ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܩܕܡܝܬܐ ܕܦܘܠܘܣ ܫܠܝܚܐ ܕܠܘܬ ܥܒ݂ܪ̈ܝܐ

ܩܦܠܐܘܢ: ܐ

1 ܒܪܵܒܵܐ ܣܵܡܹ̈ܐ ܘܒܪܵܒܵܐ ܬܵܗܵܪܹ̈ܐ ܗܘܼܡܙܸܡܠܹܐ ܐܲܠܵܗܵܐ ܥܲܡ ܐܲܒ݂ܵـ̈ܗܵܬܲܢ ܒܢܒ݂̈ܝܼܹܐ ܡ̣ܢ ܩܵܕܝܼܡܝܼ: ܘܒܚܲܪܬܵܐ ܕܐܲܢܹܐ ܝܘܿܡܵܢܹ̈ܐ ܗܘܼܡܙܸܡܠܹܐ ܥܲܡܲܢ ܒܒܪܘܼܢܹܗ: 2 ܕܐܸܠܹܗ ܡܘܼܬܸܒ݂ܠܹܐ ܝܵܪܘܿܬܵܐ ܕܟܠ ܡܸܢܕܝܼ: ܕܒܝܼܹܗ ܒܪܹܠܹܐ ܠܥܵܠܡܗܹܐ: 3 ܗ̇ܘ ܕܝܼܠܹܐ ܫܲܦ̮ܩܵܐ ܕܚܸܩܪܹܗ: ܘܨܲܠܡܵܐ ܕܐܝܼܬܘܼܬܹܗ: ܘܕܵܒ݂ܩܵܢܵܐ ܕܟܠ ܒܚܲܝܠܵܐ ܕܗܹܡܸܙܡܵܢܹܗ: ܐܝܼܡܲܢ ܕܥܒܸܕܠܹܐ ܕܵܟ݂ܵܝܬܵܐ ܕܚܛܝܼܵܬܹ̈ܐ: ܝܬܸܒ݂ܠܹܐ ܥܲܠ ܝܲܡܝܼܢܵܐ ܕܓܘܼܪܘܼܬܵܐ ܒܡܵܪ̈ܘܡܹܐ: 4 ܟܲܕ ܗ݇ܘܹܠܹܐ ܚܵܕ݇ ܗܲܕܟ݂ܵܐ ܒܘܼܫ ܓܘܼܪܵܐ ܡ̣ܢ ܡܲܠܲܐܟܹ̈ܐ: ܐܲܝܟ݂ ܕܝܪܸܬܠܹܐ ܫܸܡܵܐ ܒܘܼܫ ܓܘܼܪܵܐ ܡܟܸܢܵܝ. 5 ܣܵܒܵܒ ܕܠܲܐܝܢܝܼ ܡ̣ܢ ܡܲܠܲܐܟ݂ܹ̈ܐ ܡ̣ܢ ܩܵܕ݇ܡܵܝܬܵܐ ܐܡܸܪܹܐ: ܒܪܘܼܢܝܼ ܝܘܸܬ: ܐܵܢܵܐ ܐܸܕܝܘܿ ܡܘܼܠܸܕܠܝܼ ܐܸܠܘܼܟ݂: ܘܡܸܕܪܹܐ: ܐܵܢܵܐ ܒܸܬ ܗܵܘܹܢ ܐܸܠܹܗ ܒܵܒܵܐ: ܘܗ̇ܘ ܒܸܬ ܗܵܘܹܐ ܐܸܠܝܼ ܒܪܘܼܢܵܐ:

6 ܘܡܸܕܪܹܐ: ܐܝܼܡܲܢ ܕܡܲܐܘܘܼܪܹܐ ܗ݇ܘܵܐ ܒܘܼܟ݂ܪܵܐ ܠܥܵܠܡܵܐ: ܐܡܸܪܹܐ: ܕܐܸܠܹܗ ܨܵܓ݂ܕܝܼ ܟܠܵܝ ܡܲܠܲܐܟ݂ܹ̈ܐ ܕܐܲܠܵܗܵܐ. 7 ܐܝܼܢܵܐ ܒܵܗ݇ܣ ܕܡܲܠܲܐܟ݂ܹ̈ܐ ܐܡܼܸܪܹܐ: ܕܟܹܐ ܥܵܒܸܕ ܡܲܠܲܐܟ݂ܘܼ̈ܗܝ ܪ̈ܘܼܚܵܬܹܐ: ܘܚܸܠܡܲܬܟܵܪ̈ܘܼܗܝ ܠܵܗܵܐ ܕܢܘܼܪܵܐ.

8 ܐܝܼܢܵܐ ܒܵܗ݇ܣ ܕܒܪܘܼܢܵܐ ܐܡܸܪܹܐ: ܬܪܘܿܢܘܿܣܘܼܟ݂ ܐܲܠܵܗܵܐ: ܠܥܵܠܲܡ ܥܵܠܡܝܼܢ: ܩܵܛܝܼܵܐ ܕܬܪܘܼܨܘܼܬܵܐ ܩܵܛܝܼܵܐ ܕܡܲܠܟܘܼܬܘܼܟ݂.

9 ܡܘܼܚܸܒܠܘܼܟ݂ ܙܲܕܝܼܩܘܼܬܵܐ ܘܣܢܹܠܘܼܟ݂ ܥܵܘܠܵܐ: ܣܵܒܵܒ ܕܐܵܗܵܐ ܡܫܝܼܚܸܬܠܹܐ ܐܲܠܵܗܵܐ: ܐܲܠܵܗܘܼܟ݂: ܒܡܸܫܚܵܐ ܕܚܲܕܘܼܬܵܐ ܙܵܘܕܵܐ ܡ̣ܢ ܚܲܒ݂ܪ̈ܵܘܵܬܘܼܟ݂.

10 ܐܘܼܦ: ܐܲܢ݇ܬ ܡ̣ܢ ܒܪܵܫܝܼܬ: ܡܵܪܝܵܐ: ܫܘܼܬܸܐܣܠܘܼܟ݂ ܐܲܪܥܵܐ: ܘܫܡܲܝܹ̈ܐ ܦܘܼܠܚܵܢܵܐ ܕܐܝܼܕܵܬܘܼ̈ܟ݂ ܝܼܢܵܐ.

11 ܐܵܢܝܼ ܒܸܬ ܚܵܪܒܝܼ: ܘܐܲܢ݇ܬ ܒܸܬ ܦܵܝܫܸܬ: ܘܟܠܵܝ ܐܲܝܟ݂ ܓ̰ܘܼܠܹ̈ܐ ܒܸܬ ܒܵܠܝܼ:

12 ܘܐܲܝܟ݂ ܠܒܸܫܬܵܐ ܒܸܬ ܛܵܥܦܸܬ ܠܗ݇ܘܿܢ: ܐܵܢܝܼ ܒܸܬ ܦܵܝܫܝܼ ܡܘܼܚܠܸܦܹܐ: ܘܐܲܢ݇ܬ ܗܲܪ ܐܲܝܟ݂ ܕܝܼܘܸܬ: ܘܫܸܢܘܼ̈ܟ݂ ܠܹܐ ܬܵܝܡܝܼ.

13 ܐܝܼܢܵܐ ܠܐܲܝܢܝܼ ܡ̣ܢ ܡܲܠܲܐܟ݂ܹ̈ܐ ܡ̣ܢ ܩܵܕ݇ܡܵܝܬܵܐ ܐܡܸܪܹܐ: ܝܬܘܿܒ݂ ܡ̣ܢ ܝܲܡܝܼܢܝܼ: ܗܲܠ ܕܡܲܬܒܸܢ ܕܫܸܡܸܢܘܼ̈ܟ ܟܘܼܒ݂ܫܵܐ ܬܚܘܿܬ ܐܲܩܠܘܼ̈ܟ݂:

14 ܟܠܵܝ ܠܹܐ ܝܢܵܐ ܪ̈ܘܼܚܵܬܹܐ ܕܚܸܠܡܲܬ: ܫܘܼܕܪܹܐ ܠܚܸܠܡܲܬ ܕܐܵܢܝܼ ܕܝܼܢܵܐ ܗܕܝܼܪܹܐ ܠܸܪܝܵܬܵܐ ܦܘܼܪܩܵܢܵܐ:

ܩܦܠܐܘܢ: ܒ

1 ܣܵܒܵܒ ܕܐܵܗܵܐ ܘܵܓ̰ܸܒ ܝܼܠܵܐ ܕܙܵܘܕܵܐ ܗܵܘܵܚ ܗܸܫܝܵܪ ܒܡܸܢܟ݂ܝܼܵܢܹ̈ܐ ܕܫܡܸܥܠܲܢ: ܕܠܵܐ ܪܵܚܩܵܚ (ܡܸܢܵܝ). 2 ܣܵܒܵܒ ܐܸܢ ܗܹܡܸܙܡܵܢ ܕܗܘܼܡܙܸܡܬܵܐ ܗ݇ܘܵܐ ܒܝܼܸܕ ܡܲܠܲܐܟ݂ܹ̈ܐ ܗ݇ܘܹܠܵܐ ܩܘܝܼܬܵܐ: ܘܟܠ ܥܒ݂ܵܪܬܵܐ (ܥܲܠܘܼܗ̇) ܘܠܵܐ ܡܲܨܝܲܬܬܵܐ ܩܘܼܒܸܠܵܐ ܦܪ̈ܲܥܝܵܐ ܒܗܵܩܘܼܬܵܐ: 3 ܕܐܵܟ݂ܝܼ ܐܲܚܢܲܢ ܒܸܬ ܥܵܪܩܵܚ: ܐܸܢ ܡܲܣܠܵܚ ܠܗܲܕܟ݂ܵܐ ܦܘܼܪܩܵܢܵܐ: ܐܲܝܢܝܼ ܕܫܘܼܪܹܠܹܐ ܒܝܼܸܕ ܡܵܪܲܢ ܠܸܦܝܵܫܵܐ ܗܘܼܡܙܸܡܵܐ: ܘܡ̣ܢ ܕܐܵܢܝܼ ܕܡܸܢܹܗ ܫܡܸܥܠܘܿܢ ܦܸܫܠܹܐ ܡܘܼܩܘܝܼܵܐ ܐܸܠܲܢ: 4 ܟܲܕ ܒܝܼܵܗ݇ܒ݂ܵܐ ܣܵܗܕܘܼܬܵܐ ܥܲܡܵܝ ܐܲܠܵܗܵܐ ܢܝܼܫܲܢܩܹ̈ܐ ܘܒܥܵܓ̰ܸܒܘ̈ܬܵܐ ܘܒܚܲܝ̈ܠܹܐ ܬܵܗܵܪܹ̈ܐ ܬܵܗܵܪܹ̈ܐ: ܘܒܚܲܠܥܲܬܹ̈ܐ ܕܪܘܼܚܵܐ ܕܩܘܼܕܫܵܐ: ܐܲܝܟ݂ ܪܸܙܵܝܵܐ ܕܓܵܢܹܗ.

5 ܣܵܒܵܒ ܠܵܐ ܠܡܲܠܲܐܟ݂ܹ̈ܐ ܙܘܼܒܛܸܢܹܐ ܥܵܠܡܵܐ ܕܐܵܬܹܐ: ܕܒܵܗ݇ܣܹܗ ܗܲܡܙܘܼܡܹܐ ܝܘܵܚ. 6 ܐܸܠܵܐ ܚܵܕ݇ ܨܗܸܕܠܹܐ ܒܚܕܵܐ ܕܘܼܟܵܐ ܒܹܐܡܵܪܵܐ: ܡܘܼܕܝܼ ܝܠܵܐ ܐ݇ܢܵܫܵܐ ܕܕܵܟ݂ܪܸܬ ܠܹܗ: ܘܒܲܪܢܵܫܵܐ: ܕܣܲܚܒܸܪܸܬ ܠܹܗ:

7 ܡܘܼܟܸܦܠܘܼܟ݂ ܐܸܠܹܗ ܚܲܟ̰ܵܐ ܡ̣ܢ ܡܲܠܲܐܟ݂ܹ̈ܐ: ܒܬܸܫܒܘܿܚܬܵܐ ܘܐܝܼܩܵܪܵܐ ܒܘܼܢܦܸܪܘܼܟ݂ ܐܸܠܹܗ: ܘܡܘܼܬܸܒ݂ܠܘܼܟ݂ ܐܸܠܹܗ ܥܲܠ ܦܘܼܠܚܵܢܵܐ ܕܐܝܼܕܘܼ̈ܟ݂: 8 ܘܟܠ ܡܸܢܕܝܼ ܙܘܼܒܛܸܢܘܼܟ݂ ܬܚܘܿܬ ܐܲܩܠܘܼ̈ܗܝ.

ܣܵܒܵܒ ܒܗ̇ܝ ܕܟܠ ܡܸܢܕܝܼ ܙܘܼܒܛܸܢܹܐ ܐܸܠܹܗ: ܠܵܐ ܫܒܸܩܠܹܐ ܡܸܢܕܝܼ ܕܠܹܐ ܝܠܹܐ ܙܘܼܒܛܸܢܵܐ. ܐܝܼܢܵܐ ܐܵܕܝܼܵܐ ܗܹܫ ܠܹܐ ܝܘܵܚ ܒܸܚܙܵܝܵܐ ܟܠ ܡܸܢܕܝܼ ܙܘܼܒܛܸܢܵܐ ܐܸܠܹܗ. 9 ܐܝܼܢܵܐ ܗ̇ܘ ܕܦܸܫܠܹܐ ܡܘܼܟܸܦܵܐ ܚܲܟ̰ܵܐ ܡ̣ܢ ܡܲܠܲܐܟ݂ܹ̈ܐ ܒܸܚܙܵܝܘܼܗܝ ܝܘܵܚ: ܕܝܼܠܹܐ ܝܼܫܘܿܥ: ܣܵܒܵܒ ܕܚܲܫܵܐ ܕܡܵܘܬܹܗ: ܒܘܼܢܦܸܪܵܐ ܒܬܸܫܒܘܿܚܬܵܐ ܘܐܝܼܩܵܪܵܐ: ܕܒܫܵܦܵܩܲܬܹܗ ܕܐܵܠܵܗܵܐ ܡܒܵܕܵܠ ܕܟܠ ܐ݇ܢܵܫܵܐ ܛܵܥܸܡ ܡܵܘܬܵܐ. 10 ܣܵܒܵܒ ܕܚܫܝܼܚܬܵܐ ܗ݇ܘܵܐ ܠܗ̇ܘ ܕܟܠ ܐܸܠܹܗ ܘܟܠ ܒܝܼܹܗ: ܟܲܕ ܪܵܒܵܐ ܒܢܘܼܢܹ̈ܐ ܡܘܼܐܘܸܪܹܐ ܠܬܸܫܒܘܿܚܬܵܐ: ܕܠܪܹܫܵܐ ܕܦܘܼܪܩܵܢܵܝ ܒܝܼܸܕ ܚܲܫܹ̈ܐ ܡܲܟܡܸܠ ܗ݇ܘܵܐ ܠܹܗ. 11 ܣܵܒܵܒ ܗ̇ܘ ܕܩܵܕܘܿܫܹܐ ܝܠܹܐ: ܘܐܵܢܝܼ ܕܦܝܵܫܵܐ ܝܢܵܐ ܩܘܼܕܫܹܐ: ܡ̣ܢ ܚܵܕ݇ ܝܼܢܵܐ ܟܠܵܝ. ܣܵܒܵܒ ܕܐܵܗܵܐ ܠܵܐ ܢܚܸܦܠܹܐ ܕܩܵܪܹܐ ܗ݇ܘܵܐ ܠܗ݇ܘܿܢ: ܐܵܚܘܿܢܘܵܬܘܼ̈ܗܝ: 12 ܟܲܕ ܐܵܡܸܪ: ܒܸܬ ܗܵܩܸܢ ܫܸܡܘܼܟ݂ ܠܐܵܚܘܿܢܘܵܬܝܼ̈: ܒܓܵܘܵܗ̇ ܕܥܹܕܬܵܐ ܒܸܬ ܫܵܒܚܸܢܘܼܟ݂.

13 ܘܡܸܕܪܹܐ: ܐܵܢܵܐ ܒܸܬ ܕܵܪܸܢ ܗܹܒ݂ܝܼ ܥܲܠܘܼܗܝ. ܡܸܕܪܹܐ: ܗܵܐ: ܐܵܢܵܐ ܘܒܢܘܿܢܹ̈ܐ ܫܲܪܘܼܟܹܐ ܝܢܵܐ ܒܒܸܣܪܵܐ ܘܕܸܡܵܐ: ܐܘܼܦ ܗ̇ܘ ܒܗ̇ܝ ܕܡܘܼܬܵܐ ܫܘܼܪܸܟܠܹܐ ܗܲܪ ܒܐܲܢܹܐ: ܕܒܡܵܘܬܹܗ ܒܵܛܸܠ ܗ݇ܘܵܐ ܠܗ̇ܘ ܕܐܝܼܬ ܠܹܗ ܗܘܼܟܡܵܐ ܕܡܵܘܬܵܐ: ܕܝܼܠܹܐ ܐܵܟܹܠܩܲܪܨܵܐ: 15 ܘܫܵܪܹܐ ܗ݇ܘܵܐ ܠܐܵܢܝܼ ܕܒܙܕܘܼܥܬܵܐ ܕܡܵܘܬܵܐ ܒܟܠܵܝ ܚܵܝܵܝ̈ ܙܘܼܒܛܸܢܹܐ ܗ݇ܘܵܘ ܠܪܹܓܘܼܬܵܐ. 16 ܣܵܒܵܒ ܒܬܪܘܼܨܬܵܐ ܠܵܐ ܠܡܲܠܲܐܟ݂ܹ̈ܐ ܕܒܸܩܠܹܐ: ܐܸܠܵܐ ܡ̣ܢ ܙܲܪܥܹܗ ܕܐܲܒ݂ܪܵܗܵܐܡ ܕܒܸܩܠܹܐ. 17 ܣܵܒܵܒ ܕܐܵܗܵܐ ܚܫܝܼܚܬܵܐ ܗ݇ܘܵܐ ܕܒܟܠ ܡܸܢܕܝܼ ܦܵܝܸܫ ܗ݇ܘܵܐ ܡܘܼܕܡܝܼܵܐ ܠܐܵܚܘܿܢܘܵܬܘܼ̈ܗܝ: ܕܗܵܘܹܐ ܗ݇ܘܵܐ ܓܘܼܪܵܐ ܕܟܵܗܢܹ̈ܐ ܡܪܲܚܡܵܢܵܐ ܘܡܗܘܼܡܢܵܐ ܒܡܸܢܕܝܼܵܢܹ̈ܐ ܕܠܟܸܣ ܐܲܠܵܗܵܐ: ܕܥܵܒܸܕ ܚܘܼܣܵܝܵܐ ܥܲܠ ܚܛܝܼܵܬܹ̈ܐ ܕܛܵܝܸܦܵܐ. 18 ܣܵܒܵܒ ܒܗ̇ܝ ܕܗ̇ܘ ܩܘܼܒܸܠܹܐ ܚܲܫܵܐ ܘܦܸܫܠܹܐ ܓ̰ܘܼܪܒܵܐ: ܟܹܐ ܡܵܨܹܐ ܕܗܲܝܸܪ ܠܐܵܢܝܼ ܕܦܵܝܫܝܼ ܓ̰ܘܼܪܒܹܐ.

ܩܦܠܐܘܢ: ܓ

1 ܡܐܵܕܝܼܵܐ: ܐܵ̇ܘܿܢܘܵܬܝܼ̈ ܩܲܕܝܼܫܹ̈ܐ: ܕܫܘܼܪܸܟܠܵܘܟ݂ܘܿܢ ܒܩܪܵܝܵܐ ܕܡ̣ܢ ܫܡܲܝܵܐ: ܚܙܹܡܘܿܢ ܠܐܵܗܵܐ ܫܠܝܼܚܵܐ ܘܓܘܼܪܵܐ ܕܟܵܗܢܹ̈ܐ ܕܬܵܘܕܝܼܬܲܢ: ܝܼܫܘܿܥ ܡܫܝܼܚܵܐ: 2 ܕܡܗܘܼܡܢܵܐ ܗ݇ܘܵܐ ܠܗ̇ܘ ܕܡܘܼܬܸܒ݂ܠܹܗ: ܐܲܝܟ݂ ܕܐܘܼܦ ܡܘܼܫܹܐ ܒܟܠܹܗ ܒܲܝܬܹܗ. 3 ܣܵܒܵܒ ܗ̇ܘ ܦܝܼܫܵܐ ܝܠܹܐ ܡܘܼܚܫܸܚܵܐ ܠܚܸܩܪܵܐ ܙܵܘܕܵܐ ܡ̣ܢ ܕܡܘܼܫܹܐ: ܕܐܵܟ݂ܝܼ ܕܒܘܼܫ ܪܵܒܵܐ ܝܠܹܐ ܐܝܼܩܵܪܵܐ ܕܒܵܢܝܵܢܹܗ ܕܒܲܝܬܵܐ ܡ̣ܢ ܒܸܢܝܵܢܹܗ. 4 ܣܵܒܵܒ ܟܠ ܒܲܝܬܵܐ ܡ̣ܢ ܚܵܕ݇ ܐ݇ܢܵܫܵܐ ܟܹܐ ܦܵܝܸܫ ܒܸܢܝܵܐ: ܐܝܼܢܵܐ ܗ̇ܘ ܕܒܵܢܹܐ ܟܠ: ܐܲܠܵܗܵܐ ܝܠܹܐ. 5 ܘܡܘܼܫܹܐ ܐܲܝܟ݂ ܪܹܓܵܐ ܡܗܘܼܡܢܵܐ ܗ݇ܘܹܠܹܐ ܒܟܠܹܗ ܒܲܝܬܹܗ: ܠܣܵܗܕܘܼܬܵܐ ܕܐܵܢܝܼ ܡܸܢܕܝܼܵܢܹ̈ܐ ܕܝܼܗ݇ܘܵܘ ܗܕܝܼܪܹܐ ܠܸܦܝܵܫܵܐ ܗܘܼܡܙܸܡܹܐ: 6 ܐܝܼܢܵܐ ܡܫܝܼܚܵܐ ܐܲܝܟ݂ ܒܪܘܿܢܵܐ ܥܲܠ ܒܲܝܬܹܗ: ܘܒܲܝܬܹܗ ܐܲܚܢܲܢ ܝܼܘܵܚ: ܐܸܢ ܗܲܠ ܚܲܪܬܵܐ ܕܵܒ݂ܩܵܚ ܩܘܼܝܵܐ ܚܘܵܪܦܵܬܘܼܬܵܐ ܘܫܘܼܒ݂ܗܵܪܵܐ ܕܗܹܒ݂ܝܼܹܗ. 7 ܣܵܒܵܒ ܕܐܵܟ݂ܝܼ ܕܐ݇ܡܸܪܹܐ ܪܘܼܚܵܐ ܕܩܘܼܕܫܵܐ: ܕܐܸܕܝܘܿ ܝܘܿܡܵܐ ܐܸܢ ܒܩܵܠܹܗ ܫܲܡܥܝܼܬܘܿܢ:

8 ܠܵܐ ܡܲܩܫܝܼܬܘܿܢ ܠܸܒܵܬܵܘ̈ܟ݂ܘܿܢ ܐܲܝܟ݂ ܒܡܲܟܪܲܒ݁ܬܹܗ: ܐܲܝܟ݂ ܒܝܘܿܡܵܐ ܕܓ̰ܘܼܪܵܒܵܐ ܕܓܵܘ ܒܲܪܝܼܵܐ:

9 ܐܲܝܟܵܐ ܕܓ̰ܘܼܪܒܸܢܘܿܢ ܒܵܒܵܘܵܬܵܘ̈ܟ݂ܘܿܢ: ܘܨܘܼܚܨܝܼܸܢܘܿܢ: ܘܚܙܹܠܘܿܢ ܦܘܼܠܚܵܢܝܼ̈ ܐܲܒܥܝܼ ܫܸܢܹ̈ܐ.

10 ܣܵܒܵܒ ܕܐܵܗܵܐ ܣܩܸܕܠܝܼ ܒܗ̇ܘ ܕܵܘܪܵܐ: ܘܐܡܸܪܝܼ: ܕܵܝܸܢ ܟܹܐ ܓܵܠܸܛ ܠܸܒܵܝ: ܘܐܵܢܝܼ ܠܵܐ ܝܕܸܥܠܘܿܢ ܐܘܼܪ̈ܚܵܬܝܼ:

11 ܕܐܵܟ݂ܝܼ ܕܝܡܹܠܝܼ ܒܟܲܪܒܝܼ: ܠܹܐ ܐܵܘܕܝܼ ܠܢܝܵܚܬܝܼ.

12 ܗ݇ܘܹܡܘܿܢ ܗܸܫܝܵܪ: ܐܵܚܘܿܢܘܵܬܝܼ̈: ܠܵܐ ܗ݇ܘܹܐ ܕܗܵܘܹܐ ܓܵܘ ܐ݇ܢܵܫܵܐ ܡܸܢܵܘܟ݂ܘܿܢ ܠܸܒܵܐ ܕܠܵܐ ܗܲܝܡܵܢܘܼܬܵܐ: ܘܪܵܚܩܝܼܬܘܿܢ ܡ̣ܢ ܐܲܠܵܗܵܐ ܚܲܝܵܐ. 13 ܐܸܠܵܐ. ܦܲܪܦܸܠܘܿܢ ܚܵܕ݇ ܒܗ̇ܘ ܐ݇ܚܹܪ݇ܢܵܐ ܟܠܵܝ ܝܘܿܡܵܢܹ̈ܐ: ܟܡܵܐ ܕܝܘܿܡܵܐ ܦܵܝܸܫ ܩܸܪܝܵܐ ܐܸܕܝܼܘ: ܕܠܵܐ ܐ݇ܢܵܫܵܐ ܡܸܢܵܘܟ݂ܘܿܢ ܦܵܝܸܫ ܡܘܼܩܫܝܼܵܐ ܒܚܸܠܛܘܼܢܝܘܼܬܵܐ ܕܚܛܝܼܬܵܐ. 14 ܣܵܒܵܒ ܗ݇ܘܹܠܲܢ ܫܵܪ̈ܝܼܟܹܐ ܕܡܫܝܼܚܵܐ: ܐܸܢ ܕܵܒ݂ܩܵܚ ܩܘܼܝܵܐ ܫܘܼܪܵܝܵܐ ܕܚܵܬܸܪܓ̰ܡܥܘܼܬܲܢ ܗܲܠ ܚܲܪܬܵܐ: 15 ܕܐܵܟ݂ܝܼ ܕܝܼܠܹܐ ܐ݇ܡܝܼܪܵܐ: ܐܸܕܝܘܿ ܐܸܢ ܒܪܵܩܵܠܹܗ ܫܲܡܥܝܼܬܘܿܢ: ܠܵܐ ܡܲܩܫܝܼܬܘܿܢ ܠܸܒܵܘܵܬܵܘ̈ܟ݂ܘܿܢ ܐܲܝܟ݂ ܕܒܡܲܟܪܲܒ݁ܬܵܐ.

16 ܣܵܒܵܒ ܡܵܢܝܼ ܟܲܕ ܫܡܸܥܠܘܿܢ ܡܘܼܟܪܸܒ݁ܠܘܿܢ ܐܸܠܹܗ: ܠܹܐ ܗ݇ܘܵܘ ܟܠܵܝ ܐܵܢܝܼ ܕܦܠܸܛܠܘܿܢ ܡ̣ܢ ܡܸܨܪܹܝܢ ܒܝܼܸܕ ܡܘܼܫܹܐ: 17 ܘܒܲܐܝܢܝܼ ܣܩܸܕܠܹܐ ܐܲܪܒ݁ܝܼ ܫܸܢܹ̈ܐ: ܠܹܐ ܗ݇ܘܵܐ ܒܐܵܢܝܼ ܕܚܛܹܠܘܿܢ: ܘܓܲܪ̈ܡܵܝ ܢܦܸܠܘܿܢ ܓܵܘ ܒܲܪܝܼܵܐ: 18 ܘܥܲܠ ܐܲܝܢܝܼ ܝܡܹܠܹܐ ܕܠܹܐ ܐܵܘܪܝܼ ܗ݇ܘܵܘ ܠܢܝܵܚܬܹܗ: ܐܸܠܵܐ ܥܲܠ ܐܵܢܝܼ ܕܠܵܐ ܡܘܼܨܝܸܬܠܘܿܢ: 19 ܘܒܸܙܵܝܵܐ ܝܘܵܚ ܕܠܵܐ ܡܹܨܠܘܿܢ ܠܹܐܘܵܪܵܐ: ܣܵܒܵܒ ܕܠܵܐ ܗܘܼܡܸܢܘܿܢ.

ܩܦܠܐܘܢ: ܕ

1 ܒܲܣ ܙܵܕܥܵܚ: ܠܵܐ ܗܘܹܐ ܕܟܲܕ ܦܝܵܫܵܐ ܝܠܹܐ ܩܵܘܠܵܐ ܕܐܘܵܪܬܵܐ ܠܢܝܵܚܬܹܗ: ܦܵܝܸܫ ܚܸܙܝܵܐ ܐ݇ܢܵܫܵܐ ܡܸܢܵܘܟ݂ܘܿܢ ܕܦܵܝܸܫ ܡ̣ܢ ܠܐܹܘܵܪܵܐ. 2 ܣܵܒܵܒ ܐܘܼܦ ܐܲܚܢܲܢ ܦܸܫܠܲܢ ܡܘܼܫܚܸܕܹܐ ܐܲܝܟ݂ ܕܐܘܼܦ ܐܵܢܝܼ: ܐܸܠܵܐ ܠܵܐ ܥܒܸܕܠܵܐ ܦܲܝܕܵܐ ܐܸܠܵܝ ܗܹܡܸܙܡܵܢ ܕܫܡܸܥܠܘܿܢ: ܣܵܒܵܒ ܠܹܐ ܗ݇ܘܵܐ ܡܙܝܼܓ݂ܬܵܐ ܒܗܲܝܡܵܢܘܼܬܵܐ ܒܐܵܢܝܼ ܕܫܸܡܥܝܵܠܘܿܢ. 3 ܣܵܒܵܒ ܒܹܐܘܵܪܵܐ ܝܼܵܘܚ ܠܗ̇ܝ ܢܝܵܚܬܵܐ: ܐܲܚܢܲܢ ܐܵܢܝܼ ܕܗܘܼܡܸܢܲܢ: ܕܵܐܟ݂ܝܼ ܕܐܡܸܪܹܐ: ܐܲܝܟ݂ ܕܝܡܹܠܝܼ ܒܟܲܪܒܝܼ: ܐܸܢ ܐܵܘܪܝܼ ܠܢܝܵܚܬܝܼ: ܐܵܦܸܢ ܕܦܘܼܠܚܵܢܘܼ̈ܗܝ ܡ̣ܢ ܫܲܬܸܐܣܬܵܐ ܕܥܵܠܡܵܐ ܦܸܫܠܘܿܢ ܥܒ݂ܝܼܕܹܐ. 4 ܣܵܒܵܒ ܕܒܚܵܕ݇ ܕܘܼܟܵܐ ܐܡܸܪܹܐ ܗܲܕܟ݂ܵܐ ܥܲܠ ܫܲܒܬܵܐ: ܕܢܸܚܠܹܐ ܐܲܠܵܗܵܐ ܒܝܘܿܡܵܐ ܕܫܲܒ݂ܥܵܐ ܡ̤ܢ ܟܠܵܝ ܦܘܼܠܚܵܢܘܼ̈ܗܝ: 5 ܘܠܲܐܟ݂ܵܐ ܡܸܕܪܹܐ: ܐܸܢ ܐܵܘܪܝܼ ܠܢܝܵܚܬܝܼ.

6 ܒܲܣ ܣܵܒܵܒ ܕܦܝܵܫܵܐ ܝܠܵܐ ܕܚܲܟܡܵܐ ܐ݇ܢܵܫܹ̈ܐ ܐܵܘܪܝܼ ܓܵܘܵܗ̇: ܘܐܵܢܝܼ ܕܦܸܫܠܘܿܢ ܡܘܼܫܚܸܕܹܐ ܩܵܕ݇ܡܵܝܬܵܐ ܠܵܐ ܐܘܸܪܘܿܢ ܣܵܒܵܒ ܕܠܵܐ ܡܘܼܨܝܸܬܠܘܿܢ: 7 ܡܸܕܪܹܐ ܝܘܿܡܵܐ ܐܚܹܪ݇ܢܵܐ ܡܲܬܘܼܒ݂ܹ̈ܐ ܝܠܹܐ: ܟܲܕ ܒܹܐܡܵܪܵܐ ܝܠܹܐ ܒܕܵܘܝܼܕ: ܐܸܕܝܘܿ: ܡܒܵܬ݇ܪ ܚܵܕ݇ ܗܲܕܟ݂ܵܐ ܙܲܒ݂ܢܵܐ: ܐܲܝܟ݂ ܕܐܡܝܼܪܵܐ ܝܠܹܐ ܒܩܵܕ݇ܡܵܝܬܵܐ: ܐܸܕܝܘܿ ܐܸܢ ܒܩܵܠܹܗ ܫܲܡܥܝܼܬܘܿܢ: ܠܵܐ ܡܲܩܫܝܼܬܘܿܢ ܠܸܒܵܘܵܬܵܘ̈ܟ݂ܘܿܢ.

8 ܣܵܒܵܒ ܐܸܢ ܝܼܫܘܿܥ ܡܘܼܢܝܸܚܵܝ ܗ݇ܘܵܐ: ܠܹܐ ܐܵܡܸܪ ܗ݇ܘܵܐ ܒܵܬ݇ܪ ܗܵܕܵܐ ܒܵܗ݇ܣ ܕܝܘܿܡܵܐ ܐܚܹܪ݇ܢܵܐ. 9 ܒܲܣ ܦܝܵܫܵܐ ܝܠܵܐ ܢܝܵܚܬܵܐ ܕܫܲܒܲܬ ܠܛܵܝܸܦܹܗ ܕܐܲܠܵܗܵܐ. 10 ܣܵܒܵܒ ܗ̇ܘ ܕܐܘܸܪܹܐ ܠܢܝܵܚܬܹܗ ܢܸܚܠܹܐ ܐܘܼܦ ܗ̇ܘ ܡ̣ܢ ܦܘܼܠܚܵܢܘܼ̈ܗܝ: ܐܲܝܟ݂ ܕܐܲܠܵܗܵܐ ܡ̣ܢ ܕܝܼܹܗ. 11 ܒܲܣ ܚܵܒ݁ܛܵܚ ܕܐܵܘܪܵܚ ܠܗ̇ܝ ܢܝܵܚܬܵܐ: ܕܐ݇ܢܵܫܵܐ ܠܵܐ ܢܵܦܸܠ ܗܲܪ ܒܗ̇ܝ ܕܡܘܼܬܵܐ ܕܠܵܐ ܡܲܨܝܲܬܬܵܐ. 12 ܣܵܒܵܒ ܚܵܝܬܵܐ ܝܠܵܐ ܗܹܡܸܙܡܵܢ ܕܐܲܠܵܗܵܐ: ܘܦܵܠܚܵܢܬܵܐ: ܘܚܵܪܝܼܦܬܵܐ ܝܠܵܐ ܡ̣ܢ ܟܠ ܣܲܝܦܵܐ ܕܬܪ̈ܲܝ ܦܘܼܡܵܢܹ̈ܐ: ܘܟܹܐ ܐܵܘܪܵܐ ܗܲܠ ܦܪܵܫܬܵܐ ܕܓܵܢܵܐ ܘܕܪܘܼܚܵܐ: ܕܓܲܝܹ̈ܐ ܘܕܡܘܼܚܵܐ: ܘܟܹܐ ܕܵܝܢܵܐ ܚܘܼܫܵܒܹ̈ܐ ܘܚܝܼܵܠܹ̈ܐ ܕܠܸܒܵܐ. 13 ܘܠܲܝܬ ܒܪܝܼܬܵܐ ܕܛܵܫܝܵܐ ܡ̣ܢ ܩܵܕ݇ܡܘܼܗܝ: ܐܸܠܵܐ ܟܠ ܡܸܢܕܝܼ ܫܘܼܠܚܵܝܵܐ ܝܠܹܐ ܘܓܸܠܝܵܐ ܩܵܕ݇ܡ ܥܲܝܢܘܼ̈ܗܝ: ܕܐܸܠܹܗ ܒܝܼܵܗ݇ܒ݂ܵܐ ܝܘܵܚ ܓ̰ܘܼܘܵܒ.

14 ܒܲܣ ܣܵܒܵܒ ܕܐܝܼܬ ܠܲܢ ܓܘܼܪܵܐ ܕܟܵܗܢܹ̈ܐ ܓܘܼܪܵܐ: ܝܼܫܘܿܥ ܒܪܘܼܢܹܗ ܕܐܲܠܵܗܵܐ: ܕܥܒ݂ܝܼܪܵܐ ܝܠܹܐ ܠܫܡܲܝܵܐ: ܚܵܡܠܵܚ ܒܡܵܘܕܵܝܬܲܢ. 15 ܣܵܒܵܒ ܠܲܝܬ ܠܲܢ ܓܘܼܪܵܐ ܕܟܵܗܢܹ̈ܐ ܕܠܹܐ ܡܵܨܹܐ ܕܫܵܪܸܟ ܒܚܲܫܵܐ ܥܲܡ ܙܲܒܘܼܢܘܼܬܲܢ: ܐܸܠܵܐ ܕܓ̰ܘܼܪܒܵܐ ܗ݇ܘܵܐ ܒܟܠ ܡܸܢܕܝܼ ܐܲܝܟ݂ ܕܝܼܲܢ: ܕܠܵܐ ܚܛܝܼܬܵܐ. 16 ܒܲܣ ܐܵܬܵܚ ܩܘܼܪܒܵܐ ܒܚܘܵܪܦܵܬܘܼܬܵܐ ܠܟܘܼܪܣܝܵܐ ܕܫܵܦܵܩܲܬܹܗ: ܕܩܵܒ݁ܠܵܚ ܪ̈ܚܡܹܐ: ܘܡܵܫ̄ܟ̰ܚܵܚ ܫܵܦܵܩܲܬ ܠܗܝܼܵܪܝܼ ܒܙܲܒ݂ܢܵܐ ܠܵܙܸܡ.

ܩܦܠܐܘܢ: ܗ

1 ܣܵܒܵܒ ܟܠ ܓܘܼܪܵܐ ܕܟܵܗܢܹ̈ܐ ܕܡ̣ܢ ܒܲܢܝ̈ܢܵܫܵܐ ܦܵܝܸܫ ܫܩܝܼܠܵܐ: ܡ̣ܢ ܓܹܒܵܐ ܕܒܢܲܝ̈ܢܵܫܵܐ ܟܹܐ ܦܵܝܸܫ ܡܘܼܬܒ݂ܵܐ ܥܲܠ ܕܐܵܢܝܼ ܫܘܼܠܹ̈ܐ ܕܝܼܢܵܐ ܕܐܲܠܵܗܵܐ: ܕܡܲܩܪܸܒ݂ ܩܘܼܪ̈ܒܵܢܹܐ ܘܕܸܒ݂ܚܹ̈ܐ ܡܒܵܕܵܠ ܕܚܛܝܼܵܬܹ̈ܐ: 2 ܗ̇ܘ ܕܟܹܐ ܡܵܨܹܐ ܗܵܘܹܐ ܡܪ̈ܲܚܡܵܢܵܐ ܥܲܠ ܕܐܵܢܝܼ ܕܠܹܐ ܝܲܕܥܝܼ ܘܚܵܠܛܝܼ: ܣܵܒܵܒ ܐܘܼܦ ܗ̇ܘ ܒܙܲܒܘܼܢܘܼܬܵܐ ܟܪܝܼܟ݂ܵܐ ܝܠܹܐ. 3 ܘܣܵܒܵܒ ܕܗ̇ܝ ܘܵܓ̰ܸܒ ܝܼܠܵܐ: ܐܲܝܟ݂ ܡ̣ܢ ܓܹܒܵܐ ܕܛܵܝܸܦܵܐ: ܗܲܕܟ݂ܵܐ ܐܘܼܦ ܡ̣ܢ ܓܹܒܵܐ ܕܓܵܢܹܗ: ܕܡܲܩܪܸܒ݂ ܡܒܵܕܵܠ ܚܛܝܼܵܬܘܼ̈ܗܝ. 4 ܘܠܹܐ ܝܠܵܐ ܕܠܓܵܢܹܗ ܐ݇ܢܵܫܵܐ ܟܹܐ ܫܵܩܸܠ ܐܝܼܩܵܪܵܐ: ܐܸܠܵܐ ܗ̇ܘ ܕܦܵܝܸܫ ܩܸܪܝܵܐ ܡ̣ܢ ܐܲܠܵܗܵܐ: ܕܐܵܟ݂ܝܼ ܕܝܼܗ݇ܘܵܐ ܐܲܗܪܘܿܢ. 5 ܗܲܕܟ݂ܵܐ ܐܘܼܦ ܡܫܝܼܚܵܐ ܓܵܢܹܗ ܠܵܐ ܚܩܸܪܹܐ ܕܗܵܘܹܐ ܗ݇ܘܵܐ ܓܘܼܪܵܐ ܕܟܵܗܢܹ̈ܐ: ܐܸܠܵܐ ܗ̇ܘ ܕܐܡܸܪܹܐ ܐܸܠܹܗ: ܒܪܘܼܢܝܼ ܝܘܸܬ: ܐܵܢܵܐ ܐܸܕܝܘܿ ܡܘܼܠܸܕܠܝܼ ܐܸܠܘܼܟ݂:

6 ܐܲܝܟ݂ ܕܐܘܼܦ ܒܕܘܼܟܬܵܐ ܐܚܹܪ݇ܬܵܐ ܐܡܸܪܹܐ: ܐܲܢ݇ܬ ܝܼܘܸܬ ܟܵܗܢܵܐ ܠܐܵܒܵܕ: ܒܪܹܐܙܵܐ ܕܡܲܠܟܝܼܙܕܸܩ.

7 ܗ̇ܘ ܕܒܝܘܿܡܵܢܹ̈ܐ ܕܒܸܣܪܹܗ ܦܲܪܦܲܠܬܵܐ ܘܢܵܘܢܵܝܬܵܐ ܒܡܲܩܘܲܚܬܵܐ ܚܲܝܠܵܢܬܵܐ ܘܒܕܸܡܥܹ̈ܐ ܡܘܼܩܪܸܒ݂ܠܹܐ ܠܗ̇ܘ ܕܡܵܨܹܐ ܗ݇ܘܵܐ ܡ̣ܢ ܡܵܘܬܵܐ ܦܵܪܸܩ ܗ݇ܘܵܐ ܠܹܗ: ܘܦܸܫܠܹܐ ܫܸܡܥܝܵܐ: ܒܗ̇ܝ ܕܙܕܸܥܠܹܐ ܡ̣ܢ ܐܲܠܵܗܵܐ: 8 ܘܐܵܦܸܢ ܒܪܘܼܢܵܐ ܗ݇ܘܵܐ: ܡ̣ܢ ܚܲܫܹ̈ܐ ܕܩܘܼܒܸܠܹܐ ܝܠܸܦܠܹܐ ܠܡܲܨܝܲܬܬܵܐ. 9 ܘܟܲܕ ܦܸܫܠܹܐ ܡܘܼܟܡܸܠܵܐ: ܗ݇ܘܹܠܹܐ ܣܵܒܵܒ ܕܦܘܼܪܩܵܢܵܐ ܕܠܥܵܠܲܡ ܠܟܠܵܝ ܐܵܢܝܼ ܕܡܲܨܝܸܬܝܼ ܐܸܠܹܗ: 10 ܘܦܸܫܠܹܐ ܡܫܘܼܡܗܵܐ ܡ̣ܢ ܐܲܠܵܗܵܐ: ܓܘܼܪܵܐ ܕܟܵܗܢܹ̈ܐ ܒܪܹܐܙܵܐ ܕܡܲܠܟܝܼܙܕܸܩ.

11 ܕܒܵܗ݇ܣ ܕܝܼܹܗ ܪܵܒܵܐ ܗܹܡܸܙܡܵܢ ܐܝܼܬ ܠܹܐܡܵܪܵܐ: ܘܥܲܣܩܵܐ ܠܦܵܫܘܿܩܹܐ: ܣܵܒܵܒ ܕܗ݇ܘܹܠܵܘܟ݂ܘܿܢ ܝܵܩܘܿܪܹ̈ܐ ܒܫܡܵܥܝܬܵܘܟ݂ܘܿܢ. 12 ܣܵܒܵܒ ܟܲܕ ܘܵܓ̰ܸܒ ܝܼܗ݇ܘܵܐ ܐܸܠܵܘܟ݂ܘܿܢ ܠܸܗܘܵܝܵܐ ܡܲܠܦܵܢܹ̈ܐ ܡܣܵܒܵܒ ܕܙܲܒ݂ܢܵܐ: ܡܸܕܪܹܐ ܣܢܝܼܩܹܐ ܝܬܘܿܢ ܕܐ݇ܢܵܫܵܐ ܡܵܠܸܦ ܠܵܘܟ݂ܘܿܢ ܡܘܼܕܝܼ ܝܢܵܐ ܐܸܣܛܘܼܟ݂ܣܹ̈ܐ ܕܪܹܫܵܐ ܕܗܹܡܸܙܡܵܢܹ̈ܐ ܕܐܲܠܵܗܵܐ: ܘܗ݇ܘܹܠܵܘܟ݂ܘܿܢ ܐܲܝܟ݂ ܣܢܝܼܩܹܐ ܥܲܠ ܚܲܠܒ݂ܵܐ: ܘܠܵܐ ܥܲܠ ܡܹܐܟ݂ܘܼܠܬܵܐ ܩܘܼܝܼܬܵܐ. 13 ܣܵܒܵܒ ܟܠ ܐ݇ܢܵܫܵܐ ܕܡܹܐܟ݂ܘܼܠܬܹܗ ܚܲܠܒ݂ܵܐ ܝܠܹܐ: ܠܹܐ ܝܠܹܐ ܒܵܠܵܕ ܒܗܹܡܸܙܡܵܢ ܕܙܲܕܝܼܩܘܼܬܵܐ: ܣܵܒܵܒ ܝܵܠܵܐ ܙܥܘܿܪܵܐ ܝܠܹܐ. 14 ܐܝܼܢܵܐ ܡܹܐܟ݂ܘܼܠܬܵܐ ܩܘܝܼܬܵܐ ܕܟܵܡܝܼ̈ܠܹܐ ܝܠܵܐ: ܐܵܢܝܼ ܕܒܝܼܸܕ ܡܲܦܠܲܚܬܵܐ ܪܹ̈ܓ݂ܫܵܝ ܬܘܼܥܠܡܹܐ ܝܢܵܐ ܠܸܦܪܵܫܵܐ ܛܵܒ݂ܬܵܐ ܘܒܝܼܫܬܵܐ.

ܩܦܠܐܘܢ: ܘ

1 ܣܵܒܵܒ ܕܐܵܗܵܐ ܫܵܒ݂ܩܵܚ ܗܹܡܸܙܡܵܢ ܕܫܘܼܪܵܝܵܐ ܕܡܫܝܼܚܵܐ: ܘܐܵܬܵܚ ܠܟܵܡܝܼܠܘܼܬܵܐ: ܟܲܕ ܠܵܐ ܡܸܕܪܹܐ ܫܲܬܸܐܣܬܵܐ ܐܚܹܪ݇ܬܵܐ ܕܵܪܚ ܠܬܝܵܒ݂ܘܼܬܵܐ ܡ̣ܢ ܦܘܼܠܚܵܢܹ̈ܐ ܡܝܼܬܹ̈ܐ: ܘܠܗܲܝܡܵܢܘܼܬܵܐ ܕܒܲܐܠܵܗܵܐ: 2 ܘܠܝܘܼܠܦܵܢܵܐ ܕܡܲܥܡܘܿܕܝܼܬܵܐ: ܘܠܡܲܬܲܒ݂ܬܵܐ ܕܐܝܼܕܵܐ: ܘܠܩܝܵܡܬܵܐ ܕܡ̣ܢ ܡܝܼܬܹ̈ܐ: ܘܠܕܝܼܘܵܢ ܕܠܥܵܠܲܡ. 3 ܐܸܢ ܐܲܠܵܗܵܐ ܝܵܗ݇ܒܸܠ ܕܲܣܬܘܼܪ: ܐܵܗܑܵ ܒܸܬ ܥܵܒ݂ܕܵܚ. 4 ܣܵܒܵܒ ܐܵܢܝܼ ܕܚܕܵܐ ܓܵܗܵܐ ܦܸܫܠܘܿܢ ܒܘܼܗ݇ܪܸܢܹܐ: ܘܛܥܸܡܠܘܿܢ ܚܲܠܲܥܬ ܕܡ̣ܢ ܫܡܲܝܵܐ: ܘܗ݇ܘܹܠܵܐ ܠܗ݇ܘܿܢܫܵܪܝܼܟܘܼܬܵܐ ܡ̣ܢ ܪܘܼܚܵܐ ܕܩܘܼܕܫܵܐ: 5 ܘܛܥܸܡܠܘܿܢ ܗܹܡܸܙܡܵܢ ܛܵܒ݂ܬܵܐ ܕܐܲܠܵܗܵܐ: ܘܚܲܝ̈ܠܹܐ ܕܥܵܠܡܵܐ ܕܐܵܬܹ̈ܐ: 6 ܘܢܵܦܠܝܼ: ܠܹܐ ܡܵܨܝܵܐ ܕܡܸܢ݇ܕܪܸܫ ܠܚܲܕܘܼܬܵܝ ܠܬܝܵܒ݂ܘܼܬܵܐ: ܟܲܕ ܘܵܩܦܝܼ ܡܸܢ݇ܕܸܫ ܠܒܪܘܼܢܹܗ ܕܐܲܠܵܗܵܐ ܠܓܵܢܵܝ ܘܥܵܒ݂ܕܝܼ ܠܹܗ ܒܹܨܘܼܪ. 7 ܣܵܒܵܒ ܐܲܪܥܵܐ ܕܫܵܬܝܵܐ ܡܸܛܪܵܐ ܕܐܵܬܝܵܐ ܥܲܠܘܼܗ̇ ܪܵܒܵܐ ܓܵܗܹ̈ܐ: ܘܡܲܓ̰ܝܸܢܵܐ ܝܸܩܢܵܐ ܕܚܵܫܸܚ ܠܐܵܢܝܼ ܕܒܚܵܬܤܪܵܝ ܦܝܵܫܵܐ ܝܠܵܐ ܦܠܝܼܚܬܵܐ: ܟܹܐ ܩܵܒ݁ܠܵܐ ܒܘܼܪܟܬܵܐ ܡ̣ܢ ܐܲܠܵܗܵܐ: 8 ܐܝܼܢܵܐ ܐܸܢ ܦܵܠܛܵܐ ܩܝܼܘܵܪܹ̈ܐ ܘܟܸܬܘܹ̈ܐ: ܟܹܐ ܦܵܝܫܵܐ ܡܘܼܣܠܝܼܬܵܐ: ܘܠܵܐ ܪܸܚܩܵܐ ܡ̣ܢ ܠܵܘܛܬܵܐ ܝܠܵܐ: ܕܚܲܪܬܘܼܗ̇ ܝܩܝܵܕܵܐ ܝܠܵܐ.

9 ܐܝܼܢܵܐ ܗܲܪ ܗܘܼܡܸܢܹܐ ܝܘܵܚ ܒܵܗ݇ܣ ܕܝܼܵܘܟ݂ܘܿܢ: ܡܘܼܚܸܒܝܼ̈: ܐܵܢܝܼ ܡܸܢܕܝܼܵܢܹ̈ܐ ܕܒܘܼܫ ܫܵܦܝܼܪܹ̈ܐ: ܘܕܐܝܼܬ ܠܗ݇ܘܿܢ ܩܘܼܪܒܘܼܬܵܐ ܠܦܘܼܪܩܵܢܵܐ: ܐܵܦܸܢ ܗܲܕܟ݂ܵܐ ܗܲܡܙܘܼܡܹܐ ܝܘܵܚ. 10 ܣܵܒܵܒ ܠܹܐ ܝܠܹܐ ܢܵܐܗܲܩ ܐܲܠܵܗܵܐ ܕܢܵܫܹܐ ܦܘܼܠܚܵܢܘܟ݂ܘܿܢ ܗ̇ܘ ܕܡܘܼܚܙܹܠܵܘܟ݂ܘܿܢ ܒܫܸܡܹܗ: ܕܥܒܸܕܠܵܘܟ݂ܘܿܢ ܚܸܠܡܲܬ ܠܩܲܕܝܼܫܹ̈ܐ: ܘܒܸܥܒ݂ܵܕܵܐ ܝܬܘܿܢ ܚܸܠܡܲܬ. 11 ܐܝܼܢܵܐ ܒܸܒܲܥܝܵܐ ܝܘܵܚ ܕܟܠ ܐ݇ܢܵܫܐ ܡܸܢܵܘܟ݂ܘܿܢ ܗܲܪ ܐܵܗܵܐ ܚܵܒܵܛܘܼܬܵܐ ܡܲܚܙܹܐ ܠܬܲܡܵܡܵܬܘܼܬܵܐ ܕܗܹܒ݂ܝܼ ܗܲܠ ܚܲܪܬܵܐ: 12 ܕܠܵܐ ܗܵܘܝܬܘܿܢ ܡܲܟܣܸܠܵܢܹ̈ܐ: ܐܸܠܵܐ ܕܗܵܘܝܼܬܘܿܢ ܕܵܡܝܵܢܹ̈ܐ ܠܐܵܢܝܼ ܕܒܗܲܝܡܵܢܘܼܬܵܐ ܘܒܡܲܪܝܲܟ݂ܬܵܐ ܕܒܹܢܵܐ ܗ݇ܘܹܠܘܿܢ ܝܵܪ̈ܬܵܢܹܐ ܕܩܵܘܠܵܐ.

13 ܣܵܒܵܒ ܐܝܼܡܲܢ ܕܩܘܼܘܸܠܹܐ ܐܲܠܵܗܵܐ ܠܐܲܒ݂ܪܵܗܵܡ: ܟܲܕ ܠܲܝܬ ܗ݇ܘܵܐ ܠܹܐ ܕܒܘܼܫ ܓܘܼܪܵܐ ܡܸܢܹܗ ܕܝܵܡܹܐ ܗ݇ܘܵܐ ܒܝܼܹܗ: ܝܡܹܠܹܐ ܒܓܵܢܹܗ: 14 ܘܐܡܸܪܹܐ: ܒܵܪܘܿܟܹܐ ܒܸܬ ܒܵܪܟܸܢܘܼܟ݂: ܘܡܲܙܝܘܼܕܹܐ ܒܸܬ ܡܲܙܝܸܕܸܢܘܼܟ݂. 15 ܘܗܲܕܟ݂ܵܐ ܟܲܕ ܡܘܼܪܝܸܟ݂ܠܹܐ ܒܹܢܹܗ: ܩܘܼܒܸܠܹܐ ܩܵܘܠܵܐ. 16 ܣܵܒܵܒ ܒܢܲܝ̈ܢܵܫܵܐ ܒܗ̇ܘ ܕܒܘܼܫ ܓܘܼܪܵܐ ܡܸܢܵܝ ܟܹܐ ܝܵܡܝܼ: ܘܒܟܠ ܡܲܩܲܪܵܨܘܼܬܵܐ ܕܓܵܘܵܝ ܦܪܵܩܬܵܐ ܩܘܝܼܬܵܐ ܒܡܵܘ̈ܡܵܬܵܐ ܟܹܐܗܵܘܝܵܐ. 17 ܒܐܵܗܵܐ: ܟܲܕ ܒܣܸܡܠܵܐ ܠܹܗ ܐܲܠܵܗܵܐ ܕܡܲܚܙܹܐ ܒܘܼܫ ܙܵܘܕܵܐ ܠܝܵܪ̈ܬܵܢܹܐ ܕܩܵܘܠܵܐ ܕܪܸܙܵܝܹܗ ܠܹܐ ܦܵܝܸܫ ܫܘܼܚܠܸܦܵܐ: ܚܒܸܫܠܹܗ ܒܡܵܘ̈ܡܵܬܵܐ: 18 ܕܒܬܪ̈ܲܝ ܡܸܢܕܝܵܢܹ̈ܐ ܕܠܹܐ ܦܵܝܫܝܼ ܫܘܼܚܠܸܦܹܐ: ܕܠܹܐ ܡܵܨܹܐ ܐܲܠܵܗܵܐ ܕܕܵܓܸܠ ܒܝܼܵܝ: ܝܵܗ݇ܒܲܠܬܵܐ ܕܠܸܒܵܐ ܚܲܝܠܵܢܬܵܐ ܗܵܘܝܵܐ ܠܲܢ ܐܲܚܢܲܢ ܕܡܚܸܠܲܢ ܚܵܨܵܐ ܒܝܼܹܗ ܕܕܵܒ݂ܩܵܚ ܗܹܒ݂ܝܼ ܕܡܘܼܬܸܒ݂ܬܵܐ ܩܵܕ݇ܡܲܢ: 19 ܗ̇ܝ ܕܐܝܼܬ ܠܲܢ ܐܲܝܟ݂ ܠܲܢܓܵܪ ܕܓܵܢܹܐ: ܕܠܵܐ ܫܵܥܫܵܐ ܘܩܘܝܼܬܵܐ: ܘܟܹܐ ܐܵܘܪܵܐ ܠܓܵܘܵܝܝܼ ܡ̣ܢ ܣܸܬܪܵܐ: 20 ܐܲܝܟܵܐ ܕܐܲܝܟ݂ ܪܵܚܛܵܢܵܐ ܩܵܕ݇ܡܵܝܬܵܐ ܝܼܫܘܿܥ ܐܘܸܪܹܐ ܡܒܵܕܵܠܲܢ: ܘܗ݇ܘܹܠܹܐ ܓܘܼܪܵܐ ܕܟܵܗܢܹ̈ܐ ܕܠܥܵܠܲܡ: ܒܪܹܐܙܵܐ ܕܡܲܠܟܝܼܙܕܸܩ.

ܩܦܠܐܘܢ: ܙ

1 ܣܵܒܵܒ ܐܵܗܵܐ ܡܲܠܟܝܼܙܕܸܩ ܡܲܠܟܵܐ ܕܫܵܠܝܼܡ: ܟܵܗܢܵܐ ܕܐܲܠܵܗܵܐ ܪܵܡܵܐ: ܕܬܦܸܩܠܹܐ ܒܐܲܒ݂ܪܵܗܵܡ ܟܲܕ ܕܸܪܹܐ ܡ̣ܢ ܬܒ݂ܵܪܵܐ ܕܡܲܠܟܹ̈ܐ: ܘܒܘܼܪܸܟ݂ܠܹܗ: 2 ܘܐܸܠܹܗ ܦܪܸܫܠܹܐ ܐܲܒ݂ܪܵܗܵܡ ܡܲܥܣܵܪܹ̈ܐ ܡ̣ܢ ܟܠ ܡܸܢܕܝܼ: ـ ܟܲܕ ܩܵܕ݇ܡܵܝܬܵܐ ܦܝܵܫܵܐ ܝܠܹܐ ܦܘܼܫܩܵܐ ܗ̇ܘ: ܡܲܠܟܵܐ ܕܙܲܕܝܼܩܘܼܬܵܐ: ܘܡܸܕܪܹܐ ܡܲܠܟܵܐ ܕܫܵܠܝܼܡ: ܕܝܼܠܹܐ ܡܲܠܟܵܐ ܕܫܠܵܡܵܐ. 3 ܕܠܵܐ ܒܵܒܵܐ: ܕܠܵܐ ܝܸܡܵܐ: ܕܠܵܐ ܐܘܼܓ̰ܵܓ݂: ܘܠܲܝܬ ܠܹܗ ܪܹܫܵܐ ܕܝܘܿܡܵܢܘܼ̈ܗܝ: ܘܠܵܐ ܬܝܵܡܵܐ ܕܚܲܝܘܼ̈ܗܝ: ܐܸܠܵܐ ܒܕܡܘܼܬܵܐ ܕܒܪܘܼܢܹܗ ܕܐܲܠܵܗܵܐـ: ܦܝܵܫܵܐ ܝܠܹܐ ܟܵܗܢܵܐ ܠܥܵܠܲܡ. 4 ܐܝܼܢܵܐ ܚܙܹܡܘܿܢ ܟܡܵܐ ܓܘܼܪܵܐ ܝܠܹܐ ܐܵܗܵܐ: ܕܐܸܠܹܗ ܐܲܒ݂ܪܵܗܵܡ ܦܵܛܲܪܝܲܪܟܵܐ ܝܸܗܒ݂ܠܹܐ ܡܲܥܣܵܪܹ̈ܐ ܡ̣ܢ ܪܹ̈ܫܵܝܹܐ (ܕܣܠܵܒܵܐ). 5 ܘܐܵܢܝܼ ܡ̣ܢ ܒܢܘܼܢܹ̈ܐ ܕܠܹܘܝܼ: ܕܩܘܼܒܠܹܐ ܗ݇ܘܵܘ ܟܵܗܢܘܼܬܵܐ: ܐܝܼܬ ܠܗ݇ܘܿܢ ܦܘܼܩܕܵܢܵܐ ܕܢܵܡܘܿܣܵܐ: ܕܫܵܩܠܝܼ ܡܲܥܣܵܪܹ̈ܐ ܡ̣ܢ ܛܵܝܸܦܵܐ: ܝܲܥܢܹܐ: ܡ̣ܢ ܐܵܚܘܿܢܘܵܬܵܝ̈: ܟܲܕ ܐܘܼܦ ܐܵܢܝܼ ܡ̣ܢ ܚܵܨܹܗ ܕܐܲܒ݂ܪܵܗܵܡ ܦܠܝܼܛܹܐ ܗ݇ܘܵܘ. 6 ܐܝܼܢܵܐ ܐܵܗܵܐ ܕܠܹܐ ܝܠܹܐ ܚܘܼܫܒܸܢܵܐ ܒܐܘܼܓ̰ܵܓ݂ܵܝ̈: ܡܲܥܣܵܪܹ̈ܐ ܫܩܸܠܹܐ ܡ̣ܢ ܐܲܒ݂ܪܵܗܵܡ: ܘܒܘܼܪܸܟ݂ܠܹܐ ܠܗ̇ܘ ܕܩܘܼܒܸܠܹܐ ܩܵܘܠܵܐ. 7 ܐܝܼܢܵܐ ܕܠܵܐ ܡܲܩܲܪܵܨܘܼܬܵܐ: ܗ̇ܘ ܕܝܼܠܹܐ ܒܵܨܘܿܪܵܐ ܟܹܐ ܦܵܝܸܫ ܒܘܼܪܟ݂ܵܐ ܡܗ̇ܘ ܕܓܘܼܪܵܐ ܝܠܹܐ ܡܸܢܹܗ. 8 ܘܠܲܐܟ݂ܵܐ ܒܢܲܝ̈ܢܵܫܵܐ ܕܡܵܝܬܝܼ ܟܹܐ ܩܵܒ݁ܠܝܼ ܡܲܥܣܵܪܹ̈ܐ: ܐܝܼܢܵܐ ܬܵܡܵܐ ܗ̇ܘ ܕܦܸܫܠܵܐ ܣܗܝܼܕܬܵܐ ܒܵܗ݇ܣܹܗ ܕܚܵܝܵܐ ܝܠܹܐ. 9 ܘܐܲܝܟ݂ ܕܐ݇ܢܵܫܵܐ ܐܵܡܸܪ: ܒܝܼܸܕ ܐܲܒ݂ܪܵܗܵܡ ܐܘܼܦܠܹܘܝܼ: ܗ̇ܘ ܕܟܹܐ ܩܵܒܸ݁ܠ ܗ݇ܘܵܐ ܡܲܥܣܵܪܹ̈ܐ: ܐܘܼܦ ܗ̇ܘ ܝܸܗܒܸܠܹܐ ܡܲܥܣܵܪܹ̈ܐ. 10 ܣܵܒܵܒ ܗܹܫ ܒܚܵܨܹܗ ܕܒܵܒܹܗ ܗ݇ܘܵܐ: ܟܲܕ ܬܦܸܩܠܹܐ ܒܝܼܹܗ ܡܲܠܟܝܼܙܕܸܩ.

11 ܐܸܢ ܗܲܕܟ݂ܵܐ ܟܵܡܝܼܠܘܼܬܵܐ ܗܵܘܝܵܐ ܗ݇ܘܵܐ ܒܝܼܸܕ ܟܵܗܢܘܼܬܵܐ ܕܠܹܘܵܝܹ̈ܐ: ܣܵܒܵܒ ܒܝܼܵܗ̇ ܡܘܼܬܒ݂ܵܐ ܝܠܹܐ ܢܵܡܘܿܣܵܐ ܠܛܵܝܸܦܵܐ: ܩܵܡܘܿܕܝܼ ܠܵܙܸܡ ܝܼܗ݇ܘܵܐ ܟܵܗܢܵܐ ܐܚܹܪ݇ܢܵܐ ܕܩܵܝܸܡ ܗ݇ܘܵܐ ܒܪܹܐܙܵܐ ܕܡܲܠܟܝܼܙܕܸܩ: ܘܠܵܐ ܦܵܝܸܫ ܒܪܹܐܙܵܐ ܕܐܲܗܪܘܿܢ: 12 ܣܵܒܵܒ ܟܲܕ ܗ݇ܘܹܠܵܐ ܫܲܚܠܲܦܬܵܐ ܒܟܵܗܢܘܼܬܵܐ: ܡ̣ܢ ܐܲܢܲܢܩܹܐ ܗ݇ܘܹܠܵܐ ܫܲܚܠܲܦܬܵܐ ܐܘܼܦ ܒܢܵܡܘܿܣܵܐ. 13 ܣܵܒܵܒ ܗ̇ܘ ܕܦܸܫܠܘܿܢ ܐܡܝܼܪܹܐ ܒܵܗ݇ܣܹܗ ܐܲܢܹܐ: ܡ̣ܢ ܐܘܼܓ̰ܵܓ݂ ܐܚܹܪ݇ܬܵܐ ܦܸܫܠܹܐ ܫܘܼܪܸܟܵܐ: ܕܟ̰ܘܼ ܐ݇ܢܵܐ ܡܸܢܵܗ̇ ܠܵܐ ܥܒܸܕܠܹܐ ܚܸܠܡܲܬ ܒܡܲܕܒܚܵܐ. 14 ܣܵܒܵܒ ܡܲܥܠܘܼܡ ܝܼܠܵܐ ܕܡ̣ܢ ܝܼܗܘܼܕܵܐ ܙܪܸܩܹܐ ܡܵܪܲܢ: ܡ̣ܢ ܐܘܼܓ̰ܵܓ݂ ܕܠܵܐ ܐܡܸܪܹܐ ܥܲܠܘܼܗ̇ ܡܘܼܫܹܐ ܡܸܢܕܝܼ ܒܵܗ݇ܣ ܕܟܵܗܢܘܼܬܵܐ. 15 ܘܒܘܼܫ ܙܵܘܕܵܐ ܡܲܥܠܘܼܡ ܝܼܠܵܐ: ܐܸܢ ܒܕܡܘܼܬܵܐ ܕܡܲܠܟܝܼܙܕܸܩ ܩܵܝܸܡ ܟܵܗܢܵܐ ܐܚܹܪ݇ܢܵܐ: 16 ܕܠܵܐ ܗ݇ܘܹܠܹܐ ܒܢܵܡܘܿܣܵܐ ܕܦܘܼܩܕܵܢܹ̈ܐ ܦܲܓ݂ܪ̈ܵܢܵܝܹܐ: ܐܸܠܵܐ ܒܚܲܝܹ̈ܐ ܠܵܐ ܒܵܛܠܵܢܹ̈ܐ. 17 ܣܵܒܵܒ ܦܝܵܫܵܐ ܝܠܹܐ ܣܗܝܼܕܵܐ ܒܵܗ݇ܣܹܗ. ܐܲܢ݇ܬ ܝܼܘܸܬ ܟܵܗܢܵܐ ܠܥܵܠܲܡ: ܒܪܹܐܙܵܐ ܕܡܲܠܟܝܼܙܕܸܩ.

18 ܣܵܒܵܒ ܕܒܸܗ݇ܘܵܝܵܐ ܝܠܵܐ ܒܵܛܲܠܬܵܐ ܕܦܘܼܩܕܵܢܵܐ ܕܝܼܗ݇ܘܵܐ ܦܵܕ݇ܡܵܝܵܐ: ܒܘܼܬ ܙܲܒܘܼܢܘܼܬܹܗ ܘܠܵܐ ܦܲܝܕܵܐ: 19 ـ ܣܵܒܵܒ ܢܵܡܘܿܣܵܐ ܡܸܢܕܝܼ ܠܵܐ ܡܘܼܟܡܸܠܹܐ ـ: ܘܐܘܵܪܬܵܐ ܕܬܹܒ݂ܝܼ ܕܒܘܼܫ ܨܦܵܝܝܼ ܡܸܢܵܗ̇: ܕܒܝܼܵܗ̇ ܦܝܵܫܵܐ ܝܘܵܚ ܡܘܼܬ݇ܝܹܐ ܩܘܼܪܒܵܐ ܠܐܲܠܵܗܵܐ: 20 ܘܟܲܕ ܠܵܐ (ܗ݇ܘܹܠܹܐ) ܒܹܐ ܡܵܘܡܵܬܹ̈ܐ: 21 ܣܵܒܵܒ ܐܵܢܝܼ ܒܬܪܘܼܨܬܵܐ ܕܠܵܐ ܡܵܘܡܵܬܹ̈ܐ ܗ݇ܘܹܠܘܿܢ ܟܵܗܢܹ̈ܐ: ܐܝܼܢܵܐ ܐܵܗܵܐ ܒܡܵܘܡܵܬܹ̈ܐ ܒܝܼܸܕ ܕܗ̇ܘ ܕܐܡܸܪܹܐ ܐܸܠܹܗ: ܝܡܹܠܹܐ ܡܵܪܝܵܐ ܘܠܹܐ ܦܵܫܸܡ: ܐܲܢ݇ܬ ܝܼܘܸܬ ܟܵܗܢܵܐ ܠܥܵܠܲܡ:

22 ܗܲܪ ܒܗܲܕܟ݂ܵܐ ܟܠܹܗ ܒܘܼܫ ܨܦܵܝܝܼ ܝܠܵܐ ܕܝܵܬܹܩܹܐ ܗ̇ܝ ܕܗ݇ܘܹܠܹܐ ܒܝܼܵܗ̇ ܙܵܡܝܼܢ ܝܼܫܘܿܥ. 23 ܘܐܵܢܝܼ ܒܬܪܘܼܨܬܵܐ ܗ݇ܘܹܠܘܿܢ ܟܵܗܢܹ̈ܐ ܪܵܒܐ: ܣܵܒܵܒ ܕܒܝܼܸܕ ܡܵܘܬܵܐ ܠܹܐ ܗ݇ܘܵܘ ܦܝܵܫܵܐ ܫܒ݂ܝܼܩܹܐ ܕܥܲܪܩܸܠܝܼ: 24 ܐܝܼܢܵܐ ܐܵܗܵܐ: ܣܵܒܵܒ ܕܟܹܐ ܦܵܝܸܫ ܠܥܵܠܲܡ: ܐܝܼܬ ܠܹܗ ܟܵܗܢܘܼܬܵܐ ܠܵܐ ܥܵܒ݂ܪܵܢܬܵܐ. 25 ܣܵܒܵܒ ܕܐܵܗܵܐ ܟܹܐ ܡܵܨܹܐ ܠܡܲܚܘܼܝܹܐ ܠܥܵܠܲܡ ܠܐܵܢܝܼ ܕܩܲܪܒܸܢܝܼ ܒܐܝܼܕܹܗ ܠܐܲܠܵܗܵܐ: ܣܵܒܵܒ ܒܸܚܵܝܵܐ ܝܠܹܐ ܒܟܠ ܙܲܒ݂ܢܵܐ ܕܡܵܐܣܸܩ ܨܠܵܘܵܬܹ̈ܐ ܡܒܵܕܵܠܵܝ.

26 ܣܵܒܵܒ ܐܲܝܟ݂ ܕܐܵܗܵܐ ܓܘܼܪܵܐ ܕܟܵܗܢܹ̈ܐ ܚܵܫܸܚ ܗ݇ܘܵܐ ܐܸܠܲܢ: ܕܸܟ݂ܝܵܐ: ܕܠܵܐ ܒܝܼܫܘܼܬܵܐ: ܕܠܵܐ ܡܘܼܡܵܐ: ܦܪܝܼܫܵܐ ܡ̣ܢ ܚܲܛܵܝܹ̈ܐ: ܘܡܘܼܪܡܵܐ ܠܥܸܠܸܠ ܡ̣ܢ ܫܡܲܝܵܐ: 27 ܘܠܲܝܬ ܠܹܗ ܣܢܝܼܩܘܼܬܵܐ ܟܠ ܝܘܿܡܵܐ: ܐܲܝܟ݂ ܕܐܵܢܝܼ ܓܘܼܪ̈ܵܢܹܐ ܕܟܵܗܢܹ̈ܐ: ܕܩܵܕ݇ܡܵܝܬܵܐ ܡܒܵܕܵܠ ܕܚܛܝܼܵܬܹ̈ܐ ܕܓܵܢܹܗ ܡܲܩܪܸܒ݂ ܕܸܒ݂ܚܹ̈ܐ: ܘܗ̇ܝܓܵܗ ܡܒܵܕܵܠ ܕܛܵܝܸܦܵܐ. ܣܵܒܵܒ ܕܐܵܗܵܐ ܥܒ݂ܝܼܕܵܠܹܐ ܚܕܵܐ ܓܵܗܵܐ: ܟܲܕ ܡܘܼܩܪܸܒ݂ܠܹܐ ܓܵܢܹܗ. 28 ܣܵܒܵܒ ܕܢܵܡܘܿܣܵܐ ܟܹܐ ܡܲܩܸܡ ܓܘܼܪ̈ܵܢܹܐ ܕܟܵܗܢܹ̈ܐ ܒܢܲܝ̈ܢܵܫܵܐ ܙܲܒܘܼܢܹ̈ܐ: ܐܝܼܢܵܐ ܗܹܡܸܙܡܵܢ ܕܡܵܘ̈ܡܵܬܵܐ: ܕܗ݇ܘܹܠܵܐ ܡܒܵܬ݇ܪ ܢܵܡܘܿܣܵܐ: (ܟܹܐ ܡܲܩܸܡܵܐ) ܒܪܘܼܢܵܐ: ܟܵܡܝܼܠ ܠܥܵܠܲܡ.

ܩܦܠܐܘܢ: ܚ

1 ܐܝܼܢܵܐ ܪܹܫ ܟܠܵܝ ܡܸܢܕܝܼܵܢܹ̈ܐ ܕܐܡܝܼܪܹܐ ܝܘܵܚ (ܐܵܗܵܐ ܝܠܵܐ): ܐܝܼܬ ܠܲܢ ܚܵܕ݇ ܗܲܕܟ݂ܵܐ ܓܘܼܪܵܐ ܕܟܵܗܢܹ̈ܐ: ܗ̇ܘ ܕܝܬܸܒ݂ܠܹܐ ܡ̣ܢ ܝܲܡܝܼܢܵܐ ܕܬܪܘܿܢܘܿܣ ܕܓܘܼܪܘܼܬܵܐ ܒܫܡܲܝܵܐ: 2 ܚܸܠܡܲܬܟܵܪ ܕܒܹܝܬ ܩܘܼܕܫܵܐ: ܘܕܡܵܫܸܟܢܵܐ ܫܲܪܝܼܪܵܐ: ܗ̇ܘ ܕܢܩܸܫܠܹܐ ܡܵܪܝܵܐ ܘܠܵܐ ܒܲܪܢܵܫܵܐ. 3 ܣܵܒܵܒ ܟܠ ܓܘܼܪܵܐ ܕܟܵܗܢܹ̈ܐ ܡܘܼܩܸܡܵܐ ܝܠܹܐ ܕܡܲܩܪܸܒ݂ ܩܘܼܪ̈ܒܵܢܹܐ ܘܕܸܒ݂ܚܹ̈ܐ: ܣܵܒܵܒ ܕܐܵܗܵܐ ܠܵܙܸܡ ܝܼܗ݇ܘܵܐ ܐܘܼܦ ܠܐܵܗܵܐ ܕܗܵܘܹܐ ܗ݇ܘܵܐ ܠܹܗ ܡܸܢܕܝܼ ܕܡܲܩܪܸܒ݂. 4 ܣܵܒܵܒ ܐܸܢ ܒܐܲܪܥܵܐ ܗ݇ܘܵܐ: ܐܘܼܦ ܟܵܗܢܵܐ ܠܹܐ ܗܵܘܹܐ ܗ݇ܘܵܐ ܗ̇ܘ: ܟܲܕ ܐܝܼܬ ܟܵܗܢܹ̈ܐ ܕܡܲܩܪܸܒ݂ܝܼ ܩܘܼܪ̈ܒܵܢܹܐ ܐܲܝܟ݂ ܕܒܢܵܡܘܿܣܵܐ: 5 ܐܵܢܝܼ ܕܥܵܒ݂ܕܝܼ ܚܸܠܡܲܬ ܠܕܘܼܡܝܵܐ ܘܠܛܸܠܵܢܝܼܬܵܐ ܕܐܵܢܝܼ ܕܒܫܡܲܝܵܐ: ܐܲܝܟ݂ ܕܦܸܫܠܹܐ ܐܡܝܼܪܬܵܐ ܠܡܘܼܫܹܐ ܟܲܕ ܗܕܝܼܪܵܐ ܗ݇ܘܵܐ ܠܬܵܪܘܿܨܹܐ ܡܵܫܸܟܢܵܐ: ܣܵܒܵܒ ܒܹܐܡܵܪܵܐ ܝܠܹܐ: ܚܙܝܼ: ܘܥܒ݂ܘܿܕ ܟܠ ܡܸܢܕܝܼ ܒܗ̇ܝ ܕܡܘܼܬܵܐ ܕܦܸܫܠܵܐ ܡܘܼܚܙܝܼܬܵܐ ܐܸܠܘܼܟ݂ ܒܛܘܼܪܵܐ. 6 ܐܝܼܢܵܐ ܐܵܕܝܼܵܐ ܚܸܠܡܲܬ ܒܘܼܫ ܪܵܡܬܵܐ ܡ̣ܢ ܕܗ̇ܝ ܩܘܼܒܸܠܹܐ: ܕܐܵܟ݂ܝܼ ܕܐܘܼܦ ܗ̇ܘ ܝܼܠܹܐ ܢܵܘܸܓ̰ܝܼ ܕܕܝܵܬܹܩܹܐ ܕܒܘܼܫ ܨܦܵܝܝܼ: ܕܦܸܫܠܹܐ ܝܸܗܒܸܠܬܵܐ ܒܩܵܘ̈ܠܹܐ ܕܒܘܼܫ ܨܦܵܝܝܼ. 7 ܣܵܒܵܒ ܐܸܢ ܗ̇ܝ ܩܵܕ݇ܡܵܝܬܵܐ ܗܵܘܝܵܐ ܗ݇ܘܵܐ ܕܠܵܐ ܠܵܘܡܵܐ: ܠܹܐ ܦܵܝܫܵܐ ܗ݇ܘܵܐ ܒܥܝܼܬܵܐ ܕܘܼܟܬܵܐ ܠܗ̇ܝ ܕܬܲܪ̈ܬܹܝ. 8 ܣܵܒܵܒ ܒܸܠܝܵܡܵܝ ܝܠܹܐ: ܒܹܐܡܵܪܵܐ: ܗܵܐ: ܒܹܐܬܵܝܵܐ ܝܢܵܐ ܝܘܿܡܵܢܹ̈ܐ: ܒܹܐܡܵܪܵܐ ܝܠܹܐ ܡܵܪܝܵܐ: ܒܸܬ ܬܲܡܸܡܸܢ ܥܲܠ ܒܲܝܬܵܐ ܕܒܹܝܬ ܝܼܣܪܵܝܹܠ: ܘܥܲܠ ܒܲܝܬܵܐ ܕܒܹܝܬ ܝܼܗܘܼܕܵܐ: ܕܝܵܬܹܩܹܐ ܚܲܕܬܵܐ: 9 ܐܲܝܟ݂ ܗ̇ܝ ܕܝܵܬܹܩܹܐ ܕܥܒܸܕܠܝܼ ܥܲܡ ܐܲܒ݂ܵܗܵܬܵܝ̈: ܒܝܘܿܡܵܐ ܕܕܒܸܩܠܝܼ ܒܐܝܼܕܵܝ ܘܦܘܼܠܛܵܝܠܝܼ ܡ̣ܢ ܐܲܪܥܵܐ ܕܡܸܨܪܹܝܢ: ܣܵܒܵܒ ܐܵܢܝܼ ܠܵܐ ܥܘܼܪܩܸܠܘܿܢ ܒܕܝܵܬܹܩܹܐ ܕܝܼܝܼ: ܐܘܼܦ ܐܵܢܵܐ ܡܘܼܣܠܝܼܵܝܠܝܼ: ܒܹܐܡܵܪܵܐ ܝܠܹܐ ܡܵܪܝܵܐ. 10 ܣܵܒܵܒ ܐܵܗܵܐ ܝܠܵܐ ܕܝܵܬܹܩܹܐ ܕܒܸܬ ܝܵܗ݇ܒܸܢ ܠܒܹܝܬ ܝܼܣܪܵܝܹܠ ܒܵܬ݇ܪ ܐܵܢܝܼ ܝܘܿܡܵܢܹ̈ܐ: ܒܹܐܡܵܪܵܐ ܝܠܹܐ ܡܵܪܝܵܐ: ܒܸܬ ܝܵܗ݇ܒܸܢܹܗ ܢܵܡܘܿܣܝܼ ܒܚܝܼܵܠܵܝ̈: ܘܥܲܠ ܠܸܒܵܝ ܒܸܬ ܟܵܬܒܸܢܹܗ: ܗܵܘܸܢ ܐܸܠܵܝ ܠܐܲܠܵܗܵܐ: ܘܐܵܢܝܼ ܒܸܬ ܗܵܘܝܼ ܐܸܠܝܼ ܠܛܵܝܸܦܵܐ. 11 ܘܠܹܐ ܡܵܠܦܝܼ ܟܠ ܐ݇ܢܵܫܵܐ ܠܒܲܪ ܡܕܝܼܢ݇ܬܹܗ: ܘܟܠ ܐ݇ܢܵܫܵܐ ܠܐܵܚܘܿܢܹܗ: ܘܐܵܡܸܪ: ܝ݇ܕܥܝܼ ܠܡܵܪܝܵܐ: ܣܵܒܵܒ ܟܠܵܝ ܒܸܬ ܝܲܕܥܝܼ ܠܝܼ: ܡ̣ܢ ܙܥܘܿܪܵܝ ܘܗܲܠ ܓܘܼܪܵܝ. 12 ܣܵܒܵܒ ܒܸܬ ܦܵܚܠܸܢܘܿܢ ܡ̣ܢ ܥܵܘܠܵܝ: ܘܠܚܛܝܼܵܬܵܝ̈ ܡܸܕܪܹܐ ܠܹܐ ܕܵܟ݂ܪܸܢ ܐܸܠܵܝ. 13 ܒܗ̇ܝ ܕܐܡܸܪܹܐ (ܕܝܵܬܹܩܹܐ) ܚܲܕܬܵܐ: ܥܒܸܕܠܹܐ ܥܵܬܝܼܩܬܵܐ ܠܗ̇ܝ ܩܵܕ݇ܡܵܝܬܵܐ. ܐܝܼܢܵܐ ܡܸܢܕܝܼ ܕܝܼܠܹܐ ܥܘܼܬܩܸܢܵܐ ܘܣܝܼܒ݂ܵܐ: ܩܘܼܪܒܵܐ ܝܠܹܐ ܠܬܝܵܡܵܐ.

ܩܦܠܐܘܢ: ܛ

1 ܐܵܕܝܼܵܐ ܐܘܼܦ (ܕܝܵܬܹܩܹܐ) ܩܵܕ݇ܡܵܝܬܵܐ ܐܝܼܬ ܠܵܗ̇ ܦܘܼܩܕܵܢܹ̈ܐ ܕܚܸܠܡܲܬ: ܘܒܹܝܬ ܩܘܼܕܫܵܐ ܥܵܠܡܵܝܵܐ. 2 ܣܵܒܵܒ ܡܵܫܸܟܢܵܐ ܦܸܫܠܹܐ ܬܘܼܨܪܵܐ: ܗ̇ܘ ܩܵܕ݇ܡܵܝܵܐ: ܕܐܝܼܬ ܗ݇ܘܵܐ ܓܵܘܹܐ ܩܲܢܕܝܼܠܵܐ: ܘܦܵܬܘܿܪܵܐ: ܘܠܚܸܡ ܐܲܦܹ̈ܐ: ܘܟܹܐ ܦܵܝܸܫ ܗ݇ܘܵܐ ܩܸܪܝܵܐ: ܒܹܝܬ ܩܘܼܕܫܵܐ. 3 ܘܡ̣ܢ ܒܵܬ݇ܪ ܣܸܬܪܵܐ ܕܬܪܲܝ: ܡܵܫܸܟܢܵܐ ܕܟܹܐ ܦܵܝܸܫ ܗ݇ܘܵܐ ܩܸܪܒܵܐ: ܩܕܘܿܫ ܩܘܼܕܫܹ̈ܐ. 4 ܘܐܝܼܬ ܗ݇ܘܵܐ ܒܝܼܹܗ ܦܝܼܪܡܵܐ ܕܕܲܗܒ݂ܵܐ: ܘܩܹܒ݂ܘܼܬܵܐ ܕܕܝܵܬܹܩܹܐ ܕܩܪܝܼܡܬܵܐ ܟܠܵܗ̇ ܒܕܲܗܒ݂ܵܐ: ܕܐܝܼܬ ܗ݇ܘܵܐ ܓܵܘܵܗ̇ ܡܵܐܢܵܐ ܕܕܲܗܒ݂ܵܐ: ܗ̇ܘ ܕܐܝܼܬ ܗ݇ܘܵܐ ܓܵܘܹܗ ܡܲܢܢܵܐ: ܘܩܵܛܝܼܵܐ ܕܐܲܗܪܘܿܢ ܗ̇ܘ ܕܦܩܸܚܠܹܐ: ܘܠܘܼܚܹ̈ܐ ܕܕܝܵܬܹܩܹܐ: 5 ܘܥܸܠܸܠ ܡܸܢܵܗ̇ ܟܪ̈ܘܿܒܹܐ ܕܚܸܩܪܵܐ ܕܒܸܥܒ݂ܵܕܵܐ ܛܸܠܵܢܝܼܬܵܐ ܥܲܠ ܚܘܼܣܵܝܵܐ: ܕܐܵܕܝܼܵܐ ܠܹܐ ܝܠܹܐ ܙܲܒ݂ܢܵܐ ܕܐܵܡܪܵܚ ܥܲܠ ܟܠ ܚܕܵܐ ܡܸܢܵܝ. 6 ܟܲܕ ܐܲܢܹܐ ܗܲܕܟ݂ܵܐ ܬܘܼܪܹܨ ܗ݇ܘܵܘ: ܓܵܘ ܡܵܫܸܟܢܵܐ ܩܵܕ݇ܡܵܝܵܐ ܒܟܠ ܙܲܒ݂ܢܵܐ ܟܹܐ ܐܵܘܕܝܼ ܗ݇ܘܵܘ ܟܵܗܢܹ̈ܐ: ܘܬܲܡܸܡܝܼ ܗ݇ܘܵܘ ܚܸܠܡܲܬܵܝ: 7 ܐܝܼܢܵܐ ܓܵܘ ܡܵܫܸܟܢܵܐ ܕܬܪܲܝ: ܚܕܵܐ ܓܵܗܵܐ ܒܫܹܢ݇ܬܵܐ ܟܹܐ ܐܵܘܸܪ ܗ݇ܘܵܐ ܓܘܼܪܵܐ ܕܟܵܗܢܹ̈ܐ ܒܢܲܦ̮ܫܹܗ: ܠܵܐ ܕܠܵܐ ܕܸܡܵܐ: ܗ̇ܘ ܕܡܲܩܪܸܒ݂ ܗ݇ܘܵܐ ܡܒܵܕܵܠ ܕܓܵܢܹܗ ܘܕܚܸܠܛܘܼܢܝܘܼܝܵܬܹ̈ܐ ܕܛܵܝܸܦܵܐ. 8 ܐܝܼܢܵܐ ܐܵܗܵܐ ܟܹܐ ܡܲܕܥܝܵܐ ܗ݇ܘܵܐ ܪܘܼܚܵܐ ܕܩܘܼܕܫܵܐ: ܕܗܹܫ ܠܵܐ ܦܸܫܠܵܐ ܓܠܝܼܬܵܐ ܐܘܼܪܚܵܐ ܕܒܹܝܬ ܩܘܼܕܫܹ̈ܐ ܟܡܵܐ ܙܲܒ݂ܢܵܐ ܕܒܸܟܠܵܝܵܐ ܗ݇ܘܵܐ ܡܵܣܸܟܢܵܐ ܩܵܕ݇ܡܵܝܵܐ. 9 ܘܐܵܗܵܐ ܡܵܣܵܠܵܐ ܗ݇ܘܵܐ ܙܲܒ݂ܢܵܐ ܕܩܵܐܹܡ: ܕܒܝܼܹܗ ܩܘܼܪ̈ܒܵܢܹܐ ܘܕܸܒ݂ܚܹ̈ܐ ܟܹܐ ܦܵܝܫܝܼ ܡܘܼܩܪܸܒܹܐ: ܐܵܢܝܼ ܕܠܹܐ ܡܵܨܝܼ ܠܡܲܟܡܘܼܠܑܹ ܒܐܸܢܝܲܬܹܗ ܠܡܲܩܪܸܒ݂ܵܢܵܝ: 10 ܐܲܚܟ̰ܝܼ ܒܡܹܐܟ݂ܘܼܠܝܵܬܹ̈ܐ (ܝܢܵܐ): ܘܒܫܬܵܝܵܬܹ̈ܐ: ܘܒܡܲܥܡܘܿܕܝܵܬܹ̈ܐ ܕܬܵܗܵܪܹ̈ܐ ܬܵܗܵܪܹ̈ܐ: ܦܘܼܩܕܵܢܹ̈ܐ ܕܒܸܣܪܵܐ: ܕܡܘܼܬܒܹܐ ܝܢܵܐ ܗܲܠ ܙܲܒ݂ܢܵܐ ܕܬܘܼܪܵܨܵܐ.

11 ܐܝܼܢܵܐ ܡܫܝܼܚܵܐ ܕܐܬܹܠܹܐ ܓܘܼܪܵܐ ܕܟܵܗܢܹ̈ܐ ܕܛܵܒ݂ܵܬܹ̈ܐ ܕܗܕܝܼܪܹܐ ܗ݇ܘܵܘ: ܒܝܼܸܕ ܡܵܫܸܟܢܵܐ ܕܒܘܼܫ ܓܘܼܪܵܐ ܘܬܲܡܵܡ: ܠܵܐ ܬܘܼܪܨܵܐ ܒܐܝܼܕܵܬܹ̈ܐ: ܝܲܥܢܹܐ: ܠܹܐ ܗ݇ܘܵܐ ܕܐܵܗܵܐ ܒܪܝܼܬܵܐ: 12 ܘܠܵܐ ܒܕܸܡܵܐ ܕܥܸܙܹ̈ܐ ܘܕܡܘܼ̈ܓ̰ܹܐ: ܐܸܠܵܐ ܒܕܡܵܐ ܕܓܵܢܹܗ: ܐܘܸܤܹܐ ܚܕܵܐ ܓܵܗܵܐ ܓܵܘ ܒܹܝܬ ܩܘܼܕܫܵܐ: ܘܡܘܼܫ̄ܟ̰ܸܚܠܹܐ ܦܘܼܪܩܵܢܵܐ ܕܠܥܵܠܲܡ. 13 ܣܵܒܵܒ ܐܸܢ ܕܸܡܵܐ ܕܥܸܙܹ̈ܐ ܘܕܡܘܼ̈ܓ̰ܹܐ: ܘܩܸܛܡܵܬ ܕܫܵܪܸܚܬܵܐ ܡܘܼܪܝܸܣܵܐ ܥܲܠ ܡܛܘܼܡܝܹ̈ܐ: ܩܵܕܸܫ ܗ݇ܘܵܐ ܠܗ݇ܘܿܢ ܠܕܵܟ݂ܵܝܬܵܐ ܕܒܸܣܪܵܝ: 14 ܟܡܐܵ ܙܵܘܕܵܐ ܕܸܡܹܗ ܕܡܫܝܼܚܵܐ: ܕܒܪܘܼܚܵܐ ܕܠܥܵܠܲܡ ܡܘܼܩܪܸܒ݂ܠܹܐ ܓܵܢܹܗ ܕܠܵܐ ܡܘܼܡܵܐ ܠܐܲܠܵܗܵܐ: ܒܸܬ ܕܵܟܹܐ ܐܸܢܝܲܬܲܢ ܡ̣ܢ ܦܘܼܠܚܵܢܹ̈ܐ ܡܝܼܬܹ̈ܐ: ܕܥܵܒ݂ܕܵܚ ܚܸܠܡܲܬ ܠܐܲܠܵܗܵܐ ܚܲܝܵܐ: 15 ܘܣܵܒܵܒ ܕܐܵܗܵܐ ܗ̇ܘ ܗ݇ܘܹܠܐ ܢܵܘܸܓ̰ܝܼ ܕܕܝܵܬܹܩܹܐ ܚܲܕܬܵܐ: ܕܟܲܕ ܡܵܘܬܵܐ ܗ݇ܘܹܠܹܐ ܠܦܘܼܚܵܠܵܐ ܕܐܵܢܝܼ ܓܢܵܗܹ̈ܐ ܕܥܲܠ ܕܝܵܬܹܩܹܐ ܩܵܕ݇ܡܵܝܬܵܐ: ܐܵܢܝܼ ܕܦܸܫܠܘܿܢ ܩܸܪܝܹܐ ܫܵܩܠܝܼ ܗ݇ܘܵܘ ܠܩܵܘܠܵܐ ܕܝܵܪܬܘܼܬܵܐ ܕܠܥܵܠܲܡ. 16 ܣܵܒܵܒ ܐܲܝܟܵܐ ܕܐܝܼܬ ܕܝܵܬܹܩܹܐ: ܡܵܘܬܵܐ ܕܗ̇ܘ ܕܥܒ݂ܝܼܕܵܠܹܐ ܡ̣ܢ ܐܲܢܲܢܩܹܐ ܦܝܵܫܵܐ ܝܠܹܐ ܡܘܼܕܸܥܝܵܐ. 17 ܣܵܒܵܒ ܕܝܵܬܹܩܹܐ ܒܡܝܼܬܵܐ ܟܹܐ ܦܵܝܫܵܐ ܡܘܼܩܘܝܼܬܵܐ: ܣܵܒܵܒ ܟܡܵܐ ܕܚܵܝܵܐ ܝܠܹܐ ܗ̇ܘ ܕܥܒ݂ܝܼܕܵܠܹܐ: ܠܲܝܬ ܒܝܼܵܗ̇ ܚܲܝܠܵܐ. 18 ܣܵܒܵܒ ܕܐܵܗܵܐ ܐܘܼܦ ܗ̇ܝ ܩܵܕ݇ܡܵܝܬܵܐ ܠܵܐ ܦܸܫܠܵܐ ܡܘܼܩܸܡܬܵܐ ܕܠܵܐ ܕܸܡܵܐ. 19 ܣܵܒܵܒ ܟܲܕ ܦܸܫܠܹܐ ܐܡܝܼܪܵܐ ܟܠܹܗ ܦܘܼܩܕܵܢܵܐ ܡ̣ܢ ܡܘܼܫܹܐ ܠܟܠܹܗ ܛܵܝܸܦܵܐ ܐܲܝܟ݂ ܢܵܡܘܿܣܵܐ: ܫܩܸܠܹܐ ܕܸܡܵܐ ܕܡܘܼ̈ܓ̰ܹܐ ܘܕܥܸܙܹ̈ܐ: ܥܲܡ ܡ̈ܝܼܵܐ ܘܥܲܡܪܵܐ ܕܩܸܪܡܝܼܙ ܘܙܘܿܦܵܐ: ܘܡܘܼܪܝܸܣܠܹܐ ܥܲܠ ܟܬܵܒ݂ܵܐ ܘܥܲܠ ܟܠܹܗ ܛܵܝܸܦܵܐ: 20 ܘܐܡܸܪܹܐ ܐܸܠܵܝ: ܐܵܗܵܐ ܝܠܹܐ ܕܸܡܵܐ ܕܕܝܵܬܹܩܹܐ: ܗ̇ܝ ܕܦܸܫܠܵܐ ܦܩܝܼܕܬܵܐ ܐܸܠܵܘܟ݂ܘܿܢ ܡ̣ܢ ܐܲܠܵܗܵܐ. 21 ܐܘܼܦ ܥܲܠ ܡܵܫܸܟܢܵܐ: ܘܥܲܠ ܟܠܵܝ ܡܵܐܢܹ̈ܐ ܕܚܸܠܡܲܬ: ܒܕܸܡܵܐ ܗܲܪ ܗܵܕܹܐ ܡܘܼܪܝܸܣܠܹܐ. 22 ܘܚܲܟ̰ܵܐ ܦܵܝܫܵܐ ܕܟܠ ܡܸܢܕܝܼ ܒܕܸܡܵܐ ܟܹܐ ܦܵܝܸܫ ܕܘܼܟ݂ܝܵܐ ܒܢܵܡܘܿܣܵܐ: ܘܕܠܵܐ ܫܦܵܟ݂ܬܵܐ ܕܕܸܡܵܐ ܠܲܝܬ ܫܒ݂ܵܩܵܐ.

23 ܒܲܣ ܘܵܓ̰ܸܒ ܝܼܗ݇ܘܵܐ ܕܐܲܢܹܐ ܕܝܼܢܵܐ ܕܘܼܡܝܼܹ̈ܐ ܕܡܸܢܕܝܵܢܹ̈ܐ ܕܫܡܲܝܵܐ ܦܵܝܫܝܼ ܕܘܼܟ݂ܝܹܐ ܒܐܲܢܹܐ: ܐܝܼܢܵܐ ܐܲܢܹܐ ܫܡܲܝܵܢܵܝܹ̈ܐ ܒܕܸܒ݂ܚܹ̈ܐ ܕܒܘܼܫ ܨܦܵܝܝܼ ܡ̣ܢ ܕܐܲܢܹܐ. 24 ܣܵܒܵܒ ܠܹܐ ܝܠܵܐ ܕܓܵܘ ܒܹܝܬ ܩܘܼܕܫܵܐ ܕܬܘܼܪܨܵܐ ܒܐܝܼܕܵܬܹ̈ܐ ܐܘܸܪܹܐ ܡܫܝܼܚܵܐ: ܕܝܼܠܹܐ ܛܘܼܦ̮ܣܵܐ ܕܗ̇ܘ ܫܲܪܝܼܪܵܐ: ܐܸܠܵܐ ܠܫܡܲܝܵܐ ܒܓܵܢܘܼܗ̇: ܕܐܵܕܝܼܵܐ ܦܵܝܸܫ ܗ݇ܘܵܐ ܚܸܙܝܵܐ ܩܵܕ݇ܡ ܦܵܬܹܗ ܕܐܲܠܵܗܵܐ ܡܒܵܕܵܠܲܢ. 25 ܐܘܼܦ ܠܵܐ ܕܡܲܩܪܸܒ݂ ܓܵܢܹܗ ܪܵܒܵܐ ܓܵܗܹ̈ܐ: ܐܲܝܟ݂ ܕܓܘܼܪܵܐ ܕܟܵܗܢܹ̈ܐ ܟܹܐ ܐܵܘܸܪ ܒܟܠ ܫܹܢ݇ܬܵܐ ܠܒܹܝܬ ܩܘܼܕܫܵܐ ܒܕܸܡܵܐ ܠܵܐ ܕܓܵܢܹܗ. 26 ܘܐܸܢ ܠܵܐ: ܘܵܓ̰ܸܒ ܝܼܗ݇ܘܵܐ ܕܪܵܒܵܐ ܓܵܗܗܹܐ ܩܵܒܸ݁ܠ ܗ݇ܘܵܐ ܚܲܫܵܐ ܡ̣ܢ ܒܸܢܝܼܬ ܕܥܵܠܡܵܐ: ܐܝܼܢܵܐ ܐܵܕܝܼܵܐ ܒܚܲܪܬܹܗ ܕܥܵܠܡܵܐ ܚܕܵܐ ܓܵܗܵܐ ܦܸܫܠܹܐ ܓܸܠܝܵܐ ܒܕܒ݂ܚܬܵܐ ܕܓܵܢܹܗ ܕܒܵܛܸܠ ܠܲܚܛܝܼܬܵܐ. 27 ܘܕܵܐܟ݂ܝܼ ܕܡܘܼܬܒ݂ܵܐ ܝܠܹܐ ܠܒܲܢܝ̈ܢܵܫܵܐ ܕܚܕܵܐ ܓܵܗܹܐ ܡܵܝܬܝܼ: ܘܒܵܬ݇ܪ ܕܐܵܗܵܐ ܕܝܼܘܵܢ: 28 ܗܲܕܟ݂ܵܐ ܐܘܼܦ ܡܫܝܼܚܵܐ ܚܕܵܐ ܓܵܗܹܐ ܦܸܫܠܹܐ ܡܘܼܩܪܸܒ݂ܵܐ ܕܛܵܥܸܢ ܚܛܝܼܵܬܹ̈ܐ ܕܪܵܒܵܐ: ܐܝܼܢܵܐ ܓܵܗܵܐ ܕܬܲܪ̈ܬܹܝ ܕܠܵܐ ܚܛܝܼܵܬܹ̈ܐ ܒܸܬ ܦܵܝܸܫ ܚܸܙܝܵܐ ܠܦܘܼܪܩܵܢܵܐ ܕܐܵܢܝܼ ܕܣܵܦܪܝܼ ܐܸܠܹܗ.

ܩܦܠܐܘܢ: ܝ

1 ܣܵܒܵܒ ܡܵܢܘܿܣܵܐ ܛܸܠܵܢܝܼܬܵܐ ܐܝܼܬ ܗ݇ܘܵܐ ܒܝܼܹܗ ܕܛܵܒ݂ܵܬܹ̈ܐ ܕܝܼܢܵܐ ܗܕܝܼܪܹܐ ܕܗܵܘܝܼ: ܘܠܵܐ ܩܢܘܿܡܵܐ ܒܓܵܢܹܗ ܕܐܵܢܝܼ ܡܸܢܕܝܼܵܢܹ̈ܐ: ܣܵܒܵܒ ܕܐܵܗܵܐ: ܟܲܕ ܗܲܡܵܫܵܐ ܒܟܠ ܫܹܢ݇ܬܵܐ ܗܲܪ ܐܵܢܝܼ ܕܸܒ݂ܚܹ̈ܐ ܦܵܝܫܝܼ ܗ݇ܘܵܘ ܡܘܼܩܪܸܒܹܐ: ܗܸܟ̰ ܡܵܨܝܼ ܗ݇ܘܵܘ ܕܡܲܟܡܸܠܝܼ ܠܐܵܢܝܼ ܕܐܵܬܝܼ ܗ݇ܘܵܘ ܩܘܼܪܒܵܐ. 2 ܣܵܒܵܒ ܐܸܢ ܠܵܐ: ܠܹܐ ܫܵܠܝܼ ܗ݇ܘܵܘ ܡ̣ܢ ܩܘܼܪ̈ܒܵܢܵܝ: ܣܵܒܵܒ ܐܚܹܪ݇ܢܵܐ ܠܹܐ ܗܵܘܝܵܐ ܗ݇ܘܵܐ ܠܥܵܒ݂ܕܵܢܹ̈ܐܕܚܸܠܡܲܬ ܐܸܢܝܲܬ ܕܚܛܝܼܵܬܹ̈ܐ: ܠܐܵܢܝܼ ܕܚܕܵܐ ܓܵܗܵܐ ܦܸܫܠܘܿܢ ܕܘܼܟ݂ܝܹܐ. 3 ܐܸܠܵܐ ܒܐܲܢܹܐ ܟܹܐ ܡܲܕܟܸܪܝܼ ܠܚܛܝܼܵܬܵܝ̈ ܒܟܠ ܫܹܢ݇ܬܵܐ. 4 ܣܵܒܵܒ ܠܹܐ ܡܵܨܹܐ ܕܸܡܵܐ ܕܐܵܘܪܹ̈ܐ ܘܕܥܸܙܹ̈ܐ ܠܕܵܟ݂ܘܿܝܹܐ ܚܛܝܼܬܹ̈ܐ. 5 ܣܵܒܵܒ ܕܐܵܗܵܐ ܟܲܕ ܒܹܐܘܵܪܵܐ ܠܥܵܠܡܵܐ: ܐܡܸܪܹܐ: ܒܕܸܒ݂ܚܹ̈ܐ ܘܩܘܼܪ̈ܒܵܢܹܐ ܠܵܐ ܒܣܸܡܠܵܐ ܠܘܼܟ݂: ܐܝܼܢܵܐ ܦܲܓ݂ܪܵܐ ܗܘܼܕܸܪܘܼܟ݂ ܐܸܠܝܼ:

6 ܝܩܝܼܕܹ̈ܐ ܬܲܡܵܡ ܘ (ܩܘܼܪ̈ܒܵܢܹܐ) ܡܒܵܕܵܠ ܕܚܛܝܼܵܬܹ̈ܐ ܠܵܐ ܛܠܸܒܠܘܼܟ݂.

7 ܗ̇ܝܓܵܗ ܐܡܸܪܝܼ: ܗܵܐ: ܕܘܼ ܝܘܸܢ ܐܬܹܠܝܼ: ܒܟܸܪܟ݂ܵܐ ܘܟܬܵܒ݂ܵܐ ܝܠܹܐ ܒܵܗ݇ܣܝܼ: ܕܥܵܒ݂ܕܸܢ ܪܸܙܵܝܘܼܟ݂: ܝܵܐ ܐܲܠܵܗܵܐ.

8 ܟܲܕ ܒܥܸܠܸܠ ܐܡܸܪܹܐ: ܕܸܒ݂ܚܹ̈ܐ ܘܩܘܼܪ̈ܒܵܢܹܐ ܘܝܩܝܼܕܹ̈ܐ ܬܲܡܵܡ ܘ(ܩܘܼܪ̈ܒܵܢܹܐ) ܡܒܵܕܵܠ ܕܚܛܝܼܵܬܹ̈ܐ ܠܵܐ ܒܸܥܠܘܼܟ݂: ܘܠܵܐ ܒܣܸܡܠܵܐ ܠܘܼܟ݂ ܒܝܼܵܝ: ܐܵܢܝܼ ܕܦܝܵܫܵܐ ܗ݇ܘܵܘ ܡܘܼܩܪܸܒܹܐ ܒܢܵܡܘܿܣܵܐ: 9 ܒܵܬ݇ܪ ܗܵܕܹܐ ܐܡܸܪܹܐ: ܗܵܐ: ܐܬܹܠܝܼ ܕܥܵܒ݂ܕܸܢ ܪܸܙܵܝܘܼܟ݂. ܒܸܫܩܵܠܵܐ ܝܠܹܐ ܠܩܵܕ݇ܡܵܝܬܵܐ ܕܡܲܩܸܡ ܗ݇ܘܵܐ ܠܗ̇ܝ ܕܬܲܪ̈ܬܹܝ. 10 ܒܐܵܗܵܐ ܪܸܙܵܝܹܗ ܦܸܫܠܲܢ ܩܘܼܕܫܹܐ: ܒܡܲܩܪܲܒ݂ܬܵܐ ܕܦܲܓ݂ܪܹܗ ܕܝܼܫܘܿܥ ܡܫܝܼܚܵܐ ܗܲܪ ܚܕܵܐ ܓܵܗܵܐ. 11 ܘܟܠ ܓܘܼܪܵܐ ܕܟܵܗܢܹ̈ܐ ܟܹܐ ܟܵܠܹܐ ܘܥܵܒܸܕ ܚܸܠܡܲܬ ܟܠܝܘܿܡ: ܗܲܪ ܐܲܢܹܐ ܕܸܒ݂ܚܹ̈ܐ ܪܵܒܵܐ ܓܵܗܹ̈ܐ ܟܹܐ ܡܲܩܪܸܒ݂: ܐܵܢܝܼ ܕܗܲܪ ܠܹܐ ܡܵܨܝܼ ܕܫܵܩܠܝܼ ܚܛܝܼܵܬܹ̈ܐ. 12 ܐܝܼܢܵܐ ܐܵܗܵܐ ܚܵܕ݇ ܕܸܒ݂ܚܵܐ ܡܘܼܩܪܸܒ݂ܠܹܐ ܡܒܵܕܵܠ ܕܚܛܝܼܵܬܹ̈ܐ: ܘܝܬܸܒ݂ܠܹܐ ܥܲܠ ܝܲܡܝܼܢܵܐ ܕܐܲܠܵܗܵܐ ܠܥܵܠܲܡ. 13 ܘܡܵܐܕܝܼܵܐ ܒܸܣܦܵܪܵܐ ܝܠܹܐ ܗܲܠܦ ܕܦܵܝܫܝܼ ܡܘܼܬܒܹܐ ܕܫܸܡܸܢܘܼ̈ܗܝ ܟܘܼܒ݂ܫܵܐ ܬܚܘܿܬ ܐܲܩܠܘܼ̈ܗܝ. 14 ܣܵܒܵܒ ܒܚܵܕ݇ ܩܘܼܪܒܵܢܵܐ ܡܘܼܟܡܸܠܹܐ ܠܥܵܠܲܡ ܠܐܵܢܝܼ ܕܦܵܝܫܵܐ ܝܢܵܐ ܩܘܼܕܫܵܐ. 15 ܐܝܼܢܵܐ ܒܝܼܵܗ݇ܒ݂ܵܐ ܝܠܵܐ ܣܵܗܕܘܼܬܵܐ ܐܸܠܲܢ ܐܘܼܦ ܪܘܼܚܵܐ ܕܩܘܼܕܫܵܐ: ܣܵܒܵܒ ܒܵܬ݇ܪ ܕܐܡܸܪܹܐ: 16 ܐܵܗܵܐ ܝܠܵܐ ܕܝܵܬܹܩܹܐ ܕܒܸܬ ܡܲܬܒܸܢ ܐܸܠܵܝ ܡܒܵܬ݇ܪ ܐܵܢܝܼ ܝܘܿܡܵܢܹ̈ܐ: ܒܹܐܡܵܪܵܐ ܝܠܹܐ ܡܵܪܝܵܐ: ܒܸܬ ܝܵܗ݇ܒܸܢ ܠܢܵܡܘܿܣܝܼ ܒܠܸܒܵܝ̈: ܘܥܲܠ ܚܝܼܵܠܝ̈ ܒܸܬ ܟܵܬܒܸܢܹܗ: 17 (ܗ̇ܝܓܵܗ ܐܡܸܪܹܐ: ) ܘܥܵܘܠܵܝ ܘܚܛܝܼܵܬܵܝ̈ ܠܹܐ ܕܵܟ݂ܪܸܢ ܐܚܹܪ݇ܢܵܐ. 18 ܐܝܼܢܵܐ ܐܲܝܟܵܐ ܕܐܝܼܬ ܫܒ݂ܵܩܵܐ ܕܐܲܢܹܐ: ܠܲܝܬ ܐܚܹܪ݇ܢܵܐ ܡܲܩܘܲܒ݂ܬܵܐ ܡܒܵܕܵܠ ܕܚܛܝܼܵܬܹ̈ܐ.

19 ܟܲܕ ܐܝܼܬ ܠܲܢ ܗܲܕܟ݂ܵܐ: ܐܵܚܘܿܢܘܵܬܝܼ̈: ܚܘܵܪܦܵܬܘܼܬܵܐ ܒܐܘܵܪܬܵܐ ܕܓܵܘ ܒܹܝܬ ܩܘܼܕܫܵܐ ܒܕܸܡܹܗ ܕܝܼܫܘܿܥ: 20 ܒܗ̇ܝ ܕܚܘܼܕܸܬܠܹܐ ܐܸܠܲܢ: ܐܘܼܪܚܵܐ ܚܲܕܬܵܐ ܘܚܵܝܬܵܐ: ܒܝܼܸܕ ܣܸܬܪܵܐ: ܕܝܼܠܹܐ ܒܸܣܪܹܗ: 21 ܘ(ܟܲܕ ܐܝܼܬ ܠܲܢ) ܟܵܗܢܵܐ ܓܘܼܪܵܐ ܥܲܠ ܒܲܝܬܹܗ ܕܐܲܠܵܗܵܐ: 22 ܐܵܬܵܚ ܩܘܼܪܒܵܐ ܒܠܸܒܵܐ ܫܲܪܝܼܪܵܐ: ܘܒܬܲܡܵܡܵܬܘܼܬܵܐ ܕܗܲܝܡܵܢܘܼܬܵܐ: ܟܲܕ ܡܘܼܪܝܸܣܹܐ ܝܢܵܐ ܠܸܒܵܘ̈ܬܲܢ ܘܕܘܼܟ݂ܝܹܐ ܡ̣ܢ ܐܸܢܝܲܬ ܒܝܼܫܬܵܐ: ܘܡܘܼܣܚܝܼܵܐ ܦܲܓ݂ܪܲܢ ܒܡ̈ܝܼܵܐ ܕܸܟ݂ܝܹ̈ܐ: 23 ܘܚܵܡܠܵܚ ܒܡܵܘܕܵܝܬܵܐ ܕܗܹܒ݂ܝܼܲܢ ܘܠܵܐ ܩܵܠܒܵܚ: ܣܵܒܵܒ ܕܡܗܘܼܡܢܵܐ ܝܠܹܐ ܗ̇ܘ ܕܩܘܼܘܸܠܹܐ ܐܸܠܲܢ. 24 ܘܚܵܪܵܚ ܚܵܕ݇ ܒܗ̇ܘ ܐܚܹܪ݇ܢܵܐ ܠܡܲܐܘܲܪܬܵܐ ܒܩܲܝܪܲܬ ܕܚܘܼܒܵܐ ܕܦܘܼܠܚܵܢܹ̈ܐ ܛܵܒ݂ܹ̈ܐ: 25 ܘܠܵܐ ܗܵܘܵܚ ܒܸܫܒ݂ܵܩܵܐ ܓ̰ܡܵܥܝܬܲܢ ܠܟܸܣ ܥܘܼܕܵܠܹܐ: ܐܲܝܟ݂ ܕܐܝܼܬ ܥܵܕܲܬ ܠܐ݇ܢܵܫܵܐ ܐ݇ܢܵܫܵܐ: ܐܸܠܵܐ ܦܲܪܦܸܠܘܿܢ ܚܵܕ݇ ܒܗ̇ܘ ܐܚܹܪ݇ܢܵܐ: ܘܒܘܼܫ ܙܵܘܕܵܐ ܟܡܵܐ ܕܒܸܚܙܵܝܵܐ ܝܬܘܿܢ ܕܩܲܪܒܘܼܢܹܐ ܝܠܹܐ ܗ̇ܘ ܝܘܿܡܵܐ.

26 ܣܵܒܵܒ ܐܸܢ ܒܪܸܙܵܝܵܐ ܐܲܚܢܲܢ ܚܵܛܵܚ ܡܒܵܬ݇ܪ ܕܩܘܼܒܸܠܲܢ ܝܕܹܥܬܵܐ ܕܣܲܪܲܣܬܘܼܬܵܐ: ܐܚܹܪ݇ܢܵܐ ܠܲܝܬ ܕܸܒ݂ܚܬܵܐ ܦܝܵܫܵܐ ܡܒܵܕܵܠ ܕܚܛܝܼܵܬܹ̈ܐ: 27 ܐܸܠܵܐ ܚܕܵܐ ܣܦܵܪܬܵܐ ܣܲܗܡܵܢܬܵܐ ܕܕܝܼܘܵܢ: ܘܩܲܝܪܲܬ ܕܢܘܼܪܵܐ ܕܒܸܬ ܐܵܟ݂ܠܵܐ ܠܕܲܪ̈ܩܘܼܒ݂ܠܵܝܹܐ. 28 ܗ̇ܘ ܕܡܘܼܣܠܹܠܹܐ ܠܢܵܡܘܿܣܵܐ ܕܡܘܼܫܹܐ: ܥܲܠ ܦܘܼܡܵܐ ܕܬܪܲܝ ܘܬܠܵܬ݇ܐ ܣܵܗܕܹ̈ܐ ܕܠܵܐ ܪ̈ܲܚܡܹܐ ܟܹܐ ܡܵܝܸܬ: 29 ܟܡܵܐ ܒܸܚܫܵܒ݂ܵܐ ܝܬܘܿܢ ܙܵܘܕܵܐ ܠܥܲܙܵܒ ܒܸܬ ܦܵܝܸܫ ܡܘܼܚܫܸܚܵܐ ܗ̇ܘ ܕܕܸܫܠܹܐ ܬܚܘܿܬ ܐܲܩܠܵܐ ܠܒܪܘܼܢܹܗ ܕܐܲܠܵܗܵܐ: ܘܚܘܼܫܒܢܹܐ ܕܸܡܵܐ ܕܕܝܵܬܹܩܹܐ ܕܝܼܹܗ ܐܲܝܟ݂ ܕܟܠ ܐ݇ܢܵܫܵܐ: ܗ̇ܘ ܕܒܝܼܹܗ ܦܸܫܠܹܐ ܩܘܼܕܫܵܐ: ܘܡܘܼܒܨܪܹܐ ܠܪܘܼܚܵܐ ܕܫܵܦܵܩܲܬ: 30 ܣܵܒܵܒ ܒܝܼܕܲܥܝܵܐ ܝܘܵܚ ܠܗ̇ܘ ܕܐܡܸܪܹܐ: ܕܝܼܝܼ ܝܠܵܐ ܬܘܼܥܠܵܐ: ܐܵܢܵܐ ܒܸܬ ܦܲܪܥܸܢ. ܘܡܸܕܪܹܐ: ܒܸܬ ܕܵܝܼܢ ܡܵܪܝܵܐ ܠܛܵܝܸܦܹܗ. 31 ܙܕܘܼܥܬܵܐ ܓܘܼܪܬܵܐ ܝܠܵܐ ܠܸܢܦܵܠܵܐ ܒܐܝܼܕܵܬܹ̈ܐ ܕܐܲܠܵܗܵܐ ܚܲܝܵܐ.

32 ܐܝܼܢܵܐ ܕܟ݂ܘܿܪܘܿܢ ܠܝܘܿܡܵܢܹ̈ܐ ܩܵܕ݇ܡܵܝܹ̈ܐ: ܐܵܢܝܼ ܕܒܝܼܵܝ ܟܲܕ ܦܸܫܠܵܘܟ݂ܘܿܢ ܒܘܼܗ݇ܪܸܢܹܐ: ܚܡܸܠܵܘܟ݂ܘܿܢ ܐܵܓ݂ܘܿܢܵܐ ܓܘܼܪܵܐ ܕܚܲܫܗܹܐ: 33 ܒܚܵܕ݇ ܓܹܒܵܐ: ܟܲܕ ܗ݇ܘܹܠܵܘܟ݂ܘܿܢ ܬܵܡܵܫܹ̈ܐ ܒܠܵܘܡܹ̈ܐ ܘܒܐܘܼܠܨܵܢܹ̈ܐ: ܘܒܚܵܕ݇ ܓܹܒܵܐ: ܗ݇ܘܹܠܵܘܟ݂ܘܿܢ ܫܵܪ̈ܝܼܟܹܐ ܒܐ݇ܢܵܫܹ̈ܐ ܕܐܲܢܹܐ ܩܘܼܒܸܠܘܿܢ. 34 ܣܵܒܵܒ ܩܘܼܒܸܠܵܘܟ݂ܘܿܢ ܚܲܫܵܐ ܥܲܡ ܕܐܵܢܝܼ ܕܒܝܼܣܘܼܪܹ̈ܐ: ܘܣܠܵܒܬܵܐ ܕܡܸܢܕܝܼܵܘܟ݂ܘܿܢ ܒܚܲܕܘܼܬܵܐ ܩܘܼܒܸܠܵܘܟ݂ܘܿܢ: ܣܵܒܵܒ ܕܒܝܼܕܲܥܝܵܐ ܝܬܘܿܢ ܕܐܝܼܬ ܠܵܘܟ݂ܘܿܢ ܡܵܐܠ ܒܫܡܲܝܵܐ ܕܒܘܼܫ ܨܦܵܝܝܼ ܘܠܵܐ ܥܵܒ݂ܪܵܢܵܐ. 35 ܒܲܣ ܠܵܐ ܪܲܦܝܼܬܘܿܢ ܚܘܵܪܦܵܬܘܼܬܵܐ ܕܐܝܼܬ ܠܵܘܟ݂ܘܿܢ: ܕܐܝܼܬ ܠܵܗ̇ ܗܵܩܵܐ ܓܘܼܪܵܐ. 36 ܣܵܒܵܒ ܚܡܵܠܬܵܐ ܠܵܙܸܡ ܝܼܠܵܐ ܐܸܠܵܘܟ݂ܘܿܢ: ܕܟܲܕ ܥܵܒ݂ܕܝܼܬܘܿܢ ܪܸܙܵܝܹܗ ܕܐܲܠܵܗܵܐ: ܩܵܒ݁ܠܝܼܬܘܿܢ ܩܵܘܠܵܐ. 37 ܣܵܒܵܒ ܡܐܵܕܝܼܵܐ ܚܲܟ̰ܵܐ ܙܲܒ݂ܢܵܐ ܘܪܵܒܵܐ ܟܸܪܝܵܐ: ܕܒܸܬ ܐܵܬܹܐ ܗ̇ܘ ܕܐܵܬܹܐ: ܘܠܹܐ ܥܲܪܩܸܠ. 38 ܐܝܼܢܵܐ ܙܲܕܝܼܩܵܐ ܕܝܼܝܼ ܡ̣ܢ ܗܲܝܡܵܢܘܼܬܵܐ ܒܸܬ ܚܲܝܹܐ: ܘܐܸܢ ܣܵܩܸܕ: ܠܹܐ ܒܵܣܡܵܐ ܠܵܗ̇ ܒܝܼܹܗ ܓܵܢܝܼ. 39 ܐܝܼܢܵܐ ܐܲܚܢܲܢ ܠܹܐ ܝܘܵܚ ܕܣܸܩܕܵܐ ܠܐܲܒ݂ܕܵܢܵܐ: ܐܸܠܵܐ ܕܗܲܝܡܵܢܘܼܬܵܐ ܠܡܲܩܢܵܝܬܵܐ ܕܓܵܢܵܐ.

ܩܦܠܐܘܢ: ܝܐ

1 ܐܝܼܢܵܐ ܗܲܝܡܵܢܘܬܵܐ ܚܵܬܸܪܓ̰ܲܡܥܘܼܬܵܐ ܝܠܵܐ ܥܲܠ ܡܸܢܕܝܼܵܢܹ̈ܐ ܕܝܼܢܵܐ ܒܗܹܒ݂ܝܼ: ܘܨܵܒܸܬܘܼܬܵܐ ܕܐܵܢܝܼ ܕܠܹܐ ܦܵܝܫܝܼ ܚܸܙܝܹܐ. 2 ܣܵܒܵܒ ܒܐܵܗܵܐ ܗ݇ܘܹܠܵܐ ܣܵܗܕܘܼܬܵܐ ܥܲܠ ܐ݇ܢܵܫܹ̈ܐ ܩܵܕܝܼܡܝܼ. 3 ܣܵܒܵܒ ܒܗܲܝܡܵܢܘܼܬܵܐ ܦܲܪܡܘܼܝܹܐ ܝܘܵܚ ܕܦܸܫܠܘܿܢ ܬܘܼܪܨܹܐ ܥܵܠܡܹ̈ܐ ܒܗܹܡܸܙܡܵܢ ܕܐܲܠܵܗܵܐ: ܒܗ̇ܝ ܕܐܲܢܹܐ ܕܦܵܝܫܝܼ ܚܸܙܝܹܐ ܠܵܐ ܗ݇ܘ. ܠܘܿܢ ܡ̣ܢ ܕܐܵܢܝܼ ܕܦܵܝܫܵܐ ܝܢܵܐ ܚܸܙܝܹܐ. 4 ܒܗܲܝܡܵܢܘܼܬܵܐ ܗܵܒܹܝܠ ܡܘܼܩܪܸܒ݂ܠܹܐ ܕܸܒ݂ܚܬܵܐ ܕܪܵܒܵܐ ܒܘܼܫ ܥܸܠܸܠ ܡ̣ܢ ܕܩܵܐܹܝܢ ܠܐܲܠܵܗܵܐ: ܕܒܵܐܗܵܐ ܗ݇ܘܹܠܵܐ ܒܵܗ݇ܣܹܗ ܣܵܗܕܘܼܬܵܐ ܕܙܲܕܝܼܩܵܐ ܗ݇ܘܵܐ: ܘܣܗܸܕܠܹܐ ܥܲܠ ܩܘܼܪܒܵܢܹܗ ܐܲܠܵܗܵܐ: ܘܒܝܼܵܗ̇ ܐܘܼܦ ܟܲܕ ܡܝܼܬܵܐ ܗܲܡܙܘܼܡܹܐ ܝܠܹܐ. 5 ܒܗܲܝܡܵܢܘܼܬܵܐ ܦܸܫܠܹܐ ܫܘܼܢܝܵܐ ܚܢܘܿܟ݂ ܕܡܵܘܬܵܐ ܠܵܐ ܚܵܙܹܐ: ܘܠܵܐ ܦܸܫܠܹܐ ܡܘܼܫ̄ܟ̰ܚܵܐ: ܣܵܒܵܒ ܐܲܠܵܗܵܐ ܫܘܼܢܸܠܹܗ. ܣܵܒܵܒ ܡܩܵܕ݇ܡ ܕܫܵܢܹܐ ܗ݇ܘܵܐ ܠܹܗ: ܗ݇ܘܹܠܵܐ ܒܵܗ݇ܣܹܗ ܣܵܗܕܘܼܬܵܐ ܕܫܦܸܪܹܐ ܠܐܲܠܵܗܵܐ. 6 ܐܝܼܢܵܐ ܕܠܵܐ ܗܲܝܡܵܢܘܼܬܵܐ ܠܹܐ ܡܵܨܹܐ ܐ݇ܢܵܫܵܐ ܕܫܵܦܸܪ (ܠܐܲܠܵܗܵܐ): ܣܵܒܵܒ ܘܵܓ̰ܸܒ ܝܼܠܵܐ ܕܗ̇ܘ ܕܩܲܪܒܸܢ ܠܟܸܣ ܐܲܠܵܗܵܐ ܗܲܡܸܢ ܕܝܼܠܹܐ: ܘܕܠܛܵܥܝܵܢܹ̈ܐ ܐܸܠܹܗ ܟܹܐ ܗܵܘܹܐ ܦܲܪܥܵܢܵܐ. 7 ܒܗܲܝܡܵܢܘܼܬܵܐ ܢܘܿܚ: ܟܲܕ ܦܸܫܠܹܐ ܡܘܼܪܥܸܫܵܐ ܥܲܠ ܕܐܵܢܝܼ ܕܗܹܫ ܠܹܐ ܗ݇ܘܵܘ ܦܝܵܫܵܐ ܚܸܙܝܹܐ: ܙܕܸܥܠܹܐ: ܘܬܘܼܪܸܨܠܹܐ ܩܹܒ݂ܘܼܬܵܐ ܠܚܲܝܹ̈ܐ ܕܒܢܘܼܢܹ̈ܐ ܕܒܲܝܬܹܗ: ܕܒܝܼܵܗ̇ ܥܒܸܕܠܹܐ ܓܘܼܢܵܗܟܵܪ ܠܥܵܠܡܵܐ: ܘܗ݇ܘܹܠܹܐ ܝܵܪܘܿܬܵܐ ܕܙܲܕܝܼܩܘܼܬܵܐ ܕܒܗܲܝܡܵܢܘܼܬܵܐ. 8 ܒܗܲܝܡܵܢܘܼܬܵܐ ܐܲܒ݂ܪܵܗܵܡ: ܟܲܕ ܫܸܫܠܹܐ ܩܸܪܝܵܐ: ܡܘܼܨܝܸܬܠܹܐ ܠܸܦܠܵܛܵܐ ܠܗ̇ܝ ܕܘܼܟܵܐ ܕܗܕܝܼܪܵܐ ܗ݇ܘܵܐ ܠܸܫܩܵܠܵܐ ܝܵܪܬܘܼܬܵܐ: ܘܦܠܸܛܠܹܐ ܟܲܕ ܠܹܐ ܗ݇ܘܵܐ ܒܝܼܕܲܥܝܵܐ ܠܐܲܝܟܵܐ ܒܹܐܙܵܠܵܐ ܗ݇ܘܵܐ. 9 ܒܗܲܝܡܵܢܘܼܬܵܐ ܗ݇ܘܹܠܹܐ ܡܵܫܵܚܲܛ ܠܐܲܪܥܵܐ ܕܩܵܘܠܵܐ: ܐܲܝܟ݂ (ܕܒܲܐܪܥܵܐ) ܢܘܼܟ݂ܪܵܝܬܵܐ: ܘܒܡܲܫܟܢܹ̈ܐ ܥܡܸܪܹܐ ܥܲܡ ܐܝܼܣܚܵܩ ܘܝܲܥܩܘܒ݂: ܝܵܪ̈ܘܿܬܹܐ ܥܲܡܹܗ ܗܲܪ ܕܗ̇ܘ ܩܵܘܠܵܐ. 10 ܣܵܒܵܒ ܕܒܸܣܦܵܪܵܐ ܗ݇ܘܵܐ ܠܡܕܝܼܢ݇ܬܵܐ ܕܒܸܢܝܲܬ ܐܝܼܬ ܠܵܗ̇: ܕܐܘܼܡܵܢܘܼܗ̇ ܘܥܵܒ݂ܘܿܕܘܼܗ̇ ܐܲܠܵܗܵܐ ܝܠܹܐ. 11 ܒܗܲܝܡܵܢܘܼܬܵܐ ܐܘܼܦ ܣܲܪܵܐ ܫܩܸܠܵܐ ܚܲܝܠܵܐ ܕܩܵܒ݁ܠܵܐ ܙܲܪܥܵܐ: ܘܠܵܐ ܒܙܲܒ݂ܢܵܐ ܕܫܸܢܘܼ̈ܗ̇ ܝܠܸܕܠܵܐ: ܣܵܒܵܒ ܚܫܸܒ݂ܠܵܐ ܕܡܗܘܼܡܢܵܐ ܗ݇ܘܵܐ ܗ̇ܘ ܕܩܘܼܘܸܠܹܐ ܐܸܠܵܗ̇. 12 ܣܵܒܵܒ ܕܐܵܗܵܐ ܡ̣ܢ ܚܵܕ݇: ܐܘܼܦ ܗ̇ܘ ܐܲܝܟ݂ ܡܝܼܬܵܐ: ܗ݇ܘܹܠܘܿܢ ܪܵܒܵܐ ܐܲܝܟ݂ ܟܵܘܟ݂ܒܹ̈ܐ ܕܒܫܡܲܝܵܐ ܒܒܘܼܫܵܝܘܼܬܵܐ: ܘܐܲܝܟ݂ ܣܹܠܵܐ ܕܥܲܠ ܣܸܦܬܵܐ ܕܝܵܡܵܐ: ܕܡܸܢܝܵܢܵܐ ܠܲܝܬ ܠܹܗ.

13 ܒܗܲܝܡܵܢܘܼܬܵܐ ܡܸܬܠܘܿܢ ܐܲܢܹܐ ܟܠܵܝ: ܘܠܵܐ ܫܩܸܠܘܿܢ ܩܵܘܠܹ̈ܐ: ܐܸܠܵܐ ܚܸܙܝܵܠܘܿܢ ܡ̣ܢ ܪܸܚܩܵܐ ܘܚܦܝܼܩܵܝܠܘܿܢ: ܘܡܘܼܕܹܠܘܿܢ ܕܢܘܼܟ݂ܪ̈ܵܝܹܐ ܗ݇ܘܵܘ ܘܡܵܫܵܚܲܛܹ̈ܐ ܒܐܲܪܥܵܐ. 14 ܣܵܒܵܒ ܐܵܢܝܼ ܕܐܲܢܹܐ ܐܵܡܪܝܼ: ܒܸܥܒ݂ܵܕܵܐ ܝܢܵܐ ܡܲܥܠܘܼܡ ܕܠܘܵܬܵܢ ܕܓܵܢܵܝ ܒܸܛܲܥܝܵܐ ܝܢܵܐ. 15 ܘܐܸܢ ܠܗ̇ܝ ܕܦܠܸܛܠܘܿܢ ܡܸܢܵܗ̇ ܒܸܕܟ݂ܵܪܵܐ ܗ݇ܘܵܘ: ܐܝܼܬ ܗ݇ܘܵܐ ܠܗ݇ܘܿܢ ܙܲܒ݂ܢܵܐ ܕܡܸܕܪܹܐ ܕܵܝܪܝܼ ܗ݇ܘܵܘ. 16 ܐܝܼܢܵܐ ܐܵܕܝܼܵܐ ܫܲܗ݇ܘܘܼܬܹܐ ܝܢܵܐ ܠܗ̇ܝ ܕܒܘܼܫ ܨܦܵܝܝܼ ܡܸܢܵܗ̇: ܕܝܼܠܵܐ ܫܡܲܝܵܢܵܝܬܵܐ. ܣܵܒܵܒ ܕܐܵܗܵܐ ܠܵܐ ܢܚܸܦܠܹܐ ܐܲܠܵܗܵܐ ܕܦܵܝܸܫ ܩܸܪܝܵܐ ܐܲܠܵܗܵܝ: ܣܵܒܵܒ ܕܗܘܼܕܸܪܹܐ ܐܸܠܵܝ ܡܕܝܼܢ݇ܬܵܐ.

17 ܒܗܲܝܡܵܢܘܼܬܵܐ ܡܘܼܩܪܸܒ݂ܠܹܐ ܐܲܒ݂ܪܵܗܵܡ ܠܐܝܼܣܚܵܩ ܟܲܕ ܦܝܵܫܵܐ ܓ̰ܘܼܪܒܵܐ: ܘܠܝܼܚܕܵܝܹܗ ܡܘܼܐܣܸܩܠܹܐ ܠܡܲܕܒܚܵܐ ܗ̇ܘ ܕܩܘܼܒܠܵܐ ܗ݇ܘܵܐ ܩܵܘ̈ܠܹܐ: 18 ܕܐܸܠܹܗ ܦܝܼܫܵܐ ܗ݇ܘܵܐ ܐܢܝܼܪܵܐ: ܒܐܝܼܣܚܵܩ ܒܸܬ ܦܵܝܸܫ ܩܸܪܝܵܐ ܐܸܠܘܼܟ݂ ܙܲܪܥܵܐ: 19 ܟܲܕ ܚܫܝܼܒ݂ܵܐ ܗ݇ܘܵܐ ܒܓܵܢܹܗ: ܕܡܵܨܹܐ ܐܲܠܵܗܵܐ ܐܘܼܦ ܡ̣ܢ ܡܝܼܬܹ̈ܐ ܠܡܲܩܘܼܡܹܐ: ܕܐܘܼܦ ܡ̣ܢ ܬܵܡܵܐ ܒܡܲܬܠܵܐ ܩܘܼܒܸܠܗ. 20 ܒܗܲܝܡܵܢܘܼܬܵܐ: ܥܲܠ ܡܸܢܕܝܼܵܢܹ̈ܐ ܕܗܕܝܼܪܹܐ ܗ݇ܘܵܘ ܕܗܵܘܝܼ: ܒܘܼܪܸܟ݂ܠܹܐ ܐܝܼܣܚܵܩ ܠܝܲܥܩܘܿܒ݂ ܘܠܥܹܣܘܿ. 21 ܒܗܲܝܡܵܢܘܼܬܵܐ ܝܲܥܩܘܿܒ݂: ܟܲܕ ܒܸܡܝܵܬܵܐ ܗ݇ܘܵܐ: ܒܘܼܪܸܟ݂ܠܹܐ ܠܟܠ ܚܵܕ݇ ܡ̣ܢ ܒܢܘܼܢܹ̈ܐ ܕܝܵܘܣܸܦ: ܘܣܓܸܕܠܹܐ ܥܲܠ ܪܹܫ ܚܘܼܛܪܹܗ. 22 ܒܗܲܝܡܵܢܘܼܬܵܐ ܝܵܘܣܸܦ ܟܲܕ ܒܸܝܵܬܵܐ ܗ݇ܘܵܐ: ܡܘܼܕܟܸܪܹܐ ܠܦܠܵܛܬܵܐ ܕܒܢܲܝ̈ ܝܼܣܪܵܝܹܠ: ܘܦܩܸܕܠܹܐ ܥܲܠ ܓܲܪ̈ܡܘܼܗܝ. 23 ܒܗܲܝܡܵܢܘܼܬܵܐ ܐܲܒ݂ܵܗܹ̈ܐ ܕܡܘܼܫܹܐ: ܟܲܕ ܦܸܫܠܹܐ ܠܝܼܕܵܐ: ܩܲܡ ܛܵܫܝܼ ܠܹܐ ܬܠܵܬ݇ܐ ܝܲܪ̈ܚܹܐ: ܕܚܙܹܠܘܿܢ ܕܫܵܦܝܼܪܵܐ ܗ݇ܘܵܐ ܝܵܠܵܐ: ܘܠܵܐ ܙܕܸܥܠܘܿ ܡ̣ܢ ܦܘܼܩܕܵܢܹܗ ܕܡܲܠܟܵܐ. 24 ܒܗܲܝܡܵܢܘܼܬܵܐ ܡܘܼܫܹܐ: ܟܲܕ ܗ݇ܘܹܠܹܐ ܓܘܼܪܵܐ: ܪܵܙܝܼ ܠܵܐ ܗ݇ܘܹܠܹܐ ܕܦܵܝܸܫ ܗ݇ܘܵܐ ܩܸܪܝܵܐ ܒܪܘܼܢܵܐ ܠܒܪܵܬܵܐ ܕܦܸܪܥܘܿܢ: 25 ܘܓܘܼܒܹܠܹܐ ܠܓܵܢܘܼܗܝ ܕܒܐܘܼܠܨܵܢܵܐ ܥܲܡ ܛܵܝܸܦܵܐ ܕܐܲܠܵܗܵܐ ܗܵܘܹܐ ܗ݇ܘܵܐ: ܘܠܵܐ ܕܙܲܒ݂ܢܵܐ ܙܥܘܿܪܵܐ ܥܵܒܸܕ ܗ݇ܘܵܐ ܒܘܼܣܵܡܵܐ ܒܚܛܝܼܬܵܐ: 26 ܒܸܚܫܵܒ݂ܵܐ ܕܓܘܼܪܬܵܐ ܗ݇ܘܵܐ ܕܵܘܸܠܬܵܐ ܕܠܵܘܡܹܗ ܕܡܫܝܼܚܵܐ ܡ̣ܢ ܚܲܙܝܵܢܹ̈ܐ ܕܡܸܨܪܹܝܢ: ܣܵܒܵܒ ܒܸܚܝܵܪܵܐ ܗ݇ܘܵܐ ܒܦܘܼܪܥܵܢܵܐ ܕܗܵܩܵܐ. 27 ܒܗܲܝܡܵܢܘܼܬܵܐ ܫܒ݂ܝܼܩܵܠܹܐ ܡܸܨܪܹܝܢ: ܘܠܵܐ ܙܕܸܥܠܹܐ ܡ̣ܢ ܚܸܡܬܹܗ ܕܡܲܠܟܵܐ: ܘܚܡܸܠܹܐ: ܐܲܝܟ݂ ܒܸܚܙܵܝܵܐ ܠܗ̇ܘ ܕܠܹܐ ܦܵܝܸܫ ܚܸܙܝܵܐ. 28 ܒܗܲܝܡܵܢܘܼܬܵܐ ܥܒܸܕܠܹܐ ܦܸܨܚܵܐ ܘܡܲܪܝܼܣܬܵܐ ܕܕܸܡܵܐ: ܕܠܵܐ ܕܵܩܸܪ ܗ݇ܘܵܐ ܒܝܼܵܝ ܗ̇ܘ ܕܡܲܚܪܘܼܒܹܐ ܗ݇ܘܵܐ ܠܒܘܼܟ݂ܪܹ̈ܐ. 29 ܒܗܲܝܡܵܢܘܼܬܵܐ ܒܥܸܪܘܿܢ ܝܵܡܵܐ ܕܣܘܿܦ ܐܲܝܟ݂ ܕܥܲܠ ܐܲܪܥܵܐ ܒܵܪܘܿܙܬܵܐ: ܕܒܝܼܵܗ̇ ܓ̰ܘܼܪܸܒܠܘܿܢ ܡܸܨܪ̈ܵܝܹܐ ܘܦܸܫܠܘܿܢ ܒܸܠܥܝܹܐ. 30 ܒܗܲܝܡܵܢܘܼܬܵܐ ܫܘܼܪܹ̈ܐ ܕܐܝܼܪܝܼܚܘܿ ܢܦܸܠܘܿܢ: ܡ̣ܢ ܕܦܸܫܠܘܿܢ ܚܕܝܼܪܹܐ ܫܲܒ݂ܥܵܐ ܝܘܿܡܵܢܹ̈ܐ. 31 ܒܗܲܝܡܵܢܘܼܬܵܐ ܪܵܚܵܒ݂ ܙܵܢܝܼܬܵܐ ܠܵܐ ܬܠܸܩܠܵܐ ܥܲܡ ܕܐܵܢܝܼ ܕܠܵܐ ܡܘܼܨܝܸܬܠܘܿܢ: ܕܩܘܼܒܸܠܵܐ ܠܓ̰ܵܣܘܿܣܹ̈ܐ ܒܫܠܵܡܵܐ. 32 ܡܘܼܕܝܼ ܐܚܹܪ݇ܢܵܐ ܐܵܡܪܸܢ: ܣܵܒܵܒ ܟܸܪܝܵܐ ܝܠܹܐ ܙܲܒ݂ܢܵܐ ܕܗܵܩܸܢ ܥܲܠ ܓܸܕܥܘܿܢ: ܘܒܵܪܵܩ: ܘܫܸܡܫܘܿܢ: ܘܢܲܦ̮ܬܲܚ: ܘܕܵܘܝܼܕ: ܘܫܡܘܼܐܹܝܠ: ܘܢܒ݂̈ܝܼܹܐ: 33 ܕܒܝܼܸܕ ܗܲܝܡܵܢܘܼܬܵܐ ܓ݂ܠܸܒܠܘܿܢ ܠܡܲܠܟܘܵܬܹ̈ܐ: ܘܦܠܸܚܠܘܿܢ ܟܹܐܢܘܼܬܵܐ: ܘܡܛܹܠܘܿܢ ܠܩܵܘ̈ܠܹܐ: ܘܥܟ̰ܸܡܠܘܿܢ ܦܘܼܡܵܐ ܕܐܲܪ̈ܝܹܐ: 34 ܘܡܘܼܟ̰ܡܹܠܘܿܢ ܚܲܝ̈ܠܹܐ ܕܢܘܼܪܵܐ: ܘܦܸܫܠܘܿܢ ܦܘܼܨܝܹܐ ܡ̣ܢ ܦܘܼܡܵܐ ܕܣܲܝܦܵܐ: ܘܦܸܫܠܘܿܢ ܚܘܼܠܸܢܹܐ ܡ̣ܢ ܙܲܒܘܼܢܘܼܝܵܬܹ̈ܐ: ܘܗ݇ܘܹܠܘܿܢ ܚܲܝܠܵܢܹ̈ܐ ܒܦܠܵܫܵܐ: ܘܡܘܼܥܪܸܩܠܘܿܢ ܐܘܼ̈ܕܘܼܝܹܐ ܕܢܘܼܟ݂ܪ̈ܵܝܹܐ: 35 ܘܒܲܟ݂ܬܵܬܹ̈ܐ ܩܘܼܒܸܠܘܿܢ ܡܝܼܬܵܝ̈ ܒܝܼܸܕ ܩܝܵܡܬܵܐ. ܘܐܚܹܪ̈݇ܢܹܐ ܒܓ̰ܘܼܢܓ̰ܵܪܹ̈ܐ ܡܸܬܠܘܿܢ: ܘܠܵܐ ܣܦܸܪܘܿܢ ܠܸܦܝܵܫܵܐ ܦܘܼܨܝܹܐ: ܕܡܵܛܝܼ ܠܩܝܵܡܬܵܐ ܕܒܘܼܫ ܚܩܝܼܪܬܵܐ. 36 ܘܐܚܹܪ̈݇ܢܹܐ ܩܘܼܒܸܠܘܿܢ ܓ̰ܘܼܪܵܒܵܐ ܕܡܲܣܚܲܪ̈ܝܵܬܹܐ ܘܡܚܵܝܵܬܹ̈ܐ: ܘܐܘܼܦ ܕܝܼܣܘܼܪܹ̈ܐ ܘܕܚܒ݂ܘܼܫܝܹ̈ܐ. 37 ܦܸܫܠܘܿܢ ܪܓ̰ܝܼܡܹܐ: ܦܸܫܠܘܿܢ ܢܣܝܼܪܹܐ: ܦܸܫܠܘܿܢ ܓ̰ܘܼܪܒܹܐ: ܒܦܘܼܡܵܐ ܕܣܲܝܦܵܐ ܡܸܬܠܘܿܢ: ܚܕܸܪܘܿܢ ܟܲܕ ܠܒ݂ܝܼܫܹܐ ܓܸܠܕܗܹܐ ܕܦܹܪܹ̈ܐ ܘܕܥܸܙܹ̈ܐ: ܘܣܢܝܼܩܹ̈ܐ: ܘܡܘܼܠܝܸܨܹ̈ܐ: ܘܓ̰ܘܼܢܓ̰ܵܪܹ̈ܐ: 38 ܐܵܢܝܼ ܕܠܹܐ ܚܵܫܸܚ ܗ݇ܘܵܐ ܐܸܠܵܝ ܥܵܠܡܵܐ: ܚܠܝܼܛܹ̈ܐ ܒܒܲܪܝܼܵܐ ܘܒܛܘܼܪܹ̈ܐ ܘܒܓܸܦܝܼܵܬܹ̈ܐ ܘܒܟ̰ܸܠܦܵܦܹ̈ܐ ܕܐܲܪܥܵܐ. 39 ܘܐܲܢܹܐ ܟܠܵܝ: ܕܗ݇ܘܹܠܵܐ ܥܲܠܵܝ ܣܵܗܕܘܼܬܵܐ ܒܝܼܸܕ ܗܲܝܡܵܢܘܼܬܵܝ: ܠܵܐ ܩܘܼܒܸܠܘܿܢ ܩܵܘܠܵܐ: 40 ܣܵܒܵܒ ܐܲܠܵܗܵܐ ܩܵܕ݇ܡܵܝܬܵܐ ܚܸܪܹܐ ܒܚܵܝܪ ܕܝܼܲܢ: ܕܒܹܐ ܕܝܼܲܢ ܐܵܢܝܼ ܠܵܐ ܦܵܝܫܝܼ ܡܘܼܟܡܸܠܹܐ.

ܩܦܠܐܘܢ: ܝܒ

1 ܣܵܒܵܒ ܕܐܵܗܵܐ ܐܘܼܦ ܐܲܚܢܲܢ: ܕܐܝܼܬ ܠܲܢ ܗܲܕܟ݂ܵܐ ܥܢܵܢܵܐ ܓܘܼܪܬܵܐ ܕܣܵܗܕܹ̈ܐ ܚܵܕܸܪ̈ܘܵܢܲܢ: ܫܵܪܵܚ ܡܸܢܲܢ ܟܠܵܝ ܝܘܼܩܪܹ̈ܐ: ܐܘܼܦ ܚܛܝܼܬܵܐ ܕܒܟܠ ܙܲܒ݂ܢܵܐ ܚܲܪܘܕܘܼܝܲܢ ܝܼܠܵܐ: ܘܒܚܡܵܠܬܵܐ ܪܵܚܛܵܚ ܠܐܵܗܵܐ ܐܵܓ݂ܘܿܢܵܐܕܡܘܼܬܒ݂ܵܐ ܝܠܹܐ ܩܵܕ݇ܡܲܢ: 2 ܘܚܵܪܵܚ ܒܝܼܫܘܿܥ: ܪܹܫܵܐ ܕܡܲܟܡܸܠܵܢܵܐ ܕܗܲܝܡܵܢܘܼܬܲܢ: ܕܡܒܵܕܵܠ ܕܚܲܕܘܼܬܵܐ ܕܡܘܼܬܸܒ݂ܬܵܐ ܗ݇ܘܵܐ ܩܵܕ݇ܡܘܼܗܝ ܩܘܼܒܸܠܹܐ ܙܩܝܼܦܵܐ: ܟܲܕ ܡܲܣܠܘܼܝܹܐ ܠܢܚܸܦܬܵܐ: ܘܝܬܸܒ݂ܠܹܐ ܥܲܠ ܝܲܡܝܼܢܵܐ ܕܬܪܘܿܢܘܿܣ ܕܐܲܠܵܗܵܐ. 3 ܒܲܣ ܚܙܹܡܘܿܢܟܡܵܐ ܩܘܼܒܸܠܹܐ ܡ̣ܢ ܚܲܛܵܝܹ̈ܐ: ܐܵܢܝܼ ܕܗ݇ܘܹܠܘܿܢ ܕܲܪܩܘܼܒ݂ܠ ܕܓܵܢ[ܝ: ܕܠܵܐ ܣܵܩܕܝܼܬܘܿܢ ܘܠܵܐ ܦܵܝܫܵܐ ܪܦܝܼܬܵܐ ܓܵܢܵܘܟ݂ܘܿܢ.

ܗܹܫ ܠܵܐ ܡܛܹܠܵܘܟ݂ܘܿܢ ܗܲܠ ܕܸܡܵܐ ܒܐܵܓ݂ܘܿܢܵܐ ܕܕܲܪܩܘܼܒ݂ܠ ܕܚܛܝܼܬܵܐ. 5 ܘܢܫܸܠܵܘܟ݂ܘܿܢ ܠܢܲܨܝܼܥܲܬ: ܗ̇ܝ ܕܐܲܝܟ݂ ܕܠܒܢܘܼܢܹ̈ܐ ܐܡܸܪܵܐ ܐܸܠܵܘܟ݂ܘܿܢ: ܒܪܘܼܢܝܼ: ܠܵܐ ܡܲܣܠܸܬ ܬܲܥܠܲܡܬܹܗ ܕܡܵܪܝܵܐ: ܘܠܵܐ ܣܵܩܕܸܬ ܐܝܼܡܲܢ ܕܦܵܝܫܸܬ ܡܘܼܢܟܸܣܵܐ ܡܸܢܹܗ: 6 ܣܵܒܵܒ ܡ̇ܢ ܕܡܲܚܸܒ ܠܹܗ ܡܵܪܝܵܐ: ܟܹܐ ܬܲܥܠܸܡ ܠܹܗ: ܘܟܹܐ ܓ̰ܲܢܓ̰ܸܪ ܠܟܠ ܒܪܘܼܢܵܐ ܕܗ̇ܘ ܩܵܒܸ݁ܠ. 7 ܒܲܣ ܩܵܒ݁ܠܘܿܢ ܬܲܥܠܲܡܬܵܐ: ܐܲܝܟ݂ ܕܠܟܸܣ ܒܢܘܿܢܹ̈ܐ ܒܸܦܠܵܚܵܐ ܝܠܹܐ ܠܟܸܣܠܵܘܟ݂ܘܿܢ ܐܲܠܵܗܵܐ: ܣܵܒܵܒ ܐܲܝܢܝܼ ܝܠܹܐ ܒܪܘܼܢܵܐ ܕܠܵܐ ܬܲܥܠܸܡ ܠܹܗ ܒܵܒܹܗ: 8 ܘܐܸܢ ܕܠܵܐ ܬܲܥܠܲܡܬܵܐ ܝܬܘܿܢ: ܗ̇ܝ ܕܒܝܼܵܗ̇ ܗ݇ܘܹܠܘܿܢ ܫܵܪ̈ܝܼܟܹܐ ܟܠܵܝ: ܒܲܣ ܒܝܼ̈ܟ̰ܹܐ ܝܬܘܿܢ ܘܠܵܐ ܒܢܘܼܢܹ̈ܐ. 9 ܘܐܚܹܪ݇ܢܵܐ: ܐܝܼܬ ܗ݇ܘܵܘ ܠܲܢ ܒܵܒܵܘܵܬܹ̈ܐ ܕܒܸܣܪܵܐ ܬܲܥܠܡܵܢܹ̈ܐ: ܘܟܹܐ ܢܵܚܦܵܚ ܗ݇ܘܵܘ ܡܸܢܵܝ: ܒܲܣ ܟܡܵܐ ܒܘܼܫ ܘܵܓ̰ܸܒ ܝܼܠܵܐ ܕܦܵܝܫܵܚ ܙܲܒܛ ܠܒܵܒܵܐ ܕܪ̈ܘܼܚܵܬܹܐ ܘܚܲܝܵܚ: 10 ܣܵܒܵܒ ܐܵܢܝܼ ܠܚܲܟ̰ܵܐ ܝܘܿܡܵܢܹ̈ܐ: ܐܲܝܟ݂ ܕܒܵܣܡܵܐ ܗ݇ܘܵܐ ܠܗ݇ܘܿܢ: ܟܹܐ ܥܲܥܠܡܝܼ ܗ݇ܘܵܘ ܠܲܢ: ܐܝܼܢܵܐ ܗ̇ܘ ܠܚܵܝܪܲܢ: ܕܫܲܪܸܟܵܚ ܒܩܲܕܝܼܫܘܼܬܹܗ. 11 ܟܠ ܬܲܥܠܲܡܬܵܐ ܒܙܲܒܢܘܼܗ̇ ܠܹܐ ܦܵܝܫܵܐ ܚܫܝܼܒ݂ܬܵܐ ܕܕܚܲܕܘܼܬܵܐ ܝܠܵܐ ܐܸܠܵܐ ܕܦܵܫܲܡܬܵܐ. ܐܝܼܢܵܐ ܒܚܲܪܬܵܐ ܛܥܘܼܢܝܵܬܹ̈ܐ ܕܫܠܵܡܵܐ ܘܕܙܲܕܝܼܩܘܼܬܵܐ ܟܹܐ ܝܵܗ݇ܒ݂ܵܐ ܠܐܵܢܝܼ ܕܒܝܼܵܗ̇ ܦܵܝܫܝܼ ܬܘܼܥܠܡܹܐ. 12 ܣܵܒܵܒ ܕܐܵܗܵܐ ܐܝܼܕܵܬܵܘ̈ܟ݂ܘܿܢ ܫܘܼܢܫܸܠܹ̈ܐ ܘܒܘܼܪ̈ܟܵܟܵܘܟ݂ܘܿܢ ܪ̈ܵܥܠܵܢܹܐ ܡܲܩܘܹܡܘܿܢ: 13 ܘܓ̰ܵܕܵܘܵܬܹ̈ܐ ܬܪ̈ܘܼܨܹܐ ܥܒ݂ܘܿܕܘܿܢ ܠܐܲܩܠܵܘ̈ܟ݂ܘܿܢ: ܕܗ̇ܘ ܕܝܼܠܹܐ ܣܲܩܲܬ ܠܵܐ ܩܵܠܸܒ̇: ܐܸܠܵܐ ܦܵܝܸܫ ܒܘܼܣܡܵܐ.

14 ܪܚܘܿܛܘܿܢ ܒܵܬ݇ܪ ܫܠܵܡܵܐ ܥܲܡ ܟܠ ܐ݇ܢܵܫܵܐ: ܘܒܵܬ݇ܪ ܩܲܕܝܼܫܘܼܬܵܐ ܕܒܹܐ ܕܝܼܗ̇ ܐ݇ܢܵܫܵܐ ܠܡܵܪܲܢ ܠܹܐ ܚܵܙܹܐ. 15 ܘܗܵܘܝܼܬܘܿܢ ܗܸܫܝܵܪ ܠܵܐ ܗ݇ܘܹܐ ܕܐ݇ܢܵܫܵܐ ܚܵܣܸܪ ܡ̣ܢ ܫܵܦܵܩܲܬ ܕܐܲܠܵܗܵܐ: ܝܲܢ ܠܵܐ ܗ݇ܘܹܐ ܕܥܸܩܪܵܐ ܕܡܪܵܪܹ̈ܐ ܡܲܓ̰ܝܸܢ ܘܚܲܙܕܸܓ ܠܵܘܟ݂ܘܿܢ: ܘܒܝܼܹܗ ܪܵܒܵܐ ܦܵܝܫܝܼ ܟ̰ܘܼܦܠܸܢܹܐ. 16 ܝܲܢ ܠܵܐ ܗ݇ܘܹܐ ܕܗܵܘܹܐ ܐ݇ܢܵܫܵܐ ܓܵܘܵܘܟ݂ܘܿܢ ܕܙܲܢܵܝܵܐ ܘܟܵܦܘܿܪܵܐ: ܐܲܝܟ݂ ܥܹܣܘܿ: ܕܒܚܕܵܐ ܡܹܐܟ݂ܘܼܠܬܵܐ ܙܘܼܒ݁ܢܵܠܹܐ ܒܘܼܟ݂ܪܘܼܬܹܗ: 17 ܣܵܒܵܒ ܒܝܼܕܲܥܝܵܐ ܝܬܘܿܢ ܕܐܘܼܦ ܒܵܬ݇ܪ ܗܵܕܹܐ ܒܸܥܠܹܐ ܕܝܵܪܸܬ ܗ݇ܘܵܐ ܒܘܼܪܟܬܵܐ: ܘܦܸܫܠܹܐ ܡܘܼܣܠܝܼܵܐ: ܣܵܒܵܒ ܕܘܼܟܵܐ ܠܬܝܵܒ݂ܘܼܬܵܐ ܠܵܐ ܡܘܼܫ̈ܟ̰ܸܚܠܹܐ: ܐܵܦܸܢ ܕܒܕܸܡܥܹ̈ܐ ܒܸܥܝܵܠܹܐ.

18 ܣܵܒܵܒ ܠܵܐ ܐܬܹܠܵܘܟ݂ܘܿܢ ܩܘܼܪܒܵܐ ܠܛܘܼܪܵܐ ܕܦܵܝܸܫ ܕܩܝܼܪܵܐ ܘܕܒܸܩܝܵܕܵܐ ܒܢܘܼܪܵܐ: ܐܘܼܦ ܠܵܐ ܠܚܘܼܒ݂ܝܵܐ: ܘܠܚܸܫܟܵܐ: ܘܠܒܘܼܪܵܐ: ܘܠܵܐ ܠܩܵܠܵܐ ܕܩܵܪܢܵܐ: ܘܠܩܵܠܵܐ ܕܗܹܡܸܙܡܵܢܹ̈ܐ: ܗ̇ܘ ܕܐܵܢܝܼ ܕܫܡܸܥܠܘܿܢ ܐܸܠܹܗ ܦܘܼܪܦܸܠܘܿܢ ܕܐܚܹܪ݇ܢܵܐ ܠܵܐ ܦܵܝܸܫ ܗܘܼܡܙܸܡܵܐ ܥܲܡܵܝ: 20 ܣܵܒܵܒ ܠܹܐ ܡܵܨܝܼ ܗ݇ܘܵܘ ܠܩܵܒܘܿܠܹܐ ܡܸܢܕܝܼ ܕܦܸܫܠܹܐ ܦܩܝܼܕܵܐ: ܕܐܘܼܦ ܐܸܢ ܗܲܝܘܵܢ ܕܵܩܪܵܐ ܗ݇ܘܵܐ ܠܛܘܼܪܵܐ: ܦܵܝܫܵܐ ܗ݇ܘܵܐ ܪܓ̰ܝܼܡܬܵܐ. 21 ܘܗܲܕܟ݂ܵܐ ܣܲܗܡܵܢܵܐ ܗ݇ܘܵܐ ܚܸܙܘܵܐ: ܕܡܘܼܫܹܐ ܐܡܸܪܹܐ: ܪܵܒܵܐ ܒܸܙܕܲܥܝܵܐ ܝܘܸܢ ܘܪܲܬܪܘܼܬܹܐ ܝܘܸܢ. 22 ܐܝܼܢܵܐ ܐܲܚܬܘܿܢ ܐܬܝܼܹܐ ܝܬܘܿܢ ܩܘܼܪܒܵܐ ܠܛܘܼܪܵܐ ܕܨܸܗܝܘܿܢ: ܘܠܡܕܝܼܢ݇ܬܵܐ ܕܐܲܠܵܗܵܐ ܚܲܝܵܐ: ܠܐܘܿܪܸܫܠܸܡ ܕܒܫܡܲܝܵܐ: ܘܠܪܸ̈ܒܘܵܬܵܐ ܕܡܲܠܲܐܟ݂ܹ̈ܐ: 23 ܘܠܟܸܢܫܵܐ ܟܠܵܢܵܝܵܐ ܘܥܹܕܬܵܐ ܕܒܘܼܟ݂ܪܹ̈ܐ ܕܦܵܝܫܵܐ ܝܢܵܐ ܟܬܝܼܒ݂ܹܐ ܒܫܡܲܝܵܐ: ܘܠܐܲܠܵܗܵܐ ܕܲܝܵܢܵܐ ܕܟܠ: ܘܠܪ̈ܘܼܚܵܬܹܐ ܕܟܹܐܢܹ̈ܐ ܥܒ݂ܝܼܕܹܐ ܟܵܡܝܼܠ: 24 ܘܠܝܼܫܘܿܥ ܢܵܘܸܢܓ̰ܝܼ ܕܕܝܵܬܹܩܹܐ ܚܲܕܬܵܐ: ܘܠܕܸܡܵܐ ܕܡܲܪܝܼܣܬܵܐ ܕܗܲܡܙܘܼܡܹܐ ܝܠܹܐ ܒܘܼܫ ܨܦܵܝܝܼ ܡܗ̇ܘ ܕܗܵܒܹܝܠ. 25 ܗ݇ܘܹܡܘܿܢ ܗܸܫܝܵܪ ܕܠܵܐ ܕܡܲܚܦܸܠܝܼܬܘܿܢ ܡܗ̇ܘ ܕܗܲܡܙܘܼܡܹܐ ܝܠܹܐ. ܣܵܒܵܒ ܐܸܢ ܐܵܢܝܼ ܠܵܐ ܦܸܫܠܘܿܢ ܦܘܼܨܝܹܐ ܟܲܕ ܡܘܼܚܦܸܠܘܿܢ ܡܗ̇ܘ ܕܗܘܼܡܙܸܡܠܹܐ ܒܐܲܪܥܵܐ: ܟܡܵܐ ܙܵܘܕܵܐ ܐܲܚܢܲܢ: ܐܸܢ ܡܲܚܦܸܠܵܚ ܡܗ̇ܘ ܕܗܘܼܡܙܸܡܠܹܐ ܥܲܡܲܢ ܡ̣ܢ ܫܡܲܝܵܐ: 26 ܗ̇ܘ ܕܩܵܠܹܗ ܗ̇ܝܓܵܗ ܠܐܲܪܥܵܐ ܡܘܼܫܥܸܫܠܹܐ: ܐܝܼܢܵܐ ܐܵܕܝܼܵܐ ܩܘܼܘܸܠܵܐ ܝܠܹܐ: ܒܹܐܡܵܪܵܐ: ܡܸܕܪܹܐ ܚܕܵܐ ܓܵܗܵܐ ܐܵܢܵܐ ܒܸܬ ܡܲܫܥܸܫܸܢ: ܠܵܐ ܠܐܲܪܥܵܐ ܗܲܪ: ܐܸܠܵܐ ܐܘܼܦ ܠܫܡܲܝܵܐ. 27 ܐܝܼܢܵܐ ܐܵܗܵܐ ܕܐܡܸܪܹܐ: ܡܸܕܪܹܐ ܚܕܵܐ ܓܵܗܵܐ: ܡܲܕܘܼܥܝܹܐ ܝܠܵܐ ܫܲܚܠܲܦܬܵܐ ܕܐܵܢܝܼ ܕܦܵܝܫܵܐ ܝܢܵܐ ܫܥܝܼܫܹܐ: ܕܡܸܢܕܝܼܵܢܹ̈ܐ ܕܥܒ݂ܝܼܕܹܐ ܝܢܵܐ: ܕܥܲܪܩܸܠܝܼ ܐܵܢܝܼ ܕܠܹܐ ܦܵܝܫܝܼ ܫܥܝܼܫܹܐ. 28 ܒܲܣ ܟܲܕ ܩܘܼܒܸܠܲܢ ܡܲܠܟܘܼܬܵܐ ܕܠܹܐ ܦܵܝܫܵܐ ܫܥܝܼܫܬܵܐ: ܕܵܒ݂ܩܵܚ ܫܵܦܵܩܲܬ ܕܒܝܼܵܗ̇ ܥܵܒ݂ܕܵܚ ܚܸܠܡܲܬ ܘܫܵܦܪܵܚ ܠܐܲܠܵܗܵܐ: ܒܢܟ݂ܸܦܬܵܐ ܘܒܙܕܘܼܥܬܵܐ. 29 ܣܵܒܵܒ ܐܲܠܵܗܲܢ ܢܘܼܪܵܐ ܐܵܟ݂ܘܿܠܵܐ ܝܠܹܐ.

ܩܦܠܐܘܢ: ܝܓ

1 ܚܘܼܒܵܐ ܕܐܵܚܘܿܢܘܵܬܹ̈ܐ ܥܲܪܩܸܠ (ܓܵܘܵܘܟ݂ܘܿܢ). 2 ܘܡܵܘܗܘܼܒܲܬ ܕܠܟܸܣ ܢܘܼܟ݂ܪ̈ܵܝܹܐ ܠܵܐ ܢܵܫܝܼܬܘܿܢ: ܣܵܒܵܒ ܒܐܵܗܵܐ ܐ݇ܢܵܫܹ̈ܐ ܟܲܕ ܠܵܐ ܚܒ݁ܝܼܪܹܐ ܩܘܼܒܸܠܘܿܢ ܠܡܲܠܲܐܟ݂ܹ̈ܐ. 3 ܕܟ݂ܘܿܪܘܿܢ ܠܐܵܢܝܼ ܕܝܼܢܵܐ ܐܣܝܼܪܹܐ: ܐܲܝܟ݂ ܕܥܲܡܵܝ ܐܣܝܼܪܹܐ ܝܬܘܿܢ: ܠܐܵܢܝܼ ܕܝܼܢܵܐ ܡܘܼܠܝܼܸܨܹܐ: ܐܲܝܟ݂ ܕܐܘܼܦ ܐܲܚܬܘܿܢ ܒܦܲܓ݂ܪܵܐ ܝܬܘܿܢ. 4 ܡܝܘܼܩܪܵܐ ܝܠܹܐ ܓܒ݂ܵܪܵܐ ܒܟܠ: ܘܫܘܝܼܬܵܝ ܕܟ݂ܝܼܬܵܐ ܝܠܵܐ. ܐܝܼܢܵܐ ܠܙܲܢܵܝܹ̈ܐ ܘܠܩܲܗܒܹ̈ܐ ܐܲܠܵܗܵܐ ܒܸܬ ܕܵܝܼܸܢ. 5 ܠܵܐ ܗܵܘܹܐ ܡܲܚܸܒܵܢܵܐ ܕܙܘܼܙܵܐ ܚܝܼܵܠܵܘܟ݂ܘܿܢ: ܡܵܠܹܐ ܠܵܘܟ݂ܘܿܢ ܡܸܢܕܝܼ ܕܐܝܼܬ ܠܵܘܟ݂ܘܿܢ: ܣܵܒܵܒ ܕܒܓܵܢܹܗ ܐܡܝܼܪܵܐ ܝܠܹܐ: ܠܹܐ ܫܵܒ݂ܩܸܢܘܿܟ݂: ܘܗܲܪ ܪܲܦܸܢ ܐܝܼܕܵܐ ܡܸܢܘܼܟ݂. 6 ܗܲܕܟ݂ܵܐ ܐܝܼܬ ܠܲܢ ܕܐܵܡܪܵܚ ܒܚܘܵܪܦܵܬܘܼܬܵܐ: ܡܵܪܝܼ ܗܲܝܸܪܵܢܝܼ ܝܠܹܐ ܠܹܐ ܙܵܕܥܸܢ: ܡܘܼܕܝܼ ܥܵܒܸܕ ܠܝܼ ܒܲܪܢܵܫܵܐ:

7 ܕܟ݂ܘܿܪܘܿܢ ܠܬܲܓܒܸܪ̈ܵܢܵܘܟ݂ܘܿܢ: ܐܵܢܝܼ ܕܗܘܼܡܙܸܡܠܘܿܢ ܥܲܡܵܘܟ݂ܘܿܢ ܗܹܡܸܙܡܵܢ ܕܐܲܠܵܗܵܐ: ܦܵܟܪܘܿܢ ܒܬܝܵܡܵܐ ܕܕܘܼܒܵܪ̈ܝ ܘܦܘܼܫܘܿܢ ܕܘܼܡܝܹܐ ܒܗܲܝܡܵܢܘܼܬܵܝ. 8 ܝܼܫܘܿܥ ܡܫܝܼܚܵܐ: ܐܸܬܡܲܠ ܘܐܸܕܝܘܿ ܗܲܪ ܗ̇ܘ ܝܼܠܹܐ: ܘܗܲܠ ܥܵܠܲܡ. 9 ܠܝܘܼܠܦܵܢܹ̈ܐ ܢܘܼܟ݂ܪ̈ܵܝܹܐ ܘܬܵܗܵܪܹ̈ܐ ܬܵܗܵܪܹ̈ܐ ܠܵܐ ܦܵܝܫܝܼܬܘܿܢ ܠܘܼܒܠܹܐ: ܣܵܒܵܒ ܫܵܦܝܼܪܬܵܐ ܝܠܵܐ ܕܒܫܵܦܵܩܲܬ ܡܲܩܘܵܚ ܠܸܒܵܘ̈ܬܲܢ: ܠܵܐ ܒܡܹܐܟ݂ܘܼܠܝܵܬܹ̈ܐ ܕܠܵܐ ܦܸܫܠܘܿܢ ܗܘܼܝܸܪܹܐ ܐܵܢܝܼ ܕܚܕܸܪܘܿܢ ܒܝܼܵܝ. 10 ܐܝܼܬ ܠܲܢ ܡܲܕܒܚܵܐ ܕܠܲܝܬ ܠܗ݇ܘܿܢ ܕܲܣܬܘܼܪ ܠܹܐܟ݂ܵܠܵܐ ܡܸܢܹܗ ܐܵܢܝܼ ܕܥܵܒ݂ܕܝܼ ܚܸܠܡܲܬ ܒܡܵܫܸܟܢܵܐ. 11 ܣܵܒܵܒ ܐܵܢܝܼ ܗܲܝܘܵܢܹ̈ܐ ܕܡܲܐܘܸܪ ܗ݇ܘܵܐ ܕܸܡܵܝ ܓܘܼܪܵܐ ܕܟܵܗܢܹ̈ܐ ܠܒܹܝܬ ܩܘܼܕܫܵܐ ܡܒܵܕܵܠ ܕܚܛܝܼܵܬܹ̈ܐ: ܦܲܓ݂ܪ̈ܝ ܟܹܐ ܦܵܝܫܝܼ ܗ݇ܘܵܘ ܡܘܼܩܕܹܐ ܠܒܲܕܲܪ ܡ̣ܢ ܐܘܼܪܕܘܼܝ. 12 ܣܵܒܵܒ ܕܐܵܗܵܐ ܐܘܼܦ ܝܼܫܘܿܥ: ܕܩܵܕܸܫ ܗ݇ܘܵܐ ܠܛܵܝܸܦ݂ܗ ܒܕܸܡܹܗ: ܠܒܲܕܲܪ ܡ̣ܢ ܕܲܪܘܵܙܵܐ ܩܘܼܒܸܠܹܐ ܚܲܫܵܐ. 13 ܗܲܕܟ݂ܵܐ ܐܘܼܦ ܐܲܚܢܲܢ ܦܵܠܛܵܚ ܠܟܸܣܠܹܗ ܠܒܲܕܲܪ ܡ̣ܢ ܐܘܼܪܕܘܼܝ: ܟܲܕ ܛܵܥܢܵܚ ܠܵܘܡܹܗ. 14 ܣܵܒܵܒ ܠܲܝܬ ܠܲܢ ܡܕܝܼܢ݇ܬܵܐ ܦܵܝܫܵܢܬܵܐ ܠܲܐܟ݂ܵܐ: ܐܸܠܵܐ ܠܗ̇ܝ ܕܝܼܠܵܐ ܗܕܝܼܪܬܵܐ ܕܗܵܘܝܵܐ ܒܸܛܲܥܝܵܐ ܝܘܵܚ. 15 ܒܲܣ ܒܐܝܼܕܹܗ ܡܵܐܣܩܵܚ ܕܸܒ݂ܚܵܐ ܕܬܸܫܒܘܿܚܬܵܐ ܒܟܠ ܙܲܒ݂ܢܵܐ ܠܐܲܠܵܗܵܐ: ܕܝܼܠܵܐ: ܛܥܘܼܢܬܵܐ ܕܣܸܦܘܵܬܹ̈ܐ ܕܡܵܘܕܘܿܝܹܐ ܝܢܵܐ ܠܫܸܡܹܗ. 16 ܘܠܵܐ ܢܵܫܝܼܬܘܿܢ ܡܪܲܚܡܵܢܘܼܬܵܐ ܘܫܵܪܝܼܟܘܼܬܵܐ: ܣܵܒܵܒ ܕܒܲܐܢܹܐ ܕܸܒ݂ܚܹ̈ܐ ܟܹܐ ܫܵܦܸܪ ܐ݇ܢܵܫܵܐ ܠܐܲܠܵܗܵܐ. 17 ܡܲܨܝܸܬܘܿܢ ܠܬܲܓܒܸܪ̈ܵܢܵܘܟ݂ܘܿܢ: ܘܫܡܸܥܡܘܿܢ ܠܗ݇ܘܿܢ: ܣܵܒܵܒ ܐܵܢܝܼ ܟܹܐ ܥܵܒ݂ܕܝܼ ܫܵܗܲܪܬܵܐ ܒܚܵܬܸܪ ܕܓܵܢܵܬܵܘ̈ܟ݂ܘܿܢ: ܐܲܝܟ݂ ܐ݇ܢܵܫܗܹܐ ܕܝܵܗ݇ܒ݂ܝܼ ܚܸܫܒܘܼܢܵܐ: ܕܒܚܲܕܘܼܬܵܐ ܗܵܘܝܼ ܒܸܥܒ݂ܵܕܵܐ ܐܵܗܵܐ: ܘܠܵܐ ܒܬܵܢܲܚܝܵܬܹ̈ܐ: ܣܵܒܵܒ ܐܵܗܵܐ ܠܹܐ ܝܠܵܐ ܡܵܪܹܐ ܦܲܝܕܵܐ ܐܸܠܵܘܟ݂ܘܿܢ.

18 ܨܵܠܹܡܘܿܢ ܡܒܵܕܵܠ ܕܝܼܲܢ: ܣܵܒܵܒ ܕܚܵܬܸܪܓ̰ܡܲܥ ܝܼܘܵܚ ܕܐܸܢܝܲܬ ܛܵܒ݂ܬܵܐ ܐܝܼܬ ܠܲܢ: ܕܒܟܠ ܡܸܢܕܝܼ ܒܸܒܲܥܝܵܐ ܝܘܵܚ ܕܨܦܵܝܝܼ ܬܲܓܒܸܪܵܚ ܓܵܢܲܢ. 19 ܙܵܘܕܵܐ ܙܵܘܕܵܐ ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ ܕܥܵܒ݂ܕܝܼܬܘܿܢ ܐܵܗܵܐ: ܕܒܘܼܫ ܓ̰ܲܠܕܹܐ ܦܵܝܫܸܢ ܡܘܼܕܸܪܵܐ ܠܟܸܣܠܵܘܟ݂ܘܿܢ.

20 ܘܐܲܠܵܗܵܐ ܕܫܠܵܡܵܐ: ܗ̇ܘ ܕܡܘܼܐܣܸܩܠܹܐ ܡ̣ܢ ܡܝܼܬܹ̈ܐ ܠܪܵܥܝܵܐ ܓܘܼܪܵܐ ܕܡܲܪܥܝܼܬܵܐ: ܒܕܸܡܵܐ ܕܕܝܵܬܹܩܹܐ ܕܠܥܵܠܲܡ: ܕܝܼܠܹܐ ܝܼܫܘܿܥ ܡܵܪܲܢ: 21 ܗ̇ܘ ܡܲܟܡܸܠܵܘܟ݂ܘܿܢ ܒܟܠ ܦܘܼܠܚܵܢܵܐ ܛܵܒ݂ܵܐ ܕܥܵܒ݂ܕܝܼܬܘܿܢ ܪܸܙܵܝܹܗ: ܘܗ̇ܘ ܦܵܠܸܚ ܒܝܼܲܢ ܡܸܢܕܝܼ ܕܫܵܦܸܪ ܩܵܕ݇ܡܘܼܗܝ ܒܝܼܸܕ ܝܼܫܘܿܥ ܡܫܝܼܚܵܐ: ܕܐܸܠܹܗ ܚܸܩܪܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ.

22 ܐܝܼܢܵܐ ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ: ܐܵܚܘܿܢܘܵܬܝܼ̈: ܩܵܒܠܘܿܢ ܗܹܡܸܙܡܵܢ ܕܢܲܨܝܼܗܲܬ: ܣܵܒܵܒ ܒܚܲܟ̰ܵܐ ܗܹܡܸܙܡܵܢܹ̈ܐ ܟܬܸܒ݂ܠܝܼ ܐܸܠܵܘܟ݂ܘܿܢ. 23 ܐܝܼܢܵܐ ܝܕܸܥܡܘܿܢ ܕܐܵܚܘܿܢܲܢ ܛܝܼܡܵܬܹܐܘܿܣ ܦܸܫܠܹܐ ܫܸܪܝܵܐ: ܘܐܸܢ ܓ̰ܲܠܕܹܐ ܐܵܬܹܐ: ܥܲܡܹܗ ܒܸܬ ܚܵܙܹܢܵܘܟ݂ܘܿܢ.

24 ܗܲܒ݇ܠܘܿܢ ܫܠܵܡܵܐ ܠܟܠܵܝ ܬܲܓܒܸܪ̈ܵܢܵܘܟ݂ܘܿܢ: ܘܠܟܠܵܝ ܩܲܕܝܼܫܹ̈ܐ. ܒܝܼܵܗ݇ܒ݂ܵܐ ܝܢܵܐ ܫܠܵܡܵܐ ܐܸܠܵܘܟ݂ܘܿܢ ܐܵܢܝܼ ܕܡ̣ܢ ܐܝܼܛܵܠܝܼܵܐ.

25 ܫܵܦܲܩܲܬ ܥܲܡ ܟܠܵܘܟ݂ܘܿܢ: ܐܵܡܹܝܢ.