ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܩܕܡܝܬܐ ܕܦܘܠܘܣ ܫܠܝܚܐ ܕܠܘܬ ܬܣܠܘܢܝܩܝ̈ܐ

ܩܦܠܐܘܢ: ܐ

1 ܦܘܠܘܿܣ ܘܣܸܠܘܵܢܘܿܣ ܘܛܝܼܡܵܬܹܐܘܿܣ: ܠܥܹܕܬܵܐ ܕܬܹܣܵܠܘܿܢܝܼܩܵܝܹ̈ܐ ܕܒܲܐܠܵܗܵܐ ܒܵܒܵܐ ܘܒܡܵܪܲܢ ܝܼܫܘܿܥ ܡܫܝܼܚܵܐ: ܫܵܦܵܩܲܬ ܥܲܡܵܘܟ݂ܘܿܢ ܘܫܠܵܡܵܐ.

2 ܫܵܟܘܿܪܹܐ ܝܘܵܚ ܠܐܲܠܵܗܵܐ ܒܟܠ ܙܲܒ݂ܢܵܐ ܣܵܒܵܒ ܕܠܵܘܟ݂ܘܿܢ: ܘܡܲܕܟ݂ܘܿܪܵܘܟ݂ܘܿܢ ܝܼܘܵܚ ܒܨ̈ܠܵܘܵܬܲܢ: 3 ܘܒܸܕܟ݂ܵܪܵܐ ܝܘܵܚ ܕܠܵܐ ܫܠܵܝܬܵܐ ܩܵܕ݇ܡ ܐܲܠܵܗܵܐ ܒܵܒܲܢ ܦܘܼܠܚܵܢܹ̈ܐ ܕܗܲܝܡܵܢܘܼܬܵܘܟ݂ܘܿܢ: ܘܓ̰ܵܦܵܐ ܕܚܘܼܒܵܘܟ݂ܘܿܢ: ܘܚܡܵܠܬܵܐ ܕܗܹܒ݂ܝܼܵܘܟ݂ܘܿܢ ܕܒܡܵܪܲܢ ܝܼܫܘܿܥ ܡܫܝܼܚܵܐ: 4 ܕܒܝܼܕܲܥܬܵܐ ܝܘܵܚ ܓܵܒܵܝܬܵܘܟ݂ܘܿܢ: ܐܵܚܘܿܢܘܵܬܝܼ̈: ܡܘܼܚܸܒܹ̈ܐ ܕܐܲܠܵܗܵܐ: 5 ܕܵܐܟ݂ܝܼ ܕܡܲܫܚܲܕܬܲܢ ܠܵܐ ܗ݇ܘܹܠܵܐ ܠܟܸܣܠܵܘܟ݂ܘܿܢ ܒܗܹܡܸܙܡܵܢ ܗܲܪ: ܐܸܠܵܐ ܐܘܼܦ ܒܚܲܝܠܵܐ: ܘܒܪܘܼܚܵܐ ܕܩܘܼܕܫܵܐ: ܘܒܗܲܡܲܢܬܵܐ ܬܲܡܵܡ: ܐܲܝܟ݂ ܕܐܲܚܬܘܿܢ ܒܝܼܕܲܥܝܵܐ ܝܬܘܿܢ ܕܐܵܟ݂ܝܼ ܗ݇ܘܹܠܲܢ ܒܓܵܘܵܘܟ݂ܘܿܢ ܒܚܵܬܸܪ ܕܝܼܵܘܟ݂ܘܿܢ. 6 ܘܐܲܚܬܘܿܢ ܒܝܼܲܢ ܗ݇ܘܹܠܵܘܟ݂ܘܿܢ ܕܵܡܝܵܢܹ̈ܐ: ܘܒܡܵܪܲܢ: ܕܩܘܼܒܸܠܵܘܟ݂ܘܿܢ ܗܹܡܸܙܡܵܢ ܒܐܘܼܠܨܵܢܵܐ ܓܘܼܪܵܐ: ܒܚܲܕܘܼܬܵܐ ܕܪܘܼܚܵܐ ܕܩܘܼܕܫܵܐ: 7 ܕܐܵܟ݂ܝܼ ܕܗ݇ܘܹܠܵܘܟ݂ܘܿܢ ܛܘܼܦ̮ܣܵܐ ܠܟܠܵܝ ܗܲܡܸܢܵܢܹ̈ܐ ܕܓܵܘ ܡܵܩܹܕܘܿܢܝܼܵܐ ܘܓܵܘ ܐܵܟ݂ܵܐܝܼܵܐ. 8 ܣܵܒܵܒ ܡܸܢܵܘܟ݂ܘܿܢ ܦܸܫܠܵܐ ܫܡܝܼܥܬܵܐ ܗܹܡܸܙܡܵܢ ܕܡܵܪܲܢ: ܐܸܠܵܐ ܓܵܘ ܡܵܩܹܕܘܿܢܝܼܵܐ ܘܐܵܟ݂ܵܐܝܼܵܐ ܗܲܪ: ܐܸܠܵܐ ܒܟܠ ܕܘܼܟܵܐ ܗܲܝܡܵܢܘܼܬܵܘܟ݂ܘܿܢ ܕܒܲܐܠܵܗܵܐ ܦܠܝܼܛܬܵܐ ܝܠܵܐ: ܕܐܵܟ݂ܝܼ ܕܠܹܐ ܣܵܢܩܵܚ ܕܐܵܡܪܵܚ ܡܸܢܕܝܼ. 9 ܣܵܒܵܒ ܐܵܢܝܼ ܗܵܩܘܿܝܹܐ ܝܢܵܐ ܒܵܗ݇ܣܲܢ ܡܘܼܕܝܼ ܐܘܵܪܵܐ ܐܝܼܬ ܗ݇ܘܵܐ ܠܲܢ ܠܟܸܣܠܵܘܟ݂ܘܿܢ: ܘܕܵܐܟ݂ܝܼ ܕܸܪܵܘܟ݂ܘܿܢ ܠܟܸܣ ܐܲܠܵܗܵܐ ܡ̣ܢ ܨܵܢܲܡܹ̈ܐ: ܕܦܵܠܚܝܼܬܘܿܢ ܠܐܲܠܵܗܵܐ ܚܲܝܵܐ ܘܫܲܪܝܼܪܵܐ: 10 ܟܲܕ ܣܵܦܪܝܼܬܘܿܢ ܠܒܪܘܼܢܹܗ ܡ̣ܢ ܫܡܲܝܵܐ: ܠܝܼܫܘܿܥ: ܗ̇ܘ ܕܡܘܼܩܸܡܠܹܗ ܡ̣ܢ ܡܝܼܬܹ̈ܐ: ܗ̇ܘ ܕܟܹܐ ܦܵܨܹܐ ܠܲܢ ܡ̣ܢ ܟܲܪܒܵܐ ܕܐܵܬܝܵܐ.

ܩܦܠܐܘܢ: ܒ

1 ܣܵܒܵܒ ܐܲܚܬܘܿܢ ܒܝܼܕܲܥܝܵܐ ܝܬܘܿܢ: ܐܵܚܘܿܢܘܵܬܝܼ̈: ܕܐܘܵܪܬܲܢ ܕܠܟܸܣܠܵܘܟ݂ܘܿܢ ܠܵܐ ܗ݇ܘܹܠܵܐ ܒܹܐ ܦܲܝܕܵܐ. 2 ܐܸܠܵܐ ܩܵܕ݇ܡܵܝܬܵܐ ܩܘܼܒܸܠܲܢ ܚܲܫܵܐ: ܘܦܸܫܠܲܢ ܡܘܼܣܠܝܼܹܐ: ܐܲܝܟ. ܕܒܝܼܕܲܥܝܵܐ ܝܬܘܿܢ: ܓܵܘ ܦܝܼܠܝܼܦܘܿܣ: ܘܗ̇ܝܓܵܗ ܒܐܵܓ݂ܘܿܢܵܐ ܓܘܼܪܵܐ ܗܘܼܡܙܸܡܠܲܢ ܥܲܡܵܘܟ݂ܘܿܢ: ܒܒܸܣܬܵܝܘܼܬܵܐ ܕܐܲܠܵܗܲܢ: ܡܲܫܚܲܕܬܹܗ ܕܐܲܠܵܗܵܐ. 3 ܣܵܒܵܒ ܢܲܨܝܼܗܲܬܲܢ ܠܹܐ ܗ݇ܘܵܐ ܡ̣ܢ ܚܸܠܛܘܼܢܝܘܼܬܵܐ: ܐܘܼܦ ܠܵܐ ܡ̣ܢ ܛܲܢܦܘܼܬܵܐ: ܐܘܼܦ ܠܵܐ ܒܦܸܠܡܵܐ: 4 ܐܸܠܵܐ ܐܲܝܟ݂ ܕܦܝܼܫܹܐ ܝܘܵܚ ܡܘܼܚܫܸܚܹܐ ܡ̣ܢ ܐܲܠܵܗܵܐ ܕܦܵܝܫܵܐ ܣܘܼܦܝܼܬܵܐ ܒܝܼܲܢ ܡܲܫܚܲܕܬܹܗ: ܗܲܕܟ݂ܵܐ ܗܲܡܙܘܼܡܹܐ ܝܘܵܚ: ܠܵܐ ܐܲܝܟ݂ ܕܠܒܢܲܝ̈ܢܵܫܵܐ ܫܵܦܪܵܚ: ܐܸܠܵܐ ܠܐܲܠܵܗܵܐ: ܗ̇ܘ ܕܟܹܐ ܨܲܚܹܨܐ ܠܸܒܵܘ̈ܬܲܢ. 5 ܣܵܒܵܒ ܐܘܼܦ ܗܸܟ̃ ܠܵܐ ܡܘܼܦܠܸܚܠܲܢ ܗܹܡܸܙܡܵܢ ܕܫܵܕܲܠܬܵܐ: ܐܲܝܟ݂ ܕܒܝܼܕܲܥܝܵܐ ܝܬܘܿܢ: ܘܠܵܐ ܒܡܵܗܵܢܵܐ ܕܛܲܡܲܥܟܵܪܘܼܬܵܐ: ܐܲܠܵܗܵܐ ܣܵܗܕܵܐ ܝܠܹܐ: 6 ܘܠܵܐ ܛܸܥܠܲܢ ܠܚܸܩܪܵܐ ܡ̣ܢ ܒܢܲܝ̈ܢܵܫܵܐ: ܠܵܐ ܡܸܢܵܘܟ݂ܘܿܢ: ܘܠܵܐ ܡ̣ܢ ܐܚܹܪ̈݇ܢܹܐ: ܟܲܕ ܡܵܨܵܚ ܗ݇ܘܵܘ ܠܸܗܘܵܝܵܐ ܝܵܩܘܿܪܹ̈ܐ ܐܲܝܟ݂ ܫܠܝܼܚܹ̈ܐ ܕܡܫܝܼܚܵܐ. 7 ܐܸܠܵܐ ܗ݇ܘܹܠܲܢ ܓܵܘܵܘܟ݂ܘܿܢ ܡܵܟܝܼܟ݂ܹ̈ܐ: ܘܐܲܝܟ݂ ܓܲܪܘܸܣܵܢܬܵܐ ܕܓܲܪܘܸܣܵܐ ܝܵܠܘܼ̈ܗ̇: 8 ܗܲܕܟ݂ܵܐ ܐܘܼܦ ܐܲܚܢܲܢ ܡܲܚܘܼܒܵܘܟ݂ܘܿܢ ܝܼܘܵܚ: ܟܲܕ ܒܣܸܡܠܵܐ ܠܲܢ ܠܝܼܵܗ݇ܒ݂ܵܘܟ݂ܘܿܢ ܠܵܐ ܗܲܪ ܡܲܫܚܲܕܬܹܗ ܕܐܲܠܵܗܵܐ: ܐܸܠܵܐ ܐܘܼܦ ܓܵܢ̈ܬܲܢ: ܣܵܒܵܒ ܕܡܘܼܚܸܒܹ̈ܐ ܝܬܘܿܢ ܗ݇ܘܵܘ ܐܸܠܲܢ. 9 ܣܵܒܵܒ ܒܸܕܟ݂ܵܪܵܐ ܝܬܘܿܢ: ܐܵܚܘܿܢܘ̈ܵܬܲܢ: ܓ̰ܵܗܝܬܲܢ ܘܓ̰ܵܦܲܢ: ܟܲܕ ܒܸܦܠܵܚܵܐ ܒܠܲܝܠܹܐ ܘܒܐܝܼܡܵܡܵܐ: ܕܥܲܠ ܚܵܕ݇ ܡܸܢܵܘܟ݂ܘܿܢ ܠܵܐ ܥܵܒ݂ܕܵܚ ܗ݇ܘܵܘ ܝܘܼܩܪܵܐ: ܡܘܼܟܪܸܙܠܲܢ ܐܸܠܵܘܟ݂ܘܿܢ ܡܲܫܚܲܕܬܹܗ ܕܐܲܠܵܗܵܐ. 19 ܐܲܚܬܘܿܢ ܣܵܗܕܹ̈ܐ ܝܬܘܿܢ ܘܐܲܠܵܗܵܐ: ܕܐܵܟ݂ܝܼ ܒܩܲܕܝܼܫܘܼܬܵܐ ܘܒܙܲܕܝܼܩܘܼܬܵܐ ܘܕܠܵܐ ܠܵܘܡܵܐ ܗ݇ܘܹܠܲܢ ܠܟܸܣܠܵܘܟ݂ܘܿܢ ܕܗܲܡܘܼܢܹܐ ܝܬܘܿܢ: 11 ܕܐܵܟ݂ܝܼ ܕܒܝܼܕܲܥܝܵܐ ܝܬܘܿܢ: ܕܒܟܠ ܚܵܕ݇ ܡܸܢܵܘܟ݂ܘܿܢ: ܐܲܝܟ݂ ܒܵܒܵܐ ܒܝܵܠܘܼ̈ܗܝ ܦܘܼܪܦܸܠܲܢ ܘܝܸܗܒܸܠܲܢ ܠܸܒܵܐ ܐܸܠܵܘܟ݂ܘܿܢ: 12 ܟܲܕ ܒܸܣܗܵܕܵܐ ܐܸܠܵܘܟ݂ܘܿܢ ܕܚܵܕܪܝܼܬܘܿܢ ܐܲܝܟ݂ ܕܚܵܫܚܵܐ ܠܐܲܠܵܗܵܐ: ܗ̇ܘ ܕܩܲܡ ܩܵܪܹܐ ܠܵܘܟ݂ܘܿܢ ܠܡܲܠܟܘܼܬܹܗ ܘܠܚܸܩܪܹܗ. 13 ܣܵܒܵܒ ܕܐܵܗܵܐ ܐܘܼܦ ܐܲܚܢܲܢ ܫܵܟܘܿܪܹܐ ܝܘܵܚ ܒܕܵܝܼܡܘܼܬܵܐ ܠܐܲܠܵܗܵܐ: ܕܗܹܡܸܙܡܵܢ ܕܐܲܠܵܗܵܐ ܕܩܘܼܒܠܵܠܵܘܟ݂ܘܿܢ ܡܸܢܲܢ: ܠܵܐ ܐܲܝܟ݂ ܗܹܡܸܙܡܵܢ ܕܒܢܲܝ̈ܢܵܫܵܐ ܩܘܼܒܠܵܠܵܘܟ݂ܘܿܢ: ܐܸܠܵܐ ܕܵܐܟ݂ܝܼ ܕܝܼܠܵܐ ܫܲܪܝܼܪܵܐܝܼܬ݂: ܗܹܡܸܙܡܵܢ ܕܐܲܠܵܗܵܐ: ܗ̇ܝ ܕܒܸܦܠܵܚܵܐ ܝܠܵܐ ܒܝܼܵܘܟ݂ܘܿܢ ܕܗܲܡܙܼܢܹܐ ܝܬܘܿܢ. 14 ܣܵܒܵܒ ܐܲܚܬܘܿܢ: ܐܵܚܘܿܢܘܵܬܝܼ̈: ܗ݇ܘܹܠܵܘܟ݂ܘܿܢ ܕܵܡܝܵܢܹ̈ܐ ܠܥܹܕܵܬܹ̈ܐ ܕܐܲܠܵܗܵܐ ܕܒܝܼܗܘܼܕ ܒܝܼܫܘܿܥ ܡܫܝܼܚܵܐ: ܕܗܲܪ ܐܲܢܹܐ ܦܘܼܒܸܠܵܘܟ݂ܘܿܢ ܐܘܼܦ ܐܲܚܬܘܿܢ ܡ̣ܢ ܡܸܠܲܬܵܘܟ݂ܘܿܢ: ܕܐܵܟ݂ܝܼ ܕܐܘܼܦ ܐܵܢܝܼ ܡ̣ܢ ܝܗ݇ܘܼܕܵܝܹ̈ܐ: 15 ܐܵܢܝܼ ܕܠܡܵܪܲܢ ܝܼܫܘܿܥ ܩܛܸܠܘܿܢ ܘܠܢܒ݂̈ܝܼܹܐ: ܘܐܸܠܲܢ ܛܪܸܕܠܘܿܢ: ܘܠܲܐܠܵܗܵܐ ܠܹܐ ܫܵܦܪܝܼ: ܘܗܘܝܼܹܐ ܝܢܵܐ ܕܲܪܩܘܼܒ݂ܠ ܠܟܠܵܝ ܒܢܲܝ̈ܢܵܫܵܐ: 16 ܕܡܲܟܠܘܼܝܲܢ ܝܼܢܵܐ ܕܗܲܡܙܸܡܵܚ ܥܲܡ ܛܵܝܸܦܹ̈ܐ ܕܚܲܝܝܼ: ܠܬܲܡܘܼܡܹܐ ܚܛܝܼܵܬܵܝ̈ ܒܟܠ ܙܲܒ݂ܢܵܐ. ܐܝܼܢܵܐ ܡܛܹܠܵܐ ܥܲܠܵܝ ܟܲܪܒܵܐ ܗܲܠ ܚܲܪܬܵܐ.

17 ܐܝܼܢܵܐ ܐܲܚܢܲܢ: ܐܵܚܘܿܢܘܵܬܝܼ̈: ܟܲܕ ܗ݇ܘܹܠܲܢ ܝܵܬܘܿܡܹ̈ܐ ܡܸܢܵܘܟ݂ܘܿܢ ܙܲܒ݂ܢܵܐ ܕܣܵܥܲܬ: ܒܦܵܬܵܐ ܘܠܵܐ ܒܠܸܒܲܢ: ܒܘܼܫ ܙܵܘܕܵܐ ܚܘܼܒܸܛܠܲܢ ܕܚܵܙܵܚ ܗ݇ܘܵܘ ܦܵܬܵܘܟ݂ܘܿܢ ܒܫܲܗ݇ܘܲܬܬܵܐ ܓܘܼܪܬܵܐ: 18 ܣܵܒܵܒ ܒܸܥܠܲܢ ܠܐܹܬܵܝܵܐ ܠܟܸܣܠܵܘܟ݂ܘܿܢ ܐܵܢܵܐ ܦܵܘܠܘܿܣ ܚܕܵܐ ܓܵܗܵܐ ܘܬܲܪ̈ܬܹܝ: ܘܡܘܼܟܠܝܼܵܚܠܹܐ ܣܵܛܵܢܵܐ. 19 ܣܵܒܵܒ ܡܘܼܕܝܼ ܝܠܵܐ ܗܹܒ݂ܝܼܲܢ: ܘܚܲܕܘܼܬܲܢ: ܘܬܵܐܓ̰ ܕܫܘܼܒ݂ܗܵܪܲܢ: ܠܵܐ ܗܲܪ ܐܲܚܬܘܿܢ: ܩܵܕ݇ܡ ܡܵܪܲܢ ܝܼܫܘܿܥ ܡܫܝܼܚܵܐ ܒܐܬܵܝܬܹܗ: 20 ܣܵܒܵܒ ܐܲܚܬܘܿܢ ܝܼܬܘܿܢ ܚܸܩܪܲܢ ܘܚܲܕܘܼܬܲܢ.

ܩܦܠܐܘܢ: ܓ

1 ܣܵܒܵܒ ܟܲܕ ܐܚܹܪ݇ܢܵܐ ܠܵܐ ܚܡܸܠܲܢ: ܒܣܸܡܠܵܐ ܠܲܢ ܠܸܦܝܵܫܵܐ ܫܒ݂ܝܼܩܹܐ ܒܐܵܬܹܢܘܿܣ ܒܢܲܦ̮ܫܲܢ: 2 ܘܫܘܼܕܸܪܢ ܠܟܸܣܠܵܘܟ݂ܘܿܢ ܠܛܝܼܡܵܬܹܐܘܿܣ ܐܵܚܘܿܢܲܢ: ܚܸܠܡܲܢܟܵܪ ܕܐܲܠܵܗܵܐ ܘܦܵܠܵܚܵܐ ܥܲܡܲܢ ܒܡܲܫܚܲܕܬܹܗ ܕܡܫܝܼܚܵܐ: ܕܡܲܩܘܹܐ ܠܵܘܟ݂ܘܿܢ: ܘܝܵܗ݇ܒܸܠ ܠܵܘܟ݂ܘܿܢ ܠܸܒܵܐ ܥܲܠ ܗܲܝܡܵܢܘܼܬܵܘܟ݂ܘܿܢ: 3 ܕܐ݇ܢܵܫܵܐ ܡܸܢܵܘܟ݂ܘܿܢ ܠܵܐ ܦܵܝܸܫ ܫܥܝܼܫܵܐ ܒܐܲܢܹܐ ܐܘܼܠܨܵܢܹ̈ܐ: ܣܵܒܵܒ ܐܲܚܬܘܿܢ ܒܝܼܕܲܥܝܵܐ ܝܬܘܿܢ ܕܠܵܐܗܵܐ ܡܘܼܬܒ݂ܹܐ ܝܘܵܚ. 4 ܣܵܒܵܒ ܐܘܼܦ ܟܲܕ ܠܟܸܣܠܵܘܟ݂ܘܿܢ ܝܼܘܵܚ ܗ݇ܘܵܘ: ܩܵܕ݇ܡܵܝܬܵܐ ܐܡܸܪܲܢ ܐܸܠܵܘܟ݂ܘܿܢ: ܕܗܕܝܼܪܹܐ ܝܘܵܚ ܠܸܦܝܵܫܵܐ ܡܘܼܠܝܼܨܹܐ: ܕܐܵܟ݂ܝܼ ܕܒܝܼܕܲܥܝܵܐ ܝܬܘܿܢ ܕܗ݇ܘܹܠܵܐ. 5 ܣܵܒܵܒ ܕܐܵܗܵܐ ܐܘܼܦ ܐܵܢܵܐ: ܟܲܕ ܐ݇ܚܹܪ݇ܢܵܐ ܠܵܐ ܚܡܸܠܝܼ: ܫܘܼܕܸܪܝܼ ܕܝܲܕܥܸܬ ܗ݇ܘܵܐ ܗܲܝܡܵܢܘܼܬܵܘܟ݂ܘܿܢ: ܠܵܐ ܗ݇ܘܹܐ ܕܓ̰ܵܪܸܒ ܠܵܘܟ݂ܘܿܢ ܓ̰ܵܪܒܵܢܵܐ: ܘܗܵܘܹܐ ܓ̰ܵܦܲܢ ܒܹܐ ܦܲܝܕܵܐ. 6 ܐܝܼܢܵܐ ܠܵܕܝܼܵܐ: ܡ̣ܢ ܕܐܬܹܠܹܐ ܠܟܸܣܠܲܢ ܛܝܼܡܵܬܹܐܘܿܣ ܡܟܸܣܠܵܘܟ݂ܘܿܢ: ܘܡܘܼܫܚܸܕܵܚܠܹܐ ܥܲܠ ܗܲܝܡܵܢܘܼܬܵܘܟ݂ܘܿܢ ܘܚܘܼܒܵܘܟ݂ܘܿܢ: ܘܕܐܝܼܬ ܠܟܸܣܠܵܘܟ݂ܘܿܢ ܕܟ݂ܵܪ̈ܲܢ ܛܵܒ݂ܵܐ ܒܟܠ ܥܕܵܢܵܐ: ܘܫܘܼܗ݇ܘܸܬܹܐ ܝܬܘܿܢ ܠܸܚܙܵܝܲܢ: ܕܐܵܟ݂ܝܼ ܕܐܘܼܦ ܐܸܠܵܘܟ݂ܘܿܢ: 7 ܣܵܒܵܒ ܕܐܵܗܵܐ ܦܸܫܠܲܢ ܝܘܼܗ݇ܒܹܐ ܠܸܒܵܐ ܒܝܼܵܘܟ݂ܘܿܢ: ܐܵܚܘܿܢܘ̈ܵܬܲܢ: ܒܟܠܵܝ ܥܹܩܘܼ̈ܘܲܢ ܘܐܘܼܠ̈ܨܵܢܲܢ ܒܝܼܸܕ ܗܲܝܡܵܢܘܼܬܵܘܟ݂ܘܿܢ. 8 ܣܵܒܵܒ ܐܵܕܝܼܵܐ ܒܸܚܵܝܵܐ ܝܘܵܚ: ܐܸܢ ܐܲܚܬܘܿܢ ܟܵܠܝܼܬܘܿܢ ܒܡܲܪ̈ܲܢ. 9 ܣܵܒܵܒ ܡܘܼܕܝܼ ܫܵܟܲܪܬܵܐ ܡܵܨܵܚ ܠܸܦܪ̈ܲܥܝܵܐ ܡܒܵܕܵܠܵܘܟ݂ܘܿܢ ܠܐܲܠܵܗܵܐ: ܒܘܼܬ ܟܠ ܚܲܕܘܼܬܵܐ ܕܒܸܚܕܵܝܵܐ ܝܘܵܚ ܣܵܒܵܒ ܕܝܼܵܘܟ݂ܘܿܢ ܩܵܕ݇ܡ ܐܲܠܵܗܲܢ: 10 ܟܲܕ ܦܲܪܦܸܠܵܚ ܒܘܼܫ ܙܵܘܕܵܐ ܒܠܲܝܠܹܐ ܘܒܐܝܼܡܵܡܵܐ: ܕܚܵܙܵܚ ܦܵܬܵܘܟ݂ܘܿܢ: ܘܬܲܡܸܡܵܚ ܡܸܢܕܝܼ ܕܒܵܨܘܿܪܵܐ ܝܠܹܐ ܒܗܲܝܡܵܢܘܼܬܵܘܟ݂ܘܿܢ:

11 ܐܝܼܢܵܐ ܐܲܠܵܗܵܐ ܒܵܒܲܢ: ܘܡܵܪܲܢ ܝܼܫܘܿܥ ܡܫܝܼܚܵܐ: ܬܵܪܹܨ ܐܘܼܪܚܲܢ ܠܟܸܣܠܵܘܟ݂ܘܿܢ: 12 ܘܡܵܪܝܵܐ ܡܲܙܝܸܕ ܘܡܲܦܪܹܐ ܚܘܼܒܵܘܟ݂ܘܿܢ ܕܚܵܕ݇ ܠܟܸܣ ܕܗ̇ܘ ܐܚܹܪ݇ܢܵܐ: ܘܕܠܟܸܣ ܟܠ ܐ݇ܢܵܫܵܐ: ܕܐܵܟ݂ܝܼ ܕܐܲܚܢܲܢ ܟܹܐ ܡܲܚܸܒܵܚ ܠܵܘܟ݂ܘܿܢ: 13 ܘܡܲܩܘܹܐ ܠܸܒܵܬܵܘ̈ܟ݂ܘܿܢ ܕܠܵܐ ܠܵܘܡܵܐ ܒܩܲܕܝܼܫܘܼܬܵܐ ܩܵܕ݇ܡ ܐܲܠܵܗܵܐ ܒܵܒܲܢ: ܒܐܬܵܝܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܥܲܡ ܟܠܵܝ ܩܲܕܝܼܫܘܼ̈ܗܝ.

ܩܦܠܐܘܢ: ܕ

1 ܡܐܵܕܝܼܵܐ: ܐܵܚܘܿܢܘܵܬܝܼ̈: ܒܸܒܲܥܝܵܐ ܝܘܵܚ ܡܸܢܵܘܟ݂ܘܿܢ: ܘܦܲܪܦܘܼܠܹܐ ܝܘܵܚ ܒܝܼܵܘܟ݂ܘܿܢ: ܒܡܵܪܲܢ ܝܼܫܘܿܥ: ܕܐܲܝܟ݂ ܕܩܘܼܒܸܠܵܘܟ݂ܘܿܢ ܡܸܢܲܢ ܕܵܐܟ݂ܝܼ ܘܵܓ̰ܸܒ ܝܼܠܵܐ ܕܚܵܕܪܝܼܬܘܿܢ ܘܫܵܦܪܝܼܬܘܿܢ ܠܐܲܠܵܗܵܐ: ܕܐܵܟ݂ܝܼ ܕܐܘܼܦ ܒܸܚܕܵܪܵܐ ܝܬܘܿܢ: ܕܡܲܙܝܸܕܬܘܿܢ ܒܘܼܫ ܙܵܘܕܵܐ. 2 ܣܵܒܵܒ ܒܝܼܕܲܥܝܵܐ ܝܬܘܿܢ ܡܘܼܕܝܼ ܦܘܼܩܕܵܢܹ̈ܐ ܝܸܗܒܸܠܲܢ ܐܸܠܵܘܟ݂ܘܿܢ ܒܡܵܪܲܢ ܝܼܫܘܿܥ. 3 ܣܵܒܵܒ ܐܵܗܵܐ ܝܠܹܐ ܪܸܙܵܝܹܗ ܕܐܲܠܵܗܵܐ: ܩܲܕܝܼܫܘܼܬܵܘܟ݂ܘܿܢ: ܕܗܵܘܝܼܬܘܿܢ ܦܪܝܼܩܹܐ ܡ̣ܢ ܙܵܢܝܘܼܬܵܐ: 4 ܘܗܵܘܹܐ ܒܝܼܕܲܥܝܵܐ ܟܠ ܐ݇ܢܵܫܵܐ ܡܸܢܵܘܟ݂ܘܿܢ ܠܸܢܛܵܪܵܐ ܡܵܐܢܹܗ ܒܩܲܕܝܼܫܘܼܬܵܐ ܘܒܐܝܼܩܵܪܵܐ: 5 ܘܠܵܐ ܒܙܵܘܥܹ̈ܐ ܕܫܲܗ݇ܘܲܬܬܵܐ: ܐܲܝܟ݂ ܛܵܝܸܦܹ̈ܐ: ܐܵܢܝܼ ܕܠܹܐ ܝܲܕܥܝܼ ܠܐܲܠܵܗܵܐ: 6 ܘܠܵܐ ܗܵܘܝܼܬܘܿܢ ܒܸܥܒ݂ܵܪܵܐ ܘܒܸܙܠܵܡܵܐ ܐ݇ܢܵܫܵܐ ܠܐܵܚܘܿܢܹܗ ܒܐܵܗܵܐ ܫܘܼܠܵܐ: ܣܵܒܵܒ ܡܵܪܲܢ ܫܵܩܠܵܢܵܐ ܕܬܘܼܥܠܵܐ ܝܠܹܐ ܒܐܲܢܹܐ ܟܠܵܝ: ܕܐܵܟ݂ܝܼ ܕܐܘܼܦ ܡ̣ܢ ܩܵܕ݇ܡ ܚܵܕ݇ ܙܲܒ݂ܢܵܐ ܐܡܸܪܲܢ ܐܸܠܵܘܟ݂ܘܿܢ ܘܣܗܸܕܠܲܢ. 7 ܣܵܒܵܒ ܠܵܐ ܩܸܪܝܵܚܠܹܐ ܐܲܠܵܗܵܐ ܠܛܲܡܦܘܼܬܵܐ: ܐܸܠܵܐ ܠܩܲܕܝܼܫܘܼܬܵܐ. 8 ܒܲܣ ܗ̇ܘ ܕܡܲܣܠܹܐ: ܠܹܐ ܝܠܹܐ ܠܒܲܪܢܵܫܵܐ ܡܲܣܠܘܼܝܹܐ: ܐܸܠܵܐ ܠܐܲܠܵܗܵܐ: ܗ̇ܘ ܕܝܸܗܒ݂ܸܠܹܐ ܐܸܠܲܢ ܪܘܼܚܹܗ ܩܲܕܝܼܫܬܵܐ.

9 ܐܝܼܢܵܐ ܒܵܗ݇ܣ ܕܚܘܼܒܵܐ ܕܐܵܚܘܿܢܘܵܬܹ̈ܐ ܠܹܐ ܝܬܘܿܢ ܣܢܝܼܩܹܐ ܕܟܵܬܒ݂ܸܢ ܐܸܠܵܘܟ݂ܘܿܢ: ܣܵܒܵܒ ܐܲܚܬܘܿܢ ܒܓܵܢܵܘܟ݂ܘܿܢ ܡܘܼܠܦܹܐ ܝܬܘܿܢ ܡ̣ܢ ܐܲܠܵܗܵܐ ܕܡܲܚܤܒܝܼܬܘܿܢ ܚܵܕ݇ ܠܗ̇ܘ ܐ݇ܚܹܪ݇ܢܵܐ: 10 ܐܘܼܦ ܒܸܥܒ݂ܵܕܵܐ ܝܬܘܿܢ ܗܲܕܟ݂ܵܐ ܠܟܠܵܝ ܐܵܚܘܿܢܘܵܬܹ̈ܐ ܕܝܼܢܵܐ ܒܟܠܵܗ̇ ܡܵܩܹܕܘܿܢܝܼܵܐ. ܐܝܼܢܵܐ ܦܲܪܦܘܼܠܹܐ ܝܘܵܚ ܒܝܼܵܘܟ݂ܘܿܢ: ܐܵܚܘܿܢܘܵܬܝܼ̈: ܕܙܵܘܕܵܐ ܙܵܝܕܝܼܬܘܿܢ: 11 ܘܚܵܒ݁ܛܝܼܬܘܿܢ ܠܸܗ݇ܘܵܝܵܐ ܫܸܠܝܹ̈ܐ: ܘܠܥܸܒ݂ܵܕܵܐ ܫܘܼܠܵܐ ܕܓܵܢܵܘܟ݂ܘܿܢ: ܘܠܸܦܠܵܚܵܐ ܒܐܝܼܕܵܬܵܘ̈ܟ݂ܘܿܢ: ܕܐܵܟ݂ܝܼ ܕܩܲܡ ܦܵܩܕܵܚ ܠܵܘܟ݂ܘܿܢ: 12 ܕܗܵܘܝܼܬܘܿܢ ܒܸܚܕܵܪܵܐ ܒܐܵܕܵܒܘܼܬܵܐ ܠܟܸܣ ܒܲܪ̈ܝܹܐ ܘܥܲܠ ܐ݇ܢܵܫܵܐ ܠܵܐ ܣܵܢܩܝܼܬܘܿܢ.

13 ܐܝܼܢܵܐ ܒܲܥܝܸܢ ܕܝܲܕܥܝܼܬܘܿܢ: ܐܵܚܘܿܢܘܵܬܝܼ̈: ܒܵܗ݇ܣ ܕܐܵܢܝܼ ܕܝܼܢܵܐ ܕܡܝܼܟ݂ܹܐ: ܠܵܐ ܗܵܘܝܼܬܘܿܢ ܒܸܦܫܵܡܵܐ ܐܲܝܟ݂ ܐ݇ܢܵܫܹ̈ܐ ܐܚܹܪ̈݇ܢܹܐ ܕܗܹܒ݂ܝܼ ܠܲܝܬ ܠܗ݇ܘܿܢ. 14 ܣܵܒܵܒ ܐܸܢ ܗܲܡܘܼܢܹܐ ܝܘܵܚ ܕܝܼܫܘܿܥ ܡܸܬܠܹܐ ܘܩܸܡܠܹܐ: ܗܲܕܟ݂ܵܐ ܐܘܼܦ ܐܲܠܵܗܵܐ ܠܐܵܢܝܼ ܕܕܡܸܟ݂ܠܘܿܢ ܒܝܼܫܘܿܥ ܒܸܬ ܡܲܝܬ݇ܝܹܐ ܥܲܡܹܗ. 15 ܐܝܼܢܵܐ ܐܵܢܝܼ ܒܹܐܡܵܪܵܐ ܝܘܵܚ ܐܸܠܵܘܟ݂ܘܿܢ ܒܗܹܡܸܙܡܵܢ ܕܡܵܪܲܢ: ܕܐܲܚܢܲܢ ܐܵܢܝܼ ܕܗܵܘܵܚ ܚܵܝܹ̈ܐ: ܕܦܵܝܫܵܚ ܠܐܬܵܝܬܹܗ ܕܡܵܪܲܢ: ܠܹܐ ܩܵܕܡܵܚ ܠܐܵܢܝܼ ܕܕܡܸܟ݂ܠܘܿܢ. 16 ܣܵܒܵܒ ܡܵܪܲܢ ܒܓܵܢܹܗ: ܒܩܲܘܲܚܬܵܐ: ܘܒܩܵܠܵܐ ܕܪܸܫ ܡܲܠܲܐܟ݂ܹ̈ܐ: ܘܒܫܝܼܦܘܿܪܵܐ ܕܐܲܠܗܵܐ: ܒܸܬ ܨܵܠܹܐ ܡ̣ܢ ܫܡܲܝܵܐ: ܘܡܝܼܬܹ̈ܐ ܕܒܡܫܝܼܚܵܐ ܒܸܬ ܩܵܝܡܝܼ ܩܵܕ݇ܡܵܝܬܵܐ. 17 ܘܗ̇ܝܓܵܗ ܐܲܚܢܲܢ ܕܚܵܝܹ̈ܐ: ܐܵܢܝܼ ܕܥܲܪܩܸܠܵܚ: ܒܸܬ ܦܵܝܫܵܚ ܓ̰ܢܝܼܘܹܐ ܥܲܡܵܝ ܡܸܚܕܵܕܹ̈ܐ ܒܥܢܵܢܹ̈ܐ: ܠܐܘܼܪܚܹܗ ܕܡܵܪܲܢ ܒܗܵܘܵܐ. ܘܗܲܕܟ݂ܵܐ ܒܟܠ ܙܲܒ݂ܢܵܐ ܥܲܡ ܡܵܪܲܢ ܒܸܬ ܗܵܘܵܚ. 18 ܒܲܣ ܗ݇ܘܹܡܘܿܢ ܒܝܼܵܗ݇ܒ݂ܵܐ ܠܸܒܵܐ ܚܵܕ݇ ܠܗ̇ܘ ܐ݇ܚܹܪ݇ܢܵܐ ܒܐܲܢܹܐ ܗܹܡܸܙܡܵܢܹ̈ܐ.

ܩܦܠܐܘܢ: ܗ

1 ܐܝܼܢܵܐ ܒܵܗ݇ܣ ܕܙܲܒ݂ܢܹ̈ܐ ܘܥܕܵܢܹ̈ܐ: ܐܵܚܘܿܢܘܵܬܝܼ̈: ܠܹܐ ܝܬܘܿܢ ܣܢܝܼܩܹܐ ܕܟܵܬܒܸܢ ܐܸܠܵܘܟ݂ܘܿܢ. 2 ܣܵܒܵܒ ܐܲܚܬܘܿܢ ܝܵܩܝܼܢ ܟܹܐ ܝܲܕܥܝܼܬܘܿܢ ܕܝܘܿܡܹܗ ܕܡܵܪܲܢ ܐܲܝܟ݂ ܓܹܢܵܒ݂ܵܐ ܒܠܲܝܠܹܐ ܗܲܕܟ݂ܐ ܒܹܐܬܵܝܵܐ ܝܠܹܐ. 3 ܟܲܕ ܐܵܡܪܝܼ: ܫܠܵܡܵܐ ܘܫܲܝܢܵܐ: ܗ̇ܝܓܵܗ ܡܸܢܫܸܠܬܵܢܹ̈ܐ ܒܸܬ ܩܵܝܸܡ ܥܲܠܵܝ ܬܠܵܩܵܐ: ܐܲܝܟ݂ ܚܸܒ݂̈ܠܹܐ ܥܲܠ ܒܛܝܼܢܬܵܐ: ܘܠܹܐ ܚܵܠܨܝܼ. 4 ܐܝܼܢܵܐ ܐܲܚܬܘܿܢ: ܐܵܚܘܿܢܘܵܬܝܼ̈: ܠܹܐ ܝܬܘܿܢ ܒܚܘܼܒ݂ܝܵܐ: ܕܗ̇ܘ ܝܘܿܡܵܐ ܐܲܝܟ݂ ܓܹܢܵܒ݂ܵܐ ܡܵܛܹܐ ܠܵܘܟ݂ܘܿܢ: 5 ܣܵܒܵܒ ܟܠܵܘܟ݂ܘܿܢ ܒܢܘܼܢܹ̈ܐ ܕܒܲܗܪܵܐ ܝܬܘܿܢ ܘܒܢܘܼܢܹ̈ܐ ܕܐܝܼܡܵܡܵܐ: ܘܠܹܐ ܝܘܵܚ ܕܠܲܝܠܹܐ ܘܠܵܐ ܕܚܘܼܒ݂ܝܵܐ. 6 ܒܲܣ ܠܵܐ ܕܵܡܟ݂ܵܚ ܐܲܝܟ݂ ܐܚܹܪ̈݇ܢܹܐ: ܐܸܠܵܐ ܥܵܒ݂ܕܵܚ ܫܵܗܲܪܬܵܐ ܘܗܵܘܵܚ ܪܥܝܼܫܹܐ. 7 ܣܵܒܵܒ ܐܵܢܝܼ ܕܕܵܡܟ݂ܝܼ: ܒܠܲܝܠܹܐ ܟܹܐ ܕܵܡܟ݂ܝܼ: ܘܐܵܢܝܼ ܕܪܵܘܝܼ: ܒܠܲܝܠܹܐ ܟܹܐ ܪܵܘܝܼ. 8 ܐܝܼܢܵܐ ܐܲܚܢܲܢ ܕܝܼܘܵܚ ܕܐܝܼܡܵܡܵܐ: ܗܵܘܵܚ ܪܥܝܼܫܹܐ: ܘܠܒ݂ܝܼܫܹܐ ܓܲܝܸܡܟ̰ܵܪܵܐ ܕܗܲܝܡܵܢܘܼܬܵܐ ܘܕܚܘܼܒܵܐ: ܘܡܲܬܒ݂ܵܚ ܬܲܣܟܸܠܵܘ: ܗܹܒ݂ܝܼ ܕܚܲܝܹ̈ܐ. 8 ܣܵܒܵܒ ܕܠܹܐ ܝܠܹܐ ܡܘܼܬܒܲܢ ܐܲܠܵܗܵܐ ܠܟܲܪܒܵܐ: ܐܸܠܵܐ ܠܩܢܵܝܬܵܐ ܕܚܲܝܹ̈ܐ ܒܡܵܪܲܢ ܝܼܫܘܿܥ ܡܫܝܼܚܵܐ: 10 ܗ̇ܘ ܕܡܸܬܠܹܐ ܒܚܵܬܸܪܲܢ: ܕܐܸܢ ܪܥܝܼܫܹܐ ܝܘܵܚ: ܘܐܸܢ ܕܡܝܼܟ݂ܹܐ ܝܘܵܚ: ܡܸܚܕܵܪܹ̈ܐ ܥܲܡܹܗ ܚܲܝܵܚ. 11 ܣܵܒܵܒ ܕܐܵܗܵܐ ܗܲܒ݂݇ܠܘܿܢ ܠܸܒܵܐ ܚܵܕ݇ ܠܗ̇ܘ ܐܚܹܪ݇ܢܵܐ: ܘܒܢܹܡܘܿܢ ܚܵܕ݇ ܠܗ̇ܘ ܐܚܹܪ݇ܢܵܐ ܕܐܵܟ݂ܝܼ ܕܐܘܼܦ ܒܸܥܒ݂ܵܕܵܐ ܝܬܘܿܢ.

12 ܐܝܼܢܵܐ ܒܸܒܲܥܝܵܐ ܝܘܵܚ ܡܸܢܵܘܟ݂ܘܿܢ: ܐܵܚܘܿܢܘܵܬܝܼ̈: ܕܗܵܘܝܼܬܘܿܢ ܒܝܼܕܲܥܝܵܐ ܠܐܵܢܝܼ ܕܓ̰ܲܗ݇ܝܝܼ ܓܵܘܵܘܟ݂ܘܿܢ: ܘܟܵܠܝܼ ܩܵܕ݇ܡ ܦܵܬܵܘܟ݂ܘܿܢ ܒܡܵܪܲܢ: ܘܡܵܠܦܝܼ ܠܵܘܟ݂ܘܿܢ: 13 ܕܗܵܘܝܼ ܚܫܝܼܒ݂ܹܐ ܠܟܸܣܠܵܘܟ݂ܘܿܢ ܒܚܘܼܒܵܐ ܙܵܘܕܵܐ: ܣܵܒܵܒ ܕܦܘܼܠܚܵܢܵܝ. ܗ݇ܘܹܡܘܿܢ ܒܫܲܝܢܵܐ ܥܲܡ ܓܵܢܵܘܟ݂ܘܿܢ. 14 ܘܦܲܪܦܘܼܠܹܐ ܝܘܵܚ ܒܝܼܵܘܟ݂ܘܿܢ: ܐܵܚܘܿܢܘܵܬܝܼ̈: ܬܲܥܠܡܘܿܢ ܠܥܵܒ݂ܕܵܢܹ̈ܐ ܕܓܢܵܗܵܐ: ܘܗܲܒ݇ܠܘܿܢ ܠܸܒܵܐ ܠܟܝܼܡ ܓ̰ܘܼܪܐܲܬ: ܘܣܢܘܿܕܘܿܢ ܠܙܲܒܘܼܢܹ̈ܐ: ܘܡܲܪܝܸܟ݂ܘܿܢ ܒܹܢܵܘܟ݂ܘܿܢ ܠܟܸܣ ܟܠ ܐ݇ܢܵܫܵܐ. 15 ܗ݇ܘܹܡܘܿܢ ܗܸܫܝܵܪ ܠܵܐ ܗ݇ܘܹܐ ܕܐ݇ܢܵܫܵܐ ܡܸܢܵܘܟ݂ܘܿܢ ܦܲܪܸܥ ܒܝܼܫܵܐ ܡ̣ܢ ܓܹܒܵܐ ܕܒܝܼܫܬܵܐ: ܐܸܠܵܐ ܒܟܠ ܙܲܒ݂ܢܵܐ ܪܚܘܿܛܘܿܢ ܒܵܬ݇ܪ ܛܵܒ݂ܵܬܹ̈ܐ: ܚܵܕ݇ ܠܟܸܣ ܗ̇ܘ ܐ݇ܚܹܪ݇ܢܵܐ ܘܠܟܸܣ ܟܠ ܐ݇ܢܵܫܵܐ. 16 ܗ݇ܘܹܡܘܿܢ ܒܸܚܕܵܝܵܐ ܒܟܠ ܙܲܒ݂ܢܵܐ: 17 ܘܨܵܠܘܿܝܹܐ ܕܠܵܐ ܫܠܵܝܵܐ: 18 ܘܒܟܠ ܡܸܢܕܝܼ ܗ݇ܘܹܡܘܿܢ ܫܵܟܘܿܪܹܐ: ܣܵܒܵܒ ܐܵܗܵܐ ܝܠܹܐ ܪܸܙܵܝܹܗ ܕܐܲܠܵܗܵܐ ܒܝܼܫܘܿܥ ܡܫܝܼܚܵܐ ܠܟܸܣܠܵܘܟ݂ܘܿܢ. 19 ܪܘܼܚܵܐ ܠܵܐ ܡܲܟ̰ܡܝܼܬܘܿܢ. 20 ܢܒ݂ܝܼܵܘ̈ܬܵܐ ܠܵܐ ܡܲܣܠܝܼܬܘܿܢ. 21 ܟܠ ܡܸܢܕܝܼ ܓ̰ܵܪܒܘܿܢ: ܘܗ̇ܘ ܕܝܼܠܹܐ ܫܵܦܝܼܪܵܐ ܕܒ݂ܘܿܢܩܘܿܢ: 22 ܘܡ̣ܢ ܟܠ ܬܵܗܵܪ ܕܒܝܼܫܬܵܐ ܥܪܘܿܩܘܿܢ. 23 ܘܐܲܠܵܗܵܐ ܕܫܠܵܡܵܐ ܒܓܵܢܹܗ ܩܵܕܸܫ ܠܵܘܟ݂ܘܿܢ ܒܬܲܡܵܡܵܬܘܼܬܵܐ: ܘܟܠܵܗ̇ ܪܘܼܚܵܘܟ݂ܘܿܢ ܘܓܵܢܵܘܟ݂ܘܿܢ ܘܦܲܓ݂ܪܵܘܟ݂ܘܿܢ ܢܵܛܸܪ ܕܠܵܐ ܡܘܼܡܵܐ ܠܐܬܵܝܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 25 ܡܗܘܼܡܢܵܐ ܝܠܹܐ ܗ̇ܘ ܕܩܲܡ ܩܵܪܹܐ ܠܵܘܟ݂ܘܿܢ: ܗ̇ܘ ܕܒܸܬ ܥܵܒܸܕ.

25 ܐܵܚܘܿܢܘܵܬܝܼ̈: ܨܵܠܹܡܘܿܢ ܡܒܵܕܵܠ ܕܝܼܲܢ.

26 ܗܲܒ݇ܠܘܿܢ ܫܠܵܡܵܐ ܠܟܠܵܝ ܐܵܚܘܿܢܘ̈ܬܲܢ ܒܢܫܘܼܩܬܵܐ ܩܲܕܝܼܫܬܵܐ. 27 ܡܲܡܘܼܝܹܐ ܝܘܸܢ ܐܸܠܵܘܟ݂ܘܿܢ ܒܡܵܪܲܢ: ܕܦܵܝܫܵܐ ܩܪܝܼܬܵܐ ܐܵܗܵܐ ܐܸܓܲܪܬܵܐ ܠܟܠܵܝ ܐܵܚܘܿܢܘܵܬܹ̈ܐ ܩܲܕܝܼܫܹ̈ܐ.

28 ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡܵܘܟ݂ܘܿܢ: ܐܵܡܹܝܢ.