ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܦܘܠܘܣ ܫܠܝܚܐ ܕܠܘܬ ܩܘܠܣܝ̈ܐ

ܩܦܠܐܘܢ: ܐ

1 ܦܵܘܠܘܿܣ: ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ: ܘܛܝܼܡܵܬܹܐܘܿܣ ܐܵܚܘܿܢܵܐ. 2 ܠܐܵܢܝܼ ܕܐܝܼܬ ܒܩܘܼܠܸܣܘܿܣ: ܐܵܚܘܿܢܘܵܬܹ̈ܐ ܩܲܕܝܼܫܹ̈ܐ ܘܡܗܘܼܡܢܹ̈ܐ ܒܡܫܝܼܚܵܐ: ܫܠܵܡܵܐ ܥܲܡܵܘܟ݂ܘܿܢ ܘܫܵܦܵܩܲܬ ܡ̣ܢ ܐܲܠܵܗܵܐ ܒܵܒܲܢ.

3 ܫܵܟܘܿܪܹܐ ܝܘܵܚ ܠܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܟܠ ܙܲܒ݂ܢܵܐ: ܘܨܵܠܘܿܝܹܐ ܝܘܿܚ ܡܒܵܕܵܠܵܘܟ݂ܘܿܢ: 4 ܡ̣ܢ ܕܫܡܸܥܠܲܢ ܗܲܝܡܵܢܘܼܬܵܘܟ݂ܘܿܢ ܕܒܝܼܫܘܿܥ ܡܫܝܼܚܵܐ: ܘܚܘܼܒܵܘܟ݂ܘܿܢ ܕܠܟܸܣ ܟܠܵܝ ܩܲܕܝܼܫܹ̈ܐ: 5 ܣܵܒܵܒ ܕܗܹܒ݂ܝܼ ܕܝܼܠܵܐ ܢܛܝܼܪܬܵܐ ܐܸܠܵܘܟ݂ܘܿܢ ܒܫܡܲܝܵܐ: ܗ̇ܝ ܕܡ̣ܢ ܩܵܕ݇ܡܵܝܬܵܐ ܫܡܸܥܠܵܘܟ݂ܘܿܢ ܒܗܹܡܸܙܡܵܢ ܕܣܲܪ̈ܣܬܘܼܬܵܐ ܕܐܹܘܵܢܓܵܠܝܼܘܿܢ: 6 ܗ̇ܘ ܕܐܬܝܼܵܐ ܝܠܹܐ ܐܸܠܵܘܟ݂ܘܿܢ: ܐܲܝܟ݂ ܕܐܘܼܦ ܓܵܘ ܟܠܹܐ ܥܵܠܡܵܐ: ܘܒܝܼܵܗ݇ܒ݂ܵܐ ܝܠܹܐ ܛܥܘܼܢܝܵܬܹ̈ܐ ܘܒܸܙܝܵܕܵܐ ܐܲܝܟ݂ ܕܐܘܼܦ ܓܵܘܵܘܟ݂ܘܿܢ: ܡ̣ܢ ܝܘܿܡܵܐ ܕܫܡܸܥܠܵܘܟ݂ܘܿܢ ܘܝܕܸܥܠܵܘܟ݂ܘܿܢ ܫܵܦܵܩܲܬ ܕܐܲܠܵܗܵܐ ܒܣܲܪ̈ܲܣܬܘܼܬܵܐ: 7 ܕܐܵܟ݂ܝܼ ܕܝܠܸܦܠܵܘܟ݂ܘܿܢ ܡ̣ܢ ܐܲܦܵܦܪܵܐ: ܚܲܒ݂ܪܲܢ ܡܘܼܚܸܒܵܐ ܒܚܸܠܡܲܬ: ܗ̇ܘ ܕܝܼܠܹܐ ܒܚܵܬܸܪ ܕܝܼܵܘܟ݂ܘܿܢ ܚܸܠܡܲܬܟܵܪ ܡܗܘܼܡܢܵܐ ܕܡܫܝܼܚܵܐ: 8 ܘܗ̇ܘ ܩܲܡ ܡܲܕܸܥ ܠܲܢ ܚܘܼܒܵܘܟ݂ܘܿܢ ܕܒܪܘܼܚܵܐ.

9 ܣܵܒܵܒ ܕܐܵܗܵܐ ܐܘܼܦ ܐܲܚܢܲܢ: ܡ̣ܢ ܝܘܿܡܵܐ ܕܫܡܸܥܠܲܢ: ܠܹܐ ܝܘܵܚ ܒܸܫܠܵܝܵܐ ܡ̣ܢ ܠܨܵܠܘܿܝܹܐ ܡܒܵܕܵܠܵܘܟ݂ܘܿܢ: ܘܠܸܛܠܵܒܵܐ ܕܗܵܘܝܼܬܘܿܢ ܡܸܠܝܹܐ ܝܕܹܥܬܵܐ ܕܪܸܙܵܝܹܗ: ܒܟܠ ܥܵܩܸܠܕܵܪܘܼܬܵܐ ܘܦܲܪܡܵܝܬܵܐ ܪܘܼܚܵܢܵܝܬܵܐ: 10 ܕܚܵܕܪܝܼܬܘܿܢ ܐܲܝܟ݂ ܕܚܵܫܚܵܐ ܠܡܵܪܝܵܐ ܒܟܠܵܗ̇ ܫܦܵܪܬܵܐ: ܘܒܟܠܵܝ ܦܘܼܠܚܵܢܹ̈ܐ ܛܵܒ݂ܹ̈ܐ ܝܵܗ݇ܒ݂ܝܼܬܘܿܢ ܛܥܘܿܢܝܵܬܹ̈ܐ: ܘܒܸܙܝܵܕܵܐ ܒܝܕܹܥܬܵܐ ܕܐܲܠܵܗܵܐ: 11 ܘܒܟܠ ܚܲܝܠܵܐ ܦܵܝܫܝܼܬܘܿܢ ܚܘܼܠܸܢܹܐ ܐܲܝܟ݂ ܚܲܝܠܵܐ ܕܚܸܩܪܹܗ: ܠܟܠ ܚܡܵܠܬܵܐ: ܘܠܡܲܪܝܼܟ݂ܬܵܐ ܕܒܹܢܵܐ ܥܲܡ ܚܲܕܘܼܬܵܐ: 12 ܘܫܵܟܪܝܼܬܘܿܢ ܠܒܵܒܵܐ: ܕܩܲܡ ܡܲܚܫܸܚ ܠܲܢ ܠܣܵܡܵܐ ܕܝܵܪܬܘܼܬܵܐ ܕܩܲܕܝܼܫܹ̈ܐ ܒܒܲܗܪܵܐ: 13 ܘܦܘܼܪܩܵܚܠܹܐ ܡ̣ܢ ܗܘܼܟܡܹܗ ܕܚܘܼܒ݂ܝܵܐ: ܘܩܲܡ ܫܵܢܹܐ ܠܲܢ ܠܡܲܠܟܘܼܬܵܐ ܕܒܪܘܼܢܹܗ ܡܘܼܚܸܒܵܐ: 14 ܗ̇ܘ ܕܒܝܼܹܗ ܐܝܼܬ ܠܲܢ ܦܘܼܪܩܵܢܵܐ: ܫܒ݂ܵܩܵܐ ܕܚ̈ܛܵܗܲܢ: 15 ܗ̇ܘ ܕܝܼܠܹܐ ܕܡܘܼܬܵܐ ܕܐܲܠܵܗܵܐ ܕܠܹܐ ܦܵܝܸܫ ܚܸܙܝܵܐ: ܘܒܘܼܟ݂ܪܵܐ ܕܟܠܵܝ ܒܸܪ̈ܝܵܬܹܐ: 16 ܣܵܒܵܒ ܒܝܼܹܗ ܦܸܫܠܹܐ ܒܸܪܝܵܐ ܟܠ ܡܸܢܕܝܼ ܕܒܫܡܲܝܵܐ ܘܒܲܐܪܥܵܐ: ܟܠ ܕܦܵܝܸܫ ܚܸܙܝܵܐ ܘܟܠ ܕܠܹܐ ܦܵܝܸܫ ܚܸܙܝܵܐ: ܐܸܢ ܬܪ̈ܘܿܢܘܿܣܹܐ: ܘܐܸܢ ܡܵܪ̈ܘܵܬܹܐ: ܘܐܸܢ ܐܲܪ̈ܟܘܿܣ: ܘܐܸܢ ܫܘܼܠܛܵܢܹ̈ܐ ܟܠ ܡܸܢܕܝܼ ܒܐܝܼܕܹܗ ܘܐܸܠܹܗ ܦܸܫܠܘܿܢ ܒܸܪܝܹܐ: 17 ܘܗ̇ܘ ܝܼܠܹܐ ܡ̣ܢ ܩܵܕ݇ܡ ܟܠ: ܘܟܠ ܡܸܢܕܝܼ ܒܝܼܹܗ ܟܹܐ ܟܵܠܹܐ. 18 ܘܗ̇ܘ ܝܼܠܹܐ ܪܹܫܵܐ ܕܦܲܓ݂ܪܵܐ: ܕܥܹܕܬܵܐ: ܕܝܼܠܹܐ ܫܘܼܪܵܝܵܐ: ܘܒܘܼܟ݂ܪܵܐ ܕܡ̣ܢ ܡܝܼܬܹ̈ܐ: ܕܗܵܘܹܐ ܗ̇ܘ ܩܵܕ݇ܡܵܝܵܐ ܓܵܘ ܟܠ: 19 ܣܵܒܵܒ ܕܒܣܸܡܠܵܐ ܠܹܗ (ܒܵܒܵܐ) ܕܒܝܼܹܗ ܟܠܵܗ̇ ܬܲܡܵܡܵܬܘܼܬܵܐ ܠܸܥܡܵܪܵܐ: 20 ܘܒܐܝܼܕܹܗ ܠܣܲܙܓܘܼܪܹܐ ܥܲܡܹܗ ܠܟܠ ܡܸܢܕܝܼ: ܘܫܘܼܢܸܢܹܐ ܒܕܸܡܵܐ ܕܙܩܝܼܦܹܗ ܒܐܝܼܕܹܗ: ܒܝܼܹܗ ܗܲܪ: ܐܸܢ ܡܸܢܕܝܵܢܹ̈ܐ ܕܒܲܐܪܥܵܐ ܘܐܸܢ ܕܒܫܡܲܝܵܐ. 21 ܐܘܼܦ ܐܸܠܵܘܟ݂ܘܿܢ: ܕܩܵܕ݇ܡܵܝܬܵܐ ܢܘܼܟ݂ܪ̈ܵܝܹܐ ܝܬܘܿܢ ܗ݇ܘܵܘ ܘܕܸܫܡܸܢܹ̈ܐ ܒܚܝܼܵܠܵܘܟ݂ܘܿܢ ܒܦܘܼܠܚܵܢܵܘ̈ܟ݂ܘܿܢ ܒܝܼܫܹ̈ܐ: ܐܵܕܝܼܵܐ ܩܲܡ ܫܲܢܸܢܵܘܟ݂ܘܿܢ: 22 ܒܦܲܓ݂ܪܵܐ ܕܒܸܣܪܹܗ ܒܝܼܸܕ ܡܵܘܬܵܐ: ܕܡܲܩܸܡ ܗ݇ܘܵܐ ܠܵܘܟ݂ܘܿܢ ܩܵܕ݇ܡܘܼܗܝ ܩܲܕܝܼܫܹ̈ܐ: ܕܠܵܐ ܠܵܘܡܵܐ ܘܕܠܵܐ ܡܘܼܡܵܐ: 23 ܐܸܢ ܡܸܓ̰ܸܕ ܥܲܪܩܸܠܝܼܬܘܿܢ ܒܗܲܝܡܵܢܘܼܬܵܘܟ݂ܘܿܢ: ܟܲܕ ܗܵܘܝܵܐ ܩܘܼܝܼܬܵܐ ܒܸܢܲܬܵܘܟ݂ܘܿܢ: ܘܠܵܐ ܦܵܝܫܝܼܬܘܿܢ ܫܥܝܼܫܹܐ ܡ̣ܢ ܗܹܒ݂ܝܼ ܕܐܹܘܵܢܓܵܠܝܼܘܿܢ ܕܫܡܸܥܠܵܘܟ݂ܘܿܢ: ܕܦܸܫܠܹܐ ܡܘܼܟܪܸܙܵܐ ܒܟܠܵܗ̇ ܒܪܝܼܬܵܐ ܕܬܚܘܿܬ ܫܡܲܝܵܐ: ܗ̇ܘ ܕܐܵܢܵܐ ܦܵܘܠܘܿܣ ܗ݇ܘܹܠܝܼ ܚܸܠܡܲܬܟܵܪܘܼܗܝ.

24 ܐܵܕܝܼܵܐ ܒܸܚܕܵܝܵܐ ܝܘܸܢ ܒܚܲܫܝܼ̈ ܕܒܚܵܬܸܪܵܘܟ݂ܘܿܢ: ܘܬܲܡܘܼܡܹܐ ܝܘܸܢ ܚܲܣܝܼܪܘܼܬܵܐ ܕܐܘܼܠܨܵܢܹ̈ܐ ܕܡܫܝܼܚܵܐ ܒܒܸܣܪܝܼ: ܒܚܵܬܸܪ ܕܦܲܓ݂ܪܹܗ ܕܝܼܠܹܐ ܥܹܕܬܵܐ. 25 ܗ̇ܝ ܕܐܵܢܵܐ ܗ݇ܘܹܠܝܼ ܚܸܠܡܲܬܟܵܪܘܼܗ̇: ܐܲܝܟ݂ ܡܕܲܒܪܵܢܘܼܬܵܐ ܕܐܲܠܵܗܵܐ ܕܦܸܫܠܵܐ ܝܸܗܒܸܠܬܵܐ ܐܸܠܝܼ ܠܟܸܣܠܵܘܟ݂ܘܿܢ: ܕܬܲܡܸܡܸܢ ܗܹܡܸܙܡܵܢ ܕܐܲܠܵܗܵܐ: 26 ܣܸܪ: ܕܝܼܗ݇ܘܵܐ ܟܘܼܣܝܵܐ ܡ̣ܢ ܥܵܠܡܹ̈ܐ ܘܡ̣ܢ ܕܵܘܪܹ̈ܐ: ܐܝܼܢܵܐ ܐܵܕܝܼܵܐ ܦܸܫܠܹܐ ܓܸܠܝܵܐ ܠܩܲܕܝܼܫܘܼ̈ܗܝ: 27 ܠܐܵܢܝܼ ܕܒܣܸܡܠܵܐ ܠܹܗ ܐܲܠܵܗܵܐ ܕܡܲܕܸܥ ܡܘܼܕܝܼ ܝܠܵܐ ܕܵܘܸܠܬܵܐ ܕܚܸܩܪܹܗ ܕܐܵܗܵܐ ܣܸܪ ܓܵܘ ܛܵܝܸܦܹ̈ܐ: ܕܝܼܠܹܐ ܡܫܝܼܚܵܐ ܓܵܘܵܘܟ݂ܘܿܢ ܗܹܒ݂ܝܼ ܕܚܸܩܪܵܐ: 28 ܗ̇ܘ ܕܐܲܚܢܲܢ ܡܲܟܪܘܼܙܹܐ ܝܘܵܚ: ܘܒܝܼܵܗ݇ܒ݂ܵܐ ܝܘܵܚ ܢܲܨܝܼܗܲܬ ܠܟܠ ܒܲܪܢܵܫܵܐ: ܘܡܵܠܘܿܦܹܐ ܝܘܵܚ ܠܟܠ ܒܲܪܢܵܫܵܐ ܒܟܠ ܥܵܩܸܠܕܵܪܘܼܬܵܐ: ܕܡܲܩܸܡܵܚ ܠܟܠ ܒܲܪܢܵܫܵܐ ܟܵܡܝܼܠ ܒܝܼܫܘܿܥ ܡܫܝܼܚܵܐ. 29 ܕܒܵܐܗܵܐ ܐܘܼܦ ܒܹܐܟ݂ܵܠܵܐ ܝܘܸܢ ܓ̰ܵܦܵܐ: ܘܒܸܚܠܵܨܵܐ ܝܘܸܢ ܒܦܠܵܚܬܘܼܗܝ ܕܒܸܦܠܵܚܵܐ ܝܠܵܐ ܒܝܼܝܼ ܒܚܲܝܠܵܐ.

ܩܦܠܐܘܢ: ܒ

1 ܐܝܼܢܵܐ ܒܸܒܲܥܝܵܐ ܝܘܸܢ ܕܝܲܕܥܝܼܬܘܿܢ ܡܘܼܕܝܼ ܐܵܓ݂ܘܿܢܵܐ ܐܝܼܬ ܠܝܼ ܡܒܵܕܵܠܵܘܟ݂ܘܿܢ: ܘܡܒܵܕܵܠ ܕܐܵܢܝܼ ܕܝܼܢܵܐ ܓܵܘ ܠܵܕܝܼܩܝܼܵܐ: ܘܡܒܵܕܵܠ ܕܐ݇ܚܹܪ̈݇ܢܹܐ ܟܡܐܵ ܕܠܹܐ ܝܢܵܐ ܚܸܙܝܘܼܗ ܦܵܬܝܼ ܒܒܸܣܪܵܐ: 2 ܕܦܵܝܫܝܼ ܝܘܼܗ݇ܒܹܐ ܠܸܒܵܐ ܠܸܒܵܘܵܬܵܝ̈: ܟܲܕ ܩܕܝܼܚܹܐ ܒܚܘܼܒܵܐ: ܘܠܟܠܵܗ̇ ܕܵܘܸܠܬܵܐ ܕܗܲܡܲܢܬܵܐ ܬܲܡܵܡ ܕܦܲܪܡܵܝܬܵܐ: ܠܝܕܹܥܬܹܗ ܕܣܸܪ ܕܐܲܠܵܗܵܐ ܒܵܒܵܐ ܕܡܫܝܼܚܵܐ: 3 ܗ̇ܘ ܕܒܝܼܹܗ ܟܘܼܣܝܹܐ ܝܢܵܐ ܟܠܵܝ ܚܲܙܝܼܢܹ̈ܐ ܕܥܵܩܸܠܕܵܪܘܼܬܵܐ ܘܕܝܕܹܥܬܵܐ. 4 ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ: ܕܐ݇ܢܵܫܵܐ ܠܵܐ ܗܵܘܹܐ ܡܲܚܠܘܼܛܵܘܟ݂ܘܿܢ ܒܡܲܗܡܲܢܬܵܐ ܕܗܹܡܸܙܡܵܢܹ̈ܐ. 5 ܣܵܒܵܒ ܐܵܦܸܢ ܒܒܸܣܪܵܐ ܪܸܚܩܵܐ ܝܘܸܢ ܡܸܢܵܘܟ݂ܘܿܢ: ܐܸܠܵܐ ܒܪܘܼܚܵܐ ܥܲܡܵܘܟ݂ܘܿܢ ܝܼܘܸܢ: ܘܒܸܚܕܵܝܵܐ ܝܘܸܢ ܕܒܸܚܙܵܝܵܐ ܝܘܸܢ ܪܹܐܙܵܘܟ݂ܘܿܢ: ܘܩܘܼܝܘܼܬܵܐ ܕܗܲܝܡܵܢܘܼܬܵܘܟ݂ܘܿܢ ܕܒܡܫܝܼܚܵܐ.

6 ܒܲܣ ܕܐܵܟ݂ܝܼ ܕܩܘܼܒܸܠܵܘܟ݂ܘܿܢ ܠܝܼܫܘܿܥ ܡܫܝܼܚܵܐ ܡܵܪܲܢ: ܒܝܼܹܗ ܚܕܪܘܿܢ: 7 ܟܲܕ ܡܘܼܩܘܝܼܹܐ ܝܢܵܐ ܥܸܩܪ̈ܵܘܟ݂ܘܿܢ: ܘܦܝܵܫܵܐ ܝܬܘܿܢ ܒܸܢܝܹܐ ܒܝܼܹܗ: ܘܦܝܵܫܵܐ ܝܬܘܿܢ ܡܘܼܩܘܝܼܹܐ ܒܗܲܝܡܵܢܘܼܬܵܐ: ܕܐܵܟ݂ܝܼ ܕܦܸܫܠܵܘܟ݂ܘܿܢ ܡܘܼܠܦܹܐ: ܕܒܝܼܵܗ̇ ܙܵܝܕܝܼܬܘܿܢ ܒܫܵܟܲܪܬܵܐ.

8 ܗ݇ܘܹܡܘܿܢ ܗܸܫܝܵܪ ܠܵܐ ܗ݇ܘܹܐ ܕܐ݇ܢܵܫܵܐ ܣܵܠܸܒܠܵܘܟ݂ܘܿܢ ܒܦܝܼܠܵܣܘܿܦܘܼܬܵܐ: ܘܒܚܸܠܛܘܼܢܝܘܼܬܵܐ ܒܵܛܝܼܠܬܵܐ: ܐܲܝܟ݂ ܣܵܦܝܵܢܘܼܬܵܐ ܕܒܢܲܝ̈ܢܵܫܵܐ: ܘܐܲܝܟ݂ ܐܸܣܛܘܼܟ݂ܣܹ̈ܐ ܕܥܵܠܡܵܐ: ܘܠܵܐ ܐܲܝܟ݂ ܡܫܝܼܚܵܐ: 9 ܣܵܒܵܒ ܕܒܝܼܹܗ ܒܸܥܡܵܪܵܐ ܝܠܵܐ ܟܠܵܗ̇ ܬܲܡܵܡܵܬܘܼܬܵܐ ܕܐܲܠܵܗܘܼܬܵܐ ܓܘܼܫܡܵܢܵܐܝܼܬ݂: 10 ܘܒܝܼܹܗ ܐܘܼܦ ܐܲܚܬܘܿܢ ܦܝܵܫܵܐ ܝܬܘܿܢ ܥܒ݂ܝܼܕܹܐ ܡܸܠܝܹܐ: ܗ̇ܘ ܕܝܼܠܹܐ ܪܹܫܵܐ ܕܟܠܵܝ ܐܲܪ̈ܟܘܿܣ ܘܫܘܼܠܛܵܢܹ̈ܐ. 11 ܘܒܝܼܹܗ ܦܸܫܠܵܘܟ݂ܘܿܢ ܓܙܝܼܪܹܐ ܒܓܙܘܼܪܬܵܐ ܕܠܵܐ ܒܐܝܼܕܵܬܹ̈ܐ: ܒܫܵܠܲܚܬܵܐ ܕܦܲܓ݂ܪܵܐ ܕܒܸܣܪܵܐ: ܒܓܙܘܼܪܬܹܗ ܕܡܫܝܼܚܵܐ: 12 ܘܦܸܫܠܵܘܟ݂ܘܿܢ ܩܒ݂ܝܼܪܹܐ ܥܲܡܹܗ ܒܡܲܥܡܘܿܕܝܼܬܵܐ: ܕܒܝܼܵܗ̇ ܦܸܫܠܵܘܟ݂ܘܿܢ ܡܘܼܩܡܹܐ ܥܲܡܹܗ ܒܝܼܸܕ ܗܲܝܡܵܢܘܼܬܵܐ ܒܦܠܵܚܬܵܐ ܕܐܲܠܵܗܵܐ ܕܡܘܼܩܸܡܠܹܗ ܡ̣ܢ ܡܝܼܬܹ̈ܐ. 13 ܘܐܸܠܵܘܟ݂ܘܿܢ ܕܡܝܼܬܹ̈ܐ ܝܬܘܿܢ ܗ݇ܘܵܘ ܒܝܼܸܕ ܓܵܢܵܗܵܘ̈ܟ݂ܘܿܢ ܘܥܘܼܪܠܘܼܬܵܐ ܕܒܸܣܪܵܘܟ݂ܘܿܢ: ܩܲܡ ܡܲܚܹܐ ܠܵܘܟ݂ܘܿܢ ܥܲܡܹܗ: ܘܫܒܸܫܠܹܐ ܐܸܠܲܢ ܟܠܵܝ ܓܵܢܵـ̈ܗܲܢ: 14 ܘܓܪܸܕܠܹܐ ܗܘܼܓ̰ܲܬ ܕܕܵܝܢܲܢ ܕܒܦܘܼܩܵܕܹ̈ܐ ܗ̇ܝ ܕܝܼܗ݇ܘܵܐ ܕܲܪܩܘܼܒ݂ܠܲܢ: ܘܫܩܝܼܠܵܠܹܐ ܡ̣ܢ ܐܘܼܪܚܵܐ: ܘܡܸܚܝܵܠܹܐ ܒܙܩܝܼܦܹܗ: 15 ܘܒܫܵܠܲܚܬܵܐ (ܕܦܲܓ݂ܪܹܗ) ܓܘܼܠܹܠܹܐ ܠܐܲܪ̈ܟܘܿܣ ܘܠܫܘܼܠܛܵܢܹ̈ܐ ܒܐܲܫܟܵܪܵܐ: ܟܲܕ ܓ݂ܠܝܼܒܵܝܠܹܐ ܒܓܵܢܹܗ.

16 ܒܲܣ ܐ݇ܢܵܫܵܐ ܠܵܐ ܕܵܝܼܢ ܐܸܠܵܘܟ݂ܘܿܢ ܒܐܟ݂ܠܵܐ ܘܒܫܬܵܝܵܐ: ܝܲܢ ܒܵܗ݇ܣ ܕܥܹܐܕܵܐ ܘܕܪܹܫܵܐ ܕܝܲܪ̈ܚܹܐ ܘܕܫܵܒܵܬܹ̈ܐ: 17 ܐܲܢܹܐ ܕܝܼܢܵܐ ܛܸܠܢܝܼܵܬܹ̈ܐ ܕܐܵܢܝܼ ܕܝܼܢܵܐ ܗܕܝܼܪܹܐ ܠܸܗ݇ܘܵܝܵܐ: ܐܝܼܢܵܐ ܦܲܓ݂ܪܵܐ ܕܡܫܝܼܚܵܐ ܝܠܹܐ. 18 ܠܵܐ ܐ݇ܢܵܫܵܐ ܣܵܠܸܒ ܠܵܘܟ݂ܘܿܢ ܡ̣ܢ ܐܲܢܥܵܡܵܘܟ݂ܘܿܢ: ܒܪܹܙܵܝܹܗ: ܒܡܵܟܝܼܟ݂ܘܼܬܵܐ ܕܚܝܼܵܠ ܘܒܣܓ݂ܵܕܬܵܐ ܕܡܲܠܲܐܟ݂ܹ̈ܐ: ܟܲܕ ܒܸܟܠܵܝܵܐ ܝܠܹܐ ܥܲܠ ܡܸܢܕܝܼ ܕܠܹܐ ܝܠܹܐ ܚܸܙܝܵܐ: ܘܒܒܵܛܝܼܠܘܼܬܵܐ ܒܸܚܬܵܪܵܐ ܝܠܹܐ ܒܝܸܕ ܚܝܼܵܠ ܕܒܸܣܪܹܗ: 19 ܘܠܹܐ ܝܠܹܐ ܒܸܕܒ݂ܵܩܵܐ ܪܹܫܵܐ: ܕܡܸܢܹܗ ܟܠܹܗ ܦܲܓ݂ܪܵܐ: ܟܲܕ ܦܝܵܫܵܐ ܗܘܼܝܸܪܵܐ ܘܡܘܼܩܘܝܼܵܐ ܡܸܚܕܵܕܹ̈ܐ ܒܓܲܝܹ̈ܐ ܘܒܫܸܪ̈ܝܵܢܹܐ: ܓܲܪܘܘܼܣܹܐ ܝܠܹܐ ܓܲܪܘܲܣܬܵܐ ܕܐܲܠܵܗܵܐ.

20 ܐܸܢ ܡܸܬܠܵܘܟ݂ܘܿܢ ܥܲܡ ܡܫܝܼܚܵܐ ܡ̣ܢ ܐܸܣܛܘܼܟ݂ܣܹ̈ܐ ܕܥܵܠܡܵܐ: ܩܵܡܘܿܕܝܼ ܐܲܝܟ݂ ܕܒܸܚܵܝܵܐ ܒܥܵܠܡܵܐ ܦܝܵܫܵܐ ܝܬܘܿܢ ܙܲܒܛ ܠܦܘܼܩܵܪܹ̈ܐ: 21 ܠܵܐ ܩܲܪܒܸܢܸܬ: ܘܠܵܐ ܛܵܥܡܸܬ: ܘܠܵܐ ܕܵܩܪܸܬ: 22 ـ ܐܲܢܹܐ ܟܠܵܝ ܕܝܼܢܵܐ ܠܸܚܪܵܒ݂ܵܐ ܒܡܲܦܠܲܚܬܵܐـ: ܐܲܝܟ݂ ܦܘܼܩܵܕܹ̈ܐ ܘܝܘܼܠܦܵܢܹ̈ܐ ܕܒܢܲܝ̈ܢܵܫܵܐ: 23 ܐܲܢܝܼ ܕܟܹܐ ܦܵܝܫܝܼ ܚܸܙܝܹܐ ܐܲܝܟ݂ ܕܐܝܼܬ ܒܝܼܵܝ ܡܸܢܕܝܼ ܕܥܵܩܸܠܕܵܪܘܼܬܵܐ ܒܣܓ݂ܕܬܵܐ ܕܡ̣ܢ ܪܸܙܵܝܵܐ ܘܒܡܵܟܝܼܟ݂ܘܼܬܵܐ: ܘܒܡܲܣܠܵܝܬܵܐ ܕܦܲܓ݂ܪܵܐ: ܐܝܼܢܵܐ ܠܵܐ ܡܸܢܕܝܼ ܡܵܪܹܐ ܛܝܼܡܵܐ ܝܢܵܐ: ܠܣܒܲܥܝܵܐ ܕܒܸܣܪܵܐ.

ܩܦܠܐܘܢ: ܓ

1 ܒܲܣ ܐܸܢ ܩܸܡܠܵܘܟ݂ܘܿܢ ܥܲܡ ܡܫܝܼܚܵܐ: ܡܸܢܕܝܼ ܕܠܥܸܠܸܠ ܒܸܥܡܘܿܢ: ܐܲܝܟܵܐ ܕܝܼܠܹܐ ܡܫܝܼܚܵܐ: ܝܬܝܼܒ݂ܵܐ ܥܲܠ ܝܲܡܝܼܢܵܐ ܕܐܲܠܵܗܵܐ. 2 ܡܸܢܕܝܼ ܕܠܥܸܠܸܠ ܚܫܘܿܒ݂ܘܿܢ: ܘܠܵܐ ܕܒܲܐܪܥܵܐ. 3 ܣܵܒܵܒ ܡܸܬܠܵܘܟ݂ܘܿܢ: ܘܚܲܝܵܘ̈ܟ݂ܘܿܢ ܛܸܫܝܹܐ ܝܢܵܐ ܥܲܡ ܡܫܝܼܚܵܐ ܒܐܲܠܵܗܵܐ. 4 ܐܝܼܡܲܢ ܕܡܫܝܼܚܵܐ ܦܵܝܸܫ ܓܸܠܝܵܐ: ܗ̇ܘ ܕܝܼܠܹܐ ܚܲܝܲـ̈ܢ: ܗ̇ܝܓܵܗ ܐܘܼܦ ܐܲܚܬܘܿܢ ܒܸܬ ܦܵܝܫܝܼܬܘܿܢ ܓܸܠܝܹܐ ܥܲܡܹܗ ܒܚܸܩܪܵܐ.

5 ܒܲܣ ܡܲܡܝܸܬܘܿܢ ܗܲܕܵܡܵܘ̈ܟ݂ܘܿܢ ܕܝܼܢܵܐ ܒܐܲܪܥܵܐ ܙܵܢܝܘܼܬܵܐ: ܛܲܢܦܘܼܬܵܐ: ܙܵܘܥܹ̈ܐ ܚܲܝܡܹ̈ܐ: ܫܲܗ݇ܘܲܬܬܵܐ ܒܝܼܫܬܵܐ: ܘܛܲܡܲܥܟܵܪܘܼܬܵܐ: ܗ̇ܝ ܕܝܼܠܵܐ ܣܓ݂ܵܕܬܵܐ ܕܨܵܢܲܡܹ̈ܐ: 6 ܕܒܣܵܒܵܒ ܕܐܲܢܹܐ ܒܹܐܬܵܝܵܐ ܝܠܵܐ ܟܲܪܒܹܗ ܕܐܲܠܵܗܵܐ ܥܲܠ ܒܢܘܼܢܹ̈ܐ ܕܠܵܐ ܡܲܨܝܲܬܬܵܐ: 7 ܘܒܲܐܢܹܐ ܐܘܼܦ ܐܲܚܬܘܿܢ ܚܕܸܪܵܘܟ݂ܘܿܢ ܩܵܕ݇ܡܵܝܬܵܐ: ܟܲܕ ܚܹܠܵܘܟ݂ܘܿܢ ܒܝܵܝ. 8 ܐܝܼܢܵܐ ܐܵܕܝܼܵܐ ܡܲܢܝܸܚܘܿܢ ܡܸܢܵܘܟ݂ܘܿܢ ܐܲܢܹܐ ܟܠܵܝ: ܩܲܙܵܒ: ܟܲܪܒܵܐ: ܒܝܼܫܘܼܬܵܐ: ܓܘܼܕܵܦܵܐ: ܗܲܡܙܲܡܬܵܐ ܟ̰ܲܦܵܠ ܡ̣ܢ ܦܘܼܡܵܘܟ݂ܘܿܢ. 9 ܘܠܵܐ ܕܵܓܠܝܼܬܘܿܢ ܚܵܕ݇ ܒܗ̇ܘ ܐ݇ܚܹܪ݇ܢܵܐ: ܟܲܕ ܫܘܼܠܸܚܠܵܘܟ݂ܘܿܢ ܠܒܲܪܢܵܫܵܐ ܥܵܬܝܼܩܵܐ ܥܲܡ ܟܠܵܝ ܦܘܼܠܚܵܢܘܼ̈ܗܝ: 10 ܘܠܒܸܫܠܵܘܟ݂ܘܿܢ ܚܵܕ݇ܬܵܐ: ܕܒܸܗܘܵܝܵܐ ܝܠܹܐ ܚܘܼܕܸܬܵܐ ܒܝܕܹܥܬܵܐ ܒܕܡܘܼܬܵܐ ܕܒܵܪܝܵܢܵܐ ܐܸܠܹܗ: 11 ܐܲܝܟܵܐ ܕܠܲܝܬ ܝܗ݇ܘܼܕܵܝܵܐ ܘܐܲܪܡܵܝܵܐ: ܘܠܵܐ ܓܙܘܼܪܬܵܐ ܘܥܘܼܪܠܘܼܬܵܐ: ܘܠܵܐ ܐܸܣܩܹܛܹܐ ܘܒܲܪܒܪܵܝܵܐ: ܘܠܵܐ ܪܸܓܵܐ ܘܐܵܙܵܕ: ܐܸܠܵܐ ܟܠ ܘܒܟܠ ܝܼܠܹܐ ܡܫܝܼܚܵܐ. 12 ܠܒ݂ܘܿܫܘܿܢ ܗܲܕܟ݂ܵܐ ܐܲܝܟ݂ ܓܘܒܝܹ̈ܐ ܕܐܲܠܵܗܵܐ ܘܩܲܕܝܼܫܹ̈ܐ ܡܘܼܚܸܒܹ̈ܐ: ܪ̈ܲܚܡܹܐ: ܘܪ̈ܲܦܪ̈ܲܦܬܵܐ: ܘܡܵܟܝܼܟ݂ܘܼܬܵܐ ܕܚܝܼܵܠ: ܘܢܝܼܚܘܼܬܵܐ: ܘܡܲܪܝܲܟ݂ܬܵܐ ܕܒܹܢܵܐ: 13 ܘܗܵܘܝܼܬܘܿܢ ܒܸܚܠܵܡܵܐ ܚܵܕ݇ ܒܗ̇ܘ ܐܚܹܪ݇ܢܵܐ: ܘܒܸܫܒ݂ܵܩܵܐ ܚܵܕ݇ ܠܗ̇ܘ ܐܚܹܪ݇ܢܵܐ: ܐܸܢ ܐ݇ܢܵܫܵܐ ܐܝܼܬ ܠܹܗ ܥܲܠ ܚܲܒ݂ܪܹܗ ܕܲܥܘܝܼ: ܕܐܵܟ݂ܝܼ ܕܡܫܝܼܚܵܐ ܩܲܡ ܫܵܒܸܩ ܠܵܘܟ݂ܘܿܢ: ܗܲܕܟ݂ܵܐ ܐܘܼܦ ܐܲܚܬܘܿܢ: 14 ܘܥܲܠ ܕܐܲܢܹܐ ܟܠܵܝ: ܚܘܼܒܵܐ: ܗ̇ܘ ܕܝܼܠܹܐ ܚܠܵܨܵܐ ܕܟܵܡܝܼܠܘܼܬܵܐ. 15 ܘܫܠܵܡܹܗ ܕܡܫܝܼܚܵܐ ܬܲܓܒܸܪ ܠܸܒܵܘܵܬܵܘ̈ܟ݂ܘܿܢ: ܕܐܸܠܹܗ ܦܸܫܠܵܘܟ݂ܘܿܢ ܩܸܪܝܹܐ ܒܚܵܪ݇ ܦܲܓ݂ܪܵܐ: ܘܗܵܘܝܼܬܘܿܢ ܫܵܟܘܿܪܹܐ. 16 ܗܹܡܸܙܡܵܢ ܕܡܫܝܼܚܵܐ ܥܵܡܪܵܐ ܒܝܼܵܘܟ݂ܘܿܢ ܒܕܵܘܠܲܬܡܲܢܕܘܼܬܵܐ ܒܟܠ ܥܵܩܸܠܕܵܪܘܼܬܵܐ: ܘܗܵܘܝܼܬܘܿܢ ܡܵܠܘܿܦܹܐ ܘܬܲܥܠܘܼܡܹܐ ܓܵܢܵܘܟ݂ܘܿܢ ܒܡܲܙܡܘܿܪܹ̈ܐ ܘܒܬܸܫܒ̈ܚܵܬܵܐ ܘܒܙܡܵܪ̈ܝܵܬܹܐ ܪ̈ܘܼܚܵܢܵܝܹܐ: ܘܒܫܵܦܵܩܲܬ ܗܵܘܝܼܬܘܿܢ ܒܸܙܡܵܪܵܐ ܒܠܸܒܵܘܵܬܵܘ̈ܟ݂ܘܿܢ ܠܐܲܠܵܗܵܐ. 17 ܘܟܠ ܡܸܢܕܝܼ ܕܥܵܒ݂ܕܝܼܬܘܿܢ ܒܗܹܡܸܙܡܵܢ ܘܒܦܘܼܠܚܵܢܵܐ: ܒܫܸܡܹܗ ܕܡܵܪܲܢ ܝܼܫܘܿܥ ܗܵܘܝܼܬܘܿܢ ܒܸܥܒ݂ܵܕܵܐ: ܘܗܵܘܝܼܬܘܿܢ ܫܵܟܘܿܪܹܐ ܒܐܝܼܕܹܗ ܠܐܲܠܵܗܵܐ ܒܵܒܵܒ.

18 ܒܲܟ݂ܬܵܬܹ̈ܐ: ܗ݇ܘܹܡܘܿܢ ܙܲܒܛ ܠܓܲܒ݂ܪ̈ܵܢܵܘܟ݂ܘܿܢ: ܐܲܝܟ݂ ܕܝܼܠܵܐ ܒܸܠܚܵܡܵܐ ܒܡܵܪܝܵܐ. 19 ܓܲܒ݂ܪܹ̈ܐ: ܡܲܚܸܒܘܿܢ ܒܲܟ݂ܬܵܬܵܘ̈ܟ݂ܘܿܢ: ܘܠܵܐ ܗܵܘܝܼܬܘܿܢ ܡܲܪܝܼܪܹ̈ܐ ܥܲܠܵܝ. 20 ܒܢܘܿܢܹ̈ܐ: ܡܲܨܝܸܬܘܿܢ ܠܐܲܒ݂ܵܗܵܘ̈ܟ݂ܘܿܢ ܒܟܠ ܡܸܢܕܝܼ: ܣܵܒܵܒ ܕܐܵܗܵܐ ܫܵܦܪܵܢܬܵܐ ܝܠܵܐ ܩܵܕ݇ܡ ܡܵܪܲܢ. 21 ܐܲܒ݂ܵܗܹ̈ܐ: ܠܵܐ ܡܲܟܪܸܒ݁ܝܼܬܘܿܢ ܒܢܘܼܢܵܘ̈ܟ݂ܘܿܢ: ܕܠܵܐ ܦܵܝܫܝܼ ܡܘܼܥܝܸܩܹܐ. 22 ܪܹ̈ܓܵܘܵܬܹܐ: ܡܲܨܝܸܬܘܿܢ ܒܟܠ ܡܸܢܕܝܼ ܠܐܵܓ݂ܵܝܵܘ̈ܟ݂ܘܿܢ ܕܦܲܓ݂ܪܵܐ: ܠܐܵ ܒܚܙܵܝܬܵܐ ܕܥܲܝܢܵܐ: ܐܲܝܟ݂ ܫܵܦܪ̈ܵܢܹܐ ܠܒܢܲܝ̈ܢܵܫܵܐ: ܐܸܠܵܐ ܒܦܫܝܼܛܘܼܬܵܐ ܕܠܸܒܵܐ: ܘܒܙܕܘܼܥܬܹܗ ܕܐܲܠܵܗܵܐ. 23 ܟܠ ܕܥܵܒ݂ܕܝܼܬܘܿܢ: ܡ̣ܢ ܟܠܹܗ ܠܸܒܵܘܟ݂ܘܿܢ ܥܒ݂ܘܿܕܘܿܢ: ܐܲܝܟ݂ ܕܠܡܵܪܲܢ: ܘܠܵܐ ܐܲܝܟ݂ ܕܠܒܢܲܝ̈ܢܵܫܵܐ. 24 ܘܝܕܸܥܡܘܿܢ ܕܡ̣ܢ ܡܵܪܲܢ ܒܸܬ ܩܵܒ݁ܠܝܼܬܘܿܢ ܦܘܼܪܥܵܢܵܐ ܕܝܵܪܬܘܼܬܵܐ: ܣܵܒܵܒ ܕܠܡܵܪܝܵܐ ܡܫܝܼܚܵܐ ܒܸܦܠܵܚܵܐ ܝܬܘܿܢ. 25 ܐܝܼܢܵܐ ܥܵܒ݂ܕܵܢܵܐ ܕܢܵܐܗܲܩ ܒܸܬ ܦܵܝܸܫ ܦܸܪܥܝܵܐ ܐܲܝܟ݂ ܡܸܢܕܝܼ ܕܥܒܸܕܠܹܐ ܢܵܐܗܲܩ: ܘܠܲܝܬ ܚܙܵܝܬܵܐ ܕܦܵܬܵܐ.

ܩܦܠܐܘܢ: ܕ

1 ܐܵܓ݂ܵܝܹ̈ܐ: ܥܒ݂ܘܿܕܘܿܢ ܒܵܪܵܒܵܪܘܼܬܵܐ ܕܗܵܩܘܼܬܵܐ ܠܟܸܣ ܪܹܓܵܘܵܬܵܘܟ݂ܘܿܢ: ܟܲܕ ܗܵܘܝܼܬܘܿܢ ܒܝܼܕܲܥܝܵܐ ܕܐܘܼܦ ܐܸܠܵܘܟ݂ܘܿܢ ܐܝܼܬ ܡܵܪܵܐ ܒܫܡܲܝܵܐ.

2 ܒܨܠܘܿܬܵܐ ܗ݇ܘܹܡܘܿܢ ܕܵܝܸܡ: ܘܗܵܘܝܼܬܘܿܢ ܪܥܝܼܫܹܐ ܒܝܼܵܗ̇ ܘܫܵܟܘܿܪܹܐ: 3 ܐܘܼܦ ܡܒܵܕܵܠ ܕܝܲܢ: ܕܐܲܠܵܗܵܐ ܦܵܬܸܚ ܐܸܠܲܢ ܬܲܪܥܑܵ ܠܗܹܡܸܙܡܵܢ: ܠܗܲܡܙܘܼܡܹܐ ܣܸܪ ܕܡܫܝܼܚܵܐ: ܕܣܵܒܵܒ ܕܝܼܹܗ ܐܣܝܼܪܵܐ ܝܘܸܢ: 4 ܕܥܵܒ݂ܕܸܢܹܗ ܐܲܫܟܵܪܵܐ ܘܗܲܡܙܸܡܸܢܹܗ ܕܐܵܟ݂ܝܼ ܕܝܼܠܵܐ ܘܵܓ̰ܸܒ ܐܸܠܝܼ. 5 ܒܥܵܩܸܠܕܵܪܘܼܬܵܐ ܚܕܘܿܪܘܿܢ ܠܟܸܣ ܒܲܪ̈ܵܝܹܐ: ܘܦܵܪܩܘܿܢ ܦܸܪܣܲܬܵܘܟ݂ܘܿܢ. 6 ܘܗܲܡܙܲܡܬܵܘܟ݂ܘܿܢ ܒܟܠ ܙܲܒ݂ܢܵܐ ܗܵܘܝܵܐ ܒܫܵܦܵܩܲܬ: ܡܘܼܡܠܸܚܬܵܐ ܒܡܸܠܚܵܐ: ܕܝܲܕܥܝܼܬܘܿܢ ܕܐܵܟ݂ܝܼ ܘܵܓ̰ܸܒ ܝܼܠܵܐ ܐܸܠܵܘܟ݂ܘܿܢ ܠܡܲܕܘܼܪܹܐ ܓ̰ܘܼܘܵܒ ܠܟܠ ܐ݇ܢܵܫܵܐ.

7 ܟܠ ܡܸܢܕܝܼ ܕܠܟܸܣܠܝܼ ܒܸܬ ܡܲܕܸܥ ܠܵܘܟ݂ܘܿܢ ܛܘܼܟ݂ܝܼܩܘܿܣ: ܐܵܚܘܿܢܵܐ ܡܘܼܚܸܒܵܐ: ܘܚܸܠܡܲܬܟܵܪ ܡܗܘܼܡܢܵܐ: ܘܪܹܓܵܐ ܥܲܡܝܼ ܒܡܵܪܝܵܐ: 8 ܗ̇ܘ ܕܫܘܼܕܸܪܝܼ ܠܟܸܣܠܵܘܟ݂ܘܿܢ ܗܲܪ ܣܵܒܵܒ ܕܐܵܗܵܐ: ܕܝܲܕܸܥ ܡܸܢܕܝܼ ܕܠܟܸܣܠܵܘܟ݂ܘܿܢ: ܘܝܵܗ݇ܒܸܠ ܠܸܒܵܐ ܠܠܸܒܵܬܵܘ̈ܟ݂ܘܿܢ: 9 ܥܲܡ ܐܵܢܹܣܝܼܡܘܿܣ: ܐܵܚܘܿܢܵܐ ܡܗܘܼܡܢܵܐ ܘܡܘܼܚܸܒܵܐ: ܗ̇ܘ ܕܝܼܠܹܐ ܡܸܢܵܘܟ݂ܘܿܢ. ܐܵܢܝܼ ܒܸܬ ܡܲܕܥܝܼ ܠܵܘܟ݂ܘܿܢ ܟܠ ܡܸܢܕܝܼ ܕܠܲܐܟ݂ܵܐ. 10 ܘܒܝܼܵܗ݇ܒ݂ܵܐ ܝܠܹܐ ܫܠܵܡܵܐ ܐܸܠܵܘܟ݂ܘܿܢ ܐܵܪܸܣܛܲܪܟܘܿܣ ܝܲܚܣܝܼܪ ܕܥܲܡܝܼ: ܘܡܵܪܩܘܿܣ ܒܪܘܼܢܵܐ ܕܥܵܡܘܿܘܹܗ ܕܒܲܪܢܒ݂ܵܐ: ܗ̇ܘ ܕܦܸܫܠܵܘܟ݂ܘܿܢ ܦܩܝܼܕܹܐ ܒܵܗ݇ܣܹܗ: ܐܸܢ ܐܵܬܹܐ ܠܟܸܣܠܵܘܟ݂ܘܿܢ ܩܵܒ݁ܠܝܼܬܘܿܢ ܠܹܗ: 11 ܘܝܼܫܘܿܥ ܗ̇ܘ ܕܦܵܝܸܫ ܩܸܪܝܵܐ ܝܘܼܣܛܘܿܣ: ܐܲܢܹܐ ܕܝܼܢܵܐ ܡ̣ܢ ܓܙܘܼܪܬܵܐ. ܐܲܢܹܐ ܒܢܲܦ̮ܫܵܝ ܦܵܠܵܚܹ̈ܐ ܝܢܵܐ ܥܲܡܝܼ ܒܡܲܠܟܘܼܬܹܗ ܕܐܲܠܵܗܵܐ: ܘܐܲܢܹܐ ܗ݇ܘܹܠܘܿܢ ܐܸܠܝܼ ܝܵܗ݇ܒܲܠܬܵܐ ܕܠܸܒܵܐ. 12 ܒܝܼܵܗ݇ܒ݂ܵܐ ܝܠܹܐ ܫܠܵܡܵܐ ܐܸܠܵܘܟ݂ܘܿܢ ܐܲܦܵܦܪܵܐ: ܗ̇ܘ ܕܝܼܠܹܐ ܡܸܢܵܘܟ݂ܘܿܢ: ܪܹܓܵܐ ܕܡܫܝܼܚܵܐ: ܟܲܕ ܒܟܠ ܙܲܒ݂ܢܵܐ ܒܹܐܟ݂ܵܠܵܐ ܝܠܹܐ ܓ̰ܵܦܵܐ ܡܒܵܕܵܠܵܘܟ݂ܘܿܢ ܒܨܠܘܿܬܵܐ: ܕܟܵܠܝܼܬܘܿܢ ܟܵܡܝܼ̈ܠܹܐ ܘܬܲܡܵܡ ܒܟܠܹܗ ܪܸܙܵܝܹܐ ܕܐܲܠܵܗܵܐ. 13 ܣܵܒܵܒ ܒܸܣܗܵܕܵܐ ܝܘܸܢ ܒܵܗ݇ܣܹܗ: ܕܪܵܒܵܐ ܩܲܝܪܲܬ ܐܝܼܬ ܠܹܗ ܥܲܠܵܘܟ݂ܘܿܢ ܘܥܲܠ ܕܐܵܢܝܼ ܕܝܼܢܵܐ ܓܵܘ ܠܵܕܝܼܩܝܼܵܐ: ܘܕܓܵܘ ܐܝܼܪܵܦܘܿܠܝܼܣ. 14 ܒܝܼܵܗ݇ܒ݂ܵܐ ܝܠܹܐ ܫܠܵܡܵܐ ܐܸܠܵܘܟ݂ܘܿܢ ܠܘܼܩܵܐ: ܗܲܟܝܼܡ ܡܘܼܚܸܒܵܐ: ܘܕܹܐܡܵܐ. 15 ܗܲܒ݇ܠܘܿܢ ܫܠܵܡܵܐ ܠܐܵܚܘܿܢܘܵܬܹ̈ܐ ܕܝܼܢܵܐ ܓܵܘ ܠܵܕܝܼܩܝܼܵܐ: ܘܠܢܘܼܡܦܹܐ: ܘܠܥܸܕܬܵܐ ܕܓܵܘ ܒܲܝܬܹܗ. 16 ܘܐܝܼܡܲܢ ܕܦܵܝܫܵܐ ܩܪܝܼܬܵܐ ܐܵܗܵܐ ܐܸܓܲܪܬܵܐ ܠܟܸܣܠܵܘܟ݂ܘܿܢ: ܥܒ݂ܘܿܕܘܿܢ ܕܐܘܼܦ ܓܵܘ ܥܹܕܬܵܐ ܕܠܵܕܝܼܩܵܝܹ̈ܐ ܦܵܝܫܵܐ ܩܪܝܼܬܵܐ: ܘܗ̇ܝ ܕܡ̣ܢ ܠܵܕܝܼܩܝܼܵܐ ܩܪܹܡܘܿܢ ܠܵܗ̇ ܐܲܚܬܘܿܢ. 17 ܘܐܡܘܿܪܘܿܢ ܠܐܲܪܟܝܼܦܘܿܣ: ܗ݇ܘܝܼ ܗܸܫܝܵܪ ܒܚܸܠܡܲܬ: ܗ̇ܝ ܕܩܘܼܒܸܠܘܼܟ݂ ܒܡܵܪܲܢ: ܕܗܵܘܸܬ ܬܲܡܘܼܡܘܼܗ̇.

18 ܐܵܗܵܐ ܫܠܵܡܵܐ ܒܐܝܼܕܵܐ ܕܝܼܝܼ ܦܵܘܠܘܿܣ. ܗܵܘܝܼܬܘܿܢ ܒܸܕܟ݂ܵܪܵܐ ܠܝܼܣܘܼܪ̈ܝܼ. ܫܵܦܵܩܲܬ ܥܲܡܵܘܟ݂ܘܿܢ: ܐܵܡܹܝܢ.