ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܦܘܠܘܣ ܫܠܝܚܐ ܕܠܘܬ ܐܦܣܝ̈ܐ

ܩܦܠܐܘܢ: ܐ

1 ܦܵܘܠܘܿܣ: ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ: ܠܩܲܕܝܼܫܹ̈ܐ ܕܝܼܢܵܐ ܓܵܘ ܐܵܦܸܣܘܿܣ ܘܠܡܗܘܼܡܢܹ̈ܐ ܒܝܼܫܘܿܥ ܡܫܝܼܚܵܐ: 2 ܫܠܵܡܵܐ ܥܲܡܵܘܟ݂ܘܿܢ ܘܫܵܦܵܩܲܬ ܡ̣ܢ ܐܲܠܵܗܵܐ ܒܵܒܲܢ: ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ.

3 ܒܘܼܪܵܟ݂ܵܐ ܝܠܹܐ ܐܲܠܵܗܵܐ ܒܵܒܹܗ ܝܼܫܘܿܥ ܡܫܝܼܚܵܐ: ܗ̇ܘ ܕܒܘܼܪܟ݂ܵܚܠܹܐ ܒܟܠ ܒܘܼܪܟܬ݂ܵܐ ܪܘܼܚܵܢܵܝܬܵܐ ܒ (ܕܘܼܟܵܢܹ̈ܐ) ܫܡܲܝܵܢܹ̈ܐ ܒܡܫܝܼܚܵܐ: 4 ܕܵܐܟ݂ܝܼ ܕܓܘܼܒܝܵܚܠܹܐ ܒܝܼܹܗ ܡ̣ܢ ܩܵܕ݇ܡ ܒܸܢܝܲܬܹ̈ܗ ܕܥܵܠܡܵܐ: ܕܗܵܘܵܚ ܩܲܕܝܼܫܹ̈ܐ ܘܕܠܵܐ ܡܘܼܡܵܐ ܩܵܕ݇ܡܘܼܗܝ: 5 ܘܒܚܘܼܒܵܐ ܩܲܕ݇ܡܵܝܬܵܐ ܪܫܝܼܡܵܚܠܹܐ ܠܥܒ݂ܵܕܬܵܐ ܕܒܢܘܿܢܹ̈ܐ ܒܝܼܕ ܝܼܫܘܿܥ ܡܫܝܼܚܵܐ ܠܓܵܢܹܗ؛ ܐܲܝܟ݂ ܕܫܦܸܪܵܐ ܠܪܸܙܵܝܹܗ: 6 ܠܫܘܼܒ݂ܚܵܐ ܕܐܝܼܩܵܪܵܐ ܕܫܵܦܵܩܲܬܹܗ: ܗ̇ܝ ܕܡܘܼܫܦܸܟ݂ܠܹܐ ܐܸܠܲܢ ܒܡܘܼܚܸܒܵܐ: 7 ܕܒܝܼܹܗ ܐܝܼܬ݂ ܠܲܢ ܦܘܼܪܩܵܢܵܐ ܒܝܼܸܕ ܕܸܡܹܗ ܫܒ݂ܵܩܵܐ ܕܓܢܵܗܹ̈ܐ: ܐܲܝܟ݂ ܕܵܘܸܠܬܵܐ ܕܫܵܦܵܩܲܬܹܗ: 8 ܗ̇ܝ ܕܦܸܫܠܵܐ ܡܘܼܙܝܸܕܬܵܐ ܒܝܸܢ ܒܟܠ ܥܵܩܸܠܕܵܪܘܼܬ݂ܵܐ ܘܒ݂ܟܠ ܦܲܪܡܵܝܬܵܐ: 9 ܘܡܘܼܕܸܥܠܹܐ ܐܸܠܲܢ ܣܸܪ ܕܪܸܙܵܝܹܗ: ܐܲܝܟ ܕܫܦܸܪܹܐ ܐܸܠܹܗ: ܐܲܝܢܝܼ ܕܡܘܼܬܸܒ݂ܠܹܐ ܩܵܕ݇ܡܵܝܬܵܐ ܒܝܼܹܗ: 10 ܠܡܕܲܒܪܵܢܘܼܬ݂ܵܐ ܕܬܲܡܵܡܬܘܼܬܵܐ ܕܙܲܒ݂ܢܹ̈ܐ: ܕܟܠ ܡܸܢܕܝܼ ܦܵܝܸܫ ܚܒ݂ܝܼܫܵܐ ܒܡܫܝܼܚܵܐ: ܕܒܫܡܲܝܵܐ ܘܕܒܲܐܪܥܵܐ: ܗܲܪ ܒܝܼܹܗ: 11 ܕܐܘܼܦ ܒܝܼܹܗ ܐܲܚܢܲܢ ܗ݇ܘܹܠܲܢ ܝܵܪܘܿܬܹܗ: ܟܲܕ ܦܸܫܠܲܢ ܪܫܝܼܡܹܐ ܐܲܝܟ݂ ܪܫܵܡܬܵܐ ܕܗ̇ܘ ܕܒܸܦܠܵܚܵܐ ܝܠܹܐ ܟܠ ܡܸܢܕܝܼ ܐܲܝܟ݂ ܚܝܵܠ ܕܪܸܙܵܝܹܗ: 12 ܕܗܵܘܵܚ ܐܲܚܢܲܢ: ܐܵܢܝܼ ܕܩܵܕ݇ܡܵܝܬܵܐ ܦܸܫܠܲܢ ܒܗܹܒ݂ܝܼ ܒܡܫܝܼܚܵܐ: ܠܫܘܼܒ݂ܚܵܐ ܕܬܸܫܒܘܿܚܬܹܗ: 13 ܕܐܘܼܦ ܐܲܚܬܘܿܢ ܒܝܼܹܗ ܫܡܸܥܠܵܘܟ݂ܘܿܢ ܗܸܡܸܙܡܵܢ ܕܣܲܪܲܣܬܘܼܬܵܐ: ܕܝܼܠܵܐ ܐ݂ܘܲܢܓܵܠܝܼܘܿܢ ܕܚܲܝܵܘ̈ܟ݂ܘܿܢ: ܕܒܝܼܹܗ: ܟܲܕ ܗܘܼܡܸܢܵܘܟ݂ܘܿܢ: ܦܸܫܠܵܘܟ݂ܘܿܢ ܡܸܚܝܹܐ ܡܵܘܗܪ ܒܪܘܼܚܵܐ ܕܩܘܼܕܫܵܐ ܕܩܵܘܠܵܐ: 14 ܗ̇ܘ ܕܝܼܠܹܐ ܓܸܪܵܘ ܕܝܵܪܬܘܼܬܲܢ: ܠܦܘܼܪܩܵܢܵܐ ܕܐܵܢܝܼ ܕܚܲܝܝܼ: ܠܫܘܼܒ݂ܚܵܐ ܕܬܸܫܒܘܿܚܬܹܗ.

15 ܣܵܒܵܒ ܕܐܵܗܵܐ ܐܘܼܦ ܐܵܢܵܐ: ܗܵܐ ܡ̣ܢ ܕܫܡܸܥܠܝܼ ܗܲܝܡܵܢܘܼܬܵܐ ܕܓܵܘܵܘܟ݂ܘܿܢ ܕܒܡܵܪܲܢ ܝܼܫܘܿܥ: ܘܚܘܼܒܵܘܟ݂ܘܿܢ ܕܠܟܸܣ ܟܠܵܝ ܩܲܕܝܼܫܹ̈ܐ: 16 ܠܹܐ ܝܘܸܢ ܒܸܫܠܵܝܵܐ ܡ̣ܢ ܠܫܵܟܘܿܪܹܐ ܣܵܒܵܒ ܕܝܼܵܘܟ݂ܘܿܢ: ܘܠܸܕܟ݂ܵܪܵܘܟ݂ܘܿܢ ܒܨܠܵܘܵܬܝܼ̈: 17 ܕܐܲܠܵܗܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܒܵܒܵܐ ܕܬܸܫܒܘܿܚܬܵܐ: ܝܵܗ݇ܒܸܠ ܠܵܘܟ݂ܘܿܢ ܪܘܼܚܵܐ ܕܥܵܩܸܠܕܵܪܘܼܬܵܐ ܘܕܓܸܠܝܵܢܵܐ ܒܝܕܸܥܬܹܗ: 18 ܘܒܲܗ݇ܪܸܢܝܼ ܥܲܝܢܹ̈ܐ ܕܦܲܪܡܵܝܬܵܘܟ݂ܘܿܢ: ܕܝܲܕܥܝܼܬܘܿܢ ܡܘܼܕܝܼ ܝܠܵܐ ܗܹܒ݂ܝܼ ܕܩܪܵܝܬܹܗ: ܘܡܘܼܕܝܼ ܝܠܵܐ ܕܵܘܸܠܬܵܐ ܕܚܸܩܪܵܐ ܕܝܵܪܬܘܼܬܹܗ ܒܩܲܕܝܼܫܹ̈ܐ: 19 ܘܡܘܼܕܝܼ ܝܠܵܐ ܒܘܼܫܵܝܘܼܬܵܐ ܕܓܘܼܪܘܼܬܵܐ ܕܚܲܝܠܹܗ ܒܝܼܲܢ ܒܐܵܢܝܼ ܕܗܲܡܸܢܵܚ: ܐܲܝܟ݂ ܦܠܵܚܬܵܐ ܕܙܲܪܒ ܕܚܲܝܠܹܗ: 20 ܗ̇ܝ ܕܦܠܸܚܠܹܐ ܒܡܫܝܼܚܵܐ: ܟܲܕ ܡܘܼܩܸܡܠܹܗ ܡ̣ܢ ܡܝܼܬܹ̈ܐ: ܘܡܘܬܝܸܒ݂ܠܹܗ ܡ̣ܢ ܝܲܡܝܼܢܹܗ ܒ (ܕܘܼܟܵܢܹ̈ܐ) ܫܡܲܝܵܢܹ̈ܐ: 21 ܠܥܸܠܸܠ ܡ̣ܢ ܟܠ ܐܲܪܟܘܿܣ ܘܫܘܼܠܛܵܢܵܐ: ܘܚܲܝܠܵܐ: ܘܡܵܪܘܼܬܵܐ: ܘܡ̣ܢ ܟܠ ܫܸܡܵܐ ܕܦܝܵܫܵܐ ܝܠܹܐ ܡܫܘܼܡܗܵܐ: ܠܵܐ ܗܲܪ ܒܐܵܗܵܐ ܥܵܠܡܵܐ: ܐܸܠܵܐ ܐܘܼܦ ܒܗ̇ܘ ܕܐܵܬܹܐ. 22 ܘܥܒܸܕܠܹܐ ܙܲܒܛ ܟܠ ܡܸܢܕܝܼ ܬܚܘܿܬ ܐܲܩܠܘܼ̈ܗܝ: ܘܝܸܗܒ݂ܸܠܹܗ ܪܹܫܵܐ ܠܥܸܠܸܠ ܡ̣ܢ ܟܠ ܠܥܸܕܬܵܐ: 23 ܕܝܼܠܵܐ ܦܲܓ݂ܪܹܗ: ܘܬܲܡܵܡܬܘܼܬܵܐ ܕܗ̇ܘ ܕܟܠ ܒܟܠ ܟܹܐ ܬܲܡܸܡ.

ܩܦܠܐܘܢ: ܒ

1 ܐܘܼܦ ܐܸܠܵܘܟ݂ܘܿܢ (ܡܘܼܚܹܠܹܐ): ܟܲܕ. ܡܝܼܬܹ̈ܐ ܝܬܘܿܢ ܗ݇ܘܘ ܒܓܢܵܗܹ̈ܐ ܘܒܚܛܵܗܹ̈ܐ: 2 ܒܐܵܢܝܼ ܕܩܵܕ݇ܡܵܝܬܵܐ ܟܹܐ ܚܵܕܪܝܼܬܘܿܢ ܗ݇ܘܵܘ ܒܝܼܵܝ: ܐܲܝܟ݂ ܥܵܠܡܵܝܘܼܬܵܐ ܕܐܵܗܵܐ ܥܵܠܡܵܐ: ܘܐܲܝܟ݂ ܪܹܫܵܐ ܕܗܘܼܟܡܵܐ ܕܗܵܘܵܐ: ܕܪܘܼܚܵܐ ܕܐܵܕܝܼܵܐ ܒܸܦܠܵܚܵܐ ܝܠܵܐ ܒܒܢܘܼܢܹ̈ܐ ܕܠܵܐ ܡܲܨܝܼܬܬܵܐ: 3 ܕܐܘܼܦ ܐܲܚܢܲܢ ܟܠܲܢ ܚܕܸܪܲܢ ܒܝܼܵܝ ܩܵܕ݇ܡܵܝܬܵܐ ܒܫܲܗ݇ܘܲܬܝܵܬܹ̈ܐ ܕܒܸܣܪ̈ܲܢ: ܒܸܥܒ݂ܵܕܵܐ ܪܸܙܵܝܵܐ ܕܒܸܣܪܲܢ ܘܕܚܝܼܵܠܲܢ: ܘܒܢܘܼܢܹ̈ܐ ܕܟܲܪܒܵܐ ܝܘܵܚ ܗ݇ܘܵܘ ܒܐܲܨܠܵܐ ܐܲܝܟ. ܐܚܹܪܵܢܹ̈ܐ. 4 ܐܝܼܢܵܐ ܐܲܠܵܗܵܐ ܕܝܼܠܹܐ ܕܵܘܠܲܬܡܲܢܕ ܒܪ̈ܲܚܡܘܼܗܝ: ܣܵܒܵܒ ܕܚܘܼܒܹܗ ܪܵܒܵܐ ܕܡܘܼܚܸܒܵܚܠܹܐ: 5 ܟܲܕ ܡܝܼܬܹܐ ܝܘܵܚ ܗ݇ܘܵܘ ܒܓܢܵـ̈ܗܲܢ: ܩܲܡ ܡܲܚܹܐ ܠܲܢ ܥܲܡ ܡܫܝܼܚܵܐـ ܒܫܵܦܵܩܲܬ ܦܸܫܠܵܘܟ݂ܘܿܢ ܦܘܼܪܩܹܐ: ـ . 6 ܘܡܘܼܚܝܼܵܚܠܹܐ ܥܲܡܹܗ: ܘܩܲܡ ܡܲܬܝܸܒ݂ ܠܲܢ ܥܲܡܹܗ ܒ (ܕܘܼܟܵܢܹ̈ܐ) ܫܡܲܝܵܢܹ̈ܐ: ܒܝܼܫܘܿܥ ܡܫܝܼܚܵܐ: 7 ܕܡܲܕܸܥ ܠܕܵܘܪܹ̈ܐ ܕܐܵܬܝܼ ܓܘܼܪܘܼܬܵܐ ܕܕܵܘܸܠܬܵܐ ܕܫܵܦܵܩܲܬܹܗ ܒܒܵܣܝܼܡܘܼܬܹܗ ܕܠܟܸܣܠܲܢ ܒܝܼܫܘܿܥ ܡܫܝܼܚܵܐ. 8 ܣܵܒܵܒ ܒܫܵܦܵܩܲܬ ܦܸܫܠܵܘܟ݂ܘܿܢ ܦܘܼܪܩܹܐ: ܒܝܼܸܕ ܗܲܝܡܵܢܘܼܬܵܐ: ܘܐܵܗܵܐ ܠܹܐ ܝܠܵܐ ܡܸܢܵܘܟ݂ܘܿܢ: ܐܸܠܵܐ ܚܲܠܲܥܬ ܕܐܲܠܵܗܵܐ ܝܠܵܐ: 9 ܠܵܐ ܡ̣ܢ ܦܘܼܠܚܵܢܹ̈ܐ: ܕܠܵܐ ܐ݇ܢܵܫܵܐ ܥܵܒܸܕ ܫܘܼܒ݂ܗܵܪܵܐ: 10 ܣܵܒܵܒ ܥܒ݂ܵܕܵܐ ܕܝܼܹܗ ܝܘܵܚ: ܕܦܸܫܠܲܢ ܒܸܪܝܹܐ ܒܝܼܫܘܿܥ ܡܫܝܼܚܵܐ ܠܦܘܼܠܚܵܢܹ̈ܐ ܛܵܒ݂ܹ̈ܐ: ܐܵܢܝܼ ܕܩܵܕ݇ܡܵܝܬܵܐ ܗܘܼܕܪܹܐ ܐܲܠܵܗܵܐ ܕܚܵܕܪܵܚ ܗ݇ܘܵܘ ܒܝܼܵܝ.

11 ܣܵܒܵܒ ܕܐܵܗܵܐ ܗܵܘܝܼܬܘܿܢ ܒܸܕܟ݂ܵܪܵܐ: ܕܩܵܕ݇ܡܵܝܬܵܐ ܐܲܚܬܘܿܢ: ܛܵܝܸܦܹ̈ܐ ܕܒܒܸܣܪܵܐ: ܕܦܵܝܫܵܐ ܝܬܘܿܢ ܩܸܪܝܹܐ ܥܘܼܪܠܘܼܬܵܐ ܡ̣ܢ ܕܗ̇ܝ ܕܦܝܵܫܵܐ ܝܠܵܐ ܩܪܝܼܬܵܐ ܓܙܘܼܪܬܵܐ: ܕܒܒܸܣܪܵܐ: ܕܝܼܠܹܐ ܦܘܼܠܚܵܢܵܐ ܕܐܝܼܕܵܬܹ̈ܐ: 12 ܕܒܗ̇ܘ ܙܲܒ݂ܢܵܐ ܕܠܵܐ ܡܫܝܼܚܵܐ ܝܬܘܿܢ ܗ݇ܘܵܘ: ܘܢܘܼܟ݂ܪ̈ܵܝܹܐ ܡ̣ܢ ܕܘܼܒܵܪܹ̈ܐ ܕܝܼܣܪܵܝܹܠ: ܘܩܵܪ̈ܝܼܒ݂ܵܝܹܐ ܠܕܝܵܬܹܩ̈ܘܿܣ ܕܩܵܘܠܵܐ: ܘܕܠܵܐ ܗܹܒ݂ܝܼ ܘܕܠܵܐ ܐܲܠܵܗܵܐ ܓܵܘ ܥܵܠܡܵܐ. 13 ܐܝܼܢܵܐ ܐܵܕܝܼܵܐ ܒܝܼܫܘܿܥ ܡܫܝܼܚܵܐ: ܐܲܚܬܘܿܢ ܕܩܵܕ݇ܡܵܝܬܵܐ ܪܸܚܩܵܐ ܝܬܘܿܢ ܗ݇ܘܵܘ: ܗ݇ܘܹܠܵܘܟ݂ܘܿܢ ܩܘܼܪܒܵܐ ܒܕܸܡܹܗ ܕܡܫܝܼܚܵܐ. 14 ܣܵܒܵܒ ܗ̇ܝ ܝܼܠܹܐ ܫܲܝܢܲܢ: ܗ̇ܘ ܕܥܒܸܕܠܹܐ ܬܸܪܘܸܢܬܵܝ ܚܕܵܐ: ܘܣܬܸܪܹܐ ܠܣܝܵܓ݂ܵܐ ܕܝܼܗ݇ܘܵܐ ܟܸܠܝܵܐ ܒܒܹܝܦܲܠܓܵܐ: 15 ܘܕܸܫܡܸܢܵܝܘܼܬܵܐ ܒܘܼܛܸܠܹܐ ܒܒܸܣܪܹܗ: (ܝܲܥܢܹܐ) ܢܵܡܘܿܣܵܐ ܕܦܘܼܩܕܵܢܹ̈ܐ ܕܒܦܘܼܩܵܕܹ̈ܐ: ܕܠܬܸܪܘܵܝ ܒܵܪܹܐ ܗ݇ܘܵܐ ܒܓܵܢܹܗ ܠܚܵܕ݇ ܒܲܪܢܵܫܵܐ ܚܵܕ݇ܬܵܐ: ܘܗܲܕܟ݂ܵܐ ܥܒܸܕܠܹܐ ܫܲܝܢܵܐ: 16 ܘܕܣܲܙܓܸܪ ܗ݇ܘܵܐ ܠܬܸܪܘܵܝ ܒܚܵܕ݇ ܦܲܓ݂ܪܵܐ ܥܲܡ ܐܲܠܵܗܵܐ ܒܝܼܸܕ ܙܩܝܼܦܹܗ: ܟܲܕ ܩܛܸܠܹܐ ܠܕܸܫܡܸܢܵܝܘܼܬܵܐ ܒܝܼܹܗ. 17 ܘܐܬܹܠܹܐ ܡܘܼܫܚܸܕܠܹܐ ܫܠܵܡܵܐ ܐܸܠܵܘܟ݂ܘܿܢ: ܠܐܵܢܝܼ ܕܪܸܚܩܵܐ: ܘܠܵܐܢܝܼ ܕܩܘܼܪܒܵܐ. 18 ܣܵܒܵܒ ܕܒܝܼܹܗ ܐܝܼܬ ܩܘܼܪܒܸܢܝܘܼܬܵܐ ܠܬܸܪܘܲܢ ܒܚܕܵܐ ܪܘܼܚܵܐ ܠܟܸܣ ܒܵܒܵܐ. 19 ܒܲܣ ܐ݇ܚܹܪ݇ܢܵܐ ܠܹܐ ܝܬܘܿܢ ܢܘܼܟ݂ܪ̈ܵܝܹܐ ܘܠܵܐ ܩܵܪܝܼܒܵܝܹܐ: ܐܸܠܵܐ ܒܢܲܝ̈ ܡܕܝܼܢ݇ܬܵܐ ܕܩܲܕܝܼܫܹ̈ܐ: ܘܒܢܲܝ̈ ܒܲܝܬܵܐ ܕܐܲܠܵܗܵܐ: 20 ܘܦܸܫܠܵܘܟ݂ܘܿܢ ܒܸܢܝܹܐ ܥܲܠ ܒܸܢܝܲܬ ܕܫܠܝܼܚܹ̈ܐ ܘܕܢܒ݂̈ܝ݂ܹܐ: ܘܗ̇ܘ ܗ݇ܘܹܠܹܐ ܪܹܫܵܐ ܕܩܸܪܢܝܼܬܵܐ: ܝܼܫܘܿܥ ܡܫܝܼܚܵܐ: 21 ܕܒܝܼܹܗ ܦܝܵܫܵܐ ܝܠܹܐ ܡܘܼܪܟܸܒ݂ܵܐ ܟܠܹܐ ܒܸܢܝܵܢܵܐ: ܘܓܲܪܘܘܼܣܹܐ ܝܠܹܐ ܠܗܲܝܟܠܵܐ ܩܲܕܝܼܫܵܐ ܒܡܵܪܝܵܐ: ܟܲܕ ܐܘܼܦ ܐܲܚܬܘܿܢ ܒܝܼܹܗ ܦܝܵܫܵܐ ܝܬܘܿܢ ܒܸܢܝܹܐ ܠܥܡܵܪܵܐ ܕܐܲܠܵܗܵܐ ܒܪܘܼܚܵܐ.

ܩܦܠܐܘܢ: ܓ

1 ܣܵܒܵܒ ܕܐܵܗܵܐ ܐܵܢܵܐ ܦܵܘܠܘܿܣ: ܐܲܣܝܼܪܵܐ ܕܝܼܫܘܿܥ ܡܫܝܼܚܵܐ ܒܚܵܬܸܪ ܕܝܼܵܘܟ݂ܘܿܢ ܛܵܝܸܦܹ̈ܐ: 2 ܐܸܢ ܫܡܸܥܠܵܘܟ݂ܘܿܢ ܡܕܲܒܪܵܢܘܼܬ݂ܵܐ ܕܫܵܦܵܩܲܬܹܗ ܕܐܲܠܵܗܵܐ ܕܦܸܫܠܵܐ ܝܸܗܒ݂ܸܠܬܵܐ ܐܸܠܝܼ ܠܟܸܣܠܵܘܟ݂ܘܿܢ: 3 ܕܐܵܟ݂ܝܼ ܕܒܓܸܠܝܵܢܵܐ ܦܸܫܠܹܐ ܡܘܼܕܸܥܝܵܐ ܐܸܠܝܼ ܣܸܪ: ܐܲܝܟ݂ ܕܟܬܸܒ݂ܠܝܼ ܐܸܠܵܘܟ݂ܘܿܢ ܩܵܕ݇ܡܵܝܬܵܐ ܒܚܵܕ݇ ܩܵܕܸܪ: 4 ܗܲܕܟ݂ܵܐ ܕܡܵܨܝܼܬܘܿܢ: ܟܲܕ ܩܪܵܝܼܬܘܿܢ: ܠܦܲܪܡܘܼܝܹܐ ܝܕܹܥܬܝܼ ܕܒܣܸܪܹܗ ܕܡܫܝܼܚܵܐ: 5 ܗ̇ܘ ܕܒܕܵܘܪܹ̈ܐ ܐ݇ܚܹܪ݇ܢܹ̈ܐ ܠܵܐ ܦܸܫܠܹܐ ܡܘܼܕܸܥܝܵܐ ܠܒܢܲܝ̈ܢܵܫܵܐ: ܐܲܝܟ݂ ܕܐܵܕܝܼܵܐ ܦܸܫܠܹܐ ܓܸܠܝܵܐ ܠܫܠܝܼܚܘܼ̈ܗܝ ܩܲܕܝܼܫܹ̈ܐ ܘܠܢܒ݂ܝܼܘܼ̈ܗܝ ܒܪܘܼܚܵܠ: 6 ܕܗܵܘܝܼ ܛܵܝܼܦܹ̈ܐ ܝܵܪ̈ܘܿܬܹܐ ܥܲܡܹܗ: ܘܕܚܵܕ݇ ܦܲܓ݂ܪܵܐ: ܘܫܵܪ̈ܝܼܟܹܐ ܕܩܵܘܠܵܐ ܒܡܫܝܼܚܵܐ ܒܝܸܕ ܐܹܘܵܢܓܵܠܝܼܘܿܢ: 7 ܗ̇ܝ ܕܐܵܢܵܐ ܗ݇ܘܹܠܝܼ ܚܸܠܡܲܬܟܵܪܘܼܗ̇: ܐܲܝܟ݂ ܚܲܠܥܬ ܕܫܵܦܵܩܲܬܹܗ ܕܐܲܠܵܗܵܐ ܕܦܸܫܠܵܐ ܝܸܗܒܸܠܬܵܐ ܐܸܠܝܼ ܡ̣ܢ ܦܠܵܚܬܵܐ ܕܚܲܝܠܹܗ. 8 ܐܸܠܝܼ. ܕܝܼܘܸܢ ܒܘܼܫ ܙܥܘܿܪܵܐ ܕܟܠܵܝ ܩܲܕܝܼܫܹ̈ܐ: ܦܸܫܠܵܐ ܝܸܗܒܸܠܬܵܐ ܐܵܗܵܐ ܫܵܦܵܩܲܬ: ܕܡܲܫܚܸܕܸܢ ܓܵܘ ܛܵܝܸܦܹ̈ܐ ܕܵܘܸܠܬܵܐ ܕܡܫܝܼܚܵܐ: ܗ̇ܝ ܕܠܹܐ ܦܵܝܫܵܐ ܨܘܼܚܨܝܼܬܵܐ: 9 ܘܕܒܲܗ݇ܪܸܢܸܢ ܠܟܠ ܐ݇ܢܵܫܵܐ ܡܘܼܕܝܼ ܝܠܵܐ ܡܕܲܒܪܵܢܘܼܬܵܐ ܕܣܸܪ: ܗ̇ܘ ܕܝܼܗ݇ܘܵܐ ܟܘܼܣܝܵܐ ܡ̣ܢ ܥܵܠܡܝܼܢ ܒܐܲܠܵܗܵܐ ܕܒܪܹܠܹܐ ܟܠ: 10 ܕܒܝܼܸܕ ܥܹܕܬܵܐ ܐܵܕܝܼܵܐ ܦܵܝܫܵܐ ܗ݇ܘܵܐ ܝܕܥܝܼܬܵܐ ܥܵܩܸܠܕܵܪܘܼܬܹܗ ܕܐܲܠܵܗܵܐ: ܡܠܝܼܬܵܐ ܬܵܗܵܪܹ̈ܐ: ܠܐܲܪ̈ܟܘܿܣ ܘܠܫܘܼܠܛܵܢܹ̈ܐ ܕܒ (ܕܘܼܟܵܢܹ̈ܐ) ܫܡܲܝܵܢܹ̈ܐ: 11 ܐܲܝܟ݂ ܪܫܵܡܬܵܐ ܩܵܕ݇ܡܵܝܬܵܐ ܕܡ̣ܢ ܥܵܠܡܝܼܢ: ܕܥܒ݂ܝܼܕܵܠܹܐ ܒܝܼܫܘܿܥ ܡܫܝܼܚܵܐ ܡܵܪܲܢ: 12 ܗ̇ܘ ܕܒܝܼܹܗ ܐܝܼܬ ܠܲܢ ܒܸܣܬܵܝܘܼܬܵܐ ܘܩܘܼܪܒܸܢܝܘܼܬܵܐ ܒܚܵܬܸܪܓ̰ܲܡܥܘܼܬܵܐ ܒܝܼܸܕ ܗܲܝܡܵܢܘܼܬܹܗ. 13 ܒܘܼܬ ܕܐܵܗܵܐ ܒܸܒܲܥܝܵܐ ܝܘܸܢ ܕܠܵܐ ܗܵܘܝܵܐ ܠܵܘܟ݂ܘܿܢ ܣܩܵܕܬܵܐ ܒܐܘܼܠܨܵܢܝܼ̈ ܕܒܚܵܬܸܪܵܘܟ݂ܘܿܢ: ܕܐܵܗܵܐ ܝܠܹܐ ܚܸܩܪܵܘܟ݂ܘܿܢ.

14 ܣܵܒܵܒ ܕܐܵܗܵܐ ܡܲܟܘܼܦܹܐ ܝܘܸܢ ܒܘܼܪ̈ܟܵܟܝܼ ܠܟܸܣ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: 15 ܗ̇ܘ ܕܡܸܢܹܗ ܦܝܵܫܵܐ ܝܠܵܐ ܡܘܼܬܸܒ݂ܬܵܐ ܫܸܡܵܐ ܟܠ ܐܲܒ݂ܵܗܘܼܬܵܐ ܕܒܫܡܲܝܵܐ ܘܒܲܐܪܥܵܐ: 16 ܕܝܵܗ݇ܒܸܠ ܠܵܘܟ݂ܘܿܢ: ܐܲܝܟ݂ ܕܵܘܸܠܬܵܐ ܕܚܸܩܪܹܗ: ܕܒܚܲܝܠܵܐ ܦܵܝܫܝܼܬܘܿܢ ܡܘܼܩܘܝܼܹܐ ܒܪܘܼܚܹܗ ܒܒܲܪܢܵܫܵܘܟ݂ܘܿܢ ܕܠܓܵܘܵܝܝܼ: 17 ܕܥܵܡܸܪ ܡܫܝܼܚܵܐ ܒܠܸܒܵܘܵܬܵܘ̈ܟ݂ܘܿܢ ܒܝܸܕ ܗܲܝܡܵܢܘܼܬܵܐ: ܕܐܵܟ݂ܝܼ ܕܟܲܕ ܗܵܘܝܼ ܩܘܼܝܹܐ ܥܸܩܪܵܘܟ݂ܘܿܢ ܘܒܸܢܝܲܬܵܘܟ݂ܘܿܢ ܒܚܘܼܒܵܐ: 18 ܡܵܨܝܼܬܘܿܢ ܠܸܡܛܵܝܵܐ ܥܲܡ ܟܠܵܝ ܩܲܕܝܼܫܹ̈ܐ ܡܘܼܕܝܼ ܝܠܹܐ ܪܵܘܡܵܐ ܘܥܘܼܡܩܵܐ ܘܝܘܼܪܟ݂ܘܼܬܵܐ ܘܦܸܬܝܘܼܬܵܐ: ܘܕܝܲܕܥܝܼܬܘܿܢ ܚܘܼܒܹܗ ܕܡܫܝܼܚܵܐ ܕܠܥܸܠܸܠ ܝܼܠܹܐ ܡ̣ܢ ܝܕܹܥܬܵܐ: ܕܦܵܝܫܝܼܬܘܿܢ ܡܸܠܝܹܐ ܒܟܠܵܗ̇ ܡܠܵܝܬܵܐ ܕܐܲܠܵܗܵܐ.

20 ܐܝܼܢܵܐ ܠܗ̇ܘ ܕܡܵܨܹܐ ܒܒܘܼܫܵܝܝܼ ܙܵܘܕܵܐ ܡ̣ܢ ܟܠ ܠܸܥܒ݂ܵܕܵܐ: ܘܙܵܘܕܵܐ ܡ̣ܢ ܡܸܢܕܝܼ ܕܛܵܠܒܵܚ ܝܲܢ ܕܚܵܫܒ݂ܵܚ: ܐܲܝܟ݂ ܚܲܝܠܹܗ ܕܦܝܵܫܵܐ ܝܠܹܐ ܦܠܝܼܚܵܐ ܒܝܼܸܢ: 21 ܐܸܠܹܗ ܬܸܫܒܘܿܚܬܵܐ ܓܵܘ ܥܹܕܬܹܗ ܒܝܼܫܘܿܥ ܡܫܝܼܚܵܐ: ܒܟܠܵܝ ܕܵܘܪܹ̈ܐ ܕܥܵܠܡܲܝ̈ ܥܵܠܡܝܼ̈ܢ: ܐܵܡܹܝܢ.

ܩܦܠܐܘܢ: ܕ

1 ܒܲܣ ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ: ܐܵܢܵܐ ܐܲܣܝܼܪܵܐ ܒܡܵܪܲܢ: ܕܚܵܕܪܝܼܬܘܿܢ ܕܵܐܟ݂ܝܼ ܕܚܵܫܚܵܐ ܠܩܪܵܝܬܵܐ ܕܦܸܫܠܵܘܟ݂ܘܿܢ ܩܸܪܝܹܐ: 2 ܒܟܠܵܗ̇ ܡܵܟܝܼܟ݂ܘܼܬܵܐ ܕܚܵܝܼܠ: ܘܢܝܼܚܘܼܬܵܐ: ܘܡܲܪܝܲܟ݂ܬܵܐ ܕܒܹܢܵܐ: ܘܗܵܘܝܼܬܘܿܢ ܒܸܚܡܵܠܵܐ ܚܵܕ݇ ܠܗ̇ܘ ܐܚܹܪ݇ܢܵܐ ܒܚܘܼܒܵܐ: 3 ܘܗܵܘܝܼܬܘܿܢ ܚܵܒܛܵܢܹ̈ܐ ܠܸܢܛܵܪܵܐ ܚܕܵܝܘܼܬܵܐ ܕܪܘܼܚܵܐ ܒܚܠܵܨܵܐ ܕܫܠܵܡܵܐ. 4 (ܐܝܼܬ) ܚܵܕ݇ ܦܲܓ݂ܪܵܐ: ܘܚܕܵܐ ܪܘܼܚܵܐ: ܕܐܵܟ݂ܝܼ ܕܦܸܫܠܵܘܟ݂ܘܿܢ ܩܸܪܝܹܐ ܒܚܕܵܐ ܗܹܒ݂ܝܼ ܕܩܪܵܝܬܵܘܟ݂ܘܿܢ: 5 ܚܵܕ݇ ܡܵܪܝܵܐ: ܚܕܵܐ ܗܲܝܡܵܢܘܼܬ݂ܵܐ: ܚܕܵܐ ܡܲܥܡܘܿܕܝܼܬܵܐ: 6 ܚܵܕ݇ ܐܲܠܵܗܵܐ ܘܒܵܒܵܐ ܕܟܠ: ܘܥܲܠ ܟܠ: ܘܒܝܼܸܕ ܟܠ: ܘܒܟܠܵܝ. 7 ܐܝܼܢܵܐ ܠܟܠ ܚܵܕ݇ ܡܸܢܲܢ ܦܸܫܠܵܐ ܝܸܗܒܸܠܬܵܐ ܫܵܦܵܩܲܬ ܐܲܝܟ݂ ܟܝܼܘܼܠܵܐ ܕܚܲܠܲܥܬܹܗ ܕܡܫܝܼܚܵܐ. 8 ܣܵܒܵܒ ܕܐܵܗܵܐ ܒܹܐܡܵܪܵܐ ܝܠܹܐ: ܐܣܸܩܠܹܐ ܠܡܪܵܘܡܵܐ ܘܣܠܸܒܠܹܐ ܣܠܵܒܬܵܐ:

ܘܝܸܗܒܸܠܹܐ ܚܲܒܲܥܬܹ̈ܐ ܠܒܢܲܝ̈ܢܵܫܵܐ.

9 ܐܝܼܢܵܐ ܕܐܣܸܩܠܹܐ: ܡܘܼܕܝܼ ܝܠܵܐ ܐܸܠܵܐ ܐܸܢ ܕܐܘܼܦ ܨܠܹܠܹܐ ܩܵܕ݇ܡܵܝܬܵܐ ܠܣܵܡܹ̈ܐ ܬܲܚܬܵܝܹ̈ܐ ܕܐܲܪܥܵܐ: 10 ܗ̇ܘ ܕܨܠܹܠܹܐ: ܗܲܪ ܐܵܗܵܐ ܝܠܹܐ ܐܘܼܦ ܗ̇ܘ ܕܐ݇ܣܸܩܠܹܐ ܠܥܸܠܸܠ ܡ̣ܢ ܟܠܵܝ ܫܡܲܝܹ̈ܐ: ܕܡܵܠܹܐ ܗ݇ܘܵܐ ܟܠ. 11 ܘܗ̇ܘ ܝܸܗܒܸܠܹܐ: ܚܲܟܡܵܐ: ܫܠܝܼܚܹ̈ܐ: ܘܚܲܟܡܵܐ: ܢܒ݂̈ܝܼܹܐ: ܘܚܲܟܡܵܐ: ܡܲܫܚܸܕܵܢܹ̈ܐ: ܘܚܲܟܡܵܐ: ܪ̈ܵܥܝܹܐ ܘܡܲܠܦܵܢܹ̈ܐ: 12 ܠܡܲܟܡܲܠܬܵܐ ܕܩܲܕܝܼܫܹ̈ܐ: ܠܦܘܼܠܚܵܢܵܐ ܕܚܸܠܡܲܬ: ܠܒܸܢܝܵܢܵܐ ܕܦܲܓ݂ܪܵܐ ܕܡܫܝܼܚܵܐ: 13 ܗܲܠ ܕܡܵܛܵܚ ܟܠܲܢ ܠܚܕܵܝܘܼܬܵܐ ܕܗܲܝܡܵܢܘܼܬܵܐ: ܘܕܝܕܹܥܬܵܐ ܕܒܪܘܼܢܹܗ ܕܐܲܠܵܗܵܐ: ܠܐ݇ܢܵܫܵܐ ܟܵܡܝܼܠ: ܠܟܝܼܘܼܠܵܐ ܕܩܘܼܡܬܵܐ ܕܬܲܡܵܡܵܬܘܼܬܹܗ ܕܡܫܝܼܚܵܐ: 14 ܕܐܚܹܪ݇ܢܵܐ ܠܵܐ ܗܵܘܵܚ ܝܵܠܹ̈ܐ: ܡܘܼܫܥܸܫܹܐ ܠܐܵܗܵܐ ܓܹܒܵܐ ܘܠܗ̇ܘ ܓܹܒܵܐ: ܘܫܘܼܢܝܹܐ ܠܟܠ ܦܵܘܚܵܐ ܕܝܘܼܠܦܵܢܹ̈ܐ: ܒܦܸܠܡܵܐ ܕܒܢܲܝ̈ܢܵܫܵܐ: ܒܦܲܢܕܘܼܬܵܐ ܠܒ݂ܘܼܨܵܐ ܕܡܲܚܠܲܛܬܵܐ: 15 ܐܸܠܵܐ ܗܵܘܵܚ ܫܲܪܝܼܪܹܐ ܒܚܘܼܒܲܢ: ܘܓܲܪܘܸܣܵܚ ܒܝܼܹܗ ܒܟܠ ܡܸܢܕܝܼ: ܗ̇ܘ ܕܝܼܠܹܐ ܪܹܫܵܐ: ܡܫܝܼܚܵܐ: 16 ܕܡܸܢܹܗ ܟܠܹܐ ܦܲܓ݂ܪܵܐ ܦܝܵܫܵܐ ܝܠܹܐ ܡܘܼܪܟܸܒ݂ܵܐ ܘܟܬܝܼܪܵܐ ܡܸܚܕܵܕܹ̈ܐ ܒܟܠܵܝ ܓܲܝܹ̈ܐ ܕܗܲܝܲܪܬܵܐ: ܐܲܝܟ݂ ܡܲܥܒܲܕܬܵܐ ܒܡܫܘܼܚܬܵܐ ܕܟܠ ܚܵܕ݇ ܣܵܡܵܐ: ܘܒܸܥܒ݂ܵܕܵܐ ܝܠܹܐ ܓܲܪܘܲܣܬܵܐ ܕܦܲܓ݂ܪܵܐ ܠܒܢܵܝܬܹܗ ܒܚܘܼܒܵܐ.

17 ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ ܘܒܸܣܗܵܕܵܐ ܝܘܸܢ ܒܡܵܪܝܵܐ: ܕܡܵܐܕܝܼܵܐ ܠܵܐ ܗܵܘܝܼܬܘܿܢ ܒܸܚܕܵܪܵܐ ܐܲܝܟ݂ ܛܵܝܸܦܹ̈ܐ ܐܚܹܪ݇ܢܹܐ ܕܒܸܚܕܵܪܵܐ ܝܢܵܐ ܒܣܪܝܼܩܘܼܬܵܐ ܕܚܝܼܵܠܵܝ̈: 18 ܘܚܘܼܒ݂ܝܵܢܹ̈ܐ ܝܢܵܐ ܒܦܲܪ̈ܡܵܝܬܵܝ: ܘܢܘܼܟ݂ܪ̈ܵܝܹܐ ܝܢܵܐ ܡ̣ܢ ܚܲܝܹ̈ܐ ܕܐܲܠܵܗܵܐ: ܣܵܒܵܒ ܠܲܝܬ ܒܝܼܵܝ ܝܕܹܥܬܵܐ: ܘܣܵܒܵܒ ܕܩܸܫܝܘܼܬܵܐ ܕܠܸܒܵܝ: 19 ܐܵܢܝܼ ܕܩܛܸܥܝܹܐ ܝܢܵܐ ܡ̣ܢ ܪܥܵܫܬܵܐ: ܘܣܘܼܦܹܠܘܿܢ ܓܵܢܵܝ ܠܦܲܚܙܘܼܬܵܐ: ܘܠܦܘܼܠܚܵܢܵܐ ܕܟܠܵܗ̇ ܛܲܢܦܘܼܬܵܐ ܒܒܲܕܢܲܦ̮ܣܘܼܬܵܐ. 20 ܐܝܼܢܵܐ ܐܲܚܬܘܿܢ ܗܲܕܟ݂ܵܐ ܠܵܐ ܝܠܸܦܠܵܘܟ݂ܘܿܢ ܠܡܫܝܼܚܵܐ: 21 ܐܸܢ ܒܬܪܘܼܨܬܵܐ ܩܲܡ ܫܲܡܥܝܼܬܘܿܢ ܠܹܗ: ܘܒܝܼܹܗ ܦܸܫܠܵܘܟ݂ܘܿܢ ܡܘܼܠܦܹܐ: ܐܲܝܟ݂ ܕܝܼܠܵܐ ܣܲܪܲܣܬܘܼܬܵܐ ܒܝܼܫܘܿܥ: 22 ܡܲܢܚܸܝܼܬܘܿܢ ܡܸܢܵܘܟ݂ܘܿܢ: ܐܲܝܟ݂ ܚܕܵܪܵܘܟ݂ܘܿܢ ܩܵܕ݇ܡܵܝܹ̈ܐ ܠܒܲܪܢܵܫܵܐ ܥܵܬܝܼܩܵܐ ܕܒܸܚܪܵܒ݂ܵܐ ܝܠܹܐ ܒܫܲܗ݇ܘܲܬܝܵܬܹ̈ܐ ܕܚܸܠܛܘܼܢܝܘܼܬܵܐ: 23 ܘܕܦܵܝܫܝܼܬܘܿܢ ܚܘܼܕܬܹܐ ܒܪܘܼܚܵܐ ܕܚܝܼܵܠܘ̈ܟ݂ܘܿܢ: 24 ܘܠܵܒ݂ܫܝܼܬܘܿܢ ܠܒܲܪܢܵܫܵܐ ܚܵܕ݇ܬܵܐ: ܗ̇ܘ ܕܒܲܐܠܵܗܵܐ ܦܸܫܠܹܐ ܒܸܪܝܵܐ ܒܙܲܕܝܼܩܘܼܬܵܐ ܘܒܩܲܕܝܼܫܘܼܬܵܐ ܕܣܲܪ̈ܣܬܘܼܬܵܐ.

25 ܣܵܒܵܒ ܕܐܵܗܵܐ ܡܲܢܝܸܚܘܿܢ ܡܸܢܵܘܟ݂ܘܿܢ ܕܵܓܵܠܘܼܬܵܐ: ܘܗܲܡܙܸܡܘܿܢ ܣܲܪܲܣܬܘܼܬܵܐ ܐ݇ܢܵܫܵܐ ܥܲܡ ܫܒ݂ܵܒܹܗ: ܣܵܒܵܒ ܗܲܕܵܡܹ̈ܐ ܕܚܵܕ݇ ܕܗ̇ܘ ܐܚܹܪ݇ܢܵܐ ܝܘܵܚ. 26 ܟܪܘܿܒ݁ܘܿܢ ܘܠܵܐ ܚܵܛܝܼܬܘܿܢ: ܘܫܸܡܫܵܐ ܥܲܠ ܟܲܪܒܵܘܟ݂ܘܿܢ ܠܵܐ ܓܵܢܹܐ: 27 ܘܠܵܐ ܝܵܗ݇ܒ݂ܝܼܬܘܿܢ ܕܘܼܟܵܐ ܠܐܵܟ݂ܹܠܩܲܪܨܵܐ. 28 ܗ̇ܘ ܕܓܵܢܸܒ݂ ܗ݇ܘܵܐ ܡܐܵܕܝܼܵܐ ܠܵܐ ܓܵܢܸܒ݂: ܐܸܠܵܐ ܡܒܵܕܵܠ ܕܗܵܕܵܐ ܓ̰ܲܗ݇ܝܹܐ: ܟܲܕ ܦܵܠܸܚ ܒܐܝܼܕܵܬܘܼ̈ܗܝ ܛܵܒ݂ܵܬܹ̈ܐ: ܕܗܵܘܹܐ ܠܹܗ ܠܝܼܵܗ݇ܒ݂ܵܐ ܠܗ̇ܘ ܕܝܼܠܹܐ ܣܢܝܼܩܵܐ. 29 ܟ̰ܘܼ ܗܹܡܸܙܡܵܢ ܣܪܝܼܬܵܐ ܡ̣ܢ ܦܘܼܡܵܘܟ݂ܘܿܢ ܠܵܐ ܦܵܠܛܵܐ: ܐܸܠܵܐ ܗ̇ܝ ܕܝܼܠܵܐ ܫܵܦܝܼܪܬܵܐ ܐܲܝܟ݂ ܠܒܸܢܝܵܢܵܐ ܕܣܢܝܼܩܘܼܬܵܐ ܗܵܘܝܵܐ: ܕܝܵܗ݇ܒ݂ܵܐ ܫܵܦܵܩܲܬ ܠܐܵܢܝܼ ܕܫܲܡܥܝܼ. 30 ܘܠܵܐ ܡܲܦܫܸܡܝܼܬܘܿܢ ܠܪܘܼܚܵܐ ܩܲܕܝܼܫܵܐ ܕܐܲܠܵܗܵܐ: ܕܦܸܫܠܵܘܟ݂ܘܿܢ ܡܸܚܝܹܐ ܡܵܘܗܪ ܒܝܼܹܗ ܠܝܘܿܡܵܐ ܕܦܘܼܪܩܵܢܵܐ. 31 ܟܠܵܗ̇ ܡܲܪܝܪܘܼܬܵܐ: ܘܟܲܪܒܵܐ ܘܪܘܼܓ݂ܙܵܐ: ܘܩܲܠܡܵܩܵܠ: ܘܓܘܼܕܵܦܵܐ: ܦܵܝܫܝܼ ܫܩܝܼܠܹܐ ܡܸܢܵܘܟ݂ܘܿܢ: ܥܲܡ ܟܠܵܗ̇ ܒܝܼܫܘܼܬܵܐ: 32 ܘܗܵܘܝܼܬܘܿܢ ܒܣܝܼܡܗܹܐ ܚܵܕ݇ ܠܟܸܣ ܗ̇ܘ ܐ݇ܚܹܪ݇ܢܵܐ: ܘܡܪ̈ܲܚܡܵܢܹܐ: ܒܸܫܒ݂ܵܩܵܐ ܚܵܕ݇ ܠܗ̇ܘ ܐ݇ܚܹܪ݇ܢܵܐ: ܕܐܵܟ݂ܝܼ ܕܐܲܠܐܵܗܵܐ ܒܡܫܝܼܚܵܐ ܫܒ݂ܸܩܠܹܐ ܐܸܠܲܢ.

ܩܦܠܐܘܢ: ܗ

1 ܗܵܘܝܼܬܘܿܢ ܗܲܕܟ݂ܵܐ ܕܵܡܝܵܢܹ̈ܐ ܠܐܲܠܵܗܵܐ ܐܲܝܟ݂ ܒܢܘܿܢܹ̈ܐ ܡܘܼܚܸܒܹ̈ܐ: 2 ܘܚܕܘܿܪܘܿܢ ܒܚܘܼܒܵܐ: ܐܲܝܟ݂ ܕܐܘܼܦ ܡܫܝܼܚܵܐ ܡܘܼܚܸܠܵܚܠܹܐ: ܘܣܘܼܦܝܵܝܠܹܐ ܓܵܢܹܗ ܡܒܵܕܵܠܲܢ: ܢܸܕܪܵܐ ܘܕܸܒ݂ܚܵܐ ܠܐܲܠܵܗܵܐ ܠܪܸܝܚܵܐ ܒܵܣܝܼܡܵܐ.

3 ܐܝܼܢܵܐ ܙܵܢܝܘܼܬܵܐ: ܘܟܠܵܗ̇ ܛܲܢܦܘܼܬܵܐ: ܘܛܲܡܲܥܟܵܪܘܼܬܵܐ: ܐܘܼܦ ܠܵܐ ܩܪܵܝܵܐ ܦܵܝܫܵܐ ܩܪܝܼܬܵܐ ܓܵܘܵܘܟ݂ܘܿܢ: ܐܲܝܟ݂ ܕܚܵܫܚܵܐ ܠܩܲܕܝܼܫܹ̈ܐ: 4 ܘܠܵܐ ܫܪܝܼܚܘܼܬܵܐ: ܘܠܵܐ ܗܹܡܸܙܡܵܢܹ̈ܐ ܕܐܲܗܡܲܩܘܼܬܵܐ: ܝܲܢ ܪܸܫܚܲܢܕܘܼܬܵܐ: ܐܲܢܹܐ ܕܠܹܐ ܝܢܵܐ ܒܸܠܚܵܡܵܐ: ܐܸܠܵܐ ܡܒܵܕܵܠ ܕܐܲܢܹܐ: ܫܵܟܲܪܬܵܐ. 5 ܣܵܒܵܒ ܕܐܵܗܵܐ ܒܝܼܕܲܥܝܵܐ ܝܬܘܿܢ: ܕܟܠ ܙܲܢܵܝܵܐ: ܝܲܢ ܛܲܢܦܵܐ: ܝܲܢ ܛܲܡܲܥܟܵܪ: ܕܝܼܠܹܐ ܣܵܓ݂ܕܵܢܵܐ ܕܨܵܢܲܡܹ̈ܐ: ܠܲܝܬ ܠܹܗ ܝܵܪܬܘܼܬܵܐ ܒܡܲܠܟܘܼܬܵܐ ܕܡܫܝܼܚܵܐ ܘܕܲܐܠܵܗܵܐ. 6 ܠܵܐ ܐ݇ܢܵܫܵܐ ܡܲܚܠܸܛ ܠܵܘܟ݂ܘܿܢ ܒܗܹܡܸܙܡܵܢܹ̈ܐ ܒܵܛܝܼ̈ܠܹܐ: ܣܵܒܵܒ ܒܝܼܸܕ ܐܲܢܹܐ ܒܹܐܬܵܝܵܐ ܝܠܵܐ ܟܲܪܒܹܗ ܕܐܲܠܵܗܵܐ ܥܲܠ ܒܢܘܼܢܹ̈ܐ ܕܠܵܐ ܡܲܨܝܲܬܬܵܐ. 7 ܒܲܣ ܠܵܐ ܗܵܘܝܼܬܘܿܢ ܥܲܡܵܝ ܫܵܪ̈ܝܼܟܹܐ. 8 ܣܵܒܵܒ ܩܲܕ݇ܡܵܝܬܵܐ ܚܘܼܒ݂ܝܵܐ ܝܬܘܿܢ ܗ݇ܘܵܘ: ܐܝܼܢܵܐ ܐܵܕܝܼܵܐ ܒܲܗܪܵܐ ܝܬܘܿܢ ܒܡܵܪܲܢ. ܐܲܝܟ݂ ܒܢܘܼܢܹ̈ܐ ܕܒܲܗܪܵܐ ܚܕܘܿܪܘܿܢ: 9 ـ ܣܵܒܵܒ ܛܥܘܼܢܵܝܬܹ̈ܐ ܕܪܘܼܚܵܐ ܒܟܠܵܗ̇ ܛܵܒ݂ܬܵܐ ܝܢܵܐ: ܘܙܲܕܝܼܩܘܼܬܵܐ ܘܣܲܪ̈ܣܬܘܼܬܵܐ: 10 ܘܗܵܘܝܼܬܘܿܢܒܸܦܪܵܫܵܐ ܡܘܼܕܝܼ ܝܠܹܐ ܫܵܦܝܼܪܵܐ ܩܵܕ݇ܡ ܡܵܪܲܢ. 11 ܘܠܵܐ ܗܵܘܝܼܬܘܿܢ ܫܵܪ̈ܝܼܟܹܐ ܥܲܡ ܦܘܼܠܚܵܢܹ̈ܐ ܕܚܘܼܒ݂ܝܵܐ ܕܒܹܐ ܛܥܘܼܢܝܵܬܹ̈ܐ ܝܢܵܐ: ܐܸܠܵܐ ܡܒܵܕܵܠ ܕܗܵܕܵܐ: ܗܵܘܝܼܬܘܿܢ ܡܲܢܟ݂ܘܼܣܵܝ: 12 ܣܵܒܵܒ ܡܸܢܕܝܼܵܢܹ̈ܐ ܕܒܛܸܫܘܵܐ ܥܒ݂ܝܼܕܹܐ ܝܢܵܐ: ܥܲܒܵܐ ܝܠܹܐ ܐܘܼܦ ܠܗܲܡܙܲܡܬܵܝ. 13 ܐܝܼܢܵܐ ܟܠ ܡܸܢܕܝܼ ܟܲܕ ܦܵܝܸܫ ܡܘܼܢܟ݂ܸܣܵܐ: ܒܝܼܸܕ݂ ܒܲܗܪܵܐ ܟܹܐ ܦܵܝܸܫ ܓܸܠܝܵܐ. ܣܵܒܵܒ ܟܠ ܡܸܢܕܝܼ ܕܝܼܠܹܐ ܓܸܠܝܵܐ: ܒܲܗܪܵܐ ܝܠܹܐ. 14 ܣܵܒܵܒ ܕܐܵܗܵܐ ܐܡܝܼܪܵܐ ܝܠܹܐ: ܪܥܘܿܫ: ܝܵܐ ܘܡܝܼܟ݂ܵܐ: ܘܩܘܼܡ݇ ܡ̣ܢ ܡܝܼܬܹ̈ܐ: ܘܒܸܬ ܒܲܗ݇ܪܸܢ ܐܸܠܘܼܟ݂ ܡܫܝܼܚܵܐ.

15 ܒܲܣ ܚܙܹܡܘܿܢ ܒܗܸܫܝܵܘܼܬܵܐ ܕܐܵܟ݂ܝܼ ܕܚܵܕܪܝܼܬܘܿܢ: ܠܵܐ ܐܲܝܟ݂ ܣܲܟ݂ܠܹ̈ܐ: ܐܸܠܵܐ ܐܲܝܟ݂ ܥܵܩܸܠܕܵܪܹ̈ܐ: 16 ܒܸܙܒ݂ܵܢܵܐ ܦܸܪܣܲܬ: ܣܵܒܵܒ ܕܝܘܿܡܵܢܹ̈ܐ ܒܝܼܫܹ̈ܐ ܝܢܵܐ: 17 ܣܵܒܵܒ ܕܐܵܗܵܐ ܠܵܐ ܗܵܘܝܼܬܘܿܢ ܟܝܼܡ ܚܝܼܵܠ: ܐܸܠܵܐ ܦܲܪܡܹܡܘܿܢ ܡܘܼܕܝܼ ܝܠܹܐ ܪܸܙܵܝܹܗ ܕܡܵܪܝܵܐ. 18 ܘܠܵܐ ܗܵܘܝܼܬܘܿܢ ܒܸܪܘܵܝܵܐ ܒܚܲܡܪܵܐ: ܕܒܝܼܹܗ ܐܝܼܬ ܐܵܣܘܿܛܘܼܬܵܐ: ܐܸܠܵܐ ܦܘܼܫܘܿܢ ܡܸܠܝܹܐ ܡ̣ܢ ܪܘܼܚܵܐ: 19 ܘܗܲܡܙܸܡܘܿܢ ܥܲܡ ܓܵܢܵܘܟ݂ܘܿܢ ܒܡܲܙܡܘܿܪܹ̈ܐ: ܘܒܬܸܫܒ̈ܚܵܬܵܐ: ܘܒܙܡܵܪ̈ܝܵܬܹܐ ܪ̈ܘܼܚܵܢܵܝܹܐ: ܫܵܒܘܿܚܹܐ ܘܒܸܙܡܵܪܵܐ ܒܠܸܒܵܘܵܬܵܘ̈ܟ݂ܘܿܢ ܠܡܵܪܝܵܐ. 20 ܘܗܵܘܝܼܬܘܿܢ ܫܵܟܘܿܪܹܐ ܒܟܠ ܙܲܒ݂ܢܵܐ ܥܲܠ ܟܠܵܝ ܡܸܢܕܝܵܢܹ̈ܐ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܠܐܲܠܵܗܵܐ ܒܵܒܵܐ. 21 ܘܗܵܘܝܼܬܘܿܢ ܙܲܒܛܘܼܢܹܐ ܓܵܢܵܘܟ݂ܘܿܢ ܚܵܕ݇ ܠܗ̇ܘ ܐܚܹܪ݇ܢܵܐ: ܒܙܕܘܼܥܬܹܗ ܕܡܫܝܼܚܵܐ.

22 ܒܲܟ݂ܬܵܬܹ̈ܐ: ܙܲܒܛܸܢܝܼܬܘܿܢ ܓܵܢܵܘܟ݂ܘܿܢ ܠܓܲܒ݂ܪ̈ܵܢܵܘܟ݂ܘܿܢ: ܐܲܝܟ݂ ܕܠܡܵܪܲܢ. 23 ܣܵܒܵܒ ܓܲܒ݂ܪܵܐ ܪܹܫܵܐ ܕܒܲܟ݂ܬܵܐ ܝܠܹܐ: ܕܐܵܟ݂ܝܼ ܕܐܘܼܦ ܡܫܝܼܚܵܐ ܪܹܫܵܐ ܕܥܹܕܬܵܐ ܝܠܹܐ: ܘܗ̇ܘ ܝܼܠܹܐ ܡܲܚܝܼܵܢܵܐ ܕܦܲܓ݂ܪܵܐ. 24 ܐܸܠܵܐ ܕܐܵܟ݂ܝܼ ܕܥܹܕܬܵܐ ܦܝܵܫܵܐ ܝܠܵܐ ܙܲܒܛ ܠܡܫܝܼܚܵܐ: ܗܲ݊ܟ݂ܵܐ ܐܘܼܦ ܒܲܟ݂ܬܵܬܹ̈ܐ ܠܓܲܒ݂ܪ̈ܵܢܵܝ ܒܟܠ ܡܸܢܕܝܼ. 25 ܓܲܒ݂ܪܹ̈ܐ: ܡܲܚܸܒܘܿܢ ܠܒܲܟ݂ܬܵܬܵܘ̈ܟ݂ܘܿܢ: ܐܲܝܟ݂ ܕܐܘܼܦ ܡܫܝܼܚܵܐ ܡܘܼܚܸܒܠܹܐ ܠܥܹܕܬܵܐ: ܘܓܵܢܹܗ ܣܘܼܦܝܵܠܹܐ ܒܚܵܬܸܪܵܗ̇: 26 ܕܩܵܕܸܫ ܗ݇ܘܵܐ ܠܵܗ̇: ܘܕܵܟܹܐ ܗ݇ܘܵܐ ܠܵܗ̇ ܒܣܵܚܵܝܬܵܐ ܕܡ̈ܝܼܵܐ ܒܗܹܡܸܙܡܵܢ: 27 ܕܡܲܩܸܡ ܗ݇ܘܵܐ ܠܵܗ̇ ܠܓܵܢܹܗ ܥܹܕܬܵܐ ܚܩܝܼܪܬܵܐ: ܕܠܲܬ ܒܝܼܵܗ̇ ܡܘܼܡܵܐ: ܘܠܵܐ ܩܲܪܡܲܟ̰ܬܵܐ: ܘܠܵܐ ܡܸܢܕܝܼ ܕܐܸܠܵܝ ܕܵܡܹܐ: ܐܸܠܵܐ ܕܗܵܘܝܵܐ ܩܲܕܝܼܫܬܵܐ ܕܠܵܐ ܡܘܼܡܵܐ. 28 ܗܲܕܟ݂ܵܐ ܘܵܓ̰ܸܒ ܝܼܠܵܐ ܠܓܲܒ݂ܪܹ̈ܐ ܕܡܲܚܸܒܝܼ ܒܲܟ݂ܬܵܬܹ̈ܐ ܕܓܵܢܵܝ ܐܲܝܟ݂ ܕܠܦܲܓ݂ܪܹ̈ܐ ܕܓܵܢܵܝ. ܗ̇ܘ ܕܡܲܚܸܒ ܠܒܲܟ݂ܬܵܐ ܕܓܵܢܹܗ: ܠܓܵܢܹܗ ܡܲܚܘܼܒܹܐ ܝܠܹܐ. 29 ܣܵܒܵܒ ܐ݇ܢܵܫܵܐ ܗܲܪ ܠܹܐ ܣܵܢܹܐ ܠܦܲܓ݂ܪܹܗ: ܐܸܠܵܐ ܟܹܐ ܬܲܪܣܹܐ ܠܹܗ: ܘܟܹܐ ܐܵܟ݂ܸܠ ܚܲܡ ܕܝܼܹܗ: ܐܲܝܟ݂ ܕܐܘܼܦ ܡܫܝܼܚܵܐ ܕܥܹܕܬܵܐ: 30 ܣܵܒܵܒ ܗܲܕܵܡܹ̈ܐ ܕܦܲܓ݂ܪܹܗ ܝܘܵܚ: ܘܡ̣ܢ ܒܸܣܪܹܗ ܝܘܵܚ ܘܡ̣ܢ ܓܲܪܡܘܼܗܝ. 31 ܣܵܒܵܒ ܕܐܵܗܵܐ ܒܸܬ ܫܵܒ݂ܸܩ ܐ݇ܢܵܫܵܐ ܠܒܵܒܹܗ ܘܠܝܸܡܹܗ ܘܒܸܬ ܬܲܒܸܥ ܠܒܲܟ݂ܬܹܗ: ܘܒܸܬ ܗܵܘܝܼ ܬܸܪܘܵܝ ܚܲܕ݇ ܒܸܣܪܵܐ. 32 ܐܵܗܵܐ ܣܸܪ ܓܘܼܪܵ ܝܠܹܐ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܒܵܗ݇ܣ ܕܡܫܝܼܚܵܐ ܘܒܵܗ݇ܣ ܕܥܹܕܬܹܗ. 33 ܐܝܼܢܵܐ ܐܘܼܦ ܐܲܚܬܘܿܢ ܟܠ ܚܵܕ݇ ܚܵܕ݇ ܡܸܢܵܘܟ݂ܘܿܢ ܗܲܕܟ݂ܵܐ ܡܲܚܸܒ ܠܒܲܟ݂ܬܵܐ ܕܓܵܢܹܗ ܐܲܝܟ݂ ܕܠܓܵܢܹܗ: ܐܝܼܢܵܐ ܒܲܟ݂ܬܵܐ ܗܵܘܝܵܐ ܒܸܙܕܲܥܝܵܐ ܡ̣ܢ ܓܲܒ݂ܪܘܼܗ̇.

ܩܦܠܐܘܢ: ܘ

1 ܒܢܘܿܢܹ̈ܐ: ܡܲܨܝܸܬܘܿܢ ܠܒܵܒܵܘܵܬܵܘ̈ܟ݂ܘܿܢ ܒܡܵܪܲܢ: ܣܵܒܵܒ ܕܐܵܗܵܐ ܗܲܩ ܝܼܠܵܐ. 2 ܥܒ݂ܘܿܕ ܐܝܼܩܵܪܵܐ ܠܒܵܒܘܼܟ݂ ܘܠܝܸܡܘܼܟ݂: ـ ܕܝܼܠܹܐ ܦܘܼܩܕܵܢܵܐ ܩܵܕ݇ܡܵܝܵܐ ܥܲܡ ܩܵܘܠܵܐ: 3 ܕܗܵܘܝܵܐ ܠܘܼܟ݂ ܗ̇ܝ ܕܝܼܠܵܐ ܨܦܵܝܝܼ: ܘܝܵܪܟ݂ܝܼ ܚܲܝܘܼ̈ܟ݂ ܥܲܠ ܐܲܪܥܵܐ. 4 ܘܒܵܒܵܘܵܬܹ̈ܐ: ܠܵܐ ܡܲܟܪܸܒ݁ܝܼܬܘܿܢ ܠܝܵܠܵܘ̈ܟ݂ܘܿܢ: ܐܸܠܵܐ ܓܲܪܘܸܣܘܿܢ ܠܗ݇ܘܿܢ ܒܬܲܥܠܲܡܬܵܐ ܘܒܝܘܼܠܦܵܢܵܐ ܕܡܵܪܲܢ.

5 ܪܹ̈ܓܵܘܵܬܹܐ: ܡܲܨܝܸܬܘܿܢ ܠܐܵܓ݂ܵܝܵܘ̈ܟ݂ܘܿܢ ܕܒܒܸܣܪܵܐ: ܒܙܕܘܼܥܬܵܐ ܘܒܪܲܬܪܲܬܬܵܐ: ܘܒܦܫܝܼܛܘܼܬܵܐ ܕܠܸܒܵܘܟ݂ܘܿܢ: ܐܲܝܟ݂ ܕܠܡܫܝܼܚܵܐ: 6 ܠܐܵ ܒܚܙܵܝܬܵܐ ܕܥܲܝܢܵܐ: ܐܲܝܟ݂ ܫܵܦܪ̈ܵܢܹܐ ܠܒܢܲܝ̈ܢܵܫܵܐ: ܐܸܠܵܐ ܐܲܝܟ݂ ܪܹ̈ܓܵܘܵܬܹܐ ܕܡܫܝܼܚܵܐ ܕܥܵܒ݂ܕܝܼ ܪܸܙܵܝܹܗ ܕܐܲܠܵܗܵܐ ܡ̣ܢ ܠܸܒܵܐ: 7 ܘܥܒ݂ܘܿܕܘܿܢ ܠܗ݇ܘܿܢ ܚܸܠܡܲܬ ܒܚܘܼܒܵܐ: ܐܲܝܟ݂ ܕܠܡܵܪܲܢ ܘܠܵܐ ܐܲܝܟ݂ ܕܠܒܢܲܝ̈ܢܵܫܵܐ: 8 ܟܲܕ ܝܲܕܥܝܼܬܘܿܢ ܕܗ̇ܘ ܡܸܢܕܝܼ ܫܵܦܝܼܪܵܐ ܕܥܵܒܸܕ ܐ݇ܢܵܫܵܐ: ܗܲܪ ܗ̇ܘ ܟܹܐ ܦܵܝܸܫ ܦܸܪܥܝܵܐ ܡ̣ܢ ܡܵܪܲܢ: ܐܸܢ ܪܸܓܵܐ ܘܐܸܢ ܐܵܙܵܕ. 9 ܐܘܼܦ ܐܲܚܬܘܿܢ: ܐܵܓ݂ܵܝܹ̈ܐ: ܗܲܕܟ݂ܵܐ ܥܒ݂ܘܿܕܘܿܢ ܐܸܠܵܝ: ܒܸܫܠܵܝܵܐ ܡ̣ܢ ܓܸܙܡܹ̈ܐ: ܣܵܒܵܒ ܒܝܼܪܸܥܝܵܐ ܝܬܘܿܢ ܕܡܵܪܵܐ ܕܐܵܢܝܼ ܘܕܝܼܵܘܟ݂ܘܿܢ ܒܫܡܲܝܵܐ ܝܠܹܐ: ܘܚܙܵܝܬܵܐ ܕܦܵܬܵܐ ܠܲܝܬ ܠܟܸܣܠܹܗ.

10 ܡܐܵܕܝܼܵܐ: ܐܵܚܘܿܢܘܵܬܝܼ̈: ܚܲܠܸܢܘܿܢ ܒܡܵܪܲܢ: ܘܒܙܲܪܒ ܕܚܲܝܠܹܗ. 11 ܠܒ݂ܘܿܫܘܿܢ ܟܠܹܗ ܟ̰ܲܟܵܐ ܕܐܲܠܵܗܵܐ: ܕܡܵܨܝܼܬܘܿܢ ܠܸܟܠܵܝܵܐ ܩܵܕ݇ܡ ܦܲܢܕܹ̈ܐ ܕܐܵܟ݂ܹܠܩܲܪܨܵܐ. 12 ܣܵܒܵܒ ܦܠܵܫܵܘܟ݂ܘܿܢ ܠܹܐ ܝܠܹܐ ܥܲܡ ܕܸܡܵܐ ܘܒܸܣܪܵܐ: ܐܸܠܵܐ ܥܲܡ ܐܲܪ̈ܟܘܿܣ ܘܥܲܡ ܫܘܼܠܛܵܢܹ̈ܐ: ܘܥܲܡ ܕܵܒ݂ܩܵܢܹ̈ܐ ܕܥܵܠܡܵܐ ܕܐܵܗܵܐ ܚܘܼܒ݂ܝܵܐ: ܘܥܲܡ ܪ̈ܘܼܚܵܬܹܐ ܒܝܼܫܹ̈ܐ ܕܬܚܘܿܬ ܫܡܲܝܵܐ. 13 ܣܵܒܵܒ ܕܐܵܗܵܐ ܠܒ݂ܘܿܫܘܿܢ ܟܠܹܐ ܟ̰ܲܟܵܐ ܕܐܲܠܵܗܵܐ: ܕܡܵܨܝܼܬܘܿܢ ܟܵܠܝܼܬܘܿܢ ܕܲܪܩܘܼܒ݂ܠ ܒܝܘܿܡܵܐ ܒܝܼܫܵܐ: ܘܟܲܕ݂ ܥܒܸܕܠܵܘܟ݂ܘܿܢ ܟܠ ܡܸܢܕܝܼ: ܕܟܵܠܝܼܬܘܿܢ. 14 ܟܠܹܡܘܿܢ ܗܲܕܟ݂ܵܐ: ܘܚܠܘܿܨܘܿܢ ܚܵܨܵܘܟ݂ܘܿܢ ܒܣܲܪ̈ܣܬܘܼܬܵܐ: ܘܠܒ݂ܘܿܫܘܿܢ ܓܲܝܸܡܟ̰ܵܪܵܐ ܕܙܲܕܝܼܩܘܼܬܵܐ: 15 ܘܠܒ݂ܘܿܫܘܿܢ ܒܐܲܩܠܵܘ̈ܟ݂ܘܿܢ ܗܕܵܪܹܗ ܕܐܹܘܵܢܓܵܠܝܼܘܿܢ ܕܫܠܵܡܵܐ: 16 ܘܥܲܡ ܟܠܵܝ: ܫܩܘܿܠܘܿܢ ܠܵܘܟ݂ܘܿܢ ܡܲܛܵܠܵܐ ܕܗܲܝܡܵܢܘܼܬܵܐ: ܘܒܝܼܵܗ̇ ܡܵܨܝܼܬܘܿܢ ܠܡܲܟ̰ܡܘܼܝܹܐ ܟܠܵܝ ܓܹܐܪܹ̈ܐ ܠܲܗ݇ܝܵܢܹ̈ܐ ܕܒܝܼܫܵܐ. 17 ܘܫܩܘܿܠܘܿܢ ܬܲܣܟܸܠܵܘ ܘܦܘܼܪܩܵܢܵܐ: ܘܣܲܝܦܵܐ ܕܪܘܼܚܵܐ: ܕܝܼܠܹܐ ܗܹܡܸܙܡܵܢ ܕܐܲܠܵܗܵܐ: 18 ܘܒܟܠܵܝ ܨܠܵܘܵܬܹ̈ܐ ܘܦܲܪ̈ܦܲܠܝܵܬܹܐ ܨܵܠܡܘܿܢ ܒܟܠ ܙܲܒ݂ܢܵܐ ܒܪܘܼܚܵܐ: ܘܗܲܪ ܒܐܵܗܵܐ ܗܵܘܝܼܬܘܿܢ ܒܸܥܒ݂ܵܕܵܐ ܫܵܗܲܪܬܵܐ ܒܟܠ ܚܡܵܠܬܵܐ ܘܦܲܪܦܲܠܬܵܐ ܡܒܵܕܵܠ ܕܟܠܵܝ ܩܲܕܝܼܫܹ̈ܐ: 19 ܐܘܼܦ ܡܒܵܕܵܠ ܕܝܼܝܼ: ܕܦܵܝܫܵܐ ܝܸܗܒܸܠܬܵܐ ܐܸܠܝܼ ܗܹܡܸܙܡܵܢ ܒܦܬܵܚܬܵܐ ܕܦܘܼܡܝܼ: ܕܒܓ̰ܘܼܪܐܲܬ ܡܲܟܪܸܙܸܢ ܣܸܪ ܕܐܹܘܵܢܓܵܠܝܼܘܿܢ: 20 ܗ̇ܘ ܕܐܵܢܵܐ ܐܲܝܠܟ̰ܝܹܗ ܝܘܸܢ ܒܫܸܫ̈ܠܵܬܵܐ: ܕܒܒܸܣܬܵܝܘܼܬܵܐ ܗܲܡܙܸܡܸܢܹܗ: ܐܲܝܟ݂ ܕܝܼܠܵܐ ܘܵܓ̰ܸܒ ܐܸܠܝܼ ܠܗܲܡܙܘܼܡܹܗ.

21 ܐܝܼܢܵܐ ܕܝܲܕܥܝܼܬܘܿܢ ܐܘܼܦ ܐܲܚܬܘܿܢ ܡܸܢܕܝܼܵܢܹ̈ܐ ܕܠܟܸܣܠܝܼ: ܘܕܵܐܟ݂ܝܼ ܒܸܗ݇ܘܵܝܵܐ ܝܘܸܢ: ܒܸܬ ܡܲܕܸܥ ܠܵܘܟ݂ܘܿܢ ܟܠܵܝ ܛܘܼܟ݂ܝܼܩܘܿܣ: ܐܵܚܘܿܢܵܐ ܡܘܼܚܸܒܵܐ ܘܚܸܠܡܲܬܟܵܪ ܡܗܘܼܡܢܵܐ ܒܡܵܪܲܢ: 22 ܕܐܹܠܹܗ ܫܘܼܕܸܪܝܼ ܠܟܸܣܠܵܘܟ݂ܘܿܢ ܗܲܪ ܣܵܒܵܒ ܕܐܵܗܵܐ: ܕܝܲܕܥܝܼܬܘܿܢ ܡܸܢܕܝܼ ܕܠܟܸܣܠܲܢ: ܘܕܝܵܗ݇ܒܸܠ ܠܸܒܵܐ ܠܠܸܒܵܘܵܬܵܘ̈ܟ݂ܘܿܢ.

23 ܫܠܵܡܵܐ ܥܲܡ ܐܵܚܘܿܢ̈ܘܵܬܲܢ: ܘܚܘܼܒܵܐ ܥܲܡ ܗܲܝܡܵܢܘܼܬܵܐ: ܡ̣ܢ ܐܲܠܵܗܵܐ ܒܵܒܵܐ: ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ. 24 ܫܵܦܵܩܲܬ ܥܲܡ ܟܠܵܝ ܐܵܢܝܼ ܕܡܲܚܸܒܝܼ ܠܡܵܪܲܢ ܝܼܫܘܿܥ ܡܫܝܼܚܵܐ ܒܠܵܐ ܚܪܵܒ݂ܵܐ: ܐܵܡܹܝܢ.