ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ
ܐܝܟ݂ ܡܦܩܬܐ ܕܦܫܝܛܬܐ
ܐܓܪܬܐ ܕܬܪܬܝܢ ܕܦܘܠܘܣ ܫܠܝܚܐ ܕܠܘܬ ܩܘܪ̈ܢܬܝܐ
ܩܦܠܐܘܢ ܐ
1 ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܨܸܒ݂ܝܵܢܹܗ ܕܐܲܠܵܗܵܐ. ܘܛܝܼܡܵܬܹܐܘܿܣ ܐܲܚܵܐ. ܠܥܹܕܬܵܐ ܕܐܲܠܵܗܵܐ ܕܐܝܼܬ݂ ܒܩܘܿܪܲܢܬ݁ܘܿܣ. ܘܲܠܟ݂ܠܗܘܿܢ ܩܲܕܝܼܫܹ̈ܐ ܕܐܝܼܬ݂ ܒܐܵܟ݂ܵܐܝܼܵܐ ܟܠܵܗܿ. 2 ܛܲܝܒܘܼܬ݂ܵܐ ܥܲܡܟ݂ܘܿܢ. ܘܲܫܠܵܡܵܐ ܡܸܢ ܐܲܠܵܗܵܐ ܐܲܒ݂ܘܼܢ. ܘܡܸܢ ܡܵܪܲܢ ܝܼܫܘܿܥ ܡܫܝܼܚܵܐ. 3 ܡܒܲܪܲܟ݂ ܗܘܼ ܐܲܠܵܗܵܐ ܐܲܒ݂ܘܼܗܝ ܕܡܵܪܲܢ ܝܼܫܘܿܥ ܡܫܝܼܚܵܐ: ܐܲܒ݂ܵܐ ܕܪ̈ܲܚܡܹܐ. ܘܐܲܠܵܗܵܐ ܕܟܠ ܒܘܼܝܵܐ. 4 ܗܵܘ ܕܲܡܒܲܝܲܐ ܠܲܢ ܒܟ݂ܠܗܘܿܢ ܐܘܼܠܨܵܢܲܝ̈ܢ. ܕܐܵܦ ܚܢܲܢ ܢܸܫܟܲܚ ܢܒܲܝܲܐ ܠܐܲܝܠܹܝܢ ܕܲܒܟ݂ܠ ܐܘܼܠܨܵܢܝܼ̈ܢ ܐܸܢܘܿܢ. ܒܗܵܘ ܒܘܼܝܵܐܵܐ ܕܲܚܢܲܢ ܡܸܬ݂ܒܲܝܐܝܼܢܲܢ ܡܸܢ ܐܲܠܵܗܵܐ. 5 ܐܲܝܟܲܢܵܐ ܓܹܝܪ ܕܡܸܬ݂ܝܲܬܿܪܝܼܢ ܒܲܢ ܚܲܫܵܘ̈ܗܝ ܕܲܡܫܝܼܚܵܐ. ܗܵܟܲܢܵܐ ܒܝܲܕ݂ ܡܫܝܼܚܵܐ ܡܸܬ݂ܝܲܬܲܪ ܐܵܦ ܒܘܼܝܵܐܲܢ. 6 ܐܵܦܸܢ ܕܹܝܢ ܡܸܬ݂ܐܲܠܨܝܼܢ ܚ̄ܢܲܢ. ܥܲܠ ܐܲܦܲܝ̈ ܒܘܼܝܵܐܟ݂ܘܿܢ ܗ̄ܘܼ. ܘܥܲܠ ܐܲܦܲܝ̈ ܚܲܝܲܝ̈ܟܘܿܢ ܡܸܬ݂ܐܲܠܨܝܼܢ ܚ̄ܢܲܢ. ܘܐܸܢ ܡܸܬ݂ܒܲܝܐܝܼܢ ܚ̄ܢܲܢ. ܡܛܠ ܕܐܲܢ̄ܬܿܘܿܢ ܬܸܬ݂ܒܲܝܐܘܼܢ. ܘܬܸܗܘܹܐ ܒܟ݂ܘܿܢ ܚܦܝܼܛܘܼܬ݂ܵܐ ܕܲܬ݂ܣܲܝܒ݁ܪܘܼܢ ܐܸܢܘܿܢ ܠܚܲܫܹ̈ܐ : ܗܵܢܘܿܢ ܕܐܵܦ ܚܢܲܢ ܚܵܫܝܼܢܲܢ ܠܗܘܿܢ. 7 ܘܣܲܒ݂ܪܲܢ ܕܲܥܠܲܝܟܿܘܿܢ ܫܲܪܝܼܪ ܗ̄ܘܼ. ܝܵܕ݂ܥܝܼܢ ܚ̄ܢܲܢ ܓܹܝܪ ܕܐܸܢ ܫܵܘ̈ܬܵܦܲܝܢ ܐܲܢ̄ܬܘܿܢ ܒܚܲܫܹ̈ܐ . ܫܵܘ̈ܬܵܦܲܝܢ ܐܲܢ̄ܬܘܿܢ ܐܵܦ ܒܒ݂ܘܝܵܐܵܐ. 8 ܨܵܒܹܝܢ ܚ̄ܢܲܢ ܕܹܝܢ ܕܬܸܕ̇ܥܘܼܢ ܐܲܚܲܝ̈ܢ. ܥܲܠ ܐܘܼܠܨܵܢܵܐ ܕܲܗܘܵܐ ܠܲܢ ܒܐܵܣܝܼܵܐ. ܕܪܵܘܪܒ݂ܵܐܝܼܬ݂ ܐܸܬ݂ܐܠܸܨܢ. ܝܲܬܿܝܼܪ ܡܸܢ ܚܲܝܠܲܢ. ܥܕ݂ܲܡܵܐ ܕܩܲܪܝܼܒ݂ܝܼܢ ܗ̄ܘ̣ܵܘ ܚܲܝܲܝ̈ܢ ܠܡܸܬܿܛܲܠܵܩܘܼ. 9 ܘܥܲܠ ܢܲܦ̮ܫܲܢ ܦܣܲܩܢ ܡܵܘܬܵܐ. ܕܠܵܐ ܢܸܗܘܹܐ ܠܲܢ ܬܘܼܟ݂ܠܵܢܵܐ ܥܲܠ ܢܲܦ̮ܫܲܢ. ܐܸܠܵܐ ܥܲܠ ܐܲܠܵܗܵܐ. ܗܵܘ ܕܲܡܩܝܼܡ ܡܝܼܬܹ̈ܐ. 10 ܗܵܘ ܕܡܸܢ ܡܵܘ̈ܬܹܐ ܚܲܣܝܼܢܹ̈ܐ ܦܲܪܩܲܢ. ܘܬ݂ܘܼܒ݂ ܡܣܲܒܪܝܼܢܲܢ ܕܦܵܪܹܩ ܠܲܢ. 11 ܒܲܡܥܲܕܪܵܢܘܼܬ݂ܵܐ ܕܒ݂ܵܥܘܼܬ݂ܟ݂ܘܿܢ ܕܥܲܠ ܐܲܦܲܝ̈ܢ. ܕܬܸܗܘܹܐ ܡܵܘܗܲܒ݂ܬܹܗ ܕܲܠܘܵܬܲܢ ܛܲܝܒܘܼܬ݂ܵܐ ܕܲܥܒ݂ܝܼܕ݂ܵܐ ܒܐܲܦܲܝ̈ ܣܲܓܝܼ̈ܐܹܐ. ܘܣܲܓܝܼ̈ܐܹܐ ܢܵܘܕܘܼܢ ܠܹܗ ܥܲܠ ܐܲܦܲܝ̈ܢ. 12 ܫܘܼܒ݂ܗܵܪܲܢ ܓܹܝܪ ܗܵܢܵܘ. ܣܵܗܕܘܼܬ݂ܵܐ ܕܪܸܥܝܵܢܲܢ. ܕܒܲܦܫܝܼܛܘܼܬ݂ܵܐ ܘܲܒ݂ܕ݂ܲܟ݂ܝܘܼܬ݂ܵܐ ܘܲܒ݂ܛܲܝܒܘܼܬ݂ܵܐ ܕܐܲܠܵܗܵܐ ܐܸܬ݂ܗܲܦܲܟ݂ܢ ܒܥܵܠܡܵܐ. ܘܠܵܐ ܒܚܸܟ݂ܡܬ݂ܵܐ ܕܦܲܓ݂ܪܵܐ. ܘܝܲܬܝܼܪܵܐܝܼܬ݂ ܠܘܵܬ݂ܟ݂ܘܿܢ ܕܝܼܠܟ݂ܘܿܢ. 13 ܠܵܐ ܗ̄ܘܵܐ ܐ̄ܚܪ̈ܵܢܝܵܢ ܟܵܬ݂ܒܝܼܢܲܢ ܠܟ݂ܘܿܢ. ܐܸܠܵܐ ܐܲܝܠܹܝܢ ܕܝܵܕ݂ܥܝܼܢ ܐܢ̄ܬܘܿܢ. ܐܵܦ ܡܸܫܬܵܘܕܥܝܼܢ ܐܢ̄ܬܘܿܢ. ܬܟ݂ܝܼܠ ܐ̄ܢܵܐ ܕܹܝܢ ܕܲܥܕ݂ܲܡܵܐ ܠܲܐ̄ܚܪܵܝܬܵܐ ܬܸܫܬܵܘܕܥܘܼܢ. 14 ܐܲܝܟܲܢܵܐ ܕܐܵܦ ܐܸܫܬܵܘܕܲܥܬܿܘܿܢ ܩܲܠܝܼܠ ܡܸܢ ܣܲܓܝܼ. ܕܫܘܼܒ݂ܗܵܪܟ݂ܘܿܢ ܚܢܲܢ. ܐܲܝܟ݂ ܕܐܵܦ ܐܲܢ̄ܬܿܘܿܢ ܕܝܼܠܲܢ. ܒܝܵܘܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 15 ܘܲܒ݂ܗܵܢܵܐ ܬܘܼܟ݂ܠܵܢܵܐ ܨܵܒܹܐ ܗ̄ܘܹܝܬ݂ ܡܸܢ ܩܕ݂ܝܼܡ ܕܐܹܬܹܐ ܠܘܵܬ݂ܟ݂ܘܿܢ. ܕܐܲܥܝܼܦܵܐܝܼܬ݂ ܬܩܲܒܠܘܼܢ ܛܲܝܒܘܼܬ݂ܵܐ. 16 ܘܐܸܥܒܲܪ ܥܠܲܝܟܿܘܿܢ ܠܡܵܩܹܕܘܿܢܝܼܵܐ. ܘܬ݂ܘܼܒ݂ ܡܸܢ ܡܵܩܹܕܘܿܢܝܼܵܐ ܠܘܵܬ݂ܟ݂ܘܿܢ ܐܹܬܹܐ. ܘܐܲܢ̄ܬܿܘܿܢ ܬܠܵܘܘܿܢܵܢܝ ܠܲܝܗܘܼܕ݂. 17 ܗܵܕܹܐ ܗܵܟܹܝܠ ܕܐܸܬ݂ܪܲܥܝܼܬ݂. ܠܡܵܐ ܐܲܝܟ݂ ܡܣܲܪܗܒ݂ܵܐ ܐܸܬ݂ܪܲܥܝܼܬ݂. ܐܵܘ ܕܲܠܡܵܐ ܕܲܒ݂ܣܲܪ ܐܸܢܹܝܢ. ܐܲܝܠܹܝܢ ܕܡܸܬ݂ܪܲܥܹܐ ܐ̄ܢܵܐ. ܡܛܠ ܕܘܵܠܹܐ ܗ̄ܘܵܐ ܕܢܸܗܘܹܐ ܒܗܹܝܢ ܐܹܝܢ ܐܹܝܢ ܘܠܵܐ ܠܵܐ. 18 ܡܗܲܝܡܲܢ ܗܘܼ ܐܲܠܵܗܵܐ. ܕܠܵܐ ܗܘܸܵܬ݂ ܡܸܠܬܲܢ ܕܲܠܘܵܬ݂ܟ݂ܘܿܢ ܐܹܝܢ ܘܠܵܐ. 19 ܒܪܹܗ ܓܹܝܪ ܕܐܲܠܵܗܵܐ ܝܼܫܘܿܥ ܡܫܝܼܚܵܐ ܗܵܘ ܕܒ݂ܐܝܼܕ݂ܲܢ ܐܸܬ݂ܟܪܸܙ ܠܟ݂ܘܿܢ. ܒܝܼ ܘܲܒ݂ܣܸܠܘܵܢܘܿܣ ܘܲܒ݂ܛܝܼܡܵܬܹܐܘܿܣ (ܘܛܝܼܡܵܬܹܐܘܿܣ). ܠܵܐ ܗ̄ܘܵܐ ܐܹܝܢ ܘܠܵܐ. ܐܸܠܵܐ ܐܹܝܢ ܗܘܵܐ ܒܹܗ. 20 ܟܠܗܘܿܢ ܓܹܝܪ ܡܘܼܠܟܵܢܵܘ̈ܗܝ ܕܐܲܠܵܗܵܐ. ܒܹܗ ܗܘܼ ܒܲܡܫܝܼܚܵܐ ܐܹܝܢ ܗܘܵܘ. ܡܛܠ ܗܵܢܵܐ ܒܐܝܼܕ݂ܹܗ ܝܵܗܒܝܼܢܲܢ ܐܵܡܹܝܢ ܠܬܸܫܒܘܼܚܬܹ݁ܗ ܕܐܲܠܵܗܵܐ. 21 ܐܲܠܵܗܵܐ ܗܘܼ ܕܹܝܢ ܡܫܲܪܲܪ ܠܲܢ ܥܲܡܟ݂ܘܿܢ ܒܲܡܫܝܼܚܵܐ. ܗܵܘ ܕܗܘܼ ܡܲܫܚܲܢ 22 ܘܚܲܬܿܡܲܢ. ܘܝܲܗ̄ܒ݂ ܪܲܗܒ݂ܘܿܢܵܐ ܕܪܘܼܚܹܗ ܒܠܸܒܵܘ̈ܵܬܲܢ. 23 ܐܸܢܵܐ ܕܹܝܢ ܠܐܲܠܵܗܵܐ ܡܲܣܗܸܕ݂ ܐ̄ܢܵܐ ܥܲܠ ܢܲܦ̮ܫܝ. ܕܡܛܠ ܕܚܵܐܹܣ ܐ̄ܢܵܐ ܥܠܲܝܟܿܘܿܢ ܠܵܐ ܐܸܬܹܝܬ݂ ܠܩܘܿܪܲܢܬ݁ܘܿܣ. 24 ܠܵܐ ܗ̄ܘܵܐ ܡܛܠ ܕܡܵܪ̈ܲܝ ܗܲܝܡܵܢܘܼܬ݂ܟ݂ܘܿܢ ܚܢܲܢ. ܐܸܠܵܐ ܡܥܲܕܪ̈ܵܢܹܐ ܚܢܲܢ ܕܚܲܕ݂ܘܲܬ݂ܟ݂ܘܿܢ. ܒܗܲܝܡܵܢܘܼܬ݂ܵܐ ܗܘܼ ܓܹܝܪ ܩܵܝܡܝܼܢ ܐܢ̄ܬܘܿܢ.
ܩܦܠܐܘܢ ܒ
1 ܕܵܢܹܬ݂ ܕܹܝܢ ܗܵܕܹܐ ܒܢܲܦ̮ܫܝ. ܕܠܵܐ ܬܘܼܒ݂ ܒܟܲܪܝܘܼܬ݂ܵܐ ܐܹܬܹܐ ܠܘܵܬ݂ܟ݂ܘܿܢ. 2 ܐܸܢ ܐܸܢܵܐ ܓܹܝܪ ܡܲܟ݂ܪܹܐ ܐ̄ܢܵܐ ܠܟ݂ܘܿܢ. ܡܲܢܘܼ ܢܚܲܕܹܝܢܝ. ܐܸܠܵܐ ܗܵܘ ܕܐܸܢܵܐ ܐܲܟ݂ܪܝܼܬ݂ ܠܹܗ. 3 ܘܲܕ݂ܟܸܬ݂ܒܹܬ݂ ܠܟ݂ܘܿܢ ܗܝܼ ܗܵܕܹܐ. ܕܠܵܐ ܟܲܕ݂ ܐܹܬܹܐ ܢܲܟ݂ܪܘܿܢ ܠܝܼ. ܗܵܢܘܿܢ ܐܲܝܠܹܝܢ ܕܘܵܠܹܐ ܗ̄ܘܵܐ ܠܗܘܿܢ ܕܗܸܢܘܿܢ ܢܚܲܕܘܿܢܵܢܝ. ܬܿܟ݂ܝܼܠ ܐ̄ܢܵܐ ܕܹܝܢ ܥܲܠ ܟܠܟ݂ܘܿܢ. ܕܚܲܕ݂ܘܲܬ݂ܝ ܕܟ݂ܠܟ݂ܘܿܢ ܗܝ. 4 ܘܡܸܢ ܐܘܼܠܨܵܢܵܐ ܪܲܒܵܐ. ܘܡܸܢ ܐܵܢܘܿܣܝܵܐ ܕܠܸܒܵܐ ܟܸܬ݂ܒܹܬ݂ ܠܟ݂ܘܿܢ ܗܵܠܹܝܢ ܒܕܸܡ̈ܥܹܐ ܣܲܓܝܼ̈ܐܵܬ݂ܵܐ. ܠܵܐ ܡܛܠ ܕܬܸܟ݂ܪܹܐ ܠܟ݂ܘܿܢ. ܐܸܠܵܐ ܡܛܠ ܕܬܸܕ݂ܥܘܼܢ ܚܘܼܒܵܐ ܝܲܬܝܼܪܵܐ ܕܐܝܼܬ݂ ܠܝܼ ܠܘܵܬ݂ܟ݂ܘܿܢ. 5 ܐܸܢ ܕܹܝܢ ܐ̄ܢܵܫ ܐܲܟ݂ܪܝܼ. ܠܵܐ ܗ̄ܘܵܐ ܠܝܼ ܐܲܟ݂ܪܝܼ. ܐܸܠܵܐ ܒܨܝܼܪܵܐ ܩܲܠܝܼܠ ܠܟ݂ܠܟ݂ܘܿܢ. ܕܠܵܐ ܬܹܐܩܲܪ ܡܸܠܬ݂ܵܐ ܥܠܲܝܟܿܘܿܢ. 6 ܟܲܕܘܼ ܠܹܗ ܕܹܝܢ ܠܗܵܢܵܐ ܟܐܵܬ݂ܵܐ ܕܡܸܢ ܣܲܓܝܼ̈ܐܹܐ. 7 ܘܡܸܟܹܝܠ ܐ̄ܚܪܵܢܝܵܐܝܼܬ݂ ܘܵܠܹܐ ܕܬܸܫܒ̇ܩܘܼܢ ܠܹܗ ܘܲܬ݂ܒܲܝܐܘܼܢܹܗ. ܕܲܠܡܵܐ ܒܟܲܪܝܘܼܬ݂ܵܐ ܝܲܬܝܼܪܬܵܐ ܢܸܬ݂ܒܠܲܥ ܠܹܗ ܗܵܘ ܡܲܢ ܕܗܵܟܲܢܵܐ ܗܘܼ. 8 ܡܛܠ ܗܵܢܵܐ ܒܵܥܹܐ ܐ̄ܢܵܐ ܡܸܢܟ݂ܘܿܢ. ܕܲܬ݂ܫܲܪܪܘܼܢ ܒܹܗ ܚܘܼܒܟ݂ܘܿܢ. 9 ܡܛܠ ܗܵܢܵܐ ܓܹܝܪ ܟܸܬ݂ܒܹܬ݂ ܐܵܦ ܕܐܸܕܲܥ ܒܢܸܣܝܵܢܵܐ. ܐܸܢ ܒܟ݂ܠ ܡܸܕܸܡ ܡܸܫܬܲܡܥܝܼܢ ܐܢ̄ܬܘܿܢ. 10 ܠܡܲܢ ܕܐܲܢ̄ܬܿܘܿܢ ܕܹܝܢ ܫܵܒ݂ܩܝܼܢ ܐܢ̄ܬܘܿܢ. ܐܵܦ ܐܸܢܵܐ. ܐܵܦ ܐܸܢܵܐ ܓܹܝܪ ܡܸܕܸܡ ܕܫܸܒ݂ܩܹܬ݂ ܠܡܲܢ ܕܫܸܒ݂ܩܹܬ݂. ܡܛܠܵܬ݂ܟ݂ܘܿܢ ܗܘܼ ܫܸܒ݂ܩܹܬ݂ ܒܦܲܪܨܘܿܦܹܗ ܕܲܡܫܝܼܚܵܐ. 11 ܕܠܵܐ ܢܸܥܠܒܲܢ ܣܵܛܵܢܵܐ. ܝܵܕ݂ܥܝܼܢ ܚ̄ܢܲܢ ܓܹܝܪ ܡܲܚ̈ܫܒ݂ܵܬܹܗ. 12 ܟܲܕ݂ ܐܸܬܹܝܬ݂ ܕܹܝܢ ܠܲܛܪܘܿܐܘܿܣ ܒܲܣܒܲܪܬܹܗ ܕܲܡܫܝܼܚܵܐ: ܘܐܸܬ݂ܦܬܲܚ ܠܝܼ ܬܲܪܥܵܐ ܒܡܵܪܝܵܐ. 13 ܠܵܐ ܗ̄ܘܵܐ ܠܝܼ ܢܝܵܚܵܐ ܒܪܘܼܚܝ. ܕܠܵܐ ܐܸܫܟܚܹܬ݂ ܠܛܸܛܘܿܣ ܐܵܚܝ. ܐܸܠܵܐ ܫܪܹܝܬ݂ ܐܸܢܘܿܢ. ܘܢܸܦܩܹܬ݂ ܠܝܼ ܠܡܵܩܹܕܘܿܢܝܼܵܐ. 14 ܛܲܝܒܘܼ ܕܹܝܢ ܠܐܲܠܵܗܵܐ. ܕܲܒܟ݂ܠ ܙܒܲܢ ܚܙܵܬ݂ܵܐ ܥܵܒܹܿܕ݂ ܠܲܢ ܒܲܡܫܝܼܚܵܐ. ܘܓ݂ܵܠܹܐ ܒܲܢ ܪܹܝܚܵܐ ܕܝܼܕ݂ܲܥܬܹܗ ܒܟ݂ܠ ܐܲܬܲܪ. 15 ܪܹܝܚܵܐ ܚܢܲܢ ܓܹܝܪ ܒܲܣܝܼܡܵܐ ܒܲܡܫܝܼܚܵܐ ܠܐܲܠܵܗܵܐ. ܒܐܲܝܠܹܝܢ ܕܚܵܐܹܝܢ. ܘܒܲܐܝܠܹܝܢ ܕܐܵܒ݂ܕܝܼܢ. 16 ܠܐܲܝܠܹܝܢ. ܕܪܹܝܚܵܐ ܕܡܵܘܬܵܐ ܠܡܵܘܬܵܐ. ܘܠܲܐܝܠܹܝܢ. ܕܪܹܝܚܵܐ ܕܚܲܝܹ̈ܐ ܠܚܲܝܹ̈ܐ. ܘܲܠܗܵܠܹܝܢ ܡܲܢܘܼ ܢܸܫܘܹܐ. 17 ܠܵܐ ܗ̄ܘܲܝܢ ܓܹܝܪ ܐܲܝܟ݂ ܫܲܪܟܵܐ. ܕܲܡܡܲܙܓ݂ܝܼܢ ܡܸܠܵܘ̈ܗܝ ܕܐܲܠܵܗܵܐ. ܐܸܠܵܐ ܐܲܝܟ݂ ܕܒܲܫܪܵܪܵܐ. ܘܐܲܝܟ݂ ܕܡܸܢ ܐܲܠܵܗܵܐ. ܩܕ݂ܵܡ ܐܲܠܵܗܵܐ ܒܲܡܫܝܼܚܵܐ ܡܡܲܠܠܝܼܢܲܢ.
ܩܦܠܐܘܢ ܓ
1 ܡܫܲܪܹܝܢ ܚܢܲܢ ܠܲܢ ܬܘܼܒ݂ ܡܸܢ ܕܪܹܫ ܕܲܢܚܵܘܹܝܟ݂ܘܿܢ ܡܵܢܵܐ ܚܢܲܢ. ܐܵܘ ܕܲܠܡܵܐ ܣܢܝܼܩܝܼܢ ܚ̄ܢܲܢ ܐܲܝܟ݂ ܐ̄ܚܪ̈ܵܢܹܐ: ܕܐܸܓܪ̈ܵܬ݂ܵܐ ܕܦܘܼܩܵܕܹ̈ܐ ܢܸܬ݂ܟܲܬ݂ܒܵܢ ܠܟ݂ܘܿܢ ܥܠܲܝܢ. ܐܵܘ ܕܐܲܢ̄ܬܿܘܿܢ ܬܸܟ݂ܬܿܒ݂ܘܼܢ ܬܿܦܲܩܕ݂ܘܼܢ ܥܠܲܝܢ. 2 ܐܸܓܲܪܬܲܢ ܕܹܝܢ ܕܝܼܠܲܢ ܐܲܢ̄ܬܿܘܿܢ ܐܸܢܘܿܢ. ܕܲܟ݂ܬ݂ܝܼܒ݂ܵܐ ܒܠܸܒܲܢ ܘܝܼܕ݂ܝܼܥܵܐ ܘܡܸܬ݂ܩܲܪܝܵܐ ܡܸܢ ܟܠܢܵܫ. 3 ܝܵܕ݂ܥܝܼܬܿܘܢ ܓܹܝܪ ܕܐܸܓܲܪܬܹ݁ܗ ܐܲܢ̄ܬܿܘܿܢ ܕܲܡܫܝܼܚܵܐ. ܕܐܸܫܬܲܡܫܲܬ݂ ܡܸܢܲܢ. ܕܲܟ̣ܬ݂ܝܼܒ݂ܐ. ܠܵܐ ܒܲܕ݂ܝܘܼܬ݂ܵܐ. ܐܸܠܵܐ ܒܪܘܼܚܵܐ ܕܐܲܠܵܗܵܐ ܚܲܝܵܐ. ܠܵܐ ܒܠܘܼܚܹ̈ܐ ܕܟܹܐܦܵܐ. ܐܸܠܵܐ ܒܠܘܼܚܹ̈ܐ ܕܠܸܒܵܐ ܕܒܸܣܪܵܐ. 4 ܬܿܘܼܟ݂ܠܵܢܵܐ ܕܹܝܢ ܗܵܟܲܢܵܐ ܐܝܼܬ݂ ܠܲܢ ܒܲܡܫܝܼܚܵܐ ܠܘܵܬ݂ ܐܲܠܵܗܵܐ. 5 ܠܵܘ ܕܲܚܢܲܢ ܣܵܦܩܝܼܢ ܚ̄ܢܲܢ ܕܢܸܬ݂ܪܲܥܹܐ ܡܸܕܸܡ ܐܲܝܟ݂ ܕܡܸܢ ܢܲܦ̮ܫܲܢ. ܐܸܠܵܐ ܚܲܝܠܲܢ ܡܸܢ ܐܲܠܵܗܵܐ ܗܘܼ. 6 ܗܵܘ ܕܐܲܫܘܲܝܢ ܕܢܸܗܘܹܐ ܡܫܲܡܫܵܢܹ̈ܐ ܕܲܕ݂ܝܵܬܹܩܹܐ ܚܕ݂ܲܬ݂ܵܐ. ܠܵܐ ܒܲܟ݂ܬ݂ܵܒ݂ܵܐ. ܐܸܠܵܐ ܒܪܘܼܚܵܐ. ܟܬ݂ܵܒ݂ܵܐ ܓܹܝܪ ܩܵܛܹܠ. ܪܘܼܚܵܐ ܕܹܝܢ ܡܲܚܝܵܐ. 7 ܐܸܢ ܕܹܝܢ (ܐܸܢ ܓܹܝܪ) ܬܸܫܡܸܫܬܵܐ ܕܡܵܘܬܵܐ ܒܲܟ݂ܬ݂ܵܒ݂ܵܐ ܐܸܬ݂ܪܲܫܡܲܬ݂ ܒܟܹܐܦܹ̈ܐ. ܘܲܗܘܵܬ݂ ܒܬܸܫܒܿܘܿܚܬܵܐ: ܐܲܝܟܲܢܵܐ ܕܠܵܐ ܢܸܫܟܚܘܼܢ ܒܢܲܝ̈ ܝܼܣܪܵܝܹܠ ܠܲܡܚܵܪ ܒܦܲܪܨܘܿܦܹܗ ܕܡܘܼܫܹܐ: ܡܛܠ ܫܘܼܒ݂ܚܵܐ ܕܦܲܪܨܘܿܦܹܗ ܗܵܘ ܕܐܸܬ݂ܒܲܛܲܠ. 8 ܐܲܝܟܲܢܵܐ ܗܵܟܹܝܠ ܬܸܫܡܸܫܬܵܐ ܕܪܘܼܚܵܐ. ܠܵܐ ܝܲܬܝܼܪܵܐܝܼܬ݂ ܬܸܗܘܹܐ ܒܫܘܼܒ݂ܚܵܐ. 9 ܐܸܢ ܓܹܝܪ ܠܬܸܫܡܸܫܬܵܐ ܕܚܘܼܝܵܒ݂ܵܐ ܗܘܵܐ ܫܘܼܒ݂ܚܵܐ. ܚܲܕ݂ ܟܡܵܐ ܬܸܬ݂ܝܲܬܲܪ ܬܸܫܡܸܫܬܵܐ ܕܙܲܕܝܼܩܘܼܬ݂ܵܐ ܒܫܘܼܒ݂ܚܵܐ. 10 ܐܲܝܟ݂ ܗܵܘ ܓܹܝܪ ܕܐܵܦܠܵܐ ܡܫܲܒܚܵܐ ܗܵܝ ܕܐܸܫܬܲܒܚܲܬ݂. ܒܦܘܼܚܵܡܵܐ ܕܗܵܢܵܐ ܫܘܼܒ݂ܚܵܐ ܡܝܲܬܿܪܵܐ. 11 ܐܸܢ ܓܹܝܪ ܡܸܕܸܡ ܕܐܬ݂ܒܲܛܲܠ ܒܫܘܼܒ݂ܚܵܐ ܗܘܵܐ. ܝܲܬܝܼܪܵܐܝܼܬ݂ ܐܲܝܢܵܐ ܕܲܡܩܵܘܹܐ ܒܫܘܼܒ݂ܚܵܐ ܢܸܗܘܹܐ. 12 ܡܛܠ ܕܐܝܼܬ݂ ܠܲܢ ܗܵܟܹܝܠ ܗܵܢܵܐ ܣܲܒ݂ܪܵܐ. ܝܲܬܝܼܪܵܐܝܼܬ݂ ܒܲܓ݂ܠܹܐ ܥܹܝܢ ܡܸܬܿܕܲܒܪܝܼܢܲܢ. 13 ܘܠܵܐ ܐܲܝܟ݂ ܡܘܼܫܹܐ. ܕܪܵܡܹܐ ܗ̄ܘܵܐ ܬܲܚܦܝܼܬ݂ܵܐ ܥܲܠ ܐܲܦܵܘ̈ܗܝ. ܕܠܵܐ ܢܚܘܼܪܘܼܢ ܒܢܲܝ̈ ܝܼܣܪܵܝܹܠ ܒܫܘܼܠܵܡܹܗ ܕܗܵܘ ܕܡܸܬ݂ܒܲܛܲܠ. 14 ܐܸܠܵܐ ܐܸܬ݂ܥܵܘܲܪܘ ܒܡܲܕܥܲܝ̈ܗܘܿܢ (ܡܲܕܥܲܝ̈ܗܘܿܢ). ܥܕ݂ܲܡܵܐ ܓܹܝܪ ܠܝܵܘܡܵܢܵܐ. ܐܸܡܲܬ݂ܝ ܕܲܕ݂ܝܵܬܹܩܹܐ ܥܲܬܿܝܼܩܬܵܐ ܡܸܬ݂ܩܲܪܝܵܐ. ܗܝܼ ܗܵܝ ܬܲܚܦܝܼܬ݂ܵܐ ܩܵܝܡܵܐܥܠܲܝܗܘܿܢ. ܘܠܵܐ ܡܸܬ݂ܓܲܠܝܵܐ. ܕܒܲܡܫܝܼܚܵܐ ܗܘܼ ܡܸܬ݂ܒܲܛܠܵܐ. 15 ܘܲܥܕ݂ܲܡܵܐ ܠܝܵܘܡܵܢܵܐ. ܐܸܡܲܬ݂ܝ ܕܡܸܬ݂ܩܪܹܐ ܡܘܼܫܹܐ. ܬܲܚܦܝܼܬ݂ܵܐ ܥܲܠ ܠܸܒܗܘܿܢ ܪܲܡܝܵܐ. 16 ܘܐܸܡܲܬ݂ܝ ܕܐ̄ܢܵܫ ܡܸܢܗܘܿܢ ܢܸܬ݂ܦܢܹܐ ܠܘܵܬ݂ ܡܵܪܝܵܐ. ܡܸܫܬܲܩܠܵܐ ܡܸܢܹܗ ܬܲܚܦܝܼܬ݂ܵܐ. 17 ܡܵܪܝܵܐ ܕܹܝܢ ܗܘܸܝܘܼ ܪܘܼܚܵܐ. ܘܐܲܬܲܪ ܕܪܘܼܚܹܗ ܕܡܵܪܝܵܐ. ܚܹܐܪܘܼܬ݂ܵܐ ܗܝܼ. 18 ܚܢܲܢ ܕܹܝܢ ܟܠܲܢ ܒܐܲܦܹ̈ܐ ܓܲܠܝ̈ܵܬ݂ܵܐ. ܬܸܫܒܘܿܚܬܹ݁ܗ ܕܡܵܪܝܵܐ ܐܲܝܟ݂ ܕܲܒ݂ܡܲܚܙܝܼܬ݂ܵܐ ܚܵܙܹܝܢܲܢ. ܘܠܵܗܿ ܠܲܕ݂ܡܘܼܬ݂ܵܐ ܡܸܫܬܲܚܠܦܝܼܢܲܢ. ܡܸܢ ܫܘܼܒ݂ܚܵܐ ܠܫܘܼܒ݂ܚܵܐ. ܐܲܝܟ݂ ܕܡܸܢ ܡܵܪܝܵܐ ܪܘܼܚܵܐ.
ܩܦܠܐܘܢ ܕ
1 ܡܛܠ ܗܵܢܵܐ ܠܵܐ ܡܵܐ̇ܢܵܐ ܠܲܢ ܒܬܸܫܡܸܫܬܵܐ ܗܵܕܹܐ ܕܐܲܚܝܼܕ݂ܝܼܢ ܚ̄ܢܲܢ. ܐܲܝܟ݂ ܪ̈ܲܚܡܹܐ ܕܲܗܘܵܘ ܥܠܲܝܢ. 2 ܐܸܠܵܐ ܐܲܣܠܝܼܢ ܚ̄ܢܲܢ ܟܲܣ̈ܝܵܬ݂ܵܗܿ ܕܒܸܗܬܿܬ݂ܵܐ. ܘܠܵܐ ܡܗܲܠܟ݂ܝܼܢ ܚ̄ܢܲܢ ܒܚܵܪܥܘܬ݂ܵܐ. ܘܠܵܐ ܢܵܟ݂ܠܝܼܢ ܚ̄ܢܲܢ ܡܸܠܬܹܗ ܕܐܲܠܵܗܵܐ. ܐܸܠܵܐ ܒܓܲܠܝܘܼܬ݂ܵܐ ܕܲܫܪܵܪܵܐ ܡܚܵܘܹܝܢ ܚ̄ܢܲܢ ܢܲܦ̮ܫܲܢ. ܠܟ݂ܠܗܘܿܢ ܪܸ̈ܥܝܵܢܹܐ ܕܲܒ݂ܢܲܝ̈ܢܵܫܵܐ ܩܕ݂ܵܡ ܐܲܠܵܗܵܐ. 3 ܘܐܸܢ ܕܹܝܢ ܡܟܲܣܲܝ ܗܘܼ ܐܹܘܲܢܓܲܠܝܼܘܿܢ ܕܝܼܠܲܢ. ܠܐܲܝܠܹܝܢ ܕܐܵܒ݂ܕܝܼܢ ܗܘܼ ܡܟܲܣܲܝ. 4 ܐܲܝܠܹܝܢ ܕܐܲܠܵܗܹܗ ܕܥܵܠܡܵܐ ܗܵܢܵܐ ܥܵܘܲܪ ܡܲܕܥܲܝ̈ܗܘܿܢ ܥܲܠ ܕܠܵܐ ܡܗܲܝܡܢܝܼܢ. ܕܠܵܐ ܢܸܕ݂ܢܲܚ ܠܗܘܿܢ ܢܘܼܗܪܹܗ ܕܐܘܲܢܓܲܠܝܼܘܿܢ ܕܫܘܼܒ݂ܚܹܗ ܕܲܡܫܝܼܚܵܐ. ܕܗܘܝܘܼ ܕܡܘܼܬܹܗ ܕܐܲܠܵܗܵܐ. 5 ܠܵܐ ܗ̄ܘܵܐ ܓܹܝܪ ܢܲܦ̮ܫܲܢ ܡܲܟ݂ܪܙܝܼܢ ܚ̄ܢܲܢ. ܐܸܠܵܐ ܠܲܡܫܝܼܚܵܐ ܝܼܫܘܿܥ ܡܵܪܲܢ. ܠܢܲܦ̮ܫܲܢ ܕܹܝܢ. ܕܥܲܒ݂ܕܲܝ̈ܟ݁ܘܿܢ ܚܢܲܢ ܡܛܠ ܝܼܫܘܿܥ. 6 ܡܛܠ ܕܐܲܠܵܗܵܐ ܗܘܼ ܕܐܵܡܲܪ ܕܡܸܢ ܚܸܫܘܿܟ݂ܵܐ ܢܘܼܗܪܵܐ ܢܸܕ݂ܢܲܚ. ܗܘܼ ܕܢܲܚ ܒܠܸܒ̈ܵܘܵܬܲܢ. ܕܢܸܬ݂ܢܲܗܲܪ ܒܝܼܕ݂ܲܥܬ݂ܵܐ ܕܫܘܼܒ݂ܚܹܗ ܕܐܲܠܵܗܵܐ. ܒܦܲܪܨܘܿܦܹܗ ܕܝܼܫܘܿܥ ܡܫܝܼܚܵܐ. 7 ܐܝܼܬ݂ ܠܲܢ ܕܹܝܢ ܣܝܼܡܬ݂ܵܐ ܗܵܕܹܐ ܒܡܵܐܢܵܐ ܕܚܸܨܦܵܐ. ܕܪܲܒܘܼܬ݂ܵܐ ܕܚܲܝܠܵܐ ܡܸܢ ܐܲܠܵܗܵܐ ܬܸܗܘܹܐ. ܘܠܵܐ ܡܸܢܲܢ. 8 ܒܟ݂ܠܡܸܕܸܡ ܓܹܝܪ (ܕܹܝܢ) ܡܸܬ݂ܐܲܠܨܝܼܢ ܚ̄ܢܲܢ ܐܸܠܵܐ ܠܵܐ ܡܸܬ݂ܚܲܢܩܝܼܢ ܚ̄ܢܲܢ. ܡܸܬܿܛܲܪܦܝܼܢ ܚ̄ܢܲܢ ܐܸܠܵܐ ܠܵܐ ܚܵܝܒ̇ܝܼܢ ܚ̄ܢܲܢ. 9 ܡܸܬ݂ܪܲܕ݂ܦܝܼܢ ܚ̄ܢܲܢ ܐܸܠܵܐ ܠܵܐ ܡܸܫܬܲܒ݂ܩܝܼܢ ܚ̄ܢܲܢ. ܡܸܣܬܲܚܦܝܼܢ ܚ̄ܢܲܢ ܐܸܠܵܐ ܠܵܐ ܐܵܒ݂ܕܝܼܢ ܚ̄ܢܲܢ. 10 ܒܟ݂ܠܙܒܲܢ (ܒܟ݂ܠܙܒܲܢ ܓܹܝܪ) ܡܝܼܬ݂ܘܼܬܹܗ ܕܝܼܫܘܿܥ ܒܦܲܓ݂ܪ̈ܲܝܢ ܫܩܝܼܠܝܼܢ ܚ̄ܢܲܢ. ܕܐܵܦ ܚܲܝܵܘ̈ܗܝ ܕܝܼܫܘܿܥ ܒܦܲܓ݂ܪ̈ܲܝܢ ܢܸܬ݂ܓ݁ܠܘܿܢ. 11 ܐܸܢ ܚܢܲܢ ܓܹܝܪ ܚܲܝܹ̈ܐ ܠܡܵܘܬܵܐ ܡܸܫܬܲܠܡܝܼܢ ܚ̄ܢܲܢ. ܡܛܠ ܝܼܫܘܿܥ. ܗܵܟܲܢܵܐ ܐܵܦ ܚܲܝܵܘ̈ܗܝ ܕܝܼܫܘܿܥ ܢܸܬ݂ܓ݁ܠܘܿܢ ܒܦܲܓ݂ܪܲܢ ܗܵܢܵܐ ܕܡܵܐܹܬ݂. 12 ܗܵܫܵܐ ܡܵܘܬܵܐ ܒܲܢ ܡܸܬ݂ܚܲܦܲܛ. ܘܚܲܝܹ̈ܐ ܒܟ݂ܘܿܢ. 13 ܐܵܦ ܚܢܲܢ ܗܵܟܹܝܠ ܕܲܚܕ݂ܵܐ ܗܝܼ ܪܘܼܚܵܐܕܗܲܝܡܵܢܘܼܬ݂ܵܐ ܐܝܼܬ݂ ܠܲܢ. ܐܲܝܟ݂ ܕܲܟ݂ܬ݂ܝܼܒ݂. ܕܗܲܝܡܢܹܬ݂. ܡܛܠ ܗܵܢܵܐ ܐܵܦ ܡܲܠܠܹܬ݂. ܡܗܲܝܡܢܝܼܢ ܚ̄ܢܲܢ. ܡܛܠ ܗܵܢܵܐ ܐܵܦ ܡܡܲܠܠܝܼܢ ܚ̄ܢܲܢ. 14 ܘܝܵܕ݂ܥܝܼܢ ܚ̄ܢܲܢ ܕܗܵܘ ܡܲܢ ܕܐܲܩܝܼܡ ܠܡܵܪܲܢ ܝܼܫܘܿܥ. ܐܵܦ ܠܲܢ ܒܝܲܕ݂ ܝܼܫܘܿܥ ܢܩܝܼܡ. ܘܲܢܩܲܪܒܲܢ ܥܲܡܟ݂ܘܿܢ ܠܘܵܬܹܗ. 15 ܟܠܡܸܕܸܡ ܓܹܝܪ ܡܛܠܵܬ݂ܟ݂ܘܿܢ ܗ̄ܘܼ. ܕܟܲܕ݂ ܡܸܬ݂ܝܲܬܿܪܵܐ ܛܲܝܒܘܼܬ݂ܵܐ ܒܝܲܕ݂ ܣܲܓܝܼ̈ܐܹܐ. ܬܸܣܓܹ݁ܐ ܬܵܘܕܝܼܬ݂ܵܐ ܠܫܘܼܒ݂ܚܹܗ ܕܐܲܠܵܗܵܐ. 16 ܡܛܠ ܗܵܢܵܐ ܠܵܐ ܡܵܐ̇ܢܵܐ ܠܲܢ. ܐܵܦ ܐܸܢ ܒܲܪܢܵܫܲܢ ܓܹܝܪ ܒܲܪܵܝܵܐ ܡܸܬ݂ܚܲܒܲܠ. ܐܸܠܵܐ ܕܡܸܢ ܠܓ݂ܵܘ ܡܸܬ݂ܚܲܕܲܬ݂ ܝܘܿܡ ܡܸܢ ܝܘܿܡ. 17 ܐܘܼܠܨܵܢܹܗ ܓܹܝܪ ܕܙܲܒ݂ܢܵܐ ܗܵܢܵܐ. ܟܲܕ݂ ܛܵܒ݂ ܙܥܘܿܪ ܘܩܲܠܝܼܠ. ܫܘܼܒ݂ܚܵܐ ܪܲܒܵܐ ܕܠܵܐ ܣܵܟ݂ܵܐ ܠܥܵܠܲܡ ܥܵܠܡܝܼܢ ܡܛܲܝܸܒ݂ ܠܲܢ. 18 ܕܠܵܐ ܚܵܕܹܝܢ ܚ̄ܢܲܢ ܒܗܵܠܹܝܢ ܕܡܸܬ݂ܚܲܙ̈ܝܵܢ. ܐܸܠܵܐ ܒܗܵܠܹܝܢ ܕܠܵܐ ܡܸܬ݂ܚܲܙ̈ܝܵܢ. ܕܡܸܬ݂ܚܲܙ̈ܝܵܢ ܓܹܝܪ ܕܙܲܒ݂ܢܵܐ ܐܸܢܹܝܢ. ܕܠܵܐ ܡܸܬ݂ܚܲܙ̈ܝܵܢ ܕܹܝܢ ܕܲܠܥܵܠܲܡ ܐܸܢܹܝܢ.
ܩܦܠܐܘܢ ܗ
1 ܝܵܕ݂ܥܝܼܢ ܚ̄ܢܲܢ ܓܹܝܪ ܕܐܸܢ ܒܲܝܬܲܢ ܕܒܲܐܪܥܵܐ ܗܵܢܵܐ ܕܦܲܓ݂ܪܵܐ ܢܸܫܬܿܪܹܐ. ܐܸܠܵܐ ܐܝܼܬ݂ ܠܲܢ ܒܸܢܝܵܢܵܐ ܕܡܸܢ ܐܲܠܵܗܵܐ. ܒܲܝܬܵܐ ܕܠܵܐ ܒܲܥܒ݂ܵܕ݂ ܐܝܼ̈ܕ݂ܲܝܵܐ ܒܲܫܡܲܝܵܐ ܠܥܵܠܲܡ. 2 ܐܵܦ ܥܲܠ ܗܵܕܹܐ ܓܹܝܪ ܡܸܬܿܬܲܢܚܝܼܢ ܚ̄ܢܲܢ. ܘܲܣܘܹܝܢ ܚ̄ܢܲܢ ܕܢܸܠܒܲܫ ܒܲܝܬܲܢ ܕܡܸܢ ܫܡܲܝܵܐ. 3 ܐܸܠܵܐ ܐܵܦ ܡܵܐ ܕܲܠܒܸܫܢ ܢܸܫܬܿܟܲܚ ܠܲܢ ܥܲܪܛܸܠ. 4 ܟܲܕ݂ ܐܝܼܬܲܝܢ ܓܹܝܪ ܗܵܫܵܐ ܒܗܵܢܵܐ ܒܲܝܬܵܐ. ܡܸܬܿܬܲܢܚܝܼܢ ܚ̄ܢܲܢ ܡܸܢ ܝܘܼܩܪܹܗ. ܘܠܵܐ ܨܵܒܹܝܢ ܚ̄ܢܲܢ ܠܡܸܫܠܚܹܗ. ܐܸܠܵܐ ܕܢܸܠܒܲܫ ܠܥܸܠ ܡܸܢܹܗ. ܕܬܸܬ݂ܒܠܲܥ ܡܝܼܬ݂ܘܼܬܹܗ ܒܚܲܝܹ̈ܐ. 5 ܘܕ݂ܲܡܥܲܬܸܿܕ݂ ܠܲܢ ܠܵܗܿ ܠܗܵܕܹܐ. ܐܲܠܵܗܵܐ ܗܘܼ. ܗܵܘ ܕܝܲܗ̄ܒ݂ ܠܲܢ ܪܲܗܒ݂ܘܿܢܵܐ ܕܪܘܼܚܹܗ. 6 ܡܛܠ ܕܝܵܕ݂ܥܝܼܢ ܚ̄ܢܲܢ ܗܵܟܹܝܠ ܘܲܡܦܵܣܝܼܢ ܚ̄ܢܲܢ: ܕܲܟ݂ܡܵܐ ܕܲܒ݂ܦܲܓ݂ܪܵܐ ܫܪܹܝܢ ܚ̄ܢܲܢ ܥܲܢܝܼܕ݂ܝܼܢ ܚ̄ܢܲܢ ܡܸܢ ܡܵܪܲܢ. 7 ܒܗܲܝܡܵܢܘܼܬ݂ܵܐ ܗܘܼ ܓܹܝܪ ܡܗܲܠܟ݂ܝܼܢ ܚ̄ܢܲܢ ܘܠܵܐ ܒܲܚܙܵܝܵܐ. 8 ܡܛܠ ܗܵܢܵܐ ܬܿܟ݂ܝܼܠܝܼܢ ܚ̄ܢܲܢ ܘܲܡܣܵܘܚܝܼܢ ܚ̄ܢܲܢ. ܕܢܸܥܢܲܕ݂ ܡܸܢ ܦܲܓ݂ܪܵܐ. ܘܢܸܗܘܹܐ ܠܘܵܬ݂ ܡܵܪܲܢ. 9 ܘܡܸܬ݂ܚܲܦܛܝܼܢ ܚ̄ܢܲܢ ܕܐܸܢ ܥܵܢܘܿܕܹ̈ܐ ܚܢܲܢ ܘܐܸܢ ܥܵܡܘܪܹ̈ܐ. ܠܹܗ ܗܘܲܝܢ ܫܵܦܪܝܼܢ. 10 ܟܠܲܢ ܓܹܝܪ ܥܬ݂ܝܼܕ݂ܝܼܢ ܚ̄ܢܲܢ ܠܲܡܩܵܡ ܩܕ݂ܵܡ ܒܹܝܡ ܕܲܡܫܝܼܚܵܐ. ܕܢܸܬ݂ܦܪܲܥ ܐ̄ܢܵܫ ܐ̄ܢܵܫ ܒܦܲܓ݂ܪܹܗ ܡܸܕܸܡ ܕܲܥܒ݂ܝܼܕ݂ ܠܹܗ. ܐܸܢ ܕܛܵܒ݂ ܘܐܸܢ ܕܒ݂ܝܼܫ. 11 ܡܛܠ ܕܝܵܕ݂ܥܝܼܢ ܚ̄ܢܲܢ ܗܵܟܹܝܠ ܕܸܚܠܬܹܗ ܕܡܵܪܲܢ. ܠܲܒ̣ܢܲܝ̈ܢܵܫܵܐ ܗܘܼ ܡܦܝܼܣܝܼܢ ܚ̄ܢܲܢ. ܠܐܲܠܵܗܵܐ ܕܹܝܢ ܓܠܹܝܢ ܚ̄ܢܲܢ. ܣܵܒܲܪ ܐ̄ܢܵܐ ܕܹܝܢ ܕܐܵܦ ܠܡܲܕܥܲܝ̈ܟ݁ܘܿܢ ܕܝܼܠܟ݂ܘܿܢ ܓܠܹܝܢ ܚ̄ܢܲܢ. 12 ܠܵܐ ܗ̄ܘܵܐ ܬܘܼܒ݂ ܢܲܦ̮ܫܲܢ ܡܫܲܒܚܝܼܢ ܚ̄ܢܲܢ ܠܟ݂ܘܿܢ. ܐܸܠܵܐ ܥܸܠܬ݂ܵܐ ܗܘܼ ܝܵܗܒܝܼܢ ܚ̄ܢܲܢ ܠܟ݂ܘܿܢ. ܕܲܗܘܲܝܬܿܘܿܢ ܡܸܫܬܲܒ݂ܗܪܝܼܢ ܒܲܢ. ܠܘܵܬ݂ ܗܵܢܘܿܢ ܕܒܲܐܦܹ̈ܐ ܗ̄ܘܼ ܡܸܫܬܲܒ݂ܗܪܝܼܢ. ܘܠܵܐ ܒܠܸܒܵܐ. 13 ܐܸܢ ܓܹܝܪ ܫܵܛܹܝܢ ܚ̄ܢܲܢ. ܠܐܲܠܵܗܵܐ. ܘܐܸܢ ܬܲܩܢܝܼܢ ܚ̄ܢܲܢ. ܠܟ݂ܘܿܢ. 14 ܚܘܼܒܹܗ ܓܹܝܪ ܕܲܡܫܝܼܚܵܐ ܐܵܠܹܨ ܠܲܢ. ܕܪܵܢܹܝܢ ܚ̄ܢܲܢ ܗܵܕܹܐ. ܕܚܲܕ݂ ܚܠܵܦ ܟܠܢܵܫ ܡܝܼܬ݂. ܡܵܕܹܝܢ ܟܠܢܵܫ ܡܝܼܬ݂ ܠܹܗ. 15 ܘܲܚܠܵܦ ܟܠܢܵܫ ܗܘܼ ܡܝܼܬ݂. ܕܐܲܝܠܹܝܢ ܕܚܲܝܝܼܢ ܠܵܐ ܠܢܲܦ̮ܫܗܘܿܢ ܢܸܚܘܿܢ. ܐܸܠܵܐ ܠܗܵܘ ܐܲܝܢܵܐ ܕܥܲܠ ܐܲܦܲܝ̈ܗܘܿܢ ܡܝܼܬ݂ ܘܩ̣ܵܡ. 16 ܘܡܸܟܹܝܠ ܚܢܲܢ ܠܐ̄ܢܵܫ ܒܲܦܓܲܪ ܠܵܐ ܝܵܕ݂ܥܝܼܢܲܢ. ܘܐܸܢ ܝܼܕ݂ܲܥܢ ܒܲܦܓܲܪ ܠܲܡܫܝܼܚܵܐ. ܐܸܠܵܐ ܡܸܢ ܗܵܫܵܐ ܠܵܐ ܝܵܕ݂ܥܝܼܢܲܢ. 17 ܟܠܡܲܢ ܕܒܲܡܫܝܼܚܵܐ ܗܘܼ ܗܵܟܹܝܠ. ܒܪܝܼܬ݂ܵܐ ܗܘܼ ܚܕ݂ܲܬ݂ܵܐ. ܥܲܬܿܝܼ̈ܩܵܬ݂ܵܐ ܥܒܲܪ ܠܗܹܝܢ. 18 ܘܟ݂ܠ ܡܸܕܸܡ ܗܘܵܐ ܚܲܕ݂ܬ݂ܵܐ ܡܸܢ ܐܲܠܵܗܵܐ. ܗܵܘ ܕܪܲܥܝܲܢ ܠܹܗ ܒܲܡܫܝܼܚܵܐ. ܘܝܲܗ̄ܒ݂ ܠܲܢ ܬܸܫܡܸܫܬܵܐ ܕܬܲܪܥܘܼܬ݂ܵܐ. 19 ܐܲܠܵܗܵܐ ܗ̄ܘܵܐ ܓܹܝܪ ܒܲܡܫܝܼܚܵܐ. ܗܵܘ ܕܪܲܥܝܼ ܠܥܵܠܡܵܐ ܥܲܡ ܪܲܒܘܼܬܹܗ. ܘܠܵܐ ܚܫܲܒ݂ ܠܗܘܿܢ ܚܛܵܗܲܝ̈ܗܘܿܢ. ܘܣܵܡ ܒܲܢ ܕܝܼܠܲܢ ܡܸܠܬ݂ܵܐ ܕܬܲܪܥܘܼܬ݂ܵܐ. 20 ܐܝܼܙܓܲܕܹ̈ܐ ܚܢܲܢ ܗܵܟܹܝܠ ܚܠܵܦ ܡܫܝܼܚܵܐ. ܘܐܲܝܟ݂ ܗܵܘ ܕܐܲܠܵܗܵܐ ܒܵܥܹܐ ܡܸܢܟ݂ܘܿܢ ܒܐܝܼܕ݂ܲܢ. ܚܠܵܦ ܡܫܝܼܚܵܐ ܗܵܟܹܝܠ ܒܵܥܹܝܢ ܚ̄ܢܲܢ. ܐܸܬ݂ܪܲܥܵܘ ܠܐܲܠܵܗܵܐ. 21 ܗܵܘ ܓܹܝܪ ܕܠܵܐ ܝܵܕ݂ܲܥ ܗ̄ܘܵܐ ܚܛܝܼܬ݂ܵܐ. ܡܛܠܵܬ݂ܟ݂ܘܿܢ ܚܛܝܼܬ݂ܵܐ ܥܲܒ݂ܕܹܗ. ܕܲܚܢܲܢ ܢܸܗܘܹܐ ܒܹܗ ܙܲܕܝܼܩܘܼܬ݂ܵܐ ܕܐܲܠܵܗܵܐ.
ܩܦܠܐܘܢ ܘ
1 ܘܐܲܝܟ݂ ܡܥܲܕܪ̈ܵܢܹܐ. ܒܵܥܹܝܢ ܚ̄ܢܲܢ ܡܸܢܟ݂ܘܿܢ. ܕܠܵܐ ܬܸܣܬܲܪܲܩ ܒܟ݂ܘܿܢ ܛܲܝܒܘܼܬ݂ܵܐ ܕܐܲܠܵܗܵܐ ܕܩܲܒܸܠܬܿܘܿܢ. 2 ܐܸܡܲܪ ܓܹܝܪ. ܕܲܒ݂ܙܲܒ݂ܢܵܐ ܡܩܲܒܠܵܐ ܥܢܹܝܬ݂ܵܟ݂. ܘܲܒ݂ܝܵܘܡܵܐ ܕܚܲܝܹ̈ܐ ܥܲܕܲܪܬܵܟ݂. ܗܵܐ ܗܵܫܵܐ ܙܲܒ݂ܢܵܐ ܡܩܲܒܠܵܐ. ܘܗܵܐ ܗܵܫܵܐ ܝܵܘܡܵܐ ܕܚܲܝܹ̈ܐ. 3 ܠܡܵܐ ܒܡܸܕܸܡ ܬܸܬܿܠܘܼܢ ܠܐ̄ܢܵܫ ܥܸܠܬ݂ܵܐ ܕܬ݂ܘܼܩܠܬ݂ܵܐ. ܕܠܵܐ ܢܸܗܘܹܐ ܡܘܼܡܵܐ ܒܬܸܫܡܸܫܬܲܢ. 4 ܐܸܠܵܐ ܒܟ݂ܠ ܡܸܕܸܡ ܢܚܵܘܹܐ ܢܲܦ̮ܫܲܢ. ܕܲܡܫܲܡܫܵܢܹ̈ܐ ܚܢܲܢ ܕܐܲܠܵܗܵܐ. ܒܲܡܣܲܝܒܪܵܢܘܼܬ݂ܵܐ ܣܲܓܝܼܐܬ݂ܵܐ. ܒܐܘܼܠܨܵܢܹ̈ܐ. ܒܐܵܢܲܢܩ̈ܘܿܣ. ܒܲܚܒ݂ܘܼܫ̈ܝܹܐ. 5 ܒܢܸܓ݂ܕܹ̈ܐ. ܒܐܲܣܘܼܪܹ̈ܐ. ܒܲܫܓ݂ܘܼܫܝܹ̈ܐ. ܒܠܹܐܘܬ݂ܵܐ. ܒܫܲܗܪܵܐ. ܒܨܵܘܡܵܐ. 6 ܒܕ݂ܲܟ݂ܝܘܼܬ݂ܵܐ. ܒܝܼܕ݂ܲܥܬ݂ܵܐ. ܒܢܲܓ݁ܝܼܪܘܼܬ݂ ܪܘܼܚܵܐ. ܒܒܲܣܝܼܡܘܼܬ݂ܵܐ. ܒܪܘܼܚܵܐ ܕܩܘܼܕ݂ܫܵܐ. ܒܚܘܼܒܵܐ ܕܠܵܐ ܢܸܟ݂ܠܵܐ. 7 ܒܡܸܠܬ݂ܵܐ ܕܩܘܼܫܬܵܐ. ܒܚܲܝܠܵܐ ܕܐܲܠܵܗܵܐ. ܒܙܲܝܢܵܐ ܕܙܲܕܝܼܩܘܼܬ݂ܵܐ ܕܲܒ݂ܝܲܡܝܼܢܵܐ ܘܲܒ݂ܣܸܡܵܠܵܐ. 8 ܒܫܘܼܒ݂ܚܵܐ ܘܲܒ݂ܨܲܥܪܵܐ. ܒܩܘܼܠܵܣܵܐ ܘܲܒ݂ܓ݂ܘܢܵܝܵܐ. ܐܲܝܟ݂ ܡܲܛܥܝܵܢܹ̈ܐ. ܘܫܲܪܝܼܪܹ̈ܐ. 9 ܐܲܝܟ݂ ܠܵܐ ܝܼܕ݂ܝܼܥܹ̈ܐ. ܘܝܼܕ݂ܝܼܥܝܼܢ ܚ̄ܢܲܢ. ܐܲܝܟ݂ ܡܵܝܬܝܼܢ ܚ̄ܢܲܢ. ܘܗܵܐ ܚܲܝܝܼܢ ܚ̄ܢܲܢ. ܐܲܝܟ݂ ܕܡܸܬ݂ܪܕܹܝܢ ܚ̄ܢܲܢ. ܘܠܵܐ ܡܵܝܬܿܝܼܢ ܚ̄ܢܲܢ. 10 ܐܲܝܟ݂ ܕܟܲܪܝܵܐ ܠܲܢ. ܘܲܒܟ݂ܠܙܒܲܢ ܚܵܕܹܝܢ ܚ̄ܢܲܢ. ܐܲܝܟ݂ ܡܸܣܟܹܢܹ̈ܐ. ܘܲܠܣܲܓܝܼ̈ܐܹܐ ܡܲܥܬܿܪܝܼܢ ܚ̄ܢܲܢ. ܐܲܝܟ݂ ܕܡܸܕܸܡ ܠܲܝܬܿ ܠܲܢ. ܘܟ݂ܠܡܸܕܸܡ ܐܲܚܝܼܕ݂ܝܼܢ ܚ̄ܢܲܢ. 11 ܦܘܼܡܲܢ ܦܬ݂ܝܼܚ ܗܘܼ ܠܘܵܬ݂ܟ݂ܘܿܢ ܩܘܿܪ̈ܢܬ݂ܵܝܹܐ. ܘܠܸܒܲܢ ܪܘܝܼܚ. 12 ܠܵܐ ܐܲܠܝܼܨܝܼܢ ܐ̄ܢܬܿܘܿܢ ܒܲܢ. ܐܲܠܝܼܨܝܼ. ܐ̄ܢܬܿܘܢ ܕܹܝܢ ܒܪ̈ܲܚܡܲܝܟ݁ܘܿܢ. 13 ܐܲܝܟ݂ ܕܠܲܒ̣̈ܢܲܝܵܐ ܕܹܝܢ ܐܵܡܲܪ ܐ̄ܢܵܐ. ܦܘܼܪܥܘܼܢܝ ܚܘܼܒ݂ܠܝ ܕܲܠܘܵܬ݂ܟ݂ܘܿܢ. ܘܪܵܘܲܚܘ ܚܘܼܒܟ݂ܘܿܢ ܠܘܵܬ݂ܝ. 14 ܘܠܵܐ ܬܸܗܘܘܿܢ ܒܢܲܝ̈ ܙܵܘܓܵܐ ܠܐܲܝܠܹܝܢ ܕܠܵܐ ܡܗܲܝܡܢܝܼܢ. ܐܲܝܕ݂ܵܐ ܓܹܝܪ ܫܵܘܬܵܦܘܼܬ݂ܵܐ ܐܝܼܬ݂ ܠܙܲܕܝܼܩܘܼܬ݂ܵܐ ܥܲܡ ܥܵܘܠܵܐ. ܐܵܘ ܐܲܝܢܵܐ ܚܘܼܠܛܵܢܵܐ ܐܝܼܬ݂ ܠܢܲܗܝܼܪܵܐ ܥܲܡ ܚܸܫܘܿܟ݂ܵܐ. 15 ܐܵܘ ܐܲܝܕ݂ܵܐ ܫܲܠܡܘܼܬ݂ܵܐ ܐܝܼܬ݂ ܠܲܡܫܝܼܚܵܐ ܥܲܡ ܣܵܛܵܢܵܐ. ܐܵܘ ܐܲܝܕ݂ܵܐ ܡܢܵܬ݂ܵܐ ܐܝܼܬ݂ ܠܕ݂ܲܡܗܲܝܡܸܢ ܥܲܡ ܕܠܵܐ ܡܗܲܝܡܸܢ. 16 ܐܲܝܕ݂ܵܐ ܕܹܝܢ ܐܵܘܝܘܼܬ݂ܵܐ ܐܝܼܬ݂ ܠܗܲܝܟܠܹܗ ܕܐܲܠܵܗܵܐ ܥܲܡ ܕܫܹܐܕܹ̈ܐ. ܐܲܢ̄ܬܿܘܿܢ ܕܹܝܢ ܗܲܝܟܠܹܗ ܐܲܢ̄ܬܿܘܿܢ ܕܐܲܠܵܗܵܐ ܚܲܝܵܐ. ܐܲܝܟܲܢܵܐ ܕܐܲܡܝܼܪ. ܕܐܸܥܡܲܪ ܒܗܘܿܢ. ܘܐܹܗܲܠܸܟ݂ ܒܗܘܿܢ. ܘܐܸܗܘܹܐ ܐܲܠܵܗܗܘܿܢ. ܘܗܸܢܘܿܢ ܢܸܗܘܘܿܢ ܠܝܼ ܥܲܡܵܐ. 17 ܡܛܠ ܗܵܢܵܐ ܦܘܿܩܘ ܡܸܢ ܒܲܝܢܵܬ݂ܗܘܿܢ. ܘܐܸܬ݂ܦܲܪܫܘ ܡܸܢܗܘܿܢ. ܐܵܡܲܪ ܡܵܪܝܵܐ. ܘܲܠܛܲܡܹ̈ܐܐ ܠܵܐ ܬܸܬ݂ܩܲܪܒ݂ܘܼܢ. ܘܐܸܢܵܐ ܐܹܩܲܒܸܠܟ݂ܘܿܢ. 18 ܘܐܸܗܘܹܐ ܠܟ݂ܘܿܢ ܠܐܲܒ݂ܵܐ. ܘܐܲܢ̄ܬܿܘܿܢ ܬܸܗܘܘܿܢ ܠܝܼ ܠܲܒ̣̈ܢܲܝܵܐ ܘܠܲܒ݂̈ܢܵܬ݂ܵܐ: ܐܵܡܲܪ ܡܵܪܝܵܐ ܕܟ̣ܠ ܐܲܚܝܼܕ݂.
ܩܦܠܐܘܢ ܙ
1 ܡܛܠ ܕܐܝܼܬ݂ ܠܲܢ ܗܵܟܹܝܠ ܗܵܠܹܝܢ ܡܘܼܠܟܵܢܹ̈ܐ ܚܲܒܝܼܒܲܝ̈. ܢܕ݂ܲܟܹܐ ܢܲܦ̮ܫܲܢ ܡܸܢ ܟܠܵܗܿ ܛܲܡܐܘܼܬ݂ܵܐ ܕܒܸܣܪܵܐ ܘܲܕ݂ܪܘܼܚܵܐ. ܘܢܸܦܠܘܿܚ ܩܲܕܝܼܫܘܼܬ݂ܵܐ ܒܕܸܚܠܬ݂ܵܐ ܕܐܲܠܵܗܵܐ. 2 ܣܲܝܒܪܘܼܢ ܐܲܚܲܝ̈ܢ. ܒܐ̄ܢܵܫ ܠܵܐ ܐܲܥܘܸܠܢ ܠܐ̄ܢܵܫ ܠܵܐ ܚܲܒܸܠܢ. ܠܐ̄ܢܵܫ ܠܵܐ ܥܠܲܒ݂ܢ. 3 ܠܵܐ ܗ̄ܘܵܐ ܠܲܡܚܲܝܵܒ݂ܘܼܬ݂ܟ݂ܘܿܢ ܐܵܡܲܪ ܐ̄ܢܵܐ. ܩܲܕܡܹܬ݂ ܓܹܝܪ ܐܸܡܪܹܬ݂. ܕܲܒ݂ܠܸܒܲܢ ܐܲܢ̄ܬܿܘܿܢ ܠܲܡܡܵܬ݂ ܐܲܟ݂ܚܕ݂ܵܐ. ܘܲܠܡܸܚܵܐ. 4 ܦܵܪܹܗܣܝܼܵܐ ܣܲܓܝܼܐܬ݂ܵܐ ܐܝܼܬ݂ ܠܝܼ ܠܘܵܬ݂ܟ݂ܘܿܢ. ܘܣܲܓܝܼ ܐܝܼܬ݂ ܠܝܼ ܒܟ݂ܘܿܢ ܫܘܼܒ݂ܗܵܪܵܐ. ܘܲܡܠܹܐ ܐ̄ܢܵܐ ܒܘܼܝܵܐܵܐ. ܘܣܘܿܓ݂ܵܐܐ ܡܸܬ݂ܝܲܬܿܪܵܐ ܒܝܼ ܚܲܕ݂ܘܼܬ݂ܵܐ ܒܟ݂ܠܗܘܿܢ ܐܘܼܠܨܵܢܲܝ̈. 5 ܐܵܦ ܡܸܢ ܕܐܸܬܲܝܢ ܓܹܝܪ ܠܡܵܩܹܕܘܿܢܝܼܵܐ. ܐܵܦܠܵܐ ܚܲܕ݂ ܢܝܵܚ ܗܘܵܐ ܠܦܲܓ݂ܪܲܢ. ܐܸܠܵܐ ܒܟ݂ܠ ܡܸܕܸܡ ܐܸܬ݂ܐܠܸܨܢ. ܡܸܢ ܠܒܲܪ ܩܪܵܒ݂ܵܐ. ܘܡܸܢ ܠܓ݂ܵܘ ܕܸܚܠܬ݂ܵܐ. 6 ܐܸܠܵܐ ܐܲܠܵܗܵܐ. ܗܵܘ ܕܲܡܒܲܝܲܐ ܠܡܲܟܝܼܟܹ̈ܐ. ܒܲܝܲܐܢ ܒܡܹܐܬ݂ܝܼܬܹܗ ܕܛܸܛܘܿܣ. 7 ܘܠܵܐ ܒܲܠܚܘܿܕ݂ ܒܡܹܐܬ݂ܝܼܬܹܗ. ܐܸܠܵܐ ܐܵܦ ܒܲܢܝܵܚܹܗ ܗܵܘ ܕܐܸܬ̇ܬ̇ܢܝܼܚ ܒܟ݂ܘܿܢ. ܣܲܒܪܲܢ ܓܹܝܪ ܥܲܠ ܚܘܼܒܟ݂ܘܿܢ ܕܲܠܘܵܬܲܢ. ܘܥܲܠ ܐܸܒ݂ܠܟ݂ܘܿܢ ܘܲܛܢܵܢܟ݂ܘܿܢ ܕܥܲܠ ܐܲܦܲܝ̈ܢ. ܘܟܲܕ݂ ܫܸܡܥܹܬ݂. ܚܲܕ݂ܘܼܬ݂ܵܐ ܣܲܓܝܼܐܬ݂ܵܐ ܗܘܸܵܬ݂ ܠܝܼ. 8 ܕܐܵܦܸܢ ܐܲܟ݂ܪܝܼܬ݂ ܠܟ݂ܘܿܢ ܒܐܸܓܲܪܬܵܐ. ܠܵܐ ܬܵܘܝܵܐ ܠܝܼ ܢܲܦ̮ܫܝ. ܐܵܦܸܢ ܬܵܘܝܵܐ ܗ̄ܘܵܬ݂. ܚܵܙܹܐ ܐ̄ܢܵܐ ܓܹܝܪ ܕܗܝܼ ܐܸܓܲܪܬܵܐ. ܐܵܦܸܢ ܕܫܵܥܬ݂ܵܐ ܐܲܟ݂ܪܝܲܬ݂ ܠܟ݂ܘܿܢ. 9 ܐܸܠܵܐ ܚܲܕ݂ܘܼܬ݂ܵܐ ܣܲܓܝܼܐܬ݂ܵܐ ܥܸܒ݂ܕܲܬ݂ ܠܝܼ. ܠܵܐ ܥܲܠ ܕܟܸܪܝܲܬ݂ ܠܟ݂ܘܿܢ. ܐܸܠܵܐ ܡܛܠ ܕܟܲܪܝܘܼܬ݂ܟ݂ܘܿܢ ܠܲܬ݂ܝܵܒ݂ܘܼܬ݂ܵܐ ܐܲܝܬܿܝܲܬ݂ܟ݂ܘܿܢ. ܟܸܪܝܲܬ݂ ܠܟ݂ܘܿܢ ܓܹܝܪ ܒܕܲܐܠܵܗܵܐ. ܐܲܝܟܲܢܵܐ ܕܲܒ݂ܡܸܕܸܡ ܠܵܐ ܬܸܚܣܪܘܼܢ ܡܸܢܲܢ. 10 ܟܲܪܝܘܼܬ݂ܵܐ ܓܹܝܪ ܕܡܛܠ ܐܲܠܵܗܵܐ. ܬܘܵܬ݂ ܢܲܦ̮ܫܵܐ ܥܵܒ݂ܕܵܐ ܕܠܵܐ ܗܵܦܟܵܐ. ܘܡܲܦܢܝܵܐ ܠܚܲܝܹ̈ܐ. ܟܲܪܝܘܼܬ݂ܵܐ ܕܹܝܢ ܕܥܵܠܡܵܐ ܡܵܘܬܵܐ ܗܘܼ ܥܵܒ݂ܕܵܐ. 11 ܗܵܐ ܓܹܝܪ ܗܝܼ ܗܵܕܹܐ ܕܐܬ݁ܬ݁ܥܝܼܩܬܿܘܿܢ ܡܛܠ ܐܲܠܵܗܵܐ. ܟܡܵܐ ܐܲܥܒܕ݂ܲܬ݂ ܒܟ݂ܘܿܢ ܚܦܝܼܛܘܼܬ݂ܵܐ. ܘܡܲܦܲܩ ܒܪܘܼܚܵܐ. ܘܪܘܼܓ݂ܙܵܐ. ܘܕܸܚܠܬ݂ܵܐ. ܘܚܘܼܒܵܐ. ܘܲܛܢܵܢܵܐ. ܘܲܬ݂ܒܲܥܬ݂ܵܐ. ܘܲܒ݂ܟ݂ܠܡܸܕܸܡ ܚܵܘܝܼܬܿܘܿܢ ܢܲܦ̮ܫܟ݂ܘܿܢ. ܕܲܕ݂ܟܹܝܢ ܐ̄ܢܬܘܿܢ ܒܵܗܿ ܒܲܨܒ݂ܘܼܬ݂ܵܐ. 12 ܬܸܗܘܹܐ ܕܹܝܢ ܗܵܕܹܐ ܕܟܸܬ݂ܒܹܬ݂ ܠܟ݂ܘܿܢ. ܕܠܵܐ ܗ̄ܘܵܐ ܡܛܠ ܡܲܣܟܠܵܢܵܐ. ܐܵܦ ܠܵܐ ܡܛܠ ܗܵܘ ܡܲܢ ܕܡܲܣܟܲܠ ܒܹܗ. ܐܸܠܵܐ ܡܛܠ ܕܬܸܬ݂ܝܼܕ݂ܲܥ ܩܕ݂ܵܡ ܐܲܠܵܗܵܐ ܚܦܝܼܛܘܼܬ݂ܟ݂ܘܿܢ ܕܡܛܠܵܬܲܢ (ܡܛܠܵܬܲܢ). 13 ܡܛܠ ܗܵܢܵܐ ܐܸܬ݂ܒܲܝܲܐܢ. ܘܥܲܡ ܒܘܼܝܵܐܲܢ ܝܲܬܝܼܪܵܐܝܼܬ݂ ܚܕ݂ܝܼܢ ܒܚܲܕ݂ܘܼܬܹܗ ܕܛܸܛܘܿܣ. ܕܐܸܬ̇ܬ̇ܢܝܼܚܲܬ݂ ܪܘܼܚܹܗ ܥܲܡ ܟܠܟ݂ܘܿܢ. 14 ܕܲܒ݂ܡܸܕܸܡ ܕܐܸܫܬܲܒ݂ܗܪܹܬ݂ ܠܹܗ ܥܲܠ ܐܲܦܲܝ̈ܟܿܘܿܢ. ܠܵܐ ܒܹܗܬܹܿܬ݂. ܐܸܠܵܐ ܐܲܝܟ݂ ܕܟ݂ܠ ܡܸܕܸܡ (ܕܒ݂ܟ݂ܠܡܸܕܸܡ) ܩܘܼܫܬܵܐ ܡܲܠܸܠܢ ܥܲܡܟ݂ܘܿܢ. ܗܵܟܲܢܵܐ ܐܵܦ ܫܘܼܒ݂ܗܵܪܲܢ ܕܲܠܘܵܬ݂ ܛܸܛܘܿܣ ܒܩܘܼܫܬܵܐ ܐܸܫܬܿܟܲܚ. 15 ܐܵܦ (ܘܐܵܦ) ܪ̈ܲܚܡܵܘܗܝ ܝܲܬܝܼܪܵܐܝܼܬ݂ ܣܓ݂ܝܼܘ ܥܠܲܝܟܿܘܿܢ. ܟܲܕ݂ ܡܸܬܿܕܟܲܪ ܡܸܫܬܲܡܥܵܢܘܼܬ݂ܵܐ ܕܟ݂ܠܟ݂ܘܼܢ. ܕܲܒ݂ܕܸܚܠܬ݂ܵܐ ܘܒܲܪܬܹܝܬ݂ܵܐ ܩܲܒܸܠܬܿܘܿܢܵܝܗܝ. 16 ܚܵܕܹܐ ܐ̄ܢܵܐ ܕܲܒ̣ܟ̣ܠܡܸܕܸܡ ܬܿܟ݂ܝܼܠ ܐ̄ܢܵܐ ܥܠܲܝܟܿܘܿܢ.
ܩܦܠܐܘܢ ܚ
1 ܡܵܘܕܥܝܼܢ ܚ̄ܢܲܢ ܠܟ݂ܘܿܢ ܕܹܝܢ ܐܲܚܲܝ̈ܢ. ܛܲܝܒܘܼܬܹܗ ܕܐܲܠܵܗܵܐ ܕܐܸܬ݂ܝܲܗܒܲܬ݂ ܒܥܹܕܬܵܐ ܕܡܵܩܹܕܘܿܢܵܝܹ̈ܐ. 2 ܕܲܒ݂ܒ݂ܘܩܝܵܐ ܣܲܓܿܝܼܐܵܐ ܕܐܘܼܠܨܵܢܗܘܿܢ. ܝܲܬܝܼܪܘܬ݂ܵܐ ܗܘܸܵܬ݂ ܠܚܲܕ݂ܘܲܬ݂ܗܘܿܢ. ܘܥܘܼܡܩܵܐ ܕܡܸܣܟܹܢܘܼܬ݂ܗܘܿܢ ܐܸܬ݂ܝܲܬܲܪ ܒܥܘܼܬ݂ܪܵܐ ܕܲܦܫܝܼܛܘܼܬ݂ܗܘܿܢ. 3 ܣܵܗܹܕ݂ ܐ̄ܢܵܐ ܓܹܝܪ ܕܐܲܝܟ݂ ܚܲܝܠܗܘܿܢ ܘܝܲܬܿܝܼܪ ܡܸܢ ܚܲܝܠܗܘܿܢ. ܒܨܸܒ݂ܝܵܢ ܢܲܦ̮ܫܗܘܿܢ 4 ܒܥܵܘ ܡܸܢܲܢ ܒܒ݂ܵܥܘܼܬ݂ܵܐ ܣܲܓܝܼܐܬ݂ܵܐ. ܕܢܸܫܬܵܘܬܿܦܘܼܢ ܒܛܲܝܒܘܼܬ݂ܵܐ ܕܬܸܫܡܸܫܬܵܐ ܕܩܲܕܝܼܫܹ̈ܐ. 5 ܘܠܵܐ ܐܲܝܟ݂ ܡܵܐ ܕܣܵܒ݂ܪܝܼܢ ܗ̄ܘܲܝܢ. ܐܸܠܵܐ ܢܲܦ̮ܫܗܘܿܢ ܐܲܫܠܸܡܘ ܠܘܼܩܕ݂ܲܡ ܠܡܵܪܲܢ. ܘܐܵܦ ܠܲܢ ܒܨܸܒ݂ܝܵܢܹܗ ܕܐܲܠܵܗܵܐ. 6 ܕܲܚܢܲܢ ܢܸܒ݂ܥܹܐ ܡܸܢ ܛܸܛܘܿܣ. ܕܐܲܝܟ݂ ܕܫܲܪܝܼ. ܗܵܟܲܢܵܐ ܢܫܲܠܸܡ ܒܟ݂ܘܿܢ ܐܵܦ ܛܲܝܒܘܼܬ݂ܵܐ ܗܵܕܹܐ. 7 ܐܸܠܵܐ ܐܲܝܟܲܢܵܐ ܕܲܒ݂ܟ݂ܠܡܸܕܸܡ ܡܸܬ݂ܝܲܬܿܪܝܼܢ ܐ̄ܢܬܘܿܢ ܒܗܲܝܡܵܢܘܼܬ݂ܵܐ ܘܲܒ݂ܡܸܠܬ݂ܵܐ. ܘܒ݂ܝܼܕ݂ܲܥܬ݂ܵܐ. ܘܲܒܟ݂ܠ ܚܦܝܼܛܘܼ. ܘܲܒ݂ܚܘܼܒܲܢ ܕܲܠܘܵܬ݂ܟ݂ܘܿܢ. ܗܵܟܲܢܵܐ ܐܵܦ ܒܗܵܕܹܐ ܛܲܝܒܘܼܬ݂ܵܐ ܬܸܬ݂ܝܲܬܿܪܘܼܢ. 8 ܠܵܐ ܗ̄ܘܵܐ ܡܸܦܩܲܕ݂ ܦܵܩܹܕ݂ ܐ̄ܢܵܐ ܠܟ݂ܘܿܢ. ܐܸܠܵܐ ܒܲܚܦܝܼܛܘܼܬ݂ܵܐ ܕܚܲܒ݂ܪ̈ܲܝܟ݁ܘܿܢ. ܫܪܵܪܵܐ ܕܚܘܼܒܟ݂ܘܿܢ ܡܢܲܣܹܐ ܐ̄ܢܵܐ. 9 ܝܵܕ݂ܥܝܼܢ ܐ̄ܢܬܘܿܢ ܓܹܝܪ ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܕܡܛܠܵܬ݂ܟ݂ܘܿܢ ܐܸܬ݂ܡܲܣܟܲܢ ܟܲܕ݂ ܐܝܼܬ݂ܵܘܗܝ ܥܲܬܿܝܼܪܵܐ. ܕܐܲܢ̄ܬܿܘܿܢ ܒܡܸܣܟܹܢܘܼܬܹܗ ܬܸܥܬܿܪܘܼܢ. 10 ܡܸܡܠܲܟ݂ ܕܹܝܢ ܡܵܠܹܟ݂ ܐ̄ܢܵܐ ܠܟ݂ܘܿܢ ܗܵܕܹܐ ܕܲܡܥܲܕܪܵܐ ܠܟ݂ܘܿܢ. ܡܛܠ ܕܡܸܢ ܐܸܫܬܿܩܲܕ݂ܝ ܫܲܪܝܼܬܿܘܿܢ. ܠܵܘ ܠܡܸܨܒܵܐ ܒܲܠܚܘܿܕ݂. ܐܸܠܵܐ ܐܵܦ ܠܡܸܥܒܲܕ݂. 11 ܗܵܫܵܐ ܕܹܝܢ ܫܲܠܸܡܘ ܒܲܥܒ݂ܵܕ݂ܵܐ ܗܵܘ ܡܸܕܸܡ ܕܲܨܒܲܝܬܿܘܢ. ܕܐܲܝܟܲܢܵܐ ܕܲܗܘܵܐ ܠܟ݂ܘܿܢ ܣܘܼܘܵܚܵܐ ܠܡܸܨܒܵܐ. ܗܵܟܲܢܵܐ ܒܲܥܒ݂ܵܕ݂ܵܐ ܬܿܫܲܠܡܘܼܢ ܡܸܢ ܡܵܐ ܕܐܝܼܬ݂ ܠܟ݂ܘܿܢ. 12 ܐܸܢ ܓܹܝܪ ܨܸܒ݂ܝܵܢܵܐ ܐܝܼܬ݂ܵܘܗܝ. ܐܲܝܟ݂ ܡܵܐ ܕܐܝܼܬ݂ ܠܹܗ. ܗܵܟ݂ܘܵܬ݂ ܡܸܬ݂ܩܲܒܲܠ. ܠܵܐ ܗ̄ܘܵܐ ܐܲܝܟ݂ ܡܵܐ ܕܠܲܝܬܿ ܠܹܗ. 13 ܠܵܐ ܗ̄ܘܵܐ ܓܹܝܪ ܕܠܲܐ̄ܚܪ̈ܵܢܹܐ ܬܸܗܘܹܐ ܪܘܵܚܬܵܐ ܘܲܠܟ݂ܘܿܢ ܐܘܼܠܨܵܢܵܐ. 14 ܐܸܠܵܐ ܒܫܵܘܝܘܼܬ݂ܵܐ ܗܘܵܘ ܒܙܲܒ݂ܢܵܐ ܗܵܢܵܐ. ܕܝܲܬܝܼܪܘܼܬ݂ܟ݂ܘܿܢ ܕܝܼܠܟ݂ܘܿܢ ܬܸܗܘܹܐ ܠܚܲܣܝܼܪܘܼܬ݂ܗܘܿܢ ܕܗܵܠܹܝܢ. ܕܐܵܦ ܝܲܬܝܼܪܘܼܬ݂ܗܘܿܢ ܕܗܵܢܘܿܢ ܬܸܗܘܹܐ ܠܚܲܣܝܼܪܘܼܬ݂ܟ݂ܘܿܢ ܕܝܼܠܟ݂ܘܿܢ. ܕܬܸܗܘܹܐ ܫܵܘܝܘܼܬ݂ܵܐ. 15 ܐܲܝܟ݂ ܕܲܟ̣ܬ݂ܝܼܒ݂. ܕܗܵܘ ܕܐܲܣܓ݁ܝܼ ܫܩܲܠ. ܠܵܐ ܐܸܬ݂ܝܲܬܲܪ ܠܹܗ. ܘܗܵܘ ܕܩܲܠܝܼܠ ܫܩܲܠ. ܠܵܐ ܐܸܬ݂ܒܲܨܲܪ ܠܹܗ. 16 ܛܲܝܒܘܼ ܕܹܝܢ ܠܐܲܠܵܗܵܐ ܕܝܲܗܒܵܗܿ ܚܦܝܼܛܘܼܬ݂ܵܐ ܗܵܕܹܐ ܚܠܵܦܲܝܟܿܘܿܢ ܒܠܸܒܹܗ ܕܛܸܛܘܿܣ. 17 ܒܵܥܘܼܬܲܢ ܓܹܝܪ ܩܲܒܸܠ. ܘܡܛܠ ܕܛܵܒ݂ ܒܛܝܼܠ ܠܹܗ. ܡܸܢ ܨܸܒ݂ܝܵܢܹܗ ܢܦܲܩ ܨܸܐܕ݂ܲܝܟ݁ܘܿܢ. 18 ܫܲܕܲܪܢ ܕܹܝܢ ܥܲܡܹܗ ܠܐܲܚܘܼܢ. ܐܲܝܢܵܐ ܕܬܸܫܒܘܼܚܬܹ݁ܗ ܒܐܹܘܲܢܓܲܠܝܼܘܿܢ. ܒܟܠܗܹܝܢ ܥܹ̈ܕܵܬܵܐ. 19 ܗܵܟܲܢܵܐ ܕܐܵܦ ܡܸܓ݂ܒܵܐ ܓܒܹܐ ܡܸܢ ܥܹܕܬܵܐ: ܕܢܸܦܘܿܩ ܥܲܡܲܢ ܒܛܲܝܒܘܼܬ݂ܵܐ (ܛܲܝܒܘܼܬ݂ܵܐ) ܗܵܕܹܐ ܕܡܸܫܬܲܡܫܵܐ ܡܸܢܲܢ. ܠܫܘܼܒ݂ܚܹܗ ܕܝܼܠܹܗ ܕܐܲܠܵܗܵܐ. ܘܲܠܠܘܼܒܵܒܲܢ ܕܝܼܠܲܢ. 20 ܩܲܢܝܼܛܝܼܢ ܚ̄ܢܲܢ ܕܹܝܢ ܒܗܵܕܹܐ. ܕܠܵܐ ܐ̄ܢܵܫ ܢܣܝܼܡ ܒܲܢ ܡܘܼܡܵܐ ܒܗܵܕܹܐ ܪܲܒܘܼܬ݂ܵܐ. ܕܡܸܫܬܲܡܫܵܐ ܡܸܢܲܢ. 21 ܝܲܨܝܼܦܝܼܢ ܚ̄ܢܲܢ ܓܹܝܪ ܕܫܲܦܝܼܪ̈ܵܬ݂ܵܐ. ܠܵܐ ܩܕ݂ܵܡ ܐܲܠܵܗܵܐ ܒܲܠܚܘܿܕ݂. ܐܸܠܵܐ ܐܵܦ ܩܕ݂ܵܡ ܒܢܲܝ̈ܢܵܫܵܐ. 22 ܫܲܕܲܪܢ ܕܹܝܢ ܥܲܡܗܘܿܢ ܐܵܦ ܠܐܲܚܘܼܢ. ܐܲܝܢܵܐ ܕܠܲܢ ܒܩܹܐ ܒܟ݂ܠܙܒܲܢ ܒܣܲܓܝܼ̈ܐܵܬ݂ܵܐ. ܕܲܚܦܝܼܛܵܐ ܗܘܼ. ܗܵܫܵܐ ܕܹܝܢ ܝܲܬܝܼܪܵܐܝܼܬ݂ ܚܦܝܼܛ ܒܬ݂ܘܼܟ݂ܠܵܢܵܐ ܣܲܓܿܝܼܐܵܐ ܕܲܥܠܲܝܟܿܘܿܢ. 23 ܐܸܢ ܗܵܟܹܝܠ ܛܸܛܘܿܣ. ܫܵܘܬܵܦܵܐ ܗܘܼ ܕܝܼܠܝ ܘܲܡܥܲܕܪܵܢܵܐ ܒܟ݂ܘܿܢ. ܘܐܸܢ ܐܲܚܲܝ̈ܢ ܐ̄ܚܪ̈ܵܢܹܐ. ܫܠܝܼܚܹ̈ܐ ܐܸܢܘܿܢ ܕܥܹܕܬܵܐ ܕܫܘܼܒ݂ܚܹܗ ܕܲܡܫܝܼܚܵܐ. 24 ܡܸܟܹܝܠ ܬܲܚܘܝܼܬ݂ܵܐ ܕܚܘܼܒܟ݂ܘܿܢ ܘܫܘܼܒ݂ܗܵܪܲܢ ܕܲܒ݂ܟ݂ܘܿܢ. ܒܗܘܿܢ ܚܵܘܘ ܒܦܲܪܨܘܿܦ ܥܹ̈ܕܵܬܵܐ ܟܠܗܹܝܢ.
ܩܦܠܐܘܢ ܛ
1 ܥܲܠ ܬܸܫܡܸܫܬܵܐ ܕܹܝܢ ܕܩܲܕܝܼܫܹ̈ܐ. ܝܲܬܝܼܪܬܵܐ ܥܵܒܹܿܕ݂ ܐ̄ܢܵܐ. ܐܸܢ ܟܵܬܹܒ݂ ܐ̄ܢܵܐ ܠܟ݂ܘܿܢ. 2 ܝܵܕ݂ܲܥ ܐ̄ܢܵܐ ܓܹܝܪ ܛܘܼܝܵܒܹܗ ܕܪܸܥܝܵܢܟ݂ܘܿܢ. ܘܡܛܠ ܗܵܢܵܐ ܐܸܫܬܲܒ݂ܗܪܹܬ݂ ܒܟ݂ܘܿܢ ܠܡܵܩܹܕܘܿܢܵܝܹ̈ܐ. ܕܐܵܟ݂ܵܐܝܼܵܐ ܥܬ݂ܝܼܕ݂ܵܐ ܗܝܼ ܡܸܢ ܐܸܫܬܿܩܲܕ݂ܝ. ܘܲܛܢܵܢܵܐ ܕܝܼܠܟ݂ܘܿܢ ܠܣܲܓܝܼ̈ܐܹܐ ܓܲܪܸܓ݂. 3 ܫܲܕܪܹܬ݂ ܕܹܝܢ ܠܐܲܚܹ̈ܐ. ܕܠܵܐ ܢܸܣܬܲܪܲܩ ܫܘܼܒ݂ܗܵܪܲܢ. ܕܐܸܫܬܲܒ݂ܗܲܪܢ ܒܟ݂ܘܿܢ ܥܲܠ ܗܵܕܹܐ ܨܒ݂ܘܼܬ݂ܵܐ. ܕܐܲܝܟܲܢܵܐ ܕܐܸܡܪܹܬ݂. ܬܸܗܘܘܿܢ ܡܛܲܝܒ݂ܝܼܢ. 4 ܕܲܠܡܵܐ ܢܹܐܬ݂ܘܿܢ ܥܲܡܝ ܡܵܩܹܕܘܿܢܵܝܹ̈ܐ: ܘܢܸܫܟܚܘܼܢܵܟ݂ܘܿܢ ܟܲܕ݂ ܠܵܐ ܥܬ݂ܝܼܕ݂ܝܼܢ ܐܢ̄ܬܘܿܢ. ܘܢܸܒ݂ܗܲܬ݂ ܚܢܲܢ. ܕܠܵܐ ܢܹܐܡܲܪ ܕܐܲܢ̄ܬܿܘܿܢ ܬܸܒ݂ܗܬ݂ܘܼܢ. ܒܫܘܼܒ݂ܗܵܪܵܐ ܗܵܘ ܕܐܸܫܬܲܒ݂ܗܲܪܢ. 5 ܡܛܠ ܗܵܢܵܐ ܐܸܬ݂ܒܛܸܠ ܠܝܼ ܕܐܸܒ݂ܥܹܐ ܡܸܢ ܐܲܚܲܝ̈ ܗܵܠܹܝܢ. ܕܢܹܐܬ݂ܘܿܢ ܩܕ݂ܵܡܲܝ ܠܘܵܬ݂ܟ݂ܘܿܢ. ܘܲܢܥܲܬܿܕ݂ܘܼܢ ܒܘܼܪܟܬ݂ܵܐ ܗܵܝ ܕܡܸܢ ܩܕ݂ܝܼܡ ܐܸܫܬܿܡܲܥܬܿܘܿܢ. ܕܬܸܗܘܹܐ ܡܛܲܝܒ݂ܵܐ. ܗܵܟܲܢܵܐ ܐܲܝܟ݂ ܒܘܼܪܟܬ݂ܵܐ. ܠܵܐ ܗ̄ܘܵܐ ܐܲܝܟ݂ ܝܲܥܢܘܼܬ݂ܵܐ. 6 ܗܵܕܹܐ ܕܹܝܢ ܡܲܢ ܕܙܵܪܲܥ ܒܚܵܘܣܵܢܵܐ. ܐܵܦ ܒܚܵܘܣܵܢܵܐ ܚܵܨܹܕ݂. ܘܡܲܢ ܕܙܵܪܲܥ ܒܒ݂ܘܪܟܬ݂ܵܐ. ܒܒ݂ܘܪܟܬ݂ܵܐ ܢܸܚܨܘܿܕ݂. 7 ܟܠܢܵܫ ܐܲܝܟ݂ ܕܐܝܼܬ݂ ܒܪܸܥܝܵܢܹܗ. ܠܵܐ ܐܲܝܟ݂ ܕܡܸܢ ܟܲܪܝܘܼܬ݂ܵܐ ܐܵܘ ܐܲܝܟ݂ ܕܡܸܢ ܩܛܝܼܪܵܐ. ܠܝܵܗܘܿܒ݂ܵܐ ܗܘܼ ܓܹܝܪ ܚܲܕܵܝܵܐ ܪܵܚܹܡ ܐܲܠܵܗܵܐ. 8 ܡܵܛܝܵܐ ܗܝܼ ܕܹܝܢ ܒܐܝܼܕ݂ܲܝ̈ ܐܲܠܵܗܵܐ. ܟܠ ܛܲܝܒܘܼ ܕܲܢܝܲܬܲܪ ܒܟ݂ܘܿܢ. ܕܲܒܟ݂ܠܙܒܲܢ ܒܟ݂ܠ ܡܸܕܸܡ ܗܵܘ ܡܵܐ ܕܣܵܦܹܩ ܠܟ݂ܘܿܢ ܢܸܗܘܹܐ ܠܟ݂ܘܿܢ. ܘܬܸܬ݂ܝܲܬܿܪܘܼܢ ܒܟ݂ܠ ܥܒ݂ܵܕ݂ ܛܵܒ݂. 9 ܐܲܝܟ݂ ܕܲܟܬ݂ܝܼܒ݂. ܕܒܲܕܲܪ ܘܝܲܗ̄ܒ݂ ܠܡܸܣܟܹܢܹ̈ܐ. ܘܙܲܕܝܼܩܘܼܬܹܗ ܩܲܝܵܡܵܐ ܠܥܵܠܲܡ. 10 ܗܵܘ ܕܹܝܢ ܕܝܵܗܹܒ݂ ܙܲܪܥܵܐ ܠܙܵܪܘܿܥܵܐ ܘܠܲܚܡܵܐ ܠܡܹܐܟ݂ܘܼܠܬܵܐ. ܗܘܼ ܢܸܬܸܿܠ ܘܢܲܣܓܹ݁ܐ ܙܲܪܥܟ݂ܘܿܢ. ܘܲܢܪܲܒܐ ܦܹܐܪܹ̈ܐ ܕܙܲܕܝܼܩܘܼܬ݂ܟ݂ܘܿܢ. 11 ܕܲܒܟ݂ܠ ܡܸܕܸܡ ܬܸܥܬܿܪܘܼܢ ܒܟ݂ܠܵܗܿ ܦܫܝܼܛܘܼܬ݂ܵܐ. ܕܗܝܼ ܓܵܡܪܵܐ ܒܐܝܼܕ݂ܲܢ ܬܵܘܕܝܼܬ݂ܵܐ ܠܐܲܠܵܗܵܐ. 12 ܡܛܠ ܕܦܘܼܠܚܵܢܵܐ ܕܬܸܫܡܸܫܬܵܐ ܗܵܕܹܐ. ܠܵܐ ܗ̄ܘܵܐ ܒܲܠܚܘܿܕ݂ ܚܲܣܝܼܪܘܼܬ݂ܵܐ ܕܩܲܕܝܼܫܹ̈ܐ ܡܡܲܠܹܐ. ܐܸܠܵܐ ܐܵܦ ܡܝܲܬܲܪ ܒܬ݂ܵܘܕ̈ܝܵܬ݂ܵܐ ܣܲܓܝܼ̈ܐܵܬ݂ܵܐ ܠܐܲܠܵܗܵܐ. 13 ܡܛܠ ܒܘܼܩܝܵܐ ܓܹܝܪ ܕܬܸܫܡܸܫܬܵܐ ܗܵܕܹܐ ܠܐܲܠܵܗܵܐ ܡܫܲܒܚܝܼܢ. ܕܐܸܫܬܲܥܒܲܕܬܿܘܿܢ ܠܬ݂ܵܘܕܝܼܬ݂ܵܐ ܕܲܣܒܲܪܬܹܗ ܕܲܡܫܝܼܚܵܐ. ܘܐܸܫܬܵܘܬܲܦܬܿܘܿܢ ܒܲܦܫܝܼܛܘܼܬ݂ܟ݂ܘܿܢ ܥܲܡܗܘܿܢ ܘܥܲܡ ܟܠܢܵܫ. 14 ܘܲܨܠܘܿܬ݂ܵܐ ܡܩܲܪܒ݂ܝܼܢ ܚܠܵܦܲܝܟܿܘܿܢ ܒܚܘܼܒܵܐ ܣܲܓܿܝܼܐܵܐ. ܡܛܠ ܣܘܿܓ݂ܵܐܐ ܕܛܲܝܒܘܼܬܹܗ ܕܐܲܠܵܗܵܐ ܕܲܥܠܲܝܟܿܘܿܢ. 15 ܛܲܝܒܘܼ ܕܹܝܢ ܠܐܲܠܵܗܵܐ ܥܲܠ ܡܵܘܗܲܒ݂ܬܹܗ ܕܠܵܐ ܡܸܬ݂ܡܲܠܠܵܐ.
ܩܦܠܐܘܢ ܝ
1 ܐܸܢܵܐ ܕܹܝܢ ܦܵܘܠܘܿܣ ܒܵܥܹܐ ܐ̄ܢܵܐ ܡܸܢܟ݂ܘܿܢ. ܒܢܝܼܚܘܼܬܹܗ ܘܲܒ݂ܡܲܟܝܼܟ̣ܘܼܬܹܗ ܕܲܡܫܝܼܚܵܐ. ܕܐܵܦܸܢ ܒܐܲܦܝܼ̈ܢ ܡܲܟܝܼܟ݂ ܐ̄ܢܵܐ ܠܘܵܬ݂ܟ݂ܘܿܢ. ܐܸܠܵܐ ܟܲܕ݂ ܪܲܚܝܼܩ ܐ̄ܢܵܐ ܬܿܟ݂ܝܼܠ ܐ̄ܢܵܐ ܥܠܲܝܟܿܘܿܢ. 2 ܒܵܥܹܐ ܐ̄ܢܵܐ ܕܹܝܢ ܡܸܢܟ݂ܘܿܢ. ܕܠܵܐ ܡܵܐ ܕܐܸܬܹܝܬ݂. ܐܸܬ݂ܐܠܸܨ ܒܬ݂ܘܼܟ݂ܠܵܢܵܐ ܕܐܝܼܬ݂ ܠܝܼ. ܕܐܲܫܝܼܚ ܐܲܝܟ݂ ܕܡܸܬ݂ܪܲܥܹܐ ܐ̄ܢܵܐ. ܥܲܠ ܐ̄ܢܵܫܵܐ ܐܲܝܠܹܝܢ ܕܚܵܫܒܝܼܢ ܠܲܢ ܕܐܲܝܟ݂ ܕܒܲܒ݂ܣܲܪ ܡܗܲܠܟ݂ܝܼܢ ܚ̄ܢܲܢ. 3 ܐܵܦܸܢ ܒܲܒ݂ܣܲܪ ܓܹܝܪ ܡܗܲܠܟ݂ܝܼܢ ܚ̄ܢܲܢ. ܐܸܠܵܐ ܠܵܐ ܗ̄ܘܵܐ ܕܒܸܣܪܵܐ ܦܵܠܚܝܼܢ ܚ̄ܢܲܢ. 4 ܙܲܝܢܵܐ ܓܹܝܪ ܕܦܵܠܚܘܼܬܲܢ. ܠܵܐ ܗ̄ܘܵܐ ܕܒܸܣܪܵܐ. ܐܸܠܵܐ ܕܚܲܝܠܵܐ ܕܐܲܠܵܗܵܐ. ܘܒܹܗ ܟܵܒ݂ܫܝܼܢ ܚ̄ܢܲܢ ܚܸܣܢܹ̈ܐ ܡܪ̈ܝܼܕܹܐ. 5 ܘܣܵܬ݂ܪܝܼܢ ܚ̄ܢܲܢ ܡܲܚܫ̈ܒ݂ܵܬ݂ܵܐ. ܘܟ݂ܠ ܪܵܘܡܵܐ ܕܡܸܬ݁ܬ݁ܪܝܼܡ ܠܘܼܩܒܲܠ ܝܼܕ݂ܲܥܬܹܗ ܕܐܲܠܵܗܵܐ. ܘܫܵܒܹܝܢ ܚ̄ܢܲܢ ܟܠ ܬܲܪ̈ܥܝܵܢ ܠܡܲܫܡܲܥܬܹܗ ܕܲܡܫܝܼܚܵܐ. 6 ܘܲܡܛܲܝܒ݂ܝܼܢ ܚ̄ܢܲܢ ܠܡܸܥܒܲܕ݂ ܬܿܒܲܥܬ݂ܵܐ ܡܸܢ ܐܲܝܠܹܝܢ ܕܠܵܐ ܡܸܫܬܲܡܥܝܼܢ. ܡܵܐ ܕܐܸܬ݂ܡܲܠܝܲܬ݂ ܡܸܫܬܲܡܥܵܢܘܼܬ݂ܟ݂ܘܿܢ. 7 ܒܦܲܪ̈ܨܘܿܦܹܐ ܚܵܝܪܝܼܢ ܐܢ̄ܬܘܿܢ. ܐܸܢ ܐ̄ܢܵܫ ܬܿܟ݂ܝܼܠ ܥܲܠ ܢܲܦ̮ܫܹܗ. ܕܕ݂ܲܡܫܝܼܚܵܐ ܗܘܼ. ܗܵܢܵܐ ܢܸܕܲܥ ܡܸܢ ܢܲܦ̮ܫܹܗ. ܕܐܲܝܟ݂ ܕܗܘܼ ܕܲܡܫܝܼܚܵܐ. ܗܵܟܲܢܵܐ ܐܵܦ ܚܢܲܢ. 8 ܐܸܢ ܓܹܝܪ ܐܵܦ ܡܸܕܸܡ ܝܲܬܿܝܼܪ ܐܸܫܬܲܒ݂ܗܲܪ ܥܲܠ ܫܘܼܠܛܵܢܵܐ ܕܝܲܗ̄ܒ݂ ܠܝܼ ܡܵܪܲܢ. ܠܵܐ ܒܵܗܹܬ݂ ܐ̄ܢܵܐ. ܡܛܠ ܕܲܠܒܸܢܝܵܢܵܐ ܗܘܼ ܕܝܼܠܟ݂ܘܿܢ ܝܲܗ̄ܒ݂ ܠܲܢ. ܘܠܵܐ ܠܣܘܼܚܵܦܟ݂ܘܿܢ. 9 ܡܲܗܡܹܐ ܐ̄ܢܵܐ ܕܹܝܢ. ܕܠܵܐ ܐܸܣܬܿܒܲܪ ܐܲܝܟ݂ ܗܵܘ ܕܲܡܕܲܚܵܠܘ ܡܕܲܚܸܠ ܐ̄ܢܵܐ ܠܟ݂ܘܿܢ ܒܐܸܓ݁ܪ̈ܵܬ݂ܝ. 10 ܡܛܠ ܕܐܝܼܬ݂ ܐ̄ܢܵܫܵܐ ܕܐܵܡܪܝܼܢ. ܕܐܸܓ݁ܪ̈ܵܬ݂ܵܐ ܝܲܩܝܼܪ̈ܵܢ ܘܚܲܣܝܼ̈ܢܵܢ. ܡܹܐܬ݂ܝܹܗ ܕܹܝܢ ܕܓ݂ܘܼܫܡܵܐ ܟܪܝܼܗ. ܘܡܸܠܬܹܗ ܫܝܼܛܵܐ. 11 ܐܸܠܵܐ ܗܵܕܹܐ ܢܸܬ݂ܪܲܥܹܐ ܡܲܢ ܕܗܵܟܲܢܵܐ ܐܵܡܲܪ. ܕܐܲܝܟܲܢܵܐ ܕܐܝܼܬܲܝܢ ܒܡܸܠܬ݂ܵܐ ܕܐܸܓܲܪܬܲܢ ܟܲܕ݂ ܪܲܚܝܼܩܝܼܢ ܚ̄ܢܲܢ. ܗܵܟܲܢܵܐ ܐܝܼܬܲܝܢ ܐܵܦ ܡܵܐ ܕܩܲܪܝܼܒ݂ܝܼܢ ܚ̄ܢܲܢ ܒܲܥܒ݂ܵܕ݂ܵܐ. 12 ܠܵܐ ܓܹܝܪ ܡܲܡܪܚܝܼܢ ܚ̄ܢܲܢ ܕܢܸܚܫܘܼܒ݂ ܐܵܘ ܕܲܢܦܲܚܸܡ ܢܲܦ̮ܫܲܢ ܥܲܡ ܗܵܢܘܿܢ ܕܲܡܫܲܒ݂ܗܪܝܼܢ ܢܲܦ̮ܫܗܘܿܢ. ܐܸܠܵܐ ܡܛܠ ܕܗܸܢܘܿܢ ܒܗܘܿܢ ܠܗܘܿܢ ܡܦܲܚܡܝܼܢ. ܠܵܐ ܡܸܣܬܲܟܠܝܼܢ. 13 ܚܢܲܢ ܕܹܝܢ ܠܵܐ ܡܸܫܬܲܒ݂ܗܪܝܼܢ ܚ̄ܢܲܢ ܝܲܬܿܝܼܪ ܡܸܢ ܡܫܘܼܚܬܲܢ. ܐܸܠܵܐ ܒܲܡܫܘܼܚܬ݂ܵܐ ܕܲܬ݂ܚܘܼܡܵܐ ܕܲܦܠܲܓ݂ ܠܲܢ ܐܲܠܵܗܵܐ. ܕܢܸܡܛܹܐ ܐܵܦ ܥܕ݂ܲܡܵܐ ܠܘܵܬ݂ܟ݂ܘܿܢ. 14 ܠܵܐ ܗ̄ܘܵܐ ܓܹܝܪ ܐܲܝܟ݂ ܕܠܵܐ ܡܸܬ݂ܡܲܛܹܝܢ ܚ̄ܢܲܢ ܠܘܵܬ݂ܟ݂ܘܿܢ. ܡܵܬ݂ܚܝܼܢ ܚ̄ܢܲܢ ܢܲܦ̮ܫܲܢ. ܥܕ݂ܲܡܵܐ ܓܹܝܪ ܠܘܵܬ݂ܟ݂ܘܿܢ ܡܲܛܝܼܢ ܒܲܣܒܲܪܬܹܗ ܕܲܡܫܝܼܚܵܐ. 15 ܘܠܵܐ ܡܸܫܬܲܒ݂ܗܪܝܼܢ ܚ̄ܢܲܢ ܠܒܲܪ ܡܸܢ ܡܫܘܼܚܬܲܢ ܒܥܲܡܠܵܐ ܕܲܐ̄ܚܪ̈ܵܢܹܐ. ܐܸܠܵܐ ܐܝܼܬ݂ ܠܲܢ ܣܲܒ݂ܪܵܐ. ܕܟܲܕ݂ ܪܵܒ݂ܝܵܐ ܗܲܝܡܵܢܘܼܬ݂ܟ݂ܘܿܢ ܒܟ݂ܘܿܢ. ܢܸܬ݂ܪܵܘܪܲܒ݂ ܐܲܝܟ݂ ܡܫܘܼܚܬܲܢ. ܘܢܸܬ݂ܝܲܬܲܪ 16 ܐܵܦ ܠܗܲܠ ܡܸܢܟ݂ܘܿܢ ܠܲܡܣܲܒܵܪܘܼ. ܠܵܐ ܒܲܡܫܘܼܚܬ݂ܵܐ ܕܲܐ̄ܚܪ̈ܵܢܹܐ: ܒܐܲܝܠܹܝܢ ܕܡܲܬ݂ܩ̈ܢܵܢ ܢܸܫܬܲܒ݂ܗܲܪ. 17 ܗܵܘ ܕܹܝܢ ܕܡܸܫܬܲܒ݂ܗܲܪ. ܒܡܵܪܝܵܐ ܢܸܫܬܲܒ݂ܗܲܪ. 18 ܠܵܐ ܗ̄ܘܵܐ ܓܹܝܪ ܡܲܢ ܕܢܲܦ̮ܫܹܗ ܡܫܲܒܲܚ. ܗܵܘ ܗܘܼ ܒܩܹ̈ܐ. ܐܸܠܵܐ ܡܲܢ ܕܡܵܪܝܵܐ ܢܫܲܒܚܝܼܘܗܝ.
ܩܦܠܐܘܢ ܝܐ
1 ܐܸܫܬܿܘܿܦ ܕܹܝܢ ܡܣܲܝܒܪܝܼܢ ܗܘܲܝܬܿܘܿܢ ܠܝܼ ܩܲܠܝܼܠ. ܕܐܹܡܲܠܸܠ ܦܲܟܝܼܗܵܐܝܼܬ݂. ܐܸܠܵܐ ܐܵܦ ܡܣܲܝܒܪܝܼܢ ܐ̄ܢܬܘܿܢ ܗܘܼ ܠܝܼ. 2 ܛܵܐܹܢ ܐ̄ܢܵܐ ܓܹܝܪ ܒܟ݂ܘܿܢ ܒܲܛܢܵܢܵܐ ܕܐܲܠܵܗܵܐ. ܡܟܲܪܬܿܟ݂ܘܿܢ ܓܹܝܪ ܠܓܲܒ݂ܪܵܐ ܚܲܕ݂. ܒܬ݂ܘܼܠܬܵܐ ܕܟ݂ܝܼܬ݂ܵܐ ܕܐܹܩܲܪܸܒ݂ ܠܲܡܫܝܼܚܵܐ. 3 ܕܵܚܹܠ ܐ̄ܢܵܐ ܕܹܝܢ. ܕܲܠܡܵܐ ܐܲܝܟ݂ ܕܐܲܛܥܝܼ ܚܸܘܝܵܐ ܠܚܵܘܵܐ ܒܲܢܟ݂ܝܼܠܘܼܬܹܗ. ܗܵܟܲܢܵܐ ܢܸܬ݂ܚܲܒܠܘܼܢ ܪܸ̈ܥܝܵܢܲܝܟܿܘܿܢ ܡܸܢ ܦܫܝܼܛܘܼܬ݂ܵܐ. ܕܲܠܘܵܬ݂ ܡܫܝܼܚܵܐ. 4 ܐܸܢ ܓܹܝܪ ܗܵܘ ܕܐܸܬ݂ܵܐ ܠܘܵܬ݂ܟ݂ܘܿܢ. ܐ̄ܚܪܹܢܵܐ ܝܼܫܘܿܥ ܐܲܟ݂ܪܸܙ ܠܟ݂ܘܿܢ. ܐܲܝܢܵܐ ܕܲܚܢܲܢ ܠܵܐ ܐܲܟ݂ܪܸܙܢ. ܐܵܘ ܪܘܼܚܵܐ ܐ̄ܚܪܹܬ݂ܵܐ ܢܣܲܒ݂ܬܿܘܿܢ. ܐܲܝܕ݂ܵܐ ܕܠܵܐ ܢܣܲܒ݂ܬܿܘܿܢ. ܐܵܘ ܣܒܲܪܬ݂ܵܐ ܐ̄ܚܪܹܬ݂ܵܐ. ܐܲܝܕ݂ܵܐ ܕܠܵܐ ܩܲܒܸܠܬܿܘܿܢ. ܫܲܦܝܼܪ ܡܸܬܿܛܦܝܼܣܝܼܢ ܗ̄ܘܲܝܬܿܘܿܢ. 5 ܪܵܢܹܐ ܐ̄ܢܵܐ ܓܹܝܪ. ܕܡܸܕܸܡ ܠܵܐ ܒܲܨܪܹܬ݂ ܡܸܢ ܫܠܝܼܚܹ̈ܐ. ܐܲܝܠܹܝܢ ܕܛܵܒ݂ ܡܝܲܬܿܪܝܼܢ. 6 ܐܵܦܸܢ ܓܹܝܪ ܒܘܼܪܵܐ ܐ̄ܢܵܐ ܒܡܸܠܲܬ݂ܝ. ܐܸܠܵܐ ܠܵܐ ܒܝܼܕ݂ܲܥܬ݂ܝ. ܐܸܠܵܐ ܒܟ݂ܠܡܸܕܸܡ ܐܸܬ݂ܓ݁ܠܝܼܢ ܠܘܵܬ݂ܟ݂ܘܿܢ. 7 ܐܵܘ ܕܲܠܡܵܐ ܡܲܣܟܵܠܘ ܐܲܣܟܠܹܬ݂. ܕܡܲܟܟܹܬ݂ ܢܲܦ̮ܫܝ ܕܐܲܢ̄ܬܿܘܿܢ ܬܸܬܿܪܝܼܡܘܼܢ. ܘܡܲܓܵܢ ܐܲܟ݂ܪܙܹܬ݂ ܠܟ݂ܘܿܢ ܣܒܲܪܬܹܗ ܕܐܲܠܵܗܵܐ. 8 ܘܥܹ̈ܕܵܬܵܐ ܐ̄ܚܪ̈ܵܢܝܵܬ݂ܵܐ ܚܲܠܨܹܬ݂. ܘܢܸܣܒܹܬ݂ ܢܲܦ̈ܩܵܬ݂ܵܐ ܠܬܸܫܡܸܫܬܵܐ ܕܝܼܠܟ݂ܘܿܢ. 9 ܘܟܲܕ݂ ܐܸܬܹܝܬ݂ ܨܸܐܕ݂ܲܝܟܘܿܢ. ܘܲܚܣܲܪ ܠܝܼ. ܠܵܐ ܝܸܩܪܹܬ݂ ܥܲܠ ܐ̄ܢܵܫ ܡܸܢܟ݂ܘܿܢ. ܣܢܝܼܩܘܼܬ݂ܝ ܓܹܝܪ ܡܲܠܝܼܘ ܐܲܚܹ̈ܐ ܕܐܸܬ݂ܵܘ ܡܸܢ ܡܵܩܹܕܘܿܢܝܼܵܐ. ܘܲܒܟ݂ܠ ܡܸܕܸܡ ܢܸܛܪܹܬ݂ ܢܲܦ̮ܫܝ ܘܢܵܛܲܪ ܐ̄ܢܵܐ. ܕܠܵܐ ܐܹܩܲܪ ܥܠܲܝܟܿܘܿܢ. 10 ܐܝܼܬ݂ܵܘܗܝ ܒܝܼ ܫܪܵܪܹܗ ܕܲܡܫܝܼܚܵܐ. ܕܗܵܢܵܐ ܫܘܼܒ݂ܗܵܪܵܐ ܠܵܐ ܢܸܬ݂ܒܲܛܲܠ ܒܝܼ ܒܐܲܬ݂ܪ̈ܵܘܵܬ݂ܵܐ ܕܐܵܟ݂ܵܐܝܼܵܐ. 11 ܠܡܵܢܵܐ. ܡܛܠ ܕܠܵܐ ܡܲܚܸܒ݂ ܐ̄ܢܵܐ ܠܟ݂ܘܿܢ. ܐܲܠܵܗܵܐ ܗܘܼ ܝܵܕ݂ܲܥ. 12 ܐܸܠܵܐ ܗܵܕܹܐ ܕܥܵܒܹܿܕ݂ ܐ̄ܢܵܐ. ܐܵܦ ܐܸܥܒܸܕ݂ ܕܐܸܦܣܘܿܩ ܗܘܼ ܥܸܠܲܬ݂ܗܘܿܢ ܕܐܲܝܠܹܝܢ ܕܒ݂ܵܥܹܝܢ ܥܸܠܬ݂ܵܐ. ܕܲܒ̣ܗܵܘ ܡܸܕܸܡ ܕܡܸܫܬܲܒ݂ܗܪܝܼܢ. ܢܸܫܬܲܟ݂ܚܘܼܢ ܐܲܟ݂ܘܵܬܲܢ. 13 ܐܝܼܬܲܝܗܘܿܢ ܓܹܝܪ ܗܵܠܹܝܢ. ܫܠܝܼܚܹ̈ܐ ܕܲܓܵܠܹ̈ܐ ܘܦܵܥ̈ܠܹܐ ܢܟ݂ܝܼܠܹ̈ܐ. ܘܲܡܕܲܡܹܝܢ ܢܲܦ̮ܫܗܘܿܢ ܠܲܫܠܝܼܚܹ̈ܐ ܕܲܡܫܝܼܚܵܐ. 14 ܘܠܲܝܬܿ ܠܡܸܬܿܕܲܡܵܪܘܼ ܒܗܵܕܹܐ. ܐܸܢ ܗܘܼ ܓܹܝܪ ܕܣܵܛܵܢܵܐ ܡܸܬܿܕܲܡܹܐ ܒܡܲܠܲܐܟ݂ܵܐ ܕܢܘܼܗܪܵܐ. 15 ܠܵܐ ܗܘܸܵܬ݂ ܪܲܒܵܐ ܨܒ݂ܘܼܬ݂ܵܐ. ܐܸܢ ܐܵܦ ܡܫܲܡܫܵܢܵܘ̈ܗܝ ܡܸܬܿܕܲܡܹܝܢ ܒܲܡܫܲܡܫܵܢܹ̈ܐ ܕܙܲܕܝܼܩܘܼܬ݂ܵܐ. ܗܵܢܘܿܢ ܕܚܲܪܬ݂ܗܘܿܢ ܬܸܗܘܹܐ ܐܲܝܟ݂ ܥܒ݂ܵܕ݂ܲܝ̈ܗܘܿܢ. 16 ܬܘܼܒ݂ ܕܹܝܢ ܐܵܡܲܪ ܐ̄ܢܵܐ. ܠܡܵܐ ܐ̄ܢܵܫ ܢܲܣܒܲܪ ܥܠܲܝ ܐܲܝܟ݂ ܕܣܲܟ݂ܠܵܐ ܐ̄ܢܵܐ. ܘܐܸܢ ܠܵܐ. ܐܵܦܸܢ ܐܲܝܟ݂ ܣܲܟ݂ܠܵܐ ܩܲܒܠܘܼܢܝ. ܕܐܵܦ ܐܸܢܵܐ ܩܲܠܝܼܠ ܐܸܫܬܲܒ݂ܗܲܪ. 17 ܡܸܕܸܡ ܕܲܡܡܲܠܸܠ ܐ̄ܢܵܐ. ܠܵܐ ܗ̄ܘܵܐ ܒܡܵܪܲܢ ܡܡܲܠܸܠ ܐ̄ܢܵܐ. ܐܸܠܵܐ ܐܲܝܟ݂ ܕܲܒ݂ܦܲܟܝܼܗܘܬ݂ܵܐ. ܒܗܵܕܹܐ ܕܘܼܟܬ݂ܵܐ ܕܫܘܼܒ݂ܗܵܪܵܐ. 18 ܡܛܠ ܕܣܲܓܝܼ̈ܐܹܐ ܡܸܫܬܲܒ݂ܗܪܝܼܢ ܒܒܸܣܪܵܐ. ܐܵܦ ܐܸܢܵܐ ܐܸܫܬܲܒ݂ܗܲܪ. 19 ܡܢܵܚܝܼܢ ܐ̄ܢܬܘܿܢ ܗܘܼ ܓܹܝܪ ܠܡܸܫܬܿܡܵܥܘܼ ܠܚܲܣܝܼܪ̈ܲܝ ܪܸܥܝܵܢܵܐ. ܟܲܕ݂ ܐܲܢ̄ܬܿܘܿܢ ܚܲܟܝܼܡܹ̈ܐ ܐܲܢ̄ܬܘܿܢ. 20 ܘܡܸܬܿܕܢܹܝܢ ܐ̄ܢܬܘܿܢ ܠܡܲܢ ܕܲܡܫܲܥܒܸܕ݂ ܠܟ݂ܘܿܢ. ܘܲܠܡܲܢ ܕܐܵܟܹܠ ܠܟ݂ܘܿܢ. ܘܲܠܡܲܢ ܕܢܵܣܹܒ݂ ܡܸܢܟ݂ܘܿܢ. ܘܲܠܡܲܢ ܕܡܸܬ݁ܬ݁ܪܝܼܡ ܥܠܲܝܟܿܘܿܢ. ܘܲܠܡܲܢ ܕܡܵܚܹܐ ܠܟ݂ܘܿܢ ܥܲܠ ܐܲܦܲܝ̈ܟܿܘܿܢ. 21 ܐܲܝܟ݂ ܕܲܒ݂ܨܲܥܪܵܐ ܐܵܡܲܪ ܐ̄ܢܵܐ. ܐܲܝܟ݂ ܗܵܘ ܕܲܚܢܲܢ ܡܚܝܼܠܝܼܢ ܚ̄ܢܲܢ ܗ̄ܘܼ. ܒܚܲܣܝܼܪܘܼܬ݂ ܪܸܥܝܵܢܵܐ ܐܵܡܲܪ ܐ̄ܢܵܐ. ܕܲܒ݂ܟ݂ܠܡܸܕܸܡ ܕܡܲܡܪܲܚ ܐ̄ܢܵܫ. ܐܵܦ ܐܸܢܵܐ ܡܲܡܪܲܚ ܐ̄ܢܵܐ. 22 ܐܸܢ ܥܸܒ݂ܪ̈ܵܝܹܐ ܐܸܢܘܿܢ. ܐܵܦ ܐܸܢܵܐ. ܐܸܢ ܝܼܣܲܪ̈ܠܵܝܹܐ ܐܸܢܘܿܢ. ܐܵܦ ܐܸܢܵܐ. ܐܸܢ ܙܲܪܥܹܗ ܐܸܢܘܿܢ ܕܐܲܒ݂ܪܵܗܵܡ. ܐܵܦ ܐܸܢܵܐ. 23 ܐܸܢ ܡܫܲܡܫܵܢܹ̈ܐ ܐܸܢܘܿܢ ܕܲܡܫܝܼܚܵܐ. ܒܚܲܣܝܼܪܘܼܬ݂ ܪܸܥܝܵܢܵܐ ܐܵܡܲܪ ܐ̄ܢܵܐ. ܕܝܲܬܿܝܼܪ ܡܸܢܗܘܿܢ ܐܸܢܵܐ. ܒܠܹܐܘܬ݂ܵܐ ܝܲܬܿܝܼܪ ܡܸܢܗܘܿܢ. ܒܡܲܚ̈ܘܵܬ݂ܵܐ ܝܲܬܿܝܼܪ ܡܸܢܗܘܿܢ. ܒܐܲܣܘܪܹ̈ܐ ܝܲܬܿܝܼܪ ܡܸܢܗܘܿܢ. ܒܡܵܘ̈ܬܹܐ ܙܲܒ݂ܢ̈ܝܼܢ ܣܲܓܝܼ̈ܐܵܢ. 24 ܡܸܢ ܝܗ̄ܘܼܕ݂ܵܝܹ̈ܐ ܚܲܡܸܫ ܙܲܒ݂ܢ̈ܝܼܢ ܐܲܪܒܥܝܼܢ ܐܲܪܒܥܝܼܢ ܚܲܣܝܼܪ ܚܕ݂ܵܐ ܒܸܠܥܹܬ݂. 25 ܬܿܠܵܬ݂ ܙܲܒ݂ܢ̈ܝܼܢ ܒܫܲܒ݂̈ܛܹܐ ܐܸܬ݂ܢܲܓ݁ܕܹܬ݂. ܚܕ݂ܵܐ ܙܒܲܢ ܐܸܬ݂ܪܲܓ݂ܡܹܬ݂. ܬܿܠܵܬ݂ ܙܲܒ݂ܢ̈ܝܼܢ ܗ̄ܘܹܝܬ݂ ܢܘܼܘܵܓ݂ܵܐ (ܒܢܘܼܘܵܓ݂ܵܐ). ܐܝܼܡܵܡܵܐ ܘܠܸܠܝܵܐ ܕܠܵܐ ܣܦܝܼܢ̄ܬܵܐ ܒܝܲܡܵܐ ܗ̄ܘܹܝܬ݂. 26 ܒܐܘܪ̈ܚܵܬ݂ܵܐ ܣܲܓܝܼ̈ܐܵܬ݂ܵܐ. ܒܩܹܘܲܢܕܹܝܢܘܿܣ ܕܢܲܗܪ̈ܵܘܵܬ݂ܵܐ. ܒܩܹܘܲܢܕܹܝܢܘܿܣ ܕܓܲܝܵܣܹ̈ܐ. ܒܩܹܘܲܢܕܹܝܢܘܿܣ ܕܡܸܢ ܛܘܿܗܡܝ. ܒܩܹܘܲܢܕܹܝܢܘܿܣ ܕܡܸܢ ܥܲܡ̈ܡܹܐ. ܒܩܹܘܲܢܕܹܝܢܘܿܣ ܗ̄ܘܹܝܬ݂ ܒܲܡܕ݂ܝܼ̈ܢܵܬ݂ܵܐ. ܒܩܹܘܲܢܕܹܝܢܘܿܣ ܗ̄ܘܹܝܬ݂ ܒܚܘܼܪܒܵܐ. ܒܩܹܘܲܢܕܹܝܢܘܿܣ ܒܝܲܡܵܐ. ܒܩܹܘܲܢܕܹܝܢܘܿܣ ܕܡܸܢ ܐܲܚܹ̈ܐ ܕܲܓܵܠܹ̈ܐ. 27 ܒܥܲܡܠܵܐ ܘܲܒ݂ܠܹܐܘܬ݂ܵܐ. ܒܫܲܗܪܵܐ ܣܲܓܿܝܼܐܵܐ. ܒܟܲܦܢܵܐ ܘܲܒ݂ܨܲܗܝܵܐ. ܒܨܵܘܡܵܐ ܣܲܓܿܝܼܐܵܐ. ܒܥܲܪܝܵܐ ܘܲܒ݂ܥܲܪܛܸܠܵܝܘܼܬ݂ܵܐ. 28 ܣܛܲܪ ܡܸܢ ܝܲܬܝܼܪ̈ܵܬ݂ܵܐ. ܘܲܟ݂ܢܘܼܫܝܵܐ ܕܲܥܠܲܝ ܕܟ̣ܠܝܘܿܡ. ܘܨܸܦܬ݂ܝ ܕܥܲܠ ܐܲܦܲܝ̈ ܟܠܗܹܝܢ ܥܹ̈ܕܵܬܵܐ. 29 ܡܲܢܘܼ ܡܸܬ݂ܟܪܲܗ. ܘܠܵܐ ܐܸܢܵܐ ܡܸܬ݂ܟܪܲܗ ܐ̄ܢܵܐ. ܡܲܢܘܼ ܡܸܬ݂ܟܫܸܠ. ܘܠܵܐ ܐܸܢܵܐ ܝܵܩܹܕ݂ ܐ̄ܢܵܐ. 30 ܐܸܢ ܠܡܸܫܬܲܒ݂ܗܵܪܘܼ ܘܵܠܹܐ. ܒܟ݂ܘܼܪ̈ܗܵܢܲܝ ܐܸܫܬܲܒ݂ܗܲܪ. 31 ܝܵܕ݂ܲܥ ܗܘܼ ܐܲܠܵܗܵܐ ܐܲܒ݂ܘܼܗܝ ܕܡܵܪܲܢ ܝܼܫܘܿܥ ܡܫܝܼܚܵܐ. ܡܒܲܪܟ݂ܵܐ ܕܲܠܥܵܠܲܡ ܥܵܠܡܝܼܢ. ܕܠܵܐ ܡܟܲܕܸܒ݂ ܐ̄ܢܵܐ. 32 ܒܕ݂ܲܪܡܣܘܿܩ ܪܲܒ ܚܲܝܠܵܐ ܕܐܵܪܹܛܘܿܣ ܡܲܠܟܵܐ. ܢܵܛܲܪ ܗ̄ܘܵܐ ܡܕ݂ܝܼܢ̄ܬܵܐ ܕܕ݂ܲܪ̈ܡܘܿܣܩܵܝܹܐ. ܠܡܹܐܚܕܲܢܝ. 33 ܘܡܸܢ ܟܵܘܬ݂ܵܐ ܒܲܣܪܝܼܓ݂ܬܵܐ ܫܲܒܘܼܢܝ ܡܸܢ ܫܘܼܪܵܐ. ܘܐܸܬ݂ܦܲܠܛܹܬ݂ ܡܸܢ ܐܝܼܕ݂ܵܘ̈ܗܝ.
ܩܦܠܐܘܢ ܝܒ
1 ܠܡܸܫܬܲܒ݂ܗܵܪܘܼ ܘܵܠܹܐ. ܐܸܠܵܐ ܠܵܐ ܦܲܩܵܚ. ܐܵܬܹܐ ܐ̄ܢܵܐ ܠܝܼ ܓܹܝܪ ܠܚܸܙܘܵܢܹ̈ܐ. ܘܲܠܓܸܠܝܵܢܵܘ̈ܗܝ ܕܡܵܪܲܢ. 2 ܝܵܕ݂ܲܥ ܐ̄ܢܵܐ ܓܲܒ݂ܪܵܐ ܒܲܡܫܝܼܚܵܐ ܡܸܢ ܩܕ݂ܵܡ ܐܲܪܒܲܥܸܣܪܹ̈ܐ ܫܢ̈ܝܼܢ. ܐܸܢ ܒܲܦܓܲܪ ܕܹܝܢ ܘܐܸܢ ܕܠܵܐ ܦܓܲܪ. ܠܵܐ ܝܵܕܲܥ ܐ̄ܢܵܐ. ܐܲܠܵܗܵܐ ܗܘܼ ܝܵܕܲܥ. ܕܐܸܬ݂ܚܛܸܦ ܗܘܼ ܗܵܢܵܐ ܥܕܲܡܵܐ ܫܡܲܝܵܐ ܕܲܬ݂ܠܵܬ݂ܵܐ (ܠܬ݂ܘܼܠܬ݂ܵܐ ܕܲܫܡܲܝܵܐ). 3 ܘܝܵܕ݂ܲܥ ܐ̄ܢܵܐ ܠܹܗ ܠܗܵܢܵܐ ܒܲܪܢܵܫܵܐ. ܐܸܢ ܒܲܦܓܲܪ ܕܹܝܢ ܘܐܸܢ ܕܠܵܐ ܦܓܲܪ. ܠܵܐ ܝܵܕ݂ܲܥ ܐ̄ܢܵܐ. ܐܲܠܵܗܵܐ ܗܘܼ ܝܵܕ݂ܲܥ. 4 ܕܐܸܬ݂ܚܛܸܦ ܠܦܲܪܕܲܝܣܵܐ. ܘܲܫܡܲܥ ܡܸܠܹ̈ܐ ܕܠܵܐ ܡܸܬ݂ܡܲܠܠܵܢ. ܐܲܝܠܹܝܢ ܕܠܵܐ ܫܲܠܝܼܛ ܠܒܲܪܢܵܫܵܐ ܠܲܡܡܲܠܵܠܘ ܐܸܢܹܝܢ. 5 ܥܲܠ ܗܵܢܵܐ ܐܸܫܬܲܒ݂ܗܲܪ. ܥܲܠ ܢܲܦ̮ܫܝ ܕܹܝܢ ܠܵܐ ܐܸܫܬܲܒ݂ܗܲܪ. ܐܸܠܵܐ ܐܸܢ ܒܟ݂ܘܼܪ̈ܗܵܢܹܐ. 6 ܐܸܢ ܐܸܨܒܹܐ ܓܹܝܪ ܕܐܸܫܬܲܒ݂ܗܲܪ. ܠܵܐ ܗܵܘܹܐ ܐ̄ܢܵܐ ܫܵܛܝܵܐ. ܫܪܵܪܵܐ ܗܘܼ ܓܹܝܪ ܐܵܡܲܪ ܐ̄ܢܵܐ. ܚܵܐܹܣ ܐ̄ܢܵܐ ܕܹܝܢ. ܕܲܠܡܵܐ ܐ̄ܢܵܫ ܢܸܬ݂ܪܲܥܹܐ ܥܠܲܝ ܝܲܬܿܝܼܪ ܡܸܢ ܡܵܐ ܕܚܵܙܹܐ ܠܝܼ. ܘܲܕ݂ܫܵܡܲܥ ܡܹܢܝ. 7 ܘܲܕ݂ܠܵܐ ܐܸܬ݁ܬ݁ܪܝܼܡ ܒܝܲܬܝܼܪܘܼܬ݂ܵܐ ܕܓܸܠܝܵܢܹ̈ܐ. ܐܸܫܬܿܠܸܡ ܠܝܼ ܫܦܵܝܵܐ ܠܒܸܣܪܝ. ܡܲܠܲܐܟܹܗ ܕܣܵܛܵܢܵܐ. ܕܢܸܗܘܹܐ ܡܩܲܦܲܚ ܠܝܼ ܕܠܵܐ ܐܸܬ݁ܬ݁ܪܝܼܡ. 8 ܘܥܲܠ ܗܵܢܵܐ ܬܿܠܵܬ݂ ܙܲܒ݂ܢ̈ܝܼܢ ܒܥܹܝܬ݂ ܡܸܢ ܡܵܪܝ ܕܢܲܦܪܸܩ ܡܹܢܝ. 9 ܘܐܸܡܲܪ ܠܝܼ ܣܵܦܩܵܐ ܠܵܟ݂ ܛܲܝܒܘܼܬ݂ܝ. ܚܲܝܠܝ ܓܹܝܪ ܒܲܟ݂ܪܝܼܗܘܼܬ݂ܵܐ ܗܘܼ ܡܸܬ݂ܓ݁ܡܲܪ. ܚܵܕ݂ܝܵܐܝܼܬ݂ ܗܵܟܹܝܠ ܐܸܫܬܲܒ݂ܗܲܪ ܒܟ݂ܘܼܪ̈ܗܵܢܲܝ. ܕܢܲܓܸ݁ܢ ܥܠܲܝ ܚܲܝܠܹܗ ܕܲܡܫܝܼܚܵܐ. 10 ܡܛܠ ܗܵܢܵܐ ܨܵܒܹܐ ܐ̄ܢܵܐ ܒܟ݂ܘܼܪ̈ܗܵܢܹܐ. ܒܨܲܥܪܵܐ. ܒܐܘܼܠܨܵܢܹ̈ܐ. ܒܲܪܕ݂ܘܼܦܝܵܐ. ܒܲܚܒ݂ܘܼܫܝܵܐ ܕܥܲܠ ܐܲܦܲܝ̈ ܡܫܝܼܚܵܐ. ܐܸܡܲܬ݂ܝ ܕܲܟ݂ܪܝܼܗ ܐ̄ܢܵܐ ܓܹܝܪ. ܗܵܝܕܹܝܢ ܗܘܼ ܚܲܝܠܬ݂ܵܢ ܐ̄ܢܵܐ. 11 ܗܵܐ ܗ̄ܘܹܝܬ݂ ܚܲܣܝܼܪ ܪܸܥܝܵܢܵܐ ܒܫܘܼܒ݂ܗܵܪܝ. ܕܐܲܢ̄ܬܿܘܿܢ ܐܲܠܲܨܬܿܘܿܢܵܢܝ. ܚܲܝܵܒ݂ܝܼܢ ܗܘܲܝܬܿܘܿܢ ܓܹܝܪ. ܕܐܲܢ̄ܬܿܘܿܢ ܬܲܣܗܕ݂ܘܼܢ ܥܠܲܝ. ܡܛܠ ܕܠܵܐ ܒܲܨܪܹܬ݂ ܡܸܕܸܡ ܡܸܢ ܫܠܝܼܚܹ̈ܐ. ܐܲܝܠܹܝܢ ܕܛܵܒ݂ ܡܝܲܬܿܪܝܼܢ. ܘܐܵܦܸܢ ܠܵܐ ܗ̄ܘܹܝܬ݂ ܡܸܕܸܡ. 12 ܐܵܬ݂̈ܘܵܬ݂ܵܐ ܕܲܫܠܝܼܚܹ̈ܐ ܥܸܒ݂ܕܹܬ݂ ܒܲܝܢܵܬ݂ܟ݂ܘܿܢ. ܒܟ݂ܠ ܡܣܲܝܒܪܵܢܘܼ. ܘܒܲܓ݂ܒܲܪ̈ܘܵܬ݂ܵܐ. ܘܲܒ݂ܬܸܕ݂ܡܪ̈ܵܬ݂ܵܐ. ܘܲܒ݂ܚܲܝ̈ܠܹܐ. 13 ܒܡܵܢܵܐ ܓܹܝܪ ܐܸܬ݂ܒܲܨܲܪܬܿܘܿܢ ܡܸܢ ܥܹ̈ܕܵܬܵܐ ܐ̄ܚܪ̈ܵܢܝܵܬ݂ܵܐ. ܐܸܠܵܐ ܐܸܢ ܒܗܵܕܹܐ ܕܐܸܢܵܐ ܠܵܐ ܝܸܩܪܹܬ݂ ܥܠܲܝܟܿܘܿܢ. ܫܒ݂ܘܿܩܘ ܠܝܼ ܗܵܕܹܐ ܣܲܟ݂ܠܘܼܬ݂ܵܐ. 14 ܗܵܐ ܗܵܕܹܐ ܕܲܬ݂ܠܵܬ݂ ܗ̄ܝܼ ܙܲܒ݂ܢ̈ܝܼܢ ܕܲܡܛܲܝܲܒ݂ ܐ̄ܢܵܐ ܕܐܹܬܹܐ ܠܘܵܬ݂ܟ݂ܘܿܢ. ܘܠܵܐ ܐܹܩܲܪ ܥܠܲܝܟܿܘܿܢ. ܡܛܠ ܕܠܵܐ ܒܵܥܹܐ ܐ̄ܢܵܐ ܕܝܼܠܟ݂ܘܿܢ. ܐܸܠܵܐ ܠܟ݂ܘܿܢ. ܠܵܐ ܓܹܝܪ ܚܲܝܵܒ݂ܝܼܢ ܒ̈ܢܲܝܵܐ ܠܲܡܣܵܡ ܣܝܼ̈ܡܵܬ݂ܵܐ ܠܐܲܒ݂ܵܗܹ̈ܐ. ܐܸܠܵܐ ܐܲܒ݂ܵܗܹ̈ܐ ܠܲܒ݂ܢܲܝ̈ܗܘܿܢ. 15 ܐܸܢܵܐ ܕܹܝܢ ܚܵܕ݂ܝܵܐܝܼܬ݂ ܘܢܲܦ̈ܩܵܬ݂ܵܐ ܐܲܦܸܩ. ܘܐܵܦ ܩܢܘܿܡܝ ܐܸܬܸܿܠ ܥܲܠ ܐܲܦܲܝ̈ ܢܲܦ̮ܫܵܬ݂ܟ݂̈ܘܿܢ. ܐܵܦܸܢ ܟܲܕ݂ ܝܲܬܝܼܪܵܐܝܼܬ݂ ܡܲܚܸܒ݂ ܐ̄ܢܵܐ ܠܟ݂ܘܿܢ. ܐܲܢ̄ܬܿܘܿܢ ܒܨܝܼܪܵܐܝܼܬ݂ ܡܲܚܒ݂ܝܼܢ ܐ̄ܢܬܘܿܢ ܠܝܼ. 16 ܘܲܟ݂ܒܲܪ ܐܸܢܵܐ ܠܵܐ ܝܸܩܪܸܬ݂ ܥܠܲܝܟܿܘܿܢ. ܐܸܠܵܐ ܐܲܝܟ݂ ܓܲܒ݂ܪܵܐ ܚܵܪܥܵܐ. ܒܢܸܟ݂ܠܵܐ ܓܢܲܒ݂ܬܿܟ݂ܘܿܢ. 17 ܠܡܵܐ ܒܝܲܕ݂ ܐ̄ܢܵܫ ܐ̄ܚܪܹܝܢ ܕܫܲܕܪܹܬ݂ ܠܘܵܬ݂ܟ݂ܘܿܢ. ܐܸܬ݂ܝܲܥܢܹܬ݂ ܥܠܲܝܟܿܘܿܢ. 18 ܡܸܢ ܛܸܛܘܿܣ ܒܥܹܝܬ݂. ܘܫܲܕܪܹܬ݂ ܥܲܡܹܗ ܠܐܲܚܹ̈ܐ. ܠܡܵܐ ܡܸܕܸܡ ܐܸܬ݂ܝܲܥܲܢ ܥܠܲܝܟܿܘܿܢ ܛܸܛܘܿܣ. ܠܵܘ ܒܲܚܕ݂ܵܐ ܪܘܼܚܵܐ ܗܲܠܸܟ݂ܢ. ܘܲܒ݂ܗܹܝܢ ܒܥܸܩ̈ܒ݂ܵܬ݂ܵܐ. 19 ܠܡܵܐ ܬܘܼܒ݂ ܣܵܒ݂ܪܝܼܢ ܐ̄ܢܬܘܿܢ ܕܲܠܟ݂ܘܿܢ ܢܵܦܩܝܼܢ ܚ̄ܢܲܢ ܪܘܼܚܵܐ. ܩܕ݂ܵܡ ܐܲܠܵܗܵܐ ܒܲܡܫܝܼܚܵܐ ܡܡܲܠܠܝܼܢ ܚ̄ܢܲܢ. ܘܟܠܗܹܝܢ ܚܲܒܝܼܒܲܝ̈. ܡܛܠ ܒܸܢܝܵܢܵܐ ܗܘܼ ܕܝܼܠܟ݂ܘܿܢ. 20 ܕܵܚܹܠ ܐ̄ܢܵܐ ܓܹܝܪ ܕܲܠܡܵܐ ܐܹܬܹܐ ܠܘܵܬ݂ܟ݂ܘܿܢ. ܘܠܵܐ ܐܸܫܟܲܚܟ݂ܘܿܢ ܐܲܝܟ݂ ܕܨܵܒܹܐ ܐ̄ܢܵܐ. ܘܐܸܫܬܿܟܲܚ ܠܟ݂ܘܿܢ ܐܵܦ ܐܸܢܵܐ ܐܲܝܟ݂ ܡܵܐ ܕܠܵܐ ܨܵܒܹܝܢ ܐ̄ܢܬܿܘܢ. ܕܲܠܡܵܐ ܚܸܪܝܵܢܵܐ. ܘܲܚܣܵܡܵܐ. ܘܚܸܡܬ݂ܵܐ. ܘܥܸܨܝܵܢܵܐ. ܘܡܹܐܟܲܠܩܲܪܨܵܐ. ܘܪܸܛܢܵܐ. ܘܲܚܬ݂ܝܼܪܘܼܬ݂ܵܐ. ܘܲܫܓ݂ܘܼܫܝܵܐ. 21 ܕܲܠܡܵܐ ܟܲܕ݂ ܐܹܬܹܐ ܠܘܵܬ݂ܟ݂ܘܿܢ. ܢܡܲܟܟܲܢܝ ܐܲܠܵܗܝ. ܘܐܸܬ݂ܐܒܸܠ ܥܲܠ ܣܲܓܝܼ̈ܐܹܐ ܐܲܝܠܹܝܢ ܕܲܚܛܵܘ ܘܠܵܐ ܬܵܒ݂ܘ. ܡܸܢ ܛܲܢܦܘܼܬ݂ܵܐ. ܘܡܸܢ ܙܵܢܝܘܼܬ݂ܵܐ. ܘܡܸܢ ܦܲܚܙܘܼܬ݂ܵܐ. ܕܲܥܒܲܕ݂ܘ.
ܩܦܠܐܘܢ ܝܓ
1 ܗܵܕܹܐ ܕܲܬ݂ܠܵܬ݂ ܗ̄ܝܼ ܙܲܒ݂ܢ̈ܝܼܢ ܕܐܵܬܹܐ ܐ̄ܢܵܐ ܠܘܵܬ݂ܟ݂ܘܿܢ. ܕܥܲܠ ܦܘܼܡ ܬܪܹܝܢ ܘܲܬ݂ܠܵܬ݂ܵܐ ܣܵܗܕܝܼ̈ܢ ܬܿܩܘܼܡ ܟܠ ܡܸܠܵܐ. 2 ܡܸܢ ܩܕ݂ܝܼܡ ܐܸܡܪܹܬ݂ ܗ̄ܘܹܝܬ݂ ܠܟ݂ܘܿܢ. ܘܬ݂ܘܼܒ݂ ܡܩܲܕܸܡ ܐ̄ܢܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܐܲܝܟ݂ ܕܐܵܦ ܬܲܪܬܹܿܝܢ ܙܲܒ݂ܢ̈ܝܼܢ ܕܲܗܘܹܝܬ݂ ܠܘܵܬ݂ܟ݂ܘܿܢ ܐܸܡܪܹܬ݂ ܠܟ݂ܘܿܢ. ܘܐܵܦ ܗܵܫܵܐ ܟܲܕ݂ ܪܲܚܝܼܩ ܐ̄ܢܵܐ ܟܵܬܹܒ݂ ܐ̄ܢܵܐ. ܠܗܵܠܹܝܢ ܕܲܚܛܵܘ. ܘܲܠܫܲܪܟܵܐ ܕܲܐ̄ܚܪ̈ܵܢܹܐ. ܕܐܸܢ ܐܹܬܹܐ ܬܘܼܒ݂. ܠܵܐ ܐܹܚܘܼܣ. 3 ܡܛܠ ܕܒ݂ܘܼܩܝܵܐ ܒܵܥܹܝܢ ܐ̄ܢܬܿܘܢ ܕܲܡܫܝܼܚܵܐ ܕܲܡܡܲܠܸܠ ܒܝܼ. ܗܵܘ ܕܠܵܐ ܗܘܵܐ ܡܚܝܼܠ ܒܟ݂ܘܿܢ. ܐܸܠܵܐ ܚܲܝܠܬ݂ܵܢ ܗܘܼ ܒܟ݂ܘܿܢ. 4 ܐܵܦܸܢ ܐܸܙܕܩܸܦ ܓܹܝܪ ܒܲܡܚܝܼܠܘܼܬ݂ܵܐ. ܐܸܠܵܐ ܚܲܝ ܗܘܼ ܒܚܲܝܠܵܐ ܕܐܲܠܵܗܵܐ. ܘܐܵܦ ܚܢܲܢ ܡܚܝܼܠܝܼܢ ܚ̄ܢܲܢ ܥܲܡܹܗ. ܐܸܠܵܐ ܚܲܝܝܼܢ ܚ̱ܢܲܢ ܥܲܡܹܗ ܒܚܲܝܠܵܐ ܕܐܲܠܵܗܵܐ ܕܲܒ݂ܟ݂ܘܿܢ. 5 ܢܲܦ̮ܫܟ݂ܘܿܢ ܒܩܵܘ. ܐܸܢ ܒܵܗܿ ܒܗܲܝܡܵܢܘܼܬ݂ܵܐ ܩܵܝܡܝܼܢ ܐܢ̄ܬܘܿܢ. ܢܲܦ̮ܫܟ݂ܘܿܢ ܐܲܣܵܘ. ܐܵܘ ܠܵܐ ܡܸܫܬܵܘܕܥܝܼܢ ܐ̄ܢܬܿܘܿܢ ܕܝܼܫܘܿܥ ܡܫܝܼܚܵܐ ܒܟ݂ܘܿܢ ܗ̄ܘܼ. ܘܐܸܢ ܠܵܐ ܡܲܣ̈ܠܲܝܵܐ ܐܲܢ̄ܬܘܿܢ. 6 ܡܣܲܒܲܪ ܐ̄ܢܵܐ ܕܹܝܢ ܕܬܸܕ݂ܥܘܼܢ. ܕܲܚܢܲܢ ܠܵܐ ܗ̄ܘܲܝܢ ܡܲܣܠܹܝܢ. 7 ܒܵܥܹܐ ܐ̄ܢܵܐ ܕܹܝܢ ܡܸܢ ܐܲܠܵܗܵܐ. ܕܠܵܐ ܢܸܗܘܹܐ ܒܟ݂ܘܿܢ ܡܸܕܸܡ ܕܒ݂ܝܼܫ. ܐܲܝܟ݂ ܕܒ݂ܘܼܩܝܲܢ ܕܝܼܠܲܢ ܢܸܬ݂ܚܙܹܐ. ܐܸܠܵܐ ܕܐܲܢ̄ܬܿܘܿܢ ܬܸܗܘܘܿܢ ܣܵܥܪܝܼܢ ܛܵܒ݂ܵܬ݂ܵܐ: ܘܲܚܢܲܢ ܢܸܗܘܹܐ ܐܲܝܟ݂ ܡܲܣ̈ܠܲܝܵܐ. 8 ܠܵܐ ܓܹܝܪ ܡܸܫܟܿܚܝܼܢ ܚ̄ܢܲܢ ܕܢܸܥܒܸܕ݂ ܡܸܕܸܡ ܠܘܼܩܒܲܠ ܩܘܼܫܬܵܐ. ܐܸܠܵܐ ܚܠܵܦ ܩܘܼܫܬܵܐ. 9 ܚܵܕܹܝܢ ܚ̄ܢܲܢ ܕܹܝܢ ܡܵܐ ܕܲܚܢܲܢ ܟܪܝܼܗܝܼܢ. ܘܐܲܢ̄ܬܿܘܿܢ ܚܲܝܠܬ݂ܵܢܝܼܢ. ܗܵܕܹܐ ܓܹܝܪ ܐܵܦ ܡܨܲܠܹܝܢ ܚ̄ܢܲܢ. ܕܐܲܢ̄ܬܿܘܿܢ ܬܸܬܿܓܲܡܪܘܼܢ. 10 ܡܛܠ ܗܵܢܵܐ ܟܲܕ݂ ܪܲܚܝܼܩ ܐ̄ܢܵܐ ܗܵܠܹܝܢ ܟܵܬܹܒ݂ ܐ̄ܢܵܐ. ܕܠܵܐ ܡܵܐ ܕܐܸܬܹܝܬ݂ ܩܲܫܝܵܐܝܼܬ݂ ܐܸܣܥܘܿܪ ܐܲܝܟ݂ ܫܘܼܠܛܵܢܵܐ ܕܝܲܗ̄ܒ݂ ܠܝܼ ܡܵܪܝ. ܠܒܸܢܝܵܢܟ݂ܘܿܢ ܘܠܵܐ ܠܣܘܼܚܵܦܟ݂ܘܿܢ. 11 ܡܸܟܹܝܠ ܐܲܚܲܝ̈. ܚܕ݂ܵܘ ܘܐܸܬ݂ܓܲܡ̱ܪܘ. ܘܐܸܬ݂ܒܲܝܲܐܘ. ܘܐܵܘܝܘܼܬ݂ܵܐ ܘܫܲܝܢܵܐ ܢܸܗܘܹܐ ܒܟ݂ܘܿܢ. ܘܐܲܠܵܗܵܐ ܕܚܘܼܒܵܐ ܘܲܕ݂ܫܲܠܡܘܼܬ݂ܵܐ ܢܸܗܘܹܐ ܥܲܡܟ݂ܘܿܢ. 12 ܫܲܐܸܠܘ ܒܲܫܠܵܡܵܐ ܚܲܕ݂ ܕܚܲܕ݂ ܒܢܘܼܫܩܬܵܐ ܩܲܕܝܼܫܬܵܐ. 13 ܫܵܐܠܝܼܢ ܒܲܫܠܵܡܟ݂ܘܿܢ ܟܠܗܘܿܢ ܩܲܕܝܼܫܹ̈ܐ. 14 ܫܠܵܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܚܘܒܹܗ ܕܐܲܠܵܗܵܐ. ܘܫܵܘܬܵܦܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ. ܥܲܡ ܟܠܟ݂ܘܿܢ. ܐܵܡܹܝܢ.