ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ
ܐܝܟ݂ ܡܦܩܬܐ ܕܦܫܝܛܬܐ
ܐܓܪܬܐ ܕܬܪܬܝ ܕܦܘܠܘܣ ܫܠܝܚܐ ܕܠܘܬ ܩܘܪ̈ܢܬܝܐ
ܩܦܠܐܘܢ: ܐ
1 ܦܵܘܠܘܿܣ: ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ: ܘܛܝܼܡܵܬܹܗܐܘܿܣ ܐܵܚܘܿܢܵܐ: ܠܥܸܕܬܵܐ ܕܐܲܠܵܗܵܐ ܕܝܼܠܵܐ ܒܩܘܿܪܲܢܬܘܿܣ: ܥܲܡ ܟܠܵܝ ܩܲܕܝܼܫܹ̈ܐ ܕܝܼܢܵܐ ܒܟܠܵܗܿ ܐܵܟܼܵܐܝܼܵܐ: 2 ܫܵܦܵܩܲܬ ܥܲܡܵܘܟܼܘܿܢ ܘܫܠܵܡܵܐ ܡܼܢ ܐܲܠܵܗܵܐ ܒܵܒܲܢ ܘܡܼܢ ܡܵܪܲܢ ܝܼܫܘܿܥ ܡܫܝܼܚܵܐ. 3 ܡܒܘܼܪܟܼܵܐ ܝܠܹܐ ܐܲܠܵܗܵܐ ܘܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܒܵܒܵܐ ܕܪܲܚܡܹܐ: ܘܐܲܠܵܗܵܐ ܕܟܠ ܝܵܗ̄ܒܲܠܬܵܐ ܕܠܸܒܵܐ: 4 ܗܿܘ ܕܒܝܼܵܗ̄ܒܲܢ ܝܼܠܹܐ ܠܸܒܵܐ ܒܟܠܵܝ ܐܘܼܠܨܵܢܲܢ: ܕܐܘܼܦ ܐܲܚܢܲܢ ܡܵܨܵܚ ܝܵܗ̄ܒܼܵܚ ܠܸܒܵܐ ܠܐܵܢܝܼ ܕܝܼܢܵܐ ܒܟܠܵܝ ܐܘܼܠܨܵܢܹ̈ܐ: ܒܗܿܝ ܝܵܗ̄ܒܲܠܬܵܐ ܕܠܸܒܵܐ ܕܐܲܚܢܲܢ ܦܝܵܫܵܐ ܝܘܵܚ ܝܘܼܗ̄ܒܹܐ ܠܸܒܵܐ ܡܼܢ ܐܲܠܵܗܵܐ. 5 ܣܵܒܵܒ ܕܵܐܟܼܝܼ ܕܒܸܙܝܵܕܵܐ ܝܢܵܐ ܒܥܸܢ ܚܲܫܹ̈ܐ ܕܡܫܝܼܚܵܐ: ܗܲܕܟܼܵܐ ܒܝܸܕ ܡܫܝܼܚܵܐ ܒܸܙܝܵܕܵܐ ܝܠܵܐ ܐܘܼܦ ܝܵܗ̄ܒܲܠܬܲܢ ܕܠܸܒܵܐ. 6 ܘܐܸܢ ܦܝܵܫܵܐ ܝܘܵܚ ܡܘܼܠܝܸܨܹܐ: ܒܚܵܬܸܪ ܕܝܵܗ̄ܒܲܠܬܵܐ ܕܠܸܒܵܐ ܘܦܘܼܪܩܵܢܵܐ ܕܝܼܵܘܟܼܘܿܢ: ܘܐܸܢ ܦܵܝܫܵܐ ܝܘܵܚ ܝܘܼܗ̄ܒܹܐ ܠܸܒܵܐ: ܒܚܵܬܸܪ ܕܝܵܗ̄ܒܲܠܬܵܘܟܼܘܿܢ ܕܠܸܒܵܐ: ܗܿܝ ܕܟܹܐ ܦܵܠܚܵܐ ܒܚܡܵܠܬܵܐ ܕܐܵܢܝܼ ܚܲܫܹ̈ܐ ܕܐܘܼܦ ܐܲܚܢܲܢ ܩܵܒܘܿܠܹܐ ܝܘܵܚ. 7 ܘܗܹܒܼܥܸܢ ܕܥܲܠܵܘܟܼܘܿܢ ܩܘܝܼܬܵܐ ܝܠܵܐ: ܣܵܒܵܒ ܕܒܝܪܲܥܝܵܐ ܝܘܵܚ ܕܐܲܝܟ ܕܫܵܪ̈ܝܼܟܹܐ ܝܬܘܿܢ 8 ܒܚܲܫܹ̈ܐ: ܗܲܕܟܼܵܐ ܐܘܼܦ ܒܝܵܗ̄ܒܲܐܬܵܐ ܕܐܘܼܠܨܵܢܵܐ ܕܗ̄ܘܹܠܵܐ ܠܲܢ ܒܐܵܣܝܼܵܐ ܕܦܸܫܠܲܢ ܝܘܼܩܪܸܢܸܐ ܒܹܐ ܩܲܝܵܣ ܙܵܘܕܵܐ ܡܼܢ ܚܲܝܠܲܢ: ܗܲܠ ܕܩܛܸܥܠܲܢ ܗܹܒܼܥܸܢ ܐܘܼܦ ܡܼܢ ܚܲܝܹ̈ܐ. 9 ܘܐܘܼܦ ܐܲܚܢܲܢ ܐܝܼܬ ܗ̄ܘܵܐ ܒܓܵܢܲܢ ܦܸܬܘܵܐ ܕܡܵܘܬܵܐ: ܕܠܵܐ ܗܵܘܝܵܐ ܗ̄ܘܵܐ ܠܲܢ ܗܹܒܼܝܼ ܥܲܠ ܓܵܢܲܢ: ܐܸܠܵܐ ܥܲܠ ܐܲܠܵܗܵܐ: ܗܿܘ ܕܟܹܐ ܡܲܩܸܡ ܡܝܼܬܹ̈ܐ. 10 ܗܿܘ ܕܡܼܢ ܡܵܘܬܵܐ ܗܲܕܟܼܵܐ ܓܘܼܕܵܐ ܦܘܼܪܩܵܚܠܹܐ: ܘܒܸܬ ܦܵܪܸܩ: ܘܡܸܕܪܹܐ ܒܗܹܒܼܝܼ ܝܘܵܚ ܒܝܹܗ ܕܒܸܬ ܦܵܪܸܩ ܠܲܢ: 11 ܒܗܲܝܲܪܬܵܐ ܕܦܲܪܦܲܠܬܵܐ ܐܘܼܦ ܕܝܼܵܘܟܼܘܿܢ ܡܒܵܕܵܠܲܢ: ܘܫܵܦܵܩܲܬ ܕܠܟܸܣܠܲܢ ܡܼܢ ܪܵܒܵܐ ܐܢܵܫܹ̈ܐ ܗܵܘܝܵܐ ܠܫܵܟܲܪܬܵܐ ܒܪܵܒܵܐ ܒܚܵܬܸܪ ܕܥܸܢ. 12 ܣܵܒܵܒ ܕܫܘܼܒܼܗܵܪܲܢ ܐܵܗܵܐ ܝܠܹܐ: ܣܵܗܕܘܼܬܵܐ ܕܐܸܢܝܲܬܲܢ: ܕܒܩܲܕܝܼܫܘܼܬܵܐ ܘܒܬܪܘܼܨܘܼܬܵܐ ܕܐܲܠܵܗܵܐ: ܠܵܐ ܒܥܵܩܸܠܕܵܪܘܼܬܵܐ ܦܲܓܼܪܵܢܵܝܬܵܐ: ܐܸܠܵܐ ܒܫܵܦܵܩܲܬ ܕܐܲܠܵܗܵܐ ܚܕܸܪܲܢ ܓܵܘ ܥܵܠܡܵܐ: ܘܒܘܼܫ ܙܵܘܕܵܐ ܠܟܸܣܠܵܘܟܼܘܿܢ. 13 ܣܵܒܵܒ ܡܸܢܕܝܼܵܢܹ̈ܐ ܐܚܹܪ̄ܢܹܐ ܠܹܐ ܡܵܘܕܝܼܬܘܿܢ: ܘܒܗܸܒܼܝܼ ܝܘܸܢ ܕܗܲܠ ܚܲܪܬܵܐ ܒܸܬ ܡܵܘܕܝܼܬܘܿܢ: 14 ܕܵܐܟܼܝܼ ܕܐܘܼܦ ܩܲܡ ܡܵܘܕܝܼܬܘܿܢ ܐܸܠܲܢ ܒܚܵܕ̄ ܩܵܕܸܪ: ܕܫܘܼܒܼܗܵܪܵܘܟܼܘܿܢ ܝܼܘܵܚ: ܐܲܝܟ ܕܐܘܼܦ ܐܲܚܬܘܿܢ ܕܝܸܢ: ܒܝܘܿܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 15 ܘܒܐܵܗܵܐ ܗܲܡܲܢܬܵܐ ܒܣܸܡܠܵܐ ܠܝܼ ܡܼܢ ܩܵܕ̄ܡܵܝܬܵܐ ܕܐܵܬܸܢ ܠܟܸܣܠܵܘܟܼܘܿܢ: ܕܩܵܒܿܠܝܼܬܘܿܢ ܗ̄ܘܵܘ ܫܵܦܵܩܲܬ ܕܬܲܪ̈ܬܹܝ: 16 ܘܕܥܵܒܼܪܸܢ ܗ̄ܘܵܐ ܡܼܢ ܓܵܘܵܘܟܼܘܿܢ ܠܡܵܩܸܕܘܿܢܝܼܵܐ: ܘܡܸܕܪܹܐ ܡܼܢ ܡܵܩܸܕܘܿܢܝܼܵܐ ܕܐܵܬܸܢ ܗ̄ܘܵܐ ܠܟܸܣܠܵܘܟܼܘܿܢ: ܘܐܲܚܬܘܿܢ ܡܲܦܫܸܛܝܼܬܘܿܢ ܠܝܼ ܠܝܼܗܘܼܕ. 17 ܟܲܕ ܐܵܗܵܐ ܗܲܕܟܼܵܐ ܚܫܸܒܼܠܝܼ: ܒܩܵܠܘܿܠܘܼܬܵܐ ܦܠܸܚܠܝܪ: ܝܲܢ ܐܵܢܝܼ ܕܒܸܚܫܵܒܼܵܐ ܝܘܸܢ: ܐܲܝܟ ܕܒܒܸܣܪܵܐ ܒܸܚܫܵܒܼܵܐ ܝܘܸܢ: ܕܗܵܘܝܵܐ ܠܟܸܣܠܝܼ ܗܹܐ ܗܹܐ: ܘܠܵܐ ܠܵܐ: 18 ܐܸܠܵܐ ܡܗܘܼܡܢܵܐ ܝܠܹܐ ܐܲܠܵܗܵܐ: ܕܗܹܡܸܙܡܵܢܲܢ ܕܠܟܸܣܠܵܘܟܼܘܿܢ ܠܹܐ ܗ̄ܘܵܐ: ܗܹܐ: ܘܠܵܐ. 19 ܣܵܒܵܒ ܒܪܘܼܢܹܗ ܕܐܲܠܵܗܵܐ: ܝܼܫܘܿܥ ܡܫܝܼܚܵܐ: ܗܿܘ ܕܦܸܫܠܹܐ ܡܘܼܟܪܸܙܵܐ ܓܵܘܵܘܟܼܘܿܢ ܒܐܝܼܕܲܢ: ܒܝܸܕ ܕܝܼܝܼ ܘܒܣܸܠܘܵܢܘܿܣ ܘܒܛܝܼܡܵܬܹܐܘܿܣ: ܠܵܐ ܗ̄ܘܹܠܹܐ ܗܹܐ ܘܠܵܐ: ܐܸܠܵܐ ܗܹܐ ܗ̄ܘܹܠܵܐ ܒܝܹܗ. 20 ܣܵܒܵܒ ܟܠܵܝ ܩܵܘܠܹ̈ܐ ܕܐܲܠܵܗܵܐ ܒܝܹܗ: ܗܹܐ: ܘܒܝܹܗ ܐܵܡܹܝܢ: ܠܚܸܩܪܵܐ ܕܐܲܠܵܗܵܐ ܒܝܸܕ ܕܝܸܢ. 21 ܐܝܼܢܵܐ ܗܿܘ ܕܡܲܩܘܘܼܝܲܢ ܝܼܠܹܐ ܥܲܡܵܘܟܼܘܿܢ ܒܡܫܝܼܚܵܐ: ܘܩܲܡ ܡܵܫܸܚ ܠܲܐ: ܐܲܠܵܗܵܐ ܝܠܹܐ: 22 ܕܩܲܡ ܡܵܚܹܐ ܠܲܐ ܡܵܘܗܪ: ܘܝܸܗܒܸܠܹܐ ܓܸܪܵܘ ܕܪܘܼܚܹܗ ܒܠܸܒܵܘܵܬܲܢ. 23 ܐܝܼܢܵܐ ܐܵܢܵܐ ܒܩܪܵܝܵܐ ܝܘܸܢ ܠܐܲܠܵܗܵܐ ܣܵܗܕܵܐ ܥܲܠ ܓܵܢܝܼ: ܣܵܒܵܒ ܡܘܼܚܲܒܢܵܘܟܼܘܿܢ ܒܹܐܬܵܝܼܝܼ ܝܠܵܐ ܠܵܐ ܐܬܹܠܝܼ ܠܩܘܿܪܲܢܬܘܿܣ. 24 ܠܵܐ ܣܵܒܵܒ ܕܡܵܪܵܘܵܬܹܐ ܕܗܲܝܡܵܢܘܼܬܵܘܟܼܘܿܢ ܝܼܘܵܚ: ܐܸܠܵܐ ܗܲܝܸܪܵܢܹܐ ܕܚܲܕܘܼܬܵܘܟܼܘܿܢ ܝܼܘܵܚ: ܣܵܒܵܒ ܕܒܗܲܝܡܵܢܘܼܬܵܐ ܒܸܟܠܵܝܵܐ ܝܬܘܿܢ܆
ܩܦܠܐܘܢ: ܒ
1 ܐܝܼܢܵܐ ܐܵܗܵܐ ܕܸܢܝܼ ܒܓܵܢܝܼ ܕܡܸܕܪܹܐ ܠܵܐ ܐܵܬܸܢ ܠܟܸܣܠܵܘܟܼܘܿܢ ܒܦܵܫܲܡܬܵܐ. 2 ܣܵܒܵܒ ܐܸܢ ܐܵܢܵܐ ܡܲܦܫܸܡܸܢܵܘܟܼܘܿܢ: ܡܵܢܝܼ ܒܸܬ ܡܲܚܕܹܐ ܠܝܼ: ܐܸܠܵܐ ܗܿܘ ܕܐܵܢܵܐ ܡܘܼܦܫܸܡܠܝܼ ܐܸܠܹܗ: 3 ܘܟܬܸܒܼܠܝܼ ܐܸܠܵܘܟܼܘܿܢ ܗܲܪ ܐܵܗܵܐ: ܕܠܵܐ ܟܲܕ ܐܵܬܸܢ ܡܲܦܫܸܡܝܼ ܠܝܼ ܐܵܢܝܼ ܕܘܵܓܸܒ ܝܼܗ̄ܘܵܐ ܕܡܲܚܕܝܼ ܗ̄ܘܵܘ ܠܝܼ: ܟܲܕ ܡܵܪܹܐ ܗܹܒܼܝܼ ܝܘܸܢ ܥܲܠ ܟܠܵܘܟܼܘܿܢ: ܕܚܲܕܘܼܬܵܐ ܕܝܼܝܼ ܕܟܠܵܘܟܼܘܿܢ ܝܼܠܵܐ. 4 ܣܵܒܵܒ ܡܼܢ ܐܘܼܠܨܵܢܵܐ ܓܘܼܪܵܐ: ܘܡܼܢ ܗܲܣܪܲܬ ܕܠܸܒܵܐ: ܟܬܸܒܼܠܝܼ ܐܸܠܵܘܟܼܘܿܢ: ܒܪܵܒܵܐ ܕܸܡܥܹ̈ܐ: ܠܵܐ ܕܦܵܫܡܝܼܬܘܿܢ: ܐܸܠܵܐ ܕܝܲܕܥܝܼܬܘܿܢ ܚܘܼܒܵܐ ܕܐܝܼܬ ܠܝܼ ܒܒܘܼܫܵܝܝܼ ܠܟܸܣܠܵܘܟܼܘܿܢ. 5 ܐܝܼܢܵܐ ܐܸܢ ܐܢܵܫܵܐ ܡܘܼܦܫܸܡܠܹܐ: ܠܹܐ ܝܠܵܐ ܐܸܠܝܼ ܡܘܼܦܫܸܡܠܹܐ: ܐܸܠܵܐ ܒܚܵܕ̄ ܩܵܕܸܪ ܕܠܵܐ ܐܸܵܬܸܢ ܝܵܩܘܿܪܵܐ ܠܟܠܵܘܟܼܘܿܢ. 6 ܐܝܼܢܵܐ ܒܲܣܵܐ ܝܠܵܐ ܠܚܵܕ̄ ܕܗܲܕܟܼܵܐ ܐܵܗܵܐ ܢܓܵܘܬܵܐ ܕܡܼܢ ܪܵܒܵܐ: 7 ܗܲܕܟܼܵܐ ܕܘܵܓܸܒ ܝܼܠܵܐ ܕܡܒܵܕܵܠ ܕܗܵܕܵܐ: ܫܵܒܼܩܝܼܬܘܿܢ ܠܹܗ ܘܝܵܗ̄ܒܼܝܼܬܘܿܢ ܠܹܐ ܠܸܒܵܐ: ܠܵܐ ܗ̄ܘܹܐ ܕܒܦܵܫܲܡܬܵܐ ܙܵܘܕܵܐ ܦܵܝܸܫ ܒܸܠܥܝܵܐ ܗܿܘ ܕܝܼܠܹܐ ܗܲܕܟܼܵܐ. 8 ܣܵܒܵܒ ܕܐܵܗܵܐ ܦܲܪܦܘܼܠܹܐ ܝܘܸܢ 9 ܒܝܼܵܘܟܼܘܿܢ: ܕܡܲܩܘܝܼܬܘܿܢ ܒܝܹܗ ܚܘܼܒܵܘܟܼܘܿܢ. ܣܵܒܵܒ ܠܕܵܐܗܵܐ (ܢܝܸܬ) ܟܬܸܒܼܠܝܼ: ܐܘܼܦ ܕܝܲܕܥܸܢ ܓܵܪܲܒܬܵܘܟܼܘܿܢ: ܐܸܢ ܒܟܠ ܡܸܢܕܝܼ ܡܲܨܝܸܬܵܢܹ̈ܐ ܝܬܘܿܢ. 10 ܐܝܼܢܵܐ ܠܡܿܢ ܕܐܲܚܬܘܿܢ ܫܵܒܼܩܝܼܬܘܿܢ: ܐܘܼܦ ܐܵܢܵܐ. ܣܵܒܵܒ ܐܘܼܦ ܐܵܢܵܐ ܐܸܢ ܡܸܢܕܝܼ ܫܒܼܝܼܩܵܐ ܝܘܸܢ: ܐܸܠܹܗ ܫܒܼܝܼܩܵܐ ܝܘܸܢ ܒܚܵܬܸܪ ܕܝܼܵܘܟܼܘܿܢ: ܩܵܕ̄ܡ ܦܵܬܹܗ ܕܡܫܝܼܚܵܐ: 11 ܕܠܵܐ ܙܵܠܸܡ ܠܲܢ ܣܵܛܵܢܵܐ: ܣܵܒܵܒ ܟܹܐ ܝܲܕܥܵܚ ܦܲܢܕܘܼ̈ܗܝ. 12 ܐܝܼܢܵܐ ܟܲܕ ܐܬܸܠܝܼ ܠܛܪܘܿܐܘܿܣ ܒܡܲܫܚܲܕܬܹܗ ܕܡܫܝܼܚܵܐ: ܘܟܲܕ ܦܸܫܠܹܐ ܦܬܝܼܚܵܐ ܐܸܠܝܼ ܬܲܪܥܵܐ ܒܡܵܪܝܵܐ: 13 ܠܵܐ ܗ̄ܘܹܠܵܐ ܠܝܼ ܢܝܵܚܵܐ ܒܪܘܼܚܝܼ: ܣܵܒܵܒ ܠܵܐ ܡܘܼܫ̄ܟܚܠܝܼ ܠܛܸܛܘܿܣ ܐܵܚܘܿܢܝܼ: ܐܸܠܵܐ ܫܒܼܝܼܩܵܝܠܝܼ ܘܦܠܸܛܠܝܼ ܠܡܵܩܹܕܿܢܝܼܵܐ. 14 ܐܝܼܢܵܐ ܡܸܢܬܵܐ ܡܼܢ ܐܲܠܵܗܵܐ: ܕܒܟܠ ܙܲܒܼܢܵܐ ܟܹܐ ܥܵܒܸܕ ܠܲܢ ܓܼܵܠܒܵܢܹ̈ܐ ܒܡܫܝܼܚܵܐ: ܘܟܹܐ ܓܵܠܹܐ ܒܝܸܢ ܪܹܝܚܵܐ ܕܝܕܹܥܬܸܗ ܒܟܠ ܕܘܼܟܵܐ. 15 ܣܵܒܵܒ ܪܸܝܚܵܐ ܒܵܣܝܼܡܵܐ ܝܘܵܚ ܒܡܫܝܼܚܵܐ ܠܐܲܠܵܗܵܐ: ܒܐܵܢܝܼ ܕܒܸܚܵܝܵܐ ܘܒܵܐܢܝܼ ܕܒܸܬܠܵܩܵܐ. 16 ܠܲܐܢܹܐ: ܪܹܝܚܵܐ ܕܡܵܘܬܵܐ ܠܡܵܘܬܵܐ: ܘܠܐܵܢܝܼ: ܪܹܝܚܵܐ ܕܚܲܝܹ̈ܐ ܠܚܲܝܹ̈ܐ. ܘܠܲܐܢܹܐ ܡܵܢܝܼ ܟܹܐ ܚܵܫܸܚ: 17 ܣܵܒܵܒ ܠܹܐ ܝܘܵܚ ܐܲܝܟ ܪܵܒܵܐ: ܟܹܐ ܡܲܚܪܸܒܼܝܼ ܗܹܡܸܙܡܵܢ ܕܐܲܠܵܗܵܐ: ܐܸܠܵܐ ܐܲܝܟ ܕܒܬܪܘܼܨܘܼܬܵܐ: ܘܐܲܝܟ ܕܡܼܢ ܐܲܠܵܗܵܐ: ܩܵܕ̄ܡ ܐܲܠܵܗܵܐ: ܒܡܫܝܼܚܵܐ ܗܲܡܙܘܼܡܹܐ ܝܘܵܚ.
ܩܦܠܐܘܢ: ܓ
1 ܫܵܪܘܿܝܹܐ ܝܘܵܚ ܡܸܕܪܹܐ ܕܚܵܩܪܵܚ ܓܵܢܲܢ: ܝܲܢ ܣܢܝܼܩܹܐ ܝܘܵܚ ܐܲܝܟ ܚܲܟܡܵܐ ܕܐܸܓܲܪܬܹܐ ܕܚܩܵܪܬܵܐ ܦܵܝܫܝܼ ܟܬܝܼܒܹܐ ܐܸܠܵܘܟܼܘܿܢ: ܝܲܢ ܡܸܢܵܘܟܼܘܿܢ: 2 ܐܸܓܲܪܬܵܐ ܕܝܸܢ ܐܲܚܬܘܿܢ ܝܼܬܘܿܢ: ܕܝܼܠܵܐ ܟܬܝܼܒܼܬܵܐ ܒܠܸܒܲܢ: ܘܝܕܥܝܼܬܵܐ ܝܠܵܐ ܘܩܪܝܼܬܵܐ ܡܼܢ ܟܠ ܐܢܵܫܵܐ: 3 ܣܵܒܵܒ ܕܝܕܸܥܝܹܐ ܝܬܘܿܢ ܕܐܸܓܲܪܬܹܗ ܕܡܫܝܼܚܵܐ ܝܬܘܿܢ: ܕܦܸܫܠܵܐ ܥܒܼܝܪܕܬܵܐ ܚܸܠܡܲܬ ܡܸܢܲܢ: ܕܝܼܠܵܐ ܟܬܝܼܒܼܬܵܐ: ܠܵܐ ܒܒܸܕܝܘܼܬܵܐ: ܐܸܠܵܐ ܒܪܘܼܚܵܐ ܕܐܲܠܵܗܵܐ ܚܲܝܵܐ: ܠܵܐ ܒܠܘܼܚܹ̈ܐ ܕܟܹܐܦܵܐ: ܐܸܠܵܐ ܒܠܘܼܚܹ̈ܐ ܕܠܸܒܵܐ ܕܒܸܣܪܵܐ. 4 ܘܗܲܕܟܼܵܐ ܗܲܡܲܢܬܵܐ ܐܝܼܬ ܠܲܢ ܒܡܫܝܼܚܵܐ ܠܟܸܣ ܐܲܠܵܗܵܐ: 5 ܠܵܐ ܕܐܲܚܢܲܢ ܡܵܨܵܚ ܒܓܵܢܲܢ ܚܵܫܒܼܵܚ ܡܸܢܕܝܼ ܐܲܝܟ ܕܡܼܢ ܓܵܢܲܢ: ܐܸܠܵܐ ܡܨܵܝܬܲܢ ܡܼܢ ܐܲܠܵܗܵܐ ܝܠܵܐ: 6 ܗܿܘ ܕܩܲܡ ܡܲܡܸܨ̄ ܠܲܢ ܕܗܵܘܵܚ ܚܸܠܡܲܬܟܵܪܹ̈ܐ ܕܕܝܵܬܸܩܹܐ ܚܲܕܬܵܐ: ܠܵܐ ܕܟܬܵܒܼܵܐ: ܐܸܠܵܐ ܕܪܘܼܚܵܐ. ܣܵܒܵܒ ܕܟܬܵܒܼܵܐ ܟܹܐ ܩܵܛܸܠ: ܐܝܼܢܵܐ ܪܘܼܚܵܐ ܟܹܐ ܡܲܚܝܼܵܐ. 7 ܐܝܼܢܵܐ ܐܸܢ ܚܸܠܡܲܬ ܕܡܵܘܬܵܐ: ܕܒܟܬܵܒܼܬܵܐ: ܘܪܫܝܼܡܬܵܐ ܥܲܠ ܟܹܐܦܹ̈ܐ: ܗ̄ܘܸܠܵܐ ܒܬܸܫܒܘܿܚܬܵܐ: ܕܵܐܟܼܝܼ ܕܠܹܐ ܡܵܨܝܼ ܗ̄ܘܵܘ ܒܢܲܝ̈ ܝܼܣܪܵܝܹܠ ܠܸܚܝܵܪܵܐ ܥܲܠ ܦܵܬܹܗ ܕܡܘܼܫܹܐ ܣܵܒܵܒ ܕܚܸܩܪܵܐ ܕܦܵܬܹܗ: ܗܿܘ ܕܥܵܒܼܪܵܢܵܐ ܗ̄ܘܵܐ: 8 ܒܲܣ ܕܵܐܟܼܝܼ ܚܸܠܡܲܬ ܕܪܘܼܚܵܐ ܠܹܐ ܗܵܘܝܵܐ ܒܘܼܫ ܙܵܘܕܵܐ ܒܚܸܩܪܵܐ: 9 ܣܵܒܵܒ ܐܸܢ ܚܸܠܡܲܬ ܕܓܘܼܢܵܗܟܵܪܘܼܬܵܐ ܗ̄ܘܹܠܵܐ ܚܸܩܪܵܐ: ܟܡܵܐ ܙܵܘܕܵܐ ܒܸܬ ܙܵܝܕܵܐ ܚܸܠܡܲܬ ܕܙܲܕܝܼܩܘܼܬܵܐ ܒܚܸܩܪܵܐ: 10 ܣܵܒܵܒ ܐܘܼܦ ܗܿܘ ܕܦܸܫܠܹܐ ܚܩܝܼܪܵܐ ܠܹܐ ܗ̄ܘܵܐ ܚܩܝܼܪܵܐ ܒܐܵܗܵܐ ܗܲܓܲܬ: ܡܣܵܒܵܒ ܕܚܸܩܪܵܐ ܕܝܼܠܹܐ ܒܘܼܫ ܙܵܘܕܵܐ. 11 ܣܵܒܵܒ ܐܸܢ ܡܸܢܕܝܼ ܕܥܵܒܼܪܵܢܵܐ ܗ̄ܘܵܐ ܗ̄ܘܹܠܹܐ ܒܚܸܩܪܵܐ: ܒܘܼܫ ܙܵܘܕܵܐ ܗܿܘ ܕܥܲܪܩܸܠ ܒܸܬ ܗܵܘܹܐ ܒܚܸܩܪܵܐ. 12 ܒܲܣ ܣܵܒܵܒ ܕܐܝܼܬ ܠܲܢ ܐܵܗܵܐ ܗܹܒܼܝܪ: ܪܵܒܵܐ ܒܸܣܬܵܝܘܼܬܵܐ ܡܲܦܠܘܼܚܹܐ ܝܘܵܚ: 13 ܘܠܵܐ ܐܲܝܟ ܡܘܼܫܹܐ ܕܕܪܹܠܹܐ ܟܵܣܵܝܬܵܐ ܥܲܠ ܦܵܬܹܗ: ܕܠܵܐ ܚܵܝܪܝܼ ܗ̄ܘܵܘ ܒܢܲܝ̈ ܝܼܣܪܵܝܹܠ ܠܫܘܼܠܵܡܵܐ ܕܗܿܘ ܕܥܵܒܼܪܵܢܵܐ ܗ̄ܘܵܐ: 14 ܐܸܠܵܐ ܦܸܫܠܘܿܢ ܡܘܼܩܫܝܹܐ ܚܝܼܵܠܵܝ̈: ܣܵܒܵܒ ܕܗܲܠ ܐܵܗܵܐ ܝܘܿܡܵܐ ܐܝܼܡܲܢ ܕܕܝܵܬܹܩܹܐ ܥܲܬܝܼܩܬܵܐ ܦܵܝܫܵܐ ܩܪܝܼܬܵܐ: ܗܲܪ ܗܿܝ ܟܵܣܵܝܬܵܐ ܟܹܐ ܟܵܠܝܵܐ: ܘܠܹܐ ܦܵܝܫܵܐ ܓܠܝܼܬܵܐ: ܗܿܝ ܕܒܡܫܝܼܚܵܐ ܦܝܵܫܵܐ ܝܠܵܐ ܒܘܼܛܸܠܬܵܐ. 15 ܐܸܠܵܐ ܗܲܠ ܐܸܕܝܘܿ ܐܝܼܡܲܢ ܕܦܵܝܸܫ ܩܸܪܝܵܐ ܡܘܼܫܹܐ: ܟܵܣܵܝܬܵܐ ܥܲܠ ܠܸܒܵܝ ܕܪܝܼܬܵܐ ܝܠܵܐ. 16 ܐܝܼܢܵܐ ܐܝܼܡܲܢ ܕܐܢܵܫܵܐ ܡܸܢܵܝ ܕܵܝܸܪ ܠܟܸܣ ܡܵܪܝܵܐ: ܟܹܐ ܦܵܝܫܵܐ ܫܩܝܼܠܬܵܐ ܡܸܢܹܗ ܟܵܣܵܝܬܵܐ. 17 ܐܝܼܢܵܐ ܡܵܪܝܵܐ ܪܘܼܚܵܐ ܝܠܹܐ: ܘܐܲܝܟܵܐ ܕܝܼܠܵܐ ܪܘܼܚܹܗ ܕܡܵܪܝܵܐ ܬܵܡܵܐ ܐܵܙܵܕܘܼܬܵܐ ܝܠܵܐ. 18 ܐܝܼܢܵܐ ܐܲܚܢܲܢ ܟܠܲܢ ܒܦܵܬܵܐ ܓܠܝܼܬܵܐ ܬܸܫܒܘܿܚܬܹܗ ܕܡܵܪܝܵܐ ܐܲܝܟ ܕܒܢܵܘܪܵܐ ܒܸܚܙܵܝܵܐ ܝܘܵܚ: ܘܠܗܿܝ ܕܡܘܼܬܵܐ ܦܝܵܫܵܐ ܝܘܵܚ ܫܘܼܚܠܸܦܹܐ ܡܼܢ ܚܸܩܪܵܐ ܠܚܸܩܪܵܐ: ܐܲܝܟ ܕܡܼܢ ܡܵܪܝܵܐ ܪܘܼܚܵܐ.
ܩܦܠܐܘܢ: ܕ
1 ܣܵܒܵܒ ܕܐܵܗܵܐ: ܟܲܕ ܕܒܼܝܼܩܹܐ ܝܘܵܚ ܐܵܗܵܐ ܚܸܠܡܲܬ: ܐܲܝܟ ܪܲܚܡܹܐ ܕܗ̄ܘܹܠܘܿܢ ܥܲܠܲܢ: ܠܹܐ ܣܵܩܕܵܚ. 2 ܐܸܠܵܐ ܪܘܼܦܝܹܐ ܝܘܵܚ ܫܘܼܠܹ̈ܐ ܛܸܫܝܹ̈ܐ ܕܢܚܸܦܬܵܐ: ܠܵܐ ܒܸܚܕܵܪܵܐ ܒܝܲܕܘܼܥܘܼܬܵܐ: ܘܠܵܐ ܡܲܦܟܘܼܠܹܐ ܗܹܡܸܙܡܵܢ ܕܐܲܠܵܗܵܐ: ܐܸܠܵܐ ܒܓܠܵܝܬܵܐ ܕܣܲܪܲܣܬܘܼܬܵܐ ܡܲܚܫܘܼܚܹܐ ܝܘܵܚ ܓܵܢܲܢ ܠܟܠ ܐܸܢܝܲܬ ܕܒܢܲܝ̈ܢܵܫܵܐ: ܩܵܕ̄ܡ ܐܲܠܵܗܵܐ. 3 ܐܝܼܢܵܐ ܐܸܢ ܟܘܼܣܝܼܬܵܐ ܝܠܵܐ ܐܹܘܵܢܓܵܠܝܼܘܿܢ ܕܝܸܬ: ܒܐܵܢܝܼ ܕܝܼܢܵܐ ܒܸܬܠܵܩܵܐ ܟܘܼܣܝܼܬܵܐ ܝܠܵܐ: 4 ܕܒܝܼܵܝ ܐܲܠܵܗܵܐ ܕܐܵܗܵܐ ܥܵܠܡܵܐ ܡܘܼܣܡܹܠܹܐ ܚܝܼܵܠܹ̈ܐ ܕܠܵܐ ܗܲܡܸܢܵܢܹ̈ܐ: ܕܠܵܐ ܙܵܪܸܩ ܥܲܠܵܝ ܒܲܗܪܵܐ ܕܐܹܘܵܢܓܵܠܝܼܘܿܢ ܕܚܸܩܪܹܗ ܕܡܫܝܼܚܵܐ: ܗܿܘ ܕܝܼܠܹܐ ܕܡܘܼܬܵܐ ܕܐܲܠܵܗܵܐ. 5 ܣܵܒܵܒ ܠܹܐ ܝܘܵܚ ܡܲܟܪܘܼܙܹܐ ܓܵܢܲܢ: ܐܸܠܵܐ ܠܡܫܝܼܚܵܐ ܝܼܫܘܿܥ ܡܵܪܲܢ: ܘܓܵܢܲܢ ܪܹ̈ܓܵܘܵܬܵܘܟܼܘܿܢ ܒܚܵܬܸܪ ܕܝܼܫܘܿܥ. 6 ܣܵܒܵܒ ܐܲܠܵܗܵܐ: ܗܿܘ ܕܐܡܸܪܹܐ: ܡܼܢ ܚܘܼܒܼܝܵܐ ܒܲܗܪܵܐ ܙܵܪܸܩ: ܗܿܘ ܙܪܸܩܠܹܐ ܒܠܸܒܵܘܵܬܲܢ: ܠܝܼܵܗ̄ܒܼܵܐ ܒܲܗܪܵܐ ܕܝܕܹܥܬܵܐ ܕܚܸܩܪܹܗ ܕܐܲܠܵܗܵܐ: ܒܦܵܬܹܗ ܕܝܼܫܘܿܥ ܡܫܝܼܚܵܐ. 7 ܐܝܼܢܵܐ ܐܝܼܬ ܠܲܢ ܐܵܗܵܐ ܚܲܙܝܼܢܵܐ ܒܡܵܐܢܹ̈ܐ ܕܛܝܼܢܵ: ܕܒܘܼܫܵܝܼܝ ܕܓܘܼܪܘܼܬܵܐ ܕܚܲܝܠܵܐ ܗܵܘܹܐ ܡܼܢ ܐܲܠܵܗܵܐ ܘܠܵܐ ܡܸܢܲܢ. 8 ܒܟܠ ܡܸܢܕܝܼ ܦܝܵܫܵܐ ܝܘܵܚ ܡܘܼܠܝܼܨܹܐ: ܐܸܠܵܐ ܠܵܐ ܡܘܼܥܝܸܩܹܐ: ܦܝܵܫܵܐ ܝܘܵܚ ܡܲܥܬܵܠ: ܐܸܠܵܐ ܠܵܐ ܩܛܥܝܼܬܵܐ ܗܹܒܼܝܸܢ: 9 ܦܝܵܫܵܐ ܝܘܵܚ ܛܪܝܼܕܹܐ: ܐܸܠܵܐ ܠܵܐ ܫܒܼܝܼܩܹܐ: ܦܝܵܫܵܐ ܝܘܵܚ ܚܘܼܪܙܸܦܹܐ: ܐܸܠܵܐ ܠܵܐ ܬܘܼܠܩܹܐ: 10 ܒܟܠ ܙܲܒܼܢܵܐ ܡܝܼܬܘܼܬܹܗ ܕܡܵܪܲܢ ܝܼܫܘܿܥ ܒܦܲܓܼܪܲܢ ܛܥܝܼܢܹܐ ܝܘܵܗ: ܕܐܘܼܦ ܚܲܝܹ̈ܐ ܕܝܼܫܘܿܥ ܒܦܲܓܼܪܲܢ ܦܵܝܫܝܼ ܓܸܠܝܹܐ. 11 ܣܵܒܵܒ ܗܲܡܵܫܵܐ ܐܲܚܢܲܢ ܕܝܼܘܵܚ ܚܵܝܹ̈ܐ: ܦܝܵܫܵܐ ܝܘܵܚ ܣܘܼܦܝܹܐ ܠܡܵܘܬܵܐ ܒܚܵܬܸܚ ܕܝܼܫܘܿܥ: ܕܐܘܼܦ ܚܲܝܹ̈ܐ ܕܝܼܫܘܿܥ ܦܵܝܫܝܼ ܓܸܠܝܹܐ ܒܐܵܗܵܐ ܦܲܓܼܪܲܢ ܡܵܝܘܿܬܵܐ. 12 ܗܲܕܟܼܵܐ ܡܵܘܬܵܐ ܒܝܸܢ ܒܸܦܠܵܚܵܐ ܝܠܹܐ: ܘܚܲܝܹ̈ܐ ܒܝܼܵܘܟܼܘܿܢ. 13 ܒܲܣ ܐܘܼܦ ܐܲܚܢܲܢ ܕܚܕܵܐ ܪܘܼܚܵܐ ܕܗܲܝܡܵܢܘܼܬܵܐ ܐܝܼܬ ܠܲܢ: ܐܲܝܟ ܕܝܼܠܹܐ ܟܬܝܼܒܼܵܐ: ܗܘܼܡܸܢܝܼ: ܘܣܵܒܵܒ ܕܐܵܗܵܐ ܗܘܼܡܙܸܡܠܝܼ: ܐܘܼܦ ܐܲܚܢܲܢ ܗܲܡܘܼܢܹܐ ܝܘܵܚ: ܒܘܼܬ ܕܐܵܗܵܐ ܐܘܼܦ ܗܲܡܙܘܼܡܹܐ ܝܘܵܚ: 14 ܟܲܕ ܒܝܼܕܲܥܝܵܐ ܝܘܵܚ ܕܗܿܘ ܕܡܘܼܩܸܡܠܹܐ ܠܡܵܪܲܢ ܝܼܫܘܿܥ: ܐܘܼܦ ܐܸܠܲܢ ܥܲܡ ܝܼܫܘܿܥ ܒܸܬ ܡܲܩܸܡ: ܘܒܸܬ ܡܲܝܬ̄ܝܹܐ ܠܲܢ ܥܲܡܵܘܟܼܘܿܢ (ܠܟܸܣܠܹܗ). 15 ܣܵܒܵܒ ܟܠ ܡܸܢܕܝܼ ܒܚܵܬܸܪ ܕܝܼܵܘܟܼܘܿܢ ܝܼܠܹܐ: ܕܟܲܕ ܙܵܝܕܵܐ ܫܵܦܵܩܲܬ ܒܝܸܕ ܪܵܒܵܐ: ܡܲܙܝܸܕܵܐ ܫܵܟܲܪܬܵܐ ܠܚܸܩܪܵܐ ܕܐܲܠܵܗܵܐ. 16 ܒܘܼܬ ܕܐܵܗܵܐ ܠܹܐ ܣܵܩܕܵܚ. ܣܵܒܵܒ ܐܵܦܸܢ ܕܒܲܪܢܵܫܲܢ ܒܲܪܝܵܐ ܒܸܚܪܵܒܼܵܐ ܝܠܹܐ: ܐܸܠܵܐ ܗܿܘ ܕܝܼܠܹܐ ܓܵܘܵܝܵܐ ܦܝܵܫܵܐ ܝܠܹܐ ܚܘܼܕܸܬܵܐ ܝܘܿܡܵܐ ܡܼܢ ܝܘܿܡܵܐ. 17 ܣܵܒܵܒ ܐܘܼܠܨܵܢܲܢ ܩܵܠܘܿܠܵܐ ܕܝܼܠܹܐ ܕܛܲܪܦܲܛܬܵܐ ܕܥܲܝܢܵܐ: ܚܸܩܪܵܐ ܓܘܼܪܵܐ ܕܠܵܐ ܩܲܝܵܣ ܠܥܵܠܲܡ ܗܵܕܘܿܪܲܢ ܝܼܠܹܐ: 18 ܕܠܹܐ ܝܘܵܚ ܒܸܚܝܵܪܵܐ ܒܐܲܢܸܐ ܡܸܢܕܝܵܢܹ̈ܐ ܕܦܝܵܫܵܐ ܝܢܵܐ ܚܸܙܝܹܐ: ܐܸܠܵܐ ܒܐܵܢܝܼ ܕܠܹܐ ܦܵܝܫܝܼ ܚܸܙܝܹܐ: ܣܵܒܵܒ ܐܵܢܝܼ ܕܦܵܝܫܝܼ ܚܸܙܝܹܐ ܕܙܲܒܼܢܵܐ ܝܢܵܐ: ܐܝܼܢܵܐ ܐܵܢܝܼ ܕܠܹܐ ܦܵܝܫܝܼ ܚܸܙܝܹܐ: ܠܥܵܠܲܡ ܝܼܢܵܐ.
ܩܦܠܐܘܢ: ܗ
1 ܣܵܒܵܒ ܒܝܼܕܲܥܝܵܐ ܝܘܵܚ ܕܐܸܢ ܒܲܝܬܲܢ ܕܒܲܐܪܥܵܐ ܐܵܗܵܐ ܕܡܵܫܸܟܢܵܐ ܦܵܝܸܫ ܣܬܝܼܪܵܐ: ܐܝܼܢܵܐ ܐܝܼܬ ܠܲܢ ܒܸܢܝܵܢܵܐ ܕܡܼܢ ܐܲܠܵܗܵܐ: ܒܲܝܬܵܐ ܠܵܐ ܒܦܘܼܠܚܵܢܵܐ ܕܐܝܼܕܵܬܹ̈ܐ: ܒܫܡܲܝܵܐ ܠܥܵܠܲܡ. 2 ܣܵܒܵܒ ܐܘܼܦ ܒܐܵܗܵܐ ܬܵܢܘܿܚܹܐ ܝܘܵܚ: ܘܫܲܗ̄ܘܘܼܬܹܐ ܝܘܵܚ ܕܦܵܝܫܚ ܡܘܼܠܒܸܫܹܐ ܒܲܝܬܲܢ ܕܡܼܢ ܫܡܲܝܵܐ: 3 ܩܵܘܡܵܐ ܐܸܢ ܦܵܝܫܵܚ ܡܘܼܠܒܸܫܹܐ: ܠܹܐ ܦܵܝܫܵܚ ܡܘܼܫ̄ܟܚܹܐ ܫܘܼܠܚܵܝܹ̈ܐ. 4 ܣܵܒܵܒ ܐܲܚܢܲܢ ܕܝܼܘܵܚ ܒܐܵܗܵܐ ܡܵܫܸܟܢܵܐ ܬܵܢܘܿܚܹܐ ܝܘܵܚ ܡܼܢ ܝܘܼܩܪܹܗ: ܠܵܐ ܕܒܸܒܲܥܝܵܐ ܝܘܵܚ ܠܸܦܝܵܫܵܐ ܫܘܼܠܚܹܐ: ܐܸܠܵܐ ܕܦܵܝܫܵܚ ܡܘܼܠܒܸܫܹܐ: ܕܦܵܝܫܵܐ ܒܠܥܝܼܬܵܐ ܡܝܼܬܘܼܬܹܗ ܒܚܲܝܹ̈ܐ. 5 ܘܗܿܘ ܕܗܘܼܕܪܲܢ ܝܼܠܹܐ ܗܲܪ ܠܐܵܗܵܐ: ܝܠܹܐ: ܗܿܘ ܕܝܘܼܗ̄ܒܲܢ ܝܼܠܹܐ ܓܸܪܵܘ ܕܪܘܼܚܹܗ. 6 ܗܲܕܟܼܵܐ ܕܵܝܸܡ ܡܵܪܹ̈ܐ ܗܹܒܼܝܼ ܝܘܵܚ: ܘܒܝܼܕܲܥܝܵܐ ܝܘܵܚ ܕܟܡܵܐ ܕܒܦܲܓܼܪܵܐ ܥܡܝܼܪܹܐ ܝܘܵܚ: ܪܸܚܩܵܐ ܝܘܵܚ ܡܼܢ ܡܵܪܲܢ: 7 ܣܵܒܵܒ ܒܗܿܝܡܵܢܘܼܬܵܐ ܒܸܚܕܵܪܵܐ ܝܘܵܚ: ܘܠܵܐ ܒܚܙܵܝܬܵܐ: 8 ܡܵܪܹ̈ܐ ܗܹܒܼܝܼ ܝܘܵܚ: ܘܟܹܐ ܒܵܣܡܵܐ ܠܲܢ ܕܙܵܘܕܵܐ ܗܵܘܵܚ ܪܸܚܩܵܐ ܡܼܢ ܦܲܓܼܪܵܐ: ܘܥܡܝܼܪܹܐ ܠܟܸܣ ܡܵܪܲܢ. 9 ܣܵܒܵܒ ܕܐܵܗܵܐ ܚܵܒܘܿܛܹܐ ܝܘܵܚ: ܕܐܸܢ ܥܡܝܼܪܹܐ ܝܘܵܚ ܝܲܢ ܪܸܚܩܵܐ: ܐܸܠܹܗ ܗܵܘܵܚ ܒܸܫܦܵܪܵܐ. 10 ܣܵܒܵܒ ܘܵܓܸܒ ܝܼܠܵܐ ܠܟܠܲܢ ܕܦܵܝܫܵܚ ܚܸܙܝܹܐ ܩܵܕ̄ܡ ܟܘܼܪܣܝܵܐ ܕܕܝܼܘܵܢ ܕܡܫܝܼܚܵܐ: ܕܦܵܝܸܫ ܦܸܪܥܝܵܐ ܟܠ ܐܢܵܫܵܐ ܡܸܢܕܝܵܢܹ̈ܐ ܕܒܦܲܓܼܪܹܗ: ܐܲܝܟ ܕܗܵܘܹܐ ܥܒܼܝܼܕܵܐ: ܐܸܢ ܕܛܵܒܼܵܐ ܝܲܢ ܕܒܝܼܫܵܐ. 11 ܒܲܣ ܣܵܒܵܒ ܕܒܝܼܕܲܥܝܵܐ ܝܘܵܚ ܙܕܘܼܥܬܹܗ ܕܡܵܪܲܢ: ܠܒܢܲܝ̈ܢܵܫܵܐ ܒܸܥܒܼܵܕܵܐ ܝܘܵܚ ܕܗܲܡܸܢܝܼ: ܐܝܼܢܵܐ ܠܐܲܠܵܗܵܐ ܦܝܼܫܹܐ ܝܘܵܚ ܓܸܠܝܹܐ: ܘܒܗܹܒܼܝܼ ܝܘܸܢ ܕܐܘܼܦ ܠܐܸܢܝܲܬܹ̈ܐ ܕܝܵܘܟܼܘܿܢ ܦܝܼܫܹܐ ܝܘܵܚ ܓܸܠܝܹܐ. 12 ܣܵܒܵܒ ܠܹܐ ܝܠܵܐ ܡܸܕܪܹܐ ܓܵܢܲܢ ܒܸܚܩܵܪܵܐ ܝܘܵܚ ܐܸܠܵܘܟܼܘܿܢ: ܐܸܠܵܐ ܒܝܼܵܗ̄ܒܼܵܐ ܝܘܵܚ ܐܸܠܵܘܟܼܘܿܢ ܗܲܓܲܬ ܕܫܘܼܒܼܗܵܪܵܐ ܒܘܼܬ ܕܝܸܢ: ܕܗܵܘܹܐ ܠܵܘܟܼܘܿܢ (ܠܓܸܘܘܼܒܹܐ) ܠܐܵܢܝܪ ܕܒܸܥܒܼܵܕܵܐ ܝܢܵܐ ܫܘܼܒܼܗܵܪܵܐ ܒܦܵܬܵܐ ܘܠܵܐ ܒܠܸܒܵܐ. 13 ܣܵܒܵܒ ܐܸܢ ܫܘܼܕܸܢܹܐ ܝܘܵܚ: ܠܐܲܠܵܗܵܐ: ܘܐܸܢ ܗܵܘܢܲܢ ܨܵܚ ܝܼܠܹܐ: ܐܸܠܵܘܟܼܘܿܢ. 14 ܣܵܒܵܒ ܚܘܼܒܹܗ ܕܡܫܝܼܚܵܐ ܡܲܠܝܘܼܨܲܢ ܝܼܠܹܐ: ܕܒܸܚܫܵܒܼܵܐ ܝܘܵܚ ܐܵܗܵܐ: ܕܚܵܕ̄ ܡܒܵܕܵܠ ܕܟܠ ܐܢܵܫܵܐ ܒܲܣ ܟܠ ܐܢܵܫܵܐ ܡܸܬܠܹܐ. 15 ܘܡܒܵܕܵܠ ܕܟܠ ܐܢܵܫܵܐ ܗܿܘ ܡܸܬܠܹܐ: ܕܐܵܢܝܼ ܕܚܵܝܹ̈ܐ ܝܢܵܐ: ܐܚܹܪ̄ܢܵܐ ܠܵܐ ܚܲܝܝܼ ܠܓܵܢܵܝ: ܐܸܠܵܐ ܠܗܿܘ ܕܒܚܵܬܸܪ ܕܝܼܵܝ ܡܸܬܠܹܐ ܘܩܸܡܠܹܐ. 16 ܘܡܵܐܕܝܼܵܐ: ܐܲܚܢܲܢ ܠܐܢܵܫܵܐ ܒܦܲܓܼܪܵܐ ܠܹܐ ܝܘܵܚ ܒܝܼܕܲܥܝܵܐ: ܘܐܸܢ ܝܕܸܥܠܲܢ ܠܡܫܝܼܚܵܐ ܒܦܲܓܼܪܵܐ: ܐܸܠܵܐ ܡܐܵܕܝܼܵܐ ܠܹܐ ܝܘܵܚ ܒܝܼܕܲܥܝܵܐ (ܐܸܠܹܗ ܗܵܕܵܐ). 17 ܗܲܕܟܼܵܐ ܐܸܢ ܐܢܵܫܵܐ ܒܡܫܝܼܚܵܐ ܝܠܹܐ: ܒܪܝܼܬܵܐ ܚܲܕܬܵܐ ܝܠܹܐ. ܫܘܼܠܹ̈ܐ ܥܵܬܝܼܩܹ̈ܐ ܥܒܸܪܘܿܢ: ܗܵܐ: ܟܠ ܡܸܢܕܝܼ ܗ̄ܘܹܠܹܐ ܚܵܕ̄ܬܵܐ. 18 ܘܟܠ ܡܸܢܕܝܼ ܡܼܢ ܐܲܠܵܗܵܐ ܝܠܹܐ: ܗܿܘ ܕܩܲܡ ܣܲܙܓܸܪܲܢ ܥܲܡ ܓܵܢܹܗ ܒܡܫܝܼܚܵܐ: ܘܝܸܗ̄ܒܸܠܹܐ ܐܸܠܲܢ ܚܸܠܡܲܬ ܕܣܲܙܓܲܪܬܵܐ: 19 ܝܲܥܢܹܐ: ܕܐܲܠܵܗܵܐ ܒܡܫܝܼܚܵܐ ܗ̄ܘܵܐ ܣܲܙܓܘܼܪܹܐ: ܠܥܵܠܡܵܐ ܥܲܡ ܓܵܢܹܗ: ܘܠܵܐ ܚܘܼܫܒܸܢܹܐ ܐܸܠܵܝ ܓܢܵܗܵܝ̈: ܘܡܘܼܬܸܒܼܠܹܐ ܒܝܸܢ ܗܹܡܸܙܡܵܢ ܕܣܲܙܓܲܪܬܵܐ. 20 ܒܲܣ ܐܲܝ̈ܠܟܸܝܹܐ ܝܘܵܚ ܒܚܵܬܸܪ ܕܡܫܝܼܚܵܐ: ܐܲܝܟ ܕܐܲܠܵܗܵܐ ܦܲܪܦܘܼܠܹܐ ܒܝܼܵܘܟܼܘܿܢ ܒܐܝܼܕܲܢ: ܡܼܢ ܓܸܒܵܐ ܕܡܫܝܼܚܵܐ ܢܵܘܢܘܿܝܹܐ ܝܘܵܚ: ܣܲܙܓܸܪܘܿܢ ܥܲܡ ܐܲܠܵܗܵܐ. 21 ܣܵܒܵܒ ܕܠܗܿܘ ܕܠܵܐ ܝܕܸܥܠܹܐ ܚܛܝܼܬܵܐ: ܒܚܵܬܸܪ ܕܝܸܢ ܥܒܸܕܠܹܐ ܚܛܝܼܬܵܐ: ܕܐܲܚܢܲܢ ܗܵܘܵܚ ܒܝܹܗ ܙܲܕܝܼܩܘܼܬܵܐ ܕܐܲܠܵܗܵܐ.
ܩܦܠܐܘܢ: ܘ
1 ܘܐܲܝܟ ܦܵܠܵܚܹ̈ܐ (ܕܥܲܡܹܗ) ܦܲܪܦܘܼܠܹܐ ܝܘܵܚ ܒܝܼܵܘܟܼܘܿܢ: ܕܠܵܐ ܩܵܒܿܠܝܼܬܘܿܢ ܗܵܒܵܣ ܫܵܦܵܩܲܬ ܕܐܲܠܵܗܵܐ. 2 ܣܵܒܵܒ ܕܐܡܸܪܹܐ: ܒܙܲܒܼܢܵܐ ܡܲܩܒܘܼܠ ܩܲܡ ܓܲܘܸܒܸܢܘܼܟ: ܘܒܝܘܿܡܵܐ ܕܦܘܼܪܩܵܢܵܐ ܩܲܡ ܗܲܝܸܪܸܢܘܼܟ: ܗܵܐ: ܐܵܕܝܼܵܐ ܙܲܒܼܢܵܐ ܡܲܩܒܘܼܠ: ܘܗܵܐ: ܐܵܕܝܼܵܐ ܝܘܿܡܵܐ ܕܦܘܼܪܩܵܢܵܐ. 3 ܠܵܐ ܗ̄ܘܹܐ ܕܒܡܸܢܕܝܼ ܝܵܗ̄ܒܼܝܼܬܘܿܢ ܗܲܓܲܬ ܕܬܲܪܩܲܠܬܵܐ: ܕܠܵܐ ܗܵܘܹܐ ܠܵܘܡܵܐ ܒܚܸܠܡܲܬܲܢ: 4 ܐܸܠܵܐ ܒܟܠ ܡܸܢܕܝܼ ܡܲܚܫܸܚܵܚ ܓܵܢܲܢ ܐܲܝܟ ܚܸܠܡܲܬܟܵܪܹ̈ܐ ܕܐܲܠܵܗܵܐ: ܒܚܡܵܠܬܵܐ ܪܵܒܵܐ: ܒܐܘܼܠܨܵܢܹ̈ܐ: ܒܐܵܢܵܢܩܘܿܣ: ܒܥܸܩܘܼܘܹ̈ܐ: 5 ܒܓܸܘܼܢܓܵܪܹ̈ܐ: ܒܝܸܣܘܼܪܹ̈ܐ: ܒܫܓܼܘܼܫܝܹ̈ܐ: ܒܓܵܦܹ̈ܐ: ܒܫܵܗܲܪܝܵܬܹܐ: ܒܨܵܘܡܹ̈ܐ: 6 ܒܕܸܟܼܝܘܼܬܵܐ: ܒܝܕܹܥܬܵܐ: ܒܡܲܪܝܼܟܼܬܵܐ ܕܒܹܢܵܐ: ܒܒܵܣܝܼܡܘܼܬܵܐ: ܒܪܘܼܚܵܐ ܕܩܘܼܕܫܵܐ: ܒܚܘܼܒܵܐ ܕܠܵܐ ܦܸܠܡܵܐ: 7 ܒܗܹܡܸܙܡܵܢ ܕܣܲܪܲܣܬܘܼܬܵܐ: ܒܚܲܝܠܵܐ ܕܐܲܠܵܗܵܐ: ܒܟܲܟܵܐ ܕܙܲܕܝܼܩܘܼܬܵܐ ܕܒܝܲܡܝܼܢܵܐ ܘܒܣܸܡܵܠܵܐ: 8 ܒܚܩܵܪܬܵܐ ܘܒܒܸܨܘܿܪܘܼܬܵܐ: ܒܚܸܩܪܵܐ ܘܒܠܵܘܡܵܐ: ܐܲܝܟ ܡܲܚܠܸܛܵܢܹ̈ܐ ܘܫܲܪܝܼܪܹ̈ܐ: 9 ܐܲܝܟ ܠܵܐ ܝܕܸܥܝܹܐ: ܘܝܕܸܥܝܹܐ: ܐܲܝܟ ܒܸܡܝܵܬܵܐ: ܘܗܵܐ: ܚܵܝܹ̈ܐ ܝܘܵܚ: ܐܲܝܟ ܕܦܝܵܫܵܐ ܬܘܼܥܠܡܹܐ: ܘܠܵܐ ܡܘܼܡܝܸܬܹܐ: 10 ܐܲܝܟ ܕܦܫܝܼܡܹܐ: ܘܒܟܠ ܥܕܵܢܵܐ ܒܸܚܕܵܝܵܐ: ܐܲܝܟ ܡܸܣܟܹܢܹ̈ܐ: ܘܠܪܵܒܵܐ ܒܸܥܒܼܵܕܵܐ ܕܵܘܠܲܬܡܲܢܕܹ̈ܐ: ܐܲܝܟ ܕܡܸܢܕܝܼ ܠܲܝܬ ܠܲܐ: ܘܡܵܪܹ̈ܐ ܟܠ ܡܸܢܕܝܼ. 11 ܦܘܼܡܲܢ ܦܬܝܼܚܵܐ ܝܠܹܐ ܠܟܸܣܠܵܘܟܼܘܿܢ: ܝܵܐ ܩܘܿܕܲܢܬܵܝܹܐ: ܘܠܸܒܲܢ ܡܘܼܦܬܝܼܵܐ ܝܠܹܐ. 12 ܠܹܐ ܝܬܘܿܢ ܡܘܼܠܝܸܨܹܐ ܒܝܸܢ: ܐܝܼܢܵܐ ܡܘܼܠܝܸܨܹܐ ܝܬܘܿܢ ܒܡܲܥܝܵܘ̈ܟܼܘܿܢ. 13 ܐܝܼܢܵܐ ܗܲܪ ܒܗܿܘ ܦܘܼܪܥܵܢܵܐ: ܐܲܝܟ ܕܠܒܢܘܼܢܹ̈ܐ ܒܸܐܡܵܪܵܐ ܝܘܸܢ: ܐܘܼܦ ܐܲܚܬܘܿܢ ܗ̄ܘܸܡܘܿܢ ܡܘܼܦܬܝܹܐ. 14 ܘܠܵܐ ܗܵܘܝܼܬܘܿܢ ܙܵܘܓܵܐ ܥܲܡ ܕܐܵܢܝܼ ܕܠܹܐ ܝܢܵܐ ܗܘܼܡܸܢܹܐ: ܣܵܒܵܒ ܡܘܼܕܝܼ ܫܵܘܬܵܦܘܼܬܵܐ ܐܝܼܬ ܠܙܲܕܝܼܩܘܼܬܵܐ ܥܲܡ ܥܵܘܠܵܐ: ܝܲܢ ܡܘܼܕܝܼ ܫܵܪܝܼܟܘܼܬܵܐ ܐܝܼܬ ܠܒܲܗܪܵܐ ܥܲܡ ܚܘܼܒܼܝܵܐ: 15 ܝܲܢ ܡܘܼܕܝܼ ܬܒܵܥܝܬܵܐ ܐܝܼܬ ܠܡܫܝܼܚܵܐ ܥܲܡ ܒܸܠܝܲܥܲܠ: ܝܲܢ ܡܘܼܕܝܪ ܣܵܡܵܐ ܐܝܼܬ ܠܗܿܘ ܕܝܼܠܹܐ ܗܘܼܡܸܢܵܐ: ܥܲܡ ܕܗܿܘ ܕܠܹܐ ܝܠܹܐ ܗܘܼܡܸܢܵܐ: 16 ܐܝܼܢܵܐ ܡܘܼܕܝܼ ܣܵܙܸܓܵܪܘܼܬܵܐ ܐܝܼܬ ܠܗܲܝܟܠܹܗ ܕܐܲܠܵܗܵܐ ܥܲܡ ܨܵܢܲܡܹ̈ܐ: ܣܵܒܵܒ ܐܲܚܬܘܿܢ ܗܲܝܟܠܵܐ ܕܐܲܠܵܗܵܐ ܚܲܝܵܐ ܝܬܘܿܢ: ܕܵܐܟܼܝܼ ܕܐܡܝܼܪܵܐ ܝܠܹܐ ܐܲܠܵܗܵܐ: ܒܸܬ ܥܵܡܪܸܢ ܓܵܘܵܝ: ܘܒܸܬ ܚܵܕܪܸܢ 17 ܣܵܒܵܒ ܕܐܵܗܵܐ: ܦܠܘܿܛܘܿܢ ܡܼܢ ܓܵܘܵܝ: ܘܗ̄ܘܹܡܘܿܢ ܦܪܝܼܫܹܐ ܡܸܢܵܝ: ܒܹܐܡܵܪܵܐ ܝܠܹܐ ܡܵܪܝܵܐ: ܘܒܛܲܡܹ̈ܐܐ ܠܵܐ ܕܵܩܪܝܼܬܘܿܢ: ܘܐܵܢܵܐ ܒܸܬ ܩܵܒܠܸܢܵܘܟܼܘܿܢ: 18 ܘܒܸܬ ܗܵܘܸܢ ܐܸܠܵܘܟܼܘܿܢ ܒܵܒܵܐ: ܘܐܲܚܬܘܿܢ ܒܸܬ ܗܵܘܝܼܬܘܿܢ ܐܸܠܝܼ ܒܢܘܼܢܹ̈ܐ ܘܒܢܵܬܹ̈ܐ: ܒܹܐܡܵܪܵܐ ܝܠܹܐ ܡܵܪܝܵܐ ܐܲܚܝܼܕ ܟܠ.
ܩܦܠܐܘܢ: ܙ
1 ܒܲܣ ܟܲܕ ܐܝܼܬ ܠܲܢ ܐܲܢܹܐ ܩܵܘܠܹ̈ܐ: ܡܘܼܚܸܒܝܼ̈: ܕܵܟܼܵܚ ܓܵܢܲܢ ܡܼܢ ܟܠܵܗܿ ܛܲܡܐܘܼܬܵܐ ܕܒܸܣܪܵܐ ܘܕܪܘܼܚܵܐ: ܘܬܲܡܸܡܵܚ ܩܲܕܝܼܫܘܿܬܵܐ ܒܙܕܘܼܥܬܵܐ ܕܐܲܠܵܗܵܐ. 2 ܩܵܒܿܠܘܿܢ ܠܲܢ: ܒܐܢܵܫܵܐ ܠܵܐ ܙܠܤܡܠܲܢ: ܠܐܢܵܫܵܐ ܠܵܐ ܡܘܼܚܪܸܒܼܠܲܢ: ܠܐܢܵܫܵܐ ܠܵܐ ܥܒܸܕܠܲܢ ܠܹܐܒܵܐ. 3 ܠܹܐ ܝܠܵܐ ܠܓܘܼܢܵܗܟܵܪܘܼܬܵܐ ܒܹܐܡܵܪܵܐ ܝܘܸܢ: ܣܵܒܵܒ ܕܩܵܕ̄ܡܵܝܬܵܐ ܐܡܸܪܝܼ: ܕܒܠܸܒܲܢ ܝܼܬܘܿܢ: ܠܸܡܝܵܬܵܐ ܘܠܸܚܵܝܵܐ ܡܥܘܼܕܵܠܹܐ. 4 ܪܵܒܵܐ ܒܸܣܬܵܝܘܼܬܵܐ ܐܝܼܬ ܠܝܼ ܠܟܸܣܠܵܘܟܼܘܿܢ: ܘܪܵܒܵܐ ܫܘܼܒܼܗܵܪܵܐ ܐܝܼܬ ܠܝܼ ܣܵܒܵܒ ܕܝܼܵܘܟܼܘܿܢ: ܘܡܸܠܝܵܐ ܝܘܸܢ ܝܵܗ̄ܒܲܠܬܵܐ ܕܠܸܒܵܐ: ܒܸܙܝܵܕܵܐ ܝܘܸܢ ܪܵܒܵܐ ܒܚܲܕܘܼܬܵܐ ܒܟܠܵܝ ܐܘܼܠ̈ܨܵܢܲܢ. 5 ܣܵܒܵܒ ܐܘܼܦ ܟܲܕ ܐܬܸܠܲܢ ܠܡܵܩܸܕܘܿܢܝܼܵܐ: ܐܘܼܦ ܚܵܕ̄ ܢܝܵܚܵܐ ܠܵܐ ܗܘܹܠܹܐ ܠܦܲܓܼܪܲܢ: ܐܸܠܵܐ ܒܟܠ ܡܸܢܕܝܼ ܦܸܫܠܲܢ ܡܘܼܠܝܸܨܹܐ: ܡܼܢ ܠܒܲܕܲܪ ܦܠܵܫܹ̈ܐ ܘܠܓܵܘܵܝܝܼ ܙܕܘܼܥܝܵܬܹ̈ܐ. 6 ܐܸܠܵܐ ܐܲܠܵܗܵܐ: ܗܿܘ ܕܟܹܐ ܝܵܗ̄ܒܸܠ ܠܸܒܵܐ ܠܡܵܟܝܼܟܹ̈ܐ: ܝܘܼܗ̄ܒܼܵܚܠܹܐ ܠܸܒܵܐ ܒܐܬܵܝܬܹܗ ܕܛܸܛܘܿܣ. 7 ܘܠܵܐ ܒܐܬܵܝܬܹܗ ܗܲܪ: ܐܸܠܵܐ ܐܘܼܦ ܒܝܵܗ̄ܒܲܠܬܹܗ ܕܠܸܒܵܐ: ܗܿܝ ܕܦܸܫܠܹܐ ܝܘܼܗ̄ܒܼܵܐ ܠܸܒܵܐ ܒܝܼܵܘܟܼܘܿܢ: ܣܵܒܵܒ ܕܩܲܡ ܡܲܫܚܸܕ ܠܲܢ ܥܲܠ ܚܘܼܒܵܘܟܼܘܿܢ ܓܘܼܪܵܐ ܘܬܵܙܝܼܵܘܟܼܘܿܢ: ܘܩܲܪܲܬܵܘܟܼܘܿܢ ܒܘܼܬ ܕܝܼܝܼ: ܗܲܕܟܼܵܐ ܕܚܲܕܘܼܬܵܐ ܙܵܘܕܵܐ ܗ̄ܘܹܠܵܐ ܠܝܼ. 8 ܣܵܒܵܒ ܐܵܦܸܢ ܩܲܡ ܡܲܦܫܸܡܸܢܵܘܟܼܘܿܢ ܒܐܸܓܲܪܬܵܐ: ܠܹܐ ܝܘܸܢ ܒܦܫܵܡܵܐ: ܐܵܦܸܢ ܕܦܫܸܡܠܝܼ: ܣܵܒܵܒ ܒܸܚܙܵܝܵܐ ܝܘܸܢ ܕܗܿܝ ܐܸܓܲܪܬܵܐ ܩܲܡ ܡܲܦܫܸܡܵܐ ܠܵܘܟܼܘܿܢ: ܐܵܦܸܢ ܒܚܕܵܐ ܣܵܥܲܬ. 9 ܐܵܕܝܼܵܐ ܒܸܚܕܵܝܵܐ ܝܘܸܢ: ܠܵܐ ܣܵܒܵܒ ܕܦܫܸܡܠܵܘܟܼܘܿܢ: ܐܸܠܵܐ ܣܵܒܵܒ ܕܦܫܸܡܠܵܘܟܼܘܿܢ ܠܬܵܝܒܼܘܼܬܵܐ: ܣܵܒܵܒ ܕܦܫܤܡܠܵܘܟܼܘܿܢ ܐܲܠܵܗܵܐܝܼܬ: ܕܵܐܟܼܝܼ ܕܒܡܸܢܕܝܼ ܠܵܐ ܩܵܒܿܠܝܼܬܘܿܢ ܚܘܼܣܵܪܲܬ ܡܸܢܲܢ. 10 ܣܵܒܵܒ ܦܫܵܡܬܵܐ ܐܲܠܵܗܵܐܝܼܬ ܬܝܵܒܼܘܼܬܵܐ ܠܦܘܼܪܩܵܢܵܐ ܟܹܐ ܦܵܠܚܵܐ: ܕܠܹܐ ܕܵܝܪܵܐ: ܐܝܼܢܵܐ ܦܫܵܡܬܵܐ ܕܥܵܠܡܵܐ ܡܵܘܬܵܐ ܟܹܐ ܦܵܠܚܵܐ. 11 ܣܵܒܵܒ ܗܵܐ: ܐܵܗܵܐ ܕܦܫܸܡܠܵܘܟܼܘܿܢ ܐܲܠܵܗܵܐܝܼܬ: ܟܡܵܐ ܦܠܸܚܠܵܐ ܒܝܼܵܘܟܼܘܿܢ ܚܵܒܵܛܘܼܬܵܐ: ܗܹܐ: ܐܘܼܦ ܝܵܗ̄ܒܲܠܬܵܐ ܕܓܸܘܼܘܵܒ: ܘܟܲܪܒܵܐ: ܘܙܕܘܼܥܬܵܐ: ܘܚܘܼܒܵܐ ܓܘܼܪܵܐ: ܘܩܲܝܪܲܬ: ܘܬܘܼܥܠܵܐ. ܘܒܟܠ ܡܸܢܕܝܼ ܡܘܼܚܙܸܠܵܘܟܼܘܿܢ ܓܵܢܵܘܟܼܘܿܢ ܕܕܸܟܼܝܹ̈ܐ ܝܬܘܿܢ ܒܐܵܗܵܐ ܫܘܼܠܵܐ. 12 ܗܲܕܟܼܵܐ ܐܵܦܸܢ ܕܟܬܸܒܼܠܝܼ ܐܸܠܵܘܟܼܘܿܢ: ܠܹܐ ܗ̄ܘܵܐ ܣܵܒܵܒ ܕܥܵܒܼܕܵܢܵܐ ܕܓܢܵܗܵܐ: ܐܘܼܦ ܠܵܐ ܣܵܒܵܒ ܕܗܿܘ ܕܥܒܼܕܬܵܐ ܝܠܵܐ ܓܢܵܗܵܐ ܒܝܹܗ: ܐܸܠܵܐ ܕܦܵܝܫܵܐ ܝܕܥܝܼܬܵܐ ܠܟܸܣܠܵܘܟܼܘܿܢ ܩܵܕ̄ܡ ܐܲܠܵܗܵܐ ܚܵܒܵܛܘܼܬܵܘܟܼܘܿܢ ܒܘܼܬ ܕܝܸܢ. 13 ܣܵܒܵܒ ܕܐܵܗܵܐ ܦܸܫܠܲܢ ܝܘܼܗ̄ܒܹܐ ܠܸܒܵܐ: ܘܥܲܡ ܫܩܲܠܬܲܢ ܕܠܸܒܵܐ ܙܵܘܕܵܐ ܚܕܹܠܲܢ ܒܚܲܕܘܼܬܹܗ ܕܛܸܛܘܿܣ: ܕܦܸܫܠܵܐ ܡܘܼܢܝܸܚܬܵܐ ܪܘܼܝܝܹܗ ܡܼܢ ܟܠܵܘܟܼܘܿܢ. 14 ܣܵܒܵܒ ܐܸܢ ܒܡܸܢܕܝܼ ܥܒܤܕܠܝܼ ܫܘܼܒܼܗܵܪܵܐ ܐܸܠܹܗ ܣܵܒܵܒ ܕܝܵܘܟܼܘܿܢ: ܠܵܐ ܢܚܸܦܠܝܼ: ܐܸܠܵܐ ܐܲܝܟ ܕܒܟܠ ܡܸܢܕܝܼ ܣܲܪܲܣܬܘܼܬܵܐ ܗܘܼܡܙܸܡܠܲܢ ܥܲܡܵܘܟܼܘܿܢ: ܗܲܕܟܼܵܐ ܐܘܼܦ ܫܘܼܒܼܗܵܪܲܢ ܕܠܟܸܣ ܛܸܛܘܿܣ ܒܣܲܪܲܣܬܘܼܬܵܐ ܦܸܫܠܹܐ ܡܘܼܫ̄ܟܸܚܵܐ. 15ܘܐܘܼܦ ܪܲܚܡܘܼܗܝ ܒܘܼܫ ܙܵܘܕܵܐ ܙܝܼܕܹܐ ܝܢܵܐ ܠܟܸܣܠܵܘܟܼܘܿܢ: ܟܲܕ ܒܸܕܟܼܵܪܵܐ ܝܠܹܐ ܡܲܨܝܲܬܬܵܐ ܕܟܠܵܘܟܼܘܿܢ: ܕܒܙܕܘܼܥܬܵܐ ܘܒܪܲܬܪܲܬܬܵܐ ܩܘܼܒܸܠܵܘܟܼܘܿܢ ܐܸܠܹܗ. 16 ܒܸܚܕܵܝܵܐ ܝܘܸܢ ܕܒܟܠ ܡܸܢܕܝܼ ܡܵܪܹܐ ܗܹܒܼܝܼ ܝܘܸܢ ܒܵܗ̄ܣܵܘܟܼܘܿܢ.
ܩܦܠܐܘܢ: ܚ
1 ܐܝܼܢܵܐ ܡܲܕܘܼܥܝܹܐ ܝܘܵܚ ܐܸܠܵܘܟܼܘܿܢ: ܐܵܚܘܿܢܘܵܬܲܢ: ܫܵܦܵܩܲܬܹܗ ܕܐܲܠܵܗܵܐ ܕܦܸܫܠܵܐ ܝܸܗܒܸܠܬܵܐ ܒܥܹܕܵܬܹ̈ܐ ܕܡܵܩܹܕܘܿܢܝܼܵܐ: 2 ܕܒܨܪܲܦܬܵܐ ܪܵܒܵܐ ܕܐܘܼܠܨܵܢܵܝ ܙܵܘܕܘܿܢܝܘܼܬܵܐ ܕܚܲܕܘܼܬܵܝ ܘܥܘܼܡܩܵܐ ܕܡܸܣܟܹܢܘܼܬܵܝ ܙܸܕܠܘܿܢ ܒܕܵܘܸܠܬܵܐ ܕܦܫܝܼܛܘܼܬܵܝ. 3 ܣܵܒܵܒ ܒܸܣܗܵܕܵܐ ܝܘܸܢ: ܕܐܲܝܟ ܚܲܝܠܵܝ: ܘܙܵܘܕܵܐ ܡܼܢ ܚܲܝܠܵܝ: ܒܪܸܙܵܝܵܐ ܕܓܵܢܵܝ (ܝܸܗ̄ܒܸܠܘܿܢ): 4 ܒܸܒܲܥܝܵܐ ܡܸܢܲܢ ܒܦܲܪܦܲܠܬܵܐ ܪܵܒܵܐ: ܥܲܠ ܕܐܵܗܵܐ ܫܵܦܵܩܲܬ ܘܫܵܪܝܼܟܘܼܬܵܐ ܒܚܸܠܡܲܬ ܠܩܲܕܝܼܫܹ̈ܐ: 5 ܘܠܵܐ ܐܲܝܟ ܕܒܗܹܒܼܝܼ ܝܘܵܚ ܗܑܘܵܘ: ܐܸܠܵܐ ܓܵܢܵܝ ܣܘܼܦܝܵܠܘܿܢ ܩܵܕ̄ܡܵܝܬܵܐ ܠܡܵܪܲܢ: ܘܐܘܼܦ ܐܸܠܲܢ ܒܪܸܙܵܝܹܗ ܕܐܲܠܵܗܵܐ. 6 ܗܲܕܟܼܵܐ ܐܲܚܢܲܢ ܦܘܼܪܦܸܠܲܢ ܒܛܸܛܘܿܣ: ܕܐܲܝܟ ܕܫܘܼܪܸܠܹܐ: ܗܲܕܟܼܵܐ ܬܲܡܸܡ 7 ܒܝܼܵܘܟܼܘܿܢ ܐܘܼܦ ܐܵܗܵܐ ܫܵܦܵܩܲܬ. ܐܸܠܵܐ ܕܵܐܟܼܝܼ ܕܒܟܠ ܡܸܢܕܝܼ ܒܸܙܝܵܕܵܐ ܝܬܘܿܢ: ܒܗܲܝܡܵܢܘܼܬܵܐ: ܘܒܗܲܡܙܲܡܬܵܐ: ܘܒܝܕܹܥܬܵܐ: ܘܒܟܠܵܗܿ ܚܵܒܵܛܘܼܬܵܐ: ܘܒܚܘܼܒܵܘܟܼܘܿܢ ܕܠܟܸܣܠܲܢ: ܐܘܼܦ ܒܐܵܗܵܐ ܫܵܦܵܩܲܬ ܙܵܝܕܝܼܬܘܿܢ. 8 ܠܵܐ ܦܩܵܕܵܐ ܒܸܩܵܕܵܐ ܝܘܸܢ ܐܸܠܵܘܟܼܘܿܢ: ܐܸܠܵܐ ܒܝܸܕ ܚܵܒܵܛܙܼܬܵܐ ܕܐܚܹܪ̄ܢܸܐ ܠܓܵܪܘܼܒܹܐ ܐܘܼܦ ܣܲܪܲܣܬܘܼܬܵܐ ܕܚܘܼܒܵܘܟܼܘܿܢ. 9 ܣܵܒܵܒ ܒܝܼܕܲܥܝܵܐ ܝܬܘܿܢ ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܕܒܚܵܬܸܪ ܕܝܼܵܘܟܼܘܿܢ ܡܘܼܣܟܸܢܹܐ ܟܲܕ ܕܵܘܠܲܬܡܲܢܕ ܝܼܗ̄ܘܵܐ: ܕܐܲܚܬܘܿܢ ܒܡܸܣܟܹܢܘܼܬܹܗ ܗܵܘܝܼܬܘܿܢ ܕܵܘܠܲܬܡܲܢܕܹ̈ܐ. 10 ܐܝܼܢܵܐ ܪܵܐܝܝܼ ܒܸܥܒܼܵܕܵܐ ܝܘܸܢ ܐܸܠܵܘܟܼܘܿܢ ܒܐܵܗܵܐ: ܣܵܒܵܒ ܐܵܗܵܐ ܡܵܪܹܐ ܦܲܝܕܵܐ ܝܠܵܐ ܐܸܠܵܘܟܼܘܿܢ: ܕܡܼܢ ܫܹܢ̄ܬܵܐ ܥܒܼܝܼܪܬܵܐ ܫܘܼܪܸܠܵܘܟܼܘܿܢ: ܠܵܐ ܠܸܥܒܼܵܕܵܐ ܗܲܪ: ܐܸܠܵܐ ܐܘܼܦ ܠܸܒܲܥܝܵܐ. 11 ܐܝܼܢܵܐ ܐܵܕܝܼܵܐ ܬܲܡܸܡܘܿܢ ܠܥܒܼܵܕܬܵܐ: ܕܕܵܐܟܼܝܼ ܕܗ̄ܘܹܠܵܐ ܠܵܘܟܼܘܿܢ ܡܘܼܫܬܵܪܝܼܘܼܬܵܐ ܠܸܒܲܥܝܵܐ: ܗܲܕܟܼܵܐ ܐܘܼܦ (ܗܵܘܝܵܐ) ܬܲܡܲܡܬܵܐ ܡܼܢ ܡܸܢܕܝܪ ܕܐܝܼܬ ܠܵܘܟܼܘܿܢ. 12 ܣܵܒܵܒ ܐܸܢ ܩܵܕ̄ܡܵܝܬܵܐ ܗܵܘܹܐ ܪܸܙܵܝܵܐ: ܐܲܝܟ ܡܸܢܕܝܼ ܕܐܝܼܬ ܠܹܗ ܐܢܵܫܵܐ ܟܹܐ ܦܵܝܸܫ ܩܘܼܒܿܠܵܐ: ܠܵܐ ܐܲܝܟ ܡܸܢܕܝܼ ܕܠܲܝܬ ܠܹܗ. 13 ܣܵܒܵܒ ܠܹܐ ܝܠܵܐ ܕܠܐܚܹܪ̄ܢܹܐ ܗܵܘܝܵܐ ܕܗܲܬܘܼܬܵܐ: ܘܐܸܠܵܘܟܼܘܿܢ ܐܘܼܠܨܵܢܵܐ: ܐܸܠܵܐ ܒܒܵܪܒܵܪܘܼܬܵܐ: ܕܒܵܐܗܵܐ ܙܲܒܼܢܵܐ ܙܵܘܕܘܿܢܝܘܼܬܵܘܟܼܘܿܢ ܗܵܘܝܵܐ ܠܒܵܨܘܿܪܘܼܬܵܐ ܕܐܵܢܝܼ: 14 ܕܐܘܼܦ ܙܵܘܕܘܿܢܝܘܼܬܵܐ ܕܐܵܢܝܼ ܗܵܘܝܵܐ ܠܒܵܨܘܿܪܘܼܬܵܐ ܕܝܼܵܘܟܼܘܿܢ: ܕܗܵܘܝܵܐ ܒܵܪܒܵܪܘܼܬܵܐ: 15 ܐܲܝܟ ܕܝܼܠܹܐ ܟܬܝܼܒܼܵܐ: ܕܗܿܘ ܕܪܵܒܵܐ (ܓܸܘܼܡܸܥܠܹܐ) ܠܵܐ ܙܸܕܠܹܐ: ܘܗܿܘ ܕܚܲܟܸܵܐ: ܠܵܐ ܒܸܨܪܹܐ. 16 ܐܝܼܢܵܐ ܡܸܢܬܵܐ ܡܼܢ ܐܲܠܵܗܵܐ: ܕܝܸܗܒܼܵܠܹܐ ܐܵܗܵܐ ܚܵܒܵܛܘܼܬܵܐ ܒܘܼܬ ܕܝܼܵܘܟܼܘܿܢ ܒܠܤܒܹܗ ܕܛܸܛܘܿܣ. 17 ܣܵܒܵܒ ܦܲܪܦܲܠܬܲܢ ܩܘܼܒܠܵܠܹܐ: ܘܣܵܒܵܒ ܕܪܵܒܵܐ ܒܚܲܡ ܝܼܠܹܐ: ܡܼܢ ܪܸܙܵܝܵܐ ܕܓܵܢܹܗ ܦܠܸܛܠܹܐ ܠܟܸܣܠܵܘܟܼܘܿܢ. 18 ܘܫܘܼܕܸܪܲܢ ܥܲܡܹܗ ܐܘܼܦ ܠܐܵܚܘܿܢܵܐ: ܗܿܘ ܕܚܸܩܪܹܗ ܒܐܹܘܵܢܓܵܠܝܼܘܿܢ ܝܼܠܹܐ ܓܵܘ ܟܠܵܝ ܥܹܕܵܬܹ̈ܐ. 19 ܘܠܵܐ ܗܲܪ ܗܵܕܵܐ: ܐܸܠܵܐ ܐܘܼܦ ܓܵܒܘܿܝܹܐ ܓܘܼܒܿܝܵܐ ܝܠܹܐ ܡܼܢ ܥܹܕܵܬܹ̈ܐ ܕܦܵܠܸܛ ܥܲܡܲܢ ܒܐܵܗܵܐ ܫܵܦܵܩܲܬ: ܕܦܝܵܫܵܐ ܝܠܵܐ ܡܼܢ ܥܒܼܝܼܕܬܵܐ ܚܸܠܡܲܬ ܡܸܢܲܢ ܠܚܸܩܪܹܗ ܕܡܵܪܝܵܐ: ܘܠܡܘܼܫܬܵܪܝܼܘܼܬܵܐ ܕܝܸܢ: 20 ܟܲܕ ܥܲܝܢܲܢ ܒܙܕܘܼܥܬܵܐ ܝܠܵܐ ܒܐܵܗܵܐ: ܕܐܢܵܫܵܐ ܠܵܐ ܡܲܬܸܒܼ ܒܝܸܢ ܠܲܟܵܐ ܒܐܵܗܵܐ ܒܘܼܫܵܝܘܼܬܵܐ ܕܦܝܵܫܵܐ ܝܠܵܐ ܥܒܼܝܼܕܬܵܐ ܚܸܠܡܲܬ ܡܸܢܲܢ. 21 ܣܵܒܵܒ ܕܒܹܐܟܼܵܠܵܐ ܝܘܵܚ ܚܲܡ ܕܫܘܼܠܹ̈ܐ ܫܵܦܝܼܪܹ̈ܐ: ܠܵܐ ܩܵܕ̄ܡ ܡܵܪܝܵܐ ܗܲܪ: ܐܸܠܵܐ ܐܘܼܦ ܩܵܕ̄ܡ ܒܢܲܝ̈ܢܵܫܵܐ. 22 ܐܝܼܢܵܐ ܫܘܼܕܸܪܲܢ ܥܲܡܵܝ ܐܘܼܦ ܠܐܵܚܘܿܢܲܢ: ܗܿܘ ܕܦܸܫܠܹܐ ܒܘܼܚܪܵܐ ܡܸܢܲܢ ܪܵܒܵܐ ܓܵܗܹ̈ܐ ܒܪܵܒܵܐ ܡܸܢܕܝܵܢܹ̈ܐ: ܕܚܵܒܿܛܵܢܵܐ ܝܠܹܐ: ܐܝܼܢܵܐ ܐܵܕܝܼܵܐ ܒܘܼܫ ܙܵܘܕܵܐ ܚܵܒܿܛܵܢܵܐ: ܣܵܒܵܒ ܕܗܹܒܼܝܼ ܪܵܒܵܐ ܕܒܘܼܬ ܕܝܼܵܘܟܼܘܿܢ. 23 ܐܸܢ ܥܲܠ ܛܸܛܘܿܣ (ܗܵܘܝܵܐ ܒܵܩܲܪܬܵܐ): ܫܵܪܝܼܟܵܐ ܕܝܼܝܼ ܝܠܹܐ: ܘܗܲܝܸܪܵܢܵܐ ܓܵܘܵܘܟܼܘܿܢ: ܘܐܸܢ ܐܵܚܘܿܢܘܵܬܲܢ: ܫܠܝܪܚܹ̈ܐ ܕܥܹܕܵܬܹ̈ܐ ܘܚܸܩܪܹܗ ܕܡܫܝܼܚܵܐ ܝܢܵܐ. 24 ܒܲܣ ܡܲܕܥܝܬܵܐ ܕܚܘܼܒܵܘܟܼܘܿܢ ܘܕܫܘܪܒܼܗܵܪܲܢ ܒܝܼܵܘܟܼܘܿܢ: ܡܲܕܸܥܡܘܿܢ ܓܵܘܵܝ ܘܩܵܕ̄ܡ ܥܸܕܵܬܹ̈ܐ.
ܩܦܠܐܘܢ: ܛ
1 ܐܝܼܢܵܐ ܒܵܗ̄ܣ ܚܸܠܡܲܬ ܕܠܩܲܕܝܼܫܹ̈ܐ: ܙܵܘܕܵܐ ܡܼܢ ܕܘܵܓܸܒ ܥܵܒܼܕܸܢ ܐܸܢ ܟܸܬܒܸܢ ܐܸܠܵܘܟܼܘܿܢ. 2 ܣܵܒܵܒ ܒܝܼܕܲܥܝܵܐ ܝܘܸܢ ܗܕܵܪܬܹܗ ܕܚܵܝܼܠܵܘܟܼܘܿܢ: ܕܒܝܹܗ ܥܒܤܕܠܝܼ ܫܘܪܒܼܗܵܪܵܐ ܒܵܗ̄ܣܵܘܟܼܘܿܢ ܠܡܵܩܤܕܘܿܢܵܝܹ̈ܐ: ܕܐܵܟܵܐܝܼܵܐ ܗܵܙܸܪ ܝܼܠܵܐ ܡܼܢ ܫܹܢ̄ܬܵܐ ܥܒܼܝܼܪܬܵܐ: ܘܩܲܝܪܲܬ ܕܝܼܵܘܟܼܘܿܢ ܠܪܵܒܵܐ ܚܘܼܒܸܛܠܵܐ. 3 ܐܝܼܢܵܐ ܫܘܼܕܸܪܝܼ ܠܐܵܚܘܿܢܘܵܬܹ̈ܐ: ܕܫܘܼܒܼܗܵܪܲܢ ܕܒܝܼܵܘܟܼܘܿܢ ܠܵܐ ܗܵܘܹܐ ܒܵܛܝܼܠܵܐ ܒܐܵܗܵܐ ܫܘܼܠܵܐ: ܕܕܵܐܟܼܝܼ ܕܐܡܸܪܝܼ: ܗܵܘܝܼܬܘܿܢ ܗܘܼܕܪܹܐ. 4 ܠܵܐ ܗ̄ܘܹܐ ܕܐܵܬܝܼ ܥܲܡܝܼ ܡܵܩܸܕܘܿܢܵܝܹ̈ܐ: ܘܡܵܫ̄ܟܸܚܝܪ ܠܵܘܟܼܘܿܢ ܠܵܐ ܗܘܼܕܪܹܐ: ܘܐܲܚܢܲܢ ܢܲܚܦܵܚ: ܕܠܵܐ ܐܵܡܪܵܚ ܕܐܘܼܦ ܐܲܚܬܘܿܢ: ܒܐܵܗܵܐ ܒܸܣܬܵܝܘܼܬܵܐ. 5 ܣܵܒܵܒ ܕܐܵܗܵܐ ܚܫܸܒܼܠܝܼ ܕܘܵܓܸܒ ܕܒܲܥܝܸܢ ܗ̄ܘܵܐ ܡܐܲܢܹܐ ܐܵܚܘܿܢܘܵܬܹ̈ܐ: ܕܐܵܬܝܼ ܗ̄ܘܵܘ ܡܩܵܕ̄ܡ ܕܝܼܝܼ ܠܟܸܣܠܵܘܟܼܘܿܢ: ܘܗܵܕܪܝܼ ܗ̄ܘܵܘ ܒܘܼܪܟܬܵܘܟܼܘܿܢ: ܗܿܝ ܕܡܘܼܫܡܥܝܼܬܵܐ ܗ̄ܘܵܐ ܡܼܢ ܩܵܕ̄ܡܵܝܬܵܐ: ܕܗܵܘܝܵܐ ܗܵܙܸܪ ܗܲܕܟܼܵܐ ܐܲܝܟ ܒܘܼܪܟܬܵܐ: ܠܵܐ ܐܲܝܟ ܛܲܡܲܥܟܵܪܘܼܬܵܐ. 6 ܐܝܼܢܵܐ ܐܵܗܵܐ (ܒܹܐܡܵܪܵܐ ܝܘܸܢ): ܗܿܘ ܕܙܲܪܸܥ ܒܚܣܵܟܼܬܵܐ: ܐܘܼܦ ܒܚܣܵܟܼܬܵܐ ܒܸܬ ܚܵܨܸܕ. ܘܗܿܘ ܕܙܲܪܸܥ ܒܒܘܼܟܬܵܐ: ܐܘܼܦ ܒܒܘܼܪܟܬܵܐ ܒܸܬ ܚܵܨܸܕ. 7 ܟܠ ܐܢܵܫܵܐ (ܥܵܒܸܕ) ܐܲܝܟ ܕܩܵܕ̄ܡܵܝܬܵܐ ܡܘܼܬܒܼܵܐ ܝܠܹܐ ܒܠܸܒܹܗ: ܠܵܐ ܐܲܝܟ ܕܡܼܢ ܦܵܫܲܡܬܵܐ: ܝܲܢ ܐܲܝܟ ܕܡܼܢ ܚܲܝܠܵܐ: ܣܵܒܵܒ ܐܲܠܵܗܵܐ: ܟܹܐ ܡܲܚܸܒ ܠܝܵܗ̄ܒܼܵܢܵܐ ܚܸܕܝܵܐ. 8 ܘܟܹܐ ܡܵܨܹܐ ܐܲܠܵܗܵܐ ܠܡܲܙܝܘܼܕܹܐ ܒܝܼܵܘܟܼܘܿܢ ܟܠ ܫܵܦܵܩܲܬ: ܕܒܟܠ ܙܲܒܼܢܵܐ: ܒܟܠ ܡܸܢܕܝܼ: ܟܠ ܐܝܼܬ ܠܵܘܟܼܘܿܢ ܟܠ ܡܸܠܝܘܼܬܵܐ: ܙܵܝܕܝܼܬܘܿܢ ܒܟܠ ܦܘܼܠܚܵܢܵܐ ܛܵܒܼܵܐ: 9 ܐܲܝܟ ܕܝܼܠܹܐ ܟܬܝܼܒܼܵܐ: ܒܘܼܪܒܸܙܠܹܐ: ܝܸܗܒܸܠܹܐ ܠܡܸܣܟܹܢܹ̈ܐ: ܙܲܕܝܼܩܘܼܬܹܗ ܩܵܝܲܡ ܝܼܠܵܐ ܠܥܵܠܲܡ. 10 ܐܝܼܢܵܐ ܗܿܘ ܕܟܹܐ ܝܵܗ̄ܒܸܠ ܒܲܪܙܲܪܥܵܐ ܠܙܲܪܥܵܢܵܐ ܘܠܲܚܡܵܐ ܠܡܹܐܟܼܘܼܠܬܵܐ: ܒܸܬ ܡܲܙܝܸܕ ܒܲܪܙܲܪܥܵܘܟܼܘܿܢ: ܘܡܲܦܪܹܐ ܛܥܘܿܢܝܵܬܹ̈ܐ ܕܙܲܕܝܼܩܘܼܬܵܘܟܼܘܿܢ: 11 ܟܲܕ ܗܵܘܝܼܬܘܿܢ ܕܵܘܠܲܬܡܲܢܕ ܒܟܠ ܡܸܢܕܝܼ: ܒܟܠܵܗܿ ܦܫܝܼܛܘܼܬܵܐ: ܗܿܝ ܕܟܹܐ ܬܲܡܸܡܵܐ ܒܐܝܼܕܲܢ ܫܵܟܲܪܬܵܐ ܠܐܲܠܵܗܵܐ. 12 ܣܵܒܵܒ ܦܘܼܠܚܵܢܵܐ ܕܐܵܗܵܐ ܚܸܠܡܲܬ ܠܹܐ ܝܠܹܐ ܗܲܪ ܒܵܨܘܿܪܘܼܬܵܐ ܕܩܲܕܝܼܫܹ̈ܐ ܬܲܡܘܼܡܹܐ: ܐܸܠܵܐ ܐܘܼܦ ܒܸܙܝܵܕܵܐ ܝܠܹܐ ܒܪܵܒܵܐ ܫܵܟܲܪ̈ܝܵܬܹܐ ܠܐܲܠܵܗܵܐ. 13 ܣܵܒܵܒ ܕܒܓܵܪܲܒܬܵܐ (ܕܝܼܵܘܟܼܘܿܢ) ܒܐܵܗܵܐ ܚܸܠܡܲܬ: ܫܵܒܘܿܚܹܐ ܝܢܵܐ ܠܐܲܠܵܗܵܐ ܥܲܠ ܙܲܒܛܘܼܬܵܐ ܕܬܵܘܕܝܼܬܵܘܟܼܘܿܢ ܠܐܹܘܵܢܓܵܠܝܼܘܿܢ ܕܡܫܝܼܚܵܐ: ܘܥܲܠܦܫܝܼܛܘܼܬܵܐ ܕܫܵܪܝܼܟܘܼܬܵܐ (ܕܝܼܵܘܟܼܘܿܢ) ܥܲܡ ܕܐܵܢܝܼ ܘܥܲܡ ܟܠ ܐܢܵܫܵܐ: 14 ܘܒܨܠܘܿܬܵܝ ܡܒܵܕܵܠܵܘܟܼܘܿܢ: ܟܲܕ ܪܵܒܵܐ ܟܹܐ ܡܲܚܸܒܝܼ ܠܵܘܟܼܘܿܢ ܣܵܒܵܒ ܕܒܘܼܫܵܝܝܼ ܕܫܵܦܵܩܲܬܹܗ ܕܐܲܠܵܗܵܐ ܥܲܠܵܘܟܼܘܿܢ. 15ܡܸܢܬܵܐ ܡܼܢ ܐܲܠܵܗܵܐ ܣܵܒܵܒ ܕܚܲܠܲܥܬܹܗ ܕܠܹܐ ܐܵܬܝܵܐ ܠܗܲܡܙܘܼܡܹܐ.
ܩܦܠܐܘܢ: ܝ
1 ܐܝܼܢܵܐ ܐܵܢܵܐ ܦܵܘܠܘܿܣ ܒܓܵܢܝܼ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ: ܒܢܝܼܚܘܼܬܹܗ ܘܒܡܵܟܝܼܟܼܘܼܬܹܗ ܕܡܫܝܼܚܵܐ: ܕܒܦܵܬܵܐ ܟܘܼܦܵܐ ܝܘܸܢ ܠܟܸܣܠܵܘܟܼܘܿܢ: ܐܸܠܵܐ ܟܲܕ ܪܚܸܩܵܐ ܝܘܸܢ ܒܸܣܬܵܐ ܝܘܸܢ ܥܲܠܵܘܟܼܘܿܢ. 2 ܐܝܼܢܵܐ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ: ܕܠܵܐ ܐܝܼܡܲܢ ܕܐܵܬܸܢ ܒܲܣܬܸܢ ܒܓܸܘܼܪܐܲܬ ܕܒܝܼܵܗܿ ܒܸܚܫܵܒܼܵܐ ܝܘܸܢ ܕܩܲܫܕܸܪܸܢ ܥܲܠ ܕܐܵܢܝܼ ܕܒܸܚܫܵܒܼܵܐ ܝܢܵܐ ܐܸܠܲܢ ܕܐܲܝܟ ܕܒܒܸܣܪܵܐ ܒܸܚܕܵܪܵܐ ܝܘܵܚ. 3 ܣܵܒܵܒ ܐܵܦܸܢ ܕܒܒܸܣܪܵܐ ܒܸܚܕܵܪܵܐ ܝܘܵ̇: ܐܸܠܵܐ ܠܹܐ ܝܘܵܚ ܒܒܸܣܪܵܐ ܒܸܦܠܵܫܵܐ. 4 ܣܵܒܵܒ ܟܲܟܹ̈ܐ ܕܦܠܵܫܲܢ ܠܹܐ ܝܢܵܐ ܕܒܸܣܪܵܐ: ܐܸܠܵܐ ܚܲܝܠܵܢܗܹܐ ܩܵܕ̄ܡ ܐܲܠܵܗܵܐ ܠܙܲܒܛܲܢܬܵܐ ܕܩܲܠܥܵܬܹ̈ܐ ܥܲܨܝܹ̈ܐ: 5 ܘܒܸܣܬܵܪܵܐ ܝܘܵܚ ܚܘܼܫܵܒܹ̈ܐ: ܘܟܠ ܪܵܘܡܵܐ ܕܡܵܪܸܡ ܓܵܢܹܗ ܕܲܪܩܘܼܒܼܠ ܕܝܕܹܥܬܹܗ ܕܐܲܠܵܗܵܐ: ܘܒܸܣܠܵܒܵܐ ܝܘܵܚ ܟܠܵܝ ܚܵܝܼܠܹ̈ܐ ܠܡܲܨܝܲܬܬܹܗ ܕܡܫܝܼܚܵܐ: 6 ܘܗܵܕܘܿܪܹܐ ܝܘܵܚ ܠܸܫܩܵܠܵܐ ܬܘܼܥܠܵܐ ܡܼܢ ܟܠܵܗܿ ܠܵܐ ܡܲܨܝܲܬܬܵܐ: ܐܝܼܡܲܢ ܕܦܵܝܫܵܐ ܬܲܡܵܡ ܡܲܨܝܲܬܬܵܘܟܼܘܿܢ. 7 ܒܡܸܢܕܝܼ ܕܦܵܬܵܐ ܒܸܚܝܵܪܵܐ ܝܬܘܿܢ: ܐܸܢ ܐܢܵܫܵܐ ܒܗܸܒܼܝܼ ܝܠܹܐ ܒܓܵܢܹܗ ܕܕܡܫܝܼܚܵܐ ܝܠܹܐ: ܐܵܗܵܐ ܚܵܫܸܒܼ ܡܸܕܪܹܐ ܡܼܢ ܓܵܢܹܗ: ܕܕܵܐܟܼܝܼ ܕܗܿܘ ܕܡܫܝܼܚܵܐ ܝܠܹܐ: ܗܲܕܟܼܵܐ ܐܘܼܦ ܐܲܚܢܲܢ. 8 ܣܵܒܵܒ ܐܘܼܦ ܡܸܢܕܝܼ ܙܵܘܕܵܐ ܫܬܲܒܼܗܸܪܸܢ ܗ̄ܘܵܐ ܥܲܠ ܗܘܪܟܡܲܢ ܕܝܸܗܒܸܠܹܐ ܡܵܪܲܢ ܠܒܢܵܝܬܵܘܟܼܘܿܢ ܘܠܵܐ ܠܬܠܵܚܬܵܘܟܼܘܿܢ: ܠܹܐ ܦܵܝܫܸܢ ܡܘܼܢܚܸܦܵܐ. 9 ܕܠܵܐ ܦܵܝܫܸܢ ܚܫܝܼܒܼܵܐ ܐܲܝܟ ܗܿܘ ܕܡܲܙܕܘܼܥܝܹܐ ܡܲܙܕܘܼܥܝܵܘܟܼܘܿܢ ܝܼܘܸܢ ܒܐܸܓܲܪܝܵܬܝܼ. 10 ܣܵܒܵܒ ܕܟܹܐ ܐܵܡܪܝܼ ܕܐܸܓܲܪܝܵܬܹܐ (ܕܝܹܗ) ܝܵܩܘܿܪܹ̈ܐ ܝܢܵܐ ܘܙܲܪ̈ܒܵܢܹܐ: ܐܝܼܢܵܐ ܐܬܵܝܬܹܗ ܕܓܘܼܫܡܵܐ ܙܲܒܘܪܢ ܝܼܠܵܐ: ܘܗܹܡܸܙܡܵܢܹܗ ܡܘܼܣܠܝܼܬܵܐ. 11 ܐܸܠܵܐ ܐܵܗܵܐ ܚܵܫܸܒܼ ܗܿܘ ܕܗܲܕܟܼܵܐ: ܕܕܵܐܟܼܝܼ ܕܝܼܘܵܚ ܒܗܸܡܸܙܡܵܢ ܕܐܸܓܲܪܬܲܢ ܟܲܕ ܪܸܚܩܵܐ: ܗܲܕܟܼܵܐ ܝܘܵܚ ܐܘܼܦ ܐܝܼܡܲܢ ܕܩܘܼܪܒܵܐ ܝܘܵܚ ܒܦܘܼܠܚܵܢܵܐ. 12 ܣܵܒܵܒ ܠܹܐ ܝܘܵܚ ܩܲܫܕܘܼܪܹܐ ܕܚܲܫܒܸܢܵܚ ܝܲܢ ܡܲܕܒܸܩܵܚ ܓܵܢܲܢ ܥܲܡ ܕܐܵܢܝܼ ܕܝܼܢܵܐ ܒܸܚܩܵܪܵܐ ܓܵܢܵܝ: ܐܸܠܵܐ ܐܵܢܝܼ: ܟܲܕ ܩܲܝܘܼܣܹܐ ܝܢܵܐ ܠܓܵܢܵܝ ܒܓܵܢܵܝ: ܘܡܲܕܒܼܘܼܩܸܐ ܠܓܵܢܵܝ ܥܲܡ ܓܵܢܵܝ: ܠܹܐ ܝܢܵܐ ܦܲܪܡܘܼܝܹܐ. 13 ܐܝܼܢܵܐ ܐܲܚܢܲܢ ܠܹܐ ܫܬܲܒܼܗܸܪܵܚ ܙܵܘܕܵܐ ܡܼܢ ܟܝܼܘܼܠܲܢ: ܐܸܠܵܐ ܒܟܝܼܘܼܠܵܐ ܕܬܸܚܘܼܒ ܕܦܘܼܠܹܠܹܐ ܐܸܠܲܢ ܐܲܠܵܗܵܐ ܐܲܝܟ ܟܝܼܘܼܠܵܐ: ܠܸܡܛܵܝܵܐ ܐܘܼܦ ܗܲܠ ܠܟܸܣܠܵܘܟܼܘܿܢ. 14 ܣܵܒܵܒ ܗܲܠ ܠܟܸܣܠܵܘܟܼܘܿܢ ܡܛܸܠܲܢ ܒܡܲܫܚܲܕܬܹܗ ܕܡܫܝܼܚܵܐ: 15 ܘܠܵܐ ܫܬܲܒܼܗܘܼܪܹܐ ܙܵܘܕܵܐ ܡܼܢ ܟܝܼܘܼܠܲܢ: ܒܓܵܦܵܐ ܕܐܚܹܪ̄ܢܹܐ: ܐܸܠܵܐ ܐܝܼܬ ܠܲܢ ܗܹܒܼܝܼ ܕܟܲܕ ܓܲܪܘܸܣܵܐ ܗܲܝܡܵܢܘܼܬܵܘܟܼܘܿܢ: ܒܝܼܵܘܟܼܘܿܢ ܒܸܬ ܦܵܝܫܵܚ ܓܘܼܪܘܤܣܹܐ ܐܲܝܟ ܟܝܼܘܪܠܲܢ: ܠܒܘܪܫܵܝܘܼܬܵܐ: 16 ܕܡܲܟܪܸܙܵܚ ܐܘܼܦ ܠܗܿܘ ܓܸܒܵܐ ܡܸܢܵܘܟܼܘܿܢ: ܘܠܵܐ ܠܫܬܲܒܼܗܘܼܪܹܐ ܒܟܝܪܘܼܠܵܐ ܕܐܚܹܪ̄ܢܹܐ: ܒܐܵܢܝܼ (ܡܸܢܕܝܼܵܢܹ̈ܐ) ܕܝܼܢܵܐ ܗܘܼܕܪܸܐ. 17 ܐܝܼܢܵܐ ܗܿܘ ܕܫܬܲܒܼܗܸܪ: ܒܡܵܪܝܵܐ ܫܬܲܒܼܗܸܪ. 18 ܣܵܒܵܒ ܠܹܐ ܝܠܵܐ ܗܿܘ ܕܚܵܩܸܪ ܓܵܢܹܗ ܪܸܕܝܵܐ ܝܠܹܐ: ܐܸܠܵܐ ܗܿܘ ܕܡܵܪܝܵܐ ܚܵܩܤܪܹܗ.
ܩܦܠܐܘܢ: ܝܐ
1 ܛܘܼܒܵܐ ܕܩܵܒܿܠܝܼܬܘܿܢܗ̄ܘܵܘ ܠܝܼ ܓܲܟܸܵܐ ܒܦܲܝܟܼܘܼܬܵܐ. ܐܸܠܵܐ ܐܘܼܦ ܩܵܒܿܠܘܿܢ ܠܝܼ. 2 ܣܵܒܵܒ ܒܲܚܘܼܠܹܐ ܝܘܸܢ ܒܝܼܵܘܟܼܘܿܢ ܒܩܲܝܪܲܬ ܕܐܲܠܵܗܵܐ: ܣܵܒܵܒ ܕܩܲܡ ܛܵܠܒܸܢܵܘܟܼܘܿܢ ܠܚܵܕ̄ ܓܲܒܼܪܵܐ: ܕܒܬܘܼܠܬܵܐ ܕܟܼܝܼܬܵܐ ܡܲܝܬ̄ܝܸܢܵܘܟܼܘܿܢ ܠܡܫܝܼܚܵܐ. 3 ܐܝܼܢܵܐ ܒܸܙܕܲܥܝܵܐ ܝܘܸܢ: ܕܩܵܘܡܵܐ ܐܲܝܟ ܕܡܘܼܚܠܸܛܠܹܐ ܚܘܼܘܹܐ ܠܚܵܘܵܐ ܒܝܲܕܘܼܥܘܼܬܹܗ: ܗܲܕܟܼܵܐ ܦܵܝܫܝܼ ܡܘܼܚܪܸܒܹܐ ܚܵܝܼܠܵܘ̈ܟܼܘܿܢ ܡܼܢ ܦܫܝܼܛܘܼܬܵܐ ܘܕܸܟܼܘܼܬܵܐ ܕܠܟܸܣ ܡܫܝܼܚܵܐ. 4 ܣܵܒܵܒ ܐܸܢ ܗܿܘ ܕܐܵܬܹܐ ܡܲܟܪܸܙ ܚܵܕ̄ ܝܼܫܘܿܥ ܐܚܹܪ̄ܢܵܐ: ܗܿܘ ܕܐܲܚܢܲܢ ܠܵܐ ܡܘܼܟܪܸܙܠܲܢ: ܝܲܢ ܪܘܼܚܵܐ ܐܚܹܪ̄ܬܵܐ ܩܵܒܿܠܝܼܬܘܿܢ: ܗܿܝ ܕܠܵܐ ܩܘܼܒܠܵܘܟܼܘܿܢ: ܝܲܢ ܡܲܫܚܲܕܬܵܐ ܐܚܹܪ̄ܬܵܐ ܗܿܝ ܕܠܵܐ ܩܘܼܒܸܠܵܘܟܼܘܿܢ: ܨܦܵܝܝܼ ܡܲܨܝܘܼܬܹܐ ܝܬܘܿܢ. 5 ܣܵܒܵܒ ܒܸܚܫܵܒܼܵܐ ܝܘܸܢ ܕܒܟܘܼ ܡܸܢܕܝܼ ܠܹܐ ܝܘܸܢ ܒܵܨܘܿܪܵܐ ܡܼܢ ܫܠܝܼܚܹ̈ܐ: ܐܵܢܝܼ ܕܪܵܒܵܐ ܥܸܠܸܠ ܝܼܢܵܐ. 6 ܣܵܒܵܒ ܐܵܦܸܢ ܕܢܲܙܵܢ ܝܼܘܸܢ ܒܗܲܡܙܲܡܬܝܼ: ܐܸܠܵܐ ܠܵܐ ܒܝܕܸܥܬܝܼ: ܐܝܼܢܵܐ ܒܟܠ ܡܸܢܕܝܼ ܦܸܫܠܲܢ ܓܸܠܝܹܐ ܠܟܸܣܠܵܘܟܼܘܿܢ ܓܵܘܵܐ ܕܟܠܵܝ ܐܢܵܫܹ̈ܐ. 7 ܝܲܢ ܓܵܢܵܗܵܐ ܥܒܸܕܠܝܼ: ܕܡܘܼܡܟܸܟܼܵܠܝܼ ܓܵܢܝܪ: ܕܐܲܚܬܘܿܢ ܦܵܝܫܝܼܬܘܿܢ ܡܘܼܪܡܹܐ: ܕܚܘܼܪܵܝܝܼ ܡܘܼܟܪܸܙܠܝܼ ܐܸܠܵܘܟܼܘܿܢ ܡܲܫܚܲܕܬܹܗ ܕܐܲܠܵܗܵܐ: 8 ܘܥܹܕܵܬܹ̈ܐ ܐܚܹܪ̄ܢܹܐ ܣܠܸܒܠܝܼ: ܘܫܩܸܠܝܼ ܗܵܩܵܐ (ܡܸܢܵܝ) ܠܚܸܠܡܲܬ ܕܠܟܸܣܠܵܘܟܼܘܿܢ: 9 ܘܟܲܕ ܐܬܹܠܝܼ ܠܟܸܣܠܵܘܟܼܘܿܢ ܘܣܢܝܼܩܘܼܬܵܐ ܐܝܼܬ ܗ̄ܘܵܐ ܠܝܼ: ܠܵܐ ܕܪܸܠܝܼ ܝܘܼܩܪܵܐ ܥܲܠ ܐܢܵܫܵܐ: ܣܵܒܵܒ ܕܣܢܝܼܩܘܼܬܝܼ ܬܘܼܡܸܡܠܘܿܢ ܐܵܚܘܿܢܘܵܬܹ̈ܐ ܕܐܬܸܠܘܿܢ ܡܼܢ ܡܵܩܸܕܘܿܢܝܼܵܐ: ܘܒܟܠ ܡܸܢܕܝܼ ܢܛܸܪܝܼ ܓܵܢܝܼ: ܘܒܸܬ ܢܵܛܪܸܢ ܕܠܵܐ ܝܘܼܩܪܵܐ ܥܲܠܵܘܟܼܘܿܢ. 10 ܐܲܝܟ ܣܲܪܲܣܬܘܼܬܹܗ ܕܡܫܝܼܚܵܐ ܒܝܼܝܼ ܝܠܵܐ: ܐܵܗܵܐ ܫܘܼܒܼܵܗܵܪܵܐ ܠܹܐ ܦܵܝܸܫ ܒܘܼܛܠܵܐ ܒܝܼܝܼ ܒܐܲܬܪܵܘܵܬܹܐ ܕܐܵܟܼܵܐܝܼܵܐ. 11 ܩܵܡܘܿܕܝܼ: ܣܵܒܵܒ ܕܠܹܐ ܝܘܸܢ ܡܲܚܘܼܒܵܘܟܼܘܿܢ: ܐܲܠܵܗܵܐ ܟܹܐ ܝܲܕܸܥ. 12 ܐܝܼܢܵܐ ܐܵܗܵܐ ܕܒܸܥܒܼܵܕܵܐ ܝܘܸܢ: ܐܘܼܦ ܒܸܬ ܥܵܒܼܕܸܢ: ܕܩܲܛܥܸܢ ܗܲܓܸܬ ܕܐܵܢܝܼ ܕܒܸܒܲܥܝܵܐ ܝܢܵܐ ܗܲܓܸܬ: ܕܒܗܿܘ ܡܸܢܕܝܼ ܕܫܬܲܒܼܗܘܼܪܹܐ ܝܢܵܐ: ܦܵܝܫܝܼ ܡܫ̄ܟܝܼܚܹܐ ܐܲܝܟ ܕܝܸܢ. 13 ܣܵܒܵܒ ܐܵܢܝܼ ܕܗܲܕܟܼܵܐ ܝܢܵܐ: ܫܠܝܼܚܹ̈ܐ ܕܵܓܵܠܹ̈ܐ ܝܢܵܐ: ܘܦܵܥܠܹ̈ܐ ܦܟܸܝܼܠܹ̈ܐ: ܘܡܲܕܡܘܼܝܹܐ ܝܢܵܐ ܓܵܢܵܝ ܠܫܠܝܼܚܹ̈ܐ ܕܡܫܝܼܚܵܐ. 14 ܘܠܲܝܬ ܥܵܓܒܸܘܼܬܵܐ: ܣܵܒܵܒ ܣܵܛܵܢܵܐ ܒܓܵܢܹܗ ܟܹܐ ܦܵܝܸܫ ܡܘܼܕܡܝܼܵܐ ܒܡܲܠܲܐܟܼܵܐ ܕܒܲܗܪܵܐ. 15 ܒܲܣ ܠܹܐ ܝܠܹܐ ܡܸܢܕܝܼ ܓܘܼܪܵܐ ܐܸܢ ܐܘܼܦ ܚܸܠܡܲܬܟܵܪ̈ܘܼܗܝ ܦܵܝܫܝܼ ܡܘܼܕܡܝܹܐ ܒܚܸܠܡܲܬܟܵܪܹ̈ܐ ܕܙܲܕܝܼܩܘܼܬܵܐ: ܐܵܢܝܼ ܕܚܲܪܬܵܝ ܒܸܬ ܗܵܘܝܵܐ ܐܲܝܟ ܦܘܼܠܚܵܢܵܝ̈. 16 ܐܝܼܢܵܐ ܡܸܕܪܹܐ ܒܹܐܡܵܪܵܐ ܝܘܸܢ: ܐܢܵܫܵܐ ܠܵܐ ܚܵܫܸܒܼ ܒܵܗ̄ܣܝܼ ܐܲܝܟ ܕܥܲܙܵܢ ܝܼܘܸܢ: ܘܐܸܢ ܠܵܐ ܐܘܼܦ ܐܲܝܟ ܕܠܥܲܙܵܐ ܩܵܒܿܠܘܿܢ ܠܝܼ: ܕܐܘܼܦ ܐܵܢܵܐ ܫܬܲܒܼܗܸܪܸܢ ܚܲܟܵܐ. 17 ܡܸܢܕܝܼ ܕܗܲܡܙܼܘܼܡܹܐ ܝܘܸܢ: ܠܹܐ ܝܠܹܐ ܒܡܵܪܲܢ ܕܫܘܼܒܼܗܵܪܵܐ. 18 ܣܵܒܵܒ ܪܵܒܵܐ ܫܬܲܒܼܗܘܼܪܹܐ ܝܢܵܐ ܒܒܸܣܪܵܐ: ܘܐܘܼܦ ܐܵܢܵܐ ܒܸܬ ܫܬܲܒܼܗܸܪܸܢ. 19 ܣܵܒܵܒ ܟܹܐ ܩܵܒܿܠܝܼܬܘܿܢ ܒܒܵܣܝܼܡܘܼܬܵܐ ܠܐܵܢܝܼ ܕܝܼܢܵܐ ܟܝܼܡ ܚܝܼܵܠ: ܟܲܕ ܐܲܚܬܘܿܢ ܥܵܩܸܠܕܵܪܹ̈ܐ ܝܬܘܿܢ. 20 ܣܵܒܵܒ ܟܹܐ ܩܵܒܿܠܝܼܬܘܿܢ ܐܸܢ ܐܢܵܫܵܐ ܙܲܒܛܸܢܵܘܟܼܘܿܢ: ܐܸܢ ܐܢܵܫܵܐ ܐܵܟܸܠܵܘܟܼܘܿܢ: ܐܸܢ ܐܢܵܫܵܐ ܫܵܩܸܠ ܡܸܢܵܘܟܼܘܿܢ: ܐܸܢ ܐܢܵܫܵܐ ܡܵܪܸܡ ܓܵܢܹܗ: ܐܸܢ ܐܢܵܫܵܐ ܡܵܚܹܐ ܠܵܘܟܼܘܿܢ ܥܲܠ ܦܵܬܵܐ. 21 ܐܲܝܟ ܕܠܡܲܒܨܲܪܬܵܐ ܒܸܐܡܵܪܵܐ ܝܘܸܢ: ܐܲܝܟ ܕܐܲܚܢܲܢ ܙܲܒܘܼܢܹ̈ܐ ܝܘܵܚ ܗ̄ܘܵܘ. ܒܦܲܝܟܼܘܼܬܵܐ ܒܹܐܡܵܪܵܐ ܝܘܸܢ: ܕܒܟܠ ܡܸܢܕܝܼ ܕܩܲܫܕܸܪ ܐܢܵܫܵܐ: ܐܘܼܦ ܐܵܢܵܐ ܩܲܫܕܘܼܪܹܐ ܝܘܸܢ. 22 ܥܸܒܼܪܵܝܹ̈ܐ ܝܢܵܐ: ܐܘܼܦ ܐܵܢܵܐ. ܝܼܣܲܪܵܠܵܝܹܐ ܝܢܵܐ: ܐܘܼܦ ܐܵܢܵܐ. ܙܲܪܥܹܗ ܕܐܲܒܼܪܵܗܵܡ ܝܼܢܵܐ: ܐܘܼܦ ܐܵܢܵܐ. 23 ܚܸܠܡܲܬܟܵܪܹ̈ܐ ܕܡܫܝܼܚܵܐ ܝܢܵܐ: ܒܒܵܨܘܿܪܘܼܬܵܐ ܕܚܝܼܵܠ ܒܹܐܡܵܪܵܐ ܝܘܸܢ: ܙܵܘܕܵܐ ܡܸܢܵܝ ܐܵܢܵܐ: ܒܓܵܦܹ̈ܐ ܙܵܘܕܵܐ: ܒܡܲܚܘܵܬܹ̈ܐ ܙܵܘܕܵܐ: ܓܵܘ ܒܸܝܬ ܐܲܣܝܼܪܹ̈ܐ ܙܵܘܕܵܐ: ܒܡܵܘܬܹ̈ܐ ܪܵܒܵܐ ܓܵܗܹ̈ܐ. 24 ܡܼܢ ܝܗ̄ܘܼܕܵܝܹ̈ܐ ܚܲܡܸܫ ܓܵܗܹ̈ܐ ܐܲܪܒܥܝܼ ܐܲܪܒܥܝܼ (ܩܲܝܣܸ̈ܐ): ܚܵܕ̄ ܒܵܨܘܿܪܵܐ: ܩܘܼܒܸܠܝܼ. 25 ܬܠܵܬ̄ ܓܵܗܹ̈ܐ ܒܩܵܛ̈ܝܹܐ ܦܸܫܠܝܼ ܡܸܚܝܵܐ: ܚܕܵܐ ܓܵܗܵܐ ܦܸܫܠܝܼ ܕܓܸܝܼܡܵܐ: ܬܠܵܬ̄ ܓܵܗܹ̈ܐ ܗ̄ܘܹܠܝܼ ܒܬܒܼܵܪܬܵܐ ܕܓܵܡܝܼ: ܘܠܲܝܠܹܐ ܘܐܝܼܡܵܡܵܐ ܡܘܼܥܒܸܪܝܼ ܒܥܘܼܡܩܵܐ: 26 ܒܐܘܼܪ̈ܚܵܬܹܐ ܪܵܒܵܐ ܓܵܗܹ̈ܐ: ܒܩܹܘܲܢܕܹܢܘܿܣܹ̈ܐ ܕܢܲܗܪܵܘܵܬܹܐ: ܒܩܸܘܲܢܕܹܢܘܿܣܹ̈ܐ ܕܡܼܢ ܛܵܝܸܦܹ̈ܐ: ܒܩܸܘܲܢܕܹܢܘܿܣܹ̈ܐ ܓܵܘ ܡܕܝܼܢ̄ܬܵܐ: ܒܩܸܘܲܢܕܹܢܘܿܣܹ̈ܐ ܓܵܘ ܒܲܪܝܼܵܐ: ܒܩܸܘܲܢܕܹܢܘܿܣܹ̈ܐ ܓܵܘ ܝܵܡܵܐ: ܒܩܸܘܲܢܕܹܢܘܿܣܹ̈ܐ ܓܵܘ ܐܵܚܘܿܢܘܵܬܹ̈ܐ ܕܵܓܵܠܹ̈ܐ: 27 ܒܓܵܦܵܐ ܘܒܓܵܗ̄ܝܬܵܐ: ܒܫܵܗܲܪܬܵܐ ܪܵܒܵܐ ܓܵܗܹ̈ܐ: ܒܟܸܦܢܵܐ ܘܒܨܵܗ̄ܘܵܐ: ܒܨܵܘܡܵܐ ܪܵܒܵܐ ܓܵܗܹ̈ܐ: ܒܩܲܪܬܵܐ ܘܒܫܘܼܠܚܵܝܬܵܐ. 28 ܫܒܼܘܿܩ ܡܼܢ ܡܸܢܕܝܼܵܢܹ̈ܐ ܕܠܒܲܕܲܪ: ܚܠܵܨܬܵܐ ܕܥܲܠܝܼ ܕܟܠ ܝܘܿܡ: ܚܲܡܝܼ ܕܥܲܠ ܟܠܵܝ ܥܹܕܵܬܹ̈ܐ. 29 ܡܵܢܝܼ ܝܠܹܐ ܙܲܒܘܼܢ: ܘܐܵܢܵܐ ܠܹܐ ܝܘܸܢ ܙܲܒܘܼܢ: ܡܵܢܝܼ ܦܝܵܫܵܐ ܝܠܹܐ ܡܘܼܟܦܸܪܵܐ: ܘܐܵܢܵܐ ܠܹܐ ܝܘܸܢ ܒܸܩܝܵܕܵܐ: 30 ܘܐܸܢ ܘܵܓܸܒ ܝܼܠܵܐ ܕܫܬܲܒܼܗܸܪܸܢ: ܥܲܠ ܙܲܒܘܼܢܘܼܝܵܬܝܼ̈ ܒܸܬ ܫܬܲܒܼܗܸܪܸܢ. 31 ܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܒܘܼܪܟܼܵܐ ܕܗܲܠ ܥܵܠܲܡ ܥܵܠܡܝܼܢ: ܒܝܸܕܲܥܝܵܐ ܝܠܹܐ: ܕܠܹܐ ܝܘܸܢ ܕܵܓܘܿܠܹܐ. 32 ܒܕܲܪܡܣܘܿܩ: ܣܲܪܕܵܪ ܕܐܵܪܹܛܘܿܣ ܡܲܠܟܵܐ ܒܸܢܛܵܪܵܐ ܗ̄ܘܵܐ ܡܕܝܼܢܑܬܵܐ ܕܕܲܪܡܘܼܣܩܵܝܹܐ: ܠܸܕܒܼܵܩܝܼ: 33 ܘܡܼܢ ܟܵܘܹܐ ܒܩܸܪܛܵܠܵܐ ܩܲܡ ܟܲܢܒܸܠܝܼ ܠܝܼ ܡܼܢ ܫܘܼܪܵܐ: ܘܚܠܸܨܠܝܼ ܡܼܢ ܐܝܼܕܘܼ̈ܗܝ.
ܩܦܠܐܘܢ: ܝܒ
1 ܠܸܥܒܼܵܕܵܐ ܫܘܼܒܼܗܵܪܵܐ ܘܵܓܸܒ ܝܼܠܵܐ: ܐܸܠܵܐ ܠܹܐ ܝܠܵܐ ܠܚܲܪ: ܐܝܼܢܵܐ ܒܹܐܬܵܝܵܐ ܝܘܸܢ ܠܚܸܙܘܹ̈ܐ ܘܠܓܸܠܝܵܢܹ̈ܐ ܕܡܵܪܲܢ. 2 ܒܝܼܕܲܥܝܵܐ ܝܸܢ ܚܵܕ̄ ܐܢܵܫܵܐ ܒܡܫܝܼܚܵܐ ܐܲܪܒܲܥܣܲܪ ܫܸܢܹ̈ܐ ܡܩܵܕ̄ܡ ܐܵܕܝܵܐ ܐܝܼܢܵܐ ܐܸܢ ܒܦܵܓܼܪܵܐ ܠܹܐ ܝܘܸܢ ܒܝܼܕܲܥܝܵܐ: ܘܐܸܢ ܠܒܲܕܲܪ ܡ̣ܢ ܦܲܓܼܪܵܐ ܠܹܐ ܝܘܸܢ ܒܝܼܕܲܥܝܵܐ ܝܠܹܐ: ܞܵܕ̄ ܐܲܝܼܟ ܕܐܵܗܵܐ ܕܦܸܫܠܹܐ ܓ̰ܢܝܼܘܵܐ ܗܲܠ ܫܡܲܝܵܐ ܕܬܠܵܬ̄. 3 ܘܝܕܹܥܠܝܼ ܠܚܵܕ̄ ܗܲܕܟܼܵܐ ܐܢܵܫܵܐ: ܐܝܼܢܵܐ ܐܸܢ ܒܦܲܓܼܪܵܐ: ܘܐܸܢ ܠܒܲܕܲܪ ܡ̣ܢ ܦܲܓܼܪܵܐ: ܠܹܐ ܝܘܸܢ ܒܝܼܕܲܥܝܵܐ: ܐܲܠܵܗܵܐ ܒܝܼܕܲܥܝܵܐ ܝܠܹܐ: 4ܕܦܸܫܠܹܐ ܓ̰ܢܝܼܘܵܐ ܠܦܲܪܕܲܝܼܣܵܐ: ܘܫܡܸܥܠܹܐ ܗܹܡܸܙܡܵܢܹ̈ܐ ܕܠܹܐ ܐܵܬܝܼ ܠܗܲܡܙܘܼܡܹܐ: ܐܵܢܝܼ ܕܐܢܵܫܵܐ ܠܲܝܬ ܠܹܗ ܕܲܣܬܘܼܪ ܠܗܲܡܙܘܼܡܲܝ. 5 ܥܲܠ ܚܵܕ̄ ܕܗܲܕܟܼܵܐ ܒܸܬ ܥܵܒܼܕܸܝܢ ܫܘܼܒܼܗܵܪܵܐ: ܐܝܼܢܵܐ ܥܲܠ ܓܵܢܝ ܠܹܐ ܥܵܒܼܕܝܼܢ ܫܘܼܒܼܗܵܪܵܐ: ܐܸܠܵܐ ܐܸܢ ܒܙܲܒܘܼܢܘܼܝܵܬܹ̈ܐ. 6 ܣܵܒܵܒ ܐܸܢ ܒܲܥܝܸܢ ܕܥܵܒܼܕܸܝܢ ܫܘܼܒܼܗܵܪܵܐ: ܠܹܐ ܗܵܘܸܢ ܐܲܗܡܲܩ: ܣܵܒܵܒ ܣܲܪܲܣܬܘܼܬܵܐ ܒܸܬ ܐܵܡܪܸܢ. ܐܝܼܢܵܐ ܒܸܚܣܵܟܼܵܐ ܝܘܸܢ: ܠܵܐ ܗ̄ܘܹܐ ܕܐܢܵܫܵܐ ܚܵܫܸܒܼ ܒܵܗ̄ܣܝܼ ܙܵܘܕܵܐ ܡ̣ܢ ܕܗܵܘ ܡܸܢܕܝܼ ܕܚܵܙܹܐ ܠܝܼ ܘܕܫܲܡܲܥ ܡܸܢܝܼ. 7 ܘܕܠܵܐ ܦܵܝܼܫܸܢ ܡܘܼܪܡܵܐ ܒܒܘܼܫܵܝܘܼܬܼܵܐ ܕܓܸܠܝܵܢܹ̈: ܦܸܫܠܹܐ ܣܘܼܦܝܵܐ ܐܸܠܝܼ ܟܸܬܘܵܐ ܠܒܸܣܪܝܼ: ܡܲܠܲܐܟܹܗ ܕܣܵܛܵܢܵܐ: ܠܩܲܪܦܘܼܚܝܼ: ܕܠܵܐ 8 ܦܵܝܼܫܸܢ ܡܘܼܪܡܵܐ. ܘܥܲܠ ܕܐܵܗܵܐ ܬܠܵܬ̄ ܓܵܗܹ̈ܐ ܦܘܼܦܸܠܝܼ ܒܡܵܪܝܼ ܕܦܵܪܸܩ ܗ̄ܘ̣ܵܐ ܡܸܢܝܼ. 9 ܘܐܡܸܪܹܐ ܐܸܠܝܼ: ܟܹܐ ܡܵܠܝܵܐ ܠܘܼܟ ܫܵܦܵܩܲܬܝܼ: ܣܵܒܵܒ ܕܚܵܝܠܝܼ ܒܙܲܒܘܼܢܘܼܬܼܵܐ ܦܝܵܫܵܐ ܝܠܹܐ ܬܘܼܡܸܡܵܐ. ܒܲܣ ܒܚܲܕܘܼܬܼܵܐ ܙܵܘܕܵܐ ܒܸܬ ܫܬܲܘܗܸܪܲܢ ܒܙܲܒܘܼܢܘܼܝܵܬܝܼ̈: ܕܚܲܝܼܠܹܗ ܕܡܫܝܼܚܵܐ ܫܵܪܹܐ ܥܲܠܝܼ. 10 ܣܵܒܵܒ ܕܐܵܗܵܐ ܟܹܐ ܒܵܣܡܵܐ ܠܝܼ ܒܙܲܒܘܼܢܵܝܵܬܹ̈ܐ: ܒܡܲܣܠܵܝܵܬܹ̈ܐ: ܒܐܘܼܠܨܵܢܹ̈ܐ: ܒܛܪ̈ܵܕܝܵܬܹܐ: ܒܚܒܼܘܼܫܝܹ̈ܐ ܒܚܵܬܸܪ ܕܡܫܝܼܚܵܐ: ܣܵܒܵܒ ܐܝܼܡܲܢ ܕܙܲܒܘܼܢ ܝܘܸܢ ܐܵܢܵܐ: ܗܲܝܼܓܵܗ ܚܲܝܼܠܵܢܵܐ ܝܘܸܢ. 11 ܗ̄ܘܝܵܐ ܝܘܸܢ ܟܝܼܡ ܚܝܼܵܠ: ܐܲܚܬܘܿܢ ܩܲܡ ܡܲܠܝܼܨܝܼܬܘܼܢ ܠܝܼ: ܣܵܒܵܒ ܘܵܓ̰ܒ ܝܼܗ̄ܘܵܐ ܕܐܲܚܬܘܿܢ ܝܵܗ̄ܒܝܼܬܘܿܢ ܗ̄ܘ̣ܵܘ ܣܵܗܕܘܼܬܼܵܐ ܒܵܗ̄ܣܝܼ: ܣܵܒܵܒ ܠܹܐ ܝܘܸܢ ܒܡܸܢܕܝܼ ܒܵܨܘܿܪܵܐ ܡ̣ܢ ܫܠܝܼܚܹ̈ܐ: ܐܵܢܝܼ ܕܪܵܒܵܐ ܥܸܠܸܠ ܝܼܢܵܐ: ܐܵܦܸܢ ܡܸܢܕܝܼ ܠܹܐ ܝܘܸܢ. 12 ܢܝܼܫܲܢܩܸ̈ܐ ܕܫܠܝܼܚܹ̈ܐ ܗܲܪ ܦܸܫܠܘܿܢ ܦܠܝܼܚܹܐ ܓܵܘܘܟܼܘܿܢ: ܒܟܠ ܚܡܵܠܬܵܐ: ܒܢܝܼܫܲܢܩܹ̈ܐ ܘܒܢܵܓ̰ܸܒܘܵܬܹܐ ܘܒܚܲܝܼܠܹ̈ܐ. 13 ܣܵܒܵܒ ܡܘܼܕܝܼ ܝܠܹܐ ܕܒܝܸܗ ܒܸܨܪܵܘܟܼܘܿܢ ܡ̣ܢ ܥܹܕܵܬܹ̈ܐ ܐܚܹܪ̄ܢܹܐ : ܫܒܼܘܿܩ ܡ̣ܢ ܒܐܵܗܵܐ ܕܐܵܢܵܐ ܠܵܐ ܥܒܸܕܠܝܼ ܝܘܼܩܪܵܐ ܥܠܲܝܟܼܘܿܢ: ܫܒܼܘܿܩܘܼܢ ܠܵܗ̇ ܐܸܠܝܼ ܐܵܗܵܐ ܓܢܵܗܵܐ. 14 ܗܵܐ: ܐܵܗܵܐ ܓܵܗܵܐ ܕܬܠܵܬ̄ ܝܼܠܵܐ ܕܗܵܙܸܪ ܝܼܘܸܢ ܕܐܵܬܸܢ ܠܟܸܣܠܵܘܟܼܘܿܢ: ܘܠܹܐ ܥܵܒܼܕܸܝܢ ܝܘܼܩܪܵܐ ܥܲܠܲܘܟܼܘܿܢ: ܣܵܒܵܒ ܠܹܐ ܒܲܥܝܸܢ ܕܕܝܵܘܟܼܘܿܢ: ܐܸܠܵܐ ܐܸܠܵܘܟܼܘܿܢ. ܣܵܒܵܒ ܠܹܐ ܝܠܵܐ ܘܓ̰ܸܒ ܠܒܢܘܼܢܹ̈ܐ ܠܡܲܬܘܼܒܹܐ ܚܲܙܝܼܢܹ̈ܐ ܠܒܵܒܵܘܵܬܹܐ: ܐܸܠܵܐ ܒܵܒܠܵܘܵܬܹ̈ܐ ܠܒܢܘܼܢܘܼܢܹ̈ܐ. 15 ܘܐܵܢܵܐ ܒܚܲܕܘܼܬܵܐ ܒܸܬ ܚܵܪܓܕ̰ܸܢ ܘܐܘܼܦ ܒܸܬ ܦܵܝܼܫܢ ܚܘܼܪܓ̰ܵܐ ܒܚܵܬܸܪ ܕܓܵܢܵܘ̈ܬܟܼܘܿܢ. ܐܸܢ ܙܘܵܕܵܐ ܡܲܚܸܒܸܢܵܘܟܼܘܿܢ: ܦܝܵܫܵܐ ܝܘܸܢ ܡܘܼܚܸܒܵܐ ܒܘܼܫ ܒܵܨܘܿܪܵܐ: 16 ܘܗܵܘܝܵܐ ܗܵܕܵܐ: ܐܵܢܵܐ ܠܵܐ ܥܒܸܕܠܝܼ ܝܘܼܩܪܵܐ ܥܲܠܵܘܟܼܘܿܢ: ܐܸܠܵܐ ܐܲܝܼܟܼ ܐܢܵܫܵܐ ܝܲܕܘܼܥܘܵܐ ܒܠܹܐܒܵܐ ܩܲܡ ܕܲܒܼܩܸܢܵܘܟܼܘܿܢ. 17 ܒܝܸܕ ܚܕ̄ ܡ̣ܢ ܕܐܵܢܝ ܕܫܘܼܕܼܪܝܼ ܠܟܸܣܠܵܘܟܼܘܿܢ: ܥܒܸܕܠܝܼ ܛܲܡܲܥܟܵܪܘܼܬܼܵܐ ܥܲܠܲܘܟܼܘܿܢ: 18 ܡ̣ܢ ܛܸܛܘܿܣ ܒܸܥܠܝܼ: ܘܫܘܼܕܼܪܝܼ ܥܲܡܹܗ ܠܐܵܚܘܿܢܵܐ. ܒܡܸܢܕܝܼ ܥܒܸܕܠܹܐ ܛܲܡܲܥܟܵܪܘܼܬܼܵܐ ܥܲܠܵܘܟܼܘܼܢ ܛܸܛܘܿܣ: ܒܚܕܼܵܐ ܪܘܼܚܵܐ ܠܵܐ ܚܕܹܪܲܢ: ܘܗܲܪ ܒܐܲܢܹܐ ܫܲܘܦܵܦܹ̈ܐ: 19 ܡܸܕܪܸܐ ܒܸܚܫܵܒܼܵܐ ܝܬܘܿܢ ܕܐܸܠܵܘܟܼܘܿܢ ܒܝܵܗ̄ܒܼܵܐ ܝܘܵܚ ܓ̰ܘܼܘܵܒ ܩܵܕ̄ܡ ܐܲܠܵܗܵܐ ܒܡܫܝܼܚܵܐ ܗܲܡܙܘܼܡܹܐ ܝܘܵܚ. ܐܝܼܢܵܐ ܟܠܵܝ ܡܢܕܝܵܢܹ̈ܐ: ܡܘܼܚܒܝܼ̈: ܠܒܢܵܝܬܵܐ ܕܝܼܵܘܟܼܘܿܢ ܝܼܢܵܐ. 20 ܣܵܒܵܒ ܒܸܙܕܲܥܝܵܐ ܝܘܸܢ ܠܵܐ ܗ̄ܘܸܐ ܕܟܲܕ ܐܵܬܸܢ ܠܟܸܣܠܵܘܟܼܘܿܢ: ܠܵܐ ܡܵܫ̄ܟ̰ܚܸܢܘܿܟܼܘܿܢ ܐܲܝܼܟ ܕܒܵܣܡܵܐ ܠܝܼ: ܘܦܵܝܼܫܸܢ ܡܫ̄ܟ̰ܝܼܚܵܐ ܠܟܸܣܠܵܘܟܼܘܿܢ ܐܘܼܦ ܐܵܢܵܐ ܕܵܐܟܼܝܼ ܕܠܵܐ ܒܵܣܡܵܐ ܠܵܘܟܼܘܿܢ: ܠܵܐ ܗ̄ܘܹܐ ܕ(ܗܵܘܝܵܐ) ܡܲܩܲܪܨܘܼܬܼܵܐ: ܘܒܲܚܸܠܵܢܘܼܬܼܵܐ: ܘܚܸܡܬܵܐ: ܘܥܵܨܲܝܬܵܐ: ܘܚܵܝܬܵܐ ܕܕܲܪܗܲܩ: ܘܛܲܪܛܲܡܬܵܐ: ܘܚܲܬܝܼܪܘܼܬܵܐ ܘܫܓܼܘܼܫܝܵܐ: 21 ܠܵܐ ܗ̄ܘܹܐ ܕܟܲܕܼ ܐܵܬܸܢ ܡܸܕܪܹܐ: ܡܲܡܟܸܟ ܠܝܼ ܐܲܠܵܗܝ ܓܵܘܵܘܟܼܘܿܢ: ܘܥܵܒܼܕܝܼܢ ܬܵܙܝܼ ܥܲܠ ܪܵܒܵܐ: ܐܵܢܝܼ ܕܚܸܛܝܸܐ ܝܢܵܐ: ܘܠܹܐ ܝܢܵܐ ܬܘܼܘܸܒܹܐ ܡ̣ܢ ܛܲܢܦܘܼܬܼܵܐ: ܘܡ̣ܢ ܙܵܢܝܘܼܬܼܵܐ: ܘܡ̣ܢ ܦܲܚܙܘܼܬܼܵܐ ܕܥܒܸܕܠܘܿܢ.
ܩܦܠܐܘܢ: ܝܓ
1 ܐܵܗܵܐ ܓܵܗܵܐ ܕܬܠܬ̄ ܝܼܠܵܐ ܕܒܹܐܬܵܝܵܐ ܝܘܸܢ ܠܟܸܣܠܵܘܟܼܘܿܢ. ܥܲܠ ܦܘܼܡܵܐ ܕܬܪܲܝ ܘܬܠܵܬ̄ܐ ܣܵܗܪܹ̈ܐ ܦܵܝܫܵܐ ܡܘܼܩܒܼܝܼܬܵܐ ܟܠ ܗܹܡܸܙܡܵܢ. 2 ܡܩܵܕ̄ܡܵܝܬܵܐ ܐܡܝܼܪܵܐ ܝܘܸܢ ܐܸܠܵܘܟܼܘܿܢ: ܘܡܸܕܪܸܐ ܗܲܪ ܡܩܵܕ̄ܡܵܝܬܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܐܲܝܼܟܼ ܕܟܲܕܼ ܓܵܗܵܐ ܕܬܲܪ̈ܬܹܝ ܗ̄ܘܹܠܝܼ ܠܟܸܣܠܵܘܟܼܘܿܢ: ܐܘܼܦ ܐܵܕܝܵܐ ܟܲܕܼ ܪܸܚܩܵܐ ܠܐܵܢܝܼ ܕܚܛܹܠܘܿܢ ܆: ܘܠܟܠܵܝ ܐܚܪܹ̈ܢܹܐ: ܕܐܸܢ ܐܵܬܸܢ ܡܸܕܪܸܐ: ܠܹܐ ܚܵܣܟܸܢ: 3 ܣܵܒܵܒ ܕܒܸܒܲܥܝܵܐ ܝܬܘܿܢ ܨܵܒܸܬܘܼܬܵܐ ܕܡܫܝܼܚܵܐ ܕܗܲܡܙܘܼܡܹܐ ܝܠܹܐ ܒܝܼܝܼ: ܗܿܘ ܕܠܹܐ ܝܠܹܐ ܙܲܒܘܼܢ ܒܝܼܵܘܟܼܘܿܢ: ܐܸܠܵܐ ܚܲܝܠܵܢܵܐ ܝܠܹܐ ܓܵܘܵܘܟܼܘܿܢ. 4 ܣܵܒܵܒ ܕܦܸܫܠܹܐ ܙܩܝܼܦܵܐ ܒܙܲܒܘܼܢܘܼܬܵܐ: ܐܸܠܵܐ ܒܸܚܵܝܵܐ ܝܠܹܐ ܒܚܲܝܠܵܐ ܕܐܲܠܵܗܵܐ. ܐܘܼܦ ܐܲܚܢܲܢ ܙܲܒܘܼܢ ܝܼܘܵܚ ܒܝܹܗ: ܐܸܠܵܐ ܒܸܬ ܚܲܝܵܚ ܥܲܡܹܗ ܒܚܲܝܠܵܐ ܕܐܲܠܵܗܵܐ ܠܟܸܣܠܵܘܟܼܘܿܢ. 5 ܓܵܢܵܘܟܼܘܿܢ ܨܝܹܨܡܘܿܢ: ܐܸܢ ܒܗܲܝܡܵܢܘܼܬܵܐ ܝܬܘܿܢ: ܓܵܢܵܘܟܼܘܿܢ ܓܵܪܒܘܿܢ. ܝܲܢ ܠܹܐ ܝܬܘܿܢ ܒܝܼܕܲܥܝܵܐ ܓܵܢܵܘܟܼܘܿܢ: ܕܝܼܫܘܿܥ ܡܫܝܼܚܵܐ ܒܝܼܵܘܟܼܘܿܢ ܝܼܠܹܐ: ܘܐܸܢ ܠܵܐ: ܡܘܼܣܵܠܝܹܐ ܝܬܘܿܢ. 6 ܐܝܼܢܵܐ ܒܗܸܒܼܝܼ ܝܘܸܢ ܕܕܒܸܬ ܝܲܕܥܝܼܬܘܿܢ ܕܐܲܚܢܲܢ ܠܹܐ ܝܘܵܚ ܡܘܼܣܸܠܝܹܐ. 7 ܐܝܼܢܵܐ ܦܲܪܦܘܼܠܹܐ ܝܘܵܚ ܒܐܲܠܵܗܵܐ: ܕܠܵܐ ܥܵܒܼܕܝܼܬܘܿܢ ܡܸܢܕܝܼ ܕܣܸܪܝܵܐ: ܠܵܐ ܕܨܲܚܨܵܝܬܵܐ ܕܝܸܢ ܦܵܝܫܵܐ ܚܙܝܼܬܵܐ: ܐܸܠܵܐ ܕܐܲܚܬܘܿܢ ܗܵܘܝܼܬܘܿܢ ܒܸܦܠܵܚܵܐ ܛܵܒܼܵܬܹ̈ܐ: ܘܐܲܚܢܲܢ ܗܵܘܵܚ ܐܲܝܟ ܡܘܼܣܠܵܝܹܐ. 8 ܣܵܒܵܒ ܠܹܐ ܡܵܨܵܚ ܕܥܵܒܼܕܵܚ ܡܸܢܕܝܼ ܕܲܪܩܘܼܠ ܕܣܲܪܲܣܬܘܼܬܵܐ: ܐܸܠܵܐ ܠܓܸܒܵܐ ܕܣܲܪܲܣܬܘܼܬܵܐ. 9 ܐܝܼܢܵܐ ܟܹܐ ܚܵܕܵܚ ܐܝܼܡܲܢ ܕܐܲܚܢܲܢ ܙܲܒܘܼܢ ܝܼܕܵܚ ܘܐܲܚܬܘܿܢ ܚܲܝܠܵܢܹ̈ܐ ܝܬܘܿܢ. ܒܘܼܬ ܐܘܼܦ ܨܵܠܘܝܹܐ ܝܘܵܚ: ܕܐܲܚܬܘܿܢ ܦܵܝܫܝܼܬܘܿܢ ܡܘܼܟܡܸܠܹܐ. 10 ܣܵܒܵܒ ܕܐܵܗܵܐ ܟܲܕ ܪܸܚܩܵܐ ܝܘܸܢ ܐܲܢܸܢ ܒܸܟܬܵܒܼܵܐ ܝܘܸܢ: ܕܠܵܐ ܐܝܼܡܲܢ ܕܐܵܬܸܢ ܡܲܦܠܸܚܸܢ ܩܘܼܝܘܼܬܵܐ: ܐܲܝܟ ܗܘܼܟܡܵܐ ܕܝܸܗܒܸܠܹܐ ܐܸܠܝܼ ܡܵܪܝܼ ܠܒܢܵܝܬܵܐ ܘܠܵܐ ܠܬܠܵܚܬܵܐ. 11 ܡܐܵܕܝܼܵܐ ܐܵܚܘܿܢܘܵܬܝܼ̈: ܚܕܹܡܘܿܢ: ܗ̄ܘܸܡܘܿܢ ܬܲܡܵܡ: ܦܘܼܫܘܢ ܝܘܼܗ̄ܒܹܐ ܠܸܒܵܐ: ܚܫܘܿܒܼܘܿܢ ܗܲܪ ܚܵܕ̄ ܡܸܢܕܝܼ: ܘܫܲܝܢܵܐ ܗܵܘܹܐ ܒܝܼܵܘܟܼܘܿܢ: ܘܐܲܠܵܗܵܐ ܕܚܘܼܒܵܐ ܘܕܫܲܝܢܵܐ ܒܸܬ ܗܵܘܹܐ ܥܲܡܵܘܟܼܘܿܢ. 12 ܗܲܒ̄ܠܘܿܢ ܫܠܵܡܵܐ ܚܵܕ̄ ܠܗܿܘ ܐܚܹܪ̄ܢܵܐ ܒܢܫܘܼܩܬܵܐ ܩܲܕܝܼܫܬܵܐ. 13 ܒܝܼܵܗ̄ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܟܠܵܝ ܩܲܕܝܼܫܹ̈ܐ. 14 ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ: ܘܚܘܼܒܹܗ ܕܐܲܠܵܗܵܐ: ܘܫܵܪܝܼܟܘܼܬܵܐ ܕܪܘܼܚܵܐ ܕܩܘܼܕܫܵܐ: ܥܲܡ ܟܠܵܘܟܼܘܿܢ: ܐܵܡܹܝܢ.