܬ ܥܵܒ݂ܕܝܼ ܠܵܗ̇ ܚܵܪܵܒܵܐ: ܘܫܘܼܠܚܵܬܵܐ: ܘܒܸܣܪܘܼܗ̇ ܒܸܬ ܐܵܟ݂ܠܝܼ ܠܹܗ: ܘܐܸܠܵܗ̇ ܒܸܬ ܡܵܩܕܝܼ ܒܢܘܼܪܵܐ. 17 ܣܵܒܵܒ ܐܲܠܵܗܵܐ ܝܸܗܒ݂ܸܠܹܐ ܒܠܸܒܵܘܵܬܵܝ̈ ܠܸܥܒ݂ܵܕܵܐ ܪܹܙܵܝܵܐ ܕܝܼܹܗ: ܘܠܸܥܒ݂ܵܕܵܐ ܚܵܕ݇ ܪܸܙܵܝܵܐ: ܘܠܝܼܵܗ݇ܒ݂ܵܐ ܡܲܠܟܘܼܬܵܝ ܠܕܵܒܵܐ: ܗܲܠ ܕܦܵܝܫܝܼ ܬܘܼܡܸܡܹܐ ܗܹܡܸܙܡܵܢܹ̈ܐ ܕܐܲܠܵܗܵܐ. 18 ܘܗ̇ܝ ܒܲܟ݂ܬܵܐ ܕܚܙܹܠܘܼܟ݂: ܗ̇ܝ ܡܕܝܼܢ݇ܬܵܐ ܓܘܼܪܬܵܐ ܝܠܵܐ: ܗ̇ܝ ܕܐܝܼܬ ܠܵܗ̇ ܡܲܠܟܘܼܬܵܐ ܥܲܠ ܡܲܠܟܹ̈ܐ ܕܐܲܪܥܵܐ.

ܩܦܠܐܘܢ: ܝܚ

1 ܒܵܬ݇ܪ ܐܲܢܹܐ ܚܙܹܠܝܼ ܡܲܠܲܐܟ݂ܵܐ ܐܚܹܪ݇ܢܵܐ ܕܒܸܨܠܵܝܵܐ ܡ̣ܢ ܫܡܲܝܵܐ: ܕܐܝܼـ ܗ݇ܘܵܐ ܠܹܗ ܗܘܼܟܡܵܐ ܓܘܼܪܵܐ: ܘܐܲܪܥܵܐ ܒܘܼܗ݇ܪܸܢܵܐ ܡ̣ܢ ܬܸܫܒܘܿܚܬܹܗ. 2 ܘܩܘܼܘܸܚܠܹܐ ܒܩܵܠܵܐ ܚܲܝܠܵܢܵܐ: ܟܲܕ ܒܹܐܡܵܪܵܐ: ܢܦܸܠܑܵ: ܢܦܸܠܵܐ: ܒܵܒܹܠ ܗ̇ܝ ܓܘܼܪܬܑܵ: ܘܗ݇ܘܹܠܵܐ ܡܲܫܪܵܝܬܵܐ ܕܕܲܝܘܹ̈ܐ: ܘܢܛܘܼܪܬܵܐ ܕܟܠ ܪܘܼܚܵܐ ܛܲܡܹܐܐ: ܘܢܛܘܼܪܬܵܐ ܕܟܠܵܝ ܛܲܝܪܹ̈ܐ ܛܲܡܹ̈ܐܐ ܘܣܸܢܝܹ̈ܐ. 3 ܣܵܒܵܒ ܡ̣ܢ ܚܲܡܪܵܐ ܕܚܸܡܬܵܐ ܕܙܵܢܝܘܼܬܘܼܗ̇ ܫܬܹܠܘܿܢ ܟܠܵܝ ܛܵܝܸܦܹ̈ܐ: ܘܡܲܠܟܹ̈ܐ ܕܐܲܪܥܵܐ ܥܲܡܵܗ̇ ܙܢܹܠܘܿܢ: ܘܬܵܓ̰ܝܼܪܹ̈ܐ ܕܐܲܪܥܵܐ ܡ̣ܢ ܚܲܝܠܵܐ ܕܠܲܙܲܬܘܼ̈ܗ̇ ܗ݇ܘܹܠܘܿܢ ܕܵܘܠܲܬܡܲܢܕܹ̈ܐ.

4 ܘܫܡܸܥܠܝܼ ܩܵܠܵܐ ܐܚܹܪ݇ܢܵܐ ܡ̣ܢ ܫܡܲܝܵܐ ܒܹܐܡܵܪܵܐ: ܦܠܘܿܛܘܿܢ ܡܸܢܘܼܗ̇: ܛܵܝܸܦܵܐ ܕܝܼܝܼ: ܕܠܵܐ ܫܲܪܸܟܝܼܬܘܿܢ ܒܚܛܝܼܵܬܘܼ̈ܗ̇: ܘܡ̣ܢ ܡܲܚܘܵܬܘܼ̈ܗ̇ ܠܵܐ ܗ݇ܘܹܐ ܕܩܵܒ݁ܠܝܼܬܘܿܢ. 5 ܣܵܒܵܒ ܕܡܛܹܠܘܿܢ ܚܛܝܼܵܬܘܼ̈ܗ̇ ܗܲܠ ܫܡܲܝܵܐ: ܘܕܟܸܪܹܐ ܐܲܠܵܗܵܐ ܠܥܵܘܠܹ̈ܐ ܕܝܼܵܗ̇. 6 ܦܪܸܥܡܘܿܢ ܠܵܗ̇ ܐܲܝܟ݂ ܕܐܘܼܦ ܗ̇ܝ ܦܪܸܥܠܵܐ: ܘܗܲܒ݇ܠܘܿܢ ܠܵܗ̇ ܚܵܕ݇ ܬܒܪ̈ܲܝ ܐܲܝܟ݂ ܦܘܼܠܚܵܢܘܼ̈ܗ̇: ܒܗ̇ܘ ܟܵܣܵܐ ܕܡܙܸܓ݂ܠܑܵ: ܡܙܘܿܓ݂ܘܿܢ ܐܸܠܵܗ̇ ܚܵܕ݇ ܒܬܪ̈ܲܝ. 7 ܟܡܵܐ ܕܚܩܸܪܵܐ ܓܵܢܘܼܗ̇ ܘܛܘܼܒܸܠܵܐ: ܗܲܪ ܗܲܕܟ݂ܵܐ ܓ̰ܘܼܢܓ̰ܵܪܵܐ ܗܲܒ݇ܠܘܿܢ ܠܵܗ̇ ܘܬܙܝ. ܣܵܒܵܒ ܒܹܐܡܵܪܵܐ ܝܠܵܐ ܒܠܸܒܘܼܗ̇: ܒܸܬܝܵܒ݂ܵܐ ܝܘܵܢ ܡܲܠܟܬܵܐ: ܘܠܹܐ ܝܘܵܢ ܐܲܪܡܸܠܬܵܐ: ܘܬܵܙܝܼ ܠܹܐ ܚܵܙܝܵܐ ܐܢܵܐ. 8 ܣܵܒܵܒ ܕܐܵܗܵܐ ܒܚܵܕ݇ ܝܘܿܡܵܐ ܒܸܬ ܐܵܬܝܼ ܐܲܢܹܐ ܡܲܚܘܵܬܹ̈ܐ ܕܝܼܵܗ̇: ܡܵܘܬܵܐ: ܘܬܵܙܝܼ: ܘܟܸܦܬܢܵܐ: ܘܒܢܘܼܪܵܐ ܒܸܬ ܦܵܝܫܵܐ ܡܘܼܩܸܕܬܵܐ: ܣܵܒܵܒ ܚܲܝܠܵܢܵܐ ܝܠܹܐ ܡܵܪܝܵܐ ܐܲܠܵܗܵܐ ܗ̇ܘ ܕܕܝܼܢܵܠܹܐ. 9 ܘܒܸܬ ܒܵܟ݂ܝܼ ܥܲܠܘܼܗ̇ ܘܒܸܬ ܥܵܒ݂ܕܝܼ ܬܵܙܝܼ ܥܲܠܘܼܗ̇ ܡܲܠܟܹ̈ܐ ܕܐܲܪܥܑܵ: ܐܵܢܝܼ ܕܥܲܡܵܗ̇ ܙܢܹܠܘܿܢ ܘܛܘܼܒܸܠܘܿܢ: ܐܝܼܡܲܢ ܕܚܵܙܝܼ ܠܬܸܢܵܐ ܕܝܩܵܕܘܗ̇: 10 ܟܲܕ ܡ̣ܢ ܪܸܚܩܵܐ ܟܸܠܝܹܐ: ܡ̣ܢ ܙܕܘܼܥܬܵܐ ܕܓ̰ܘܼܢܓ̰ܵܪܘܼܗ̇: ܒܹܐܡܵܪܵܐ: ܘܵܝ: ܘܵܝ: ܡܕܝܼܢ݇ܬܵܐ ܗ̇ܝ ܓܘܼܪܬܵܐ: ܒܵܒܹܠ: ܡܕܝܼܢ݇ܬܵܐ ܗ̇ܝ ܚܲܝܠܵܢܬܵܐ! ܣܵܒܵܒ ܐܬܹܠܵܐ ܕܝܼܘܵܢ ܕܝܼܵܟ݂ܝ. 11 ܘܬܵܓ̰ܝܼܪܹ̈ܐ ܕܐܲܪܥܵܐ ܟܹܐ ܒܵܟ݂ܝܼ ܘܥܵܒ݂ܕܝܼ ܬܵܙܝܼ ܥܲܠܘܼܗܝ: ܣܵܒܵܒ ܕܛܲܥܢܵܢܝ ܐܚܹܪ݇ܢܵܐ ܐ݇ܢܵܫܵܐ ܠܹܐ ܙܵܒܸܢ: 12 ܛܲܥܢܵܐ ܕܕܲܗܒ݂ܵܐ: ܘܕܣܹܐܡܵܐ: ܘܕܟܹܐܦܹ̈ܐ ܛܝܼܡܵܢܹ̈ܐ: ܘܕܡܲܪ̈ܓܵܢܝܵܬܹܐ: ܘܕܟܸܬܵܢ ܢܵܙܸܟ: ܘܕܣܡܘܿܩܵܐ: ܘܕܲܐܒܪܹܣܝܼܡ: ܘܕܩܸܪܡܝܼܙ: ܘܟܠ ܩܲܝܣܵܐ ܕܒܸܣܡܵܐ: ܘܟܠ ܡܵܐܢܵܐ ܕܓܪ̈ܲܡܦܝܼܠܵܐ: ܘܟܠ ܡܵܐܢܵܐ ܕܩܲܝܣܵܐ ܪܵܒܵܐ ܛܝܼܡܵܢܵܐ: ܘܕܢܚܵܫܵܐ: ܘܕܦܪܸܙܠܵܐ: ܘܕܟܹܐܦܵܐ ܕܡܲܪܡܵܪ: 13 ܘܕܲܪܟ̰ܝܢ: ܘܒܸܣܡܵܢܹ̈ܐ: ܘܡܘܼܪܵܐ: ܘܠܝܼܒܵܐܢܘܿܢ: ܘܚܲܡܪܵܐ: ܘܡܸܫܚܵܐ: ܘܩܲܡܚܵܐ ܕܲܝܩܵܐ: ܘܚܸܛܹ̈ܐ: ܘܩܸܢܵܝܵܐ: ܘܥܸܪ̈ܒܹܐ: ܘܣܘܼܣܵܘܵܬܹ̈ܐ: ܘܐܵܪ̈ܒܵܢܹܐ: ܘܦܲܓ݂ܪܹ̈ܐ: ܘܓܵܢܵܬܹ̈ܐ ܕܒܲܢܲܝ̈ܢܵܫܵܐ. 14 ܘܛܥܘܼܢܬܵܐ ܕܫܲܗ݇ܘܲܬܬܵܐ ܕܓܵܢܵܟ݂ܝ ܐܙܸܠܵܐ ܡܸܢܵܟ݂: ܘܟܠܵܝ ܐܲܢܹܐ ܛܪ̈ܝܼܨܹܐ ܘܫܵܦܝܼܪܹ̈ܐ ܬܠܸܩܠܘܿܢ ܡܸܢܵܟ݂ܝ: ܘܐܚܪ݇ܢܵܐ ܠܹܐ ܡܵܫ̄ܟ̰ܚܝܼ ܠܗ݇ܘܿܢ. 15 ܬܵܓ̰ܝܼܪܹ̈ܐ ܕܐܲܢܹܐ: ܕܒܝܼܵܗ̇ ܗ݇ܘܹܠܘܿܢ ܕܵܘܠܲܬܡܲܢܕܹ̈ܐ: ܡ̣ܢ ܪܸܚܩܵܐ ܒܸܬ ܟܵܠܝܼ ܡܣܵܒܵܒ ܕܙܕܘܼܥܬܵܐ ܕܓ̰ܘܼܢܓ̰ܵܪܘܼܗ̇: ܟܲܕ ܒܸܒܟ݂ܵܝܵܐ ܘܒܸܥܒ݂ܵܕܵܐ ܬܵܘܙܝܼ: 16 ܒܹܐܡܵܪܵܐ: ܘܵܝ: ܘܵܝ: ܡܕܝܼܢ݇ܬܵܐ ܓܘܼܪܬܵܐ: ܗ̇ܝ ܕܝܼܗ݇ܘܵܐ ܠܒ݂ܝܼܫܬܵܐ ܟܸܬܵܢ ܢܵܙܸܟ ܘܣܡܘܼܩܵܐ ܘܩܸܪܡܝܼܙ: ܘܡܘܼܫܩܸܠܬܵܐ ܒܕܲܗܒ݂ܵܐ: ܘܒܟܹܐܦܹ̈ܐ ܛܝܼܡܵܢܹ̈ܐ ܘܡܲܪ̈ܓܵܢܝܵܬܹܐ! ܣܵܒܵܒ ܕܒܚܕܵܐ ܣܵܥܲܬ ܚܪܸܒ݂ܠܵܐ ܚܕܵܐ ܗܲܕܟ݂ܵܐ ܕܵܘܸܠܬܵܐ. 17 ܘܟܠ ܣܘܼܠܛܵܢ ܕܓܵܡܝܼ: ܘܟܠ ܐܵܙܵܠܢܵܐ ܠܕܘܼܢܝܹܐ ܒܓܵܡܝܼ: ܘܓܵܡܝܼܵܟ̰ܝܼܹܐ: ܘܟܠ ܕܒܝܵܡܵܐ ܦܵܠܚܝܼ: ܡ̣ܢ ܪܸܚܩܵܐ ܟܠܹܠܘܿܢ: 18 ܘܡܘܼܩܘܸܚܠܘܿܢ ܟܲܕ ܒܸܚܙܵܝܵܐ ܠܬܸܢܵܐ ܕܝܩܝܼܕܘܼܗ̇: ܟܲܕ ܒܑܹܡܵܪܵܐ: ܐܲܝܢܝܼ ܝܠܵܐ ܕܟܹܐ ܕܵܡܝܵܐ ܠܗ̇ܝ ܡܕܝܼܢ݇ܬܵܐ ܓܘܼܪܬܵܐ: 19 ܘܕܪܹܠܘܿܢ ܥܲܦܪܵܐ ܥܲܠ ܪܹ̈ܫܵܝ: ܘܡܘܿܩܘܸܚܠܘܿܢ ܟܲܕ ܒܸܒܟ݂ܵܝܵܐ ܘܒܸܥܒ݂ܵܕܵܐ ܬܵܙܝܼ: ܒܹܐܡܵܪܵܐ: ܘܵܝ: ܘܵܝ: ܡܕܝܼܢ݇ܬܵܐ ܓܘܼܪܬܵܐ: ܗ̇ܝ ܕܒܝܼܵܗ̇ ܗ݇ܘܹܠܘܿܢ ܕܵܘܠܲܬܡܲܢܕܹ̈ܐ ܟܠܵܝ ܐܵܢܝܼ ܕܐܝܼܬ ܠܗ݇ܘܿܢ ܓܵܡ̈ܝܼܹܐ ܒܝܵܡܵܐ ܡ̣ܢ ܛܝܼܡܘܼܬܘܼܗ̇! ܣܵܒܵܒ ܕܒܚܕܵܐ ܣܵܥܲܬ ܗ݇ܘܹܠܵܐܚܪܵܒܵܐ. 20 ܥܒ݂ܘܿܕܘܿܢ ܒܘܼܣܵܡܵܐ ܥܲܠܘܼܗ̇: ܫܡܲܝܵܐ: ܘܩܲܕܝܼܫܹ̈ܐ: ܘܫܠܝܼܚܹ̈ܐ: ܘܢܒ݂̈ܝܼܹܐ: ܣܵܒܵܒ ܕܕܸܢܹܐ ܐܲܠܵܗܵܐ ܕܝܼܘܵܢ ܕܝܼܵܘܟ݂ܘܿܢ ܡܸܢܵܗ̇.

21 ܘܫܩܸܠܹܐ ܚܵܕ݇ ܡܲܠܲܐܟ݂ܵܐ ܚܲܝܠܵܢܵܐ ܟܹܐܦܵܐ ܓܘܼܪܵܐ ܐܲܝܟ݂ ܕܗ̇ܘ ܕܐܸܪܚܹܐ: ܘܕܪܹܠܹܐ ܓܵܘ ܝܵܡܵܐ: ܒܹܐܡܵܪܵܐ ܗܲܕܟ݂ܵܐ ܒܙܲܪܒ ܒܸܬ ܦܵܝܫܵܐ ܪܘܼܦܝܼܬܵܐ ܒܵܒܹܠ: ܡܕܝܼܢ݇ܬܵܐ ܗ̇ܝ ܓܘܼܪܬܵܐ: ܘܠܹܐ ܦܵܝܫܵܐ ܡܫ̄ܟ̰ܝܼܚܬܵܐ ܡܸܕܪܹܐ. 22 ܘܩܵܠܵܐ ܕܡܵܚܝܵܢܹ̈ܐ ܕܩܝܼܬܵܪܹ̈ܐ: ܘܕܡܘܼܣܝܼܩܘܿܪܹ̈ܐ: ܘܕܙܵܡܵܪܹ̈ܐ: ܘܕܫܝܼܦܘܿܪ̈ܟ̰ܝܼܹܐ: ܠܹܐ ܦܵܝܸܫ ܫܸܡܥܝܵܐ ܓܵܘܵܟ݂ܝ ܡܸܕܪܹܐ: ܘܟܠ ܐܘܼܡܵܢܵܐ ܕܟܠ ܐܘܼܡܵܢܘܼܬܵܐ ܠܹܐ ܦܵܝܸܫ ܡܫ̄ܟ̰ܝܼܚܵܐ ܓܵܘܵܟ݂ܝ ܡܸܕܪܹܐ: ܘܩܵܠܵܐ ܕܐܸܪܚܹܐ ܠܹܐ ܦܵܝܸܫ ܫܸܡܥܝܵܐ ܓܵܘܵܟ݂ܝ ܡܸܕܪܹܐ. 23 ܘܒܲܗܪܵܐ ܕܫܪܵܝܵܐ ܠܹܐ ܦܵܝܸܫ ܚܸܙܝܵܐ ܓܵܘܵܟ݂ܝ ܡܸܕܪܹܐ: ܘܩܵܠܵܐ ܕܚܸܬܢܵܐ ܘܕܟܵܠܬܵܐ ܠܹܐ ܦܵܝܸܫ ܫܸܡܥܝܵܐ ܓܵܘܵܟ݂ܝ ܡܸܕܪܹܐ: ܣܵܒܵܒ ܕܬܵܓ̰ܝܼܪܹ̈ܐ ܕܝܼܵܟ݂ܝ ܓܘܼܪ̈ܵܢܹܐ ܕܐܲܪܥܵܐ ܗ݇ܘܵܘ: ܣܵܒܵܒ ܕܒܚܲܪܵܫܘܼܬܵܟ݂ܝ ܦܸܫܠܘܿܢ ܡܘܼܚܠܸܛܹܐ ܟܠܵܝ ܛܵܝܸܦܹ̈ܐ. 24 ܘܒܝܼܵܗ̇ ܕܸܡܵܐ ܕܢܒ݂̈ܝܼܹܐ ܘܕܩܲܕܝܼܫܹ̈ܐ ܡܫ̄ܟ̰ܸܚܠܹܐ: ܘܕܟܠܵܝ ܐܵܢܝܼ ܕܦܝܼܫܹܐ ܝܢܵܐ ܦܪܝܼܡܹܐ ܥܲܠ ܐܲܪܥܵܐ.

ܩܦܠܐܘܢ: ܝܛ

1 ܒܵܬ݇ܪ ܐܲܢܹܐ ܫܡܸܥܠܝܼ ܐܲܝܟ݂ ܩܵܠܵܐ ܓܘܼܪܵܐ ܕܟܸܢܫܵܐ ܪܵܒܵܐ ܒܫܡܲܝܵܐ: ܒܹܐܡܵܪܵܐ: ܗܲܠܹܠܘܼܝܵܐ: ܦܘܼܪܩܵܢܵܐ: ܘܚܲܝܠܵܐ: ܘܬܸܫܒܘܿܚܬܵܐ: ܠܡܵܪܝܵܐ ܐܲܠܵܗܵܐ ܕܝܼܲܢ: 2 ܣܵܒܵܒ ܕܫܲܪܝܼܪܹ̈ܐ ܝܢܵܐ ܘܟܹܐܢܹ̈ܐ ܕܝܼܘܵܢܹ̈ܐ ܕܝܼܹܗ: ܣܵܒܵܒ ܕܕܸܢܹܐ ܠܗ̇ܝ ܙܵܢܝܼܬܵܐ ܓܘܼܪܬܵܐ: ܗ̇ܝ ܕܡܘܼܚܪܸܒ݂ܠܵܐ ܠܐܲܪܥܵܐ ܒܙܵܢܝܘܼܬܘܼܗ̇: ܘܫܩܸܠܹܐ ܠܬܘܼܥܠܵܐ ܕܕܸܡܵܐ ܕܪܹ̈ܓܵܘܵܬܘܼܗܝ ܡ̣ܢ ܐܝܼܕܘܼܗ̇. 3 ܘܓܵܗܵܐ ܕܬܲܪ̈ܬܹܝ ܐܡܸܪܘܿܢ: ܗܲܠܸܠܘܼܝܵܐ. ܘܬܸܢܘܼܗ̇ ܒܹܐܣܵܩܵܐ ܗ݇ܘܵܐ ܠܥܵܠܲܡ ܥܵܠܡܝܼܢ. 4 ܘܢܦܸܠܘܿܢ ܐܲܢܹܐ ܥܸܣܪܝܼ ܘܐܲܪܒܥܵܐ ܚܘܵܪ̈ܕܸܩܢܹܐ: ܘܐܵܢܝܼ ܐܲܪܒܲܥ ܚܲܝܘ̈ܵܬܑܵ: ܘܣܓܸܕܠܘܿܢ ܠܐܲܠܵܗܵܐ: ܗ̇ܘ ܕܝܼܠܹܐ ܝܬܝܼܒ݂ܵܐ ܥܲܠ ܬܪܘܿܢܘܿܣ: ܟܲܕ ܒܹܐܡܵܪܵܐ: ܐܵܡܹܝܢ: ܗܲܠܸܠܘܼܝܵܐ. 5 ܘܩܵܠܵܐ ܦܠܸܛܠܹܐ ܡ̣ܢ ܬܪܘܿܢܘܿܣ: ܒܹܐܡܵܪܵܐ: ܫܵܒܚܘܿܢ ܠܐܲܠܵܗܵܐ ܕܝܼܲܢ: ܟܠܵܝ ܪܹ̈ܓܵܘܵܬܘܼܗܝ: ܘܐܵܢܝܼ ܕܙܵܕܥܝܼ ܡܸܢܹܗ: ܙܥܘܿܪܹ̈ܐ ܘܓܘܼܪܹ̈ܐ. 6 ܘܫܡܸܥܠܝܼ ܐܲܝܟ݂ ܩܵܠܵܐ ܕܟܸܢܫܵܐ ܪܵܒܵܐ: ܘܐܲܝܟ݂ ܩܵܠܵܐ ܕܡ̈ܝܼܵܐ ܪܵܒܵܐ: ܘܐܲܝܟ݂ ܩܵܠܵܐ ܕܪ̈ܲܥܡܹܐ ܚܲܝܠܵܢܹ̈ܐ: ܒܹܐܡܵܪܵܐ: ܥܲܠܸܠܘܼܝܵܐ: ܣܵܒܵܒ ܕܥܒܸܕܠܹܐ ܡܲܠܟܘܼܬܵܐ ܡܵܪܝܵܐ ܐܲܠܵܗܵܐ ܕܝܼܲܢ: ܐܲܚܝܼܕ ܟܠ. 7 ܚܵܕܵܚ: ܘܦܵܨܚܵܚ: ܘܝܵܗ݇ܒ݂ܵܚ ܬܸܫܒܘܿܚܬܵܐ ܐܸܠܹܗ: ܣܵܒܵܒ ܕܐܬܹܠܹܐ ܚܠܘܼܠܵܐ ܕܦܹܪܵܐ: ܘܒܲܟ݂ܬܹܗ ܗܘܼܕܸܪܬܵܐ ܝܠܵܐ ܓܵܢܘܼܗ̇. 8 ܘܦܸܫܠܹܐ ܝܘܼܗ݇ܒ݂ܵܐ ܐܸܠܵܗ̇ ܕܦܵܝܫܵܐ ܡܘܼܠܒܸܫܬܵܐ ܟܸܬܵܢ ܢܵܙܸܟ: ܘܡܲܒܪܸܩܵܢܵܐ ܘܕܸܟ݂ܝܵܐ: ܣܵܒܵܒ ܕܗ̇ܘ ܟܸܬܵܢ ܢܵܙܸܟ ܙܲܕܝܼܩܘܼ̈ܝܵܬܵܐ ܕܩܲܕܝܼܫܹ̈ܐ ܝܠܹܐ. 9 ܘܐܡܸܪܹܐ ܐܸܠܝܼ: ܟܬܘܿܒ݂: ܛܘܼܒ݂ܵܢܹ̈ܐ ܝܢܵܐ ܐܵܢܝܼ ܕܠܚܵܪܲܡܫܵܐ ܕܚܠܘܼܠܹܗ ܕܦܹܪܵܐ ܩܸܪܝܹܐ ܝܢܵܐ. ܘܐܡܸܪܹܐ ܐܸܠܝܼ: ܐܲܢܹܐ ܗܹܡܸܙܡܵܢܹ̈ܐ ܫܲܪܝܼܪܹ̈ܐ ܕܐܲܠܵܗܵܐ ܝܢܵܐ. 10 ܘܢܦܸܠܝܼ ܩܵܕ݇ܡ ܐܲܩܠܘܼ̈ܗܝ ܠܸܣܓ݂ܵܕܵܐ ܐܸܠܹܗ: ܘܐܡܸܪܹܐ ܐܸܠܝܼ: ܚܙܝܼ: ܠܵܐ. ܚܲܒ݂ܪܘܼܟ݂ ܒܚܸܠܡܲܬ ܝܼܘܸܢ: ܘܕܵܐܚܘܿܢܘܵܬܹܐ ܕܝܼܘܼܟ݂: ܐܵܢܝܼ ܕܐܝܼܬ ܠܗ݇ܘܿܢ ܣܵܗܕܘܼܬܵܐ ܕܝܼܫܘܿܥ: ܠܐܲܠܵܗܵܐ ܣܓ݂ܘܿܕܘܿܢ. ܣܵܒܵܒ ܣܵܗܕܘܼܬܵܐ ܕܝܼܫܘܿܥ ܝܼܠܵܐ ܪܘܼܚܵܐ ܕܢܒ݂ܝܼܘܼܬܵܐ.

11 ܘܚܙܹܠܝܼ ܠܫܡܲܝܵܐ ܕܦܬܝܼܚܬܵܐ: ܘܗܵܐ: ܣܘܼܣܹܐ ܚܘܵܪܵܐ: ܘܗ̇ܘ ܕܝܼܗ݇ܘܵܐ ܝܬܝܼܒ݂ܵܐ ܥܲܠܘܼܗܝ ܦܵܝܸܫ ܗ݇ܘܵܐ ܩܸܪܝܵܐ ܡܗܘܼܡܢܵܐ ܘܫܲܪܝܼܪܵܐ: ܘܒܙܲܕܝܼܩܘܼܬܵܐ ܟܹܐ ܕܵܝܸܢ ܘܟܹܐ ܥܵܒ݂ܸܕ ܦܠܵܫܵܐ. 12 ܘܥܲܝܢܘܼ̈ܗܝ ܐܲܝܟ݂ ܠܵܗܵܐ ܕܢܘܼܪܵܐ: ܘܥܲܠ ܪܹܫܹܗ ܬܵܐܓ̰ܹ̈ܐ ܣܲܓܝܼ̈ܐܹܐ: ܘܐܝܼܬ ܠܹܗ ܫܸܡܵܐ ܕܝܼܠܹܐ ܟܬܝܼܒ݂ܵܐ: ܠܗ̇ܘ ܕܐ݇ܢܵܫܵܐ ܠܹܐ ܝܲܕܸܥ ܫܒ݂ܘܿܩ ܡ̣ܢ ܓܵܢܹܗ. 13 ܘܠܒ݂ܝܼܫܵܐ ܓ̰ܘܼܠܵܐ ܕܓܒ݂ܝܼܠܵܐ ܒܕܸܡܵܐ: ܘܦܝܵܫܵܐ ܝܠܹܐ ܫܸܡܹܗ ܡܸܠܬܵܐ ܕܐܲܠܵܗܵܐ. 14 ܘܥܲܣܟܵܪ̈ܘܵܬܹܐ ܕܒܫܡܲܝܵܐ ܐܙܸܠܘܿܢ ܒܵܬ݇ܪܹܗ ܥܲܠ ܣܘܼܣܵܘܵܬܹ̈ܐ ܚܘܵܪܹ̈ܐ: ܠܒ݂ܝܼܫܹܐ ܠܒ݂ܸܫܬܵܐ ܕܟܸܬܵܢ ܢܵܙܸܟ: ܕܸܟ݂ܝܵܐ ܚܘܵܪܵܐ. 15 ܘܡ̣ܢ ܦܘܼܡܹܗ ܝܠܹܐ ܣܲܝܦܵܐ ܚܵܪܝܼܦܵܐ: ܕܒܝܼܹܗ ܡܵܚܹܐ ܠܛܵܝܸܦܹ̈ܐ. ܘܗ̇ܘ ܒܸܬ ܡܲܪܥܹܐ ܠܗ݇ܘܿܢ ܒܚܘܼܛܪܵܐ ܕܦܪܸܙܠܵܐ. ܗ̇ܘ ܒܸܬ ܡܵܪܸܥܟ̃ ܡܲܥܨܲܪܬܵܐ ܕܚܲܡܪܵܐ ܕܚܸܡܬܵܐ ܕܟܲܪܒܹܗ ܕܐܲܠܵܗܵܐ ܐܲܚܝܼܕ ܟܠ. 16 ܘܐܝܼܬ ܠܹܗ ܥܲܠ ܓ̰ܘܼܠܵܐ ܘܥܲܠ ܥܸܛܡܵܐ ܕܝܼܹܗ ܫܸܡܵܐ ܕܝܼܠܹܐ ܟܬܝܼܒ݂ܵܐ: ܡܠܟܵܐ ܕܡܠܟܹ̈ܐ: ܘܡܵܪܵܐ ܕܡܵܪ̈ܵܘܵܬܹܐ.

17 ܘܚܙܹܠܝܼ ܚܵܕ݇ ܡܲܠܲܐܟ݂ܵܐ ܟܲܕ ܟܸܠܝܵܐ ܒܫܸܡܫܵܐ: ܘܩܘܼܘܸܚܠܹܐ ܒܩܵܠܵܐ ܓܘܼܪܵܐ ܟܲܕ ܒܹܐܡܵܪܵܐ ܠܟܠܵܝ ܛܲܝܪܹ̈ܐ ܕܒܸܦܪܵܚܵܐ ܝܢܵܐ ܒܒܹܝܦܲܠܓܵܐ ܕܫܡܲܝܵܐ: ܬܹܡܘܿܢ ܓ̰ܡܸܥܡܘܿܢ ܠܡܸܫܬܘܼܬܵܐ ܓܘܼܪܬܵܐ ܕܐܲܠܵܗܵܐ: 18 ܕܐܵܟ݂ܠܝܼܬܘܿܢ ܒܸܣܪܵܐ ܕܡܲܠܟܹ̈ܐ: ܘܒܸܣܪܵܐ ܕܪܹ̈ܫܵܢܹܐ ܕܐܲܠܦܹ̈ܐ: ܘܒܸܣܪܵܐ ܕܚܲܝܠܵܢܹ̈ܐ: ܘܒܸܣܪܵܐ ܕܣܘܼܣܵܘܵܬܹ̈ܐ: ܘܕܵܐܢܝܼ ܕܝܼܢܵܐ ܝܬܝܼܒ݂ܹܐ ܥܲܠܵܝ: ܘܒܸܣܪܵܐ ܕܟܠܵܝ: ܐܵܙܵܕܹ̈ܐ ܘܩܘܼܠܹ̈ܐ: ܘܙܥܘܿܪܹ̈ܐ ܘܓܘܼܪܹ̈ܐ.

19 ܘܚܙܹܠܝܼ ܠܕܵܒ݂ܵܐ: ܘܠܡܲܠܟܹ̈ܐ ܕܐܲܪܥܵܐ: ܘܠܥܲܣܟܵܪ̈ܘܵܬܹܐ ܕܝܼܵܝ: ܕܝܼܗ݇ܘܵܘ ܓ̰ܸܡܥܝܹܐ ܠܸܥܒ݂ܵܕܵܐ ܦܠܵܫܵܐ ܥܲܡ ܗ̇ܘ ܕܝܼܠܹܐ ܪܟܝܼܒ݂ܵܐ ܥܲܠ ܣܘܼܣܹܐ: ܘܥܲܡ ܥܲܣܟܵܪ̈ܘܵܬܘܼܗܝ. 20 ܘܦܸܫܠܹܐ ܨܝܼܕܵܐ ܕܵܒܵܐ: ܘܢܒ݂ܝܼܵܐ ܕܵܓܵܠܵܐ ܥܲܡܹܗ: ܗ̇ܘ ܕܥܒܸܕܠܹܐ ܐܲܢܹܐ ܢܝܼܫܲܢܩܹ̈ܐ ܩܵܕ݇ܡܘܼܗܝ: ܕܒܝܼܵܝ ܡܘܼܚܠܸܛܠܹܐ ܠܐܲܢܹܐ ܕܫܩܸܠܘܿܢ ܪܘܼܫܡܵܐ ܕܕܵܒܵܐ: ܘܠܲܐܢܹܐ ܕܣܓܸܕܠܘܿܢ ܠܨܠܡܹܗ: ܘܟܲܕ ܚܲܝܹܐ ܦܸܫܠܘܿܢ ܕܸܪܝܹܐ ܬܸܪܘܵܝ ܓܵܘ ܝܵܡܵܐ ܕܢܘܼܪܵܐ: ܗ̇ܝ ܕܝܼܠܵܐ ܒܸܩܝܵܕܵܐ ܒܟܸܒܪܝܼܬ. 21 ܘܐܵܢܝܼ ܐܚܹܪ̈݇ܢܹܐ ܦܸܫܠܘܿܢ ܩܛܝܼܠܹܐ ܒܣܲܝܦܵܐ ܕܗ̇ܘ ܕܝܼܗ݇ܘܵܐ ܪܟܝܼܒ݂ܵܐ ܥܲܠ ܣܘܼܣܹܐ: ܕܒܸܦܠܵܛܵܐ ܝܠܹܐ ܡ̣ܢ ܦܘܼܡܹܗ: ܘܟܠܵܝ ܛܲܝܪܹ̈ܐ ܣܒܸܥܠܘܿܢ ܡ̣ܢ ܒܸܣܪܵܝ.

ܩܦܠܐܘܢ: ܟ

1 ܘܚܙܹܠܝܼ ܡܲܠܲܐܟ݂ܵܐ ܕܒܸܨܠܵܝܵܐ ܡ̣ܢ ܫܡܲܝܵܐ: ܕܐܝܼܬ ܗ݇ܘܵܐ ܠܹܗ ܩܕܝܼܠܵܐ ܕܬܗܘܿܡܵܐ: ܘܫܹܫܸܠܬܵܐ ܓܘܼܪܬܵܐ ܒܐܝܼܕܹܗ. 2 ܘܕܒ݂ܸܩܠܹܐ ܠܬܵܢܝܼܢܵܐ: ܗ̇ܘ ܚܘܼܘܹܐ ܥܵܬܝܼܩܵܐ: ܗ̇ܘ ܕܝܼܠܹܐ ܐܵܟ݂ܹܠܩܲܪܨܵܐ ܘܣܵܛܵܢܵܐ: ܘܐܣܸܪܹܗ ܐܲܠܦܵܐ ܫܸܢܹ̈ܐ: 3 ܘܕܪܹܠܹܗ ܒܬܗܘܿܡܵܐ: ܘܕܒ݂ܸܩܠܹܐ ܘܡܚܹܠܹܐ ܡܵܘܗܪ ܥܲܠܘܼܗܝ: ܕܠܵܐ ܡܲܚܠܸܛ ܡܸܕܪܹܐ ܠܛܵܝܸܦܹ̈ܐ ܗܲܠ ܕܬܲܡܸܡܝܼ ܐܲܢܹܐ ܐܲܠܦܵܐ ܫܸܢܹ̈ܐ. ܐܝܼܢܵܐ ܒܵܬ݇ܪ ܐܲܢܹܐ ܠܵܙܸܡ ܝܼܠܵܐ ܕܦܵܝܸܫ ܫܸܪܝܵܐ ܚܲܟ̰ܵܐ ܙܲܒ݂ܢܵܐ.

4 ܘܚܙܹܠܝܼ ܬܪ̈ܘܿܢܘܿܣܹܐ ܘܝܬܸܒ݂ܠܘܿܢ ܥܲܠܵܝ: ܘܕܝܼܘܵܢ ܦܸܫܠܵܐ ܝܸܗܒ݂ܸܠܬܵܐ ܐܸܠܵܝ: ܘܠܓܵܢܵܬܹ̈ܐ ܕܦܸܫܠܘܿܢ ܦܪܝܼܡܹܐ ܣܵܒܵܒ ܕܣܵܗܕܘܼܬܵܐ ܕܝܼܫܘܿܥ: ܘܣܵܒܵܒ ܕܗܹܡܸܙܡܵܢ ܕܐܲܠܵܗܵܐ: ܘܐܵܢܝܼ ܐ݇ܢܵܫܹ̈ܐ ܕܠܵܐ ܣܓ݂ܸܕܠܘܿܢ ܠܕܵܒܵܐ: ܘܠܵܐ ܠܨܲܠܡܹܗ: ܘܠܵܐ ܩܘܼܒܸܠܘܿܢ ܠܪܘܼܫܡܹܗ ܥܲܠ ܩܸܨܵܝ ܘܥܲܠ ܐܝܼܕܵܝ: ܘܚܹܝܠܘܿܢ ܘܥܒ݂ܸܕܠܘܿܢ ܡܲܠܟܘܼܬܵܐ ܥܲܡ ܡܫܝܼܚܵܐ ܐܲܠܦܵܐ ܫܸܢܹ̈ܐ. 5 ܐܝܼܢܵܐ ܐܚܹܪ̈݇ܢܹܐ ܕܡܝܼܬܹ̈ܐ ܠܵܐ ܚܹܝܠܘܿܢ ܡܸܕܪܹܐ ܗܲܠ ܕܬܸܡܠܘܿܢ ܐܲܠܦܵܐ ܫܸܢܹ̈ܐ. ܐܵܗܵܐ ܝܠܵܐ ܩܝܵܡܬܵܐ ܗ̇ܝ ܩܵܕ݇ܡܵܝܬܵܐ. 6 ܛܘܼܒ݂ܵܢܵܐ ܝܠܹܐ ܘܩܲܕܝܼܫܵܐ ܗ̇ܘ ܕܐܝܼܬ ܠܹܗ ܣܵܡܵܐ ܒܩܝܵܡܬܵܐ ܗ̇ܝ ܩܵܕ݇ܡܵܝܬܵܐ. ܥܲܠ ܕܐܵܢܝܼ ܡܵܘܬܵܐ ܕܬܪܲܝ ܠܲܝܬ ܠܹܗ ܗܘܼܟܡܵܐ: ܐܸܠܵܐ ܒܸܬ ܗܵܘܝܼ ܟܵܗܢܹ̈ܐ ܕܐܲܠܵܗܵܐ ܘܕܡܫܝܼܚܵܐ: ܘܒܸܬ ܥܵܒ݂ܕܝܼ ܡܲܠܟܘܼܬܵܐ ܥܲܡܹܗ ܐܲܢܹܐ ܐܲܠܦܵܐ ܫܸܢܹ̈ܐ.

7 ܘܐܝܼܡܲܢ ܕܬܲܡܸܡܝܼ ܐܲܢܹܐ ܐܲܠܦܵܐ ܫܸܢܹ̈ܐ: ܒܸܬ ܦܵܝܸܫ ܫܸܪܝܵܐ ܗ̇ܘ ܣܵܛܵܢܵܐ ܡ̣ܢ ܒܹܷܬ ܢܛܘܼܪܬܹܗ. 8 ܘܒܸܬ ܦܵܠܸܛ ܠܡܲܚܠܘܼܛܹܐ ܠܛܵܝܸܦܹ̈ܐ ܕܒܲܐܪܒܲܥ ܩܘܼܢܓ̰ܝܼܵܬܹ̈ܐ ܕܐܲܪܥܵܐ: ܠܓܘܼܓ݂ ܘܠܡܵܓ݂ܘܿܓ݂: ܠܓ̰ܲܡܘܼܥܝܵܝ ܠܦܠܵܫܵܐ: ܐܲܢܹܐ ܕܡܸܢܝܵܢܵܝ ܐܲܝܟ݂ ܣܹܠܵܐ ܕܝܵܡܵܐ. 9 ܘܐܣܸܩܠܘܿܢ ܥܲܠ ܦܸܬܝܘܼܬܵܐ ܕܐܲܪܥܵܐ: ܘܚܕܝܼܪܵܠܘܿܢ ܠܐܘܼܪܕܘܼܝ ܕܩܲܕܝܼܫܹ̈ܐ: ܘܠܡܕܝܼܢ݇ܬܵܐ ܡܘܼܚܸܒܬܵܐ: ܘܨܠܹܠܹܐ ܢܘܼܪܵܐ ܡ̣ܢ ܐܲܠܵܗܵܐ ܡ̣ܢ ܫܡܲܝܵܐ ܘܐܟ݂ܝܼܠܵܝܠܹܐ. 10 ܘܐܵܟ݂ܹܠܩܲܪܨܵܐ ܕܡܘܼܚܠܸܛܵܝܠܹܐ ܦܸܫܠܹܐ ܕܸܪܝܵܐ ܓܵܘ ܝܵܡܵܐ ܕܢܘܼܪܵܐ ܘܕܟܸܒܪܝܼܬ: ܐܲܝܟܵܐ ܕܝܼܗ݇ܘܵܘ ܐܘܼܦ ܕܵܒܵܐ ܘܢܒ݂ܝܼܵܐ ܕܵܓܵܠܵܐ: ܘܒܸܬ ܦܵܝܫܝܼ ܓ̰ܘܼܢܓ̰ܸܪܹܐ ܐܝܼܡܵܡܵܐ ܘܠܲܝܠܹܐ: ܠܥܵܠܡܹ̈ܐ ܕܥܵܠܡܹ̈ܐ.

11 ܘܚܙܹܠܝܼ ܬܪܘܿܢܘܿܣ ܓܘܼܪܬܵܐ ܚܘܵܪܬܵܐ: ܘܠܗ̇ܘ ܕܝܼܗ݇ܘܵܐ ܝܬܝܼܒ݂ܵܐ ܥܲܠܘܼܗ̇: ܗ̇ܘ ܕܡ̣ܢ ܦܵܬܹܗ ܥܪܸܩܠܵܐ ܐܲܪܥܵܐ ܘܫܡܲܝܵܐ: ܘܕܘܼܟܬܵܐ ܠܵܐ ܡܫ̄ܟ̰ܸܚܠܵܐ ܐܸܠܵܝ. 12 ܘܚܙܹܠܝܼ ܠܡܝܼܬܹ̈ܐ: ܠܓܘܼܪܹ̈ܐ ܘܠܙܥܘܿܪܹ̈ܐ: ܒܸܟܠܵܝܵܐ ܩܵܕ݇ܡ ܐܲܠܵܗܵܐ: ܘܟܬܵܒ݂ܹ̈ܐ ܦܸܫܠܘܿܢ ܦܬܝܼܚܹܐ. ܘܟܬܵܒ݂ܵܐ ܐܚܹܪ݇ܢܵܐ ܦܸܫܠܹܐ ܦܬܝܼܚܵܐ: ܗܚܘ ܕܝܼܠܹܐ ܕܚܲܝܹ̈ܐ: ܘܦܸܫܠܘܿܢ ܕܝܼܢܹܐ ܡܝܼܬܹ̈ܐ ܡ̣ܢ ܕܐܵܢܝܼ ܕܝܼܗ݇ܘܵܘ ܟܬܝܼܒ݂ܹܐ ܓܵܘ ܟܬܵܒ݂ܹ̈ܐ: ܐܲܝܟ݂ ܦܘܼܠܚܵܢܵܝ̈. 13 ܘܝܸܗ݇ܒ݂ܸܠܵܐ ܝܵܡܵܐ ܡܝܼܬܹ̈ܐ ܐܵܢܝܼ ܕܓܵܘܵܗ̇: ܘܡܵܘܬܵܐ ܘܫܝܘܿܠ ܝܸܗܒ݂ܸܠܘܿܢ ܡܝܼܬܹ̈ܐ ܐܵܢܝܼ ܕܓܵܘܵܝ: ܘܦܸܫܠܘܿܢ ܕܝܼܢܹܐ ܟܠ ܚܵܕ݇ ܐܲܝܟ݂ ܦܘܼܠܚܵܢܵܝ̈. 14 ܘܡܵܘܬܵܐ ܘܫܝܘܿܠ ܦܸܫܠܘܿܢ ܕܸܪܝܹܐ ܓܵܘ ܕܗ̇ܝ ܝܵܡܵܐ ܕܢܘܼܪܵܐ. ܐܵܗܵܐ ܝܠܹܐ ܡܵܘܬܵܐ ܕܬܪܲܝ: ܗ̇ܝ ܝܵܡܵܐ ܕܢܘܼܪܵܐ. 15 ܘܐܸܢ ܐ݇ܢܵܫܵܐ ܠܵܐ ܦܸܫܠܹܐ ܡܫ̄ܟ̰ܝܼܚܵܐ ܟܬܝܼܒ݂ܵܐ ܓܵܘ ܟܬܵܒ݂ܵܐ ܓܵܘ ܕܚܲܝܹ̈ܐ: ܦܸܫܠܹܐ ܕܸܪܝܵܐ ܓܵܘ ܕܗ̇ܝ ܝܵܡܵܐ ܕܢܘܼܪܵܐ.

ܩܦܠܐܘܢ: ܟܐ

1 ܘܚܙܹܠܝܼ ܫܡܲܝܵܐ ܚܵܕ݇ܬܹ̈ܐ ܘܐܲܪܥܵܐ ܚܲܕ݇ܬܵܐ: ܣܵܒܵܒ ܗ̇ܝ ܫܡܲܝܵܐ ܩܵܕ݇ܡܵܝܬܵܐ ܘܐܲܪܥܵܐ ܩܵܕ݇ܡܵܝܬܵܐ ܐܙܸܠܘܿܢ: ܘܝܵܡܵܐ ܠܲܝܬ ܗ݇ܘܵܐ ܡܸܕܪܹܐ. 2 ܘܠܗ̇ܝ ܡܕܝܼܢ݇ܬܵܐ ܩܲܕܝܼܫܬܵܐ: ܐܘܿܪܸܠܸܡ ܚܲܕܬܵܐ ܚܙܹܠܝܼ ܟܲܕ ܒܸܨܠܵܝܵܐ ܡ̣ܢ ܫܡܲܝܵܐ ܡ̣ܢ ܐܲܠܵܗܵܐ: ܗܘܼܕܸܪܬܵܐ ܐܲܝܟ݂ ܟܵܠܬܵܐ ܣܘܼܩܸܠܬܵܐ ܠܓܲܒ݂ܪܘܼܗ̇. 3 ܘܫܡܸܥܠܝܼ ܩܵܠܵܐ ܓܘܼܵܐ ܡ̣ܢ ܫܡܲܝܵܐ ܕܒܹܐܡܵܪܵܐ: ܗܵܐ: ܡܲܫܟܢܵܐ ܕܐܲܠܗܵܐ ܥܲܡ ܒܢܲܝ̈ܢܵܫܵܐ: ܘܒܸܬ ܫܵܪܹܐ ܥܲܡܵܝ: ܘܐܲܢܹܐ ܒܸܬ ܗܵܘܝܼ ܛܵܝܸܦܵܐ ܕܝܼܹܗ: ܘܐܲܠܵܗܵܐ ܒܓܵܢܹܗ ܥܲܡܵܝ ܒܸܬ ܗܵܘܹܐ ܠܐܲܠܵܗܵܐ: 4 ܘܒܸܬ ܡܵܫܹܐ ܟܠ ܕܸܡܥ̱ܬܵܐ ܡ̣ܢ ܥܲܝܢܵܝ̈: ܘܡܵܘܬܵܐ ܠܹܐ ܗܵܘܹܐ ܡܸܕܪܹܐ: ܘܠܵܐ ܬܵܘܝܼ: ܘܠܵܐ ܡܲܩܘܲܚܬܵܐ: ܘܟܠ ܕܲܪܕ ܠܹܐ ܗܵܘܹܐ ܡܸܕܪܹܐ: ܣܵܒܵܒ ܕܫܘܼܠܹ̈ܐ ܩܵܕ݇ܡܵܝܹ̈ܐ ܥܒܸܪܘܿܢ. 5 ܘܐܡܸܪܹܐ ܗ̇ܘ ܕܝܼܗ݇ܘܵܐ ܝܬܝܼܒ݂ܵܐ ܥܲܠ ܬܪܘܿܢܘܿܣ: ܗܵܐ: ܠܟܠܵܝ ܒܸܥܒ݂ܵܕܵܐ ܝܘܸܢ ܚܵܕ݇ܬܹ̈ܐ. ܘܐܡܸܪܹܐ: ܟܬܘܿܒ݂: ܣܵܒܵܒ ܐܲܢܹܐ ܗܹܡܸܙܡܵܢܹ̈ܐ ܡܗܘܼܡܢܹ̈ܐ ܘܫܲܪܝܼܪܹ̈ܐ ܝܢܵܐ. 6 ܘܐܡܸܪܹܐ ܐܸܠܝܼ: ܗ݇ܘܹܠܘܿܢ. ܐܵܢܵܐ ܝܘܸܢ ܐܵܠܲܦ ܘܬܵܘ: ܫܘܼܪܵܝܵܐ ܘܫܘܼܠܵܡܵܐ. ܠܗ̇ܘ ܕܝܼܠܹܐ ܨܸܗ݇ܝܵܐ ܐܵܢܵܐ ܒܸܬ ܝܵܗ݇ܒ݂ܸܢ ܡ̣ܢ ܥܲܝܢܵܐ ܕܡ̈ܝܼܵܐ ܚܵܝܹ̈ܐ ܚܘܼܪܵܝܝܼ. 7 ܗ̇ܘ ܕܓ݂ܵܠܸܒ ܒܸܬ ܝܵܪܸܬ ܐܲܢܹܐ: ܘܒܸܬ ܗܵܘܸܢ ܐܸܠܹܗ ܐܲܠܵܗܵܐ: ܘܗ̇ܘ ܒܸܬ ܗܵܘܹܐ ܒܪܘܼܢܵܐ ܕܝܼܝܼ. 8 ܐܝܼܢܵܐ ܠܙܵܕܘܿܥܘܹ̈ܐ: ܘܠܵܐ ܡܗܘܼܡܢܹ̈ܐ: ܘܟ̰ܘܼܦܠܸܢܹ̈ܐ: ܘܩܵܛܘܿܠܹ̈ܐ: ܘܙܲܢܵܝܹ̈ܐ: ܘܚܲܪ̈ܵܫܹܐ: ܘܣܵܓ݂ܕܵܢܹ̈ܐ ܕܨܵܢܲܡܹ̈ܐ: ܘܟܠܵܝ ܕܵܓܵܠܹ̈ܐ: ܣܵܡܵܝ (ܒܸܬ ܗܵܘܹܐ) ܓܵܘ ܕܗ̇ܝ ܝܵܡܵܐ ܕܝܼܠܵܐ ܒܸܩܝܵܕܵܐ ܒܢܘܼܪܵܐ ܘܟܸܒܪܝܼܬ: ܗ̇ܝ ܕܝܼܠܵܐ ܡܵܘܬܵܐ ܕܬܪܲܝ.

9 ܘܐܬܹܠܹܐ ܠܟܸܣܠܝܼ ܚܵܕ݇ ܡ̣ܢ ܕܐܲܢܹܐ ܫܲܒ݂ܥܵܐ ܡܲܠܲܐܟ݂ܹ̈ܐ ܕܐܝܼܬ ܠܗ݇ܘܿܢ ܐܲܢܹܐ ܫܲܒ݂ܥܵܐ ܦܝܼܵܠܲܐܣ̈: ܕܝܼܢܵܐ ܡܸܠܝܹܐ ܡܐܵܢܝܼ ܫܲܒ݂ܲܥ ܡܲܚܘܵܬܹ̈ܐ ܐܚܵܪ̈ܵܝܹܐ: ܘܗܘܼܡܙܸܡܠܹܐ ܥܲܡܝܼ ܟܲܕ ܒܹܐܡܵܪܵܐ: ܬܵܐ: ܒܸܬ ܡܲܚܙܸܢ ܐܸܠܘܼܟ݂ ܠܟܵܠܬܵܐ ܒܲܟ݂ܬܹܗ ܕܦܹܪܵܐ. 10 ܘܠܘܼܒܠܸܢܹܐ ܒܪܘܼܚܵܐ ܥܲܠ ܛܘܼܪܵܐ ܓܘܼܪܵܐ ܘܪܵܡܵܐ: ܘܡܘܼܚܙܹܠܹܐ ܐܸܠܝܼ ܠܡܕܝܼܢ݇ܬܵܐ ܩܲܕܝܼܫܬܵܐ ܐܘܿܪܸܫܠܸܡ: ܒܸܨܠܵܝܵܐ ܡ̣ܢ ܫܡܲܝܵܐ ܡ̣ܢ ܐܲܠܵܗܵܐ: 11 ܟܲܕ ܐܝܼܬ ܠܵܗ̇ ܬܸܫܒܘܿܚܬܵܐ ܕܐܲܠܵܗܵܐ: ܘܒܲܗܪܘܼܗ̇ ܟܹܐ ܕܵܡܹܐ ܠܟܹܐܦܵܐ ܪܵܒܵܐ ܛܝܼܡܵܢܵܐ: ܐܲܝܟ݂ ܟܹܐܦܵܐ ܕܐܝܼܵܣܦܘܿܢ ܒܸܕܢܡܵܝܵܐ ܠܩܪܸܣܛܸܠܘܿܣ: 12 ܕܐܝܼܬ ܠܵܗ̇ ܫܘܼܪܵܐ ܓܘܼܪܵܐ ܘܪܵܡܵܐ ܕܐܝܼܬ ܠܹܗ ܬܪܸܥܣܲܪ ܕܲܪ̈ܘܵܙܹܐ: ܘܒܕܲܪ̈ܘܵܙܹܐ ܬܪܸܥܣܲܪ ܡܲܠܲܐܟ݂ܹ̈ܐ: ܘܫܸܡܵܢܹ̈ܐ ܕܟܬܝܼܒ݂ܹܐ ܥܲܠܵܝ: ܐܲܢܹܐ ܕܝܼܢܵܐ ܫܸܡܵܢܹ̈ܐ ܕܬܪܸܥܣܲܪ ܐܘܼ̈ܓ̰ܵܓܹܐ ܕܒܢܲܝ̈ ܝܼܣܪܵܝܹܠ. 13 ܡ̣ܢ ܡܲܕܢܚܵܐ ܬܠܵܬ݇ܐ ܕܲܪ̈ܙܘܵܙܹܐ: ܘܡ̣ܢ ܓܲܪܒܝܵܐ ܬܠܵܬ݇ܐ ܕܲܪ̈ܘܵܙܹܐ: ܘܡ̣ܢ ܬܲܝܡܢܵܐ ܬܠܵܬ݇ܐ ܕܲܪ̈ܘܵܙܹܐ: ܘܡ̣ܢ ܡܲܥ̱ܪܒ݂ܵܐ ܬܠܵܬ݇ܐ ܕܲܪ̈ܘܵܙܹܐ. 14 ܘܠܫܘܼܪܵܐ ܕܡܕܝܼܢ݇ܬܵܐ: ܐܝܼܬ ܠܹܗ ܬܪܸܥܣܲܪ ܒܸܢܝܲܬܹ̈ܐ: ܘܥܲܠܵܝ: ܫܸܡܵܢܹ̈ܐ ܕܬܪܸܥܣܲܪ ܫܠܝܼܚܹ̈ܐ ܕܦܹܪܵܐ. 15 ܘܗ̇ܘ ܕܗܲܡܙܘܼܡܹܐ ܗ݇ܘܵܐ ܥܲܡܝܼ: ܐܝܼܬ ܗ݇ܘܵܐ ܠܹܗ ܙܹܠܵܐ ܕܕܲܗܒ݂ܵܐ: ܕܡܵܫܸܚ ܗ݇ܘܵܐ ܠܡܕܝܼܢ݇ܬܵܐ ܘܠܕܲܪ̈ܘܵܙܘܼܗ̇ ܘܠܫܘܼܪܘܼܗ̇. 16 ܘܡܕܝܼܢ݇ܬܵܐ ܟ̰ܗܵܪܓܘܼܫܵܐ ܡܘܼܬܸܒ݂ܬܵܐ ܗ݇ܘܵܐ: ܘܝܘܼܪܟ݂ܘܼܗ̇ ܟܡܵܐ ܕܐܘܼܦ ܦܸܬܘܘܼܗ̇. ܘܡܫܸܚܠܹܐ ܠܡܕܝܼܢ݇ܬܵܐ ܒܸܙܠܵܐ: ܬܪܸܥܣܲܪ ܐܲܠܦܹ̈ܐ ܐܸܣܛ̈ܕܵܘܵܬܵܐ: ܝܘܼܪܟ݂ܘܼܬܵܐ ܘܦܸܬܝܘܼܬܵܐ ܘܪܵܡܘܼܬܵܐ ܕܝܼܵܗ̇ ܒܵܪܵܒܵܪ ܝܼܢܵܐ. 17 ܘܡܫܸܚܠܹܐ ܠܫܘܼܪܘܼܗ̇ ܡܵܐܐ ܘܐܲܪܒܥܝܼ ܘܐܲܪܒܲܥ ܡܫܘܼܚ̈ܝܵܬܵܐ ܕܝܲܡܝܼܢܹ̈ܐ ܕܒܲܪܢܵܫܵܐ: ܗ̇ܝ ܕܝܼܠܵܐ: ܕܡܲܠܲܐܟ݂ܵܐ. 18 ܘܒܸܢܝܵܢܵܐ ܕܫܘܼܪܘܼܗ̇ ܐܝܼܵܣܦܝܼܣ ܝܼܗ݇ܘܵܐ. ܘܡܕܝܼܢ݇ܬܵܐ ܕܕܲܗܒ݂ܵܐ ܨܸܦܝܵܐ ܝܠܵܐ: ܕܟܹܐ ܕܵܡܹܐ ܠܫܘܼܫܵܐ ܨܸܦܝܵܐ. 19 ܘܒܸܢܝܲܬܹ̈ܐ ܕܫܘܼܪܵܐ ܕܡܕܝܼܢ݇ܬܵܐ ܒܟܠ ܟܹܐܦܵܐ ܛܝܼܡܵܢܵܐ ܣܘܼܩܠܹܐ ܝܢܵܐ. ܒܸܢܝܲܬ ܗ̇ܝ ܩܵܕ݇ܡܵܝܬܵܐ ܐܝܼܵܣܦܝܼܣ: ܗ̇ܝ ܕܬܲܪ̈ܬܹܝ ܦܝܼܪܘܼܙܵܐ: ܗ̇ܝ ܕܬܠܵܬ݇ ܟܵܠܝܼܕܘܿܢ: ܗ̇ܝ ܕܐܲܪܒܲܥ ܙܸܡܪܘܼܕ: 20 ܗ̇ܝ ܕܚܲܡܸܫ ܠܵܥܠ: ܗ̇ܝ ܕܐܸܫܸܬܣܵܪܝܼܕܘܿܢ: ܗ̇ܝ ܕܫܲܒ݂ܲܥ ܥܲܩܝܼܩ: ܗ̇ܝ ܕܬܡܵܢܝܵܐ ܒܝܼܪܸܠ: ܗ̇ܝ ܕܐܸܬܫܲܥ ܛܘܼܦܵܐܕܝܼܘܿܢ: ܗ̇ܝ ܕܥܸܣܲܪ ܟܪܸܣܘܿܦܘܿܣܝܼܘܿܣ: ܗ̇ܝ ܕܚܲܕܸܥܣܲܪ ܗܘܼܝܵܐܩܝܼܢܬܘܿܣ: ܗ̇ܝ ܕܬܪܸܥܣܲܪ ܡܲܪܓ̰ܵܢ. 21 ܘܐܲܢܹܐ ܬܪܸܥܣܲܪ ܕܲܪ̈ܘܵܙܹܐ ܬܪܸܥܣܲܪ ܡܲܪ̈ܓܵܢܝܵܬܹܐ ܝܢܵܐ: ܚܕܵܐ ܚܕܵܐ ܟܠ ܚܵܕ݇ ܡ̣ܢ ܕܲܪ̈ܘܵܙܹܐ ܡ̣ܢ ܚܕܵܐ ܡܲܪܓܵܢܝܼܬܵܐ ܗ݇ܘܵܐ. ܘܥܵܠܘܿܠܵܐ ܦܸܬܝܵܐ ܕܡܕܝܼܢ݇ܬܵܐ ܕܲܗܒ݂ܵܐ ܨܸܦܝܵܐ: ܐܲܝܟ݂ ܫܘܼܫܵܐ ܫܲܦ̮ܩܵܢܵܐ. 22 ܘܗܲܝܟܠܵܐ ܠܵܐ ܚܙܹܠܝܼ ܓܵܘܵܗ̇: ܣܵܒܵܒ ܡܵܪܝܵܐ ܐܲܠܵܗܵܐ ܐܲܚܝܼܕ ܟܠ ܗܲܝܟܠܘܼܗ̇ ܝܠܹܐ: ܘܗ̇ܘ ܦܹܪܵܐ. 23 ܘܗ̇ܝ ܡܕܝܼܢ݇ܬܵܐ ܠܝܼܬ ܠܵܗ̇ ܣܘܼܢܩܵܢܵܐ ܕܫܸܡܫܵܐ: ܘܠܵܐ ܕܣܲܗܪܵܐ: ܕܝܵܗ݇ܒ݂ܝܼ ܒܲܗܪܵܐ ܓܵܘܵܗ̇: ܣܵܒܵܒ ܬܸܫܒܘܿܚܬܵܐ ܕܐܲܠܵܗܵܐ ܒܘܼܗ݇ܪܸܢܵܐ ܐܸܠܘܼܗ̇: ܘܫܪܵܝܘܼܗ̇ ܦܹܪܵܐ ܝܠܹܐ. 24 ܘܒܸܬ ܚܵܕܪܝܼ ܛܵܝܸܦܹ̈ܐ ܒܝܼܸܕ ܒܲܗܪܘܼܗ̇: ܘܡܲܠܵܟ݂ܹ̈ܐ ܕܐܲܪܥܵܐ ܟܹܐ ܡܲܝܬ݇ܝܝܼ ܚܸܩܪܵܝ ܓܵܘܵܗ̇. 25 ܘܕܲܪ̈ܘܵܙܘܼܗ̇ ܠܹܐ ܦܵܝܫܝܼ ܕܒ݂ܝܼܪܹܐ ܒܐܝܼܡܵܡܵܐ: ܣܵܒܵܒ ܕܠܲܝܠܹܐ ܠܹܐ ܗܵܘܹܐ ܬܵܡܵܐ. 26 ܘܒܸܬ ܡܲܝܬ݇ܝܝܼ ܠܚܸܩܪܵܐ ܘܠܲܐܝܼܩܵܪܵܐ ܕܛܵܝܸܦܹ̈ܐ ܓܵܘܵܗ̇. 27 ܘܠܹܐ ܐܵܘܸܪ ܓܵܘܵܗ̇ ܟ̰ܘܼ ܡܸܢܕܝܼ ܛܲܡܵܐܐ: ܘܗ̇ܘ ܕܥܵܒ݂ܸܕ ܛܲܡܐܘܼܬܵܐ ܘܕܵܓܵܠܘܼܬܵܐ: ܐܸܠܵܐ ܐܵܢܝܼ ܕܝܼܢܵܐ ܟܬܝܼܒ݂ܹܐ ܒܟܬܵܒ݂ܵܐ ܕܚܲܝܹ̈ܐ ܕܦܹܪܵܐ.

ܩܦܠܘܢ: ܟܒ

1 ܘܩܲܡ ܡܲܚܙܹܠ ܠܝܼ ܢܲܗܪܵܐ ܕܡ̈ܝܼܵܐ ܚܵܝܹ̈ܐ ܨܸܦܝܵܐ ܐܲܝܟ݂ ܩܪܸܣܛܹܠܘܿܣ: ܕܒܸܦܠܵܛܵܐ ܡ̣ܢ ܬܪܘܿܢܘܿܣ ܕܐܲܠܵܗܵܐ: ܘܕܦܹܪܵܐ: 2 ܒܒܹܝܦܲܠܓܵܐ ܕܥܵܠܘܠܵܐ ܦܸܬܝܝܵܐ ܕܝܼܵܗ̇. ܘܥܲܠ ܢܲܗܪܵܐ ܡܐܵܗܵܐ ܓܹܒܵܐ ܘܡܗ̇ܘ ܓܹܒܵܐ: ܐܝܼܠܵܢܵܐ ܕܚܲܝܹ̈ܐ: ܕܡܵܐܘܹܐ ܬܪܸܥܣܲܪ ܛܥܘܼܢܝܵܬܹ̈ܐ: ܕܒܟܠ ܝܲܪܚܵܐ ܒܝܼܵܗ݇ܒ݂ܵܐ ܟܠ ܚܕܵܐ ܛܥܘܼܢܬܵܐ ܕܝܼܹܗ. ܘܛܲܪ̈ܦܹܐ ܕܩܲܝܣܵܐ ܠܗܲܟܝܼܡܘܼܬܵܐ ܕܡܸܠܲܬܹ̈ܐ. 3 ܘܟ̰ܘܼ ܠܵܘܛܬܵܐ ܠܹܐ ܗܵܘܝܵܐ ܡܸܕܪܹܐ. ܘܬܪܘܿܢܘܿܣ ܕܐܲܠܵܗܵܐ ܘܕܦܹܪܵܐ ܓܵܘܵܗ̇ ܒܸܬ ܗܵܘܝܵܐ: ܘܪܹ̈ܓܵܘܵܬܘܼܗܝ ܒܸܬ ܥܵܒ݂ܕܝܼ ܠܹܗ ܚܸܠܡܲܬ: 4 ܘܒܸܬ ܚܵܙܝܼ ܦܵܬܹܗ: ܘܫܸܡܹܗ ܥܲܠ ܩܸܨܵܝ ܝܠܹܐ. 5 ܘܠܲܝܠܹܐ ܐܚܹܪ݇ܢܵܐ ܠܹܐ ܗܵܘܹܐ ܬܵܡܵܐ: ܘܠܲܝܬ ܠܗ݇ܘܿܢ ܣܘܼܢܩܵܢܵܐ ܕܒܲܗܪܵܐ ܕܫܪܵܝܵܐ: ܘܕܒܲܗܪܵܐ ܕܫܸܡܫܵܐ: ܣܵܒܵܒ ܡܵܪܝܵܐ ܐܲܠܵܗܵܐ ܒܸܬ ܒܲܗ݇ܪܸܢ ܐܸܠܵܝ: ܘܒܸܬ ܥܵܒ݂ܕܝܼ ܡܲܠܟܘܼܬܵܐ ܠܥܵܠܡܹ̈ܐ ܕܥܵܠܡܹ̈ܐ.

6 ܘܐܡܸܪܹܐ ܐܸܠܝܼ: ܐܲܢܹܐ ܗܹܡܸܙܡܵܢܹ̈ܐ ܡܗܘܼܡܢܹ̈ܐ ܘܫܲܪܝܼܪܹ̈ܐ ܝܢܵܐ. ܘܡܵܪܝܵܐ: ܐܲܠܵܗܵܐ ܕܢܒ݂̈ܝܼܹܐ ܩܲܕܝܼܫܹ̈ܐ: ܫܘܼܕܸܪܹܐ ܠܡܲܠܲܐܟ݂ܹܗ ܠܡܲܚܙܘܼܝܹܐ ܠܪܹ̈ܓܵܘܵܬܘܼܗܝ ܐܲܢܹܐ ܕܝܼܢܵܐ ܘܵܓ̰ܸܒ ܠܸܗܘܵܝܵܐ ܓ̰ܲܠܕܹܐ. 7 ܘܗܵܐ: ܒܹܐܬܵܝܵܐ ܝܘܸܢ ܓ̰ܲܠܕܹܐ. ܛܘܼܒ݂ܵܢܵܐ ܝܠܹܐ ܗ̇ܘ ܕܢܵܛܸܪ ܠܗܹܡܸܙܡܵܢܹ̈ܐ ܕܢܒ݂ܝܼܘܼܬܵܐ ܕܐܵܗܵܐ ܟܬܵܒ݂ܵܐ.

8 ܘܐܵܢܵܐ ܝܘܿܚܲܢܵܢ ܝܼܘܸܢ ܗ̇ܘ ܕܫܡܸܥܠܹܐ ܘܚܙܹܠܹܐ ܐܲܢܹܐ. ܘܟܲܕ ܫܡܸܥܠܝܼ ܐܵܢܵܐ ܘܚܙܹܠܝܼ: ܢܦܸܠܝܼ ܠܸܣܓ݂ܵܕܵܐ ܩܵܕ݇ܡ ܐܲܩܠܹ̈ܐ ܕܡܲܠܲܐܟ݂ܵܐ ܕܐܲܢܹܐ ܡܲܚܙܘܼܝܹܐ ܗ݇ܘܵܐ ܐܸܠܝܼ. 9 ܘܐܡܸܪܹܐ ܐܸܠܝܼ: ܚܙܝܼ: ܠܵܐ. ܚܲܒ݂ܪܵܐ ܕܝܼܘܼܟ ܝܼܘܸܢ ܒܚܸܠܡܲܬ: ܘܕܵܐܚܘܿܢܘܵܬܘܼ̈ܟ݂ ܢܒ݂̈ܝܼܹܐ: ܘܕܵܐܢܝܼ ܕܢܵܛܪܝܼ ܠܗܹܡܸܙܡܵܢܹ̈ܐ ܕܐܵܗܵܐ ܟܬܵܒ݂ܵܐ: ܠܐܲܠܵܗܵܐ ܣܓ݂ܘܿܕ.

10 ܘܐܡܸܪܹܐ ܐܸܠܝܼ: ܠܵܐ ܚܬܘܿܡ ܠܗܹܡܸܙܡܵܢܹ̈ܐ ܕܢܒ݂ܝܼܘܼܬܵܐ ܕܐܵܗܵܐ ܟܬܵܒ݂ܵܐ: ܣܵܒܵܒ ܕܙܲܒ݂ܢܵܐ ܩܘܼܪܒܵܐ ܝܠܹܐ. 11 ܗ̇ܘ ܕܥܵܘܵܠܵܐ ܝܠܹܐ: ܗܲܪ ܥܵܒ݂ܸܕ ܥܵܘܠܵܐ: ܘܗ̇ܘ ܕܝܼܠܹܐ ܫܸܚܬܵܢܵܐ: ܗܲܪ ܦܵܝܸܫ ܫܸܚܬܵܢܵܐ: ܘܗ̇ܘ ܕܝܼܠܹܐ ܙܲܕܝܼܩܵܐ: ܗܲܪ ܙܲܕܝܼܩܘܼܬܵܐ ܥܵܒ݂ܸܕ: ܘܗ̇ܘ ܕܝܼܠܹܐ ܩܲܕܝܼܫܵܐ: ܗܲܪ ܦܵܝܸܫ ܡܩܘܼܕܫܵܐ. 12 ܗܵܐ: ܒܹܐܬܵܝܵܐ ܝܘܸܢ ܓ̰ܲܠܕܹܐ: ܘܗܵܩܝܼ ܥܲܡܝܼ: ܠܸܦܪܲܥܝܵܐ ܠܟܠ ܚܵܕ݇ ܐܲܝܟ݂ ܕܗܵܘܹܐ ܦܘܼܠܚܵܢܹܗ. 13 ܐܵܢܵܐ ܝܘܸܢ ܐܵܠܲܦ ܘܬܵܘ: ܩܵܕ݇ܡܵܝܵܐ ܘܐܚܵܪܵܝܵܐ: ܫܘܼܪܵܝܵܐ ܘܫܘܼܠܵܡܵܐ. 14 ܛܘܼܒ݂ܵܢܹ̈ܐ ܝܢܵܐ ܐܵܢܝܼ ܕܚܘܼܠܸܠܘܿܢ ܐܸܣܛܠܵܝ̈: ܕܗܵܘܹܐ ܠܗ݇ܘܿܢ ܕܲܣܬܘܼܪ ܥܲܠ ܩܲܝܣܵܐ ܕܚܲܝܹ̈ܐ: ܘܕܵܐܘܪܝܼ ܒܕܲܪ̈ܙܘܵܙܹܐ ܓܵܘ ܡܕܝܼܢ݇ܬܵܐ. 15 ܠܒ݂ܲܕܲܪ ܟܲܠܒܹ̈ܐ: ܘܚܲܪ̈ܵܫܹܐ: ܘܙܲܢܵܝܹ̈ܐ: ܘܩܵܛܘܿܠܹ̈ܐ: ܘܣܵܓ݂ܕܵܢܹ̈ܐ ܕܨܵܢܲܡܹ̈ܐ: ܘܟܠ ܕܡܲܚܸܒ ܘܥܵܒ݂ܸܕ ܕܵܓܵܠܘܼܬܵܐ.

16 ܐܵܢܵܐ ܝܼܫܘܿܥ ܫܘܼܕܸܪܝܼ ܠܡܲܠܲܐܟ݂ܝܼ ܠܝܼܵܗ݇ܒ݂ܵܐ ܣܵܗܕܘܼܬܵܐ ܐܸܠܵܘܟ݂ܘܿܢ ܐܲܢܹܐ ܩܵܕ݇ܡ ܥܹܕܵܬܹ̈ܐ. ܐܵܢܵܐ ܝܘܸܢ ܥܸܩܪܵܐ ܘܓܸܢܣܵܐ ܕܕܵܘܝܕ: ܟܵܘܟ݂ܒ݂ܵܐ ܒܲܗܪܵܢܵܐ ܕܨܲܦܪܵܐ.

17 ܘܪܘܼܚܵܐ ܘܟܵܠܬܵܐ ܒܹܐܡܵܪܵܐ ܝܢܵܐ: ܬܵܐ. ܘܗ̇ܘ ܕܫܲܡܸܥ ܐܵܡܸܪ: ܬܵܐ. ܘܗ̇ܘ ܕܝܼܠܹܐ ܨܸܗ݇ܝܵܐ: ܐܵܬܹܐ. ܗ̇ܘ ܕܒܵܣܡܵܐ ܠܹܗ: ܫܵܩܸܠ ܡ̈ܝܼܵܐ: ܚܵܝܹ̈ܐ ܚܘܼܪܵܝܝܼ.

18 ܐܵܢܵܐ ܒܸܣܗܵܕܵܐ ܝܘܸܢ ܠܟܠ ܕܫܲܡܸܥ ܠܗܹܡܸܙܡܵܢܹ̈ܐ ܕܢܒ݂ܝܼܘܼܬܵܐ ܕܐܵܗܵܐ ܟܬܵܒ݂ܵܐ: ܕܐܸܢ ܐ݇ܢܵܫܵܐ ܡܲܬܸܒ݂ ܥܲܠܵܝ: ܒܸܬ ܡܲܬܸܒ݂ ܐܲܠܵܗܵܐ ܥܲܠܘܼܗܝ ܠܡܲܚܘܵܬܹ̈ܐ ܕܝܼܢܵܐ ܟܬܝܼܒ݂ܹܐ ܒܐܵܗܵܐ ܟܬܵܒ݂ܵܐ. 19 ܘܐܸܢ ܐ݇ܢܵܫܵܐ ܡܲܒܨܸܪ ܡ̣ܢ ܗܹܡܸܙܡܵܢܹ̈ܐ ܕܟܬܵܒ݂ܵܐ ܕܐܵܗܵܐ ܢܒ݂ܝܼܘܼܬܵܐ: ܒܸܬ ܡܲܒܨܸܪ ܐܲܠܵܗܵܐ ܠܣܵܡܹܗ ܡ̣ܢ ܐܝܼܠܵܢܵܐ ܕܚܲܝܹ̈ܐ: ܘܡ̣ܢ ܡܕܝܼܢ݇ܬܵܐ ܩܲܕܝܼܫܬܵܐ: ܕܝܼܢܵܐ ܟܬܝܼܒ݂ܹܐ ܒܐܵܗܵܐ ܟܬܵܒ݂ܵܐ.

20 ܒܹܐܡܵܪܵܐ ܝܠܹܐ ܗ̇ܘ ܕܒܸܣܗܵܕܵܐ ܝܠܹܐ ܐܲܢܹܐ: ܗܹܐ: ܒܹܐܬܵܝܵܐ ܝܘܸܢ ܓ̰ܲܠܕܹܐ. ܐܵܡܹܝܢ. ܗܹܐ ܬܵܐ: ܡܵܪܝܵܐ ܝܼܫܘܿܥ.

21 ܫܵܦܵܩܲܬܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ ܥܲܡ ܟܠܵܝ ܩܲܕܝܼܫܹ̈ܐ: ܐܵܡܹܝܢ.