ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

 

ܐܓܪܬܐ ܩܕܡܝܬܐ ܕܦܘܠܘܣ ܫܠܝܚܐ ܕܠܘܬ ܩܘܪ̈ܢܬܝܐ

 

ܩܦܠܐܘܢ: ܐ

1 ܦܵܘܠܘܿܣ: ܩܸܪܝܵܐ ܫܠܝܼܚܵܐ ܕܝܼܫܘܿܥ ܡܫܝܼܚܵܐ: ܒܪܸܙܵܝܹܗ ܕܐܲܠܵܗܵܐ: ܘܣܘܼܣܬܹܢܝܼܣ ܐܵܚܘܿܢܵܐ: 2 ܠܥܸܕܬܵܐ ܕܐܲܠܵܗܵܐ ܕܝܼܠܵܐ ܓܵܘ ܩܘܼܪܲܢܬܘܿܣ: ܩܸܪܝܹܐ ܩܲܕܝܼܫܹ̈ܐ: ܕܒܝܼܫܘܿܥ ܡܫܝܼܚܵܐ ܡܩܘܼܕܫܹܐ: ܥܲܡ ܟܠܵܝ ܐܵܢܝܼ ܕܩܵܪܝܼ ܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܟܠ ܕܘܼܟܵܐ: ܕܝܼܵܝܼ ܘܕܸܢ: 3 ܫܵܦܵܩܲܬ ܥܲܡܵܘܟܼܘܿܢ ܘܫܠܵܡܵܐ: ܡܼܢ ܐܲܠܵܗܵܐ ܒܵܒܲܢ ܘܡܼܢ ܡܵܪܲܢ ܝܼܫܘܿܥ ܡܫܝܼܚܵܐ. 4 ܫܵܟܘܿܪܹܐ ܝܘܸܢ ܠܐܲܠܵܗܵܝܼ ܒܟܠ ܙܲܒܼܢܵܐ ܣܵܒܵܒ ܕܝܼܵܘܟܼܘܿܢ: ܕܫܵܦܵܩܲܬ ܕܐܲܠܵܗܵܐ ܕܦܸܫܠܵܐ ܝܸܗܒܸܠܬܵܐ ܐܸܠܵܘܟܼܘܿܢ ܒܝܼܫܘܿܥ ܡܫܝܼܚܵܐ: 5 ܕܒܟܠ ܗ̄ܘܹܠܵܘܟܼܘܿܢ ܕܵܘܠܲܬܡܲܢܕ ܒܝܹܗ: ܒܟܠ ܗܲܡܙܲܡܬܵܐ ܘܒܟܠ ܝܕܹܥܬܵܐ: 6 ܗܲܪ ܐܲܝܟ ܕܣܵܗܕܘܼܬܹܗ ܕܡܫܝܼܚܵܐ ܦܸܫܠܵܐ ܡܘܼܩܘܝܼܬܵܐ ܒܝܼܵܘܟܼܘܿܢ: 7 ܗܲܕܟܼܵܐ ܕܠܹܐ ܝܬܘܿܢ ܒܵܨܘܿܪܹ̈ܐ ܒܚܕܵܐ ܡܼܢ ܚܲܠܲܥܬ̈ܗ: ܟܲܕ ܒܸܣܦܵܪܵܐ ܝܬܘܿܢ ܠܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: 8 ܗܿܘ ܕܒܸܬ ܡܲܩܘܹܐ ܠܵܘܟܼܘܿܢ ܗܲܠ ܚܲܪܬܵܐ: (ܕܗܵܘܝܼܬܘܿܢ) ܕܠܵܐ ܠܲܟܵܐ ܒܝܘܿܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 9 ܡܗܘܼܡܢܵܐ ܝܠܹܐ ܐܲܠܵܗܵܐ: ܕܒܐܝܼܕܹܗ ܦܸܫܠܵܘܟܼܘܿܢ ܩܸܪܝܹܐ ܠܫܵܪܝܼܪܘܼܬܵܐ ܕܒܪܘܼܢܹܗ ܝܼܫܘܿܥ ܡܫܝܼܚܵܐ ܡܵܪܲܢ. 10 ܐܵܕܝܼܵܐ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ: ܐܵܚܘܿܢܘܵܬܝܼ̈: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܕܟܠܵܘܟܼܘܿܢ ܗܲܪ ܚܵܕ̄ ܡܸܢܕܝܼ ܗܲܡܙܸܡܝܼܬܘܿܢ: ܘܠܵܐ ܗܵܘܝܼ ܓܵܘܵܟܼܘܿܢ ܕܘܼܒܵܪ̈ܘܼܝܵܬܹܗ: ܐܸܠܵܐ ܕܦܵܝܫܝܼܬܘܿܢ ܡܘܼܟܡܤܠܹܐ ܡܸܚܕܵܕܹ̈ܐ ܒܚܵܕ̄ ܚܝܼܵܠ ܘܒܚܵܕ̄ ܚܘܼܫܵܒܼ. 11 ܣܵܒܵܒ ܕܦܸܫܠܹܐ ܡܘܼܕܸܥܝܵܐ ܐܸܠܝܼ ܒܵܗ̄ܣܵܘܟܼܘܿܢ: ܐܵܚܘܿܢܘܵܬܝܼ̈: ܡܼܢ ܒܲܝܬܵܐ ܕܟܠܵܐܹܐ: ܕܡܲܩܲܪܵܨܘܼܝܵܬܹܐ ܐܝܼܬ 12 ܓܵܘܵܘܟܼܘܿܢ. ܝܲܥܢܵܐ ܐܵܗܵܐ ܒܹܐܡܵܪܵܐ ܝܘܸܢ: ܕܟܠ ܚܵܕ̄ ܡܸܢܵܘܟܼܘܿܢ ܟܹܐ ܐܵܡܸܪ: ܐܵܢܵܐ ܕܦܵܘܠܘܿܣ ܝܘܸܢ: ܘܐܵܢܵܐ ܕܐܵܦܲܠܘܿ: ܘܐܵܢܵܐ ܕܟܹܐܦܵܐ: ܘܐܵܢܵܐ ܕܡܫܝܼܚܵܐ. 13 ܦܘܼܠܝܼܵܐ ܝܠܹܐ ܡܫܝܼܚܵܐ: ܝܲܢ ܦܵܘܠܘܿܣ ܦܸܫܠܹܐ ܙܩܝܼܦܵܐ ܡܒܵܕܠܵܘܟܼܘܿܢ: ܝܲܢ ܒܫܸܡܹܗ ܕܦܵܘܠܘܿܣ ܥܡܸܕܠܵܘܟܼܘܿܢ: 14 ܫܵܟܘܿܪܹܐ ܝܘܸܢ ܠܐܲܠܵܗܵܐ: ܕܠܐܢܵܫܵܐ ܡܸܢܵܘܟܼܘܿܢ ܠܵܐ ܡܘܼܥܡܸܕܠܝܼ: ܐܸܠܵܐ ܐܸܢ ܠܩܪܝܼܣܦܘܿܣ ܘܠܓܵܐܝܘܿܣ: 15 ܕܐܢܵܫܵܐ ܠܵܐ ܐܵܡܸܪ: ܕܒܫܸܡܵܐ ܕܓܵܢܝܼ ܡܘܼܥܡܸܕܠܝܼ. 16 ܘܡܘܼܥܡܸܕܠܝܼ ܐܘܼܦ ܠܒܲܝܬܹܗ ܕܐܸܣܛܲܦܵܢܲܐ. ܡܸܕܪܹܐ ܠܹܐ ܝܘܸܢ ܒܝܼܕܲܥܝܵܐ ܐܸܢ ܠܐܢܵܫܵܐ ܐܚܹܪ̄ܢܵܐ ܡܘܼܥܡܸܕܠܝܼ. 17 ܣܵܒܵܒ ܠܵܐ ܫܘܼܕܪܸܢܹܐ ܡܫܝܼܚܵܐ ܠܡܲܥܡܘܼܕܹܐ: ܐܸܠܵܐ ܠܡܲܫܚܘܼܕܹܐ: ܠܵܐ ܒܥܵܩܸܠܕܵܪܘܼܬܵܐ ܕܗܹܡܸܙܡܵܢܹ̈ܐ: ܕܠܵܐ ܦܵܝܸܫ ܒܛܝܼܠܵܐ ܙܩܝܼܦܹܗ ܕܡܫܝܼܚܵܐ. 18 ܣܵܒܵܒ ܗܹܡܸܙܡܵܢ ܕܙܩܝܼܦܵܐ ܠܐܵܢܝܼ ܕܝܼܢܵܐ ܒܸܬܠܵܩܵܐ ܐܲܗܡܲܩܘܼܬܵܐ ܝܠܵܐ: ܐܝܼܢܵܐ ܐܸܠܲܢ ܕܝܼܘܵܚ ܒܸܚܵܝܵܐ ܚܲܝܠܵܐ ܕܐܲܠܵܗܵܐ ܝܠܵܐ. 19 ܣܵܒܵܒ ܕܟܬܝܼܒܼܵܐ ܝܠܹܐ: ܒܸܬ ܬܵܠܩܸܢ ܥܵܩܸܠܕܵܪܘܼܬܵܐ ܕܥܵܩܸܠܕܵܪܹ̈ܐ: ܘܒܸܬ ܒܵܛܠܸܢ ܦܲܪܡܵܝܬܵܐ ܕܦܲܪ̈ܡܝܼܵܢܹܐ. 20 ܐܲܝܟܵܐ ܝܠܹܐ ܥܵܩܸܠܕܵܕ: ܐܲܝܟܵܐ ܝܠܹܐ ܣܵܦܪܵܐ: ܐܲܝܟܵܐ ܝܠܹܐ ܕܵܪܫܵܢܵܐ ܕܐܵܗܵܐ ܥܵܠܡܵܐ: ܗܵܐ: ܐܲܠܵܗܵܐ ܠܵܐ ܥܒܼܝܼܕܵܠܹܐ ܢܲܙܢܘܼܬܵܐ ܥܵܩܸܠܕܵܪܘܼܬܵܐ ܕܐܵܗܵܐ ܥܵܠܡܵܐ: 21 ܣܵܒܵܒ ܕܟܲܕ ܒܥܵܩܸܠܕܵܪܘܼܬܵܐ ܠܵܐ ܝܕܸܥܠܹܐ ܠܐܲܠܵܗܵܐ: ܒܣܸܡܠܵܐ ܠܹܐ ܐܲܠܵܗܵܐ ܕܒܢܲܙܢܘܼܬܵܐ ܕܡܲܟܪܲܙܬܵܐ ܡܲܚܹܐ ܠܐܵܢܝܼ ܕܗܲܡܸܢܝܼ. 22 ܣܵܒܵܒ ܝܗ̄ܘܼܕܵܝܹ̈ܐ ܢܝܼܫܲܢܩܹ̈ܐ ܟܹܐ ܛܵܠܒܝܼ: ܘܝܵܘܢܵܝܹ̈ܐ ܠܥܵܩܸܠܕܵܪܘܼܬܵܐ ܟܹܐ ܛܵܥܝܼ. 23 ܐܝܼܢܵܐ ܐܲܚܢܲܢ ܟܹܐ ܡܲܟܪܸܙܵܚ ܡܫܝܼܚܵܐ ܡܸܚܝܵܐ ܠܙܩܝܼܦܵܐ: ܬܘܼܪܩܵܠܵܐ ܠܝܗ̄ܘܼܕܵܝܹ̈ܐ: ܘܠܝܵܘܢܵܝܹ̈ܐ ܢܲܙܵܢܘܼܬܵܐ: 24 ܐܝܼܢܵܐ ܠܐܵܢܝܼ ܕܝܼܢܵܐ ܩܸܪܝܹܐ: ܝܗ̄ܘܼܕܵܝܹ̈ܐ ܘܝܵܘܢܵܝܹ̈ܐ: ܡܫܝܼܚܵܐ ܚܲܝܠܵܐ ܕܐܲܠܵܗܵܐ ܘܥܵܩܸܠܕܵܪܘܼܬܹܗ ܕܐܲܠܵܗܵܐ. 25 ܣܵܒܵܒ ܢܲܙܵܢܘܼܬܹܗ ܕܐܲܠܵܗܵܐ ܥܵܩܸܠܕܵܪ ܝܼܠܵܐ ܡܼܢ ܒܢܲܝ̈ܢܵܫܵܐ: ܘܙܲܒܘܼܢܘܼܬܹܗ ܕܐܲܠܵܗܵܐ ܚܲܝܠܵܢܬܵܐ ܝܠܵܐ ܡܼܢ ܒܢܲܝ̈ܢܵܫܵܐ. 26 ܣܵܒܵܒ ܚܙܹܡܘܿܢ ܩܪܵܝܬܵܘܟܼܘܿܢ: ܐܵܚܘܿܢܘܵܬܝܼ̈: ܕܠܵܐ ܪܵܒܵܐ ܥܵܩܸܠܕܵܪܹ̈ܐ ܒܒܸܣܪܵܐ: ܘܠܵܐ ܪܵܒܵܐ ܚܲܝܠܵܢܹ̈ܐ: ܘܠܵܐ ܪܵܒܵܐ ܡܲܥܩܘܼܠܹ̈ܐ: 27 ܐܸܠܵܐ ܐܲܠܵܗܵܐ ܓܘܼܒܹܠܹܐ ܠܢܲܙܵܢܗܹܐ ܕܥܵܠܡܵܐ ܕܡܲܢܚܸܦ ܠܚܲܝܠܵܢܹ̈ܐ: 28 ܘܐܲܠܵܗܵܐ ܓܘܼܒܹܠܹܐ ܠܐܵܢܝܼ ܕܐܘܼܓܼܵܓܼܵܝ ܒܵܨܘܿܪܬܵܐ ܝܠܵܐ ܒܥܵܠܡܵܐ: ܘܠܡܘܼܣ̈ܠܝܹܐ: ܘܠܐܵܢܝܼ ܕܠܹܐ ܝܢܵܐ: ܕܒܵܛܸܠ ܠܐܵܢܝܼ ܕܝܼܢܵܐ: 29 ܕܟܘܼ ܒܸܣܪܵܐ ܠܵܐ ܥܵܒܸܕ ܫܘܼܒܼܗܵܪܵܐ ܩܵܕ̄ܡ ܐܲܠܵܗܵܐ. 30 ܐܝܼܢܵܐ ܐܵܚܬܘܿܢ ܡܸܢܹܗ ܝܬܘܿܢ ܒܝܼܫܘܿܥ ܡܫܝܼܚܵܐ: ܗܿܘ ܕܗ̄ܘܹܠܹܐ ܐܸܠܲܢ ܥܵܩܸܠܕܵܪܘܼܬܵܐ ܡܼܢ ܐܲܠܵܗܵܐ: ܘܙܲܕܝܼܩܘܪܬܵܐ: ܘܩܲܕܝܼܫܘܼܬܵܐ: ܘܦܘܼܪܩܵܢܵܐ: 31 ܗܲܕܟܼܵܐ: ܐܲܝܟ ܕܝܼܠܹܐ ܟܬܝܼܒܼܵܐ ܕܗܿܘ ܕܥܵܒܸܕ ܫܘܼܒܼܗܵܪܵܐ: ܒܡܵܪܝܵܐ ܥܵܒܸܕ ܫܘܼܒܼܗܵܪܵܐ.

 

ܩܦܠܐܘܢ: ܒ

1 ܘܐܵܢܵܐ: ܐܵܚܘܿܢܘܵܬܝܪ̈: ܟܲܕ ܐܬܸܠܝܼ ܠܟܸܣܠܵܘܟܼܘܿܢ: ܠܵܐ ܐܬܸܠܝܼ ܒܗܲܡܙܲܡܬܵܐ ܓܘܼܪܬܵܐ ܝܲܢ ܒܥܵܩܸܠܕܵܪܘܼܬܵܐ: ܡܲܫܚܘܼܕܹܐ ܐܸܠܵܘܟܼܘܿܢ ܣܸܪ ܕܐܲܠܵܗܵܐ. 2 ܣܵܒܵܒ ܕܸܢܝܼ ܕܠܵܐ ܝܲܕܥܸܢ ܓܵܘܵܘܟܼܘܿܢ ܡܸܢܕܝܼ: ܫܒܼܘܿܩ ܡܼܢ ܠܝܼܫܘܿܥ ܡܫܝܼܚܵܐ: ܐܘܼܦ ܐܸܠܹܗ ܡܸܚܝܵܐ ܠܙܩܝܼܦܵܐ. 3 ܘܐܵܢܵܐ ܒܙܲܒܘܼܢܘܼܬܵܐ ܘܒܙܕܘܼܥܬܵܐ ܘܒܪ̈ܬܪܲܬܬܵܐ ܪܠܵܒܵܐ ܗ̄ܘܹܠܝܼ ܠܟܸܣܠܵܘܟܼܘܿܢ. 4 ܘܗܲܡܙܲܡܬܝܼ ܘܡܲܟܪܲܙܬܝܼ ܠܹܐ ܗ̄ܘܵܘ ܒܥܒܼܵܕܬܵܐ ܠܗܲܡܘܼܢܹܐ ܒܗܹܡܸܙܡܵܢܹ̈ܐ ܕܥܵܩܸܠܕܵܪܘܼܬܵܐ: ܐܸܠܵܐ ܒܡܲܕܵܥܝܬܵܐ ܕܪܘܼܚܵܐ ܘܕܚܲܝܠܵܐ: 5 ܘܠܵܐ ܗܵܘܝܵܐ ܗܲܝܡܵܢܘܼܬܵܘܟܼܘܿܢ ܒܥܵܩܸܠܕܵܪܘܼܬܵܐ ܕܒܢܲܝ̈ܢܵܫܵܐ: ܐܸܠܵܐ ܒܚܲܝܠܵܐ ܕܐܲܠܵܗܵܐ. 6 ܐܝܼܢܵܐ ܥܵܩܸܠܕܵܪܘܼܬܵܐ ܗܲܡܙܘܼܡܹܐ ܝܘܵܚ ܓܵܘܵܐ. ܕܟܵܡܝܼܠܹ̈ܐ: ܐܝܼܢܵܐ ܠܵܐ ܥܵܩܸܠܕܵܪܘܼܬܵܐ ܕܐܵܗܵܐ ܥܵܠܡܵܐ: ܐܘܼܦ ܠܵܐ ܕܗܵܟܝܼܡܹ̈ܐ ܕܐܵܗܵܐ ܥܵܠܡܵܐ ܕܦܵܝܸܫܝܼ ܒܛܝܼܠܹܐ: 7 ܐܸܠܵܐ ܗܲܡܙܘܼܡܹܐ ܝܘܵܚ ܥܵܩܸܠܕܵܪܘܼܬܹܗ ܕܐܲܠܵܗܵܐ ܒܣܸܪ: ܗܿܝ ܕܡܟܘܼܣܝܼܬܵܐ ܗ̄ܘܵܐ: ܕܩܵܕ̄ܡܵܝܬܵܐ ܦܪܝܼܫܵܠܹܐ ܐܲܠܵܗܵܐ ܡܼܢ ܩܵܕ̄ܡ ܥܵܠܡܵܐ ܠܚܸܩܪܵܐ ܕܝܸܢ: 8 ܗܿܝ ܕܠܵܐ ܕܚܵܕ̄ ܡܼܢ ܗܲܟܝܼܡܹ̈ܐ ܕܐܵܗܵܐ ܥܵܠܡܵܐ ܝܕܸܥܝܵܠܹܐ: ܣܵܒܵܒ ܐܸܢ ܗܵܘܝܼ ܗ̄ܘܵܘ ܝܕܸܥܝܘܼܗܿ: ܠܹܐ ܙܵܩܦܝܼ ܗ̄ܘܵܘ ܠܡܵܪܵܐ ܕܬܸܫܒܘܿܚܬܵܐ. 9 ܐܸܠܵܐ: ܐܲܝܟ ܕܝܼܠܹܐ ܟܬܝܼܒܼܵܐ: ܐܵܢܝܼ ܕܥܲܝܢܵܐ ܠܵܐ ܚܙܸܠܵܐ: ܘܢܵܬܵܐ ܠܵܐ ܫܡܸܥܠܵܐ: ܘܓܵܘ ܠܸܒܵܐ ܕܒܲܪܢܵܫܵܐ ܠܵܐ ܐܣܸܩܠܹܐ: ܟܠܵܝ ܡܸܢܕܝܼܵܢܵܐ ܕܗܘܼܕܸܪܹܐ ܐܲܠܵܗܵܐ ܠܐܵܢܝܼ ܕܡܲܚܸܒܝܼ ܠܹܗ. 10 ܐܝܼܢܵܐ ܐܸܠܲܢ ܓܠܹܠܹܐ ܐܲܠܵܗܵܐ ܒܪܘܼܚܹܗ: ܣܵܒܵܒ ܪܘܼܚܵܐ ܟܠ ܡܸܢܕܝܼ ܟܹܐ ܬܲܦܬܸܫ: ܐܘܼܦ ܥܘܼܡܩܹ̈ܐ ܕܐܲܠܵܗܵܐ. 11 ܣܵܒܵܒ ܐܲܝܢܝܼ ܒܲܪܢܵܫܵܐ ܟܹܐ ܝܲܕܸܥ ܡܸܢܕܝܼܵܢܹ̈ܐ ܕܒܒܲܪܢܵܫܵܐ: ܫܒܼܘܿܩ ܡܼܢ ܪܘܼܚܹܗ ܕܒܲܪܢܵܫܵܐ ܕܝܼܠܵܐ ܓܵܘܹܗ: ܗܲܕܟܼܵܐ ܐܘܼܦ ܡܸܢܕܝܼܵܢܹ̈ܐ ܕܒܲܐܠܵܗܵܐ ܐܢܵܫܵܐ ܠܹܐ ܝܲܕܸܥ: ܐܸܠܵܐ ܪܘܼܚܹܗ ܕܐܲܠܵܗܵܐ. 12 ܐܝܼܢܵܐ ܐܲܚܢܲܢ ܪܘܼܚܵܐ ܕܥܵܠܡܵܐ ܠܵܐ ܩܘܼܒܸܠܲܢ: ܐܸܠܵܐ ܪܘܼܚܵܐ ܕܡܼܢ ܐܲܠܵܗܵܐ: ܕܝܲܕܥܵܚ ܚܲܠܲܥܬܹ̈ܐ ܕܦܸܫܠܘܿܢ ܝܘܼܗ̄ܒܹܐ ܐܸܠܲܢ ܡܼܢ ܐܲܠܵܗܵܐ: 13 ܐܵܢܝܼܕܐܘܼܦ ܗܲܡܙܘܼܡܹܐ ܝܘܵܚ: ܠܵܐ ܒܗܹܡܸܙܡܵܢܹ̈ܐ ܡܘܼܠܦܹܐ ܒܥܵܠܩܸܕܵܪܘܼܬܵܐ ܕܒܢܲܝ̈ܢܵܫܵܐ: ܐܸܠܵܐ ܡܘܼܠܦܹܐ ܒܪܘܼܚܵܐ ܕܩܘܼܕܫܵܐ: ܘܡܲܕܒܼܘܼܩܹܐ ܝܘܵܚ ܡܸܢܕܝܼܵܢܹ̈ܐ ܪ̈ܘܼܚܵܢܹܐ ܥܲܡ ܪܘܼܚܵܢܹܐ. 14 ܣܵܒܵܒ ܒܲܪܢܵܫܵܐ ܕܒܲܐܨܠܵܐ ܠܹܐ ܩܵܒܸܿܠ ܡܸܢܕܝܼܵܢܹ̈ܐ ܕܪܘܼܚܵܐ ܕܐܲܠܵܗܵܐ: ܣܵܒܵܒ ܢܲܙܵܢܘܼܬܵܐ ܝܢܵܐ ܐܸܠܹܗ: ܘܠܹܐ ܡܵܨܸܐ ܠܝܼܕܲܥܝܵܝ: ܣܵܒܵܒ ܕܒܪܘܼܚܵܐ ܟܹܐ ܦܵܝܸܫ ܕܝܼܢܹܐ. 15 ܐܝܼܢܵܐ ܪܘܼܚܵܢܵܐ ܟܠ ܡܸܢܕܝܼ ܟܹܐ ܕܵܝܸܢ: ܘܗܿܘ ܡܼܢ ܐܢܵܫܵܐ ܠܹܐ ܦܵܝܸܫ ܕܝܼܢܵܐ. 16 ܣܵܒܵܒ ܡܵܢܝܼ ܝܕܸܥܝܵܐ ܝܠܹܐ ܚܵܝܼܠܹܗ ܕܡܵܪܝܵܐ: ܕܡܵܠܸܦ ܠܹܗ: ܐܝܼܢܵܐ ܐܲܚܢܲܢ ܚܝܼܵܠ ܕܡܫܝܼܚܵܐ ܐܝܼܬ ܠܲܢ.

 

ܩܦܠܐܘܢ: ܓ

1 ܘܐܵܢܵܐ: ܐܵܚܘܿܢܘܵܬܝܼ̈: ܠܵܐ ܡܨܸܠܝܼ ܕܗܲܡܙܸܡܸܢ ܥܲܡܵܘܟܼܘܿܢ ܐܲܝܟ ܕܥܲܡ ܪ̈ܘܼܚܵܢܹܐ: ܐܸܠܵܐ ܐܲܝܟ ܕܥܲܡ ܦܲܓܼܪܵܢܹ̈ܐ: ܘܐܲܝܟ ܕܠܝܲܠܘܼܕܹ̈ܐ ܒܡܫܝܼܚܵܐ. 2 ܚܲܠܒܼܵܐ ܩܲܡ ܝܵܗܒܸܢܵܘܟܼܘܿܢ: ܘܠܵܐ ܡܹܐܟܼܘܼܠܬܵܐ: ܣܵܒܵܒ ܗܹܫ ܠܹܐ ܡܵܨܝܼܬܘܿܢ ܗ̄ܘܵܘ: ܐܸܠܵܐ ܐܘܼܦ ܐܵܕܝܼܵܐ ܠܹܐ ܡܵܨܝܼܬܘܿܢ. 3 ܣܵܒܵܒ ܗܹܫ ܦܲܓܼܪܵܢܹ̈ܐ ܝܬܘܿܢ: ܣܵܒܵܒ ܟܲܕ ܐܝܼܬ ܓܵܘܵܘܟܼܘܿܢ ܒܲܚܸܠܵܢܘܼܬܵܐ: ܘܡܲܩܲܪܵܨܘܼܬܵܐ: ܘܕܘܼܒܵܪ̈ܘܼܝܵܬܹܐ: ܠܹܐ ܝܬܘܿܢ ܦܲܓܼܪܵܢܹ̈ܐ ܘܐܲܝܟ ܒܲܪܢܵܫܵܐ ܒܸܚܕܵܪܵܐ: 4 ܣܵܒܵܒ ܐܝܼܡܲܢ ܕܐܵܡܸܪ ܚܵܕ̄: ܐܵܢܵܐ ܕܦܵܘܠܘܿܣ ܝܼܘܸܢ: ܘܐܚܹܪ̄ܢܵܐ: ܐܵܢܵܐ ܕܐܵܦܲܠܘܿ ܝܘܸܢ: ܠܹܐ ܝܬܘܿܢ ܐܢܵܫܹ̈ܐ: 5 ܒܲܣ ܡܵܢܝܼ ܝܠܹܐ ܐܵܦܲܠܘܿ: ܘܡܵܢܝܼ ܝܠܹܐ ܦܵܘܠܘܿܣ: ܐܸܠܵܐ ܚܸܠܡܲܬܟܵܪܹ̈ܐ ܕܒܐܝܲܕܵܝ̈ ܗܘܼܡܸܢܵܘܟܼܘܿܢ: ܘܠܟܠ ܚܵܕ̄ ܐܲܝܟ ܕܝܸܗܒܸܠܹܐ ܐܸܠܵܐ ܡܵܪܝܵܐ. 6 ܐܵܢܵܐ ܢܨܸܒܼܠܝܼ: ܘܐܵܦܲܠܘܿ ܡܘܼܫܬܸܠܹܐ: ܐܸܠܵܐ ܐܲܠܵܗܵܐ ܓܘܼܪܘܸܣܠܹܐ. 7 ܒܲܣ ܠܵܐ ܗܿܘ ܕܢܵܨܸܒܼ ܡܸܢܕܝܼ ܝܠܹܐ: ܘܠܵܐ ܗܿܘ ܕܡܲܫܬܹܐ: ܐܸܠܵܐ ܐܲܠܵܗܵܐ ܕܟܹܐ 8 ܓܲܪܘܸܣ. ܐܝܼܢܵܐ ܗܿܘ ܕܢܵܨܸܒܼ: ܘܗܿܘ ܕܡܲܫܬܹܐ: ܐܸܠܵܐ ܐܲܠܵܗܵܐ ܚܵܕ̄ ܝܼܢܵܐ. ܐܝܼܢܵܐ ܟܠ ܐܢܵܫܵܐ ܒܸܬ ܩܵܒܸܿܠ ܗܵܩܹܗ ܐܲܝܟ ܓܵܦܹܗ. 9 ܣܵܒܵܒ ܥܲܡ ܐܲܠܵܗܵܐ ܒܸܦܠܵܚܵܐ ܝܘܵܚ: ܘܚܲܩܠܵܐ ܕܐܲܠܵܗܵܐ ܘܒܸܢܝܵܢܵܐ ܕܐܲܠܵܗܵܐ ܐܲܚܬܘܿܢ ܝܼܬܘܿܢ. 10 ܐܲܝܟ ܫܵܦܵܩܲܬ ܕܐܲܠܵܗܵܐ ܕܦܸܫܠܵܐ ܝܸܗܒܸܠܬܵܐ ܐܸܠܝܼ: ܡܘܼܬܸܒܼܠܝܼ ܒܸܢܝܲܬ ܐܲܝܟ ܡܸܥܡܵܪ ܥܵܩܸܠܕܵܪ: ܘܐܚܹܪ̄ܢܵܐ ܒܸܒܢܵܝܵܐ ܝܠܹܐ ܥܲܠܘܼܗܿ. ܐܝܼܢܵܐ ܟܠ ܐܢܵܫܵܐ ܚܵܙܹܐ ܕܵܐܟܼܝܼ ܒܸܒܢܵܝܵܐ ܝܠܹܐ ܥܲܠܘܼܗܿ. 11 ܣܵܒܵܒ ܕܒܸܢܝܲܬ ܐܚܹܪ̄ܬܵܐ: ܫܒܼܘܿܩ ܡܼܢ ܐܵܗܵܐ ܕܡܘܼܬܸܒܼܬܵܐ ܝܠܵܐ: ܐܢܵܫܵܐ ܠܹܐ ܡܵܨܹܐ ܠܡܲܬܘܼܒܹܐ: ܕܝܼܠܵܐ ܝܼܫܘܿܥ ܡܫܝܼܚܵܐ. 12 ܘܐܸܢ ܐܢܵܫܵܐ ܒܵܢܹܐ ܥܲܠ ܕܐܵܗܵܐ ܒܸܢܝܲܬ: ܕܲܗܒܼܵܐ: ܝܲܢ ܣܹܐܡܵܐ: ܝܲܢ ܟܹܐܦܹ̈ܐ ܛܝܼܡܵܢܹ̈ܐ: ܝܲܢ ܩܲܝܣܵܐ: ܝܲܢ ܓܸܠܵܐ: ܝܲܢ ܟܘܼܠܵܫ: 13 ܦܘܼܠܚܵܢܵܐ ܕܟܠ ܐܢܵܫܵܐ ܒܸܬ ܦܵܝܸܫ ܓܸܠܝܵܐ: ܣܵܒܵܒ ܗܿܘ ܝܘܿܡܵܐ ܒܸܬ ܓܵܠܹܐ ܠܹܗ: ܣܵܒܵܒ ܕܦܝܵܫܵܐ ܝܠܹܐ ܓܸܠܝܵܐ ܒܢܘܼܪܵܐ: ܘܦܘܼܠܚܵܢܵܐ ܕܟܠ ܐܢܵܫܵܐ ܕܵܐܟܼܝܼ ܕܝܪܠܹܐ: ܢܘܼܪܵܐ ܒܸܬ ܦܵܪܸܫ ܠܹܗ. 14 ܐܸܢ ܥܲܪܩܸܠ ܦܘܼܠܚܵܢܹܗ ܕܐܢܵܫܵܐ ܗܿܘ ܕܒܸܢܝܵܐ ܝܠܹܐ: ܗܵܩܹܗ ܒܸܬ ܩܵܒܸܿܠ. 15 ܐܸܢ ܝܵܩܸܕ ܦܘܼܠܚܵܢܹܗ ܕܐܢܵܫܵܐ: ܒܸܬ ܩܵܒܸܿܐ ܚܘܼܣܪܵܢܵܐ. ܐܝܼܢܵܐ ܒܓܵܢܹܗ ܒܸܬ ܦܵܪܸܩ: ܐܝܼܢܵܐ ܗܲܕܟܼܵܐ ܐܲܝܟ ܕܡܼܢ ܢܘܼܪܵܐ. 16 ܠܹܐ ܝܬܘܿܢ ܒܝܼܕܲܥܝܵܐ ܕܗܲܝܟܠܹܗ ܕܐܲܠܵܗܵܐ ܝܬܘܿܢ: ܘܪܘܼܚܹܗ ܕܐܲܠܵܗܵܐ ܒܥܡܵܪܵܐ ܝܠܵܐ ܓܵܘܵܘܟܼܘܿܢ: 17 ܐܸܢ ܐܢܵܫܵܐ ܡܲܚܪܸܒܼ ܠܗܲܝܟܠܹܗ ܕܐܲܠܵܗܵܐ: ܒܸܬ ܡܲܚܪܸܒܼ ܠܹܗ ܐܲܠܵܗܵܐ: ܣܵܒܵܒ ܗܲܝܟܠܹܗ ܕܐܲܠܵܗܵܐ ܩܲܕܝܼܫܵܐ ܝܠܹܐ: ܕܝܼܬܘܿܢ ܐܲܚܬܘܿܢ. 18 ܐܢܵܫܵܐ ܠܵܐ ܡܲܚܠܸܛ ܓܵܢܹܗ. ܐܸܢ ܐܢܵܫܵܐ ܚܵܫܸܒܼ ܓܵܘܵܘܟܼܘܿܢ ܕܥܵܩܸܠܕܵܪ ܝܼܠܹܐ ܒܐܵܗܵܐ ܥܵܠܡܵܐ: ܗܵܘܹܐ ܢܲܙܵܢ: ܕܗܵܘܹܐ ܥܵܩܸܠܕܵܪ. 19 ܣܵܒܵܒ ܥܵܩܸܠܕܵܪܘܼܬܹܗ ܕܐܵܗܵܐ ܥܵܠܡܵܐ ܢܲܙܵܢܘܼܬܵܐ ܝܠܵܐ ܠܟܸܣ ܐܲܠܵܗܵܐ: ܣܵܒܵܒ ܕܟܬܝܼܒܼܵܐ ܝܠܹܐ: ܟܹܐ ܕܵܒܸܩ ܠܥܵܩܸܠܕܵܪܹ̈ܐ ܒܝܲܕܘܼܥܘܼܬܵܝ. 20 ܘܡܸܕܪܹܐ: ܡܵܪܝܵܐ ܟܹܐ ܝܲܕܸܥ ܚܘܼܫܵܒܹ̈ܐ ܕܥܵܩܸܠܕܵܪܹ̈ܐ: ܕܒܵܛܝܼܵܠܹܐ ܝܢܵܐ. 21 ܣܵܒܵܒ ܕܐܵܗܵܐ: ܐܢܵܫܵܐ ܠܵܐ ܥܵܒܼܕ ܫܘܼܒܼܗܵܪܵܐ ܒܒܢܲܝ̈ܢܵܫܵܐ: ܣܵܒܵܒ ܟܠ ܡܸܢܕܝܼ ܕܝܼܵܘܟܼܘܿܢ ܝܼܠܹܐ: 22 ܐܸܢ ܦܵܘܠܘܿܣ: ܘܐܸܢ ܐܵܦܲܠܘܿ: ܘܐܸܢ ܟܹܐܦܵܐ: ܘܐܸܢ ܥܵܠܡܵܐ: ܘܐܸܢ ܚܲܝܹ̈ܐ: ܘܐܸܢ ܡܵܘܬܵܐ: ܘܐܸܢ ܡܸܢܕܝܼܵܢܹ̈ܐ ܕܐܵܕܝܼܵܐ: ܘܐܸܢ ܕܒܸܬ ܗܵܘܝܼ: ܟܠ ܡܸܢܕܝܼ ܕܝܼܵܘܟܼܘܿܢ ܝܼܠܹܐ: 23 ܘܐܲܚܬܘܿܢ ܕܡܫܝܼܚܵܐ ܝܬܘܿܢ: ܘܡܫܝܼܚܵܐ ܐܲܠܵܗܵܐ.

 

ܩܦܠܐܘܢ: ܕ

1 ܐܢܵܫܵܐ ܗܲܕܟܼܵܐ ܚܵܫܸܒܼ ܒܵܗ̄ܣܲܢ: ܐܲܝܟ ܚܸܠܡܲܬܟܵܪܹ̈ܐ ܕܡܫܝܼܚܵܐ: ܘܢܵܙܝܼܪܹ̈ܐ ܕܣܸܪܹ̈ܐ ܕܐܲܠܵܗܵܐ. 2 ܠܐܲܟܼܵܐ ܗܲܪ ܟܹܐ ܦܵܝܫܵܐ ܛܠܝܼܒܬܵܐ ܡܼܢ ܢܵܙܝܼܪܹ̈ܐ: ܕܐܢܵܫܵܐ ܡܗܘܼܡܢܵܐ ܦܵܝܸܫ ܡܫ̄ܟܼܝܼܚܵܐ. 3 ܐܝܼܢܵܐ ܐܵܗܵܐ ܡܸܢܕܝܼ ܪܵܒܵܐ ܙܥܘܿܪܵܐ ܝܠܹܐ ܠܟܸܣܠܝܼ ܕܦܵܝܫܸܢ ܕܝܼܢܵܐ ܡܸܢܵܘܟܼܘܿܢ: ܝܲܢ ܡܼܢ ܒܲܪܢܵܫܵܐ: ܐܸܠܵܐ ܐܘܼܦ ܐܵܢܵܐ ܓܵܢܝܼ ܠܹܐ ܝܘܸܢ ܒܸܕܝܵܢܵܐ. 4 ܣܵܒܵܒ ܥܲܠ ܓܵܢܝܼ ܟܼܘ ܡܸܢܕܝܼ ܠܹܐ ܝܘܸܢ ܒܝܼܕܲܥܝܵܐ: ܐܸܠܵܐ ܒܐܵܗܵܐ ܠܵܐ ܦܸܫܠܝܼ ܡܘܼܟܫܸܛܵܐ: ܣܵܒܵܒ ܕܕܲܝܵܢܝܼ ܡܵܪܝܵܐ ܝܠܹܐ. 5 ܣܵܒܵܒ ܕܐܵܗܵܐ ܠܵܐ ܗܵܘܝܼܬܘܿܢ ܒܸܕܝܵܢܵܐ ܡܸܢܕܝܼ ܡܩܵܕ̄ܡ ܙܲܒܼܢܵܐ: ܗܲܠ ܕܐܵܬܹܐ ܡܵܪܝܵܐ: ܕܒܸܬ ܒܲܗ̄ܪܸܢ ܡܸܢܟܼܝܼܵܢܹ̈ܐ ܛܸܫܝܹ̈ܐ ܕܚܘܼܒܼܝܵܐ: ܘܒܸܬ ܓܵܠܹܐ ܚܘܼܫܵܒܹ̈ܐ ܕܠܸܒܵܘܵܬܹ̈ܐ: ܘܗܿܝܓܵܗ ܒܸܬ ܗܵܘܹܐ ܚܸܩܪܵܐ ܠܟܠ ܐܢܵܫܵܐ ܡܼܢ ܐܲܠܵܗܵܐ.

6 ܘܐܲܢܸܐ: ܐܵܚܘܿܢܘܵܬܝܼ̈: ܒܚܵܬܸܪ ܕܝܼܵܘܟܼܘܿܢ ܡܘܼܬܸܒܼܠܝܼ ܒܛܘܼܦܣܵܐ ܕܝܼܝܼ ܘܕܵܐܦܲܠܘܿ: ܕܒܥܸܢ ܝܵܠܦܝܼܬܘܿܢ ܕܠܵܐ ܚܵܫܒܼܝܼܬܘܿܢ ܡܸܢܕܝܼ ܙܵܘܕܵܐ ܡܼܢ ܕܗܿܘ ܕܝܼܠܹܐ ܟܬܝܼܒܼܵܐ: ܕܐܢܵܫܵܐ ܥܲܠ ܚܲܒܼܪܹܗ ܠܵܐܡܵܪܸܡ ܓܵܢܹܗ ܒܚܵܬܸܪ ܕܐܚܹܪ̄ܢܵܐ. 7 ܣܵܒܵܒ ܡܵܢܝܼ ܩܲܡ ܦܵܪܸܫ ܠܘܼܟ: ܝܲܢ ܡܘܼܕܝܼ ܐܝܼܬ ܠܘܼܟ ܕܠܵܐ ܩܘܼܒܸܠܘܼܟ: ܘܐܸܢ ܩܘܼܒܸܠܘܼܟ: ܩܵܡܘܿܕܝܼ ܒܸܥܒܼܵܕܵܐ ܝܘܸܬ ܫܘܼܒܼܗܵܪܵܐ ܐܲܝܟ ܕܠܵܐ ܩܘܼܒܸܠܘܼܟ: 8 ܡܼܢ ܓܲܠܕܹܐ ܣܒܸܥܠܵܘܟܼܘܿܢ: ܡܼܢ ܓܲܠܕܹܐ ܗ̄ܘܹܠܵܘܟܼܘܿܢ ܕܵܘܠܲܬܡܲܢܕ: ܘܒܹܐ ܕܸܢ ܥܒܤܕܠܵܘܟܼܘܿܢ ܡܲܠܟܘܼܬܵܐ. ܘܛܘܼܒܼܵܐ ܕܥܵܒܼܕܝܼܬܘܿܢ ܗ̄ܘܵܘ ܡܲܠܟܘܼܬܵܐ: ܕܐܘܼܦ ܐܲܚܢܲܢ ܥܵܒܼܕܵܚ ܗ̄ܘܵܘ ܡܲܠܟܘܼܬܵܐ ܥܲܡܵܘܟܼܘܿܢ. 9 ܣܵܒܵܒ ܒܸܚܫܵܒܪܵܐ ܝܘܸܢ: ܕܐܸܠܲܢ ܫܠܝܼܚܹ̈ܐ ܐܚܵܪ̈ܝܹܐ ܡܘܼܬܸܒܼܠܹܐ ܐܲܠܵܗܵܐ ܐܲܝܟ ܕܠܡܵܘܬܵܐ: ܕܗ̄ܘܹܠܲܢ ܬܵܡܵܫܵܐ ܠܥܵܠܡܵܐ: ܠܡܲܠܲܐܟܹ̈ܐ: ܘܠܒܢܲܝ̈ܢܵܫܵܐ. 10 ܐܲܚܢܲܢ ܢܲܙܲܢܹ̈ܐ ܝܘܵܚ ܒܚܵܬܸܪ ܕܡܫܝܼܚܵܐ: ܐܝܼܢܵܐ ܐܲܚܬܘܿܢ ܥܵܩܸܠܕܵܪܹ̈ܐ ܒܡܫܝܼܚܵܐ: ܐܲܚܢܲܢ ܙܲܒܪܘܼܢܹ̈ܐ: ܘܐܲܚܬܘܿܢ ܚܲܝܠܵܢܹ̈ܐ: ܐܲܚܬܘܿܢ ܚܩܝܼܪܹܐ ܝܬܘܿܢ: ܘܐܲܚܢܲܢ ܡܘܼܒܸܨܪܹܐ. 11 ܗܲܠ ܐܵܗܵܐ ܣܵܥܲܬ ܟܦܝܼܢܹܐ ܝܘܵܚ: ܘܨܸܗ̄ܝܹܐ ܝܘܵܚ: ܘܫܘܼܠܚܵܝܹ̈ܐ ܝܘܵܚ: ܘܦܝܵܫܵܐ ܝܘܵܚ ܩܘܼܪܦܸܚܹܐ: ܘܒܲܝܬܵܐ ܕܟܠܵܝܵܐ ܠܲܝܬ ܠܲܢ: 12 ܘܒܸܓܸܗ̄ܝܵܐ ܝܘܵܚ ܟܲܕ ܒܸܦܠܵܚܵܐ ܒܐܝܼ̈ܕܵܬܲܢ. ܟܲܕ ܥܵܒܼܕܝܼ ܠܲܢ ܒܸܨܘܼܪ: ܟܹܐ ܒܵܪܟܼܵܚ: ܟܲܕ ܛܵܪܕܝܼ ܠܲܢ: ܟܹܐ ܩܵܒܿܠܵܚ: 13 ܟܵܕ ܨܵܥܪܝܼ ܠܲܢ: ܟܹܐ ܦܲܪܦܸܠܵܚ ܒܝܼܵܝ. ܐܲܝܟ ܙܸܒܠܵܐ ܕܥܵܠܡܵܐ ܗ̄ܘܹܠܲܢ: ܘܡܫܵܝܬܵܐ ܕܟܠ ܐܢܵܫܵܐ: ܗܲܠ ܐܵܕܝܼܵܐ. 14 ܠܹܐ ܝܠܵܐ ܕܡܲܢܚܸܦܸܢܵܘܟܼܘܿܢ ܒܸܟܬܵܒܼܵܐ ܝܘܸܢ ܐܲܢܸܐ: ܐܸܠܵܐ ܐܲܝܟ ܕܠܒܢܘܼܢܹ̈ܐ ܡܘܼܚܸܒܹ̈ܐ ܒܝܼܵܗ̄ܒܼܵܐ ܝܘܸܢ ܢܲܨܝܼܗܲܬ. 15 ܣܵܒܵܒ ܐܵܦܸܢ ܕܗܵܘܝܼ ܠܵܘܟܼܘܿܢ ܪܸܒܘܼ ܪܵܒܝܹܐ ܒܡܫܝܼܚܵܐ: ܐܸܠܵܐ ܠܵܐ ܪܵܒܵܐ ܒܵܒܵܘܵܬܹ̈ܐ: ܣܵܒܵܒ ܕܒܝܼܫܘܿܥ ܡܫܝܼܚܵܐ ܐܵܢܵܐ ܩܲܡ ܡܲܠܸܕܸܢܵܘܟܼܘܿܢ ܒܡܲܫܚܲܕܬܵܐ. 16 ܒܲܣ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ: ܗܵܘܝܼܬܘܿܢ ܕܵܡܝܵܢܹ̈ܐ ܐܸܠܝܼ. 17 ܣܵܒܵܒ ܕܐܵܗܵܐ ܫܘܼܕܸܪܝܼ ܠܟܸܣܠܵܘܟܼܘܿܢ ܠܛܝܼܡܵܬܸܐܘܿܣ: ܕܝܼܠܹܐ ܒܪܘܼܢܝܼ ܡܘܼܚܸܒܵܐ ܘܡܗܘܼܡܢܵܐ ܒܡܵܪܝܵܐ: ܗܿܘ ܒܸܬ ܡܲܕܟܸܪܵܟܼܘܿܢ ܐܘܼ̈ܚܵܬܝܼ ܕܒܡܫܝܼܚܵܐ: ܕܵܐܟܼܝܼ ܕܡܵܠܘܿܦܹܐ ܝܘܸܢ ܒܟܠ ܥܹܕܬܵܐ. 18 ܐܝܼܢܵܐ ܐܲܝܟ ܕܠܹܐ ܝܘܸܢ ܗ̄ܘܵܐ ܒܹܐܬܵܝܵܐ ܠܟܸܣܠܵܘܟܼܘܿܢ: ܚܬܸܪܘܿܢ ܚܵܟܡܵܐ ܐܢܵܫܹ̈ܐ. 19 ܐܸܠܵܐ ܐܸܢ ܡܵܪܝܵܐ ܒܵܣܡܵܐ ܠܹܐ: ܓܲܠܕܹܐ ܒܸܬ ܐܵܬܸܢ ܠܟܸܣܠܵܘܟܼܘܿܢ: ܘܒܸܬ ܝܲܕܥܸܢ ܠܵܐ ܗܹܡܸܙܡܵܢ ܕܐܵܢܝܼ ܕܡܵܪܘܿܡܹܐ ܝܢܵܐ ܓܵܢܵܝ: ܐܸܠܵܐ ܚܲܝܠܵܝ. 20 ܣܵܒܵܒ ܡܲܠܟܘܼܬܹܗ ܕܲܠܵܗܵܐ ܠܹܐ ܝܠܵܐ ܒܗܹܡܸܙܡܵܢ: ܐܸܠܵܐ ܒܚܲܝܠܵܐ. 21 ܕܵܐܟܼܝܼ ܒܵܣܡܵܐ ܠܵܘܟܼܘܿܢ: ܒܚܘܼܛܪܵܐ ܐܵܬܹܢ ܠܟܸܣܠܵܘܟܼܘܿܢ: ܝܲܢ ܒܚܘܼܒܵܐ ܘܒܪܘܼܚܵܐ ܡܵܟܝܼܟܼܬܵܐ:

 

ܩܦܠܐܘܢ: ܗ

1 ܗܲܪ ܦܝܵܫܵܐ ܝܠܵܐ ܫܡܝܼܥܬܵܐ ܓܵܘܵܘܟܼܘܿܢ ܙܵܢܝܘܼܬܵܐ: ܘܐܲܝܟ ܕܐܵܗܵܐ ܙܵܢܝܘܼܬܵܐ ܗܿܝ ܕܠܲܝܬ ܐܘܼܦ ܓܵܘ ܚܲܢܦܹ̈ܐ: ܗܲܠ ܕܓܵܒܸܪ 2 ܐܢܵܫܵܐ ܒܲܟܼܬܵܐ ܕܒܵܒܹܗ. ܘܐܲܚܬܘܿܢ ܚܬܸܪܵܘܟܼܘܿܢ: ܘܠܵܐ ܙܵܘܕܵܐ ܝܬܸܒܼܠܵܘܟܼܘܿܢ ܒܬܵܙܝܼ: ܕܦܵܝܸܫ ܫܩܝܼܠܵܐ ܡܼܢ ܓܵܘܵܘܟܼܘܿܢ ܗܿܘ ܕܦܠܸܚܠܹܐ ܐܵܗܵܐ ܫܘܼܠܵܐ. 3 ܣܵܒܵܒ ܐܵܢܵܐ: ܟܲܕ ܪܸܚܩܵܐ ܝܘܸܢ ܡܸܢܵܘܟܼܘܿܢ ܒܦܲܓܼܪܵܐ: ܘܩܘܼܪܒܵܐ ܐܸܠܵܘܟܼܘܿܢ ܒܪܘܼܚܵܐ: ܡܼܢ ܩܵܕ̄ܡ ܐܵܕܝܼܵܐ ܕܝܼܢܵܐ ܝܘܸܢ ܐܲܝܟ ܩܘܼܪܒܵܐ ܠܗܿܘ ܕܗܲܕܟܼܵܐ ܦܠܸܚܠܹܐ ܐܵܗܵܐ: 4 ܕܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܟܲܕ ܗܵܘܝܼܬܘܿܢ ܓܸܡܥܝܹܐ: ܘܐܵܢܵܐ ܥܲܡܵܘܟܼܘܿܢ ܒܪܘܼܚܵܐ: ܥܲܡ ܚܲܝܠܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: 5 ܣܵܦܝܼܬܘܿܢ ܠܗܿܘ ܕܗܲܕܟܼܵܐ ܠܣܵܛܵܢܵܐ ܠܬܠܵܩܵܐ ܕܦܲܓܼܪܹܗ: ܕܪܘܼܚܵܐ ܚܲܝܵܐ ܒܝܘܿܡܹܗ ܕܡܵܪܲܢ ܝܼܫܘܿܥ. 6 ܠܹܐ ܝܠܹܐ ܨܦܵܝܝܼ ܫܘܼܒܼܗܵܪܵܘܟܼܘܿܢ. ܠܹܐ ܝܬܘܿܢ ܒܝܼܕܲܥܝܵܐ ܕܚܲܟܵܐ ܚܡܝܼܪܵܐ ܟܠܵܗܿ ܓܒܼܝܼܠܬܵܐ ܟܹܐ ܡܲܚܡܸܥ ܠܵܗܿ: 7 ܕܵܟܹܡܘܿܢ ܚܡܝܼܪܵܐ ܥܵܬܝܼܩܵܐ: ܕܗܵܘܝܼܬܘܿܢ ܓܒܼܝܼܠܬܵܐ ܚܲܕܬܵܐ: ܐܲܝܟ ܕܝܼܬܘܿܢ ܦܲܛܝܼܪܵܐ: ܣܵܒܵܒ ܦܸܨܚܵܐ ܕܝܸܢ: ܡܫܝܼܚܵܐ: ܦܸܫܠܹܐ ܦܪܝܼܡܵܐ. 8 ܣܵܒܵܒ ܕܐܵܗܵܐ ܥܵܒܼܕܵܚ ܥܹܐܕܵܐ: ܠܵܐ ܒܚܡܝܼܪܵܐ ܥܵܬܝܼܩܵܐ: ܘܠܵܐ ܒܚܡܝܼܪܵܐ ܕܒܝܼܫܘܼܬܵܐ ܘܕܡܲܪܝܼܪܘܼܬܵܐ: ܐܸܠܵܐ ܒܦܲܛܝܼܪܵܐ ܕܨܦܝܘܼܬܵܐ ܘܬܪܘܼܨܘܼܬܵܐ. 9 ܟܬܸܒܼܠܝܼ ܐܸܠܵܘܟܼܘܿܢ ܒܸܐ ܓܲܪܬܵܐ: ܕܠܵܐ ܚܵܒܼܛܝܼܬܘܿܢ ܥܲܡ ܙܲܢܵܝܹ̈ܐ: 10 ܠܵܐ ܗܲܪ ܥܲܡ ܙܲܢܵܝܹ̈ܐ ܕܐܵܗܵܐ ܥܵܠܡܵܐ: ܝܲܢ ܥܲܡ ܛܲܡܲܥܟܵܪܹ̈ܐ ܝܲܢ ܥܲܡ ܟܵܠܵܘܼܓܹܐ: ܝܲܢ ܥܲܡ ܣܵܓܓܼܕܵܢܹ̈ܐ ܕܨܵܢܲܡܹ̈ܐ: ܣܵܒܵܒ ܐܸܢ ܗܵܕܵܐ: ܘܓܸܒ ܝܼܗ̄ܘܵܐ ܐܸܠܵܘܟܼܘܿܢ ܠܸܦܠܵܛܵܐ ܐܘܼܦ ܡܼܢ ܕܘܼܢܝܹܐ. 11 ܐܝܼܢܵܐ ܐܵܕܝܼܵܐ ܟܬܸܒܼܠܝܼ ܐܸܠܵܘܟܼܘܿܢ ܕܠܵܐ ܚܵܒܼܛܝܼܬܘܿܢ: ܐܸܢ ܐܝܼܬ ܕܦܵܝܸܫ ܩܸܪܝܵܐ ܐܵܚܘܿܢܵܐ ܘܗܵܘܹܐ ܙܲܢܵܝܵܐ: ܝܲܢ ܛܲܡܲܥܟܵܪ: ܝܲܢ ܣܵܓܼܕܵܢܵܐ ܠܨܵܢܵܡܹ̈ܐ: ܝܲܢ ܨܵܥܪܵܢܵܐ: ܝܲܢ ܪܵܘܵܝܵܐ: ܝܲܢ ܟܵܠܘܿܓܼܵܐ: ܥܲܡ ܕܗܿܘ ܕܗܲܕܟܼܵܐ ܝܠܹܐ ܐܘܼܦ ܠܹܐܟܼܵܠܵܐ ܠܲܚܡܵܐ. 12 ܣܵܒܵܒ ܡܵܐ ܠܝܼ ܠܸܕܝܵܢܵܐ ܠܒܲܪ̈ܝܹܐ: ܠܹܐ ܝܬܘܿܢ ܐܲܚܬܘܿܢ ܒܸܕܝܵܢܵܐ ܠܐܵܢܝܼ ܕܝܼܢܵܐ ܓܵܘܵܝܝܼ: 13 ܟܲܕ ܠܒܲܪ̈ܝܹܐ ܐܲܠܵܗܵܐ ܟܹܐ ܕܵܝܸܢ: ܦܵܠܛܘܿܢ ܠܗܿܘ ܒܝܼܫܵܐ ܡܼܢ ܓܵܘܵܘܟܼܘܿܢ.

 

ܩܦܠܐܘܢ: ܘ

1 ܩܲܫܕܘܼܪܹܐ ܝܠܹܐ ܐܢܵܫܵܐ ܡܸܢܵܘܟܼܘܿܢ: ܟܲܕ ܐܝܼܬ ܠܹܗ ܕܝܼܘܵܢ ܥܲܡ ܚܵܕ̄ ܐܚܹܪ̄ܢܵܐ ܕܕܵܝܸܢ ܥܵܘܵܠܹ̈ܐ: ܘܠܵܐ ܩܵܕ̄ܡ ܩܲܕܝܼܫܹ̈ܐ: 2 ܝܲܢ ܠܹܐ ܝܬܘܿܢ ܒܝܼܕܲܥܝܵܐ ܕܩܲܕܝܼܫܹ̈ܐ ܠܥܵܠܡܵܐ ܒܸܬ ܕܵܝܢܝܼ: ܘܐܸܢ ܥܵܠܡܵܐ ܡܸܢܵܘܟܼܘܿܢ ܦܝܵܫܵܐ ܝܠܹܐ ܕܝܼܢܵܐ: ܠܹܐ ܚܵܫܚܝܼܬܘܿܢ ܠܸܕܝܵܢܵܐ ܕܝܼܘܵܢܹ̈ܐ ܕܒܘܼܫ ܙܥܘܿܪܹ̈ܐ: 3 ܠܹܐ ܝܬܘܿܢ ܒܝܼܕܲܥܝܵܐ ܕܠܡܲܠܲܐܟܹ̈ܐ ܒܸܬ ܕܵܝܢܵܚ: ܟܡܵܐ ܙܵܘܕܵܐ ܐܵܢܝܼ ܕ܆ܝܼܢܵܐ ܕܐܵܗܵܐ ܥܵܠܡܵܐ: 4 ܐܸܠܵܐ ܐܸܢ ܐܝܼܬ ܠܵܘܟܼܘܿܢ ܕܝܼܘܵܢ ܥܲܠ ܡܸܢܕܝܼܵܢܹ̈ܐ ܕܥܵܠܡܵܐ: ܠܐܵܢܝܼ ܕܝܼܢܵܐ ܒܵܨܘܿܪܹ̈ܐ ܓܵܘ ܥܹܕܬܵܐ ܡܲܬܒܼܘܿܢ ܠܵܘܟܼܘܿܢ ܒܕ܆ܝܼܘܵܢ. 5 ܐܝܼܢܵܐ ܠܢܚܸܦܬܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܒܲܣ ܠܲܝܬ ܓܵܘܵܘܟܼܘܿܢ ܐܘܼܦ ܠܵܐ ܚܵܕ̄ ܥܵܩܸܠܕܵܪ: ܕܡܵܨܹܐ ܕܵܝܸܢ ܒܸܝܠ ܐܵܚܘܿܢܵܐ ܠܐܵܚܘܿܢܹܗ: 6 ܐܸܠܵܐ ܐܵܚܘܿܢܵܐ ܥܲܡ ܐܵܚܘܿܢܹܗ ܦܝܵܫܵܐ ܝܠܹܐ ܕܝܼܢܵܐ: ܘܐܘܼܦ ܗܿܝ ܩܵܕ̄ܡ ܠܵܐ ܡܗܘܼܡܢܹ̈ܐ: 7 ܒܲܣ ܗܲܪ ܐܝܼܬ ܓܵܘܵܘܟܼܘܿܢ ܓܢܵܗܵܐ ܬܲܡܵܡ: ܕܕܝܼܘܵܢ ܚܵܕ̄ ܥܲܡ ܗܿܘ ܐܚܹܪ̄ܢܵܐ ܐܝܼܬ ܠܵܘܟܼܘܿܢ. ܣܵܒܵܒ ܩܵܡܘܿܕܝܼ ܠܹܐ ܝܬܘܿܢ ܩܵܒܿܘܿܠܹܐ ܙܠܘܼܡܝܵܐ: ܘܩܵܡܘܿܕܝܼ ܠܹܐ ܝܬܘܿܢ ܩܵܒܿܘܿܠܹܐ ܚܘܼܣܵܪܲܬ: 8 ܐܸܠܵܐ ܐܲܚܬܘܿܢ ܒܸܙܠܵܡܵܐ ܝܬܘܿܢ: ܘܒܸܥܒܼܵܕܵܐ ܝܬܘܿܢ ܚܘܼܣܪܲܬ܆ ܐܘܼܦ ܗܿܝ ܠܐܵܚܘܿܢܘܵܬܵܘ̈ܟܼܘܿܢ. 9 ܝܲܢ ܠܹܐ ܝܬܘܿܢ ܒܝܼܕܲܥܝܵܐ: ܕܥܵܘܵܠܹ̈ܐ ܡܲܠܟܘܼܬܹܗ ܕܐܲܠܵܗܵܐ ܠܹܐ ܝܵܪܬܝܼ܆ ܠܵܐ ܚܵܠܛܝܼܬܘܿܢ. ܠܵܐ ܙܲܢܵܝܹ̈ܐ: ܘܠܵܐ ܣܵܓܼܕܵܢܹ̈ܐ ܕܨܵܢܲܡܹ̈ܐ: ܘܠܵܐ ܩܲܗܒܹ̈ܐ: ܘܠܵܐ ܡܘܼܚܪܸ̈ܒܹܐ: ܘܠܵܐ ܕܵܡܟܼܵܢܹ̈ܐ ܥܲܡ ܐܘܼܪ̈ܙܹܐ: 10 ܘܠܵܐ ܛܲܡܵܥܟܵܪܹ̈ܐ: ܘܠܵܐ ܓܸܢܵܒܹ̈ܐ: ܘܠܵܐ ܪܵܘܵܝܹܐ: ܘܠܵܐ ܨܵܥܪܵܢܹ̈ܐ: ܘܠܵܐ ܟܵܠܘܿܓܹܐ: ܐܲܢܹܐ ܡܲܠܟܘܼܬܹܗ ܕܐܲܠܵܗܵܐ ܠܹܐ ܝܵܪܬܝܼ. 11 ܘܗܲܕܟܼܵܐ ܗ̄ܘܵܘ ܐܢܵܫܵܐ ܐܢܵܫܵܐ ܡܸܢܵܘܟܼܘܿܢ: ܐܸܵܐ ܣܚܹܠܵܘܟܼܘܿܢ ܘܦܸܫܠܵܘܟܼܘܿܢ ܡܩܘܼܕܫܹܐ: ܘܦܸܫܠܵܘܟܼܘܿܢ ܡܘܼܟܫܸܛܹܐ ܒܫܸܡܹܗ ܕܡܵܪܲܢ ܝܼܫܘܿܗ ܘܒܪܘܼܚܹܗ ܕܐܲܠܵܗܲܢ. 12 ܟܠ ܡܸܢܕܝܼ ܒܪܸܣܬܘܼܪ ܝܼܠܹܐ ܐܸܠܝܼ: ܐܸܠܵܐ ܟܠ ܠܹܐ ܝܠܹܐ ܡܵܪܹܐ ܦܲܝܪܵܐ ܐܸܠܝܼ. ܟܠ ܡܸܢܕܝܼ ܒܪܲܣܬܘܼܪ ܝܼܠܹܐ ܐܸܠܝܼ: ܐܸܠܵܐ ܥܲܠܝܼ ܐܢܵܫܵܐ ܠܵܐ ܗܵܟܸܡ. 13 ܡܹܐܟܼܘܼܠܬܵܐ ܠܟܸܪ̄ܣܵܐ: ܘܟܹܪ̄ܣܵܐ ܠܡܹܐܟܼܘܼܠܬܵܐ: ܐܝܼܢܵܐ ܐܲܠܵܗܵܐ ܠܐܵܗܵܐ ܘܠܗܿܝ ܒܸܬ ܒܵܛܸܠ. ܘܦܲܓܼܪܵܐ ܠܹܐ ܝܠܹܐ ܠܙܵܢܝܘܼܬܵܐ: ܐܸܠܵܐ ܠܡܵܪܲܢ: ܘܡܵܪܲܢ ܠܦܲܓܼܪܵܐ. 14 ܘܐܲܠܵܗܵܐ ܐܘܼܦ ܠܡܵܪܲܢ ܡܘܼܩܸܡܠܹܐ: ܘܐܸܠܲܢ ܒܸܬ ܡܲܩܸܡ ܒܚܲܝܠܹܗ. 15 ܠܹܐ ܝܬܘܿܢ ܒܝܼܕܲܥܝܵܐ ܕܦܲܓܼܪܵܘܟܼܘܿܢ ܗܲܕܵܡܹ̈ܐ ܕܡܫܝܼܚܵܐ ܝܢܵܐ: ܒܲܣ ܫܵܩܠܸܢ ܗܲܕܵܡܵܐ ܕܡܫܝܼܚܵܐ ܥܵܒܼܕܸܢܹܗ ܗܲܕܵܡܵܐ ܕܡܫܝܼܚܵܐ ܝܢܵܐ: ܒܲܣ ܫܵܩܸܠܸܢ ܗܲܕܵܡܵܐ ܕܡܫܝܼܚܵܐ ܥܵܒܼܕܸܢܸܗ ܗܲܕܵܡܵܐ ܕܙܵܢܝܼܬܵܐ: ܚܵܣ ܠܝܼ. 16 ܝܲܢ ܠܹܐ ܝܬܘܿܢ ܒܝܼܕܲܥܝܵܐ ܕܗܿܘ ܕܬܲܒܸܥ ܠܙܵܢܝܼܬܵܐ: ܚܵܕ̄ ܦܲܓܼܪܵܐ ܝܠܹܐ: ܣܵܒܵܒ ܒܹܐܡܵܪܵܐ ܝܠܹܐ: ܕܒܸܬ ܗܵܘܝܼ ܬܸܪܘܵܝ ܚܵܕ̄ ܦܲܓܼܪܵܐ. 17 ܐܝܼܢܵܐ ܗܿܘ ܕܬܲܒܸܥ ܠܡܵܪܲܢ: ܚܕܵܐ ܪܘܼܚܵܐ ܝܠܹܐ. 18 ܥܪܘܿܩܘܿܢ ܡܼܢ ܙܵܢܝܘܼܬܵܐ. ܣܵܒܵܒ ܟܠ ܚܛܝܼܬܵܐ ܕܥܵܒܸܕ ܒܲܪܢܵܫܵܐ ܠܒܲܕܲܪ ܡܼܢ ܦܲܓܼܪܹܗ ܝܠܵܐ: ܐܝܼܢܵܐ ܗܿܘ ܕܥܵܒܸܕ ܙܵܢܝܘܼܬܵܐ: ܒܦܲܓܼܪܹܗ ܟܹܐ ܚܵܛܸܐ. 19 ܝܲܢ ܠܹܐ ܝܬܘܿܢ ܒܝܼܕܲܥܝܵܐ ܕܦܲܓܼܪܵܘܟܼܘܿܢ ܗܲܝܟܠܵܐ ܕܪܘܼܚܵܐ ܕܩܘܼܕܫܵܐ ܝܠܹܐ ܕܝܼܠܹܐ ܒܝܼܵܘܟܼܘܿܢ: ܗܿܘ ܕܩܘܼܒܸܠܵܘܟܼܘܿܢ ܡܼܢ ܐܲܠܵܗܵܐ: ܘܠܹܐ ܝܬܘܿܢ ܕܓܵܢܵܘܟܼܘܿܢ: 20 ܣܵܒܵܒ ܕܦܸܫܠܵܘܟܼܘܿܢ ܙܒܼܝܼܢܹܐ ܒܛܝܼܡܵܐ. ܒܲܣ ܗܵܘܝܼܬܘܿܢ ܫܵܒܘܿܚܹܐ ܠܐܲܠܵܗܵܐ ܒܦܲܓܼܪܵܘܟܼܘܿܢ.

 

ܩܦܠܐܘܢ: ܙ

1 ܘܒܵܗ̄ܣ ܐܵܢܝܼ ܡܸܢܕܝܼܵܢܹ̈ܐ ܕܟܬܸܒܼܠܵܘܟܼܘܿܢ ܐܸܠܝܼ: ܨܦܵܝܝܼ ܝܠܵܐ ܠܐܢܵܫܵܐ ܕܒܒܲܟܼܬܵܐ ܠܵܐ ܕܵܩܸܪ. 2 ܐܸܠܵܐ ܣܵܒܵܒ ܕܙܵܢܝܘܼܬܵܐ: ܟܠ ܐܢܵܫܵܐ ܕܵܒܸܩ ܒܲܟܼܬܹܗ: ܘܟܠ ܒܲܟܼܬܵܐ ܕܵܒܼܩܵܐ ܓܵܒܼܪܘܼܗܿ. 3 ܓܲܒܼܪܵܐ ܠܒܲܟܼܬܹܗ ܗܿܘ ܕܝܼܠܹܐ ܘܵܓܸܒ ܦܲܪܸܥ. ܗܲܕܟܼܵܐ ܐܘܼܦ ܒܲܟܼܬܵܐ ܠܓܲܒܼܪܘܼܗܿ. 4 ܒܲܟܼܬܵܐ ܠܲܝܬ ܠܵܗܿ ܗܘܼܟܡܵܐ ܥܲܠ ܦܲܓܼܪܵܐ ܕܓܵܢܘܼܗܿ: ܐܸܠܵܐ ܓܵܒܼܪܘܼܗܿ. ܗܲܕܟܼܵܐ ܐܘܼܦ ܓܲܒܼܪܵܐ ܠܲܝܬ ܠܹܗ ܗܘܼܟܡܵܐ ܥܲܠ ܦܲܓܼܪܵܐ ܕܓܵܢܹܗ: ܐܸܠܵܐ ܒܲܟܼܬܹܗ. 5 ܒܲܣ ܠܵܐ ܙܵܠܡܝܼܬܘܿܢ ܚܵܕ̄ ܠܗܿܘ ܐܚܹܪ̄ܢܵܐ: ܡܵܓܲܪ ܐܝܼܡܲܢ ܕܬܸܪܘܵܘܟܼܘܿܢ ܗܵܘܝܼܬܘܿܢ ܒܚܵܕ̄ ܪܸܙܵܝܵܐ ܩܵܐ ܚܵܕ̄ ܙܲܒܼܢܵܐ: ܕܝܵܗ̄ܒܼܝܼܬܘܿܢ ܓܵܢܵܘܟܼܘܿܢ ܠܨܠܘܿܬܵܐ: ܘܡܸܕܪܸܐ ܐܵܬܝܼܬܘܿܢ ܡܸܚܕܵܕܹ̈ܐ: ܕܠܵܐ ܓܵܪܸܒ ܠܵܘܟܼܘܿܢ ܣܵܛܵܢܵܐ ܒܸܝܼܕ ܠܵܐ ܚܡܵܠܬܵܘܟܼܘܿܢ. 6 ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ ܒܝܵܗ̄ܒܲܠܬܵܐ ܕܕܲܣܬܘܼܪ: ܠܵܐ ܡܼܢ ܦܘܼܩܕܵܢܵܐ. 7 ܣܵܒܵܒ ܐܵܢܵܐ ܒܸܒܲܥܝܵܐ ܝܘܸܢ ܕܟܠܵܝ ܒܢܲܝ̈ܢܵܫܵܐ ܗܵܘܝܼ ܐܲܝܟ ܕܝܼܝܼ. ܐܸܠܵܐ ܟܠ ܐܢܵܫܵܐ ܐܝܼܬ ܠܹܗ ܚܲܠܲܥܬ ܕܓܵܢܹܗ ܡܼܢ ܐܲܠܵܗܵܐ: ܐܝܼܬ ܕܗܲܕܟܼܵܐ: ܘܐܝܼܬ ܕܗܲܕܟܼܵܐ. 8 ܐܝܼܢܵܐ ܒܹܐܡܵܪܵܐ ܝܘܸܢ ܠܐܵܢܝܼ ܕܠܲܝܬ ܠܗ̄ܘܿܢ ܒܲܟܼܬܵܬܹ̈ܐ: ܘܠܲܐܪ̈ܡܸܠܝܵܬܹܐ: ܕܨܦܵܝܝܼ ܝܠܵܐ ܐܸܠܵܝ ܐܸܢ ܦܵܝܫܝܼ ܐܲܝܟ ܕܝܼܝܼ. 9 ܐܝܼܢܵܐ ܐܸܢ ܠܹܐ ܚܵܡܠܝܼ: ܓܵܒܼܪܝܼ. ܣܵܒܵܒ ܒܘܼܫ ܨܦܵܝܝܼ ܝܠܵܐ ܠܸܓܒܼܵܪܵܐ ܡܼܢ ܠܸܩܝܵܕܵܐ. 10 ܐܝܼܢܵܐ ܠܓܒܼܝܼܪܹ̈ܐ ܦܵܩܘܿܕܹܐ ܝܘܸܢ: ܠܵܐ ܐܵܢܵܐ: ܐܵܠܵܐ ܡܵܪܝܼ: ܕܒܲܟܼܬܵܐ ܡܼܢ ܓܲܒܼܪܘܼܗ̄ ܠܵܐ ܦܵܪܫܵܐ: 11 ܘܐܸܢ ܦܵܪܫܵܐ: ܦܵܝܫܵܐ ܕܠܵܐ ܓܲܒܼܪܵܐ: ܝܲܢ: ܣܲܙܓܸܪܵܐ ܥܲܡ ܓܲܒܼܪܘܼܗܿ. ܘܓܲܒܼܪܵܐ ܠܒܲܟܼܬܹܗ ܠܵܐ ܫܵܒܸܩ. 12 ܐܝܼܢܵܐ ܠܐܚܹܪ̄ܢܸܐ ܒܹܐܡܵܪܵܐ ܝܘܸܢ: ܐܵܢܵܐ: ܠܵܐ ܡܵܪܝܵܐ: ܐܸܢ ܐܝܼܬ ܐܵܚܘܿܢܵܐ ܕܐܝܼܬ ܠܹܗ ܒܲܟܼܬܵܐ ܠܵܐ ܡܗܘܼܡܸܢܬܵܐ: ܘܗܿܝ ܒܲܥܝܵܐ ܕܥܵܡܪܵܐ ܥܲܡܹܗ: ܠܵܐ ܫܵܒܸܩ ܠܵܗܿ. 13 ܘܒܲܟܼܬܵܐ ܗܿܝ ܕܐܝܼܬ ܠܵܗܿ ܓܲܒܼܪܵܐ ܠܵܐ ܡܗܘܼܡܢܵܐ: ܘܗܿܘ ܒܲܥܝܹܐ ܕܥܵܡܸܪ ܥܲܡܵܗܿ: ܠܵܐ ܫܵܒܼܩܵܐ ܠܓܲܒܼܪܘܼܗܿ. 14 ܣܵܒܵܒ ܡܩܘܼܕܫܵܐ ܝܠܹܐ ܓܲܒܼܪܵܐ ܠܵܐ ܡܗܘܼܡܢܵܐ ܒܒܲܟܼܬܹܗ. ܘܡܩܘܕܸܫܵܐ ܝܠܵܐ ܒܲܟܼܬܵܐ ܠܵܐ ܡܗܘܼܡܸܢܬܵܐ ܒܐܵܚܘܿܢܵܐ. ܘܐܸܢ ܠܵܐ: ܒܢܘܼܢܵܝ̈ ܛܲܡܹ̈ܐܐ ܗ̄ܘܵܘ: ܐܝܼܢܵܐ ܐܵܕܝܼܵܐ ܡܩܘܼܕܫܹܐ ܝܢܵܐ. 15 ܐܝܼܢܵܐ ܐܸܢ ܗܿܘ ܕܠܹܐ ܝܠܹܐ ܡܗܘܼܡܢܵܐ ܦܵܪܸܫ: ܦܵܪܸܫ. ܠܹܐ ܝܠܹܐ ܙܲܒܛ ܐܵܚܘܿܢܵܐ ܝܲܢ ܚܵܬܵܐ ܒܐܵܢܝܼ ܕܐܲܝܟ ܕܐܲܢܹܐ: ܠܫܠܵܡܵܐ ܩܸܪܝܲܢ ܝܼܠܹܐ ܐܲܠܵܗܵܐ. 16 ܣܵܒܵܒ ܕܵܐܟܼܝܼ ܒܝܼܕܲܥܝܵܐ ܝܘܲܬܝ: ܒܲܟܼܬܵܐ: ܐܸܢ ܠܓܲܒܼܪܵܟܼܝ ܒܸܬ ܡܲܚܝܲܬܝ: ܝܲܢ ܐܲܢ̄ܬ: ܓܲܒܼܪܵܐ: ܕܵܐܟܼܝܼ ܒܝܼܕܲܥܝܵܐ ܝܘܸܬ: ܐܸܢ ܠܒܲܟܼܬܘܼܟ ܒܸܬ ܡܲܚܸܬ: 17 ܐܸܠܵܐ ܟܠ ܐܢܵܫܵܐ ܐܲܝܟ ܘܦܘܼܠܹܠܹܐ ܐܸܠܹܗ ܡܵܪܝܵܐ: ܘܐܢܵܫܵܐ ܐܲܝܟ ܕܩܪܸܠܹܗ ܐܲܠܵܗܵܐ: ܗܲܕܟܼܵܐ ܚܵܕܸܪ. ܘܐܘܼܦ ܓܵܘ ܟܠܵܝ ܥܹܕܵܬܹ̈ܐ ܗܲܕܟܼܵܐ ܦܵܩܘܿܕܹܐ ܝܘܸܢ. 18 ܐܸܢ ܟܲܕ ܓܙܝܼܪܵܐ ܦܸܫܠܹܐ ܩܸܪܝܵܐ ܐܢܵܫܵܐ: ܠܵܐ ܕܵܝܸܪ ܠܥܘܼܪܠܘܼܬܵܐ. ܘܐܸܢ ܒܥܘܼܪܠܘܼܬܵܐ ܦܸܫܠܹܐ ܩܸܪܝܵܐ: ܠܵܐ ܦܵܝܸܫ ܓܙܝܼܪܵܐ. 19 ܓܙܘܼܪܬܵܐ ܠܹܐ ܝܠܵܐ ܡܸܢܕܝܼ: ܘܥܘܼܪܠܘܼܬܵܐ ܠܹܐ ܝܠܵܐ ܡܸܢܕܝܼ: ܐܸܠܵܐ ܢܛܵܪܬܵܐ ܘܦܘܼܩܕܵܢܹ̈ܐ ܕܐܲܠܵܗܵܐ. 20 ܟܠ ܐܢܵܫܵܐ ܒܩܪܵܝܬܵܐ ܕܦܸܫܠܹܐ ܩܸܪܝܵܐ: ܒܝܼܵܗܿ ܥܲܪܩܸܠ. 21 ܩܘܼܠܵܐ ܦܸܫܠܘܼܟ ܩܸܪܝܵܐ: ܠܵܐ ܗܵܘܝܵܐ ܠܘܼܟ ܚܲܡ: ܐܸܠܵܐ ܐܘܼܦ ܐܸܢ ܡܵܨܸܬ ܕܗܵܘܸܬ ܐܵܙܵܕ: ܒܘܼܫ ܙܵܘܕܵܐ ܡܲܦܠܸܚ ܠܵܗܿ. 22 ܣܵܒܵܒ ܗܿܘ ܕܩܘܼܠܵܐ ܦܸܫܠܹܐ ܩܸܪܝܵܐ ܒܡܵܪܲܢ: ܐܵܙܵܕ ܕܡܵܪܝܵܐ ܝܠܹܐ. ܗܲܕܟܼܵܐ ܐܘܼܦ ܗܿܘ ܕܐܵܙܵܕ ܦܸܫܠܹܐ ܩܸܪܝܵܐ: ܩܘܼܠܵܐ ܕܡܫܝܼܚܵܐ ܝܠܹܐ. 23 ܒܛܝܼܡܵܐ ܦܸܫܠܵܘܟܼܘܿܢ ܙܒܼܝܼܢܹܐ: ܠܵܐ ܗ̄ܘܸܡܘܿܢ ܩܘܼܠܹܐ ܕܒܢܲܝ̈ܢܵܫܵܐ. 24 ܐܵܚܘܿܢܘܵܬܝܼ̈: ܟܠ ܐܢܵܫܵܐ ܒܗܵܠ ܕܦܸܫܠܹܐ ܩܸܪܝܵܐ: ܒܝܼܵܗ ܥܲܪܩܸܠ ܠܟܸܣ ܐܲܠܵܗܵܐ. 25 ܐܝܼܢܵܐ ܒܵܗ̄ܣ ܕܒܬܘܼܠܵܬܹ̈ܐ ܦܘܼܩܕܵܢܵܐ ܕܡܵܪܝܵܐ ܠܲܝܬ ܠܝܼ: ܐܝܼܢܵܐ ܪܵܐܝܝܼ ܒܝܼܵܗ̄ܒܼܵܐ ܝܘܸܢ ܐܲܝܟ ܐܢܵܫܵܐ ܕܦܸܫܠܝܼ ܟܘܼܪܡܸܢܵܐ ܡܼܢ ܡܵܪܝܵܐ ܕܗܵܘܸܢ ܡܗܘܼܡܢܵܐ. 26 ܒܲܣ ܒܸܚܫܵܒܼܵܐ ܝܘܸܢ ܕܐܵܗܵܐ ܨܦܵܝܝܼ ܝܠܵܐ ܒܘܼܬ ܐܵܢܵܢܩܹܐ ܕܐܵܗܵܐ ܙܲܒܼܢܵܐ: ܨܦܵܝܝܼ ܝܠܵܐ ܠܒܲܪܢܵܫܵܐ ܕܗܲܕܟܼܵܐ ܗܵܘܹܐ. 27 ܐܣܝܼܪܵܐ ܝܘܸܬ ܒܒܲܟܼܬܵܐ: ܠܵܐ ܒܲܥܝܸܬ ܪܲܦܵܝܬܵܐ. ܫܸܪܝܵܐ 28 ܝܘܸܬ ܡܼܢ ܒܲܟܼܬܵܐ: ܠܹܐ ܝܘܸܬ ܒܸܚܛܵܝܵܐ: ܘܐܸܢܒܬܘܼܠܬܵܐ ܓܵܒܼܪܵܐ: ܠܹܐ ܝܠܵܐ ܒܸܚܛܵܝܵܐ. ܐܝܼܢܵܐ ܐܘܼܠܨܵܢܵܐ ܒܦܲܓܼܪܵܐ ܒܸܬ ܗܵܘܹܐ ܠܐܵܢܝܼ ܕܗܲܕܟܼܵܐ ܝܢܵܐ. ܘܐܵܢܵܐ ܡܘܼܚܲܒܢܵܘܟܼܘܿܢ ܒܹܐܬܵܝܝܼ ܝܠܵܐ. 29 ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ: ܐܵܚܘܿܢܘܵܬܝܼܗ: ܕܙܲܒܼܢܵܐ ܟܸܪܝܵܐ ܝܠܹܐ: ܡܐܵܕܝܼܵܐ ܝܠܵܐ ܕܐܵܢܝܼ 30 ܕܐܝܼܬ ܠܗ̄ܘܿܢ ܒܲܟܼܬܵܬܹ̈ܐ: ܗܵܘܝܼ ܐܲܝܟ ܕܠܲܝܬ ܠܗ̄ܘܿܢ: ܘܐܵܢܝܼ ܕܒܵܟܼܝܼ: ܐܲܝܟ ܕܠܵܐ ܒܵܟܼܝܼ: ܘܐܵܢܝܼ ܕܚܵܕܝܼ: ܐܲܝܟ ܕܠܵܐ ܚܵܕܝܼ: ܘܐܵܢܝܼ ܕܙܵܒܼܢܢܝܼ: ܐܲܝܟ ܠܵܐ ܗ̄ܘܝܹܐ ܡܵܪܵܘܵܬܹܐ. 31 ܘܐܵܢܝܼ ܕܡܲܦܠܸܚܝܼ ܐܵܗܵܐ ܥܵܠܡܵܐ: ܠܵܐ ܠܒܲܕܲܪ ܡܼܢ ܘܵܓܸܒܘܼܬܵܐ ܕܡܲܦܠܲܚܬܵܐ: ܣܵܒܵܒ ܕܒܸܥܒܼܵܪܵܐ ܝܠܹܐ ܐܸܣܟܹܝܡܵܐ ܕܐܵܗܵܐ ܥܵܠܡܵܐ. 32 ܐܝܼܢܵܐ ܒܸܒܲܥܝܵܐ ܝܘܸܢ ܕܗܵܘܝܼܬܘܿܢ ܕܠܵܐ ܚܲܡܹ̈ܐ. ܗܿܘ ܕܠܲܝܬ ܠܹܗ ܒܲܟܼܬܵܐ: ܟܹܐ ܐܵܟܹܠ ܚܲܡ ܥܲܠ ܡܸܢܕܝܼ ܕܡܵܪܝܵܐ: ܕܐܵܟܼܝܼ ܫܵܦܸܪ ܠܡܵܪܝܵܐ. 33 ܘܗܿܘ ܕܐܝܼܬ ܠܹܗ ܒܲܟܼܬܵܐ: ܟܹܐ ܐܵܟܸܠ ܚܲܡ ܥܲܠ ܡܸܢܕܝܼ ܕܥܵܠܡܵܐ: ܕܵܐܟܼܝܼ ܕܫܵܦܸܪ ܠܒܲܟܼܬܹܗ. 34 ܐܝܼܢܵܐ ܐܝܼܬ ܦܘܼܪܫܘܼܢܝܵܐ ܒܸܝܠ ܒܲܟܼܬܵܐ ܠܒܬܘܼܠܬܵܐ. ܗܿܝ ܕܠܓܲܒܼܪܵܐ ܠܵܐ ܗ̄ܘܸܠܵܐ: ܟܹܐ ܚܵܫܒܼܵܐ ܥܲܠ ܡܸܢܕܝܼ ܕܡܵܪܝܵܐ: ܕܗܵܘܝܵܐ ܩܲܕܝܼܫܬܵܐ ܒܦܲܓܼܪܘܼܗܿ ܘܒܪܘܼܚܘܼܗܿ. ܘܗܿܝ ܕܐܝܼܬ ܠܵܗܿ ܓܲܒܼܪܵܐ: ܟܹܐ ܚܵܫܒܼܵܐ ܥܲܠ ܡܸܢܕܝܼ ܕܥܵܠܡܵܐ: ܕܵܐܟܼܝܼ ܕܫܵܦܪܵܐ ܠܓܲܒܼܪܘܼܗܿ. 35 ܘܐܵܗܵܐ ܠܚܵܝܪ ܕܝܼܵܘܟܼܘܿܢ ܒܹܐܡܵܪܵܐ ܝܘܸܢ: ܠܹܐ ܝܠܵܐ ܕܢܸܫܒܼܵܐ ܒܸܕܪܵܝܵܐ ܝܘܸܢ ܐܸܠܵܘܟܼܘܿܢ: ܐܸܠܵܐ ܠܐܵܕܵܒܘܼܬܵܐ: ܘܕܗܵܘܝܪܬܘܿܢ ܒܚܸܠܡܲܬ ܠܟܸܣ ܡܵܪܝܵܐ ܕܠܵܐ ܕܘܼܒܵܪܘܼܬܵܐ. 36 ܐܝܼܢܵܐ ܐܸܢ ܐܢܵܫܵܐ ܚܵܫܸܒܼ ܕܦܝܵܫܵܐ ܝܠܹܐ ܡܘܼܣܚܸܪܵܐ ܣܵܒܵܒ ܕܒܬܘܼܠܬ. ܗ: ܐܸܢ ܥܒܸܪܵܐ ܥܕܵܢܘܼܗ̄: ܘܠܵܙܸܡ ܝܼܠܵܐ ܕܗܲܕܟܼܐ ܗܵܘܝܵܐ: ܐܲܝܟ ܕܒܵܣܡܵܐ ܠܹܗ ܥܵܒܼܕ: ܠܹܐ ܝܠܹܐ ܒܸܚܛܵܝܵܐ: ܚܘܼܫ ܓܵܒܼܪܝܼ. 37 ܐܝܼܢܵܐ ܗܿܘ ܕܩܘܼܝܵܐ ܟܸܠܝܵܐ ܝܠܹܐ ܒܠܸܒܹܗ: ܘܠܲܝܬ ܠܹܗ ܐܵܢܵܢܩܹܐ: ܘܐܝܼܬ ܠܹܗ ܗܘܼܟܡܵܐ ܥܲܠ ܪܸܙܵܝܹܗ: ܘܗܲܕܟܼܵܐ ܩܛܸܥܠܹܐ ܒܠܸܒܹܗ ܕܢܵܛܸܪ ܒܬܘܼܠܬܹܗ: ܨܦܵܝܝܼ ܒܸܥܒܪܵܕܵܐ ܝܠܹܐ. 38 ܘܗܲܕܟܼܵܐ ܐܘܼܦ ܗܿܘ ܕܝܵܗ̄ܒܸܠ ܒܬܘܼܠܬܹܗ: ܨܦܵܝܝܼ ܒܸܥܒܼܵܕܵܐ ܝܠܹܐ: ܘܗܿܘ ܕܠܵܐ ܝܵܗ̄ܒܸܠ ܒܬܘܼܠܹܗ: ܒܘܼܫ ܨܦܵܝܝܼ ܒܸܥܒܼܵܕܵܐ ܝܠܹܐ. 39 ܒܲܟܼܬܵܐ: ܟܡܵܐ ܕܚܲܝܹܐ ܓܲܒܼܪܘܿܗܿ: ܐܣܝܼܪܬܵܐ ܝܠܵܐ: ܐܝܼܢܵܐ ܐܸܢ ܕܵܡܸܟ ܓܲܒܼܪܘܼܗܿ: ܐܵܙܵܕ ܝܼܠܵܐ ܕܗܵܘܝܵܐ ܠܡܿܢ ܕܒܵܣܡܵܐ ܠܵܗܿ: ܐܝܼܢܵܐ ܗܲܪ ܒܡܵܪܲܢ. 40 ܐܝܼܢܵܐ ܛܘܼܒܼܵܐ ܐܸܠܵܗ: ܐܸܢ ܥܲܪܩܸܠܵܐ ܗܲܕܟܼܵܐ: ܐܲܝܟ ܚܝܼܵܠ ܕܝܼܝܼ. ܘܒܸܚܫܵܒܼܵܐ ܝܘܸܢ ܕܐܘܼܦ ܐܵܢܵܐ ܪܘܼܚܵܐ ܕܐܲܠܵܗܵܐ ܐܝܼܬ ܠܝܼ.

 

ܩܦܠܐܘܢ: ܚ

1 ܐܝܼܢܵܐ ܥܲܠ ܕܒܼܚܹ̈ܐ ܕܨܵܢܲܡܹ̈ܐ: ܒܝܼܕܲܥܝܵܐ ܝܘܵܚ ܕܒܟܠܲܢ ܐܝܼܬ ܝܕܹܥܬܵܐ. ܝܕܹܥܬܵܐ ܟܹܐ ܡܲܚܬܸܪܵܐ: ܐܝܼܢܵܐ ܚܘܼܒܵܐ ܟܹܐ ܒܵܢܹܐ. 2 ܐܸܢ ܐܢܵܫܵܐ ܚܵܫܸܒܼ ܕܟܹܐ ܝܲܕܸܥ ܡܸܢܕܝܼ: ܗܸܫ ܠܹܐ ܝܠܹܐ ܝܕܹܥܝܵܐ ܕܵܐܟܼܝܼ ܕܘܵܓܸܒ ܝܼܠܵܐ ܐܸܠܹܗ ܕܝܲܕܸܥ: 3 ܐܝܼܢܵܐ ܐܸܢ ܐܢܵܫܵܐ ܡܲܚܸܒ ܠܐܲܠܵܗܵܐ: ܐܵܗܵܐ: ܐܵܗܵܐ ܦܝܼܫܵܐ ܝܠܹܐ ܝܕܸܥܝܵܐ ܡܸܢܹܗ. 4 ܒܲܣ ܒܘܼܬ ܐܟܼܵܠܬܵܐ ܕܕܒܼܝܼܚܹ̈ܐ ܠܨܵܢܲܡܹ̈ܐ: ܒܝܼܕܲܥܝܵܐ ܝܘܵܚ ܕܨܵܢܲܡ ܠܹܐ ܝܠܹܐ ܡܸܢܕܝܼ ܠܵܘ ܥܵܠܡܵܐ: ܘܕܠܲܝܬ ܐܲܠܵܗܵܐ ܐܸܠܵܐ ܐܸܢ ܚܵܕ̄. 5 ܣܵܒܵܒ ܐܵܦܸܢ ܐܝܼܬ ܕ܆ܦܵܝܫܝܼ ܩܸܪܝܹܐ ܐܲܠܵܗܹ̈ܐ: ܝܲܢ ܒܫܡܲܝܵܐ ܝܲܢ ܒܐܲܪܥܵܐ: ܕܵܐܟܼܝܼ ܕܐܝܼܬ ܐܲܠܵܗܹ̈ܐ ܪܵܒܵܐ: ܘܡܵܪܵܘܵܬܹܐ ܪܵܒܵܐ: 6 ܐܸܠܵܐ ܐܲܚܢܲܢ ܚܵܕ̄ ܐܲܠܵܗܵܐ ܐܝܼܬ ܠܲܢ: ܒܵܒܵܐ: ܕܟܠ ܡܸܢܹܗ: ܘܐܲܚܢܲܢ ܒܝܹܗ. ܘܚܵܕ̄ ܡܵܪܝܵܐ: ܝܼܫܘܿܥ ܡܫܝܼܚܵܐ: ܕܟܠ ܒܐܝܼܕܹܗ: ܘܐܘܼܦ ܐܲܚܢܲܢ ܒܐܝܼܕܹܗ. 7 ܐܸܠܵܐ ܒܟܠ ܐܢܵܫܵܐ ܠܲܝܬ ܗܿܝ ܝܕܹܥܬܵܐ: ܣܵܒܵܒ ܕܐܝܼܬ ܐܢܵܫܹ̈ܐ ܗܲܠ ܐܵܕܝܼܵܐ ܕܒܸܐܢܝܲܬ ܕܨܵܢܲܡ ܐܲܝܟ ܕܕܒܼܝܹܚܵܐ ܠܨܵܢܲܡ ܟܹܐ ܐܵܟܼܠܝܼ: ܘܐܸܢܝܲܬܵܝ ܙܲܒܘܼܢ ܟܹܐ ܦܵܝܫܵܐ ܡܛܘܼܡܐܝܼܬܵܐ. 8 ܐܝܼܢܵܐ ܡܹܐܟܼܘܼܠܬܵܐ ܠܹܐ ܡܲܝܬ̄ܝܵܐ ܠܲܢ ܩܘܼܪܒܵܐ ܠܐܲܠܵܗܵܐ: ܣܵܒܵܒ ܐܸܢ ܐܵܟܼܠܵܚ ܠܹܐ ܙܵܝܕܵܚ: ܘܐܸܢ ܠܵܐ ܐܵܟܼܠܵܚ ܠܹܐ ܒܵܨܪܵܚ. 9 ܐܝܼܢܵܐ ܚܙܹܡܘܿܢ ܠܵܐ ܗ̄ܘܹܐ ܕܐܵܗܵܐ ܗܘܼܟܡܵܘܟܼܘܿܢ ܗܵܘܹܐ ܬܘܼܪܩܵܠܵܐ ܠܙܲܒܘܼܢܹ̈ܐ. 10 ܣܵܒܵܒ ܐܸܢ ܐܢܵܫܵܐ ܚܵܙܹܐ ܠܘܼܟ ܕܐܝܼܬ ܒܝܼܘܼܟ ܝܕܹܥܬܵܐ: ܕܝܬܝܼܒܼܵܐ ܝܘܸܬ ܒܕܘܼܟܵܐ ܕܨܵܢܲܡܹ̈ܐ: ܐܢܝܲܬܹܗ: ܐܸܢ ܙܲܒܘܼܢ ܝܼܠܹܐ: ܠܹܐ ܦܵܝܫܵܐ ܡܘܼܩܘܝܼܬܵܐ ܠܹܐܟܼܵܠܵܐ ܕܕܒܼܝܼܚܵܐ ܠܨܵܢܲܡ: 11 ܘܒܸܬܠܵܩܵܐ ܝܠܹܐ ܒܝܕܹܥܝܵܐ ܕܝܼܘܼܟ ܗܿܘ ܕܝܼܠܹܐ ܙܲܒܘܼܢ: ܐܵܚܘܿܢܵܐ ܕܒܚܵܬܸܪܹܗ ܡܸܬܠܹܐ ܡܫܝܼܚܵܐ. 12 ܘܟܲܕ ܗܲܕܟܼܵܐ ܥܵܒܼܕܝܼܬܘܿܢ ܓܢܵܗܵܐ ܒܐܵܚܘܿܢܘܵܬܵܘ̈ܟܼܘܿܢ: ܘܩܲܪܦܸܚܝܼܬܘܿܢ ܐܸܢܝܲܬܵܝ̈ ܙܲܒܘܼܢܹ̈ܐ: ܒܡܫܝܼܚܵܐ ܒܸܥܒܼܵܕܵܐ ܝܬܘܿܢ ܓܢܵܗܵܐ. 13 ܣܵܒܵܒ ܕܐܵܗܵܐ: ܐܸܢ ܡܹܐܟܼܘܼܠܬܵܐ ܡܲܟܦܸܪܵܐ ܠܐܵܚܘܿܢܝܼ: ܠܐܵܒܵܕ ܒܸܣܪܵܐ ܠܹܐ ܐܵܟܼܠܸܢ: ܕܠܵܐ ܡܲܟܦܸܪܸܢ ܠܐܵܚܘܿܢܝܼ.

 

ܩܦܠܐܘܢ: ܛ

1 ܠܹܐ ܝܘܸܢ ܐܵܙܵܕ: ܝܲܢ ܠܹܐ ܝܘܸܢ ܫܠܝܼܚܵܐ: ܝܲܢ ܠܝܼܫܘܿܥ ܡܫܝܼܚܵܐ ܡܵܪܲܢ ܠܵܐ ܚܙܹܠܝܼ: ܝܲܢ ܠܹܐ ܝܬܘܿܢ ܦܘܼܠܚܵܢܝܼ ܒܡܵܪܝܵܐ: 2 ܘܐܸܢ ܠܐܚܹܪ̄ܢܹܐ ܠܹܐ ܝܘܸܢ ܫܠܝܼܚܵܐ: ܐܸܠܵܐ ܐܸܠܵܘܟܼܘܿܢ ܗܲܪ ܝܘܸܢ: ܣܵܒܵܒ ܡܵܘܗܪ ܕܫܠܝܼܚܘܼܬܝܼ ܐܲܚܬܘܿܢ ܝܼܬܘܿܢ ܒܡܵܪܝܵܐ. 3 ܘܓܼܘܼܘܵܒܝܼ ܠܐܵܢܝܼ ܕܒܸܕܝܵܢܝܼ ܝܢܵܐ ܐܵܗܵܐ ܝܠܹܐ. 4 ܠܲܝܬ ܠܲܢ ܗܲܩ ܠܹܐܟܼܵܠܵܐ ܘܠܸܫܬܵܝܵܐ: 5 ܠܲܝܬ ܠܲܢ ܗܲܩ ܠܡܲܚܕܘܼܪܹܐ ܥܲܡܲܢ ܚܵܬܵܐ ܒܲܟܼܬܵܐ: ܐܲܝܟ ܫܠܝܼܚܹ̈ܐ ܐܚܹܪ̄ܢܹܐ: ܘܐܲܝܟ ܐܵܚܘܿܢܘܵܬܹ̈ܐ ܕܡܵܪܲܢ: ܘܐܲܝܟ ܟܹܦܵܐ: 6 ܝܲܢ ܗܲܪ ܐܵܢܵܐ ܘܒܲܪܢܒܼܵܐ ܠܲܝܬ ܠܲܢ ܗܲܩ ܠܵܐ ܠܸܦܠܵܚܵܐ: 7 ܡܵܢܝܼ ܟܹܐ ܥܵܒܸܕ ܣܲܪܒܵܙܘܼܬܵܐ ܒܚܲܪ̈ܓܸܠܸܓܸܐ ܕܓܵܢܹܗ: ܡܵܢܝܼ ܟܹܐ ܢܵܨܸܒܼ ܟܲܪܡܵܐ: ܘܡܼܢ ܛܥܘܼܢܝܵܬܘܼ̈ܗܝ ܠܵܐ ܐܵܟܸܠ: ܝܲܢ ܡܵܢܝܼ ܟܹܐ ܡܲܪܥܹܐ ܥܼ̈ܒܹܐ: ܘܡܼܢ ܚܲܠܒܼܵܐ ܕܥܸܪ̈ܒܹܗ ܠܵܐ ܐܟܸܠ: 8 ܗܵܐ: ܐܲܝܟ ܒܲܪܢܵܫܵܐ ܐܲܢܹܐ ܒܹܐܡܵܪܵܐ ܝܘܸܢ: ܝܲܢ ܐܘܼܦ ܢܵܡܘܿܣܵܐ ܐܲܢܹܐ ܠܹܐ ܝܠܹܐ ܒܹܐܡܵܪܵܐ: 9 ܣܵܒܵܒ ܕܟܬܝܼܒܼܵܐ ܝܠܹܐ ܒܢܵܡܘܿܣܵܐ ܕܡܘܼܫܹܐ: ܠܵܐ ܐܵܣܪܸܬ ܦܘܼܡܵܐ ܕܬܵܘܪܵܐ ܕܕܵܘܸܪ. ܥܲܠ ܬܵܘܪܹ̈ܐ ܟܹܐ ܐܵܟܸܠ ܚܲܡ ܐܲܠܵܗܵܐ: 10 ܝܲܢ ܗܲܪ ܣܵܒܵܒ ܕܝܸܢ ܐܡܸܪܹܐ: ܘܣܵܒܵܒ ܕܝܸܢ ܦܸܫܠܵܐ ܟܬܝܼܒܼܬܵܐ: ܕܒܗܸܒܼܝܼ ܘܵܓܸܒ ܝܼܠܵܐ ܠܡܵܚܝܵܢܵܐ ܕܟܪܸܒܼܵܐ ܡܵܚܹܐ ܟܪܸܒܼܵܐ: ܘܗܿܘ ܕܕܵܘܸܪ ܒܗܸܒܼܝܼ ܕܫܪܵܟܬܵܐ. 11 ܐܸܢ ܐܲܚܢܲܢ ܡܸܢܟܼܝܵܢܹ̈ܐ ܪ̈ܘܼܚܵܢܹܐ ܙܪܸܥܠܲܢ ܐܼܠܵܘܟܼܘܿܢ: ܡܸܢܕܝܼ ܓܘܼܪܵܐ ܝܠܹܐ ܐܸܢ ܐܲܚܢܲܢ ܡܸܢܕܝܼܵܢܹ̈ܐ ܦܲܓܼܪܵܢܹܐ ܚܵܨܕܵܚ ܡܸܢܵܘܟܼܘܿܢ: 12 ܐܸܢ ܐܚܹܪ̄ܢܹܐ ܫܵܪܟܝܼ ( ܒܐܵܗܵܐ) ܗܲܩ ܥܲܠܵܘܟܼܘܿܢ: ܐܲܚܢܲܢ ܠܵܐ ܙܵܘܕܵܐ: ܐܸܠܵܐ ܐܲܚܢܲܢ ܠܵܐ ܡܘܼܦܠܸܚܠܲܢ ܐܵܗܵܐ ܗܲܩ: ܐܸܠܵܐ ܟܠ ܡܸܢܕܝܼ ܒܸܩܒܵܠܵܐ ܝܘܵܚ: ܕܒܡܸܢܕܝܼ ܠܵܐ ܡܲܟܠܵܚ ܐܸܘܵܢܓܵܠܝܼܘܿܢ ܕܡܫܝܼܚܵܐ. 13 ܠܹܐ ܝܬܘܿܢ ܒܝܼܕܲܥܝܵܐ ܕܐܵܢܝܼ ܕܓܵܘ ܒܹܝܬ ܩܘܼܕܫܵܐ ܦܵܠܚܝܼ: ܡܼܢ ܒܹܝܬ ܩܘܼܕܫܵܐ ܟܹܐ ܐܵܟܼܠܝܼ: ܘܐܵܢܝܼ ܕܠܡܲܕܒܚܵܐ ܦܵܠܚܝܼ: ܥܲܡ ܡܲܕܒܚܵܐ ܟܹܐ ܦܲܠܝܼ: 14 ܗܲܕܟܼܵܐ ܐܘܼܦ ܡܵܪܲܢ ܦܩܸܕܠܹܐ: ܕܐܵܢܝܼ ܕܡܲܟܪܸܙܝܼ ܡܲܫܚܲܕܬܹܗ: ܡܼܢ ܡܲܫܚܲܕܬܹܗ ܚܲܝܝܼ. 15 ܐܝܼܢܵܐ ܐܵܢܵܐ ܠܵܐ ܡܘܼܦܠܸܚܠܝܼ ܚܵܕ̄ ܡܐܲܢܹܐ. ܘܐܲܢܹܐ ܠܵܐ ܟܬܸܒܼܠܝܼ ܕܗܲܕܟܼܵܐ ܗܵܘܝܵܐ ܐܸܠܝܼ. ܣܵܒܵܒ ܨܦܵܝܝܼ ܝܠܵܐ ܐܸܠܝܼ ܕܡܝܵܬܵܐ ܡܵܝܬܸܢ: ܘܠܵܐ ܐܢܵܫܵܐ ܫܘܼܒܼܗܵܪܝܼ ܥܵܒܸܕ ܒܵܛܝܼܠܵܐ. 16 ܣܵܒܵܒ ܐܘܼܦ ܐܸܢ ܡܲܫܚܘܼܕܹܐ ܝܘܸܢ ܠܲܝܬ ܠܝܼ ܫܘܼܒܼܗܵܪܵܐ: ܣܵܒܵܒ ܐܵܢܵܢܩܹܐ ܡܘܼܬܸܒܼܬܵܐ ܝܠܵܐ ܥܲܠܝܼ: ܘܘܵܝ ܐܸܠܝܼ ܐܸܢ ܠܵܐ ܡܲܫܚܸܕܸܢ. 17 ܣܵܒܵܒ ܐܸܢ ܒܪܸܙܵܝܝܼ ܐܵܗܵܐ ܦܵܠܚܸܢ: ܗܵܩܵܐ ܐܝܼܬ ܠܝܼ: ܐܝܼܢܵܐ ܐܸܢ ܠܵܐ ܒܪܸܙܵܝܝܼ: ܢܵܙܝܼܪܘܼܬܵܐ ܣܘܼܦܝܼܬܵܐ ܝܠܵܐ ܒܝܼܝܼ. 18 ܒܲܣ ܡܘܼܕܝܼ ܝܠܹܐ ܗܵܩܝܼ: ܕܟܲܕ ܡܲܫܚܸܕܸܢ: ܥܵܒܼܕܸܢܵܗܿ ܡܲܫܚܲܕܬܹܗ ܕܡܫܝܼܚܵܐ ܕܠܵܐ ܚܲܪܓܸܠܸܓܼ: ܘܠܵܐ ܡܲܦܠܸܚܸܢ ܙܵܘܕܵܐ ܡܼܢ ܠܵܙܸܡ ܗܘܼܟܡܝܼ ܒܐܸܘܵܢܓܵܠܝܼܘܿܢ. 19 ܣܵܒܵܒ ܕܟܲܕ ܐܵܙܵܕ ܝܘܸܢ ܗ̄ܘܵܐ ܡܼܢ ܟܠܵܝܼ: ܠܟܠܵܝ ܙܘܼܒܛܸܢܝ ܓܵܢܝܼ: ܕܠܪܵܒܵܐ ܩܵܢܸܢ. 20 ܘܗ̄ܘܹܠܝܼ ܠܝܗ̄ܘܼܕܵܝܹ̈ܐ: ܕܩܵܢܸܢ ܗ̄ܘܵܐ ܠܝܗ̄ܘܼܕܵܝܹ̈ܐ: ܘܠܵܐܢܝܼ ܕܝܼܢܵܐ ܬܚܘܿܬ ܢܵܡܘܿܣܵܐ: ܐܲܝܟ ܕܬܚܘܿܬ ܢܵܡܘܿܣܵܐ: ܕܩܵܢܸܢ ܠܐܵܢܝܼ ܕܝܼܢܵܐ ܬܚܘܿܬ ܢܵܡܘܿܣܵܐ: 21 ܘܠܵܐܢܝܼ ܕܢܵܡܘܿܣܵܐ ܠܲܝܬ ܠܗ̄ܘܿܢ: ܐܲܝܟ ܕܠܵܐ ܢܵܡܘܿܣܵܐ: ܟܲܕ ܠܹܐ ܝܘܸܢ ܠܐܲܠܵܗܵܐ ܕܠܵܐ ܢܵܡܘܿܣܵܐ: ܐܸܠܵܐ ܬܚܘܿܬ ܢܵܡܘܿܣܵܐ ܠܡܫܝܼܚܵܐ: ܕܩܵܢܸܢ ܐܘܼܦ ܠܐܵܢܝܼ ܕܝܼܢܵܐ ܕܠܵܐ ܢܵܡܘܿܣܵܐ. 22 ܗ̄ܘܹܠܝܼ ܠܙܲܒܘܼܢܹ̈ܐ ܐܲܝܟ ܙܲܒܘܼܢ: ܕܩܵܢܸܢ ܠܙܲܒܘܼܢܹ̈ܐ. ܠܟܠ ܐܢܵܫܵܐ ܟܠ ܗ̄ܘܹܠܝܼ: ܕܒܟܠ ܬܵܗܵܪ ܠܐܢܵܫܹ̈ܐ ܡܸܢܵܝ ܦܵܪܩܸܢ. 23 ܘܐܵܗܵܐ ܒܸܥܒܼܵܕܵܐ ܝܘܸܢ: ܒܚܵܬܸܪ ܕܡܲܫܚܲܕܬܵܐ: ܕܗܵܘܸܢ ܫܵܪܝܼܟܘܼܗܿ. 24 ܠܹܐ ܝܬܘܿܢ ܒܝܼܕܲܥܝܵܐ ܕܐܵܢܝܼ ܕܪܵܚܛܝܼ ܒܡܲܝܕܵܢ ܟܠܵܝ ܟܹܐ ܪܵܚܛܝܼ: ܐܝܼܢܵܐ ܚܵܕ̄ ܟܹܐ ܫܵܩܸܠ ܠܵܗܿ ܓܵܠܸܒܘܼܬܵܐ: ܗܲܕܟܼܵܐ ܪܚܘܿܛܘܿܢ ܕܵܐܟܼܝܼ ܕܡܵܛܝܼܬܘܿܢ. 25 ܘܟܠ ܐܢܵܫܵܐ ܕܥܵܒܸܕ ܐܵܓܼܘܿܢܵܐ: ܒܟܠ ܡܸܢܕܝܼ ܟܹܐ ܕܵܒܸܩ ܓܵܢܹܗ: ܐܝܼܢܵܐ ܐܵܢܝܼ ܕܫܵܩܠܝܼ ܟܠܝܼܠܵܐ ܚܵܪܒܼܵܢܵܐ: ܐܝܼܢܵܐ ܐܲܚܢܲܢ: ܚܵܕ̄ ܠܵܐ ܚܵܪܒܼܵܢܵܐ. 26 ܒܲܣ ܐܵܢܵܐ ܗܲܕܟܼܵܐ ܒܸܪܚܵܛܵܐ ܝܘܸܢ: ܠܵܐ ܐܲܝܟ ܕܥܲܠ ܡܸܢܕܝܼ ܠܵܐ ܝܕܸܥܝܵܐ: ܘܗܲܕܟܼܵܐ ܒܸܦܠܵܫܵܐ ܝܘܸܢ: ܠܵܐ ܐܲܝܟ ܕܗܿܘ ܕܡܵܚܹܐ ܠܗܵܘܵܐ. 27 ܐܝܼܢܵܐ ܐܵܢܵܐ ܦܲܓܼܪܝܼ ܙܲܒܛܘܼܢܹܐ ܝܘܸܢ: ܘܡܵܐܘܘܼܗܝ ܝܘܸܢ ܬܚܘܿܬ ܪܓܘܼܬܵܐ: ܠܵܐ ܗ̄ܘܹܐ ܕܟܲܕ ܠܐܚܹܪ̄ܢܹܐ ܡܘܼܟܪܸܙܠܝܼ: ܒܓܵܢܝܼ ܦܵܝܫܸܢ ܡܘܼܣܠܝܼܵܐ.

 

ܩܦܠܐܘܢ: ܝ

ܣܵܒܵܒ ܒܸܒܲܥܝܵܐ ܝܘܸܢ ܕܝܲܕܥܝܼܬܘܿܢ: ܐܲܚܘܿܢܘܵܬܝܼ̈: ܕܐܵܒܼܵܗܵܬܲܢ ܟܠܵܝ ܬܚܘܿܬ ܥܢܵܢܵܐ ܗ̄ܘܹܠܘܿܢ: ܘܟܠܵܝ ܡܼܢ ܓܵܘ ܝܵܡܵܐ ܥܒܸܪܘܿܢ: 2 ܘܟܠܵܝ ܠܡܘܼܫܹܐ ܥܡܸܕܠܘܿܢ ܒܥܢܵܢܵܐ ܘܒܝܵܡܵܐ: 3 ܘܟܠܵܝ ܗܲܪ ܚܕܵܐ ܡܹܐܟܼܘܼܠܬܵܐ ܪܘܼܚܵܢܵܝܬܵܐ ܐܟܸܠܘܿܢ: 4 ܘܟܠܵܝ ܗܲܪ ܚܵܕ̄ ܫܬܵܝܵܐ ܪܘܼܚܵܢܵܝܵܐ ܫܬܸܠܘܿܢ: ܣܵܒܵܒ ܕܫܬܸܠܘܿܢ ܡܼܢ ܟܹܐܦܵܐ ܕܪܘܼܚܵܐ ܕܐܬܹܠܹܐ ܒܵܬ̄ܪܵܝ: ܘܗܿܘ ܟܹܐܦܵܐ ܡܫܝܼܚܵܐ ܗ̄ܘܵܐ. 5 ܐܝܼܢܵܐ ܒܪܵܒܵܐ ܡܸܢܵܝ ܠܵܐ ܒܣܸܡܠܵܐ ܠܹܗ ܐܲܠܵܗܵܐ: ܣܵܒܵܒ ܦܸܫܠܘܿܢ ܡܘܼܢܦܸܠܹܐ ܓܵܘ ܒܲܪܝܼܵܐ. 6 ܐܝܼܢܵܐ ܐܲܢܹܐ ܗ̄ܘܹܠܘܿܢ ܛܘܼܦܣܵܐ ܐܸܠܲܢ: ܕܠܵܐ ܗܵܘܵܚ ܫܲܗ̄ܘܘܼܬܹܐ ܠܒܲܝܼܫܵܬܹ̈ܐ: ܕܵܐܟܼܝܼ ܕܐܵܢܝܼ ܫܘܼܗ̄ܘܸܬܠܘܿܢ. 7 ܘܐܘܼܦ ܠܵܐ ܗܵܘܝܼܬܘܿܢ ܣܵܓܼܕܵܢܹ̈ܐ ܕܨܵܢܲܡܹ̈ܐ: ܕܵܐܟܼܝܼ ܕܐܘܼܦ ܡܸܢܵܝ ܗ̄ܘܹܠܘܿܢ: ܐܲܝܟ ܕܝܼܠܹܐ ܟܬܝܼܒܼܵܐ: ܝܬܸܒܼܠܐ ܛܵܝܸܦܵܐ ܠܹܐܟܼܵܠܵܐ ܘܠܸܫܬܵܝܵܐ: ܘܩܸܡܠܘܿܢ ܠܛܵܒܼܘܿܠܹܐ. 8 ܐܘܼܦ ܠܵܐ ܙܵܢܵܚ: ܕܵܐܟܼܝܼ ܕܡܸܢܵܝ ܙܢܸܠܘܿܢ: ܘܢܦܸܠܘܿܢ ܒܚܵܕ̄ ܝܘܿܡܵܐ ܥܸܣܪܝܼ ܘܬܠܵܬ̄ܐ ܐܲܠܦܹ̈ܐ. 9 ܠܵܐ ܓܵܪܒܵܚ ܠܡܫܝܼܚܵܐ: ܕܵܐܟܼܝܼ ܕܡܸܢܵܝ ܓܸܘܼܪܸܒܠܘܿܢ: ܘܬܘܼܠܩܵܝܠܘܿܢ ܚܘܼܘܵܘܵܬܹ̈. 10 ܐܘܼܦ ܠܵܐ ܛܲܪܛܸܡܝܼܬܘܿܢ ܕܵܐܟܼܝܼ ܕܡܸܢܵܝ ܛܘܼܪܛܸܡܠܘܿܢ: ܘܬܠܸܩܠܘܿܢ ܒܝܸܕ ܡܲܚܪܸܒܼܵܢܵܐ. 11 ܐܝܼܢܵܐ ܐܲܢܹܐ ܟܠܵܝ ܩܘܼܘܡܠܘܿܢ ܐܸܠܵܝ ܠܛܘܼܦܣܹ̈ܐ: ܘܦܸܫܠܘܿܢ ܟܬܝܼܒܹܐ ܠܬܲܥܠܲܡܬܵܐ ܕܝܸܢ: ܕܥܲܠܲܢ ܡܛܸܠܵܐ ܚܲܪܬܵܐ ܕܥܵܠܡܹ̈ܐ. 12 ܒܲܣ ܗܿܘ ܕܚܵܫܸܒܼ ܕܟܸܠܝܵܐ ܝܠܹܐ: ܗܵܘܹܐ ܗܸܫܝܵܪ ܕܠܵܐ ܢܵܦܸܠ. 13 ܓܸܘܼܪܵܒܵܐ ܠܵܐ ܡܛܹܠܹܐ ܐܸܠܵܘܟܼܘܿܢ: ܐܸܠܵܐ ܐܲܝܟ ܕܠܒܢܲܝ̈ܢܵܫܵܐ: ܐܝܪܢܵܐ ܡܗܘܼܡܢܵܐ ܝܠܹܐ ܐܲܠܵܗܵܐ: ܕܠܹܐ ܫܵܒܸܩ ܠܵܘܟܼܘܿܢ ܕܦܵܝܫܝܼܬܘܿܢ ܓܸܘܼܪܒܹܐ ܙܵܘܕܵܐ ܡܼܢ ܕܡܵܨܝܼܬܘܿܢ: ܐܸܠܵܐ ܒܸܬ ܥܵܒܸܕ ܥܲܡ ܓܸܘܼܪܵܒܵܐ ܐܘܼܦ ܚܠܵܨܵܐ: ܕܵܐܟܼܝܼ ܕܡܵܨܝܼܬܘܿܢ ܠܩܵܒܘܿܠܹܐ. 14 ܣܵܒܵܒ ܕܐܵܗܵܐ: ܡܘܼܚܸܒܝܼ̈: ܥܪܘܿܩܘܿܢ ܡܼܢ ܣܓܼܵܕܬܵܐ ܕܨܵܢܲܡܹ̈ܐ. 15 ܐܲܝܟ ܕܠܥܵܩܸܠܕܵܪܹ̈ܐ ܒܹܐܡܵܪܵܐ ܝܘܸܢ: ܕܘܼܢܘܿܢ ܐܲܚܬܘܿܢ ܡܸܢܕܝܼ ܕܒܹܐܡܵܪܵܐ ܝܘܸܢ. 16 ܗܿܘ ܟܵܣܵܐ ܕܫܵܟܲܪܬܵܐ ܕܒܵܪܘܿܟܹܐ ܝܘܵܚ: ܠܹܐ ܝܠܹܐ ܫܵܪܝܼܟܘܼܬܵܐ ܕܕܸܡܹܗ ܕܡܫܝܼܚܵܐ: ܘܠܲܚܡܵܐ ܗܿܘ ܕܒܸܩܨܵܝܵܐ ܝܘܵܚ: ܠܹܐ ܝܠܹܐ ܫܵܪܝܼܟܘܼܬܵܐ ܕܦܲܓܼܪܹܗ ܕܡܫܝܼܚܵܐ: 17 ܣܵܒܵܒ ܐܲܚܢܲܢ ܟܲܕ ܪܵܒܵܐ: ܚܵܕ̄ ܠܲܚܡܵܐ: ܘܚܵܕ̄ ܦܲܓܼܪܵܐ ܝܘܵܚ ܣܵܒܵܒ ܟܠܲܢ ܗܲܪ ܡܗܿܘ ܚܵܕ̄ ܠܲܚܡܵܐ ܟܹܐ ܫܵܪܟܵܚ. 18 ܚܙܹܡܘܿܢ ܠܝܼܣܪܵܝܹܠ ܕܒܒܸܣܪܵܐ. ܠܹܐ ܝܠܵܐ ܐܵܢܝܼ ܕܟܹܐ ܐܵܟܼܠܝܼ ܕܸܒܼܚܹ̈ܐ ܫܵܪܝܼܟܹܐ ܝܢܵܐ ܕܡܲܕܒܚܵܐ: 19 ܒܲܣ ܡܘܼܕܼ ܒܹܐܡܵܪܵܐ ܝܘܸܢ: ܕܨܵܢܲܡ ܡܸܢܕܝܼ ܝܠܹܐ: ܝܲܢ ܕܒܸܚܵܐ ܕܨܵܢܲܡ ܡܸܢܕܝܼ ܝܠܹܐ: 20 ܐܸܠܵܐ: ܗܿܘ ܡܸܢܕܝܼ ܕܕܵܒܼܚܝܼ ܚܲܢܦܹ̈ܐ: ܠܕܲܝܘܹ̈ܐ ܟܹܐ ܕܵܒܼܚܝܼ ܘܠܵܐ ܠܐܲܠܵܗܵܐ. ܐܝܼܢܵܐ ܠܹܐ ܒܵܣܡܵܐ ܠܝܼ ܕܗܵܘܝܼܬܘܿܢ ܫܵܪ̈ܝܼܟܹܐ ܕܕܲܝܘܹ̈ܐ. 21 ܠܹܐ ܡܵܨܝܼܬܘܿܢ ܕܗܵܘܝܼܬܘܿܢ ܫܵܪ̈ܝܼܟܹܐ ܒܨܘܼܦܪܵܐ ܕܡܵܪܲܢ ܘܒܨܘܼܦܪܵܐ ܕܕܲܝܘܹ̈ܐ. 22 ܝܲܢ ܡܲܐܘܘܼܪܹܐ ܝܘܵܚ ܒܩܲܝܪܲܬ ܠܡܵܪܲܢ: ܚܲܝܠܵܢܹ̈ܐ ܝܘܵܚ ܡܸܢܹܗ: 23 ܟܠ ܡܸܢܕܝܼ ܒܕܲܣܬܘܼܪ ܝܼܠܹܐ: ܐܸܠܵܐ ܟܠ ܡܸܢܕܝܼ ܠܹܐ ܝܠܹܐ ܠܚܲܝܪ. ܟܠ ܡܸܢܕܝܼ ܒܕܲܣܬܘܼܪ ܝܼܠܹܐ: ܐܸܠܵܐ ܟܠ ܡܸܢܕܝܼ ܠܹܐ ܒܵܢܹܐ. 24 ܐܢܵܫܵܐ ܠܵܐ ܒܲܥܝܹܐ ܡܸܢܕܝܼ ܕܓܵܢܹܗ: ܐܸܠܵܐ ܟܠ ܐܢܵܫܵܐ ܕܚܲܒܼܪܹܗ. 25 ܟܠ ܡܸܢܕܝܼ ܕܦܵܝܸܫ ܙܘܼܒܢܵܐ ܓܵܘ ܩܲܨܒܚܵܢܵܐ: ܗܵܘܝܼܬܘܿܢ ܒܹܐܟܼܵܠܵܐ ܕܠܵܐ ܨܲܚܨܵܝܬܵܐ ܒܚܵܬܸܪ ܕܐܸܢܝܲܬ. 26 ܣܵܒܵܒ ܐܲܪܥܵܐ ܕܡܵܪܝܵܐ ܝܠܵܐ: ܘܡܸܠܝܘܼܬܘܼܗܿ. 27 ܐܸܢ ܐܢܵܫܵܐ ܢܼܢ ܠܵܐ ܡܗܘܼܡܢܹ̈ܐ ܩܵܪܹܐ ܠܵܘܟܼܘܿܢ ܘܒܵܣܡܵܐ ܠܵܘܟܼܘܿܢ ܠܹܐܙܵܠܵܐ: ܟܠ ܡܸܢܕܝܼ ܕܦܵܝܸܫ ܡܘܼܬܒܼܵܐ ܩܵܪ̄ܡܵܘܟܼܘܿܢ ܘܒܵܣܡܵܐ ܐܟܼܘܿܠܘܿܢ: ܕܠܵܐ ܨܲܚܨܵܝܬܵܐ ܒܚܵܬܸܪ ܕܐܸܢܝܲܬ. 28 ܐܝܼܢܵܐ ܐܸܢ ܐܢܵܫܵܐ ܐܵܡܸܪ ܐܸܠܵܘܟܼܘܿܢ: ܐܵܗܵܐ ܕܒܼܝܼܚܵܐ ܝܠܹܐ: ܠܵܐ ܐܵܟܼܠܝܼܬܘܿܢ: ܒܚܵܬܸܪ ܕܗܿܘ ܕܡܘܼܚܙܸܠܹܗ ܘܕܸܐܢܝܲܬ. 29 ܒܹܐܡܵܪܵܐ ܝܘܸܢ: ܠܵܐ ܕܓܵܢܘܼܟ: ܐܸܠܵܐ ܕܗܿܘ ܐܚܹܪ̄ܢܵܐ. ܣܵܒܵܒ ܩܵܡܘܿܕܝܼ ܐܵܙܵܕܘܼܬܝܼ ܦܵܝܫܵܐ ܕܝܼܢܬܵܐ ܡܼܢ ܐܸܢܝܲܬ ܐܚܹܪ̄ܬܵܐ: 30 ܐܸܢ ܐܵܢܵܐ ܒܫܵܦܵܩܲܬ ܫܵܪܝܼܟܵܐ ܝܘܸܢ: ܩܵܡܘܿܕܝܼ ܦܝܵܫܵܐ ܝܘܸܢ ܓܕܝܼܦܵܐ ܒܡܸܢܕܝܼ ܕܐܵܢܵܐ ܫܵܟܘܿܪܹܐ 31 ܝܘܸܢ: ܒܲܣ ܐܸܢ ܐܵܟܼܠܝܼܬܘܿܢ ܘܐܸܢ ܫܵܬܝܼܬܘܿܢ: ܘܐܸܢ ܡܸܢܕܝܼ ܥܵܒܼܕܝܼܬܘܿܢ: ܟܠ ܡܸܢܕܝܼ ܠܬܸܫܒܘܿܚܬܹܗ ܕܐܲܠܵܗܵܐ ܗܵܘܝܼܬܘܿܢ ܒܸܥܒܼܵܕܵܐ. 32 ܕܠܵܐ ܬܲܪܩܲܠܬܵܐ ܗ̄ܘܹܡܘܿܢ ܠܝܗ̄ܘܼܕܵܝܹ̈ܐ: ܘܠܲܐܪ̈ܡܵܝܹܐ: ܘܠܥܸܕܬܵܐ ܕܐܲܠܵܗܵܐ. 33 ܐܲܝܟ ܕܐܘܼܦ ܒܲܥܝܸܢ ܡܸܢܕܝܼ ܠܟܠ ܐܢܵܫܵܐ ܟܹܐ ܫܵܦܪܸܢ: ܘܠܹܐ ܒܲܥܝܸܢ ܡܸܢܕܝܼ ܕܥܵܒܸܕ ܚܲܝܪ ܠܓܵܢܝܼ: ܐܝܼܢܵܐ ܗܿܘ ܕܠܪܵܒܵܐ ܥܵܒܸܕ ܚܲܝܪ: ܕܚܲܝܝܼ.

 

ܩܦܠܐܘܢ: ܝܐ

1 ܗܵܘܝܼܬܘܿܢ ܕܵܡܝܵܢܹ̈ܐ ܐܸܠܝܼ: ܕܵܐܟܼܝܼ ܕܐܘܼܦ ܐܵܢܵܐ ܒܡܫܝܼܚܵܐ. 2 ܐܝܼܢܵܐ ܒܸܚܩܵܪܵܘܟܼܘܿܢ ܝܼܘܸܢ: ܐܵܚܘܿܢܘܵܬܝܼ̈: ܕܒܟܠ ܡܸܢܕܝܼ ܩܲܡ ܕܵܟܼܪܝܼܬܘܿܢ ܠܝܼ: ܘܕܵܐܟܼܝܼ ܘܣܘܼܦܸܠܝܼ ܐܸܠܵܘܟܼܘܿܢ ܣܵܦܝܵܢܘܼܝܵܬܹ̈ܐ ܕܒܼܝܼܩܵܝ ܝܬܘܿܢ. 3 ܐܝܼܢܵܐ ܒܸܒܲܥܝܵܐ ܝܘܸܢ ܕܝܲܕܥܝܼܬܘܿܢ: ܕܪܹܫܵܐ ܕܟܠ ܐܢܵܫܵܐ ܡܫܝܼܚܵܐ ܝܠܹܐ: ܘܪܹܫܵܐ ܕܒܲܟܼܬܵܐ ܓܲܒܼܪܵܐ ܝܠܹܐ: ܘܪܹܫܹܗ ܕܡܫܝܼܚܵܐ ܐܲܠܵܗܵܐ ܝܠܹܐ. 4 ܟܠ ܐܢܵܫܵܐ ܕܨܵܠܹܐ ܝܲܢ ܢܵܒܹܐ: ܟܲܕ ܟܘܼܣܝܵܐ ܪܸܫܹܗ: ܟܹܐ ܡܲܢܚܸܦ ܠܪܸܫܹܗ. 5 ܘܟܠ ܒܲܟܼܬܵܐ ܕܨܵܠܝܵܐ ܝܲܢ ܢܵܒܝܵܐ: ܟܲܕ ܓܸܠܝܵܐ ܪܹܫܘܼܗܿ: ܟܹܐ ܡܲܢܚܸܦܵܐ ܠܪܹܫܘܼܗܿ: ܣܵܒܵܒ ܚܕܵܐ ܝܼܠܵܐ ܥܲܡ ܕܗܿܝ ܕܗܵܘܝܵܐ ܓܪܥܝܼܬܵܐ. 6 ܣܵܒܵܒ ܐܸܢ ܠܵܐ ܦܵܝܫܵܐ ܟܘܼܣܝܼܬܵܐ ܒܲܟܼܬܵܐ: ܐܘܼܦ ܗܵܘܝܵܐ ܡܘܼܩܪܸܛܬܵܐ. ܐܝܼܢܵܐ ܐܸܢ ܥܲܝܒܵܐ ܝܠܹܐ ܠܒܲܟܼܬܵܐ: ܐܘܼܦ ܗܵܘܝܵܐ ܡܘܼܩܪܸܛܬܵܐ ܝܲܢ ܓܪܥܝܼܬܵܐ: ܦܵܝܫܵܐ ܟܘܼܣܝܼܬܵܐ. 7 ܣܵܒܵܒ ܐܢܵܫܵܐ ܠܹܐ ܝܠܵܐ ܘܵܓܸܒ ܕܟܵܣܹܐ ܪܹܫܹܗ: ܣܵܒܵܒ ܕܕܡܘܼܬܵܐ ܘܬܸܫܒܘܿܚܬܵܐ ܕܐܲܠܵܗܵܐ ܝܠܹܐ. ܐܝܼܢܵܐ ܒܲܟܼܬܵܐ ܚܸܩܪܵܐ ܕܓܲܒܼܪܵܐ ܝܠܵܐ. 8 ܣܵܒܵܒ ܐܢܵܫܵܐ ܠܹܐ ܝܠܹܐ ܡܼܢ ܒܲܟܼܬܵܐ: ܐܸܠܵܐ ܒܲܟܼܬܵܐ ܡܼܢ ܐܢܵܫܵܐ. 9 ܣܵܒܵܒ ܐܘܼܦ ܐܢܵܫܵܐ ܠܵܐ ܦܸܫܠܹܐ ܒܼܪܝܵܐ ܣܵܒܵܒ ܕܒܲܟܼܬܵܐ: ܐܸܠܵܐ ܒܲܟܼܬܵܐ ܣܵܒܵܒ ܕܐܢܵܫܵܐ. 10 ܣܵܒܵܒ ܕܐܵܗܵܐ ܘܵܓܸܒ ܝܼܠܵܐ ܠܒܲܟܼܬܵܐ ܕܗܵܘܹܐ ܗܘܼܟܡܵܐ ܥܲܠ ܪܹܫܘܼܗܿ: ܣܵܒܵܒ ܕܡܲܠܲܐܟܹ̈ܐ. 11 ܐܝܼܢܵܐ ܠܹܐ ܝܠܹܐ ܐܢܵܫܵܐ ܠܒܲܕܲܪ ܡܼܢ ܒܲܟܼܬܵܐ: ܐܘܼܦ ܠܵܐ ܒܲܟܼܬܵܐ ܠܒܲܕܲܪ ܡܼܢ ܐܢܵܫܵܐ: ܒܡܵܪܲܢ. 12 ܣܵܒܵܒ ܕܵܐܟܼܝܼ ܕܝܼܠܵܐ ܒܲܟܼܬܵܐ ܡܼܢ ܓܲܒܼܪܵܐ: ܗܲܕܟܼܵܐ ܐܘܼܦ ܓܲܒܼܪܵܐ ܒܝܸܕ ܓܲܒܼܪܵܐ ܒܝܸܕ ܒܲܟܼܬܵܐ: ܐܝܼܢܵܐ ܟܠ ܡܸܢܕܝܼ ܡܼܢ ܐܲܠܵܗܵܐ ܝܠܹܐ. 13 ܕܘܼܢܘܿܢ ܒܓܵܢܵܘܟܼܘܿܢ. ܟܹܐ ܠܵܚܡܵܐ ܠܒܲܟܼܬܵܐ ܕܟܲܕ ܓܸܠܝܵܐ ܪܹܫܘܼܗܿ ܨܵܠܝܵܐ ܩܵܕ̄ܡ ܐܲܠܵܗܵܐ: 14 ܐܘܼܦ ܐܲܨܠܵܐ ܒܓܵܢܹܗ ܠܹܐ ܝܠܹܐ ܡܵܠܘܿܦܵܘܟܼܘܿܢ ܕܐܢܵܫܵܐ ܐܝܼܡܲܢ ܕܝܵܪܸܟ ܣܲܥܪܵܐ ܕܪܸܫܹܗ: ܒܵܨܘܿܪܘܼܬܵܐ ܝܠܵܐ ܐܸܠܹܗ: 15 ܘܒܲܟܼܬܵܐ ܐܝܼܡܲܢ ܕܝܵܪܸܟ ܟܵܘܣܘܼܗܿ ܚܸܩܪܵܐ ܝܠܹܐ ܐܸܠܵܗܿ: ܣܵܒܵ ܕܟܵܘܣܘܼܗܿ ܡܒܵܕܲܠ ܕܡܵܟܲܣܝܵܐ ܦܸܫܠܹܐ ܝܘܼܗܑܒܼܵܐ ܐܸܠܵܗܿ. 16 ܐܝܼܢܵܐ ܐܸܢ ܐܢܵܫܵܐ ܦܵܝܸܫ ܚܸܙܝܵܐ ܐܲܝܟ ܡܲܩܪܸܨܵܢܵܐ: ܐܲܚܢܲܢ ܠܲܝܬ ܠܲܢ ܥܵܕܲܬ ܐܲܝܟ ܕܐܵܗܵܐ: ܘܠܵܐ ܥܹܪܬܹܗ ܕܐܲܠܵܗܵܐ. 17 ܐܝܼܢܵܐ ܐܵܗܵܐ ܦܵܩܘܿܕܹܐ ܝܘܸܢ: ܠܵܐ ܐܲܝܟ ܕܚܵܩܪܸܢܵܘܟܼܘܿܢ: ܣܵܒܵܒ ܠܹܐ ܗ̄ܘܵܐ ܕܠܵܩܵܕ̄ܡܵܘܟܼܘܿܢ ܐܬܸܠܵܘܟܼܘܿܢ ܡܸܚܕܵܪܹ̈ܐ: ܐܸܠܵܐ ܠܒܵܨܘܿܪܘܼܬܵܐ. 18 ܣܵܒܵܒ ܩܵܕ̄ܡܵܝܬܵܐ: ܐܝܼܡܲܢ ܕܒܸܓܸܡܲܥܝܵܐ ܝܬܘܿܢ ܒܥܸܕܬܵܐ: ܒܸܫܡܲܥܝܵܐ ܝܘܸܢ ܕܐܝܼܬ ܓܵܘܵܘܟܼܘܿܢ ܕܘܼܒܵܪ̈ܘܼܝܵܬܹܐ: ܘܡܸܢܕܝܼ ܡܸܢܕܝܼ ܗܲܡܘܼܢܹܐ ܝܘܸܢ. 19 ܣܵܒܵܒ ܠܵܙܸܡ ܝܼܠܵܐ ܕܗܵܘܝܼ ܐܘܼܦ ܡܲܩܲܪ̈ܨܘܼܝܵܬܹܐ ܓܵܘܵܘܟܼܘܿܢ: ܕܐܵܢܝܼ ܕܝܼܢܵܐ ܡܲܩܒܘܼܠ ܦܵܝܫܝܼ ܝܕܸܥܝܹܐ ܓܵܘܵܘܟܼܘܿܢ. 20 ܒܲܣ ܐܝܼܡܲܢ ܕܓܲܡܥܝܼܬܘܿܢ ܒܚܕܵܐ ܕܘܼܟܵܐ: ܠܲܝܬ ܡܘܼܡܟܸܢ ܠܹܐܟܼܵܠܵܐ ܚܵܪܲܡܫܵܐ ܕܡܵܪܲܢ: 21 ܣܵܒܵܒ ܟܲܕ ܐܵܟܼܠܝܼܬܘܿܢ: ܟܠ ܐܢܵܫܵܐ ܩܵܕ̄ܡܵܝܬܵܐ (ܡܗܿܘ ܐܚܹܪ̄ܢܵܐ) ܒܸܫܩܵܠܵܐ ܝܠܹܐ ܚܵܪܲܡܫܵܐ ܕܓܵܢܹܗ: ܘܒܸܗ̄ܘܵܝܵܐ ܝܠܹܐ ܚܵܕ̄ ܟܦܝܪܢܵܐ: ܘܚܕ̄ ܪܵܘܵܝܵܐ 22 ܡܘܼܕܝܼ: ܒܵܬܹ̈ܐ ܠܲܝܬ ܠܵܘܟܼܘܿܢ ܕܐܵܟܼܠܝܬܘܿܢ ܘܫܵܬܝܼܬܘܿܢ: ܝܲܢ ܠܥܸܕܬܹܗ ܕܐܲܠܵܗܵܐ ܡܲܣܠܘܼܝܹܐ ܝܬܘܿܢ: ܘܡܲܢܚܘܼܦܹܐ ܝܬܘܿܢ ܠܐܵܢܝܼ ܕܠܲܝܬ ܠܗ̄ܘܿܢ: ܡܘܼܕܝܼ ܐܵܡܪܸܢܵܘܟܼܘܿܢ: ܚܵܩܪܸܢܵܘܟܼܘܿܢ: ܒܐܵܗܵܐ ܠܹܐ ܚܵܩܪܸܢ. 23 ܣܵܒܵܒ ܐܵܢܵܐ ܩܘܼܒܸܠܝܼ ܡܼܢ ܡܵܪܲܢ ܗܿܘ ܡܸܢܕܝܼ ܕܣܘܼܦܸܠܝܼ ܐܸܠܵܘܟܼܘܿܢ: ܕܡܵܪܲܢ ܝܼܫܘܿܥ ܒܗܿܘ ܠܲܝܠܹܐ ܕܦܝܵܫܵܐ ܗ̄ܘܵܐ ܣܘܼܦܝܵܐ: ܫܩܸܠܹܐ ܠܲܚܡܵܐ: 24 ܘܒܘܼܪܸܟܼܠܹܐ: ܘܩܨܹܠܹܐ: ܘܐܡܸܪܹܐ: ܐܵܗܵܐ ܝܠܹܐ ܦܲܓܼܪܝܼ ܕܒܚܵܬܸܪ ܕܝܼܵܘܟܼܘܿܢ ܦܝܵܫܵܐ ܝܠܹܐ ܩܨܸܝܵܐ: ܐܵܗܵܐ ܥܒܼܪܘܿܢ ܠܕܟܼܵܪܝܼ. 25 ܗܲܕܟܼܵܐ ܡܒܵܬ̄ܪ ܕܐܟܸܠܘܿܢ ܚܵܪܲܡܫܵܐ: ܐܘܼܦ ܟܵܣܵܐ: ܟܲܕ ܐܵܡܸܪ: ܐܵܗܵܐ ܟܵܣܵܐ ܕܝܵܬܹܩܹܐ ܚܲܕܬܵܐ ܝܠܹܐ ܒܕܸܡܝܼ: ܐܵܗܵܐ ܥܒܼܘܿܕܘܿܢ: ܟܠ ܐܝܼܡܲܢ ܕܫܵܬܝܼܬܘܿܢ: ܠܕܟܼܵܪܝܼ. 26 ܣܵܒܵܒ ܟܠ ܐܝܼܡܲܢ ܕܐܵܟܼܠܝܼܬܘܿܢ ܐܵܗܵܐ ܠܲܚܡܵܐ: ܘܫܵܬܝܼܬܘܿܢ ܐܵܗܵܐ ܟܵܣܵܐ: ܡܵܘܬܹܗ ܕܡܵܪܲܢ ܟܹܐ ܡܲܕܥܝܼܬܘܿܢ: ܗܲܠ ܐܬܵܝܬܹܗ. 27 ܒܲܣ ܗܿܘ ܕܐܵܟܸܠ ܡܼܢ ܠܲܚܡܹܗ ܘܫܵܬܹܐ ܡܼܢ ܟܵܣܹܗ ܕܡܵܪܝܵܐ ܘܠܵܐ ܚܵܫܸܚ ܐܸܠܹܗ: ܓܘܼܢܵܗܟܵܪ ܝܼܠܹܗ ܠܕܸܡܹܗ ܕܡܵܪܝܵܐ ܘܠܦܲܓܼܪܹܗ. 28 ܐܝܼܢܵܐ ܗܵܘܹܐ ܐܢܵܫܵܐ ܨܲܚܨܘܼܝܹܐ ܓܵܢܹܗ: ܘܗܲܕܟܼܵܐ ܐܵܟܸܠ ܡܼܢ ܠܲܚܡܵܐ: ܘܫܵܬܹܐ ܡܼܢ ܟܵܣܵܐ. 29 ܣܵܒܵܒ ܡܿܢ ܕܐܵܟܸܠ ܘܫܵܬܹܐ ܡܸܢܹܗ ܓܘܼܢܵܗܟܵܪܘܼܬܵܐ ܠܓܵܢܹܗ ܟܹܐ ܐܵܟܸܠ ܘܟܹܐ ܫܵܬܹܐ: ܐܸܢ ܠܵܐ ܦܵܪܸܫ ܦܲܓܼܪܹܗ ܕܡܵܪܝܵܐ. 30 ܣܵܒܵܒ ܕܐܵܗܵܐ ܪܵܒܵܐ ܝܢܵܐ ܓܵܘܵܘܟܼܘܿܢ ܡܸܪ̈ܥܝܹܐ ܘܙܲܒܘܼܢܹ̈ܐ: ܘܪܵܒܵܐ ܕܕܡܝܼܟܹܐ ܝܢܵܐ. 31 ܐܝܼܢܵܐ ܐܸܢ ܓܵܢܲܢ ܦܵܪܫܵܚ ܗ̄ܘܵܘ: ܠܹܐ ܦܵܝܫܵܚ ܗ̄ܘܵܘ ܕܝܼܢܹܐ. 32 ܐܝܼܢܵܐ ܟܲܕ ܦܵܝܫܵܚ ܕܝܼܢܹܐ: ܟܹܐ ܦܵܝܫܵܚ ܬܘܼܥܠܡܹܐ ܡܼܢ ܡܵܪܝܵܐ: ܕ܆ܠܵܐ ܦܵܝܫܵܚ ܥܒܼܝܼܕܹܐ ܓܘܼܢܵܗܟܵܪ ܥܲܡ ܥܵܠܡܵܐ. 33 ܒܲܣ ܐܵܚܘܿܢܘܵܬܝܼ̈: ܐܝܼܡܲܢ ܕܓܲܡܥܝܼܬܘܿܢ ܠܹܐܟܼܵܠܵܐ: ܗܵܘܝܪܬܘܿܢ ܥܲܪܩܘܼܠܹܐ ܚܵܕ̄ ܠܕܗܿܘ ܐܚܹܪ̄ܢܵܐ. 34 ܐܝܼܢܵܐ ܗܿܘ ܕܝܼܠܹܐ ܟܦܝܼܢܵܐ: ܓܵܘ ܒܲܝܬܹܗ ܐܵܟܸܠ: ܕܠܵܐ ܠܓܘܼܢܵܗܟܵܪܘܼܬܵܐ ܗܵܘܝܼܬܘܿܢ ܒܸܓܼܡܲܥܝܵܐ. ܐܝܼܢܵܐ ܥܲܠ ܡܸܢܝܼܵܢܹ̈ܐ ܐܚܹܪ̄ܢܹ̈ܐ: ܐܝܼܡܲܢ ܕܐܵܬܸܢ ܒܸܬ ܦܵܩܕܸܢܵܘܟܼܘܿܢ.

 

ܩܦܠܐܘܢ: ܝܒ

1 ܐܝܼܢܵܐ ܥܲܠ (ܚܲܠܲܥܬܹ̈ܐ) ܕܪܘܼܚܵܐ: ܐܵܚܘܿܢܘܵܬܝܼܗ: ܒܸܒܲܥܝܵܐ ܝܘܸܢ 2 ܕܝܲܕܥܝܪܬܘܿܢ ܕܟܲܕ ܚܲܢܦܹ̈ܐ ܝܬܘܿܢ ܗ̄ܘܵܘ: ܠܨܵܢܲܡܹ̈ܐ ܐܵܢܝܼ ܕܠܲܝܬ ܠܗ̄ܘܿܢ ܩܵܠܵܐ ܟܹܐ ܦܵܝܫܝܼܬܘܿܢ ܗ̄ܘܵܘ ܠܘܼܒܠܹܐ: ܟܠ ܕܐܵܟܼܝܼ ܕܦܵܝܫܝܼܬܘܿܢ ܗ̄ܘܵܘ ܬܘܼܓܒܼܪܹܐ. 3 ܣܵܒܵܒ ܕܐܵܗܵܐ ܡܲܕܘܼܥܝܹܐ ܝܘܸܢ ܐܸܠܵܘܟܼܘܿܢ: ܕܠܲܝܬ ܐܢܵܫܵܐ ܕܗܲܡܙܸܡ ܒܪܘܼܚܵܐ ܕܐܲܠܵܗܵܐ: ܘܐܵܡܸܪ: ܡܘܼܚܪܸܡܵܐ ܝܠܹܐ ܝܼܫܘܿܥ: ܘܐܘܼܦ ܠܹܐ ܐܢܵܫܵܐ ܡܵܨܹܐ ܠܐܹܡܵܪܵܐ: ܡܵܪܝܵܐ ܝܠܹܐ ܝܼܫܘܿܥ: ܐܸܠܵܐ ܐܸܢ ܒܪܘܼܚܵܐ ܕܩܘܼܕܫܵܐܐ 4 ܐܝܼܢܵܐ ܐܝܼܬ ܦܲܠܝܵܬܹ̈ܐ ܕܚܲܠܲܥܬܹ̈ܐ: ܐܸܠܵܐ ܚܕܵܐ ܪܘܼܚܵܐ ܝܠܵܐ. 5 ܘܐܝܼܬ ܦܲܠܝܵܬܹ̈ܐ ܕܚܸܠܡܲܬܹ̈ܐ: ܐܸܠܵܐ ܚܵܕ̄ ܡܵܪܝܵܐ ܝܠܹܐ. 6 ܘܐܝܼܬ ܦܲܠܝܵܬܹ̈ܐ ܕܡܲܥܒܲܕܝܵܬܹ̈ܐ: ܐܸܠܵܐ ܚܵܕ̄ ܝܼܠܹܐ ܐܲܠܵܗܵܐ ܕܟܹܐ ܡܲܥܒܸܕ ܟܠ ܡܸܢܕܝܼ ܒܟܠܵܝ. 7 ܐܝܼܢܵܐ ܠܐܢܵܫܵܐ ܐܢܵܫܵܐ ܟܹܐ ܦܵܝܸܫ ܝܘܼܗ̄ܒܼܵܐ ܓܸܠܝܵܢܵܐ ܕܪܘܼܚܵܐ: ܠܗܲܝܘܼܪܘܼܗܝ. 8 ܣܵܒܵܒ ܐܝܼܬ ܕܝܸܗܒܸܠܬܵܐ ܝܠܵܐ ܐܸܠܹܗ ܒܪܘܼܚܵܐ ܗܸܡܹܙܡܵܢ ܕܥܵܩܸܠܕܵܪܘܼܬܵܐ: ܘܠܐܚܹܪ̄ܢܵܐ: 9 ܗܹܡܹܙܡܵܢ ܕܝܕܹܥܬܵܐ: ܗܲܪ ܒܗܿܝ ܪܘܼܚܵܐ: ܠܐܚܹܪ̄ܢܵܐ: ܗܲܝܡܵܢܘܼܬܵܐ: ܗܲܪ ܒܗܿܝ ܪܘܼܚܵܐ: ܘܠܐܚܹܪ̄ܢܵܐ: ܚܲܠܲܥܬܹ̈ܐ ܕܗܲܟܝܼܡܘܼܬܵܐ: ܗܲܪ ܒܗܿܝ ܪܘܼܚܵܐ: 10 ܘܠܐܚܹܪ̄ܢܵܐ: ܡܲܥܒܲܕܝܵܬܹ̈ܐ ܕܚܲܝ̈ܠܹܐ: ܘܠܐܚܹܪ̄ܢܵܐ: ܢܒܼܝܼܘܼܬܵܐ: ܘܠܐܚܹܪ̄ܢܵܐ: ܦܪܵܫܬܵܐ ܕܪ̈ܘܼܚܹܐ: ܘܠܐܚܹܪ̄ܢܵܐ: ܬܵܗܵܪܹ̈ܐ ܕܠܸܫܵܢܹ̈ܐ: ܘܠܐܚܹܪ̄ܢܵܐ: ܦܵܫܲܩܬܵܐ ܕܠܸܫܵܢܹ̈ܐ. 11 ܐܝܼܢܵܐ ܐܲܢܹܐ ܟܠܵܝ ܗܲܪ ܗܿܝ ܚܕܵܐ ܪܘܼܚܵܐ ܟܹܐ ܡܲܥܒܼܕܵܐ: ܘܟܹܐ ܦܲܠܝܼܾܵܐ ܠܟܠ ܐܢܵܫܵܐ ܚܵܕܐ ܚܵܕ̄ ܐܲܝܟ ܕܗܿܝ ܒܵܣܡܵܐ ܠܵܗܿ. 12 ܣܵܒܵܒ ܕܵܐܟܼܝܼ ܕܦܲܓܼܪܵܐ ܚܵܕ̄ ܝܼܠܹܐ: ܘܐܝܼܬ ܒܝܹܗ ܗܲܕܵܡܹ̈ܐ ܪܵܒܵܐ: ܐܝܼܢܵܐ ܟܠܵܝ ܗܲܕܵܡܹ̈ܐ ܕܦܲܓܼܪܵܐ ܕܝܼܠܹܐ ܚܵܕ̄: ܟܲܕ ܪܵܒܵܐ ܝܢܵܐ: ܚܵܕ̄ ܦܲܓܼܪܵܐ ܝܢܵܐ: ܗܲܕܟܼܵܐ ܐܘܼܦ ܡܫܝܼܚܵܐ. 13 ܣܵܒܵܒ ܐܘܼܦ ܐܲܚܢܲܢ ܟܠܲܢ ܒܚܕܵܐ ܪܘܼܚܵܐ ܠܚܵܕ̄ ܦܲܓܼܪܵܐ ܥܡܸܕܠܲܢ: ܐܸܢ ܝܗ̄ܘܼܕܵܝܹ̈ܐ ܘܐܸܢ ܝܵܘܢܵܝܹ̈ܐ: ܘܐܸܢ ܩܘܼܠܹ̈ܐ ܘܐܸܢ ܐܵܙܵܕܹ̈ܐ: ܘܟܠܲܢ ܡܼܢ ܚܕܵܐ ܪܘܼܚܵܐ ܫܬܸܠܲܢ. 14 ܣܵܒܵܒ ܐܘܼܦ ܦܲܓܼܪܵܐ ܠܹܐ ܝܠܹܐ ܚܵܕ̄ ܗܲܕܵܡܵܐ: ܐܸܠܵܐ ܪܵܒܵܐ. 15 ܐܸܢ ܐܵܡܪܵܐ ܐܲܩܠܵܐ: ܣܵܒܵܒ ܠܹܐ ܝܘܵܢ ܐܝܼܕܵܐ ܠܹܐ ܝܘܵܢ ܡܼܢ ܦܲܓܼܪܵܐ: ܣܵܒܵܒ ܕܐܵܗܵܐ ܠܹܐ ܝܠܵܐ ܗܲܪ ܡܼܢ 16 ܦܲܓܼܪܵܐ: ܐܵܡܪܵܐ ܢܵܬܵܐ: ܣܵܒܵܒ ܠܹܐ ܝܘܵܢ ܥܲܝܢܵܐ ܠܹܐ ܝܘܵܢ ܡܼܢ ܦܲܓܼܪܵܐ: ܣܵܒܵܒ ܕܐܵܗܵܐ ܠܹܐ ܝܠܵܐ ܗܲܪ ܡܼܢ ܦܲܓܼܪܵܐ: 17 ܐܸܢ ܟܠܹܗ ܦܲܓܼܪܵܐ ܗܵܘܹܐ ܗ̄ܘܵܐ ܥܲܝܢܵܐ: ܐܲܝܟܵܐ ܗ̄ܘܵܐ ܫܡܵܥܝܬܵܐ: ܘܐܸܢ ܟܠܹܐ ܫܡܵܥܝܬܵܐ: ܐܲܝܟܵܐ ܗ̄ܘܵܐ ܫܩܵܠܬܵܐ ܕܪܹܝܚܵܐ: 18 ܐܝܼܢܵܐ ܐܵܕܝܼܵܐ ܐܲܠܵܗܵܐ ܡܘܼܬܸܒܼܠܹܐ ܠܗܲܕܵܡܹ̈ܐ ܠܟܠ ܚܵܕ ܡܸܢܵܝ ܒܦܲܓܼܪܵܐ: ܕܵܐܟܼܝܼ 19 ܕܗܿܘ ܒܣܸܡܠܵܐ ܠܹܐ. ܐܝܼܢܵܐ ܐܸܢ ܟܠܵܝ ܗ̄ܘܵܘ ܚܵܕ̄ ܗܲܕܵܡܵܐ: ܐܲܝܟܵܐ ܗ̄ܘܵܐ ܦܲܓܼܪܵܐ: 20 ܐܝܼܢܵܐ ܐܵܕܝܼܵܐ ܗܲܕܵܡܹ̈ܐ ܪܵܒܵܐ ܝܢܵܐ: ܐܝܼܢܵܐ ܚܵܕ̄ ܦܲܓܼܪܵܐ ܝܠܹܐ. 21 ܠܹܐ ܡܵܨܝܵܐ ܥܲܝܢܵܐ ܕܐܵܡܪܵܐ ܠܐܝܼܕܵܐ: ܕ܆ܠܹܐ ܝܘܲܬܝ ܠܵܙܸܡ ܐܸܠܝܼ: ܝܲܢ ܡܸܕܪܹܐ ܪܸܫܵܐ ܠܐܲܩܠܵܬܹ̈ܐ: ܕܠܹܐ ܝܬܘܿܢ ܠܵܙܸܡ ܐܸܠܝܼ. 22 ܐܸܠܵܐ ܙܵܘܕܵܐ ܐܵܢܝܼ ܗܲܕܵܡܹ̈ܐ ܕܦܲܓܼܪܵܐ ܕܦܵܝܫܝܼ ܚܫܝܼܒܹܐ ܒܘܼܫ ܙܲܒܘܼܢܹ̈ܐ: ܥܲܠܵܝ ܐܝܼܬ ܣܢܝܼܩܘܼܬܵܐ: 23 ܘܐܵܢܝܼ ܕܟܹܐ ܚܵܫܒܼܝܝ ܒܘܼܫ ܒܵܨܘܿܪܹ̈ܐ ܕܦܲܓܼܪܵܐ: ܠܐܵܢܝܼ ܐܝܼܩܵܪܵܐ ܙܵܘܕܵܐ ܟܹܐ ܡܲܚܕܵܝܝ: ܘܐܵܢܝܼ ܕܝܸܢ ܕܢܚܸܦܬܵܐ ܝܢܵܐ: ܐܵܕܵܒܘܼܬܵܐ ܙܵܘܕܵܐ ܐܝܼܬ ܠܗ̄ܘܿܢ: 24 ܘܐܵܢܝܼ ܗܲܕܵܡܹ̈ܐ ܕܒܥܸܢ ܕܝܼܢܵܐ ܡܵܪܹ̈ܐ ܐܵܕܵܒ ܠܲܝܬ ܠܗ̄ܘܿܢ ܣܢܝܼܩܘܼܬܵܐ: ܣܵܒܵܒ ܕܐܲܠܵܗܵܐ ܡܙܸܓܼܠܹܐ ܠܦܲܓܼܪܵܐ: ܘܝܸܗܒܸܠܹܐ ܐܝܼܩܵܪܵܐ ܙܵܘܕܵܐ ܠܗܿܘ ܕܝܼܠܹܐ ܒܵܨܘܿܪܵܐ: 25 ܕܠܵܐ ܗܵܘܝܵܐ ܕܘܼܒܵܪܘܼܬܵܐ ܒܦܲܓܼܪܵܐ: ܐܸܠܵܐ ܕܗܲܕܵܡܹ̈ܐ ܗܵܘܝܼ ܒܹܐ ܟܼܵܠܵܐ ܗܲܪ ܗܿܝ ܚܲܡ ܚܵܕ̄ ܥܲܠ ܗܿܘ ܐܚܹܪ̄ܢܵܐ. 26 ܘܐܸܢ ܚܵܕ̄ ܗܲܕܵܡܵܐ ܩܵܒܸܠ ܚܲܫܵܐ: ܟܠܵܝ ܗܲܕܵܡܹ̈ܐ ܟܹܐ ܩܵܒܸܠܝܼ ܚܲܫܵܐ ܥܲܡܹܗ: ܘܐܸܢ ܦܵܝܸܫ ܚܩܝܼܪܵܐ ܚܵܕ̄ ܗܲܕܵܡܵܐ: ܟܠܵܝ ܗܲܕܵܡ̈ܐ ܟܹܐ ܚܵܕܝܼ ܥܲܡܹܗ. 27 ܐܝܼܢܵܐ ܐܲܚܬܘܿܢ ܦܲܓܼܪܹܗ ܕܡܫܝܼܚܵܐ ܝܬܘܿܢ: ܘܗܲܕܵܡܹ̈ܐ ܟܠ ܚܵܕ̄ ܒܕܘܼܘܼܟܬܹܗ. 28 ܣܵܒܵܒ ܕܡܘܼܬܸܒܼܠܹܐ ܚܲܟܡܵܐ ܐܲܠܵܗܵܐ ܒܥܸܕܬܹܗ: ܩܵܕ̄ܡܵܝܬܵܐ ܫܠܝܼܚܹ̈ܐ: ܕܬܪܲܝ ܢܒܼ̈ܝܹܐ: ܘܕܬܠܵܬ̄ܐ ܡܲܠܦܵܢܹ̈ܐ: ܒܵܬ̄ܪܵܝ ܚܲܝ̈ܠܹܐ: ܒܵܬ̄ܪܵܝ ܚܲܠܲܥܬܹ̈ܐ ܕܗܲܟܝܼܡܘܼܬܵܐ: ܘܗܲܝܲܪܵܝܵܬܵܐ: ܘܬܲܓܒܲܪܝܵܬܵܐ: ܘܬܵܗܵܪܹ̈ܐ ܕܠܸܫܵܢܹ̈ܐ. 29 ܟܠܵܝ ܫܠܝܼܚܹ̈ܐ ܝܢܵܐ: ܟܠܵܝ ܢܒܼ̈ܝܹܐ ܝܢܵܐ: ܟܠܵܝ ܡܲܠܦܵܢܹ̈ܐ ܝܢܵܐ ܟܠܵܝ (ܥܵܒܼܕܵܢܹ̈ܐ ܕ) ܚܲܝ̈ܠܹܐ ܝܢܵܐ: 30 ܟܠܵܝ ܐܝܪܬ ܠܗ̄ܘܿܢ ܚܲܠܲܥܬܹ̈ܐ ܕܗܲܟܝܼܡܘܼܬܵܐ: ܟܠܵܝ ܒܠܸܫܵܢܹ̈ܐ ܟܹܐ ܗܲܡܙܸܡܝܼ: ܝܲܢ ܟܠܵܝ ܟܹܐ ܦܵܫܩܝܼ: 31 ܐܝܼܢܵܐ ܒܲܚܸܠܘܿܢ ܒܚܲܠܲܥܬܹ̈ܐ ܪܹܫܵܝܹܐ. ܘܐܵܢܵܐ ܡܸܕܪܹܐ ܒܸܬ ܡܲܚܙܸܢܵܘܟܼܘܿܢ ܐܘܿܪܚܵܐ ܕܒܘܼܫ ܨܦܵܝܝܼ.

 

ܩܦܠܐܘܢ: ܝܓ

1 ܐܸܢ ܒܠܸܫܵܢܹ̈ܐ ܕܒܢܲܝ̈ܢܵܫܵܐ ܗܲܡܙܸܡܸܢ: ܘܒܲܕܡܲܠܲܐܟܹ̈ܐ: ܘܚܘܼܒܵܐ ܠܵܐ ܗܵܘܹܐ ܒܝܼܝܼ: ܗ̄ܘܹܠܝܼ ܢܚܵܫܵܐ ܕܙܲܡܙܸܡ: ܝܲܢ ܟܲܢܓ ܕܝܵܗ̄ܒܸܠ ܩܵܠܵܐ. 2 ܘܐܸܢ ܗܵܘܝܵܐ ܒܝܼܝܼ ܢܒܼܝܼܘܼܬܵܐ: ܘܝܲܕܥܸܢ ܟܠܵܝ ܣܸܪܹ̈ܐ ܘܟܠܵܗܿ ܝܕܹܥܬܵܐ: ܘܐܸܢ ܗܵܘܝܵܐ ܒܝܼܝܼ ܟܠܵܗܿ ܗܲܝܡܵܢܘܼܬܵܐ: ܕܵܐܟܼܝܼ ܕܛܘܼܪܹ̈ܐ ܫܵܢܸܢ: ܘܚܘܼܒܵܐ ܠܲܝܬ ܒܝܼܝܼ: ܠܹܐ ܝܘܸܢ ܡܸܢܕܝܼ. 3 ܘܐܸܢ ܡܵܐܟܼܠܸܢ ܟܠ ܕܐܝܼܬ ܠܝܼ (ܠܡܸܣܟܹܢܹ̈ܐ): ܘܐܸܢ ܣܵܦܸܢ ܦܲܓܼܪܝܼ ܕܦܵܝܫ ܡܘܼܩܕܵܐ: ܘܚܘܼܒܵܐ ܠܵܐ ܗܵܘܹܐ ܒܝܼܝܼ: ܡܸܢܕܝܼ ܠܹܐ ܝܘܸܢ ܒܸܙܝܵܕܵܐ. 4 ܚܘܼܒܵܐ ܝܵܪܝܪܟܼܬܵܐ ܝܠܵܐ ܒܹܢܹܗ: ܘܒܵܣܝܼܡܵܐ ܝܠܹܐ: ܚܘܼܒܵܐ ܠܹܐ ܒܲܚܸܠ: ܚܘܼܒܵܐ ܠܹܐ ܓܲܪܘܼܣ ܓܵܢܹܗ: ܠܹܐ ܚܵܬܸܪ: 5 ܠܹܐ ܦܵܠܸܚ ܕܢܚܸܦܬܵܐ: ܠܹܐ ܒܲܥܝܹܐ ܡܸܢܕܝܼ ܕܓܵܢܹܗ: ܠܹܐ ܟܵܪܸܒ: ܠܹܐ ܚܵܫܸܒܼ ܕܣܸܪܝܵܐ: 6 ܠܹܐ ܚܕܹܐ ܒܥܵܘܠܵܐ: ܐܝܼܢܵܐ ܟܹܐ ܚܵܕܹܐ ܒܣܲܪܲܣܬܘܼܬܵܐ: 7 ܟܠ ܡܸܢܕܝܼ ܟܹܐ ܩܵܒܸܠ: ܟܠ ܡܸܢܕܝܼ ܟܹܐ ܗܲܡܸܢ: ܥܲܠ ܟܠ ܟܹܐ ܦܵܝܸܫ ܒܗܸܒܼܝܼ: ܟܠ ܟܹܐ ܚܵܡܸܠ. 8 ܚܘܼܒܵܐ ܗܲܪ ܠܹܐ ܢܵܦܸܠ: ܐܝܼܢܵܐ ܐܸܢ ܢܒܼܝܼܵܘܵܬܵܐ: ܒܸܬ ܒܵܛܠܝܼ: ܘܐܸܢ ܠܸܫܵܢܹ̈ܐ: ܒܸܬ ܫܵܬܩܝܼ: ܘܐܸܢ ܝܕܹܥܬܵܐ: ܒܸܬ ܒܵܛܠܵܐ. 9 ܣܵܒܵܒ ܚܵܕ̄ ܩܵܕܸܪ ܟܹܐ ܝܲܕܥܵܚ: ܘܚܵܕ̄ ܩܵܕܸܪ ܟܹܐ ܢܵܒܵܚ: 10 ܐܝܼܢܵܐ ܐܝܼܡܲܢ ܕܐܵܬܝܵܐ ܟܵܡܝܼܠܘܼܬܵܐ: ܗܿܝܓܵܗ ܒܸܬ ܒܵܛܸܠ ܗܿܘ ܡܸܢܕܝܼ ܕܝܼܗܑܘܵܐ ܒܚܵܕ̄ ܩܵܕܸܪ. 11 ܟܲܕ ܝܵܠܵܐ ܝܘܸܢ ܗ̄ܘܵܐ: ܐܲܝܟ ܝܵܠܵܐ ܟܹܐ ܗܲܡܙܸܡܸܢ ܗ̄ܘܵܐ: ܘܐܲܝܟ ܝܵܠܵܐ ܟܹܐ ܦܲܪܡܸܢ ܗ̄ܘܵܐ: ܘܐܲܝܟ ܝܵܠܵܐ ܟܹܐ ܚܵܫܒܸܢ ܗ̄ܘܵܐ. ܐܝܼܢܵܐ ܟܲܕ ܗ̄ܘܹܠܝܼ ܐܢܵܫܵܐ: ܒܘܼܛܠܵܝܠܝܼ ܡܸܢܕܝܼܵܢܹ̈ܐ ܕܝܵܠܘܼܬܵܐ. 12 ܣܵܒܵܒ ܐܵܕܝܼܵܐ ܐܲܝܟ ܕܒܢܘܼܪܵܐ ܒܸܚܙܵܝܵܐ ܝܘܵܚ: ܒܡܵܣܵܠܵܐ: ܐܝܼܢܵܐ ܗܿܝܓܵܗ ܦܵܬܵܐ ܩܵܕ̄ܡ ܦܵܬܵܐ. ܐܵܕܝܼܵܐ ܒܝܼܕܲܥܝܵܐ ܝܘܸܢ ܒܚܵܕ̄ ܩܵܕܸܪ: ܐܝܼܢܵܐ ܗܿܝܓܵܗ ܒܸܬ ܝܲܕܥܸܢ ܕܵܐܟܼܝܼ ܕܐܘܼܦ ܦܸܫܠܝܼ ܝܕܸܥܝܵܐ. 13 ܐܝܼܢܵܐ ܐܵܕܝܼܵܐ ܐܲܢܹܐ ܬܠܵܬܐ ܟܹܐ ܦܵܝܸܫܝܼ: ܗܲܝܡܵܢܘܼܬܵܐ: ܘܗܸܒܼܝܼ: ܘܚܘܼܒܵܐ: ܘܒܘܼܫ ܓܘܼܪܵܐ ܡܸܢܵܝ ܚܘܼܒܵܐ ܝܠܹܐ.

 

ܩܦܠܐܘܢ: ܝܕ

1 ܪܚܘܿܛܘܿܢ ܒܵܬ̄ܪ ܚܘܼܒܵܐ: ܘܒܲܚܸܠܘܿܢ ܒܚܲܠܲܥܬܹ̈ܐ ܕܪܘܼܚܵܐ: ܐܝܼܢܵܐ ܒܘܼܫ ܙܵܘܕܵܐ ܕܢܵܒܝܼܬܘܿܢ. 2 ܣܵܒܵܒ ܗܿܘ ܕܗܲܡܙܸܡ ܒܠܸܫܵܢܵܐ: ܠܹܐ ܝܠܹܐ ܠܒܢܲܝܗܢܵܫܵܐ ܗܲܡܙܘܼܡܹܐ: ܐܸܠܵܐ ܠܐܲܠܵܗܵܐ. ܣܵܒܵܒ ܐܢܵܫܵܐ ܠܹܐ ܫܲܡܸܥ: ܐܝܼܢܵܐ ܒܪܘܼܚܵܐ ܣܸܪܹ̈ܐ ܟܹܐ ܗܲܡܙܸܡ. 3 ܐܝܼܢܵܐ ܗܿܘ ܕܢܵܒܹܐ: ܠܒܢܲܝ̈ܢܵܫܵܐ ܟܹܐ ܗܲܡܙܸܡ ܒܸܢܝܵܢܵܐ: ܘܢܲܨܝܗܲܝܬ: ܘܝܵܗ̄ܒܲܠܬܵܐ ܕܠܸܒܵܐ. 4 ܗܿܘ ܕܗܲܡܙܸܡ ܒܠܸܫܵܢܵܐ: ܠܓܵܢܹܗ ܟܹܐ ܒܵܢܹܐ: ܐܝܼܢܵܐ ܗܿܘ ܕܢܵܒܹܐ: ܠܥܸܕܬܵܐ ܟܹܐ ܒܵܢܹܐ. 5 ܐܵܕܝܼܵܐ ܒܸܒܲܥܝܵܐ ܝܘܸܢ ܕܟܠܵܘܟܼܘܿܢ ܗܲܡܙܸܡܝܼܬܘܿܢ ܒܠܸܫܵܢܹ̈ܐ: ܐܝܼܢܵܐ ܙܵܘܕܵܐ ܕܢܵܒܝܼܬܘܿܢ: ܣܵܒܵܒ ܒܘܼܫ ܓܵܘܼܪܵܐ ܝܠܹܐ ܗܿܘ ܕܢܵܒܹܐ ܡܗܿܘ ܕܗܲܡܙܸܡ ܒܠܸܫܵܢܵܐ: ܐܸܢ ܠܵܐ ܦܵܫܸܩ: ܕܥܹܕܬܵܐ ܩܵܒܿܠܵܐ ܒܸܢܝܵܢܵܐ. 6 ܘܐܵܕܝܼܵܐ: ܐܵܚܘܿܢܘܵܬܝܼ̈: ܐܸܢ ܐܵܬܸܢ ܠܟܸܣܠܵܘܟܼܘܿܢ ܘܗܲܡܙܸܡܸܢ ܒܠܸܫܵܢܵܐ: ܡܘܼܕܝܼ ܦܲܝܕܵܐ ܒܸܬ ܥܵܒܼܕܸܢ ܐܸܠܵܘܟܼܘܿܢ: ܐܸܢ ܠܵܐ ܗܲܡܙܸܡܸܢ ܥܲܡܵܘܟܼܘܿܢ ܝܲܢ ܒܓܸܠܝܵܢܵܐ: ܝܲܢ ܒܝܕܹܥܬܵܐ: ܝܲܢ ܒܢܒܼܝܼܘܼܬܵܐ: ܝܲܢ ܒܝܘܼܠܦܵܢܵܐ: 7 ܣܵܒܵܒ ܐܘܼܦ ܡܸܢܕܝܼܵܢܹ̈ܐ ܕܠܲܝܬ ܒܵܝܝܼ ܓܵܢܵܐ: ܘܕܝܵܗ̄ܒܼܝܼ ܩܵܠܵܐ: ܐܸܢ ܫܲܒܝܼܒܵܐ: ܘܐܸܢ ܩܝܼܬܵܪܵܐ: ܐܸܢ ܦܘܼܫܘܼܢܝܵܐ ܠܵܐ ܥܵܒܼܕܝܼ ܒܗܵܘܵܙܹ̈ܐ: ܕܐܵܟܼܝܼ ܦܵܝܸܫ ܝܕܹܥܝܵܐ ܡܸܢܕܝܼ ܕܦܵܝܸܫ ܙܡܝܼܪܵܐ ܝܲܢ ܡܸܚܝܵܐ ܒܗܵܘܵܙ: 8 ܣܵܒܵܒ ܐܘܼܦ ܐܸܢ ܫܝܼܦܘܿܪܵܐ ܩܵܪܝܵܐ ܩܵܠܵܐ ܠܵܐ ܦܪܝܼܫܵܐ: ܡܵܢܝܼ ܒܸܬ ܗܵܕܸܪ ܓܵܢܹܗ ܠܦܠܵܫܵܐ: 9 ܗܲܕܟܼܵܐ ܐܘܼܦ ܐܲܚܬܘܿܢ: ܐܸܢ ܠܵܐ ܐܵܡܪܝܼܬܘܿܢ ܒܠܸܫܵܢܵܐ ܗܹܡܸܙܡܵܢ ܗܵܣܢܵܝܝܼ ܠܦܲܪܡܘܼܝܹܐ: ܕܵܐܟܼܝܼ ܦܵܝܸܫ ܝܕܸܥܝܵܐ ܡܸܢܕܝܼ ܕܝܼܠܹܐ ܐܡܝܼܪܵܐ: ܒܸܬ ܗܵܘܝܼܬܘܿܢ ܐܲܝܟ ܕܠܗܵܘܵܐ ܗܲܡܙܘܼܡܹܐ. 10 ܟܹܐ ܗܵܘܝܵܐ ܕܓܵܘ ܥܵܠܡܵܐ ܗܲܕܟܼܵܐ ܪܵܒܵܐ ܬܵܗܵܪܹ̈ܐ ܕܠܸܫܵܢܹ̈ܐ ܐܝܼܬ: ܘܠܲܝܬ ܚܵܕ̄ ܡܸܢܵܝ ܕܠܵܐ ܩܵܠܵܐ. 11 ܒܲܣ ܐܸܢ ܠܵܐ ܝܲܕܥܸܢ ܚܲܝܠܹܗ ܕܩܵܠܵܐ: ܟܹܐ ܗܵܘܸܢ ܒܲܪܒܪܵܝܵܐ ܠܗܿܘ ܕܗܲܡܙܸܡ: ܘܐܘܼܦ ܗܿܘ ܕܗܲܡܙܸܡ ܟܹܐ ܗܵܘܹܐ ܐܸܠܝܼ ܒܲܪܒܪܵܝܵܐ. 12 ܗܲܕܟܼܵܐ ܐܘܼܦ ܐܲܚܬܘܿܢ: ܣܵܒܵܒ ܕܩܲܕܲܬܟܲܫܹܐ ܝܬܘܿܢ ܕܚܲܠܲܥܬܹ̈ܐ ܕܪܘܼܚܵܐ: ܒܥܸܡܘܿܢ ܕܙܵܝܕܝܼܬܘܿܢ ܠܒܸܢܝܵܢܵܐ ܕܥܹܕܬܵܐ. 13 ܣܵܒܵܒ ܕܐܵܗܵܐ ܗܿܘ ܕܗܲܡܙܸܡ ܒܠܸܫܵܢܵܐ: ܨܵܠܹܐ ܕܦܵܫܸܩ. 14 ܣܵܒܵܒ ܐܸܢ ܗܵܘܸܢ ܨܵܠܘܿܝܹܐ ܒܠܸܫܵܢܵܐ: ܪܘܼܚܝܼ ܟܹܐ ܨܵܠܝܵܐ: ܐܝܼܢܵܐ ܚܝܼܵܠܝܼ ܕܠܵܐ ܛܥܘܼܢܝܵܬܹ̈ܐ ܝܠܹܐ. 15 ܒܲܣ ܡܘܼܕܝܼ ܝܠܹܐ: ܒܸܬ ܨܵܠܸܢ ܒܪܘܼܚܝܼ: ܘܒܸܬ ܨܵܠܸܢ ܐܘܼܦ ܒܚܝܼܵܠܝܼ. ܒܸܬ ܙܵܡܪܸܢ ܒܪܘܼܚܝܼ: ܘܒܸܬ ܙܵܡܪܸܢ ܐܘܼܦ ܒܚܝܼܵܠܝܼ. 16 ܘܐܸܢ ܠܵܐ: ܐܸܢ ܒܵܪܟܸܬ ܒܪܘܼܚܵܐ: ܗܿܘ ܕܒܸܕܒܼܵܩܵܐ ܝܠܹܐ ܕܘܼܟܬܹܗ ܕܠܵܐ ܝܠܝܼܦܵܐ: ܕܵܐܟܼܝܼ ܒܸܬ ܐܵܡܸܪ: ܐܵܡܹܝܢ: ܥܲܠ ܫܵܟܲܪܬܵܐ ܕܝܼܘܼܟ: ܣܵܒܵܒ ܠܹܐ ܝܠܹܐ ܒܝܼܕܲܥܝܵܐ ܡܘܼܕܝܼ ܒܹܐܡܵܪܵܐ ܝܘܸܬ. 17 ܣܵܒܵܒ ܐܲܢ̄ܬ ܨܦܵܝܝܼ ܒܵܪܘܿܟܹܐ ܝܘܸܬ: ܐܸܠܵܐ ܗܿܘ ܐܚܹܪ̄ܢܵܐ ܠܹܐ ܝܠܹܐ ܦܝܵܫܵܐ ܒܸܢܝܵܐ. 18 ܫܵܟܘܿܪܹܐ ܝܘܸܢ ܠܐܲܠܵܗܝܼ: ܙܵܘܕܵܐ ܡܼܢ ܟܠܵܘܟܼܘܿܢ ܟܹܐ ܗܲܡܙܸܡܸܢ ܒܠܸܫܵܢܵܐ: 19 ܐܸܠܵܐ ܓܵܘ ܥܸܕܬܵܐ ܒܸܒܲܥܝܵܐ ܝܘܸܢ ܕܚܲܡܸܫ ܗܹܡܸܙܡܵܢܹ̈ܐ ܒܚܝܼܵܠܝܼ ܗܲܡܙܸܡܸܢ: ܕܐܘܼܦ ܠܐܚܹܪ̄ܢܹܐ ܡܲܠܦܸܢ: ܙܵܘܕܵܐ ܡܼܢ ܪܸܒܘܼ ܗܹܡܸܙܡܵܢܹ̈ܐ ܒܠܸܫܵܢܵܐ. 20 ܐܵܚܘܿܢܘܵܬܝܼ̈: ܠܵܐ ܗܵܘܝܼܬܘܿܢ ܝܵܠܹܐ ܒܚܵܝܼܠܵܘ̈ܟܼܘܿܢ: ܐܸܠܵܐ ܠܒܝܼܫܵܬܹ̈ܐ ܗ̄ܘܹܡܘܿܢ ܝܵܠܹܐ: ܒܚܵܝܼܠܵܘ̈ܟܼܘܿܢ ܗ̄ܘܹܡܘܿܢ ܟܵܡܝܼ̈ܠܹܐ. 21 ܒܢܵܡܘܿܣܵܐ ܟܬܝܼܒܼܵܐ ܝܠܹܐ: ܕܒܠܸܫܵܢܹ̈ܐ ܐܚܹܪ̄ܢܹܐ ܘܒܣܸܦܘܵܬܹ̈ܐ ܕܢܘܼܟܼܪܵܝܹ̈ܐ ܒܸܬ ܗܲܡܙܸܡܸܢ ܥܲܡ ܕܐܵܗܵܐ ܛܵܝܸܦܵܐ: ܐܘܼܦ ܗܲܕܟܼܵܐ ܠܹܐ ܫܲܡܥܝܼ ܠܝܼ: ܒܹܐܡܵܪܵܐ ܝܠܹܐ ܡܵܪܝܵܐ. 22 ܒܲܣ ܠܸܫܵܢܹ̈ܐ ܠܢܝܼܫܲܢܩܵܐ ܝܢܵܐ: ܠܵܐ ܠܗܲܡܸܢܵܢܹ̈ܐ ܐܸܠܵܐ ܠܠܵܐ ܗܲܡܸܢܵܢܹ̈ܐ. ܐܝܼܢܵܐ ܢܒܼ̈ܝܼܘܵܬܵܐ ܠܹܐ ܝܢܵܐ ܠܠܵܐ ܗܲܡܸܢܵܢܹ̈ܐ: ܐܸܠܵܐ ܠܗܲܡܸܢܵܢܹ̈ܐ. 23 ܒܲܣ ܐܸܢ ܓܲܡܥܵܐ ܟܠܵܗ ܥܹܕܬܵܐ ܡܸܚܕܵܕܹ̈ܐ: ܘܟܠܵܝ ܒܠܸܫܵܢܹ̈ܐ ܗܲܡܙܸܡܝܼ: ܘܐܵܘܪܝܼ ܐܵܢܝܼ ܕܝܼܢܵܐ ܠܵܐ ܝܠܝܼܦܹ̈ܐ ܝܲܢ ܠܵܐ ܗܲܡܸܢܵܢܹ̈ܐ: ܠܹܐ ܐܵܡܪܝܼ ܕܫܘܼܕܸܢܵܘܟܼܘܿܢ: 24 ܐܝܼܢܵܐ ܐܸܢ ܟܠܵܘܟܼܘܿܢ ܗܵܘܝܼܬܘܿܢ ܢܵܒܘܿܝܹܐ: ܘܐܵܘܸܪ ܠܟܸܣܠܵܘܟܼܘܿܢ ܚܵܕ̄ ܠܵܐ ܝܠܝܼܦܵܐ: ܝܲܢ ܠܵܐ ܗܲܡܸܢܵܢܵܐ: ܒܸܬ ܦܵܝܸܫ ܡܘܼܢܟܸܣܵܐ ܡܼܢ ܟܠܵܝ: ܘܒܸܬ ܦܵܝܸܫ ܕܝܼܢܵܐ ܡܼܢ ܟܠܵܝ: 25 ܫܘܼܠܹ̈ܐ ܛܸܫܝܹ̈ܐ ܕܠܸܒܹܗ ܟܹܐ ܦܵܝܸܫ ܓܸܠܝܹܐ: ܘܗܲܕܟܼܵܐ ܒܸܬ ܢܵܦܸܠ ܥܲܠ ܦܵܬܹܗ: ܘܣܵܓܸܕ ܠܐܲܠܵܗܵ: ܘܐܵܡܸܪ: ܒܫܲܪܝܼܪܘܼܬܵܐ ܐܲܠܵܗܵܐ ܓܵܘܵܘܟܼܘܿܢ ܝܼܠܹܐ. 26 ܒܲܣ ܡܘܼܕܝܼ ܝܠܹܐ ܐܵܚܘܿܢܘܵܬܝܼ̈: ܐܝܼܡܲܢ ܕܓܸܡܥܝܼܬܘܿܢ: ܟܠ ܚܵܕ̄ ܡܸܢܵܘܟܼܘܿܢ ܐܝܼܬ ܠܹܐ ܡܲܙܡܘܿܪܵܐ: ܐܝܼܬ ܠܹܗ ܝܘܼܠܦܵܢܵܐ: ܐܝܼܬ ܠܹܗ ܓܸܠܝܵܢܵܐ: ܐܝܼܬ ܠܹܗ ܠܸܫܵܢܵܐ: ܐܝܪܬ ܠܹܗ ܦܘܼܫܵܩܵܐ ܟܠܵܝ ܠܒܸܢܝܵܢܵܐ ܗܵܘܝܼ. 27 ܐܸܢ ܒܠܸܫܵܢܵܐ ܐܢܵܫܵܐ ܗܲܡܙܸܡ: ܬܪܲܝ ܗܲܡܙܸܡܝܼ: ܝܲܢ ܟܲܕ ܪܵܒܵܐ: ܬܠܵܬ̄ܐ: ܘܚܵܕ̄ ܒܚܵܕ̄ ܗܲܡܙܸܡܝܼ: ܘܚܵܕ̄ ܦܵܫܸܩ. 28 ܘܐܸܢ ܠܲܝܬ ܕܦܵܫܸܩ: ܫܵܬܸܩ ܓܵܘ ܥܹܕܬܵܐ: ܘܒܸܝܠ ܓܵܢܹܗ ܘܠܲܐܠܵܗܵܐ ܗܲܡܙܸܡ. 29 ܘܢܒܼܝܹܐ: ܬܪܲܝ ܝܲܢ ܬܠܵܬ̄ܐ ܗܲܡܙܸܡܝܼ: ܘܐܵܢܝܼ ܐܚܹܪ̄ܢܹܐ ܦܵܪܸܫܝܼ. 30 ܐܝܼܢܵܐ ܐܸܢ ܠܐܚܹܪ̄ܢܵܐ ܕܝܼܠܹܐ ܟܬܝܼܒܼܵܐ ܡܸܢܕܝܼ ܦܵܝܸܫ ܓܸܠܝܵܐ: ܗܿܘ ܩܵܕ̄ܡܵܝܐ ܫܵܬܸܩ. 31 ܣܵܒܵܒ ܕܡܵܨܝܼܬܘܿܢ ܟܠܵܘܟܼܘܿܢ ܢܵܒܝܼܬܘܿܢ ܚܵܕ̄ ܒܚܵܕ̄: ܕܟܠ ܐܢܵܫܵܐ ܝܵܠܸܦ: ܘܟܠ ܐܢܵܫܵܐ ܦܵܝܸܫ ܝܘܼܗ̄ܒܼܵܐ ܠܸܒܵܐ: 32 ܘܪ̈ܘܼܚܹܐ ܕܢܒܼ̈ܝܹܐ ܠܢܒܼ̈ܝܹܐ ܟܹܐ ܗܵܘܝܼ ܙܲܒܛ: 33 ܣܵܒܵܒ ܐܲܠܵܗܵܐ ܠܹܐ ܝܠܹܐ ܕܫܓܼܘܼܫܝܵܐ: ܐܸܠܵܐ ܕܫܠܵܡܵܐ: ܐܲܝܟ ܕܒܟܠܵܝ ܥܹܕܵܬܹ̈ܐ ܕܩܲܕܝܼܫܹ̈ܐ. 34 ܒܲܟܼܬܵܬܵܘܟܼܘܿܢ ܓܵܘ ܥܹܕܬܵܐ ܗܵܘܝ ܫܬܝܼܩܹ̈ܐ: ܣܵܒܵܒ ܠܲܝܬ ܠܗ̄ܘܿܢ ܕܲܣܬܘܪ ܕܗܲܡܙܸܡܝܼ: ܐܸܠܵܐ ܕܗܵܘܝܼ ܙܲܒܛ: ܕܵܐܟܼܝܼ ܕܐܘܼܦ ܢܵܡܘܿܣܵܐ ܐܡܸܪܹܐ. 35 ܘܐܸܢ ܡܸܢܕܝܼ ܒܵܣܡܵܐ ܠܗ̄ܘܿܢ ܕܝܵܠܦܝܼ ܓܵܘ ܒܲܬܘܵܬܵܝ̈ ܒܵܩܪܝܼ ܡܼܢ ܓܲܒܼܪܵܢܵܝ: ܣܵܒܵܒ ܢܚܸܦܬܵܐ ܝܠܵܐ ܠܒܲܟܼܬܵܐ ܕܗܲܡܙܸܡܵܐ ܓܵܘ ܥܹܕܬܵܐ. 36 ܩܵܡܘܿܕܝܼ: ܡܸܢܵܘܟܼܘܿܢ ܦܠܸܛܠܵܐ ܗܹܡܸܙܡܵܢ ܕܐܲܠܵܗܵܐ: ܝܲܢ ܠܟܤܠܵܘܟܼܘܿܢ ܒܢܲܦܫܵܘܟܼܘܿܢ ܡܛܸܠܵܐ: 27 ܐܸܢ ܐܢܵܫܵܐ ܚܵܫܸܒܼ ܕܢܒܼܝܼܵܐ ܝܠܹܐ: ܝܲܢ ܕܪܘܼܚܵܢܵܐ ܝܠܹܐ: ܝܲܕܸܥ ܐܲܢܸܐ ܕܒܸܟܬܵܒܼܵܐ ܝܘܸܢ ܐܸܠܘܟܼܘܿܢ ܕܦܘܼܩܕܵܢܹ̈ܐ ܕܡܵܪܲܢ ܝܼܢܵܐ. 38 ܐܝܼܢܵܐ ܐܸܢ ܐܢܵܫܵܐ ܠܹܐ ܝܲܕܸܥ: ܠܵܐ ܝܲܕܸܥ. 39 ܒܲܣ ܐܘܘܵܪܘܿܢ ܒܩܲܝܪܲܬ: ܐܵܚܘܿܢܘܵܬܝܼ̈: ܠܢܵܒܘܿܝܹܐ: ܘܠܗܲܡܙܘܼܡܹܐ ܒܠܸܫܵܢܹ̈ܐ ܠܵܐ ܡܲܟܠܝܼܬܘܿܢ. 40 ܐܝܼܢܵܐ ܟܠ ܡܸܢܕܝܼ ܗܵܘܹܐ ܒܐܵܕܵܒܘܼܬܵܐ ܘܒܪܹܐܙܵܐ.

 

ܩܦܠܐܘܢ: ܝܗ

1 ܐܝܼܢܵܐ ܡܲܕܘܼܥܝܹܐ ܝܘܸܢ ܐܸܠܵܘܟܼܘܿܢ: ܐܵܚܘܿܢܵܘܬܝܼ̈: ܐܸܘܵܢܓܵܝܼܘܿܢ ܕܡܘܼܫܚܸܕܠܝܼ ܐܸܠܵܘܟܼܘܿܢ: ܘܩܘܼܒܠܵܠܵܘܟܼܘܿܢ ܘܟܠܹܠܵܘܟܼܘܼܢ ܒܝܼܵܗܿ: 2 ܒܸܚܵܝܵܐ ܝܬܘܿܢ: ܐܸܢ ܕܵܒܼܩܝܼܬܘܿܢ ܒܗܿܝ ܗܹܡܸܙܡܵܢ ܕܡܘܼܫܚܸܕܠܝܼ ܐܸܠܵܘܟܼܘܿܢ: ܐܸܢ ܠܵܐ ܝܠܹܐ ܕܗܵܒܵܣ ܗܘܼܡܸܢܵܘܟܼܘܿܢ. 3 ܣܵܒܵܒ ܕܣܘܼܦܹܠܝܼ ܐܸܠܵܘܟܼܘܿܢ ܡܼܢ ܩܵܕ̄ܡܵܝܬܵܐ ܗܿܘ ܕܐܘܼܦ ܩܘܼܒܸܠܝܼ: ܕܡܫܝܼܚܵܐ ܡܸܬܠܹܐ ܣܵܒܵܒ ܕܚ̈ܛܵܗܲܢ: ܕܵܐܟܼܝܼ ܕܝܼܠܹܐ ܟܬܝܼܒܼܵܐ. 4 ܘܕܦܸܫܠܹܐ ܩܒܼܝܼܪܵܐ: ܘܕܦܸܫܠܹܐ ܡܘܼܩܸܡܵܐ ܒܝܘܿܡܵܐ ܕܬܠܵܬ̄ܐ: ܐܲܝܟ ܕܝܼܠܹܐ ܟܬܝܼܒܼܵܐ: 5 ܘܦܸܫܠܹܐ ܚܸܙܝܵܐ ܠܟܹܐܦܵܐ: ܘܒܵܬ̄ܪ ܕܗܿܘ ܠܬܪܸܥܣܲܪ: 6 ܘܒܵܬ̄ܪ ܗܵܕܵܐ ܦܸܫܠܹܐ ܚܸܙܝܵܐ ܠܙܵܘܕܵܐ ܡܼܢ ܚܲܡܸܫܡܵܐܐ ܐܵܚܘܿܢܘܵܬܹ̈ܐ ܡܸܚܕܵܕܹ̈ܐ: ܕܪܵܒܵܐ ܡܸܢܵܝ ܦܝܵܫܵܐ ܝܢܵܐ ܗܲܠ ܐܵܕܝܼܵܐ: ܘܡܸܢܵܝ ܕܡܸܟܼܠܘܿܢ. 7 ܘܒܵܬ̄ܪ ܐܲܢܹܐ: ܦܸܫܠܹܐ ܚܸܙܝܵܐ ܠܝܲܥܩܘܿܒܼ: ܘܒܵܬ̄ܪܹܗ ܠܟܠܵܝ ܫܠܝܼܚܹ̈ܐ. 8 ܐܝܼܢܵܐ ܒܚܲܪܬܵܐ ܕܟܠܵܝ: ܐܲܝܟ ܕܠܡܘܼܪܚܸܫܵܐ: ܦܸܫܠܹܐ ܚܸܙܝܵܐ ܐܘܼܦ ܐܸܠܝܼ. 9 ܣܵܒܵܒ ܐܵܢܵܐ ܝܘܸܢ ܙܥܘܿܪܵܐ ܕܫܠܝܼܚܹ̈ܐ: ܕܠܹܐ ܚܵܫܚܸܢ ܕܦܵܝܫܸܢ ܩܸܪܝܵܐ ܫܠܝܼܚܵܐ: ܣܵܒܵܒ ܕܛܪܸܕܠܝܼ ܠܥܸܕܬܹܗ ܕܐܲܠܵܗܵܐ. 10 ܐܝܼܢܵܐ ܒܫܵܦܵܩܲܬ ܕܐܲܠܵܗܵ ܝܼܘܸܢ ܡܸܢܕܝܼ ܕܝܼܘܸܢ: ܘܫܵܦܵܩܲܬܹܗ ܕܒܝܼܝܼ ܠܵܐ ܗ̄ܘܹܠܵܐ ܒܵܛܝܼܠܬܵܐ: ܐܸܠܵܐ ܙܵܘܕܵܐ ܡܼܢ ܟܠܵܝ ܓܹܗܠܝܼ: ܘܠܵܐ ܐܵܢܵܐ: ܐܸܠܵܐ ܫܵܦܵܩܲܬ ܕܐܲܠܵܗܵܐ ܕܝܼܠܵܐ ܥܲܡܝܼ. 11 ܒܲܣ ܐܸܢ ܐܵܢܵܐ ܘܐܸܢ ܐܵܢܝܼ: ܗܲܕܟܼܵܐ ܡܲܟܪܘܼܙܹܐ ܝܘܵܚ: ܘܗܲܕܟܼܵܐ ܗܘܼܡܸܢܵܘܟܼܘܿܢ. 12 ܐܝܼܢܵܐ ܐܸܢ ܡܫܝܼܚܵܐ ܦܝܵܫܵܐ ܝܠܹܐ ܡܘܼܟܪܸܙܵܐ ܕܩܸܡܠܹܐ ܡܼܢ ܡܝܼܬܹ̈ܐ: ܕܵܐܟܼܝܼ ܐܢܵܫܹ̈ܐ ܓܵܘܵܘܟܼܘܿܢ ܒܹܐܡܵܪܵܐ ܝܢܵܐ: ܕܠܲܝܬ ܩܝܵܡܬܵܐ ܕܡܝܼܬܹ̈ܐ: 13 ܐܝܼܢܵܐ ܐܸܢ ܩܝܵܡܬܵܐ ܕܡܝܼܬܹ̈ܐ ܠܲܝܬ: ܐܘܼܦ ܡܫܝܼܚܵܐ ܠܹܐ ܝܠܹܐ ܩܝܼܡܵܐ. 14 ܘܐܸܢ ܡܫܝܼܚܵܐ ܠܹܐ ܝܠܹܐ ܩܝܼܡܵܐ ܒܲܣ ܒܵܛܝܼܠܬܵܐ ܝܠܵܐ ܟܵܪܘܿܙܘܼܬܲܢ: ܘܒܵܛܝܼܠܬܵܐ ܝܠܵܐ ܐܘܼܦ ܗܲܝܡܵܢܘܼܬܵܐ ܕܝܼܵܘܟܼܘܿܢ. 15 ܘܐܘܼܦ ܐܲܚܢܲܢ ܦܝܵܫܵܐ ܝܘܵܚ ܡܫ̄ܟܸܝܼܚܹܐ ܣܵܗܕܹ̈ܐ ܕܵܓܵܠܹ̈ܐ ܕܐܲܠܵܗܵܐ: ܕܣܗܸܕܠܲܢ ܥܲܠ ܐܲܠܵܗܵܐ: ܕܡܘܼܩܸܡܠܹܐ ܠܡܫܝܼܚܵܐ: ܟܲܕ ܠܵܐ ܡܘܪܩܸܡܠܹܗ: ܐܸܢ ܗܲܕܟܼܵܐ ܡܝܼܬܹ̈ܐ ܠܹܐ ܩܵܝܡܝܼ. 16 ܣܵܒܵܒ ܐܸܢ ܡܝܼܬܹ̈ܐ ܠܹܐ ܩܵܝܡܝܼ: ܐܘܼܦ ܡܫܝܼܚܵܐ ܠܹܐ ܝܠܹܐ ܩܝܼܡܵܐ: 17 ܘܐܸܢ ܡܫܝܼܚܵܐ ܠܹܐ ܝܠܹܐ ܩܝܼܡܵܐ: ܒܵܛܝܼܠܬܵܐ ܝܠܵܐ ܗܲܝܡܵܢܘܼܬܵܘܟܼܘܿܢ: ܘܗܸܫ ܒܚܛܝܼܵܬܘ̈ܟܼܘܿܢ ܝܼܬܘܿܢ. 18 ܒܲܣ ܐܘܼܦ ܐܵܢܝܼ ܕܝܼܢܵ ܕܡܝܼܟܹܐ ܒܡܫܝܼܚܵܐ ܬܠܝܼܩܹܐ ܝܢܵܐ. 19 ܘܐܸܢ ܗܲܪ ܒܐܲܢܝܹܐ ܚܲܝܹ̈ܐ ܦܝܵܫܵܐ ܝܘܵܚ ܒܣܲܒܼܪܵܐ ܒܡܫܝܼܚܵܐ: ܒܘܼܫ ܫܲܩܝܼ ܝܘܵܚ ܡܼܢ ܟܠܵܝ ܒܢܲܝ̈ܢܵܫܵܐ. 20 ܐܝܼܢܵܐ ܐܵܕܝܼܵܐ ܡܫܝܼܚܵܐ ܩܝܼܡܵܐ ܝܠܹܐ ܡܼܢ ܡܝܼܬܹ̈ܐ: ܘܗ̄ܘܸܠܹܐ ܪܹܫܝܼܬܵܐ ܕܐܵܢܝܼ ܕܝܼܢܵܐ ܕܡܝܼܟܹܐ. 21 ܣܵܒܵܒ ܟܲܕ ܒܝܸܕ ܒܲܪܢܵܫܵܐ ܗ̄ܘܸܠܹܐ ܡܵܘܬܵܐ: ܗܲܕܟܼܵܐ ܐܘܼܦ ܒܝܸܕ ܒܲܪܢܵܫܵܐ ܗ̄ܘܸܠܵܐ ܩܝܵܡܬܵܐ ܕܡܝܼܬ̈. 22 ܒܲܣ ܕܵܐܟܼܝܼ ܕܒܵܐܕܵܡ ܟܠܵܝ ܟܹܐ ܡܵܝܬܝܼ: ܗܲܕܟܼܵܐ ܐܘܼܦ ܒܡܫܝܼܚܵܐ ܟܠܵܝ ܒܸܬ ܦܵܝܫܝܼ ܡܘܼܚܝܹܐ. 23 ܟܠ ܐܢܵܫܵܐ ܒܪܸܐܙܵܐ ܕܓܵܢܹܗ: ܡܫܝܼܚܵܐ ܪܸܫܝܼܬܵܐ: ܒܵܬ̄ܪ ܗܵܕܵܐ ܐܵܢܝܼ ܕܝܼܢܵܐ ܕܡܫܝܼܚܵܐ: ܒܐܬܵܝܬܹܐ. 24 ܗܲܝܓܵܗ ܒܸܬ ܗܵܘܝܵܐ ܚܲܪܬܵܐ: ܐܝܼܡܲܢ ܕܣܵܦܹܐ ܡܲܠܟܘܼܬܵܐ ܠܐܲܠܵܗܵܐ ܒܵܒܵܐ: ܐܝܼܡܲܢ ܕܒܵܛܸܠ ܠܟܠ ܪܸܫܵܐ: ܘܟܠ ܗܘܼܟܡܵܐ: ܘܟܠ ܚܲܝܠܵܐ. 25 ܣܵܒܵܒ ܘܵܓܸܒ ܝܼܠܵܐ ܕܗܵܟܸܡ: ܗܲܠ ܕܡܲܬܸܒܼ ܠܟܠܵܝ ܕܸܫܡܸܢܘܼ̈ܗܝ ܬܚܘܿܬ ܐܲܩܠܘܼ̈ܗܝ. 26 ܕܸܫܡܸܢ ܐܚܪܵܢܵܐ ܕܒܸܬ ܦܵܝܸܫ ܒܘܼܛܠܵܐ: ܡܵܘܬܵܐ ܝܠܹܐ. 27 ܣܵܒܵܒ ܟܠ ܙܘܼܒܛܸܢܹܐ ܬܚܘܿܬ ܐܲܩܠܘܼ̈ܗܝ. ܐܝܼܢܵܐ ܐܝܼܡܲܢ ܕܐܡܸܪܹܐ: ܟܠ ܡܸܢܕܝܼ ܦܸܫܠܹܐ ܙܲܒܛ ܐܸܠܹܗ: ܡܲܥܠܘܼܡ ܝܼܠܵܐ ܕܫܒܼܘܿܩ ܡܼܢ ܕܗܿܘ ܝܼܠܹܐ ܕܙܘܼܒܛܸܢܹܐ ܐܸܠܹܗ ܟܠ ܡܸܢܕܝܼ. 28 ܘܐܝܼܡܲܢ ܕܦܵܝܸܫ ܙܲܒܛ ܐܸܠܹܗ ܟܠ: ܗܿܝܓܵܗ ܒܪܘܼܢܵܐ ܒܓܵܢܹܗ ܒܸܬ ܦܵܝܸܫ ܙܲܒܛ ܠܗܿܘ ܕܥܒܸܕܠܹܐ ܙܲܒܛ ܐܸܠܹܐ ܟܠ: ܕܗܵܘܹܐ ܐܲܠܵܗܵܐ ܟܠ ܒܟܠ. 29 ܘܐܸܢ ܠܵܐ: ܡܘܼܕܝܼ ܒܸܬ ܥܵܒܼܕܝܼ ܐܵܢܝܼ ܕܒܸܥܡܵܕܵܐ ܝܢܵܐ ܡܼܢ ܓܸܒܵܐ ܕܡܝܼܬܹ̈ܐ: ܐܸܢ ܡܝܼܬܹ̈ܐ ܗܲܪ ܠܹܐ ܩܵܝܡܝܼ: ܩܵܡܘܿܕܝܼ ܒܸܥܡܵܪܵܐ ܝܢܵܐ ܡܼܢ ܓܸܒܵܝ: ܘܩܵܡܘܿܕܝܼ ܐܘܼܦ ܐܲܚܢܲܢ 31 ܒܟܠ ܣܵܥܲܬ ܒܩܹܘܲܢܕܹܢܘܿܣ ܒܸܟܠܵܝܵܐ ܝܘܵܚ: ܒܝܼܡܵܝܵܐ ܝܘܸܢ ܒܗܿܘ ܫܘܼܒܼܗܵܪܵܘܟܼܘܿܢ: ܐܵܚܘܢܘܵܬܝܼ̈: ܕܐܝܼܬ ܠܝܼ ܒܡܵܪܲܢ ܝܼܫܘܿܥ ܡܫܝܼܚܵ: ܕܟܠ ܝܘܿܡ ܒܸܡܝܵܬܵܐ ܝܘܸܢ. 32 ܐܸܢ ܐܲܝܟ ܕܓܵܘ ܒܢܲܝ̈ܢܵܫܵܐ ܦܠܸܫܠܝܼ ܥܲܡ ܗܲܝܘܵܢܹ̈ܐ ܓܵܘ ܐܵܦܣܘܿܣ: ܡܘܼܕܝܼ ܦܲܝܕܵܐ ܗ̄ܘܹܠܵܐ ܠܝܼ: ܐܸܢ ܡܝܼܬܹ̈ܐ ܠܹܐ ܩܵܝܡܝܼ: ܐܵܟܼܠܵܚ ܘܫܵܬܵܚ: ܣܵܒܵܒ ܩܵܝܕܲܡܬܵܐ ܡܵܝܬܵܚ. 33 ܠܵܐ ܚܵܠܛܝܼܬܘܿܢ: ܨܵܘܗܒܲܬܹ̈ܐ ܣܸܪܝܹܐ ܟܹܐ ܡܲܚܪܸܒܪܝܼ ܠܕܘܼܒܵܪܹ̈ܐ ܒܵܣܝܼܡܹ̈ܐ. 34 ܪܥܘܿܫܘܿܢ ܙܲܕܝܼܩܵܐܝܼܬ: ܘܠܵܐ ܚܵܛܝܼܬܘܿܢ: ܣܵܒܵܒ ܐܝܼܬ ܐܢܵܫܹ̈ܐ ܕܝܕܹܥܬܵܐ ܕܐܲܠܵܗܵܐ ܠܲܝܬ ܒܝܼܵܝ. ܠܢܚܸܦܬܵܘܟܼܘܿܢ ܐܵܗܵܐ ܒܹܐܡܵܪܵܐ ܝܘܸܢ. 35 ܐܸܠܵܐ ܒܸܬ ܐܵܡܸܪ ܐܢܵܫܵܐ: ܕܵܐܟܼܝܼ ܒܸܬ ܩܵܝܡܝܼ ܡܝܼܬܹ̈ܐ: ܘܒܡܘܼܕܝܼ ܦܲܓܼܪܵܐ ܒܸܬ ܐܵܬܝܼ: 36 ܐܵܝ ܟܝܼܡ ܗܵܘܢܵܐ: ܗܿܘ ܕܒܸܙܪܲܥܝܵܐ ܝܘܸܬ: ܐܸܢ ܠܵܐ ܡܵܝܸܬ: ܠܹܐ ܦܵܝܸܫ ܡܘܼܚܝܼܵܐ. 37 ܘܗܿܘ ܡܸܢܕܝܼ ܕܒܸܙܪܲܥܝܵܐ ܝܘܸܬ: ܠܹܐ ܠܹܐ ܗܿܘ ܦܲܓܼܪܵܐ ܕܒܸܬ ܗܵܘܹܐ ܒܸܙܪܲܥܝܵܐ ܝܘܸܬ: ܐܸܠܵܐ ܕܲܢܕܸܟܬܵܐ ܫܘܼܠܚܵܝܬܵܐ: ܡܩܵܘܡܵܐ ܕܚܸܛܹ̈ܐ ܝܲܢ ܕܒܲܪܙܲܪ̈ܥܹܐ ܐܚܹܪ̄ܢܹܐ: 38 ܐܝܼܢܵܐ ܐܲܠܵܗܵܐ ܟܹܐ ܝܵܗ̄ܒܸܠ ܠܹܗ ܦܲܓܼܪܵܐ: ܕܐܵܟܼܝܼ ܕܒܵܣܡܵܐ ܠܹܗ: ܘܠܟܠ ܚܵܕ̄ ܡܼܢ ܒܲܪܙܲܪ̈ܥܹܐ ܦܲܓܼܪܵܐ ܕܓܵܢܹܗ. 39 ܟܠ ܒܸܣܪܵܐ ܠܹܐ ܝܠܹܐ ܚܵܕ̄ ܬܵܗܵܪ ܒܸܣܪܵܐ: ܐܸܠܵܐ ܚܵܕ̄ ܬܵܗܵܐ ܒܸܣܪܵܐ ܕܒܲܪܢܵܫܵܐ ܝܠܹܐ: ܘܐܚܹܪ̄ܢܵܐ ܒܸܣܪܵܐ ܕܗܲܝܘܵܢܹ̈ܐ: ܘܐܚܹܪ̄ܢܵܐ ܕܛܲܝܪܹ̈ܐ: ܘܐܚܹܪ̄ܢܵܐ ܕܢܘܼܢܹ̈ܐ. 40 ܐܝܼܬ ܦܲܓܼܪܹ̈ܐ ܫܡܲܝܵܢܹ̈ܐ: ܘܐܝܼܬ ܦܲܓܼܪܹ̈ܐ ܐܲܪ̈ܥܵܢܹܐ. ܐܸܠܵܐ ܚܵܕ̄ ܬܵܗܵܪ ܝܼܠܹܐ ܚܩܝܼܪܵܐ ܕܫܡܲܝܵܢܹ̈ܐ: ܘܐܚܹܪ̄ܢܵܐ ܝܠܹܐ ܕܐܲܪ̈ܥܵܢܹܐ. 41 ܚܵܕ̄ ܬܵܗܵܐ ܝܼܠܹܐ ܚܸܩܪܵܐ ܕܫܸܡܫܵܐ: ܘܐܚܹܪ̄ܢܵܐ ܝܠܹܐ ܚܩܪܵܐ ܕܣܲܗܪܵܐ: ܘܐܚܹܪ̄ܢܵܐ ܝܠܹܐ ܚܩܪܵܐ ܕܟܵܘܒܼܟܹ̈ܐ: ܣܵܒܵܒ ܟܵܘܟܼܒܼܵܐ ܡܼܢ ܟܵܘܟܼܒܼܵܐ ܦܪܝܼܫܵܐ ܝܠܹܐ ܒܚܸܩܪܵܐ. 42 ܗܲܕܟܼܵܐ ܐܘܼܦ ܩܝܵܡܬܵܐ ܕܡܝܼܬܹ̈ܐ. ܟܹܐ ܦܵܝܸܫ ܙܸܪܥܝܵܐ ܒܚܪܵܒܼܵܐ: ܟܹܐ ܩܵܝܸܡ ܕܠܵܐ ܚܪܵܒܼܵܐ. 43 ܟܹܐ ܦܵܝܸܫ ܙܸܪܥܝܵܐ ܒܒܸܨܘܿܪܘܼܬܵܐ: ܟܹܐ ܩܵܝܸܡ ܒܚܸܩܪܵܐ. ܟܹܐ ܦܵܝܸܫ ܙܸܪܥܝܵܐ ܒܙܲܒܘܼܢܘܼܬܵܐ: ܟܹܐ ܩܵܝܸܡ ܒܚܲܝܠܵܐ. 44 ܟܹܐ ܦܵܝܸܫ ܙܸܪܥܝܵܐ ܦܲܓܼܪܵܐ ܐܲܨܠܵܢܵܝܵܐ: ܟܹܐ ܩܵܝܸܡ ܦܲܓܼܪܵܐ ܪܘܼܚܵܢܵܝܵܐ. ܐܸܢ ܐܝܼܬ ܦܲܓܼܪܵܐ ܐܲܨܠܵܢܵܝܵܐ: ܐܘܼܦ ܐܝܼܬ ܦܲܓܼܪܵܐ ܪܘܼܚܵܢܵܝܵܐ. 45 ܗܲܕܟܼܵܐ ܐܘܼܦ ܟܬܝܼܒܼܵܐ ܝܠܹܐ: ܒܲܪܢܵܫܵܐ ܩܵܕܡܵܝܵܐ: ܐܵܕܵܡ: ܗ̄ܘܹܠܹܐ ܠܓܵܢܵܐ ܚܵܝܬܵܐ: ܘܐܵܕܵܡ ܐܚܵܪܵܝܵܐ: ܠܪܘܼܚܵܐ ܡܲܚܝܼܵܢܬܵܐ. 46 ܐܸܠܵܐ ܠܹܐ ܗ̄ܘܵܐ ܩܵܕ̄ܡܵܝܬܵܐ ܪܘܼܚܵܢܵܝܵܐ: ܐܸܠܵܐ 47 ܐܲܨܠܵܢܵܝܵܐ: ܘܗܿܝܓܵܗ ܪܘܼܚܵܢܵܝܵܐ. ܒܲܪܢܵܫܵܐ ܩܵܕ̄ܡܵܝܵܐ ܡܼܢ ܐܲܪܥܵܐ: ܥܲܦܪܵܢܵܐ. ܒܲܪܢܵܫܵܐ ܕܬܪܲܝ: ܡܼܢ ܫܡܲܝܵܐ. 48 ܕܵܐܟܼܝܼ ܕܝܼܠܹܐ ܗܿܘ ܥܲܦܪܵܢܵܐ: ܗܲܕܟܼܵܐ ܐܘܼܦ ܥܲܦܪܵܢܹ̈ܐ. ܘܕܵܐܟܼܝܼ ܕܝܼܠܹܐ ܗܿܘ ܕܡܼܢ ܫܡܲܝܵܐ: ܗܲܕܟܼܵܐ ܐܘܼܦ ܫܡܲܝܵܢܹ̈ܐ. 49 ܘܐܲܝܟ ܕܠܒܸܫܠܲܢ ܕܡܘܼܬܵܐ ܕܗܿܘ ܡܼܢ ܥܲܦܪܵܐ: ܐܘܼܦ ܒܸܬ ܠܵܒܼܫܵܚ ܕܡܘܼܬܵܐ ܕܗܿܘ ܕܡܼܢ ܫܡܲܝܵܐ. 50 ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ: ܐܵܚܘܿܢܘܸܬܝܼ̈: ܕܒܸܣܪܵܐ ܘܕܸܡܵܐ ܡܲܠܟܘܼܬܵܐ ܕܐܲܠܵܗܵܐ ܠܹܐ ܡܵܨܝܼ ܕܝܵܪܬܝܼ: ܘܚܪܵܒܼܵܐ ܠܹܐ ܝܵܪܸܬ ܠܵܐ ܚܪܵܒܼܬܵܐ. 51 ܗܵܐ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܣܸܪ. ܟܠܲܢ ܠܹܐ ܕܵܡܟܼܵܚ: ܐܝܼܢܵܐ ܟܠܲܢ ܒܸܬ ܦܵܝܫܵܚ ܡܘܼܚܠܸܦܹܐ: 52 ܡܸܢܫܸܠܬܵܢܹ̈ܐ: ܒܛܲܪܦܲܛܬܵܐ ܕܥܲܝܢܵܐ: ܒܩܵܪ̄ܢܵܐ ܐܚܵܪܵܝܬܵܐ: ܣܵܒܵܒ ܕܒܸܬ ܩܵܪܝܵܐ: ܘܒܸܬ ܩܵܝܡܝܼ ܡܝܼܬܹ̈ܐ ܕܠܵܐ ܚܪܵܒܼܵܐ: ܐܘܼܦ ܐܚܲܢܲܢ ܒܸܬ ܦܵܝܸܫܚ ܡܘܼܚܠܸܦܹܐ. 53 ܣܵܒܵܒ ܘܵܓܸܒ ܝܼܠܵܐ ܕܐܵܗܵܐ ܚܵܪܒܼܵܢܵܐ ܠܵܒܸܫ ܠܵܐ ܚܪܵܒܬܵܐ: ܘܐܵܗܵܐ ܡܵܝܘܿܬܵܐ ܠܵܒܸܫ ܠܵܐ ܡܵܝܘܿܬ ܘܼܬܵܐ. 54 ܐܝܼܢܵܐ ܐܝܼܡܲܢ ܕܐܵܗܵܐ ܚܵܪܒܼܵܢܵܐ ܠܵܒܸܫ ܠܵܐ ܚܪܵܒܼܬܵܐ: ܘܐܵܗܵܐ ܡܵܝܘܿܬܵܐ ܠܵܒܸܫ ܠܵܐ ܡܵܝܘܿܬܘܼܬܵܐ: ܗܿܝܓܵܗ ܒܸܬ ܗܵܘܝܵܐ ܗܿܝ ܗܹܡܸܙܡܵܢ ܕܝܼܠܵܐ ܟܬܝܼܒܼܵܐ: ܦܸܫܠܹܐ ܒܸܠܥܝܵܐ ܡܵܘܬܵܐ ܒܓܼܵܠܸܒܘܼܬܵܐ. 55 ܐܲܝܟܵܐ ܝܠܹܐ ܢܸܟܣܘܼܟ: ܡܵܘܬܵܐ: ܘܐܲܝܟܵܐ ܝܠܵܐ ܓܼܵܠܸܒܘܼܬܵܟܼܝ: ܩܲܒܼܪܵܐ: 56 ܢܸܟܣܹܗ ܕܡܵܘܬܵܐ: ܘܐܲܝܟܵܐ ܝܠܵܐ: ܘܚܲܝܠܵܐ ܕܚܛܝܼܬܵܐ ܢܵܡܘܿܣܵܐ ܝܠܹܐ. 57 ܐܝܼܢܵܐ ܡܸܢܬܵܐ ܡܼܢ ܐܲܠܵܗܵܐ ܕܒܝܼܵܗ̄ܒܲܢ ܝܼܠܹܐ ܓܼܵܠܸܒܘܼܬܵܐ ܒܝܸܕ ܡܵܪܲܢ ܝܼܫܘܿܥ ܡܫܝܼܚܵܐ. 58 ܡܐܵܕܝܼܵܐ: ܐܵܚܘܿܢܘܵܬܝܼ̈ ܡܘܼܚܸܒܹ̈ܐ: ܦܘܼܫܘܿܢ ܡܘܼܩܝܹܐ: ܘܠܵܐ ܥܫܝܼܫܹܐ: ܒܸܙܝܵܕܵܐ ܒܟܠ ܙܲܒܼܢܵܐ ܒܦܘܼܠܚܵܢܵܐ ܕܡܵܪܝܵܐ: ܟܲܕ ܝܲܕܥܝܼܬܘܿܢ ܕܓܵܦܵܘܟܼܘܿܢ ܠܹܐ ܝܠܹܐ ܒܵܛܝܼܠܵܐ ܒܡܵܪܝܵܐ.

 

ܩܦܠܐܘܢ: ܝܘ

1 ܐܝܼܢܵܐ ܒܘܼܬ ܡܸܢܕܝܼ ܕܦܵܝܸܫ ܓܸܘܼܡܸܥܝܵܐ ܠܩܲܕܝܼܫܹ̈ܐ: ܐܲܝܟ ܕܦܩܸܕܠܝܼ ܠܥܸܕܵܬܹ̈ܐ ܕܓܵܠܵܛܝܼܵܐ: ܗܲܕܟܼܵܐ ܐܘܼܦ ܐܲܚܬܘܿܢ ܥܒܼܘܿܕܘܿܢ. 2 ܒܚܵܒܫܸܒܵܐ ܟܠ ܐܢܵܫܵܐ ܡܸܢܵܘܟܼܘܿܢ ܗܵܘܹܐ ܡܲܬܘܼܒܹܐ ܠܟܸܣ ܓܵܢܹܗ ܘܒܸܢܛܵܪܵܐ ܐܲܝܟ ܕܡܲܢܬܹܐ: ܕܐܝܼܡܲܢ ܕܐܵܬܸܢ ܗܿܝܓܵܗ ܠܵܐ ܗܵܘܝܼ ܓܸܡܵܥܝܵܬܹ̈ܐ. 3 ܘܐܝܼܡܲܢ ܕܐܵܬܸܢ: ܠܐܵܢܝܼ ܕܓܵܒܿܝܼܬܘܿܢ ܒܸܬ ܫܵܕܪܸܢܘܿܢ ܒܐܸܓܲܪܬܵܐ: ܕܠܵܒܠܝܼ ܫܵܦܵܩܲܬܵܘܟܼܘܿܢ ܠܐܘܿܪܸܫܠܸܡ. 4 ܐܝܼܢܵܐ ܐܸܢ ܚܵܫܸܚ ܫܘܼܠܵܐ ܕܐܘܼܦ ܐܵܢܵܐ ܐܵܙܸܠ̄ܢ: ܐܘܼܦ ܐܵܢܝܼ ܐܵܙܠ̄ܝܼ ܥܲܡܝܼ. 5 ܐܝܼܢܵܐ ܒܸܬ ܐܵܬܸܢ ܠܟܸܣܠܵܘܟܼܘܿܢ ܐܝܼܡܲܢ ܕܥܵܒܼܪܸܢ ܡܼܢ ܓܵܘ ܡܵܩܸܕܘܿܢܝܼܵܐ: ܣܵܒܵܒ ܗܲܪ ܒܸܬ ܥܵܒܼܪܸܢ ܡܼܢ ܓܵܘ ܡܵܩܸܕܘܿܢܝܼܵܐ. 6 ܘܡܩܵܘܡܵܐ ܐܘܼܦ ܠܟܸܣܠܵܘܟܼܘܿܢ ܥܲܪܩܸܠܸܢ: ܝܲܢ ܦܵܝܫܸܢ ܒܣܸܬܘܵܐ: ܕܐܲܚܬܘܿܢ ܡܲܦܫܸܛܝܼܬܘܿܢ ܠܝܼ ܠܐܲܝܟܵܐ ܕܐܵܙܸܠ̄ܢ. 7 ܣܵܒܵܒ ܠܹܐ ܒܲܥܝܸܢ ܕܐܵܕܝܼܵܐ ܚܵܙܸܢܵܘܟܼܘܿܢ ܒܥܒܼܵܪܬܵܐ: ܣܵܒܵܒ ܒܗܸܒܼܝܼ ܝܘܸܢ ܕܒܸܬ ܥܲܪܩܸܠܸܢ ܚܵܕ̄ ܙܲܒܼܢܵܐ ܠܟܸܣܠܵܘܟܼܘܿܢ: ܐܸܢ ܡܵܪܝܼ ܝܵܗ̄ܒܸܠܝܼ ܕܲܣܬܘܼܪ. 8 ܐܝܼܢܵܐ ܒܸܬ ܥܲܪܩܸܠܸܢ ܒܐܵܦܸܣܘܿܣ ܗܲܠ ܦܲܢܛܸܩܘܿܣܛܹܐ: 9 ܣܵܒܵܒ ܬܲܪܥܵܐ ܓܘܼܪܵܐ ܦܸܫܠܹܐ ܦܬܝܼܚܵܐ ܐܸܠܝܼ ܘܡܸܠܝܵܐ ܦܘܼܠܚܵܢܹ̈ܐ: ܘܕܲܪ̈ܩܘܼܒܼܠܵܝܹ̈ܐ ܪܵܒܵܐ ܝܢܵܐ. 10 ܐܝܼܢܵܐ ܐܸܢ ܐܵܬܹܐ ܠܟܸܣܠܵܘܟܼܘܿܢ ܛܝܼܡܵܬܹܐܘܿܣ: ܚܙܹܡܘܿܢ ܕܗܵܘܹܐ ܕܠܵܐ ܙܕܘܼܥܬܵܐ ܠܟܸܣܠܵܘܟܼܘܿܢ: ܣܵܒܵܒ ܦܘܼܠܚܵܢܵܐ ܕܡܵܪܝܵܐ ܟܹܐ ܦܵܠܸܚ ܐܲܝܟ ܕܝܼܝܼ. 11 ܒܲܣ ܠܵܐ ܐܢܵܫܵܐ ܡܲܣܠܹܐ ܠܹܗ: ܐܸܠܵܐ ܡܲܦܫܸܛܘܿܢ ܠܹܗ ܒܫܠܵܡܵܐ ܕܐܵܬܹܐ ܠܟܸܣܠܝܼ: ܣܵܒܵܒ ܒܸܣܦܵܪܵܐ ܝܘܸܢ ܐܸܠܹܗ ܥܲܡ ܐܵܚܘܿܢܘܵܬܹ̈ܐ. 12 ܐܝܼܢܵܐ ܐܵܦܲܠܘܿ ܐܵܚܘܿܢܵܐ: ܪܵܒܵܐ ܦܘܼܪܦܸܠܝܼ ܒܝܹܗ ܕܐܵܬܹܐ ܗ̄ܘܵܐ ܠܟܸܣܠܵܘܟܼܘܿܢ ܥܲܡ ܐܵܚܘܿܢܘܵܬܹ̈ܐ: ܘܗܲܪ ܠܵܐ ܗ̄ܘܹܠܵܐ ܠܹܗ ܪܸܙܵܝܵܐ ܕܐܵܕܝܼܵܐ ܐܵܬܹܐ ܠܟܸܣܠܵܘܟܼܘܿܢ: ܐܝܼܢܵܐ ܐܝܼܡܲܢ ܕܗܵܘܝܵܐ ܠܹܗ ܦܸܪܣܲܬ: ܒܸܬ ܐܵܬܹܐ ܠܟܸܣܠܵܘܟܼܘܿܢ. 13 ܦܘܼܫܘܿܢ ܪܥܝܼܫܹܐ: ܟܠܸܡܘܿܢ ܒܗܲܝܡܵܢܘܼܬܵܐ: ܗ̄ܘܹܡܘܿܢ ܓܲܒܼܪܹ̈ܐ: ܘܦܘܼܫܘܿܢ ܚܘܼܠܸܢܹܐ. 14 ܘܟܠܵܝ ܫܘܼܠܵܘ̈ܟܼܘܿܢ ܒܚܘܼܒܵܐ ܗܵܘܝܼ. 15 ܐܝܼܢܵܐ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ: ܐܵܚܘܿܢܘܵܬܝܼ̈: ܟܹܐ ܝܲܕܥܝܼܬܘܿܢ ܠܒܲܝܬܹܗ ܕܐܸܣܛܲܦܵܢܲܐ: ܪܕܸܫܝܼܬܵܐ ܝܠܹܐ ܕܐܵܟܼܵܐܝܼܵܐ: ܘܡܘܼܬܸܒܼܠܘܿܢ ܓܵܢܵܝ ܠܚܸܠܡܲܬ ܕܩܲܕܝܼܫܹ̈ܐ: 16 ܕܐܘܼܦ ܐܲܚܬܘܿܢ ܗܵܘܝܼܬܘܿܢ ܙܲܒܛ ܠܐܵܢܝܼ ܕܝܼܢܵܐ ܗܲܕܟܼܵܐ: ܘܠܟܠ ܐܢܵܫܵܐ ܕܗܲܝܸܪ ܥܲܡܲܢ ܘܕܓܸܗ̄ܝܹܐ. 17 ܘܒܸܚܕܵܝܵܐ ܝܘܸܢ ܒܐܬܵܝܬܹܗ ܕܐܸܣܛܲܦܵܢܲܐ: ܘܕܦܵܪܛܘܼܢܵܛܘܿܣ: ܘܕܵܐܟܼܵܐܝܼܩܘܿܣ: ܕܒܵܨܘܿܪܘܼܬܵܐ ܕܝܼܵܘܟܼܘܿܢ ܐܵܢܝܼ ܬܘܼܡܸܡܠܘܿܢ. 18 ܣܵܒܵܒ ܡܘܼܢܚܸܠܘܿܢ ܪܘܼܚܵܐ ܕܝܼܝܼ ܘܕܝܼܵܘܟܼܘܿܢ. ܒܲܣ ܗܵܘܝܼܬܘܿܢ ܒܝܼܕܲܥܝܵܐ ܠܐܵܢܝܼ ܕܝܼܢܵܐ ܗܲܕܟܼܵܐ. 19 ܒܝܼܵܗ̄ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܪܵܒܵܐ ܒܡܵܪܲܢ ܐܵܩܸܠܘܿܣ ܘܦܪܝܼܣܩܸܠܵܐ: ܥܲܡ ܥܹܕܬܵܐ ܕܓܵܘ ܒܲܝܬܵܝ. 20 ܒܝܼܵܗ̄ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܟܠܵܝ ܐܵܚܘܿܢܘܵܬܹ̈ܐ. ܗܲܒ̄ܠܘܿܢ ܫܠܵܡܵܐ ܚܵܕ̄ ܠܗܿܘ ܐܚܹܪ̄ܢܵܐ ܒܢܫܘܼܩܬܵܐ ܩܲܕܝܼܫܬܵܐ. ܫܠܵܡܵܐ ܒܟܬܵܒܼܬܵܐ ܕܐܝܼܕܵܐ ܕܝܼܝܼ ܦܵܘܠܘܿܣ. 21 ܐܸܢ ܐܢܵܫܵܐ ܠܵܐ 22 ܡܲܚܸܒ ܠܡܵܪܲܢ ܝܼܫܘܿܥ ܡܫܝܼܚܵܐ: ܗܵܘܹܐ ܡܘܼܚܪܸܡܵܐ. ܡܵܪܲܢ ܐܸܬܹܐ. 23 ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡܵܘܟܼܘܿܢ. 24 ܚܘܼܒܝܼ ܥܲܡ ܟܠܵܘܟܼܘܿܢ ܒܡܫܝܼܚܵܐ ܝܼܫܘܿܥ: ܐܵܡܹܝܢ.