ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܦܘܠܘܣ ܫܠܝܚܐ ܕܠܘܬ ܪ̈ܗܘܡܝܐ

ܩܦܠܐܘܢ: ܐ

1 ܦܵܘܠܘܿܣ ܪܹܓܵܐ ܕܝܼܫܘܿܥ ܡܫܝܼܚܵܐ: ܩܸܪܝܵܐ ܫܠܝܼܚܵܐ: ܕܦܸܫܠܹܐ ܦܪܝܼܫܵܐ ܠܐܹܘܵܢܓܵܠܝܼܘܿܢ ܕܐܲܠܵܗܵܐ: 2 ܕܡܼܢ ܩܵܕܡܝܬܵܐ ܩܘܼܘܸܠܹܐ ܒܼܝܼܕܼ ܢܒܼܝܼܘܼ̈ܗܝ ܒܟܬܵܒܹ̈ܐ ܩܲܕܝܼܫܹ̈ܐ. 3 ܒܵܗܣ ܕܒܪܘܼܢܹܗ: ܗܿܘ ܕܦܸܫܠܹܐ ܝܠܝܼܕܵܐ ܡܼܢ ܙܲܪܥܹܗ ܕܒܹܝܬ ܕܵܘܝܼܕ ܐܲܝܟ ܒܒܸܣܪܵܐ. 4 ܘܦܸܫܠܹܐ ܡܘܼܕܥܸܝܵܐ ܒܪܘܼܢܵܐ ܕܐܵܠܵܗܵܐ ܒܚܲܝܠܵܐ: ܐܲܝܟ ܒܪܘܼܚܵܐ ܕܩܲܕܝܼܫܘܼܬܵܐ: ܒܝܸܕ ܩܝܵܡܬܵܐ ܕܡܝܼܬܹ̈ܐ: ܝܼܫܘܿܥ ܡܫܝܼܚܵܐ ܡܵܪܲܢ: 5 ܕܒܼܝܹܗ ܫܩܸܠܲܢ ܫܵܦܵܩܲܬ ܘܫܠܝܼܚܘܼܬܵܐ: ܠܡܲܨܝܲܬܬܵܐ ܕܗܲܝܡܵܢܘܼܬܵܐ ܓܵܘ ܟܠܵܝ ܡܸܠܲܬܹ̈ܐ: ܒܚܵܬܸܪ ܕܫܸܡܹܗ: 6 ܕܐܘܼܦ ܐܲܚܬܘܿܢ ܡܸܢܵܝ ܝܬܘܿܢ: ܩܸܪ̈ܝܹܐ ܕܝܼܫܘܿܥ ܡܫܝܼܚܵܐ: 7 ܠܟܠܵܝ ܐܵܢܝܼ ܕܝܼܢܵܐ ܓܵܘ ܪܗܘܿܡܹܐ: ܡܘܼܚܼܒܹ̈ܐ ܕܐܲܠܵܗܵܐ: ܩܸܪ̈ܝܹܐ ܩܲܕܝܼܫܹ̈ܐ: ܫܠܵܡܵܐ ܘܫܵܦܵܩܲܬ ܥܲܡܵܘܟܼܘܿܢ ܡܼܢ ܐܲܠܵܗܵܐ ܒܵܒܼܢ ܘܡܵܪܲܢ ܝܼܫܘܿܥ ܡܫܝܼܚܵܐ. 8 ܩܵܕܡܵܝܬܵܐ ܫܵܟܘܿܪܹܐ ܝܘܸܢ ܠܐܲܠܵܗܝܼ ܒܼܝܸܕ ܝܼܫܘܿܥ ܡܫܝܼܚܵܐ ܥܲܠ ܟܠܵܘܟܼܘܿܢ: ܕܗܲܝܡܵܢܘܼܬܵܟܼܘܿܢ ܦܸܫܠܵܐ ܗܘܼܡܙܸܡܬܵܐ ܓܵܘ ܟܠܵܗܿ ܐܲܪܥܵܐ. 9 ܣܵܒܵܒ ܐܲܠܵܗܵܐ ܣܲܗܕܵܐ ܝܠܹܐ ܐܸܠܝܼ: ܕܐܸܠܹܗ ܒܸܥܒܼܵܕܵܐ ܝܘܼܢ ܚܸܠܡܲܬ ܒܪܘܼܚܝܼ ܒܐܹܘܵܢܓܵܠܝܼܘܿܢ ܕܒܪܘܼܢܹܗ: ܕܐܵܟܼܝܼ ܕܠܵܐ ܫܠܵܝܬܵܐ ܒܸܕܟܼܵܪܵܘܟܼܘܿܢ ܝܼܘܸܢ: 10 ܘܢܵܘܢܘܿܝܹܐ ܝܘܸܢ ܒܟܠ ܙܲܒܼܢܵܐ ܒܨܠܵܘܵܬܝܼ̈: ܕܐܸܢ ܩܵܘܡܵܐ ܒܵܬܪ ܚܕܵܐ ܥܕܵܢܵܐ ܦܵܝܫܵܐ ܡܘܼܢܬܝܼܬܵܐ: ܐܸܠܝܼ ܐܘܼܪܚܵܐ: ܒܪܸܙܵܝܹܗ ܕܐܲܠܵܗܵܐ: ܕܐܵܬܸܢ ܠܟܸܣܠܵܘܟܼܘܿܢ. 11 ܣܵܒܵܒ ܪܵܒܵܐ ܫܘܼܗܘܸܬܵܐ ܝܘܸܢ ܕܚܵܙܸܢܵܟܼܘܿܢ: ܕܝܵܗܒܸܢܵܘܟܼܘܿܢ ܚܲܠܲܢܬ ܕܪܘܼܚܵܐ: ܒܗܼܝ ܕܦܵܝܫܝܼܬܘܿܢ ܡܘܼܩܘܝܹܐ: 12 ܝܲܥܢܹܐ: ܡܸܚܕܵܕܹ̈ܐ ܦܵܝܫܵܚ ܝܘܼܗܒܹܐ ܠܸܒܵܐ: ܒܗܲܝܡܵܢܘܼܬܵܐ ܕܐܸܚܕܵܕܹ̈ܐ: ܕܝܼܵܟܼܘܿܢ ܘܕܝܼܝܼ. 13 ܐܝܼܢܵܐ ܒܲܥܝܸܢ ܕܠܵܐ ܗܵܘܝܼܬܘܿܢ ܒܹܐ ܚܲܒܿܪܵܐ: ܐܵܚܘܿܢܘܵܬܝܼ̈ ܕܪܵܒܵܐ ܓܵܗܹ̈ܐ ܡܘܼܬܸܒܼܠܝܼ ܒܠܸܒܝܼ ܕܐܵܬܸܢ ܠܟܸܣܠܵܘܟܼܘܿܢ: ܘܦܸܫܠܝܼ ܡܘܼܟܼܠܝܼܵܐ ܗܲܠ ܐܵܕܝܼܵܐ ܕܐܘܼܦ ܒܝܼܵܘܟܼܘܿܢ ܗܵܘܝܵܐ ܠܝܼ ܛܥܘܼܢܬܵܐ: ܐܲܝܟ ܕܓܵܘ ܛܵܝܸܦܹ̈ܐ ܐܚܹܪܢܸ̈ܐ. 14 ܠܝܵܘܢܵܝܹ̈ܐ ܘܒܲܪܒܵܪ̈ܝܹܐ: ܠܥܵܩܸܠܕܵܕܹ̈ܐ ܘܠܣܲܟܼ̈ܠܹܐ: ܕܵܝܢܵܢܵܐ ܝܘܸܢ. 15 ܗܲܕܟܼܵܐ: ܟܡܵܐ ܕܐܝܼܬ ܠܝܼ ܚܲܝܠܵܐ: ܗܲܙܸܪ ܝܼܘܸܢ ܕܐܘܼܦ ܐܸܠܵܘܟܼܘܿܢ ܕܒܪܗܘܿܡܹܐ ܡܲܫܚܸܕܸܢ ܐܸܘܵܢܓܵܠܝܼܘܿܢ. 16 ܣܵܒܵܒ ܠܹܐ ܝܘܸܢ ܒܸܢܚܵܦܵܐ ܒܸܐܘܵܢܓܵܠܝܼܘܿܢ: ܣܵܒܵܒ ܚܲܝܠܵܐ ܕܐܲܠܵܗܵܐ ܝܠܵܐ: ܠܚܲܝܹ̈ܐ ܕܟܠ ܕܗܲܡܸܢ ܒܝܼܵܗܿ: ܠܝܗܘܼܕܵܝܵܐ ܩܵܕܡܵܝܬܵܐ: ܘܠܝܘܢܵܝܵܐ. 17 ܣܵܒܵܒ ܙܲܕܝܼܩܘܼܬܵܐ ܕܐܲܠܵܗܵܐ ܒܝܼܵܗܿ ܦܝܵܫܵܐ ܝܠܵܐ ܓܠܝܼܬܵܐ: ܡܼܢ ܗܲܝܡܵܢܘܼܬܵܐ ܠܗܲܝܡܵܢܘܼܬܵܐ: ܐܝܟ ܕܝܼܠܹܐ ܟܬܝܼܒܼܵܐ: ܘܙܲܕܝܼܩܵܐ ܡܼܢ ܗܲܝܡܵܢܘܼܬܵܐ ܒܸܬ ܚܲܝܹܐ. 18 ܣܵܒܵܒ ܕܦܝܵܫܵܐ ܝܠܵܐ ܓܠܝܼܬܵܐ ܟܲܪܒܹܗ ܕܐܲܠܵܗܵܐ ܡܼܢ ܫܡܲܝܵܐ ܥܲܠ ܟܠܹܗ ܟܦܘܼܪܝܵܐ ܘܥܵܘܠܵܐ ܕܒܢܲܝ̈ܢܵܫܵܐ: ܐܵܢܝܼ ܕܣܲܪܲܣܬܘܬܵܐ ܒܥܵܘܠܵܐ ܕܒܼܝܩܹܐ ܝܢܵܐ: 19 ܣܵܒܵܒ ܝܕܹܥܬܹܗ ܕܐܲܠܵܗܵܐ ܓܠܝܼܬܵܐ ܝܠܵܐ ܒܵܝܼܝ: ܣܵܒܵܒ ܕܐܲܠܵܗܵܐ ܓܸܠܝܵܠܹܐ ܐܸܠܵܝ. 20 ܣܵܒܵܒ ܫܘܼܠܹ̈ܐ ܟܸܣܝܹ̈ܐ ܕܝܹܗܼ ܡܼܢ ܒܪܵܝܬܵܐ ܕܥܵܠܡܵܐ ܦܝܵܫܵܐ ܝܢܵܐ ܚܸܙܝܹܐ: ܟܲܕ ܦܝܵܫܵܐ ܝܢܵܐ ܦܘܼܪܡܝܹܐ ܡܼܢ ܡܸܢܕܝܵܢܹ̈ܐ ܕܒܸܪܝܹܐ ܝܢܵܐ (ܝܲܥܢܹܐ) ܝܼܚܠܹܗ ܘܐܲܠܵܗܘܼܬܹܗ ܕܠܥܵܠܲܡ: ܕܗܵܘܝܼ ܕܠܵܐ ܡܲܕܲܪܵܬܵܐ ܕܓܼܘܼܘܵܒ. 21 ܣܵܒܵܒ ܕܟܲܕ ܝܕܥܠܘܿܢ ܠܐܲܠܵܗܵܐ: ܠܵܐ ܐܲܝܟ ܕܠܲܐܠܵܗܵܐ ܫܘܼܒܸܚܠܘܿܢ ܐܸܠܹܗ ܘܫܘܼܟܸܪܘܿܢ ܐܸܠܹܗ: ܐܸܠܵܐ ܗܘܹܠܘܿܢ ܒܵܛܝܼ̈ܠܹܐ ܒܚܘܼܫܵܒܼܵܝ̈: ܘܚܒܹܠܸܐ ܠܸܒܵܐ ܠܵܐ ܦܲܪܡܝܼܵܢܵܐ. 22 ܘܟܲܕ ܒܸܐܡܵܪܵܐ ܝܢܵܐ ܒܓܵܢܵܝ ܕܥܵܩܸܠܕܵܕܹ̈ܐ ܝܢܵܐ: ܗܘܹܠܘܿܢ ܐܲܗܡܲܩܹ̈ܐ: 23 ܘܡܘܼܚܠܸܦܠܘܿܢ ܬܸܫܒܘܿܚܬܸܗ ܕܐܲܠܵܗܵܐ ܠܵܐ ܚܵܪܒܼܵܢܵܐ ܒܕܡܘܼܬܵܐ ܕܨܲܠܡܵܐ ܕܒܲܪܢܵܫܵܐ ܚܵܪܒܼܵܢܵܐ: ܘܕܛܲܝܪܹ̈ܐ: ܘܕܗܲܝܘܵܢܹ̈ܐ ܕܐܲܪܒܲܥ ܐܲܩܠܹ̈ܐ: ܘܕܪܸ̈ܓܼܒܹܐ. 24 ܣܵܒܵܒ ܕܐܵܗܵܐ ܣܘܼܦܵܚܠܹܐ ܐܲܠܵܗܵܐ ܠܫܲܗܘܲܬܝܵܬܹ̈ܐ ܕܠܸܒܵܝ ܠܛܲܢܦܘܼܬܵܐ: ܕܥܵܒܼܟܼܝܼ ܒܸܨܘܼܪ ܦܲܓܼܪܵܝ ܒܓܵܘܵܐ ܕܓܵܢܵܝ. 25 ܘܡܘܼܚܠܸܦܠܘܿܢ ܣܲܪܲܣܬܘܼܬܹܗ ܕܐܲܠܵܗܵܐ ܒܕܘܼܓܠܵܐ: ܘܣܓܸܕܠܘܿܢ ܘܥܒܸܕܠܘܿܢ ܚܸܠܡܲܬ ܠܒܪܝܼܬܵܐ ܙܵܘܕܵܐ ܡܼܢ ܕܠܒܵܪܝܵܢܵܐ: ܕܝܼܠܹܐ ܒܘܼܪܵܟܼܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ. 26 ܣܵܒܵܒ ܐܵܗܵܐ ܣܘܼܦܵܚܠܹܐ ܐܲܠܵܗܵܐ ܠܙܵܘܥܹ̈ܐ ܕܒܸܨܘܿܪܬܵܐ: ܣܵܒܵܒ ܢܸܩܒܼܵܝ̈ ܡܘܼܚܠܸܦܠܘܿܢ ܡܲܦܠܲܚܬܵܐ ܐܲܨܠܵܢܵܝܬܵܐ ܠܕܗܿܝ ܕܝܼܠܵܐ ܕܲܪܩܘܼܒܼܠ ܕܐܲܨܠܵܐ. 27 ܘܗܲܕܟܼܵܐ ܐܘܼܦ ܐܘܼܪ̈ܙܵܝ: ܫܒܸܩܠܘܿܢ ܡܲܦܠܲܚܬܵܐ ܐܲܨܠܵܢܵܝܼܬܵܐ ܕܢܸܩܒܗܹܐ: ܘܫܪܸܚܠܘܿܢ ܒܫܲܗܘܲܬܬܵܐ ܚܵܕ ܠܗܿܘ ܐܚܸܪܢܵܐ: ܘܐܘܼܪܙܵܐ ܥܲܡ ܐܘܼܪܙܵܐ ܢܚܸܦܬܵܐ ܥܒܸܕܠܘܿܢ: ܘܦܪܲܥܝܵܐ ܕܘܵܓܸܒ ܝܼܗܘܵܐ ܠܚܸܠܛܘܼܢܝܘܼܬܵܝ ܩܘܼܒܸܠܘܿܢ ܒܓܵܢܵܝ. 28 ܘܐܲܝܟ ܕܠܵܐ ܒܣܸܡܠܵܐ ܠܗܘܿܢ ܒܓܵܢܵܝ ܕܝܲܕܥܝܼ ܠܐܲܠܵܗܵܐ: ܣܘܼܦܵܚܠܹܐ ܐܲܠܵܗܵܐ ܠܚܝܼܵܠ ܡܘܼܣܠܝܼܵܐ: ܕܗܵܘܝܼ ܒܸܥܒܼܵܕܵܐ ܡܸܢܕܝܼܵܢܹ̈ܐ ܠܵܐ ܚܫܝܼܚܹ̈ܐ: 29 ܟܲܕ ܡܸܠܝܹܐ ܝܢܵܐ ܟܠ ܥܵܘܠܵܐ: ܣܸܪܝܘܼܬܵܐ: ܒܝܼܫܘܼܬܵܐ: ܛܲܡܲܥܟܵܪܘܼܬܵܐ: ܒܲܚܸܠܵܢܘܼܬܵܐ : ܩܸܛܠܵܐ: ܡܲܩܲܪܵܨܘܼܬܵܐ: ܦܸܠܡܵܐ ܚܲܝܼܠܹ̈ܐ ܒܝܼܫܹ̈ܐ: 30 ܥܵܒܼܕܵܢܹ̈ܐ ܕܩܲܝܒܲܬ: ܡܵܚܝܵܢܹ̈ܐ ܕܪܲܪܗܲܩ: ܣܵܢܝܵܢܹ̈ܐ ܠܐܲܠܵܗܵܐ: ܨܵܥܪܵܢܹ̈ܐ: ܚܬܝܼܕܹ̈ܐ: ܫܲܒܼܗܪܵܢܹ̈ܐ: ܡܵܫܟܚܵܢܹ̈ܐ ܕܒܝܼܫܵܬܹ̈ܐ: ܟܝܼܡ ܚܝܼܵܠ: ܠܐܲܒܼܵܗܵܝ̈ ܠܵܐ ܡܲܨܝܸܬܵܢܹ̈ܐ: 31 ܬܵܒܼܪܵܢܹ̈ܐ ܕܩܵܘܠܵܐ: ܕܠܵܐ ܚܘܼܒܵܐ ܐܲܨܠܵܢܵܝܵܐ: ܕܠܵܐ ܪܲܚ̈ܡܹܐ: 32 ܐܵܢܝܼ: ܕܟܲܕ ܟܹܐ ܝܲܕܥܝ ܕܝܼܘܵܢܹܗ ܕܐܲܠܵܗܵܐ: ܕܐܵܢܝܼ ܕܐܲܝܟ ܐܲܢܹܐ ܦܵܠܚܝܼ ܠܡܵܘܬܵܐ ܟܹܐ ܚܵܫܚܝܼ: ܠܵܐ ܐܲܚܟܝܼ ܒܸܥܒܼܵܕܵܝ ܝܢܵܐ: ܐܸܠܵܐ ܐܘܼܦ ܟܹܐ ܗܵܘܝܼ ܪܵܙܝܼ ܒܐܵܢܝܼ ܕܥܵܒܼܟܼܝܼ ܠܗܘܿܢ.

ܩܦܠܐܘܢ: ܒ

1 ܣܵܒܵܒ ܐܲܠܵܗܵܐ ܠܲܝܬ ܠܘܼܟ ܡܲܕܲܪܬܵܐ ܕܓܼܘܼܘܵܒ: ܐܲܝ ܒܲܪܢܵܫܵܐ: ܟܠ ܕܝܼܘܸܬ ܕܒܸܕܝܵܢܵܐ ܝܘܸܬ: ܣܵܒܵܒ ܕܒܗܿܘ ܕܒܸܕܝܵܢܵܐ ܝܘܸܬ ܠܐܚܸܪܢܵܐ: ܓܵܢܘܼܟ ܒܸܥܒܼܵܕܵܐ ܝܘܸܬ ܓܘܼܢܵܗܟܵܪ. ܣܵܒܵܒ ܐܘܼܦ ܐܲܢܬ ܕܒܸܕܝܵܢܵܐ ܝܘܸܬ ܗܲܪ ܐܵܢܝܼ ܒܸܦܠܵܚܵܐ ܝܘܸܬ. 2 ܘܒܝܼܕܵܥܝܵܐܝܘܵܚ ܕܕܝܼܘܵܢܹܗ ܕܐܲܠܿܗܵܐ ܒܣܲܕ̈ܣܬܘܼܬܵܐ ܝܠܵܐ ܝܲܠ ܐܵܢܝܼ ܕܐܲܢܸܐ ܦܵܠܚܝܼ. 3 ܐܝܼܢܵܐ ܐܵܗܵܐ ܒܸܚܫܵܒܼܵܐ ܝܘܹܬ: ܐܲܝ ܒܲܪܢܵܫܵܐ: ܕܒܼܟܸܝܵܢܵܐ ܝܘܸܬ ܠܐܵܢܝܼ ܕܐܲܢܸܐ ܒܸܦܠܵܚܵܐ ܝܢܵܐ: ܟܲܕ ܐܘܼܦ ܐܲܢܬ ܒܸܥܒܼܵܕܵܝ ܝܘܸܬ: ܕܐܲܢܬ ܒܸܬ ܚܵܠܨܸܬ ܡܼܢ ܕܝܼܘܵܢܸܗ ܕܐܲܠܵܗܵܐ: 4 ܝܲܢ ܠܕܵܘܸܠܬܵܐ ܕܒܵܣܝܼܡܘܼܬܹܗ: ܘܕܡܲܪܝܲܟܼܬܵܐ ܕܒܸܢܸܗ: ܘܕܡܵܘܗܠܲܬܹܗ: ܡܲܣܠܘܼܝܹܐ ܝܘܸܬ: ܘܠܹܐ ܝܘܸܬ ܒܝܼܕܥܝܵܐ ܕܒܵܣܝܼܡܘܼܬܹܗ ܕܐܲܠܵܗܵܐ ܠܬܵܝܒܼܘܼܬܵܐ ܡܵܐܘܘܼܟ ܝܼܠܵܐ: 5 ܐܸܠܵܐ ܐܲܝܟ ܩܸܫܝܘܼܬܘܼܟ ܘܠܸܒܘܼܟ ܠܵܐ ܬܲܘܸܒܵܢܵܐ: ܡܲܬܘܼܒܹܐ ܝܘܸܬ ܠܓܵܢܘܼܟ ܚܲܙܝܼܢܵܐ ܕܟܲܪܒܵܐ ܒܝܘܿܡܵܐ ܕܟܲܪܒܵܐ ܘܓܸܠܝܵܢܵܐ ܕܕܝܼܘܵܢ ܗܲܩ ܕܐܲܠܵܗܵܐ: 6 ܗܿܘ ܕܒܸܬ ܦܲܪܸܥ ܠܟܠ ܐܢܵܫܵܐ ܐܲܝܟ ܦܘܼܠܚܵܢܘܼ̈ܗܝ: 7 ܠܐܵܢܝܼ ܕܒܚܡܵܠܬܵܐ ܕܦܘܼܠܚܵܢܹ̈ܐ ܛܵܒܹ̈ܐ: ܬܸܫܒܘܿܚܬܵܐ ܘܐܝܼܩܵܪܵܐ ܘܠܵܐ ܚܪܵܒܼܬܵܐ ܒܸܒܲܥܝܵܐ ܝܢܵܐ: ܚܲܝܹ̈ܐ ܕܠܵܐܒܵܕ: 8 ܐܝܼܢܵܐ ܠܥܵܨܝܹ̈ܐ: ܘܠܵܐ ܡܲܨܝܸܬܵܢܹ̈ܐ ܠܣܲܪܲܣܬܘܼܬܵܐ: ܐܸܠܵܐ ܠܥܵܘܠܵܐ ܡܲܨܝܸܬܝܼ: (ܒܸܬ ܗܵܘܝܵܐ) ܟܲܪܒܵܐ ܘܚܸܡܬܵܐ: 9 ܐܘܼܠܨܵܢܵܐ ܘܓܼܘܼܢܓܼܵܪܵܐ: ܥܲܠ ܟܠ ܓܵܢܵܐ ܕܒܲܪܢܵܫܵܐ ܕܦܵܠܚܵܐ ܒܝܼܫܬܵܐ: ܠܝܗܘܼܕܵܝܵܐ ܩܵܕܡܵܝܬܵܐ: ܘܠܝܵܘܢܵܝܵܐ: 10 ܐܝܼܢܵܐ ܬܸܫܒܘܿܚܬܵܐ: ܘܐܝܼܩܵܪܵܐ: ܘܫܠܵܡܵܐ: ܠܟܠ ܕܦܲܠܸܚ ܛܵܒܼܬܵܐ: ܠܝܗܘܼܕܵܝܵܐ ܩܵܕܡܵܝܬܵܐ: ܘܠܝܵܘܢܵܝܵܐ: 11 ܣܵܒܵܒ ܠܲܝܬ ܚܙܵܝܬܵܐ ܕܦܵܬܵܐ ܠܟܸܣ ܐܲܠܵܗܵܐ: 12 ܣܵܒܵܒ ܟܠܵܝ ܕܕܠܵܐ ܢܵܡܘܿܣܵܐ ܚܛܸܠܘܿܢ: ܐܘܼܦ ܕܠܵܐ ܢܵܡܘܿܣܵܐ ܒܸܬ ܬܲܠܩܝܼ: ܘܟܠܵܝ ܕܒܢܵܡܘܿܣܵܐ ܚܛܸܠܘܿܢ: ܡܼܢ ܢܵܡܘܿܣܵܐ ܒܸܬ ܦܵܝܫܝܼ ܕܝܼܢܹܐ. 13 ܣܵܒܵܒ ܠܵܐ ܕܫܲܡܥܵܢܹ̈ܐ ܕܢܵܡܘܿܣܵܐ ܙܲܕܝܼܩܹ̈ܐ ܝܢܵܐ ܩܵܕܡ ܐܲܠܵܗܵܐ: ܐܸܠܵܐ ܥܵܒܼܪܵܢܹ̈ܐ ܕܢܵܡܘܿܣܵܐ ܒܸܬ ܦܵܝܫܝܼ ܡܘܼܟܫܸܛܹܐ: 14 ܣܵܒܵܒ ܕܟܲܕ ܛܵܝܸܦܹ̈ܐ ܕܠܲܝܬ ܠܗܘܿܢ ܢܵܡܘܿܣܵܐ: ܡܼܢ ܐܲܨܠܵܝ ܥܵܒܼܕܝܼ ܫܘܼܠܹ̈ܐ ܕܢܵܡܘܿܣܵܐ: ܐܵܢܝܼ: ܟܲܕ ܢܵܡܘܼܣܵܐ ܠܲܝܬ ܠܗܘܿܢ: ܠܓܵܢܵܝ ܗܘܹܠܘܿܢ ܢܵܡܘܿܣܵܐ: 15 ܒܗܿܝ ܕܟܹܐ ܡܲܚܙܝܼ ܦܘܼܠܚܵܢܹܗ ܕܢܵܡܘܿܣܵܐ ܟܬܝܼܒܼܵܐ ܥܲܠ ܠܸܒܵܝ: ܟܲܕ ܝܵܗܒܼܵܐ ܣܵܗܕܘܼܬܵܐ ܐܸܢܝܲܬܵܝ: ܟܲܕ ܚܘܼܫܵܒܼܵܝ̈ ܒܹܝܠ ܓܵܢܵܝ ܟܹܐ ܡܲܢܟܸܣܝܼ ܝܲܢ ܓܲܘܸܒܝܼ (ܐܸܠܵܝ): 16 ܒܝܘܿܡܵܐ ܕܕܵܝܸܢ ܐܲܠܵܗܵܐ ܫܘܼܠܹ̈ܐ ܛܸܫܝܹ̈ܐ ܕܒܢܲܝ̈ܢܵܫܵܐ: ܐܲܝܟ ܐܸܘܵܢܓܵܠܝܼܘܿܢ ܕܝܼܝܼ: ܒܼܝܸܕ ܝܼܫܘܿܥ ܡܫܝܼܚܵܐ. 17 ܐܝܼܢܵܐ ܐܸܢ ܐܲܢܬ ܦܝܵܫܵܐ ܝܘܸܬ ܩܸܪܝܵܐ ܝܗܘܼܕܵܝܵܐ: ܘܒܸܢܵܚܝܵܐ. ܝܘܸܬ ܒܢܵܡܘܿܣܵܐ: ܘܒܸܥܒܼܵܕܵܐ ܝܘܸܬ ܫܘܼܒܼܗܵܪܵܐ ܒܐܲܠܵܗܵܐ: 18 ܘܒܝܼܕܲܥܝܵܐ ܝܘܸܬ ܪܸܙܵܝܹܗ: ܘܒܸܦܪܵܫܵܐ ܝܘܸܬ ܡܸܢܟܼܝܵܢܹ̈ܐ ܦܪ̈ܝܼܫܹܐ: ܟܲܕ ܡܘܿܠܦܵܐ ܝܘܸܬ ܡܼܢ ܢܵܡܘܿܣܵܐ: 19 ܘܗܲܪ ܗܘܼܡܸܢܵܐ ܝܘܸܬ ܒܓܵܢܘܼܟ ܕܬܲܓܒܸܪܵܢܵܐ ܕܣܸܡܝܹ̈ܐ ܝܘܸܬ: ܘܒܲܗܪܵܐ ܕܐܵܢܝܼ ܕܝܼܢܵܐ ܒܚܘܼܒܼܝܵܐ: 20 ܘܬܲܥܠܡܵܢܵܐ ܕܣܲܟܼܠܹ̈ܐ: ܘܡܲܠܦܵܢܵܐ ܕܝܲܠܘܼܕܹ̈ܐ: ܘܐܝܼܬ ܠܘܼܟ ܐܸܣܟܹܝܡܵܐ ܕܝܕܹܥܝܵܐ ܘܕܣܲܪܲܣܬܘܼܬܵܐ ܒܢܵܡܘܿܣܵܐ: 21 ܐܲܢܬ ܗܲܕܟܼܵܐ ܕܡܵܠܘܿܦܹܐ ܝܘܸܬ ܠܐܚܹܪܢܹ̈ܐ: ܠܓܵܢܘܼܟ ܠܹܐ ܝܘܸܬ ܡܵܠܘܿܦܹܐ: ܐܲܢܬ ܕܡܲܟܪܘܼܙܹܐ ܝܘܸܬ ܕܠܵܐ ܓܵܢܒܼܝܼ: ܒܸܓܢܵܒܼܵܐ ܝܘܸܬ: 22 ܐܲܢܬ ܕܒܸܐܡܵܪܵܐ ܝܘܸܬ ܕܠܵܐ ܥܵܒܼܕܝܼ ܩܲܗܒܘܼܬܵܐ: ܒܸܥܒܼܵܕܵܐ ܝܘܸܬ ܩܲܗܒܘܼܬܵܐ: ܐܲܢܬ ܕܡܲܣܠܘܼܝܹܐ ܝܘܸܬ ܨܵܢܲܡܹ̈ܐ: ܫܵܠܘܿܚܹܐ ܝܘܸܬ ܡܲܩܕܫܹ̈ܐ: 23 ܐܲܢܬ ܕܒܸܥܒܼܵܕܵܐ ܝܘܸܬ ܫܘܼܒܼܗܵܪܵܐ ܒܢܵܡܘܿܣܵܐ: ܒܼܝܸܕ ܥܒܼܵܪܬܘܼܟ ܥܲܠ ܢܵܡܘܿܣܵܐ ܠܐܲܠܵܗܵܐ ܡܲܒܨܘܼܪܹܐ ܝܘܸܬ: 24 ܣܵܒܵܒ ܫܸܡܹܗ ܕܐܲܠܵܗܵܐ ܒܘܼܬ ܕܝܼܵܘܟܼܘܿܢ ܟܹܐ ܦܵܝܸܫ ܓܕܝܼܦܵܐ ܓܵܘ ܛܵܝܸܦܹ̈ܐ: ܐܲܝܟ ܕܝܼܠܹܐ ܟܬܝܼܒܼܵܐ. 25 ܣܵܒܵܒ ܓܙܘܼܪܬܵܐ ܟܹܐ ܥܵܒܼܕܵܐ ܦܲܝܕܵܐ ܐܸܢ ܢܵܡܘܿܣܵܐ ܬܲܡܸܡܸܬ. ܐܝܼܢܵܐ ܐܸܢ ܥܵܒܼܪܸܬ ܥܲܠ ܢܵܡܘܿܣܵܐ: ܓܙܼܪܬܘܼܟ ܗܘܹܠܵܐ ܥܘܼܪܠܘܼܬܵܐ. 26 ܐܝܼܢܵܐ ܐܸܢ ܥܘܼܪܠܘܼܬܵܐ ܢܵܛܪܵܐ ܦܘܼܩܕܵܢܹܗ ܕܢܵܡܘܿܣܵܐ: ܗܵܐ ܥܘܼܪܠܘܼܬܵܐ 27 ܠܹܐ ܦܵܝܫܵܐ ܚܘܼܫܒܸܢܬܵܐ ܠܓܙܘܼܪܬܵܐ: ܘܥܘܼܪܠܘܼܬܵܐ ܕܡܼܢ ܐܲܨܠܵܗܿ: ܐܸܢ ܬܲܡܸܡܵܐ ܢܵܡܘܿܣܵܐ: ܠ. ܐ ܕܵܝܢܵܐ ܐܸܠܘܼܟ: ܕܒܟܬܵܒܼܵܐ ܘܒܓܙܘܼܪܬܵܐ ܒܸܥܒܼܵܕܵܐ ܝܘܸܬ ܥܲܠ ܢܵܡܘܿܣܵܐ: 28 ܣܵܒܵܒ ܠܹܐ ܝܠܹܐ ܡܿܢ ܕܒܲܪܵܐܝܼܬ ܗܿܘ ܝܠܹܐ ܝܗܘܼܕܵܝܵܐ: ܐܘܼܦܠܵܐ ܗܿܝ ܕܝܼܠܵܐ ܒܲܪܵܐܝܼܬ ܒܒܸܣܪܵܐ ܓܙܘܼܪܬܵܐ. 29 ܐܸܠܵܐ ܗܿܘ ܝܼܠܹܐ ܝܗܘܼܕܵܝܵܐ ܗܿܘ ܕܓܵܘܵܐܝܼܬ ܝܼܠܹܐ: ܘܓܙܘܼܪܬܵܐ ܗܿܝ ܕܠܸܒܵܐ ܝܠܵܐ: ܒܪܘܼܚܵܐ ܘܠܵܐ ܒܟܬܵܒܼܵܐ: ܗܿܝ ܕܚܸܩܘܼܗܿ ܠܹܐ ܝܠܹܐ ܡܼܢ ܒܢܲܝ̈ܢܵܫܵܐ: ܐܸܠܵܐ ܡܼܢ ܐܲܠܵܗܵܐ.

ܩܦܠܐܘܢ: ܓ

1 ܒܲܣ ܡܘܼܕܝܼ ܝܠܵܐ ܙܵܘܕܘܿܢܝܘܼܬܹܗ ܕܝܗܘܼܕܵܝܵܐ: ܝܲܢ ܡܘܼܕܝܼ ܝܠܹܐ ܦܲܝܕܵܐ ܕܓܙܘܼܪܬܵܐ: 2 ܪܵܒܵܐ ܒܟܠ ܬܵܗܵܪ. ܩܵܕܡܵܝܬܵܐ: ܕܦܸܫܠܘܿܢ ܣܘܼܦܝܹܐ ܒܵܝܼܝ ܗܹܡܸܙܡܵܢܹ̈ܐ ܕܐܲܠܵܗܵܐ. 3 ܣܵܒܵܒ ܡܘܼܕܝܼ: ܐܸܢ ܐܢܵܫܹ̈ܐ ܡܸܢܵܝ ܠܵܐ ܗܘܼܡܸܢܘܿܢ: ܒܠܵܐ ܗܲܝܡܵܢܘܼܬܵܝ ܠܡܗܘܼܡܢܘܼܬܹܗ ܕܐܲܠܵܗܵܐ ܒܵܓܠܝܼ: 4 ܚܵܣ ܠܝܼ. ܣܵܒܵܒ ܐܲܠܵܗܵܐ ܣܲܪܲܣܬ ܗܵܘܹܐ: ܐܝܼܢܵܐ ܟܠ ܒܲܪܢܵܫܵܐ ܕܵܓܵܠܵܐ: ܐܲܝܟ ܕܝܼܠܹܐ ܟܬܝܼܒܼܵܐ: ܕܦܵܝܫܸܬ ܡܘܼܟܫܸܛܵܐ ܒܗܹܡܸܙܡܵܢܘܼܟ: ܘܕܓܼܵܠܒܸܬ ܟܲܕ ܕܵܝܢܝܼ ܠܘܼܟ. 5 ܐܝܼܢܵܐ ܐܸܢ ܥܵܘܠܵܐ ܕܝܸܢ ܡܲܩܸܡ ܙܲܕܷܩܘܼܬܹܗ ܕܐܲܠܵܗܵܐ: ܡܘܼܕܝܼ ܐܵܡܪܵܚ: ܢܵܐܗܲܩ ܝܼܠܹܐ ܐܲܠܵܗܵܐ ܕܡܲܝܬܝܹܐ ܟܲܪܒܹܗ: ܐܲܝܟ ܒܲܪܢܵܫܵܐ ܗܲܡܙܘܼܡܹܐ ܝܘܸܢ: 6 ܚܵܣ ܠܝܼ: ܘܐܸܢ ܠܵܐ: ܕܵܐܟܼܝܼ ܒܸܬ ܕܵܝܸܢ ܐܲܠܵܗܵܐ ܠܥܵܠܡܵܐ: 7 ܐܝܼܢܵܐ ܐܸܢ ܣܲܪܲܣܬܘܼܬܹܗ ܕܐܲܠܵܗܵܐ ܙܸܕܠܵܐ ܒܕܵܓܵܠܘܼܬܝܼ ܠܬܸܫܒܘܿܚܬܵܐ ܕܝܹܗ: ܒܲܣ ܩܵܡܘܿܕܝܼ ܐܵܢܵܐ ܐܲܝܟ ܚܲܛܵܝܵܐ ܦܝܵܫܵܐ ܝܘܸܢ ܕܝܼܢܵܐ: 8 ܘܩܵܡܘܿܕܝܼ ܠܵܐ ܐܲܝܟ ܕܓܵܕܦܝܼ ܥܲܠܲܢ ܘܐܵܡܪܝܼ: ܕܐܲܚܢܲܢ ܒܹܐܡܵܪܵܐ ܝܘܵܚ: ܥܵܒܼܕܵܚ ܒܝܼܫܵܬܹ̈ܐ ܕܐܵܬܝܼ ܛܵܒܼܵܬܹ̈ܐ: ܐܵܢܝܼ ܕܕܝܼܘܵܢܵܝ ܗܲܩ ܝܼܠܵܐ. 9 ܒܲܣ ܡܘܼܕܝ: ܐܲܚܢܲܢ ܙܵܘܕܵܐ ܝܘܵܚ: ܠܵܐ: ܒܟܼܘܼ ܬܵܗܵܪ: ܣܵܒܵܒ ܩܲܕܡܵܝܬܵܐ ܩܛܸܥܠܲܢ ܒܵܗܣ ܕܝܗܘܼܕܵܝܹ̈ܐ ܘܒܵܗܣ ܕܝܵܘܢܵܝܹ̈ܐ: ܕܟܠܵܝ ܬܚܘܿܬ ܚܛܝܼܬܵܐ ܝܢܵܐ: 10 ܐܲܝܟ ܕܝܼܠܵܐ ܟܬܝܼܒܼܵܐ: ܠܲܝܬ ܙܲܕܝܼܩܵܐ: ܐܘܼܦܠܵܐ ܚܵܕ: 11 ܠܲܝܬ ܕܦܲܪܡܹܐ: ܠܲܝܬ ܕܒܲܥܝܹܐ ܠܐܲܠܵܗܵܐ: 12 ܟܠܵܝ ܩܠܸܒܠܘܿܢ ܡܸܚܕܵܕܹ̈ܐ ܘܦܸܫܠܘܿܢ ܡܘܼܣܠܝܸܐ: ܘܠܲܝܬ ܕܥܵܒܸܕ ܛܵܒܼܬܵܐ: ܐܘܼܦ ܠܵܐ ܚܵܕ. 13 ܒܵܠܘܿܥܘܵܝ̈ ܩܲܒܼܪܹ̈ܐ ܦܬܝܼܚܹ̈ܐ ܝܢܵܐ: ܒܠܸܫܵܢܵܝ̈ ܦܠܸܡܠܘܿܢ: ܘܣܲܡܵܐ ܕܐܸܣܦܸܣ ܬܚܘܿܬ ܣܸܦܘܵܬܵܝ̈ ܝܠܹܐ. 14 ܦܘܼܡܵܝ ܡܸܠܝܵܐ ܝܠܹܐ ܠܵܘܛܬܵܐ ܘܡܲܪܝܼܪܘܼܬܵܐ. 15 ܐܲܩܠܵܝ̈ ܩܵܠܘܿܠܹ݁̈ܐ ܝܢܵܐ ܠܫܵܦܘܿܟܹܐ ܕܸܡܵܐ: 16 ܓܼܘܼܢܓܼܵܪܵܐ ܘܫܲܩܝܼܘܼܬܵܐ ܒܐܘܼܪ̈ܚܵܬܵܝ ܝܢܵܐ: 17 ܘܐܘܼܪܚܵܐ ܕܫܠܵܡܵܐ ܠܹܐ ܝܢܵܐ ܝܕܸܥܝܹܐ. 18 ܙܕܘܼܥܬܹܗ ܕܐܲܠܵܗܵܐ ܠܲܝܬ ܩܵܕܡ ܥܲܝܢܵܝ̈. 19 ܐܝܼܢܵܐ ܒܝܼܕܲܥܝܵܐ ܝܘܵܚ: ܕܡܸܢܕܝܼ ܕܐܡܸܪܹܐ ܢܵܡܘܿܣܵܐ: ܠܐܵܢܝܼ ܕܢܵܡܘܿܣܵܐ ܝܢܵܐ ܐܡܸܪܹܐ: ܕܟܠ ܦܘܼܡܵܐ ܦܵܝܸܫ ܥܟܼܝܼܡܵܐ: ܘܟܠܹܗ ܥܵܠܡܵܐ ܦܵܝܸܫ ܓܘܼܢܵܗܟܵܪ ܩܵܕܡ ܐܲܠܵܗܵܐ. 20 ܣܵܒܵܒ ܡܼܢ ܦܘܼܠܚܵܢܹ̈ܐ ܕܢܵܡܘܿܣܵܐ ܠܹܐ ܦܵܝܸܫ ܡܘܼܟܫܸܛܵܐ ܟܼܘܼ ܒܤܣܪܵܐ ܩܵܕܡܘܼܗܝ: ܣܵܒܵܒ ܒܸܝܼܕ ܢܵܡܘܿܣܵܐ ܦܝܵܫܵܐ ܝܠܵܐ ܝܕܥܝܼܬܵܐ ܚܛܝܼܬܵܐ. 21 ܐܝܼܢܵܐ ܐܵܕܝܼܵܐ ܕܠܵܐ ܢܵܡܘܿܣܵܐ ܙܲܕܝܼܩܘܼܬܹܗ ܕܐܲܠܵܗܵܐ ܦܸܫܠܵܐ ܓܠܝܼܬܵܐ: ܘܒܵܝܪܗܒܼܵܐ ܝܠܹܐ ܣܵܗܕܘܼܬܵܐ ܥܲܠܘܼܗܿ ܢܵܡܘܿܣܵܐ ܘܢܒܼܝܹ̈ܐ: 22 ܙܲܕܝܼܩܘܼܬܹܗ ܕܐܲܠܵܗܵܐ ܗܿܝ ܕܒܼܝܸܕ ܗܲܝܡܵܢܘܼܬܗ. ܕܝܼܫܘܿܥ ܡܫܝܼܚܵܐ ܠܟܠܵܝ: ܐܘܼܦ ܥܲܠ ܟܠܵܝ: ܕܗܲܡܸܢܝܼ ܒܼܝܸܗ: ܣܵܒܵܒ ܠܲܝܬ ܦܘܼܪܫܘܼܢܝܵܐ: 23 ܣܵܒܵܒ ܟܠܵܝ ܚܛܹܠܘܿܢ: ܘܚܣܸܪܘܿܢ ܡܼܢ ܬܫܒܘܿܚܬܹܗ ܕܐܲܠܵܗܵܐ: 24 ܘܟܹܐ ܦܵܝܫܝܼ ܡܘܼܟܫܸܛܹܐ ܒܫܵܦܵܩܲܬܹܗ ܚܘܼܪܵܝܝܼ: ܒܦܘܼܪܩܵܢܵܐ ܕܝܼܠܵܐ ܒܝܼܫܘܿܥ ܡܫܝܼܚܵܐ: 25 ܗܿܘ ܕܩܵܕܡܵܝܬܵܐ ܡܘܼܬܸܒܼܠܹܗ ܐܲܠܵܗܵܐ ܚܘܼܣܵܝܵܐ: ܒܼܝܸܕ ܗܲܝܡܵܢܘܼܬܵܐ: ܒܕܸܡܹܗ: ܠܡܲܚܙܵܝܬܵܐ ܕܙܲܕܝܼܩܘܼܬܹܗ: ܣܵܒܵܒ ܕܡܲܚܠܵܥܝܬܵܐ ܕܚܛܵܝܪܬܵܐ ܕܡܩܵܕܡܵܝܬܵܐ ܦܠܝܼܚܹܐܗܘܵܘ: ܒܡܲܪܝܲܟܼܬܵܐ ܕܒܸܢܵܐ ܕܐܲܠܵܗܵܐ: 26 ܠܡܲܚܙܵܝܬܵܐ: (ܒܸܐܡܵܪܵܐ ܝܘܸܢ): ܕܙܲܕܝܼܩܘܼܬܹܗ ܒܐܵܗܵܐ ܙܲܒܼܢܵܐ: ܕܗܿܘ ܗܵܘܹܐ ܒܓܵܢܹܐ ܙܲܕܝܼܩܵܐ: ܘܡܲܟܫܸܛܵܢܵܐ ܠܗܿܘ ܕܝܼܠܹܐ ܒܗܲܝܡܵܢܘܼܬܵܐ ܕܝܼܫܘܿܥ. 27 ܒܲܣ ܐܲܝܟܵܐ ܝܠܹܐ ܫܘܼܒܼܗܵܪܵܐ: ܦܸܫܠܹܐ ܒܘܼܛܠܵܐ. ܒܡܘܼܕܝܼ ܢܵܡܘܿܣܵܐ: ܕܦܘܼܠܚܵܢܹ̈ܐ: ܠܵܐ: ܐܸܠܵܐ ܒܢܵܡܘܿܣܵܐ ܕܗܲܝܡܵܢܘܼܬܵܐ. 28 ܒܲܣ ܒܸܚܫܵܒܼܵܐ ܝܘܵܚ ܕܒܗܲܝܡܵܢܘܼܬܵܐ ܟܹܐ ܦܵܝܸܫ ܡܘܼܟܫܸܛܵܐ ܒܲܪܢܵܫܵܐ ܕܠܵܐ ܦܘܼܠܚܵܢܹ̈ܐ ܕܢܵܡܘܿܣܵܐ. 29 ܝܲܢ ܐܲܠܵܗܵܐ ܕܝܗܘܼܕܵܝܹ̈ܐ ܝܠܹܐ ܗܲܪ: ܘܕܛܵܝܸܦܹ̈ܐ ܠܵܐ: ܝܹܐ: ܐܘܼܦ ܕܛܵܝܸܦܹ̈ܐ: 30 ܐܸܢ ܚܵܕ ܝܼܠܹܐ ܐܲܠܵܗܵܐ ܕܟܹܐ ܡܲܟܫܸܛ ܓܙܘܼܪܬܵܐ ܒܗܲܝܡܵܢܘܼܬܵܐ: ܐܘܼܦ ܥܘܼܪܠܘܼܬܵܐ ܗܲܪ ܒܼܝܸܕ ܗܲܝܡܵܢܘܼܬܵܐ. 31 ܒܲܣ ܡܘܼܕܝܼ: ܢܵܡܘܿܣܵܐ ܒܵܛܘܿܠܹܐ ܝܘܵܚ ܒܗܲܝܡܵܢܘܼܬܵܐ: ܚܵܣ ܠܝܼ: ܐܸܠܵܐ ܢܵܡܘܿܣܵܐ ܡܲܩܘܼܡܹܐ ܝܘܵܚ.

ܩܦܠܐܘܢ: ܕ

1 ܒܲܣ ܡܘܼܕܝܼ ܐܵܡܪܵܚ ܕܐܲܒܼܪܵܗܵܡ ܪܹܫܵܐ ܕܐܲܒܼܵܗܵܬܲܢ ܡܘܼܫܟܸܚܠܹܐ ܒܒܸܣܪܵܐ: 2 ܣܵܒܵܒ ܐܸܢ ܐܲܒܼܪܵܗܵܡ ܡܼܢ ܦܘܼܠܚܵܢܹ̈ܐ ܦܸܫܠܹܐ ܡܘܼܟܫܸܛܵܐ: ܐܝܼܬ ܗܘܵܐ ܠܹܗ ܫܘܼܒܼܗܵܪܵܐ: ܐܸܠܵܐ ܠܵܐ ܠܟܸܣ ܐܲܠܵܗܵܐ. 3 ܣܵܒܵܒ ܡܘܼܕܝܼ ܐܡܸܪܹܐ ܟܬܵܒܼܵܐ: ܗܘܼܡܸܢܹܐ ܐܲܒܼܪܵܗܵܡ ܒܐܲܠܵܗܵܐ: ܘܦܸܫܠܹܐ ܚܘܼܫܒܸܢܬܵܐ ܐܸܠܹܗ ܠܙܲܕܝܪܩܘܼܬܵܐ. 4 ܐܝܼܢܵܐ ܠܡܿܢ ܕܦܵܠܸܚ ܗܵܩܹܗ ܠܹܐ ܦܵܝܸܫ ܚܘܼܫܒܸܢܵܐ ܐܸܠܹܗ ܐܲܝܟ ܕܒܫܵܦܵܩܲܬ: ܐܸܠܵܐ ܐܲܝܟ ܕܒܕܵܝܢܵܐ. 5 ܐܝܼܢܵܐ ܠܗܿܘ ܕܠܵܐ ܦܵܠܸܚ: ܐܸܠܵܐ ܗܲܡܸܢ ܒܗܿܘ ܕܡܲܟܫܸܛ ܠܚܲܛܵܝܹ̈ܐ: ܟܹܐ ܦܵܝܫܵܐ ܚܘܼܫܒܸܢܬܵܐ ܗܲܝܡܵܢܘܼܬܹܗ ܠܙܲܕܝܼܩܘܼܬܵܐ. 6 ܕܐܵܟܼܝܼ ܕܐܘܼܦ ܕܵܘܝܼܕ ܗܘܼܡܙܸܡܠܹܐ ܥܲܠ ܛܘܼܒܹܗ ܕܐܢܵܫܵܐ: ܗܿܘ ܕܐܲܠܵܗܵܐ ܟܹܐ ܚܲܫܒܸܢ ܐܤܠܹܗ ܟܹܐܢܘܼܬܵܐ ܕܠܵܐ ܦܘܼܠܚܵܢܹ̈ܐ: 7 (ܒܹܐܡܵܪܵܐ): ܛܘܼܒܼܵܐ ܠܐܵܢܝܼ ܕܦܸܫܠܹܐ ܫܒܼܝܼܩܵܐ ܐܸܠܵܝ ܥܵܘܠܵܝ ܘܦܸܫܠܘܿܢ ܟܘܼܣܝܹܐ ܚܛܝܼܵܬܵܝ̈. 8 ܛܘܼܒܼܵܐ ܠܐܢܵܫܵܐ ܕܠܵܐ ܚܲܫܒܸܢ ܐܲܠܵܗܵܐ ܐܸܠܹܗ ܚܛܝܼܬܵܐ. 9 ܒܲܣ ܐܵܗܵܐ ܛܘܼܒܼܵܐ ܥܲܠ ܓܙܘܼܪܬܵܐ ܝܠܹܐ: ܝܲܢ ܐܘܼܦ ܥܲܠ ܥܘܼܪܠܘܼܬܵܐ: ܣܵܒܵܒ ܟܹܐ ܐܵܡܪܵܚ: ܕܗܲܝܡܵܢܘܼܬܹܗ ܕܐܲܒܼܪܵܗܵܡ ܦܸܫܠܵܐ ܚܘܼܫܒܸܢܬܵܐ ܠܙܲܕܝܼܩܘܼܬܵܐ. 10 ܒܲܣ ܕܵܐܟܼܝܼ ܦܸܫܠܹܐ ܚܘܼܫܒܸܢܬܵܐ: ܟܲܕ ܝܼܗܘܵܐ ܒܓܙܘܼܪܬܵܐ: ܝܲܢ ܒܥܘܼܪܠܘܼܬܵܐ: ܠܹܐ ܗܘܵܐ ܒܓܙܘܼܪܬܵܐ: ܐܸܠܵܐ ܒܥܘܼܪܠܘܼܬܵܐ. 11 ܘܫܩܸܠܹܐ ܢܝܼܫܲܢܩܵܐ ܕܓܙܘܼܪܬܵܐ: ܡܵܘܗܪ ܕܙܲܕܝܼܩܘܼܬܵܐ ܕܗܲܝܡܵܢܘܼܬܹܗ ܕܒܥܘܼܪܠܘܼܬܵܐ: ܕܗܵܘܹܐ ܒܵܒܵܐ ܠܟܠܵܝ ܐܵܢܝܼ ܕܗܲܡܸܢܝܼ ܟܲܕ ܒܥܘܼܪܠܘܼܬܵܐ: ܕܐܘܼܦ ܠܐܵܢܝܼ ܙܲܕܝܼܩܘܼܬܵܐ ܦܵܝܫܵܐ ܚܘܼܫܒܸܢܬܵܐ: 12 ܘܒܵܒܵܐ ܕܓܙܘܼܪܬܵܐ ܠܐܵܢܝܼ ܕܠܵܐ ܡܼܢ ܓܙܘܼܪܬܵܐ ܝܢܵܐ ܗܲ: ܐܸܠܵܐ ܐܘܼܦ ܠܐܵܢܝܼ ܕܚܵܕܪܝܼ ܒܫܵܘܦܵܦܹ̈ܐ ܕܗܲܝܡܵܢܘܼܬܵܐ ܕܒܥܘܼܪܠܘܼܬܵܐ ܕܒܵܒܲܢ ܐܲܒܼܪܵܗܵܡ. 13 ܣܵܒܵܒ ܠܵܐ ܒܼܝܸܕ ܢܵܡܘܿܣܵܐ ܗܘܸܠܹܐ ܩܵܘܠܵܐ ܠܐܲܒܼܪܵܗܵܡ ܝܲܢ ܠܙܲܪܥܹܗ: ܕܗܵܘܹܐ ܝܵܪܘܿܬܵܐ ܕܥܵܠܡܵܐ: ܐܸܠܵܐ ܒܼܝܸܕ ܙܲܕܝܼܩܘܼܬܵܐ ܕܗܲܝܡܵܢܘܼܬܹܗ. 14 ܣܵܒܵܒ ܐܸܢ ܐܵܢܝܼ ܕܡܼܢ ܢܵܡܘܿܣܵܐ ܗܘܸܠܘܿܢ ܝܵܪ̈ܬܬܹܐ: ܒܠܝܼܠܬܵܐ ܝܠܵܐ ܗܲܝܡܵܢܘܼܬܵܐ: ܘܒܘܼܛܠܵܐ ܝܠܹܐ ܩܵܘܠܵܐ. 15 ܣܵܒܵܒ ܢܵܡܘܿܣܵܐ ܡܲܥܒܸܕܵܢܵܐ ܕܟܲܪܒܵܐ ܝܠܹܐ: ܣܵܒܵܒ ܐܲܝܟܵܐ ܕܠܲܝܬ ܢܵܡܘܿܣܵܐ: ܐܘܼܦ ܠܲܝܬ ܥܒܼܵܪܬܵܐ ܠܢܵܡܘܿܣܵܐ. 16 ܣܵܒܵܒ ܕܐܵܗܵܐ ܒܗܲܝܡܵܢܘܼܬܵܐ (ܝܠܵܐ: ܕܗܵܘܝܵܐ) ܒܫܵܦܵܩܲܬ: ܕܗܵܘܹܐ ܩܘܼܝܵܐ ܩܵܘܠܵܐ ܠܟܠܹܗ ܙܲܪܥܹܗ: ܠܵܐ ܠܗܿܘ ܕܡܼܢ ܗܲܝܡܵܢܘܼܬܹܗ ܕܐܵܒܼܪܵܗܵܡ: ܕܝܼܠܹܐ ܒܵܒܵܐ ܕܟܠܲܢ: 17 ܕܐܵܟܼܝܼ ܕܝܼܠܹܐ ܟܬܝܼܒܼܵܐ: ܕܩܲܡ ܡܲܬܒܸܢܘܼܟ ܒܵܒܵܐ ܠܪܵܒܵܐ ܛܵܝܸܦܹ̈ܐ: ܩܵܕܡ ܐܲܠܵܗܵܐ ܗܿܘ ܕܗܘܼܡܸܢܹܐ ܒܝܹܗ: ܕܟܹܐ ܡܲܚܹܐ ܡܝܼܬܹ̈ܐ: ܘܟܹܐ ܩܵܪܹܐ ܠܐܵܢܝܼ ܡܢܕܝܼܵܢܹ̈ܐ ܕܠܹܐ ܝܢܵܐ: ܐܲܝܟ ܕܝܼܢܵܐ. 18 ܗܿܘ ܕܕܲܪܩܘܼܒܼܠ ܕܗܸܒܼܝܼ ܒܗܸܒܼܝܼ ܗܘܼܡܸܢܹܐ: ܕܗܵܘܹܐ ܗܘܵܐ ܒܵܒܵܐ ܠܪܵܒܵܐ ܛܵܝܸܦܹ̈ܐ: ܐܲܝܟ ܕܝܼܠܹܐ ܐܡܝܼܪܵܐ: ܗܲܕܟܼܵܐ ܒܸܬ ܗܵܘܹܐ ܙܲܪܥܘܼܟ. 19 ܘܠܵܐ ܦܸܫܠܹܐ ܙܲܒܘܼܢ ܒܗܲܝܡܵܢܘܼܬܹܗ: ܟܲܕ ܚܸܪܹܐ ܒܦܲܓܼܪܹܗ ܡܝܼܬܵܐ: ܕܝܪܗܘܵܐ ܐܲܝܟ ܒܲܪ ܡܵܐܐ ܫܸܢܹ̈ܐ: ܘܒܡܲܪܒܥܵܐ ܡܝܼܬܵܐ ܕܣܲܪܵܐ. 20 ܘܒܩܵܘܠܵܐ ܕܐܲܠܵܗܵܐ ܠܵܐ ܦܸܫܠܹܐ ܕܘܼܒܵܪܵܐ ܒܠܵܐ ܗܲܝܡܵܢܘܼܬܵܐ: ܐܸܠܵܐ ܚܘܼܠܸܢܹܐ ܒܗܲܝܡܵܢܘܼܬܵܐ: ܒܝܼܵܗ̄ܒܼܵܐ ܬܸܫܒܘܿܚܬܵܐ ܠܐܲܠܵܗܵܐ: 21 ܘܩܘܼܝܵܐ ܗܘܼܡܸܢܹܐ: ܕܡܸܢܟܼܝܼ ܕܩܘܼܘܸܠܵܐ ܗ̄ܘܵܐ ܥܲܡܹܗ: ܡܵܨܹܐ ܗ̄ܘܵܐ ܠܬܲܡܘܼܡܹܐ. 22 ܣܵܒܵܒ ܕܐܵܗܵܐ ܦܸܫܠܵܐ ܚܘܼܫܒܸܢܬܵܐ ܐܸܠܹܐ ܠܙܲܕܝܼܩܘܼܬܵܐ. 23 ܘܠܹܐ ܗ̄ܘܵܐ ܣܵܒܵܒ ܕܝܹܗ ܒܢܲܦܫܹܗ ܦܸܫܠܹܐ ܟܬܝܼܒܼܵܐ ܐܵܗܵܐ: ܕܦܸܫܠܵܐ ܚܘܼܫܒܢܬܵܐ ܐܸܠܹܗ: 24 ܐܸܠܵܐ ܐܘܼܦ ܣܵܒܵܒ ܕܝܲܢ: ܕܐܘܼܦ ܐܸܠܲܢ ܒܸܬ ܦܵܝܫܵܐ ܚܘܼܫܒܸܢܬܵܐ: ܕܗܲܡܘܼܢܹܐ ܝܘܵܚ ܒܗܿܘ ܕܡܘܼܩܸܡܠܹܐ ܠܡܵܪܲܢ ܝܼܫܘܿܥ ܡܼܢ ܡܝܼܬܹ̈ܐ: 25 ܗܿܘ ܕܦܸܫܠܹܐ ܣܘܼܦܝܵܐ ܒܣܵܒܵܒ ܕܚܛ̈ܛܝܼܵܬܲܢ ܘܩܸܡܠܹܐ ܒܣܵܒܵܒ ܕܡܲܟܫܲܓܬܲܢ.

ܩܦܠܐܘܢ: ܗ

1 ܒܲܣ ܟܲܕ ܦܸܫܠܲܢ ܡܘܼܟܫܸܛܹܐ ܒܗܲܝܡܵܢܘܼܬܵܐ: ܗܵܘܹܐ ܠܲܢ ܫܠܵܡܵܐ ܠܟܸܣ ܐܲܠܵܗܵܐ: ܒܡܵܪܲܢ ܝܼܫܘܿܥ ܡܫܝܼܚܵܐ: 2 ܕܐܘܼܦ ܒܝܹܗ ܐܝܼܬ ܠܲܢ ܩܲܪܒܲܢܬܵܐ ܒܗܲܝܡܵܢܘܼܬܵܐ ܠܐܵܗܵܐ ܫܵܦܵܩܬܵ ܕܒܝܼܵܗܿ ܒܸܟܠܵܝܵܐ ܝܘܵܚ: ܘܒܸܥܒܼܵܕܵܐ ܝܘܵܚ ܫܘܼܒܼܗܵܪܵܐ ܒܗܸܒܼܝܼ ܕܬܸܫܒܘܿܚܬܹܗ ܕܐܲܠܵܗܵܐ. 3 ܘܠܵܐ ܗܲܕܟܼܵܐ ܐܲܚܟܼܝܼ: ܐܸܠܵܐ ܐܘܼܦ ܕܒܐܘܼܠܨܵܢܲܢ ܒܸܥܒܼܵܕܵܐ ܝܘܵܚ ܫܘܼܒܼܗܵܪܵܐ: ܕܒܝܼܕܸܥܝܵܐ ܝܘܵܚ ܕܐܘܼܠܨܵܢܵܐ ܒܸܦܠܵܚܵܐ ܝܠܹܐ ܚܡܵܠܬܵܐ ܒܝܲܢ: 4 ܘܚܡܵܠܬܵܐ ܨܲܪܲܦܬܵܐ: 5 ܘܨܲܪܦܬܵܐ ܘܗܹܒܼܝܼ ܠܹܐ ܡܲܢܚܸܦܵܐ: ܣܵܒܵܒ ܚܘܼܒܹܗ ܕܐܲܠܵܗܵܐ ܡܘܼܫܦܸܟܼܵܐ ܝܠܹܐ ܥܲܠ ܠܸܒܵܘ̈ܬܲܢ ܒܪܘܼܚܵܐ ܕܩܘܼܕܫܵܐ ܕܦܸܫܠܹܐ ܝܸܗܒܸܠܬܵܐ ܐܸܠܲܢ. 6 ܣܵܒܵܒ ܟܲܕ ܙܲܒܘܼܢܹ̈ܐ ܝܘܵܚ ܗ̄ܘܵܘ: ܡܫܝܼܚܵܐ ܒܙܲܒܼܢܵܐ ܡܒܵܕܵܠ ܕܒܝܼܫܹ̈ܐ ܡܸܬܠܹܐ: 7 ܣܵܒܵܒ ܕܒܚܲܝܠܵܐ ܐܢܵܫܵܐ ܡܒܵܕܵܠ ܕܐܢܵܫܵܐ ܟܹܐܢܵܐ ܒܸܬ ܡܵܝܸܬ: ܣܵܒܵܒ ܡܒܵܕܵܠ ܕܐܢܵܫܵܐ ܛܵܒܼܵܐ ܒܲܠܟܵܐ ܩܲܫܟܸܪ ܐܢܵܫܵܐ ܠܸܡܸܝܵܬܵܐ. 8 ܐܝܼܢܵܐ ܡܲܕܘܼܥܝܹܐ ܝܠܹܐ ܐܲܠܵܗܵܐ ܚܘܼܒܹܗ ܕܠܟܸܣܠܲܢ: ܕܟܲܕ ܚܲܛܵܝܹ̈ܐ ܝܘܵܚ ܗ̄ܘܵܘ ܡܫܝܼܚܵܐ ܡܒܵܕܵܠ ܕܝܲܢ ܡܸܬܠܹܐ. 9 ܒܲܣ ܟܡܵܐ ܙܵܘܕܵܐ: ܟܲܕ ܐܵܕܝܼܵܐ ܦܸܫܠܲܢ ܡܘܼܟܫܸܛܹܐ ܒܕܸܡܹܗ: ܒܝܹܗ ܒܸܬ ܦܵܝܫܵܚ ܦܘܼܨܝܹܐ ܡܼܢ ܟܲܪܒܵܐ: 10 ܣܵܒܵܒ ܐܸܢ ܟܲܕ ܕܫܸܡܸܢܹ̈ܐ ܝܘܵܚ ܗ̄ܘܵܘ: ܦܸܫܠܲܢ ܣܘܼܙܓܸܪܹܐ ܥܲܡ ܐܲܠܵܗܵܐ: ܒܼܝܸܕ ܡܵܘܬܵܐ ܕܒܪܘܼܢܹܗ: ܟܡܵܐ ܙܵܘܕܵܐ ܟܲܕ ܗ̄ܘܹܠܲܢ ܣܘܼܙܓܸܪܹܐ ܒܸܬ ܦܵܝܫܵܚ ܦܘܼܪܩܹܐ ܒܚܲܝܘܼ̈ܗܝ: 11 ܘܠܵܐ ܗܲܕܟܼܵܐ ܐܲܚܟܼܝܼ: ܐܸܠܵܐ ܐܘܼܦ ܒܸܥܒܼܵܕܵܐ ܝܘܵܚ ܫܘܼܒܼܗܵܪܵܐ ܒܐܲܠܵܗܵܐ ܒܼܝܸܕ ܡܵܪܲܢ ܝܼܫܘܿܥ ܡܫܝܼܚܵܐ: ܕܒܼܝܸܕ ܕܗܿܘ ܐܵܕܝܼܵܐ ܩܘܼܒܸܠܲܢ ܣܲܙܓܲܪܬܵܐ. 12 ܣܵܒܵܒ ܕܐܵܗܵܐ: ܕܵܐܟܼܝܼ ܕܒܼܝܸܕ ܚܵܕ̄ ܒܲܪܢܵܫܵܐ ܐܘܸܪܐ ܚܛܝܼܬܵܐ ܓܵܘ ܥܲܠܡܵܐ: ܘܒܼܝܤܕ ܚܛܝܼܬܵܐ ܡܵܘܬܵܐ: ܘܗܲܕܟܼܵܐ ܒܟܠܵܝ ܒܢܲܝ̈ܢܵܫܵܐ ܥܒܸܪܹܐ ܡܵܘܬܵܐ: ܒܗܿܝ ܕܟܠܵܝ ܚܛܹܠܘܿܢ: 13 ܣܵܒܵܒ ܕܗܲܠ ܢܵܡܘܿܣܵܐ ܚܛܝܼܬܵܐ ܓܵܘ ܥܵܠܡܵܐ ܗ̄ܘܵܐ: ܐܝܼܢܵܐ ܠܹܐ ܝܠܵܐ ܚܘܼܫܒܸܢܬܵܐ ܚܛܝܼܬܵܐ: ܟܲܕ ܠܲܝܬ ܢܵܡܘܿܣܵܐ. 14 ܐܸܠܵܐ ܗܘܼܟܸܡܠܹܐ ܡܵܘܬܵܐ ܡܼܢ ܐܵܕܵܡ ܗܲܠ ܡܘܼܫܹܐ: ܐܘܼܦ ܥܲܠ ܕܐܵܢܝܼ ܕܠܵܐ ܚܛܹܠܘܿܢ ܒܕܡܘܼܬܵܐ ܕܥܒܼܵܪܬܵܐ ܕܐܵܕܵܡ: ܗܿܘ ܕܝܼܠܹܐ ܕܘܼܡܝܵܐ ܕܗܿܘ ܕܒܸܬ ܐܵܬܸܐ ܗ̄ܘܵܐ. 15 ܐܸܠܵܐ ܠܹܐ ܝܠܵܐ ܐܲܝܟ ܓܢܵܗܵܐ ܗܲܕܟܼܵܐ ܚܲܠܲܢܬ. ܣܵܒܵܒ ܐܸܢ ܒܓܼܵܪܛܬܹܗ ܕܚܵܕ̄ ܪܵܒܵܐ ܡܸܬܠܘܿܢ: ܟܡܵܐ ܙܵܘܕܵܐ ܫܵܦܵܩܲܬܹܗ ܕܐܲܠܵܗܵܐ: ܘܚܲܠܲܢܬܹܗ ܒܫܵܦܵܩܲܬ ܕܚܵܕ̄ ܐܢܵܫܵܐ: ܝܼܫܘܿܥ ܡܫܝܼܚܵܐ: ܙܸܕܠܵܐ ܠܪܵܒܵܐ. 16 ܘܠܵܐ ܐܲܝܟ ܒܼܝܸܕ ܚܵܕ̄ ܕܚܛܹܠܹܐ: ܗܲܕܟܼܵܐ ܚܲܠܲܢܬ. ܣܵܒܵܒ ܕܝܪܘܵܢ ܗ̄ܘܹܠܵܐ ܡܼܢ ܚܵܕ̄: ܠܓܘܼܢܵܗܟܵܪܘܼܬܵܐ: ܐܝܼܢܵܐ ܚܲܠܲܢܬ ܡܼܢ ܪܵܒܵܐ ܓܢܵܗܹ̈ܐ ܗ̄ܘܹܠܵܐ ܠܡܲܟܫܲܛܬܵܐ. 17 ܣܵܒܵܒ ܐܸܢ ܒܼܝܸܕ ܓܢܵܗܵܐ ܕܚܵܕ̄: ܗܘܼܟܸܡܠܹܐ ܡܵܘܬܵܐ ܒܼܝܸܕ ܚܵܕ̄ ܒܘܼܫ ܙܵܘܕܵܐ ܐܵܢܝܼ ܕܫܩܸܠܘܿܢ ܒܘܼܫܵܝܝܼ ܕܫܵܦܵܩܲܬ ܘܕܚܲܠܲܢܬ ܕܙܲܕܝܼܩܘܼܬܵܐ: ܒܚܲܝܹ̈ܐ ܒܸܬ ܗܵܟܡܝܼ ܒܼܝܸܕ ܚܵܕ̄: ܝܼܫܘܿܥ ܡܫܝܼܚܵܐ. 18 ܒܲܣ ܕܵܐܟܼܝܼ ܕܒܼܝܼܕ ܚܕܵܐ ܓܢܵܗܵܐ ܗ̄ܘܹܠܵܐ ܓܘܼܢܵܗܟܵܪܘܼܬܵܐ ܠܟܠܵܝ ܒܢܲܝ̈ܢܵܫܵܐ: ܗܲܕܟܼܵܐ ܒܼܝܸܕ ܚܕܵܐ ܙܲܕܝܼܩܘܼܬܵܐ ܒܸܬ ܗܵܘܝܵܐ ܡܲܟܫܲܛܬܵܐ ܠܚܲܝܹ̈ܐ ܠܟܠܵܝ ܒܢܲܝ̈ܢܵܫܵܐ. 19 ܣܵܒܵܒ ܕܵܐܟܼܝܼ ܕܒܪܝܸܕ ܠܵܐ ܡܲܨܝܲܬܬ. ܗ ܕܚܵܕ̄ ܒܲܪܢܵܫܵܐ ܪܵܒܵܐ ܗ̄ܘܹܠܘܿܢ ܚܲܛܵܝܹ̈ܐ: ܗܲܕܟܼܵܐ ܐܘܼܦ ܒܼܝܸܕ ܡܲܨܝܲܬܬܹܗ ܕܚܵܕ̄ ܪܵܒܵܐ ܒܸܬ ܗܵܘܝܼ ܙܲܕܝܼܩܹ̈ܐ. 20 ܘܢܵܡܘܿܣܵܐ ܐܘܸܪܹܐ: ܕܙܵܝܪܵܐ ܗ̄ܘܵܐ ܓܢܵܗܵܐ: ܐܝܼܢܵܐ ܐܲܝܟܵܐ ܕܙܸܕܠܵܐ ܚܛܝܼܬܵܐ: ܬܵܡܵܐ ܙܸܕܠܵܐ ܒܘܼܫ ܪܵܒܵܐ ܫܵܦܵܩܲܬ: 21 ܕܐܲܝܟ ܕܗܘܼܟܸܡܠܵܐ ܚܛܝܼܬܵܐ ܒܡܵܘܬܵܐ: ܗܲܕܟܼܵܐ ܗܵܟܡܵܐ ܫܵܦܵܩܲܬ ܒܼܝܸܕ ܙܲܕܝܸܩܘܼܬܵܐ ܠܚܲܝܹ̈ܐ ܕܠܵܐܒܵܕ: ܒܼܝܸܕ ܡܵܪܲܢ ܝܼܫܘܿܥ ܡܫܝܼܚܵܐ.

ܩܦܠܐܘܢ: ܘ

1 ܒܲܣ ܡܘܼܕܝܼ ܐܵܡܪܵܚ ܥܲܪܩܸܠܵܚ ܒܚܛܝܼܬܵܐ ܕܫܵܦܵܩܲܬ ܙܵܝܕܵܐ: 2 ܚܵܣ ܠܲܢ. ܐܲܚܢܲܢ ܕܡܸܬܠܲܢ ܠܚܛܝܼܬܵܐ: ܕܵܐܟܼܝܼ ܐܚܹܪ̄ܢܵܐ ܚܲܝܵܚ ܒܝܼܵܗܿ: 3 ܝܲܢ ܠܹܐ ܝܬܘܿܢ ܒܝܼܕܲܥܝܵܐ ܕܟܠܲܢ ܕܥܡܸܕܠܲܢ ܒܝܼܫܘܿܥ ܡܫܝܼܚܵܐ: ܒܡܵܘܬܹܗ ܥܡܸܕܠܲܢ: 4 ܦܸܫܠܲܢ ܩܒܼܝܼܪܹܐ ܗܲܕܟܼܵܐ ܥܲܡܹܗ ܒܼܝܸܕ ܡܲܥܡܘܿܕܝܼܬܵܐ ܠܡܵܘܬܵܐ: ܕܕܵܐܟܼܝܼ ܕܩܸܡܠܹܐ ܡܫܝܼܚܵܐ ܡܼܢ ܡܝܼܬܹ̈ܐ ܒܬܸܫܒܘܿܬܵܐ ܕܒܵܒܹܗ: ܗܲܕܟܼܵܐ ܐܘܼܦ ܐܲܚܢܲܢ ܒܚܲܝܹ̈ܐ ܚܵܕ̄ܬܹ̈ܐ ܚܵܕܪܵܚ. 5 ܣܵܒܵܒ ܐܸܢ ܦܸܫܠܲܢ ܙܘܼܘܸܓܹܐ ܥܲܡܹܐ: ܒܕܡܘܼܬܵܐ ܕܡܵܘܬܹܗ: ܗܲܕܟܼܵܐ ܒܸܬ ܗܵܘܵܚ ܐܘܼܦ (ܒܕܡܘܼܬܵܐ) ܕܩܝܵܡܬܹܗ: 6 ܟܲܕ ܒܝܼܕܲܥܝܵܐ ܝܘܵܚ: ܕܒܲܪܢܵܫܲܢ ܥܵܬܝܼܩܵܐ ܦܸܫܠܹܐ ܙܩܝܼܦܵܐ ܥܲܡܹܗ: ܕܦܵܝܸܫ ܗ̄ܘܵܐ ܒܛܝܼܠܵܐ ܦܲܓܼܪܵܐ ܕܚܛܝܼܬܵܐ: ܕܐܚܹܪ̄ܢܵܐ ܠܵܐ ܥܵܒܼܕܵܚ ܩܘܼܠܘܼܬܵܐ ܠܚܛܝܼܬܵܐ: 7 ܣܵܒܵܒ ܗܿܘ ܕܡܸܬܠܹܐ: ܗ̄ܘܹܠܹܐ ܐܵܙܵܕ ܡܼܢ ܚܛܝܼܬܵܐ. 8 ܐܝܼܢܵܐ ܐܸܢ ܡܸܬܠܲܢ ܥܲܡ ܡܫܝܼܚܵܐ: ܗܲܡܘܼܢܹܐ ܝܘܵܚ ܕܐܘܼܦ ܥܲܡܹܗ ܒܸܬ ܚܲܝܵܚ: 9 ܣܵܒܵܒ ܒܝܼܕܥܝܵܐ ܝܘܵܚ ܕܡܫܝܼܚܵܐ ܩܸܡܠܹܐ ܡܼܢ ܡܝܼܬܹ̈ܐ: ܘܡܸܕܪܹܐ ܠܹܐ ܡܵܝܸܬ: ܘܡܵܘܬܵܐ ܡܸܕܪܹܐ ܠܹܐ ܗܵܟܸܡ ܒܼܝܹܗ. 10 ܣܵܒܵܒ ܒܗܿܝ ܕܡܸܬܠܹܐ: ܠܚܛܝܼܬܵܐ ܡܸܬܠܹܐ ܚܕܵܐ ܓܵܗܵܐ. ܘܒܗܿܝ ܕܚܵܝܵܐ ܝܠܹܐ ܠܐܲܠܵܗܵܐ. 11 ܗܲܕܟܼܵܐ ܐܘܼܦ ܐܲܚܬܘܿܢ ܚܫܘܿܒܼܘܿܢ ܓܵܢܵܘܟܼܘܿܢ ܕܡܝܼܬܹ̈ܐ ܝܬܘܿܢ ܠܚܛܝܼܬܵܐ: ܐܝܼܢܵܐ ܚܵܝܹ̈ܐ ܠܐܲܠܵܗܵܐ ܒܡܵܪܲܢ ܝܼܫܘܿܥ ܡܫܝܼܚܵܐ. 12 ܒܲܣ ܠܵܐ ܗܲܟܡܵܐ ܚܛܝܼܬܵܐ ܒܦܲܓܼܪܵܘܟܼܘܿܢ ܡܝܼܬܵܐ: ܕܡܲܨܝܸܬܝܼܬܘܿܢ ܐܸܠܵܗܿ ܠܫܲܗ̄ܘܲܬܝܵܬܹ̈ܗ: 13 ܘܐܘܼܦ ܠܵܐ ܗܵܕܪܝܼܬܘܿܢ ܗܲܕܵܡܵܘ̈ܟܼܘܿܢ ܐܲܣܒܵܒܹ̈ܐ ܕܥܵܘܠܵܐ ܠܚܛܝܼܬܵܐ: ܐܸܠܵܐ ܗܵܕܪܘܿܢ ܓܵܢܵܘܟܼܘܿܢ ܠܐܲܠܵܗܵܐ: ܐܲܝܟ ܐܢܵܫܹ̈ܐ ܕܡܼܢ ܡܝܼܬܹ̈ܐ ܚܹܝܠܵܘܟܼܘܿܢ: ܘܗܲܕܵܡܵܘ̈ܟܼܘܿܢ ܐܲܣܒܵܒܹ̈ܐ ܕܙܲܕܝܼܩܘܼܬܵܐ ܠܐܲܠܵܗܵܐ. 14 ܣܵܒܵܒ ܚܛܝܼܬܵܐ ܠܹܐ ܗܲܟܡܵܐ ܥܲܠܵܘܟܼܘܿܢ: ܣܵܒܵܒ ܠܹܐ ܝܬܘܿܢ ܬܚܘܿܬ ܢܵܡܘܿܣܵܐ: ܐܸܠܵܐ ܬܚܘܿܬ ܫܵܦܵܩܲܬ. 15 ܒܲܣ ܡܘܼܕܝܼ: ܚܵܛܵܚ ܣܵܒܵܒ ܕܠܹܐ ܝܘܵܚ ܬܚܘܿܬ ܢܵܡܘܿܣܵܐ ܐܸܠܵܐ ܬܚܘܿܬ ܫܵܦܵܩܲܬ: ܚܵܣ ܠܲܢ. 16 ܠܹܐ ܝܬܘܿܢ ܒܝܼܕܲܥܝܵܐ ܕܠܗܿܘ ܕܗܵܕܪܝܼܬܘܿܢ ܓܵܢܵܘܟܼܘܿܢ ܪܹ̈ܓܵܘܵܬܹܐ ܠܡܲܨܝܲܬܬܵܐ: ܪܹ̈ܓܵܘܵܬܹܐ ܕܗܿܘ ܝܼܬܘܿܢ ܕܡܲܨܝܘܼܬܹܐ ܝܬܘܿܢ ܐܸܠܹܗ: ܝܲܢ ܕܚܛܝܼܬܵܐ ܠܡܵܘܬܵܐ: ܝܲܢ ܕܡܲܨܝܲܬܬܵܐ ܠܙܲܕܝܼܩܘܼܬܵܐ: 17 ܐܝܼܢܵܐ ܡܸܢܬܵܐ ܡܼܢ ܐܲܠܵܗܵܐ: ܕܟܲܕ ܪܹ̈ܓܵܘܵܬܹܐ ܕܚܛܝܼܬܵܐ ܝܬܘܿܢ ܗ̄ܘܵܘ: ܡܘܼܨܝܸܬܠܵܘܟܼܘܿܢ ܡܼܢ ܠܸܒܵܐ ܠܗܿܘ ܐܸܣܸܝܡܵܐ ܕܝܘܼܠܦܵܢܵܐ ܕܦܸܫܠܵܘܟܼܘܿܢ ܣܘܼܦܝܹܐ ܒܼܝܹܗ. 18 ܘܟܲܕ ܦܸܫܠܵܘܟܼܘܿܢ ܥܒܼܝܼܕܹܐ ܐܵܙܵܕ ܡܼܢ ܚܛܝܼܬܵܐ: ܗ̄ܘܸܠܵܘܟܼܘܿܢ ܪܹ̈ܓܵܘܵܬܹܐ ܠܙܲܕܝܼܩܘܼܬܵܐ. 19 ܐܲܝܟ ܕܓܵܘ ܒܢܲܝ̈ܢܵܫܵܐ ܒܹܐܡܵܪܵܐ ܝܘܸܢ: ܣܵܒܵܒ ܕܙܲܒܘܼܢܘܼܬܵܐ ܕܒܸܣܪܵܘܟܼܘܿܢ: ܕܕܵܐܟܼܝܼ ܕܗܘܼܕܸܪܵܘܟܼܘܿܢ ܗܲܕܵܡܵܘ̈ܟܼܘܿܢ ܪܹ̈ܓܵܘܵܬܹܐ ܠܛܲܢܦܘܼܬܵܐ ܘܠܥܵܠܘܠܵܐ ܩܵܐ ܥܵܘܠܵܐ: ܗܲܕܟܼܵܐ ܐܘܼܦ ܐܵܕܝܼܵܐ ܗܵܕܪܘܿܢ ܗܲܕܵܡܵܘ̈ܟܼܘܿܢ ܪܹ̈ܓܵܘܵܬܹܐ ܙܲܕܝܼܩܘܼܬܵܐ ܩܵܐ ܩܲܕܝܼܫܘܼܬܵܐ. 20 ܣܵܒܵܒ ܟܲܕ ܪܹ̈ܓܵܘܵܬܹܐ ܕܚܛܝܼܬܵܐ ܝܬܘܿܢ ܗ̄ܘܵܘ: ܐܵܙܵܕܹ̈ܐ ܝܬܘܿܢ ܗ̄ܘܵܘ ܡܼܢ ܙܲܕܝܼܩܘܼܬܵܐ. 21 ܘܡܘܼܕܝܼ ܛܥܘܼܢܬܵܐ ܐܝܼܬ ܗ̄ܘܵܐ ܠܵܘܟܼܘܿܢ ܗܿܝܓܵܗ ܒܐܲܢܹܐ ܕܐܵܕܝܼܵܐ ܒܸܢܚܵܦܵܐ ܝܬܘܿܢ ܒܵܝܼܝ: ܣܵܒܵܒ ܚܲܪܬܵܝ ܡܵܘܬܵܐ ܝܠܵܐ. 22 ܐܝܼܢܵܐ ܐܲܕܝܼܵܐ ܕܦܸܫܠܵܘܟܼܘܿܢ ܥܒܼܝܪܕܵܐ ܐܵܙܵܕ ܡܼܢ ܚܛܝܼܬܵܐ: ܘܗ̄ܘܹܠܵܘܟܼܘܿܢ ܪܹ̈ܓܵܘܵܬܹܐ ܠܐܲܠܵܗܵܐ: ܐܝܼܬ ܠܵܘܟܼܘܿܢ ܛܥܘܼܢܬܵܐ ܠܩܲܕܝܼܫܘܼܬܵܐ: ܘܚܲܪܬܵܐ ܚܲܝܹ̈ܐ ܕܠܵܐܒܵܕ. 23 ܣܵܒܵܒ ܗܵܩܵܐ ܕܚܛܝܼܬܵܐ ܡܵܘܬܵܐ ܝܠܹܐ: ܐܝܼܢܵܐ ܚܲܠܲܥܬܹܗ ܕܐܲܠܵܗܵܐ ܚܲܝܗܹܐ ܕܠܵܐܒܵܕ ܒܡܵܪܲܢ ܝܼܫܘܿܥ ܡܫܝܼܚܵܐ.

ܩܦܠܐܘܢ: ܙ

1 ܝܲܢ ܠܹܐ ܝܬܘܿܢ ܒܝܼܕܲܥܝܵܐ: ܐܵܚܘܿܢܘܵܬܝܼ̈: ܣܵܒܵܒ ܗܲܡܙܘܼܡܹܐ ܝܘܸܢ ܥܲܡ ܝܲܕܥܵܢܹ̈ܐ ܕܢܵܡܘܿܣܵܐ: ܐܝܼܬ ܠܹܗ ܗܘܼܟܡܵܐ ܥܲܠ ܐܢܵܫܵܐ ܟܡܵܐ ܕܚܵܝܵܐ ܝܠܹܐ: 2 ܣܵܒܵܒ ܒܲܟܼܝܵܐ ܕܐܝܼܬ ܠܵܗܿ ܓܲܒܼܪܵܐ ܐܣܝܼܪܵܐ ܝܠܵܐ ܒܓܲܒܼܪܘܼܗܿ ܒܼܝܸܕ ܢܵܡܘܿܣܵܐ ܟܡܵܐ ܕܚܵܝܵܐ ܝܠܹܐ: ܐܝܼܢܵܐ ܐܸܢ ܡܸܬܠܹܐ ܓܲܒܼܪܘܼܗܿ: ܫܪܝܼܬܵܐ ܝܠܵܐ ܡܼܢ ܢܵܡܘܿܣܵܐ ܕܓܲܒܼܪܘܼܗܿ. 3 ܒܲܣ ܐܸܢ ܟܲܕ ܚܵܝܵܐ ܝܠܹܐ ܓܲܒܼܪܘܼܗܿ: ܗܵܘܝܵܐ ܬܲܒܲܥ ܠܐܢܵܫܵܐ ܐܚܹܪ̄ܢܵܐ: ܒܸܬ ܦܵܝܫܵܐ ܩܪܝܼܬܵܐ ܩܲܗܒܵܐ. ܐܝܼܢܵܐ ܐܸܢ ܡܵܝܸܬ ܓܲܒܼܪܘܼܗܿ: ܗ̄ܘܹܠܵܐ ܐܵܙܵܕ ܡܼܢ ܢܵܡܘܿܣܵܐ: ܗܲܕܟܼܵܐ ܕܠܹܐ ܗܵܘܝܵܐ ܩܲܗܒܵܐ ܐܸܢ ܗܵܘܝܵܐ ܠܐܢܵܫܵܐ ܐܚܹܪ̄ܢܵܐ. 4 ܗܲܕܟܼܵܐ: ܐܵܚܘܿܢܘܵܬܝܼ̈ ܐܘܼܦ ܐܲܚܬܘܿܢ ܦܸܫܠܵܘܟܼܘܿܢ ܡܘܼܡܝܹܬܹܐ ܠܢܵܡܘܿܣܵܐ ܒܼܝܸܕ ܦܲܓܼܪܹܐ ܕܡܫܝܼܚܵܐ: ܕܗܵܘܝܼܬܘܿܢ ܠܚܵܕ̄ ܐܚܹܪ̄ܢܵܐ: ܗܿܘ ܕܩܸܡܠܹܐ ܡܼܢ ܡܝܼܬܹ̈ܐ: ܕܝܵܗ̄ܒܼܵܚ ܛܥܘܼܢܵܝܬܹ̈ܐ ܠܐܲܠܵܗܵܐ. 5 ܣܵܒܵܒ ܟܲܕ ܒܒܸܣܪܵܐ ܝܘܵܚ ܗ̄ܘܵܘ: ܙܵܘܥܹ̈ܐ ܕܚܛܝܼܬܗܹܐ: ܕܝܼܗ̄ܘܵܘ ܒܼܝܸܕ ܢܵܡܘܼܣܵܐ: ܟܹܐ ܚܵܒܿܛܝܼ ܗ̄ܘܵܘ ܒܗܲܕܵܡܲܝ̈ܢ ܠܝܼܵܗ̄ܒܼܵܐ ܛܥܘܼܢܝܵܬܹ̈ܐ ܠܡܵܘܬܵܐ. 6 ܐܝܼܢܵܐ ܐܵܕܝܼܵܐ ܦܸܫܠܲܢ ܫܸܪܝܹܐ ܡܼܢ ܢܵܡܘܿܣܵܐ: ܟܲܕ ܡܸܬܠܲܢ ܠܗܿܢ ܕܕܒܼܝܼܩܲܢ ܝܼܗ̄ܘܵܐ: ܗܲܕܟܼܵܐ ܕܟܹܐ ܥܵܒܼܕܵܚ ܚܸܠܡܲܬ ܒܚܵܕ̄ܬܘܼܬܵܐ ܕܪܘܼܚܵܐ ܘܠܵܐ ܒܥܵܬܝܼܩܘܼܬܵܐ ܕܟܬܵܒܼܵܐ. 7 ܒܲܣ ܡܘܼܕܝܼ ܐܵܡܪܵܚ: ܢܵܡܘܿܣܵܐ ܚܛܝܼܬܵܐ ܝܠܹܐ: ܚܵܣ ܠܲܢ. ܐܸܠܵܐ ܠܚܛܝܼܬܵܐ ܠܵܐ ܝܟܼܥܸܠܝܼ ܫܒܼܘܿܩ ܡܼܢ ܒܼܝܸܕ ܢܵܡܘܿܣܵܐ: ܣܵܒܵܒ ܠܹܐ ܝܲܕܥܸܢ ܗ̄ܘܵܐ ܫܲܗ̄ܘܸܬܸܬ. ܘܚܛܝܼܬܵܐ ܡܘܼܫ̄ܟܼܚܠܵܐ ܗܲܓܲܬ: ܘܒܼܝܸܕ ܦܘܼܩܕܵܢܵܐ ܡܘܼܥܒܸܕܠܵܐ ܒܝܼܝܼ ܟܠ ܫܲܗ̄ܘܲܬܬܵܐ. ܣܵܒܵܒ ܒܠܵܐ ܢܵܡܘܿܣܵܐ ܚܛܝܼܬܵܐ ܡܝܼܬܬܵܐ ܝܠܵܐ. 9 ܐܝܼܢܵܐ ܐܵܢܵܐ ܚܵܝܵܐ ܝܘܸܢ ܗ̄ܘܵܐ ܒܠܵܐ ܢܵܡܘܿܣܵܐ: ܩܵܕ̄ܡܵܝܬܵܐ. ܐܝܼܢܵܐ ܟܲܕ ܐܬܹܠܹܐ ܦܘܼܩܕܵܢܵܐ: ܚܛܝܼܬܵܐ ܚܸܝܠܵܐ: ܘܐܵܢܵܐ ܡܸܬܠܝܼ: 10 ܘܦܘܼܩܕܵܢܵܐ ܕܝܼܗ̄ܘܵܐ ܠܚܲܝܹ̈ܐ: ܐܵܗܵܐ ܡܘܼܫ̄ܟܼܚܠܝܼ ܠܡܵܘܬܵܐ. 11 ܣܵܒܵܒ ܚܛܝܼܬܵܐ: ܒܗܲܓܲܬ ܕܡܘܼܫ̄ܟܼܚܠܵܐ: ܒܼܝܸܕ ܦܘܼܩܕܵܢܵܐ ܩܲܡ ܡܲܚܠܸܛܵܐ ܠܝܼ: ܘܒܼܝܸܗ ܩܲܡ ܩܵܛܠܵܐ ܠܝܼ. 12 ܒܲܣ ܢܵܡܘܿܣܵܐ ܩܲܕܝܼܫܵܐ ܝܠܹܐ: ܘܦܘܼܩܕܵܢܵܐ ܩܲܕܝܼܫܵܐ ܝܠܹܐ: ܘܟܹܐܢܵܐ: ܘܛܵܒܼܵܐ. 13 ܒܲܣ ܛܵܒܼܬܵܐ ܗ̄ܘܹܠܵܐ ܠܡܵܘܬܵܐ ܐܸܠܝܼ: ܚܵܣ ܠܝܼ. ܐܸܠܵܐ ܚܛܝܼܬܵܐ: ܕܦܵܝܫܵܐ ܚܙܝܼܬܵܐ ܕܚܛܝܼܬܵܐ ܝܠܵܐ: ܕܒܛܵܒܼܬܵܐ ܡܘܼܥܒܸܠܵܐ ܒܝܼܝܪ ܡܵܘܬܵܐ: ܕܒܼܝܸܕ ܦܘܼܩܕܵܢܵܐ ܒܘܼܫ ܙܵܘܕܵܐ ܦܵܝܫܵܐ ܗ̄ܘܵܐ ܓܘܼܢܵܗܟܵܪ ܚܛܝܼܬܵܐ. 14 ܣܵܒܵܒ ܒܝܼܕܲܥܝܵܐ ܝܘܵܚ ܕܢܵܡܘܿܣܵܐ ܪܘܼܚܵܢܵܝܵܐ ܝܠܹܐ: ܐܝܼܢܵܐ ܐܵܢܵܐ ܒܸܣܪܵܢܵܝܵܐ ܝܘܸܢ: ܙܘܼܒܢܵܐ ܬܚܘܿܬ ܚܛܝܼܬܵܐ. 15 ܣܵܒܵܒ ܡܸܢܟܼܝܼ ܕܒܸܦܠܵܚܵܐ ܝܘܸܢ ܠܹܐ ܝܘܸܢ ܒܝܼܕܲܥܝܵܐ: ܣܵܒܵܒ ܠܵܐ ܡܸܢܕܝܼ ܕܒܸܒܲܥܝܵܐ ܝܘܸܢ ܒܸܥܒܼܵܕܵܐ ܝܘܸܢ: ܐܸܠܵܐ ܡܸܢܕܝܼ ܕܒܸܣܢܵܝܵܐ ܝܘܸܢ: ܗ̄ܘ ܒܸܥܒܼܵܕܵܐ ܝܘܸܢ. 16 ܘܐܸܢ ܡܸܢܕܝܼ ܕܠܹܐ ܒܲܥܝܸܢ ܒܸܥܒܼܵܕܵܐ ܝܘܸܢ: ܒܝܼܵܗ̄ܒܼܵܐ ܝܘܸܢ ܣܵܗܕܘܼܬܵܐ ܥܲܠ ܢܵܡܘܿܣܵܐ: ܕܫܵܦܝܼܪܵܐ ܝܠܹܐ. 17 ܗܲܕܟܼܵܐ ܐܵܕܝܼܵܐ ܠܹܐ ܝܠܹܐ ܐܵܢܵܐ ܕܒܸܦܠܵܚܵܐ ܝܘܸܢ ܐܵܗܵܐ: ܐܸܠܵܐ ܚܛܝܼܬܵܐ ܕܝܼܠܵܐ ܥܡܝܼܪܬܵܐ ܒܝܼܝܼ. 18 ܣܵܒܵܒ ܒܝܼܕܲܥܝܵܐ ܝܘܸܢ ܕܠܹܐ ܝܠܵܐ ܒܸܥܡܵܪܵܐ ܒܝܼܝܼ: ܝܲܥܢܹܐ: ܒܒܸܣܪܝܼ: ܛܵܒܼܬܵܐ. ܣܵܒܵܪ ܠܸܒܲܥܝܵܐ ܩܘܼܪܒܵܐ ܝܠܵܐ ܠܟܸܠܝܼ: ܐܝܼܢܵܐ ܕܦܵܠܚܸܢܵܗܿ ܛܵܒܼܬܵܐ: ܠܹܐ ܝܘܸܢ ܡܨܵܝܵܐ. 19 ܣܵܒܵܒ ܛܵܒܼܬܵܐ ܕܒܼܒܲܥܝܵܐ ܝܘܸܢ ܠܹܐ ܝܘܸܢ ܒܸܥܒܼܵܕܵܐ: ܐܸܠܵܐ ܒܝܼܫܵܐ ܕܠܹܐ ܝܘܸܢ ܒܸܒܲܥܝܵܐ: ܠܗܿܝ ܒܸܥܒܼܵܕܵܐ ܝܘܸܢ. 20 ܘܐܸܢ ܡܸܢܕܝܼ ܕܠܹܐ ܝܘܸܢ ܒܸܒܲܥܝܵܐ: ܒܸܥܒܼܵܕܵܐ ܝܘܸܢ: ܠܹܐ ܝܠܵܐ ܐܚܹܪ̄ܢܵܐ ܐܵܢܵܐ ܕܒܸܥܒܼܵܕܵܐ ܝܘܸܢ: ܐܸܠܵܐ ܚܛܝܼܬܵܐ ܕܝܼܠܵܐ ܥܡܝܼܪܬܵܐ ܒܝܼܝܼ. 21 ܒܲܣ ܡܵܫ̄ܟܼܘܿܚܹܐ ܝܘܸܢ ܠܢܵܡܘܿܣܵܐ ܕܟܲܕ ܐܵܢܵܐ ܒܲܥܝܸܢ ܕܥܵܒܼܟܸܢ ܛܵܒܼܬܵܐ: ܒܝܼܫܵܐ ܩܘܼܪܒܵܐ ܝܠܵܐ ܠܟܸܣܠܝܼ. 22 ܣܵܒܵܒ ܒܸܚܕܵܝܵܐ ܝܘܸܢ ܒܢܵܡܘܿܣܹܗ ܕܐܲܠܵܗܵܐ: ܒܒܲܪܢܵܫܵܐ ܕܠܓܵܘܵܝܝܼ: 23 ܐܝܼܢܵܐ ܒܸܚܙܵܝܵܐ ܝܘܸܢ ܢܵܡܘܿܣܵܐ ܐܚܹܪ̄ܢܵܐ ܒܗܲܕܵܡܝܼ̈ ܕܒܸܦܠܵܫܵܐ ܝܠܹܐ ܠܕܲܪܩܘܼܒܼܠ ܕܢܵܡܘܿܣܵܐ ܕܚܵܝܼܠܝܼ: ܘܒܸܣܠܵܒܝܼ ܝܠܹܐ ܠܢܵܡܘܿܣܵܐ ܕܚܛܝܼܬܵܐ ܕܐܝܼܬ ܒܗܲܕܵܡܝܼ̈. 24 ܐܵܗ: ܒܲܪܢܵܫܵܐ ܫܲܩܝܼ ܝܘܸܢ ܡܵܢܝܼ ܒܸܬ ܦܵܨܹܐ ܠܝܼ ܡܼܢ ܦܲܓܼܪܵܐ ܕܐܵܗܵܐ ܡܵܘܬܵܐ: 25 ܫܵܟܘܿܪܹܐ ܝܘܸܢ ܠܐܲܠܵܗܵܐ ܒܪܝܸܕ ܡܵܪܲܢ ܝܼܫܘܿܥ ܡܫܝܼܚܵܐ. ܒܲܣ ܐܵܕܝܼܵܐ ܐܵܢܵܐ ܒܓܵܢܝܼ ܒܚܵܝܼܠܝܼ ܒܸܦܠܵܚܵܐ ܝܘܸܢ ܠܢܵܡܘܿܣܵܐ ܕܐܲܠܵܗܵܐ: ܐܝܼܢܵܐ ܒܒܸܣܪܝܼ ܠܢܵܡܘܿܣܵܐ ܕܚܛܝܼܬܵܐ.

ܩܦܠܐܘܢ: ܚ

1 ܒܲܣ ܡܐܵܕܝܼܵܐ ܠܲܝܬ ܓܘܼܢܵܗܟܵܪܘܼܬܵܐ ܠܐܵܢܝܼ ܕܝܼܢܵܐ 2 ܒܝܼܫܘܿܥ ܡܫܝܼܚܵܐ ܣܵܒܵܒ ܢܵܡܘܿܣܵܐ ܕܪܘܼܚܵܐ ܕܚܲܝܹ̈ܐ ܕܒܝܼܫܘܿܥ ܡܫܝܼܚܵܐ ܥܒܼܝܼܕܸܢܹܐ ܐܵܙܵܕ ܡܼܢ ܢܵܡܘܿܣܵܐ ܕܚܛܝܼܬܵܐ ܘܕܡܵܘܬܵܐ. 3 ܒܠܵܐ ܡܨܵܝܬܵܐ ܕܢܵܡܘܿܣܵܐ: ܒܗܿܝ ܕܙܲܒܘܼܢ ܝܼܗ̄ܘܵܐ ܒܼܝܸܕ ܒܸܣܪܵܐ: ܫܘܼܕܸܪܹܐ ܐܲܠܵܗܵܐ ܠܒܪܘܼܢܵܐ ܕܓܵܢܹܗ ܒܕܡܘܼܬܵܐ ܕܒܸܣܪܵܐ ܕܚܛܝܼܬܵܐ: ܘܣܵܒܵܒ ܕܚܛܝܼܬܵܐ: ܥܒܼܕܠܹܐ ܓܘܼܢܵܗܟܵܪ ܠܚܛܝܼܬܵܐ. ܒܒܸܣܪܵܐ: 4 ܕܦܵܩܲܕܬܵܐ ܕܢܵܡܘܿܣܵܐ ܒܥܸܢ ܦܵܝܫܵܐ ܗ̄ܘܵܐ ܬܘܼܡܸܡܬܵܐ: ܕܠܵܐ ܝܘܵܚ ܒܸܚܕܵܪܵܐ ܒܒܸܣܪܵܐ: ܐܸܠܵܐ ܒܪܘܼܚܵܐ. 5 ܣܵܒܵܒ ܐܵܢܝܼ ܕܒܒܸܣܪܵܐ ܝܢܵܐ: ܡܢܕܝܼ ܕܒܼܣܪܵܐ ܟܹܐ ܚܵܫܒܼܝܼ: . ܐܵܢܝܼ ܕܒܪܘܼܚܵܐ ܝܢܵܐ: ܡܸܢܕܝܼ ܕܪܘܼܚܵܐ. 6 ܣܵܒܵܒ ܚܵܝܼܠ ܕܒܼܣܪܵܐ ܡܵܘܬܵܐ ܝܠܹܐ: ܘܚܵܝܼܠ ܕܪܘܼܚܵܐ ܚܲܝܹ̈ܐ ܘܫܠܵܡܵܐ. 7 ܣܵܒܵܒ ܚܵܝܼܠ ܕܒܸܣܪܵܐ ܕܫܸܫܡܸܢܵܝܘܼܬܵܐ ܝܠܹܐ ܥܲܠ ܐܲܠܵܗܵܐ: ܣܵܒܵܒ ܠܹܐ ܝܠܹܐ ܙܲܒܛ ܠܢܵܡܘܿܣܵܐ ܕܐܲܠܵܗܵܐ: ܣܵܒܵܒ ܠܹܐ ܡܵܨܹܐ. 8 ܘܐܵܢܝܼ ܕܒܸܣܪܵܐ ܝܢܵܐ: ܠܹܐ ܡܵܨܝܼ ܠܸܫܦܵܪܵܐ ܠܐܲܠܵܗܵܐ. 9 ܐܝܼܢܵܐ ܐܲܚܬܘܿܢ ܠܹܐ ܝܬܘܿܢ ܒܒܸܣܪܵܐ: ܐܸܠܵܐ ܒܪܘܼܚܵܐ: ܐܸܢ ܐܢܵܫܵܐ ܠܲܝܬ ܒܼܝܹܗ ܪܘܼܚܹܗ ܕܡܫܝܼܚܵܐ: ܐܵܗܵܐ ܠܹܐ ܝܠܹܐ ܕܝܹܗ. 10 ܘܐܸܢ ܡܫܝܼܚܵܐ ܒܝܼܵܘܟܼܘܿܢ ܝܼܠܹܐ: ܦܲܓܼܪܵܐ ܡܝܼܬܵܐ ܝܠܹܐ ܣܵܒܵܒ ܕܚܛܝܼܬܵܐ: ܐܝܼܢܵܐ ܪܘܼܚܵܐ ܚܵܝܬܵܐ ܝܠܵܐ ܣܵܒܵܒ ܕܙܲܕܝܼܩܘܼܬܵܐ. 11 ܘܐܸܢ ܪܘܪܚܹܗ ܕܗܿܘ ܕܡܘܼܩܸܡܠܹܐ ܠܡܫܝܼܚܵܐ ܡܼܢ ܡܝܼܬܹ̈ܐ: ܐܘܼܦ ܠܦܲܓܼܪ̈ܘܿܟܼܘܿܢ ܡܝܼܬܹ̈ܐ ܒܸܬ ܡܲܚܹܐ: ܣܵܒܵܒ ܕܪܘܼܚܹܗ ܕܒܸܥܡܵܪܵܐ ܝܠܵܐ ܒܝܼܵܘܟܼܘܿܢ. 12 ܒܲܣ: ܐܵܚܘܿܢܘܵܬܝܼ̈: ܕܝܢܵܢܹ̈ܐ ܝܘܵܚ: ܠܵܐ ܠܒܸܣܪܵܐ ܕܒܒܸܣܪܵܐ ܚܲܝܵܚ: 13 ܣܵܒܵܒ ܐܸܢ ܒܒܸܣܪܵܐ ܒܸܚܵܝܵܐ ܝܬܘܿܢ: ܗܕܝܼܪܹܐ ܝܬܘܿܢ ܠܸܡܝܵܬܵܐ: ܐܝܼܢܵܐ ܐܸܢ ܒܪܘܼܚܵܐ ܦܘܼܠܚܵܢܹ̈ܐ ܕܦܲܓܼܪܵܐ ܡܲܡܝܘܼܬܹܐ ܝܬܘܿܢ: ܒܸܬ ܚܝܼܬܘܿܢ. 14 ܣܵܒܵܒ ܟܠܵܝ ܕܒܪܘܼܚܵܐ ܕܐܲܠܵܗܵܐ ܦܵܝܫܝܼ ܬܘܼܓܒܸܪܹܐ: ܐܲܢܹܐ ܒܢܘܼܢܹ̈ܐ ܕܐܲܠܵܗܵܐ ܝܢܵܐ. 15 ܣܵܒܵܒ ܠܵܐ ܩܘܼܒܸܠܵܘܟܼܘܿܢ ܪܘܼܚܵܐ ܕܩܘܼܠܘܼܬܵܐ ܡܸܕܪܹܐ ܠܙܕܘܼܥܬܵܐ: ܐܸܠܵܐ ܩܘܼܒܸܠܵܘܟܼܘܿܢ ܪܘܼܚܵܐ ܕܥܒܼܵܕܬܵܐ ܕܒܢܘܼܢܹ̈ܐ: ܕܒܝܼܵܗܿ ܒܸܩܪܵܝܵܐ ܝܘܵܚ: ܐܲܒܵܐ: ܒܵܒܲܢ. 16 ܘܗܿܘ ܪܘܼܚܵܐ ܒܝܪܵܗ̄ܒܼܵܐ ܝܠܹܐ ܣܵܗܕܘܼܬܵܐ ܠܪܘܼܚܲܢ: ܕܒܢܘܼܢܗܹܐ ܕܐܲܠܵܗܵܐ ܝܘܵܚ: 17 ܘܐܸܢ ܒܢܘܼܢܹ̈ܐ: ܐܘܼܦ ܝܵܪܬܘܿܬܹܐ: ܝܵܪܘܿܬܹܐ ܕܐܲܠܵܗܵܐ: ܘܚܲܒܼܪܵܘܵܬܹܐ ܒܝܵܪܬܘܼܬܵܐ ܥܲܡ ܡܫܝܼܚܵܐ: ܐܸܢ ܗܲܪ ܩܵܒܿܠܵܚ ܚܲܫܵܐ ܥܲܡܹܗ ܕܐܘܼܦ ܥܲܡܹܗ ܦܵܝܫܵܚ ܚܩܝܼܪܹܐ. 18 ܣܵܒܵܒ ܒܸܚܫܵܒܼܵܐ ܝܘܸܢ ܕܠܹܐ ܛܵܒܼܝܼ ܚܲܫܹ̈ܐ ܕܐܵܗܵܐ ܙܲܒܼܢܵܐ ܥܲܡ ܬܸܫܒܘܿܚܬܵܐ ܕܒܸܬ ܦܵܝܫܵܐ ܓܠܝܼܬܵܐ ܒܥܸܢ. 19 ܣܵܒܵܒ ܕܣܦܵܪܬܵܐ ܩܘܼܝܼܬܵܐ ܕܒܪܝܪܬܵܐ ܒܸܣܦܵܪܵܐ ܝܠܵܐ ܠܓܸܠܝܵܢܵܐ ܕܒܢܘܼܢܹ̈ܐ ܕܐܲܠܵܗܵܐ. 20 ܣܵܒܵܒ ܒܪܝܼܬܵܐ ܦܸܫܠܵܐ ܙܲܒܛ ܠܣܪܝܼܩܘܼܬܵܐ: ܠܵܐ ܒܪܸܙܵܝܘܼܗܿ: ܐܸܠܵܐ ܣܵܒܵܒ ܕܗܿܘ ܕܙܘܼܒܛܸܢܵܠܹܐ: 21 ܒܗܸܒܼܝܼ ܕܐܘܼܦ ܒܪܝܼܬܵܐ ܒܓܵܢܘܼܗܿ ܦܵܝܫܵܐ ܥܒܼܝܼܕܬܵܐ ܐܵܙܵܕ ܡܼܢ ܩܘܼܠܘܼܬܵܐ ܕܚܵܪܒܼܵܐ ܠܐܵܙܵܕܘܼܬܵܐ ܕܬܸܫܒܘܿܚܬܵܐ ܕܒܢܘܼܢܹ̈ܐ ܕܐܲܠܵܗܵܐ. 22 ܣܵܒܵܒ ܒܝܼܕܲܥܝܵܐ ܝܘܵܚ ܕܟܠܵܗܿ ܒܪܝܼܬܵܐ ܬܵܢܚܵܐ ܘܟܸܐ ܕܵܒܼܩܵܐ ܚܸܒܼܵܠܸܐ ܗܲܠ ܐܵܕܝܼܵܐ. 23 ܘܠܵܐ ܗܲܪ ܐܵܢܝܼ: ܐܹܠܵܐ ܐܘܼܦ ܐܲܚܢܲܢ ܕܐܝܼܬ ܒܥܸܢ ܢܘܼܒܲܪܠܸܔܼ ܕܪܘܼܚܵܐ: ܐܘܼܦ ܐܲܚܢܲܢ ܬܵܢܘܿܚܸܐ ܝܘܵܚ ܒܔܵܢܲܢ: ܘܒܸܣܦܵܪܵܐ ܝܘܵܚ ܠܥܒܼܵܪܬܵܐ ܕܒܢܘܼܢܸ̈ܐ: ܠܦܘܼܪܩܵܢܵܐ ܕܦܲܔܼܪܼܵܢ. 24 ܣܵܒܵܒ ܒܗܸܒܼܝܼ ܦܸܫܠܲܢ ܦܘܼܪܩܹܐ. ܐܝܼܢܵܐ ܗܸܒܼܝܼ ܕܦܵܝܫܵܐ ܚܙܝܼܬܵܐ ܠܸܐ ܝܠܵܐ ܗܸܒܼܝܼ: ܣܵܒܵܒ ܡܸܢܕܝܼ ܕܐܢܵܫܵܐ ܚܵܙܸܐ: ܩܵܡܘܕܝܼ ܣܵܦܸܪ ܐܸܠܸܗ: 25 ܐܝܼܢܵܐ ܐܸܢ ܠܡܸܢܕܝܼ ܕܠܸܐ ܒܸܚܙܵܝܵܐ ܒܗܸܒܼܝܼ ܝܘܵܚ: ܒܚܡܵܠܬܵܐ ܟܸܐ ܣܵܦܪܚ ܐܸܠܸܗ. 26 ܗܲܕܟܼܵܐ ܐܘܼܦ ܪܘܼܚܵܐ ܟܹܐ ܗܲܝܸܪ ܠܙܲܒܘܼܢܘܼܬܲܢ: ܣܵܒܵܒ ܡܘܼܕܝܼ ܨܵܠܵܚ: ܕܵܐܟܼܝܼ ܕܝܼܠܵܐ ܘܵܓܼܒ: ܠܹܐ ܝܘܵܚ ܒܝܼܕܲܥܝܵܐ: ܐܸܠܵܐ ܪܘܼܚܵܐ ܒܓܵܢܹܗ ܟܹܐ ܦܲܪܦܸܠ ܡܒܵܕܵܠܲܢ ܒܬܵܢܲܚܝܵܬܹ̈ܐ ܕܠܹܐ ܐܵܬܝܼ ܠܗܲܡܙܘܼܡܹܐ. 27 ܘܗܿܘ ܕܟܹܐ ܨܚܸܨܐ ܠܸܒܵܘܵܬܵܐ: ܗܿܘ ܟܹܐ ܝܲܕܸܥ ܡܘܼܕܝܼ ܝܠܹܐ ܚܝܼܵܠ ܕܪܘܼܚܵܐ: ܕܐܲܝܟ ܪܸܙܵܝܹܗ ܕܐܲܠܵܗܵܐ ܟܹܐ ܦܲܪܦܸܠ ܡܒܵܕܵܠ ܕܩܲܕܝܼܫܹ̈ܐ. 28 ܐܝܼܢܵܐ ܒܝܼܕܲܥܝܵܐ ܝܘܵܚ: ܕܠܵܐܢܝܼ ܕܡܲܚܸܒܝܼ ܠܐܲܠܵܗܵܐ: ܟܠܵܝ ܡܸܢܕܝܼܵܢܹ̈ܐ ܟܹܐ ܦܵܠܚܝܼ ܥܲܡܵܝ ܠܛܵܒܼܬܵܐ: ܠܐܵܢܝܼ ܕܩܵܕ̄ܡܵܝܬܵܐ ܡܘܼܬܸܒܼܠܹܐ ܕܗܵܘܝܼ ܩܸܪ̈ܝܹܐ. 29 ܣܵܒܵܒ ܐܵܢܝܼ ܕܡܼܢ ܩܵܕ̄ܡܵܝܬܵܐ ܝܕܸܥܵܚܠܹܐ: ܪܫܝܼܡܵܝܠܹܐ ܒܕܡܘܼܬܵܐ ܕܨܘܼܪܬܵܐ ܕܒܪܘܼܢܸܗ: ܕܗܿܘ ܗܵܘܹܐ ܒܘܼܟܼܪܵܐ ܓܵܘ ܪܵܒܵܐ ܐܵܚܘܿܢܘܵܬܹ̈ܐ. 30 ܐܝܼܢܵܐ ܠܐܵܢܝܼ ܕܩܵܕ̄ܡܵܝܬܵܐ ܪܫܝܼܡܵܝܠܹܐ: ܩܪܹܠܹܐ: ܘܠܵܐܢܝܼ ܕܩܪܹܠܹܐ: ܡܘܼܟܫܸܛܵܝܠܹܐ: ܘܠܵܐܢܝܼ ܕܡܘܼܟܫܸܛܠܹܐ ܚܩܝܼܪܵܝܠܹܐ. 31 ܒܲܣ ܡܘܼܕܝܼ ܐܵܡܪܵܚ ܥܲܠ ܕܐܲܢܹܐ ܡܸܢܕܝܼܵܢܹ̈ܐ: ܐܸܢ ܐܲܠܵܗܵܐ ܠܵܓܸܒܢ ܝܼܠܹܐ: ܡܵܢܝܼ ܝܠܹܐ ܠܕܲܪܩܘܼܒܼܠܲܢ: 32 ܗܿܘ ܕܠܒܪܘܼܢܵܐ ܕܓܵܢܹܗ ܠܵܐ ܚܣܸܟܼܠܹܐ: ܐܸܠܵܐ ܡܼܢ ܓܹܒܵܐ ܕܟܠܲܢ ܣܘܼܦܹܠܹܗ: ܕܵܐܟܼܝܼ ܥܲܡܹܗ ܠܹܐ ܝܵܗ̄ܒܸܠ ܠܲܢ ܟܠ ܡܸܢܕܝܼ: 33 ܡܵܢܝܼ ܒܸܬ ܕܵܒܸܩ ܓܢܵܗܵܐ ܥܲܠ ܓܘܼܒܿܝܹ̈ܐ ܕܐܲܠܵܗܵܐ: ܐܲܠܵܗܵܐ ܟܹܐ ܡܲܟܫܸܛ. 34 ܡܵܢܝܼ ܒܸܥܒܼܵܕܵܐ ܓܘܼܢܵܗܟܵܪ: ܡܫܝܼܚܵܐ ܡܸܬܠܹܐ: ܘܒܘܼܫ ܙܵܘܕܵܐ ܩܝܼܡܵܐ ܝܠܹܐ ܘܥܲܠ ܝܲܡܝܼܢܵܐ ܕܐܲܠܵܗܵܐ ܝܠܹܐ: ܘܦܲܪܦܘܼܠܹܐ ܝܠܹܐ ܡܒܵܕܵܠܲܢ. 35 ܡܵܢܝܼ ܒܸܬ ܦܵܪܸܫ ܠܲܢ ܡܼܢ ܚܘܼܒܹܗ ܕܡܫܝܼܚܵܐ: ܐܘܼܠܨܵܢܵܐ: ܝܲܢ ܚܒܼܘܼܫܝܵܐ: ܝܲܢ ܛܪܵܕܬܵܐ: ܝܲܢ ܟܸܦܢܵܐ: ܝܲܢ ܫܘܼܠܚܵܝܘܼܬܵܐ: ܝܲܢ ܩܸܘܲܢܕܝܼܢܘܿܣ: ܝܲܢ ܣܲܝܦܵܐ: 36 ܐܲܝܟ ܕܝܼܠܹܐ ܟܬܝܼܒܼܵܐ: ܒܚܵܬܸܪ ܕܝܼܘܼܟ ܟܠ ܝܘܿܡ ܦܵܝܫܵܐ ܝܘܵܚ. ܩܛܝܼܠܹܐ: ܘܦܸܫܠܲܢ ܚܘܼܫܒܸܢܹܐ ܐܲܝܟ ܦܸܪܹ̈ܐ ܠܦܪܵܡܬܵܐ. 37 ܐܸܠܵܐ ܒܐܲܢܸܐ ܟܠܵܝ ܙܵܘܕܵܐ ܡܼܢ ܠܵܠܒܵܢܹ̈ܐ ܝܘܵܚ: ܒܼܝܸܕ ܕܗܿܘ ܘܡܘܼܚܸܒܵܠܹܐ. 28 ܣܵܒܵܒ ܗܲܡܘܼܢܹܐ ܝܘܸܢ: ܕܠܵܐ ܡܵܘܬܵܐ: ܘܠܵܐ ܚܲܝܹ̈ܐ ܘܠܵܐ ܡܲܠܲܐܟܹ̈ܐ ܘܠܵܐ ܗ ܘܼܟܡܹ̈ܐ: ܘܠܵܐ ܚܲܝ̈ܠܹܐ: ܘܠܵܐ ܡܸܢܕܝܼܵܢܹ̈ܐ ܕܝܼܢܵܐ: ܘܠܵܐ ܕܒܸܬ ܗܵܘܝܼ: 39 ܘܠܵܐ ܪܵܘܡܵܐ: ܘܠܵܐ ܥܘܼܡܩܵܐ: ܘܐܘܼܦ ܠܵܐ ܒܪܝܼܬܵܐ ܐܚܹܪ̄ܬܵܐ: ܡܵܨܝܵܐ ܕܦܵܪܫܵܐ ܠܲܢ ܡܼܢ ܚܘܼܒܹܗ ܕܐܲܠܵܗܵܐ ܕܒܡܵܪܲܢ ܝܼܫܘܿܥ ܡܫܝܼܚܵܐ.

ܩܦܠܐܘܢ: ܛ

1 ܣܲܪܲܣܬܘܼܬܵܐ ܒܹܐܡܪܵܐ ܝܘܸܢ ܒܡܫܝܼܚܵܐ: ܘܠܹܐ ܝܘܸܢ ܕܵܓܘܼܠܹܐ: ܘܐܸܢܝܲܬܝ ܒܝܼܵܗ̄ܒܼܵܐ ܝܠܵܐ ܣܵܗܕܘܼܬܵܐ ܥܲܠܝܼ ܒܪܘܼܚܵܐ ܕܩܘܼܕܫܵܐ: 2 ܕܦܵܫܲܡܬܵܐ ܓܘܼܪܬܵܐ ܐܝܼܬ ܠܝܼ: ܘܕܲܪܕ ܡܼܢ ܠܸܒܝܼ ܠܹܐ ܝܠܹܐ ܒܸܫܠܵܝܵܐ. 3 ܣܵܒܵܒ ܐܵܢܵܐ ܒܲܥܝܸܢ ܗ̄ܘܵܐ ܕܓܵܢܝܼ ܗܵܘܸܢ ܗ̄ܘܵܐ ܡܘܼܚܪܸܡܵܐ ܡܼܢ ܡܫܝܼܚܵܐ: ܡܼܢ ܓܸܒܵܐ ܕܐܵܚܘܿܢܘܵܬܝܼ̈ ܘܚܸܙܡܝܼ̈ ܒܒܸܣܪܵܐ: 4 ܕܝܼܢܵܐ ܒܢܲܝ̈ ܝܼܣܪܵܝܹܠ: ܕܕܝܼܵܝ ܝܠܵܐ ܥܒܼܵܕܬܵܐ ܕܒܢܘܼܢܹ̈ܐ: ܘܬܸܫܒܘܿܚܬܵܐ: ܘܕܝܵܬܹܩܹ̈ܐ: ܘܝܵܗ̄ܒܲܠܬܵܐ ܕܢܵܡܘܿܣܵܐ: ܘܚܸܠܡܲܬ: ܘܩܵܘܠܹ̈ܐ: 5 ܘܕܝܼܵܝ ܐܲܒܼܵܗܵܬܵܐ: ܘܡܸܢܵܝ ܡܫܝܼܚܵܐ ܒܒܸܣܪܵܐ: ܕܝܼܠܹܐ ܐܲܠܵܗܵܐ ܥܲܠ ܟܠ: ܕܐܸܠܹܗ ܒܘܼܪ̈ܟܵܬܹܐ ܠܥܵܠܲܡ ܥܵܠܡܝܼܢ: ܐܵܡܝܼܢ. 6 ܐܝܼܢܵܐ ܠܹܐ ܝܠܵܐ ܐܲܝܟ ܕܒܛܸܠܵܐ ܗܹܡܸܙܡܵܢܹܗ ܕܐܲܠܵܗܵܐ. ܣܵܒܵܒ ܠܵܐ ܟܠܵܝ ܕܡ̣ܢ ܝܼܣܪܵܝܹܠ. ܝܼܣܪܵܝܹܠ ܝܼܢܵܐ: 7 ܕܙܲܪܥܹܗ ܕܐܲܒܼܪܵܗܵܡ ܝܼܢܵܐ: ܟܠܵܝ ܒܢܘܼܢܹ̈ܐ ܝܢܵܐ: ܐܸܠܵܐ ܒܐܝܼܣܚܵܩ ܒܸܬ ܦܵܝܸܫ ܩܸܪܝܵܐ ܐܸܠܘܼܟ ܙܲܪܥܵܐ. 8 ܝܲܥܢܹܐ: ܠܹܐ ܝܠܵܐ ܕܒܢܘܼܢܹ̈ܐ ܕܒܸܣܪܵܐ: ܐܲܢܹܐ ܝܢܵܐ ܒܢܘܼܢܹ̈ܐ ܕܐܲܠܵܗܵܐ: ܐܝܼܢܵܐ ܒܢܘܼܢܹ̈ܐ ܕܩܵܘܠܵܐ ܦܝܵܫܵܐ ܝܢܵܐ ܚܘܼܫܒܸܢܹܐ ܠܙܲܪܥܵܐ. 9 ܣܵܒܵܒ ܝܠܵܐ ܐܵܗܵܐ ܗܹܡܸܙܡܵܢ: ܒܐܵܗܵܐ ܙܲܒܼܢܵܐ ܒܸܬ ܐܵܬܸܢ: ܘܒܸܬ ܗܸܘܹܐ ܒܪܘܼܢܵܐ ܠܣܲܪܵܐ. 10 ܘܠܵܐ ܗܲܪ ܐܵܗܵܐ: ܐܸܠܵܐ ܐܘܼܦ ܪܲܦܩܵܐ: ܟܲܕ ܐܝܼܬ ܗ̄ܘܵܐ ܠܵܗܿ ܫܵܪܝܼܟܘܼܬܵܐ ܥܲܡ ܚܵܕ̄: ܒܵܒܲܢ ܐܝܼܣܚܵܩ: 11 ܣܵܒܵܒ ܟܲܕ ܗܸܫ ܠܹܐ ܗ̄ܘܵܘ ܗ̄ܘܝܹܐ ܒܢܘܼܢܘܼ̈ܗܿ: ܘܠܵܐ ܦܠܝܼܚܹܐ ܛܵܒܼܬܵܐ ܝܼܢ ܒܝܼܫܬܵܐ: ܕܪܸܙܵܝܵܐ ܕܐܲܠܵܗܵܐ ܐܲܝܟ ܒܓܵܒܵܝܬܵܐ ܥܲܪܩܸܠ: ܠܵܐ ܒܦܘܼܠܚܵܢܹ̈ܐ: ܐܸܠܵܐ ܒܼܝܸܕ ܕܗܿܘ ܕܩܪܸܠܹܐ: 12 ܦܸܫܠܹܐ ܐܡܝܼܪܵܐ ܐܸܠܵܗܿ: ܕܓܘܼܪܵܐ ܒܸܬ ܗܵܘܹܐ ܪܸܓܵܐ ܠܙܥܘܿܪܵܐ. 13 ܐܲܝܟ ܕܝܼܠܹܐ ܟܬܝܼܒܼܵܐ: ܠܝܲܥܩܘܿܒܼ ܡܘܼܚܼܒܠܝܼ: ܐܝܼܢܵܐ ܠܥܹܣܘ ܣܢܹܠܝܼ. 14 ܒܲܣ ܡܘܼܕܝܼ ܐܵܡܪܵܚ: ܢܵܐܗܲܩܘܼܬܵܐ ܐܝܼܬ ܠܟܸܣ ܐܲܠܵܗܵܐ: ܚܵܣ ܠܲܝܼ. 15 ܣܵܒܵܒ ܕܠܡܘܼܫܹܐ ܐܡܸܪܹܐ: ܒܸܬ ܥܵܒܼܕܸܢ ܪܲܚܡܹܐ ܥܲܠ ܕܗܿܘ ܕܥܵܒܼܕܝܸܢ ܪܲܚܡܹܐ: ܘܒܸܬ ܥܵܒܪܕܸܢ ܟܵܪܲܡ ܠܗܿܘ ܕܥܵܒܼܕܢ ܟܵܪܲܡ. 16 ܒܲܣ ܠܹܐ ܝܠܵܐ ܒܗܿܘ ܕܒܲܥܝܹܐ: ܘܠܵܐ ܒܗܿܘ ܕܪܚܸܛ : ܐܸܠܵܐ ܒܐܲܠܵܗܵܐ ܕܟܹܐ ܥܵܒܸܕ ܪܲܚܡܹܐ. 17 ܣܵܒܵܒ ܕܐܡܸܪܹܐ ܟܬܒܼܵܐ ܠܦܸܪܥܘܿܢ: ܗܲܪ ܠܐܵܗܵܐ ܩܲܡ ܡܲܩܸܡܸܢܘܼܟ: ܕܡܲܚܙܸܢ ܒܝܼܘܼܟ ܚܲܝܠܝܼ: ܘܕܦܵܝܸܫ ܡܘܼ ܟܪܸܙܵܐ ܫܡܝܼ ܒܟܠܵܗܿ ܐܲܪܥܵܐ. 18 ܒܲܣ ܥܲܠ ܡܿܢ ܕܒܵܣܡܵܐ ܠܹܗ ܗܿܘ: ܟܹܐ ܥܵܒܸܕ ܪܲܚܡܹܐ: ܘܠܗܿܘ ܕܒܵܣܡܵܐ ܠܹܗ ܟܹܐ ܡܲܩܫܹܐ. 19 ܒܲܣ ܒܸܬ ܐܵܡܪܸܬ ܐܸܠܝܼ: ܩܵܡܘܿܕܝܼ ܐܚܸܪ̄ܢܵܐ ܒܕܒܼܵܩܵܐ ܝܠܹܐ ܓܢܵܗܵܐ: ܣܵܒܵܒ ܡܵܢܝܼ ܟܸܠܝܵܐ ܝܠܹܐ ܕܲܪܩܘܼܒܼܠ ܕܪܸܙܵܝܹܗ: 20 ܒܲܣ ܐܲܢ̄ܬ ܡܵܢܝܼ ܝܘܸܬ: ܝܵܐ ܒܲܪܢܵܫܵܐ: ܕܓܼܘܼܘܵܒ ܠܐܲܠܵܗܵܐ ܒܝܼܵܗ̄ܒܼܵܐ ܝܘܸܬ: ܟܹܐ ܐܵܡܪܵܐ ܓܒܼܝܼܠܬܵܐ ܠܗܿܘ ܕܓܒܼܝܼܠܵܠܹܐ: ܩܵܡܘܿܕܝܼ ܗܲܕܟܼܵܐ ܓܒܼܝܼܠܲܢܘܼܟ: 21 ܝܲܢ ܠܲܝܬ ܠܹܗ ܗܘܼܟܡܵܐ ܦܲܚܪܵܐ ܥܲܠ ܛܝܼܢܹܗ: ܕܗܲܪ ܡܼܢ ܕܗܿܝ ܓܒܼܝܼܠܬܵܐ ܬܵܪܸܨ ܚܵܪ̄ ܡܵܐܢܵܐ ܠܐܝܼܩܵܪܵܐ: ܘܚܵܕ̄ ܠܒܹܨܘܿܪܘܼܬܵܐ: 22 ܡܘܼܕܝܼ ܐܸܢ ܐܲܠܵܗܵܐ: ܟܲܕ ܒܣܸܡܠܵܐ ܠܹܗ ܕܡܲܚܙܹܐ ܟܲܪܒܹܗ ܘܡܲܕܸܥ ܚܲܝܠܹܗ: ܩܘܼܒܸܠܹܐ ܒܒܘܼܫܵܝܝܼ ܕܡܲܪܝܼܟܼܬܵܐ ܕܒܹܢܹܗ ܡܵܐܢܹ̈ܐ ܕܟܲܪܒܵܐ ܕܝܼܢܵܐ ܡܘܼܠܚܸܡܹܐ ܠܬܠܵܩܵܐ: 23 ܘܕܡܲܕܸܥ ܕܵܘܸܠܬܵܐ ܕܚܸܩܪܹܗ ܥܲܠ ܡܵܐܢܹ̈ܐ ܕܪܲܚܡܹܐ: ܕܩܵܕ̄ܡܵܝܬܵܐ ܗܘܼܕܸܪܹܐ ܠܚܸܩܪܵܐ: 24 ܕܝܼܘܵܚ ܐܲܚܢܲܢ: ܕܩܪܹܠܹܐ: ܠܵܐ ܗܲܪ ܡܼܢ ܝܗ̄ܘܼܕܵܝܹ̈ܐ: ܐܸܠܵܐ ܐܘܼܦ ܡܼܢ ܛܵܝܸܦܹ̈ܐ: 25 ܕܵܐܟܼܝܼ ܕܐܘܼܦ ܒܗܘܼܫܲܥ ܐܡܸܪܹܐ: ܒܸܬ ܩܵܪܹܢ ܠܐܵܢܝܼ ܕܠܹܐ ܗ̄ܘܵܘ ܛܵܝܸܦܝܼ: ܛܵܝܸܦܵܐ ܕܝܼܝܼ: ܘܠܠܵܐ ܡܘܼܚܸܒܬܵܐ: ܡܘܼܚܸܒܬܵܐ. 26 ܘܒܸܬ ܗܵܘܝܵܐ: ܒܕܘܼܟܬܵܐ ܐܲܝܟܵܐ ܕܦܸܫܠܹܐ ܐܡܝܼܪܵܐ ܐܸܠܵܝ: ܠܹܐ ܝܬܘܿܢ ܛܵܝܸܦܝܼ: ܬܵܡܵܐ ܒܸܬ ܦܵܝܸܫܝܼ ܩܸܪܝܹܐ ܒܢܘܼܢܹ̈ܐ ܕܐܲܠܵܗܵܐ ܚܵܝܵܐ. 27 ܐܝܼܢܵܐ ܐܸܫܲܥܝܵܐ ܡܲܩܘܘܼܚܹܐ ܝܠܹܐ ܒܵܗ̄ܣ ܕܒܢܲܝ̈ ܝܼܣܪܵܝܹܠ: ܐܸܢ ܗܵܘܹܐ ܡܸܢܝܵܢܵܐ ܕܒܢܲܝ̈ ܝܼܣܪܵܝܹܠ ܐܲܝܟ ܣܹܠܵܐ ܕܝܼܵܡܵܐ: ܣܵܡܵܐ ܦܝܼܫܵܐ ܡܸܢܵܝ ܒܸܬ ܚܲܝܹܐ. 28 ܣܵܒܵܒ ܒܸܩܛܲܥܝܵܐ ܘܒܸܦܣܵܩܵܐ ܒܸܬ ܥܵܒܸܕ ܡܵܪܝܵܐ ܚܲܒܿܪܵܐ (ܕܝܹܗ) ܥܲܠ ܐܲܪܥܵܐ. 29 ܘܐܲܝܟ ܡܸܢܕܝܼ ܕܩܵܕ̄ܡܵܝܬܵܐ ܐܡܸܪܹܐ ܐܸܫܲܥܝܵܐ: ܐܸܢ ܡܵܪܝܵܐ ܨܒܼܵܐܘܼܬ ܠܵܐ ܗܵܘܹܐ ܗ̄ܘܵܐ ܫܒܼܝܼܩܵܐ ܐܸܠܲܢ ܙܲܪܥܵܐ: ܐܲܝܟ ܣܕܘܿܡ ܒܸܬ ܗܵܘܵܚ ܗ̄ܘܵܘ: ܘܠܥܵܡܘܿܪܵܐ ܒܸܬ ܦܵܝܫܵܚ ܗ̄ܘܵܘ ܕܘܼܡܝܹܐ. 30 ܒܲܣ ܡܘܼܕܝܼ ܐܵܡܪܵܚ: ܕܛܵܝܸܦܹ̈ܐ: ܕܠܹܐ ܗ̄ܘܵܘ ܒܸܪܚܵܛܵܐ ܒܵܬ̄ܪ ܙܲܕܝܼܩܘܼܬܵܐ: ܡܛܸܠܘܿܢ ܠܙܲܕܝܼܩܘܼܬܵܐ: ܘܙܲܕܝܼܩܘܼܬܵܐ ܗܿܝ ܕܡܼܢ ܗܲܝܡܵܢܘܼܬܵܐ ܝܠܵܐ: 31 ܐܝܼܢܵܐ ܝܼܣܪܵܝܹܠ: ܕܒܸܪܚܵܛܵܐ ܗ̄ܘܵܐ ܒܵܬ̄ܪ ܢܵܡܘܿܣܵܐ ܕܙܲܕܝܼܩܘܼܬܵܐ: ܠܢܵܡܘܿܣܵܐ ܕܙܲܕܝܼܩܘܼܬܵܐ ܠܵܐ ܡܛܸܠܹܐ. 32 ܩܵܡܘܿܕܝܼ: ܣܵܒܵܒ ܠܹܐ ܗ̄ܘܵܐ ܡܼܢ ܗܲܝܡܵܢܘܼܬܵܐ: ܐܸܠܵܐ ܐܲܝܟ ܕܡܼܢ ܦܘܼܠܚܵܢܹ̈ܐ. ܣܵܒܵܒ ܬܘܼܪܩܸܠܘܲܢ ܒܟܹܐܦܵܐ ܕܬܲܪܩܲܠܬܵܐ: 33 ܐܲܝܟ ܕܝܼܠܹܐ ܟܬܝܼܒܼܵܐ: ܗܵܐ ܡܲܬܘܼܒܹܐ ܝܘܸܢ ܒܸܨܗܝܘܿܢ ܟܹܐܦܵܐ ܕܬܲܪܩܲܠܬܵܐ: ܘܐܝܼܨܵܪܵܐ ܕܟܦܘܼܪܝܵܐ: ܘܗܿܘ ܕܗܲܡܸܢ ܒܼܝܸܗ ܠܹܐ ܢܵܚܸܦ.

ܩܦܠܐܘܢ: ܝ

1ܐܵܚܘܿܢܘܵܬܝܼܗ: ܪܸܙܵܝܵܐ ܕܠܸܒܝܼ ܘܦܲܪܦܲܠܬܝܼ ܕܠܟܸܣ ܐܲܠܵܗܵܐ ܡܼܢ ܓܸܒܵܝ ܝܼܠܵܐ: ܕܚܲܝܝܼ. 2 ܣܵܒܵܒ ܒܸܣܗܵܕܵܐ ܝܘܸܢ ܥܲܠܵܝ ܕܩܲܝܪܲܬ ܕܐܲܠܵܗܵܐ ܐܝܼܬ ܒܵܝܼܝ: ܐܸܠܵܐ ܠܵܐ ܒܝܕܥܬܵܐ. 3 ܣܵܒܵܒ ܟܲܕ ܠܵܐ ܒܝܼܕܲܥܝܵܐ ܙܲܕܝܼܩܘܼܬܹܗ ܕܐܲܠܵܗܵܐ: ܘܒܸܒܲܥܝܵܐ ܕܡܲܩܸܡܝܼ ܙܲܕܝܼܩܘܼܬܵܐ ܕܓܵܢܵܝ: ܠܙܲܕܝܼܩܘܼܬܹܗ ܕܐܲܠܵܗܵܐ ܠܵܐ ܗ̄ܘܸܠܘܿܢ ܙܲܒܛ. 4 ܣܵܒܵܒ ܕܩܲܝܵܣܹܗ ܕܢܵܡܘܿܣܵܐ ܡܫܝܼܚܵܐ ܝܠܹܐ: ܠܙܲܕܝܼܩܘܼܬܵܐ ܠܟܠ ܕܗܲܡܸܢ. 5 ܣܵܒܵܒ ܡܘܼܫܹܐ ܟܬܸܒܼܠܹܐ ܒܵܗ̄ܣ ܕܙܲܕܝܼܩܘܼܬܵܐ ܕܒܢܵܡܘܿܣܵܐ: ܕܗܿܘ ܐܢܵܫܵܐ ܕܥܵܒܸܕ ܐܲܢܹܐ: ܒܸܬ ܚܲܝܹܐ ܒܵܝܼܝ. 6 ܐܝܼܢܵܐ ܙܲܕܝܼܩܘܼܬܵܐ ܕܒܗܲܝܡܵܢܘܼܬܵܐ ܗܲܕܟܼܵܐ ܒܹܐܡܵܪܵܐ ܝܠܵܐ: ܠܵܐ ܐܵܡܪܸܬ ܒܠܸܒܘܼܟ: ܡܵܢܝܼ ܒܸܬ ܐܵܣܸܩ ܠܫܡܲܝܵܐ: ܝܲܥܢܹܐ: ܕܡܲܨܠܸܐ ܠܡܫܝܼܚܵܐ: 7 ܝܲܢ ܒܸܬ ܨܵܠܹܐ ܠܥܘܼܡܩܵܐ: ܝܲܥܢܹܐ: ܕܡܵܐܣܸܩ ܠܡܫܝܼܚܵܐ ܡܼܢ ܡܝܼܬܹ̈ܐ: 8 ܐܸܠܵܐ ܡܘܼܕܝܼ ܐܡܸܪܹܐ: ܩܘܼܪܒܵܐ ܝܠܵܐ ܐܸܠܘܼܟ ܗܹܡܸܙܡܵܢ: ܓܵܘ ܦܘܼܡܘܼܟ: ܘܓܵܘ ܠܸܒܘܼܟ: ܝܲܥܢܹܐ: ܗܹܡܸܙܡܵܢ ܕܗܲܝܡܵܢܘܼܬܵܐ ܕܡܲܟܪܘܼܙܹܐ ܝܘܵܚ: 9 ܣܵܒܵܒ ܐܸܢ ܡܵܘܕܸܬ ܒܦܘܼܡܘܼܟ ܒܡܵܪܲܢ ܝܼܫܘܿܥ: ܘܗܲܡܸܢܹܬ ܒܠܸܒܘܼܟ ܕܐܲܠܵܗܵܐ ܡܘܼܩܸܡܠܹܗ ܡܼܢ ܡܝܼܬܹ̈ܐ: ܒܸܬ ܚܲܝܸܬ. 10 ܣܵܒܵܒ ܒܠܸܒܵܐ ܟܹܐ ܡܵܘܕܹܐ ܠܦܘܼܪܩܵܢܵܐ. 11ܣܵܒܵܒ ܕܐܡܸܪܹܐ ܟܬܵܒܼܵܐ: ܟܠ ܕܗܲܡܸܢ ܒܝܹܗ ܠܹܐ ܢܵܚܸܦ. 12 ܣܵܒܵܒ ܠܲܝܬ ܦܘܼܪܫܘܼܢܝܵܐ ܒܹܝܠ ܝܗ̄ܘܼܕܵܝܵܐ ܘܝܵܘܢܵܝܵܐ: ܣܵܒܵܒ ܚܵܕ̄ ܝܼܠܹܐ ܡܵܪܝܵܐ ܕܟܠܵܝ: ܕܕܵܘܠܲܬܡܲܢܕ ܝܼܠܹܐ ܠܟܠ ܕܩܵܪܹܐ ܠܹܗ. 13 ܣܵܒܵܒ ܟܠ ܕܩܵܪܹܐ ܒܫܸܡܹܗ ܕܡܵܪܝܵܐ ܒܸܬ ܚܲܝܹ̈ܐ. 14 ܒܲܣ ܕܵܐܟܼܝܼ ܒܸܬ ܩܵܪܝܼ ܠܗܿܘ ܕܠܵܐ ܗܘܼܡܸܢܘܿܢ ܒܝܹܗ ܝܲܢ ܕܵܐܟܼܝܼ ܒܸܬ ܗܲܡܸܢܝܼ ܒܗܿܘ ܕܠܵܐ ܫܡܥܠܘܿܢ ܒܵܗ̄ܣܹܗ: ܝܲܢ ܕܵܐܟܼܝܼ ܒܸܬ ܫܲܡܥܝܼ ܕܠܵܐ ܡܲܟܪܸܙܵܢܵܐ: 15 ܝܲܢ ܕܵܐܟܼܝܼ ܒܸܬ ܡܲܟܪܸܙܝܼ: ܐܸܢ ܠܵܐ ܦܵܝܫܝܼ ܫܘܼܕܪܹܐ: ܐܲܝܕܝܼܠܹܐ ܟܬܝܼܒܼܵܐ: ܟܡܵܐ ܫܵܦܝܼܪܹ̈ܐ ܝܢܵܐ ܐܲܩܠܵܬܹ̈ܐ ܕܡܲܫܚܸܕܵܢܹ̈ܐ ܕܫܠܵܡܵܐ ܘܕܡܲܫܚܸܕܵܢܹ̈ܐ ܕܛܵܒܼܵܬܹ̈ܐ. 16ܐܸܠܵܐ ܟܠܵܝ ܠܵܐ ܡܘܼܨܝܸܬܠܘܿܢ ܠܐܸܘܵܢܔܵܠܝܼܘܿܢ. ܣܵܒܵܒ ܕܐܹܫܲܥܝܵܐ ܐܡܸܪܹܐ: ܡܵܢܝܼ ܗܘܼܡܸܢܹܐ ܠܡܲܫܡܵܥܝܬܲܢ: 17 ܒܲܣ ܗܲܝܡܵܢܘܼܬܵܐ ܡܼܢ ܫܡܵܥܝܵܬܐ ܝܠܵܐ: ܘܫܡܵܥܝܵܬܐ ܡܼܢ ܗܹܡܸܙܡܵܢ ܕܐܲܠܵܗܵܐ. 18 ܐܸܠܵܐ ܒܸܐܡܵܪܵܐ ܝܘܸܢ ܠܵܐ ܫܡܸܥܠܘܿܢ: ܝܹܐ: ܕܒܪܝܼܬܵܐ ܗܹܡܸܙܡܵܢܵܝ̈. 19 ܐܸܠܵܐ ܒܹܐܡܵܪܵܐ ܝܘܸܢ: ܠܵܐ ܝܕܸܥܠܹܐ ܝܼܣܪܵܝܸܠ: ܗܵܕ̄ܡܵܝܵܐ ܡܘܼܫܹܐ ܐܡܸܪܹܐ: ܒܸܬ ܡܲܐܘܸܪܸܢܵܟܼܘܿܢ ܒܩܝܪܲܬ ܒܛܵܝܸܦܵܐ ܕܠܹܐ ܝܠܹܐ ܛܵܝܸܦܵܐ: ܒܛܵܝܸܦܵܐ ܕܠܵܐ ܦܲܪܡܵܝܬܵܐ ܒܸܬ ܡܲܟܪܸܒܸܿܢܘܿܟܼܘܿܢ. 20 ܐܝܼܢܵܐ ܐܹܫܲܥܝܵܐ ܩܘܼܫܕܸܪܹܐ ܘܐܡܸܪܹܐ: ܦܸܫܠܝܼ ܡܘܼܫ̄ܟܼܚܵܐ ܠܐܵܢܝܼ ܕܠܵܐ ܛܤܥܠܘܿܢ ܐܸܠܝܼ: ܘܦܸܫܠܝܼ ܚܸܙܝܵܐ ܠܐܵܢܝܼ ܕܠܵܐ ܒܘܼܩܪܘܿܢ ܥܲܠܝܼ. 21 ܐܝܼܢܵܐ ܠܝܼܣܪܵܝܹܐ ܐܡܸܪܹܐ: ܟܠܹܗ ܝܘܿܡܵܐ ܦܘܼܫܸܛܠܝܼ ܐܝܼܕܵܬܝܼ̈ ܠܟܸܣ ܛܵܝܸܦܵܐ ܡܲܩܪܸܨܵܢܵܐ ܘܠܵܐ ܡܲܖܝܸܬܵܢܵܐ.

ܩܦܠܐܘܢ: ܝܐ

1 ܒܲܣ ܒܹܐܡܵܪܵܐ ܝܘܸܢ: ܟܼܘܼܡܟܸܡܠܹܐ ܐܲܠܵܗܵܐ ܠܛܵܝܸܦܹܗ: ܚܵܣ ܠܝܼ. ܣܵܒܵܒ ܐܘܼܦ ܐܵܢܵܐ ܡܼܢ ܝܼܣܪܵܝܹܠ ܝܼܘܸܢ: ܡܼܢ ܙܲܪܥܹܗ ܕܐܲܒܼܪܵܗܵܡ: ܡܼܢ ܐܘܼܓܼܵܓܼ ܕܒܸܢܝܵܡܝܼܢ. 2 ܠܵܐ ܟܼܘܼܡܟܸܡܠܹܐ ܐܲܠܵܗܵܐ ܠܛܵܝܸܦܹܗ: ܗܿܘ ܕܡܼܢ ܩܵܕ̄ܡܵܝܬܵܐ ܝܕܸܥܝܵܐ ܗ̄ܘܵܐ ܐܸܠܹܐ. ܝܲܢ ܠܹܐ ܝܬܘܿܢ ܒܝܼܕܲܥܝܵܐ ܒܐܹܠܝܼܵܐ: ܟܬܵܒܼܵܐ ܡܘܼܕܝܼ ܐܡܸܪܹܐ: ܟܲܕ ܒܼܩܒܼܵܠܵܐ ܗ̄ܘܵܐ ܠܐܲܠܵܗܵܐ ܥܲܠ ܝܼܣܪܵܝܹܠ: ܘܒܹܐܡܵܪܵܐ: 3 ܡܵܪܝܼ: ܠܢܒܼܝܼܘܼ̈ܟ ܩܛܸܠܘܿܢ: ܘܠܡܲܕܒܚܘܼ̈ܟ ܬܠܸܚܠܘܿܢ: ܘܐܵܢܵܐ ܒܢܲܦܫܝܼ ܦܸܫܠܝܼ ܫܒܼܝܼܩܵܐ: ܘܒܸܛܲܥܝܵܐ ܝܢܵܐ ܠܓܵܢܝܼ. 4 ܐܸܠܵܐ ܡܘܼܕܝܼ ܐܡܸܪܹܐ ܐܸܠܹܗ ܓܸܠܝܵܢܵܐ: ܫܒܸܩܠܝܼ ܠܓܵܢܝܼ ܫܲܒܼܥܵܐ ܐܲܠܦܹ̈ܐ ܐܢܵܫܹ̈ܐ: ܐܵܢܝܼ ܕܠܵܐ ܒܪܸܟܿܠܘܿܢ ܒܘܪܟܵܐ ܠܒܲܥܠܵܐ. 5 ܗܲܪܟܼܵܐ ܐܘܼܦ ܒܐܵܗܵܐ ܙܲܒܼܢܵܐ: ܣܵܡܵܐ ܦܝܼܫܵܐ ܐܝܼܬ ܒܓܵܒܵܝܬܵܐ ܕܫܵܦܵܩܲܬ. 6 ܐܝܼܢܵܐ ܐܸܢ ܒܫܵܦܵܩܲܬ: ܠܹܐ ܝܠܵܐ ܐܚܹܪ̄ܢܵܐ ܡܼܢ ܦܘܼܠܚܵܢܹ̈ܐ: ܘܐܸܢ ܠܵܐ: ܫܵܦܵܩܲܬ ܠܹܐ ܝܠܵܐ ܫܵܦܵܩܲܬ. ܐܝܼܢܵܐ ܐܸܢ ܒܦܘܼܠܚܵܢܹ̈ܐ: ܠܹܐ ܝܠܵܐ ܐܚܹܪ̄ܢܵܐ ܫܵܦܵܩܲܬ: ܘܐܸܢ ܠܵܐ: ܦܘܼܠܚܵܢܵܐ ܠܹܐ ܝܠܹܐ ܦܘܼܠܚܵܢܵܐ. 7 ܒܲܣ ܡܘܼܕܝܼ: ܗܿܝ ܕܛܸܥܠܹܐ ܐܸܠܵܗܿ ܝܼܣܪܵܝܹܐ ܠܵܐ ܡܘܼܫ̄ܟܸܚܠܹܐ: ܐܝܼܢܵܐ ܓܵܒܵܝܬܵܐ ܡܘܼܫ̄ܟܸܚܠܵܐ: ܘܐܵܢܝܼ ܐܚܸܪ̈ܢܹܐ ܦܸܫܠܘܿܢ ܡܘܩܫܝܹܐ: 8 ܕܵܐܟܼܝܼ ܕܝܼܠܵܐ ܟܬܝܼܒܼܵܐ: ܕܝܸܗܒܸܠܹܐ ܐܸܠܵܝ ܐܲܠܵܗܵܐ ܪܘܼܚܵܐ ܕܫܸܢܬܵܐ ܝܵܩܘܿܪܬܵܐ: ܥܲܝܢܹ̈ܐ ܕܠܵܐ ܚܵܙܝܼ: ܘܢܵܬܝܵܬܹ̈ܐ ܕܠܵܐ ܫܲܡܥܝܼ: ܗܲܠ ܝܘܿܡܵܐ ܕܐܸܕܝܘܼ. 9 ܘܕܵܘܝܼܕ ܐܡܸܪܹܐ: ܗܵܘܹܐ ܨܘܼܦܪܵܝ ܠܟܼܘܼܪܸܬܡܵܐ ܘܠܢܸܫܒܼܵܐ: ܘܠܬܘܼܪܩܵܠܵܐ: ܘܠܦܘܼܪܥܵܢܵܐ ܐܸܠܵܝ: 10 ܚܵܒܼܝܼ ܥܲܝܢܵܝ̈ ܕܠܵܐ ܚܵܙܝܼ: ܘܠܚܵܨܵܝ ܒܟܠ ܙܲܒܼܢܵܐ ܡܟܸܦ. 11 ܐܝܼܢܵܐ ܒܹܐܡܵܪܵܐ ܝܘܸܢ ܬܘܼܪܩܸܠܘܢ ܕܢܵܦܠܝܼ: ܚܵܣ ܠܝܼ. ܐܸܠܵܐ ܒܬܲܪܩܲܠܬܵܐ ܕܝܼܵܝ ܗ̄ܘܹܠܘܢ ܚܲܝܹ̈ܐ ܠܛܵܝܸܦܹ̈ܐ: ܠܡܲܐܘܘܼܪܵܝ ܒܩܲܝܪܲܬ. 12 ܘܐܸܢ ܬܲܪܩܲܠܬܵܝ ܗ̄ܘܹܠܵܐ ܕܵܘܸܠܬܵܐ ܠܥܵܠܡܵܐ: ܘܚܘܼܣܪܵܢܵܝ ܕܵܘܸܠܬܵܐ ܠܛܵܝܸܦܹ̈ܐ: ܒܲܣ ܟܡܵܐܙܵܘܕܵܐ ܬܲܡܵܡܵܬܘܼܬܵܝ: 13 ܐܝܼܢܵܐ ܐܸܠܵܟܼܘܿܢ ܒܹܐܡܵܪܵܐ ܝܘܸܢ: ܠܛܵܝܸܦܹ̈ܐ. ܣܵܒܵܒ ܕܫܠܝܼܚܵܐ 14 ܝܘܸܢ ܛܵܝܸܦܹ̈ܐ: ܠܚܸܠܡܲܬܝܼ ܒܸܚܩܵܪܵܐ ܝܘܸܢ: ܕܩܵܘܵܡܵܐ ܡܲܐܘܸܪܸܢ ܒܩܲܝܪܲܬ (ܠܒܢܲܝ̈) ܒܸܣܪܝܼ: ܘܦܵܪܩܸܢ ܐܢܵܫܹ̈ܐ ܡܸܢܵܝ. 15 ܣܵܒܵܒ ܐܸܢ ܡܲܣܠܝܬܝ ܗ̄ܘܹܠܵܐ ܣܲܙܓܲܪܬܵܐ ܕܥܵܠܡܵܐ: ܡܘܕܝܼ ܩܵܒܲܠܬܵܝ: ܐܸܢ ܠܵܐ ܚܲܝܹ̈ܐ ܕܡܼܢ ܡܝܼܬܹ̈ܐ: 16 ܐܝܼܢܵܐ ܐܸܢ ܢܘܼܒܲܪܠܸܓܼ ܕܟܼܝܼܬܵܐ ܝܠܵܐ: ܐܘܼܦ ܓܒܼܝܼܠܬܵܐ: ܘܐܸܢ ܥܸܩܪܵܐ ܕܸܟܼܝܵܐ ܝܠܹܐ: ܐܘܼܦ ܦܲܥܘܵܢܹ̈ܐ. 17 ܘܐܸܢ ܡܼܢ ܦܲܥܘܵܢܹ̈ܐ ܦܸܫܠܘܿܢ ܟܠܝܼܦܹܐ: ܘܐܲܢ̄ܬ: ܕܝܼܘܹܬ ܙܲܝܬܵܐ ܕܒܲܪܝܼܵܐ: ܦܸܫܠܘܼܟ ܥܒܼܝܼܕܵܐ ܦܲܝܒܲܢܕ ܓܵܘܵܝ: ܘܗ̄ܘܹܠܘܼܟ ܫܵܪܝܼܟܼܵܐ ܠܥܩܪܵܐ ܘܛܪܝܼܨܘܼܬܵܐ ܕܙܲܝܬܵܐ: 18 ܠܵܐ ܚܵܬܪܸܬ ܥܲܠ ܦܲܥܘܵܢܹ̈ܐ: ܐܝܼܢܵܐ ܐܸܢ ܚܵܬܪܸܬ: ܐܲܢ̄ܬ ܠܹܐ ܝܘܸܬ ܛܥܝܼܢܵܐ ܠܥܸܩܪܵܐ: ܐܸܠܵܐ ܥܸܩܪܵܐ ܐܸܠܘܼܟ. 19 ܒܲܣ ܒܸܬ ܐܵܡܪܸܬ: ܦܲܥܘܵܢܹ̈ܐ ܦܸܫܠܘܼܢ ܟܠܝܼܦܹܐ: ܕܐܵܢܵܐ ܦܵܝܫܸܢ ܥܒܼܝܼܕܵܐ ܦܲܝܒܲܢܕ. 20 ܨܦܵܝܝ: ܐܲܢܹܐ ܣܵܒܵܒ ܕܠܵܐ ܗܘܼܡܸܢܘܿܢ ܦܸܫܠܘܿܢ ܬܒܼܝܼܪܹܐ: ܘܐܲܢ̄ܬ ܒܗܲܝܡܵܢܘܼܬܵܐ ܟܸܠܝܵܐ 21 ܝܘܸܬ. ܠܵܐ ܪܵܝܡܸܬ ܕܡܼܢ ܐܲܨܠܵܝ ܠܵܐ ܐܬܹܠܵܐ ܠܹܗ ܡܘܼܚܲܒܢܵܝ: ܩܵܘܡܵܐ ܐܘܼܦ ܥܲܠܘܼܟ ܠܵܐ ܐܵܬܝܵܐ ܠܹܗ ܡܘܼܚܲܒܢܘܼܟ. 22 ܚܙܝܼ ܗܲܕܟܼܵܐ ܒܵܣܝܼܡܘܼܬܹܗ ܘܩܸܫܝܘܼܬܹܗ ܕܐܲܠܵܗܵܐ: ܥܲܠ ܕܐܵܢܝܼ ܕܢܦܸܠܘܿܢ: ܩܸܫܝܘܼܬܵܐ: ܐܝܼܢܵܐ ܥܲܠܘܿܟ: ܒܵܣܝܼܡܘܼܬܵܐ: ܐܸܢ ܥܲܪܩܸܠܸܬ ܗܲܪ ܒܗܿܝ ܒܵܣܝܼܡܘܼܬܵܐ: ܘܐܸܢ ܠܵܐ: ܐܘܼܦ ܐܲܢ̄ܬ ܒܸܬ ܦܵܝܫܸܬ ܟܠܝܼܦܵܐ. 23 ܘܐܵܢܝܼ ܐܸܢ ܠܵܐ ܥܲܪܩܸܠܝܼ ܒܠܵܐ ܗܲܝܡܵܢܘܼܬܵܝ: ܐܘܼܦ ܐܵܢܝܼ ܒܸܬ ܦܵܝܫܝܼ ܥܒܼܝܪܕܹܐ ܦܲܝܒܲܢܕ: ܣܵܒܵܒ ܕܟܹܐ ܡܵܨܹܐ ܐܲܠܵܗܵܐ ܕܡܸܕܪܹܐ ܥܵܒܸܕ ܠܗ̄ܘܿܢ ܦܲܝܒܲܢܕ. 24 ܣܵܒܵܒ ܐܸܢ ܐܲܢ̄ܬ ܦܸܫܠܘܿܢ ܦܪܝܼܡܵܐ ܡܼܢ ܙܲܝܬܵܐ ܕܒܲܐܨܠܘܼܗܿ ܕܒܲܪܝܼܵܐ ܝܠܵܐ: ܘܕܲܪܩܘܼܒܼܠ ܕܐܲܨܠܵܐ ܦܸܫܠܘܼܟ ܥܒܼܝܼܕܵܐ ܦܲܝܒܲܢܕ ܒܙܲܝܬܵܐ ܨܦܵܝܝ: ܒܲܣ ܟܡܢܵܐ ܙܵܘܕܵܐ ܐܵܢܝܼ ܕܒܲܐܨܠܵܐ ܝܢܵܐ ܒܸܬ ܦܵܝܫܝܼ ܥܒܼܝܼܕܹܐ ܦܲܝܒܲܢܕ ܒܙܲܝܬܵܐ ܕܐܲܨܠܵܝ: 25 ܣܵܒܵܒ ܒܸܒܲܥܝܵܐ ܝܘܸܢ ܕܝܲܕܥܝܼܬܘܿܢ: ܐܵܚܘܿܢܘܵܬܝܼ̈: ܐܵܗܵܐ ܣܸܪ: ܕܠܵܐ ܗܵܘܝܼܬܘܿܢ ܥܵܩܸܠܕܵܕܹ̈ܐ ܒܚܵܝܼܠ ܕܓܵܢܘܟܼܘܿܢ: ܕܩܫܵܝܬܵܐ ܒܚܵܕ̄ ܣܵܡܵܐ ܗ̄ܘܹܠܵܐ ܠܝܼܣܪܵܝܹܠ: ܗܲܠ ܕܐܵܘܪܵܐ ܬܲܡܵܡܵܬܘܼܬܵܐ ܕܛܵܝܸܦܹ̈ܐ: 26 ܘܗܲܕܟܼܵܐ ܟܠܹܗ ܝܼܣܪܵܝܹܠ ܒܸܬ ܚܲܝܹܐ: ܕܵܐܟܼܝܼ ܕܝܼܠܹܐ ܟܬܝܼܒܼܵܐ: ܕܒܸܬ ܐܵܬܹܐ ܡܼܢ ܨܗܝܘܿܢ ܦܵܪܘܿܩܵܐ: ܘܒܸܬ ܡܲܕܸܪ ܥܵܘܠܵܐ ܡܼܢ ܝܲܥܩܘܿܒܼ: 27 ܘܐܵܗܵܐ ܝܠܹܐ ܩܵܘܠܵܐ ܕܡܼܢ ܠܟܸܣܠܝܼ ܐܸܠܵܝ: ܐܝܼܡܲܢ ܕܡܲܚܠܸܥܢ ܚܛܵܗܵܝ̈. 28 ܡܼܢ ܐܸܘܵܢܓܵܠܝܼܘܿܢ ܓܸܒܵܐ ܕܸܫܡܸܢܹ̈ܐ ܝܢܵܐ ܒܚܵܬܸܪ ܕܝܼܵܘܟܼܘܿܢ: ܐܝܼܢܵܐ ܡܼܢ ܓܵܒܵܝܬܵܐ: ܡܘܼܚܸܒܹ̈ܐ ܝܢܵܐ ܒܚܵܬܸܪ ܕܐܲܒܼܵܗܵܬܵܐ. 29 ܣܵܒܵܒ ܐܲܠܵܗܵܐ ܠܹܐ ܕܵܝܸܪ ܒܚܲܠܲܥܬܸܗ ܘܒܩܪܵܝܬܹܗ. 30 ܣܵܒܵܒ ܕܵܐܟܼܝܼ ܕܐܘܼܦ ܐܲܚܬܘܿܢ ܠܹܐ ܡܲܨܝܸܬܝܼܬܘܿܢ ܗ̄ܘܵܘ ܠܐܲܠܵܗܵܐ ܩܵܕ̄ܡܵܝܬܵܐ: ܘܐܵܕܝܼܵܐ ܦܸܫܠܵܘܟܼܘܿܢ ܟܘܼܪܡܸܢܹܐ ܒܠܵܐ ܡܲܨܝܲܬܬܵܐ ܕܐܵܢܝܼ: 31 ܗܲܕܟܼܵܐ ܐܘܼܦ ܐܵܢܝܼ ܐܵܕܝܼܵܐ ܠܵܐ ܡܘܼܨܝܸܬܠܘܿܢ: ܕܒܪܲܚܡܹܐ ܕܥܲܠܵܘܟܼܘܿܢ ܐܘܼܦ ܥܲܠܵܝ ܗܵܘܝܼ ܪܲܚܡܹܐ. 32 ܣܵܒܵܒ ܕܚܒܸܫܠܹܐ ܐܲܠܵܗܵܐ ܠܟܠ ܐܢܵܫܵܐ ܒܠܵܐ ܡܲܨܝܲܬܝܵܐ: ܕܥܲܠ ܟܠ ܐܢܵܫܵܐ ܥܵܒܸܕ ܪܲܚܡܹܐ. 33 ܝܵܐ ܥܘܼܡܩܵܐ ܕܕܵܘܸܠܬܵܐ ܘܥܵܩܸܠܕܵܪܘܼܬܵܐ ܘܝܕܸܥܬܵܐ ܕܐܲܠܵܗܵܐ. ܠܲܝܬ ܬܲܦܬܲܫܬܵܐ ܕܝܼܘܵܢܘܼ̈ܗܝ: ܘܐܘܼܪܚܵܬܹܗ ܠܹܐ ܐܵܬܝܼ ܠܨܲܚܨܘܼܝܹܐ. 34 ܣܵܒܵܒ ܡܵܢܝܼ ܝܕܸܥܝܵܐ ܝܠܹܐ ܚܝܼܵܠܹܗ ܕܡܵܪܝܵܐ: ܝܲܢ ܡܵܢܝܼ ܗ̄ܘܹܠܹܐ ܐܸܠܹܗ ܥܵܒܼܕܵܢܵܐ ܕܪܵܐܝܝܼ: 35 ܝܲܢ ܡܵܢܝܼ ܩܵܕ̄ܡܵܝܬܵܐ ܝܸܗܒܸܠܹܐ ܐܸܠܹܗ: ܘܡܸܕܪܹܐ ܒܸܬ ܦܵܝܸܫ ܦܸܪܥܝܵܐ ܐܸܠܹܗ: 36 ܣܵܒܵܒ ܕܟܠ ܡܸܢܹܗ ܝܠܹܐ: ܘܟܠ ܒܝܹܗ: ܘܟܠ ܐܸܠܹܗ ܬܸܫܒܘܿܚܬܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ.

ܩܦܠܐܘܢ: ܝܒ

1 ܒܲܣ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ: ܐܵܚܘܿܢܘܵܬܝܼ̈: ܒܪܲܚܡܹܐ ܕܐܲܠܵܗܵܐ: ܕܡܲܟܠܝܼܬܘܿܢ ܦܲܓܼܪ̈ܘܿܟܼܘܿܢ ܕܸܒܼܚܬܵܐ ܚܵܝܬܵܐ ܘܩܲܕܝܼܫܬܵܐ ܘܡܲܩܒܘܼܠ ܠܐܲܠܵܗܵܐ: ܕܝܼܠܵܐ ܚܸܠܡܲܬܵܘܟܼܘܿܢ ܡܵܪܹܐ ܗܵܘܢܵܐ. 2 ܘܠܵܐ ܦܵܝܫܝܼܬܘܿܢ ܡܘܼܕܡܝܹܐ ܠܐܵܗܵܐ ܥܵܠܡܵܐ: ܐܸܠܵܐ ܦܘܼܫܘܿܢ ܫܘܼܚܠܸܦܹܐ ܒܚܲܕܲܬܬܵܐ ܕܚܵܝܼܠܵܘ̈ܟܼܘܿܢ: ܕܗܵܘܝܼܬܘܿܢ ܒܸܦܪܵܫܵܐ ܡܘܼܕܝܼ ܝܠܹܐ ܪܸܙܵܝܹܗ ܕܐܲܠܵܗܵܐ: ܛܵܒܼܵܐ: ܘܡܲܩܒܘܼܠ: ܘܬܲܡܵܡ. 3 ܣܵܒܵܒ ܕܒܹܐܡܵܪܵܐ ܝܘܸܢ: ܒܫܵܦܵܩܲܬ ܕܦܸܫܠܵܐ ܝܸܗܒܸܠܬܵܐ ܐܸܠܝܼ ܠܟܠ ܐܢܵܫܵܐ ܕܝܼܠܹܐ ܓܵܘܵܘܟܼܘܿܢ: ܠܵܐ ܗܵܘܝܼܬܘܿܢ ܒܸܚܫܵܒܼܵܐ ܙܵܘܕܵܐ ܡܼܢ ܕܘܵܓܸܒ ܝܼܠܹܐ ܕܚܵܫܒܼܝܼܬܘܿܢ: ܐܸܠܵܐ ܗܵܘܝܼܬܘܿܢ ܒܸܚܫܵܒܼܵܐ ܒܢܲܟܼܦܘܼܬܵܐ: ܟܠ ܐܢܵܫܵܐ ܐܲܝܟ ܕܦܘܼܠܹܠܹܐ ܐܸܠܹܐ ܐܲܠܵܗܵܐ ܟܝܼܘܼܠܵܐ ܕܗܲܝܡܵܢܘܼܬܵܐ. 4 ܣܵܒܵܒ ܕܵܐܟܼܝܼ ܕܒܚܵܕ̄ ܦܲܓܼܪܵܐ ܪܵܒܵܐ ܗܲܕܵܡܹ̈ܐ ܐܝܼܬ ܠܲܢ: ܘܟܠܵܝ ܗܲܕܵܡܹ̈ܐ ܠܗ̄ܘܿܢ ܚܵܕ̄ ܫܘܼܠܵܐ: 5 ܗܲܕܟܼܵܐ ܐܘܼܦ ܐܲܚܢܲܢ ܕܪܵܒܵܐ ܝܘܵܚ: ܚܵܕ̄ ܦܲܓܼܪܵܐ ܝܘܵܚ ܒܡܫܝܼܚܵܐ: ܘܗܲܕܵܡܹ̈ܐ ܕܚܵܕ̄ ܕܗܵܘ ܐܚܹܪ̄ܢܵܐ. 6 ܐܸܠܵܐ ܐܝܼܬ ܠܲܢ ܚܲܠܲܥܬܹ̈ܐ ܬܵܗܵܪܹ̈ܐ ܬܵܗܵܪܹ̈ܐ: ܐܲܝܟ ܫܵܦܵܩܲܬ ܕܦܸܫܠܵܐ ܝܸܗܒܸܠܬܵܐ ܐܸܠܲܢ: ܐܸܢ ܕܢܒܼܝܼܘܼܬܵܐ: (ܢܵܒܵܚ) ܐܲܝܟ ܟܝܼܘܼܠܵܐ ܕܗܲܝܡܵܢܘܼܬܲܢ: 7 ܘܐܸܢ ܕܚܸܠܡܲܬ: (ܟܵܠܵܚ) ܒܚܸܠܡܲܬܲܢ: ܐܸܢ ܡܲܠܦܵܢܵܐ ܝܠܹܐ: ܒܝܘܼܠܦܵܢܹ̈ܗ: 8 ܘܐܸܢ ܝܵܗ̄ܒܼܵܢܵܐ ܕܠܸܒܵܐ ܝܠܹܐ: ܒܝܵܗܒܲܠܬܹܗ ܕܠܸܒܵܐ: ܗܿܘ ܕܝܵܗ̄ܒܸܠ: ܒܦܫܝܼܛܘܼܬܵܐ: ܗܿܘ ܕܬܲܓܒܸܪ: ܒܚܵܒܵܛܘܼܬܵܐ: ܗܿܘ ܕܥܵܒܸܕ ܪܲܚܡܹܐ: ܒܦܨܝܼܚܘܼܬܵܐ. 9 ܠܵܐ ܗܵܘܹܐ ܠܹܐܒܵܢܵܐ ܚܘܼܒܵܘܟܼܘܿܢ: ܐܸܠܵܐ ܗܵܘܝܼܬܘܿܢ ܒܸܣܢܵܝܵܐ ܠܒܿܝܼܫܬܵܐ ܘܒܸܬܒܲܥܝܵܐ ܠܛܵܒܼܵܬܵܐ. 10 ܗܵܘܝܼܬܘܿܢ ܡܲܚܘܼܒܹܐ ܚܵܕ̄ ܠܗܿܘ ܐܚܸܪ̄ܢܵܐ ܒܚܘܼܒܵܐ ܕܐܵܚܘܿܢܘܵܬܹ̈ܐ. ܗܵܘܝܼܬܘܿܢ ܩܵܕ̄ܡܵܝܹ̈ܐ ܒܡܝܵܩܪܬܵܐ ܚܵܕ̄ ܠܗܿܘ ܐܚܸܪ̄ܢܵܐ. 11 ܗܵܘܝܼܬܘܿܢ ܚܵܒܿܛܵܢܹ̈ܐ: ܘܠܵܐ ܡܲܟܣܸܠܵܢܹ̈ܐ: ܗܵܘܝܼܬܘܿܢ ܒܸܪܬܵܚܵܐ ܒܪܘܼܚܵܐ: ܗܵܘܼܝܼܬܘܿܢ ܒܸܦܠܵܚܵܐ ܠܡܵܪܝܵܐ. 12 ܗܵܘܝܼܬܘܿܢ ܒܸܚܕܵܝܵܐ ܒܗܸܒܼܝܼܵܘܟܼܘܿܢ: ܗܵܘܝܼܬܘܿܢ ܒܸܚܡܵܠܵܐ ܝܲܠܨܘܼܘܵܘ̈ܟܼܘܿܢ: ܗܵܘܝܼܬܘܿܢ ܕܵܝܸܡ ܒܨܠܘܿܬܵܐ: 13 ܗܵܘܝܼܬܘܿܢ ܫܲܪܘܼܟܹܐ ܒܣܢܝܼܩܘܼܬܵܐ ܕܩܲܕܝܼܫܹ̈ܐ: ܗܵܘܝܼܬܘܿܢ ܡܲܚܘܼܒܹܐ ܠܢܘܼܟܼܪܵܝܹܐ. 14 ܒܵܪܟܼܘܿܢ ܠܛܵܪ̈ܕܵܢܵܘܟܼܘܿܢ: ܒܵܪܟܼܘܿܢ: ܘܠܵܐ ܠܵܝܛܝܼܬܘܿܢ. 15 ܚܕܹܡܘܿܢ ܥܲܡ ܕܐܵܢܝܼ ܕܚܵܕܝܼ: ܘܒܟܹܡܘܿܢ ܥܲܡ ܕܐܵܢܝܼ ܕܒܵܟܼܝܼ. 16 ܚܫܘܿܒܼܘܿܢ ܗܲܪ ܚܵܕ̄ ܡܸܢܕܝܼ ܚܵܕ̄ ܠܟܸܣ ܗܿܘ ܐܚܹܪ̄ܢܵܐ. ܠܵܐ ܚܵܫܒܼܝܼܬܘܿܢ ܚܝܼܵܠ ܪܵܡܵܐ: ܐܸܠܵܐ ܬܒܸܥܡܘܿܢ ܠܐܵܢܝܼ ܕܝܼܢܵܐ ܡܵܟܝܼܟܹ̈ܐ: ܘܠܵܐ ܗܵܘܝܼܬܘܿܢ ܥܵܩܸܠܕܵܪܹ̈ܐ ܒܚܵܝܼܠ ܕܓܵܢܵܘܟܼܘܿܢ. 17 ܠܵܐ ܦܲܪܥܝܼܬܘܿܬ ܠܐܢܵܫܵܐ ܒܝܼܫܬܵܐ ܡܒܵܕܵܠ ܕܒܝܼܫܬܵܐ: ܐܸܠܵܐ ܐܵܟܼܠܝܼܬܘܿܢ ܚܲܡ ܠܫܘܼܠܹ̈ܐ ܫܵܦܝܼܪܹ̈ܐ ܩܵܕ̄ܡ ܟܠܵܝ ܒܢܲܝ̈ܢܵܫܵܐ. 18 ܘܐܸܢ ܡܵܨܝܵܐ: ܟܡܵܐ ܕܡܼܢ ܠܟܸܣܠܵܘܟܼܘܿܢ ܗܵܘܝܵܐ: ܥܲܡ ܟܠ ܐܢܵܫܵܐ ܒܫܲܝܢܵܐ ܗ̄ܘܹܡܘܿܢ. 19 ܘܠܵܐ ܗܵܘܝܼܬܘܿܢ ܒܸܫܩܵܠܵܐ ܬܘܼܥܠܵܐ ܕܓܵܢܵܘܟܼܘܿܢ: ܡܘܼܚܸܒܝܼ̈: ܐܸܠܵܐ ܗܲܒ̄ܠܘܿܢ ܕܘܼܟܵܐ ܠܟܲܪܒܵܐ: ܣܵܒܵܒ ܕܟܬܝܼܒܼܵܐ ܝܠܹܐ: ܫܩܵܠܬܵܐ ܕܬܘܼܥܠܵܐ ܕܝܼܝܼ ܝܠܵܐ: ܘܐܵܢܵܐ ܒܸܬ ܦܲܪܥܸܢ: ܒܹܐܡܵܪܵܐ ܝܠܹܐ ܡܵܪܝܵܐ. 20 ܐܝܼܢܵܐ ܐܸܢ ܟܵܦܸܢ ܕܸܫܡܸܢܘܼܟ: ܡܵܐܟܸܠ ܠܹܗ: ܘܐܸܢ ܨܲܗ̄ܝܹܐ: ܡܲܫܬܝܼ ܠܹܗ: ܣܵܒܵܒ ܐܸܢ ܐܲܢܹܐ ܥܵܒܼܕܸܬ ܐܸܠܹܗ: ܓܘܼܡܪܹ̈ܐ ܕܢܘܼܪܵܐ ܒܸܬ ܓܲܡܥܸܬ ܥܲܠ ܩܲܪܩܲܦܬܹܗ. 21 ܠܵܐ ܓܵܠܒܵܐ ܠܘܼܟ ܒܝܼܫܬܵܐ: ܐܸܠܵܐ ܓܼܠܘܿܒܿ ܠܒܿܝܼܫܬܵܐ ܒܛܵܒܼܬܵܐ.

ܩܦܠܐܘܢ: ܝܓ

1 ܟܠ ܓܵܢܵܐ ܠܗܘܼܟܡܹ̈ܐ ܕܓܘܼܪܘܼܬܵܐ ܦܵܝܫܵܐ ܙܲܒܛ: ܣܵܒܵܒ ܠܲܝܬ ܗܘܼܟܡܵܐ ܕܠܹܐ ܝܠܹܐ ܡܼܢ ܐܲܠܵܗܵܐܘ ܘܐܵܢܝܼ ܗܘܼܟܡܹ̈ܐ ܕܐܝܼܬ: ܡܼܢ ܐܲܠܵܗܵܐ ܦܩܝܼܪܹܐ ܝܢܵܐ. 2 ܒܲܣ ܡܿܢ ܕܩܵܝܸܡ ܠܕܲܪܩܘܼܒܼܠ ܕܗܘܼܟܡܵܐ: ܠܕܲܪܩܘܼܒܼܠ ܕܦܘܼܩܕܵܢܵܐ ܕܐܲܠܵܗܵܐ ܟܹܐ ܩܵܝܸܡ: ܘܐܵܢܝܼ ܕܩܵܝܡܝܼ ܠܕܲܪܩܘܼܒܼܠܵܝ: ܕܝܼܘܵܢ ܒܸܬ ܩܵܒܿܠܝܼ. 3 ܣܵܒܵܒ ܗܲܟܝܼܡܹ̈ܐ ܠܹܐ ܝܢܵܐ ܙܕܘܼܥܬܵܐ ܠܦܘܼܠܚܵܢܹ̈ܐ ܛܵܒܹ̈ܐ: ܐܸܠܵܐ ܠܒܿܝܼܫܹ̈ܐ. ܒܲܣ ܒܸܒܲܥܝܵܐ ܝܘܸܬ ܕܠܵܐ ܙܵܕܸܥܬ ܡܼܢ ܗܘܼܟܡܵܐ: ܥܒܼܘܿܕ ܛܵܒܼܬܵܐ: ܘܚܸܩܪܵܐ ܒܸܬ ܗܵܘܹܐ ܠܘܼܟ ܡܸܢܹܗ: 4 ܣܵܒܵܒ ܚܸܠܡܲܬܟܵܪ ܕܐܲܠܵܗܵܐ ܝܠܹܐ ܐܸܠܘܼܟ ܠܛܵܒܼܵܬܵܐ. ܐܝܼܢܵܐ ܐܸܢ ܒܝܼܫܬܵܐ ܥܵܒܪܕܤܬ: ܙܕܥܝܼ: ܣܵܒܵܒ ܕܠܹܐ ܝܠܹܐ ܗܵܒܵܣ ܐܣܝܼܪܵܐ ܠܣܲܝܦܵܐ: ܣܵܒܵܒ ܚܸܠܡܲܬܟܵܪ ܕܐܲܠܵܗܵܐ ܝܠܹܐ: ܫܵܩܠܵܢܵܐ ܕܬܘܼܥܠܵܐ ܕܟܲܪܒܵܐ ܠܗܿܘ ܕܥܵܒܸܕ ܒܝܼܫܬܵܐ. 5 ܣܵܒܵܒ ܕܐܵܗܵܐ ܘܵܓܸܒ ܝܼܠܹܐ ܐܸܠܲܢ ܠܸܦܝܵܫܵܐ ܙܲܒܛ: ܠܵܐ ܣܵܒܵܒ ܕܟܲܪܒܵܐ ܗܲܪ: ܐܸܠܵܐ ܐܘܼܦ ܒܚܵܬܸܪ ܕܐܸܢܝܲܬ. 6 ܣܵܒܵܒ ܕܐܵܗܵܐ ܐܘܼܦ ܚܲܪܓ ܒܝܼܵܗ̄ܒܼܵܐ ܝܬܘܿܢ: ܣܵܒܵܒ ܚܸܠܡܲܬܟܵܪܹ̈ܐ ܕܐܲܠܵܗܵܐ ܝܢܵܐ: ܕܗܲܪ ܠܐܵܗܵܐ ܫܘܼܠܵܐ ܟܹܐ ܟܵܠܝܼ. 7 ܒܲܣ ܦܪܸܥܡܘܿܢ ܠܟܠ ܐܢܵܫܵܐ ܐܲܝܟ ܕܝܼܠܵܐ ܘܵܓܒ ܐܸܠܹܗ: ܠܡܲܢ ܕܚܲܪܓ: ܚܲܪܓ: ܘܠܡܿܢ ܕܕܲܡܓܼܵܐ: ܕܲܡܓܼܵܐ: ܘܠܡܿܢ ܕܙܕܘܼܥܬܵܐ: ܙܕܘܼܥܬܵܐ: ܘܠܡܿܢ ܕܐܝܼܩܵܪܵܐ: ܐܝܼܩܵܪܵܐ. 8 ܠܟܘܼ ܐܢܵܫܵܐ ܠܵܐ ܗܵܘܝܼܬܘܿܢ ܕܵܝܢܵܢܹ̈ܐ: ܐܸܠܵܐ ܐܸܢ ܚܵܕ̄ ܠܗܿܘ ܐܚܸܪ̄ܢܵܐ ܠܡܲܚܘܼܒܹܐ: ܣܵܒܵܒ ܡܿܢ ܕܡܲܚܸܒ ܠܚܲܒܼܪܹܗ: ܢܵܡܘܿܣܵܐ ܬܘܼܡܸܡܵܐ ܝܠܹܐ. 9 ܣܵܒܵܒ ܕܐܘܼܦ ܗܿܝ: ܠܵܐ ܩܵܛܠܸܬ: ܠܵܐ ܥܵܒܼܕܸܬ ܩܲܗܒܘܼܬܵܐ: ܠܵܐ ܓܢܒܸܬ: ܠܵܐ ܫܲܗ̄ܘܸܬܸܬ: ܘܐܸܢ ܐܝܼܬ ܦܘܼܩܕܵܢܵܐ ܐܚܹܪ̄ܢܵܐ: ܒܐܵܗܵܐ ܗܹܡܸܙܡܵܢ ܟܹܐ ܦܵܝܸܫ ܬܘܼܡܸܡܵܐ: ܝܲܥܢܹܐ: ܡܲܚܸܒܸܬ ܠܫܒܼܵܒܘܼܟ ܐܲܝܟ ܓܵܢܘܼܟ. 10 ܚܘܼܒܵܐ ܠܫܒܼܵܒܹܗ ܣܪܝܼܬܵܐ ܠܹܐ ܦܵܠܸܚ. ܒܲܣ ܚܘܼܒܵܐ ܬܲܡܲܡܬܵܐ ܕܢܵܡܘܿܣܵܐ ܝܠܹܐ. 11 ܘܐܵܗܵܐ: ܟܲܕ ܝܲܕܥܵܚ ܙܲܒܼܢܵܐ: ܕܣܵܥܲܬ ܝܼܠܵܐ ܡܐܵܕܝܼܵܐ ܕܪܵܥܫܵܚ ܡܼܢ ܫܸܢܬܲܢ: ܣܵܒܵܒ ܐܵܕܝܼܵܐ ܒܘܼܫ ܙܵܘܕܵܐ ܩܘܼܪܒܸܢܹܐ ܝܢܵܐ ܐܸܠܲܢ ܚܲܝܲܢ ܡܼܢ ܕܟܲܕ ܗܘܼܡܸܢܲܢ. 12 ܠܲܝܠܹܐ ܥܒܼܝܼܪܵܐ ܝܠܹܐ: ܘܐܝܼܡܵܡܵܐ ܩܘܼܪܒܸܢܵܐ ܝܠܹܐ. ܒܲܣ ܪܲܦܵܚ ܡܸܢܲܢ ܦܘܼܠܚܵܢܹ̈ܐ ܕܚܘܼܒܼܝܵܐ: ܘܠܵܒܼܫܵܚ ܟܲܟܹ̈ܐ ܕܒܲܗܪܵܐ. 13 ܐܲܝܟ ܕܒܐܝܼܡܵܡܵܐ ܒܐܵܕܵܒܘܼܬܵܐ ܚܵܕܪܵܚ: ܠܵܐ ܒܙܡܵܪܵܐ ܘܒܪܵܘܵܘܝܘܼܬܵܐ: ܠܵܐ ܒܕܡܵܟܼܵܐ ܟܲܦܵܠ ܘܒܦܲܚܙܘܼܬܵܐ: ܠܵܐ ܒܒܲܚܸܠܵܢܘܼܬܵܐ ܘܒܡܲܩܲܪܨܘܼܬܵܐ. 14 ܐܸܠܵܐ ܠܒܼܘܿܫܘܿܢ ܠܡܵܪܲܢ ܝܼܫܘܼܿܥ ܡܫܝܼܚܵܐ: ܘܠܵܐ ܐܵܟܼܠܝܼܬܘܿܢ ܚܲܡ ܕܒܸܣܪܵܟܼܘܿܢ ܠܫܲܗ̄ܘܲܬܝܵܬܹ̈ܐ.

ܩܦܠܐܘܢ: ܝܕ

1 ܠܗܿܘ ܕܝܼܠܹܐ ܙܲܒܘܼܢ ܒܗܲܝܡܵܢܘܼܝܬܵܐ ܩܵܒܿܠܘܿܢ: ܠܵܐ ܠܬܲܦܬܲܫܬܵܐ ܕܚܘܼܫܵܒܹ̈ܐ. 2 ܣܵܒܵܒ ܐܝܼܬ ܕܗܲܘܡܸܢ ܕܟܠ ܡܸܢܕܝܼ ܐܵܟܸܠ: ܐܝܼܢܵܐ ܗܿܘ ܕܝܼܠܹܐ ܙܲܒܘܼܢ: ܝܲܪܩܵܐ ܟܹܐ ܐܵܟܸܠ. 3 ܗܿܘ ܕܐܵܟܸܠ: ܠܗܿܘ ܕܠܵܐ ܐܵܟܸܠ ܠܵܐ ܡܲܣܠܹܐ: ܘܗܿܘ ܕܠܵܐ ܐܵܟܸܠ: ܠܗܿܘ ܕܐܵܟܸܠ ܠܵܐ ܕܵܝܸܢ: ܣܵܒܵܒ ܐܲܠܵܗܵܐ ܩܘܼܒܠܹܗ ܝܠܹܐ. 4 ܐܲܢ̄ܬ ܡܵܢܝܼ ܝܘܸܬ ܕܒܸܕܝܵܢܵܐ ܝܘܸܬ ܠܪܸܓܵܐ ܕܠܵܐ ܕܝܼܘܼܟ: ܠܡܵܪܵܐ ܕܓܵܢܹܗ ܟܹܐ ܟܵܠܹܐ ܝܲܢ ܢܵܦܸܠ. ܐܝܼܢܵܐ ܟܠܵܝܵܐ ܒܸܬ ܟܵܠܹܐ: ܣܵܒܵܒ ܕܟܹܐ ܡܵܨܹܐ ܐܲܠܵܗܵܐ ܡܲܟܠܹܐ ܠܹܗ. 5 ܐܝܼܬ ܕܟܸܐ ܡܝܵܩܸܪ ܝܘܿܡܵܐ (ܙܵܘܕܵܐ) ܡܼܢ ܝܘܿܡܵܐ: ܘܐܝܼܬ ܕܟܹܐ ܡܝܵܩܸܪ ܟܠ ܝܘܿܡܵܐ: ܐܝܼܢܵܐ ܟܠ ܐܢܵܫܵܐ ܒܚܝܼܵܠ ܕܓܵܢܹܗ ܦܵܝܸܫ ܡܘܼܩܘܝܼܵܐ. 6 ܡܿܢ ܕܚܵܫܸܒܼ ܠܝܘܿܡܵܐ: ܠܡܵܪܲܢ ܟܹܐ ܚܵܫܸܒܼ ܠܹܗ. ܘܗܿܘ ܕܐܵܟܸܠ: ܠܡܵܪܲܢ ܟܹܐ ܐܵܟܸܠ: ܣܵܒܵܒ ܕܐܲܠܵܗܵܐ ܟܹܐ ܫܵܟܸܪ. ܘܗܿܘ ܕܠܵܐ ܐܵܟܸܠ: ܠܡܵܪܲܢ ܠܹܐ ܐܵܟܸܠ: ܘܟܹܐ ܫܵܟܸܪ ܠܐܲܠܵܗܵܐ. 7 ܣܵܒܵܒ ܠܲܝܬ ܐܢܵܫܵܐ ܡܸܢܲܢ ܕܠܓܵܢܹܗ ܟܹܐ ܚܲܝܹܐ: ܘܠܲܝܬ ܐܢܵܫܵܐ ܕܠܓܵܢܹܗ ܟܹܐ ܡܵܝܸܬ. 8 ܣܵܒܵܒ ܐܸܢ ܚܲܝܵܚ ܠܡܵܪܲܢ ܟܹܐ ܚܲܝܵܚ: ܘܐܸܢ ܡܵܝܬܵܚ: ܠܡܵܪܲܢ ܟܹܐ ܡܵܝܬܵܚ. ܒܲܣ ܐܸܢ ܚܲܝܵܚ ܘܐܸܢ ܡܵܝܬܵܚ: ܕܡܵܪܲܢ ܝܼܘܸܚ. 9 ܣܵܒܵܒ ܠܕܵܐܗܵܐ ܐܘܼܦ ܡܫܝܼܚܵܐ ܡܸܬܠܹܐ ܘܚܸܠܹܐ: ܕܗܿܘ ܗܵܘܹܐ ܡܵܪܝܵܐ ܠܡܝܼܬܹ̈ܐ ܘܠܚܵܝܹ̈ܐ. 10 ܐܝܼܢܵܐ ܐܢ̄ܬ ܩܵܡܘܼܕܝܼ ܒܸܕܝܵܢܵܐ ܝܘܸܬ ܠܐܵܚܘܿܢܘܼܟ: ܝܲܢ ܐܘܼܦ ܐܢ̄ܬ ܩܵܡܘܼܕܝܼ ܡܲܣܠܘܼܝܹܐ ܝܘܸܬ ܠܐܵܚܘܿܢܘܼܟ: ܣܵܒܵܒ ܟܠܲܢ ܒܸܬ ܟܵܠܵܚ ܩܵܕ̄ܡ ܟܘܼܪܣܝܵܐ ܕܕܝܼܘܵܢ ܕܡܫܝܼܚܵܐ. 11 ܣܵܒܵܒ ܕܟܬܝܼܒܼܵܐ ܝܠܹܐ: ܚܲܝܵܐ ܝܘܸܢ: ܒܸܐܡܵܪܵܐ ܝܠܹܐ ܡܵܪܝܵܐ: ܐܸܠܝܼ ܒܸܬ ܒܵܪܟܵܐ ܟܠ ܒܘܼܪܟܵܐ: ܘܠܲܐܠܵܗܵܐ ܒܸܬ ܡܵܘܕܹܐ ܟܠ ܠܸܫܵܢܵܐ. 12 ܒܲܣ ܟܠ ܐܢܵܫܵܐ ܡܸܢܲܢ ܓܘܼܘܵܒ ܡܼܢ ܓܸܒܵܐ ܕܓܵܢܹܗ ܒܸܬ ܝܵܗ̄ܒܸܠ ܠܐܲܠܵܗܵܐ. 13 ܒܲܣ ܡܐܵܕܝܼܵܐ ܠܵܐ ܕܵܝܢܵܚ ܚܵܕ̄ ܠܗܿܘ ܐܚܹܪ̄ܢܵܐ: ܐܸܠܵܐ ܐܵܗܵܐ ܕܘܼܢܘܿܢ ܙܵܘܕܵܐ: ܕ܆ܬܘܼܪܩܵܠܵܐ ܝܲܢ ܗܲܓܲܬ ܕܢܦܵܠܬܵܐ ܠܵܐ ܡܲܬܒܼܬ ܠܐܵܚܘܿܢܘܼܟ. 14 ܒܝܼܕܲܥܝܵܐ ܝܘܸܢ ܘܗܲܪ ܗܘܼܡܸܢܵܐ ܝܘܸܢ ܒܡܵܪܝܵܐ ܝܼܫܘܿܥ: ܕܠܲܝܬ ܡܸܢܕܝܼ ܕܛܲܡܵܐܐ ܝܠܹܐ ܡܼܢ ܓܵܢܹܗ. ܐܸܠܵܐ ܠܗܿܘ ܕܚܵܫܸܒܼ ܥܲܠ ܡܸܢܕܝܼ ܕܛܲܡܵܐܐ ܝܠܹܐ: ܠܗܿܘ ܛܲܡܵܐܐ ܝܠܹܐ. 15 ܣܵܒܵܒ ܐܸܢ ܥܲܠ ܡܸܐܟܼܘܼܠܬܵܐ ܦܵܝܸܫ ܡܘܼܦܫܵܡܵܐ ܐܵܚܘܿܢܘܼܟ: ܠܹܐ ܝܘܸܬ ܐܚܸܪ̄ܢܵܐ ܒܸܚܕܵܪܵܐ ܒܚܘܼܒܵܐ. ܠܵܐ ܬܵܠܩܸܬ ܒܡܹܐܟܼܘܼܠܬܘܼܟ 16 ܠܗܿܘ ܕܒܚܵܬܸܪܸܗ ܡܸܬܠܹܐ ܡܫܝܼܚܵܐ. ܘܠܵܐ ܦܵܝܫܵܐ ܓܕܝܼܦܬܵܐ ܛܵܒܼܬܘܟܼܘܿܢ. 17 ܣܵܒܵܒ ܡܲܠܟܘܼܬܹܗ ܕܐܲܠܵܗܵܐ ܠܹܐ ܝܠܵܐ ܐܟܼܵܠܵܐ ܘܫܬܵܝܵܐ: ܐܸܠܵܐ ܙܲܕܝܼܩܘܼܬܵܐ ܘܫܠܵܡܵܐ ܘܚܲܕܘܼܬܵܐ ܒܪܘܼܚܵܐ ܕܩܘܼܕܫܵܐ. 18 ܣܵܒܵܒ ܡܿܢ ܕܒܲܐܢܸܐ ܥܵܒܸܕ ܚܸܠܡܲܬ ܠܡܫܝܼܚܵܐ ܟܹܐ ܫܵܦܸܪ ܠܐܲܠܵܗܵܐ: ܘܩܵܕ̄ܡ ܒܢܲܝ̈ܢܵܫܵܐ ܪܸܕܝܵܐ ܝܠܹܐ. 19 ܒܲܣ ܒܵܬ̄ܪ ܫܠܵܡܵܐ ܪܵܚܛܵܚ. ܘܒܵܬ̄ܪ ܒܸܢܝܵܢܵܐ ܕܚܵܪ̄ ܕܗܿܘ ܐܚܹܪ̄ܢܵܐ. 20 ܘܠܵܐ ܒܘܼܬ ܡܹܐܟܼܘܼܠܬܵܐ ܒܵܛܠܸܬ ܦܘܼܠܚܵܢܵܐ ܕܐܲܠܵܗܵܐ. ܣܵܒܵܒ ܟܠ ܡܢܕܝܼ ܕܟܼܝܵܐ ܝܠܹܐ: ܐܝܼܢܵܐ ܣܸܪܝܵܐ ܝܠܹܐ ܠܐܢܵܫܵܐ ܕܐܵܟܸܠ ܒܬܲܪܩܲܠܬܵܐ. 21 ܨܦܵܝܝܼ ܝܠܵܐ ܠܵܐ ܠܹܐܟܼܵܠܵܝ ܒܸܣܪܵܐ: ܘܠܵܐ ܠܸܫܬܵܝܵܐ ܚܲܡܪܵܐ: ܘܠܵܐ ܠܥܸܒܼܵܕܵܐ ܡܸܢܕܝܼ ܕܒܝܹܗ ܬܲܪܩܸܠ ܐܵܚܘܿܢܲܢ. 22 ܐܲܢ̄ܬ ܕܐܝܼܬ ܠܘܼܟ ܗܲܝܡܵܢܘܼܬܵܐ: ܠܓܵܢܘܼܟ ܕܒܼܘܿܩ ܠܵܗܿ ܩܵܕ̄ܡ ܐܲܠܵܗܵܐ. ܛܘܼܒܼܵܐ ܠܗܿܘ ܕܠܵܐ ܕܵܝܸܢ ܓܵܢܹܗ ܒܡܸܢܕܝܼ ܕܩܵܒܸܿܠ. 23 ܣܵܒܵܒ ܗܿܘ ܕܦܵܝܸܫ ܕܘܼܒܵܪ: ܐܸܢ ܐܵܟܸܠ: ܗ̄ܘܹܠܹܐ ܓܘܼܢܵܗܟܵܪ: ܣܵܒܵܒ ܕܠܹܐ ܗ̄ܘܵܐ ܒܗܲܝܡܵܢܘܼܬܵܐ. ܣܵܒܵܒ ܟܠ ܡܸܢܕܝܼ ܕܠܹܐ ܝܠܹܐ ܡܼܢ ܗܲܝܡܵܢܘܼܬܵܐ ܚܛܝܼܬܵܐ ܝܠܹܐ.

ܩܦܠܐܘܢ: ܝܗ

1 ܒܲܣ ܐܸܠܲܢ ܚܲܝܠܵܢܹ̈ܐ ܘܵܓܸܒ ܝܼܠܵܐ ܕܡܲܪ̈ܥܹܐ ܕܙܲܒܘܼܢܹ̈ܐ ܛܵܥܢܵܚ: ܘܠܵܐ ܠܓܵܢܲܢ ܫܵܦܪܵܚ. 2 ܐܸܠܵܐ ܟܠ ܐܢܵܫܵܐ ܡܸܢܲܢ ܫܵܦܸܪ ܠܫܒܼܵܒܼܘܼܗܝ ܒܛܵܒܼܵܬܹ̈ܐ: ܐܲܝܟ ܕܠܒܸܢܝܵܢܵܐ. 3 ܣܵܒܵܒ ܐܘܼܦ ܡܫܝܼܚܵܐ ܠܓܵܢܹܗ ܠܵܐ ܫܦܸܪܹܐ: ܐܸܠܵܐ ܐܲܝܟ ܕܝܼܠܵܐ ܟܬܝܼܒܼܵܐ: ܠܵܘܡܹ̈ܐ ܕܠܵܝܡܵܢܘܼ̈ܟ ܢܦܸܠܘܿܢ ܥܲܠܝܼ. 4 ܣܵܒܵܒ ܟܠ ܡܢܕܝܼ ܕܡܼܢ ܩܵܕ̄ܡܵܝܬܵܐ ܦܸܫܠܹܐ ܟܬܝܼܒܼܵ: ܠܝܘܼܠܦܵܢܵܐ ܕܝܸܢ ܦܸܫܠܹܐ ܟܬܝܼܒܼܵܐ: ܕܒܚܡܵܠܬܵܐ ܘܒܝܵܗ̄ܒܲܠܬܵܐ ܕܠܸܒܵܐ ܕܟܬܵܒܹ̈ܐ ܗܵܘܝܵܐ ܠܲܢ ܗܸܒܼܝܼ. 5 ܘܐܲܠܵܗܵܐ ܕܚܡܵܠܬܵܐ ܘܕܝܵܗ̄ܒܲܠܬܵܐ ܕܠܸܒܵܐ ܝܵܗ̄ܒܸܠ ܠܵܘܟܼܘܿܢ ܕܗܲܪ ܚܵܕ̄ ܡܸܢܕܝܼ ܚܵܫܒܼܝܼܬܘܿܢ ܚܵܕ̄ ܥܲܠ ܕܗܿܘ ܐܚܹܪ̄ܢܵܐ: ܒܝܼܫܘܿܥ ܡܫܝܼܚܵܐ: 6 ܕܒܚܵܕ̄ ܚܵܝܼܠ: ܘܒܚܵܕ̄ ܦܘܼܡܵܐ: ܫܵܒܿܚܝܼܬܘܿܢ ܠܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 7 ܣܵܒܵܒ ܕܐܵܗܵܐ ܩܵܒܿܠܘܿܢ ܚܵܕ̄ ܠܗܿܘ ܐܚܹܪ̄ܢܵܐ: ܕܵܐܟܼܝܼ ܐܘܼܦ ܡܫܝܼܚܵܐ ܩܘܼܒܠܸܬܘܿܢܠܹܐ ܠܚܸܩܪܹܗ ܕܐܲܠܵܗܵܐ. 8 ܣܵܒܵܒ ܒܹܐܡܵܪܵܐ ܝܘܸܢ ܕܝܼܫܘܿܥ ܡܫܝܼܚܵܐ ܗ̄ܘܹܠܹܐ ܚܸܠܡܲܬܟܵܪ ܕܓܙܘܼܪܬܵܐ ܣܵܒܵܒ ܕܣܲܪܲܣܬܘܼܬܵܐ ܕܐܲܠܵܗܵܐ: ܕܡܲܩܘܹܐ ܗ̄ܘܵܐ ܩܵܘܠܹ̈ܐ (ܝܘܼܗ̄ܒܹܐ) ܠܐܲܒܼܵܗܵܬܹ̈ܐ: 9 ܘܕܛܵܝܸܦܹ̈ܐ ܫܵܒܿܚܝܼ ܠܐܲܠܵܗܵܐ ܣܵܒܵܒ ܕܪ̈ܚܡܹܐ: ܐܲܝܟ ܕܝܼܠܹܐ ܟܬܝܼܒܼܵܐ: ܣܵܒܵܒ ܕܐܵܗܵܐ ܒܸܬ ܡܵܘܕܸܢ ܐܸܠܘܼܟ ܓܵܘܵܐ ܕܛܵܝܸܦܹ̈ܐ: ܘܠܫܸܡܘܼܟ ܒܸܬ ܙܵܡܪܸܢ 10 ܘܡܸܕܪܹܐ ܐܡܸܪܹܐ: ܥܒܼܘܿܕܘܿܢ ܒܘܼܣܵܡܵܐ: ܡܸܠܲܬܹ̈ܐ: ܥܲܡ ܛܵܝܸܦܹܗ. 11 ܘܡܸܕܪܹܐ: ܫܵܒܿܚܘܿܢ ܠܡܵܪܝܵܐ: ܟܠܵܘܟܼܘܿܢ ܛܵܝܸܦܹ̈ܐ: ܫܵܟܪܘܿܢ ܠܹܗ: ܟܠܵܝ ܡܸܠܲܬܹ̈ܐ. 12 ܘܡܸܕܪܹܐ ܐܸܫܲܥܝܵܐ ܐܡܸܪܹܐ: ܒܸܬ ܗܵܘܹܐ ܥܸܩܪܵܐ ܠܐܝܼܫܲܝ: ܘܗܿܘ ܕܩܵܝܸܡ ܕܗܵܘܹܐ ܪܹܫܵܐ ܠܛܵܝܸܦܹ̈ܐ: ܥܲܠܘܼܗܝ ܒܸܬ ܦܵܝܫܝܼ ܒܗܹܒܼܝܼ ܛܵܝܸܦܹ̈ܐ. 13 ܐܝܼܢܵܐ ܐܲܠܵܗܵܐ ܕܗܹܒܼܝܼ ܡܵܠܹܐ ܠܵܘܟܼܘܿܢ ܟܠܵܗܿ ܚܲܕܘܼܬܵܐ: ܘܫܠܵܡܵܐ ܒܗܲܝܡܵܢܘܼܬܵܐ: ܕܙܵܝܕܝܼܬܘܿܢ ܒܗܹܒܼܝܼ: ܒܚܲܝܠܵܐ ܕܪܘܼܚܵܐ ܕ܆ܩܘܼܕܫܵܐ. 14ܘܐܘܼܦ ܐܵܢܵܐ ܗܲܪ ܗܘܼܡܸܢܵܐ ܝܘܸܢ ܒܘܼܬ ܕܝܼܵܟܼܘܿܢ: ܐܵܚܘܿܢܘܵܬܝܼ̈: ܕܐܘܼܦ ܐܲܚܬܘܿܢ ܛܵܒܼܬܵܐ: ܘܬܲܡܵܡ ܝܼܬܘܿܢ ܒܟܠܵܗܿ ܝܕܥܹܬܵܐ: ܘܕܡܵܨܝܼܬܘܿܢ ܐܘܼܦ ܠܝܼܵܗ̄ܒܼܵܐ ܢܲܨܝܼܗܲܬ ܚܵܕ̄ ܠܗܿܘ ܐܚܹܪ̄ܢܵܐ. 15 ܐܝܼܢܵܐ ܙܵܘܕܵܐ ܒܩܲܫܕܲܪܬܵܐ ܟܬܸܒܼܠܝܼ ܐܸܠܵܘܟܼܘܿܢ ܒܚܵܕ̄ ܣܵܡܵܐ: ܐܵܚܘܿܢܘܵܬܝ̈: ܕܡܲܕܟܸܪܸܢܵܘܟܼܘܿܢ: ܣܵܒܵܒ ܕܫܵܦܵܩܲܬ ܕܦܸܫܠܵܐ ܝܸܗܒܸܠܬܵܐ ܐܸܠܝܼ ܡܼܢ ܐܲܠܵܗܵܐ: 16 ܕܗܵܘܸܢ ܚܸܠܡܲܬܟܵܪ ܕܝܼܫܘܿܥ ܡܫܝܼܚܵܐ ܠܛܵܝܸܦܹ̈ܐ: ܘܦܵܠܚܸܢ ܠܐܹܘܵܢܓܵܠܝܼܘܿܢ ܕܐܲܠܵܗܵܐ: ܕܡܲܩܪܲܒܼܬܵܐ ܕܛܵܝܸܦܹ̈ܐ ܗܵܘܝܵܐ ܡܲܩܒܘܼܠ: ܘܡܩܘܸܕܸܫܵܐ ܒܪܘܼܚܵܐ ܕܩܘܼܕܫܵܐ. 17 ܐܝܼܬ ܠܝܼ ܗܲܕܟܼܵܐ ܫܘܼܒܼܗܵܪܵܐ ܒܝܼܫܘܿܥ ܡܫܝܼܚܵܐ ܒܡܸܢܕܝܼܵܢܹ̈ܐ ܕܠܟܸܣ ܐܲܠܵܗܵܐ. 18 ܣܵܒܵܒ ܠܹܐ ܩܲܫܕܸܪܸܢ ܕܐܵܡܪܸܢ ܥܲܠ ܡܸܢܕܝܼܵܢܹ̈ܐ ܕܠܵܐ ܦܠܸܚܠܹܐ ܡܫܝܼܚܵܐ ܒܐܝܼܕܝܼ̈: ܠܡܲܫܡܵܥܝܬܵܐ ܕܛܵܝܸܦܹ̈ܐ: ܒܗܹܡܸܙܡܵܢ ܘܒܦܘܼܠܚܵܢܹ̈ܐ: 19 ܒܚܲܝܠܵܐ ܕܢܝܼܫܲܢܩܹ̈ܐ ܘܕܥܵܓܸܒܘܼ̈ܝܵܬܵܐ: ܘܒܚܲܝܠܵܐ ܕܪܘܼܚܹܗ ܕܐܲܠܵܗܵܐ: ܗܲܕܟܼܵܐ ܕܡܼܢ ܐܘܿܪܸܫܠܸܡ: ܘܚܵܕܸܪܘܵܢܹܐ ܗܲܠ ܐܸܠܘܿܪܝܼܩܘܿܢ: ܬܘܼܡܸܡܵܐ ܝܘܸܢ ܡܲܫܚܲܕܬܹܗ: 20 ܟܲܕ ܗܲܕܟܼܵܐ ܚܵܒܿܘܿܛܹܐ ܝܘܸܢ ܕܡܲܫܚܸܕܸܢ: ܠܵܐ ܐܲܝܟܵܐ ܕܦܸܫܠܹܐ ܩܸܪܝܵܐ ܫܸܡܹܗ ܕܡܫܝܼܚܵܐ: ܕܠܵܐ ܒܵܢܸܢ ܥܲܠ ܒܸܢܝܲܬ ܕܚܵܕ̄ ܐܚܹܪ̄ܢܵܐ: 21 ܐܸܠܵܐ ܕܵܐܟܼܝܼ ܕܝܼܠܹܐ ܟܬܝܼܒܼܵܐ: ܘܐܵܢܝܼ ܕܠܵܐ ܦܸܫܠܹܐ ܐܡܝܼܪܵܐ ܐܸܠܵܝ ܒܘܼܬ ܕܝܹܗ: ܒܸܬ ܚܵܙܝܼ ܠܹܗ: ܘܐܵܢܝܼ ܕܠܵܐ ܫܡܸܥܠܘܿܢ ܒܸܬ ܦܲܪܡܝܼ. 22 ܣܵܒܵܒ ܕܐܵܗܵܐ ܦܸܫܠܝܼ ܡܘܼܟܠܝܼܵܐ ܐܲܢܹܐ ܪܵܒܵܐ ܓܵܗܹ̈ܐ ܡܼܢ ܕܐܵܬܸܢ ܠܟܸܣܠܵܘܟܼܘܿܢ. 23 ܐܝܼܢܵܐ ܐܵܕܝܼܵܐ: ܣܵܒܵܒ ܕܐܚܹܪ̄ܢܵܐ ܕܘܼܟܵܐ ܠܲܝܬ ܠܝܼ ܒܐܲܢܹܐ ܐܲܬܪܵܘܵܬܹܐ: ܘܫܘܼܗ̄ܘܸܬܵܐ ܝܘܸܢ ܗ̄ܘܵܐ ܡܼܢ ܩܵܕ̄ܡ ܪܵܒܵܐ ܫܸܢܹ̈ܐ ܕܐܵܬܸܢ ܠܟܸܣܠܵܘܟܼܘܿܢ: 24 ܐܝܼܡܲܢ ܐܵܙܸܠ̄ܢ ܠܐܸܣܦܵܢܝܼܵܐ: ܣܵܒܵܒ ܐܝܼܬ ܠܝܼ ܗܸܒܼܝܼ ܕܟܲܕ ܥܵܒܼܕܸܢ ܣܵܦܵܪ ܚܵܙܸܢܵܘܟܼܘܿܢ: ܘܐܲܚܬܘܿܢ ܡܲܦܫܸܛܝܼܬܘܿܢ ܠܝܼ ܠܬܵܡܵܐ: ܐܸܢ ܩܵܕ̄ܡܵܝܬܵܐ ܚܵܕ̄ ܩܵܕܸܪ ܦܵܝܫܸܢ ܡܸܠܝܵܐ ܒܘܼܣܵܡܵܐ ܒܚܙܵܝܬܵܘܟܼܘܿܢ: 25 ܐܝܼܢܵܐ ܐܵܕܝܼܵܐ: (ܒܹܐܡܵܪܵܐ ܝܘܸܢ): ܒܹܐܙܵܠܵܐ ܝܘܸܢ ܠܐܘܿܪܸܫܠܸܡ: ܕܥܵܒܼܕܸܢ ܚܸܠܡܲܬ ܠܩܲܕܝܼܫܹ̈ܐ. 26 ܣܵܒܵܒ ܕܒܣܸܡܠܵܐ ܠܗ̄ܘܿܢ ܐܵܢܝܼ ܕܒܡܵܩܸܕܘܿܢܝܼܵܐ ܘܒܵܐܟܼܵܐܝܼܵܐ: ܕܗܵܘܝܵܐ ܠܗ̄ܘܿܢ ܫܵܪܝܼܟܘܼܬܵܐ ܥܲܡ ܡܸܣܟܹܢܹ̈ܐ ܩܲܕܝܼܫܹ̈ܐ ܕܓܵܘ ܐܘܿܪܸܫܠܸܡ. 27 ܒܣܸܡܠܵܐ ܠܗ̄ܘܿܢ: ܣܵܒܵܒ ܕܐܘܼܦ ܕܵܝܢܵܢܹ̈ܐ ܝܢܵܐ ܐܸܠܝܼ. ܣܵܒܵܒ ܐܸܢ ܒܡܸܢܕܝܼܵܢܹ̈ܐ ܕܪܘܼܚܵܐ ܦܸܫܠܘܿܢ ܫܘܼܪܟܵܐ ܥܲܡܵܝ ܛܵܝܦܹ̈ܐ: ܕܵܝܢܗܵܢܹ̈ܐ ܝܢܵܐ ܕܐܘܼܦ ܒܡܸܢܕܝܼܵܢܹ̈ܐ ܕܒܸܣܪܵܐ ܥܵܒܼܕܝܼ ܠܗ̄ܘܿܢ ܚܸܠܡܲܬ. 28 ܗܲܕܟܼܵܐ ܐܝܼܡܲܢ ܕܬܲܡܸܡܸܢ ܠܐܵܗܵܐ: ܘܚܵܬܡܸܢ ܐܸܠܵܝ ܐܵܗܵܐ ܛܥܘܼܢܬܵܐ: ܒܸܬ ܥܵܒܼܕܸܢ ܡܼܢ ܠܟܸܣܠܵܘܟܼܘܿܢ ܠܐܸܣܦܵܢܝܼܵܐ. 29 ܘܒܝܼܕܲܥܝܵܐ ܝܘܸܢ ܕܐܝܼܡܲܢ ܕܐܵܬܸܢ ܠܟܸܣܠܵܘܟܼܘܿܢ: ܒܬܲܡܵܡܵܬܘܼܬܵܐ ܕܒܘܼܪܟܬܵܐ ܕܐܸܘܵܢܓܵܠܝܼܘܿܢ ܕܡܫܝܼܚܵܐ ܒܸܬ ܐܵܬܸܢ. 30 ܐܵܕܝܼܵܐ ܦܲܪܦܘܼܠܹܐ ܝܘܸܢ ܒܪܵܘܟܼܘܿܢ: ܐܵܚܘܿܢܘܵܬܝܼ̈: ܒܡܵܪܲܢ ܝܼܫܘܿܥ ܡܫܝܼܚܵܐ: ܘܒܚܘܼܒܵܐ ܕܪܘܼܚܵܐ: ܕܐܵܟܼܠܝܼܬܘܿܢ ܓܵܦܵܐ ܥܲܡܝܼ ܒܨܠܘܿܬܵܐ ܡܒܵܕܠܝܼ ܠܟܸܣ ܐܲܠܵܗܵܐ: 31 ܕܦܵܝܫܸܢ ܦܘܼܨܝܵܐ ܡܼܢ ܕܐܵܢܝܼ ܕܒܝܼܗܘܼܕ ܕܠܹܐ ܝܢܵܐ ܡܲܨܝܘܼܬܹܐ: ܘܕܚܠܡܲܬܝܼ ܠܐܘܿܪܸܫܠܸܡ ܗܵܘܝܵܐ ܨܦܵܝܝܼ ܩܒܿܝܼܠܬܵܐ ܡܼܢ ܩܲܕܝܼܫܹ̈ܐ: 32 ܕܐܵܬܸܢ ܠܟܸܣܠܵܘܟܼܘܿܢ ܒܚܲܕܘܼܬܵܐ ܒܪܸܙܵܝܹܗ ܕܐܲܠܵܗܵܐ: ܘܥܲܡܵܘܟܼܘܿܢ ܡܸܚܕܵܕܹ̈ܐ ܦܵܝܫܸܢ ܡܘܼܢܝܸܚܵܐ. 33 ܘܐܲܠܵܗܵܐ ܕܫܠܵܡܵܐ ܗܵܘܹܐ ܥܲܡ ܟܠܵܘܟܼܘܿܢ: ܐܵܡܹܝܢ.

ܩܦܠܐܘܢ: ܝܘ

1 ܣܵܦܘܿܝܵܐ ܝܘܸܢ ܒܝܼܵܘܟܼܘܿܢ ܠܦܹܘܒܹܿܐ ܚܵܬܲܢ: ܕܝܼܠܵܐ ܚܸܠܡܲܬܟܵܪ ܕܥܸܕܬܵܐ ܕܩܵܢܟܪܹܐܘܿܣ: 2 ܕܩܵܒܿܠܝܼܬܘܿܢ ܠܵܗܿ ܒܡܵܪܲܢ: ܐܲܝܟ ܕܚܵܫܚܵܐ ܠܩܲܕܝܼܫܹ̈ܐ: ܘܒܟܠ ܡܸܢܕܝܼ ܕܣܵܢܩܵܐ ܐܸܠܵܘܟܼܘܿܢ ܗܲܝܸܪܝܼܬܘܿܢ ܠܵܗܿ: ܣܵܒܵܒ ܕܐܘܼܦ ܗܼܝ ܗ̄ܘܹܠܵܐ ܗܲܝܸܪܵܢܬܵܐ ܠܪܵܒܵܐ: ܐܘܼܦ ܐܸܠܝܼ. 3 ܗܲܒ̄ܠܘܿܢ ܫܠܵܡܵܐ ܠܦܪܝܼܣܩܸܠܵܐ ܘܠܵܐܩܸܠܘܿܣ: ܦܵܠܵܚܹ̈ܐ ܥܲܡܝܼ ܒܝܼܫܘܿܥ ܡܫܝܼܚܵܐ: 4 ܐܵܢܝܼ ܕܡܼܢ ܓܸܒܵܐ ܕܓܵܢܵܐ ܕܝܼܝܼ ܩܕܵܠܵܝ̈ ܝܸܗܒܸܠܘܿܢ: ܘܠܵܐ ܗܲܪ ܐܵܢܵܐ ܒܸܛܥܵܢܵܐ ܝܘܸܢ ܡܸܢܬܵܐ ܡܸܢܵܝ: ܐܸܠܵܐ ܐܘܼܦ ܟܠܵܝ ܥܹܕܵܬܹ̈ܐ ܕܛܵܝܸܦܹ̈ܐ. 5 ܘܗܲܒ̄ܠܘܿܢ ܫܠܵܡܵܐ ܠܥܸܕܬܵܐ ܕܓܵܘ ܒܲܝܬܵܝ. ܗܲܒ̄ܠܘܿܢ ܫܠܵܡܵܐ ܠܐܵܦܸܢܛܘܿܣ ܡܘܼܚܸܒܝܼ: ܗܿܘ ܕܝܼܠܹܐ ܪܸܫܝܼܬܵܐ ܕܐܵܟܼܵܐܝܼܵܐ ܒܡܫܝܼܚܵܐ. 6 ܗܲܒ̄ܠܘܿܢ ܫܠܵܡܵܐ ܠܡܲܪܝܲܡ: ܗܿܝ ܕܪܵܒܵܐ ܐܟܸܠܵܐ ܓܵܦܵܐ ܥܲܠܲܢ. 7 ܗܲܒ̄ܠܘܿܢ ܫܠܵܡܵܐ ܠܐܵܢܕܪܘܿܢܝܼܩܘܿܣ ܘܠܝܘܿܢܝܼܵܐ: ܚܸܙܡܝܼ̈: ܘܐܲܣܝܼܪܹ̈ܐ ܥܲܡܝܼ: ܕܡܵܪܹ̈ܐ ܫܸܡܵܐ ܝܢܵܐ ܓܵܘ ܫܠܝܼܚܹ̈ܐ: ܘܡܩܵܕ̄ܡ ܕܝܼܝܼ ܗ̄ܘܹܠܘܿܢ ܒܡܫܝܼܚܵܐ. 8 ܗܲܒ̄ܠܘܿܢ ܫܠܵܡܵܐ ܠܐܘܼܒܵܢܘܿܣ: ܡܘܼܚܸܒܝܼ ܒܡܵܪܲܢ. 9 ܗܲܒ̄ܠܘܿܢ ܫܠܵܡܵܐ ܠܐܘܼܪܒܵܢܘܿܣ: ܦܵܠܵܚܵܐ ܥܲܡܲܢ ܒܡܫܝܼܚܵܐ: ܘܠܸܐܣܛܵܟܼܝܼܘܿܣ ܡܘܼܚܸܒܝܼ. 10 ܗܲܒ̄ܠܘܿܢ ܫܠܵܡܵܐ ܠܐܵܦܲܠܹܐ: ܩܘܼܒܿܠܵܐ ܒܡܫܝܼܚܵܐ. ܗܵܒ̄ܠܘܿܢ ܫܠܵܡܵܐ ܠܒܢܲܝ̈ ܒܲܝܬܹܗ ܕܐܵܪܸܣܛܵܒܼܘܼܠܘܿܣ. 11 ܗܲܒ̄ܠܘܿܢ ܫܠܵܡܵܐ ܠܗܸܪܘܿܕܝܼܘܿܢ ܚܸܙܡܝܼ. ܗܲܒ̄ܠܘܿܢ ܫܠܵܡܵܐ ܠܒܢܲܝ̈ ܒܲܝܬܹܗ ܕܢܵܪܩܸܣܘܿܣ: ܐܵܢܝܼ ܕܝܼܢܵܐ ܒܡܵܪܲܢ. 12 ܗܲܒ̄ܠܘܿܢ ܫܠܵܡܵܐ ܠܛܪܘܼܦܸܢܵܐ ܘܠܛܪܘܼܦܸܣܵܐ: ܐܵܟܼܠܵܢܹ̈ܐ ܕܓܵܦܵܐ ܒܡܵܪܲܢ. ܗܲܒ̄ܠܘܿܢ ܫܠܵܡܵܐ ܠܦܲܪܣܸܣ ܡܘܼܚܸܒܲܢ: ܗܿܝ ܕܪܵܒܵܐ ܐܟܸܠܵܐ ܓܵܦܵܐ ܒܡܵܪܲܢ. 13 ܗܲܒ̄ܠܘܿܢ ܫܠܵܡܵܐ ܠܪܘܼܦܘܿܣ ܓܘܼܒܿܝܵܐ ܒܡܵܪܲܢ: ܘܠܝܸܡܵܐ ܕܝܹܗ ܘܕܝܼܝܼ. 14 ܗܲܒ̄ܠܘܿܢ ܫܠܵܡܵܐ ܠܐܵܣܘܿܢܩܪܸܛܘܿܣ: ܘܠܵܐܦܸܠܓܼܘܿܢ: ܘܠܗܵܪܡܵܣ: ܘܠܦܲܛܪܵܒܼܵܣ: ܘܠܗܵܪܡܹܣ: ܘܠܵܐܚܘܿܢܘܵܬܹ̈ܐ ܕܥܲܡܵܝ. 15 ܗܲܒ̄ܠܘܿܢ ܫܠܵܡܵܐ ܠܦܝܼܠܵܠܵܓܼܘܿܣ: ܘܠܝܘܿܠܝܼܵܐ: ܘܠܢܹܐܪܹܣ ܘܠܚܵܬܹܗ: ܘܠܐܵܠܘܿܡܦܵܣ: ܘܠܟܠܵܝ ܩܲܕܝܼܫܹ̈ܐ ܕܝܼܢܵܐ ܥܲܡܵܝ. 16 ܗܲܒ̄ܠܘܿܢ ܫܠܵܡܵܐ ܚܵܕ̄ ܠܗܿܘ ܐܚܹܪ̄ܢܵܐ ܒܢܫܘܼܩܬܵܐ ܩܲܕܝܼܫܬܵܐ. ܒܝܼܵܗ̄ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܟܠܵܝ ܥܹܕܵܬܹ̈ܐ ܕܡܫܝܼܚܵܐ. 17 ܐܝܼܢܗܵܐ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ: ܐܵܚܘܿܢܘܵܬܝܼ̈: ܕܗܵܘܝܼܬܘܿܢ ܗܸܫܝܵܪ ܡܐܵܢܝܼ ܕܥܵܒܼܕܝܼ ܕܘܼܒܵܪ̈ܘܼܝܵܬܹܐ ܘܬܘܼܪ̈ܩܵܠܹܐ: ܠܒܲܕܲܪ ܡܼܢ ܝܘܼܠܦܵܢܵܐ ܕܐܲܚܬܘܿܢ ܝܠܸܦܠܵܘܟܼܘܿܢ: ܕܦܵܝܫܝܼܬܘܿܢ ܪܚܝܼܩܹܐ ܡܤܢܵܝ. 18 ܣܵܒܵܒ ܐܵܢܝܼ ܕܗܲܕܟܼܵܐ ܝܢܵܐ ܠܹܐ ܥܵܒܼܕܝܼ ܚܸܠܡܲܬ ܠܡܵܪܲܢ ܝܼܫܘܿܥ ܡܫܝܼܚܵܐ: ܐܸܠܵܐ ܠܟܸܪ̄ܣܵܐ ܕܓܵܢܵܝ: ܘܒܗܹܡܸܙܡܵܢܹ̈ܐ ܟ̰ܘܼܥܝܹ̈ܐ ܘܒܵܣܝܼܡܹ̈ܐ ܟܹܐ ܡܲܚܠܸܛܝܼ ܠܸܒܵܘܵܬܹ̈ܐ ܕܦܫܝܼܛܹ̈ܐ. 19 ܐܝܼܢܵܐ ܡܲܨܝܲܬܬܵܐ ܕܝܼܵܘܟܼܘܿܢ ܗ̄ܘܸܠܵܐ ܡܲܥܠܘܼܡ ܠܟܠ ܐܢܵܫܵܐ. ܒܸܚܕܵܝܵܐ ܝܘܸܢ ܗܲܕܟܼܵܐ ܒܝܼܵܘܟܼܘܿܢ: ܘܒܸܒܲܥܝܵܐ ܝܘܸܢ ܕܗܵܘܝܼܬܘܿܢ ܥܵܩܸܠܕܵܪܹ̈ܐ ܠܛܵܒܼܬܵܐ: ܘܬܲܡܝܼܡܹ̈ܐ ܠܒܿܝܼܫܬܵܐ. 20 ܘܐܲܠܵܗܵܐ ܕܫܠܵܡܵܐ ܒܸܬ ܛܲܚܛܸܚ ܓܲܠܕܹܐ ܠܣܵܛܵܢܵܐ ܬܚܘܿܬ ܐܲܩܠܵܘ̈ܟܼܘܿܢ. ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ ܗܵܘܝܵܐ ܥܲܡܵܘܟܼܘܿܢ. 21 ܒܝܼܵܗ̄ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܛܝܼܡܵܬܹܐܘܿܣ ܦܵܠܵܚܵܐ ܥܲܡܝܼ: ܘܠܘܼܩܝܼܘܿܣ: ܘܐܝܼܵܣܘܿܢ: ܘܣܘܼܣܝܼܦܵܛܪܘܿܣ: ܚܸܙܡܝܼ̈. 22 ܒܝܼܵܗ̄ܒܼܵܐ ܝܘܸܢ ܫܠܵܡܵܐ ܐܸܠܵܘܟܼܘܿܢ: ܐܵܢܵܐ ܛܲܪܛܝܼܘܿܣ: ܕܒܸܟܬܵܒܼܵܐ ܝܘܸܢ ܐܸܓܲܪܬܵܐ ܒܡܵܪܲܢ. 23 ܒܝܼܵܗ̄ܒܼܾܵܐ ܝܠܹܐ ܫܠܵܡܵܐ ܐܸܠܵܘܟܼܘܿܢ ܓܵܐܝܼܘܿܣ: ܡܲܫܪܝܼܵܢܵܐ ܕܝܼܝܼ ܕܟܠܵܗ̄ ܥܹܕܬܵܐ. ܒܝܼܵܗ̄ܒܼܵܐ ܝܠܹܐ ܫܠܵܡܵܐ ܐܸܠܵܘܟܼܘܿܢ ܐܵܪܹܣܛܘܿܣ ܢܵܙܝܼܪ ܕܡܕܝܼܢ̄ܬܵܐ: ܘܩܘܼܐܵܪܛܘܿܣ ܐܵܚܘܿܢܵܐ. 25 ܘܠܗܿܘ ܕܡܵܨܹܐ ܕܡܲܩܘܹܐ ܠܵܘܟܼܘܿܢ ܒܐܹܘܵܢܓܵܠܝܼܘܿܢ ܕܝܼܝܼ ܘܡܲܟܪܲܙܬܵܐ ܕܝܼܫܘܿܥ ܡܫܝܼܚܵܐ: ܐܲܝܟ ܓܸܠܝܵܢܵܐ ܕܣܸܪ ܕܟܘܼܣܝܵܐ ܗ̄ܘܵܐ ܡܼܢ ܙܲܒܼܢܹ̈ܐ ܕܥܵܠܡܹ̈ܐ: 26 ܐܝܼܢܵܐ ܒܐܵܗܵܐ ܙܲܒܼܢܵܐ ܦܸܫܠܹܐ ܓܸܠܝܵܐ: ܘܒܝܹܕ ܟܬ̈ܒܹ̈ܐ ܕܢܒܼ̈ܝܹܐ: ܐܲܝܟ ܦܘܼܩܕܵܢܹܗ ܕܐܲܠܵܗܵܐ ܐܵܒܵܕܝܼܢܵܝܵܐ: ܦܸܫܠܹܐ ܝܕܸܥܝܵܐ ܠܟܠܵܝ ܛܵܝܸܦܹ̈ܐ ܠܡܲܨܝܲܬܬܵܐ ܕܗܲܝܡܵܢܘܼܬܵܐ: 27 ܠܐܲܠܵܗܵܐ ܥܵܩܠܕܵܪ ܒܢܲܦܫܹܗ: ܚܸܩܪܵܐ ܒܝܹܕ ܝܼܫܘܿܥ ܡܫܝܼܚܵܐ: ܠܥܵܠܲܡ ܥܵܠܡܝܼܢ: ܐܵܡܹܝܢ.