ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܓܪܬܐ ܕܬܪܬܝ ܕܦܘܠܘܣ ܫܠܝܚܐ ܕܠܘܬ ܛܝܡܬܐܘܣ

ܩܦܠܐܘܢ: ܐ

1 ܦܵܘܠܘܿܣ: ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ: ܐܲܝܟ݂ ܩܵܘܠܵܐ ܕܚܲܝܹ̈ܐ ܕܒܝܼܫܘܿܥ: 2 ܠܛܝܼܡܵܬܹܐܘܿܣ ܒܪܘܼܢܝܼ ܡܘܼܚܸܒܵܐ: ܫܵܦܵܩܲܬ ܘܪ̈ܲܚܡܹܐ ܘܫܠܵܡܵܐ: ܡ̣ܢ ܐܲܠܵܗܵܐ ܒܵܒܵܐ ܘܡܵܪܲܢ ܝܑܼܫܘܿܥ ܡܫܝܼܚܵܐ.

3 ܫܵܟܘܿܪܹܐ ܝܘܸܢ ܠܐܲܠܵܗܵܐ: ܗ̇ܘ ܕܐܸܠܹܗ ܒܸܥܒ݂ܵܕܵܐ ܝܘܸܢ ܚܸܠܡܲܬ ܡ̣ܢ ܐܲܒ݂ܵܗܵܬܝܼ̈ ܒܐܸܢܝܲܬ ܕܟ݂ܝܼܬܵܐ: ܕܒܕܵܝܸܡܘܼܬܵܐ ܒܸܕܟ݂ܵܪܘܼܟ݂ ܝܼܘܸܢ ܒܨܠܵܘܵܬܝܼ̈ ܕܠܲܝܠܹܐ ܘܕܐܝܼܡܵܡܵܬ. 4 ܘܫܘܼܗ݇ܘܸܬܵܐ ܝܘܸܢ ܠܸܚܙܵܝܘܼܟ݂: ܟܲܕ ܒܸܕܟ݂ܵܪܵܐ ܕܸܡܥܹ̈ܐ ܕܥܲܝܢܘܼ̈ܟ݂: ܕܦܵܝܫܸܢ ܡܸܠܝܵܐ ܚܲܕܘܼܬܵܐ: 5 ܒܕܟ݂ܵܪܵܐ ܕܐܝܼܬ ܠܝܼ ܥܲܠ ܗܲܝܡܵܢܘܼܬܵܐ ܫܲܪܝܼܪܬܵܐ ܕܒܝܼܘܼܟ݂: ܗ̇ܝ ܕܫܪܹܠܵܐ ܩܵܕ݇ܡܵܝܬܵܐ ܒܝܸܡܵܐ ܕܝܸܡܘܼܟ݂ ܠܘܿܐܝܼܣ: ܘܒܝܸܡܘܼܟ݂ ܐܹܘܢܝܼܩܹܐ: ܘܚܵܬܸܪܓ̰ܲܡܥ ܝܼܘܸܢ ܕܐܘܼܦ ܒܝܼܘܼܟ݂. 6 ܣܵܒܵܒ ܕܐܵܗܵܐ ܡܲܕܟ݂ܘܼܪܘܼܟ݂ ܝܼܘܸܢ ܕܡܲܪܥܸܫܸܬ ܚܲܠܲܥܬ ܕܐܲܠܵܗܵܐ: ܗ̇ܝ ܕܐܝܼܬ ܒܝܼܘܼܟ݂ ܒܝܼܸܕ ܡܲܬܲܒ݂ܬܵܐ ܕܐܝܼܕܝܼ. 7 ܣܵܒܵܒ ܠܵܐ ܝܸܗ݇ܒ݂ܵܚܠܹܐ ܐܲܠܵܗܵܐ ܪܘܼܚܵܐ ܕܙܕܘܼܥܬܵܐ: ܐܸܠܵܐ ܕܚܲܝܠܵܐ ܘܚܘܼܒܵܐ ܘܕܬܲܥܠܲܡܬܵܐ. 8 ܒܲܣ ܠܵܐ ܢܵܚܦܸܬ ܒܣܵܗܕܘܼܬܹܗ ܕܡܵܪܲܢ: ܐܘܼܦ ܠܵܐ ܒܝܼܝܼ ܐܲܣܝܼܪܹܗ: ܐܸܠܵܐ ܩܵܒܸ݁ܠ ܒܝܼܫܵܬܹ̈ܐ ܥܲܡ ܐܹܘܵܢܓܵܠܝܼܘܿܢ ܒܚܲܝܠܵܐ ܕܐܲܠܵܗܵܐ: 9 ܗ̇ܘ ܕܦܘܼܪܩܵܚܠܹܐ ܘܩܸܪܝܵܚܠܹܐ ܒܩܪܵܝܬܵܐ ܩܲܕܝܼܫܬܵܐ: ܠܵܐ ܐܲܝܟ݂ ܦܘܼ̈ܠܚܵܢܲܢ: ܐܸܠܵܐ ܐܲܝܟ݂ ܪܸܙܵܝܹܗ ܘܫܵܦܵܩܲܬܹܗ: ܗ̇ܝ ܕܦܸܫܠܵܐ ܝܸܗܒܸܠܬܵܐ ܐܸܠܲܢ ܒܝܼܫܘܿܗ ܡܫܝܼܚܵܐ ܡ̣ܢ ܩܵܕ݇ܡ ܙܲܒ݂ܢܵܐ ܕܥܵܠܡܹ̈ܐ: 10 ܐܝܼܢܵܐ ܦܸܫܠܵܐ ܓܠܝܼܬܵܐ ܐܵܕܝܼܵܐ ܒܓܸܠܝܵܢܹܗ ܕܦܵܪܘܿܩܲܢ ܝܼܫܘܿܥ ܡܫܝܼܚܵܐ: ܕܒܘܼܛܸܠܹܐ ܠܡܵܘܬܵܐ: ܘܡܘܼܚܙܹܠܹܐ ܚܲܝܹ̈ܐ ܘܠܵܐ ܚܪܵܒ݂ܬܵܐ ܒܐܹܘܵܢܓܵܠܝܼܘܿܢ: 11 ܗ̇ܘ ܕܦܸܫܠܝܼ ܡܘܼܬܒ݂ܵܐ ܒܝܼܹܗ ܐܵܢܵܐ ܟܵܪܘܿܙܵܐ: ܘܫܠܝܼܚܵܐ: ܘܡܲܠܦܵܢܵܐ ܕܛܵܝܸܦܹ̈ܐ. 12 ܣܵܒܵܒ ܕܐܵܗܵܐ ܩܵܒܘܿܠܹܐ ܝܘܸܢ ܐܲܢܹܐ ܡܸܢܕܝܼܵܢܹ̈ܐ: ܐܝܼܢܵܐ ܠܹܐ ܝܘܸܢ ܒܸܢܚܵܦܵܐ: ܣܵܒܵܒ ܒܝܼܕܲܥܝܵܐ ܝܘܸܢ ܒܡܵܢܝܼ ܗܘܼܡܸܢܵܐ ܝܘܸܢ: ܘܚܵܬܸܪܓ̰ܲܡܥ ܝܼܘܸܢ ܕܟܹܐ ܡܵܨܹܐ ܠܸܢܛܵܪܵܐ ܩܵܬܝܼ ܗܵܝܡܲܢܬܝܼ ܠܗ̇ܘ ܝܘܿܡܵܐ. 13 ܕܒ݂ܘܿܩ ܠܘܼܟ݂ ܛܘܼܦ̮ܣܵܐ ܕܗܹܡܸܙܡܵܢܹ̈ܐ ܨܵܚ ܕܫܡܸܥܠܘܼܟ݂ ܡܸܢܝܼ: ܒܗܲܝܡܵܢܘܼܬܵܐ ܘܒܚܘܼܒܵܐ ܕܝܼܫܘܿܥ ܡܫܝܼܚܵܐ. 14 ܠܗܚܝ ܗܵܝܡܲܢܬܵܐ ܨܦܵܝܝܼ ܢܛܘܿܪ ܒܪܘܼܚܵܐ ܕܩܘܼܕܫܵܐ ܕܟܹܐ ܥܵܡܸܪ ܒܝܼܲܢ.

15 ܒܝܼܕܲܥܬܵܐ ܝܘܸܬ ܐܵܗܵܐ: ܕܕܸܪܘܿܢ ܡܸܢܝܼ ܟܠܵܝ ܐܵܢܝܼ ܕܓܵܘ ܐܵܣܝܼܵܐ: ܕܝܼܢܵܐ ܡܸܢܵܝ ܦܹܘܓܹܠܘܿܣ ܘܗܲܪܡܵܓܹܢܝܼܣ. 16 ܝܵܗ݇ܒܸܠ ܡܵܪܲܢ ܪ̈ܲܚܡܹܐ ܠܒܲܝܬܹܗ ܕܐܵܢܹܣܝܼܦܵܪܘܿܣ: ܕܪܵܒܵܐ ܓܵܗܹ̈ܐ ܡܘܼܢܝܸܚܸܢܹܐ: ܘܒܫܸܫܗܠܵܬܵܐ ܕܝܸܣܘܼܪ̈ܝܼ ܠܵܐ ܢܚܸܦܠܹܐ: 17 ܐܸܠܵܐ ܐܘܼܦ ܟܲܕ ܗ݇ܘܹܠܹܐ ܒܪܗ݇ܘܿܡܹܐ: ܒܚܵܒܵܛܘܼܬܵܐ ܙܵܘܕܵܐ ܛܸܥܠܹܐ ܐܸܠܝܼ ܘܡܘܼܫ̄ܟ̰ܚܸܢܹܐ: 18 ܝܵܗ݇ܒܸܠ ܠܹܐ ܡܵܪܲܢ ܕܡܵܫ̄ܟ̰ܸܚ ܪ̈ܲܚܡܹܐ ܠܟܸܣ ܡܵܪܲܢ ܒܗ̇ܘ ܝܘܿܡܵܐ: ܘܟܡܵܐ ܕܥܒܸܕܠܹܐ ܚܸܠܡܲܬ ܐܸܠܝܼ ܓܵܘ ܐܵܦܸܣܘܿܣ: ܪܵܒܵܐ ܨܦܜܵܝܝܼ ܟܹܐ ܝܲܕܥܸܬ.

ܩܦܠܐܘܢ: ܒ

1 ܐܲܢ݇ܬ ܗܲܕܟ݂ܵܐ: ܒܘܼܢܝܼ: ܦܘܼܫ ܚܘܼܠܸܢܵܐ ܒܫܵܦܵܩܲܬ ܕܒܝܼܫܘܿܥ ܡܫܝܼܚܵܐ: 2 ܘܐܵܢܝܼ ܕܫܡܸܥܠܘܼܟ ܡܸܢܝܼ ܒܝܼܸܕ ܪܵܒܵܐ ܣܵܗܕܹ̈ܐ: ܐܲܢܹܐ ܣܵܦܝܼ ܠܐ݇ܢܵܫܹ̈ܐ ܡܗܘܼܡܢܹ̈ܐ: ܐܵܢܝܼ ܕܡܵܨܝܼ ܐܘܼܦ ܠܐܚܹܪ̈݇ܢܹܐ ܠܡܵܠܘܿܦܹܐ. 3 ܩܵܒܸ݁ܠ ܒܝܼܫܵܬܹ̈ܐ (ܥܲܡܝܼ) ܐܲܝܟ݂ ܣܲܪܒܵܙ ܛܵܒ݂ܵܐ ܕܝܼܫܘܿܥ ܡܫܝܼܚܵܐ. 4 ܐ݇ܢܵܫܵܐ ܕܥܵܒܸܕ ܣܲܪܒܵܙܘܼܬܵܐ ܠܹܐ ܦܵܝܸܫ ܐܣܝܼܪܵܐ ܒܡܸܢܕܝܵܢܹ̈ܐ ܕܐܲܢܹܐ ܚܲܝܹ̈ܐ: ܕܫܵܦܪ ܠܗ̇ܘ ܕܓܘܼܒܹܠܹܗ ܠܣܲܪܒܵܙܘܼܬܵܐ. 5 ܘܐܸܢ ܐ݇ܢܵܫܵܐ ܥܵܒܸܕ ܐܵܓ݂ܘܿܢܵܐ (ܓܵܘ ܡܲܝܕܵܢ): ܠܹܐ ܦܵܝܸܫ ܒܘܼܢܦܸܪܵܐ: ܐܸܢ ܐܲܝܟ݂ ܒܢܵܡܘܿܣܵܐ ܠܵܐ ܥܵܒܸܕ ܐܵܓ݂ܘܿܢܵܐ. 6 ܐܲܟܵܪܵܐ ܕܓ̰ܲܗ݇ܝܹܐ: ܘܵܓ̰ܸܒ ܝܼܠܵܐ ܕܩܵܕ݇ܡܵܝܬܵܐ ܫܵܪܸܟ ܡ̣ܢ ܡܲܗܨܘܼܠܘܼ̈ܗܝ. 7 ܦܲܪܡܝܼ ܡܸܢܕܝܼ ܕܒܹܐܡܵܪܵܐ ܝܘܸܢ ܝܵܗ݇ܒܸܠ ܠܘܼܟ݂ ܡܵܪܲܢ ܦܲܪܡܵܝܬܵܐ ܒܟܠ ܡܸ̤ܕܝܼ. 8 ܕܟ݂ܘܿܪ ܠܝܼܫܘܿܥ ܡܫܝܼܚܵܐ ܕܩܸܡܠܹܐ ܡ̣ܢ ܡܝܼܬܹ̈ܐ: ܕܝܼܠܹܐ ܡ̣ܢ ܙܲܪܥܹܗ ܕܕܵܘܝܼܕ: ܐܲܝܟ݂ ܐܹܵܢܓܵܠܝܼܘܿܢ ܕܝܼܝܼ: 9 ܕܒܝܼܵܗ̇ ܒܸܩܒܵܠܵܐ ܝܘܸܢ ܒܝܼܫܵܬܹ̈ܐ ܗܲܠ ܝܸܣܘܼܪܹ̈ܐ: ܐܲܝܟ݂ ܥܵܒ݂ܕܵܢܵܐ ܕܒܝܼܫܵܬܹ̈ܐ: ܐܸܠܵܐ ܗܹܡܸܙܡܵܢܹܗ ܕܐܲܠܵܗܵܐ ܠܹܐ ܝܠܵܐ ܐܣܝܼܪܬܵܐ. 10 ܣܵܒܵܒ ܕܐܵܗܵܐ ܟܠ ܡܸܢܕܝܼ ܒܸܚܡܵܠܵܐ ܝܘܸܢ ܒܚܵܬܸܪ ܕܓܘܼܒ݁ܝܹ̈ܐ: ܕܐܘܼܦ ܐܵܢܝܼ ܩܵܒ݁ܠܝܼ ܠܦܘܼܪܩܵܢܵܐ ܕܒܝܼܫܘܿܥ ܡܫܝܼܚܵܐ ܥܲܡ ܚܸܩܪܵܐ ܕܠܥܵܠܲܡ. 11 ܡܗܘܼܡܸܢܬܵܐ ܝܠܵܐ ܗܹܡܸܙܡܵܢ: ܣܵܒܵܒ ܐܸܢ ܡܸܬܠܲܢ ܥܲܡܹܗ: ܐܘܼܦ ܥܲܡܹܗ ܒܸܬ ܚܲܝܵܚ. 12 ܘܐܸܢ ܚܵܡܠܵܚ: ܐܘܼܦ ܒܸܬ ܥܵܒ݂ܕܵܚ ܡܲܠܟܘܼܬܵܐ ܥܲܡܹܗ. ܐܝܼܢܵܐ ܐܸܢ ܟܵܦܪܵܚ ܒܝܼܹܗ: ܐܘܼܦ ܗ̇ܘ ܒܸܬ ܟܵܦܸܪ ܒܝܲܢ. 13 ܗ̇ܘ ܒܡܗܘܼܡܢܘܼܬܵܐ ܟܹܐ ܥܲܪܩܸܠ: ܣܵܒܵܒ ܠܹܐ ܡܵܨܹܐ ܕܟܵܦܸܪ ܒܓܵܢܹܗ.

14 ܐܲܢܹܐ ܗܵܘܸܬ ܡܲܕܟ݂ܘܼܪܵܝ: ܘܒܸܣܗܵܕܵܐ ܩܵܕ݇ܡ ܡܵܪܲܢ: ܕܠܵܐ ܗܵܘܝܼ ܡܲܩܪܘܼܨܹܐ ܒܗܹܡܸܙܡܵܢܹ̈ܐ ܕܠܵܐ ܦܲܝܕܵܐ: ܠܬܠܵܚܬܵܐ ܕܐܵܢܝܼ ܕܫܲܡܥܝܼ ܠܗ݇ܘܿܢ. 15 ܐܟ݂ܘܿܠ ܚܲܡ ܕܡܲܩܸܡܸܬ ܓܵܢܘܼܟ݂ ܡܲܩܒܘܼܠ ܩܵܕ݇ܡ ܐܲܠܵܗܵܐ: ܦܵܠܵܚܵܐ ܢܚܸܦܬܵܐ: ܕܡܲܟܪܸܙ ܒܬܪܘܼܨܘܼܬܵܐ ܗܹܡܸܙܡܵܢ ܕܣܲܪ̈ܲܣܬܘܼܬܵܐ. 16 ܦܨܝܼ ܠܘܼܟ݂ ܡ̣ܢ ܗܹܡܸܙܡܵܢܹ̈ܐ ܒܵܛܝܼ̈ܠܹܐ ܘܗܲܪ̈ܙܹܐ: ܣܵܒܵܒ ܕܒܸܬ ܐܵܬܝܼ ܠܩܵܕ݇ܡܵܝ ܙܵܘܕܵܐ ܒܟܦܘܼܪܝܵܐ: 17 ܘܗܹܡܸܙܡܵܢܵܝ ܐܲܝܟ݂ ܚܘܼܪܸܟ݂ ܒܸܬ ܕܵܒ݂ܩܵܐ ܕܘܼܟܵܐ: ܘܡܸܢܵܝ ܝܠܹܐ ܗܹܘܡܹܢܹܐܘܿܣ ܘܦܝܼܠܹܛܘܿܣ: 18 ܐܲܢܹܐ ܕܚܠܸܛܠܘܿܢ ܡ̣ܢ ܣܲܪ̈ܲܣܬܘܼܬܵܐ ܓܹܒܵܐ: ܟܲܕ ܒܹܐܡܵܪܵܐ: ܕܩܵܝܡܬܵܐ ܕܡܝܼܬܹ̈ܐ ܥܒ݂ܝܼܪܬܵܐ ܝܠܵܐ ܡ̣ܢ ܩܵܕ݇ܡ ܐܵܕܝܼܵܐ: ܘܡܲܕܘܼܪܹܐ ܝܢܵܐ ܗܲܝܡܵܢܘܼܬܵܐ ܕܐ݇ܢܵܫܵܐ ܐ݇ܢܵܫܵܐ. 19 ܐܝܼܢܵܐ ܒܸܢܝܲܬ ܕܐܲܠܵܗܵܐ ܩܘܼܝܼܬܵܐ ܟܹܐ ܟܵܠܝܵܐ: ܘܐܝܼܬ ܠܵܗ̇ ܐܵܗܵܐ ܡܵܘܗܪ: ܟܹܐ ܝܲܕܸܥ ܡܵܪܝܵܐ ܠܐܵܢܝܼ ܕܕܝܼܹܗ ܝܢܵܐ: ܐܘܼܦ: ܦܵܪܸܩ ܡ̣ܢ ܥܵܘܠܵܐ ܟܠ ܕܩܵܪܹܐ ܫܸܡܹܗ ܕܡܫܝܼܚܵܐ. 20 ܐܝܼܢܵܐ ܓܵܘ ܚܵܕ݇ ܒܲܝܬܵܐ ܓܘܼܪܵܐ: ܠܵܐ ܗܲܪ ܡܵܐܢܹ̈ܐ ܕܕܲܗܒ݂ܵܐ ܝܲܢ ܕܣܹܡܵܐ ܒܢܲܦ̮ܫܵܝ ܐܝܼܬ: ܐܸܠܵܐ ܐܘܼܦ ܕܩܲܝܣܵܐ: ܐܘܼܦ ܕܦܲܚܵܪܵܐ: ܚܲܟܡܵܐ ܠܐܝܼܩܵܪܵܐ: ܘܚܲܟܡܵܐ ܠܒܹܨܘܼܪܘܼܬܵܐ. 21 ܐܸܢ ܐ݇ܢܵܫܵܐ ܗܲܕܟ݂ܵܐ ܕܵܟܹܐ ܠܵܗ̇ ܓܵܢܹܗ ܡܐܲܢܹܐ: ܟܹܐ ܗܵܘܹܐ ܡܵܐܢܵܐ ܠܐܝܼܩܵܪܵܐ: ܕܘܼܟ݂ܝܵܐ: ܕܚܵܫܸܚ ܠܡܲܦܠܲܚܬܵܐ ܕܡܵܪܹܗ: ܘܗܘܼܕܪܵܐ ܠܟܠ ܦܘܼܠܚܵܢܵܐ ܛܵܒ݂ܵܐ. 22 ܡ̣ܢ ܫܲܗ̄ܘܲܬܝܵܬܹ̈ܐ ܕܓ̰ܘܲܢܩܘܼܬܵܐ ܥܪܘܿܩ: ܘܪܚܘܿܛ ܒܵܬ݇ܪ ܙܲܕܝܼܩܘܼܬܵܐ: ܘܗܲܝܡܵܢܘܼܬܵܐ: ܘܚܘܼܒܵܐ: ܘܫܠܵܡܵܐ: ܥܲܡ ܕܐܵܢܝܼ ܕܩܵܪܝܼ ܠܡܵܪܲܢ ܒܠܸܒܵܐ ܕܸܟ݂ܝܵܐ. 23 ܐܝܼܢܵܐ ܒܵܩܲܪ̈ܝܵܬܹܐ ܐܲܗܡܲܩܹ̈ܐ ܘܒܹܐ ܡܲܪܕܘܼܬܵܐ: ܦܨܝܼ ܠܘܼܟ݂ ܡܸܢܵܝ: ܣܵܒܵܒ ܟܹܐ ܝܲܕܥܸܬ ܕܦܠܵܫܹ̈ܐ ܟܹܐ ܡܲܗܘܝܼ. 24 ܘܪܹܓܹܗ ܕܡܵܪܲܢ ܠܹܐ ܝܠܵܐ ܘܵܓ̰ܸܒ ܕܦܵܠܸܫ: ܐܸܠܵܐ ܕܗܵܘܹܐ ܡܵܟܝܼܟ݂ܵܐ ܠܟܸܣ ܟܠ ܐ݇ܢܵܫܵܐ: ܡܲܠܦܵܢܵܐ: ܩܵܒ݁ܠܵܢܵܐ ܕܒܝܼܫܵܬܹ̈ܐ: 25 ܬܥܠܘܼܡܹܐ ܒܡܵܟܝܼܟ݂ܘܼܬܵܐ ܠܐܵܢܝܼ ܕܡܲܩܪܸܨܝܼ ܠܕܲܪܩܘܼܒ݂ܠ: ܕܡܩܵܘܡܵܐ ܝܵܗ݇ܒܸܠ ܠܗ݇ܘܿܢ ܐܲܠܵܗܵܐ ܬܝܵܒ݂ܘܼܬܵܐ ܠܝܕܹܥܬܵܐ ܕܣܲܪܣܬܘܼܬܵܐ: 26 ܘܪܵܥܫܝܼ ܡ̣ܢ ܢܸܫܒܹܗ ܕܐܵܟ݂ܹܠܩܲܪܨܵܐ: ܕܒܝܼܹܗ ܦܸܫܠܘܿܢ ܨܝܼܕܹܐ ܠܪܹܙܵܝܹܗ (ܕܐܲܠܵܗܵܐ).

ܩܦܠܐܘܢ: ܓ

1 ܐܝܼܢܵܐ ܐܵܗܵܐ ܗܵܘܸܬ ܒܝܼܕܲܥܝܵܐ: ܕܒܝܘܿܡܵܢܹ̈ܐ ܐܚܵܪ̈ܵܝܹܐ ܒܸܬ ܐܵܬܝܼ ܙܲܒ݂ܢܹ̈ܐ ܩܸܫܝܹ̈ܐ. 2 ܣܵܒܵܒ ܒܸܬ ܗܵܘܝܼ ܒܢܲܝ̈ܢܵܫܵܐ ܡܲܚܸܒܵܢܹ̈ܐ ܕܓܵܢܵܝ: ܡܲܚܸܒܵܢܹ̈ܐ ܕܙܘܼܙܵܐ: ܫܲܒ݂ܗܪ̈ܵܢܹܐ: ܪ̈ܵܡܹܐ: ܓܵܕܦܵܢܹ̈ܐ: ܠܐܲܒ݂ܵܗܵܝ ܠܵܐ ܡܲܨܝܸܬܵܢܹ̈ܐ: ܠܵܐ ܛܵܥܢܵܢܹ̈ܐ ܕܡܸܢܬܵܐ: ܒܝܼܫܹ̈ܐ: 3 ܕܠܵܐ ܚܘܼܒܵܐ ܐܲܨܠܵܢܵܝܵܐ: ܠܵܐ ܥܵܒ݂ܕܵܢܹ̈ܐ ܕܨܘܼܠܗ: ܡܵܚܝܵܢܹ̈ܐ ܕܕܲܪܗܲܩ: ܙܘܼܒܛܸܢܹܐ ܠܫܲܗ݇ܘܲܬܬܵܐ: ܟܝܼܘ̈ܝܼܹܐ: ܣܵܢܝܵܢܹ̈ܐ ܛܵܒ݂ܵܬܹ̈ܐ: 4 ܣܵܦܝܵܢܹ̈ܐ: ܡܘܼܠܝܸܙܹ̈ܐ: ܚܬܝܼܪܹ̈ܐ: ܡܲܚܸܒܵܢܹ̈ܐ ܕܚܘܿܫ̈ܝܼܹܐ ܙܵ،ܕܵܐ ܡ̣ܢ ܡܲܚܸܒܵܢܹ̈ܐ ܕܐܲܠܵܗܵܐ: 5 ܕܐܝܼܬ ܠܗ݇ܘܿܢ ܐܸܣܟܹܝܡܵܐ ܕܕܸܚܠܲܬ ܐܲܠܵܗܵܐ: ܐܝܼܢܵܐ ܒܚܲܝܠܘܼܗ̇ ܒܸܟܦܵܪܵܐ ܝܢܵܐ. ܐܵܢܝܼ ܕܗܲܕܟ݂ܵܐ ܝܢܵܐ ܦܨܝܼ ܡܸܢܵܝ. 6 ܣܵܒܵܒ ܡܸܢܵܝ ܝܢܵܐ ܐܵܢܝܼ ܕܟܹܐ ܐܵܘܪܝܼ ܓܵܘ ܒܵܬܹ̈ܐ: ܘܣܵܠܒܝܼ ܒܲܟ݂ܬܵܬܹ̈ܐ ܡܘܼܛܥܸܢܹܐ ܒܚܛܝܼܵܬܹ̈ܐ: ܘܦܵܝܫܝܼ ܠܘܼܒܠܹܐ ܠܫܲܗ݇ܘܲܬܝܵܬܹ̈ܐ ܬܵܗܵܪܹ̈ܐ ܬܵܗܵܪܹ̈ܐ: 7 ܕܒܟܠ ܙܲܒ݂ܢܵܐ ܒܸܠܝܵܦܵܐ ܝܢܵܐ: ܘܗܲܪ ܠܹܐ ܡܵܨܝܼ ܠܹܐܬܵܝܵܐ ܠܝܕܹܥܬܵܐ ܕܣܲܪ̈ܣܬܘܼܬܵܐ. 8 ܐܝܼܢܵܐ ܕܐܵܟ݂ܝܼ ܕܝܲܢܹܣ ܘܝܲܡܒܪܹܣ ܩܸܡܠܘܿܢ ܕܲܪܩܘܼܒ݂ܠ ܕܡܘܼܫܹܐ: ܗܲܕܟ݂ܵܐ ܐܘܼܦ ܐܲܢܹܐ ܒܸܩܝܵܡܵܐ ܝܢܵܐ ܕܲܪܩܘܼܒ݂ܠ ܕܣܲܪ̈ܣܬܘܼܬܵܐ: ܐ݇ܢܵܫܹ̈ܐ ܡܘܼܚܪܸܒ݂ܹܐ ܒܚܝܼܵܠ: ܘܡܘܼܣܠܝܼܹܐ ܡ̣ܢ ܗܲܝܡܵܢܘܼܬܵܐ ܓܹܒܵܐ. 9 ܐܸܠܵܐ ܠܹܐ ܐܵܬܝܼ ܠܩܵܕ݇ܡܵܝ: ܣܵܒܵܒ ܐܲܗܡܲܩܘܼܬܵܝ ܒܸܬ ܗܵܘܝܵܐ ܝܕܥܝܼܬܵܐ ܠܟܠ ܐ݇ܢܵܫܵܐ: ܕܐܵܟ݂ܝܼ ܕܐܘܼܦ ܕܐܵܢܝܼ ܗ݇ܘܹܠܵܐ. 10 ܐܝܼܢܵܐ ܐܲܢ݇ܬ ܐܬܹܠܘܼܟ݂ ܒܵܬ݇ܪ ܝܘܼܠܦܵܢܝܼ: ܘܕܒܵܪ̈ܝܼ: ܘܪܸܙܵܝܝܼ: ܘܗܲܝܡܵܢܘܼܬܝܼ: ܘܡܲܪܝܲܟ݂ܬܵܐ ܕܒܹܢܝܼ: ܘܚܘܼܒܝܼ: ܘܚܡܵܠܬܝܼ: 11 ܘܛܪܝܼܕܘܼܬܝܼ: ܘܚܲܫܝܼ: ܐܵܢܝܼ ܕܗ݇ܘܹܠܘܿܢ ܥܲܠܝܼ ܒܐܵܢܛܝܘܿܟ݂ܝ: ܘܒܐܝܼܩܵܢܘܿܢ: ܘܒܠܘܼܣܛܪܵܐ: ܐܵܢܝܼ ܛܵܪ̈ܕܝܵܬܵܐ ܩܘܼܒܸܠܝܼ: ܘܡ̣̤ ܟܠܵܝ ܦܘܼܨܝܼܢܹܐ ܡܵܪܝܼ. 12 ܘܟܠܵܝ ܐܵܢܝܼ ܕܒܵܣܡܵܐ ܠܗ݇ܘܿܢ ܒܕܸܚܠܲܬ ܐܲܠܵܗܵܐ ܕܚܲܝܝܼ ܒܝܼܫܘܿܥ ܡܫܝܼܚܵܐ: ܟܹܐ ܦܵܝܫܝܼ ܛܪܝܼܕܹܐ. 13 ܐܝܼܢܵܐ ܐ݇ܢܵܫܹ̈ܐ ܒܝܼܫܹ̈ܐ ܘܡܲܚܠܸܛܵܢܹ̈ܐ ܒܸܬ ܡܲܙܝܸܕܝܼ ܥܲܠ ܒܝܼܫܘܼܬܵܝ: ܟܲܕ ܡܲܚܠܘܼܛܹܐ ܘܡܘܼܚܠܸܛܹܐ. 14 ܐܝܼܢܵܐ ܐܲܢ݇ܬ ܥܲܪܩܸܠ ܒܐܵܢܝܼ ܕܝܠܸܦܠܘܼܟ݂ ܘܦܸܫܠܘܼܟ݂ ܡܟܘܼܩܘܝܼܵܐ ܒܝܼܵܝ: ܣܵܒܵܒ ܟܹܐ ܝܲܕܥܸܬ ܡ̣ܢ ܡܵܢܝܼ ܝܠܝܼܦܵܐ ܝܘܸܬ: 15 ܘܕܡ̣ܢ ܝܵܠܘܼܬܘܼܟ݂ ܟܬܵܒ݂ܹ̈ܐ ܩܲܕܝܼܫܹ̈ܐ ܝܕܸܥܝܵܐ ܝܘܸܬ: ܕܟܹܐ ܡܵܨܝܼ ܥܵܒ݂ܕܝܼ ܠܘܼܟ݂ ܥܵܩܸܠܕܵܪ ܠܚܲܝܹ̈ܐ: ܒܗܲܝܡܵܢܘܼܬܵܐ ܕܒܝܼܫܘܿܥ ܡܫܝܼܚܵܐ. 16 ܟܠ ܟܬܵܒ݂ܵܐ ܕܢܦܝܼܚܵܐ ܡ̣ܢ ܪܘܼܚܵܐ ܕܐܲܠܵܗܵܐ ܡܵܪܑܹ ܦܲܝܕܵܐ ܝܠܹܐ ܠܝܘܼܠܦܵܢܵܐ: ܘܠܡܲܢܟܲܣܬܵܐ: ܘܠܬܘܼܪܵܨܵܐ: ܘܠܬܲܥܠܲܡܬܵܐ ܕܒܟܹܐܢܘܼܬܵܐ: 17 ܕܗܵܘܹܐ ܟܵܡܝܼܠ ܐ݇ܢܵܫܵܐ ܕܐܲܠܵܗܵܐ: ܘܬܲܡܵܡ ܠܟܠ ܦܘܼܠܚܵܢܵܐ ܛܵܒ݂ܵܐ.

ܩܦܠܐܘܢ: ܕ

1 ܒܸܣܗܵܕܵܐ ܝܘܸܢ ܐܸܠܘܼܟ݂ ܩܵܕ݇ܡ ܐܲܠܵܗܵܐ: ܘܡܵܪܲܢ ܝܼܫܘܿܥ ܡܫܝܼܚܵܐ: ܗ̇ܘ ܕܝܼܠܹܐ ܗܕܝܼܪܵܐ ܠܸܕܝܵܢܵܐ ܚܵܝܹ̈ܐ ܘܡܝܼܬܹ̈ܐ: ܘܒܓܸܠܝܵܢܹܗ ܘܡܲܠܟܘܼܬܹܗ: 2 ܡܲܟܪܸܙ ܗܹܡܸܙܡܵܢ: ܘܟܠܝܼ ܒܚܵܒܵܛܘܼܬܵܐ ܒܙܲܒ݂ܢܵܐ ܘܕܠܵܐ ܙܲܒ݂ܢܵܐ: ܡܲܢܟܸܣ: ܘܬܲܥܠܸܡ: ܘܦܲܪܦܸܠ: ܒܟܠܵܗ̇ ܡܲܪܝܼܟ݂ܬܵܐ ܕܒܹܝܢܵܐ ܘܝܘܼܠܦܵܢܵܐ. 3 ܣܵܒܵܒ ܒܸܬ ܗܵܘܹܐ ܙܲܒ݂ܢܵܐ ܕܒܝܘܼܠܦܵܢܵܐ ܨܵܚ ܠܹܐ ܚܵܡܠܝܼ: ܐܸܠܵܐ ܐܲܝܟ݂ ܫܲܗ݇ܘܲܬܝܵܬܵܝ̈ ܒܸܬ ܡܲܙܝܸܕܝܼ ܠܓܵܢܵܝ ܡܲܠܦܵܢܹ̈ܐ ܒܚܝܵܟܬܵܐ ܕܢܵܬܝܵܬܵܝ̈: 4 ܘܡ̣ܢ ܣܲܪ̈ܲܣܬܘܼܬܵܐ ܒܸܬ ܡܕܸܪܝܼ ܢܵܬܵܝ: ܘܠܗܲܩܝܲܬܹ̈ܐ ܒܸܬ ܩܵܠܒ݁ܝܼ. 5 ܐܝܼܢܵܐ ܐܲܢ݇ܬ ܗܵܘܸܬ ܪܥܝܼܫܵܐ ܒܟܠ ܡܸܢܕܝܼ: ܘܩܵܒܸ݁ܠ ܒܝܼܫܵܬܹ̈ܐ: ܘܦܠܘܿܚ ܦܘܼܠܚܵܢܵܐ ܕܡܲܫܚܸܕܵܢܵܐ: ܘܚܸܠܡܲܬܘܼܟ݂ ܬܲܡܸܡ. 6 ܣܵܒܵܒ ܐܵܢܑܵ ܡܐܵܕܝܼܵܐ ܦܝܵܫܵܐ ܝܘܸܢ ܨܘܼܢܸܨܠܵܐ (ܢܘܼܩܵܝܵܐ): ܘܙܲܒ݂ܢܵܐ ܕܦܵܝܫܸܢ ܫܸܪܝܵܐ ܡܛܹܠܹܐ. 7 ܐܵܓ݂ܘܿܢܵܐ ܫܵܦܝܼܪܵܐ ܦܠܝܼܫܵܐ ܝܘܸܢ: ܪ̈ܲܗܛܝܼ ܬܘܼܡܸܡܹ̈ܐ ܝܘܸܢ: ܗܲܝܡܵܢܘܼܬܝܼ ܢܛܝܼܪܵܐ ܝܘܸܢ. 8 ܡܐܵܕܝܼܵܐ ܢܛܝܼܪܵܐ ܝܠܹܐ ܐܸܠܝܼ ܬܵܐܓ̰ ܕܙܲܕܝܼܩܘܼܬܵܐ: ܕܒܸܬ ܦܲܪܸܥ ܠܝܼ ܡܵܪܝܼ ܒܗ̇ܘ ܝܘܿܡܵܐ: ܗ̇ܘ ܕܝܼܠܹܐ ܕܲܝܵܢܵܐ ܟܹܐܢܵܐ. ܘܠܵܐ ܐܸܠܝܼ ܗܲܪ: ܐܸܠܵܐ ܐܘܼܦ ܠܟܠܵܝ ܕܡܘܼܚܸܒܠܘܿܢ ܠܓܸܠܝܵܢܹܗ.

9 ܚܵܒܸܛ ܕܐܵܬܹܬ ܠܟܸܣܠܝܼ ܓ̰ܲܠܕܹܐ: 10 ܣܵܒܵܒ ܕܕܹܐܡܵܐ ܫܒ݂ܝܼܩܸܢܹܐ: ܟܲܕ ܡܘܼܚܸܒܠܹܐ ܐܵܗܵܐ ܥܵܠܡܵܐ: ܘܐܙܸܠܹܐ ܠܬܹܣܵܠܘܿܢܝܼܩܹܐ: ܩܪܝܼܣܦܘܿܣ ܠܓܵܠܵܛܝܼܵܐ: ܛܸܛܘܿܣ ܠܕܲܠܡܵܛܝܼܵܐ. 11 ܠܘܼܩܵܐ ܝܠܹܐ ܒܢܲܦ̮ܫܹܗ ܥܲܡܝܼ. ܠܡܵܪܩܘܿܣ ܫܩܘܿܠ ܘܡܲܝܬ݇ܝܼ ܠܹܗ ܥܲܡܘܼܟ݂: ܣܵܒܵܒ ܡܵܪܹܐ ܦܲܝܕܵܐ ܝܠܹܐ ܐܸܠܝܼ ܠܚܸܠܡܲܬ. 12 ܐܝܼܢܵܐ ܠܛܘܼܟ݂ܝܼܩܘܿܣ ܫܘܼܕܸܪܝܼ ܠܐܵܦܸܣܘܿܣ. 13 ܥܵܒܵܝܬܵܐ ܕܫܒܸܩܠܝܼ ܓܵܘ ܛܪܘܿܐܘܿܣ ܠܟܸܣ ܩܵܪܦܘܿܣ: ܐܝܼܡܲܢ ܕܐܵܬܸܬ ܡܲܝܬ݇ܝ ܠܵܗ̇: ܘܟܬܵܒ݂ܹ̈ܐ: ܒܘܼܫ ܙܵܘܕܵܐ ܓܸܠܕܹ̈ܐ. 14 ܐܵܠܹܟܣܲܢܕܪܘܿܣ ܙܲܪܓܵܪ ܪܵܒܵܐ ܒܝܼܫܵܬܹ̈ܐ ܘܡܘܼܚܙܝܼܢܹܐ. ܦܲܪܸܥ ܠܹܗ ܡܵܪܲܢ ܐܲܝܟ݂ ܦܘܼܠܚܵܢܘܼ̈ܗܝ. 15 ܘܐܘܼܦ ܐܲܢ݇ܬ ܗ݇ܘܝܼ ܗܸܫܝܵܪ ܡܸܢܹܗ: ܣܵܒܵܒ ܪܵܒܵܐ ܟܸܠܝܵܐ ܝܠܹܐ ܕܲܪܩܘܼܒ݂ܠ ܕܗܹܡܸܙ̈ܡܵܢܲܢ. 16 ܒܝܵܗ݇ܒܲܠܬܵܐ ܕܓ̰ܙܼܙܵܒܝܼ ܩܵܕ݇ܡܵܝܬܵܐ ܠܵܐ ܐ݇ܢܵܫܵܐ ܗ݇ܘܹܠܹܐ ܠܟܸܣܠܝܼ: ܐܸܠܵܐ ܟܠܵܝ ܫܒ݂ܝܼܩܸܢܘܿܢ. ܠܵܐ ܦܵܫܵܐ ܚܘܼܫܒܸܢܬܵܐ ܐܸܠܵ ܐܵܗܵܐ. 17 ܐܝܼܢܵܐ ܡܵܪܝܼ ܟܠܹܠܹܐ ܠܟܸܣܠܝܼ: ܘܩܲܡ ܚܲܠܸܢܝܼ: ܕܒܝܼܝܼ ܟܵܪܘܿܙܘܼܬܵܐ ܦܵܝܫܵܐ ܬܘܼܡܸܡܬܵܐ: ܘܕܫܲܡܥܝܼ ܟܠܵܝ ܛܵܝܸܦܹ̈ܐ: ܘܦܸܫܠܝܼ ܦܘܼܨܝܵܐ ܡ̣ܢ ܦܘܼܡܵܐ ܕܐܲܪܝܵܐ. 18 ܘܒܸܬ ܦܵܨܹܐ ܠܝܼ ܡܵܪܝܼ ܡ̣ܢ ܟܠ ܦܘܼܠܚܵܢܵܐ ܒܝܼܫܵܐ ܘܒܸܬ ܦܵܪܤܩ ܠܝܼ ܠܡܲܠܟܘܼܬܹܗ ܕܒܫܡܲܝܵܐ: ܕܐܸܠܹܗ ܚܸܩܪܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ.

19 ܗܲܒ݇ܠ ܫܠܵܡܵܐ ܠܦܪܝܼܣܩܸܠܵܐ ܘܠܵܐܩܸܠܘܿܣ: ܘܠܒܲܝܬܵ ܕܐܵܢܹܣܝܼܦܵܪܘܿܣ. 20 ܐܵܪܸܣܛܘܿܣ ܦܸܫܠܹܐ ܓܵܘ ܩܘܿܪܲܢܬܘܿܣ: ܐܝܼܢܵܐ ܠܛܪܘܼܦܝܼܡܘܿܣ ܫܒܸܩܠܝܼ ܡܸܪܥܝܵܐ ܓܵܘ ܡܝܼܠܹܛܘܿܣ. 21 ܚܵܒܸ݁ܛ ܕܐܵܬܸܬ ܡܩܵܕ݇ܡ ܣܸܬܘܵܐ. ܒܝܼܵܗ݇ܒ݂ܘܼܟ݂ ܝܼܠܹܐ ܫܠܵܡܵܐ ܐܹܘܒܘܿܠܘܿܣ: ܘܦܘܿܕܸܣ: ܘܠܝܼܢܘܿܣ: ܘܩܠܵܘܕܝܼܵܐ: ܘܟܠܵܝ ܐܵܚܘܿܢܘܵܬܹ̈ܐ.

23 ܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܘܼܟ݂. ܫܵܦܵܩܲܬ ܥܲܡܵܘܟ݂ܘܿܢ: ܐܵܡܹܝܢ.