ܟܬܒ̣ܐ
ܕܕܝܬܩܐ ܚܕܬܐ
ܕܡܪܢ ܝܫܘܥ ܡܫܝܚܐ
ܦܘܼܫܵܩܵܐ ܡ̣ܢ ܐܲܨܚܬܐ ܦܫܝܛܬܐ: ܡܘܼܕܒ̣ܩܐ ܥܡ ܕܐܢܝ ܕܝܘܢܝܐ
ܐܓܪܬܐ ܕܝܥܩܘܒ݂ ܫܠܝܚܐ
ܩܦܠܐܘܢ: ܐ
1 ܝܲܥܩܘܿܒ݂: ܪܹܓܹܗ ܕܐܲܠܵܗܵܐ ܕܡܵܪܲܢ ܝܼܫܘܿܥ ܡܫܝܼܚܵܐ: ܠܬܪܸܥܣܲܪ ܐܘܼ̈ܓ̰ܵܓܹܐ ܕܝܼܢܵܐ ܒܘܼܪܒܸܙܹܐ: ܫܠܵܡܵܐ.
2 ܟܠ ܚܲܕܕܘܼܬܵܐ ܚܫܘܿܒ݂ܘܿܢܠܵܗ̇: ܐܵܚܘܿܢܘܵܬܝܼ̈: ܟܲܕ ܢܵܦܠܝܼܬܘܿܢ ܒܓ̰ܘܼܪ̈ܵܒܹܐ ܬܵܗܵܪܹ̈ܐ ܬܵܗܵܪܹ̈ܐ: 3 ܣܵܒܵܒ ܒܝܼܕܲܥܝܵܐ ܝܬܘܿܢ ܕܒܵܚܲܪܬܵܐ ܕܗܲܝܡܵܢܘܼܬܵܘܟ݂ܘܿܢ ܟܹܐ ܦܵܠܚܵܐ ܚܡܵܠܬܵܐ: 4 ܐܝܼܢܵܐ ܚܡܵܠܬܵܐ ܗܵܘܹܐ ܠܵܗ̇ ܦܘܼܠܚܵܢܵܐ ܬܲܡܵܡ: ܕܗܵܘܝܼܬܘܿܢ ܟܵܡܝܼ̈ܠܹܐ ܘܬܲܡܵܡ: ܘܒܡܸܢܕܝܼ ܠܵܐ ܗܵܘܝܼܬܘܿܢ ܚܣܝܼܪܹ̈ܐ.
5 ܐܝܼܢܵܐܐܸܢ ܐ݇ܢܵܫܵܐ ܡܸܢܵܘܟ݂ܘܿܢ ܚܣܝܼܪܵܐ ܝܠܹܐ ܡ̣ܢ ܥܵܩܸܠܕܵܪܘܼܬܵܐ: ܛܵܠܸܒ ܡ̣ܢ ܐܲܠܵܗܵܐ: ܗ̇ܘ ܕܟܹܐ ܝܵܗ݇ܒܸܠ ܠܟܠ ܒܕܵܘܠܲܬܡܲܢܕܘܼܬܵܐ ܘܠܹܐ ܠܵܝܸܡ: ܘܒܸܬ ܦܵܝܫܵܐ ܝܼܗ݇ܒܸܠܬܵܐ ܐܸܠܹܗ. 6 ܐܝܼܢܵܐ ܛܵܠܸܒ ܒܗܲܝܡܵܢܘܼܬܵܐ: ܟܲܕ ܠܵܐ ܦܵܝܸܫ ܕܘܼܒܵܪ. ܣܵܒܵܒ ܗ̇ܘ ܕܦܵܝܸܫ ܕܘܼܒܵܪ: ܟܹܐ ܕܵܡܹܐ ܠܠܲܦܹ̈ܐ ܕܝܵܡܵܐ ܫܓ݂ܝܼܫܹܐ ܡ̣ܢ ܦܵܘܚܵܐ. 7 ܘܠܵܐ ܚܵܫܸܒ݂ ܗ̇ܘ ܐ݇ܢܵܫܵܐ ܕܒܸܬ ܫܵܩܸܠ ܡܸܢܕܝܼ ܡ̣ܢ ܡܵܪܝܵܐ: 8 ܐ݇ܢܵܫܵܐ ܕܘܼܒܵܪ ܝܼܠܹܐ ܒܚܝܼܵܠܹܗ: ܫܓ݂ܝܼܫܵܐ ܒܟܠܵܝ ܐܘܼܪ̈ܚܵܬܘܼܗܝ.
9 ܐܝܼܢܵܐ ܥܵܒܸܕ ܫܘܼܒ݂ܗܵܪܵܐ ܐܵܚܘܿܢܵܐ ܟܘܼܦܵܐ ܒܪܝܵܡܬܹܗ: 10 ܘܕܵܘܠܲܬܡܲܢܕ ܒܟܝܵܦܬܹܗ: ܣܵܒܵܒ ܐܲܝܟ݂ ܦܸܩܚܵܐ ܕܓܸܠܵܐ ܗܲܕܟ݂ܵܐ ܒܸܬ ܥܵܒܸܪ. 11 ܣܵܒܵܒ ܟܹܐ ܙܵܪܸܩ ܫܸܡܫܵܐ ܒܚܸܡܹܗ: ܘܟܹܐ ܡܲܒܪܸܙ ܠܓܸܠܵܐ: ܘܦܸܩܚܹܗ ܟܹܐ ܢܵܦܸܠ: ܘܫܘܼܦܪܵܐ ܕܚܸܙܘܹܗ ܟܹܐ ܬܵܠܸܩ. ܗܲܕܟ݂ܵܐ ܐܘܼܦ ܕܵܘܠܲܬܡܲܢܕ ܒܸܬ ܟ̰ܵܡܸܥـܟ̰ ܒܚܕܵܪ̈ܘܼܗܝ.
12 ܛܘܼܒ݂ܵܐ ܠܐ݇ܢܵܫܵܐ ܕܚܵܡܸܠ ܓ̰ܘܼܪ̈ܵܒܹܐ: ܕܐܝܼܡܲܢ ܕܦܵܝܸܫ ܒܚܝܼܪܵܐ ܒܸܬ ܫܵܩܸܠ ܬܵܐܓ̰ ܕܚܲܝܹ̈ܐܗ̇ܘ ܕܩܘܼܘܸܠܹܐ ܡܵܪܝܵܐ ܠܐܵܢܝܼ ܕܡܲܚܸܒܝܼ ܠܹܗ. 13 ܠܵܐ ܐܵܡܸܪ ܐ݇ܢܵܫܵܐ ܟܲܕ ܦܵܝܸܫ ܓ̰ܘܼܪܒܵܐ: ܕܡ̣ܢ ܐܲܠܵܗܵܐ ܦܵܝܫܵܐ ܝܘܸܢ ܓ̰ܘܼܪܒܵܐ. ܣܵܒܵܒ ܐܲܠܵܗܵܐ ܠܹܐ ܦܵܝܸܫ ܓ̰ܘܼܪܒܵܐ ܡ̣ܢ ܒܝܼܫܵܬܹ̈ܐ: ܘܗ̇ܘ ܠܐ݇ܢܵܫܵܐ ܠܹܐ ܓ̰ܵܪܸܒ. 14 ܐܸܠܵܐ ܟܠ ܐ݇ܢܵܫܵܐ ܟܹܐ ܦܵܝܸܫ ܓ̰ܘܼܪܒܵܐ ܡ̣ܢ ܫܲܗ݇ܘܲܬܬܹܗ: ܟܲܕ ܦܝܵܫܵܐ ܡܘܼܩܠܸܒܵܐ ܘܫܘܼܕܠܵܐ (ܒܝܼܵܗ̇). 15 ܗ̇ܝܓܵܗ ܫܲܗ݇ܘܲܬܬܵܐ ܟܲܕ ܒܵܛܢܵܐ: ܟܹܐ ܝܵܠܕܵܐ ܚܛܝܼܬܵܐ. ܐܝܼܢܵܐ ܚܛܝܼܬܵܐ: ܐܝܼܡܲܢ ܕܦܵܝܫܵܐ ܬܘܼܡܸܡܬܵܐ: ܟܹܐ ܝܵܠܕܵܐ ܡܵܘܬܵܐ. 16 ܠܵܐ ܚܵܠܛܝܼܬܘܿܢ: ܐܵܚܘܿܢܘܵܬܝܼ̈ ܡܘܼܚܸܒܝܼ̈: 17 ܟܲܠ ܚܲܠܲܥܬ ܛܵܒ݂ܬܵܐ ܘܟܠ ܐܲܢܥܵܡ ܟܵܡܝܼܠ: ܡܥܸܠܸܠ ܝܼܠܵܐ: ܒܸܨܠܵܝܵܐ ܡ̣ܢ ܒܵܒܵܒ ܕܢܲܗܝܼܪܹ̈ܐ: ܗ̇ܘ ܕܠܲܝܬ ܠܟܸܣܠܹܗ ܟ̰ܘܼ ܫܘܼܚܠܵܦܵܐ: ܐܘܼܦ ܠܵܐ ܛܸܠܵܢܝܼܬܵܐ ܕܫܲܚܠܲܦܬܵܐ. 18 ܗ̇ܘ ܒܣܸܡܠܵܐ ܠܹܗ ܘܩܲܡ ܡܲܠܸܕ ܠܲܢ ܒܗܹܡܸܙܡܵܢ ܕܣܲܪܲܣܬܘܼܬܵܐ: ܕܗܵܘܵܚ ܐܲܝܟ݂ ܪܹܫܝܼܬܵܐ ܕܒܸܪ̈ܝܵܬܹܗ.
19 ܒܝܼܕܲܥܝܵܐ ܝܬܘܿܢ (ܐܲܢܹܐ): ܐܵܚܘܿܡܘܵܬܝܼ̈ ܡܘܼܚܸܒܹ̈ܐ. ܐܝܼܢܵܐ ܟܠ ܐ݇ܢܵܫܵܐ ܗܵܘܹܐ ܡܲܠܝܘܼܙܹܐ ܠܸܫܡܲܥܝܵܐ: ܘܥܲܪܩܘܼܠܹܐ ܠܗܲܡܙܘܼܡܹܐ: ܘܥܲܪܩܘܼܠܹܐ ܠܸܟܪܵܒܵܐ. 20 ܣܵܒܵܒ ܟܲܪܒܹܗ ܕܐ݇ܢܵܫܵܐ ܙܲܕܝܼܩܘܼܬܵܐ ܕܐܲܠܵܗܵܐ ܠܹܐ ܦܵܠܚܵܐ. 21 ܣܵܒܵܒ ܕܐܵܗܵܐ ܪܲܦܹܡܘܿܢ ܡܸܢܵܘܟ݂ܘܿܢ ܟܠܵܗ̇ ܛܲܢܦܘܼܬܵܐ ܘܒܘܼܫܵܝܘܼܬܵܐ ܕܒܝܼܫܘܼܬܵܐ: ܘܒܡܵܟܝܼܟ݂ܘܼܬܵܐ ܩܵܒܠܘܿܢ ܗܹܡܸܙܡܵܢ ܢܨܝܼܒ݂ܬܵܐ: ܗ̇ܝ ܕܡܵܨܝܵܐ ܕܡܲܚܝܼܵܐ ܠܓܵܢܵܬܵܘ̈ܟ݂ܘܿܢ. 22 ܐܝܼܢܵܐ ܗ݇ܘܹܡܘܿܢ ܥܵܒ݂ܕܵܢܹ̈ܐ ܕܗܹܡܸܙܡܵܢ: ܘܠܵܐ ܫܲܡܥܵܢܹ̈ܐ ܗܲܪ: ܟܲܕ ܡܲܚܠܘܼܟܹܐ ܓܵܢܵܬܵܘ̈ܟ݂ܘܿܢ. 23 ܣܵܒܵܒ ܐܸܢ ܐ݇ܢܵܫܵܐ ܗܵܘܹܐ ܫܲܡܥܵܢܵܐ ܕܗܹܡܸܙܡܵܢ ܘܠܵܐ ܥܵܒ݂ܕܵܢܘܼܗ̇: ܐܵܗܵܐ ܟܹܐ ܕܵܡܹܐ ܠܐ݇ܢܵܫܵܐ ܕܚܸܙܝܵܠܹܐ ܦܵܬܹܗ ܟܝܵܢܵܝܬܵܐ ܒܢܵܘܪܵܐ. 24 ܣܵܒܵܒ ܕܚܸܙܝܵܠܹܐ ܓܵܢܹܗ ܘܥܒܸܪܹܐ: ܘܕܲܪܣܵܥܲܬ ܢܫܹܠܹܐ ܕܐܵܟ݂ܝܼ ܗ݇ܘܵܐ. 25 ܐܝܼܢܵܐ ܟܠ ܕܚܵܝܸܪ ܒܢܵܡܘܿܣܵܐ ܬܲܡܵܡ ܕܐܵܙܵܕܘܼܬܵܐ: ܘܟܵܠܹܐ ܒܝܼܹܗ: ܐܵܗܵܐ ܠܹܐ ܝܠܹܐ ܫܲܡܥܵܢܵܐ ܕܟܹܐ ܢܵܫܹܐ: ܐܸܠܵܐ ܥܵܒ݂ܕܵܢܵܐ ܕܦܘܼܠܚܵܢܹ̈ܐ: ܘܐܵܗܵܐ ܛܘܼܒ݂ܵܢܵܐ ܒܸܬ ܗܵܘܹܐ ܒܦܘܼܠܚܵܢܹܗ. 26 ܘܐܸܢ ܐ݇ܢܵܫܵܐ ܚܵܫܸܒ݂ ܕܥܵܒ. ܕܵܢܵܐ ܕܚܸܠܡܲܬ ܠܐܲܠܵܗܵܐ ܝܠܹܐ: ܘܠܵܐ ܕܵܒܸܩ ܠܠܸܫܵܢܹܗ: ܐܸܠܵܐ ܡܲܚܠܸܛ ܠܠܸܒܹܗ: ܚܸܠܡܲܬ ܕܐܵܗܵܐ ܒܵܛܝܼܠܬܵܐ ܝܠܵܐ. 27 ܣܵܒܵܒ ܚܸܠܡܲܬ ܕܟ݂ܝܼܬܵܐ ܘܩܲܕܝܼܫܬܵܐ ܩܵܕ݇ܡ ܐܲܠܵܗܵܐ ܒܵܒܵܐ ܐܵܗܵܐ ܝܠܵܐ: ܠܸܬܦܵܩܵܐ ܒܝܵܬܘܿܡܗܹܐ ܘܐܲܪ̈ܡܸܠܝܵܬܹܗ ܒܐܘܼܠܨܵܢܵܝ̈: ܘܠܸܢܛܵܪܵܐ ܐ݇ܢܵܫܵܐ ܓܵܢܹܗ ܡ̣ܢ ܥܵܠܡܵܐ ܕܠܵܐ ܠܲܟܵܐ.
ܩܦܠܐܘܢ: ܒ
1 ܐܵܚܘܿܢܘܵܬܝܼ̈: ܠܵܐ ܒܚܙܵܝܬܵܐ ܕܦܵܬܵܐ ܕܵܒ݂ܩܝܼܬܘܿܢ ܠܗܲܝܡܵܢܘܼܬܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܕܬܸܫܒ݁ܘܿܚܬܵܐ. 2 ܣܵܒܵܒ ܐܸܢ ܐܵܘܸܪ ܠܟܢܘܼܫܬܵܘܟ݂ܘܿܢ ܐ݇ܢܵܫܵܐ ܡܵܪܹܐ ܥܹܙܲܩܬܵܐ ܕܕܲܗܒ݂ܵܐ: ܒܓ̰ܘܼ̈ܠܹܐ ܫܵܦܝܼܪܹ̈ܐ: ܘܐܵܘܸܪ ܡܸܣܟܹܢܹܐ ܒܓ̰ܵܘܼܠܹ̈ܐ ܫܸܚܬܵܢܹ̈ܐ: 3 ܘܚܵܝܪܝܼܬܘܿܢ ܒܗ̇ܘ ܕܝܼܠܹܐ ܠܒ݂ܝܼܫܵܐ ܓ̰ܘܼܠܹ̈ܐ ܫܵܦܝܼܪܹ̈ܐ: ܘܐܵܡܪܝܼܬܘܿܢ ܠܹܗ: ܐܲܢ݇ܬ ܝܬܘܿܡ ܠܲܐܟ݂ܵܐ ܨܦܵܝܝܼ: ܘܠܡܸܣܟܹܢܵܐ ܐܵܡܪܝܼܬܘܿܢ: ܐܲܢ݇ܬ ܟܠܝܼ ܬܵܡܵܐ: ܝܲܢ ܝܬܘܿܒ݂ ܠܲܐܟ݂ܵܐ ܬܚܘܿܬ ܟܘܼܒ݂ܫܵܐ ܕܐܲܩܠܝܼ̈: 4 ܠܵܐ ܗ݇ܘܹܠܵܘܟ݂ܘܿܢ ܦܲܠܝܵܢܹ̈ܐ ܓܵܘ ܓܵܢܵܘܟ݂ܘܿܢ: ܘܗ݇ܘܹܠܵܘܟ݂ܘܿܢ ܕܲܝܵܢܹ̈ܐ ܡܵܪܹ̈ܐ ܚܘܼܫܵܒ݂ܹ̈ܐ ܒܝܼܫܹ̈ܐ: 5 ܫܡܸܥܡܘܿܢ: ܐܵܚܘܿܢܘܵܬܝܼ̈ ܡܘܼܚܸܒܹ̈ܐ: ܠܵܐ ܓܘܼܒܹܠܹܐ ܐܲܠܵܗܵܐ ܠܡܸܣܟܹܢܹ̈ܐ ܕܐܵܗܵܐ ܥܵܠܡܵܐ (ܕܗܵܘܝܼ) ܕܵܘܠܲܬܡܲܢܕܹ̈ܐ ܒܗܲܝܡܵܢܘܼܬܵܐ: ܘܝܵܪ̈ܘܿܬܹ̈ܐ ܕܗ̇ܝ ܡܲܠܟܘܼܬܵܐ ܕܩܘܼܘܸܠܹܐ ܠܐܵܢܝܼ ܕܡܲܚܸܒܝܼ ܠܹܗ: 6 ܐܝܼܢܵܐ ܐܲܚܬܘܿܢ ܡܘܼܣܠܹܠܵܘܟ݂ܘܿܢ ܠܡܸܣܟܹܢܹܐ. ܕܵܘܠܲܬܡܲܢܕܹ̈ܐ ܠܹܐ ܝܢܵܐ ܒܸܙܠܵܡܵܐ ܥܲܠܵܘܟ݂ܘܿܢ: ܘܐܵܢܝܼ ܒܸܓܪܵܫܵܘܟ݂ܘܿܢ ܠܹܝܬ ܕܝܼܘܵܢ: 7 ܐܵܢܝܼ ܠܹܐ ܝܢܵܐ ܒܸܓܕܵܦܵܐ ܥܲܠ ܫܸܡܵܐ ܛܵܒ݂ܵܐ ܕܦܸܫܠܹܐ ܩܸܪܝܵܐ ܥܲܠܵܘܟ݂ܘܿܢ: 8 ܐܝܼܢܵܐ ܐܸܢ ܢܵܡܘܿܣܵܐ ܡܲܠܟܵܝܵܐ ܬܲܡܘܼܡܹܐ ܝܬܘܿܢ: ܐܲܝܟ݂ ܕܝܼܠܹܐ ܟܬܝܼܒ݂ܵܐ ܡܲܚܸܒܸܬ ܠܫܒ݂ܵܒ݂ܘܼܟ݂ ܐܲܝܟ݂ ܓܵܢܘܼܟ݂: ܫܵܦܝܼܪܵܐ ܒܸܥܒ݂ܵܕܵܐ ܝܬܘܿܢ. 9 ܐܝܼܢܵܐ ܐܸܢ ܦܵܬܵܐ ܒܸܚܙܵܝܵܐ ܝܬܘܿܢ: ܚܛܝܼܬܵܐ ܒܸܥܒ݂ܵܕܵܐ ܝܬܘܿܢ: ܘܦܝܵܫܵܐ ܝܬܘܿܢ ܡܘܼܢܟܸܣܹܐ ܡ̣ܢ ܢܵܡܘܿܣܵܐ: ܐܲܝܟ݂ ܥܵܒ݂ܪ̈ܵܢܹܐ ܥܲܠ ܢܵܡܘܿܣܵܐ. 10 ܣܵܒܵܒ ܗ̇ܘ ܕܟܠܹܗ ܢܵܡܘܿܣܵܐ ܢܵܛܸܪ: ܘܒܚܵܕ݇ ܓ̰ܵܪܸܛ: ܠܟܠܵܝ ܦܸܫܠܹܐ ܓܘܼܢܵܗܟܵܪ. 11 ܣܵܒܵܒ ܗ̇ܘ ܕܐܡܸܪܹܐ: ܠܵܐ ܥܵܒ݂ܕܸܬ ܩܲܗܒܘܼܬܵܐ: ܗܲܪ ܗ̇ܘ ܐܡܸܪܹܐ: ܠܵܐ ܩܛܠܸܬ. ܐܵܕܝܼܵܐ ܐܸܢ ܠܹܐ ܝܘܸܬ ܒܸܥܒ݂ܵܕܵܐ ܩܲܗܒܘܼܬܵܐ: ܐܸܠܵܐ ܒܸܩܛܵܠܵܐ ܝܘܸܬ: ܗ݇ܘܹܠܘܼܟ݂ ܥܵܒ݂ܪܵܢܵܐ ܥܲܠ ܢܵܡܘܿܣܵܐ. 12 ܗܲܕܟ݂ܵܐ ܗܵܘܝܼܬܘܿܢ ܗܲܡܙܘܼܡܹܐ: ܘܗܲܕܟ݂ܵܐ ܗܵܘܝܼܬܘܿܢ ܒܸܦܠܵܚܵܐ: ܐܲܝܟ݂ ܐ݇ܢܵܫܹ̈ܐ ܕܒܢܵܡܘܿܣܵܐ ܕܐܲܙܵܕܘܼܬܵܐ ܗܕܝܼܪܹܐ ܝܬܘܿܢ ܠܸܦܝܵܫܵܐ ܕܝܼܢܹܐ. 13 ܣܵܒܵܒ ܕܝܼܘܵܢ ܕܠܵܐ ܪ̈ܲܚܡܹܐ ܒܸܬ ܗܵܘܝܵܐ ܥܲܠ ܕܗ̇ܘ ܕܠܵܐ ܥܵܒܸܕ ܪ̈ܲܚܡܹܐ. ܪ̈ܲܚܡܹܐ ܒܸܥܒ݂ܵܕܵܐ ܝܢܵܐ ܫܘܼܒ݂ܗܵܪܵܐ ܥܲܠ ܕܝܼܘܵܢ.
14 ܡܘܼܕܝܼ ܦܲܝܕܵܐ: ܐܵܚܘܿܢܘܵܬܝܼ̈: ܐܸܢ ܐ݇ܢܵܫܵܐ ܐܵܡܸܪ ܕܐܝܼܬ ܠܝܼ ܗܲܝܡܵܢܘܼܬܵܐ: ܘܦܘܼܠܚܵܢܹ̈ܐ ܠܲܝܬ ܠܹܗ: ܟܹܐ ܡܵܨܝܵܐ ܗܲܝܡܵܢܘܼܬܹܗ ܕܡܲܚܝܼܵܐ ܠܹܗ: 15 ܘܐܸܢ ܐܵܚܘܿܢܵܐ ܝܲܢ ܚܵܬܵܐ ܗܵܘܝܼ ܫܘܼܠܚܵܝܹ̈ܐ: ܘܚܣܝܼܪܹܐ ܡ̣ܢ ܢܵܦܵܩ ܕܝܘܿܡܵܐ: 16 ܘܐܵܡܸܪ ܐܸܠܵܝ ܐ݇ܢܵܫܵܐ ܡܸܢܵܘܟ݂ܘܿܢ: ܙܹܠ݇ܡܘܿܢ ܒܫܠܵܡܵܐ: ܫܚܘܿܢܘܿܢ ܘܣܒܸܥܡܘܿܢ: ܘܠܵܐ ܝܵܗ݇ܒ݂ܝܼܬܘܿܢ ܠܗ݇ܘܿܢ ܣܢܝܼܩܘܼܬܵܐ ܕܦܲܓ݂ܪܵܐ: ܡܘܼܕܝܼ ܦܲܝܕܵܐ: 17 ܗܲܕܟ݂ܵܐ ܐܘܼܦ ܗܲܝܡܵܢܘܼܬܵܐ: ܐܸܢ ܠܵܐ ܗܵܘܝܼ ܠܵܗ̇ ܦܘܼܠܚܵܢܹ̈ܐ: ܡܝܼܬܵܬܵܐ ܝܠܵܐ ܒܢܲܦ̮ܫܘܼܗ̇. 18 ܐܸܠܵܐ ܒܸܬ ܐܵܡܸܪ ܐ݇ܢܵܫܵܐ: ܐܲܢ݇ܬ ܐܝܼܬ ܠܘܼܟ݂ ܗܲܝܡܵܢܘܼܬܵܐ ܘܐܵܢܵܐ ܐܝܼܬ ܠܝܼ ܦܘܼܠܚܵܢܹ̈ܐ. ܡܲܚܙܝܼ ܠܝܼ ܗܲܝܡܵܢܘܼܬܵܐ ܕܠܵܐ ܦܘܼܠܚܵܢܹ̈ܐ: ܘܐܵܢܵܐ ܒܸܬ ܡܲܚܙܸܢܘܼܟ݂ ܗܲܝܡܵܢܘܼܬܝܼ ܒܝܼܸܕ ܦܘܼܠܚܵܢܝܼ̈. 19 ܗܲܡܘܼܢܹܐ ܝܘܸܬ ܕܚܵܕ݇ ܝܼܠܹܐ ܐܲܠܵܗܵܐ: ܨܵܝܝܼ ܒܸܥܒ݂ܵܕܵܐ ܝܘܸܬ. ܐܘܼܦ ܕܲܝܘܹ̈ܐ ܟܹܐ ܗܲܡܸܢܝܼ ܘܪܵܓܕܝܼ. 20 ܒܸܒܲܥܝܵܐ ܝܘܸܬ ܕܝܲܕܥܸܬ: ܝܵܐ ܒܲܪܢܵܫܵܐ ܒܵܛܝܼܠܵܐ: ܕܗܲܝܡܵܢܘܼܬܵܐ ܕܠܵܐ ܦܘܼܠܚܵܢܹ̈ܐ ܡܝܼܬܬܵܐ ܝܠܵܐ: 21 ܒܵܒܲܢ ܐܲܒ݂ܪܵܗܵܡ ܠܹܐ ܗ݇ܘܵܐ ܡ̣ܢ ܦܘܼܠܚܵܢܹ̈ܐ ܦܸܫܠܹܐ ܡܘܼܟܫܸܛܵܐ: ܕܡܘܼܩܪܸܒ݂ܠܹܐ ܠܐܝܼܣܚܵܩ ܒܪܘܼܢܹܗ ܥܲܠ ܡܲܕܒܚܵܐ: 22 ܒܸܚܙܵܝܵܐ ܝܘܸܬ ܕܗܲܝܡܵܢܘܼܬܹܗ ܗܘܼܝܼܪܵܐ ܠܦܘܼܠܚܵܢܘܼ̈ܗܝ: ܘܡ̣ܢ ܦܘܼܠܚܵܢܹ̈ܐ ܗܲܝܡܵܢܘܼܬܹܗ ܦܸܫܠܵܐ ܡܘܼܟܡܸܠܬܵܐ. 23 ܘܦܸܫܠܹܐ ܬܘܼܡܸܡܵܐ ܟܬܵܒ݂ܵܐ: ܕܐܡܸܪܹܐ: ܗܘܼܡܸܢܹܐ ܐܲܒ݂ܪܵܗܵܡ ܒܐܲܠܵܗܵܐ: ܘܦܸܫܠܵܐ ܚܘܼܫܒܸܢܬܵܐ ܐܸܠܹܗ ܠܙܲܕܝܼܩܘܼܬܵܐ: ܘܕܵܘܣܸܬ ܕܐܲܠܵܗܵܐ ܦܸܫܠܹܐ ܩܸܪܝܵܐ. 24 ܒܸܚܙܵܝܵܐ ܝܬܘܿܢ ܕܡ̣ܢ ܦܘܼܠܚܵܢܗܹܐ ܟܹܐ ܦܵܝܸܫ ܡܘܼܟܫܸܛܵܐ ܒܲܪܢܵܫܵܐ: ܘܠܵܐ ܡ̣ܢ ܗܲܝܡܵܢܘܼܬܵܐ ܒܢܲܦ̮ܫܵܗ̇. 25 ܗܲܕܟ݂ܵܐ ܐܘܼܦ ܪܵܚܵܒ݂ ܙܵܢܝܼܬܵܐ: ܠܹܐ ܗ݇ܘܵܐ ܕܡ̣ܢ ܦܘܼܠܚܵܢܹ̈ܐ ܦܸܫܠܵܐ ܡܘܼܟܫܸܛܬܵܐ: ܟܲܕ ܩܘܼܒܸܠܵܐ ܠܓ̰ܵܣܘܿܣܗܹܐ ܘܒܐܘܼܪܚܵܐ ܐܚܹܪ݇ܬܵܐ ܦܘܼܠܛܵܝܠܵܐ: 26 ܣܵܒܵܒ ܕܐܵܟ݂ܝܼ ܕܦܲܓ݂ܪܵܐ ܕܠܵܐ ܪܘܼܚܵܐ ܡܝܼܬܵܐ ܝܠܹܐ: ܗܲܕܟ݂ܵܐ ܐܘܼܦ ܗܲܝܡܵܢܘܼܬܵܐ ܕܠܵܐ ܦܘܼܠܚܵܢܹ̈ܐ ܡܝܼܬܬܵܐ ܝܠܵܐ.
ܩܦܠܐܘܢ: ܓ
1 ܠܵܐ ܪܵܒܵܐ ܡܲܠܦܵܢܹ̈ܐ ܗܵܘܝܼܬܘܿܢ: ܐܵܚܘܿܢܘܵܬܝܼ̈: ܟܲܕ ܗܵܘܝܼܬܘܿܢ ܒܝܼܕܲܥܝܵܐ ܕܕܝܼܘܵܢ ܒܘܼܫ ܙܵܘܕܵܐ ܒܸܬ ܩܵܒ݁ܠܵܚ. 2 ܣܵܒܵܒ ܪܵܒܵܐ ܒܸܓ̰ܪܵܛܵܐ ܝܘܵܚ ܟܠܲܢ: ܐܸܢ ܐ݇ܢܵܫܵܐ ܒܗܹܡܸܙܡܵܢ ܠܵܐ ܓ̰ܵܪܸܛ: ܐܵܗܵܐ ܐ݇ܢܵܫܵܐ ܟܵܡܝܼܠ ܝܼܠܹܐ: ܕܡܵܨܹܐ ܙܲܒܛܸܢ ܐܘܼܦ ܠܟܠܹܗ ܦܲܓ݂ܪܹܗ. 3 ܐܝܼܢܵܐ ܐܸܢ ܠܥܲܡܹ̈ܐ ܒܦܘܼܡܵܐ ܕܣܝܼܣܵܘܵܬܹ̈ܐ ܒܸܕܪܵܝܵܐ ܝܘܵܚ: ܕܦܵܝܫܝܼ ܙܲܒܛ ܐܸܠܲܢ: ܟܠܹܗ ܓܘܼܫܡܵܝ ܡܲܕܘܼܪܹܐ ܝܘܵܚ. 4 ܗܵܐ: ܐܘܼܦ ܓܵܡ̈ܝܼܹܐ ܕܝܼܢܵܐ ܗܲܕܟ݂ܵܐ ܓܘܼܪܹ̈ܐ: ܘܠܘܼܒܠܹܐ ܡ̣ܢ ܦܵܘܚܹ̈ܐ ܩܸܫܝܹ̈ܐ: ܡ̣ܢ ܣܵܘܟܵܢ ܪܵܒܵܐ ܙܥܘܿܪܵܐ ܟܹܐ ܦܵܝܫܝܼ ܡܘܼܕܸܪܹܐ: ܠܗ̇ܝ ܕܘܼܟܬܵܐ ܕܒܲܥܝܹܐ ܪܹܙܵܝܹܗ ܕܗ̇ܘ ܕܬܲܓܒܸܪ. 5 ܗܲܕܟ݂ܵܐ ܐܘܼܦ ܠܸܫܵܢܵܐ ܗܲܕܵܡܵܐ ܙܥܘܿܪܵܐ ܝܠܹܐ: ܘܟܹܐ ܫܬܲܒ݂ܗܸܪ ܡܸܢܕܝܵܢܹ̈ܐ ܓܘܼܪܹ̈ܐ. ܗܵܐ: ܢܘܼܪܵܐ ܙܥܘܿܪܵܐ ܡܲܝܫܵܬܹ̈ܐ ܟܡܵܐ ܓܘܼܪܹ̈ܐ ܟܹܐ ܬܵܦܹܐ: 6 ܘܠܸܫܵܢܵܐ ܢܘܼܪܵܐ ܝܠܹܐ: ܘܥܵܠܡܵܐ ܘܥܵܘܠܵܐ. ܠܸܫܵܢܵܐ ܓܵܘ ܗܲܕܵܡܲـ̈ܢ ܝܼܠܹܐ ܗ̇ܘ ܕܟܹܐ ܠܲܟܸܢ ܠܟܠܹܗ ܦܲܓ݂ܪܲܢ: ܘܟܹܐ ܡܲܠܗܹܐ ܠܟ̰ܲܪܚ ܕܒܪܝܼܬܵܐ: ܘܡܘܼܠܗ݇ܝܼܵܐ ܝܠܹܐ ܐܘܼܦ ܗ̇ܘ ܡ̣ܢ ܓܹܗܲܢܵܐ. 7 ܣܵܒܵܒ ܟܠܵܝ ܟܝܵܢܹ̈ܐ ܕܗܲܝܘܵܢܹ̈ܐ: ܘܕܛܲܝܪܹ̈ܐ: ܘܕܪܸ̈ܓ̰ܒܹܐ: ܘܕܪ̈ܚܫܵܐ ܕܝܵܡܵܐ: ܟܹܐ ܦܵܝܫܝܼ ܙܘܼܒܛܸܢܹܐ: ܘܦܝܼܫܹܐ ܝܢܵܐ ܙܘܼܒܛܸܢܹܐ ܠܟܝܵܢܵܐ ܕܐ݇ܢܵܫܘܼܬܵܐ. 8 ܐܝܼܢܵܐ ܠܸܫܵܢܵܐ ܟ̰ܘܼ ܒܲܪܢܵܫܵܐ ܠܹܐ ܝܠܹܐ ܡܸܨܝܵܐ ܕܙܲܒܛܸܢܹܗ. ܒܝܼܫܬܵܐ ܠܵܐ ܫܠܝܼܬܵܐ ܝܠܹܐ: ܡܸܠܝܵܐ ܣܲܡܵܐ ܕܡܵܘܬܵܐ. 9 ܒܝܼܹܗ ܒܪܘܿܟ݂ܹܐ ܝܘܵܚ ܠܡܵܪܝܵܐ ܘܒܵܒܵܒܐ: ܘܒܝܼܹܗ ܒܸܠܝܵܛܵܐ ܝܘܵܚ ܠܒܢܲܝ̈ܢܵܫܵܐ ܕܒܕܡܘܼܬܵܐ ܕܐܲܠܵܗܵܐ ܒܸܪܝܹܐ ܝܢܵܐ. 10 ܗܲܪ ܡܗ̇ܘ ܦܘܼܡܵܐ ܟܹܐ ܦܵܠܛܝܼ ܠܵܘܛܵܬܹ̈ܐ ܘܒܘܼܪ̈ܟܵܬܹܐ. ܠܹܐ ܝܠܵܐ ܘܵܓ̰ܸܒ: ܐܵܚܘܿܢܘܵܬܝܼ̈: ܕܐܲܢܹܐ ܗܲܕܟ݂ܵܐ ܗܵܘܝܼ. 11 ܟܹܐ ܡܵܨܝܵܐ ܥܲܝܢܵܐ ܗܲܪ ܡ̣ܢ ܚܵܕ݇ ܦܘܼܡܵܐ ܦܵܠܛܵܐ ܡ̈ܝܼܵܐ ܚܸܠܝܹ̈ܐ ܘܡܲܪܝܼܪܹ̈ܐ: 12 ܝܼܢ ܟܹܐ ܡܵܨܹܐ: ܐܵܚܘܿܢܘܵܬܝܼ̈: ܐܝܼܠܵܢܵܐ ܕܬܹܐܢܵܐ ܙܲܝܬܹ̈ܐ ܥܵܒܸܕ: ܓܸܦܬܵܐ ܬܹܐܢܹ̈ܐ: ܗܲܕܟ݂ܵܐ ܡ̈ܝܼܵܐ ܫܘܿܪ ܠܹܐ ܡܵܨܝܼ ܕܥܵܒ݂ܕܝܼ ܚܸܠܝܹ̈ܐ.
13 ܡܵܢܝܼ ܝܠܹܐ ܡܸܢܵܘܟ݂ܘܿܢ ܥܵܩܸܠܕܵܪ ܘܬܘܼܥܠܡܵܐ: ܡܲܚܙܹܐ ܦܘܼܠܚܵܢܘܼ̈ܗܝ ܡ̣ܢ ܚܕܵܪܹ̈ܐ ܫܵܦܝܼܪܹ̈ܐ: ܒܥܵܩܸܠܕܵܪܘܼܬܵܐ ܡܵܟܝܼܟ݂ܬܵܐ. 14 ܐܝܼܢܵܐ ܐܸܢ ܒܲܚܸܠܵܢܘܼܬܵܐ ܡܲܪܝܼܪܬܵܐ ܐܝܼܬ ܓܵܘܵܘܟ݂ܘܿܢ: ܝܼܢ ܡܲܩܲܪܵܨܘܼܬܵܐ ܒܠܸܒܵܘ̈ܟ݂ܘܿܢ: ܠܵܐ ܚܵܬܪܝܼܬܘܿܢ ܘܕܵܓܠܝܼܬܘܿܢ ܥܲܠ ܣܲܪ̈ܣܬܘܼܬܵܐ. 15 ܐܵܗܵܐ ܥܵܩܸܠܕܵܪܘܼܬܵܐ ܡ̣ܢ ܥܸܠܸܠ ܠܹܐ ܝܠܵܐ ܒܸܨܠܵܝܵܐ: ܐܸܠܵܐ ܐܲܪܥܵܢܵܝܬܵܐ ܝܠܵܐ: ܢܲܦ̮ܫܵܢܵܝܬܵܐ ܘܕܲܝܘܵܢܵܝܬܵܐ. 16 ܣܵܒܵܒ ܐܲܝܟܵܐ ܕܐܝܼܬ ܒܲܚܸܠܵܢܘܼܬܵܐ ܘܡܲܩܲܪܵܨܘܼܬܵܐ: ܬܵܡܵܐ (ܐܝܼܬ) ܐܘܼܦ ܚܒ݂ܵܛܵܐ ܘܟܠ ܡܸܢܕܝܼ ܣܸܪܝܵܐ. 17 ܐܝܼܢܵܐ ܥܵܩܸܠܕܵܪܘܼܬܵܐ ܕܡ̣ܢ ܥܸܠܸܠ ܩܵܕ݇ܡܵܝܬܵܐ ܕܟ݂ܬܵܐ ܝܠܵܐ: ܗ̇ܝܓܵܗ ܡܠܝܼܬܵܐ ܫܠܵܡܵܐ: ܡܵܟܝܼܟ݂ܬܵܐ: ܩܵܒ݁ܠܵܢܬܵܐ: ܡܠܝܼܬܵܐ ܪ̈ܲܚܡܹܐ ܘܛܥܘܼܢܝܵܬܹ̈ܐ ܛܵܒ݂ܹ̈ܐ: ܕܠܵܐ ܕܘܼܒܵܪܘܼܬܵܐ: ܘܦܵܬܵܐ ܠܹܐ ܚܵܙܝܵܐ. 18 ܐܝܼܢܵܐ ܛܥܘܼܢܝܵܬܹ̈ܐ ܕܙܲܕܝܼܩܘܼܬܵܐ ܒܫܲܝܢܵܐ ܟܹܐ ܦܵܝܫܝܼ ܙܸܪܥܝܹܐ ܒܕܵܐܢܝܼ ܕܥܵܒ݂ܕܝܼ ܫܠܵܡܵܐ.
ܩܦܠܐܘܢ: ܕ
1 ܡܐܲܝܟܵܐ ܐܝܼܬ ܓܵܘܵܘܟ݂ܘܿܢ ܦܠܵܫܹ̈ܐ ܘܡܲܩܲܪ̈ܨܘܼܝܵܬܹܐ: ܠܹܐ ܝܢܵܐ ܡܐܲܟ݂ܵܐ: ܡ̣ܢ ܫܲܗ݇ܘܲܬܝܵܬܹ̈ܐ ܕܒܸܦܠܵܫܵܐ ܝܢܵܐ ܓܵܘ ܗܲܕܵܡܵܘ̈ܟ݂ܘܿܢ: 2 ܫܲܗ݇ܘܘܼܬܹܐ ܝܬܘܿܢ ܘܠܲܝܬ ܠܵܘܟ݂ܘܿܢ: ܒܸܩܛܵܠܵܐ ܝܬܘܿܢ ܘܒܲܚܘܼܠܹܐ ܝܬܘܿܢ: ܘܠܹܐ ܡܵܨܝܼܬܘܿܢ ܕܡܵܛܝܼܬܘܿܢ: ܘܡܲܩܪܘܼܨܹܐ ܝܬܘܿܢ ܘܒܸܦܠܵܫܵܐ ܝܬܘܿܢ: ܠܲܝܬ ܠܵܘܟ݂ܘܿܢ: ܣܵܒܵܒ ܠܹܐ ܝܬܘܿܢ ܒܸܛܠܵܒܵܐ. 3 ܒܸܛܠܵܒܵܐ ܝܬܘܿܢ ܘܠܹܐ ܝܬܘܿܢ ܩܵܒ݁ܘܿܠܹܐ: ܣܵܒܵܒ ܒܣܪܝܼܬܵܐ ܒܸܛܠܵܒܵܐ ܝܬܘܿܢ: ܕܬܲܣܝܼܬܘܿܢ ܫܲܗ݇ܘܲܬܝܵܬܵܘ̈ܟ݂ܘܿܢ. 4 ܝܵܐ ܩܲܗܒܝܵܬܹ̈ܐ: ܠܹܐ ܝܬܘܿܢ ܒܝܼܕܲܥܝܵܐ ܕܡܲܚܒܬܹܗ ܕܐܵܗܵܐ ܥܵܠܡܵܐ ܕܸܫܡܸܢܵܝܘܼܬܵܐ ܝܠܑܵ ܠܟܸܣ ܐܲܠܵܗܵܐ: ܒܲܣ ܗ̇ܘ ܕܒܲܥܝܹܐ ܕܗܵܘܹܐ ܕܵܘܣܬܵܐ ܕܐܵܗܵܐ ܥܵܠܡܵܐ: ܕܸܫܡܸܢ ܝܼܠܹܐ ܠܐܲܠܵܗܵܐ. 5 ܝܲܢ ܒܸܚܫܵܒ݂ܵܐ ܝܬܘܿܢ ܕܗܵܒܵܣ ܐܡܸܪܹܐ ܟܬܵܒ݂ܵܐ: ܒܩܲܝܪܲܬ ܟܹܐ ܫܲܗ݇ܘܸܬ ܪܘܼܚܵܐ ܕܒܸܥܡܵܪܵܐ ܝܠܹܐ ܒܝܼܲܢ: 6 ܐܝܼܢܵܐ ܫܵܦܵܩܲܬ ܒܘܼܫ ܙܵܘܕܵܐ ܒܝܼܵܗ݇ܒ݂ܵܐ ܝܠܹܐ. ܣܵܒܵܒ ܕܐܵܗܵܐ ܐܡܸܪܹܐ: ܐܲܠܵܗܵܐ ܟܹܐ ܟܵܠܹܐ ܕܲܪܩܘܼܒ݂ܠ ܕܪ̈ܵܡܹܐ: ܘܠܡܵܟܝܼܟ݂ܹ̈ܐ ܟܹܐ ܝܵܗ݇ܒܸܠ ܫܵܦܵܩܲܬ. 7 ܒܲܣ ܗ݇ܘܹܡܘܿܢ ܙܲܒܛ ܠܐܲܠܵܗܵܐ: ܐܝܼܢܵܐ ܩܘܼܡܘܿܢ ܠܕܲܪܩܘܼܒ݂ܠ ܕܣܵܛܵܢܵܐ: ܘܒܸܬ ܥܵܪܸܩ ܡܸܢܵܘܟ݂ܘܿܢ. 8 ܘܩܲܪܒܸܢܘܿܢ ܠܟܸܣ ܐܲܠܵܗܵܐ: ܘܒܸܬ ܩܲܪܒܸܢ ܐܸܠܵܘܟ݂ܘܿܢ. ܕܵܟܹܡܘܿܢ ܐܝܼܕܵܬܵܘ̈ܟ݂ܘܿܢ: ܚܲܛܵܝܹ̈ܐ: ܩܵܕܫܘܿܢ ܠܸܒܵܘܵܬܵܘ̈ܟ݂ܘܿܢ: ܕܘܼܒܲܪܹ̈ܐ ܒܚܝܼܵܠ. 9 ܦܘܼܫܘܿܢ ܒܚܲܫܵܐ: ܘܥܒ݂ܘܿܕܘܿܢ ܬܵܙܝܼ: ܘܒܟܹܡܘܿܢ: ܘܓܸܚܟܵܘܟ݂ܘܿܢ ܠܬܵܙܝܼ ܕܵܝܸܪ: ܘܚܲܕܘܼܬܵܘܟ݂ܘܿܢ ܠܥܵܘܩܵܢܵܐ. 10 ܡܲܡܟܸܟ݂ܘܿܢ ܓܵܢܵܘܟ݂ܘܿܢ ܩܵܕ݇ܡ ܡܵܪܝܵܐ: ܘܒܸܬ ܡܵܪܸܡ ܠܵܘܟ݂ܘܿܢ.
11 ܠܵܐ ܗܵܘܝܼܬܘܿܢ ܗܲܡܙܘܼܡܹܐ ܕܲܪܩܘܼܒ݂ܠ ܕܚܕܵܕܹ̈ܐ: ܐܵܚܘܿܢܘܵܬܝܼ̈: ܗ̇ܘ ܕܗܲܡܙܸܡ ܕܲܪܩܘܼܒ݂ܠ ܕܐܵܚܘܿܢܹܗ: ܝܲܢ ܕܵܝܸܢ ܠܐܵܚܘܿܢܹܗ: ܟܹܐ ܗܲܡܙܸܡ ܕܲܪܩܘܼܒ݂ܠ ܕܢܵܡܘܿܣܵܐ: ܘܟܹܐ ܕܵܝܸܢ ܠܢܵܡܘܿܣܵܐ. ܘܐܸܢ ܠܢܵܡܘܿܣܵܐ ܒܸܕܝܵܢܵܐ ܝܘܸܬ: ܠܹܐ ܝܘܸܬ ܥܵܒ݂ܕܵܢܵܐ ܕܢܵܡܘܿܣܵܐ: ܐܸܠܵܐ ܕܲܝܵܢܹܗ. 12 ܚܵܕ݇ ܝܼܠܹܐ ܡܲܬܒ݂ܵܢܵܐ ܕܢܵܡܘܿܣܵܐ ܘܕܲܝܵܢܵܐ: ܗ̇ܘ ܕܡܵܨܹܐ ܕܡܲܚܹܐ ܘܬܵܠܸܩ. ܐܝܼܢܵܐ ܐܲܢ݇ܬ ܡܵܢܝܼ ܝܘܸܬ ܕܒܸܕܝܵܢܵܐ ܝܘܸܬ ܠܫܒ݂ܵܒ݂ܘܼܟ݂:
13 ܬܹܡܘܿܢ ܐܵܕܝܼܵܐ ܐܲܚܬܘܿܢ ܕܒܹܐܡܵܪܵܐ ܝܬܘܿܢ: ܐܸܕܝܘܿ ܝܼܢ ܩܵܝܕܲܡܬܵܐ ܒܸܬ ܐܵܙܵܠ݇ܚ ܠܦܸܠܵܢ ܡܕܝܼܢ݇ܬܵܐ: ܘܒܸܬ ܦܵܠܚܵܚ ܬܵܡܵܐ ܚܕܵܐ ܫܹܢ݇ܬܵܐ: ܘܒܸܬ ܥܵܒ݂ܕܵܚ ܬܵܓ̰ܝܼܘܼܬܵܐ ܘܩܵܢܵܚ: 14 ܐܲܚܬܘܿܢ ܕܠܹܐ ܝܲܕܥܝܼܬܘܿܢ ܕܩܵܕܲܡܬܵܐ. ܣܵܒܵܒ ܝܢܵܐ ܚܲܝܵܘ̈ܟ݂ܘܿܢ: ܐܸܠܵܐ ܐܸܢ ܗܵܘܓܵܐ ܕܚܲܟ̰ܵܐ ܦܵܝܸܫ ܚܸܙܝܵܐ ܘܗ̇ܝܓܵܗ ܬܵܝܸܡ: 15 ܡܒܵܕܵܠ ܕܐܵܡܪܝܼܬܘܿܢ: ܐܸܢ ܡܵܪܝܵܐ ܒܵܣܡܵܐ ܠܹܗ ܘܚܲܝܵܚ: ܒܸܬ ܥܵܒ݂ܕܵܚ ܐܵܗܵܐ ܝܲܢ ܗ̇ܝ. 16 ܐܝܼܢܵܐ ܐܵܕܝܼܵܐ ܒܸܥܒ݂ܵܕܵܐ ܝܬܘܿܢ ܫܘܼܒ݂ܗܵܪܵܐ ܒܚܬܵܪܬܵܘܟ݂ܘܿܢ. ܟܠ ܗܲܕܟ݂ܵܐ ܫܘܼܒ݂ܗܵܪܵܐ ܒܝܼܫܵܐ ܝܠܹܐ. 17 ܘܗ̇ܘ ܕܝܲܕܸܥ ܠܸܥܒ݂ܵܕܵܐ ܛܵܒ݂ܬܵܐ: ܘܠܵܐ ܥܸܒܸܕ ܠܵܗ̇: ܚܛܝܼܬܵܐ ܝܠܵܐ ܐܸܠܹܗ.
ܩܦܠܐܘܢ: ܗ
1 ܬܹܡܘܿܢ ܐܵܕܝܼܐ: ܐܲܝ ܕܵܘܠܲܬܡܲܢܕܹ̈ܐ: ܘܲܠܘܸܠܘܿܢ ܘܒܟܹܡܘܿܢ ܥܲܠ ܕܲܪ̈ܕܹܐ ܝܢܵܐ ܥܲܠܵܘܟ݂ܘܿܢ. 2 ܕܵܘܸܠܬܵܘܟ݂ܘܿܢ ܚܪܸܒ݂ܠܵܐ: ܘܓ̰ܘܼܠܵܘ̈ܟ݂ܘܿܢ ܦܸܫܠܘܿܢ ܐܟ݂ܝܼܠܹܐ ܡ̣ܢ ܐܸܟ݂ܠܵܐ. 3 ܕܲܗܒ݂ܵܘܟ݂ܘܿܢ ܘܣܹܐܡܵܘܟ݂ܘܿܢ ܓ̰ܘܼܢܓ̰ܵܢܹܐ: ܘܓ̰ܵܢܓܵܝ ܒܸܬ ܒܸܬ ܗܵܘܝܵܐ ܠܣܵܗܕܘܼܬܵܐ ܥܲܠܵܘܟ݂ܘܿܢ: ܘܒܸܬ ܐܵܟ݂ܠܵܐ ܒܸܣܪܵܘܟ݂ܘܿܢ ܐܲܝܟ݂ ܢܘܼܪܵܐ. ܚܲܙܝܼܢܵܐ ܓ̰ܘܼܡܸܥܠܵܘܟ݂ܘܿܢ ܐܸܠܵܘܟ݂ܘܿܢ ܠܝܘܿܡܵܢܹ̈ܐ ܐܚܵܪ̈ܵܝܹܐ. 4 ܗܵܐ: ܗܵܩܵܐ ܕܦܵܥ̈ܠܹܐ ܕܚܨܕܠܘܿܢ ܐܵܪ̈ܥܵܬܵܘܟ݂ܘܿܢ: ܗ̇ܘ ܕܙܠܸܡܠܵܘܟ݂ܘܿܢ: ܡܲܩܘܘܼܚܹܐ ܝܠܹܐ: ܘܫܲܦܠܲܦܬܵܐ ܕܚܵܨܵܕܗܹܐ ܠܢܵܬܝܵܬܹ̈ܐ ܕܡܵܪܝܵܐ ܨܒ݂ܵܐܘܼܬ ܐܘܸܪܵܐ. 5 ܥܒܸܕܠܵܘܟ݂ܘܿܢ ܒܘܼܣܵܡܵܐ ܥܲܠ ܐܲܪܥܵܐ: ܘܥܒܸܕܠܵܘܟ݂ܘܿܢ ܒܲܕܢܲܦ̮ܣܘܼܬܵܐ: ܘܬܘܼܪܣܹܠܵܘܟ݂ܘܿܢ ܠܸܒܵܘܵܬܘ̈ܟ݂ܘܿܢ ܐܲܝܟ݂ ܠܝܘܿܡܵܐ ܕܦܪܵܡܬܵܐ. 6 ܥܒܸܕܠܵܘܟ݂ܘܿܢ ܓܘܼܢܵܗܟܵܪ ܘܩܛܸܠܵܘܟ݂ܘܿܢ ܠܙܲܕܝܼܩܵܐ: ܘܠܵܐ ܩܸܡܠܹܐ ܠܕܲܪܩܘܼܒ݂ܠܵܘܟ݂ܘܿܢ.
7 ܒܲܣ ܐܲܚܬܘܿܢ: ܐܵܚܘܿܢܘܵܬܝܼ̈: ܡܲܪܝܸܟ݂ܘܿܢ ܒܹܢܵܘܟ݂ܘܿܢ ܗܲܠ ܐܬܵܝܬܹܗ ܕܡܵܪܝܵܐ. ܗܵܐ: ܐܲܟܵܪܵܐ ܟܹܐ ܣܵܦܸܪ ܠܡܲܗܨܘܼܠܹ̈ܐ ܡܝܘܼܩܪܹ̈ܐ ܕܐܲܪܥܵܐ: ܘܡܲܪܝܸܟ݂ ܒܹܢܹܗ ܥܲܠܵܝ: ܗܲܠ ܕܩܵܒܥܸܠ ܡܸܛܪܵܐ ܗܵܪܘܵܫ ܘܣܹܘܵܕܬܵܐ. 8 ܐܘܼܦ ܐܲܚܬܘܿܢ. ܡܲܪܝܸܟ݂ܘܿܢ ܒܹܢܵܘܟ݂ܘܿܢ: ܘܠܸܒܵܘܵܬܵܘ̈ܟ݂ܘܿܢ ܡܲܩܘܹܡܘܿܢ: ܣܵܒܵܒ ܩܘܼܪܒܸܢܬܵܐ ܝܠܵܐ ܐܬܵܝܬܹܗ ܕܡܵܪܲܢ. 9 ܠܵܐ ܬܵܢܚܝܼܬܘܿܢ ܚܵܕ݇ ܥܲܠ ܗ̇ܘ ܐܚܹܪ݇ܢܵܐ ܐܵܚܘܿܢܘܵܬܝܼ̈: ܕܠܵܐ ܦܵܝܫܝܼܬܘܿܢ ܕܝܼܢܹܐ. ܗܵܐ ܕܲܝܵܢܵܐ ܩܵܕ݇ܡ ܬܲܪܥܵܐ ܟܸܠܝܵܐ ܝܠܹܐ. 10 ܠܛܘܼܦ̮ܣܵܐ ܕܐܘܼܠܨܵܢܹ̈ܐ ܘܕܡܲܪܝܲܟ݂ܬܵܐ ܕܒܹܢܵܐ: ܫܩܘܿܠܘܿܢ ܠܵܘܟ݂ܘܿܢ ܠܢܒ݂̈ܝܼܹܐ: ܐܵܚܘܿܢܘܵܬܝܼ̈: ܐܵܢܝܼ ܕܗܘܼܡܙܸܡܠܘܿܢ ܒܫܸܡܹܗ ܕܡܵܪܝܵܐ. 11 ܗܵܐ: ܒܝܼܵܗ݇ܒ݂ܵܐ ܝܘܵܚ ܛܘܼܒ݂ܵܐܠܐܵܢܝܼ ܕܚܡܸܠܘܿܢ. ܫܡܸܥܠܵܘܟ݂ܘܿܢ ܚܡܵܠܬܹܗ ܕܐܝܼܘܿܒ݂: ܘܚܲܪܬܵܐ ܕܡܵܪܝܵܐ ܚܙܹܠܵܘܟ݂ܘܿܢ: ܣܵܒܵܒ ܡܪܲܚܡܵܢܵܐ ܝܼܠܹܐ ܡܵܪܝܵܐ ܘܡܪܲܦܪܸܦܵܢܵܐ.
12 ܐܝܼܢܵܐ ܩܵܕ݇ܡ ܟܠܹܗ ܡܸܢܕܝܼ: ܐܵܚܘܿܡܘܵܬܝܼ̈: ܠܵܐ ܗܵܘܝܼܬܘܿܢ ܒܹܡܵܝܵܐ: ܠܵܐ ܒܫܡܲܝܵܐ: ܘܠܵܐ ܒܐܲܪܥܵܐ: ܐܘܼܦ ܠܵܐ ܒܡܵܘܡܵܬܵܐ ܐܚܹܪ݇ܬܵܐ. ܐܸܠܵܐ ܗܵܘܝܵܐ ܗܹܐ ܕܝܼܵܘܟ݂ܘܿܢ ܗܹܐ: ܘܠܵܐ: ܠܵܐ: ܕܠܵܐ ܢܵܦܠܝܼܬܘܿܢ ܒܓܘܼܢܵܗܟܵܪܘܼܬܵܐ.
13 ܐܸܢ ܐ݇ܢܵܫܵܐ ܡܸܢܵܘܟ݂ܘܿܢ ܗܵܘܹܐ ܒܐܘܼܠܨܵܢܵܐ: ܨܵܠܹܐ ܨܠܘܿܬܵܐ. ܐܸܢ ܚܵܕܹܐ: ܙܵܡܸܪ ܡܲܙܡܘܿܪܹ̈ܐ: 14 ܐܸܢ ܡܸܪܥܝܵܐ ܝܠܹܐ: ܩܵܪܹܐ ܠܩܲܫܝܼܫܹ̈ܐ ܕܥܹܕܬܵܐ: ܘܨܵܠܝܼ ܥܲܠܘܼܗܝ: ܘܡܵܫܚܝܼ ܠܹܗ ܡܸܫܚܵܐ ܒܫܸܡܹܗ ܕܡܵܪܲܢ. 15 ܘܨܠܘܿܬܵܐ ܕܗܲܝܡܵܢܘܼܬܵܐ ܒܸܬ ܡܲܚܝܼܵܐ ܠܹܗ ܗ̇ܘ ܕܝܼܠܹܐ ܡܸܥܝܵܐ: ܘܒܸܬ ܡܲܩܸܡ ܠܹܗ ܡܪܲܢ: ܘܐܸܢ ܚܛܵܝܼܵܬܹ̈ܐ ܥܒ݂ܝܼܕܵܐ ܝܠܹܐ: ܒܸܬ ܦܵܝܫܝܼ ܫܒ݂ܝܼܩܹܐ ܐܸܠܹܗ. 16 ܐܝܼܢܵܐ ܗܵܘܝܼܬܘܿܢ ܡܵܘܕܘܿܝܹܐ ܓܢܵܗܵܘ̈ܟ݂ܘܿܢ ܚܵܕ݇ ܠܗ̇ܘ ܐܚܹܪܢܵܐ: ܘܗܵܘܝܼܬܘܿܢ ܨܵܠܘܿܝܹܐ ܚܵܕ݇ ܥܲܠ ܗ̇ܘ ܐܚܹܪ݇ܢܵܐ: ܕܦܵܝܫܝܼܬܘܿܢ ܒܘܼܣܡܹܐ. ܓܘܼܪܵܐ ܝܠܹܐ ܚܲܝܠܵܐ ܕܨܠܘܿܬܵܐ ܗ̇ܝ ܕܙܲܕܝܼܩܵܐ ܨܵܠܹܐ ܠܵܗ̇. 17 ܐܹܠܝܼܵܐ ܒܲܪܢܵܫܵܐ ܗ݇ܘܵܐ ܚܵܫܘܿܫܵܐ ܐܲܝܟ݂ ܕܝܼܲܢ: ܘܨܘܼܠܹܠܹܐ ܨܠܘܿܬܵܐ ܕܠܵܐ ܥܵܪܝܵܐ ܗ݇ܘܵܐ ܡܸܛܪܵܐ ܥܲܠ ܐܲܪܥܵܐ: ܘܠܵܐ ܥܪܹܠܵܐ ܬܠܵܬ݇ ܫܸܢܹ̈ܐ ܘܐܸܫܬܵܐ ܝܲܪ̈ܚܹܐ. 18 ܘܡܸܕܪܹܐ ܨܘܼܠܹܠܹܐ: ܘܫܡܲܝܹ̈ܐ ܝܸܗܝܸܠܘܿܢ ܡܸܛܪܵܐ: ܘܐܲܪܥܵܐ ܝܸܥܒܸܠܵܐ ܡܲܗܨܘܼܠܘܼ̈ܗ̇.
19 ܐܵܚܘܿܢܘܵܬܝܼ̈: ܐܸܢ ܐ݇ܢܵܫܵܐ ܡܸܢܵܘܟ݂ܘܿܢ ܚܵܠܸܛ ܡ̣ܢ ܣܲܪ̈ܣܬܘܼܬܵܐ: ܘܐ݇ܢܵܫܵܐ ܡܲܕܪܹܗ: 20 ܝܲܕܸܥ ܕܗ̇ܘ ܕܡܲܕܸܪ ܠܚܲܛܵܝܵܐ ܡ̣ܢ ܚܸܠܛܘܼܢܝܘܼܬܵܐ ܕܐܘܼܪܚܹܗ: ܟܹܐ ܦܵܪܸܩ ܚܕܵܐ ܓܵܢܵܐ ܡ̣ܢ ܡܵܘܬܵܐ: ܘܟܹܐ ܟܵܣܹܐ ܒܘܼܫܵܝܘܼܬܵܐ ܕܚܛܝܼܵܬܹ̈ܐ.