ܟܪܘܙܘܬܐ ܕܡܪܩܘܣ

ܟܬܒ̣ܐ

ܕܕܝܬܩܐ ܚܕܬܐ

ܕܡܪܢ ܝܫܘܥ ܡܫܝܚܐ

ܦܘܼܫܵܩܵܐ ܡ̣ܢ ܐܲܨܚܬܐ ܦܫܝܛܬܐ: ܡܘܼܕܒ̣ܩܐ ܥܡ ܕܐܢܝ ܕܝܘܢܝܐ

ܟܪܘܙܘܬܐ ܕܡܪܩܘܣ

ܩܦܠܐܘܢ: ܐ

1 ܪܹܫܵܐ ܕܐܹܘܵܢܓܵܠܝܼܘܿܢ ܕܝܼܫܘܿܥ ܡܫܝܼܚܵܐ: ܒܪܘܼܢܹܗ ܕܐܲܠܵܗܵܐ. 2 ܐܲܝܟ ܕܝܼܠܹܐ ܟܬܝܼܒ̣ܵܐ ܒܐܹܫܲܥܝܵܐ ܢܒ̣ܝܼܵܐ: ܗܵܐ: ܫܵܕܘܿܪܹܐ ܝܘܸܢ 3 ܡܲܠܲܐܟ̣ܝ ܩܵܕ̄ܡ ܦܵܬܘܼܟ: ܕܗܵܕܸܪ ܐܘܼܪܚܘܼܟ ܩܵܕ̄ܡܘܼܟ. ܩܵܠܵܐ ܕܩܵܪܹܐ ܒܒܪܝܼܵܐ: ܗܵܕܪܘܿܢ ܠܐܘܼܪܚܹܗ ܕܡܵܪܝܵܐ: ܘܡܲܫܘܹܡܘܿܢ 4 ܓ̰ܵܕܵܘܵܬܘܼ̈ܗܝ. ܗ̄ܘܹܠܹܐ ܝܘܿܚܲܢܵܢ ܡܲܥܡܘܿܕܹܐ ܓܵܘ ܒܲܪܝܼܵܐ ܘܡܲܟܪܘܼܙܹܐ 5 ܡܲܥܡܘܿܕܝܼܬܵܐ ܕܬܝܵܒ̣ܘܼܬܵܐ ܠܫܒ̣ܵܩܵܐ ܕܚܛܝܼܵܬܹ̈ܐ. ܘܦܠܸܛܠܹܐ ܠܟܸܣܠܹܗ ܟܠܹܗ ܐܲܬܪܵܐ ܕܝܼܗܘܼܕ: ܘܒܢܲܝ̈ ܐܘܿܪܸܫܠܸܡ: ܘܥܵܡܕܝܼ ܗ̄ܘܵܘ ܡܸܢܹܗ ܟܠܵܝ ܒܝܘܿܪܕܢܵܢ ܢܲܗܪܵܐ: ܟܲܕ ܡܵܘܕܘܿܝܹܐ 6 ܒܚܛܝܼܵܬܵܝ̈. ܘܝܘܿܚܲܢܵܢ ܠܒ̣ܝܼܫܵܐ ܗ̄ܘܵܐ ܠܒܸܫܬܵܐ ܕܣܲܥܪܵܐ ܕܓܘܼܡܠܹ̈ܐ: ܘܬܲܣܡܵܐ ܕܓܸܠܕܵܐ ܒܚܵܨܹܗ: ܘܟܹܐ ܐܵܟܸܠ ܗ̄ܘܵܐ 7 ܩܲܡܨܹ̈ܐ ܘܕܸܒ̣ܫܵܐ ܕܒܲܪܝܼܵܐ. ܘܡܲܟܪܸܙ ܗ̄ܘܵܐ ܘܐܵܡܸܪ: ܒܹܐܬܵܝܵܐ ܝܠܹܐ ܒܵܬ̄ܪܝܼ ܕܒܘܼܫ ܚܲܝܠܵܢܵܐ ܝܠܹܐ ܡܸܢܝܼ: ܗ̇ܘ ܕܠܹܐ ܚܵܫܚܸܢ 8 ܐܵܢܵܐ ܕܟܵܝܦܸܢ ܠܸܫܪܵܝܵܐ ܠܬܲܣܡܵܬܹ̈ܐ ܕܨܵܘܠܘܼ̈ܗܝ. ܐܵܢܵܐ ܡܘܼܥܡܸܕܠܝܼ ܐܸܠܵܘܟ̣ܘܿܢ ܒܡ̈ܝܼܵܐ: ܐܝܼܢܵܐ ܗ̇ܘ ܒܸܬ ܡܲܥܡܸܕ ܠܵܘܟ̣ܘܿܢ ܒܪܘܼܚܵܐ ܕܩܘܼܕܫܵܐ. 9 ܘܗ̄ܘܹܠܵܐ ܒܐܵܢܝܼ ܝܘܿܡܵܢܹ̈ܐ: ܐܬܹܠܹܐ ܝܼܫܘܿܥ ܡ̣ܢ ܢܵܨܪܲܬ 10 ܕܓܠܝܼܠܵܐ: ܘܥܡܸܕܠܹܐ ܒܝܘܿܪܕܢܵܢ ܡ̣ܢ ܝܘܿܚܲܢܵܢ. ܘܕܲܪܣܵܥܲܬ ܟܲܕ ܐܣܸܩܠܹܐ ܡ̣ܢ ܡ̈ܝܼܵܐ: ܚܙܹܠܹܐ ܕܟ̰ܠܸܦܠܘܿܢ ܫܡܲܝܹ̈ܐ: ܘܪܘܼܚܵܐ 11 ܐܲܝܟ ܝܵܘܢܵܐ ܒܸܨܠܵܝܵܐ ܥܲܠܘܼܗܝ. ܘܩܵܠܵܐ ܗ̄ܘܹܠܹܐ ܡ̣ܢ ܫܡܲܝܵܐ: ܐܲܢ̄ܬ ܝܼܘܸܬ ܒܪܘܼܢܝܼ ܡܘܼܚܸܒܵܐ: ܕܒܝܼܘܼܟ ܒܸܒܣܵܡܝܼ ܝܠܵܐ. 12 ܘܕܲܪܣܵܥܲܬ ܦܘܼܠܸܛܠܵܐ ܐܸܠܹܗ ܪܘܼܚܵܐ ܠܒܲܪܝܼܵܐ. ܘܗ̄ܘܹܠܹܐ 13 ܓܵܘ ܒܲܪܝܼܵܐ ܐܲܪܒܥܝܼ ܝܘܿܡܵܢܹ̈ܐ: ܟܲܕ ܦܝܵܫܵܐ ܓ̰ܘܼܪܒܵܐ ܡ̣ܢ ܣܵܛܵܢܵܐ: ܘܥܲܡ ܕܵܒܹ̈ܐ ܗ̄ܘܵܐ: ܘܥܵܒ̣ܕܝܼ ܗ̄ܘܵܘ ܠܹܗ ܚܸܠܡܲܬ ܡܲܠܲܐܟܹ̈ܐ. 14 ܐܝܼܢܵܐ ܡܒܵܬ̄ܪ ܕܦܸܫܠܹܐ ܣܘܼܦܝܵܐ ܝܘܿܚܲܢܵܢ: ܐܬܹܠܹܐ ܝܼܫܘܿܥ ܠܓܠܝܼܠܵܐ: ܡܲܟܪܘܼܙܹܐ ܡܲܫܚܲܕܬܵܐ [1] ܕܡܲܠܟܘܼܬܹܗ ܕܐܲܠܵܗܵܐ. 15 ܘܐܵܡܸܪ: ܬܘܼܡܸܡܠܹܐ ܙܲܒ̣ܢܵܐ: [2] ܘܩܘܼܪܒܸܢܹܐ ܡܲܠܟܘܼܬܵܐ ܕܐܲܠܵܗܵܐ. ܬܲܘܸܒܘܼܢ: ܘܗܲܡܸܢܘܿܢ ܒܐܹܘܵܢܓܵܠܝܼܘܿܢ. 16 ܘܟܲܕ ܒܸܚܕܵܪܵܐ ܗ̄ܘܵܐ ܥܲܠ ܡܲܪܙܵܐ ܕܝܵܡܵܐ ܕܓܠܝܼܠܵܐ: ܚܙܹܠܹܐ ܠܫܸܡܥܘܿܢ ܘܠܲܐܢܕܪܹܐܘܿܣ ܐܵܚܘܿܢܘܼܗܝ ܒܸܕܪܵܝܵܐ [3] ܓܲܪܕܵܐ 17 ܒܝܵܡܵܐ: ܣܵܒܵܒ ܕܨܲܝܵܕܹ̈ܐ ܗ̄ܘܵܘ. ܘܐܡܸܪܹܐ ܐܸܠܝ ܝܼܫܘܿܥ: ܬܹܡܘܿܢ ܒܵܬ̄ܪܝܼ: ܘܒܸܬ ܥܵܒ̣ܕܸܢܵܘܟ̣ܘܿܢ ܕܗܵܘܝܼܬܘܿܢ ܨܲܝܵܕܹ̈ܐ 18 ܕܒܢܲܝ̈ܢܵܫܵܐ. ܘܕܲܪܣܵܥܲܬ ܫܒܸܩܠܘܿܢ [4] ܠܓܲܪ̈ܕܵܝ: ܘܐܙܸܠܘܿܢ 19 ܒܵܬ̄ܪܹܗ. ܘܟܲܕ ܥܒܸܪܹܐ ܚܲܟ̰ܵܐ: ܚܙܹܠܹܐ ܠܝܲܥܩܘܿܒ̣ ܒܪܘܼܢܹܗ ܕܙܲܒ̣ܕܲܝ: ܘܠܝܘܿܚܲܢܵܢ ܐܵܚܘܿܢܘܼܗܝ: ܘܐܘܼܦ ܐܵܢܝܼ ܒܓܵܡܝܼ ܬܵܪܘܿܨܹܐ 20 [5] ܠܓܲܪ̈ܕܵܝ. ܘܕܲܪܣܵܥܲܬ ܩܸܪܝܵܝܠܹܐ: ܘܫܒܸܩܠܘܿܢ ܠܙܲܒ̣ܕܲܝ ܒܵܒܵܝ ܓܵܘ ܓܵܡܝܼ ܥܲܡ ܪܹ̈ܓܵܘܵܬܹܐ ܕܗܵܩܵܐ: ܘܐܙܸܠܘܿܢ ܒܵܬ̄ܪܹܗ. 21 ܘܐܘܸܪܘܿܢ ܠܟܦܲܪܢܵܚܘܿܡ: ܘܕܲܪܣܵܥܲܬ ܒܫܲܒܬܵܐ ܐܘܸܪܹܐ 22 ܠܟܢܘܼܫܬܵܐ ܘܡܵܠܸܦ ܗ̄ܘܵܐ. ܘܥܵܓ̰ܒܝܼ ܗ̄ܘܵܘ ܒܝܘܼܠܦܵܢܹܗ: ܣܵܒܵܒ ܕܡܵܠܸܦ ܗ̄ܘܵܐ ܠܗ̄ܘܿܢ ܐܲܝܟ ܡܵܪܹܐ ܗܘܼܟܡܵܐ: ܘܠܵܐ ܐܲܝܟ 23 ܣܵܦܪܹ̈ܐ. ܘܐܝܼܬ ܗ̄ܘܵܐ ܒܟܢܘܼܫܬܵܝ ܚܵܕ̄ ܐܢܵܫܵܐ ܕܐܝܼܬ ܗ̄ܘܵܐ 24 ܒܝܹܗ ܪܘܼܚܵܐ ܛܲܡܹܐܐ: ܘܡܘܼܩܘܸܚܠܹܐ. ܘܐܡܸܪܹܐ: ܡܵܐ ܠܘܼܟ ܡܸܢܲܢ: ܝܼܫܘܿܥ ܢܵܨܪܵܝܵܐ: ܐܬܹܠܘܿܟ ܠܬܵܠܘܿܩܲܢ. ܟܹܐ ܝܲܕܥܸܢܘܼܟ ܡܵܢܝ 25 ܝܘܸܬ: ܩܲܕܝܼܫܹܗ ܕܐܲܠܵܗܵܐ. ܘܢܓ̰ܘܼܠܹܐ ܒܝܹܗ ܝܼܫܘܿܥ: ܘܐܡܸܪܹܐ: 26 ܥܟ̰ܘܿܡ ܦܘܼܡܘܼܟ ܘܦܠܘܿܛ ܡܸܢܹܗ. [6] ܘܟ̰ܘܼܢܟ̰ܸܪܵܐ ܐܸܠܹܗ ܪܘܼܚܵܐ ܛܲܡܹܐܐ: ܘܡܘܼܩܘܸܚܠܵܐ ܒܩܵܠܵܐ ܪܵܡܵܐ: ܘܦܠܸܛܠܵܐ 27 ܡܸܢܹܗ. ܘܥܘܼܓ̰ܸܒܠܘܿܢ ܟܠܵܝ: ܗܲܕܟ̣ܵܐ ܕܒܵܩܪܝܼ ܚܵܕ̄ ܡܗ̇ܘ ܐܚܹܪ̄ܢܵܐ: ܘܐܵܡܪܝܼ: ܡܘܼܕܝܼ ܝܠܵܐ ܐܵܗܵܐ: [7] ܘܡܘܼܕܝܼ ܝܠܹܐ ܐܵܗܵܐ ܝܘܼܠܦܵܢܵܐ ܚܵܕ̄ܬܵܐ: ܕܒܗܘܼܟܡܵܐ ܐܘܼܦ ܠܪ̈ܘܼܚܹܐ ܛܲܡܹ̈ܐܐ 28 ܒܸܦܩܵܕܵܐ ܝܠܹܐ: ܘܡܲܨܝܘܼܬܹܐ ܝܢܵܐ ܐܸܠܹܗ. ܘܕܲܪܣܵܥܲܬ ܦܠܸܛܠܵܐ ܒܵܗܣܹܗ ܒܟܠܹܗ ܐܲܬܪܵܐ ܕܚܵܕܸܪ̈ܘܵܢܹܐ ܕܓܠܝܼܠܵܐ. 29 ܘܕܲܪܣܵܥܲܬ ܦܠܸܛܠܘܿܢ ܡ̣ܢ ܟܢܘܼܫܬܵܐ: ܐܬܹܠܘܿܢ ܠܒܲܝܬܹܗ 30 ܕܫܸܡܥܘܿܢ ܘܕܲܐܢܕܪܹܐܘܿܣ ܥܲܡ ܝܲܥܩܘܿܒ̣ ܘܝܘܿܚܲܢܵܢ. ܘܚܡܵܬܹܗ ܕܫܸܡܥܘܿܢ ܢܦܝܼܠܬܵܐ ܗ̄ܘܵܐ ܒܐܫܵܬܵܐ: ܘܕܲܪܣܵܥܲܬ ܐܡܸܪܘܿܢ ܐܸܠܹܗ 31 ܒܘܼܬ ܕܝܼܵܗ̇. ܘܐܬܹܠܹܐ ܕܒ̣ܝܼܩܵܠܹܐ ܒܐܝܼܕܵܗ̇: ܘܡܘܼܩܸܡܵܠܹܐ: ܘܫܒ̣ܝܼܩܵܠܵܐ ܐܫܵܬܵܐ: ܘܥܵܒ̣ܕܵܐ ܗ̄ܘܵܐ ܠܗ̄ܘܿܢ ܚܸܠܡܲܬ. 32 ܘܒܪܲܡܫܵܐ: ܒܓܢܵܝܹܗ ܕܫܸܡܫܵܐ: ܡܘܼܬ̄ܝܹܠܘܿܢ ܠܟܸܣܠܹܗ ܟܠܵܝ 33 ܐܵܢܝܼ ܕܡܸܪܥܝܹܐ ܗ̄ܘܵܘ: ܘܕܲܝܘܵܢܹ̈ܐ. ܘܟܠܵܗ̇ ܡܕܝܼܢ̄ܬܵܐ ܓ̰ܡܥܝܼܬܵܐ 34 ܗ̄ܘܵܐ ܥܲܠ ܬܲܪܥܵܐ. ܘܒܘܼܣܸܡܠܹܐ ܠܪܵܒܵܐ ܕܡܸܪܥܝܹܐ ܗ̄ܘܵܘ ܒܡܲܪ̈ܥܹܐ ܬܵܗܵܪܹ̈ܐ ܬܵܗܵܪܹ̈ܐ: ܘܪܵܒܵܐ ܕܲܝܘܹ̈ܐ ܦܘܪܠܸܛܠܹܐ: ܘܠܹܐ ܫܵܒܸܩ ܗ̄ܘܵܐ ܠܕܲܝܘܹ̈ܐ ܠܗܲܡܙܘܼܡܹܐ: ܣܵܒܵܒ ܟܹܐ ܝܲܕܥܝܼ ܗ̄ܘܵܘ ܠܹܗ. 35 ܒܨܲܦܪܵܐ ܩܘܼܕܸܡܠܹܐ ܪܵܒܵܐ ܓ̰ܲܠܕܹܐ: ܘܦܠܸܛܠܹܐ ܘܐܙܸܠܹܐ ܠܚܕܵܐ 36 ܕܘܼܟܵܐ ܚܵܪܵܒܵܐ: ܘܬܵܡܵܐ ܨܵܠܹܐ ܗ̄ܘܵܐ. ܘܐܙܸܠܘܿܢ ܒܵܬ̄ܪܹܗ 37 ܫܸܡܥܘܿܢ ܘܐܵܢܝܼ ܕܥܲܡܹܗ. ܘܟܲܕ ܡܘܼܫ̄ܟ̰ܸܚܠܘܿܢ: ܐܵܡܪܝܼ ܐܸܠܹܗ: 38 ܟܠܵܝ ܐܢܵܫܹ̈ܐ ܒܸܛܲܥܝܵܐ ܝܢܵܐ ܐܸܠܘܼܟ. ܐܵܡܸܪ ܐܸܠܵܝ: ܐܵܙܵܠ̄ܚ ܠܡܵܬܘܵܬܹ̈ܐ ܓܘܼܪܹ̈ܐ ܕܝܼܢܵܐ ܩܘܼܪܒܵܐ: ܕܐܘܼܦ ܬܵܡܵܐ ܡܲܟܪܸܙܸܢ: 39 ܣܵܒܵܒ ܕܠܵܐܗܵܐ ܐܬܹܠܝܼ. ܘܐܙܸܠܹܐ ܡܲܟܪܘܼܙܹܐ ܓܵܘ ܟܠܵܝ ܟܢܘܼܫܝܵܬܵܝ̈ ܒܟܠܵܗ̇ ܓܠܝܼܠܵܐ: ܘܦܵܠܸܛ ܗ̄ܘܵܐ ܕܲܝܘܹ̈ܐ. 40 ܘܐܬܹܠܹܐ ܠܟܸܣܠܹܗ ܚܵܕ̄ ܓܸܪܒ̣ܵܢܵܐ: ܘܒܪܸܟ̇ܠܹܐ ܩܵܕ̄ܡܘܼܗܝ: ܘܦܲܪܦܸܠ ܗ̄ܘܵܐ ܒܝܹܗ: ܒܹܐܡܵܪܵܐ: ܐܸܢ ܒܲܥܝܸܬ: ܟܹܐ ܡܵܨܸܬ 41 ܠܕܵܟ̣ܘܿܝܝܼ. ܘܝܼܫܘܿܥ ܪܘܼܚܸܡܠܹܐ ܥܲܠܘܼܗܝ: ܘܦܘܼܫܛܵܠܹܐ ܐܝܼܕܹܗ: ܕܩܸܪܹܐ ܒܝܹܗ ܘܐܡܸܪܹܐ: ܒܸܒܲܥܝܵܐ ܝܘܸܢ: ܗ̄ܘܝܼ ܕܸܟ̣ܝܵܐ. 42 ܘܒܗ̇ܝ ܣܵܥܲܬ ܐܙܸܠܹܐ ܡܸܢܹܗ ܓܸܪܒܹܗ: ܘܦܸܫܠܹܐ ܕܘܼܟ̣ܝܵܐ. 43 ܘܢܓ̰ܘܼܠܹܐ ܒܝܹܗ: ܘܕܲܪܣܵܥܲܬ ܦܘܼܠܸܛܠܹܗ. ܘܐܡܸܪܹܐ ܐܸܠܹܗ: 44 ܚܙܝܼ ܠܐܢܵܫܵܐ ܠܵܐ ܐܵܡܪܸܬ: ܐܸܠܵܐ ܙܹܠ̄ܐ ܡܲܚܙܝܼ ܓܵܢܘܼܟ ܠܟܵܗܢܵܐ: ܘܡܲܩܪܸܒ̣ ܡܒܵܕܵܠ ܕܕܵܟ̣ܵܝܬܘܼܟ ܐܵܢܝܼ ܕܦܩܸܕܠܹܐ ܡܘܼܫܹܐ 45 ܠܣܵܗܕܘܼܬܵܝ. ܐܝܼܢܵܐ ܗ̇ܘ ܟܲܕ ܦܠܸܛܠܹܐ: ܫܘܼܪܹܠܹܐ ܠܡܲܟܪܘܼܙܹܐ ܪܵܒܵܐ: ܘܦܘܼܠܛܵܠܹܐ ܒܵܗܣ ܕܫܘܼܠܵܐ: ܗܲܕܟ̣ܵܐ ܕܠܹܐ ܡܵܨܹܐ ܗ̄ܘܵܐ ܝܼܫܘܿܥ ܒܐܲܫܟܵܪܵܐ ܐܵܘܸܪ ܓܵܘ ܡܕܝܼܢ̄ܬܵܐ: ܐܸܠܵܐ ܠܒܲܕܲܪ ܝܼܗ̄ܘܵܐ ܒܕܘܼܟܵܢܹ̈ܐ ܚܵܪܵܒܵܐ. ܘܐܵܬܝܼ ܗ̄ܘܵܘ ܠܟܸܣܠܹܗ ܡ̣ܢ ܟܠ ܕܘܼܟܵܐ.

ܩܦܠܐܘܢ: ܒ

1 ܘܐܘܸܪܹܐ ܝܼܫܘܿܥ ܡܸܕܪܹܐ ܠܟܦܲܪܢܵܚܘܿܡ ܡܒܵܬ̄ܪ ܚܲܟܡܵܐ 2 ܝܘܿܡܵܢܹ̈ܐ: ܘܦܸܫܠܵܐ ܫܡܥܝܼܬܵܐ ܕܓܵܘ ܒܲܝܬܵܐ ܗ̄ܘܵܐ. ܘܓ̰ܡܸܥܠܘܿܢ ܪܵܒܵܐ: ܗܲܕܟ̣ܵܐ ܕܐܚܹܪ̄ܢܵܐ ܠܹܐ ܡܵܨܹܐ ܗ̄ܘܵܐ ܠܸܕܒ̣ܵܩܵܝ: ܐܘܼܦ ܠܵܐ 3 ܩܵܕ̄ܡ ܬܲܪܥܵܐ: ܘܗܲܡܙܸܡ ܗ̄ܘܵܐ ܥܲܡܵܝ ܗܹܡܸܙܡܵܢ. ܘܐܬܹܠܘܿܢ ܠܟܸܣܠܹܗ: ܘܡܘܼܬ̄ܝܹܠܘܿܢ ܚܵܕ̄ ܫܦܝܼܠܵܐ ܟܲܕ ܫܩܝܼܠܵܐ ܒܹܝܠ 4 ܐܲܪܒܥܵܐ. ܘܟܲܕ ܠܵܐ ܡܨܹܠܘܿܢ ܠܹܐܬܵܝܵܐ ܩܘܼܪܒܵܐ ܐܸܠܹܗ ܡܣܵܒܵܒ ܕܟܸܢܫܵܐ: ܓܘܼܠܹܠܘܿܢ ܠܫܟܘܼܪܹ̈ܐ ܐܲܝܟܵܐ ܕܝܼܗ̄ܘܵܐ: ܘܟܲܕ ܣܬܸܪܘܿܢ: ܟ̰ܘܼܢܒܸܠܵܠܘܿܢ ܫܘܝܼܬܵܐ ܕܕܸܪܝܵܐ ܗ̄ܘܵܐ ܒܝܼܘܼܗ̇ ܗ̇ܘ 5 ܫܦܝܼܠܵܐ. ܘܟܲܕ ܚܙܹܠܹܐ ܝܼܫܘܿܥ ܠܗܲܝܡܵܢܘܼܬܵܝ: ܐܡܸܪܹܐ 6 ܠܫܦܝܼܠܵܐ: ܒܪܘܼܢܝܼ: ܫܒ̣ܝܼܩܹܐ ܝܢܵܐ ܐܸܠܘܼܟ ܚܛܝܼܵܬܘܼ̈ܟ. ܐܝܼܢܵܐ ܐܝܼܬ ܗ̄ܘܵܘ ܡ̣ܢ ܣܵܦܪܹ̈ܐ ܕܝܬܝܼܒܹܐ ܗ̄ܘܵܘ ܬܵܡܵܐ: ܘܒܸܚܫܵܒ̣ܵܐ 7 ܒܠܸܒܵܝ. ܩܵܡܘܿܕܝܼ ܐܵܗܵܐ [8] ܗܲܡܙܘܼܡܹܐ ܝܠܹܐ ܗܲܕܟ̣ܵܐ ܓܘܼܕܵܦܵܐ: ܡܵܢܝܼ ܟܹܐ ܡܵܨܹܐ ܠܸܫܒ̣ܵܩܵܐ ܚܛܝܼܵܬܹ̈ܐ ܫܒ̣ܘܿܩ ܡ̣ܢ ܚܵܕ̄: ܐܲܠܵܗܵܐ. 8 ܘܝܼܫܘܿܥ ܕܲܪܣܵܥܲܬ ܝܕܸܥܠܹܐ ܒܪܘܼܚܹܗ ܕܗܲܕܟ̣ܵܐ ܒܸܚܫܵܒ̣ܵܐ ܗ̄ܘܵܘ ܒܓܵܢܵܝ: ܘܐܡܸܪܹܐ ܐܸܠܵܝ: ܩܵܡܘܿܕܝܼ ܒܸܚܫܵܒ̣ܵܐ ܝܬܘܿܢ ܐܲܢܹܐ 9 ܒܠܸܒܵܘܟ̣ܘܿܢ. ܐܲܝܢܝܼ ܗܵܣܵܢܵܝܝܼ ܝܠܵܐ ܠܹܐܡܵܪܵܐ ܠܫܦܝܼܠܵܐ: ܫܒ̣ܝܼܩܹܐ ܝܢܵܐ ܐܸܠܘܼܟ ܚܛܝܼܵܬܘܼ̈ܟ: ܝܲܢ ܠܹܐܡܵܪܵܐ: ܩܘܼܡ̄: ܫܩܘܿܠ 10 ܫܘܝܼܬܘܼܟ ܘܚܕ̇ܘܿܪ. ܐܝܼܢܵܐ ܕܝܲܕܥܝܼܬܘܿܢ ܕܐܝܼܬ ܗܘܼܟܡܵܐ ܠܒܪܘܼܢܹܗ ܕܐܢܵܫܵܐ ܒܐܲܪܥܵܐ ܠܸܫܒ̣ܵܩܵܐ ܚܛܝܼܵܬܹ̈ܐ: ܐܡܸܪܹܐ 11 ܠܫܦܝܼܠܵܐ. ܐܸܠܘܼܟ ܒܹܐܡܵܪܵܐ ܝܘܸܢ: ܩܘܼܡ̄: ܫܩܘܿܠ ܫܘܝܼܬܘܼܟ: 12 ܘܙܹܠ̄ܐ ܠܒܲܝܬܘܼܟ. ܘܗܲܪ ܒܗ̇ܝ ܣܵܥܲܬ ܩܸܡܠܹܐ: ܘܫܩܸܠܹܐ ܫܘܝܼܬܹܗ: ܘܦܠܸܛܠܹܐ ܩܵܕ̄ܡ ܟܠܵܝ: ܕܵܐܟ̣ܝܼ ܕܥܵܓ̰ܒܝܼ ܗ̄ܘܵܘ ܟܠܵܝ: ܘܫܵܒܚܝܼ ܗ̄ܘܵܘ ܠܐܲܠܵܗܵܐ: ܟܲܕ ܐܵܡܪܝܼ: ܗܲܪ ܠܵܐ ܚܙܹܠܲܢ ܗܲܕܟ̣ܵܐ. 13 ܘܦܠܸܛܠܹܐ ܡܸܕܪܹܐ ܠܟܸܣ ܝܵܡܵܐ: ܘܟܠܹܗ ܟܸܢܫܵܐ ܒܹܐܬܵܝܵܐ 14 ܗ̄ܘܵܘ ܠܟܸܣܠܹܗ: ܘܡܵܠܘܿܦܵܝ ܗ̄ܘܵܐ. ܘܟܲܕ ܒܸܥܒ̣ܵܪܵܐ: ܚܙܹܠܹܐ ܠܠܹܘܝܼ ܒܲܪ ܚܲܠܦܲܝ: ܝܬܝܼܒ̣ܵܐ ܒܕܘܼܟܵܐ ܕܕܲܡܓ̣ܵܐ: ܘܐܡܸܪܹܐ 15 ܐܸܠܹܗ: ܬܵܐ ܒܵܬ̄ܪܝܼ: ܘܩܸܡܠܹܐ ܐܙܸܠܹܐ ܒܵܬ̄ܪܹܗ. ܘܗ̄ܘܹܠܵܐ ܟܲܕ ܝܬܝܼܒ̣ܵܐ ܗ̄ܘܵܐ ܠܨܘܼܦܪܵܐ ܒܒܲܝܬܹܗ: ܪܵܒܵܐ ܕܲܡܓ̣ܵܟ̈ܝܹܐ ܘܚܲܛܵܝܹ̈ܐ ܝܬܝܼܒܹܐ ܗ̄ܘܵܘ ܥܲܡ ܝܼܫܘܿܥ ܘܥܲܡ ܬܲܠܡܝܼܕܘܼ̈ܗܝ: ܣܵܒܵܒ 16 ܕܪܵܒܵܐ ܗ̄ܘܵܘ: ܘܬܹܠܘܿܢ ܒܵܬ̄ܪܹܗ. ܘܣܵܦܪܹ̈ܐ ܘܦܪ̈ܝܼܫܹܐ: ܟܲܕ ܚܙܹܠܘܿܢ ܐܸܠܹܗ ܒܹܐܟ̣ܵܠܵܐ ܥܲܡ ܕܲܡܓ̣ܵܟ̰ܝܹ̈ܐ ܘܥܲܡ ܚܲܛܵܝܹ̈ܐ: ܐܡܸܪܘܿܢ ܠܬܲܠܡܝܼܕܘܼ̈ܗܝ: ܩܵܡܘܿܕܝܼ ܥܲܡ ܕܲܡܓ̣ܵܟ̰̈ܝܹܐ ܘܚܲܛܵܝܹ̈ܐ 17 ܒܹܐܟ̣ܵܠܵܐ ܝܠܹܐ ܘܒܸܫܬܵܝܵܐ. ܘܟܲܕ ܫܡܸܥܠܹܐ ܝܼܫܘܿܥ: ܐܡܸܪܹܐ ܐܸܠܵܝ: ܠܹܐ ܝܢܵܐ ܣܢܝܼܩܹܐ ܐܵܢܝܼ ܕܝܼܢܵܐ ܨܵܚ ܥܲܠ ܗܲܟܝܼܡ: ܐܸܠܵܐ ܐܵܢܝܼ ܕܡܸܪܥܝܹܐ ܝܢܵܐ. ܠܵܐ ܐܬܹܠܝܼ ܕܩܵܪܸܢ ܠܙܲܕܝܼܩܹ̈ܐ: ܐܸܠܵܐ 18 ܠܚܲܛܵܝܹ̈ܐ. ܐܝܼܢܵܐ ܬܲܠܡܝܼܕܹ̈ܐ ܕܝܘܿܚܲܢܵܢ ܘܦܪ̈ܝܼܫܹܐ ܒܸܨܝܵܡܵܐ ܗ̄ܘܵܘ. ܘܐܬܹܠܘܿܢ ܘܐܵܡܪܝܼ ܐܸܠܹܗ: ܩܵܡܘܿܕܝܼ ܬܲܠܡܝܼܕܹ̈ܐ ܕܝܘܿܚܲܢܵܢ ܘܕܦܪ̈ܝܼܫܹܐ ܟܹܐ ܨܵܝܡܝܼ: ܘܬܲܠܡܝܼܕܹ̈ܐ ܕܝܼܘܼܟ ܠܹܐ ܨܵܝܡܝܼ. 19 ܐܡܸܪܹܐ ܐܸܠܵܝ ܝܼܫܘܿܥ: ܟܹܐ ܡܵܨܝܼ ܕܓܢܘܿܢܵܐ ܨܵܝܡܝܼ ܟܡܵܐ ܕܚܸܬܢܵܐ ܥܲܡܵܝ ܝܠܹܐ: ܟܡܵܐ ܕܐܝܼܬ ܚܸܬܢܵܐ ܥܲܡܵܝ ܠܹܐ 20 ܡܵܨܝܼ ܨܵܝܡܝܼ. ܐܝܼܢܵܐ ܒܸܬ ܐܵܬܝܼ ܝܘܿܡܵܢܹ̈ܐ: ܐܝܼܡܲܢ ܕܦܵܝܸܫ ܫܩܝܼܠܵܐ ܡܸܢܵܝ ܚܸܬܢܵܐ: ܗ̇ܝܓܵܗ ܒܸܬ ܨܵܝܡܝܼ ܒܗ̇ܘ ܝܘܿܡܵܐ. 21 ܐܢܵܫܵܐ ܠܹܐ ܕܵܪܹܐ ܥܵܪܵܝܬܵܐ ܚܲܕ̄ܬܵܐ ܘܚܵܝܸܛ ܥܲܠ ܓ̰ܘܼܠܵܐ ܒܸܠܝܵܐ: ܘܐܸܢ ܠܵܐ: ܟܹܐ ܫܵܩܠܵܐ ܡܸܠܝܘܼܬܘܼܗ̇ ܗ̇ܝ ܚܲܕ̄ܬܵܐ ܡ̣ܢ ܒܸܠܝܵܐ: 22 ܘܟܹܐ ܗܵܘܹܐ ܦܸܪܛܵܐ ܙܵܘܕܵܐ. ܘܐܢܵܫܵܐ ܠܹܐ ܕܵܪܹܐ ܚܲܡܪܵܐ ܚܵܕ̄ܬܵܐ ܒܓܘܼܕܹ̈ܐ ܒܸܠܝܹ̈ܐ: ܘܐܸܢ ܠܵܐ: ܒܸܬ [9] ܟ̰ܲܢܟ̰ܸܪ ܚܲܡܪܵܐ ܠܓܘܼܕܹ̈ܐ: ܘܚܲܡܪܵܐ ܒܸܬ ܬܵܠܸܩ: ܐܘܼܦ ܓܘܼܕܹ̈ܐ: ܐܸܠܵܐ ܟܹܐ ܕܵܪܝܼ ܚܲܡܪܵܐ ܚܵܕ̄ܬܵܐ ܒܓܘܼܕܹ̈ܐ ܚܵܕ̄ܬܹ̈ܐ. 23 ܘܗ̄ܘܹܠܵܐ ܕܒܹܐܙܠܵܐ ܗ̄ܘܵܐ ܝܼܫܘܿܥ ܒܫܲܒܬܵܐ ܓܵܘ ܡܲܙܪܲܥܝܵܐ: ܘܬܲܠܡܝܼܕܘܼ̈ܗܝ ܒܸܚܕܵܪܵܐ: ܘܫܘܼܪܹܠܘܿܢ ܠܸܡܠܵܓܵܐ ܒܘܼܠܹ̈ܐ. 24 ܘܐܵܡܪܝܼ ܐܸܠܹܗ ܦܪ̈ܝܼܫܹܐ: ܚܙܝܼ: ܩܵܡܘܿܕܝܼ ܒܸܥܒ̣ܵܕܵܐ ܝܢܵܐ ܒܫܲܒܬܵܐ 25 ܡܸܢܕܝܼ ܕܠܹܐ ܝܠܹܐ ܒܕܲܣܬܘܼܪ. ܐܵܡܸܪ ܐܸܠܵܝ: ܗܲܪ ܠܵܐ ܩܪܹܠܵܘܟ̣ܘܿܢ ܡܘܼܕܝܼ ܥܒܸܕܠܹܐ ܕܵܘܝܼܕ: ܟܲܕ ܣܢܝܼܩܵܐ ܗ̄ܘܵܐ 26 ܘܟܦܸܢܹܐ: ܗ̇ܘ ܘܐܵܢܝܼ ܕܥܲܡܹܗ. ܕܵܐܟ̣ܝܼ ܐܘܸܪܹܐ ܓܵܘ ܒܲܝܬܹܗ ܕܐܲܠܵܗܵܐ: ܟܲܕ ܐܲܒ̣ܝܼܬܵܪ ܓܘܼܪܵܐ ܕܟܵܗܢܹ̈ܐ ܗ̄ܘܵܐ: ܘܠܲܚܡܵܐ ܕܦܵܬܘܿܪܹܗ ܕܡܵܪܝܵܐ ܐܟܸܠܹܐ: ܗ̇ܘ ܕܠܹܐ ܝܠܹܐ ܒܕܲܣܬܘܼܪ ܠܹܐܟ̣ܵܠܵܐ ܫܒ̣ܘܿܩ ܡ̣ܢ ܠܟܵܗܢܹ̈ܐ: ܘܝܸܗܒܸܠܹܐ ܐܘܼܦ ܠܐܵܢܝܼ 27 ܕܥܲܡܹܗ. ܘܐܡܸܪܹܐ ܐܸܠܵܝ: ܫܲܒܬܵܐ ܒܘܼܬ ܒܲܪܢܵܫܵܐ ܦܸܫܠܵܐ 28 ܒܪܝܼܬܵܐ: ܘܠܵܐ ܒܲܪܢܵܫܵܐ ܒܘܼܬ ܫܲܒܬܵܐ. ܡܵܪܵܐ ܝܠܹܐ ܗܲܕܟ̣ܵܐ ܐܘܼܦ ܕܫܲܒܬܵܐ ܒܪܘܼܢܹܗ ܕܐܢܵܫܵܐ.

ܩܦܠܐܘܢ: ܓ

1 ܘܐܘܸܪܹܐ ܝܼܫܘܿܥ ܡܸܕܪܹܐ ܓܵܘ ܟܢܘܼܫܬܵܐ: ܘܐܝܼܬ ܗ̄ܘܵܐ ܬܵܡܵܐ 2 ܚܵܕ̄ ܐܢܵܫܵܐ ܕܒܪܝܼܙܬܵܐ ܗ̄ܘܵܐ ܐܝܼܕܹܗ. ܘܢܵܛܪܝܼ ܗ̄ܘܵܘ ܠܹܗ: ܕܐܸܢ ܒܵܣܸܡ ܗ̄ܘܵܐ ܠܹܗ ܒܫܲܒܬܵܐ: ܕܡܵܚܝܼ ܗ̄ܘܵܘ ܕܲܪܗܲܩܹܗ. 3 ܘܐܡܸܪܹܐ ܠܗ̇ܘ ܐܢܵܫܵܐ ܕܐܝܼܬ ܗ̄ܘܵܐ ܠܹܗ ܐܝܼܕܵܐ ܒܪܝܼܙܬܵܐ 4 ܩܘܼܡ̄ ܒܒܹܝܦܲܠܓܵܐ. ܘܐܡܸܪܹܐ ܐܸܠܵܝ: ܒܕܲܣܬܘܼܪ ܝܼܠܵܐ ܒܫܲܒܬܵܐ ܠܸܥܒ̣ܵܕܵܐ ܕܨܦܵܝܝܼ: ܝܲܢ ܠܸܥܒ̣ܵܕܵܐ ܕܣܸܪܝܵܐ: ܓܵܢܵܐ ܠܡܲܚܘܼܝܹܐ ܝܲܢ 5 ܠܬܵܠܘܿܩܹܐ: ܐܝܼܢܵܐ ܐܵܢܝܼ ܫܬܝܼܩܹܐ ܗ̄ܘܵܘ. ܘܚܸܪܹܐ ܒܝܼܵܝ ܒܟܲܪܒܵܐ: ܟܲܕ ܦܫܝܼܡܵܐ ܥܲܠ ܩܸܫܝܘܼܬܵܐ ܕܠܸܒܵܝ: ܘܐܡܸܪܹܐ ܠܗ̇ܘ ܐܢܵܫܵܐ: ܦܵܫܸܛ ܐܝܼܕܘܼܟ. ܘܦܘܼܫܛܵܠܹܐ: ܘܬܪܸܨܠܵܐ ܐܝܼܕܹܗ. 6 ܘܦܠܸܛܠܘܿܢ ܦܪ̈ܝܼܫܹܐ ܕܲܪܣܵܥܲܬ ܥܲܡ ܕܒܹܝܬ ܗܹܪܘܿܕܸܣ: ܘܥܒܸܕܠܘܿܢ ܪܵܐܝܝܼ ܥܲܠܘܼܗܝ: ܕܵܐܟ̣ܝܼ ܕܬܵܠܩܝܼ ܠܹܗ. 7 ܘܝܼܫܘܿܥ ܥܲܡ ܬܲܠܡܝܼܕܘܼ̈ܗܝ ܐܙܸܠܹܐ ܠܟܸܣ ܝܵܡܵܐ. ܘܟܸܢܫܵܐ 8 ܪܵܒܵܐ ܡ̣ܢ ܓܠܝܼܠܵܐ ܐܙܸܠܹܐ ܒܵܬ̄ܪܹܗ: ܘܡ̣ܢ ܝܼܗܘܼܕ. ܘܡ̣ܢ ܐܘܿܪܸܫܠܸܡ: ܘܡ̣ܢ ܐܲܕܘܿܡ: ܘܡ̣ܢ ܓܹܒܵܐ ܐܚܹܪ̄ܢܵܐ ܕܝܘܿܪܕܢܵܢ: ܘܚܵܕܸܪ̈ܘܵܢܹܐ ܕܨܘܿܪ: ܘܕܨܲܝܕܘܿܢ: ܟܸܢܫܹ̈ܐ ܪܵܒܵܐ ܕܫܸܡܥܝܹܐ ܗ̄ܘܵܘ 9 ܟܠ ܕܒܸܥܒ̣ܵܕܵܐ ܗ̄ܘܵܐ: ܐܬܹܠܘܿܢ ܠܟܸܣܠܹܗ. ܘܐܡܸܪܹܐ ܠܬܲܠܡܝܼܕܘܼ̈ܗܝ: ܕܡܲܝܬ̄ܝܝܼ ܗ̄ܘܵܘ ܠܹܗ ܓܵܡܝܼ ܙܥܘܿܪܬܵܐ: 10 ܣܵܒܵܒ ܕܟܸܢܫܹ̈ܐ: ܕܠܵܐ ܚܵܠܨܝܼ ܗ̄ܘܵܘ ܠܹܗ. ܣܵܒܵܒ ܠܪܵܒܵܐ ܒܘܼܣܸܡܠܹܐ: ܗܲܕܟ̣ܵܐ [10] ܕܢܦܸܠܘܿܢ ܥܲܠܘܼܗܝ ܕܕܵܩܪܝܼ ܒܝܹܗ: 11 ܟܡܵܐ ܕܐܝܼܬ ܗ̄ܘܵܘ ܠܗ̄ܘܿܢ ܡܲܚܘܵܬܹ̈ܐ. ܘܪ̈ܘܼܚܹܐ ܛܲܡܹ̈ܐܐ: ܐܝܼܡܲܢ ܕܚܙܹܠܘܿܢ ܐܸܠܹܗ: ܢܵܦܠܝܼ ܗ̄ܘܵܘ ܩܵܕ̄ܡܘܼܗܝ: ܘܡܲܩܘܸܚܝܼ ܗ̄ܘܵܘ 12 ܘܐܵܡܪܝܼ: ܐܲܢ̄ܬ ܝܼܘܸܬ ܒܪܘܼܢܹܗ ܕܐܲܠܵܗܵܐ. ܘܪܵܒܵܐ ܢܓ̰ܘܼܠܹܐ ܒܝܼܵܝ: ܕܠܵܐ ܓܵܠܝܼ ܗ̄ܘܵܘ ܠܹܗ. 13 ܘܐܣܸܩܠܹܐ ܠܛܘܼܪܵܐ: ܘܩܪܹܠܹܐ ܠܐܵܢܝܼ ܕܒܲܥܝܹܐ ܗ̄ܘܵܐ: 14 ܘܐܬܹܠܘܿܢ ܠܟܸܣܠܹܗ. ܘܦܪܸܫܠܹܐ ܬܪܸܥܣܲܪ ܕܗܵܘܝܼ ܗ̄ܘܵܘ 15 ܥܲܡܹܗ: ܘܕܫܵܕܸܪ ܗ̄ܘܵܐ ܠܗ̄ܘܿܢ ܠܡܲܟܪܘܼܙܹܐ. ܘܕܗܵܘܹܐ ܗ̄ܘܵܐ 16 ܠܗ̄ܘܿܢ ܗܘܼܟܡܵܐ [11] ܠܦܵܠܘܿܛܹܐ ܕܲܝܘܹ̈ܐ. ܘܡܘܼܬܸܒ̣ܠܹܐ ܠܫܸܡܥܘܿܢ 17 ܫܸܡܵܐ: ܟܹܐܦܵܐ. ܘܠܝܲܥܩܘܿܒ̣ ܒܲܪ ܙܲܒ̣ܕܲܝ: ܘܠܝܘܿܚܲܢܵܢ ܐܵܚܘܿܢܹܗ ܕܝܲܥܩܘܿܒ̣: ܡܘܼܬܸܒ̣ܠܹܐ ܐܸܠܵܝ ܫܸܡܵܐ ܒܢܲܝ̈ ܪܲܓ̣ܫܝ: ܕܝܼܠܹܐ: 18 ܒܢܘܼܢܹ̈ܐ ܕܪܲܥܡܵܐ. ܘܐܲܢܕܪܹܐܘܿܣ: ܘܦܝܼܠܝܼܦܘܿܣ: ܘܒܲܪ ܬܘܼܠܡܲܝ: ܘܡܲܬܲܝ: ܘܬܐܘܿܡܵܐ: ܘܝܲܥܩܘܿܒ̣ ܒܪܘܼܢܵܐ ܕܚܲܠܦܲܝ: 19 ܘܬܲܕܲܝ: ܘܫܸܡܥܘܿܢ ܩܢܵܢܵܝܵܐ. ܘܝܼܗܘܼܕܵܐ ܣܟܲܪܝܘܿܛܵܐ: ܗ̇ܘ ܕܣܘܼܦܹܠܹܗ ܘܐܬܹܠܘܿܢ ܠܒܲܝܬܵܐ. 20 ܘܡܸܕܪܹܐ ܓ̰ܡܸܥܠܹܐ ܟܸܢܫܵܐ: ܕܵܐܟ̣ܝܼ ܕܠܹܐ ܡܵܨܝܼ ܗ̄ܘܵܘ 21 ܠܲܚܡܵܐ ܠܹܐܟ̣ܵܠܵܐ. ܘܫܡܸܥܠܘܿܢ ܚܸܙܡܘܼ̈ܗܝ: ܘܦܠܸܛܠܘܿܢ ܠܸܕܒ̣ܵܩܹܗ: ܣܵܒܵܒ ܕܐܵܡܪܝܼ ܗ̄ܘܵܘ: ܡ̣ܢ ܗܵܘܢܹܗ ܦܠܝܼܛܵܐ 22 ܝܠܹܐ. ܘܐܵܢܝܼ ܣܵܦܪܹ̈ܐ ܕܨܠܹܠܘܿܢ ܡ̣ܢ ܐܘܿܪܸܫܠܸܡ ܐܵܡܪܝܼ ܗ̄ܘܵܘ: ܒܥܸܠܙܒ̣ܘܿܒ̣ ܐܝܼܬ ܠܹܗ: ܘܒܪܹܫܵܐ ܕܕܲܝܘܹ̈ܐ ܦܵܠܘܿܛܹܐ 23 ܝܠܹܐ ܕܲܝܘܹ̈ܐ. ܘܩܸܪܝܵܝܠܹܐ: ܘܒܡܵܣܵܠܹ̈ܐ ܐܡܸܪܹܐ ܐܸܠܵܝ: ܕܵܐܟ̣ܝܼ 24 ܡܵܨܹܐ ܣܵܛܵܢܵܐ ܠܣܵܛܵܢܵܐ ܠܦܵܠܘܿܛܹܐ. ܘܐܸܢ ܡܲܠܟܘܼܬܵܐ ܥܲܠ ܓܵܢܘܼܗ̇ ܦܵܝܫܵܐ ܕܘܼܒܵܪ: ܠܹܐ ܡܵܨܝܵܐ ܠܸܟܠܵܝܵܐ ܗ̇ܝ ܡܲܠܟܘܼܬܵܐ. 25 ܘܐܸܢ ܒܲܝܬܵܐ ܥܲܠ ܓܵܢܹܗ ܦܵܝܸܫ ܕܘܼܒܵܪ: ܠܹܐ ܡܵܨܹܐ ܠܸܟܠܵܝܵܐ 26 ܗ̇ܘ ܒܲܝܬܵܐ. ܘܐܸܢ ܣܵܛܵܢܵܐ ܩܵܝܸܡ ܥܲܠ ܓܵܢܹܗ ܘܦܵܝܸܫ ܕܘܼܒܵܪ: 27 ܠܹܐ ܡܵܨܹܐ ܠܸܟܠܵܝܵܐ: ܐܸܠܵܐ ܚܲܪܬܵܐ ܐܝܼܬ ܠܹܗ. ܐܢܵܫܵܐ ܠܹܐ ܡܵܨܹܐ ܐܘܸܪ ܓܵܘ ܒܲܝܬܹܗ ܕܙܲܪܒܵܢܵܐ: [12] ܘܟ̰ܵܠܸܓ̰ ܡܸܢܕ̈ܝܹܗ: ܐܸܢ ܠܵܐ ܩܵܕ̄ܡܵܝܬܵܐ ܐܵܣܸܪ ܠܙܲܪܒܵܢܵܐ: ܘܗ̇ܝܓܵܗ ܒܸܬ ܣܵܠܸܒ 28 ܒܲܝܬܹܗ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܟܠܵܝ ܚܛܝܼܵܬܹ̈ܐ ܘܓܘܼܕܵܦܹ̈ܐ ܟܡܵܐ ܕܓܵܕܦܝܼ ܒܢܲܝ̈ܢܵܫܵܐ: ܒܸܬ ܦܵܝܫܝܼ 29 ܫܒ̣ܝܼܩܹܐ ܐܸܠܵܝ. ܐܝܼܢܵܐ ܡ̣ܢ ܕܓܵܕܸܦ ܥܲܠ ܪܘܼܚܵܐ ܕܩܘܼܕܫܵܐ: ܠܲܝܬ ܠܹܗ ܫܒ̣ܵܩܵܐ ܠܥܵܠܲܡ: ܐܸܠܵܐ ܓܘܼܢܗܟܵܪ ܝܼܠܹܐ [13] ܠܚܛܝܼܬܵܐ 30 ܕܠܥܵܠܲܡ. ܣܵܒܵܒ ܕܐܵܡܪܝܼ ܗ̄ܘܵܘ: ܪܘܼܚܵܐ ܛܲܡܹܐܐ ܐܝܼܬ ܒܝܹܗ. 31 ܘܐܬܹܠܘܿܢ ܝܸܡܹܗ ܘܐܵܚܘܿܢܘܵܬܘܼ̈ܗܝ: ܟܸܠܝܹܐ ܠܒܲܕܲܪ: 32 ܘܫܘܼܕܸܪܘܿܢ ܠܸܩܪܵܝܹܗ ܠܟܸܣܠܵܝ. ܘܟܸܢܫܵܐ ܝܬܝܼܒ̣ܵܐ ܗ̄ܘܵܐ ܠܚܵܕܸܪ̈ܘܵܢܘܼܗܝ: ܘܐܡܸܪܘܿܢ ܐܸܠܹܗ: ܗܵܐ: ܝܸܡܘܼܟ ܘܐܵܚܘܿܢܘܵܬܘܼ̈ܟ 33 ܠܒܲܕܲܪ ܒܸܒܲܥܝܘܼܟ ܝܼܢܵܐ. ܘܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܡܵܢܝܼ 34 ܝܠܵܐ ܝܸܡܝܼ: ܝܲܢ ܐܵܚܘܿܢܘܵܬܝܼ̈. ܘܚܸܪܹܐ ܒܐܵܢܝܼ ܕܝܬܝܼܒܹܐ ܗ̄ܘܵܘ 35 ܠܚܵܕܸܪ̈ܘܵܢܘܼܗܝ: ܘܐܡܸܪܹܐ: ܗܵܐ: ܝܸܡܝܼ: ܘܐܵܚܘܿܢܘܵܬܝܼ̈. ܣܵܒܵܒ ܡ̇ܢ ܕܥܵܒܸܕ ܪܸܙܵܝܹܗ ܕܐܲܠܵܗܵܐ: ܗ̇ܘ ܝܼܠܹܐ ܐܵܚܘܿܢܝܼ ܘܚܵܬܝܼ ܘܝܸܡܝܼ.

ܩܦܠܐܘܢ: ܕ

1 ܘܡܸܕܪܹܐ ܫܘܼܪܹܠܹܐ ܠܡܵܠܘܿܦܹܐ ܥܲܠ ܣܸܦܬܵܐ ܕܝܵܡܵܐ: ܘܓ̰ܡܸܥܝܹܐ ܠܟܸܣܠܹܗ ܟܸܢܫܵܐ ܪܵܒܵܐ ܪܵܒܵܐ: ܗܲܕܟ̣ܵܐ ܕܐܣܸܩܠܹܐ ܘܝܬܸܒ̣ܠܹܐ ܓܵܘ ܓܵܡܝܼ ܒܝܵܡܵܐ: ܘܟܠܹܗ ܟܸܢܫܵܐ ܥܲܠ ܐܲܪܥܵܐ 2 ܗ̄ܘܵܐ ܥܲܠ ܣܸܦܬܵܐ ܕܝܵܡܵܐ. ܘܡܵܠܸܦ ܗ̄ܘܵܐ ܠܗ̄ܘܿܢ ܒܡܵܣܵܠܹ̈ܐ 3 ܪܵܒܵܐ: ܘܐܡܸܪܹܐ ܒܝܘܼܠܦܵܢܹܗ. ܫܡܸܥܡܘܿܢ: ܗܵܐ: ܦܠܸܛܠܹܐ 4 ܙܲܪܥܵܢܵܐ ܠܸܙܕܲܥܝܵܐ. ܘܗ̄ܘܹܠܵܐ ܕܟܲܕ ܙܪܸܥܠܹܐ: ܐܝܼܬ ܗ̄ܘܵܐ ܕܢܦܸܠܹܐ ܥܲܠ ܡܲܪܙܵܐ ܕܐܘܼܪܚܵܐ: ܘܐܬܹܠܘܿܢ ܛܲܝܪܹ̈ܐ ܘܐܟܸܠܘܿܢ 5 ܐܸܠܹܗ. ܘܐܚܹܪ̄ܢܵܐ ܢܦܸܠܹܐ ܥܲܠ ܕܘܼܟܵܐ ܟܹܐܦܵܢܬܵܐ: ܐܲܝܟܵܐ ܕܠܲܝܬ ܗ̄ܘܵܐ ܐܲܪܥܵܐ ܪܵܒܵܐ: ܘܗܲܪ ܒܗ̇ܝ ܣܵܥܲܬ ܡܘܼܓ̰ܝܸܢܹܐ: 6 ܣܵܒܵܒ ܕܠܲܝܬ ܗ̄ܘܵܐ ܥܘܼܡܩܵܐ ܕܐܲܪܥܵܐ. ܘܟܲܕ ܙܪܸܩܠܹܐ ܫܸܡܫܵܐ: ܟ̰ܡܸܟ̰ܠܹܐ: ܘܣܵܒܵܒ ܕܠܲܝܬ ܗ̄ܘܵܐ ܠܹܗ ܥܸܩܪܵܐ: 7 ܒܪܸܙܠܹܐ. ܘܐܚܹܪ̄ܢܵܐ ܢܦܸܠܹܐ ܓܵܘ ܟܸܬܘܹ̈ܐ: ܘܐܣܸܩܠܘܿܢ ܟܸܬܘܹ̈ܐ 8 ܘܚܢܸܩܠܘܿܢ ܐܸܠܹܗ: ܘܛܥܘܼܢܝܵܬܹ̈ܐ ܠܵܐ ܝܸܗܒܸܠܹܐ. ܘܐܚܹܪ̄ܢܵܐ ܢܦܸܠܹܐ ܥܲܠ ܐܲܪܥܵܐ ܨܦܵܝܝܼ: ܘܐܣܸܩܠܹܐ ܘܓܘܼܪܘܸܣܠܹܐ: ܘܝܸܗܒܸܠܹܐ ܛܥܘܼܢܝܵܬܹ̈ܐ: ܘܡܘܼܬ̄ܝܹܠܹܐ ܕܬܠܵܬ̄ܝܼ: ܘܕܸܐܫܬܝܼ: ܘܕܡܵܐܐ. 9 ܘܐܡܸܪܹܐ ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ: ܫܲܡܸܥ. 10 ܘܟܲܕ ܗ̄ܘܹܠܘܿܢ ܒܢܲܦ̮ܫܵܝ: ܒܘܼܩܸܪܘܿܢ ܡܸܢܹܗ ܐܵܢܝܼ ܕܥܲܡܹܗ 11 ܥܲܡ ܬܪܸܥܣܲܪܬܹܗ ܗ̇ܘ ܡܵܣܵܠܵܐ. ܘܐܡܸܪܹܐ ܐܸܠܵܝ: ܐܸܠܵܘܟ̣ܘܿܢ ܝܘܼܗ̄ܒ̣ܵܐ ܝܠܹܐ ܣܸܪ ܕܡܲܠܟܘܼܬܹܗ ܕܐܲܠܵܗܵܐ: ܐܝܼܢܵܐ ܠܒܲܪ̈ܵܝܹܐ 12 ܟܠ ܡܸܢܕܝܼ ܒܡܵܣܵܠܹ̈ܐ ܟܹܐ ܗܵܘܹܐ. ܕܚܙܵܝܵܐ ܚܵܙܝܼ: ܘܠܵܐ ܦܵܪܫܝܼ: ܘܫܡܵܥܝܵܐ ܫܲܡܥܝܼ: ܘܠܵܐ ܦܲܪܡܝܼ: ܠܵܐ ܗ̄ܘܹܐ ܕܕܵܝܪܝܼ 13 ܘܦܵܝܫܝܼ ܫܒ̣ܝܼܩܹܐ ܐܸܠܵܝ ܚܛܝܼܵܬܵܝ̈. ܘܐܡܸܪܹܐ ܐܸܠܵܝ: ܠܹܐ ܝܬܘܿܢ ܒܝܼܕܲܥܝܵܐ ܠܐܵܗܵܐ ܡܵܣܠܵܐ: ܘܕܵܐܟ̣ܝܼ ܟܠܵܝ ܡܵܣܵܠܹ̈ܐ ܒܸܬ 14 15 ܝܲܕܥܝܼܬܘܿܢ. ܙܲܪܥܵܢܵܐ ܗܹܡܸܙܡܵܢ ܟܹܐ ܙܲܪܸܥ. ܘܐܲܢܹܐ ܝܢܵܐ ܐܵܢܝܼ ܕܥܲܠ ܡܲܪܙܵܐ ܕܐܘܼܪܚܵܐ: ܐܲܝܟܵܐ ܕܦܵܝܫܵܐ ܙܪܥܝܼܬܵܐ ܗܹܡܸܙܡܵܢ: ܘܐܝܼܡܲܢ ܕܫܡܸܥܠܘܿܢ: ܕܲܪܣܵܥܲܬ ܟܹܐ ܐܵܬܹܐ ܣܵܛܵܢܵܐ: ܘܟܹܐ ܫܵܩܸܠ 16 ܠܗܹܡܸܙܡܵܢ ܕܝܼܠܵܐ ܙܪܥܝܼܬܵܐ ܒܝܼܵܝ. ܘܗܲܕܟ̣ܵܐ ܐܲܢܹܐ ܕܥܲܠ ܐܲܪܥܵܐ ܟܹܐܦܵܢܬܵܐ ܦܸܫܠܘܿܢ ܙܸܪܥܝܹܐ: ܐܵܢܝܼ ܝܢܵܐ ܕܐܝܼܡܲܢ ܕܫܡܸܥܠܘܿܢ 17 ܠܗܹܡܸܙܡܵܢ: ܕܲܪܣܵܥܲܬ ܒܚܲܕܘܼܬܵܐ ܟܹܐ ܩܵܒܠܝܼ ܠܵܗ̇. ܘܠܲܝܬ ܠܗ̄ܘܿܢ ܥܸܩܪܵܐ ܒܓܵܢܵܝ: ܐܸܠܵܐ ܕܙܲܒ̣ܢܵܐ ܝܢܵܐ: ܘܐܝܼܡܲܢ ܕܗ̄ܘܹܠܹܐ ܐܘܼܠܨܵܢܵܐ ܝܲܢ ܛܪܵܕܬܵܐ ܣܵܒܵܒ ܕܗܹܡܸܙܡܵܢ: ܓ̰ܲܠܕܹܐ ܟܹܐ 18 [14] ܟܵܦܪܝܼ. ܘܐܚܹܪ̄ܢܹܐ ܕܓܵܘ ܟܸܬܘܹ̈ܐ ܦܸܫܠܘܿܢ ܙܸܪܥܝܹܐ: ܐܵܢܝܼ 19 ܝܢܵܐ ܕܫܡܸܥܠܘܿܢ ܗܹܡܸܙܡܵܢ. ܘܚܲܡ ܕܐܵܗܵܐ ܥܵܠܡܵܐ: ܘܚܸܠܛܘܼܢܝܘܼܬܵܐ ܕܕܵܘܸܠܬܵܐ: ܘܫܲܗ̄ܘܲܬܝܵܬܹ̈ܐ ܕܡܸܢܕܝܵܢܹ̈ܐ ܐܚܹܪ̄ܢܹܐ ܒܹܐܘܵܪܵܐ ܟܹܐ ܚܵܢܩܝܼ ܠܗܹܡܸܙܡܵܢ: ܘܒܸܗ̄ܘܵܝܵܐ ܝܠܵܐ ܕܠܵܐ 20 ܛܥܘܼܢܝܵܬܹ̈ܐ. ܘܐܲܢܹܐ ܝܢܵܐ ܐܵܢܝܼ ܕܒܲܐܪܥܵܐ ܨܦܵܝܝܼ ܦܸܫܠܘܿܢ ܙܸܪܥܝܹܐ: ܐܵܢܝܼ ܕܫܲܡܥܝܼ ܗܹܡܸܙܡܵܢ: ܘܩܵܒܠܝܼ: ܘܝܵܗ̄ܒ̣ܝܼ ܛܥܘܼܢܝܵܬܹ̈ܐ: ܒܬܠܵܬ̄ܝܼ: ܘܒܐܸܫܬܝܼ: ܘܒܡܵܐܐ. 21 ܘܐܡܸܪܹܐ ܐܸܠܵܝ: ܟܹܐ ܐܵܬܝܵܐ ܫܪܵܝܵܐ ܕܦܵܝܫܵܐ ܡܘܼܬܸܒ̣ܬܵܐ ܬܚܘܿܬ ܣܲܐܬܵܐ: ܝܲܢ ܬܚܘܿܬ ܫܘܝܼܬܵܐ: ܠܹܐ ܝܠܵܐ ܕܥܲܠ ܟ̰ܪܲܚܦܝܼ 22 ܦܵܝܫܵܐ ܡܘܼܬܸܒ̣ܬܵܐ. ܣܵܒܵܒ ܠܲܝܬ ܡܸܢܕܝܼ ܛܸܫܝܵܐ: ܐܸܠܵܐ ܕܦܵܝܸܫ 23 ܓܸܠܝܵܐ: ܘܠܵܐ ܗ̄ܘܹܠܹܐ ܒܛܸܫܘܵܐ: ܐܸܠܵܐ ܕܗܵܘܹܐ ܐܲܫܟܵܪܵܐ. ܐܸܢ 24 ܐܢܵܫܵܐ ܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ: ܫܲܡܸܥ. ܘܐܡܸܪܹܐ ܐܸܠܵܝ: ܚܙܹܡܘܿܢ ܡܘܼܕܝܼ ܒܸܫܡܲܥܝܵܐ ܝܬܘܿܢ. ܒܗ̇ܝ ܟܝܵܠܬܵܐ ܕܟܵܝܠܝܼܬܘܿܢ: ܒܸܬ ܦܵܝܸܫ ܟܝܼܠܵܐ ܐܸܠܵܘܟ̣ܘܿܢ: ܘܒܸܬ ܦܵܝܸܫ ܡܘܼܙܝܸܕܵܐ ܐܸܠܵܘܟ̣ܘܿܢ. 25 ܣܵܒܵܒ ܡ̇ܢ ܕܐܝܼܬ ܠܹܗ: ܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܹܗ: ܘܡ̇ܢ ܕܠܲܝܬ ܠܹܗ: ܐܘܼܦ ܗ̇ܘ ܕܐܝܼܬ ܠܹܗ ܒܸܬ ܦܵܝܸܫ ܫܩܝܼܠܵܐ ܡܸܢܹܗ. 26 ܘܐܡܸܪܹܐ: ܗܲܕܟ̣ܵܐ ܝܠܵܐ ܡܲܠܟܘܼܬܹܗ ܕܐܲܠܵܗܵܐ: ܐܲܝܟ ܕܐܸܢ 27 ܐܢܵܫܵܐ ܒܵܙܸܩ ܒܲܪܙܲܪܥܵܐ ܒܐܲܪܥܵܐ. ܘܕܵܡܸܟ. ܘܩܵܝܸܡ ܒܠܲܝܠܹܐ ܘܒܐܝܼܡܵܡܵܐ: ܘܒܲܪܙܲܪܥܵܐ ܡܲܓ̰ܝܸܢ ܘܝܵܪܸܟ: ܟܲܕ ܗ̇ܘ ܠܹܐ ܝܠܹܐ 28 ܒܝܼܕܲܥܝܵܐ. ܣܵܒܵܒ ܕܐܲܪܥܵܐ ܒܓܵܢܘܼܗ̇ ܟܹܐ ܡܲܝܬ̄ܝܵܐ ܠܹܗ ܠܛܥܘܼܢܬܵܐ: ܩܵܕ̄ܡܵܝܬܵܐ ܝܸܩܢܵܐ: ܘܒܵܬ̄ܪܹܗ ܒܘܼܠܵܐ: ܐܝܼܬܵܐ ܚܸܛܝܼܬܵܐ 29 ܡܠܝܼܬܵܐ ܒܒܘܼܠܵܐ. ܐܝܼܢܵܐ ܐܝܼܡܲܢ ܕܡܵܛܝܵܐ ܛܥܘܼܢܬܵܐ: ܕܲܪܣܵܥܲܬ ܟܹܐ ܕܵܪܹܐ ܡܲܓܠܵܐ: ܣܵܒܵܒ ܕܡܛܹܠܹܐ ܚܸܨܕܵܐ. 30 ܘܐܡܸܪܹܐ: ܠܡܘܼܕܝܼ ܡܲܕܡܵܚ ܠܵܗ̇ ܡܲܠܟܘܼܬܵܐ ܕܐܲܠܵܗܵܐ: 31 ܝܲܢ ܒܐܲܝܢܝܼ ܡܵܣܵܠܵܐ ܡܵܬܠܵܚ ܠܵܗ̇. ܐܲܝܟ ܕܲܢܕܸܟܬܵܐ ܕܚܲܪܕܵܠ ܝܼܠܵܐ: ܗ̇ܝ ܕܐܝܼܡܲܢ ܦܸܫܠܵܐ ܙܪܥܝܼܬܵܐ ܒܐܲܪܥܵܐ: ܙܥܘܿܪܬܵܐ ܝܠܵܐ 32 ܡ̣ܢ ܟܠܵܝ ܒܲܪܙܲܪ̈ܥܹܐ ܕܥܲܠ ܐܲܪܥܵܐ. ܐܝܼܢܵܐ ܐܝܼܡܲܢ ܦܸܫܠܵܐ ܙܪܥܝܼܬܵܐ: ܟܹܐ ܐܵܣܩܵܐ ܘܗܵܘܝܵܐ ܓܘܼܪܬܵܐ ܡ̣ܢ ܟܠܵܝ ܝܲܪ̈ܩܹܐ: ܘܟܹܐ ܥܵܒ̣ܕܵܐ ܦܲܥܘܵܢܹ̈ܐ ܓܘܼܪܹ̈ܐ: ܗܲܕܟ̣ܵܐ ܕܡܵܨܝܼ ܛܲܝܪܹ̈ܐ ܕܫܡܲܝܵܐ ܫܵܪܝܼ ܒܛܸܠܵܢܝܼܬܘܼܗ̇. 33 ܘܒܪܵܒܵܐ ܡܵܣܵܠܹ̈ܐ ܐܲܝܟ ܕܐܲܢܹܐ ܟܹܐ ܗܲܡܙܸܡ ܗ̄ܘܵܐ ܥܲܡܵܝ 34 ܗܹܡܸܙܡܵܢ: ܐܲܝܟ ܕܡܵܨܝܼ ܗ̄ܘܵܘ ܠܸܫܡܲܥܝܵܐ. ܘܕܠܵܐ ܡܵܣܵܠܹܐ ܠܹܐ ܗܲܡܙܸܡ ܗ̄ܘܵܐ ܥܲܡܵܝ. ܐܝܼܢܵܐ ܠܬܲܠܡܝܼܕܘܼ̈ܗܝ: ܒܹܝܠܹܗ ܘܐܸܠܵܝ: ܟܹܐ ܦܵܫܸܩ ܗ̄ܘܵܐ ܟܠ ܡܸܢܕܝܼ. 35 ܘܐܡܸܪܹܐ ܐܸܠܵܝ ܒܗ̇ܘ ܝܘܿܡܵܐ ܒܪܲܡܫܵܐ: ܥܵܒ̣ܪܵܚ ܠܡܲܪܙܵܐ 36 ܐܚܹܪ̄ܢܵܐ. ܘܫܒܸܩܠܘܿܢ ܠܟܸܢܫܹ̈ܐ: ܘܠܘܼܒܸܠܘܿܢ ܐܸܠܹܗ ܐܲܝܟ ܕܝܼܗ̄ܘܵܐ ܒܓܵܡܝܼ: ܘܐܚܹܪ̄ܢܹܐ ܓܵܡ̈ܝܹܐ ܐܝܼܬ ܗ̄ܘܵܘ ܥܲܡܹܗ. 37 ܘܗ̄ܘܹܠܵܐ ܒܘܼܪܵܢ ܓܘܼܪܬܵܐ ܕܦܵܘܚܵܐ: ܘܠܲܦܹ̈ܐ ܒܸܢܦܵܠܵܐ ܗ̄ܘܵܘ 38 ܓܵܘ ܓܵܡܝܼ: ܕܵܐܟ̣ܝܼ ܕܦܵܝܫܵܐ ܗ̄ܘܵܐ ܡܠܝܼܬܵܐ. ܘܗ̇ܘ ܒܓܵܢܹܗ ܕܡܝܼܟ̣ܵܐ ܗ̄ܘܵܐ ܥܲܠ ܣܦܵܕܝܼܬܵܐ ܒܚܲܪܬܵܗ̇ ܕܓܵܡܝܼ. ܘܡܘܼܩܸܡܠܘܿܢ: ܘܐܵܡܪܝܼ ܐܸܠܹܗ: ܪܵܒܝܲܢ: ܠܹܐ ܝܘܸܬ ܒܚܲܡ 39 ܕܒܸܬܠܵܩܵܐ ܝܘܵܚ. ܘܩܸܡܠܹܐ: ܘܢܓ̰ܘܼܠܹܐ ܒܦܵܘܚܵܐ: ܘܐܡܸܪܹܐ ܠܝܵܡܵܐ: ܫܠܝܼ: ܗ̄ܘܝܼ ܪܵܗܲܬ. ܘܫܠܹܠܹܐ ܦܵܘܚܵܐ: ܘܗ̄ܘܹܠܹܐ 40 ܢܝܵܚܵܐ ܓܘܼܪܵܐ. ܘܐܡܸܪܹܐ ܐܸܠܵܝ: ܩܵܡܘܿܕܝܼ ܙܵܕܘܿܥܘܹ̈ܐ ܝܬܘܿܢ. 41 ܗܹܫ ܠܲܝܬ ܠܵܘܟ̣ܘܿܢ ܗܲܝܡܵܢܘܼܬܵܐ. ܘܙܕܸܥܠܘܿܢ ܙܕܘܼܥܬܵܐ ܓܘܼܪܬܵܐ: ܘܐܵܡܪܝܼ ܚܵܕ̄ ܠܗ̇ܘ ܐܚܹܪ̄ܢܵܐ: ܒܲܣ ܡܵܢܝܼ ܝܠܹܐ ܐܵܗܵܐ: ܕܐܘܼܦ ܦܵܘܚܵܐ ܘܝܵܡܵܐ ܡܲܨܝܘܼܬܹܐ ܝܢܵܐ ܐܸܠܹܗ.

ܩܦܠܐܘܢ: ܗ

1 ܘܐܬܹܠܘܿܢ ܠܡܲܪܙܵܐ ܐܚܹܪ̄ܢܵܐ ܕܝܵܡܵܐ ܠܐܲܬܪܵܐ [15] ܕܓܸܕܪ̈ܵܝܹܐ. 2 ܘܟܲܕ ܦܠܸܛܠܹܐ ܡ̣ܢ ܓܵܡܝܼ: ܕܲܪܣܵܥܲܬ ܬܦܸܩܠܹܐ ܒܝܹܗ ܡ̣ܢ ܒܹܝܬ ܩܒ̣ܘܼܪܹ̈ܐ ܚܵܕ̄ ܐܢܫܵܐ ܕܐܝܼܬ ܗ̄ܘܵܐ ܒܝܹܗ ܪܘܼܚܵܐ ܛܲܡܹܐܐ. 3 ܘܥܵܡܸܪ ܗ̄ܘܵܐ ܓܵܘ ܒܹܝܬ ܩܒ̣ܘܼܪܹ̈ܐ. ܘܐܘܼܦ ܒܫܹܫܠܝܵܬܹ̈ܐ ܐܢܵܫܵܐ 4 ܠܹܐ ܡܵܨܹܐ ܗ̄ܘܵܐ ܠܹܐܣܵܪܹܗ. ܣܵܒܵܒ ܪܵܒܵܐ ܓܵܗܹ̈ܐ ܒܩܵܘܕܹ̈ܐ ܘܒܫܹܫܸܠܝܵܬܹ̈ܐ ܦܵܝܸܫ ܗ̄ܘܵܐ ܐܣܝܼܪܵܐ: ܘܫܹܫܸܠܝܵܬܹ̈ܐ ܟܹܐ ܩܲܛܸܥ ܗ̄ܘܵܐ: ܘܩܵܘܕܹ̈ܐ ܬܵܒܸܪ ܗ̄ܘܵܐ: ܘܐܢܵܫܵܐ ܠܹܐ ܡܵܨܹܐ ܗ̄ܘܵܐ 5 ܠܙܲܒܛܘܼܢܹܗ. ܘܒܟܠ ܙܲܒ̣ܢܵܐ: ܒܠܲܝܠܹܐ ܘܒܐܝܼܡܵܡܵܐ: ܓܵܘ ܒܹܝܬ ܩܒ̣ܘܼܪܹ̈ܐ ܘܓܵܘ ܛܘܼܪ̈ܵܢܹܐ: ܡܲܩܘܘܼܚܹܐ ܗ̄ܘܵܐ: ܘܕܲܪܒܘܼܢܹܐ 6 ܓܵܢܹܗ ܒܟܹܐܦܹ̈ܐ. ܘܟܲܕ ܚܙܹܠܹܐ ܠܝܼܫܘܿܥ ܡ̣ܢ ܪܸܚܩܵܐ: ܪܚܸܛܠܹܐ 7 ܣܓܸܕܠܹܐ ܐܸܠܹܗ. ܘܡܘܼܩܘܸܚܠܹܐ ܒܩܵܠܵܐ ܪܵܡܵܐ ܘܐܡܸܪܹܐ: ܡܵܐ ܠܘܼܟ ܡܸܢܝܼ: ܝܼܫܘܿܥ: ܒܪܘܼܢܹܗ ܕܐܲܠܵܗܵܐ ܪܵܡܵܐ: ܡܲܐܡܘܼܝܘܼܟ 8 ܝܼܘܸܢ ܒܐܲܠܵܗܵܐ: ܕܠܵܐ ܓ̰ܲܢܓ̰ܸܪܸܬ ܠܝܼ. ܣܵܒܵܒ ܕܐܡܸܪܹܐ ܐܸܠܹܗ: 9 ܦܠܘܿܛ ܡ̣ܢ ܐܢܵܫܵܐ: ܪܘܼܚܵܐ ܛܲܡܹܐܐ. ܘܒܘܼܩܸܪܹܐ ܡܸܢܹܗ: ܡܘܼܕܝܼ ܝܠܹܐ ܫܸܡܘܼܟ: ܘܐܵܡܸܪ ܐܸܠܹܗ: ܠܸܓ̣ܝܘܿܢ ܝܼܠܹܐ ܫܸܡܝܼ: 10 ܣܵܒܵܒ ܪܵܒܵܐ ܝܘܵܚ. ܘܦܘܼܪܦܸܠܹܐ ܒܝܹܗ ܪܵܒܵܐ ܕܠܵܐ ܫܵܕܸܪܘܿܢ 11 ܠܒܲܕܲܪ ܡ̣ܢ ܐܲܬܪܵܐ. ܐܝܼܢܵܐ ܐܝܼܬ ܗ̄ܘܵܐ ܬܵܡܵܐ ܠܟܸܣ ܛܘܼܪܵܐ 12 ܒܲܩܪܵܐ ܓܘܼܪܬܵܐ ܕܚܙܘܼܪܹ̈ܐ ܒܸܪ̈ܥܵܝܵܐ. ܘܦܘܼܪܦܸܠܘܿܢ ܒܝܹܗ: 13 ܒܹܐܡܵܪܵܐ: ܫܵܕܸܪܲܢ ܠܐܲܢܹܐ ܚܙܘܼܪܹ̈ܐ ܕܐܵܘܪܵܚ ܒܝܼܵܝ. ܘܝܸܗܒܸܠܹܐ ܕܲܣܬܘܼܪ ܐܸܠܵܝ. ܘܦܠܸܛܠܘܿܢ ܐܵܢܝܼ ܪ̈ܘܼܚܹܐ ܛܲܡܹ̈ܐܐ ܘܐܘܸܪܘܿܢ ܓܵܘ ܚܙܘܼܪܹ̈ܐ. ܘܪܚܸܛܠܵܐ ܒܲܩܪܵܐ ܠܫܸܢܵܐ ܠܐܸܠܬܸܚ ܒܝܵܡܵܐ: 14 ܐܲܝܟ ܬܪܲܝ ܐܲܠܦܹ̈ܐ: ܘܚܢܸܩܠܘܿܢ ܒܝܵܡܵܐ. ܘܐܵܢܝܼ ܕܡܲܪܥܘܼܝܹܐ ܗ̄ܘܵܘ ܠܚܙܘܼܪܹ̈ܐ ܥܪܸܩܠܘܿܢ ܘܡܘܼܕܸܥܠܘܿܢ ܓܵܘ ܡܕܝܼܢ̄ܬܵܐ ܘܐܘܼܦ ܓܵܘ ܡܵܬܘܵܬܹ̈ܐ. ܘܦܠܸܛܠܘܿܢ ܠܸܚܙܵܝܵܐ ܡܸܢܕܝܼ ܕܗ̄ܘܹܠܹܐ. 15 ܘܐܬܹܠܘܿܢ ܠܟܸܣ ܝܼܫܘܿܥ: ܘܚܙܹܠܘܿܢ ܠܕܲܝܘܵܢܵܐ ܝܬܝܼܒ̣ܵܐ: ܠܒ̣ܝܼܫܵܐ [16] ܘܡܵܪܹܐ ܐܵܕܵܒ: ܗ̇ܘ ܕܐܝܼܬ ܗ̄ܘܵܐ ܒܝܹܗ ܠܸܓ̣ܝܘܿܢ: 16 ܘܙܕܸܥܠܘܿܢ. ܘܗܘܼܩܹܠܘܿܢ ܐܸܠܵܝ ܐܵܢܝܼ ܕܚܙܹܠܘܿܢ: ܕܵܐܟ̣ܝܼ 17 ܗ̄ܘܹܠܵܐ ܠܕܲܝܘܵܢܵܐ: ܘܐܘܼܦ ܥܲܠ ܕܐܵܢܝܼ ܚܙܘܼܪܹ̈ܐ. ܘܫܘܼܪܹܠܘܿܢ 18 ܠܦܲܪܦܘܼܠܹܐ ܒܝܹܗ ܕܐܵܙܸܠ ܗ̄ܘܵܐ ܡ̣ܢ ܬܸܚܘܼܒܵܝ̈. ܘܟܲܕ ܐܣܸܩܠܹܐ ܠܓܵܡܝܼ: ܦܘܼܪܦܸܠܹܐ ܒܝܹܗ ܗ̇ܘ ܕܝܼܗ̄ܘܵܐ ܕܲܝܘܵܢܵܐ 19 ܕܗܵܘܹܐ ܗ̄ܘܵܐ ܥܲܡܹܗ. ܘܠܵܐ ܫܒܸܩܠܹܗ: ܐܸܠܵܐ ܐܡܸܪܹܐ ܐܸܠܹܗ: ܙܹܠ̄ܐ ܠܒܲܝܬܘܼܟ ܠܟܸܣ ܐܢܵܫܘܼ̈ܟ: ܘܗܵܩܝܼ ܠܗ̄ܘܿܢ ܕܵܐܟ̣ܝܼ 20 ܡܸܢܕܝܼ ܥܒܸܕܠܹܐ ܐܸܠܘܼܟ ܡܵܪܝܵܐ: ܘܕܪܘܼܚܸܡܠܹܐ ܥܲܠܘܼܟ. ܘܐܙܸܠܹܐ ܘܫܘܼܪܹܠܹܐ ܠܡܲܟܪܘܼܙܹܐ ܒܥܸܣܪܲܬ ܡܕܝܼܢܵܬܵܐ ܡܸܢܕܝܼ ܕܥܒܸܕܠܹܐ ܐܸܠܹܗ ܝܼܫܘܿܥ. ܘܟܠܵܝ ܥܵܓ̰ܒܝܼ ܗ̄ܘܵܘ. 21 ܘܟܲܕ ܥܒܸܪܹܐ ܡܸܕܪܹܐ ܝܼܫܘܿܥ ܒܓܵܡܝܼ ܠܗ̇ܘ ܡܲܪܙܵܐ ܐܚܹܪ̄ܢܵܐ: ܓ̰ܡܸܥܠܘܿܢ ܥܲܠܘܼܗܝ ܟܸܢܫܹ̈ܐ ܪܵܒܵܐ: ܟܲܕ ܥܲܠ ܣܸܦܬܵܐ 22 ܕܝܵܡܵܐ ܗ̄ܘܵܐ. ܘܐܬܹܠܹܐ ܚܵܕ̄ ܡ̣ܢ ܓܘܼܪ̈ܵܢܹܐ ܕܟܢܘܼܫܬܵܐ: ܕܫܸܡܹܗ ܝܘܿܐܵܪܵܫ: ܘܟܲܕ ܚܙܹܠܹܗ: ܢܦܸܠܹܐ ܠܟܸܣ ܐܲܩܠܘܼ̈ܗܝ. 23 ܘܦܘܼܪܦܸܠܹܐ ܒܝܹܗ ܪܵܒܵܐ: ܘܐܵܡܸܪ ܐܸܠܹܗ: ܒܪܵܬܝܼ ܙܥܘܿܪܬܵܐ ܩܵܕ̄ܡ ܡܵܘܬܵܐ ܝܠܵܐ: ܬܵܐ ܡܲܬܸܒ̣ ܐܝܼܕܘܼ̈ܟ ܥܲܠܘܼܗ̇: ܕܦܵܝܫܵܐ 24 ܒܘܼܣܸܡܬܵܐ: ܘܚܲܝܵܐ. ܘܐܙܸܠܹܐ ܥܲܡܹܗ: ܘܟܸܢܫܵܐ ܪܵܒܵܐ ܒܹܐܙܵܠܵܐ ܗ̄ܘܵܐ ܒܵܬ̄ܪܹܗ: ܘܒܸܚܠܵܨܵܐ ܗ̄ܘܵܐ ܐܸܠܹܗ. 25 ܘܚܕܵܐ ܒܲܟ̣ܬܵܐ ܕܝܼܗ̄ܘܵܐ ܒܡܲܓ̰ܪܵܝܬܵܐ ܕܕܸܡܵܐ ܬܪܸܥܣܲܪ 26 ܫܸܢܹ̈ܐ. ܘܪܵܒܵܐ ܩܘܼܒܸܠܬܵܐ ܗ̄ܘܵܐ ܡ̣ܢ ܪܵܒܵܐ ܗܲܟܝܼܡܹ̈ܐ: ܘܚܘܼܪܸܓ̣ܬܵܐ ܗ̄ܘܵܐ ܟܠ ܡܸܢܕܝܼ ܕܐܝܼܬ ܗ̄ܘܵܐ ܠܵܗ̇: ܘܡܸܢܕܝܼ ܠܵܐ ܗ̄ܘܹܠܹܐ 27 ܐܸܠܵܗ̇ ܦܲܝܕܵܐ: ܐܸܠܵܐ ܐܘܼܦ ܙܵܘܕܵܐ ܦܸܫܠܵܐ ܡܘܼܠܝܸܨܬܵܐ. ܟܲܕ ܫܡܸܥܠܵܐ ܒܵܗܣ ܕܝܼܫܘܿܥ: ܐܬܹܠܵܐ ܒܟܸܢܫܵܐ ܡ̣ܢ ܒܵܬ̄ܪܹܗ: 28 ܘܕܩܸܪܵܐ ܒܠܒܸܫܬܹܗ. ܣܵܒܵܒ ܕܐܡܸܪܵܐ: ܐܘܼܦ ܐܸܢ ܒܠܒܸܫܬܹܗ 29 ܕܵܩܪܵܢ ܐܢܵܐ: ܒܸܬ ܚܲܝܵܢ. ܘܕܲܪܣܵܥܲܬ ܒܪܸܙܠܵܐ ܥܲܝܢܵܐ ܕܕܸܡܘܼܗ̇: ܘܪܥܸܫܠܵܐ ܒܦܲܓ̣ܪܘܼܗ̇ ܕܒܣܸܡܠܵܐ ܡ̣ܢ ܡܚܘܿܬܘܼܗ̇. 30 ܘܝܼܫܘܿܥ ܕܲܪܣܵܥܲܬ ܝܕܸܥܠܹܐ ܒܓܵܢܹܗ ܕܚܲܝܠܵܐ ܦܠܸܛܠܹܐ ܡܸܢܹܗ: ܘܕܸܪܹܐ ܓܵܘ ܟܸܢܫܵܐ ܘܐܡܸܪܹܐ: ܡܵܢܝܼ ܕܩܸܪܹܐ ܒܠܒܸܫܬܝܼ. 31 ܐܡܸܪܘܿܢ ܐܸܠܹܗ ܬܲܠܡܝܼܕܘܼ̈ܗܝ: ܒܸܚܙܵܝܵܐ ܝܘܸܬ ܠܟܸܢܫܵܐ ܒܸܚܠܵܨܘܼܟ: 32 ܘܒܹܐܡܵܪܵܐ ܝܘܸܬ: ܡܵܢܝܼ ܕܩܸܪܹܐ ܒܝܼܝܼ. ܘܒܸܚܝܵܪܵܐ ܗ̄ܘܵܐ ܕܚܵܙܹܐ 33 ܠܗ̇ܝ ܕܥܒܸܕܠܵܐ ܐܵܗܵܐ. ܐܝܼܢܵܐ ܒܲܟ̣ܬܵܐ: ܟܲܕ ܒܸܙܕܲܥܝܵܐ ܘܪܲܬܪܘܼܬܹܐ: ܒܝܼܕܲܥܝܵܐ ܡܸܢܕܝܼ ܕܗ̄ܘܹܠܹܐ ܐܸܠܵܗ̇: ܐܬܹܠܵܐ ܢܦܸܠܵܐ ܩܵܕ̄ܡܘܼܗܝ: 34 ܘܐܡܸܪܵܐ ܐܸܠܹܗ ܟܠܵܗ̇ ܣܲܪܲܣܬܘܼܬܵܐ. ܘܗ̇ܘ ܐܡܸܪܹܐ ܐܸܠܵܗ̇: ܒܪܵܬܵܐ: ܗܲܝܡܵܢܘܼܬܵܟ̣ܝ ܩܲܡ ܡܲܚܝܼܵܐ ܠܵܟ̣ܝ: ܙܹܠ̄ܐܝ ܒܫܠܵܡܵܐ: ܘܗܵܘܝܲܬܝ ܒܘܼܣܸܡܬܵܐ ܡ̣ܢ ܡܚܘܿܬܵܟ̣ܝ. 35 ܘܗܹܫ ܗ̇ܘ ܗܲܡܙܘܼܡܹܐ: ܐܬܹܠܘܿܢ ܡ̣ܢ ܒܲܝܬܵܐ ܕܓܘܼܪܵܐ ܕܟܢܘܼܫܬܵܐ ܘܐܵܡܪܝܼ: ܒܪܵܬܘܼܟ ܡܝܼܬܬܵܐ ܝܠܵܐ: ܐܚܹܪ̄ܢܵܐ 36 ܩܵܡܘܿܕܝܼ ܙܲܗܡܲܬ ܒܝܼܵܗ̄ܒ̣ܵܐ ܝܘܸܬ ܠܡܲܠܦܵܢܵܐ. ܐܝܼܢܵܐ ܝܼܫܘܿܥ [17] ܟܲܕ ܠܵܐ ܨܸܬܠܹܐ ܠܗܹܡܸܙܡܵܢ ܕܐܡܸܪܘܿܢ: ܐܡܸܪܹܐ ܠܗ̇ܘ ܓܘܼܪܵܐ 37 ܕܟܢܘܼܫܬܵܐ: ܠܵܐ ܙܵܕܸܥܬ: ܐܲܚܟ̰ܝܼ ܗܲܡܸܢ. ܘܠܵܐ ܫܒܸܩܠܹܐ ܠܐܢܵܫܵܐ ܕܐܵܙܸܠ ܥܲܡܹܗ: ܫܒ̣ܘܿܩ ܡ̣ܢ ܟܹܐܦܵܐ: ܘܝܲܥܩܘܿܒ̣: 38 ܘܝܘܿܚܲܢܵܢ ܐܵܚܘܿܢܹܗ ܕܝܲܥܩܘܿܒ̣. ܘܐܬܹܠܘܿܢ ܠܒܲܝܬܵܐ ܕܗ̇ܘ ܓܘܼܪܵܐ ܕܟܢܘܼܫܬܵܐ: ܘܚܙܹܠܹܐ ܫܓ̣ܘܼܫܝܵܐ: ܘܐܵܢܝܼ ܕܒܸܒܟ̣ܵܝܵܐ 39 ܘܒܸܥܒ̣ܵܕܵܐ ܬܵܙܝܼ ܪܵܒܵܐ. ܘܟܲܕ ܐܘܸܪܹܐ ܐܡܸܪܹܐ ܐܸܠܵܝ: ܩܵܡܘܿܕܝܼ ܒܸܥܒ̣ܵܕܵܐ ܝܬܘܿܢ ܫܓ̣ܘܼܫܝܵܐ ܘܒܸܒܟ̣ܵܝܵܐ: ܒܪܵܬܵܐ ܠܹܐ ܝܠܵܐ 40 ܡܝܼܬܬܵܐ: ܐܸܠܵܐ ܕܡܝܼܟ̣ܬܵܐ ܝܠܵܐ. ܘܓܚܸܟܠܘܿܢ ܒܝܹܗ. ܐܝܼܢܵܐ ܗ̇ܘ ܦܘܼܠܸܛܠܹܐ ܠܟܠܵܝ: ܘܠܘܼܒܸܠܹܐ ܠܒܵܒܵܗ̇ ܕܒܪܵܬܵܐ ܘܠܝܸܡܵܗ̇ 41 ܘܠܵܐܢܝܼ ܕܥܲܡܹܗ: ܘܐܘܸܪܹܐ ܠܐܲܝܟܵܐ ܕܝܼܗ̄ܘܵܐ ܒܪܵܬܵܐ. ܘܕܒܸܩܠܹܐ ܒܐܝܼܕܵܗ̇ ܕܒܪܵܬܵܐ: ܘܐܡܸܪܹܐ ܐܸܠܵܗ̇: ܛܠܝܼܬܵܐ ܩܘܼܡ̄ܝ: ܕܦܝܵܫܵܐ ܝܠܵܐ ܦܘܼܫܸܩܬܵܐ: ܒܪܵܬܵܐ: ܐܸܠܵܟ̣ܝ ܒܹܐܡܵܪܵܐ ܝܘܸܢ: ܩܘܼܡ̄ܝ. 42 ܘܕܲܪܣܵܥܲܬ ܩܸܡܠܵܐ ܒܪܵܬܵܐ: ܘܚܕܸܪܵܐ: ܣܵܒܵܒ ܕܒܲܪܬ̄ ܬܪܸܥܣܲܪ ܫܸܢܹ̈ܐ ܗ̄ܘܵܐ. ܘܥܘܼܓ̰ܸܒܠܘܿܢ ܥܘܼܓ̰ܵܒܵܐ ܓܘܼܪܵܐ. 43 ܘܦܘܼܩܕܵܝܠܹܐ ܪܵܒܵܐ ܕܐܢܫܵܐ ܠܵܐ ܝܲܕܸܥ ܐܵܗܵܐ. ܘܐܡܸܪܹܐ ܕܝܵܗ̄ܒ̣ܝܼ ܠܵܗ̇ ܠܹܐܟ̣ܵܠܵܐ.

ܩܦܠܐܘܢ: ܘ

1 ܘܦܠܸܛܠܹܐ ܡ̣ܢ ܬܵܡܵܐ: ܘܐܬܹܠܹܐ ܠܐܲܬܪܹܗ: ܘܐܙܸܠܘܿܢ 2 ܒܵܬ̄ܪܹܗ ܬܲܠܡܝܼܕܘܼ̈ܗܝ. ܘܟܲܕ ܗ̄ܘܹܠܵܐ ܫܲܒܬܵܐ: ܫܘܼܪܹܠܹܐ ܠܡܵܠܘܿܦܹܐ ܒܟܢܘܼܫܬܵܐ. ܘܪܵܒܵܐ ܕܫܡܸܥܠܘܿܢ ܥܘܼܓ̰ܸܒܠܘܿܢ: ܘܐܵܡܪܝܼ: ܐܵܗܵܐ ܡܐܲܝܟܵܐ ܐܝܼܬ ܠܹܗ ܐܲܢܹܐ: ܘܡܘܼܕܝܼ ܝܠܵܐ ܥܵܩܸܠܕܵܪܘܼܬܵܐ ܕܦܸܫܠܵܐ ܝܸܗܒܸܠܬܵܐ ܐܸܠܹܗ: ܕܗܲܕܟ̣ܵܐ ܚܲܝ̈ܠܹܐ 3 ܒܐܝܼܕܘܼ̈ܗܝ ܒܸܗ̄ܘܵܝܵܐ ܝܢܵܐ. ܠܹܐ ܝܠܹܐ ܐܵܗܵܐ ܢܲܓ̰ܵܪ: ܒܪܘܼܢܵܐ ܕܡܲܪܝܲܡ: ܘܐܵܚܘܿܢܹܗ ܕܝܲܥܩܘܿܒ̣: ܘܕܝܘܿܣܹܐ: ܘܕܝܼܗܘܼܕܵܐ: ܘܕܫܸܡܥܘܿܢ: ܘܠܹܐ ܝܢܵܐ ܚܵܬܘܵܬܹ̈ܗ ܠܲܐܟ̣ܵܐ ܠܟܸܣܠܲܢ: [18] ܘܟܦܸܪܘܿܢ 4 ܒܝܹܗ. ܘܐܡܸܪܹܐ ܐܸܠܵܝ ܝܼܫܘܿܥ: ܠܲܝܬ ܢܒ̣ܝܼܵܐ ܕܒܹܐ ܐܝܼܩܵܪܵܐ ܫܒ̣ܘܿܩ ܡ̣ܢ ܓܵܘ ܐܲܬܪܹܗ: ܘܓܵܘ ܚܸܙܡܘܼ̈ܗܝ: ܘܓܵܘ ܒܲܝܬܹܗ. 5 ܘܠܹܐ ܡܵܨܹܐ ܗ̄ܘܵܘ ܕܥܵܒܸܕ ܬܵܡܵܐ ܐܘܼܦܠܵܐ ܚܵܕ̄ ܚܲܝܠܵܐ: ܫܒ̣ܘܿܩ ܡ̣ܢ ܕܥܲܠ ܚܲܟ̰ܵܐ ܡܸܪ̈ܥܝܹܐ ܡܘܼܬܸܒ̣ܠܹܐ ܐܝܼܕܹ̈ܗ ܘܒܘܼܣܡܵܝܠܹܐ. 6 ܘܥܓ̰ܸܒܠܹܐ ܥܲܠ ܠܵܐ ܗܲܝܡܵܢܘܼܬܵܝ. ܘܒܸܚܕܵܪܵܐ ܗ̄ܘܵܐ ܒܡܵܬܘܵܬܹ̈ܐ ܟܲܕ ܡܵܠܘܿܦܹܐ. 7 ܘܩܪܹܠܹܐ ܠܬܪܸܥܣܲܪܬܹܗ: ܘܫܘܼܪܹܠܹܐ ܕܫܵܕܸܪܘܿܢ ܬܪܲܝ ܬܪܲܝ: ܘܝܘܼܗ̄ܒ̣ܵܝܠܹܐ ܗܘܼܟܡܵܐ ܥܲܠ ܪ̈ܘܼܚܹܐ ܛܲܡܹ̈ܐܐ. 8 ܘܦܘܼܩܕܵܝܠܹܐ: ܕܠܵܐ ܫܵܩܠܝܼ ܡܸܢܕܝܼ ܩܵܐ ܐܘܼܪܚܵܐ: ܫܒ̣ܘܿܩ ܡ̣ܢ ܚܘܼܛܪܵܐ ܒܢܲܦ̮ܫܹܗ: ܠܵܐ ܓ̰ܲܢܬܵܐ: ܘܠܵܐ ܢܚܵܫܵܐ 9 ܒܟܸܣܬܵܐ. ܐܸܠܵܐ ܕܠܵܒ̣ܫܝܼ ܟ̰ܵܪ̈ܘܿܚܹܐ: ܘܠܵܐ ܠܵܒ̣ܫܝܼ ܬܲܪ̈ܬܹܝ 10 ܨܘܼܕܵܪ̈ܵܬܹܐ. ܘܐܡܸܪܹܐ ܐܸܠܵܝ: ܟܠ ܐܲܝܟܵܐ ܕܐܵܘܪܝܼܬܘܿܢ ܠܒܲܝܬܵܐ: 11 ܬܵܡܵܐ ܥܲܪܩܸܠܘܿܢ ܗܲܠ ܕܦܵܠܛܝܼܬܘܿܢ ܡ̣ܢ ܬܵܡܵܐ. ܘܟܠ ܡ̇ܢ ܕܠܵܐ ܩܵܒ̇ܠܝܼ ܠܵܘܟ̣ܘܿܢ: ܘܠܵܐ ܫܲܡܥܝܼ ܠܵܘܟ̣ܘܿܢ: ܟܲܕ ܦܵܠܛܝܼܬܘܿܢ ܡ̣ܢ ܬܵܡܵܐ: ܢܦܘܿܨܘܿܢ ܬܵܘܙ ܕܬܚܘܿܬ ܐܲܩܠܵܘ̈ܟ̣ܘܿܢ 12 ܠܣܵܗܕܘܼܬܵܝ [19] . ܘܦܠܸܛܠܘܿܢ ܘܡܘܼܟܪܸܙܠܘܿܢ ܕܬܲܘܸܒܝܼ 13 ܗ̄ܘܵܘ. ܘܪܵܒܵܐ ܕܲܝܘܹ̈ܐ ܦܵܠܛܝܼ ܗ̄ܘܵܘ: ܘܡܵܫܚܝܼ ܗ̄ܘܵܘ ܒܡܸܫܚܵܐ ܪܵܒܵܐ ܡܸܪ̈ܥܝܹܐ ܘܒܵܣܡܝܼ ܗ̄ܘܵܘ ܠܗ̄ܘܿܢ. 14 ܘܫܡܸܥܠܹܐ ܗܹܪܘܿܕܸܣ ܡܲܠܟܵܐ: ܣܵܒܵܒ ܕܗ̄ܘܹܠܹܐ ܝܕܸܥܝܵܐ ܫܸܡܹܗ: ܘܐܡܸܪܹܐ: ܝܘܿܚܲܢܵܢ ܡܲܥܡܕܵܢܵܐ ܩܸܡܠܹܐ ܡ̣ܢ ܡܝܼܬܹ̈ܐ: ܘܣܵܒܵܒ 15 ܕܐܵܗܵܐ ܚܲܝ̈ܠܹܐ ܦܝܵܫܵܐ ܝܢܵܐ ܦܠܝܼܚܹܐ ܒܝܹܗ. ܐܚܹܪ̄ܢܹܐ ܐܵܡܪܝܼ ܗ̄ܘܵܘ: ܕܐܹܠܝܼܵܐ ܝܠܹܐ: ܘܐܚܹܪ̄ܢܹܐ ܐܵܡܪܝܼ: ܕܢܒ̣ܝܼܵܐ ܝܠܹܐ: ܐܲܝܟ ܚܵܕ̄ 16 ܡ̣ܢ ܢܒ̣̈ܝܹܐ. ܐܝܼܢܵܐ ܟܲܕ ܫܡܸܥܠܹܐ ܗܹܪܘܿܕܸܣ: ܐܡܸܪܹܐ: ܝܘܿܚܲܢܵܢ: ܗ̇ܘ ܕܐܵܢܵܐ ܦܪܸܡܠܝܼ ܪܹܫܹܗ: ܐܵܗܵܐ ܩܝܼܡܵܐ ܝܠܹܐ. 17 ܣܵܒܵܒ ܕܗܹܪܘܿܕܸܣ ܒܓܵܢܹܗ ܫܘܼܕܪܵܐ ܗ̄ܘܵܐ ܕܒ̣ܝܼܩܹܗ ܠܝܘܿܚܲܢܵܢ ܘܕܸܪܝܹܗ ܓܵܘ ܒܹܝܬ ܐܲܣܝܼܪܹ̈ܐ: ܒܘܼܬ ܗܹܪܘܿܕܝܼܵܐ ܒܲܟ̣ܬܵܐ ܕܦܝܼܠܝܼܦܘܿܣ ܐܵܚܘܿܢܘܼܗܝ: ܣܵܒܵܒ ܕܓܒ̣ܝܼܪܘܼܗ̇ ܗ̄ܘܵܐ. 18 ܣܵܒܵܒ ܕܐܵܡܸܪ ܗ̄ܘܵܐ ܝܘܿܚܲܢܵܢ ܠܗܹܪܘܿܕܸܣ: ܕܠܹܐ ܝܠܵܐ 19 ܒܕܲܣܬܘܼܪ ܐܸܠܘܼܟ ܕܓܵܒ̣ܪܸܬ ܒܲܟ̣ܬܵܐ ܕܐܵܚܘܿܢܘܼܟ. ܘܗ̇ܝ ܗܹܪܘܿܕܝܼܵܐ ܕܒ̣ܝܼܩܬܵܐ ܗ̄ܘܵܐ ܟܝܼܢ ܡܸܢܹܗ: ܘܒܲܥܝܵܐ ܗ̄ܘܵܐ ܠܸܩܛܵܠܹܗ: 20 ܘܠܹܐ ܡܵܨܝܵܐ ܗ̄ܘܵܐ. ܣܵܒܵܒ ܗܹܪܘܿܕܸܣ ܟܹܐ ܙܵܕܸܥ ܗ̄ܘܵܐ ܡ̣ܢ ܝܘܿܚܲܢܵܢ: ܕܟܹܐ ܝܲܕܸܥ ܗ̄ܘܵܐ ܠܹܗ ܐܢܵܫܵܐ ܙܲܕܝܼܩܵܐ ܘܩܲܕܝܼܫܵܐ: ܘܢܵܛܸܪ ܗ̄ܘܵܐ ܠܹܗ. ܘܟܲܕ ܫܲܡܸܥ ܗ̄ܘܵܐ ܠܹܗ: [20] ܪܵܒܵܐ ܥܵܒܸܕ 21 ܗ̄ܘܵܐ: ܘܒܚܲܕܘܼܬܵܐ ܟܹܐ ܫܲܡܸܥ ܗ̄ܘܵܐ ܠܹܗ. ܘܗ̄ܘܹܠܹܐ ܝܘܿܡܵܐ ܝܕܸܥܝܵܐ: ܟܲܕ ܗܹܪܘܿܕܸܣ ܒܒܹܝܬ ܝܲܠܕܹܗ ܥܒܸܕܠܹܐ ܡܸܫܬܘܼܬܵܐ ܠܓܘܼܪ̈ܵܢܘܼܗܝ: ܘܠܟܝܼܠܝܼܵܪ̈ܟܹܐ: ܘܠܪܹ̈ܫܵܢܹܐ 22 ܕܓܠܝܼܠܵܐ. ܘܐܘܸܪܵܐ ܒܪܵܬܵܗ̇ ܕܗܹܪܘܿܕܝܼܵܐ ܪܩܸܕܠܵܐ: ܘܫܦܸܪܵܐ ܠܗܹܪܘܿܕܸܣ ܘܠܵܐܢܝܼ ܕܝܼܗ̄ܘܵܘ ܝܬܝܼܒܹܐ ܠܨܘܼܦܪܵܐ ܥܲܡܹܗ: ܘܐܡܸܪܹܐ ܡܲܠܟܵܐ ܠܒܪܵܬܵܐ: ܛܠܘܿܒܝ ܡܸܢܝܼ ܡܸܢܕܝܼ ܕܒܵܣܡܵܐ 23 ܠܵܟ̣ܝ: ܘܒܸܬ ܝܵܗ̄ܒܸܢܵܟ̣ܝ. ܘܝܡܹܠܹܐ ܐܸܠܵܗ̇: ܕܡܸܢܕܝܼ ܕܛܵܠܒܲܬܝ ܡܸܢܝܼ ܒܸܬ ܝܵܗ̄ܒܸܢܵܟ̣ܝ: ܗܲܠ ܦܲܠܓܵܗ̇ ܕܡܲܠܟܘܼܬܝܼ. 24 ܐܝܼܢܵܐ ܗ̇ܝ ܦܠܸܛܠܵܐ ܘܐܡܸܪܵܐ ܠܝܸܡܘܼܟ: ܡܘܼܕܝܼ ܛܵܠܒܵܢ: 25 ܐܡܸܪܵܐ ܐܸܠܵܗ̇: ܪܹܫܹܗ ܕܝܘܿܚܲܢܵܢ ܡܲܥܡܕܵܢܵܐ. ܘܕܲܪܣܵܥܲܬ ܐܘܸܪܵܐ ܒܝܲܠܙܘܼܝ ܠܟܸܣ ܡܲܠܟܵܐ: ܘܛܠܸܒܠܵܐ: ܒܹܐܡܵܪܵܐ: ܒܲܥܝܵܢ ܒܐܵܗܵܐ ܣܵܥܲܬ ܝܵܗ̄ܒܸܬ ܠܝܼ ܥܲܠ ܛܲܫܬ ܪܹܫܹܗ ܕܝܘܿܚܲܢܵܢ ܡܲܥܡܕܵܢܵܐ. 26 ܘܦܫܸܡܠܹܐ ܡܲܠܟܵܐ ܪܵܒܵܐ: ܐܝܼܢܵܐ ܣܵܒܵܒ ܕܡܵܘܡܵܬܹ̈ܐ ܘܒܚܵܬܸܪ ܕܐܵܢܝܼ ܕܝܼܗ̄ܘܵܘ ܝܬܝܼܒܹܐ ܠܨܘܼܦܪܵܐ ܥܲܡܹܗ: ܠܵܐ ܒܣܸܡܠܵܐ ܠܹܗ 27 ܠܸܚܣܵܟ̣ܵܐ ܡܸܢܵܗ̇. ܘܕܲܪܣܵܥܲܬ ܫܘܼܕܸܪܹܐ ܡܲܠܟܵܐ ܓ̰ܲܠܵܕ: ܘܦܩܸܕܠܹܐ ܕܡܲܝܬ̄ܝܹܐ ܗ̄ܘܵܐ ܪܹܫܹܗ. ܘܐܙܸܠܹܐ ܦܪܸܡܠܹܗ ܪܹܫܹܗ 28 ܓܵܘ ܒܹܝܬ ܐܲܣܝܼܪܹ̈ܐ. ܘܡܘܼܬ̄ܝܹܠܹܐ ܪܹܫܹܗ ܒܛܲܫܬ: ܘܝܸܗܒܸܠܹܐ 29 ܠܒܪܵܬܵܐ: ܘܒܪܵܬܵܐ ܝܸܗܒܸܠܵܐ ܠܝܸܡܘܼܗ̇. ܘܫܡܸܥܠܘܿܢ ܬܲܠܡܝܼܕܘܼ̈ܗܝ: ܘܐܬܹܠܘܿܢ ܫܩܸܠܘܿܢ ܫܠܲܕܹܗ: ܘܡܘܼܬܒ̣ܵܠܘܿܢ ܓܵܘ ܒܹܝܬ ܩܒ̣ܘܼܪܵܐ. 30 ܘܓ̰ܡܸܥܠܘܿܢ ܫܠܝܼܚܹ̈ܐ ܠܟܸܣ ܝܼܫܘܿܥ: ܘܡܘܼܕܸܥܠܘܿܢ ܐܸܠܹܗ ܟܠ ܡܸܢܕܝܼ ܕܥܒܸܕܠܘܿܢ: ܘܟܠ ܡܸܢܕܝܼ ܕܡܘܼܠܸܦܠܘܿܢ. 31 ܘܐܡܸܪܹܐ: ܐܸܠܵܝ: ܬܹܡܘܿܢ ܐܵܙܵܠ̄ܚ ܠܕܘܼܟܵܐ ܚܵܪܵܒܵܐ ܒܢܲܦ̮ܫܲܢ: ܘܡܲܢܝܸܚܘܿܢ ܚܲܟ̰ܵܐ. ܣܵܒܵܒ ܐܝܼܬ ܗ̄ܘܵܘ ܪܵܒܵܐ ܒܹܐܙܵܠܵܐ ܘܒܹܐܬܵܝܵܐ: ܘܠܲܝܬ ܗ̄ܘܵܐ ܠܗ̄ܘܿܢ ܡܵܘܗܠܲܬ: ܐܘܼܦ ܠܵܐ ܠܹܐܟ̣ܵܠܵܐ. 32 ܘܐܙܸܠܘܿܢ ܠܚܕܵܐ ܕܘܼܟܵܐ ܚܵܪܵܒܵܐ ܒܓܵܡܝܼ ܒܢܲܦ̮ܫܵܝ. ܘܚܸܙܝܵܝܠܘܿܢ 33 ܟܲܕ ܒܹܐܙܵܠܵܐ: ܘܪܵܒܵܐ ܐܢܵܫܹ̈ܐ ܝܕܸܥܝܵܝܠܘܿܢ: ܘܒܒܸܪܙܵܐ ܪܚܸܛܠܘܿܢ ܠܬܵܡܵܐ ܡ̣ܢ ܟܠܵܝ ܡܕܝܼܢܵܬܹ̈ܐ: ܘܩܘܼܕܸܡܠܘܿܢ ܐܸܠܵܝ. 34 ܘܦܠܸܛܠܹܐ ܝܼܫܘܿܥ ܚܙܹܠܹܐ ܟܸܢܫܵܐ ܓܘܼܪܵܐ: ܘܪܘܼܚܸܡܠܹܐ ܥܲܠܵܝ: ܕܝܼܗ̄ܘܵܘ ܐܲܝܟ ܥܸܪ̈ܒܹܐ ܕܠܲܝܬ ܠܗ̄ܘܿܢ ܪܵܥܝܵܐ. ܘܫܘܼܪܹܠܹܐ ܠܡܵܠܘܿܦܵܝ ܪܵܒܵܐ ܡܸܢܕܝܵܢܹ̈ܐ. 35 ܘܟܲܕ ܗ̄ܘܹܠܵܐ ܥܕܵܢܵܐ ܪܵܒܵܐ: ܐܬܹܠܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ: ܘܐܵܡܪܝܼ ܐܸܠܹܗ: ܐܵܗܵܐ ܕܘܼܟܵܐ ܚܵܪܵܒܵܐ ܝܠܵܐ: 36 ܘܥܕܵܢܵܐ ܪܵܒܵܐ ܥܒ̣ܝܼܪܬܵܐ ܝܠܵܐ. ܫܵܕܸܪܘܿܢ ܕܐܵܙܠ̄ܝܼ ܠܩܸܫ̈ܠܵܓܹܐ ܕܚܵܕܸܪ̈ܘܵܢܲܢ ܘܠܡܵܬܘܵܬܹ̈ܐ: ܘܙܵܒ̣ܢܝܼ ܠܗ̄ܘܿܢ ܡܸܢܕܝܼ ܠܹܐܟ̣ܵܠܵܐ. 37 ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܗܲܒ̄ܠܘܿܢ ܠܗ̄ܘܿܢ ܐܲܚܬܘܿܢ ܠܹܐܟ̣ܵܠܵܐ. ܐܵܡܪܝܼ ܐܸܠܹܗ: ܐܵܙܵܠ̄ܚ ܙܵܒ̣ܢܵܚ ܠܲܚܡܵܐ ܕܬܪܲܝܡܵܐܐ 38 ܕܹܝܢܵܪܹ̈ܐ ܘܝܵܗ̄ܒ̣ܵܝܝ ܠܗ̄ܘܿܢ ܠܹܐܟ̣ܵܠܵܐ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܟܡܵܐ ܠܲܚܡܹ̈ܐ ܐܝܼܬ ܠܵܘܟ̣ܘܿܢ: ܙܹܠ̄ܡܘܿܢ ܚܙܹܡܘܿܢ. ܘܟܲܕ ܝܕܸܥܠܘܿܢ: ܐܵܡܪܝܼ ܐܸܠܹܗ: ܚܡܫܵܐ: ܘܬܪܲܝ ܢܘܼܢܹ̈ܐ. 39 ܘܦܩܝܼܕܵܝܠܹܐ ܕܡܲܬܝܸܒ̣ܝܼ ܗ̄ܘܵܘ ܠܟܠܵܝ ܐܢܵܫܹ̈ܐ ܕܲܣܬܹ̈ܐ ܕܲܣܬܹ̈ܐ: 40 ܥܲܠ ܓܸܠܵܐ ܩܝܼܢܵܐ. ܘܝܬܸܒ̣ܠܘܿܢ ܕܲܣܬܹ̈ܐ ܕܲܣܬܹ̈ܐ: ܕܡܵܐܐ 41 ܡܵܐܐ: ܘܕܚܲܡܫܝܼ ܘܫܩܸܠܹܐ ܠܐܵܢܝܼ ܚܲܡܫܵܐ ܠܲܚܡܹ̈ܐ ܘܬܪܲܝ ܢܘܼܢܹ̈ܐ: ܘܚܸܪܹܐ ܒܫܡܲܝܵܐ: ܘܒܘܼܪܸܟ̣ܠܹܐ ܘܩܨܹܠܹܐ ܠܲܚܡܹ̈ܐ: ܘܝܸܗܒܸܠܹܐ ܠܬܲܠܡܝܼܕܘܼ̈ܗܝ ܕܡܲܬܒ̣ܝܼ ܩܵܕ̄ܡܵܝ: ܘܠܐܵܢܝܼ ܬܪܲܝ 42 ܢܘܼܢܹ̈ܐ ܦܘܼܠܹܠܘܿܢ ܠܟܠܵܝ. ܘܐܟܸܠܘܿܢ ܟܠܵܝ ܘܣܒܸܥܠܘܿܢ. 43 ܘܫܩܸܠܘܿܢ ܩܸܛܥܵܛܹ̈ܐ: ܬܪܸܥܣܲܪ ܩܘܼܦܹ̈ܐ ܡܸܠܝܹ̈ܐ: ܘܡ̣ܢ ܢܘܼܢܹ̈ܐ. 44 ܐܝܼܢܵܐ ܐܵܢܝܼ ܕܐܟܸܠܘܿܢ ܠܲܚܡܵܐ ܝܼܗ̄ܘܵܘ ܚܲܡܫܵܐ ܐܲܠܦܹ̈ܐ ܐܢܵܫܹ̈ܐ. 45 ܘܕܲܪܣܵܥܲܬ ܡܘܼܠܝܸܨܠܹܐ ܠܬܲܠܡܝܼܕܘܼ̈ܗܝ ܕܐܵܣܩܝܼ ܠܓܵܡܝܼ: ܘܐܵܙܠ̄ܝܼ ܩܵܕ̄ܡܘܼܗܝ ܠܡܲܪܙܵܐ ܐܚܹܪ̄ܢܵܐ ܠܒܹܝܬ ܨܲܝܵܕܵܐ: ܗܲܠ 46 ܕܗ̇ܘ ܫܵܕܸܪ ܗ̄ܘܵܐ ܠܟܸܢܫܵܐ. ܘܟܲܕ ܫܒ̣ܝܼܩܵܝܠܹܐ: ܐܙܸܠܹܐ 47 ܠܛܘܼܪܵܐ ܠܨܵܠܘܿܝܹܐ. ܐܝܼܢܵܐ ܟܲܕ ܗ̄ܘܹܠܹܐ ܪܲܡܫܵܐ: ܓܵܡܝܼ ܒܒܹܝܦܲܠܓܵܐ ܕܝܵܡܵܐ ܗ̄ܘܵܐ: ܘܗ̇ܘ ܒܢܲܦ̮ܫܹܗ ܥܲܠ ܐܲܪܥܵܐ. 48 ܘܚܸܙܝܵܝܠܹܐ ܥܘܼܓ̰ܸܙܹ̈ܐ ܟܲܕ ܒܸܛܪܵܝܵܐ: ܣܵܒܵܒ ܕܦܵܘܚܵܐ ܠܒܲܪܩܘܼܒ̣ܠܵܝ ܗ̄ܘܵܐ: ܘܐܲܝܟ ܒܒܲܕܠܵܐ ܕܐܲܪܒܲܥ ܕܠܲܝܠܹܐ ܐܬܹܠܹܐ ܠܟܸܣܠܵܝ: ܟܲܕ ܒܸܚܕܵܪܵܐ ܥܲܠ ܝܵܡܵܐ: ܘܒܲܥܝܹܐ ܕܥܵܒܸܪ ܗ̄ܘܵܐ 49 ܠܗ̄ܘܿܢ. ܘܐܵܢܝܼ ܚܙܹܠܘܿܢ ܐܸܠܹܗ ܒܸܚܕܵܪܵܐ ܥܲܠ ܝܵܡܵܐ: ܘܚܫܸܒ̣ܠܘܿܢ 50 ܕܚܸܙܘܵܐ ܕܵܓܵܠܵܐ ܝܠܹܐ: ܘܡܘܼܩܘܸܚܠܘܿܢ. ܣܵܒܵܒ ܟܠܵܝ ܚܙܹܠܘܿܢ ܐܸܠܹܗ ܘܙܕܸܥܠܘܿܢ. ܘܕܲܪܣܵܥܲܬ ܗܘܼܡܙܸܡܠܹܐ ܥܲܡܵܝ: ܘܐܡܸܪܹܐ ܐܸܠܵܝ: ܦܘܼܫܘܿܢ ܠܸܒܵܢܹ̈ܐ: ܐܵܢܵܐ ܝܘܸܢ: ܠܵܐ ܙܵܕܥܝܼܬܘܿܢ. 51 ܘܐܣܸܩܠܹܐ ܠܟܸܣܠܵܝ ܠܓܵܡܝܼ: ܘܫܠܹܠܹܐ ܦܵܘܚܵܐ. ܘܪܵܒܵܐ 52 ܥܵܓ̰ܒܝܼ ܗ̄ܘܵܘ ܒܓܵܢܵܝ. ܣܵܒܵܒ ܠܹܐ ܗ̄ܘܵܘ ܦܘܼܪܡܝܹܐ ܡܐܵܢܝܼ ܠܲܚܡܹ̈ܐ: ܣܵܒܵܒ ܕܠܸܒܵܝ ܚܠܥܝܼܡܵܐ ܗ̄ܘܵܐ. 53 ܘܟܲܕ ܥܒܸܪܘܿܢ ܠܡܲܪܙܵܐ ܐܚܹܪ̄ܢܵܐ: ܐܬܹܠܘܿܢ ܠܐܲܪܥܵܐ 54 ܕܓܹܢܣܲܪ: ܘܓܪܸܫܠܘܿܢ ܠܒܸܪܙܵܐ. ܘܟܲܕ ܦܠܸܛܠܘܿܢ ܡ̣ܢ 55 ܓܵܡܝܼ: ܕܲܪܣܵܥܲܬ ܝܕܸܥܠܘܿܢ ܐܸܠܹܗ. ܘܪܚܸܛܠܘܿܢ ܒܟܠܹܗ ܗ̇ܘ ܐܲܬܪܵܐ ܚܵܕܸܪ̈ܘܵܢܹܐ: ܘܫܘܼܪܹܠܘܿܢ [21] ܠܡܵܐܘܹܐ ܥܲܠ ܫܘܝܼܵܬܹ̈ܐ ܠܐܵܢܝܼ ܕܡܸܪܥܝܹܐ ܗ̄ܘܵܘ: ܠܐܲܝܟܵܐ ܕܫܲܡܥܝܼ ܗ̄ܘܵܘ ܕܝܼܗ̄ܘܵܐ. 56 ܘܐܲܝܟܵܐ ܕܐܵܘܸܪ: ܗ̄ܘܵܐ: ܓܵܘ ܡܵܬܘܵܬܹ̈ܐ ܝܲܢ ܓܵܘ ܡܕܝܼܢܵܬܹ̈ܐ: ܝܲܢ ܓܵܘ ܩܸܫ̈ܠܵܓܹܐ: ܓܵܘ ܫܘܼܩܹ̈ܐ ܟܹܐ ܡܲܬܒ̣ܝܼ ܗ̄ܘܵܘ ܡܸܪ̈ܥܝܹܐ: ܘܦܲܪܦܸܠܝܼ ܗ̄ܘܵܘ ܒܝܹܗ: ܕܐܸܢ ܐܘܼܦ ܒܫܸܦܘܼܠܵܐ ܕܠܒܸܫܬܹܗ ܕܵܩܪܝܼ ܗ̄ܘܵܘ. ܘܟܠܵܝ ܐܵܢܝܼ ܕܕܩܸܪܘܿܢ ܒܝܹܗ ܦܸܫܠܘܿܢ ܒܘܼܣܡܹܐ.

ܩܦܠܐܘܢ: ܙ

1 ܘܓ̰ܡܸܥܠܘܿܢ ܠܟܸܣܠܹܗ ܦܪ̈ܝܼܫܹܐ ܘܚܲܟܡܵܐ ܡ̣ܢ ܣܵܦܪܹ̈ܐ 2 ܕܐܬܹܠܘܿܢ ܡ̣ܢ ܐܘܿܪܸܫܠܸܡ. ܘܚܙܹܠܘܿܢ ܐܢܵܫܹ̈ܐ ܡ̣ܢ ܬܲܠܡܝܼܕܘܼ̈ܗܝ ܕܒܹܐܟ̣ܵܠܵܐ ܠܲܚܡܵܐ ܒܐܝܼܕܵܬܹ̈ܐ ܛܲܡܹ̈ܐܐ: ܝܲܥܢܹܐ: ܠܵܐ ܚܘܼܠܸܠܹ̈ܐ. 3 ܣܵܒܵܒ ܦܪ̈ܝܼܫܹܐ ܘܟܠܵܝ ܝܗ̄ܘܼܕܵܝܹ̈ܐ: ܐܸܢ ܒܚܲܡܚܘܵܪܘܼܬܵܐ ܠܵܐ ܚܲܠܸܠܝܼ ܐܝܼܕܵܬܵܝ̈: ܠܹܐ ܐܵܟ̣ܠܝܼ: ܒܸܕܒ̣ܵܩܵܐ ܠܣܵܦܝܵܢܘܼܬܵܐ 4 ܕܚܘܵܪ̈ܕܸܩܢܹܐ. ܘܡܢ ܫܘܼܩܵܐ: ܐܸܢ ܠܵܐ ܚܲܠܸܠܝܼ: ܠܹܐ ܐܵܟ̣ܠܝܼ ܘܐܝܼܬ ܪܵܒܵܐ ܡܸܢܕܝܵܢܹ̈ܐ ܐܚܹܪ̄ܢܹܐ: ܐܵܢܝܼ ܕܩܘܼܒܸܠܘܿܢ ܕܢܵܛܪܝܼ: ܚܲܠܲܠܝܵܬܹ̈ܐ ܕܟܵܣܹ̈ܐ ܘܒܵܕ̈ܝܹܐ ܘܡܵܐܢܹ̈ܐ ܕܢܚܵܫܵܐ: ܘܨܘܼܦܪܹ̈ܐ. 5 ܘܒܘܼܩܸܪܘܿܢ ܡܸܢܹܗ ܣܵܦܪܹ̈ܐ ܘܦܪ̈ܝܼܫܹܐ: ܩܵܡܘܿܕܝܼ ܬܲܠܡܝܼܕܘܼ̈ܟ ܠܹܐ ܝܢܵܐ ܒܸܚܕܵܪܵܐ ܐܲܝܟ ܣܵܦܝܵܢܘܼܬܵܐ ܕܚܘܵܪ̈ܕܸܩܢܹܐ: ܐܸܠܵܐ ܟܲܕ ܠܵܐ 6 ܚܘܼܠܸܠܹ̈ܐ ܐܝܼܕܵܬܵܝ̈ ܒܹܐܟ̣ܵܠܵܐ ܝܢܵܐ ܠܲܚܡܵܐ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܨܦܵܝܝܼ ܢܘܼܒܸܠܹܐ ܥܲܠܵܘܟ̣ܘܿܢ ܐܹܫܲܥܝܵܐ: ܢܵܣܒܲܝ̈ ܒܐܲܦܹ̈ܐ: ܐܲܝܟ ܕܝܼܠܹܐ ܟܬܝܼܒ̣ܵܐ: ܕܐܵܗܵܐ ܛܵܝܦܵܐ ܒܣܸܦܘܵܬܹ̈ܗ ܟܹܐ ܥܵܒܸܕ ܐܝܼܩܵܪܵܐ 7 ܐܸܠܝܼ: ܐܝܼܢܵܐ ܠܸܒܵܝ ܪܵܒܵܐ ܪܸܚܩܵܐ ܝܠܹܐ ܡܸܢܝܼ. ܘܒܒܵܛܝܼܠܘܼܬܵܐ ܟܹܐ ܣܵܓ̣ܕܝܼ ܐܸܠܝܼ: ܟܲܕ ܡܵܠܘܿܦܹܐ ܝܘܼܠܦܵܢܹ̈ܐ: ܦܘܼܩܕܵܢܹ̈ܐ 8 ܕܒܢܲܝ̈ܢܵܫܵܐ. ܫܒܸܩܠܵܘܟ̣ܘܿܢ ܦܘܼܩܕܵܢܵܐ ܕܐܲܠܵܗܵܐ: ܘܕܒ̣ܝܼܩܹܐ 9 ܝܬܘܿܢ ܣܵܦܝܵܢܘܼܬܵܐ ܕܒܢܲܝ̈ܢܵܫܵܐ. ܐܵܡܸܪ ܐܸܠܵܝ: ܨܦܵܝܝܼ ܟܹܐ ܒܵܛܠܝܼܬܘܿܢ ܠܦܘܼܩܕܵܢܵܐ ܕܐܲܠܵܗܵܐ: ܕܢܵܛܪܝܼܬܘܿܢ 10 ܠܣܵܦܝܵܢܘܼܬܵܘܟ̣ܘܿܢ. ܣܵܒܵܒ ܡܘܼܫܹܐ ܐܡܸܪܹܐ: ܥܒ̣ܘܿܕ ܐܝܼܩܵܪܵܐ ܠܒܵܒܘܼܟ ܘܠܝܸܡܘܼܟ: ܘܡ̇ܢ ܕܨܵܥܸܪ ܠܒܵܒܵܐ ܝܲܢ ܠܝܸܡܵܐ: ܡܵܘܬܵܐ 11 ܡܵܝܸܬ. ܐܝܼܢܵܐ ܐܲܚܬܘܿܢ ܟܹܐ ܐܵܡܪܝܼܬܘܿܢ: ܐܸܢ ܐܢܵܫܵܐ ܐܵܡܸܪ ܠܒܵܒܹܗ ܝܲܢ ܠܝܸܡܹܗ: ܩܘܼܪܒܵܢ: ܝܲܥܢܹܐ: ܢܸܕܪܵܐ: ܡܸܢܕܝܼ ܕܡܸܢܝܼ 12 ܙܵܝܕܸܬ ܗ̄ܘܵܐ. ܐܚܹܪ̄ܢܵܐ ܠܹܐ ܝܬܘܿܢ ܒܸܫܒ̣ܵܩܵܐ ܐܸܠܹܗ ܕܥܵܒܸܕ 13 ܡܸܢܕܝܼ ܩܵܐ ܒܵܒܹܗ ܝܲܢ ܝܸܡܹܗ. ܘܒܵܛܘܿܠܹܐ ܝܬܘܿܢ ܠܗܹܡܸܙܡܵܢ ܕܐܲܠܵܗܵܐ ܒܣܵܦܝܵܢܘܼܬܵܘܟ̣ܘܿܢ ܕܣܘܼܦܹܠܵܘܟ̣ܘܿܢ. ܘܪܵܒܵܐ ܡܸܢܕܝܵܢܹ̈ܐ ܕܟܹܐ ܕܵܡܝܼ ܠܐܲܢܹܐ ܟܹܐ ܥܵܒ̣ܕܝܼܬܘܿܢ. 14 ܘܩܪܹܠܹܐ ܝܼܫܘܿܥ ܠܟܠܹܗ ܟܸܢܫܵܐ ܘܐܡܸܪܹܐ ܐܸܠܵܝ: ܫܡܸܥܡܘܿܢ 15 ܐܸܠܝܼ ܟܠܵܘܟ̣ܘܿܢ: ܘܦܲܪܡܹܡܘܿܢ. ܠܲܝܬ ܡܸܢܕܝܼ ܕܠܒܲܕܲܪ ܡ̣ܢ ܒܲܪܢܵܫܵܐ ܝܠܹܐ: ܘܐܵܘܸܪ ܓܵܘܹܗ ܡܵܨܹܐ ܡܛܲܡܹܐܐ ܠܹܗ: ܐܸܠܵܐ ܡܸܢܕܝܼ 16 ܕܦܵܠܸܛ ܡܸܢܹܗ: ܗ̇ܘ ܝܼܠܹܐ ܕܟܹܐ ܡܛܲܡܹܐܐ ܠܒܲܪܢܵܫܵܐ. ܡ̇ܢ 17 ܕܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ: ܫܲܡܸܥ. ܘܟܲܕ ܐܘܸܪܹܐ ܠܒܲܝܬܵܐ ܡ̣ܢ ܟܸܢܫܵܐ: ܒܘܼܩܸܪܘܿܢ ܡܸܢܹܗ ܬܲܠܡܝܼܕܘܼ̈ܗܝ ܥܲܠ ܡܵܣܵܠܵܐ. 18 ܘܐܵܡܸܪ ܐܸܠܵܝ: ܗܲܕܟ̣ܵܐ ܐܘܼܦ ܐܲܚܬܘܿܢ ܕܠܵܐ ܦܲܪܡܵܝܬܵܐ ܝܬܘܿܢ: ܠܹܐ ܝܬܘܿܢ ܒܝܼܕܲܥܝܵܐ ܕܟܠ ܡܸܢܕܝܼ ܕܡ̣ܢ ܠܒܲܕܲܪ ܐܵܘܸܪ ܓܵܘ 19 ܒܲܪܢܵܫܵܐ: ܠܹܐ ܡܵܨܹܐ ܕܡܛܲܡܹܐܐ ܠܹܗ. ܣܵܒܵܒ ܕܠܹܐ ܝܠܹܐ ܓܵܘ ܠܸܒܹܗ ܒܹܐܘܵܪܵܐ: ܐܸܠܵܐ ܓܵܘ ܟܹܪ̄ܣܹܗ: ܘܟܹܐ ܦܵܠܸܛ ܠܕܵܟ̣ܵܝܬܵܐ: [22] ( ܐܵܗܵܐ ܐܡܸܪܹܐ) ܒܸܥܒ̣ܵܕܵܐ ܕܟ̣ܝܼܬܵܐ ܟܠܵܗ̇ ܡܹܐܟ̣ܘܼܠܬܵܐ. 20 ܘܐܡܸܪܹܐ: ܡܸܢܕܝܼ ܕܦܵܠܸܛ ܡ̣ܢ ܒܲܪܢܵܫܵܐ: ܗ̇ܘ ܟܹܐ ܡܛܲܡܹܐܐ 21 ܠܒܲܪܢܵܫܵܐ. ܣܵܒܵܒ ܡ̣ܢ ܠܓܵܘܵܝܝܼ: ܡ̣ܢ ܠܸܒܵܐ ܕܒܢܲܝ̈ܢܵܫܵܐ: ܟܹܐ ܦܵܠܛܝܼ ܚܘܼܫܵܒܹ̈ܐ ܒܝܼܫܹ̈ܐ: ܩܲܗܒܘܼܝܵܬܵܐ: ܙܵܢܝܘܼ̈ܝܵܬܵܐ: ܓܹܢܵܒ̣ܘܼ̈ܝܵܬܵܐ: 22 ܩܸܛܠܹ̈ܐ. ܛܲܡܲܥܟܵܪ̈ܘܼܝܵܬܵܐ: ܒܝܼܫܘܼ̈ܝܵܬܵܐ: ܥܲܠܕܵܝܬܵܐ: ܠܵܘܬܝܼܘܼܬܵܐ: 23 ܥܲܝܢܵܐ ܒܝܼܫܬܵܐ: ܓܘܼܕܵܦܵܐ: ܫܲܒ̣ܗܪܵܢܘܼܬܵܐ: ܐܲܗܡܲܩܘܼܬܵܐ. ܐܲܢܹܐ ܒܝܼܫܵܬܹ̈ܐ ܟܠܵܝ ܡ̣ܢ ܠܓܵܘܝܝܼ ܟܹܐ ܦܵܠܛܝܼ: ܘܟܹܐ ܡܛܲܡܐܝܼ ܠܒܪܢܵܫܵܐ. 24 ܡ̣ܢ ܬܵܡܵܐ ܩܸܡܠܹܐ: ܘܦܠܸܛܠܹܐ ܠܬܸܚܘܼܒ̣ ܕܨܘܿܪ ܘܕܨܲܝܕܘܿܢ. ܘܐܘܸܪܹܐ ܠܚܵܕ̄ ܒܝܬܵܐ: ܘܠܹܐ ܒܲܥܝܹܐ ܗ̄ܘܵܐ ܕܐܢܵܫܵܐ ܝܲܕܸܥ: ܘܠܵܐ 25 ܡܨܹܠܹܐ ܕܛܵܫܹܐ ܗ̄ܘܵܐ. ܣܵܒܵܒ ܕܕܲܪܣܵܥܲܬ ܫܡܸܥܠܹܐ ܚܕܵܐ ܒܲܟ̣ܬܵܐ ܒܵܗܣܹܗ: ܕܐܝܼܬ ܗ̄ܘܵܐ ܠܒܪܵܬܘܼܗ̇ ܙܥܘܿܪܬܵܐ ܪܘܼܚܵܐ 26 ܛܲܡܹܐܐ: ܘܐܬܹܠܹܐ ܢܦܸܠܵܐ ܩܵܕ̄ܡ ܐܲܩܠܘܼ̈ܗܝ. ܐܝܼܢܵܐ ܗ̇ܝ ܒܲܟ̣ܬܵܐ [23] ܚܲܢܦܬܵܐ ܗ̄ܘܵܐ: ܒܡܸܠܲܬ ܦܹܘܢܝܼܩܵܝܬܵܐ ܕܣܘܼܪܝܼܵܐ: ܘܦܲܪܦܸܠܵܐ 27 ܗ̄ܘܵܐ ܒܝܹܗ ܕܦܵܠܸܛ ܠܕܲܝܘܵܐ ܡ̣ܢ ܒܪܵܬܘܼܗ̇. ܘܐܡܸܪܹܐ ܐܸܠܵܗ̇: ܫܒ̣ܘܿܩܝ ܩܵܕ̄ܡܵܝܬܵܐ ܣܲܒ̣ܥܝܼ ܒܢܘܼܢܹ̈ܐ: ܣܵܒܵܒ ܠܹܐ ܝܠܵܐ 28 ܨܦܵܝܝ ܕܫܵܩܠܵܚ ܠܲܚܡܵܐ ܕܒܢܘܼܢܹ̈ܐ ܘܕܵܪܵܚ ܠܟܲܠܒܹ̈ܐ. ܐܝܼܢܵܐ ܗ̇ܝ ܓ̰ܘܼܘܸܒܠܵܐ ܘܐܵܡܪܵܐ ܐܸܠܹܗ: ܗܹܐ: ܡܵܪܝܼ: ܐܘܼܦ ܟܲܠܒܹ̈ܐ ܡ̣ܢ 29 ܬܚܘܿܬ ܨܘܼܦܪܹ̈ܐ ܟܹܐ ܐܵܟ̣ܠܝܼ ܦܸܪ̈ܬܘܼܚܹܐ ܕܒܢܘܼܢܹ̈ܐ. ܐܵܡܸܪ ܐܸܠܵܗ̇: ܙܹܠ̄ܐܝ: ܣܵܒܵܒ ܕܐܵܗܵܐ ܗܹܡܸܙܡܵܢ: ܦܠܸܛܠܹܐ ܕܲܝܘܵܐ ܡ̣ܢ 30 ܒܪܵܬܵܟ̣ܝ. ܘܐܙܸܠܵܐ ܠܒܲܝܬܘܼܗ̇: ܘܡܘܼܫ̄ܟ̰ܸܚܠܵܐ ܠܒܪܵܬܘܼܗ̇ ܢܦܝܼܠܬܐ ܒܫܘܝܼܬܵܐ: ܘܦܠܝܼܛܐ ܡܸܢܵܗ̇ ܕܲܝܘܵܐ. 31 ܡܸܕܪܹܐ ܦܠܸܛܠܹܐ ܡ̣ܢ ܬܸܚܘܼܒ̣ ܕܨܘܿܪ: ܘܐܬܹܠܹܐ ܡ̣ܢ ܓܵܘ ܨܝܕܘܿܢ ܠܝܵܡܵܐ ܕܓܠܝܼܠܵܐ: ܡ̣ܢ ܠܵܘܵܐ ܕܬܸܚܘܼܒܹ̈ܐ ܕܥܸܣܪܲܬ 32 ܡܕܝܼ̈ܢܵܬܵܐ. ܘܡܘܼܬ̄ܝܹܠܘܿܢ ܠܟܸܣܠܹܗ ܚܵܕ̄ ܟܲܪܵܐ ܦܸܠܬܸܟ: ܘܦܲܪܦܸܠܝܼ ܗ̄ܘܵܘ ܒܝܹܗ ܕܡܲܬܸܒ̣ ܗ̄ܘܵܐ ܥܲܠܘܼܗܝ ܐܝܼܕܵܐ. 33 ܘܓܪܸܫܠܹܗ ܡ̣ܢ ܟܸܢܫܵܐ ܒܢܲܦ̮ܫܹܗ: ܘܡܚܹܠܹܐ ܨܸܒܥܵܬܹ̈ܗ 34 ܒܢܵܬܝܵܬܘܼ̈ܗܝ: ܘܪܸܩܠܹܐ: ܘܕܩܸܪܹܐ ܒܠܸܫܵܢܹܗ. ܘܚܸܪܹܐ ܒܫܡܲܝܵܐ ܘܬܘܼܢܸܚܠܹܐ: ܘܐܡܸܪܹܐ ܐܸܠܹܗ: ܐܸܬ̣ܦܲܬܲܚ: ܝܲܥܢܹܐ: ܦܘܼܫ 35 ܦܬܝܚܵܐ. ܘܦܸܫܠܘܿܢ ܦܬܝܼܚܹܐ ܢܵܬܝܵܬܘܼ̈ܗܝ: ܘܦܸܫܠܹܐ ܫܸܪܝܵܐ 36 ܝܸܣܘܼܪܵܐ ܕܠܸܫܵܢܹܗ: ܘܗܘܼܡܙܸܡܠܹܐ ܒܨܸܦܝܘܼܬܵܐ. ܘܦܩܸܕܠܹܐ ܕܠܐܢܵܫܵܐ ܠܵܐ ܐܵܡܪܝܼ ܗ̄ܘܵܘ. ܘܟܡܵܐ ܕܗ̇ܘ ܦܩܝܼܕܵܝܠܹܐ ܐܵܢܝܼ 37 ܒܘܼܫ ܙܵܘܕܵܐ ܡܲܟܪܸܙܝܼ ܗ̄ܘܵܘ. ܘܙܵܘܕܵܐ ܙܵܘܕܵܐ ܥܵܓ̰ܸܒܝܼ ܗ̄ܘܵܘ: ܘܐܵܡܪܝܼ: ܕܟܠ ܡܸܢܕܝܼ ܨܦܵܝܝܼ ܥܒ̣ܝܼܕܵܐ ܝܠܹܐ: ܐܘܼܦ ܠܟܲܪܹ̈ܐ ܟܹܐ ܥܵܒܸܕ ܕܫܲܡܥܝܼ: ܘܠܵܐܢܝܼ ܕܠܹܐ ܗܲܡܙܸܡܝܼ ܕܗܲܡܙܸܡܝܼ.

ܩܦܠܐܘܢ: ܚ

1 ܘܒܵܐܢܝܼ ܝܘܿܡܵܢܹ̈ܐ: ܟܲܕ ܡܸܕܪܹܐ ܟܸܢܫܵܐ ܪܵܒܵܐ ܐܝܼܬ ܗ̄ܘܵܘ: ܘܠܲܝܬ ܗ̄ܘܵܐ ܡܸܢܕܝܼ ܕܐܵܟ̣ܠܝܼ: ܩܪܹܠܹܐ ܠܬܲܠܡܝܼܕܘܼ̈ܗܝ 2 ܘܐܡܸܪܹܐ ܐܸܠܵܝ. ܪܵܚܘܿܡܹܐ ܝܘܸܢ ܥܲܠ ܕܐܵܗܵܐ ܟܸܢܫܵܐ: ܕܐܵܕܝܼܵܐ ܬܠܵܬ̄ܐ ܝܘܿܡܵܢܹ̈ܐ ܥܘܼܪܩܸܠܘܿܢ ܠܟܸܣܠܝܼ: ܘܠܲܝܬ ܠܗ̄ܘܿܢ 3 ܡܸܢܕܝܼ ܕܐܵܟ̣ܠܝܼ. ܘܐܸܢ ܫܵܕܪܸܢܘܿܢ ܟܲܕ ܨܝܼܡܹܐ ܠܒܵܬܵܝ̈: ܒܸܬ ܟܵܟ̰ܵܚܝܼ ܒܐܘܼܪܚܵܐ: ܘܐܢܵܫܹ̈ܐ ܡܸܢܵܝ ܡ̣ܢ ܪܸܚܩܵܐ ܐܬܝܹܐ ܝܢܵܐ. 4 ܘܓ̰ܘܼܘܸܒܠܘܿܢ ܐܸܠܹܗ ܬܲܠܡܝܼܕܘܼ̈ܗܝ: ܡܐܲܝܟܵܐ ܡܵܨܹܐ ܐܢܵܫܵܐ 5 ܠܲܐܟ̣ܵܐ ܓܵܘ ܒܲܪܝܼܵܐ ܡܲܣܒܸܥ ܒܠܲܚܡܵܐ ܠܐܲܢܹܐ. ܘܗ̇ܘ ܒܘܼܩܸܪܹܐ ܡܸܢܵܝ: ܟܡܵܐ ܠܲܚܡܹ̈ܐ ܐܝܼܬ ܠܵܘܟ̣ܘܿܢ: ܐܵܡܪܝܼ 6 ܐܸܠܹܗ: ܫܲܒ̣ܥܵܐ. ܘܦܘܼܩܸܕܠܹܐ ܠܟܸܢܫܹ̈ܐ ܠܸܬܝܵܒ̣ܵܐ ܥܲܠ ܐܲܪܥܵܐ. ܘܫܒܸܩܠܹܐ ܠܐܵܢܝܼ ܫܲܒ̣ܥܵܐ ܠܲܚܡܹ̈ܐ: ܘܒܘܼܪܸܟ̣ܠܹܐ: ܘܩܨܹܠܹܐ ܘܝܸܗܒܸܠܹܐ ܠܬܲܠܡܝܼܕܘܼ̈ܗܝ ܕܡܲܬܒ̣ܝܼ ܗ̄ܘܵܘ. ܘܡܘܼܬܸܒ̣ܠܘܿܢ 7 ܠܟܸܢܫܵܐ. ܘܐܝܼܬ ܗ̄ܘܵܘ ܚܲܟ̰ܵܐ ܢܘܼܢܹ̈ܐ ܕܲܝܩܹ̈ܐ: ܘܒܘܼܪܟ̣ܵܝܠܹܐ: 8 ܘܐܡܸܪܹܐ ܕܡܲܬܒ̣ܝܼ ܐܘܼܦ ܠܐܵܢܝܼ. ܘܐܟܸܠܘܿܢ ܘܣܒܸܥܠܘܿܢ: 9 ܘܫܒܸܩܠܘܿܢ ܙܝܼܘܼܕܹ̈ܐ ܕܩܸܛܥܵܛܹ̈ܐ ܫܲܒ̣ܥܵܐ ܣܵܠܹ̈ܐ. ܘܐܵܢܝܼ ܕܐܟܸܠܘܿܢ ܝܼܗ̄ܘܵܘ ܐܲܝܟ ܐܲܪܒܥܵܐ ܐܲܠܦܹ̈ܐ: ܘܫܘܼܕܪܵܝܠܹܐ. 10 ܘܐܣܸܩܠܹܐ ܕܲܪܣܵܥܲܬ ܠܓܵܡܝܼ ܥܲܡ ܬܲܠܡܝܼܕܘܼ̈ܗܝ: ܘܐܬܹܠܹܐ ܠܬܸܚܘܼܒܹ̈ܐ ܕܕܲܠܡܵܢܘܼܬܵܐ. 11 ܘܦܠܸܛܠܘܿܢ ܦܪ̈ܝܼܫܹܐ ܘܫܘܼܪܹܠܘܿܢ ܠܸܕܪܵܫܵܐ ܥܲܡܹܗ: ܘܛܵܠܒܝܼ ܗ̄ܘܵܘ ܡܸܢܹܗ ܢܝܼܫܲܢܩܵܐ ܡ̣ܢ ܫܡܲܝܵܐ: ܟܲܕ ܓ̰ܵܪܘܿܒܹܗ. 12 ܘܬܘܼܢܸܚܠܹܐ ܒܪܘܼܚܹܗ ܘܐܡܸܪܹܐ: ܩܵܡܘܿܕܝܼ ܒܸܒܲܥܝܵܐ ܝܠܵܐ ܢܝܼܫܲܢܩܵܐ ܐܵܗܵܐ ܐܘܼܓ̰ܵܓ̣: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܦܵܝܸܫ 13 ܝܘܼܗ̄ܒ̣ܵܐ ܢܝܼܫܲܢܩܵܐ ܠܐܵܗܵܐ ܐܘܼܓ̰ܵܓ̣: ܘܫܒ̣ܝܼܩܵܝܠܹܐ: ܘܐܣܸܩܠܹܐ ܡܸܕܪܹܐ ܠܓܵܡܝܼ: ܘܐܙܸܠܹܐ ܠܡܲܪܙܵܐ ܐܚܹܪ̄ܢܵܐ. 14 ܘܢܫܹܠܘܿܢ ܕܫܵܩܠܝܼ ܗ̄ܘܵܘ ܠܲܚܡܵܐ: ܘܫܒ̣ܘܿܩ ܡ̣ܢ ܚܕܵܐ 15 ܓܸܪܕܲܝܵܐ ܠܲܝܬ ܗ̄ܘܵܐ ܥܲܡܵܝ ܓܵܘ ܓܵܡܝܼ. ܘܦܩܝܼܕܵܝܠܹܐ ܘܐܡܸܪܹܐ ܐܸܠܵܝ: ܚܙܹܡܘܿܢ: ܗ̄ܘܹܡܘܿܢ ܗܸܫܝܵܪ ܡ̣ܢ ܚܡܝܼܪܵܐ 16 ܕܦܪ̈ܝܼܫܹܐ: ܘܡ̣ܢ ܚܡܝܼܪܹܗ ܕܗܹܪܘܿܕܸܣ. ܘܒܸܚܫܵܒ̣ܵܐ ܗ̄ܘܵܘ ܚܵܕ̄ 17 ܥܲܡ ܕܗ̇ܘ ܐܚܹܪ̄ܢܵܐ: ܒܹܐܡܵܪܵܐ: ܕܠܲܚܡܵܐ ܠܲܝܬ ܠܲܢ. ܐܝܼܢܵܐ ܝܼܫܘܿܥ ܝܕܸܥܠܹܐ: ܘܐܡܸܪܹܐ ܐܸܠܵܝ: ܩܵܡܘܿܕܝܼ ܒܸܚܫܵܒ̣ܵܐ ܝܬܘܿܢ ܕܠܲܚܡܵܐ ܠܲܝܬ ܠܵܘܟ̣ܘܿܢ: ܗܲܠ ܐܵܕܝܼܵܐ ܠܹܐ ܝܬܘܿܢ ܒܝܼܕܲܥܝܵܐ: ܘܠܹܐ ܝܬܘܿܢ ܦܲܪܡܘܼܝܹܐ: ܗܹܫ ܠܸܒܵܐ ܩܸܫܝܵܐ ܐܝܼܬ ܠܵܘܟ̣ܘܿܢ. 18 ܥܲܝܢܹ̈ܐ ܐܝܼܬ ܠܵܘܟ̣ܘܿܢ: ܘܠܹܐ ܝܬܘܿܢ ܒܸܚܙܵܝܵܐ: ܘܢܵܬܝܵܬܹ̈ܐ ܐܝܼܬ ܠܵܘܟ̣ܘܿܢ: ܘܠܹܐ ܝܬܘܿܢ ܒܸܫܡܲܥܝܵܐ: ܘܠܹܐ ܝܬܘܿܢ ܒܸܕܟ̣ܵܪܵܐ. 19 ܟܲܕ ܐܵܢܝܼ ܚܲܡܫܵܐ ܠܲܚܡܹ̈ܐ ܩܸܨܠܝܼ ܩܵܐ ܚܲܡܫܵܐ ܐܲܠܦܹ̈ܐ: ܟܡܵܐ ܩܘܼܦܹ̈ܐ ܕܩܸܛܥܵܛܹ̈ܐ ܡܸܠܝܹ̈ܐ ܫܩܸܠܵܘܟ̣ܘܿܢ: ܐܵܡܪܝܼ ܐܸܠܹܗ: 20 ܬܪܸܥܣܲܪ. ܘܟܲܕ ܫܲܒ̣ܥܵܐ ܩܵܐ ܐܲܪܒܥܵܐ ܐܲܠܦܹ̈ܐ: ܟܡܵܐ ܣܵܠܹ̈ܐ 21 ܕܩܸܛܥܵܛܹ̈ܐ ܡܸܠܝܹ̈ܐ ܫܩܸܠܵܘܟ̣ܘܿܢ: ܐܵܡܪܝܼ: ܫܲܒ̣ܥܵܐ. ܘܐܵܡܸܪ ܐܸܠܵܝ: ܕܵܐܟ̣ܝܼ ܠܹܐ ܝܬܘܿܢ ܦܲܪܡܘܼܝܹܐ. 22 ܘܐܬܹܠܹܐ ܠܒܹܝܬ ܨܲܝܵܕܵܐ: ܘܡܘܼܬ̄ܝܹܠܘܿܢ ܠܟܸܣܠܹܗ ܚܵܕ̄ 23 ܣܸܡܝܵܐ: ܘܦܘܼܪܦܸܠܘܿܢ ܒܝܹܗ ܕܕܵܩܸܪ ܗ̄ܘܵܐ ܒܝܹܗ. ܘܕܒܸܩܠܹܐ ܒܐܝܼܕܹܗ ܕܣܸܡܝܵܐ ܘܦܘܼܠܸܛܠܹܗ ܠܒܲܕܲܪ ܡ̣ܢ ܡܵܬܵܐ: ܘܪܸܩܠܹܐ ܥܲܠ ܥܲܝܢܘ̈ܗܝ ܘܡܘܼܬܸܒ̣ܠܹܐ ܐܝܼܕܵܬܹ̈ܗ ܥܲܠܘܼܗܝ: ܘܒܘܼܩܸܪܹܗ 24 [24] ܕܐܸܢ ܡܸܢܕܝܼ ܒܸܚܙܵܝܵܐ ܗ̄ܘܵܐ. ܘܚܸܪܹܐ ܘܐܡܸܪܹܐ: ܒܸܚܙܵܝܵܐ ܝܘܸܢ 25 ܒܢܲܝ̈ܢܵܫܵܐ ܐܲܝܟ ܐܝܼܠܵܢܹ̈ܐ: ܒܸܚܕܵܪܵܐ. ܡܸܕܪܹܐ ܡܘܼܬܸܒ̣ܠܹܐ ܐܝܼܕܵܬܹ̈ܗ ܥܲܠ ܥܲܝܢܘܼ̈ܗܝ: ܘܚܸܪܹܐ: ܘܬܪܸܨܠܹܐ: ܘܚܙܹܠܹܐ ܟܠ ܡܸܢܕܝܼ 26 ܨܸܦܝܵܐ. ܘܫܘܼܕܸܪܹܗ ܠܒܲܝܬܹܗ ܘܐܡܸܪܹܐ: ܐܘܼܦ ܠܡܵܬܵܐ ܠܵܐ ܐܵܘܪܸܬ: [25] ܘܠܵܐ ܐܵܡܪܸܬ ܠܐܢܵܫܵܐ ܓܵܘ ܡܵܬܵܐ. 27 ܘܦܠܸܛܠܹܐ ܝܼܫܘܿܥ ܘܬܲܠܡܝܼܕܘܼ̈ܗܝ ܠܡܵܬܘܵܬܹ̈ܐ ܕܩܹܣܲܪܝܵܐ ܕܦܝܼܠܝܼܦܘܿܣ: ܘܒܵܩܸܪ ܗ̄ܘܵܐ ܡ̣ܢ ܬܲܠܡܝܼܕܘܼ̈ܗܝ ܒܐܘܼܪܚܵܐ: 28 ܘܐܵܡܸܪ ܐܸܠܵܝ: ܡܵܢܝܼ ܒܹܐܡܵܪܵܐ ܝܢܵܐ ܥܲܠܝܼ ܐܢܵܫܹ̈ܐ: ܕܝܼܘܸܢ. ܘܐܵܢܝܼ ܐܡܸܪܘܿܢ: ܝܘܿܚܲܢܵܢ ܡܲܥܡܕܵܢܵܐ: ܘܐܚܹܪ̄ܢܹܐ: ܐܹܠܝܼܵܐ: ܘܐܚܹܪ̄ܢܹܐ: ܚܵܕ̄ 29 ܡ̣ܢ ܢܒ̣̈ܝܹܐ. ܘܒܘܼܩܸܪܹܐ ܡܸܢܵܝ ܗ̇ܘ: ܐܝܼܢܵܐ ܐܲܚܬܘܿܢ ܡܵܢܝܼ ܒܹܐܡܵܪܵܐ ܝܬܘܿܢ ܕܝܼܘܸܢ: ܓ̰ܘܼܘܸܒܠܹܐ ܟܹܐܦܵܐ ܘܐܡܸܪܹܐ ܐܸܠܹܗ: ܐܲܢ̄ܬ ܝܼܘܸܬ 30 ܡܫܝܼܚܵܐ. ܘܢܓ̰ܸܘܠܹܐ ܒܝܼܵܝ: ܕܠܐܢܵܫܵܐ ܠܵܐ ܐܵܡܪܝܼ ܥܲܠܘܼܗܝ. 31 ܘܫܘܼܪܹܠܹܐ ܠܡܵܠܘܿܦܵܝ ܕܘܵܓ̰ܸܒ ܝܼܠܵܐ ܕܒܪܘܼܢܹܗ ܕܐܢܵܫܵܐ ܩܵܒܸ̇ܠ ܚܲܫܵܐ ܪܵܒܵܐ: ܘܕܦܵܝܸܫ ܡܘܼܣܠܝܼܵܐ ܡ̣ܢ ܚܘܵܪ̈ܕܸܩܢܹܐ: ܘܡ̣ܢ ܓܘܼܪ̈ܵܢܹܐ ܕܟܵܗܢܹ̈ܐ: ܘܡ̣ܢ ܣܵܦܪܹ̈ܐ: ܘܕܦܵܝܸܫ ܩܛܝܼܠܵܐ: ܘܒܵܬ̄ܪ ܬܠܵܬ̄ܐ 32 ܝܘܿܡܵܢܹ̈ܐ ܩܵܝܸܡ. ܘܒܐܫܟܵܪܵܐ ܗ̇ܝ ܗܹܡܸܙܡܵܢ ܗܘܼܡܙܸܡܠܹܐ. 33 ܘܠܘܼܒܸܠܹܗ ܟܹܐܦܵܐ: ܘܫܘܼܪܹܠܹܐ ܠܸܢܓ̰ܵܘܵܐ ܒܝܹܗ. ܐܝܼܢܵܐ ܗ̇ܘ ܕܸܪܹܐ ܘܚܸܪܹܐ ܒܬܲܠܡܝܼܕܘܼ̈ܗܝ: ܘܢܓ̰ܸܘܠܹܐ ܒܟܹܐܦܵܐ: ܘܐܡܸܪܹܐ: ܙܹܠ̄ܐ ܠܘܼܟ ܠܵܒܵܬ̄ܪܝܼ: ܣܵܛܵܢܵܐ: ܣܵܒܵܒ ܠܹܐ ܝܘܸܬ ܒܸܚܫܵܒ̣ܵܐ 34 ܕܐܲܠܵܗܵܐ: ܐܸܠܵܐ ܕܒܢܲܝ̈ܢܵܫܵܐ. ܘܩܪܹܠܹܐ ܠܟܸܢܫܵܐ ܥܲܡ ܬܲܠܡܝܼܕܘܼ̈ܗܝ: ܘܐܡܸܪܹܐ ܐܸܠܵܝ: ܡ̇ܢ ܕܒܵܣܡܵܐ ܠܹܗ ܕܐܵܬܹܐ ܒܵܬ̄ܪܝܼ: ܟܵܦܸܪ ܒܓܵܢܹܗ: ܘܫܵܩܸܠ ܙܩܝܼܦܹܗ ܘܐܵܬܹܐ ܒܵܬ̄ܪܝܼ. 35 ܣܵܒܵܒ ܟܠ ܡ̇ܢ ܕܒܲܥܝܹܐ ܡܲܚܹܐ ܓܵܢܹܗ ܒܸܬ ܬܵܠܸܩ ܠܵܗ̇: ܘܟܠ ܕܬܵܠܸܩ ܓܵܢܹܗ ܒܚܵܬܸܪ ܕܝܼܝܼ ܘܕܡܲܫܚܲܕܬܝ: ܒܸܬ ܡܲܚܹܐ 36 ܠܵܗ̇. ܣܵܒܵܒ ܡܘܼܕܝܼ ܦܲܝܕܵܐ ܟܹܐ ܗܵܘܹܐ ܠܒܲܪܢܵܫܵܐ: ܐܸܢ ܟܠܹܗ 37 ܥܵܠܡܵܐ: ܩܵܢܹܐ: ܘܓܵܢܹܗ ܡܲܒܨܸܪ. ܝܲܢ ܡܘܼܕܝܼ ܒܸܬ ܝܵܗ̄ܒܸܠ 38 ܒܲܪܢܵܫܵܐ ܡܒܵܕܵܠ ܕܓܵܢܹܗ. ܣܵܒܵܒ ܟܠ ܕܢܵܚܸܦ ܒܝܼܝܼ ܘܒܗܹܡܸܙܡܵܢܝܼ̈ ܒܐܵܗܵܐ ܐܘܼܓ̰ܵܓ̣ ܚܲܛܵܝܬܵܐ ܘܩܲܗܒܵܐ: ܐܘܼܦ ܒܪܘܼܢܹܗ ܕܐܢܵܫܵܐ ܒܸܬ ܢܵܚܸܦ ܒܝܹܗ: ܐܝܼܡܲܢ ܕܐܵܬܹܐ ܒܚܸܩܪܵܐ ܕܒܵܒܹܗ ܥܲܡ ܡܲܠܲܐܟ̣ܘܼ̈ܗܝ ܩܲܕܝܼܫܹ̈ܐ.

ܩܦܠܐܘܢ: ܛ

1 ܘܐܡܸܪܹܐ ܐܸܠܵܝ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܝܼܬ ܐܢܵܫܹ̈ܐ ܕܟܸܠܝܹܐ ܠܲܐܟ̣ܵܐ: ܕܠܹܐ ܛܵܥܡܝܼ ܡܵܘܬܵܐ: ܗܲܠ ܕܚܵܙܝܼ ܡܲܠܟܘܼܬܹܗ ܕܐܲܠܵܗܵܐ ܐܬܝܼܬܵܐ ܒܚܲܝܠܵܐ. 2 ܘܒܵܬ̄ܪ ܐܸܫܬܵܐ ܝܘܿܡܵܢܹ̈ܐ ܠܘܼܒܸܠܹܐ ܝܼܫܘܿܥ ܠܟܹܐܦܵܐ ܘܠܝܲܥܩܘܿܒ̣ ܘܠܝܘܿܚܲܢܵܢ: ܘܡܘܼܐܣܩܵܝܠܹܐ ܠܛܘܼܪܵܐ ܪܵܡܵܐ ܒܢܲܦ̮ܫܵܝ: ܘܦܸܫܠܹܐ 3 ܫܘܼܚܠܸܦܵܐ ܩܵܕ̄ܡܝܼ. ܘܝܵܗ̄ܒ̣ܵܐ ܗ̄ܘܵܐ ܫܲܦ̮ܩܵܐ ܠܒܸܫܬܹܗ: ܡܲܚܘܘܼܪܹܐ ܪܵܒܵܐ: ܕܵܐܟ̣ܝܼ ܕܡܲܚܘܸܪܵܢܵܐ ܒܐܲܪܥܵܐ ܠܹܐ ܡܵܨܹܐ 4 ܠܡܲܚܘܘܼܪܹܐ. ܘܦܸܫܠܘܿܢ ܚܸܙܝܹܐ ܐܸܠܵܝ ܡܘܼܫܹܐ ܘܐܹܠܝܼܵܐ: ܟܲܕ 5 ܗܲܡܙܘܼܡܹܐ ܥܲܡ ܝܼܫܘܿܥ. ܓ̰ܘܼܘܸܒܠܹܐ ܟܹܐܦܵܐ ܘܐܡܸܪܹܐ ܠܝܼܫܘܿܥ: ܪܵܒܝܼ: ܨܦܵܝܝܼ ܝܠܵܐ ܐܸܠܲܢ ܕܠܲܐܟ̣ܵܐ ܗܵܘܵܚ: ܘܥܵܒ̣ܕܵܚ ܬܠܵܬ̄ ܡܛܲܠܠܹ̈ܐ: ܚܕܵܐ ܐܸܠܘܼܟ: ܘܚܕܵܐ ܠܡܘܼܫܹܐ: ܘܚܕܵܐ ܠܐܹܠܝܼܵܐ. 6 ܣܵܒܵܒ ܠܵܐ ܝܕܸܥܠܹܐ ܡܘܼܕܝܼ ܐܵܡܸܪ ܗ̄ܘܵܐ: ܣܵܒܵܒ ܕܒܙܕܘܼܥܬܵܐ 7 ܗ̄ܘܹܠܘܿܢ. ܘܗ̄ܘܹܠܵܐ ܥܢܵܢܵܐ ܘܥܒܸܕܠܵܐ ܛܸܠܵܢܝܼܬܵܐ ܥܲܠܵܝ: ܘܩܵܠܵܐ ܐܬܹܠܹܐ ܡ̣ܢ ܥܢܵܢܵܐ: ܒܹܐܡܵܪܵܐ: ܐܵܗܵܐ ܝܠܹܐ ܒܪܘܼܢܝܼ 8 ܡܘܼܚܸܒܵܐ: ܐܸܠܹܗ ܫܡܸܥܡܘܿܢ. ܘܡܸܢܫܸܠܬܵܢܹ̈ܐ: ܟܲܕ ܚܸܪܘܿܢ: ܐܚܹܪ̄ܢܵܐ ܠܐܢܵܫܵܐ ܠܵܐ ܚܙܹܠܘܿܢ: ܫܒ̣ܘܿܩ ܡ̣ܢ ܝܼܫܘܿܥ ܒܢܲܦ̮ܫܹܗ ܥܲܡܵܝ. 9 ܘܟܲܕ ܒܸܨܠܵܝܵܐ ܗ̄ܘܵܘ ܡ̣ܢ ܛܘܼܪܵܐ: ܦܩܝܼܕܵܝܠܹܐ ܕܠܐܢܵܫܵܐ ܠܵܐ ܐܵܡܪܝܼ ܡܸܢܕܝܼ ܕܚܙܹܠܘܿܢ: ܐܸܠܵܐ ܐܸܢ ܐܝܼܡܲܢ ܕܩܵܝܸܡ ܒܪܘܼܢܹܗ 10 ܕܐܢܵܫܵܐ ܡ̣ܢ ܡܝܼܬܹ̈ܐ. ܘܕܒ̣ܝܼܩܵܠܘܿܢ ܠܗܹܡܸܙܡܵܢ: ܘܒܵܩܪܝܼ ܗ̄ܘܵܘ ܓܵܘ ܓܵܢܵܝ: ܡܘܼܕܝܼ ܝܠܵܐ ܕܩܵܝܸܡ ܡ̣ܢ ܡܝܼܬܹ̈ܐ. 11 ܘܒܵܩܪܝܼ ܗ̄ܘܵܘ ܡܸܢܹܗ: ܘܐܵܡܪܝܼ: ܩܵܡܘܿܕܝܼ ܗܲܕܟ̣ܵܐ ܟܹܐ ܐܵܡܪܝܼ 12 ܣܵܦܪܹ̈ܐ: ܕܐܹܠܝܼܵܐ ܘܵܓ̰ܸܒ ܝܼܠܵܐ ܕܐܵܬܹܐ ܩܵܕ̄ܡܵܝܬܵܐ. ܐܡܸܪܹܐ ܐܸܠܵܝ: ܐܹܠܝܼܵܐ ܒܬܪܘܼܨܬܵܐ ܒܹܐܬܵܝܵܐ ܝܠܹܐ ܩܵܕ̄ܡܵܝܬܵܐ: ܕܟܠ ܡܸܢܕܝܼ ܡܲܕܸܪ: ܘܕܵܐܟ̣ܝܼ ܕܟܬܝܼܒ̣ܵܐ ܝܠܹܐ ܥܲܠ ܒܪܘܼܢܹܗ ܕܐܢܵܫܵܐ: ܕܪܵܒܵܐ 13 ܩܵܒܸ̇ܠ ܚܲܫܵܐ: ܘܦܵܝܸܫ ܡܘܼܣܠܝܼܵܐ. ܐܸܠܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܘܼܦ ܐܹܠܝܼܵܐ ܐܬܝܼܵܐ ܝܠܹܐ: ܘܥܒܸܕܠܵܘܿܢ ܒܝܹܗ ܟܠ ܡܸܢܕܝܼ ܕܒܣܸܡܠܵܐ ܠܗ̄ܘܿܢ: ܕܵܐܟ̣ܝܼ ܕܝܼܠܹܐ ܟܬܝܼܒ̣ܵܐ ܥܲܠܘܼܗܝ 14 ܘܟܲܕ ܐܬܹܠܹܐ ܠܟܸܣ ܬܲܠܡܝܼܕܘܼ̈ܗܝ: ܚܙܹܠܹܐ ܠܟܸܣܠܝܼ 15 ܟܸܢܫܵܐ ܪܵܒܵܐ: ܘܣܵܦܪܹ̈ܐ ܟܲܕ ܒܸܕܪܵܫܵܐ ܥܲܡܵܝ. ܘܕܲܪܣܵܥܲܬ ܟܠܹܗ ܟܸܢܫܵܐ ܚܙܹܠܘܿܢ ܐܸܠܹܗ: ܘܚܓ̰ܸܠܘܿܢ: ܘܪܚܸܛܠܘܿܢ ܕܪܹܠܘܿܢ 16 ܫܠܵܡܵܐ ܐܸܠܹܗ. ܘܒܘܼܩܸܪܹܐ ܡ̣ܢ ܣܵܦܪܹ̈ܐ: ܩܵܡܘܿܕܝܼ ܒܸܕܪܵܫܵܐ 17 ܝܬܘܿܢ ܥܲܡܵܝ. ܘܓ̰ܘܼܘܸܒܠܹܐ ܚܵܕ̄ ܡ̣ܢ ܟܸܢܫܵܐ ܘܐܡܸܪܹܐ: ܡܲܠܦܵܢܵܐ: ܡܘܼܬ̄ܝܹܠܝܼ ܒܪܘܼܢܝܼ ܠܟܸܣܠܘܼܟ: ܕܐܝܼܬ ܠܹܗ ܪܘܼܚܵܐ 18 ܠܲܥܠܹܐ. ܘܐܲܝܟܵܐ ܕܕܵܒ̣ܩܵܐ ܠܹܗ: [26] ܟܹܐ ܟ̰ܲܢܟ̰ܸܪܵܐ ܠܹܗ: ܕܟܹܐ ܓܲܒܓܸܒ ܦܘܼܡܹܗ: ܘܟܹܐ ܚܲܪܚܸܟ̰ ܟܹܟܘܼ̈ܗܝ: ܘܟܹܐ ܒܵܪܸܙ. ܘܐܡܸܪܝܼ ܠܬܲܠܡܝܼܕܘܼ̈ܟ ܕܦܵܠܛܝܼ ܠܹܗ: ܘܠܵܐ ܡܨܹܠܘܿܢ. 19 ܓ̰ܘܼܘܸܒܠܹܐ ܗ̇ܘ ܘܐܡܸܪܹܐ ܐܸܠܵܝ: ܝܵܐ ܐܘܼܓ̰ܵܓ̣ ܠܵܐ ܗܘܼܡܸܢܬܵܐ: ܗܲܠ ܐܝܼܡܲܢ ܗܵܘܸܢ ܥܡܵܘܟ̣ܘܿܢ: ܘܗܲܠ ܐܝܼܡܲܢ ܩܵܒ̇ܠܸܢܵܘܟ̣ܘܿܢ: 20 ܡܲܝܬ̄ܡܘܿܢ ܠܹܗ ܠܟܸܣܠܝܼ. ܘܡܘܼܬ̄ܝܹܠܘܿܢ ܐܸܠܹܗ ܠܟܸܣܠܹܗ ܘܟܲܕ ܚܙܹܠܹܗ: ܕܲܪܣܵܥܲܬ ܪܘܼܚܵܐ [27] ܟ̰ܘܼܢܟ̰ܸܪܵܐ ܐܸܠܹܗ: ܘܢܦܸܠܹܐ 21 ܥܲܠ ܐܲܪܥܵܐ: ܘܥܘܼܪܒܸܛܠܹܐ: ܘܓܲܒܓܘܼܒܹܐ ܦܘܼܡܹܗ. ܘܒܘܼܩܸܪܹܐ ܡ̣ܢ ܒܵܒܹܗ: ܟܡܵܐ ܙܲܒ̣ܢܵܐ ܐܝܼܬ ܡ̣ܢ ܕܐܵܗܵܐ ܗ̄ܘܹܠܵܐ ܐܸܠܹܗ: 22 ܘܗ̇ܘ ܐܡܸܪܹܐ: ܡ̣ܢ ܝܵܠܘܿܬܹܗ. ܘܪܵܒܵܐ ܙܲܒ̣ܢܹ̈ܐ ܕܪܹܠܵܐ ܐܸܠܹܗ ܒܢܘܼܪܵܐ ܘܒܡ̈ܝܼܵܐ: ܕܬܵܠܩܵܐ ܗ̄ܘܵܐ ܠܹܗ. ܐܸܠܵܐ ܐܸܢ ܡܸܢܕܝܼ 23 ܡܵܨܸܬ: ܪܵܚܸܡ ܥܲܠܲܢ: ܗܲܝܸܪܲܢ. ܐܵܡܸܪ ܐܸܠܹܗ ܝܼܫܘܿܥ: [28] ܐܸܢ ܡܵܨܸܬ ܕܗܲܡܸܢܸܬ: ܟܠ ܡܸܢܕܝܼ ܟܹܐ ܡܵܨܹܐ ܕܗܵܘܹܐ ܠܡ̇ܢ ܕܗܲܡܸܢ. 24 ܘܕܲܪܣܵܥܲܬ ܡܘܼܩܘܸܚܠܹܐ ܒܵܒܹܗ ܕܝܵܠܵܐ: ܟܲܕ ܒܸܒܟ̣ܵܝܵܐ: ܘܐܡܸܪܹܐ: 25 ܗܲܡܘܼܢܹܐ ܝܘܸܢ: ܗܲܝܸܪ ܠܠܵܐ ܗܲܝܡܵܢܘܼܬܝܼ. ܐܝܼܢܵܐ ܟܲܕ ܚܙܹܠܹܐ ܝܼܫܘܿܥ ܕܒܸܪܚܵܛܵܐ ܟܸܢܫܵܐ ܘܒܸܓ̰ܡܲܥܝܵܐ: ܢܓ̰ܘܼܠܹܐ ܒܗ̇ܝ ܪܘܼܚܵܐ ܛܲܡܹܐܐ: ܘܐܡܸܪܹܐ ܐܸܠܵܗ̇: ܪܘܼܚܵܐ ܟܲܪܹܐ ܘܠܲܥܠܹܐ: ܐܵܢܵܐ ܦܵܩܘܿܕܹܐ ܝܘܸܢ ܐܸܠܵܟ̣ܝ: ܦܠܘܿܛܝ ܡܸܢܹܗ: ܘܡܸܕܪܹܐ 26 ܠܵܐ ܐܵܘܪܲܬܝ ܒܝܹܗ. ܘܡܘܼܩܘܸܚܠܹܐ: ܘܪܵܒܵܐ [29] ܟ̰ܘܼܢܟ̰ܸܪܹܗ: ܘܦܠܸܛܠܹܐ: ܘܗ̄ܘܹܠܹܐ ܐܲܝܟ ܡܝܼܬܵܐ: ܗܲܕܟ̣ܵܐ ܕܪܵܒܵܐ ܐܡܸܪܘܿܢ: ܡܝܼܬܵܐ 27 ܝܠܹܐ. ܐܝܼܢܵܐ ܝܼܫܘܿܥ ܕܒܸܩܠܹܗ ܒܐܝܼܕܹܗ: ܘܡܘܼܩܸܡܠܹܗ: ܘܗ̇ܘ 28 ܩܸܡܠܹܐ. ܘܟܲܕ ܐܘܸܪܹܐ ܗ̇ܘ ܠܒܲܝܬܵܐ: ܒܘܼܩܸܪܘܿܢ ܡܸܢܹܗ ܬܲܠܡܝܼܕܘܼ̈ܗܝ ܒܢܲܦ̮ܫܵܝ: ܩܵܡܘܿܕܝܼ ܐܲܚܢܲܢ ܠܵܐ ܡܨܹܠܲܢ 29 ܠܦܵܠܘܿܛܹܗ. ܐܵܡܸܪ ܐܸܠܵܝ: ܐܵܗܵܐ ܬܵܗܵܪ ܒܡܸܢܕܝܼ ܠܹܐ ܡܵܨܹܐ ܠܸܦܠܵܛܵܐ: ܫܒ̣ܘܿܩ ܡ̣ܢ [30] ܒܨܵܘܡܵܐ ܘܒܨܠܘܼܬܵܐ. 30 ܘܟܲܕ ܦܠܸܛܠܘܿܢ ܡ̣ܢ ܬܵܡܵܐ: ܒܸܥܒ̣ܵܪܵܐ ܗ̄ܘܵܘ ܡ̣ܢ ܓܵܘ 31 ܓܠܝܼܠܵܐ: ܘܠܐ ܒܸܥܠܹܐ ܕܐܢܵܫܵܐ ܝܲܕܸܥ. ܣܵܒܵܒ ܕܡܵܠܸܦ ܗ̄ܘܵܐ ܠܬܲܠܡܝܼܕܘܼ̈ܗܝ. ܘܐܵܡܸܪ ܐܸܠܵܝ: ܕܒܪܘܼܢܹܗ ܕܐܢܵܫܵܐ ܦܝܵܫܵܐ ܝܠܹܐ ܣܘܼܦܝܵܐ ܒܐܝܼܕܵܬܹ̈ܐ ܕܒܢܲܝ̈ܢܵܫܵܐ: ܘܒܸܬ ܩܵܛܠܝܼ ܠܹܗ: ܘܟܲܕ ܦܸܫܠܹܐ ܩܛܝܼܠܵܐ: ܡܒܵܬ̄ܪ ܬܠܵܬ̄ܐ ܝܘܿܡܵܢܹ̈ܐ ܒܸܬ ܩܵܝܸܡ. ܐܝܼܢܵܐ ܐܵܢܝܼ ܠܹܗ ܗ̄ܘܵܘ ܒܝܼܕܲܥܝܵܐ ܠܗ̇ܝ ܗܹܡܸܙܡܵܢ: ܘܒܸܙܕܲܥܝܵܐ ܗ̄ܘܵܘ ܕܒܵܩܪܝܼ ܠܹܗ. 33 ܘܐܬܹܠܘܿܢ ܠܟܦܲܪܢܵܚܘܿܡ. ܘܟܲܕ ܓܵܘ ܒܲܝܬܵܐ ܗ̄ܘܵܐ: ܒܘܼܩܸܪܹܐ ܡܸܢܵܝ: ܡܘܼܕܝܼ ܒܸܕܪܵܫܵܐ ܝܬܘܿܢ ܗ̄ܘܵܘ ܒܐܘܼܪܚܵܐ 34 ܒܓܵܘܵܘܟ̣ܘܿܢ. ܐܝܼܢܵܐ ܐܵܢܝܼ ܫܬܝܼܩܹܐ ܗ̄ܘܵܘ: ܣܵܒܵܒ ܕܡܘܼܩܪܸܨܹܐ ܗ̄ܘܵܘ ܒܐܘܼܪܚܵܐ ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ: ܡܵܢܝܼ ܝܼܠܹܐ ܓܘܼܪܵܐ. 35 ܘܝܬܸܒ̣ܠܹܐ ܘܩܪܹܠܹܐ ܠܬܪܸܥܣܲܪ: ܘܐܡܸܪܹܐ ܐܸܠܵܝ: ܡ̇ܢ ܕܒܲܥܝܹܐ ܗܵܘܹܐ ܩܵܕ̄ܡܵܝܵܐ: ܒܸܬ ܗܵܘܹܐ ܐܚܵܪܵܝܵܐ ܕܟܠܵܝ: ܘܚܸܠܡܲܬܟܵܪ 36 ܕܟܠܵܝ. ܘܫܩܸܠܹܐ ܚܵܕ̄ ܝܵܠܵܐ ܙܥܘܿܪܵܐ ܘܡܘܼܟܠܹܠܹܗ ܒܒܹܝܦܲܠܓܵܝ: ܘܫܩܸܠܹܗ ܥܲܠ ܕܪܲܥܢܵܢܘܼܗܝ: ܘܐܡܸܪܹܐ ܐܸܠܵܝ. 37 ܟܠܡ̇ܢ ܕܩܵܒܸ̇ܠ ܚܵܕ̄ ܡ̣ܢ ܗܲܕܟ̣ܵܐ ܝܵܠܹ̈ܐ ܙܥܘܿܪܹ̈ܐ ܒܫܸܡܝܼ: ܐܸܠܝܼ ܩܵܒ̇ܘܿܠܹܐ ܝܠܹܐ: ܘܡ̇ܢ ܕܐܸܠܝܼ ܩܵܒ̇ܘܿܠܹܐ ܝܠܹܐ: ܠܹܐ ܝܠܹܐ ܐܸܠܝܼ ܩܵܒ̇ܘܿܠܹܐ: ܐܸܠܵܐ ܠܡ̇ܢ ܕܫܘܼܕܪܸܢܹܐ. 38 ܐܡܸܪܹܐ ܐܸܠܹܗ ܝܘܿܚܲܢܵܢ: ܪܵܒܝܼ: ܚܙܹܠܲܢ ܐܢܵܫܵܐ ܦܵܠܘܿܛܹܐ ܕܲܝܘܹ̈ܐ ܒܫܸܡܘܼܟ: ܘܡܘܼܟܠܹܠܲܢ ܐܸܠܹܗ: ܣܵܒܵܒ ܕܠܹܐ ܗ̄ܘܵܐ ܒܹܐܬܵܝܵܐ 39 ܒܵܬ̄ܪܲܢ. ܐܝܼܢܵܐ ܐܡܸܪܹܐ ܐܸܠܵܝ ܝܼܫܘܿܥ: ܠܵܐ ܡܲܟܠܝܼܬܘܿܢ ܠܹܗ: ܣܵܒܵܒ ܠܲܝܬ ܐܢܵܫܵܐ ܕܥܵܒܸܕ ܚܲܝܠܵܐ ܒܫܸܡܝܼ: ܘܡܵܨܹܐ ܓ̰ܲܠܕܹܐ 40 ܐܵܡܸܪ ܥܲܠܝܼ ܕܣܸܪܝܵܐ. ܣܵܒܵܒ ܡ̇ܢ ܕܠܹܐ ܝܠܹܐ ܠܕܲܪܩܘܼܒ̣ܠܲܢ: 41 ܠܵܓܹܒܲܢ ܝܼܠܹܐ. ܣܵܒܵܒ ܟܠ ܕܡܲܫܬܹܐ ܠܵܘܟ̣ܘܿܢ ܟܵܣܵܐ ܕܡ̈ܝܼܵܐ: ܒܫܸܡܵܐ ܕܕܡܫܝܼܚܵܐ ܝܬܘܿܢ: ܬܪܘܼܨܵܐ ܒܹܐܡܵܪܵܐ ܝܘܸܢ 42 ܐܸܠܵܘܟ̣ܘܿܢ: ܕܠܹܐ ܬܵܠܸܩ ܗܵܩܹܗ. ܘܟܠ ܡ̇ܢ [31] ܕܡܲܟܦܸܪ ܠܚܵܕ̄ ܡܐܲܢܹܐ ܙܥܘܿܪܹ̈ܐ ܕܗܲܡܘܼܢܹܐ ܝܢܵܐ ܒܝܼܝܼ: ܨܦܵܝܝܼ ܗ̄ܘܵܐ ܐܸܠܹܗ: ܐܸܢ ܗܵܘܝܵܐ ܗ̄ܘܵܐ ܬܠܝܼܬܵܐ ܐܸܪܚܹܐ ܕܚܡܵܪܵܐ ܒܩܕܵܠܹܗ: ܘܪܘܼܦܝܵܐ 43 ܒܝܵܡܵܐ. ܐܝܼܢܵܐ ܐܸܢ ܐܝܼܕܘܼܟ [32] ܡܲܟܦܸܪܵܐ ܠܘܼܟ: ܦܪܘܿܡ ܠܵܗ̇: ܨܦܵܝܝܼ ܝܠܵܐ ܐܸܠܘܼܟ ܕܣܲܩܲܬ ܐܵܘܪܸܬ ܠܚܲܝܹ̈ܐ: ܡ̣ܢ ܟܲܕ ܐܝܼܬ ܠܘܼܟ ܬܲܪ̈ܬܹܝ ܐܝܼܕܵܬܹ̈ܐ ܕܐܵܙܸܠ̄ܬ ܠܓܹܗܲܢܵܐ: ܠܢܘܼܪܵܐ ܕܠܹܐ 45 ܟ̰ܲܡܹܐ. [33] ܘܐܸܢ ܐܲܩܠܘܼܟ [34] ܡܲܟܦܸܪܵܐ ܠܘܼܟ: ܦܪܘܿܡ ܠܵܗ̇: ܨܦܵܝܝܼ ܝܠܵܐ ܐܸܠܘܼܟ ܕܐܵܘܪܸܬ ܠܚܲܝܹ̈ܐ ܫܸܠܵܐ: ܡ̣ܢ ܟܲܕ ܐܝܼܬ 47 ܠܘܼܟ ܬܲܪ̈ܬܹܝ ܐܲܩܠܵܬܹ̈ܐ ܕܦܵܝܫܸܬ ܪܘܼܦܝܵܐ ܒܓܹܗܲܢܵܐ. [35] ܘܐܸܢ ܗܲܝܢܘܼܟ [36] ܡܲܟܦܸܪܵܐ ܠܘܼܟ: ܚܪܘܿܛ ܠܵܗ̇: ܨܦܵܝܝܼ ܝܠܵܐ ܐܸܠܘܼܟ ܕܒܚܕܵܐ ܥܲܝܢܵܐ ܐܵܘܪܸܬ ܠܡܲܠܟܘܼܬܹܗ ܕܐܲܠܵܗܵܐ: ܡ̣ܢ ܟܲܕ ܐܝܼܬ 48 ܠܘܼܟ ܬܲܪ̈ܬܹܝ ܥܲܝܢܹ̈ܐ: ܕܦܵܝܫܸܬ ܪܘܼܦܝܵܐ ܒܓܹܗܲܢܵܐ. ܐܲܝܟܵܐ 49 ܕܬܸܘܸܠܥܵܝ ܠܹܐ ܡܵܝܬܵܐ: ܘܢܘܼܪܵܝ ܠܹܐ ܟ̰ܲܡܹܐ. ܣܵܒܵܒ ܕܟܠ ܒܢܘܼܪܵܐ ܟܹܐ ܦܵܝܸܫ ܡܘܼܡܠܸܚܵܐ: ܘܟܠ ܕܸܒ̣ܚܬܵܐ ܒܡܸܠܚܵܐ ܒܸܬ 50 ܦܵܝܫܵܐ ܡܘܼܡܠܸܚܬܵܐ. ܨܦܵܝܝܼ ܝܠܵܐ ܡܸܠܚܵܐ: ܐܝܼܢܵܐ ܐܸܢ ܡܸܠܚܵܐ ܦܵܝܟܵܐ: ܒܡܘܼܕܝܼ ܒܸܬ ܡܲܡܠܸܚܝܼܬܘܿܢ ܠܵܗ̇: ܗܵܘܝܵܐ ܒܝܼܵܘܟ̣ܘܿܢ ܡܸܠܚܵܐ: ܘܒܫܲܝܢܵܐ ܗ̄ܘܹܡܘܿܢ ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ.

ܩܦܠܐܘܢ: ܝ

1 ܘܩܸܡܠܹܐ ܡ̣ܢ ܬܵܡܵܐ: ܘܐܬܹܠܹܐ ܠܬܸܚܘܼܒܹ̈ܐ ܕܝܼܗܘܼܕ ܘܠܡܲܪܙܵܐ ܐܚܹܪ̄ܢܵܐ ܕܝܘܿܪܕܢܵܢ. ܘܐܙܸܠܘܿܢ ܡܸܕܪܹܐ ܠܟܸܣܠܹܗ ܟܸܢܫܹ̈ܐ: ܘܡܵܠܸܦ ܗ̄ܘܵܐ ܠܗ̄ܘܿܢ ܡܸܕܪܹܐ ܕܵܐܟ̣ܝܼ ܕܐܝܼܬ ܗ̄ܘܵܐ ܠܹܗ ܥܵܕܲܬ. 2 ܘܐܬܹܠܘܿܢ ܦܪ̈ܝܼܫܹܐ: ܘܒܵܩܪܝܼ ܠܹܗ: ܕܐܸܢ ܒܕܲܣܬܘܼܪ ܝܼܠܵܐ 3 ܠܐܢܵܫܵܐ ܕܫܵܒܸܩ ܒܲܟ̣ܬܹܗ: ܟܲܕ ܓ̰ܵܪܘܿܒܹܗ. ܓ̰ܘܼܘܸܒܠܹܐ 4 ܘܐܡܸܪܹܐ ܐܸܠܵܝ: ܡܘܼܕܝܼ ܩܲܡ ܦܵܩܸܕܠܵܘܟ̣ܘܿܢ ܡܘܼܫܹܐ. ܘܐܵܢܝܼ ܐܵܡܪܝܼ: ܡܘܼܫܹܐ ܝܸܗܒܸܠܹܐ ܕܲܣܬܘܼܪ ܐܸܠܲܢ: ܕܟܵܬܒ̣ܵܚ ܟܬܵܒ̣ܵܐ 5 ܕܕܘܼܠܵܠܵܐ ܘܪܲܦܵܚ. ܘܝܼܫܘܿܥ ܐܡܸܪܹܐ ܐܸܠܵܝ: ܠܕܲܪܩܘܼܒ̣ܠ ܕܩܸܫܝܘܼܬܵܐ ܕܠܸܒܵܘܟ̣ܘܿܢ ܟܬܸܒ̣ܠܹܐ ܐܸܠܵܘܟ̣ܘܿܢ ܐܵܗܵܐ ܦܘܼܩܕܵܢܵܐ. 6 ܐܝܼܢܵܐ ܡ̣ܢ ܪܹܫܵܐ ܕܒܪܝܼܬܵܐ: ܐܘܼܪܙܵܐ ܘܢܸܩܒ̣ܵܐ ܥܒ̣ܝܼܕܵܝܠܹܐ ܐܲܠܵܗܵܐ. 7 ܣܵܒܵܒ ܕܐܵܗܵܐ ܒܸܬ ܫܵܒܸܩ ܐܢܵܫܵܐ ܠܒܵܒܹܗ ܘܠܝܸܡܹܗ: ܘܒܸܬ 8 ܬܲܒܸܥ ܠܒܲܟ̣ܬܹܗ. ܘܒܸܬ ܗܵܘܝܼ ܬܸܪܘܵܝ ܚܵܕ̄ ܒܸܣܪܵܐ. ܒܲܣ 9 ܐܚܹܪ̄ܢܵܐ ܠܹܐ ܝܢܵܐ ܬܪܲܝ: ܐܸܠܵܐ ܚܵܕ̄ ܒܸܣܪܵܐ. ܡܸܢܕܝܼ ܗܲܕܟ̣ܵܐ ܕܐܲܠܵܗܵܐ ܙܘܼܘܸܓܠܹܐ: ܒܲܪܢܵܫܵܐ ܠܵܐ ܦܵܪܸܫ.

10 ܘܒܘܼܩܸܪܘܿܢ ܡܸܢܹܗ ܡܸܕܪܹܐ ܬܲܠܡܝܼܕܘܼ̈ܗܝ ܓܵܘ ܒܲܝܬܵܐ ܥܲܠ 11 ܕܐܵܗܵܐ. ܘܐܡܸܪܹܐ ܐܸܠܵܝ: ܟܠܡ̇ܢ ܕܪܲܦܹܐ ܒܲܟ̣ܬܹܗ ܘܓܵܒܸܪ ܚܕܵܐ 12 ܐܚܹܪ̄ܬܵܐ: ܒܸܥܒ̣ܵܕܵܐ ܝܠܹܐ ܩܲܗܒܘܼܬܵܐ ܥܲܠܘܼܗܝ. ܘܐܸܢ ܒܲܟ̣ܬܵܐ ܪܲܦܵܐ ܓܲܒ̣ܪܘܼܗ̇ ܘܓܵܒ̣ܪܵܐ ܚܵܕ̄ ܐܚܹܪ̄ܢܵܐ: ܒܸܥܒ̣ܵܕܵܐ ܝܠܵܐ ܩܲܗܒܘܼܬܵܐ. 13 ܘܡܘܼܬ̄ܝܹܠܘܿܢ ܠܟܸܣܠܹܗ ܝܵܠܹ̈ܐ ܙܥܘܿܪܹ̈ܐ ܕܕܵܩܸܪ ܗ̄ܘܵܐ ܒܝܼܵܝ. ܐܝܼܢܵܐ ܬܲܠܡܝܼܕܘ̈ܗܝ ܢܓ̰ܸܘܠܘܿܢ ܒܐܵܢܝܼ [37] ܕܡܵܐܘܵܝ ܗ̄ܘܵܘ. 14 ܐܝܼܢܵܐ ܟܲܕ ܚܙܹܠܹܐ ܝܼܫܘܿܥ: ܗ̄ܘܹܠܹܐ ܒܹܐ ܟܵܝܦ: ܘܐܡܸܪܹܐ ܐܸܠܵܝ: ܫܒ̣ܘܿܩܘܿܢ ܝܵܠܹ̈ܐ ܙܥܘܿܪܹ̈ܐ ܐܵܬܝܼ ܠܟܸܣܠܝܼ: ܘܠܵܐ ܡܲܟܠܝܼܬܘܿܢ ܠܗ̄ܘܿܢ: ܣܵܒܵܒ ܕܕܐܵܢܝܼ ܕܐܲܝܟ ܕܐܲܢܹܐ ܝܼܠܵܐ ܡܲܠܟܘܼܬܵܐ ܕܐܲܠܵܗܵܐ. 15 ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܟܠ ܕܠܵܐ ܩܵܒܸ̇ܠ ܡܲܠܟܘܼܬܵܐ ܕܐܲܠܵܗܵܐ ܐܲܝܟ ܝܵܠܵܐ ܙܥܘܿܪܵܐ: ܠܹܐ ܐܵܘܸܪ ܓܵܘܵܗ̇. 16 ܘܫܩܝܼܠܵܝܠܹܐ ܥܲܠ ܕܪܲܥܢܵܢܘܼܗܝ: ܘܡܘܼܬܸܒ̣ܠܹܐ ܐܝܼܕܵܬܹ̈ܗ ܥܲܠܵܝ: ܘܒܘܼܪܟ̣ܵܝܠܹܐ. 17 ܘܟܲܕ ܒܹܐܙܵܠܵܐ ܗ̄ܘܵܐ ܒܐܘܼܪܚܵܐ: ܪܚܸܛܠܹܐ ܚܵܕ̄ ܒܪܸܟ̇ܠܹܐ ܩܵܕ̄ܡܘܼܗܝ: ܘܒܘܼܩܸܪܹܐ ܡܸܢܹܗ: ܡܲܠܦܵܢܵܐ ܛܵܒ̣ܵܐ: ܡܘܼܕܝܼ ܥܵܒ̣ܕܸܢ 18 ܕܝܵܪܬܢ ܚܲܝܹ̈ܐ ܕܠܵܐܒܵܕ. ܐܵܡܸܪ ܐܸܠܹܗ ܝܼܫܘܿܥ: ܩܵܡܘܿܕܝܼ ܒܸܩܪܵܝܝܼ ܝܘܸܬ ܛܵܒ̣ܵܐ: ܠܲܝܬ ܛܵܒ̣ܵܐ: ܫܒ̣ܘܿܩ ܡ̣ܢ ܚܵܕ̄: ܐܲܠܵܗܵܐ. 19 ܦܘܼܩܕܵܢܹ̈ܐ ܟܹܐ ܝܲܕܥܸܬ: ܠܵܐ ܥܵܒ̣ܕܸܬ ܩܲܗܒܘܼܬܵܐ: ܠܵܐ ܓܵܢܒܸܬ: ܠܵܐ ܩܵܛܠܸܬ: ܘܠܵܐ ܝܵܗ̄ܒܸܬ ܣܵܗܕܘܼܬܵܐ ܕܘܼܓܠܵܢܬܵܐ: ܠܵܐ 20 ܙܵܠܡܸܬ: ܥܒ̣ܘܿܕ ܐܝܼܩܵܪܵܐ ܠܒܵܒܘܼܟ ܘܠܝܸܡܘܼܟ. ܘܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ: ܡܲܠܦܵܢܵܐ: ܐܲܢܹܐ ܟܠܵܝ ܢܛܝܼܪܵܝ ܝܘܸܢ 21 ܡ̣ܢ ܝܵܠܘܼܬܝܼ. ܘܚܸܪܹܐ ܒܝܹܗ ܝܼܫܘܿܥ: ܘܡܘܼܚܸܒܠܹܗ: ܘܐܡܸܪܹܐ ܐܸܠܹܗ: ܚܕܵܐ ܒܵܨܘܿܪܬܵܐ ܝܠܵܐ ܐܸܠܘܼܟ: ܙܹܠ̄ܐ ܙܵܒܸ̇ܢ ܟܠ ܡܸܢܕܝܼ ܕܐܝܼܬ ܠܘܼܟ: ܘܗܲܒ̄ܠ ܠܡܸܣܟܹܢܹ̈ܐ: ܘܒܸܬ ܗܵܘܝܵܐ ܠܘܼܟ ܚܲܙܝܼܢܵܐ 22 ܒܫܡܲܝܵܐ: ܘܬܵܐ: ܐܵܬܸܬ ܒܵܬ̄ܪܝܼ. ܐܝܼܢܵܐ ܚܘܼܠܩܘܼܗܝ ܢܦܸܠܹܐ ܒܐܵܗܵܐ ܗܹܡܸܙܡܵܢ: ܘܐܙܸܠܹܐ ܦܫܝܼܡܵܐ: ܣܵܒܵܒ ܕܪܵܒܵܐ ܡܵܐܠ ܐܝܼܬ 23 ܗ̄ܘܵܐ ܠܹܗ. ܐܝܼܢܵܐ ܚܸܪܹܐ ܝܼܫܘܿܥ ܠܚܵܕܸܪ̈ܘܵܢܹܗ: ܘܐܡܸܪܹܐ ܠܬܲܠܡܝܼܕܘܼ̈ܗܝ: ܟܡܵܐ ܥܲܣܩܵܐ ܝܠܵܐ ܠܐܵܢܝܼ ܕܐܝܼܬ ܠܗ̄ܘܿܢ 24 ܡܵܐܠ: ܕܐܵܘܪܝܼ ܠܡܲܠܟܘܼܬܵܐ ܕܐܲܠܵܗܵܐ!. ܐܝܼܢܵܐ ܬܲܠܡܝܼܕܹ̈ܐ ܥܓ̰ܸܒܠܘܿܢ ܥܲܠ ܗܹܡܸܙܡܵܢܘܼ̈ܗܝ. ܘܓ̰ܘܼܘܸܒܠܹܐ ܝܼܫܘܿܥ ܡܸܕܪܹܐ ܘܐܡܸܪܹܐ ܐܸܠܵܝ: ܒܢܘܼܢܝܼ̈: ܟܡܵܐ ܥܲܣܩܵܐ ܝܠܵܐ ܠܐܵܢܝܼ ܕܝܼܢܵܐ 25 ܒܗܹܒ̣ܝܼ ܥܲܠ ܡܵܐܠܵܝ̈: ܕܐܵܘܪܝܼ ܠܡܲܠܟܘܼܬܵܐ ܕܐܲܠܵܗܵܐ!. ܒܘܼܫ ܗܵܣܵܢܵܝܝܼ ܝܠܵܐ ܠܓܘܼܡܠܵܐ ܕܐܵܘܪܵܐ ܒܢܸܩܒܵܐ ܕܚܡܵܛܵܐ: ܡ̣ܢ 26 ܕܕܵܘܠܲܬܡܲܢܕ ܐܵܘܸܪ ܠܡܲܠܟܘܼܬܹܗ ܕܐܲܠܵܗܵܐ. ܐܝܼܢܵܐ ܐܵܢܝܼ ܒܘܼܫ 27 ܙܵܘܕܵܐ ܥܓ̰ܸܒܠܘܿܢ: ܘܐܡܸܪܘܿܢ ܒܹܝܠܵܝ: ܡܵܢܝܼ ܡܵܨܹܐ ܠܸܚܵܝܵܐ. ܘܚܸܪܹܐ ܒܝܼܵܝ ܝܼܫܘܿܥ: ܘܐܡܸܪܹܐ ܐܸܠܵܝ: ܠܟܸܣ ܒܢܲܝ̈ܢܵܫܵܐ ܐܵܗܵܐ ܠܹܐ ܡܵܨܝܵܐ: ܐܸܠܵܐ ܠܵܐ ܠܟܸܣ ܐܲܠܵܗܵܐ: ܣܵܒܵܒ ܟܠ ܡܸܢܕܝܼ ܠܟܸܣ ܐܲܠܵܗܵܐ 28 ܟܹܐ ܡܵܨܝܵܐ. ܘܫܘܼܪܹܠܹܐ ܟܹܐܦܵܐ ܠܹܐܡܵܪܵܐ ܐܸܠܹܗ: ܗܵܐ: ܐܲܚܢܲܢ 29 ܫܒܸܩܠܲܢ ܟܠ ܡܸܢܕܝܼ ܘܐܬܹܠܲܢ ܒܵܬ̄ܪܘܼܟ. ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܲܝܬ ܐܢܵܫܵܐ ܕܫܒ̣ܝܼܩܵܐ ܝܠܹܐ ܒܲܝܬܵܐ: ܝܲܢ ܐܵܚܘܿܢܘܵܬܹ̈ܐ: ܝܲܢ ܚܵܬܘܵܬܹ̈ܐ: ܝܲܢ ܒܵܒܵܐ: ܝܲܢ ܝܸܡܵܐ: ܝܲܢ ܒܲܟ̣ܬܵܐ: ܝܲܢ ܒܢܘܼܢܹ̈ܐ: ܝܲܢ ܚܲܩܠܵܢܹ̈ܐ: ܒܚܵܬܸܪ ܕܝܼܝܼ 30 ܘܕܡܲܫܚܲܕܬܵܐ. ܘܠܵܐ ܩܵܒܸ̇ܠ ܚܵܕ̄ ܒܡܵܐܐ ܐܵܕܝܼܵܐ ܒܐܵܗܵܐ ܙܲܒ̣ܢܵܐ: ܒܵܬܹ̈ܐ: ܘܐܵܚܘܿܢܘܵܬܹ̈ܐ: ܘܚܵܬܘܵܬܹ̈ܐ: ܘܝܸܡܵܬܹ̈ܐ: ܘܒܢܘܼܢܹ̈ܐ: ܘܚܲܩܠܵܢܹ̈ܐ: 31 ܥܲܡ ܛܪܵܕܝܵܬܹܐ: ܘܒܥܵܠܡܵܐ ܕܐܵܬܹܐ: ܚܲܝܹ̈ܐ ܕܠܵܐܒܵܕ. ܐܝܼܢܵܐ ܪܵܒܵܐ ܩܵܕ̄ܡܵܝܹ̈ܐ ܒܸܬ ܗܵܘܝܼ ܐܚܵܪܵܝܹܐ: ܘܐܚܵܪ̈ܵܝܹܐ ܩܵܕ̄ܡܵܝܹ̈ܐ. 32 ܘܟܲܕ ܒܹܐܣܵܩܵܐ ܗ̄ܘܵܘ ܒܐܘܼܪܚܵܐ ܠܐܘܿܪܸܫܠܸܡ: ܝܼܫܘܿܥ ܒܹܐܙܵܠܵܐ ܗ̄ܘܵܐ ܩܵܕ̄ܡܵܝ. ܘܥܵܓ̰ܒܝܼ ܗ̄ܘܵܘ: ܘܐܵܙܵܠ̄ܢܹ̈ܐ ܒܵܬ̄ܪܹܗ ܙܕܸܥܠܘܿܢ. ܘܠܘܼܒܸܠܹܐ ܡܸܕܪܹܐ ܠܬܪܸܥܣܲܪܬܹܗ: ܘܫܘܼܪܹܠܹܐ 33 ܕܐܵܡܸܪ ܐܸܠܵܝ ܡܸܢܕܝܼ ܕܗܕܝܼܪܵܐ ܗ̄ܘܵܐ ܕܗܵܘܹܐ ܐܸܠܹܗ. ܗܵܐ: ܒܹܐܣܵܩܵܐ ܝܘܵܚ ܠܐܘܿܪܸܫܠܸܡ: ܘܒܪܘܼܢܹܗ ܕܐܢܵܫܵܐ ܒܸܬ ܦܵܝܸܫ ܣܘܼܦܝܵܐ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܣܵܦܪܹ̈ܐ: ܘܒܸܬ ܥܵܒ̣ܕܝܼ ܠܹܗ 34 ܓܘܼܢܵܗܟܵܪ ܠܡܵܘܬܵܐ: ܘܒܸܬ ܣܵܦܝܼ ܠܹܗ ܠܛܵܝܸܦܹ̈ܐ. ܘܒܸܬ ܡܲܣܚܸܪܝܼ ܒܝܹܗ: ܘܓ̰ܲܢܓ̰ܸܪܝܼ ܠܹܗ: ܘܪܵܝܩܝܼ ܥܲܠܘܼܗܝ: ܘܩܵܛܠܝܼ ܠܹܗ: ܘܡܒܵܬ̄ܪ ܬܠܵܬ̄ܐ ܝܘܿܡܵܢܹ̈ܐ ܒܸܬ ܩܵܝܸܡ. 35 ܘܐܬܹܠܘܿܢ ܩܘܼܪܒܵܐ ܠܟܸܣܠܹܗ ܝܲܥܩܘܿܒ̣ ܘܝܘܿܚܲܢܵܢ: ܒܢܘܼܢܹ̈ܐ ܕܙܲܒ̣ܕܲܝ: ܘܐܵܡܪܝܼ ܐܸܠܹܗ: ܡܲܠܦܵܢܵܐ: ܒܲܥܝܵܚ ܕܟܠ ܕܛܵܠܒܵܚ 36 ܥܵܒ̣ܕܸܬ ܐܸܠܲܢ. ܐܵܡܸܪ ܐܸܠܵܝ: ܡܘܼܕܝܼ ܒܲܥܝܝܼܬܘܿܢ ܕܥܵܒ̣ܕܸܢ 37 ܐܸܠܵܘܟ̣ܘܿܢ. ܐܵܡܪܝܼ ܐܸܠܹܗ: ܗܲܒ̄ܠ ܠܲܢ: ܕܚܵܕ̄ ܡ̣ܢ ܝܲܡܝܼܢܘܼܟ 38 ܘܚܵܕ̄ ܡ̣ܢ ܣܸܡܵܠܘܼܟ ܝܵܬܒ̣ܵܚ ܒܚܸܩܪܘܼܟ. ܐܝܼܢܵܐ ܝܼܫܘܿܥ ܐܡܸܪܹܐ ܐܸܠܝܼ: ܠܹܐ ܝܬܘܿܢ ܒܝܼܕܲܥܝܵܐ ܡܘܼܕܝܼ ܒܸܛܠܵܒܵܐ ܝܬܘܿܢ. ܡܵܨܝܼܬܘܿܢ ܫܵܬܝܼܬܘܿܢ ܟܵܣܵܐ ܕܐܵܢܵܐ ܫܵܬܸܢ: ܝܲܢ ܡܲܥܡܘܿܕܝܼܬܵܐ ܕܐܵܢܵܐ 39 ܥܵܡܕܸܢ: ܥܵܡܕܝܼܬܘܿܢ. ܐܵܡܪܝܼ ܐܸܠܹܗ: ܟܹܐ ܡܵܨܵܚ. ܐܵܡܸܪ ܐܸܠܵܝ ܝܼܫܘܿܥ: ܟܵܣܵܐ ܕܫܵܬܸܢ ܒܬܪܘܼܨܬܵܐ ܒܸܬ ܫܵܬܝܼܬܘܿܢ: 40 ܘܡܲܥܡܘܿܕܝܼܬܵܐ ܕܐܵܢܵܐ ܥܵܡܕܸܢ ܒܸܬ ܥܵܡܕܝܼܬܘܿܢ. ܐܝܼܢܵܐ ܕܝܵܬܒ̣ܝܼܬܘܿܢ ܡ̣ܢ ܝܲܡܝܼܢܝܼ ܝܲܢ ܡ̣ܢ ܣܸܡܵܠܝܼ: ܠܹܐ ܝܠܵܐ ܕܝܼܝܼ 41 ܠܝܼܵܗ̄ܒ̣ܵܐ: ܐܸܠܵܐ ܠܐܵܢܝܼ (ܕܐܸܠܵܝ) ܗܘܼܕܸܪܬܵܐ ܝܠܵܐ. ܘܟܲܕ ܫܡܸܥܠܘܿܢ ܥܸܣܪܵܐ: ܫܘܼܪܹܠܘܿܢ ܠܸܟܪܵܒܵܐ ܥܲܠ ܝܲܥܩܘܿܒ̣ 42 ܘܝܘܿܚܲܢܵܢ. ܘܩܸܪܝܵܝܠܹܐ ܝܼܫܘܿܥ: ܘܐܡܸܪܹܐ ܐܸܠܵܝ: ܒܝܼܕܲܥܝܵܐ ܝܬܘܿܢ ܕܐܵܢܝܼ ܕܦܵܝܫܝܼ ܚܫܝܼܒܹܐ ܪܹ̈ܫܵܢܹܐ ܕܛܵܝܸܦܹ̈ܐ ܟܹܐ ܥܵܒ̣ܕܝܼ ܡܵܪܘܼܬܵܐ ܥܲܠܵܝ: ܘܓܘܼܪ̈ܵܢܵܝ ܟܹܐ ܥܵܒ̣ܕܝܼ ܗܘܼܟܡܵܐ ܥܲܠܵܝ. 43 ܐܝܼܢܵܐ ܗܲܕܟ̣ܵܐ ܠܹܐ ܝܠܵܐ ܓܵܘܵܘܟ̣ܘܿܢ: ܐܸܠܵܐ ܡ̇ܢ ܕܒܲܥܝܹܐ ܗܵܘܹܐ 44 ܓܘܼܪܵܐ ܓܵܘܵܘܟ̣ܘܿܢ: ܒܸܬ ܗܵܘܹܐ ܚܸܠܡܲܬܟܵܪܵܘܟ̣ܘܿܢ. ܘܐܲܝܢܝܼ ܡܸܢܵܘܟ̣ܘܿܢ ܕܒܲܥܝܹܐ ܗܵܘܹܐ ܩܵܕ̄ܡܵܝܵܐ: ܒܸܬ ܗܵܘܹܐ ܪܹܓܵܐ ܕܟܠ. 45 ܣܵܒܵܒ ܕܐܘܼܦ ܒܪܘܼܢܹܗ ܕܐܢܵܫܵܐ ܠܵܐ ܐܬܹܠܹܐ ܕܦܵܝܸܫ ܥܒ̣ܝܼܕܵܐ ܚܸܠܡܲܬ: ܐܸܠܵܐ ܕܥܵܒܸܕ ܚܸܠܡܲܬ: ܘܕܝܵܗ̄ܒܸܠ ܓܵܢܹܗ ܦܘܼܪܩܵܢܵܐ ܡܒܵܕܵܠ ܕܪܵܒܵܐ.

46 ܘܐܬܹܠܘܿܢ ܠܐܝܼܪܝܼܚܘܿ ܘܟܲܕ ܦܠܸܛܠܹܐ ܡ̣ܢ ܐܝܼܪܝܼܚܘܿ: ܗ̇ܘ ܘܬܲܠܡܝܼܕܘܼ̈ܗܝ: ܘܟܸܢܫܵܐ ܪܵܒܵܐ: ܒܲܪܛܝܼܡܲܝ: ܒܪܘܼܢܹܗ ܕܛܝܼܡܲܝ: ܓܹܒ̣ܵܝܵܐ ܣܸܡܝܵܐ: ܝܬܝܼܒ̣ܵܐ ܗ̄ܘܵܐ ܥܲܠ ܣܸܦܬܵܐ ܕܐܘܼܪܚܵܐ. 47 ܘܫܡܸܥܠܹܐ ܕܝܼܫܘܿܥ ܢܵܨܪܵܝܵܐ ܝܠܹܐ: ܘܫܘܼܪܹܠܹܐ ܠܡܲܩܘܘܼܚܹܐ 48 ܘܠܹܐܡܵܪܵܐ: ܝܼܫܘܿܥ ܒܪܘܼܢܹܗ ܕܕܵܘܝܼܕ: ܪܵܚܸܡ ܥܲܠܝܼ. ܘܪܵܒܵܐ ܢܵܓ̰ܘܝܼ ܗ̄ܘܵܘ ܒܝܹܗ ܕܫܵܬܸܩ ܗ̄ܘܵܐ. ܐܝܼܢܵܐ ܗ̇ܘ ܒܘܼܫ ܙܵܘܕܵܐ 49 ܡܘܼܩܘܸܚܠܹܐ: ܒܪܘܼܢܹܗ ܕܕܵܘܝܼܕ: ܪܵܚܸܡ ܥܲܠܝܼ. ܘܟܠܹܠܹܐ ܝܼܫܘܿܥ: ܘܐܡܸܪܹܐ ܕܩܵܪܝܼ ܠܹܗ. ܘܩܪܹܠܘܿܢ ܠܗܘ ܣܸܡܝܵܐ: ܒܹܐܡܵܪܵܐ ܐܸܠܹܗ: ܗ̄ܘܝܼ ܠܸܒܵܢܵܐ: ܩܘܼܡ̄: ܒܸܩܪܵܝܘܼܟ ܝܼܠܹܐ. 50 ܘܗ̇ܘ ܪܘܼܦܝܵܠܹܐ ܠܒܸܫܬܹܗ: ܘܢܕܸܠܹܐ: ܘܐܬܹܠܹܐ ܠܟܸܣ ܝܼܫܘܿܥ. 51 ܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ ܝܼܫܘܿܥ: ܡܘܼܕܝܼ ܒܲܥܝܸܬ ܕܥܵܒ̣ܕܸܢ ܐܸܠܘܼܟ: 52 ܘܣܸܡܝܵܐ ܐܡܸܪܹܐ ܐܸܠܹܗ: ܪܵܒܝܼ: ܕܚܵܙܸܢ. ܘܝܼܫܘܿܥ ܐܡܸܪܹܐ ܐܸܠܹܗ: ܙܹܠ̄ܐ. ܗܲܝܡܵܢܘܼܬܘܼܟ ܩܲܡ ܡܲܚܝܼܵܐ ܠܘܼܟ. ܘܕܲܪܣܵܥܲܬ ܚܙܹܠܹܐ: ܘܐܙܸܠܹܐ ܒܵܬ̄ܪܹܗ ܒܐܘܼܪܚܵܐ.

ܩܦܠܐܘܢ: ܝܐ

1 ܘܟܲܕ [38] ܩܘܼܪܒܸܢܘܿܢ ܠܐܘܿܪܸܫܠܸܡ: ܠܒܹܝܬ ܦܵܓܹܐ ܘܠܒܹܝܬ ܥܲܢܝܵܐ: ܠܟܸܣ ܛܘܼܪܵܐ ܕܙܲܝܬܹ̈ܐ: ܫܘܼܕܸܪܹܐ ܬܪܲܝ ܡ̣ܢ 2 ܬܲܠܡܝܼܕܘܼ̈ܗܝ. ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܠܗ̇ܝ ܡܵܬܵܐ ܕܝܼܠܵܐ ܠܒܲܪܩܘܼܒ̣ܠܵܘܟ̣ܘܿܢ: ܘܕܲܪܣܵܥܲܬ ܕܐܵܘܪܝܼܬܘܿܢ ܓܵܘܵܗ̇: ܒܸܬ ܡܵܫ̄ܟ̰ܚܝܼܬܘܿܢ ܓ̰ܲܥܫܵܐ ܐܣܝܼܪܵܐ: ܕܐܢܵܫܵܐ ܡ̣ܢ ܒܢܲܝ̈ܢܵܫܵܐ ܗܹܫ ܠܵܐ 3 ܝܬܸܒ̣ܠܹܐ ܥܲܠܘܼܗܝ. ܫܪܹܡܘܿܢ ܡܲܝܬ̄ܡܘܿܢ ܠܹܗ. ܘܐܸܢ ܐܢܵܫܵܐ ܐܵܡܸܪ ܐܸܠܵܘܟ̣ܘܿܢ: ܩܵܡܘܿܕܝܼ ܒܸܥܒ̣ܵܕܵܐ ܝܬܘܿܢ ܐܵܗܵܐ ܐܡܘܿܪܘܿܢ ܐܸܠܹܗ: ܕܠܡܵܪܲܢ ܠܵܙܸܡ ܝܼܠܹܐ: ܘܕܲܪܣܵܥܲܬ ܒܸܬ ܫܵܕܸܪܹܗ 4 ܠܲܐܟ̣ܵܐ. ܘܐܙܸܠܘܿܢ ܡܘܼܫ̄ܟ̰ܸܚܠܘܿܢ ܓ̰ܲܥܫܵܐ ܐܣܝܼܪܵܐ ܥܲܠ 5 ܬܲܪܥܵܐ ܠܒܲܕܲܪ ܒܥܵܠܘܿܠܵܐ: ܘܫܪܹܠܘܿܢ ܐܸܠܹܗ. ܘܐܢܵܫܹ̈ܐ ܡ̣ܢ ܕܐܵܢܝܼ ܕܟܸܠܝܹܐ ܗ̄ܘܵܘ ܬܵܡܵܐ ܐܡܸܪܘܿܢ ܐܸܠܵܝ: ܡܘܼܕܝܼ ܒܸܥܒ̣ܵܕܵܐ 6 ܝܬܘܿܢ ܒܸܫܪܵܝܵܐ ܠܓ̰ܲܥܫܵܐ. ܘܐܵܢܝܼ ܐܡܸܪܘܿܢ ܐܸܠܵܝ ܐܲܝܟ 7 ܕܦܩܝܼܕܵܝܠܹܐ ܝܼܫܘܿܥ: ܘܫܒ̣ܝܼܩܵܝܠܘܿܢ. ܘܡܘܼܬ̄ܝܹܠܘܿܢ ܠܓ̰ܲܥܫܵܐ ܠܟܸܣ ܝܼܫܘܿܥ: ܘܕܪܹܠܘܿܢ ܥܲܠܘܼܗܝ ܓ̰ܘܼܠܵܝ̈: ܘܪܟܸܒ̣ܠܹܐ 8 ܥܲܠܘܼܗܝ. ܐܝܼܢܵܐ ܪܵܒܵܐ ܫܵܘܝܼ ܗ̄ܘܵܘ ܠܓ̰ܘܼܠܵܝ̈ ܒܐܘܼܪܚܵܐ: 9 ܘܐܚܹܪ̄ܢܹܐ ܠܦܲܥܘܵܢܹ̈ܐ ܕܦܪܸܡܠܘܿܢ ܡ̣ܢ ܚܲܩܠܵܢܹ̈ܐ. ܘܐܵܙܵܠ̄ܢܹ̈ܐ ܩܵܕ̄ܡܘܼܗܝ: ܘܐܵܬܝܵܢܹ̈ܐ ܒܵܬ̄ܪܹܗ: ܩܘܼܘܸܚܠܘܿܢ: ܒܹܐܡܵܪܵܐ: ܐܘܿܫܲܥܢܵܐ: ܒܪܝܼܟ̣ܵܐ ܝܠܹܐ ܗ̇ܘ ܕܒܹܐܬܵܝܵܐ ܝܠܹܐ ܒܫܸܡܹܗ ܕܡܵܪܝܵܐ. 10 ܘܒܪܝܼܟ̣ܬܵܐ ܝܠܵܐ ܡܲܠܟܘܼܬܵܐ ܕܒܹܐܬܵܝܵܐ ܝܠܵܐ: ܕܒܵܒܲܢ ܕܵܘܝܼܕ: ܐܘܿܫܲܥܢܵܐ ܒܡܪ̈ܵܘܡܹܐ. 11 ܘܐܘܸܪܹܐ ܠܐܘܿܪܸܫܠܸܡ ܠܗܲܝܟܠܵܐ: ܘܚܸܪܹܐ ܚܵܕܸܪ̈ܘܵܢܹܗ ܠܟܠ ܡܸܢܕܝܼ: ܘܟܲܕ ܐܵܕܝܼܵܐ ܪܲܡܫܵܐ ܗ̄ܘܵܐ: ܦܠܸܛܠܹܐ ܠܒܹܝܬ ܥܲܢܝܵܐ ܥܲܡ ܬܪܸܥܣܲܪ. 12 ܘܒܝܘܿܡܵܐ ܐܚܹܪ̄ܢܵܐ: ܟܲܕ ܦܠܸܛܠܘܿܢ ܡ̣ܢ ܒܹܝܬ ܥܲܢܝܵܐ: 13 ܟܦܸܢܹܐ. ܘܚܙܹܠܹܐ ܚܵܕ̄ ܐܝܼܠܵܢܵܐ ܕܬܹܐܢܵܐ ܡ̣ܢ ܪܸܚܩܵܐ: ܕܐܝܼܬ ܗ̄ܘܵܘ ܒܝܹܗ ܛܲܪ̈ܦܹܐ: ܘܐܬܹܠܹܐ ܕܐܸܢ ܒܲܠܟܵܐ ܡܵܫ̄ܟ̰ܸܚ ܗ̄ܘܵܐ ܒܝܹܗ ܡܸܢܕܝܼ ܘܟܲܕ ܐܬܹܠܹܐ ܠܟܸܣܠܹܗ: ܠܵܐ ܡܘܼܫ̄ܟ̰ܸܚܠܹܐ ܡܸܢܕܝܼ ܫܒ̣ܘܿܩ ܡ̣ܢ ܛܲܪ̈ܦܹܐ: ܣܵܒܵܒ ܕܠܹܐ ܗ̄ܘܵܐ ܙܲܒ̣ܢܵܐ 14 ܕܬܹܐܢܹ̈ܐ. ܘܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ: ܡܐܵܕܝܼܵܐ ܘܠܥܵܠܲܡ ܐܢܵܫܵܐ ܡܸܢܘܼܟ ܛܥܘܼܢܬܵܐ ܠܵܐ ܐܵܟܸܠ. ܘܫܡܸܥܠܘܿܢ ܬܲܠܡܝܼܕܘܼ̈ܗܝ 15 ܘܐܬܹܠܘܿܢ ܠܐܘܿܪܸܫܠܸܡ: ܘܐܘܸܪܹܐ ܠܗܲܝܟܠܵܐ: ܘܫܘܼܪܹܠܹܐ ܠܦܵܠܘܿܛܹܐ ܠܐܵܢܝܼ ܕܒܸܙܒ̣ܵܢܵܐ ܗ̄ܘܵܘ ܘܙܵܒܘܿܢܹܐ ܓܵܘ ܗܲܝܟܠܵܐ: ܘܡܘܼܚܕܸܪܹܐ ܠܨܘܼܦܪܹ̈ܐ ܕܨܲܪ̈ܵܦܹܐ: ܘܠܟܘܼܪ̈ܣܵܘܵܬܹܐ ܕܐܵܢܝܼ 16 ܕܙܵܒ̇ܘܿܢܹܐ ܝܵܘܢܹ̈ܐ. ܘܠܵܐ ܫܒܸܩܠܹܐ ܕܐܢܵܫܵܐ ܡܲܥܒܸܪ ܗ̄ܘܵܐ ܡܵܐܢܵܐ 17 ܡ̣ܢ ܓܵܘ ܗܲܝܟܠܵܐ. ܘܡܵܠܸܦ ܗ̄ܘܵܐ ܘܐܵܡܸܪ ܐܸܠܵܝ: ܠܹܐ ܝܠܹܐ ܟܬܝܼܒ̣ܵܐ ܕܒܲܝܬܝܼ ܒܲܝܬܵܐ ܕܨܠܘܿܬܵܐ ܒܸܬ ܦܵܝܸܫ ܩܸܪܝܵܐ ܠܟܠܵܝ ܛܵܝܸܦܹ̈ܐ: ܐܝܼܢܵܐ ܐܲܚܬܘܿܢ ܥܒܸܕܠܵܘܟ̣ܘܿܢ ܐܸܠܹܗ ܓܸܦܝܼܬܵܐ 18 ܕܓ̰ܵܠܵܠܝܹܐ. ܘܫܡܸܥܠܘܿܢ ܓܘܼܪ̈ܵܢܹ̈ܐ ܕܟܵܗܢܹ̈ܐ ܘܣܵܦܪܹ̈ܐ: ܘܛܸܥܠܘܿܢ ܕܵܐܟ̣ܝܼ ܕܬܵܠܩܝܼ ܗ̄ܘܵܘ ܠܹܗ: ܣܵܒܵܒ ܕܙܕܸܥܠܘܿܢ ܡܸܢܹܗ: ܣܵܒܵܒ ܕܟܠܹܗ ܟܸܢܫܵܐ ܥܵܓ̰ܒܝܼ ܗ̄ܘܵܘ ܒܝܘܼܠܦܵܢܹܗ. 16 ܘܟܲܕ ܗ̄ܘܹܠܹܐ ܪܲܡܫܵܐ: ܟܹܐ ܦܵܠܸܛ ܗ̄ܘܵܐ ܠܒܲܕܲܪ ܡ̣ܢ ܡܕܝܼܢ̄ܬܵܐ. 20 ܘܒܩܵܝܕܲܡܬܵܐ: ܟܲܕ ܒܸܥܒ̣ܵܪܵܐ ܗ̄ܘܵܘ: ܚܙܹܠܘܿܢ ܗ̇ܘ ܐܝܼܠܵܢܵܐ 21 ܕܬܹܐܢܵܐ ܒܪܝܼܙܵܐ ܡ̣ܢ ܥܸܩܪܹܗ. ܘܕܟܸܪܹܐ ܟܹܐܦܵܐ ܘܐܡܸܪܹܐ ܐܸܠܹܗ: ܪܵܒܝܼ: ܗܵܐ: ܗ̇ܘ ܐܝܼܠܵܢܵܐ ܕܬܹܐܢܵܐ ܕܠܸܛܠܘܼܟ ܒܪܝܼܙܵܐ ܝܠܹܐ. 22 ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܗܵܘܝܵܐ ܠܵܘܟ̣ܘܿܢ ܗܲܝܡܵܢܘܼܬܵܐ 23 ܒܐܲܠܵܗܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܡ̇ܢ ܕܐܵܡܸܪ ܠܐܵܗܵܐ ܛܘܼܪܵܐ: ܦܘܼܫ ܫܩܝܼܠܵܐ: ܘܦܘܼܫ ܪܘܼܦܝܵܐ ܒܝܵܡܵܐ: ܘܠܵܐ ܦܵܝܸܫ ܕܘܼܒܵܪ ܒܠܸܒܹܗ: ܐܸܠܵܐ ܗܲܡܸܢ ܕܗܵܘܹܐ ܗ̇ܘ ܡܸܢܕܝܼ ܕܐܵܡܸܪ: 24 ܒܸܬ ܗܵܘܹܐ ܠܹܗ ܡܸܢܕܝܼ ܕܐܵܡܸܪ. ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܡܸܢܕܝܼ ܕܨܵܠܝܼܬܘܿܢ ܘܛܵܠܒܝܼܬܘܿܢ: ܗܲܡܸܢܘܿܢ 25 ܕܩܘܼܒܸ̇ܠܵܘܟ̣ܘܿܢ: ܘܒܸܬ ܗܵܘܹܐ ܠܵܘܟ̣ܘܿܢ. ܘܐܝܼܡܲܢ ܕܟܵܠܝܼܬܘܿܢ ܠܨܵܠܘܿܝܹܐ: ܫܒ̣ܘܿܩܘܿܢ ܐܸܢ ܡܸܢܕܝܼ ܐܝܼܬ ܠܵܘܟ̣ܘܿܢ ܥܲܠ ܐܢܵܫܵܐ: ܕܐܘܼܦ ܒܵܒܵܘܟ̣ܘܿܢ ܕܒܫܡܲܝܵܐ ܫܵܒܸܩ ܠܵܘܟ̣ܘܿܢ ܓܢܵܗܵܘ̈ܟ̣ܘܿܢ. 26 [39] ܐܝܼܢܵܐ ܐܸܢ ܐܲܚܬܘܿܢ ܠܵܐ ܫܵܒ̣ܩܝܼܬܘܿܢ: ܐܘܼܦ ܒܵܒܵܘܟ̣ܘܿܢ ܕܒܫܡܲܝܵܐ ܠܹܐ ܫܵܒܸܩ ܠܵܘܟ̣ܘܿܢ ܓܢܵܗܵܘ̈ܟ̣ܘܿܢ. 27 ܘܐܬܹܠܘܿܢ ܡܸܕܪܹܐ ܠܐܘܿܪܸܫܠܸܡ: ܘܟܲܕ ܒܸܚܕܵܪܵܐ ܗ̄ܘܵܐ ܓܵܘ ܗܲܝܟܠܵܐ: ܐܬܹܠܘܿܢ ܠܟܸܣܠܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ 28 ܘܚܘܵܪ̈ܕܸܩܢܹܐ. ܘܐܵܡܪܝܼ ܐܸܠܹܗ: ܒܡܘܼܕܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܬ: ܘܡܵܢܝܼ ܩܲܡ ܝܵܗ̄ܒܸܠ ܠܘܼܟ ܐܵܗܵܐ ܗܘܼܟܡܵܐ ܕܥܵܒ̣ܕܸܬ 29 ܐܲܢܹܐ. ܐܝܼܢܵܐ ܝܼܫܘܿܥ ܐܡܸܪܹܐ ܐܸܠܵܝ: ܐܘܼܦ ܐܵܢܵܐ ܒܸܬ ܒܵܩܪܸܢ ܡܸܢܵܘܟ̣ܘܿܢ ܚܕܵܐ ܗܹܡܸܙܡܵܢ: ܘܓ̰ܲܘܸܒܝܼܬܘܿܢ ܠܝܼ: ܘܐܵܢܵܐ ܒܸܬ ܐܵܡܪܸܢܵܘܟ̣ܘܿܢ ܒܡܘܼܕܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. 30 ܡܲܥܡܘܿܕܝܼܬܹܗ ܕܝܘܿܚܲܢܵܢ ܡ̣ܢ ܫܡܲܝܵܐ ܗ̄ܘܵܐ: ܝܲܢ ܡ̣ܢ ܒܢܲܝ̈ܢܵܫܵܐ: 31 ܓ̰ܲܘܸܒܘܿܢ ܠܝܼ. ܘܚܫܸܒ̣ܠܘܿܢ ܒܓܵܢܵܝ: ܒܹܐܡܵܪܵܐ: ܐܸܢ ܐܵܡܪܵܚ ܠܹܗ: ܡ̣ܢ ܫܡܲܝܵܐ: ܒܸܬ ܐܵܡܸܪ ܐܸܠܲܢ: ܒܲܣ ܩܵܡܘܿܕܝܼ ܠܵܐ 32 ܗܘܼܡܸܢܵܘܟ̣ܘܿܢ ܐܸܠܹܗ. ܐܸܠܵܐ ܐܸܢ ܐܵܡܪܵܚ: ܡ̣ܢ ܒܢܲܝ̈ܢܵܫܵܐ: ܙܕܸܥܠܘܿܢ ܡ̣ܢ ܛܵܝܸܦܵܐ. ܣܵܒܵܒ ܟܠܵܝ ܕܒ̣ܝܼܩܹܐ ܗ̄ܘܵܘ ܠܝܘܿܚܲܢܵܢ 33 ܕܒܫܲܪܝܼܪܘܼܬܵܐ ܢܒ̣ܝܼܵܐ ܗ̄ܘܵܐ. ܘܓ̰ܘܼܘܸܒܠܘܿܢ ܘܐܵܡܪܝܼ ܠܝܼܫܘܿܥ: ܠܹܐ ܝܲܕܥܵܚ. ܘܝܼܫܘܿܥ ܐܡܸܪܹܐ ܐܸܠܵܝ: ܘܐܘܼܦ ܐܵܢܵܐ ܠܹܐ ܐܵܡܪܸܢܵܘܟ̣ܘܿܢ ܒܡܘܼܕܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ.

ܩܦܠܐܘܢ: ܝܒ

1 ܘܫܘܼܪܹܠܹܐ ܠܗܲܡܙܘܼܡܹܐ ܥܲܡܵܝ ܒܡܵܣܵܠܹ̈ܐ. ܚܵܕ̄ ܐܢܵܫܵܐ ܢܨܸܒ̣ܠܹܐ ܟܲܪܡܵܐ: ܘܥܒܸܕܠܹܐ ܚܵܕܸܪ̈ܘܵܢܹܗ ܣܝܵܓ̣ܵܐ: ܘܚܦܸܪܹܐ ܓܵܘܹܗ [40] ܡܲܥܨܲܪܬܵܐ: ܘܒܢܹܠܹܐ ܒܘܼܪܓ̰ܵܐ: ܘܣܘܼܦܹܠܹܗ ܠܦܵܠܵܚܹ̈ܐ: 2 ܘܐܙܸܠܹܐ ܠܪܸܚܩܵܐ. ܘܒܙܲܒ̣ܢܵܐ ܠܪܸܚܩܵܐ. ܘܒܙܲܒ̣ܢܵܐ ܫܘܼܕܸܪܹܐ ܠܟܸܣ ܦܵܠܵܚܹ̈ܐ ܪܹܓܹܗ 3 ܕܫܵܩܸܠ ܗ̄ܘܵܐ ܡ̣ܢ ܦܵܠܵܚܹ̈ܐ ܛܥܘܼܢܬܵܐ ܕܟܲܪܡܵܐ. ܘܐܵܢܝܼ ܕܒܸܩܠܘܿܢ ܐܸܠܹܗ ܘܡܚܹܠܘܿܢ: ܘܫܘܼܕܸܪܘܿܢ ܐܸܠܹܗ ܣܦܝܼܩܵܐ. 4 ܘܫܘܼܕܸܪܹܐ ܡܸܕܪܹܐ ܠܟܸܣܠܵܝ ܚܵܕ̄ ܪܹܓܵܐ ܐܚܹܪ̄ܢܵܐ: ܘܐܘܼܦ ܠܗ̇ܘ 5 ܕܘܼܪܒܸܢܘܿܢ ܪܹܫܹܗ: ܘܥܒܸܕܠܘܿܢ ܒܹܨܘܼܪ. ܘܫܘܼܕܸܪܹܐ ܚܵܕ̄ ܐܚܹܪ̄ܢܵܐ: ܘܐܘܼܦ ܠܗ̇ܘ ܩܛܸܠܘܿܢ. ܘܠܪܵܒܵܐ ܐܚܹܪ̄ܢܵܐ: ܘܡܸܢܵܝ 6 ܡܚܹܠܘܿܢ: ܘܡܸܢܵܝ ܩܛܸܠܘܿܢ. ܐܝܼܬ ܗ̄ܘܵܐ ܠܹܗ ܚܵܕ̄ ܒܪܘܼܢܵܐ ܡܘܼܚܸܒܵܐ: ܘܫܘܼܕܸܪܹܐ ܐܸܠܹܗ ܠܟܸܣܠܵܝ ܒܐܚܵܪܵܝܬܵܐ: ܟܲܕ ܐܵܡܸܪ: 7 ܒܸܬ ܢܵܚܦܝܼ ܡ̣ܢ ܒܪܘܼܢܝܼ. ܐܝܼܢܵܐ ܐܵܢܝܼ ܦܵܠܵܚܹ̈ܐ ܐܡܸܪܘܿܢ ܒܓܵܢܵܝ: ܐܵܗܵܐ ܝܠܹܐ ܡܝܼܪܲܬܓܵܪ. ܬܹܡܘܿܢ ܩܵܛܠܵܚ ܠܹܗ: ܘܒܸܬ ܗܵܘܝܵܐ 8 ܕܝܲܢ ܡܝܼܪܲܬܓܵܪܘܼܬܵܐ. ܘܫܩܸܠܘܿܢ ܩܛܸܠܘܿܢ ܐܸܠܹܗ: 9 ܘܦܘܼܠܸܛܠܘܿܢ ܐܸܠܹܗ ܠܒܲܕܲܪ ܡ̣ܢ ܟܲܪܡܵܐ. ܒܲܣ ܡܘܼܕܝܼ ܒܸܬ ܥܵܒܸܕ ܡܵܪܵܐ ܕܟܲܪܡܵܐ. ܒܸܬ ܐܵܬܹܐ ܘܬܵܠܸܩ ܠܐܵܢܝܼ ܦܵܠܵܚܹ̈ܐ: ܘܒܸܬ 10 ܝܵܗ̄ܒܸܠ ܠܹܗ ܟܲܪܡܵܐ ܠܐܚܹܪ̄ܢܵܐ. ܘܐܘܼܦ ܐܵܗܵܐ ܟܬܵܒ̣ܵܐ ܠܵܐ ܩܪܹܠܵܘܟ̣ܘܿܢ: ܟܹܐܦܵܐ ܕܡܘܼܣܠܹܠܘܿܢ ܒܲܢܹ̈ܐ: ܗ̇ܘ ܗ̄ܘܹܠܹܐ ܠܪܹܫܵܐ 11 ܕܩܸܪܢܝܼܬܵܐ. ܡ̣ܢ ܠܟܸܣ ܡܵܪܝܵܐ ܗ̄ܘܹܠܵܐ ܐܵܗܵܐ: ܘܥܵܓ̰ܸܒܘܼܬܵܐ 12 ܝܠܵܐ ܒܥܲܝ̈ܢܲܢ. ܘܛܵܥܝܼ ܗ̄ܘܵܘ ܠܸܕܒ̣ܵܩܹܗ: ܘܙܕܸܥܠܘܿܢ ܡ̣ܢ ܛܵܝܸܦܵܐ: ܣܵܒܵܒ ܕܝܕܸܥܠܘܿܢ ܕܥܲܠܵܝ ܐܡܸܪܹܐ ܐܵܗܵܐ ܡܵܣܵܠܵܐ. ܘܫܒܸܩܠܘܿܢ ܐܸܠܹܗ: ܘܐܙܸܠܘܿܢ. 13 ܡܫܘܼܕܸܪܘܿܢ ܠܟܸܣܠܹܗ ܐܢܵܫܹ̈ܐ ܡ̣ܢ ܦܪ̈ܝܼܫܹܐ: ܘܡ̣ܢ ܕܒܹܝܬ 14 ܗܹܪܘܿܕܸܣ: ܕܨܵܝܕܝܼ ܗ̄ܘܵܘ ܠܹܗ ܒܗܹܡܸܙܡܵܢ. ܘܐܵܢܝܼ ܐܬܹܠܘܿܢ ܘܐܡܸܪܘܿܢ ܐܸܠܹܗ: ܡܲܠܦܵܢܵܐ: ܒܝܼܕܲܥܝܵܐ ܝܘܵܚ ܕܫܲܪܝܼܪܵܐ ܝܘܸܬ: ܘܠܲܝܬ ܠܘܼܟ ܚܲܡ ܠܐܢܵܫܵܐ: ܣܵܒܵܒ ܠܹܐ ܚܵܝܪܸܬ ܠܦܵܬܵܐ ܕܐܢܵܫܵܐ: ܐܸܠܵܐ ܒܫܲܪܝܼܪܘܼܬܵܐ ܐܘܼܪܚܵܐ ܕܐܲܠܵܗܵܐ ܡܵܠܘܿܦܹܐ ܝܘܸܬ: ܒܕܲܣܬܘܼܪ ܝܼܠܵܐ ܠܝܼܵܗ̄ܒ̣ܵܐ ܚܲܪܓ̰ ܕܪܹܫܵܐ ܠܩܹܣܲܪ: ܝܲܢ ܠܵܐ: ܝܵܗ̄ܒ̣ܵܚ: ܝܲܢ 15 ܠܵܐ ܝܵܗ̄ܒ̣ܵܚ. ܐܝܼܢܵܐ ܗ̇ܘ ܝܕܸܥܠܹܐ ܦܸܠܡܵܝ: ܘܐܡܸܪܹܐ ܐܸܠܵܝ: ܩܵܡܘܿܕܝܼ ܓ̰ܵܪܘܿܒܝܼ ܝܬܘܿܢ: ܡܲܝܬ̄ܡܘܿܢ ܠܝܼ ܕܝܼܢܵܪܵܐ ܕܚܵܙܸܢ. 16 ܘܡܘܼܬ̄ܝܹܠܘܿܢ ܐܸܠܹܗ. ܐܵܡܸܪ ܐܸܠܵܝ: ܕܡܵܢܝܼ ܝܠܹܐ ܐܵܗܵܐ ܫܸܟܠܵܐ 17 ܘܣܸܟܵܐ: ܘܐܵܢܝܼ ܐܡܸܪܘܿܢ: ܕܩܹܣܲܪ. ܘܝܼܫܘܿܥ ܐܡܸܪܹܐ ܐܸܠܵܝ: ܕܩܹܣܲܪ ܗܲܒܠܘܿܢ ܠܩܹܣܲܪ: ܘܕܲܐܠܵܗܵܐ ܠܐܲܠܵܗܵܐ. ܘܥܘܼܓ̰ܸܒܠܘܿܢ ܒܝܹܗ. 18 ܘܐܬܹܠܘܿܢ ܙܲܕܘܼܩܵܝܹ̈ܐ ܠܟܸܣܠܹܗ: ܐܵܢܝܼ ܕܟܹܐ ܐܵܡܪܝܼ ܕܠܲܝܬ 19 ܩܝܵܡܬܵܐ: ܘܒܘܼܩܸܪܘܿܢ ܡܸܢܹܗ: ܘܐܵܡܪܝܼ. ܡܲܠܦܵܢܵܐ: ܡܘܼܫܹܐ ܟܬܸܒ̣ܠܹܐ ܐܸܠܲܢ: ܕܐܸܢ ܡܵܝܸܬ ܐܵܚܘܿܢܹܗ ܕܐܢܵܫܵܐ: ܘܫܵܒܸܩ ܒܲܟ̣ܬܵܐ: ܘܒܢܘܼܢܹ̈ܐ ܠܵܐ ܫܵܒܸܩ: ܓܵܒܸܪ ܐܵܚܘܿܢܹܗ ܒܲܟ̣ܬܹܗ: ܘܡܲܩܸܡ ܙܲܪܥܵܐ 20 ܠܐܵܚܘܿܢܹܗ. ܫܲܒ̣ܥܵܐ ܐܵܚܘܿܢܘܵܬܹ̈ܐ ܐܝܼܬ ܗ̄ܘܵܘ. ܩܵܕ̄ܡܵܝܵܐ ܓܒܸܪܹܐ 21 ܒܲܟ̣ܬܵܐ: ܘܡܸܬܠܹܐ ܘܠܵܐ ܫܒܸܩܠܹܐ ܙܲܪܥܵܐ. ܘܗ̇ܘ ܕܬܪܲܝ ܫܩܝܼܠܵܠܹܐ: ܘܡܸܬܠܹܐ: ܟܲܕ ܐܘܼܦ ܗ̇ܘ ܠܵܐ ܫܒܸܩܠܹܐ ܙܲܪܥܵܐ. 22 ܘܕܬܠܵܬ̄ܐ ܗܲܕܟ̣ܵܐ. ܘܫܲܒ̣ܥܲܢܬܵܝ ܫܩܝܼܠܵܠܘܿܢ: ܘܠܵܐ ܫܒܸܩܠܘܿܢ ܙܲܪܥܵܐ. ܒܚܲܪܬܵܐ ܕܟܠܵܝ ܐܘܼܦ ܗ̇ܝ ܒܲܟ̣ܬܵܐ ܡܸܬܠܵܐ. 23 ܒܩܝܵܡܬܵܐ ܕܐܲܝܢܝܼ ܡܸܢܵܝ ܒܸܬ ܗܵܘܝܵܐ ܒܲܟ̣ܬܵܐ: ܣܵܒܵܒ ܕܫܲܒ̣ܥܲܢܬܵܝ 24 ܫܩܝܼܠܵܠܘܿܢ. ܘܐܡܸܪܹܐ ܐܸܠܵܝ ܝܼܫܘܿܥ: ܠܹܐ ܝܠܵܐ ܣܵܒܵܒ ܕܐܵܗܵܐ ܒܸܚܠܵܛܵܐ ܝܬܘܿܢ: ܕܠܹܐ ܝܬܘܿܢ ܒܝܼܕܲܥܝܵܐ ܟܬܵܒܹ̈ܐ: ܘܠܵܐ 25 ܚܲܝܠܹܗ ܕܐܲܠܵܗܵܐ. ܣܵܒܵܒ ܐܝܼܡܲܢ ܕܩܵܝܡܝܼ ܡ̣ܢ ܡܝܼܬܹ̈ܐ: ܠܹܐ ܓܵܒ̣ܪܝܼ: ܐܘܼܦ ܠܹܐ ܦܵܝܫܝܼ ܝܘܼܗ̄ܒ̣ܵܐ ܠܓܲܒ̣ܪܹ̈ܐ: ܐܸܠܵܐ ܐܲܝܟ 26 ܡܲܠܲܐܟܹ̈ܐ ܕܒܫܡܲܝܵܐ ܝܢܵܐ. ܐܝܼܢܵܐ ܥܲܠ ܡܝܼܬܹ̈ܐ: ܕܩܵܝܡܝܼ: ܠܵܐ ܩܪܹܠܵܘܟ̣ܘܿܢ ܒܟܬܵܒ̣ܵܐ ܕܡܘܼܫܹܐ: ܕܵܐܟ̣ܝܼ ܡ̣ܢ ܣܲܢܝܵܐ ܗܘܼܡܙܸܡܠܹܐ ܥܲܡܹܗ ܐܲܠܵܗܵܐ: ܘܐܡܸܪܹܐ: ܐܵܢܵܐ ܝܘܸܢ ܐܲܠܵܗܹܗ ܕܐܲܒ̣ܪܵܗܵܡ: ܘܐܲܠܵܗܹܗ 27 ܕܐܝܼܣܚܵܩ: ܘܐܲܠܵܗܹܗ ܕܝܲܥܩܘܿܒ̣. ܠܹܐ ܝܠܹܐ ܐܲܠܵܗܵܐ ܕܡܝܼܬܹ̈ܐ: ܐܸܠܵܐ ܕܚܵܝܹ̈ܐ: ܪܵܒܵܐ ܒܸܚܠܵܛܵܐ ܝܬܘܿܢ. 28 ܘܐܬܹܠܹܐ ܚܵܕ̄ ܡ̣ܢ ܣܵܦܪܹ̈ܐ ܘܫܸܡܥܝܵܝܠܹܐ [41] ܕܒܸܕܪܵܫܵܐ: ܘܚܙܹܠܹܐ ܕܨܦܵܝܝܼ ܓ̰ܘܼܘܵܒ ܡܘܼܕܸܪܹܐ ܐܸܠܵܝ: ܘܒܘܼܩܸܪܹܗ: ܐܲܝܢܝܼ 29 ܦܘܼܩܕܵܢܵܐ ܩܵܕ̄ܡܵܝܵܐ ܝܠܹܐ ܕܟܠܵܝ. ܓ̰ܘܼܘܸܒܠܹܐ ܝܼܫܘܿܥ: ܩܵܕ̄ܡܵܝܵܐ ܡ̣ܢ ܟܠܵܝ ܦܘܼܩܕܵܢܹ̈ܐ: ܫܡܥܝܼ: ܝܼܣܪܵܝܹܠ: ܡܵܪܝܵܐ ܐܲܠܵܗܲܢ ܚܵܕ̄ 30 ܡܵܪܝܵܐ ܝܠܹܐ. ܘܡܲܚܸܒܸܬ ܠܡܵܪܝܵܐ ܐܲܠܵܗܘܼܟ ܡ̣ܢ ܟܠܹܗ ܠܸܒܘܼܟ: ܘܡ̣ܢ ܟܠܹܗ ܓܵܢܘܼܟ: ܘܡ̣ܢ ܟܠܹܗ ܚܝܼܵܠܘܼܟ: ܘܡ̣ܢ ܟܠܹܗ 31 ܚܲܝܠܘܼܟ: [42] ܐܵܗܵܐ ܝܠܹܐ ܦܘܼܩܕܵܢܵܐ ܩܵܕ̄ܡܵܝܵܐ. ܕܬܪܲܝ [43] ܟܹܐ ܕܵܡܹܐ ܐܸܠܹܗ: ܡܲܚܸܒܸܬ ܠܫܒ̣ܵܒ̣ܘܼܟ ܐܲܝܟ ܓܵܢܘܼܟ. ܦܘܼܩܕܵܢܵܐ ܐܚܹܪ̄ܢܵܐ 32 ܕܓܘܼܪܵܐ ܡ̣ܢ ܕܐܲܢܹܐ ܠܲܝܬ. ܐܵܡܸܪ ܐܸܠܹܗ ܗ̇ܘ ܣܵܦܪܵܐ: ܨܦܵܝܝܼ: ܪܵܒܝܼ: ܒܫܲܪܝܼܪܘܼܬܵܐ ܐܡܸܪܘܼܟ: ܕܚܵܕ̄ ܝܼܠܹܐ: ܘܠܲܝܬ ܐܚܹܪ̄ܢܵܐ 33 ܫܒ̣ܘܿܩ ܡܸܢܹܗ. ܘܕܡܲܚܸܒ ܠܹܗ ܐܢܵܫܵܐ ܡ̣ܢ ܟܠܹܗ ܠܸܒܵܐ: ܘܡ̣ܢ ܟܠܹܗ ܚܝܼܵܠ: ܘܡ̣ܢ ܟܠܵܗ̇ ܓܵܢܵܐ: ܘܡ̣ܢ ܟܠܹܗ ܚܲܝܠܵܐ: ܘܕܡܲܚܸܒ ܠܫܒ̣ܵܒܹܗ ܐܲܝܟ ܓܵܢܹܗ: ܙܵܘܕܵܐ ܝܠܵܐ ܡ̣ܢ ܟܠܵܝ ܝܩܝܼܕܹ̈ܐ 34 ܬܲܡܵܡ ܘܕܸܒ̣ܚܹ̈ܐ. ܘܝܼܫܘܿܥ ܚܙܹܠܹܗ ܕܒܗܵܘܢܵܢܘܼܬܵܐ ܡܲܕܘܼܪܹܐ ܗ̄ܘܵܐ ܓ̰ܘܼܘܵܒ: ܘܐܡܸܪܹܐ ܐܸܠܹܗ: ܠܹܐ ܝܘܸܬ ܪܸܚܩܵܐ ܡ̣ܢ ܡܲܠܟܘܼܬܵܐ ܕܐܲܠܵܗܵܐ. ܘܡܸܕܪܹܐ ܐܢܵܫܵܐ ܠܵܐ ܩܘܼܫܕܸܪܹܐ ܠܒܵܩܘܿܪܹܗ. 35 ܘܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܟܲܕ ܡܵܠܘܿܦܹܐ ܒܗܲܝܟܠܵܐ: ܕܵܐܟ̣ܝܼ ܒܹܐܡܵܪܵܐ ܝܢܵܐ ܣܵܦܪܹ̈ܐ ܕܡܫܝܼܚܵܐ ܒܪܘܼܢܹܗ ܕܕܵܘܝܼܕ 36 ܝܼܠܹܐ. ܣܵܒܵܒ ܕܕܵܘܝܼܕ ܒܓܵܢܹܗ ܐܡܸܪܹܐ ܒܪܘܼܚܵܐ ܕܩܘܼܕܫܵܐ: ܐܡܸܪܹܐ ܡܵܪܝܵܐ ܠܡܵܪܝܼ: ܝܬܘܿܒ̣ ܠܘܼܟ ܡ̣ܢ ܝܲܡܝܼܢܝܼ: ܗܲܠ 37 ܕܡܲܬܒܸܢ ܕܸܫܡܸܢܘܼ̈ܟ ܟܘܼܒ̣ܫܵܐ ܬܚܘܿܬ ܐܲܩܠܘܼ̈ܟ. ܕܵܘܝܼܕ ܒܓܵܢܹܗ ܒܸܩܪܵܝܹܗ ܝܠܹܐ ܡܵܪܝܵܐ: ܘܕܵܐܟ̣ܝܼ ܒܪܘܼܢܹܗ ܝܠܹܐ: ܘܪܵܒܵܐ ܟܸܢܫܵܐ ܫܲܡܸܥ ܗ̄ܘܵܐ ܠܹܗ ܒܚܲܕܘܼܬܵܐ. 38 ܘܒܝܘܼܠܦܵܢܹܗ ܐܡܸܪܹܐ ܐܸܠܵܝ: ܗ̄ܘܹܡܘܿܢ ܗܸܫܝܵܪ ܡ̣ܢ ܣܵܦܪܹ̈ܐ ܕܒܲܥܝܝܼ ܒܠܒܸܫܝܵܬܹ̈ܐ ܝܵܪ̈ܝܼܟܹܐ ܚܵܕܪܝܼ: ܘܫܠܵܡܹ̈ܐ ܒܥܵܠܘܿܠܹ̈ܐ 39 ( ܗܵܘܝܼ ܠܗ̄ܘܿܢ). ܘܪܹܫܵܐ ܕܡܵܘܬܒܹ̈ܐ ܓܵܘ ܟܢܘܼܫܝܵܬܹ̈ܐ: ܘܪܹܫܵܐ 40 ܕܝܬܝܵܒܹ̈ܐ ܒܡܸܫܬܘܼܝܵܬܹ̈ܐ. ܐܵܢܝܼ ܕܟܹܐ ܐܵܟ̣ܠܝܼ ܒܵܬܹ̈ܐ ܕܐܲܪ̈ܡܸܠܝܵܬܹܐ: ܘܒܡܵܗܢܵܐ ܟܹܐ ܡܲܪܝܸܟ̣ܝܼ ܨܠܵܘܵܬܵܝ̈. ܐܵܢܝܼ ܒܸܬ ܩܵܒ̇ܠܝܼ ܕܝܼܘܵܢ ܙܵܘܕܵܐ. 41 ܘܟܲܕ ܝܬܸܒ̣ܠܹܐ ܝܼܫܘܿܥ ܠܒܲܪܩܘܼܒ̣ܠ ܕܒܹܝܬ ܚܲܙܝܼܢܵܐ: ܒܸܚܝܵܪܵܐ ܗ̄ܘܵܐ ܕܵܐܟ̣ܝܼ ܟܸܢܫܵܐ ܒܸܕܪܵܝܵܐ ܗ̄ܘܵܘ ܙܘܼܙܵܐ ܓܵܘ ܚܲܙܝܼܢܵܐ: 42 ܘܪܵܒܵܐ ܕܵܘܠܲܬܡܲܢܕܹ̈ܐ ܒܸܕܪܵܝܵܐ ܗ̄ܘܵܘ ܪܵܒܵܐ. ܘܐܬܹܠܵܐ ܚܕܵܐ ܐܲܪܡܸܠܬܵܐ ܡܸܣܟܸܢܬܵܐ: ܕܪܹܠܵܐ ܫܵܡܘܿܢܹ̈ܐ ܕܝܼܢܵܐ ܫܵܗܝܼ. 43 ܘܩܪܹܠܹܐ ܠܬܲܠܡܝܼܕܘܼ̈ܗܝ: ܘܐܡܸܪܹܐ ܐܸܠܵܝ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܵܗܵܐ ܐܲܪܡܸܠܬܵܐ ܡܸܣܟܸܢܬܵܐ ܙܵܘܕܵܐ ܡ̣ܢ ܟܠܵܝ 44 ܐܢܵܫܹ̈ܐ ܕܒܸܕܪܵܝܵܐ ܝܢܵܐ ܕܪܹܠܵܐ ܓܵܘ ܚܲܙܝܼܢܵܐ. ܣܵܒܵܒ ܟܠܵܝ ܡ̣ܢ ܡܸܢܕܝܼ ܕܝܼܠܹܐ ܙܵܘܕܵܐ ܐܸܠܵܝ ܕܪܹܠܘܿܢ: ܐܝܼܢܵܐ ܐܵܗܵܐ ܡ̣ܢ ܒܵܨܘܿܪܘܼܬܵܗ̇ ܟܠ ܕܐܝܼܬ ܗ̄ܘܵܐ ܠܵܗ̇ ܕܪܹܠܵܐ ܐܸܠܹܗ: ܟܠܵܝ ܚܲܝܘܼ̈ܗ̇.

ܩܦܠܐܘܢ: ܝܓ

1 ܘܟܲܕ ܦܠܸܛܠܹܐ ܗ̇ܘ ܡ̣ܢ ܗܲܝܟܠܵܐ: ܐܡܸܪܹܐ ܐܸܠܹܗ ܚܵܕ̄ ܡ̣ܢ ܬܲܠܡܝܼܕܘܼ̈ܗܝ: ܡܲܠܦܵܢܵܐ: ܚܙܝܼ: ܕܵܐܟ̣ܝܼ ܟܹܐܦܹ̈ܐ: ܘܕܵܐܟ̣ܝܼ 2 ܒܸܢܝܵܢܹ̈ܐ. ܘܝܼܫܘܿܥ ܐܡܸܪܹܐ ܐܸܠܹܗ: ܒܸܚܙܵܝܵܐ ܝܘܸܬ ܐܲܢܹܐ ܒܸܢܝܵܢܹ̈ܐ ܓܘܼܪܹ̈ܐ: ܠܹܐ ܗܵܘܝܵܐ ܫܒ̣ܝܼܩܬܵܐ ܠܲܐܟ̣ܵܐ ܟܹܐܦܵܐ ܥܲܠ ܟܹܐܦܵܐ: ܕܠܹܐ ܦܵܝܫܵܐ ܣܬܝܼܪܬܵܐ. 3 ܘܟܲܕ ܝܬܸܒ̣ܠܹܐ ܗ̇ܘ ܒܛܘܼܪܵܐ ܕܙܲܝܬܹ̈ܐ ܠܒܲܪܩܘܼܒ̣ܠ ܕܗܲܝܟܠܵܐ: ܒܘܼܩܸܪܘܿܢ ܡܸܢܹܗ ܟܹܐܦܵܐ ܘܝܲܥܩܘܿܒ̣ ܘܝܘܿܚܲܢܵܢ 4 ܘܐܲܢܕܪܹܐܘܿܣ ܒܢܲܦ̮ܫܵܝ. ܘܐܡܘܿܪ ܐܸܠܲܢ ܐܝܼܡܲܢ ܐܲܢܹܐ ܒܸܬ ܗܵܘܝܼ: ܘܡܘܼܕܝܼ ܝܠܹܐ ܢܝܼܫܲܢܩܵܐ ܐܝܼܡܲܢ ܕܗܕܝܼܪܹܐ ܝܢܵܐ ܐܲܢܹܐ ܟܠܵܝ 5 ܠܸܦܝܵܫܵܐ ܬܘܼܡܸܡܹܐ. ܘܫܘܼܪܹܠܹܐ ܝܼܫܘܿܥ ܠܹܐܡܵܪܵܐ ܐܸܠܵܝ: ܚܙܹܡܘܿܢ 6 ܕܠܵܐ ܐܢܵܫܵܐ ܡܲܚܠܸܛ ܠܵܘܟ̣ܘܿܢ. ܪܵܒܵܐ ܒܸܬ ܐܵܬܝܼ ܒܫܸܡܝܼ 7 ܘܐܵܡܪܝܼ: ܐܵܢܵܐ ܝܘܸܢ: ܘܠܪܵܒܵܐ ܒܸܬ ܡܲܚܠܸܛܝܼ. ܐܝܼܢܵܐ ܐܝܼܡܲܢ ܕܫܲܡܥܝܼܬܘܿܢ ܦܠܵܫܹ̈ܐ ܘܒܵܗܣܹ̈ܐ ܕܦܠܵܫܹ̈ܐ: ܠܵܐ ܙܵܕܥܝܼܬܘܿܢ: ܘܵܓ̰ܸܒ 8 ܝܼܠܵܐ ܕܗܵܘܹܐ: ܐܸܠܵܐ ܗܹܫ ܠܵܐ ܚܲܪܬܵܐ. ܣܵܒܵܒ ܕܒܸܬ ܩܵܝܸܡ ܛܵܝܸܦܵܐ ܥܲܠ ܛܵܝܸܦܵܐ: ܘܡܲܠܟܘܼܬܵܐ ܥܲܠ ܡܲܠܟܘܼܬܵܐ: ܘܒܸܬ ܗܵܘܝܼ ܪܵܘܕܵܢܹܐ ܒܕܘܼܟܵܐ ܕܘܼܟܵܐ: ܘܒܸܬ ܗܵܘܝܼ ܟܸܦܢܹ̈ܐ ܘܫܓ̣ܘܼܫܝܹ̈ܐ. 9 ܐܲܢܹܐ ܝܢܵܐ ܪܹܫܵܐ ܕܚܸܒ̣ܠܹ̈ܐ. ܐܝܼܢܵܐ ܚܙܹܡܘܿܢ ܐܲܚܬܘܿܢ ܒܓܵܢܵܘܟ̣ܘܿܢ: ܣܵܒܵܒ ܕܒܸܬ ܣܵܦܝܼ ܠܵܘܟ̣ܘܿܢ ܠܟܸܢܫܹ̈ܐ ܕܪܵܐܝܼ: ܘܓܵܘ ܟܢܘܼܫܝܵܬܹ̈ܐ ܒܸܬ ܦܵܝܫܝܼܬܘܿܢ ܓ̰ܘܼܢܓ̰ܸܪܹܐ: ܘܩܵܕ̄ܡ ܡܲܠܟܹ̈ܐ ܘܗܵܟܝܼܡܹ̈ܐ ܒܸܬ ܟܵܠܝܼܬܘܿܢ ܒܚܵܬܸܪ ܕܝܼܝܼ: ܠܣܵܗܕܘܼܬܵܝ. 10 ܐܝܼܢܵܐ ܩܵܕ̄ܡܵܝܬܵܐ ܘܵܓ̰ܸܒ ܝܼܠܵܐ ܕܦܵܝܫܵܐ ܡܘܼܟܪܸܙܬܵܐ ܡܲܫܚܲܕܬܵܐ 11 ܒܟܠܵܝ ܛܵܝܸܦܹ̈ܐ. ܘܐܝܼܡܲܢ ܕܡܲܝܬ̄ܝܝܼ ܠܵܘܟ̣ܘܿܢ ܘܣܵܦܝܼ ܠܵܘܟ̣ܘܿܢ: ܠܵܐ ܐܵܟ̣ܠܝܼܬܘܿܢ ܚܲܡ ܡܩܵܕ̄ܡܵܝܬܵܐ ܡܘܼܕܝܼ ܒܸܬ ܗܲܡܙܸܡܝܼܬܘܿܢ: ܐܸܠܵܐ ܗ̇ܘ ܡܸܢܕܝܼ ܕܦܵܝܸܫ ܝܘܼܗ̄ܒ̣ܵܐ ܐܸܠܵܘܟ̣ܘܿܢ ܒܗ̇ܝ ܣܵܥܲܬ: ܗ̇ܘ ܗܲܡܙܸܡܘܿܢ. ܣܵܒܵܒ ܠܹܐ ܝܠܹܐ ܐܲܚܬܘܿܢ 12 ܕܗܲܡܙܘܼܡܹܐ ܝܬܘܿܢ: ܐܸܠܵܐ ܪܘܼܚܵܐ ܕܩܘܼܕܫܵܐ. ܘܒܸܬ ܣܵܦܹܐ ܐܵܚܘܿܢܵܐ ܠܐܵܚܘܿܢܹܗ ܠܡܵܘܬܵܐ: ܘܒܵܒܵܐ ܠܒܪܘܼܢܹܗ: ܘܒܸܬ ܩܵܝܡܝܼ 13 ܒܢܘܼܢܹ̈ܐ ܥܲܠ ܐܲܒ̣ܵܗܵܝ̈: ܘܒܸܬ ܡܲܡܝܸܬܝܼ ܠܗ̄ܘܿܢ. ܘܒܸܬ ܗܵܘܝܼܬܘܿܢ ܣܸܢܝܹ̈ܐ ܡ̣ܢ ܟܠ ܐܢܵܫܵܐ ܒܚܵܬܸܪ ܕܫܸܡܝܼ: ܐܝܼܢܵܐ ܡ̇ܢ ܕܚܵܡܸܠ ܗܲܠ ܚܲܪܬܵܐ: ܗ̇ܘ ܒܸܬ ܚܲܝܹܐ. 14 ܐܝܼܢܵܐ ܐܝܼܡܲܢ ܕܚܵܙܝܼܬܘܿܢ ܢܝܼܫܲܢܩܵܐ ܛܲܡܵܐܐ ܕܚܵܪܵܒܝܼܘܼܬܵܐ: [44] ܗ̇ܘ ܕܝܼܠܹܐ ܐܡܝܼܪܵܐ ܒܕܵܢܝܼܐܹܝܠ ܢܒ̣ܝܼܵܐ: ܒܸܟܠܵܝܵܐ ܐܲܝܟܵܐ ܕܠܹܐ ܝܠܵܐ ܘܵܓ̰ܸܒ: ܗ̇ܘ ܕܩܵܪܹܐ ܦܲܪܡܹܐ: ܗ̇ܝܓܵܗ ܐܵܢܝܼ ܕܝܼܢܵܐ ܓܵܘ 15 ܝܼܗܘܼܕ ܥܵܪܩܝܼ ܠܛܘܼܪ̈ܵܢܹܐ. ܘܡ̇ܢ ܕܝܼܠܹܐ ܥܲܠ ܐܓܵܪܹܐ: ܠܵܐ 16 ܨܵܠܹܐ: ܘܠܵܐ ܐܵܘܸܪ ܠܸܫܩܵܠܵܐ ܡܸܢܕܝܼ ܡ̣ܢ ܒܲܝܬܹܗ. ܘܡ̇ܢ ܕܝܼܠܹܐ ܓܵܘ ܚܲܩܠܵܐ: ܠܵܐ ܕܵܝܸܪ ܠܒܵܬ̄ܪܹܗ ܕܫܵܩܸܠ ܠܒܸܫܬܹܗ. 17 ܐܝܼܢܵܐ ܘܵܝ ܠܐܵܢܝܼ ܕܝܼܢܵܐ ܒܛܝܼܢܹܐ: ܘܠܵܐܢܝܼ ܕܡܲܡܸܨܝܼ: ܒܐܵܢܝܼ 18 ܝܘܿܡܵܢܹ̈ܐ. ܘܨܵܠܹܡܘܿܢ ܕܠܵܐ ܗܵܘܹܐ ܥܪܵܩܵܘܟ̣ܘܿܢ ܒܣܸܬܘܵܐ. 19 ܣܵܒܵܒ ܕܒܸܬ ܗܵܘܹܐ ܐܘܼܠܨܵܢܵܐ ܒܐܵܢܝܼ ܝܘܿܡܵܢܹ̈ܐ: ܕܠܵܐ ܗ̄ܘܹܠܹܐ ܐܲܝܟ ܕܝܹܗ ܡ̣ܢ ܪܹܫܵܐ ܕܒܪܝܼܬܵܐ ܕܒܪܹܠܹܐ ܐܲܠܵܗܵܐ ܘܗܲܠ ܐܵܕܝܼܵܐ: 20 ܘܠܹܐ ܗܵܘܹܐ. ܘܐܸܢ ܡܵܪܝܵܐ ܠܵܐ ܡܲܟܪܹܐ ܗ̄ܘܵܐ ܠܐܵܢܝܼ ܝܘܿܡܵܢܹ̈ܐ: ܠܹܐ ܚܲܝܹܐ ܗ̄ܘܵܐ ܟܠ ܒܸܣܪܵܐ: ܐܸܠܵܐ ܒܚܵܬܸܪ ܕܓܘܼܒ̇ܝܹ̈ܐ 21 ܕܓܘܼܒܹܠܹܐ ܡܘܼܟܪܹܠܹܐ ܠܐܵܢܝܼ ܝܘܿܡܵܢܹ̈ܐ. ܐܸܢ ܐܢܵܫܵܐ ܐܵܡܸܪ ܐܸܠܵܘܟ̣ܘܿܢ: ܗܵܐ: ܠܲܐܟ̣ܵܐ ܝܠܹܐ ܡܫܝܼܚܵܐ: ܝܲܢ ܗܵܐ: ܬܵܡܵܐ: ܠܵܐ 22 ܗܲܡܸܢܝܼܬܘܿܢ. ܣܵܒܵܒ ܕܒܸܬ ܩܵܝܡܝܼ ܡܫܝܼܚܹ̈ܐ ܕܵܓܵܠܹ̈ܐ ܘܢܒ̣̈ܝܹܐ ܕܵܓܵܠܹ̈ܐ: ܘܒܸܬ ܝܵܗ̄ܒ̣ܝܼ ܢܝܼܫܲܢܩܹ̈ܐ ܘܥܵܓ̰ܸܒܘܵܬܵܐ: ܕܡܲܚܠܸܛܝܼ: 23 ܐܸܢ ܡܵܨܝܵܐ: ܐܘܼܦ ܠܓܘܼܒ̇ܝܹ̈ܐ. ܐܝܼܢܵܐ ܐܲܚܬܘܿܢ ܗ̄ܘܹܡܘܿܢ ܗܸܫܝܵܪ. ܗܵܐ: ܡܩܵܕ̄ܡܵܝܬܵܐ ܐܡܸܪܝܼ ܐܸܠܵܘܟ̣ܘܿܢ ܟܠ ܡܸܢܕܝܼ.

24 ܐܝܼܢܵܐ ܒܐܵܢܝܼ ܝܘܿܡܵܢܹ̈ܐ: ܡܒܵܬ̄ܪ ܕܗ̇ܘ ܐܘܼܠܨܵܢܵܐ: ܫܸܡܫܵܐ ܒܸܬ 25 ܚܵܒܹܐ: ܘܣܲܗܪܵܐ ܠܹܐ ܝܵܗ̄ܒܸܠ ܒܗܪܹܗ. ܘܟܵܘܟ̣ܒܹ̈ܐ ܒܸܬ ܗܵܘܝܼ ܒܸܢܦܵܠܵܐ ܡ̣ܢ ܫܡܲܝܵܐ: ܘܚܲܝܠܵܘܵܬܵܐ ܕܫܡܲܝܹ̈ܐ ܒܸܬ ܦܵܝܫܝܼ 26 ܡܘܼܫܥܸܫܹܐ. ܘܗ̇ܝܓܵܗ ܒܸܬ ܚܵܙܝܼ ܠܒܪܘܼܢܹܗ ܕܐܢܵܫܵܐ ܒܹܐܬܵܝܵܐ 27 ܒܥܢܵܢܹ̈ܐ ܥܲܡ ܚܲܝܠܵܐ ܓܘܼܪܵܐ ܘܥܲܡ ܚܸܩܪܵܐ. ܘܗ̇ܝܓܵܗ ܒܸܬ ܫܵܕܸܪ ܡܲܠܲܐܟ̣ܘܼ̈ܗܝ ܘܒܸܬ ܓ̰ܲܡܸܥ ܠܓܘܼܒ̇ܝܘܼ̈ܗܝ ܡ̣ܢ ܐܲܪܒܲܥܢܬܵܝ 28 ܦܵܘܚܹ̈ܐ: ܡ̣ܢ ܪܹܫܵܗ̇ ܕܐܲܪܥܵܐ ܘܗܲܠ ܪܹܫܵܗ̇ ܕܫܡܲܝܵܐ. ܐܝܼܢܵܐ ܡ̣ܢ ܐܝܼܠܵܢܵܐ ܕܬܹܐܢܵܐ ܝܠܘܿܦܘܿܢ ܡܵܣܵܠܵܐ: ܟܲܕ ܪܵܟܟ̣ܝܼ ܦܲܥܘܵܢܘܼ̈ܗܝ: ܘܒܲܪܛܸܢܝܼ ܛܲܪ̈ܦܘܼܗܝ: ܟܹܐ ܝܲܕܥܝܼܬܘܿܢ ܕܩܘܼܪܒܵܐ ܝܠܹܐ 29 ܩܲܝܛܵܐ. ܗܲܕܟ̣ܵܐ ܐܘܼܦ ܐܲܚܬܘܿܢ: ܐܝܼܡܲܢ ܕܚܵܙܝܼܬܘܿܢ: ܐܲܢܹܐ 30 ܒܸܗ̄ܘܵܝܵܐ: ܝܕܸܥܡܘܿܢ ܕܩܘܼܪܒܵܐ ܝܠܵܐ ܥܲܠ ܬܲܪ̈ܥܵܢܹܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܥܵܒ̣ܪܵܐ ܐܵܗܵܐ ܐܘܼܓ̰ܵܓ̣: ܗܲܠ ܐܲܢܹܐ 31 ܟܠܵܝ ܗܵܘܝܼ. ܫܡܲܝܵܐ ܘܐܲܪܥܵܐ ܒܸܬ ܥܵܒ̣ܪܝܼ: ܐܝܼܢܵܐ ܗܹܡܸܙܡܵܢܝܼ̈ ܠܹܐ 32 ܥܵܒ̣ܪܝܼ. ܐܝܼܢܵܐ ܥܲܠ ܕܗ̇ܘ ܝܘܿܡܵܐ ܘܥܲܠ ܕܗ̇ܝ ܣܵܥܲܬ ܐܢܵܫܵܐ ܠܹܐ ܝܲܕܸܥ: ܐܘܼܦ ܠܵܐ ܡܲܠܲܐܟܹ̈ܐ ܕܫܡܲܝܵܐ: ܘܠܵܐ ܒܪܘܼܢܵܐ: ܐܸܠܵܐ ܒܵܒܵܐ. 33 ܚܙܹܡܘܿܢ: ܥܒ̣ܘܿܕܘܿܢ ܫܵܗܲܪܬܵܐ ܘܨܵܠܹܡܘܿܢ: ܣܵܒܵܒ ܠܹܐ ܝܲܕܥܝܼܬܘܿܢ 34 ܐܝܼܡܲܢ ܝܼܠܹܐ ܙܲܒ̣ܢܵܐ. ܐܲܝܟ ܐܢܵܫܵܐ ܝܠܹܐ ܕܪܚܸܫܠܹܐ ܠܪܸܚܩܵܐ: ܘܫܒܸܩܠܹܐ ܒܲܝܬܹܗ: ܘܝܸܗܒܸܠܹܐ ܗܘܼܟܡܵܐ ܠܪܹ̈ܓܵܘܵܬܘܼܗܝ: ܘܠܟܠ ܐܢܵܫܵܐ ܦܘܼܠܚܵܢܹܗ: ܘܠܢܵܛܲܪ ܬܲܪܥܵܐ ܦܩܸܕܠܹܐ ܕܗܵܘܹܐ 35 ܪܥܝܼܫܵܐ. ܥܒ̣ܘܿܕܘܿܢ ܫܵܗܲܪܬܵܐ ܗܲܕܟ̣ܵܐ: ܣܵܒܵܒ ܠܹܐ ܝܲܕܥܝܼܬܘܿܢ ܐܝܼܡܲܢ ܐܵܬܹܐ ܡܵܪܵܐ ܕܒܲܝܬܵܐ: ܒܪܲܡܫܵܐ: ܝܲܢ ܒܦܲܠܓܹܗ ܕܠܲܝܠܹܐ: ܝܲܢ 36 ܒܩܪܵܝܵܐ ܕܩܵܪܘܿܝܵܐ: ܝܲܢ ܒܨܲܦܪܵܐ. ܠܵܐ ܗ̄ܘܹܐ ܕܐܵܬܹܐ ܡܸܢܫܸܠܬܵܢܹ̈ܐ 37 ܘܡܵܫ̄ܟ̰ܸܚ ܠܵܘܟ̣ܘܿܢ ܕܡܝܼܟܹܐ. ܐܝܼܢܵܐ ܡܸܢܕܝܼ ܕܐܸܠܵܘܟ̣ܘܿܢ ܒܹܐܡܵܪܵܐ ܝܘܸܢ: ܠܟܠܵܝ ܒܹܐܡܵܪܵܐ ܝܘܸܢ: ܥܒ̣ܘܿܕܘܿܢ ܫܵܗܲܪܬܵܐ.

ܩܦܠܐܘܢ: ܝܕ

1 ܐܝܼܢܵܐ ܒܵܬ̄ܪ ܬܪܲܝ ܝܘܿܡܵܢܹ̈ܐ ܗ̄ܘܹܠܹܐ ܦܸܨܚܵܐ ܕܦܲܛܝܼܪܹ̈ܐ: ܘܛܸܥܠܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܵܐܟ̣ܝܼ ܒܦܸܠܡܵܐ ܕܵܒ̣ܩܝܼ 2 ܗ̄ܘܵܘ ܠܹܗ ܘܩܵܛܠܝܼ ܠܹܗ. ܣܵܒܵܒ ܕܐܡܸܪܘܿܢ: ܠܵܐ ܒܥܹܐܕܵܐ: ܠܵܐ ܗ̄ܘܹܐ ܕܫܓ̣ܘܼܫܝܵܐ ܗܵܘܹܐ ܓܵܘ ܛܵܝܸܦܵܐ. 3 ܘܟܲܕ ܗ̇ܘ ܒܒܹܝܬ ܥܲܢܝܵܐ ܗ̄ܘܵܐ: ܓܵܘ ܒܲܝܬܹܗ ܕܫܸܡܥܘܿܢ ܓܸܪܒ̣ܵܢܵܐ: ܟܲܕ ܝܬܝܼܒ̣ܵܐ ܠܨܘܼܦܪܵܐ: ܐܬܹܠܵܐ ܚܕܵܐ ܒܲܟ̣ܬܵܐ ܕܐܝܼܬ ܗ̄ܘܵܐ ܠܵܗ̇ ܫܵܛܝܼܦܬܵܐ ܕܡܸܫܚܵܐ ܕܢܵܪܕܝܼܢ ܓ̰ܸܢܣ: ܪܵܒܵܐ ܡܵܪܹܐ ܛܝܼܡܵܐ: [45] ܘܦܬܝܼܚܵܠܵܐ ܫܵܛܝܼܦܬܵܐ ܘܡܘܼܫܦܸܟ̣ܵܠܵܐ ܥܲܠ ܪܹܫܹܗ. 4 ܐܝܼܢܵܐ ܐܝܼܬ ܗ̄ܘܵܘ ܐܢܵܫܹ̈ܐ ܕܟܪܸܒܠܘܿܢ ܓܵܘ ܓܵܢܵܝ: ܘܐܡܸܪܘܿܢ: 5 ܩܵܡܘܿܕܝܼ ܗ̄ܘܹܠܹܐ ܐܵܗܵܐ ܬܠܵܩܵܐ ܕܡܸܫܚܵܐ. ܣܵܒܵܒ ܕܟܹܐ ܡܵܨܹܐ ܗ̄ܘܵܐ ܗ̇ܘ ܡܸܫܚܵܐ ܕܦܵܝܸܫ ܗ̄ܘܵܐ ܙܘܼܒܢܵܐ ܒܙܵܘܕܵܐ ܡ̣ܢ ܬܠܵܬ̄ܡܵܐܐ ܕܝܼܢܵܪܹ̈ܐ: ܘܦܵܝܸܫ ܗ̄ܘܵܐ ܝܘܼܗ̄ܒ̣ܵܐ ܠܡܸܣܟܹܢܹ̈ܐ. ܘܛܘܼܪܛܸܡܠܘܿܢ 6 ܥܲܠܘܼܗ̇. ܐܝܼܢܵܐ ܝܼܫܘܿܥ ܐܡܸܪܹܐ: ܫܒ̣ܘܿܩܘܿܢ ܠܵܗ̇: ܩܵܡܘܿܕܝܼ ܡܲܓ̰ܗ̄ܘܼܝܹܐ ܝܬܘܿܢ ܐܸܠܵܗ̇: ܦܘܼܠܚܵܢܵܐ ܨܦܵܝܝܼ ܥܒܸܕܠܵܐ ܥܲܠܝܼ. 7 ܣܵܒܵܒ ܒܟܠ ܙܲܒ̣ܢܵܐ ܡܸܣܟܹܢܹ̈ܐ ܐܝܼܬ ܠܵܘܟ̣ܘܿܢ ܥܲܡܵܘܟ̣ܘܿܢ: ܘܐܝܼܡܲܢ ܕܒܲܥܝܝܼܬܘܿܢ ܟܹܐ ܡܵܨܝܼܬܘܿܢ ܥܵܒ̣ܕܝܼܬܘܿܢ ܠܗ̄ܘܿܢ ܨܦܵܝܘܼܬܵܐ: ܐܝܼܢܵܐ ܐܵܢܵܐ ܒܟܠܹܗ ܙܲܒ̣ܢܵܐ ܠܹܐ ܝܘܸܢ ܠܟܸܣܠܵܘܟ̣ܘܿܢ. 8 ܗ̇ܘ ܕܐܝܼܬ ܗ̄ܘܵܐ ܠܵܗ̇ ܥܒܸܕܠܵܐ: ܐܲܝܟ ܕܠܩܒ̣ܘܼܪܬܵܐ ܡܩܵܕ̄ܡܵܝܬܵܐ 9 ܡܫܸܚܠܵܐ ܠܓܘܼܫܡܝܼ. ܘܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܐܲܝܟܵܐ ܕܦܵܝܫܵܐ ܡܘܼܟܪܸܙܬܵܐ ܐܵܗܵܐ ܡܲܫܚܲܕܬܝܼ ܒܟܠܵܗ̇ ܕܘܼܢܝܹܐ: ܘܐܘܼܦ ܡܸܢܕܝܼ ܕܥܒܸܕܠܵܐ ܐܵܗܵܐ ܒܸܬ ܦܵܝܸܫ ܗܘܼܡܙܸܡܵܐ ܠܕܟ̣ܵܪܵܗ̇. 10 ܐܝܼܢܵܐ ܝܼܗܘܼܕܵܐ ܣܟܲܪܝܘܿܛܵܐ: ܚܵܕ̄ ܡ̣ܢ ܬܪܸܥܣܲܪ: ܐܙܸܠܹܐ 11 ܠܟܸܣ ܓܘܼܪ̈ܵܢܹܐ ܕܟܵܗܢܹ̈ܐ: ܕܣܵܦܹܐ ܗ̄ܘܵܐ ܠܹܗ ܐܸܠܵܝ. ܘܐܵܢܝܼ ܟܲܕ ܫܡܸܥܠܘܿܢ ܚܕܹܠܘܿܢ: ܘܥܒܸܕܠܘܿܢ ܩܵܘܠܵܐ ܕܝܵܗ̄ܒ̣ܝܼ ܠܹܗ ܙܘܼܙܹ̈ܐ. ܘܛܵܥܹܐ ܗ̄ܘܵܐ ܠܦܸܪܨܲܬ ܠܣܵܦܘܿܝܹܗ. 12 ܘܒܝܘܿܡܵܐ ܩܵܕ̄ܡܵܝܵܐ ܕܦܲܛܝܼܪܹ̈ܐ: ܐܝܼܡܲܢ ܕܟܹܐ ܕܵܒ̣ܚܝܼ ܦܸܨܚܵܐ: ܐܵܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܐܲܝܟܵܐ ܒܵܣܡܵܐ ܠܘܼܟ ܕܐܵܙܵܠ̄ܚ 13 ܗܵܕܪܵܚ ܕܐܵܟ̣ܠܸܬ ܦܸܨܚܵܐ. ܘܫܘܼܕܸܪܹܐ ܬܪܲܝ ܡ̣ܢ ܬܲܠܡܝܼܕܘܼ̈ܗܝ: ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܠܡܕܝܼܢ̄ܬܵܐ: ܘܒܸܬ ܬܵܦܸܩ ܒܝܼܵܘܟ̣ܘܿܢ 14 ܐܢܵܫܵܐ ܫܩܝܼܠܵܐ ܬܲܠܡܵܐ ܕܡ̈ܝܼܵܐ: ܙܹܠ̄ܡܘܿܢ ܒܵܬ̄ܪܹܗ. ܘܠܲܐܝܟܵܐ ܕܐܵܘܸܪ: ܐܡܘܿܪܘܿܢ ܠܡܵܪܹܐ ܒܲܝܬܵܐ: ܪܵܒܝܸܢ ܒܹܐܡܵܪܵܐ ܝܠܹܐ: ܐܲܝܟܵܐ ܝܠܹܐ [46] ܒܹܝܬ ܡܲܫܪܝܵܐ: ܐܲܝܟܵܐ ܕܐܵܟ̣ܠܸܢ ܦܸܨܚܵܐ ܥܲܡ ܬܲܠܡܝܼܕܝܼ̈. 15 ܘܒܸܬ ܡܲܚܙܹܐ ܠܵܘܟ̣ܘܿܢ [47] ܒܵܠܵܚܵܢܵܐ ܓܘܼܪܬܵܐ: ܫܘܼܘܝܼܬܵܐ 16 ܘܗܘܼܕܸܪܬܵܐ. ܬܵܡܵܐ ܗܵܕܪܘܿܢ ܠܲܢ. ܘܦܠܸܛܠܘܿܢ ܬܲܠܡܝܼܕܘܼ̈ܗܝ ܘܐܬܹܠܘܿܢ ܠܡܕܝܼܢ̄ܬܵܐ: ܘܡܘܼܫ̄ܟ̰ܸܚܠܘܿܢ ܕܵܐܟ̣ܝܼ ܕܐܡܸܪܹܐ ܐܸܠܝ: ܘܗܘܼܕܸܪܘܿܢ ܦܸܨܚܵܐ. 17 ܘܟܲܕ ܗ̄ܘܹܠܹܐ ܪܲܡܫܵܐ: ܐܬܹܠܹܐ ܥܲܡ ܬܪܸܥܣܲܪܬܹܗ. 18 ܘܟܲܕ ܝܬܝܼܒܹܐ ܗ̄ܘܵܘ ܘܒܹܐܟ̣ܵܠܵܐ: ܐܡܸܪܹܐ ܝܼܫܘܿܥ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܚܵܕ̄ ܡܸܢܵܘܟ̣ܘܿܢ ܕܒܹܐܟ̣ܵܠܵܐ ܝܠܹܐ 19 ܥܲܡܝܼ: ܗ̇ܘ ܒܸܬ ܣܵܦܹܐ ܠܝܼ. ܘܐܵܢܝܼ ܫܘܼܪܹܠܘܿܢ ܠܸܦܫܵܡܵܐ: 20 ܘܐܵܡܪܝܼ ܐܸܠܹܗ ܚܵܕ̄ ܚܵܕ̄: ܐܵܢܵܐ ܝܘܸܢ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: 21 ܚܵܕ̄ ܡ̣ܢ ܬܪܸܥܣܲܪ ܕܒܸܛܡܵܫܵܐ ܝܠܹܐ ܥܲܡܝܼ ܒܡܵܐܢܵܐ. ܒܪܘܼܢܹܗ ܕܐܢܵܫܵܐ ܒܹܐܙܵܠܵܐ ܝܠܹܐ: ܕܵܐܟ̣ܝܼ ܕܝܼܠܹܐ ܟܬܝܼܒ̣ܵܐ ܥܲܠܘܼܗܝ: ܐܝܼܢܵܐ ܘܵܝ ܠܗ̇ܘ ܐܢܵܫܵܐ ܕܒܐܝܼܕܹܗ ܦܵܝܸܫ ܣܘܼܦܝܵܐ ܒܪܘܼܢܹܗ ܕܐܢܵܫܵܐ. ܨܦܵܝܝܼ ܗ̄ܘܵܐ ܠܗ̇ܘ ܐܢܵܫܵܐ: ܐܸܢ ܠܵܐ ܗܵܘܹܐ ܗ̄ܘܵܐ ܗ̄ܘܝܼܵܐ. 22 ܘܟܲܕ ܐܵܢܝܼ ܒܹܐܟ̣ܵܠܵܐ ܗ̄ܘܵܘ: ܫܩܸܠܹܐ ܝܼܫܘܿܥ ܠܲܚܡܵܐ: ܘܒܘܼܪܸܟ̣ܠܹܐ: ܘܩܨܹܠܹܐ: ܘܝܸܗܒܸܠܹܐ ܐܸܠܵܝ: ܘܐܡܸܪܹܐ ܐܸܠܵܝ: 23 ܫܩܘܿܠܘܿܢ: ܐܵܗܵܐ ܝܠܹܐ ܦܲܓ̣ܪܝܼ. ܘܫܩܸܠܹܐ ܟܵܣܵܐ: ܘܫܘܼܟܸܪܹܐ: 24 ܘܝܸܗܒܸܠܹܐ ܐܸܠܵܝ: ܘܫܬܹܠܘܿܢ ܡܸܢܹܗ ܟܠܵܝ. ܘܐܡܸܪܹܐ ܐܸܠܵܝ: ܐܵܗܵܐ ܝܠܹܐ ܕܸܡܝܼ [48] ܕܕܝܵܬܹܩܹܐ ܕܡܒܵܕܵܠ ܕܪܵܒܵܐ ܦܝܵܫܵܐ ܝܠܹܐ 25 ܫܘܼܦܟ̣ܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܸܕܪܹܐ ܠܹܐ ܫܵܬܸܢ ܡ̣ܢ ܡܲܗܨܘܼܠ ܕܓܸܦܬܵܐ: ܗܲܠ ܕܗ̇ܘ ܝܘܿܡܵܐ ܕܒܝܹܗ ܫܵܬܸܢܵܗ̇ ܚܲܕܬܵܐ ܒܡܲܠܟܘܼܬܹܗ ܕܐܲܠܵܗܵܐ. 26 ܘܫܘܼܒܸܚܠܘܿܢ: ܘܦܠܸܛܠܘܿܢ ܠܛܘܼܪܵܐ ܕܙܲܝܬܹ̈ܐ. 27 ܘܐܡܸܪܹܐ ܐܸܠܵܝ ܝܼܫܘܿܥ: ܟܠܵܘܟ̣ܘܿܢ ܒܸܬ [49] ܟܵܦܪܝܼܬܘܿܢ [50] ܒܝܼܝܼ ܒܐܵܗܵܐ ܠܲܝܠܹܐ. ܣܵܒܵܒ ܕܟܬܝܼܒ̣ܵܐ ܝܠܹܐ: ܒܸܬ ܡܵܚܸܢ ܠܪܵܥܝܵܐ: 28 ܘܒܸܬ ܦܵܝܫܝܼ ܒܘܼܪܒܸܙܹܐ ܥܸܪ̈ܒܘܼܗܝ. ܐܸܠܵܐ ܒܵܬ̄ܪ ܕܩܸܡܠܝܼ: 29 ܒܸܬ ܐܵܙܸܠ̄ܢ ܡܩܵܕ̄ܡ ܕܝܼܵܘܟ̣ܘܿܢ ܠܓܠܝܼܠܵܐ. ܐܝܼܢܵܐ ܐܡܸܪܹܐ ܐܸܠܹܗ 30 ܟܹܐܦܵܐ: ܐܸܢ ܟܠܵܝ [51] ܟܵܦܪܝܼ: ܐܸܠܵܐ ܠܵܐ ܐܵܢܵܐ. ܘܐܵܡܸܪ ܐܸܠܹܗ ܝܼܫܘܿܥ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܘܼܟ: ܕܐܲܢ̄ܬ: ܐܸܕܝܘܼ: ܒܐܵܗܵܐ ܠܲܝܠܹܐ: ܡܩܵܕ̄ܡ ܕܩܵܪܹܐ ܩܵܪܘܿܝܵܐ ܬܲܪ̈ܬܹܝ ܓܵܗܹ̈ܐ: ܬܠܵܬ̄ ܓܵܗܹ̈ܐ 31 ܒܸܬ ܣܵܪܒܸܬ ܠܝܼ. ܐܝܼܢܵܐ ܗ̇ܘ ܪܵܒܵܐ ܒܘܼܫ ܙܵܘܕܵܐ ܐܵܡܸܪ ܗ̄ܘܵܐ: ܐܸܢ ܗܵܘܹܐ ܠܝܼ ܠܸܡܝܵܬܵܐ ܥܲܡܘܼܟ: ܠܹܐ ܣܵܪܒܸܢܘܼܟ: ܘܐܲܝܟ ܕܗ̇ܘ ܐܘܼܦ ܟܠܵܝ ܐܡܸܪܘܿܢ. 32 ܘܐܬܹܠܘܿܢ ܠܕܘܼܟܬܵܐ ܐܲܝܢܝܼ ܕܦܝܵܫܵܐ ܝܠܵܐ ܩܪܝܼܬܵܐ: ܓܲܕܣܹܡܵܢ. ܘܐܡܸܪܹܐ ܠܬܲܠܡܝܼܕܘܼ̈ܗܝ: ܝܬܘܿܒ̣ܘܿܢ ܠܲܐܟ̣ܵܐ ܗܲܠ 33 ܕܨܵܠܹܐ ܐܢܵܐ ܨܠܘܿܬܵܐ. ܘܠܘܼܒܸܠܹܐ ܥܲܡܹܗ ܠܟܹܐܦܵܐ ܘܠܝܲܥܩܘܿܒ̣ ܘܠܝܘܿܚܲܢܵܢ: ܘܫܘܼܪܹܠܹܐ ܠܸܥܓ̰ܵܒܵܐ ܪܵܒܵܐ ܘܠܸܦܝܵܫܵܐ ܒܥܹܩܘܝܼ. 34 ܘܐܡܸܪܹܐ ܐܸܠܵܝ: ܦܫܝܼܡܬܵܐ ܝܠܵܐ ܓܵܢܝܼ ܗܲܠ ܡܵܘܬܵܐ. ܥܲܪܩܸܠܘܿܢ 35 ܠܲܐܟ̣ܵܐ: ܘܥܒ̣ܘܿܕܘܿܢ ܫܵܗܲܪܬܵܐ. ܘܐܙܸܠܹܐ ܠܩܵܕ̄ܡܘܼܗܝ ܚܲܟ̰ܵܐ ܘܢܦܸܠܹܐ ܥܲܠ ܐܲܪܥܵܐ. ܘܨܵܠܹܐ ܗ̄ܘܵܐ ܨܠܘܿܬܵܐ: ܕܐܸܢ 36 ܡܵܨܝܵܐ: ܥܵܒ̣ܪܵܐ ܡܸܢܹܗ ܣܵܥܲܬ. ܘܐܡܸܪܹܐ: ܐܲܒܵܐ: ܒܵܒܵܐ: ܟܠ ܡܸܢܕܝܼ ܐܲܢ̄ܬ ܟܹܐ ܡܵܨܸܬ: ܡܲܥܒܸܪ ܡܸܢܝܼ ܐܵܗܵܐ ܟܵܣܵܐ: [52] ܐܸܠܵܐ ܠܵܐ 37 ܪܸܙܵܝܵܐ ܕܝܼܝܼ: ܐܸܠܵܐ ܕܝܼܘܼܟ. ܘܐܬܹܠܹܐ ܡܘܼܫ̄ܟ̰ܚܵܝܠܹܐ ܕܡܝܼܟܹܐ: ܘܐܡܸܪܹܐ ܠܟܹܐܦܵܐ: ܫܸܡܥܘܿܢ: ܕܡܝܼܟ̣ܵܐ ܝܘܸܬ: ܠܵܐ ܡܨܹܠܘܼܟ 38 ܚܕܵܐ ܣܵܥܲܬ ܠܸܥܒ̣ܵܕܵܐ ܫܵܗܲܪܬܵܐ. ܥܒ̣ܘܿܕܘܿܢ ܫܵܗܲܪܬܵܐ ܘܨܵܠܹܡܘܿܢ: ܕܠܵܐ ܐܵܘܪܝܼܬܘܿܢ ܠܓ̰ܘܼܪܵܒܵܐ. ܪܘܼܚܵܐ ܒܬܪܘܼܨܬܵܐ 39 ܟܹܐ ܒܵܣܡܵܐ ܠܵܗ̇: ܐܸܠܵܐ ܦܲܓ̣ܪܵܐ ܙܲܒܘܼܢ ܝܼܠܹܐ. ܘܐܙܸܠܹܐ ܡܸܕܪܹܐ 40 ܨܘܼܠܹܠܹܐ: ܘܗܲܪ ܗ̇ܝ ܗܹܡܸܙܡܵܢ ܐܡܸܪܹܐ. ܘܡܸܕܪܹܐ ܐܬܹܠܹܐ ܡܘܼܫ̄ܟ̰ܸܚܵܝܠܹܐ ܕܡܝܼܟܹܐ: ܣܵܒܵܒ ܕܥܲܝܢܵܝ̈ ܝܘܼܩܪܸܢܹܐ ܗ̄ܘܵܘ: ܘܠܵܐ 41 ܝܕܸܥܠܘܿܢ ܡܘܼܕܝܼ ܓ̰ܲܘܸܒܝܼ ܠܹܗ. ܘܐܬܹܠܹܐ ܓܵܗܵܐ ܕܬܠܵܬ̄: ܘܐܡܸܪܹܐ ܐܸܠܵܝ: ܕܡܘܿܟ̣ܘܿܢ ܡܐܵܕܝܼܵܐ ܘܡܲܢܝܸܚܘܿܢ. ܟܹܐ ܡܵܠܝܵܐ: ܐܬܹܠܵܐ ܣܵܥܲܬ. ܘܗܵܐ: ܦܝܵܫܵܐ ܝܠܹܐ ܣܘܼܦܝܵܐ ܒܪܘܼܢܹܗ ܕܐܢܵܫܵܐ ܒܐܝܼܕܵܬܹ̈ܐ 42 ܕܚܲܛܵܝܹ̈ܐ. ܩܘܼܡܘܿܢ ܐܵܙܵܠ̄ܚ. ܗܵܐ: [53] ܩܘܼܪܒܸܢܹܐ ܗ̇ܘ ܕܣܵܦܹܐ ܠܝܼ. 43 ܘܕܲܪܣܵܥܲܬ: ܗܹܫ ܗ̇ܘ ܗܲܡܙܘܼܡܹܐ: ܐܬܹܠܹܐ ܝܼܗܘܼܕܵܐ: ܚܵܕ̄ ܡ̣ܢ ܬܪܸܥܣܲܪ: ܘܥܲܡܹܗ ܟܸܢܫܵܐ ܪܵܒܵܐ: ܥܲܡ ܣܲܝܦܹ̈ܐ ܘܚܘܼܛܪܹ̈ܐ: ܡ̣ܢ ܠܟܸܣ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܚܘܵܪ̈ܕܸܩܢܹܐ. 44 ܘܝܘܼܗ̄ܒ̣ܵܐ ܗ̄ܘܵܐ ܢܝܼܫܲܢܩܵܐ ܐܸܠܵܝ ܗ̇ܘ ܕܣܵܦܹܐ ܗ̄ܘܵܐ ܠܹܗ: ܒܹܐܡܵܪܵܐ: ܗ̇ܘ ܕܢܵܫܩܸܢܹܗ: ܗ̇ܘ ܝܼܠܹܐ: ܕܒ̣ܘܿܩܘܿܢ ܠܹܗ: ܘܒܗܸܫܝܵܪܘܼܬܵܐ 45 ܠܵܒܠܘܿܢ ܠܹܗ. ܘܐܬܹܠܹܐ: ܘܒܗ̇ܝ ܣܵܥܲܬ [54] ܩܘܼܪܒܸܢܹܐ: ܘܐܡܸܪܹܐ 46 ܐܸܠܹܗ: ܪܵܒܝܼܝܼ: ܘܢܫܸܩܠܹܗ. ܘܐܵܢܝܼ ܕܪܹܠܘܿܢ ܥܲܠܘܼܗܝ ܐܝܼܕܵܝ̈: 47 ܘܕܒܸܩܠܘܿܢ ܐܸܠܹܗ. ܐܝܼܢܵܐ ܚܵܕ̄ ܡ̣ܢ ܕܐܵܢܝܼ ܕܟܸܠܝܹܐ ܗ̄ܘܵܘ: ܓܪܸܫܠܹܐ ܣܲܝܦܵܐ: ܘܡܚܹܠܹܐ ܠܪܹܓܹܗ ܕܓܘܼܪܵܐ ܕܟܵܗܢܹ̈ܐ: 48 ܘܦܪܝܼܡܵܠܹܐ ܢܵܬܹܗ. ܘܝܼܫܘܿܥ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܐܲܝܟ ܕܥܲܠ ܓ̰ܵܠܵܠܝܼ ܦܠܸܛܠܵܘܟ̣ܘܿܢ ܥܲܠܝܼ: ܒܣܲܝܦܹ̈ܐ 49 ܘܒܚܘܼܛܪܹ̈ܐ ܕܕܵܒ̣ܩܝܼܬܘܿܢ ܠܝܼ. ܟܠ ܝܘܿܡܵܐ ܠܟܸܣܠܵܘܟ̣ܘܿܢ ܝܼܘܸܢ ܗ̄ܘܵܐ ܡܵܠܘܿܦܹܐ ܒܗܲܝܟܠܵܐ: ܘܠܵܐ ܕܒܸܩܠܵܘܟ̣ܘܿܢ ܐܸܠܝܼ: 50 ܐܸܠܵܐ ܕܦܵܝܫܝܼ ܬܘܼܡܸܡܹܐ ܟܬܵܒܹ̈ܐ (ܗ̄ܘܹܠܵܐ ܐܵܗܵܐ). ܘܫܒܸܩܠܘܿܢ 51 ܐܸܠܹܗ ܟܠܵܝ: ܘܥܪܸܩܠܘܿܢ. ܘܚܵܕ̄ ܓ̰ܘܲܢܩܵܐ ܒܹܐܬܵܝܵܐ ܗ̄ܘܵܐ ܒܵܬ̄ܪܹܗ: ܘܕܸܪܝܵܐ ܗ̄ܘܵܐ ܟܸܬܵܢ ܥܲܠ (ܦܲܓ̣ܪܹܗ) ܫܘܼܠܚܵܝܵܐ: 52 ܘܕܒܸܩܠܘܿܢ ܐܸܠܹܗ. ܐܝܼܢܵܐ ܗ̇ܘ ܫܒܸܩܠܹܐ ܟܸܬܵܢ: ܘܥܪܸܩܠܹܐ ܫܘܼܠܚܵܝܵܐ. 43 ܘܠܘܼܒܸܠܘܿܢ ܠܝܼܫܘܿܥ ܠܟܸܣ ܓܘܼܪܵܐ ܕܟܵܗܢܹ̈ܐ: ܘܓ̰ܡܸܥܠܘܿܢ ܠܟܸܣܠܹܗ ܟܠܵܝ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܚܘܵܪ̈ܕܸܩܢܹܐ. 54 ܘܟܹܐܦܵܐ ܡ̣ܢ ܪܸܚܩܵܐ ܐܬܝܼܵܐ ܗ̄ܘܵܐ ܒܵܬ̄ܪܹܗ: ܗܲܠ ܓܵܘ ܕܵܪܬܹܗ ܕܓܘܼܪܵܐ ܕܟܵܗܢܹ̈ܐ: ܘܝܬܝܼܒ̣ܵܐ ܗ̄ܘܵܐ ܥܲܡ ܚܸܠܡܲܬܟܵܪܹ̈ܐ ܘܒܸܫܚܵܢܵܐ 55 ܩܵܕ̄ܡ ܢܘܼܪܵܐ. ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܘܟܠܹܗ ܟܸܢܫܵܝ ܛܵܥܝܼ ܗ̄ܘܵܘ ܠܣܵܗܕܘܼܬܵܐ ܥܲܠ ܝܼܫܘܿܥ ܕܡܲܡܝܸܬܝܼ ܠܹܗ: ܘܠܵܐ 56 ܡܘܼܫ̄ܟ̰ܸܚܠܘܿܢ. ܣܵܒܵܒ ܪܵܒܵܐ ܟܲܕ ܝܵܗ̄ܒ̣ܝܼ ܗ̄ܘܵܘ ܣܵܗܕܘܼܬܵܐ ܕܵܓܵܠܬܵܐ ܥܲܠܘܼܗܝ: ܠܹܐ ܗ̄ܘܵܘ ܒܸܕܒ̣ܵܩܵܐ ܣܵܗܕܘܵܬܵܝ̈ 57 [55] ܡܸܚܕܵܕܹ̈ܐ. ܐܝܼܢܵܐ ܐܢܵܫܹ̈ܐ ܩܸܡܠܘܿܢ ܥܲܠܘܼܗܝ ܘܝܸܗܒܸܠܘܿܢ 58 ܣܵܗܕܘܼܬܵܐ ܕܵܓܵܠܬܵܐ: ܘܐܡܸܪܘܿܢ. ܐܲܚܢܲܢ ܫܡܸܥܠܲܢ ܡܸܢܹܗ ܕܐܡܸܪܹܐ: ܐܵܢܵܐ ܒܸܬ ܣܵܬܪܸܢܹܗ ܐܵܗܵܐ ܗܲܝܟܠܵܐ ܕܝܼܠܹܐ ܥܒ̣ܝܼܕܵܐ ܒܐܝܼܕܵܬܹ̈ܐ: ܘܒܬܠܵܬ̄ܐ ܝܘܿܡܵܢܹ̈ܐ ܒܸܬ ܒܵܢܹܐ ܐܢܵܐ ܚܵܕ̄ ܐܚܹܪ̄ܢܵܐ 59 ܕܠܵܐ ܥܒ̣ܝܼܕܵܐ ܒܐܝܼܕܵܬܹ̈ܐ. ܘܐܘܼܦ ܗܲܕܟ̣ܵܐ ܣܵܗܕܘܼܬܵܝ ܠܹܐ 60 ܗ̄ܘܵܐ ܒܸܕܒ̣ܵܩܵܐ. ܘܩܸܡܠܹܐ ܓܘܼܪܵܐ ܕܟܵܗܢܹ̈ܐ ܒܒܹܝܦܲܠܓܵܐ: ܘܒܘܼܩܸܪܹܐ ܡ̣ܢ ܝܼܫܘܿܥ ܘܐܡܸܪܹܐ: ܠܹܐ ܝܘܸܬ ܓ̰ܲܘܘܼܒܹܐ ܡܸܢܕܝܼ: 61 ܡܘܼܕܝܼ ܣܵܗܕܘܼܬܵܐ ܒܝܼܵܗ̄ܒ̣ܵܐ ܝܢܵܐ ܥܲܠܘܼܟ ܐܲܢܹܐ. ܐܝܼܢܵܐ ܗ̇ܘ ܫܬܸܩܠܹܐ: ܘܡܸܢܕܝܼ ܠܵܐ ܓ̰ܘܼܘܸܒܠܹܐ. ܘܡܸܕܪܹܐ ܒܘܼܩܸܪܹܗ ܓܘܼܪܵܐ ܕܟܵܗܢܹ̈ܐ ܘܐܡܸܪܹܐ: ܐܲܢ̄ܬ ܝܼܘܸܬ ܡܫܝܼܚܵܐ ܒܪܘܼܢܹܗ ܕܒܪܝܼܟ̣ܵܐ. 62 ܘܝܼܫܘܿܥ ܐܡܸܪܹܐ ܐܸܠܹܗ: ܐܵܢܵܐ ܝܘܸܢ. ܘܒܸܬ ܚܵܙܝܼܬܘܿܢ ܠܒܪܘܼܢܹܗ ܕܐܢܵܫܵܐ ܝܬܝܼܒ̣ܵܐ ܡ̣ܢ ܝܲܡܝܼܢܵܐ ܕܚܲܝܠܵܐ: ܘܒܹܐܬܵܝܵܐ ܥܲܡ ܥܢܵܢܹ̈ܐ 63 ܕܫܡܲܝܵܐ. ܘܓܘܼܪܵܐ ܕܟܵܗܢܹ̈ܐ [56] ܟ̰ܘܼܢܟ̰ܸܪܹܐ ܓ̰ܘܼܠܘܼ̈ܗܝ ܘܐܡܸܪܹܐ: 64 ܡܐܵܕܝܼܵܐ ܩܵܡܘܿܕܝܼ ܝܢܵܐ ܠܵܙܝܼܡܲܢ ܣܵܗܕܹ̈ܐ. ܫܡܸܥܠܵܘܟ̣ܘܿܢ ܓܘܼܕܵܦܵܐ. ܡܘܼܕܝܼ ܒܸܚܫܵܒ̣ܵܐ ܝܬܘܿܢ: ܘܐܵܢܝܼ ܟܠܵܝ ܕܸܢܘܿܢ ܕܓܘܼܢܵܗܟܵܪ 65 ܝܼܠܹܐ ܠܡܵܘܬܵܐ. ܘܫܘܼܪܹܠܘܿܢ ܐܢܵܫܹ̈ܐ ܠܸܪܝܵܩܵܐ ܥܲܠܘܼܗܝ: ܘܠܟܵܣܘܿܝܹܐ ܦܵܬܹܗ: ܘܠܩܲܪܦܘܼܚܹܗ: ܘܠܹܐܡܵܪܵܐ: ܢܵܒܝܼ. ܘܦܲܪ̈ܫܹܐ ܡܵܚܝܼ ܗ̄ܘܵܘ ܠܹܗ ܒܐܝܼܕܵܐ. 66 ܘܟܲܕ ܟܹܐܦܵܐ ܠܐܸܠܬܸܚ ܓܵܘ ܕܵܪܬܵܐ ܗ̄ܘܵܐ: ܐܬܹܠܵܐ ܚܕܵܐ 67 ܚܵܡܬܵܐ ܕܓܘܼܪܵܐ ܕܟܵܗܢܹ̈ܐ. ܘܚܙܹܠܵܐ ܠܟܹܐܦܵܐ ܒܸܫܚܵܢܵܐ: ܘܚܸܪܵܐ ܒܝܹܗ: ܘܐܡܸܪܹܐ ܐܸܠܹܗ: ܐܘܼܦ ܐܲܢ̄ܬ ܥܲܡ ܝܼܫܘܿܥ ܢܵܨܪܵܝܵܐ ܝܘܸܬ 68 ܗ̄ܘܵܐ. ܐܝܼܢܵܐ ܗ̇ܘ ܣܪܸܒ̣ܠܹܐ ܒܹܐܡܵܪܵܐ: ܠܹܐ ܝܘܸܢ ܒܝܼܕܲܥܝܵܐ ܘܠܹܐ ܝܘܸܢ ܦܲܪܡܘܼܝܹܐ ܡܘܼܕܝܼ ܒܹܐܡܵܪܵܐ ܝܘܲܬܝ. ܘܦܠܸܛܠܹܐ 69 ܠܒܲܕܲܪ ܠܨܘܼܦܵܐ: ܘܩܪܹܠܹܐ ܩܵܪܘܿܝܵܐ. ܘܚܙܹܠܵܐ ܐܸܠܹܗ ܡܸܕܪܹܐ ܗ̇ܝ ܚܵܡܬܵܐ: ܘܫܘܼܪܹܠܵܐ ܠܹܐܡܵܪܵܐ ܠܐܵܢܝܼ ܕܟܸܠܝܹܐ ܗ̄ܘܵܘ: ܐܵܗܵܐ 70 ܡܸܢܵܝ ܝܠܹܐ. ܐܝܼܢܵܐ ܗ̇ܘ ܡܸܕܪܹܐ ܣܪܸܒ̣ܠܹܐ. ܘܒܵܬ̄ܪ ܚܲܟ̰ܵܐ ܡܸܕܪܹܐ ܐܵܢܝܼ ܕܟܸܠܝܹܐ ܗ̄ܘܵܘ ܐܡܸܪܘܿܢ ܠܟܹܐܦܵܐ: ܫܲܪܝܼܪܵܐܝܼܬ 71 ܡܸܢܵܝ ܝܘܸܬ: ܣܵܒܵܒ ܕܐܘܼܦ ܓܠܝܼܠܵܝܵܐ ܝܘܸܬ [57] . ܐܝܼܢܵܐ ܗ̇ܘ ܫܘܼܪܹܠܹܐ ܠܡܲܚܪܘܼܡܹܐ ܘܠܹܡܵܝܵܐ: ܕܠܹܐ ܝܲܕܥܸܢ ܠܐܵܗܵܐ ܐܢܵܫܵܐ 72 ܕܒܹܐܡܵܪܵܐ ܝܬܘܿܢ. ܘܕܲܪܣܵܥܲܬ ܩܪܹܠܹܐ ܩܵܪܘܿܝܵܐ ܓܵܗܵܐ ܕܬܲܪ̈ܬܹܝ. ܘܕܟܸܪܹܐ ܫܸܡܥܘܿܢ ܠܗܹܡܸܙܡܵܢ ܕܝܼܫܘܿܥ ܐܡܝܼܪܵܐ ܗ̄ܘܵܐ ܐܸܠܹܗ: ܡܩܵܕ̄ܡ ܕܩܵܪܹܐ ܩܵܪܘܿܝܵܐ ܬܲܪ̈ܬܹܝ ܓܵܗܹ̈ܐ: ܬܠܵܬ̄ ܓܵܗܹ̈ܐ ܒܸܬ ܟܵܦܪܸܬ ܒܝܼܝܼ. ܘܫܘܼܪܹܠܹܐ ܠܸܒܟ̣ܵܝܵܐ.

ܩܦܠܐܘܢ: ܝܗ

1 ܘܕܲܪܣܵܥܲܬ ܒܨܲܦܪܵܐ ܥܒܸܕܠܘܿܢ ܪܵܐܝܝܼ ܓܘܼܪ̈ܵܢܹܐ ܕܟܵܗܢܹ̈ܐ ܥܲܡ ܚܘܵܪ̈ܕܸܩܢܹܐ ܘܥܲܡ ܣܵܦܪܹ̈ܐ: ܘܥܲܡ ܟܠܹܗ ܟܸܢܫܵܐ ܕܪܵܐܝܝܼ: ܘܐܣܸܪܘܿܢ ܠܝܼܫܘܿܥ: ܘܠܘܼܒܸܠܘܿܢ ܘܣܘܼܦܹܠܘܿܢ ܐܸܠܹܗ 2 ܠܦܝܼܠܵܛܘܿܣ. ܘܒܘܼܩܸܪܹܐ ܡܸܢܹܗ ܦܝܼܠܵܛܘܿܣ: ܐܲܢ̄ܬ ܝܼܘܸܬ ܡܲܠܟܵܐ ܕܝܼܗ̄ܘܼܕܵܝܹ̈ܐ: ܘܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܹܗ: ܐܲܢ̄ܬ 3 ܒܹܐܡܵܪܵܐ ܝܘܸܬ. ܘܡܚܹܠܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܕܲܪܗܲܩܹܗ 4 ܒܪܵܒܵܐ ܡܸܢܕܝܵܢܹ̈ܐ. ܘܦܝܼܠܵܛܘܿܣ ܡܸܕܪܹܐ ܒܘܼܩܸܪܹܗ: ܘܐܡܸܪܹܐ ܐܸܠܹܗ: ܠܹܐ ܝܘܸܬ ܓ̰ܲܘܘܼܒܹܐ ܡܸܢܕܝܼ: ܚܙܝܼ: ܟܡܵܐ ܒܸܡܚܵܝܵܐ ܝܢܵܐ 5 ܕܲܪܗܲܩܘܼܟ. ܐܝܼܢܵܐ ܝܼܫܘܿܥ ܐܚܹܪ̄ܢܵܐ ܡܸܢܕܝܼ ܓ̰ܘܼܘܵܒ ܠܵܐ ܝܸܗܒܸܠܹܐ: ܕܵܐܟ̣ܝܼ ܕܥܘܼܓ̰ܸܒܠܹܐ ܦܝܼܠܵܛܘܿܣ. 6 ܐܝܼܢܵܐ ܒܥܹܐܕܵܐ ܟܹܐ ܫܵܪܹܐ ܗ̄ܘܵܐ ܐܸܠܵܝ ܚܵܕ̄ ܐܲܣܝܼܪܵܐ: ܐܵܝܢܝܼ 7 ܕܛܵܠܒܝܼ ܗ̄ܘܵܘ. ܘܐܝܼܬ ܗ̄ܘܵܐ ܚܵܕ̄ ܕܦܝܵܫܵܐ ܗ̄ܘܵܐ ܩܸܪܝܵܐ: ܒܲܪ ܐܲܒܵܐ: ܕܐܣܝܼܪܵܐ ܗ̄ܘܵܐ ܥܲܡ ܥܵܒ̣ܕܵܢܹ̈ܐ ܕܫܓ̣ܘܼܫܝܵܐ: ܐܵܢܝ 8 ܕܥܒ̣ܝܼܕܹܐ ܗ̄ܘܵܘ ܩܸܛܠܵܐ ܒܫܓ̣ܘܼܫܝܵܐ. [58] ܘܡܘܼܩܘܸܚܠܘܿܢ ܟܸܢܫܵܐ: ܘܫܘܼܪܹܠܘܿܢ ܠܸܛܠܵܒܵܐ: ܕܐܲܝܟ ܕܐܝܼܬ ܗ̄ܘܵܐ ܠܹܗ ܥܵܕܲܬ 9 ܥܵܒܸܕ ܗ̄ܘܵܐ ܐܸܠܵܝ. ܐܝܼܢܵܐ ܦܝܼܠܵܛܘܿܣ ܓ̰ܘܼܘܸܒܠܹܐ ܘܐܡܸܪܹܐ: 10 ܒܲܥܝܝܼܬܘܿܢ ܕܫܵܪܸܢ ܐܸܠܵܘܟ̣ܘܿܢ ܡܲܠܟܵܐ ܕܝܗ̄ܘܼܕܵܝܹ̈ܐ. ܣܵܒܵܒ ܕܒܝܼܕܲܥܝܵܐ ܗ̄ܘܵܐ ܕܡ̣ܢ ܒܲܚܸܠܵܢܘܼܬܵܐ ܣܘܼܦܹܠܘܿܢ ܐܸܠܹܗ ܓܘܼܪ̈ܵܢܹܐ 11 ܕܟܵܗܢܹ̈ܐ. ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܚܘܼܒܸܛܠܘܿܢ ܠܟܸܢܫܹ̈ܐ: 12 ܕܗܲܪ ܠܒܲܪ ܐܲܒܵܐ ܫܵܪܹܐ ܗ̄ܘܵܐ ܐܸܠܵܝ. ܘܦܝܼܠܵܛܘܿܣ ܓ̰ܘܼܘܸܒܠܹܐ ܡܸܕܪܹܐ ܐܸܠܵܝ: ܒܲܣ ܡܘܼܕܝܼ ܒܲܥܝܝܼܬܘܿܢ ܕܥܵܒ̣ܕܸܢ ܠܐܵܗܵܐ 13 ܕܒܸܩܪܵܝܵܐ ܝܬܘܿܢ ܡܲܠܟܵܐ ܕܝܗ̄ܘܼܕܵܝܹ̈ܐ. ܘܐܵܢܝܼ ܡܸܕܪܹܐ 14 ܡܘܼܩܘܸܚܠܘܿܢ: ܙܩܘܿܦ ܠܹܗ. ܐܝܼܢܵܐ ܦܝܼܠܵܛܘܿܣ ܐܡܸܪܹܐ ܐܸܠܵܝ: ܩܵܡܘܿܕܝܼ: ܡܘܼܕܝܼ ܣܸܪܝܵܐ ܥܒ̣ܝܼܕܵܐ ܝܠܹܐ: ܘܐܵܢܝܼ ܒܘܼܫ ܙܵܘܕܵܐ 15 ܡܲܩܘܸܚܝܼ ܗ̄ܘܵܘ: ܙܩܘܿܦ ܠܹܗ. ܘܦܝܼܠܵܛܘܿܣ ܟܲܕ ܒܸܒܲܥܝܵܐ ܠܡܲܒܣܘܼܡܹܐ ܠܟܸܢܫܵܐ: ܫܪܹܠܹܐ ܐܸܠܵܝ ܠܒܲܪ ܐܲܒܵܐ: ܘܣܘܼܦܹܠܹܐ ܒܝܼܵܝ ܠܝܼܫܘܿܥ: ܟܲܕ ܓ̰ܘܼܢܓ̰ܸܪܵܐ: ܕܦܵܝܸܫ ܡܸܚܝܵܐ ܠܙܩܝܼܦܵܐ. 16 ܘܣܲܪ̈ܒܵܙܹܐ ܠܘܼܒܸܠܘܿܢ ܐܸܠܹܗ ܠܓܵܘ ܕܵܪܬܵܐ: ܕܝܼܠܵܐ ܦܪܵܛܘܿܪܝܼܢ: 17 ܘܩܪܹܠܘܿܢ ܠܟܠܵܗ̇ ܕܲܣܬܵܐ. ܘܡܘܼܠܒܸܫܠܘܿܢ ܐܸܠܹܗ ܐܲܪܓܘܵܢܵܐ: ܘܓܕܸܠܘܿܢ ܡܘܼܬܸܒ̣ܠܘܿܢ ܥܲܠܘܼܗܝ ܒܸܢܦܵܪ ܕܟܸܬܘܹ̈ܐ. 18 ܘܫܘܼܪܹܠܘܿܢ ܠܸܕܪܵܝܵܐ ܫܠܵܡܵܐ ܐܸܠܹܗ: ܫܠܵܡܵܐ: ܡܲܠܟܵܐ ܕܝܗ̄ܘܼܕܵܝܹ̈ܐ. 19 ܘܡܚܹܠܘܿܢ ܥܲܠ ܪܹܫܹܗ ܒܙܹܠܵܐ: ܘܪܸܩܠܘܿܢ ܥܲܠܘܼܗܝ: ܘܒܸܒܪܵܟܵܐ 20 ܥܲܠ ܒܘܼܪ̈ܟܵܟܵܝ ܣܓܸܕܠܘܿܢ ܐܸܠܹܗ. ܘܟܲܕ ܡܘܼܣܚܸܪܘܿܢ ܒܝܹܗ: ܫܘܼܠܸܚܠܘܿܢ ܡܸܢܹܗ ܓ̰ܘܼܠܹ̈ܐ ܕܐܲܪܓܘܵܢܵܐ: ܘܡܘܼܠܒܸܫܠܘܿܢ ܐܸܠܹܗ ܓ̰ܘܼܠܹ̈ܐ ܕܓܵܢܹܗ: ܘܦܘܼܠܸܛܠܘܿܢ ܕܡܵܚܝܼ ܠܹܗ ܠܙܩܝܼܦܵܐ. 21 ܘܥܒܸܕܠܘܿܢ ܫܘܼܚܪܵܐ ܠܚܵܕ̄ ܕܒܸܥܒ̣ܵܪܵܐ ܗ̄ܘܵܐ: ܫܸܡܥܘܿܢ ܩܹܘܪܝܼܢܵܝܵܐ: ܕܒܹܐܬܵܝܵܐ ܗ̄ܘܵܐ ܡ̣ܢ ܚܲܩܠܵܐ: ܒܵܒܹܗ ܕܐܵܠܹܟ̣ܣܲܢܕܪܘܿܣ 22 ܘܕܪܘܼܦܘܿܣ: ܕܫܵܩܸܠ ܗ̄ܘܵܐ ܙܩܝܼܦܹܗ. ܘܡܘܼܬ̄ܝܹܠܘܿܢ ܐܸܠܹܗ ܠܓܵܓ̣ܘܼܠܬܵܐ ܕܘܼܟܬܵܐ: ܕܦܝܵܫܵܐ ܝܠܵܐ ܦܘܼܫܸܩܬܵܐ: ܕܘܼܟܵܐ 23 ܕܩܲܪܩܲܦܬܵܐ. ܘܝܸܗܒܸܠܘܿܢ ܐܸܠܗ ܠܸܫܬܵܝܵܐ ܚܲܡܪܵܐ ܚܒ̣ܝܼܛܵܐ 24 ܒܝܹܗ ܡܘܼܪܵܐ. ܐܝܼܢܵܐ ܗ̇ܘ ܠܵܐ ܫܩܸܠܹܐ. ܘܟܲܕ ܙܩܸܦܠܘܿܢ ܐܸܠܹܗ: ܦܘܼܠܹܠܘܿܢ ܓ̰ܘܼܠܘܼ̈ܗܝ: ܘܕܪܹܠܘܿܢ ܥܲܠܵܝ ܦܸܫܟܵܐ: ܡܘܼܕܝܼ 25 ܟܠ ܚܵܕ̄ ܫܵܩܸܠ ܗ̄ܘܵܐ. ܘܣܵܥܲܬ ܕܬܠܵܬ̄ ܝܼܗ̄ܘܵܐ: ܘܙܩܸܦܠܘܿܢ 26 ܐܸܠܹܗ. ܘܟܬܝܼܒ̣ܵܐ ܗ̄ܘܵܐ ܟܬܵܒ̣ܵܐ ܕܗܲܓ̰ܲܬܹܗ: ܡܠܟܐ 27 ܕܝܗ̄ܘܼܕܝ̈ܐ. ܘܙܩܸܦܠܘܿܢ ܥܲܡܹܗ ܠܬܪܲܝ ܓ̰ܵܠܵܠܝܹܐ: ܚܵܕ̄ ܡ̣ܢ 28 ܝܲܡܝܼܢܹܗ ܘܚܵܕ̄ ܡ̣ܢ ܣܸܡܵܠܹܗ. [59] ܘܬܘܼܡܸܡܠܹܐ ܟܬܵܒ̣ܵܐ ܕܐܡܸܪܹܐ: 29 ܕܥܲܡ ܢܵܐܗܲܩܹ̈ܐ ܦܸܫܠܹܐ ܡܸܢܝܵܐ. ܐܘܼܦ ܥܵܒ̣ܪ̈ܵܢܹܐ ܓܵܕܦܝܼ ܗ̄ܘܵܘ ܥܲܠܘܼܗܝ: ܘܫܵܥܫܝܼ ܗ̄ܘܵܘ ܪܹ̈ܫܵܝ ܘܐܵܡܪܝܼ: ܐܲܝ ܣܵܬܪܵܢܵܐ 30 ܕܗܲܝܟܠܵܐ: ܘܒܵܢܝܵܢܹܗ ܒܬܠܵܬ̄ܐ ܝܘܿܡܵܢܹ̈ܐ. ܦܵܨܝܼ ܓܵܢܘܼܟ: 31 ܘܨܠܝܼ ܡ̣ܢ ܙܩܝܼܦܵܐ. ܘܗܲܕܟ̣ܵܐ ܐܘܼܦ ܓܘܼܪ̈ܵܢܹܐ ܕܟܵܗܢܹ̈ܐ ܒܸܓܚܵܟܵܐ ܚܵܕ̄ ܥܲܡ ܕܗ̇ܘ ܐܚܹܪ̄ܢܵܐ: ܥܲܡ ܣܵܦܪܹ̈ܐ: ܐܡܸܪܘܿܢ: 32 ܠܐܚܹܪ̄ܢܹܐ ܡܘܼܚܹܠܹܐ: ܠܓܵܢܹܗ ܠܹܐ ܡܵܨܹܐ ܠܡܲܚܘܼܝܹܐ. ܡܫܝܼܚܵܐ ܡܲܠܟܹܗ ܕܝܼܣܪܵܝܹܠ ܨܵܠܹܐ ܐܵܕܝܼܵܐ ܡ̣ܢ ܙܩܝܼܦܵܐ: ܕܚܵܙܵܚ ܘܗܲܡܸܢܵܚ. ܘܐܘܼܦ ܐܵܢܝܼ ܕܦܸܫܠܘܿܢ ܙܩܝܼܦܹܐ ܥܲܡܹܗ ܠܸܡܠܘܿܢ ܐܸܠܹܗ. 33 ܘܟܲܕ ܗ̄ܘܹܠܵܐ ܣܵܥܲܬ ܕܐܸܫܸܬ: ܗ̄ܘܹܠܹܐ ܚܘܼܒ̣ܝܵܐ ܥܲܠ ܟܠܵܗ̇ 34 ܐܲܪܥܵܐ: ܗܲܠ ܣܵܥܲܬ ܕܐܸܬܫܲܥ. ܘܒܣܵܥܲܬ ܕܐܸܬܫܲܥ ܡܘܼܩܘܸܚܠܹܐ ܝܼܫܘܿܥ ܒܩܵܠܵܐ ܪܵܡܵܐ ܘܐܡܸܪܹܐ: ܐܹܝܠܝ: ܐܹܝܠܝ: ܠܡܵܢܵܐ ܫܒܲܩܬܵܢܝ: ܕܦܝܵܫܵܐ ܝܠܵܐ ܦܘܼܫܸܩܬܵܐ: ܐܲܠܵܗܝܼ ܐܲܠܵܗܝܼ: ܩܵܡܘܿܕܝܼ 35 ܫܒ̣ܝܼܩܸܢܘܼܟ. ܘܐܢܵܫܹ̈ܐ ܕܫܡܸܥܠܘܿܢ ܡ̣ܢ ܕܐܵܢܝܼ ܕܝܼܗ̄ܘܵܘ ܟܸܠܝܹܐ: 36 ܐܡܸܪܘܿܢ: ܗܵܐ: ܠܐܹܠܝܼܵܐ ܒܸܩܪܵܝܵܐ ܝܠܹܐ. ܐܝܼܢܵܐ ܪܚܸܛܠܹܐ ܚܵܕ̄ ܘܡܠܹܠܹܐ ܐܸܣܦܘܼܓܵܐ ܚܵܠܵܐ: ܘܐܣܸܪܹܗ ܒܙܹܠܵܐ ܕܡܲܫܬܹܐ ܗ̄ܘܵܐ ܠܹܗ: ܘܐܡܸܪܹܐ: ܫܒ̣ܘܿܩܘܿܢ: ܚܵܙܵܚ: ܐܸܢ ܐܵܬܹܐ ܐܹܠܝܼܵܐ: ܡܲܨܠܹܐ ܠܹܗ. 37 ܐܝܼܢܵܐ ܝܼܫܘܿܥ ܡܘܼܩܘܸܚܠܹܐ ܒܩܵܠܵܐ ܪܵܡܵܐ: ܘܣܘܼܦܝܵܠܹܐ 38 ܪܘܼܚܹܗ. ܘܣܸܬܪܵܐ ܕܬܲܪܥܵܐ ܕܗܲܝܟܠܵܐ ܦܸܫܠܹܐ [60] ܟ̰ܘܼܢܟ̰ܸܪܵܐ 39 ܠܬܪܲܝ ܡ̣ܢ ܠܥܸܠܸܠ ܗܲܠ ܠܐܸܠܬܸܚ. ܐܝܼܢܵܐ ܟܲܕ ܚܙܹܠܹܐ ܩܸܢܛܪܘܿܢܵܐ: ܗ̇ܘ ܕܟܸܠܝܵܐ ܗ̄ܘܵܐ ܠܒܲܪܩܘܼܒ̣ܠܹܗ: ܕܗܲܕܟ̣ܵܐ ܡܘܼܩܘܸܚܠܹܐ ܘܣܘܼܦܝܵܠܹܐ ܪܘܼܚܹܗ: ܐܡܸܪܹܐ: ܒܫܲܪܝܼܪܘܼܬܵܐ ܐܵܗܵܐ 40 ܐܢܵܫܵܐ ܒܪܘܼܢܹܗ ܕܐܲܠܵܗܵܐ ܗ̄ܘܵܐ. ܐܝܼܢܵܐ ܐܝܼܬ ܗ̄ܘܵܘ ܐܘܼܦ ܒܲܟ̣ܬܵܬܹ̈ܐ ܡ̣ܢ ܪܸܚܩܵܐ ܒܸܚܝܵܪܵܐ: ܕܡܸܢܵܝ ܗ̄ܘܵܐ ܡܲܪܝܲܡ ܡܲܓ̣ܕܠܵܝܬܵܐ: ܘܡܲܪܝܲܡ ܝܸܡܹܗ ܕܝܲܥܩܘܿܒ̣ ܙܥܘܿܪܵܐ ܘܕܝܘܿܣܹܐ: ܘܫܵܠܘܿܡ. 41 ܐܵܢܝܼ ܕܟܲܕ ܗ̇ܘ ܒܸܓܠܝܼܠܵܐ ܗ̄ܘܵܐ ܐܵܙܠ̄ܝܼ ܗ̄ܘܵܘ ܒܵܬ̄ܪܹܗ: ܘܥܵܒ̣ܕܝܼ ܗ̄ܘܵܘ ܠܹܗ ܚܸܠܡܲܬ: ܘܪܵܒܵܐ ܒܲܟ̣ܬܵܬܹ̈ܐ ܐܚܹܪ̄ܢܹܐ ܕܐܣܝܼܩܹܐ ܗ̄ܘܵܘ ܥܲܡܹܗ ܠܐܘܪܸܫܠܸܡ. 42 ܘܟܲܕ ܗ̄ܘܹܠܹܐ ܪܲܡܫܵܐ: ܣܵܒܵܒ ܕܝܼܗ̄ܘܵܐ ܗܲܕܲܪܬܵܐ: ܝܲܥܢܹܐ: 43 ܝܘܿܡܵܐ ܕܡܩܵܕ̄ܡ ܫܲܒܬܵܐ. ܐܬܹܠܹܐ ܝܵܘܣܸܦ ܗ̇ܘ ܕܡ̣ܢ ܪܵܡܬܵܐ: ܪܵܐܝܝܼܟܵܪ ܡܝܘܼܩܪܵܐ: ܕܐܘܼܦ ܒܓܵܢܹܗ ܒܸܣܦܵܪܵܐ ܗ̄ܘܵܐ ܠܡܲܠܟܘܼܬܵܐ ܕܐܲܠܵܗܵܐ: ܘܩܘܼܫܕܸܪܹܐ ܐܘܸܪܹܐ ܠܟܸܣ ܦܝܼܠܵܛܘܿܣ: ܘܛܠܸܒܠܹܐ 44 ܦܲܓ̣ܪܹܗ ܕܝܼܫܘܿܥ. ܐܝܼܢܵܐ ܦܝܼܠܵܛܘܿܣ ܥܘܼܓ̰ܸܒܠܹܐ ܕܐܸܢ ܗܲܪ ܐܵܕܝܼܵܐ ܡܝܼܬܵܐ ܗ̄ܘܵܐ. ܘܩܪܹܠܹܐ ܠܩܸܢܛܪܘܿܢܵܐ: ܘܒܘܼܩܸܪܹܐ ܡܸܢܹܗ: 45 ܕܐܸܢ ܡ̣ܢ ܩܵܕ̄ܡ ܥܕܵܢܵܐ ܡܝܼܬܵܐ ܗ̄ܘܵܐ. ܘܟܲܕ ܝܕܸܥܠܹܐ ܡ̣ܢ 46 ܩܸܢܛܪܘܿܢܵܐ: ܝܸܗܒܸܠܹܐ ܦܲܓ̣ܪܹܗ ܠܝܵܘܣܸܦ. ܘܙܒܸܢܹܐ ܝܵܘܣܸܦ ܟܸܬܵܢ: ܘܡܘܼܨܠܹܠܹܗ ܘܟܘܼܪܸܟ̣ܠܹܗ ܒܟܸܬܵܢ: ܘܡܘܼܬܸܒ̣ܠܹܗ ܒܩܲܒ̣ܪܵܐ ܕܢܩܝܼܪܬܵܐ ܗ̄ܘܵܐ ܒܩܵܝܵܐ. ܘܡܘܼܚܕܸܪܹܐ ܟܹܐܦܵܐ ܥܲܠ 47 ܬܲܪܥܵܗ̇ ܕܩܲܒ̣ܪܵܐ. ܘܡܲܪܝܲܡ ܡܲܓ̣ܕܠܵܝܬܵܐ: ܘܡܲܪܝܲܡ ܗ̇ܝ ܕܝܘܿܣܹܐ: ܚܙܹܠܘܿܢ ܐܲܝܟܵܐ ܕܦܸܫܠܹܐ ܡܘܼܬܒ̣ܵܐ.

ܩܦܠܐܘܢ: ܝܘ

1 ܘܟܲܕ ܥܒܸܪܵܐ ܫܲܒܬܵܐ: ܡܲܪܝܲܡ ܡܲܓ̣ܕܠܵܝܬܵܐ: ܘܡܲܪܝܲܡ ܕܝܲܥܩܘܿܒ̣: ܘܫܵܠܘܿܡ: ܙܒܸܢܘܿܢ ܗܹܪ̈ܘܿܡܹܐ: ܕܐܵܬܝܼ ܗ̄ܘܵܘ ܘܡܵܫܚܝܼ 2 ܠܹܗ. ܐܝܼܢܵܐ ܒܨܲܦܪܵܐ ܒܚܵܒ̣ܫܹܒܵܐ: ܐܬܹܠܘܿܢ ܠܒܹܝܬ ܩܒ̣ܘܼܪܵܐ: 3 ܟܲܕ ܙܪܸܩܠܹܐ ܫܸܡܫܵܐ. ܘܐܡܸܪܘܿܢ ܒܓܵܢܵܝ: ܡܵܢܝܼ ܒܸܬ 4 ܡܲܚܕܸܪܹܗ ܠܲܢ ܟܹܐܦܵܐ ܡ̣ܢ ܬܲܪܥܵܐ ܕܒܹܝܬ ܩܒ̣ܘܼܪܵܐ. ܘܚܸܪܘܿܢ ܚܙܹܠܘܿܢ ܕܡܘܼܚܕܸܪܵܐ ܗ̄ܘܵܐ ܟܹܐܦܵܐ: ܣܵܒܵܒ ܪܵܒܵܐ ܓܘܼܪܵܐ 5 ܗ̄ܘܵܐ. ܘܐܘܸܪܘܿܢ ܠܒܹܝܬ ܩܒ̣ܘܼܪܵܐ: ܘܚܙܹܠܘܿܢ ܓ̰ܘܲܢܩܵܐ ܝܬܝܼܒ̣ܵܐ ܡ̣ܢ ܝܲܡܝܼܢܵܐ: ܠܒ̣ܝܼܫܵܐ ܐܸܣܛܠܵܐ ܚܘܵܪܬܵܐ: 6 ܘܥܘܼܓ̰ܸܒܠܘܿܢ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܠܵܐ ܥܓ̰ܘܿܒܘܿܢ. ܠܝܼܫܘܿܥ ܢܵܨܪܵܝܵܐ ܒܸܛܲܥܝܵܐ ܝܬܘܿܢ: ܗ̇ܘ ܕܦܸܫܠܹܐ ܙܩܝܼܦܵܐ ܩܸܡܠܹܐ: ܠܹܐ ܝܠܹܐ ܠܲܐܟ̣ܵܐ ܗܵܐ: ܕܘܼܟܬܵܐ ܐܲܝܟܵܐ ܕܡܘܼܬܸܒ̣ܠܘܿܢ 7 ܐܸܠܹܗ. ܐܸܠܵܐ ܙܹܠ̄ܡܘܿܢ ܐܡܘܿܪܘܿܢ ܠܬܲܠܡܝܼܕܘܼ̈ܗܝ: ܘܠܟܹܐܦܵܐ: ܕܩܵܕܘܿܡܵܘܟ̣ܘܿܢ ܝܼܠܹܐ ܠܓܠܝܼܠܵܐ: ܬܵܡܵܐ ܒܸܬ ܚܵܙܝܼܬܘܿܢ ܠܹܗ: 8 ܕܐܵܟ̣ܝܼ ܕܐܡܸܪܹܐ ܐܸܠܵܘܟ̣ܘܿܢ. ܘܦܠܸܛܠܘܿܢ ܘܥܪܸܩܠܘܿܢ ܡ̣ܢ ܩܲܒ̣ܪܵܐ: ܣܵܒܵܒ ܕܕܒ̣ܝܼܩܵܝ ܗ̄ܘܵܐ ܥܘܼܓ̰ܵܒܵܐ ܘܪܲܬܪܲܬܬܵܐ: ܘܠܐܢܵܫܵܐ ܡܸܢܕܝܼ ܠܵܐ ܐܡܸܪܘܿܢ: ܣܵܒܵܒ ܙܸܕܥܝܹܐ ܗ̄ܘܵܘ. 9 [61] ܐܝܼܢܵܐ ܒܨܲܦܪܵܐ ܒܚܵܒ̣ܫܹܒܵܐ: ܩܸܡܠܹܐ ܘܦܸܫܠܹܐ ܚܸܙܝܵܐ ܩܵܕ̄ܡܵܝܬܵܐ ܠܡܲܪܝܲܡ ܡܲܓ̣ܕܠܵܝܬܵܐ: ܗ̇ܝ ܕܫܲܒ̣ܥܵܐ ܕܲܝܘܹ̈ܐ ܦܘܼܠܛܵܐ 10 ܗ̄ܘܵܐ ܡܸܢܵܗ̇. ܘܗ̇ܝ ܐܙܸܠܵܐ ܡܘܼܫܚܸܕܠܵܐ ܠܐܵܢܝܼ ܕܗ̄ܘܝܹܐ ܗ̄ܘܵܘ 11 ܥܲܡܹܗ: ܟܲܕ ܒܸܥܒ̣ܵܕܵܐ ܬܵܙܝܼ ܘܒܸܒܟ̣ܵܝܵܐ. ܘܐܵܢܝܼ ܟܲܕ ܫܡܸܥܠܘܿܢ ܕܚܲܝܵܐ ܝܠܹܐ ܘܦܸܫܠܹܐ ܚܸܙܝܵܐ ܐܸܠܵܗ̇: ܠܵܐ ܗܘܼܡܸܢܘܿܢ. 12 ܒܵܬ̄ܪ ܐܲܢܹܐ ܦܸܫܠܹܐ ܚܸܙܝܵܐ ܠܬܪܝ ܡܸܢܵܝ ܒܕܘܼܡܝܵܐ 13 ܐܚܹܪ̄ܢܵܐ: ܟܲܕ ܒܹܐܙܵܠܵܐ ܠܐܲܬܪܵܐ. ܘܐܵܢܝܼ ܐܙܸܠܘܿܢ ܐܡܸܪܘܿܢ ܠܐܵܢܝܼ ܐܚܹܪ̄ܢܹܐ ܐܘܼܦ ܠܐܵܢܝܼ ܠܵܐ ܗܘܼܡܸܢܘܿܢ. 14 ܐܝܼܢܵܐ ܒܚܲܪܬܵܐ ܦܸܫܠܹܐ ܚܸܙܝܵܐ ܠܚܲܕܸܥܣܲܪ ܟܲܕ ܝܬܝܼܒܹܐ ܠܨܘܼܦܪܵܐ: ܘܠܸܡܠܹܐ ܠܠܵܐ ܗܲܝܡܵܢܘܼܬܵܝ ܘܠܩܸܫܝܘܼܬܵܐ ܕܠܸܒܝܼ: ܕܠܵܐܢܝܼ ܕܚܙܹܠܘܿܢ ܐܲܠܹܗ ܩܝܼܡܵܐ ܠܵܗ̇ ܗܘܼܡܸܢܘܿܢ. 15 ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܠܟܠܹܗ ܥܵܠܡܵܐ: ܘܡܲܟܪܸܙܘܿܢ 16 ܡܲܫܚܲܕܬܝܼ ܠܟܠܵܗ̇ ܒܪܝܼܬܵܐ. ܗ̇ܘ ܕܗܲܡܸܢ ܘܥܵܡܸܕ: ܒܸܬ 17 ܚܲܝܹ̈ܐ: ܘܗ̇ܘ ܕܠܵܐ ܗܲܡܸܢ: ܒܸܬ ܦܵܝܸܫ ܓܘܼܢܵܗܟܵܪ. ܘܐܲܢܹܐ ܢܝܼܫܲܢܩܹ̈ܐ ܠܐܵܢܝܼ ܕܗܲܡܸܢܝܼ ܒܸܬ ܐܵܬܝܼ ܒܵܬ̄ܪܵܝ: ܒܫܸܡܝܼ ܕܲܝܘܹ̈ܐ 18 ܒܸܬ ܦܵܠܛܝܼ: ܘܒܠܸܫܵܢܹ̈ܐ ܚܵܕ̄ܬܹ̈ܐ ܒܸܬ ܗܲܡܙܸܡܝܼ. ܘܚܘܼܘܵܘܵܬܹ̈ܐ ܒܸܬ ܫܵܩܠܝܼ: ܘܐܸܢ ܣܲܡܵܐ ܕܡܵܘܬܵܐ ܫܵܬܝܼ: ܗܲܪ ܠܹܐ ܚܲܙܕܓ ܠܗ̄ܘܿܢ: ܘܐܝܼܕܵܬܵܝ̈ ܒܸܬ ܡܲܬܒ̣ܝܼ ܥܲܠ ܡܸܪ̈ܥܝܹܐ ܘܒܸܬ ܒܵܣܡܝܼ. 19 ܗܲܕܟ̣ܵܐ ܡܵܪܲܢ ܝܼܫܘܿܥ: ܡܒܵܬ̄ܪ ܕܗܘܼܡܙܸܡܠܹܐ ܥܲܡܵܝ: ܦܸܫܠܹܐ ܠܘܼܒܠܵܐ ܠܫܡܲܝܵܐ: ܘܝܬܸܒ̣ܠܹܐ ܡ̣ܢ ܝܲܡܝܼܢܵܐ ܕܐܲܠܵܗܵܐ. 20 ܘܐܵܢܝܼ ܦܠܸܛܠܘܿܢ ܘܡܘܼܟܪܸܙܠܘܿܢ ܒܟܠ ܕܘܼܟܵܐ: ܘܡܵܪܲܢ ܟܹܐ ܗܲܝܸܪ ܗ̄ܘܵܐ ܠܗ̄ܘܿܢ: ܘܡܲܩܘܹܐ ܗ̄ܘܵܐ ܗܹܡܸܙܡܵܢܵܝ̈ ܒܢܝܼܫܲܢܩܹ̈ܐ ܕܬܲܒܥܝܼ ܗ̄ܘܵܘ ܐܸܠܵܝ ܐܵܡܹܝܢ.

[1] ܐܨܚ̈. ܥܬ̈. ܝܘܢ̈ـ. ܠܝܬ. ܕܡܲܠܟܘܼܬܹܗ.

[7] ܐܨܚ̈. ܥܬ̈. ܝܘܢ̈ـ. ܝܘܼܠܦܵܢܵܐ ܚܵܕ̄ܬܵܐ!

[8] ܝܢ: ܗܲܡܙܘܼܡܹܐ ܝܠܹܐ ܗܲܕܟ̣ܵܐ: ܒܸܓܕܵܦܵܐ ܝܠܹܐ.

[11] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܠܒܵܣܘܿܡܹܐ ܡܸܪ̈ܥܝܹܐ: ܘܠܦܵܠܘܛܹܐ ܕܲܝܘܹ̈ܐ.

[13] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܠܕܝܼܘܵܢ.

[15] ܚܟܡܐ ܐܨܚ̈. ܝܘܢ̈ـ. ܓܸܪ̈ܵܣܹܝܢܹܐ.

[17] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܟܲܕ ܫܡܸܥܠܹܐ.

[19] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܘܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܗܵܘܹܐ ܢܝܵܚܵܐ ܠܣܕܘܿܡ ܘܠܥܵܡܘܿܪܵܐ ܒܝܘܿܡܵܐ ܕܕܝܼܘܵܢ ܙܵܘܕܵܐ ܡ̣ܢ ܠܗ̇ܝ ܡܕܝܼܢ̄ܬܵܐ.

[20] ܚܟܡܐ ܐܨܚ̈. ܥܬ̈. ܝܘܢ̈ـ. ܪܵܒܵܐ ܦܵܝܸܫ ܗ̄ܘܵܐ ܡܲܥܬܵܠ.

[22] ܦܫܝܛ. ܘܚܟܡܐ ܐܨܚ̈. ܝܘܢ̈ـ. ܕܕܵܟ̣ܝܵܐ ܟܠܵܗ̇ ܡܹܐܟ̣ܘܼܠܬܵܐ.

[24] ܚܟܡܐ ܐܨܚ̈. ܥܬ̈. ܝܘܢ̈ـ. ܡܸܢܕܝܼ ܒܸܚܙܵܝܵܐ ܝܘܸܬ.

[25] ܚܟܡܐ ܐܨܚ̈. ܥܬ̈. ܝܘܢ̈ـ. ܠܝܬ. ܘܠܵܐ ܐܵܡܪܸܬ ܠܐܢܵܫܵܐ ܓܵܘ ܡܵܬܵܐ.

[28] ܚܟܡܐ ܐܨܚ̈. ܥܬ̈. ܝܘܢ̈ـ. ܐܸܢ ܡܵܨܸܬ.

[30] ܚܟܡܐ ܐܨܚ̈. ܝܘܢ̈ـ. ܠܝܬ. ܒܨܵܘܡܵܐ ܘ.

[33] ܐܨܚ̈. ܪ̈ܫܝܐ ܝܘܢ̈ـ. ܠܝܬ. ܓ̰ܪ 44. 46 .

[35] ܐܨܚ̈. ܪܫܝܐ ܝܘܢ̈ـ. ܠܲܝܬ ܓ̰ܪ. 44 . 46 .

[39] ܚܟܡܐ ܐܨܚ̈. ܥܬ̈. ܝܘܢـ̈. ܠܝܬ. ܓ̰ܪ. 26 .

[40] ܚܟܡܐ ܐܨܚ̈. ܥܬ̈. ܝܘܢ̈ـ. ܠܝܬ. ܓ̰ܪ. 26 .

[41] ܝܘܢܐܝܬ: ܒܵܩܘܿܪܹܐ ܡܸܚܕܵܕܹ̈ܐ.

[42] ܐܨܚ̈. ܥܬ̈. ܝܘܢ̈ـ. ܠܝܬ. ܐܵܗܵܐ ܩܵܕ̄ܡܵܝܵܐ.

[43] ܐܨܚ̈. ܥܬ̈. ܝܘܢ̈ـ. ܠܝܬ. ܟܹܐ ܕܵܡܹܐ ܐܸܠܹܗ.

[44] ܚܟܡܐ ܐܨܚ̈. ܥܬ̈. ܝܘܢ̈ـ. ܠܝܬ. ܗ̇ܘ ܕܝܼܠܹܐ ܐܡܝܼܪܵܐ ܒܕܵܢܝܼܐܹܝܠ ܢܒ̣ܝܼܵܐ.

[46] ܝܘܢܐܝܬ: ܒܹܝܬ ܡܲܫܪܝܵܐ ܕܝܼܝܼ.

[48] ܝܢ: ܕܩܵܘܠܵܐ. ܦܫܝܛܬܐ: ܕܝܵܬܹܩܹܐ ܚܲܕܬܵܐ.

[50] ܐܨܚ̈. ܥܬ̈. ܝܘܢ̈ـ. ܠܝܬ. ܒܝܼܝܼ ܒܐܵܗܵܐ ܠܲܝܠܹܐ.

[52] ܝܘܢܐܝܬ: ܐܸܠܵܐ ܠܵܐ ܗ̇ܘ ܕܐܵܢܵܐ ܒܲܥܝܸܢ: ܐܸܠܵܐ ܗ̇ܘ ܕܐܲܢ̄ܬ.

[57] ܦܫܝܛ ܘܚܟܡܐ ܐܨܚ̈. ܝܘܢ̈ـ. ܘܗܲܡܙܲܡܬܘܼܟ ܒܸܕܡܵܝܵܐ ܝܠܵܐ.

[58] ܚܟܡܐ ܐܨܚ̈. ܥܬ̈. ܝܘܢ̈ـ. ܘܐܣܸܩܠܹܐ ܟܸܢܫܵܐ.

[59] ܒܓ̰ܡܥ ܐܨܚ̈. ܥܬ̈. ܝܘܢ̈ـ. ܠܝܬ. ܓ̰ܪ. 28 .

[61] ܐܨܚ̈. ܥܬ̈. ܝܘܢ̈ـ. ܠܝܬ. ܓ̰ܪ. 9 – 20.