ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܦܘܠܘܣ ܫܠܝܚܐ ܕܠܘܬ ܓܠܛܝ̈ܐ

ܩܦܠܐܘܢ: ܐ

1 ܦܵܘܠܘܿܣ: ܫܠܝܼܚܵܐ: ܠܵܐ ܡ̣ܢ ܒܢܲܝܼܢܵܫܵܐ: ܘܠܵܐ ܒܝܸܕܼ ܒܲܪܢܵܫܵܐ: ܐܸܠܵܐ ܒܝܸܕܼ ܝܼܫܘܿܥ ܡܫܝܼܚܵܐ: ܘܐܲܠܵܗܵܐ ܒܵܒܵܐ: ܗܵܘ ܕܡܘܼܩܡܠܹܗ ܡ̣ܢ ܡܝܼܬܹ̈ܐ: 2 ܘܟܠܵܝ ܐܵܚܘܿܢܘܵܬܹ̈ܐ ܕܥܲܡܝ: ܠܥܹܕܬܹ̈ܐ ܕܐܝܼܬܼ ܓܵܘ ܓܵܠܵܛܝܼܵܐ: 3 ܫܵܦܲܩܲܬ ܥܲܡܵܘܟܼܘܿܢܘܫܠܵܡܵܐ ܡ̣ܢ ܐܲܠܵܗܵܐ ܒܵܒܵܐ ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ: 4 ܗܵܝ ܕܝܸܗܒܼܵܠܹܐ ܓܵܢܹܗ ܡܒܵܕܵܠ ܕܚܛ̈ܝܵܬܲܢ: ܕܦܵܨܹܐ ܗ̄ܘܵܐ ܠܲܢ ܡܐܵܗܵܐ ܥܵܠܡܵܐ ܒܝܼܫܵܐ: ܐܲܝܟܼ ܪܸܙܵܝܹܗ ܕܐܲܠܵܗܵܐ ܒܵܒܲܢ: 5 ܕܐܸܠܹܗ ܫܘܼܒܼܚܵܐ ܠܥܵܠܲܡ ܥܵܠܡܝܼܢ 6 ܥܵܓ̰ܘܿܒܹܐ ܝܘܸܢ ܕܵܐܟܼܝܼ ܓ̰ܵܠܕܹܐ ܒܸܕܝܵܪܵܐ ܝܬܘܿܢ ܡ̣ܢ ܕܗܵܘ ܕܩܵܡ ܩܵܪܹܐ ܠܵܘܟܼܘܿܢ ܒܫܵܦܵܩܲܬܹܗ ܕܡܫܝܼܚܵܐ: ܠܐܹܘܵܢܓܵܠܝܘܿܢ ܐܚܹܪܬܵܐ: 7 ܗ̇ܝ ܕܠܹܐ ܝܠܵܐ ܐܚܹܪ̄ܬܵܐ ܐܸܠܵܐ ܐܝܼܬܼ ܐܢܵܫܹ̈ܐ ܕܒܸܚܒܼܵܛܵܐ ܝܢܵܐ ܐܸܠܵܘܟܼܘܿܢ: ܘܒܸܒܲܥܝܵܐ ܝܢܵܐ ܕܫܲܚܠܸܦܝܼ ܐܹܘܲܢܓܵܠܝܘܿܢ ܕܡܫܝܼܚܵܐ. 8 ܐܝܼܢܵܐ ܐܘܼܦ ܐܸܢ ܐܲܚܢܲܢ: ܝܲܢ ܡܲܠܲܐܟܼܵܐ ܡ̣ܢ ܫܡܲܝܵܐ: ܡܲܫܚܸܕ ܠܵܘܟܼܘܿܢ ܠܒܲܕܲܪ ܡ̣ܢ ܡܸܢܕܝܼ ܕܡܘܼܫܚܸܕܠܲܢ ܐܸܠܵܘܟܼܘܿܢ: ܗܵܘܹܐ ܡܘܼܚܕܲܡܵܐ. 9 ܕܵܐܟܼܝܼ ܕܡܩܲܕ̄ܡܲܝܬܵܐ ܐܡܸܪܲܢ ܘܐܵܕܝܵܐ ܡܸܕܪܸܐ ܒܹܐܡܵܪܵܐ ܝܘܸܢ: ܕܐܸܢ ܐܢܵܫܵܐ ܡܲܫܚܸܕ ܠܵܘܟܼܘܿܢ ܠܒܲܕܲܪ ܡ̣ܢ ܡܸܢܕܝܼ ܕܩܘܼܒܲܠܵܘܟܼܘܿܢ: ܗܵܘܹܐ ܡܘܼܚܪܸܡܵܐ. 10 ܣܵܒܵܒ ܐܵܕܝܵܐ ܠܒܼܢܲܝܼܢܵܫܵܐ ܒܸܥܒܼܵܕܼܵܐ ܝܘܸܢ ܪܵܙܝܼ: ܝܲܢ ܠܒܼܢܲܝܼܢܵܫܵܐ ܒܸܒܲܥܝܵܐ ܝܼܘܸܢ ܕܫܵܦܪܲܢ: ܣܵܒܵܒ ܐܸܢ ܗܲܠ ܐܵܕܝܵܐ ܠܒܼܢܲܝ̈ܢܵܫܵܐ ܫܵܦܪܲܢ ܗ̄ܘܵܐ: ܪܸܓܵܐ ܕܡܫܝܼܚܵܐ ܠܹܐ ܗܵܘܹܢ ܗ̄ܘ̣ܵܐ. 11 ܐܝܼܢܵܐ ܡܲܕܘܼܥܝܹܐ ܝܘܸܢ ܐܸܠܵܘܟܼܘܿܢ: ܐܵܚܘܿܢܘܵܬܝ̈: ܕܡܲܫܚܲܕܬܵܐ ܕܦܸܫܠܵܐ ܡܘܼܫܚܸܕܬܵܐ ܡܸܢܝܼ: ܠܹܐ ܗ̄ܘܼܵܐ ܡ̣ܢ ܒܲܪܢܵܫܵܐ. 12 ܣܵܒܵܒ ܐܘܼܦ ܐܵܢܵܐ ܡ̣ܢ ܒܲܪܢܵܫܵܐ ܠܵܐ ܩܘܼܒܸܠܵܠܝܼ ܘܝܼܠܝܼܦܵܠܝܼ: ܐܸܠܵܐ ܒܝܸܕܼ ܓܸܠܝܵܢܵܐ ܕܝܼܫܘܿܥ ܡܫܝܼܚܵܐ: 13 ܣܵܒܵܒ ܕܫܡܸܥܠܵܘܟܼܘܿܢ ܚܕܵܪ̈ܝܼ ܕܡ̣ܢ ܩܵܕ̄ܡܵܝܬܵܐ ܕܒܝܗ̄ܘܕܵܝܘܼܬܵܐ: ܕܒܹܐ ܗܲܕܼ ܟܹܐ ܛܵܪܕܪܹܝܢ ܗ̄ܘܵܐ ܠܥܹܕܬܹܗ ܕܐܲܠܵܗܵܐ: ܘܟܹܐ ܡܲܚܪܸܒܸܢ ܗ̄ܘܵܐ ܠܵܗ. 14 ܘܟܹܐ ܙܵܝܕܹܝܢ ܗ̄،̣ܵܐ ܒܝܗ̄ܘܼܕܵܝܘܼܬܼܵܐ ܙܵܘܕܵܐ ܡ̣ܢ ܪܵܒܵܐ ܚܲܒܼܪ̈ܵܘܵܬܼܝܼ ܒܫܸܢܹ̈ܐ ܕܝܼܗ̄ܘܵܘ ܒܛܘܿܗܡܝܼ: ܘܪܵܒܵܐ ܩܲܝܼܪܲܬܟܲܫ ܝܘܸܢ ܗ̄ܘ̣ܵܐ ܒܣܵܦܝܵܢܘܼܝܵܬܹ̈ܐ ܕܒܵܒܵܘܵܬܝܼ̈. 15 ܐܝܼܢܵܐ ܟܲܕܼ ܒܣܸܡܠܵܐ ܠܹܗ ܐܲܠܵܗܵܐ: ܗܵܘ ܕܦܪܝܼܫܸܢܹܐ ܡ̣ܢ ܟܹܪ̄ܣܵܐ ܕܝܸܡܝܼ: ܘܩܸܪܝܸܢܹܐ ܒܫܵܦܲܩܲܬܹܗ: 16 ܕܓܵܠܹܐ ܒܪܘܼܢܹܗ ܒܝܼܝܼ: ܕܡܲܫܚܸܕܸܢ ܗ̄ܘܵܐ ܠܹܗ ܓܵܘ ܛܵܝܸܦܹ̈ܐ: ܕܲܪܣܲܥܲܬ ܠܵܐ ܥܒܸܕܠܝܼ ܪܵܐܝܝܼ ܥܲܡ ܒܸܣܪܵܐ ܘܕܸܡܵܐ: 17 ܘܠܵܐ ܐܣܸܩܠܝܼ ܠܐܘܿܪܸܫܠܸܡ ܠܟܸܣ ܫܠܝܼܚܹ̈ܐ ܕܝܼܗ̄ܘܵܘ ܡ̣ܢ ܩܵܕ̄ܡ ܕܝܝܼ: ܐܸܠܵܐ ܐܙܸܠ ܠܐܵܪܒܝܵܐ: ܘܡܸܕܪܸܐ ܕܪܝܼ ܠܕܲܪܡܣܘܿܩ. 18 ܠܟܹܐܦܵܐ ܘܥܘܼܪܩܸܠܝܼ ܠܟܸܣܠܹܗ ܚܲܡܫܲܥܣܲܪ ܝܘܿܡܵܢܹ̈ܐ. ܐܝܼܢܵܐ ܠܐܚܹܪ̄ܢܵܐ ܡ̣ܢ ܫܠܝܼܚܹ̈ܐ ܠܵܐ ܚܙܝܼܠܝ: ܫܒܼܘܿܩ ܡ̣ܢ ܝܲܥܩܘܿܒܼ ܐܵܚܘܿܢܹܗ ܕܡܵܪܲܢ. 20 ܐܝܼܢܵܐ ܐܲܢܹܐ ܕܒܸܟܬܵܒܼܵܐ ܝܘܸܢ ܐܸܠܵܘܟܼܘܿܢ: ܗܵܐ 21 ܩܵܕ̄ܡ ܐܲܠܵܗܵܐ ܠܹܐ ܝܘܸܢ ܕܵܓܘܿܠܹܐ. ܘܡ̣ܢ ܒܵܬ̄ܪ ܐܲܢܸܐ ܐܬܹܠܝܼ ܠܐܲܬܪ̈ܵܘܵܬܝܼ ܕܣܘܼܪܝܵܐ ܘܕܝܼܩܝܼܠܝܼܩܝܵܐ. 22 ܘܠܹܐ ܗ̄ܘܵܘ ܒܝܼܕܲܥܝܝܼ 23 ܐܚܕܝܼ ܫܸܡܥܝܹܐ ܗ̄ܘܵܘ: ܕܗ̇ܘܼ ܩܲܕܡܵܝܼܬܵܐ ܟܹܐ ܛܵܪܸܕ ܗ̄ܘܵܐ ܠܲܢ: ܐܵܕܝܵܐ ܡܲܫܚܘܼܕܹܐ ܝܠܹܐ ܗܲܝܼܡܵܢܘܼܬܼܵܐ ܗ̇ܝ ܕܡ̣ܢ ܚܵܕ̄ ܙܲܒܼܢܵܐ ܟܹܐ ܬܵܠܲܚ ܗ̄ܘ̣ܵܐ. 24 ܘܫܵܒܚܝܼ ܗ̄ܘ̣ܵܐ ܗ̄ܘ̣ܵܘ ܒܝܝܼ ܠܐܲܠܵܗܵܐ.

ܩܦܠܐܘܢ: ܒ

1 ܘܡܸܕܪܸܐ ܡ̣ܢ ܒܵܬ̄ܪ ܐܲܪܒܲܥܣܲܪ ܫܸܢܹ̈ܐܧ ܐܣܸܩܠܝܼ ܠܐܘܿܪܸܫܠܸܡ ܥܲܡ ܒܲܪܢܒܼܵܐ: ܘܠܘܿܒܸܠܝܼ ܥܲܡܝܼ ܠܛܸܛܘܿܣ. 2 ܘܐܣܩܠܝܼ ܒܓܸܠܝܵܢܵܐ: ܘܡܘܼܕܥܠܝܼ ܐܸܠܵܝ ܐܹܘܲܢܓܵܠܝܘܿܢ ܕܡܲܟܪܘܼܙܹܐ ܝܘܸܢܓܵܘܵܐ ܕܛܵܝܦܹ̈ܐ: ܐܝܼܢܵܐ ܠܐܵܢܝܼ ܒܢܲܦ̮ܫܵܝ ܕܦܝܵܫܵܐ ܗ̄ܘ̣ܵܘ ܚܫܝܼܒܹܐ ܕܡܸܢܕܝܼ ܝܢܵܐ: ܠܵܐ ܗ̄ܘܹܐ ܕܗܵܒܵܣ ܪܚܸܛܠܝܼ: ܝܲܢ ܗ̄ܘ̣ܵܐ: ܠܵܐ ܦܸܫܠܹܐ ܡܘܼܠܝܸܨܵܐ ܕܗܵܘܹܐ ܗ̄ܘܵܐ ܓܙܝܼܪܵܐ. 3 ܗ̄ܘ̣ܵܐ: ܠܵܐ ܦܸܫܠܹܐ ܡܘܼܠܝܸܨܵܐ ܕܗܵܘܹܐ ܗ̄ܘܵܐ ܓܙܝܼܪܵܐ. 4 ܐܝܼܢܵܐ ܣܵܒܵܒ ܕܐܵܚܘܿܢܘܵܬܹ̈ܐ ܕܓܵـ̈ܠܹܐ ܕܝܼܗ̄ܘܵܘ ܡܘܼܐܘܸܪܸܐ: ܐܵܢܝܼ ܕܐܘܸܪܘܿܢ ܒܛܸܫܘܵܐ ܠܓܲܣܘܼܣܸܐ ܐܵܙܵܕܘܼܬܲܢ ܕܐܝܼܬܼ ܠܲܢ ܒܝܼܫܘܿܥ: ܕܙܲܒܛܸܢܝܼ ܗ̄ܘ̣ܵܐ ܠܲܢ: 5 ܠܐܵܢܝ ܠܵܐ ܚܕܼܵܐ ܣܵܥܲܬ ܡܘܼܨܝܸܬܠܲܢ ܠܙܲܒܛܘܼܬܼܵܐ: ܕܣܲܪܲܣܬܘܼܬܵܐ ܕܐܹܘܲܢܓܵܠܝܘܿܢ ܥܲܪܩܸܠܵܐ ܗ̄ܘ̣ܵܐ ܠܟܸܣܠܵܘܟܼܘܿܢ. 6 ܐܝܼܢܵܐ ܐܵܢܝܼ ܕܦܝܵܫܵܐ ܝܢܵܐ ܚܫܝܼܒܹܐ ܕܡܸܢܕܝܼ ܝܢܵܐ: ܐܵܢܵܐ ܠܲܝܬ ܠܝܼ ܚܲܡ ܡܘܼܕܝܼ ܝܢܵܐ: ܣܵܒܵܒ ܐܲܠܵܗܵܐ ܦܵܬܵܐ ܡ̣ܢ ܐܢܵܫܵܐ ܠܹܐ ܚܵܙܹܐ: ܣܵܒܵܒ ܐܵܢܝܼ: ܕܟܹܐ ܦܵܝܼܫܝܼ ܚܫܝܼܒܹܐ ܡܸܢܕܝܼ: ܠܵܐ ܡܘܼܙܝܕܠܘܿܢ ܐܸܠܝܼ ܡܸܢܕܝܼ: 7 ܐܸܠܵܐ ܡܒܵܕܵܠ ܕܗܵܕܵܐ: ܣܵܒܵܒ ܕܚܙܹܠܘܿܢ ܕܦܸܫܠܵܐ ܣܘܼܦܝܼܬܼܵܐ ܐܸܠܝܼ ܡܲܫܚܲܕܬܵܐ ܕܥܘܼܪܠܘܼܬܵܐ: ܐܲܝܼܟ 8 ܕܠܟܹܐܦܵܐ ܕܓܙܘܼܪܬܵܐ: ܚܘܼܒܸܛܠܹܐ ܐܘܼܦ ܒܝܝܼ ܠܛܵܝܸܦܹ̈ܐ: 9 ܘܟܲܕܼ ܝܕܸܥܥܠܘܿܢ ܫܵܦܵܩܲܬ ܕܦܸܫܠܵܐ ܝܸܗܒܸܠܬܵܐ ܐܸܠܝܼ: ܝܲܥܩܘܿܒܼ ܘܟܹܐܦܵܐ ܘܝܘܿܚܲܢܵܢ: ܐܵܢܝܼ ܕܦܝܵܫܵܐ ܗ̄ܘ̣ܵܘ ܚܫܝܼܒܹܐ ܕܣܛܘܼܢܹ̈ܐ ܗ̄ܘ̣ܵܘ: ܝܲܡܝܼܢܵܐ ܕܫܵܪܝܼܟܼܘܼܬܵܐ ܝܸܗܒܸܠܘܿܢ ܐܸܠܝܼ ܘܠܒܲܪܢܒܼܵܐ: ܕܐܲܚܢܲܢ ܓܵܘ ܛܲܝܸܦܹ̈ܐ ܕܐܵܢܝܼ ܓܵܘ ܓܙܘܼܪܬܵܐ: 10 ܐܲܚܟ̰ܝܼ (ܒܸܥܠܘܿܢ) ܕܠܡܸܣܟܹܢܹ̈ܐ ܗܵܘܵܚ ܗ̄ܘ̣ܵܐ ܗ̄ܘ̣ܵܐ ܒܸܕܟܼܵܪܵܐ: ܗܲܪ ܗܵܝܼ ܕܐܘܼܦ ܐܢܵܐ ܒܚܲܡ ܝܼܘܸܢ ܗ̄ܘ̣ܵܐ ܠܥܸܒܼܵܕܘܼܗ̇. 11 ܐܝܼܢܵܐ ܟܲܕܼ ܐܬܹܠܵܐ ܟܹܐܦܵܐ ܠܐܲܢܛܝܘܿܟܼܝܼ: ܒܦܵܬܹܗ ܩܸܡܠܝܼ ܠܕܲܪܩܘܼܠܹܗ: ܣܵܒܵܒ ܕܗ̄ܘܝܵܐ ܗ̄ܘ̣ܵܐ ܓܘܼܢܵܗܟܵܪ: 12 ܣܵܒܵܒ ܕܗܹܫ ܠܵܐ ܐܬܵܝܵܐ ܐܢܵܫܹ̈ܐ ܡ̣ܢ ܠܟܸܣ ܝܲܥܩܿܒܼ: ܥܲܡ ܛܵܝܦܹ̈ܐ ܟܹܐ ܐܵܟܸܠ ܗ̄ܘ̣ܵܐ: ܟܹܐ ܐܵܟܸܠ ܗ̄ܘܵܐ: ܐܝܼܢܵܐ ܟܲܕܼ ܐܬܹܠܿܢ: ܓܪܝܼܫܵܠܹܐ ܓܵܢܹܗ ܘܦܪܸܫܠܹܐ: ܣܵܒܵܒ ܕܟܹܐ ܙܵܕܥ ܗ̄ܘ̣ܵܐ ܡܐܵܢܝܼ ܕܡ̣ܢ ܓܙܘܼܪܬܵܐ. 13 ܘܫܘܼܪܟܠܘܿܢ ܥܲܡܹܗ ܒܐܵܗܵܐ ܐܘܼܦ ܝܗ̄ܘܼܕܵܝܹ̈ܐ ܐ̄ܚܪܹ̈ܢܹܐ: ܕܵܐܟܼܝܼ ܕܐܘܼܦ ܒܲܪܢܒܼܵܐ ܦܸܫܠܹܐ ܠܘܼܒܠܵܐ ܠܡܲܣܲܒܼ ܒܲܐܦܘܼܬܵܐ ܕܐܵܢܝܼ. 14 ܐܸܠܵܐ ܟܲܕܼ ܚܹܠܝܼ ܕܠܹܐ ܗ̄ܘ̣ܵܘ ܒܹܐܙܵܠܵܐ ܬܪܘܼܨܵܐ ܒܣܲܪܲܣܬܘܼܬܵܐ ܕܐܹܲܢܓܵܠܝܘܿܢ: ܐܡܸܪܝܼ ܠܟܹܐܦܵܐ ܩܵܕ̄ܡ ܟܠܵܝ: ܐܸܢ ܐܲܢ̄ܬ: ܕܝܗ̄ܘܼܕܵܝܵܐ ܝܘܸܬ: ܐܲܝܼܟ ܐܲܪ̈ܡܵܝܹܐ ܒܸܚܵܝܵܐ ܝܘܸܬ: ܘܠܵܐ ܐܲܝܼܟܼ ܝܼܗ̄ܘܼܕܵܝܹ̈ܐ: ܩܵܡܘܿܕܝܼ ܡܲܠܝܘܼܨܝܼ ܝܘܸܬ ܠܛܵܝܸܦܹ̈ܐ ܕܚܲܝ ܐܲܝܟܼ ܝܗ̄ܘܼܕܵܝܹ̈ܐ: 15 ܐܲܚܢܲܢ ܕܡ̣ܢ ܐܲܨܠܲܢ ܝܗ̄ܘܼܕܵܝܹ̈ܐ ܝܘܵܚ: ܘܠܹܐ ܝܘܵܚ ܡ̣ܢ ܛܵܝܸܦܹ̈ܐ ܚܲܛܵܝܹ̈ܐ: 16 ܐܝܼܢܵܐ ܟܲܕܼ ܒܝܼܕܲܥܝܵܐ ܕܠܹܐ ܦܵܝܼܫ ܡܘܼܟܫܛܵܐ ܒܲܪܢܵܫܵܐ ܡ̣ܢ ܦܘܼܠܚܵܢܹ̈ܐ ܕܢܵܡܘܿܣܵܐ: ܐܸܠܵܐ ܒܗܲܝܡܵܢܘܼܬܼܵܐ ܕܝܼܫܘܿܥ ܡܫܝܼܚܵܐ: ܐܘܼܦ ܐܲܚܢܲܢ ܗܲܪ ܒܝܼܫܘܿܥ ܡܫܝܼܚܵܐ ܗܘܼܡܸܢܲܢ: ܕܡ̣ܢ ܗܲܝܼܡܵܢܘܼܬܹܗ ܕܡܫܝܼܚܵܐ ܦܵܝܫܵܚ ܡܘܼܟܫܛܹܐ: ܘܠܵܐ ܡ̣ܢ ܦܘܼܠܚܵܢܹ̈ܐ ܕܢܵܡܘܿܣܵܐ. ܣܵܒܵܒ ܕܡ̣ܢ ܦܘܼܠܚܵܢܹ̈ܐ ܕܢܵܡܘܿܣܵܐ ܠܹܐ ܦܵܝܼܫ ܡܘܼܟܫܸܛܸܐ ܒܡܫܝܼܚܵܐ: 17 ܐܝܼܢܵܐ ܐܸܢ ܟܲܕܼ ܒܸܒܲܥܝܵܐ ܝܘܵܚ ܕܦܵܫܵܚ ܡܘܼܟܫܸܛܝܼ ܒܡܫܝܼܚܵܐ: ܦܵܝܫܵܚ ܡܫ̄ܟ̰ܝܼܚܹܐ ܐܘܼܦ ܐܲܚܢܲܢ ܚܲܛܵܝܹ̈ܐ: ܒܲܣ ܡܫܝܼܚܵܐ ܚܸܠܡܲܬܟܵܪ ܕܚܛܝܼܬܼܵܐ ܝܠܹܐ: ܚܵܣ ܠܝܼ. 18 ܣܵܒܵܒ ܐܸܢ ܠܐܵܢܝܼ ܕܣܬܸܪܝܼ: ܡܸܕܪܸܐ ܒܵܢܸܢܘܿܢ: ܒܸܥܒܼܵܕܼܵܐ ܝܘܸܢ ܠܓܵܢܝܼ ܕܥܲܒܼܪܵܢܵܐ 19 ܥܲܠ ܦܘܼܩܕܵܢܵܐ ܝܘܸܢܣܵܒܵܒ ܐܵܢܵܐ ܒܝܸܕ ܢܵܡܘܿܣܵܐ ܠܢܵܡܘܿܣܵܐ ܡܸܬܠܝܼ: ܕܠܲܐܠܵܗܵܐ ܚܲܝܸܢ ܗ̄ܘ̣ܵܐ. 20 ܘܥܲܡ ܡܫܝܼܚܵܐ ܦܝܼܫܵܐ ܝܘܸܢ ܙܩܝܼܦܵܐ: ܐܝܼܢܵܐ ܒܸܚܵܝܵܐ ܝܘܸܢ: ܐܚܪ̄ܢܵܐ ܠܵܐ ܐܵܢܵܐ ܡܫܝܼܚܵܐ ܒܸܚܵܝܵܐ ܝܠܹܐ ܒܝܼܝܼ. ܘܐܵܗܵܐ ܕܐܵܕܝܵܐ ܒܸܚܵܝܵܐ ܝܘܸܢ ܒܒܸܣܪܵܐ: ܒܗܲܝܡܵܢܘܼܬܼܵܐ ܕܒܪܘܼܢܹܗ ܕܐܲܠܵܗܵܐ ܒܸܚܵܝܵܐ ܝܸܘܸܢ: ܗ̇ܘ ܕܡܘܿܚܸܒܸܢܹܐ: ܘܝܸܗܒܼܵܠܹܐ ܓܵܢܹܗ ܡܒܵܕܵܠܝܼ. 21 ܠܹܐ ܝܘܸܢ ܡܲܣܠܘܼܝܹܐ ܫܵܦܲܩܲܬܹܗ ܕܐܲܠܵܗܵܐ: ܣܵܒܵܒ ܐܸܢ ܒܝܸܕܼ ܢܵܡܘܿܣܵܐ ܝܠܵܐ ܙܲܕܝܼܩܘܼܬܼܵܐ: ܒܲܣ ܡܫܝܼܚܵܐ ܚܘܼܪܵܝܝܼ ܡܸܬܠܹܐ.

ܩܦܠܐܘܢ: ܓ

1 ܝܵܐ ܟܝܼܡ ܚܝܼܵܠ ܓܵܠܵܛܵܝܹ̈ܐ: ܡܵܢܝܼ ܫܘܼܕܼܢܵܘܟܼܘܿܢ ܝܼܠܹܐ: . ܕܩܵܕ̄ܡ ܥܲܝܢܵܘ̈ܟܼܘܿܢ ܥܒܼܝܼܕܵܐ ܗ̄ܘ̣ܵܐ ܨܘܼܪܬܵܐ ܝܼܫܘܿܥ ܡܫܝܼܚܵܐ ܟܲܕܼ ܙܩܝܼܦܵܐ: 2 ܐܵܗܵܐ ܗܲܪ ܒܸܒܲܥܝܵܐ ܝܘܸܢ ܕܝܵܠܦܸܢ ܡܸܢܵܘܟܼܘܿܢ: ܡ̣ܢ ܦܘܼܠܚܵܢܹ̈ܐ ܕܢܵܡܘܿܣܵܐ ܩܘܼܒܸܠܵܘܟܼܘܿܢ ܪܘܼܚܵܐ: ܝܲܢ ܡ̣ܢ ܫܡܲܝܵܐ ܕܗܲܝܡܵܢܘܼܬܼܵܐ: 3 ܗܲܕܟܼܵܐ ܟܝܼܡ ܚܝܼܵܠ ܝܼܬܘܿܢ: ܟܲܕܼ ܫܘܼܪܸܠܵܘܟܼܘܿܢ ܒܪܘܼܚܵܐ: ܐܵܕܝܵܐ ܒܒܸܣܪܵܐ ܬܲܡܘܼܡܹܐ ܝܬܘܿܢ: 4 ܐܲܢܸܐ ܟܠ̇ܝ ܒܒܵܛܝܼܠܘܼܬܼܵܐ ܩܘܼܒܸܠܵܘܟܼܘܿܢ: ܐܸܢ ܡܸܓ̰ܸܕܼ ܒܒܼܵܛܘܼܠܘܼܬܼܵܐ. 5 ܒܲܣ ܗܵܘ ܕܒܝܵܗܒܼܵܐ ܝܠܹܐ ܒܝܼܵܘܟܼܘܼܢ ܪܘܼܚܵܐ: ܘܒܸܦܠܵܚܵܐ ܝܼܠܹܐ ܒܝܼܵܘܟܼܘܿܢ ܚܲܝܠܹ̈ܐ: ܡ̣ܢ ܦܘܼܠܚܢܹ̈ܐ ܕܢܵܡܘܿܣܵܐ: ܝܲܢ ܡ̣ܢ ܫܡܲܥܝܵܐ ܕܗܲܝܼܡܵܢܘܼܬܼܵܐ: 6 ܕܵܐܟܼܝܼ ܕܗܘܼܡܸܢܸܐ ܐܲܒܼܪܵܗܵܡ ܒܐܲܠܵܗܵܐ: ܘܦܸܫܠܵܐ ܚܘܼܫܒܸܢܬܵܐ ܐܸܠܹܗ ܠܙܲܕܝܼܩܘܼܬܼܵܐ. 7 ܒܲܣ ܝܕܹܥܡܘܿܢ ܕܐܵܢܝܼ ܕܡ̣ܢ ܗܲܝܼܡܵܢܘܼܬܼܵܐ ܝܢܵܐ: ܐܵܢܝܼ ܒܢܘܼܢܹ̈ܐ ܕܐܲܒܼܪܵܗܵܡ. 8 ܘܟܬܼܵܒܼܵܐ: ܟܲܕܼ ܩܵܕܘܼܡܹܐ ܚܙܹܠܹܐ ܕܐܲܠܵܗܵܐ ܒܸܬ ܡܲܟܫܸܛ ܗ̄ܘ̣ܵܐ ܠܛܲܝܦܹ̈ܐ ܒܗܲܝܡܵܢܘܼܬܼܵܐ: ܩܵܕ̄ܡܵܝܬܵܐ: ܡܘܼܫܚܸܕܠܹܐ ܠܐܲܒܼܪܵܗܵܡ: ܕܒܝܼܘܼܟܼ ܒܸܕ ܦܵܝܼܫܝܼ ܒܘܼܪܟܹܐ ܟܠܵܝ ܛܵܝܸܦܹ̈ܐ. 9 ܒܲܣ ܐܵܢܝܼ ܕܡ̣ܢ ܗܲܝܡܵܢܘܼܬܼܵܐ ܟܹܐ ܦܵܝܫܝܼ ܒܘܼܪܟܹܐ ܥܲܡ ܐܲܒܼܪܵܗܵܡ ܡܗܘܼܝܡܢܵܐ. 10 ܣܵܒܵܒ ܐܵܢܝܼ ܕܝܼܢܵܐ ܡ̣ܢ ܦܘܼܠܚܵܢܹ̈ܐ ܕܢܵܡܘܿܣܵܐ: ܬܚܘܿܬܼ ܠܵܘܛܬܵܐ ܝܢܵܐ. ܣܵܒܵܒ ܡܸܢܕܝܼ ܕܝܼܠܹܐ ܟܬܝܼܒܼܵܐ ܒܟܬܵܒܼܵܐ ܕܢܵܡܘܿܣܵܐ: ܕܥܵܒܸܕ ܠܹܗ. 11 ܐܝܼܢܵܐ ܕܐܢܵܫܵܐ ܒܹܐ ܦܵܝܸܫ ܡܘܼܟܫܸܛܵܐ ܒܢܵܡܘܿܣܵܐ ܠܟܸܣ ܐܲܠܵܗܵܐ: ܐܵܗܵܐ ܡܲܥܠܘܼܡ ܝܼܠܵܐ: ܣܵܒܵܒ ܙܲܕܝܼܩܵܐ ܒܗܲܝܼܡܵܢܘܼܬܼܵܐ ܒܸܬ ܚܲܝܹ̈ܐ. 12 ܐܝܼܢܵܐ ܢܵܡܘܿܣܵܐ ܠܹܐ ܝܠܹܐ ܡ̣ܢ ܗܲܝܡܵܢܘܼܬܼܵܐ: ܐܸܠܵܐ ܗ̇ܘ ܒܩܲܪܢܵܫܵܐ ܕܥܵܒܸܕ ܠܗ̄ܘܿܢ ܒܸܬ ܚܲܝܹܐ ܒܝܼܵܝ. 13 ܐܲܚܢܲܢ ܡܫܝܼܚܵܐ ܙܒܼܝܼܢܵܚܠܹܐ ܡ̣ܢ ܠܵܘܛܬܵܐ ܕܢܵܡܘܿܣܵܐ: ܘܒܓܵܢܹܗ ܗ̄ܘܼܠܹܐ ܠܵܘܛܬܵܐ ܡܒܵܕܵܠܲܢ: ܣܵܒܵܒ ܟܬܝܼܒܼܵܐ ܝܠܹܐ: ܠܝܼܛܵܐ ܝܠܹܐ ܟܠ ܡ̇ܢ ܕܦܵܝܫ ܬܸܠܝܵܐ ܒܩܲܝܣܵܐ: 14 ܕܓܵܘܼ ܛܵܝܸܦܹ̈ܐ ܗܵܘܝܵܐ ܗ̄ܘ̣ܵܐ ܒܘܼܪܟܬܹܗ ܕܐܲܒܼܪܵܗܵܡ ܒܝܼܫܘܿܥ ܡܫܝܼܚܵܐ: ܕܐܲܚܢܲܢ ܩܵܒܠܵܚ ܗ̄ܘܵܘ ܩܵܘܠܵܐ ܕܪܘܼܚܵܐ ܒܝܸܕ ܗܲܝܼܡܵܢܘܼܬܼܵܐ. ܐܵܚܘܿܢܘܵܬܝ̈: 15 ܐܲܝܼܟܼ ܕܓܵܘ ܒܢܲܝ̈ܢܵܫܵܐ ܒܹܐܡܵܪܵܐ ܝܘܸܢ: ܐܘܼܦ ܕܝܵܬܹܩܹܐ ܕܒܲܪܢܫܵܐ ܟܲܕܼ ܦܸܫܠܵܐ ܡܘܼܩܼܝܼܬܼܵܐ: ܐܢܵܫܵܐ ܠܹܐ ܡܲܣܠܹܐ ܐܡܝܼܪܹܐ ܩܵܘܠܹ̈ܐ ܘܠܙܲܪܥܹܗ. ܘܠܵܐ ܐܡܸܪܹܐ ܐܸܠܹܗ: ܘܠܙܲܪ̈ܥܹܗ: ܐܲܝܼܟܼ ܒܵܗ̄ܣ ܕܪܵܒܵܐ: ܐܸܠܵܐ ܒܵܗ̄ܣ ܕܚܵܕ̄ : ܘܠܲܪܥܘܼܟܼ: ܗܵܘ ܕܝܼܠܹܐ ܡܫܝܼܚܵܐ. 17 ܐܝܼܢܵܐ ܒܹܐܡܵܪܵܐ ܝܘܸܢ: ܕܕܝܵܬܹܩܹܐ ܕܡ̣ܢ ܩܵܕ̄ܡܵܝܬܵܐ ܦܸܫܠܵܐ ܡܘܼܩܒܼܝܼܬܼܵܐ ܡ̣ܢ ܐܲܠܵܗܵܐ: ܢܵܡܘܿܣܵܐ: ܗܵܘ ܕܗ̄ܘܹܠܹܐ ܡ̣ܢ ܒܵܬ̄ܪ ܐܲܪܒܲܥܡܵܐܐ ܘܬܠܵܬ̄ܝܼ ܫܸܢܹ̈ܐ: ܠܹܐ ܡܵܨܹܐ ܕܡܲܣܠܹܐ ܠܵܗܿ ܕܒܵܛܸܠ ܠܩܵܘܠܵܐ. 18 ܣܵܒܵܒ ܐܸܢ ܡܼܢ ܢܵܡܘܿܣܵܐ ܝܠܵܐ ܝܵܪܬܘܼܬܵܐ: ܒܲܣ ܠܵܐ ܗ̄ܘܸܠܵܐ ܡܼܢ ܩܵܘܠܵܐ. ܐܝܼܢܵܐ ܠܐܲܒܼܪܵܗܵܡ ܒܩܵܘܠܵܐ ܝܸܗܒܸܠܹܐ ܐܲܠܵܗܵܐ. 19 ܒܲܣ ܡܘܼܕܝܼ ܝܠܹܐ ܢܵܡܘܿܣܵܐ: ܣܵܒܵܒ ܕܩܠܵܒܿܬܵܐ ܦܸܫܠܹܐ ܡܘܼܙܝܸܕܵܐ: ܗܲܠ ܕܐܵܬܹܐ ܗ̄ܘܵܐ ܙܲܪܥܵܐ ܗܵܘ ܕܐܸܠܹܗ ܗ̄ܘܹܠܹܐ ܩܵܘܠܵܐ ܘܦܸܫܠܹܐ ܝܘܼܗ̄ܒܼܵܐ (ܢܵܡܘܿܣܵܐ) ܒܝܸܕܼ ܡܲܠܲܐܟܹܐ ܒܐܝܼܕܼܵܐ ܕܢܵܘܲܢܓ̰ܝܼ. 20 ܐܝܼܢܵܐ ܢܵܘܸܢܓ̰ܝܼ ܠܹܐ ܝܠܹܐ ܕܚܵܕ̄: ܐܸܠܵܐ ܐܲܠܵܗܵܐ ܚܵܕ̄ ܝܼܠܹܐ. 21 ܒܲܣ ܢܵܡܘܿܣܵܐ ܕܲܪܩܘܼܒܼܠ ܝܼܠܹܐ ܕܩܵܘ̈ܠܹܐ ܕܐܲܠܵܗܵܐ: ܚܵܣ ܠܝܼ. ܣܵܒܵܒ ܐܸܢ ܗܵܘܹܐ ܗ̄ܘ̣ܵܐ ܗ̄ܘ̣ܵܐ ܝܘܼܗ̄ܒܼܵܐ ܢܵܡܘܿܣܵܐ ܕܡܵܨܹܐ ܗ̄ܘܵܐ ܠܡܲܚܘܼܝܹܐ: ܒܬܪܘܼܨܬܵܐ ܙܲܕܝܼܩܘܼܬܼܵܐ ܒܸܬ ܗܵܘܝܵܐ ܗ̄ܘ̣ܵܐ ܡ̣ܢ ܢܵܡܘܿܣܵܐ. 22 ܐܸܠܵܐ ܚܒܸܫܠܹܐ ܟܬܼܵܒܼܵܐ ܟܠ ܡܸܢܕܝܼ ܬܚܘܿܬ ܚܛܝܼܬܼܵܐ: ܕܩܵܘܠܵܐ ܒܗܲܝܡܵܢܘܼܬܼܵܐ ܕܝܼܫܘܿܥ ܡܫܝܼܚܵܐ ܦܵܝܸܫ ܝܘܼܗ̄ܒܼܵܐ ܠܐܵܢܝܼ ܕܗܲܝܡܸܢܝܼ. 23 ܐܝܼܢܵܐ ܗܹܫ ܠܵܐ ܐܬܝܼܬܵܐ ܗܲܝܡܵܢܘܼܬܼܵܐ: ܢܵܡܘܿܣܵܐ ܟܹܐ ܢܵܛܸܪ ܗ̄ܘ̣ܵܐ ܠܲܢ: ܟܲܕܼ ܚܒܼܝܼܫܹܐ ܝܘܵܚ ܗ̄ܘܵܘ ܠܗܲܝܼܡܵܢܘܼܬܼܵܐ ܕܝܼܗ̄ܘ̣ܵܐ ܗܕܝܼܪܬܵܐ ܠܸܦܝܵܫܵܐ ܓܠܝܼܬܼܵܐ. 24 ܗܲܕܟܼܵܐ ܕܢܵܡܘܿܣܵܐ ܪܵܒܝܼ ܗ̄ܘܹܠܹܐ ܐܸܠܲܢ (ܕܡܲܝܬ̄ܝܹܐ ܠܲܢ) ܠܟܸܣ ܡܫܝܼܚܵܐ: ܕܡ̣ܢ ܗܲܝܼܡܵܢܘܼܬܼܵܐ ܦܵܝܫܸܚ ܗ̄ܘ̣ܵܘ ܡܘܼܫܸܛܹܐ. 25 ܐܝܼܢܵܐ ܟܲܕܼ ܐܬܝܼܬܵܐ ܝܠܵܐ ܗܲܝܼܡܵܢܘܼܬܼܵܐ: ܠܹܐ ܝܘܵܚ ܐܚܪ̄ܢܵܐ ܬܚܘܿܬܼ ܪܵܒܝܼ. 26 ܣܵܒܵܒ ܟܠܵܘܟܼܘܿܢ ܒܢܘܼ̈ܢܹ̈ܐ ܕܐܲܠܵܗܵܐ ܝܬܘܿܢ ܒܝܸܕ ܗܲܝܼܡܵܢܘܼܬܼܵܐ ܕܒܝܼܫܘܿܥ ܡܫܝܼܚܵܐ. 27 ܣܵܒܵܒ ܟܡܵܐ ܡܸܢܵܘܟܼܘܿܢ ܕܒܡܫܝܼܚܵܐ ܥܡܸܕܠܵܘܟܼܘܿܢ: ܠܡܫܝܼܚܵܐ ܠܒܸܫܠܵܘܟܼܘܿܢ. 28 ܠܲܝܬ ܝܗ̄ܘܼܕܵܝܵܐ: ܘܠܵܐ ܝܵܘܢܵܝܵܐ: ܠܲܝܬ ܪܹܓܵܐ ܘܠܵܐ ܐܵܙܵܕ: ܠܲܝܬ ܐܘܪܙܵܐ ܢܸܩܒܼܵܐ: ܣܵܒܵܒ ܟܠܵܘܟܼܘܿܢ ܚܵܕ̄ ܝܼܬܘܿܢ ܒܝܼܫܘܿܥ ܡܫܝܼܚܵܐ. 29 ܘܐܸܢ ܕܡܫܝܼܚܵܐ ܝܬܘܿܢ: ܒܲܣ ܙܲܪܥܹܗ ܕܐܲܒܼܪܵܗܵܡ ܝܼܬܘܿܢ: ܘܝܵܪ̈ܘܿܬܹܐ ܒܩܵܘܠܵܐ.

ܩܦܠܐܘܢ: ܕ

1 ܐܝܼܢܵܐ ܒܹܐܡܵܪܵܐ ܝܘܸܢ ܕܟܡܵܐ ܙܲܒܼܢܵܐ ܕܝܵܪ̈ܘܿܬܹܐ ܝܵܠܵܐ ܝܠܹܐ: ܠܹܐ ܝܠܹܐ ܦܪܝܼܫܵܐ ܡ̣ܢ ܪܸܓܵܐ: ܠܵܦܸܢ ܡܵܪܵܐ ܕܟܠܵܝ ܝܠܹܐ: 2 ܐܸܠܵܐ ܬܚܘܿܬܼ ܘܲܟܝܼ̈ܠܹܐ ܝܠܹܐ ܘܢܵܙܝܼܪܹ̈ܐ: ܗܲܠ ܙܲܒܼܢܵܐ ܕܡܘܼܬܸܒܼܠܹܐ ܒܵܒܹܐ. 3 ܗܲܕܟܼܵܐ ܐܘܼܦ ܐܲܚܢܲܢ: ܟܲܕܼ ܝܵܠܹ̈ܐ ܝܘܵܚ ܗ̄،ܵܘ: ܬܚܘܿܬܼ ܐܸܣܛܘܼܟܼܣܹ̈ܐ ܕܥܵܠܡܵܐ ܙܘܼܒܛܸܢܹܐ ܝܘܵܚ ܗ̄ܘ̣ܵܘ. 4 ܐܝܼܢܵܐ ܟܲܕܼ ܡܛܹܠܵܐ ܬܲܡܵܡܵܬܘܼܬܵܐ ܕܙܲܒܼܢܵܐ: ܫܘܼܕܹܪܹܐ ܐܲܠܵܐ ܠܒܪܘܼܢܹܗ: ܗ̄ܘܝܵܐ ܡ̣ܢ ܒܲܟܼܝܵܐ: ܘܗ̄ܘܹܠܹܐ ܬܚܘܿܬ ܢܵܡܘܿܣܵܐ: 5 ܕܠܵܐܢܝܼ ܕܝܼܢܵܐ ܬܚܘܿܬܼ ܢܵܡܘܿܣܵܐ ܙܵܒܸܢ ܗ̄ܘ̣ܵܐ: ܕܩܵܒܠܵܚ ܗ̄ܘܵܘ ܥܒܼܵܕܬܵܐ ܕܒܢܘܼܢܹ̈ܐ. 6 ܘܣܵܒܵܒ ܕܝܼܬܘܿܢ ܒܢܘܼܢܹ̈ܐ: ܫܘܼܕܸܪܹܗܐ ܐܲܠܵܗܵܐ ܪܘܼܚܵܐ ܕܒܪܘܼܢܹܗ ܓܵܘ ܠܸܒܵܘܵܬܼܵܘ̈ܟܼܘܿܢ: ܗ̇ܝ ܕܒܸܩܪܵܝܵܐ ܝܠܵܐ: ܐܲܒܼܵܐ: ܒܵܒܵܐ. 7 ܒܲܣ ܠܹܐ ܝܘܸܬ ܐܚܪܹ̄ܢܵܐ ܪܸܓܵܐ: ܐܸܠܵܐ ܒܪܘܼܢܵܐ: ܘܐܸܢ ܒܪܘܼܢܵܐ: ܐܘܼܦ ܝܵܪܘܿܬܵܐ ܕܐܲܠܵܗܵܐ ܒܝܸܕ ܡܫܝܼܚܵܐ. 8 ܐܸܠܵܐ ܗܲܝܓܵܗ: ܟܲܕܼ ܠܹܐ ܝܲܕܥܝܼܬܘܿܢ ܗ̄ܘ̣ܵ ܠܐܲܠܵܗܵܐ: ܥܒܸܕܠܵܘܟܼܘܿܢ ܪܸܓܘܼܬܼܵܐ ܠܐܵܢܝܼ ܕܡ̣ܢ ܐܲܨܵܝ ܠܹܐ ܗ̄ܘ̣ܵܘ ܐܲܠܵܗܹ̈ܐ. 9 ܐܝܼܢܵܐ ܐܵܕܝܵܐ ܕܝܕܸܥܠܵܘܟܼܘܿܢ ܠܐܲܠܵܗܵܐ: ܘܙܵܘܕܵܐ ܕܦܸܫܠܵܘܟܼܘܿܢ ܝܕܸܥܝܹܐ ܡ̣ܢ ܐܲܠܵܗܵܐ ܕܵܐܟܼܝܼ ܡܸܕܪܸܐ ܕܪܲܘܟܼܘܿܢ ܥܲܠ ܕܐܵܢܝܼ ܐܸܣܛܘܼܟܼܣܹ̈ܐ ܙܲܒܘܼܢܹ̈ܐ ܘܡܸܣܟܹܢܹ̈ܐ: ܘܡܸܕܪܸܐ ܡ̣ܢ ܪܹܫܵܐ ܝܬܘܿܢ ܠܸܗ̄ܘܵܝܵܐ ܙܒܲܛ ܐܸܠܵܝ: 10 ܝܘܿܡܵܢܹܐ ܘܝܲܪܚܹܐ ܘܙܲܒܼܢܹ̈ܐ: ܘܫܸܢܹ̈ܐ ܒܸܢܛܵܪܵܐ ܝܬܘܿܢ. 11 ܒܸܙܕܲܥܝܵܐ ܝܘܸܢ ܡܸܢܵܘܟܼܘܿܢ ܕܩܵܘܡܵܐ ܗܵܒܵܣ ܓ̰ܗ̄ܠܝܼ ܒܝܼܵܘܟܼܘܿܢ 12 ܗ̄ܘܹܡܘܿܢ ܐܲܝܼܟܼ ܕܝܼܝܼ: ܣܵܒܵܒ ܐܘܼܦ ܐܵܢܵܐ ܐܲܝܼܟܼ ܕܝܼܵܘܟܼܘܿܢ ܝܼܘܸܢ: ܐܵܚܘܿܢܘܵܬܝܼ̈: ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ. ܡܸܢܕܝܼ ܠܵܐ ܥܒܸܕܠܵܘܟܼܘܿܢ ܓܢܵܗܵܐ ܒܝܼܝܼ. 13 ܣܵܒܵܒ ܒܝܼܕܲܥܝܵܐ ܝܬܘܿܢ ܕܒܝܸܕ ܙܲܒܘܼܢܘܼܬܵܐ ܕܒܸܣܪܝܼ ܡܘܼܫܚܸܕܠܝܼ ܐܸܠܵܘܟܼܘܿܢ ܒܩܵܕ̄ܡܵܝܬܵܐ. 14 ܘܓ̰ܘܼܪܵܒܵܐ ܕܒܒܸܣܪܪ ܠܵܐ ܡܘܼܣܠܹܠܵܘܟܼܘܿܢ: ܘܠܵܐ ܓܘܼܢܓܸܨܠܵܘܟܼܘܼܢ: ܐܸܠܵܐ ܐܲܝܼܟܼ ܕܠܲܡܲܠܲܐܟܼܵܐ ܕܐܲܠܵܗܵܐ ܩܘܼܒܸܠܵܘܟܼܘܿܢ: ܐܲܝܼܟܼ ܕܠܝܼܫܘܿܥ ܡܫܝܼܚܵܐ. 15 ܒܲܣ ܐܲܝܟܵܐ ܝܠܹܐ ܛܘܼܵܒܼܵܟܼܘܿܢ: ܣܵܒܵܒ ܒܸܣܗܵܕܵܐ ܝܘܸܢ ܒܵܗ̄ܣܵܘܟܼܘܿܢ: ܕܐܸܢ ܡܵܨܝܵܐ ܗ̄ܘܵܐ: ܥܲܝܢܵܘ̈ܟܼܘܿܢ ܒܸܬ ܚܵܪܛܝܼܬܘܿܢ ܗ̄ܘ̣ܵܘ ܘܝܵܗ̄ܒܼܝܼܬܘܿܢ ܗ̄ܘܵܘ ܠܝܼ. 16 ܒܲܣ ܗܲܕܟܼܵܐ ܗ̄ܘܠܝܼ ܕܸܫܡܸܢܵܘܟܼܘܿܢ: ܕܒܹܐܡܵܪܵܐ ܝܸܢ ܐܸܠܵܘܟܼܘܿܢ ܣܲܪܲܣܬܘܼܬܼܵܐ: 17 ܒܲܚܘܼܠܹܐ ܝܢܵܐ ܒܝܼܵܘܟܼܘܿܢ: ܠܵܐ ܠܨܦܵܝܘܼܬܼܵܐ: ܐܸܠܵܐ ܠܸܛܪܵܕܵܘܟܼܘܿܢ ܒܸܒܲܥܝܵܐ ܝܢܵܐ: ܕܐܲܚܬܘܼܢ ܗܵܘܝܼܬܘܿܢ ܒܲܚܘܼܠܹܐ ܒܝܵܝܼ. 18 ܐܝܼܢܵܐ ܨܦܵܝܝܼ ܝܠܵܐ ܕܒܲܚܸܠܝܼܬܘܿܢ ܒܫܘܼ̈ܠܹܐ ܫܵܦܝܼܪܹ̈ܐ ܒܟܠ ܙܲܒܼܢܵܐ: ܘܠܵܐ ܐܝܼܡܲܢ ܕܗܵܘܸܢ ܠܟܸܣܠܵܘܟܼܘܿܢ ܗܲܪ. 19 ܒܢܘܼܢܝܼ̈ ܙܥܘܿܪܹ̈ܐ: ܐܵܢܝܼ ܕܒܼܵܝܼ ܡܸܕܪܹܐ ܒܸܓܪܵܫܵܐ ܝܘܸܢ ܚܸܒܼܠܹ̈ܐ: ܗܲܠ ܕܦܵܝܸܫ ܥܒܼܝܼܕܵܐ ܨܘܼܪܬܵܐ ܓܵܘܵܘܟܼܘܿܢ ܡܫܝܼܚܵܐ: 20 ܒܸܒܲܥܝܵܐ ܝܘܸܢ ܕܗܵܘܸܢ ܠܟܸܣܠܵܘܟܼܘܿܢ ܐܵܕܝܵܐ: ܘܕܫܲܚܠܸܦܸܢ ܩܵܠܝܼ: ܣܵܒܵܒ ܕܚܒܼܝܼܛܵܐ ܝܘܸܢ ܒܘܼܬ ܕܝܼܵܘܟܼܘܿܢ. 21 ܐܡܘܿܪܘܿܢ ܠܝܼ: ܐܲܚܬܘܿܢ ܐܵܢܝܼ ܕܒܸܒܲܥܝܵܐ ܝܢܵܐ ܕܗܵܘܝܼ ܬܚܘܿܬ ܠܢܵܡܘܿܣܵܐ ܠܹܐ ܒܸܫܡܲܥܝܵܐ: 22 ܣܵܒܵܒ ܕܟܬܝܼܒܼܵܐ ܝܠܹܐ: ܠܐܲܒܼܪܵܗܵܡ ܗܹ̄ܠܘܿܢ ܬܪܲܝ ܒܢܘܼܢܹ̈ܐ: ܚܵܕܼ ܡ̣ܢ ܚܹܕܲܡܬܵܐ: ܘܚܵܕ̄ ܡ̣ܢ ܐܵܙܵܕ. 23 ܐܸܠܵܐ ܗ̇ܘ ܕܡ̣ܢ ܚܹܕܲܡܬܵܐ: ܒܒܸܣܪܵܐ ܦܸܫܠܹܐ ܗ̄ܘܝܵܐ: ܐܝܼܢܵܐ ܗ̇ܘ ܕܡ̣ܢ ܐܵܙܵܕ: ܒܝܸܕ ܩܵܘܠܵܐ. 24 ܐܝܼܢܵܐ ܐܲܢܹܐ ܝܢܵܐ ܡܵܣܸܠܹ̈ܐ: ܣܵܒܵܒ ܐܲܢܹܐ (ܒܲܟܼܬܵܬܹ̈ܐ) ܬܪܲܝ ܩܵܘܠܹ̈ܐ ܝܢܵܐ ܚܕܵܐ ܕܡ̣ܢ ܛܘܼܪܵܐ ܕܣܝܼܢܲܝ ܒܸܠܝܵܕܵܐ ܠܪܸܓܘܼܬܵܐ: ܕܝܼܠܵܐ ܗܵܓܲܪ. 25 ܣܵܒܵܒ ܗܵܓܲܪ ܕܣܝܼܢܲܝ ܝܼܠܹܐ: ܕܓܵܘ ܥܲܪܵܒܵܝܼܵܐ: ܘܒܸܫܠܵܡܵܐ ܝܠܵܐ ܠܐܘܿܪܸܫܠܸܡ ܕܐܵܕܝܵܐ: ܘܟܹܐ ܦܵܠܚܵܐ ܪܸܓܘܼܬܵܐ ܗ̇ܝ ܘܒܢܘܼܢܘܼ̈ܗ̇. 26 ܐܝܼܢܵܐ ܗ̇ܝ ܐܘܿܪܸܫܠܸܡ ܕܠܥܸܠܸܠ ܐܵܙܵܕ ܝܼܠܵܐ: ܕܝܼܠܵܐ ܝܸܡܲܢ. 27 ܣܵܒܵܒ ܕܟܬܝܼܒܼܵܐ ܝܠܹܐ: ܥܒܼܘܿܕܲܝ ܒܘܼܣܵܡܵܐ: ܝܵܐ ܥܩܲܪܬܵܐ: ܗܿܝ ܕܠܹܐ ܝܵܠܕܵܐ: ܘܡܵܪܸܡܝ ܩܵܠܵܟܼܝ ܘܡܲܩܘܸܚܝ: ܗܿܝ ܕܠܹܐ ܓܵܪܫܵܐ ܚܸܒܼܠܹ̈ܐ: ܣܵܒܵܒ ܕܙܸܕܠܘܿܢ ܒܢܘܼܢܹ̈ܐ ܕܡܘܼܫܲܡܸܪ ܙܵܘܕܵܐ ܡܼܢ ܕܡܵܪܹܐ ܓܲܒܼܪܵܐ. 28 ܐܝܼܢܵܐ ܐܲܚܢܲܢ ܐܵܚܘܿܢܘܵܬܝܼ̈: ܐܲܝܟ ܐܝܼܣܚܵܩ ܒܢܘܼܢܹ̈ܐ ܕܩܵܘܠܵܐ ܝܘܵܚ. 29 ܐܸܠܵܐ ܐܲܝܟ ܕܗܿܝܵܓܗ: ܗܿܘ ܕܦܸܫܠܹܐ ܝܠܝܼܕܵܐ ܒܒܸܣܪܵܐ ܛܪܸܕܠܹܐ ܠܗܿܘ ܕܒܪܘܼܚܵܐ: ܗܲܕܟܼܵܐ ܐܘܼܦ ܐܵܕܝܼܵܐ. 30 ܐܸܠܵܐ ܡܘܼܕܝܼ ܐܡܸܪܹܐ ܟܬܵܒܼܵܐ: ܦܵܠܸܛ ܠܚܹܕܲܡܬܵܐ ܘܠܒܪܘܼܢܘܼܗܿ: ܣܵܒܵܒ ܠܹܐ ܝܵܪܸܬ ܒܪܘܼܢܵܐ ܕܚܹܕܲܡܬܵܐ ܥܲܡ ܒܪܘܼܢܵܐ ܕܐܵܙܵܕ. 31 ܒܲܣ ܐܲܚܢܲܢ: ܐܵܚܘܿܢܘܵܬܝܼ̈: ܠܹܐ ܝܘܵܚ ܒܢܘܼܢܹ̈ܐ ܕܚܹܕܲܡܬܵܐ: ܐܸܠܵܐ ܕܐܵܙܵܕ.

ܩܦܠܐܘܢ: ܗ

1 ܒܐܵܙܵܕܘܼܬܵܐ ܡܫܝܼܚܵܐ ܥܒܹܕܲܚܠܹܐ ܐܵܙܵܕ. ܒܲܣ ܟܠܹܡܘܿܢ: ܘܠܵܐ ܦܵܝܫܝܼܬܘܿܢ ܐܣܝܼܪܹܐ ܡܸܕܪܸܐ ܒܢܝܼܪܵܐ ܕܪܸܓܘܼܬܵܐ. 2 ܗܵܐ: ܐܵܢܵܐ ܦܵܘܠܘܿܣ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܦܲܝܼܕܵܐ. 3 ܐܝܼܢܵܐ ܒܸܣܗܵܕܵܐ ܝܘܸܢ ܡܸܕܪܸܐ ܠܟܠ ܒܲܪܢܵܫܵܐ ܕܦܵܝܸܫ ܓܙܝܼܪܵܐ ܕܕܵܝܵܢܵܐ ܝܠܹܐ ܕܟܠܹܗ ܢܵܡܘܿܣܵܐ ܥܵܒܸܕ ܠܹܗ. 4 ܦܸܫܠܵܘܟܼܘܿܢ ܒܛܝܼܠܹܐ ܡ̣ܢ ܡܫܝܼܚܵܐ: ܐܵܢܝܼ ܕܒܢܵܡܘܿܣܵܐ ܦܝܵܫܵܐ ܝܬܘܿܢ ܡܘܼܟܫܸܛܹܐ: ܡ̣ܢ ܫܵܦܲܩܲܬ ܢܦܸܠܵܘܟܼܘܿܢ. 5 ܣܵܒܵܒ ܐܲܚܢܲܢ ܒܝܸܕ ܪܘܼܚܵܐ ܒܗܲܝܡܵܢܘܼܬܼܵܐ ܠܗܹܝܒܼ ܕܙܲܕܝܼܩܘܼܬܼܵܐ ܒܸܣܦܵܪܵܐ ܝܘܵܚ. 6 ܣܵܒܵܒ ܒܡܫܝܼܚܵܐ ܝܼܫܘܿܥ: ܠܵܐ ܓܙܘܼܪܵܐ ܡܵܨܝܵܐ ܥܵܒܼܕܵܐ ܡܸܢܕܝܼ ܘܠܵܐ ܥܘܼܪܠܘܼܬܵܐ: ܐܸܠܵܐ ܗܲܝܡܵܢܘܼܬܼܵܐ ܕܒܸܦܠܵܚܵܐ ܝܠܵܐ ܒܚܘܼܒܵܐ. 7 ܨܦܵܝܼܝܼ ܒܸܪܚܵܛܵܐ ܝܬܘܿܢ ܗ̄ܘ̣ܵܘ: ܡܵܢܝܼ ܩܲܡ ܡܲܟܠܹܐ ܠܵܘܟܼܘܿܢ ܕܠܵܐ ܡܲܨܝܸܬܝܼܬܘܿܢ ܗ̄ܘܵܘ ܠܣܲܪܲܣܬܘܼܬܵܐ: 8 ܐܵܗܵܐ ܗܲܡܲܢܬܵܐ ܠܹܐ ܝܠܵܐ ܡ̣ܢ ܕܗ̇ܘ ܕܩܲܡ ܩܵܪܹܐ ܠܵܘܟܼܘܿܢ. 9 ܚܲܟ̰ܵܐ ܚܡܝܼܪܵܐ ܟܠܵܗ̇ ܓܒܼܝܼܠܬܵܐ ܟܹܐ ܡܲܚܡܸܥ ܠܵܗ̇. 10 ܐܵܢܵܐ ܚܵܬܸܪܓ̰ܲܡܲܥ ܝܼܘܸܢ ܒܝܵܘܟܼܘܿܢ ܒܡܵܪܲܢ: ܕܡܸܢܕܝܼ ܐܚܪ̄ܢܵܐ ܠܹܐ ܚܵܫܒܼܝܼܬܘܿܢ: ܐܝܼܢܵܐ ܗ̇ܘ ܕܚܵܒܲܛ ܠܵܘܟܼܘܿܢ: ܗ̇ܘ ܒܸܬ ܩܵܒܸܠ ܕܝܼܘܵܢ: ܟܠ ܡ̇ܢ ܕܝܼܠܹܐ. 11 ܐܝܼܢܵܐ ܐܵܢܵܐ: ܐܵܚܘܿܢܘܵܬܝܼ: ܐܸܢ ܗܹܫ ܓܙܘܼܪܬܵܐ ܡܲܟܪܘܼܙܹܐ ܝܘܸܢ: ܩܵܡܘܿܕܝܼ ܦܝܵܫܵܐ ܝܘܸܢ ܛܪܝܼܕܵܐ: ܒܲܣ ܒܛܸܠܹܗ ܟܦܘܼܪܝܹܗ ܕܙܩܝܼܦܵܐ. 12 ܐܝܼܢܵܐ ܛܘܼܒ݂ܵܐ ܕܐܘܼܦ ܦܪܵܡܵܐ ܦܵܫܝܼ ܗ݇ܘܵܘ ܦܪܝܼܡܹܐ ܐܵܢܝܼ ܕܒܸܚܒ݂ܵܛܵܘܟ݂ܘܿܢ ܝܼܢܵܐ. 13 ܣܵܒܵܒ ܐܲܚܬܘܿܢ ܠܐܵܙܵܕܘܼܬܵܐ ܦܸܫܠܵܘܟ݂ܘܿܢ ܩܸܪܝܵܐ: ܐܵܚܘܿܢܘܵܬܝܼ̈: ܐܲܚܟ̰ܝܼ ܠܵܐ ܗܵܘܝܵܐ ܐܵܙܵܕܘܼܬܵܘܟ݂ܘܿܢ ܠܗܲܓ̰ܲܬ ܕܒܸܣܪܵܐ: ܐܸܠܵܐ ܠܚܘܼܒܵܐ ܗܵܘܝܼܬܘܿܢ ܪܸ̈ܓܵܘܵܬܹܗ ܚܵܕ݇ ܠܗ̇ܘ ܐܚܹܪ݇ܢܵܐ. 14 ܣܵܒܵܒ ܟܠܹܗ ܢܵܡܘܿܣܵܐ ܒܚܕܵܐ ܗܹܡܸܙܡܵܢ ܟܹܐ ܦܵܝܸܫ ܬܘܼܡܸܡܵܐ: ܒܗ̇ܝ: ܕܡܲܚܸܒܸܬ ܠܫܒ݂ܵܒ݂ܘܼܟ݂ ܐܲܝܟ݂ ܓܵܢܘܼܟ݂. 15 ܐܝܼܢܵܐ ܐܸܢ ܚܵܕ݇ ܠܗ̇ܘ ܐܚܹܪ݇ܢܵܐ ܢܵܝܨܝܼܬܘܿܢ ܘܐܵܟ݂ܠܝܼܬܘܿܢ: ܚܙܹܡܘܿܢ ܠܵܐ ܗ݇ܘܹܐ ܕܚܵܕ݇ ܡܗ̇ܘ ܐܚܹܪ݇ܢܵܐ ܦܵܣܫܝܼܬܘܿܢ ܐܝܼܡܹܐ.

16 ܐܝܼܢܵܐ ܒܹܐܡܵܪܵܐ ܝܘܸܢ: ܚܕܘܿܪܘܿܢ ܒܪܘܼܚܵܐ ܘܫܲܗ̄ܘܲܬܬܵܐ ܕܒܸܣܪܵܐ ܠܹܗ ܬܲܡܸܡܝܼܬܘܿܢ. 17 ܣܵܒܵܒ ܒܸܣܪܵܐ ܟܹܐ ܫܲܗ̄ܘܸܬ ܕܲܪܩܘܼܒ݂ܠ ܕܪܘܼܚܵܐ: ܘܪܘܼܚܵܐ ܟܹܐ ܫܲܗ̄ܘܸܬܵܐ ܕܲܪܩܘܼܒ݂ܠ ܕܒܸܣܪܵܐ: ܘܐܲܢܹܐ ܕܲܪܩܘܼܒ݂ܠ ܝܼܢܵܐ ܚܵܕ݇ ܠܗ̇ܘ ܐܚܹܪ݇ܢܵܐ: ܕܠܹܐ ܥܵܒ݂ܕܝܼܬܘܿܢ ܡܸܢܕܝܼ ܕܒܵܣܡܵܐ ܠܵܘܟ݂ܘܿܢ. 18 ܐܝܼܢܵܐ ܐܸܢ ܒܪܘܼܚܵܐ ܦܝܵܫܵܐ ܝܬܘܿܢ ܬܘܼܓܒܸܪܹܐ: ܠܹܐ ܝܬܘܿܢ ܬܚܘܿܬ ܢܵܡܘܿܣܵܐ. 19 ܣܵܒܵܒ ܕܝܕܸܥܝܹܐ ܝܢܵܐ ܦܘܼܠܚܵܢܹ̈ܐ ܕܒܸܣܪܵܐ: ܕܝܼܢܵܐ: ܙܵܢܝܘܼܬܵܐ: ܛܲܢܦܘܼܬ݂ܵܐ: ܦܲܚܙܘܼܬܵܐ: 20 ܣܵܓ݂ܕܬܵܐ ܕܨܵܢܲܡܹ̈ܐ: ܚܲܪܵܫܘܼܬܵܐ: ܕܫܡܸܡܵܝܘܼܬܵܐ: ܡܲܨܲܪܵܨܘܼܬܵܐ: ܩܲܝܪ̈ܬ: ܚܸܡܬܵܐ: ܥܵܨܵܝܵـ̈ܬܵܐ: ܦܲܠܵܝܵـ̈ܬܵܐ: ܕܘܼܒܵܪ̈ܘܼܝܵܬܵܐ: 21 ܒܲܚܸܠܵܢܘܼܬܵܐ: ܪܵܘܵܝܘܼܬܵܐ: ܙܡܵܪܵܐ: ܘܐܵܢܝܼ ܕܠܲܐܢܹܐ ܕܡܵܝܼ. ܘܐܵܢܝܼ ܕܐܲܢܹܐ ܦܵܠܚܝܼ: ܐܲܝܟ݂ ܕܡ̣ܢ ܩܵܕ݇ܡܵܝܬܵܐ ܐܸܡܸܪܝܼ ܐܸܠܵܘܟ݂ܘܿܢ: ܐܘܼܦ ܒܩܵܕ݇ܡܵܝܬܵܐ ܒܹܐܡܵܪܵܐ ܝܘܸܢ: ܕܡܲܠܟܘܼܬܹܗ ܕܐܲܠܵܗܵܐ ܠܹܐ ܝܵܪܬܝܼ. 22 ܐܝܼܢܵܐ ܛܥܘܼܢܝܵܬܹ̈ܐ ܕܪܘܼܚܵܐ ܝܼܢܵܐ: ܚܘܼܒܵܐ: ܚܲܕܘܼܬܵܐ: ܫܠܵܡܵܐ: ܡܲܪܝܼܟ݂ܬܵܐ ܕܒܹܢܵܐ: ܒܵܣܝܼܡܘܼܬܵܐ: ܛܵܒ݂ܘܼܬܵܐ: ܗܲܝܡܵܢܘܼܬܵܐ: 23 ܡܵܟܝܼܟ݂ܘܼܬܵܐ: ܕܒ݂ܵܩܬܵܐ ܕܓܵܢܵܐ. ܥܲܠ ܕܐܲܢܹܐ ܢܵܡܘܿܣܵܐ ܠܲܝܬ݁. 24 ܐܝܼܢܵܐ ܐܵܢܝܼ ܕܝܼܢܵܐ ܕܡܫܝܼܚܵܐ ܙܩܸܦܠܘܿܢ ܒܸܣܪܵܐ ܥܲܡ ܙܵܘܥܘܼ̈ܗܝ ܘܫܲܗ̄ܘܲܬܝܵܬܘܼ̈ܗܝ. 25 ܐܸܢ ܚܲܝܵܝ ܒܪܘܼܚܵܐ؛ ܒܪܘܼܚܵܐ ܐܘܼܦ ܚܵܕܪܵܚ. 26 ܠܵܐ ܗܵܘܵܚ ܡܵܪܹ̈ܐ ܚܸܩܪܵܐ ܒܵܛܝܼܠܵܐ: ܡܲܟܪܘܼܒܹ݁ܐ ܚܵܕ݇ ܠܗ̇ܘ ܐܚܹܪ݇ܢܵܐ: ܘܒܲܚܘܼܠܹܐ ܚܵܕ݇ ܒܗ̇ܘ ܐܚܹܪ݇ܢܵܐ.

ܩܦܠܐܘܢ: ܘ

1 ܐܵܚܘܿܢܘܵܬܝܼ̈: ܐܘܼܦ ܐܸܢ ܐ݇ܢܵܫܵܐ ܦܵܝܸܫ ܕܒ݂ܝܼܩܵܐ ܒܓܢܵܗܵܐ: ܬܲܚܬܘܿܢ ܕܒܪܘܼܚܵܐ ܝܬܘܿܢ ܬܵܪܨܘܿܢ ܠܹܗ ܒܪܘܼܚܵܐ ܡܵܟܝܼܟ݂ܬܵܐ: ܒܸܚܵܪܵܐ ܒܓܵܢܘܼܟ݂ ܕܩܵܘܡܵܐ ܐܘܼܦ ܐܲܢ݇ܬ ܦܵܝܫܸܬ ܓ̰ܘܼܪܒܵܐ. 2 ܛܥܘܿܢܘܿܢ ܝܘܼܩܪܵܐ ܕܚܵܕ݇ ܕܗ̇ܘ ܐܚܹܪ݇ܢܵܐ: ܕܗܲܕܟ݂ܵܐ ܬܲܡܸܡܝܼܬܘܿܢ ܢܵܡܘܿܣܹܗ ܕܡܫܝܼܚܵܐ. 3 ܣܵܒܵܒ ܐܸܢ ܐܢܵܫܵܐ ܚܵܫܸܒ݂ ܕܝܼܠܹܐ ܡܸܢܕܝܼ ܟܲܕ݂ ܠܹܐ ܝܠܹܐ: ܓܵܢܹܗ ܡܲܚܠܘܼܛܹܐ ܝܠܹܗ. 4 ܐܸܠܵܐ ܟܠ ܐ݇ܢܵܫܵܐ ܦܘܼܠܚܵܢܵܐ ܕܓܵܢܹܗ ܗܵܘܹܐ ܨܲܚܨܘܼܝܹܐ: ܘܗ̇ܝܓܵܗ ܠܟܸܣ ܓܵܢܹܗ ܒܢܲܦ̮ܫܹܗ ܒܸܬ ܗܵܘܹܐ ܠܹܗ ܫܘܼܒ݂ܗܵܪܵܐ: ܘܠܵܐ ܒܐܚܹܪ̈݇ܢܹܐ. 5 ܣܵܒܵܒ ܟܠ ܐ݇ܢܵܫܵܐ ܟܪܬܵܐ ܕܓܵܢܹܗ ܒܸܬ ܛܵܥܸܢ.

6 ܐܝܼܢܵܐ ܗ̇ܘ ܕܡܘܼܠܦܵܐ ܝܠܹܐ ܒܗܸܡܸܙܡܵܢ ܫܲܪܸܟ ܒܗܵܘ ܕܡܵܠܸܦ ܒܟܠܵܝ ܛܵܒ݂ܵܬܹ̈ܐ. 7 ܠܵܐ ܚܵܠܛܝܼܬܘܿܢ: ܐܲܠܵܗܵܐ ܠܹܐ ܦܵܝܸܫ ܡܘܼܣܚܸܪܵܐ: ܣܵܒܵܒ ܡܸܢܕܝܼ ܕܙܲܪܸܥ ܒܲܪܢܵܫܵܐ: ܗ̇ܘ ܒܸܬ ܚܵܨܸܕ. 8 ܗ̇ܘ ܕܙܲܪܸܥ ܠܒܸܣܪܹܗ ܡ̣ܢ ܒܸܣܪܵܐ ܚܪܵܒ݂ܵܐ ܒܸܬ ܚܵܨܸܕ: ܘܗ̇ܘ ܕܙܲܪܸܥ ܠܪܘܼܚܵܐ: ܡ̣ܢ ܪܘܼܚܵܐ ܚܲܝܹ̈ܐ ܕܠܵܐܒܵܕ ܒܸܬ ܚܵܨܸܕ. 9 ܘܟܲܕ݂ ܒܸܥܒ݂ܵܕܵܐ ܝܘܵܚ ܡܸܢܕܝܼ ܛܵܒ݂ܵܐ: ܠܵܐ ܣܵܩܕܵܓ: ܣܵܒܵܒ ܒܙܲܒ݂ܢܵܐ ܕܝܼܠܹܐ ܘܵܓ̰ܸܒ ܒܸܬ ܚܵܨܕܵܚ: ܟܲܕ݂ ܠܹܐ ܣܵܩܕܵܚ. 10 ܒܲܣ ܐܵܕܝܼܵܐ: ܐܲܝܟ݂ ܕܐܝܼܬ݂ ܠܲܢ ܙܲܒ݂ܢܵܐ: ܦܵܠܚܵܚ ܛܵܒ݂ܵܬܹ̈ܐ ܠܟܸܣ ܟܠ ܐ݇ܢܵܫܵܐ: ܒܘܼܫ ܙܵܘܕܵܐ ܠܟܸܣ ܒܢܘܼܢܹ̈ܐ ܕܒܲܝܬܵܐ ܕܗܲܝܡܵܢܘܼܬ݂ܵܐ.

11 ܚܙܹܡܘܿܢ ܕܵܐܟ݂ܝܼ ܐܵܬ݂ܘܵܬܹ̈ܐ ܓܘܼܪܹ̈ܐ ܟܬܸܒ݂ܠܝܼ ܐܸܠܵܘܟ݂ܘܿܢ ܒܐܝܼܕܵܬܝܼ̈. 12 ܐܵܢܝܼ ܕܒܲܥܝܼ ܥܵܒ݂ܕܝܼ ܫܘܼܒ݂ܗܵܪܵܐ ܒܒܸܣܪܵܐ: ܐܵܢܝܼ ܡܲܠܝܘܼܨܵܘܟ݂ܘܿܢ ܝܼܢܵܐ ܕܦܵܝܫܝܼܬܘܿܢ ܓܙܝܼܪܹ̈ܐ: ܐܲܚܟ̰ܝܼ ܕܒܙܩܝܼܦܹܗ ܕܡܫܝܼܚܵܐ ܠܵܐ ܦܵܝܫܝܼ ܛܪܝܼܕܹܐ. 13 ܣܵܒܵܒ ܐܘܼܦ ܐܵܢܝܼ ܕܦܝܵܫܵܐ ܝܢܵܐ ܓܙܝܼܪܹ̈ܐ: ܒܓܵܢܵܝ ܠܹܐ ܝܢܵܐ ܒܸܢܛܵܪܵܐ ܢܵܡܘܿܣܵܐ: ܐܸܠܵܐ ܒܸܒܲܥܝܵܐ ܝܢܵܐ ܕܐܲܚܬܘܿܢ ܦܵܝܫܝܼܬܘܿܢ ܓܙܝܼܪܹܐ: ܕܒܒܸܣܪܵܘܟ݂ܘܿܢ ܥܵܒ݂ܕܝ ܫܘܼܒ݂ܗܵܪܵܐ. 14 ܐܝܼܢܵܐ ܕܐܵܢܵܐ ܥܵܒ݂ܕܸܢ ܫܘܼܒ݂ܗܵܪܵܐ: ܐܸܠܵܐ ܐܸܢ ܒܙܩܝܼܦܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܕܒ݂ܝܼܹܗ ܥܵܠܡܵܐ ܙܩܝܼܦܵܐ ܝܠܹܐ ܐܸܠܝܼ: ܘܐܵܢܵܐ ܠܥܵܠܡܵܐ. 15 ܣܵܒܵܒ ܠܵܐ ܓܙܘܼܪܬܵܐ ܡܸܢܵܟ݂ܝ ܝܠܵܐ: ܘܠܵܐ ܥܘܼܪܠܘܼܬܵܐ: ܐܸܠܵܐ ܒܪܝܼܬ݂ܵܐ ܚܲܕܬܵܐ. 16 ܘܐܵܢܝܼ ܕܚܵܕܪܝܼ ܒܐܵܗܵܐ ܩܵܢܘܿܢܵܐ: ܫܠܵܡܵܐ ܗܵܘܹܐ ܥܲܠܵܝ ܘܪܲܚܡܹܐ. ܘܥܲܠ ܝܼܣܪܵܝܹܠ ܕܐܲܠܵܗܵܐ.

17 ܡܐܵܕܝܼܵܐ ܥܲܠܝܼ ܐ݇ܢܵܫܵܐ ܓ̰ܵܦܵܐ ܠܵܐ ܕܵܪܹܐ: ܣܵܒܵܒ ܐܵܢܵܐ ܠܲܟܹ̈ܐ ܕܡܵܪܲܢ ܝܼܫܘܿܥ ܒܦܲܓ݂ܪܝܼ ܒܸܛܥܵܢܵܐ ܝܘܸܢ.

18 ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܵܘܟ݂ܘܿܢ: ܐܵܚܘܿܢܘܵܬܝܼ: ܐܵܡܹܝܢ.