ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܬܪܬܝܢ ܕܦܘܠܘܣ ܫܠܝܚܐ ܕܠܘܬ ܬܣܠܘܢܝܩܝ̈ܐ

ܩܦܠܐܘܢ ܐ

1 ܦܵܘܠܘܿܣ ܘܣܸܠܘܵܢܘܿܣ ܘܛܝܼܡܵܬܹܐܘܿܣ. ܠܥܹܕܬܵܐ ܕܬܸܣܵܠܘܿܢܝܼܩܵܝܹ̈ܐ ܕܒܲܐܠܵܗܵܐ ܐܲܒ݂ܘܼܢ ܘܡܵܪܲܢ ܝܼܫܘܿܥ ܡܫܝܼܚܵܐ. 2 ܛܲܝܒܘܼܬ݂ܵܐ ܥܲܡܟ݂ܘܿܢ ܘܲܫܠܵܡܵܐ. ܡܸܢ ܐܲܠܵܗܵܐ ܐܲܒ݂ܘܼܢ ܘܡܸܢ ܡܵܪܲܢ ܝܼܫܘܿܥ ܡܫܝܼܚܵܐ. 3 ܠܡܵܘܕܵܝܘܼ ܠܐܲܠܵܗܵܐ ܒܟ݂ܠܙܒܲܢ ܚܲܝܵܒ݂ܝܼܢ ܚ̄ܢܲܢ ܥܠܲܝܟܿܘܿܢ ܐܲܚܲܝ̈. ܐܲܝܟ݂ ܡܵܐ ܕܘܵܠܹܐ. ܕܝܲܬܝܼܪܵܐܝܼܬ݂ ܪܵܒ݂ܝܵܐ ܗܲܝܡܵܢܘܼܬ݂ܟ݂ܘܿܢ. ܘܣܵܓܹ̇ܐ ܚܘܼܒܵܐ ܕܟ݂ܠܟ݂ܘܿܢ. ܕܟ݂ܠܢܵܫ ܠܘܵܬ݂ ܚܲܒ݂ܪܹܗ. 4 ܐܲܝܟ݂ ܕܐܵܦ ܚܢܲܢ ܒܟ݂ܘܿܢ ܢܸܗܘܹܐ ܡܸܫܬܲܒ݂ܗܪܝܼܢ ܚ̱ܢܲܢ ܒܥܹܕܬܵܐ ܕܐܲܠܵܗܵܐ. ܥܲܠ ܗܲܝܡܵܢܘܼܬ݂ܟ݂ܘܿܢ ܘܥܲܠ ܡܣܲܝܒܪܵܢܘܼܬ݂ܟ݂ܘܿܢ. ܕܲܒܟ݂ܠܵܗܿ ܪܕ݂ܝܼܦܘܼܬ݂ܟ݂ܘܿܢ ܘܐܘܼܠܨܵܢܲܝ̈ܟܿܘܿܢ ܕܲܡܣܲܝܒܪܝܼܢ ܐܢ̄ܬܘܿܢ. 5 ܠܬܲܚܘܝܼܬ݂ܵܐ ܕܕ݂ܝܼܢܵܐ ܟܹܐܢܵܐ ܕܐܲܠܵܗܵܐ. ܕܬܸܫܘܘܿܢ ܠܡܲܠܟܿܘܼܬܹܗ ܗܵܝ ܕܥܲܠ ܐܲܦܹܝ̈ܗ݁ ܚܵܫܝܼܢ ܐ̄ܢܬܿܘܿܢ. 6 ܘܐܸܢ ܟܹܐܢܵܐ ܩܕ݂ܵܡ ܐܲܠܵܗܵܐ. ܕܢܸܦܪܘܿܥ ܐܘܼܠܨܵܢܵܐ ܠܐܵܠܘܿܨܲܝ̈ܟ݁ܘܿܢ: 7 ܘܲܠܟ݂ܘܿܢ ܕܡܸܬ݂ܐܠܨܝܼܢ ܐ̄ܢܬܿܘܢ ܢܲܚܹܐ ܥܲܡܲܢ. ܒܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܡܸܢ ܫܡܲܝܵܐ ܥܲܡ ܚܲܝܠܵܐ ܕܡܲܠܲܐܟ݂ܵܘ̈ܗܝ: 8 ܡܵܐ ܕܥܵܒܹܿܕ݂ ܬܿܒܲܥܬ݂ܵܐ ܒܓ݂ܵܘܙܵܠܵܐ ܕܢܘܼܪܵܐ ܡܸܢ ܗܵܢܘܿܢ ܕܠܵܐ ܝܼܕ݂ܲܥܘ ܠܐܲܠܵܗܵܐ. ܘܡܸܢ ܗܵܢܘܿܢ ܕܠܵܐ ܐܸܫܬܵܘܕܲܥܘ ܠܲܣܒܲܪܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 9 ܕܗܸܢܘܿܢ ܒܕ݂ܝܼܢܵܐ ܢܸܬ݂ܦܲܪܥܘܿܢ ܐܲܒ݂ܕ݂ܵܢܵܐ ܕܲܠܥܵܠܲܡ ܡܸܢ ܦܲܪܨܘܿܦܹܗ ܕܡܵܪܲܢ. ܘܡܸܢ ܫܘܼܒ݂ܚܵܐ ܕܚܲܝܠܹܗ. 10 ܡܵܐ ܕܐܵܬܹܐ ܕܢܸܫܬܲܒܲܚ ܒܩܲܕ݁ܝܼܫܵܘ̈ܗܝ: ܘܲܢܚܵܘܹܐ ܬܸܕ݂ܡܪ̈ܵܬܹܗ ܒܲܡܗܲܝ̈ܡܢܵܘܗܝ: ܕܬܸܬ݂ܗܲܝܡܲܢ ܣܵܗܕܘܼܬܲܢ ܕܲܥܠܲܝܟܿܘܿܢ ܒܗܵܘ ܝܵܘܡܵܐ. 11 ܡܛܠ ܗܵܢܵܐ ܒܟ݂ܠܙܒܲܢ ܡܨܲܠܹܝܢ ܚ̄ܢܲܢ ܥܠܲܝܟܿܘܿܢ. ܕܢܲܫܘܹܝܟ݂ܘܿܢ ܐܲܠܵܗܵܐ ܠܩܸܪܝܵܢܟ݂ܘܿܢ. ܘܢܸܡܠܹܝܟ݂ܘܿܢ ܟܠܹܗ ܨܸܒ݂ܝܵܢܵܐ ܕܛܵܒ݂ܵܬ݂ܵܐ. ܘܲܥܒ݂ܵܕܹ̈ܐ ܕܗܲܝܡܵܢܘܼܬ݂ܵܐ ܒܚܲܝܠܵܐ. 12 ܕܢܸܫܬܲܒܲܚ ܒܟ݂ܘܿܢ ܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܐܵܦ ܐܲܢ̄ܬܿܘܿܢ ܒܹܗ. ܐܲܝܟ݂ ܛܲܝܒܘܼܬܹܗ ܕܐܲܠܵܗܲܢ ܘܡܵܪܲܢ ܝܼܫܘܿܥ ܡܫܝܼܚܵܐ.

ܩܦܠܐܘܢ ܒ

1 ܒܵܥܹܝܢ ܚ̄ܢܲܢ ܕܹܝܢ ܡܸܢܟ݂ܘܿܢ ܐܲܚܲܝ̈. ܥܲܠ ܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܥܲܠ ܟܢܘܼܫܝܵܐ ܕܝܼܠܲܢ ܕܲܠܘܵܬܹܗ. 2 ܕܠܵܐ ܥܓܲܠ ܬܸܬܿܙܝܼܥܘܼܢ ܒܪܸ̈ܥܝܵܢܲܝܟܿܘܿܢ. ܘܠܵܐ ܬܸܬܵܘܗܘܼܢ ܠܵܐ ܡܸܢ ܡܸܠܬ݂ܵܐ. ܘܠܵܐ ܡܸܢ ܪܘܼܚܵܐ. ܘܠܵܐ ܡܸܢ ܐܸܓܲܪܬܵܐ ܕܐܲܝܟ݂ ܕܡܸܢ ܠܘܵܬܲܢ ܗ݇ܝܼ. ܕܗܵܐ ܠܲܡ ܡܲܛܝܼ ܝܵܘܡܹܗ ܕܡܵܪܲܢ. 3 ܠܡܵܐ ܐ̄ܢܵܫ ܢܲܛܥܹܝܟ݂ܘܿܢ ܒܚܲܕ݂ ܡܸܢ ܐܸܣܟܹܡ̈ܝܼܢ. ܡܛܠ ܕܐܸܢ ܠܵܐ ܬܹܐܬܹܐ ܠܘܼܩܕ݂ܲܡ ܡܵܪܘܿܕ݂ܘܼܬ݂ܵܐ. ܘܢܸܬ݂ܓ݁ܠܹܐ ܒܲܪܢܵܫܵܐ ܕܲܚܛܝܼܬ݂ܵܐ ܒܪܹܗ ܕܐܲܒ݂ܕ݂ܵܢܵܐ. 4 ܗܵܘ ܕܕܲܠܩܘܼܒ݂ܠܵܐ ܗ̄ܘܼ. ܘܡܸܫܬܲܥܠܹܐ ܥܲܠ ܟܠܡܲܢ ܕܡܸܬ݂ܩܪܹܐ ܐܲܠܵܗܿ ܘܕܸܚܠܵܐ. ܐܲܝܟܲܢܵܐ ܕܐܵܦ ܒܗܲܝܟܠܵܐ ܕܐܲܠܵܗܵܐ ܐܲܝܟ݂ ܐܲܠܵܗܵܐ ܢܸܬܸܒ݂. ܘܲܢܚܵܘܹܐ ܥܲܠ ܢܲܦ̮ܫܹܗ ܐܲܝܟ݂ ܕܐܲܠܵܗܵܐ ܗܘܼ. 5 ܠܵܐ ܥܵܗܕܝܼܢ ܐ̄ܢܬܿܘܿܢ. ܕܟܲܕ݂ ܠܘܵܬ݂ܟ݂ܘܿܢ ܗ̄ܘܹܝܬ݂. ܗܵܠܹܝܢ ܐܸܡܪܹܬ݂ ܗ̄ܘܹܝܬ݂ ܠܟ݂ܘܿܢ. 6 ܘܗܵܫܵܐ ܝܵܕ݂ܥܝܼܢ ܐܢ̄ܬܘܿܢ. ܡܵܐ ܕܐܲܚܝܼܕ݂ ܕܢܸܬ݂ܓ݁ܠܹܐ ܗܘܼ ܒܙܲܒ݂ܢܹܗ. 7 ܐ̄ܪܵܙܵܐ ܓܹܝܪ ܕܥܵܘܠܵܐ ܡܸܢ ܟܲܕܘܼ ܫܲܪܝܼ ܠܡܸܬ݂ܚܲܦܵܛܘܼ. ܒܲܠܚܘܿܕ݂ ܐܸܢ ܗܵܘ ܡܵܐ ܕܗܵܫܵܐ ܐܲܚܝܼܕ݂ ܢܸܫܬܿܩܸܠ ܡܸܢ ܡܨܲܥܬ݂ܵܐ. 8 ܘܗܵܝܕܹܝܢ ܢܸܬ݂ܓ݁ܠܹܐ ܥܵܘܠܵܐ. ܗܵܘ ܕܡܵܪܲܢ ܝܼܫܘܿܥ ܢܣܝܼܦܝܼܘܗܝ ܒܪܘܼܚ ܦܘܼܡܹܗ. ܘܲܢܒܲܛܠܝܼܘܗܝ ܒܓܸܠܝܵܢܵܐ ܕܡܹܐܬ݂ܝܼܬܹܗ. 9 ܡܹܐܬ݂ܝܼܬܹܗ ܓܹܝܪ ܕܗܵܘ ܒܡܲܥܒܕ݂ܵܢܘܼܬ݂ܵܐ ܗ݇ܝܼ ܕܣܵܛܵܢܵܐ. ܒܟ݂ܠ ܚܹܝܠ. ܘܐܵܬ݂̈ܘܵܬ݂ܵܐ. ܘܬܸܕ݂ܡܪ̈ܵܬ݂ܵܐ ܕܲܓ̈ܵܠܵܬ݂ܵܐ. 10 ܘܲܒܟ݂ܠܵܗܿ ܛܘܼܥܝܲܝ ܕܥܵܘܠܵܐ ܕܗܵܘܝܵܐ ܒܐܲܒ݁ܝܼܕܹ̈ܐ: ܥܲܠ ܕܠܵܐ ܩܲܒܸܠܘ ܚܘܼܒܵܐ ܕܩܘܼܫܬܵܐ ܕܒܹܗ ܢܸܚܘܿܢ. 11 ܡܛܠ ܗܵܢܵܐ ܢܫܲܕܲܪ ܠܗܘܿܢ ܐܲܠܵܗܵܐ ܡܲܥܒܕ݂ܵܢܘܼܬ݂ܵܐ ܕܛܘܼܥܝܲܝ. ܕܲܢܗܲܝܡܢܘܼܢ ܠܫܘܼܩܪܵܐ. 12 ܘܢܸܬ݁ܬ݁ܕ݂ܝܼܢܘܼܢ ܟܠܗܘܿܢ ܐܲܝܠܹܝܢ ܕܠܵܐ ܗܲܝܡܸܢܘ ܒܩܘܼܫܬܵܐ. ܐܸܠܵܐ ܐܸܨܛܒ݂ܝܼܘ ܒܥܵܘܠܵܐ. 13 ܚܢܲܢ ܕܹܝܢ ܚܲܝܵܒ݂ܝܼܢ ܚ̄ܢܲܢ ܠܡܵܘܕܵܝܘܼ ܠܐܲܠܵܗܵܐ ܒܟ݂ܠܙܒܲܢ: ܥܲܠ ܐܲܦܲܝ̈ܟܿܘܿܢ ܐܲܚܲܝ̈ܢ ܚܲܒܝܼܒ݂ܵܘ̈ܗܝ ܕܡܵܪܲܢ. ܕܲܓ݂ܒ݂ܵܟ݂ܘܿܢ ܐܲܠܵܗܵܐ ܡܸܢ ܪܹܫܝܼܬ݂ܵܐ ܠܚܲܝܹ̈ܐ: ܒܩܲܕ݁ܝܼܫܘܼܬ݂ܵܐ ܕܪܘܼܚܵܐ ܘܲܒ݂ܗܲܝܡܵܢܘܼܬ݂ܵܐ ܕܲܫܪܵܪܵܐ. 14 ܠܗܵܠܹܝܢ ܗܘܼ ܓܹܝܪ ܩܪܵܟ݂ܘܿܢ ܒܲܡܣܲܒܪܵܢܘܼܬ݂ܵܐ ܕܝܼܠܲܢ. ܕܬܸܗܘܘܿܢ ܬܸܫܒܿܘܿܚܬܵܐ ܠܡܵܪܲܢ ܝܼܫܘܿܥ ܡܫܝܼܚܵܐ. 15 ܡܸܟܹܝܠ ܐܲܚܲܝ̈ ܐܸܬ݂ܩܲܝܲܡܘ ܘܚܲܡܣܸܢܘ ܒܦܘܼܩܕܵܢܹ̈ܐ ܕܝܼܠܸܦܬܿܘܿܢ. ܐܸܢ ܒܡܸܠܬ݂ܵܐ ܘܐܸܢ ܒܐܸܓܲܪܬܵܐ ܕܝܼܠܲܢ. 16 ܗܘܼ ܕܹܝܢ ܡܵܪܲܢ ܝܼܫܘܿܥ ܡܫܝܼܚܵܐ ܘܐܲܠܵܗܵܐ ܐܲܒ݂ܘܼܢ. ܗܵܘ ܕܐܲܚܒܲܢ ܘܝܲܗ̄ܒ݂ ܠܲܢ ܒܘܼܝܵܐܵܐ ܕܲܠܥܵܠܲܡ. ܘܣܲܒ݂ܪܵܐ ܛܵܒ݂ܵܐ ܒܛܲܝܒܘܼܬܹܗ. 17 ܢܒܲܝܲܐ ܠܸܒܵܘܵܬ݂ܟ݂̈ܘܿܢ. ܘܲܢܩܲܝܸܡ ܒܟ݂ܠ ܡܸܠܹ̈ܐ. ܘܲܒܟ݂ܠ ܥܒ݂ܵܕ݂ ܛܵܒ݂.

ܩܦܠܐܘܢ ܓ

1 ܡܸܢ ܗܵܫܵܐ ܐܲܚܲܝ̈ܢ ܨܲܠܵܘ ܥܠܲܝܢ. ܕܡܸܠܬܹܗ ܕܡܵܪܲܢ ܬܸܗܘܹܐ ܪܵܗܛܵܐ ܘܡܸܫܬܲܒܚܵܐ ܒܟ݂ܠ ܕܘܼܟܵܐ ܐܲܝܟ݂ ܕܲܠܘܵܬ݂ܟ݂ܘܿܢ. 2 ܘܲܕ݂ܢܸܬ݂ܦܲܨܹܐ ܡܸܢ ܒܢܲܝ̈ܢܵܫܵܐ ܒܝܼܫܹ̈ܐ ܘܥܲܢ̈ܵܬܹܐ. ܠܵܘ ܓܹܝܪ ܕܟ݂ܠܢܵܫ ܗ̄ܝܼ ܗܲܝܡܵܢܘܼܬ݂ܵܐ. 3 ܡܗܲܝܡܲܢ ܗܘܼ ܕܹܝܢ ܡܵܪܝܵܐ. ܕܗܘܼ ܢܢܲܛܲܪܟ݂ܘܿܢ. ܘܲܢܫܵܘܙܸܒ݂ܟ݂ܘܿܢ ܡܸܢ ܒܝܼܫܵܐ. 4 ܬܿܟ݂ܝܼܠܝܼܢ ܚ̄ܢܲܢ ܕܹܝܢ ܥܠܲܝܟܿܘܿܢ ܒܡܵܪܲܢ. ܕܡܸܕܸܡ ܕܲܡܦܲܩܕ݂ܝܼܢ ܚ̄ܢܲܢ ܠܟ݂ܘܿܢ. ܥܒܲܕܬܿܘܿܢ ܐܵܦ ܥܵܒ݂ܕܝܼܢ ܐ̄ܢܬܘܿܢ. 5 ܘܡܵܪܲܢ ܢܸܬ݂ܪܘܿܨ ܠܸܒܵܘܵܬ݂ܟ݂̈ܘܿܢ. ܠܚܘܼܒܹܗ ܕܐܲܠܵܗܵܐ ܘܠܲܡܣܲܒܪܵܢܘܼܬܹܗ ܕܲܡܫܝܼܚܵܐ 6 ܡܦܲܩܕ݂ܝܼܢ ܚ̄ܢܲܢ ܠܟ݂ܘܿܢ ܕܹܝܢ ܐܲܚܲܝ̈. ܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܕܲܗܘܲܝܬܿܘܿܢ ܦܲܪܝܼܩܝܼܢ ܡܸܢ ܟܠ ܐܲܚܵܐ ܐܲܝܢܵܐ ܕܒ݂ܝܼܫ ܒܝܼܫ ܡܗܲܠܸܟ݂. ܘܠܵܐ ܐܲܝܟ݂ ܦܘܼܩܕܵܢܹ̈ܐ ܕܩܲܒܸܠܘ ܡܸܢܲܢ. 7 ܐܲܢ̄ܬܿܘܿܢ ܓܹܝܪ ܝܵܕ݂ܥܝܼܢ ܐܢ̄ܬܘܿܢ. ܐܲܝܟܲܢܵܐ ܘܵܠܹܐ ܠܡܸܬܿܕܲܡܵܝܘܼ ܒܲܢ. ܕܠܵܐ ܗܲܠܸܟ݂ܢ ܒܝܼܫ ܒܝܼܫ ܒܲܝܢܵܬ݂ܟ݂ܘܿܢ. 8 ܐܵܦܠܵܐ ܠܲܚܡܵܐ ܕܡܲܓܵܢ ܐܸܟܲܠ̣ܢ ܡܸܢ ܐ̄ܢܵܫ ܡܸܢܟ݂ܘܿܢ. ܐܸܠܵܐ ܒܥܲܡܠܵܐ ܘܲܒ݂ܠܹܐܘܬ݂ܵܐ ܒܠܸܠܝܵܐ ܘܒ݂ܐܝܼܡܵܡܵܐ ܦܵܠܚܝܼܢ ܗ̄ܘܲܝܢ. ܕܥܲܠ ܐ̄ܢܵܫ ܡܸܢܟ݂ܘܿܢ ܠܵܐ ܢܹܐܩܲܪ. 9 ܠܵܐ ܗ̄ܘܵܐ ܡܛܠ ܕܠܵܐ ܫܲܠܝܼܛ ܠܲܢ. ܐܸܠܵܐ ܕܲܒ݂ܢܲܦ̮ܫܲܢ ܢܸܬܸܿܠ ܠܟ݂ܘܿܢ ܛܘܼܦ̮ܣܵܐ ܕܒܲܢ ܬܸܬܿܕܲܡܘܿܢ. 10 ܐܵܦ ܟܲܕ݂ ܠܘܵܬ݂ܟ݂ܘܿܢ ܗ̄ܘܲܝܢ ܓܹܝܪ. ܗܵܕܹܐ ܡܦܲܩܕ݂ܝܼܢ ܗ̄ܘܲܝܢ ܠܟ݂ܘܿܢ. ܕܟ݂ܠ ܕܠܵܐ ܨܵܒܹܐ ܕܢܸܦܠܘܿܚ. ܐܵܦܠܵܐ ܢܸܠܥܲܣ. 11 ܫܵܡܥܝܼܢ ܚ̄ܢܲܢ ܓܹܝܪ. ܕܐܝܼܬ݂ ܒܟ݂ܘܿܢ ܐ̄ܢܵܫܵܐ ܕܒ݂ܝܼܫ ܒܝܼܫ ܡܗܲܠܟ݂ܝܼܢ. ܘܡܸܕܸܡ ܠܵܐ ܦܵܠܚܝܼܢ ܐܸܠܵܐ ܐܸܢ ܣܪ̈ܝܼܩܵܬ݂ܵܐ. 12 ܠܗܘܿܢ ܕܹܝܢ ܠܗܵܠܹܝܢ ܡܦܲܩܕ݂ܝܼܢ ܚ̄ܢܲܢ: ܘܒ݂ܵܥܹܝܢ ܚ̄ܢܲܢ ܡܸܢܗܘܿܢ ܒܡܵܪܲܢ ܝܼܫܘܿܥ ܡܫܝܼܚܵܐ. ܕܲܒ݂ܫܸܠܝܵܐ ܢܸܗܘܘܿܢ ܦܵܠܚܝܼܢ ܘܐܵܟ݂ܠܝܼܢ ܠܲܚܡܗܘܿܢ. 13 ܐ̄ܢܬܘܿܢ ܕܹܝܢ ܐܲܚܲܝ̈. ܠܵܐ ܬܸܡܐܲܢ ܠܟ݂ܘܿܢ ܠܡܸܥܒܲܕ݂ ܕܫܲܦܝܼܪ. 14 ܘܐܸܢ ܐ̄ܢܵܫ ܠܵܐ ܡܸܫܬܿܡܲܥ ܠܡܸܠܲܝ̈ܢ ܗܵܠܹܝܢ ܕܒܸܐܓܲܪܬܵܐ. ܢܸܬ݂ܦܪܸܫ ܠܟ݂ܘܿܢ ܗܵܢܵܐ. ܘܠܵܐ ܗܘܲܝܬܿܘܿܢ ܡܸܬ݂ܚܲܠܛܝܼܢ ܥܲܡܹܗ ܕܢܸܒ݂ܗܲܬ݂. 15 ܘܠܵܐ ܐܲܝܟ݂ ܒܥܸܠܕܒ݂ܵܒ݂ܵܐ ܬܹܐܚܕ݁ܘܼܢܸܗ. ܐܸܠܵܐ ܗܘܲܝܬܿܘܿܢ ܡܲܪܬܹܿܝܢ ܠܹܗ ܐܲܝܟ݂ ܕܠܲܐܚܵܐ. 16 ܗܘܼ ܕܹܝܢ ܡܵܪܹܗ ܕܲܫܠܵܡܵܐ ܢܸܬܸܿܠ ܠܟ݂ܘܿܢ ܫܠܵܡܵܐ ܒܟ݂ܠܙܒܲܢ ܒܟ݂ܠܡܸܕ݂ܡ. ܡܵܪܲܢ ܥܲܡ ܟܠܟ݂ܘܿܢ. 17 ܫܠܵܡܵܐ ܒܲܟ݂ܬ݂ܵܒܲܬ݂ ܐܝܼܕ݂ܲܝ̈. ܐܸܢܵܐ ܦܵܘܠܘܿܣ ܟܸܬ݂ܒܹ݁ܬ݂. ܕܐܝܼܬ݂ܵܘܗܝ ܐܵܬ݂ܵܐ ܕܲܒ݂ܟ݂ܠܗܹܝܢ ܐܸܓ݁ܪ̈ܵܬ݂ܝ. ܗܵܟܲܢܵܐ ܟܵܬܹܒ݂ ܐ̄ܢܵܐ. 18 ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܟ݂ܘܿܢ. (ܟܠܟ݂ܘܿܢ ܐܲܚܲܝ̈.) ܐܵܡܹܝܢ.