ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܩܕܡܝܬܐ ܕܦܘܠܘܣ ܫܠܝܚܐ ܕܠܘܬ ܬܣܠܘܢܝܩܝ̈ܐ

ܩܦܠܐܘܢ ܐ

1 ܦܵܘܠܘܿܣ ܘܣܸܠܘܵܢܘܿܣ ܘܛܝܼܡܵܬܹܐܘܿܣ. ܠܥܹܕܬܵܐ ܕܬܸܣܵܠܘܿܢܝܼܩܵܝܹ̈ܐ ܕܒܲܐܠܵܗܵܐ ܐܲܒ݂ܵܐ ܘܲܒ݂ܡܵܪܲܢ ܝܼܫܘܿܥ ܡܫܝܼܚܵܐ. ܛܲܝܒܘܼܬ݂ܵܐ ܥܲܡܟ݂ܘܿܢ ܘܲܫܠܵܡܵܐ. 2 ܡܵܘܕܹܝܢ ܚ̄ܢܢ ܠܐܲܠܵܗܵܐ ܒܟ݂ܠܙܒܲܢ ܥܲܠ ܟܠܟ݂ܘܿܢ. ܘܡܸܬܿܕܲܟ݂ܪܝܼܢ ܚ̄ܢܲܢ ܠܟ݂ܘܿܢ ܒܲܨ̈ܠܵܘܵܬܲܢ ܐܲܡܝܼܢܵܐܝܼܬ݂. 3 ܘܥܵܗܕܝܼܢ ܚ̄ܢܲܢ ܩܕ݂ܵܡ ܐܲܠܵܗܵܐ ܐܲܒ݂ܵܐ. ܥܒ݂ܵܕܹ̈ܐ ܕܗܲܝܡܵܢܘܼܬ݂ܟ݂ܘܿܢ. ܘܥܲܡܠܵܐ ܕܚܘܼܒܟ݂ܘܿܢ. ܘܲܡܣܲܝܒܪܵܢܘܼܬ݂ܵܐ ܕܣܲܒ݂ܪܟ݂ܘܿܢ. ܕܲܒ݂ܡܵܪܲܢ ܝܼܫܘܿܥ ܡܫܝܼܚܵܐ. 4 ܝܵܕ݂ܥܝܼܢ ܚ̄ܢܲܢ ܓܹܝܪ ܓܲܒ݂ܝܘܼܬ݂ܟ݂ܘܿܢ ܐܲܚܲܝ̈ ܚܲܒܝܼܒ݂ܵܘܗܝ ܕܐܲܠܵܗܵܐ. 5 ܡܛܠ ܕܲܡܣܲܒܪܵܢܘܼܬܲܢ ܠܵܐ ܗ̄ܘܵܐ ܒܡܸܠܹ̈ܐ ܒܲܠܚܘܿܕ݂ ܗܘܸܵܬ݂ ܠܘܵܬ݂ܟ݂ܘܿܢ. ܐܸܠܵܐ ܐܵܦ ܒܚܲܝܠܵܐ. ܘܲܒ݂ܪܘܼܚܵܐ ܕܩܘܼܕ݂ܫܵܐ. ܘܒܲܦܝܵܣܵܐ ܫܲܪܝܼܪܵܐ. ܐܵܦ ܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ. ܐܲܝܟܲܢܵܐ ܗܘܲܝܢ ܒܲܝܢܵܬ݂ܟ݂ܘܿܢ ܡܛܠܵܬ݂ܟ݂ܘܿܢ. 6 ܘܐܲܢ̄ܬܿܘܿܢ ܒܲܢ ܐܸܬܿܕܲܡܝܼܬܿܘܢ ܘܲܒ݂ܡܵܪܲܢ. ܕܩܲܒܸܠܬܿܘܿܢ ܡܸܠܬ݂ܵܐ ܒܐܘܼܠܨܵܢܵܐ ܪܲܒܵܐ ܘܲܒ݂ܚܲܕ݂ܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ. 7 ܘܲܗܘܲܝܬܿܘܿܢ ܕܡܘܼܬ݂ܵܐ ܠܟ݂ܠܗܘܿܢ ܡܗܲܝܡܢܹ̈ܐ ܕܐܝܼܬ݂ ܒܡܵܩܹܕܘܿܢܝܼܵܐ . ܘܒܲܐܟ݂ܵܐܝܼܵܐ. 8 ܡܸܢܟ݂ܘܿܢ ܓܹܝܪ ܐܸܫܬܲܡܥܲܬ݂ ܡܸܠܬܹܗ ܕܡܵܪܲܢ. ܠܵܐ ܒܲܠܚܘܿܕ݂ ܒܡܵܩܹܕܘܿܢܝܼܵܐ ܘܒܲܐܟ݂ܵܐܝܼܵܐ. ܐܸܠܵܐ ܒܟ݂ܠ ܐܲܬܲܪ ܗܲܝܡܵܢܘܼܬ݂ܟ݂ܘܿܢ ܕܒܲܐܠܵܗܵܐ ܐܸܫܬܲܡܥܲܬ݂. ܐܲܝܟܲܢܵܐ ܕܠܵܐ ܢܸܣܬܿܢܸܩ ܕܢܹܐܡܲܪ ܥܠܲܝܟܿܘܿܢ ܡܸܕܸܡ. 9 ܗܸܢܘܿܢ ܓܹܝܪ ܡܸܫܬܲܥܹܝܢ. ܐܲܝܢܵܐ ܡܲܥܠܵܢܵܐ ܗܘܵܐ ܠܲܢ ܠܘܵܬ݂ܟ݂ܘܿܢ. ܘܐܲܝܟܲܢܵܐ ܐܸܬ݂ܦܢܝܼܬܿܘܿܢ ܠܘܵܬ݂ ܐܲܠܵܗܵܐ ܡܸܢ ܕܸܚܠܲܬ݂ ܦܬܲܟ݂ܪܹ̈ܐ: ܕܬܸܦܠܚܘܼܢ ܠܐܲܠܵܗܵܐ ܚܲܝܵܐ ܘܫܲܪܝܼܪܵܐ. 10 ܟܲܕ݂ ܡܣܲܟܹܝܢ ܐ̄ܢܬܿܘܢ ܠܲܒ݂ܪܹܗ ܡܸܢ ܫܡܲܝܵܐ. ܠܝܼܫܘܿܥ ܗܵܘ ܕܐܲܩܝܼܡ ܡܸܢ ܒܹܝܬ݂ ܡܝܼܬܹ̈ܐ ܕܗܘܼ ܡܦܲܨܹܐ ܠܲܢ ܡܸܢ ܪܘܼܓ݂ܙܵܐ ܕܐܵܬܹܐ.

ܩܦܠܐܘܢ ܒ

 1 ܘܐܲܢ̄ܬܿܘܿܢ ܝܵܕ݂ܥܝܼܢ ܐ̄ܢܬܘܿܢ ܐܲܚܲܝ̈. ܕܡܲܥܠܵܢܲܢ ܕܲܠܘܵܬ݂ܟ݂ܘܿܢ ܠܵܐ ܗ̄ܘܵܐ ܣܪܝܼܩܵܐܝܼܬ݂ ܗܘܵܐ. 2 ܐܸܠܵܐ ܠܘܼܩܕ݂ܲܡ ܚܲܫܢܲܢ ܘܐܸܨܛܲܥܲܪܢܲܢ. ܐܲܝܟ݂ ܕܝܵܕ݂ܥܝܼܢ ܐ̄ܢܬܿܘܢ ܒܦܝܼܠܝܼܦܘܿܣ. ܘܗܵܝܕܹܝܢ ܒܐܵܓ݂ܘܿܢܵܐ ܪܲܒܵܐ. ܡܲܠܸܠܢ ܥܲܡܟ݂ܘܿܢ ܒܦܲܪܹܗܣܝܼܵܐ ܕܐܲܠܵܗܲܢ ܣܒܲܪܬܹܗ ܕܲܡܫܝܼܚܵܐ. 3 ܒܘܼܝܵܐܲܢ ܓܹܝܪ ܠܵܐ ܗ̄ܘܵܐ ܡܸܢ ܛܵܥܝܘܼܬ݂ܵܐ. ܐܵܦܠܵܐ ܡܸܢ ܛܲܢܦܘܼܬ݂ܵܐ. ܐܵܦܠܵܐ ܒܢܸܟ݂ܠܵܐ. 4 ܐܸܠܵܐ ܐܲܝܟ݂ ܡܵܐ ܕܲܒ݂ܩܹܝܢ ܚ̄ܢܲܢ ܠܐܲܠܵܗܵܐ ܕܬܸܬ݂ܗܲܝܡܲܢ ܣܒܲܪܬܹܗ. ܗܵܟܲܢܵܐ ܡܡܲܠܠܝܼܢ ܚ̄ܢܲܢ. ܠܵܐ ܐܲܝܟ݂ ܕܠܲܒ݂ܢܲܝ̈ܢܵܫܵܐ ܢܸܫܦܲܪ. ܐܸܠܵܐ ܠܐܲܠܵܗܵܐ ܗܵܘ ܕܒ݂ܵܩܹܐ ܠܸܒ̈ܵܘܵܬܲܢ. 5 ܐܵܦܠܵܐ ܓܹܝܪ ܡܸܡܬ݂ܘܿܡ ܐܸܬ݂ܚܲܫܲܚܢ ܒܡܲܡܠ̱ܠܵܐ ܫܲܕܠܵܐ ܐܲܝܟ݂ ܕܝܵܕ݂ܥܝܼܢ ܐܢ̄ܬܘܿܢ. ܘܠܵܐ ܒܥܸܠܬ݂ܵܐ ܕܝܲܥܢܘܼܬ݂ܵܐ. ܐܲܠܵܗܵܐ ܣܵܗܹܕ݂. 6 ܘܠܵܐ ܒܥܲܝܢ ܫܘܼܒ݂ܚܵܐ ܡܸܢ ܒܢܲܝ̈ܢܵܫܵܐ. ܠܵܐ ܡܸܢܟ݂ܘܿܢ ܘܠܵܐ ܡܸܢ ܐ̄ܚܪܵܢܹܐ. ܟܲܕ݂ ܡܸܫܟܿܚܝܼܢ ܗ̄ܘܲܝܢ ܝܲܩܝܼܪܹ̈ܐ ܠܡܸܗܘܵܐ ܐܲܝܟ݂ ܫܠܝܼܚܹ̈ܐ ܕܲܡܫܝܼܚܵܐ. 7 ܐܸܠܵܐ ܗܘܲܝܢ ܒܲܝܢܵܬ݂ܟ݂ܘܿܢ ܡܲܟܝܼܟܹ̈ܐ. ܘܐܲܝܟ݂ ܡܪܲܒܝܵܢܝܼܬ݂ܵܐ ܕܲܡܚܲܒܒ݂ܵܐ ܒܢܹܝ̈ܗܿ. 8 ܗܵܟܲܢܵܐ ܐܵܦ ܚܢܲܢ ܡܚܲܒܒ݂ܝܼܢ ܚ̄ܢܲܢ ܘܲܡܣܵܘܚܝܼܢ ܚ̄ܢܲܢ ܠܡܸܬܲܠ ܠܟ݂ܘܿܢ. ܠܵܐ ܒܲܠܚܘܿܕ݂ ܣܒܲܪܬܹܗ ܕܐܲܠܵܗܵܐ. ܐܸܠܵܐ ܐܵܦ ܢܲܦ̮ܫܲܢ. ܡܛܠ ܕܚܲܒܝܼܒܲܝ̈ܢ ܐܲܢ̄ܬܘܿܢ. 9 ܥܵܗܕܝܼܢ ܐ̄ܢܬܘܿܢ ܓܹܝܪ ܐܲܚܲܝ̈ܢ. ܕܠܵܐܹܝܢ ܗ̄ܘܲܝܢ ܘܥܵܡܠܝܼܢ ܒܲܥܒ݂ܵܕ݂ ܐܝܼܕ݂ܲܝ̈ܢ ܒܠܸܠܝܵܐ ܘܒܐܝܼܡܵܡܵܐ . ܕܥܲܠ ܚܲܕ݂ ܡܸܢܟ݂ܘܿܢ ܠܵܐ ܢܹܐܩܲܪ. 10 ܐܲܢ̄ܬܿܘܿܢ ܣܵܗܕܝܼܢ ܘܐܲܠܵܗܵܐ. ܐܲܝܟܲܢܵܐ ܐܲܟ݂ܪܸܙܢ ܠܟ݂ܘܿܢ ܣܒܲܪܬܹܗ ܕܐܲܠܵܗܵܐ ܕܲܟ݂ܝܵܐܝܼܬ݂ ܘܟܹܐܢܵܐܝܼܬ݂. ܘܲܕ݂ܠܵܐ ܪܸܫܝܵܢ ܗܘܲܝܢ ܠܘܵܬ݂ ܟܠܗܘܿܢ ܡܗܲܝܡܢܹ̈ܐ. 11 ܐܲܝܟܲܢܵܐ ܕܝܵܕ݂ܥܝܼܢ ܐ̄ܢܬܘܿܢ ܕܡܸܢ ܚܲܕ݂ ܚܲܕ݂ ܡܸܢܟ݂ܘܿܢ ܐܲܝܟ݂ ܐܲܒ݂ܵܐ ܡܸܢ ܒܢܵܘ̈ܗܝ: ܒܵܥܹܝܢ ܗ̄ܘܲܝܢ. ܘܡܵܠܹܝܢ ܗ̄ܘܲܝܢ ܒܠܸܒܟ݂ܘܿܢ. ܘܲܡܣܲܗܕ݂ܝܼܢ ܚ̄ܢܲܢ ܠܟ݂ܘܿܢ. 12 ܕܲܬ݂ܗܲܠܟ݂ܘܿܢ ܐܲܝܟ݂ ܕܝܵܐܹܐ ܠܐܲܠܵܗܵܐ. ܗܵܘ ܕܲܩܪܵܟ݂ܘܿܢ ܠܡܲܠܟܿܘܼܬܹܗ ܘܲܠܫܘܼܒ݂ܚܹܗ. 13 ܡܛܠ ܗܵܢܵܐ ܐܵܦ ܚܢܲܢ ܡܵܘܕܹܝܢ ܚ̄ܢܲܢ ܐܲܡܝܼܢܵܐܝܼܬ݂ ܠܐܲܠܵܗܵܐ. ܕܡܸܠܬ݂ܵܐ ܕܐܲܠܵܗܵܐ ܕܩܲܒܸܠܬܿܘܿܢ ܡܸܢܲܢ. ܠܵܐ ܗ̄ܘܵܐ ܐܲܝܟ݂ ܡܸܠܬ݂ܵܐ ܕܲܒ݂ܢܲܝ̈ܢܵܫܵܐ ܩܲܒܸܠܬܿܘܿܢܵܗܿ. ܐܸܠܵܐ ܐܲܝܟܲܢܵܐ ܕܐܝܼܬܹܝܗܿ ܫܲܪܝܼܪܵܐܝܼܬ݂ ܡܸܠܬ݂ܵܐ ܕܐܲܠܵܗܵܐ. ܘܗܝܼ ܒܲܥܒ݂ܵܕ݂ܵܐ ܡܸܣܬܲܥܪܵܐ ܒܟ݂ܘܿܢ ܒܐܲܝܠܹܝܢ ܕܲܡܗܲܝܡܢܝܼܢ. 14 ܐܲܢ̄ܬܿܘܿܢ ܕܹܝܢ ܐܲܚܲܝ̈. ܐܸܬܿܕܲܡܝܼܬܿܘܿܢ ܠܥܹܕܬܵܐ ܕܐܲܠܵܗܵܐ ܕܒܲܝܗܘܼܕ݂ ܗܵܠܹܝܢ ܕܲܒ݂ܝܼܫܘܿܥ ܡܫܝܼܚܵܐ. ܕܗܵܟܲܢ ܣܲܝܒܲܪܬܿܘܿܢ ܐܵܦ ܐܲܢ̄ܬܿܘܿܢ ܡܸܢ ܒܢܲܝ̈ ܫܲܪܒܲܬ݂ܟ݂ܘܿܢ. ܐܲܝܟܲܢܵܐ ܕܐܵܦ ܗܸܢܘܿܢ ܡܸܢ ܝܗ̄ܘܼܕ݂ܵܝܹ̈ܐ: 15 ܗܵܢܘܿܢ ܕܲܠܡܵܪܲܢ ܝܼܫܘܿܥ ܡܫܝܼܚܵܐ ܩܛܲܠܘ. ܘܠܲܢܒ݂ܝܹ̈ܐ ܕܡܸܢܗܘܿܢ ܘܠܲܢ ܪܕ݂ܲܦܘ. ܘܠܲܐܠܵܗܵܐ ܠܵܐ ܫܵܦܪܝܼܢ. ܘܲܥܒ݂ܝܼܕ݂ܝܼܢ ܣܲܩܘܼܒ݂ܠܵܐ ܠܟ݂ܠܗܘܿܢ ܒܢܲܝ̈ܢܵܫܵܐ. 16 ܕܟ݂ܵܠܹܝܢ ܠܲܢ ܕܲܢܡܲܠܸܠ ܥܲܡ ܥܲܡ̈ܡܹܐ ܕܢܸܚܘܿܢ. ܠܲܡܫܲܠܵܡܘ ܚܛܵܗܲܝ̈ܗܘܿܢ ܒܟ݂ܠܙܒܲܢ. ܡܲܛܝܼ ܕܹܝܢ ܥܠܲܝܗܘܿܢ ܪܘܼܓ݂ܙܵܐ ܥܕ݂ܲܡܵܐ ܠܚܲܪܬ݂ܵܐ. 17 ܚܢܲܢ ܕܹܝܢ ܐܲܚܲܝ̈ܢ. ܗܘܲܝܢ ܝܲܬ݂ܡܹ̈ܐ ܡܸܢܟ݂ܘܿܢ ܙܲܒ݂ܢܵܐ ܕܫܵܥܬ݂ܵܐ ܒܐܲܦܲܝ̈ܢ ܘܠܵܐ ܒܠܸܒܲܢ. ܘܝܲܬܝܼܪܵܐܝܼܬ݂ ܐܸܬ݂ܚܲܦܲܛܢ ܠܡܸܚܙܵܐ ܐܲܦܲܝ̈ܟܿܘܿܢ ܒܚܘܼܒܵܐ ܣܲܓܿܝܼܐܵܐ. 18 ܘܲܨܒܲܝܢ ܕܢܹܐܬܹܐ ܠܘܵܬ݂ܟ݂ܘܿܢ ܐܸܢܵܐ ܦܵܘܠܘܿܣ ܚܕ݂ܵܐ ܙܒܲܢ ܘܬܲܪܬܹ݁ܝܢ. ܘܥܵܘܟܲܢܝ ܣܵܛܵܢܵܐ. 19 ܐܲܝܢܵܘ ܓܹܝܪ ܣܲܒ݂ܪܲܢ ܘܚܲܕ݂ܘܼܬܲܢ ܘܲܟ݂ܠܝܼܠܵܐ ܕܫܘܼܒ݂ܗܵܪܲܢ. ܐܸܠܵܐ ܐܸܢ ܐܲܢ̄ܬܿܘܿܢ ܩܕ݂ܵܡ ܡܵܪܲܢ ܝܼܫܘܿܥ ܒܡܹܐܬ݂ܝܼܬܹܗ. 20 ܐܲܢ̄ܬܿܘܿܢ ܐܸܢܘܿܢ ܓܹܝܪ ܬܸܫܒܘܿܚܬܲܢ ܘܚܲܕ݂ܘܼܬܲܢ.

ܩܦܠܐܘܢ ܓ

1 ܘܡܛܠ ܕܠܵܐ ܚܲܡܣܸܢܢ. ܨܒܲܝܢ ܠܲܡܦܵܫ ܒܐܵܬܹܢܘܿܣ ܒܲܠܚܘܿܕܲܝܢ. 2 ܘܲܢܫܲܕܲܪ ܠܘܵܬ݂ܟ݂ܘܿܢ ܠܛܝܼܡܵܬܹܐܘܿܣ ܐܲܚܘܼܢ ܘܲܡܫܲܡܫܵܢܵܐ ܕܐܲܠܵܗܵܐ. ܘܲܡܥܲܕܪܵܢܲܢ ܒܲܣܒܲܪܬܹܗ ܕܲܡܫܝܼܚܵܐ. ܕܲܢܫܲܪܲܪܟ݂ܘܿܢ ܘܢܸܒ݂ܥܹܐ ܡܸܢܟ݂ܘܿܢ ܥܲܠ ܗܲܝܡܵܢܘܼܬ݂ܟ݂ܘܿܢ. 3 ܕܠܵܐ ܐ̄ܢܵܫ ܡܸܢܟ݂ܘܿܢ ܬܸܬ݂ܩܲܛܲܥ ܠܹܗ ܒܐܘܼܠܨܵܢܹ̈ܐ ܗܵܠܹܝܢ. ܐܲܢ̄ܬܿܘܿܢ ܓܹܝܪ ܝܵܕ݂ܥܝܼܢ ܐܢ̄ܬܘܿܢ. ܕܲܠܗܵܕܹܐ ܗܘܼ ܣܝܼܡܝܼܢ ܚ̄ܢܲܢ. 4 ܐܵܦ ܟܲܕ݂ ܠܘܵܬ݂ܟ݂ܘܿܢ ܗܘܲܝܢ ܓܹܝܪ. ܩܲܕܸܡܢ ܐܸܡܲܪܢ ܠܟ݂ܘܿܢ. ܕܲܥܬ݂ܝܼܕ݂ܝܼܢ ܚ̄ܢܲܢ ܠܡܸܬ݂ܐܲܠܵܨܘܼ. ܐܲܝܟܲܢܵܐ ܕܝܵܕ݂ܥܝܼܢ ܐ̄ܢܬܘܿܢ ܕܲܗܘܵܐ. 5 ܡܛܠ ܗܵܢܵܐ ܐܵܦ ܐܸܢܵܐ ܠܵܐ ܚܲܡܣܢܹܬ݂. ܥܕ݂ܲܡܵܐ ܕܫܲܕܪܹܬ݂ ܕܐܸܕܲܥ ܗܲܝܡܵܢܘܼܬ݂ܟ݂ܘܿܢ. ܕܕ݂ܲܠܡܵܐ ܢܢܲܣܹܝܟ݂ܘܿܢ ܡܢܲܣܝܵܢܵܐ. ܘܢܸܗܘܹܐ ܥܲܡܠܲܢ ܣܪܝܼܩܵܐ. 6 ܗܵܫܵܐ ܕܹܝܢ ܡܸܢ ܕܐܸܬ݂ܵܐ ܠܘܵܬܲܢ ܛܝܼܡܵܬܹܐܘܿܣ ܡܸܢ ܨܸܐܕ݂ܲܝܟ݁ܘܿܢ. ܘܣܲܒ݂ܪܲܢ ܥܲܠ ܗܲܝܡܵܢܘܼܬ݂ܟ݂ܘܿܢ ܘܥܲܠ ܚܘܼܒܟ݂ܘܿܢ ܘܕܐܝܼܬ݂ ܠܘܵܬ݂ܟ݂ܘܿܢ ܥ̱ܘܗܕܵܢܲܢ ܛܵܒ݂ܵܐ ܒܟ݂ܠܥܸܕܵܢ: ܘܲܣܘܹܝܢ ܐ̄ܢܬܘܿܢ ܠܡܸܚܙܝܲܢ ܐܲܝܟܲܢܵܐ ܕܐܵܦ ܚܢܲܢ ܠܟ݂ܘܿܢ. 7 ܡܛܠ ܗܵܢܵܐ ܐܸܬ݂ܒܲܝܲܐܢ ܒܟ݂ܘܿܢ ܐܲܚܲܝ̈ܢ: ܥܲܠ ܟܠܗܹܝܢ ܥܵܩ̈ܵܬܲܢ ܘܐܘܼܠܨܵܢܲܝ̈ܢ. ܡܛܠ ܗܲܝܡܵܢܘܼܬ݂ܟ݂ܘܿܢ. 8 ܘܗܵܫܵܐ ܗܘܼ ܚܲܝܼܝܢܲܢ. ܐܸܢ ܐܲܢ̄ܬܿܘܿܢ ܬܸܬ݂ܩܲܝܡܘܼܢ ܒܡܵܪܲܢ. 9 ܐܲܝܕ݂ܵܐ ܓܹܝܪ ܬܵܘܕܝܼܬ݂ܵܐ ܡܸܫܟܿܚܝܼܢ ܚ̄ܢܲܢ ܠܡܸܦܪܲܥ ܚܠܵܦܲܝܟܿܘܿܢ ܠܐܲܠܵܗܵܐ. ܥܲܠ ܟܠ ܚܲܕ݂ܘܼܬ݂ܵܐ ܕܚܵܕܹܝܢ ܚ̄ܢܲܢ ܡܛܠܵܬ݂ܟ݂ܘܿܢ. 10 ܐܸܠܵܐ ܕܲܩܕ݂ܵܡ ܐܲܠܵܗܵܐ ܝܲܬܝܼܪܵܐܝܼܬ݂ ܢܸܬ݂ܟܲܫܲܦ ܒܠܸܠܝܵܐ ܘܒ݂ܐܝܼܡܵܡܵܐ . ܕܢܸܚܙܹܐ ܐܲܦܲܝ̈ܟܿܘܿܢ: ܘܢܸܓ݂ܡܘܿܪ ܡܵܐ ܕܚܲܣܝܼܪܵܐ ܗܲܝܡܵܢܘܼܬ݂ܟ݂ܘܿܢ. 11 ܗܘܼ ܕܹܝܢ ܐܲܠܵܗܵܐ ܐܲܒ݂ܘܼܢ ܘܡܵܪܲܢ ܝܼܫܘܿܥ ܡܫܝܼܚܵܐ. ܢܸܬ݂ܪܘܿܨ ܐܘܼܪܚܲܢ ܠܘܵܬ݂ܟ݂ܘܿܢ. 12 ܘܢܲܣܓܹ݁ܐ ܘܲܢܝܲܬܲܪ ܚܘܼܒܟ݂ܘܿܢ ܕܚܲܕ݂ ܠܘܵܬ݂ ܚܲܕ݂ ܘܕ݂ܲܠܘܵܬ݂ ܟܠܢܵܫ. ܐܲܝܟܲܢܵܐ ܕܲܚܢܲܢ ܡܲܚܒ݂ܝܼܢ ܚ̄ܢܲܢ ܠܟ݂ܘܿܢ. 13 ܘܲܢܩܲܝܸܡ ܠܸܒܵܘܵܬ݂ܟ݂̈ܘܿܢ ܕܠܵܐ ܪܸܫܝܵܢ ܒܩܲܕ݁ܝܼܫܘܼܬ݂ܵܐ ܩܕ݂ܵܡ ܐܲܠܵܗܵܐ ܐܲܒ݂ܘܼܢ. ܒܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܥܲܡ ܟܠܗܘܿܢ ܩܲܕ݁ܝܼܫܵܘ̈ܗܝ.

ܩܦܠܐܘܢ ܕ

1 ܡܸܟܹܝܠ ܐܲܚܲܝ̈ ܒܵܥܹܝܢ ܚ̄ܢܲܢ ܡܸܢܟ݂ܘܿܢ. ܘܡܸܬ݂ܟܲܫܦܝܼܢ ܚ̄ܢܲܢ ܠܟ݂ܘܿܢ ܒܡܵܪܲܢ ܝܼܫܘܿܥ. ܕܐܲܝܟ݂ ܕܩܲܒܸܠܬܿܘܿܢ ܡܸܢܲܢ. ܐܲܝܟܲܢ ܘܵܠܹܐ ܠܟ݂ܘܿܢ ܕܲܬ݂ܗܲܠܟ݂ܘܿܢ ܘܬܸܫܦܪܘܼܢ ܠܐܲܠܵܗܵܐ. ܕܝܲܬܝܼܪܵܐܝܼܬ݂ ܬܵܘܣܦܘܼܢ. 2 ܝܵܕ݂ܥܝܼܢ ܐ̄ܢܬܘܿܢ ܓܹܝܪ. ܐܲܝܠܹܝܢ ܦܘܼܩܕܵܢܹ̈ܐ ܝܲܗ̄ܒ݂ܢ ܠܟ݂ܘܿܢ. ܒܡܵܪܲܢ ܝܼܫܘܿܥ. 3 ܗܵܢܵܘ ܓܹܝܪ ܨܸܒ݂ܝܵܢܹܗ ܕܐܲܠܵܗܵܐ. ܩܲܕ݁ܝܼܫܘܼܬ݂ܟ݂ܘܿܢ. ܘܲܕܬܸܗܘܘܿܢ ܦܲܪܝܼܩܝܼܢ ܡܸܢ ܟܠ ܙܵܢܝܘܼܬ݂ܵܐ. 4 ܘܢܸܗܘܹܐ ܝܵܕ݂ܲܥ ܐ̄ܢܵܫ ܐ̄ܢܵܫ ܡܸܢܟ݂ܘܿܢ ܠܡܸܩܢܵܐ ܡܵܐܢܹܗ ܒܩܲܕ݁ܝܼܫܘܼܬ݂ܵܐ ܘܒ݂ܐܝܼܩܵܪܵܐ. 5 ܘܠܵܐ ܒܚܲܫܹ̈ܐ ܕܪܸܓ݁ܬ݂ܵܐ. ܐܲܝܟ݂ ܫܲܪܟܵܐ ܕܥܲܡ̈ܡܹܐ ܗܵܢܘܿܢ ܕܠܵܐ ܝܵܕ݂ܥܝܼܢ ܠܐܲܠܵܗܵܐ. 6 ܘܠܵܐ ܬܸܗܘܘܿܢ ܡܫܝܼܚܝܼܢ ܠܡܸܥܒܲܪ ܘܲܠܡܸܥܠܲܒ݂ ܐ̄ܢܵܫ ܠܐܲܚܘܼܗܝ ܒܗܵܕܹܐ ܨܒ݂ܘܼܬ݂ܵܐ. ܡܛܠ ܕܡܵܪܲܢ ܗܘܼ ܬܵܒ݂ܘܿܥܵܐ ܥܲܠ ܗܵܠܹܝܢ ܟܠܗܹܝܢ. ܐܲܝܟܲܢܵܐ ܕܐܵܦ ܡܸܢ ܩܕ݂ܵܡ ܙܲܒ݂ܢܵܐ ܐܸܡܲܪܢ ܠܟ݂ܘܿܢ. ܘܣܲܗܸܕ݂ܢ. 7 ܠܵܐ ܓܹܝܪ ܩܪܵܟ݂ܘܿܢ ܐܲܠܵܗܵܐ ܠܛܲܢܦܘܼܬ݂ܵܐ. ܐܸܠܵܐ ܠܩܲܕ݁ܝܼܫܘܼܬ݂ܵܐ. 8 ܡܸܟܹܝܠ ܡܲܢ ܕܛܵܠܹܡ. ܠܵܐ ܗ̄ܘܵܐ ܠܒܲܪܢܵܫܵܐ ܛܵܠܹܡ ܐܸܠܵܐ ܠܐܲܠܵܗܵܐ. ܗܵܘ ܕܝܲܗ̄ܒ݂ ܒܟ݂ܘܿܢ ܪܘܼܚܹܗ ܩܲܕ݁ܝܼܫܬܵܐ. 9 ܥܲܠ ܚܘܼܒܵܐ ܕܹܝܢ ܕܐܲܚܹ̈ܐ. ܠܵܐ ܣܢܝܼܩܝܼܢ ܐ̄ܢܬܿܘܿܢ ܠܡܸܟ݂ܬܲܒ݂ ܠܟ݂ܘܿܢ. ܐܲܢ̄ܬܿܘܿܢ ܓܹܝܪ ܩܢܘܿܡܟ݂ܘܿܢ ܡܲܠܦܹ̈ܐ ܐܲܢܬܘܿܢ ܕܐܲܠܵܗܵܐ. ܕܬܲܚܒ݂ܘܼܢ ܚܲܕ݂ ܠܚܲܕ݂. 10 ܐܵܦ ܥܵܒ݂ܕܝܼܢ ܐ̄ܢܬܘܿܢ ܗܵܟܲܢܵܐ ܠܟ݂ܠܗܘܿܢ ܐܲܚܹ̈ܐ ܕܲܒܟ݂ܠܵܗܿ ܡܵܩܹܕܘܿܢܝܼܵܐ. ܒܵܥܹܐ ܐ̄ܢܵܐ ܕܹܝܢ ܡܸܢܟ݂ܘܿܢ ܐܲܚܲܝ̈. ܕܬܸܬ݂ܝܲܬܿܪܘܼܢ 11 ܘܬܸܬ݂ܚܲܦܛܘܼܢ. ܕܬܸܗܘܘܿܢ ܫܠܹܝܢ ܘܲܥܢܹܝܢ ܒܣܘܥܪ̈ܵܢܲܝܟ݁ܘܿܢ: ܘܲܗܘܲܝܬܿܘܿܢ ܦܵܠܚܝܼܢ ܒܐܝܼܕ݂ܲܝ̈ܟ݁ܘܿܢ ܐܲܝܟܲܢܵܐ ܕܦܲܩܸܕ݂ܢܵܟ݂ܘܿܢ. 12 ܕܬܸܗܘܘܿܢ ܡܗܲܠܟ݂ܝܼܢ ܒܐܸܣܟܹܡܵܐ ܠܘܵܬ݂ ܒܲܪ̈ܵܝܹܐ ܘܥܲܠ ܐ̄ܢܵܫ ܠܵܐ ܬܸܣܬܲܢܩܘܼܢ. 13 ܨܵܒܹܐ ܐ̄ܢܵܐ ܕܹܝܢ ܕܬܸܕ݂ܥܘܼܢ ܐܲܚܲܝ̈. ܕܥܲܠ ܐܲܝܠܹܝܢ ܕܕ݂ܵܡܟ݁ܝܼܢ ܠܵܐ ܬܸܗܘܹܐ ܟܵܪܝܵܐ ܠܟ݂ܘܿܢ. ܐܲܝܟ݂ ܫܲܪܟܵܐ ܕܐ̄ܢܵܫܵܐ ܕܣܲܒ݂ܪܵܐ ܠܲܝܬܿ ܠܗܘܿܢ. 14 ܐܸܢ ܓܹܝܪ ܡܗܲܝܡܢܝܼܢ ܚ̄ܢܲܢ ܕܝܼܫܘܿܥ ܡܝܼܬ݂ ܘܩܼܵܡ. ܗܵܟܲܢܵܐ ܐܵܦ ܐܲܠܵܗܵܐ ܠܐܲܝܠܹܝܢ ܕܲܕ݂ܡܸܟ݂ܘ ܒܝܼܫܘܿܥ ܡܲܝܬܹܐ ܥܲܡܹܗ. 15 ܗܵܕܹܐ ܕܹܝܢ ܐܵܡܪܝܼܢ ܚ̄ܢܲܢ ܠܟ݂ܘܿܢ ܒܡܸܠܬܹܗ ܕܡܵܪܲܢ. ܕܲܚܢܲܢ ܐܲܝܠܹܝܢ ܕܡܸܫܬܲܚܪܝܼܢ ܚ̄ܢܲܢ ܒܡܹܐܬ݂ܝܼܬܹܗ ܕܡܵܪܲܢ ܕܚܲܝܝܼܢܲܢ. ܠܵܐ ܢܲܕ݂ܪܸܟ݂ ܠܐܲܝܠܹܝܢ ܕܲܕ݂ܡܸܟ݂ܘ. 16 ܡܛܠ ܕܗܘܼ ܡܵܪܲܢ ܒܦܘܼܩܕܵܢܵܐ. ܘܲܒ݂ܩܵܠܵܐ ܕܪܹܫ ܡܲܠܲܐܟܹ̈ܐ. ܘܲܒ݂ܩܲܪܢܵܐ ܕܐܲܠܵܗܵܐ. ܢܚܸܬ݂ ܡܸܢ ܫܡܲܝܵܐ. ܘܡܝܼܬܹ̈ܐ ܕܒܲܡܫܝܼܚܵܐ ܢܩܘܼܡܘܼܢ ܠܘܼܩܕ݂ܲܡ. 17 ܘܗܵܝܕܹܝܢ ܚܢܲܢ ܐܲܝܠܹܝܢ ܕܡܸܫܬܲܚܪܝܼܢ ܚ̄ܢܲܢ ܕܚܲܝܝܼܢܲܢ. ܢܸܬ݂ܚܛܸܦ ܥܲܡܗܘܿܢ ܐܲܟ݂ܚܕ݂ܵܐ ܒܲܥܢܵܢܹ̈ܐ ܠܐܘܼܪܥܹܗ ܕܡܵܪܲܢ ܒܵܐܐܲܪ. ܘܗܵܟܲܢܵܐ ܒܟ݂ܠܙܒܲܢ ܥܲܡ ܡܵܪܲܢ ܢܸܗܘܹܐ. 18 ܗܘܵܘ ܗܵܟܹܝܠ ܡܒܲܝܐܝܼܢ ܚܲܕ݂ ܠܚܲܕ݂. ܒܡܸܠܹ̈ܐ ܗܵܠܹܝܢ.

ܩܦܠܐܘܢ ܗ

1 ܥܲܠ ܙܲܒ݂ܢܹ̈ܐ ܕܹܝܢ ܘܥܸܕܵܢܹ̈ܐ. ܐܲܚܲܝ̈. ܠܵܐ ܣܢܝܼܩܝܼܢ ܐ̄ܢܬܿܘܿܢ ܠܡܸܟ݂ܬܲܒ݂ ܠܟ݂ܘܿܢ. 2 ܐܲܢ̄ܬܿܘܿܢ ܓܹܝܪ ܫܲܪܝܼܪܵܐܝܼܬ݂ ܝܵܕ݂ܥܝܼܢ ܐܢ̄ܬܘܿܢ. ܕܝܵܘܡܹܗ ܕܡܵܪܲܢ ܐܲܝܟ݂ ܓܲܢܵܒ݂ܵܐ ܒܠܸܠܝܵܐ. ܗܵܟܲܢܵܐ ܐܵܬܹܐ. 3 ܟܲܕ݂ ܢܹܐܡܪܘܼܢ ܕܲܫܠܵܡܵܐ ܗ̄ܘܼ ܘܫܲܝܢܵܐ. ܘܗܵܝܕܹܝܢ ܡܸܢ ܫܸܠܝܵܐ ܢܩܘܼܡ ܥܠܲܝܗܘܿܢ ܐܲܒ݂ܕܵܢܵܐ. ܐܲܝܟ݂ ܚܸܒ݂̈ܠܹܐ ܥܲܠ ܒܲܛܢܬ݂ܵܐ. ܘܠܵܐ ܢܲܡܕ݂ܘܼܢ. 4 ܐܲܢ̄ܬܿܘܿܢ ܕܹܝܢ ܐܲܚܲܝ̈. ܠܵܐ ܗܘܲܝܬܿܘܿܢ ܒܚܸܫܘܿܟ݂ܵܐ. ܕܗܵܘ ܝܵܘܡܵܐ ܐܲܝܟ݂ ܓܲܢܵܒ݂ܵܐ ܢܲܕ݂ܪܸܟ݂ܟ݂ܘܿܢ. 5 ܟܠܟ݂ܘܿܢ ܓܹܝܪ ܒܢܲܝ̈ ܢܘܼܗܪܵܐ ܐܲܢ̄ܬܿܘܿܢ ܘܲܒ݂ܢܲܝ̈ ܐܝܼܡܵܡܵܐ. ܘܠܵܐ ܗܘܲܝܬܿܘܿܢ ܒܢܲܝ̈ ܠܸܠܝܵܐ ܘܠܵܐ ܒܢܲܝ̈ ܚܸܫܘܿܟ݂ܵܐ. 6 ܠܵܐ ܢܸܕ݂ܡܲܟ݂ ܗܵܟܹܝܠ ܐܲܝܟ݂ ܫܲܪܟܵܐ. ܐܸܠܵܐ ܗܘܲܝܢ ܥܝܼܪܝܼܢ ܘܲܡܗܵܘܢܝܼܢ. 7 ܐܲܝܠܹܝܢ ܓܹܝܪ ܕܕ݂ܵܡܟ݁ܝܼܢ. ܒܠܸܠܝܵܐ ܗ̄ܘܼ ܕܵܡܟ݁ܝܼܢ. ܘܐܲܝܠܹܝܢ ܕܪܵܘܹܝܢ. ܒܠܸܠܝܵܐ ܗ̄ܘܼ ܪܵܘܹܝܢ. 8 ܚܢܲܢ ܕܹܝܢ ܕܲܒ݂ܢܲܝ̈ ܐܝܼܡܵܡܵܐ ܚܢܲܢ. ܗܘܲܝܢ ܥܝܼܪܝܼܢ ܒܪܸܥܝܵܢܲܢ. ܘܲܠܒ݂ܝܼܫܝܼܢ ܫܸܪܝܵܢܵܐ ܕܗܲܝܡܵܢܘܼܬ݂ܵܐ ܘܲܕܚܘܼܒܵܐ. ܘܲܢܣܝܼܡ ܣܲܢܘܲܪܬܵܐ ܕܣܲܒ݂ܪܵܐ ܕܚܲܝܹ̈ܐ. 9 ܡܛܠ ܕܠܵܐ ܣܵܡܲܢ ܐܲܠܵܗܵܐ ܠܪܘܼܓ݂ܙܵܐ. ܐܸܠܵܐ ܠܩܸܢܝܵܢܵܐ ܕܚܲܝܹ̈ܐ ܒܡܵܪܲܢ ܝܼܫܘܿܥ ܡܫܝܼܚܵܐ. 10 ܗܵܘ ܕܡܝܼܬ݂ ܥܲܠ ܐܲܦܲܝ̈ܢ: ܕܐܸܢ ܥܝܼܪܝܼܢ ܚ̄ܢܲܢ ܘܐܸܢ ܕܵܡܟܝܼܢ ܚ̄ܢܲܢ. ܐܲܟ݂ܚܕ݂ܵܐ ܥܲܡܹܗ ܢܸܚܹܐ. 11 ܡܛܠ ܗܵܢܵܐ ܒܲܝܲܐܘ ܚܲܕ݂ ܠܚܲܕ݂. ܘܒܲܢܵܘ ܚܲܕ݂ ܠܚܲܕ݂. ܐܲܝܟܲܢܵܐ ܕܐܵܦ ܥܵܒ݂ܕܝܼܢ ܐ̄ܢܬܿܘܿܢ. 12 ܒܵܥܹܝܢ ܚ̄ܢܲܢ ܕܹܝܢ ܡܸܢܟ݂ܘܿܢ ܐܲܚܲܝ̈. ܕܲܗܘܲܝܬܿܘܿܢ ܝܵܕ݂ܥܝܼܢ ܠܐܲܝܠܹܝܢ ܕܠܵܐܹܝܢ ܒܟ݂ܘܿܢ. ܘܩܵܝܡܝܼܢ ܒܐܲܦܲܝ̈ܟܿܘܿܢ ܒܡܵܪܲܢ. ܘܡܲܠܦܝܼܢ ܠܟ݂ܘܿܢ. 13 ܕܲܗܘܵܘ ܚܫܝܼܒ݂ܝܼܢ ܠܟ݂ܘܿܢ ܒܚܘܼܒܵܐ ܝܲܬܝܼܪܵܐ. ܘܡܛܠ ܥܒ݂ܵܕ݂ܗܘܿܢ ܐܸܫܬܲܝܲܢܘ ܥܲܡܗܘܿܢ. 14 ܒܵܥܹܝܢ ܚ̄ܢܲܢ ܕܹܝܢ ܡܸܢܟ݂ܘܿܢ ܐܲܚܲܝ̈. ܪܕ݂ܵܘ ܠܡܲܣܟܠܵܢܹ̈ܐ. ܘܠܲܒܸܒ݂ܘ ܠܲܙܥܘܿܪ̈ܲܝ ܢܲܦ̮ܫܵܐ. ܘܣܲܒ݂ܘ ܛܲܥܢܵܐ ܕܲܡܚܝܼܠܹ̈ܐ. ܘܐܲܓܲܪܘ ܪܘܼܚܟ݂ܘܿܢ ܠܘܵܬ݂ ܟܠܢܵܫ. 15 ܘܐܸܙܕܲܗ̄ܪܘ ܕܲܠܡܵܐ ܐ̄ܢܵܫ ܡܸܢܟ݂ܘܿܢ ܒܝܼܫܬܵܐ ܚܠܵܦ ܒܝܼܫܬܵܐ ܢܸܦܪܘܿܥ. ܐܸܠܵܐ ܒܟ݂ܠܙܒܲܢ ܗܲܪ̱ܛܘ ܒܵܬܲܪ ܛܵܒ݂ܵܬ݂ܵܐ ܠܘܵܬ݂ ܚܕ݂ܵܕܹ̈ܐ. ܘܲܠܘܵܬ݂ ܟܠܢܵܫ. 16 ܗܘܵܘ ܚܵܕܹܝܢ ܒܟ݂ܠܙܒܲܢ. 17 ܘܲܡܨܲܠܹܝܢ ܕܠܵܐ ܫܲܠܘܵܐ. 18 ܘܲܒܟ݂ܠ ܡܸܕܸܡ ܗܘܵܘ ܡܵܘܕܹܝܢ. ܗܵܢܵܘ ܓܹܝܪ ܨܸܒ݂ܝܵܢܹܗ ܕܐܲܠܵܗܵܐ ܒܝܼܫܘܿܥ ܡܫܝܼܚܵܐ ܒܟ݂ܘܿܢ. 19 ܪܘܼܚܵܐ ܠܵܐ ܬܿܕ݂ܲܥܟ݂ܘܼܢ. 20 ܢܒ݂̈ܝܼܵܘܵܬ݂ܵܐ ܠܵܐ ܬܲܣܠܘܿܢ. 21 ܟܠܡܸܕܸܡ ܒܩܵܘ. ܘܲܕ݂ܫܲܦܝܼܪ ܐܲܚܘܿܕ݂ܘ. 22 ܘܡܸܢ ܟܠ ܨܒ݂ܘܼ ܒܝܼܫܵܐ ܥܪܘܿܩܘ. 23 ܗܘ̤ ܕܹܝܢ ܐܲܠܵܗܵܐ ܕܲܫܠܵܡܵܐ. ܢܩܲܕܫܟ݂ܘܿܢ ܓܡܝܼܪܵܐܝܼܬ݂ ܠܟ݂ܠܟ݂ܘܿܢ. ܘܟ݂ܠܵܗܿ ܪܘܼܚܟ݂ܘܿܢ ܘܢܲܦ̮ܫܟ݂ܘܿܢ ܘܦܲܓ݂ܪܟ݂ܘܿܢ. ܢܢܲܛܲܪ ܕܠܵܐ ܪܸܫܝܵܢ. ܠܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 24 ܡܗܲܝܡܲܢ ܗܘܼ ܡܲܢ ܕܲܩܪܵܟ݂ܘܿܢ. ܕܗܘܼ ܢܸܥܒܸܕ݂. 25 ܐܲܚܲܝ̈ ܨܲܠܵܘ ܥܠܲܝܢ. 26 ܫܲܐܠܘ ܒܲܫܠܵܡܵܐ ܕܐܲܚܲܝ̈ܢ ܟܠܗܘܿܢ ܒܢܘܼܫܩܬܵܐ ܩܲܕ݁ܝܼܫܬܵܐ. 27 ܡܵܘܡܹܐ ܐ̄ܢܵܐ ܠܟ݂ܘܿܢ ܒܡܵܪܲܢ. ܕܬܸܬ݂ܩܪܹܐ ܐܸܓܲܪܬܵܐ ܗܵܕܹܐ ܠܟ݂ܠܗܘܿܢ ܐܲܚܹ̈ܐ ܩܲܕ݁ܝܼܫܹ̈ܐ. 28 ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡܟ݂ܘܿܢ. ܐܵܡܹܝܢ.