ܟܬܒ̣ܐ

ܕܕܝܬܩܐ ܚܕܬܐ

ܕܡܪܢ ܝܫܘܥ ܡܫܝܚܐ

ܦܘܼܫܵܩܵܐ ܡ̣ܢ ܐܲܨܚܬܐ ܦܫܝܛܬܐ: ܡܘܼܕܒ̣ܩܐ ܥܡ ܕܐܢܝ ܕܝܘܢܝܐ

ܟܪܘܙܘܬܐ ܕܠܘܩܐ

ܩܦܠܐܘܢ: ܐ

1 ܣܵܒܵܒ ܕܪܵܒܵܐ ܕܪܹܠܘܿܢ ܐܝܼܕܵܐ ܠܡܲܠܚܘܼܡܹܐ ܬܲܫܥ̈ـܝܵܬܵܐ 2 ܒܵܗܣ ܕܐܵܢܝܼ ܫܘܼܠܹ̈ܐ ܕܦܝܼܫܹܐ ܝܢܵܐ ܗܘܼܡܸܢܹܐ ܒܓܵܘܲܢ. ܕܵܐܟ̣ܝܼ ܕܣܘܼܦܹܠܘܿܢ ܒܝܲܢ ܐܵܢܝܼ ܕܡ̣ܢ ܩܵܕ̄ܡܵܝܬܵܐ ܗ̄ܘܹܠܘܿܢ ܚܵܙܝܵܢܹ̈ܐ 3 ܘܚܸܠܡܲܬܟܵܪܹ̈ܐ ܕܗܹܡܸܙܡܵܢ. ܐܘܼܦ ܐܵܢܵܐ: ܕܡ̣ܢ ܩܵܕ̄ܡܵܝܬܵܐ ܬܘܼܦ̮ܬܸܫܠܝܼ ܒܚܲܡܚܘܵܪܘܼܬܵܐ ܠܟܠܵܝ: ܚܫܸܒ̣ܠܝܼ ܕܒܪܹܐܙܵܐ 4 ܟܵܬܒܸܢܘܼܟ: ܝܵܐ ܢܲܨܝܼܚܵܐ ܬܹܐܘܿܦܝܼܠܲܐ. ܕܝܲܕܥܸܬ ܫܲܪܝܼܪܘܼܬܵܐ ܕܐܵܢܝܼ ܗܹܡܸܙܡܵܢܹ̈ܐ ܕܦܸܫܠܘܼܟ ܬܘܼܠܡܸܕܵܐ ܐܸܠܵܝ. 5 ܗ̄ܘܹܠܹܐ ܒܝܘܿܡܵܢܹ̈ܐ ܕܗܹܪܘܿܕܸܣ: ܡܲܠܟܵܐ ܕܝܼܗܘܼܕܵܐ: ܚܵܕ̄ ܟܵܗܢܵܐ ܕܫܸܡܹܗ ܙܟܲܪܝܵܐ: ܡ̣ܢ ܚܸܠܡܲܬ ܕܒܹܝܬ ܐܲܒ̣ܝܼܵܐ: ܘܒܲܟ̣ܬܹܗ 6 ܡ̣ܢ ܒܢܵܬܹ̈ܐ ܕܐܲܗܪܘܿܢ: ܫܸܡܵܗ̇ ܗ̄ܘܵܐ ܐܹܠܝܼܫܒܲܥ. ܘܬܸܪܘܸܢܬܵܝ ܙܲܕܝܼܩܹ̈ܐ ܗ̄ܘܵܘ ܩܵܕ̄ܡ ܐܲܠܵܗܵܐ: ܒܸܚܕܵܪܵܐ ܒܟܠܵܝ ܦܘܼܩܕܵܢܹ̈ܐ 7 ܘܩܵܢܘܿܢܹ̈ܐ ܕܡܵܪܝܵܐ ܕܠܵܐ ܠܵܘܡܵܐ. ܐܝܼܢܵܐ ܝܵܠܵܐ ܠܲܝܬ ܗ̄ܘܵܐ ܠܗ̄ܘܿܢ: ܣܵܒܵܒ ܐܹܠܝܼܫܒܲܥ ܥܩܲܪܬܵܐ ܗ̄ܘܵܐ: ܘܬܸܪܘܸܢܬܵܝ ܪܵܒܵܐ ܗ̄ܘܵܘ ܒܝܘܿܡܵܢܵܝ̈. 8 ܘܗ̄ܘܹܠܵܐ ܕܟܲܕ ܒܸܥܒ̣ܵܕܵܐ ܗ̄ܘܵܐ ܟܵܗܢܘܼܬܵܐ ܒܛܲܟ̣ܣܵܐ 9 ܕܚܸܠܡܲܬܹܗ ܩܵܕ̄ܡ ܐܲܠܵܗܵܐ. ܒܥܵܕܲܬ ܕܟܵܗܢܘܼܬܵܐ ܡܛܹܠܵܐ ܐܸܠܹܗ ܕܡܵܩܸܕ ܒܸܣܡܹ̈ܐ: ܘܐܘܸܪܹܐ ܠܗܲܝܟܠܹܗ ܕܡܵܪܝܵܐ. 10 ܘܟܠܵܗ̇ ܓ̰ܲܡܵܥܲܬ ܕܛܵܝܸܦܵܐ ܨܵܠܘܿܝܹܐ ܗ̄ܘܵܐ ܠܒܲܕܲܪ ܒܥܕܵܢܵܐ 11 ܕܒܸܣܡܹ̈ܐ. ܘܦܸܫܠܹܐ ܚܸܙܝܵܐ ܐܸܠܹܗ ܡܲܠܲܐܟ̣ܵܐ ܕܡܵܪܝܵܐ: ܕܟܸܠܝܵܐ 12 ܡ̣ܢ ܝܲܡܝܼܢܵܐ ܕܡܲܕܒܚܵܐ ܕܒܸܣܡܹ̈ܐ. ܘܦܸܫܠܹܐ ܫܓ̣ܝܼܫܵܐ ܙܟܲܪܝܵܐ 13 ܟܲܕ ܚܙܹܠܹܗ: ܘܙܕܘܼܥܬܵܐ ܢܦܸܠܵܐ ܥܲܠܘܼܗܝ. ܘܐܡܸܪܹܐ ܐܸܠܹܗ ܡܲܠܲܐܟ̣ܵܐ: ܠܵܐ ܙܵܕܥܸܬ: ܙܟܲܪܝܵܐ: ܣܵܒܵܒ ܕܦܸܫܠܵܐ ܫܡܥܝܼܬܵܐ ܦܲܪܦܲܠܬܘܼܟ: ܘܒܲܟ̣ܬܘܼܟ ܐܹܠܝܼܫܒܲܥ ܒܸܬ ܝܵܠܕܵܐ ܠܘܼܟ ܒܪܘܼܢܵܐ: 14 ܘܒܸܬ ܩܵܪܸܬ ܫܸܡܹܗ: ܝܘܿܚܲܢܵܢ. ܘܒܸܬ ܗܵܘܝܵܐ ܠܘܼܟ ܚܲܕܘܼܬܵܐ 15 ܘܦܨܵܚܵܐ: ܘܪܵܒܵܐ ܒܸܬ ܚܵܕܝܼ ܒܗ̄ܘܵܝܬܹܗ. ܣܵܒܵܒ ܕܒܸܬ ܗܵܘܹܐ ܓܘܼܪܵܐ ܩܵܕ̄ܡ ܡܵܪܝܵܐ: ܘܚܲܡܪܵܐ ܘܥܵܪܵܩ ܠܹܐ ܫܵܬܹܐ: ܘܒܸܬ ܦܵܝܸܫ ܡܸܠܝܵܐ ܪܘܼܚܵܐ ܕܩܘܼܕܫܵܐ: ܗܲܪ ܡ̣ܢ ܟܹܪ̄ܣܵܐ 16 ܕܝܸܡܹܗ. ܘܪܵܒܵܐ ܡ̣ܢ ܒܢܲܝ̈ ܝܼܣܪܵܝܹܠ ܒܸܬ ܡܲܕܸܪ ܠܟܸܣ 17 ܡܵܪܝܵܐ ܐܲܠܵܗܵܝ. ܘܗ̇ܘ ܒܸܬ ܐܵܙܸܠ ܩܵܕ̄ܡܘܼܗܝ ܒܪܘܼܚܵܐ ܘܒܚܲܝܠܵܐ ܕܐܹܠܝܼܵܐ: ܕܡܲܕܸܪ ܠܸܒܵܘܵܬܹ̈ܐ ܕܐܲܒ̣ܵܗܹ̈ܐ ܠܒܢܘܼܢܹ̈ܐ: ܘܠܵܐܢܝܼ ܕܠܹܐ ܡܲܨܝܸܬܝܼ ܠܦܲܪܡܵܝܬܵܐ ܕܟܹܐܢܹ̈ܐ: ܘܕܗܵܕܸܪ ܠܡܵܪܝܵܐ ܛܵܝܸܦܵܐ 18 ܟܵܡܝܼܠ. ܘܐܡܸܪܹܐ ܙܟܲܪܝܵܐ ܠܡܲܠܲܐܟ̣ܵܐ: ܕܵܐܟ̣ܝܼ ܝܲܕܥܸܢ ܐܵܗܵܐ: ܣܵܒܵܒ ܐܵܢܵܐ ܣܵܒ̣ܵܐ ܝܘܸܢ: ܘܒܲܟ̣ܬܝܼ ܪܵܒܵܐ ܝܠܵܐ ܒܝܘܿܡܵܢܘܼ̈ܗ̇. 19 ܘܓ̰ܘܼܘܸܒܠܹܐ ܡܲܠܲܐܟ̣ܵܐ ܘܐܡܸܪܹܐ ܐܸܠܹܗ: ܐܵܢܵܐ ܝܘܸܢ ܓܲܒ̣ܪܝܹܠ ܕܟܹܐ ܟܵܠܸܢ ܩܵܕ̄ܡ ܐܲܠܵܗܵܐ: ܘܦܸܫܠܝܼ ܫܘܼܕܪܵܐ ܕܗܲܡܙܸܡܸܢ 20 ܥܲܡܘܼܟ: ܘܡܲܫܚܸܕܸܢܘܼܟ ܐܲܢܹܐ. ܘܗܵܐ: ܒܸܬ ܗܵܘܸܬ ܫܬܝܼܩܵܐ: ܘܠܹܐ ܡܵܨܸܬ ܠܗܲܡܙܘܼܡܹܐ: ܗܲܠ ܝܘܿܡܵܐ ܕܐܲܢܹܐ ܗܵܘܝܼ: ܣܵܒܵܒ ܕܠܵܐ ܗܘܼܡܸܢܘܼܟ ܠܗܹܡܸܙܡܵܢܝܼ̈: ܐܵܢܝܼ ܕܒܸܬ ܦܵܝܫܝܼ ܬܘܼܡܸܡܹܐ 21 ܒܙܲܒ̣ܢܵܝ. ܐܝܼܢܵܐ ܛܵܝܸܦܵܐ ܒܸܣܦܵܪܵܐ ܗ̄ܘܵܐ ܠܙܟܲܪܝܵܐ: ܘܥܘܼܓ̰ܒܹܐ 22 ܗ̄ܘܵܘ ܒܥܲܪܩܲܠܬܹܗ ܓܵܘ ܗܲܝܟܠܵܐ. ܐܝܼܢܵܐ ܟܲܕ ܦܠܸܛܠܹܐ: ܠܹܐ ܡܵܨܹܐ ܗ̄ܘܵܐ ܕܗܲܡܙܸܡ ܥܲܡܵܝ: ܘܦܘܼܪܡܹܠܘܿܢ ܕܚܸܙܘܵܐ ܚܙܹܠܹܐ ܓܵܘ ܗܲܝܟܠܵܐ: ܘܗ̇ܘ ܪܡܵܙܵܐ ܪܵܡܸܙ ܗ̄ܘܵܐ ܠܗ̄ܘܿܢ: ܘܦܸܫܠܹܐ 23 ܠܲܥܠܵܐ. ܘܗ̄ܘܹܠܵܐ ܕܟܲܕ ܦܸܫܠܘܿܢ ܬܘܼܡܸܡܹܐ ܝܘܿܡܵܢܹ̈ܐ ܕܚܸܠܡܲܬܹܗ: ܐܙܸܠܹܐ ܠܒܲܝܬܹܗ. 24 ܘܡܒܵܬ̄ܪ ܕܐܵܢܝܼ ܝܘܿܡܵܢܹ̈ܐ ܒܛܸܢܵܐ ܐܹܠܝܼܫܲܥ ܒܲܟ̣ܬܹܗ: 25 ܘܛܘܼܫܝܵܠܵܐ ܓܵܢܘܼܗ̇ ܚܲܡܫܵܐ ܝܲܪ̈ܚܹܐ: ܘܐܵܡܪܵܐ ܗ̄ܘܵܐ. ܗܲܕܟ̣ܵܐ ܥܒܸܕܠܹܐ ܐܸܠܝܼ ܡܵܪܝܵܐ: ܒܝܘܿܡܵܢܹ̈ܐ ܕܚܸܪܹܐ ܒܝܼܝܼ ܠܸܫܩܵܠܵܐ ܠܵܘܡܝܼ ܓܵܘ ܒܢܲܝ̈ܢܵܫܵܐ. 26 ܘܒܝܲܪܚܵܐ ܕܐܹܫܬܵܐ ܦܸܫܠܹܐ ܫܘܼܕܪܵܐ ܓܲܒ̣ܪܝܹܠ ܡܲܠܲܐܟ̣ܵܐ ܡ̣ܢ 27 ܠܟܸܣ ܐܲܠܵܗܵܐ ܠܡܕܝܼܢ̄ܬܵܐ ܕܓܠܝܼܠܵܐ ܕܫܸܡܵܗ̇ ܢܵܨܪܲܬ. ܒܬܘܼܠܬܵܐ ܛܠܝܼܒܬܵܐ ܠܐܢܵܫܵܐ ܕܫܸܡܹܗ ܝܵܘܣܸܦ: ܡ̣ܢ ܒܹܝܬ ܕܵܘܝܼܕ: ܘܫܸܡܵܐ 28 ܕܒܬܘܼܠܬܵܐ ܡܲܪܝܲܡ. ܘܐܘܪܹܐ ܓܵܘܵܝܝܼ ܠܟܸܣܠܵܗ̇: ܘܐܡܸܪܹܐ ܐܸܠܵܗ̇: ܫܠܵܡܵܐ ܠܵܟ̣ܝ: ܡܠܝܼܬܵܐ ܫܵܦܵܩܲܬ: ܡܵܪܝܵܐ ܥܲܡܵܟ̣ܝ: [1] ܒܪܝܼܟ̣ܬܵܐ ܓܵܘ 29 ܒܲܟ̣ܬܵܬܹ̈ܐ. ܐܝܼܢܵܐ ܗ̇ܝ ܚܓ̰ܸܠܵܐ ܒܗܹܡܸܙܡܵܢܹܗ: ܘܚܵܫܒ̣ܵܐ ܗ̄ܘܵܐ 30 ܕܡܘܼܕܝܼ ܝܠܹܐ ܐܵܗܵܐ ܫܠܵܡܵܐ. ܘܐܡܸܪܹܐ ܐܸܠܵܗ̇ ܡܲܠܲܐܟ̣ܵܐ: ܠܵܐ ܙܵܕܥܝܲܬܝ: ܡܲܪܝܲܡ: ܣܵܒܵܒ ܕܡܘܼܫ̄ܟ̰ܸܚܠܵܟ̣ܝ ܫܵܦܵܩܲܬ ܠܟܹܣ 31 ܐܲܠܵܗܵܐ. ܘܗܵܐ: ܒܸܬ ܩܵܒ̇ܠܲܬܝ ܒܛܵܢܵܐ: ܘܝܵܠܕܲܬܝ ܒܪܘܼܢܵܐ: ܘܒܸܬ 32 ܩܵܪܝܲܬܝ ܫܸܡܹܗ: ܝܼܫܘܿܥ. ܐܵܗܵܐ ܒܸܬ ܗܵܘܹܐ ܓܘܼܪܵܐ: ܘܒܪܘܼܢܹܗ ܕܥܸܠܵܝܵܐ ܒܸܬ ܦܵܝܸܫ ܩܸܪܝܵܐ: ܘܒܸܬ ܝܵܗ̄ܒܸܠ ܠܹܗ ܡܵܪܝܵܐ ܐܲܠܵܗܵܐ 33 ܬܪܘܿܢܘܿܣ ܕܕܵܘܝܼܕ ܒܵܒܘܼܗܝ. ܘܒܸܬ ܥܵܒܸܕ ܡܲܠܟܘܼܬܵܐ ܥܲܠ ܒܲܝܬܹܗ ܕܝܲܥܩܘܿܒ̣ ܠܥܵܠܲܡ: ܘܠܡܲܠܟܘܼܬܹܗ ܬܝܵܡܵܐ ܠܹܐ 34 ܗܵܘܹܐ. ܐܵܡܪܵܐ ܡܲܪܝܲܡ ܠܡܲܠܲܐܟ̣ܵܐ: ܕܵܐܟ̣ܝܼ ܒܸܬ ܗܵܘܝܵܐ ܐܵܗܵܐ: 35 ܣܵܒܵܒ ܕܠܐܢܵܫܵܐ ܠܹܐ ܝܘܵܢ ܝܕܥܝܼܬܵܐ. ܓ̰ܘܼܘܸܒܠܹܐ ܡܲܠܲܐܟ̣ܵܐ ܘܐܡܸܪܹܐ ܐܸܠܵܗ̇: ܪܘܼܚܵܐ ܕܩܘܼܕܫܵܐ ܒܸܬ ܐܵܬܝܵܐ ܥܲܠܵܟ̣ܝ: ܘܚܲܝܠܹܗ ܕܥܸܠܵܝܵܐ ܒܸܬ ܥܵܒܸܕ ܛܸܠܵܢܝܼܬܵܐ ܥܲܠܵܟ̣ܝ: ܣܵܒܵܒ ܕܐܵܗܵܐ ܗ̇ܘ ܩܲܕܝܼܫܵܐ ܕܦܵܝܸܫ ܗ̄ܘܝܼܵܐ: ܒܪܘܼܢܹܗ ܕܐܲܠܵܗܵܐ ܒܸܬ ܦܵܝܸܫ ܩܸܪܝܵܐ. 36 ܘܗܵܐ: ܐܹܠܝܼܫܒܲܥ ܚܸܙܡܵܟ̣ܝ: ܐܘܼܦ ܗ̇ܝ ܒܛܝܼܢܬܵܐ ܝܠܵܐ ܒܪܘܼܢܵܐ ܒܣܲܝܒܘܼܬܵܗ̇: ܘܐܵܗܵܐ ܝܲܪܚܵܐ ܕܐܸܫܬܵܐ ܝܠܹܐ ܠܗ̇ܝ ܕܦܵܝܫܵܐ 37 ܩܪܝܼܬܵܐ: ܥܩܲܪܬܵܐ. ܣܵܒܵܒ ܕܠܹܐ ܝܠܹܐ ܥܸܨܝܵܐ ܠܐܲܠܵܗܵܐ ܟ̰ܘ 38 ܡܸܢܕܝܼ. ܐܵܡܪܵܐ ܡܲܪܝܲܡ: ܗܵܐ: ܚܹܕܲܡܬܹܗ ܕܡܵܪܝܵܐ: ܗܵܘܝܵܐ ܠܝܼ ܐܲܝܟ ܗܹܡܸܙܡܵܢܘܼܟ: ܘܐܙܸܠܹܐ ܡܲܠܲܐܟ̣ܵܐ ܡ̣ܢ ܠܟܸܣܠܵܗ̇. 39 ܘܩܸܡܠܵܐ ܡܲܪܝܲܡ ܒܐܵܢܝܼ ܝܘܿܡܵܢܹ̈ܐ ܘܐܙܸܠܵܐ ܒܝܲܠܙܘܝ 40 ܠܛܘܼܪܵܐ: ܠܡܕܝܼܢ̄ܬܵܐ ܕܝܼܗܘܼܕ. ܘܐܘܸܪܵܐ ܠܒܲܝܬܹܗ ܕܙܲܟܲܪܝܵܐ: 41 ܘܕܪܹܠܵܐ ܫܠܵܡܵܐ ܠܐܹܠܝܼܫܒܲܥ. ܘܗ̄ܘܹܠܵܐ ܟܲܕ ܫܡܸܥܠܵܐ ܐܹܠܝܼܫܒܲܥ ܫܠܵܡܵܐ ܕܡܲܪܝܲܡ: ܦܨܸܚܠܹܐ ܝܵܠܵܐ ܒܟܹܪ̄ܣܵܗ̇: 42 ܘܦܸܫܠܵܐ ܡܠܝܼܬܵܐ ܐܹܠܝܼܫܒܲܥ ܪܘܼܚܵܐ ܕܩܘܼܕܫܵܐ. ܘܩܘܼܘܸܚܠܵܐ ܒܩܵܠܵܐ ܪܵܡܵܐ: ܘܐܡܸܪܵܐ: ܒܪܝܼܟ̣ܬܵܐ ܝܘܲܬܝ ܓܵܘ ܒܲܟ̣ܬܵܬܹ̈ܐ: 43 ܘܒܪܝܼܟ̣ܬܵܐ ܝܠܵܐ ܛܥܘܼܢܬܵܐ ܕܟܹܪ̄ܣܵܟ̣ܝ. ܡܐܲܝܟܵܐ ܠܝܼ ܐܵܗܵܐ: 44 ܕܝܸܡܹܗ ܕܡܵܪܝܼ ܐܵܬܝܵܐ ܠܟܸܣܠܝܼ. ܣܵܒܵܒ ܗܵܐ: ܟܲܕ ܢܦܸܠܹܐ ܩܵܠܵܐ ܕܫܠܵܡܵܟ̣ܝ ܒܢܵܬܝܵܬܝܼ̈: ܒܚܲܕܘܼܬܵܐ ܓܘܼܪܬܵܐ ܦܨܸܚܠܹܐ 45 ܝܵܠܵܐ ܒܟܹܪ̄ܣܝܼ. ܘܛܘܼܒ̣ܵܐ ܠܗ̇ܝ [2] ܕܗܘܼܡܸܢܵܐ ܕܗܵܘܹܐ ܬܝܵܡܵܐ ܠܐܵܢܝܼ ܕܦܸܫܠܘܿܢ ܗܘܼܡܙܸܡܹܐ ܥܲܡܵܗ̇ ܡ̣ܢ ܠܟܸܣ ܡܵܪܝܵܐ. 46 ܘܐܡܸܪܵܐ ܡܲܪܝܲܡ: ܡܲܓܘܘܼܪܹܐ ܝܠܵܐ ܓܵܢܝܼ ܠܡܵܪܝܵܐ: 47 ܘܚܕܹܠܵܐ ܪܘܼܚܝܼ ܒܐܲܠܵܗܵܐ ܡܲܚܝܼܵܢܝܼ. 48 ܣܵܒܒ ܕܚܸܪܹܐ ܒܡܵܟܝܼܟ̣ܘܼܬܵܐ ܕܚܹܕܲܡܬܹܗ: ܣܵܒܵܒ ܗܵܐ: ܡ̣ܢ ܐܵܕܝܼܵܐ ܛܘܼܒ̣ܵܐ ܒܸܬ ܝܵܗ̄ܒ̣ܝܼ ܠܝܼ ܟܠܵܝ ܐܘܼ̈ܓ̰ܵܓܹܐ. 49 ܣܵܒܵܒ ܕܥܒܸܕܠܹܐ ܠܟܸܣܠܝܼ ܫܘܼܠܹ̈ܐ ܓܘܼܪܹ̈ܐ ܗ̇ܘ ܕܝܼܠܹܐ ܚܲܝܠܵܢܵܐ: ܘܩܲܕܝܼܫܵܐ ܝܠܹܐ ܫܸܡܹܗ: 50 ܘܪ̈ܲܚܡܹܗ ܠܕܵܘܪܹ̈ܐ ܘܕܵܘܪܹ̈ܐ ܥܲܠ ܕܐܵܢܝܼ ܕܙܵܕܥܝܼ ܡܸܢܹܗ. 51 ܥܒܸܕܠܹܐ ܚܲܝܠܵܐ ܒܕܪܲܥܢܘܼܗܝ: ܘܒܘܼܪܒܸܙܠܹܐ ܠܚܬܝܼܪܹ̈ܐ ܒܚܝܼܵܠ ܕܠܸܒܵܝ. 52 ܚܘܼܪܙܸܦܠܹܐ ܠܙܲܪ̈ܒܵܢܹܐ ܡ̣ܢ ܟܘܼܪ̈ܣܵܘܵܬܵܐ: ܘܡܘܼܪܸܡܠܹܐ ܠܡܵܟܝܼܟܹ̈ܐ. 53 ܟܦܝܼܢܹ̈ܐ ܡܘܼܣܒܸܥܠܹܐ ܛܵܒ̣ܵܬܹ̈ܐ: ܘܕܵܘܠܲܬܡܲܢܕܹ̈ܐ ܫܘܼܕܸܪܹܐ ܣܦܝܼܩܹ̈ܐ. 54 ܗܘܼܝܸܪܹܐ ܠܝܼܣܪܵܝܹܠ ܪܹܓܹܗ: ܠܸܕܟ̣ܵܪܵܐ ܪܲܚܡܹܐ: 55 ܐܲܝܟ ܕܗܘܼܡܙܸܡܠܹܐ ܥܲܡ ܒܵܒܵܘܵܬܲܢ: ܠܟܸܣ ܐܲܒ̣ܪܵܗܵܡ ܘܠܟܸܣ ܙܲܪܥܹܗ: ܠܥܵܠܲܡ. 56 ܘܥܘܼܪܩܸܠܵܐ ܡܲܪܝܲܡ ܠܟܸܣܠܵܗ̇ ܐܲܝܟ ܬܠܵܬ̄ܐ ܝܲܪ̈ܚܹܐ: ܘܕܸܪܵܐ ܠܒܲܝܬܘܼܗ̇. 57 ܘܐܹܠܝܼܫܒܲܥ ܬܘܼܡܸܡܠܹܐ ܙܲܒ̣ܢܵܐ ܕܝܵܠܕܵܐ ܗ̄ܘܵܐ: ܘܝܠܸܕܠܵܐ 58 ܒܪܘܼܢܵܐ. ܘܫܡܸܥܠܘܿܢ ܫܒ̣ܵܒ̣ܘܼ̈ܗ̇ ܘܚܸܙܡܘܼ̈ܗ̇ ܕܡܘܼܙܝܸܕܠܹܐ ܡܵܪܝܵܐ ܪ̈ܲܚܡܹܐ ܠܟܸܣܠܵܗ̇: ܘܚܕܹܠܘܿܢ ܥܲܡܵܗ̇. 59 ܘܗ̄ܘܹܠܵܐ ܒܝܘܿܡܵܐ ܕܬܡܵܢܝܵܐ: ܐܬܹܠܘܿܢ ܠܸܓܙܵܪܹܗ ܠܝܵܠܵܐ: 60 ܘܩܵܪܝܼ ܗ̄ܘܵܘ ܠܹܗ ܒܫܸܡܵܐ ܕܒܵܒܹܗ: ܙܟܲܪܝܵܐ. ܘܓ̰ܘܼܘܸܒܠܵܐ ܝܸܡܹܗ ܘܐܵܡܪܵܐ ܐܸܠܵܝ: ܠܵܐ ܗܲܕܟ̣ܵܐ: ܐܸܠܵܐ ܦܵܝܸܫ ܩܸܪܝܵܐ: ܝܘܿܚܲܢܵܢ. 61 ܘܐܡܸܪܘܿܢ ܐܸܠܵܗ̇: ܠܲܝܬ ܐܢܵܫܵܐ ܒܐܘܼܓ̰ܵܓ̣ܵܟ̣ܝ ܕܦܵܝܸܫ ܩܸܪܝܵܐ 62 ܒܐܵܗܵܐ ܫܸܡܵܐ. ܘܪܡܸܙܠܘܿܢ ܠܒܵܒܹܗ ܕܵܐܟ̣ܝܼ ܕܒܵܣܡܵܐ ܗ̄ܘܵܐ 63 ܠܹܗ ܕܦܵܝܸܫ ܩܸܪܝܵܐ. ܘܛܠܸܒܠܹܐ ܦܸܢܩܝܼܬܵܐ: ܘܟܬܸܒ̣ܠܹܐ: ܘܐܡܸܪܹܐ: ܝܘܿܚܲܢܵܢ ܝܼܠܹܐ ܫܸܡܹܗ. ܘܥܘܼܓ̰ܸܒܠܹܐ ܟܠ ܐܢܵܫܵܐ. 64 ܘܕܲܪܣܵܥܲܬ ܦܸܫܠܹܐ ܦܬܝܼܚܵܐ ܦܘܼܡܹܗ ܘܠܸܫܵܢܹܗ: ܘܗܘܼܡܙܸܡܠܹܐ: 65 ܘܫܘܼܒܸܚܠܹܐ ܠܐܲܠܵܗܵܐ. ܘܗ̄ܘܹܠܵܐ ܙܕܘܼܥܬܵܐ ܥܲܠ ܟܠܵܝ ܕܥܡܝܼܪܹܐ ܗ̄ܘܵܘ ܒܚܵܕܸܪ̈ܘܵܢܵܝ: ܘܒܟܠܹܗ ܛܘܼܪܵܐ ܕܝܼܗܘܼܕ ܐܲܢܹܐ ܡܸܢܕܝܵܢܹ̈ܐ 66 ܦܵܝܫܝܼ ܗ̄ܘܵܘ ܗܘܼܡܙܸܡܹܐ. ܘܟܠܵܝ ܕܫܡܸܥܠܘܿܢ ܚܵܫܒ̣ܝܼ ܗ̄ܘܵܘ ܒܠܸܒܵܝ ܘܐܵܡܪܝܼ: ܝܵܐ ܪܲܒ: ܡܘܼܕܝܼ ܒܸܬ ܗܵܘܹܐ ܐܵܗܵܐ ܝܵܠܵܐ: ܣܵܒܵܒ ܐܝܼܕܹܗ ܕܡܵܪܝܵܐ ܥܲܡܹܗ ܗ̄ܘܵܐ. 67 ܘܙܟܲܪܝܵܐ ܒܵܒܹܗ ܦܸܫܠܹܐ ܡܸܠܝܵܐ ܪܘܼܚܵܐ ܕܩܘܼܕܫܵܐ: ܘܢܘܼܒܸܠܹܐ: ܘܐܡܸܪܹܐ: 68 ܒܪܝܼܟ̣ܵܐ ܝܠܹܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܣܘܼܚܒܸܪܹܐ ܠܛܵܝܸܦܹܗ: ܘܥܒܸܕܠܹܐ ܦܘܼܪܩܵܢܵܐ ܐܸܠܹܗ: 69 ܘܡܘܼܩܸܡܠܹܐ ܐܸܠܲܢ ܩܵܪ̄ܢܵܐ ܕܦܘܼܪܩܵܢܵܐ: ܒܒܲܝܬܹܗ ܕܕܵܘܝܼܕ ܪܹܓܹܗ: 70 ܐܲܝܟ ܕܗܘܼܡܙܸܡܠܹܐ ܒܦܘܼܡܵܐ ܕܢܒ̣ܝܼܘܼ̈ܗܝ ܩܲܕܝܼܫܹ̈ܐ ܕܡ̣ܢ ܥܵܠܲܡ: 71 ܦܘܼܪܩܵܢܵܐ ܡ̣ܢ ܕܸܫ̈ܡܸܢܲܢ: ܘܡ̣ܢ ܐܝܼܕܵܐ ܕܟܠܵܝ ܣܵܢ̈ܝܵܢܲܢ: 72 ܠܸܥܒ̣ܵܕܵܐ ܪ̈ܲܚܡܹܐ ܠܟܸܣ ܒܵܒܵܘܵܬܲܢ. ܘܠܸܕܟ̣ܵܪܵܐ ܠܕܝܵܬܹܩܹܗ ܩܲܕܝܼܫܬܵܐ: 73 ܘܡܵܘܡܵܬܹ̈ܐ ܕܝܡܹܠܹܐ ܠܒܵܒܲܢ ܐܲܒ̣ܪܵܗܵܡ: 74 ܕܝܵܗ̄ܒܸܠ ܠܲܢ ܕܟܲܕ ܦܵܝܫܵܚ ܦܘܼܪܩܹܐ ܡ̣ܢ ܐܝܼܕܵܐ ܕܕܸܫ̈ܡܸܢܲܢ: ܕܠܵܐ ܙܕܘܼܥܬܵܐ ܦܵܠܚܵܚ ܐܸܠܹܗ: 75 ܒܟܹܐܢܘܼܬܵܐ ܘܙܲܕܝܼܩܘܼܬܵܐ ܩܵܕ̄ܡܘܼܗܝ ܟܠܵܝ ܝܘܿܡܵـ̈ـܢܲܢ. 76 ܘܐܲܢ̄ܬ: ܝܵܠܵܐ: ܢܒ̣ܝܹܗ ܕܥܸܠܵܝܵܐ ܒܸܬ ܦܵܝܫܸܬ ܩܸܪܝܵܐ: ܣܵܒܵܒ ܒܸܬ ܐܵܙܸܠ̄ܬ ܩܵܕ̄ܡ ܦܵܬܹܗ ܕܡܵܪܝܵܐ ܕܗܵܕܪܸܬ ܐܘܼܪ̈ܚܵܬܘܼܗܝ: 77 ܕܝܵܗ̄ܒܸܠ ܥܵܩܸܠ ܕܚܲܝܹ̈ܐ ܠܛܵܝܸܦܹܗ: ܒܫܒ̣ܵܩܵܐ ܕܚܛܵܗܵܝ̈: 78 ܒܪܲܚܡܹܐ ܕܟܵܪܲܡ ܕܐܲܠܵܗܲܢ: ܕܒܝܼܵܝ ܒܸܬ ܬܵܦܸܩ ܒܝܲܢ ܙܪܵܩܵܐ ܡ̣ܢ ܪܵܘܡܵܐ: 79 ܠܒܲܗ̄ܪܘܼܢܹܐ ܠܐܵܢܝܼ ܕܝܼܢܵܐ ܝܬܝܼܒܹܐ ܒܚܘܼܒ̣ܝܵܐ ܘܒܛܸܠܵܢܝܼܬܵܐ ܕܡܵܘܬܵܐ: ܠܸܥܒ̣ܵܕܵܐ ܬܪ̈ܘܼܨܹܐ ܐܲܩ̈ܠܲܢ ܒܐܘܼܪܚܵܐ ܕܫܠܵܡܵܐ. 80 ܘܝܵܠܵܐ ܓܲܪܘܸܣ ܗ̄ܘܵܐ ܘܦܵܝܸܫ ܗ̄ܘܵܐ ܚܘܼܠܸܢܵܐ ܒܪܘܼܚܵܐ: ܘܓܵܘ ܒܲܪܝܼܵܐ ܗ̄ܘܵܐ ܗܲܠ ܝܘܿܡܵܐ ܕܡܲܚܙܵܝܬܹܗ ܠܟܸܣ ܝܼܣܪܵܝܹܠ.

ܩܦܠܐܘܢ: ܒ

1 ܘܗ̄ܘܹܠܵܐ ܒܐܵܢܝܼ ܝܘܿܡܵܢܹ̈ܐ: ܘܦܠܸܛܠܹܐ ܦܘܼܩܕܵܢܵܐ ܡ̣ܢ ܐܵܓ̣ܘܼܣܛܘܿܣ ܩܹܣܲܪ: ܕܦܵܝܫܵܐ ܡܘܼܟܬܸܒ̣ܬܵܐ ܟܠܵܗ̇ [3] ܕܘܼܢܝܹܐ. 2 ܐܵܗܵܐ ܡܲܟܬܲܒ̣ܬܵܐ ܩܵܕ̄ܡܵܝܬܵܐ ܗ̄ܘܹܠܵܐ ܒܗܵܟܝܼܡܘܼܬܵܐ ܕܩܸܘܪܝܼܢܘܿܣ 3 ܒܣܘܼܪܝܼܵܐ. ܘܐܙܸܠܘܿܢ ܟܠܵܝ ܕܦܵܝܫܝܼ ܡܘܼܟܬܸܒܹܐ: ܟܠ ܐܢܵܫܵܐ 4 ܠܡܕܝܼܢ̄ܬܹܗ. ܘܐܣܸܩܠܹܐ ܐܘܼܦ ܝܵܘܣܸܦ ܡ̣ܢ ܓܠܝܼܠܵܐ: ܡ̣ܢ ܡܕܝܼܢ̄ܬܵܐ ܕܢܵܨܪܲܬ: ܠܝܼܗܘܼܕ: ܠܡܕܝܼܢ̄ܬܹܗ ܕܕܵܘܝܼܕ: ܕܦܝܵܫܵܐ ܝܠܵܐ ܩܪܝܼܬܵܐ ܒܹܝܬܠܚܸܡ: ܣܵܒܵܒ ܕܡ̣ܢ ܒܲܝܬܹܗ ܘܡ̣ܢ ܐܘܼܓ̰ܵܓܹܗ 5 ܕܕܵܘܝܼܕ ܝܼܗ̄ܘܵܐ. ܥܲܡ ܡܲܪܝܲܡ ܛܠܝܼܒܬܹܗ: ܟܲܕ ܒܛܝܼܢܬܵܐ: 6 ܕܦܵܝܸܫ ܡܘܼܟܬܸܒ̣ܵܐ. ܘܗ̄ܘܹܠܵܐ ܕܟܲܕ ܐܵܢܝܼ ܬܵܡܵܐ ܗ̄ܘܵܘ: 7 ܦܸܫܠܘܿܢ ܬܘܼܡܸܡܹܐ ܝܘܿܡܵܢܘܼ̈ܗ̇ ܕܝܵܠܕܵܐ ܗ̄ܘܵܐ. ܘܝܠܸܕܠܵܐ ܒܪܘܼܢܵܗ̇ ܒܘܼܟ̣ܪܵܐ: ܘܟܘܼܪܡܸܟ̣ܠܵܐ ܐܸܠܹܗ ܒܒܲܢܕܹ̈ܐ: ܘܡܘܼܬܸܒ̣ܠܵܐ ܐܸܠܹܗ ܒܐܘܼܪܹܐ: ܣܵܒܵܒ ܕܠܲܝܬ ܗ̄ܘܵܐ ܠܗ̄ܘܿܢ ܕܘܼܟܬܵܐ ܓܵܘ ܒܹܝܬ ܡܲܫܪܝܵܐ. 8 ܘܪ̈ܵܥܝܹܐ ܐܝܼܬ ܗ̄ܘܵܘ ܒܗ̇ܘ ܐܲܬܪܵܐ: ܫܸܪܝܹܐ ܒܚܲܩܠܵܐ: 9 ܘܒܸܢܛܵܪܵܐ ܒܲܕܠܹ̈ܐ ܕܠܲܝܠܹܐ ܥܲܠ ܦܸܣܩܵܝ. ܘܗܵܐ: ܡܲܠܲܐܟ̣ܵܐ ܕܡܵܪܝܵܐ ܟܠܹܠܹܐ ܠܟܸܣܠܝܼ: ܘܬܸܫܒܘܿܚܬܹܗ ܕܡܵܪܝܵܐ ܒܘܼܗ̄ܪܸܢܵܐ 10 ܚܵܕܸܪ̈ܘܵܢܵܝ: ܘܙܕܸܥܠܘܿܢ ܙܕܘܼܥܬܵܐ ܓܘܼܪܬܵܐ. ܘܐܡܸܪܹܐ ܐܸܠܵܝ ܡܲܠܲܐܟ̣ܵܐ: ܠܵܐ ܙܵܕܥܝܼܬܘܿܢ: ܣܵܒܵܒ ܗܵܐ: ܡܲܫܚܘܼܕܹܐ ܝܘܸܢ ܐܸܠܵܘܟ̣ܘܿܢ ܚܲܕܘܼܬܵܐ ܓܘܼܪܬܵܐ ܕܒܸܬ ܗܵܘܝܵܐ ܠܟܠ ܛܵܝܸܦܵܐ. 11 ܣܵܒܵܒ ܕܦܸܫܠܹܐ ܝܠܝܼܕܵܐ ܐܸܠܵܘܟ̣ܘܿܢ ܐܸܕܝܘܿ ܦܵܪܘܿܩܵܐ: ܕܝܼܠܹܐ 12 ܡܫܝܼܚܵܐ ܡܵܪܝܵܐ: ܓܵܘ ܡܕܝܼܢ̄ܬܹܗ ܕܕܵܘܝܼܕ. ܘܐܵܗܵܐ ܐܸܠܵܘܟ̣ܘܿܢ ܢܝܼܫܲܢܩܵܐ: ܒܸܬ ܡܵܫ̄ܟ̰ܚܝܼܬܘܿܢ ܝܵܠܵܐ ܟܘܼܪܡܸܟ̣ܵܐ ܒܒܲܢܕܹ̈ܐ 13 ܘܡܘܼܬܒ̣ܵܐ ܒܐܘܼܪܹܐ. ܘܡܸܢܫܸܠܬܵܢܹ̈ܐ ܗ̄ܘܹܠܹܐ ܥܲܡ ܡܲܠܲܐܟ̣ܵܐ ܒܘܼܫܵܝܝܼ ܕܚܲܝܠܵܘܵܬܹ̈ܐ ܕܫܡܲܝܵܐ ܫܵܒܘܿܚܹܐ ܠܐܲܠܵܗܵܐ: ܘܒܹܐܡܵܪܵܐ: 14 ܬܸܫܒܘܿܚܬܵܐ ܠܐܲܠܵܗܵܐ ܒܡܪ̈ܵܘܡܹܐ: [4] ܘܥܲܠ ܐܲܪܥܵܐ ܫܠܵܡܵܐ: ܘܣܲܒ̣ܪܵܐ ܛܵܒ̣ܵܐ ܠܒܢܲܝ̈ܢܵܫܵܐ. 15 ܘܗ̄ܘܹܠܵܐ: ܟܲܕ ܐܙܸܠܘܿܢ ܡܲܠܲܐܟܹ̈ܐ ܡ̣ܢ ܠܟܸܣܠܵܝ ܠܫܡܲܝܵܐ: ܗܘܼܡܙܸܡܠܘܿܢ ܪ̈ܵܥܝܹܐ ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ: ܐܵܙܵܠ̄ܚ ܗܲܠ ܒܹܝܬܠܚܸܡ: ܘܚܵܙܵܚ ܠܐܵܗܵܐ ܡܸܢܕܝܼ ܕܗ̄ܘܹܠܹܐ: ܗ̇ܘ ܕܡܵܪܝܵܐ 16 ܩܲܡ ܡܲܕܸܥ ܠܲܢ. ܘܐܬܹܠܘܿܢ ܒܝܲܠܙܘܼܝ: ܘܡܘܼܫ̄ܟ̰ܸܚܠܘܿܢ 17 ܠܡܲܪܝܲܡ ܘܠܝܵܘܣܸܦ: ܘܠܝܵܠܵܐ ܡܘܼܬܒ̣ܵܐ ܒܐܘܼܪܹܐ. ܘܟܲܕ ܚܙܹܠܘܿܢ: ܡܘܼܕܸܥܠܘܿܢ ܠܗܹܡܸܙܡܵܢ ܕܦܸܫܠܵܐ ܗܘܼܡܙܸܡܬܵܐ ܥܲܡܵܝ 18 ܒܵܗ̄ܣ ܕܐܵܗܵܐ ܝܵܠܵܐ. ܘܟܠܵܝ ܕܫܡܸܥܠܘܿܢ ܥܘܼܓ̰ܸܒܠܘܿܢ 19 ܥܲܠ ܕܐܵܢܝܼ ܕܦܸܫܠܘܿܢ ܗܘܼܡܙܸܡܹܐ ܐܸܠܵܝ ܡ̣ܢ ܪ̈ܵܥܝܹܐ. ܐܝܼܢܵܐ ܡܲܪܝܲܡ ܢܵܛܪܵܐ ܗ̄ܘܵܐ ܐܲܢܹܐ ܗܹܡܸܙܡܵܢܹ̈ܐ ܟܠܵܝ: ܬܲܚܡܘܼܢܹܐ ܥܲܠܵܝ 20 ܒܠܸܒܘܼܗ̇. ܘܕܸܪܘܿܢ ܐܵܢܝܼ ܪ̈ܵܥܝܹܐ: ܟܲܕ ܫܵܒܘܿܚܹܐ ܘܡܵܐܣܘܼܩܹܐ ܗܲܠܸܠܘܼܝܵܐ ܠܐܲܠܵܗܵܐ ܥܲܠ ܟܠ ܕܚܙܹܠܘܿܢ ܘܫܡܸܥܠܘܿܢ: ܕܵܐܟ̣ܝܼ ܕܦܸܫܠܹܐ ܗܘܼܡܙܸܡܵܐ ܥܲܡܵܝ. 21 ܘܟܲܕ ܬܘܼܡܸܡܠܘܿܢ ܬܡܵܢܝܵܐ ܝܘܿܡܵܢܹ̈ܐ ܕܦܵܝܸܫ ܗ̄ܘܵܐ ܓܙܝܼܪܵܐ ܝܵܠܵܐ: ܦܸܫܠܹܐ ܩܸܪܝܵܐ ܫܸܡܹܗ: ܝܼܫܘܿܥ: ܕܩܸܪܝܵܐ ܗ̄ܘܵܐ ܡ̣ܢ ܡܲܠܲܐܟ̣ܵܐ ܡܩܵܕ̄ܡ ܕܦܵܝܸܫ ܗ̄ܘܵܐ ܒܛܝܼܢܵܐ ܒܟܹܪ̄ܣܵܐ. 22 ܘܟܲܕ ܦܸܫܠܘܿܢ ܬܘܼܡܸܡܹܐ ܝܘܿܡܵܢܹ̈ܐ ܕܕܵܟ̣ܵܝܬܵܝ: ܐܲܝܟ ܢܵܡܘܿܣܵܐ ܕܡܘܼܫܹܐ: ܡܘܼܐܣܸܩܠܘܿܢ ܐܸܠܹܗ ܠܐܘܿܪܸܫܠܸܡ: ܕܡܲܩܸܡܝܼ ܗ̄ܘܵܘ 23 ܠܹܗ ܩܵܕ̄ܡ ܡܵܪܝܵܐ. ܐܲܝܟ ܕܝܼܠܹܐ ܟܬܝܼܒ̣ܵܐ ܒܢܵܡܘܿܣܵܐ ܕܡܵܪܝܵܐ: ܟܠ ܐܘܼܪܙܵܐ ܦܵܬܚܵܢܵܐ ܕܡܲܪܒܥܐ: ܩܲܕܝܼܫܵܐ ܕܡܵܪܝܵܐ ܒܸܬ ܦܵܝܸܫ 24 ܩܸܪܝܵܐ. ܘܝܵܗ̄ܒ̣ܝܼ ܕܸܒ̣ܚܵܐ ܕܐܵܟ̣ܝܼ ܕܝܼܠܹܐ ܐܡܝܼܪܵܐ ܒܢܵܡܘܿܣܵܐ ܕܡܵܪܝܵܐ: ܙܵܘܓܵܐ ܕܓܘܼܪ̈ܓܘܼܡܹܐ: ܝܲܢ ܬܪܲܝ ܙܲܥܝܹ̈ܐ ܕܝܵܘܢܵܐ. 25 ܘܗܵܐ: ܐܝܼܬ ܗ̄ܘܵܐ ܚܵܕ̄ ܐܢܵܫܵܐ ܓܵܘ ܐܘܿܪܸܫܠܸܡ: ܫܸܡܹܗ ܫܸܡܥܘܿܢ: ܐܵܗܵܐ ܐܢܵܫܵܐ ܟܹܐܢܵܐ ܗ̄ܘܵܐ ܘܙܲܕܝܼܩܵܐ: ܘܒܸܣܦܵܪܵܐ ܠܝܵܗ̄ܒܲܠܬܵܐ ܕܠܸܒܵܐ ܕܝܼܣܪܵܝܹܠ: ܘܪܘܼܚܵܐ ܕܩܘܼܕܫܵܐ ܥܲܠܘܼܗܝ ܗ̄ܘܵܐ. 26 ܘܦܝܼܫܵܐ ܗ̄ܘܵܐ ܓܸܠܝܵܐ ܐܸܠܹܗ ܡ̣ܢ ܪܘܼܚܵܐ ܕܩܘܼܕܫܵܐ: ܕܠܹܐ ܚܵܙܹܐ ܗ̄ܘܵܐ ܡܵܘܬܵܐ: ܡܩܵܕ̄ܡ ܕܚܵܙܹܐ ܗ̄ܘܵܐ ܠܡܫܝܼܚܹܗ ܕܡܵܪܝܵܐ. 27 ܘܐܬܹܠܹܐ ܒܪܘܼܚܵܐ ܠܗܲܝܟܠܵܐ. ܘܟܲܕ ܡܲܐܘܘܼܪܹܐ ܗ̄ܘܵܘ ܐܲܒ̣ܵܗܘܼ̈ܗܝ ܠܝܼܫܘܿܥ ܝܵܠܵܐ: ܕܥܵܒ̣ܕܝܼ ܡܒܵܕܵܠܹܗ ܕܵܐܟ̣ܝܼ ܕܝܼܠܹܐ ܦܩܝܼܕܵܐ 28 ܒܢܵܡܘܿܣܵܐ. ܫܩܸܠܹܗ ܥܲܠ ܕܪ̈ܲܥܢܵܢܘܼܗܝ: ܘܫܘܼܒܸܚܠܹܐ ܠܐܲܠܵܗܵܐ: ܘܐܡܸܪܹܐ: 29 ܡܐܵܕܝܼܵܐ ܫܪܝܼ ܠܪܹܓܘܼܟ: ܝܵܐ ܡܵܪܝܵܐ: ܐܲܝܟ ܗܹܡܸܙܡܵܢܘܼܟ: ܒܫܠܵܡܵܐ: 30 ܣܵܒܵܒ ܕܚܙܹܠܘܿܢ ܥܲܝܢܝܼ̈ ܦܘܼܪܩܵܢܘܼܟ: 31 ܗ̇ܘ ܕܗܘܼܕܸܪܘܼܟ ܒܦܵܬܵܐ ܕܟܠܵܝ ܡܸܠܲܬܹ̈ܐ: 32 ܒܲܗܪܵܐ ܠܓܸܠܝܵܢܵܐ ܠܛܵܝܸܦܹ̈ܐ: ܘܚܸܩܪܵܐ ܕܛܵܝܸܦܘܼܟ ܝܼܣܪܵܝܹܠ. 33 ܘܝܵܘܣܸܦ ܘܝܸܡܹܗ ܥܵܓ̰ܒܝܼ ܗ̄ܘܵܘ ܥܲܠ ܕܐܵܢܝܼ ܕܦܵܝܫܝܼ ܗ̄ܘܵܘ 43 ܗܘܼܡܙܸܡܹܐ ܒܵܗ̄ܣܹܗ. ܘܒܘܼܪܟ̣ܵܝܠܹܐ ܫܸܡܥܘܿܢ: ܘܐܡܸܪܹܐ ܠܡܲܪܝܲܡ ܝܸܡܹܗ: ܗܵܐ: ܐܵܗܵܐ ܡܘܼܬܒ̣ܵܐ ܝܠܹܐ ܠܢܦܵܠܬܵܐ ܘܠܩܝܵܡܬܵܐ ܕܪܵܒܵܐ ܒܝܼܣܪܵܝܹܠ: ܘܠܢܝܼܫܲܢܩܵܐ ܕܡܲܩܲܪܵܨܘܼܬܵܐ. 35 ܘܒܓܵܢܵܐ ܕܝܼܵܟ̣ܝ ܒܸܬ ܥܵܒ̣ܪܵܐ ܪܘܼܡܚܵܐ: ܕܦܵܝܫܝܼ ܓܸܠܝܹܐ 36 ܚܘܼܫܵܒܹ̈ܐ ܕܪܵܒܵܐ ܠܸܒܵܘܵܬܹ̈ܐ. ܘܐܝܼܬ ܗ̄ܘܵܐ ܚܲܢܵܐ ܢܒ̣ܝܼܬܵܐ: ܒܪܵܬܹܗ ܕܦܢܘܼܐܹܝܠ: ܡ̣ܢ ܫܲܒ̣ܛܵܐ ܕܐܵܫܹܝܪ: ܐܘܼܦ ܗ̇ܝ ܐܘܝܼܪܬܵܐ ܗ̄ܘܵܐ ܒܝܘܿܡܵܢܹ̈ܐ ܪܵܒܵܐ: ܕܫܲܒܲܥ ܫܸܢܹ̈ܐ ܥܲܡ ܓܲܒ̣ܪܘܼܗ̇ 37 ܚܹܝܠܵܐ ܡ̣ܢ ܒܬܘܼܠܘܼܬܘܼܗ̇. ܘܗ̄ܘܹܠܵܐ ܐܲܪܡܸܠܬܵܐ ܐܲܝܟ ܬܡܵܢܝܼ ܘܐܲܪܒܲܥ ܫܸܢܹ̈ܐ: ܘܠܹܐ ܦܵܪܩܵܐ ܗ̄ܘܵܐ ܡ̣ܢ ܗܲܝܟܠܵܐ: ܘܒܨܵܘܡܵܐ 38 ܕܨܠܘܿܬܵܐ ܦܵܠܚܵܐ ܗ̄ܘܵܐ ܒܐܝܼܡܵܡܵܐ ܘܠܲܝܠܹܐ. ܘܐܘܼܦ ܗ̇ܝ ܩܸܡܠܵܐ ܒܗ̇ܝ ܣܵܥܲܬ ܘܫܘܼܟܸܪܵܐ ܠܡܵܪܝܵܐ: ܘܗܲܡܙܸܡܵܐ ܗ̄ܘܵܐ ܒܘܼܬ ܕܝܹܗ ܥܲܡ ܟܠܵܝ ܕܒܸܣܦܵܪܵܐ ܗ̄ܘܵܘ ܠܦܘܼܪܩܵܢܵܐ ܕܐܘܿܪܸܫܠܸܡ. 39 ܘܟܲܕ ܬܘܼܡܸܡܠܘܿܢ ܟܠ ܡܸܢܕܝܼ ܐܲܝܟ ܕܒܢܵܡܘܿܣܵܐ 40 ܕܡܵܪܝܵܐ: ܕܸܪܘܿܢ ܠܓܠܝܼܠܵܐ: ܠܢܵܨܪܲܬ ܡܕܝܼܢ̄ܬܵܝ. ܐܝܼܢܵܐ ܝܵܠܵܐ ܓܲܪܘܸܣ ܗ̄ܘܵܐ: ܘܦܵܝܸܫ ܗ̄ܘܵܐ ܚܘܼܠܸܢܵܐ [5] ܒܸܡܠܵܝܵܐ ܥܵܩܸܠܕܵܪܘܼܬܵܐ: ܘܫܵܦܵܩܲܬ ܕܐܲܠܵܗܵܐ ܥܲܠܘܼܗܝ ܗ̄ܘܵܐ. 41 ܘܐܲܒ̣ܵܗܘܼ̈ܗܝ ܒܟܠ ܫܹܢ̄ܬܵܐ ܟܹܐ ܐܵܙܠ̄ܝܼ ܗ̄ܘܵܘ ܠܐܘܿܪܸܫܠܸܡ 42 ܒܥܹܐܕܵܐ ܕܦܸܨܚܵܐ. ܘܟܲܕ ܗ̄ܘܹܠܹܐ ܒܲܪ ܬܪܸܥܣܲܪ ܫܸܢܹ̈ܐ: 43 ܐܣܸܩܠܘܿܢ ܐܲܝܟ ܥܵܪܸܬ ܕܥܹܐܕܵܐ. ܘܟܲܕ ܬܘܼܡܸܡܠܘܿܢ ܝܘܿܡܵܢܹ̈ܐ: ܐܝܼܡܲܢ ܕܒܸܕܝܵܪܵܐ ܗ̄ܘܵܘ: ܝܼܫܘܿܥ ܝܵܠܵܐ ܦܸܫܠܹܐ ܓܵܘ ܐܘܿܪܸܫܠܸܡ: 44 ܘܐܲܒ̣ܵܗܘܼ̈ܗܝ ܠܵܐ ܝܕܸܥܠܘܿܢ. ܐܝܼܢܵܐ ܟܲܕ ܒܸܚܫܵܒ̣ܵܐ ܕܥܲܡ ܚܲܒ̣ܪ̈ܵܘܵܬܵܝ ܗ̄ܘܵܐ: ܐܬܹܠܘܿܢ ܐܘܼܪܚܵܐ ܕܚܵܕ̄ ܝܘܿܡܵܐ: ܘܛܸܥܠܘܿܢ ܐܸܠܹܗ ܠܟܸܣ ܐܢܵܫܵܝ̈: ܘܠܟܸܣ ܡ̇ܢ ܕܟܹܐ ܝܲܕܸܥ ܗ̄ܘܵܐ ܠܗ̄ܘܿܢ. 45 ܘܠܵܐ ܡܘܼܫ̄ܟ̰ܸܚܠܘܿܢ ܐܸܠܹܗ: ܘܕܸܪܘܿܢ ܡܸܕܪܹܐ ܠܐܘܿܪܸܫܠܸܡ: 46 ܘܛܵܥܝܼ ܗ̄ܘܵܘ ܒܵܬ̄ܪܹܗ. ܘܗ̄ܘܹܠܵܐ: ܡܒܵܬ̄ܪ ܬܠܵܬ̄ܐ ܝܘܿܡܵܢܹ̈ܐ ܡܘܼܫ̄ܟ̰ܸܚܠܘܿܢ ܐܸܠܹܗ ܓܵܘ ܗܲܝܟܠܵܐ: ܝܬܝܼܒ̣ܵܐ ܒܓܵܘܵܐ ܕܡܲܠܦܵܢܹ̈ܐ: 47 ܘܫܲܡܸܥ ܗ̄ܘܵܐ ܡܸܢܵܝ: ܘܒܵܩܸܪ ܗ̄ܘܵܐ ܠܗ̄ܘܿܢ. ܘܥܵܓ̰ܒܝܼ ܗ̄ܘܵܘ ܟܠܵܝ ܐܵܢܝܼ ܕܫܲܡܥܝܼ ܗ̄ܘܵܘ ܠܹܗ: ܒܥܵܩܸܠܕܵܪܘܼܬܹܗ 48 ܘܒܓ̰ܘܼܘܵܒܹ̈ܗ. ܘܟܲܕ ܚܙܹܠܘܿܢ ܐܸܠܹܗ ܥܘܓ̰ܸܒܠܘܿܢ: ܘܐܡܸܪܵܐ ܐܸܠܹܗ ܝܸܡܹܗ: ܒܪܘܼܢܝܼ: ܩܵܡܘܿܕܝܼ ܥܒܸܕܠܘܼܟ: ܐܸܠܲܢ ܗܲܕܟ̣ܵܐ: ܗܵܐ 49 ܐܵܢܵܐ ܘܒܵܒܘܼܟ ܒܥܹܩܘܝܼ ܒܸܛܲܥܝܵܐ ܝܘܵܚ ܗ̄ܘܵܘ ܐܸܠܘܼܟ. ܐܵܡܸܪ ܐܸܠܵܝ: ܩܵܡܘܿܕܝܼ ܒܸܛܲܥܝܵܐ ܝܬܘܿܢ ܗ̄ܘܵܘ ܐܸܠܝܼ: ܠܹܐ ܝܬܘܿܢ ܒܝܼܕܲܥܝܵܐ ܕܓܵܘ [6] ܫܘܼܠܵܐ ܕܒܵܒܝܼ ܘܵܓ̰ܸܒ ܝܼܠܵܐ ܐܸܠܝܼ ܕܗܵܘܸܢ. 50 ܐܝܼܢܵܐ ܐܵܢܝܼ ܠܵܐ ܦܘܼܪܡܹܠܘܿܢ ܠܗܹܡܸܙܡܵܢ ܕܐܡܸܪܹܐ ܐܸܠܵܝ. 51 ܘܨܠܹܠܹܐ ܥܲܡܵܝ ܘܐܬܹܠܹܐ ܠܢܵܨܪܲܬ: ܘܙܲܒܛ ܝܼܗ̄ܘܵܐ ܐܸܠܵܝ. ܘܝܸܡܹܗ ܢܵܛܪܵܐ ܗ̄ܘܵܐ ܟܠܵܝ ܐܲܢܹܐ ܗܹܡܸܙܡܵܢܹ̈ܐ ܒܠܸܒܵܗ̇. 52 ܘܝܼܫܘܿܥ ܙܵܝܸܕ ܗ̄ܘܵܐ ܒܩܘܼܡܬܹܗ ܘܒܥܵܩܸܠܕܵܪܘܼܬܹܗ: ܘܒܫܵܦܵܩܲܬ ܠܟܸܣ ܐܲܠܵܗܵܐ ܘܒܢܲܝ̈ܢܵܫܵܐ.

ܩܦܠܐܘܢ: ܓ

1 ܐܝܼܢܵܐ ܒܫܹܢ̄ܬܵܐ ܕܚܲܡܫܲܥܣܲܪ ܕܡܲܠܟܘܼܬܹܗ ܕܛܹܒܲܪܝܼܘܿܣ ܩܹܣܲܪ: ܟܲܕ ܦܵܢܛܝܼܘܿܣ ܦܝܼܠܵܛܘܿܣ ܗܵܟܝܼܡ ܕܝܼܗܘܼܕ ܝܼܗܘܵܐ: ܘܟܲܕ ܛܸܛܪܲܪܟܵܐ ܕܓܠܝܼܠܵܐ ܗ̄ܘܵܐ ܗܹܪܘܿܕܸܣ: ܘܦܝܼܠܝܼܦܘܿܣ ܐܵܚܘܿܢܘܼܗܝ ܛܸܛܪܲܪܟܵܐ ܕܐܝܼܛܘܿܪܝܼܵܐ ܘܕܲܐܬܪܵܐ ܕܛܪܵܟ̣ܘܿܢܵܐ: 2 ܘܠܘܼܣܵܢܝܼܵܐ ܛܸܛܪܲܪܟܵܐ ܕܐܲܒ̣ܝܼܠܝܼܢܹܐ. ܒܓܘܼܪܘܼܬܵܐ ܕܟܵܗܢܘܼܬܵܐ ܕܚܲܢܵܢ ܘܕܩܲܝܵܦܵܐ: ܗ̄ܘܹܠܵܐ ܗܹܡܸܙܡܵܢ ܕܐܲܠܵܗܵܐ ܥܲܠ ܝܘܿܚܲܢܵܢ 3 ܒܪܘܼܢܵܐ ܕܙܟܲܪܝܵܐ: ܓܵܘ ܒܲܪܝܼܵܐ. ܘܐܬܹܠܹܐ ܒܟܠܹܗ ܐܲܬܪܵܐ ܕܚܵܕܸܪ̈ܘܵܢܹܐ ܕܝܘܿܪܕܢܵܢ: ܟܲܕ ܡܲܟܪܘܼܙܹܐ ܡܲܥܡܘܿܕܝܼܬܵܐ ܕܬܝܵܒ̣ܘܼܬܵܐ 4 ܠܫܒ̣ܵܩܵܐ ܕܚܛܝܼܵܬܹ̈ܐ. ܕܵܐܟ̣ܝܼ ܕܝܼܠܹܐ ܟܬܝܼܒ̣ܵܐ ܒܟܬܵܒ̣ܵܐ ܕܗܹܡܸܙܡܵܢܹ̈ܐ ܕܐܹܫܲܥܝܵܐ ܢܒ̣ܝܼܵܐ: ܕܐܡܸܪܹܐ: ܩܵܠܵܐ ܕܩܵܪܹܐ ܓܵܘ ܒܲܪܝܼܵܐ: ܗܵܕܪܘܿܢ ܐܘܼܪܚܹܗ ܕܡܵܪܝܵܐ: ܘܡܲܫܘܹܡܘܿܢ ܠܓ̰ܵܕܵܘܵܬܘܼ̈ܗܝ. 5 ܟܠܵܝ ܪܵܘܘܿܠܹܐ ܒܸܬ ܦܵܝܫܝܼ ܡܸܠܝܹܐ: ܘܟܠ ܛܘܼܪܵܐ ܘܪܘܼܡܬܵܐ ܒܸܬ ܦܵܝܫܝܼ ܡܘܼܟܸܦܹܐ: ܘܦܟ̰ܝܼܠܵܐ ܒܸܬ ܗܵܘܹܐ ܠܬܪܘܼܨܵܐ: 6 ܘܐܘܼܪ̈ܚܵܬܹܐ ܥܲܣܩܹ̈ܐ ܠܕܸܫܬܵܐ. ܘܒܸܬ ܚܵܙܹܐ ܟܠ ܒܸܣܪܵܐ ܦܘܼܪܩܵܢܵܐ ܕܐܲܠܵܗܵܐ. 7 ܘܐܡܸܪܹܐ ܠܐܵܢܝܼ ܟܸܢܫܹ̈ܐ ܕܒܹܐܬܵܝܵܐ ܗ̄ܘܵܘ ܠܟܸܣܠܹܗ ܠܸܥܡܵܕܵܐ: ܙܲܪܥܵܐ ܕܐܵܟܸܕܢܹ̈ܐ: ܡܵܢܝܼ ܡܘܼܕܸܥܠܹܐ ܐܸܠܵܘܟ̣ܘܿܢ ܠܸܥܪܵܩܵܐ ܡ̣ܢ 8 ܟܲܪܒܵܐ ܕܒܹܐܬܵܝܵܐ ܝܠܵܐ. ܥܒ̣ܘܿܕܘܿܢ ܗܲܕܟ̣ܵܐ ܛܥܘܼܢܝܵܬܹ̈ܐ ܕܚܵܫܚܝܼ ܠܬܝܵܒ̣ܘܼܬܵܐ: ܘܠܵܐ ܫܵܪܝܼܬܘܿܢ ܠܹܐܡܵܪܵܐ ܒܓܵܢܵܘܟ̣ܘܿܢ: ܕܒܵܒܵܐ ܐܝܼܬ ܠܲܢ ܐܲܒ̣ܪܵܗܵܡ. ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܵܨܹܐ 9 ܐܲܠܵܗܵܐ ܡܐܲܢܹܐ ܟܹܐܦܹ̈ܐ ܠܡܲܩܘܼܡܹܐ ܒܢܘܼܢܹ̈ܐ ܠܐܲܒ̣ܪܵܗܵܡ. ܘܐܵܕܝܼܵܐ ܢܲܪܥܵܐ ܡܘܼܬܒ̣ܵܐ ܝܠܹܐ ܥܲܠ ܥܸܩܪܵܐ ܕܐܝܼܠܵܢܹ̈ܐ. ܟܠ ܐܝܼܠܵܢܵܐ ܗܲܕܟ̣ܵܐ ܕܛܥܘܼܢܝܵܬܹ̈ܐ: ܫܵܦܝܼܪܹ̈ܐ ܠܵܐ ܥܵܒܸܕ: ܟܹܐ ܦܵܝܸܫ ܦܪܝܼܡܵܐ 10 ܘܕܸܪܝܵܐ ܒܢܘܼܪܵܐ. ܘܒܵܩܪܝܼ ܗ̄ܘܵܘ ܠܹܗ ܟܸܢܫܹ̈ܐ: ܘܐܵܡܪܝܼ: 11 ܒܲܣ ܡܘܼܕܝܼ ܥܵܒ̣ܕܵܚ. ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܡ̇ܢ ܕܐܝܼܬ ܠܹܗ ܬܪ̈ܬܹܝ ܨܘܼܕܪ̈ܵܬܹܐ: ܝܵܗ̄ܒܸܠ ܠܡ̇ܢ ܕܠܲܝܬ ܠܹܗ. ܘܡ̇ܢ 12 ܕܐܝܼܬ ܠܹܗ ܡܹܐܟ̣ܘܼܠܬܵܐ: ܗܲܕܟ̣ܵܐ ܥܵܒܸܕ. ܘܐܬܹܠܘܿܢ ܐܘܼܦ ܕܲܡܓ̣ܵܟ̰ܝܹ̈ܐ ܠܸܥܡܵܕܵܐ: ܘܐܵܡܪܝܼ ܐܸܠܹܗ: ܡܲܠܦܵܢܵܐ. ܡܘܼܕܝܼ 13 ܥܵܒ̣ܕܵܚ. ܘܗ̇ܘ ܐܡܸܪܹܐ ܐܸܠܵܝ: ܠܵܐ ܫܵܩܠܝܼܬܘܿܢ ܡܸܢܕܝܼ ܙܵܘܕܵܐ 14 ܥܲܠ ܕܗ̇ܘ ܕܝܼܠܹܐ ܦܩܝܼܕܵܐ ܐܸܠܵܘܟ̣ܘܿܢ. ܘܒܵܩܪܝܼ ܗ̄ܘܵܘ ܠܹܗ ܣܲܪ̈ܒܵܙܹܐ: ܘܐܵܡܪܝܼ: ܡܘܼܕܝܼ ܥܵܒ̣ܕܵܚ ܐܘܼܦ ܐܲܚܢܲܢ: ܐܵܡܸܪ ܐܸܠܵܝ: ܒܐܢܵܫܵܐ ܠܵܐ ܬܵܦܝܼܬܘܿܢ: ܘܠܐܢܵܫܵܐ ܠܵܐ ܙܵܠܡܝܼܬܘܿܢ: ܘܡܵܠܝܼ ܠܵܘܟ̣ܘܿܢ ܡܲܘܵܓ̰ܝܼܒܵܘ̈ܟ̣ܘܿܢ. 15 ܐܝܼܢܵܐ ܟܲܕ ܒܸܣܦܵܪܵܐ ܗ̄ܘܵܐ ܛܵܝܸܦܵܐ: ܘܟܠܵܝ ܒܸܚܫܵܒ̣ܵܐ ܗ̄ܘܵܘ 16 ܒܠܸܒܵܝ ܥܲܠ ܝܘܿܚܲܢܵܢ: ܕܩܵܘܡܵܐ ܐܵܗܵܐ ܝܠܹܐ ܡܫܝܼܚܵܐ. ܓ̰ܘܼܘܸܒܠܹܐ ܝܘܿܚܲܢܵܢ ܘܐܡܸܪܹܐ ܠܟܠܵܝ: ܐܵܢܵܐ ܗܵܐ: ܡܲܥܡܘܿܕܹܐ ܝܘܸܢ ܐܸܠܵܘܟ̣ܘܿܢ ܒܡ̈ܝܼܵܐ: ܐܝܼܢܵܐ ܒܹܐܬܵܝܵܐ ܝܠܹܐ ܗ̇ܘ ܕܒܘܼܫ ܚܲܝܠܵܢܵܐ ܡܸܢܝܼ: ܗ̇ܘ ܕܠܹܐ ܚܵܫܚܸܢ ܕܫܵܪܸܢ ܬܲܣܡܵܬܹ̈ܐ ܕܨܵܘܠܘܼ̈ܗܝ: ܗ̇ܘ ܒܸܬ ܡܲܥܡܸܕ 17 ܠܵܘܟ̣ܘܿܢ ܒܪܘܼܚܵܐ ܕܩܘܼܕܫܵܐ ܘܒܢܘܼܪܵܐ. ܗ̇ܘ ܕܪܘܼܦ̮ܫܬܹܗ ܒܐܝܼܕܹܗ: ܘܕܵܟ̣ܘܿܝܹܐ ܝܠܹܐ ܒܐܸܕܪܵܬܘܼܗܝ: ܘܚܸܛܹ̈ܐ ܓ̰ܲܡܘܼܥܝܹܐ ܝܠܹܐ ܓܵܘ ܐܲܢܒܵܪ̈ܘܼܗܝ: ܐܝܼܢܵܐ ܬܸܒ̣ܢܵܐ ܒܸܬ ܡܵܩܸܕ ܒܢܘܼܪܵܐ ܕܠܹܐ ܟ̰ܲܡܹܐ. 18 ܘܐܘܼܦ ܪܵܒܵܐ ܡܸܢܕܝܵܢܹ̈ܐ ܐܚܹܪ̄ܢܹܐ ܡܵܠܸܦ ܗ̄ܘܵܐ ܘܡܲܫܚܸܕ ܗ̄ܘܵܐ 19 ܠܛܵܝܸܦܵܐ. ܐܝܼܢܵܐ ܗܹܪܘܿܕܸܣ ܛܸܛܪܲܪܟܵܐ: ܣܵܒܵܒ ܕܦܝܼܫܵܐ ܗ̄ܘܵܐ ܡܘܼܢܟܸܣܵܐ ܡܸܢܹܗ ܒܘܼܬ ܗܹܪܘܿܕܝܼܵܐ ܒܲܟ̣ܬܵܐ ܕܦܝܼܠܝܼܦܘܿܣ ܐܵܚܘܿܢܹܗ: 20 ܘܒܘܼܬ ܟܠܵܝ ܒܝܼܫܵܬܹ̈ܐ ܕܥܵܒܸܕ ܗ̄ܘܵܐ ܗܹܪܘܿܕܸܣ. ܡܘܼܙܝܸܕܠܹܐ ܐܘܼܦ ܐܵܗܵܐ ܥܲܠ ܟܠܵܝ: ܘܕܪܹܠܹܐ ܠܝܘܿܚܲܢܵܢ ܓܵܘ ܒܹܝܬ ܐܲܣܝܼܪܹ̈ܐ. 21 ܐܝܼܢܵܐ ܗ̄ܘܹܠܵܐ ܟܲܕ ܥܡܸܕܠܹܐ ܟܠܹܗ ܛܵܝܸܦܵܐ: ܘܐܘܼܦ ܝܼܫܘܿܥ ܥܡܸܕܠܹܐ: ܘܟܲܕ ܨܵܠܘܿܝܹܐ ܗ̄ܘܵܐ: ܦܸܫܠܘܿܢ ܦܬܝܼܚܹܐ ܫܡܲܝܵܐ. 22 ܘܨܠܹܠܵܐ ܪܘܼܚܵܐ ܕܩܘܼܕܫܵܐ ܥܲܠܘܼܗܝ ܒܕܘܼܡܝܵܐ ܕܓܘܼܫܡܵܐ ܕܝܵܘܢܵܐ: ܘܩܵܠܵܐ ܗ̄ܘܹܠܹܐ ܡ̣ܢ ܫܡܲܝܵܐ: ܕܐܵܡܸܪ: ܐܲܢ̄ܬ ܝܼܘܸܬ ܒܪܘܼܢܝܼ ܡܘܼܚܸܒܵܐ: ܒܝܼܘܼܟ ܒܸܒܣܵܡܝܼ ܝܠܵܐ. 23 ܘܝܼܫܘܿܥ ܐܲܝܟ ܒܲܪ ܬܠܵܬ̄ܝܼ ܫܸܢܹ̈ܐ ܗ̄ܘܵܐ ܟܲܕ ܫܘܼܪܹܠܹܐ (ܠܡܵܠܘܿܦܹܐ): ܟܲܕ ܝܼܗ̄ܘܵܐ: ܐܲܝܟ ܕܦܵܝܸܫ ܗ̄ܘܵܐ ܚܫܝܼܒ̣ܵܐ: 24 ܒܪܘܼܢܵܐ ܕܝܵܘܣܸܦ: ܒܪܘܼܢܵܐ ܕܗܹܠܝܼ. ܒܪܘܼܢܵܐ ܕܡܲܛܬܲܬ: ܒܪܘܼܢܵܐ ܕܠܹܘܝܼ: ܒܪܘܼܢܵܐ ܕܡܲܠܟܝܼ: ܒܪܘܼܢܵܐ ܕܝܲܐܢܝܼ: ܒܪܘܼܢܵܐ 25 ܕܝܵܘܣܸܦ. ܒܪܘܼܢܵܐ ܕܡܲܬܬܲܬܝܼܵܐ: ܒܪܘܼܢܵܐ ܕܥܲܡܘܿܨ: ܒܪܘܼܢܵܐ ܕܢܵܚܘܿܡ: ܒܪܘܼܢܵܐ ܕܚܲܣܠܝܼ: ܒܪܘܼܢܵܐ ܕܢܵܓܝܼ. 26 ܒܪܘܼܢܵܐ ܕܡܵܐܲܬ: ܒܪܘܼܢܵܐ ܕܡܲܬܬܲܬܝܼܵܐ: ܒܪܘܼܢܵܐ [7] ܕܫܲܡܥܝܼ: 27 ܒܪܘܼܢܵܐ [8] ܕܝܵܘܣܸܦ: ܒܪܘܼܢܵܐ [9] ܕܝܼܗܘܼܕܵܐ. ܒܪܘܼܢܵܐ ܕܝܘܿܚܲܢܵܢ: ܒܪܘܼܢܵܐ ܕܪܵܣܵܐ: ܒܪܘܼܢܵܐ ܕܙܘܼܪܒܵܒܸܠ: 28 ܒܪܘܼܢܵܐ ܕܫܹܠܲܬܐܹܝܠ: ܒܪܘܼܢܵܐ ܕܢܹܐܪܝܼ. ܒܪܘܼܢܵܐ ܕܡܲܠܟܝܼ: ܒܪܘܼܢܵܐ ܕܐܲܕܝܼ: ܒܪܘܼܢܵܐ ܕܩܘܼܣܵܡ: ܒܪܘܼܢܵܐ 29 ܕܐܲܠܡܘܼܕܵܡ: ܒܪܘܼܢܵܐ ܕܥܝܼܪ. ܒܪܘܼܢܵܐ [10] ܕܝܘܿܣܹܐ: ܒܪܘܼܢܵܐ ܕܐܹܠܝܼܥܵܙܲܪ: ܒܪܘܼܢܵܐ ܕܝܘܿܪܵܡ: ܒܪܘܼܢܵܐ ܕܡܲܬܬܲܬ: ܒܪܘܼܢܵܐ 30 ܕܠܹܘܝܼ. ܒܪܘܼܢܵܐ ܕܫܸܡܥܘܿܢ: ܒܪܘܼܢܵܐ ܕܝܼܗܘܼܕܵܐ: ܒܪܘܼܢܵܐ 31 ܕܝܵܘܣܸܦ: ܒܪܘܼܢܵܐ ܕܝܘܿܢܵܡ: ܒܪܘܼܢܵܐ ܕܐܹܠܝܵܩܝܼܡ. ܒܪܘܼܢܵܐ ܕܡܲܠܝܵܐ: ܒܪܘܼܢܵܐ ܕܡܲܐܢܲܐ: ܒܪܘܼܢܵܐ ܕܡܲܛܬܵܐ: ܒܪܘܼܢܵܐ ܕܢܵܬܵܢ: 32 ܒܪܘܼܢܵܐ ܕܕܵܘܝܼܕ. ܒܪܘܼܢܵܐ ܕܐܝܼܫܲܝ: ܒܪܘܼܢܵܐ ܕܥܘܿܒ̣ܝܼܕ: ܒܪܘܼܢܵܐ ܕܒܵܥܵܙ: ܒܪܘܼܢܵܐ ܕܣܲܠܡܘܿܢ: ܒܪܘܼܢܵܐ ܕܢܲܚܫܘܿܢ. 33 ܒܪܘܼܢܵܐ ܕܥܲܡܝܼܢܵܕܵܒ̣: ܒܪܘܼܢܵܐ [11] ܕܐܵܪܵܡ: ܒܪܘܼܢܵܐ ܕܚܸܨܪܘܿܢ: 34 ܒܪܘܼܢܵܐ ܕܦܲܪܨ: ܒܪܘܼܢܵܐ ܕܝܼܗܘܼܕܵܐ. ܒܪܘܼܢܵܐ ܕܝܲܥܩܘܿܒ̣: ܒܪܘܼܢܵܐ ܕܐܝܼܣܚܵܩ: ܒܪܘܼܢܵܐ ܕܐܲܒ̣ܪܵܗܵܡ: ܒܪܘܼܢܵܐ ܕܬܲܪܚ: ܒܪܘܼܢܵܐ ܕܢܵܚܘܿܪ. ܒܪܘܼܢܵܐ ܕܣܵܪܘܿܓ̣: ܒܪܘܼܢܵܐ [12] ܕܐܲܪܥܘܿ: ܒܪܘܼܢܵܐ ܕܦܵܠܵܓ̣: ܒܪܘܼܢܵܐ ܕܥܵܒ̣ܵܪ: ܒܪܘܼܢܵܐ ܕܥܵܒ̣ܵܪ: ܒܪܘܼܢܵܐ ܕܫܵܠܵܚ. 36 ܒܪܘܼܢܵܐ ܕܩܲܝܢܵܢ: ܒܪܘܼܢܵܐ ܕܐܲܪܦܲܟܫܲܕ: ܒܪܘܼܢܵܐ ܕܫܹܝܡ: 37 ܒܪܘܼܢܵܐ ܕܢܘܿܚ: ܒܪܘܼܢܵܐ ܕܠܲܡܟ. ܒܪܘܼܢܵܐ ܕܡܲܬܘܼܫܠܲܚ. ܒܪܘܼܢܵܐ ܕܚܢܘܿܟ: ܒܪܘܼܢܵܐ ܕܝܲܪܕ: ܒܪܘܼܢܵܐ ܕܡܲܗܠܵܠܵܐܹܝܠ: 38 ܒܪܘܼܢܵܐ ܕܩܲܝܢܵܢ. ܒܪܘܼܢܵܐ ܕܐܵܢܘܿܫ: ܒܪܘܼܢܵܐ ܕܫܹܝܬ: ܒܪܘܼܢܵܐ ܕܐܵܕܵܡ: ܒܪܘܼܢܵܐ ܕܐܲܠܵܗܵܐ.

ܩܦܠܐܘܢ: ܕ

1 ܐܝܼܢܵܐ ܝܼܫܘܿܥ: ܟܲܕ ܡܸܠܝܵܐ ܪܘܼܚܵܐ ܕܩܘܼܕܫܵܐ: ܕܸܪܹܐ ܡ̣ܢ 2 ܝܘܿܪܕܢܵܢ: ܘܦܸܫܠܹܐ ܠܘܼܒܠܵܐ ܒܪܘܼܚܵܐ ܠܒܲܪܝܼܵܐ. ܐܲܪܒܥܝܼ ܝܘܿܡܵܢܹ̈ܐ: ܟܲܕ ܦܵܝܸܫ ܗ̄ܘܵܐ ܓ̰ܘܼܪܒܵܐ ܡ̣ܢ ܐܵܟܹܠܩܲܪܨܵܐ. ܘܠܵܐ ܐܟܸܠܹܐ ܡܸܢܕܝܼ ܒܐܵܢܝܼ ܝܘܿܡܵܢܹ̈ܐ: ܘܟܲܕ ܬܸܡܠܘܿܢ ܟܦܸܢܹܐ. 3 ܘܐܡܸܪܹܐ ܐܸܠܹܗ ܐܵܟܹܠܩܲܪܨܵܐ: ܐܸܢ ܒܪܘܼܢܹܗ ܕܐܲܠܵܗܵܐ ܝܘܸܬ: 4 ܐܡܘܿܪ ܠܐܵܗܵܐ ܟܹܐܦܵܐ ܕܗܵܘܹܐ ܠܲܚܡܵܐ. ܓ̰ܘܼܘܸܒܠܹܐ ܝܼܫܘܿܥ ܐܸܠܹܗ: ܟܬܝܼܒ̣ܵܐ ܝܠܹܐ: ܕܠܵܐ ܒܠܲܚܡܵܐ ܒܢܲܦܫܹܗ ܟܹܐ ܚܲܝܹܐ 5 ܒܲܪܢܵܫܵܐ[13] . ܘܡܘܼܐܣܸܩܠܹܗ [14] ܐܵܟܹܠܩܲܪܨܵܐ ܠܛܘܼܪܵܐ ܪܵܡܵܐ: ܘܡܘܼܚܙܹܠܹܗ ܟܠܵܝ ܡܲܠܟܘܵܬܹ̈ܐ ܕܐܲܪܥܵܐ ܒܛܲܪܦܲܛܬܵܐ ܕܥܲܝܢܵܐ. 6 ܘܐܡܸܪܹܐ ܐܸܠܹܗ ܐܵܟܸܠܩܲܪܨܵܐ: ܐܸܠܘܼܟ ܒܸܬ ܝܵܗ̄ܒܸܢ ܐܵܗܵܐ ܗܘܼܟܡܵܐ ܟܠܹܗ ܘܚܸܩܪܵܝ: ܣܵܒܵܒ ܕܒܝܼܝܼ ܣܘܼܦܝܵܐ ܝܠܹܐ: ܘܠܡ̇ܢ 7 ܕܒܲܥܝܸܢ ܟܹܐ ܝܵܗ̄ܒܸܢܹܗ. ܐܸܢ ܗܲܕܟ̣ܵܐ ܐܲܢ̄ܬ ܣܵܓ̣ܕܸܬ ܩܵܕ̄ܡܝܼ: 8 ܕܝܼܘܼܟ ܒܸܬ ܗܵܘܹܐ ܟܠܹܗ. ܐܝܼܢܵܐ ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܹܗ: ܟܬܝܼܒ̣ܵܐ ܝܠܹܐ: ܠܡܵܪܝܵܐ ܐܲܠܵܗܘܼܟ ܣܵܓ̣ܕܸܬ: ܘܐܸܠܹܗ 9 ܒܢܲܦ̮ܫܹܗ ܦܵܠܚܸܬ. ܘܡܘܼܬ̄ܝܹܠܹܗ ܠܐܘܿܪܸܫܠܸܡ: ܘܡܘܼܟܠܹܠܹܗ ܥܲܠ ܟܸܢܦܵܐ ܕܗܲܝܟܠܵܐ: ܘܐܡܸܪܹܐ ܐܸܠܹܗ: ܐܸܢ ܒܪܘܼܢܹܗ ܕܐܲܠܵܗܵܐ 10 ܝܘܸܬ: ܪܲܦܝܼ ܓܵܢܘܼܟ ܡܐܲܟ̣ܵܐ ܠܐܸܠܬܸܚ. ܣܵܒܵܒ ܕܟܬܝܼܒ̣ܵܐ ܝܠܹܐ: ܠܡܲܠܲܐܟ̣ܘܼ̈ܗܝ ܒܸܬ ܦܵܩܸܕ ܥܲܠܘܼܟ: ܕܢܵܛܪܝܼ ܠܘܼܟ. 11 ܘܥܲܠ ܐܝܼܕܵܬܵܝ̈ ܒܸܬ ܫܵܩܠܝܼ ܠܘܼܟ: ܠܵܐ ܗ̄ܘܹܐ ܕܡܵܚܸܬ 12 ܒܟܹܐܦܵܐ ܐܲܩܠܘܼܟ. ܐܝܼܢܵܐ ܝܼܫܘܿܥ ܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ: ܐܡܝܼܪܵܐ ܝܠܹܐ: ܠܵܐ ܓ̰ܵܪܒܸܬ ܠܡܵܪܝܵܐ ܐܲܠܵܗܘܼܟ. 13 ܘܟܲܕ ܬܘܼܡܸܡܠܹܐ ܐܵܟܹܠܩܲܪܨܵܐ ܟܠ ܓ̰ܘܼܪܵܒܘܼܗܝ: ܦܪܸܩܠܹܐ ܡ̣ܢ ܠܟܸܣܠܹܗ ܗܲܠ ܙܲܒ̣ܢܵܐ. 14 ܘܕܸܪܹܐ ܝܼܫܘܿܥ ܒܚܲܝܠܵܐ ܕܪܘܼܚܵܐ ܠܓܠܝܼܠܵܐ: ܘܦܠܸܛܠܵܐ 15 ܒܵܗ̄ܣܹܗ ܒܟܠܹܗ ܐܲܬܪܵܐ: ܕܚܵܕܸܪ̈ܘܵܢܵܝ. ܘܡܵܠܸܦ ܗ̄ܘܵܐ ܒܟܢܘܼܫܝܵܬܵܝ̈: ܘܦܵܝܸܫ ܗ̄ܘܵܐ ܚܩܝܼܪܵܐ ܡ̣ܢ ܟܠܵܝ. 16 ܘܐܬܹܠܹܐ ܠܢܵܨܪܲܬ: ܐܲܝܟܵܐ ܕܦܸܫܠܹܐ ܓܘܼܪܘܸܣܵܐ: ܘܐܘܸܪܹܐ: ܕܵܐܟ̣ܝܼ ܕܐܝܼܬ ܗ̄ܘܵܐ ܠܹܗ ܥܵܕܲܬ: ܠܟܢܘܼܫܬܵܐ ܒܝܘܿܡܵܐ ܕܫܲܒܬܵܐ: 17 ܘܩܸܡܠܹܐ ܠܸܩܪܵܝܵܐ. ܘܦܸܫܠܹܐ ܝܘܼܗ̄ܒ̣ܵܐ ܐܸܠܹܗ ܟܬܵܒ̣ܵܐ ܕܐܹܫܲܥܝܵܐ ܢܒ̣ܝܼܵܐ. ܘܦܬܸܚܠܹܐ ܟܬܵܒ̣ܵܐ: ܘܡܘܼܫ̄ܟ̰ܸܚܠܹܐ ܕܘܼܟܬܵܐ ܐܲܝܟܵܐ 18 ܕܝܼܗ̄ܘܵܐ ܟܬܝܼܒ̣ܵܐ. ܪܘܼܚܹܗ ܕܡܵܪܝܵܐ ܥܲܠܝܼ: ܣܵܒܵܒ ܕܩܲܡ 19 ܡܵܫܸܚ ܠܝܼ ܠܡܲܫܚܘܼܕܹܐ ܠܡܸܣܟܹܢܹ̈ܐ: [15] ܘܫܘܼܕܪܸܢܹܐ ܠܡܲܟܪܘܿܙܹܐ ܠܝܲܚܣܝܼܪܹ̈ܐ ܫܒ̣ܵܩܵܐ: ܘܠܣܸܡܝܹ̈ܐ ܚܙܵܝܵܐ: ܘܠܸܫܪܵܝܵܐ ܠܬܒ̣ܝܼܪܹ̈ܐ 20 ܒܫܒ̣ܵܩܵܐ: ܘܠܡܲܟܪܘܼܙܹܐ ܫܹܢ̄ܬܵܐ ܩܘܼܒܸܠܬܵܐ ܕܡܵܪܝܵܐ. ܘܟܪܸܟ̣ܠܹܐ ܟܬܵܒ̣ܵܐ ܘܝܸܗܒܸܠܹܐ ܠܚܸܠܡܲܬܟܵܪ: ܘܝܬܸܒ̣ܠܹܐ. ܘܟܠܵܝ ܐܵܢܝܼ 21 ܕܓܵܘ ܟܢܘܼܫܬܵܐ ܥܲܝܢܝܼ̈ ܒܸܚܝܵܪܵܐ ܗ̄ܘܵܘ ܒܝܹܗ. ܘܫܘܼܪܹܠܹܐ ܠܹܐܡܵܪܵܐ ܐܸܠܵܝ: ܐܸܕܝܘܿ ܦܸܫܠܹܐ ܬܘܼܡܸܡܵܐ ܐܵܗܵܐ ܟܬܵܒ̣ܵܐ 22 ܒܢܵܬܝܵܬܵܘ̈ܟ̣ܘܿܢ: ܘܝܵܗ̄ܒ̣ܝܼ ܗ̄ܘܵܘ ܣܵܗܕܘܼܬܵܐ ܐܸܠܹܗ ܟܠܵܝ: ܘܥܵܓ̰ܒܝܼ ܗ̄ܘܵܘ ܒܗܹܡܸܙܡܵܢܹ̈ܐ ܕܫܵܦܵܩܲܬ ܕܦܵܠܛܝܼ ܗ̄ܘܵܘ ܡ̣ܢ 23 ܦܘܼܡܹܗ: ܘܐܵܡܪܝܼ: ܠܹܐ ܝܠܹܐ ܐܵܗܵܐ ܒܪܘܼܢܵܐ ܕܝܵܘܣܸܦ. ܐܵܡܸܪ ܐܸܠܵܝ: ܐܲܠܒܲܬܵܐ ܒܸܬ ܐܵܡܪܝܼܬܘܿܢ ܐܸܠܝܼ ܐܵܗܵܐ ܡܵܣܵܠܵܐ: ܗܲܟܝܼܡ: ܒܵܣܸܡ ܓܵܢܘܼܟ: ܟܠܵܝ ܕܫܡܸܥܠܲܢ ܥܒ̣ܝܼܕܹܐ ܓܵܘ ܟܦܲܪܢܵܚܘܿܡ: 24 ܥܒ̣ܘܿܕ ܐܘܼܦ ܠܲܐܟ̣ܵܐ ܓܵܘ ܡܕܝܼܢ̄ܬܘܼܟ. ܘܐܡܸܪܹܐ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܲܝܬ ܢܒ̣ܝܼܵܐ ܕܦܵܝܸܫ ܩܘܼܒ̇ܠܵܐ ܓܵܘ 25 ܐܲܬܪܹܗ. ܣܵܒܵܒ ܒܣܲܪܲܣܬܘܼܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܪܵܒܵܐ ܐܲܪ̈ܡܸܠܝܵܬܹܐ ܐܝܼܬ ܗ̄ܘܵܘ ܓܵܘ ܝܼܣܪܵܝܹܠ ܒܝܘܿܡܵܢܹ̈ܐ ܕܐܹܠܝܼܵܐ: ܟܲܕ ܦܸܫܠܘܿܢ ܕܒ̣ܝܼܩܹܐ ܫܡܲܝܵܐ ܬܠܵܬ̄ ܫܸܢܹ̈ܐ ܘܐܸܫܬܵܐ ܝܲܪ̈ܚܹܐ: ܟܲܕ 26 ܗ̄ܘܹܠܹܐ ܟܸܦܢܵܐ ܓܘܼܪܵܐ ܒܟܠܵܗ̇ ܐܲܪܥܵܐ. ܘܠܟܸܣ ܚܕܵܐ ܡܸܢܵܝ ܠܵܐ ܦܸܫܠܹܐ ܫܘܼܕܪܵܐ ܐܹܠܝܼܵܐ: ܐܸܠܵܐ ܠܨܲܪܦܲܬ ܕܨܲܝܕܘܿܢ: 27 ܠܟܸܣ ܒܲܟ̣ܬܵܐ ܐܲܪܡܸܠܬܐ. ܘܪܵܒܵܐ ܓܸܪ̈ܒ̣ܵܢܹܐ ܐܝܼܬ ܗ̄ܘܵܘ ܓܵܘ ܝܼܣܪܵܝܹܠ ܒܝܘܿܡܵܢܹ̈ܐ ܕܐܹܠܝܼܫܲܥ ܢܒ̣ܝܼܵܐ: ܘܚܵܕ̄ ܡܸܢܵܝ ܠܵܐ ܦܸܫܠܹܐ 28 ܕܘܼܟ̣ܝܵܐ: ܐܸܠܵܐ ܢܲܥܡܵܢ ܐܵܪܵܡܵܝܵܐ. ܘܟܲܕ ܫܡܸܥܠܘܿܢ ܐܲܢܹܐ ܐܵܢܝܼ 29 ܕܓܵܘ ܟܢܘܼܫܬܵܐ: ܦܸܫܠܘܿܢ ܡܸܠܝܹܐ ܟܲܪܒܵܐ ܟܠܵܝ. ܘܩܸܡܠܘܿܢ ܦܘܼܠܸܛܠܘܿܢ ܐܸܠܹܗ ܠܒܲܕܲܪ ܡ̣ܢ ܡܕܝܼܢ̄ܬܵܐ: ܘܡܘܼܬ̄ܝܹܠܘܿܢ ܐܸܠܹܗ ܗܲܠ ܓܒ̣ܝܼܢܵܐ ܕܛܘܼܪܵܐ: ܗ̇ܘ ܕܡܕܝܼܢ̄ܬܵܝ ܒܢܝܼܬܵܐ ܗ̄ܘܵܐ 30 ܥܲܠܘܼܗܝ: ܕܪܲܦܝܼ ܗ̄ܘܵܘ ܠܹܗ ܠܐܸܠܬܸܚ. ܐܝܼܢܵܐ ܗ̇ܘ ܥܒܸܪܹܐ ܒܓܵܘܵܝ ܘܐܙܸܠܹܐ. 31 ܘܨܠܹܠܹܐ ܠܟܦܲܪܢܵܚܘܿܡ: ܡܕܝܼܢ̄ܬܵܐ ܕܓܠܝܼܠܵܐ: ܘܡܵܠܸܦ 32 ܗ̄ܘܵܐ ܠܗ̄ܘܿܢ ܒܫܲܒܵܬܹ̈ܐ. ܘܥܵܓ̰ܒܝܼ ܗ̄ܘܵܘ ܒܝܘܼܠܦܵܢܹܗ: ܣܵܒܵܒ 33 ܗܹܡܸܙܡܵܢܹܗ ܒܗܘܼܟܡܵܐ ܗ̄ܘܵܐ. ܘܐܝܼܬ ܗ̄ܘܵܐ ܓܵܘ ܟܢܘܼܫܬܵܐ ܐܢܵܫܵܐ ܕܐܝܼܬ ܗ̄ܘܵܐ ܠܹܗ ܪܘܼܚܵܐ ܕܕܲܝܘܵܐ ܛܲܡܵܐܐ: ܘܡܘܼܩܘܸܚܠܹܐ 34 ܒܩܵܠܵܐ ܪܵܡܵܐ. ܫܒ̣ܘܿܩ: ܡܵܐ ܠܘܼܟ ܡܸܢܲܢ: ܝܼܫܘܿܥ ܢܵܨܪܵܝܵܐ: ܐܬܹܠܘܿܟ ܠܬܵܠܘܿܩܲܢ: ܒܝܼܕܲܥܝܘܼܟ ܝܼܘܸܢ ܡܵܢܝܼ ܝܘܸܬ: ܩܲܕܝܼܫܹܗ 35 ܕܐܲܠܵܗܵܐ. ܘܢܓ̰ܘܼܠܹܐ ܒܝܹܗ ܝܼܫܘܿܥ: ܘܐܡܸܪܹܐ: ܫܬܘܿܩ: ܘܦܠܘܿܛ ܡܸܢܹܗ. ܘܪܘܼܦܹܠܹܗ ܕܲܝܘܵܐ ܒܒܹܝܦܲܠܓܵܐ: ܘܦܠܸܛܠܹܐ 36 ܡܸܢܹܗ: ܟܲܕ ܠܵܐ ܥܒܸܕܠܹܐ ܙܵܪܵܪ ܡܸܢܕܝܼ ܒܝܹܗ. ܘܥܘܼܓ̰ܵܒܵܐ ܕܒܸܩܠܹܐ ܠܟܠܵܝ: ܘܗܲܡܙܘܼܡܝܼ ܗ̄ܘܵܘ ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ: ܒܹܐܡܵܪܵܐ: ܡܘܼܕܝܼ ܝܠܵܐ ܐܵܗܵܐ ܗܹܡܸܙܡܵܢ: ܕܒܗܘܼܟܡܵܐ ܘܒܚܲܝܠܵܐ 37 ܒܸܦܩܵܕܵܐ ܝܠܹܐ ܠܪ̈ܘܼܚܹܐ ܛܲܡܹ̈ܐܐ: ܘܒܸܦܠܵܛܵܐ ܝܢܵܐ. ܘܦܠܸܛܠܵܐ ܒܵܗ̄ܣܹܗ ܒܟܠ ܕܘܼܟܵܐ ܕܚܵܕܸܪ̈ܘܵܢܵܝ. 38 ܘܟܲܕ ܦܠܸܛܠܹܐ ܡ̣ܢ ܟܢܘܼܫܬܵܐ: ܐܘܸܪܹܐ ܠܒܲܝܬܹܗ ܕܫܸܡܥܘܿܢ. ܘܚܡܵܬܹܗ ܕܫܸܡܥܘܿܢ ܡܘܼܠܝܸܨܬܵܐ ܗ̄ܘܵܐ ܒܐܫܵܬܵܐ ܓܘܼܪܬܵܐ: 39 ܘܒܸܥܠܘܿܢ ܡܸܢܹܗ ܒܘܼܬ ܕܝܼܵܗ̇. ܘܟܠܹܠܹܐ ܠܥܸܠܸܠ ܡܸܢܵܗ̇: ܘܢܓ̰ܘܼܠܹܐ ܒܐܫܵܬܵܗ̇: ܘܫܒ̣ܝܼܩܵܠܵܐ. ܘܕܲܪܣܵܥܲܬ ܩܸܡܠܵܐ ܘܥܒܸܕܠܵܐ ܚܸܠܡܲܬ ܐܸܠܵܝ. 40 ܐܝܼܢܵܐ ܒܓܢܵܝܹܗ ܕܫܸܡܫܵܐ: ܟܠܵܝ ܐܵܢܝܼ ܕܐܝܼܬ ܗ̄ܘܵܘ ܠܗ̄ܘܿܢ ܡܸܪ̈ܥܝܹܐ: ܒܡܲܪ̈ܥܹܐ ܬܵܗܵܪܹ̈ܐ ܬܵܗܵܪܹ̈ܐ: ܡܘܼܬ̄ܝܵܝܠܘܿܢ ܠܟܸܣܠܹܗ. ܘܗ̇ܘ ܥܲܠ ܟܠ ܚܵܕ̄ ܡܸܢܵܝ ܡܲܬܸܒ̣ ܗ̄ܘܵܐ ܐܝܼܕܹܗ: ܘܒܵܣܸܡ 41 ܗ̄ܘܵܐ ܠܗܘܿܢ. ܘܦܵܠܛܝܼ ܗ̄ܘܵܘ ܐܘܼܦ ܕܲܝܘܹ̈ܐ ܡ̣ܢ ܪܵܒܵܐ: ܟܲܕ ܡܲܩܘܸܚܝܼ ܗ̄ܘܵܘ ܘܐܵܡܪܝܼ: ܕܐܲܢ̄ܬ ܝܼܘܸܬ ܒܪܘܼܢܹܗ ܕܐܲܠܵܗܵܐ. ܘܢܵܓ̰ܸܘ ܗ̄ܘܵܐ ܒܝܼܵܝ: ܘܠܹܐ ܫܵܒܸܩ ܗ̄ܘܵܐ ܠܗ̄ܘܿܢ ܠܗܲܡܙܘܼܡܹܐ: ܣܵܒܵܒ ܝܕܸܥܠܘܿܢ ܕܗ̇ܘ ܝܼܗ̄ܘܵܐ ܡܫܝܼܚܵܐ. 42 ܘܟܲܕ ܗ̄ܘܹܠܹܐ ܝܘܿܡܵܐ: ܦܠܸܛܠܹܐ ܐܙܸܠܹܐ ܠܕܘܼܟܵܐ ܚܵܪܵܒܵܐ: ܘܟܸܢܫܹ̈ܐ ܛܵܥܝܼ ܗ̄ܘܵܘ ܠܹܗ: ܘܐܬܹܠܘܿܢ ܗܲܠ ܠܟܸܣܠܹܗ: ܘܩܲܡ 43 ܕܵܒ̣ܩܝܼ ܠܹܗ ܕܠܵܐ ܐܵܙܸܠ ܗ̄ܘܵܐ ܡ̣ܢ ܠܟܸܣܠܵܝ. ܘܗ̇ܘ ܐܡܸܪܹܐ ܐܸܠܵܝ: ܐܘܼܦ ܠܡܕܝܼܢܵܬܹ̈ܐ ܐܚܹܪ̄ܢܹܐ ܘܵܓ̰ܸܒ ܝܼܠܵܐ ܕܡܲܫܚܸܕܢ ܡܲܠܟܘܼܬܹܗ ܕܐܲܠܵܗܵܐ: ܣܵܒܵܒ ܠܕܵܐܗܵܐ ܦܸܫܠܝܼ ܫܘܼܕܪܵܐ. 44 ܘܗ̇ܘ ܡܲܟܪܘܿܙܹܐ ܗ̄ܘܵܐ ܓܵܘ ܟܢܘܼܫܝܵܬܹ̈ܐ ܕܓܠܝܼܠܵܐ.

ܩܦܠܐܘܢ: ܗ

1 ܐܝܼܢܵܐ ܗ̄ܘܹܠܵܐ ܟܲܕ ܓ̰ܡܸܥܠܹܐ ܥܲܠܘܼܗܝ ܟܸܢܫܵܐ ܠܸܫܡܲܥܝܵܐ ܗܹܡܸܙܡܵܢ ܕܐܲܠܵܗܵܐ: ܘܗ̇ܘ ܟܸܠܝܵܐ ܗ̄ܘܵܐ ܥܲܠ ܣܸܦܬܵܐ ܕܝܵܡܵܐ 2 ܕܓܹܢܣܲܪ. ܘܚܙܹܠܹܐ ܬܲܪ̈ܬܹܝ ܓܵܡ̈ܝܹܐ ܟܸܠܝܹܐ ܥܲܠ ܣܸܦܬܵܐ ܕܝܵܡܵܐ: ܐܝܼܢܵܐ ܨܝܵܕܹ̈ܐ ܐܣܝܼܩܹܐ ܗ̄ܘܵܘ ܡܸܢܵܝ ܘܚܲܠܘܼܠܹܐ ܗ̄ܘܵܘ 3 [16] ܓܲܪ̈ܕܝ. ܘܐܣܸܩܠܹܐ ܥܲܠ ܚܕܵܐ ܡ̣ܢ ܓܵܡ̈ܝܹܐ: ܕܝܼܗ̄ܘܵܐ ܕܫܸܡܥܘܿܢ: ܘܒܸܥܠܹܐ ܕܠܵܒܸܠ ܗ̄ܘܵܐ ܠܵܗ̇ ܚܲܟ̰ܵܐ ܡ̣ܢ ܒܸܪܙܵܐ: 4 ܘܝܬܸܒ̣ܠܹܐ ܘܡܘܼܠܸܦܠܹܐ ܡ̣ܢ ܓܵܡܝܼ ܠܟܸܢܫܹ̈ܐ. ܘܟܲܕ ܫܬܸܩܠܹܐ ܡ̣ܢ ܗܲܡܙܲܡܬܹܗ: ܐܡܸܪܹܐ ܠܫܸܡܥܘܿܢ: ܠܵܒܠܘܿܢ ܠܥܘܼܡܩܵܐ: 5 ܘܕܪܹܡܘܿܢ [17] ܓܪ̈ܕܵܘܟ̣ܘܿܢ ܠܨܲܝܕܵܐ. ܘܓ̰ܘܼܘܸܒܠܹܐ ܫܸܡܥܘܿܢ ܘܐܡܸܪܹܐ: ܐܸܠܹܗ: ܪܵܒܝܼܝܼ: ܟܠܹܗ ܠܲܝܠܹܐ ܓ̰ܸܗ̄ܠܲܢ: ܘܡܸܢܕܝܼ ܠܵܐ 6 ܕܒܸܩܠܲܢ: ܐܝܼܢܵܐ ܒܚܵܬܸܪ ܕܗܹܡܸܙܡܵܢܘܼܟ ܒܸܬ ܕܵܪܸܢ [18] ܓܲܪܕܵܐ. ܘܟܲܕ ܐܵܗܵܐ ܥܒܸܕܠܘܿܢ: ܕܒܸܩܠܘܿܢ ܢܘܼܢܹ̈ܐ ܒܘܼܫܵܝܝܼ ܪܵܒܵܐ: ܘܦܝܵܫܵܐ ܗ̄ܘܵܐ 7 [19] ܟ̰ܘܼܢܟ̰ܸܪܵܐ [20] ܓܲܪܕܵܝ. ܘܪܡܸܙܠܘܿܢ ܠܚܲܒ̣ܪ̈ܵܘܵܬܵܝ ܕܒܓܵܡܝܼ ܐܚܹܪ̄ܬܵܐ: ܕܐܵܬܝܼ ܗ̄ܘܵܘ ܗܲܝܸܪܝܼ ܠܗ̄ܘܿܢ. ܘܐܬܹܠܘܿܢ ܡܸܠܝܵܝܠܘܿܢ 8 ܬܸܪܘܵܝ ܓܵܡ̈ܝܹܐ: ܐܲܝܟ ܕܒܸܛܒܲܥܝܵܐ ܗ̄ܘܵܘ. ܐܝܼܢܵܐ ܟܲܕ ܚܙܹܠܹܐ ܫܸܡܥܘܿܢ ܟܹܐܦܵܐ: ܢܦܸܠܹܐ ܩܵܕ̄ܡ ܒܘܼܪ̈ܟܵܟܹܐ ܕܝܼܫܘܿܥ: ܘܐܡܸܪܹܐ: ܦܪܘܿܩ ܡܸܢܝܼ: ܣܵܒܵܒ ܐܢܵܫܵܐ ܚܲܛܵܝܵܐ ܝܘܸܢ: ܝܵܐ ܡܵܪܝܼ. 9 ܣܵܒܵܒ ܕܥܘܼܓ̰ܵܒܵܐ ܕܒ̣ܝܼܩܘܼܗܝ ܗ̄ܘܵܐ ܘܠܟܠܵܝ ܐܵܢܝܼ ܕܥܲܡܹܗ: 10 ܥܲܠ ܨܲܝܕܵܐ ܕܢܘܼܢܹ̈ܐ ܕܕܒܸܩܠܘܿܢ. ܘܗܲܕܟ̣ܵܐ ܐܘܼܦ ܠܝܲܥܩܘܿܒ̣ ܘܠܝܘܿܚܲܢܵܢ ܒܢܘܼܢܹ̈ܐ ܕܙܲܒ̣ܕܲܝ: ܕܝܼܗ̄ܘܵܘ ܫܵܪ̈ܝܼܟܹܐ ܕܫܸܡܥܘܿܢ: ܘܐܡܸܪܹܐ ܝܼܫܘܿܥ ܠܫܸܡܥܘܿܢ: ܠܵܐ ܙܵܕܸܥܬ: ܡ̣ܢ ܐܵܕܝܼܵܐ ܒܢܲܝ̈ ܐܢܵܫܵܐ 11 ܒܸܬ ܗܵܘܸܬ ܒܸܨܝܵܕܵܐ. ܘܟܲܕ ܡܘܼܬ̄ܝܵܝܠܘܿܢ ܓܵܡ̈ܝܹܐ ܠܐܲܪܥܵܐ: ܫܒܸܩܠܘܿܢ ܟܠ ܡܸܢܕܝܼ: ܘܐܬܹܠܘܿܢ ܒܵܬ̄ܪܹܗ. 12 ܘܗ̄ܘܹܠܵܐ ܟܲܕ ܗ̇ܘ ܓܵܘ ܚܕܵܐ ܡ̣ܢ ܡܕܝܼܢܵܬܹ̈ܐ ܗ̄ܘܵܐ: ܗܵܐ: ܚܵܕ̄ ܐܢܵܫܵܐ ܕܡܸܠܝܵܐ: ܓܸܪܒ̣ܵܐ: ܚܙܹܠܹܐ ܠܝܼܫܘܿܥ ܘܢܦܸܠܹܐ ܥܲܠ ܦܵܬܹܗ: ܘܦܲܪܦܸܠ ܗ̄ܘܵܐ ܒܝܹܗ: ܘܐܵܡܸܪ ܐܸܠܹܗ: ܡܵܪܝܼ: ܐܸܢ 13 ܒܵܣܡܵܐ ܠܘܼܟ ܟܹܐ ܡܵܨܸܬ ܠܕܵܟ̣ܘܿܝܝܼ. ܘܦܘܼܫܛܵܠܹܐ ܐܝܼܕܹܗ: ܕܩܸܪܹܐ ܒܝܹܗ: ܘܐܡܸܪܹܐ: ܒܸܒܣܵܡܝܼ ܝܠܵܐ: ܦܘܼܫ ܕܸܟ̣ܝܵܐ. 14 ܘܕܲܪܣܵܥܲܬ ܐܙܸܠܹܐ ܡܸܢܹܗ ܓܸܪܒ̣ܵܐ. ܘܦܩܸܕܠܹܗ ܕܠܐܢܵܫܵܐ ܠܵܐ ܐܵܡܪܸܬ: ܐܸܠܵܐ ܙܹܠ̄ܐ ܡܲܚܙܝܼ ܓܵܢܘܼܟ ܠܟܵܗܢܵܐ: ܘܡܲܩܪܸܒ̣ ܡܒܵܕܵܠ ܕܕܵܟ̣ܵܝܬܘܼܟ: ܕܵܐܟ̣ܝܼ ܕܦܩܸܕܠܹܐ ܡܘܼܫܹܐ ܠܣܵܗܕܘܼܬܵܝ. 15 ܘܦܠܸܛܠܵܐ ܒܵܗ̄ܣܹܗ ܒܘܼܫ ܙܵܘܕܵܐ: ܘܓ̰ܲܡܥܝܼ ܗ̄ܘܵܘ ܟܸܢܫܹ̈ܐ ܪܵܒܵܐ 16 ܠܸܫܡܲܥܝܵܐ ܡܸܢܹܗ: ܘܠܸܦܝܵܫܵܐ ܒܘܼܣܡܹܐ ܡ̣ܢ ܡܲܪ̈ܥܵܝ. ܐܝܼܢܵܐ ܗ̇ܘ ܓܪܸܫܠܹܐ ܠܒܲܪܝܼܵܐ ܘܨܵܠܹܐ ܗ̄ܘܵܐ ܨܠܘܿܬܵܐ. 17 ܘܗ̄ܘܹܠܵܐ ܒܚܵܕ̄ ܡ̣ܢ ܝܘܿܡܵܢܹ̈ܐ: ܟܲܕ ܡܵܠܘܿܦܹܐ ܗ̄ܘܵܐ ܗ̇ܘ: ܝܬܝܼܒܹܐ ܗ̄ܘܵܘ ܦܪ̈ܝܼܫܹܐ ܘܡܲܠܦܵܢܹ̈ܐ ܕܢܵܡܘܿܣܵܐ: ܕܐܬܝܹܐ ܗ̄ܘܵܘ ܡ̣ܢ ܟܠܵܝ ܡܵܬܘܵܬܹ̈ܐ: ܕܓܠܝܼܠܵܐ ܘܕܝܼܗܘܼܕ ܘܕܐܘܿܪܸܫܠܸܡ: 18 ܘܚܲܝܠܵܐ ܕܡܵܪܝܵܐ ܐܝܼܬ ܗ̄ܘܵܐ ܠܒܵܣܘܿܡܵܝ. ܘܗܵܐ: ܐܢܵܫܹ̈ܐ ܡܘܼܬ̄ܝܹܠܘܿܢ ܒܫܘܝܼܬܵܐ ܚܵܕ̄ ܐܢܵܫܵܐ ܕܝܼܗ̄ܘܵܐ ܫܦܝܼܠܵܐ: ܘܒܲܥܝܝܼ 19 ܗ̄ܘܵܘ ܕܡܲܐܘܸܪܝܼ ܡܲܬܒ̣ܝܼ ܠܹܗ ܩܵܕ̄ܡܘܼܗܝ. ܘܟܲܕ ܠܵܐ ܡܨܹܠܘܿܢ ܕܵܐܟ̣ܝܼ ܡܲܐܘܸܪܝܼ ܠܹܗ: ܡ̣ܢ ܟܸܢܫܵܐ: ܐܣܸܩܠܘܿܢ ܠܐܓܵܪܹܐ: ܘܟ̰ܘܼܢܒܸܠܘܿܢ ܐܸܠܹܗ ܥܲܡ ܫܘܝܼܬܹܗ ܡ̣ܢ ܫܟܘܼܪܹܐ ܠܒܹܝܦܲܠܓܵܐ 20 ܩܵܕ̄ܡ ܝܼܫܘܿܥ. ܘܟܲܕ ܚܙܹܠܹܐ ܗܲܝܡܵܢܘܼܬܵܝ: ܐܡܸܪܹܐ: ܐܢܵܫܵܐ: 21 ܫܒ̣ܝܼܩܹܐ ܝܢܵܐ ܐܸܠܘܼܟ ܚܛܝܼܵܬܘܼ̈ܟ. ܘܫܘܼܪܹܠܘܿܢ ܣܵܦܪܹ̈ܐ ܘܦܪ̈ܝܼܫܹܐ ܒܸܚܫܵܒ̣ܵܐ ܘܐܵܡܪܝܼ: ܡܵܢܝܼ ܝܠܹܐ ܐܵܗܵܐ ܕܗܲܡܙܘܼܡܹܐ ܝܠܹܐ ܓܘܼܕܵܦܹ̈ܐ: ܡܵܢܝܼ ܡܵܨܹܐ ܠܸܫܒ̣ܵܩܵܐ ܚܛܝܼܵܬܹ̈ܐ: ܫܒ̣ܘܿܩ ܡ̣ܢ ܐܲܠܵܗܵܐ 22 ܒܢܲܦ̮ܫܹܗ. ܐܝܼܢܵܐ ܝܼܫܘܿܥ ܝܕܸܥܠܹܐ ܚܘܼܫܵܒ̣ܵܝ̈: ܘܓ̰ܘܼܘܸܒܠܹܐ 23 ܘܐܡܸܪܹܐ ܐܸܠܵܝ: ܡܘܼܕܝܼ ܒܸܚܫܵܒ̣ܵܐ ܝܬܘܿܢ ܒܠܸܒܵܘܟ̣ܘܿܢ. ܐܵܝܢܝܼ ܗܵܣܵܢܵܝܝܼ ܝܠܵܐ ܠܹܐܡܵܪܵܐ: ܫܒ̣ܝܼܩܹܐ ܝܢܵܐ ܐܸܠܘܼܟ ܚܛܝܼܵܬܘܼ̈ܟ: ܝܲܢ 24 ܠܹܐܡܵܪܵܐ: ܩܘܼܡ̄ ܚܕܘܿܪ. ܐܝܼܢܵܐ ܕܝܲܕܥܝܼܬܘܿܢ ܕܐܝܼܬ ܠܹܗ ܗܘܼܟܡܵܐ ܒܪܘܼܢܹܗ ܕܐܢܵܫܵܐ ܒܐܲܪܥܵܐ ܕܫܵܒܸܩ ܚܛܝܼܵܬܹ̈ܐ: ܐܡܸܪܹܐ ܠܫܦܝܼܠܵܐ: ܐܸܠܘܼܟ ܒܹܐܡܵܪܵܐ ܝܘܸܢ: ܩܘܼܡ̄: ܫܩܘܿܠ 25 ܫܘܝܼܬܘܼܟ: ܘܙܹܠ̄ܐ ܠܒܲܝܬܘܼܟ. ܘܕܲܪܣܵܥܲܬ ܩܸܡܠܹܐ ܩܵܕ̄ܡ ܥܲܝܢܵܝ̈: ܘܫܩܝܼܠܵܠܹܐ ܗ̇ܝ ܕܥܲܠܘܼܗ̇ ܕܡܝܼܟ̣ܵܐ ܗ̄ܘܵܐ: ܘܐܙܸܠܹܐ 26 ܠܒܲܝܬܹܗ. ܟܲܕ ܫܵܒܘܿܚܹܐ ܠܐܲܠܵܗܵܐ. ܘܥܘܼܓ̰ܵܒܵܐ ܕܒܸܩܠܹܐ ܠܟܠ ܐܢܵܫܵܐ: ܘܫܵܒܚܝܼ ܗ̄ܘܵܘ ܠܐܲܠܵܗܵܐ: ܘܦܸܫܠܘܿܢ ܡܸܠܝܹܐ ܙܕܘܼܥܬܵܐ: ܘܐܵܡܪܝܼ: ܕܚܙܹܠܲܢ ܐܸܕܝܘܼ ܥܵܓ̰ܸܒܘܵܬܵܐ. 27 ܘܒܵܬ̄ܪ ܐܲܢܹܐ ܦܠܸܛܠܹܐ: ܘܚܙܹܠܹܐ ܚܵܕ̄ ܕܲܡܓ̣ܵܟ̰ܝܼ: ܫܸܡܹܗ ܠܹܘܝܼ: ܝܬܝܼܒ̣ܵܐ ܒܕܘܼܟܵܐ ܕܕܲܡܓ̣ܵܟ̰̈ܝܹܐ: ܘܐܡܸܪܹܐ ܐܸܠܹܗ: ܬܵܐ 28 ܒܵܬ̄ܪܝܼ. ܘܫܒܸܩܠܹܐ ܟܠ ܡܸܢܕܝܼ: ܘܩܸܡܠܹܐ ܐܙܸܠܹܐ ܒܵܬ̄ܪܹܗ. 29 ܘܥܒܸܕܠܹܐ ܩܵܐ ܕܝܹܗ ܠܹܘܝܼ ܒܒܲܝܬܹܗ ܐܲܪܚܘܼܬܵܐ ܓܘܼܪܬܵܐ ܘܐܝܼܬ ܗ̄ܘܵܐ ܟܸܢܫܵܐ ܪܵܒܵܐ ܕܕܲܡܓ̣ܵܟ̰̈ܝܹܐ: ܘܕܐܚܹܪ̄ܢܹܐ ܕܝܬܝܼܒܹܐ ܗ̄ܘܵܘ 30 ܠܨܘܼܦܪܵܐ ܥܲܡܵܝ. ܘܛܘܼܪܛܸܡܠܘܿܢ ܣܵܦܪܹ̈ܐ ܘܦܪ̈ܝܼܫܹܐ: ܘܐܵܡܪܝܼ ܠܬܲܠܡܝܼܕܘܼ̈ܗܝ: ܩܵܡܘܿܕܝܼ ܥܲܡ ܕܲܡܓ̣ܵܟ̰̈ܝܹܐ ܘܚܲܛܵܝܹ̈ܐ ܒܹܐܟ̣ܵܠܵܐ 31 ܝܬܘܿܢ ܘܒܸܫܬܵܝܵܐ. ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܠܹܐ ܝܠܹܐ ܠܵܙܸܡ ܗܲܟܝܼܡ ܠܐܵܢܝܼ ܕܨܵܚ ܝܼܢܵܐ: ܐܸܠܵܐ ܠܐܵܢܝܼ ܕܡܸܪܥܝܹܐ 32 ܝܢܵܐ. ܠܵܐ ܐܬܹܠܝܼ ܕܩܵܪܸܢ ܠܙܲܕܝܼܩܹ̈ܐ: ܐܸܠܵܐ ܠܚܲܛܵܝܹ̈ܐ 33 ܠܬܝܵܒ̣ܘܼܬܵܐ. ܘܐܵܢܝܼ ܐܡܸܪܘܿܢ ܐܸܠܹܗ: ܩܵܡܘܿܕܝܼ ܬܲܠܡܝܼܕܹ̈ܐ ܕܝܘܿܚܲܢܵܢ ܟܹܐ ܨܵܝܡܝܼ ܪܵܒܵܐ: ܘܥܵܒ̣ܕܝܼ ܦܲܪ̈ܦܲܠܝܵܬܹ̈ܐ: ܘܗܲܕܟ̣ܵܐ 34 ܐܘܼܦ ܕܦܪ̈ܝܼܫܹܐ: ܐܝܼܢܵܐ ܕܝܼܘܼܟ ܟܹܐ ܐܵܟ̣ܠܝܼ ܘܫܵܬܝܼ. ܘܝܼܫܘܿܥ ܐܡܸܪܹܐ ܐܸܠܵܝ: ܡܵܨܝܼܬܘܿܢ ܕܡܲܨܝܸܡܝܼܬܘܿܢ ܠܒܢܘܼܢܹ̈ܐ ܕܓܢܘܼܢܵܐ: 35 ܟܡܵܐ ܕܚܸܬܢܵܐ ܥܲܡܵܝ ܝܠܹܐ. ܐܝܼܢܵܐ ܒܸܬ ܐܵܬܝܼ ܝܘܿܡܵܢܹ̈ܐ ܟܲܕ ܦܵܝܸܫ ܫܩܝܼܠܵܐ ܚܸܬܢܵܐ ܡܸܢܵܝ: ܗ̇ܝܓܵܗ ܒܸܬ ܨܵܝܡܝܼ ܒܐܵܢܝܼ 36 ܝܘܿܡܵܢܹ̈ܐ. ܘܐܘܼܦ ܐܡܸܪܹܐ ܐܸܠܵܝ ܡܵܣܵܠܵܐ: ܐܢܵܫܵܐ ܠܹܐ ܦܵܪܸܛ ܥܵܪܵܝܬܵܐ ܡ̣ܢ ܓ̰ܘܼܠܵܐ ܚܵܕ̄ܬܵܐ ܘܕܵܪܹܐ ܠܵܗ̇ ܥܲܠ ܓ̰ܘܼܠܵܐ ܒܸܠܝܵܐ: ܘܐܸܢ ܠܵܐ: ܒܸܬ ܟ̰ܲܢܟ̰ܸܪ ܠܚܵܕ̄ܬܵܐ: ܘܥܵܪܵܝܬܵܐ ܕܡ̣ܢ ܚܵܕ̄ܬܵܐ ܠܹܐ 37 ܕܵܒ̣ܩܵܐ ܠܒܸܠܝܵܐ. ܘܐܢܵܫܵܐ ܠܹܐ ܕܵܪܹܐ ܚܲܡܪܵܐ ܚܵܕ̄ܬܵܐ ܒܓܘܼܕܹ̈ܐ ܒܸܠܝܹ̈ܐ: ܘܐܸܢ ܠܵܐ: ܒܸܬ ܒܲܙܸܥ ܚܲܡܪܵܐ ܚܵܕ̄ܬܵܐ: ܠܓܘܼܕܹ̈ܐ: ܘܗ̇ܘ 38 ܒܸܬ [21] ܬܵܦܸܟ: ܘܓܘܼܕܹ̈ܐ ܒܸܬ ܬܵܠܩܝܼ. ܐܸܠܵܐ ܚܲܡܪܵܐ ܚܵܕ̄ܬܵܐ 39 ܒܓܘܼܕܹ̈ܐ ܚܵܕ̄ܬܹ̈ܐ ܟܹܐ ܕܵܪܝܼ [22] . ܘܐܢܵܫܵܐ ܠܹܐ ܫܵܬܹܐ ܚܲܡܪܵܐ ܥܵܬܝܼܩܵܐ ܕܲܪܣܵܥܲܬ ܒܲܥܝܹܐ ܚܵܕ̄ܬܵܐ: ܣܵܒܵܒ ܕܟܹܐ ܐܵܡܸܪ: ܥܵܬܝܼܩܵܐ ܒܘܼܫ ܒܵܣܝܼܡܵܐ ܝܠܹܐ.

ܩܦܠܐܘܢ: ܘ

1 ܐܝܼܢܵܐ ܗ̄ܘܹܠܵܐ ܒܫܲܒܬܵܐ: ܕܒܹܐܙܵܠܵܐ ܗ̄ܘܵܐ ܝܼܫܘܿܥ ܡ̣ܢ ܓܵܘ ܡܲܙܪܲܥܝܵܐ: ܘܬܲܠܡܝܼܕܘܼ̈ܗܝ ܡܵܠܓܝܼ ܗ̄ܘܵܘ ܒܘܼܠܹ̈ܐ: ܘܦܵܪܟ̣ܝܼ 2 ܗ̄ܘܵܘ ܒܐܝܼܕܵܬܵܝ̈ ܘܐܵܟ̣ܠܝܼ. ܐܝܼܢܵܐ ܐܢܵܫܹ̈ܐ ܡ̣ܢ ܦܪ̈ܝܼܫܹܐ ܐܡܸܪܘܿܢ: ܩܵܡܘܿܕܝܼ ܒܸܥܒ̣ܵܕܵܐ ܝܬܘܿܢ ܡܸܢܕܝܼ ܕܠܹܐ ܝܠܹܐ ܒܕܲܣܬܘܼܪ 3 ܠܸܥܒ̣ܵܕܵܐ ܒܫܲܒܬܵܐ. ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܐܘܼܦ ܐܵܗܵܐ ܠܵܐ ܩܪܹܠܵܘܟ̣ܘܿܢ: ܡܸܢܕܝܼ ܕܥܒܸܕܠܹܐ ܕܵܘܝܼܕ ܟܲܕ ܟܦܸܢܹܐ: ܗ̇ܘ 4 ܘܐܵܢܝܼ ܕܥܲܡܹܗ. ܕܵܐܟ̣ܝܼ ܐܘܸܪܹܐ ܠܒܲܝܬܹܗ ܕܐܲܠܵܗܵܐ: ܘܠܲܚܡܵܐ ܕܦܵܬܘܼܪܹܗ ܕܡܵܪܝܵܐ ܫܩܸܠܹܐ ܐܟܸܠܹܐ: ܘܝܸܗܒܸܠܹܐ ܠܐܵܢܝܼ ܕܥܲܡܹܗ: ܗ̇ܘ ܕܠܹܐ ܗ̄ܘܵܐ ܒܕܲܣܬܘܼܪ ܠܹܐܟ̣ܵܠܵܐ ܐܸܠܵܐ ܠܟܵܗܢܹ̈ܐ ܒܢܲܦ̮ܫܵܝ. 5 ܘܐܡܸܪܹܐ ܐܸܠܵܝ: ܡܵܪܵܐ ܝܠܹܐ ܕܫܲܒܬܵܐ ܒܪܘܼܢܹܗ ܕܐܢܵܫܵܐ. 6 ܘܗ̄ܘܹܠܵܐ ܒܫܲܒܬܵܐ ܐܚܹܪ̄ܬܵܐ: ܐܘܸܪܹܐ ܠܟܢܘܼܫܬܵܐ ܘܡܵܠܸܦ ܗ̄ܘܵܐ. ܘܐܝܼܬ ܗ̄ܘܵܐ ܬܵܡܵܐ ܚܵܕ̄ ܐܢܵܫܵܐ ܕܐܝܼܕܹܗ ܕܝܲܡܝܼܢܵܐ 7 ܒܪܝܼܙܬܵܐ ܗ̄ܘܵܐ. ܘܣܵܦܪܹ̈ܐ ܘܦܪ̈ܝܼܫܹܐ ܢܵܛܪܝܼ ܗ̄ܘܵܘ ܠܹܗ: ܐܸܢ ܒܵܣܸܡ ܗ̄ܘܵܐ ܒܫܲܒܬܵܐ: ܕܡܵܫ̄ܟ̰ܸܚܝܼ ܕܵܐܟ̣ܝܼ ܕܡܵܚܝܼ ܗ̄ܘܵܘ 8 ܕܲܪܗܲܩܹܗ. ܐܝܼܢܵܐ ܗ̇ܘ ܟܹܐ ܝܲܕܸܥ ܗ̄ܘܵܐ ܚܘܼܫܵܒ̣ܵܝ̈: ܘܐܡܸܪܹܐ ܠܗ̇ܘ ܐܢܵܫܵܐ ܕܒܪܝܼܙܬܵܐ ܗ̄ܘܵܐ ܐܝܼܕܹܗ: ܩܘܼܡ̄ ܘܟܠܝܼ 9 ܒܒܹܝܦܲܠܓܵܐ: ܘܩܸܡܠܹܐ ܘܟܠܹܠܹܐ. ܘܐܡܸܪܹܐ ܐܸܠܵܝ ܝܼܫܘܿܥ: ܒܸܬ ܒܵܩܪܸܢ ܡܸܢܵܘܟ̣ܘܿܢ: ܒܕܲܣܬܘܼܪ ܝܼܠܵܐ ܒܫܲܒܬܵܐ ܠܸܥܒ̣ܵܕܵܐ ܕܨܦܵܝܝܼ ܝܲܢ ܕܣܸܪܝܵܐ: ܓܵܢܵܐ ܠܡܲܚܘܼܝܹܐ: ܝܲܢ ܠܬܵܠܘܿܩܹܐ. 10 ܘܚܸܪܹܐ ܚܵܕܸܪ̈ܘܵܢܘܼܗܝ ܒܟܠܵܝ: ܘܐܡܸܪܹܐ ܠܗ̇ܘ ܐܢܵܫܵܐ: ܦܵܫܸܛ 11 ܐܝܼܕܘܼܟ: ܘܥܒܸܕܠܹܐ ܗܲܕܟ̣ܵܐ: ܘܬܪܸܨܠܵܐ ܐܝܼܕܹܗ. ܐܝܼܢܵܐ ܐܵܢܝܼ ܦܸܫܠܘܿܢ ܡܸܠܝܹܐ ܚܸܡܬܵܐ: ܘܗܲܡܙܸܡܝܼ ܗ̄ܘܵܘ ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ: ܕܡܘܼܕܝܼ ܥܵܒ̣ܕܝܼ ܗ̄ܘܵܘ ܠܝܼܫܘܿܥ. 12 ܐܝܼܢܵܐ ܗ̄ܘܹܠܵܐ ܒܐܵܢܝܼ ܝܘܿܡܵܢܹ̈ܐ: ܦܠܸܛܠܹܐ ܠܛܘܼܪܵܐ ܠܨܵܠܘܿܝܹܐ: 13 ܘܬܵܡܵܐ ܡܘܼܥܒܸܪܹܐ ܠܲܝܠܹܐ [23] ܒܨܠܘܿܬܹܗ ܕܐܲܠܵܗܵܐ. ܘܟܲܕ ܗ̄ܘܹܠܹܐ ܝܘܿܡܵܐ: ܩܪܹܠܹܐ ܠܬܲܠܡܝܼܕܘܼ̈ܗܝ: ܘܓܘܼܒܹܠܹܐ ܡܸܢܵܝ 14 ܬܪܸܥܣܲܪ: ܐܵܢܝܼ ܕܡܘܼܬܸܒ̣ܠܹܐ ܫܸܡܵܝ ܫܠܝܼܚܹ̈ܐ. ܫܸܡܥܘܿܢ: ܗ̇ܘ ܕܡܘܼܬܸܒ̣ܠܹܐ ܫܸܡܹܗ ܟܹܐܦܵܐ: ܘܐܲܢܕܪܹܐܘܿܣ ܐܵܚܘܿܢܹܗ: ܘܝܲܥܩܘܿܒ̣ ܘܝܘܿܚܲܢܵܢ: ܘܦܝܼܠܝܼܦܘܿܣ ܘܒܲܪ ܬܘܼܠܡܲܝ. 15 ܘܡܲܬܲܝ ܘܬܐܘܿܡܵܐ: ܘܝܲܥܩܘܿܒ̣ ܒܪܘܼܢܵܐ ܕܚܲܠܦܲܝ: ܘܫܸܡܥܘܿܢ: 16 ܕܦܝܵܫܵܐ ܝܠܹܐ ܩܸܪܝܵܐ ܛܲܢܵܢܵܐ. ܘܝܼܗܘܼܕܵܐ ܒܪܘܼܢܵܐ ܕܝܲܥܩܘܿܒ̣: 17 ܘܝܼܗܘܼܕܵܐ ܣܟܲܪܝܘܿܛܵܐ: ܗ̇ܘ ܕܗ̄ܘܹܠܹܐ ܣܵܦܝܵܢܵܐ. ܘܨܠܹܠܹܐ ܥܲܡܵܝ ܘܟܠܹܠܹܐ [24] ܒܕܸܫܬܵܐ: ܘܟܸܢܫܵܐ ܪܵܒܵܐ ܕܬܲܠܡܝܼܕܘܼ̈ܗܝ: ܘܒܘܼܫܵܝܝܼ ܕܟܸܢܫܵܐ ܕܛܵܝܸܦܵܐ ܡ̣ܢ ܟܠܵܗ̇ ܝܼܗܘܼܕ: ܘܡ̣ܢ ܐܘܿܪܸܫܠܸܡ: ܘܡ̣ܢ ܡܲܪܙܵܐ ܕܝܵܡܵܐ ܕܨܘܿܪ ܘܕܨܲܝܕܘܿܢ: ܕܐܬܹܠܘܿܢ 18 ܕܫܲܡܥܝܼ ܡܸܢܹܗ: ܘܕܦܵܝܫܝܼ ܒܘܼܣܡܹܐ ܡ̣ܢ ܡܲܪ̈ܥܵܝ. ܘܐܵܢܝܼ ܕܦܵܝܫܝܼ ܗ̄ܘܵܘ ܡܘܼܠܝܸܨܹܐ ܡ̣ܢ ܪ̈ܘܼܚܹܐ ܛܲܡܹ̈ܐܐ: ܘܦܸܫܠܘܿܢ 19 ܒܘܼܣܡܹܐ. ܘܟܠܹܗ ܟܸܢܫܵܐ ܒܸܒܲܥܝܵܐ ܗ̄ܘܵܘ ܠܸܕܩܵܪܵܐ ܒܝܹܗ: ܣܵܒܵܒ ܕܚܲܝܠܵܐ ܟܹܐ ܦܵܠܸܛ ܗ̄ܘܵܐ ܡܸܢܹܗ: ܘܠܟܠܵܝ ܟܹܐ ܒܵܣܸܡ ܗ̄ܘܵܐ. 20 ܘܡܘܼܪܸܡܠܹܐ ܥܲܝܢܘܼ̈ܗܝ ܥܲܠ ܬܲܠܡܝܼܕܘܼ̈ܗܝ: ܘܐܡܸܪܹܐ: ܛܘܼܒ̣ܵܐ ܐܸܠܵܘܟ̣ܘܿܢ ܡܸܣܟܹܢܹ̈ܐ: ܣܵܒܵܒ ܕܕܝܼܵܘܟ̣ܘܿܢ ܝܼܠܵܐ 21 ܡܲܠܟܘܼܬܵܐ ܕܐܲܠܵܗܵܐ. ܛܘܼܒ̣ܵܐ ܐܸܠܵܘܟ̣ܘܿܢ ܐܵܢܝܼ ܕܟܵܦܢܝܼ ܐܵܕܝܼܵܐ: ܣܵܒܵܒ ܕܒܸܬ ܣܲܒ̣ܥܝܼܬܘܿܢ: ܛܘܼܒ̣ܵܐ ܐܸܠܵܘܟ̣ܘܿܢ ܐܵܢܝܼ ܕܒܵܟ̣ܝܼ 22 ܐܵܕܝܼܵܐ: ܣܵܒܵܒ ܕܒܸܬ ܓܵܚܟܝܼܬܘܿܢ. ܛܘܼܒ̣ܵܐ ܐܸܠܵܘܟ̣ܘܿܢ ܐܝܼܡܲܢ ܕܣܵܢܝܼ ܠܵܘܟ̣ܘܿܢ ܒܢܲܝ̈ܢܵܫܵܐ: ܘܦܵܪܫܝܼ ܠܵܘܟ̣ܘܿܢ: ܘܠܵܝܡܝܼ ܠܵܘܟ̣ܘܿܢ: ܘܦܵܠܛܝܼ ܫܸܡܵܘܟ̣ܘܿܢ ܐܲܝܟ ܒܝܼܫܹ̈ܐ: ܒܚܵܬܸܪ ܕܒܪܘܼܢܹܗ 23 ܕܐܢܵܫܵܐ. ܚܕܹܡܘܿܢ ܒܗ̇ܘ ܝܘܿܡܵܐ ܘܦܨܘܿܚܘܿܢ: ܣܵܒܵܒ ܗܵܐ: ܗܵܩܵܘܟ̣ܘܿܢ ܙܸܕܠܹܐ ܒܫܡܲܝܵܐ. ܣܵܒܵܒ ܗܲܕܟ̣ܵܐ ܟܹܐ ܥܵܒ̣ܕܝܼ ܗ̄ܘܵܘ 24 ܒܵܒܵܘܵܬܵܝ̈ ܠܢܒ̣̈ܝܹܐ. ܐܝܼܢܵܐ ܘܵܝ ܐܸܠܵܘܟ̣ܘܿܢ ܐܲܝ ܕܵܘܠܬܲܡܲܢܕܹ̈ܐ: 25 ܣܵܒܵܒ ܕܩܘܪܒܸܠܵܘܟ̣ܘܿܢ ܝܵܗ̄ܒܲܠܬܵܐ ܕܠܸܒܵܘܟ̣ܘܿܢ. ܘܵܝ ܐܸܠܵܘܟ̣ܘܿܢ ܐܲܝ ܣܸܒ̣ܥܝܹ̈ܐ: ܣܵܒܵܒ ܕܒܸܬ ܟܵܦܢܝܼܬܘܿܢ: ܘܵܝ ܐܸܠܵܘܟ̣ܘܿܢ ܐܵܢܝܼ ܕܓܵܚܟܝܼ ܐܵܕܝܼܵܐ: ܣܵܒܵܒ ܕܒܸܬ ܒܵܟ̣ܝܼܬܘܿܢ ܘܒܸܬ ܥܵܒ̣ܕܝܼܬܘܿܢ 26 ܬܵܙܝܼ. ܘܵܝ ܐܸܠܵܘܟ̣ܘܿܢ ܟܲܕ ܗܵܘܝܼ ܒܹܐܡܵܪܵܐ ܨܦܵܝܘܼܬܵܐ ܒܘܼܬ ܕܝܼܵܘܟ̣ܘܿܢ ܟܠܵܝ ܒܢܲܝ̈ܢܵܫܵܐ: ܣܵܒܵܒ ܗܲܕܟ̣ܵܐ ܟܹܐ ܥܵܒ̣ܕܝܼ ܗ̄ܘܵܘ ܒܵܒܵܘܵܬܵܝ̈ ܠܢ̈ܒ̣ܝܹܐ ܕܵܓܵܠܹ̈ܐ. 27 ܐܝܼܢܵܐ ܐܸܠܵܘܟ̣ܘܿܢ ܒܹܐܡܵܪܵܐ ܝܘܸܢ: ܠܐܵܢܝܼ ܕܒܸܫܡܲܥܝܵܐ ܝܢܵܐ: ܡܲܚܸܒܘܿܢ ܠܕܸܫܡܸܢܵܘ̈ܟ̣ܘܿܢ: ܘܥܒ̣ܘܿܕܘܿܢ ܨܦܵܝܘܼܬܵܐ ܠܐܵܢܝܼ ܕܣܵܢܝܼ 28 ܠܵܘܟ̣ܘܿܢ. ܘܒܵܪܟ̣ܘܿܢ ܠܐܵܢܝܼ ܕܠܵܝܛܝܼ ܠܵܘܟ̣ܘܿܢ: ܘܨܵܠܹܡܘܿܢ 29 ܥܲܠ ܕܐܵܢܝܼ ܕܥܵܒ̣ܕܝܼ ܠܵܘܟ̣ܘܿܢ ܒܹܨܘܼܪ. ܘܠܗ̇ܘ ܕܡܵܚܹܐ ܠܘܼܟ ܥܲܠ ܚܕܵܐ ܦܵܬܘܼܟ: ܡܲܕܸܪ ܐܸܠܹܗ ܐܘܼܦ ܗ̇ܝ ܐܚܹܪ̄ܬܵܐ: ܘܡ̣ܢ ܡ̇ܢ ܕܫܵܩܸܠ ܥܵܒܵܝܘܼܟ: ܠܵܐ ܡܲܟܠܸܬ ܐܘܼܦ [25] ܨܘܼܕܪܘܼܟ. 30 ܠܟܠ ܕܛܵܠܸܒ ܡܸܢܘܼܟ ܗܲܒ̄ܠ ܠܹܗ: ܘܡ̣ܢ ܡ̇ܢ ܕܫܵܩܸܠ 31 ܕܕܝܼܘܼܟ: ܠܵܐ ܛܵܠܒܸܬ ܡܸܕܪܹܐ. ܘܕܵܐܟ̣ܝܼ ܕܒܲܥܝܝܼܬܘܿܢ ܕܥܵܒ̣ܕܝܼ ܐܸܠܵܘܟ̣ܘܿܢ ܒܢܲܝ̈ܢܵܫܵܐ: ܗܲܕܟ̣ܵܐ ܥܒ̣ܘܿܕܘܿܢ ܐܸܠܵܝ ܐܘܼܦ ܐܲܚܬܘܿܢ. 32 ܣܵܒܵܒ ܐܸܢ ܡܲܚܸܒܝܼܬܘܿܢ ܠܐܵܢܝܼ ܕܡܲܚܸܒܝܼ ܠܵܘܟ̣ܘܿܢ: ܡܘܼܕܝܼ ܝܠܵܐ ܡܸܢܬܵܘܟ̣ܘܿܢ: ܣܵܒܵܒ ܐܘܼܦ ܚܲܛܵܝܹ̈ܐ ܠܐܵܢܝܼ ܕܡܲܚܸܒܝܼ ܠܗ̄ܘܿܢ ܟܹܐ 33 ܡܲܚܸܒܝܼ. ܘܐܸܢ ܥܵܒ̣ܕܝܼܬܘܿܢ ܨܦܵܝܘܼܬܵܐ ܠܐܵܢܝܼ ܕܥܵܒ̣ܕܝܼ ܨܦܵܝܘܼܬܵܐ ܐܸܠܵܘܟ̣ܘܿܢ: ܡܘܼܕܝܼ ܝܠܵܐ ܡܸܢܬܵܘܟ̣ܘܿܢ: ܣܵܒܒ ܐܘܼܦ ܚܲܛܵܝܹ̈ܐ 34 ܗܲܕܟ̣ܵܐ ܟܹܐ ܥܵܒ̣ܕܝܼ. ܘܐܸܢ ܝܵܗ̄ܒ̣ܝܼܬܘܿܢ ܕܵܝܢܵܐ ܠܡ̇ܢ ܕܐܝܼܬ ܠܵܘܟ̣ܘܿܢ ܗܹܒ̣ܝܼ ܕܦܵܝܫܝܼܬܘܿܢ ܦܸܪܥܝܹܐ ܡܸܢܹܗ: ܡܘܼܕܝܼ ܝܠܵܐ ܡܸܢܬܵܘܟ̣ܘܿܢ: ܐܘܼܦ ܚܲܛܵܝܹ̈ܐ ܠܚܲܛܵܝܹ̈ܐ ܟܹܐ ܝܵܗ̄ܒ̣ܝܼ ܕܵܝܢܵܐ: ܕܚܵܕ̄ 35 ܗܵܕܵܐ ܫܵܩܠܝܼ. ܐܝܼܢܵܐ ܡܲܚܸܒܘܿܢ ܠܕܸܫܡܸܢܵܘ̈ܟ̣ܘܿܢ: ܘܥܒ̣ܘܿܕܘܿܢ ( ܠܗ̄ܘܿܢ) ܨܦܵܝܘܼܬܵܐ: ܘܗܲܒ̄ܠܘܿܢ ܕܵܝܢܵܐ: ܘܠܵܐ ܩܲܛܥܝܼܬܘܿܢ ܗܹܒ̣ܝܼ ܕܐܢܵܫܵܐ: ܘܒܸܬ ܗܵܘܹܐ ܪܵܒܐ ܗܵܩܵܘܟ̣ܘܿܢ: ܘܒܸܬ ܗܵܘܝܼܬܘܿܢ ܒܢܘܼܢܹ̈ܐ ܕܪܵܡܵܐ: ܣܵܒܵܒ ܗ̇ܘ ܒܵܣܝܼܡܵܐ ܝܠܹܐ ܥܲܠ ܠܵܐ ܛܵܥܢܵܢܹ̈ܐ 36 ܕܡܸܢܬܵܐ: ܘܥܲܠ ܒܝܼܫܹ̈ܐ. ܗ̄ܘܹܡܘܿܢ ܡܪܲܚܡܵܢܹܐ: ܕܵܐܟ̣ܝܼ 37 ܕܒܵܒܵܘܟ̣ܘܿܢ ܡܪܲܚܡܵܢܵܐ ܝܠܹܐ. ܠܵܐ ܕܵܝܢܝܼܬܘܿܢ: ܘܠܹܐ ܦܵܝܫܝܼܬܘܿܢ ܕܝܼܢܹܐ: ܠܵܐ ܥܵܒ̣ܕܝܼܬܘܿܢ ܓܘܼܢܵܗܟܵܪ: ܘܠܹܐ ܦܵܝܫܝܼܬܘܿܢ ܥܒ̣ܝܼܕܹܐ ܓܘܼܢܵܗܟܵܪ: ܫܪܹܡܘܿܢ: ܘܒܸܬ ܦܵܝܫܝܼܬܘܿܢ ܫܸܪܝܹܐ. 38 ܗܲܒ̄ܠܘܿܢ: ܘܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܵܘܟ̣ܘܿܢ: ܒܟܝܵܠܬܵܐ ܨܦܵܝܝܼ: ܫܥܝܼܫܬܵܐ: ܕܝܼܫܬܵܐ: ܘܫܦܝܼܟ̣ܬܵܐ ܒܸܬ ܕܵܪܝܼ ܓܵܘ ܥܘܼܒܵܘܟ̣ܘܿܢ. ܣܵܒܵܒ ܕܒܗ̇ܝ ܟܝܵܠܬܵܐ ܕܟܵܠܝܼܬܘܿܢ ܒܸܬ ܦܵܝܸܫ ܟܝܼܠܵܐ ܐܸܠܵܘܟ̣ܘܿܢ. 39 ܘܐܘܼܦ ܐܡܸܪܹܐ ܐܸܠܵܝ ܡܵܣܵܠܵܐ: ܟܹܐ ܡܵܨܹܐ ܣܸܡܝܵܐ ܠܣܸܡܝܵܐ 40 ܠܠܵܒܘܿܠܹܐ: ܬܸܪܘܵܝ ܓܵܘ ܓܘܼܒܵܐ ܠܹܐ ܢܵܦܠܝܼ. ܠܹܐ ܝܠܹܐ ܬܲܠܡܝܼܕܵܐ ܙܵܘܕܵܐ ܡ̣ܢ ܪܵܒܝܹܗ: ܐܝܼܢܵܐ ܟܠ ܐܢܵܫܵܐ ܕܝܼܠܹܐ 41 ܡܘܼܟܡܸܠܵܐ ܒܸܬ ܗܵܘܹܐ ܐܲܝܟ ܪܵܒܝܹܗ. ܐܝܼܢܵܐ ܩܵܡܘܿܕܝܼ ܒܸܚܙܵܝܵܐ ܝܘܸܬ ܓܸܠܵܐ ܕܒܥܲܝܢܹܗ ܕܐܵܚܘܿܢܘܼܟ: ܘܩܵܪܝܼܬܵܐ ܕܒܥܲܝܢܘܼܟ ܠܹܐ 42 ܝܘܸܬ ܒܸܚܙܵܝܘܼܗ̇. ܝܲܢ ܕܵܐܟ̣ܝܼ ܡܵܨܸܬ ܠܹܐܡܵܪܵܐ ܠܐܵܚܘܿܢܘܼܟ: ܐܵܚܘܿܢܝܼ: ܫܒ̣ܘܿܩ ܦܵܠܛܸܢ ܓܸܠܵܐ ܡ̣ܢ ܥܲܝܢܘܼܟ: ܟܲܕ ܩܵܪܝܼܬܵܐ ܕܒܥܲܝܢܵܐ ܕܝܼܘܼܟ ܠܹܐ ܝܘܸܬ ܒܸܚܙܵܝܘܼܗ̇: ܐܲܝ ܢܵܣܹܒ̣ ܒܐܲܦܹ̈ܐ: ܦܵܠܸܛ ܩܵܕ̄ܡܵܝܬܵܐ ܩܵܪܝܼܬܵܐ ܡ̣ܢ ܥܲܝܢܘܼܟ: ܘܗ̇ܝܓܵܗ ܨܸܦܝܵܐ ܒܸܬ ܚܵܙܸܬ 43 ܠܦܵܠܘܿܛܹܐ ܓܸܠܵܐ ܕܒܥܲܝܢܹܗ ܕܐܵܚܘܿܢܘܼܟ. ܣܵܒܵܒ ܠܲܝܬ ܐܝܼܠܵܢܵܐ ܨܦܵܝܝܼ ܕܥܵܒܸܕ ܛܥܘܼܢܝܵܬܹ̈ܐ ܚܸܪܒܵܐ: ܐܘܼܦܠܵܐ ܐܝܼܠܵܢܵܐ 44 ܚܸܪܒܵܐ ܕܥܵܒܸܕ ܛܥܘܼܢܝܵܬܹ̈ܐ ܨܦܵܝܝܼ. ܣܵܒܵܒ ܟܠ ܐܝܼܠܵܢܵܐ ܡ̣ܢ ܛܥܘܼܢܝܵܬܘܼ̈ܗܝ ܟܹܐ ܦܵܝܸܫ ܝܕܸܥܝܵܐ: ܣܵܒܵܒ ܠܹܐ ܓܵܒܝܼ ܡ̣ܢ ܟܸܬܘܹ̈ܐ ܬܹܐܢܹ̈ܐ: ܘܐܘܼܦ ܠܵܐ ܡ̣ܢ ܣܲܢܝܵܐ ܩܵܛܦܝܼ ܥܲܢܒܹ̈ܐ. 45 ܐܢܵܫܵܐ ܛܵܒ̣ܵܐ ܡ̣ܢ ܚܲܙܝܼܢܵܐ ܛܵܒ̣ܬܵܐ ܕܠܸܒܹܗ ܟܹܐ ܦܵܠܸܛ ܛܵܒ̣ܵܬܹ̈ܐ: ܘܐܢܵܫܵܐ ܒܝܼܫܵܐ ܡ̣ܢ ܚܲܙܝܼܢܵܐ ܒܝܼܫܬܵܐ ܟܹܐ ܦܵܠܸܛ ܒܝܼܫܵܬܹ̈ܐ: ܣܵܒܵܒ ܡ̣ܢ ܙܵܘܕܘܿܢܝܘܼܬܵܐ ܕܠܸܒܵܐ ܟܹܐ ܗܲܡܙܸܡ ܦܘܼܡܹܗ. 46 ܘܩܵܡܘܿܕܝܼ ܒܸܩܪܵܝܝܼ ܝܬܘܿܢ: ܡܵܪܝܼ: ܡܵܪܝܼ: ܘܡܸܢܕܝܼ 47 ܕܒܹܐܡܵܪܵܐ ܝܘܸܢ ܠܹܐ ܥܵܒ̣ܕܝܼܬܘܿܢ. ܟܠ ܐܢܵܫܵܐ ܕܐܵܬܹܐ ܠܟܸܣܠܝܼ ܘܫܲܡܸܥ ܗܹܡܸܙܡܵܢܝܼ̈ ܘܥܵܒܸܕ ܠܗ̄ܘܿܢ: ܒܸܬ ܡܲܕܥܸܢܵܘܟ̣ܘܿܢ ܠܡܘܼܕܝܼ 48 ܟܹܐ ܕܵܡܹܐ. ܟܹܐ ܕܵܡܹܐ ܠܐܢܵܫܵܐ ܕܒܢܹܠܹܐ ܒܲܝܬܵܐ: ܘܚܦܸܪܹܐ ܘܡܘܼܥܡܸܩܠܹܐ: ܘܡܘܼܬܸܒ̣ܠܹܐ ܒܸܢܝܲܬ ܥܲܠ ܩܵܝܵܐ. ܐܝܼܢܵܐ ܟܲܕ ܗ̄ܘܹܠܵܐ [26] ܣܵܝܠ: ܩܸܬܠܹܐ ܢܲܗܪܵܐ ܒܗ̇ܘ ܒܝܬܵܐ: ܘܠܵܐ ܡܨܹܠܹܐ ܕܡܲܫܥܸܫ ܗ̄ܘܵܐ ܠܹܗ: ܣܵܒܵܒ ܕܒܸܢܝܲܬܹܗ ܥܲܠ ܩܵܝܵܐ ܡܘܼܬܸܒ̣ܬܵܐ 49 ܗ̄ܘܵܐ. ܐܝܼܢܵܐ ܗ̇ܘ ܕܫܲܡܸܥ ܘܠܵܐ ܥܵܒܸܕ: ܟܹܐ ܕܵܡܹܐ ܠܐܢܵܫܵܐ ܕܒܢܹܠܹܐ ܒܲܝܬܹܗ ܥܲܠ ܥܲܦܪܵܐ: ܕܠܵܐ ܒܸܢܝܲܬ: ܕܒܝܹܗ ܩܸܬܠܹܐ ܢܲܗܪܵܐ: ܘܕܲܪܣܵܥܲܬ ܢܦܸܠܹܐ: ܘܗ̄ܘܹܠܵܐ ܢܦܵܠܬܹܗ ܕܗ̇ܘ ܒܝܬܵܐ ܓܘܼܪܬܵܐ.

ܩܦܠܐܘܢ: ܙ

1 ܘܟܲܕ ܬܘܼܡܸܡܠܹܐ ܟܠܵܝ ܗܹܡܸܙܡܵܢܹ̈ܐ ܠܡܲܫܡܵܥܝܬܹܗ 2 ܕܛܵܝܸܦܵܐ: ܐܘܸܪܹܐ ܠܟܦܲܪܢܵܚܘܿܡ. ܘܪܹܓܵܐ ܕܚܵܕ̄ ܩܸܢܛܪܘܿܢܵܐ ܡܸܪܥܝܵܐ ܗ̄ܘܵܐ: ܐܲܝܢܝܼ ܕܐܝܼܬ ܗ̄ܘܵܐ ܠܹܗ ܚܵܬܸܪ ܠܟܸܣܠܹܗ: 3 ܘܗܕܝܼܪܵܐ ܗ̄ܘܵܐ ܠܸܡܝܵܬܵܐ. ܘܫܡܸܥܠܹܐ ܒܵܗ̄ܣ ܕܝܼܫܘܿܥ: ܘܫܘܼܕܸܪܹܐ ܠܟܸܣܠܹܗ ܚܘܵܪ̈ܕܸܩܢܹܐ ܕܝܗ̄ܘܼܕܵܝܹ̈ܐ: ܘܒܲܥܝܹܐ ܗ̄ܘܵܐ 4 ܡܸܢܹܗ ܕܐܵܬܹܐ ܡܲܚܹܐ ܠܪܹܓܹܗ. ܘܐܵܢܝܼ ܟܲܕ ܐܬܹܠܘܿܢ ܠܟܸܣ ܝܼܫܘܿܥ ܦܘܼܪܦܸܠܘܿܢ ܒܝܹܗ ܒܚܵܒܵܛܘܼܬܵܐ ܘܐܵܡܪܝܼ: ܟܹܐ 5 ܚܵܫܸܚ ܕܥܵܒ̣ܕܸܬ ܠܹܗ ܐܵܗܵܐ. ܣܵܒܵܒ ܕܟܹܐ ܡܲܚܸܒ̣ ܠܛܵܝܸܦܲܢ: 6 ܘܐܘܼܦ ܟܢܘܼܫܬܵܐ ܒܢܹܠܹܐ ܩܵܬܲܢ. ܘܝܼܫܘܿܥ ܐܙܸܠܹܐ ܥܲܡܵܝ. ܐܝܼܢܵܐ ܟܲܕ ܠܹܐ ܗ̄ܘܵܐ ܪܵܒܵܐ ܪܸܚܩܵܐ ܡ̣ܢ ܒܲܝܬܵܐ: ܫܘܼܕܸܪܹܗ ܠܟܸܣܠܹܗ ܩܸܢܛܪܘܿܢܵܐ ܕܵܘܣܬܘܼ̈ܗܝ: ܘܐܡܸܪܹܐ ܐܸܠܹܗ: ܡܵܪܝܼ: ܙܲܗܡܲܬ ܠܵܐ ܓܵܪܫܸܬ: ܣܵܒܵܒ ܕܠܹܐ ܚܵܫܚܸܢ ܕܐܵܘܪܸܬ ܬܚܘܿܬ ܫܟܘܼܪܝܼ. 7 ܣܵܒܵܒ ܕܐܵܗܵܐ ܐܵܢܵܐ ܠܵܐ ܚܫܸܚܠܝܼ ܕܠܟܸܣܠܘܼܟ ܐܵܬܸܢ ܗ̄ܘܵܐ: 8 ܐܸܠܵܐ ܐܡܘܿܪ ܒܗܹܡܸܙܡܵܢ: ܘܒܸܬ ܒܵܣܸܡ ܝܵܠܝܼ. ܣܵܒܵܒ ܐܘܼܦ ܐܵܢܵܐ ܐܢܵܫܵܐ ܝܘܸܢ ܡܘܼܬܒ̣ܵܐ ܬܚܘܿܬ ܗܘܼܟܡܵܐ: ܘܐܝܼܬ ܬܚܘܿܬ ܐܝܼܕܝܼ ܣܲܪ̈ܒܵܙܹܐ: ܘܟܹܐ ܐܵܡܪܸܢ ܠܐܵܗܵܐ: ܙܹܠ̄ܐ: ܘܟܹܐ ܐܵܙܸܠ: ܘܠܗ̇ܘ ܐܚܹܪ̄ܢܵܐ: ܬܵܐ: ܘܟܹܐ ܐܵܬܹܐ: ܘܠܪܹܓܝܼ: ܥܒ̣ܘܿܕ ܐܵܗܵܐ: 9 ܘܟܹܐ ܥܵܒܸܕ. ܟܲܕ ܫܡܸܥܠܹܐ ܝܼܫܘܿܥ ܐܲܢܹܐ: ܥܘܼܓ̰ܸܒܠܹܐ ܒܝܹܗ: ܘܕܸܪܹܐ ܘܐܡܸܪܹܐ ܠܟܸܢܫܵܐ ܕܒܹܐܬܵܝܵܐ ܗ̄ܘܵܐ ܒܵܬ̄ܪܹܗ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܘܼܦ ܓܵܘ ܝܼܣܪܵܝܹܠ ܠܵܐ ܡܘܼܫ̄ܟ̰ܸܚܠܝܼ ܐܲܝܟ ܕܐܵܗܵܐ 10 ܗܲܝܡܵܢܘܼܬܵܐ. ܘܐܵܢܝܼ ܕܦܸܫܠܘܿܢ ܫܘܼܕܪܹܐ ܕܸܪܘܿܢ ܠܒܲܝܬܵܐ: ܘܡܘܼܫ̄ܟ̰ܸܚܠܘܿܢ ܠܗ̇ܘ ܪܹܓܵܐ ܕܝܼܗ̄ܘܵܐ ܡܸܪܥܵܝܵܐ ܒܣܝܼܡܵܐ. 11 ܘܗ̄ܘܹܠܵܐ ܒܝܘܿܡܵܐ ܕܒܵܬ̄ܪܹܗ: ܒܹܐܙܵܠܵܐ ܗ̄ܘܵܐ ܠܡܕܝܼܢ̄ܬܵܐ ܕܫܸܡܘܼܗ̇ ܢܵܐܹܝܢ: ܘܬܲܠܡܝܼܕܘܼ̈ܗܝ ܐܙܸܠܘܿܢ ܥܲܡܹܗ: ܘܟܸܢܫܵܐ 12 ܪܵܒܵܐ. ܘܟܲܕ [27] ܩܘܼܪܒܸܢܹܐ ܠܬܲܪܥܵܐ ܕܡܕܝܼܢ̄ܬܵܐ: ܗܵܐ: ܦܵܠܘܿܛܹܐ ܗ̄ܘܵܘ ܚܵܕ̄ ܡܝܼܬܵܐ: ܕܒܪܘܼܢܵܐ ܝܲܟܵܢܵܐ ܗ̄ܘܵܐ ܠܝܸܡܹܗ: ܘܗ̇ܝ ܝܸܡܹܗ ܐܲܪܡܸܠܬܵܐ ܗ̄ܘܵܐ: ܘܟܸܢܫܵܐ ܪܵܒܵܐ ܕܒܢܲܝ̈ ܡܕܝܼܢ̄ܬܵܐ ܥܲܡܵܗ̇. 13 ܘܟܲܕ ܚܸܙܝܵܠܹܐ ܡܵܪܲܢ: ܪܘܼܚܸܡܠܹܐ ܥܲܠܘܼܗ̇: ܘܐܡܸܪܹܐ ܐܸܠܵܗ̇: ܠܵܐ 14 ܒܲܟ̣ܝܲܬܝ. ܘܐܙܸܠܹܐ ܕܩܸܪܹܐ ܒܥܵܪ̄ܣܵܐ: ܘܐܵܢܝܼ ܕܫܩܝܼܠܘܼܗ̇ ܗ̄ܘܵܘ ܟܠܹܠܘܿܢ: ܘܐܵܡܸܪ: ܓ̰ܘܲܢܩܵܐ: ܐܸܠܘܼܟ ܒܹܐܡܵܪܵܐ ܝܘܸܢ: 15 ܩܘܼܡ̄. ܘܝܬܸܒ̣ܠܹܐ ܗ̇ܘ ܡܝܼܬܵܐ: ܘܫܘܼܪܹܠܹܐ ܠܗܲܡܙܘܼܡܹܐ. 16 ܘܝܸܗܒܸܠܹܗ ܠܝܸܡܹܗ. ܘܕܒܸܩܠܵܐ ܙܕܘܼܥܬܵܐ ܠܟܠܵܝ ܐܢܵܫܹ̈ܐ: ܘܫܵܒܚܝܼ ܗ̄ܘܵܘ ܠܐܲܠܵܗܵܐ: ܘܐܵܡܪܝܼ: ܢܒ̣ܝܼܵܐ ܓܘܼܪܵܐ ܩܸܡܠܹܐ 17 ܓܵܘܲܢ: ܘܣܘܼܚܒܸܪܹܐ ܐܲܠܵܗܵܐ ܠܛܵܝܸܦܹܗ. ܘܦܠܸܛܠܵܐ ܒܵܗ̄ܣ ܕܝܹܗ ܐܵܗܵܐ ܗܹܡܸܙܡܵܢ ܒܟܠܵܗ̇ ܝܼܗܘܼܕ: ܘܒܟܠܹܗ ܐܲܬܪܵܐ ܕܚܵܕܸܪ̈ܘܵܢܵܝ. 18 ܘܗܘܪܩܹܠܘܿܢ ܠܝܘܿܚܲܢܵܢ ܬܲܠܡܝܼܕܘܼ̈ܗܝ ܐܲܢܹܐ ܟܠܵܝ. 19 ܘܩܪܹܠܹܐ ܝܘܿܚܲܢܵܢ ܠܬܪܲܝ ܡ̣ܢ ܬܲܠܡܝܼܕܘܼ̈ܗܝ: ܘܫܘܼܕܪܵܝܠܹܐ ܠܟܸܣ ܝܼܫܘܿܥ: ܘܐܡܸܪܹܐ: ܐܲܢ̄ܬ ܝܘܸܬ ܗ̇ܘ ܕܐܵܬܹܐ: ܝܲܢ ܠܚܵܕ̄ 20 ܐܚܹܪ̄ܢܵܐ ܣܵܦܪܵܚ. ܘܐܬܹܠܘܿܢ ܐܵܢܝܼ ܐܢܵܫܹ̈ܐ ܠܟܸܣܠܹܗ ܘܐܵܡܪܝܼ ܐܸܠܹܗ: ܝܘܿܚܲܢܵܢ ܡܲܥܡܕܵܢܵܐ ܩܲܡ ܫܵܕܸܪܲܢ ܠܟܸܣܠܘܼܟ: ܒܹܐܡܵܪܵܐ: 21 ܐܲܢ̄ܬ ܝܘܸܬ ܗ̇ܘ ܕܐܵܬܹܐ: ܝܲܢ ܠܚܵܕ̄ ܐܚܹܪ̄ܢܵܐ ܣܵܦܪܵܚ. ܘܒܗ̇ܝ ܣܵܥܲܬ ܪܵܒܵܐ ܡ̣ܢ ܡܲܪ̈ܥܹܐ ܒܘܼܣܸܡܠܹܐ: ܘܡ̣ܢ ܡܲܚܘܵܬܹ̈ܐ ܘܡ̣ܢ ܪ̈ܘܼܚܹܐ ܒܝܼܫܵܬܹ̈ܐ: ܘܠܪܵܒܵܐ ܣܸܡܝܹ̈ܐ ܝܸܗܒܸܠܹܐ ܠܸܚܙܵܝܵܐ. 22 ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܐܡܘܿܪܘܿܢ ܠܝܘܿܚܲܢܵܢ ܡܸܢܕܝܼ ܕܚܙܹܠܵܘܟ̣ܘܿܢ ܘܫܡܸܥܠܵܘܟ̣ܘܿܢ: ܣܸܡܝܹ̈ܐ ܒܸܚܙܵܝܵܐ ܝܢܵܐ: ܫܸܠܹ̈ܐ ܒܸܚܕܵܪܵܐ ܝܢܵܐ: ܓܸܪ̈ܒ̣ܵܢܹܐ ܦܝܵܫܵܐ ܝܢܵܐ ܕܘܼܟ̣ܝܹܐ: ܘܟܲܪܹ̈ܐ ܒܸܫܡܲܥܝܵܐ ܝܢܵܐ: ܡܝܼܬܹ̈ܐ ܒܸܩܝܵܡܵܐ ܝܢܵܐ: ܘܡܸܣܟܹܢܹ̈ܐ ܦܝܵܫܵܐ ܝܢܵܐ ܡܘܼܫܚܸܕܹܐ. 23 ܘܛܘܼܒ̣ܵܐ ܠܡ̇ܢ ܕܠܵܐ ܬܲܪܩܸܠ ܒܝܼܝܼ. ܐܝܼܢܵܐ ܟܲܕ ܐܙܸܠܘܿܢ 24 ܩܵܨܕܹ̈ܐ ܕܝܘܿܚܲܢܵܢ: ܫܘܼܪܹܠܹܐ ܠܹܐܡܵܪܵܐ ܠܟܸܢܫܹ̈ܐ ܒܵܗ̄ܣ ܕܝܘܿܚܲܢܵܢ: ܡܘܼܕܝܼ ܦܠܸܛܠܵܘܟ̣ܘܿܢ ܠܒܲܪܝܼܵܐ ܠܸܚܙܵܝܵܐ: ܙܹܠܵܐ ܡ̣ܢ ܦܵܘܚܵܐ 25 ܫܥܝܼܫܵܐ. ܐܸܢ ܠܵܐ: ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܐܢܵܫܵܐ ܕܓ̰ܘܼ̈ܠܹܐ ܪ̈ܵܟܝܼܟܹܐ ܠܒ̣ܝܼܫܵܐ: ܗܵܐ: ܐܵܢܝܼ ܕܒܠܒܸܫܝܵܬܹ̈ܐ ܚܩܝܼܪܹ̈ܐ 26 ܘܒܒܘܼܣܵܡܹ̈ܐ ܝܢܵܐ: ܓܵܘ ܒܵܬܹ̈ܐ ܕܡܲܠܟܹ̈ܐ ܝܢܵܐ. ܐܸܢ ܠܵܐ: ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܢܒ̣ܝܼܵܐ: ܗܹܐ: ܒܹܐܡܵܪܵܐ ܝܘܸܢ 27 ܐܸܠܵܘܟ̣ܘܿܢ: ܘܙܵܘܕܵܐ ܡ̣ܢ ܢܒ̣ܝܼܵܐ. ܐܵܗܵܐ ܝܠܹܐ ܕܒܵܗ̄ܣܹܗ ܟܬܝܼܒ̣ܵܐ ܝܠܹܐ: ܗܵܐ: ܐܵܢܵܐ ܫܵܕܘܿܪܹܐ ܝܘܸܢ ܩܵܨܸܕܝܼ ܩܵܕ̄ܡ ܦܵܬܘܼܟ: ܕܗܵܕܸܪ 28 ܐܘܼܪܚܘܼܟ ܩܵܕ̄ܡܘܼܟ. ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܲܝܬ ܢܒ̣ܝܼܵܐ ܓܵܘ ܗ̄ܘ̈ܝܹܐ ܡ̣ܢ ܒܲܟ̣ܬܵܬܹ̈ܐ ܕܒܘܼܫ ܓܘܼܪܵܐ ܡ̣ܢ ܝܘܿܚܲܢܵܢ: ܐܝܼܢܵܐ ܙܥܘܿܪܵܐ ܒܡܲܠܟܘܼܬܵܐ ܕܐܲܠܵܗܵܐ ܒܘܼܫ ܓܘܼܪܵܐ ܝܠܹܐ ܡܸܢܹܗ. 29 ܘܟܠܹܗ ܛܵܝܸܦܵܐ ܕܫܡܸܥܠܘܿܢ: ܐܘܼܦ ܕܲܡܓ̣ܵܟ̰̈ܝܹܐ: ܡܘܼܟܫܸܛܠܘܿܢ 30 ܠܐܲܠܵܗܵܐ: ܕܥܡܝܼܕܹܐ ܗ̄ܘܵܘ ܡܲܥܡܘܿܕܝܼܬܹܗ ܕܝܘܿܚܲܢܵܢ. ܐܝܼܢܵܐ ܦܪ̈ܝܼܫܹܐ ܘܫܲܪܥܲܬܟܵܪܹ̈ܐ ܡܘܼܣܠܹܠܘܿܢ ܒܓܵܢܵܝ ܪܸܙܵܝܵܐ ܕܐܲܠܵܗܵܐ: 31 ܟܲܕ ܠܵܐ ܦܸܫܠܘܿܢ ܥܡܝܼܕܹܐ ܡܸܢܹܗ. ܘܐܡܸܪܹܐ ܡܵܪܲܢ: ܠܡ̇ܢ ܗܲܕܟ̣ܵܐ ܡܲܕܡܸܢ ܐܢܵܫܹ̈ܐ ܕܐܵܗܵܐ ܐܘܼܓ̰ܵܓ̣: ܘܠܡ̇ܢ ܟܹܐ ܕܵܡܝܼ. 32 ܟܹܐ ܕܵܡܝܼ ܠܝܵܠܹ̈ܐ ܕܝܵܬܒ̣ܝܼ ܒܫܘܼܩܵܐ ܘܡܲܩܘܸܚܝܼ ܚܵܕ̄ ܠܗ̇ܘ ܐܚܹܪ̄ܢܵܐ ܘܐܵܡܪܝܼ: [28] ܡܚܹܠܲܢ ܙܘܪܢܵܐ ܐܸܠܵܘܟ̣ܘܿܢ ܘܠܵܐ ܪܩܸܕܠܵܘܟ̣ܘܿܢ: 33 ܘܝܠܹܠܲܢ ܐܸܠܵܘܟ̣ܘܿܢ: ܘܠܵܐ ܒܟܹܠܵܘܟ̣ܘܿܢ. ܣܵܒܵܒ ܕܐܬܹܠܹܐ ܝܘܿܚܲܢܵܢ ܡܲܥܡܕܵܢܵܐ: ܠܵܐ ܒܹܐܟ̣ܵܠܵܐ ܠܲܚܡܵܐ ܘܠܵܐ ܒܸܫܬܵܝܵܐ ܚܲܡܪܵܐ: 34 ܘܒܹܐܡܵܪܵܐ ܝܬܘܿܢ: ܕܲܝܘܵܐ ܐܝܼܬ ܒܝܹܗ. ܐܬܹܠܹܐ ܒܪܘܼܢܹܗ ܕܐܢܵܫܵܐ ܒܹܐܟ̣ܵܠܵܐ ܘܒܸܫܬܵܝܵܐ: ܘܒܹܐܡܵܪܵܐ ܝܬܘܿܢ: ܗܵܐ: ܐܢܵܫܵܐ ܐܵܟ̣ܘܿܠܵܐ ܘܫܵܬܝܵܢܵܐ ܕܚܲܡܪܵܐ: ܘܕܵܘܣܬ ܕܕܲܡܓ̣ܵܟ̰̈ܝܹܐ ܘܚܲܛܵܝܹ̈ܐ. 35 ܘܦܸܫܠܵܐ ܡܘܼܟܫܸܛܬܵܐ ܥܵܩܸܠܕܵܪܘܼܬܵܐ ܡ̣ܢ ܟܠܵܝ ܒܢܘܼܢܘܼ̈ܗ̇. 36 ܐܝܼܢܵܐ ܒܸܥܠܹܐ ܡܸܢܹܗ ܚܵܕ̄ ܡ̣ܢ ܦܪ̈ܝܼܫܹܐ ܕܐܵܟܸܠ ܥܲܡܹܗ. 37 ܘܐܘܸܪܹܐ ܠܒܲܝܬܹܗ ܕܗ̇ܘ ܦܪܝܼܫܵܐ: ܘܝܬܸܒ̣ܠܹܐ ܠܨܘܼܦܪܵܐ. ܘܗܵܐ: ܒܲܟ̣ܬܵܐ ܒܗ̇ܝ ܡܕܝܼܢ̄ܬܵܐ: ܕܝܼܗ̄ܘܵܐ ܚܲܛܵܝܬܵܐ: ܘܟܲܕ ܝܕܸܥܠܵܐ ܕܝܬܝܼܒ̣ܵܐ ܗ̄ܘܵܐ ܠܨܘܼܦܪܵܐ ܓܵܘ ܒܲܝܬܹܗ ܕܦܪܝܼܫܵܐ: ܫܩܸܠܵܐ 38 ܫܵܛܝܼܦܬܵܐ ܕܒܸܣܡܵܐ. ܘܟܠܹܠܵܐ ܒܵܬ̄ܪܹܗ ܠܟܸܣ ܐܲܩܠܘܼ̈ܗܝ: ܘܒܵܟ̣ܝܵܐ ܗ̄ܘܵܐ: ܘܫܘܼܪܹܠܵܐ ܒܕܸܡܥܘܼ̈ܗ̇ ܠܡܲܬܪܘܼܝܹܐ ܐܲܩܠܘܼ̈ܗܝ: ܘܒܟܵܘܣܵܐ ܕܪܹܫܵܗ̇ ܡܵܫܝܵܐ ܗ̄ܘܵܐ ܠܗ̄ܘܿܢ: ܘܢܵܫܩܵܐ ܗ̄ܘܵܐ ܐܲܩܠܘܼ̈ܗܝ: 39 ܘܡܵܫܚܵܐ ܗ̄ܘܵܐ ܠܗ̄ܘܿܢ ܒܒܸܣܡܵܐ. ܐܝܼܢܵܐ ܟܲܕ ܚܙܹܠܹܗ ܗ̇ܘ ܦܪܝܼܫܵܐ ܕܩܪܹܠܹܗ: ܚܫܸܒ̣ܠܹܐ ܒܓܵܢܹܗ ܘܐܡܸܪܹܐ: ܐܸܢ ܐܵܗܵܐ ܗܵܘܹܐ ܗ̄ܘܵܐ ܢܒ̣ܝܼܵܐ: ܒܸܬ ܝܲܕܸܥ ܗ̄ܘܵܐ ܡܵܢܝܼ ܝܠܵܐ ܘܡܘܼܕܝܼ ܬܵܗܵܪ ܒܲܟ̣ܬܵܐ ܝܠܵܐ: ܕܚܲܛܵܝܬܵܐ ܝܠܵܐ ܒܲܟ̣ܬܵܐ ܗ̇ܝ ܕܕܩܸܪܵܐ ܒܝܹܗ. 40 ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܹܗ: ܫܸܡܥܘܿܢ: ܡܸܢܕܝܼ ܐܝܼܬ 41 ܠܝܼ ܕܐܵܡܪܸܢܘܼܟ: ܘܐܡܸܪܹܐ ܐܸܠܹܗ: ܐܡܘܿܪ: ܪܵܒܝܼ. ܚܵܕ̄ ܡܵܪܝܵܐ ܕܕܵܝܢܵܐ ܐܝܼܬ ܗ̄ܘܵܘ ܠܹܗ ܬܪܲܝ ܕܵܝܢܵܢܹ̈ܐ: ܚܵܕ̄ ܕܵܝܢܵܢܵܐ ܗ̄ܘܵܐ ܐܸܠܹܗ ܚܲܡܸܫܡܵܐܐ ܕܝܼܢܵܪܹ̈ܐ: ܘܗ̇ܘ ܐܚܹܪ̄ܢܵܐ ܚܲܡܫܝܼ ܕܝܼܢܵܪܹ̈ܐ. 42 ܘܕܠܲܝܬ ܗ̄ܘܵܐ ܠܗ̄ܘܿܢ ܠܸܦܪܲܥܝܵܐ: ܠܬܸܪܘܵܝ ܫܒܸܩܠܹܐ. ܐܲܝܢܝܼ 43 ܡܸܢܵܝ ܗܲܕܟ̣ܵܐ ܙܵܘܕܵܐ ܒܸܬ ܡܲܚܸܒ ܠܹܗ. ܓ̰ܘܼܘܸܒܠܹܐ ܫܸܡܥܘܿܢ ܘܐܡܸܪܹܐ: ܒܸܚܫܵܒ̣ܵܐ ܝܘܸܢ ܗ̇ܘ ܕܦܸܫܠܹܐ ܫܒ̣ܝܼܩܵܐ ܐܸܠܹܗ ܙܵܘܕܵܐ: 44 ܘܗ̇ܘ ܐܡܸܪܹܐ ܐܸܠܹܗ: ܒܬܪܘܼܨܘܼܬܵܐ ܕܸܢܘܼܟ. ܘܕܸܪܹܐ ܠܟܸܣ ܒܲܟ̣ܬܵܐ: ܘܐܡܸܪܹܐ ܠܫܸܡܥܘܿܢ ܒܸܚܙܵܝܵܐ ܝܘܸܬ ܐܵܗܵܐ ܒܲܟ̣ܬܵܐ: ܠܒܲܝܬܘܼܟ ܐܘܸܪܝܼ: ܡ̈ܝܼܵܐ ܠܐܲܩܠܵܬܝܼ̈ ܠܵܐ ܝܸܗܒܸܠܘܼܟ: ܐܝܼܢܵܐ ܐܵܗܵܐ ܒܕܸܡܥܘܼ̈ܗ̇ ܐܲܩܠܝܼ̈ ܡܘܼܬܪܹܠܵܐ: ܘܒܟܵܘܣܘܼܗ̇ ܡܸܫܚܵܠܵܐ. 45 ܐܲܢ̄ܬ ܠܵܐ ܢܫܝܼܩܸܢܘܼܟ: ܐܝܼܢܵܐ ܐܵܗܵܐ: ܡ̣ܢ ܕܐܘܸܪܝܼ: ܠܵܐ ܫܠܹܠܵܐ 46 ܡ̣ܢ ܠܸܢܫܵܩܵܐ ܐܲܩܠܝܼ̈. ܐܲܢ̄ܬ ܡܸܫܚܵܐ ܠܪܹܫܝܼ ܠܵܐ ܡܫܸܚܠܘܼܟ: 47 ܐܝܼܢܵܐ ܐܵܗܵܐ ܒܡܸܫܚܵܐ ܕܒܸܣܡܵܐ ܠܐܲܩܠܝܼ̈ ܡܫܸܚܠܵܐ. ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܘܼܟ: ܕܫܒ̣ܝܼܩܹܐ ܝܢܵܐ ܐܸܠܵܗ̇ ܚܛܝܼܵܬܘܼ̈ܗ̇ ܪܵܒܵܐ: ܣܵܒܵܒ ܕܡܘܼܚܸܒܠܵܐ ܪܵܒܵܐ. ܐܝܼܢܵܐ ܗ̇ܘ ܕܚܲܟ̰ܵܐ ܦܵܝܸܫ 48 ܫܒ̣ܝܼܩܵܐ ܐܸܠܹܗ: ܚܲܟ̰ܵܐ ܟܹܐ ܡܲܚܸܒ. ܘܐܡܸܪܹܐ ܐܸܠܵܗ̇: ܫܒ̣ܝܼܩܹܐ 49 ܝܢܵܐ ܐܸܠܵܟ̣ܝ ܚܛܝܼܵܬܵܟ̣ܝ̈. ܐܝܼܢܵܐ ܫܘܼܪܹܠܘܿܢ ܐܵܢܝܼ ܕܝܼܗ̄ܘܵܘ ܝܬܝܼܒܹܐ ܠܨܘܼܦܪܵܐ ܥܲܡܹܗ ܠܹܐܡܵܪܵܐ ܒܓܵܢܵܝ: ܡܵܢܝܼ ܝܠܹܐ ܐܵܗܵܐ 50 ܕܐܘܼܦ ܚܛܝܼܵܬܹ̈ܐ ܒܸܫܒ̣ܵܩܵܐ ܝܠܹܐ. ܘܐܡܸܪܹܐ ܠܒܲܟ̣ܬܵܐ: ܗܲܝܡܵܢܘܼܬܵܟ̣ܝ ܩܲܡ ܡܲܚܝܼܵܐ ܠܵܟ̣ܝ: ܒܫܠܵܡܵܐ.

ܩܦܠܐܘܢ: ܚ

1 ܘܗ̄ܘܹܠܵܐ ܒܵܬ̄ܪ ܐܲܢܹܐ: ܒܸܚܕܵܪܵܐ ܗ̄ܘܵܐ ܗ̇ܘ ܓܵܘ ܡܕܝܼܢܵܬܹ̈ܐ: ܘܓܵܘ ܡܵܬܘܵܬܹ̈ܐ: ܡܲܟܪܘܼܙܹܐ ܘܡܲܫܚܘܼܕܹܐ ܡܲܠܟܘܼܬܵܐ ܕܐܲܠܵܗܵܐ: 2 ܘܬܪܸܥܣܲܪܬܹܗ ܥܲܡܹܗ. ܘܒܲܟ̣ܬܵܬܹ̈ܐ ܐܵܢܝܼ ܕܦܸܫܠܘܿܢ ܒܘܼܣܡܹܐ ܡ̣ܢ ܡܲܪ̈ܥܹܐ: ܘܡ̣ܢ ܪ̈ܘܼܚܹܐ ܒܝܼܫܵܬܹ̈ܐ: ܡܲܪܝܲܡ ܕܦܵܝܫܵܐ ܗ̄ܘܵܐ ܩܪܝܼܬܵܐ ܡܲܓ̣ܕܠܵܝܬܵܐ: ܗ̇ܝ ܕܫܲܒ̣ܥܵܐ ܕܲܝܘܹ̈ܐ ܦܠܸܛܠܘܿܢ ܡܸܢܵܗ̇. 3 ܘܝܘܿܚܲܢܵܢ ܒܲܟ̣ܬܵܐ ܕܟܘܼܙܵܐ ܢܵܙܝܼܪܹܗ ܕܗܹܪܘܿܕܸܣ: ܘܫܘܿܫܲܢ: ܘܪܵܒܵܐ ܐܚܹܪ̄ܢܹܐ: ܐܵܢܝܼ ܕܟܹܐ ܥܵܒ̣ܕܝܼ ܗ̄ܘܵܘ ܠܗ̄ܘܿܢ ܚܸܠܡܲܬ ܡ̣ܢ ܡܸܢܕܝܵܝ̈. 4 ܘܟܲܕ ܟܸܢܫܵܐ ܪܵܒܵܐ ܓ̰ܸܡܥܝܵܐ ܗ̄ܘܵܐ: ܘܡ̣ܢ ܟܠܵܝ ܡܕܝܼܢܵܬܹ̈ܐ 5 ܐܵܬܝܼ ܗ̄ܘܵܘ ܠܟܸܣܠܹܗ: ܐܡܸܪܹܐ ܒܡܵܣܵܠܵܐ. ܦܠܸܛܠܹܐ ܚܵܕ̄ ܙܲܪܥܵܢܵܐ ܠܸܙܪܲܥܝܵܐ ܒܲܪܙܲܪܥܹܗ. ܘܟܲܕ ܙܪܸܥܠܹܐ: ܐܝܼܬ ܗ̄ܘܵܐ ܕܢܦܸܠܹܐ ܥܲܠ ܡܲܪܙܵܐ ܕܐܘܼܪܚܵܐ: ܘܦܸܫܠܹܐ ܕܝܼܫܵܐ: ܘܐܟܸܠܘܿܢ ܐܸܠܹܗ ܛܲܝܪܹ̈ܐ 6 ܕܫܡܲܝܵܐ. ܘܐܚܹܪ̄ܢܵܐ ܢܸܦܠܹܐ ܥܲܠ ܟܹܐܦܵܐ: ܘܟܲܕ ܡܘܼܓ̰ܝܸܢܹܐ: 7 ܕܠܲܝܬ ܗ̄ܘܵܐ ܠܹܗ ܬܲܠܝܼܠܘܼܬܵܐ: ܒܪܸܙܠܹܐ. ܘܐܚܹܪ̄ܢܵܐ ܢܦܸܠܹܐ ܓܵܘ ܟܸܬܘܹ̈ܐ: ܘܡܘܼܓ̰ܝܸܢܘܿܢ ܥܲܡܹܗ ܟܸܬܘܹ̈ܐ: ܘܚܢܸܩܠܘܿܢ 8 ܐܸܠܹܗ. ܘܐܚܹܪ̄ܢܵܐ ܢܦܸܠܹܐ ܒܐܲܪܥܵܐ ܨܦܵܝܝܼ: ܘܡܘܼܓ̰ܝܸܢܹܐ: ܘܥܒܸܕܠܹܐ ܛܥܘܼܢܝܵܬܹ̈ܐ ܚܵܕ̄ ܒܡܵܐܐ. ܟܲܕ ܐܵܡܸܪ ܐܲܢܹܐ: ܡܲܩܘܸܚ ܗ̄ܘܵܐ: ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ: ܫܲܡܸܥ. 9 ܘܒܘܼܩܸܪܘܿܢ ܡܸܢܹܗ ܬܲܠܡܝܼܕܘܼ̈ܗܝ: ܡܘܼܕܝܼ ܝܠܹܐ ܐܵܗܵܐ 10 ܡܵܣܵܠܵܐ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܐܸܠܵܘܟ̣ܘܿܢ ܝܘܼܗ̄ܒ̣ܵܐ ܝܠܹܐ ܠܝܼܕܲܥܝܵܐ ܣܸܪܹ̈ܐ ܕܡܲܠܟܘܼܬܹܗ ܕܐܲܠܵܗܵܐ: ܐܝܼܢܵܐ ܠܐܚܹܪ̄ܢܹܐ ܒܡܵܣܵܠܹ̈ܐ: ܕܟܲܕ ܚܵܙܝܼ ܠܵܐ ܚܵܙܝܼ: ܘܟܲܕ ܫܲܡܥܝܼ ܠܵܐ ܦܲܪܡܝܼ. 11 ܐܝܼܢܵܐ ܐܵܗܵܐ ܝܠܹܐ ܡܵܣܵܠܵܐ. ܒܲܪܙܲܪܥܵܐ ܗܹܡܸܙܡܵܢ ܕܐܲܠܵܗܵܐ ܝܠܹܐ. 12 ܘܐܵܢܝܼ ܕܥܲܠ ܡܲܪܙܵܐ ܕܐܘܼܪܚܵܐ: ܐܵܢܝܼ ܝܢܵܐ ܕܫܲܡܥܝܼ: ܗ̇ܝܓܵܗ ܟܹܐ ܐܵܬܹܐ ܐܵܟܹܠܩܲܪܨܵܐ ܘܫܵܩܸܠ ܗܹܡܸܙܡܵܢ ܡ̣ܢ ܠܸܒܵܝ: ܕܠܵܐ ܗܲܡܸܢܝܼ 13 ܘܚܲܝܝܼ. ܘܐܵܢܝܼ ܕܥܲܠ ܟܹܐܦܵܐ: ܐܵܢܝܼ ܝܢܵܐ ܕܐܝܼܡܲܢ ܕܫܡܸܥܠܘܿܢ: ܒܚܲܕܘܼܬܵܐ ܩܵܒ̇ܠܝܼ ܠܵܗ̇ ܠܗܹܡܸܙܡܵܢ: ܘܐܲܢܹܐ ܥܸܩܪܵܐ ܠܲܝܬ ܠܗ̄ܘܿܢ: ܕܙܲܒ̣ܢܵܐ ܝܠܵܐ ܗܲܝܡܵܢܘܼܬܵܝ: ܘܒܥܕܵܢܵܐ ܕܓ̰ܘܼܪܵܒܵܐ ܟܹܐ 14 ܩܵܠܒ̇ܝܼ. ܐܝܼܢܵܐ ܗ̇ܘ ܕܢܦܸܠܹܐ ܓܵܘ ܟܸܬܘܹ̈ܐ: ܐܵܢܝܼ ܝܢܵܐ ܐܵܝܢܝܼ ܕܫܲܡܥܝܼ: ܘܟܲܕ ܦܵܠܛܝܼ: ܒܚܲܡ ܘܒܕܵܘܸܠܬܵܐ ܘܒܫܲܗ̄ܘܲܬܝܵܬܹ̈ܐ ܕܐܲܢܹܐ ܚܲܝܹ̈ܐ ܟܹܐ ܦܵܝܫܝܼ ܚܢܝܼܩܹܐ: ܘܛܥܘܼܢܝܵܬܹ̈ܐ ܠܹܐ ܡܲܡܛܝܼ. 15 ܐܝܼܢܵܐ ܗ̇ܘ ܕܒܲܐܪܥܵܐ ܨܦܵܝܝܼ: ܐܵܢܝܼ ܝܢܵܐ ܐܲܝܢܝܼ ܕܒܠܸܒܵܐ ܨܸܦܝܵܐ ܘܨܦܵܝܝܼ ܟܹܐ ܫܲܡܥܝܼ ܗܹܡܸܙܡܵܢ ܘܕܵܒ̣ܩܝܼ ܠܵܗ̇: ܘܝܵܗ̄ܒ̣ܝܼ ܛܥܘܼܢܝܵܬܹ̈ܐ ܒܚܡܵܠܬܵܐ. 16 ܐܢܵܫܵܐ ܠܹܐ ܬܵܦܹܐ ܫܪܵܝܵܐ: [29] ܘܟܵܣܹܐ ܠܵܗ̇ ܒܡܵܐܢܵܐ: ܝܲܢ ܡܲܬܸܒ̣ ܠܵܗ̇ ܬܚܘܿܬ ܫܘܝܼܬܵܐ: ܐܸܠܵܐ ܟܹܐ ܡܲܬܸܒ̣ ܠܵܗ̇ ܥܲܠ ܟ̰ܪܲܚܦܝܼ: 17 ܕܐܵܢܝܼ ܕܐܵܘܪܝܼ ܚܵܙܝܼ ܒܲܗܪܘܼܗ̇. ܣܵܒܵܒ ܠܲܝܬ ܡܸܢܕܝܼ ܟܘܼܣܝܵܐ: ܕܠܵܐ ܦܵܝܸܫ ܓܸܠܝܵܐ. ܘܠܵܐ ܕܛܸܫܝܵܐ: ܕܠܵܐ ܦܵܝܸܫ ܝܕܸܥܝܵܐ ܘܐܵܬܹܐ 18 ܠܐܲܫܟܵܪܵܐ. ܚܙܹܡܘܿܢ ܗܲܕܟ̣ܵܐ ܕܵܐܟ̣ܝܼ ܫܲܡܥܝܼܬܘܿܢ. ܣܵܒܵܒ ܡ̇ܢ ܕܐܝܼܬ ܠܹܗ: ܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܹܗ: ܘܡ̇ܢ ܕܠܲܝܬ ܠܹܗ: ܐܘܼܦ ܗ̇ܘ ܕܚܵܫܸܒ̣ ܕܐܝܼܬ ܠܹܗ ܒܸܬ ܦܵܝܸܫ ܫܩܝܼܠܵܐ ܡܸܢܹܗ. 19 ܘܐܬܹܠܘܿܢ ܠܟܸܣܠܹܗ ܝܸܡܹܗ ܘܐܵܚܘܿܢܘܵܬܘܼ̈ܗܝ: ܘܠܹܐ ܡܵܨܝܼ 20 ܗ̄ܘܵܘ ܠܸܡܛܵܝܵܐ ܠܟܸܣܠܹܗ ܡ̣ܢ ܟܸܢܫܵܐ. ܘܦܸܫܠܹܐ ܬܘܼܢܝܵܐ: ܝܸܡܘܼܟ ܘܐܵܚܘܿܢܘܵܬܘܼ̈ܟ ܒܸܟܠܵܝܵܐ ܝܢܵܐ ܠܒܲܕܲܪ: ܘܒܸܒܲܥܝܵܐ 21 ܠܸܚܙܵܝܘܼܟ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܐܲܢܹܐ ܝܢܵܐ ܝܸܡܝܼ ܘܐܵܚܘܿܢܘܵܬܝܼ̈ ܐܵܢܝܼ ܕܫܲܡܥܝܼ ܗܹܡܸܙܡܵܢ ܕܐܲܠܵܗܵܐ: ܘܥܵܒ̣ܕܝܼ ܠܵܗ̇. 22 ܘܗ̄ܘܹܠܵܐ ܒܚܵܕ̄ ܡ̣ܢ ܝܘܿܡܵܢܹ̈ܐ: ܘܐܣܸܩܠܹܐ ܠܓܵܡܝܼ: ܗ̇ܘ ܘܬܲܠܡܝܼܕܘܼ̈ܗܝ. ܘܐܡܸܪܹܐ ܐܸܠܵܝ: ܥܵܒ̣ܪܵܚ ܠܡܲܪܙܵܐ ܐܚܹܪ̄ܢܵܐ 23 ܕܝܵܡܵܐ: ܘܛܪܹܠܘܿܢ. ܘܟܲܕ ܒܸܛܪܵܝܵܐ ܗ̄ܘܵܘ ܕܡܸܟ̣ܠܹܐ: ܘܨܠܹܠܵܐ ܒܘܼܪܵܢ ܕܦܵܘܚܵܐ ܥܲܠ ܝܵܡܵܐ: ܘܒܸܡܠܵܝܵܐ ܗ̄ܘܵܘ (ܡ̈ܝܼܵܐ): ܘܗ̄ܘܹܠܘܿܢ 24 ܒܙܕܘܼܥܬܵܐ ܓܘܼܪܬܵܐ. ܘܐܬܹܠܘܿܢ ܠܟܸܣܠܹܗ ܡܘܼܪܥܸܫܠܘܿܢ ܐܸܠܹܗ: ܒܹܐܡܵܪܵܐ: ܪܵܒܝܲܢ: ܪܵܒܝܲܢ: ܒܸܬܠܵܩܵܐ ܝܘܵܚ. ܘܗ̇ܘ ܩܸܡܠܹܐ: ܘܢܓ̰ܸܘܼܠܹܐ ܒܦܵܘܚܹ̈ܐ ܘܒܠܲܦܹ̈ܐ ܕܡ̈ܝܼܵܐ: ܘܢܸܚܠܘܿܢ: 25 ܘܗ̄ܘܹܠܹܐ ܫܠܵܝܵܐ. ܘܐܡܸܪܹܐ ܐܸܠܵܝ: ܐܲܝܟܵܐ ܝܠܵܐ ܗܲܝܡܵܢܘܼܬܵܘܟ̣ܘܿܢ ܐܝܼܢܵܐ ܐܵܢܝܼ ܟܲܕ ܙܸܕܥܝܹܐ ܥܘܼܓ̰ܸܒܠܘܿܢ: ܘܐܵܡܪܝܼ ܚܵܕ̄ ܠܗ̇ܘ ܐܚܹܪ̄ܢܵܐ: ܝܵܐ ܪܲܒ: ܡܵܢܝܼ ܝܠܹܐ ܐܵܗܵܐ ܕܐܘܼܦ ܠܦܵܘܚܹ̈ܐ ܒܸܦܩܵܕܵܐ ܝܠܹܐ ܘܠܡ̈ܝܼܵܐ: ܘܡܲܨܝܘܼܬܹܐ ܝܢܵܐ ܐܸܠܹܗ. 26 ܘܛܪܹܠܘܿܢ ܠܐܲܬܪܵܐ [30] ܕܓܸܕܪ̈ܵܝܹܐ: ܕܝܼܠܹܐ ܒܡܲܪܙܵܐ ܐܚܹܪ̄ܢܵܐ 27 ܠܒܲܪܩܘܼܒ̣ܠ ܕܓܠܝܼܠܵܐ. ܘܟܲܕ ܦܠܸܛܠܹܐ ܠܐܲܪܥܵܐ: ܬܦܸܩܠܹܐ ܒܝܹܗ ܚܵܕ̄ ܐܢܵܫܵܐ ܡ̣ܢ ܡܕܝܼܢ̄ܬܵܐ: ܕܐܝܼܬ ܗ̄ܘܵܘ ܒܝܹܗ ܕܲܝܘܹ̈ܐ ܡ̣ܢ ܪܵܒܵܐ ܙܲܒ̣ܢܵܐ: ܘܓ̰ܘܼܠܹ̈ܐ ܠܹܐ ܠܵܒܸܫ ܗ̄ܘܵܐ: ܘܒܒܲܝܬܵܐ 28 ܠܹܐ ܥܵܡܸܪ ܗ̄ܘܵܐ: ܐܸܠܵܐ ܓܵܘ ܒܹܝܬ ܩܒ̣ܘܼܪܹ̈ܐ. ܐܝܼܢܵܐ ܟܲܕ ܚܙܹܠܹܐ ܠܝܼܫܘܿܥ: ܡܘܼܩܘܸܚܠܹܐ ܘܢܦܸܠܹܐ ܩܵܕ̄ܡܘܼܗܝ: ܘܒܩܵܠܵܐ ܪܵܡܵܐ ܐܡܸܪܹܐ: ܡܵܐ ܠܘܼܟ ܡܸܢܝܼ: ܝܼܫܘܿܥ ܒܪܘܼܢܹܗ ܕܐܲܠܵܗܵܐ ܪܵܡܵܐ: 29 ܒܸܒܲܥܝܵܐ ܝܘܸܢ ܡܸܢܘܼܟ: ܠܵܐ ܓ̰ܲܢܓ̰ܸܪܸܬ ܠܝܼ. ܣܵܒܵܒ ܕܦܘܼܩܸܕܠܹܐ ܠܪܘܼܚܵܐ ܛܲܡܹܐܐ ܠܸܦܠܵܛܵܐ ܡ̣ܢ ܕܗ̇ܘ ܐܢܵܫܵܐ: ܣܵܒܵܒ ܕܪܵܒܵܐ ܙܲܒ̣ܢܹ̈ܐ ܕܒ̣ܝܼܩܘܼܗܝ ܗ̄ܘܵܐ: ܘܟܹܐ ܦܵܝܸܫ ܗ̄ܘܵܐ ܐܣܝܪܵܐ ܒܫܸܫܠܝܵܬܹ̈ܐ: ܘܒܩܵܘܕܹ̈ܐ ܦܵܝܸܫ ܗ̄ܘܵܐ ܢܛܝܼܪܵܐ: ܘܩܲܛܸܥ ܗ̄ܘܵܐ ܝܸܣܘܼܪ̈ܘܼܗܝ: 30 ܘܦܵܝܸܫ ܗ̄ܘܵܐ ܠܘܼܒܠܵܐ ܡ̣ܢ ܕܲܝܘܵܐ ܠܒܲܪܝܼܵܐ. ܘܒܘܼܩܸܪܹܐ ܡܸܢܹܗ ܝܼܫܘܿܥ: ܡܘܼܕܝܼ ܝܠܹܐ ܫܸܡܘܼܟ: ܐܵܡܸܪ ܐܸܠܹܗ: ܠܓ̣ܝܘܿܢ: ܣܵܒܵܒ 31 ܕܲܝܘܹ̈ܐ ܪܵܒܵܐ ܐܘܝܼܪܹܐ ܗ̄ܘܵܘ ܒܝܹܗ. ܘܦܘܼܪܦܸܠܘܿܢ ܒܝܹܗ: ܕܠܵܐ 32 ܦܵܩܸܕ ܠܗ̄ܘܿܢ ܠܹܐܙܵܠܵܐ ܠܥܘܼܡܩܵܐ. ܐܝܼܢܵܐ ܐܝܼܬ ܗ̄ܘܵܘ ܬܵܡܵܐ ܒܲܩܪܵܐ ܕܚܙܘܼܪܹ̈ܐ ܪܵܒܵܐ ܕܒܸܪܥܵܝܵܐ ܒܛܘܼܪܵܐ: ܘܒܲܥܝܝܼ ܗ̄ܘܵܘ ܡܸܢܹܗ ܕܝܵܗ̄ܒܸܠ ܠܗ̄ܘܿܢ ܕܲܣܬܘܼܪ ܕܐܵܘܪܝܼ ܒܝܼܵܝ: ܘܝܸܗܒܸܠܹܐ 33 ܕܲܣܬܘܼܪ ܐܸܠܵܝ. ܘܦܠܸܛܠܘܿܢ ܕܲܝܘܹ̈ܐ ܡ̣ܢ ܐܢܵܫܵܐ: ܘܐܘܸܪܘܿܢ ܒܚܙܘܼܪܹ̈ܐ: ܘܪܚܸܛܠܵܐ ܒܲܩܪܵܐ ܠܫܸܢܵܐ ܠܐܸܠܬܵܚ ܒܝܵܡܵܐ: 34 ܘܚܢܸܩܠܘܿܢ. ܐܝܼܢܵܐ ܟܲܕ ܚܙܹܠܘܿܢ ܪܵܥܝܹܐ ܡܸܢܕܝܼ ܕܗ̄ܘܹܠܹܐ: ܥܪܸܩܠܘܿܢ ܘܗܘܼܩܹܠܘܿܢ ܓܵܘ ܡܕܝܼܢ̄ܬܵܐ ܘܓܵܘ ܡܵܬܘܵܬܹ̈ܐ. 35 ܘܦܠܸܛܠܘܿܢ ܕܚܵܙܝܼ ܡܸܢܕܝܼ ܕܗ̄ܘܹܠܹܐ: ܘܐܬܹܠܘܿܢ ܠܟܸܣ ܝܼܫܘܿܥ: ܘܡܘܼܫ̄ܟ̰ܸܚܠܘܿܢ ܠܐܢܵܫܵܐ ܕܦܠܸܛܠܘܿܢ ܡܸܢܹܗ ܕܲܝܘܹ̈ܐ ܠܒ̣ܝܼܫܵܐ [31] ܘܡܵܪܹܐ ܐܵܕܵܒ̣: ܘܝܬܝܼܒ̣ܵܐ ܠܟܸܣ ܐܲܩܠܹ̈ܐ ܕܝܼܫܘܿܥ: 36 ܘܙܕܸܥܠܘܿܢ. ܘܗܘܼܩܹܠܘܿܢ ܐܸܠܵܝ ܐܵܢܝܼ ܕܚܙܹܠܘܿܢ: ܕܵܐܟ̣ܝܼ 37 ܦܸܫܠܹܐ ܒܘܼܣܡܵܐ ܗ̇ܘ ܐܢܵܫܵܐ ܕܲܝܘܵܢܵܐ. ܘܒܲܥܝܝܼ ܗ̄ܘܵܘ ܡܸܢܹܗ ܟܠܹܗ ܟܸܢܫܵܐ ܕܐܲܬܪܵܐ ܕܚܵܕܸܪ̈ܘܵܢܹܐ [32] ܕܓܸܕܪܵܝܹܐ ܕܐܵܙܸܠ ܡ̣ܢ ܠܟܸܣܠܵܝ: ܣܵܒܵܒ ܕܙܕܘܼܥܬܵܐ ܓܘܼܪܬܵܐ 38 ܕܒ̣ܝܼܩܵܝܠܵܐ. ܘܗ̇ܘ ܐܣܸܩܠܹܐ ܠܓܵܡܝܼ ܘܕܸܪܹܐ. ܐܝܼܢܵܐ ܗ̇ܘ ܐܢܵܫܵܐ ܕܦܠܸܛܠܘܿܢ ܡܸܢܹܗ ܕܲܝܘܹ̈ܐ ܒܲܥܝܹܐ ܗ̄ܘܵܐ ܡܸܢܹܗ ܕܠܟܸܣܠܹܗ ܗܵܘܹܐ ܗ̄ܘܵܐ. ܐܝܼܢܵܐ ܝܼܫܘܿܥ ܫܘܼܕܸܪܹܗ: ܘܐܡܸܪܹܐ 39 ܐܸܠܹܗ. ܕܘܼܪ ܠܒܲܝܬܘܼܟ: ܘܗܵܩܝܼ ܕܵܐܟ̣ܝܼ ܡܸܢܕܝܼ ܥܒܸܕܠܹܐ ܐܸܠܘܼܟ ܐܲܠܵܗܵܐ. ܘܐܙܸܠܹܐ: ܘܡܲܟ̇ܪܸܙ ܗ̄ܘܵܐ ܒܟܠܵܗ̇ ܡܕܝܼܢ̄ܬܵܐ ܡܸܢܕܝܼ ܕܥܒܸܕܠܹܐ ܐܸܠܹܗ ܝܼܫܘܿܥ. 40 ܘܗ̄ܘܹܠܵܐ ܟܲܕ ܕܸܪܹܐ ܝܼܫܘܿܥ: ܩܘܼܒܸܠܹܗ ܟܸܢܫܵܐ: ܣܵܒܵܒ 41 ܕܟܠܵܝ ܒܸܣܦܵܪܵܐ ܗ̄ܘܵܘ ܐܸܠܹܗ. ܘܗܵܐ: ܐܬܹܠܹܐ ܚܵܕ̄ ܐܢܵܫܵܐ ܕܫܸܡܹܗ ܝܘܿܐܵܪܵܫ: ܪܹܫܵܐ ܕܟܢܘܼܫܬܵܐ: ܘܢܦܸܠܹܐ ܩܵܕ̄ܡ ܐܲܩܠܹ̈ܐ 42 ܕܝܼܫܘܿܥ: ܘܒܲܥܝܹܐ ܗ̄ܘܵܐ ܡܸܢܹܗ ܕܐܵܘܸܪ ܠܒܲܝܬܹܗ. ܣܒܵܒ ܒܪܵܬܵܐ ܝܼܚܝܼܕܵܝܬܵܐ ܐܝܼܬ ܗ̄ܘܵܐ ܠܹܗ ܐܲܝܟ ܒܲܪ̄ܬ ܬܪܸܥܣܲܪ ܫܸܢܹ̈ܐ: ܘܒܸܡܝܵܬܵܐ ܗ̄ܘܵܐ. ܘܟܲܕ ܒܹܐܙܵܠܵܐ ܗ̄ܘܵܐ ܗ̇ܘ: ܟܸܢܫܵܐ ܪܵܒܵܐ ܒܸܚܠܵܨܹܗ ܗ̄ܘܵܐ. 43 ܐܝܼܢܵܐ ܚܕܵܐ ܒܲܟ̣ܬܵܐ ܕܟܹܐ ܐܵܙܸܠ ܗ̄ܘܵܐ ܕܸܡܘܼܗ̇ ܬܪܸܥܣܲܪ ܫܸܢܹ̈ܐ: ܗ̇ܝ ܕܓܵܘ ܗܲܟܝܼܡܹ̈ܐ ܟܠܹܗ ܡܸܢܕܝܘܼܗ̇ ܚܘܼܪܸܓ̰ܠܵܐ: 44 ܘܠܵܐ ܡܸܨܠܵܐ ܕܡ̣ܢ ܚܵܕ̄ ܦܵܝܫܵܐ ܗ̄ܘܵܐ ܒܘܼܣܸܡܬܵܐ. ܐܬܹܠܵܐ ܡ̣ܢ ܒܵܬ̄ܪܹܗ ܘܕܩܸܪܵܐ ܒܫܸܦܘܼܠܵܐ ܕܓ̰ܘܼܠܹܗ: ܘܕܲܪܣܵܥܲܬ 45 ܟܠܹܠܵܐ ܡܲܓ̰ܪܵܝܬܵܐ ܕܕܸܡܘܼܗ̇. ܘܐܡܸܪܹܐ ܝܼܫܘܿܥ: ܡܵܢܝܼ ܕܩܹܪܹܐ ܒܝܼܝܼ: ܘܟܲܕ ܟܠܵܝ ܣܵܪܒ̣ܝܼ ܗ̄ܘܵܘ: ܐܡܸܪܹܐ ܐܸܠܹܗ ܟܹܐܦܵܐ ܘܐܵܢܝܼ ܕܥܲܡܹܗ: ܪܵܒܝܲܢ: ܟܸܢܫܹ̈ܐ ܡܲܠܝܘܼܨܘܼܟ ܝܼܢܵܐ ܘܒܸܚܠܵܨܵܐ ܝܢܵܐ: 46 [33] ܘܒܹܐܡܵܪܵܐ ܝܘܸܬ: ܡܵܢܝܼ ܕܩܸܪܹܐ ܒܝܼܝܼ. ܐܝܼܢܵܐ ܝܼܫܘܿܥ ܐܡܸܪܹܐ: ܐܢܵܫܵܐ ܕܩܸܪܹܐ ܒܝܼܝܼ: ܣܵܒܵܒ ܐܵܢܵܐ ܝܕܸܥܠܝܼ ܕܚܲܝܠܵܐ ܦܠܸܛܠܹܐ 47 ܡܸܢܝܼ. ܐܝܼܢܵܐ ܒܲܟ̣ܬܵܐ ܟܲܕ ܚܙܹܠܵܐ ܕܠܵܐ ܗ̄ܘܹܠܵܐ ܛܫܝܼܬܵܐ: ܐܬܹܠܵܐ ܒܸܪܓܵܕܵܐ ܘܢܦܸܠܵܐ ܩܵܕ̄ܡܘܼܗܝ: ܘܐܡܸܪܵܐ ܩܵܕ̄ܡ ܟܠܹܗ ܛܵܝܸܦܵܐ ܒܘܼܬ ܐܲܝܢܝܼ ܗܲܓ̰ܲܬ ܕܩܸܪܵܐ: ܘܕܵܐܟ̣ܝܼ ܕܲܪܣܵܥܲܬ ܒܣܸܡܠܵܐ. 48 ܐܝܼܢܵܐ ܗ̇ܘ ܐܡܸܪܹܐ ܐܸܠܵܗ̇: [34] ܒܪܵܬܵܐ: ܗܲܝܡܵܢܘܼܬܵܟ̣ܝ ܩܲܡ ܡܲܚܝܼܵܐ ܠܵܟ̣ܝ: ܙܹܠ̄ܐܝ ܒܫܠܵܡܵܐ. 49 ܘܗܹܫ ܗ̇ܘ ܗܲܡܙܘܼܡܹܐ: ܐܬܹܠܹܐ ܐܢܵܫܵܐ ܡ̣ܢ ܓܘܼܪܵܐ ܕܟܢܘܼܫܬܵܐ: ܘܐܡܸܪܹܐ ܐܸܠܹܗ: ܡܸܬܠܵܐ ܒܪܵܬܘܼܟ: ܠܵܐ ܝܵܗ̄ܒܸܬ 50 ܙܲܗܡܲܬ ܠܡܲܠܦܵܢܵܐ. ܐܝܼܢܵܐ ܝܼܫܘܿܥ ܫܡܸܥܠܹܐ: ܘܓ̰ܘܼܘܸܒܠܹܐ 51 ܐܸܠܹܗ: ܠܵܐ ܙܵܕܥܸܬ: ܗܲܪ ܗܲܡܸܢ: ܘܒܸܬ ܚܲܝܵܐ. ܘܟܲܕ ܐܘܸܪܹܐ ܠܒܝܬܵܐ: ܠܵܐ ܫܒܸܩܠܹܐ ܠܐܢܵܫܵܐ ܕܐܵܘܸܪ ܥܲܡܹܗ: ܫܒ̣ܘܿܩ ܡ̣ܢ ܠܫܸܡܥܘܿܢ ܘܠܝܲܥܩܘܿܒ̣ ܘܠܝܘܿܚܲܢܵܢ: ܘܠܒܵܒܵܐ ܕܒܪܵܬܵܐ 52 ܘܠܝܸܡܘܼܗ̇. ܘܟܠܵܝ ܒܵܟ̣ܝܼ ܗ̄ܘܵܘ ܘܥܵܒ̣ܕܝܼ ܗ̄ܘܵܘ ܬܵܙܝܼ ܥܲܠܘܼܗ̇. ܐܝܼܢܵܐ ܗ̇ܘ ܐܡܸܪܹܐ: ܠܵܐ ܒܵܟ̣ܝܼܬܘܿܢ: ܣܵܒܵܒ ܠܹܐ ܝܠܵܐ 53 ܡܝܼܬܬܵܐ: ܐܸܠܵܐ ܕܡܝܼܟ̣ܬܵܐ ܝܠܵܐ. ܘܓܵܚܟܝܼ ܗ̄ܘܵܘ ܒܝܹܗ: 54 ܕܝܲܕܥܝܼ ܗ̄ܘܵܘ ܕܡܝܼܬܬܵܐ ܗ̄ܘܵܐ. ܐܝܼܢܵܐ ܗ̇ܘ [35] ܕܒ̣ܝܼܩܵܠܹܐ 55 ܒܐܝܼܕܘܼܗ̇: ܘܩܸܪܝܵܠܹܐ ܘܐܡܸܪܹܐ: ܒܪܵܬܵܐ: ܩܘܼܡ̄ܝ. ܘܕܸܪܵܐ ܪܘܼܚܵܗ̇ ܘܕܲܪܣܵܥܲܬ ܩܸܡܠܵܐ: ܘܦܩܸܕܠܹܐ ܕܝܵܗ̄ܒ̣ܝܼ ܠܵܗ̇ 56 ܠܹܐܟ̣ܵܠܵܐ. ܘܥܘܼܓ̰ܸܒܠܘܿܢ ܐܲܒ̣ܵܗܵܘ̈ܗ̇: ܐܝܼܢܵܐ ܗ̇ܘ ܥܒ̣ܝܼܕܵܝܠܹܐ ܗܸܫܝܵܪ ܕܠܐܢܵܫܵܐ ܠܵܐ ܐܵܡܪܝܼ ܡܸܢܕܝܼ ܕܗ̄ܘܹܠܹܐ.

ܩܦܠܐܘܢ: ܛ

1 ܘܩܪܹܠܹܐ ܝܼܫܘܿܥ ܠܬܪܸܥܣܲܪ ܬܲܠܡܝܼܕܘܼ̈ܗܝ: ܘܝܸܗܒܸܠܹܐ ܐܸܠܵܝ ܚܲܝܠܵܐ ܘܗܘܼܟܡܵܐ ܥܲܠ ܟܠܵܝ ܕܲܝܘܹ̈ܐ: ܘܡܲܪ̈ܥܹܐ 2 ܠܒܵܣܘܿܡܹܐ. ܘܫܘܼܕܪܵܝܠܹܐ ܠܡܲܟܪܘܼܙܹܐ ܡܲܠܟܘܼܬܹܗ ܕܐܲܠܵܗܵܐ: 3 ܘܠܒܵܣܘܿܡܹܐ ܡܸܪ̈ܥܝܹܐ. ܘܐܡܸܪܹܐ ܐܸܠܵܝ: ܡܸܢܕܝܼ ܠܵܐ ܫܵܩܠܝܼܬܘܿܢ ܠܐܘܼܪܚܵܐ: ܠܵܐ ܩܵܛܝܼܵܐ: ܘܠܵܐ ܓ̰ܲܢܬܵܐ: ܘܠܵܐ ܠܲܚܡܵܐ: ܘܠܵܐ 4 ܣܹܐܡܵܐ: ܘܠܵܐ ܬܲܪ̈ܬܹܝ ܨܘܼܕܪ̈ܵܬܹܐ ܗܵܘܝܼ ܠܵܘܟ̣ܘܿܢ. ܘܠܲܐܝܢܝܼ ܒܲܝܬܵܐ ܕܐܵܘܪܝܼܬܘܿܢ ܓܵܘܹܗ: ܬܵܡܵܐ ܦܘܼܫܘܿܢ: ܘܡ̣ܢ ܬܵܡܵܐ 5 ܦܠܘܿܛܘܿܢ. ܘܠܡ̇ܢ ܕܠܵܐ ܩܵܒܠܝܼ ܠܵܘܟ̣ܘܿܢ: ܐܝܼܡܲܢ ܕܦܵܠܛܝܼܬܘܿܢ ܡܗ̇ܝ ܡܕܝܼܢ̄ܬܵܐ: ܐܘܼܦ ܬܵܘܙ ܡ̣ܢ ܐܲܩܠܵܘ̈ܟ̣ܘܿܢ 6 ܢܦܘܿܨܘܿܢ ܥܲܠܵܝ ܠܣܵܗܕܘܼܬܵܐ. ܘܦܠܸܛܠܘܿܢ: ܘܚܵܕܪܝܼ ܗ̄ܘܵܘ ܓܵܘ ܡܵܬܘܵܬܹ̈ܐ: ܘܡܲܫܚܸܕܝܼ ܗ̄ܘܵܘ ܘܒܵܣܡܝܼ ܗ̄ܘܵܘ ܒܟܠ ܕܘܼܟܵܐ. 7 ܐܝܼܢܵܐ ܫܡܸܥܠܹܐ ܗܹܪܘܿܕܸܣ ܛܸܛܪܲܪܟܵܐ ܟܠܵܝ ܕܒܸܗܘܵܝܵܐ ܗ̄ܘܵܘ: ܘܦܸܫܠܹܐ ܥܘܼܓ̰ܒܵܐ: ܣܵܒܵܒ ܕܐܵܡܪܝܼ ܗ̄ܘܵܘ ܐܢܵܫܹ̈ܐ: 8 ܝܘܿܚܲܢܵܢ ܩܝܼܡܵܐ ܝܠܹܐ ܡ̣ܢ ܓܵܘܵܐ ܕܡܝܼܬܹ̈ܐ. ܘܐܚܹܪ̄ܢܹܐ ܐܵܡܪܝܼ ܗ̄ܘܵܘ: ܕܐܹܠܝܼܵܐ ܦܸܫܠܹܐ ܚܸܙܝܵܐ: ܘܐܚܹܪ̄ܢܵܐ: ܕܢܒ̣ܝܼܵܐ ܚܵܕ̄ ܡ̣ܢ 9 ܩܵܕ̄ܡܵܝܹ̈ܐ ܩܝܼܡܵܐ ܝܠܹܐ. ܘܐܡܸܪܹܐ ܗܹܪܘܿܕܸܣ: ܪܹܫܹܗ ܕܝܘܿܚܲܢܵܢ ܐܵܢܵܐ ܦܪܸܡܠܝܼ: ܐܝܼܢܵܐ ܡܵܢܝܼ ܝܠܹܐ ܐܵܗܵܐ ܕܐܲܝܟ ܕܐܲܢܹܐ ܒܸܫܡܲܥܝܵܐ ܝܘܸܢ ܒܵܗ̄ܣܹܗ: ܘܛܸܥܠܹܐ ܠܸܚܙܵܝܹܗ. 10 ܘܟܲܕ ܕܸܪܘܿܢ ܫܠܝܼܚܹ̈ܐ: ܗܘܼܩܹܠܘܿܢ ܐܸܠܹܗ ܟܠ ܡܸܢܕܝܼ ܕܥܒܸܕܠܘܿܢ. ܘܠܘܼܒܠܵܝܠܹܐ ܒܢܲܦ̮ܫܵܝ ܘܐܙܸܠܹܐ ܠܚܕܵܐ ܡܕܝܼܢ̄ܬܵܐ: 11 ܕܦܵܝܫܵܐ ܩܪܝܼܬܵܐ: ܒܹܝܬ ܨܲܝܕܵܐ. ܐܝܼܢܵܐ ܟܸܢܫܹ̈ܐ ܟܲܕ ܝܕܸܥܠܘܿܢ: ܐܙܸܠܘܿܢ ܒܵܬ̄ܪܹܗ: ܘܩܘܼܒ̇ܠܵܝܠܹܐ: ܘܗܘܼܡܙܸܡܠܹܐ ܥܲܡܵܝ ܥܲܠ ܡܲܠܟܘܼܬܵܐ ܕܐܲܠܵܗܵܐ. ܘܠܵܐܢܝܼ ܕܣܢܝܼܩܹܐ ܗ̄ܘܵܘ ܥܲܠ ܒܣܵܡܬܵܐ 12 ܒܘܼܣܸܡܠܹܐ. ܐܝܼܢܵܐ ܟܲܕ ܫܘܼܪܹܠܹܐ ܝܘܿܡܵܐ ܠܸܩܠܵܒܵܐ: ܐܬܹܠܘܿܢ ܬܪܸܥܣܲܪܬܹܗ: ܘܐܵܡܪܝܼ ܐܸܠܹܗ: ܫܵܕܸܪ ܠܟܸܢܫܹ̈ܐ: ܕܐܵܙܠ̄ܝܼ ܠܡܵܬܘܵܬܹ̈ܐ ܕܚܵܕܸܪ̈ܘܵܢܲܢ ܘܠܩܸܫ̈ܠܵܓܹܐ: ܕܫܵܪܝܼ ܒܝܼܵܝ: ܘܡܵܫ̄ܟ̰ܚܝܼ ܠܗ̄ܘܿܢ ܡܹܐܟ̣ܘܼܠܬܵܐ: ܣܵܒܵܒ ܠܲܐܟ̣ܵܐ ܒܕܘܼܟܵܐ ܚܵܪܵܒܵܐ ܝܘܵܚ. 13 ܐܝܼܢܵܐ ܐܵܡܸܪ ܐܸܠܵܝ: ܗܲܒ̄ܠܘܿܢ ܠܗ̄ܘܿܢ ܐܲܚܬܘܿܢ ܠܹܐܟ̣ܵܠܵܐ. ܐܝܼܢܵܐ ܐܵܢܝܼ ܐܵܡܪܝܼ: ܠܲܝܬ ܠܲܢ ܙܵܘܕܵܐ ܡ̣ܢ ܚܲܡܫܵܐ ܠܲܚܡܹ̈ܐ ܘܬܪܲܝ ܢܘܼܢܹ̈ܐ: ܡܵܓܲܪ ܕܐܵܙܵܠ̄ܚ ܘܙܵܒ̣ܢܵܚ ܡܹܐܟ̣ܘܼܠܬܵܐ ܩܵܐ ܕܐܵܗܵܐ ܛܵܝܸܦܵܐ 14 ܟܠܹܗ. ܣܵܒܵܒ ܕܗܵܘܝܼ ܗ̄ܘܵܘ ܐܲܝܟ ܚܲܡܫܵܐ ܐܲܠܦܹ̈ܐ ܐܢܵܫܹ̈ܐ. ܘܐܡܸܪܹܐ ܠܬܲܠܡܝܼܕܘܼ̈ܗܝ: ܡܲܬܝܸܒ̣ܘܿܢ ܠܗ̄ܘܿܢ ܕܲܣܬܹ̈ܐ: ܚܲܡܫܝܼ 15 ܒܕܲܣܬܵܐ. ܘܥܒܸܕܠܘܿܢ ܗܲܕܟ̣ܵܐ: ܘܡܘܼܬܝܸܒ̣ܠܘܿܢ ܠܟܠܵܝ. 16 ܘܫܩܸܠܹܐ ܐܵܢܝܼ ܚܲܡܫܵܐ ܠܲܚܡܹ̈ܐ ܘܬܪܲܝ ܢܘܼܢܹ̈ܐ: ܘܚܸܪܹܐ ܒܫܡܲܝܵܐ: ܘܒܘܼܪܟ̣ܵܝܠܹܐ: ܘܩܨܹܠܹܐ: ܘܝܸܗܒܸܠܹܐ ܠܬܲܠܡܝܼܕܘܼ̈ܗܝ ܕܡܲܬܒ̣ܝܼ 17 ܠܟܸܢܫܹ̈ܐ. ܘܐܟܸܠܘܿܢ ܟܠܵܝ ܘܣܒܸܥܠܘܿܢ: ܘܫܩܸܠܘܿܢ ܩܸܛܥܵܛܹ̈ܐ ܡܸܢܕܝܼ ܕܙܸܕܠܘܿܢ: ܬܪܸܥܣܲܪ ܩܘܼܦܹ̈ܐ. 18 ܘܗ̄ܘܹܠܵܐ: ܟܲܕ ܨܵܠܘܿܝܹܐ ܗ̄ܘܵܐ ܒܢܲܦ̮ܫܹܗ: ܬܲܠܡܝܼܕܘܼ̈ܗܝ ܥܲܡܹܗ ܗ̄ܘܹܠܘܿܢ: ܘܒܘܼܩܸܪܹܐ ܡܸܢܵܝ ܘܐܡܸܪܹܐ: ܡܵܢܝܼ ܒܹܐܡܵܪܵܐ 19 ܝܢܵܐ ܒܘܼܬ ܕܝܼܝܼ ܟܸܢܫܹ̈ܐ ܕܝܼܘܸܢ. ܓ̰ܘܼܘܸܒܠܘܿܢ ܘܐܵܡܪܝܼ ܐܸܠܹܗ: ܝܘܿܚܲܢܵܢ ܡܲܥ̱ܡܕܵܢܵܐ: ܘܐܚܹܪ̄ܢܹܐ: ܐܹܠܝܼܵܐ: ܘܐܚܹܪ̄ܢܹܐ: ܢܒ̣ܝܼܵܐ ܚܵܕ̄ 20 ܡ̣ܢ ܩܵܕ̄ܡܵܝܹ̈ܐ ܩܝܼܡܵܐ ܝܠܹܐ. ܐܵܡܸܪ ܐܸܠܵܝ: ܐܝܼܢܵܐ ܐܲܚܬܘܿܢ ܡܵܢܝܼ ܒܹܐܡܵܪܵܐ ܝܬܘܿܢ ܕܝܼܘܸܢ: ܓ̰ܘܼܘܸܒܠܹܐ ܟܹܐܦܵܐ ܘܐܡܸܪܹܐ: ܡܫܝܼܚܹܗ 21 ܕܐܲܠܵܗܵܐ. ܐܝܼܢܵܐ ܗ̇ܘ ܢܓ̰ܘܼܠܹܐ ܒܝܼܵܝ: ܘܦܩܸܕܠܹܐ ܕܐܵܗܵܐ ܠܐܢܵܫܵܐ 22 ܠܵܐ ܐܵܡܪܝܼ ܗ̄ܘܵܘ. ܒܹܐܡܵܪܵܐ: ܘܵܓ̰ܸܒ ܝܼܠܵܐ ܕܒܪܘܼܢܹܗ ܕܐܢܵܫܵܐ ܪܵܒܵܐ ܚܲܫܵܐ ܩܵܒܸ̇ܠ: ܘܦܵܝܸܫ ܡܘܼܣܠܝܼܵܐ ܡ̣ܢ ܚܘܵܪ̈ܕܸܩܢܹܐ ܘܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ: ܘܦܵܝܸܫ ܩܛܝܼܠܵܐ: ܘܒܝܘܿܡܵܐ 23 ܕܬܠܵܬ̄ܝ ܩܵܝܸܡ. ܘܐܵܡܸܪ ܗ̄ܘܵܐ ܠܟܠܵܝ: ܡ̇ܢ ܕܒܵܣܡܵܐ ܠܹܗ ܕܐܵܬܹܐ ܒܵܬ̄ܪܝܼ: ܟܵܦܸܪ ܒܓܵܢܹܗ: ܘܫܵܩܸܠ ܙܩܝܼܦܹܗ ܝܘܿܡܵܐ 24 ܒܝܘܿܡܵܐ: ܘܐܵܬܹܐ ܒܵܬ̄ܪܝܼ. ܣܵܒܵܒ ܡ̇ܢ ܕܒܵܣܡܵܐ ܠܹܗ ܕܓܵܢܹܗ ܡܲܚܹܐ: ܒܸܬ ܬܵܠܸܩ ܠܵܗ̇: ܐܝܼܢܵܐ ܡ̇ܢ ܕܬܵܠܸܩ ܓܵܢܹܗ ܒܚܵܬܸܪ 25 ܕܝܼܝܼ: ܗ̇ܘ ܒܸܬ ܡܲܚܹܐ ܠܵܗ̇. ܣܵܒܵܒ ܡܘܼܕܝܼ ܦܲܝܕܵܐ ܟܹܐ ܗܵܘܹܐ ܠܒܲܪܢܵܫܵܐ: ܕܩܵܢܹܐ ܟܠܹܗ ܥܵܠܡܵܐ: ܐܝܼܢܵܐ ܓܵܢܹܗ ܬܵܠܸܩ ܝܲܢ 26 ܡܲܒܨܸܪ. ܣܵܒܵܒ ܡ̇ܢ ܕܢܵܚܸܦ ܒܝܼܝܼ ܘܒܗܹܡܸܙܡܵܢܝܼ̈: ܒܸܬ ܢܵܚܸܦ ܒܝܹܗ ܒܪܘܼܢܹܗ ܕܐܢܵܫܵܐ: ܐܝܼܡܲܢ ܕܐܵܬܹܐ ܒܚܸܩܪܵܐ ܕܓܵܢܹܗ ܘܕܒܵܒܵܐ 27 ܘܕܡܲܠܲܐܟܹ̈ܐ ܩܲܕܝܼܫܹ̈ܐ. ܫܲܪܝܼܪܘܼܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܝܼܬ ܐܢܵܫܹ̈ܐ ܒܸܟܠܵܝܵܐ ܠܲܐܟ̣ܵܐ: ܕܗܲܪ ܠܹܐ ܛܵܥܡܝܼ ܡܵܘܬܵܐ ܗܲܠ ܕܚܵܙܝܼ ܡܲܠܟܘܼܬܵܐ ܕܐܲܠܵܗܵܐ. 28 ܐܝܼܢܵܐ ܗ̄ܘܹܠܵܐ ܒܵܬ̄ܪ ܐܲܢܹܐ ܗܹܡܸܙܡܵܢܹ̈ܐ ܐܲܝܟ ܬܡܵܢܝܵܐ ܝܘܿܡܵܢܹ̈ܐ: ܠܘܼܒܸܠܹܐ ܠܟܹܐܦܵܐ ܘܠܝܲܥܩܘܿܒ̣ ܘܠܝܘܿܚܲܢܵܢ: ܘܐܣܸܩܠܹܐ ܠܛܘܼܪܵܐ 29 ܠܨܵܠܘܿܝܹܐ ܨܠܘܿܬܵܐ. ܘܗ̄ܘܹܠܵܐ ܟܲܕ ܗ̇ܘ ܨܵܠܘܿܝܹܐ ܗ̄ܘܵܐ: ܦܸܫܠܹܐ ܡܘܼܚܠܸܦܵܐ ܚܸܙܘܵܐ ܕܦܵܬܹܗ: ܘܠܒܸܫܬܹܗ ܚܘܸܪܵܐ ܘܡܲܒܪܸܩܵܐ 30 ܗ̄ܘܵܐ. ܘܗܵܐ: ܬܪܲܝ ܐܢܵܫܹ̈ܐ ܗܲܡܙܘܼܡܹܐ ܥܲܡܹܗ: ܕܝܼܗ̄ܘܵܘ ܡܘܼܫܹܐ 31 ܘܐܹܠܝܼܵܐ. ܕܦܸܫܠܘܿܢ ܚܸܙܝܹܐ ܒܬܸܫܒܘܿܚܬܵܐ: ܘܐܵܡܪܝܼ ܗ̄ܘܵܘ ܒܵܗ̄ܣ ܕܦܠܵܛܹܗ ܕܗܕܝܼܪܵܐ ܗ̄ܘܵܐ ܕܬܲܡܸܡ ܒܐܘܿܪܸܫܠܸܡ. 32 ܘܟܹܐܦܵܐ ܘܐܵܢܝܼ ܕܥܲܡܹܗ ܝܘܼܩܪܸܢܹܐ ܗ̄ܘܵܘ ܒܫܸܢܬܵܐ: ܘܟܲܕ ܪܥܸܫܠܘܿܢ ܚܙܹܠܘܿܢ ܚܸܩܪܹܗ: ܘܠܵܐܢܝܼ ܬܪܲܝ ܐܢܵܫܹ̈ܐ ܕܒܸܟܠܵܝܵܐ 33 ܠܟܸܣܠܹܗ. ܘܗ̄ܘܹܠܵܐ ܟܲܕ ܒܸܦܪܵܫܵܐ ܗ̄ܘܵܘ ܡܸܢܹܗ: ܐܡܸܪܹܐ ܟܹܐܦܵܐ ܠܝܼܫܘܿܥ: ܪܵܒܝܼ: ܨܦܵܝܝܼ ܝܠܵܐ ܩܵܬܲܢ ܕܠܲܐܟ̣ܵܐ ܗܵܘܵܚ. ܘܥܵܒ̣ܕܵܚ ܬܠܵܬ̄ ܡܛܲܠܠܹ̈ܐ: ܚܕܵܐ ܩܵܐ ܕܝܼܘܼܟ: ܘܚܕܵܐ ܩܵܐ ܡܘܼܫܹܐ: ܘܚܕܵܐ ܩܵܐ ܐܹܠܝܼܵܐ: ܘܠܹܐ ܗ̄ܘܵܐ ܒܝܼܕܲܥܝܵܐ ܡܘܼܕܝܼ 34 ܒܹܐܡܵܪܵܐ ܗ̄ܘܵܐ. ܘܟܲܕ ܐܡܸܪܹܐ ܐܲܢܹܐ: ܗ̄ܘܹܠܵܐ ܥܢܵܢܵܐ ܘܥܒܸܕܠܵܐ ܛܸܠܵܢܝܼܬܵܐ ܥܲܠܵܝ: ܘܙܕܸܥܠܘܿܢ ܟܲܕ ܐܵܢܝܼ ܐܘܸܪܘܿܢ ܓܵܘ ܥܢܵܢܵܐ. 35 ܘܩܵܠܵܐ ܗ̄ܘܹܠܹܐ ܡ̣ܢ ܥܢܵܢܵܐ ܒܹܐܡܵܪܵܐ: ܐܵܗܵܐ ܝܠܹܐ ܒܪܘܼܢܝܼ 36 [36] ܡܘܼܚܸܒܵܐ: ܐܸܠܹܗ ܫܡܸܥܡܘܿܢ. ܘܟܲܕ ܗ̄ܘܹܠܹܐ ܩܵܠܵܐ: ܦܸܫܠܹܐ ܡܘܼܫ̄ܟ̰ܸܚܵܐ ܝܼܫܘܿܥ ܒܢܲܦ̮ܫܹܗ. ܘܐܵܢܝܼ ܫܬܸܩܠܘܿܢ: ܘܠܐܢܵܫܵܐ ܠܵܐ ܐܡܸܪܘܿܢ ܒܐܵܢܝܼ ܝܘܿܡܵܢܹ̈ܐ ܡܸܢܕܝܼ ܡ̣ܢ ܕܐܵܢܝܼ ܕܚܙܹܠܘܿܢ. 37 ܘܗ̄ܘܹܠܵܐ ܒܝܘܿܡܵܐ ܕܒܵܬ̄ܪܹܗ: ܟܲܕ ܒܸܨܠܵܝܵܐ ܐܵܢܝܼ ܡ̣ܢ ܛܘܼܪܵܐ: 38 ܬܦܸܩܠܹܐ ܒܝܹܗ ܟܸܢܫܵܐ ܪܵܒܵܐ. ܘܗܵܐ: ܚܵܕ̄ ܐܢܵܫܵܐ ܡ̣ܢ ܟܸܢܫܵܐ ܡܘܼܩܘܸܚܠܹܐ ܘܐܡܸܪܹܐ: ܡܲܠܦܵܢܵܐ: ܦܲܪܦܘܼܠܹܐ ܝܘܸܢ ܒܝܼܘܼܟ ܥܒ̣ܘܿܕ 39 ܪܲܚܡܹܐ ܥܲܠ ܒܪܘܼܢܝܼ ܕܝܼܚܝܼܕܵܝܵܐ ܝܠܹܐ ܐܸܠܝܼ. ܘܗܵܐ: ܪܘܼܚܵܐ ܟܹܐ ܥܵܒ̣ܪܵܐ ܥܲܠܘܼܗܝ: ܘܡܸܢܫܸܠܬܵܢܹ̈ܐ ܟܹܐ ܡܲܩܘܸܚ: ܘܟܹܐ [37] ܟ̰ܲܢܟ̰ܸܪܵܐ ܠܹܗ ܥܲܡ ܓܸܒ̇ܘܼ: ܘܒܚܲܝܠܵܐ ܟܹܐ ܦܵܪܩܵܐ ܡܸܢܹܗ 40 ܓ̰ܲܢܓ̰ܘܼܪܹܐ ܐܸܠܹܗ. ܘܦܘܼܪܦܸܠܝܼ ܒܬܲܠܡܝܼܕܘܼ̈ܟ ܕܦܵܠܛܝܼ ܠܹܗ: 41 ܘܠܵܐ ܡܨܹܠܘܿܢ. ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܝܵܐ ܐܘܼܓ̰ܵܓ̣ ܠܵܐ ܗܘܼܡܸܢܬܵܐ ܘܦܟ̰ܝܼܠܬܵܐ: ܗܲܠ ܐܝܼܡܲܢ ܒܸܬ ܗܵܘܸܢ ܠܟܸܣܠܵܘܟ̣ܘܿܢ: 42 ܘܚܵܡܠܸܢ ܒܝܼܵܘܟ̣ܘܿܢ: ܡܲܝܬ̄ܝ ܠܹܗ ܠܲܐܟ̣ܵܐ ܒܪܘܼܢܘܼܟ. ܘܟܲܕ ܒܹܐܬܵܝܵܐ ܗ̄ܘܵܐ: ܚܘܼܪܙܸܦܠܹܗ ܗ̇ܘ ܕܲܝܘܵܐ: ܘܚܠܸܨܠܹܗ. ܘܢܓ̰ܸܘܠܹܐ ܝܼܫܘܿܥ ܒܪܘܼܚܵܐ ܛܲܡܹܐܐ: ܘܒܘܼܣܸܡܠܹܐ ܠܝܵܠܵܐ: ܘܝܸܗܒܸܠܹܗ ܠܒܵܒܹܗ. 43 ܘܥܘܼܓ̰ܸܒܠܘܿܢ ܟܠܵܝ ܒܓܘܼܪܘܼܬܹܗ ܕܐܲܠܵܗܵܐ. ܘܟܲܕ ܟܠܵܝ ܐܢܵܫܹ̈ܐ ܥܵܓ̰ܒܝܼ ܗ̄ܘܵܘ ܥܲܠ ܟܠ ܕܥܵܒܸܕ ܗ̄ܘܵܐ: ܐܡܸܪܹܐ 44 ܠܬܲܠܡܝܼܕܘܼ̈ܗܝ. ܡܲܬܒ̣ܘܿܢ ܐܲܚܬܘܿܢ ܐܲܢܹܐ ܗܹܡܸܙܡܵܢܹ̈ܐ ܒܢܵܬܝܵܬܵܘ̈ܟ̣ܘܿܢ: ܣܵܒܵܒ ܒܪܘܼܢܹܗ ܕܐܢܵܫܵܐ ܗܕܝܼܪܵܐ ܝܠܹܐ ܕܦܵܝܸܫ 45 ܣܘܼܦܝܵܐ ܒܐܝܼܕܵܬܹ̈ܐ ܕܒܢܲܝ̈ܢܵܫܵܐ. ܐܝܼܢܵܐ ܐܵܢܝܼ ܠܵܐ ܦܘܼܪܡܹܠܘܿܢ ܠܐܵܗܵܐ ܗܹܡܸܙܡܵܢ: ܘܛܘܼܫܝܼܬܵܐ ܗ̄ܘܵܐ ܡܸܢܵܝ ܕܠܵܐ ܝܲܕܥܝܼ ܗ̄ܘܵܘ ܠܵܗ̇: ܘܒܸܙܕܲܥܝܵܐ ܗ̄ܘܵܘ ܕܒܵܩܪܝܼ ܠܹܗ ܥܲܠ ܕܗ̇ܝ ܗܹܡܸܙܡܵܢ. 46 ܘܐܘܸܪܹܐ ܒܝܼܵܝ ܚܘܼܫܵܒ̣: ܕܡܵܢܝܼ ܝܠܹܐ ܓܘܼܪܵܐ ܓܵܘܵܝ. 47 ܐܝܼܢܵܐ ܝܼܫܘܿܥ ܝܕܸܥܠܹܐ ܚܘܼܫܵܒ̣ ܕܠܸܒܵܝ: ܘܫܩܸܠܹܐ ܝܵܠܵܐ ܙܥܘܿܪܵܐ: 48 ܘܡܘܼܟܠܹܠܹܗ ܠܟܸܣܠܹܗ. ܘܐܡܸܪܹܐ ܐܸܠܵܝ: ܟܠ ܡ̇ܢ ܕܩܵܒܸ̇ܠ ܠܐܵܗܵܐ ܝܵܠܵܐ ܙܥܘܿܪܵܐ ܒܫܸܡܝܼ: ܐܸܠܝܼ ܟܹܐ ܩܵܒܸ̇ܠ: ܘܡ̇ܢ ܕܐܸܠܝܼ ܩܵܒܸ̇ܠ: ܟܹܐ ܩܵܒܸ̇ܠ ܠܗ̇ܘ ܕܫܘܼܕܪܸܢܹܐ. ܣܵܒܵܒ ܐܲܝܢܝܼ ܕܝܼܠܹܐ 43 ܙܥܘܿܪܵܐ ܓܵܘ ܟܠܵܘܟܘܿܢ: ܐܵܗܵܐ ܝܠܹܐ ܓܘܼܪܵܐ. ܘܓ̰ܘܼܘܸܒܠܹܐ ܝܘܿܚܲܢܵܢ ܘܐܡܸܪܹܐ: ܪܵܒ̇ܝܲܢ: ܚܙܹܠܲܢ ܐܢܵܫܵܐ ܦܵܠܘܿܛܹܐ ܕܲܝܘܹ̈ܐ ܒܫܸܡܘܼܟ: ܘܡܘܼܟܠܹܠܲܢ ܐܸܠܹܗ: ܣܵܒܵܒ ܕܠܵܐ ܐܬܹܠܹܐ ܥܲܡܲܢ ܒܵܬ̄ܪܘܼܟ. 50 ܐܵܡܸܪ ܐܸܠܹܗ ܝܼܫܘܿܥ: ܠܵܐ ܡܲܟܠܝܼܬܘܿܢ: ܣܵܒܵܒ ܡ̇ܢ ܕܠܹܐ ܝܠܹܐ ܠܕܲܪܩܘܼܒ̣ܠܵܘܟ̣ܘܿܢ ܠܓܹܒܵܘܟ̣ܘܿܢ ܝܼܠܹܐ. 51 ܘܗ̄ܘܹܠܵܐ: ܟܲܕ ܦܝܵܫܵܐ ܗ̄ܘܵܘ ܬܘܼܡܸܡܹܐ ܝܘܿܡܵܢܹ̈ܐ ܕܣܘܼܠܵܩܹܗ: 52 ܡܘܼܬܒ̣ܵܠܹܐ ܦܵܬܹܗ ܬܪܘܼܨܵܐ ܕܐܵܙܸܠ ܠܐܘܿܪܸܫܠܸܡ. ܘܫܘܼܕܸܪܹܐ ܩܵܨܸܕܹ̈ܐ ܩܵܕ̄ܡ ܦܵܬܹܗ: ܘܐܙܸܠܘܿܢ ܘܐܘܸܪܘܿܢ ܠܡܵܬܵܐ ܕܫܵܡܪ̈ܵܝܹܐ: 53 ܕܗܵܕܪܝܼ ܗ̄ܘܵܘ ܩܵܐ ܕܝܹܗ. ܘܠܵܐ ܩܘܼܒܸܠܘܿܢ ܐܸܠܹܗ: ܣܵܒܵܒ 54 ܕܦܵܬܹܗ ܡܘܼܬܒ̣ܵܐ ܗ̄ܘܵܐ ܠܹܐܙܵܠܵܐ ܠܐܘܿܪܸܫܠܸܡ. ܘܟܲܕ ܚܙܹܠܘܿܢ ܝܲܥܩܘܿܒ̣ ܘܝܘܿܚܲܢܵܢ ܬܲܠܡܝܼܕܘܼ̈ܗܝ: ܐܵܡܪܝܼ ܐܸܠܹܗ: ܡܵܪܲܢ: ܒܲܥܝܸܬ ܕܐܵܡܪܵܚ ܘܨܵܠܹܐ ܢܘܼܪܵܐ ܡ̣ܢ ܫܡܲܝܵܐ ܘܬܵܝܸܡ ܠܗ̄ܘܿܢ: ܐܲܝܟ ܕܐܘܼܦ 55 ܐܹܠܝܼܵܐ ܥܒܸܕܠܹܐ. ܘܕܸܪܹܐ ܘܢܓ̰ܸܘܠܹܐ ܒܝܼܵܝ [38] ܘܐܙܸܠܘܿܢ ܠܡܵܬܵܐ 56 ܐܚܹܪ̄ܬܵܐ. 57 ܘܗ̄ܘܹܠܵܐ ܟܲܕ ܒܹܐܙܵܠܵܐ ܗ̄ܘܵܘ ܒܐܘܪܚܵܐ: ܐܡܸܪܹܐ ܐܸܠܹܗ ܚܵܕ̄ 58 ܐܢܵܫܵܐ: ܒܸܬ ܐܵܬܸܢ ܒܵܬ̄ܪܘܼܟ ܠܐܲܝܟܵܐ ܕܐܵܙܸܠ̄ܬ. ܐܵܡܸܪ ܐܸܠܹܗ ܝܼܫܘܿܥ: ܬܲܥ̈ܠܹܐ ܒܸܙܥܵܙܹ̈ܐ ܐܝܼܬ ܠܗ̄ܘܿܢ: ܘܛܲܝܪܹ̈ܐ ܕܫܡܝܵܐ ܕܘܼܟܵܐ ܕܫܪܵܝܬܵܐ: ܐܝܼܢܵܐ ܒܪܘܼܢܹܗ ܕܐܢܵܫܵܐ ܠܲܝܬ ܠܹܗ ܐܲܝܟܵܐ ܕܡܲܬܸܒ̣ ܪܹܫܹܗ. 59 ܘܐܡܸܪܹܐ ܠܚܵܕ̄ ܐܚܹܪ̄ܢܵܐ: ܬܵܐ ܒܵܬ̄ܪܝܼ ܐܝܼܢܵܐ ܗ̇ܘ ܐܡܸܪܹܐ ܐܸܠܹܗ: ܡܵܪܝܼ: ܗܲܒ̄ܠ ܠܝܼ ܕܲܣܬܘܼܪ ܩܵܕ̄ܡܵܝܬܵܐ ܕܐܵܙܸܠ̄ܢ ܩܵܒ̣ܪܸܢ 60 ܠܒܵܒܝܼ. ܐܝܼܢܵܐ ܐܡܸܪܹܐ ܐܸܠܹܗ: ܫܒ̣ܘܿܩ ܡܝܼܬܹ̈ܐ ܩܵܒ̣ܪܝܼ ܡܝܼܬܵܝ̈: 61 ܘܐܲܢ̄ܬ ܙܹܠ̄ܐ ܡܲܫܚܸܕ ܡܲܠܟܘܼܬܹܗ ܕܐܲܠܵܗܵܐ. ܘܐܡܸܪܹܐ ܐܸܠܹܗ ܚܵܕ̄ ܐܚܹܪ̄ܢܵܐ: ܒܸܬ ܐܵܬܸܢ ܒܵܬ̄ܪܘܼܟ: ܡܵܪܝܼ: ܐܝܼܢܵܐ ܩܵܕ̄ܡܵܝܬܵܐ ܗܲܒ̄ܠ ܠܝܼ ܕܲܣܬܘܼܪ ܕܐܵܙܸܠ̄ܢ ܫܵܒ̣ܩܸܢ ܒܫܠܵܡܵܐ ܠܐܵܢܝܼ ܕܓܵܘ 62 ܒܲܝܬܝܼ. ܐܝܼܢܵܐ ܐܵܡܸܪ ܐܸܠܹܗ ܝܼܫܘܿܥ: ܐܢܵܫܵܐ ܠܹܐ ܕܵܪܹܐ ܐܝܼܕܹܗ ܥܲܠ ܦܕܵܢܵܐ: ܘܚܵܝܸܪ ܠܵܒܵܬ̄ܪܹܗ: ܘܚܵܫܸܚ ܠܡܲܠܟܘܼܬܹܗ ܕܐܲܠܵܗܵܐ.

ܩܦܠܐܘܢ: ܝ

1 ܒܵܬ̄ܪ ܐܲܢܹܐ ܦܪܸܫܠܹܐ ܡܵܪܲܢ ܐܘܼܦ ܫܲܒ̣ܥܝܼ ܐܚܹܪ̄ܢܹܐ: ܘܫܘܼܕܪܵܝܠܹܐ ܬܪܲܝ ܬܪܲܝ ܩܵܕ̄ܡ ܦܵܬܹܗ: ܠܟܠ ܕܘܼܟܵܐ 2 ܘܡܕܝܼܢ̄ܬܵܐ ܕܗܕܝܼܪܵܐ ܗ̄ܘܵܐ ܠܹܐܙܵܠܵܐ. ܘܐܡܸܪܹܐ ܐܸܠܵܝ: ܚܸܨܕܵܐ ܪܵܒܵܐ ܝܠܹܐ: ܘܦܵܥ̈ܠܹܐ ܚܲܟ̰ܵܐ: ܒܸܥܡܘܿܢ ܗܲܕܟ̣ܵܐ ܡ̣ܢ ܡܵܪܵܐ 3 ܕܚܸܨܕܵܐ: ܕܦܵܠܸܛ ܦܵܥ̈ܠܹܐ ܠܚܸܨܕܹܗ. ܙܹܠ̄ܡܘܿܢ: ܗܵܐ: ܐܵܢܵܐ 4 ܫܵܕܘܿܪܵܘܟ̣ܘܿܢ ܝܼܘܸܢ ܐܲܝܟ ܦܹܪܹ̈ܐ ܒܓܵܘܵܐ ܕܕܹܐܒܹ̈ܐ. ܠܵܐ ܫܵܩܠܝܼܬܘܿܢ ܠܵܘܟ̣ܘܿܢ ܟܝܼܣܬܵܐ ܘܠܵܐ ܓ̰ܲܢܬܵܐ: ܘܠܵܐ ܨܵܘܠܹ̈ܐ: 5 ܘܫܠܵܡܵܐ ܠܐܢܵܫܵܐ ܒܐܘܼܪܚܵܐ ܠܵܐ ܕܵܪܝܼܬܘܿܢ. ܘܠܟܠ ܒܲܝܬܵܐ ܕܐܵܘܪܝܼܬܘܿܢ: ܩܵܕ̄ܡܵܝܬܵܐ ܐܡܘܿܪܘܿܢ: ܫܠܵܡܵܐ ܠܐܵܗܵܐ ܒܲܝܬܵܐ. 6 ܘܐܸܢ ܐܝܼܬ ܬܵܡܵܐ ܒܪܘܼܢܵܐ ܕܸܫܠܵܡܵܐ: ܒܸܬ ܥܲܪܩܸܠ ܥܲܠܘܼܗܝ 7 ܫܠܵܡܵܘܟ̣ܘܿܢ: ܘܐܸܢ ܠܵܐ: ܥܲܠܵܘܟ̣ܘܿܢ ܒܸܬ ܕܵܝܸܪ. ܐܝܼܢܵܐ ܗ̇ܘ ܒܲܝܬܵܐ ܗ̄ܘܹܡܘܿܢ: ܟܲܕ ܒܹܐܟ̣ܵܠܵܐ ܘܒܸܫܬܵܝܵܐ ܡ̣ܢ ܕܝܼܵܝ: ܣܵܒܵܒ ܕܟܹܐ ܚܵܫܸܚ ܦܵܥܠܵܐ ܠܗܵܩܹܗ. ܘܠܵܐ ܫܵܢܝܼܬܘܿܢ ܡ̣ܢ ܒܲܝܬܵܐ 8 ܠܒܲܝܬܵܐ. ܘܠܲܐܝܢܝܼ ܡܕܝܼܢ̄ܬܵܐ ܕܐܵܘܪܝܼܬܘܿܢ ܘܩܵܒ̇ܠܝܼ ܠܵܘܟ̣ܘܿܢ: 9 ܐܟ̣ܘܿܠܘܿܢ ܡܸܢܕܝܼ ܕܦܵܝܸܫ ܡܘܼܬܒ̣ܵܐ ܩܵܕ̄ܡܵܘܟ̣ܘܿܢ. ܘܒܵܣܡܘܿܢ ܠܐܵܢܝܼ ܕܝܼܢܵܐ ܡܸܪܥܝܹܐ ܓܵܘܵܗ̇: ܘܐܡܘܿܪܘܿܢ ܐܸܠܵܝ: [39] ܩܘܼܪܒܸܢܵܐ 10 ܥܲܠܵܘܟ̣ܘܿܢ ܡܲܠܟܘܼܬܹܗ ܕܐܲܠܵܗܵܐ. ܐܝܼܢܵܐ ܠܐܲܝܢܝܼ ܡܕܝܼܢ̄ܬܵܐ ܕܐܵܘܪܝܼܬܘܿܢ: ܘܠܵܐ ܩܵܒ̇ܠܝܼ ܠܵܘܟ̣ܘܿܢ: ܦܠܘܿܛܘܿܢ ܐܲܚܬܘܿܢ 11 ܒܥܵܠܘܿܠܵܢܘܼ̈ܗ̇: ܘܐܡܘܿܪܘܿܢ. ܘܐܘܼܦ ܬܵܘܙ ܕܝܼܠܵܐ ܛܦܝܼܬܵܐ ܒܐܲܩ̈ܠܲܢ ܡ̣ܢ ܡܕܝܼܢ̄ܬܵܘܟ̣ܘܿܢ: ܒܸܢܦܵܨܵܐ ܝܘܵܚ ܐܸܠܵܘܟ̣ܘܿܢ ܐܝܼܢܵܐ ܐܵܗܵܐ ܝܕܸܥܡܘܿܢ: [40] ܕܩܘܼܪܒܸܢܵܐ ܥܲܠܵܘܟ̣ܘܿܢ ܡܲܠܟܘܼܬܹܗ ܕܐܲܠܵܗܵܐ. 12 ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܣܕܘܿܡ ܒܸܬ ܗܵܘܹܐ ܢܝܵܚܵܐ ܒܗ̇ܘ 13 ܝܘܿܡܵܐ: ܙܵܘܕܵܐ ܡ̣ܢ ܠܗ̇ܝ ܡܕܝܼܢ̄ܬܵܐ. ܘܵܝ ܐܸܠܵܟ̣ܝ: ܟܘܼܪܙܝܼܢ: ܘܵܝ ܐܸܠܵܟ̣ܝ: ܒܹܝܬ ܨܝܵܕܵܐ: ܣܵܒܵܒ ܐܸܢ ܒܨܘܼܪ ܘܒܨܲܝܕܘܿܢ ܗܵܘܝܼ ܗ̄ܘܵܘ ܚܲܝ̈ܠܹܐ ܕܗ̄ܘܹܠܘܿܢ ܒܝܼܵܘܟ̣ܘܿܢ: ܡ̣ܢ ܓ̰ܲܠܕܹܐ ܟܲܕ ܝܬܝܼܒܹܐ 14 ܒܣܲܩܹ̈ܐ ܘܒܩܸܛܡܵܐ ܒܸܬ ܬܲܘܸܒܝܼ ܗ̄ܘܵܘ. ܐܝܼܢܵܐ ܠܨܘܿܪ ܘܠܨܲܝܕܘܿܢ ܒܸܬ ܗܵܘܹܐ ܢܝܵܚܵܐ ܒܕܝܼܘܵܢ: ܙܵܘܕܵܐ ܡ̣ܢ ܕܐܸܠܵܘܟ̣ܘܿܢ. 15 ܘܐܲܢ̄ܬܝ: ܟܦܲܪܢܵܚܘܿܡ: ܗܲܠ ܫܡܲܝܵܐ ܒܸܬ ܦܵܝܫܲܬܝ ܡܘܼܪܸܡܬܵܐ: 16 ܗܲܠ ܫܝܘܿܠ ܒܸܬ ܦܵܝܫܲܬܝ ܡܘܼܨܠܝܼܬܵܐ. ܡ̇ܢ ܕܐܸܠܵܘܟ̣ܘܿܢ ܫܲܡܸܥ ܐܸܠܝܼ ܒܸܫܡܲܥܝܵܐ ܝܠܹܐ: ܘܡ̇ܢ ܕܐܸܠܵܘܟ̣ܘܿܢ ܡܲܣܠܹܐ ܐܸܠܝܼ ܡܲܣܠܘܼܝܹܐ ܝܠܹܐ: ܘܡ̇ܢ ܕܐܸܠܝܼ ܡܲܣܠܹܐ ܡܲܣܠܘܼܝܹܐ ܝܠܹܐ ܠܡ̇ܢ ܕܫܘܼܕܪܸܢܹܐ. 17 ܘܕܸܪܘܿܢ ܐܵܢܝܼ ܫܲܒ̣ܥܝܼ ܒܚܲܕܘܼܬܵܐ: ܘܐܵܡܪܝܼ ܐܸܠܹܗ: ܡܵܪܲܢ: 18 ܐܘܼܦ ܕܲܝܘܹ̈ܐ ܦܝܵܫܵܐ ܝܢܵܐ ܙܲܒܛ ܐܸܠܲܢ ܒܫܸܡܘܼܟ. ܘܐܡܸܪܹܐ ܐܸܠܵܝ: ܐܵܢܵܐ ܚܙܹܠܝܼ ܠܣܵܛܵܢܵܐ ܕܢܦܸܠܹܐ ܐܲܝܟ ܒܸܪܩܵܐ ܡ̣ܢ ܫܡܲܝܵܐ. 19 ܗܵܐ: ܝܸܗ̄ܒܸܠܝܼ ܐܸܠܵܘܟ̣ܘܿܢ ܗܘܼܟܡܵܐ ܕܗܵܘܝܼܬܘܿܢ ܒܸܕܝܵܫܵܐ ܚܘܼܘܵܘܵܬܹ̈ܐ ܘܥܵܩܸܪ̈ܒܹܐ: ܘܟܠܹܗ ܚܲܝܠܹܗ ܕܕܸܫܡܸܢ: ܘܡܸܢܕܝܼ ܠܹܐ ܚܲܙܕܓ 20 ܠܵܘܟ̣ܘܿܢ. ܐܝܼܢܵܐ ܒܐܵܗܵܐ ܠܵܐ ܚܵܕܝܼܬܘܿܢ ܕܪ̈ܘܼܚܹܐ ܦܝܵܫܵܐ ܝܢܵܐ ܙܲܒܛ ܐܸܠܵܘܟ̣ܘܿܢ: ܐܸܠܵܐ ܚܕܹܡܘܿܢ ܕܫܸܡܵܢܵܘ̈ܟ̣ܘܿܢ ܦܸܫܠܘܿܢ ܟܬܝܼܒܹܐ ܒܫܡܲܝܵܐ. 21 ܒܗ̇ܝ ܣܵܥܲܬ ܦܨܸܚܠܹܐ ܝܼܫܘܿܥ ܒܪܘܼܚܵܐ ܕܩܘܼܕܫܵܐ ܘܐܡܸܪܹܐ: ܫܵܟܘܿܪܹܐ ܝܘܸܢ ܐܸܠܘܼܟ: ܒܵܒܝܼ: ܡܵܪܵܐ ܕܫܡܲܝܵܐ ܘܐܲܪܥܵܐ: ܕܟܘܼܣܹܠܘܼܟ ܐܲܢܹܐ ܡ̣ܢ ܥܵܩܸܠܕܵܪܹ̈ܐ ܘܦܲܪ̈ܡܝܼܵܢܹܐ: ܘܓܸܠܝܵܝܠܘܼܟ ܠܝܲܠܘܼܕܹ̈ܐ: ܗܹܐ: 22 ܒܵܒܝܼ: ܕܗܲܕܟ̣ܵܐ ܗ̄ܘܹܠܹܐ ܪܸܙܵܝܵܐ ܩܵܕ̄ܡܘܼܟ. ܟܠ ܡܸܢܕܝܼ ܦܸܫܠܹܐ ܣܘܼܦܝܵܐ ܒܝܼܝܼ ܡ̣ܢ ܒܵܒܝܼ: ܘܠܵܐ ܐܢܵܫܵܐ ܒܝܼܕܲܥܝܵܐ ܝܠܹܐ ܡܵܢܝܼ ܝܠܹܐ ܒܪܘܼܢܵܐ: ܐܸܠܵܐ ܒܵܒܵܐ: ܘܡܵܢܝܼ ܝܠܹܐ ܒܵܒܵܐ: ܐܸܠܵܐ ܒܪܘܼܢܵܐ: ܘܠܡ̇ܢ ܕܒܵܣܡܵܐ ܠܹܗ ܒܪܘܼܢܵܐ ܕܓܵܠܹܐ (ܠܹܗ). 23 ܘܕܸܪܹܐ ܠܟܸܣ ܬܲܠܡܝܼܕܘܼ̈ܗܝ ܒܢܲܦ̮ܫܵܝ ܘܐܡܸܪܹܐ: ܛܘܼܒ̣ܵܐ 24 ܠܥܲܝܢܹ̈ܐ ܕܚܵܙܝܼ ܡܸܢܕܝܼ ܕܐܲܚܬܘܿܢ ܒܸܚܙܵܝܵܐ ܝܬܘܿܢ. ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܪܵܒܵܐ ܢܒ̣̈ܝܹܐ ܘܡܲܠܟܹ̈ܐ ܒܣܸܡܠܵܐ ܠܗ̄ܘܿܢ ܕܚܵܙܝܼ ܡܸܢܕܝܼ ܕܒܸܚܙܵܝܵܐ ܝܬܘܿܢ: ܘܠܵܐ ܚܙܹܠܘܿܢ: ܘܠܸܫܡܲܥܝܵܐ ܡܸܢܕܝܼ ܕܐܲܚܬܘܿܢ ܒܸܫܡܲܥܝܵܐ ܝܬܘܿܢ: ܘܠܵܐ ܫܡܸܥܠܘܿܢ. 25 ܘܗܵܐ: ܚܵܕ̄ ܫܲܪܥܲܬܟܵܪ ܩܸܡܠܹܐ ܕܓ̰ܵܪܸܒ ܠܹܗ ܘܐܡܸܪܹܐ: 26 ܡܲܠܦܵܢܵܐ: ܡܘܼܕܝܼ ܥܵܒ̣ܕܸܢ ܕܝܵܪܬܸܢ ܚܲܝܹ̈ܐ ܕܠܵܐܒܵܕ. ܘܐܡܸܪܹܐ ܐܸܠܹܗ: ܒܢܵܡܘܿܣܵܐ ܡܘܼܕܝܼ ܟܬܝܼܒ̣ܵܐ ܝܠܹܐ: ܕܵܐܟ̣ܝܼ ܟܹܐ ܩܵܪܸܬ. 27 ܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ: ܕܡܲܚܒܸܬ ܠܡܵܪܝܵܐ ܐܲܠܵܗܘܼܟ ܡ̣ܢ ܟܠܹܗ ܠܸܒܘܼܟ: ܘܡ̣ܢ ܟܠܵܗ̇ ܓܵܢܘܼܟ: ܘܡ̣ܢ ܟܠܹܗ ܚܲܝܠܘܼܟ: 28 ܘܡ̣ܢ ܟܠܹܗ ܚܝܼܵܠܘܼܟ: ܘܠܫܒ̣ܵܒ̣ܘܼܟ ܐܲܝܟ ܓܵܢܘܼܟ. ܐܵܡܸܪ ܐܸܠܹܗ: ܒܬܪܘܼܨܬܵܐ ܓ̰ܘܼܘܸܒܠܘܼܟ. ܐܵܗܵܐ ܥܒ̣ܘܿܕ: ܘܒܸܬ 29 ܚܲܝܸܬ. ܐܝܼܢܵܐ ܗ̇ܘ: ܟܲܕ ܒܸܥܠܹܐ ܠܡܲܟܫܘܼܛܹܐ ܓܵܢܹܗ: ܐܡܸܪܹܐ 30 ܠܝܼܫܘܿܥ: ܘܡܵܢܝܼ ܝܠܹܐ ܫܒ̣ܵܒ̣ܝܼ. ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܚܵܕ̄ ܐܢܵܫܵܐ ܒܸܨܠܵܝܵܐ ܗ̄ܘܵܐ ܡ̣ܢ ܐܘܿܪܸܫܠܸܡ ܠܐܝܼܪܝܼܚܘܿ: ܘܢܦܸܠܹܐ ܓܵܘܵܐ ܕܓ̰ܵܠܵܠܵܬܹܐ ܘܫܘܼܠܚܸܠܘܿܢ ܐܸܠܹܗ: ܘܡܚܹܠܘܿܢ ܐܸܠܹܗ: 31 ܘܐܙܸܠܘܿܢ: ܒܸܫܒ̣ܵܩܘܼܗܝ ܦܲܠܓܘܼ ܡܝܵܬܵܐ. ܘܩܘܼܘܸܡܠܵܐ ܕܚܵܕ̄ ܟܵܗܢܵܐ ܒܸܨܠܵܝܵܐ ܗ̄ܘܵܐ ܒܗ̇ܝ ܐܘܼܪܚܵܐ: ܚܙܹܠܹܗ: ܥܒܸܪܹ̈ܐ. 32 ܘܗܲܕܟ̣ܵܐ ܐܘܼܦ ܠܹܘܵܝܵܐ: ܘܟܲܕ ܡܛܹܠܹܐ ܠܗ̇ܝ ܕܘܼܟܬܵܐ ܘܚܙܹܠܹܗ: 33 ܥܒܸܪܹܐ. ܐܝܼܢܵܐ ܐܢܵܫܵܐ ܫܵܡܪܵܝܵܐ: ܟܲܕ ܒܸܥܒ̣ܵܕܵܐ ܗ̄ܘܵܐ ܣܵܦܵܪ: ܐܬܹܠܹܐ ܠܐܲܝܟܵܐ ܕܝܼܗ̄ܘܵܐ: ܘܚܙܹܠܹܗ: ܘܪܘܼܚܸܡܠܹܐ ܥܲܠܘܼܗܝ. 34 [41] ܘܩܘܼܪܒܸܢܹܐ: ܘܐܣܸܪܹܐ ܡܲܚܘܵܬܹ̈ܗ: ܨܲܢܨܘܼܠܹܐ ܥܲܠܵܝ ܚܲܡܪܵܐ ܘܡܸܫܚܵܐ: ܘܡܘܼܬܸܒ̣ܠܹܗ ܥܲܠ ܐܘܼܠܵܓܹܗ: ܘܡܘܼܬ̄ܝܹܠܹܗ 35 ܠܟܲܪܘܵܢܣܵܪܵܐ: ܘܐܟܸܠܹܐ ܚܲܡ ܒܘܼܬ ܕܝܹܗ. ܘܒܩܵܝܕܲܡܬܵܐ ܦܘܼܠܸܛܠܹܐ ܬܪܲܝ ܕܝܼܢܵܪܹ̈ܐ ܘܝܸܗܒܸܠܹܐ ܠܟܲܪܘܵܢܣܵܪܵܟ̰ܝܼ: ܘܐܡܸܪܹܐ: ܐܟ̣ܘܿܠ ܚܲܡ ܒܘܼܬ ܕܝܹܗ: ܘܟܠ ܡܸܢܕܝܼ ܕܙܵܘܕܵܐ ܚܵܪܓ̰ܸܬ: 36 ܐܝܼܡܲܢ ܕܕܵܝܪܸܢ ܒܸܬ ܝܵܗܒܸܢܘܼܟ. ܡܵܢܝܼ ܗܲܕܟ̣ܵܐ ܡܐܲܢܹܐ ܬܠܵܬ̄ܐ ܒܸܚܫܵܒ̣ܵܐ ܝܘܸܬ ܗ̄ܘܹܠܹܐ ܫܒ̣ܵܒ̣ܵܐ ܠܗ̇ܘ ܕܢܦܸܠܹܐ ܓܵܘܵܐ 37 ܕܓ̰ܵܠܵܠ̈ܝܹܐ. ܘܗ̇ܘ ܐܡܸܪܹܐ: ܗ̇ܘ ܕܪܘܼܚܸܡܠܹܐ ܥܲܠܘܼܗܝ. ܐܵܡܸܪ ܐܸܠܹܗ ܝܼܫܘܿܥ: ܙܹܠ̄ܐ: ܐܘܼܦ ܐܲܢ̄ܬ ܗܲܕܟ̣ܵܐ ܥܵܒ̣ܕܸܬ. 38 ܘܗ̄ܘܹܠܵܐ ܟܲܕ ܒܹܐܙܵܠܵܐ ܗ̄ܘܵܘ: ܐܘܸܪܹܐ ܠܚܕܵܐ ܡܵܬܵܐ: ܘܚܕܵܐ 39 ܒܲܟ̣ܬܵܐ ܕܫܸܡܘܼܗ̇ ܡܵܪܬܵܐ ܩܘܼܒܸܠܵܐ ܐܸܠܹܗ ܒܒܲܝܬܘܼܗ̇. ܘܐܝܼܬ ܗ̄ܘܵܐ ܠܵܗ̇ ܚܵܬܵܐ ܫܸܡܘܼܗ̇ ܡܲܪܝܲܡ: ܝܬܸܒ̣ܠܹܐ ܠܟܸܣ 40 ܐܲܩܠܹ̈ܗ ܕܝܼܫܘܿܥ: ܘܫܲܡܥܵܐ ܗ̄ܘܵܐ ܗܹܡܸܙܡܵܢܘܼ̈ܗܝ. ܐܝܼܢܵܐ ܡܵܪܬܵܐ ܡܘܼܠܝܸܨܬܵܐ ܗ̄ܘܵܐ ܒܚܸܠܡܲܬ ܪܵܒܵܐ: ܘܐܬܹܠܹܐ ܐܡܸܪܵܐ ܐܸܠܹܗ: ܡܵܪܝܼ: ܠܹܐ ܝܘܸܬ ܒܚܲܡ ܕܚܵܬܝܼ ܫܒ̣ܝܼܩܲܢܵܐ ܒܢܲܦ̮ܫܝܼ 41 ܠܸܥܒ̣ܵܕܵܐ ܚܸܠܡܲܬ: ܒܲܣ ܐܡܘܿܪ ܐܸܠܵܗ̇ ܕܗܲܝܸܪܵܐ ܠܝܼ. ܐܝܼܢܵܐ ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܗ̇: ܡܵܪܬܵܐ: ܡܵܪܬܵܐ: ܒܹܐܟ̣ܵܠܵܐ 42 ܝܘܲܬܝ ܚܲܡ ܘܫܓ̣ܝܼܫܬܵܐ ܝܘܲܬܝ ܥܲܠ ܪܵܒܵܐ ܡܸܢܕܝܵܢܹ̈ܐ. ܐܝܼܢܵܐ ܚܕܵܐ ܠܵܙܸܡ ܝܼܠܵܐ: ܘܡܲܪܝܲܡ ܣܵܡܵܐ ܨܦܵܝܝܼ ܓܘܼܒܹܠܵܐ: ܗ̇ܘ ܕܠܹܐ ܦܵܝܸܫ ܫܩܝܼܠܵܐ ܡܸܢܵܗ̇.

ܩܦܠܐܘܢ: ܝܐ

1 ܘܗ̄ܘܹܠܵܐ ܟܲܕ ܗ̇ܘ ܨܵܠܘܿܝܹܐ ܗ̄ܘܵܐ ܨܠܘܿܬܵܐ ܒܚܕܵܐ ܕܘܼܟܬܵܐ: ܟܲܕ ܦܩܸܕܠܹܐ: ܐܡܸܪܹܐ ܐܸܠܹܗ ܚܵܕ̄ ܡ̣ܢ ܬܲܠܡܝܼܕܘܼ̈ܗܝ: ܡܵܪܲܢ: ܡܵܠܸܦ ܠܲܢ ܠܨܵܠܘܿܝܹܐ: ܕܵܐܟ̣ܝܼ ܕܐܘܼܦ ܝܘܿܚܲܢܵܢ ܡܘܼܠܸܦܠܹܐ 2 ܠܬܲܠܡܝܼܕܘܼ̈ܗܝ. ܘܐܡܸܪܹܐ ܐܸܠܵܝ: ܐܝܼܡܲܢ ܕܨܵܠܝܼܬܘܿܢ: ܐܡܘܿܪܘܿܢ: ܒܵܒܲܢ ܕܒܫܡܲܝܵܐ: ܦܵܝܸܫ ܩܘܼܕܫܵܐ ܫܸܡܘܼܟ. ܐܵܬܝܵܐ ܡܲܠܟܘܼܬܘܼܟ. 3 ܗܵܘܹܐ ܪܸܙܵܝܘܼܟ: ܐܲܝܟ ܕܒܫܡܲܝܵܐ ܐܘܼܦ ܒܐܲܪܥܵܐ. ܗܲܒ̄ܠ ܠܲܢ 4 ܠܲܚܡܵܐ ܕܣܘܼܢܩܵܢܲܢ ܝܘܿܡܵܐ ܒܝܘܿܡܵܐ. ܘܫܒ̣ܘܿܩ ܠܲܢ ܚܛ̈ܝܼܵܬܲܢ: ܣܵܒܵܒ ܕܐܘܼܦ ܐܲܚܢܲܢ ܟܹܐ ܫܵܒ̣ܩܵܚ ܠܟܠܵܝ ܕܕܵܝܢܵܢܹ̈ܐ ܝܢܵܐ ܐܸܠܲܢ. ܘܠܵܐ ܡܲܐܘܸܪܸܬ ܠܲܢ ܠܓ̰ܘܼܪܵܒܵܐ: ܐܸܠܵܐ ܦܵܪܸܩ ܠܲܢ ܡ̣ܢ ܒܝܼܫܵܐ. 5 ܘܐܡܸܪܹܐ ܐܸܠܵܝ: ܡܵܢܝܼ ܝܠܹܐ ܡܸܢܵܘܟ̣ܘܿܢ ܕܐܝܼܬ ܠܹܗ ܕܵܘܣܬ: ܘܐܵܙܸܠ ܠܟܸܣܠܹܗ ܒܦܲܠܓܹܗ ܕܠܲܝܠܹܐ: ܘܐܵܡܸܪ ܐܸܠܹܗ: 6 ܕܵܘܣܬܝܼ: ܗܲܒ̄ܠ ܠܝܼ ܕܵܝܢܵܐ ܬܠܵܬ̄ ܓܸܪ̈ܕܲܝܹܐ. ܣܵܒܵܒ ܕܕܵܘܣܬ ܐܬܹܠܹܐ ܠܟܸܣܠܝܼ ܡ̣ܢ ܐܘܼܪܚܵܐ: ܘܠܲܝܬ ܠܝܼ ܡܸܢܕܝܼ 7 ܕܡܲܬܒܸܢ ܩܵܕ̄ܡܘܼܗܝ. ܘܗ̇ܘ ܡ̣ܢ ܠܓܵܘܵܝܝܼ ܒܸܬ ܓ̰ܲܘܸܒ ܘܐܵܡܸܪ: ܠܵܐ ܡܲܓ̰ܗ̄ܝܼܬܘܿܢ ܠܝܼ: ܐܵܕܝܼܵܐ ܬܲܪܥܵܐ ܕܒ̣ܝܼܪܵܐ ܝܠܹܐ: ܘܝܵܠܝܼ̈ ܥܲܡܝܼ ܒܫܘܝܼܬܵܐ: ܠܹܐ ܡܵܨܸܢ ܩܵܝܡܸܢ ܘܝܵܗ̄ܒܸܢܘܼܟ. 8 ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܣܵܒܵܒ ܕܕܵܘܣܬܹܗ ܝܠܹܐ ܠܵܐ ܩܵܝܸܡ ܘܝܵܗ̄ܒܸܠ ܠܹܗ: ܐܝܼܢܵܐ ܣܵܒܵܒ ܕܩܘܝܘܼܬܵܐ ܕܦܵܬܹܗ ܒܸܬ 9 ܩܵܝܸܡ ܘܒܸܬ ܝܵܗ̄ܒܸܠ ܠܹܗ ܟܡܵܐ ܕܗܵܘܹܐ ܠܵܙܝܼܡܘܼܗܝ. ܘܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܛܠܘܿܒܘܿܢ: ܘܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܵܘܟ̣ܘܿܢ: ܛܥܹܡܘܿܢ: ܘܒܸܬ ܡܵܫ̄ܟ̰ܚܝܼܬܘܿܢ: ܬܲܩܬܸܩܘܿܢ: ܘܒܸܬ 10 ܦܵܝܸܫ ܦܬܝܼܚܵܐ ܐܸܠܵܘܟ̣ܘܿܢ. ܣܵܒܵܒ ܟܠ ܕܛܵܠܸܒ ܟܹܐ ܫܵܩܸܠ: ܘܗ̇ܘ ܕܛܵܥܹܐ ܟܹܐ ܡܵܫ̄ܟ̰ܸܚ: ܘܗ̇ܘ ܕܬܲܩܬܸܩ ܟܹܐ ܦܵܝܸܫ 11 ܦܬܝܼܚܵܐ ܐܸܠܹܗ. ܣܵܒܵܒ ܐܲܝܢܝܼ ܡܸܢܵܘܟ̣ܘܿܢ ܒܵܒܵܐ ܕܛܵܠܸܒ ܡܸܢܹܗ ܒܪܘܼܢܹܗ ܠܲܚܡܵܐ: ܟܹܐܦܵܐ ܦܵܫܸܛ ܠܹܗ: ܘܐܸܢ ܢܘܼܢܵܐ: 12 ܡ̣ܢ ܓܹܒܵܐ ܕܢܘܼܢܵܐ ܚܘܼܘܹܐ ܦܵܫܸܛ ܠܹܗ. ܘܐܸܢ ܒܹܥܬܵܐ ܛܵܠܸܒ 13 ܡܸܢܹܗ: ܗ̇ܘ ܥܵܩܸܪܒ̣ܵܐ ܦܵܫܸܛ ܠܹܗ. ܘܐܸܢ ܗܲܕܟ̣ܵܐ ܐܲܚܬܘܿܢ: ܕܒܝܼܫܹ̈ܐ ܝܬܘܿܢ: ܟܹܐ ܝܲܕܥܝܼܬܘܿܢ ܚܲܠܲܥ̄ܬܹ̈ܐ ܛܵܒܹ̈ܐ ܠܝܼܵܗ̄ܒ̣ܵܐ ܠܒܢܘܼܢܵܘ̈ܟ̣ܘܿܢ: ܟܡܵܐ ܙܵܘܕܵܐ ܒܵܒܵܘܟ̣ܘܿܢ ܡ̣ܢ ܫܡܲܝܵܐ ܒܸܬ ܝܵܗ̄ܒܸܠ ܪܘܼܚܵܐ ܕܩܘܼܕܫܵܐ ܠܐܵܢܝܼ ܕܛܵܠܒܝܼ ܡܸܢܹܗ. 14 ܘܦܵܠܘܿܛܹܐ ܗ̄ܘܵܐ ܕܲܝܘܵܐ ܕܝܼܗ̄ܘܵܐ ܠܲܥܠܵܐ. ܘܗ̄ܘܹܠܵܐ: ܟܲܕ ܦܠܸܛܠܹܐ ܗ̇ܘ ܕܲܝܘܵܐ: ܗܘܼܡܙܸܡܠܹܐ ܗ̇ܘ ܠܲܥܠܵܐ: 15 ܘܥܘܼܓ̰ܸܒܠܘܿܢ ܟܸܢܫܹ̈ܐ. ܐܝܼܢܵܐ ܐܢܵܫܹ̈ܐ ܡܸܢܵܝ ܐܡܸܪܘܿܢ: 16 ܒܒܥܸܠܙܒ̣ܘܿܒ̣ ܪܹܫܵܐ ܕܕܲܝܘܹ̈ܐ ܦܵܠܘܿܛܹܐ ܝܠܹܐ ܕܲܝܘܹ̈ܐ. ܘܐܚܹܪ̄ܢܹܐ: ܟܲܕ ܓ̰ܵܪܒܝܼ ܗ̄ܘܵܘ ܠܹܗ: ܢܝܼܫܲܢܩܵܐ ܡ̣ܢ ܫܡܲܝܵܐ ܛܵܠܒܝܼ ܗ̄ܘܵܘ 17 ܡܸܢܹܗ. ܐܝܼܢܵܐ ܟܲܕ ܝܲܕܸܥ ܗ̄ܘܵܐ ܚܘܼܫܵܒ̣ܵܝ̈: ܐܡܸܪܹܐ ܐܸܠܵܝ: ܟܠ ܡܲܠܟܘܼܬܵܐ ܕܦܵܝܫܵܐ ܕܘܼܒܵܪ ܥܲܠ ܓܵܢܘܼܗ̇ ܒܸܬ ܚܵܪܒ̣ܵܐ: 18 ܘܒܲܝܬܵܐ (ܕܝܼܠܹܐ ܕܘܼܒܵܪ) ܥܲܠ ܒܲܝܬܵܐ: ܟܹܐ ܢܵܦܸܠ. ܘܐܸܢ ܣܵܛܵܢܵܐ ܥܲܠ ܓܵܢܹܗ ܦܸܫܠܹܐ ܕܘܼܒܵܪ: ܕܵܐܟ̣ܝܼ ܒܸܬ ܟܵܠܝܵܐ ܡܲܠܟܘܼܬܹܗ: ܣܵܒܵܒ ܕܒܹܐܡܵܪܵܐ ܝܬܘܿܢ ܒܒܥܸܠܙܒ̣ܘܿܒ̣ ܦܵܠܘܿܛܹܐ ܝܘܸܢ ܕܲܝܘܹ̈ܐ. 19 ܘܐܸܢ ܐܵܢܵܐ ܒܒܥܸܠܙܒ̣ܘܿܒ̣ ܦܲܠܘܿܛܹܐ ܝܘܸܢ ܕܲܝܘܹ̈ܐ: ܒܢܘܼܢܵܘ̈ܟ̣ܘܿܢ ܒܡܵܢܝܼ ܟܹܐ ܦܵܠܛܝܼ: ܣܵܒܵܒ ܕܐܵܗܵܐ ܐܵܢܝܼ ܒܸܬ ܗܵܘܝܼ ܐܸܠܵܘܟ̣ܘܿܢ 20 ܕܲܝܵܢܹ̈ܐ. ܐܝܼܢܵܐ ܐܸܢ ܒܸܨܒܥܵܐ ܕܐܲܠܵܗܵܐ ܦܵܠܘܿܛܹܐ ܝܘܸܢ ܕܲܝܘܹ̈ܐ: 21 ܒܲܣ [42] ܩܘܼܪܒܸܢܵܐ ܐܸܠܵܘܟ̣ܘܿܢ ܡܲܠܟܘܼܬܹܗ ܕܐܲܠܵܗܵܐ. ܐܝܼܡܲܢ ܕܙܲܪܒܵܢܵܐ ܟ̰ܘܼܟܒܸܢܵܐ ܢܵܛܸܪ ܕܵܪܬܹܗ: ܒܫܲܝܢܵܐ ܝܠܹܐ ܡܸܢܕܝܹܗ. 22 ܐܝܼܢܵܐ ܐܝܼܡܲܢ ܕܐܵܬܹܐ ܡ̇ܢ ܕܒܘܼܫ ܙܲܪܒܵܢܵܐ ܝܠܹܐ ܡܸܢܹܗ ܘܓ̣ܵܠܸܒ ܠܹܗ: ܟܠܹܗ ܟ̰ܲܟܹܗ ܟܹܐ ܫܵܩܸܠ: ܗ̇ܘ ܕܝܼܗ̄ܘܵܐ ܒܗܹܒ̣ܝܼ 23 ܥܲܠܘܼܗܝ: ܘܣܠܵܒܬܹܗ ܟܹܐ ܦܲܠܹܐ. ܡ̇ܢ ܕܠܵܐ ܗܵܘܹܐ ܥܲܡܝܼ ܠܕܲܪܩܘܼܒ̣ܠܝܼ ܝܠܹܐ: ܘܡ̇ܢ ܕܠܵܐ ܓ̰ܲܡܸܥ ܥܲܡܝܼ ܒܲܪܒܘܼܙܹܐ 24 ܟܹܐ ܒܲܪܒܸܙ. ܪܘܼܚܵܐ ܛܲܡܹܐܐ ܐܝܼܡܲܢ ܕܦܵܠܛܵܐ ܡ̣ܢ ܐܢܵܫܵܐ: ܟܹܐ ܚܵܕܪܵܐ ܒܕܘܼܟܵܢܹ̈ܐ ܕܡ̈ܝܼܵܐ ܠܲܝܬ ܒܝܼܵܝ: ܒܸܛܲܥܝܵܐ ܠܢܝܵܚܵܐ: ܘܟܲܕ ܠܵܐ ܡܵܫ̄ܟ̰ܚܵܐ: ܟܹܐ ܐܵܡܪܵܐ: ܒܸܬ ܕܵܝܪܵܢ ܠܒܲܝܬܝܼ ܡܐܲܝܟܵܐ 25 ܕܦܠܸܛܠܝܼ. ܘܟܲܕ ܐܵܬܝܵܐ: ܟܹܐ ܡܵܫ̄ܟ̰ܚܵܐ ܠܹܗ ܟܢܝܼܫܵܐ 26 ܘܣܘܼܩܠܵܐ. ܗ̇ܝܓܵܗ ܟܹܐ ܐܵܙܵܠ̄ܐ ܠܵܒܠܵܐ ܫܲܒܲܥ ܪ̈ܘܼܚܹܐ ܐܚܹܪ̄ܢܹܐ ܒܘܼܫ ܒܝܼܫܹ̈ܐ ܡ̣ܢ ܓܵܢܘܼܗ̇: ܘܟܹܐ ܐܵܘܪܝܼ ܘܥܵܡܪܝܼ ܬܵܡܵܐ: ܘܟܹܐ ܗܵܘܝܵܐ ܚܲܪܬܹܗ ܕܗ̇ܘ ܐܢܵܫܵܐ ܒܘܼܫ ܚܸܪܒܵܐ ܡ̣ܢ ܩܵܕ̄ܡܵܝܬܹܗ. 27 ܘܟܲܕ ܐܲܢܹܐ ܗܲܡܙܘܼܡܹܐ ܗ̄ܘܵܐ: ܡܘܼܪܸܡܠܵܐ ܚܕܵܐ ܒܲܟ̣ܬܵܐ ܩܵܠܘܼܗ̇ ܡ̣ܢ ܟܸܢܫܵܐ: ܘܐܡܸܪܵܐ ܐܸܠܹܗ: ܛܘܼܒ̣ܵܐ ܠܟܹܪ̄ܣܵܐ ܕܩܲܡ 28 ܛܵܥܢܵܐ ܠܘܼܟ: ܘܠܒܸܙܵܙܹ̈ܐ ܕܡܸܨܠܘܼܟ. ܐܵܡܸܪ ܗ̇ܘ: ܐܝܼܢܵܐ ܙܵܘܕܵܐ: ܛܘܼܒ̣ܵܐ ܠܐܵܢܝܼ ܕܫܲܡܥܝܼ ܗܹܡܸܙܡܵܢ ܕܐܲܠܵܗܵܐ ܘܢܵܛܪܝܼ ܠܵܗ̇. 29 ܘܟܲܕ ܒܸܓ̰ܡܲܥܝܵܐ ܗ̄ܘܵܘ ܟܸܢܫܹ̈ܐ: ܫܘܼܪܹܠܹܐ ܠܹܐܡܵܪܵܐ: ܐܵܗܵܐ ܐܘܼܓ̰ܵܓ̣ ܒܝܼܫܬܵܐ ܝܠܵܐ: ܢܝܼܫܲܢܩܵܐ ܒܸܒܲܥܝܵܐ ܝܠܵܐ: ܘܢܝܼܫܲܢܩܵܐ ܠܹܐ ܦܵܝܸܫ ܝܘܼܗ̄ܒ̣ܵܐ ܐܸܠܵܗ̇: ܫܒ̣ܘܿܩ ܡ̣ܢ ܢܝܼܫܲܢܩܹܗ 30 ܕܝܵܘܢܵܢ. ܣܵܒܵܒ ܕܵܐܟ̣ܝܼ ܕܗ̄ܘܹܠܹܐ ܝܵܘܢܵܢ ܢܝܼܫܲܢܩܵܐ ܠܢܝܼܢܘܵܝܹ̈ܐ: ܗܲܕܟ̣ܵܐ ܒܸܬ ܗܵܘܹܐ ܐܘܼܦ ܒܪܘܼܢܹܗ ܕܐܢܵܫܵܐ ܠܐܵܗܵܐ 31 ܐܘܼܓ̰ܵܓ̣. ܡܲܠܟܬܵܐ ܕܬܲܝܡܢܵܐ ܒܸܬ ܩܵܝܡܵܐ ܒܕܝܼܘܵܢ ܥܲܡ ܐܢܵܫܹ̈ܐ ܕܐܵܗܵܐ ܐܘܼܓ̰ܵܓ̣: ܘܒܸܬ ܥܵܒ̣ܕܵܐ ܠܗ̄ܘܿܢ ܓܘܼܢܗܟܵܪ: ܣܵܒܵܒ ܕܐܬܹܠܵܐ ܡ̣ܢ ܡܲܪ̈ܙܵܢܹܐ ܕܐܲܪܥܵܐ ܕܫܲܡܥܵܐ ܥܵܩܸܠܕܵܪܘܼܬܹܗ ܕܫܠܹܝܡܘܿܢ: ܘܗܵܐ: ܕܒܘܼܫ ܓܘܪܵܐ ܡ̣ܢ ܫܠܹܝܡܘܿܢ ܠܲܐܟ̣ܵܐ. 32 ܐܢܵܫܹ̈ܐ ܢܝܼܢܘܵܝܹ̈ܐ ܒܸܬ ܩܵܝܡܝܼ ܒܕܝܼܘܵܢ ܥܲܡ ܕܐܵܗܵܐ ܐܘܼܓ̰ܵܓ̣: ܘܒܸܬ ܥܵܒ̣ܕܝܼ ܠܵܗ̇ ܓܘܼܢܵܗܟܵܪ: ܣܵܒܵܒ ܕܬܘܼܘܸܒܠܘܿܢ ܒܟܵܪܘܿܙܘܼܬܹܗ ܕܝܵܘܢܵܢ: ܘܗܵܐ: ܕܒܘܼܫ ܓܘܼܪܵܐ ܡ̣ܢ ܝܵܘܢܵܢ ܠܲܐܟ̣ܵܐ. 33 ܐܢܵܫܵܐ ܠܹܐ ܬܵܦܹܐ ܫܪܵܝܵܐ ܘܡܲܬܸܒ̣ ܠܵܗ̇ [43] ܒܛܸܫܘܵܐ: ܝܲܢ ܬܚܘܿܬ ܣܲܐܬܵܐ: ܐܸܠܵܐ ܥܲܠ ܟ̰ܪܲܚܦܝܼ: ܕܐܵܢܝܼ ܕܐܵܘܪܝܼ ܚܵܙܝܼ 34 ܒܲܗܪܘܼܗ̇. ܫܪܵܝܵܐ ܕܦܲܓ̣ܪܵܐ ܥܲܝܢܘܼܟ ܝܼܠܵܐ: ܐܝܼܡܲܢ ܗܲܕܟ̣ܵܐ ܥܲܝܢܘܼܟ ܦܫܝܼܛܬܵܐ ܝܠܵܐ: ܐܘܼܦ ܟܠܹܗ ܦܲܓ̣ܪܘܼܟ ܒܲܗܪܵܢܵܐ ܝܠܹܐ. ܐܝܼܢܵܐ ܐܸܢ ܗܵܘܝܵܐ ܒܝܼܫܬܵܐ: ܘܐܘܼܦ ܦܲܓ̣ܪܘܿܟ ܚܘܼܒ̣ܝܵܢܵܐ ܝܠܹܐ. 35 ܗ̄ܘܝܼ ܗܸܫܝܵܪ ܗܲܕܟ̣ܵܐ ܕܒܲܗܪܵܐ ܕܒܝܼܘܼܟ ܠܵܐ ܗܵܘܹܐ ܚܘܼܒ̣ܝܵܐ. 36 ܐܸܢ ܗܲܕܟ̣ܵܐ ܟܠܹܗ ܦܲܓ̣ܪܘܿܟ ܒܲܗܪܵܢܵܐ ܝܠܹܐ: ܘܠܲܝܬ ܒܝܹܗ ܣܵܡܵܐ ܡܸܢܕܝܼ ܚܘܼܒ̣ܝܵܐ: ܒܸܬ ܗܵܘܹܐ ܟܠܹܗ ܒܲܗܪܵܢܵܐ: ܐܲܝܟ ܕܟܲܕ ܫܪܵܝܵܐ ܒܫܲܦ̮ܩܘܼܗ̇ ܟܹܐ ܒܲܗ̄ܪܸܢܵܐ ܠܘܼܟ. 37 ܘܟܲܕ ܗܲܡܙܘܼܡܹܐ ܗ̄ܘܵܐ: ܒܸܥܠܵܐ ܡܸܢܹܗ ܚܵܕ̄ ܦܪܝܼܫܵܐ ܕܐܵܟܸܠ ܗ̄ܘܵܐ ܫܵܪܘܼܬܵܐ ܠܟܸܣܠܹܗ: ܘܐܘܸܪܹܐ ܝܬܸܒ̣ܠܹܐ ܠܹܐܟ̣ܵܠܵܐ. 38 ܐܝܼܢܵܐ ܗ̇ܘ ܦܪܝܼܫܵܐ ܟܲܕ ܚܙܹܠܹܗ: ܥܘܼܓ̰ܸܒܠܹܐ ܕܩܵܕ̄ܡܵܝܬܵܐ 39 ܠܵܐ ܚܘܼܠܸܠܹܐ ܡ̣ܢ ܩܵܕ̄ܡ ܫܵܪܘܿܬܹܗ. ܐܝܼܢܵܐ ܐܡܸܪܹܐ ܐܸܠܹܗ ܡܵܪܲܢ: ܐܵܕܝܼܵܐ ܐܲܚܬܘܿܢ ܦܪ̈ܝܼܫܹܐ ܒܲܪܹܗ ܕܟܵܣܵܐ ܘܕܛܲܫܬ ܟܹܐ ܕܵܟ̣ܝܼܬܘܿܢ: ܐܝܼܢܵܐ ܓܵܘܵܘܟ̣ܘܿܢ ܡܸܠܝܵܐ ܝܠܹܐ [44] ܟ̰ܵܠܵܓ̰ܵܐ ܘܒܝܼܫܬܵܐ. 40 ܝܵܐ ܟܝܼܡ ܗܵܘܢܵܐ: ܠܹܐ ܗ̄ܘܵܐ ܡ̇ܢ ܕܥܒܸܕܠܹܐ ܠܒܲܪܝܝܼ ܐܘܼܦ 41 ܠܓܵܘܵܝܝܼ ܥܒܸܕܠܹܐ. ܐܝܼܢܵܐ ܡܸܢܕܝܼ ܕܐܝܼܬ ܗܲܒ̄ܠܘܿܢ ܠܹܗ ܒܐܸܪܘܵܢܵܐ: ܘܗܵܐ: ܟܠ ܡܸܢܕܝܼ ܕܸܟ̣ܝܵܐ ܝܠܹܐ ܐܸܠܵܘܟ̣ܘܿܢ. 42 ܐܸܠܵܐ ܘܵܝ ܐܸܠܵܘܟ̣ܘܿܢ ܦܪ̈ܝܼܫܹܐ: ܣܵܒܵܒ ܕܟܹܐ ܝܵܗܒ̣ܝܼܬܘܿܢ ܡܲܥܣܵܪܹ̈ܐ ܢܲܥܢܵܐ ܘܦܸܓ̣ܢܵܐ ܘܟܠ ܝܸܩܢܵܐ: ܘܟܹܐ ܥܵܒ̣ܪܝܼܬܘܿܢ ܥܲܠ ܕܝܼܘܵܢ ܘܥܲܠ ܚܘܼܒܵܐ ܕܐܲܠܵܗܵܐ. ܐܝܼܢܵܐ ܐܲܢܹܐ ܘܵܓ̰ܸܒ ܝܼܗ̄ܘܵܐ 43 ܕܥܵܒ̣ܕܝܼܬܘܿܢ ܗ̄ܘܵܘ: ܘܐܵܢܝܼ ܠܵܐ ܫܵܒ̣ܩܝܼܬܘܿܢ ܗ̄ܘܵܘ. ܘܵܝ ܐܸܠܵܘܟ̣ܘܿܢ ܦܪ̈ܝܼܫܹܐ: ܣܵܒܵܒ ܕܟܹܐ ܡܲܚܸܒܝܼܬܘܿܢ ܪܹܫܵܐ ܕܡܵܘܬܒܹ̈ܐ 44 ܒܟܢܘܼܫܝܵܬܹ̈ܐ: ܘܫܠܵܡܵܐ ܒܫܘܼܩܹ̈ܐ. ܘܵܝ ܐܸܠܵܘܟ̣ܘܿܢ: ܣܵܒܵܒ ܐܲܝܟ ܩܲܒ̣ܪܹ̈ܐ ܝܬܘܿܢ ܕܠܹܐ ܝܢܵܐ ܡܵܥܠܘܿܡ: ܘܐܢܵܫܹ̈ܐ ܟܹܐ ܚܵܕܪܝܼ ܥܲܠܵܝ ܘܠܹܐ ܝܲܕܥܝܼ. 45 ܘܓ̰ܘܼܘܸܒܠܹܐ ܚܵܕ̄ ܡ̣ܢ ܫܲܪܥܲܬܟܵܪܹ̈ܐ ܘܐܡܸܪܹܐ ܐܸܠܹܗ: ܡܲܠܦܵܢܵܐ: ܟܲܕ ܐܲܢܹܐ ܒܹܐܡܵܪܵܐ ܝܘܸܬ ܘܐܘܼܦ ܐܸܠܲܢ ܡܲܒܨܘܪܹܐ 46 ܝܘܸܬ. ܘܐܡܸܪܹܐ: ܐܘܼܦ ܐܸܠܵܘܟ̣ܘܿܢ ܫܲܪܥܲܬܟܵܪܹ̈ܐ ܘܵܝ: ܣܵܒܵܒ ܕܟܹܐ ܡܲܛܥܸܢܝܼܬܘܿܢ ܠܒܢܲܝ̈ܢܵܫܵܐ ܟܵܪ̈ܵܬܹܐ ܝܵܩܘܿܪܹ̈ܐ: ܘܐܲܚܬܘܿܢ ܒܚܕܵܐ 47 ܡ̣ܢ ܨܸܒܥܵܬܵܘ̈ܟ̣ܘܿܢ ܠܹܐ ܕܵܩܪܝܼܬܘܿܢ ܒܐܵܢܝܼ ܟܵܪ̈ܵܬܹܐ. ܘܵܝ ܐܸܠܵܘܟ̣ܘܿܢ: ܣܵܒܵܒ ܕܟܹܐ ܒܵܢܝܼܬܘܿܢ ܩܲܒ̣ܪ̈ܵܘܵܬܹܐ ܕܢܒ̣̈ܝܹܐ: 48 ܕܒܵܒܵܘܵܬܵܘ̈ܟ̣ܘܿܢ. ܗܲܕܟ̣ܵܐ ܣܵܗܕܹ̈ܐ ܝܬܘܿܢ ܘܪܵܙܝܼ ܝܬܘܿܢ ܒܦܘܼܠܚܵܢܹ̈ܐ ܕܒܵܒܵܘܵܬܵܘ̈ܟ̣ܘܿܢ: ܕܐܵܢܝܼ ܩܛܝܼܠܵܝܠܘܿܢ: 49 ܘܐܲܚܬܘܿܢ ܟܹܐ ܒܵܢܝܼܬܘܿܢ ܩܲܒ̣ܪ̈ܵܘܵܬܵܝ. ܣܵܒܵܒ ܕܐܵܗܵܐ ܐܘܼܦ ܥܵܩܸܠܕܵܪܘܼܬܵܐ ܕܐܲܠܵܗܵܐ ܐܡܸܪܵܐ: ܐܵܢܵܐ ܒܸܬ ܫܵܕܪܵܢ ܠܟܸܣܠܵܝ ܢܒ̣̈ܝܹܐ ܘܫܠܝܼܚܹ̈ܐ: ܡܸܢܵܝ ܒܸܬ ܛܵܪܕܝܼ ܘܒܸܬ ܩܵܛܠܝܼ. 50 ܕܦܵܝܸܫ ܛܠܝܼܒܵܐ ܕܸܡܵܐ ܕܟܠܵܝ ܢܒ̣̈ܝܹܐ: ܕܦܸܫܠܹܐ ܫܘܼܦܟ̣ܵܐ ܡ̣ܢ 51 ܒܸܢܝܲܬ ܕܥܵܠܡܵܐ: ܡܐܵܗܵܐ ܐܘܼܓ̰ܵܓ̣. ܡ̣ܢ ܕܸܡܹܗ ܕܗܵܒܹܝܠ ܗܲܠ ܕܸܡܹܗ ܕܙܲܟܪܝܵܐ: ܗ̇ܘ ܕܦܸܫܠܹܐ ܩܛܝܼܠܵܐ ܒܹܝܠ ܗܲܝܟܠܵܐ ܠܡܲܕܒܚܵܐ: ܗܹܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܦܵܝܸܫ 52 ܛܠܝܼܒܵܐ ܡܐܵܗܵܐ ܐܘܼܓ̰ܵܓ̣. ܘܵܝ ܐܸܠܵܘܟ̣ܘܿܢ ܫܲܪܥܲܬܟܵܪܹ̈ܐ: ܕܫܩܸܠܵܘܟ̣ܘܿܢ ܩܕܝܼ̈ܠܹܐ ܕܝܕܸܥܬܵܐ: ܐܲܚܬܘܿܢ ܠܵܐ ܐܘܸܪܵܘܟ̣ܘܿܢ: ܘܠܵܐܢܝܼ ܕܒܹܐܘܵܪܵܐ ܗ̄ܘܵܘ ܡܘܼܟܠܹܠܵܘܟ̣ܘܿܢ. 53 ܘܟܲܕ ܦܠܸܛܠܹܐ ܡ̣ܢ ܬܵܡܵܐ: ܫܘܼܪܹܠܘܿܢ ܣܵܦܪܹ̈ܐ ܘܦܪ̈ܝܼܫܹܐ ܠܸܚܠܵܨܘܼܗܝ ܪܵܒܵܐ: ܘܠܦܵܠܘܿܛܹܐ ܡܸܢܹܗ ܚܲܒܪܵܐ ܥܲܠ ܪܵܒܵܐ 54 ܡܸܢܕܝܵܢܹ̈ܐ. ܘܥܵܒ̣ܕܝܼ ܗ̄ܘܵܘ ܒܘܼܨܵܐ ܐܸܠܹܗ: ܟܲܕ ܒܲܥܝܝܼ ܗ̄ܘܵܘ ܠܸܕܒ̣ܵܩܵܐ ܡܸܢܕܝܼ ܡ̣ܢ ܦܘܼܡܹܗ. [45]

ܩܦܠܐܘܢ: ܝܒ

1 ܒܗ̇ܝ ܥܕܵܢܵܐ: ܟܲܕ ܓ̰ܡܸܥܠܘܿܢ ܪܸ̈ܒܘܵܬܹܐ ܕܟܸܢܫܹ̈ܐ ܪܵܒܵܐ: ܕܵܐܟ̣ܝܼ ܕܕܵܝܫܝܼ ܗ̄ܘܵܘ ܚܵܕ̄ ܠܗ̇ܘ ܐܚܹܪ̄ܢܵܐ: ܫܘܼܪܹܠܹܐ ܠܹܐܡܵܪܵܐ ܠܬܲܠܡܝܼܕܘܼ̈ܗܝ ܩܵܕ̄ܡܵܝܬܵܐ: ܗ̄ܘܹܡܘܿܢ ܗܸܫܝܵܪ ܒܓܵܢܵܘܟ̣ܘܿܢ ܡ̣ܢ ܚܡܝܼܪܵܐ ܕܦܪ̈ܝܼܫܹܐ: ܕܝܼܠܹܐ ܡܲܣܲܒ̣ ܒܐܲܦܹ̈ܐ. 2 ܐܝܼܢܵܐ ܠܝܬ ܡܸܢܕܝܼ ܟܘܼܣܝܵܐ ܕܠܵܐ ܦܵܝܸܫ ܓܸܠܝܵܐ: ܘܠܵܐ 3 ܕܛܘܼܫܝܵܐ ܕܠܵܐ ܦܵܝܸܫ ܝܕܸܥܝܵܐ. ܣܵܒܵܒ ܟܠ ܕܒܚܘܼܒ̣ܝܵܐ ܐܡܸܪܵܘܟ̣ܘܿܢ: ܒܒܲܗܪܵܐ ܒܸܬ ܦܵܝܸܫ ܫܸܡܥܝܵܐ: ܘܡܸܢܕܝܼ ܕܒܟܘܼܚܝܵܬܹ̈ܐ ܒܢܵܬܵܐ ܦܘܼܬܦܸܬܠܵܘܟ̣ܘܿܢ: ܥܲܠ ܐܓܵܪ̈ܵܘܵܬܹܐ ܒܸܬ 4 ܦܵܝܸܫ ܡܘܼܟܪܸܙܵܐ. ܘܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ ܕܵܘܣܬܝܼ̈: ܠܵܐ ܙܵܕܥܝܼܬܘܿܢ ܡ̣ܢ ܕܐܵܢܝܼ ܕܩܵܛܠܝܼ ܦܲܓ̣ܪܵܐ: ܘܡ̣ܢ ܒܵܬ̄ܪ ܗܵܕܵܐ 5 ܠܲܝܬ ܠܗ̄ܘܿܢ ܡܸܢܕܝܼ ܙܵܘܕܵܐ ܠܸܥܒ̣ܵܕܵܐ. ܐܝܼܢܵܐ ܒܸܬ ܡܲܚܙܸܢܵܘܟ̣ܘܿܢ ܡ̣ܢ ܡ̇ܢ ܙܵܕܥܝܼܬܘܿܢ: ܙܕܸܥܡܘܿܢ ܡ̣ܢ ܕܗ̇ܘ ܕܡ̣ܢ ܒܵܬ̄ܪ ܕܩܵܛܸܠ ܐܝܼܬ ܠܹܗ ܗܘܼܟܡܵܐ ܠܸܕܪܵܝܵܐ ܒܓܹܗܲܢܵܐ: ܗܹܐ: ܒܹܐܡܵܪܵܐ ܝܘܸܢ 6 ܐܸܠܵܘܟ̣ܘܿܢ: ܡ̣ܢ ܕܗ̇ܘ ܙܕܸܥܡܘܿܢ. ܚܲܡܸܫ ܨܸܦܪܹ̈ܐ ܠܹܐ ܦܵܝܫܝܼ ܙܘܼܒܢܹܐ ܒܬܪܲܝ ܫܵܗ̈ܝܹܐ: ܘܚܕܵܐ ܡܸܢܵܝ ܠܹܐ ܝܠܵܐ ܢܫܝܼܬܵܐ ܩܵܕ̄ܡ 7 ܐܲܠܵܗܵܐ. ܐܸܠܵܐ ܐܘܼܦ ܡܸܙܝܵܬܹ̈ܐ ܕܪܹܫܵܘܟ̣ܘܿܢ ܟܠܵܝ ܡܸܢܝܹܐ ܝܢܵܐ. ܠܵܐ ܗܲܕܟ̣ܵܐ ܙܵܕܥܝܼܬܘܿܢ: ܡ̣ܢ ܪܵܒܵܐ ܨܸܦܪܹ̈ܐ ܙܵܘܕܵܐ ܝܬܘܿܢ. 8 ܘܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܕܡܵܘܕܹܐ ܒܝܼܝܼ ܩܵܕ̄ܡ ܒܢܲܝ̈ܢܵܫܵܐ: ܐܘܼܦ ܒܪܘܼܢܹܗ ܕܐܢܵܫܵܐ ܒܸܬ ܡܵܘܕܹܐ ܒܝܹܗ ܩܵܕ̄ܡ 9 ܡܲܠܲܐܟܹ̈ܐ ܕܐܲܠܵܗܹ̈ܐ. ܐܝܼܢܵܐ ܡ̣ܢ ܕܣܵܪܸܒ̣ ܠܝܼ ܩܵܕ̄ܡ ܒܢܲܝ̈ܢܵܫܵܐ: 10 ܒܸܬ ܦܵܝܸܫ ܣܪܝܼܒ̣ܵܐ ܩܵܕ̄ܡ ܡܲܠܲܐܟܹ̈ܐ ܕܐܲܠܵܗܵܐ. ܘܟܠ ܕܐܵܡܸܪ ܗܹܡܸܙܡܵܢ ܥܲܠ ܒܪܘܼܢܹܗ ܕܐܢܵܫܵܐ: ܒܸܬ ܦܵܝܸܫ ܫܒ̣ܝܼܩܵܐ ܐܸܠܹܗ: ܐܝܼܢܵܐ ܡ̇ܢ ܕܥܲܠ ܪܘܼܚܵܐ ܕܩܘܼܕܫܵܐ ܓܵܕܸܦ: ܠܹܐ ܦܵܝܸܫ 11 ܫܒ̣ܝܼܩܵܐ ܐܸܠܹܗ. ܘܐܝܼܡܲܢ ܕܡܲܝܬ̄ܝܝܼ ܠܵܘܟ̣ܘܿܢ ܠܟܢܘܼܫܝܵܬܹ̈ܐ ܩܵܕ̄ܡ ܪܹ̈ܫܵܢܹܐ ܘܗܵܟܝܼܡܹ̈ܐ: ܠܵܐ ܐܵܟ̣ܠܝܼܬܘܿܢ ܚܲܡ ܕܵܐܟ̣ܝܼ ܝܲܢ ܡܘܼܕܝܼ ܒܸܬ ܓ̰ܲܘܸܒܝܼܬܘܿܢ: ܝܲܢ ܡܘܼܕܝܼ ܒܸܬ ܐܵܡܪܝܼܬܘܿܢ. 12 ܣܵܒܵܒ ܪܘܼܚܵܐ ܕܩܘܼܕܫܵܐ ܒܸܬ ܡܵܠܸܦ ܠܵܘܟ̣ܘܿܢ ܗܲܪ ܒܗ̇ܝ ܣܵܥܲܬ ܡܸܢܕܝܼ ܕܘܵܓ̰ܸܒ ܝܼܠܹܐ ܕܐܵܡܪܝܼܬܘܿܢ. 13 ܘܐܡܸܪܹܐ ܐܸܠܹܗ ܐܢܵܫܵܐ ܡ̣ܢ ܟܸܢܫܵܐ: ܡܲܠܦܵܢܵܐ: ܐܡܘܿܪ 14 ܠܐܵܚܘܿܢܝܼ ܕܦܵܠܹܐ ܥܲܡܝܼ ܡܝܼܪܲܬܓܵܪܘܼܬܵܐ. ܐܝܼܢܵܐ ܐܡܸܪܹܐ ܐܸܠܹܗ: ܐܢܵܫܵܐ: ܡܵܢܝܼ ܩܲܡ ܡܲܩܸܡ ܠܝܼ ܥܲܠܵܘܟ̣ܘܿܢ ܕܲܝܵܢܵܐ ܘܦܲܠܝܼܵܢܵܐ. 15 ܘܐܡܸܪܹܐ ܐܸܠܵܝ: ܚܙܹܡܘܿܢ ܘܗ̄ܘܹܡܘܿܢ ܗܸܫܝܵܪ ܡ̣ܢ ܟܠܵܗ̇ ܛܲܡܲܥܟܵܪܘܼܬܵܐ: ܣܵܒܵܒ ܠܵܐ ܒܙܵܘܕܘܿܢܝܘܼܬܵܐ ܕܡܵܐܠ ܠܐܢܵܫܵܐ 16 ܝܼܢܵܐ ܚܲܝܘܼ̈ܗܝ. ܘܗܘܼܡܙܸܡܠܹܐ ܘܐܡܸܪܹܐ ܡܵܣܵܠܵܐ ܐܸܠܵܝ: ܚܵܕ̄ ܐܢܵܫܵܐ ܕܵܘܠܲܬܡܲܢܕ ܡܘܼܬ̄ܝܹܠܵܐ ܐܸܠܹܗ ܐܲܪܥܹܗ ܗܵܨܝܼ̈ܠܹܐ ܪܵܒܵܐ. 17 ܘܚܫܸܒ̣ܠܹܐ ܒܓܵܢܹܗ ܘܐܡܸܪܹܐ: ܡܘܼܕܝܼ ܥܵܒ̣ܕܸܢ: ܣܵܒܵܒ ܠܲܝܬ 18 ܠܝܼ ܐܲܝܟܵܐ ܕܓ̰ܲܡܥܸܢ ܗܵܨܝܼܠܝܼ̈. ܘܐܡܸܪܹܐ: ܐܵܗܵܐ ܒܸܬ ܥܵܒ̣ܕܸܢ: ܒܸܬ ܣܵܬܪܸܢ ܐܲܢܒܵܪ̈ܝܼ: ܘܒܸܬ ܒܵܢܸܢ ܕܒܘܼܫ ܓܘܼܪܹ̈ܐ: ܘܒܸܬ 19 ܓ̰ܲܡܥܸܢ ܬܵܡܵܐ ܟܠܵܗ̇ ܕܲܚܠܝܼ ܘܡܸܢܕܝܼܝܼ̈. ܘܒܸܬ ܐܵܡܪܸܢ ܠܓܵܢܝܼ: ܓܵܢܝܼ: ܐܝܼܬ ܠܵܟ̣ܝ ܪܵܒܵܐ ܡܸܢܕܝܵܢܹ̈ܐ: ܕܡܘܼܬܒ̣ܵܐ ܝܢܵܐ ܩܵܐ ܪܵܒܵܐ ܫܸܢܹ̈ܐ: ܦܘܼܡܝ ܢܝܼܚܬܵܐ: ܐܟ̣ܘܿܠܝ: ܫܬܝܼ: ܥܒ̣ܘܿܕܝ 20 ܒܘܼܣܵܡܵܐ. ܐܝܼܢܵܐ ܐܡܸܪܹܐ ܐܸܠܹܗ ܐܲܠܵܗܵܐ ܐܲܝ ܟܝܼܡ ܗܵܘܢܵܐ: ܒܐܵܗܵܐ ܠܲܝܠܹܐ ܓܵܢܘܼܟ ܒܸܬ ܛܵܠܒܝܼ ܠܵܗ̇ ܡܸܢܘܼܟ: ܘܐܲܢܹܐ 21 ܕܗܘܼܕܸܪܘܿܟ: ܠܡܵܢܝܼ ܒܸܬ ܗܵܘܝܼ. ܗܲܕܟ̣ܵܐ ܝܠܹܐ ܡ̇ܢ ܕܡܲܬܸܒ̣ ܠܓܵܢܹܗ ܚܲܙܝܼܢܹ̈ܐ: ܘܒܲܐܠܵܗܵܐ ܠܹܐ ܝܠܹܐ ܕܵܘܠܲܬܡܲܢܕ. 22 ܘܐܡܸܪܹܐ ܠܬܲܠܡܝܼܕܘܼ̈ܗܝ: ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܵܐ ܐܵܟ̣ܠܝܼܬܘܿܢ ܚܲܡ ܠܓܵܢܵܘܟ̣ܘܿܢ: ܡܘܼܕܝܼ ܐܵܟ̣ܠܝܼܬܘܿܢ: ܘܠܵܐ ܠܦܲܓ̣ܪ̈ܵܘܟ̣ܘܿܢ: ܡܘܼܕܝܼ ܠܵܒ̣ܫܝܼܬܘܿܢ. 23 ܣܵܒܵܒ ܓܵܢܵܐ ܙܵܘܕܵܐ ܝܠܵܐ ܡ̣ܢ ܡܹܐܟ̣ܘܼܠܬܵܐ ܘܦܲܓ̣ܪܵܐ ܡ̣ܢ ܠܒܸܫܬܵܐ. 24 ܚܘܼܪܘܿܢ ܒܢܲܥܒܹ̈ܐ: ܕܠܹܐ ܙܲܪܥܝܼ: ܘܠܹܐ ܚܵܨܕܝܼ: ܘܠܲܝܬ ܠܗ̄ܘܿܢ ܟܘܼܚܝܼܵܬܹ̈ܐ ܝܲܢ ܐܲܢܒܵܪܹ̈ܐ: ܘܐܲܠܵܗܵܐ ܟܹܐ ܬܲܪܣܹܐ ܠܗ̄ܘܿܢ. ܟܡܵܐ 25 ܐܲܚܬܘܿܢ ܙܵܘܕܵܐ ܝܬܘܿܢ ܡ̣ܢ ܛܲܝܪܹ̈ܐ. ܐܝܼܢܵܐ ܐܲܝܢܝܼ ܡܸܢܵܘܟ̣ܘܿܢ ܟܲܕ ܐܵܟܸܠ ܚܲܡ ܟܹܐ ܡܵܨܹܐ ܠܡܲܙܝܘܼܕܹܐ ܥܲܠ ܩܘܼܡܬܹܗ ܚܕܵܐ 26 ܝܲܡܝܼܢܵܐ. ܘܐܸܢ ܗܲܕܟ̣ܵܐ ܐܘܼܦ ܙܥܘܿܪܬܵܐ ܠܹܐ ܡܵܨܝܼܬܘܿܢ: ܩܵܡܘܿܕܝܼ 27 ܥܲܠ ܡܸܢܕܝܼ ܐܚܹܪ̄ܢܵܐ ܒܹܐܟ̣ܵܠܵܐ ܝܬܘܿܢ ܚܲܡ. ܚܘܼܪܘܿܢ ܒܫܘܼܫܲܢܹ̈ܐ ܕܵܐܟ̣ܝܼ ܟܹܐ ܓܲܪܘܸܣܝܼ: ܠܹܐ ܓ̰ܲܗ̄ܝܝܼ: ܘܠܹܐ ܥܵܙܠܝܼ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܘܼܦ ܫܠܹܝܡܘܿܢ ܒܟܠܹܗ 28 ܚܸܩܪܹܗ ܠܹܐ ܗ̄ܘܵܐ ܠܒ̣ܝܼܫܵܐ ܐܲܝܟ ܚܲܕ̄ ܡ̣ܢ ܕܐܲܢܹܐ. ܐܝܼܢܵܐ ܐܸܢ ܠܓܹܠܵܐ ܕܐܸܕܝܘܼ ܓܵܘ ܚܲܩܠܵܐ ܝܠܹܐ: ܘܒܩܵܝܕܲܡܬܵܐ ܟܹܐ ܦܵܝܸܫ ܕܸܪܝܵܐ ܓܵܘ ܬܵܢܘܿܪܵܐ: ܐܲܠܵܗܵܐ ܗܲܕܟ̣ܵܐ ܟܹܐ ܡܲܠܒܸܫ: ܟܡܵܐ ܙܵܘܕܵܐ 29 ܐܸܠܵܘܟ̣ܘܿܢ: ܝܵܐ ܟܝܼܡ ܗܲܝܡܵܢܘܼܬܵܐ. ܘܐܲܚܬܘܿܢ ܠܵܐ ܒܲܥܝܝܼܬܘܿܢ ܡܘܼܕܝܼ ܐܵܟ̣ܠܝܼܬܘܿܢ: ܘܡܘܼܕܝܼ ܫܵܬܝܼܬܘܿܢ: ܘܠܵܐ ܒܵܕܹܐ 30 ܚܝܵܠܵܘܟ̣ܘܿܢ. ܣܵܒܵܒ ܐܲܢܹܐ ܟܠܵܝ ܛܵܝܸܦܹ̈ܐ ܕܥܵܠܡܵܐ ܟܹܐ ܒܲܥܝܝܼ ܠܗ̄ܘܿܢ: ܐܝܼܢܵܐ ܒܵܒܵܘܟ̣ܘܿܢ ܟܹܐ ܝܲܕܸܥ ܕܐܸܠܵܘܟ̣ܘܿܢ ܠܵܙܸܡ ܝܼܢܵܐ 31 ܐܲܢܹܐ. ܐܝܼܢܵܐ ܒܸܥܡܘܿܢ ܡܲܠܟܘܼܬܹܗ ܕܐܲܠܵܗܵܐ: ܘܐܲܢܹܐ ܟܠܵܝ ܒܸܬ 32 ܦܵܝܫܝܼ ܡܘܼܙܝܸܕܹܐ ܐܸܠܵܘܟ̣ܘܿܢ. ܠܵܐ ܙܵܕܥܸܬ: ܦܸܣܩܵܐ ܙܥܘܿܪܵܐ: ܣܵܒܵܒ ܕܒܣܸܡܠܵܐ ܠܹܗ ܒܵܒܵܘܟ̣ܘܿܢ ܕܝܵܗ̄ܒܸܠ ܠܵܘܟ̣ܘܿܢ 33 ܡܲܠܟܘܼܬܵܐ. ܙܵܒܢܘܿܢ ܡܸܢܕܝܼܵܘܟ̣ܘܿܢ: ܘܗܲܒ̄ܠܘܿܢ ܐܸܪܘܵܢܵܐ: ܬܵܪܨܘܿܢ ܠܵܘܟ̣ܘܿܢ ܟܸܣܝܵܬܹ̈ܐ ܕܠܹܐ ܒܵܠܝܼ: ܘܚܲܙܝܼܢܵܐ ܕܠܹܐ ܬܵܝܡܵܐ ܒܫܡܲܝܵܐ: ܐܲܝܟܵܐ ܕܓܹܢܵܒ̣ܵܐ ܠܹܐ [46] ܩܲܪܒܸܢ: ܘܓ̰ܲܢܓ ܠܹܐ ܡܲܚܪܸܒ̣. 34 ܣܵܒܵܒ ܐܲܝܟܵܐ ܕܝܼܠܵܐ ܚܲܙܝܼܢܵܘܟ̣ܘܿܢ: ܬܵܡܵܐ ܒܸܬ ܗܵܘܹܐ ܐܘܼܦ ܠܸܒܵܘܟ̣ܘܿܢ. 35 ܗܵܘܝܼ ܐܣܝܼܪܹܐ ܚܵܨܵܘ̈ܟ̣ܘܿܢ: ܘܒܲܗ̄ܪܘܼܢܹܐ ܫܪ̈ܵܝܵܘܟ̣ܘܿܢ. 36 ܘܗ̄ܘܹܡܘܿܢ ܒܸܕܡܵܝܵܐ ܠܐܢܵܫܹ̈ܐ ܕܣܵܦܪܝܼ ܠܐܵܓ̣ܵܝܵܝ: ܐܝܼܡܲܢ ܕܕܵܝܸܪ ܡ̣ܢ ܒܹܝܬ ܚܠܘܼܠܵܐ: ܕܗ̇ܝ ܥܕܵܢܵܐ ܕܐܵܬܹܐ ܘܬܲܩܬܸܩ: ܕܲܪܣܵܥܲܬ 37 ܦܵܬܚܝܼ ܐܸܠܹܗ. ܛܘܼܒ̣ܵܐ ܠܐܵܢܝܼ ܪܹ̈ܓܵܘܵܬܹܐ: ܐܲܝܢܝܼ ܕܐܵܬܹܐ ܐܵܓ̣ܵܝܵܝ ܘܡܵܫ̄ܟ̰ܸܚ ܠܗ̄ܘܿܢ ܪܥܝܼܫܹܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܐܵܣܸܪ ܚܵܨܹܗ: ܘܒܸܬ ܡܲܬܝܸܒ̣ ܠܗ̄ܘܿܢ: ܘܒܸܬ 38 ܐܵܬܹܐ ܘܥܵܒܸܕ ܠܗ̄ܘܿܢ ܚܸܠܡܲܬ. ܘܐܸܢ ܐܵܬܹܐ ܒܒܲܕܠܵܐ ܕܬܪܲܝ: ܝܲܢ ܕܬܠܵܬ̄ܐ: ܘܡܵܫ̄ܟ̰ܸܚ ܗܲܕܟ̣ܵܐ: ܛܘܼܒ̣ܵܐ ܠܐܵܢܝܼ 39 ܪܹ̈ܓܵܘܵܬܹܐ. ܐܝܼܢܵܐ ܐܵܗܵܐ ܝܕܸܥܡܘܿܢ: ܕܐܸܢ ܝܲܕܸܥ ܗ̄ܘܵܐ ܡܵܪܹܐ ܒܲܝܬܵܐ ܒܐܲܝܢܝܼ ܣܵܥܲܬ ܐܵܬܹܐ ܗ̄ܘܵܐ ܓܹܢܵܒ̣ܵܐ: ܒܸܬ ܦܵܝܸܫ ܗ̄ܘܵܐ 40 ܪܥܝܼܫܵܐ: ܘܠܹܐ ܫܵܒܸܩ ܗ̄ܘܵܐ ܕܗܵܘܹܐ ܒܸܙܥܝܵܐ ܒܲܝܬܹܗ. ܐܘܼܦ ܐܲܚܬܘܿܢ ܗܲܕܟ̣ܵܐ ܗ̄ܘܹܡܘܿܢ ܗܵܙܸܪ: ܣܵܒܵܒ ܕܒܗ̇ܝ ܣܵܥܲܬ ܕܠܹܐ ܝܬܘܿܢ ܒܸܚܫܵܒ̣ܵܐ ܒܹܐܬܵܝܵܐ ܝܠܹܐ ܒܪܘܼܢܹܗ ܕܐܢܵܫܵܐ. 41 ܘܐܡܸܪܹܐ ܐܸܠܹܗ ܟܹܐܦܵܐ: ܡܵܪܲܢ: ܐܸܠܲܢ ܒܹܐܡܵܪܵܐ ܝܘܸܬ ܠܐܵܗܵܐ 42 ܡܵܣܵܠܵܐ ܝܲܢ ܐܘܼܦ ܠܟܠ ܐܢܵܫܵܐ. ܘܐܡܸܪܹܐ ܐܸܠܹܗ ܡܵܪܲܢ: ܒܲܣ ܡܵܢܝܼ ܝܠܹܐ ܢܵܙܝܪ ܡܗܘܼܡܢܵܐ ܘܥܵܩܸܠܕܵܪ: ܕܡܲܩܸܡ ܠܹܗ ܐܵܓ̣ܵܝܹܗ 43 ܥܲܠ ܚܸܠܡܲܬܹܗ: ܕܝܵܗ̄ܒܸܠ ܡܹܐܟ̣ܘܼܠܬܵܐ ܒܙܲܒ̣ܢܵܗ̇. ܛܘܼܒ̣ܵܐ ܠܗ̇ܘ ܪܹܓܵܐ ܕܟܲܕ ܐܵܬܹܐ ܐܵܓ̣ܵܝܹܗ ܡܵܫ̄ܟ̰ܸܚ ܠܹܗ ܒܸܥܒ̣ܵܕܵܐ 44 ܗܲܕܟ̣ܵܐ. ܒܬܪܘܼܨܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ. ܕܒܸܬ ܡܲܬܸܒ̣ 45 ܠܹܗ ܥܲܠ ܟܠܹܗ ܡܸܢܕܝܹܗ. ܐܝܼܢܵܐ ܐܸܢ ܐܵܡܸܪ ܗ̇ܘ ܪܹܓܵܐ ܒܠܸܒܹܗ: ܐܵܓ̣ܵܝܝܼ ܥܲܪܩܘܼܠܹܐ ܝܠܹܐ ܠܹܐܬܵܝܵܐ: ܘܫܵܪܹܐ ܠܸܡܚܵܝܵܐ ܠܪܹ̈ܓܵܘܵܬܹܐ ܘܠܚܹܕܲܡܝܵܬܹ̈ܐ: ܘܠܹܐܟ̣ܵܠܵܐ ܘܠܸܫܬܵܝܵܐ ܘܠܸܪܘܵܝܵܐ. 46 ܒܸܬ ܐܵܬܹܐ ܐܵܓ̣ܵܝܹܗ ܕܗ̇ܘ ܪܹܓܵܐ ܒܝܘܿܡܵܐ ܕܠܹܐ ܚܵܫܸܒ̣: ܘܒܣܵܥܲܬ ܕܠܹܐ ܝܲܕܸܥ: ܘܒܸܬ ܦܲܠܹܐ ܠܹܗ ܠܬܪܲܝ: ܘܡܲܬܸܒ̣ ܣܵܡܹܗ ܥܲܡ 47 ܕܐܵܢܝܼ ܕܠܹܐ ܝܢܵܐ ܡܗܘܼܡܢܹ̈ܐ. ܘܪܹܓܵܐ ܐܲܝܢܝܼ ܕܝܕܸܥܠܹܐ ܪܸܙܵܝܵܐ ܕܐܵܓ̣ܵܝܹܗ: ܘܠܵܐ ܗܘܼܕܸܪܹܐ: ܘܠܵܐ ܥܒܸܕܠܹܐ ܐܲܝܟ ܪܸܙܵܝܹܗ: ܒܸܬ 48 ܦܵܝܸܫ ܡܸܚܝܵܐ ܪܵܒܵܐ. ܐܝܼܢܵܐ ܗ̇ܘ ܕܠܵܐ ܝܕܸܥܠܹܐ ܘܥܒܸܕܠܹܐ ܡܸܢܕܝܼ ܕܚܵܫܸܚ ܠܡܲܚܘܵܬܹ̈ܐ: ܒܸܬ ܦܵܝܸܫ ܡܸܚܝܵܐ ܚܲܟ̰ܵܐ. ܣܵܒܵܒ ܟܠ ܕܦܸܫܠܹܐ ܝܘܼܗ̄ܒ̣ܵܐ ܐܸܠܹܗ ܪܵܒܵܐ: ܪܵܒܵܐ ܒܸܬ ܦܵܝܸܫ ܛܠܝܼܒܵܐ ܡܸܢܹܗ: ܘܠܗ̇ܘ ܕܦܸܫܠܹܐ ܣܘܼܦܝܵܐ ܒܝܹܗ ܪܵܒܵܐ: ܒܘܼܫ ܙܵܘܕܵܐ ܒܸܬ ܛܵܠܒܝܼ ܒܐܝܼܕܹܗ. 49 ܢܘܼܪܵܐ ܐܬܹܠܝܼ ܕܕܵܪܸܢ ܒܐܲܪܥܵܐ: ܘܡܘܼܕܝܼ ܒܵܣܡܵܐ ܠܝܼ ܐܸܢ 50 ܡ̣ܢ ܩܵܕ̄ܡ ܐܵܕܝܼܵܐ ܗܵܘܹܐ ܬܸܦܝܵܐ. ܘܡܲܥܡܘܿܕܝܼܬܵܐ ܐܝܼܬ ܠܝܼ ܕܥܵܡܕܸܢ: ܘܟܡܵܐ ܡܘܼܠܝܸܨܵܐ ܝܘܸܢ ܗܲܠ ܕܦܵܝܫܵܐ ܬܘܼܡܸܡܬܵܐ. 51 ܒܸܚܫܵܒ̣ܵܐ ܝܬܘܿܢ ܕܐܬܹܠܝܼ ܕܫܲܝܢܵܐ ܕܵܪܸܢ ܒܐܲܪܥܵܐ: ܒܹܐܡܵܪܵܐ ܝܘܸܢ 52 ܐܸܠܵܘܟ̣ܘܿܢ: ܠܵܐ: ܐܸܠܵܐ ܦܲܠܝܵܬܹ̈ܐ. ܣܵܒܵܒ ܡ̣ܢ ܐܵܕܝܼܵܐ ܒܸܬ ܗܵܘܝܼ ܚܲܡܫܵܐ ܒܚܵܕ̄ ܒܲܝܬܵܐ ܦܘܼܠܝܹܐ: ܬܠܵܬ̄ܐ ܥܲܠ ܬܪܲܝ: ܘܬܪܲܝ 53 ܥܲܠ ܬܠܵܬ̄ܐ. ܒܸܬ ܦܵܝܸܫ ܦܘܼܠܝܼܵܐ: ܒܵܒܵܐ ܥܲܠ ܒܪܘܼܢܹܗ: ܘܒܪܘܼܢܵܐ ܥܲܠ ܒܵܒܹܗ: ܝܸܡܵܐ ܥܲܠ ܒܪܵܬܘܼܗ̇: ܘܒܪܵܬܵܐ ܥܲܠ ܝܸܡܘܼܗ̇: ܚܡܬܵܐ ܥܲܠ ܟܵܠܬܘܼܗ̇: ܘܟܵܠܬܵܐ ܥܲܠ ܚܡܵܬܘܼܗ̇. 54 ܘܐܡܸܪܹܐ ܠܟܸܢܫܹ̈ܐ: ܐܝܼܡܲܢ ܕܚܵܙܝܼܬܘܿܢ ܥܢܵܢܵܐ ܒܸܙܪܵܩܵܐ ܡ̣ܢ ܡܲܥ̱ܪܒ̣ܵܐ: ܕܲܪܣܵܥܲܬ ܟܹܐ ܐܵܡܪܝܼܬܘܿܢ: ܡܸܛܪܵܐ ܒܹܐܬܵܝܵܐ 55 ܝܠܵܐ: ܘܟܹܐ ܗܵܘܝܵܐ ܗܲܕܟ̣ܵܐ. ܘܐܝܼܡܲܢ ܦܵܘܚܵܐ ܕܬܲܝܡܢܵܐ ܡܵܚܹܐ: ܟܹܐ ܐܵܡܪܝܼܬܘܿܢ: ܚܸܡܵܐ ܒܸܬ ܗܵܘܹܐ: ܘܟܹܐ ܗܵܘܹܐ. 56 ܢܵܣܒܲܝ̈ ܒܐܲܦܹ̈ܐ: ܦܵܬܵܐ ܕܐܲܪܥܵܐ ܘܕܫܡܲܝܵܐ ܟܹܐ ܝܲܕܥܝܼܬܘܿܢ ܕܦܵܪܫܝܼܬܘܿܢ: ܐܝܼܢܵܐ ܐܵܗܵܐ ܙܲܒ̣ܢܵܐ ܕܵܐܟ̣ܝܼ ܠܹܐ ܝܬܘܿܢ 57 ܒܝܼܕܲܥܝܵܐ ܠܸܦܪܵܫܵܐ. ܐܝܼܢܵܐ ܩܵܡܘܿܕܝܼ ܐܘܼܦ ܡ̣ܢ ܓܵܢܵܘܟ̣ܘܿܢ 58 ܠܹܐ ܕܵܝܢܝܼܬܘܿܢ ܗܵܩܘܼܬܵܐ. ܣܵܒܵܒ ܐܝܼܡܲܢ ܕܐܵܙܸܠ̄ܬ ܥܲܡ ܡܘܼܪܸܥܝܼܘܼܟ ܠܟܸܣ ܗܵܟܝܼܡ: ܗܹܫ ܒܐܘܼܪܚܵܐ ܝܘܸܬ: ܗܲܒ̄ܠ ܬܹܐܓ̣ܘܼܪܬܵܐ ܕܦܵܪܩܸܬ ܡܸܢܹܗ: ܠܵܐ ܗ̄ܘܹܐ ܕܠܵܒܸܠ ܠܘܼܟ ܠܟܸܣ ܕܲܝܵܢܵܐ: ܘܕܲܝܵܢܵܐ ܣܵܦܹܐ ܠܘܼܟ ܠܦܲܪܵܫ: ܘܦܲܪܵܫ ܕܵܪܹܐ ܠܘܼܟ ܓܵܘ 59 ܒܹܝܬ ܐܲܣܝܼܪܹ̈ܐ. ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܹܐ ܦܵܠܛܸܬ ܡ̣ܢ ܬܵܡܵܐ: ܗܲܠ ܕܝܵܗ̄ܒܸܬ ܫܵܡܘܿܢܵܐ ܐܚܵܪܵܝܵܐ.

ܩܦܠܐܘܢ: ܝܓ

1 ܐܝܼܢܵܐ ܒܗ̇ܘ ܙܲܒ̣ܢܵܐ ܐܝܼܬ ܗ̄ܘܵܘ ܬܵܡܵܐ ܐܢܵܫܹ̈ܐ ܕܗܘܼܩܹܠܘܿܢ ܐܸܠܹܗ ܒܵܗ̄ܣ ܕܓܠܝܼܠܵܝܹ̈ܐ: ܐܵܢܝܼ ܕܦܝܠܵܛܘܿܣ ܚܒܸܛܠܹܐ ܕܸܡܵܝ 2 ܥܲܡ ܕܸܒ̣ܚܵܝ̈. ܘܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܒܸܚܫܵܒ̣ܵܐ ܝܬܘܿܢ ܕܐܵܢܝܼ ܓܠܝܼܠܵܝܹ̈ܐ ܚܲܛܵܝܹ̈ܐ ܗ̄ܘܵܘ ܙܵܘܕܵܐ ܡ̣ܢ ܟܠܵܝ ܓܠܝܼܠܵܝܹ̈ܐ: 3 ܕܗܲܕܟ̣ܵܐ ܐܬܹܠܵܐ ܒܪܹܫܵܝ. ܠܵܐ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܠܵܐ ܬܲܘܸܒܝܼܬܘܿܢ: ܐܘܼܦ ܟܠܵܘܟ̣ܘܿܢ ܗܲܕܟ̣ܵܐ ܒܸܬ 4 ܬܵܠܩܝܼܬܘܿܢ. ܝܲܢ ܐܵܢܝܼ ܬܡܵܢܸܥܣܲܪ ܕܢܦܸܠܹܐ ܥܲܠܵܝ ܒܘܼܪܓ̰ܵܐ ܒܫܝܼܠܘܿܚܵܐ: ܘܩܛܝܼܠܵܝܠܹܐ: ܒܸܚܫܵܒ̣ܵܐ ܝܬܘܿܢ ܕܚܲܛܵܝܹ̈ܐ ܗ̄ܘܵܘ 5 ܙܵܘܕܵܐ ܡ̣ܢ ܟܠܵܝ ܒܢܲܝ̈ܢܵܫܵܐ ܕܒܸܥܡܵܪܵܐ ܒܐܘܿܪܸܫܠܸܡ. ܠܵܐ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܠܵܐ ܬܲܘܸܒܝܼܬܘܿܢ: ܟܠܵܘܟ̣ܘܿܢ ܐܲܝܟ ܕܐܵܢܝܼ ܒܸܬ ܬܵܠܩܝܼܬܘܿܢ. 6 ܘܐܡܸܪܹܐ ܐܵܗܵܐ ܡܵܣܵܠܵܐ: ܚܵܕ̄ ܐܝܼܠܵܢܵܐ ܕܬܹܐܢܵܐ ܐܝܼܬ ܗ̄ܘܵܐ ܠܐܢܵܫܵܐ ܕܢܨܝܼܒ̣ܵܐ ܓܵܘ ܟܲܪܡܹܗ: ܘܐܬܹܠܹܐ ܛܸܥܠܹܐ ܒܝܹܗ 7 ܠܛܥܘܼܢܝܵܬܹ̈ܐ: ܘܠܵܐ ܡܘܼܫ̄ܟ̰ܸܚܠܹܐ. ܘܐܡܸܪܹܐ ܠܦܵܠܚܵܐ: ܗܵܐ: ܬܠܵܬ̄ ܫܸܢܹ̈ܐ ܒܹܐܬܵܝܵܐ ܝܘܸܢ ܒܸܛܲܥܝܵܐ ܠܛܥܘܼܢܬܵܐ ܒܐܵܗܵܐ ܐܝܼܠܵܢܵܐ ܕܬܹܐܢܵܐ: ܘܠܹܐ ܝܘܸܢ ܡܵܫ̄ܟ̰ܘܿܚܹܐ: ܦܪܘܿܡ ܠܹܗ: ܩܵܡܘܿܕܝܼ 8 ܒܵܛܘܿܠܹܐ ܝܠܹܐ ܠܐܲܪܥܵܐ. ܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ: ܐܵܓ̣ܵܝܝܼ: ܫܒ̣ܘܿܩ ܠܹܗ ܐܘܼܦ ܐܵܗܵܐ ܫܹܢ̄ܬܵܐ: ܗܲܠ ܕܚܵܦܪܸܢ ܚܵܕܸܪ̈ܘܵܢܹܗ 9 ܘܙܲܒܠܸܢܸܢܹܗ. ܘܐܸܢ ܥܵܒܸܕ ܛܥܘܼܢܬܵܐ. (ܨܦܵܝܝܼ) ܘܐܸܢ ܠܵܐ: ܒܵܬ̄ܪ ܗܵܕܵܐ ܦܵܪܡܸܬ ܠܹܗ. 10 ܐܝܼܢܵܐ ܟܲܕ ܡܵܠܘܿܦܹܐ ܗ̄ܘܵܐ ܒܫܲܒܬܵܐ ܓܵܘ ܚܕܵܐ ܡ̣ܢ 11 ܟܢܘܼܫܝܵܬܹ̈ܐ. ܗܵܐ: ܚܕܵܐ ܒܲܟ̣ܬܵܐ ܕܐܝܼܬ ܗ̄ܘܵܐ ܠܵܗ̇ ܪܘܼܚܵܐ ܕܡܲܪܥܵܐ ܬܡܵܢܸܥܣܲܪ ܫܸܢܹ̈ܐ: ܘܟܝܼܦܬܵܐ ܗ̄ܘܵܐ: ܘܗܸܟ̰ ܠܹܐ ܡܵܨܝܵܐ 12 ܗ̄ܘܵܐ ܠܸܦܫܵܩܵܐ. ܘܟܲܕ ܚܸܙܝܵܠܹܐ ܝܼܫܘܿܥ: ܩܸܪܝܵܠܹܐ ܘܐܡܸܪܹܐ 13 ܐܸܠܵܗ̇: ܒܲܟ̣ܬܵܐ: ܫܪܝܼܬܵܐ ܝܘܲܬܝ ܡ̣ܢ ܡܲܪܥܵܟ̣ܝ. ܘܡܘܼܬܒ̣ܵܠܹܐ ܐܝܼܕܹܗ ܥܲܠܘܼܗ̇: ܘܕܲܪܣܵܥܲܬ ܦܫܸܩܠܵܐ: ܘܫܘܼܒܸܚܠܵܐ ܠܐܲܠܵܗܵܐ. 14 ܐܝܼܢܵܐ ܓ̰ܘܼܘܸܒܠܹܐ ܓܘܼܪܵܐ ܕܟܢܘܼܫܬܵܐ: ܟܲܕ ܒܸܟܪܵܒܵܐ: ܣܵܒܵܒ ܕܒܘܼܣܸܡܠܹܐ ܒܫܲܒܬܵܐ ܝܼܫܘܿܥ: ܘܐܡܸܪܹܐ ܠܟܸܢܫܵܐ: ܐܸܫܬܵܐ ܝܘܿܡܵܢܹ̈ܐ ܝܢܵܐ ܕܒܝܼܝ ܘܵܓ̰ܸܒ ܝܼܠܵܐ ܠܸܦܠܵܚܵܐ: ܒܲܣ ܒܝܼܵܝ ܗܵܘܝܼܬܘܿܢ ܒܹܐܬܵܝܵܐ ܠܸܦܝܵܫܵܐ ܒܘܼܣܡܹܐ: ܘܠܵܐ ܒܝܘܿܡܵܐ ܕܫܲܒܬܵܐ. 15 ܐܝܼܢܵܐ ܓ̰ܘܼܘܸܒܠܹܐ ܡܵܪܲܢ ܘܐܡܸܪܹܐ ܐܸܠܹܗ: ܐܲܝ ܢܵܣܒܝ̈ ܒܐܲܦܹ̈ܐ: ܟܠ ܚܵܕ̄ ܡܸܢܵܘܟ̣ܘܿܢ ܒܫܲܒܬܵܐ ܠܹܐ ܫܵܪܹܐ ܬܵܘܪܹܗ ܝܲܢ ܚܡܵܪܹܗ 16 ܡ̣ܢ ܐܘܼܪܹܐ: ܘܠܵܒܸܠ ܡܲܫܬܹܐ. ܐܝܼܢܵܐ ܐܵܗܵܐ: ܕܒܪܵܬܹܗ ܕܐܲܒ̣ܪܵܗܵܡ ܝܼܠܵܐ: ܕܐܣܝܼܪܵܠܹܐ ܣܵܛܵܢܵܐ: ܗܵܐ: ܬܡܵܢܸܥܣܲܪ ܫܸܢܹ̈ܐ: ܠܹܐ ܗ̄ܘܵܐ ܘܲܓ̰ܸܒ ܕܦܵܝܫܵܐ ܫܪܝܼܬܵܐ ܡܐܵܗܵܐ ܝܸܣܘܼܪܵܐ ܒܝܘܿܡܵܐ 17 ܕܫܲܒܬܵܐ. ܘܟܲܕ ܐܲܢܹܐ ܐܡܸܪܹܐ: ܢܚܸܦܠܘܿܢ ܟܠܵܝ ܩܵܝܡܵܢܹ̈ܐ ܠܕܲܪܩܘܼܒ̣ܠܹܗ: ܘܟܠܹܗ ܛܵܝܸܦܵܐ ܚܵܕܹܐ ܗ̄ܘܵܐ ܒܟܠܵܝ ܥܵܓ̰ܸܒܘܼܝܵܬܵܐ ܕܗܵܘܝܼ ܗ̄ܘܵܘ ܒܐܝܼܕܹܗ. 18 ܐܡܸܪܹܐ ܗܲܕܟ̣ܵܐ: ܠܡܘܼܕܝܼ ܟܹܐ ܕܵܡܝܵܐ ܡܲܠܟܘܼܬܵܐ ܕܐܲܠܵܗܵܐ: 19 ܘܠܡܘܼܕܝܼ ܡܲܕܡܸܢܵܗ̇. ܟܹܐ ܕܵܡܝܵܐ ܠܕܲܢܕܸܟܬܵܐ ܕܚܲܪܕܵܠ: ܗ̇ܝ ܕܫܩܝܼܠܵܠܹܐ ܐܢܵܫܵܐ ܕܸܪܝܵܠܹܐ ܓܵܘ ܓܲܢܬܹܗ: ܘܓܘܼܪܘܸܣܠܵܐ ܘܗ̄ܘܹܠܵܐ ܐܝܼܠܵܢܵܐ: ܘܛܲܝܪܹ̈ܐ ܕܫܡܲܝܵܐ ܫܪܹܠܘܿܢ ܒܦܲܥܘܵܢܘܼ̈ܗ̇. 20 ܘܡܸܕܪܹܐ ܐܡܸܪܹܐ: ܠܡܘܼܕܝܼ ܡܲܕܡܸܢܵܗ̇ ܡܲܠܟܘܼܬܵܐ ܕܐܲܠܵܗܵܐ. 21 ܟܹܐ ܕܵܡܝܵܐ ܠܚܡܝܼܪܵܐ: ܗ̇ܘ ܕܫܩܸܠܵܐ ܒܲܟ̣ܬܵܐ ܛܘܼܡܸܪܵܐ ܒܬܠܵܬ̄ܐ ܟܝܼܘܼ̈ܠܹܐ ܕܩܲܡܝܵܐ: ܗܲܠ ܕܟܠܹܗ ܚܡܸܥܠܹܐ. 22 ܘܚܵܕܸܪ ܗ̄ܘܵܐ ܓܵܘ ܡܵܬܘܵܬܹ̈ܐ ܘܡܕܝܼܢܵܬܹ̈ܐ: ܡܵܠܘܿܦܹܐ: 23 ܘܒܹܐܙܵܠܵܐ ܠܵܐܘܿܪܸܫܠܸܡ. ܘܐܡܸܪܹܐ ܐܸܠܹܗ ܚܵܕ̄ ܐܢܵܫܵܐ: ܡܵܪܲܢ: 24 ܚܲܟ̰ܵܐ ܝܢܵܐ ܐܵܢܝܼ [47] ܕܚܲܝܝܼ: ܘܐܡܸܪܹܐ ܐܸܠܵܝ. ܚܠܘܿܨܘܿܢ ܠܹܐܘܵܪܵܐ ܒܬܲܪܥܵܐ ܥܝܼܩܵܐ: ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܪܵܒܵܐ 25 ܒܸܬ ܒܲܥܝܝܼ ܠܹܐܘܵܪܵܐ: ܘܠܹܐ ܡܵܨܝܼ. ܡ̣ܢ ܣܵܥܲܬ ܕܩܵܝܸܡ ܡܵܪܹܐ ܒܲܝܬܵܐ: ܘܕܵܒܸܪ ܬܲܪܥܵܐ: ܘܫܵܪܝܼܬܘܿܢ ܠܸܟܠܵܝܵܐ ܠܒܲܕܲܪ ܘܬܲܩܬܘܼܩܹܐ ܒܬܲܪܥܵܐ: ܘܠܹܐܡܵܪܵܐ: ܡܵܪܲܢ: ܦܬܘܿܚ ܐܸܠܲܢ: ܘܗ̇ܘ ܒܸܬ ܓ̰ܲܘܸܒ ܘܒܸܬ ܐܵܡܸܪ ܐܸܠܵܘܟ̣ܘܿܢ: ܠܹܐ ܝܲܕܥܸܢܵܘܟ̣ܘܿܢ ܡܐܲܝܟܵܐ 26 ܝܬܘܿܢ. ܗ̇ܝܓܵܗ ܒܸܬ ܫܵܪܝܼܬܘܿܢ ܠܹܐܡܵܪܵܐ: ܩܵܕ̄ܡܘܼܟ ܐܟܸܠܲܢ 27 ܘܫܬܹܠܲܢ: ܘܒܥܵـ̈ـܠܘܿܠܵܢܲܢ ܡܘܼܠܸܦܠܘܼܟ. ܘܒܸܬ ܐܵܡܸܪ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܹܐ ܝܲܕܥܸܢܵܘܟ̣ܘܿܢ ܡܐܲܝܟܵܐ ܝܬܘܿܢ: ܪܚܘܿܩܘܿܢ 28 ܟܠܵܘܟ̣ܘܿܢ ܡܸܢܝܼ: ܐܲܝ ܦܵܠܵܚܹ̈ܐ ܕܥܵܘܠܵܐ. ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ: ܟܲܕ ܚܵܙܝܼܬܘܿܢ ܠܐܲܒ̣ܪܵܗܵܡ ܘܠܐܝܼܣܚܵܩ ܘܠܝܲܥܩܘܿܒ̣: ܘܠܟܠܵܝ ܢܒ̣̈ܝܹܐ: ܓܵܘ ܡܲܠܟܘܼܬܵܐ 29 ܕܐܲܠܵܗܵܐ: ܐܝܼܢܵܐ ܒܓܵܢܵܘܟ̣ܘܿܢ ܦܘܼܠܛܹܐ ܠܒܲܕܲܪ. ܘܒܸܬ ܐܵܬܝܼ ܡ̣ܢ ܡܲܕܢ̱ܚܵܐ ܘܡ̣ܢ ܡܲܥ̱ܪܒ̣ܵܐ: ܘܡ̣ܢ ܬܲܝܡܢܵܐ ܘܡ̣ܢ ܓܲܪܒܝܵܐ: 30 ܘܒܸܬ ܝܵܬܒ̣ܝܼ ܓܵܘ ܡܲܠܟܘܼܬܵܐ ܕܐܲܠܵܗܵܐ. ܘܗܵܐ: ܐܝܼܬ ܐܚܵܪ̈ܵܝܹܐ ܘܒܸܬ ܗܵܘܝܼ ܩܵܕ̄ܡܵܝܹ̈ܐ: ܘܐܝܼܬ ܩܵܕ̄ܡܵܝܹ̈ܐ ܕܒܸܬ ܗܵܘܝܼ ܐܚܵܪ̈ܵܝܹܐ. 31 ܒܗ̇ܝ ܣܵܥܲܬ ܐܬܹܠܘܿܢ ܐܢܵܫܹ̈ܐ ܡ̣ܢ ܦܪ̈ܝܼܫܹܐ: ܒܹܐܡܵܪܵܐ ܐܸܠܹܗ: ܦܠܘܿܛ: ܙܹܠ̄ܐ ܠܘܼܟ ܡܐܲܟ̣ܵܐ: ܣܵܒܵܒ ܗܹܪܘܿܕܸܣ ܒܸܒܲܥܝܵܐ ܝܠܹܐ 32 ܠܸܩܛܵܠܘܼܟ. ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܐܡܘܿܪܘܿܢ ܠܐܵܗܵܐ ܬܲܥܠܵܐ: ܗܵܐ: ܦܵܠܘܿܛܹܐ ܝܘܸܢ ܕܲܝܘܹ̈ܐ: ܘܗܲܟܝܼܡܘܼܝܵܬܹ̈ܐ ܒܸܥܒ̣ܵܕܵܐ ܝܘܸܢ ܐܸܕܝܘܼ ܘܩܵܝܕܲܡܬܵܐ: ܘܒܝܘܿܡܵܐ ܕܬܠܵܬܐ ܦܝܵܫܵܐ ܝܘܸܢ 33 [48] ܬܘܼܡܸܡܵܐ. ܐܝܼܢܵܐ ܘܵܓ̰ܸܒ ܝܼܠܵܐ ܐܸܠܝܼ: ܕܐܸܕܝܘܼ ܘܩܵܝܕܲܡܬܵܐ ܘܒܝܘܿܡܵܐ ܐܚܹܪ̄ܢܵܐ ܐܵܙܸܠ̄ܢ: ܣܵܒܵܒ ܠܹܐ ܡܵܨܝܵܐ ܕܢܒ̣ܝܼܵܐ ܬܵܠܸܩ 34 ܠܒܲܕܲܪ ܡ̣ܢ ܐܘܿܪܸܫܠܸܡ. ܐܘܿܪܸܫܠܸܡ: ܐܘܿܪܸܫܠܸܡ: ܩܵܛܠܵܢܬܵܐ ܕܢܒ̣̈ܝܹܐ: ܘܪܵܓ̰ܡܵܢܬܵܐ ܕܐܵܢܝܼ ܕܝܼܢܵܐ ܫܘܼܕܪܹܐ ܠܟܸܣܠܵܗ̇! ܟܡܵܐ ܓܵܗܹ̈ܐ ܒܣܸܡܠܵܐ ܠܝܼ ܠܓ̰ܲܡܘܼܥܝܹܐ ܒܢܘܼܢܵܟ̣ܝ̈: ܐܲܝܟ ܕܟܬܵܝܬܵܐ ܓ̰ܲܡܥܵܐ ܙܲܥܝܘܼ̈ܗ̇ ܬܚܘܿܬ ܓܘܼܠܦܵܢܘܼ̈ܗ̇: ܘܠܵܐ ܒܣܸܡܠܵܐ 35 ܠܵܘܟ̣ܘܿܢ. ܗܵܐ: ܦܝܵܫܵܐ ܝܠܹܐ ܫܒ̣ܝܼܩܵܐ ܐܸܠܵܘܟ̣ܘܿܢ ܒܲܝܬܵܘܟ̣ܘܿܢ ( ܚܵܪܵܒܵܐ): ܘܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܚܵܙܝܼܬܘܿܢ ܠܝܼ: ܗܲܠ ܕܐܵܡܪܝܼܬܘܿܢ: ܒܪܝܼܟ̣ܵܐ ܝܠܹܐ ܗ̇ܘ ܕܐܵܬܹܐ ܒܫܸܡܹܗ ܕܡܵܪܝܵܐ.

ܩܦܠܐܘܢ: ܝܕ

1 ܘܗ̄ܘܹܠܵܐ: ܟܲܕ ܐܘܸܪܹܐ ܠܒܲܝܬܵܐ ܕܚܵܕ̄ ܡ̣ܢ ܪܹ̈ܫܵܢܹܐ ܕܦܪ̈ܝܼܫܹܐ ܕܐܵܟܸܠ ܗ̄ܘܵܐ ܠܲܚܡܵܐ: ܒܝܘܿܡܵܐ ܕܫܲܒܬܵܐ: ܐܵܢܝܼ ܒܸܢܛܵܪܘܼܗܝ 2 ܗ̄ܘܵܘ. ܘܗܵܐ: ܚܵܕ̄ ܐܢܵܫܵܐ [49] ܙܝܼܪܵܐ ܡ̣ܢ ܡ̈ܝܼܵܐ ܐܝܼܬ ܗ̄ܘܵܐ 3 ܩܵܕ̄ܡܘܼܗܝ. ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܠܫܲܪܥܲܬܟܵܪܹ̈ܐ 4 ܘܠܦܪ̈ܝܼܫܹܐ: ܒܕܲܣܬܘܼܪ ܝܼܠܵܐ ܒܫܲܒܬܵܐ ܠܒܵܣܘܿܡܹܐ: ܝܲܢ ܠܵܐ. ܐܝܼܢܵܐ ܐܵܢܝܼ ܫܬܸܩܠܘܿܢ ܘܕܒܸܩܠܹܗ ܗ̇ܘ ܘܒܘܼܣܸܡܠܹܗ: ܘܫܘܼܕܸܪܹܗ. 5 ܘܐܡܸܪܹܐ ܐܸܠܵܝ: ܡܵܢܝܼ ܡܸܢܵܘܟ̣ܘܿܢ ܕܢܵܦܸܠ [50] ܚܡܵܪܹܐ ܝܲܢ ܬܵܘܪܹܗ ܓܵܘ ܒܹܪܵܐ ܒܝܘܿܡܵܐ ܕܫܲܒܬܵܐ: ܘܕܲܪܣܵܥܲܬ ܠܹܐ ܓܵܪܸܫ ܠܹܗ. 6 ܘܠܵܐ ܡܨܹܠܘܿܢ ܠܓ̰ܲܘܘܼܒܘܼܗܝ ܥܲܠ ܕܐܵܗܵܐ. 7 ܘܐܡܸܪܹܐ ܡܵܣܵܠܵܐ ܠܟܸܣ ܕܐܵܢܝܼ ܕܝܼܗ̄ܘܵܘ ܟ̰ܝܼܪܹ̈ܐ: ܟܲܕ ܒܸܚܙܵܝܵܝ ܗ̄ܘܵܐ ܕܵܐܟ̣ܝܼ ܓܵܒ̇ܘܿܝܹܐ ܗ̄ܘܵܘ ܕܘܼܟܵܢܹ̈ܐ ܒܪܹܫ ܡܵܘܬܒܹ̈ܐ: 8 ܒܹܐܡܵܪܵܐ ܐܸܠܵܝ. ܐܝܼܡܲܢ ܕܦܵܝܫܸܬ ܟ̰ܝܼܪܵܐ ܡ̣ܢ ܐܢܵܫܵܐ ܠܒܹܝܬ ܚܠܘܼܠܵܐ: ܠܵܐ ܝܵܬܒܸܬ ܒܪܹܫ ܡܵܘܬܒ̣ܵܐ: ܠܵܐ ܗ̄ܘܹܐ ܕܗܵܘܹܐ 9 ܟ̰ܝܼܕܵܐ ܬܵܡܵܐ ܐܢܵܫܵܐ ܒܘܼܫ ܡܝܘܼܩܪܵܐ ܡܸܢܘܼܟ. ܘܐܵܬܹܐ ܗ̇ܘ ܕܐܸܠܘܼܟ ܘܐܸܠܹܗ ܩܪܹܠܹܐ: ܘܐܵܡܸܪ ܐܸܠܘܼܟ: ܗܲܒ̄ܠ ܕܘܼܟܬܵܐ ܠܐܵܗܵܐ: ܘܗ̇ܝܓܵܗ ܒܸܬ ܫܵܪܸܬ ܒܢܚܸܦܬܵܐ ܠܸܕܒ̣ܵܩܵܐ ܕܘܼܟܬܵܐ 10 ܐܚܵܪܵܝܬܵܐ. ܐܸܠܵܐ ܐܝܼܡܲܢ ܕܦܸܫܠܘܿܟ ܟ̰ܝܼܕܵܐ: ܙܹܠ̄ܐ ܝܬܘܿܒ̣ ܠܘܼܟ ܠܐܸܠܬܸܚ ܡ̣ܢ ܟܠܵܝ: ܕܐܝܼܡܲܢ ܐܵܬܹܐ ܗ̇ܘ ܕܩܲܡ ܩܵܪܹܐ ܠܘܼܟ: ܐܵܡܸܪ ܐܸܠܘܼܟ: ܕܵܘܣܬܝܼ: ܐܣܘܿܩ ܠܥܸܠܸܠ. ܘܒܸܬ ܗܵܘܹܐ ܠܘܼܟ ܚܸܩܪܵܐ ܩܵܕ̄ܡ ܟܠܵܝ ܕܐܵܢܝܼ ܕܝܬܝܼܒܹܐ ܝܢܵܐ ܠܨܘܼܦܪܵܐ ܥܲܡܘܼܟ. 11 ܣܵܒܵܒ ܟܠ ܕܡܵܪܸܡ ܠܵܗ̇ ܓܵܢܹܗ ܒܸܬ ܦܵܝܸܫ ܡܘܼܟܸܦܵܐ: ܘܟܠ ܕܡܲܟܸܦ ܓܵܢܹܗ ܒܸܬ ܦܵܝܸܫ ܡܘܼܪܡܵܐ. 12 ܘܐܡܸܪܹܐ ܐܘܼܦ ܠܗ̇ܘ ܕܩܪܹܠܹܗ: ܐܝܼܡܲܢ ܕܥܵܒ̣ܕܸܬ ܫܵܪܘܼܬܵܐ ܝܲܢ ܚܵܪܲܡܫܵܐ: ܠܵܐ ܗܵܘܸܬ ܒܸܩܪܵܝܵܐ ܠܕܵܘܣܬܘܼ̈ܟ: ܐܘܼܦ ܠܵܐ ܠܐܵܚܘܿܢܘܵܬܘܼ̈ܟ: ܝܲܢ ܠܚܸܙܡܘܼ̈ܟ: ܘܠܵܐ ܠܫܒ̣ܵܒ̣ܘܼ̈ܟ ܕܵܘܠܲܬܡܲܢܕܹ̈ܐ: ܠܵܐ ܗ̄ܘܹܐ ܕܐܘܼܦ ܐܵܢܝܼ ܩܵܪܝܼ ܠܘܼܟ: ܘܗܵܘܹܐ ܠܘܼܟ ܦܘܼܪܥܵܢܵܐ. 13 ܐܸܠܵܐ ܐܝܼܡܲܢ ܕܥܵܒ̣ܕܸܬ ܐܲܪܚܘܼܬܵܐ: ܩܪܝܼ ܠܡܸܣܟܹܢܹ̈ܐ: ܣܲܩܲܬܹ̈ܐ: 14 ܫܸܠܹ̈ܐ: ܣܸܡܝܹ̈ܐ. ܘܛܘܼܒ̣ܵܐ ܐܸܠܘܼܟ: ܕܠܲܝܬ ܠܗ̄ܘܿܢ ܕܦܲܪܥܝܼ ܠܘܼܟ: ܣܵܒܵܒ ܕܒܸܬ ܦܵܝܫܸܬ ܦܸܪܥܝܵܐ ܒܩܝܵܡܬܵܐ ܕܙܲܕܝܼܩܹ̈ܐ. 15 ܘܟܲܕ ܫܡܸܥܠܹܐ ܐܲܢܹܐ ܚܵܕ̄ ܡ̣ܢ ܕܐܵܢܝܼ ܕܝܼܗ̄ܘܵܘ ܝܬܝܼܒܹܐ ܠܨܘܼܦܪܵܐ ܥܲܡܹܗ: ܐܡܸܪܹܐ ܐܸܠܹܗ: ܛܘܼܒ̣ܵܐ ܠܡ̇ܢ ܕܐܵܟܸܠ ܠܲܚܡܵܐ 16 ܒܡܲܠܟܘܼܬܹܗ ܕܐܲܠܵܗܵܐ. ܐܵܡܸܪ ܐܸܠܹܗ: ܚܵܕ̄ ܐܢܵܫܵܐ ܥܒܸܕܠܹܐ 17 ܚܵܪܲܡܫܵܐ ܓܘܼܪܬܵܐ: ܘܩܪܹܠܹܐ ܠܪܵܒܵܐ. ܘܫܘܼܕܸܪܹܐ ܪܹܓܹܗ ܒܥܕܵܢܵܐ ܕܚܵܪܲܡܫܵܐ: ܕܐܵܡܸܪ ܠܐܵܢܝܼ ܕܝܼܗ̄ܘܵܘ ܩܸܪܝܹܐ: ܐܵܕܝܼܵܐ ܟܠ 18 ܡܸܢܕܝܼ ܗܵܙܸܪ ܝܼܠܹܐ: ܬܹܡܘܿܢ. ܘܫܘܼܪܹܠܘܿܢ ܚܵܕ̄ ܚܵܕ̄ ܟܠܵܝ ܠܸܒܥܝܵܐ ܡܲܚܠܵܥܝܬܵܐ. ܐܡܸܪܹܐ ܐܸܠܹܗ ܩܵܕ̄ܡܵܝܵܐ: ܚܲܩܠܵܐ ܙܒܸܢܝܼ: ܘܵܓ̰ܸܒ ܝܼܠܵܐ ܕܦܵܠܛܸܢ ܚܵܙܸܢܵܗ̇: ܒܸܒܲܥܝܵܐ ܝܘܸܢ ܡܸܢܘܼܟ: ܫܒ̣ܘܿܩ 19 ܠܝܼ ܕܦܵܝܫܸܢ ܡܘܼܚܠܸܥܝܵܐ. ܐܚܹܪ̄ܢܵܐ ܐܡܸܪܹܐ: ܚܲܡܫܵܐ ܙܵܘ̈ܓܹܐ ܬܵܘܪܹ̈ܐ ܙܒܸܢܝܼ: ܘܒܹܐܙܵܠܵܐ ܝܘܸܢ ܕܓ̰ܵܪܒܸܢܘܿܢ: ܒܸܒܲܥܝܵܐ ܝܘܸܢ ܡܸܢܘܼܟ: 20 ܫܒ̣ܘܿܩ ܠܝܼ ܕܦܵܝܫܸܢ ܡܘܼܚܠܸܥܝܵܐ. ܐܚܹܪ̄ܢܵܐ ܐܡܸܪܹܐ: ܒܲܟ̣ܬܵܐ 21 ܓܒ̣ܝܼܪܵܐ ܝܘܸܢ: ܘܣܵܒܵܒ ܕܐܵܗܵܐ ܠܹܐ ܡܵܨܸܢ ܕܐܵܬܸܢ. ܘܐܬܹܠܹܐ ܗ̇ܘ ܪܹܓܵܐ ܘܡܘܼܕܸܥܠܹܐ ܐܲܢܹܐ ܠܐܵܓ̣ܵܝܹܗ. ܗ̇ܝܓܵܗ ܟܪܸܒ̇ܠܹܐ ܡܵܪܹܐ ܒܲܝܬܵܐ: ܘܐܡܸܪܹܐ ܠܪܹܓܹܗ: ܦܠܘܿܛ ܓ̰ܲܠܕܹܐ ܠܫܘܼܩܹ̈ܐ ܘܠܥܵܠܘܿܠܹ̈ܐ ܕܡܕܝܼܢ̄ܬܵܐ: ܘܡܲܐܘܸܪ ܠܲܐܟ̣ܵܐ ܠܡܸܣܟܹܢܹ̈ܐ ܘܠܕܲܪܕܵܢܹܐ 22 ܘܠܸܫ̈ܠܹܐ ܘܠܣܸܡܝܹ̈ܐ. ܘܐܡܸܪܹܐ ܪܹܓܵܐ: ܐܵܓ̣ܵܝܝܼ: ܗ̄ܘܹܠܵܐ ܐܲܝܟ 23 ܕܦܘܼܩܸܕܠܘܼܟ: ܘܡܸܕܪܹܐ ܐܝܼܬ ܕܘܼܟܵܐ. ܘܐܡܸܪܹܐ ܐܵܓ̣ܵܐ ܠܪܹܓܹܗ: ܦܠܘܿܛ ܠܐܘܼܪ̈ܚܵܬܹܐ ܘܠܥܵܠܘܿܠܹ̈ܐ: ܘܡܲܠܝܸܨ 24 ܕܐܵܘܪܝܼ: ܕܦܵܝܸܫ ܡܸܠܝܵܐ ܒܲܝܬܝܼ. ܣܒܵܒ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܚܵܕ̄ ܡܐܵܢܝܼ ܐܢܵܫܹ̈ܐ ܕܩܸܪܝܹܐ ܗ̄ܘܵܘ ܠܹܐ ܛܵܥܡܝܼ ܡ̣ܢ ܚܵܪܲܡܫܝܼ. 25 ܘܐܙܸܠܘܿܢ ܥܲܡܹܗ ܟܸܢܫܹ̈ܐ ܪܵܒܵܐ: ܘܕܸܪܹܐ: ܘܐܡܸܪܹܐ ܐܸܠܵܝ. 26 ܡ̇ܢ ܕܐܵܬܹܐ ܠܟܸܣܠܝܼ: ܘܠܵܐ ܣܵܢܹܐ ܠܒܵܒܹܗ: ܘܠܝܸܡܹܗ: ܘܠܵܐܚܘܿܢܘܵܬܘܼ̈ܗܝ: ܘܠܚܵܬܘܵܬܹ̈ܗ: ܘܠܒܢܘܼܢܘܼ̈ܗܝ: 27 ܘܐܘܼܦ ܠܓܢܵܐ ܕܓܵܢܹܗ: ܬܲܠܡܝܼܕܝܼ ܠܹܐ ܡܵܨܹܐ ܕܗܵܘܹܐ. ܡ̇ܢ ܕܠܵܐ ܫܵܩܸܠ ܙܩܝܼܦܹܗ ܘܐܵܬܹܐ ܒܵܬ̄ܪܝܼ: ܬܲܠܡܝܼܕܝܼ ܠܹܐ ܡܵܨܹܐ ܕܗܵܘܹܐ. 28 ܣܵܒܵܒ ܡܵܢܝܼ ܝܠܹܐ ܡܸܢܵܘܟ̣ܘܿܢ ܕܒܲܥܝܹܐ ܒܵܢܹܐ ܒܘܼܪܓ̰ܵܐ: ܘܩܵܕ̄ܡܵܝܬܵܐ ܠܹܐ ܝܵܬܸܒ̣ ܚܲܫܒܸܢ ܚܲܪܓ̰ܠܸܓܹܗ: ܐܸܢ ܐܝܼܬ ܠܹܗ ܠܬܲܡܲܡܬܹܗ. 29 ܠܵܐ ܗ̄ܘܹܐ ܕܟܲܕ ܡܲܬܸܒ̣ ܒܸܢܝܲܬ: ܘܠܵܐ ܡܨܹܐ ܠܬܲܡܘܼܡܹܐ: ܟܠܵܝ 30 ܕܚܵܙܝܼ ܫܵܪܝܼ ܠܡܲܣܚܘܼܪܹܐ ܒܝܹܗ. ܘܐܵܡܪܝܼ: ܐܵܗܵܐ ܐܢܵܫܵܐ 31 ܫܘܼܪܹܠܹܐ ܠܸܒܢܵܝܵܐ: ܘܠܵܐ ܡܨܹܠܹܐ ܠܬܲܡܘܼܡܹܐ. ܝܲܢ ܡܵܢܝܼ ܝܠܹܐ ܡܲܠܟܵܐ ܕܐܵܙܸܠ ܠܦܠܵܫܵܐ ܠܸܥܒ̣ܵܕܵܐ ܕܲܥܘܝܼ ܥܲܡ ܡܲܠܟܵܐ ܐܚܹܪ̄ܢܵܐ: ܘܩܵܕ̄ܡܵܝܬܵܐ ܠܹܐ ܝܵܬܸܒ̣ ܘܚܵܫܸܒ̣: ܕܐܸܢ ܡܵܨܹܐ ܒܥܸܣܪܵܐ ܐܲܠܦܹ̈ܐ 32 ܠܸܬܦܵܩܵܐ ܒܗ̇ܘ ܕܐܵܬܹܐ ܥܲܠܘܼܗܝ ܒܥܸܣܪܝܼ ܐܲܠܦܹ̈ܐ. ܘܐܸܢ ܠܵܐ: ܗܹܫ ܗ̇ܘ ܡܸܢܹܗ: ܟܹܐ ܫܵܕܸܪ ܐܝܼܙܓܲܕܹ̈ܐ ܘܒܲܥܝܹܐ ܒܘܼܬ 33 ܫܠܵܡܵܐ. ܒܲܣ ܗܲܕܟ̣ܵܐ ܟܠ ܐܢܵܫܵܐ ܡܸܢܵܘܟ̣ܘܿܢ ܕܠܵܐ ܫܵܒܸܩ 34 ܟܠܹܗ ܡܸܢܕܝܹܗ: ܠܹܐ ܡܵܨܹܐ ܕܗܵܘܹܐ ܬܲܠܡܝܼܕܝܼ. ܨܦܵܝܝܼ ܝܠܹܐ ܗܲܕܟ̣ܵܐ ܡܸܠܚܵܐ: ܐܝܼܢܵܐ ܐܸܢ ܐܘܼܦ ܡܸܠܚܵܐ ܦܵܝܟܵܐ: ܒܡܘܼܕܝܼ ܒܸܬ 35 ܦܵܝܫܵܐ ܡܘܼܡܠܸܚܬܵܐ. ܠܵܐ ܠܐܲܪܥܵܐ ܘܠܵܐ ܠܙܸܒܠܵܐ ܦܲܝܕܵܐ ܐܝܼܬ ܠܵܗ̇: ܠܒܲܕܲܪ ܟܹܐ ܪܲܦܝܼ ܠܵܗ̇. ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ ܫܲܡܸܥ.

ܩܦܠܐܘܢ: ܝܗ

1 ܐܝܼܢܵܐ [51] ܩܲܪܒܘܼܢܹܐ ܗ̄ܘܵܘ ܠܟܸܣܠܹܗ ܟܠܵܝ ܕܲܡܓ̣ܵܟ̰ܝܹ̈ܐ 2 ܘܚܲܛܵܝܹ̈ܐ ܕܫܲܡܥܝܼ ܠܹܗ. ܘܣܵܦܪܹ̈ܐ ܘܦܪ̈ܝܼܫܹܐ ܛܲܪܛܸܡܝܼ ܗ̄ܘܵܘ: ܘܐܵܡܪܝܼ: ܐܵܗܵܐ ܠܚܲܛܵܝܹ̈ܐ ܩܵܒܘܿܠܹܐ ܝܠܹܐ: ܘܒܹܐܟ̣ܵܠܵܐ ܝܠܹܐ ܥܲܡܵܝ. 3 ܘܐܡܸܪܹܐ ܐܸܠܵܝ ܐܵܗܵܐ ܡܵܣܵܠܵܐ. ܡܵܢܝܼ ܝܠܹܐ ܡܸܢܵܘܟ̣ܘܿܢ 4 ܐܢܵܫܵܐ ܕܐܝܼܬ ܠܹܗ ܡܵܐܐ ܥܸܪ̈ܒܹܐ: ܘܐܸܢ ܬܵܠܸܩ ܚܵܕ̄ ܡܸܢܵܝ: ܠܹܐ ܫܵܒܸܩ ܐܸܬܫܥܝܼ ܘܐܸܬܫܥܵܐ ܓܵܘ ܒܲܪܝܼܵܐ: ܘܐܵܙܸܠ 5 ܒܵܬ̄ܪ ܕܗ̇ܘ ܕܬܠܸܩܠܹܐ: ܗܲܠ ܕܡܵܫ̄ܟ̰ܸܚ ܠܹܗ. ܘܟܲܕ ܡܵܫ̄ܟ̰ܸܚ ܠܹܗ: ܟܹܐ ܚܵܕܹܐ: ܘܟܹܐ ܫܵܩܸܠ ܠܹܗ ܥܲܠ 6 ܪ̈ܘܼܦ̮ܫܵܢܘܼܗܝ. ܘܟܹܐ ܐܵܬܹܐ ܠܒܲܝܬܹܗ: ܘܟܹܐ ܩܵܪܹܐ ܠܕܵܘܣܬܘܼܗܝ ܘܠܫܒ̣ܵܒܘܼ̈ܗܝ: ܘܟܹܐ ܐܵܡܸܪ ܐܸܠܵܝ: ܚܕܹܡܘܿܢ 7 ܥܲܡܝܼ: ܕܡܘܼܫ̄ܟ̰ܸܚܠܝܼ ܥܸܪܒܝܼ ܕܝܼܗ̄ܘܵܐ ܬܠܝܼܩܵܐ. ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܗܲܕܟ̣ܵܐ ܒܸܬ ܗܵܘܝܵܐ ܚܲܕܘܼܬܵܐ ܒܫܡܲܝܵܐ ܥܲܠ ܚܵܕ̄ ܚܲܛܵܝܵܐ ܕܬܲܘܸܒ: ܙܵܘܕܵܐ ܡ̣ܢ ܥܲܠ ܐܸܬܫܥܝܼ ܘܐܸܬܫܥܵܐ ܙܲܕܝܼܩܹ̈ܐ ܕܠܹܐ ܝܠܵܐ ܠܵܙܸܡ ܐܸܠܵܝ ܬܝܵܒ̣ܘܼܬܵܐ. 8 ܝܲܢ ܐܲܝܢܝܼ ܝܠܵܐ ܒܲܟ̣ܬܵܐ ܕܐܝܼܬ ܠܵܗ̇ ܥܸܣܪܵܐ ܙܘܼܙܹ̈ܐ: ܘܬܵܠܩܵܐ ܚܵܕ̄ ܡܸܢܵܝ: ܘܠܹܐ ܬܵܦܝܵܐ ܫܪܵܝܵܐ: ܘܟܵܢܫܵܐ ܒܲܝܬܵܐ: ܘܛܵܥܝܵܐ ܐܸܠܹܗ 9 ܒܚܲܡܚܘܵܪܘܼܬܵܐ ܗܲܠ ܕܡܵܫ̄ܟ̰ܚܵܐ ܠܹܗ. ܘܟܲܕ ܡܵܫ̄ܟ̰ܚܵܐ ܠܹܗ: ܟܹܐ ܩܵܪܝܵܐ ܠܕܵܘܣܬܘܼ̈ܗ ܘܠܫܒ̣ܵܒ̣ܝܵܬܘܼ̈ܗ̇: ܘܟܹܐ ܐܵܡܪܵܐ ܐܸܠܵܝ: ܚܕܹܡܘܿܢ ܥܲܡܝܼ: ܕܡܘܼܫ̄ܟ̰ܸܚܠܝܼ ܙܘܼܙܝܼ ܕܝܼܗ̄ܘܵܐ ܬܠܝܼܩܵܐ. 10 ܗܲܕܟ̣ܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܚܲܕܘܼܬܵܐ ܐܝܼܬ ܩܵܕ̄ܡ ܡܲܠܲܐܟܹ̈ܐ ܕܐܲܠܵܗܵܐ ܥܲܠ ܚܵܕ̄ ܚܲܛܵܝܵܐ ܕܬܲܘܸܒ. 11 ܘܐܡܸܪܹܐ: ܚܵܕ̄ ܐܢܵܫܵܐ ܐܝܼܬ ܗ̄ܘܵܘ ܠܹܗ ܬܪܲܝ ܒܢܘܼܢܹ̈ܐ. 12 ܘܐܡܸܪܹܐ ܠܒܵܒܵܐ ܒܪܘܼܢܹܗ ܙܥܘܿܪܵܐ: ܒܵܒܵܐ: ܗܲܒ̄ܠ ܠܝܼ ܣܵܡܵܐ 13 ܕܡܸܢܕܝܼ ܕܡܵܛܹܐ ܠܝܼ. ܘܦܘܼܠܹܠܹܐ ܐܸܠܵܝ ܡܸܢܕܝܹܗ. ܘܡ̣ܢ ܒܵܬ̄ܪ ܚܲܟ̰ܵܐ ܝܘܿܡܵܢܹ̈ܐ: ܓ̰ܘܼܡܸܥܠܹܐ ܒܪܘܼܢܹܗ ܙܥܘܿܪܵܐ ܟܠܹܗ ܡܸܢܕܝܹܗ: ܘܐܙܸܠܹܐ ܠܐܲܬܪܵܐ ܪܸܚܩܵܐ: ܘܬܵܡܵܐ ܒܘܼܪܒܸܙܠܹܐ 14 ܡܸܢܕܝܹܗ: ܟܲܕ ܒܸܚܵܝܵܐ ܒܐܵܣܘܿܛܘܼܬܵܐ. ܘܟܲܕ ܬܘܼܡܸܡܠܹܐ ܟܠ ܡܸܢܕܝܼ ܕܐܝܼܬ ܗ̄ܘܵܐ ܠܹܗ: ܗ̄ܘܹܠܹܐ ܟܸܦܢܵܐ ܓܘܼܪܵܐ ܒܗ̇ܘ 15 ܐܲܬܪܵܐ: ܘܫܘܼܪܹܠܹܐ ܠܸܚܣܵܪܵܐ. ܘܐܙܸܠܹܐ ܬܒܸܥܠܹܐ ܠܚܵܕ̄ ܡ̣ܢ ܒܢܲܝ̈ ܡܕܝܼܢ̄ܬܵܐ ܕܗ̇ܘ ܐܲܬܪܵܐ: ܘܗ̇ܘ ܫܘܼܕܸܪܹܗ ܠܚܲܩܠܵܐ 16 ܠܡܲܪܥܘܼܝܹܐ ܚܙܘܼܪܹ̈ܐ. ܘܫܲܗ̄ܘܸܬ ܗ̄ܘܵܐ ܠܸܡܠܵܝܵܐ ܟܹܪ̄ܣܹܗ ܡܐܵܢܝܼ ܚܲܪ̈ܘܼܒܹܐ ܕܐܵܟ̣ܠܝܼ ܗ̄ܘܵܘ ܚܙܘܼܪܹ̈ܐ: ܘܠܵܐ ܐܢܵܫܵܐ ܝܵܗ̄ܒܸܠ 17 ܗ̄ܘܵܐ ܠܹܗ. ܘܟܲܕ ܐܬܹܠܹܐ ܠܟܸܣ ܓܵܢܹܗ ܐܡܸܪܹܐ: ܟܡܵܐ ܪܹ̈ܓܵܘܵܬܹܐ ܕܗܵܩܵܐ ܕܒܵܒܝܼ ܙܵܘܕܵܐ ܝܠܹܐ ܐܸܠܵܝ ܠܲܚܡܵܐ: ܘܐܵܢܵܐ 18 ܠܲܐܟ̣ܵܐ ܡ̣ܢ ܟܸܦܢܝܼ ܒܸܬܠܵܩܵܐ ܝܘܸܢ. ܒܸܬ ܩܵܝܡܸܢ ܐܵܙܸܠ̄ܢ ܠܟܸܣ ܒܵܒܝܼ: ܘܒܸܬ ܐܵܡܪܸܢ ܐܸܠܹܗ: ܒܵܒܝܼ: ܚܛܹܠܝܼ ܒܫܡܲܝܵܐ 19 ܘܩܵܕ̄ܡܘܼܟ: ܘܡܵܐܕܝܼܵܐ ܠܹܐ ܚܵܫܚܸܢ ܕܒܪܘܼܢܘܼܟ ܦܵܝܫܸܢ ܩܸܪܝܵܐ: 20 ܥܒ̣ܘܿܕ ܠܝܼ ܐܲܝܟ ܚܵܕ̄ ܡ̣ܢ ܪܹ̈ܓܵܘܵܬܘܼܟ ܕܗܵܩܵܐ. ܘܩܸܡܠܹܐ ܐܬܹܠܹܐ ܠܟܸܣ ܒܵܒܹܗ: ܘܗܹܫ ܗ̇ܘ ܪܸܚܩܵܐ ܗ̄ܘܵܐ: ܚܙܹܠܹܗ ܒܵܒܹܗ ܘܪܘܼܚܸܡܠܹܐ ܥܲܠܘܼܗܝ: ܘܪܚܸܛܠܹܐ ܢܦܸܠܹܐ ܥܲܠ ܩܕܵܠܹܗ 21 ܘܢܫܸܩܠܹܗ. ܘܐܡܸܪܹܐ ܐܸܠܹܗ ܒܪܘܼܢܹܗ: ܒܵܒܝܼ: ܚܛܹܠܝܼ ܒܫܡܲܝܵܐ ܘܩܵܕ̄ܡܘܼܟ: ܘܡܵܐܕܝܼܵܐ ܠܹܐ ܚܵܫܚܸܢ ܕܒܪܘܼܢܘܼܟ ܦܵܝܫܸܢ 22 ܩܸܪܝܵܐ. ܐܝܼܢܵܐ ܐܡܸܪܹܐ ܒܵܒܹܗ ܠܪܹ̈ܓܵܘܵܬܘܼܗܝ: ܓ̰ܲܠܕܹܐ ܦܵܠܛܘܿܢ ܓ̰ܘܼܒܵܐ ܕܡ̣ܢ ܟܠܵܝ ܨܦܵܝܝܼ ܘܡܲܠܒܸܫܘܿܢ ܠܹܗ: ܘܡܚܹܡܘܿܢ ܥܹܙܲܩܬܵܐ ܒܐܝܼܕܹܗ: ܘܨܵܘܠܹ̈ܐ ܒܐܲܩܠܘܼ̈ܗܝ. 23 ܘܡܲܝܬ̄ܡܘܿܢ ܩܛܘܿܠܘܿܢ ܬܵܘܪܵܐ ܛܪܝܼܨܵܐ: ܘܐܵܟ̣ܠܵܚ: ܘܥܵܒ̣ܕܵܚ 24 ܒܘܼܣܵܡܵܐ. ܣܵܒܵܒ ܐܵܗܵܐ ܒܪܘܼܢܝܼ ܡܝܼܬܵܐ ܗ̄ܘܵܐ: ܘܚܹܝܠܹܐ: ܘܬܠܝܼܩܵܐ ܗ̄ܘܵܐ ܘܡܫ̄ܟ̰ܸܚܠܹܐ ܘܫܘܼܪܹܠܘܿܢ ܠܸܥܒ̣ܵܕܵܐ ܒܘܼܣܵܡܵܐ. 25 ܐܝܼܢܵܐ ܒܪܘܼܢܹܗ ܓܘܼܪܵܐ ܒܚܲܩܠܵܐ ܗ̄ܘܵܐ: ܘܟܲܕ ܐܬܹܠܹܐ [52] ܘܩܘܼܪܒܸܢܹܐ ܠܟܸܣ ܒܲܝܬܵܐ: ܫܡܸܥܠܹܐ ܩܵܠܵܐ ܕܙܡܵܪܵܐ 26 ܘܪܩܵܕܵܐ. ܘܩܪܹܠܹܐ ܠܚܵܕ̄ ܡ̣ܢ ܝܵܠܹܐ: ܘܒܘܼܩܸܪܹܗ: ܡܘܼܕܝܼ 27 ܝܠܵܐ ܐܵܗܵܐ. ܐܡܸܪܹܐ ܐܸܠܹܗ: ܐܵܚܘܿܢܘܼܟ ܐܬܹܠܹܐ: ܘܩܛܸܠܹܐ 28 ܒܵܒܘܼܟ ܬܵܘܪܵܐ ܛܪܝܼܨܵܐ: ܣܵܒܵܒ ܕܨܵܚ ܩܘܼܒܸܠܹܗ. ܐܝܼܢܵܐ ܟܪܸܒܠܹܐ: ܘܠܹܐ ܒܲܥܝܹܐ ܗ̄ܘܵܐ ܠܹܐܘܵܪܵܐ. ܘܦܠܸܛܠܹܐ ܗܲܕܟ̣ܵܐ 29 ܒܵܒܹܗ ܘܦܘܼܪܦܸܠܹܐ ܒܝܹܗ. ܐܝܼܢܵܐ ܓ̰ܘܼܘܸܒܠܹܐ ܘܐܡܸܪܹܐ ܠܒܵܒܹܗ: ܗܵܐ: ܟܡܵܐ ܫܸܢܹ̈ܐ ܒܸܦܠܵܚܵܐ ܝܘܸܢ ܐܸܠܘܼܟ ܪܹܓܘܼܬܵܐ: ܘܗܸܟ̰ ܠܵܐ ܥܒܸܪܝܼ ܠܦܘܼܩܕܵܢܘܼܟ: ܘܠܵܐ ܚܵܕ̄ ܓܸܕܝܵܐ ܝܸܗܒܸܠܘܼܟ ܐܸܠܝܼ 30 ܕܥܵܒ̣ܕܸܢ ܗ̄ܘܵܐ ܒܘܼܣܵܡܵܐ ܥܲܡ ܕܵܘܣܬܝܼ̈. ܐܝܼܢܵܐ ܟܲܕ ܐܵܗܵܐ ܒܪܘܼܢܘܼܟ: ܕܒܘܼܪܒܸܙܠܹܐ ܡܸܢܕܝܼܘܼܟ ܥܲܡ ܙܵܢܝܵܬܹ̈ܐ: ܐܬܹܠܹܐ: 31 ܦܪܸܡܠܘܼܟ ܩܵܐ ܕܝܹܗ ܬܵܘܪܵܐ ܛܪܝܼܨܵܐ. ܘܐܡܸܪܹܐ ܐܸܠܹܗ: ܒܪܘܼܢܝܼ: ܐܲܢ̄ܬ ܒܟܠ ܙܲܒ̣ܢܵܐ ܥܲܡܝܼ ܝܘܸܬ: ܘܟܠ ܡܸܢܕܝܼ 32 ܕܝܼܝܼ ܕܝܼܘܼܟ ܝܼܠܹܐ. ܐܝܼܢܵܐ ܘܵܓ̰ܸܒ ܝܼܗ̄ܘܵܐ ܐܸܠܲܢ ܠܸܥܒ̣ܵܕܵܐ ܒܘܼܣܵܡܵܐ ܘܠܸܚܕܵܝܵܐ: ܕܐܵܗܵܐ ܐܵܚܘܿܢܘܼܟ ܡܝܼܬܵܐ ܗ̄ܘܵܐ: ܘܚܹܝܠܹܐ: ܘܬܠܝܼܩܵܐ: ܘܡܫ̄ܟ̰ܸܚܠܹܐ.

ܩܦܠܐܘܢ: ܝܘ

1 ܘܐܡܸܪܹܐ ܐܘܼܦ ܠܬܲܠܡܝܼܕܘܼ̈ܗܝ: ܐܝܼܬ ܗ̄ܘܵܐ ܚܵܕ̄ ܐܢܵܫܵܐ ܕܵܘܠܲܬܡܲܢܕ: ܘܐܝܼܬ ܗ̄ܘܵܐ ܠܹܗ ܢܵܙܝܼܪ. ܘܡܚܹܠܘܿܢ ܕܲܪܗܲܩܹܗ 2 ܕܡܸܢܕܝܹܗ ܒܲܪܒܘܼܙܹܐ ܗ̄ܘܵܐ. ܘܩܪܹܠܹܗ: ܘܐܡܸܪܹܐ ܐܸܠܹܗ: ܡܘܼܕܝܼ ܝܠܹܐ ܐܵܗܵܐ ܕܒܸܫܡܲܥܝܵܐ ܝܘܸܢ ܒܵܗ̄ܣܘܼܟ: ܗܲܒ̄ܠ ܠܝܼ ܚܸܫܒܘܼܢܵܐ ܕܢܵܙܝܼܪܘܼܬܘܼܟ: ܣܵܒܵܒ ܠܹܐ ܡܵܨܸܬ ܡܐܵܕܝܼܵܐ ܗܵܘܸܬ 3 ܢܵܙܝܼܪ. ܐܵܡܸܪ ܗ̇ܘ ܢܵܙܝܼܪ ܒܓܵܢܹܗ: ܡܘܼܕܝܼ ܥܵܒ̣ܕܸܢ: ܣܵܒܵܒ ܐܵܓ̣ܵܝܝܼ ܒܸܫܩܵܠܘܼܗ̇ ܝܠܹܐ ܢܵܙܝܼܪܘܼܬܵܐ ܡܸܢܝܼ: ܕܚܵܦܪܸܢ ܠܹܐ 4 ܡܵܨܸܢ: ܘܠܹܓܒ̣ܵܝܵܐ ܒܸܢܚܵܦܵܐ ܝܘܸܢ. ܝܕܸܥܠܝܼ ܡܘܼܕܝܼ ܒܸܬ ܥܵܒ̣ܕܸܢ: ܕܐܝܼܡܲܢ ܦܵܝܫܸܢ ܦܘܼܠܛܵܐ ܡ̣ܢ ܢܵܙܝܼܪܘܼܬܵܐ ܩܵܒ̇ܠܝܼ ܠܝܼ 5 ܓܵܘ ܒܵܬܵܝ̈ . ܘܩܪܹܠܹܐ ܚܵܕ̄ ܒܚܵܕ̄ ܡ̣ܢ ܕܵܝܢܵܢܹ̈ܐ ܕܐܵܓ̣ܵܝܹܗ: 6 ܘܐܡܸܪܹܐ ܠܩܵܕ̄ܡܵܝܵܐ: ܟܡܵܐ ܕܵܝܢܵܢܵܐ ܝܘܸܬ ܠܐܵܓ̣ܵܝܝܼ. ܘܐܡܸܪܹܐ ܐܸܠܹܗ: ܡܵܐܐ [53] ܟܝܼܘܼܠܹ̈ܐ ܡܸܫܚܵܐ. ܐܵܡܸܪ ܐܸܠܹܗ: ܫܩܘܿܠ ܟܬܵܒ̣ܘܼܟ: 7 ܘܝܬܘܿܒ̣ ܓ̰ܲܠܕܹܐ ܟܬܘܿܒ̣ ܚܲܡܫܝܼ. ܗ̇ܝܓܵܗ ܐܡܸܪܹܐ ܠܐܚܹܪ̄ܢܵܐ: ܘܐܲܢ̄ܬ ܡܘܼܕܝܼ ܕܵܝܢܵܢܵܐ ܝܘܸܬ: ܐܵܡܸܪ ܐܸܠܹܗ: ܡܵܐܐ [54] ܟܘܿܪ̈ܝܼܢ ܚܸܛܹ̈ܐ. ܐܵܡܸܪ ܐܸܠܹܗ: ܫܩܘܿܠ ܟܬܵܒ̣ܘܼܟ: ܘܟܬܘܿܒ̣ 8 ܬܡܵܢܝܼ. ܘܚܩܸܪܹܐ ܡܵܪܲܢ ܠܢܵܙܝܼܪ ܢܵܐܗܲܩ: ܕܒܗܵܘܢܵܢܘܼܬܵܐ ܥܒܸܕܠܹܐ. ܣܵܒܵܒ ܒܢܘܼܢܹ̈ܐ ܕܐܵܗܵܐ ܥܵܠܡܵܐ ܒܘܼܫ ܗܵܘܢܵܢܹ̈ܐ ܝܢܵܐ 9 ܡ̣ܢ ܒܢܘܼܢܹ̈ܐ ܕܢܘܼܗܪܵܐ ܒܐܵܗܵܐ ܐܘܼܓ̰ܵܓ̣ܝ. ܘܐܘܼܦ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܥܒ̣ܘܿܕܘܿܢ ܠܵܘܟ̣ܘܿܢ ܕܵܘܣܬܹ̈ܐ ܡ̣ܢ ܡܵܡܘܿܢܵܐ ܕܢܵܐܗܲܩ: ܕܐܝܼܡܲܢ ܕܬܸܡܠܹܐ: ܩܵܒ̇ܠܝܼ ܠܵܘܟ̣ܘܿܢ 10 ܒܡܲܫܪ̈ܝܵܬܹܐ ܕܠܥܵܠܲܡ. ܡ̇ܢ ܕܒܚܲܟ̰ܵܐ ܡܗܘܼܡܢܵܐ ܝܠܹܐ ܐܘܼܦ ܒܪܵܒܵܐ ܡܗܘܼܡܢܵܐ ܝܠܹܐ: ܘܡ̇ܢ ܕܒܚܲܟ̰ܵܐ ܢܵܐܗܲܩ ܝܠܹܐ ܘܐܘܼܦ 11 ܒܪܵܒܵܐ ܢܵܐܗܲܩ ܝܼܠܹܐ. ܐܸܢ ܗܲܕܟ̣ܵܐ ܒܡܵܡܘܿܢܵܐ ܕܢܵܐܗܲܩ ܡܗܘܼܡܢܹ̈ܐ ܠܵܐ ܗ̄ܘܹܠܵܘܟ̣ܘܿܢ: (ܕܵܘܸܠܬܵܐ) ܣܲܪܲܣܬ ܒܝܼܵܘܟ̣ܘܿܢ 12 ܡܵܢܝܼ ܒܸܬ ܣܵܦܹܐ. ܘܐܸܢ ܒܡܸܢܕܝܼ ܕܠܹܐ ܝܠܹܐ ܕܝܼܵܘܟ̣ܘܿܢ ܠܵܐ ܗ̄ܘܹܠܵܘܟ̣ܘܿܢ ܡܗܘܼܡܢܹ̈ܐ: ܕܝܼܵܘܟ̣ܘܿܢ ܡܵܢܝܼ ܒܸܬ ܝܵܗ̄ܒܸܠ 13 ܠܵܘܟ̣ܘܿܢ. ܠܲܝܬ ܪܹܓܵܐ ܕܡܵܨܹܐ ܠܸܦܠܵܚܵܐ ܠܬܪܲܝ ܡܵܪ̈ܵܘܵܬܹܐ: ܣܵܒܵܒ ܕܝܲܢ ܠܚܵܕ̄ ܒܸܬ ܣܵܢܹܐ: ܘܠܗ̇ܘ ܐܚܹܪ̄ܢܵܐ ܒܸܬ ܡܲܚܸܒ̇: ܝܲܢ ܠܚܵܕ̄ ܒܸܬ ܡܝܵܩܸܪ: ܘܠܗ̇ܘ ܐܚܹܪ̄ܢܵܐ ܒܸܬ ܡܲܣܠܹܐ. ܠܹܐ ܡܵܨܝܼܬܘܿܢ ܠܸܦܠܵܚܵܐ ܠܐܲܠܵܗܵܐ ܘܠܡܵܡܘܿܢܵܐ. 14 ܘܦܪ̈ܝܼܫܹܐ: ܟܲܕ ܫܡܸܥܠܘܿܢ ܐܲܡܹܐ ܟܠܵܝ: ܣܵܒܵܒ ܕܟܹܐ ܡܲܚܸܒܝܼ 15 ܗ̄ܘܵܘ ܙܘܙܵܐ: ܡܲܣܚܸܪܝܼ ܗ̄ܘܵܘ ܒܝܹܗ. ܘܐܡܸܪܹܐ ܐܸܠܵܝ: ܐܲܚܬܘܿܢ ܝܼܬܘܿܢ ܐܵܢܝܼ ܕܡܲܟܫܸܛܝܼ ܓܵܢܵܝ ܩܵܕ̄ܡ ܒܢܲܝ̈ܢܵܫܵܐ: ܐܝܼܢܵܐ ܐܲܠܵܗܵܐ ܟܹܐ ܝܲܕܸܥ ܠܸܒܵܘܟ̣ܘܿܢ: ܕܡܸܢܕܝܼ ܕܝܼܠܹܐ ܪܵܡܵܐ ܓܵܘ ܒܢܲܝ̈ܢܵܫܵܐ: ܩܵܕ̄ܡ 16 ܐܲܠܵܗܵܐ ܓܘܼܢܓܸܨܵܐ ܝܠܹܐ. ܢܵܡܘܿܣܵܐ ܘܢܒ̣̈ܝܹܐ (ܗ̄ܘܹܠܘܿܢ) ܗܲܠ ܝܘܿܚܲܢܵܢ: ܡܗ̇ܝܓܵܗ ܡܲܠܟܘܼܬܵܐ ܕܐܲܠܵܗܵܐ ܟܹܐ ܦܵܝܫܵܐ ܡܘܼܫܚܸܕܬܵܐ: 17 ܘܟܠ ܟܹܐ ܚܵܠܸܨ ܕܐܵܘܸܪ ܓܵܘܘܼܗ̇. ܐܝܼܢܵܐ ܗܵܣܵܢܵܝܝܼ ܝܠܵܐ ܕܫܡܲܝܵܐ ܘܐܲܪܥܵܐ ܥܵܒ̣ܪܝܼ: ܙܵܘܕܵܐ ܡ̣ܢ ܕܚܕܵܐ ܐܵܬܘܼܬܵܐ ܡ̣ܢ ܢܵܡܘܿܣܵܐ 18 ܢܵܦܠܵܐ. ܟܠ ܡ̇ܢ ܕܪܲܦܹܐ ܒܲܟ̣ܬܹܗ ܘܓܵܒܸܪ ܚܕܵܐ ܐܚܹܪ̄ܬܵܐ: ܟܹܐ ܥܵܒܸܕ ܩܲܗܒܘܼܬܵܐ: ܘܟܠ ܡ̇ܢ ܕܫܵܩܸܠ ܫܒ̣ܝܼܩܬܵܐ ܡ̣ܢ ܓܲܒ̣ܪܵܐ: ܟܹܐ ܥܵܒܸܕ ܩܲܗܒܘܼܬܵܐ.

19 ܐܝܼܢܵܐ ܐܝܼܬ ܗ̄ܘܵܐ ܚܵܕ̄ ܐܢܵܫܵܐ ܕܵܘܠܲܬܡܲܢܕ: ܘܟܹܐ ܠܵܒܸܫ ܗ̄ܘܵܐ ܟܸܬܵܢ ܘܐܲܪܓܘܵܢܵܐ: ܘܟܠܝܘܿܡ ܟܹܐ ܥܵܒܸܕ ܗ̄ܘܵܐ ܒܘܼܣܵܡܵܐ 20 ܒܚܘܿܫܝܼ. ܘܚܵܕ̄ ܡܸܣܟܹܢܵܐ ܕܫܸܡܹܗ ܠܲܥܵܙܲܪ ܕܸܪܝܵܐ ܗ̄ܘܵܐ 21 ܠܟܸܣ ܬܲܪܥܹܗ: ܡܵܪܹܐ ܕܲܪ̈ܒܵܬܹܐ. ܘܫܲܗ̄ܘܘܼܬܹܐ ܗ̄ܘܵܐ ܕܡܵܠܹܐ ܟܹܪ̄ܣܹܗ ܡ̣ܢ ܦܸܪ̈ܬܘܼܚܹܐ ܕܢܵܦܠܝܼ ܗ̄ܘܵܘ ܡ̣ܢ ܨܘܼܦܪܹܗ ܕܗ̇ܘ ܕܵܘܠܬܲܡܲܢܕ: ܐܸܠܵܐ: ܐܘܼܦ ܟܲܠܒܹ̈ܐ ܐܵܬܝܼ ܗ̄ܘܵܘ ܠܵܟܚܝܼ ܗ̄ܘܵܘ 22 ܕܲܪ̈ܒܵܬܘܼܗܝ. ܘܗ̄ܘܹܠܵܐ ܕܡܸܬܠܹܐ ܗ̇ܘ ܡܸܣܟܹܢܵܐ: ܘܠܘܼܒܸܠܘܿܢ ܐܸܠܹܗ ܡܲܠܲܐܟܹ̈ܐ ܠܓܵܘ ܥܘܼܒܹܗ ܕܐܲܒ̣ܪܵܗܵܡ. ܘܡܸܬܠܹܐ ܐܘܼܦ ܗ̇ܘ 23 ܕܵܘܠܲܬܡܲܢܕ ܘܦܸܫܠܹܐ ܩܒ̣ܝܼܪܵܐ. ܘܓܵܘ ܫܝܘܿܠ: ܟܲܕ ܦܝܵܫܵܐ ܗ̄ܘܵܐ ܓ̰ܘܼܢܓ̰ܸܪܵܐ: ܡܘܼܪܸܡܠܹܐ ܥܲܝܢܘܼ̈ܗܝ: ܘܚܙܹܠܹܐ ܠܐܲܒ̣ܪܵܗܵܡ 24 ܡ̣ܢ ܪܸܚܩܵܐ: ܘܠܠܲܥܵܙܲܪ ܓܵܘ ܥܘܼܒܹܗ. ܘܩܪܹܠܹܐ ܘܐܡܸܪܹܐ: ܒܵܒܵܐ ܐܲܒ̣ܪܵܗܵܡ: ܪܵܚܸܡ ܥܲܠܝܼ: ܘܫܵܕܸܪ ܠܠܲܥܵܙܲܪ ܕܛܲܡܸܫ ܪܹܫܵܐ ܕܨܒܥܹܗ ܒܡ̈ܝܼܵܐ: ܘܡܲܩܸܫ ܠܹܗ ܠܸܫܵܢܝܼ: ܣܵܒܵܒ ܦܝܵܫܵܐ ܝܘܸܢ 25 ܓ̰ܘܼܢܓ̰ܸܪܵܐ ܒܐܵܗܵܐ ܠܵܗܵܐ. ܐܵܡܸܪ ܐܸܠܹܗ ܐܲܒ̣ܪܵܗܵܡ: ܒܪܘܼܢܝܼ: ܕܟ̣ܘܿܪ ܕܩܘܼܒܸܠܘܼܟ ܛܵܒ̣ܵܬܘܼ̈ܟ ܒܚܲܝܘܼ̈ܟ: ܐܘܼܦ ܗܲܕܟ̣ܵܐ ܠܲܥܵܙܲܪ ܒܝܼܫܵܬܹ̈ܗ: ܘܐܵܕܝܼܵܐ ܗ̇ܘ ܦܝܵܫܵܐ ܝܠܹܐ ܢܝܼܚܵܐ ܠܲܐܟ̣ܵܐ: ܘܐܲܢ̄ܬ ܦܝܵܫܵܐ 26 ܝܘܸܬ ܓ̰ܘܼܢܓ̰ܸܪܵܐ. ܘܥܲܡ ܕܐܲܢܹܐ ܟܠܵܝ: ܗܵܘܬܵܐ ܓܘܼܪܬܵܐ ܡܘܼܬܸܒ̣ܬܵܐ ܝܠܵܐ ܒܹܝܠܲܢ ܘܒܹܝܠܵܘܟ̣ܘܿܢ: ܕܐܵܢܝܼ ܕܒܲܥܝܝܼ ܡܐܲܟ̣ܵܐ ܥܵܒ̣ܪܝܼ ܠܟܸܣܠܵܘܟ̣ܘܿܢ ܠܹܐ ܡܵܨܝܼ: ܐܘܼܦ ܠܵܐ ܕܡ̣ܢ ܬܵܡܵܐ 27 ܥܵܒ̣ܪܝܼ ܠܟܸܣܠܲܢ. ܐܵܡܸܪ ܐܸܠܹܗ: ܒܲܣ ܢܵܘܢܘܿܝܹܐ ܝܘܸܢ ܒܝܼܘܼܟ: 28 ܒܵܒܝܼ: ܕܫܵܕܪܸܬ ܠܹܗ ܠܒܲܝܬܵܐ ܕܒܵܒܝܼ. ܣܵܒܵܒ ܕܚܲܡܫܵܐ ܐܵܚܘܿܢܘܵܬܹ̈ܐ ܐܝܼܬ ܠܝܼ: ܝܵܗ̄ܒܸܠ ܠܗ̄ܘܿܢ ܣܵܗܕܘܼܬܵܐ: ܕܐܘܼܦ ܐܵܢܝܼ 29 ܠܵܐ ܐܵܬܝܼ ܠܐܵܗܵܐ ܕܘܼܟܬܵܐ ܕܓ̰ܘܼܢܓ̰ܵܪܵܐ. ܐܝܼܢܵܐ ܐܡܸܪܹܐ ܐܲܒ̣ܪܵܗܵܡ: 30 ܐܝܼܬ ܠܗ̄ܘܿܢ ܡܘܼܫܹܐ ܘܢܒ̣̈ܝܹܐ: ܫܲܡܥܝܼ ܠܗ̄ܘܿܢ. ܐܝܼܢܵܐ ܗ̇ܘ ܐܡܸܪܹܐ ܐܸܠܹܗ: ܠܵܐ: ܒܵܒܵܐ ܐܲܒ̣ܪܵܗܵܡ: ܐܸܠܵܐ ܐܸܢ ܐܢܵܫܵܐ ܡ̣ܢ ܡܝܼܬܹ̈ܐ 31 ܐܵܙܸܠ ܠܟܸܣܠܵܝ ܒܸܬ ܬܲܘܸܒܝܼ. ܐܵܡܸܪ ܐܸܠܹܗ: ܐܸܢ ܠܡܘܼܫܹܐ ܘܠܢܒ̣̈ܝܹܐ ܠܵܐ ܫܲܡܥܝܼ: ܐܘܼܦ ܐܸܢ ܐܢܵܫܵܐ ܡ̣ܢ ܡܝܼܬܹ̈ܐ ܩܵܝܸܡ: ܠܹܐ ܗܲܡܸܢܝܼ ܐܸܠܹܗ.

ܩܦܠܐܘܢ: ܝܙ

1 ܘܐܡܸܪܹܐ ܠܬܲܠܡܝܼܕܘܼ̈ܗܝ: ܠܹܐ ܡܵܨܝܵܐ ܕܠܵܐ ܐܵܬܝܼ [55] ܟܦܘܼܪ̈ܝܹܐ: 2 ܐܝܼܢܵܐ ܘܵܝ ܠܗ̇ܘ ܕܒܐܝܼܕܹܗ ܐܵܬܝܼ. ܒܘܼܫ ܨܦܵܝܝܼ ܗ̄ܘܵܐ ܐܸܠܹܗ: ܐܸܢ [56] ܐܸܪܚܹܐ ܕܚܡܵܪܵܐ ܗܵܘܝܵܐ ܗ̄ܘܵܐ ܬܠܝܼܬܵܐ ܒܩܕܵܠܹܗ: ܘܪܘܼܦܝܵܐ 3 ܒܝܵܡܵܐ: ܡ̣ܢ [57] ܕܡܲܟܦܸܪ ܠܚܵܕ̄ ܡܐܲܢܹܐ ܙܥܘܿܪܹ̈ܐ. ܗ̄ܘܹܡܘܿܢ ܗܸܫܝܵܪ ܒܓܵܢܵܘܟ̣ܘܿܢ: ܐܸܢ ܚܵܛܹܐ ܐܵܚܘܿܢܘܼܟ: ܢܓ̰ܘܿ ܒܝܹܗ: 4 ܘܐܸܢ ܬܲܘܸܒ: ܫܒ̣ܘܿܩ ܠܹܗ. ܘܐܸܢ ܫܲܒܲܥ ܓܵܗܹ̈ܐ ܒܝܘܿܡܵܐ ܥܵܒܸܕ ܓܢܵܗܵܐ ܒܝܼܘܼܟ: ܘܫܲܒܲܥ ܓܵܗܹ̈ܐ ܕܵܝܸܪ ܠܟܸܣܠܘܼܟ: ܘܐܵܡܸܪ: ܬܲܘܘܼܒܹܐ ܝܘܸܢ: ܫܒ̣ܘܿܩ ܠܹܗ. 5 ܘܐܡܸܪܘܿܢ ܫܠܝܼܚܹ̈ܐ ܠܡܵܪܲܢ: ܡܲܙܝܸܕ ܐܸܠܲܢ ܗܲܝܡܵܢܘܼܬܵܐ. 6 ܡܵܪܲܢ ܐܡܸܪܹܐ ܐܸܢ ܐܝܼܬ ܠܵܘܟ̣ܘܿܢ ܗܲܝܡܵܢܘܼܬܵܐ ܐܲܝܟ ܕܲܢܕܸܟܬܵܐ ܕܚܲܪܕܵܠ: ܒܸܬ ܐܵܡܪܝܼܬܘܿܢ ܗ̄ܘܵܘ ܠܐܵܗܵܐ ܬܘܼܬܵܐ: ܦܘܼܫܝ ܥܩܝܼܪܬܵܐ: ܘܦܘܼܫܝ ܢܨܝܼܒ̣ܬܵܐ ܒܝܵܡܵܐ: ܘܒܸܬ ܡܲܨܝܸܬ ܗ̄ܘܵܐ ܐܸܠܵܘܟ̣ܘܿܢ. 7 ܐܝܼܢܵܐ ܡܵܢܝܼ ܝܠܹܐ ܡܸܢܵܘܟ̣ܘܿܢ ܕܐܝܼܬ ܠܹܗ ܪܹܓܵܐ: ܕܛܵܪܹܐ ܦܕܵܢܵܐ: ܝܲܢ ܕܡܲܪܥܹܐ ܥܸܪ̈ܒܹܐ: ܘܐܸܢ ܐܵܬܹܐ ܡ̣ܢ ܚܲܩܠܵܐ: ܒܸܬ ܐܵܡܸܪ 8 ܐܸܠܹܗ: ܕܲܪܣܵܥܲܬ ܥܒ̣ܘܿܪ ܝܬܘܿܒ̣ ܠܹܐܟ̣ܵܠܵܐ. ܐܸܠܵܐ ܠܹܐ ܐܵܡܸܪ ܐܸܠܹܗ: ܗܵܕܸܪ ܐܸܠܝܼ ܡܸܢܕܝܼ ܕܐܵܟ̣ܠܸܢ ܚܵܪܲܡܫܵܐ: ܘܐܣܘܿܪ ܚܵܨܘܼܟ ܥܒ̣ܘܿܕ ܠܝܼ ܚܸܠܡܲܬ: ܗܲܠ ܕܐܵܟ̣ܠܸܢ ܘܫܵܬܸܢ: ܘܒܵܬ̄ܪ ܗܵܕܵܐ 9 ܐܘܼܦ ܐܲܢ̄ܬ ܒܸܬ ܐܵܟ̣ܠܸܬ ܘܫܵܬܸܬ. ܡܸܢܬܵܐ ܟܹܐ ܛܵܥܸܢ ܡ̣ܢ 10 ܪܹܓܵܐ ܕܥܒܸܕܠܹܐ ܐܵܢܝܼ ܕܝܼܗ̄ܘܵܘ ܦܩܝܼܕܹܐ. ܗܲܕܟ̣ܵܐ ܐܘܼܦ ܐܲܚܬܘܿܢ: ܐܝܼܡܲܢ ܕܥܒܸܕܠܵܘܟ̣ܘܿܢ ܐܲܢܹܐ ܟܠܵܝ ܕܝܼܢܵܐ ܦܩܝܼܕܹܐ ܐܸܠܵܘܟ̣ܘܿܢ: ܐܡܘܿܪܘܿܢ: ܪܹ̈ܓܵܘܵܬܹܐ ܒܹܐ ܦܲܝܕܵܐ ܝܘܵܚ: ܡܸܢܕܝܼ ܕܘܵܓ̰ܸܒ ܝܼܗ̄ܘܵܐ ܐܸܠܲܢ ܠܸܥܒ̣ܵܕܵܐ ܥܒܸܕܠܲܢ. 11 ܘܗ̄ܘܹܠܵܐ ܒܐܙܵܠܬܵܐ ܠܐܘܿܪܸܫܠܸܡ: ܒܸܥܒ̣ܵܪܵܐ ܗ̄ܘܵܐ ܡ̣ܢ ܓܵܘ 12 ܫܵܡܪܹܝܢ ܘܓܠܝܼܠܵܐ. ܘܟܲܕ ܒܹܐܘܵܪܵܐ ܗ̄ܘܵܐ ܠܚܕܵܐ ܡܵܬܵܐ: ܬܦܸܩܠܘܿܢ ܒܝܹܗ ܥܸܣܪܵܐ ܐܢܵܫܹ̈ܐ ܓܸܪ̈ܒ̣ܵܢܹܐ: ܘܟܠܹܠܘܿܢ ܡ̣ܢ 13 ܪܸܚܩܵܐ. ܘܡܘܼܪܸܡܠܘܿܢ ܩܵܠܵܝ: ܘܐܵܡܪܝܼ: ܝܼܫܘܿܥ ܪܵܒܝܼ: 14 ܪܵܚܸܡ ܥܲܠܲܢ. ܘܟܲܕ ܚܸܙܝܵܝܠܹܐ: ܐܡܸܪܹܐ ܐܸܠܵܝ: ܙܹܠ̄ܡܘܿܢ ܡܲܚܙܹܡܘܿܢ ܓܵܢܵܘܟ̣ܘܿܢ ܠܟܵܗܢܹ̈ܐ. ܘܗ̄ܘܹܠܵܐ ܕܟܲܕ ܒܹܐܙܵܠܵܐ ܗ̄ܘܵܘ: 15 ܦܸܫܠܘܿܢ ܕܘܼܟ̣ܝܹܐ. ܘܚܵܕ̄ ܡܸܢܵܝ: ܟܲܕ ܚܙܹܠܹܐ ܕܦܸܫܠܹܐ ܕܘܼܟ̣ܝܵܐ: 16 ܕܸܪܹܐ: ܘܒܩܵܠܵܐ ܪܵܡܵܐ ܫܘܼܒܸܚܠܹܐ ܠܐܲܠܵܗܵܐ. ܘܢܦܸܠܹܐ ܥܲܠ ܦܵܬܹܗ ܩܵܕ̄ܡ ܐܲܩܠܹ̈ܗ: ܟܲܕ ܫܵܟܘܿܪܹܐ ܐܸܠܹܗ. ܘܗ̇ܘ ܫܵܡܪܵܝܵܐ 17 ܗ̄ܘܵܐ. ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܠܹܐ ܗ̄ܘܵܘ ܥܸܣܪܵܐ ܐܵܢܝܼ 18 ܕܦܸܫܠܘܿܢ ܕܘܼܟ̣ܝܹܐ: ܐܲܝܟܵܐ ܝܢܵܐ ܐܸܬܫܥܵܐ. ܠܵܐ ܡܫ̄ܟ̰ܸܚܠܘܿܢ ܕܕܵܝܪܝܼ ܠܝܼܵܗ̄ܒ̣ܵܐ ܬܸܫܒ̇ܘܿܚܬܵܐ ܠܐܲܠܵܗܵܐ: ܫܒ̣ܘܿܩ ܡ̣ܢ ܐܵܗܵܐ 19 ܢܘܼܟ̣ܪܵܝܵܐ. ܘܐܡܸܪܹܐ ܐܸܠܹܗ: ܩܘܼܡ̄: ܙܹܠ̄ܐ: ܗܲܝܡܵܢܘܼܬܘܼܟ ܩܲܡ ܡܲܚܝܼܵܐ ܠܘܼܟ. 20 ܘܟܲܕ ܦܸܫܠܹܐ ܒܘܼܩܪܵܐ ܡ̣ܢ ܦܪ̈ܝܼܫܹܐ: ܐܝܼܡܲܢ ܐܵܬܝܵܐ ܡܲܠܟܘܼܬܹܗ ܕܐܲܠܵܗܵܐ: ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܠܹܐ ܐܵܬܝܵܐ 21 ܡܲܠܟܘܼܬܹܗ ܕܐܲܠܵܗܵܐ ܒܢܛܵܪ̈ܝܵܬܹܐ. ܘܠܹܐ ܐܵܡܪܝܼ: ܗܵܐ: ܠܲܐܟ̣ܵܐ: ܘܗܵܐ: ܬܵܡܵܐ. ܣܵܒܵܒ ܗܵܐ: ܡܲܠܟܘܼܬܹܗ ܕܐܲܠܵܗܵܐ ܓܵܘܵܘܟ̣ܘܿܢ ܝܼܠܵܐ. 22 ܘܐܡܸܪܹܐ ܠܬܲܠܡܝܼܕܘܼ̈ܗܝ: ܒܸܬ ܐܵܬܝܼ ܝܘܿܡܵܢܹ̈ܐ ܕܒܸܬ ܫܲܗ̄ܘܸܬܝܼܬܘܿܢ ܠܸܚܙܵܝܵܐ ܚܵܕ̄ ܡ̣ܢ ܝܘܿܡܵܢܹ̈ܐ ܕܒܪܘܼܢܹܗ ܕܐܢܵܫܵܐ: 23 ܘܠܹܐ ܚܵܙܝܼܬܘܿܢ. ܘܒܸܬ ܐܵܡܪܝܼ ܠܵܘܟ̣ܘܿܢ: ܗܵܐ: ܠܲܐܟ̣ܵܐ ܝܠܹܐ: ܗܵܐ: ܬܵܡܵܐ ܝܠܹܐ: ܠܵܐ ܐܵܙܠ̄ܝܼܬܘܿܢ ܘܠܵܐ ܬܲܒܥܝܼܬܘܿܢ ܐܸܠܵܝ. 24 ܣܵܒܵܒ ܕܵܐܟ̣ܝܼ ܕܒܸܪܩܵܐ ܒܵܪܸܩ ܡ̣ܢ ܫܡܲܝܵܐ ܘܟܠܹܗ ܬܚܘܿܬ ܫܡܲܝܵܐ ܟܹܐ ܒܲܗ̄ܪܸܢ: ܗܲܕܟ̣ܵܐ ܒܸܬ ܗܵܘܹܐ ܒܪܘܼܢܹܗ ܕܐܢܵܫܵܐ 25 ܒܝܘܿܡܹܗ. ܐܝܼܢܵܐ ܩܵܕ̄ܡܵܝܬܵܐ ܘܵܓ̰ܸܒ ܝܼܠܵܐ ܕܩܵܒܸ̇ܠ ܚܲܫܵܐ ܪܵܒܵܐ: 26 ܘܦܵܝܸܫ ܡܘܼܣܠܝܼܵܐ ܡܐܵܗܵܐ ܐܘܼܓ̰ܵܓ̣. ܘܕܵܐܟ̣ܝܼ ܕܗ̄ܘܹܠܵܐ ܒܝܘܿܡܵܢܹ̈ܐ ܕܢܘܿܚ: ܗܲܕܟ̣ܵܐ ܒܸܬ ܗܵܘܝܵܐ ܒܝܘܿܡܵܢܹ̈ܐ ܕܒܪܘܼܢܹܗ 27 ܕܐܢܵܫܵܐ. ܐܟܸܠܘܿܢ: ܫܬܹܠܘܿܢ: ܓܒܸܪܘܿܢ: ܘܦܸܫܠܘܿܢ ܝܘܼܗ̄ܒܹܐ ܠܓܲܒ̣ܪܹ̈ܐ: ܗܲܠ ܝܘܿܡܵܐ ܕܐܘܸܪܹܐ ܢܘܿܚ ܠܩܹܒ̣ܘܼܬܵܐ: ܘܐܬܹܠܹܐ 28 ܛܵܘܦܵܢܵܐ ܘܬܘܼܠܩܠܹܐ ܠܟܠܵܝ. ܘܕܵܐܟ̣ܝܼ ܡܸܕܪܹܐ ܕܗ̄ܘܹܠܵܐ ܒܝܘܿܡܵܢܹ̈ܐ ܕܠܘܿܛ: ܐܟܸܠܘܿܢ: ܫܬܹܠܘܿܢ: ܙܒܸܢܘܿܢ: ܙܘܼܒܸܢܘܿܢ: 29 ܢܸܨܒ̣ܠܘܿܢ: ܒܢܹܠܘܿܢ. ܐܝܼܢܵܐ ܒܝܘܿܡܵܐ ܕܦܠܸܛܠܹܐ ܠܘܿܛ ܡ̣ܢ ܣܕܘܿܡ: ܡܘܼܥܪܹܠܹܐ ܡܵܪܝܵܐ ܢܘܼܪܵܐ ܘܟܸܒܪܝܼܬ ܡ̣ܢ ܫܡܲܝܵܐ: 30 ܘܬܘܼܠܸܩܠܹܐ ܠܟܠܵܝ. ܗܲܪ ܗܲܕܟ̣ܵܐ ܒܸܬ ܗܵܘܹܐ ܒܝܘܿܡܵܐ 31 ܕܦܵܝܸܫ ܓܸܠܝܵܐ ܒܪܘܼܢܹܗ ܕܐܢܵܫܵܐ. ܒܗ̇ܘ ܝܘܿܡܵܐ ܡ̇ܢ ܕܝܼܠܹܐ ܥܲܠ ܐܓܵܪܹܐ: ܘܡܸܢܕܝܼܘܼ̈ܗܝ ܓܵܘ ܒܲܝܬܵܐ: ܠܵܐ ܨܵܠܹܐ ܕܫܵܩܸܠ ܠܗ̄ܘܿܢ. ܘܡ̇ܢ ܕܝܼܠܹܐ ܓܵܘ ܚܲܩܠܵܐ: ܐܘܼܦ ܗܲܕܟ̣ܵܐ ܠܵܐ ܕܵܝܸܪ 32 ܠܒܵܬ̄ܪܹܗ. ܕܟ̣ܘܿܪܘܿܢ ܠܒܲܟ̣ܬܹܗ ܕܠܘܿܛ. ܡ̇ܢ ܕܒܵܣܡܵܐ ܠܹܗ ܕܡܲܚܹܐ ܓܵܢܹܗ: ܒܸܬ ܬܵܠܸܩ ܠܵܗ̇: ܡ̇ܢ ܕܬܵܠܸܩ ܠܵܗ̇: 34 ܒܸܬ ܡܲܚܹܐ ܠܵܗ̇. ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܗ̇ܘ ܠܲܝܠܹܐ ܬܪܲܝ ܒܸܬ ܗܵܘܝܼ ܒܚܕܵܐ ܫܘܝܼܬܵܐ: ܚܵܕ̄ ܒܸܬ ܦܵܝܸܫ ܠܘܼܒܠܵܐ: 35 ܘܗ̇ܘ ܐܚܹܪ̄ܢܵܐ ܒܸܬ ܦܵܝܸܫ ܫܒ̣ܝܼܩܵܐ. ܘܬܲܪ̈ܬܹܝ ܒܸܬ ܗܵܘܝܼ ܒܸܓܪܵܣܵܐ [58] ܡܸܚܕܵܕܹ̈ܐ: ܚܕܵܐ ܒܸܬ ܦܵܝܫܵܐ ܠܘܼܒܸܠܬܵܐ: ܘܗ̇ܝ 36 ܐܚܹܪ̄ܬܵܐ ܒܸܬ ܦܵܝܫܵܐ ܫܒ̣ܝܼܩܬܵܐ. [59] ܬܪܲܝ ܒܸܬ ܗܵܘܝܼ ܓܵܘ ܚܲܩܠܵܐ: ܚܵܕ̄ ܒܸܬ ܦܵܝܸܫ ܠܘܼܒܠܵܐ: ܘܗ̇ܘ ܐܚܹܪ̄ܢܵܐ ܒܸܬ ܦܵܝܸܫ 37 ܫܒ̣ܝܼܩܵܐ. ܓ̰ܘܼܘܸܒܠܘܿܢ ܘܐܡܸܪܘܿܢ ܐܸܠܹܗ: ܠܐܲܝܟܵܐ: ܡܵܪܲܢ: ܐܵܡܸܪ ܐܸܠܵܝ: ܐܲܝܟܵܐ ܕܝܼܠܹܐ ܦܲܓ̣ܪܵܐ: ܬܵܡܵܐ ܒܸܬ ܓ̰ܲܡܥܝܼ ܢܸܫܪܹ̈ܐ.

ܩܦܠܐܘܢ: ܝܚ

1 ܐܝܼܢܵܐ ܐܡܸܪܹܐ ܐܸܠܵܝ ܐܘܼܦ ܐܵܗܵܐ ܡܵܣܠܵܐ: ܕܒܟܠ ܥܕܵܢܵܐ 2 ܘܵܓ̰ܸܒ ܝܼܠܵܐ ܕܨܵܠܝܼ ܨܠܘܿܬܵܐ ܘܠܵܐ ܣܵܩܕܝܼ: ܒܹܐܡܵܪܵܐ. ܚܵܕ̄ ܕܲܝܵܢܵܐ ܐܝܼܬ ܗ̄ܘܵܐ ܓܵܘ ܚܕܵܐ ܡܕܝܼܢ̄ܬܵܐ: ܘܡ̣ܢ ܐܲܠܵܗܵܐ ܠܹܐ ܙܵܕܸܥ 3 ܗ̄ܘܵܐ: ܘܡ̣ܢ ܒܢܲܝ̈ܢܵܫܵܐ ܠܹܐ ܢܵܚܸܦ ܗ̄ܘܵܐ. ܘܚܕܵܐ ܐܲܪܡܸܠܬܵܐ ܐܝܼܬ ܗ̄ܘܵܐ ܒܗ̇ܝ ܡܕܝܼܢ̄ܬܵܐ: ܘܐܵܬܝܵܐ ܗ̄ܘܵܐ ܠܟܸܣܠܹܗ: ܘܐܵܡܪܵܐ: 4 ܥܒ̣ܘܿܕ ܠܵܗ̇ ܕܝܼܘܵܢܝܼ ܡ̣ܢ ܡܘܼܕܲܥܝܝܼ. ܘܠܹܐ ܒܵܣܡܵܐ ܗ̄ܘܵܐ ܠܹܗ ܚܵܕ̄ ܙܲܒ̣ܢܵܐ: ܐܝܼܢܵܐ ܒܵܬ̄ܪ ܗܵܕܵܐ ܐܡܸܪܹܐ ܒܓܵܢܹܗ: ܐܸܢ ܡ̣ܢ ܐܲܠܵܗܵܐ 5 ܠܹܐ ܝܘܸܢ ܒܸܙܕܲܥܝܵܐ: ܘܡ̣ܢ ܒܢܲܝ̈ܢܵܫܵܐ ܠܹܐ ܝܘܸܢ ܒܸܢܚܵܦܵܐ. ܐܝܼܢܵܐ ܣܵܒܵܒ ܕܡܲܓ̰ܗ̄ܘܝܝܼ ܝܠܵܐ ܐܵܗܵܐ ܐܲܪܡܸܠܬܵܐ: ܒܸܬ ܥܵܒ̣ܕܸܢܵܗ̇ ܕܝܼܘܵܢܘܼܗ̇: ܕܒܟܠ ܥܕܵܢܵܐ ܠܵܐ ܗܵܘܝܵܐ ܒܹܐܬܵܝܵܐ ܥܲܓ̰ܘܙܝܼ. 6 ܘܐܡܸܪܹܐ ܡܵܪܲܢ: ܫܡܸܥܡܘܿܢ ܡܘܼܕܝܼ ܐܡܸܪܹܐ ܕܲܝܵܢܵܐ ܢܵܐܗܲܩ. 7 ܘܐܲܠܵܗܵܐ ܠܹܐ ܥܵܒܸܕ ܠܵܗ̇ ܕܝܼܘܵܢ ܕܓܘܼܒ̇ܝܘܼ̈ܗܝ ܕܩܵܪܝܼ ܠܹܗ 8 ܒܐܝܼܡܵܡܵܐ ܘܒܠܲܝܠܹܐ: ܘܡܲܪܝܸܟ ܒܹܢܹܗ ܥܲܠܵܝ. ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܥܵܒܸܕ ܠܵܗ̇ ܕܝܼܘܵܢܵܝ ܓ̰ܲܠܕܹܐ. ܐܝܼܢܵܐ ܟܲܕ ܐܵܬܹܐ ܒܪܘܼܢܹܗ ܕܐܢܵܫܵܐ: ܒܸܬ ܡܵܫ̄ܟ̰ܸܚ ܗܲܝܡܵܢܘܼܬܵܐ ܥܲܠ ܐܲܪܥܵܐ: 9 ܘܐܡܸܪܹܐ ܐܵܗܵܐ ܡܵܣܵܠܵܐ ܕܲܪܩܘܼܒ̣ܠ ܕܐܵܢܝܼ ܕܒܗܹܒ̣ܝܼ ܗ̄ܘܵܘ ܒܓܵܢܵܝ ܕܙܲܕܝܼܩܹ̈ܐ ܗ̄ܘܵܘ: ܘܡܲܣܠܝܼ ܗ̄ܘܵܘ ܠܐܚܹܪ̄ܢܹܐ. 10 ܬܪܲܝ ܐܢܵܫܹ̈ܐ ܐܣܸܩܠܘܿܢ ܠܗܲܝܟܠܵܐ ܠܨܵܠܘܿܝܹܐ: ܚܵܕ̄ ܦܪܝܼܫܵܐ: 11 ܗ̇ܘ ܐܚܹܪ̄ܢܵܐ ܕܲܡܓ̣ܸܟ̰ܝܼ. ܦܪܝܼܫܵܐ ܟܸܠܝܵܐ ܗ̄ܘܵܐ ܒܹܝܠܹܗ ܠܓܵܢܹܗ: ܘܐܲܢܹܐ ܨܵܠܘܿܝܹܐ ܗ̄ܘܵܐ: ܐܲܠܵܗܵܐ: ܫܵܟܘܿܪܹܐ ܝܘܸܢ ܐܸܠܘܼܟ ܕܠܹܐ ܝܘܸܢ ܐܲܝܟ ܐܢܵܫܹ̈ܐ ܐܚܹܪ̈̄ܢܹܐ: [60] ܚܵܛܘܿܦܹ̈ܐ: ܢܵܐܗܲܩܹ̈ܐ: 12 ܩܲܗܒܹ̈ܐ: ܝܲܢ ܐܲܝܟ ܐܵܗܵܐ ܕܲܡܓ̣ܵܟ̰ܝܼ. ܟܹܐ ܨܵܝܡܸܢ ܬܲܪ̈ܬܹܝ ܓܵܗܹ̈ܐ 13 ܒܫܲܒܬܵܐ: ܟܹܐ ܝܵܗ̄ܒܸܢ ܡܲܥܣܵܪܹ̈ܐ ܕܟܠ ܡܸܢܕܝܼ ܕܩܵܢܸܢ. ܐܝܼܢܵܐ ܕܲܡܓ̣ܵܟ̰ܝܼ ܟܸܠܝܵܐ ܡ̣ܢ ܪܸܚܩܵܐ: ܠܹܐ ܒܲܥܝܹܐ ܗ̄ܘܵܐ ܐܘܼܦ ܠܵܐ ܥܲܝܢܘܼ̈ܗܝ ܡܵܪܸܡ ܠܫܡܲܝܵܐ: ܐܸܠܵܐ ܡܵܚܹܐ ܗ̄ܘܵܐ ܥܲܠ ܨܲܕܪܹܗ 14 ܘܐܵܡܸܪ: ܐܲܠܵܗܵܐ: ܥܒ̣ܘܿܕ ܪܲܚܡܹܐ ܐܸܠܝܼ ܚܲܛܵܝܵܐ. ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܨܠܹܠܹܐ ܐܵܗܵܐ ܡܘܼܟܫܸܛܵܐ ܠܒܲܝܬܹܗ: ܙܵܘܕܵܐ ܡ̣ܢ ܕܗ̇ܘ ܐܚܹܪ̄ܢܵܐ: ܣܵܒܵܒ ܟܠ ܐܢܵܫܵܐ ܕܡܵܪܸܡ ܓܵܢܹܗ ܒܸܬ ܦܵܝܸܫ ܡܘܼܟܸܦܵܐ: ܘܟܠ ܡ̇ܢ ܕܡܲܟܸܦ ܓܵܢܹܗ ܒܸܬ ܦܵܝܸܫ ܡܘܼܪܡܵܐ. 15 ܐܝܼܢܵܐ ܡܘܼܬ̄ܝܹܠܘܿܢ ܠܟܸܣܠܹܗ ܐܘܼܦ [61] ܝܲܠܘܼܕܹ̈ܐ ܕܕܵܩܸܪ ܗ̄ܘܵܐ ܒܝܼܵܝ: ܘܚܸܙܝܵܝܠܘܿܢ ܬܲܠܡܝܼܕܘܼ̈ܗܝ ܘܢܓ̰ܸܘܠܘܿܢ ܒܝܼܵܝ. 16 ܐܝܼܢܵܐ ܝܼܫܘܿܥ ܩܸܪܝܵܝܠܹܐ ܠܟܸܣܠܹܗ: ܘܐܡܸܪܹܐ ܐܸܠܵܝ: ܫܒ̣ܘܿܩܘܿܢ ܝܵܠܹ̈ܐ ܙܥܘܿܪܹ̈ܐ ܐܵܬܝܼ ܠܟܸܣܠܝܼ: ܘܠܵܐ ܡܲܟܠܝܼܬܘܿܢ ܠܗ̄ܘܿܢ: 17 ܣܵܒܵܒ ܕܐܵܢܝܼ ܕܐܲܝܟ ܕܐܲܢܹܐ ܝܼܠܵܐ ܡܲܠܟܘܼܬܵܐ ܕܫܡܲܝܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡ̇ܢ ܕܠܵܐ ܩܵܒܸ̇ܠ ܡܲܠܟܘܼܬܐ ܕܐܲܠܵܗܵܐ ܐܲܝܟ ܝܵܠܵܐ ܙܥܘܿܪܵܐ: ܠܹܐ ܐܵܘܸܪ ܓܵܘܵܗ̇. 18 ܘܒܘܼܩܸܪܹܗ ܚܵܕ̄ ܡ̣ܢ ܪܹ̈ܫܵܢܹܐ: ܘܐܡܸܪܹܐ: ܐܸܠܹܗ: ܡܲܠܦܵܢܵܐ 19 ܛܵܒ̣ܵܐ: ܡܘܼܕܝܼ ܥܵܒ̣ܕܸܢ ܕܝܵܪܬܸܢ ܚܲܝܹ̈ܐ ܕܠܵܐܒܵܕ. ܐܵܡܸܪ ܐܸܠܹܗ ܝܼܫܘܿܥ: ܩܵܡܘܿܕܝܼ ܒܸܩܪܵܝܝܼ ܝܘܸܬ ܛܵܒ̣ܵܐ: ܠܲܝܬ ܛܵܒ̣ܵܐ ܫܒ̣ܘܿܩ 20 ܡ̣ܢ ܚܵܕ̄: ܐܲܠܵܗܵܐ. ܦܘܼܩܕܵܢܹ̈ܐ ܟܹܐ ܝܼܕܥܸܬ: ܠܵܐ ܩܵܛܠܸܬ: ܘܠܵܐ ܥܵܒ̣ܕܸܬ ܩܲܗܒܘܼܬܵܐ: ܘܠܵܐ ܓܵܢܒܸܬ: ܘܠܵܐ ܝܵܗ̄ܒܸܬ ܣܵܗܕܘܼܬܵܐ ܕܕܘܼܓܠܵܐ: ܥܒ̣ܘܿܕ ܐܝܼܩܵܪܵܐ ܠܒܵܒܘܼܟ ܘܠܝܸܡܘܼܟ. 21 ܘܐܡܸܪܹܐ ܐܸܠܹܗ: ܐܲܢܹܐ ܟܠܵܝ ܢܛܝܼܪܵܝ ܝܘܸܢ ܡ̣ܢ ܝܵܠܘܼܬܝܼ. 22 ܐܝܼܢܵܐ ܟܲܕ ܫܡܸܥܠܹܐ ܝܼܫܘܿܥ ܐܲܢܹܐ: ܐܡܸܪܹܐ ܐܸܠܹܗ: ܒܚܵܕ̄ ܡܸܢܕܝܼ ܒܵܨܘܿܪܵܐ ܝܘܸܬ: ܙܵܒܸ̇ܢ ܟܠ ܡܸܢܕܝܼ ܕܐܝܼܬ ܠܘܼܟ: ܘܗܲܒ̄ܠ ܠܡܸܣܟܹܢܹ̈ܐ: ܘܒܸܬ ܗܵܘܝܵܐ ܠܘܼܟ ܚܲܙܝܼܢܵܐ ܒܫܡܲܝܵܐ ܘܬܵܐ: ܐܵܬܸܬ 23 ܒܵܬ̄ܪܝܼ. ܐܝܼܢܵܐ ܗ̇ܘ ܟܲܕ ܫܡܸܥܠܹܐ ܐܲܢܹܐ: ܟܪܹܠܵܐ ܠܹܗ ܪܵܒܵܐ: 24 ܣܵܒܵܒ ܕܪܵܒܵܐ ܕܵܘܠܲܬܡܲܢܕ ܝܼܗ̄ܘܵܐ. ܘܟܲܕ ܚܙܹܠܹܐ ܝܼܫܘܿܥ: ܐܡܸܪܹܐ: ܟܡܵܐ ܥܲܣܩܵܐ ܝܠܵܐ ܠܐܵܢܝܼ ܕܐܝܼܬ ܠܗ̄ܘܿܢ ܡܵܐܠ 25 ܕܐܵܘܪܝܼ ܠܡܲܠܟܘܼܬܹܗ ܕܐܲܠܵܗܵܐ!. ܒܘܼܫ ܗܵܣܵܢܵܝܝܼ ܝܠܵܐ ܠܓܘܼܡܠܵܐ ܕܐܵܘܪܵܐ ܒܢܸܩܒܵܐ ܕܚܡܵܛܵܐ: ܡ̣ܢ ܕܕܵܘܠܲܬܡܲܢܕ ܐܵܘܸܪ 26 ܠܡܲܠܟܘܼܬܹܗ ܕܐܲܠܵܗܵܐ. ܐܵܡܪܝܼ ܐܸܠܹܗ ܐܵܢܝܼ ܕܫܡܸܥܠܘܿܢ: 27 ܒܲܣ ܡܵܢܝܼ ܡܵܨܹܐ ܠܸܚܵܝܵܐ. ܐܝܼܢܵܐ ܐܡܸܪܹܐ: ܐܵܢܝܼ ܕܠܟܸܣ ܒܢܲܝ̈ܢܵܫܵܐ ܠܹܐ ܡܵܨܝܼ ܠܸܗܘܵܝܵܐ: ܠܟܸܣ ܐܲܠܵܗܵܐ ܟܹܐ ܡܵܨܝܼ. 28 ܐܵܡܸܪ ܐܸܠܹܗ ܟܹܐܦܵܐ: ܗܵܐ: ܐܲܚܢܲܢ ܫܒܸܩܠܲܢ ܟܠ ܡܸܢܕܝܼ ܘܐܬܹܠܲܢ 29 ܒܵܬ̄ܪܘܼܟ. ܐܵܡܸܪ ܐܸܠܹܗ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܲܝܬ ܐܢܵܫܵܐ ܕܫܵܒܸܩ ܒܵܬܹ̈ܐ: ܝܲܢ ܐܲܒ̣ܵܗܹ̈ܐ: ܝܲܢ ܐܵܚܘܿܢܘܵܬܹ̈ܐ: ܝܲܢ 30 ܒܲܟ̣ܬܵܐ: ܝܲܢ ܒܢܘܼܢܹ̈ܐ: ܒܚܵܬܸܪ ܕܡܲܠܟܘܼܬܵܐ ܕܐܲܠܵܗܵܐ. ܘܠܵܐ ܩܵܒܸ̇ܠ ܚܵܕ̄ ܒܪܵܒܵܐ ܒܐܵܗܵܐ ܙܲܒ̣ܢܵܐ: ܘܒܥܵܠܡܵܐ ܕܐܵܬܹܐ ܚܲܝܹ̈ܐ ܕܠܵܐܒܵܕ. 31 ܘܠܘܼܒܸܠܹܐ ܠܬܪܸܥܣܲܪܬܹܗ: ܘܐܡܸܪܹܐ ܐܸܠܵܝ: ܗܵܐ: ܒܹܐܣܵܩܵܐ ܝܘܵܚ ܠܐܘܿܪܸܫܠܸܡ: ܘܒܸܬ ܦܵܝܫܝܼ ܬܘܼܡܸܡܹܐ ܟܠܵܝ ܕܝܼܢܵܐ 32 ܟܬܝܼܒܹܐ ܒܢܒ̣̈ܝܹܐ ܒܵܗ̄ܣ ܕܒܪܘܼܢܹܗ ܕܐܢܵܫܵܐ. ܣܵܒܵܒ ܕܒܸܬ ܦܵܝܸܫ ܣܘܼܦܝܵܐ ܠܛܵܝܸܦܹ̈ܐ: ܘܒܸܬ ܡܲܣܚܸܪܝܼ ܒܝܹܗ: ܘܒܸܬ 33 ܥܵܒ̣ܕܝܼ ܠܹܗ ܒܹܨܘܼܪ: ܘܒܸܬ ܪܵܝܩܝܼ ܓܵܘ ܦܵܬܹܗ. ܘܒܸܬ ܓ̰ܲܢܓ̰ܸܪܝܼ ܠܹܗ: ܘܒܸܬ ܩܵܛܠܝܼ ܠܹܗ: ܘܒܝܘܿܡܵܐ ܕܬܠܵܬ̄ܐ 34 ܒܸܬ ܩܵܝܸܡ. ܘܐܵܢܝܼ ܚܕܵܐ ܡ̣ܢ ܕܐܲܢܹܐ ܠܵܐ ܦܘܼܪܡܹܠܘܿܢ: ܘܡܘܼܟܸܣܬܵܐ ܗ̄ܘܵܐ ܡܸܢܵܝ ܐܵܗܵܐ ܗܹܡܸܙܡܵܢ: ܘܠܵܐ ܝܕܸܥܠܘܿܢ ܐܲܢܹܐ ܕܝܼܗ̄ܘܵܘ ܗܘܼܡܙܸܡܹܐ. 35 ܘܗ̄ܘܹܠܵܐ ܟܲܕ [62] ܩܘܼܪܒܸܢܹܐ ܠܐܝܼܪܝܼܚܘܿ: ܚܵܕ̄ ܣܸܡܝܵܐ ܝܬܝܼܒ̣ܵܐ 36 ܗ̄ܘܵܐ ܥܲܠ ܡܲܪܙܵܐ ܕܐܘܼܪܚܵܐ ܒܸܓܒ̣ܵܝܵܐ. ܘܫܡܸܥܠܹܐ ܟܸܢܫܵܐ 37 ܒܸܥܒ̣ܵܪܵܐ: ܘܒܘܼܩܸܪܹܐ: ܡܘܼܕܝܼ ܝܠܹܐ ܐܵܗܵܐ. ܐܵܡܪܝܼ ܐܸܠܹܗ: 38 ܝܼܫܘܿܥ ܢܵܨܪܵܝܵܐ ܒܸܥܒ̣ܵܪܵܐ ܝܠܹܐ. ܘܡܘܼܩܘܸܚܠܹܐ ܘܐܡܸܪܹܐ: ܝܼܫܘܿܥ: 39 ܒܪܘܼܢܹܗ ܕܕܵܘܝܼܕ: ܪܵܚܸܡ ܥܲܠܝܼ. ܘܐܵܢܝܼ ܕܒܹܐܙܵܠܵܐ ܗ̄ܘܵܘ ܩܵܕ̄ܡܘܼܗܝ ܢܓ̰ܸܘܠܘܿܢ ܒܝܹܗ ܕܫܵܬܸܩ: ܐܝܼܢܵܐ ܗ̇ܘ ܒܘܼܫ ܙܵܘܕܵܐ 40 ܡܲܩܘܸܚ ܗ̄ܘܵܐ: ܒܪܘܼܢܹܗ ܕܕܵܘܝܼܕ: ܪܵܚܸܡ ܥܲܠܝܼ. ܘܟܠܹܠܹܐ ܝܼܫܘܿܥ: ܘܦܩܸܕܠܹܐ ܕܡܲܝܬ̄ܝܝܼ ܠܹܗ ܠܟܸܣܠܹܗ ܘܟܲܕ 41 [63] ܩܘܼܪܒܸܢܹܐ: ܒܘܼܩܸܪܹܗ. ܘܐܡܸܪܹܐ ܐܸܠܹܗ: ܡܘܼܕܝܼ ܒܲܥܝܸܬ 42 ܥܵܒ̣ܕܸܢ ܐܸܠܘܼܟ: ܘܗ̇ܘ ܐܡܸܪܹܐ: ܡܵܪܝܼ: ܕܚܵܙܸܢ. ܘܝܼܫܘܿܥ ܐܡܸܪܹܐ 43 ܐܸܠܹܗ: ܚܙܝܼ: ܗܲܝܡܵܢܘܼܬܘܼܟ ܩܲܡ ܡܲܚܝܼܵܐ ܠܘܼܟ. ܘܗܲܪ ܒܗ̇ܝ ܣܵܥܲܬ ܚܙܹܠܹܐ: ܘܐܵܬܹܐ ܗ̄ܘܵܐ ܒܵܬ̄ܪܹܗ: ܫܵܒܘܿܚܹܐ ܠܐܲܠܵܗܵܐ. ܘܟܠܹܗ ܛܵܝܸܦܵܐ ܟܲܕ ܚܙܹܠܹܐ: ܝܸܗܒܸܠܹܐ ܚܸܩܪܵܐ ܠܐܲܠܵܗܵܐ.

ܩܦܠܐܘܢ: ܝܛ

1 ܘܟܲܕ ܐܘܸܪܹܐ: ܥܒܸܪܹܐ ܡ̣ܢ ܓܵܘ ܐܝܼܪܝܼܚܘܿ. ܘܗܵܐ: ܚܵܕ̄ ܐܢܵܫܵܐ 2 ܕܫܸܡܹܗ ܙܲܟܲܝ: ܓܘܼܪܵܐ ܕܕܲܡܓ̣ܵܟ̰̈ܝܹܐ ܗ̄ܘܵܐ ܘܕܵܘܠܲܬܡܲܢܕ. 3 ܘܒܲܥܝܹܐ ܗ̄ܘܵܐ ܕܚܵܙܹܐ ܠܝܼܫܘܿܥ: ܕܡܵܢܝܼ ܝܠܐ: ܘܠܹܐ ܡܵܨܹܐ ܗ̄ܘܵܐ 4 ܡ̣ܢ ܟܸܢܫܵܐ: ܣܵܒܵܒ ܕܒܩܘܼܡܬܹܗ ܟܸܪܝܵܐ ܗ̄ܘܵܐ. ܘܪܚܸܛܠܹܐ ܠܩܵܕ̄ܡܘܼܗܝ: ܘܐܣܸܩܠܹܐ ܠܬܹܬܵܐ ܦܲܟܝܼܗܬܵܐ ܕܚܵܙܹܐ ܠܹܗ: 5 ܣܵܒܵܒ ܕܒܗ̇ܝ ܐܘܼܪܚܵܐ ܗܕܝܼܪܵܐ ܗ̄ܘܵܐ ܕܥܵܒܸܪ. ܘܟܲܕ ܐܬܹܠܹܐ ܠܗ̇ܝ ܕܘܼܟܬܵܐ ܝܼܫܘܿܥ: ܚܸܪܹܐ ܠܥܸܠܸܠ ܘܚܙܹܠܹܗ: ܘܐܡܸܪܹܐ ܐܸܠܹܗ: ܝܠܘܿܙ: ܨܠܝܼ ܙܲܟܲܝ: ܣܵܒܵܒ ܕܐܸܕܝܘܼ ܘܵܓ̰ܸܒ ܝܼܠܵܐ ܕܓܵܘ 6 ܒܲܝܬܘܼܟ ܗܵܘܸܢ. ܘܝܠܸܙܠܹܐ ܨܠܹܠܹܐ: ܘܩܘܼܒܸܠܹܗ ܒܚܲܕܘܼܬܵܐ. 7 ܐܝܼܢܵܐ ܟܲܕ ܚܙܹܠܘܿܢ ܟܠܵܝ ܛܘܼܪܛܸܡܠܘܿܢ: ܘܐܡܸܪܘܿܢ: ܠܟܸܣ 8 ܐܢܵܫܵܐ ܚܲܛܵܝܵܐ ܐܘܸܪܹܐ ܫܪܹܠܹܐ. ܐܝܼܢܵܐ ܩܸܡܠܹܐ ܙܲܟܲܝ ܘܐܡܸܪܹܐ ܠܡܵܪܲܢ: ܗܵܐ: ܡܵܪܝܼ: ܦܲܠܓܵܐ ܕܡܸܢܕܝܝܼ̈ ܒܝܼܵܗ̄ܒ̣ܵܐ ܝܘܸܢ ܠܡܸܣܟܹܢܹ̈ܐ: ܘܐܸܢ ܠܐܢܵܫܵܐ ܡܸܢܕܝܼ ܙܠܸܡܠܝܼ: ܚܵܕ̄ ܒܐܲܪܒܥܵܐ 9 ܒܸܦܪܲܥܝܵܐ ܝܘܸܢ. ܐܵܡܸܪ ܐܸܠܹܗ ܝܼܫܘܿܥ: ܐܸܕܝܘܼ ܗ̄ܘܹܠܘܿܢ ܚܲܝܹ̈ܐ ܠܐܵܗܵܐ 10 ܒܲܝܬܵܐ: ܣܵܒܵܒ ܕܐܘܼܦ ܐܵܗܵܐ ܒܪܘܼܢܵܐ ܕܐܲܒ̣ܪܵܗܵܡ ܝܼܠܹܐ. ܣܵܒܵܒ ܕܐܬܹܠܹܐ ܒܪܘܼܢܹܗ ܕܐܢܵܫܵܐ ܕܛܵܥܹܐ ܘܡܲܚܹܐ ܠܡܸܢܕܝܼ ܕܝܼܗ̄ܘܵܐ ܬܠܝܼܩܵܐ. 11 ܘܟܲܕ ܫܡܸܥܠܘܿܢ ܐܲܢܹܐ: ܡܘܼܙܝܸܕܠܹܐ ܠܹܐܡܵܪܵܐ ܡܵܣܵܠܵܐ: ܣܵܒܵܒ ܕܩܘܼܪܒܵܐ ܗ̄ܘܵܐ ܠܐܘܿܪܸܫܠܸܡ: ܘܚܵܫܒ̣ܝܼ ܗ̄ܘܵܘ ܕܒܗ̇ܝ ܣܵܥܲܬ ܗܕܝܼܪܬܵܐ ܗ̄ܘܵܐ ܕܦܵܝܫܵܐ ܐܲܫܟܵܪܵܐ ܡܲܠܟܘܼܬܹܗ ܕܐܲܠܵܗܵܐ. 12 ܐܡܸܪܹܐ ܗܲܕܟ̣ܵܐ: ܚܵܕ̄ ܐܢܵܫܵܐ ܕܡ̣ܢ ܐܘܼܓ̰ܵܓ̣ ܓܘܼܪܬܵܐ ܐܙܸܠܹܐ 13 ܠܐܲܬܪܵܐ ܪܸܚܩܵܐ: ܕܫܵܩܸܠ ܠܹܗ ܡܲܠܟܘܼܬܵܐ ܘܕܵܝܸܪ. ܘܩܪܹܠܹܐ ܥܸܣܪܵܐ ܪܹ̈ܓܵܘܵܬܘܼܗܝ: ܘܝܸܗܒܸܠܹܐ ܐܸܠܵܝ ܥܸܣܪܵܐ ܡܢܝܼ̈ܢ: ܘܐܡܸܪܹܐ 14 ܐܸܠܵܝ: ܥܒ̣ܘܿܕܘܿܢ ܡܲܥܡܠܵܐ ܗܲܠ ܕܐܵܬܹܐ ܐܢܵܐ. ܐܝܼܢܵܐ ܒܢܲܝ̈ ܡܕܝܼܢ̄ܬܹܗ ܟܹܐ ܣܵܢܝܼ ܗ̄ܘܵܘ ܠܹܗ: ܘܫܘܼܕܸܪܘܿܢ ܩܵܨܸܕܹ̈ܐ ܒܵܬ̄ܪܹܗ: ܘܐܵܡܪܝܼ: ܠܹܐ ܒܵܣܡܵܐ ܠܲܢ ܕܐܵܗܵܐ ܥܵܒܸܕ ܡܲܠܟܘܼܬܵܐ ܥܲܠܲܢ. 15 ܘܗ̄ܘܹܠܵܐ: ܟܲܕ ܫܩܸܠܹܐ ܡܲܠܟܘܼܬܵܐ ܘܕܸܪܹܐ: ܐܡܸܪܹܐ ܕܩܵܪܝܼ ܗ̄ܘܵܘ ܠܗ̄ܘܿܢ ܠܟܸܣܠܹܗ ܐܵܢܝܼ ܪܹ̈ܓܵܘܵܬܘܼܗܝ ܕܝܸܗܒܸܠܹܐ ܐܸܠܵܝ ܙܘܼܙܵܐ: ܕܝܼܕܸܥ ܡܘܼܕܝܼ ܟܠ ܚܵܕ̄ ܡܸܢܵܝ ܩܢܹܠܹܐ ܒܥܒ̣ܵܕܬܵܐ 16 ܕܡܲܥܡܠܵܐ. ܘܐܬܹܠܹܐ ܩܵܕ̄ܡܵܝܵܐ ܘܐܡܸܪܹܐ: ܡܵܪܝܼ: ܡܲܢܝܘܼܟ 17 ܥܸܣܪܵܐ ܡܢܝܼ̈ܢ ܡܘܼܙܝܸܕܠܹܐ. ܐܵܡܸܪ ܐܸܠܹܗ: ܟ̰ܵܝܒܘܿ: ܪܹܓܵܐ ܛܵܒ̣ܵܐ: ܕܒܚܲܟ̰ܵܐ ܗ̄ܘܹܠܘܼܟ ܡܗܘܼܡܢܵܐ: ܗܵܘܹܐ ܠܘܼܟ ܗܘܼܟܡܵܐ 18 ܥܲܠ ܥܸܣܲܪ ܡܕܝܼܢܵܬܹ̈ܐ. ܘܐܬܹܠܹܐ ܕܬܪܲܝ: ܘܐܡܸܪܹܐ: ܡܵܪܝܼ: 19 ܡܲܢܝܘܼܟ ܚܲܡܫܵܐ ܡܢܝܼ̈ܢ ܥܒܸܕܠܹܐ. ܐܡܸܪܹܐ ܐܘܼܦ ܠܐܵܗܵܐ: ܐܘܼܦ 20 ܐܲܢ̄ܬ ܗ̄ܘܝܼ ܥܲܠ ܚܲܡܸܫ ܡܕܝܼܢܵܬܹ̈ܐ. ܘܐܬܹܠܹܐ ܐܚܹܪ̄ܢܵܐ ܘܐܡܸܪܐ: ܡܵܪܝܼ: ܗܵܐ: ܗ̇ܘ ܡܲܢܝܘܼܟ: ܕܗ̄ܘܹܠܹܐ ܠܟܸܣܠܝܼ ܡܘܼܬܒ̣ܵܐ 21 ܒܝܵܠܸܚܬܵܐ. ܣܵܒܵܒ ܙܕܸܥܠܝܼ ܡܸܢܘܼܟ: ܕܐܢܵܫܵܐ ܩܸܫܝܵܐ ܝܘܸܬ: ܟܹܐ ܫܵܩܠܸܬ ܡܸܢܕܝܼ ܕܠܵܐ ܡܘܼܬܸܒ̣ܠܘܼܟ: ܘܟܹܐ ܚܵܨܕܸܬ ܡܸܢܕܝܼ 22 ܕܠܵܐ ܙܪܸܥܠܘܼܟ. ܐܵܡܸܪ ܐܸܠܹܗ: ܡ̣ܢ ܦܘܼܡܘܼܟ ܒܸܬ ܕܵܝܢܸܢܘܼܟ: ܪܹܓܵܐ ܒܝܼܫܵܐ: ܒܝܼܕܲܥܝܝܼ ܝܘܸܬ ܗ̄ܘܵܐ ܕܐܢܵܫܵܐ ܩܸܫܝܵܐ ܝܘܸܢ: ܘܟܹܐ ܫܵܩܠܸܢ ܡܸܢܕܝܼ ܕܠܵܐ ܡܘܼܬܸܒ̣ܠܝܼ: ܘܚܵܨܕܸܢ ܡܸܢܕܝܼ ܕܠܵܐ 23 ܙܪܸܥܠܝܼ. ܒܲܣ ܩܵܡܘܿܕܝܼ ܠܵܐ ܝܸܗܒܸܠܘܼܟ ܙܘܼܙܝܼ ܥܲܠ ܨܘܼܦܪܵܐ ( ܕܨܲܪܵܦ): ܘܐܵܢܵܐ ܟܲܕ ܐܵܬܸܢ ܗ̄ܘܵܐ ܒܸܬ ܛܵܠܒܸܢ ܗ̄ܘܵܐ ܠܹܗ 24 ܥܲܡ ܙܵܘܕܘܿܢܝܹܗ. ܘܠܵܐܢܝܼ ܕܟܸܠܝܹܐ ܗ̄ܘܵܘ ܩܵܕ̄ܡܘܼܗܝ ܐܡܸܪܹܐ: ܫܩܘܿܠܘܿܢ ܡܸܢܹܗ ܡܲܢܝܵܐ: ܘܗܲܒ̄ܠܘܿܢ ܠܗ̇ܘ ܕܐܝܼܬ ܠܹܗ ܥܸܣܪܵܐ 25 ܡܢܝܼ̈ܢ. ܐܵܡܪܝܼ ܐܸܠܹܗ: ܡܵܪܲܢ: ܐܝܼܬ ܠܹܗ ܥܸܣܪܵܐ ܡܢܝܼ̈ܢ. 26 ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܡ̇ܢ ܕܐܝܼܬ ܠܹܗ: ܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܹܗ: ܘܡ̣ܢ ܕܗ̇ܘ ܕܠܲܝܬ ܠܹܗ: ܐܘܼܦ ܗ̇ܘ ܕܐܝܼܬ 27 ܠܹܗ ܒܸܬ ܦܵܝܸܫ ܫܩܝܼܠܵܐ ܡܸܢܹܗ. ܐܝܼܢܵܐ ܠܐܵܢܝܼ ܕܸܫܡܸܢܝܼ̈: ܐܲܝܢܝܼ ܕܠܹܐ ܒܲܥܝܝܼ ܗ̄ܘܵܘ ܕܥܒ̣ܕܸܢ ܡܲܠܟܘܼܬܵܐ ܥܲܠܵܝ: ܡܲܝܬ̄ܡܘܿܢ ܠܗ̄ܘܿܢ ܠܲܐܟ̣ܵܐ: ܘܩܛܘܿܠܘܿܢ ܠܗ̄ܘܿܢ ܩܵܕ̄ܡܝܼ. 28 ܘܟܲܕ ܐܡܸܪܹܐ ܐܲܢܹܐ: ܦܠܸܛܠܹܐ ܠܵܩܵܕ̄ܡܘܼܗܝ ܕܐܵܣܸܩ ܗ̄ܘܵܐ ܠܐܘܿܪܸܫܠܸܡ. 29 ܘܗ̄ܘܹܠܵܐ ܕܟܲܕ [64] ܩܘܼܪܒܸܢܹܐ ܠܒܹܝܬ ܦܵܓܹܐ ܘܒܹܝܬ ܥܲܢܝܵܐ: ܠܟܸܣ ܛܘܼܪܵܐ ܕܦܝܵܫܵܐ ܝܠܹܐ ܩܸܪܝܵܐ ܕܙܲܝܬܹ̈ܐ: ܫܘܼܕܸܪܹܐ ܬܪܲܝ 30 ܡ̣ܢ ܬܲܠܡܝܼܕܘܼ̈ܗܝ. ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܠܡܵܬܵܐ ܕܠܒܲܪܩܘܼܒ̣ܠܲܢ: ܘܟܲܕ ܐܵܘܪܝܼܬܘܿܢ ܓܵܘܵܗ̇ ܒܸܬ ܡܵܫ̄ܟ̰ܚܝܼܬܘܿܢ ܓ̰ܲܥܫܵܐ ܐܣܝܼܪܵܐ: ܕܟ̰ܘܼ ܐܢܵܫܵܐ ܠܵܐ ܝܬܸܒ̣ܠܹܐ ܥܲܠܘܼܗܝ. ܫܪܹܡܘܿܢ 31 ܡܲܝܬ̄ܡܘܿܢ ܠܹܗ. ܘܐܸܢ ܐܢܵܫܵܐ ܒܵܩܸܪܵܘܟ̣ܘܿܢ: ܩܵܡܘܿܕܝܼ ܒܸܫܪܵܝܹܗ ܝܬܘܿܢ: ܗܲܕܟ̣ܵܐ ܐܡܘܿܪܘܿܢ ܐܸܠܹܗ: ܠܡܵܪܲܢ ܠܵܙܸܡ 32 ܝܼܠܹܐ. ܘܐܙܸܠܘܿܢ ܐܵܢܝܼ ܕܦܸܫܠܘܿܢ ܫܘܼܕܪܹܐ: ܘܡܘܼܫ̄ܟ̰ܸܚܠܘܿܢ 33 ܕܵܐܟ̣ܝܼ ܕܐܡܸܪܹܐ ܐܸܠܵܝ. ܘܟܲܕ ܒܸܫܪܵܝܵܐ ܗ̄ܘܵܘ ܠܓ̰ܲܥܫܵܐ: ܐܡܸܪܘܿܢ ܐܸܠܵܝ ܡܵܪ̈ܵܘܵܬܘܼܗܝ: ܩܵܡܘܿܕܝܼ ܒܸܫܪܵܝܵܐ ܝܬܘܿܢ 34 ܠܓ̰ܲܥܫܵܐ. ܘܐܡܸܪܘܿܢ ܐܸܠܵܝ: ܠܡܵܪܲܢ ܠܵܙܸܡ ܝܼܠܹܐ. 35 ܘܡܘܼܬ̄ܝܹܠܘܿܢ ܐܸܠܹܗ ܠܟܸܣ ܝܼܫܘܿܥ. ܘܕܪܹܠܘܿܢ ܥܲܠ ܓ̰ܲܥܫܵܐ 36 ܓ̰ܘܼܠܵܝ̈: ܘܡܘܼܪܟܸܒ̣ܠܘܿܢ ܠܝܼܫܘܿܥ ܥܲܠܘܼܗܝ. ܐܝܼܢܵܐ ܟܲܕ 37 ܒܹܐܙܵܠܵܐ ܗ̄ܘܵܐ: ܫܘܼܘܹܠܘܿܢ ܓ̰ܘܼܠܵܝ̈ ܒܐܘܼܪܚܵܐ. ܘܟܲܕ [65] ܩܘܼܪܒܸܢܹܐ ܠܡܲܨܠܵܝܬܵܐ ܕܛܘܼܪܵܐ ܕܙܲܝܬܹ̈ܐ: ܫܘܼܪܹܠܘܿܢ ܟܠܹܗ ܟܸܢܫܵܐ ܕܬܲܠܡܝܼܕܹ̈ܐ ܒܸܚܕܵܝܵܐ ܘܫܵܒܘܿܚܹܐ ܠܐܲܠܵܗܵܐ ܒܩܵܠܵܐ ܪܵܡܵܐ 38 ܥܲܠ ܟܠܵܝ ܚܲܝܠܹ̈ܐ ܕܚܙܹܠܘܿܢ. ܒܹܐܡܵܪܵܐ: ܒܪܝܼܟ̣ܵܐ ܝܠܹܐ ܡܲܠܟܵܐ ܕܒܹܐܬܵܝܵܐ ܝܠܹܐ ܒܫܸܡܹܗ ܕܡܵܪܝܵܐ: ܫܠܵܡܵܐ ܒܫܡܲܝܵܐ: 39 ܘܫܘܼܒ̣ܚܵܐ ܒܡܪ̈ܵܘܡܹܐ. ܐܝܼܢܵܐ ܐܢܵܫܹ̈ܐ ܡ̣ܢ ܦܪ̈ܝܼܫܹܐ ܡ̣ܢ ܓܵܘܵܐ ܕܟܸܢܫܹ̈ܐ ܐܵܡܪܝܼ ܐܸܠܹܗ: ܪܵܒܝܼ: ܢܓ̰ܘܿ ܒܬܲܠܡܝܼܕܘܼ̈ܟ. 40 ܓ̰ܘܼܘܸܒܠܹܐ ܘܐܡܸܪܹܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܐܲܢܹܐ ܫܵܬܩܝܼ ܟܹܐܦܹ̈ܐ ܒܸܬ ܡܲܩܘܸܚܝܼ. 41 ܘܟܲܕ [66] ܩܘܼܪܒܸܢܹܐ: ܚܸܙܝܵܠܹܐ ܠܡܕܝܼܢ̄ܬܵܐ ܘܒܟܹܠܹܐ 42 ܥܲܠܘܼܗ̇. ܘܐܡܸܪܹܐ: ܐܸܢ ܝܲܕܥܲܬܝ ܗ̄ܘܵܐ ܒܐܵܗܵܐ ܝܘܿܡܵܐ: ܐܘܼܦ ܐܲܢ̄ܬܝ: ܐܵܢܝܼ ܕܝܼܢܵܐ ܕܫܠܵܡܵܟ̣ܝ: ܐܝܼܢܵܐ ܐܵܕܝܼܵܐ ܦܸܫܠܘܿܢ ܟܘܼܣܝܹܐ 43 ܡ̣ܢ ܥܲܝܢܵܟ̣ܝ̈. ܣܵܒܵܒ ܒܸܬ ܐܵܬܝܼ ܥܲܠܵܟ̣ܝ ܝܘܿܡܵܢܹ̈ܐ: ܕܒܸܬ ܕܵܪܝܼ ܣܲܢܓܵܪ ܠܚܵܕܸܪ̈ܘܵܢܵܟ̣ܝ: ܘܒܸܬ ܚܲܪܕܝܼ ܠܵܟ̣ܝ ܡ̣ܢ ܟܠ 44 ܕܘܼܟܵܐ. ܘܒܸܬ ܬܵܠܚܝܼ ܠܵܟ̣ܝ: ܘܠܒܢܘܼܢܵܟ̣ܝ̈ ܒܓܵܘܵܟ̣ܝ: ܘܠܹܐ ܫܵܒ̣ܩܝܼ ܓܵܘܵܟ̣ܝ ܟܹܐܦܵܐ ܥܲܠ ܟܹܐܦܵܐ: ܣܵܒܵܒ ܕܠܵܐ ܝܕܸܥܠܵܟ̣ܝ ܙܲܒ̣ܢܵܐ ܕܣܲܚܒܲܪܬܵܟ̣ܝ.

45 ܘܟܲܕ ܐܘܸܪܹܐ ܠܗܲܝܟܠܵܐ: ܫܘܼܪܹܠܹܐ ܠܦܵܠܘܿܛܹܐ ܠܙܵܒ̇ܢܵܢܹ̈ܐ. 46 ܘܐܡܸܪܹܐ ܐܸܠܵܝ: ܟܬܝܼܒܹܐ ܝܠܹܐ: ܒܲܝܬܝܼ ܒܲܝܬܵܐ ܕܨܠܘܿܬܵܐ ܗܵܘܹܐ: ܐܝܼܢܵܐ ܐܲܚܬܘܿܢ ܥܒ̣ܝܼܕܘܼܗܝ ܝܬܘܿܢ ܓܸܦܝܼܬܵܐ ܕܓ̰ܵܠܵܠ̈ܝܹܐ. 47 ܘܗ̇ܘ ܡܵܠܘܿܦܹܐ ܗ̄ܘܵܐ ܟܠ ܝܘܿܡ ܓܵܘ ܗܲܝܟܠܵܐ. ܐܝܼܢܵܐ ܓܘܼܪܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܛܵܝܸܦܵܐ ܛܸܥܠܘܿܢ 48 ܠܬܵܠܘܿܩܹܗ. ܘܠܵܐ ܡܘܼܫ̄ܟ̰ܸܚܠܘܿܢ ܡܘܼܕܝܼ ܥܵܒ̣ܕܝܼ ܗ̄ܘܵܘ: ܣܵܒܵܒ ܟܠܹܗ ܛܵܝܸܦܵܐ ܬܸܠܝܵܐ ܗ̄ܘܵܐ ܒܝܹܗ ܠܸܫܡܲܥܝܹܗ.

ܩܦܠܐܘܢ: ܟ

1 ܘܗ̄ܘܹܠܵܐ ܒܚܵܕ̄ ܡ̣ܢ ܝܘܿܡܵܢܹ̈ܐ: ܟܲܕ ܡܵܠܘܿܦܹܐ ܗ̄ܘܵܐ ܓܵܘ ܗܲܝܟܠܵܐ ܠܛܵܝܸܦܵܐ ܘܡܲܫܚܘܼܕܹܐ: ܩܸܡܠܘܿܢ ܥܲܠܘܼܗܝ ܓܘܪ̈ܵܢܹܐ 2 ܕܟܵܗܢܹ̈ܐ ܘܣܵܦܪܹ̈ܐ ܥܲܡ ܚܘܵܪ̈ܕܸܩܢܹܐ. ܘܗܘܼܡܙܸܡܠܘܿܢ ܥܲܡܹܗ ܒܹܐܡܵܪܵܐ: ܐܡܘܿܪ ܐܸܠܲܢ ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܬ: ܝܲܢ ܡܵܢܝܼ ܝܠܹܐ ܗ̇ܘ ܕܝܸܗܒܸܠܹܐ ܐܸܠܘܼܟ ܐܵܗܵܐ ܗܘܼܟܡܵܐ. 3 ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܒܸܬ ܒܵܩܪܸܢܵܘܟ̣ܘܿܢ ܐܘܼܦ ܐܵܢܵܐ ܚܕܵܐ 4 ܗܹܡܸܙܡܵܢ: ܘܐܡܘܿܪܘܿܢ ܠܝܼ. ܡܲܥܡܘܿܕܝܼܬܹܗ ܕܝܘܿܚܲܢܵܢ ܡ̣ܢ 5 ܫܡܲܝܵܐ ܗ̄ܘܵܐ: ܝܲܢ ܡ̣ܢ ܒܢܲܝ̈ܢܵܫܵܐ. ܐܝܼܢܵܐ ܐܵܢܝܼ ܚܵܫܒ̣ܝܼ ܗ̄ܘܵܘ ܒܓܵܢܵܝ ܘܐܵܡܪܝܼ: ܐܸܢ ܐܵܡܪܵܚ: ܡ̣ܢ ܫܡܲܝܵܐ: ܒܸܬ ܐܵܡܸܪ ܐܸܠܲܢ: 6 ܩܵܡܘܿܕܝܼ ܠܵܐ ܗܘܼܡܸܢܵܘܟ̣ܘܿܢ ܐܸܠܹܗ. ܘܐܸܢ ܐܵܡܪܵܚ: ܡ̣ܢ ܒܢܲܝ̈ܢܵܫܵܐ: ܒܸܬ ܪܵܓ̰ܸܡ ܠܲܢ ܟܠܹܗ ܛܵܝܸܦܵܐ: ܣܵܒܵܒ ܕܗܘܼܡܸܢܹܐ 7 ܝܢܵܐ ܕܝܘܿܚܲܢܵܢ ܢܒ̣ܝܼܵܐ ܝܠܹܐ. ܘܓ̰ܘܼܘܸܒܠܘܿܢ: ܠܹܐ ܝܘܵܚ 8 ܒܝܼܕܲܥܝܵܐ ܡܐܲܝܟܵܐ ܝܠܵܐ. ܐܵܡܸܪ ܐܸܠܵܝ ܝܼܫܘܿܥ: ܘܐܵܢܵܐ ܠܹܐ ܐܵܡܪܸܢܵܘܟ̣ܘܿܢ ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. 9 ܘܫܘܼܪܹܠܹܐ ܕܐܵܡܸܪ ܠܛܵܝܸܦܵܐ ܐܵܗܵܐ ܡܵܣܵܠܵܐ: ܚܵܕ̄ ܐܢܵܫܵܐ ܢܸܨܒ̣ܠܹܐ ܟܲܪܡܵܐ: ܘܣܘܼܦܹܠܹܗ ܠܦܵܠܚܹ̈ܐ: ܘܐܙܸܠܹܐ ܠܪܸܚܩܵܐ 10 ܙܲܒ̣ܢܵܐ ܪܵܒܵܐ. ܘܒܙܲܒ̣ܢܵܐ ܫܘܼܕܸܪܹܐ ܪܹܓܹܗ ܠܟܸܣ ܦܵܠܵܚܹ̈ܐ: ܕܝܵܗ̄ܒ̣ܝܼ ܠܹܗ ܡ̣ܢ ܛܥܘܼܢܝܵܬܹ̈ܗ ܕܟܲܪܡܵܐ: ܐܝܼܢܵܐ ܦܵܠܵܚܹ̈ܐ ܡܚܹܠܘܿܢ 11 ܐܸܠܹܗ: ܘܫܘܼܕܸܪܘܿܢ ܐܸܠܹܗ ܣܦܝܼܩܵܐ. ܘܡܘܼܙܝܸܕܠܹܐ ܘܫܘܼܕܸܪܹܐ ܠܪܹܓܹܗ ܐܚܹܪ̄ܢܵܐ: ܐܝܼܢܵܐ ܐܘܼܦ ܠܗ̇ܘ ܡܚܹܠܘܿܢ ܘܥܒܸܕܠܘܿܢ 12 ܒܹܨܘܼܪ: ܘܫܘܼܕܸܪܘܿܢ ܐܸܠܹܗ ܣܦܝܼܩܵܐ. ܘܡܘܼܙܝܸܕܠܹܐ ܘܫܘܼܕܸܪܹܐ ܕܬܠܵܬ̄ܐ: ܐܝܼܢܵܐ ܐܘܼܦ ܠܗ̇ܘ ܡܚܹܠܘܿܢ ܒܪܝܼܢܕܵܪ ܘܦܘܼܠܸܛܠܘܿܢ 13 ܐܸܠܹܗ. ܐܵܡܸܪ ܡܵܪܵܐ ܕܟܲܪܡܵܐ: ܡܘܼܕܝܼ ܥܵܒ̣ܕܸܢ: ܒܸܬ ܫܵܕܪܸܢ 14 ܒܪܘܼܢܝܼ ܡܘܼܚܸܒܵܐ: ܩܵܘܡܵܐ ܢܵܚܦܝܼ ܡܸܢܹܗ. ܐܝܼܢܵܐ ܟܲܕ ܚܙܹܠܘܿܢ ܐܸܠܹܗ ܦܵܠܵܚܹ̈ܐ: ܚܵܫܒ̣ܝܼ ܗ̄ܘܵܘ ܒܓܵܢܵܝ ܘܐܵܡܪܝܼ: ܐܵܗܵܐ ܝܠܹܐ ܡܝܼܪܲܬܓܵܪ: ܩܵܛܠܵܚ ܠܹܗ: ܘܒܸܬ ܗܵܘܝܵܐ ܡܝܼܪܲܬܓܵܪܘܼܬܵܐ 15 ܕܝܲܢ. ܘܦܘܼܠܸܛܠܘܿܢ ܐܸܠܹܗ ܠܒܲܕܲܪ ܡ̣ܢ ܟܲܪ̈ܡܵܐ: ܘܩܛܸܠܘܿܢ ܐܸܠܹܗ. ܡܘܼܕܝܼ ܗܲܕܟ̣ܵܐ ܒܸܬ ܥܵܒܸܕ ܠܗ̄ܘܿܢ ܡܵܪܵܐ ܕܟܲܪܡܵܐ. 16 ܒܸܬ ܐܵܬܹܐ ܘܒܸܬ ܬܵܠܸܩ ܠܐܵܢܝܼ ܦܵܠܵܚܹ̈ܐ: ܘܒܸܬ ܝܵܗ̄ܒܸܠ ܟܲܪܡܵܐ ܠܐܚܹܪ̄ܢܹܐ. ܐܝܼܢܵܐ ܟܲܕ ܫܡܸܥܠܘܿܢ: ܐܡܸܪܘܿܢ: ܐܵܗܵܐ ܠܵܐ 17 ܗܵܘܝܵܐ. ܐܝܼܢܵܐ ܗ̇ܘ ܚܸܪܹܐ ܒܝܼܵܝ ܘܐܡܸܪܹܐ: ܒܲܣ ܡܘܼܕܝܼ ܝܠܵܐ ܗ̇ܝ ܕܝܼܠܵܐ ܟܬܝܼܒ̣ܬܵܐ: ܟܹܐܦܵܐ ܕܡܘܼܣܠܹܠܘܿܢ ܒܲܢܹ̈ܐ: ܗ̇ܘ ܗ̄ܘܹܠܹܐ 18 ܠܪܹܫܵܐ ܕܩܸܪܢܝܼܬܵܐ. ܘܟܠ ܡ̇ܢ ܕܢܵܦܸܠ ܥܲܠ ܕܗ̇ܘ ܟܹܐܦܵܐ: ܒܸܬ ܦܵܝܸܫ ܛܒ̣ܝܼܚܵܐ: ܘܟܠ ܡ̇ܢ ܕܗ̇ܘ ܢܵܦܸܠ ܥܲܠܘܼܗܝ: ܒܸܬ ܕܵܪܹܐ ܠܹܗ. 19 ܘܛܸܥܠܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܕܵܪܝܼ ܥܲܠܘܼܗܝ ܐܝܼܕܵܬܹ̈ܐ ܗܲܪ ܒܗ̇ܝ ܣܵܥܲܬ: ܘܙܕܸܥܠܘܿܢ ܡ̣ܢ ܛܵܝܸܦܵܐ: ܣܵܒܵܒ 20 ܕܝܕܸܥܠܘܿܢ ܕܥܲܠܵܝ ܐܡܸܪܹܐ ܐܵܗܵܐ ܡܵܣܵܠܵܐ. ܘܟܲܕ ܨܵܝܕܝܼ ܗ̄ܘܵܘ ܠܹܗ ܫܘܼܕܸܪܘܿܢ ܠܟܸܣܠܹܗ ܓ̰ܵܣܘܿܣܹ̈ܐ: ܡܲܕܡܘܼܝܹܐ ܓܵܢܵܝ ܠܸܗ̄ܘܵܝܵܐ ܙܲܕܝܼܩܹ̈ܐ: ܕܕܵܒ̣ܩܝܼ ܠܹܗ ܒܗܹܡܸܙܡܵܢ: ܘܣܵܦܝܼ ܠܹܗ 21 ܠܕܝܼܘܵܢ ܘܠܗܘܼܟܡܵܐ ܕܗܵܟܝܼܡ. ܘܒܘܼܩܸܪܘܿܢ ܡܸܢܹܗ ܘܐܡܸܪܘܿܢ ܐܸܠܹܗ: ܡܲܠܦܵܢܵܐ: ܟܹܐ ܝܲܕܥܵܚ ܕܒܬܪܘܼܨܘܼܬܵܐ ܟܹܐ ܗܲܡܙܸܡܸܬ ܘܟܹܐ ܡܵܠܦܸܬ: ܘܠܹܐ ܫܵܩܠܸܬ ܦܵܬܵܐ: ܐܸܠܵܐ ܒܗܵܩܘܼܬܵܐ ܐܘܼܪܚܵܐ 22 ܕܐܲܠܵܗܵܐ ܡܵܠܘܿܦܹܐ ܝܘܸܬ. ܒܕܲܣܬܘܼܪ ܝܼܠܵܐ ܐܸܠܲܢ ܕܝܵܗ̄ܒ̣ܵܚ 23 ܚܲܪܓ̰ ܕܪܹܫܵܐ ܠܩܹܣܲܪ: ܝܲܢ ܠܵܐ. ܐܝܼܢܵܐ ܗ̇ܘ ܦܘܼܪܡܹܠܹܐ 24 ܨܢܝܼܥܘܼܬܵܝ: ܘܐܡܸܪܹܐ [67]. ܡܲܚܙܹܡܘܿܢ ܠܝܼ ܕܝܼܢܵܪܵܐ. ܫܸܟܠܵܐ ܘܣܸܟܵܐ ܕܡ̇ܢ ܐܝܼܬ ܒܝܹܗ: ܘܐܵܢܝܼ ܓ̰ܘܼܘܸܒܠܘܿܢ ܘܐܡܸܪܘܿܢ: 25 ܕܩܹܣܲܪ. ܐܵܡܸܪ ܐܸܠܵܝ ܗ̇ܘ: ܗܲܒ̄ܠܘܿܢ ܗܲܕܟ̣ܵܐ ܕܩܹܣܲܪ 26 ܠܩܹܣܲܪ: ܘܕܲܐܠܵܗܵܐ ܠܐܲܠܵܗܵܐ. ܘܠܵܐ ܡܨܹܠܘܿܢ ܠܸܕܒ̣ܵܩܵܐ ܡܸܢܹܗ ܗܹܡܸܙܡܵܢ ܩܵܕ̄ܡ ܛܵܝܸܦܵܐ: ܘܥܘܼܓ̰ܸܒܠܘܿܢ ܒܓ̰ܘܼܘܵܒܹܗ: ܘܫܬܸܩܠܘܿܢ. 27 ܐܝܼܢܵܐ ܐܬܹܠܘܿܢ ܠܟܸܣܠܹܗ ܐܢܵܫܹ̈ܐ ܡ̣ܢ ܙܲܕܘܼܩܵܝܹ̈ܐ: ܐܵܢܝܼ ܕܟܹܐ 28 ܐܵܡܪܝܼ ܕܩܝܵܡܬܵܐ ܠܲܝܬ: ܘܒܘܼܩܸܪܘܿܢ ܡܸܢܹܗ. ܘܐܡܸܪܘܿܢ ܐܸܠܹܗ: ܡܲܠܦܵܢܵܐ: ܡܘܼܫܹܐ ܟܬܸܒ̣ܠܹܐ ܐܸܠܲܢ: ܕܐܸܢ ܐܵܚܘܿܢܹܗ ܕܐܢܵܫܵܐ ܡܵܝܸܬ: ܕܐܝܼܬ ܠܹܗ ܒܲܟ̣ܬܵܐ: ܘܗܵܘܹܐ ܕܠܵܐ ܒܢܘܼܢܹ̈ܐ: ܓܵܒܸܪ 29 ܐܵܚܘܿܢܹܗ ܒܲܟ̣ܬܹܗ: ܘܡܲܩܸܡ ܙܲܪܥܵܐ ܠܐܵܚܘܿܢܹܗ. ܒܲܣ ܐܝܼܬ ܗ̄ܘܵܘ ܫܲܒ̣ܥܵܐ ܐܲܚܘܿܢܘܵܬܹ̈ܐ: ܘܩܵܕ̄ܡܵܝܵܐ ܓܒܸܪܹܐ ܒܲܟ̣ܬܵܐ: ܘܡܸܬܠܹܐ 30 ܕܠܵܐ ܒܢܘܼܢܹ̈ܐ. ܘܗ̇ܘ ܕܬܪܲܝ [68] ܫܩܝܼܠܵܠܹܐ ܠܒܲܟ̣ܬܹܗ: ܘܐܵܗܵܐ 31 ܡܸܬܠܹܐ ܕܠܵܐ ܒܢܘܼܢܹ̈ܐ. ܘܗ̇ܘ ܕܬܠܵܬ̄ܐ ܫܩܝܼܠܵܠܹܐ: ܘܗܲܕܟ̣ܵܐ 32 ܐܘܼܦ ܫܲܒܲܥܢܬܵܝ ܠܵܐ ܫܒܸܩܠܘܿܢ ܒܢܘܼܢܹ̈ܐ: ܘܡܸܬܠܘܿܢ. ܘܡܸܬܠܵܐ 33 ܒܚܲܪܬܵܐ ܕܟܠܵܝ ܐܘܼܦ ܒܲܟ̣ܬܵܐ. ܒܩܝܵܡܬܵܐ ܗܲܕܟ̣ܵܐ ܕܐܵܝܢܝܼ ܡܸܢܵܝ 34 ܒܸܬ ܗܵܘܝܵܐ ܒܲܟ̣ܬܵܐ: ܣܵܒܵܒ ܕܫܲܒܲܥܢܬܵܝ ܓܒ̣ܝܼܪܵܠܘܿܢ. ܘܐܡܸܪܹܐ ܐܸܠܵܝ ܝܼܫܘܿܥ: ܒܢܘܿܢܹ̈ܐ ܕܐܵܗܵܐ ܥܵܠܡܵܐ ܟܹܐ ܓܵܒ̣ܪܝܼ: ܘܟܹܐ ܦܵܝܫܝܼ 35 ܝܘܼܗ̄ܒܹܐ ܠܓܲܒ̣ܪܹ̈ܐ. ܐܝܼܢܵܐ ܐܵܢܝܼ ܕܚܵܫܚܝܼ ܠܸܩܢܵܝܵܐ ܠܗ̇ܘ ܥܵܠܡܵܐ: ܘܠܩܝܵܡܬܵܐ ܡ̣ܢ ܡܝܼܬܹ̈ܐ: ܠܹܐ ܠܵܒ̣ܪܝܼ: ܐܘܼܦ ܠܹܐ ܦܵܝܫܝܼ 36 ܝܘܼܗ̄ܒ̣ܵܐ ܠܓܲܒ̣ܪܹ̈ܐ. ܣܵܒܵܒ ܐܘܼܦ ܠܵܐ ܡܸܕܪܹܐ ܠܸܡܝܵܬܵܐ ܟܹܐ ܡܵܨܝܼ: ܣܵܒܵܒ ܐܲܝܟ ܡܲܠܲܐܟܹ̈ܐ ܝܢܵܐ: ܘܒܢܘܼܢܹ̈ܐ ܕܐܲܠܵܗܵܐ ܝܢܵܐ: 37 ܣܵܒܵܒ ܕܗ̄ܘܹܠܘܿܢ ܒܢܘܼܢܹ̈ܐ ܕܩܝܵܡܬܵܐ. ܐܝܼܢܵܐ ܕܩܵܝܡܝܼ ܡܝܼܬܹ̈ܐ: ܐܘܼܦ ܡܘܼܫܹܐ ܡܘܼܕܸܥܠܹܐ ܒܣܲܢܝܵܐ: ܟܲܕ ܐܡܸܪܹܐ: ܡܵܪܝܵܐ ܐܵܠܵܗܹܗ 38 ܕܐܲܒ̣ܪܵܗܵܡ ܘܐܲܠܵܗܹܗ ܕܐܝܼܣܚܵܩ ܘܐܲܠܵܗܹܗ ܕܝܲܥܩܘܿܒ̣. ܐܝܼܢܵܐ ܐܲܠܵܗܵܐ ܠܹܐ ܝܠܹܐ ܕܡܝܼܬܹ̈ܐ: ܐܸܠܵܐ ܕܚܵܝܹ̈ܐ: ܣܵܒܵܒ ܟܠܵܝ ܟܹܐ 39 ܚܵܝܝܼ ܐܸܠܹܗ. ܘܓ̰ܘܼܘܸܒܠܘܿܢ ܐܢܵܫܹ̈ܐ ܡ̣ܢ ܣܵܦܪܹ̈ܐ: ܘܐܡܸܪܘܿܢ 40 ܐܸܠܹܗ: ܡܲܠܦܵܢܵܐ: ܨܦܵܝܝܼ ܒܹܐܡܵܪܵܐ ܝܘܸܬ. ܘܡܸܕܪܹܐ ܠܵܐ ܩܘܼܫܕܸܪܘܿܢ ܠܒܵܩܘܿܪܹܐ ܡܸܢܹܗ ܡܸܢܕܝܼ. 41 ܘܐܡܸܪܹܐ ܐܸܠܵܝ: ܕܵܐܟ̣ܝܼ ܟܹܐ ܐܵܡܪܝܼ ܕܡܫܝܼܚܵܐ ܒܪܘܼܢܹܗ ܕܕܵܘܝܼܕ 42 ܝܼܠܹܐ. ܣܵܒܵܒ ܕܵܘܝܼܕ ܒܓܵܢܹܗ: ܐܡܸܪܹܐ ܒܟܬܵܒ̣ܵܐ ܕܡܲܙܡܘܿܪܹ̈ܐ: 43 ܐܡܸܪܹܐ ܡܵܪܝܵܐ ܠܡܵܪܝܼ: ܝܬܘܿܒ̣ ܠܘܼܟ ܡ̣ܢ ܝܲܡܝܼܢܝܼ. ܗܲܠ 44 ܕܡܲܬܒܸܢ ܕܸܫܡܸܢܘܼ̈ܟ ܟܘܼܒ̣ܫܵܐ ܬܚܘܿܬ ܐܲܩܠܘܼ̈ܟ. ܕܵܘܝܼܕ ܗܲܕܟ̣ܵܐ ܒܸܩܪܵܝܹܗ ܝܠܹܐ ܡܵܪܝܵܐ: ܘܕܵܐܟ̣ܝܼ ܒܪܘܼܢܹܗ ܝܠܹܐ. 45 ܘܟܲܕ ܟܠܹܗ ܛܵܝܸܦܵܐ ܒܸܫܡܲܥܝܵܐ ܗ̄ܘܵܐ: ܐܡܸܪܹܐ 46 ܠܬܲܠܡܝܼܕܘܼ̈ܗܝ. ܗ̄ܘܹܡܘܿܢ ܗܸܫܝܵܪ ܡ̣ܢ ܣܵܦܪܹ̈ܐ ܕܒܲܥܝܝܼ ܠܸܚܕܵܪܵܐ ܒܠܒܸܫܝܵܬܹ̈ܐ ܝܵܪ̈ܝܼܟܹܐ: ܘܟܹܐ ܡܲܚܸܒܝܼ ܫܠܵܡܵܐ ܒܫܘܼܩܹ̈ܐ: ܘܪܹܫܵܐ ܕܡܵܘܬܒܹ̈ܐ ܓܵܘ ܟܢܘܼܫܝܵܬܹ̈ܐ: ܘܪܹܫܵܐ ܕܝܬܝܵܒܹ̈ܐ 47 ܒܐܲܪ̈ܚܘܼܝܵܬܹܐ. ܐܵܢܝܼ ܕܟܹܐ ܐܵܟ̣ܠܝܼ ܒܵܬܹ̈ܐ ܕܐܲܪ̈ܡܠܝܵܬܹܐ: ܘܒܡܵܗܵܢܵܐ ܟܹܐ ܡܲܪܝܸܟ̣ܝܼ ܨܠܵܘܵܬܵܝ̈. ܐܵܢܝܼ ܒܸܬ ܩܵܒܠܝܼ ܕܝܼܘܵܢ ܙܵܘܕܵܐ.

ܩܦܠܐܘܢ: ܟܐ

1 ܘܟܲܕ ܚܸܪܹܐ: ܚܙܹܠܹܐ ܠܕܵܘܠܲܬܡܲܢܕܹ̈ܐ ܒܸܕܪܵܝܵܐ ܓܵܘ ܚܲܙܝܼܢܵܐ 2 ܕܝܼܵܪ̈ܝܼܵܝ. ܘܚܙܹܠܹܐ ܐܘܼܦ ܚܕܵܐ ܐܲܪܡܸܠܬܵܐ ܡܸܣܟܹܢܬܵܐ ܕܕܪܹܠܵܐ 3 ܬܵܡܵܐ ܬܪܲܝ ܫܵܡܘܿܢܹ̈ܐ. ܘܐܡܸܪܹܐ: ܣܲܪܲܣܬܘܼܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܵܗܵܐ ܐܲܪܡܸܠܬܵܐ ܡܸܣܟܹܢܬܵܐ ܕܪܹܠܵܐ ܙܵܘܕܵܐ ܡ̣ܢ 4 ܟܠܵܝ. ܣܵܒܵܒ ܐܵܢܝܼ ܟܠܵܝ ܡ̣ܢ ܡܸܢܕܝܼ ܕܙܵܘܕܵܐ ܗ̄ܘܵܐ ܐܸܠܵܝ ܕܪܹܠܘܿܢ ܠܕܝܼܵܪ̈ܝܹܐ: ܐܝܼܢܵܐ ܗ̇ܝ ܡ̣ܢ ܒܵܨܘܿܪܘܼܬܘܼܗ̇ ܟܠ ܕܐܝܼܬ ܗ̄ܘܵܐ ܠܵܗ̇ ܕܪܹܠܵܐ. 5 ܘܟܲܕ ܐܵܡܪܝܼ ܗ̄ܘܵܘ ܐܢܵܫܹ̈ܐ ܒܵܗ̄ܣ ܕܗܲܝܟܠܵܐ: ܕܒܟܹܐܦܹ̈ܐ 6 ܫܵܦܝܼܪܹ̈ܐ ܘܒܕܝܵܪ̈ܝܹܐ ܣܘܼܩܠܵܐ ܗ̄ܘܵܐ: ܐܡܸܪܹܐ. ܐܲܢܹܐ ܕܒܸܚܙܵܝܵܐ ܝܬܘܿܢ: ܒܸܬ ܐܵܬܝܼ ܝܘܿܡܵܢܹ̈ܐ ܕܒܝܼܵܝ ܠܹܐ ܗܵܘܹܐ ܫܒ̣ܝܼܩܵܐ ܟܹܐܦܵܐ 7 ܥܲܠ ܟܹܐܦܵܐ ܕܠܵܐ ܦܵܝܸܫ ܣܬܝܼܪܵܐ. ܘܒܵܩܪܝܼ ܗ̄ܘܵܘ ܠܹܗ ܘܐܵܡܪܝܼ: ܡܲܠܦܵܢܵܐ: ܒܲܣ ܐܝܼܡܲܢ ܐܲܢܹܐ ܒܸܬ ܗܵܘܝܼ: ܘܡܘܼܕܝܼ 8 ܝܠܹܐ ܢܝܼܫܲܢܩܵܐ ܐܝܼܡܲܢ ܕܗܕܝܼܪܹܐ ܝܢܵܐ ܐܲܢܹܐ ܠܸܗ̄ܘܵܝܵܐ. ܐܝܼܢܵܐ ܗ̇ܘ ܐܡܸܪܹܐ: ܐܸܠܝ: ܚܙܹܡܘܿܢ ܠܵܐ ܗ̄ܘܹܐ ܕܚܵܠܛܝܼܬܘܿܢ: ܣܵܒܵܒ ܕܪܵܒܵܐ ܒܸܬ ܐܵܬܝܼ ܒܫܸܡܝܼ: ܘܒܸܬ ܐܵܡܪܝܼ: ܐܵܢܵܐ ܝܘܸܢ: ܘܙܲܒ̣ܢܵܐ 9 [69] ܩܘܼܪܒܸܢܹܐ: ܐܝܼܢܵܐ ܠܵܐ ܐܵܙܠ̄ܝܼܬܘܿܢ ܒܵܬ̄ܪܵܝ. ܘܐܝܼܡܲܢ ܕܫܲܡܥܝܼܬܘܿܢ ܦܠܵܫܹ̈ܐ ܘܫܓ̣ܘܼܫܝܹ̈ܐ: ܠܵܐ ܙܵܕܥܝܼܬܘܿܢ: ܣܵܒܵܒ ܘܵܓ̰ܸܒ ܝܼܠܵܐ ܕܐܲܢܹܐ ܩܵܕ̄ܡܵܝܬܵܐ ܗܵܘܝܼ: ܐܸܠܵܐ ܗܸܫ ܠܵܐ ܡܛܹܠܵܐ ܚܲܪܬܵܐ. 10 ܗ̇ܝܓܵܗ ܐܡܸܪܹܐ ܐܸܠܵܝ: ܒܸܬ ܩܵܝܸܡ ܛܵܝܸܦܵܐ ܥܲܠ ܛܵܝܸܦܵܐ: 11 ܘܡܲܠܟܘܼܬܵܐ ܥܲܠ ܡܲܠܟܘܼܬܵܐ. ܘܪ̈ܵܘܕܵܢܹܐ ܓܘܼܪܹ̈ܐ ܒܸܬ ܗܵܘܝܼ ܒܕܘܼܟܵܐ ܕܘܼܟܵܐ: ܘܟܸܦܢܹ̈ܐ ܘܡܵܘܬܵܢܹ̈ܐ: ܘܨܵܘܹ̈ܐ ܘܢܝܼܫܲܢܩܹ̈ܐ ܓܘܼܪܹ̈ܐ 12 ܡ̣ܢ ܫܡܲܝܵܐ ܒܸܬ ܗܵܘܝܼ. ܐܝܼܢܵܐ ܡܩܵܕ̄ܡ ܕܐܲܢܹܐ ܟܠܵܝ: ܒܸܬ ܕܵܪܝܼ ܥܲܠܵܘܟ̣ܘܿܢ ܐܝܼܕܵܝ̈: ܘܒܸܬ ܛܵܪܕܝܼ ܠܵܘܟ̣ܘܿܢ: ܘܣܵܦܝܼ ܠܵܘܟ̣ܘܿܢ ܠܟܢܘܼܫܝܵܬܹ̈ܐ ܘܠܒܹܝܬ ܐܲܣܝܼܪܹ̈ܐ: ܘܡܲܝܬ̄ܝܝܼ ܠܵܘܟ̣ܘܿܢ 13 ܩܵܕ̄ܡ ܡܲܠܟܹ̈ܐ ܘܗܵܟܝܼܡܹ̈ܐ: ܒܚܵܬܸܪ ܕܫܸܡܝܼ. ܘܒܸܬ ܗܵܘܝܵܐ 14 ܐܸܠܵܘܟ̣ܘܿܢ ܠܣܵܗܕܘܼܬܵܐ. ܡܲܬܒ̣ܘܿܢ ܗܲܕܟ̣ܵܐ ܒܠܸܒܵܘܟ̣ܘܿܢ: 15 ܕܠܵܐ ܗܵܘܝܼܬܘܿܢ ܒܹܐܟ̣ܵܠܵܐ ܚܲܡ ܠܝܼܵܗ̄ܒ̣ܵܐ ܓ̰ܘܼܘܵܒ. ܣܵܒܵܒ ܐܵܢܵܐ ܒܸܬ ܝܵܗ̄ܒܸܢܵܘܟ̣ܘܿܢ ܦܘܼܡܵܐ ܘܥܵܩܸܠܕܵܪܘܼܬܵܐ: ܐܲܝܢܝܼ ܕܠܹܐ ܡܵܨܝܼ ܠܡܲܕܘܼܪܹܐ ܓ̰ܘܼܘܵܒ ܘܠܵܐ ܠܸܩܝܵܡܵܐ ܠܕܲܪܩܘܼܒ̣ܠܘܼܗ̇ ܟܠܵܝ 16 ܕܸܫܡܸܢܵܘ̈ܟ̣ܘܿܢ. ܐܝܼܢܵܐ ܣܵܦܝܼ ܠܵܘܟ̣ܘܿܢ ܒܵܒܵܘܵܬܵܘ̈ܟ̣ܘܿܢ: ܘܐܵܚܘܿܢܘܵܬܵܘ̈ܟ̣ܘܿܢ: ܘܚܸܙܡܵܘ̈ܟ̣ܘܿܢ: ܘܕܵܘܣܬܵܘ̈ܟ̣ܘܿܢ: ܘܒܸܬ 17 ܡܲܡܝܸܬܝܼ ܡܸܢܵܘܟ̣ܘܿܢ. ܘܒܸܬ ܗܵܘܝܼܬܘܿܢ ܣܸܢܝܹ̈ܐ ܡ̣ܢ ܟܠ 18 ܐܢܵܫܵܐ ܒܚܵܬܸܪ ܕܫܸܡܝܼ. ܘܡܸܙܬܵܐ ܡ̣ܢ ܪܹܫܵܘܟ̣ܘܿܢ ܠܹܐ ܬܵܠܩܵܐ. 19 ܒܚܡܵܠܬܵܘܟ̣ܘܿܢ ܒܸܬ ܩܵܢܝܼܬܘܿܢ [70] ܓܵܢܵܘܟ̣ܘܿܢ. 20 ܐܝܼܢܵܐ ܐܝܼܡܲܢ ܕܚܵܙܝܼܬܘܿܢ ܠܐܘܿܪܸܫܠܸܡ ܚܘܼܪܕܝܼܬܘܼܗ̇ ܩܵܘܫܘܿܢ: 21 ܗ̇ܝܓܵܗ ܝܕܸܥܡܘܿܢ [71] ܕܩܘܼܪܒܸܢܹܐ ܚܪܵܒ̣ܘܼܗ̇. ܗ̇ܝܓܵܗ ܐܵܢܝܼ ܕܝܼܢܵܐ ܒܝܼܗܘܼܕ ܥܵܪܩܝܼ ܠܛܘܼܪܵܐ: ܘܐܵܢܝܼ ܕܝܼܢܵܐ ܓܵܘܵܗ̇ ܥܵܪܩܝܼ: ܘܐܵܢܝܼ 22 ܕܝܼܢܵܐ ܓܵܘ ܡܵܬܘܵܬܹ̈ܐ ܠܵܐ ܐܵܘܪܝܼ ܓܵܘܵܗ̇. ܣܵܒܵܒ ܐܲܢܹܐ ܝܘܿܡܵܢܹ̈ܐ ܕܬܘܼܥܠܵܐ ܝܢܵܐ: ܕܒܸܬ ܬܲܡܸܡ ܟܠ ܡܸܢܕܝܼ ܕܝܼܠܹܐ ܟܬܝܼܒ̣ܵܐ. 23 ܐܝܼܢܵܐ ܘܵܝ ܠܐܵܢܝܼ ܕܝܼܢܵܐ ܒܛܝܼܢܹܐ: ܘܠܵܐܢܝܼ ܕܡܲܡܸܨܝܼ ܒܐܵܢܝܼ ܝܘܿܡܵܢܹ̈ܐ: ܣܵܒܵܒ ܕܒܸܬ ܗܵܘܹܐ ܐܘܼܠܨܵܢܵܐ ܓܘܼܪܵܐ ܒܐܲܪܥܵܐ: ܘܟܲܪܒܵܐ 24 ܥܲܠ ܐܵܗܵܐ ܛܵܝܸܦܵܐ. ܘܒܸܬ ܢܵܦܠܝܼ ܒܦܘܼܡܵܐ ܕܣܲܝܦܵܐ: ܘܦܵܝܫܝܼ ܠܘܼܒܠܹܐ ܝܲܚܣܝܼܪ ܠܟܠܵܝ ܡܸܠܲܬܹ̈ܐ: ܘܐܘܿܪܸܫܠܸܡ ܒܸܬ ܗܵܘܝܵܐ 25 ܕܝܼܫܬܵܐ ܡ̣ܢ ܛܵܝܸܦܹ̈ܐ: ܗܲܠ ܕܬܲܡܸܡܝܼ ܙܲܒ̣ܢܹ̈ܐ ܕܛܵܝܸܦܹ̈ܐ. ܘܒܸܬ ܗܵܘܝܼ ܢܝܼܫܲܢܩܹ̈ܐ ܒܫܸܡܫܵܐ ܘܒܣܲܗܪܵܐ ܘܒܟܵܘܟ̣ܒܹ̈ܐ: ܘܒܲܐܪܥܵܐ ܐܘܼܠܨܵܢܵܐ ܕܛܵܝܸܦܹ̈ܐ: ܒܢܹܓܵܪܵܢܘܼܬܵܐ ܟܲܕ ܝܵܡܵܐ ܘܠܲܦܹ̈ܐ 26 ܒܲܪܒܸܥܪܝܼ. ܐܢܵܫܹ̈ܐ [72] ܫܲܡܫܘܼܡܹܐ ܡ̣ܢ ܙܕܘܼܥܬܵܐ ܘܡ̣ܢ ܣܦܵܪܬܵܐ ܕܐܵܢܝܼ ܕܝܼܢܵܐ ܗܕܝܼܪܹܐ ܠܹܐܬܵܝܵܐ ܥܲܠ ܐܲܪܥܵܐ. ܣܵܒܵܒ ܕܒܸܬ ܦܵܝܫܝܼ 27 ܫܥܝܼܫܹܐ ܚܲܝ̈ܠܹܐ ܕܫܡܲܝܵܐ. ܘܗ̇ܝܓܵܗ ܒܸܬ ܚܵܙܝܼ ܠܒܪܘܼܢܹܗ 28 ܕܐܢܵܫܵܐ ܒܹܐܬܵܝܵܐ ܒܥܢܵܢܹ̈ܐ ܥܲܡ ܚܲܝܠܵܐ ܘܚܸܩܪܵܐ ܓܘܼܪܵܐ. ܐܝܼܢܵܐ ܐܝܼܡܲܢ ܕܫܵܪܝܼ ܐܲܢܹܐ ܕܗܵܘܝܼ: ܗ̄ܘܹܡܘܿܢ ܠܸܒܵܢܹ̈ܐ: ܘܡܵܪܡܘܿܢ ܪܹ̈ܫܵܘܟ̣ܘܿܢ: ܣܵܒܵܒ [73] ܕܩܘܼܪܒܸܢܹܐ ܦܘܼܪܩܵܢܵܘܟ̣ܘܿܢ. 29 ܘܐܡܸܪܹܐ ܐܸܠܵܝ ܡܵܣܵܠܵܐ: ܚܙܹܡܘܿܢ ܠܐܝܼܠܵܢܵܐ ܕܬܹܐܢܵܐ: 30 ܘܠܟܠܵܝ ܐܝܼܠܵܢܹ̈ܐ. ܐܝܼܡܲܢ ܕܒܲܪܛܸܢܝܼ: ܟܹܐ ܚܵܙܝܼܬܘܿܢ ܘܡ̣ܢ ܓܵܢܵܘܟ̣ܘܿܢ ܦܲܪܡܝܼܬܘܿܢ ܕܐܵܕܝܼܵܐ ܩܘܼܪܒܵܐ ܝܠܹܐ ܩܲܝܛܵܐ. 31 ܗܲܕܟ̣ܵܐ ܐܘܼܦ ܐܲܚܬܘܿܢ: ܐܝܼܡܲܢ ܕܚܵܙܝܼܬܘܿܢ ܐܲܢܹܐ ܒܸܗ̄ܘܵܝܵܐ: 32 ܝܕܸܥܡܘܿܢ ܕܩܘܼܪܒܵܐ ܝܠܵܐ ܡܲܠܟܘܼܬܵܐ ܕܐܲܠܵܗܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܥܵܒ̣ܪܵܐ ܐܵܗܵܐ ܐܘܼܓ̰ܵܓ̣: ܗܲܠ 33 ܕܐܲܢܹܐ ܟܠܵܝ ܗܵܘܝܼ. ܫܡܲܝܵܐ ܘܐܲܪܥܵܐ ܒܸܬ ܥܵܒ̣ܪܝܼ: ܐܝܼܢܵܐ ܗܹܡܸܙܡܵܢܝܼ̈ ܠܹܐ ܥܵܒ̣ܪܝܼ. 34 ܐܝܼܢܵܐ ܗ̄ܘܹܡܘܿܢ ܗܸܫܝܵܪ ܒܓܵܢܵܘܟ̣ܘܿܢ: ܠܵܐ ܗ̄ܘܹܐ ܕܝܲܩܪܸܢܝܼ ܠܸܒܵܘܵܬܵܘ̈ܟ̣ܘܿܢ ܒܒܲܕܢܲܦ̮ܣܘܼܬܵܐ: ܘܒܪܵܘܵܝܘܼܬܵܐ: ܘܒܚܲܡ ܕܥܵܠܡܵܐ: ܘܐܵܬܹܐ ܥܲܠܵܘܟ̣ܘܿܢ ܗ̇ܘ ܝܘܿܡܵܐ ܐܲܝܟ ܢܸܫܒ̣ܵܐ. 35 ܣܵܒܵܒ ܗܲܕܟ̣ܵܐ ܒܸܬ ܐܵܬܹܐ ܥܲܠ ܟܠܵܝ ܕܝܬܝܼܒܹܐ ܝܢܵܐ ܥܲܠ ܦܵܬܵܐ 36 ܕܟܠܵܗ̇ ܐܲܪܥܵܐ. ܗ̄ܘܹܡܘܿܢ ܗܲܕܟ̣ܵܐ ܒܸܥܒ̣ܵܕܵܐ ܫܵܗܲܪܬܵܐ ܒܟܠ ܙܲܒ̣ܢܵܐ: ܘܨܵܠܘܿܝܹܐ: ܕܚܵܫܚܝܼܬܘܿܢ ܠܸܥܪܵܩܵܐ ܡ̣ܢ ܕܐܲܢܹܐ ܕܝܼܢܵܐ ܗܕܝܼܪܹܐ ܠܸܗܘܵܝܵܐ: ܘܕܟܵܠܝܼܬܘܿܢ ܩܵܕ̄ܡ ܒܪܘܼܢܹܗ ܕܐܢܵܫܵܐ. 37 ܘܒܐܝܼܡܵܡܵܐ ܟܹܐ ܡܵܠܸܦ ܗ̄ܘܵܐ ܓܵܘ ܗܲܝܟܠܵܐ: ܘܒܠܲܝܠܹܐ ܟܹܐ ܦܵܠܸܛ ܗ̄ܘܵܐ ܦܵܝܸܫ ܗ̄ܘܵܐ ܓܵܘ ܛܘܼܪܵܐ: ܕܦܵܝܸܫ ܩܸܪܝܵܐ: 38 ܕܙܲܝܬܹ̈ܐ. ܘܟܠܹܗ ܛܵܝܸܦܵܐ ܟܹܐ ܩܵܕܡܝܼ ܗ̄ܘܵܘ ܒܩܵܕܲܡܬܵܐ ܠܟܸܣܠܹܗ ܠܗܲܝܟܠܵܐ ܠܸܫܡܲܥܝܹܗ.

ܩܦܠܐܘܢ: ܟܒ

1 ܐܝܼܢܵܐ [74] ܩܘܼܪܒܸܢܵܐ ܗ̄ܘܵܐ ܥܹܐܕܵܐ ܕܦܲܛܝܼܪܹ̈ܐ: ܕܦܝܵܫܵܐ ܝܠܹܐ 2 ܩܸܪܝܵܐ: ܦܸܨܚܵܐ. ܘܛܵܥܝܼ ܗ̄ܘܵܘ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܵܐܟ̣ܝܼ ܩܵܛܠܝܼ ܠܹܗ: ܣܵܒܵܒ ܕܒܸܙܕܲܥܝܵܐ ܗ̄ܘܵܘ ܡ̣ܢ ܛܵܝܸܦܵܐ. 3 ܐܝܼܢܵܐ ܐܘܝܪܵܐ ܗ̄ܘܵܐ ܣܵܛܵܢܵܐ ܒܝܼܗܘܼܕܵܐ: ܕܦܝܵܫܵܐ ܝܠܹܐ ܩܸܪܝܵܐ ܣܟܲܪܝܘܿܛܵܐ: ܕܝܼܗ̄ܘܵܐ ܡ̣ܢ ܡܸܢܝܵܢܵܐ ܕܬܪܸܥܣܲܪ. 4 ܘܐܙܸܠܹܐ ܗܘܼܡܙܸܡܠܹܐ ܥܲܡ ܓܘܼܪ̈ܵܢܹܐ ܕܟܵܗܢܹ̈ܐ ܘܪܹ̈ܫܵܢܹܐ ܕܣܵܦܹܐ 5 ܗ̄ܘܵܐ ܠܹܗ ܐܸܠܵܝ. ܘܚܕܹܠܘܿܢ: ܘܩܘܼܘܸܚܠܘܿܢ ܕܝܵܗ̄ܒ̣ܝܼ ܠܹܗ 6 ܙܘܼܙܹ̈ܐ. ܘܝܸܗܒܸܠܹܐ ܘܲܥܕܵܐ ܐܸܠܵܝ: ܘܛܵܥܹܐ ܗ̄ܘܵܐ ܠܦܸܪܣܲܬ ܕܣܵܦܹܐ ܗ̄ܘܵܐ ܠܹܗ ܐܸܠܵܝ ܒܹܐ ܚܲܒ̇ܪܵܐ ܡ̣ܢ ܟܸܢܫܵܐ. 7 ܘܡܛܹܠܹܐ ܝܘܿܡܵܐ ܕܦܲܛܝܼܪܹ̈ܐ: ܕܒܝܹܗ ܘܵܓ̰ܸܒ ܝܼܗ̄ܘܵܐ ܕܦܵܝܸܫ 8 ܗ̄ܘܵܐ ܦܪܝܼܡܵܐ ܦܸܨܚܵܐ. ܘܫܘܼܕܸܪܹܐ ܠܟܹܐܦܵܐ ܘܠܝܘܿܚܲܢܵܢ: ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܗܵܕܪܘܿܢ ܠܲܢ ܦܸܨܚܵܐ ܕܐܵܟ̣ܠܵܚ. 9 ܘܐܡܸܪܘܿܢ ܐܸܠܹܗ: ܐܲܝܟܵܐ ܒܵܣܡܵܐ ܠܘܼܟ ܕܗܵܕܪܵܚ. ܐܡܸܪܹܐ 10 ܐܸܠܵܝ: ܗܵܐ: ܐܝܼܡܲܢ ܕܐܵܘܪܝܼܬܘܿܢ ܠܡܕܝܼܢ̄ܬܵܐ: ܒܸܬ ܬܵܦܸܩ ܒܝܼܵܘܟ̣ܘܿܢ: ܐܢܵܫܵܐ ܫܩܝܼܠܵܐ ܬܲܠܡܵܐ ܕܡ̈ܝܼܵܐ: ܙܹܠ̄ܡܘܿܢ ܒܵܬ̄ܪܹܗ 11 ܓܵܘ ܒܲܝܬܵܐ ܐܲܝܟܵܐ ܕܐܵܘܸܪ. ܘܐܡܘܿܪܘܿܢ ܠܡܵܪܵܐ ܕܒܲܝܬܵܐ: ܪܵܒܝܲܢ ܒܹܐܡܵܪܵܐ ܝܠܹܐ: ܐܲܝܟܵܐ ܝܠܹܐ ܒܹܝܬ ܡܲܫܪܝܵܐ: ܐܲܝܟܵܐ ܕܐܵܟ̣ܠܸܢ 12 ܦܸܨܚܵܐ ܥܲܡ ܬܲܠܡܝܼܕܝܼ̈. ܘܗ̇ܘ ܒܸܬ ܡܲܚܙܹܐ ܠܵܘܟ̣ܘܿܢ ܚܕܵܐ 13 [75] ܒܵܠܵܚܵܢܵܐ ܓܘܼܪܬܵܐ ܫܘܼܘܝܼܬܵܐ: ܬܵܡܵܐ ܗܵܕܪܘܿܢ. ܘܐܙܸܠܘܿܢ: ܡܘܼܫ̄ܟ̰ܸܚܠܘܿܢ ܐܲܝܟ ܕܐܡܸܪܹܐ ܐܸܠܵܝ: ܘܗܘܼܕܸܪܘܿܢ ܦܸܨܚܵܐ. 14 ܘܟܲܕ ܗ̄ܘܹܠܵܐ ܣܵܥܲܬ: ܝܬܸܒ̣ܠܹܐ: ܘܫܠܝܼܚܹ̈ܐ ܥܲܡܹܗ. 15 ܘܐܡܸܪܹܐ ܐܸܠܵܝ: ܫܲܗ̄ܘܲܬܬܵܐ ܫܘܼܗ̄ܘܸܬܠܝܼ ܕܐܵܗܵܐ ܦܸܨܚܵܐ 16 ܐܵܟ̣ܠܸܢܹܗ ܥܲܡܵܘܟ̣ܘܿܢ ܡܩܵܕ̄ܡ ܕܩܵܒ̇ܠܸܢ ܚܲܫܵܐ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܹܐ ܐܲܟ̣ܠܸܢܹܗ: ܗܲܠ ܕܬܲܡܸܡ 17 ܒܡܲܠܟܘܼܬܹܗ ܕܐܲܠܵܗܵܐ. ܘܫܩܸܠܹܐ ܟܵܣܵܐ: ܘܫܘܼܟܸܪܹܐ: ܘܐܡܸܪܹܐ: 18 ܫܩܘܿܠܘܿܢ ܐܵܗܵܐ ܘܦܲܠܹܡܘܿܢ ܓܵܘܵܘܟ̣ܘܿܢ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܵܐܕܝܼܵܐ ܠܹܐ ܫܵܬܸܢ ܡ̣ܢ ܡܲܗܨܘܼܠ ܕܓܸܦܬܵܐ: 19 ܗܲܠ ܕܐܵܬܝܵܐ ܡܲܠܟܘܼܬܵܐ ܕܐܲܠܵܗܵܐ. ܘܫܩܸܠܹܐ ܠܲܚܡܵܐ: ܘܫܘܼܟܸܪܹܐ: ܘܩܨܹܠܹܐ: ܘܝܸܗܒܸܠܹܐ ܐܸܠܵܝ: ܘܐܡܸܪܹܐ: ܐܵܗܵܐ ܝܠܹܐ ܦܲܓ̣ܪܝܼ ܕܒܚܵܬܸܪܵܘܟ̣ܘܿܢ ܦܝܵܫܵܐ ܝܠܹܐ ܝܘܼܗ̄ܒ̣ܵܐ: ܐܵܗܵܐ ܥܒ̣ܘܿܕܘܿܢ 20 ܠܕܵܟ̣ܵܪܝܼ. ܘܗܲܕܟ̣ܵܐ ܐܘܼܦ ܥܲܠ ܟܵܣܵܐ: ܡ̣ܢ ܒܵܬ̄ܪ ܕܐܟܸܠܘܿܢ ܚܵܪܲܡܫܵܐ: ܐܡܸܪܹܐ: ܐܵܗܵܐ ܟܵܣܵܐ ܕܝܵܬܹܩܹܐ ܚܲܕܬܵܐ ܝܠܹܐ ܒܕܸܡܝܼ: 21 ܕܡܒܵܕܵܠܵܘܟ̣ܘܿܢ ܦܝܵܫܵܐ ܝܠܹܐ ܫܘܼܦܟ̣ܵܐ. ܐܝܼܢܵܐ ܗܵܐ: ܐܝܼܕܹܗ 22 ܕܣܵܦܝܵܢܝܼ ܥܲܡܝܼ ܥܲܠ ܨܘܼܦܪܵܐ. ܣܵܒܵܒ ܒܪܘܼܢܹܗ ܕܐܢܵܫܵܐ ܒܹܐܙܵܠܵܐ ܝܠܹܐ ܕܵܐܟ̣ܝܼ ܕܦܸܫܠܹܐ ܦܪܝܼܫܵܐ: ܐܝܼܢܵܐ ܘܵܝ ܠܗ̇ܘ ܐܢܵܫܵܐ 23 ܕܒܐܝܼܕܹܗ ܦܝܵܫܵܐ ܝܠܹܐ ܣܘܼܦܝܵܐ. ܘܫܘܼܪܹܠܘܿܢ ܕܨܲܚܨܝܼ ܓܵܘܵܝ: ܝܵܐ ܪܲܒ: ܡܵܢܝܼ ܝܠܹܐ ܡܸܢܵܝ ܗ̇ܘ ܕܐܵܗܵܐ ܗܕܝܼܪܵܐ ܗ̄ܘܵܐ ܠܸܦܠܵܚܵܐ: 24 ܘܗ̄ܘܹܠܵܐ ܐܘܼܦ ܡܲܩܲܪܵܨܘܼܬܵܐ ܓܵܘܵܝ: ܕܡܵܢܝܼ ܡܸܢܵܝ ܦܵܝܸܫ 25 ܚܫܝܼܒ̣ܵܐ ܓܘܼܪܵܐ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܡܲܠܟܹ̈ܐ ܕܛܵܝܸܦܹ̈ܐ ܡܵܪ̈ܵܘܵܬܵܝ ܝܢܵܐ: ܘܐܵܢܝܼ ܕܟܹܐ ܥܵܒ̣ܕܝܼ ܗܘܼܟܡܵܐ ܥܲܠܵܝ ܟܹܐ ܦܵܝܫܝܼ 26 ܩܸܪܝܹܐ: ܥܵܒ̣ܕܵܢܹ̈ܐ ܕܛܵܒ̣ܵܬܹ̈ܐ. ܐܝܼܢܵܐ ܐܲܚܬܘܿܢ ܠܵܐ ܗܲܕܟ̣ܵܐ: ܐܸܠܵܐ ܐܲܝܢܝܼ ܕܝܼܠܹܐ ܓܘܼܪܵܐ ܓܵܘܵܘܟ̣ܘܿܢ: ܗܵܘܹܐ ܐܲܝܟ ܙܥܘܿܪܵܐ: ܘܐܲܝܢܝܼ 27 ܕܝܼܠܹܐ ܪܹܫܵܐ: ܐܲܝܟ ܚܸܠܡܲܬܟܵܪ. ܣܵܒܵܒ ܐܲܝܢܝܼ ܓܘܼܪܵܐ ܝܠܹܐ: ܗ̇ܘ ܕܝܼܠܹܐ ܝܬܝܼܒ̣ܵܐ ܠܨܘܼܦܪܵܐ: ܗ̇ܘ ܕܥܵܒܸܕ ܚܸܠܡܲܬ: ܠܹܐ ܝܠܹܐ ܗ̇ܘ ܕܝܼܠܹܐ ܝܬܝܼܒ̣ܵܐ ܠܨܘܼܦܪܵܐ: ܐܝܼܢܵܐ ܐܵܢܵܐ ܓܵܘܵܘܟ̣ܘܿܢ 28 ܝܼܘܸܢ ܐܲܝܟ ܕܗ̇ܘ ܕܥܵܒܸܕ ܚܸܠܡܲܬ. ܐܲܚܬܘܿܢ ܝܼܬܘܿܢ 29 ܕܥܘܼܪܩܸܠܵܘܟ̣ܘܿܢ ܠܟܸܣܠܝܼ ܒܓ̰ܘܪ̈ܵܒܝܼ. ܘܐܵܢܵܐ ܩܲܘܘܼܠܹܐ ܝܘܸܢ ܐܸܠܵܘܟ̣ܘܿܢ ܐܲܝܟ ܕܩܘܼܘܠܹܐ ܐܸܠܝܼ ܒܵܒܝܼ: ܡܲܠܟܘܼܬܵܐ. 30 ܕܐܵܟ̣ܠܝܼܬܘܿܢ ܘܫܵܬܝܼܬܘܿܢ ܥܲܠ ܨܘܼܦܪܝܼ ܒܡܲܠܟܘܼܬܝܼ: ܘܝܵܬܒ̣ܝܼܬܘܿܢ ܥܲܠ ܟܘܼܪ̈ܣܝܵܘܵܬܵܐ: ܘܕܵܝܢܝܼܬܘܿܢ ܠܬܪܸܥܣܲܪ ܫܲܒ̣ܛܹ̈ܐ ܕܝܼܣܪܵܝܹܠ.

31 ܘܐܡܸܪܹܐ ܡܵܪܲܢ: ܫܸܡܥܘܿܢ: ܗܵܐ: ܣܵܛܵܢܵܐ ܒܸܥܠܹܐ 32 ܕܣܵܪܸܕܠܵܘܟ̣ܘܿܢ ܐܲܝܟ ܕܠܚܸܛܹ̈ܐ. ܘܐܵܢܵܐ ܛܠܸܒܠܝܼ ܒܘܼܬ ܕܝܼܘܼܟ ܕܠܵܐ [76] ܚܵܣܪܵܐ ܗܲܝܡܵܢܘܼܬܘܼܟ: ܘܐܘܼܦ ܐܲܢ̄ܬ ܐܝܼܡܲܢ 33 ܕܕܸܪܘܼܟ: ܡܲܩܘܝܼ ܠܐܵܚܘܿܢܘܵܬܘܼ̈ܟ. ܐܝܼܢܵܐ ܐܡܸܪܹܐ ܐܸܠܹܗ: ܡܵܪܝܼ: ܥܲܡܘܼܟ ܗܕܝܼܪܵܐ ܝܘܸܢ ܠܹܐܙܵܠܵܐ ܠܒܹܝܬ ܐܲܣܝܼܪܹ̈ܐ ܘܠܡܵܘܬܵܐ. 34 ܐܵܡܸܪ ܐܸܠܹܗ: ܒܹܐܡܵܪܵܐ ܝܘܸܢ ܐܸܠܘܼܟ: ܟܹܐܦܵܐ: ܕܠܹܐ ܩܵܪܹܐ ܩܵܪܘܿܝܵܐ ܐܸܕܝܘܼ: ܗܲܠ ܕܬܠܵܬ̄ܐ ܓܵܗܹ̈ܐ ܣܵܪܒܸܬ ܕܠܹܐ ܝܲܕܥܸܬ ܠܝܼ. 35 ܘܐܡܸܪܹܐ ܐܸܠܵܝ: ܟܲܕ ܩܲܡ ܫܵܕܪܸܢܵܘܟ̣ܘܿܢ ܕܠܵܐ ܟܸܣܝܵܬܹ̈ܐ ܘܕܠܵܐ ܓ̰ܲܢܝܵܬܹ̈ܐ ܘܨܵܘܠܹ̈ܐ: ܚܣܸܪܹܐ ܐܸܠܵܘܟ̣ܘܿܢ ܡܸܢܕܝܼ: ܐܡܸܪܘܿܢ 36 ܐܸܠܹܗ: ܠܐ ܡܸܢܕܝܼ. ܐܡܸܪܹܐ ܐܸܠܵܝ: ܡ̣ܢ ܐܵܕܝܼܵܐ ܡ̇ܢ ܕܐܝܼܬ ܠܹܗ ܟܸܣܬܵܐ: ܫܵܩܸܠ: ܘܗܲܕܟ̣ܵܐ ܐܘܼܦ ܓ̰ܲܢܬܵܐ: ܘܡ̇ܢ ܕܠܲܝܬ ܠܹܗ: 37 ܙܵܒܸ̇ܢ ܓ̰ܘܼܠܘܼ̈ܗܝ: ܘܙܵܒܸܢ ܣܲܝܦܵܐ. ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܘܼܦ ܐܵܗܵܐ ܕܝܼܠܵܐ ܟܬܝܼܒ̣ܬܵܐ ܘܵܓ̰ܸܒ ܝܼܠܵܐ ܕܦܵܝܫܵܐ ܬܘܼܡܸܡܬܵܐ ܒܝܼܝܼ: ܘܥܲܡ ܢܵܐܗܲܩܹ̈ܐ ܦܸܫܠܹܐ ܡܸܢܝܵܐ: ܣܵܒܵܒ ܟܠ 38 ܒܵܗ̄ܣ ܕܝܼܝܼ ܐܝܼܬ ܠܹܗ [77] ܬܝܵܡܵܐ. ܘܐܵܢܝܼ ܐܵܡܪܝܼ ܐܸܠܹܗ: ܡܵܪܲܢ: ܗܵܐ: ܠܲܐܟ̣ܵܐ ܐܝܼܬ ܬܪܲܝ ܣܲܝܦܹ̈ܐ. ܐܵܡܸܪ ܐܸܠܵܝ: ܟܹܐ ܡܵܠܝܼ. 39 ܘܦܠܸܛܠܹܐ ܘܐܙܸܠܹܐ: ܐܲܝܟ ܕܐܝܼܬ ܗ̄ܘܵܐ ܠܹܗ ܥܵܕܲܬ: ܠܛܘܼܪܵܐ ܕܙܲܝܬܹ̈ܐ: ܘܐܙܸܠܘܿܢ ܒܵܬ̄ܪܹܗ ܐܘܼܦ ܬܲܠܡܝܼܕܘܼ̈ܗܝ. 40 ܘܟܲܕ ܡܛܹܠܹܐ ܠܚܕܵܐ ܕܘܼܟܬܵܐ: ܐܡܸܪܹܐ ܐܸܠܵܝ: ܨܵܠܹܡܘܿܢ ܕܠܵܐ 41 ܐܵܘܪܝܼܬܘܿܢ ܠܓ̰ܘܼܪܵܒܵܐ. ܘܗ̇ܘ ܪܚܸܩܠܹܐ ܡܸܢܵܝ ܐܲܝܟ ܪܲܦܵܝܬܵܐ 42 ܕܟܹܐܦܵܐ: ܘܒܪܸܟ̇ܠܹܐ: ܘܨܘܼܠܹܠܹܐ. ܘܐܵܡܸܪ: ܝܵܐ ܒܵܒܵܐ: ܐܸܢ ܒܵܣܡܵܐ ܠܘܼܟ ܡܲܥܒܸܪ ܡܸܢܝܼ ܐܵܗܵܐ ܟܵܣܵܐ: ܐܝܼܢܵܐ ܠܵܐ ܪܸܙܵܝܵܐ 43 ܕܝܼܝܼ: ܐܸܠܵܐ ܕܝܼܘܼܟ ܗܵܘܹܐ. [78] ܘܦܸܫܠܹܐ ܚܸܙܝܵܐ ܐܸܠܹܗ ܡܲܠܲܐܟ̣ܸܵܐ ܡ̣ܢ 44 ܫܡܲܝܵܐ ܕܚܲܠܸܢ ܗ̄ܘܵܐ ܠܹܗ. ܘܟܲܕ ܗ̄ܘܹܠܹܐ ܒܐܵܓ̣ܘܿܢܵܐ: ܒܚܲܝܠܵܐ ܕܠܸܒܵܐ ܨܘܼܠܹܠܹܐ: ܘܗ̄ܘܹܠܵܐ ܕܲܥܬܹܗ ܐܲܝܟ ܢܵܛܘܿܦܝܵܬܹ̈ܐ ܕܕܸܡܵܐ 45 ܒܸܢܦܵܠܵܐ ܥܲܠ ܐܲܪܥܵܐ. ܘܩܸܡܠܹܐ ܡ̣ܢ ܨܠܘܿܬܹܗ ܘܐܬܹܠܹܐ ܠܟܸܣ ܬܲܠܡܝܼܕܘܼ̈ܗܝ: ܘܡܘܼܫ̄ܟ̰ܸܚܵܝܠܹܐ ܕܡܝܼܟܹܐ ܡ̣ܢ ܦܫܵܡܬܵܐ. 46 ܘܐܡܸܪܹܐ ܐܸܠܵܝ: ܩܵܡܘܿܕܝܼ ܕܡܝܼܟܹܐ ܝܬܘܿܢ: ܩܘܼܡܘܿܢ ܘܨܵܠܹܡܘܿܢ: ܕܠܵܐ ܐܵܘܪܝܼܬܘܿܢ ܠܓ̰ܘܼܪܵܒܵܐ. 47 ܘܗܹܫ ܗ̇ܘ ܗܲܡܙܘܼܡܹܐ: ܗܵܐ: ܟܸܢܫܵܐ: ܘܗ̇ܘ ܕܦܝܵܫܵܐ ܝܠܹܐ ܩܸܪܝܵܐ ܝܼܗܘܼܕܵܐ: ܚܵܕ̄ ܡ̣ܢ ܬܪܸܥܣܲܪ: ܒܹܐܬܵܝܵܐ ܩܵܕ̄ܡܵܝ: 48 [79] ܘܩܘܼܪܒܸܢܹܐ ܠܟܸܣ ܝܼܫܘܿܥ ܠܸܢܫܵܩܹܗ. ܐܝܼܢܵܐ ܐܡܸܪܹܐ ܐܸܠܹܗ ܝܼܫܘܿܥ: ܝܼܗܘܼܕܵܐ: ܒܢܫܘܼܩܬܵܐ ܣܵܦܘܿܝܹܐ ܝܘܸܬ ܠܒܪܘܼܢܹܗ 49 ܕܐܢܵܫܵܐ. ܘܟܲܕ ܚܙܹܠܘܿܢ ܐܵܢܝܼ ܕܥܲܡܹܗ ܡܸܢܕܝܼ ܕܒܸܬ ܗܵܘܹܐ ܗ̄ܘܵܐ: ܐܡܸܪܘܿܢ ܐܸܠܹܗ: ܡܵܪܲܢ: ܡܵܚܵܚ ܠܗ̄ܘܿܢ ܒܣܲܝܦܹ̈ܐ. 50 ܘܡܚܹܠܹܐ ܚܵܕ̄ ܡܸܢܵܝ ܠܪܹܓܹܗ ܕܓܘܼܪܵܐ ܕܟܵܗܢܹ̈ܐ: ܘܦܪܝܼܡܵܠܹܐ 51 ܢܵܬܹܗ ܕܝܲܡܝܼܢܵܐ. ܐܝܼܢܵܐ ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܫܒ̣ܘܿܩܘܿܢ 52 ܗܲܠ ܐܵܗܵܐ. ܘܕܩܸܪܹܐ ܒܢܵܬܹܗ: ܘܒܘܼܣܡܵܠܹܐ. ܘܐܡܸܪܹܐ ܝܼܫܘܿܥ ܠܐܵܢܝܼ ܕܐܬܹܠܘܿܢ ܥܲܠܘܼܗܝ: ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܘܪܹ̈ܫܵܢܹܐ ܕܗܲܝܟܠܵܐ: ܐܲܝܟ ܕܥܲܠ ܓ̰ܵܠܵܠܝܼ ܦܠܸܛܠܵܘܟ̣ܘܿܢ ܥܲܠܝܼ 53 ܒܣܲܝܦܹ̈ܐ ܘܒܚܘܼܛܪܹ̈ܐ. ܟܠ ܝܘܿܡ ܥܲܡܵܘܟ̣ܘܿܢ ܝܼܘܸܢ ܗ̄ܘܵܐ ܒܗܲܝܟܠܵܐ: ܘܠܵܐ ܦܘܼܫܸܛܠܵܘܟ̣ܘܿܢ ܥܲܠܝܼ ܐܝܼܕܵܬܹ̈ܐ ܐܸܠܵܐ ܐܵܗܵܐ ܝܠܵܐ ܣܵܥܲܬܵܘܟ̣ܘܿܢ ܘܗܘܼܟܡܵܐ ܕܚܘܼܒ̣ܝܵܐ. 54 ܘܕܒܸܩܠܘܿܢ ܐܸܠܹܗ ܘܡܘܼܬ̄ܝܹܠܘܿܢ: ܘܡܘܼܐܘܸܪܘܿܢ ܐܸܠܹܗ ܠܒܲܝܬܹܗ ܕܓܘܼܪܵܐ ܕܟܵܗܢܹ̈ܐ. ܘܟܹܐܦܵܐ ܒܹܐܬܵܝܵܐ ܗ̄ܘܵܐ ܒܵܬ̄ܪܹܗ 55 ܡ̣ܢ ܪܸܚܩܵܐ. ܐܝܼܢܵܐ ܬܘܼܦܹܠܘܿܢ ܢܘܼܪܵܐ ܒܒܹܝܦܲܠܓܵܐ ܕܕܵܪܬܵܐ: ܘܝܬܝܒܹܐ ܗ̄ܘܵܘ ܚܵܕܸܪ̈ܘܵܢܹܗ: ܘܝܬܝܼܒܹܐ ܗ̄ܘܵܐ ܐܘܼܦ ܟܹܐܦܵܐ 56 ܓܵܘܵܝ. ܘܚܙܹܠܵܐ ܐܸܠܹܗ ܚܕܵܐ ܚܵܡܬܵܐ ܝܬܝܼܒ̣ܵܐ ܠܟܸܣ ܢܘܼܪܵܐ: 57 ܘܚܸܪܵܐ ܒܝܹܗ ܘܐܡܸܪܹܐ: ܐܘܼܦ ܐܵܗܵܐ ܥܲܡܹܗ ܗ̄ܘܵܐ. ܐܝܼܢܵܐ ܗ̇ܘ 58 ܣܪܸܒ̣ܠܹܐ: ܒܹܐܡܵܪܵܐ: ܒܲܟ̣ܬܵܐ: ܠܹܐ ܝܲܕܥܸܢܹܗ. ܘܒܵܬ̄ܪ ܚܲܟ̰ܵܐ ܚܙܹܠܹܗ ܚܵܕ̄ ܐܚܹܪ̄ܢܵܐ: ܘܐܡܸܪܹܐ ܐܸܠܹܗ: ܐܘܼܦ ܐܲܢ̄ܬ ܡܸܢܵܝ ܝܘܸܬ. 59 ܐܝܼܢܵܐ ܟܹܐܦܵܐ ܐܡܸܪܹܐ: ܐܢܵܫܵܐ: ܠܹܐ ܝܘܸܢ. ܘܒܵܬ̄ܪ ܐܲܝܟ ܚܕܵܐ ܣܵܥܲܬ ܚܵܕ̄ ܐܚܹܪ̄ܢܵܐ ܩܘܼܝܵܐ ܗܘܼܡܙܸܡܠܹܐ ܘܐܡܸܪܹܐ: ܒܫܲܪܝܼܪܘܼܬܵܐ ܐܘܼܦ ܐܵܗܵܐ ܥܲܡܹܗ ܗ̄ܘܵܐ: ܣܵܒܵܒ ܕܐܘܼܦ ܓܠܝܼܠܵܝܵܐ ܝܠܹܐ. 60 ܘܐܵܡܸܪ ܟܹܐܦܵܐ: ܐܢܵܫܵܐ: ܠܹܐ ܝܘܸܢ ܒܝܼܕܲܥܝܵܐ ܡܘܼܕܝܼ ܒܹܐܡܵܪܵܐ ܝܘܸܬ. 61 ܘܕܲܪܣܵܥܲܬ: ܟܲܕ ܗ̇ܘ ܗܲܡܙܘܼܡܹܐ: ܩܪܹܠܹܐ ܩܵܪܘܿܝܵܐ. ܘܕܸܪܹܐ ܡܵܪܲܢ: ܘܚܸܪܹܐ ܒܟܹܐܦܵܐ: ܘܕܟܸܪܹܐ ܟܹܐܦܵܐ ܗܹܡܸܙܡܵܢ ܕܡܵܪܲܢ: ܕܐܡܝܼܪܵܐ ܗ̄ܘܵܐ ܐܸܠܹܗ: ܕܡܩܵܕ̄ܡ ܕܩܵܪܹܐ ܩܵܪܘܿܝܵܐ ܐܸܕܝܘܼ: ܒܸܬ 62 ܣܵܪܒܸܬ ܠܝܼ ܬܠܵܬ̄ ܓܵܗܹ̈ܐ. ܘܦܠܸܛܠܹܐ ܠܒܲܕܲܪ ܟܹܐܦܵܐ: ܒܟܹܠܹܐ ܒܡܲܪܝܼܪܘܼܬܵܐ. 63 ܘܐܢܵܫܹ̈ܐ ܕܕܒ̣ܝܼܩܹܐ ܗ̄ܘܵܘ ܠܝܼܫܘܿܥ: ܡܲܣܚܸܪܝܼ ܗ̄ܘܵܘ ܘܡܵܚܝܼ 64 ܗ̄ܘܵܘ ܠܹܗ. ܘܟܵܣܝܼ ܗ̄ܘܵܘ ܠܹܗ: ܘܒܵܩܪܝܼ: ܒܹܐܡܵܪܵܐ: ܢܵܒܝܼ: 65 ܡܵܢܝܼ ܩܲܡ ܡܵܚܹܐ ܠܘܼܟ. ܘܪܵܒܵܐ ܡܸܢܕܝܵܢܹ̈ܐ ܐܚܹܪ̄ܢܹܐ ܓܵܕܦܝܼ ܗ̄ܘܵܘ: ܘܐܵܡܪܝܼ ܥܲܠܘܼܗܝ. 66 ܘܟܲܕ ܗ̄ܘܹܠܹܐ ܝܘܿܡܵܐ: ܓ̰ܡܸܥܠܘܿܢ ܚܘܵܪ̈ܕܸܩܢܹܐ ܕܛܵܝܸܦܵܐ ܘܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ: ܘܡܘܼܐܣܸܩܠܘܿܢ ܐܸܠܹܗ ܓܵܘ 67 ܟܢܘܼܫܬܵܝ. ܘܐܵܡܪܝܼ ܐܸܠܹܗ: ܐܸܢ ܐܲܢ̄ܬ ܝܼܘܸܬ ܡܫܝܼܚܵܐ: ܐܡܘܿܪ ܐܸܠܲܢ. ܐܡܸܪܹܐ ܐܸܠܵܝ: ܐܸܢ ܐܵܡܪܸܢܵܘܟ̣ܘܿܢ: ܠܹܐ ܗܲܡܸܢܝܼܬܘܿܢ ܐܸܠܝܼ. 68 ܘܐܸܢ ܒܵܩܪܸܢܵܘܟ̣ܘܿܢ: ܠܹܐ ܡܲܕܸܪܝܼܬܘܿܢ ܓ̰ܘܼܘܵܒ. ܡ̣ܢ ܐܵܕܝܼܵܐ ܒܸܬ 69 ܗܵܘܹܐ ܒܪܘܼܢܹܗ ܕܐܢܵܫܵܐ ܝܬܝܼܒ̣ܵܐ ܡ̣ܢ ܝܲܡܝܼܢܵܐ ܕܚܲܝܠܵܐ ܕܐܲܠܵܗܵܐ. 70 ܘܐܵܡܪܝܼ ܟܠܵܝ: ܒܲܣ ܐܲܢ̄ܬ ܝܼܘܸܬ ܒܪܘܼܢܹܗ ܕܐܲܠܵܗܵܐ: ܐܵܡܸܪ 71 ܐܸܠܵܝ: ܐܲܚܬܘܿܢ ܒܹܐܡܵܪܵܐ ܝܬܘܿܢ ܕܐܵܢܵܐ ܝܘܸܢ. ܐܵܡܪܝܼ ܡܘܼܕܝܼ ܐܚܹܪ̄ܢܵܐ ܠܵܙܸܡ ܝܼܠܵܐ ܐܸܠܲܢ ܣܵܗܕܘܼܬܵܐ: ܣܵܒܵܒ ܐܲܚܢܲܢ ܫܡܸܥܠܲܢ ܡ̣ܢ ܦܘܼܡܹܗ.

ܩܦܠܐܘܢ: ܟܓ

1 ܘܩܸܡܠܘܿܢ ܟܠܹܗ ܟܸܢܫܵܝ ܘܡܘܼܬ̄ܝܹܠܘܿܢ ܐܸܠܹܗ ܠܟܸܣ 2 ܦܝܼܠܵܛܘܿܣ. ܘܫܘܼܪܹܠܘܿܢ ܕܡܵܚܝܼ ܕܲܪ̈ܗܲܩܘܼܗܝ: ܘܐܵܡܪܝܼ: ܠܐܵܗܵܐ ܡܘܼܫ̄ܟ̰ܸܚܠܲܢ ܡܲܚܠܘܼܛܹܐ ܠܛܵܝܸܦܲܢ: ܘܡܲܟܠܘܼܝܹܐ ܕܝܵܗ̄ܒ̣ܵܚ ܚܲܪܓ̰ ܕܪܹܫܵܐ ܠܩܹܣܲܪ: ܘܒܹܐܡܵܪܵܐ ܒܵܗ̄ܣ ܕܓܵܢܹܗ: ܕܡܫܝܼܚܵܐ 3 ܝܠܹܐ ܡܲܠܟܵܐ. ܐܝܼܢܵܐ ܦܝܼܠܵܛܘܿܣ ܒܘܼܩܸܪܹܐ ܡܸܢܹܗ: ܒܹܐܡܵܪܵܐ: ܐܲܢ̄ܬ ܝܼܘܸܬ ܡܲܠܟܵܐ ܕܝܗ̄ܘܼܕܵܝܹ̈ܐ: ܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ: 4 ܐܲܢ̄ܬ ܒܹܐܡܵܪܵܐ ܝܘܸܬ. ܘܐܡܸܪܹܐ ܦܝܼܠܵܛܘܿܣ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܟܸܢܫܵܐ: ܐܵܢܵܐ ܡܸܢܕܝܼ ܗܲܓ̰ܲܬ ܠܹܐ ܝܘܸܢ ܡܵܫ̄ܟ̰ܘܼܚܹܐ ܥܲܠ 5 ܕܐܵܗܵܐ ܐܢܵܫܵܐ. ܐܝܼܢܵܐ ܐܵܢܝܼ ܚܘܼܠܸܢܘܿܢ ܘܐܡܸܪܘܿܢ: ܕܫܓܸܫܠܹܗ ܠܛܵܝܸܦܲܢ: ܟܲܕ ܡܵܠܘܿܦܹܐ ܝܠܹܐ ܒܟܠܵܗ̇ ܝܼܗܘܼܕ: ܘܫܘܼܪܹܠܹܐ 6 ܡ̣ܢ ܓܠܝܼܠܵܐ ܘܗܲܠ ܠܲܐܟ̣ܵܐ. ܐܝܼܢܵܐ ܦܝܼܠܵܛܘܿܣ ܟܲܕ 7 ܫܡܸܥܠܹܐ: ܒܘܼܩܸܪܹܐ: ܕܐܸܢ ܐܢܵܫܵܐ ܓܠܝܼܠܵܐ ܝܠܹܐ. ܘܟܲܕ ܝܕܸܥܠܹܐ ܕܡ̣ܢ ܬܚܘܿܬ ܗܘܼܟܡܵܐ ܕܗܹܪܘܿܕܸܣ ܝܼܗ̄ܘܵܐ. ܫܘܼܕܸܪܹܗ ܠܟܸܣ ܗܹܪܘܿܕܸܣ: ܣܵܒܵܒ ܕܓܵܘ ܐܘܿܪܸܫܠܸܡ ܝܼܗ̄ܘܵܐ ܒܐܵܢܝܼ ܝܘܿܡܵܢܹ̈ܐ. 8 ܘܗܹܪܘܿܕܸܣ ܟܲܕ ܚܙܹܠܹܐ ܠܝܼܫܘܿܥ: ܚܕܹܠܹܐ ܪܵܒܵܐ: ܣܵܒܵܒ ܕܒܸܒܲܥܝܵܐ ܗ̄ܘܵܐ ܠܸܚܙܵܝܹܗ ܡ̣ܢ ܙܲܒ̣ܢܵܐ ܪܵܒܵܐ: ܣܵܒܵܒ ܕܫܸܡܥܝܵܐ ܗ̄ܘܵܐ ܒܵܗ̄ܣܹܗ ܪܵܒܵܐ ܡܸܢܕܝܵܢܹ̈ܐ: ܘܒܗܹܒ̣ܝܼ ܗ̄ܘܵܐ ܕܡܸܢܕܝܼ 9 ܢܝܼܫܲܢܩܵܐ ܒܸܬ ܚܵܙܹܐ ܗ̄ܘܵܐ ܥܒ̣ܝܼܕܵܐ ܡܸܢܹܗ. ܘܗܹܡܸܙܡܵܢܹ̈ܐ ܪܵܒܵܐ ܒܘܼܩܸܪܹܐ ܡܸܢܹܗ. ܐܝܢܵܐ ܗ̇ܘ ܓ̰ܘܼܘܵܒ ܠܵܐ ܡܘܼܕܸܪܹܐ ܐܸܠܹܗ. 10 ܐܝܼܢܵܐ ܒܸܟܠܵܝܵܐ ܗ̄ܘܵܘ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ: ܘܒܙܲܪܒ 11 ܡܵܚܝܼ ܗ̄ܘܵܘ ܕܲܪ̈ܗܲܩܘܼܗܝ. ܘܗܹܪܘܿܕܸܣ ܡܘܼܣܠܹܠܹܗ: ܗ̇ܘ ܘܣܲܪ̈ܒܵܙܘܼܗܝ: ܘܟܲܕ ܡܲܣܚܘܼܪܹܐ ܡܘܼܠܒܸܫܠܹܗ ܓ̰ܘܼ̈ܠܹܐ 12 ܣܡܘܼܩܹ̈ܐ: ܘܡܘܼܕܸܪܹܗ ܠܟܸܣ ܦܝܼܠܵܛܘܿܣ. ܘܒܗ̇ܘ ܝܘܿܡܵܐ ܗ̄ܘܹܠܘܿܢ ܕܵܘܣܬܹ̈ܐ ܦܝܼܠܵܛܘܿܣ ܘܗܹܪܘܿܕܸܣ [80] ܡܥܘܼܕܵܠܹܐ: ܣܵܒܵܒ ܕܸܫܡܸܢܵܝܘܼܬܵܐ ܐܝܼܬ ܗ̄ܘܵܐ ܡ̣ܢ ܩܵܕ̄ܡܵܝܬܵܐ ܒܹܝܠܝ. 13 ܘܩܪܹܠܹܐ ܦܝܼܠܵܛܘܿܣ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܪܹ̈ܫܵܢܹܐ 14 ܘܠܛܵܝܸܦܵܐ. ܘܐܡܸܪܹܐ ܐܸܠܝܼ: ܡܘܼܬ̄ܝܹܠܘܟ̣ܘܿܢ ܠܟܸܣܠܝܼ ܐܵܗܵܐ ܐܢܵܫܵܐ ܐܲܝܟ ܕܡܲܕܘܼܪܹܐ ܝܠܹܐ ܛܵܝܸܦܵܐ. ܘܗܵܐ: ܐܵܢܵܐ ܨܘܼܚܨܹܠܝܼ ܐܸܠܹܗ ܩܵܕ̄ܡ ܥܲܝܢܵܘ̈ܟ̣ܘܿܢ: ܘܗܲܓ̰ܲܬ ܡܸܢܕܝܼ ܠܵܐ ܡܘܼܫ̄ܟ̰ܸܚܠܝܼ ܒܐܵܗܵܐ 15 ܐܢܵܫܵܐ ܡ̣ܢ ܕܐܵܢܝܼ ܕܒܸܠܝܵܡܹܗ ܝܬܘܿܢ. ܐܸܠܵܐ ܐܘܼܦ ܠܵܐ ܗܹܪܘܿܕܸܣ: [81] ܣܵܒܵܒ ܕܫܘܼܕܸܪܝܼ ܐܸܠܵܘܟ̣ܘܿܢ ܠܟܸܣܠܹܗ: ܘܗܵܐ: 16 ܡܸܢܕܝܼ ܕܚܵܫܸܚ ܠܡܵܘܬܵܐ ܠܹܐ ܝܠܹܐ ܦܠܝܼܚܵܐ. ܒܲܣ ܒܸܬ 17 ܬܲܥܠܡܸܢܹܗ ܘܒܸܬ ܫܵܪܸܢܹܗ. [82] ܣܵܒܵܒ ܘܵܓ̰ܸܒ ܝܼܗ̄ܘܵܐ ܕܫܵܪܹܐ 18 ܗ̄ܘܵܐ ܠܗ̄ܘܿܢ ܚܵܕ̄ ܒܥܹܐܕܵܐ. ܐܝܼܢܵܐ ܡܘܼܩܘܸܚܠܘܿܢ ܟܠܹܗ ܟܸܢܫܵܐ: ܘܐܵܡܪܝܼ: ܫܩܘܿܠ ܠܹܗ ܐܵܗܵܐ: ܘܫܪܝܼ ܠܲܢ ܠܒܲܪ ܐܲܒܵܐ. 19 ܗ̇ܘ ܕܣܵܒܵܒ ܕܫܓ̣ܘܼܫܝܵܐ: ܘܩܸܛܠܵܐ: ܕܗ̄ܘܹܠܹܐ ܓܵܘ ܡܕܝܼܢ̄ܬܵܐ: 20 ܕܸܪܝܵܐ ܗ̄ܘܵܐ ܓܵܘ ܒܹܝܬ ܐܲܣܝܼܪܹ̈ܐ. ܐܝܼܢܵܐ ܡܸܕܪܹܐ ܗܘܼܡܙܸܡܠܹܐ 21 ܥܲܡܵܝ ܦܝܼܠܵܛܘܿܣ: ܟܲܕ ܒܲܥܝܹܐ ܗ̄ܘܵܐ ܕܫܵܪܹܐ ܠܝܼܫܘܿܥ. ܐܝܼܢܵܐ ܐܵܢܝܼ ܡܲܩܘܸܚܝܼ ܗ̄ܘܵܘ ܘܐܵܡܪܝܼ: ܙܩܘܿܦ ܠܹܗ: ܙܩܘܿܦ ܠܹܗ. 22 ܐܝܼܢܵܐ ܗ̇ܘ ܓܵܗܵܐ ܕܬܠܵܬ̄ ܐܡܸܪܹܐ ܐܸܠܵܝ: ܡܘܼܕܝܼ ܚܸܪܒܵܐ ܥܒ̣ܝܼܕܵܐ ܝܠܹܐ ܐܵܗܵܐ: ܡܸܢܕܝܼ ܗܲܓ̰ܲܬ ܕܚܵܫܚܵܐ ܠܡܵܘܬܵܐ ܠܵܐ ܡܘܼܫ̄ܟ̰ܸܚܠܝܼ 23 ܒܝܹܗ. ܒܲܣ ܒܸܬ ܬܲܥܠܡܸܢܹܗ ܘܫܵܪܸܢܹܗ. ܐܝܼܢܵܐ ܐܵܢܝܼ ܡܲܠܝܸܙܝܼ ܗ̄ܘܵܘ ܒܩܵܠܵܐ ܪܵܡܵܐ: ܘܛܵܠܒܝܼ ܗ̄ܘܵܘ ܕܦܵܝܸܫ 24 ܙܩܝܼܦܵܐ. ܘܓܠܸܒܠܹܐ ܩܵܠܵܐ ܕܝܼܵܝ. ܘܦܝܼܠܵܛܘܿܣ ܦܩܸܕܠܹܐ 25 ܕܗܵܘܝܵܐ ܗ̄ܘܵܐ ܡܲܛܠܲܒܵܝ. ܘܫܪܹܠܹܐ ܠܗ̇ܘ ܕܣܵܒܵܒ ܕܫܓ̣ܘܼܫܝܵܐ ܘܩܸܛܠܵܐ ܕܸܪܝܵܐ ܗ̄ܘܵܐ ܓܵܘ ܒܹܝܬ ܐܲܣܝܼܪܹ̈ܐ: ܗ̇ܘ ܕܛܠܸܒܠܘܿܢ: ܐܝܼܢܵܐ ܠܝܼܫܘܿܥ ܣܘܼܦܹܠܹܐ ܠܪܸܙܵܝܵܝ. 26 ܘܟܲܕ ܠܵܒܘܿܠܹܗ ܗ̄ܘܵܘ: ܕܒܸܩܠܘܿܢ ܠܫܸܡܥܘܿܢ ܩܸܘܪܝܼܢܵܝܵܐ ܕܒܹܐܬܵܝܵܐ ܗ̄ܘܵܐ ܡ̣ܢ ܡܵܬܵܐ: ܘܡܘܼܬܸܒ̣ܠܘܿܢ ܥܲܠܘܼܗܝ ܙܩܝܼܦܵܐ ܕܛܵܥܸܢ ܗ̄ܘܵܐ ܒܵܬ̄ܪܹܗ ܕܝܼܫܘܿܥ. 27 ܘܒܹܐܬܵܝܵܐ ܗ̄ܘܵܐ ܒܵܬ̄ܪܹܗ ܒܘܼܫܵܝܝܼ ܕܛܵܝܸܦܵܐ: ܘܒܲܟ̣ܬܵܬܹ̈ܐ 28 ܕܒܸܥܒ̣ܵܕܵܐ ܗ̄ܘܵܐ ܬܵܙܝܼ ܘܒܸܠܝܵܝܵܐ ܥܲܠܘܼܗܝ. ܘܕܸܪܹܐ ܠܟܸܣܠܝܼ ܝܼܫܘܿܥ: ܘܐܡܸܪܹܐ: ܒܢܵܬܹ̈ܐ ܕܐܘܿܪܸܫܠܸܡ: ܠܵܐ ܒܵܟ̣ܝܼܬܘܿܢ ܥܲܠܝܼ: 29 ܐܝܼܢܵܐ ܥܲܠ ܓܵܢܵܘܟ̣ܘܿܢ ܒܟܹܡܘܿܢ ܘܥܲܠ ܒܢܘܼܢܵܘ̈ܟ̣ܘܿܢ. ܣܵܒܵܒ ܗܵܐ: ܒܹܐܬܵܝܵܐ ܝܢܵܐ ܝܘܿܡܵܢܹ̈ܐ ܕܒܝܼܵܝ ܒܸܬ ܐܵܡܪܝܼ: ܛܘܼܒ̣ܵܐ ܠܥܲܩܪ̈ܵܬܵܐ ܘܠܟܹܪ̄ܣܵܬܵܐ ܕܠܵܐ ܝܠܸܕܠܘܿܢ: ܘܠܒܸܙܵܙܹ̈ܐ ܕܠܵܐ 30 ܡܘܼܡܸܨܠܘܿܢ. ܗ̇ܝܓܵܗ ܒܸܬ ܫܵܪܝܼ ܠܹܐܡܵܪܵܐ ܠܛܘܼܪ̈ܵܢܹܐ: 31 ܢܦܘܿܠܘܿܢ ܥܲܠܲܢ: ܘܠܪ̈ܘܼܡܝܵܬܹܐ: ܟܵܣܘܿܢ ܠܲܢ. ܣܵܒܵܒ ܐܸܢ ܒܩܲܝܣܵܐ ܬܲܠܝܼܠܵܐ ܐܲܢܹܐ ܒܸܥܒ̣ܵܕܵܐ ܝܢܵܐ: ܒܒܵܪܘܿܙܵܐ ܡܘܼܕܝܼ ܒܸܬ ܗܵܘܹܐ. 32 ܘܦܸܫܠܘܿܢ ܡܘܼܬ̄ܝܹܐ ܥܲܡܹܗ ܬܪܲܝ ܐܚܹܪ̄ܢܹܐ ܥܵܒ̣ܕܵܢܹ̈ܐ ܕܒܝܼܫܵܬܹ̈ܐ: ܕܦܵܝܫܝܼ ܩܛܝܼܠܹܐ. 33 ܘܟܲܕ ܐܬܹܠܘܿܢ ܠܚܕܵܐ ܕܘܼܟܬܵܐ ܕܦܝܵܫܵܐ ܝܠܵܐ ܩܪܝܼܬܵܐ ܩܲܪܩܲܦܬܵܐ: ܙܩܸܦܠܘܿܢ ܐܸܠܹܗ ܬܵܡܵܐ: ܘܠܵܐܢܝܼ ܥܵܒ̣ܕܵܢܹ̈ܐ 34 ܕܒܝܼܫܵܬܹ̈ܐ: ܚܵܕ̄ ܡ̣ܢ ܝܲܡܝܼܢܹܗ ܘܚܵܕ̄ ܡ̣ܢ ܣܸܡܵܠܹܗ. ܐܝܼܢܵܐ ܝܼܫܘܿܥ ܐܡܸܪܹܐ: ܒܵܒܵܐ: ܫܒ̣ܘܿܩ ܠܗ̄ܘܿܢ: ܣܵܒܵܒ ܕܠܹܐ ܝܢܵܐ ܒܝܼܕܲܥܝܵܐ ܡܘܼܕܝܼ ܒܸܥܒ̣ܵܕܵܐ ܝܢܵܐ. ܘܦܘܼܠܹܠܘܿܢ ܠܓ̰ܘܼܠܘܼ̈ܗܝ: 35 ܘܕܪܹܠܘܿܢ ܥܲܠܵܝ ܦܸܫܟܵܐ. ܐܝܼܢܵܐ ܟܠܹܠܹܐ ܛܵܝܸܦܵܐ ܒܸܚܝܵܪܵܐ. ܘܡܲܣܚܸܪܝܼ ܗ̄ܘܵܘ ܒܝܹܗ ܐܘܼܦ ܓܘܼܪ̈ܵܢܹܐ: ܘܐܵܡܪܝܼ: ܠܐܚܹܪ̄ܢܹܐ ܡܘܼܚܹܠܹܐ: ܡܲܚܹܐ ܠܓܵܢܹܗ: ܐܸܢ ܐܵܗܵܐ ܝܠܹܐ ܡܫܝܼܚܵܐ ܓܘܼܒ̇ܝܹܗ 36 ܕܐܲܠܵܗܵܐ. ܘܡܣܚܸܪܝܼ ܗ̄ܘܵܘ ܒܝܹܗ ܐܘܼܦ ܣܲܪ̈ܒܵܙܹܐ: ܒܹܐܬܵܝܵܐ 37 ܠܟܸܣܠܹܗ: [83] ܡܵܐܘܹܐ ܐܸܠܹܗ ܚܵܠܵܐ. ܘܒܹܐܡܵܪܵܐ: ܐܸܢ ܐܲܢ̄ܬ ܝܼܘܸܬ 38 ܡܲܠܟܵܐ ܕܝܼܗ̄ܘܼܕܵܝܹ̈ܐ: ܡܲܚܝܼ ܓܵܢܘܼܟ. ܐܝܼܢܵܐ ܐܝܼܬ ܗ̄ܘܵܐ ܐܘܼܦ ܟܬܵܒ̣ܵܐ ܟܬܝܼܒ̣ܵܐ ܠܥܸܠܸܠ ܡܸܢܹܗ: [84] ܒܠܸܫܵܢܵܐ ܕܝܵܘܢܵܝܹ̈ܐ ܘܕܪܗ̄ܘܿܡܵܝܹܐ ܘܕܥܸܒ̣ܪ̈ܵܝܹܐ: ܐܗܐ ܝܠܐ ܡܠܟܐ ܕܝܗ̄ܘܼܕܝ̈ܐ. 39 ܘܚܵܕ̄ ܡ̣ܢ ܕܐܵܢܝܼ ܥܵܒ̣ܕܵܢܹ̈ܐ ܕܒܝܼܫܵܬܹ̈ܐ ܕܬܸܠܝܹܐ ܗ̄ܘܵܘ ܥܲܡܹܗ: ܓܵܕܸܦ ܗ̄ܘܵܐ ܥܲܠܘܼܗܝ ܘܐܵܡܸܪ: [85] ܐܸܢ ܐܲܢ̄ܬ ܝܼܘܸܬ ܡܫܝܼܚܵܐ: 40 ܦܵܨܝܼ ܓܵܢܘܼܟ ܘܐܸܠܲܢ. ܓ̰ܘܼܘܸܒܠܹܐ ܗ̇ܘ ܐܚܹܪ̄ܢܵܐ: ܘܢܓ̰ܸܘܠܹܐ ܒܝܹܗ: ܘܐܡܸܪܹܐ: ܐܘܼܦ ܡ̣ܢ ܐܲܠܵܗܵܐ ܠܹܐ ܝܘܸܬ ܒܸܙܕܲܥܝܵܐ: ܕܐܘܼܦ 41 ܐܲܢ̄ܬ ܒܐܵܗܵܐ ܕܝܼܘܵܢ ܝܼܘܸܬ: ܘܐܲܚܢܲܢ ܒܗܵܩܘܼܬܵܐ: ܣܵܒܵܒ ܐܲܝܟ ܕܚܵܫܚܝܼ ܥܵܡ̈ܠܲܢ ܩܵܒܘܿܠܹܐ ܝܘܵܚ: ܐܝܼܢܵܐ ܐܵܗܵܐ ܡܸܢܕܝܼ ܚܸܪܒܵܐ 42 ܠܹܐ ܝܠܹܐ ܥܒ̣ܝܼܕܵܐ. [86] ܘܐܡܸܪܹܐ: ܝܼܫܘܿܥ: ܕܟ̣ܘܿܪܝܼ: ܐܝܼܡܲܢ 43 ܕܐܵܬܸܬ ܒܡܲܠܟܘܼܬܘܼܟ. ܐܵܡܸܪ ܐܸܠܹܗ ܝܼܫܘܿܥ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܘܼܟ: ܕܐܸܕܝܘܼ ܥܲܡܝܼ ܒܸܬ ܗܵܘܸܬ ܓܵܘ ܦܲܪܕܲܝܣܵܐ. 44 ܐܝܼܢܵܐ ܐܲܝܟ ܣܵܥܲܬ ܕܐܸܫܸܬ ܝܼܗ̄ܘܵܐ: ܘܗ̄ܘܹܠܹܐ ܚܘܼܒ̣ܝܵܐ ܥܲܠ 45 ܟܠܵܗ̇ ܐܲܪܥܵܐ ܗܲܠ ܣܵܥܲܬ ܕܐܸܬܫܲܥ. ܘܫܸܡܫܵܐ ܚܒܹܠܹܐ: ܘܣܸܬܪܵܐ ܕܗܲܝܟܠܵܐ ܦܸܫܠܹܐ [87] ܟ̰ܘܼܢܟ̰ܸܪܵܐ ܡ̣ܢ ܒܹܝܦܲܠܓܹܗ. 46 ܘܡܘܼܩܘܸܚܠܹܐ ܝܼܫܘܿܥ ܒܩܵܠܵܐ ܪܵܡܵܐ: ܘܐܡܸܪܹܐ: ܒܵܒܵܐ: ܒܐܝܼܕܘܼ̈ܟ ܣܵܦܘܿܝܹܐ ܝܘܸܢ ܪܘܼܚܝܼ. ܐܵܗܵܐ ܐܡܸܪܹܐ: ܘܣܘܼܦܵܝܠܹܐ ܓܵܢܹܗ. 47 ܘܟܲܕ ܚܙܹܠܹܐ ܩܸܢܛܪܘܿܢܵܐ ܡܸܢܕܝܼ ܕܗ̄ܘܹܠܹܐ: ܫܘܼܒܸܚܠܹܐ ܠܐܲܠܵܗܵܐ: 48 ܒܹܐܡܵܪܵܐ: ܒܬܪܘܼܨܬܵܐ ܐܵܗܵܐ ܐܢܵܫܵܐ ܙܲܕܝܼܩܵܐ ܗ̄ܘܵܐ. ܘܟܠܵܝ ܟܸܢܫܹ̈ܐ ܕܝܼܗ̄ܘܵܘ ܓ̰ܸܡܥܝܹܐ ܠܐܵܗܵܐ ܚܙܵܝܬܵܐ: ܟܲܕ ܚܙܹܠܘܿܢ ܡܸܢܕܝܼ 49 ܕܗ̄ܘܹܠܹܐ: ܕܸܪܘܿܢ ܒܸܡܚܵܝܵܐ ܥܲܠ ܨܲܕܪܵܝ. ܘܟܸܠܝܹܐ ܗ̄ܘܵܘ ܡ̣ܢ ܪܸܚܩܵܐ ܟܠܵܝ ܝܲܕܥܵܢܘܼ̈ܗܝ: ܘܒܲܟ̣ܬܵܬܹ̈ܐ ܕܝܼܗ̄ܘܵܘ ܐܬܝܹܐ ܥܲܡܹܗ ܡ̣ܢ ܓܠܝܼܠܵܐ: ܘܒܸܚܙܵܝܵܐ ܗ̄ܘܵܘ ܐܲܢܹܐ. 50 ܘܗܵܐ: ܚܵܕ̄ ܐܢܵܫܵܐ ܕܫܸܡܹܗ ܝܵܘܣܸܦ: ܪܵܐܝܝܼܟܵܪ: ܡ̣ܢ ܪܵܡܬܵܐ 51 ܡܕܝܼܢ̄ܬܵܐ ܕܝܼܗܘܼܕ: ܐܢܵܫܵܐ ܛܵܒ̣ܵܐ ܘܙܲܕܝܼܩܵܐ. ܐܵܗܵܐ ܠܹܐ ܗ̄ܘܵܐ ܬܸܒܥܝܵܐ ܠܪܸܙܵܝܵܝ ܘܠܦܘܼܠܚܵܢܵܝ: ܕܒܸܣܦܵܪܵܐ ܗ̄ܘܵܐ ܠܡܲܠܟܘܼܬܵܐ 52 ܕܐܲܠܵܗܵܐ. ܐܵܗܵܐ ܐܬܹܠܹܐ ܠܟܸܣ ܦܝܼܠܵܛܘܿܣ: ܘܛܠܸܒܠܹܐ 53 ܦܲܓ̣ܪܹܗ ܕܝܼܫܘܿܥ. ܘܡܘܼܨܠܹܠܹܗ: ܘܟܘܼܪܸܟ̣ܠܹܗ ܒܟܸܬܵܢ: ܘܡܘܼܬܸܒ̣ܠܹܗ ܓܵܘ ܒܹܝܬ ܩܒ̣ܘܼܪܵܐ ܢܩܝܼܪܬܵܐ ܒܟܹܐܦܵܐ: ܗ̇ܝ 54 ܕܗܹܫ ܐܢܵܫܵܐ ܠܹܐ ܗ̄ܘܵܐ ܡܘܼܬܒ̣ܵܐ ܓܵܘܘܼܗ̇. ܘܝܘܿܡܵܐ ܕܗܵܕܲܪܬܵܐ 55 ܗ̄ܘܵܐ: ܘܫܲܒܬܵܐ ܒܸܙܪܵܩܵܐ ܗ̄ܘܵܐ. ܘܐܬܹܠܘܿܢ ܒܵܬ̄ܪܵܐ ܒܲܟ̣ܬܵܬܹ̈ܐ: ܐܵܢܝܼ ܕܐܬܝܹܐ ܗ̄ܘܵܘ ܥܲܡܹܗ ܡ̣ܢ ܓܠܝܼܠܵܐ: ܘܚܸܙܝܵܠܘܿܢ ܠܩܲܒ̣ܪܵܐ: 56 ܘܕܵܐܟ̣ܝܼ ܦܸܫܠܹܐ ܡܘܼܬܒ̣ܵܐ ܦܲܓ̣ܪܹܗ. ܘܕܸܪܘܿܢ ܗܘܼܕܸܪܘܿܢ ܒܸܣܡܹ̈ܐ ܘܗܹܪ̈ܘܿܡܹܐ: ܘܒܫܲܒܬܵܐ ܫܠܹܠܘܿܢ ܐܲܝܟ ܦܘܼܩܕܵܢܵܐ.

ܩܦܠܐܘܢ: ܟܕ

1 ܐܝܼܢܵܐ ܒܚܵܒ̣ܫܹܒܵܐ ܒܨܲܦܪܵܐ: ܒܦܝܵܪܬܵܐ: ܐܬܹܠܘܿܢ ܠܒܹܝܬ ܩܒ̣ܘܼܪܵܐ: ܘܡܘܼܬ̄ܝܹܠܘܿܢ ܗܹܪ̈ܘܿܡܹܐ ܐܵܢܝܼ ܕܗܘܼܕܪܹܐ ܗ̄ܘܵܘ. 2 ܘܡܘܼܫ̄ܟ̰ܸܚܠܘܿܢ ܠܟܹܐܦܵܐ ܡܘܼܚܕܸܪܵܐ ܡ̣ܢ ܒܹܝܬ ܩܒ̣ܘܼܪܵܐ. 3 ܘܐܘܸܪܘܿܢ ܘܠܵܐ ܡܘܼܫ̄ܟ̰ܸܚܠܘܿܢ ܠܦܲܓ̣ܪܵܐ ܕܡܵܪܲܢ ܝܼܫܘܿܥ. 4 ܘܗ̄ܘܹܠܵܐ ܟܲܕ ܐܵܢܝܼ ܥܘܼܓ̰ܒܹܐ ܗ̄ܘܵܘ ܥܲܠ ܕܐܵܗܵܐ: ܗܵܐ: ܬܪܲܝ ܐܢܵܫܹ̈ܐ ܟܠܹܠܘܿܢ ܠܥܸܠܸܠ ܡܸܢܵܝ ܒܠܒܸܫܬܵܐ ܡܲܒܪܸܩܵܢܬܵܐ. 5 ܘܗ̄ܘܹܠܘܿܢ ܒܙܕܘܼܥܬܵܐ: ܘܡܘܼܟܸܦܠܘܿܢ ܦܵܬܵܝ ܠܐܲܪܥܵܐ: ܘܐܵܡܪܝܼ 6 ܐܸܠܵܝ: ܩܵܡܘܿܕܝܼ ܒܸܛܲܥܝܵܐ ܝܬܘܿܢ ܠܚܵܝܵܐ ܓܵܘ ܡܝܼܬܹ̈ܐ. ܠܹܐ ܝܠܹܐ ܠܲܐܟ̣ܵܐ: ܩܝܼܡܵܐ ܝܠܹܐ. ܕܟ̣ܘܿܪܘܿܢ ܕܗܘܼܡܙܸܡܠܹܐ ܥܲܡܵܘܟ̣ܘܿܢ 7 ܟܲܕ ܗ̇ܘ ܒܓܠܝܼܠܵܐ ܗ̄ܘܵܐ. ܘܐܡܸܪܹܐ: ܕܘܵܓ̰ܸܒ ܝܼܠܵܐ ܕܒܪܘܼܢܹܗ ܕܐܢܵܫܵܐ ܦܵܝܸܫ ܣܘܼܦܝܵܐ ܒܐܝܼܕܵܬܹ̈ܐ ܕܐܢܵܫܹ̈ܐ ܚܲܛܵܝܹ̈ܐ: ܘܦܵܝܸܫ 8 ܙܩܝܼܦܵܐ: ܘܒܝܘܿܡܵܐ ܕܬܠܵܬ̄ܐ ܩܵܝܸܡ. ܘܐܵܢܝܼ ܕܟܸܪܘܿܢ 9 ܠܗܹܡܸܙܡܵܢܘܼ̈ܗܝ. ܘܕܸܪܘܿܢ ܡ̣ܢ ܩܲܒ̣ܪܵܐ: ܘܗܘܼܩܹܠܘܿܢ ܐܲܢܹܐ 10 ܟܠܵܝ ܠܚܲܕܸܥܣܲܪ ܘܠܟܠܵܝ ܐܚܹܪ̄ܢܹܐ. ܐܝܼܢܵܐ ܝܼܗ̄ܘܵܘ ܡܲܪܝܲܡ ܡܲܓ̣ܕܠܵܝܬܵܐ: ܘܝܘܿܚܲܢ: ܘܡܲܪܝܲܡ ܝܸܡܹܗ ܕܝܲܥܩܘܿܒ̣: ܘܐܚܹܪ̄ܢܹܐ 11 ܕܥܲܡܵܝ: ܕܡܘܼܕܸܥܠܘܿܢ ܐܲܢܹܐ ܠܫܠܝܼܚܹ̈ܐ. ܘܦܸܫܠܘܿܢ ܚܸܙܝܹܐ ܒܥܲܝܢܵܝ̈ ܐܲܢܹܐ ܗܹܡܸܙܡܵܢܵܝ̈ ܐܲܝܟ ܒܵܛܝܼܠܹ̈ܐ: ܘܠܵܐ ܗܘܼܡܸܢܘܿܢ ܐܸܠܵܝ. 12 ܐܝܼܢܵܐ ܟܹܐܦܵܐ ܩܸܡܠܹܐ ܘܪܚܸܛܠܹܐ ܠܩܲܒ̣ܪܵܐ: ܘܟܸܦܠܹܐ ܚܙܹܠܹܐ ܟܸܬܵܢܹ̈ܐ ܡܘܼܬܒܹܐ ܒܢܲܦ̮ܫܵܝ: ܘܐܙܸܠܹܐ ܥܵܓ̰ܘܼܒܹܐ ܒܓܵܢܹܗ ܥܲܠ ܡܸܢܕܝܼ ܕܗ̄ܘܹܠܹܐ.

13 ܘܗܵܐ: ܬܪܝ ܡܸܢܵܝ ܒܗ̇ܘ ܝܘܿܡܵܐ ܒܹܐܙܵܠܵܐ ܗ̄ܘܵܘ ܠܡܵܬܵܐ ܕܫܸܡܵܗ̇: ܥܲܡܵܐܘܿܣ: ܘܪܸܚܩܵܐ ܡ̣ܢ ܐܘܿܪܸܫܠܸܡ ܐܸܫܬܝܼ 14 ܐܸܣܛ̈ܕܵܘܵܬܵܐ. ܘܐܵܢܝܼ ܗܲܡܙܘܼܡܹܐ ܗ̄ܘܵܘ ܚܵܕ̄ ܥܲܡ ܕܗ̇ܘ 15 ܐܚܹܪ̄ܢܵܐ: ܥܲܠ ܕܐܲܢܹܐ ܟܠܵܝ ܕܩܘܼܘܸܡܠܘܿܢ. ܘܗ̄ܘܹܠܵܐ: ܟܲܕ ܐܵܢܝܼ ܗܲܡܙܘܼܡܹܐ ܗ̄ܘܵܘ ܘܒܵܩܘܿܪܹܐ ܚܵܕ̄ ܡܗ̇ܘ ܐܚܹܪ̄ܢܵܐ: 16 ܕܝܼܫܘܿܥ ܒܓܵܢܹܗ [88] ܩܘܼܪܒܸܢܹܐ: ܘܚܕܸܪܹܐ ܥܲܡܵܝ. ܘܥܲܝܢܵܝ̈ 17 ܕܒ̣ܝܼܩܹܐ ܗ̄ܘܵܘ: ܕܠܵܐ ܝܲܕܥܝܼ ܗ̄ܘܵܘ ܠܹܗ. ܘܐܡܸܪܹܐ ܐܸܠܵܝ: ܡܘܼܕܝܼ ܝܢܵܐ ܐܲܢܹܐ ܗܹܡܸܙܡܵܢܹ̈ܐ ܕܗܲܡܙܘܼܡܹܐ ܝܬܘܿܢ [89] ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ: ܟܲܕ ܒܸܚܕܵܪܵܐ ܝܬܘܿܢ ܘܦܫܝܼܡܹܐ ܝܬܘܿܢ. 18 ܘܓ̰ܘܼܘܸܒܠܹܐ ܚܵܕ̄ ܡܸܢܵܝ ܕܫܸܡܹܗ ܩܲܠܝܘܿܦܵܐ: ܘܐܡܸܪܹܐ ܐܸܠܹܗ: ܐܲܢ̄ܬ ܒܢܲܦ̮ܫܘܼܟ ܡܵܫܵܚܲܛ ܝܼܘܸܬ ܓܵܘ ܐܘܿܪܸܫܠܸܡ ܕܠܹܐ ܝܘܸܬ 19 ܒܝܼܕܲܥܝܵܐ ܡܸܢܕܝܼ ܕܗ̄ܘܹܠܹܐ ܓܵܘܘܼܗ̇ ܒܐܲܢܹܐ ܝܘܿܡܵܢܹ̈ܐ. ܐܵܡܸܪ ܐܸܠܵܝ: ܡܘܼܕܝܼ: ܐܵܡܪܝܼ ܐܸܠܹܗ: ܒܵܗ̄ܣ ܕܝܼܫܘܿܥ: ܗ̇ܘ ܕܡ̣ܢ ܢܵܨܪܲܬ: ܐܢܵܫܵܐ ܕܝܼܗ̄ܘܵܐ ܢܒ̣ܝܼܵܐ: ܘܚܲܝܠܵܢܵܐ ܒܗܹܡܸܙܡܵܢ ܘܒܦܘܼܠܚܵܢܵܐ 20 ܩܵܕ̄ܡ ܐܲܠܵܗܵܐ ܘܩܵܕ̄ܡ ܟܠܹܗ ܛܵܝܸܦܵܐ. ܘܕܵܐܟ̣ܝܼ ܣܘܼܦܹܠܘܿܢ ܐܸܠܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܪܹ̈ܫܵܢܹܐ ܕܝܸܢ ܠܕܝܼܘܵܢ ܕܡܵܘܬܵܐ: 21 ܘܙܩܸܦܠܘܿܢ ܐܸܠܹܗ. ܐܝܼܢܵܐ ܐܲܚܢܲܢ ܒܗܹܒ̣ܝܼ ܝܘܵܗ ܗ̄ܘܵܘ ܕܐܵܗܵܐ ܗ̄ܘܵܘ ܗ̇ܘ ܕܗܕܝܼܪܵܐ ܗ̄ܘܵܐ ܕܦܵܪܸܩ ܠܝܼܣܪܵܝܹܠ. ܐܸܠܵܐ ܥܲܡ ܕܐܲܢܹܐ ܟܠܵܝ: ܐܵܗܵܐ ܝܘܿܡܵܐ ܕܬܠܵܬ̄ܐ ܡ̣ܢ ܕܐܲܢܹܐ ܟܠܵܝ 22 ܗ̄ܘܹܠܘܿܢ. ܐܝܼܢܵܐ ܐܘܼܦ ܒܟ̣ܬܵܬܹ̈ܐ ܡܸܢܲܢ ܩܲܡ ܡܲܥܓ̰ܸܒܝܼ ܠܲܢ: 23 ܣܵܒܵܒ ܕܩܘܼܕܸܡܠܘܿܢ ܠܒܹܝܬ ܩܒ̣ܘܼܪܵܐ. ܘܟܲܕ ܠܵܐ ܡܘܼܫ̄ܟ̰ܸܚܠܘܿܢ ܠܦܲܓ̣ܪܹܗ: ܐܬܹܠܘܿܢ: ܐܡܸܪܘܿܢ: ܕܚܸܙܘܵܐ ܕܡܲܠܲܐܟܹ̈ܐ 24 ܚܙܹܠܘܿܢ: ܕܐܡܸܪܘܿܢ ܕܚܵܝܵܐ ܝܠܹܐ. ܘܐܘܼܦ ܐܢܵܫܹ̈ܐ ܡܸܢܲܢ ܐܙܸܠܘܿܢ ܠܒܹܝܬ ܩܒ̣ܘܼܪܵܐ: ܘܡܘܼܫ̄ܟ̰ܸܚܠܘܿܢ ܗܲܕܟ̣ܵܐ ܕܵܐܟ̣ܝܼ ܕܐܡܸܪܘܿܢ 25 ܒܲܟ̣ܬܵܬܹ̈ܐ: ܐܝܼܢܵܐ ܐܸܠܹܗ ܠܵܐ ܚܙܹܠܘܿܢ. ܘܐܡܸܪܹܐ ܐܸܠܵܝ: ܝܵܐ ܟܝܼܡ ܚܝܼܵܠ ܘܝܵܩܘܿܪܹ̈ܐ ܒܠܸܒܵܐ ܠܗܲܡܘܼܢܹܐ ܠܟܠܵܝ ܐܵܢܝܼ ܕܗܘܼܡܙܸܡܠܘܿܢ 26 ܢܒ̣̈ܝܹܐ. ܠܹܐ ܗ̄ܘܵܐ ܘܵܓ̰ܸܒ ܕܩܵܒܸ̇ܠ ܗ̄ܘܵܐ ܐܲܢܹܐ ܡܫܝܼܚܵܐ: 27 ܘܕܐܵܘܸܪ ܠܬܸܫܒܘܿܚܬܹܗ. ܘܫܘܼܪܹܠܹܐ ܡ̣ܢ ܡܘܼܫܹܐ ܘܡ̣ܢ ܟܠܵܝ ܢܒ̣̈ܝܹܐ: ܘܦܘܼܫܸܩܠܹܐ ܐܸܠܵܝ ܒܵܗ̄ܣ ܕܓܵܢܹܗ ܡ̣ܢ ܟܠܵܝ ܟܬܵܒܹ̈ܐ. 28 [90] ܘܩܘܼܪܒܸܢܹܐ ܗ̄ܘܵܘ ܠܡܵܬܵܐ: ܗ̇ܝ ܕܒܹܐܙܵܠܵܐ ܗ̄ܘܵܘ ܐܸܠܵܗ̇: ܘܗ̇ܘ ܡܘܼܚܫܸܒ̣ܠܹܐ ܐܲܝܟ ܕܠܕܘܼܟܵܐ ܒܘܼܫ ܪܸܚܩܵܐ ܒܹܐܙܵܠܵܐ ܗ̄ܘܵܐ. 29 ܘܡܘܼܠܝܸܨܠܘܿܢ ܐܸܠܹܗ: ܒܹܐܡܵܪܵܐ: ܦܘܼܫ ܠܟܸܣܠܲܢ: ܣܵܒܵܒ ܩܘܼܪܒܵܐ ܝܠܹܐ ܪܲܡܫܵܐ ܘܟܝܼܦܵܐ ܝܠܹܐ ܝܘܿܡܵܐ. ܘܐܘܸܪܹܐ ܕܦܵܝܸܫ 30 ܠܟܸܣܠܵܝ. ܘܗ̄ܘܹܠܵܐ ܕܟܲܕ ܝܬܸܒ̣ܠܹܐ ܠܨܘܼܦܪܵܐ ܥܲܡܵܝ: ܫܩܸܠܹܐ ܠܲܚܡܵܐ: ܘܒܘܼܪܸܟ̣ܠܹܐ: ܘܩܨܹܠܹܐ: ܘܝܸܗܒܸܠܹܐ ܐܸܠܵܝ. 31 ܘܦܸܫܠܘܿܢ ܦܬܝܼܚܹܐ ܥܲܝܢܵܝ̈: ܘܝܕܸܥܠܘܿܢ ܐܸܠܹܗ. ܘܐܚܹܪ̄ܢܵܐ ܠܵܐ 32 ܚܙܹܠܘܿܢ ܐܸܠܹܗ. ܘܐܵܡܪܝܼ ܗ̄ܘܵܘ ܚܵܕ̄ ܠܗ̇ܘ ܐܚܹܪ̄ܢܵܐ: ܠܹܐ ܗ̄ܘܵܐ ܠܸܒܢ ܒܸܩܝܵܕܵܐ ܒܓܵܘܲܢ: ܟܲܕ ܗܲܡܙܘܼܡܹܐ ܗ̄ܘܵܐ ܥܲܡܲܢ 33 ܒܐܘܼܪܚܵܐ: ܘܦܵܫܘܿܩܹܐ ܐܸܠܲܢ ܟܬܵܒܹ̈ܐ. ܘܩܸܡܠܘܿܢ ܒܗ̇ܝ ܣܵܥܲܬ ܘܕܸܪܘܿܢ ܠܐܘܿܪܸܫܠܸܡ: ܘܡܘܼܫ̄ܟ̰ܸܚܠܘܿܢ ܠܚܲܕܸܥܣܲܪ ܓ̰ܸܡܥܝܹܐ: 34 ܘܠܵܐܢܝܼ ܕܥܲܡܵܝ. ܟܲܕ ܒܹܐܡܵܪܵܐ: ܒܫܲܪܝܼܪܘܼܬܵܐ ܩܝܼܡܵܐ 35 ܝܠܹܐ ܡܵܪܲܢ: ܘܦܸܫܠܹܐ ܚܸܙܝܵܐ ܠܫܸܡܥܘܿܢ. ܘܐܘܼܦ ܐܵܢܝܼ ܗܘܼܩܹܠܘܿܢ ܐܵܢܝܼ ܕܗ̄ܘܹܠܘܿܢ ܒܐܘܼܪܚܵܐ: ܘܕܵܐܟ̣ܝܼ ܦܸܫܠܹܐ ܝܕܸܥܝܵܐ ܐܸܠܵܝ ܒܩܨܵܝܬܵܐ ܕܠܲܚܡܵܐ. 36 ܘܟܲܕ ܐܲܢܹܐ ܗܲܡܙܘܼܡܹܐ ܗ̄ܘܵܘ: ܝܼܫܘܿܥ ܒܓܵܢܹܗ ܟܠܹܠܹܐ 37 ܒܓܵܘܵܝ: ܘܐܡܸܪܹܐ ܐܸܠܵܝ: ܫܠܵܡܵܐ ܥܲܡܵܘܟ̣ܘܿܢ. ܘܐܵܢܝܼ ܚܓ̰ܸܠܘܿܢ ܘܗ̄ܘܹܠܘܿܢ ܒܙܕܘܼܥܬܵܐ: ܣܵܒܵܒ ܒܸܚܫܵܒ̣ܵܐ ܗ̄ܘܵܘ ܪܘܼܚܵܐ ܒܸܚܙܵܝܵܐ 38 ܗ̄ܘܵܘ. ܐܵܡܸܪ ܐܸܠܵܝ: ܩܵܡܘܿܕܝܼ ܦܝܵܫܵܐ ܝܬܘܿܢ ܫܥܝܼܫܹܐ ܘܩܵܡܘܿܕܝܼ ܒܹܐܣܵܩܵܐ ܝܢܵܐ ܚܘܼܫܵܒܹ̈ܐ ܓܵܘ ܠܸܒܵܘܵܬܵܘ̈ܟ̣ܘܿܢ. 39 ܚܙܹܡܘܿܢ ܐܝܼܕܵܬܝܼ̈ ܘܐܲܩܠܵܬܝܼ̈: ܕܐܵܢܵܐ ܝܘܸܢ. ܦܲܠܬܸܫܘܿܢ ܠܝܼ: ܘܝܕܸܥܡܘܿܢ: ܣܵܒܵܒ ܪܘܼܚܵܐ ܒܸܣܪܵܐ ܘܓܲܪ̈ܡܹܐ ܠܲܝܬ ܠܵܗ̇: ܐܲܝܟ 40 ܕܒܸܚܙܵܝܵܐ ܝܬܘܿܢ ܐܵܢܵܐ ܐܝܼܬ ܠܝܼ. ܘܟܲܕ ܐܲܢܹܐ ܐܡܸܪܹܐ: 41 ܡܘܼܚܙܹܠܹܐ ܐܸܠܵܝ ܐܝܼܕܵܬܘܼ̈ܗܝ ܘܐܲܩܠܵܬܘܼ̈ܗܝ. ܘܟܲܕ ܗܹܫ ܠܹܐ ܗ̄ܘܵܘ ܗܘܼܡܸܢܹܐ ܡ̣ܢ ܚܲܕܘܼܬܵܝ: ܘܥܵܓ̰ܘܿܒܹܐ ܗ̄ܘܵܘ: ܐܡܸܪܹܐ ܐܸܠܵܝ: 42 ܐܝܼܬ ܠܵܘܟ̣ܘܿܢ ܡܸܢܕܝܼ ܠܲܐܟ̣ܵܐ ܠܹܐܟ̣ܵܠܵܐ. ܘܝܸܗܒܸܠܘܿܢ ܐܸܠܹܗ 43 ܣܵܡܵܐ ܡ̣ܢ ܢܘܼܢܵܐ ܛܘܼܘܝܼܬܵܐ: [91] ܘܡ̣ܢ ܫܵܢܵܐ ܕܕܸܒ̣ܫܵܐ. ܘܫܩܸܠܹܐ ܐܟܸܠܹܐ ܩܵܕ̄ܡ ܥܲܝܢܵܝ̈. 44 ܘܐܡܸܪܹܐ ܐܸܠܵܝ: ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗܘܼܡܙܸܡܠܝ ܥܲܡܵܘܟ̣ܘܿܢ ܟܲܕ ܠܟܸܣܠܵܘܟ̣ܘܿܢ ܝܼܘܸܢ ܗ̄ܘܵܐ: ܕܘܵܓ̰ܸܒ ܝܼܠܵܐ ܕܦܵܝܸܫ ܬܘܼܡܸܡܵܐ ܟܠ ܡܸܢܕܝܼ ܕܝܼܠܹܐ ܟܬܝܼܒ̣ܵܐ ܒܢܵܡܘܿܣܵܐ 45 ܕܡܘܼܫܹܐ: ܘܒܢܒ̣̈ܝܹܐ: ܘܒܡܲܙܡܘܿܪܹ̈ܐ: ܒܵܗ̄ܣ ܕܝܼܝܼ. ܗ̇ܝܓܵܗ 46 ܦܬܸܚܠܹܐ ܚܝܼܵܠܵܝ ܠܦܲܪܡܘܼܝܹܐ ܟܬܵܒܹ̈ܐ. ܘܐܡܸܪܹܐ ܐܸܠܵܝ: ܗܲܕܟ̣ܵܐ ܟܬܝܼܒ̣ܵܐ. ܕܩܵܒܸ̇ܠ ܚܲܫܵܐ ܡܫܝܼܚܵܐ: ܘܕܩܵܝܸܡ ܡ̣ܢ ܡܝܼܬܹ̈ܐ 47 ܒܝܘܿܡܵܐ ܕܬܠܵܬ̄ܐ. ܘܕܦܵܝܫܝܼ ܡܘܼܟܪܸܙܹܐ ܒܫܸܡܹܗ ܬܝܵܒ̣ܘܼܬܵܐ ܘܫܒ̣ܵܩܵܐ ܕܚܛܝܼܵܬܹ̈ܐ ܒܟܠܵܝ ܛܵܝܸܦܹ̈ܐ: ܘܫܵܪܵܝܬܵܐ ܗܵܘܝܵܐ ܡ̣ܢ 48 ܐܘܿܪܸܫܠܸܡ. ܐܲܚܬܘܿܢ ܣܵܗܕܹ̈ܐ ܝܬܘܿܢ ܕܐܲܢܹܐ. ܘܗܵܐ: ܐܵܢܵܐ ܒܸܬ ܫܵܕܪܸܢ ܥܲܠܵܘܟ̣ܘܿܢ ܩܵܘܠܵܐ ܕܒܵܒܝܼ: ܐܝܼܢܵܐ ܐܲܚܬܘܿܢ ܥܲܪܩܸܠܘܿܢ ܓܵܘ ܡܕܝܼܢ̄ܬܵܐ: ܗܲܠ ܕܠܵܒ̣ܫܝܼܬܘܿܢ ܚܲܝܠܵܐ ܡ̣ܢ ܪܵܘܡܵܐ. 50 ܘܦܘܼܠܛܵܝܠܹܐ ܗܲܠ ܒܹܝܬ ܥܲܢܝܵܐ: ܘܡܘܼܪܸܡܠܹܐ ܐܝܼܕܵܬܘܼ̈ܗܝ 51 ܘܒܘܼܪܟ̣ܵܝܠܹܐ. ܘܗ̄ܘܹܠܵܐ ܟܲܕ ܒܵܪܘܿܟ̣ܵܝ ܗ̄ܘܵܐ: ܦܸܫܠܹܐ ܦܪܝܼܫܵܐ 52 ܡܸܢܵܝ: ܘܦܸܫܠܹܐ ܡܘܼܐܣܩܵܐ ܠܫܡܲܝܵܐ. ܘܐܵܢܝܼ ܣܓܸܕܠܘܿܢ 53 ܐܸܠܹܗ: ܘܕܸܪܘܿܢ ܠܐܘܿܪܸܫܠܸܡ ܒܚܲܕܘܼܬܵܐ ܓܘܼܪܬܵܐ. ܘܒܟܠ ܙܲܒ̣ܢܵܐ ܓܵܘ ܗܲܝܟܠܵܐ ܗ̄ܘܵܘ: ܫܵܒܘܿܚܹܐ ܘܒܸܚܩܵܪܵܐ ܠܐܲܠܵܗܵܐ. ܐܵܡܹܝܢ.

---

[1] ܚܟܡܐ: ܐܨܚ̈. ܝܘܢ̈ـ. ܠܝܬ. ܒܪܝܼܟ̣ܬܵܐ ܓܵܘ ܒܲܟ̣ܬܵܬܹ̈ܐ.

[2] ܝܢ: ܕܗܘܼܡܸܢܵܐ: ܣܵܒܵܒ ܕܒܸܬ ܗܵܘܹܐ: ܘܫܪ.

[3] ܝܘܢܐܝܬ: ܕܘܼܢܝܹܐ ܥܡܝܼܪܬܵܐ.

[4] ܝܢ: ܘܥܲܠ ܐܲܪܥܵܐ ܫܠܵܡܵܐ: ܓܵܘܵܐ ܕܐܢܵܫܹ̈ܐ ܕܒܸܒܣܵܡܵܐ ܝܠܹܐ ܒܝܼܵܝ.

[5] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܒܪܘܼܚܵܐ.

[6] ܝܢ: ܒܲܝܬܵܐ.

[7] ܝܢ: ܕܣܹܡܲܝܢ.

[8] ܝܢ: ܕܝܵܘܣܸܟ.

[9] ܝܢ: ܕܝܵܘܕܵܐ.

[10] ܝܢ: ܕܝܫܘܥ.

[11] ܝܢ: ܕܐܲܪܢܲܝ

[12] ܝܢ: ܕܪܥܘܿ.

[13] ܦܫܝܛ ܘܚܟܡܐ ܐܨܚ̈. ܝܘܢ̈ـ. ܐܸܠܵܐ ܒܟܠ ܗܹܡܸܙܡܵܢ ܕܐܲܠܵܗܵܐ.

[14] ܚܟܡܐ ܐܨܚ̈. ܝܘܢ̈ـ. ܠܝܬ. ܐܵܟܹܠܩܲܪܨܵܐ ܠܛܘܼܪܵܐ ܪܵܡܵܐ.

[15] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܘܩܲܡ ܫܵܕܸܪܝܼ ܠܒܵܣܘܿܡܹܐ ܠܬܒ̣ܝܼܪܹ̈ܐ ܒܠܸܒܵܐ.

[16] ܝܢ: ܫܵܒܵܟܵܝ̈.

[17] ܝܢ: ܫܵܒܵܟܵܘ̈ܟ̣ܘܿܢ.

[18] ܝܢ: ܫܵܒܵܟܵܐ.

[19] ܝܢ: ܨܸܪܝܵܐ.

[20] ܝܢ: ܫܵܒܵܟܵܝ.

[21] ܝܢ: ܡܒܵܕܸܪ.

[22] ܦܫܝܛ. ܘܚܟܡܐ. ܐܨܚ̈. ܝܘܢ̈ـ. ܘܬܸܪܘܸܢܬܵܝ ܟܹܐ ܦܵܝܫܝܼ ܢܛܝܼܪܹܐ.

[23] ܝܢ: ܒܨܠܘܿܬܵܐ ܠܐܲܠܵܗܵܐ.

[24] ܝܘܢܐܝܬ: ܒܕܘܼܟܬܵܐ ܬܪܘܼܨܬܵܐ.

[25] ܝܢ: ܓܘܼܕܕܘܼܟ.

[26] ܝܢ: ܡܸܠܐܵܐ.

[27] ܝܢ: ܩܪܸܒ̣ܠܹܐ.

[28] ܝܢ: ܙܡܸܪܲܢ ܒܙܘܼܪܢܐ.

[29] ܘܡܲܚܦܹܐ.

[30] ܝܢ: ܕܓܸܪ̈ܵܣܹܝܢܹܐ.

[31] ܝܢ: ܘܗܵܘܢܘܼܗܝ ܨܵܚ.

[32] ܝܢ: ܕܓܸܪ̈ܵܣܹܝܢܹܐ.

[33] ܚܟܡܐ ܐܨܚ̈. ܝܘܢ̈ـ. ܠܝܬ. ܘܒܹܐܡܵܪܵܐ.. ܒܝܼܝܼ.

[34] ܦܫܝܛ ܘܚܟܡܐ ܐܨܚ̈. ܝܘܢ̈ـ. ܦܘܼܫܝ ܠܸܒܵܢܬܵܐ ܒܪܵܬܝܼ: ܗܲܝܡܵܢܘܼܬܵܟ̣ܝ ܘܫܪ.

[35] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܦܘܼܠܸܛܠܹܐ ܠܟܠ ܐܢܵܫܵܐ ܠܒܲܕܲܪ: ܘܕܒ̣ܝܼܩܵܠܹܐ ܘܫܪ.

[36] ܚܟܡܐ ܐܨܚ̈. ܝܘܢ̈ـ. ܓܘܼܒ̇ܝܵܐ.

[37] ܝܢ: ܨܵܪܝܵܐ.

[38] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܘܐܡܸܪܹܐ: ܠܹܐ ܝܬܘܿܢ ܒܝܼܕܲܥܝܵܐ ܕܡܘܼܕܝܼ ܪܘܼܚܵܐ ܝܬܘܿܢ. 55 ܣܵܒܵܒ ܒܪܘܼܢܹܗ ܕܐܢܵܫܵܐ ܠܵܐ ܐܬܹܠܹܐ ܠܬܵܠܘܿܩܹܐ ܓܵܢܵܬܹ̈ܐ: ܐܸܠܵܐ ܠܡܲܚܘܼܝܹܐ. ܘܐܙܸܠܘܿܢ ܘܫܪ.

[39] ܝܢ: ܩܪܸܒ̣ܠܵܐ.

[40] ܝܢ: ܕܩܪܸܒ̣ܠܵܐ.

[41] ܝܢ: ܘܩܪܸܒ̣ܠܹܐ.

[42] ܝܢ: ܩܪܸܒ̣ܠܵܐ.

[43] ܝܘܢܐܝܬ: ܒܙܝܼܪܙܵܡܝܼܢ.

[44] ܝܢ: ܚܛܘܼܦܝܵܐ.

[45] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܕܡܵܚܝܼ ܗ̄ܘܵܘ ܕܲܪܗܲܩܹܗ.

[46] ܝܢ: ܩܵܪܸܒ̣.

[47] ܝܘܢܐܝܬ: ܕܦܵܪܩܝܼ.

[48] ܝܢ: ܡܘܼܟܡܸܠܵܐ.

[49] ܝܢ: ܡܥܘܼܒܝܵܐ.

[50] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܒܪܘܼܢܹܗ.

[51] ܝܢ: ܒܸܩܪܵܒ̣ܵܐ.

[52] ܝܢ: ܘܩܪܸܒ̣ܠܹܐ.

[53] ܝܘܢܐܝܬ: ܒܲܬܹ̈ܐ. ܚܙܝ ܚܙ. 45 : 10 . 11 .

[54] ܚܙܝ ܚܙ. 45 : 14 .

[55] ܝܘܢܐܝܬ: ܬܘܼܪ̈ܩܵܠܹܐ.

[56] ܝܢ: ܟܹܐܦܵܐ ܕܐܸܪܚܹܐ.

[57] ܝܘܢܐܝܬ: ܕܡܬܲܪܩܸܠ.

[58] ܝܢ: ܡܥܘܼܕܵܠܹܐ.

[59] ܐܨܚ̈. ܥܬ̈. ܝܘܢ̈ـ. ܠܝܬ ܓ̰ܪ. 36 .

[60] ܝܢ: ܟ̰ܵـ̈ـܠܘܿܓ̰ܹܐ.

[61] ܝܘܢܐܝܬ: ܬܸܦܝܼ̈ܠܹܐ.

[62] ܝܢ: ܩܪܸܒ̣ܠܹܐ.

[63] ܝܢ: ܩܪܸܒ̣ܠܹܐ.

[64] ܝܢ: ܩܪܸܒ̣ܠܹܐ.

[65] ܝܢ: ܩܪܸܒ̣ܠܹܐ.

[66] ܝܢ: ܩܪܸܒ̣ܠܹܐ.

[67] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܩܵܡܘܿܕܝܼ ܓ̰ܵܪܘܿܒܝܼ ܝܬܘܿܢ.

[68] ܐܨܚ̈. ܥܬ̈. ܝܘܢ̈ـ. ܠܝܬ. ܫܩܝܼܠܵܠܹܐ.. ܕܠܵܐ ܒܢܘܼܢܹ̈ܐ.

[69] ܝܢ: ܩܪܸܒ̣ܠܹܐ.

[70] ܝܢ: ܚܲܝܵܘ̈ܟ̣ܘܿܢ.

[71] ܝܢ: ܕܩܪܸܒ̣ܠܹܐ.

[72] ܝܢ: ܓܵܢܵܝ ܒܸܦܠܵܛܵܐ.

[73] ܝܢ: ܕܩܪܸܒ̣ܠܹܐ.

[74] ܝܢ: ܩܪܝܼܒ̣ܵܐ.

[75] ܝܢ: ܒܹܝܬ ܥܸܠܝܼܬܵܐ.

[76] ܝܘܢܐܝܬ: ܩܲܛܥܵܐ.

[77] ܝܢ: ܬܲܡܲܡܬܵܐ.

[78] ܚܟܡܐ ܐܨܚ̈. ܥܬ̈ ܝܘܢ̈ـ. ܠܝܬ. ܓ̰ܪ̈. 43 . 44 .

[79] ܝܢ: ܘܩܪܸܒ̣ܠܹܐ.

[80] ܝܢ: ܡܸܚܕܵܕܹ̈ܐ.

[81] ܝܢ: ܣܵܒܵܒ ܕܡܘܼܕܸܪܹܗ ܠܟܸܣܠܲܢ.

[82] ܪܒܐ ܐܨܚ̈. ܥܬ̈. ܝܘܢ̈ـ. ܠܝܬ. ܓ̰ܪ. 17 .

[83] ܝܢ: ܡܲܝܬܘܼܝܹܐ.

[84] ܚܟܡܐ ܐܨܚ̈. ܝܘܢ̈ـ. ܠܝܬ. ܒܠܸܫܵܢܵܐ.. ܘܕܥܸܒ̣ܪ̈ܵܝܹܐ.

[85] ܚܟܡܐ ܐܨܚ̈. ܝܘܢ̈ـ. ܐܲܢ̄ܬ ܠܹܐ ܝܼܘܸܬ ܡܫܝܼܚܵܐ.

[86] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܘܐܡܸܪܹܐ ܠܝܼܫܘܿܥ: ܕܟ̣ܘܿܪܝܼ: ܡܵܪܝܼ: ܐܝܼܡܲܢ ܘܫܪ.

[87] ܝܢ: ܨܸܪܝܵܐ.

[88] ܝܢ: ܩܪܸܒ̣ܠܹܐ.

[89] ܝܢ: ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ: ܘܟܠܹܠܘܿܢ: ܚܘܼܠܩܵܝ ܦܫܝܼܡܹ̈ܐ.

[90] ܝܢ: ܘܩܪܸܒ̣ܠܘܿܢ.

[91] ܚܟܡܐ ܐܨܚ̈. ܝܘܢ̈ـ. ܠܝܬ. ܘܡ̣ܢ ܫܵܢܵܐ ܕܕܸܒ̣ܫܵܐ.