ܟܬܒ݂ܐ ܩܕܝܫܐ ܕܕܝܬܩܐ ܚܕܬܐ

ܐܝܟ݂ ܡܦܩܬܐ ܕܦܫܝܛܬܐ

ܐܓܪܬܐ ܕܝܘܚܢܢ ܫܠܝܚܐ

ܩܦܠܐܘܢ ܐ

1 ܡܣܲܒܪܝܼܢ ܚ̄ܢܲܢ ܠܟ݂ܘܿܢ. ܠܗܵܘ ܕܐܝܼܬ݂ܵܘܗܝ ܗܘܵܐ ܡܸܢ ܒܪܵܫܝܼܬ. ܗܵܘ ܕܲܫܡܲܥܢ ܘܲܚܙܲܝܢܵܝܗܝ ܒܥܲܝܢܲܝ̈ܢ. ܚܙܲܝܢ ܘܓܲܫ̣ܢ ܒܐܝܼܕ݂ܲܝ̈ܢ. ܗܵܘ ܕܐܝܼܬ݂ܵܘܗܝ ܡܸܠܬ݂ܵܐ ܕܚܲܝܹ̈ܐ. 2 ܘܚܲܝܹ̈ܐ ܐܸܬ݂ܓ݁ܠܝܼܘ. ܘܲܚܙܲܝܢ ܘܣܵܗܕܝܼܢ ܚ̄ܢܲܢ. ܘܡܲܟ݂ܪܙܝܼܢ ܚ̄ܢܲܢ ܠܟ݂ܘܿܢ ܚܲܝܹ̈ܐ ܕܲܠܥܵܠܲܡ. ܗܵܢܘܿܢ ܕܐܝܼܬܲܝܗܘܿܢ ܗܘܵܘ ܠܘܵܬ݂ ܐܲܒ݂ܵܐ. ܘܐܸܬ݂ܓ݁ܠܝܼܘ ܠܲܢ. 3 ܘܡܸܕܸܡ ܕܲܚܙܲܝܢ ܘܲܫܡܲܥܢ. ܡܵܘܕܥܝܼܢ ܚ̄ܢܲܢ ܐܵܦ ܠܟ݂ܘܿܢ. ܕܬܸܗܘܹܐ ܠܟ݂ܘܿܢ ܫܵܘܬܵܦܘܼܬ݂ܵܐ ܥܲܡܲܢ. ܘܫܵܘܬܵܦܘܼܬܲܢ ܕܹܝܢ ܕܝܼܠܲܢ ܐܝܼܬܹܝܗ݁. ܥܲܡ ܐܲܒ݂ܵܐ ܘܥܲܡ ܒܪܹܗ ܝܼܫܘܿܥ ܡܫܝܼܚܵܐ. 4 ܘܗܵܠܹܝܢ ܟܵܬ݂ܒ݁ܝܼܢ ܚ̄ܢܲܢ ܠܟ݂ܘܿܢ. ܕܚܲܕ݂ܘܼܬܲܢ ܕܲܒ݂ܟ݂ܘܿܢ ܬܸܗܘܹܐ ܡܫܲܡܠܝܵܐ. 5 ܘܗܵܕܹܐ ܗܝܼ ܣܒܲܪܬ݂ܵܐ ܕܲܫܡܲܥܢ ܡܸܢܹܗ. ܘܲܡܣܲܒܪܝܼܢ ܚ̄ܢܲܢ ܠܟ݂ܘܿܢ. ܕܐܲܠܵܗܵܐ ܢܘܼܗܪܵܐ ܗ̄ܘܼ. ܘܚܸܫܘܿܟ݂ܵܐ ܟܠ ܟܠܹܗ ܠܲܝܬܿ ܒܹܗ. 6 ܘܐܸܢ ܐܵܡܪܝܼܢ ܚ̄ܢܲܢ ܕܫܵܘܬܵܦܘܼܬ݂ܵܐ ܐܝܼܬ݂ ܠܲܢ ܥܲܡܹܗ ܘܲܡܗܲܠܟ݂ܝܼܢ ܚ̄ܢܲܢ ܒܚܸܫܘܿܟ݂ܵܐ. ܕܲܓܵܠܹ̈ܐ ܚܢܲܢ ܘܠܵܘ ܒܲܫܪܵܪܵܐ ܪܵܕܹܝܢ ܚ̄ܢܲܢ. 7 ܐܸܢ ܕܹܝܢ ܒܢܘܼܗܪܵܐ ܡܗܲܠܟ݂ܝܼܢ ܚ̄ܢܲܢ ܐܲܝܟ݂ ܕܗܘܼ ܐܝܼܬ݂ܵܘܗܝ ܒܢܘܼܗܪܵܐ. ܐܝܼܬ݂ ܠܲܢ ܫܵܘܬܵܦܘܼܬ݂ܵܐ ܥܲܡ ܚܕ݂ܵܕܹ̈ܐ: ܘܲܕ݂ܡܵܐ ܕܝܼܫܘܿܥ ܒܪܹܗ ܡܕ݂ܲܟܹܐ ܠܲܢ ܡܸܢ ܟܠܗܘܿܢ ܚܛܵܗܲܝ̈ܢ. 8 ܘܐܸܢ ܢܹܐܡܲܪ ܕܠܲܝܬܿ ܠܲܢ ܚܛܝܼܬ݂ܵܐ. ܢܲܦ̮ܫܲܢ ܡܲܛܥܹܝܢ ܚ̄ܢܲܢ. ܘܲܫܪܵܪܵܐ ܠܲܝܬܿ ܒܲܢ. 9 ܐܸܢ ܕܹܝܢ ܡܵܘܕܹܝܢ ܚ̄ܢܲܢ ܒܲܚܛܵܗܲܝ̈ܢ. ܡܗܲܝܡܲܢ ܗܘܼ ܘܙܲܕܝܼܩ ܕܢܸܫܒ݁ܘܼܩ ܠܲܢ ܚܛܵܗܲܝ̈ܢ. ܘܲܢܕ݂ܲܟܹܝܢ ܡܸܢ ܟܠܹܗ ܥܵܘܠܲܢ. 10 ܘܐܸܢ ܐܵܡܪܝܼܢ ܚ̄ܢܲܢ ܕܠܵܐ ܚܛܲܝܢ. ܥܵܒ݂ܕܝܼܢ ܚ̄ܢܲܢ ܠܹܗ ܕܲܓܵܠܵܐ. ܘܡܸܠܬܹܗ ܠܲܝܬܿ ܠܘܵܬܲܢ.

ܩܦܠܐܘܢ ܒ

1 ܒܢܲܝ̈. ܗܵܠܹܝܢ ܟܵܬܹܒ݂ ܐ̄ܢܵܐ ܠܟ݂ܘܿܢ. ܕܠܵܐ ܬܸܚܛܘܼܢ. ܘܐܸܢ ܐܢܵܫ ܢܸܚܛܹܐ. ܐܝܼܬ݂ ܠܲܢ ܦܵܪܲܩܠܹܝܛܵܐ ܠܘܵܬ݂ ܐܲܒ݂ܵܐ. ܝܼܫܘܿܥ ܡܫܝܼܚܵܐ ܙܲܕܝܼܩܵܐ. 2 ܗܘܸܝܘܼ ܓܹܝܪ ܚܘܼܣܵܝܵܐ ܕܥܲܠ ܐܲܦܲܝ̈ ܚܛܵܗܲܝ̈ܢ. ܘܠܵܘ ܚܠܵܦܲܝܢ ܕܝܼܠܲܢ ܒܲܠܚܘܿܕ݂. ܐܸܠܵܐ ܐܵܦ ܚܠܵܦ ܟܠܹܗ ܥܵܠܡܵܐ. 3 ܘܲܒ݂ܗܵܕܹܐ ܡܲܪܓ݁ܫܝܼܢ ܚ̄ܢܲܢ ܕܝܼܕ݂ܲܥܢܵܝܗܝ. ܐܸܢ ܢܵܛܪܝܼܢ ܚ̄ܢܲܢ ܦܘܼܩܕܵܢܵܘ̈ܗܝ. 4 ܗܵܘ ܓܹܝܪ ܕܐܵܡܲܪ ܕܝܼܕ݂ܲܥܬܹܗ. ܘܦܘܼܩܕܵܢܵܘ̈ܗܝ ܠܵܐ ܢܵܛܲܪ. ܕܲܓܵܠܵܐ ܗܘܼ. ܘܲܫܪܵܪܵܐ ܠܲܝܬܿ ܒܹܗ. 5 ܗܵܘ ܕܹܝܢ ܕܢܵܛܲܪ ܡܸܠܬܹܗ. ܒܗܵܢܵܐ ܡܫܲܠܲܡ ܫܲܪܝܼܪܵܐܝܼܬ݂ ܚܘܼܒܹܗ ܕܐܲܠܵܗܵܐ. ܒܗܵܕܹܐ ܓܹܝܪ ܝܵܕ݂ܥܝܼܢ ܚ̄ܢܲܢ ܕܒܹܗ ܚܢܲܢ. 6 ܗܵܘ ܕܐܵܡܲܪ ܕܒܹܗ ܐܝܼܬܲܝ. ܘܵܠܹܐ ܠܹܗ ܕܐܲܝܟ݂ ܗܲܠܟ݂ܵܬܹ̈ܗ ܕܝܼܠܹܗ ܢܗܲܠܸܟ݂. 7 ܚܲܒܝܼܒܲܝ̈. ܠܵܘ ܦܘܼܩܕܵܢܵܐ ܚܲܕ݂ܬ݂ܵܐ ܟܵܬܹܒ݂ ܐ̄ܢܵܐ ܠܟ݂ܘܿܢ. ܐܸܠܵܐ ܦܘܼܩܕܵܢܵܐ ܥܲܬܿܝܼܩܵܐ. ܗܵܘ ܕܐܝܼܬ݂ ܗ̄ܘܵܐ ܠܟ݂ܘܿܢ ܡܸܢ ܒܪܵܫܝܼܬ݂. ܦܘܼܩܕܵܢܵܐ ܕܹܝܢ ܥܲܬܿܝܼܩܵܐ ܐܝܼܬ݂ܵܘܗܝ ܡܸܠܬ݂ܵܐ ܗܵܝ ܕܲܫܡܲܥܬܿܘܿܢ. 8 ܬܘܼܒ݂ ܦܘܼܩܕܵܢܵܐ ܚܲܕ݂ܬ݂ܵܐ ܟܵܬܹܒ݂ ܐ̄ܢܵܐ ܠܟ݂ܘܿܢ. ܗܵܘ ܕܐܝܼܬ݂ܵܘܗܝ ܫܲܪܝܼܪܵܐ ܒܹܗ ܘܲܒ݂ܟ݂ܘܿܢ. ܕܚܸܫܘܿܟ݂ܵܐ ܥܒܲܪ ܠܹܗ. ܘܢܘܼܗܪܵܐ ܫܲܪܝܼܪܵܐ ܫܲܪܝܼ ܡܸܬ݂ܚܙܹܐ. 9 ܡܲܢ ܕܐܵܡܲܪ ܗܵܟܹܝܠ ܕܐܝܼܬ݂ܵܘܗܝ ܒܢܘܼܗܪܵܐ. ܘܣܵܢܹܐ ܠܐܲܚܘܼܗܝ. ܒܚܸܫܘܿܟ݂ܵܐ ܐܝܼܬ݂ܵܘܗܝ ܥܕ݂ܲܡܵܐ ܠܗܵܫܵܐ. 10 ܗܵܘ ܕܹܝܢ ܕܡܲܚܸܒ݂ ܠܐܲܚܘܼܗܝ. ܒܢܘܼܗܪܵܐ ܡܟܲܬܲܪ. ܘܟܸܫܠܵܐ ܠܲܝܬܿ ܒܹܗ. 11 ܗܵܘ ܕܹܝܢ ܕܣܵܢܹܐ ܠܐܲܚܘܼܗܝ. ܒܚܸܫܘܿܟ݂ܵܐ ܐܝܼܬ݂ܵܘܗܝ. ܘܲܒ݂ܚܸܫܘܿܟ݂ܵܐ ܡܗܲܠܸܟ݂. ܘܠܵܐ ܝܵܕ݂ܲܥ ܠܐܲܝܟܵܐ ܐܵܙܹܠ. ܡܛܠ ܕܚܸܫܘܿܟ݂ܵܐ ܣܲܡܝܼ ܐܸܢܹܝܢ ܥܲܝܢܵܘ̈ܗܝ. 12 ܟܵܬܹܒ݂ ܐ̄ܢܵܐ ܠܟ݂ܘܿܢ ܒ̈ܢܲܝܵܐ. ܕܐܸܫܬܿܒܸܩܘ ܠܟ݂ܘܿܢ ܚܛܵܗܲܝ̈ܟ݁ܘܿܢ. ܡܛܠ ܫܡܹܗ. 13 ܟܵܬܹܒ݂ ܐ̄ܢܵܐ ܠܟ݂ܘܿܢ ܐܲܒ݂ܵܗܹ̈ܐ. ܕܝܼܕ݂ܲܥܬܿܘܿܢܵܝܗܝ ܠܗܵܘ ܕܐܝܼܬ݂ܵܘܗܝ ܗܘܵܐ ܡܸܢ ܒܪܵܫܝܼܬ݂. ܟܵܬܹܒ݂ ܐ̄ܢܵܐ ܠܟ݂ܘܿܢ ܥܠܲܝܡܹ̈ܐ. ܕܲܙܟܲܝܬܿܘܼܢܵܝܗܝ ܠܒ݂ܝܼܫܵܐ. ܟܸܬ݂ܒܹܬ݂ ܠܟ݂ܘܿܢ ܛܠܵܝܹ̈ܐ. ܕܝܼܕ݂ܲܥܬܿܘܿܢ ܠܐܲܒ݂ܵܐ. 14 ܟܸܬ݂ܒܹܬ݂ ܠܟ݂ܘܿܢ ܐܲܒ݂ܵܗܹ̈ܐ. ܕܝܼܕ݂ܲܥܬܿܘܿܢ ܠܗܵܘ ܕܡܸܢ ܒܪܵܫܝܼܬ݂. ܟܸܬ݂ܒܹܬ݂ ܠܟ݂ܘܿܢ ܥܠܲܝܡܹ̈ܐ. ܕܚܲܝܠܬ݂ܵܢܹ̈ܐ ܐ݇ܢܬܿܘܿܢ. ܘܡܸܠܬܹܗ ܕܐܲܠܵܗܵܐ ܫܲܪܝܵܐ ܒܟ݂ܘܿܢ. ܘܲܙܟܲܝܬܿܘܿܢܵܝܗܝ ܠܒ݂ܝܼܫܵܐ. 15 ܠܵܐ ܬܸܪܚܡܘܼܢ ܠܥܵܠܡܵܐ (ܥܵܠܡܵܐ). ܘܠܵܐ ܠܡܸܕܸܡ ܕܐܝܼܬ݂ ܒܹܗ. ܡܲܢ ܓܹܝܪ ܕܪܵܚܹܿܡ ܠܥܵܠܡܵܐ. ܚܘܼܒܹܗ ܕܐܲܒ݂ܵܐ ܠܲܝܬܿ ܒܹܗ. 16 ܟܠܡܸܕܸܡ ܓܹܝܪ ܕܐܝܼܬ݂ ܒܹܗ ܒܥܵܠܡܵܐ. ܪܸܓ݁ܬ݂ܵܐ ܗܘܼ ܕܦܲܓ݂ܪܵܐ. ܘܪܸܓ݁ܬ݂ܵܐ ܕܥܲܝܢܹ̈ܐ. ܘܫܘܼܒ݂ܗܵܪܵܐ ܕܥܵܠܡܵܐ. ܗܵܠܹܝܢ ܕܠܵܐ ܗܘܲܝ̈ ܡܸܢ ܐܲܒ݂ܵܐ. ܐܸܠܵܐ ܡܸܢܹܗ ܐܸܢܹܝܢ ܡܸܢ ܥܵܠܡܵܐ. 17 ܘܥܵܒܲܪ ܥܵܠܡܵܐ ܗܘܼ ܘܪܸܓ݁ܬܹܗ. ܗܵܘ ܕܹܝܢ ܕܥܵܒܹܿܕ݂ ܨܸܒ݂ܝܵܢܹܗ ܕܐܲܠܵܗܵܐ. ܡܩܵܘܹܐ ܠܥܵܠܲܡ. 18 ܒܢܲܝ̈. ܙܲܒ݂ܢܵܐ ܗܘܼ ܐ݇ܚܪܵܝܵܐ. ܘܐܲܝܟ݂ ܡܸܕܸܡ ܕܲܫܡܲܥܬܿܘܿܢ ܕܐܵܬܹܐ ܡܫܝܼܚܵܐ ܕܲܓܵܠܵܐ. ܘܗܵܫܵܐ ܗܘܵܘ ܠܗܘܿܢ ܣܲܓܝܼ̈ܐܹܐ ܡܫܝܼܚܹ̈ܐ ܕܲܓܵܠܹ̈ܐ. ܘܡܸܢ ܗܵܕܹܐ ܝܵܕ݂ܥܝܼܢ ܚ̄ܢܲܢ. ܕܙܲܒ݂ܢܵܐ ܗܘܼ ܐ݇ܚܪܵܝܵܐ. 19 ܡܸܢܲܢ ܢܦܲܩܘ. ܐܸܠܵܐ ܠܵܘ ܡܸܢܲܢ ܗܘܵܘ. ܐܸܠܘܼ ܓܹܝܪ ܡܸܢܲܢ ܗܘܵܘ. ܠܘܵܬܲܢ ܡܟܲܬܿܪܝܼܢ ܗܘܵܘ. ܐܸܠܵܐ ܢܦܲܩܘ ܡܸܢܲܢ. ܕܬܸܬ݂ܝܼܕ݂ܲܥ ܕܠܵܘ ܡܸܢܲܢ ܗܘܵܘ. 20 ܘܐܲܢ݇ܬܿܘܢ ܡܫܝܼܚܘܼܬ݂ܵܐ ܐܝܼܬ݂ ܠܟ݂ܘܿܢ ܡܸܢ ܩܲܕܝܼܫܹ̈ܐ. ܘܦܵܪܫܝܼܢ ܐ݇ܢܬܿܘܿܢ ܗ̄ܘܼ ܠܟ݂ܠ ܐ̄ܢܵܫ. 21 ܠܵܐ ܟܸܬ݂ܒܹܬ݂ ܠܟ݂ܘܿܢ. ܕܠܵܐ ܝܵܕ݂ܥܝܼܢ ܐ݇ܢܬܿܘܿܢ ܠܹܗ ܠܲܫܪܵܪܵܐ. ܐܸܠܵܐ ܕܝܵܕ݂ܥܝܼܢ ܐ݇ܢܬܿܘܿܢ ܠܹܗ. ܘܲܕ݂ܟ݂ܠܵܗܿ ܕܲܓܵܠܘܼܬ݂ܵܐ ܠܵܐ ܗܘܵܬ݂ ܡܸܢܹܗ ܡܸܢ ܫܪܵܪܵܐ. 22 ܡܲܢܘܼ ܕܲܓܵܠܵܐ. ܐܸܠܵܐ ܐܸܢ ܐܲܝܢܵܐ ܕܟ݂ܵܦܲܪ ܕܝܼܫܘܿܥ ܠܵܐ ܗܘܵܐ ܡܫܝܼܚܵܐ. ܗܵܢܵܐ ܗܘܼ ܡܫܝܼܚܵܐ ܕܲܓܵܠܵܐ. ܗܵܘ ܕܟ݂ܵܦܲܪ ܒܐܲܒ݂ܵܐ. ܟܵܦܲܪ ܐܵܦ ܒܲܒ݂ܪܵܐ. 23 ܘܗܵܘ ܕܟ݂ܵܦܲܪ ܒܲܒ݂ܪܵܐ. ܐܵܦܠܵܐ ܒܐܲܒ݂ܵܐ ܡܗܲܝܡܸܢ. ܡܲܢ ܕܡܵܘܕܹܐ ܒܲܒ݂ܪܵܐ. ܐܵܦ ܒܐܲܒ݂ܵܐ ܡܵܘܕܹܐ. 24 ܘܐܲܢ̄ܬܿܘܢ ܡܸܕܸܡ ܕܲܫܡܲܥܬܿܘܿܢ ܡܸܢ ܩܕ݂ܝܼܡ. ܢܩܵܘܹܐ ܠܘܵܬ݂ܟ݂ܘܿܢ. ܐܸܢ ܓܹܝܪ ܡܩܵܘܹܐ ܠܘܵܬ݂ܟ݂ܘܿܢ ܡܸܕܸܡ ܕܲܫܡܲܥܬܿܘܿܢ ܡܸܢ ܩܕ݂ܝܼܡ. ܐܵܦ ܐܲܢܬܿܘܿܢ ܡܩܵܘܹܝܢ ܐܢ݇ܬܿܘܿܢ ܒܐܲܒ݂ܵܐ ܘܒܲܒ݂ܪܵܐ. 25 ܘܗܵܢܵܘ ܫܘܼܘܕܵܝܵܐ ܕܐܸܫܬܵܘܕܝܼ ܠܲܢ. ܚܲܝܹ̈ܐ ܕܲܠܥܵܠܲܡ. 26 ܗܵܠܹܝܢ ܕܹܝܢ ܟܸܬ݂ܒܹܬ݂ ܠܟ݂ܘܿܢ. ܡܛܠ ܐܲܝܠܹܝܢ ܕܡܲܛܥܹܝܢ ܠܟ݂ܘܿܢ. 27 ܘܐܵܦ ܐܲܢܬܿܘܿܢ ܐܸܢ ܬܿܩܵܘܹܐ ܠܘܵܬ݂ܟ݂ܘܿܢ ܡܫܝܼܚܘܼܬ݂ܵܐ ܕܩܲܒܸܠܬܿܘܿܢ ܡܸܢܹܗ. ܠܵܐ ܣܢܝܼܩܝܼܢ ܐܢ݇ܬܿܘܿܢ ܕܐ݇̄ܢܵܫ ܢܲܠܸܦܟ݂ܘܿܢ. ܐܸܠܵܐ ܐܲܝܟ݂ ܡܫܝܼܚܘܼܬ݂ܵܐ ܕܐܝܼܬܹܝܗܿ ܡܸܢ ܐܲܠܵܗܵܐ. ܗܝܼ ܡܲܠܦܵܐ ܠܟ݂ܘܿܢ ܥܲܠ ܟܠܡܸܕ݂ܡ. ܘܫܲܪܝܼܪܵܐ ܗܝܼ ܘܠܲܝܬܿ ܒܵܗܿ ܕܲܓܵܠܘܼܬ݂ܵܐ. ܘܐܲܝܟ݂ ܕܐܲܠܸܦܟ݂ܘܿܢ. ܩܵܘܵܘ ܒܹܗ. 28 ܘܗܵܫܵܐ ܒܢܲܝ̈. ܩܵܘܵܘ ܒܹܗ. ܕܡܵܐ ܕܡܸܬ݂ܓ݁ܠܹܐ ܠܵܐ ܢܸܒ݂ܗܲܬ݂ ܡܸܢܹܗ. ܐܸܠܵܐ ܬܸܗܘܹܐ ܠܲܢ ܓܲܠܝܘܼܬ݂ ܐܲܦܹܐ ܒܡܹܐܬ݂ܝܼܬܹܗ. 29 ܐܸܢ ܝܼܕ݂ܲܥܬܿܘܿܢ ܕܙܲܕܝܼܩ ܗ̄ܘܼ. ܕܲܥܘ ܕܐܵܦ ܟܠ ܕܥܵܒܹܿܕ݂ ܙܲܕܝܼܩܘܼܬ݂ܵܐ. ܡܸܢܹܗ ܐܝܼܬ݂ܵܘܗܝ.

ܩܦܠܐܘܢ ܓ

1 ܘܲܚܙܵܘ ܕܲܟ݂ܡܵܐ ܣܲܓܝܼ ܚܘܼܒܹܗ ܕܐܲܒ݂ܵܐ ܠܘܵܬܲܢ. ܕܲܒ݂̈ܢܲܝܵܐ ܩܪܵܢ. ܐܵܦ ܥܲܒ݂ܕܲܢ. ܡܛܠ ܗܵܢܵܐ ܥܵܠܡܵܐ ܠܵܐ ܝܵܕ݂ܲܥ ܠܲܢ. ܡܛܠ ܕܐܵܦܠܵܐ ܠܹܗ ܝܼܕ݂ܲܥ. 2 ܚܲܒܝܼܒܲܝ̈. ܗܵܫܵܐ ܒܢܵܘ̈ܗܝ ܚܢܲܢ ܕܐܲܠܵܗܵܐ. ܘܠܵܐ ܐܸܬ݂ܓ݁ܠܝܼ ܥܕ݂ܲܡܵܐ ܠܗܵܫܵܐ. ܡܵܢܵܐ ܥܬ݂ܝܼܕ݂ܝܼܢ ܚ̄ܢܲܢ ܕܢܸܗܘܹܐ. ܝܵܕ݂ܥܝܼܢ ܚ̄ܢܲܢ ܕܹܝܢ ܕܡܵܐ ܕܐܸܬ݂ܓ݁ܠܝܼ. ܒܲܕ݂ܡܘܼܬܹܗ ܗܵܘܹܝܢ ܚ̄ܢܲܢ. ܘܚܵܙܹܝܢ ܚ̄ܢܲܢ ܠܹܗ ܐܲܝܟ݂ ܡܸܕܸܡ ܕܐܝܼܬ݂ܵܘܗܝ. 3 ܘܟ݂ܠ ܐܲܝܢܵܐ ܕܐܝܼܬ݂ ܠܹܗ ܥܠܵܘܗܝ ܗܵܢܵܐ ܣܲܒ݂ܪܵܐ. ܡܕ݂ܲܟܐ ܢܲܦ̮ܫܹܗ ܐܲܝܟ݂ ܕܗܘܼ ܕܟܹܐ ܗ̄ܘܼ. 4 ܡܲܢ ܕܹܝܢ ܕܥܵܒܹܿܕ݂ ܚܛܝܼܬ݂ܵܐ. ܥܵܘܠܵܐ ܣܵܥܲܪ. ܚܛܝܼܬ݂ܵܐ ܓܹܝܪ ܟܠܵܗܿ ܥܵܘܠܵܐ ܗܝܼ. 5 ܘܝܵܕ݂ܥܝܼܢ ܐܢ݇ܬܿܘܿܢ. ܕܗܵܘ ܕܐܸܬ݂ܓ݁ܠܝܼ ܕܢܸܣܲܒ݂ ܚܛܵܗܲܝ̈ܢ. ܘܲܚܛܝܼܬ݂ܵܐ ܒܹܗ ܠܲܝܬܿ. 6 ܘܟ݂ܠ ܕܒܹܗ ܡܩܵܘܹܐ. ܠܵܐ ܚܵܛܹܐ. ܘܟ݂ܠ ܕܚܵܛܹܐ. ܠܵܐ ܚܙܵܝܗܝ ܘܠܵܐ ܝܲܕ݂ܥܹܗ. 7 ܒܢܲܝ̈. ܠܵܐ ܐ݇ܢܵܫ ܢܲܛܥܹܝܟ݂ܘܿܢ. ܗܵܘ ܕܥܵܒܹܿܕ݂ ܙܲܕܝܼܩܘܼܬ݂ܵܐ. ܙܲܕܝܼܩܵܐ ܗܘܼ. ܐܲܝܟ݂ ܕܐܵܦ ܗܘܼ ܡܫܝܼܚܵܐ ܐܝܼܬ݂ܵܘܗܝ ܙܲܕܝܼܩܵܐ. 8 ܗܵܘ ܕܣܵܥܲܪ ܚܛܝܼܬ݂ܵܐ. ܡܸܢ ܣܵܛܵܢܵܐ ܗܘܼ. ܡܛܠ ܕܡܸܢ ܪܹܫܝܼܬ݂ܵܐ ܗܘܼ ܣܵܛܵܢܵܐ ܚܲܛܵܝܵܐ ܗܘܼ. ܘܡܛܠ ܗܵܢܵܐ ܐܸܬ݂ܚܙܝܼ ܒܪܹܗ ܕܐܲܠܵܗܵܐ. ܕܢܸܫܪܹܐ ܥܒ݂ܵܕ݂ܵܘ̈ܗܝ ܕܣܵܛܵܢܵܐ. 9 ܟܠ ܕܐܸܬ݂ܝܼܠܸܕ݂ ܡܸܢ ܐܲܠܵܗܵܐ. ܚܛܝܼܬ݂ܵܐ ܠܵܐ ܥܵܒܹܿܕ݂. ܡܛܠ ܕܙܲܪܥܹܗ ܒܹܗ ܐܝܼܬ݂ܵܘܗܝ. ܘܠܵܐ ܡܸܫܟܲܚ ܠܡܸܚܛܵܐ. ܕܡܸܢ ܐܲܠܵܗܵܐ ܐܸܬ݂ܝܼܠܸܕ݂. 10 ܒܗܵܕܹܐ ܡܸܬ݂ܦܲܪܫܝܼܢ ܒܢܵܘ̈ܗܝ ܕܐܲܠܵܗܵܐ. ܡܸܢ ܒܢܵܘ̈ܗܝ ܕܣܵܛܵܢܵܐ. ܟܠ ܕܠܵܐ ܥܵܒܹܿܕ݂ ܙܲܕܝܼܩܘܼܬ݂ܵܐ ܘܠܵܐ ܡܲܚܸܒ݂ ܠܐܲܚܘܼܗܝ. ܠܲܝܬܵܘܗܝ ܡܸܢ ܐܲܠܵܗܵܐ 11 ܕܗܵܢܵܘ ܦܘܼܩܕܵܢܵܐ ܕܲܫܡܲܥܬܿܘܿܢ ܡܸܢ ܩܕ݂ܝܼܡ. ܕܬܲܚܒ݂ܘܼܢ ܚܲܕ݂ ܠܚܲܕ݂. 12 ܠܵܘ ܐܲܝܟ݂ ܩܵܐܹܝܢ ܗܵܘ ܕܐܝܼܬ݂ܵܘܗܝ ܗܘܵܐ ܡܸܢ ܒܝܼܫܵܐ ܘܲܩܛܲܠ ܠܐܲܚܘܼܗܝ. ܘܡܛܠ ܡܵܢܵܐ ܩܲܛܠܹܗ. ܐܸܠܵܐ ܡܛܠ ܕܒ݂ܝܼܫܝܼܢ ܗܘܵܘ ܥܒ݂ܵܕ݂ܵܘ̈ܗܝ: ܘܕ݂ܲܐܚܘܼܗܝ ܙܲܕܝܼܩܝܼܢ. 13 ܘܠܵܐ ܬܸܬܿܕܲܡܪܘܼܢ ܐܲܚܲܝ̈. ܐܸܢ ܣܵܢܹܐ ܠܟ݂ܘܿܢ ܥܵܠܡܵܐ. 14 ܚܢܲܢ ܝܵܕ݂ܥܝܼܢ ܚ̄ܢܲܢ ܕܫܲܢܝܼܢܲܢ ܡܸܢ ܡܵܘܬܵܐ ܠܚܲܝܹ̈ܐ: ܒܗܵܕܹܐ ܕܡܲܚܒ݂ܝܼܢ ܚ̄ܢܲܢ ܠܐܲܚܲܝ̈ܢ. ܗܵܘ ܕܠܵܐ ܡܲܚܸܒ݂ ܠܐܲܚܘܼܗܝ. ܡܩܵܘܹܐ ܒܡܵܘܬܵܐ. 15 ܟܠ ܓܹܝܪ ܕܣܵܢܹܐ ܠܐܲܚܘܼܗܝ. ܩܵܛܹܠ ܐܢܵܫܵܐ ܗܘܼ. ܘܝܵܕ݂ܥܝܼܢ ܐܢ݇ܬܿܘܿܢ ܕܟܠ ܕܩܵܛܹܠ ܐܢܵܫܵܐ. ܠܵܐ ܡܸܫܟܿܚܝܼܢ ܡܩܵܘܹܝܢ ܒܹܗ ܚܲܝܹ̈ܐ ܕܲܠܥܵܠܲܡ. 16 ܒܗܵܕܹܐ ܝܵܕ݂ܥܝܼܢ ܚ̄ܢܲܢ ܚܘܼܒܹܗ ܕܲܠܘܵܬܲܢ. ܕܗܘܼ ܝܲܗܒ݂ ܢܲܦ̮ܫܹܗ ܚܠܵܦܲܝܢ. ܘܐܵܦ ܚܢܲܢ ܙܵܕܹܩ ܠܲܢ. ܕܥܲܠ ܐܲܦܲܝ̈ ܐܲܚܲܝ̈ܢ ܢܸܬܸܿܠ ܢܲܦ̮̈ܫܵܬܲܢ. 17 ܘܐܲܝܢܵܐ ܕܐܝܼܬ݂ ܠܹܗ ܩܸܢܝܵܢܵܐ ܕܥܵܠܡܵܐ. ܘܢܸܚܙܹܐ ܠܐܲܚܘܼܗܝ ܕܲܣܢܝܼܩ. ܘܢܹܐܚܘܿܕ݂ ܪ̈ܲܚܡܵܘܗܝ ܡܸܢܹܗ. ܐܲܝܟܲܢܵܐ ܐܝܼܬ݂ ܒܹܗ ܚܘܼܒܹܗ ܕܐܲܠܵܗܵܐ. 18 ܒܢܲܝ̈. ܠܵܐ ܢܲܚܸܒ݂ ܚܲܕ݂ ܠܚܲܕ݂ ܒܡܸܠܹ̈ܐ ܘܲܒ݂ܠܸܫܵܢܵܐ. ܐܸܠܵܐ ܒܲܥܒ݂ܵܕܹ̈ܐ ܘܒܲܫܪܵܪܵܐ. 19 ܘܲܒ݂ܗܵܕܹܐ ܡܸܫܬܵܘܕܥܝܼܢ ܚ̄ܢܲܢ. ܕܡܸܢ ܫܪܵܪܵܐ ܐܝܼܬܲܝܢ. ܘܲܩܕ݂ܵܡ ܕܢܹܐܬܹܐ ܗܘܼ. ܡܦܝܼܣܝܼܢ ܚ̄ܢܲܢ ܠܸܒܲܢ. 20 ܕܐܸܢ ܗܘܼ ܠܸܒܲܢ ܒܵܣܲܪ ܠܲܢ. ܟܡܵܐ ܐܲܠܵܗܵܐ ܕܪܲܒ ܡܸܢ ܠܸܒܲܢ ܘܝܵܕ݂ܲܥ ܟܠܡܸܕ݂ܡ. 21 ܚܲܒܝܼܒܲܝ̈. ܐܸܢ ܠܸܒܲܢ ܠܵܐ ܒܵܣܲܪ ܠܲܢ. ܓܵܠ̈ܝܵܢ ܐܸܢܹܝܢ ܐܲܦܲܝ̈ܢ ܩܕ݂ܵܡ ܐܲܠܵܗܵܐ. 22 ܘܟ݂ܠܡܸܕܸܡ ܕܫܵܐܠܝܼܢ ܚ̄ܢܲܢ. ܢܵܣܒܝܼܢ ܚ̄ܢܲܢ ܡܸܢܹܗ. ܡܛܠ ܕܢܵܛܪܝܼܢ ܚ̄ܢܲܢ ܦܘܼܩܕܵܢܵܘ̈ܗܝ: ܘܫܲܦܝܼܪ̈ܵܬ݂ܵܐ ܣܵܥܪܝܼܢ ܚ̄ܢܲܢ ܩܕ݂ܵܡܵܘܗܝ. 23 ܘܗܵܢܵܐ ܗ̄ܘܼ ܦܘܼܩܕܵܢܹܗ. ܕܲܢܗܲܝܡܸܢ ܒܲܫܡܵܐ ܕܲܒ݂ܪܹܗ ܝܼܫܘܿܥ ܡܫܝܼܚܵܐ. ܘܢܲܚܸܒ݂ ܚܲܕ݂ ܠܚܲܕ݂. ܐܲܝܟ݂ ܕܦܲܩܕܲܢ. 24 ܘܐܲܝܢܵܐ ܕܢܵܛܲܪ ܦܘܼܩܕܵܢܵܘ̈ܗܝ. ܒܹܗ ܡܸܬ݂ܢܛܲܪ. ܘܗܘܼ ܫܵܪܹܐ ܒܹܗ. ܘܲܒ݂ܗܵܕܹܐ ܡܸܣܬܲܟܠܝܼܢ ܚ̄ܢܲܢ ܕܫܵܪܹܐ ܒܲܢ. ܡܸܢ ܪܘܼܚܹܗ ܗܵܝ ܕܝܲܗܒ݂ ܠܲܢ.

ܩܦܠܐܘܢ ܕ

1 ܚܲܒܝܼܒܲܝ̈. ܠܵܐ ܠܟ݂ܠ ܪ̈ܘܼܚܝܼܢ ܬܿܗܲܝܡܢܘܼܢ. ܐܸܠܵܐ ܗܘܲܝܬܿܘܿܢ ܦܵܪܫܝܼܢ ܪ̈ܘܼܚܹܐ. ܐܸܢ ܡܸܢ ܐܲܠܵܗܵܐ ܐܝܼܬܲܝܗܹܝܢ. ܡܛܠ ܕܣܲܓܝܼ̈ܐܹܐ ܢܒ݂ܝܹ̈ܐ ܕܲܓܵܠܹ̈ܐ ܢܦܲܩܘ ܒܹܗ ܒܥܵܠܡܵܐ. 2 ܒܗܵܕܹܐ ܡܸܬ݂ܝܲܕ݂ܥܵܐ ܪܘܼܚܹܗ ܕܐܲܠܵܗܵܐ. ܟܠ ܪܘܼܚܵܐ ܕܡܵܘ̈ܕܝܵܢ (ܕܡܵܘܕܝܵܐ) ܕܝܼܫܘܿܥ ܡܫܝܼܚܵܐ ܐܸܬ݂ܵܐ ܒܲܒ݂ܣܲܪ. ܡܸܢ ܐܲܠܵܗܵܐ ܗܝܼ. 3 ܘܟ݂ܠ ܪܘܼܚܵܐ ܕܠܵܐ ܡܵܘܕܝܵܐ ܕܝܼܫܘܿܥ ܐܸܬ݂ܵܐ ܒܲܒ݂ܣܲܪ. ܠܲܝܬܹܿܝܗ݁ ܡܸܢ ܐܲܠܵܗܵܐ. ܐܸܠܵܐ ܗܵܕܹܐ ܡܸܢ ܡܫܝܼܚܵܐ ܗܝܼ ܕܲܓܵܠܵܐ. ܗܵܘ ܕܲܫܡܲܥܬܿܘܿܢ ܕܐܵܬܹܐ. ܘܗܵܫܵܐ ܒܥܵܠܡܵܐ ܐܝܼܬ݂ܵܘܗܝ ܡܸܢ ܟܲܕܘܼ. 4 ܐܲܢܬܿܘܿܢ ܕܹܝܢ ܡܸܢ ܐܲܠܵܗܵܐ ܐܝܼܬܲܝܟ݁ܘܿܢ ܒ̈ܢܲܝܵܐ. ܘܲܙܟܲܝܬܿܘܿܢ ܐܸܢܘܿܢ. ܡܛܠ ܕܪܲܒ ܗܘܼ ܕܲܒ݂ܟ݂ܘܿܢ. ܡܸܢ ܗܵܘ ܕܲܒ݂ܥܵܠܡܵܐ. 5 ܘܗܵܠܹܝܢ ܡܸܢ ܥܵܠܡܵܐ ܐܸܢܘܿܢ. ܡܛܠ ܗܵܢܵܐ ܡܸܢ ܥܵܠܡܵܐ ܡܡܲܠܠܝܼܢ. ܘܥܵܠܡܵܐ ܠܗܘܿܢ ܫܵܡܲܥ. 6 ܚܢܲܢ ܕܹܝܢ ܡܸܢ ܐܲܠܵܗܵܐ ܚܢܲܢ. ܘܗܵܘ ܕܝܵܕ݂ܲܥ ܠܐܲܠܵܗܵܐ. ܫܵܡܲܥ ܠܲܢ. ܘܗܵܘ ܕܠܵܐ ܐܝܼܬ݂ܵܘܗܝ ܡܸܢ ܐܲܠܵܗܵܐ. ܠܵܐ ܫܵܡܲܥ ܠܲܢ. ܒܵܗܿ ܒܗܵܕܹܐ ܡܸܣܬܲܟܠܝܼܢ ܚ̄ܢܲܢ ܠܪܘܼܚܵܐ ܕܲܫܪܵܪܵܐ. ܘܲܠܪܘܼܚܵܐ ܕܡܲܛܥܝܵܢܘܼܬ݂ܵܐ. 7 ܚܲܒܝܼܒܲܝ̈. ܢܲܚܸܒ݂ ܚܲܕ݂ ܠܚܲܕ݂. ܡܛܠ ܕܚܘܼܒܵܐ ܡܸܢ ܐܲܠܵܗܵܐ ܗܘܼ. ܘܟ݂ܠ ܡܲܢ ܕܡܲܚܸܒ݂. ܡܸܢ ܐܲܠܵܗܵܐ ܝܼܠܝܼܕ݂. ܘܝܵܕ݂ܲܥ ܠܐܲܠܵܗܵܐ. 8 ܡܛܠ ܕܐܲܠܵܗܵܐ ܚܘܼܒܵܐ ܗܘܼ. ܘܟ݂ܠ ܕܠܵܐ ܡܲܚܸܒ݂. ܠܵܐ ܝܵܕ݂ܲܥ ܠܐܲܠܵܗܵܐ. 9 ܒܗܵܕܹܐ ܐܸܬ݂ܝܼܕ݂ܲܥ ܚܘܼܒܹܗ ܕܐܲܠܵܗܵܐ ܕܲܠܘܵܬܲܢ. ܕܠܲܒ݂ܪܹܗ ܝܼܚܝܼܕ݂ܵܝܵܐ ܫܲܕܲܪ ܐܲܠܵܗܵܐ ܠܥܵܠܡܵܐ ܕܢܸܚܹܐ ܒܐܝܼܕ݂ܹܗ. 10 ܒܗܵܢܵܐ ܐܝܼܬ݂ܵܘܗܝ ܚܘܼܒܵܐ. ܠܵܐ ܗܘܵܐ ܕܲܚܢܲܢ ܐܲܚܸܒ݂ܢ ܠܐܲܠܵܗܵܐ. ܐܸܠܵܐ ܗܘܼ ܐܲܚܒܲܢ. ܘܫܲܕܲܪ ܠܲܒ݂ܪܹܗ ܚܘܼܣܵܝܵܐ ܥܲܠ ܐܲܦܲܝ̈ ܚܛܵܗܲܝ̈ܢ. 11 ܚܲܒܝܼܒܲܝ̈. ܐܸܢ ܗܵܟܲܢܵܐ ܐܲܚܒܲܢ ܐܲܠܵܗܵܐ. ܐܵܦ ܚܢܲܢ ܚܲܝܵܒ݂ܝܼܢ ܚ̄ܢܲܢ ܚܲܕ݂ ܠܚܲܕ݂ ܠܡܲܚܵܒ݂ܘܼ. 12 ܠܐܲܠܵܗܵܐ ܡܸܡܬ݂ܘܿܡ ܐ̄ܢܵܫ ܠܵܐ ܚܙܵܝܗܝ. ܐܸܢ ܕܹܝܢ ܢܲܚܸܒ݂ ܚܲܕ݂ ܠܚܲܕ݂. ܐܲܠܵܗܵܐ ܒܲܢ ܡܩܵܘܹܐ. ܘܚܘܼܒܹܗ ܡܸܫܬܲܡܠܹܐ ܒܲܢ. 13 ܘܲܒ݂ܗܵܕܹܐ ܝܵܕ݂ܥܝܼܢ ܚ̄ܢܲܢ ܕܒܹܗ ܡܩܵܘܹܝܢ ܚ̄ܢܲܢ. ܘܗܘܼ ܡܩܵܘܹܐ ܒܲܢ. ܕܡܸܢ ܪܘܼܚܹܗ ܝܲܗܒ݂ ܠܲܢ. 14 ܘܲܚܢܲܢ ܚܙܲܝܢ ܘܡܲܣܗܕ݂ܝܼܢ ܚ̄ܢܲܢ. ܕܐܲܒ݂ܵܐ ܫܲܕܲܪ ܠܲܒ݂ܪܹܗ ܦܵܪܘܿܩܵܐ ܠܥܵܠܡܵܐ. 15 ܟܠ ܕܡܵܘܕܹܐ ܒܝܼܫܘܿܥ ܕܗܘܸܝܘܼ ܒܪܹܗ ܕܐܲܠܵܗܵܐ. ܐܲܠܵܗܵܐ ܒܹܗ ܡܩܵܘܹܐ. ܘܗܘܼ ܡܩܵܘܹܐ ܒܐܲܠܵܗܵܐ. 16 ܘܲܚܢܲܢ ܗܲܝܡܸܢܢ ܘܝܼܕ݂ܲܥܢ ܚܘܼܒܵܐ. ܕܐܝܼܬ݂ ܠܹܗ ܠܐܲܠܵܗܵܐ ܨܸܐܕ݂ܲܝܢ. ܐܲܠܵܗܵܐ ܓܹܝܪ ܚܘܼܒܵܐ ܗܘܼ. ܘܟ݂ܠ ܕܲܡܩܵܘܹܐ ܒܚܘܼܒܵܐ. ܒܐܲܠܵܗܵܐ ܡܩܵܘܹܐ. 17 ܘܲܒ݂ܗܵܕܹܐ ܡܸܫܬܲܠܲܡ ܚܘܼܒܹܗ ܥܲܡܲܢ. ܕܓܲܠܝܘܼܬ݂ ܐܲܦܹ̈ܐ ܬܸܗܘܹܐ ܠܲܢ ܒܝܵܘܡܵܐ ܕܕ݂ܝܼܢܵܐ. ܡܛܠ ܕܐܲܝܟ݂ ܕܲܗܘܵܐ ܗ̤ܘ. ܗܵܟܲܢܵܐ ܐܵܦ ܚܢܲܢ ܐܝܼܬܲܝܢ ܒܗܵܢܵܐ ܥܵܠܡܵܐ. 18 ܕܸܚܠܬ݂ܵܐ ܒܚܘܼܒܵܐ ܠܲܝܬܿ. ܐܸܠܵܐ ܚܘܼܒܵܐ ܡܫܲܡܠܝܵܐ. ܠܒܲܪ ܫܵܕܹܐ ܠܵܗܿ ܠܕ݂ܸܚܠܬ݂ܵܐ. ܡܛܠ ܕܕ݂ܸܚܠܬ݂ܵܐ ܒܩܸܢܛܵܐ ܐܝܼܬܹܝܗܿ. ܗܵܘ ܕܹܝܢ ܕܕ݂ܵܚܹܠ. ܠܵܐ ܡܫܲܡܠܲܝ ܒܚܘܼܒܵܐ. 19 ܚܢܲܢ ܗܵܟܹܝܠ ܢܲܚܸܒ݂ ܠܐܲܠܵܗܵܐ. ܡܛܠ ܕܗܘܼ ܩܲܕ݂ܡܵܝܼܬ݂ ܐܲܚܒܲܢ. 20 ܐܸܢ ܕܹܝܢ ܐ̄ܢܵܫ ܢܹܐܡܲܪ ܕܡܲܚܸܒ݂ ܐ̄ܢܵܐ ܠܐܲܠܵܗܵܐ. ܘܠܲܐܚܘܼܗܝ ܣܵܢܹܐ. ܕܲܓܵܠܵܐ ܗܘܼ. ܗܵܘ ܓܹܝܪ ܕܠܲܐܚܘܼܗܝ ܕܡܸܬ݂ܚܙܹܐ ܠܵܐ ܡܲܚܸܒ݂. ܠܐܲܠܵܗܵܐ ܗܵܘ ܕܠܵܐ ܡܸܬ݂ܚܙܹܐ ܐܲܝܟܲܢܵܐ ܡܸܫܟܲܚ ܕܢܲܚܸܒ݂. 21 ܘܗܵܢܵܐ ܦܘܼܩܕܵܢܵܐ ܩܲܒܸܠܢ ܡܸܢܹܗ. ܕܟܠ ܕܡܲܚܸܒ݂ ܠܐܲܠܵܗܵܐ. ܢܲܚܸܒ݂ ܐܵܦ ܠܐܲܚܘܼܗܝ.

ܩܦܠܐܘܢ ܗ

1 ܟܠ ܕܲܡܗܲܝܡܸܢ ܕܝܼܫܘܿܥ ܐܝܼܬ݂ܵܘܗܝ ܡܫܝܼܚܵܐ. ܡܸܢ ܐܲܠܵܗܵܐ ܝܼܠܝܼܕ݂. ܘܟ݂ܠ ܕܡܲܚܸܒ݂ ܠܝܵܠܘܿܕ݂ܵܐ. ܡܲܚܸܒ݂ ܐܵܦ ܠܗܵܘ ܕܐܸܬ݂ܝܼܠܸܕ݂ ܡܸܢܹܗ. 2 ܘܲܒ݂ܗܵܕܹܐ ܝܵܕ݂ܥܝܼܢ ܚ̄ܢܲܢ ܕܡܲܚܒ݂ܝܼܢ ܚ̄ܢܲܢ ܠܲܒ݂ܢܵܘ̈ܗܝ ܕܐܲܠܵܗܵܐ. ܡܵܐ ܕܠܲܐܠܵܗܵܐ ܡܲܚܒ݂ܝܼܢ ܚ̄ܢܲܢ ܘܥܵܒ݂ܕܝܼܢ ܚ̄ܢܲܢ ܦܘܼܩܕܵܢܵܘ̈ܗܝ. 3 ܗܵܢܵܐ ܗܘܼ ܓܹܝܪ ܚܘܼܒܹܗ ܕܐܲܠܵܗܵܐ. ܕܢܸܛܲܪ ܦܘܼܩܕܵܢܵܘ̈ܗܝ. ܘܦܘܼܩܕܵܢܵܘ̈ܗܝ ܠܵܐ ܝܲܩܝܼܪܝܼܢ. 4 ܡܛܠ ܕܟܠ ܕܝܼܠܝܼܕ݂ ܡܸܢ ܐܲܠܵܗܵܐ. ܙܵܟܹܐ ܠܹܗ ܠܥܵܠܡܵܐ. ܘܗܵܕܹܐ ܗܝܼ ܙܵܟ݂ܘܼܬ݂ܵܐ ܕܲܙܟ݂ܵܬܹܗ ܠܥܵܠܡܵܐ. ܗܲܝܡܵܢܘܼܬܲܢ. 5 ܡܲܢܘܼ ܓܹܝܪ ܕܙܵܟܹܐ ܠܹܗ ܠܥܵܠܡܵܐ. ܐܸܠܵܐ ܗܵܘ ܕܲܡܗܲܝܡܸܢ ܕܝܼܫܘܿܥ ܒܪܹܗ ܗ̄ܘܼ ܕܐܲܠܵܗܵܐ. 6 ܗܵܢܵܘ ܕܐܸܬ݂ܵܐ ܒܝܲܕ݂ ܡܲܝ̈ܵܐ ܘܲܕ݂ܡܵܐ ܝܼܫܘܿܥ ܡܫܝܼܚܵܐ. ܠܵܐ ܗܘܵܐ ܒܡܲܝ̈ܵܐ ܒܲܠܚܘܿܕ݂. ܐܸܠܵܐ ܒܡܲܝ̈ܵܐ ܘܲܕ݂ܡܵܐ. 7 ܘܪܘܼܚܵܐ ܡܲܣܗܕ݂ܵܐ. ܕܗܝܼ ܪܘܼܚܵܐ ܐܝܼܬܹܝܗܿ ܫܪܵܪܵܐ. 8 ܘܐܝܼܬܲܝܗܘܿܢ ܬܠܵܬ݂ܵܐ ܣܵܗܕܝܼܢ. ܪܘܼܚܵܐ ܘܡܲܝ̈ܵܐ ܘܲܕ݂ܡܵܐ. ܘܲܬ݂ܠܵܬܲܝܗܘܿܢ ܒܚܲܕ݂ ܐܸܢܘܿܢ. 9 ܐܸܢ ܣܵܗܕܘܼܬ݂ܵܐ ܕܲܒ݂ܢܲܝ̈ܢܵܫܵܐ ܡܩܲܒܠܝܼܢ ܚܢܲܢ. ܚܲܕ݂ ܟܡܵܐ ܣܵܗܕܘܼܬܹܗ ܕܐܲܠܵܗܵܐ ܕܪܲܒܵܐ ܗܝܼ. ܘܗܵܕܹܐ ܗܝܼ ܣܵܗܕܘܼܬܹܗ ܕܐܲܠܵܗܵܐ ܕܐܲܣܗܸܕ݂ ܥܲܠ ܒܪܹܗ. 10 ܟܠܡܲܢ ܕܲܡܗܲܝܡܸܢ ܒܲܒ݂ܪܹܗ ܕܐܲܠܵܗܵܐ. ܐܝܼܬ݂ ܠܹܗ ܗܵܕܹܐ ܣܵܗܕܘܼܬ݂ܵܐ ܒܢܲܦ̮ܫܹܗ. ܟܠ ܕܠܵܐ ܡܗܲܝܡܸܢ. ܠܐܲܠܵܗܵܐ ܕܲܓܵܠܵܐ ܥܲܒ݂ܕܹܗ. ܒܲܕ݂ܠܵܐ ܗܲܝܡܸܢ ܠܣܵܗܕܘܼܬ݂ܵܐ ܕܐܲܣܗܸܕ݂ ܐܲܠܵܗܵܐ ܥܲܠ ܒܪܹܗ. 11 ܘܗܵܕܹܐ ܗܝܼ ܣܵܗܕܘܼܬ݂ܵܐ. ܕܚܲܝܹ̈ܐ ܕܲܠܥܵܠܲܡ ܝܲܗܒ݂ ܠܲܢ ܐܲܠܵܗܵܐ. ܘܗܸܢܘܿܢ ܚܲܝܹ̈ܐ ܒܲܒ݂ܪܹܗ ܐܝܼܬܲܝܗܘܿܢ. 12 ܟܠ ܕܲܐܚܝܼܕ݂ ܠܲܒ݂ܪܵܐ. ܐܲܚܝܼܕ݂ ܐܵܦ ܠܚܲܝܹ̈ܐ. ܘܟ݂ܠ ܕܠܵܐ ܐܲܚܝܼܕ݂ ܠܲܒ݂ܪܹܗ ܕܐܲܠܵܗܵܐ. ܠܲܝܬܿ ܠܹܗ ܚܲܝܹ̈ܐ. 13 ܗܵܠܹܝܢ ܟܸܬ݂ܒܹܬ݂ ܠܟ݂ܘܿܢ. ܕܬܸܕ݂ܥܘܼܢ ܕܚܲܝܹ̈ܐ ܕܲܠܥܵܠܲܡ ܐܝܼܬ݂ ܠܟ݂ܘܿܢ. ܠܐܲܝܠܹܝܢ ܕܗܲܝܡܸܢܬܿܘܿܢ ܒܲܫܡܹܗ ܕܲܒ݂ܪܹܗ ܕܐܲܠܵܗܵܐ. 14 ܘܗܵܕܹܐ ܦܲܪܹܗܣܝܼܵܐ ܐܝܼܬ݂ ܠܲܢ ܠܘܵܬܹܗ. ܕܟܠ ܕܫܵܐܠܝܼܢ ܚ̄ܢܲܢ ܠܹܗ ܐܲܝܟ݂ ܨܸܒ݂ܝܵܢܹܗ. ܫܵܡܲܥ ܠܲܢ. 15 ܘܐܸܢ ܡܦܵܣܝܼܢ ܚ̄ܢܲܢ ܕܫܵܡܲܥ ܠܲܢ ܥܲܠ ܡܸܕܸܡ ܕܫܵܐܠܝܼܢ ܚ̄ܢܲܢ ܡܸܢܹܗ. ܬܟ݂ܝܼܠܝܼܢ ܚ̄ܢܲܢ ܕܩܲܒܸܠܢ ܡܸܢ ܟܲܕܘܼ ܫܹܐ̈ܠܵܬܲܢ ܕܲܫܐܸܠܢ ܡܸܢܹܗ. 16 ܐܸܢ ܐܢܵܫ ܢܸܚܙܹܐ ܠܐܲܚܘܼܗܝ ܕܚܵܛܹܐ ܚܛܵܗܵܐ ܕܠܵܐ ܡܚܲܝܲܒ݂ ܠܡܵܘܬܵܐ. ܢܸܫܐܲܠ ܘܡܸܬ݂ܝܲܗܒܝܼܢ ܠܹܗ ܚܲܝܹ̈ܐ: ܠܐܲܝܠܹܝܢ ܕܠܵܐ ܗܘܵܐ ܐܲܝܟ݂ ܕܲܠܡܵܘܬܵܐ ܚܵܛܹܝܢ. ܐܝܼܬ݂ ܓܹܝܪ ܚܛܵܗܵܐ ܕܡܵܘܬܵܐ. ܠܵܐ ܗܘܵܐ ܥܲܠ ܗܵܢܵܐ ܐܵܡܲܪ ܐ݇ܢܵܐ ܕܢܸܒ݂ܥܹܐ ܐ݇ܢܵܫ. 17 ܟܠ ܥܵܘܠܵܐ ܓܹܝܪ ܚܛܝܼܬ݂ܵܐ ܗܘܼ. ܘܐܝܼܬ݂ ܚܛܵܗܵܐ ܕܠܵܐ ܗܘܵܐ ܕܡܵܘܬܵܐ ܗܘܼ. 18 ܘܝܵܕ݂ܥܝܼܢ ܚ̄ܢܲܢ ܕܟܠ ܕܝܼܠܝܼܕ݂ ܡܸܢ ܐܲܠܵܗܵܐ. ܠܵܐ ܚܵܛܹܐ. ܗܵܘ ܓܹܝܪ ܕܝܼܠܝܼܕ݂ ܡܸܢ ܐܲܠܵܗܵܐ. ܢܵܛܲܪ ܢܲܦ̮ܫܹܗ. ܘܒ݂ܝܼܫܵܐ ܠܵܐ ܡܸܬ݂ܩܲܪܲܒ݂ ܠܹܗ. 19 ܝܵܕ݂ܥܝܼܢ ܚ̄ܢܲܢ ܕܡܸܢ ܐܲܠܵܗܵܐ ܚܢܲܢ. ܘܥܵܠܡܵܐ ܟܠܹܗ ܒܒ݂ܝܼܫܵܐ ܗܘܼ ܣܝܼܡ. 20 ܘܝܵܕ݂ܥܝܼܢ ܚ̄ܢܲܢ ܕܲܒ݂ܪܹܗ ܕܐܲܠܵܗܵܐ ܐܸܬ݂ܵܐ. ܘܝܲܗܒ݂ ܠܲܢ ܡܲܕܥܵܐ ܕܢܸܕܲܥ ܠܫܲܪܝܼܪܵܐ. ܘܢܸܗܘܹܐ ܒܹܗ ܒܫܲܪܝܼܪܵܐ. ܒܲܒ݂ܪܹܗ ܝܼܫܘܿܥ ܡܫܝܼܚܵܐ. ܗܵܢܵܘ ܐܲܠܵܗܵܐ ܫܲܪܝܼܪܵܐ ܘܚܲܝܹ̈ܐ ܕܲܠܥܵܠܲܡ. 21 ܒܢܲܝ̈. ܛܲܪܘ ܢܲܦ̮ܫܟ݂ܘܿܢ ܡܸܢ ܕܸܚܠܲܬ݂ ܦܬܲܟ݂ܪܹ̈ܐ.