ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܓܪܬܐ ܕܬܪܬܝܢ ܕܫܡܥܘܢ ܟܐܦܐ

ܩܦܠܐܘܢ ܐ

1 ܫܸܡܥܘܿܢ ܦܲܛܪܘܿܣ ܥܲܒ݂ܕܵܐ ܘܲܫܠܝܼܚܵܐ ܕܝܼܫܘܿܥ ܡܫܝܼܚܵܐ. ܠܐܲܝܠܹܝܢ ܕܲܠܗܲܝܡܵܢܘܼܬ݂ܵܐ ܫܵܘܝܲܬ݂ ܒܐܝܼܩܵܪܵܐ ܥܲܡܲܢ ܐܸܫܬܿܘܝܼܘ. ܒܙܲܕܝܼܩܘܼܬ݂ܵܐ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ. 2 ܛܲܝܒܘܼܬ݂ܵܐ ܘܲܫܠܵܡܵܐ ܢܸܣܓܹ݁ܐ ܠܟ݂ܘܿܢ. ܒܫܘܼܘܕܵܥܵܐ ܕܡܵܪܲܢ ܝܼܫܘܿܥ ܡܫܝܼܚܵܐ. 3 ܐܲܝܟ݂ ܡܲܢ ܕܟ݂ܠܗܹܝܢ ܐܲܝܠܹܝܢ ܕܐܝܼܬܲܝܗܹܝܢ ܕܚܲܝܠܵܐ ܐܲܠܵܗܵܝܵܐ: ܠܘܵܬ݂ ܚܲܝܹ̈ܐ ܘܕ݂ܸܚܠܲܬ݂ ܐܲܠܵܗܵܐ ܝܲܗ̄ܒ݂. ܒܝܲܕ݂ ܫܘܼܘܕܵܥܵܐ ܕܗܵܘ ܕܲܩܪܵܐ ܠܲܢ. ܒܬܸܫܒܿܘܿܚܬܵܐ ܕܝܼܠܹܗ ܘܲܡܝܲܬܿܪܘܼܬ݂ܵܐ. 4 ܕܒ݂ܐܝܼܕ݂ܲܝ̈ܗܹܝܢ ܫܘܼܘܕܵܝܹ̈ܐ ܪܵܘܪ̈ܒܹܐ ܘܝܲܩܝܼܪܹ̈ܐ ܠܟ݂ܘܿܢ ܝܲܗ̄ܒ݂. ܕܲܒ݂ܝܲܕ݂ ܗܵܠܹܝܢ ܬܸܗܘܘܿܢ ܫܵܘܬܵܦܹ̈ܐ ܕܲܟ݂ܝܵܢܵܐ ܐܲܠܵܗܵܝܵܐ. ܟܲܕ݂ ܥܵܪܩܝܼܢ ܐ̄ܢܬܘܿܢ ܡܸܢ ܚܒ݂ܵܠܵܐ ܕܲܪ̈ܓ݂ܝܼܓ݂ܵܬ݂ܵܐ ܕܲܒ݂ܥܵܠܡܵܐ. 5 ܘܗܝܼ ܕܹܝܢ ܗܵܕܹܐ ܟܲܕ݂ ܫܩܵܠ ܛܲܥܢܵܐ ܟܠܹܗ ܡܲܥܠܝܼܢ ܐ݇ܢܬܘܿܢ. ܐܵܘܣܸܦܘ ܥܲܠ ܗܲܝܡܵܢܘܼܬ݂ܟ݂ܘܿܢ. ܡܝܲܬܿܪܘܼܬ݂ܵܐ. ܥܲܠ ܕܹܝܢ ܡܝܲܬܿܪܘܼܬ݂ܵܐ. ܝܼܕ݂ܲܥܬ݂ܵܐ. 6 ܥܲܠ ܕܹܝܢ ܝܼܕ݂ܲܥܬ݂ܵܐ. ܡܚܲܡܣܢܵܢܘܼܬ݂ܵܐ. ܥܲܠ ܕܹܝܢ ܡܚܲܡܣܢܵܢܘܼܬ݂ܵܐ. ܡܣܲܝܒܪܵܢܘܼܬ݂ܵܐ. ܥܲܠ ܕܹܝܢ ܡܣܲܝܒܪܵܢܘܼܬ݂ܵܐ. ܕܸܚܠܲܬ݂ ܐܲܠܵܗܵܐ. 7 ܥܲܠ ܕܹܝܢ ܕܸܚܠܲܬ݂ ܐܲܠܵܗܵܐ. ܪܸܚܡܲܬ݂ ܐܲܚܘܼܬ݂ܵܐ. ܥܲܠ ܕܹܝܢ ܪܸܚܡܲܬ݂ ܐܲܚܘܼܬ݂ܵܐ. ܚܘܼܒܵܐ. 8 ܗܵܠܹܝܢ ܓܹܝܪ ܟܲܕ݂ ܫܟ݂ܝܼ̈ܚܵܢ ܠܟ݂ܘܿܢ ܘܝܲܬܝܼܪ̈ܵܢ. ܠܵܐ ܗ̄ܘܵܐ ܒܲܛܝܼ̈ܠܹܐ ܐܵܦܠܵܐ ܕܠܵܐ ܦܹܐܪܹ̈ܐ ܡܩܝܼ̈ܡܵܢ ܠܟ݂ܘܿܢ. ܒܫܘܼܘܕܵܥܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 9 ܗܵܘ ܓܹܝܪ ܕܠܵܐ ܫܟ݂ܝܼ̈ܚܵܢ ܠܹܗ ܗܵܠܹܝܢ. ܣܲܡܝܵܐ ܐܝܼܬ݂ܵܘܗܝ ܕܠܵܐ ܚܵܙܹܐ. ܕܲܛܥܵܐ ܕܘܼܟܵܝܵܐ ܕܲܚܛܵܗܵܘ̈ܗܝ ܩܲܕ݂ܡܵܝܹ̈ܐ. 10 ܘܥܲܠ ܗܵܝ ܝܲܬܝܼܪܵܐܝܼܬ݂ ܐܲܚܲܝ̈. ܝܼܨܲܦܘ ܕܲܒ݂ܝܲܕ݂ ܥܒ݂ܵܕ݂ܲܝ̈ܟ݁ܘܿܢ ܛܵܒܹ̈ܐ: ܩܪܵܝܬܿܟ݂ܘܿܢ ܘܲܓ݂ܒ݂ܝܼܬ݂ܟ݂ܘܿܢ (ܘܓܲܒ݂ܝܘܼܬ݂ܟ݂ܘܿܢ) ܡܫܲܪܲܪܬܵܐ ܬܸܥܒ݁ܕ݂ܘܼܢ. ܟܲܕ݂ ܓܹܝܪ ܗܵܠܹܝܢ ܥܵܒ݂ܕ݁ܝܼܢ ܐܢ̄ܬܘܿܢ. ܠܵܐ ܡܬ݂ܘܿܡ ܡܸܫܬܲܪܥܝܼܢ ܐܢ̄ܬܘܿܢ. 11 ܗܵܟܲܢܵܐ ܓܹܝܪ ܥܲܬܿܝܼܪܵܐܝܼܬ݂ ܡܸܬ݂ܝܲܗ̄ܒܵܐ ܠܟ݂ܘܿܢ. ܡܲܥܲܠܬܵܐ ܕܡܲܠܟܘܼܬ݂ܵܐ ܕܲܠܥܵܠܲܡ ܕܡܵܪܲܢ ܘܦܵܪܘܿܩܲܢ. ܝܼܫܘܿܥ ܡܫܝܼܚܵܐ. 12 ܘܥܲܠ ܗܵܕܹܐ ܠܵܐ ܡܲܡܐܸܢ ܐ̄ܢܵܐ (ܡܵܐܢܵܐ ܠܝܼ). ܡܸܢ ܕܡܲܥܗܸܕ݂ ܐ̄ܢܵܐ ܠܟ݂ܘܿܢ (ܕܐܲܥܗܸܕ݂ ܠܟ݂ܘܿܢ) ܐܲܡܝܼܢܵܐܝܼܬ݂ ܥܲܠ ܗܵܠܹܝܢ. ܟܲܕ݂ ܛܵܒ݂ ܐܵܦ ܝܵܕ݂ܥܝܼܢ ܐ̄ܢܬܘܿܢ ܘܲܣܡܝܼܟ݂ܝܼܢ ܐ̄ܢܬܘܿܢ ܥܲܠ ܫܪܵܪܵܐ ܗܵܢܵܐ. 13 ܕܟܹܐܢܵܐ ܕܹܝܢ ܐܸܣܬܲܒ݂ܪܲܬ݂ ܠܝܼ. ܕܲܟ݂ܡܵܐ ܕܐܝܼܬܲܝ ܒܦܲܓ݂ܪܵܐ ܗܵܢܵܐ. ܐܲܥܝܼܪܟ݂ܘܿܢ ܒܥܘܼܗܕܵܢܵܐ. 14 ܟܲܕ݂ ܝܵܕ݂ܲܥ ܐ̄ܢܵܐ. ܕܥܘܼܢܕܵܢܵܐ ܕܦܲܓ݂ܪܝ (ܕܥܘܼܢܕܵܢܝ ܡ݂ܢ ܡܲܫܟܢܵܐ ܗܵܢܵܐ) ܒܲܥܓܲܠ ܗܵܘܹܐ. ܐܲܝܟܲܢܵܐ ܕܐܵܦ ܡܵܪܲܢ ܝܼܫܘܿܥ ܡܫܝܼܚܵܐ ܐܵܘܕܥܲܢܝ. 15 ܝܵܨܹܦ ܐ̄ܢܵܐ ܕܹܝܢ. ܕܐܵܦ ܐܲܡܝܼܢܵܐܝܼܬ݂ ܗ̄ܘܵܐ ܐܝܼܬ݂ ܠܟ݂ܘܿܢ (ܬܸܗܘܹܐ ܠܟ݂ܘܿܢ). ܕܐܵܦ ܡܸܢ ܒܵܬܲܪ ܡܲܦܩܵܢܵܐ ܕܝܼܠܝ ܥܘܼܗܕܵܢܵܐ ܕܗܵܠܹܝܢ ܬܸܗܘܘܿܢ ܥܵܒ݂ܕܝܼܢ. 16 ܠܵܐ ܗ̄ܘܵܐ ܓܹܝܪ ܟܲܕ݂ ܒܵܬܲܪ ܡܲܬ݂̈ܠܹܐ ܕܲܥܒ݂ܝܼܕ݂ܝܼܢ ܒܐܘܼܡܵܢܘܼܬ݂ܵܐ ܐܵܙܠܝܼܢ ܚ̄ܢܲܢ. ܐܵܘܕܲܥܢܵܟ݂ܘܿܢ ܚܲܝܠܹܗ ܘܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܐܸܠܵܐ ܟܲܕ݂ ܚܲܙܵܝܹ̈ܐ ܗ̄ܘܲܝܢ ܕܪܲܒܘܼܬ݂ܵܐ ܕܝܼܠܹܗ (ܕܪܲܒܘܼܬܹܗ). 17 ܟܲܕ݂ ܓܹܝܪ ܢܣܲܒ݂ ܡܸܢ ܐܲܠܵܗܵܐ ܐܲܒ݂ܵܐ ܐܝܼܩܵܪܵܐ ܘܬܸܫܒܿܘܿܚܬܵܐ: ܟܲܕ݂ ܩܵܠܵܐ ܐܸܬ݂ܵܐ ܠܹܗ ܕܐܲܝܟ݂ ܗܵܢܵܐ ܡܸܢ ܬܸܫܒܿܘܿܚܬܵܐ ܦܲܐܝܲܬ݂ ܒܪܲܒܘܼܬ݂ܵܗ݁: ܕܗܵܢܵܘ ܒܹܪܝ ܗܵܘ ܚܲܒܝܼܒ݂ܵܐ ܗܵܘ ܕܒܹܗ ܐܸܨܛܒ݂ܝܼܬ݂. 18 ܐܵܦ ܚܢܲܢ ܠܹܗ ܠܗܵܢܵܐ ܩܵܠܵܐ ܫܡܲܥܢܲܢ ܡܸܢ ܫܡܲܝܵܐ ܕܐܸܬ݂ܵܐ ܠܹܗ. ܟܲܕ݂ ܐܝܼܬܲܝܢ ܗ̄ܘܲܝܢ ܥܲܡܹܗ ܒܛܘܼܪܵܐ ܩܲܕܝܼܫܵܐ. 19 ܘܐܝܼܬ݂ ܠܲܢ ܕܫܲܪܝܼܪܵܐ ܐܵܦ ܡܸܠܬ݂ܵܐ ܕܲܢܒ݂ܝܼܘܼܬ݂ܵܐ. ܗܵܝ ܕܫܲܦܝܼܪ ܥܵܒ݂ܕܝܼܢ ܐܢ̄ܬܘܿܢ. ܟܲܕ݂ ܒܵܗܿ ܚܵܝܪܝܼܢ ܐܢ̄ܬܘܿܢ. ܐܲܝܟ݂ ܕܒܲܫܪܵܓ݂ܵܐ ܕܡܲܢܗܲܪ ܒܐܲܬ݂ܪܵܐ ܥܲܡܘܼܛܵܐ. ܥܕ݂ܲܡܵܐ ܕܐܝܼܡܵܡܵܐ ܢܸܢܗܲܪ. ܘܫܸܡܫܵܐ ܢܸܕ݂ܢܲܚ ܒܠܸܒܵܘܵܬ݂ܟ݂̈ܘܿܢ. 20 ܟܲܕ݂ ܗܵܕܹܐ ܠܘܼܩܕ݂ܲܡ ܝܵܕ݂ܥܝܼܢ ܐܢ̄ܬܘܿܢ. ܕܟ݂ܠ ܢܒ݂ܝܼܘܼܬ݂ܵܐ ܫܪܵܝܵܐ ܕܲܟ݂ܬ݂ܵܒ݂ܵܐ ܕܝܼܠܵܗܿ ܠܵܐ ܗܵܘܝܵܐ. 21 ܠܵܐ ܗ̄ܘܵܐ ܓܹܝܪ ܒܨܸܒ݂ܝܵܢܵܐ ܕܒܲܪܢܵܫܵܐ. ܐܸܬܲܬܸ ܡܸܢ ܡܬ݂ܘܿܡ ܢܒ݂ܝܼܘܼܬ݂ܵܐ. ܐܸܠܵܐ ܟܲܕ݂ ܡܸܢ ܪܘܼܚܵܐ ܩܲܕܝܼܫܵܐ ܡܸܬ݂ܢܲܓ݂ܕܝܼܢ. ܡܲܠܸܠܘ ܩܲܕܝܼܫܹ̈ܐ ܒܢܲܝ̈ܢܵܫܵܐ ܕܐܲܠܵܗܵܐ.

ܩܦܠܐܘܢ ܒ

1 ܗܘܵܘ ܕܹܝܢ ܐܵܦ ܢܒ݂ܝܹ̈ܐ ܕܲܓܵܠܹ̈ܐ ܒܥܲܡܵܐ. ܐܲܝܟ݂ ܕܐܵܦ ܒܟ݂ܘܿܢ ܢܸܗܘܘܿܢ ܡܲܠܦܵܢܹ̈ܐ ܕܲܓܵܠܹ̈ܐ ܐܲܝܠܹܝܢ ܕܡܲܥܠܝܼܢ ܗܹܪܹ̈ܣܝܼܵܣ ܕܐܲܒ݂ܕ݂ܵܢܵܐ. ܘܲܒ݂ܡܵܪܵܐ ܕܲܙܒܲܢ ܐܸܢܘܿܢ ܟܵܦܪܝܼܢ. ܟܲܕ݂ ܡܲܝܬܿܝܼܢ ܥܲܠ ܢܲܦ̮ܫܗܘܿܢ ܐܲܒ݂ܕܵܢܵܐ ܡܣܲܪܗܒ݂ܵܐ. 2 ܘܣܲܓܝܼ̈ܐܹܐ ܢܹܐܙܠ̄ܘܼܢ ܒܵܬܲܪ ܛܲܢܦܘܼܬ݂ܵܐ ܕܝܼܠܗܘܿܢ. ܗܵܠܹܝܢ ܕܡܛܠܵܬ݂ܗܘܿܢ ܐܘܼܪܚܵܐ ܕܲܫܪܵܪܵܐ ܬܸܬ݂ܓܲܕܲܦ. 3 ܘܲܒ݂ܥܵܠܘܿܒ݂ܘܼܬ݂ܵܐ ܘܲܒ݂ܡܸܠܹ̈ܐ ܕܒܸܕ݂ܝܵܐ (ܘܲܒ݂ܠܲܥܒ݁ܘܼܬ݂ܵܐ ܒܡܸܠܹ̈ܐ ܘܒܸܕ݂ܝܵܐ) ܢܸܬܿܬܲܓ݁ܪܘܼܢ ܒܟ݂ܘܿܢ ܗܵܠܹܝܢ ܕܕ݂ܝܼܢܗܘܿܢ ܡܸܢ ܩܕ݂ܝܼܡ ܠܵܐ ܒܵܛܹܠ. ܘܐܲܒ݂ܕܵܢܗܘܿܢ ܠܵܐ ܢܵܐܹܡ. 4 ܐܸܢ ܓܹܝܪ ܐܲܠܵܗܵܐ ܥܲܠ ܡܲܠܲܐܟܹ̈ܐ ܕܲܚܛܵܘ ܠܵܐ ܚܵܣ݂. ܐܸܠܵܐ ܒܫܸܫ̈ܠܵܬ݂ܵܐ ܕܥܲܡܛܵܢܵܐ ܥܲܓܸ݁ܢ ܐܸܢܘܿܢ ܒܬܲܚ̈ܬܵܝܵܬ݂ܵܐ: ܘܐܲܫܠܸܡ ܐܸܢܘܿܢ ܕܢܸܬ݂ܢܲܛܪܘܼܢ ܠܕ݂ܝܼܢܵܐ (ܠܕ݂ܝܼܢܵܐ ܕܫܘܼܢܵܩܵܐ). 5 ܘܥܲܠ ܥܵܠܡܵܐ ܩܲܕ݂ܡܵܝܵܐ ܠܵܐ ܚܵܣ݂. ܐܸܠܵܐ ܠܢܘ݁ܚ ܕܲܬ݂ܡܵܢܝܵܐ ܟܵܪܘܿܙܵܐ ܕܟܹܐܢܘܼܬ݂ܵܐ ܢܛܲܪ. ܟܲܕ݂ ܛܵܘܦܵܢܵܐ ܥܲܠ ܥܵܠܡܵܐ ܕܪ̈ܲܫܝܼܥܹܐ ܐܲܝܬܿܝܼ. 6 ܘܟܲܕ݂ ܠܲܡܕ݂ܝܼ̈ܢܵܬ݂ܵܐ ܕܲܣܕ݂ܘܿܡ ܘܲܕ݂ܥܵܡܘܿܪܵܐ ܐܵܘܩܸܕ݂. ܘܒܲܗܦܘܼܟ݂ܝܵܐ ܚܲܝܸܒ݂ ܐܸܢܹܝܢ: ܟܲܕ݂ ܬܲܚܘܝܼܬ݂ܵܐ ܠܪ̈ܲܫܝܼܥܹܐ ܕܲܥܬ݂ܝܼܕ݂ܝܼܢ ܕܢܸܗܘܘܿܢ ܣ̣ܵܡ. 7 ܐܵܦ ܠܠܘܿܛ ܙܲܕܝܼܩܵܐ ܕܡܸܬ݂ܩܲܦܲܚ ܗ̄ܘܵܐ ܡܸܢ ܗܘܼܦܵܟ݂ܵܐ ܕܲܒ݂ܛܲܢܦܘܼܬ݂ܵܐ ܕܗܵܠܹܝܢ ܕܲܕ݂ܠܵܐ ܢܵܡܘܿܣܵܐ ܐܝܼܬܲܝܗܘܿܢ ܗ̄ܘ̣ܵܘ ܦܲܨܝܼ. 8 ܒܲܚܙܵܬ݂ܵܐ ܓܹܝܪ ܘܲܒ݂ܫܸܡܥܵܐ ܟܲܕ݂ ܥܵܡܲܪ ܗ̄ܘܵܐ ܟܹܐܢܵܐ ܗܵܘ ܒܲܝܢܵܬ݂ܗܘܿܢ. ܝܘܿܡ ܡܸܢ ܝܘܿܡ ܠܢܲܦ̮ܫܹܗ ܙܲܕܝܼܩܬܵܐ ܒܲܥܒ݂ܵܕܹ̈ܐ ܕܠܵܐ ܢܵܡܘܿܣ ܡܫܲܢܸܩ ܗ̄ܘܵܐ. 9 ܝܵܕ݂ܲܥ ܗܘܼ ܡܵܪܝܵܐ ܕܢܸܦܪܘܿܩ ܡܸܢ ܐܘܼܠܨܵܢܵܐ ܠܐܲܝܠܹܝܢ ܕܕ݂ܵܚܠܝܼܢ ܠܹܗ. ܠܥܵܘܵܠܹ̈ܐ ܕܹܝܢ ܠܝܵܘܡܵܐ ܕܕ݂ܝܼܢܵܐ ܟܲܕ݂ ܡܸܫܬܲܢܩܝܼܢ ܢܸܛܲܪ. 10 ܝܲܬܝܼܪܵܐܝܼܬ݂ ܕܹܝܢ ܠܐܲܝܠܹܝܢ ܕܒܵܬܲܪ ܒܸܣܪܵܐ ܒܪܸܓ݁ܬ݂ܵܐ ܕܛܲܡܐܘܼܬ݂ܵܐ ܐܵܙܠ̄ܝܼܢ. ܘܥܲܠ ܡܵܪܘܼܬ݂ܵܐ ܡܒܲܣܪܝܼܢ. ܡܲܪ̈ܵܚܹܐ ܘܲܡܫܲܩ̈ܠܹܐ. ܕܡܸܢ ܬܸܫܒܿܘܿܚܬܵܐ ܠܵܐ ܙܵܝܥܝܼܢ ܟܲܕ݂ ܡܓܲܕܦܝܼܢ. 11 ܐܲܝܟܵܐ ܕܡܲܠܲܐܟܹ̈ܐ ܕܲܒ݂ܚܲܝܠܵܐ ܘܲܒ݂ܥܘܼܫܢܵܐ ܪܵܘܪܒ݂ܝܼܢ ܡܸܢܗܘܿܢ. ܠܵܐ ܡܲܝܬܹܿܝܢ ܥܠܲܝܗܘܿܢ ܡܸܢ ܡܵܪܝܵܐ ܕܝܼܢܵܐ ܕܓ݂ܘܼܕܵܦܵܐ. 12 ܗܵܠܹܝܢ ܕܹܝܢ ܕܐܲܝܟ݂ ܚܲܝ̈ܘܵܬ݂ܵܐ ܚܲܪ̈ܫܵܬ݂ܵܐ ܗ̄ܘܼܵܘ ܒܲܟ݂ܝܵܢܵܐ ܠܚܲܪܒܵܐ ܘܠܲܚܒ݂ܵܠܵܐ. ܟܲܕ݂ ܒܐܲܝܠܹܝܢ ܕܠܵܐ ܝܵܕ݂ܥܝܼܢ ܡܓܲܕܦܝܼܢ. ܒܲܚܒ݂ܵܠܵܐ ܕܝܼܠܗܘܿܢ ܢܸܬ݂ܚܲܒܠܘܼܢ. 13 ܟܲܕ݂ ܐܲܝܠܹܝܢ ܕܗܵܘܹܐ ܒܗܘܿܢ ܥܵܘܠܵܐ. ܐܲܓ݂ܪܵܐ ܕܥܵܘܠܵܐ(13 ܟܲܕ݂ ܢܵܣܒܝܼܢ ܐܲܓ݂ܪܵܐ ܕܥܵܘܠܵܐ) ܗܲܢܝܼܐܘܼܬ݂ܵܐ ܚܫܝܼܒ݂ ܠܗܘܿܢ. ܒܘܼܣܵܡܵܐ ܕܲܗܘܵܐ ܒܐܝܼܡܵܡܵܐ (ܒܘܼܣܵܡܵܐ ܕܝܵܘܡܵܐ). ܡܟܲܬܿܡܹ̈ܐ ܘܡܲܠܝܲܝ̈ ܡܘܼܡܹ̈ܐ. ܕܟܲܕ݂ ܡܸܬ݂ܒܲܣܡܝܼܢ ܒܲܢ̈ܝܵܚܵܬ݂ܗܘܿܢ ܡܸܬ݂ܦܲܢܩܝܼܢ. (ܒܲܢ̈ܝܵܚܵܬ݂ܗܘܿܢ. ܒܡܸܫܬܘܼܬ݂ܵܐ ܥܲܡܟ݂ܘܿܢ) ܡܸܬ݂ܦܲܢܩܝܼܢ. 14 ܟܲܕ݂ ܥܲܝܢܹ̈ܐ ܐܝܼܬ݂ ܠܗܘܿܢ ܕܡܲܠ̈ܝܵܢ ܓܵܘܪܵܐ ܘܲܚܛܵܗܹ̈ܐ ܕܠܵܐ ܡܵܘܦܹܝܢ. ܟܲܕ݂ ܡܫܲܕܠܝܼܢ ܠܢܲܦ̮̈ܫܵܬ݂ܵܐ ܕܠܵܐ ܣܡ̈ܝܼܟ݂ܵܢ. ܘܠܸܒܵܐ ܕܲܡܕ݂ܲܪܲܫ ܒܥܵܠܘܿܒ݂ܘܼܬ݂ܵܐ (ܒܠܲܥܒ݁ܘܼܬ݂ܵܐ) ܐܝܼܬ݂ ܠܗܘܿܢ. ܒ̈ܢܲܝܵܐ ܕܠܵܘܛܬ݂ܵܐ. 15 ܕܟܲܕ݂ ܫܒܲܩܘ ܐܘܼܪܚܵܐ ܬܪܝܼܨܬܵܐ. ܫܓ݂ܵܘ ܘܐܸܙܲܠܘ ܒܐܘܼܪܚܵܐ ܕܒܸܠܥܲܡ ܒܲܪ ܒܥܘܿܪ. ܗܵܘ ܕܐܲܓ݂ܪܵܐ ܕܥܵܘܠܵܐ ܐܲܚܸܒ݂. 16 ܡܲܟ݁ܣܵܢܘܼܬ݂ܵܐ ܕܹܝܢ ܕܲܗܘܵܬ݂ ܠܹܗ ܠܡܸܬ݂ܥܲܒ݂ܪܵܢܘܼܬܹܗ. ܐܲܬܵܢܵܐ ܕܠܵܐ ܩܵܠܵܐ. ܕܲܒ݂ܩܵܠܵܐ ܕܲܒ݂ܢܲܝ̈ܢܵܫܵܐ ܡܲܠܠܲܬ݂ ܟܠܵܬ݂ ܠܫܵܛܝܘܼܬܹܗ ܕܲܢܒ݂ܝܼܵܐ. 17 ܗܵܠܹܝܢ ܐܸܢܘܿܢ ܡܥܝܼܢܹ̈ܐ ܕܠܵܐ ܡܲܝ̈ܵܐ. ܥܢܵܢܹ̈ܐ ܕܡܸܢ ܥܲܠܥܵܠܵܐ ܡܸܬ݂ܪ̈ܲܕ݂ܦܵܢ. ܗܵܠܹܝܢ ܕܥܲܡܛܵܢܵܐ ܕܚܸܫܘܿܟ݂ܵܐ ܢܛܝܼܪ ܠܗܘܿܢ. 18 ܟܲܕ݂ ܓܹܝܪ ܓܘܼܢܚܵܐ ܕܲܣܪܝܼܩܘܼܬ݂ܵܐ ܡܡܲܠܠܝܼܢ. ܡܫܲܕܠܝܼܢ ܒܲܪ̈ܓ݂ܝܼܓ݂ܵܬ݂ܵܐ ܛܲܢ̈ܦܵܬ݂ܵܐ ܕܒܸܣܪܵܐ. ܠܐܲܝܠܹܝܢ ܕܒܲܡܠܹܐ ܩܲܠܝܼܠ ܥܵܪܩܝܼܢ ܡܸܢ ܐܲܝܠܹܝܢ ܕܲܒ݂ܛܵܥܝܘܼܬ݂ܵܐ ܡܸܬ݂ܗܲܦܟ݂ܝܼܢ. 19 ܘܚܹܐܪܘܼܬ݂ܵܐ ܠܗܘܿܢ ܡܸܫܬܵܘܕܹܝܢ. ܟܲܕ݂ ܗܸܢܘܿܢ ܥܲܒ݂ܕܹ̈ܐ ܐܝܼܬܲܝܗܘܿܢ ܕܲܚܒ݂ܵܠܵܐ. ܠܗܵܘ ܓܹܝܪ ܡܸܕܸܡ ܕܐ̄ܢܵܫ ܙܟܸܐ ܠܹܗ (ܙܟܸܐ ܡܸܢܹܗ). ܠܗܵܢܵܐ ܐܵܦ ܡܫܲܥܒܲܕ݂. 20 ܐܸܢ ܓܹܝܪ ܟܲܕ݂ (ܐܸܢ ܓܹܝܪ) ܥܪܲܩܘ ܡܸܢ ܛܲܢ̈ܦܘܵܬܹܗ ܕܥܵܠܡܵܐ ܒܫܘܼܘܕܵܥܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܘܦܵܪܘܿܩܲܢ. ܒܗܹܝܢ ܒܗܵܠܹܝܢ ܟܲܕ݂ ܡܸܬ݂ܥܲܪܙܠܝܼܢ ܬܘܼܒ݂ ܡܸܙܕܟܹܝܢ. ܗܘܸܵܬ݂ ܠܵܗܿ ܚܲܪܬ݂ܗܘܿܢ. ܕܒ݂ܝܼܫܵܐ ܡܸܢ ܩܲܕ݂ܡܵܝܬܵܐ. 21 ܦܲܩܵܚ ܗ̄ܘܵܐ ܠܗܘܿܢ ܓܹܝܪ ܕܠܵܐ ܢܸܫܬܵܘܕܥܘܼܢ ܠܐܘܼܪܚܵܐ ܕܙܲܕܝܼܩܘܼܬ݂ܵܐ. ܐܵܘ ܕܟܲܕ݂ ܐܸܫܬܵܘܕܲܥܘ ܠܒ݂ܵܬ݂ܪܵܐ (ܠܒܸܣܬܪܵܐ) ܢܸܗܦܟ݂ܘܿܢ ܡܸܢ ܦܘܼܩܕܵܢܵܐ ܩܲܕܝܼܫܵܐ ܕܐܸܫܬܿܠܸܡ ܠܗܘܿܢ. 22 ܓܕ݂ܲܫ ܠܗܘܿܢ ܕܹܝܢ ܗܵܠܹܝܢ (ܓܕ݂ܲܫ ܠܗܘܿܢ ܕܹܝܢ) ܕܡܲܬ݂ܠܵܐ ܫܲܪܝܼܪܵܐ. ܕܟܲܠܒܵܐ (ܟܲܠܒܵܐ) ܕܗܵܦܹܟ݂ ܥܲܠ ܬܝܘܿܒܹܗ. ܘܲܚܙܝܼܪܬܵܐ (ܚܙܝܼܪܬܵܐ) ܕܲܣܚܵܬ̤ ܒܥܘܼܪܓܵܠܵܐ ܕܲܣܝܵܢܵܐ.

ܩܦܠܐܘܢ ܓ

1 ܗܵܕܹܐ ܡܸܢ ܟܲܕܘܼ ܚܲܒܝܼܒܲܝ̈. ܐܸܓܲܪܬܵܐ ܕܬܲܪܬܹܿܝܢ ܟܵܬܹܒ݂ ܐ̄ܢܵܐ ܠܟ݂ܘܿܢ. ܗܵܠܹܝܢ ܕܲܒ݂ܗܹܝܢ ܡܥܝܼܪ ܐ̄ܢܵܐ ܒܥܘܼܗܕܵܢܵܐ ܠܪܸܥܝܵܢܟ݂ܘܿܢ ܫܲܦܝܵܐ. 2 ܕܬܸܬܥܗܕ݂ܘܼܢ ܠܡܸܠܹ̈ܐ ܕܩܲܕܸܡ ܐܸܬ݂ܐܡܲܪ ܡܸܢ ܢܒ݂ܝܹ̈ܐ ܩܲܕܝܼܫܹ̈ܐ: ܘܲܠܦܘܼܩܕܵܢܹܗ ܕܡܵܪܲܢ ܘܦܵܪܘܿܩܲܢ ܕܲܒ݂ܝܲܕ݂ ܫܠܝܼܚܹ̈ܐ: 3 ܟܲܕ݂ ܗܵܕܹܐ ܠܘܼܩܕ݂ܲܡ ܝܵܕ݂ܥܝܼܢ ܐܢ̄ܬܘܿܢ. ܕܢܹܐܬ݂ܘܿܢ ܒܚܲܪܬ݂ܵܐ ܕܝܵܘ̈ܡܵܬ݂ܵܐ ܡܒܲܙܚܵܢܹ̈ܐ ܕܲܡܒܲܙܚܝܼܢ ܟܲܕ݂ ܐܲܝܟ݂ ܪ̈ܓ݂ܝܼܓ݂ܵܬ݂ܵܐ ܕܝܼܠܗܘܿܢ ܡܗܲܠܟ݂ܝܼܢ  4 ܘܐܵܡܪܝܼܢ. ܕܐܲܝܟܵܐ ܐܝܼܬ݂ܵܘܗܝ ܡܘܼܠܟܵܢܵܐ ܕܡܹܐܬ݂ܝܼܬܹܗ. ܡܸܢ ܟܲܕ݂ ܓܹܝܪ ܐܲܒ݂̈ܵܗܵܬܲܢ ܫܟܸܒ݂ܘ. ܟܠܡܸܕܸܡ ܗܵܟܲܢܵܐ ܡܟܲܬܲܪ. ܡܸܢ ܫܘܼܪܵܝܵܗܿ ܕܲܒ݂ܪܝܼܬ݂ܵܐ. 5 ܛܵܥܝܵܐ ܠܗܘܿܢ ܓܹܝܪ ܗܵܕܹܐ ܟܲܕ݂ ܨܵܒܹܝܢ. ܕܲܫܡܲܝܵܐ ܐܝܼܬܲܝܗܘܿܢ ܗ̄ܘܼܵܘ ܡܸܢ ܩܕ݂ܝܼܡ ܘܐܲܪܥܵܐ. ܡܸܢ ܡܲܝ̈ܵܐ ܘܲܒ݂ܝܲܕ݂ ܡܲܝ̈ܵܐ ܩܵܡܲܬ݂. ܒܡܸܠܬ݂ܵܐ ܕܐܲܠܵܗܵܐ. 6 ܗܵܠܹܝܢ ܕܒ݂ܐܝܼܕ݂ܲܝ̈ܗܘܿܢ ܥܵܠܡܵܐ ܕܗܵܝܕܹܝܢ ܛܵܦ̣ ܒܡܲܝ̈ܵܐ. ܘܐܸܒܲܕ݂. 7 ܫܡܲܝܵܐ ܕܹܝܢ ܕܗܵܫܵܐ ܘܐܲܪܥܵܐ ܒܡܸܠܬ݂ܵܐ ܕܝܼܠܹܗ ܐܲܣܝܼܢܝܼܢ ܟܲܕ݂ ܠܢܘܼܪܵܐ ܡܸܬ݂ܢܲܛܪܝܼܢ. ܠܝܵܘܡܵܐ ܕܕ݂ܝܼܢܵܐ ܘܕ݂ܲܐܒ݂ܕܵܢܵܐ ܕܲܒ݂ܢܲܝ̈ܢܵܫܵܐ ܪ̈ܲܫܝܼܥܹܐ. 8 ܗܵܕܹܐ ܕܹܝܢ ܚܕ݂ܵܐ ܠܵܐ ܬܸܛܥܹܝܟ݂ܘܿܢ ܚܲܒܝܼܒܲܝ̈. ܕܚܲܕ݂ ܝܵܘܡܵܐ ܠܡܵܪܝܵܐ ܐܲܝܟ݂ ܐܵܠܹܦ ܫܢ̈ܝܼܢ ܐܝܼܬ݂ܵܘܗܝ. ܘܐܵܠܹܦ ܫܢ̈ܝܼܢ. ܐܲܝܟ݂ ܝܵܘܡܵܐ ܚܲܕ݂. 9 ܠܵܐ ܡܸܫܬܵܘܚܲܪ ܡܵܪܝܵܐ ܒܡܘܼܠܟܵܢܵܘ̈ܗܝ ܐܲܝܟ݂ ܕܐ̄ܢܵܫ̈ܝܼܢ ܫܘܼܘܚܵܪܵܐ ܡܲܣܒܪܝܼܢ. ܐܸܠܵܐ ܡܲܓܲܪ ܪܘܼܚܹܗ ܡܛܠܵܬ݂ܟ݂ܘܿܢ. ܒܲܕ݂ܠܵܐ ܨܵܒܹܐ ܕܐ̄ܢܵܫ ܢܹܐܒܲܕ݂. ܐܸܠܵܐ ܟܠܢܵܫ ܠܲܬ݂ܝܵܒ݂ܘܼܬ݂ܵܐ ܢܹܐܬܹܐ. 10 ܐܵܬܹܐ ܕܹܝܢ ܝܵܘܡܹܗ ܕܡܵܪܝܵܐ ܐܲܝܟ݂ ܓܲܢܵܒ݂ܵܐ. ܗܵܘ ܕܒܹܗ ܫܡܲܝܵܐ ܡܸܢ ܫܹܠܝ ܥܵܒ݂ܪܝܼܢ. ܐܸܣܛܘܼܟ݂ܣܹ̈ܐ ܕܹܝܢ ܟܲܕ݂ ܝܵܩܕܝܼܢ ܢܸܫܬܿܪܘܿܢ. ܘܐܲܪܥܵܐ ܘܲܥܒ݂ܵܕܹ̈ܐ ܕܒ݂ܵܗܿ. ܬܸܫܬܿܟܲܚ (ܬܹܐܩܲܕ݂). 11 ܟܲܕ݂ ܗܵܟܹܝܠ ܗܵܠܹܝܢ ܟܠܗܘܿܢ ܡܸܫܬܪܹܝܢ (ܟܠܗܹܝܢ ܡܸܫܬܲܪ̈ܝܵܢ). ܕܐܲܝܟ݂ ܐܲܝܠܹܝܢ ܙܵܕܹܩ ܠܟ݂ܘܿܢ ܕܬܸܗܘܘܿܢ ܒܗܘܼܦܵܟܲܝ̈ܟܘܿܢ (ܒܗܘܼܦܵܟܹ̈ܐ) ܩܲܕܝܼܫܹ̈ܐ ܘܲܒ݂ܕܸܚܠܲܬ݂ ܐܲܠܵܗܵܐ. 12 ܟܲܕ݂ ܡܣܲܟܹܝܢ ܐ̄ܢܬܘܿܢ ܘܣܵܘܚܝܼܢ ܐ̄ܢܬܘܿܢ ܠܡܹܐܬ݂ܝܼܬ݂ܵܐ ܕܝܵܘܡܹܗ ܕܐܲܠܵܗܵܐ. ܗܵܘ ܕܒܹܗ ܫܡܲܝܵܐ ܟܲܕ݂ ܡܸܬ݂ܒܲܚܪܝܼܢ ܒܢܘܼܪܵܐ. ܢܸܫܬܿܪܘܿܢ. ܘܐܸܣܛܘܼܟ݂ܣܹ̈ܐ ܟܲܕ݂ ܝܵܩܕܝܼܢ. ܢܫܘܼܚܘܼܢ. 13 ܠܲܫܡܲܝܵܐ ܕܹܝܢ ܚܲܕ݂ܬܹ̈ܐ ܘܐܲܪܥܵܐ ܚܕ݂ܲܬ݂ܵܐ. ܐܲܝܟ݂ ܡܘܼܠܟܵܢܵܐ ܕܝܼܠܹܗ. ܡܣܲܟܹܝܢ ܚ̄ܢܲܢ. ܗܵܠܹܝܢ ܕܲܒ݂ܗܘܿܢ ܙܲܕܝܼܩܘܼܬ݂ܵܐ ܥܵܡܪܵܐ. 14 ܡܛܠ ܗܵܢܵܐ ܚܲܒܝܼܒܲܝ̈. ܟܲܕ݂ ܠܗܵܠܹܝܢ ܡܣܲܟܹܝܢ ܐܢ̄ܬܘܿܢ. ܝܼܨܲܦܘ ܕܲܕ݂ܠܵܐ ܟܘܼܬ݂ܡܵܐ ܘܲܕ݂ܠܵܐ ܡܘܼܡܵܐ. ܠܹܗ ܬܸܫܬܲܟ݂ܚܘܼܢ ܒܲܫܠܵܡܵܐ. 15 ܘܲܠܡܲܓ݁ܪܲܬ݂ ܪܘܼܚܹܗ ܕܡܵܪܝܵܐ (ܕܡܵܪܲܢ) ܦܘܼܪܩܵܢܵܐ ܬܸܚܫܒ݂ܘܼܢ. ܐܲܝܟܲܢܵܐ ܕܐܵܦ ܐܲܚܘܼܢ ܚܲܒܝܼܒ݂ܵܐ ܦܵܘܠܘܿܣ. ܐܲܝܟ݂ ܚܸܟ݂ܡܬ݂ܵܐ ܕܐܸܬ݂ܝܲܗܒܲܬ̤ ܠܹܗ. ܟܬܲܒ݂ ܠܟ݂ܘܿܢ. 16 ܐܲܝܟܲܢܵܐ ܕܲܒ݂ܟ݂ܠܗܹܝܢ ܐܸܓ݁ܪ̈ܵܬܹܗ ܡܲܠܸܠ ܒܗܹܝܢ ܥܲܠ ܗܵܠܹܝܢ. ܐܲܝܠܹܝܢ ܕܐܝܼܬ݂ ܒܗܹܝܢ ܡܸܕܸܡ ܕܲܥܣܝܼܩ ܠܣܘܼܟܵܠܵܐ. ܗܵܠܹܝܢ ܕܐܲܝܠܹܝܢ ܕܲܕ݂ܠܵܐ ܝܘܼܠܦܵܢܵܐ ܐܸܢܘܿܢ ܘܠܵܐ ܣܡܝܼܟ݂ܝܼܢ. ܡܥܲܩܡܝܼܢ ܠܗܹܝܢ. ܐܲܝܟ݂ ܕܐܵܦ ܠܗܵܠܹܝܢ ܟܬ݂ܵܒܹ̈ܐ ܕܫܲܪܟܵܐ. ܠܘܵܬ݂ ܐܲܒ݂ܕܵܢܵܐ ܕܝܼܠܗܘܿܢ (ܐܲܒ݂ܕܵܢܗܘܿܢ). 17 ܐܲܢ̄ܬܿܘܿܢ ܗܵܟܹܝܠ ܚܲܒܝܼܒܲܝ̈. ܟܲܕ݂ ܩܵܕ݂ܡܝܼܢ ܐ̄ܢܬܘܿܢ ܝܵܕ݂ܥܝܼܢ ܛܲܪܘ ܢܲܦ̮ܫܟ݂ܘܿܢ. ܕܕ݂ܲܠܡܵܐ ܟܲܕ݂ ܐܵܙܠ̄ܝܼܢ ܐ̄ܢܬܘܿܢ ܒܵܬܲܪ ܛܵܥܝܘܼܬ݂ܵܐ ܕܐܲܝܠܹܝܢ ܕܲܕ݂ܠܵܐ ܢܵܡܘܿܣ ܐܸܢܘܿܢ. ܬܸܦܠܘܼܢ ܡܸܢ ܣܵܡܟܵܐ ܕܝܼܠܟ݂ܘܿܢ (ܡܣܲܬ݁ܬ݂ܘܼܟ݂ܘܼܢ). 18 ܗܘܲܝܬܿܘܿܢ ܕܹܝܢ ܡܸܬ݂ܪܲܒܹܝܢ ܒܛܲܝܒܘܼܬ݂ܵܐ. ܘܒ݂ܝܼܕ݂ܲܥܬ݂ܵܐ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ ܘܕ݂ܲܐܠܵܗܵܐ ܐܲܒ݂ܵܐ. ܕܠܹܗ ܬܸܫܒܿܘܿܚܬܵܐ ܐܵܦ ܗܵܫܵܐ ܘܲܒܟ݂ܠܙܒܲܢ ܘܲܠܝܵܘܡܲܝ̈ (ܘܲܠܝܘܿܡ) ܥܵܠܡܵܐ. ܐܵܡܹܝܢ.