ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܦܘܠܘܣ ܫܠܝܚܐ ܕܠܘܬ ܛܛܘܣ

ܩܦܠܐܘܢ: ܐ

1 ܦܵܘܠܘܣ: ܪܹܓܹܗ ܕܐܲܠܗܵܐ: ܘܫܠܝܼܚܹܗ ܕܝܼܫܘܿܥ ܡܫܝܼܚܵܐ: ܒܗܲܝܡܵܢܘܼܬܵܐ ܕܓܘܼܒ̈ܝܹ̈ܐ ܕܐܲܠܵܗܵܐ ܘܝܕܹܥܬܵܐ ܕܣܲܪ̈ܣܬܘܼܬܵܐ ܕܒܕܸܚܠܲܬ ܐܲܠܵܗܵܐ:  2 ܥܲܠ ܣܲܒ݂ܪܵܐ ܕܚܲܝܹ̈ܐ ܕܠܵܐܒܵܕ: ܕܩܘܼܘܸܠܹܐ ܐܲܠܵܗܵܐ: ܕܠܹܐ ܕܵܓܸܠ: ܩܵܕ݇ܡ ܙܲܒ݂ܢܹ̈ܐ ܕܥܵܠܡܵܐ:  3 ܘܕܸܠܝܵܠܹܐ ܗܹܡܸܙܡܵܢܹܗ ܒܙܲܒ݂ܢܘܼܗ̇ ܒܝܼܸܕ ܟܵܪܘܿܙܘܼܬܲܢ: ܗ̇ܝ ܕܦܸܫܠܵܐ ܣܘܼܦܝܵܐ ܒܝܼܝܼ: ܒܦܘܼܩܕܵܢܵܐ ܕܐܲܠܵܗܵܐ ܦܵܪܘܿܩܲܢ:  4 ܠܛܸܛܘܿܣ: ܒܪܘܼܢܵܐ ܫܲܪܝܼܵܐ ܒܗܲܝܡܵܢܘܼܬܵܐ ܕܝܠܵܐ ܕܟܠܵܝ: ܫܵܦܵܩܲܬ ܘܫܠܵܡܵܐ ܡ̣ܢ ܐܲܠܵܗܵܐ ܒܵܒܲܢ: ܘܡܵܪܲܢ ܝܼܫܘܿܥ ܡܫܝܼܚܵܐ ܦܵܪܘܿܩܲܢ.

5 ܣܵܒܵܒ ܕܐܵܗܵܐ ܩܲܡ ܫܵܒ݂ܩܸܢܘܼܟ݂ ܓܵܘ ܩܪܹܛܹܐ: ܕܐܵܢܝܼ ܡܸܢܕܝܼܵܢܹ̈ܐ ܕܝܼܢܵܐ ܚܣܝܼܪܹ̈ܐ ܬܵܪܨܸܬ ܠܗ݇ܘܿܢ: ܘܡܲܩܸܡܸܬ ܩܲܫܝܼܫܹ̈ܐ ܓܵܘ ܟܠ ܡܕܝܼܢ݇ܬܵܐ: ܕܐܵܟ݂ܝܼ ܕܩܲܡ ܦܵܩܕܸܢܘܼܟ݂:  6 ܐܸܢ ܐ݇ܢܵܫܵܐ ܕܠܵܐ ܡܘܼܡܵܐ ܝܠܹܐ: ܓܲܒ݂ܪܵܐ ܕܚܕܵܐ ܒܲܟ݂ܬܵܐ: ܘܐܝܼܬ ܠܹܗ ܝܵܠܹ̈ܐ ܡܗܘܼܡܢܹ̈ܐ ܕܠܹܐ ܝܢܵܐ ܒܠܵܘܡܵܐ ܕܐܵܣܘܿܛܘܼܬܵܐ ܝܲܢ ܕܥܵܨܝܼܘܼܬܵܐ. 7 ܣܵܒܵܒ ܘܵܓ̰ܸܒ ܝܼܠܵܐ ܠܐܲܦܸܣܩܘܿܦܵܐ ܕܗܵܘܹܐ ܕܠܵܐ ܡܘܼܡܵܐ: ܐܲܝܟ݂ ܢܵܙܝܼܪ ܕܐܲܠܵܗܵܐ: ܘܠܵܐ ܠܘܼܒܠܵܐ ܒܚܝܼܵܠ ܕܓܵܢܹܗ: ܘܠܑܵ ܚܸܡܬܵܢܵܐ: ܘܠܵܐ ܐܵܘܵܠ݇ܢܵܐ ܒܵܬ݇ܪ ܚܲܡܪܵܐ: ܘܠܵܐ ܡܵܚܝܵܢܵܐ: ܘܠܵܐ ܡܲܚܸܒܵܢܵܐ ܕܩܢܵܝܬܵܐ ܟ̰ܲܦܵܠ:  8 ܐܸܠܵܐ ܡܲܚܸܒܵܢܵܐ ܕܢܘܼܟ݂ܪ̈ܵܝܹܐ: ܘܡܲܚܸܒܵܢܵܐ ܕܛܵܒ݂ܵܬܹ̈ܐ: ܨܵܠܝܼܠܵܐ: ܘܙܲܕܝܼܩܵܐ: ܘܕܸܟ݂ܝܵܐ: ܘܕܒ݂ܝܼܩܘܼܗ̇ ܓܵܢܹܗ ܡ̣ܢ ܫܲܗ݇ܘܲܬܵܝܵܬܹ̈ܐ:  9 ܘܒܸܕܒ݂ܵܩܵܐ ܠܗܹܡܸܙܡܵܢ ܡܗܘܼܡܸܢܬܵܐ ܕܐܲܝܟ݂ ܡܵܠܲܦܬܵܐ: ܕܡܵܨܹܐ ܐܘܼܦ ܠܝܼܵܗ݇ܒ݂ܵܐ ܠܸܒܵܐ ܒܝܘܼܠܦܵܢܹܗ ܨܵܚ: ܘܠܡܲܢܟ݂ܘܼܣܹܐ ܠܐܵܢܝܼ ܕܡܲܩܪܸܨܝܼ. 10 ܣܵܒܵܒ ܐܝܼܬ ܪܵܒܵܐ ܥܵܨ̈ܝܼܹܐ: ܗܲܡܙܸܡܵܢܹ̈ܐ ܒܵܛܝܼ̈ܠܹܐ ܘܡܲܚܠܸܛܵܢܹ̈ܐ: ܒܘܼܫ ܙܵܘܕܵܐ ܐܵܢܝܼ ܕܡ̣ܢ ܓܙܘܼܪܬܵܐ:  11 ܐܵܢܝܼ ܕܘܵܓ̰ܸܒ ܝܼܠܵܐ ܠܸܥܟ̰ܡܵܐ ܦܘܼܡܵܝ: ܐܵܢܝܼ ܕܒܵܬܹ̈ܐ ܬܲܡܵܡ ܟܹܐ ܬܵܠܚܝܼ: ܘܟܹܐ ܡܵܠܦܝܼ ܡܸܢܕܝܼ ܕܠܹܐ ܝܠܹܐ ܘܵܓ̰ܸܒ: ܒܚܵܬܸܪ ܕܩܢܵܝܬܵܐ ܟ̰ܲܦܵܠ. 12 ܐ݇ܡܸܪܹܐ ܐ݇ܢܵܫܵܐ ܡܸܢܵܝ: ܢܒ݂ܝܼܵܐ ܕܓܵܢܵܝ: ܕܒܢܲܝ̈ ܩܪܹܛܹܐ ܒܟܠ ܙܲܒ݂ܢܵܐ ܕܘܼܓܠܵܢܹ̈ܐ ܝܢܵܐ: ܗܲܝܘܵܢܹ̈ܐ ܒܝܼܫܹ̈ܐ: ܟܹܪ̈݇ܣܵܬܹܐ ܒܵܛܝܼܠܹ̈ܐ. 13 ܘܫܲܪܝܼܪܬܵܐ ܝܠܵܐ ܐܵܗܵܐ ܣܵܗܕܘܼܬܵܐ. ܣܵܒܵܒ ܕܐܵܗܵܐ ܗܵܘܸܬ ܡܲܢܟ݂ܘܼܣܵܝ ܒܩܘܼܝܘܼܬܵܐ: ܕܗܵܘܝܼ ܨܵܚ ܒܗܲܝܡܵܢܘܼܬܵܐ:  14 ܘܠܵܐ ܕܵܪܝܼ ܓܵܢܵܝ ܠܗܲܩܝܲܬܹ̈ܐ ܕܝܗ݇ܘܼܕܵܝܹ̈ܐ: ܘܠܦܘܼܩܕܵܢܹ̈ܐ ܕܒܢܲܝ̈ܢܵܫܵܐ ܕܟܹܐ ܡܲܣܠܝܼ ܣܲܪ̈ܲܣܬܘܼܬܵܐ. 15 ܟܠ ܡܸܢܕܝܼ ܕܸܟ݂ܝܵܐ ܝܠܹܐ ܠܕܸܟ݂ܝܹ̈ܐ: ܐܝܼܢܵܐ ܠܟ̰ܲܦܵܠܹ̈ܐ ܘܠܠܵܐ ܗܘܼܡܸܢܹ̈ܐ: ܡܸܢܕܝܼ ܕܸܟ݂ܝܵܐ ܠܲܝܬ ܠܗ݇ܘܿܢ: ܐܸܠܵܐ ܟܛܲܦܵܠ ܝܼܠܹܐ ܚܝܼܵܠܵܝ ܘܐܸܢܝܲܬܵܝ. 16 ܟܹܐ ܡܵܘܕܝܼ ܕܟܹܐ ܝܲܕܥܝܼ ܠܐܲܠܵܗܵܐ: ܐܝܼܢܵܐ ܒܦܘܼܠܚܵܢܵܝ̈ ܟܹܐ ܣܵܪܒ݂ܝܼ ܠܹܗ: ܓܘܼܢܓܸܨܹܐ ܝܢܵܐ ܘܕܠܵܐ ܡܲܨܝܲܬܬܵܐ: ܘܡܘܼܣܠܝܼܹܐ ܠܟܠ ܦܘܼܠܚܵܢܵܐ ܛܵܒ݂ܵܐ.

ܩܦܠܐܘܢ: ܒ

1 ܐܝܼܢܵܐ ܐܲܢ݇ܬ ܗܲܡܙܸܡ ܡܸܢܕܝܼ ܕܝܼܠܹܐ ܘܵܓ̰ܸܒ ܠܝܘܼܠܦܵܢܵܐ ܨܵܚ:  2 ܘܚܘܵܪ̈ܕܸܩܢܹܐ ܗܵܘܝܼ ܪ݁ܥܝܼܫܹܐ ܒܚܝܼܵܠܵܝ̈: ܝܵܩܘܿܪܹ̈ܐ: ܨܵܠܝܼܠܹ̈ܐ: ܨܵܚ ܒܗܲܝܡܵܢܘܼܬܵܐ ܘܒܚܘܼܒܵܐ ܘܒܚܡܵܠܬܵܐ:  3 ܘܗܲܕܟ݂ܵܐ ܐܘܼܦ ܚܘܵܪ̈ܟܵܘܣܹܐ: ܗܵܘܝܼ ܒܕܘܼܒܵܪܹ̈ܐ ܕܚܵܫܚܝܼ ܠܕܸܚܠܲܬ ܐܲܠܵܗܵܐ: ܘܠܵܐ ܡܵܚܝܵܢܹ̈ܐ ܕܕܲܪܗܲܩ: ܘܠܵܐ ܙܘܼܒܛܸܢܹܐ ܠܚܲܡܪܵܐ ܪܵܒܵܐ: ܘܡܲܠܦܵܢܹ̈ܐ ܕܫܘܼ̈ܠܹܐ ܫܵܦܝܼܪܹ̈ܐ:  4 ܕܬܲܥܠܡܝܼ ܠܐܵܢܝܼ ܕܝܼܢܵܐ ܚܵܡܵܬܹ̈ܐ ܠܡܲܚܘܼܒܹܐ ܓܲܒ݂ܪ̈ܵܢܵܝ ܘܝܵܠܵܝ̈:  5 ܘܠܸܗ݇ܘܵܝܵܐ ܢܵܟ݂ܘܿܦܹ̈ܐ: ܘܕܸܟ݂ܝܹ̈ܐ ܘܛܵܒ݂ܹ̈ܐ: ܘܒܹܐܟ݂ܵܠܵܐ ܚܲܡ ܨܦܵܝܝܼ ܕܒܵܬܵܝܗ: ܘܠܸܦܝܵܫܵܐ ܙܲܒܛ ܠܓܲܒ݂ܪ̈ܵܢܵܝ: ܕܐ݇ܢܵܫܵܐ ܠܵܐ ܓܵܕܸܦ ܥܲܠ ܗܹܡܸܙܡܵܢ ܕܐܲܠܵܗܵܐ. 6 ܘܒܵܐܢܝܼ ܕܝܼܢܵܐ ܓ̰ܘܲܢܩܹ̈ܐ ܐܘܼܦ ܗܲܕܟ̣ܵܐ ܦܲܪܦܸܠ: ܕܗܵܘܝܼ ܢܵܟ݂ܘܿܦܹ̈ܐ. 7 ܐܝܼܢܵܐ ܒܟܠ ܡܸܢܕܝܼ ܡܲܚܙܝܼ ܛܘܼܦ̮ܣܵܐ ܒܓܵܢܘܼܟ݂ ܕܦܘܼܠܚܵܢܹ̈ܐ ܛܵܒ݂ܹ̈ܐ: ܘܒܡܵܠܲܦܬܘܼܟ݂ (ܡܲܚܙܘܼܝܹܐ) ܠܵܐ ܚܪܵܒ݂ܬܵܐ: ܝܵܩܘܿܪܘܼܬܵܐ: 8 ܗܹܡܸܙܡܵܢ ܨܵܚ: ܕܐ݇ܢܵܫܵܐ ܠܹܐ ܡܵܨܹܐ ܡܲܣܠܹܐ ܠܵܗ̇: ܕܗ̇ܘ ܕܟܵܠܹܐ ܕܲܪܩܘܼܒ݂ܠ ܢܵܚܸܦ: ܟܲܕ ܠܲܝܬ ܠܹܗ ܡܸܢܕܝܼ ܣܸܪܝܵܐ ܕܐܵܡܸܪ ܥܠܲܢ. 9 ܪܹ̈ܓܵܘܵܬܹܐ ܗܵܘܝܼ ܙܲܒܛ ܠܐܵܓ݂ܵܝܵܝ̈ ܘܗܵܘܝܼ ܒܸܫܦܵܪܵܐ ܒܟܠ ܡܸܢܕܝܼ: ܠܵܐ ܗܵܘܝܼ ܡܲܕܘܼܪܹܐ ܓ̰ܘܼܘܵܒ:  10 ܘܠܵܐ ܗܵܘܝܼ ܒܸܓܢܵܒ݂ܵܐ: ܐܸܠܵܐ ܡܲܚܙܝܼ ܬܪܘܼܨܘܼܬܵܐ ܨܦܵܝܝܼ ܒܟܠ ܡܸܢܕܝܼ: ܕܣܵܩܠܝܼ ܝܘܼܠܦܵܢܹܗ ܕܐܲܠܵܗܵܐ ܦܵܪܘܿܩܲܢ ܒܟܠ ܡܸ̤ܕܝܼ. 11 ܣܵܒܵܒ ܦܸܫܠܵܐ ܓܠܝܼܬܵܐ ܫܵܦܵܩܲܬܹܗ ܕܐܲܠܵܗܵܐ ܗ̇ܝ ܕܝܼܠܵܐ ܦܵܪܩܵܢܬܵܐ ܠܟܠ ܐ݇ܢܵܫܵܐ:  12 ܘܡܵܠܘܿܦܲܢ ܝܼܠܵܐ ܕܟܵܦܪܵܚ ܒܟܦܘܼܪܝܵܐ ܘܒܫܲܗ݇ܘܲܬܝܵܬܹ̈ܐ ܕܥܵܠܡܵܐ: ܘܚܲܝܵܚ ܒܐܵܗܵܐ ܥܵܠܡܵܐ ܒܢܵܟ݂ܦܘܼܬܵܐ ܘܒܙܲܕܝܼܩܘܼܬܵܐ ܘܒܕܸܚܠܲܬ ܐܲܠܵܗܵܐ: 13 ܟܲܕ ܒܸܣܦܵܪܵܐ ܝܘܵܚ ܠܣܲܒ݂ܪܵܐ ܒܪܝܼܟ݂ܵܐ: ܘܠܓܸܠܝܵܢܵܐ ܕܬܸܫܒܘܿܚܬܹܗ ܕܐܲܠܵܗܵܐ ܓܘܼܪܵܐ: ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ:  14 ܗ̇ܘ ܕܝܸܗܒ݂ܵܠܹܐ ܓܵܢܹܗ ܡܒܵܕܵܠܲܢ: ܕܦܵܪܸܩ ܗ݇ܘܵܐ ܠܲܢ ܡ̣ܢ ܟܠ ܥܵܘܠܵܐ: ܘܕܵܟܹܐ ܗ݇ܘܵܐ ܠܲܢ ܠܓܵܢܹܗ ܛܵܝܸܦܵܐ ܦܪܝܼܫܵܐ: ܕܒܲܚܸܠ ܒܦܘܼܠܚܵܢܹ̈ܐ ܛܵܒ݂ܹ̈ܐ. 15 ܐܲܢܹܐ ܗܲܡܙܸܡ ܙܒܥܝܼ ܘܡܲܢܟܸܣ ܒܟܠ ܦܵܩܲܕܬܵܐ. ܘܐ݇ܢܵܫܵܐ ܠܵܐ ܡܲܣܠܹܐ ܠܘܼܟ݂.

ܩܦܠܐܘܢ: ܓ

1 ܘܗܵܘܸܬ ܡܲܕܟ݂ܘܼܪܵܝ ܕܠܪܹ̈ܫܵܢܹܐ ܘܠܗܵܟܝܼܡܹ̈ܐ ܡܲܨܝܸܬܝܼ ܘܦܵܝܫܝ ܘܲܒܛ: ܘܕܗܵܘܝܼ ܗܵܙܸܪ ܠܟܠ ܦܘܼܠܚܵܢܵܐ ܛܵܒ݂ܵܐ:  2 ܘܥܲܠ ܐ݇ܢܵܫܵܐ ܠܵܐ ܓܵܕܦܝܼ: ܘܠܵܐ ܗܵܘܝܼ ܡܲܩܪܸ̈ܨܵܢܹܐ: ܐܸܠܵܐ ܗܵܘܝ ܡܵܟܝܼܟܹ̈ܐ ܘܒܟܠ ܡܸܢܕܝܼ ܡܲܚܙܝܼ ܒܵܣܝܼܢܘܼܬܵܝ ܠܟܸܣ ܟܠܵܝ ܒܢܲܝ̈ܢܵܫܵܐ. 3 ܣܵܒܵܒ ܐܘܼܦ ܐܲܚܢܲܢ ܩܵܕ݇ܡܵܝܬܵܐ ܟܝܼܡ ܚܝܼܵܠ ܝܼܘܵܚ ܗ݇ܘܵܘ: ܘܕܠܵܐ ܡܲܨܝܲܬܬܵܐ: ܘܡܘܼܚܠܸܛܹܐ: ܘܙܘܼܒܛܸܢܹܐ ܠܫܲܗ݇ܘܲܬܝܵܬܹ̈ܐ ܘܚܘܿܫ̈ܝܼܹܐ ܬܵܗܵܪܹ̈ܐ ܬܵܗܵܪܹ̈ܐ: ܘܒܒܝܼܫܘܼܬܵܐ ܘܒܒܲܚܸܠܵܢܘܼܬܵܐ ܟܹܐ ܗ݇ܘܿܘ: ܘܣܸܢܝܹ̈ܐ ܗ݇ܘܵܘ: ܐܘܼܦ ܒܸܣܢܵܝܵܐ ܚܵܕ݇ ܠܗ̇ܘ ܐ݇ܚܹܪ݇ܢܵܐ. 4 ܐܝܼܢܵܐ ܟܲܕ ܦܸܫܠܵܐ ܓܠܝܼܬܵܐ ܒܵܣܝܼܡܘܼܬܹܗ ܘܡܪܲܚܡܵܢܘܼܬܹܗ ܕܐܲܠܵܗܵܐ ܦܵܪܘܿܩܲܢ:  5 ܠܵܐ ܡ̣ܢ ܦܘܼܠܚܵܢܹ̈ܐ ܕܙܲܕܝܼܩܘܼܬܵܐ ܕܥܒܸܕܠܲܢ: ܐܸܠܵܐ ܒܪ̈ܲܚܡܹܐ ܕܝܼܹܗ ܩܲܡ ܦܵܪܸܩ ܠܲܢ: ܒܣܚܵܬܵܐ ܕܗ݇ܘܵܝܬܵܐ ܡܸܢ݇ܕܪܸܫ: ܘܒܚܲܕܲܬܬܵܐ ܕܪܘܼܚܵܐ ܕܩܘܼܕܫܵܐ:  6 ܗ̇ܝ ܕܡܘܼܫܦܸܟ݂ܠܹܐ ܥܲܠܲܢ ܒܕܵܘܠܲܬܡܲܢܕܘܼܬܵܐ ܒܝܼܸܕ ܝܼܫܘܿܥ ܡܫܝܼܚܵܐ ܦܵܪܘܿܩܲܢ:  7 ܕܒܫܵܦܵܩܲܬܹܗ ܦܵܝܫܵܚ ܡܘܼܟܫܸܛܹܐ ܘܗܵܘܵܚ ܝܵܪ̈ܘܿܬܹܗ ܒܗܹܒ݂ܝܼ ܕܚܲܝܹ̈ܐ ܕܠܵܐܒܵܕ. 8 ܡܗܘܼܡܸܢܬܵܐ ܝܠܵܐ ܗܹܡܸܙܡܵܢ: ܘܒܲܐܢܹܐ ܟܹܐ ܒܵܣܡܵܐ ܠܝܼ ܕܐܘܼܦ ܐܲܢ݇ܬ ܗܵܘܸܬ ܡܲܩܘܘܼܵܚ: ܕܐܵܟ݂ܠܝܼ ܚܲܡ ܠܸܦܠܵܚܵܐ ܦܘܼܠܚܵܢܹ̈ܐ ܛܵܒ݂ܹ̈ܐ ܐܵܢܝܼ ܕܗܘܼܡܸܢܘܿܢ ܒܐܲܠܵܗܵܐ. ܐܲܢܹܐ ܨܦܵܝܝܼ ܝܢܵܐ ܘܡܵܪܹ̈ܐ ܦܲܝܕܵܐ ܠܒܢܲܝ̈ܢܵܫܵܐ. 9 ܐܝܼܢܵܐ ܡ̣ܢ ܒܵܩܲܪ̈ܝܵܬܹܐ ܐܲܗܡܲܩܹ̈ܐ: ܘܡ̣ܢ ܗܲܩܝܲܬܹ̈ܐ ܕܐܘܼ̈ܓ̰ܵܠܹܐ: ܘܡ̣ܢ ܕܪ̈ܫܝܵܬܹܐ: ܘܡ̣ܢ ܦܠܵܫܹ̈ܐ ܕܢܵܡܘܿܣܵܐ ܦܨܝܼ: ܣܵܒܵܒ ܕܦܲܝܕܵܐ ܠܲܝܬ ܒܝܼܵܝ: ܘܒܵܛܝܼܠܹ̈ܐ ܝܘܵܐ. 10 ܡ̣ܢ ܐ݇ܢܵܫܵܐ ܗܲܪܛܝܼܩܵܐ ܒܵܬ݇ܪ ܡܲܢܟܲܣܬܵܐ ܚܕܵܐ ܘܬܲܪ̈ܬܹܝ: ܦܨܝܼ. 11 ܘܗܵܘܸܬ ܒܝܼܕܲܥܝܵܐ ܕܗ̇ܘ ܕܗܲܕܟ݂ܵܐ ܝܠܹܐ: ܩܠܝܼܒܵܐ ܝܠܹܐ: ܘܒܸܚܛܵܝܵܐ ܝܠܹܐ: ܘܥܒ݂ܝܼܕܵܠܹܐ ܓܘܼܢܵܗܟܵܪ ܓܵܢܹܗ.

12 ܐܝܼܡܲܢ ܕܫܵܕܪܸܢ ܠܟܸܣܠܘܼܟ݂ ܠܐܵܪܛܸܡܵܐ ܝܲܢ ܠܛܘܼܟ݂ܝܼܩܘܿܣ: ܚܵܒܸܛ ܕܐܵܬܸܬ ܒܟܸܣܠܝܼ ܠܢܝܼܩܵܦܘܿܠܝܼܣ: ܣܵܒܵܒ ܕܬܵܡܵܐ ܡܘܼܬܒ݂ܵܐ ܝܘܸܢ ܒܚܝܼܵܠܝܼ ܕܦܵܝܫܸܢ ܒܣܸܬܘܵܐ. 13 ܠܙܹܐܢܵܐ ܣܵܦܪܵܐ ܘܠܵܐܦܲܠܘܿ ܡܲܦܫܸܛ ܒܚܵܒܵܛܘܼܬܵܐ: ܡܸܢܕܝܼ ܠܵܐ ܚܵܣܸܪ ܐܸܠܵܝ. 14 ܘܝܵܠܦܝܼ ܐܘܼܦ ܐܵܢܝܼ ܕܝܼܢܵܐ ܕܝܼܲܢ ܕܗܵܘܝܼ ܒܸܦܠܵܚܵܐ ܦܘܼܠܚܵܢܹ̈ܐ ܛܵܒ݂ܹ̈ܐ ܒܫܘܼܠܹ̈ܐ ܠܵܙܸܡ: ܕܠܵܐ ܗܵ،ܝܼ ܕܠܵܐ ܛܥܘܼܢܵܝܬܹ̈ܐ.

15 ܒܝܼܵܗ݇ܒ݂ܵܐ ܝܢܵܐ ܫܠܵܡܵܐ ܐܸܠܘܼܟ݂ ܟܠܵܝ ܐܵܢܝܼ ܕܝܼܢܵܐ ܥܲܡܝܼ ܗܲܒ݇ܠ ܫܠܵܡܵܐ ܠܟܠܵܝ ܐܵܢܝܼ ܕܡܲܚܸܒܝܼ ܠܲܢ ܒܗܲܝܡܵܢܘܼܬܵܐ. ܫܵܦܵܩܲܬ ܥܲܡ ܟܠܵܘܟ݂ܘܿܢ: ܐܵܡܹܝܢ.