ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܦܘܠܘܣ ܫܠܝܚܐ ܕܠܘܬ ܦܝܠܝܦܣܝ̈ܐ

ܩܦܠܐܘܢ: ܐ

1 ܦܵܘܠܘܿܣ ܘܛܝܼܡܵܬܹܐܘܿܣ: ܪܹ̈ܓܵܘܵܬܹܐ ܕܝܼܫܘܿܥ ܡܫܝܼܚܵܐ: ܠܟܠܵܣ ܩܲܕܝܼܫܹ̈ܐ ܕܒܝܼܫܘܿܥ ܡܫܝܼܚܵܐ ܕܝܼܢܵܐ ܓܵܘ ܦܝܼܠܝܼܦܘܿܣ: ܥܲܡ ܐܲܦܸܣܩܘܿܦܹ̈ܐ ܘܫܵܡܵܫܗܹܐ: 2 ܫܵܦܵܩܲܬ ܥܲܡܵܘܟ݂ܘܿܢ ܘܫܠܵܡܵܐ ܡ̣ܢ ܐܲܠܵܗܵܐ ܒܵܒܲܢ: ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ.

ܫܵܟܘܿܪܹܐ ܝܘܸܢ ܠܐܲܠܵܗܝܼ ܥܲܠ ܟܠܹܗ ܕܟ݂ܵܪܵܘܟ݂ܘܿܢ: 4 ܕܵܝܸܡ ܒܟܠܵܝ ܦܲܪ̈ܦܲܠܝܵܬܝܼ ܡܒܵܕܵܠ ܕܟܠܵܘܟ݂ܘܿܢ: ܘܟܲܕ ܒܸܚܕܵܝܵܐ ܦܲܪܦܘܼܠܹܐ ܝܘܸܢ: 5 ܣܵܒܵܒ ܕܫܵܪܝܼܟܘܼܬܵܘܟ݂ܘܿܢ ܕܒܹܐܘܵܢܓܵܠܝܼܘܿܢ: ܡ̣ܢ ܝܘܿܡܵܐ ܩܵܕ݇ܡܵܝܵܐ ܘܗܲܠ ܐܵܕܝܼܵܐ. 6 ܣܵܒܵܒ ܚܵܬܸܪܓ̰ܲܡܥ ܝܼܘܸܢ ܗܲܪ ܒܐܵܗܵܐ: ܕܗ̇ܘ ܕܫܘܼܪܹܠܹܐ ܒܝܼܵܘܟ݂ܘܿܢ ܦܘܼܠܚܵܢܵܐ ܛܵܒ݂ܵܐ: ܗ̇ܘ ܒܸܬ ܬܲܡܸܡ ܠܹܗ ܗܲܠ ܝܘܿܡܹܗ ܕܝܼܫܘܿܥ ܡܫܝܼܚܵܐ: 7 ܕܐܵܟ݂ܝܼ ܕܝܼܠܵܐ ܗܲܩ ܐܸܠܝܼ ܠܸܚܫܵܒ݂ܵܐ ܒܵܗ݇ܣ ܟܠܵܘܟ݂ܘܿܢ: ܣܵܒܵܒ ܒܠܸܒܝܼ ܡܘܼܬܒ݂ܹܐ ܝܬܘܿܢ: ܣܵܒܵܒ ܒܝܼܣܘܼܪ̈ܝܼ ܘܒܝܵܗ݇ܒܲܠܬܵܐ ܕܓ̰ܘܼܘܵܒ ܘܡܲܩܘܵܝܬܵܐ ܕܐܹܘܵܢܓܵܠܝܼܘܿܢ: ܫܵܪ̈ܝܼܟܹܐ ܝܬܘܿܢ ܥܲܡܝܼ ܟܠܵܘܟ݂ܘܿܢ ܒܫܵܦܵܩܲܬ. 8 ܣܵܒܵܒ ܣܵܗܕܝܼ ܝܠܹܗ ܐܲܠܵܗܵܐ: ܕܐܵܟ݂ܝܼ ܪܵܒܵܐ ܡܲܚܘܼܒܹܐ ܝܘܸܢ ܠܟܠܵܘܟ݂ܘܿܢ ܒܪ̈ܲܚܡܹܐ ܕܝܼܫܘܿܥ ܡܫܝܼܚܵܐ. 9 ܘܐܵܗܵܐ ܨܵܠܘܿܝܹܐ ܝܘܸܢ: ܕܡܸܕܪܹܐ ܙܵܝܸܕ ܙܵܘܕܵܐ ܘܙܵܘܕܵܐ ܚܘܼܒܵܘܟ݂ܘܿܢ ܒܝܕܹܥܬܵܐ ܘܒܟܠ ܦܲܪܡܵܝܬܵܐ: 10 ܕܗܵܘܝܼܬܘܿܢ ܒܸܦܪܵܫܵܐ ܠܡܸܢܕܝܵܢܹ̈ܐ ܕܦܪܝܼܫܹܐ ܝܢܵܐ: ܘܗܵܘܝܼܬܘܿܢ ܕܸܟ݂ܝܹ̈ܐ ܕܠܵܐ ܬܲܪܩܲܠܬܵܐ ܒܝܘܿܡܹܗ ܕܡܫܝܼܚܵܐ: 11 ܘܡܸܠܝܹ̈ܐ ܛܥܘܼܢܝܵܬܹ̈ܐ ܕܙܲܕܝܼܩܘܼܬܵܐ ܕܒܝܼܫܘܿܥ ܡܫܝܼܚܵܐ: ܠܚܸܩܪܵܐ ܘܠܐܝܼܩܵܪܵܐ ܕܐܲܠܵܗܵܐ.

12 ܐܝܼܢܵܐ ܒܸܒܲܥܝܵܐ ܝܘܸܢ ܕܝܲܕܥܝܼܬܘܿܢ: ܐܵܚܘܿܢܘܵܬܝܼ̈: ܕܫܘܼܠܹ̈ܐ ܕܠܟܸܣܠܝܼ ܒܘܼܫ ܙܵܘܕܵܐ ܦܠܝܼܛܹܐ ܝܢܵܐ ܠܓܲܪܘܲܣܬܵܐ ܕܐܹܘܵܢܓܵܠܝܼܘܿܢ. 13 ܕܐܵܟ݂ܝܼ ܕܐܘܼܦ ܝܸܣܘܼܪ̈ܝܼ ܗ݇ܘܹܠܘܿܢ ܐܲܫܟܵܪܵܐ ܒܡܫܝܼܚܵܐ ܓܵܘ ܟܠܵܗ̇ ܦܵܪܛܘܿܪܝܼܢ: ܘܠܟܠܵܣ ܐܚܹܪ݇ܢܹܐ: 14 ܘܪܵܒܵܐ ܡ̣ܢ ܐܵܚܘܙܿܢܘܵܬܹ̈ܐ ܕܒܡܵܪܲܢ: ܟܲܕ ܕܒܸܩܠܘܿܢ ܗܹܒ݂ܝܼ ܒܝܼܸܕ ܝܼܣܘܼܪ̈ܝܼ: ܩܘܼܫܕܸܪܘܿܢ ܒܘܼܫ ܙܵܘܕܵܐ ܒܠܵܐ ܙܕܘܼܥܬܵܐ ܠܗܲܡܙܘܼܡܹܐ ܗܹܡܸܙܡܵܢ ܕܐܲܠܵܗܵܐ. 15 ܐ݇ܢܵܫܵܐ ܐ݇ܢܵܫܵܐ ܡ̣ܢ ܒܲܚܸܠܵܢܘܼܬܵܐ ܘܡܲܨܲܪܵܨܘܼܬܵܐ: ܘܐ݇ܢܵܫܵܐ ܐ݇ܢܵܫܵܐ ܒܪܸܙܵܝܵܐ ܛܵܒ݂ܵܐ: ܠܡܫܝܼܚܵܐ ܡܲܟܪܘܼܙܹܐ ܝܢܵܐ: 16 ܐܲܢܹܐ ܡ̣ܢ ܚܘܼܒܵܐ: ܟܕ ܒܝܼܪܸܥܝܵܐ ܕܠܝܵܗ݇ܒܲܠܬܵܐ ܕܓ̰ܘܼܘܵܒ ܕܐܹܘܵܢܓܵܠܝܼܘܿܢ ܡܘܼܬܒ݂ܵܐ ܝܘܸܢ: 17 ܐܝܼܢܵܐ ܐܵܢܝܼ ܒܡܲܩܲܪܵܨܘܼܬܵܐ ܡܲܟܪܘܼܙܹܐ ܝܢܵܐ ܠܡܫܝܼܚܵܐ: ܠܵܐ ܒܬܪܘܼܨܘܼܬܵܐ: ܟܲܕ ܒܸܚܫܵܒ݂ܵܐ ܝܢܵܐ ܕܡܲܙܝܸܕܝܼ ܐܘܼܠܨܵܢܵܐ ܠܝܸܣܘܼܪ̈ܝܼ. 18 ܒܲܣ ܡܘܼܕܝܼ: ܒܐܵܗܵܐ ܒܸܚܕܵܝܵܐ ܝܘܸܢ ܘܒܸܬ ܚܵܕܸܢ: ܕܒܟܠ ܬܵܗܵܪ: ܐܸܢ ܒܡܵܗܵܢܵܐ ܡܐܸܢ ܒܬܪܘܼܨܘܼܬܵܐ: ܡܫܝܼܚܵܐ ܦܝܵܫܵܐ ܝܠܹܐ ܡܘܼܟܪܸܙܵܐ. 19 ܣܵܒܵܒ ܒܝܼܕܲܥܝܵܐ ܝܘܸܢ ܕܐܲܢܹܐ ܠܚܲܝܹ̈ܐ ܦܝܵܫܵܐ ܝܢܵܐ ܡܘܼܫ̄ܟ̰ܚܹܐ ܐܸܠܝܼ ܒܦܲܪܦܲܠܬܵܘܟ݂ܘܿܢ: ܘܒܗܲܝܲܪܬܵܐ ܕܪܘܼܚܵܐ ܕܝܼܫܘܿܥ ܡܫܝܼܚܵܐ: 20 ܕܐܵܟ݂ܝܼ ܕܒܗܹܒ݂ܝܼ ܝܘܸܢ ܘܩܘܼܝܵܐ ܒܸܣܦܵܪܵܐ ܝܘܸܢ: ܕܒܡܸܢܕܝܼ ܠܵܐ ܢܵܚܦܸܢ: ܐܸܠܵܐ ܒܟܠܵܗ̇ ܚܘܵܪܦܵܬܘܼܬܵܐ ܐܲܝܟ݂ ܕܒܟܠ ܙܲܒ݂ܢܵܐ ܐܘܼܦ ܐܵܕܝܼܵܐ ܦܵܝܸܫ ܓܘܼܪܘܸܣܵܐ ܡܫܝܼܚܵܐ ܒܦܲܓ݂ܪܝܼ: ܐܸܢ ܒܚܲܝܹ̈ܐ: ܘܐܸܢ ܒܡܵܘܬܵܐ. 21 ܣܵܒܵܒ ܕܐܸܠܝܼ ܠܸܚܵܝܵܐ ܡܫܝܼܚܵܐ ܝܠܹܐ: ܘܠܸܡܝܵܬܵܐ ܦܲܝܕܵܐ ܝܠܵܐ. 22 ܐܝܼܢܵܐ ܐܢ ܠܸܚܵܝܵܐ ܒܒܸܣܪܵܐ: ܐܵܗܵܐ ܝܠܵܐ ܐܸܠܝܼ ܛܥܘܼܢܬܵܐ ܕܦܘܼܠܚܵܢܵܐ: ܒܲܣ ܠܹܐ ܝܘܸܢ ܒܝܼܕܲܥܝܵܐ ܡܘܼܕܝܼ ܓܵܒܸ݁ܢ ܠܓܵܢܝܼ. 23 ܣܵܒܵܒ ܡܘܼܠܝܼܨܵܐ ܝܘܸܢ ܒܐܲܢܹܐ ܬܲܪ̈ܬܹܝ: ܫܲܗ݇ܘܘܼܬܹܐ ܝܘܸܢ ܠܫܵܢܘܿܝܹܐ ܘܠܸܗܘܵܝܵܐ ܥܲܡ ܡܫܝܼܚܵܐ: ܘܐܵܗܵܐ ܒܘܼܫ ܨܦܵܝܝܼ ܗ݇ܘܵܐ. 24 ܐܸܠܵܐ ܕܦܵܝܫܸܢ ܒܦܲܓ݂ܪܝܼ ܒܘܼܫ ܠܵܙܸܡ ܝܼܠܵܐ ܒܚܵܬܸܪܵܘܟ݂ܘܿܢ. 25 ܘܟܲܕ ܕܒ݂ܝܼܩܵܐ ܐܵܗܵܐ ܒܗܹܒ݂ܝܼ: ܒܝܼܕܸܥܝܵܐ ܝܘܸܢ ܕܒܸܬ ܦܵܝܫܸܢ: ܘܥܲܪܩܸܠܸܢ ܥܲܡ ܟܠܵܘܟ݂ܘܿܢ ܠܓܲܪܘܲܣܬܵܘܟ݂ܘܿܢ ܘܚܲܕܘܼܬܵܐ ܕܗܲܝܡܵܢܘܼܬܵܘܟ݂ܘܿܢ: 26 ܕܟܲܕ ܐܵܬܸܢ ܡܸܕܪܹܐ ܠܟܸܣܠܵܘܟ݂ܘܿܢ: ܙܵܝܸܕ ܒܝܼ ܫܘܼܒ݂ܗܵܪܘܟ݂ܘܿܢ ܕܒܝܼܫܘܿܥ ܡܫܝܼܚܵܐ. 27 ܐܲܚܟ̰ܝܼ ܕܐܵܟ݂ܝܼ ܕܚܵܫܚܵܐ ܠܐܹܘܵܢܓܵܠܝܼܘܿܢ ܕܡܫܝܼܚܵܐ ܗܵܘܝܼܬܘܿܢ ܬܲܓܒܘܼܪܹܐ ܓܵܢܵܘܟ݂ܘܿܢ: ܕܐܸܢ ܐܵܬܸܢ ܚܵܙܸܢܵܘܟ݂ܘܿܢ: ܘܐܸܢ ܪܸܚܩܵܐ ܗܵܘܸܢ: ܫܲܡܥܸܢ ܒܵܗ݇ܣܵܙܟ݂ܘܿܢ ܕܟܵܠܝܼܬܘܿܢ ܒܚܕܵܐ ܪܘܼܚܵܐ: ܘܒܚܕܵܐ ܓܵܢܵܐ ܚܵܠܨܝܼܬܘܿܢ ܡܸܚܕܵܪܹ̈ܐ ܒܗܲܝܡܵܢܘܼܬܵܐ ܕܐܹܘܵܢܓܵܠܝܼܘܿܢ: 28 ܘܕܒܡܸܢܕܝܼ ܠܹܐ ܝܬܘܿܢ ܫܥܝܼܫܹܐ ܡ̣ܢ ܕܲܪ̈ܩܘܼܒ݂ܠܵܝܹܐ: ܕܝܼܠܵܐ ܐܸܠܵܝ ܡܲܕܵܥܝܬܵܐ ܕܬܠܵܩܵܐ: ܐܝܼܢܵܐ ܕܚܲܝܹ̈ܐ ܐܸܠܵܘܟ݂ܘܿܢ: ܘܐܵܗܵܐ ܐܲܠܵܗܵܐ ܝܠܵܐ. 29 ܣܵܒܵܒ ܦܸܫܠܵܐ ܝܸܗ݇ܒܸܠܬܵܐ ܐܸܠܵܘܟ݂ܘܿܢ ܒܚܵܬܸܪ ܕܡܫܝܼܚܵܐ: ܠܵܐ ܕܗܲܡܙܘܼܢܹܐ ܗܲܡܸܢܝܼܬܘܿܢ ܒܝܼܹܗ ܗܲܪ: ܐܸܠܵܐ ܐܘܼܦ ܕܒܚܵܬܸܪܹܗ ܩܵܒ݁ܠܝܼܬܘܿܢ ܚܲܫܵܐ: 30 ܟܲܕ ܐܝܼܬ ܠܵܘܟ݂ܘܿܢ ܗ̇ܘ ܐܵܓ݂ܘܿܢܵܐ ܐܲܝܟ݂ ܕܚܙܹܠܵܘܟ݂ܘܿܢ ܒܝܼܝ: ܘܐܵܕܝܼܵܐ ܒܸܫܡܲܥܝܵܐ ܝܬܘܿܢ ܕܐܝܼܬ ܒܝܼܝܼ.

ܩܦܠܐܘܢ: ܒ

1 ܒܲܣ ܐܸܢ ܐܝܼܬ ܝܵܗ݇ܒܲܠܬܵܐ ܕܠܸܒܵܐ ܒܡܫܝܼܚܵܐ: ܘܐܸܢ ܡܠܵܝܬܵܐ ܕܠܸܒܵܐ ܒܚܘܼܒܵܐ: ܘܐܸܢ ܫܵܪܝܘܼܬܵܐ ܕܪܘܼܚܵܐ: ܘܐܸܢ ܪ̈ܲܦܪܲܦܬܵܐ ܘܪ̈ܲܚܡܹܐ: 2 ܬܲܡܡܸܡܘܿܢ ܚܲܕܘܼܬܝܼ: ܕܚܵܕ݇ ܚܝܼܵܠ ܗܵܘܹܐ ܠܵܘܟ݂ܘܿܢ: ܘܚܵܕ݇ ܚܘܼܒܵܐ: ܘܚܕܵܐ ܓܵܢܵܐ: ܘܚܵܕ݇ ܚܘܼܫܵܒ݂. 3 ܘܡܸܢܕܝܼ ܒܡܲܩܲܪܵܨܘܼܬܵܐ ܝܼܢ ܒܚܸܩܪܵܐ ܒܵܛܝܼܠܵܐ ܠܵܐ ܥܵܒ݂ܕܝܼܬܘܿܢ: ܐܸܠܵܐ ܒܡܵܟܝܼܟ݂ܘܼܬܵܐ ܕܚܝܼܵܠ ܚܵܫܒ݂ܝܼܬܘܿܢ ܚܵܕ݇ ܠܗ̇ܘ ܐܚܹܪ݇ܢܵܐ ܙܵܘܕܵܐ ܡ̣ܢ ܓܵܢܵܘܟ݂ܘܿܢ. 4 ܘܠܵܐ ܐܵܟ݂ܠܝܼܬܘܿܢ ܐ݇ܢܵܫܵܐ ܚܲܡ ܕܓܵܢܹܗ: ܐܸܠܵܐ ܟܠ ܐ݇ܢܵܫܵܐ ܐܘܼܦ ܕܚܲܒ݂ܪܹܗ. 5 ܘܐܵܗܵܐ ܚܫܘܿܒ݂ܘܿܢ ܒܓܵܢܵܘܟ݂ܘܿܢ: ܗ̇ܝ ܕܝܼܗ݇ܘܵܐ ܐܘܼܦ ܒܝܼܫܘܿܥ ܡܫܝܼܚܵܐ: 6 ܗ̇ܘ ܕܟܲܕ ܒܕܡܘܼܬܵܐ ܕܐܲܠܵܗܵܐ ܗ݇ܘܵܐ: ܠܵܐ ܟ̰ܠܵܓ̰ܵܐ ܚܫܝܼܒ݂ܵܠܹܐ ܠܐܵܗܵܐ: ܕܗܵܘܹܐ ܒܵܪܒܵܪ ܥܲܡ ܐܲܠܵܗܵܐ: 7 ܐܸܠܵܐ ܓܵܢܹܗ ܣܘܼܦܩܵܠܹܐ: ܘܬܵܗܵܪ ܕܪܸܓܵܐ ܫܩܸܠܹܐ: ܘܗ݇ܘܹܠܹܐ ܒܨܘܼܪܬܵܐ ܕܒܢܲܝ̈ܢܵܫܵܐ: 8 ܘܒܸܐܣܟܹܝܡܵܐ ܦܸܫܠܹܐ ܡܫ̄ܟ̰ܝܼܚܵܐ ܐܲܝܟ݂ ܒܲܪܢܵܫܵܐ: ܘܡܘܼܡܟܸܟ݂ܵܠܹܐ ܓܵܢܹܗ: ܘܡܘܼܨܝܸܬܠܹܐ ܗܲܠ ܡܵܘܬܵܐ: ܘܡܵܘܬܵܐ ܕܙܩܝܼܦܵܐ. 9 ܣܵܒܵܒ ܕܐܵܗܵܐ ܐܘܼܦ ܐܲܠܵܗܵܐ ܙܵܘܕܵܐ ܡܘܼܪܸܡܠܹܗ: ܘܝܸܗܒܸܠܹܐ ܐܸܠܹܗ ܫܸܡܵܐ ܕܒܘܼܫ ܙܵܘܕܵܐ ܡ̣ܢ ܟܠܵܝ ܫܸܡܵܢܹ̈ܐ: 10 ܕܒܫܸܡܹܗ ܕܝܼܫܘܿܥ ܟܠ ܒܘܼܪܟܵܐ ܟܵܝܦܵܐ ܕܒܫܡܲܝܵܐ ܘܒܲܐܪܥܵܐ: ܘܕܠܸܐܠܬܸܚ ܡ̣ܢ ܐܲܪܥܵܐ: 11 ܘܟܠ ܠܸܫܵܢܵܐ ܡܵܘܕܹܐ ܕܡܵܪܝܵܐ ܝܠܹܐ ܝܼܫܘܿܥ ܡܫܝܼܚܵܐ: ܠܚܸܩܪܵܐ ܕܐܲܠܵܗܵܐ ܒܵܒܵܐ.

12 ܒܲܣ ܡܘܼܚܸܒܝܼ̈: ܕܐܵܟ݂ܝܼ ܕܒܟܠ ܙܲܒ݂ܢܵܐ ܡܘܼܨܝܸܬܠܵܘܟ݂ܘܿܢ: ܠܵܐ ܟܲܕ ܩܘܼܪܒܵܐ ܝܘܸܢ ܗ݇ܘܵܐ ܠܟܸܣܠܵܘܟ݂ܘܿܢ ܗܲܪ: ܐܸܠܵܐ ܐܵܕܝܼܵܐ ܒܘܼܫ ܙܵܘܕܵܐ ܕܪܸܚܩܵܐ ܝܘܸܢ ܡܸܢܵܘܟ݂ܘܿܢ: ܒܙܕܘܼܥܬܵܐ ܘܒܪ̈ܲܬܪܲܬܬܵܐ ܦܠܘܿܚܘܿܢ ܦܘܼܠܚܵܢܵܐ ܕܦܘܼܪܩܵܢܵܘܟ݂ܘܿܢ: 13 ܣܵܒܵܒ ܐܲܠܵܗܵܐ ܝܠܹܐ ܕܦܵܠܸܚ ܒܝܼܵܘܟ݂ܘܿܢ ܐܘܼܦ ܠܸܒܲܥܝܵܐ ܐܘܼܦ ܠܸܦܠܵܚܵܐ ܒܪܸܙܵܝܹܗ ܛܵܒ݂ܵܐ. 14 ܟܠ ܡܸܢܕܝܼ ܗܵܘܝܼܬܘܿܢ ܒܸܥܒ݂ܵܕܵܐ ܕܠܵܐ ܛܲܪܛܲܡܬܵܐ ܘܕܠܵܐ ܕܘܼܒܵܪܘܼܬܵܐ: 15 ܘܗܵܘܝܼܬܘܿܢ ܬܲܡܝܼܡܹ̈ܐ ܘܕܠܵܐ ܡܘܼܡܵܐ: ܒܢܘܼܢܹ̈ܐ ܕܐܲܠܵܗܵܐ ܕܠܵܐ ܠܵܘܡܵܐ ܓܵܘܵܐ ܕܕܵܘܪܵܐ ܥܲܣܩܵܐ ܘܦܟ̰ܝܼܠܵܐ: ܕܦܝܵܫܵܐ ܝܬܘܢ ܚܸܙܝܹܐ ܓܵܘܵܝ ܐܲܝܟ݂ ܒܲܗܪܵܐ ܒܥܵܠܡܵܐ: 16 ܟܲܕ ܕܵܒ݂ܩܝܼܬܘܿܢ ܗܹܡܸܙܡܵܢ ܕܚܲܝܹ̈ܐ: ܠܫܘܼܒ݂ܗܵܪܵܐ ܕܝܼܝܼ ܒܝܘܿܡܹܗ ܕܡܫܝܼܚܵܐ: ܕܠܵܐ ܚܘܼܪܵܝܝܼ ܪܓܸܛܠܝܼ: ܘܠܵܐ ܕܚܘܼܪܵܝܝܼ ܐܟܸܠܝܼ ܓ̰ܵܦܵܐ. 17 ܐܸܠܵܐ ܐܘܼܦ ܐܸܢ ܦܵܝܫܸܢ ܨܘܼܢܸܨܠܵܐ ܥܲܠ ܕܸܒ̣ܚܬܵܐ ܘܚܸܠܡܲܬ ܕܗܲܝܡܵܢܘܼܬܵ. ܟ݂ܘܿܢ: ܒܸܚܕܵܝܵܐ ܝܘܸܢ ܘܒܸܦܨܵܚܵܐ ܝܘܸܢ ܥܲܡ ܟܠܵܘܟ݂ܘܿܢ. 18 ܘܗܲܪ ܗܲܕܟ݂ܵܐ ܐܘܼܦ ܐܚܬܘܿܢ ܚܕܹܡܘܿܢ ܘܦܨܘܿܚܘܿܢ ܥܲܡܝܼ.

19 ܐܝܼܢܵܐ ܒܗܹܒ݂ܝܼ ܝܘܸܢ ܒܡܵܪܲܢ ܝܼܫܘܿܥ ܕܒܸܬ ܫܵܕܪܸܢ ܠܟܸܣܠܵܘܟ݂ܘܿܢ ܠܛܝܼܡܵܬܹܐܘܿܣ ܓ̰ܲܠܕܹܐ: ܕܐܘܼܦ ܐܸܠܝܼ ܗܵܘܹܐ ܢܝܵܚܵܐ ܟܲܕ ܝܲܕܥܸܢ ܒܵܗ݇ܣܵܘܟ݂ܘܿܢ. 20 ܣܵܒܵܒ ܠܲܝܬ ܠܝܼ ܐܚܹܪ݇ܢܵܐ ܕܝܼܠܹܐ ܐܲܝܟ݂ ܓܵܢܝܼ: ܕܫܲܪܝܼܪܵܐܝܼܬ݂ ܐܵܟܸܠ ܚܲܡ ܕܝܼܵܘܟ݂ܘܿܢ. 21 ܣܵܒܵܒ ܟܠܵܝ ܡܸܢܕܝܼ ܕܓܵܢܵܝ ܒܸܒ݂ܥܝܵܐ ܝܢܵܐ: ܘܠܵܐ ܕܝܼܫܘܿܥ ܡܫܝܼܚܵܐ. 22 ܐܝܼܢܵܐ ܨܵܒܸܬܘܼܬܵܐ ܕܗ̇ܘ ܒܝܼܕܲܥܝܵܐ ܝܬܘܿܢ: ܐܲܝܟ݂ ܒܪܘܼܢܵܐ ܥܲܡ ܒܵܒܹܗ: ܗܲܕܟ݂ܵܐ ܦܠܝܼܚܵܐ ܝܠܹܐ ܥܲܡܝܼ ܒܡܲܫܚܲܕܬܵܐ. 23 ܠܐܵܗܵܐ ܒܗܹܒ݂ܝܼ ܝܘܸܢ ܕܫܵܕܪܸܢ ܠܟܸܣܠܵܘܟ݂ܘܿܢ ܓ̰ܲܠܕܹܐ: ܐܝܼܡܲܢ ܕܚܵܙܸܢ ܫܘܼܠܹ̈ܐ ܕܠܟܸܣܠܝܼ. 24 ܘܒܗܹܒ݂ܝܼ ܝܘܸܢ ܥܲܠ ܡܵܪܝ: ܕܐܘܼܦ ܐܵܢܵܐ ܓ̰ܲܠܕܹܐ ܒܸܬ ܐܵܬܹܢ. 25 ܐܝܼܢܵܐ ܚܫܸܒ݂ܠܝܼ ܕܘܵܓ̰ܸܒ ܝܼܗ݇ܘܵܐ ܕܫܵܕܪܸܢ ܠܟܸܣܠܵܘܟ݂ܘܿܢ ܠܐܵܦܵܦܪܘܿܕܝܼܛܘܿܣ ܐܵܚܘܿܢܵܐ: ܕܝܼܠܹܐ ܗܲܝܸܪܵܢܵܐ ܘܣܲܪܒܵܙ ܥܲܡܝܼ: ܐܝܼܢܵܐ ܫܠܝܼܚܵܐ ܕܝܼܵܘܟ݂ܘܿܢ ܘܚܸܠܡܲܬܟܵܪ ܕܣܢܝܼܩܘܼܬܝܼ. 26 ܣܵܒܵܒ ܫܲܗ݇ܘܘܼܬܹܐ ܗ݇ܘܵܐ ܠܸܚܙܵܝܵܐ ܠܟܠܵܘܟ݂ܘܿܢ: ܘܡܘܼܥܝܸܩܵܐ ܗ݇ܘܵܐ ܕܐܲܚܬܘܿܢ ܫܡܸܥܠܵܘܟ݂ܘܿܢ ܕܡܸܪܥܝܵܐ ܗ݇ܘܵܐ. 27 ܣܵܒܵܒ ܐܘܼܦ ܡܪܸܥܠܹܐ ܗܲܠ ܡܵܘܬܵܐ: ܐܸܠܵܐ ܐܲܠܵܗܵܐ ܪܘܼܚܸܡܠܹܐ ܥܲܠܘܼܗܝ: ܐܝܼܢܵܐ ܠܵܐ ܥܲܠܘܼܗܝ ܗܲܪ: ܐܸܠܵܐ ܐܘܼܦ ܥܠܝܼ: ܕܠܵܐ ܗܵܘܹܐ ܗ݇ܘܵܐ ܠܝܼ ܚܲܫܵܐ ܥܲܠ ܚܲܫܵܐ. 28 ܒܚܵܒܵܛܘܼܬܵܐ ܗܲܕܟ݂ܵܐ ܫܘܼܕܪܘܼܗܝ ܝܘܸܢ ܠܟܸܣܠܵܘܟ݂ܘܿܢ: ܕܟܲܕ ܚܵܙܝܼܬܘܿܢ ܠܹܗ ܡܸܕܪܹܐ ܚܵܕܝܼܬܘܿܢ: ܘܕܚܲܫܵܐ ܕܝܼܝܼ ܗܵܘܹܐ ܡܘܼܒܨܸܪܵܐ. 29 ܒܲܣ ܩܵܒ݁ܠܘܿܢ ܠܹܐ ܒܡܵܪܝܵܐ ܒܟܠ ܚܲܕܘܼܬܵܐ: ܘܠܵܐܢܝܼ ܕܝܼܢܵܐ ܗܲܕܟ݂ܵܐ: ܒܐܝܼܩܵܪܵܐ ܕܒܘܿܩܘܿܢ ܠܗ݇ܘܿܢ. 30 ܣܵܒܵܒ ܒܚܵܬܸܪ ܕܦܘܼܠܚܵܢܵܐ ܕܡܫܝܼܚܵܐ ܗܲܠ ܡܵܘܬܵܐ ܡܛܹܠܹܐ: ܘܡܘܼܣܠܹܠܹܐ ܠܓܵܢܹܗ ܕܬܲܡܸܡ ܗ݇ܘܵܐ ܡܸܢܕܝܼ ܕܗ݇ܘܹܠܵܘܟ݂ܘܿܢ ܒܵܨܘܿܪܹ̈ܐ ܒܚܸܠܡܲܬ ܕܠܟܸܣܠܝܼ.

ܩܦܠܐܘܢ: ܓ

1 ܡܐܵܕܝܼܵܐ: ܐܵܚܘܿܢܘܵܬܝܼ̈: ܚܕܹܡܘܿܢ ܒܡܵܪܲܢ. ܕܟܵܬܒܸܢ ܗܲܪ ܐܲܢܹܐ ܐܸܠܵܘܟ݂ܘܿܢ: ܠܹܐ ܣܵܩܕܵܐ ܠܝܼ: ܐܝܼܢܵܐ ܐܸܠܵܘܟ݂ܘܿܢ ܐܲܡܝܼܢܵܝܼ ܝܢܵܐ. 2 ܗ݇ܘܹܡܘܿܢ ܗܸܫܝܵܪ ܡ̣ܢ ܟܲܠܒܹ̈ܐ: ܗ݇ܘܹܡܘܿܢ ܗܸܫܵܪ ܡ̣ܢ ܦܵܥ̈ܠܹܐ ܒܝܼܫܹ̈ܐ: ܗ݇ܘܹܡܘܿܢ ܗܸܫܝܵܪ ܡ̣ܢ ܩܛܵܥܬܵܐ ܕܒܸܣܪܵܐ. 3 ܣܵܒܵܐ ܕܐܲܚܢܲܢ ܝܼܘܵܚ ܓܙܘܼܪܬܵܐ: ܐܵܢܝܼ ܕܒܸܦܠܵܚܵܐ ܝܘܵܚ ܒܪܘܼܚܵܐ ܠܐܲܠܵܗܵܐ: ܘܒܸܥܒ݂ܵܕܵܐ ܝܘܵܚ ܫܘܼܒ݂ܗܵܪܵܐ ܒܝܼܫܘܿܥ ܡܫܝܼܚܵܐ: ܘܠܹܐ ܝܘܵܚ ܒܗܹܒ݂ܝܼ ܥܲܠ ܒܸܣܪܵܐ: 4 ܐܵܦܸܢ ܐܵܢܵܐ ܐܝܼܬ ܗ݇ܘܵܐ ܠܝܼ ܗܹܒ݂ܝܼ ܐܘܼܦ ܥܲܠ ܒܸܣܪܵܐ. ܐܸܢ ܐ݇ܢܵܫܵܐ ܐܚܹܪ݇ܢܵܐ ܚܵܫܸܒ݂ ܕܗܹܒ݂ܝܼܹܗ ܒܒܸܣܪܵܐ ܝܠܵܐ: ܙܵܘܕܵܐ ܡܸܢܹܗ ܐܵܢܵܐ: 5 ܓܙܝܼܪܵܐ ܒܲܪ ܬܡܵܢܝܵܐ ܝܘܿܡܵܢܹ̈ܐ: ܡ̣ܢ ܐܘܼܓ̰ܵܓ݂ ܕܝܼܣܪܵܝܹܠ: ܡ̣ܢ ܫܲܒ݂ܛܵܐ ܕܒܸܢܝܵܡܹܝܢ: ܥܸܒ݂ܪܵܝܵܐ ܒܲܪ ܥܸܒ݂ܪ̈ܵܝܹܐ: ܒܢܵܡܘܿܣܵܐ ܦܪܝܼܫܵܝܵܐ: 6 ܒܩܲܝܪܲܬ ܛܵܪܕܵܢܵܐ: ܘܒܙܲܕܝܼܩܘܼܬܵܐ ܕܢܵܡܘܿܣܵܐ ܕܠܵܐ ܠܵܘܡܵܐ ܝܘܸܢ ܗ݇ܘܵܐ. 7 ܐܝܼܢܵܐ ܐܲܢܹܐ: ܕܙܵܘܕܘܿܢܝܘܼܬܵܐ ܗ݇ܘܵܘ ܐܸܠܝܼ: ܚܘܼܣܪܵܢܵܐ ܚܘܼܫܒܸܢܵܝܠܝܼ ܒܚܵܬܸܪ ܕܡܫܝܼܚܵܐ. 8 ܘܐܘܼܦ ܚܲܫܒܘܼܢܵܝ ܝܘܸܢ ܟܠܵܝ ܚܘܼܣܪܵܢܵܐ ܣܵܒܵܒ ܕܓܘܼܪܘܼܬܵܐ ܕܝܕܹܥܬܹܗ ܕܝܼܫܘܿܥ ܡܫܝܼܚܵܐ ܡܵܪܝ: ܗ̇ܘ ܕܒܚܵܬܸܪܹܗ ܒܟܠ ܡܸܢܕܝܼ ܩܘܼܒܸܠܝܼ ܚܘܼܣܪܵܢܵܐ: ܘܙܸܒܠܵܐ ܚܲܫܒܘܼܢܵܝ ܝܘܸܢ: ܕܠܡܫܝܼܚܵܐ ܩܵܢܸܢ: 9 ܘܦܵܝܫܸܢ ܡܫ̄ܟ̰ܝܼܚܵܐ ܒܝܼܹܗ: ܟܲܕ ܠܲܝܬ ܠܝܼ ܙܲܕܝܼܩܘܼܬܵܐ ܕܓܵܢܝܼ: ܗ̇ܝ ܕܡ̣ܢ ܢܵܡܘܿܣܵܐ: ܐܸܠܵܐ ܗ̇ܝ ܕܡ̣ܢ ܗܲܝܡܵܢܘܼܬܹܗ ܕܡܫܝܼܚܵܐ: ܕܝܼܠܵܐ ܙܲܕܝܼܩܘܼܬܵܐ ܘܕܡ̣ܢ ܐܲܠܵܗܵܐ ܒܗܲܝܡܵܢܘܼܬܵܐ: 10 ܕܝܲܕܥܸܢܹܗ: ܘܠܚܲܝܠܵܐ ܕܩܵܝܡܬܹܗ: ܘܠܫܵܪܝܼܟܘܼܬܵܐ ܕܚܲܫܘܼ̈ܗܝ: ܘܦܵܝܫܸܢ ܕܘܼܡܝܵܐ ܒܡܵܘܬܹܗ: 11 ܕܡܩܵܘܡܵܐ ܡܵܨܸܢ ܠܸܡܛܵܝܵܐ ܠܩܝܵܡܬܵܐ ܕܡ̣ܢ ܡܝܼܬܹ̈ܐ. 12 ܠܹܐ ܝܠܵܐ ܕܗܹܫ ܩܘܼܒܸܠܝܼ: ܝܲܢ ܗܹܫ ܗ݇ܘܹܠܝܼ ܟܵܡܝܼܠ: ܐܸܠܵܐ ܒܸܪܚܵܛܵܐ ܝܘܸܢ: ܕܡܩܵܘܡܵܐ ܡܵܛܸܢ ܠܡܸܢܕܝܼ ܕܒܘܼܬ ܕܝܼܹܗ ܡܸܛܝܼܢܹܐ ܝܼܫܘܿܥ ܡܫܝܼܚܵܐ. 13 ܐܵܚܘܿܢܘܵܬܝܼ̈: ܐܵܢܵܐ ܒܵܗ݇ܣ ܕܓܵܢܝܼ ܠܹܐ ܝܘܸܢ ܒܸܚܫܵܒ݂ܵܐ ܕܡܛܹܠܝܼ: ܐܝܼܢܵܐ ܚܵܕ݇ ܡܸܢܕܝܼ ܒܝܼܕܲܥܝܵܐ ܝܘܸܢ: ܕܡܸܢܕܝܵܢܹ̈ܐ ܕܒܵܬ݇ܪܝܼ ܒܸܢܫܵܝܵܐ ܝܘܸܢ: ܘܠܵܐܢܝܼ ܕܠܵܩܵܕ݇ܡܵܝܝܼ ܒܸܦܫܵܛܵܐ ܝܘܸܢ: 14 ܘܒܸܪܚܵܛܵܐ ܝܘܸܢ ܠܓܹܒܵܐ ܕܢܝܼܫܲܢܩܵܐ ܠܓ݂ܵܠܸܒܘܼܬܵܐ ܕܩܪܵܝܬܵܐ ܕܠܥܸܠܸܠ ܕܐܲܠܵܗܵܐ: ܒܝܼܫܘܿܥ ܡܫܝܼܚܵܐ. 15 ܒܲܣ ܟܡܵܐ ܡܸܢܲܢ ܕܝܼܘܵܚ ܟܵܡܝܼ̈ܠܹܐ ܐܵܗܵܐ ܚܵܫܒ݂ܵܚ: ܘܐܸܢ ܡܸܢܕܝܼ ܒܬܵܗܵܪ ܐܚܹܪ݇ܢܵܐ ܚܵܫܒ݂ܝܼܬܘܿܢ: ܐܘܼܦ ܐܵܗܵܐ ܐܲܠܵܗܵܐ ܒܸܬ ܓܵܠܹܐ ܐܸܠܵܘܟ݂ܘܿܢ. 16 ܐܝܼܢܵܐ ܠܐܵܗܵܐ ܕܡܛܹܠܲܢ: ܒܚܵܕ݇ ܩܵܢܘܿܢܵܐ ܚܵܕܪܵܚ.

17 ܡܲܕܡܘܿܢ ܓܵܢܵܘܟ݂ܘܿܢ ܡܸܚܕܵܪܹ̈ܐ ܒܝܼܝܼ: ܐܵܚܘܿܢܘܵܬܝܼ̈: ܘܗܵܘܝܼܬܘܿܢ ܒܸܚܝܵܪܵܐ ܒܐܵܢܝܼ ܕܗܲܕܟ݂ܵܐ ܒܸܚܕܵܪܵܐ ܝܢܵܐ: ܐܲܝܟ݂ ܛܘܼܦ̮ܣܵܐ ܕܒܝܼܲܢ ܐܝܼܬ ܠܵܘܟ݂ܘܿܢ. 18 ܣܵܒܵܒ ܪܵܒܵܐ ܒܸܚܕܵܪܵܐ ܝܢܵܐ: ܐܵܢܝܼ ܕܪܵܒܵܐ ܓܵܗܹ̈ܐ ܐ݇ܡܝܼܪܵܐ ܝܘܸܢ ܐܸܠܵܘܟ݂ܘܿܢ ܒܵܗ݇ܣܵܝ: ܐܝܼܢܵܐ ܐܵܕܝܼܵܐ ܟܲܕ ܒܸܒܟ݂ܵܝܵܐ ܝܘܸܢ ܒܹܐܡܵܪܵܐ ܝܘܸܢ: ܕܕܸܫܡܸܢܹ̈ܐ ܝܢܵܐ ܕܙܩܝܼܦܹܗ ܕܡܫܝܼܚܵܐ: 19 ܐܵܢܝܼ ܕܚܲܪܬܵܝ ܐܲܒ݂ܕܵܢܵܐ ܝܠܵܐ: ܐܵܢܝܼ ܕܐܲܠܵܗܵܝ ܟܹܪ݇ܣܵܝ: ܘܚܸܩܪܵܝ ܒܢܚܸܦܬܵܣ: ܐܵܢܝܼ ܕܚܝܼܵܠܵܝ ܒܐܲܪܥܵܐ ܝܠܹܐ. 20 ܐܝܼܢܵܐ ܕܘܼܒܵܪܹ̈ܐ ܕܝܼܲܢ ܒܫܡܲܝܵܐ ܝܢܵܐ: ܘܡ̣ܢ ܬܵܡܵܐ ܒܸܣܦܵܪܵܐ ܝܘܵܚ ܠܦܵܪܘܿܩܲܢ ܒܡܵܪܲܢ ܝܼܫܘܿܥ ܡܫܝܼܚܵܐ: 21 ܗ̇ܘ ܕܒܸܬ ܡܲܚܠܸܦ ܦܲܓ݂ܪܵܐ ܕܡܘܼܟܵܟܲܢ: ܕܗܵܘܹܐ ܒܕܡܘܼܬܵܐ ܕܦܲܓ݂ܪܵܐ ܕܚܸܩܪܹܗ: ܐܲܝܟ݂ ܦܠܵܚܬܵܐ ܕܒܝܼܵܗ̇ ܗ̇ܘ ܡܵܨܹܐ ܕܙܲܒܛܸܢ ܠܟܠ ܡܸܢܕܝܼ ܠܓܵܢܹܗ.

ܩܦܠܐܘܢ: ܕ

1 ܡܐܵܕܝܼܵܐ ܐܵܚܘܿܢܘܵܬܝܼ̈ ܣܵܘܓܘܿܠܹ̈ܐ ܘܡܘܼܚܸܒܹ̈ܐ: ܚܲܕܘܼܬܝܼ ܘܟܠܝܼܠܝܼ: ܗܲܕܟ݂ܵܐ ܟܠܹܡܘܿܢ ܒܡܵܪܲܢ: ܡܘܼܚܸܒܝܼ̈.

2 ܦܲܪܦܘܼܠܹܐ ܝܘܸܢ ܒܐܹܘܗܵܕܝܼܵܐ: ܘܦܲܪܦܘܼܠܹܐ ܝܘܸܢ ܒܣܘܼܢܛܹܟܹܐ: ܕܚܵܕ݇ ܚܝܼܵܠ ܗܵܘܹܐ ܠܗ݇ܘܿܢ ܒܡܵܪܲܢ. 3 ܦܲܪܦܘܼܠܹܐ ܝܘܸܢ ܐܘܼܦ ܒܝܼܘܟ݂: ܒܲܪ ܙܵܘܓܝܼ ܫܲܪܝܼܪܵܐ: ܕܗܵܘܸܬ ܗܲܝܘܼܪܵܝ ܐܵܢܝܼ ܒܲܟ݂ܬܵܬܹ̈ܐ ܕܓ̰ܗ݇ܠܘܿܢ ܥܲܡܝܼ ܒܐܹܘܵܢܓܵܠܝܼܘܿܢ: ܥܲܡ ܩܠܹܡܝܼܣ: ܘܥܲܡ ܗܲܝܸܪ̈ܵܢܝܼ ܐܚܹܪ݇ܢܹܐ: ܐܵܢܝܼ ܕܫܸܡܵܢܵܝ̈ ܒܟܬܵܒ݂ܵܐ ܕܚܲܝܹ̈ܐ ܝܢܵܐ.

4 ܚܕܹܡܘܿܢ ܒܡܵܪܲܢ ܒܟܠ ܙܲܒ݂ܢܵܐ: ܘܡܸܕܪܹܐ ܒܹܐܡܵܪܵܐ ܝܘܸܢ: ܚܕܹܡܘܿܢ. 5 ܡܵܟܝܼܟ݂ܘܼܬܵܘܟ݂ܘܿܢ ܦܵܝܫܵܐ ܝܕܥܝܼܬܵܐ ܠܟܸܣ ܟܠ ܐ݇ܢܵܫܵܐ. ܡܵܪܲܢ ܩܘܼܪܒܵܐ ܝܠܹܐ. 6 ܡܸܢܕܝܼ ܠܵܐ ܐܵܟ݂ܠܝܼܬܘܿܢ ܚܲܡ: ܐܸܠܵܐ ܒܟܠ ܙܲܒ݂ܢܵܐ ܒܨܠܘܿܬܵܐ ܘܒܒܵܥܘܼܬܵܐ ܘܥܲܡ ܫܵܟܲܪܬܵܐ ܦܲܪ̈ܦܲܠܝܵܬܵܘܟ݂ܘܿܢ ܦܵܝܫܝܼ ܝܕܸܥܝܹܐ ܩܵܕ݇ܡ ܐܲܠܵܗܵܐ. 7 ܫܠܵܡܹܗ ܕܐܲܠܵܗܵܐ ܗ̇ܘ ܕܝܼܠܹܐ ܓܘܼܪܵܐ ܡ̣ܢ ܟܠܵܗ̇ ܦܲܪܡܵܝܬܵܐ: ܒܸܬ ܢܵܛܸܪ ܠܠܸܒܵܘܵܬܵܘ̈ܟ݂ܘܿܢ ܘܚܝܼܵܠܵܘ̈ܟ݂ܘܿܢ ܒܝܼܫܘܿܥ ܡܫܝܼܚܵܐ.

8 ܡܐܵܕܝܼܵܐ ܐܵܚܘܿܢܘܵܬܝܼ̈ ܐܵܢܝܼ ܡܸܢܕܝܵܢܹ̈ܐ ܕܝܼܢܵܐ ܣܲܪ̈ܣܬ: ܐܵܢܝܼ ܕܝܼܢܵܐ ܡܝܘܼܩܪܹ̈ܐ: ܐܵܢܝܼ ܕܝܼܢܵܐ ܗܲܩ: ܐܵܢܝܼ ܕܝܼܢܵܐ ܕܸܟ݂ܝܹ̈ܐ: ܐܵܢܝܼ ܕܝܼܢܵܐ ܡܘܼܚܸܒܹܐ: ܐܵܢܝܼ ܕܝܼܢܵܐ ܚܩܝܼܪܹܐ: ܐܸܢ ܐܝܼܬ ܕܛܵܒ݂ܬܵܐ: ܐܸܢ ܐܝܼܬ ܕܐܝܼܩܵܪܵܐ: ܐܲܢܹܐ ܚܫܘܿܒ݂ܘܿܢ. 9 ܐܵܢܝܼ ܕܝܠܸܦܠܵܘܟ݂ܘܿܢ ܘܩܘܼܒܸܠܵܘܟ݂ܘܿܢ ܘܫܡܸܥܠܵܘܟ݂ܘܿܢ ܘܚܙܹܠܵܘܟ݂ܘܿܢ ܒܝܼܝܼ: ܐܲܢܹܐ ܦܠܘܿܚܘܿܢ. ܘܐܲܠܵܗܵܐ ܕܫܠܵܡܵܐ ܒܸܬ ܗܵܘܹܐ ܥܲܡܵܘܟ݂ܘܿܢ.

10 ܐܝܼܢܵܐ ܪܵܒܵܐ ܚܕܹܠܝܼ ܒܡܵܪܲܢ: ܕܐܵܕܝܼܵܐ ܒܚܲܪܬܵܐ ܫܘܼܪܸܠܵܘܟ݂ܘܿܢ ܠܹܐܟ݂ܵܠܵܐ ܚܲܡ ܕܝܼܝܼ: ܕܐܵܟ݂ܝܼ ܕܐܘܼܦ ܐܟܸܠܵܘܟ݂ܘܿܢ ܚܲܡ: ܐܝܼܢܵܐ ܠܲܝܬ ܗ݇ܘܵܐ ܠܵܘܟ݂ܘܿܢ ܦܸܪܣܲܬ. 11 ܐܝܼܢܵܐ ܠܹܐ ܝܠܵܐ ܣܵܒܵܒ ܕܣܢܸܩܠܝܼ ܒܹܐܡܵܪܵܐ ܝܘܸܢ: ܣܵܒܵܒ ܐܵܢܵܐ ܝܠܝܼܦܵܐ ܝܘܸܢ ܕܡܵܠܹܐ ܠܝܼ ܗ̇ܘ ܡܸܢܕܝܼ ܕܐܝܼܬ ܠܝܼ. 12 ܒܝܼܕܲܥܝܵܐ ܝܘܸܢ ܕܦܵܝܫܸܢ ܡܘܼܡܟܸܟ݂ܵܐ ܘܒܝܼܕܲܥܝܵܐ ܝܘܸܢ ܐܘܼܦ ܕܙܵܝܕܸܢ: ܒܟܠ ܕܘܼܟܵܐ ܘܒܟܠ ܡܸܢܕܝܼ ܝܠܝܼܦܵܐ ܝܘܸܢ ܐܘܼܦ ܠܸܣܒܲܥܝܵܐ ܐܘܼܦ ܠܸܟܦܵܢܵܐ: ܠܸܗ݇ܘܵܝܵܐ ܒܦܸܪܝܘܼܬܵܐ ܘܒܒܵܨܘܿܪܘܼܬܵܐ. 13 ܟܠ ܡܸܢܕܝܼ ܟܹܐ ܡܵܨܹܐ ܒܗ̇ܘ ܕܚܲܠܘܼܢܝܼ ܝܠܹܐ. 14 ܐܝܼܢܵܐ ܫܵܦܝܼܪܵܐ ܥܒܸܕܠܵܘܟ݂ܘܿܢ ܕܫܘܼܪܸܟܠܵܘܟ݂ܘܿܢ ܒܐܘܼܠܨܵܢܝܼ̈. 15 ܘܒܝܼܕܲܥܝܵܐ ܝܬܘܿܢ ܐܘܼܦ ܐܲܚܬܘܿܢ: ܦܝܼܠܝܼܦܸܣܵܝܹ̈ܐ: ܕܒܫܵܪܵܝܬܵܐ ܕܡܲܫܚܲܕܬܵܐ: ܟܲܕ ܦܠܸܛܠܝܼ ܡ̣ܢ ܡܵܩܕܘܿܢܝܼܵܐ: ܐܘܼܦ ܚܕܵܐ ܡ̣ܢ ܥܹܕܵܬܹ̈ܐ ܠܵܐ ܫܘܼܪܸܟܠܵܐ ܥܲܡܝܼ ܒܫܘܼܠܵܐ ܕܝܵܗ݇ܒ݂ܵܐ ܘܩܵܒܘܿܠܹܐ: ܐܸܠܵܐ ܗܲܪ ܐܲܚܬܘܿܢ: 16 ܣܵܒܵܒ ܐܘܼܦ ܠܬܹܣܵܠܘܿܢܝܼܩܹܐ ܚܕܵܐ ܓܵܗܵܐ ܘܬܲܪ̈ܬܹܝ ܫܘܼܕܸܪܵܘܟ݂ܘܿܢ ܠܣܢܝܼܩܘܼܬܝܼ. 17 ܠܹܐ ܝܠܵܐ ܕܚܲܠܲܥܬ ܒܸܒܲܥܝܵܐ ܝܘܸܢ: ܐܸܠܵܐ ܒܸܒܲܥܝܵܐ ܝܘܸܢ ܕܛܘܥܘܼܢܝܵܬܹ̈ܐ ܙܵܝܕܝܼ ܠܚܸܫܒܘܼܢܵܘܟ݂ܘܿܢ. 18 ܟܠ ܡܸܢܕܝܼ ܐܝܼܬ ܠܝܼ: ܘܙܵܘܕܵܐ ܝܠܹܐ ܐܸܠܝܼ: ܘܡܸܠܝܵܐ ܝܘܸܢ ܟܲܕ ܩܘܼܒܸܠܝܼ ܐܵܢܝܼ ܡܸܢܕܝܵܢܹ̈ܐ ܕܡܸܢܵܘܟ݂ܘܿܢ ܒܝܼܸܕ ܐܵܦܵܦܘܿܕܝܼܛܘܿܣ: ܪܹܝܚܵܐ ܒܵܣܝܼܡܵܐ ܘܕܸܒ݂ܚܵܐ ܩܘܼܒܠܵܐ: ܫܵܦܪܵܢܵܐ ܠܐܲܠܵܗܵܐ. 19 ܘܐܲܠܵܗܝܼ ܒܸܬ ܡܵܠܹܐ ܟܠܵܗ̇ ܣܢܝܼܩܘܼܬܵܘܟ݂ܘܿܢ ܐܲܝܟ݂ ܕܵܘܸܠܬܹܗ ܒܚܸܩܪܵܐ ܒܝܼܫܘܿܥ ܡܫܝܼܚܵܐ. 20 ܐܝܼܢܵܐ ܠܐܲܠܵܗܵܐ ܒܵܒܲܢ ܚܸܩܪܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ.

21 ܗܲܒ݇ܠܘܿܢ ܫܠܵܡܵܐ ܠܟܠܵܝ ܩܲܕܝܼܫܗܹܐ ܕܒܝܼܫܘܿܥ ܡܫܝܼܚܵܐ. ܒܝܼܵܗ݇ܒ݂ܵܐ ܝܢܵܐ ܫܠܵܡܵܐ ܐܸܠܵܘܟ݂ܘܿܢ ܐܵܚܘܿܢܘܵܬܹ̈ܐ ܕܝܼܢܵܐ ܥܲܡܝܼ. 22 ܒܝܼܵܗ݇ܒ݂ܵܐ ܝܢܵܐ ܫܠܵܡܵܐ ܐܸܠܵܘܟ݂ܘܿܢ ܟܠܵܝ ܩܲܕܝܼܫܹ̈ܐ: ܒܘܼܫ ܙܵܘܕܵܐ ܐܵܢܝܼ ܕܡ̣ܢ ܒܲܝܬܹܗ ܕܩܹܣܲܪ.

23 ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܵܘܟ݂ܘܿܢ: ܐܵܡܹܝܢ.