ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܬܪܬܝܢ ܕܦܘܠܘܣ ܫܠܝܚܐ ܕܠܘܬ ܬܣܠܘܢܝܩܝ̈ܐ

ܩܦܠܐܘܢ: ܐ

1 ܦܵܘܠܘܿܣ: ܘܣܸܠܘܵܢܘܿܣ: ܘܛܝܼܡܵܬܹܐܘܿܣ: ܠܥܹܕܬܵܐ ܕܬܹܣܵܠܘܿܢܝܼܩܵܝܹ̈ܐ ܕܒܲܐܠܵܗܵܐ ܒܵܒܲܢ ܘܡܵܪܲܢ ܝܼܫܘܿܥ ܡܫܝܼܚܵܐ: 2 ܫܵܦܵܩܲܬ ܥܲܡܵܘܟ݂ܘܿܢ ܘܫܠܵܡܵܐ ܡ̣ܢ ܐܲܠܵܗܵܐ ܒܵܒܲܢ ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ.

3 ܕܵܝܢܵܢܹ̈ܐ ܝܘܵܚ ܠܫܵܟܘܿܪܹܐ ܠܐܲܠܵܗܵܐ ܒܟܠ ܙܲܒ݂ܢܵܐ ܣܵܒܵܒ ܕܝܼܵܘܟ݂ܘܿܢ: ܐܵܚܘܿܢܘܵܬܝܼ̈: ܕܐܵܟ݂ܝܼ ܕܝܼܠܵܐ ܚܫܝܼܚܬܵܐ: ܕܒܘܼܫ ܙܵܘܕܵܐ ܓܲܪܘܘܼܣܹܐ ܝܠܵܐ ܗܲܝܡܵܢܘܼܬܵܘܟ݂ܘܿܢ: ܘܒܸܙܝܵܕܵܐ ܝܠܹܐ ܚܘܼܒܵܐ ܕܟܠܵܘܟ݂ܘܿܢ: ܕܟܠ ܐ݇ܢܵܫܵܐ ܠܟܸܣ ܚܲܒ݂ܪܹܗ: 4 ܕܐܵܟ݂ܝܼ ܕܐܘܼܦ ܐܲܚܢܲܢ ܒܝܼܵܘܟ݂ܘܿܢ ܒܸܚܩܵܪܵܐ ܝܘܵܚ ܓܵܘ ܥܹܕܬܹ̈ܐ ܕܐܲܠܵܗܵܐ: ܣܵܒܵܒ ܕܗܲܝܡܵܢܘܼܬܵܘܟ݂ܘܿܢ ܘܚܡܵܠܬܵܘܟ݂ܘܿܢ ܒܟܠܵܝ ܛܵܪ̈ܕܝܵܬܵܘܟ݂ܘܿܢ ܘܐܘܼܠܨܵܢܵܘ̈ܟ݂ܘܿܢ ܕܒܸܚܡܵܠܵܐ ܝܬܘܿܢ: 5 ܕܝܼܠܵܐ ܡܲܕܵܥܝܬܵܐ ܕܕܝܼܘܵܢ ܗܲܩ ܕܐܲܠܵܗܵܐ: ܕܚܵܫܚܝܼܬܘܿܢ ܠܡܲܠܟܘܼܬܹܗ ܕܐܲܠܵܗܵܐ: ܗ̇ܝ ܕܣܵܒܵܒ ܕܝܼܵܗ̇ ܩܵܒܘܿܠܹܐ ܝܬܘܿܢ ܚܲܫܵܐ: 6 ܐܸܢ ܗܲܩ ܝܼܠܵܐ ܩܵܕ݇ܡ ܐܲܠܵܗܵܐ ܕܦܲܪܸܥ ܐܘܼܠܨܵܢܵܐ ܠܐܵܢܝܼ ܕܡܲܠܝܸܨܝܼ ܠܵܘܟ݂ܘܿܢ: 7 ܘܐܸܠܵܘܟ݂ܘܿܢ ܕܦܝܵܫܵܐ ܝܬܘܿܢ ܡܘܼܠܝܸܨܹܐ: ܢܵܚܬܵܐ ܥܲܡܲܢ: ܒܓܸܠܝܵܢܹܗ ܕܡܵܪܲܢ ܝܼܫܘܿܥ ܕܡ̣ܢ ܫܡܲܝܵܐ: ܥܲܡ ܡܲܠܲܐܟ݂ܹ̈ܐ ܕܚܲܝܠܹܗ ܒܠܵܗܵܐ ܕܢܘܼܪܵܐ: 8 ܐܝܼܡܲܢ ܕܫܵܩܸܠ ܬܘܼܥܠܵܐ ܡ̣ܢ ܕܐܵܢܝܼ ܕܠܵܐ ܝܕܸܥܠܘܿܢ ܠܐܲܠܵܗܵܐ: ܘܡ̣ܢ ܕܐܵܢܝܼ ܕܠܵܐ ܡܘܼܨܝܸܬܠܘܿܢ ܠܡܲܫܚܲܕܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: 9 ܐܵܢܝܼ ܕܒܕܝܼܘܵܢ ܒܸܬ ܦܵܝܫܝܼ ܦܸܪܥܝܹܐ ܬܠܵܩܵܐ ܕܠܥܵܠܲܡ ܡ̣ܢ ܦܵܬܹܗ ܕܡܵܪܲܢ ܘܡ̣ܢ ܚܸܩܪܵܐ ܕܚܲܝܠܹܗ: 10 ܐܝܼܡܲܢ ܕܐܵܬܹܐ ܕܦܵܝܸܫ ܚܩܝܼܪܵܐ ܒܩܲܕܝܼܫܘܼ̈ܗܝ: ܘܡܲܚܙܹܐ ܥܵܓ̰ܸܒܘܼܝܵܬܹ̈ܗ ܒܟܠܵܝ ܕܗܲܡܸܢܝܼ ـ ܣܵܒܵܒ ܕܦܸܫܠܵܐ ܗܘܼܡܸܢܬܵܐ ܣܵܗܕܘܼܬܲܢ ܠܟܸܣܠܵܘܟ݂ܘܿܢ ـ ܒܗ̇ܘ ܝܘܿܡܵܐ. 11 ܐܘܼܦ ܠܐܵܗܵܐ ( ܢܝܼܲܬ) ܒܟܠ ܙܲܒ݂ܢܵܐ ܨܵܠܘܿܝܹܐ ܝܘܵܚ ܡܒܵܕܵܠܵܘܟ݂ܘܿܢ: ܕܐܲܠܵܗܲܢ ܡܲܚܫܸܚ ܠܵܘܟ݂ܘܿܢ ܠܩܪܵܝܬܵܘܟ݂ܘܿܢ: ܘܡܵܠܹܐ ܠܵܘܟ݂ܘܿܢ ܟܠܹܗ ܪܸܙܵܝܵܐ ܕܛܵܒ݂ܘܼܬܵܐ: ܘ (ܟܠܵܝ) ܦܘܼܠܚܵܢܹ̈ܐ ܕܗܲܝܡܵܢܘܼܬܵܐ: ܒܚܲܝܠܵܐ: 12 ܕܦܵܝܸܫ ܚܩܝܼܵܐ ܒܝܼܵܘܟ݂ܘܿܢ ܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܐܘܼܦ ܐܲܚܬܘܿܢ ܒܝܼܹܗ: ܐܲܝܟ݂ ܫܵܦܵܩܲܬܹܗ ܕܐܲܠܵܗܲܢ ܘܡܵܪܲܢ ܝܼܫܘܿܥ ܡܫܝܼܚܵܐ.

ܩܦܠܐܘܢ: ܒ

1 ܐܝܼܢܵܐ ܒܸܒܲܥܝܵܐ ܝܘܵܚ ܡܸܢܵܘܟ݂ܘܿܢ: ܐܵܚܘܿܢܘܵܬܝܼ̈: ܒܵܗ݇ܣ ܕܐܬܵܝܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܘܓ̰ܡܵܥܝܬܵܐ ܕܝܼܲܢ ܕܠܟܸܣܠܹܗ: 2 ܕܓ̰ܲܠܕܹܐ ܠܵܐ ܦܵܝܫܝܼܬܘܿܢ ܫܥܝܼܫܹܐ ܒܚܝܼܵܠܵܘ̈ܟ݂ܘܿܢ: ܘܠܵܐ ܡܘܼܫܓܸܫܹܐ: ܠܵܐ ܒܝܼܸܕ ܗܹܡܸܙܡܵܢ: ܘܠܵܐ ܒܝܼܸܕ ܪܘܼܚܵܐ: ܘܠܵܐ ܒܝܼܸܕ ܐܲܓܲܪܬܵܐ ܐܲܝܟ݂ ܕܡ̣ܢ ܠܟܸܣܠܲܢ: ܐܲܝܟ݂ ܕܡܛܹܠܹܐ ܝܘܿܡܹܗ ܕܡܫܝܼܚܵܐ: 3 ܠܵܐ ܐ݇ܢܵܫܵܐ ܡܲܚܠܸܛ ܠܵܘܟ݂ܘܿܢ ܒܟ̰ܘܼ ܬܵܗܵܪ: ܣܵܒܵܒ (ܠܹܐ ܐܵܬܹܐ): ܐܸܢ ܠܵܐ ܐܵܬܝܵܐ ܩܵܕ݇ܡܵܝܬܵܐ ܩܠܵܒ݁ܬܵܐ: ܘܦܵܝܸܫ ܓܸܠܝܵܐ ܒܲܪܢܵܫܵܐ ܕܚܛܝܼܬܵܐ: ܒܪܘܼܢܵܐ ܕܐܲܒ݂ܕܵܢܵܐ: 4 ܗ̇ܘ ܕܝܼܠܹܐ ܕܲܪܩܘܼܒ݂ܠ: ܘܟܹܐ ܡܵܪܸܡ ܓܵܢܹܗ: ܥܲܠ ܟܠ ܕܦܵܝܸܫ ܩܸܪܝܵܐ ܐܲܠܵܗܵܐ ܘܣܓ݂ܝܼܕܵܐ: ܕܐܵܟ݂ܝܼ ܕܐܘܼܦ ܓܵܘ ܗܲܝܟܠܵܐ ܕܐܲܠܵܗܵܐ ܐܲܝܟ݂ ܐܲܠܵܗܵܐ ܟܹܐ ܝܵܬܸܒ݂: ܘܟܹܐ ܡܲܚܙܹܐ ܓܵܢܹܗ ܐܲܝܟ݂ ܕܐܲܠܵܗܵܐ ܝܠܹܐ. 5 ܠܹܐ ܝܬܘܿܢ ܒܸܕܟ݂ܵܪܵܐ ܕܟܲܕ ܠܟܸܣܠܵܘܟ݂ܘܿܢ ܗ݇ܘܹܠܝܼ: ܐܲܢܹܐ ܐ݇ܡܸܪܝܼ ܐܸܠܵܘܟ݂ܘܿܢ: 6 ܘܐܵܕܝܼܵܐ ܒܝܼܕܲܥܝܵܐ ܝܬܘܿܢ ܡܸܢܕܝܼ ܕܡܲܟܠܘܼܝܹܐ ܝܠܹܐ: ܕܦܵܝܸܫ ܓܸܠܝܵܐ ܗ̇ܘ ܒܙܲܒ݂ܢܹܗ. 7ܣܵܒܵܒ ܣܸܪ ܕܥܵܘܠܵܐ ܡ̣ܢ ܓ̰ܲܠܕܹܐ ܒܸܦܠܵܚܵܐ ܝܠܹܐ: ܐܲܚܟ̰ܝܼ ܗܲܠ ܗ̇ܘ ܕܐܵܕܝܼܵܐ ܡܲܠܟܘܼܒܹܐ ܝܠܹܐ ܦܵܝܸܫ ܫܩܝܼܠܵܐ ܡ̣ܢ ܐܵܪܠܸܓ̣. 8 ܘܗ̇ܝܓܵܗ ܒܸܬ ܦܵܝܸܫ ܓܸܠܝܵܐ ܥܵܘܵܠܵܐ: ܗ̇ܘ ܕܡܵܪܲܢ ܝܼܫܘܿܥ ܒܸܬ ܦܵܢܹܐ ܠܹܗ ܒܪܘܼܚܵܐ ܕܦܘܼܡܹܗ: ܘܒܸܬ ܒܵܛܸܠ ܠܹܗ ܒܓܸܠܝܵܢܵܐ ܕܐܬܵܝܬܹܗ: 9 ܗ̇ܘ ܕܐܬܵܝܬܹܗ ܐܲܝܟ݂ ܦܠܵܚܬܵܐ ܕܣܵܛܵܢܵܐ ܝܠܵܐ: ܒܟܠ ܚܲܝܠܵܐ ܘܢܝܼܫܲܢܩܹ̈ܐ ܘܥܵܓ̰ܸܒܘ̈ܵܬܵܐ ܕܘܼܓܠܵܢܹ̈ܐ: 10 ܘܒܟܠܵܗ̇ ܚܸܠܛܘܼܢܝܼܘܬܵܐ ܕܥܵܘܠܵܐ ܠܐܵܢܝܼ ܕܒܸܬܠܵܩܵܐ ܝܢܵܐ: ܣܵܒܵܒ ܠܵܐ ܩܘܼܒܸܠܘܿܢ ܚܘܼܒܵܐ ܕܣܲܪ̈ܲܣܬܘܼܬܵܐ: ܕܚܲܝܝܼ ܗ݇ܘܵܘ. 11 ܘܣܵܒܵܒ ܕܐܵܗܵܐ ܒܸܬ ܫܵܕܸܪ ܐܸܠܵܝ ܐܲܠܵܗܵܐ ܦܠܵܚܬܵܐ ܕܚܸܠܛܘܼܢܝܼܬܵܐ: ܕܗܲܡܸܢܝܼ ܠܕܘܼܓܠܵܐ: 12 ܕܦܵܝܫܝܼ ܕܝܼܢܹܐ ܟܠܵܝ ܐܵܢܝܼ ܕܠܵܐ ܗܘܼܡܸܢܘܿܢ ܒܣܲܪܲܣܬܘܼܬܵܐ: ܐܸܠܵܐ ܒܣܸܡܠܵܐ ܠܗ݇ܘܿܢ ܒܥܵܘܠܵܐ.

13 ܐܝܼܢܵܐ ܐܲܚܢܲܢ ܕܵܝܢܵܢܹ̈ܐ ܝܘܵܚ ܠܫܵܟܘܿܪܹܐ ܠܐܲܠܵܗܵܐ ܒܟܠ ܙܲܒ݂ܢܵܐ ܣܵܒܵܒ ܕܝܼܵܘܟ݂ܘܿܢ: ܐܵܚܘܿܢܘܵܬܝܼ̈: ܡܘܼܚܸܒܹ̈ܐ ܕܡܵܪܲܢ: ܕܩܲܡ ܓܵܒܹ݁ܐ ܠܵܘܟ݂ܘܿܢ ܐܲܠܵܗܵܐ ܡ̣ܢ ܫܘܼܪܵܝܵܐ ܠܦܘܼܪܩܵܢܵܐ: ܒܩܲܕܝܼܫܘܼܬܵܐ ܕܪܘܼܚܵܐ: ܘܒܗܲܝܡܵܢܘܼܬܵܐ ܕܣܲܪ̈ܲܣܬܘܼܬܵܐ. 14 ܕܠܕܵܐܗܵܐ ܩܲܡ ܩܵܪܹܐ ܠܵܘܟ݂ܘܿܢ ܐܲܠܵܗܵܐ ܒܝܼܸܕ ܡܲܫܚܲܕܬܵܐ ܕܝܼܲܢ: ܠܩܢܵܝܬܵܐ ܕܚܸܩܪܵܐ ܕܡܵܪܲܢ ܝܼܫܘܿܥ ܡܫܝܼܚܵܐ. 15 ܒܲܣ ܐܵܕܝܼܵܐ: ܐܵܚܘܿܢܘܵܬܝܼ̈: ܟܠܹܡܘܿܢ ܘܚܡܘܿܠܘܿܢ ܒܣܵܦܝܵܢܘܼܝܵܬܹ̈ܐ ܕܝܠܸܦܠܵܘܟ݂ܘܿܢ: ܐܸܢ ܒܝܼܸܕ ܗܹܡܸܙܡܵܢ: ܘܐܸܢ ܒܝܼܸܕ ܐܸܓܲܪܬܵܐ ܕܝܼܲܢ. 16 ܐܝܼܢܵܐ ܡܵܪܲܢ ܝܼܫܘܿܥ ܡܫܝܼܚܵܐ ܒܓܵܢܹܗ: ܘܐܲܠܵܗܵܐ ܒܵܒܲܢ ܗ̇ܘ ܕܡܘܼܚܸܒܠܹܐ ܐܸܠܲܢ: ܘܝܸܗܒܸܠܹܐ ܐܸܠܲܢ ܝܵܗ݇ܒܲܠܬܵܐ ܕܠܸܒܵܐ ܐܵܒܵܕܝܼܢܵܝܬܵܐ: ܘܣܲܒ݂ܪܵܐ ܛܵܒ݂ܵܐ ܒܫܵܦܵܩܲܬܹܗ: 17 ܝܵܗ݇ܒܸܠ ܠܸܒܵܐ ܠܠܸܒܵܘܵܬܵܘ̈ܟ݂ܘܿܢ: ܘܡܲܩܘܹܐ ܠܗ݇ܘܿܢ ܒܟܠ ܗܹܡܸܙܡܵܢ ܘܒܟܠ ܦܘܼܠܚܵܢܵܐ ܛܵܒ݂ܵܐ.

ܩܦܠܐܘܢ: ܓ

1 ܡܐܵܕܝܼܵܐ: ܐܵܚܘܿܢ̈ܘܵܬܲܢ: ܨܵܠܹܡܘܿܢ ܡܒܵܕܵܠ ܕܝܼܲܢ: ܕܗܹܡܸܙܡܵܢ ܕܡܵܪܲܢ ܗܵܘܝܵܐ ܒܸܪܚܵܛܵܐ ܘܦܵܝܫܵܐ ܚܩܝܼܪܬܵܐ ܐܲܝܟ݂ ܕܐܘܼܦ ܠܟܸܣܠܵܘܟ݂ܘܿܢ. 2 ܘܕܦܵܝܫܵܚ ܦܘܼܨܝܹܐ ܡ̣ܢ ܒܢܲܝ̈ܢܵܫܵܐ ܦܟ̰ܝܼ̈ܠܹܐ ܘܒܝܼܫܹ̈ܐ: ܣܵܒܵܒ ܗܲܝܡܵܢܘܼܬܵܐ ܠܹܐ ܝܠܵܐ ܕܟܠ ܐ݇ܢܵܫܵܐ. 3 ܡܗܘܼܡܢܵܐ ܝܠܹܐ ܡܵܪܝܵܐ: ܗ̇ܘ ܕܒܸܬ ܡܲܩܘܹܐ ܠܵܘܟ݂ܘܿܢ: ܘܢܵܛܸܪܵܘܟ݂ܘܿܢ ܡ̣ܢ ܒܝܼܫܵܐ. 4 ܐܝܼܢܵܐ ܚܵܬܸܪܓ̰ܲܡܥ ܝܼܘܵܚ ܡܸܢܵܘܟ݂ܘܿܢ ܓܹܒܵܐ ܒܡܵܪܲܢ: ܕܡܸܢܕܝܼ ܕܦܵܩܘܿܕܹܐ ܝܘܵܚ ܐܸܠܵܘܟ݂ܘܿܢ ܟܹܐ ܥܵܒ݂ܕܝܼܬܘܿܢ: ܐܘܼܦ ܒܸܬ ܥܵܒ݂ܕܝܼܬܘܿܢ. 5 ܘܡܵܪܲܢ ܬܲܓܒܸܪ ܠܸܒܵܘܵܬܵܘ̈ܟ݂ܘܿܢ ܠܚܘܼܒܹܗ ܕܐܲܠܵܗܵܐ: ܘܠܚܡܵܠܬܵܐ ܕܡܫܝܼܚܵܐ.

6 ܐܝܼܢܵܐ ܦܵܩܘܿܕܹܐ ܝܘܵܚ ܐܸܠܵܘܟ݂ܘܿܢ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܕܗܵܘܝܼܬܘܿܢ ܦܪܝܼܩܹܐ ܡ̣ܢ ܟܠ ܐܵܚܘܿܢܵܐ ܗ̇ܘ ܕܒܹܐ ܪܹܐܙܵܐ ܚܵܕܸܪ: ܘܠܵܐ ܐܲܝܟ݂ ܣܵܦܝܵܢܘܼܬܵܐ ܕܩܘܼܒܸܠܹܐ ܡܸܢܲܢ. 7 ܣܵܒܵܒ ܐܲܚܬܘܿܢ ܒܝܼܕܲܥܝܵܐ ܝܬܘܿܢ ܕܐܵܟ݂ܝܼ ܘܵܓ̰ܸܒ ܝܼܠܵܐ ܠܸܦܝܵܫܵܐ ܕܘܼܡܝܹܐ ܒܝܼܲܢ: ܕܠܵܐ ܚܕܸܪܲܢ ܒܹܐ ܪܹܐܙܵܐ ܓܵܘܵܘܟ݂ܘܿܢ. 8 ܐܘܼܦ ܠܲܚܡܵܐ ܚܘܼܪܵܝܝܼ ܠܵܐ ܐܟܸܠܲܢ ܡ̣ܢ ܐ݇ܢܵܫܵܐ: ܐܸܠܵܐ ܒܓ̰ܵܦܵܐ ܘܒܓ̰ܵܗ݇ܝܬܵܐ: ܒܠܲܝܠܹܐ ܘܒܐܝܼܡܵܡܵܐ ܦܠܸܚܠܲܢ: ܕܥܲܠ ܐ݇ܢܵܫܵܐ ܡܸܢܵܘܟ݂ܘܿܢ ܠܵܐ ܥܵܒ݂ܕܵܚ ܗ݇ܘܵܘ ܝܘܼܩܪܵܐ: 9 ܠܵܐ ܣܵܒܵܒ ܕܠܲܝܬ ܠܲܢ ܗܘܼܟܡܵܐ: ܐܸܠܵܐ ܕܒܓܵܢܲܢ ܝܵܗ݇ܒ݂ܵܚ ܠܵܘܟ݂ܘܿܢ ܛܘܼܦ̮ܣܵܐ: ܕܒܝܼܲܢ ܦܵܝܫܝܼܬܘܿܢ ܕܘܼܡܝܹܐ. 10 ܣܵܒܵܒ ܐܘܼܦ ܟܲܕ ܠܟܸܣܠܵܘܟ݂ܘܿܢ ܝܼܘܵܚ ܗ݇ܘܵܘ: ܐܵܗܵܐ ܦܩܸܕܠܲܢ ܐܸܠܵܘܟ݂ܘܿܢ: ܕܐܸܢ ܐ݇ܢܵܫܵܐ ܠܵܐ ܒܵܣܡܵܐ ܠܹܗ ܕܦܵܠܸܚ: ܐܘܼܦ ܠܵܐ ܐܵܟܸܠ. 11 ܣܵܒܵܒ ܒܸܫܡܲܥܝܵܐ ܝܘܵܚ ܕܐܝܼܬ ܓܵܘܵܘܟ݂ܘܿܢ ܐ݇ܢܵܫܹ̈ܐ ܕܒܸܚܕܵܪܵܐ ܝܢܵܐ ܒܹܐ ܪܹܐܙܵܐ: ܘܗܲܪ ܠܹܐ ܝܢܵܐ ܒܸܦܠܵܚܵܐ: ܐܸܠܵܐ ܚܵܒ݂ܛܵܢܹ̈ܐ ܝܢܵܐ ܒܫܘܼܠܹ̈ܐ ܒܵܛܝܼܠܹ̈ܐ. 12 ܐܝܼܢܵܐ ܗܲܪ ܠܐܲܢܹܐ ܦܵܩܘܿܕܹܐ ܝܘܵܚ: ܘܦܲܪܦܘܼܠܹܐ ܝܘܵܚ ܒܝܼܵܝ ܒܡܵܪܲܢ ܝܼܫܘܿܥ ܡܫܝܼܚܵܐ: ܕܒܢܝܼܚܘܼܬܵܐ ܗܵܘܝܼ ܒܸܦܠܵܚܵܐ ܘܒܹܐܟ݂ܵܠܵܐ ܠܲܚܡܵܐ ܕܓܵܢܵܝ. 13 ܐܝܼܢܵܐ ܐܲܚܬܘܿܢ: ܐܵܚܘܿܢܘܵܬܝܼ̈: ܠܵܐ ܣܵܩܕܝܼܬܘܿܢ ܡ̣ܢ ܠܸܥܒ݂ܵܕܵܐ ܡܸܢܕܝܼ ܕܝܼܠܹܐ ܨܦܵܝܝܼ. 14 ܘܐܸܢ ܐ݇ܢܵܫܵܐ ܠܵܐ ܡܲܨܝܸܬ ܠܗܹܡܸܙ̈ܡܵܢܲܢ: ܐܲܢܹܐ ܕܓܵܘ ܐܸܓܲܪܬܵܐ: ܡܚܹܡܘܿܢ ܠܹܗ ܢܝܼܫܲܢܩܵܐ: ܘܠܵܐ ܚܵܒ݂ܛܝܼܬܘܿܢ ܥܲܡܹܗ: ܕܢܵܚܸܦ. 15 ܐܝܼܢܵܐ ܠܵܐ ܕܵܒ݂ܩܝܼܬܘܿܢ ܠܹܗ ܐܲܝܟ݂ ܕܸܫ̰ܡܸܢ: ܐܸܠܵܐ ܗܵܘܝܼܬܘܿܢ ܒܝܼܵܗ݇ܒ݂ܘܼܗܝ ܢܲܨܝܼܗܲܬ ܐܲܝܟ݂ ܕܠܵܐܚܘܿܢܵܐ.

16 ܘܡܵܪܹܗ ܕܫܠܵܡܵܐ ܒܓܵܢܹܗ ܝܵܗ݇ܒܸܠ ܠܵܘܟ݂ܘܿܢ ܫܠܵܡܵܐ: ܒܟܠ ܙܲܒ݂ܢܵܐ ܒܟܠ ܬܵܗܵܪ. ܡܵܪܲܢ ܥܲܡ ܟܠܵܘܟ݂ܘܿܢ.

17 ܫܠܵܡܵܐ ܒܐܝܼܕܵܐ ܕܝܼܝܼ ܦܵܘܠܘܿܣ: ܕܝܼܠܹܐ ܢܝܼܫܲܢܩܵܐ ܕܒܟܠܵܝ ܐܸܓܪ̈ܝܵܬܝܼ: ܗܲܕܟ݂ܵܐ ܒܸܟܬܵܒ݂ܵܐ ܝܘܸܢ. 18 ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܵܘܟ݂ܘܿܢ: ܐܵܡܹܝܢ.