ܟܬܒ̣ܐ

ܕܕܝܬܩܐ ܚܕܬܐ

ܕܡܪܢ ܝܫܘܥ ܡܫܝܚܐ

ܦܘܼܫܵܩܵܐ ܡ̣ܢ ܐܲܨܚܬܐ ܦܫܝܛܬܐ: ܡܘܼܕܒ̣ܩܐ ܥܡ ܕܐܢܝ ܕܝܘܢܝܐ

ܟܪܘܙܘܬܐ ܕܡܬܝ

ܩܦܠܐܘܢ: ܐ

1 ܟܬܵܒ̣ܵܐ ܕܝܼܠܝܼܕܘܼܬܹܗ ܕܝܼܫܘܿܥ ܡܫܝܼܚܵܐ: ܒܪܘܼܢܹܗ ܕܕܵܘܝܼܕ: ܒܪܘܼܢܹܗ ܕܐܲܒ̣ܪܵܗܵܡ. 2 ܐܲܒ̣ܪܵܗܵܡ ܡܘܼܠܸܕܠܹܗ ܠܐܝܼܣܚܵܩ: ܐܝܼܣܚܵܩ ܡܘܼܠܸܕܠܹܗ ܠܝܲܥܩܘܿܒ̣: ܝܲܥܩܘܿܒ̣ ܡܘܼܠܸܕܠܹܗ ܠܝܼܗܘܼܕܵܐ ܘܠܵܐܚܘܿܢܘܵܬܘܼ̈ܗܝ. 3 ܝܼܗܘܼܕܵܐ ܡܘܼܠܸܕܠܹܗ ܠܦܲܪܨ ܘܠܙܲܪܚ ܡ̣ܢ ܬܵܡܵܪ: ܦܲܪܨ 4 ܡܘܼܠܸܕܠܹܗ ܠܚܸܨܪܘܿܢ: ܚܸܨܪܘܿܢ ܡܘܼܠܸܕܠܹܗ ܠܐܵܪܵܡ. ܐܵܪܵܡ ܡܘܼܠܸܕܠܹܗ ܠܥܲܡܝܼܢܵܕܵܒ̣: ܥܲܡܝܼܢܵܕܵܒ̣ ܡܘܼܠܸܕܠܹܗ ܠܢܲܚܫܘܿܢ: 5 ܢܲܚܫܘܿܢ ܡܘܼܠܸܕܠܹܗ ܠܣܲܠܡܘܿܢ. ܣܲܠܡܘܿܢ ܡܘܼܠܸܕܠܹܗ ܠܒܵܥܵܙ ܡ̣ܢ ܪܵܚܵܒ̣: ܒܵܥܵܙ ܡܘܼܠܸܕܠܹܗ ܠܥܘܼܒܝܼܕ ܡ̣ܢ ܪܥܘܿܬ: 6 ܥܘܼܒ̣ܝܼܕ ܡܘܼܠܸܕܠܹܗ ܠܐܝܼܫܲܝ. ܐܝܼܫܲܝ ܡܘܼܠܸܕܠܹܗ ܠܕܵܘܝܼܕ ܡܲܠܟܐ: ܕܵܘܝܼܕ ܡܘܼܠܸܕܠܹܗ ܠܫܠܹܝܡܘܿܢ: ܡ̣ܢ ܒܲܟ̣ܬܹܗ ܕܐܘܿܪܝܼܵܐ. 7 ܫܠܹܝܡܘܿܢ ܡܘܼܠܸܕܠܹܗ ܠܪܚܸܒ̣ܥܲܡ: ܪܚܸܒ̣ܥܲܡ ܡܘܼܠܸܕܠܹܗ 8 ܠܐܲܒ̣ܝܵܐ: ܐܲܒ̣ܝܵܐ ܡܘܼܠܸܕܠܹܗ ܠܐܵܣܵܐ. ܐܵܣܵܐ ܡܘܼܠܸܕܠܹܗ ܠܝܵܗܘܿܫܵܦܵܛ: ܝܵܗܘܿܫܵܦܵܛ ܡܘܼܠܸܕܠܹܗ ܠܝܘܿܪܵܡ: ܝܘܿܪܲܡ 9 ܡܘܼܠܸܕܠܹܗ ܠܥܘܿܙܝܼܵܐ. ܥܘܿܙܝܼܵܐ ܡܘܼܠܸܕܠܹܗ ܠܝܘܿܬܵܡ: ܝܘܿܬܵܡ 10 ܡܘܼܠܸܕܠܹܗ ܠܐܵܚܵܙ: ܐܵܚܵܙ ܡܘܼܠܸܕܠܹܗ ܠܚܹܙܲܩܝܵܐ. ܚܹܙܲܩܝܵܐ ܡܘܼܠܸܕܠܹܗ ܠܡܢܲܫܹܐ: ܡܢܲܫܹܐ ܡܘܼܠܸܕܠܹܗ[1] ܠܐܲܡܘܿܢ: ܐܲܡܘܿܢ 11 ܡܘܼܠܸܕܠܹܗ ܠܝܘܿܫܝܼܵܐ. ܝܘܿܫܝܼܵܐ ܡܘܼܠܸܕܠܹܗ ܠܝܘܿܟܲܢܝܵܐ ܘܠܵܐܚܘܿܢܘܵܬܘܼ̈ܗܝ: ܒܓܵܠܘܼܬܵܐ ܕܒܵܒܹܠ.

12 ܘܡ̣ܢ ܒܵܬ̄ܪ ܓܵܠܘܼܬܵܐ ܕܒܵܒܹܠ: ܝܘܿܟܲܢܝܵܐ ܡܘܼܠܸܕܠܹܗ ܠܫܹܠܲܬܐܹܝܠ: ܫܹܠܲܬܐܹܝܠ ܡܘܼܠܸܕܠܹܗ ܠܙܘܼܪܒܵܒܹܠ. 13 ܙܘܼܪܒܵܒܹܠ ܡܘܼܠܸܕܠܹܗ ܠܐܲܒ̣ܝܼܘܿܕ: ܐܲܒ̣ܝܼܘܿܕ ܡܘܼܠܸܕܠܹܗ 14 ܠܐܹܠܝܵܩܝܼܡ: ܐܸܠܝܵܩܝܼܡ ܡܘܼܠܸܕܠܹܗ ܠܥܵܙܘܿܪ. ܥܙܘܿܪ ܡܘܼܠܸܕܠܹܗ ܠܙܲܕܘܿܩ: ܙܵܕܘܿܩ ܡܘܼܠܸܕܠܹܗ ܠܐܲܟܝܼܢ: ܐܲܟܝܼܢ ܡܘܼܠܸܕܠܹܗ 15 ܠܐܹܠܝܼܘܿܕ. ܐܸܠܝܼܘܿܕ ܡܘܼܠܸܕܠܹܗ ܠܐܹܠܝܼܥܵܙܲܪ: ܐܹܠܝܼܥܵܙܲܪ ܡܘܼܠܸܕܠܹܗ 16 ܠܡܵܬܵܢ: ܡܵܬܵܢ ܡܘܼܠܸܕܠܹܗ ܠܝܲܥܩܘܿܒ̣. ܝܲܥܩܘܿܒ̣ ܡܘܼܠܸܕܠܹܗ ܠܝܵܘܣܸܦ ܓܲܒ̣ܪܵܗ̇ ܕܡܲܪܝܲܡ: ܕܡܸܢܵܗ̇ ܦܸܫܠܹܗ ܝܠܝܼܕܵܐ ܝܼܫܘܿܥ: ܕܦܝܵܫܵܐ ܝܠܹܗ ܩܸܪܝܵܐ ܡܫܝܼܚܵܐ. 17 ܗܲܕܟ̣ܵܐ ܟܠܵܝ ܐܘܼ̈ܓ̰ܵܓܹܐ ܡ̣ܢ ܐܲܒ̣ܪܵܗܵܡ: ܗܲܠ ܕܵܘܝܼܕ: ܐܲܪܒܲܥܣܲܪ ܐܘܼ̈ܓ̰ܵܓܹܐ: ܘܡ̣ܢ ܕܵܘܝܼܕ ܗܲܠ ܓܵܠܘܼܬܵܐ ܕܒܵܒܹܠ: ܐܲܪܒܲܥܣܲܪ ܐܘܼ̈ܓ̰ܵܓܹܐ: ܘܡ̣ܢ ܓܵܠܘܼܬܵܐ ܕܒܵܒܹܠ ܗܲܠ ܡܫܝܼܚܵܐ: ܐܲܪܒܲܥܣܲܪ ܐܘܼ̈ܓ̰ܵܓܹܐ.

18 ܐܝܼܢܵܐ ܝܲܠܕܹܗ ܕܝܼܫܘܿܥ ܡܫܝܼܚܵܐ ܗܲܕܟ̣ܵܐ ܗ̄ܘܹܠܹܗ: ܟܲܕ ܛܠܝܼܒܬܵܐ ܗ̄ܘܵܐ ܡܲܪܝܲܡ ܝܸܡܹܗ ܠܝܵܘܣܸܦ: ܗܹܫ ܠܵܐ ܫܘܼܪܟܹܐ: 19 ܦܸܫܠܵܐ ܡܘܼܫ̄ܟ̰ܸܚܬܵܐ ܒܛܝܼܢܬܵܐ ܡ̣ܢ ܪܘܼܚܵܐ ܕܩܘܼܕܫܵܐ. ܘܝܵܘܣܸܦ ܓܲܒ̣ܪܵܗ̇ ܟܹܐܢܵܐ ܗ̄ܘܵܐ: ܘܠܵܐ ܒܣܸܡܠܵܐ ܠܹܗ ܕܥܵܒܸܕ ܗ̄ܘܵܐ ܠܵܗ̇ 20 ܐܲܫܟܵܪܵܐ: ܘܡܘܼܬܸܒ̣ܠܹܗ ܒܠܸܒܹܗ ܕܒܛܸܫܘܵܐ ܪܲܦܹܐ ܠܵܗ̇. ܐܝܼܢܵܐ ܟܲܕ ܐܲܢܹܐ ܒܸܚܫܵܒ̣ܵܐ ܗ̄ܘܵܐ: ܗܵܐ: ܦܸܫܠܹܗ ܚܸܙܝܵܐ ܐܸܠܹܗ ܡܲܠܲܐܟܹܗ ܕܡܵܪܝܵܐ ܒܚܸܠܡܵܐ: ܘܐܡܸܪܹܐ: ܝܵܘܣܸܦ: ܒܪܘܼܢܹܗ ܕܕܵܘܝܼܕ: ܠܵܐ ܙܵܕܸܥܬ ܠܸܫܩܵܠܵܐ ܠܡܲܪܝܲܡ ܒܲܟ̣ܬܘܼܟ: ܣܵܒܵܒ ܗ̇ܘ ܕܦܸܫܠܹܗ 21 ܒܛܝܼܢܵܐ ܒܝܼܵܗ̇ ܡ̣ܢ ܪܘܼܚܵܐ ܕܩܘܼܕܫܵܐ ܝܠܹܗ. ܒܸܬ ܝܵܠܕܵܐ ܒܪܘܼܢܵܐ: ܘܒܸܬ ܩܵܪܸܬ ܫܸܡܹܗ ܝܫܘܥ: ܣܵܒܵܒ ܕܗ̇ܘ ܒܸܬ ܡܲܚܹܐ ܠܛܵܝܸܦܹܗ ܡ̣ܢ ܚܛܝܼܵܬܵܝ̈.

22 ܐܝܼܢܵܐ ܐܵܗܵܐ ܟܠܵܗ̇ ܗ̄ܘܹܠܵܐ: ܕܦܵܝܸܫ ܬܘܼܡܸܡܵܐ ܡܸܢܕܝܼ 23 ܕܦܸܫܠܹܗ ܐܡܝܼܪܵܐ ܡ̣ܢ ܡܵܪܝܵܐ ܒܝܸܕ ܢܒ̣ܝܼܵܐ: ܒܹܐܡܵܪܵܐ. ܗܵܐ: ܒܬܘܼܠܬܵܐ ܒܸܬ ܒܵܛܢܵܐ: ܘܒܸܬ ܝܵܠܕܵܐ ܒܪܘܼܢܵܐ: ܘܒܸܬ ܩܵܪܝܼ ܫܸܡܹܗ ܥܲܡܲܢܘܼܐܹܝܠ: ܕܦܝܵܫܵܐ ܝܠܹܗ ܦܘܼܫܩܵܐ: ܥܲܡܲܢ ܐܲܠܵܗܵܐ. 24 ܘܟܲܕ ܩܸܡܠܹܗ ܝܵܘܣܸܦ ܡ̣ܢ ܫܸܢܬܹܗ: ܥܒܸܕܠܹܗ ܕܵܐܟ̣ܝܼ ܕܦܩܸܕܠܹܗ 25 ܡܲܠܲܐܟܹܗ ܕܡܵܪܝܵܐ: ܘܠܘܼܒܠܵܠܹܗ ܒܲܟ̣ܬܹܗ. ܘܠܵܐ ܝܕܸܥܝܵܠܹܗ ܗܲܠ ܕܝܠܸܕܠܵܐ [2] ܠܒܪܘܼܢܵܐ: ܘܩܪܹܠܵܐ ܫܸܡܹܗ ܝܼܫܘܿܥ.

ܩܦܠܐܘܢ: ܒ

1 ܘܟܲܕ ܦܸܫܠܹܗ ܝܠܝܼܕܵܐ ܝܼܫܘܿܥ ܓܵܘ ܒܹܝܬܠܚܸܡ ܕܝܼܗܘܼܕܵܐ: ܒܝܘܿܡܵܢܹ̈ܐ: ܕܗܹܪܘܿܕܸܣ ܡܲܠܟܵܐ: ܗܵܐ: ܐܬܹܠܘܿܢ ܡܓ̣ܘܼܫܹ̈ܐ ܡ̣ܢ 2 ܡܲܕܢܚܵܐ ܠܐܘܿܪܸܫܠܸܡ. ܘܐܵܡܪܝܼ: ܐܲܝܟܵܐ ܝܠܹܗ ܡܲܠܟܵܐ ܕܝܗ̄ܘܼܕܵܝܹ̈ܐ ܕܦܸܫܠܹܗ ܗ̄ܘܝܼܵܐ: ܣܵܒܵܒ ܕܚܙܹܠܲܢ ܟܵܘܟ̣ܒܹܗ ܒܡܲܕܢܚܵܐ: 3 ܘܐܬܹܠܲܢ ܠܸܣܓ̣ܵܕܵܐ ܐܸܠܹܗ. ܘܟܲܕ ܫܡܸܥܠܹܗ ܗܹܪܘܿܕܸܣ ܡܲܠܟܵܐ: 4 ܫܥܸܫܠܹܗ: ܘܟܠܵܗ̇ ܐܘܿܪܸܫܠܸܡ ܥܲܡܹܗ. ܘܓ̰ܘܼܡܸܥܠܹܗ ܟܠܵܝ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܛܵܝܸܦܵܐ: ܘܒܘܼܩܸܪܹܐ ܡܸܢܵܝ ܐܲܝܟܵܐ 5 ܦܵܝܸܫ ܝܠܝܼܕܵܐ ܡܫܝܼܚܵܐ. ܘܐܵܢܝܼ ܐܡܸܪܘܿܢ ܐܸܠܹܗ: ܓܵܘ ܒܹܝܬ ܠܚܸܡ 6 ܕܝܼܗܘܼܕܵܐ: ܣܵܒܵܒ ܗܲܕܟ̣ܵܐ ܟܬܝܼܒ̣ܵܐ ܝܠܹܗ ܒܝܸܕ ܢܒ̣ܝܼܵܐ. ܐܘܼܦ ܐܲܢ̄ܬܝ ܒܹܝܬܠܚܸܡ ܒܐܲܪܥܵܐ ܕܝܼܗܘܼܕܵܐ: ܠܹܐ ܝܘܲܬܝ ܒܵܨܘܿܪܬܵܐ ܒܗܵܟܝܼܡܹ̈ܐ ܕܝܼܗܘܼܕܵܐ: ܣܵܒܵܒ ܡܸܢܵܟ̣ܝ ܒܸܬ ܦܵܠܸܛ ܗܵܟܝܼܡ: ܗ̇ܘ ܕܒܸܬ 7 ܡܲܪܥܹܐ ܠܛܵܝܸܦܝܼ ܝܼܣܪܵܝܹܠ. ܗ̇ܝܓܵܗ ܗܹܪܘܿܕܸܣ ܒܛܸܫܘܵܐ ܩܪܹܠܹܗ ܠܡܓ̣ܘܼܫܹ̈ܐ: ܘܝܠܸܦܠܹܗ ܡܸܢܵܝ ܒܚܲܡܚܘܵܪܘܼܬܵܐ ܒܐܲܝܢܝܼ 8 ܙܲܒ̣ܢܵܐ ܦܸܫܠܹܗ ܚܸܙܝܵܐ ܐܸܠܵܝ ܟܵܘܟ̣ܒ̣ܵܐ. ܘܫܘܼܕܪܵܝܠܹܗ ܠܒܹܝܬܠܚܸܡ: ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܨܲܚܨܸܡܘܿܢ ܥܲܠ ܝܵܠܵܐ ܒܚܲܡܚܘܵܪܘܼܬܵܐ: ܘܐܝܼܡܲܢ ܕܡܘܼܫ̄ܟ̰ܸܚܠܵܘܟ̣ܘܿܢ ܐܸܠܹܗ: ܡܲܕܸܥܡܘܿܢ ܠܝܼ: ܕܐܘܼܦ ܐܵܢܵܐ 9 ܐܵܙܸܠ̄ܢ ܣܵܓ̣ܕܸܢ ܐܸܠܹܗ. ܐܝܼܢܵܐ ܐܵܢܝܼ: ܟܲܕ ܫܡܸܥܠܘܿܢ ܡ̣ܢ ܡܲܠܟܵܐ: ܐܙܹܠܘܿܢ: ܘܗܵܐ: ܗ̇ܘ ܟܵܘܟ̣ܒ̣ܵܐ ܕܚܙܹܠܘܿܢ ܒܡܲܕܢܚܵܐ ܐܙܸܠܹܗ ܩܵܕ̄ܡܵܝ: ܗܲܠ ܕܐܬܹܠܹܗ ܟܠܹܠܹܗ ܠܥܸܠܸܠ ܡ̣ܢ ܐܲܝܟܵܐ 10 ܕܝܼܗ̄ܘܵܐ ܝܵܠܵܐ ܙܥܘܿܪܵܐ. ܘܟܲܕ ܚܙܹܠܘܿܢ ܠܟܵܘܟ̣ܒ̣ܵܐ: ܚܕܹܠܘܿܢ 11 ܚܲܕܘܼܬܵܐ ܓܘܼܪܬܵܐ ܪܵܒܵܐ. ܘܐܘܸܪܘܿܢ ܠܒܝܬܵܐ: ܘܚܙܹܠܘܿܢ ܠܝܵܠܵܐ ܙܥܘܿܪܵܐ ܥܲܡ ܡܲܪܝܲܡ ܝܸܡܹܗ: ܘܢܦܸܠܘܿܢ ܣܓܸܕܠܘܿܢ ܐܸܠܹܗ: ܘܦܬܸܚܠܘܿܢ ܚܲܙܝܼܢܵܝ̈ ܘܡܘܼܩܪܸܒ̣ܠܘܿܢ ܐܸܠܹܗ ܕܝܼܵܪ̈ܝܹܐ: ܕܲܗܒ̣ܵܐ: 12 ܘܡܘܪܵܐ: ܘܠܒ̣ܘܼܢ̄ܬܵܐ. ܘܟܲܕ ܥܒ̣ܝܼܕܹܐ ܗ̄ܘܵܘ ܗܸܫܝܵܪ (ܡ̣ܢ ܐܲܠܵܗܵܐ) ܒܚܸܠܡܵܐ ܕܠܵܐ ܕܵܝܪܝܼ ܠܟܸܣ ܗܹܪܘܿܕܸܣ: ܒܐܘܼܪܚܵܐ ܐܚܹܪ̄ܬܵܐ ܐܙܸܠܘܿܢ ܠܐܲܬܪܵܝ. 13 ܘܟܲܕ ܐܙܸܠܘܿܢ: ܗܵܐ: ܦܸܫܠܹܗ ܚܸܙܝܵܐ ܡܲܠܲܐܟ̣ܵܐ ܕܡܵܪܝܵܐ ܒܚܸܠܡܵܐ ܠܝܵܘܣܸܦ: ܘܐܡܸܪܹܐ: ܩܘܼܡ̄: ܠܵܒܸܠ ܠܝܵܠܵܐ ܙܥܘܿܪܵܐ ܘܠܝܸܡܹܗ: ܘܥܪܘܿܩ ܠܡܸܨܪܹܝܢ: ܘܬܵܡܵܐ ܗ̄ܘܝܼ ܗܲܠ ܕܐܵܡܪܸܢܘܿܟ ܣܵܒܵܒ ܕܗܕܝܼܪܵܐ ܝܠܹܗ ܗܹܪܘܿܕܸܣ ܠܸܛܲܥܝܵܐ 14 ܠܝܵܠܵܐ ܕܬܵܠܸܩ ܠܹܗ. ܘܝܵܘܣܸܦ ܩܸܡܠܹܗ ܫܩܸܠܹܗ ܠܝܵܠܵܐ ܙܥܘܿܪܵܐ ܘܠܝܸܡܹܗ ܒܠܲܝܠܹܐ: ܘܥܪܸܩܠܹܗ ܠܡܸܨܪܹܝܢ. 15 ܘܗ̄ܘܹܠܹܗ ܬܵܡܵܐ ܗܲܠ ܡܵܘܬܹܗ ܕܗܹܪܘܿܕܸܣ: ܕܦܵܝܸܫ ܬܘܼܡܸܡܵܐ ܡܸܢܕܝܼ ܕܦܸܫܠܹܗ ܐܡܝܼܪܵܐ ܡ̣ܢ ܡܵܪܝܵܐ ܒܝܸܕ ܢܒ̣ܝܼܵܐ: ܕܐܡܸܪܹܐ: ܡ̣ܢ ܡܸܨܪܹܝܢ ܩܪܹܠܝܼ ܠܒܪܘܼܢܝܼ.

16 ܗ̇ܝܓܵܗ ܗܹܪܘܿܕܸܣ: ܟܲܕ ܚܙܹܠܹܗ ܕܦܸܫܠܹܗ ܡܘܼܣܚܸܪܵܐ ܡ̣ܢ ܡܓ̣ܘܼܫܹ̈ܐ: ܟܪܸܒܠܹܗ ܪܵܒܵܐ: ܘܫܘܼܕܸܪܹܐ ܡܘܼܩܛܸܠܹܗ ܠܟܠܵܝ ܝܵܠܹ̈ܐ ܕܓܵܘ ܒܹܝܬܠܚܸܡ ܘܕܓܵܘ ܟܠܵܝ ܬܸܚܘܼܒܘܼ̈ܗ̇: ܕܡ̣ܢ ܒܲܪ ܬܲܪ̈ܬܹܝ ܫܸܢܹ̈ܐ ܘܠܐܸܠܬܸܚ: ܐܲܝܟ ܙܲܒ̣ܢܵܐ ܕܝܠܸܦܠܹܗ 17 ܒܚܲܡܚܘܵܪܘܼܬܵܐ ܡ̣ܢ ܡܓ̣ܘܼܫܹ̈ܐ. ܗ̇ܝܓܵܗ ܦܸܫܠܹܗ ܬܘܼܡܸܡܵܐ 18 ܡܸܢܕܝܼ ܕܐܡܝܼܪܵܐ ܗ̄ܘܵܐ ܒܝܸܕ ܐܹܪܲܡܝܵܐ ܢܒ̣ܝܼܵܐ: ܕܐܡܸܪܹܐ. ܩܵܠܵܐ ܦܸܫܠܹܗ ܫܸܡܥܝܵܐ ܒܪܵܡܬܵܐ: ܒܸܟ̣ܝܵܐ ܘܝܠܝܵܝܵܐ ܪܵܒܵܐ: ܪܵܚܹܝܠ ܒܸܒܟ̣ܵܝܵܐ ܥܲܠ ܒܢܘܼܢܘܼ̈ܗ̇: ܘܠܹܐ ܒܵܣܡܵܐ ܗ̄ܘܵܐ ܠܵܗ̇ ܠܸܫܩܵܠܵܐ ܠܸܒܵܐ: ܣܵܒܵܒ ܕܠܲܝܬ ܗ̄ܘܵܘ.

19 ܐܝܼܢܵܐ ܟܲܕ ܡܸܬܠܹܗ ܗܹܪܘܿܕܸܣ: ܗܵܐ: ܦܸܫܠܹܗ ܚܸܙܝܵܐ ܡܲܠܲܐܟܹܗ 20 ܕܡܵܪܝܵܐ ܒܚܸܠܡܵܐ ܠܝܵܘܣܸܦ ܒܡܸܨܪܹܝܢ. ܘܐܡܸܪܹܐ: ܩܘܼܡ̄: ܠܵܒܸܠ ܠܝܵܠܵܐ ܙܥܘܿܪܵܐ ܘܠܝܸܡܹܗ: ܘܙܹܠ̄ܐ ܠܐܲܪܥܵܐ ܕܝܼܣܪܵܝܹܠ: ܣܵܒܵܒ ܕܡܸܬܠܘܿܢ ܐܵܢܝܼ ܕܒܸܛܲܥܝܵܐ ܗ̄ܘܵܘ ܠܓܵܢܹܗ ܕܝܵܠܵܐ. 21 ܘܝܵܘܣܸܦ ܩܸܡܠܹܗ ܠܘܼܒܸܠܹܗ ܠܝܵܠܵܐ ܙܥܘܿܪܵܐ ܘܠܝܸܡܹܗ ܘܐܬܹܠܹܗ 22 ܠܐܲܪܥܵܐ ܕܝܼܣܪܵܝܹܠ. ܐܝܼܢܵܐ ܟܲܕ ܫܡܸܥܠܹܗ ܕܐܲܪܟܹܠܹܐܘܿܣ ܗ̄ܘܹܠܹܗ ܡܲܠܟܵܐ ܒܝܼܗܘܼܕ ܡܒܵܕܵܠ ܕܗܹܪܘܿܕܸܣ ܒܵܒܹܗ: ܙܕܸܥܠܹܗ ܕܐܵܙܸܠ ܠܬܵܡܵܐ: ܘܟܲܕ ܦܸܫܠܹܗ ܥܒ̣ܝܼܕܵܐ ܗܸܫܝܵܪ (ܡ̣ܢ ܐܲܠܵܗܵܐ) 23 ܒܚܸܠܡܵܐ: ܐܙܸܠܹܗ ܠܐܲܬܪܵܐ ܕܓܠܝܼܠܵܐ. ܘܐܬܹܠܹܗ ܥܡܸܪܹܐ ܓܵܘ ܡܕܝܼܢ̄ܬܵܐ ܩܪܝܼܬܵܐ ܢܵܨܪܲܬ: ܕܦܵܝܸܫ ܬܘܼܡܸܡܵܐ ܡܸܢܕܝܼ ܕܐܡܝܼܪܵܐ ܗ̄ܘܵܐ ܒܝܸܕ ܢܒ̣̈ܝܹܐ: ܕܢܵܨܪܵܝܵܐ ܒܸܬ ܦܵܝܸܫ ܩܸܪܝܵܐ.

ܩܦܠܐܘܢ: ܓ

1 ܘܒܐܵܢܝܼ ܝܘܿܡܵܢܹ̈ܐ ܐܬܹܠܹܗ ܝܘܿܚܲܢܵܢ ܡܲܥ̄ܡܕܵܢܵܐ: ܡܲܟܪܘܿܙܹܐ 2 ܠܵܘ ܒܲܪܝܼܵܐ ܕܝܼܗܘܼܕܵܐ. ܒܹܐܡܵܪܵܐ: ܬܲܘܸܒܘܿܢ: ܣܵܒܵܒ [3] ܩܘܼܪܒܸܢܹܐ 3 ܡܲܠܟܘܼܬܵܐ ܕܫܡܲܝܵܐ. ܣܵܒܵܒ ܐܵܗܵܐ ܝܠܹܗ ܗ̇ܘ ܕܝܼܠܹܗ ܐܡܝܼܪܵܐ ܒܝܸܕ ܐܹܫܲܥܝܵܐ ܢܒ̣ܝܼܵܐ: ܕܐܡܸܪܹܐ: ܩܵܠܵܐ ܕܩܵܪܹܐ ܓܵܘ ܒܲܪܝܼܵܐ: ܗܵܕܪܘܿܢ ܐܘܼܪܚܹܗ ܕܡܵܪܝܵܐ: ܘܡܲܫܘܹܡܘܿܢ ܠܓ̰ܵܕܵܘܵܬܘܼ̈ܗܝ. 4 ܘܗ̇ܘ ܝܘܿܚܲܢܵܢ ܐܝܼܬ ܗ̄ܘܵܐ ܠܹܗ ܠܒܸܫܬܵܐ ܕܣܲܥܪܵܐ ܕܓܘܼܡܠܹ̈ܐ: ܘܚܵܨܵܐ ܕܓܸܠܕܵܐ ܒܚܵܨܹܗ: ܘܡܹܐܟ̣ܘܼܠܬܹܗ ܩܲܡܨܹ̈ܐ ܘܕܸܒ̣ܫܵܐ 5 ܕܒܲܪܝܼܵܐ. ܗ̇ܝܓܵܗ ܦܠܸܛܠܵܐ ܠܟܸܣܠܹܗ ܐܘܿܪܸܫܠܸܡ ܘܟܠܵܗ̇ 6 ܝܼܗܘܼܕ: ܘܟܠܹܗ ܐܲܬܪܵܐ ܕܠܚܵܕܸܪ̈ܘܵܢܹܐ ܕܝܘܿܪܕܢܢ. ܘܥܡܸܕܠܘܿܢ 7 ܡܸܢܹܗ ܒܝܘܿܪܕܢܵܢ ܢܲܗܪܵܐ: ܟܲܕ ܡܵܘܕܘܿܝܹܐ ܒܚܛܝܼܵܬܝܼ̈. ܐܝܼܢܵܐ ܟܲܕ ܚܙܹܠܹܗ ܪܵܒܵܐ ܡ̣ܢ ܦܪ̈ܝܼܫܹܐ ܘܡ̣ܢ ܙܲܕܘܼܩܵܝܹ̈ܐ ܒܹܐܬܵܝܵܐ ܠܡܲܥܡܘܿܕܝܼܬܹܗ: ܐܡܸܪܹܐ ܐܸܠܵܝ: ܙܲܪܥܵܐ ܕܐܵܟܸܕܢܹ̈ܐ: ܡܵܢܝܼ ܡܘܼܕܸܥܠܹܗ ܐܸܠܵܘܟ̣ܘܿܢ ܠܸܥܪܵܩܵܐ ܡ̣ܢ ܟܲܪܒܵܐ ܕܒܹܐܬܵܝܵܐ ܝܠܵܐ. 8 ܥܒ̣ܘܿܕܘܿܢ ܗܲܕܟ̣ܵܐ ܛܥܘܼܢܝܵܬܹ̈ܐ ܕܚܵܫܚܝܼ ܠܬܝܵܒ̣ܘܼܬܵܐ. ܘܠܵܐ 9 ܚܵܫܒ̣ܝܼܬܘܿܢ ܘܐܵܡܪܝܼܬܘܿܢ ܒܓܵܢܵܘܟ̣ܘܿܢ: ܒܵܒܵܐ ܐܝܼܬ ܠܲܢ: ܐܲܒ̣ܪܵܗܵܡ: ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܵܨܹܐ ܐܲܠܵܗܵܐ 10 ܡܐܲܢܹܐ ܟܹܐܦܹ̈ܐ ܠܡܲܩܘܼܡܹܐ ܒܢܘܼܢܹ̈ܐ ܠܐܲܒ̣ܪܵܗܵܡ. ܘܐܘܼܦ ܐܵܕܝܼܵܐ ܢܲܪܥܹܐ ܡܘܼܬܒ̣ܵܐ ܝܠܹܗ ܥܲܠ ܥܸܩܪܵܐ ܕܐܝܼܠܵܢܹ̈ܐ. ܟܠ ܐܝܼܠܵܢܵܐ ܗܲܕܟ̣ܵܐ ܕܛܥܘܼܢܝܵܬܹ̈ܐ ܫܵܦܝܼܪܹ̈ܐ ܠܵܐ ܥܵܒܸܕ: ܟܹܐ ܦܵܝܸܫ ܦܪܝܼܡܵܐ 11 ܘܕܸܪܝܵܐ ܒܢܘܼܪܵܐ. ܐܵܢܵܐ ܡܲܥܡܘܿܕܹܐ ܝܘܸܢ ܐܸܠܵܘܟ̣ܘܿܢ ܒܡ̈ܝܼܵܐ ܠܬܝܵܒ̣ܘܼܬܵܐ: ܐܝܼܢܵܐ ܗ̇ܘ ܕܒܹܐܬܵܝܵܐ ܝܠܹܗ ܒܵܬ̄ܪܝܼ ܒܘܼܫ ܙܲܪܒܵܢܵܐ ܝܠܹܗ ܡܸܢܝܼ: ܗ̇ܘ ܕܠܹܐ ܚܵܫܚܸܢ ܐܵܢܵܐ ܠܨܵܘܠܘܼ̈ܗܝ ܠܸܫܩܵܠܵܐ: ܗ̇ܘ 12 ܡܲܥܡܸܕ ܠܵܘܟ̣ܘܿܢ ܒܪܘܼܚܵܐ ܕܩܘܼܕܫܵܐ ܘܒܢܘܪܵܐ. ܗ̇ܘ ܕܪܘܼܦ̮ܫܬܵܐ ܒܐܝܼܕܹܗ ܘܒܸܬ ܕܵܟܹܐ ܒܸܐܕܪܵܬܘܼܗܝ: ܘܚܸܛܘܼ̈ܗܝ ܒܸܬ ܓ̰ܲܡܸܥ ܠܐܲܢܒܵܪ̈ܘܼܗܝ: ܘܬܸܒ̣ܢܵܐ ܒܸܬ ܡܵܩܸܕ ܒܢܘܼܪܵܐ ܕܠܹܐ ܟ̰ܲܡܹܐ. 13 ܗ̇ܝܓܵܗ ܐܬܹܠܹܗ ܝܼܫܘܿܥ ܡ̣ܢ ܓܠܝܼܠܵܐ ܠܝܘܿܪܕܢܵܢ ܠܟܸܣ 14 ܝܘܿܚܲܢܵܢ: ܕܥܵܡܸܕ ܡܸܢܹܗ. ܐܝܼܢܵܐ ܝܘܿܚܲܢܵܢ ܡܲܟܠܹܐ ܗ̄ܘܵܐ ܠܹܗ: ܘܐܵܡܸܪ: ܐܵܢܵܐ ܣܢܝܼܩܵܐ ܝܘܸܢ ܕܡܸܢܘܼܟ ܦܵܝܫܸܢ ܡܘܼܥܡܸܕܵܐ: ܘܐܲܢ̄ܬ 15 ܠܟܸܣܠܝܼ ܐܬܹܠܘܼܟ. ܐܝܼܢܵܐ ܝܼܫܘܿܥ ܓ̰ܘܼܘܸܒܠܹܗ ܘܐܡܸܪܹܐ ܐܸܠܹܗ: ܫܒ̣ܘܿܩ ܐܵܕܝܼܵܐ: ܣܵܒܵܒ ܗܲܕܟ̣ܵܐ ܘܵܓ̰ܸܒ ܝܼܠܵܐ ܐܸܠܲܢ ܕܬܲܡܸܡܵܚ ܟܠܵܗ̇ ܟܹܐܢܘܼܬܵܐ. ܗ̇ܝܓܵܗ ܫܒܸܩܠܹܗ.

16 ܘܟܲܕ ܥܡܸܕܠܹܗ ܝܼܫܘܿܥ: ܕܲܪܣܵܥܲܬ ܐܣܸܩܠܹܗ ܡ̣ܢ ܡ̈ܝܼܵܐ: ܘܗܵܐ: ܦܸܫܠܘܿܢ ܦܬܝܼܚܹܐ ܐܸܠܹܗ ܫܡܲܝܹ̈ܐ: ܘܚܙܹܠܹܗ ܪܘܼܚܵܐ ܕܐܲܠܵܗܵܐ 17 ܒܸܨܠܵܝܵܐ ܐܲܝܟ ܝܵܘܢܵܐ: ܘܒܹܐܬܵܝܵܐ ܥܲܠܘܼܗܝ. ܘܗܵܐ: ܩܵܠܵܐ ܡ̣ܢ ܫܡܲܝܵܐ ܕܐܵܡܸܪ: ܐܵܗܵܐ ܝܠܹܗ ܒܪܘܼܢܝܼ ܡܘܼܚܸܒܵܐ: ܕܒܝܹܗ ܒܸܒܣܵܡܝܼ ܝܠܵܐ.

ܩܦܠܐܘܢ: ܕ

1 ܗ̇ܝܓܵܗ ܝܼܫܘܿܥ ܦܸܫܠܹܗ ܠܘܼܒܠܵܐ ܡ̣ܢ ܪܘܼܚܵܐ ܕܩܘܼܕܫܵܐ 2 ܠܒܲܪܝܼܵܐ: ܕܦܵܝܸܫ ܓ̰ܘܼܪܒܵܐ ܡ̣ܢ ܐܵܟܸܠܩܲܪܨܵܐ. ܘܨܸܡܠܹܗ ܐܲܪܒܥܝܼ ܝܘܿܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ: ܘܒܚܲܪܬܵܐ ܟܦܸܢܹܐ. 3 ܘܐܬܹܠܹܗ ܓ̰ܵܪܒܵܢܵܐ: ܘܐܡܸܪܹܐ ܐܸܠܹܗ: ܐܸܢ ܒܪܘܼܢܹܗ ܕܐܲܠܵܗܵܐ ܝܘܸܬ: 4 ܐܡܘܿܪ ܕܐܲܢܹܐ ܟܹܐܦܹ̈ܐ ܗܵܘܝܼ ܠܲܚܡܵܐ. ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐܡܸܪܹܐ: ܟܬܝܼܒ̣ܵܐ ܝܠܹܗ: ܠܵܐ ܗܲܪ ܒܠܲܚܡܵܐ ܒܸܬ ܚܲܝܹܐ ܒܲܪܢܵܫܵܐ: ܐܸܠܵܐ ܒܟܠ ܗܹܡܸܙܡܵܢ ܕܦܵܠܛܵܐ ܡ̣ܢ ܦܘܼܡܹܗ ܕܐܲܠܵܗܵܐ. 5 ܗ̇ܝܓܵܗ ܠܘܼܒܸܠܹܗ ܐܵܟܸܠܩܲܪܨܵܐ ܠܡܕܝܼܢ̄ܬܵܐ ܩܲܕܝܼܫܬܵܐ: ܘܡܘܼܟܠܹܠܹܗ 6 ܥܲܠ ܟܸܢܦܵܐ ܕܗܲܝܟܠܵܐ. ܘܐܡܸܪܹܐ ܐܸܠܹܗ: ܐܸܢ ܒܪܘܼܢܹܗ ܕܐܲܠܵܗܵܐ ܝܘܸܬ: ܪܲܦܝܼ ܓܵܢܘܼܟ ܠܐܸܠܬܵܚ: ܣܵܒܵܒ ܕܟܬܝܼܒܹܐ ܝܠܹܗ: ܠܡܲܠܲܐܟ̣ܘܼ̈ܗܝ ܒܸܬ ܦܵܩܸܕ ܥܲܠܘܼܟ: ܘܥܲܠ ܐܝܼܕܵܬܵܝ̈ ܒܸܬ ܫܵܩܠܝܼ ܠܘܼܟ: ܠܵܐ ܗ̄ܘܹܐ ܕܡܵܚܸܬ ܒܟܹܐܦܵܐ ܐܲܩܠܘܼܟ. 7 ܘܐܡܸܪܹܐ ܐܸܠܹܗ ܝܼܫܘܿܥ: ܡܸܕܪܹܐ ܟܬܝܼܒ̣ܵܐ ܝܠܹܗ: ܠܵܐ ܓ̰ܵܪܒܸܬ 8 ܠܡܵܪܝܵܐ ܐܲܠܵܗܘܼܟ. ܡܸܕܪܹܐ ܠܘܼܒܸܠܹܗ ܐܵܟܸܠܩܲܪܨܵܐ ܠܛܘܪܵܐ ܪܵܒܵܐ ܪܵܡܵܐ: ܘܡܘܼܚܙܹܠܹܗ ܟܠܵܝ ܡܲܠܟܘܵܬܹ̈ܐ ܕܥܵܠܡܵܐ 9 ܘܚܸܩܪܵܝ. ܘܐܡܸܪܹܐ ܐܸܠܹܗ: ܐܲܢܹܐ ܟܠܵܝ ܐܸܠܘܼܟ ܒܸܬ ܝܵܗ̄ܒܸܢ: 10 ܐܸܢ ܢܵܦܠܸܬ ܣܵܓ̣ܕܸܬ ܠܝܼ. ܗ̇ܝܓܵܗ ܐܡܸܪܹܐ ܐܸܠܹܗ ܝܼܫܘܿܥ: ܙܹܠ̄ܐ ܠܘܼܟ: ܣܵܛܵܢܵܐ: ܣܵܒܵܒ ܕܟܬܝܼܒ̣ܵܐ ܝܠܹܗ: ܠܡܵܪܝܵܐ ܐܲܠܵܗܘܼܟ 11 ܣܵܓ̣ܕܸܬ: ܘܐܸܠܹܗ ܒܢܲܦ̮ܫܹܗ ܦܵܠܚܸܬ. ܗ̇ܝܓܵܗ ܫܒܸܩܠܹܗ ܐܵܟܹܠܩܲܪܨܵܐ: ܘܗܵܐ: ܡܲܠܲܐܟܹ̈ܐ ܐܬܹܠܘܿܢ ܘܥܒܸܕܠܘܿܢ ܐܸܠܹܗ ܚܸܠܡܲܬ. 12 ܘܟܲܕ ܫܡܸܥܠܹܗ ܝܼܫܘܿܥ ܕܝܘܿܚܲܢܵܢ ܦܸܫܠܹܗ ܣܘܼܦܝܵܐ: ܫܘܼܢܹܠܹܗ 13 ܠܓܠܝܼܠܵܐ. ܘܫܒ̣ܝܼܩܵܠܹܗ ܠܢܵܨܪܲܬ: ܘܐܬܹܠܹܗ ܥܡܸܪܹܐ ܒܟܦܲܪܢܵܚܘܢ ܥܲܠ ܣܸܦܬܵܐ ܕܝܵܡܵܐ: ܒܬܸܚܘܼܒ̣ ܕܙܒ̣ܘܿܠܘܿܢ 14 ܘܕܢܲܦ̮ܬܵܠܝܼ: ܕܦܵܝܸܫ ܬܘܼܡܸܡܵܐ ܡܸܢܕܝܼ ܕܦܸܫܠܹܗ ܐܡܝܼܪܵܐ 15 ܒܝܸܕ ܐܹܫܲܥܝܵܐ ܢܒ̣ܝܼܵܐ: ܕܐܡܸܪܹܐ. ܐܪܥܵܐ ܕܙܒ̣ܘܿܠܘܿܢ: ܐܲܪܥܵܐ ܕܢܲܦ̮ܬܵܠܝܼ: ܐܘܼܪܚܵܐ ܕܝܵܡܵܐ: ܓܹܒܵܐ ܐܚܹܪ̄ܢܵܐ ܕܝܘܿܪܕܢܵܢ: ܓܠܝܼܠܵܐ 16 ܕܛܵܝܸܦܹ̈ܐ. ܛܵܝܸܦܵܐ ܕܝܬܝܼܒ̣ܵܐ ܗ̄ܘܵܐ ܒܚܘܼܒ̣ܝܵܐ ܒܲܗܪܵܐ ܓܘܼܪܵܐ ܚܙܹܠܹܗ: ܘܐܵܢܝܼ ܕܝܬܝܼܒܹܐ ܗ̄ܘܵܘ ܒܐܲܬܪܵܐ ܘܒܛܸܠܵܢܝܼܬܵܐ ܕܡܵܘܬܵܐ: ܒܲܗܪܵܐ ܙܪܸܩܠܹܗ ܐܸܠܵܝ.

17 ܡܗ̇ܝܓܵܗ ܫܘܼܪܹܠܹܗ ܝܼܫܘܿܥ ܠܡܲܟ̇ܪܘܼܙܹܐ ܘܠܹܐܡܵܪܵܐ: ܬܲܘܸܒܘܿܢ: ܣܵܒܵܒ [4] ܕܩܘܼܪܒܸܢܵܐ ܡܲܠܟܘܼܬܵܐ ܕܫܡܲܝܵܐ. 18 ܘܟܲܕ ܒܸܚܕܵܪܵܐ ܗ̄ܘܵܐ ܥܲܠ ܣܸܦܬܵܐ ܕܝܵܡܵܐ ܕܓܠܝܼܠܵܐ: ܚܙܹܠܹܗ ܬܪܲܝ ܐܵܚܘܿܢܘܵܬܹ̈ܐ: ܫܸܡܥܘܢ ܕܦܸܫܠܹܗ ܩܸܪܝܵܐ ܟܹܐܦܵܐ: ܘܐܲܢܕܪܹܐܘܿܣ ܐܵܚܘܿܢܹܗ: ܒܸܕܪܵܝܵܐ [5] ܓܲܪ̈ܕܹܐ ܒܝܵܡܵܐ: ܣܵܒܵܒ ܨܲܝܵܕܹ̈ܐ 19 ܗ̄ܘܵܘ. ܘܐܡܸܪܹܐ ܐܸܠܵܝ: ܬܹܡܘܿܢ ܒܵܬ̄ܪܵܝ ܘܒܸܬ ܥܵܒ̣ܕܸܢܵܘܟ̣ܘܿܢ ܨܲܝܵܕܹ̈ܐ ܕܒܢܲܝ̈ܢܵܫܵܐ. ܘܐܵܢܝܼ ܕܲܪܣܵܥܲܬ ܫܒܸܩܠܘܿܢ [6] ܓܲܪ̈ܕܵܝ: 21 ܘܐܙܸܠܘܿܢ ܒܵܬ̄ܪܹܗ. ܘܟܲܕ ܥܒܸܪܹܐ ܡ̣ܢ ܬܵܡܐ ܚܙܹܠܹܗ ܬܪܲܝ ܐܵܚܘܿܢܘܵܬܹ̈ܐ ܐܚܹܪ̄ܢܹܐ: ܝܲܥܩܘܿܒ̣ ܒܪܘܼܢܵܐ ܕܙܲܒ̣ܕܲܝ: ܘܝܘܿܚܲܢܵܢ ܐܵܚܘܿܢܹܗ: ܒܓܵܡܝܼ ܥܲܡ ܙܲܒ̣ܕܲܝ ܒܵܒܵܝ: ܬܵܪܘܿܨܹܐ [7] ܓܲܪ̈ܕܵܝ: 22 ܘܩܸܪܝܵܝܠܹܗ. ܘܐܵܢܝܼ ܕܲܪܣܵܥܲܬ ܫܒܸܩܠܘܿܢ ܠܓܵܡܝܼ ܘܠܒܵܒܵܝ: ܘܐܙܸܠܘܿܢ ܒܵܬ̄ܪܹܗ. 23 ܘܒܸܚܕܵܪܵܐ ܗ̄ܘܵܐ ܝܼܫܘܿܥ ܒܟܠܵܗ̇ ܓܠܝܼܠܵܐ: ܡܵܠܘܿܦܹܐ ܒܟܢܘܼܫܝܵܬܵܝ̈: ܘܡܲܟܪܘܼܙܹܐ ܡܲܫܚܲܕܬܵܐ ܕܡܲܠܟܘܼܬܵܐ: ܘܒܵܣܘܿܡܹܐ 24 ܟܠ ܕܪܕ ܘܟܠ ܡܲܪܥܵܐ ܒܛܵܝܸܦܵܐ. ܘܦܸܠܛܠܵܐ ܒܵܗܣܹܗ ܒܟܠܵܗ̇ ܣܘܼܪܝܼܵܐ: ܘܡܘܼܬ̄ܝܹܠܘܿܢ ܠܟܸܣܠܹܗ ܟܠܵܝ ܐܵܢܝܼ ܕܣܸܪܝܵܐ ܕܒ̣ܝܼܩܹܐ ܗ̄ܘܵܘ ܒܡܲܪ̈ܥܹܐ ܬܵܗܵܪܹ̈ܐ ܬܵܗܵܪܹ̈ܐ: ܘܐܵܢܝܼ ܕܡܘܼܠܝܸܨܹܐ ܒܓ̰ܘܼܢܓ̰ܵܪܹ̈ܐ: ܘܕܲܝܘܵܢܹ̈ܐ: ܘܕܒܲܪ ܐܸܓܵܪܹ̈ܐ: 25 ܘܫܦܝܼ̈ܠܹܐ: ܘܒܘܼܣܡܵܝܠܹܗ. ܘܐܙܸܠܘܿܢ ܒܵܬ̄ܪܹܗ ܟܸܢܫܹ̈ܐ ܪܵܒܵܐ: ܡ̣ܢ ܓܠܝܼܠܵܐ: ܘܡ̣ܢ ܥܸܣܪܲܬ ܡܕܝܼܢܵـ̈ـܬܵܐ: ܘܡ̣ܢ ܐܘܿܪܸܫܠܸܡ: ܘܡܢ ܝܼܗܘܼܕ: ܘܡ̣ܢ ܓܹܒܵܐ ܐܚܹܪ̄ܢܵܐ ܕܝܘܿܪܕܢܵܢ.

ܩܦܠܐܘܢ: ܗ

1 ܘܟܲܕ ܚܙܹܠܹܗ ܠܟܸܢܫܹ̈ܐ: ܐܣܸܩܠܹܗ ܠܛܘܼܪܵܐ: ܘܟܲܕ ܝܬܸܒ̣ܠܹܗ: 2 ܐܬܹܠܘܿܢ ܠܟܸܣܠܹܗ ܬܲܠܡܝܼܕܘܼܗ̈ܝ. ܘܦܬܸܚܠܹܗ ܦܘܼܡܹܗ: ܘܡܵܠܸܦ ܗ̄ܘܵܐ ܠܗ̄ܘܿܢ: ܘܐܵܡܸܪ. 3 ܛܘܼܒ̣ܵܐ ܠܡܸܣܟܹܢܹ̈ܐ ܒܪܘܼܚܵܐ: ܣܵܒܵܒ ܕܕܝܼܵܝ ܝܠܵܐ ܡܲܠܟܘܼܬܵܐ ܕܫܡܲܝܵܐ. 4 ܛܘܼܒ̣ܵܐ ܠܥܵܒ̣ܕܵܢܹ̈ܐ ܕܬܵܙܝܼ: ܣܵܒܵܒ ܕܐܵܢܝܼ ܒܸܬ ܦܵܝܫܝܼ ܝܘܼܗ̄ܒܹܐ ܠܒܵܐ. 5 ܛܘܼܒ̣ܵܐ ܠܡܵܟܝܼܟܹ̈ܐ: ܣܵܒܵܒ ܕܐܵܢܝܼ ܒܸܬ ܝܵܪܬܝܼ ܐܲܪܥܵܐ. 6 ܛܘܼܒ̣ܵܐ ܠܐܵܢܝܼ ܕܟܵܦܢܝܼ ܘܨܲܗ̄ܝܝܼ ܠܟܹܐܢܘܼܬܵܐ: ܣܵܒܵܒ ܕܐܵܢܝܼ ܒܸܬ ܣܲܒ̣ܥܝܼ.

7 ܛܘܼܒ̣ܵܐ ܠܡܪܲܚܡܵܢܹܐ: ܣܵܒܵܒ ܕܥܲܠܵܝ ܒܸܬ ܗܵܘܝܼ ܪܲܚܡܹܐ. 8 ܛܘܼܒ̣ܵܐ ܠܐܵܢܝܼ ܕܝܼܢܵܐ ܕܸܟ̣ܝܹ̈ܐ ܒܠܸܒܵܐ: ܣܵܒܵܒ ܕܐܵܢܝܼ ܒܸܬ ܚܵܙܝܼ ܠܐܲܠܵܗܵܐ. 9 ܛܘܼܒ̣ܵܐ ܠܥܵܒ̣ܕܵܢܹ̈ܐ ܘܫܠܵܡܵܐ: ܣܵܒܵܒ ܕܒܢܘܢܹ̈ܐ ܕܐܲܠܵܗܵܐ ܒܸܬ ܦܵܝܫܝܼ ܩܸܪܝܹܐ. 10 ܛܘܼܒ̣ܵܐ ܠܐܵܢܝܼ ܕܦܸܫܠܘܿܢ ܛܪܝܼܕܹܐ ܣܵܒܵܒ ܕܟܹܐܢܘܼܬܵܐ: ܣܵܒܵܒ ܕܕܝܼܵܝ ܝܠܵܐ ܡܲܠܟܘܼܬܵܐ ܕܫܡܲܝܵܐ. 11 ܛܘܼܒ̣ܵܐ ܐܸܠܵܘܟ̣ܘܿܢ ܐܝܼܡܲܢ ܕܠܵܝܡܝܼ ܠܵܘܟ̣ܘܢ: ܘܛܵܪܕܝܼ ܠܵܘܟ̣ܘܿܢ: ܘܐܵܡܪܝܼ ܥܲܠܵܘܟ̣ܘܿܢ ܟܠ ܗܹܡܸܙܡܵܢ ܒܝܼܫܬܵܐ ܣܵܒܵܒ 12 ܕܝܼܝܼ ܒܕܵܓܵܠܘܼܬܵܐ. ܚܕܹܡܘܿܢ ܘܦܨܘܿܚܘܿܢ: ܕܗܵܩܵܘܟ̣ܘܿܢ ܪܵܒܵܐ ܝܠܹܗ ܒܫܡܲܝܵܐ: ܣܵܒܵܒ ܗܲܕܟ̣ܵܐ ܛܪܸܕܠܘܿܢ ܠܢܒܼ̈ܝܹܐ ܕܡ̣ܢ ܩܵܕ̄ܡܵܘܟ̣ܘܿܢ.

13 ܐܲܚܬܘܿܢ ܝܼܬܘܿܢ ܡܸܠܚܵܐ ܕܐܲܪܥܵܐ: ܐܝܼܢܵܐ ܐܸܢ ܡܸܠܚܵܐ ܦܵܝܟܵܐ: ܒܡܘܼܕܝܼ ܒܸܬ ܦܵܝܫܵܐ ܡܘܼܡܠܸܚܬܵܐ: ܠܡܸܢܕܝܼ ܦܲܝܕܵܐ ܠܹܐ ܗܵܘܝܵܐ: 14 ܐܸܠܵܐ ܕܦܵܝܫܵܐ ܪܘܼܦܝܼܬܵܐ ܠܒܲܕܲܪ ܘܕܝܼܫܬܵܐ ܡ̣ܢ ܐܢܵܫܹ̈ܐ. ܐܚܬܘܿܢ ܝܼܬܘܿܢ ܒܲܗܪܹܗ ܕܥܵܠܡܵܐ. ܠܹܐ ܡܵܨܝܵܐ ܕܛܵܫܝܵܐ ܡܕܝܼܢ̄ܬܵܐ ܕܥܲܠ 15 ܛܘܼܪܵܐ ܒܢܝܼܬܵܐ. ܘܠܹܐ ܬܵܦܝܼ ܫܪܵܝܵܐ ܘܡܲܬܒ̣ܝܼ ܠܵܗ̇ ܬܚܘܿܬ ܣܲܐܬܵܐ: ܐܸܠܵܐ ܥܲܠ ܟ̰ܪܲܚܦܝܼ: ܘܟܹܐ ܝܵܗ̄ܒ̣ܵܐ ܒܲܗܪܵܐ ܠܟܠܵܝ 16 ܐܵܢܝܼ ܕܒܒܲܝܬܵܐ ܝܢܵܐ. ܗܲܕܟ̣ܵܐ ܒܲܗ̄ܪܸܢ ܒܲܗܪܵܘܟ̣ܘܿܢ ܩܵܕ̄ܡ ܒܢܲܝ̈ܢܵܫܵܐ ܕܚܵܙܝܼ ܦܘܼܠܚܵܢܵܘ̈ܟ̣ܘܿܢ ܛܵܒܹ̈ܐ: ܘܫܵܒܚܝܼ ܠܒܵܒܵܘܟ̣ܘܿܢ ܕܒܫܡܲܝܵܐ.

17 ܠܵܐ ܚܵܫܒ̣ܝܼܬܘܿܢ ܕܐܬܹܠܝܼ ܕܫܵܪܸܢ ܢܵܡܘܿܣܵܐ ܝܲܢ ܢܒ̣̈ܝܹܐ ܠܵܐ 18 ܐܬܹܠܝܼ ܕܫܵܪܸܢ ܐܸܠܵܐ ܕܬܲܡܸܡܸܢ. ܣܵܒܵܒ ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܗܲܠ ܕܥܵܒ̣ܪܝܼ ܫܡܲܝܵܐ ܘܐܲܪܥܵܐ: ܚܕܵܐ ܝܘܿܕ ܝܲܢ ܚܵܕ̄ ܣܸܪܛܵܐ ܠܹܐ ܥܵܒܸܪ ܡ̣ܢ ܢܵܡܘܿܣܵܐ ܗܲܠ ܕܟܠ ܗܵܘܹܐ. 19 ܟܠ ܡ̇ܢ ܕܫܵܪܹܐ ܗܲܕܟ̣ܵܐ ܚܵܕ̄ ܡ̣ܢ ܕܐܲܢܹܐ ܦܘܼܩܕܵܢܹ̈ܐ ܒܘܼܫ ܙܥܘܿܪܹ̈ܐ: ܘܡܵܠܸܦ ܗܲܕܟ̣ܵܐ ܠܒܢܲܝ̈ܢܵܫܵܐ: ܒܘܼܫ ܙܥܘܿܪܵܐ ܒܸܬ ܦܵܝܸܫ ܩܸܪܝܵܐ ܒܡܲܠܟܘܼܬܵܐ ܕܫܡܲܝܵܐ: ܐܝܼܢܵܐ ܟܠ ܕܥܵܒܸܕ ܘܡܵܠܸܦ: ܐܵܗܵܐ ܓܘܼܪܵܐ ܒܸܬ ܦܵܝܸܫ ܩܸܪܝܵܐ ܒܡܲܠܟܘܼܬܵܐ 20 ܕܫܡܲܝܵܐ. ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܠܵܐ ܙܵܝܕܵܐ ܟܹܐܢܘܼܬܵܘܟ̣ܘܿܢ ܙܵܘܕܵܐ ܡ̣ܢ ܕܣܵܦܪܹ̈ܐ ܘܦܪ̈ܝܼܫܹܐ: ܠܹܐ ܐܲܘܪܝܼܬܘܿܢ ܠܡܲܠܟܘܼܬܵܐ ܕܫܡܲܝܵܐ.

21 ܫܡܸܥܠܵܘܟ̣ܘܿܢ ܕܦܸܫܠܹܗ ܐܡܝܼܪܵܐ ܠܩܵܕ̄ܡܵܝܹ̈ܐ: ܠܵܐ ܩܵܛܠܸܬ: 22 ܘܟܠ ܕܩܵܛܸܠ: ܓܘܼܢܵܗܟܵܪ ܝܼܠܹܗ ܠܕܝܼܘܵܢ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܟܠ ܡ̇ܢ ܕܟܵܪܸܒ̣ ܥܠ ܐܵܚܘܿܢܹܗ [8] ܕܠܵܐ ܗܲܓ̰ܲܬ: ܓܘܼܢܵܗܟܵܪ ܝܼܠܹܗ ܠܕܝܼܘܵܢ: ܘܟܠ ܕܐܵܡܸܪ ܠܐܵܚܘܿܢܹܗ: ܪܵܩܵܐ: ܓܘܼܢܵܗܟܵܪ ܝܼܠܹܗ ܠܟܸܢܫܵܐ ܕܪܵܐܝܝܼ: ܘܟܠ ܕܐܵܡܸܪ: ܐܲܗܡܲܩ: ܓܘܢܗܟܵܪ ܝܼܠܹܗ ܐܓܹܗܲܢܵܐ ܕܢܘܼܪܵܐ. 23 ܐܸܢ ܗܲܕܟ̣ܵܐ ܡܲܝܬ̄ܝܸܬ ܩܘܼܒܵܢܘܼܟ ܠܡܲܕܒܚܵܐ: ܘܬܵܡܵܐ ܕܵܟ̣ܪܸܬ 24 ܕܕܒ̣ܝܼܩܵܐ ܝܠܹܗ ܥܲܠܘܼܟ ܐܵܚܘܿܢܘܼܟ ܟܝܼܢ ܡܸܢܕܝܼ. ܫܒ̣ܘܿܩ ܬܵܡܵܐ ܩܘܼܒܵܢܘܼܟ [9] ܥܲܠ ܡܲܕܒܚܵܐ: ܘܙܹܠ̄ܐ ܩܵܕ̄ܡܵܝܬܵܐ ܦܘܼܫ ܣܘܼܙܓܸܪܵܐ ܥܲܡ ܐܵܚܘܿܢܘܼܟ: ܘܗ̇ܝܓܵܗ ܬܵܐ ܡܲܩܪܸܒ̣ ܩܘܼܪܒܵܢܘܼܟ. 25 ܗܵܘܸܬ ܣܲܙܓܘܼܪܹܐ ܥܲܡ ܡܘܼܕܲܥܝܼܘܼܟ ܓ̰ܲܠܕܹܐ: ܗܹܫ ܥܲܡܹܗ ܝܘܸܬ ܒܐܘܼܪܚܵܐ: ܕܡܘܼܪܸܥܝܼܘܼܟ ܠܵܐ ܣܵܦܹܐ ܠܘܼܟ ܠܪܸܝܵܢܵܐ: ܘܪܸܝܵܢܵܐ ܣܵܦܹܐ ܠܘܼܟ ܠܦܲܪܵܫ: ܘܦܵܝܫܸܬ ܕܪܸܝܐ ܓܵܐ ܒܹܝܬ ܐܲܣܝܼܪܹ̈ܐ. 26 ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܘܼܟ: ܕܠܹܐ ܦܵܠܛܸܬ ܡ̣ܢ ܬܵܡܵܐ: ܗܲܠ ܕܝܵܗ̄ܒܸܬ ܫܵܗܝܼ ܐܚܵܪܵܝܵܐ. 27 ܫܡܸܥܠܵܘܟ̣ܘܿܢ ܕܦܸܫܠܸܐ ܐܡܝܼܪܵܐ ܠܩܵܕ̄ܡܵܝܹ̈ܐ ܠܵܐ ܥܵܒ̣ܕܸܬ 28 ܩܲܗܒܘܼܬܵܐ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܟܠ ܡ̇ܢ ܕܚܵܙܹܐ ܒܲܟ̣ܬܵܐ ܐܲܝܟ ܕܫܲܗ̄ܘܸܬ ܐܸܠܵܗ̇: ܒܗ̇ܝ ܣܵܥܲܬ ܥܒܸܕܠܹܗ 29 ܩܲܗܒܘܼܬܵܐ ܥܲܡܵܗ̇ ܒܠܸܒܹܗ. ܘܐܸܢ ܥܲܝܢܘܼܟ ܕܝܲܡܝܼܢܵܐ ܡܲܟܦܸܪܵܐ ܠܘܼܟ: ܚܪܘܿܛ ܠܵܗ̇ ܘܪܲܦܝܼ ܠܵܗ̇ ܡܸܢܘܼܟ: ܣܵܒܵܒ ܕܨܦܵܝܝܼ ܝܠܵܐ ܐܸܠܘܼܟ ܕܬܵܠܸܩ ܚܵܕ̄ ܡ̣ܢ ܗܲܕܵܡܘܼ̈ܟ: ܘܟܠܹܗ ܦܲܓ̣ܪܘܼܟ ܠܵܐ 30 ܦܵܝܸܫ ܕܸܪܝܵܐ ܒܓܹܗܲܢܵܐ. ܘܐܸܢ ܐܝܼܕܘܼܟ ܕܝܲܡܝܼܢܵܐ ܡܲܟܦܸܪܵܐ ܠܘܼܟ: ܦܪܘܿܡ ܪܲܦܝܼ ܠܵܗ̇ ܡܸܢܘܼܟ: ܣܵܒܵܒ ܕܨܦܵܝܝܼ ܝܠܵܐ ܐܸܠܘܼܟ ܕܬܵܠܸܩ ܚܵܕ̄ ܡ̣ܢ ܗܲܕܵܡܘܼ̈ܟ: ܘܟܠܹܗ ܦܲܓ̣ܪܘܼܟ ܠܵܐ ܦܵܝܸܫ 31 ܕܸܪܝܵܐ ܒܓ݂ܗܲܢܵܐ. ܦܸܫܠܹܗ ܐܡܝܼܪܵܐ: ܡ̇ܢ ܕܪܲܦܹܐ ܒܲܟ̣ܬܹܗ: 32 ܝܵܗ̄ܒܸܠ ܠܵܗ̇ ܟܬܵܒ̣ܵܐ ܕܕܘܼܠܠܵܐ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܡ̇ܢ ܕܪܲܦܹܐ ܒܲܟ̣ܬܹܗ: ܫܒ̣ܘܿܩ ܡ̣ܢ ܒܗܲܓ̰ܲܬ ܕܙܵܢܝܘܼܬܵܐ: ܒܸܥܒ̣ܵܕܘܼܗ̇ ܝܠܹܗ ܕܥܵܒ̣ܕܵܐ ܩܲܗܒܘܼܬܵܐ: ܘܡ̇ܢ ܕܫܵܩܸܠ ܫܒ̣ܝܼܩܬܵܐ: ܒܸܥܒ̣ܵܕܵܐ ܝܠܹܗ ܩܲܗܒܘܼܬܵܐ.

33 ܡܸܕܪܹܐ ܫܡܸܥܠܵܘܟ̣ܘܿܢ ܕܦܸܫܠܹܗ ܐܡܝܼܪܵܐ ܠܩܵܕ̄ܡܵܝܹ̈ܐ: ܠܵܐ ܕܵܓܠܸܬ ܒܡܵܘܡܵܬܘܼ̈ܟ: ܐܝܼܢܵܐ ܬܲܡܸܡܸܬ ܠܡܵܪܝܵܐ ܡܵܘܡܵܬܘܼ̈ܟ. 34 ܐܝܼܢܵܐ ܐܵܢܵܐ ܒܹܐܡܵܪܐ ܝܘܸܢ ܐܸܠܵܘܟ̣ܘܿܢ: ܠܵܐ ܝܵܡܝܼܬܘܿܢ ܗܸܟ̰: ܠܵܐ 35 ܒܫܡܲܝܵܐ: ܣܵܒܵܒ ܕܟܘܼܪܣܝܵܐ ܕܐܲܠܵܗܵܐ ܝܠܹܗ. ܘܠܵܐ ܒܐܲܪܥܵܐ: ܕܟܘܼܒ̣ܫܵܐ ܝܠܵܐ ܬܚܘܿܬ ܐܲܩܠܘܼ̈ܗܝ: ܐܘܼܦܠܵܐ ܒܐܘܿܪܸܫܠܸܡ: 36 ܣܵܒܵܒ ܡܕܝܼܢ̄ܬܹܗ ܕܡܲܠܟܵܐ ܓܘܼܪܵܐ ܝܠܵܐ. ܐܘܦ ܒܪܹܫܘܼܟ ܠܵܐ ܝܵܡܸܬ: ܣܵܒܵܒ ܕܠܹܐ ܡܵܨܸܬ ܠܸܥܒ̣ܵܕܵܐ ܚܕܵܐ ܡܸܙܬܵܐ ܟܘܼܡܬܵܐ 37 ܝܲܢ ܚܘܵܪܬܵܐ. ܐܸܠܵܐ ܗܹܡܸܙܡܵܢܵܘܟ̣ܘܿܢ ܗܵܘܝܵܐ: ܗܹܐ ܗܹܐ: ܘܠܵܐ ܠܵܐ ܡܸܢܕܝܼ ܕܡ̣ܢ ܕܐܲܢܹܐ ܙܵܘܕܵܐ: ܡ̣ܢ ܒܝܼܫܵܐ ܝܠܹܗ.

38 ܫܡܸܥܠܵܘܟ̣ܘܿܢ ܕܦܸܫܠܹܗ ܐܡܝܼܪܵܐ: ܥܲܝܢܵܐ ܡܒܵܕܵܠ ܕܥܲܝܢܵܐ: 39 ܘܟܹܟܵܐ ܡܒܵܕܵܠ ܕܟܹܟܵܐ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܵܐ ܩܵܝܡܝܼܬܘܿܢ ܕܲܪܩܘܼܒ̣ܠ ܕܒܝܼܫܵܐ: ܐܸܠܵܐ ܡ̇ܢ ܕܡܵܚܹܐ ܠܘܼܟ ܥܲܠ ܦܵܬܘܼܟ ܕܝܲܡܝܼܢܵܐ: ܡܲܕܸܪ ܐܸܠܹܗ ܐܘܼܦ ܗ̇ܝ ܐܚܹܪ̄ܬܵܐ. 40 ܘܡ̇ܢ ܕܒܲܥܝܹܐ ܥܵܒܸܕ ܕܝܼܘܵܢ ܥܲܡܘܼܟ ܘܫܵܩܸܠ ܨܘܼܕܪܘܼܟ: ܫܒ̣ܘܿܩ 41 ܐܸܠܹܗ ܐܘܼܦ ܥܵܒܵܝܘܼܟ. ܘܡ̇ܢ ܕܥܵܒܸܕ ܫܘܼܚܪܵܐ ܐܸܠܘܼܟ ܚܵܕ̄ 42 ܡܝܼܠܵܐ: ܙܹܠ̄ܐ ܥܲܡܹܗ ܬܪܲܝ. ܡ̇ܢ ܕܛܵܠܸܒ ܡܸܢܘܼܟ ܗܲܒ̄ܠ ܠܹܗ: ܘܡ̇ܢ ܕܒܲܥܝܹܐ ܫܵܩܸܠ ܕܵܝܢܵܐ ܡܸܢܘܼܟ ܠܵܐ ܡܲܟܠܸܬ ܠܹܗ. 43 ܫܡܸܥܠܵܘܟ̣ܘܿܢ ܕܦܸܫܠܹܗ ܐܡܝܼܪܵܐ: ܡܲܚܸܒ ܠܫܒ̣ܵܒ̣ܘܼܟ: ܘܣܢܝܼ 44 ܠܕܸܫܡܸܢܘܼܟ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܡܲܚܸܒܘܿܢ ܠܕܸܫܡܸܢܵܘ̈ܟ̣ܘܿܢ: [10] ܘܒܵܪܟ̣ܘܿܢ ܠܐܵܢܝܼ ܕܠܵܝܛܝܼ ܠܵܘܟ̣ܘܿܢ: ܘܥܒ̣ܘܿܕܘܿܢ ܨܦܵܝܘܼܬܵܐ ܠܐܵܢܝܼ ܕܣܵܢܝܼ ܠܵܘܟ̣ܘܿܢ: ܘܨܵܠܹܡܘܿܢ ܥܲܠ ܕܐܵܢܝܼ ܕ [11] ܥܵܒ̣ܕܝܼ ܣܪܝܼܬܐ ܒܝܼܵܘܟ̣ܘܿܢ ܘܛܵܪܕܝܼ ܠܵܘܟ̣ܘܿܢ. 45 ܕܗܵܘܝܼܬܘܿܢ ܒܢܘܼܢܹ̈ܐ ܕܒܵܒܵܘܟ̣ܘܿܢ ܕܒܫܡܲܝܵܐ: ܗ̇ܘ ܕܡܲܙܪܸܩ ܫܸܡܫܹܗ ܥܲܠ ܛܵܒܹ̈ܐ ܘܥܲܠ ܒܝܼܫܹ̈ܐ: ܘܡܲܨܠܹܐ ܡܸܛܪܵܐ ܥܲܠ ܟܹܐܢܹ̈ܐ ܘܥܲܠ 46 ܥܵܘܠܹ̈ܐ. ܣܵܒܵܒ ܐܸܢ ܡܲܚܸܒܝܼܬܘܿܢ ܠܐܵܢܝܼ ܕܡܲܚܸܒܝܼ ܠܵܘܟ̣ܘܿܢ: ܡܘܼܕܝܼ ܗܵܩܵܐ ܐܝܼܬ ܠܵܘܟ̣ܘܿܢ: ܐܘܼܦ ܕܲܡ̈ܓ̣ܵܟ̰ܝܹܐ ܐܵܗܵܐ ܠܹܐ 47 ܥܵܒ̣ܕܝܼ. ܘܐܸܢ ܕܵܪܝܼܬܘܿܢ ܫܠܵܡܵܐ ܠܐܵܚܘܿܢܘܵܬܵܘ̈ܟ̣ܘܿܢ  ܐܲܚܟ̰ܝܼ: ܡܘܼܕܝܼ ܙܵܘܕܵܐ ܒܸܥܒ̣ܵܕܵܐ ܝܬܘܿܢ: ܗܵܐ ܐܘܼܦ ܛܵܝܸܦܹ̈ܐ ܐܗܵܐ ܠܹܐ 48 ܥܵܒ̣ܕܝܼ. ܗ̄ܘܹܡܘܿܢ ܗܲܕܟ̣ܵܐ ܐܲܚܬܘܿܢ ܟܵܡܝܼܠܹܐ: ܕܵܐܟ̣ܝܼ ܕܒܒܵܘܟ̣ܘܿܢ ܕܒܫܡܲܝܵܐ ܟܵܡܝܼܠ ܝܼܠܹܐ.

ܩܦܠܐܘܢ: ܘ

1 ܚܘܼܪܘܿܢ [12] ܒܙܲܕܝܼܩܘܼܬܵܘܟ̣ܘܿܢ: ܕܠܵܐ ܥܵܒ̣ܕܝܼܬܘܿܢ ܠܵܗ̇ ܩܵܕ̄ܡ ܒܢܲܝ̈ܢܵܫܵܐ: ܐܲܝܟ ܕܦܵܝܫܝܼܬܘܿܢ ܚܸܙܝܹܐ ܐܸܠܵܝ: ܘܐܸܢ ܠܵܐ: ܠܲܝܬ ܠܵܘܟ̣ܘܿܢ ܗܵܩܵܐ ܠܟܸܣ ܒܵܒܵܘܟ̣ܘܿܢ ܕܒܫܡܲܝܵܐ. 2 ܐܝܼܡܲܢ ܗܲܕܟ̣ܵܐ ܕܥܵܒ̣ܕܸܬ ܐܸܪܘܵܢܵܐ: ܠܵܐ ܩܵܪܸܬ ܩܵܪ̄ܢܵܐ ܩܵܕ̄ܡܘܼܟ: ܐܲܝܟ ܕܥܵܒ̣ܕܝܼ ܢܵܣܒܲܝ̈ ܒܐܲܦܹ̈ܐ ܒܟܢܘܼܫܝܵܬܹ̈ܐ ܘܒܥܵܠܘܿܠܹ̈ܐ: ܕܦܵܝܫܝܼ ܚܩܝܼܪܹܐ ܡ̣ܢ ܒܢܲܝ̈ܢܵܫܵܐ. ܬܪܘܼܨܵܐ ܒܹܐܡܵܪܵܐ 3 ܝܘܸܢ ܐܸܠܵܘܟ̣ܘܿܢ ܕܩܘܼܒܸܠܘܿܢ ܗܵܩܝ. ܐܝܼܢܵܐ ܐܲܢ̄ܬ: ܐܝܼܡܲܢ ܕܥܵܒ̣ܕܸܬ ܐܸܪܘܵܢܵܐ: ܠܵܐ ܝܲܕܥܵܐ ܣܸܡܵܠܘܼܟ ܡܘܼܕܝܼ ܒܸܥܒ̣ܵܕܵܐ ܝܠܵܐ 4 ܝܲܡܝܼܢܘܼܟ. ܕܗܵܘܹܐ ܐܸܪܘܵܢܘܼܟ ܒܛܸܫܘܵܐ: ܘܒܵܒܘܼܟ ܕܚܵܙܹܐ ܒܛܸܫܘܵܐ: ܗ̇ܘ ܒܸܬ ܦܲܪܸܥ ܠܘܼܟ.

5 ܘܐܝܼܡܲܢ ܕܨܵܠܸܬ ܨܠܘܿܬܵܐ: ܠܵܐ ܗܵܘܸܬ ܐܲܝܟ ܢܵܣܒܲܝ̈ ܒܐܲܦܹ̈ܐ: ܕܡܲܚܸܒܝܼ ܠܸܟܠܵܝܵܐ ܒܟܢܘܼܫܝܵܬܹ̈ܐ ܘܒܩܘܼܢܓ̰ܝܼܵܬܹ̈ܐ ܕܥܵܠܘܿܠܹ̈ܐ ܠܨܵܠܘܿܝܹܐ: ܕܦܵܝܫܝܼ ܚܸܙܝܹܐ ܠܒܢܲܝ̈ܢܵܫܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ 6 ܐܸܠܵܘܟ̣ܘܿܢ ܕܩܘܼܒܸܠܘܿܢ ܗܵܩܵܝ. ܐܝܼܢܵܐ ܐܲܢ̄ܬ: ܐܝܼܡܲܢ ܕܨܵܠܸܬ: ܐܘܘܿܪ ܠܟܘܼܚܬܘܼܟ ܘܥܟ̰ܘܿܡ ܬܲܪܥܘܼܟ: ܘܨܵܠܝܼ ܠܒܵܒܘܼܟ ܕܒܛܸܫܘܵܐ: ܘܒܵܒܘܼܟ ܕܚܵܙܹܐ ܒܛܸܫܘܵܐ ܒܸܬ ܦܲܪܸܥ ܠܘܼܟ. 7 ܘܐܝܼܡܲܢ ܕܨܵܠܝܼܬܘܿܢ: ܠܵܐ ܗܵܘܝܼܬܘܿܢ ܒܸܬܢܵܝܵܐ ܗܹܡܸܙܡܵܢ ܐܲܝܟ ܛܝܸܦܹ̈ܐ: ܣܵܒܵܒ ܕܟܹܐ ܚܵܫܒ̣ܝܼ ܕܒܗܲܡܙܲܡܬܐܵ ܪܵܒܵܐ ܦܵܝܫܝܼ 8 ܫܸܡܥܝܹܐ. ܗܲܕܟ̣ܵܐ ܠܵܐ ܕܵܡܝܼܬܘܿܢ ܐܸܠܝܼ: ܣܵܒܵܒ ܒܵܒܵܘܟ̣ܘܿܢ ܟܹܐ ܝܲܕܸܥ ܡܘܼܕܝܼ ܠܵܙܸܡ ܝܼܠܹܐ ܐܸܠܵܘܟ̣ܘܿܢ: ܗܹܫ ܠܵܐ ܛܵܠܒܝܼܬܘܿܢ 9 ܡܸܢܹܗ. ܒܲܣ ܗܲܕܟ̣ܵܐ ܨܵܠܹܡܘܿܢ ܐܲܚܬܘܿܢ: ܒܵܒܲܢ ܕܒܫܡܲܝܵܐ: 10 ܦܵܝܸܫ ܡܩܘܼܕܫܵܐ ܫܸܡܘܼܟ. ܐܵܬܝܵܐ ܡܲܠܟܘܼܬܘܼܟ. ܗܵܘܹܐ 11 ܪܹܙܵܝܘܼܟ: ܕܵܐܟ̣ܝܼ ܕܒܫܡܲܝܵܐ ܐܘܼܦ ܒܐܲܪܥܵܐ. ܗܲܒ̄ܠ ܠܲܢ ܠܲܚܡܵܐ 12 ܕܣܘܼܢܩܵܢܲܢ ܐܸܕܝܘܼ ܝܘܿܡܵܐ. ܘܫܒ̣ܘܿܩ ܠܲܢ ܚܵܘܒܲܝ̈ܢ: ܕܵܐܟ̣ܝܼ 13 ܕܐܘܼܦ ܐܲܚܢܲܢ ܫܒܸܩܠܲܢ ܠܕܵܝܢܵܢܕܵܪܲܢ. ܘܠܵܐ ܡܲܐܘܸܪܸܬ ܠܲܢ ܠܓ̰ܘܼܪܵܒܵܐ: ܐܸܠܵܐ ܦܵܨܝܼ ܠܲܢ ܡ̣ܢ ܒܝܼܫܵܐ. [13] ܣܵܒܵܒ ܕܝܼܘܼܟ ܝܼܠܵܐ ܡܲܠܟܘܼܬܵܐ: ܘܚܲܝܠܵܐ: ܘܬܸܫܒܘܿܚܬܵܐ: ܠܥܵܠܲܡ ܥܵܠܡܝܼܢ: 14 ܐܵܡܹܝܢ. ܣܵܒܵܒ ܕܐܸܢ ܫܵܒ̣ܩܝܼܬܘܿܢ ܠܒܢܲܝ̈ܢܵܫܵܐ ܓܢܵܗܵܝ̈: ܐܘܼܦ 15 ܒܵܒܵܘܟ̣ܘܿܢ ܕܒܫܡܲܝܵܐ ܒܸܬ ܫܵܒܸܩ ܠܵܘܟ̣ܘܿܢ. ܐܝܼܢܵܐ ܐܸܢ ܠܵܐ ܫܵܒ̣ܩܝܼܬܘܿܢ ܠܒܢܲܝ̈ܢܵܫܵܐ ܓܢܵܗܵܝ̈: ܐܘܼܦ ܒܵܒܵܘܟ̣ܘܿܢ ܠܹܐ ܫܵܒܸܩ ܠܵܘܟ̣ܘܿܢ ܓܢܵܗܵܘ̈ܟ̣ܘܿܢ.

16 ܘܐܝܼܡܲܢ ܕܨܵܝܡܝܼܬܘܿܢ: ܠܵܐ ܗܵܘܝܼܬܘܿܢ ܦܫܝܼܡܹ̈ܐ ܐܲܝܟ ܢܵܣܒܲܝ̈ ܒܐܲܦܹ̈ܐ: ܣܵܒܵܒ ܕܟܹܐ ܡܲܣܪܝܼ ܚܘܼܠܩܵܝ: ܕܦܵܝܫܝܼ ܚܸܙܝܹܐ ܠܒܢܲܝ̈ܢܵܫܵܐ ܕܒܸܨܝܵܡܵܐ ܝܢܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ 17 ܕܩܘܼܒܸܠܘܿܢ ܗܵܩܵܝ. ܐܝܼܢܵܐ ܐܲܢ̄ܬ: ܐܝܼܡܲܢ ܕܨܵܝܡܸܬ: ܚܲܠܸܠ 18 ܦܵܬܘܼܟ ܘܡܫܘܿܚ ܪܹܫܘܼܟ. ܕܠܵܐ ܦܵܝܫܸܬ ܚܸܙܝܵܐ ܠܒܢܲܝ̈ܢܵܫܵܐ ܕܒܸܨܝܵܡܵܐ ܝܘܸܬ: ܐܸܠܵܐ ܠܒܵܒܘܼܟ ܕܒܛܸܫܘܵܐ: ܘܒܵܒܘܼܟ ܕܚܵܙܹܐ ܒܛܸܫܘܵܐ: ܗ̇ܘ ܒܸܬ ܦܲܪܸܥ ܠܘܼܟ.

19 ܠܵܐ ܡܲܬܒ̣ܝܼܬܘܿܢ ܠܵܘܟ̣ܘܿܢ ܚܲܙܝܼܢܹ̈ܐ ܒܐܲܪܥܵܐ: ܐܲܝܟܵܐ ܕܓ̰ܲܢܓ ܘܐܸܟ̣ܠܵܐ ܡܲܚܪܸܒ̣ܝܼ: ܘܐܲܝܟܵܐ ܕܓܹܢܵܒܹ̈ܐ ܒܲܙܥܝܼ ܘܓܵܢܒ̣ܝܼ. 20 ܐܸܠܵܐ ܡܲܬܒ̣ܘܿܢ ܠܵܘܟ̣ܘܿܢ ܚܲܙܝܼܢܹ̈ܐ ܒܫܡܲܝܵܐ: ܐܲܝܟܵܐ ܕܠܵܐ ܠܲܢܓ ܘܠܵܐ ܐܸܟ̣ܠܵܐ ܡܲܚܪܸܒ̣ܝܼ: ܘܐܲܝܟܵܐ ܕܓܹܢܵܒܹ̈ܐ ܠܹܐ ܒܲܙܥܝܼ ܘܠܹܐ 21 ܓܵܢܒ̣ܝܼ. ܣܵܒܵܒ ܐܲܝܟܵܐ ܕܝܼܠܵܐ ܚܲܙܝܼܢܵܘܟ̣ܘܿܢ: ܬܵܡܵܐ ܒܸܬ ܗܵܘܹܐ 22 ܐܘܼܦ ܠܸܒܵܘܟ̣ܘܿܢ. ܫܪܵܝܵܐ ܕܦܲܓ̣ܪܵܐ ܥܲܝܢܵܐ ܝܠܵܐ: ܐܸܢ ܥܲܝܢܘܼܟ ܗܲܕܟ̣ܵܐ ܗܵܘܝܵܐ ܦܫܝܼܛܬܵܐ: ܐܘܼܦ ܟܠܹܗ ܦܲܓ̣ܪܘܼܟ ܒܲܗܪܵܢܵܐ ܝܠܹܐ. 23 ܐܝܼܢܵܐ ܐܸܢ ܥܲܝܢܘܼܟ ܗܵܘܝܵܐ ܒܝܼܫܬܵܐ: ܟܠܹܗ ܦܲܓ̣ܪܘܼܟ ܚܘܼܒ̣ܝܵܢܵܐ ܒܸܬ ܗܵܘܹܐ. ܐܸܢ ܗܲܕܟ̣ܵܐ ܒܲܗܪܵܐ ܕܒܝܘܼܟ. ܚܘܼܒ̣ܝܵܐ ܝܠܹܐ: ܚܘܼܒ̣ܝܘܼܟ ܟܡܵܐ ܒܸܬ ܗܵܘܹܐ. 24 ܐܢܵܫܵܐ ܠܹܐ ܡܵܨܹܐ ܠܸܦܠܵܚܵܐ ܠܬܪܲܝ ܡܵܪ̈ܵܘܵܬܹܐ: ܣܵܒܵܒ ܝܲܢ ܠܚܵܕ̄ ܒܸܬ ܣܵܢܹܐ: ܘܠܗ̇ܘ ܐܚܹܪ̄ܢܵܐ ܒܸܬ ܡܲܚܸܒ: ܝܲܢ ܠܚܵܕ̄ ܒܸܬ ܡܝܵܩܸܪ: ܘܠܗ̇ܘ ܐܚܹܕ̄ܢܵܐ ܒܸܬ ܡܲܣܠܹܐ. ܠܹܐ ܡܵܨܝܼܬܘܿܢ ܠܸܦܠܵܚܵܐ 25 ܠܐܲܠܵܗܵܐ ܘܠܡܵܡܘܿܢܵܐ. ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܼܢ ܐܸܠܵܘܟ̣ܘܿܢ: ܠܵܐ ܐܵܟ̣ܠܝܼܬܘܿܢ ܚܲܡ ܠܓܵܢܵܘܟ̣ܘܿܢ: ܡܘܼܕܝܼ ܐܵܟ̣ܠܝܼܬܘܿܢ ܘܡܘܼܕܝܼ ܫܵܬܝܼܬܘܿܢ: ܘܠܵܐ ܠܦܲܓ̣ܪܵܘܟ̣ܘܿܢ: ܡܘܼܕܝܼ ܠܵܒ̣ܫܝܼܬܘܿܢ. ܠܹܐ ܝܠܵܐ ܓܵܢܵܐ ܙܵܘܕܵܐ ܡ̣ܢ ܡܹܐܟ̣ܘܼܠܬܵܐ: ܘܦܲܓ̣ܪܵܐ ܡ̣ܢ ܠܒܸܫܬܵܐ. 26 ܚܘܼܪܘܼܢ ܒܛܲܝܪܹ̈ܐ ܕܫܡܲܝܵܐ: ܕܠܹܐ ܙܲܪܥܝܼ ܘܠܹܐ ܚܵܨܕܝܼ: ܘܠܹܐ ܓ̰ܲܡܥܝܼ ܒܐܲܢܒܵܪܹ̈ܐ: ܘܒܵܒܵܘܟ̣ܘܿܢ ܕܒܫܡܲܝܵܐ ܟܹܐ ܬܲܪܣܹܐ ܠܗ̄ܘܿܢ. 27 ܠܹܐ ܝܬܘܿܢ ܐܲܚܬܘܿܢ ܙܵܘܕܵܐ ܡܸܢܵܝ. ܐܝܼܢܵܐ ܡܵܢܝܼ ܡܸܢܵܘܟ̣ܘܿܢ ܟܲܕ ܐܵܟܸܠ ܚܲܡ: ܡܵܨܹܐ ܠܡܲܙܝܘܼܕܹܐ ܥܲܠ ܩܘܼܡܬܹܗ ܚܕܵܐ ܝܲܡܝܼܢܵܐ.  28 ܘܥܲܠ ܠܒܸܫܬܵܐ ܩܵܡܘܿܕܝܼ ܚܲܡ ܒܹܐܟ̣ܵܠܵܐ ܝܬܘܿܢ: ܚܘܼܪܘܼܢ ܒܫܘܼܫܲܢܹ̈ܐ ܕܕܸܫܬܵܐ: ܕܵܐܟ̣ܝܼ ܟܹܐ ܓܲܪܘܸܣܝܼ: ܕܠܹܐ ܓ̰ܲܗ̄ܝܝܼ ܘܠܹܐ 29 ܥܵܙܠܝܼ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܘܼܦ ܫܠܹܝܡܘܿܢ 30 ܒܟܠܹܗ ܚܸܩܪܹܗ ܠܹܐ ܗ̄ܘܵܐ ܠܒ̣ܝܼܫܵܐ ܐܲܝܟ ܚܵܕ̄ ܡܸܢܵܝ. ܐܝܼܢܵܐ ܐܸܢ ܠܓܸܠܵܐ ܕܚܲܩܠܵܐ ܕܐܸܕܝܘܼ ܝܠܹܐ: ܘܩܵܝܕܲܡܬܵܐ ܟܹܐ ܦܵܝܸܫ ܕܸܪܝܵܐ ܒܬܵܢܘܿܪܵܐ: ܐܲܠܵܗܵܐ ܗܲܕܟ̣ܵܐ ܟܹܐ ܡܲܠܒܸܫ: ܠܵܐ ܒܘܼܫ ܙܵܘܕܵܐ 31 ܐܸܠܵܘܟ̣ܘܿܢ: ܝܵܐ ܟܝܼܡ ܗܲܝܡܵܢܘܼܬܵܐ. ܒܲܣ ܠܵܐ ܐܵܟ̣ܠܝܼܬܘܿܢ ܚܲܡ: ܝܢ ܐܵܡܪܝܼܬܘܿܢ: ܡܘܼܕܝܼ ܐܵܟ̣ܠܵܚ: ܝܲܢ ܡܘܼܕܝܼ ܫܵܬܵܚ: ܝܲܢ 32 ܡܘܼܕܝܼ ܠܵܒ̣ܫܵܚ. ܣܵܒܵܒ ܐܲܢܹܐ ܟܠܵܝ ܛܵܝܸܦܹ̈ܐ ܟܹܐ ܒܲܥܝܝܼ ܠܗ̄ܘܿܢ: ܐܝܼܢܵܐ ܒܵܒܵܘܟ̣ܘܿܢ ܕܒܫܡܲܝܵܐ ܟܹܐ ܝܲܕܸܥ ܕܐܸܠܵܘܟ̣ܘܿܢ 33 ܠܵܙܸܡ ܝܼܢܵܐ ܐܲܢܹܐ ܟܠܵܝ. ܐܝܼܢܵܐ ܒܸܥܡܘܿܢ ܩܵܕ̄ܡܵܝܬܵܐ ܡܲܠܟܘܼܬܹܗ ܕܐܲܠܵܗܵܐ ܘܙܲܕܝܼܩܘܼܬܹܗ: ܘܟܠܵܝ ܐܲܢܹܐ ܒܸܬ ܦܵܝܫܝܼ ܡܘܼܙܝܸܕܹܐ 34 ܐܸܠܵܘܟ̣ܘܿܢ. ܒܲܣ ܠܵܐ ܐܵܟ̣ܠܝܼܬܘܿܢ ܚܲܡ ܕܩܵܝܕܲܡܬܵܐ: ܣܵܒܵܒ ܕܗ̇ܝ ܩܵܝܕܲܡܬܵܐ ܒܸܬ ܐܵܟ̣ܠܵܐ ܚܲܡ ܕܓܵܢܘܼܗ̇. ܟܹܐ ܡܵܠܝܵܐ ܠܹܗ ܠܝܘܿܡܵܐ ܒܝܼܫܬܹܗ.

ܩܦܠܐܘܢ: ܙ

1 ܠܵܐ ܕܵܝܢܝܼܬܘܿܢ: ܕܠܵܐ ܦܵܝܫܝܼܬܘܿܢ ܕܝܼܢܹܐ. ܣܵܒܵܒ ܕܒܕܝܼܘܵܢ 2 ܕܕܵܝܢܝܼܬܘܿܢ: ܒܸܬ ܦܵܝܫܝܼܬܘܿܢ ܕܝܼܢܹܐ: ܘܒܟܝܵܠܬܵܐ ܕܟܵܠܝܼܬܘܿܢ: 3 ܒܸܬ ܦܵܝܸܫ ܟܝܼܠܵܐ ܐܸܠܵܘܟ̣ܘܿܢ. ܘܩܵܡܘܿܕܝܼ ܒܸܚܙܵܝܵܐ ܝܘܸܬ ܓܸܠܵܐ ܕܒܥܲܝܢܹܗ ܕܐܵܚܘܿܢܘܼܟ: ܘܠܩܵܪܝܼܬܵܐ ܕܒܥܲܝܢܵܐ ܕܓܵܢܘܼܟ ܠܹܐ ܝܘܸܬ 4 ܒܵܚܘܿܪܹܐ. ܝܲܢ ܕܵܐܟ̣ܝܼ ܒܹܐܡܵܪܵܐ ܝܘܸܬ ܠܐܵܚܘܿܢܘܼܟ: ܫܒ̣ܘܿܩ ܦܵܠܛܸܢ ܓܸܠܵܐ ܡ̣ܢ ܥܲܝܢܘܼܟ: ܘܗܵܐ ܩܵܪܝܼܬܵܐ ܒܥܲܝܢܵܐ ܕܓܵܢܘܼܟ. 5 ܢܵܣܸܒ̣ ܒܐܲܦܹ̈ܐ: ܦܵܠܸܛ ܩܵܕ̄ܡܵܝܬܵܐ ܩܵܪܝܼܬܵܐ ܡ̣ܢ ܥܲܝܢܵܐ ܕܓܵܢܘܼܟ: ܘܗ̇ܝܓܵܗ̇ ܨܸܦܝܵܐ ܒܸܬ ܚܵܙܸܬ ܠܦܵܠܘܿܛܹܐ ܛܸܠܵܐ ܡ̣ܢ ܥܲܝܢܹܗ ܕܐܵܚܘܿܢܘܼܟ.

6 ܠܵܐ ܝܵܗ̄ܒ̣ܝܼܬܘܿܢ ܩܘܼܕܫܵܐ ܠܟܲܠܒܹ̈ܐ: ܘܠܵܐ ܕܵܪܝܼܬܘܿܢ ܡܲܪ̈ܓܵܢܝܵܬܵܘܟ̣ܘܿܢ ܩܵܕ̄ܡ ܚܙܘܼܪܹ̈ܐ: ܕܠܵܐ ܕܵܝܫܝܼ ܠܗ̄ܘܿܢ ܒܐܲܩܠܵܝ̈: ܘܕܵܝܪܝܼ ܘܟ̰ܲܢܟ̰ܸܪܝܼ ܠܵܘܟ̣ܘܿܢ.

7 ܛܠܘܼܒܘܿܢ: ܘܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܵܘܟ̣ܘܿܢ: ܒܸܥܡܘܿܢ: ܘܒܸܬ ܡܵܫ̄ܟ̰ܚܝܼܬܘܿܢ: ܬܲܩܬܸܩܘܿܢ: ܘܒܸܬ ܦܵܝܸܫ ܦܬܝܼܚܵܐ 8 ܐܸܠܵܘܟ̣ܘܿܢ. ܣܵܒܵܒ ܟܠ ܕܛܵܠܸܒ: ܟܹܐ ܫܵܩܸܠ: ܘܗ̇ܘ ܕܒܲܥܝܹܐ ܟܹܐ ܡܵܫ̄ܟ̰ܸܚ: ܘܠܲܐܝܢܝܼ ܕܬܲܩܬܸܩ: ܟܹܐ ܦܵܝܸܫ ܦܬܝܼܚܐ 9 ܐܸܠܹܗ. ܝܲܢ ܡܵܢܝܼ ܝܠܹܐ ܡܸܢܵܘܟ̣ܘܿܢ ܐܢܵܫܵܐ ܕܛܵܠܸܒ ܡܸܢܹܗ 10 ܒܪܘܼܢܹܗ ܠܲܚܡܵܐ: ܟܹܐܦܵܐ ܦܵܫܸܛ ܠܹܗ. ܘܐܸܢ ܢܘܼܢܵܐ ܛܵܠܸܒ 11 ܡܸܢܹܗ: ܚܘܼܘܹܐ ܦܵܫܸܛ ܠܹܗ. ܒܲܣ ܐܸܢ ܐܲܚܬܘܿܢ ܕܝܼܬܘܿܢ ܒܝܼܫܹ̈ܐ: ܟܹܐ ܝܲܕܥܝܼܬܘܿܢ ܚܲܠܥܲܬܹ̈ܐ ܛܵܒܹ̈ܐ ܠܝܼܵܗ̄ܒ̣ܵܐ ܠܒܢܘܼܢܵܘ̈ܟ̣ܘܿܢ: ܟܡܵܐ ܙܵܘܕܵܐ ܒܵܒܵܘܟ̣ܘܿܢ ܕܒܫܡܲܝܵܐ ܒܸܬ ܝܵܗ̄ܒܸܠ ܛܵܒ̣ܵܬܹ̈ܐ ܠܐܵܢܝܼ 12 ܕܛܵܠܒܝܼ ܡܸܢܹܗ. ܟܠ ܡܸܢܕܝܼ ܕܒܵܣܡܵܐ ܠܵܘܟ̣ܘܿܢ ܕܥܵܒ̣ܕܝܼ ܐܸܠܵܘܟ̣ܘܿܢ ܒܢܲܝ̈ܢܵܫܵܐ: ܗܲܕܟ̣ܵܐ ܐܘܼܦ ܐܲܚܬܘܿܢ ܥܒ̣ܘܿܕܘܿܢ ܐܸܠܵܝ: ܣܵܒܵܒ ܐܵܗܵܐ ܝܠܹܐ ܢܵܡܘܿܣܵܐ ܘܢܒ̣̈ܝܹܐ.

13 ܐܘܘܿܪܘܿܢ ܒܬܲܪܥܵܐ ܥܝܼܩܵܐ: ܣܵܒܵܒ ܦܸܬܝܵܐ ܝܠܹܐ ܬܲܪܥܵܐ: ܘܪܘܝܼܚܬܵܐ ܝܠܵܐ ܐܘܼܪܚܵܐ: ܕܠܵܒܠܵܐ ܠܐܲܒ̣ܕܵܢܵܐ: ܘܪܵܒܵܐ ܝܢܵܐ ܐܵܢܝܼ 14 ܕܐܵܙܠ̄ܝܼ ܒܝܼܵܗ̇. ܣܵܒܒ ܥܝܼܩܵܐ ܝܠܹܐ ܬܲܪܥܵܐ: ܘܥܝܼܩܬܵܐ ܝܠܵܐ ܐܘܼܪܚܵܐ: ܕܠܵܒܠܵܐ ܠܚܲܝܹ̈ܐ: ܘܚܲܟ̰ܵܐ ܝܢܵܐ ܐܵܢܝܼ ܕܡܵܫ̄ܟ̰ܚܝܼ ܠܵܗ̇. 15 ܗ̄ܘܹܡܘܿܢ ܗܸܫܝܵܪ ܡ̣ܢ ܢܒ̣̈ܝܹܐ ܕܵܓܵܠܹ̈ܐ ܕܐܵܬܝܼ ܠܟܸܣܠܵܘܟ̣ܘܿܢ ܒܠܒܸܫܝܵܬܹ̈ܐ [14] ܕܦܹܪܹ̈ܐ: ܐܝܼܢܵܐ ܡ̣ܢ ܠܓܵܘܵܝܝܼ ܕܐܹܒܹ̈ܐ ܚܵܛܘܿܦܹ̈ܐ ܝܢܵܐ. 16 ܡ̣ܢ ܛܥܘܼܢܝܵܬܵܝ̈ ܒܸܬ ܝܲܕܥܝܬܘܿܢ ܠܗ̄ܘܿܢ. ܟܹܐ ܓܵܒܝܼ ܡ̣ܢ17 ܟܸܬܘܹ̈ܐ ܥܲܢܒܹ̈ܐ: ܝܲܢ ܡ̣ܢ ܩܝܼܘܵܪܹ̈ܐ ܬܹܐܢܹ̈ܐ. ܗܲܕܟ̣ܵܐ ܟܠ ܐܝܼܠܵܢܵܐ ܨܦܵܝܝܼ ܛܥܘܼܢܝܵܬܹ̈ܐ ܫܵܦܝܼܪܹ̈ܐ ܟܹܐ ܥܒܸܕ: ܐܝܼܢܵܐ ܐܝܼܠܵܢܵܐ ܚܸܪܒܵܐ: 18 ܛܥܘܼܢܝܵܬܹ̈ܐ ܚܸܪܒܵܐ ܟܹܐ ܥܵܒܸܕ. ܠܹܐ ܡܵܨܹܐ ܐܝܼܠܵܢܵܐ ܨܦܵܝܝܼ ܛܥܘܼܢܝܵܬܹ̈ܐ ܚܸܪܒܵܐ ܠܸܥܒ̣ܵܕܵܐ: ܠܵܐ ܐܝܼܠܵܢܵܐ ܚܸܪܒܵܐ ܛܥܘܼܢܝܵܬܹ̈ܐ 19 ܫܲܦܝܼܪܹ̈ܐ ܠܸܥܒ̣ܵܕܵܐ. ܟܠ ܐܝܼܠܵܢܵܐ ܕܠܵܐ ܥܵܒܸܕ ܛܥܘܼܢܝܵܬܹ̈ܐ 20 ܫܵܦܝܼܪܹ̈ܐ: ܟܹܐ ܦܵܝܸܫ ܦܪܝܼܡܵܐ ܘܕܸܪܝܵܐ ܒܢܘܼܪܵܐ. ܒܲܣ ܡ̣ܢ ܛܥܘܼܢܝܵܬܵܝ̈ ܒܸܬ ܝܲܕܥܝܼܬܘܿܢ ܠܗ̄ܘܿܢ.

21 ܠܹܐ ܝܠܵܐ ܟܠ ܕܐܵܡܸܪ ܐܸܠܝܼ: ܡܵܪܝܼ: ܡܵܪܝܼ: ܒܸܬ ܐܵܘܸܪ ܠܡܲܠܟܘܼܬܵܐ ܕܫܡܲܝܵܐ: ܐܸܠܵܐ ܡ̇ܢ ܕܥܵܒܸܕ ܪܸܙܵܝܹܗ ܕܒܵܒܝܼ 22 ܕܒܫܡܲܝܵܐ. ܪܵܒܵܐ ܒܸܬ ܐܵܡܪܝܼ ܐܸܠܝܼ ܒܗ̇ܘ ܝܘܡܵܐ: ܡܵܪܝ: ܡܵܪܝܼ: ܒܫܸܡܘܼܟ ܠܵܐ ܢܘܼܒܹܠܲܢ: ܘܒܫܸܡܘܼܟ ܕܲܝܘܹ̈ܐ ܦܘܼܠܸܛܠܲܢ: 23 ܘܒܫܸܡܘܼܟ ܚܲܝ̈ܠܹܐ ܪܵܒܵܐ ܥܒܸܕܠܲܢ. ܘܗ̇ܝܓܵܗ ܒܸܬ ܡܵܘܕܸܢ ܐܸܠܵܝ: ܗܸܟ̰ ܠܵܐ ܝܕܸܥܠܝܼ ܐܸܠܵܘܟ̣ܘܿܢ: ܪܚܘܿܩܘܿܢ: ܪܚܘܿܩܘܿܢ ܐܲܚܬܘܿܢ ܡܸܢܝܼ: ܦܵܠܵܚܹ̈ܐ ܕܥܵܘܠܵܐ. 24 ܗܲܕܟ̣ܵܐ ܟܠ ܕܫܲܡܸܥ ܠܐܲܢܹܐ ܗܹܡܸܙܡܵܢܝܼ̈: ܘܥܵܒܸܕ ܠܗ̄ܘܿܢ: ܒܸܬ ܦܵܝܸܫ ܡܘܼܕܡܝܼܵܐ ܠܐܢܵܫܵܐ ܥܵܩܸܠܕܵܪ: ܗ̇ܘ ܕܒܢܹܠܹܐ ܒܲܝܬܹܗ 25 ܥܲܠ ܩܵܝܵܐ. ܘܨܠܹܠܵܐ ܡܸܛܪܵܐ: ܘܐܬܹܠܘܿܢ ܢܲܗܪ̈ܵܘܵܬܹܐ: ܘܡܚܹܠܘܿܢ ܦܵܘܚܹ̈ܐ: ܘܩܸܬܠܘܿܢ ܒܗ̇ܘ ܒܲܝܬܵܐ: ܘܠܵܐ ܢܦܸܠܹܐ: 26 ܣܵܒܵܒ ܕܫܲܬܸܐܣܬܹܗ ܥܲܠ ܩܵܝܵܐ ܡܘܼܬܸܒ̣ܬܵܐ ܗ̄ܘܵܐ. ܟܠ ܡ̇ܢ ܕܫܲܡܸܥ ܠܐܲܢܹܐ ܗܹܡܸܙܡܵܢܝܼ̈: ܘܠܵܐ ܥܵܒܸܕ ܠܗ̄ܘܿܢ: ܒܸܬ ܦܵܝܸܫ ܡܘܼܕܡܝܼܵܐ ܠܐܢܵܫܵܐ ܣܲܟ̣ܠܵܐ: ܕܒܢܹܠܹܗ ܒܲܝܬܹܗ ܥܲܠ 27 ܣܹܠܵܐ. ܘܨܠܹܠܵܐ ܡܸܛܪܵܐ: ܘܐܬܹܠܘܿܢ ܢܲܗܪ̈ܵܘܵܬܹܐ: ܘܡܚܹܠܘܿܢ ܦܵܘܚܹ̈ܐ: ܘܩܸܬܠܘܿܢ ܒܗ̇ܘ ܒܲܝܬܵܐ: ܘܢܦܸܠܹܐ: ܘܗ̄ܘܹܠܵܐ ܢܦܵܠܬܹܗ ܓܘܼܪܬܵܐ.

28 ܘܗ̄ܘܹܠܵܐ: ܟܲܕ ܬܘܼܡܸܡܠܹܐ ܝܼܫܘܿܥ ܐܲܢܹܐ ܗܹܡܸܙܡܵܢܹ̈ܐ: ܥܘܼܓ̰ܒܹܐ 29 ܗ̄ܘܵܘ ܟܸܢܫܹ̈ܐ ܥܲܠ ܝܘܼܠܦܵܢܹܗ. ܣܵܒܵܒ ܕܡܵܠܸܦ ܗ̄ܘܵܐ ܠܗܘܿܢ ܐܲܝܟ ܡܵܪܹܐ ܗܘܼܟܡܵܐ: ܘܠܵܐ ܐܲܝܟ ܣܵܦܪܵܝ.

ܩܦܠܐܘܢ: ܚ

1 ܘܟܲܕ ܨܠܹܠܹܐ ܡ̣ܢ ܛܘܼܪܵܐ: ܬܒܸܥܠܘܿܢ ܐܸܠܹܗ ܟܸܢܫܹ̈ܐ ܪܵܒܵܐ. 2 ܘܗܵܐ: ܚܵܕ̄ ܓܸܪܒ̣ܵܢܵܐ ܐܬܹܠܹܐ ܣܓܸܕܠܹܐ ܐܸܠܹܗ: ܘܐܡܸܪܹܐ: ܡܵܪܝܼ: 3 ܐܸܢ ܒܲܥܝܸܬ: ܟܹܐ ܡܵܨܸܬ ܠܕܵܟ̣ܘܿܝܝܼ. ܘܝܼܫܘܿܥ ܦܘܼܫܛܵܠܹܐ ܐܝܼܕܹܗ ܕܩܸܪܹܐ ܒܝܹܗ: ܘܐܡܸܪܹܐ: ܒܸܒܲܥܝܵܐ ܝܘܸܢ: ܦܘܼܫ ܕܸܟ̣ܝܵܐ. 4 ܘܕܲܪܣܲܥܲܬ ܕܟܹܠܹܐ ܓܸܪܒܹܗ. ܘܐܡܸܪܹܐ ܐܸܠܹܗ ܝܼܫܘܿܥ: ܚܙܝܼ: ܕܠܐܢܵܫܵܐ ܠܵܐ ܐܵܡܪܸܬ: ܐܸܠܵܐ ܙܹܠ̄ܐ ܡܲܚܙܝܼ ܓܵܢܘܼܟ ܠܟܵܗܢܵܐ: ܘܡܲܩܪܸܒ̣ ܩܘܼܪܒܵܢܵܐ ܕܦܩܸܕܠܹܐ ܡܘܼܫܹܐ ܠܣܵܗܕܘܼܬܵܝ. 5 ܘܟܲܕ ܐܘܸܪܹܐ ܝܼܫܘܿܥ ܠܟܦܲܪܢܵܚܘܿܡ: ܐܬܹܠܹܐ ܠܟܸܣܠܹܗ 6 ܚܵܕ̄ ܩܸܢܛܪܘܿܢܵܐ: ܘܦܲܪܦܸܠ ܗ̄ܘܵܐ ܒܝܹܗ. ܘܐܵܡܸܪ: ܡܵܪܝܼ: [15] ܝܵܠܝܼ ܕܸܪܝܵܐ ܝܠܹܐ ܒܒܲܝܬܵܐ: ܫܦܝܼܠܵܐ: ܘܣܸܪܝܵܐ ܦܝܵܫܵܐ 7 ܓ̰ܘܼܢܓܸܪܵܐ. ܐܵܡܸܪ ܐܸܠܹܗ ܝܼܫܘܿܥ: ܐܵܢܵܐ ܒܸܬ ܐܵܬܸܢ ܘܒܸܬ 8 ܒܵܣܡܸܢܹܗ. ܓ̰ܘܼܘܸܒܠܹܐ ܩܸܢܛܪܘܿܢܵܐ ܘܐܡܸܪܹܐ: ܡܵܪܝܼ: ܠܹܐ ܚܵܫܚܸܢ ܕܐܵܘܪܸܬ ܬܚܘܿܬ ܫܟܘܼܪܝܼ: ܐܸܠܵܐ ܗܲܪ ܐܡܘܿܪ ܒܗܹܡܸܙܡܵܢ: 9 ܘܒܸܬ ܒܵܣܸܡ [16] ܝܵܠܝܼ. ܣܵܒܵܒ ܐܘܼܦ ܐܵܢܵܐ ܐܢܵܫܵܐ ܝܘܸܢ ܬܚܘܿܬ ܗܘܼܟܡܵܐ: ܘܐܝܼܬ ܬܚܘܿܬ ܐܝܼܕܝܼ̈ ܣܲܪ̈ܒܵܙܹܐ: ܘܟܹܐ ܐܵܡܪܸܢ ܠܐܵܗܵܐ: ܙܹܠ̄ܐ: ܘܟܹܐ ܐܵܙܸܠ: ܘܠܗ̇ܘ ܐܚܹܪ̄ܢܵܐ: ܬܵܐ: ܘܟܹܐ ܐܵܬܹܐ: 10 ܘܠܪܹܓܝܼ: ܥܒ̣ܘܿܕ ܐܵܗܵܐ: ܘܟܹܐ ܥܵܒܸܕ. ܘܟܲܕ ܫܡܸܥܠܹܐ ܝܼܫܘܿܥ: ܥܘܼܓ̰ܸܒܠܹܐ: ܘܐܡܸܪܹܐ ܠܐܵܢܝܼ ܕܒܹܐܬܵܝܵܐ ܗ̄ܘܵܘ ܥܲܡܹܗ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܘܼܦ ܓܵܘ ܝܼܣܪܵܝܹܠ ܠܵܐ 11 ܡܘܼܫ̄ܟ̰ܸܚܠܝܼ ܐܲܝܟ ܕܐܵܗܵܐ ܗܲܝܡܵܢܘܼܬܵܐ. ܘܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܪܵܒܵܐ ܒܸܬ ܐܵܬܝܼ ܡ̣ܢ ܡܲܕܢܚܵܐ ܘܡ̣ܢ ܡܲܥ̱ܪܒ̣ܵܐ: ܘܒܸܬ ܝܵܬܒ̣ܝܼ ܥܲܡ ܐܲܒ̣ܪܵܗܵܡ ܘܐܝܼܣܚܵܩ ܘܝܲܥܩܘܿܒ̣ 12 ܒܡܲܠܟܘܼܬܵܐ ܕܫܡܲܝܵܐ. ܐܝܼܢܵܐ ܒܢܘܼܢܹ̈ܐ ܕܡܲܠܟܘܼܬܵܐ ܒܸܬ ܦܵܠܛܝܼ ܠܚܘܼܒ̣ܝܵܐ ܒܲܪܵܝܵܐ: ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ 13 ܕܟܹܟܹ̈ܐ. ܘܐܡܸܪܹܐ ܝܼܫܘܿܥ ܠܗ̇ܘ ܩܸܢܛܪܘܿܢܵܐ: ܙܹܠ̄ܐ: ܕܵܐܟ̣ܝܼ ܕܗܘܼܡܸܢܘܼܟ: ܗܵܘܹܐ ܠܘܼܟ. ܘܒܣܸܡܠܹܐ [17] ܝܵܠܹܗ ܒܗ̇ܝ ܣܵܥܲܬ. 14 ܘܐܬܹܠܹܐ ܝܼܫܘܿܥ ܠܒܲܝܬܹܗ ܕܟܹܐܦܵܐ: ܘܚܙܹܠܹܐ ܠܚܡܵܬܹܗ 15 ܕܡܝܼܟ̣ܬܵܐ ܘܕܒ̣ܝܼܩܬܘܼܗ̇ ܐܫܵܬܵܐ. ܘܕܩܸܪܹܐ ܒܐܝܼܕܵܗ̇ ܘܫܒ̣ܝܼܩܵܠܵܐ 16 ܐܫܵܬܵܐ: ܘܩܸܡܠܵܐ ܘܥܵܒ̣ܕܵܐ ܗ̄ܘܵܐ ܠܗ̄ܘܿܢ ܚܸܠܡܲܬ. ܘܟܲܕ ܗ̄ܘܹܠܹܐ ܪܲܡܫܵܐ: ܡܘܼܬ̄ܝܹܠܘܿܢ ܩܵܕ̄ܡܘܼܗܝ ܕܲܝܘܵܢܹ̈ܐ ܪܵܒܵܐ: ܘܦܘܼܠܸܛܠܹܐ ܕܲܝܘܹ̈ܐ ܒܗܹܡܸܙܡܵܢ: ܘܠܟܠܵܝ ܐܵܢܝܼ ܕܣܸܪܝܵܐ 17 ܡܸܪܥܝܹܐ ܗ̄ܘܵܘ ܒܘܼܣܸܡܠܹܐ. ܕܦܵܝܸܫ ܬܘܼܡܸܡܵܐ ܡܸܢܕܝܼ ܕܦܸܫܠܹܐ ܐܡܝܼܪܵܐ ܒܝܸܕ ܐܹܫܲܥܝܵܐ ܢܒ̣ܝܼܵܐ: ܕܐܡܸܪܹܐ: ܗ̇ܘ ܫܩܸܠܹܐ ܕܲܪܕܲܢ ܘܡܲܪ̈ܥܲܢ ܛܥܸܢܹܐ. 18 ܘܟܲܕ ܚܙܹܠܹܐ ܝܼܫܘܿܥ ܟܸܢܫܹ̈ܐ ܪܵܒܵܐ ܠܚܵܕܸܪ̈ܘܵܢܘܼܗܝ: ܦܩܸܕܠܹܐ 19 ܕܐܵܙܠ̄ܝܼ ܠܗ̇ܘ ܡܲܪܙܵܐ ܐܚܹܪ̄ܢܵܐ: ܘܐܬܹܠܹܐ ܚܵܕ̄ ܣܵܦܪܵܐ ܘܐܡܸܪܹܐ 20 ܐܸܠܹܗ: ܪܵܒܝܼ: ܒܸܬ ܐܵܬܸܢ ܒܵܬ̄ܪܘܼܟ ܠܐܲܝܟܵܐ ܕܐܵܙܸܠ̄ܬ. ܐܵܡܸܪ ܐܸܠܹܗ ܝܼܫܘܿܥ: ܬܲܥ̈ܠܹܐ ܒܸܙܥܵܙܹ̈ܐ ܐܝܼܬ ܠܗ̄ܘܿܢ: ܘܛܲܝܪܹ̈ܐ ܕܫܡܲܝܵܐ ܕܘܼܟܵܢܹ̈ܐ ܕܫܪܵܝܬܵܐ: ܐܝܼܢܵܐ ܒܪܘܼܢܹܗ ܕܐܢܵܫܵܐ ܠܲܝܬ ܠܹܗ ܕܘܼܟܵܐ 21 ܕܡܲܬܸܒ̣ ܪܹܫܹܗ. ܘܚܵܕ̄ ܐܚܹܪ̄ܢܵܐ ܡ̣ܢ ܬܲܠܡܝܼܕܘܼ̈ܗܝ ܐܡܸܪܹܐ ܐܸܠܹܗ: ܡܵܪܝܼ: ܗܲܒ̄ܠ ܠܝܼ ܕܲܣܬܘܼܪ ܩܵܕ̄ܡܵܝܬܵܐ ܕܐܵܙܸܠ̄ܢ ܩܵܒ̣ܪܸܢ 22 ܠܒܵܒܝܼ. ܐܝܼܢܵܐ ܝܼܫܘܿܥ ܐܡܸܪܹܐ ܐܸܠܹܗ: ܬܵܐ ܐܸܠܹܗ: ܬܵܐ ܒܵܬ̄ܪܝܼ: ܘܫܒ̣ܘܿܩ ܡܝܼܬܹ̈ܐ ܩܵܒ̣ܪܝܼ ܡܝܼܬܵܝ̈.

23 ܘܟܲܕ ܐܣܸܩܠܹܐ ܝܼܫܘܿܥ ܠܓܵܡܝܼ: ܐܙܸܠܘܿܢ ܒܵܬ̄ܪܹܗ 24 ܬܲܠܡܝܼܕܘܼ̈ܗܝ. ܘܗܵܐ: ܫܥܵܫܵܐ ܓܘܼܪܵܐ ܗ̄ܘܹܠܹܐ ܒܝܵܡܵܐ: ܕܐܵܟ̣ܝܼ ܕܓܵܡܝܼ ܦܵܝܫܵܐ ܗ̄ܘܵܐ ܟܘܼܣܝܼܬܐ ܡ̣ܢ ܠܲܦܹ̈ܐ: ܐܝܼܢܵܐ ܗ̇ܘ ܕܡܝܼܟ̣ܵܐ 25 ܗ̄ܘܵܐ. ܘܐܬܹܠܘܿܢ ܬܲܠܡܝܼܕܘܼ̈ܗܝ ܕܡܲܪܥܸܫܝܼ ܗ̄ܘܵܘ ܠܹܗ: 26 ܒܹܐܡܵܪܵܐ: ܡܵܪܲܢ: ܦܵܨܝܼ ܠܲܢ: ܒܸܬܠܵܩܵܐ ܝܘܵܚ. ܘܐܡܸܪ ܐܸܠܵܝ ܝܼܫܘܿܥ: ܩܵܡܘܿܕܝܼ ܙܵܕܘܿܥܝܹ̈ܐ ܝܬܘܿܢ: ܝܵܐ ܟܝܼܡ ܗܲܝܡܵܢܘܼܬܵܐ: ܗ̇ܝܓܵܗ ܩܸܡܠܹܐ ܘܢܓ̰ܘܼܠܹܐ ܒܦܵܘܚܵܐ ܘܒܝܵܡܵܐ: ܘܗ̄ܘܹܠܹܐ ܫܠܵܝܵܐ 27 ܓܘܼܪܵܐ. ܐܝܼܢܵܐ ܐܢܵܫܹ̈ܐ ܥܘܼܓ̰ܸܒܠܘܿܢ: ܒܹܐܡܵܪܵܐ: ܕܵܐܟ̣ܝܼ ܐܢܵܫܵܐ ܝܠܹܐ ܐܵܗܵܐ ܕܐܘܼܦ ܦܵܘܚܹ̈ܐ ܘܝܵܡܵܐ ܡܲܨܝܘܼܬܹܐ ܝܢܵܐ ܐܸܠܹܗ.

28 ܘܟܲܕ ܐܬܹܠܹܐ ܝܼܫܘܿܥ ܠܡܲܪܙܵܐ ܐܚܹܪ̄ܢܵܐ ܠܐܲܬܪܵܐ [18] ܕܓܸܕܪ̈ܵܝܹܐ: ܬܦܸܩܠܘܿܢ ܒܝܹܗ ܬܪܲܝ ܕܲܝܘܵܢܹ̈ܐ ܒܸܦܠܵܛܵܐ ܡ̣ܢ ܒܹܝܬ ܩܒ̣ܘܼܪܹ̈ܐ: ܨܪ̈ܝܼܚܹܐ ܪܵܒܵܐ: ܗܲܕܟ̣ܵܐ ܕܐܢܵܫܵܐ ܠܹܐ ܡܵܨܹܐ ܕܥܵܒܸܕ ܗ̄ܘܵܐ ܒܗ̇ܝ 29 ܐܘܼܪܚܵܐ.  ܘܗܵܐ: ܡܘܼܩܘܸܚܠܘܿܢ ܒܹܐܡܵܪܵܐ: ܡܵܐ ܠܘܼܟ ܡܸܢܲܢ: ܝܼܫܘܿܥ ܒܪܘܼܢܹܗ ܕܐܲܠܵܗܵܐ: ܐܬܹܠܘܼܟ ܠܲܐܟ̣ܵܐ ܡܩܵܕ̄ܡ 30 ܙܲܒ̣ܢܵܐ ܠܓ̰ܲܢܓ̰ܘܼܪܲܢ. ܐܝܼܢܵܐ ܐܝܼܬ ܗ̄ܘܵܐ ܪܸܚܩܵܐ ܡܸܢܵܝ: 31 ܒܲܩܪܵܐ ܕܚܙܘܼܪܹ̈ܐ ܪܵܒܵܐ ܕܒܸܪܥܵܝܵܐ. ܘܐܵܢܝܼ ܕܲܝܘܹ̈ܐ ܦܘܼܪܦܸܠܘܿܢ ܒܝܹܗ: ܒܹܐܡܵܪܵܐ: ܐܸܢ ܦܵܠܛܸܬ ܠܲܢ: [19] ܗܲܒ̄ܠ ܠܲܢ ܕܲܣܬܘܼܪ 32 ܕܐܵܙܵܠ̄ܚ ܓܵܘ ܒܲܩܪܵܐ ܕܚܙܘܼܪܹ̈ܐ. ܐܵܡܸܪ ܐܸܠܵܝ ܝܼܫܘܿܥ: ܙܹܠ̄ܡܘܿܢ: ܘܦܠܸܛܠܘܿܢ ܘܐܘܸܪܘܿܢ ܓܵܘ ܚܙܘܼܪܹ̈ܐ: ܘܗܵܐ: ܟܠܵܗ̇ ܒܲܩܪܵܐ ܪܚܸܛܠܵܐ ܠܫܸܢܵܐ ܠܐܸܠܬܸܚ ܒܝܵܡܵܐ: ܘܡܸܬܠܘܿܢ 33 ܒܡ̈ܝܼܵܐ. ܐܝܼܢܵܐ ܐܵܢܝܼ ܕܡܲܪܥܘܼܝܹܐ ܗ̄ܘܵܘ ܥܪܸܩܠܘܿܢ ܘܐܙܸܠܘܿܢ ܠܡܕܝܼܢ̄ܬܵܐ: ܘܡܘܼܕܸܥܠܘܿܢ ܟܠ ܡܸܢܕܝܼ: ܘܗ̇ܝ ܕܗ̄ܘܹܠܵܐ 34 ܠܕܲܝܘܵܢܹ̈ܐ. ܘܗܵܐ: ܦܠܸܛܠܵܐ ܟܠܵܗ̇ ܡܕܝܼܢ̄ܬܵܐ ܠܐܘܼܪܚܹܗ ܕܝܼܫܘܿܥ: ܘܟܲܕ ܚܙܹܠܘܿܢ ܐܸܠܹܗ: ܦܘܼܪܦܸܠܘܿܢ ܒܝܹܗ ܕܫܵܢܹܐ ܡ̣ܢ ܬܸܚܘܼܒܵܝ̈.

ܩܦܠܐܘܢ: ܛ

1 ܘܐܣܸܩܠܹܐ ܠܓܵܡܝܼ: ܘܥܒܸܪܹܐ ܘܐܬܹܠܹܐ ܠܡܕܝܼܢ̄ܬܹܗ. 2 ܘܗܵܐ: ܡܘܼܬ̄ܝܹܠܘܿܢ ܠܟܸܣܠܹܗ ܚܵܕ̄ ܫܦܝܼܠܵܐ: ܕܸܪܝܵܐ ܒܫܘܝܼܬܵܐ: ܘܚܙܹܠܹܐ ܝܼܫܘܿܥ ܗܲܝܡܵܢܘܼܬܵܝ: ܘܐܡܸܪܹܐ ܠܗ̇ܘ ܫܦܝܼܠܵܐ: ܦܘܼܫ 3 ܠܸܒܵܢܵܐ: ܒܪܘܼܢܝܼ: ܫܒ̣ܝܼܩܹܐ ܝܢܵܐ ܐܸܠܘܼܟ ܚܛܝܼܵܬܘܼ̈ܟ. ܘܗܵܐ: ܐܢܵܫܹ̈ܐ ܡ̣ܢ ܣܵܦܪܹ̈ܐ: ܐܡܸܪܘܿܢ ܒܓܵܢܵܝ: ܐܵܗܵܐ ܒܸܓܕܵܦܵܐ ܝܠܹܐ. 4 ܘܝܼܫܘܿܥ ܝܕܸܥܠܹܐ ܚܘܼܫܵܒ̣ܵܝ̈: ܘܐܡܸܪܹܐ ܐܸܠܵܝ: ܩܵܡܘܿܕܝܼ ܒܸܚܫܵܒ̣ܵܐ 5 ܝܬܘܿܢ ܒܝܼܫܬܵܐ ܒܠܸܒܵܘܟ̣ܘܿܢ. ܣܵܒܵܒ ܐܲܝܢܝܼ ܗܵܣܵܢܵܝܝܼ ܝܠܵܐ ܠܹܐܡܵܪܵܐ: ܕܫܒ̣ܝܼܩܹܐ ܝܢܵܐ ܐܸܠܘܼܟ ܚܛܝܼܵܬܘܼ̈ܟ: ܝܲܢ ܠܹܐܡܵܪܵܐ: 6 ܩܘܼܡ̄ ܚܕܘܼܪ. ܐܝܼܢܵܐ ܕܝܲܕܥܝܼܬܘܿܢ ܕܐܝܼܬ ܗܘܼܟܡܵܐ ܠܒܪܘܼܢܹܗ ܕܐܢܵܫܵܐ ܒܐܲܪܥܵܐ ܠܸܫܒ̣ܵܩܵܐ ܚܛܝܼܵܬܹ̈ܐ: ܗ̇ܝܓܵܗ ܐܡܸܪܹܐ ܠܫܦܝܼܠܵܐ: 7 ܩܘܼܡ̄: ܫܩܘܿܠ ܫܘܝܼܬܘܼܟ ܘܙܹܠ̄ܐ ܠܒܲܝܬܘܼܟ. ܘܩܸܡܠܹܐ 8 ܐܙܹܠܹܐ ܠܒܲܝܬܹܗ. ܐܝܼܢܵܐ ܟܲܕ ܚܙܹܠܘܿܢ ܐܵܢܝܼ ܟܸܢܫܹ̈ܐ: ܙܕܸܥܠܘܿܢ: ܘܫܘܼܒܸܚܠܘܿܢ ܠܐܲܠܵܗܵܐ ܕܝܸܗܒܸܠܹܐ ܐܲܝܟ ܕܐܵܗܵܐ ܗܘܼܟܡܵܐ ܠܒܢܲܝ̈ܢܵܫܵܐ.ܘܟܲܕ ܥܒܸܪܹܐ ܝܼܫܘܿܥ ܡ̣ܢ ܬܵܡܵܐ: ܚܙܹܠܹܐ ܐܢܵܫܵܐ ܝܬܝܼܒ̣ܵܐ ܒܕܘܼܟܵܐ ܕܕܲܡܓ̰ܵܟ̣̈ܝܹܐ: ܫܸܡܹܗ ܡܲܬܲܝ: ܘܐܡܸܪܹܐ ܐܸܠܹܗ: ܬܵܐ ܒܵܬ̄ܪܝܼ. ܘܩܸܡܠܹܐ ܐܙܸܠܹܐ ܒܵܬ̄ܪܹܗ. 10 ܘܗ̄ܘܹܠܵܐ ܕܟܲܕ ܝܬܝܼܒ̣ܵܐ ܗ̄ܘܵܐ ܠܨܘܼܦܪܵܐ ܒܒܲܝܬܵܐ: ܗܵܐ: ܐܬܹܠܘܿܢ ܕܲܡܓ̣ܵܟ̰ܝܹ̈ܐ ܘܚܲܛܵܝܹ̈ܐ ܪܵܒܵܐ: ܝܬܸܒ̣ܠܘܿܢ ܠܨܘܼܦܪܵܐ 11 ܥܲܡ ܝܼܫܘܿܥ ܘܥܲܡ ܬܲܠܡܝܼܕܘܼ̈ܗܝ. ܘܟܲܕ ܚܙܹܠܘܿܢ ܦܪ̈ܝܼܫܹܐ: ܐܵܡܪܝܼ ܠܬܲܠܡܝܼܕܘܼ̈ܝ: ܩܵܡܘܿܕܝܼ ܥܲܡ ܕܲܡܓ̣ܵܟ̰ܝܹ̈ܐ ܘܚܲܛܵܝܹ̈ܐ 12 ܒܹܐܟ̣ܵܠܵܐ ܝܠܹܐ ܪܵܒܝܼܵܘܟ̣ܘܿܢ. ܘܝܼܫܘܿܥ ܟܲܕ ܫܡܸܥܠܹܐ ܐܡܸܪܹܐ ܐܸܠܵܝ: ܠܹܐ ܝܢܵܐ ܣܢܝܼܩܹܐ ܐܵܢܝܼ ܕܝܼܢܵܐ ܨܵܚ ܥܲܠ ܗܲܟܝܼܡ: ܐܸܠܵܐ 13 ܐܵܢܝܼ ܕܡܸܪܥܝܹܐ ܝܢܵܐ. ܙܹܠ̄ܡܘܿܢ ܝܠܘܿܦܘܿܢ ܡܘܼܕܝܼ ܝܠܹܐ: ܪ̈ܲܚܡܹܐ ܟܹܐ ܒܲܥܝܸܢ ܘܠܵܐ ܕܸܒ̣ܚܬܵܐ: ܣܵܒܵܒ ܕܠܵܐ ܐܬܹܠܝܼ ܕܩܵܪܸܢ ܠܙܲܕܝܼܩܹ̈ܐ: ܐܸܠܵܐ ܠܚܲܛܵܝܹ̈ܐ. 14 ܗ̇ܝܓܵܗ ܐܬܹܠܘܿܢ ܠܟܸܣܠܹܗ ܬܲܠܡܝܼܕܹ̈ܐ ܕܝܘܿܚܲܢܵܢ: ܒܹܐܡܵܪܵܐ: ܩܵܡܘܿܕܝܼ ܐܲܚܢܲܢ ܘܦܪ̈ܝܼܫܹܐ ܟܹܐ ܨܵܝܡܵܚ ܪܵܒܵܐ: ܘܬܲܠܡܝܼܕܘܼ̈ܟ ܠܹܐ 15 ܨܵܝܡܝܼ. ܐܵܡܸܪ ܐܸܠܵܝ ܝܼܫܘܿܥ: ܟܹܐ ܡܵܨܝܼ ܒܢܘܼܢܹ̈ܐ ܕܓܢܘܿܢܵܐ ܠܸܨܝܵܡܵܐ ܟܡܵܐ ܕܸܚܬܢܵܐ ܥܲܡܵܝ: ܐܝܼܢܵܐ ܒܹܐܬܵܝܵܐ ܝܢܵܐ ܝܘܿܡܵܢܹ̈ܐ: ܟܲܕ 16 ܦܵܝܸܫ ܫܩܝܼܠܵܐ ܡܸܢܵܝ ܚܸܬܢܵܐ: ܘܗ̇ܝܓܵܗ ܒܸܬ ܨܵܝܡܝܼ. ܐܢܵܫܵܐ ܠܹܐ ܕܵܪܹܐ ܥܵܪܵܝܬܵܐ ܚܲܕܬܵܐ ܥܲܠ ܓ̰ܘܼܠܵܐ ܒܸܠܝܵܐ: ܣܵܒܵܒ ܕܟܹܐ ܓܵܪܫܵܐ ܡܸܠܝܘܼܬܘܼܗ̇ ܡܗ̇ܘ ܓ̰ܘܼܠܵܐ: ܘܟܹܐ ܗܵܘܹܐ ܦܸܪܛܵܐ 17 ܙܵܘܕܵܐ. ܘܠܹܐ ܕܵܪܝܼ ܚܲܡܪܵܐ ܚܵܕ̄ܬܵܐ ܒܓܘܼܕܹ̈ܐ ܒܸܠܝܹ̈ܐ: ܘܐܸܢ ܠܵܐ: ܟܹܐ ܦܵܝܫܝܼ [20] ܟ̰ܘܼܢܟ̰ܸܪܹܐ ܓܘܼܕܹ̈ܐ: ܘܚܲܡܪܵܐ [21] ܬܵܦܸܟ: ܘܓܘܼܕܹ̈ܐ ܟܹܐ ܬܵܠܩܝܼ. ܐܸܠܵܐ ܚܲܡܪܵܐ ܚܵܕ̄ܬܵܐ ܟܹܐ ܕܵܪܝܼ ܒܓܘܼܪܹ̈ܐ ܚܵܕ̄ܬܹ̈ܐ: ܘܬܸܪܘܵܝ ܟܹܐ ܦܝܫܝܼ ܢܛܝܼܪܹܐ.

18 ܘܟܲܕ ܐܲܢܹܐ ܗܲܡܙܘܼܡܹܐ ܗ̄ܘܵܐ ܥܲܡܵܝ: ܗܵܐ: ܐܬܹܠܹܐ ܚܵܕ̄ ܐܲܪܟܘܿܢܵܐ ܣܓܸܕܠܹܐ ܐܸܠܹܗ: ܘܐܡܸܪܹܐ: ܒܪܵܬܝܼ ܐܵܕܝܼܵܐ ܡܸܬܠܵܐ: 19 ܐܸܠܵܐ ܬܵܐ ܡܲܬܸܒ̣ ܐܝܼܕܘܼܟ ܥܲܠܘܼܗ̇ ܘܒܸܬ ܚܲܝܵܐ. ܘܩܸܡܠܹܐ 20 ܝܼܫܘܿܥ ܘܬܲܠܡܝܼܕܘܼ̈ܗܝ ܘܐܙܸܠܘܿܢ ܒܵܬ̄ܪܹܗ. ܘܗܵܐ: ܚܕܵܐ ܒܲܟ̣ܬܵܐ ܕܒܹܐܙܵܠܵܐ ܗ̄ܘܵܐ ܕܸܡܘܼܗ̇ ܬܪܸܥܣܲܪ ܫܸܢܹ̈ܐ: ܐܬܹܠܵܐ ܡ̣ܢ 21 ܒܵܬ̄ܪܹܗ: ܘܕܩܸܪܵܐ ܒܫܸܦܘܼܠܵܐ ܕܠܒܸܫܬܹܗ. ܣܵܒܵܒ ܕܐܡܸܪܵܐ ܓܵܘ ܓܵܢܘܼܗ̇: ܐܵܦܸܢ ܕܗܲܪ ܒܓ̰ܘܼܠܹܗ ܕܵܩܪܸܢ: ܒܸܬ ܒܵܣܡܵܢ. 22 ܐܝܼܢܵܐ ܝܼܫܘܿܥ ܕܸܪܹܐ ܚܸܙܝܵܠܹܐ: ܘܐܡܸܪܹܐ ܐܸܠܵܗ̇: ܦܘܼܫܝ ܠܸܒܵܢܬܵܐ ܒܪܵܬܝܼ: ܗܲܝܡܵܢܘܼܬܵܟ̣ܝ ܡܘܼܚܹܠܵܐ ܐܸܠܵܟ̣ܝ. ܘܒܣܸܡܠܵܐ ܒܲܟ̣ܬܵܐ 23 ܡ̣ܢ ܕܗ̇ܝ ܣܵܥܲܬ. ܘܟܲܕ ܐܬܹܠܹܐ ܝܼܫܘܿܥ ܠܒܲܝܬܹܗ ܕܐܲܪܟܘܿܢܵܐ: 24 ܘܚܙܹܠܹܐ ܙܵܡܵܪܹ̈ܐ ܘܟܸܢܫܹ̈ܐ ܒܸܥܒ̣ܵܕܵܐ ܫܓ̣ܘܼܫܝܵܐ. ܐܡܸܪܹܐ ܐܸܠܵܝ: ܦܪܘܿܩܘܿܢ ܠܵܘܟ̣ܘܿܢ: ܣܵܒܵܒ ܕܒܪܵܬܵܐ ܠܹܐ ܝܠܵܐ ܡܝܼܬܬܵܐ: ܐܸܠܵܐ 25 ܕܡܝܼܟ̣ܬܵܐ ܝܠܵܐ. ܘܓܵܚܟܝܼ ܗ̄ܘܵܘ ܒܝܹܗ. ܘܟܲܕ ܦܘܼܠܸܛܠܹܐ ܠܟܸܢܫܹ̈ܐ: ܐܘܸܪܹܐ ܕܒ̣ܝܼܩܵܠܹܐ ܒܐܝܼܕܵܗ̇: ܘܩܸܡܠܵܐ ܒܪܵܬܵܐ. 26 ܘܦܠܸܛܠܵܐ ܐܵܗܵܐ ܒܵܗܣ ܒܟܠܵܗ̇ ܗ̇ܝ ܐܲܪܥܵܐ. 27 ܘܟܲܕ ܥܒܸܪܹܐ ܝܼܫܘܿܥ ܡ̣ܢ ܬܵܡܵܐ: ܐܙܸܠܘܿܢ ܒܵܬ̄ܪܹܗ ܬܪܲܝ ܣܸܡܝܹ̈ܐ ܡܲܩܘܘܼܚܹܐ ܘܒܹܐܡܵܪܵܐ: ܥܒ̣ܘܼܕ ܪ̈ܲܚܡܹܐ ܥܲܠܲܢ: ܝܵܐ 28 ܒܪܘܼܢܹܗ ܕܕܵܘܝܼܕ. ܘܟܲܕ ܐܬܹܠܹܐ ܠܒܲܝܬܵܐ: ܐܬܹܠܘܿܢ ܠܟܸܣܠܹܗ ܐܵܢܝܼ ܣܸܡܝܹ̈ܐ. ܐܵܡܸܪ ܐܸܠܵܝ ܝܼܫܘܿܥ: ܗܲܡܘܼܢܹܐ ܝܬܘܿܢ ܕܡܵܨܸܢ ܐܵܢܵܐ 29 ܐܵܗܵܐ ܠܸܥܒ̣ܵܕܵܐ: ܐܵܡܪܝܼ ܐܸܠܹܗ: ܗܹܐ: ܡܵܪܲܢ. ܗ̇ܝܓܵܗ ܕܩܸܪܹܐ ܒܥܲܝܢܵܝ̈ ܘܐܡܸܪܹܐ: ܕܵܐܟ̣ܝܼ ܕܗܘܼܡܸܢܵܘܟ̣ܘܿܢ ܗܵܘܹܐ ܠܵܘܟ̣ܘܿܢ. 30 ܘܦܸܫܠܘܿܢ ܦܬܝܼܚܹܐ ܥܲܝܢܵܝ̈: ܘܢܓ̰ܘܼܠܹܐ ܒܝܼܵܝ ܝܼܫܘܿܥ ܘܐܡܸܪܹܐ: 31 ܚܙܹܡܘܿܢ ܕܐܢܵܫܵܐ ܠܵܐ ܝܲܕܸܥ. ܐܝܼܢܵܐ ܐܵܢܝܼ ܦܠܸܛܠܘܿܢ: ܘܦܘܼܠܛܵܠܘܿܢ ܒܵܗܣܹܗ ܒܟܠܵܗ̇ ܗܵܝ̇ ܐܲܪܥܵܐ.

32 ܘܟܲܕ ܦܠܸܛܠܘܿܢ: ܗܵܐ: ܡܘܼܬ̄ܝܹܠܘܿܢ ܠܟܸܣܠܹܗ ܚܵܕ̄ 33 ܠܲܥܠܵܐ ܕܐܝܼܬ ܗ̄ܘܵܐ ܒܝܹܗ ܕܲܝܘܵܐ. ܘܡ̣ܢ ܕܦܠܸܛܠܹܐ ܕܲܝܘܵܐ: ܗܘܼܡܙܸܡܠܹܐ ܗ̇ܘ ܠܲܥܠܵܐ: ܘܥܓ̰ܸܒܠܘܿܢ ܟܸܢܫܹ̈ܐ ܒܹܐܡܵܪܵܐ: ܗܸܟ̰ 34 ܠܵܐ ܦܸܫܠܹܐ ܚܸܙܝܵܐ ܗܲܕܟ̣ܵܐ ܒܝܼܣܪܵܝܹܠ. ܐܝܼܢܵܐ ܦܪ̈ܝܼܫܹܐ ܐܵܡܪܝ ܗ̄ܘܵܘ: ܒܪܹܫܵܐ ܕܕܲܝܘܹ̈ܐ ܦܵܠܘܿܛܹܐ ܝܠܹܐ ܕܲܝܘܹ̈ܐ. 35 ܘܚܵܕܸܪ ܗ̄ܘܵܐ ܒܟܠܵܝ ܡܕܝܼܢܵܬܹ̈ܐ ܘܡܵܬܘܵܬܹ̈ܐ: ܘܡܵܠܸܦ ܗ̄ܘܵܐ ܒܟܢܘܼܫܝܵܬܵܝ̈: ܘܡܲܟܪܸܙ ܗ̄ܘܵܐ ܡܲܫܚܲܕܬܵܐ ܕܡܲܠܟܘܼܬܵܐ: ܘܒܵܣܸܡ ܗ̄ܘܵܐ ܟܠܵܝ ܡܲܪ̈ܥܹܐ ܘܕܲܪ̈ܕܹܐ. 36 ܐܝܼܢܵܐ ܟܲܕ ܚܙܹܠܹܐ ܠܟܸܢܫܹ̈ܐ: ܪܘܼܚܸܡܠܹܐ ܥܲܠܵܝ: ܕܓ̰ܗ̄ܝܹܐ 37 ܗ̄ܘܵܘ ܘܫܸܪܝܹܐ: ܐܲܝܟ ܥܸܪ̈ܒܹܐ ܕܠܲܝܬ ܠܗ̄ܘܿܢ ܪܵܥܝܵܐ. ܗ̇ܝܓܵܗ ܐܡܸܪܹܐ ܠܬܲܠܡܝܼܕܘܼ̈ܗܝ: ܚܸܨܕܵܐ ܪܵܒܵܐ ܝܠܹܐ ܘܦܵܥ̈ܠܹܐ ܚܲܟ̰ܵܐ. 38 ܒܸܥܡܘܿܢ ܗܲܕܟ̣ܵܐ ܡ̣ܢ ܡܵܪܹܗ ܕܚܸܨܕܵܐ: ܕܦܵܠܸܛ ܦܵܥ̈ܠܹܐ ܠܚܸܨܕܹܗ.

ܩܦܠܐܘܢ: ܝ

1 ܘܩܪܹܠܹܐ ܠܬܪܸܥܣܲܪ ܬܲܠܡܝܼܕܘܼ̈ܗܝ: ܘܝܸܗܒܸܠܹܐ ܐܸܠܵܝ ܗܘܼܟܡܵܐ ܥܲܠ ܪ̈ܘܼܚܹܐ ܛܲܡܹ̈ܐܐ ܠܦܵܠܘܿܛܵܝ: ܘܠܒܵܣܘܿܡܹܐ ܟܠ 2 ܕܲܪܕ ܘܡܲܪܥܵܐ. ܘܫܸܡܵܢܹ̈ܐ ܕܬܪܸܥܣܲܪ ܫܠܝܼܚܹ̈ܐ ܐܲܢܹܐ ܝܢܵܐ: ܩܵܕ̄ܡܵܝܵܝ: ܫܸܡܥܘܿܢ: ܕܦܵܝܸܫ ܩܪܝܵܐ ܟܹܐܦܵܐ: ܘܐܲܢܕܪܹܐܘܿܣ ܐܵܚܘܿܢܘܼܗܝ: ܝܲܥܩܘܿܒ̣ ܒܪܘܼܢܹܗ ܕܙܲܒ̣ܕܲܝ: ܘܝܘܿܚܲܢܵܢ ܐܵܚܘܿܢܘܼܗܝ. 3 ܦܝܼܠܝܼܦܘܿܣ: ܘܒܲܪ ܬܘܼܠܡܲܝ: ܬܐܘܿܡܵܐ: ܘܡܲܬܲܝ ܕܲܡܓ̣ܵܟ̰ܝܼ: ܝܲܥܩܘܿܒ̣ ܒܪܘܼܢܹܗ ܕܚܲܠܦܲܝ: ܘܠܲܒܲܝ: ܕܦܸܫܠܹܐ ܩܸܪܝܵܐ ܬܲܕܲܝ. 4 ܫܸܡܥܘܿܢ ܩܢܵܢܵܝܵܐ: ܘܝܼܗܘܼܕܵܐ ܣܟܲܪܝܘܿܛܵܐ: ܗ̇ܘ ܕܣܘܼܦܹܠܹܗ. 5 ܠܐܲܢܹܐ ܬܪܸܥܣܲܪ ܫܘܼܕܸܪܹܗ ܝܼܫܘܿܥ ܘܦܩܝܼܕܵܝܠܹܐ ܘܐܡܸܪܹܐ: ܒܐܘܼܪܚܵܐ ܕܛܵܝܸܦܹ̈ܐ ܠܵܐ ܙܵܠ̄ܝܼܬܘܿܢ: ܘܓܵܘ ܡܕܝܼܢ̄ܬܵܐ ܕܫܵܡܪ̈ܵܝܹܐ ܠܵܐ 6 ܐܵܘܪܝܼܬܘܿܢ. ܐܝܼܢܵܐ ܙܵܘܕܵܐ ܙܹܠ̄ܡܘܿܢ ܠܵܘܟ̣ܘܿܢ ܠܟܸܣ ܥܸܪ̈ܒܹܐ 7 ܬܠܝܼܩܹ̈ܐ ܡ̣ܢ ܒܹܝܬ ܝܼܣܪܵܝܹܠ. ܘܟܲܕ ܐܵܙܠ̄ܝܼܬܘܿܢ: ܡܲܟܪܸܙܘܿܢ 8 ܘܐܡܘܿܪܘܿܢ: [22] ܩܘܼܪܒܸܢܵܐ ܡܲܠܟܘܼܬܵܐ ܕܫܡܲܝܵܐ. ܡܸܪ̈ܥܝܹܐ ܒܵܣܡܘܿܢ: ܡܝܼܬܹ̈ܐ ܡܲܩܸܡܘܿܢ: ܓܸܪ̈ܒ̣ܵܢܹܐ ܕܵܟܹܡܘܿܢ: ܕܲܝܘܹ̈ܐ ܦܵܠܛܘܿܢ 9 ܚܘܼܪܵܝܝܼ ܫܩܸܠܵܘܟ̣ܘܿܢ: ܚܘܼܪܵܝܝܼ ܗܲܒ̄ܠܘܼܢ. ܠܵܐ ܩܵܢܝܼܬܘܿܢ 10 ܕܲܗܒ̣ܵܐ ܘܠܵܐ ܣܹܐܡܵܐ ܘܠܵܐ ܢܚܵܫܵܐ ܒܟܸܣܝܵܬܵܘ̈ܟ̣ܘܿܢ. ܘܠܵܐ ܓ̰ܲܢܬܵܐ ܠܐܘܼܪܚܵܐ: ܘܠܵܐ ܬܲܪ̈ܬܹܝ ܨܘܼܕܪ̈ܵܬܹܐ: ܘܠܵܐ ܨܵܘ̈ܠܹܐ: ܘܠܵܐ 11 ܚܘܼܛܪܵܐ: ܣܵܒܵܒ ܕܚܵܫܸܚ ܦܵܥܠܵܐ ܠܡܹܐܟ̣ܘܼܠܬܹܗ. ܘܠܲܐܝܢܝܼ ܡܕܝܼܢ̄ܬܵܐ ܝܲܢ ܡܵܬܵܐ ܕܐܵܘܪܝܼܬܘܿܢ: ܒܵܩܪܘܿܢ ܡܵܢܝܼ ܟܹܐ ܚܵܫܸܚ 12 ܒܝܼܵܗ̇: ܘܬܵܡܵܐ ܦܘܼܫܘܿܢ ܗܲܠ ܕܦܵܠܛܝܼܬܘܿܢ. ܘܐܝܼܡܲܢ 13 ܕܐܵܘܪܝܼܬܘܿܢ ܠܒܲܝܬܵܐ: ܕܪܹܡܘܿܢ ܫܠܵܡܵܐ ܐܸܠܹܗ. ܘܐܸܢ ܚܵܫܸܚ ܒܲܝܬܵܐ: ܫܠܵܡܵܘܟ̣ܘܿܢ ܐܵܬܹܐ ܥܲܠܘܼܗܝ: ܐܝܼܢܵܐ ܐܸܢ ܠܵܐ ܚܵܫܸܚ: 14 ܫܠܵܡܵܘܟ̣ܘܿܢ ܥܲܠܵܘܟ̣ܘܿܢ ܕܵܝܸܪ. ܐܝܼܢܵܐ ܡ̇ܢ ܕܠܵܐ ܩܵܒܸ̇ܠ ܠܵܘܟ̣ܘܿܢ: ܘܠܵܐ ܫܲܡܸܥ ܠܗܹܡܸܙܡܵܢܵܘ̈ܟ̣ܘܿܢ: ܟܲܕ ܦܵܠܛܝܼܬܘܿܢ ܡ̣ܢ ܕܗ̇ܘ ܒܲܝܬܵܐ ܝܲܢ ܡ̣ܢ ܕܗ̇ܝ ܡܕܝܼܢ̄ܬܵܐ: ܢܦܘܿܨܘܿܢ ܬܵܘܙ ܡ̣ܢ 15 ܐܲܩܠܵܘ̈ܟ̣ܘܿܢ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܲܐܪܥܵܐ ܕܣܕܘܼܡ ܘܕܥܵܡܘܿܪܵܐ ܒܸܬ ܗܵܘܹܐ ܢܝܵܚܵܐ ܒܝܘܿܡܵܐ ܕܕܝܼܘܵܢ: ܙܵܘܕܵܐ ܡ̣ܢ ܠܗ̇ܝ ܡܕܝܼܢ̄ܬܵܐ.

16 ܗܵܐ: ܐܵܢܵܐ ܫܵܕܘܿܪܹܐ ܝܘܸܢ ܐܸܠܵܘܟ̣ܘܿܢ ܐܲܝܟ ܥܸܪ̈ܒܹܐ ܒܓܵܘܵܐ ܕܕܹܐܒܹ̈ܐ: ܗ̄ܘܹܡܘܿܢ ܗܲܕܟ̣ܵܐ ܥܵܩܸܠܕܵܪܹ̈ܐ ܐܲܝܟ ܚܘܼܘܵܘܵܬܹ̈ܐ: ܘܨܸܦܝܹ̈ܐ 17 ܐܲܝܟ ܝܵܘܢܹ̈ܐ. ܐܝܼܢܵܐ ܗ̄ܘܹܡܘܿܢ ܗܸܫܝܵܪ ܡ̣ܢ ܒܢܲܝ̈ܢܵܫܵܐ: ܣܵܒܵܒ ܕܒܸܬ ܣܵܦܝܼ ܠܵܘܟ̣ܘܿܢ ܠܟܸܢܫܹ̈ܐ ܕܪܵܐܝܝܼ: ܘܓܵܘ ܟܢܘܼܫܝܵܬܵܝ̈ 18 ܒܸܬ ܓ̰ܲܢܓ̰ܸܪܝܼ ܠܵܘܟ̣ܘܿܢ. ܘܩܵܕ̄ܡ ܗܵܟܝܼܡܹ̈ܐ ܘܡܲܠܟܹ̈ܐ ܒܸܬ ܡܲܝܬ̄ܝܝܼ ܠܵܘܟ̣ܘܿܢ ܣܵܒܵܒ ܕܝܼܝܼ: ܠܣܵܗܕܘܼܬܵܐ ܕܝܼܵܝ ܘܕܛܵܝܸܦܹ̈ܐ. 19 ܐܝܼܢܵܐ ܐܝܼܡܲܢ ܕܣܵܦܝܼ ܠܵܘܟ̣ܘܿܢ: ܠܵܐ ܐܵܟ̣ܠܝܼܬܘܿܢ ܚܲܡ ܕܵܐܟ̣ܝܼ ܝܲܢ ܡܘܼܕܝܼ ܒܸܬ ܗܲܡܙܸܡܝܼܬܘܿܢ: ܣܵܒܵܒ ܕܒܸܬ ܦܵܝܸܫ ܝܘܼܗ̄ܒ̣ܵܐ 20 ܐܸܠܵܘܟ̣ܘܿܢ ܒܗ̇ܝ ܣܵܥܲܬ ܡܘܼܕܝܼ ܗܲܡܙܸܡܝܼܬܘܿܢ. ܣܵܒܵܒ ܠܵܐ ܐܲܚܬܘܿܢ ܗܲܡܙܘܼܡܹܐ ܝܬܘܿܢ: ܐܸܠܵܐ ܪܘܼܚܵܐ ܕܒܵܒܵܘܟ̣ܘܿܢ ܕܗܲܡܙܘܼܡܹܐ 21 ܝܠܹܐ ܒܝܼܵܘܟ̣ܘܿܢ. ܐܝܼܢܵܐ ܒܸܬ ܣܵܦܹܐ ܐܵܚܘܿܢܵܐ ܠܐܵܚܘܿܢܘܼܗܝ ܠܡܵܘܬܵܐ: ܘܒܵܒܵܐ ܠܒܪܘܼܢܹܗ: ܘܒܸܬ ܩܵܝܡܝܼ ܒܢܘܼܢܹ̈ܐ ܥܲܠ 22 ܐܲܒ̣ܵܗܵܝ̈: ܘܒܸܬ ܡܲܡܝܸܬܝܼ ܠܗ̄ܘܿܢ. ܘܒܸܬ ܦܵܝܫܝܼܬܘܿܢ ܣܸܢܝܹܐ ܡ̣ܢ ܟܠ ܐܢܵܫܵܐ ܣܵܒܵܒ ܕܫܸܡܝܼ: ܐܝܼܢܵܐ ܡ̇ܢ ܕܚܵܡܸܠ ܗܲܠ 23 ܚܲܪܬܵܐ: ܗ̇ܘ ܒܸܬ ܚܲܝܹܐ. ܘܐܝܼܡܲܢ ܕܛܵܪܕܝܼ ܠܵܘܟ̣ܘܿܢ ܒܐܵܗܵܐ ܡܕܝܼܢ̄ܬܵܐ: ܥܪܘܿܩܘܿܢ ܠܵܘܟ̣ܘܿܢ ܠܗ̇ܝ ܐܚܹܪ̄ܬܵܐ: ܣܵܒܵܒ ܕܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܬܲܡܸܡܝܼܬܘܿܢ ܡܕܝܼܢܵܬܹ̈ܐ ܕܒܹܝܬ ܝܼܣܪܵܝܹܠ: ܗܲܠ ܕܐܵܬܹܐ ܒܪܘܼܢܹܗ ܕܐܢܵܫܵܐ.

24 ܠܲܝܬ ܬܲܠܡܝܼܕܵܐ ܕܙܵܘܕܵܐ ܡ̣ܢ ܪܵܒܝܹܗ: ܘܠܵܐ ܪܹܓܵܐ ܡ̣ܢ 25 ܐܵܓ̣ܝܹܗ. ܟܹܐ ܡܵܠܝܵܐ ܠܹܗ ܠܬܲܠܡܝܼܕܵܐ ܕܗܵܘܹܐ ܐܲܝܟ ܪܵܒܝܹܗ: ܘܠܪܹܓܵܐ ܐܲܝܟ ܐܵܓ̣ܵܝܹܗ. ܐܸܢ ܠܡܵܪܹܗ ܕܒܲܝܬܵܐ ܩܪܹܠܘܿܢ 26 ܒܥܸܠܙܒ̣ܘܼܒ̣: ܟܡܵܐ ܙܵܘܕܵܐ ܠܒܢܘܼܢܹ̈ܐ ܕܒܲܝܬܹܗ. ܠܵܐ ܗܲܕܟ̣ܵܐ ܙܵܕܥܝܼܬܘܿܢ ܡܸܢܵܝ: ܣܵܒܵܒ ܠܲܝܬ ܡܸܢܕܝܼ ܕܝܼܠܹܐ ܟܘܼܣܝܵܐ ܕܠܵܐ ܦܵܝܸܫ ܓܸܠܝܵܐ: ܘܗ̇ܘ ܕܝܼܠܹܐ ܛܸܫܝܵܐ ܕܠܵܐ ܦܵܝܸܫ ܝܕܸܥܝܵܐ.

27 ܡܸܢܕܝܼ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ ܒܚܘܼܒ̣ܝܵܐ: ܐܡܘܿܪܘܿܢ ܠܹܗ ܐܲܚܬܘܿܢ ܒܒܲܗܪܵܐ: ܘܡܸܢܕܝܼ ܕܒܸܫܡܲܥܝܵܐ ܝܬܘܿܢ ܒܢܵܬܵܐ: ܡܲܟܪܸܙܘܿܢ 28 ܥܲܠ ܐܓܵܪ̈ܵܘܵܬܹܐ. ܘܠܵܐ ܙܵܕܥܝܼܬܘܿܢ ܡܐܵܢܝܼ ܕܩܵܛܠܝܼ ܠܦܲܓ̣ܪܵܐ: ܐܝܼܢܵܐ ܠܓܵܢܵܐ ܠܹܐ ܡܵܨܝܼ ܠܸܩܛܵܠܵܐ: ܐܝܼܢܵܐ ܙܕܸܥܡܘܿܢ ܙܵܘܕܵܐ ܡ̣ܢ ܡ̇ܢ ܕܡܵܨܹܐ ܠܓܵܢܵܐ ܘܠܦܲܓ̣ܪܵܐ ܬܵܠܸܩ ܒܓܹܗܲܢܵܐ. 29 ܬܲܪ̈ܬܹܝ ܨܦܪܹ̈ܐ ܠܹܐ ܦܵܝܫܝܼ ܙܘܼܒܢܹܐ ܒܚܵܕ̄ ܫܵܗܝܼ: ܘܚܕܵܐ ܡܸܢܵܝ 30 ܕܠܵܐ ܒܵܒܵܘܟ̣ܘܿܢ ܠܹܐ ܢܵܦܠܵܐ ܥܲܠ ܐܲܪܥܵܐ. ܐܝܼܢܵܐ ܕܝܼܵܘܟ̣ܘܿܢ 31 ܐܘܼܦ ܡܸܙܝܵܬܹ̈ܐ ܕܪܹܫܵܘܟ̣ܘܿܢ ܟܠܵܝ ܡܸܢܝܹܐ ܝܢܵܐ. ܠܵܐ ܗܲܕܟ̣ܵܐ 32 ܙܵܕܥܝܼܬܘܿܢ: ܡ̣ܢ ܪܵܒܵܐ ܨܸܦܪܹ̈ܐ ܙܵܘܕܵܐ ܝܬܘܿܢ. ܟܠ ܐܢܵܫܵܐ ܗܲܕܟ̣ܵܐ ܕܡܵܘܕܹܐ ܒܝܼܝܼ ܩܵܕ̄ܡ ܒܢܲܝ̈ܢܵܫܵܐ: ܒܸܬ ܡܵܘܕܸܢ ܒܝܹܗ 33 ܐܘܼܦ ܐܵܢܵܐ ܩܵܕ̄ܡ ܒܵܒܝܼ ܕܒܫܡܲܝܵܐ. ܐܝܼܢܵܐ ܡ̇ܢ ܕܣܵܪܸܒ̣ ܠܝܼ ܩܵܕ̄ܡ ܒܢܲܝ̈ܢܵܫܵܐ: ܒܸܬ ܣܵܪܒܸܢ ܐܸܠܹܗ ܐܘܼܦ ܐܵܢܵܐ ܩܵܕ̄ܡ ܒܵܒܝܼ ܕܒܫܡܲܝܵܐ.

34 ܠܵܐ ܚܵܫܒ̣ܝܼܬܘܿܢ ܕܐܬܹܠܝܼ ܕܕܵܪܸܢ ܫܲܝܢܵܐ ܒܐܲܪܥܵܐ. ܠܵܐ 35 ܐܬܹܠܝܼ ܕܕܵܪܸܢ ܫܲܝܢܵܐ: ܐܸܠܵܐ ܣܲܝܦܵܐ. ܣܵܒܵܒ ܕܐܬܹܠܝܼ ܕܦܵܪܫܸܢ ܐܢܵܫܵܐ ܡ̣ܢ ܒܵܒܘܼܗܝ: ܘܒܪܵܬܵܐ ܡ̣ܢ ܝܸܡܘܼܗ̇: ܘܟܵܠܬܵܐ ܡ̣ܢ 36 ܚܡܵܬܘܼܗ̇. ܘܕܸܫܡܸܢܹ̈ܐ ܕܐܢܵܫܵܐ ܒܢܘܼܢܹ̈ܐ ܕܒܲܝܬܹܗ (ܒܸܬ 37 ܗܵܘܝܼ). ܡ̇ܢ ܕܡܲܚܸܒ̣ ܠܒܵܒܵܐ ܝܲܢ ܠܝܸܡܵܐ ܙܵܘܕܵܐ ܡܸܢܝܼ: ܠܹܐ ܚܵܫܸܚ ܐܸܠܝܼ. ܘܡ̇ܢ ܕܡܲܚܸܒ̣ ܠܒܪܘܼܢܵܐ ܝܲܢ ܠܒܪܵܬܵܐ ܙܵܘܕܵܐ 38 ܡܸܢܝܼ: ܠܹܐ ܚܵܫܸܚ ܐܸܠܝܼ. ܘܟܠ ܕܠܵܐ ܫܵܩܸܠ ܙܩܝܼܦܹܗ ܘܐܵܬܹܐ 39 ܒܵܬ̄ܪܝܼ: ܠܹܐ ܚܵܫܸܚ ܐܸܠܝܼ. ܡ̇ܢ ܕܡܵܫ̄ܟ̰ܸܚ ܠܵܗ̇ ܓܵܢܹܗ: ܒܸܬ ܬܵܠܸܩ ܠܵܗ̇: ܘܡ̇ܢ ܕܬܵܠܸܩ ܠܵܗ̇ ܓܵܢܹܗ ܣܵܒܵܒ ܕܕܝܼܝܼ: ܒܸܬ ܡܵܫ̄ܟ̰ܸܚ ܠܵܗ̇. 40 ܡ̇ܢ ܕܩܵܒܸ̇ܠ ܠܵܘܟ̣ܘܿܢ: ܐܸܠܝܼ ܩܵܒ̇ܘܿܠܹܐ ܝܠܹܐ. ܘܡ̇ܢ ܕܐܸܠܝܼ 41 ܩܵܒܸ̇ܠ: ܠܡ̇ܢ ܕܫܘܼܕܪܸܢܹܐ ܩܵܒ̇ܘܿܠܹܐ ܝܠܹܐ. ܡ̇ܢ ܕܩܵܒܸ̇ܠ ܢܒ̣ܝܼܵܐ ܒܫܸܡܹܗ ܕܢܒ̣ܝܼܵܐ: ܗܵܩܵܐ ܕܢܒ̣ܝܼܵܐ ܒܸܬ ܫܵܩܸܠ: ܘܡ̇ܢ ܕܩܵܒܸ̇ܠ ܙܲܕܝܼܩܵܐ ܒܫܸܡܹܗ ܕܙܲܕܝܼܩܵܐ: ܗܵܩܵܐ ܕܙܲܕܝܼܩܵܐ ܒܸܬ 42 ܫܵܩܸܠ. ܘܟܠ ܕܡܲܫܬܹܐ ܠܚܵܕ̄ ܡ̣ܢ ܕܐܲܢܹܐ ܙܥܘܿܪܹ̈ܐ ܟܵܣܵܐ ܕ (ܡ̈ܝܼܵܐ) ܩܲܪܝܼܪܹ̈ܐ ܐܲܚܟ̰ܝܼ: ܒܫܸܡܵܐ ܕܬܲܠܡܝܼܕܵܐ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܬܵܠܸܩ ܗܵܩܵܗ.

ܩܦܠܐܘܢ: ܝܐ

1 ܘܗ̄ܘܹܠܵܐ ܕܟܲܕ ܬܘܼܡܸܡܠܹܐ ܝܼܫܘܿܥ ܠܦܵܩܘܿܕܹܐ ܠܬܪܸܥܣܲܪ ܬܲܠܡܝܼܕܘܼ̈ܗܝ: ܫܘܼܢܹܠܹܐ ܡ̣ܢ ܬܵܡܵܐ ܠܡܵܠܘܿܦܹܐ ܘܠܡܲܟܪܘܿܙܹܐ ܒܡܕܝܼܢܵܬܵܝ̈.

2 ܐܝܼܢܵܐ ܟܲܕ ܫܡܸܥܠܹܐ ܝܘܿܚܲܢܵܢ ܓܵܘ ܒܹܝܬ ܐܲܣܝܼܪܹ̈ܐ ܦܘܼܠܚܵܢܹ̈ܐ 3 ܕܡܫܝܼܚܵܐ: ܫܘܼܕܸܪܹܐ ܒܝܸܕ ܬܲܠܡܝܼܕܘܼ̈ܗܝ. ܘܐܡܸܪܹܐ ܐܸܠܹܗ: 4 ܐܲܢ̄ܬ ܝܼܘܸܬ ܗ̇ܘ ܕܐܵܬܹܐ: ܝܲܢ ܠܐܚܹܪ̄ܢܵܐ ܣܵܦܪܵܚ. ܝܼܫܘܿܥ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܡܲܕܸܥܡܘܿܢ ܠܝܘܿܚܲܢܵܢ ܐܵܢܝܼ 5 ܕܒܸܫܡܲܥܝܵܐ ܝܬܘܿܢ ܘܒܸܚܙܵܝܵܐ. ܣܸܡܝܹ̈ܐ ܒܸܚܙܵܝܵܐ ܝܢܵܐ: ܘܫܸܠܹ̈ܐ ܒܸܚܕܵܪܵܐ ܝܢܵܐ: ܘܓܸܪ̈ܒ̣ܵܢܹܐ ܦܝܵܫܵܐ ܝܢܵܐ ܕܘܼܟܝܹܐ: ܘܟܲܪܹ̈ܐ ܒܸܫܡܲܥܝܵܐ ܝܢܵܐ: ܘܡܝܼܬܹ̈ܐ ܦܝܵܫܵܐ ܝܢܵܐ ܡܘܼܩܸܡܹܐ: ܘܡܸܣܟܹܢܹ̈ܐ ܦܝܵܫܵܐ 6 ܝܢܵܐ ܡܘܼܫܚܸܕܹܐ. ܘܛܘܼܒ̣ܵܐ ܠܗ̇ܘ ܕܠܵܐ [23] ܟܵܦܸܪ ܒܝܼܝܼ. 7 ܘܟܲܕ ܐܙܸܠܘܿܢ: ܫܘܼܪܹܠܹܐ ܝܼܫܘܿܥ ܠܹܐܡܵܪܵܐ ܠܟܸܢܫܹ̈ܐ ܥܲܠ ܝܘܿܚܲܢܵܢ: ܡܘܼܕܝܼ ܦܠܸܛܠܵܘܟ̣ܘܿܢ ܠܒܲܪܝܼܵܐ ܠܸܚܙܵܝܵܐ: ܙܹܠܵܐ ܕܡ̣ܢ ܦܵܘܚܵܐ 8 ܡܘܼܫܥܸܫܵܐ. ܐܸܠܵܐ ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܐܢܵܫܵܐ ܕܓ̰ܘܼܠܹ̈ܐ ܪ̈ܵܟܝܼܟܹܐ ܠܒ̣ܝܼܫܵܐ: ܗܵܐ: ܐܵܢܝܼ ܕ( ܓ̰ܘܼܠܹܐ) ܪ̈ܵܟܝܼܟܹܐ ܟܹܐ ܠܵܒ̣ܫܝܼ ܓܵܘ 9 ܒܵܬܹ̈ܐ ܕܡܲܠܟܹ̈ܐ ܝܢܵܐ. ܐܸܠܵܐ ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܢܒ̣ܝܼܵܐ: ܗܹܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܘܙܵܘܕܵܐ ܡ̣ܢ ܢܒ̣ܝܼܵܐ. 10 ܣܵܒܵܒ ܕܐܵܗܵܐ ܝܠܹܐ ܗ̇ܘ ܕܥܲܠܘܼܗܝ ܟܬܝܼܒ̣ܵܐ ܝܠܹܐ: ܗܵܐ: ܐܵܢܵܐ ܫܵܕܘܿܪܹܐ ܝܘܸܢ ܡܲܠܲܐܟ̣ܝܼ ܩܵܕ̄ܡ ܦܵܬܘܼܟ: ܕܒܸܬ ܗܵܕܸܪ ܐܘܼܪܚܘܼܟ 11 ܩܵܕ̄ܡܘܼܟ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܵܐ ܩܸܡܠܹܐ ܒܗ̄ܘ̈ܝܹܐ ܡ̣ܢ ܒܲܟ̣ܬܵܬܹ̈ܐ ܕܒܘܼܫ ܓܘܼܪܵܐ ܡ̣ܢ ܝܘܿܚܲܢܵܢ ܡܲܥܡܕܵܢܵܐ: ܐܝܼܢܵܐ ܙܥܘܿܪܵܐ ܒܡܲܠܟܘܼܬܵܐ ܕܫܡܲܝܵܐ ܓܘܼܪܵܐ ܝܠܹܐ ܡܸܢܹܗ. 12 ܘܡ̣ܢ ܝܘܿܡܵܢܹ̈ܐ ܕܝܘܿܚܲܢܵܢ ܡܲܥܡܕܵܢܵܐ ܘܗܲܠ ܐܵܕܝܼܵܐ: ܡܲܠܟܘܼܬܵܐ ܕܫܡܲܝܵܐ ܒܚܲܝܠܵܐ ܟܹܐ ܦܵܝܫܵܐ ܠܘܼܒܸܠܬܵܐ: ܘܥܵܒ̣ܕܵܢܹ̈ܐ ܕܚܲܝܠܵܐ ܟܹܐ 13 ܓ̰ܵܢܘܝܼ ܠܵܗ̇. ܣܵܒܵܒ ܟܠܵܝ ܢܒ̣̈ܝܹܐ ܘܢܵܡܘܿܣܵܐ ܗܲܠ ܝܘܿܚܲܢܵܢ 14 ܢܘܼܒܸܠܘܿܢ. ܘܐܸܢ ܒܵܣܡܵܐ ܠܵܘܟ̣ܘܿܢ ܠܩܵܒܘܿܠܹܐ: ܐܵܗܵܐ ܝܠܹܐ 15 ܐܹܠܝܼܵܐ ܕܝܼܠܹܐ ܗܕܝܼܪܵܐ ܠܹܐܬܵܝܵܐ. ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ: ܫܲܡܸܥ.

16 ܐܝܼܢܵܐ ܠܡ̇ܢ ܡܲܕܡܸܢܵܗ̇ ܐܵܗܵܐ ܐܘܼܓ̰ܵܓ̣: ܟܹܐ ܕܵܡܝܵܐ ܠܝܵܠܹ̈ܐ 17 ܕܝܵܬܒ̣ܝܼ ܒܫܘܼܩܹ̈ܐ: ܘܡܲܩܘܸܚܝܼ ܠܚܲܒ̣ܪ̈ܵܘܵܬܝ. ܘܐܵܡܪܝܼ: ܡܚܹܠܲܢ ܙܘܼܪܢܵܐ ܐܸܠܵܘܟ̣ܘܿܢ: ܘܠܵܐ ܪܩܸܕܠܵܘܟܘܿܢ: ܘܝܹܠܠܲܢ 18 ܐܸܠܵܘܟ̣ܘܿܢ: ܘܠܵܐ ܥܒܸܕܠܵܘܟ̣ܘܿܢ ܬܵܙܝܼ. ܣܵܒܵܒ ܕܐܬܹܠܹܐ ܝܘܿܚܲܢܵܢ ܠܵܐ ܒܹܐܟ̣ܵܠܵܐ ܘܠܵܐ ܒܸܫܬܵܝܵܐ: ܘܐܵܡܪܝܼ: ܕܲܝܘܵܐ ܐܝܼܬ 19 ܠܹܗ. ܐܬܹܠܹܐ ܒܪܘܼܢܹܗ ܕܐܢܵܫܵܐ ܒܹܐܟ̣ܵܠܵܐ ܘܒܸܫܬܵܝܵܐ: ܘܐܵܡܪܝܼ: ܗܵܐ: ܐܢܵܫܵܐ ܐܵܟ̣ܘܿܠܵܐ ܘܫܵܬܝܵܢܵܐ ܕܚܲܡܪܵܐ: ܘܕܵܘܣܬ ܕܕܲܡܓ̣ܵܟ̰̈ܝܹܐ ܘܚܲܛܵܝܹ̈ܐ. ܘܦܸܫܠܹܐ ܡܘܼܟܫܸܛܬܵܐ ܥܵܩܸܠܕܵܪܘܼܬܵܐ ܡ̣ܢ [24] ܦܘܼܠܚܵܢܘܼ̈ܗ̇. 20 ܒܗ̇ܝ ܥܕܵܢܵܐ ܫܘܼܪܹܠܹܐ ܝܼܫܘܿܥ ܠܸܠܝܵܡܵܐ ܠܡܕܝܼܢܵܬܹ̈ܐ: 21 ܕܗ̄ܘܹܠܘܿܢ ܒܝܼܵܝ ܚܲܝܠܘܼ̈ܗܝ ܪܵܒܵܐ: ܕܠܵܐ ܬܘܼܘܸܒܠܘܿܢ. ܘܵܝ ܠܵܟ̣ܝ ܟܘܼܪܙܝܼܢ: ܘܵܝ ܠܵܟ̣ܝ ܒܹܝܬ ܨܲܝܵܕܵܐ: ܣܵܒܵܒ ܐܸܢ ܒܨܘܿܪ ܘܒܨܲܝܕܘܼܢ ܗܵܘܝܼ ܗ̄ܘܵܘ ܐܲܢܹܐ ܚܲܝ̈ܠܹܐ ܕܗ̄ܘܹܠܘܿܢ ܒܝܼܵܘܟ̣ܘܿܢ: ܡ̣ܢ ܓ̰ܲܠܕܹܐ 22 ܒܣܲܩܹ̈ܐ ܘܩܸܛܡܵܐ ܒܸܬ ܬܲܘܸܒܝܼ ܗ̄ܘܵܘ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܨܘܿܪ ܘܠܨܲܝܕܘܿܢ ܒܸܬ ܗܵܘܹܐ ܢܝܵܚܵܐ ܒܝܘܿܡܵܐ 23 ܕܕܝܼܘܵܢ ܙܵܘܕܵܐ ܡ̣ܢ ܕܐܸܠܵܘܟ̣ܘܿܢ. ܘܐܲܢ̄ܬܝܼ: ܟܦܲܪܢܵܚܘܿܢ: ܗܲܠ ܫܡܲܝܵܐ ܒܸܬ [25] ܦܵܝܫܲܬܝ ܡܘܼܪܸܡܬܵܐ: ܗܲܠ ܫܝܘܿܠ [26] ܒܸܬ ܦܵܝܫܲܬܝ ܡܘܼܨܠܝܼܬܵܐ: ܣܵܒܵܒ ܕܐܸܢ ܒܣܕܘܿܡ ܗܵܘܝܼ ܗ̄ܘܵܘ ܐܵܢܝܼ ܚܲܝܠܹ̈ܐ 24 ܕܗ̄ܘܹܠܘܿܢ ܒܝܼܵܟ̣ܝ: ܒܸܬ ܦܵܝܫܵܐ ܗ̄ܘܵܐ ܗܲܠ ܐܸܕܝܘܼ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܲܐܪܥܵܐ ܕܣܕܘܿܡ ܒܸܬ ܗܵܘܹܐ ܢܚܵܝܵܐ ܒܝܘܿܡܵܐ ܕܕܝܼܘܵܢ ܙܵܘܕܵܐ ܡ̣ܢ ܕܐܸܠܵܟ̣ܝ.

25 ܒܗ̇ܘ ܙܲܒ̣ܢܵܐ ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܫܵܟܘܿܪܹܐ ܝܘܸܢ ܐܸܠܘܼܟ: ܝܵܐ ܒܵܒܝܼ: ܡܵܪܵܐ ܕܫܡܲܝܵܐ ܘܐܲܪܥܵܐ: ܕܟܘܼܣܹܠܘܼܟ ܐܲܢܹܐ 26 ܡ̣ܢ ܥܵܩܸܠܕܵܪܹ̈ܐ ܘܦܲܪ̈ܡܝܼܵܢܹܐ: ܘܓܸܠܝܵܝܠܘܼܟ ܠܝܵܠܘܿܢܹ̈ܐ. ܗܹܐ: 27 ܒܵܒܝܼ: ܣܵܒܵܒ ܕܗܲܕܟ̣ܵܐ ܗ̄ܘܹܠܹܐ ܪܸܙܵܝܵܐ ܩܵܕ̄ܡܘܼܟ. ܟܠ ܡܸܢܕܝܼ ܦܸܫܠܹܐ ܣܘܼܦܝܵܐ ܐܸܠܝܼ ܡ̣ܢ ܒܵܒܝܼ ܘܐܢܵܫܵܐ ܠܹܐ ܝܲܕܸܥ ܠܒܪܘܼܢܵܐ ܫܒ̣ܘܿܩ ܡ̣ܢ ܒܵܒܵܐ: ܐܘܼܦ ܠܒܵܒܵܐ ܐܢܵܫܵܐ ܠܹܐ ܝܲܕܸܥ ܫܒ̣ܘܿܩ ܡ̣ܢ ܒܪܘܼܢܵܐ: ܘܠܡ̇ܢ ܕܒܵܣܡܵܐ ܠܹܗ ܒܪܘܼܢܵܐ ܕܓܵܠܹܐ ܠܹܗ. 28 ܬܹܡܘܿܢ ܠܟܸܣܠܝܼ: ܟܠܵܘܟ̣ܘܿܢ ܓ̰ܸܗ̄ܝܹ̈ܐ ܘܫܩܝܼܠܹ̈ܐ ܟܵܪ̈ܵܬܹܐ: 29 ܘܐܵܢܵܐ ܒܸܬ ܡܲܢܝܸܚܸܢܵܘܟ̣ܘܿܢ. ܫܩܘܿܠܘܿܢ ܢܝܼܪܝܼ ܥܲܠܵܘܟ̣ܘܿܢ: ܘܝܠܘܿܦܘܿܢ ܡܸܢܝܼ: ܕܢܝܼܚܵܐ ܝܘܸܢ ܘܡܵܟܝܼܟ̣ܵܐ ܒܠܸܒܵܐ: ܘܒܸܬ 30 ܡܵܫ̄ܟ̰ܚܝܼܬܘܿܢ ܢܝܵܚܵܐ ܠܓܵܢܵܬܵܘ̈ܟ̣ܘܿܢ. ܣܵܒܵܒ ܢܝܼܪܝܼ ܒܵܣܝܼܡܵܐ ܝܠܹܐ: ܘܟܵܪܬܝܼ ܩܵܠܘܿܠܬܵܐ ܝܠܵܐ.

ܩܦܠܐܘܢ: ܝܒ

1 ܒܗ̇ܘ ܙܲܒ̣ܢܵܐ ܒܸܚܕܵܪܵܐ ܗ̄ܘܵܐ ܝܼܫܘܿܥ ܒܫܲܒܬܵܐ ܓܵܘ ܡܲܙܪܲܥܝܵܐ: ܘܬܲܠܡܝܼܕܘܼ̈ܗܝ ܟܦܸܢܘܿܢ: ܘܫܘܼܪܹܠܘܿܢ ܠܸܡܠܵܓܵܐ ܒܘܼܠܹ̈ܐ 2 ܘܠܹܐܟ̣ܵܠܵܐ. ܐܝܼܢܵܐ ܦܪ̈ܝܼܫܹܐ ܟܲܕ ܚܸܙܝܵܝܠܘܿܢ ܐܵܡܪܝܼ ܐܸܠܹܗ: ܗܵܐ: ܬܲܠܡܝܼܕܘܼ̈ܟ ܒܸܥܒ̣ܵܕܵܐ ܝܢܵܐ ܡܸܢܕܝܼ ܕܠܹܐ ܝܠܹܐ ܒܪܹܣܬܘܼܪ 3 ܠܥܸܒ̣ܕܵܐ ܒܫܲܒܬܵܐ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܠܵܐ ܩܪܹܠܵܘܟ̣ܘܿܢ 4 ܡܘܼܕܝܼ ܥܒܸܕܠܹܐ ܕܵܘܝܼܕ ܟܲܕ ܟܦܸܢܹܐ: ܘܐܵܢܝܼ ܕܥܲܡܹܗ. ܕܵܐܟ̣ܝܼ ܐܘܸܪܹܐ ܠܒܲܝܬܵܐ ܕܐܲܠܵܗܵܐ: ܘܠܲܚܡܵܐ ܕܦܵܬܘܿܪܹܗ ܕܡܵܪܝܵܐ ܐܟܸܠܹܐ: ܗ̇ܘ ܕܠܹܐ ܗ̄ܘܵܐ ܒܕܲܣܬܘܼܪ ܐܸܠܹܗ ܠܹܐܟ̣ܵܠܵܐ: ܘܠܵܐ ܠܐܵܢܝܼ 5 ܕܥܲܡܹܗ: ܐܸܠܵܐ ܐܸܢ ܠܟܵܗܢܹ̈ܐ ܒܢܲܦ̮ܫܝܼ. ܝܲܢ ܠܵܐ ܩܪܹܠܵܘܟ̣ܘܿܢ ܒܢܵܡܘܿܣܵܐ: ܕܟܵܗܢܹ̈ܐ ܓܵܘ ܗܲܝܟܠܵܐ ܟܹܐ ܫܵܪܝܼ ܠܫܲܒܬܵܐ: ܘܕܠܵܐ 6 ܠܵܘܡܵܐ ܝܢܵܐ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܘܼܫ 7 ܓܘܼܪܵܐ ܡ̣ܢ ܗܲܝܟܠܵܐ ܐܝܼܬ ܠܲܐܟ̣ܵܐ. ܐܝܼܢܵܐ ܐܸܢ ܗܵܘܝܼܬܘܿܢ ܗ̄ܘܵܘ ܒܝܼܕܲܥܝܵܐ ܡܘܼܕܝܼ ܝܠܹܐ: ܪܲܚܡܹܐ ܒܸܒܲܥܝܵܐ ܝܘܸܢ ܘܠܵܐ ܕܸܒ̣ܚܬܵܐ: ܠܹܐ ܥܵܒ̣ܕܝܼܬܘܿܢ ܗ̄ܘܵܘ ܓܘܼܢܗܵܟܵܪ ܠܐܵܢܝܼ ܕܕܠܵܐ ܠܵܘܡܵܐ ܝܢܵܐ. 8 ܣܵܒܵܒ ܡܵܪܵܐ ܕܫܲܒܬܵܐ ܒܪܘܼܢܹܗ ܕܐܢܵܫܵܐ ܝܠܹܐ. 9 ܘܫܘܼܢܹܠܹܐ ܡ̣ܢ ܬܵܡܵܐ ܘܐܬܹܠܹܐ ܠܟܢܘܼܫܬܵܝ. ܘܗܵܐ: ܚܵܕ̄ 10 ܐܢܵܫܵܐ ܐܝܼܬ ܗ̄ܘܵܐ ܬܵܡܵܐ ܕܐܝܼܕܹܗ ܒܪܝܼܙܬܵܐ: ܘܒܵܩܪܝܼ ܗ̄ܘܵܘ  ܡܸܢܹܗ ܘܐܵܡܪܝܼ: ܐܸܢ ܒܕܲܣܬܘܼܪ ܝܼܠܵܐ ܒܫܲܒܬܵܐ ܠܒܵܣܘܿܡܹܐ: 11 ܕܡܵܚܝܼ ܗ̄ܘܵܘ ܕܪܗܲܩܹܗ. ܐܝܼܢܵܐ ܐܡܸܪܹܐ ܐܸܠܵܝ: ܡܵܢܝܼ ܝܠܹܐ ܐܢܵܫܵܐ ܡܸܢܵܘܟ̣ܘܿܢ ܕܐܝܼܬ ܠܹܗ ܚܵܕ̄ ܥܸܪܒܵܐ: ܘܐܸܢ ܢܵܦܸܠ ܒܒܹܪܵܐ 12 ܒܝܘܿܡܵܐ ܕܫܲܒܬܵܐ: ܠܹܐ ܕܵܒܸܩ ܘܡܲܩܸܡ ܠܹܗ. ܐܝܼܢܵܐ ܟܡܵܐ ܙܵܘܕܵܐ ܝܠܹܐ ܒܲܪܢܵܫܵܐ ܡ̣ܢ ܥܸܪܒܵܐ: ܒܲܣ ܒܕܲܣܬܘܼܪ ܝܼܠܵܐ 13 ܒܫܲܒܬܵܐ ܠܸܥܒ̣ܵܕܵܐ ܕܨܦܵܝܝܼ. ܗ̇ܝܓܵܗ ܐܡܸܪܹܐ ܠܗ̇ܘ ܐܢܵܫܵܐ: ܦܵܫܸܛ ܐܝܼܕܘܼܟ: ܘܦܘܼܫܛܵܠܹܐ: ܘܬܪܸܨܠܵܐ: ܐܲܝܟ ܕܗ̇ܝ ܐܚܹܪ̄ܬܵܐ. 14 ܘܦܠܸܛܠܘܿܢ ܦܪ̈ܝܼܫܹܐ: ܘܥܒܸܕܠܘܿܢ ܪܵܐܝܝܼ ܥܲܠܘܼܗܝ 15 ܕܬܵܠܩܝܼ ܗ̄ܘܵܘ ܠܹܗ. ܐܝܼܢܵܐ ܝܼܫܘܿܥ ܝܕܸܥܠܹܐ: ܘܫܘܼܢܹܠܹܐ ܡ̣ܢ ܬܵܡܵܐ: ܘܐܙܸܠܘܿܢ ܒܵܬ̄ܪܹܗ ܟܸܢܫܹ̈ܐ ܪܵܒܵܐ: ܘܒܘܼܣܸܡܠܹܐ ܠܟܠܵܝ. 15 ܘܢܓܸܘܠܹܐ ܒܝܼܵܝ ܕܠܵܐ ܓܵܠܝܼ ܗ̄ܘܵܘ ܠܹܗ. ܕܦܵܝܸܫ ܬܘܼܡܸܡܵܐ 17 18 ܡܸܢܕܝܼ ܕܦܸܫܠܹܐ ܐܡܝܼܪܵܐ ܒܝܸܕ ܢܒ̣ܝܼܵܐ: ܕܐܡܸܪܹܐ. ܗܵܐ: ܪܹܓܝܼ ܕܓܘܼܒܹܠܝܼ: ܡܘܼܚܸܒܝܼ ܕܒܝܹܗ ܓܵܢܝܼ ܒܸܒܣܵܡܘܼܗ̇ ܝܠܵܐ. ܪܘܼܚܝܼ 19 ܒܸܬ ܡܲܬܒܸܢ ܥܲܠܘܼܗܝ: ܘܕܝܼܘܵܢ ܠܛܵܝܸܦܹ̈ܐ ܒܸܬ. ܡܲܕܸܥ. ܠܹܐ ܡܲܩܪܸܨ: ܘܠܹܐ ܡܲܩܘܸܚ: ܘܐܢܵܫܵܐ ܩܵܠܹܗ ܠܹܐ ܫܲܡܸܥ 20 ܒܥܵܠܘܿܠܹ̈ܐ. ܙܹܠܵܐ ܛܒ̣ܝܼܚܵܐ ܠܹܐ ܬܵܒܸܪ: ܘܫܪܵܝܵܐ ܕܛܲܦܛܸܦܵܐ 21 ܠܹܐ ܡܲܟ̰ܡܹܐ: ܗܲܠ ܕܦܵܠܸܛ ܕܝܼܘܵܢ ܠܓ̣ܵܠܸܒܘܼܬܵܐ. ܘܒܫܸܡܹܗ ܛܵܝܸܦܹ̈ܐ ܒܸܬ ܣܵܒܪܝܼ.

22 ܗ̇ܝܓܵܗ ܦܸܫܠܹܐ ܡܘܼܬ̄ܝܵܐ ܠܟܸܣܠܹܗ ܚܵܕ̄ ܕܲܝܘܵܢܵܐ ܕܠܲܥܠܵܐ ܘܣܸܡܝܵܐ: ܘܒܘܼܣܸܡܠܹܗ: ܕܵܐܟ̣ܝܼ ܕܠܲܥܠܵܐ ܘܣܸܡܝܵܐ ܗܲܡܙܸܡ 23 ܘܚܵܙܹܐ ܗ̄ܘܵܐ. ܘܥܵܓ̰ܒܝܼ ܗ̄ܘܵܘ ܟܠܵܝ ܟܸܢܫܹ̈ܐ ܘܐܵܡܪܝܼ: ܠܹܐ 24 ܝܠܹܐ ܐܵܗܵܐ ܒܪܘܼܢܹܗ ܕܕܵܘܝܼܕ. ܐܝܼܢܵܐ ܦܪ̈ܝܼܫܹܐ ܟܲܕ ܫܡܸܥܠܘܿܢ: ܐܵܡܪܝܼ: ܐܵܗܵܐ ܠܹܐ ܝܠܹܐ ܦܵܠܘܿܛܹܐ ܕܲܝܘܹ̈ܐ: ܫܒ̣ܘܿܩ ܡ̣ܢ 25 ܒܒܥܸܠܙܒ̣ܘܼܒ̣ ܪܹܫܵܐ ܕܕܲܝܘܹ̈ܐ. ܐܝܼܢܵܐ ܝܼܫܘܿܥ ܝܕܸܥܠܹܐ ܚܘܼܫܵܒ̣ܵܝ̈: ܘܐܡܸܪܹܐ ܐܸܠܵܝ: ܟܠ ܡܲܠܟܘܼܬܵܐ ܕܦܵܝܫܵܐ ܕܘܼܒܵܪ ܥܲܠ ܓܵܢܘܼܗ̇ ܒܸܬ ܚܵܪܒ̣ܵܐ: ܘܟܠ ܒܲܝܬܵܐ ܘܡܕܝܼܢ̄ܬܵܐ ܕܦܵܝܸܫ ܕܘܼܒܵܪ ܥܲܠ 26 ܓܵܢܹܗ ܠܹܐ ܟܵܠܹܐ. ܘܐܸܢ ܣܵܛܵܢܵܐ ܠܣܵܛܵܢܵܐ ܦܵܠܸܛ: ܥܲܠ ܓܵܢܹܗ ܦܸܫܠܹܐ ܕܘܼܒܵܪ. ܒܲܣ ܕܵܐܟ̣ܝܼ ܒܸܬ ܟܵܠܝܵܐ ܡܲܠܟܘܼܬܹܗ. 27 ܘܐܸܢ ܐܵܢܵܐ ܒܒܥܸܠܙܒ̣ܘܿܒ̣ ܦܵܠܘܿܛܹܐ ܝܘܸܢ ܕܲܝܘܹ̈ܐ: ܒܢܘܼܢܵܘ̈ܟ̣ܘܿܢ ܒܡܵܢܝܼ ܟܹܐ ܦܵܠܛܝܼ ܠܗ̄ܘܿܢ: ܣܵܒܵܒ ܕܐܵܗܵܐ ܐܵܢܝܼ ܒܸܬ ܗܵܘܝܼ 28 ܐܸܠܵܘܟ̣ܘܿܢ ܕܲܝܵܢܹ̈ܐ. ܘܐܸܢ ܒܪܘܼܚܵܐ ܕܐܲܠܵܗܵܐ ܐܵܢܵܐ ܦܵܠܘܿܛܹܐ ܝܘܸܢ 29 ܕܲܝܘܹ̈ܐ: ܒܲܣ ܩܘܼܪܒܸܢܵܐ ܥܲܠܵܘܟ̣ܘܿܢ ܡܲܠܟܘܼܬܵܐ ܕܐܲܠܵܗܵܐ. ܝܲܢ ܕܵܐܟ̣ܝܼ ܡܵܨܹܐ ܐܢܵܫܵܐ ܐܵܘܸܪ ܠܒܲܝܬܹܗ ܕܙܲܪܒܵܢܵܐ ܘܡܸܢܕ̈ܝܹܗ ܣܵܠܸܒ: ܐܸܢ ܠܵܐ ܕܩܵܕ̄ܡܵܝܬܵܐ ܐܵܣܸܪ ܠܙܲܪܒܵܢܵܐ: ܘܗ̇ܝܓܵܗ ܒܸܬ ܣܵܠܸܒ 30 ܒܲܝܬܹܗ. ܡܢ ܕܠܵܐ ܗܵܘܹܐ ܥܲܡܝܼ ܕܲܪܩܘܼܒ̣ܠܝܼ ܝܠܹܐ: ܘܡ̇ܢ 31 ܕܠܵܐ ܓ̰ܲܡܸܥ ܥܲܡܝܼ ܟܹܐ ܒܲܪܒܸܙ. ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܟܠ ܚܛܝܼܬܵܐ ܘܓܘܼܕܵܦܵܐ ܒܸܬ ܦܵܝܫܝܼ ܫܒ̣ܝܼܩܹܐ ܠܒܢܲܝ̈ܢܵܫܵܐ: ܐܝܼܢܵܐ ܓܘܼܕܵܦܵܐ ܕܥܲܠ ܪܘܼܚܵܐ ܠܹܐ ܦܵܝܸܫ ܫܒ̣ܝܼܩܵܐ 32 ܠܒܢܲܝ̈ܢܵܫܵܐ. ܘܟܠ ܡ̇ܢ ܕܐܵܡܸܪ ܗܹܡܸܙܡܵܢ ܥܲܠ ܒܪܘܼܢܹܗ ܕܐܢܵܫܵܐ: ܒܸܬ ܦܵܝܸܫ ܫܒ̣ܝܼܩܵܐ ܐܸܠܹܗ: ܐܝܼܢܵܐ ܟܠ ܕܥܲܠ ܪܘܼܚܵܐ ܕܩܘܼܕܫܵܐ ܐܵܡܸܪ: ܠܹܐ ܦܵܝܸܫ ܫܒ̣ܝܼܩܵܐ ܐܸܠܹܗ: ܠܵܐ ܒܐܵܗܵܐ ܥܵܠܡܵܐ: 33 ܘܠܵܐ ܒܥܵܠܡܵܐ ܕܐܵܬܹܐ. ܝܲܢ ܥܒ̣ܘܿܕܘܿܢ ܐܝܼܠܵܢܵܐ ܨܦܵܝܝ ܘܛܥܘܼܢܝܵܬܘܼ̈ܗܝ ܨܦܵܝܝܼ: ܝܲܢ ܥܒ̣ܘܿܕܘܿܢ ܐܝܼܠܵܢܵܐ ܚܸܪܒܵܐ: ܘܛܥܘܼܢܵܝܬܘܼ̈ܗܝ ܚܸܪܒܵܐ. ܣܵܒܵܒ ܡ̣ܢ ܛܥܘܼܢܵܝܬܘܼ̈ܗܝ ܟܹܐ ܦܵܝܸܫ 34 ܝܕܸܥܝܵܐ ܐܝܼܠܵܢܵܐ. ܝܵܐ ܙܲܪܥܵܐ ܕܐܵܟܸܕܢܹ̈ܐ: ܕܵܐܟ̣ܝܼ ܡܵܨܝܼܬܘܿܢ ܛܵܒ̣ܵܬܹ̈ܐ ܠܗܲܡܙܘܼܡܹܐ ܟܲܕ ܒܝܼܫܹ̈ܐ ܝܬܘܿܢ. ܣܵܒܵܒ ܡ̣ܢ ܙܵܘܕܘܼܢܝܘܬܐ 35 ܕܠܸܒܵܐ ܟܹܐ ܗܲܡܙܸܡ ܦܘܼܡܵܐ. ܐܢܵܫܵܐ ܛܵܒ̣ܵܐ ܡ̣ܢ ܚܙܝܼܢܵܐ ܛܵܒ̣ܬܵܐ ܟܹܐ ܦܵܠܸܛ ܛܵܒ̣ܵܬܹ̈ܐ: ܘܐܢܵܫܵܐ ܒܝܼܫܵܐ ܡ̣ܢ ܚܲܙܝܼܢܵܐ ܒܝܼܫܬܵܐ ܟܹܐ 36 ܦܵܠܸܛ ܒܝܼܫܵܬܹ̈ܐ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܗܹܡܸܙܡܵܢ ܒܲܛܝܼܠܬܵܐ ܕܐܵܡܪܝܼ ܒܢܲܝ̈ܢܵܫܵܐ: ܒܸܬ ܝܵܗ̄ܒ̣ܝܼ ܓ̰ܘܼܘܵܒܘܼܗ̇ 37 ܒܝܘܿܡܵܐ ܕܕܝܼܘܵܢ. ܣܵܒܵܒ ܡ̣ܢ ܗܹܡܸܙܡܵܢܘܼ̈ܟ ܒܸܬ ܦܵܝܫܸܬ ܡܘܼܟܫܸܛܵܐ: ܘܡ̣ܢ ܗܹܡܸܙܡܵܢܘܼ̈ܟ ܒܸܬ ܦܵܝܫܸܬ ܥܒ̣ܝܼܕܵܐ ܓܘܼܢܗܵܟܵܪ. 38 ܗ̇ܝܓܵܗ ܓ̰ܘܼܘܸܒܠܘܿܢ ܐܢܵܫܹ̈ܐ ܡ̣ܢ ܣܵܦܪܹ̈ܐ ܘܡ̣ܢ ܦܪ̈ܝܼܫܹܐ: ܒܹܐܡܵܪܵܐ ܐܸܠܹܗ: ܡܲܠܦܵܢܵܐ: ܒܸܒܲܥܝܵܐ ܝܘܵܚ ܕܚܵܙܵܚ ܡܸܢܘܼܟ 39 ܢܝܼܫܲܢܩܵܐ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܐܘܼܓ̰ܵܓ̣ ܒܝܼܫܬܵܐ ܘܩܲܗܒܵܐ ܢܝܼܫܲܢܩܵܐ ܒܸܒܲܥܝܵܐ ܝܠܵܐ: ܘܢܝܼܫܲܢܩܵܐ ܠܹܐ ܦܵܝܸܫ 40 ܝܘܼܗ̄ܒ̣ܵܐ ܐܸܠܵܗ̇: ܫܒ̣ܘܿܩ ܡ̣ܢ ܢܝܼܫܲܢܩܹܗ ܕܝܵܘܢܵܢ ܢܒ̣ܝܼܵܐ. ܣܵܒܵܒ ܕܵܐܟ̣ܝܼ ܕܗ̄ܘܹܠܹܐ ܝܵܘܢܵܢ ܓܵܘ ܟܹܪ̄ܣܵܗ̇ ܕܢܘܼܢܵܐ ܓܘܼܪܬܵܐ ܬܠܵܬ̄ܐ ܐܝܼܡܵܡܹ̈ܐ ܘܬܠܵܬ̄ܐ ܠܲܝܠܵܘܵܬܹ̈ܐ: ܗܲܕܟ̣ܵܐ ܒܸܬ ܗܵܘܹܐ ܒܪܘܼܢܹܗ ܕܐܢܵܫܵܐ ܒܠܸܒܵܗ̇ ܕܐܲܪܥܵܐ ܬܠܵܬ̄ܐ ܐܝܼܡܵܡܹ̈ܐ ܘܬܠܵܬ̄ܐ ܠܲܝܠܵܘܵܬܹ̈ܐ. 41 ܐܢܵܫܹ̈ܐ ܢܝܼܢܘܵܝܹ̈ܐ ܒܸܬ ܩܵܝܡܝܼ ܒܕܝܼܘܵܢ ܥܲܡ ܕܐܵܗܵܐ ܐܘܼܓ̰ܵܓ̣: ܘܒܸܬ ܥܵܒ̣ܕܝܼ ܠܵܗ̇ ܓܘܼܢܵܗܟܵܪ: ܣܵܒܵܒ ܕܐܵܢܝܼ ܬܘܼܘܸܒܠܘܿܢ ܒܟܵܪܘܿܙܘܼܬܹܗ ܕܝܵܘܢܵܢ: ܘܗܵܐ: ܕܒܘܼܫ ܓܘܼܪܵܐ ܡ̣ܢ ܝܵܘܢܵܢ 42 ܠܲܐܟ̣ܵܐ. ܡܲܠܟܬܵܐ ܕܬܲܝܡܢܵܐ ܒܸܬ ܩܵܝܡܵܐ ܒܕܝܼܘܵܢ ܥܲܡ ܕܐܵܗܵܐ ܐܘܼܓ̰ܵܓ̣ ܘܒܸܬ ܥܵܒ̣ܕܵܐ ܠܵܗ̇ ܓܘܼܢܵܗܟܵܪ: ܣܵܒܵܒ ܕܗ̇ܝ ܐܬܹܠܵܐ ܡ̣ܢ ܡܲܪ̈ܙܵܢܹܐ ܕܐܲܪܥܵܐ ܕܫܲܡܥܵܐ ܥܵܩܸܠܕܵܪܘܼܬܹܗ ܕܫܠܹܝܡܘܿܢ: ܘܗܵܐ 43 ܕܒܘܼܫ ܓܘܼܪܵܐ ܡ̣ܢ ܫܠܹܝܡܘܿܢ ܠܲܐܟ̣ܵܐ. ܐܝܼܡܲܢ ܕܪܘܼܚܵܐ ܛܲܡܹܐܐ ܦܵܠܛܵܐ ܡ̣ܢ ܐܢܵܫܵܐ: ܟܹܐ ܚܵܕܪܵܐ ܒܕܘܼܟܵܢܹ̈ܐ ܕܡ̈ܝܼܵܐ ܠܲܝܬ ܒܝܼܵܝ: 44 ܒܸܛܲܥܝܵܐ ܠܢܝܵܚܵܐ: ܘܠܹܐ ܡܵܫ̄ܟ̰ܚܵܐ. ܗ̇ܝܓܵܗ ܟܹܐ ܐܵܡܪܵܐ: ܒܸܬ ܕܵܝܪܵܢ ܠܒܲܝܬܝܼ ܡܐܲܝܟܵܐ ܕܦܠܸܛܠܝܼ: ܘܟܲܕ ܐܵܬܝܵܐ: ܟܹܐ 45 ܡܵܫ̄ܟ̰ܚܵܐ ܠܹܗ ܣܦܝܼܩܵܐ ܘܟܢܝܼܫܵܐ ܘܣܘܼܩܠܵܐ. ܗ̇ܝܓܵܗ ܟܹܐ ܐܵܙܵܠ̄ܐ ܠܵܒܠܵܐ ܥܲܡܵܗ̇ ܫܲܒܲܥ ܪ̈ܘܼܚܹܐ ܐܚܹܪ̄ܢܹܐ ܒܘܼܫ ܒܝܼܫܹ̈ܐ ܡ̣ܢ ܓܵܢܘܼܗ̇: ܘܟܹܐ ܐܵܘܪܝܼ ܘܥܵܡܪܝܼ ܬܵܡܵܐ: ܘܟܹܐ ܗܵܘܝܵܐ ܚܲܪܬܹܗ ܕܗ̇ܘ ܐܢܵܫܵܐ ܒܘܼܫ ܚܸܪܒܵܐ ܡ̣ܢ ܩܵܕ̄ܡܵܝܬܹܗ. ܗܲܕܟ̣ܵܐ ܒܸܬ ܗܵܘܹܐ ܠܐܵܗܵܐ ܐܘܼܓ̰ܵܓ̣ ܒܝܼܫܬܵܐ.

46 ܐܝܼܢܵܐ ܟܲܕ ܗ̇ܘ ܗܲܡܙܘܼܡܹܐ ܗ̄ܘܵܐ ܠܟܸܢܫܹ̈ܐ: ܗܵܐ: ܝܸܡܹܗ ܘܐܵܚܘܿܢܘܵܬܹ̈ܗ ܟܸܠܝܹܐ ܗ̄ܘܵܘ ܠܒܲܕܲܪ: ܒܸܒܲܥܝܵܐ ܕܗܲܡܙܸܡܝܼ 47 ܥܲܡܹܗ. ܘܐܡܸܪܹܐ ܐܸܠܹܗ ܚܵܕ̄ ܐܢܵܫܵܐ: ܗܵܐ: ܝܸܡܘܼܟ ܘܐܵܚܘܿܢܘܵܬܘܼ̈ܟ 48 ܟܸܠܝܹܐ ܝܢܵܐ ܠܒܲܕܲܪ: ܘܒܲܥܝܝܼ ܕܗܲܡܙܸܡܝܼ ܥܲܡܘܼܟ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܠܗ̇ܘ ܕܐܡܸܪܹܐ ܐܸܠܹܗ: ܡܵܢܝܼ ܝܠܵܐ ܝܸܡܝܼ: 49 ܘܡܵܢܝܼ ܝܢܵܐ ܐܵܚܘܿܢܘܵܬܝܼ̈. ܘܦܘܼܫܛܵܠܹܐ ܐܝܼܕܹܗ ܠܟܸܣ 50 ܬܲܠܡܝܼܕܘܼ̈ܗܝ: ܘܐܡܸܪܹܐ: ܗܵܐ: ܝܸܡܝܼ ܘܐܵܚܘܿܢܘܵܬܵܝ̈. ܣܵܒܵܒ ܟܠ ܐܢܵܫܵܐ ܕܥܵܒܸܕ ܪܸܙܵܝܹܗ ܕܒܵܒܝܼ ܕܒܫܡܲܝܵܐ: ܗ̇ܘ ܝܼܠܹܐ ܐܵܚܘܿܢܝ ܘܚܵܬܝܼ ܘܝܸܡܝܼ.

ܩܦܠܐܘܢ: ܝܓ

1 ܒܗ̇ܘ ܝܘܿܡܵܐ ܦܠܸܛܠܹܐ ܝܼܫܘܿܥ ܡܢ ܒܲܝܬܵܐ ܘܝܬܸܒ̣ܠܹܐ ܥܲܠ 2 ܡܲܪܙܵܐ ܕܝܵܡܵܐ. ܘܓ̰ܡܸܥܠܘܿܢ ܠܟܸܣܠܹܗ ܟܸܢܫܹ̈ܐ ܪܵܒܵܐ: ܗܲܕܟ̣ܵܐ ܕܐܣܸܩܠܹܐ ܘܝܬܸܒ̣ܠܹܐ ܓܵܘ ܓܵܡܝܼ: ܘܟܠܹܗ ܟܸܢܫܵܐ ܟܸܠܝܵܐ ܗ̄ܘܵܐ 3 ܥܲܠ ܣܸܦܬܵܐ ܕܝܵܡܵܐ. ܘܗܘܼܡܙܸܡܠܹܐ ܪܵܒܵܐ ܥܲܡܵܝ ܒܡܵܣܵܠܹ̈ܐ 4 ܘܐܵܡܸܪ: ܗܵܐ: ܦܠܸܛܠܹܐ ܙܲܪܥܵܢܵܐ ܠܸܙܪܲܥܝܵܐ. ܘܟܲܕ ܙܪܸܥܠܹܐ: ܐܝܼܬ ܗ̄ܘܵܐ ܕܢܦܸܠܹܐ ܥܲܠ ܡܲܪܙܵܐ ܕܐܘܼܪܚܵܐ: ܘܐܬܹܠܘܿܢ ܛܲܝܪܹ̈ܐ 5 ܘܐܟܸܠܘܿܢ ܐܸܠܹܗ. ܘܐܚܹܪ̄ܢܵܐ ܢܦܸܠܹܐ ܥܲܠ ܐܲܪܥܵܐ ܟܹܐܦܵܢܬܵܐ: ܐܲܝܟܵܐ ܕܠܲܝܬ ܗ̄ܘܵܐ ܥܲܦܪܵܐ ܪܵܒܵܐ: ܘܗܲܪ ܒܗ̇ܝ ܣܵܥܲܬ 6 ܡܘܼܓ̰ܝܸܢܹܐ: ܣܵܒܵܒ ܕܠܲܝܬ ܗ̄ܘܵܐ ܥܘܼܡܩܵܐ ܕܐܲܪܥܵܐ. ܐܝܼܢܵܐ ܟܲܕ ܙܪܸܩܠܹܐ ܫܸܡܫܵܐ ܚܸܡܠܹܐ: ܘܣܵܒܵܒ ܕܠܲܝܬ ܗ̄ܘܵܐ ܠܹܗ 7 ܥܸܩܪܵܐ: ܒܪܸܙܠܹܐ. ܘܐܚܹܪ̄ܢܵܐ ܢܦܸܠܹܐ ܓܵܘ ܟܸܬܘܹ̈ܐ: ܘܐܣܸܩܠܘܿܢ 8 ܟܸܬܘܹ̈ܐ ܘܚܢܸܩܠܘܿܢ ܐܸܠܹܗ. ܐܝܼܢܵܐ ܐܚܹܪ̄ܢܵܐ ܢܦܸܠܹܐ ܒܐܲܪܥܵܐ ܨܦܵܝܝܼ: ܘܝܸܗܒܸܠܹܐ ܛܥܘܼܢܝܵܬܹ̈ܐ: ܐܝܼܬ ܗ̄ܘܵܐ ܕܡܵܐܐ: ܘܐܝܼܬ ܗ̄ܘܵܐ 9 ܕܐܸܫܬܝܼ: ܘܐܝܼܬ ܗ̄ܘܵܐ ܕܬܠܵܬ̄ܝܼ. ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ: ܫܲܡܸܥ.

10 ܘܐܬܹܠܘܿܢ ܬܲܠܡܝܼܕܘܼ̈ܗܝ ܘܐܡܸܪܘܿܢ ܐܸܠܹܗ: ܩܵܡܘܿܕܝܼ 11 ܒܡܵܣܵܠܹ̈ܐ ܗܲܡܙܘܼܡܹܐ ܝܘܸܬ ܥܲܡܵܝ. ܘܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܐܸܠܵܘܟ̣ܘܿܢ ܝܘܼܗ̄ܒ̣ܵܐ ܝܠܹܐ ܠܝܼܕܲܥܝܵܐ ܣܸܪܹ̈ܐ ܕܡܲܠܟܘܼܬܵܐ 12 ܕܫܡܲܝܵܐ: ܐܝܼܢܵܐ ܠܐܵܢܝܼ ܠܹܐ ܝܠܹܐ ܝܘܼܗ̄ܒ̣ܵܐ. ܣܵܒܵܒ ܠܡ̇ܢ ܕܐܝܼܬ ܠܹܗ: ܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܹܗ ܘܒܸܬ ܙܵܝܸܕ ܐܸܠܹܗ: ܘܠܡ̇ܢ ܕܠܲܝܬ ܠܹܗ: ܘܐܘܼܦ ܗ̇ܘ ܕܐܝܼܬ ܠܹܗ ܒܸܬ ܦܵܝܸܫ 13 ܫܩܝܼܠܵܐ ܡܸܢܹܗ. ܣܵܒܵܒ ܕܐܵܗܵܐ ܒܡܵܣܵܠܹ̈ܐ ܗܲܡܙܘܼܡܹܐ ܝܘܸܢ ܥܲܡܵܝ: ܣܵܒܵܒ ܕܚܙܵܝܵܐ ܠܹܐ ܚܵܙܝܼ: ܘܫܡܲܥܝܵܐ ܠܹܐ ܫܲܡܥܝܼ: ܘܠܹܐ 14 ܦܲܪܡܝܼ. ܘܦܵܝܫܵܐ ܝܠܵܐ ܬܘܼܡܸܡܬܵܐ ܒܝܼܵܝ ܢܒ̣ܝܼܘܼܬܹܗ ܕܐܹܫܲܥܝܵܐ ܢܒ̣ܝܼܵܐ ܕܐܡܸܪܹܐ: ܕܫܡܲܥܝܵܐ ܒܸܬ ܫܲܡܥܝܼܬܘܿܢ ܘܠܹܐ ܦܲܪܡܝܼܬܘܿܢ: 15 ܘܚܙܵܝܵܐ ܒܸܬ ܚܵܙܝܼܬܘܿܢ ܘܠܹܐ ܝܲܕܥܝܼܬܘܿܢ. ܣܵܒܵܒ ܕܚܠܸܥܡܠܹܐ ܠܸܒܹܗ ܕܐܵܗܵܐ ܛܵܝܸܦܵܐ: ܘܒܢܵܬܝܵܬܵܝ̈ ܒܝܵܩܘܿܪܘܼܬܵܐ ܫܡܸܥܠܘܿܢ: ܘܥܲܝܢܵܝ̈ ܥܟ̰ܸܡܠܘܿܢ: ܕܠܵܐ ܚܵܙܝܼ ܒܥܲܝܢܵܝ̈: ܘܫܲܡܥܝܼ ܒܢܵܬܝܵܬܵܝ̈: 16 ܘܦܲܪܡܝܼ ܒܠܸܒܵܝ: ܘܕܵܝܪܝܼ ܘܒܵܣܡܸܢܘܿܢ. ܐܝܼܢܵܐ ܕܝܼܵܘܟ̣ܘܿܢ: ܛܘܼܒ̣ܵܐ ܠܥܲܝܢܵܘ̈ܟ̣ܘܿܢ ܕܟܹܐ ܚܵܙܝܼ: ܘܠܢܵܬܝܵܬܵܘ̈ܟ̣ܘܿܢ ܕܟܹܐ 17 ܫܲܡܥܝܼ. ܣܵܒܵܒ ܕܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܪܵܒܵܐ ܢܒ̣̈ܝܹܐ ܘܙܲܕܝܼܩܹ̈ܐ ܫܘܼܗ̄ܘܸܬܠܘܿܢ ܠܸܚܙܵܝܵܐ ܡܸܢܕܝܼ ܕܒܸܚܙܵܝܵܐ ܝܬܘܿܢ: ܘܠܵܐ ܚܙܹܠܘܿܢ: ܘܠܸܫܡܲܥܝܵܐ ܡܸܢܕܝܼ ܕܒܸܫܡܲܥܝܵܐ ܝܬܘܿܢ: ܘܠܵܐ ܫܡܸܥܠܘܿܢ.

18 ܐܝܼܢܵܐ ܐܲܚܬܘܿܢ ܫܡܸܥܡܘܿܢ ܡܵܣܵܠܵܐ ܕܙܲܪܥܵܢܵܐ. ܟܠ 19 ܕܫܲܡܸܥ ܗܹܡܸܙܡܵܢ ܕܡܲܠܟܘܼܬܵܐ ܘܠܵܐ ܦܲܪܡܹܐ ܠܵܗ̇: ܟܹܐ ܐܵܬܹܐ ܒܝܼܫܵܐ ܘܟܹܐ ܓ̰ܵܢܸܘ ܡܸܢܕܝܼ ܕܝܼܠܹܐ ܙܸܪܥܝܵܐ ܒܠܸܒܹܗ. ܐܵܗܵܐ ܝܠܹܐ 20 ܗ̇ܘ ܕܥܲܠ ܡܲܪܙܵܐ ܕܐܘܼܪܚܵܐ ܦܸܫܠܹܐ ܙܸܪܥܝܵܐ. ܘܗ̇ܘ ܕܥܲܠ ܐܲܪܥܵܐ ܟܹܐܦܵܢܬܵܐ ܦܸܫܠܹܐ ܙܸܪܥܝܵܐ: ܗ̇ܘ ܝܼܠܹܐ ܕܫܲܡܸܥ ܗܹܡܸܙܡܵܢ: 21 ܘܕܲܪܣܵܥܲܬ ܒܚܲܕܘܼܬܵܐ ܩܵܒܸ̇ܠ ܠܵܗ̇. ܐܝܼܢܵܐ ܠܲܝܬ ܠܹܗ ܥܸܩܪܵܐ ܒܓܵܢܹܗ: ܐܸܠܵܐ ܕܙܲܒ̣ܢܵܐ ܝܠܹܐ: ܘܐܝܼܡܲܢ ܕܗ̄ܘܹܠܹܐ ܐܘܼܠܨܵܢܵܐ 22 ܝܲܢ ܛܪܵܕܬܵܐ ܣܵܒܵܒ ܕܗܹܡܸܙܡܵܢ: ܓ̰ܲܠܕܹܐ [27] ܟܹܐ ܟܵܦܸܪ. ܘܗ̇ܘ ܕܓܵܘ ܟܸܬܘܹ̈ܐ ܦܸܫܠܹܐ ܙܸܪܥܝܵܐ: ܗ̇ܘ ܝܼܠܹܐ ܕܫܲܡܸܥ ܗܹܡܸܙܡܵܢ: ܘܚܲܡ ܕܐܵܗܵܐ ܥܵܠܡܵܐ ܘܚܸܠܛܘܼܢܝܘܼܬܵܐ ܕܕܵܘܸܠܬܵܐ ܟܹܐ ܚܵܢܩܝܼ 23 ܠܵܗ̇ ܗܹܡܸܙܡܵܢ: ܘܟܹܐ ܗܵܘܝܵܐ ܕܠܵܐ ܛܥܘܼܢܝܵܬܹ̈ܐ. ܐܝܼܢܵܐ ܗ̇ܘ ܕܥܲܠ ܐܲܪܥܵܐ ܨܦܵܝܝܼ ܦܸܫܠܹܐ ܙܸܪܥܝܵܐ: ܗ̇ܘ ܝܼܠܹܐ ܕܫܲܡܸܥ ܗܹܡܸܙܡܵܢ: ܘܦܲܪܡܹܐ (ܠܵܗ̇): ܘܝܵܗ̄ܒܸܠ ܛܥܘܼܢܝܵܬܹ̈ܐ: ܘܥܵܒܸܕ: ܐܝܼܬ ܕܡܵܐܐ: ܘܐܝܼܬ ܕܐܸܫܬܝܼ: ܘܐܝܼܬ ܕܬܠܵܬ̄ܝܼ.

24 ܡܵܣܵܠܵܐ ܐܚܹܪ̄ܢܵܐ ܡܘܼܬܸܒ̣ܠܹܐ ܩܵܕ̄ܡܝܼ ܘܐܡܸܪܹܐ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܐܢܵܫܵܐ ܕܙܪܸܥܠܹܐ ܒܲܪܙܲܪܥܵܐ ܨܦܵܝܝܼ 25 ܒܚܲܩܠܹܗ. ܘܟܲܕ ܕܡܸܟ̣ܠܘܿܢ ܐܢܵܫܹ̈ܐ: ܐܬܹܠܹܐ ܕܸܫܡܸܢܹܗ 26 ܘܙܪܸܥܠܹܐ ܙܝܼܘܵܢܹ̈ܐ ܒܓܵܘܵܐ ܕܚܸܛܹ̈ܐ ܘܐܙܸܠܹܐ. ܐܝܼܢܵܐ ܟܲܕ ܡܘܼܓ̰ܝܸܢܹܐ ܝܸܩܢܵܐ ܘܥܒܸܕܠܹܐ ܛܥܘܼܢܝܵܬܹ̈ܐ: ܗ̇ܝܓܵܗ ܦܸܫܠܘܿܢ 27 ܚܸܙܝܹܐ ܐܘܼܦ ܙܝܼܘܵܢܹ̈ܐ. ܘܐܬܹܠܘܿܢ ܪܹ̈ܓܵܘܵܬܹܐ ܕܡܵܪܹܐ ܒܲܝܬܵܐ ܘܐܡܸܪܘܿܢ ܐܸܠܹܗ: ܐܵܓ̣ܝܲܢ: ܒܲܪܙܲܪܥܵܐ ܨܦܵܝܝܼ ܠܵܐ ܙܪܸܥܠܘܼܟ 28 ܒܚܲܩܠܘܼܟ: ܡܐܲܝܟܵܐ ܐܝܼܬ ܒܝܹܗ ܙܝܼܘܵܢܹ̈ܐ. ܘܗ̇ܘ ܐܡܸܪܹܐ ܐܸܠܵܝ: ܐܢܵܫܵܐ ܕܸܫܡܸܢ ܥܒܸܕܠܹܐ ܐܵܗܵܐ: ܐܵܡܪܝܼ ܐܸܠܹܗ ܪܹ̈ܓܵܘܵܬܘܼܗܝ: 29 ܒܲܥܝܸܬ ܕܐܵܙܵܠ̄ܚ ܓܵܒܵܚ ܠܗ̄ܘܿܢ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܠܵܐ: ܠܵܐ ܗ̄ܘܹܐ ܕܟܲܕ ܓܵܒ̇ܝܼܬܘܿܢ ܙܝܼܘܵܢܹ̈ܐ: ܥܵܩܪܝܼܬܘܿܢ ܥܲܡܵܝ 30 ܐܘܼܦ ܚܸܛܹ̈ܐ. ܫܒ̣ܘܿܩܘܿܢ ܕܓܲܪܘܸܣܝܼ ܬܸܪܘܵܝ [28] ܡܸܚܕܵܕܹ̈ܐ ܗܲܠ ܚܸܨܕܵܐ: ܘܒܙܲܒ̣ܢܵܐ ܕܚܸܨܕܵܐ ܒܸܬ ܐܵܡܪܸܢ ܠܚܵܨܵܕܹ̈ܐ: ܓܵܒܹܡܘܿܢ ܩܵܕ̄ܡܵܝܬܵܐ ܙܝܼܘܵܢܹ̈ܐ: ܘܐܣܘܿܪܘܿܢ ܠܗ̄ܘܿܢ ܕܲܪ̈ܙܹܐ ܠܡܵܩܘܿܕܵܝ: ܐܝܢܵܐ ܚܸܛܹ̈ܐ ܓ̰ܲܡܸܥܡܘܿܢ ܠܗ̄ܘܿܢ ܠܐܲܢܒܵܪ̈ܝܼ.

31 ܡܵܣܵܠܵܐ ܐܚܹܪ̄ܢܵܐ ܡܘܼܬܸܒ̣ܠܹܐ ܩܵܕ̄ܡܵܝ ܘܐܡܸܪܹܐ: ܟܹܐ ܕܡܝܐ ܡܲܠܟܘܼܬܵܐ ܕܫܡܲܝܵܐ ܠܕܲܢܕܸܟܬܵܐ ܕܚܲܪܕܵܠ: ܕܫܩܝܼܠܵܠܹܐ ܐܢܵܫܵܐ 32 ܘܙܸܪܥܝܵܠܹܐ ܒܚܲܩܠܹܗ. ܘܗ̇ܝ ܙܥܘܿܪܬܵܐ ܝܠܵܐ ܡ̣ܢ ܟܠܵܝ ܒܲܪܙܲܪ̈ܥܹܐ: ܐܝܼܢܵܐ ܐܝܼܡܲܢ ܕܓܘܼܪܘܸܣܠܵܐ: ܓܘܼܪܬܵܐ ܝܠܵܐ ܡ̣ܢ ܟܠܵܝ ܝܲܪ̈ܩܹܐ: ܘܟܹܐ ܗܵܘܝܵܐ ܐܝܼܠܵܢܵܐ: ܗܲܕܟ̣ܵܐ ܕܐܵܬܝܼ ܛܲܝܪܹ̈ܐ ܕܫܡܲܝܵܐ ܫܵܪܝܼ ܒܦܲܥܘܵܢܘܼ̈ܗ̇.

33 ܡܵܣܵܠܵܐ ܐܚܹܪ̄ܢܵܐ ܐܡܸܪܹܐ ܐܸܠܵܝ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܚܡܝܼܪܵܐ: ܗ̇ܘ ܕܫܩܸܠܵܐ ܒܲܟ̣ܬܵܐ ܛܘܼܡܸܪܵܐ ܒܬܠܵܬ̄ܐ ܟܝܼܘܼ̈ܠܹܐ ܕܩܲܡܚܵܐ: ܗܲܠ ܕܟܠܹܗ ܚܡܸܥܠܹܐ. 34 ܐܲܢܹܐ ܟܠܵܝ ܗܘܼܡܙܸܡܠܹܐ ܝܼܫܘܿܥ ܒܡܵܣܵܠܹ̈ܐ ܠܟܸܢܫܹ̈ܐ: ܘܕܠܵܐ 35 ܡܵܣܵܠܹ̈ܐ ܠܹܐ ܗܲܡܙܸܡ ܗ̄ܘܵܐ ܥܲܡܵܝ. ܕܦܵܝܸܫ ܬܘܼܡܸܡܵܐ ܡܸܢܕܝܼ ܕܐܡܝܼܪܵܐ ܗ̄ܘܵܐ ܒܝܸܕ ܢܒ̣ܝܼܵܐ: ܕܐܡܸܪܹܐ: ܒܸܬ ܦܵܬܚܸܢ ܦܘܼܡܝ ܒܡܵܣܵܠܹ̈ܐ: ܘܒܸܬ ܡܲܢܒܸܥܢ ܫܘܼܠܹ̈ܐ ܟܸܣܝܹ̈ܐ ܕܡ̣ܢ ܩܵܕ̄ܡ 36 ܒܸܢܝܲܬܹ̈ܗ ܕܥܵܠܡܵܐ. ܗ̇ܝܓܵܗ ܫܒܸܩܠܹܐ ܝܼܫܘܿܥ ܠܟܸܢܫܹ̈ܐ ܘܐܬܹܠܹܐ ܠܒܲܝܬܵܐ: ܘܐܬܹܠܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ ܘܐܵܡܪܝܼ 37 ܐܸܠܹܗ: ܦܵܫܸܩ ܠܲܢ ܗ̇ܘ ܡܵܣܵܠܵܐ ܕܙܝܼܘܵܢܹ̈ܐ ܘܕܚܲܩܠܵܐ. ܘܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܗ̇ܘ ܕܙܪܸܥܠܹܐ ܒܲܪܙܲܪܥܵܐ ܨܦܵܝܝܼ 38 ܒܪܘܼܢܹܗ ܕܐܢܵܫܵܐ ܝܠܹܐ. ܚܲܩܠܵܐ ܥܵܠܡܵܐ ܝܠܵܐ: ܘܒܲܪܙܲܪܥܵܐ ܨܦܵܝܝܼ: ܒܢܘܼܢܹ̈ܐ ܕܡܲܠܟܘܼܬܵܐ ܝܢܵܐ: ܐܝܼܢܵܐ ܙܝܼܘܵܢܹ̈ܐ ܒܢܘܼܢܹ̈ܐ 39 ܕܒܝܼܫܵܐ ܝܢܵܐ. ܕܸܫܡܸܢ ܕܙܸܪܥܝܵܝܠܹܐ ܐܲܢܹܐ ܐܵܟܹܠܩܲܪܨܵܐ ܝܠܹܐ. ܚܸܨܕܵܐ 40 ܬܝܵܡܹܗ ܕܥܵܠܡܵܐ ܝܠܹܐ: ܘܚܵܨܵܕܹ̈ܐ ܡܲܠܲܐܟܹ̈ܐ ܝܢܵܐ. ܕܵܐܟ̣ܝܼ ܗܲܕܟ̣ܵܐ ܕܦܵܝܫܝܼ ܓܘܼܒ̇ܝܹܐ ܙܝܼܘܵܢܹ̈ܐ ܘܝܵܩܕܝܼ ܒܢܘܪܵܐ: ܗܲܕܟ̣ܵܐ ܒܸܬ ܗܵܘܹܐ 41 ܒܬܝܵܡܹܗ ܕܥܵܠܡܵܐ. ܒܸܬ ܫܵܕܸܪ ܒܪܘܼܢܹܗ ܕܐܢܵܫܵܐ ܡܲܠܲܐܟ̣ܘܼ̈ܗܝ: ܘܒܸܬ ܓܵܒܝܼ ܡ̣ܢ ܡܲܠܟܘܼܬܹܗ ܟܠܵܝ [29] ܟܦܘܼܪ̈ܝܹܐ ܘܥܵܒ̣ܕܵܢܹ̈ܐ 42 ܕܥܵܘܠܵܐ. ܘܒܸܬ ܕܵܪܝܼ ܠܗ̄ܘܿܢ ܒܐܲܬܘܿܢܵܐ ܕܢܘܼܪܵܐ. ܬܵܡܵܐ ܒܸܬ 43 ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ. ܗ̇ܝܓܵܗ ܙܲܕܝܼܩܹ̈ܐ ܒܸܬ ܒܲܗ̄ܪܸܢܝܼ ܐܲܝܟ ܫܸܡܫܵܐ ܒܡܲܠܟܘܼܬܵܐ ܕܒܵܒܵܝ. ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܲܡܸܥ: ܫܲܡܸܥ.

44 ܡܸܕܪܹܐ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܚܲܙܝܼܢܵܐ ܕܛܘܼܫܝܼܬܵܐ ܒܚܲܩܠܵܐ: ܗ̇ܝ ܕܡܘܼܫ̄ܟ̰ܚܵܠܹܐ ܐܢܵܫܵܐ ܘܛܘܼܫܵܝܠܹܐ: ܘܡ̣ܢ ܚܲܕܘܼܬܹܗ ܐܙܹܠܹܐ ܙܘܼܒܸ̇ܢܹܐ ܟܠ ܡܸܢܕܝܼ ܕܐܝܼܬ ܗ̄ܘܵܐ ܠܹܗ: ܘܙܒ̣ܝܼܢܵܠܹܐ ܗ̇ܝ ܚܲܩܠܵܐ. 45 ܡܸܕܪܹܐ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܐܢܵܫܵܐ ܬܵܓ̰ܝܼܪ 46 ܕܛܵܥܹܐ ܗ̄ܘܵܐ ܠܡܲܪ̈ܓܵܢܝܵܬܹܐ ܫܵܦܝܼܪܹ̈ܐ. ܘܟܲܕ ܡܘܼܫ̄ܟ̰ܸܚܠܹܐ ܚܕܵܐ ܡܲܪܓܵܢܝܼܬܵܐ ܡܵܪܹܐ ܛܝܼܡܵܐ: ܐܙܸܠܹܐ ܙܘܼܒܸܢܹܐ ܟܠ ܡܸܢܕܝܼ ܕܐܝܼܬ ܗ̄ܘܵܐ ܠܹܗ ܘܙܒ̣ܝܼܢܵܠܹܐ. 47 ܡܸܕܪܹܐ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ [30] ܠܓܲܪܕܵܐ ܕܸܪܝܵܐ 48 ܓܵܘ ܝܵܡܵܐ: ܘܡ̣ܢ ܟܠ ܬܵܗܵܪ ܓ̰ܘܼܡܸܥܠܹܐ. ܘܟܲܕ ܡܠܹܠܹܐ: ܡܘܼܐܣܸܩܠܘܿܢ ܐܸܠܹܗ ܠܣܸܦܬܵܐ ܕܝܵܡܵܐ: ܘܝܬܸܒ̣ܠܘܿܢ ܘܓܘܼܒܹܠܘܿܢ 49 ܛܵܒܹ̈ܐ ܒܡܵܐܢܹ̈ܐ: ܘܣܸܪ̈ܝܹܐ ܪܘܼܦܹܠܘܿܢ ܠܒܲܕܲܪ. ܗܲܕܟ̣ܵܐ ܒܸܬ ܗܵܘܹܐ ܒܬܝܵܡܹܗ ܕܥܵܠܡܵܐ. ܒܸܬ ܦܵܠܛܝܼ ܡܲܠܲܐܟܹ̈ܐ: ܘܒܸܬ 50 ܦܵܪܫܝܼ ܒܝܼܫܹ̈ܐ ܡ̣ܢ ܓܵܘܵܐ ܕܙܲܕܝܼܩܹ̈ܐ. ܘܒܸܬ ܕܵܪܝܼ ܠܗ̄ܘܿܢ ܒܐܲܬܘܿܢܵܐ ܕܢܘܼܪܵܐ: ܬܵܡܵܐ ܒܸܬ ܗܵܘܹܐ ܒܸܟܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ. 51 ܦܘܼܪܡܹܠܵܘܟ̣ܘܿܢ ܟܠܵܝ ܐܲܢܹܐ: ܐܵܡܪܝܼ ܐܸܠܹܗ: ܗܹܐ: ܡܵܪܲܢ. 52 ܐܡܸܪܹܐ ܐܸܠܵܝ: ܣܵܒܵܒ ܕܐܵܗܵܐ ܟܠ ܣܵܦܪܵܐ ܬܘܼܠܡܸܕܵܐ ܠܡܲܠܟܘܼܬܵܐ ܕܫܡܲܝܵܐ: ܟܹܐ ܕܵܡܹܐ ܠܐܢܵܫܵܐ ܡܵܪܹܐ ܒܲܝܬܵܐ: ܕܦܵܠܸܛ ܡ̣ܢ ܚܲܙܝܼܢܹܗ ܚܵܕ̄ܬܹ̈ܐ ܘܥܵܬܝܼܩܹ̈ܐ.

53 ܘܗ̄ܘܹܠܵܐ ܟܲܕ ܬܘܼܡܸܡܠܹܐ ܝܼܫܘܿܥ ܐܲܢܹܐ ܡܵܣܵܠܹ̈ܐ: ܫܘܼܢܹܠܹܐ 54 ܡ̣ܢ ܬܵܡܵܐ. ܘܐܬܹܠܹܐ ܠܐܲܬܪܹܗ: ܘܡܵܠܸܦ ܗ̄ܘܵܐ ܠܗ̄ܘܿܢ ܒܟܢܘܼܫܝܵܬܵܝ̈: ܕܵܐܟ̣ܝܼ ܕܥܵܓ̰ܒܝܼ ܗ̄ܘܵܘ ܘܐܵܡܪܝܼ: ܐܵܗܵܐ ܡܐܲܝܟܵܐ 55 ܠܹܗ ܐܵܗܵܐ ܥܵܩܸܠܕܵܪܘܼܬܵܐ ܘܚܲܝ̈ܠܹܐ. ܠܹܐ ܝܠܹܐ ܐܵܗܵܐ ܒܪܘܼܢܹܗ ܕܢܵܓ̰ܵܪ: ܝܸܡܹܗ ܠܹܐ ܝܠܵܐ ܦܝܵܫܵܐ ܩܪܝܼܬܵܐ ܡܲܪܝܲܡ: ܘܐܵܚܘܿܢܘܵܬܹ̈ܗ: 56 ܝܲܥܩܘܿܒ̣ ܘܝܵܘܣܸܦ ܘܫܸܡܥܘܿܢ ܘܝܼܗܘܼܕܵܐ. ܘܚܵܬܘܵܬܹ̈ܗ ܟܠܵܝ: ܗܵܐ ܠܹܐ ܝܢܵܐ ܠܟܸܣܠܲܢ ܡܐܲܝܟܵܐ ܠܹܗ ܐܵܗܵܐ ܟܠܵܝ ܐܲܢܹܐ. 57 [31] ܘܦܸܫܠܘܿܢ ܡܘܼܟܦܸܪܹܐ ܒܝܹܗ. ܐܝܼܢܵܐ ܝܼܫܘܿܥ ܐܡܸܪܹܐ ܐܸܠܵܝ: ܠܲܝܬ ܢܒ̣ܝܼܵܐ ܕܠܵܐ ܐܝܼܩܵܪܵܐ: ܫܒ̣ܘܿܩ ܡ̣ܢ ܓܵܘ ܐܲܬܪܹܗ ܘܓܵܘ 58 ܒܲܝܬܹܗ. ܘܠܵܐ ܥܒܸܕܠܹܐ ܬܵܡܵܐ ܚܲܝ̈ܠܹܐ ܪܵܒܵܐ ܣܵܒܵܒ ܕܠܵܐ ܗܲܝܡܵܢܘܼܬܵܝ.

ܩܦܠܐܘܢ: ܝܕ

1 ܒܗ̇ܘ ܙܲܒ̣ܢܵܐ ܫܡܸܥܠܹܐ ܗܹܪܘܿܕܸܣ ܛܸܛܪܲܪܟܵܐ ܒܵܗܣ 2 ܕܝܼܫܘܿܥ. ܘܐܡܸܪܹܐ ܠܪܹ̈ܓܵܘܵܬܘܼܗܝ: ܐܵܗܵܐ ܝܘܿܚܲܢܵܢ ܡܲܥܡܕܵܢܵܐ ܝܠܹܐ: ܗ̇ܘ ܩܝܼܡܵܐ ܝܠܹܐ ܡ̣ܢ ܡܝܼܬܹ̈ܐ: ܣܵܒܵܒ ܕܐܵܗܵܐ ܚܲܝ̈ܠܹܐ 3 ܦܝܵܫܵܐ ܝܢܵܐ ܦܠܝܼܚܹܐ ܒܝܹܗ. ܣܵܒܵܒ ܕܗܹܪܘܿܕܸܣ ܕܒ̣ܝܼܩܵܐ ܗ̄ܘܵܐ ܠܝܘܿܚܲܢܵܢ: ܘܐܣܸܪܹܗ ܘܕܪܹܠܹܗ ܓܵܘ ܒܹܝܬ ܐܲܣܝܼܪܹ̈ܐ ܒܘܼܬ 4 ܗܹܪܘܿܕܝܼܵܐ: ܒܲܟ̣ܬܹܗ ܕܦܝܼܠܝܼܦܘܿܣ ܐܵܚܘܿܢܹܗ. ܣܵܒܵܒ ܕܐܵܡܸܪ ܗ̄ܘܵܐ ܠܹܗ ܝܘܿܚܲܢܵܢ: ܠܹܐ ܝܠܵܐ ܒܕܲܣܬܘܼܪ ܕܗܵܘܝܵܐ ܐܸܠܘܼܟ 5 ܠܒܲܟ̣ܬܵܐ. ܘܟܲܕ ܒܲܥܝܹܐ ܗ̄ܘܵܐ ܠܸܩܛܵܠܹܗ: ܙܕܸܥܠܹܐ ܡ̣ܢ ܛܵܝܸܦܵܐ: 6 ܣܵܒܵܒ ܐܲܝܟ ܕܠܢܒ̣ܝܼܵܐ ܕܒ̣ܝܼܩܘܼܗܝ ܗ̄ܘܵܘ. ܐܝܼܢܵܐ ܟܲܕ ܗ̄ܘܹܠܹܐ ܒܹܝܬ ܝܲܠܕܹܗ ܕܗܹܪܘܿܕܸܣ: ܪܩܸܕܠܵܐ ܒܪܵܬܵܗ̇ ܕܗܹܪܘܿܕܝܼܵܐ 7 ܩܵܕ̄ܡܵܝ: ܘܫܦܸܪܵܐ ܠܗܹܪܘܿܕܸܣ. ܣܵܒܵܒ ܕܐܵܗܵܐ ܒܡܵܘܡܵܬܹ̈ܐ ܩܘܼܘܸܠܹܐ ܐܸܠܵܗ̇: ܕܝܵܗ̄ܒܸܠ ܗ̄ܘܵܐ ܠܵܗ̇ ܟܠ ܡܸܢܕܝܼ ܕܛܵܠܒܵܐ 8 ܗ̄ܘܵܐ. ܐܝܼܢܵܐ ܗ̇ܝ: ܣܵܒܵܒ ܕܡܘܼܠܸܦܬܵܐ ܗ̄ܘܵܐ ܡ̣ܢ ܝܸܡܵܗ̇: ܐܡܸܪܵܐ: ܗܲܒ̄ܠ ܠܝܼ ܠܲܐܟ̣ܵܐ ܒܛܲܫܬ ܪܹܫܹܗ ܕܝܘܿܚܲܢܵܢ ܡܲܥ̄ܡܕܵܢܵܐ. 9 ܘܦܫܸܡܠܹܐ ܡܲܠܟܵܐ: ܐܝܼܢܵܐ ܣܵܒܵܒ ܕܡܵܘܡܵܬܹ̈ܐ ܘܐܵܢܝܼ ܕܝܬܝܼܒܹ̈ܐ ܗ̄ܘܵܘ ܠܨܘܼܦܪܵܐ ܥܲܡܹܗ: ܦܩܸܕܠܹܐ ܕܦܵܝܸܫ ܝܘܼܗ̄ܒ̣ܵܐ ܐܸܠܵܗ̇. 10 ܘܫܘܼܕܸܪܹܐ ܡܘܼܦܪܸܡܠܹܗ ܪܹܫܹܗ ܕܝܘܿܚܲܢܵܢ ܓܵܘ ܒܹܝܬ ܐܲܣܝܼܪܹ̈ܐ. 11 ܘܦܸܫܠܹܐ ܡܘܼܬ̄ܝܵܐ ܪܹܫܹܗ ܒܛܲܫܬ: ܘܦܸܫܠܹܐ ܝܘܼܗ̄ܒ̣ܵܐ ܠܒܪܵܬܵܐ: 12 ܘܡܘܼܬ̄ܝܹܠܵܐ ܐܸܠܹܗ ܠܝܸܡܵܗ̇. ܘܐܬܹܠܘܿܢ ܬܲܠܡܝܼܕܘܼ̈ܗܝ ܘܫܩܸܠܘܿܢ ܫܠܲܕܹܗ: ܘܩܒܸܪܘܿܢ ܐܸܠܹܗ: ܘܐܬܹܠܘܿܢ ܗܘܼܩܹܠܘܿܢ ܠܝܼܫܘܿܥ. 13 ܐܝܼܢܵܐ ܝܼܫܘܿܥ ܟܲܕ ܫܡܸܥܠܹܐ: ܫܘܼܢܠܹܐ ܡ̣ܢ ܬܵܡܵܐ ܒܓܵܡܝܼ ܠܕܘܼܟܵܐ ܚܵܪܵܒܵܐ ܒܢܲܦ̮ܫܹܗ. ܘܟܲܕ ܫܡܸܥܠܘܿܢ ܟܸܢܫܹ̈ܐ: ܐܙܸܠܘܿܢ 14 ܒܵܬ̄ܪܹܗ ܒܒܸܪܙܵܐ ܡ̣ܢ ܡܕܝܼܢܵܬܹ̈ܐ. ܘܦܠܸܛܠܹܐ ܚܙܹܠܹܐ ܟܸܢܫܹ̈ܐ ܪܵܒܵܐ: ܘܪܘܼܚܸܡܠܹܐ ܥܲܠܵܝ: ܘܒܘܼܣܸܡܠܹܐ ܡܸܪ̈ܥܝܵܝ.

15 ܘܟܲܕ ܗ̄ܘܹܠܹܐ ܪܲܡܫܵܐ: ܐܬܹܠܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ: ܘܐܡܸܪܘܿܢ ܐܸܠܹܗ: ܕܘܼܟܵܐ ܚܵܪܒܵܐ ܝܠܵܐ: ܘܥܕܵܢܵܐ ܥܒ̣ܝܼܪܬܵܐ ܝܠܵܐ: ܫܵܕܸܪ ܠܟܸܢܫܹ̈ܐ ܕܐܵܙܠ̄ܝܼ ܠܡܵܬܘܵܬܹ̈ܐ: ܘܙܵܒ̣ܢܝܼ ܠܗ̄ܘܿܢ 16 ܡܹܐܟ̣ܘܼܠܬܵܐ. ܐܝܼܢܵܐ ܝܼܫܘܿܥ ܐܡܸܪܹܐ ܐܸܠܵܝ: ܠܹܐ ܝܠܵܐ ܠܵܙܸܡ ܐܸܠܵܝ 17 ܠܹܐܙܵܠܵܐ: ܗܲܒ̄ܠܘܿܢ ܠܗ̄ܘܿܢ ܐܲܚܬܘܿܢ ܠܹܐܟ̣ܵܠܵܐ. ܐܝܼܢܵܐ ܐܵܢܝܼ ܐܡܸܪܘܿܢ ܐܸܠܹܗ: ܠܲܝܬ ܠܲܢ ܠܲܐܟ̣ܵܐ: ܫܒ̣ܘܿܩ ܡ̣ܢ ܚܲܡܫܵܐ ܠܲܚܡܹ̈ܐ 18 ܘܬܲܪ̈ܬܹܝ ܢܘܼܢܹ̈ܐ. ܘܗ̇ܘ ܐܡܸܪܹܐ: ܡܲܝܬ̄ܡܘܿܢ ܠܗ̄ܘܿܢ ܠܟܸܣܠܝܼ 19 ܠܲܐܟ̣ܵܐ. ܘܦܩܸܕܠܹܐ ܠܟܸܢܫܹ̈ܐ ܠܸܬܝܵܒ̣ܵܐ ܥܲܠ ܓܸܠܵܐ: ܘܫܩܸܠܹܐ ܐܵܢܝܼ ܚܸܡܫܵܐ ܠܲܚܡܹ̈ܐ ܘܬܲܪ̈ܬܹܝ ܢܘܼܢܹ̈ܐ: ܘܚܸܪܹܐ ܒܫܡܲܝܵܐ ܘܒܘܼܪܸܟ̣ܠܹܐ: ܘܩܨܹܠܹܐ: ܘܝܸܗܒܸܠܹܐ ܠܲܚܡܹ̈ܐ ܠܬܲܠܡܝܼܕܘܼ̈ܗܝ: 20 ܘܬܲܠܡܝܼܕܹ̈ܐ ܠܟܸܢܫܹ̈ܐ. ܘܐܟܸܠܘܿܢ ܟܠܵܝ ܘܣܒܸܥܠܘܿܢ: ܘܫܩܸܠܘܿܢ ܙܝܼܘܼܕܹ̈ܐ ܕܩܸܛܥܵܛܹ̈ܐ ܬܪܸܥܣܲܪ ܩܘܼܦܹ̈ܐ ܡܸܠܚܹ̈ܐ. 21 ܐܝܼܢܵܐ ܐܵܢܝܼ ܐܢܵܫܹ̈ܐ ܕܐܟܸܠܘܿܢ ܐܲܝܟ ܚܲܡܫܵܐ ܐܲܠܦܹ̈ܐ ܗ̄ܘܵܘ: ܫܒ̣ܘܿܩ ܡ̣ܢ ܒܲܟ̣ܬܵܬܹ̈ܐ ܘܝܵܠܘܿܢܹ̈ܐ.

22 ܘܕܲܪܣܵܥܲܬ ܡܘܼܠܝܸܨܠܹܐ ܠܬܲܠܡܝܼܕܘܼ̈ܗܝ ܕܐܵܣܩܝܼ ܠܓܵܡܝܼ: ܘܐܵܙܠ̄ܝܼ ܩܵܕ̄ܡܘܼܗܝ ܠܗ̇ܘ ܓܹܒܵܐ ܐܚܹܪ̄ܢܵܐ: ܗܲܠ ܕܫܵܕܸܪ ܗ̄ܘܵܐ 23 ܠܟܸܢܫܹ̈ܐ. ܘܟܲܕ ܫܘܼܕܪܵܝܠܹܐ ܟܸܢܫܹ̈ܐ: ܐܣܸܩܠܹܐ ܠܛܘܼܪܵܐ 42 ܒܢܲܦ̮ܫܹܗ ܠܨܵܠܘܿܝܹܐ. ܘܟܲܕ ܗ̄ܘܹܠܹܐ ܪܲܡܫܵܐ ܬܵܡܵܐ ܗ̄ܘܵܐ ܒܢܲܦ̮ܫܹܗ. ܘܓܵܡܝܼ ܪܸܚܩܵܐ ܗ̄ܘܵܐ ܡ̣ܢ ܐܲܪܥܵܐ ܐܸܣܛ̈ܕܵܘܵܬܵܐ ܪܵܒܵܐ: ܟܲܕ ܫܓ̣ܝܼܫܬܵܐ ܪܵܒܵܐ ܡ̣ܢ ܠܲܦܹ̈ܐ: ܣܵܒܵܒ ܦܵܘܚܵܐ ܠܒܲܪܩܘܒ̣ܠܘܼܗ̇ 25 ܗ̄ܘܵܐ. ܘܒܒܲܕܠܵܐ ܕܐܲܪܒܲܥ ܕܠܲܝܠܹܐ ܐܬܹܠܹܐ ܠܟܸܣܠܵܝ ܝܼܫܘܼܥ: 26 ܒܸܚܕܵܪܵܐ ܥܲܠ ܝܵܡܵܐ. ܘܚܙܹܠܘܿܢ ܐܸܠܹܗ ܬܲܠܡܝܼܕܘܼ̈ܗܝ ܒܸܚܕܵܪܵܐ ܥܲܠ ܝܵܡܵܐ ܘܫܓܸܫܠܘܿܢ: ܒܹܐܡܵܪܵܐ: ܕܚܸܙܘܵܐ ܕܵܓܵܠܵܐ ܝܠܹܐ. ܘܡ̣ܢ 27 ܙܕܘܼܥܬܵܝ ܡܘܼܩܘܸܚܠܘܿܢ. ܐܝܼܢܵܐ ܝܼܫܘܿܥ ܕܲܪܣܵܥܲܬ ܗܘܼܡܙܸܡܠܹܐ ܥܲܡܵܝ ܘܐܡܸܪܹܐ: ܦܘܼܫܘܿܢ ܠܸܒܵܢܹ̈ܐ: ܐܵܢܵܐ ܝܘܸܢ: ܠܵܐ ܙܵܕܥܝܼܬܘܿܢ. 28 ܘܓ̰ܘܼܘܸܒܠܹܐ ܟܹܐܦܵܐ ܘܐܡܸܪܹܐ ܐܸܠܹܗ: ܡܵܪܝܼ: ܐܸܢ ܐܲܢ̄ܬ ܝܼܘܸܬ: 29 ܦܩܘܿܕ ܠܝܼ ܐܵܬܸܢ ܠܟܸܣܠܘܼܟ ܥܲܠ ܡ̈ܝܼܵܐ. ܘܗ̇ܘ ܐܡܸܪܹܐ ܐܸܠܹܗ: ܬܵܐ. ܘܨܠܹܠܹܐ ܟܹܐܦܵܐ ܡ̣ܢ ܓܵܡܝܼ: ܘܚܕܸܪܹܐ ܥܲܠ ܡ̈ܝܼܵܐ 30 ܕܐܵܬܹܐ ܗ̄ܘܵܐ ܠܟܸܣ ܝܼܫܘܿܥ. ܘܟܲܕ ܚܙܹܠܹܐ ܦܵܘܚܵܐ ܩܸܫܝܵܐ: ܙܕܸܥܠܹܐ: ܘܫܘܼܪܹܠܹܐ ܠܸܛܒܲܥܝܵܐ: ܘܡܘܼܪܸܡܠܹܐ ܩܵܠܹܗ ܘܐܡܸܪܹܐ: 31 ܡܵܪܝܼ: ܦܵܪܸܩ ܠܝܼ. ܘܕܲܪܣܵܥܲܬ ܦܘܼܫܛܵܠܹܐ ܐܝܼܕܹܗ ܝܼܫܘܿܥ ܘܕܒܸܩܠܹܗ: ܘܐܡܸܪܹܐ ܐܸܠܹܗ: ܝܵܐ ܟܝܼܡ ܗܲܝܡܵܢܘܼܬܵܐ: ܩܵܡܘܿܕܝܼ 32 ܦܸܫܠܘܿܟ ܕܘܼܒܵܪ. ܘܟܲܕ ܐܣܸܩܠܘܿܢ ܠܓܵܡܝܼ: ܫܠܹܠܹܐ 33 ܦܵܘܚܵܐ. ܐܵܢܝܼ ܕܝܼܗ̄ܘܵܘ ܒܓܵܡܝܼ ܣܓܸܕܠܘܿܢ ܐܸܠܹܗ: ܘܐܡܸܪܘܿܢ: ܒܬܪܘܼܨܬܵܐ ܒܪܘܼܢܹܗ ܕܐܲܠܵܗܵܐ ܝܘܸܬ.

34 ܘܟܲܕ ܥܒܸܪܘܿܢ ܐܬܹܠܘܿܢ ܠܐܲܪܥܵܐ ܕܓܹܢܹܣܲܪ. ܘܝܕܸܥܠܘܿܢ ܐܸܠܹܗ ܐܢܵܫܹ̈ܐ ܕܗ̇ܝ ܕܘܼܟܵܐ: ܘܫܘܼܕܸܪܘܿܢ ܠܟܠܵܝ ܡܵܬܘܵܬܹ̈ܐ ܕܚܵܕܸܪ̈ܘܵܢܵܝ: ܘܡܘܼܬ̄ܝܹܠܘܿܢ ܠܟܸܣܠܹܗ  ܟܠܵܝ ܐܵܢܝܼ ܕܡܸܪܥܝܹܐ 36 ܗ̄ܘܵܘ. ܘܦܘܼܪܦܸܠܘܿܢ ܒܝܹܗ ܕܕܵܩܪܝܼ ܗ̄ܘܵܘ ܗܲܪ ܒܫܸܦܘܼܠܵܐ ܕܠܒܸܫܬܹܗ: ܘܐܵܢܝܼ ܕܕܩܸܪܘܿܢ ܒܣܸܡܠܘܿܢ.

ܩܦܠܐܘܢ: ܝܗ

1 ܗ̇ܝܓܵܗ ܐܬܹܠܘܿܢ ܠܟܸܣ ܝܼܫܘܿܥ ܦܪ̈ܝܼܫܹܐ ܘܣܵܦܪܹ̈ܐ: ܕܡ̣ܢ 2 ܐܘܿܪܸܫܠܸܡ: ܘܐܵܡܪܝܼ: ܩܵܡܘܿܕܝܼ ܬܲܠܡܝܼܕܘܼ̈ܟ ܒܸܥܒ̣ܵܪܵܐ ܝܢܵܐ ܥܲܠ ܣܵܦܝܵܢܘܼܬܵܐ ܕܚܘܵܪ̈ܕܸܩܢܹܐ: ܣܵܒܵܒ ܠܹܐ ܝܢܵܐ ܚܲܠܘܼܠܹܐ ܐܝܼܕܵܬܵܝ̈ 3 ܟܲܕ ܐܵܟ̣ܠܝܼ ܠܲܚܡܵܐ. ܘܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܩܵܡܘܕܝܼ ܐܘܼܦ ܐܲܚܬܘܿܢ ܒܸܥܒ̣ܵܪܵܐ ܝܬܘܿܢ ܥܲܠ ܦܘܼܩܕܵܢܵܐ ܕܐܲܠܵܗܵܐ ܒܘܼܬ 4 ܣܵܦܝܵܢܘܼܬܵܘܟ̣ܘܿܢ. ܣܵܒܵܒ ܐܲܠܵܗܵܐ ܐܡܸܪܹܐ: ܥܒ̣ܘܿܕ ܐܝܼܩܵܪܐ ܠܒܵܒܘܼܟ ܘܠܝܸܡܘܼܟ: ܘܡ̇ܢ ܕܨܵܥܸܪ ܠܒܵܒܹܗ ܘܠܝܸܡܹܗ ܡܝܵܬܵܐ 5 ܡܵܝܸܬ. ܐܝܼܢܵܐ ܐܲܚܬܘܿܢ ܒܹܐܡܵܪܵܐ ܝܬܘܿܢ: ܟܠ ܡ̇ܢ ܕܐܵܡܸܪ ܠܒܵܒܵܐ ܝܲܢ ܠܝܸܡܵܐ: ܢܸܕܪܵܐ (ܝܠܹܐ) ܡܸܢܕܝܼ ܕܗܵܘܹܐ ܦܲܝܕܵܐ ܐܸܠܘܼܟ ܡܸܢܝܼ: ܠܵܐ ܥܵܒܸܕ ܐܝܼܩܵܪܵܐ ܠܒܵܒܹܗ ܝܲܢ ܠܝܸܡܹܗ. 6 ܘܒܘܼܛܸܠܵܘܟ̣ܘܿܢ ܠܗܹܡܸܙܡܵܢ ܕܐܲܠܵܗܵܐ ܣܵܒܵܒ ܕܣܵܦܝܵܢܘܼܬܵܘܟ̣ܘܿܢ. 7 ܢܵܣܒܲܝ̈ ܒܐܲܦܹ̈ܐ: ܨܦܵܝܝܼ ܢܘܼܒܸܠܹܐ ܥܲܠܵܘܟ̣ܘܿܢ ܐܹܫܲܥܝܵܐ ܘܐܡܸܪܹܐ. 8 ܐܵܗܵܐ ܛܵܝܸܦܵܐ ܒܣܸܦܘܵܬܹܗ ܟܹܐ ܥܵܒܸܕ ܐܝܼܩܵܪܵܐ ܐܸܠܝܼ: ܐܝܼܢܵܐ ܠܸܒܵܝ 9 ܪܵܒܵܐ ܪܸܚܩܵܐ ܝܠܹܐ ܡܸܢܝܼ. ܘܒܣܪܝܼܩܘܼܬܵܐ ܒܸܣܓ̣ܵܕܵܐ ܝܢܵܐ ܐܸܠܝܼ: ܟܲܕ ܡܵܠܘܿܦܹܐ ܝܢܵܐ ܝܘܼܠܦܵܢܹ̈ܐ ܕܦܘܼܩܕܵܢܹ̈ܐ ܕܒܢܲܝ̈ܢܵܫܵܐ.

10 ܘܩܪܹܠܹܐ ܠܟܸܢܫܹ̈ܐ: ܘܐܡܸܪܹܐ ܐܸܠܵܝ: ܫܡܸܥܡܘܿܢ ܘܦܲܪܡܹܡܘܿܢ. 11 ܠܹܐ ܝܠܹܐ ܡܸܢܕܝܼ ܕܐܵܘܸܪ ܠܦܘܼܡܵܐ ܟܹܐ ܟ̰ܲܦܠܸܢ ܠܒܲܪܢܵܫܵܐ: ܐܸܠܵܐ ܡܸܢܕܝܼ ܕܦܵܠܸܛ ܡ̣ܢ ܦܘܼܡܵܐ: ܗ̇ܘ ܟܹܐ ܟ̰ܲܦܠܸܢ ܠܒܲܪܢܵܫܵܐ. 12 ܗ̇ܝܓܵܗ ܐܬܹܠܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ ܘܐܵܡܪܝܼ ܐܸܠܹܗ: ܒܝܼܕܲܥܝܵܐ ܝܘܸܬ ܕܦܪ̈ܝܼܫܹܐ ܕܫܡܸܥܠܘܿܢ ܐܵܗܵܐ ܗܹܡܸܙܡܵܢ [32] ܦܸܫܠܘܿܢ 13 ܡܘܼܟܦܸܪܹܐ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ: ܟܠ ܢܨܝܼܒ̣ܬܵܐ ܐܲܝܢܝܼ ܕܠܵܐ ܢܨܝܼܒ̣ܵܠܹܐ ܒܵܒܝܼ ܕܒܫܡܲܝܵܐ: ܒܸܬ ܦܵܝܫܵܐ ܥܩܝܼܪܬܵܐ. 14 ܫܒ̣ܘܿܩܘܿܢ ܠܗ̄ܘܿܢ: ܬܲܓܒܸܪ̈ܵܢܹܐ ܣܸܡܝܹ̈ܐ ܝܢܵܐ. ܐܝܼܢܵܐ ܐܸܢ ܣܸܡܝܵܐ 15 ܠܣܸܡܝܵܐ ܬܲܓܒܸܪ: ܬܸܪܘܵܝ ܒܓܘܼܒܵܐ ܟܹܐ ܢܵܦܠܝܼ. ܓ̰ܘܼܘܸܒ̇ܠܹܐ 16 ܟܹܐܦܵܐ ܘܐܡܸܪܹܐ ܐܸܠܹܗ: ܦܵܫܸܩ ܠܲܢ ܐܵܗܵܐ ܡܵܣܵܠܵܐ. ܘܐܡܸܪܹܐ 17 ܐܸܠܵܝ: ܗܲܠ ܐܵܕܝܼܵܐ ܐܘܼܦ ܐܲܚܬܘܿܢ ܠܹܐ ܝܬܘܿܢ ܦܲܪܡܘܼܝܹܐ. ܠܹܐ ܝܬܘܿܢ ܒܝܼܕܲܥܝܵܐ ܕܡܸܢܕܝܼ ܕܐܵܘܸܪ ܠܦܘܼܡܵܐ ܠܟܹܪ̄ܣܵܐ ܟܹܐ ܐܵܙܸܠ: 18 ܘܒܕܵܟ̣ܵܝܬܵܐ ܟܹܐ ܦܵܝܸܫ ܪܘܼܦܝܵܐ ܠܒܲܕܲܪ. ܐܝܼܢܵܐ ܡܸܢܕܝܼ ܕܡ̣ܢ ܦܘܼܡܵܐ ܦܵܠܸܛ: ܡ̣ܢ ܠܸܒܵܐ ܟܹܐ ܦܵܠܸܛ: ܘܗ̇ܘ ܟܹܐ ܟ̰ܲܦܠܸܢ 19 ܠܒܲܪܢܵܫܵܐ. ܣܵܒܵܒ ܕܡ̣ܢ ܠܸܒܵܐ ܟܹܐ ܦܵܠܛܝܼ ܚܘܼܫܵܒܹ̈ܐ ܒܝܼܫܹ̈ܐ: ܩܸܛܠܹ̈ܐ: ܩܲܗܒܘܼܝܵܬܵܐ: ܙܵܢܝܘܼܝܵܬܵܐ: ܓܹܢܵܒ̣ܘܼܝܵܬܵܐ: ܣܵܗܕܘܼܬܵܐ 20 ܕܵܓܠܬܵܐ: ܓܘܼܕܵܦܹ̈ܐ. ܐܲܢܹܐ ܝܢܵܐ ܕܟܹܐ ܟ̰ܲܦܠܸܢܝܼ ܠܒܲܪܢܵܫܵܐ. ܐܝܼܢܵܐ ܠܹܐܟ̣ܵܠܵܐ ܒܐܝܼܕܵܬܹ̈ܐ ܠܵܐ ܚܘܪܠܸܠܹ̈ܐ: ܠܹܐ ܟ̰ܲܦܠܸܢܵܐ ܠܒܲܪܢܵܫܵܐ. 21 ܘܦܠܸܛܠܹܐ ܡ̣ܢ ܬܵܡܵܐ ܝܼܫܘܿܥ: ܘܐܬܹܠܹܐ ܠܬܸܚܘܼܒ̣ ܕܨܘܿܪ 22 ܘܕܨܲܚܕܘܿܢ. ܘܗܵܐ: ܚܕܵܐ ܒܲܟ̣ܬܵܐ ܟܢܲܥܢܵܝܬܵܐ ܡ̣ܢ ܕܐܵܢܝܼ ܬܸܚܘܼܒܹ̈ܐ ܦܠܸܛܠܵܐ ܡܲܩܘܼܘܚܹܐ ܘܒܹܐܡܵܪܵܐ: ܪܵܚܸܡ ܥܲܠܝܼ: ܡܵܪܝܼ: ܒܪܘܼܢܹܗ ܕܕܵܘܝܼܕ: ܒܪܵܬܝܼ ܣܸܪܝܵܐ ܦܝܵܫܵܐ ܝܠܵܐ ܓ̰ܘܼܢܓ̰ܸܪܬܵܐ 23 ܒܕܲܝܘܵܐ. ܐܝܼܢܵܐ ܗ̇ܘ ܠܵܐ ܡܘܼܕܸܪܹܐ ܐܸܠܵܗ̇ ܓ̰ܘܼܘܵܒ ܘܐܬܹܠܘܿܢ ܬܲܠܡܝܼܕܘܼ̈ܗܝ ܒܸܥܠܘܿܢ ܡܸܢܹܗ ܒܹܐܡܵܪܵܐ: ܫܵܕܸܪܵܗ̇: ܕܡܲܩܘܘܼܚܹܐ 24 ܝܠܵܐ ܒܵܬ̄ܪܲܢ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ: ܠܵܐ ܦܸܫܠܝܼ ܫܘܼܕܸܪܵܐ ܐܸܠܵܐ ܠܟܸܣ ܥܸܪ̈ܒܹܐ ܬܠܝܼܩܹ̈ܐ ܡ̣ܢ ܒܹܝܬ ܝܼܣܪܵܝܹܠ. 25 ܐܝܼܢܵܐ ܗ̇ܝ ܐܬܹܠܵܐ ܣܓܸܕܠܵܐ ܐܸܠܹܗ: ܘܐܡܸܪܹܐ: ܡܵܪܝܼ: 26 ܗܲܝܸܪܝܼ. ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ܆ ܠܹܐ ܝܠܵܐ ܨܦܵܝܝܼ ܠܸܫܩܵܠܵܐ 27 ܠܲܚܡܵܐ ܕܒܢܘܼܢܹ̈ܐ ܘܠܸܕܪܵܝܵܐ ܠܟܲܠܒܹ̈ܐ. ܐܝܼܢܵܐ ܗ̇ܝ ܐܡܸܪܵܐ: ܗܹܐ ܡܵܪܝܼ: ܐܝܼܢܵܐ ܐܘܼܦ ܟܲܠܒܹ̈ܐ ܟܹܐ ܐܵܟ̣ܠܝܼ ܡ̣ܢ ܦܸܪ̈ܬܘܼܚܹܐ ܕܢܵܦܠܝܼ 28 ܡ̣ܢ ܨܘܼܦܪܵܐ ܕܡܵܪ̈ܵܘܵܬܵܝ. ܗ̇ܝܓܵܗ ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܗ̇: ܝܵܐ ܒܲܟ̣ܬܵܐ: ܓܘܼܪܬܵܐ ܝܠܵܐ ܗܲܝܡܵܢܘܼܬܵܟ̣ܝ: ܗܵܘܹܐ ܠܵܟ̣ܝ ܐܲܝܟ ܕܒܵܣܡܵܐ ܠܵܟ̣ܝ: ܘܒܣܸܡܠܵܐ ܒܪܵܬܘܼܗ̇ ܡܗ̇ܝ ܣܵܥܲܬ.

29 ܘܫܘܼܢܹܠܹܐ ܡ̣ܢ ܬܵܡܵܐ ܝܼܫܘܼܥ: ܘܐܬܹܠܹܐ ܥܲܠ ܓܹܒܵܐ ܕܝܵܡܵܐ ܕܓܠܝܼܠܵܐ: ܘܐܣܸܩܠܹܐ ܠܛܘܪܵܐ: ܘܝܬܸܒ̣ܠܹܐ ܬܵܡܵܐ. 30 ܘܐܬܹܠܘܿܢ ܠܟܸܣܠܹܗ ܟܸܢܫܹ̈ܐ ܪܵܒܵܐ: ܕܐܝܼܬ ܗ̄ܘܵܘ ܥܲܡܵܝ ܫܸܠܝܹ̈ܐ: ܘܣܸܡܝܹ̈ܐ ܘܠܲܥ̈ܠܹܐ: ܘܣܲܩܲܬܹ̈ܐ: ܘܐܚܹܪ̄ܢܹܐ ܪܵܒܵܐ܆ ܘܕܸܪܝܵܝܠܘܿܢ 31 ܠܟܸܣ ܐܲܩܠܵܬܹ̈ܐ ܕܝܼܫܘܼܥ: ܘܒܘܼܣܡܵܠܹܐ. ܕܵܐܟ̣ܝܼ ܕܥܵܓ̰ܒܝܼ ܗ̄ܘܵܘ ܐܵܢܝܼ ܟܸܢܫܹ̈ܐ: ܕܚܵܙܝܼ ܠܲܥܠܹ̈ܐ ܗܲܡܙܘܼܡܹܐ: ܘܣܲܩܲܬܹ̈ܐ ܦܝܵܫܵܐ ܒܘܼܣܡܹܐ: ܘܫܸܠܹ̈ܐ ܒܸܚܕܵܪܵܐ: ܘܣܸܡܝܹ̈ܐ ܒܸܚܙܵܝܵܐ: ܘܫܘܼܒܸܚܠܘܿܢ ܠܐܲܠܵܗܵܐ ܕܝܼܣܪܵܝܹܠ.

32 ܐܝܼܢܵܐ ܝܼܫܘܿܥ ܩܪܹܠܹܐ ܠܬܲܠܡܝܼܕܘܼ̈ܗܝ ܘܐܡܸܪܹܐ ܐܸܠܵܝ: ܐܵܢܵܐ ܪܵܚܘܿܡܹܐ ܝܘܸܢ ܠܐܵܗܵܐ ܟܸܢܫܵܐ: ܕܐܵܕܝܼܵܐ ܬܠܵܬ̄ܐ ܝܘܿܡܵܢܹ̈ܐ ܥܘܼܪܩܸܠܘܿܢ ܠܟܸܣܠܝܼ: ܘܠܲܝܬ ܠܗ̄ܘܿܢ ܡܸܢܕܝܼ ܕܐܵܟ̣ܠܝܼ: ܘܕܫܵܕܪܸܢܘܿܢ ܟܲܕ ܨܝܼܡܹܐ ܠܹܐ ܒܵܣܡܵܐ ܠܝܼ: ܠܵܐ ܗ̄ܘܸܐ ܕܟܵܟ̰ܚܝܼ 33 ܒܐܘܼܪܚܵܐ. ܐܵܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܡܐܲܝܟܵܐ ܐܝܼܬ ܠܲܢ ܚܵܕ̄ ܗܵܕܵܐ ܠܲܚܡܵܐ ܓܵܘ ܒܲܪܝܼܵܐ: ܕܡܲܣܒ̣ܵܥܚ ܠܚܵܕ̄ ܗܲܕܟ̣ܵܐ 34 ܟܸܢܫܵܐ. ܐܵܡܸܪ ܐܸܠܵܝ ܝܼܫܘܿܥ: ܟܡܵܐ ܠܲܚܡܹ̈ܐ ܐܝܼܬ ܠܵܘܟ̣ܘܿܢ: 35 ܐܵܡܪܝܼ: ܫܲܒ̣ܥܵܐ: ܘܚܲܟ̰ܵܐ ܢܘܼܢܹ̈ܐ ܕܲܝܩܹ̈ܐ. ܘܦܘܼܩܸܕܠܹܐ ܠܟܸܢܫܹ̈ܐ 36 ܕܝܵܬܒ̣ܝܼ ܥܲܠ ܐܲܪܥܵܐ. ܘܫܩܸܠܹܐ ܠܐܵܢܝܼ ܫܲܒ̣ܥܵܐ ܠܲܚܡܹ̈ܐ ܘܠܢܘܼܢܹ̈ܐ: ܘܫܘܼܒܸܚܠܹܐ: ܘܩܸܨܠܹܐ: ܘܝܸܗܒܸܠܹܐ ܠܬܲܠܡܝܼܕܘܼ̈ܗܝ: 37 ܘܬܲܠܡܝܼܕܹ̈ܐ ܠܟܸܢܫܹ̈ܐ. ܘܐܟܸܠܘܿܢ ܟܠܵܝ ܘܣܒܸܥܠܘܿܢ: 38 ܘܫܩܸܠܘܿܢ ܙܝܼܘܼܕܹ̈ܐ ܕܩܸܛܥܵܛܹ̈ܐ ܫܲܒ̣ܥܵܐ ܣܵܠܹ̈ܐ ܡܸܠܝܹܐ. ܘܐܵܢܝ ܕܐܟܸܠܘܢ ܐܲܪܒܥܵܐ ܐܲܠܦܹ̈ܐ ܐܢܵܫܹ̈ܐ ܗ̄ܘܵܘ: ܫܒ̣ܘܿܩ ܡ̣ܢ ܒܲܟ̣ܬܵܬܹ̈ܐ 39 ܘܝܵܠܘܿܢܹ̈ܐ. ܘܟܲܕ ܫܘܼܕܸܪܹܐ ܠܟܸܢܫܹ̈ܐ: ܐܣܸܩܠܹܐ ܠܓܵܡܝܼ: ܘܐܬܹܠܹܐ ܠܬܸܚܘܼܒ̣ [33] ܕܡܲܓ̣ܕܘܼ.

ܩܦܠܐܘܢ: ܝܘ

1 ܘܐܬܹܠܘܿܢ ܠܟܸܣܠܹܗ ܦܪ̈ܝܼܫܹܐ ܘܙܲܕܘܼܩܵܝܹ̈ܐ ܓ̰ܵܪܘܿܒܹܗ: ܘܛܠܸܒܠܘܿܢ ܡܸܢܹܗ ܕܡܲܚܙܹܐ ܠܗ̄ܘܿܢ ܢܝܼܫܲܢܩܵܐ ܡ̣ܢ ܫܡܲܝܵܐ. 2 ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܐܝܼܡܲܢ ܕܗ̄ܘܹܠܹܐ ܪܲܡܫܵܐ: ܟܹܐ ܐܵܡܪܝܼܬܘܿܢ: ܨܸܚܘܵܐ ܝܠܵܐ: ܣܵܒܵܒ ܕܣܡܸܩܠܵܐ ܫܡܲܝܵܐ. 3 ܘܒܨܦܪܵܐ ܟܹܐ ܐܵܡܪܝܼܬܘܿܢ: ܐܸܕܝܘܼ ܗܵܘܵܐ ܐܲܝܟ ܣܸܬܘܵܐ ܝܠܵܐ: ܣܵܒܵܒ ܕܣܡܸܩܠܵܐ ܫܡܲܝܵܐ ܘܚܒܸܛܠܵܐ. ܦܵܬܵܐ ܕܫܡܲܝܵܐ ܟܹܐ ܝܲܕܥܝܼܬܘܿܢ ܕܦܵܪܫܝܼܬܘܿܢ: ܐܝܼܢܵܐ ܢܝܼܫܲܢܩܹ̈ܐ ܕܐܵܗܵܐ ܙܲܒ̣ܢܵܐ ܠܹܐ 4 ܡܵܨܝܼܬܘܿܢ ܕܦܵܪܫܝܼܬܘܿܢ. ܐܘܼܓ̰ܵܓ̣ ܒܝܼܫܬܵܐ ܘܩܲܗܒܵܐ ܢܝܼܫܲܢܩܵܐ ܒܸܒܲܥܝܵܐ ܝܠܵܐ: ܘܢܝܼܫܲܢܩܵܐ ܠܹܐ ܦܵܝܸܫ ܝܘܼܗ̄ܒ̣ܵܐ ܐܸܠܵܗ̇: ܫܒ̣ܘܿܩ ܡ̣ܢ ܢܝܼܫܲܢܩܹܗ ܕܝܵܘܢܵܢ. ܘܫܒ̣ܝܼܩܵܝܠܹܐ ܘܐܙܸܠܹܐ. 5 ܘܟܲܕ ܐܬܹܠܘܿܢ ܬܲܠܡܝܼܕܘܼ̈ܗܝ ܠܓܹܒܵܐ ܐܚܹܪ̄ܢܵܐ: ܢܫܹܠܘܿܢ 6 ܕܫܵܩܠܝܼ ܠܲܚܡܵܐ. ܘܝܼܫܘܿܥ ܐܡܸܪܹܐ ܐܸܠܵܝ: ܚܙܹܡܘܿܢ: ܗ̄ܘܹܡܘܿܢ 7 ܗܸܫܝܵܪ ܡ̣ܢ ܚܡܝܼܪܵܐ ܕܦܪ̈ܝܼܫܹܐ ܘܕܙܲܕܘܼܩܵܝܹ̈ܐ. ܐܝܼܢܵܐ ܐܵܢܝܼ ܒܸܚܫܵܒ̣ܵܐ 8 ܗ̄ܘܵܘ ܒܓܵܢܵܝ ܒܹܐܡܵܪܵܐ: ܕܠܲܚܡܵܐ ܠܵܐ ܫܩܸܠܲܢ. ܐܝܼܢܵܐ ܝܼܫܘܿܥ ܝܕܸܥܠܹܐ: ܘܐܡܸܪܹܐ ܐܸܠܝܼ: ܩܵܡܘܿܕܝܼ ܒܸܚܫܵܒ̣ܵܐ ܝܬܘܿܢ ܒܓܵܢܵܘܟ̣ܘܿܢ: ܝܵܐ ܟܝܼܡ ܗܲܝܡܵܢܘܼܬܵܐ: ܣܵܒܵܒ ܕܠܲܚܡܵܐ ܠܵܐ ܫܩܸܠܵܘܟ̣ܘܿܢ. 9 ܗܲܠ ܐܵܕܝܼܵܐ ܠܵܐ ܦܘܼܪܡܹܠܵܘܟ̣ܘܿܢ: ܠܹܐ ܝܬܘܿܢ ܒܸܕܟ̣ܵܪܵܐ ܠܐܵܢܝܼ ܚܲܡܫܵܐ ܠܲܚܡܹ̈ܐ ܕܚܲܡܫܵܐ ܐܲܠܦܹ̈ܐ: ܘܟܡܵܐ ܩܘܼܦܹ̈ܐ ܫܩܸܠܵܘܟ̣ܘܿܢ. 10 ܘܠܵܐ ܠܐܵܢܝܼ ܫܲܒ̣ܥܵܐ ܠܲܚܡܹ̈ܐ ܕܐܲܪܒܥܵܐ ܠܲܚܡܹ̈ܐ ܕܐܲܪܒܥܵܐ ܐܲܠܦܹ̈ܐ: ܘܟܡܵܐ ܣܵܠܹ̈ܐ 11 ܫܩܸܠܵܘܟ̣ܘܿܢ. ܕܐܵܟ̣ܝ ܠܵܐ ܦܘܼܪܡܹܠܵܘܟ̣ܘܿܢ ܠܹܐ ܗ̄ܘܵܐ ܕܥܲܠ ܠܲܚܡܵܐ ܐܡܸܪܝܼ ܐܸܠܵܘܟ̣ܘܿܢ: ܐܸܠܵܐ ܗܵܘܝܼܬܘܿܢ ܗܸܫܝܵܪ ܡ̣ܢ ܚܡܝܼܪܵܐ 12 ܕܦܪ̈ܝܼܫܹܐ ܘܕܙܲܕܘܼܩܵܝܹ̈ܐ. ܗ̇ܝܓܵܗ ܦܘܼܪܡܹܠܘܿܢ ܕܠܵܐ ܐܡܸܪܹܐ ܕܗܵܘܝܼ ܗܸܫܝܵܪ ܡ̣ܢ ܚܡܝܼܪܵܐ ܕܠܲܚܡܵܐ: ܐܸܠܵܐ ܡ̣ܢ ܝܘܼܠܦܵܢܵܐ ܕܦܪ̈ܝܼܫܹܐ ܘܕܙܲܕܘܼܩܵܝܹ̈ܐ. 13 ܘܟܲܕ ܐܬܹܠܹܐ ܝܼܫܘܿܥ ܠܐܲܬܪܵܐ ܕܩܹܣܲܪܝܵܐ ܕܦܝܼܠܝܼܦܘܿܣ: ܒܘܼܩܸܪܹܐ ܡ̣ܢ ܬܲܠܡܝܼܕܘܼ̈ܗܝ ܘܐܡܸܪܹܐ: ܡܵܢܝܼ ܟܹܐ ܐܵܡܪܝܼ ܥܲܠܝܼ 14 ܐܢܵܫܹ̈ܐ ܕܐܵܢܵܐ ܒܪܘܼܢܹܗ ܕܐܢܵܫܵܐ ܝܼܘܸܢ. ܘܐܵܢܝܼ ܐܡܸܪܘܿܢ: ܐܝܼܬ ( ܕܒܹܐܡܵܪܵܐ ܝܢܵܐ): ܝܘܿܚܲܢܵܢ ܡܲܥ̄ܡܕܵܢܵܐ: ܘܐܚܹܪ̄ܢܹܐ: ܐܹܠܝܼܵܐ: 15 ܘܐܚܹܪ̄ܢܹܐ: ܐܹܪܲܡܝܵܐ: ܝܲܢ ܚܵܕ̄ ܡ̣ܢ ܢܒ̣̈ܝܹܐ. ܐܡܸܪܹܐ ܐܸܠܵܝ: ܐܝܼܢܵܐ 16 ܐܲܚܬܘܿܢ ܡܵܢܝܼ ܒܹܐܡܵܪܐ ܝܬܘܿܢ ܕܝܼܘܸܢ. ܓ̰ܘܼܘܸܒܠܹܐ ܫܸܡܥܘܿܢ ܟܹܐܦܵܐ ܘܐܡܸܪܹܐ: ܐܲܢ̄ܬ ܝܼܘܸܬ ܡܫܝܼܚܵܐ: ܒܪܘܼܢܹܗ ܕܐܲܠܵܗܵܐ ܚܲܝܵܐ. 17 ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܹܗ: ܛܘܼܒ̣ܵܐ ܐܸܠܘܼܟ: ܫܸܡܥܘܿܢ ܒܪܘܼܢܹܗ ܕܝܘܿܢܵܐ: ܣܵܒܵܒ ܕܒܸܣܪܵܐ ܘܕܸܡܵܐ ܠܵܐ ܓܠܹܠܹܐ ܐܸܠܘܼܟ: 18 ܐܸܠܵܐ ܒܵܒܝܼ ܕܒܫܡܲܝܵܐ. ܐܘܼܦ ܐܵܢܵܐ ܒܹܐܡܵܪܵܐ ܝܘܸܢ ܐܸܠܘܼܟ: ܐܲܢ̄ܬ ܝܼܘܸܬ ܟܹܐܦܵܐ: ܘܥܲܠ ܕܐܵܗܵܐ ܟܹܐܦܵܐ ܒܸܬ ܒܵܢܸܢܵܗ̇ ܥܹܕܬܝܼ: 19 ܘܬܲܪ̈ܥܵܢܹܐ ܕܫܝܘܿܠ ܠܹܐ ܙܲܪܒܸܢܝܼ ܒܝܼܵܗ̇. ܐܸܠܘܼܟ ܒܸܬ ܝܵܗ̄ܒܸܢ ܩܕܝܼ̈ܠܹܐ ܕܡܲܠܟܘܼܬܵܐ ܕܫܡܲܝܵܐ: ܘܟܠ ܡܸܢܕܝܼ ܕܐܵܣܪܸܬ ܒܐܲܪܥܵܐ: ܒܸܬ ܗܵܘܹܐ ܐܣܝܼܪܵܐ ܒܫܡܲܝܵܐ: ܘܡܸܢܕܝܼ ܕܫܵܪܸܬ 20 ܒܐܲܪܥܵܐ: ܒܸܬ ܗܵܘܹܐ ܫܸܪܝܵܐ ܒܫܡܲܝܵܐ. ܗ̇ܝܓܵܗ ܦܩܸܕܠܹܐ ܠܬܲܠܡܝܼܕܘܼ̈ܗܝ: ܕܠܐܢܵܫܵܐ ܠܵܐ ܐܵܡܪܝܼ ܕܗ̇ܘ ܝܼܠܹܐ ܡܫܝܼܚܵܐ. 21 ܘܡ̣ܢ ܗ̇ܝܓܵܗ ܫܘܼܪܹܠܹܐ ܝܼܫܘܿܥ ܠܡܲܚܙܘܼܝܹܐ ܠܬܲܠܡܝܼܕܘܼ̈ܗܝ: ܕܘܵܓ̰ܸܒ ܝܼܗ̄ܘܵܐ ܕܐܵܙܸܠ ܠܐܘܿܪܸܫܠܸܡ: ܘܪܵܒܵܐ ܩܵܒܸ̇ܠ ܚܲܫܵܐ ܡ̣ܢ ܚܘܵܪ̈ܕܸܩܢܹܐ: ܘܡ̣ܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ: ܘܦܵܝܸܫ ܩܛܝܼܠܵܐ: 22 ܘܒܝܘܿܡܵܐ ܕܬܠܵܬܐ ܦܵܝܸܫ ܡܘܼܩܸܡܵܐ. ܘܠܘܼܒܸܠܹܗ ܟܹܐܦܵܐ ܘܫܘܼܪܹܠܹܐ ܠܸܢܓ̰ܵܘܵܐ ܒܝܹܗ: ܘܐܡܸܪܹܐ: ܚܵܣ ܡܸܢܘܼܟ: ܡܵܪܝܼ: ܠܵܐ 23 ܗܵܘܝܵܐ ܠܘܼܟ ܐܵܗܵܐ. ܐܝܼܢܵܐ ܗ̇ܘ ܕܸܪܹܐ ܘܐܡܸܪܹܐ ܠܟܹܐܦܵܐ: ܙܹܠ̄ܐ ܠܘܼܟ ܠܵܒܵܬ̄ܪܝܼ: ܣܵܛܵܢܵܐ: ܬܘܼܪܩܵܠܵܐ ܝܘܸܬ ܐܸܠܝܼ: ܣܵܒܵܒ ܠܹܐ 24 ܝܘܸܬ ܒܸܚܫܵܒ̣ܵܐ ܡܸܢܕܝܵܢܹ̈ܐ ܕܐܲܠܵܗܵܐ: ܐܸܠܵܐ ܕܒܢܲܝ̈ܢܵܫܵܐ. ܗ̇ܝܓܵܗ ܐܡܸܪܹܐ ܝܼܫܘܿܥ ܠܬܲܠܡܝܼܕܘܼ̈ܗܝ: ܡ̇ܢ ܕܒܲܥܝܹܐ ܐܵܬܹܐ ܒܵܬ̄ܪܝܼ: 25 ܟܵܦܸܪ ܒܓܵܢܹܗ ܘܫܵܩܸܠ ܙܩܝܼܦܹܗ ܘܐܵܬܹܐ ܒܵܬ̄ܪܝܼ. ܣܵܒܵܒ ܡ̇ܢ ܕܒܲܥܝܹܐ ܕܡܲܚܹܐ ܓܵܢܹܗ: ܒܸܬ ܬܵܠܸܩ ܠܵܗ̇: ܘܡ̇ܢ ܕܬܵܠܸܩ ܓܵܢܹܗ 26 ܒܚܵܛܸܪ ܕܝܼܝܼ: ܡܵܫ̄ܟ̰ܸܚ ܠܵܗ̇. ܣܵܒܵܒ ܕܡܘܼܕܝܼ ܒܸܬ ܗܵܘܹܐ ܦܲܝܕܵܐ ܠܒܲܪܢܵܫܵܐ: ܐܸܢ ܥܵܠܡܵܐ ܟܠܹܗ ܩܵܢܹܐ: ܘܓܵܢܹܗ ܡܲܒܨܸܪ: ܝܲܢ ܡܘܼܕܝܼ ܒܸܬ ܝܵܗ̄ܒܸܠ ܒܲܪܢܵܫܵܐ ܡܒܵܕܵܠ ܕܓܵܢܹܗ. 27 ܣܵܒܵܒ ܕܗܕܝܼܪܵܐ ܝܠܹܐ ܒܪܘܼܢܹܗ ܕܐܢܵܫܵܐ ܕܐܵܬܹܐ ܒܬܸܫܒܘܿܚܬܵܐ ܕܒܵܒܘܼܗܝ ܥܲܡ ܡܲܠܲܐܟ̣ܘܼ̈ܗܝ: ܘܗ̇ܝܓܵܗ ܒܸܬ ܦܲܪܸܥ ܠܟܠ 28 ܐܢܵܫܵܐ ܐܲܝܟ ܦܘܼܠܚܵܢܘܼ̈ܗܝ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܝܼܬ ܐܢܵܫܹ̈ܐ ܒܸܟܠܵܝܵܐ ܠܲܐܟ̣ܵܐ: ܕܠܹܐ ܛܵܥܡܝܼ ܡܵܘܬܵܐ: ܗܲܠ ܕܚܵܙܝܼ ܠܒܪܘܼܢܹܗ ܕܐܢܵܫܵܐ ܒܹܐܬܵܝܵܐ ܒܡܲܠܟܘܼܬܹܗ.

ܩܦܠܐܘܢ: ܝܙ

1 ܘܡܒܵܬ̄ܪ ܐܸܫܬܵܐ ܝܘܿܡܵܢܹ̈ܐ: ܠܘܼܒܸܠܹܐ ܝܼܫܘܿܥ ܠܟܹܐܦܵܐ: ܘܠܝܲܥܩܘܿܒ̣: ܘܠܝܘܿܚܲܢܵܢ ܐܵܚܘܿܢܘܼܗܝ: ܘܡܘܼܐܣܩܵܝܠܹܐ ܠܛܘܼܪܵܐ 2 ܪܵܡܵܐ ܒܢܲܦ̮ܫܵܝ. ܘܦܸܫܠܹܐ ܫܘܼܚܠܸܦܵܐ ܩܵܕ̄ܡܵܝ: ܘܒܘܼܗ̄ܪܸܢܵܐ ܦܵܬܹܗ ܐܲܝܟ ܫܸܡܫܵܐ: ܘܠܒ̣ܘܼܫܘܼ̈ܗܝ ܚܘܸܪܘܿܢ ܐܲܝܟ ܢܘܼܗܪܵܐ. 3 ܘܗܵܐ: ܦܸܫܠܘܿܢ ܚܸܙܝܹܐ ܐܸܠܵܝ ܡܘܼܫܹܐ ܘܐܹܠܝܼܵܐ ܗܲܡܙܘܼܡܹܐ ܥܲܡܹܗ. 4 ܘܓ̰ܘܼܘܸܒܠܹܐ ܟܹܐܦܵܐ ܘܐܡܸܪܹܐ ܠܝܼܫܘܿܥ: ܡܵܪܝܼ: ܨܦܵܝܝܼ ܝܠܵܐ ܐܸܠܲܢ ܕܠܲܐܟ̣ܵܐ ܗܵܘܵܚ: ܘܐܸܢ ܒܵܣܡܵܐ ܠܘܼܟ: ܒܸܬ [34] ܥܵܒ̣ܕܸܢ ܠܲܐܟ̣ܵܐ ܬܠܵܬ̄ ܡܛܲܠܠܹ̈ܐ: ܚܕܵܐ ܩܵܐ ܕܝܼܘܼܟ: ܘܚܕܵܐ ܩܵܐ ܡܘܼܫܹܐ: 5 ܘܚܕܵܐ ܩܵܐ ܐܹܠܝܼܵܐ. ܘܗܹܫ ܗ̇ܘ ܗܲܡܙܘܼܡܹܐ: ܗܵܐ: ܥܢܵܢܵܐ ܒܲܗܪܵܢܬܵܐ ܥܒܸܕܠܵܐ ܛܸܠܵܢܝܼܬܵܐ ܥܲܠܵܝ: ܘܗܵܐ: ܩܵܠܵܐ ܡ̣ܢ ܥܢܵܢܵܐ: ܒܹܐܡܵܪܵܐ: ܐܵܗܵܐ ܝܠܹܐ ܒܪܘܼܢܝܼ ܡܘܼܚܸܒܵܐ: ܕܒܝܹܗ ܒܸܒܣܵܡܝܼ 6 ܝܠܵܐ: ܐܸܠܹܗ ܫܡܸܥܡܘܿܢ. ܘܟܲܕ ܫܡܸܥܠܘܿܢ ܬܲܠܡܝܼܕܹ̈ܐ: 7 ܢܦܸܠܘܿܢ ܥܲܠ ܦܵܬܘܵܬܵܝ̈: ܘܙܕܸܥܠܘܿܢ ܪܵܒܵܐ. ܘܐܬܹܠܹܐ ܠܟܸܣܠܵܝ ܝܼܫܘܿܥ: ܘܕܩܸܪܹܐ ܒܝܼܝ ܘܐܡܸܪܹܐ: ܩܘܼܡܘܿܢ: ܠܵܐ 8 ܙܵܕܥܝܼܬܘܿܢ. ܘܡܘܼܪܸܡܠܘܿܢ ܥܲܝܢܵܝ̈ ܘܠܐܢܵܫܵܐ ܠܵܐ ܚܙܹܠܘܿܢ ܫܒ̣ܘܿܩ ܡ̣ܢ ܠܝܼܫܘܿܥ ܒܢܲܦ̮ܫܹܗ. 9 ܘܟܲܕ  ܒܸܨܠܵܝܵܐ ܗ̄ܘܵܘ ܡ̣ܢ ܛܘܼܪܵܐ: ܦܩܝܼܕܵܝܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܠܐܢܵܫܵܐ ܠܵܐ ܐܵܡܪܝܼܬܘܿܢ ܐܵܗܵܐ ܚܸܙܘܵܐ: ܗܲܠ 10 ܕܩܵܝܸܡ ܒܪܘܼܢܹܗ ܕܐܢܵܫܵܐ ܡ̣ܢ ܡܝܼܬܹ̈ܐ. ܘܒܘܼܩܸܪܘܿܢ ܡܸܢܹܗ ܬܲܠܡܝܼܕܘܼ̈ܗܝ: ܘܐܡܸܪܘܿܢ ܐܸܠܹܗ: ܒܲܣ ܩܵܡܘܿܕܝܼ ܣܵܦܪܹ̈ܐ ܟܹܐ 11 ܐܵܡܪܝܼ ܘܵܓ̰ܸܒ ܝܼܠܵܐ ܕܐܹܠܝܼܵܐ ܐܵܬܹܐ ܩܵܕ̄ܡܵܝܬܵܐ. ܓ̰ܘܼܘܸܒܠܹܐ ܘܐܡܸܪܹܐ: ܐܹܠܝܼܵܐ ܗܲܪ ܒܹܐܬܵܝܵܐ ܝܠܹܐ: ܘܟܠ ܡܸܢܕܝܼ ܒܸܬ ܡܲܕܸܪ. 12 ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܩܵܕ̄ܡ ܐܵܕܝܼܵܐ ܐܹܠܝܼܵܐ ܐܬܝܼܵܐ ܝܠܹܐ: ܘܠܵܐ ܝܕܸܥܠܘܿܢ ܐܸܠܹܗ: ܘܥܒܸܕܠܘܿܢ ܒܝܹܗ ܟܠ ܡܸܢܕܝܼ ܕܒܣܸܡܠܵܐ ܠܗ̄ܘܿܢ. ܗܲܕܟ̣ܵܐ ܐܘܼܦ ܒܪܘܼܢܹܗ ܕܐܢܵܫܵܐ ܗܕܝܼܪܵܐ 13 ܝܠܹܐ ܕܩܵܒܸ̇ܠ ܚܲܫܵܐ ܡܸܢܵܝ. ܗ̇ܝܓܵܗ ܦܘܼܪܡܹܠܘܿܢ ܬܲܠܡܝܼܕܹ̈ܐ ܕܥܲܠ ܝܘܿܚܲܢܵܢ ܡܲܥ̄ܡܕܵܢܵܐ ܐܡܸܪܹܐ ܐܸܠܵܝ. 14 ܘܟܲܕ ܐܬܹܠܘܿܢ ܠܟܸܣ ܟܸܢܫܵܐ: ܐܬܹܠܹܐ ܠܟܸܣܠܹܗ ܚܵܕ̄ 15 ܐܢܵܫܵܐ: ܘܒܪܸܟ̇ܠܹܐ ܩܵܕ̄ܡܘܼܗܝ: ܘܐܡܸܪܹܐ ܐܸܠܹܗ. ܡܵܪܝܼ: ܪܵܚܸܡ ܥܲܠ ܒܪܘܼܢܝܼ: ܕܝܼܠܹܐ ܒܲܪ ܐܸܓܵܪܵܐ ܘܣܸܪܝܵܐ ܡܸܪܥܝܵܐ ܝܠܹܐ: ܣܵܒܵܒ ܪܵܒܵܐ ܓܵܗܹ̈ܐ ܒܢܘܼܪܵܐ ܟܹܐ ܢܵܦܸܠ: ܘܪܵܒܵܐ ܓܵܗܹ̈ܐ 16 ܒܡ̈ܝܼܵܐ. ܘܡܘܼܬ̄ܝܹܠܝܼ ܐܸܠܹܗ ܠܟܸܣ ܬܲܠܡܝܼܕܘܼ̈ܟ: ܘܠܵܐ 17 ܡܨܹܠܘܿܢ ܠܒܵܣܘܿܡܹܗ. ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܐܲܝ ܐܘܼܓ̰ܵܓ̣ ܠܵܐ ܗܘܼܡܸܢܬܵܐ ܘܦܟ̰ܝܼܠܬܵܐ: ܗܲܠ ܐܝܼܡܲܢ ܒܸܬ ܗܵܘܸܢ ܠܟܸܣܠܵܘܟ̣ܘܿܢ: ܘܗܲܠ ܐܝܼܡܲܢ ܒܸܬ ܩܵܒ̇ܠܸܢܵܘܟ̣ܘܿܢ: ܡܲܝܬ̄ܝ ܠܹܗ 18 ܠܟܸܣܠܝܼ ܠܲܐܟ̣ܵܐ. ܘܢܓ̰ܘܼܠܹܐ ܒܝܹܗ ܝܼܫܘܿܥ: ܘܦܠܸܛܠܹܐ ܡܸܢܹܗ 19 ܕܲܝܘܵܐ: ܘܒܣܸܡܠܹܐ ܝܵܠܵܐ ܡܗ̇ܝ ܣܵܥܲܬ. ܗ̇ܝܓܵܗ ܐܬܹܠܘܿܢ ܬܲܠܡܝܼܕܹ̈ܐ ܠܟܸܣ ܝܼܫܘܿܥ ܒܢܲܦ̮ܫܹܗ ܘܐܡܸܪܘܿܢ ܐܸܠܹܗ: ܩܵܡܘܿܕܝܼ 20 ܐܲܚܢܲܢ ܠܵܐ ܡܨܹܠܲܢ ܠܦܵܠܘܿܛܹܗ. ܐܵܡܸܪ ܐܸܠܵܝ: ܒܘܼܬ ܠܵܐ ܗܲܝܡܵܢܘܼܬܵܟ̣ܘܿܢ. ܣܵܒܵܒ ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܗܵܘܝܵܐ ܠܵܘܟ̣ܘܿܢ ܗܲܝܡܵܢܘܼܬܵܐ ܐܲܝܟ ܕܲܢܕܸܟܬܵܐ ܕܚܲܪܕܵܠ: ܒܸܬ ܐܵܡܪܝܼܬܘܿܢ ܠܐܵܗܵܐ ܛܘܼܪܵܐ: ܫܵܢܝܼ ܡܐܲܟ̣ܵܐ ܠܬܵܡܵܐ: ܘܒܸܬ ܫܵܢܹܐ: 21 ܘܡܸܢܕܝܼ ܠܹܐ ܗܵܘܝܵܐ ܥܸܨܝܵܐ ܐܸܠܵܘܟ̣ܘܿܢ. [35] ܐܝܼܢܵܐ ܐܵܗܵܐ ܬܵܗܵܪ ܠܹܐ ܦܵܠܸܛ ܫܒ̣ܘܿܩ ܡ̣ܢ ܒܨܵܘܡܵܐ ܘܒܨܠܘܿܬܵܐ. 22 ܘܟܲܕ ܫܸܪܝܹܐ ܗ̄ܘܵܘ ܒܓܠܝܼܠܵܐ: ܐܡܸܪܹܐ ܐܸܠܵܝ ܝܼܫܘܿܥ: ܗܕܝܼܪܵܐ ܝܠܹܐ ܒܪܘܼܢܹܗ ܕܐܢܵܫܵܐ ܕܦܵܝܸܫ ܣܘܼܦܝܵܐ ܒܐܝܼܕܵܬܹ̈ܐ 23 ܕܒܢܲܝ̈ܢܵܫܵܐ. ܘܒܸܬ ܩܵܛܠܝܼ ܠܹܗ: ܘܒܝܘܿܡܵܐ ܕܬܠܵܬ̄ܐ ܒܸܬ ܦܵܝܸܫ ܡܘܼܩܸܡܵܐ. ܘܦܫܸܡܠܘܿܢ ܪܵܒܵܐ. 24 ܘܟܲܕ ܐܬܹܠܘܿܢ ܠܟܦܲܪܢܵܚܘܿܡ: ܐܬܹܠܘܿܢ ܐܵܢܝܼ ܕܫܵܩܠܝܼ ܗ̄ܘܵܘ ܬܪܲܝ ܬܪܲܝ ܙܘܼܙܹ̈ܐ ܕܚܲܪܓ̰ ܕܪܹܫܵܐ ܠܟܸܣ ܟܹܐܦܵܐ: ܘܐܡܸܪܘܿܢ ܐܸܠܹܗ: ܪܵܒܝܼܵܘܟ̣ܘܿܢ ܠܹܐ ܝܵܗ̄ܒܸܠ ܬܪܲܝ ܙܘܼܙܹ̈ܐ. 25 ܐܵܡܸܪ ܐܸܠܵܝ: ܝܹܐ. ܘܟܲܕ ܐܘܸܪܹܐ ܠܒܲܝܬܵܐ: ܡܩܵܕ̄ܡ ܕܗ̇ܘ ܐܡܸܪܹܐ ܐܸܠܹܗ ܝܼܫܘܿܥ: ܡܘܼܕܝܼ ܒܸܚܫܵܒ̣ܵܐ ܝܘܸܬ: ܫܸܡܥܘܿܢ: ܡܲܠܟܹ̈ܐ ܕܐܲܪܥܵܐ ܡ̣ܢ ܡܵܢܝܼ ܟܹܐ ܫܵܩܠܝܼ ܕܲܡܓ̣ܵܐ ܘܚܲܪܓ̰ ܕܪܹܫܵܐ: ܡ̣ܢ 26 ܒܢܘܼܢܵܝ̈: ܝܲܢ ܡ̣ܢ ܢܘܼܟ̣ܪ̈ܵܝܹܐ. ܐܵܡܸܪ ܐܸܠܹܗ ܟܹܐܦܵܐ: ܡ̣ܢ ܢܘܼܟ̣ܪ̈ܵܝܹܐ. ܐܵܡܸܪ ܐܸܠܹܗ ܝܼܫܘܿܥ: ܒܲܣ ܒܢܘܼܢܹ̈ܐ ܐܵܙܵܕܹ̈ܐ ܝܢܵܐ. 27 ܐܝܼܢܵܐ ܕܠܵܐ ܡܲܟܦܸܪܵܚ ܠܗ̄ܘܿܢ: ܙܹܠ̄ܐ ܠܝܵܡܵܐ: ܘܕܪܝܼ ܟ̰ܲܢܓܵܠ: ܘܢܘܼܢܵܐ ܩܵܕ̄ܡܵܝܵܐ ܕܐܵܣܸܩ ܫܩܘܿܠ: ܘܦܬܘܿܚ ܦܘܼܡܹܗ ܘܒܸܬ ܡܵܫ̄ܟ̰ܚܸܬ ܙܘܼܙܵܐ. ܠܗ̇ܘ ܫܩܘܿܠ ܘܗܲܒ̄ܠ ܡ̣ܢ ܓܹܒܝܼ ܘܡ̣ܢ ܓܹܒܘܼܟ.

ܩܦܠܐܘܢ: ܝܚ

1 ܒܗ̇ܝ ܣܵܥܲܬ ܐܬܹܠܘܿܢ ܬܲܠܡܝܼܕܹ̈ܐ ܠܟܸܣ ܝܼܫܘܿܥ ܘܐܵܡܪܝܼ: 2 ܒܲܣ ܡܵܢܝܼ ܝܠܹܐ ܓܘܼܪܵܐ ܒܡܲܠܟܘܼܬܵܐ ܕܫܡܲܝܵܐ. ܘܩܪܹܠܹܐ 3 ܚܵܕ̄ ܝܵܠܵܐ ܙܥܘܿܪܵܐ ܘܡܘܼܟܠܹܠܹܐ ܒܓܵܘܵܝ. ܘܐܡܸܪܹܐ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܠܵܐ ܕܵܝܪܝܼܬܘܿܢ ܘܗܵܘܝܼܬܘܿܢ ܐܲܝܟ 4 ܝܵܠܹ̈ܐ ܙܥܘܿܪܹ̈ܐ: ܠܹܐ ܐܵܘܪܝܼܬܘܿܢ ܠܡܲܠܟܘܼܬܵܐ ܕܫܡܲܝܵܐ. ܡ̇ܢ ܗܲܕܟ̣ܵܐ ܕܡܲܡܟܸܟ ܓܵܢܹܗ ܐܲܝܟ ܕܐܵܗܵܐ ܝܵܠܵܐ ܙܥܘܿܪܵܐ: ܗ̇ܘ ܝܼܠܹܐ 5 ܓܘܼܪܵܐ ܒܡܲܠܟܘܼܬܵܐ ܕܫܡܲܝܵܐ. ܘܡ̇ܢ ܕܩܵܒܸ̇ܠ ܐܲܝܟ ܕܐܵܗܵܐ ܝܵܠܵܐ 6 ܙܥܘܿܪܵܐ ܒܫܸܡܝܼ: ܐܸܠܝܼ ܩܵܒ̇ܘܿܠܹܐ ܝܠܹܐ. ܐܝܼܢܵܐ ܟܠ [36] ܕܡܲܟܦܸܪ ܠܚܵܕ̄ ܡܐܲܢܹܐ ܙܥܘܿܪܹ̈ܐ ܕܗܲܡܘܼܢܹܐ ܝܢܵܐ ܒܝܼܝܼ: ܨܦܵܝܝܼ ܗ̄ܘܵܐ ܐܸܠܹܗ: ܕܗܵܘܝܵܐ ܬܠܝܼܬܵܐ [37] ܐܸܪܚܹܐ ܕܚܡܵܪܵܐ ܒܩܕܵܠܹܗ: ܘܗܵܘܹܐ ܛܸܒ̇ܥܝܵܐ ܒܥܘܼܡܩܵܗ̇ ܕܝܵܡܵܐ. 7 ܘܵܝ ܠܥܵܠܡܵܐ ܡ̣ܢ [38] ܟܦܘܼܪ̈ܝܹܐ: ܣܵܒܵܒ ܕܐܲܢܲܢܩܹܐ ܝܠܵܐ ܕܐܲܬܝܼ [39] ܟܦܘܼܪ̈ܝܹܐ: ܐܝܼܢܵܐ ܘܵܝ ܠܗ̇ܘ ܐܢܵܫܵܐ ܕܒܐܝܼܕܹܗ ܐܵܬܹܐ 8 [40]ܟܦܘܼܪܝܵܐ. ܘܐܸܢ ܐܝܼܕܘܼܟ ܝܲܢ ܐܲܩܠܘܼܟ [41] ܡܲܟܦܸܪܵܐ ܠܘܼܟ: ܦܪܘܿܡ ܠܵܗ̇ ܘܕ̈ܦܝܼ ܠܵܗ̇ ܡܸܢܘܼܟ ܣܵܒܵܒ ܕܨܦܵܝܝܼ ܝܠܵܐ ܐܸܠܘܼܟ ܕܐܵܘܕܸܬ ܠܚܲܝܹ̈ܐ ܟܲܕ ܣܲܩܲܬ ܝܘܸܬ ܝܲܢ ܫܸܠܵܐ: ܘܠܵܐ ܟܲܕ ܐܝܼܬ ܠܘܼܟ ܬܲܪ̈ܬܸܝ ܐܝܼܕܵܬܹ̈ܐ ܝܲܢ ܬܲܪ̈ܬܹܝ ܐܲܩܠܵܬܹ̈ܐ: ܦܵܝܫܸܬ ܪܘܼܦܝܵܐ 9 ܒܢܘܼܪܵܐ ܕܠܵܐܒܵܕ. ܘܐܸܢ ܥܲܝܢܘܼܟ [42] ܡܲܟܦܸܪܵܐ ܠܘܼܟ: ܚܪܘܿܛ ܠܵܗ̇ ܘܪܲܦܝܼ ܠܵܗ̇ ܘܪܲܦܝܼ ܠܵܗ̇ܡܸܢܘܼܟ. ܨܦܵܝܝܼ ܝܠܵܐ ܐܸܠܘܼܟ ܕܒܚܕܵܐ ܥܲܝܢܵܐ ܐܵܘܪܸܬ ܠܚܲܝܹ̈ܐ: ܘܠܵܐ ܟܲܕ ܐܝܼܬ ܠܘܼܟ ܬܲܪ̈ܬܹܝ ܥܲܝܢܹ̈ܐ ܦܵܝܫܸܬ ܪܘܼܦܝܵܐ 10 ܒܓܹܗܵܢܵܐ ܕܢܘܼܪܵܐ. ܚܙܹܡܘܿܢ ܕܠܵܐ ܡܲܣܠܝܼܬܘܿܢ ܠܚܵܕ̄ ܡܐܲܢܹܐ ܙܥܘܼܪܹ̈ܐ: ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܲܠܲܐܟ̣ܵܝ̈ ܒܫܡܲܝܵܐ ܒܟܠܹܗ ܙܲܒ̣ܢܵܐ ܟܹܐ ܚܵܙܝܼ ܦܵܬܹܗ ܕܒܵܒܝܼ ܕܒܫܡܲܝܵܐ. 11 [43] ܣܵܒܵܒ ܕܐܬܹܠܹܐ ܒܪܘܼܢܹܗ ܕܐܢܵܫܵܐ ܕܡܲܚܹܐ ܡܸܢܕܝܼ ܕܝܼܗ̄ܘܵܐ 12 ܬܠܝܼܩܵܐ. ܡܘܼܕܝܼ ܒܸܚܫܵܒ̣ܵܐ ܝܬܘܿܢ: ܐܸܢ ܐܢܵܫܵܐ ܗܵܘܝܼ ܠܹܗ ܡܵܐܐ ܥܸܪ̈ܒܹܐ: ܘܬܵܠܸܩ ܚܵܕ̄ ܡܸܢܵܝ: ܠܹܐ ܫܵܒܸܩ ܐܸܬܫܥܝܼ 13 ܘܐܸܬܫܥܵܐ ܘܐܵܙܸܠ ܠܛܘܼܪ̈ܵܢܹܐ ܛܵܥܹܐ ܠܗ̇ܘ ܕܬܠܸܩܠܹܐ. ܘܐܸܢ ܗܵܘܝܵܐ ܕܡܵܫ̄ܟ̰ܸܚ ܠܹܗ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܚܵܕܹܐ ܒܝܹܗ ܙܵܘܕܵܐ ܡ̣ܢ ܒܐܸܬܫܥܝܼ ܘܐܸܬܫܥܵܐ ܕܠܵܐ 14 ܬܠܸܩܠܘܿܢ. ܗܲܕܟ̣ܵܐ ܠܲܝܬ ܪܸܙܵܝܵܐ ܩܵܕ̄ܡ ܒܵܒܵܘܟ̣ܘܿܢ ܕܒܫܡܲܝܵܐ: ܕܬܵܠܸܩ ܚܵܕ̄ ܡܐܲܢܹܐ ܙܥܘܿܪܹ̈ܐ.15 ܐܝܼܢܵܐ ܐܸܢ ܥܒܸܕܠܹܐ ܓܢܵܗܵܐ ܒܝܼܘܼܟ ܐܵܚܘܿܢܘܿܟ: ܙܹܠ̄ܐ ܡܲܢܟܸܣ ܠܹܗ ܗܲܪ ܒܹܝܠܘܼܟ ܘܒܹܝܠܘܼܟ ܘܒܹܝܠܹܗ. ܐܸܢ ܫܲܡܸܥ ܠܘܼܟ: ܩܢܹܠܘܿܟ 16 ܐܵܚܘܿܢܘܼܟ. ܘܐܸܢ ܠܵܐ ܫܲܡܸܥ ܠܘܼܟ: ܐܝܼܬܵܐ ܠܵܒܸܠ ܥܲܡܘܼܟ ܚܵܕ̄ ܝܲܢ ܬܪܲܝ: ܕܥܲܠ ܦܘܼܡܵܐ ܕܬܪܲܝ ܝܲܢ ܬܠܵܬ̄ܐ ܣܵܗܕܹ̈ܐ ܦܵܝܫܵܐ 17 ܡܘܼܩܘܝܼܬܵܐ ܟܠ ܗܹܡܸܙܡܵܢ. ܐܝܼܢܵܐ ܐܸܢ ܠܐܵܢܝܼ ܠܵܐ ܫܲܡܸܥ: ܐܡܘܿܪ ܠܥܸܕܬܵܐ. ܐܝܼܢܵܐ ܐܸܢ ܠܥܹܕܬܵܐ ܠܵܐ ܫܲܡܸܥ: ܗܵܘܹܐ ܐܸܠܘܼܟ 18 ܐܲܝܟ ܕܲܡܓ̣ܵܟ̰ܝܼ ܘܐܲܝܟ ܚܲܢܦܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܡܸܢܕܝܼ ܕܐܵܣܪܝܼܬܘܿܢ ܒܐܲܪܥܵܐ ܒܸܬ ܗܵܘܹܐ ܐܣܝܼܪܵܐ ܒܫܡܲܝܵܐ: ܘܡܸܢܕܝܼ ܕܫܵܪܝܼܬܘܿܢ ܒܐܲܪܥܵܐ ܒܸܬ ܗܵܘܹܐ 19 ܫܸܪܝܵܐ ܒܫܡܲܝܵܐ. ܡܸܕܪܹܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܬܪܲܝ ܡܸܢܵܘܟ̣ܘܿܢ ܗܵܘܝܼ ܒܸܕܒ̣ܵܩܵܐ [44] ܡܥܘܼܕܵܠܹܐ ܒܐܲܪܥܵܐ ܥܲܠ ܟܠ ܩܸܨܬ ܕܛܵܠܒܝܼ: ܒܸܬ ܗܵܘܹܐ ܠܗ̄ܘܿܢ ܡ̣ܢ ܠܟܸܣ ܒܵܒܝܼ 20 ܕܒܫܡܲܝܵܐ. ܣܵܒܵܒ ܐܲܝܟܵܐ ܕܬܪܲܝ ܝܲܢ ܬܠܵܬ̄ܐ ܓ̰ܸܡܥܝܹܐ ܝܢܵܐ ܒܫܸܡܝܼ: ܬܵܡܵܐ ܝܘܸܢ ܒܓܵܘܵܝ.

21 ܗ̇ܝܓܵܗ ܐܬܹܠܹܐ ܠܟܸܣܠܹܗ ܟܹܐܦܵܐ: ܘܐܡܸܪܹܐ ܐܸܠܹܗ: ܡܵܪܝܼ: ܟܡܵܐ ܓܵܗܹ̈ܐ ܚܵܛܹܐ ܥܲܠܝܼ ܐܵܚܘܿܢܝ ܘܫܵܒ̣ܩܸܢܹܗ: ܗܲܠ ܫܲܒܲܥ 22 ܓܵܗܹ̈ܐ. ܐܵܡܸܪ ܐܸܠܹܗ ܝܼܫܘܿܥ: ܠܹܐ ܝܘܸܢ ܒܹܐܡܵܪܵܐ ܐܸܠܘܼܟ ܗܲܠ 23 ܫܲܒܲܥ: ܐܸܠܵܐ ܗܲܠ ܫܲܒ̣ܥܝܼ ܓܵܗܹ̈ܐ ܫܲܒܲܥ. ܣܵܒܵܒ ܕܐܵܗܵܐ ܦܸܫܠܵܐ ܡܘܼܕܡܝܼܬܵܐ ܡܲܠܟܘܼܬܵܐ ܕܫܡܲܝܵܐ ܠܐܢܵܫܵܐ ܡܲܠܟܵܐ ܕܒܸܥܠܹܐ 24 ܕܫܵܩܸܠ ܚܸܫܒܘܼܢܵܐ ܡ̣ܢ ܪܹ̈ܓܵܘܵܬܘܼܗܝ. ܘܟܲܕ ܫܘܼܪܹܠܹܐ ܠܸܫܩܵܠܵܐ: ܡܘܼܬ̄ܝܹܠܘܿܢ ܠܟܸܣܠܹܗ ܚܵܕ̄ ܕܕܵܝܢܵܢܐ ܗ̄ܘܵܐ ܥܸܣܪܵܐ 25 ܐܲܠܦܹ̈ܐ ܟܲܟܪܹ̈ܐ. ܘܟܲܕ ܠܲܝܬ ܗ̄ܘܵܐ ܠܹܗ ܠܸܦܪܲܥܝܵܐ: ܦܩܸܕܠܹܐ ܐܵܓ̣ܵܝܹܗ ܕܦܵܝܸܫ ܙܘܼܒ̇ܢܵܐ: ܗ̇ܘ ܘܒܲܟ̣ܬܹܗ ܘܒܢܘܼܢܘܼ̈ܗܝ: ܘܟܠ 26 ܡܸܢܕܝܼ ܕܐܝܼܬ ܗ̄ܘܵܐ ܠܹܗ: ܘܕܦܲܪܸܥ ܗ̄ܘܵܐ. ܢܦܸܠܹܐ ܗܲܕܟ̣ܵܐ ܗ̇ܘ ܪܹܓܵܐ ܘܣܓܸܕܠܹܐ ܐܸܠܹܗ: ܘܐܡܸܪܹܐ: ܐܵܓ̣ܵܝܝܼ: ܡܲܪܝܸܟ ܒܹܢܵܐ ܥܲܠܝܼ: 27 ܘܟܠ ܡܸܢܕܝܼ ܒܸܬ ܦܲܪܥܸܢܘܼܟ. ܘܪܘܼܚܸܡܠܹܐ ܐܵܓ̣ܵܝܹܗ ܕܗ̇ܘ 28 ܪܹܓܵܐ ܘܫܪܹܠܹܗ: ܘܕܵܝܢܹܗ ܫܒܸܩܠܹܐ ܐܸܠܹܗ. ܐܝܼܢܵܐ ܦܠܸܛܠܹܐ ܗ̇ܘ ܪܹܓܵܐ ܘܡܘܼܫ̄ܟ̰ܸܚܠܹܐ ܠܚܵܕ̄ ܡ̣ܢ ܚܲܒ̣ܪ̈ܵܘܵܬܹܗ ܒܚܸܠܡܲܬ ܕܕܝܢܵܢܵܐ ܗ̄ܘܵܐ ܐܸܠܹܗ ܡܵܐܐ ܕܸܝܢܵܪܹ̈ܐ: ܘܕܒܸܩܠܹܗ ܘܚܵܢܸܩ ܗ̄ܘܵܐ ܠܹܗ: ܘܐܡܸܪܹܐ ܐܸܠܹܗ: ܗܲܒ̄ܠ ܡܸܢܕܝܼ ܕܕܝܢܵܢܵܐ ܝܘܸܬ ܐܸܠܝܼ. 29 ܘܢܦܸܠܹܐ ܗ̇ܘ ܚܲܒ̣ܪܹܗ ܒܚܸܠܡܲܬ: ܦܘܼܪܦܸܠܹܐ ܒܝܹܗ ܘܐܡܸܪܹܐ: 30 ܡܲܪܝܸܟ ܥܲܠܝܼ ܒܹܢܵܐ: ܘܒܸܬ ܦܲܪܥܸܢܘܿܟ. ܐܝܼܢܵܐ ܗ̇ܘ ܠܵܐ ܒܣܸܡܠܵܐ ܠܹܗ: ܐܙܸܠܹܐ ܘܕܪܹܠܹܗ ܓܵܘ ܒܹܝܬ ܐܲܣܝܼܪܹ̈ܐ: ܗܲܠ ܕܝܵܗ̄ܒܸܠ 31 ܗ̄ܘܵܐ ܠܹܗ ܡܸܢܕܝܼ ܕܕܝܢܵܢܵܐ ܗ̄ܘܵܐ ܐܸܠܹܗ. ܘܟܲܕ ܚܙܹܠܘܿܢ ܚܲܒ̣ܪ̈ܵܘܵܬܵܝ ܒܚܸܠܡܲܬ ܡܸܢܕܝܼ ܕܗ̄ܘܹܠܹܐ: ܦܫܸܡܠܘܿܢ ܪܵܒܵܐ: ܘܐܬܹܠܘܿܢ ܘܡܘܼܕܸܥܠܘܿܢ ܠܐܵܓ̣ܵܝܝ ܟܠ ܡܸܢܕܝܼ ܕܗ̄ܘܹܠܹܐ. 32 ܗ̇ܝܓܵܗ ܩܪܹܠܹܗ ܐܵܓ̣ܵܝܹܗ: ܘܐܡܸܪܹܐ ܐܸܠܹܗ: ܪܹܓܵܐ ܒܝܼܫܵܐ: ܟܠܹܗ 33 ܗ̇ܘ ܕܵܝܢܵܐ ܫܒܸܩܠܝܼ ܐܸܠܘܼܟ: ܣܵܒܵܒ ܕܦܘܼܪܦܸܠܘܼܟ ܒܝܼܝܼ. ܠܹܐ ܗ̄ܘܵܐ ܘܵܓ̰ܸܒ ܕܐܘܼܦ ܐܲܢ̄ܬ ܪܵܚܡܸܬ ܗ̄ܘܵܐ ܠܚܲܒ̣ܪܘܼܟ ܒܚܸܠܡܲܬ: 34 ܕܵܐܟ̣ܝܼ ܕܐܵܢܵܐ ܪܘܼܚܸܡܠܝܼ ܐܸܠܘܼܟ. ܘܟܪܸܒܠܹܐ ܐܵܓ̣ܵܝܹܗ: ܘܣܘܼܦܹܠܹܗ ܠܓ̰ܲܢܓ̰ܸܪ̈ܵܢܹܐ: ܗܲܠ ܕܦܲܪܸܥ ܗ̄ܘܵܐ ܟܠ ܡܸܢܕܝܼ ܕܕܝܢܵܢܵܐ 35 ܗ̄ܘܵܐ. ܗܲܕܟ̣ܵܐ ܐܘܼܦ ܒܵܒܝܼ ܕܒܫܡܲܝܵܐ ܒܸܬ ܥܵܒܸܕ ܐܸܠܵܘܟ̣ܘܿܢ: ܐܸܢ ܠܵܐ ܫܵܒ̣ܩܝܼܬܘܿܢ ܐܢܵܫܵܐ ܠܐܵܚܘܿܢܘܼܗܝ ܡ̣ܢ ܠܸܒܵܘܵܬܵܘ̈ܟ̣ܘܿܢ.

ܩܦܠܐܘܢ: ܝܛ

1 ܘܗ̄ܘܹܠܵܐ: ܟܲܕ ܬܘܼܡܸܡܠܹܐ ܝܼܫܘܿܥ ܠܐܲܢܹܐ ܗܹܡܸܙܡܵܢܹ̈ܐ: ܫܘܼܢܹܠܹܐ ܡ̣ܢ ܓܠܝܼܠܵܐ ܘܐܬܹܠܹܐ ܠܬܸܚܘܼܒܹ̈ܐ ܕܝܼܗܘܼܕ ܠܡܲܪܙܵܐ 2 ܐܚܹܪ̄ܢܵܐ ܕܝܘܿܪܕܢܵܢ. ܘܐܬܹܠܘܿܢ ܒܵܬ̄ܪܹܗ ܟܸܢܫܹ̈ܐ ܪܵܒܵܐ: ܘܒܘܼܣܡܵܝܠܹܐ ܬܵܡܵܐ. 3 ܘܐܬܹܠܘܿܢ ܠܟܸܣܠܹܗ ܦܪ̈ܝܼܫܹܐ: ܓ̰ܵܪܘܿܒܹܗ: ܘܒܹܐܡܵܪܵܐ: ܐܸܢ 4 ܒܕܲܣܬܘܼܪ ܝܼܠܵܐ ܕܪܲܦܹܐ ܒܲܟ̣ܬܹܗ ܒܟܠ ܗܲܓ̰ܲܬ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ: ܠܵܐ ܩܪܹܠܵܘܟ̣ܘܿܢ ܕܗ̇ܘ ܕܥܒܸܕܠܹܐ 5 ܡ̣ܢ ܒܪܵܫܝܼܬ: ܐܘܼܪܙܵܐ ܘܢܸܩܒ̣ܵܐ ܥܒ̣ܝܼܕܵܝܠܹܐ. ܘܐܡܸܪܹܐ: ܣܵܒܵܒ ܕܐܵܗܵܐ ܒܸܬ ܫܵܒܸܩ ܐܢܵܫܵܐ ܠܒܵܒܹܗ ܘܠܝܸܡܹܗ: ܘܒܸܬ ܬܲܒܸܥ 6 ܠܒܲܟ̣ܬܹܗ: ܘܒܸܬ ܗܵܘܝܼ ܬܸܪܘܵܝ ܚܵܕ̄ ܒܸܣܪܵܐ. ܗܲܕܟ̣ܵܐ ܐܚܹܪ̄ܢܵܐ ܠܹܐ ܝܢܵܐ ܬܪܲܝ: ܐܸܠܵܐ ܚܵܕ̄ ܒܸܣܪܵܐ. ܒܲܣ ܡܸܢܕܝܼ 7 ܕܐܲܠܵܗܵܐ ܙܘܼܘܸܓܠܹܐ: ܒܲܪܢܵܫܵܐ ܠܵܐ ܦܵܪܸܫ. ܐܵܡܪܝܼ ܐܸܠܹܗ: ܒܲܣ ܩܵܡܘܿܕܝܼ ܡܘܼܫܹܐ ܦܩܸܕܠܹܐ ܠܝܼܵܗ̄ܒ̣ܵܐ ܟܬܵܒ̣ܵܐ ܕܕܘܼܠܵܠܵܐ: 8 ܘܠܪܲܦܘܼܝܘܼܗ̇. ܐܡܸܪܹܐ ܐܸܠܵܝ: ܡܘܼܫܹܐ ܠܕܲܪܩܘܼܒ̣ܠ ܕܩܸܫܝܘܼܬܵܐ ܕܠܸܒܵܘܟ̣ܘܿܢ ܝܸܗܒܸܠܹܐ ܕܲܣܬܘܼܪ ܐܸܠܵܘܟ̣ܘܿܢ ܕܪܲܦܝܼܬܘܿܢ 9 ܒܲܟ̣ܬܵܬܵܘ̈ܟ̣ܘܿܢ: ܐܝܼܢܵܐ ܡ̣ܢ ܒܪܵܫܝܼܬ ܠܹܐ ܗ̄ܘܵܐ ܗܲܕܟ̣ܵܐ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡ̇ܢ ܕܫܵܒܸܩ ܒܲܟ̣ܬܹܗ ܫܒ̣ܘܿܩ ܡ̣ܢ ܒܗܲܓ̰ܲܬ ܕܙܵܢܝܘܼܬܵܐ: ܘܫܵܩܸܠ ܚܕܵܐ ܐܚܹܪ̄ܬܵܐ: ܒܸܥܒ̣ܵܕܵܐ ܝܠܹܐ ܩܲܗܒܘܼܬܵܐ: ܘܡ̇ܢ ܕܫܵܩܸܠ ܠܫܒ̣ܝܼܩܬܵܐ: ܒܸܥܒ̣ܵܕܵܐ ܝܠܹܐ ܩܲܗܒܘܼܬܵܐ. 10 ܐܵܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܐܸܢ ܗܲܕܟ̣ܵܐ ܫܘܼܠܵܐ ܐܝܼܬ 11 ܒܹܝܠ ܓܲܒ̣ܪܵܐ ܠܒܲܟ̣ܬܵܐ: ܠܹܐ ܝܠܵܐ ܨܦܵܝܝܼ ܠܸܓܒ̣ܵܪܵܐ. ܐܝܼܢܵܐ ܗ̇ܘ ܐܡܸܪܹܐ ܐܸܠܵܝ: ܟܠ ܐܢܵܫܵܐ ܠܹܐ ܡܵܨܹܐ ܩܵܒܸ̇ܠ ܠܐܵܗܵܐ 12 ܗܹܡܸܙܡܵܢ: ܐܸܠܵܐ ܡ̇ܢ ܕܝܼܠܹܐ ܝܘܼܗ̄ܒ̣ܵܐ ܐܸܠܹܗ. ܣܵܒܵܒ ܕܐܝܼܬ ܡܗܲܝܡܢܹ̈ܐ ܕܡ̣ܢ ܟܹܪ̄ܣܵܐ ܕܝܸܡܵܝ ܗ̄ܘܹܠܘܿܢ ܗܲܕܟ̣ܵܐ: ܘܐܝܼܬ ܡܗܲܝܡܢܹ̈ܐ ܕܡ̣ܢ ܒܢܲܝ̈ܢܵܫܵܐ ܗ̄ܘܹܠܘܿܢ ܡܗܲܝܡܢܹ̈ܐ: ܘܐܝܼܬ ܡܗܲܝܡܢܹ̈ܐ ܕܥܒ̣ܝܼܕܵܠܘܿܢ ܓܵܢܵܝ ܡܗܲܝܡܢܹ̈ܐ ܒܚܵܬܸܪ ܕܡܲܠܟܘܼܬܵܐ ܕܫܡܲܝܵܐ. ܡ̇ܢ ܕܡܵܨܹܐ ܩܵܒܸ̇ܠ: ܩܵܒܸ̇ܠ. 13 ܗ̇ܝܓܵܗ ܡܘܼܬ̄ܝܹܠܘܿܢ ܠܟܸܣܠܹܗ ܝܵܠܹ̈ܐ ܙܥܘܿܪܹ̈ܐ ܕܡܲܬܸܒ̣ ܐܝܼܕܵܬܹ̈ܗ ܥܲܠܵܝ: ܘܨܵܠܹܐ. ܘܢܓ̰ܘܸܠܘܿܢ ܒܝܼܵܝ ܬܲܠܡܝܼܕܘܼ̈ܗܝ. 14 ܐܝܼܢܵܐ ܝܼܫܘܿܥ ܐܡܸܪܹܐ ܐܸܠܵܝ: ܫܒ̣ܘܿܩܘܿܢ ܠܝܵܠܹ̈ܐ ܙܥܘܿܪܹ̈ܐ ܕܐܵܬܝܼ ܠܟܸܣܠܝܼ: ܘܠܵܐ ܡܲܟܠܝܼܬܘܿܢ ܠܗ̄ܘܿܢ: ܣܵܒܵܒ ܕܕܵܐܢܝܼ ܕܐܲܝܟ 15 ܕܐܲܢܹܐ ܝܼܠܵܐ ܡܲܠܟܘܼܬܵܐ ܕܫܡܲܝܵܐ. ܘܡܘܼܬܒ̣ܵܝܠܹܐ ܐܝܼܕܵܬܹ̈ܗ ܥܲܠܵܝ: ܘܐܙܸܠܹܐ ܡ̣ܢ ܬܵܡܵܐ. 16 ܘܗܵܐ: ܐܬܹܠܹܐ ܚܵܕ̄ ܘܐܡܸܪܹܐ ܐܸܠܹܗ: ܡܲܠܦܵܢܵܐ ܛܵܒ̣ܵܐ: ܡܘܼܕܝܼ 17 ܡܸܢܕܝܼ ܛܵܒ̣ܵܐ ܥܵܒ̣ܕܸܢ: ܕܗܵܘܝܼ ܠܝܼ ܚܲܝܹ̈ܐ ܕܠܵܐܒܵܕ. ܐܝܼܢܵܐ ܗ̇ܘ ܐܡܸܪܹܐ ܐܸܠܹܗ: [45] ܩܵܡܘܿܕܝܼ ܒܸܩܪܵܝܝܼ ܝܘܸܬ ܛܵܒ̣ܵܐ: ܠܲܝܬ ܛܵܒ̣ܵܐ ܫܒ̣ܘܿܩ ܡ̣ܢ ܚܵܕ̄: ܐܲܠܵܗܵܐ. ܐܝܼܢܵܐ ܐܸܢ ܒܸܒܲܥܝܵܐ ܝܘܸܬ 18 ܕܐܵܘܪܸܬ ܠܚܲܝܹ̈ܐ: ܢܛܘܪ ܦܘܼܩܕܵܢܹ̈ܐ. ܐܵܡܸܪ ܐܸܠܹܗ: ܐܲܝܢܝܼ: ܝܼܫܘܿܥ ܐܡܸܪܹܐ ܐܸܠܹܗ: ܠܵܐ ܩܵܛܠܸܬ: ܠܵܐ ܥܵܒ̣ܕܸܬ ܩܲܗܒܘܼܬܵܐ: 19 ܠܵܐ ܓܵܢܒܸܬ: ܠܵܐ ܝܵܗ̄ܒܸܬ ܣܵܗܕܘܼܬܵܐ ܕܵܓܵܠܬܵܐ. ܘܥܒ̣ܘܿܕ ܐܝܼܩܵܪܵܐ ܠܒܵܒܘܼܟ ܘܠܝܸܡܘܼܟ: ܘܡܲܚܒܸܬ ܠܫܒ̣ܵܒ̣ܘܼܟ ܐܲܝܟ 20 ܓܵܢܘܼܟ. ܐܵܡܸܪ ܐܸܠܹܗ ܗ̇ܘ ܓ̰ܘܲܢܩܵܐ: ܐܲܢܹܐ ܟܠܵܝ ܢܛܝܼܪܵܝ 21 ܝܘܸܢ [46] ܡ̣ܢ ܝܵܠܘܼܬܝܼ. ܡܘܼܕܝܼ ܐܚܹܪ̄ܢܵܐ ܒܵܨܘܿܪܵܐ ܝܘܸܢ. ܐܡܸܪܹܐ ܐܸܠܹܗ ܝܼܫܘܿܥ: ܐܸܢ ܒܲܥܝܸܬ ܗܵܘܸܬ ܟܵܡܝܼܠ: ܙܹܠ̄ܐ ܙܵܒܸ̇ܢ ܡܸܢܕܝܼܘܟ ܘܗܲܒ̄ܠ ܠܡܸܣܟܹܢܹ̈ܐ: ܘܒܸܬ ܗܵܘܝܵܐ ܠܘܼܟ ܚܲܙܝܼܢܵܐ ܒܫܡܲܝܵܐ: ܬܵܐ: 22 ܐܵܬܸܬ ܒܵܬ̄ܪܝܼ. ܘܫܡܸܥܠܹܐ ܗ̇ܘ ܓ̰ܘܲܢܩܵܐ ܐܵܗܵܐ ܗܹܡܸܙܡܵܢ: ܘܐܙܸܠܹܐ ܟܲܕ ܦܫܝܼܡܵܐ: ܣܵܒܵܒ ܕܐܝܼܬ ܗ̄ܘܵܐ ܠܹܗ ܡܵܐܠ ܪܵܒܵܐ. 23 ܘܐܡܸܪܹܐ ܝܼܫܘܿܥ ܠܬܲܠܡܝܼܕܘܼ̈ܗܝ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܥܲܣܩܵܐ ܝܠܵܐ ܠܕܵܘܠܲܬܡܲܢܕ ܕܐܵܘܸܪ ܠܡܲܠܟܘܼܬܵܐ 24 ܕܫܡܲܝܵܐ. ܘܡܸܕܪܹܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܘܼܫ ܗܵܣܵܢܵܝܝܼ ܝܠܵܐ ܠܓܘܼܡܠܵܐ ܠܹܐܘܵܪܵܐ ܒܢܸܩܒܵܐ ܕܚܡܵܛܵܐ: 25 ܡ̣ܢ ܕܕܵܘܠܲܬܡܲܢܕ ܐܵܘܸܪ ܠܡܲܠܟܘܼܬܹܗ ܕܐܲܠܵܗܵܐ. ܘܟܲܕ ܫܡܸܥܠܘܿܢ ܬܲܠܡܝܼܕܹ̈ܐ: ܥܵܓ̰ܒܝܼ ܗ̄ܘܵܘ ܪܵܒܵܐ: ܘܐܵܡܪܝܼ: 26 ܒܲܣ ܡܵܢܝܼ ܡܵܨܹܐ ܚܲܝܹܐ. ܚܹܪܹܐ ܒܝܼܵܝ ܝܼܫܘܿܥ: ܘܐܡܸܪܹܐ ܐܸܠܵܝ: ܠܟܸܣ ܒܢܲܝ̈ܢܵܫܵܐ ܐܵܗܵܐ ܠܹܐ ܡܵܨܝܵܐ: ܐܝܼܢܵܐ ܠܟܸܣ 27 ܐܲܠܵܗܵܐ ܟܠ ܡܸܢܕܝܼ ܟܹܐ ܡܵܨܝܵܐ. ܗ̇ܝܓܵܗ ܓ̰ܘܼܘܸܒܠܹܐ ܟܹܐܦܵܐ: ܘܐܡܸܪܹܐ ܐܸܠܹܗ: ܗܵܐ: ܐܲܚܢܵܢ ܫܒܸܩܠܲܢ ܟܠ ܡܸܢܕܝܼ ܘܐܬܹܠܲܢ 28 ܒܵܬ̄ܪܘܼܟ. ܒܲܣ ܡܘܼܕܝܼ ܒܸܬ ܗܵܘܹܐ ܠܲܢ. ܐܵܡܸܪ ܐܸܠܵܝ ܝܼܫܘܿܥ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܲܚܬܘܿܢ ܕܐܬܹܠܵܘܟ̣ܘܿܢ ܒܵܬ̄ܪܝܼ: ܒܥܵܠܡܵܐ ܚܵܕ̄ܬܵܐ ܐܝܼܡܲܢ ܕܝܵܬܸܒ̣ ܒܪܘܼܢܹܗ ܕܐܢܵܫܵܐ ܥܲܠ ܬܪܘܿܢܘܿܣ ܕܚܸܩܪܹܗ: ܒܸܬ ܝܵܬܒ̣ܝܼܬܘܿܢ ܐܘܼܦ ܐܲܚܬܘܿܢ ܥܲܠ ܬܪܸܥܣܲܪ ܬܪ̈ܘܿܢܘܿܣܹܐ: ܘܒܸܬ ܕܵܝܢܝܼܬܘܿܢ ܬܪܸܥܣܲܪ ܫܲܒ̣̈ܛܹܐ 29 ܕܝܼܣܪܵܝܹܠ. ܘܟܠ ܐܢܵܫܵܐ ܕܫܵܒܸܩ ܒܵܬܹ̈ܐ: ܝܲܢ ܐܵܚܘܿܢܘܵܬܹ̈ܐ: ܝܢ ܚܵܬܘܵܬܹ̈ܐ: ܝܲܢ ܒܵܒܵܐ: ܝܲܢ ܝܸܡܵܐ: ܝܲܢ ܒܲܟ̣ܬܵܐ: ܝܲܢ ܒܢܘܼܢܹ̈ܐ: ܝܲܢ ܚܲܩܠܵܢܹ̈ܐ: ܒܚܵܬܸܪ ܕܫܸܡܝܼ: ܚܵܕ̄ ܒܡܵܐܐ ܒܸܬ ܩܵܒܸ̇ܠ: ܘܚܲܝܹ̈ܐ 30 ܕܠܵܐܒܵܕ ܒܸܬ ܝܵܪܸܬ. ܐܝܼܢܵܐ ܪܵܒܵܐ ܩܵܕ̄ܡܵܝܹ̈ܐ ܒܸܬ ܗܵܘܝܼ ܐܚܵܪ̈ܵܝܹܐ: ܘܐܚܵܪ̈ܵܝܹܐ ܩܵܕ̄ܡܵܝܹ̈ܐ.

ܩܦܠܐܘܢ: ܟ

1 ܣܵܒܵܒ ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܐܢܵܫܵܐ ܡܵܪܹܐ ܒܲܝܬܵܐ: 2 ܕܦܠܸܛܠܹܐ ܒܨܲܦܪܵܐ ܕܕܵܒܸܩ ܦܵܥܠܹ̈ܐ ܠܟܲܪܡܹܗ. ܘܩܛܸܥܠܹܐ ܥܲܡ ܦܵܥ̈ܠܹܐ ܡ̣ܢ ܕܝܼܢܵܪܵܐ ܒܝܘܿܡܵܐ: ܘܫܘܼܕܪܵܝܠܹܐ ܠܟܲܪܡܹܗ. 3 ܘܦܠܸܛܠܹܐ ܒܣܵܥܲܬ ܕܬܠܵܬ̄: ܘܚܙܹܠܹܐ ܐܚܹܪ̄ܢܹܐ ܟܸܠܝܹܐ ܒܫܘܼܩܵܐ 4 ܒܵܛܝܼ̈ܠܹܐ. ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܐܘܼܦ ܐܲܚܬܘܿܢ ܠܟܲܪܡܵܐ: 5 ܘܡܸܢܕܝܼ ܕܝܼܠܹܐ ܗܲܩ ܒܸܬ ܝܵܗ̄ܒܸܢܵܘܟ̣ܘܿܢ. ܘܐܵܢܝܼ ܐܙܸܠܘܿܢ: ܘܦܠܸܛܠܹܐ ܡܸܕܪܹܐ ܒܣܵܥܲܬ ܕܐܸܫܸܬ ܘܕܸܐܬܫܲܥ ܘܥܒܸܕܠܹܐ 6 ܗܲܕܟ̣ܵܐ. ܘܐܲܝܟ ܒܣܵܥܲܬ ܕܚܲܕܸܥܣܲܪ ܦܠܸܛܠܹܐ ܘܡܘܼܫ̄ܟ̰ܸܚܠܹܐ ܐܚܹܪ̄ܢܹܐ ܟܸܠܝܹܐ ܒܵܛܝܼܠܹ̈ܐ: ܘܐܡܸܪܹܐ ܐܸܠܵܝ: ܩܵܡܘܿܕܝܼ ܟܸܠܝܹܐ 7 ܝܬܘܿܢ ܠܲܐܟ̣ܵܐ ܟܠܹܗ ܝܘܿܡܵܐ ܒܵܛܝܼܠܹ̈ܐ. ܐܵܡܪܝܼ ܐܸܠܹܗ: ܕܐܢܵܫܵܐ ܠܵܐ ܕܒܸܩܠܹܐ ܐܸܠܲܢ. ܐܡܸܪܹܐ ܐܸܠܵܝ: ܙܹܠ̄ܡܘܿܢ ܐܘܼܦ ܐܲܚܬܘܿܢ 8 ܠܟܲܪܡܵܐ. ܐܝܼܢܵܐ ܟܲܕ ܗ̄ܘܹܠܹܐ ܪܲܡܫܵܐ: ܐܡܸܪܹܐ ܡܵܪܵܐ ܕܟܲܪܡܵܐ ܠܢܵܙܝܼܪܹܗ: ܩܪܝܼ ܠܦܵܥ̈ܠܹܐ: ܘܗܲܒ̄ܠ ܗܵܩܵܝ: ܘܫܵܪܝܼ ܡ̣ܢ 9 ܐܚܵܪ̈ܵܝܹܐ ܘܗܲܠ ܩܵܕ̄ܡܵܝܹ̈ܐ. ܘܐܬܹܠܘܿܢ ܐܵܢܝܼ ܕܐܲܝܟ ܒܣܵܥܲܬ 10 ܕܚܲܕܸܥܣܲܪ: ܫܩܸܠܘܿܢ ܕܝܢܵܪܐ ܕܝܢܵܪܵܐ. ܘܟܲܕ ܐܬܹܠܘܿܢ ܩܵܕ̄ܡܵܝܹ̈ܐ: ܚܫܸܒ̣ܠܘܿܢ ܕܙܵܘܕܵܐ ܒܸܬ ܫܵܩܠܝܼ ܗ̄ܘܵܘ: ܘܫܩܸܠܘܿܢ 11 ܕܝܼܢܵܪܵܐ ܕܝܢܵܪܵܐ ܐܘܼܦ ܐܵܢܝܼ. ܘܟܲܕ ܫܩܸܠܘܿܢ: ܛܘܼܪܛܸܡܠܘܿܢ 12 ܥܲܠ ܡܵܪܹܐ ܒܲܝܬܵܐ. ܒܹܐܡܵܪܵܐ: ܐܲܢܹܐ ܐܚܵܪ̈ܵܝܹܐ ܚܕܵܐ ܣܵܥܲܬ ܦܠܸܚܠܘܿܢ: ܘܥܒ̣ܝܼܕܵܝܠܘܼܟ ܒܵܪܵܒܵܪ ܥܲܡܲܢ ܕܛܥܸܢܲܢ ܝܘܼܩܪܹܗ 13 ܕܝܘܿܡܵܐ ܘܚܸܡܹܗ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܠܚܵܕ̄ ܡܸܢܵܝ: ܚܲܒ̣ܪܝܼ: ܢܵܐܗܲܩ ܠܹܐ ܝܘܸܢ ܒܸܥܒ̣ܵܕܵܐ ܒܝܼܘܼܟ. ܠܹܐ ܗ̄ܘܵܐ 14 ܒܕܝܢܵܪܵܐ ܩܛܸܥܠܘܼܟ ܥܲܡܝܼ. ܫܩܘܠ ܕܝܼܘܼܟ ܘܙܹܠ̄ܐ. 15 ܒܸܒܲܥܝܵܐ ܝܘܸܢ ܕܠܵܐܗܵܐ ܐܚܵܪܵܝܵܐ ܝܵܗ̄ܒܸܢ ܐܲܝܟ ܕܐܘܼܦ ܐܸܠܘܼܟ. ܝܲܢ ܠܹܐ ܝܠܵܐ ܒܕܲܣܬܘܼܪ ܐܸܠܝܼ: ܕܡܸܢܕܝܼ ܕܒܵܣܡܵܐ ܠܝܼ ܥܵܒ̣ܕܸܢ ܒܕܝܼܝܼ: ܝܲܢ ܥܲܝܢܘܼܟ ܒܝܼܫܬܵܐ ܝܠܵܐ ܣܵܒܵܒ ܕܐܵܢܵܐ ܛܵܒ̣ܵܐ ܝܘܸܢ. 16 ܗܲܕܟ̣ܵܐ ܒܸܬ ܗܵܘܝܼ ܐܚܵܪܵܝܹܐ ܩܵܕ̄ܡܵܝܹ̈ܐ: ܘܩܵܕ̄ܡܵܝܹ̈ܐ ܐܚܵܪܵܝܹܐ. 17 ܘܟܲܕ ܝܼܫܘܿܥ ܒܹܐܣܵܩܵܐ ܗ̄ܘܵܐ ܠܐܘܿܪܸܫܠܸܡ: ܠܘܼܒܸܠܹܐ ܠܬܪܸܥܣܲܪ ܬܲܠܡܝܼܕܘܼ̈ܗܝ ܒܹܝܠܹܗ ܘܐܸܠܵܝ: ܘܒܐܘܼܪܚܵܐ ܐܡܸܪܹܐ 18 ܐܸܠܵܝ. ܗܵܐ: ܒܹܐܣܵܩܵܐ ܝܘܵܚ ܠܐܘܿܪܸܫܠܸܡ: ܘܒܪܘܼܢܹܗ ܕܐܢܵܫܵܐ ܒܸܬ ܦܵܝܸܫ ܣܘܼܦܝܵܐ ܠܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ: ܘܒܸܬ 19 ܥܵܒ̣ܕܝܼ ܠܹܗ ܓܘܼܢܵܗܟܵܪ ܠܡܵܘܬܵܐ. ܘܒܸܬ ܣܵܦܝܼ ܠܹܗ ܠܛܵܝܸܦܹ̈ܐ ܕܡܲܣܚܸܪܝܼ ܒܝܹܗ: ܘܓ̰ܲܢܓ̰ܸܪܝܼ ܠܹܗ: ܘܡܵܚܝܼ ܠܹܗ ܠܙܩܝܼܦܵܐ: ܘܒܝܘܿܡܵܐ ܕܬܠܬ̄ܐ ܒܸܬ [47] ܩܵܝܸܡ. 20 ܗ̇ܝܓܵܗ ܐܬܹܠܵܐ ܠܟܸܣܠܹܗ ܝܸܡܵܐ ܕܒܢܘܼܢܹ̈ܐ ܕܙܲܒ̣ܕܲܝ ܥܲܡ ܒܢܘܼܢܘܼ̈ܗ̇: ܘܣܓܸܕܠܵܐ ܐܸܠܹܗ ܘܛܵܠܒܵܐ ܗ̄ܘܵܐ ܡܸܢܹܗ ܡܸܢܕܝܼ. 21 ܘܗ̇ܘ ܐܡܸܪܹܐ ܐܸܠܵܗ̇: ܡܘܼܕܝܼ ܒܲܥܝܲܬܝ: ܐܵܡܪܵܐ ܐܸܠܹܗ: ܐܡܘܿܪ ܕܝܵܬܒ̣ܝܼ ܐܲܢܹܐ ܬܪܲܝ ܒܢܘܼܢܝܼ̈: ܚܵܕ̄ ܡ̣ܢ ܝܲܡܝܼܢܘܼܟ ܘܚܵܕ̄ ܡ̣ܢ 22 ܣܸܡܵܠܘܼܟ ܒܡܲܠܟܘܼܬܘܼܟ. ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ: ܠܹܐ ܝܬܘܿܢ ܒܝܼܕܲܥܝܵܐ ܡܘܼܕܝܼ ܒܸܛܠܵܒܵܐ ܝܬܘܿܢ. ܡܵܨܝܼܬܘܿܢ ܠܸܫܬܵܝܵܐ ܟܵܣܵܐ ܕܐܵܢܵܐ ܗܕܝܼܪܵܐ ܝܘܸܢ ܠܸܫܬܵܝܵܐ: [48] ܐܵܡܪܝܼ ܐܸܠܹܗ: 23 ܟܹܐ ܡܵܨܵܚ. ܐܵܡܸܪ ܐܸܠܵܝ: ܟܵܣܝܼ ܗܲܪ ܒܸܬ ܫܵܬܝܼܬܘܿܢ: [49] ܐܝܼܢܵܐ ܠܸܬܝܵܒ̣ܵܐ ܡ̣ܢ ܝܲܡܝܼܢܝܼ ܘܡ̣ܢ ܣܸܡܵܠܝܼ: ܠܹܐ ܝܠܵܐ ܕܝܼܝܼ ܕܝܵܗ̄ܒܸܢ: 24 ܐܸܠܵܐ ܠܐܵܢܝܼ ܕܦܸܫܠܵܐ ܗܘܼܕܸܪܬܵܐ (ܐܸܠܵܝ) ܡ̣ܢ ܒܵܒܝܼ. ܐܝܼܢܵܐ ܟܲܕ ܫܡܸܥܠܘܿܢ ܥܸܣܪܵܐ: ܟܪܸܒܠܘܿܢ ܥܲܠ ܕܐܵܢܝܼ ܬܪܲܝ 25 ܐܵܚܘܿܢܘܵܬܹ̈ܐ. ܘܩܪܹܠܹܐ ܠܐܲܢܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܒܝܼܕܲܥܝܵܐ ܝܬܘܿܢ ܕܪܹ̈ܫܵܢܹܐ ܕܛܵܝܸܦܹ̈ܐ ܡܵܪ̈ܵܘܵܬܵܝ ܝܢܵܐ: ܘܓܘܼܪ̈ܵܢܵܝ ܟܹܐ 26 ܥܵܒ̣ܕܝܼ ܗܘܼܟܡܵܐ ܥܲܠܵܝ. ܐܝܼܢܵܐ ܠܵܐ ܗܲܕܟ̣ܵܐ ܗܵܘܹܐ ܓܵܘܵܘܟ̣ܘܿܢ: ܐܸܠܵܐ ܡ̇ܢ ܕܒܲܥܝܹܐ ܗܵܘܹܐ ܓܵܘܵܘܟ̣ܘܿܢ ܓܘܼܪܵܐ: ܗܵܘܹܐ 27 ܚܸܠܡܲܬܟܵܪܵܘܟ̣ܘܿܢ. ܘܡ̇ܢ ܕܒܲܥܝܹܐ ܗܵܘܹܐ ܩܵܕ̄ܡܵܝܵܐ ܓܵܘܵܘܟ̣ܘܿܢ: 28 ܒܸܬ ܗܵܘܹܐ ܪܹܓܵܘܟ̣ܘܿܢ. ܕܵܐܟ̣ܝܼ ܕܒܪܘܼܢܹܗ ܕܐܢܵܫܵܐ ܠܵܐ ܐܬܹܠܹܐ ܕܦܵܝܸܫ ܥܒ̣ܝܼܕܵܐ ܚܸܠܡܲܬ: ܐܸܠܵܐ ܕܥܵܒܸܕ ܚܸܠܡܲܬ: ܘܕܝܵܗ̄ܒܸܠ ܓܵܢܹܗ ܦܘܼܪܩܵܢܵܐ ܡܒܵܕܵܠ ܕܪܵܒܵܐ. 29 ܘܟܲܕ ܦܠܸܛܠܹܐ ܝܼܫܘܿܥ ܡ̣ܢ ܐܝܼܪܝܼܚܘܿ: ܐܬܹܠܹܐ ܒܵܬ̄ܪܹܗ 30 ܟܸܢܫܵܐ ܪܵܒܵܐ. ܘܗܵܐ: ܬܪܲܝ ܣܸܡܝܹ̈ܐ ܒܸܬܝܵܒ̣ܵܐ ܥܲܠ ܡܲܪܙܵܐ ܕܐܘܼܪܚܵܐ: ܘܟܲܕ ܫܡܸܥܠܘܿܢ ܕܝܼܫܘܿܥ ܒܸܥܒ̣ܵܕܵܐ ܗ̄ܘܵܐ: ܝܸܗܒܸܠܘܿܢ ܩܵܠܵܐ ܒܹܐܡܵܪܵܐ: ܪܵܚܸܡ ܥܲܠܲܢ: ܡܵܪܝܵܐ: ܒܪܘܼܢܹܗ ܕܕܵܘܝܼܕ. 31 ܐܝܼܢܵܐ ܟܸܢܫܵܐ ܢܓܸܘܠܹܐ ܒܝܼܵܝ ܕܫܵܬܩܝܼ. ܘܐܵܢܝܼ ܒܘܼܫ ܙܵܘܕܵܐ ܡܘܼܪܸܡܠܘܿܢ ܩܵܠܵܝ ܒܹܐܡܵܪܵܐ: ܪܵܚܸܡ ܥܲܠܲܢ: ܡܵܪܝܵܐ: ܒܪܘܼܢܹܗ 32 ܕܕܵܘܝܼܕ. ܘܟܠܹܠܹܐ ܝܼܫܘܿܥ ܘܩܸܪܝܵܝܠܹܐ: ܘܐܡܸܪܹܐ: ܡܘܼܕܝܼ 33 ܒܲܥܝܝܼܬܘܿܢ ܕܥܵܒ̣ܕܸܢܵܘܟ̣ܘܿܢ. ܐܵܡܪܝܼ ܐܸܠܹܗ: ܐܵܓ̣ܝܢ: ܕܦܵܝܫܝܼ 34 ܦܬܝܼܚܹܐ ܥܲܝ̈ܢܲܢ. ܘܪܘܼܚܸܡܠܹܐ ܥܲܠܵܝ ܝܼܫܘܿܥ: ܘܕܩܸܪܹܐ ܒܥܲܝܢܵܝ̈. ܘܕܲܪܣܵܥܲܬ ܚܙܹܠܘܿܢ: ܘܐܙܸܠܘܿܢ ܒܵܬ̄ܪܹܗ.

ܩܦܠܐܘܢ: ܟܐ

1 ܘܟܲܕ [50] ܩܘܼܪܒܸܢܘܿܢ ܠܐܘܿܪܸܫܠܸܡ: ܘܐܬܹܠܘܿܢ ܠܒܹܝܬ. ܦܵܓܹܐ ܠܟܸܣ ܛܘܼܪܵܐ ܕܙܲܝܬܹ̈ܐ: ܗ̇ܝܓܵܗ ܫܘܼܕܸܪܹܐ ܝܼܫܘܿܥ ܠܬܪܲܝ ܡ̣ܢ 2 ܬܲܠܡܝܼܕܘܼ̈ܗܝ. ܘܐܡܸܪܹܐ ܐܸܠܵܝ: ܙܹܠ̄ܡܘܿܢ ܠܐܵܗܵܐ ܡܵܬܵܐ ܕܝܼܠܵܐ ܠܒܲܪܩܘܼܒ̣ܠܵܘܟ̣ܘܿܢ: ܘܕܲܪܣܵܥܵܬ ܒܸܬ ܡܵܫ̄ܟ̰ܚܝܼܬܘܿܢ ܚܡܵܪܬܵܐ ܐܣܝܼܪܬܵܐ ܘܓ̰ܲܥܫܵܐ ܥܲܡܵܗ̇: ܫܪܹܡܘܿܢ ܡܲܝܬ̄ܡܘܿܢ ܠܟܸܣܠܝܼ. 3 ܘܐܸܢ ܐܢܵܫܵܐ ܐܵܡܸܪ ܐܸܠܵܘܟ̣ܘܿܢ ܡܸܢܕܝܼ: ܐܡܘܿܪܘܿܢ ܐܸܠܹܗ: ܠܡܵܪܲܢ 4 ܠܵܙܸܡ ܝܼܢܵܐ: ܘܕܲܪܣܵܥܲܬ ܒܸܬ ܫܵܕܸܪܘܿܢ. ܐܝܼܢܵܐ ܐܵܗܵܐ ܗ̄ܘܹܠܵܐ: ܕܦܵܝܸܫ ܬܘܼܡܸܡܵܐ ܡܸܢܕܝܼ ܕܐܡܝܼܪܵܐ ܗ̄ܘܵܐ ܒܝܸܕ ܢܒ̣ܝܼܵܐ: ܕܐܡܸܪܹܐ. 5 ܐܡܘܿܪܘܿܢ ܠܒܪܵܬܐ ܕܨܸܗܝܘܿܢ: ܗܵܐ: ܡܲܠܟܵܟ̣ܝ ܒܹܐܬܵܝܵܐ ܝܠܹܐ ܠܟܸܣܠܵܟ̣ܝ: ܡܟܝܼܟ̣ܵܐ ܘܪܟܝܼܒ̣ܵܐ ܥܲܠ ܚܡܵܪܬܵܐ: ܘܥܲܠ 6 ܓ̰ܲܥܫܐ ܟܘܼܪܪܵܐ ܕܚܡܵܪܬܐ. ܘܐܙܸܠܘܿܢ ܬܲܠܡܝܼܕܹ̈ܐ ܘܥܒܸܕܠܘܿܢ 7 ܕܵܐܟ̣ܝܼ ܕܦܩܝܼܕܵܝܠܹܐ ܝܼܫܘܿܥ. ܘܡܘܼܬ̄ܝܹܠܘܿܢ ܠܚܡܵܪܬܵܐ ܘܠܓ̰ܲܥܫܵܐ: ܘܡܘܼܬܸܒ̣ܠܘܿܢ ܥܲܠܝ ܓ̰ܘܼܠܵܝ̈: ܘܪܟܸܒ̣ܠܹܐ ܥܲܠܘܼܗܝ 8 ܝܼܫܘܿܥ. ܘܒܘܼܫܵܝܝܼ ܕܟܸܢܫܹ̈ܐ ܫܵܘܝܼ ܗ̄ܘܵܘ ܓ̰ܘܼܠܵܝ̈ ܒܐܘܼܪܚܵܐ: ܘܐܚܹܪ̄ܢܹܐ ܦܵܪܡܝܼ ܗ̄ܘܵܘ ܦܲܥܘܵܢܹ̈ܐ ܡ̣ܢ ܐܝܼܠܵܢܹ̈ܐ ܘܕܵܪܝܼ ܗ̄ܘܵܘ 9 ܒܐܘܼܪܚܵܐ. ܘܟܸܢܫܹ̈ܐ ܕܒܹܐܙܵܠܵܐ ܗ̄ܘܵܘ ܩܵܕ̄ܡܘܼܗܝ: ܘܒܹܐܬܵܝܵܐ ܗ̄ܘܵܘ ܒܵܬ̄ܪܹܗ: ܡܲܩܘܸܚܝܼ ܗ̄ܘܵܘ ܘܐܵܡܪܝܼ: ܐܘܿܫܲܥܢܵܐ ܠܒܪܘܼܢܹܗ ܕܕܵܘܝܼܕ: ܒܪܝܼܟ̣ܵܐ ܝܠܹܐ ܗ̇ܘ ܕܒܹܐܬܵܝܵܐ ܝܠܹܐ ܒܫܸܡܹܗ ܕܡܵܪܝܵܐ: 10 ܐܘܿܫܲܥܢܵܐ ܒܡܪ̈ܵܘܡܹܐ. ܘܟܲܕ ܐܘܸܪܹܐ ܠܐܘܿܪܸܫܠܸܡ: ܫܥܸܫܠܵܐ 11 ܟܠܵܗ̇ ܡܕܝܼܢ̄ܬܵܐ: ܒܹܐܡܵܪܵܐ: ܡܵܢܝܼ ܝܠܹܐ ܐܵܗܵܐ. ܘܟܸܢܫܹ̈ܐ ܐܵܡܪܝܼ ܗ̄ܘܵܘ: ܐܵܗܵܐ ܝܠܹܐ ܝܼܫܘܿܥ ܢܒ̣ܝܼܵܐ ܕܡ̣ܢ ܢܵܨܪܲܬ ܕܓܠܝܼܠܵܐ. 12 ܘܐܘܸܪܹܐ ܝܼܫܘܿܥ ܠܗܲܝܟܠܵܐ ܕܐܲܠܵܗܵܐ: ܘܦܘܼܠܸܛܠܹܐ ܠܟܠܵܝ ܐܵܢܝܼ ܕܒܸܙܒ̣ܵܢܵܐ ܗ̄ܘܵܘ ܘܙܵܒܘܿܢܹܐ ܓܵܘ ܗܲܝܟܠܵܐ: ܘܡܘܼܚܕܸܪܹܐ ܠܨܘܼܦܪܹ̈ܐ ܕܨܲܪ̈ܵܦܹܐ: ܘܠܟܘܼܪ̈ܣܵܘܵܬܹܐ ܕܐܵܢܝܼ ܕܙܵܒܘܿܢܹܐ ܝܵܘܢܹ̈ܐ. 13 ܘܐܡܸܪܹܐ ܐܸܠܵܝ: ܟܬܝܼܒ̣ܵܐ ܝܠܹܐ: ܒܲܝܬܝܼ ܒܲܝܬܵܐ ܕܨܠܘܿܬܵܐ ܒܸܬ ܦܵܝܸܫ ܩܸܪܝܵܐ: ܐܝܼܢܵܐ ܐܲܚܬܘܿܢ ܥܒܸܕܠܵܘܟ̣ܘܿܢ ܐܸܠܹܗ ܓܸܦܝܼܬܵܐ 14 ܕܓ̰ܵܠܵܠܝܹܐ. ܘܐܬܹܠܘܿܢ ܠܟܸܣܠܹܗ ܓܵܘ ܗܲܝܟܠܵܐ ܣܸܡܝܹ̈ܐ 15 ܘܣܲܩܲܬܹ̈ܐ ܘܒܘܼܣܡܵܝܠܹܐ. ܐܝܼܢܵܐ ܟܲܕ ܚܙܹܠܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܥܵܓ̰ܸܒܘܼܝܵܬܹ̈ܐ ܕܒܸܥܒ̣ܵܕܵܐ ܗ̄ܘܵܐ: ܘܝܵܠܘܿܢܹ̈ܐ ܩܲܘܘܼܚܹܐ ܒܗܲܝܟܠܵܐ ܘܒܹܐܡܵܪܵܐ: ܐܘܿܫܲܥܢܵܐ ܠܒܪܘܼܢܹܗ ܕܕܵܘܝܼܕ: 16 ܗ̄ܘܹܠܘܿܢ ܒܹܐ ܟܵܝܦ. ܘܐܡܸܪܘܿܢ ܐܸܠܹܗ: ܒܸܫܡܲܥܝܵܐ ܝܘܸܬ ܡܘܼܕܝܼ ܒܹܐܡܵܪܵܐ ܝܢܵܐ ܐܲܢܹܐ: ܐܵܡܸܪ ܐܸܠܵܝ ܝܼܫܘܿܥ: ܗܹܐ. ܗܲܪ ܠܵܐ ܩܪܹܠܵܘܟ̣ܘܿܢ: ܕܡ̣ܢ ܦܘܼܡܵܐ ܕܝܵܠܹ̈ܐ ܘܕܝܲܠܘܼܕܹ̈ܐ ܡܘܼܟܡܸܠܘܼܟ 17 ܬܸܫܒܘܿܚܬܵܐ. ܘܫܒ̣ܝܼܩܵܝܠܹܐ: ܘܦܠܸܛܠܹܐ ܠܒܲܕܲܪ ܡ̣ܢ ܡܕܝܼܢ̄ܬܵܐ ܠܒܹܝܬ ܥܲܢܝܵܐ. ܘܦܸܫܠܹܐ ܒܠܲܝܠܹܐ ܬܵܡܵܐ. 18 ܐܝܼܢܵܐ ܒܩܵܝܕܲܡܬܵܐ: ܟܲܕ ܕܸܪܹܐ ܠܡܕܝܼܢ̄ܬܵܐ: ܟܦܸܢܹܐ. 19 ܘܚܙܹܠܹܐ ܚܵܕ̄ ܐܝܼܠܵܢܵܐ ܕܬܹܐܢܵܐ ܒܐܘܼܪܚܵܐ: ܘܐܬܹܠܹܐ ܠܟܸܣܠܹܗ: ܘܠܵܐ ܡܘܼܫ̄ܟ̰ܸܚܠܹܐ ܒܝܹܗ ܡܸܢܕܝܼ ܫܒ̣ܘܿܩ ܡ̣ܢ ܛܲܪ̈ܦܹܐ ܒܢܲܦ̮ܫܵܝ. ܘܐܡܸܪܹܐ ܐܸܠܹܗ: ܐܚܹܪ̄ܢܵܐ ܠܵܐ ܗܵܘܝܼ ܒܝܼܘܼܟ ܛܥܘܼܢܝܵܬܹ̈ܐ ܠܐܵܒܵܕ. 20 ܘܕܲܪܣܵܥܲܬ ܒܪܸܙܠܹܐ ܗ̇ܘ ܐܝܼܠܵܢܵܐ ܕܬܹܐܢܵܐ. ܘܚܙܹܠܘܿܢ ܬܲܠܡܝܼܕܹ̈ܐ ܘܥܘܼܓ̰ܸܒܠܘܿܢ: ܘܐܡܸܪܘܿܢ: ܕܵܐܟ̣ܝܼ ܕܲܪܣܵܥܲܬ ܒܪܸܙܠܹܐ ܐܝܼܠܵܢܵܐ 21 ܕܬܹܐܢܵܐ. ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܗܵܘܝܵܐ ܠܵܘܟ̣ܘܿܢ ܗܲܝܡܵܢܘܼܬܵܐ: ܘܠܵܐ ܦܵܝܫܝܼܬܘܿܢ ܕܘܼܒܵܪ: ܠܵܐ ܗܲܪ ܐܵܗܵܐ ܕܐܝܼܠܵܢܵܐ ܕܬܹܐܢܵܐ ܒܸܬ ܥܵܒ̣ܕܝܼܬܘܿܢ: ܐܸܠܵܐ ܐܘܼܦ ܐܸܢ ܠܐܵܗܵܐ ܛܘܼܪܵܐ ܐܵܡܪܝܼܬܘܿܢ: ܦܘܼܫ ܫܩܝܼܠܵܐ 22 ܘܦܘܼܫ ܪܘܼܦܝܵܐ ܒܝܵܡܵܐ: ܒܸܬ ܗܵܘܝܵܐ. ܘܟܠ ܡܸܢܕܝܼ ܕܛܵܠܒܝܼܬܘܿܢ ܒܨܠܘܿܬܵܐ ܘܗܲܡܸܢܝܼܬܘܿܢ: ܒܸܬ ܫܵܩܠܝܼܬܘܿܢ.23 ܘܟܲܕ ܐܬܹܠܹܐ ܗ̇ܘ ܠܗܲܝܟܠܵܐ: ܐܬܹܠܘܿܢ ܠܟܸܣܠܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܕܛܵܝܸܦܵܐ ܟܲܕ ܡܵܠܘܿܦܹܐ ܗ̄ܘܵܐ: ܘܐܡܸܪܘܿܢ ܐܸܠܹܗ: ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܬ: ܘܡܵܢܝܼ 24 ܝܘܼܗ̄ܒ̣ܘܼܟ ܝܼܠܹܐ ܐܵܗܵܐ ܗܘܼܟܡܵܐ. ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܐܘܼܦ ܐܵܢܵܐ ܒܸܬ ܒܵܩܪܸܢ ܡܸܢܵܘܟ̣ܘܿܢ ܚܕܵܐ ܗܹܡܸܙܡܵܢ: ܘܐܸܢ ܐܵܡܪܝܼܬܘܿܢ ܠܝܼ: ܐܘܼܦ ܐܵܢܵܐ ܒܸܬ ܐܵܡܪܸܢ ܐܸܠܵܘܟ̣ܘܿܢ ܒܐܲܝܢܝܼ 25 ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. ܡܲܥܡܘܿܕܝܼܬܹܗ ܕܝܘܿܚܲܢܵܢ ܡ̣ܢ ܐܲܝܟܵܐ ܗ̄ܘܵܐ: ܡ̣ܢ ܫܡܲܝܵܐ ܝܲܢ ܡ̣ܢ ܒܢܲܝ̈ܢܵܫܵܐ: ܐܝܼܢܵܐ ܐܵܢܝܼ ܚܫܸܒ̣ܠܘܿܢ ܒܓܵܢܵܝ ܒܹܐܡܵܪܵܐ: ܐܸܢ ܐܵܡܪܵܚ ܡ̣ܢ ܫܡܲܝܵܐ: ܒܸܬ ܐܵܡܸܪ ܐܸܠܲܢ: 26 ܒܲܣ ܩܵܡܘܿܕܝܼ ܠܵܐ ܗܘܼܡܸܢܵܘܟ̣ܘܿܢ ܒܝܹܗ. ܘܐܸܢ ܐܵܡܪܵܚ ܡ̣ܢ ܒܢܲܝ̈ܢܵܫܵܐ: ܒܸܙܕܲܥܝܵܐ ܝܘܵܚ ܡ̣ܢ ܟܸܢܫܵܐ: ܣܵܒܵܒ ܟܠܵܝ ܐܲܝܟ ܢܒ̣ܝܼܵܐ 27 ܟܹܐ ܕܵܒ̣ܩܝܼ ܠܝܘܿܚܲܢܵܢ. ܘܓ̰ܘܼܘܸܒܠܘܿܢ ܘܐܡܸܪܘܿܢ ܠܝܼܫܘܿܥ: ܠܹܐ ܝܘܵܚ ܒܝܼܕܲܥܝܵܐ. ܐܵܡܸܪ ܐܸܠܵܝ ܗ̇ܘ: ܐܘܼܦ ܐܵܢܵܐ ܠܹܐ ܐܵܡܪܸܢ ܐܸܠܵܘܟ̣ܘܿܢ ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. 28 ܐܝܼܢܵܐ ܡܘܼܕܝܼ ܒܸܚܫܵܒ̣ܵܐ ܝܬܘܿܢ: ܚܵܕ̄ ܐܢܵܫܵܐ ܐܝܼܬ ܗ̄ܘܵܘ ܠܹܗ ܬܪܲܝ ܒܢܘܼܢܹ̈ܐ: ܘܐܬܹܠܹܐ ܠܟܸܣ ܩܵܕ̄ܡܵܝܵܐ: ܘܐܡܸܪܹܐ ܐܸܠܹܗ: 29 ܒܪܘܼܢܵܐ: ܙܹܠ̄ܐ ܐܸܕܝܘܼ ܦܠܘܿܚ ܓܵܘ ܟܲܪܡܵܐ. ܘܗ̇ܘ ܓ̰ܘܼܘܸܒܠܹܐ ܘܐܡܸܪܹܐ: ܠܹܐ ܒܵܣܡܵܐ ܠܝܼ. ܐܝܼܢܵܐ ܒܚܲܪܬܵܐ ܦܫܸܡܠܹܐ ܘܐܙܸܠܹܐ. 30 ܘܐܬܹܠܹܐ ܠܟܸܣ ܕܗ̇ܘ ܐܚܹܪ̄ܢܵܐ: ܘܐܡܸܪܹܐ ܐܸܠܹܗ ܗܲܕܟ̣ܵܐ 31 ܘܓ̰ܘܼܘܸܒܠܹܐ ܘܐܡܸܪܹܐ: ܗܹܐ: ܐܵܓ̣ܵܝܝܼ: ܘܠܵܐ ܐܙܸܠܹܐ. ܡܵܢܝܼ ܡܐܲܢܹܐ ܬܪܲܝ ܥܒܸܕܠܹܐ ܪܸܙܵܝܵܐ ܕܒܵܒܘܼܗܝ: ܐܵܡܪܝܼ: ܗ̇ܘ ܩܵܕ̄ܡܵܝܵܐ. ܐܵܡܸܪ ܐܸܠܵܝ ܝܼܫܘܿܥ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܕܲܡܓ̣ܵܟ̰̈ܝܹܐ ܘܙܵܢܝܵܬܹ̈ܐ ܒܸܩܕܵܡܵܘܟ̣ܘܿܢ ܝܼܢܵܐ ܠܡܲܠܟܘܼܬܵܐ 32 ܕܐܲܠܵܗܵܐ. ܣܵܒܵܒ ܕܐܬܹܠܹܐ ܠܟܸܣܠܵܘܟ̣ܘܿܢ ܝܘܿܚܲܢܵܢ ܒܐܘܼܪܚܵܐ ܕܟܹܐܢܘܼܬܵܐ: ܘܠܵܐ ܗܘܼܡܸܢܵܘܟ̣ܘܿܢ ܒܝܹܗ: ܐܝܼܢܵܐ ܕܲܡܓ̣ܵܟ̰̈ܝܹܐ ܘܙܵܢܝܵܬܹ̈ܐ ܗܘܼܡܸܢܘܿܢ ܒܝܹܗ. ܘܐܲܚܬܘܿܢ ܟܲܕ ܚܙܹܠܵܘܟ̣ܘܿܢ: ܐܘܼܦ ܠܵܐ ܦܫܸܡܠܵܘܟ̣ܘܿܢ ܒܚܲܪܬܵܐ: ܕܗܲܡܸܢܝܼܬܘܿܢ ܗ̄ܘܵܘ ܒܝܹܗ. 33 ܫܡܸܥܡܘܿܢ ܡܵܣܵܠܵܐ ܐܚܹܪ̄ܢܵܐ. ܐܝܼܬ ܗ̄ܘܵܐ ܚܵܕ̄ ܐܢܵܫܵܐ ܡܵܪܹܐ ܒܲܝܬܵܐ: ܘܢܨܸܒ̣ܠܹܐ ܟܲܪܡܵܐ: ܘܡܚܹܠܹܐ ܠܚܵܕܸܪ̈ܘܵܢܘܼܗܝ ܣܝܵܓ̣ܵܐ: ܘܚܦܸܪܹܐ ܓܵܘܹܗ [51] ܡܲܥܨܲܪܬܵܐ: ܘܒܢܹܠܹܐ ܒܘܼܪܓ̰ܵܐ: ܘܣܘܼܦܹܠܹܗ 34 ܠܦܵܠܵܚܹ̈ܐ: ܘܐܙܸܠܹܐ ܠܪܸܚܩܵܐ. ܘܟܲܕ [52] ܩܘܼܪܒܸܢܹܐ ܙܲܒ̣ܢܵܐ ܕܛܥܘܼܢܝܵܬܹ̈ܐ: ܫܘܼܕܸܪܹܐ ܠܪܹ̈ܓܵܘܵܬܘܼܗܝ ܠܟܸܣ ܦܵܠܚܹ̈ܐ: 35 ܕܫܵܩܠܝܼ ܗ̄ܘܵܘ ܛܥܘܼܢܝܵܬܹ̈ܗ. ܘܕܒܸܩܠܘܿܢ ܦܵܠܵܚܹ̈ܐ ܠܪܹ̈ܓܵܘܵܬܘܼܗܝ: ܘܐܝܼܬ ܗ̄ܘܵܐ ܕܡܚܹܠܘܿܢ ܐܸܠܹܗ: ܘܐܝܼܬ ܗ̄ܘܵܐ 36 ܕܪܓ̰ܸܡܠܘܿܢ: ܘܐܝܼܬ ܗ̄ܘܵܐ ܕܩܛܸܠܘܿܢ. ܘܡܸܕܪܹܐ ܫܘܼܕܸܪܹܐ ܪܹ̈ܓܵܘܵܬܹܐ ܐܚܹܪ̄ܢܹܐ ܒܘܼܫ ܪܵܒܵܐ ܡ̣ܢ ܩܵܕ̄ܡܵܝܹ̈ܐ: ܘܗܲܕܟ̣ܵܐ ܥܒܸܕܠܘܿܢ 37 ܐܸܠܵܝ. ܐܝܼܢܵܐ ܒܚܲܪܬܵܐ ܫܘܼܕܸܪܹܐ ܠܟܸܣܠܵܝ ܠܒܪܘܼܢܹܗ: 38 ܒܹܐܡܵܪܵܐ: ܡܩܵܘܡܵܐ ܒܸܬ ܢܵܚܦܝܼ ܡ̣ܢ ܒܪܘܼܢܝܼ. ܐܝܼܢܵܐ ܦܵܠܵܚܹ̈ܐ ܟܲܕ ܚܙܹܠܘܿܢ ܠܒܪܘܼܢܵܐ: ܐܡܸܪܘܿܢ ܒܓܵܢܵܝ: ܐܵܗܵܐ ܝܠܹܐ ܡܝܼܪܲܬܓܵܪ: ܬܹܡܘܿܢ ܩܵܛܠܵܚ ܠܹܗ ܘܕܵܒ̣ܩܵܚ ܡܝܼܪܲܬܓܵܪܘܼܬܹܗ. 39 ܙܕܒܸܩܠܘܿܢ ܦܘܼܠܸܛܠܘܿܢ ܐܸܠܹܗ ܠܒܲܕܲܪ ܡ̣ܢ ܟܲܪܡܵܐ: ܘܩܛܸܠܘܿܢ. 40 ܒܲܣ ܐܝܼܡܲܢ ܗܲܕܟ̣ܵܐ ܕܐܵܬܹܐ ܡܵܪܵܐ ܕܟܲܪܡܵܐ: ܡܘܼܕܝܼ ܒܸܬ 41 ܥܵܒܸܕ ܠܐܵܢܝܼ ܦܵܠܵܚܹ̈ܐ. ܐܵܡܪܝܼ ܐܸܠܹܗ: ܣܸܪܝܵܐ ܒܸܬ ܬܵܠܸܩ ܠܗ̄ܘܿܢ ܐܵܢܝܼ ܒܝܼܫܹ̈ܐ: ܘܟܲܪܡܵܐ ܒܸܬ ܝܵܗ̄ܒܸܠ ܠܦܵܠܵܚܹ̈ܐ ܐܚܹܪ̄ܢܹܐ: 42 ܐܵܢܝܼ ܕܝܵܗ̄ܒ̣ܝܼ ܠܹܗ ܛܥܘܼܢܝܵܬܹ̈ܐ ܒܙܲܒ̣ܢܵܝ. ܐܵܡܸܪ ܐܸܠܵܝ ܝܼܫܘܿܥ: ܗܲܪ ܠܵܐ ܩܪܹܠܵܘܟ̣ܘܿܢ ܒܟܬܵܒܹ̈ܐ: ܟܹܐܦܵܐ ܕܡܘܼܣܠܹܠܘܿܢ ܒܲܢܹ̈ܐ ܗ̇ܘ ܗ̄ܘܹܠܹܐ ܠܪܹܫܵܐ ܕܩܸܪܢܝܼܬܵܐ: ܡ̣ܢ ܠܟܸܣ ܡܵܪܝܵܐ ܗ̄ܘܹܠܵܐ ܐܵܗܵܐ: 43 ܘܥܵܓ̰ܸܒܘܼܬܵܐ ܝܠܵܐ ܒܥܲܝ̈ܢܲܢ. ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܦܵܝܫܵܐ ܫܩܝܼܠܬܵܐ ܡܸܢܵܘܟ̣ܘܿܢ ܡܠܟܘܼܬܵܐ ܕܐܲܠܵܗܵܐ: ܘܒܸܬ ܦܵܝܫܵܐ ܝܸܗܒܸܠܬܵܐ ܠܛܵܝܸܦܵܐ  ܕܥܵܒܸܕ ܛܥܘܼܢܝܵܬܘܼ̈ܗ̇. 44 ܘܡ̇ܢ ܕܢܵܦܸܠ ܥܲܠ ܕܐܵܗܵܐ ܟܹܐܦܵܐ: ܒܸܬ ܦܵܝܸܫ ܛܒ̣ܝܼܚܵܐ: ܐܝܼܢܵܐ ܟܠ ܡܢ ܕܗ̇ܘ ܢܵܦܸܠ ܥܲܠܘܼܗܝ: ܒܸܬ ܡܕܵܪܹܐ ܠܹܗ. 45 ܘܟܲܕ ܫܡܸܥܠܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܦܪ̈ܝܼܫܹܐ ܠܡܵܣܵܠܘܼ̈ܗܝ: 46 ܝܕܸܥܠܘܿܢ ܕܥܲܠܵܝ ܐܡܸܪܹܐ. ܘܛܸܥܠܘܿܢ ܠܸܕܒ̣ܵܩܹܗ: ܘܙܕܸܥܠܘܿܢ ܡ̣ܢ ܟܸܢܫܵܐ: ܣܵܒܵܒ ܐܲܝܟ ܠܢܒ̣ܝܼܵܐ ܕܒ̣ܝܼܩܘܼܗܝ ܗ̄ܘܵܘ.

ܩܦܠܐܘܢ: ܟܒ

1 ܘܓ̰ܘܼܘܸܒܠܹܐ ܝܼܫܘܿܥ ܘܗܘܼܡܙܸܡܠܹܐ ܡܸܕܪܹܐ ܒܡܵܣܵܠܹ̈ܐ ܐܸܠܵܝ: 2 ܘܐܡܸܪܹܐ. ܟܹܐ ܦܵܝܫܵܐ ܕܘܼܡܝܼܬܵܐ ܡܲܠܟܘܼܬܵܐ ܕܫܡܲܝܵܐ ܠܐܢܵܫܵܐ 3 ܡܲܠܟܵܐ ܕܥܒܸܕܠܹܐ ܚܠܘܼܠܵܐ ܩܵܐ ܒܪܘܼܢܹܗ. ܘܫܘܼܕܸܪܹܐ ܠܪܹ̈ܓܵܘܵܬܘܼܗܝ ܕܩܵܪܝܼ ܠܟ̰ܝܼܕܹ̈ܐ ܠܚܠܘܼܠܵܐ: ܘܠܵܐ ܒܣܸܡܠܵܐ 4 ܠܗ̄ܘܿܢ ܠܹܐܬܵܝܵܐ. ܘܡܸܕܪܹܐ ܫܘܼܕܸܪܹܐ ܪܹ̈ܓܵܘܵܬܹܐ ܐܚܹܪ̄ܢܹܐ: ܘܐܡܸܪܹܐ: ܐܡܘܿܪܘܿܢ ܠܟ̰ܝܼܕܹ̈ܐ: ܗܵܐ: ܫܵܪܘܼܬܝܼ ܗܘܼܕܪܵܐ ܝܘܸܢ: ܘܬܵܘܪܝܼ ܘܛܪ̈ܝܼܨܝܼ ܩܛܝܼܠܹܐ ܝܢܵܐ: ܘܟܠ ܡܸܢܕܝܼ ܗܘܼܕܪܵܐ 5 ܝܠܹܐ: ܬܹܡܘܿܢ ܠܚܠܘܼܠܵܐ. ܐܸܠܵܐ ܐܵܢܝܼ ܡܘܼܣܠܹܠܘܿܢ ܘܐܙܸܠܘܿܢ: ܐܝܼܬ ܗ̄ܘܵܐ ܕܠܚܲܩܠܹܗ: ܘܐܝܼܬ ܗ̄ܘܵܐ ܕܠܬܵܓ̰ܝܼܪܘܼܬܹܗ. 6 ܘܐܵܢܝܼ ܐܚܹܪ̄ܢܹܐ ܕܒܸܩܠܘܿܢ ܠܪܹ̈ܓܵܘܵܬܘܼܗܝ: ܘܥܒܸܕܠܘܿܢ ܒܹܨܘܼܪ 7 ܘܩܛܸܠܘܿܢ ܐܸܠܵܝ. ܐܝܼܢܵܐ ܡܲܠܟܵܐ ܟܪܸܒ̇ܠܹܐ: ܘܫܘܼܕܸܪܹܐ ܥܲܣܟܵܪ̈ܘܵܬܹܗ ܬܘܼܠܸܩܠܹܐ ܠܐܵܢܝܼ ܩܵܛܘܿܠܹ̈ܐ: ܘܠܡܕܝܼܢ̄ܬܵܝ 8 ܡܘܼܩܸܕܠܹܐ. ܗ̇ܝܓܵܗ ܐܡܸܪܹܐ ܠܪܹ̈ܓܵܘܵܬܘܼܗܝ: ܚܠܘܼܠܵܐ ܗܘܼܕܪܵܐ ܝܠܹܐ: ܘܐܵܢܝܼ ܕܝܼܗ̄ܘܵܘ ܟ̰ܝܼܕܹ̈ܐ ܠܹܐ ܚܵܫܚܝܼ ܗ̄ܘܵܘ. 9 ܙܹܠ̄ܡܘܿܢ ܗܲܕܟ̣ܵܐ ܠܦܠܵܛܹ̈ܐ ܕܐܘܼܪ̈ܚܵܬܹܐ: ܘܟܠ ܡ̇ܢ 10 ܕܡܵܫ̄ܟ̰ܚܝܼܬܘܿܢ ܩܪܹܡܘܿܢ ܠܚܠܘܼܠܵܐ. ܘܦܠܸܛܠܘܿܢ ܐܵܢܝܼ ܪܹ̈ܓܵܘܵܬܹܐ ܠܐܘܼܪ̈ܚܵܬܹܐ: ܘܓ̰ܘܼܡܸܥܠܘܿܢ ܟܠ ܕܡܘܼܫ̄ܟ̰ܸܚܠܘܿܢ: ܐܘܼܦ ܒܝܼܫܹ̈ܐ ܘܛܵܒܹ̈ܐ: ܘܡܠܹܠܹܐ ܒܹܝܬ ܚܠܘܼܠܵܐ ܡ̣ܢ ܐܲܪ̈ܚܹܐ. 11 ܘܟܲܕ ܐܘܸܪܹܐ ܡܲܠܟܵܐ ܕܚܵܙܹܐ ܗ̄ܘܵܐ ܠܐܲܪ̈ܚܹܐ: ܚܙܹܠܹܐ ܬܵܡܵܐ 12 ܐܢܵܫܵܐ ܕܠܹܐ ܗ̄ܘܵܐ ܠܒ̣ܝܼܫܵܐ ܠܒܸܫܬܵܐ ܕܚܠܘܼܠܵܐ. ܘܐܡܸܪܹܐ ܐܸܠܹܗ: ܚܲܒ̣ܪܝܼ: ܕܵܐܟ̣ܝܼ ܐܘܸܪܘܼܟ ܠܲܐܟ̣ܵܐ: ܟܲܕ ܠܒܸܫܬܵܐ ܕܚܠܘܼܠܵܐ 13 ܠܲܝܬ ܠܘܼܟ: ܐܝܼܢܵܐ ܗ̇ܘ ܫܬܸܩܠܹܐ. ܗ̇ܝܓܵܗ ܐܡܸܪܹܐ ܡܲܠܟܵܐ ܠܚܸܠܡܲܬܟܵܪܹ̈ܐ: ܐܣܘܿܪܘܿܢ ܐܝܼܕܘܼ̈ܗܝ ܘܐܲܩܠܘܼ̈ܗܝ: ܘܦܵܠܛܘܿܢ ܠܹܗ ܠܚܘܼܒ̣ܝܵܐ ܒܲܪܵܝܵܐ: ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ 14 ܕܟܹܟܹ̈ܐ. ܣܵܒܵܒ ܕܪܵܒܵܐ ܝܢܵܐ ܩܸܪ̈ܝܹܐ ܘܚܲܟ̰ܵܐ ܝܢܵܐ ܓܘܼܒ̇ܝܹ̈ܐ. 15 ܗ̇ܝܓܵܗ ܐܙܸܠܘܿܢ ܦܪ̈ܝܼܫܹܐ ܘܥܒܸܕܠܘܿܢ ܪܵܐܝܝܼ ܕܵܐܟ̣ܝܼ ܕܨܵܝܕܝܼ 16 ܗ̄ܘܵܘ ܠܹܗ ܒܗܲܡܙܲܡܬܵܐ. ܘܫܘܼܕܸܪܘܿܢ ܠܟܸܣܠܹܗ ܬܲܠܡܝܼܕܵܝ̈ ܥܲܡ ܕܒܹܝܬ ܗܹܪܘܿܕܸܣ: ܘܐܵܡܪܝܼ ܐܸܠܹܗ: ܡܲܠܦܵܢܵܐ: ܒܝܼܕܲܥܝܵܐ ܝܘܵܚ ܕܣܲܪܲܣܬ ܝܘܸܬ: ܘܐܘܼܪܚܵܐ ܕܐܲܠܵܗܵܐ ܒܣܲܪܲܣܬܘܼܬܵܐ ܡܵܠܘܿܦܹܐ ܝܘܸܬ: ܘܠܲܝܬ ܠܘܼܟ ܚܲܡ ܠܐܢܵܫܵܐ: ܣܵܒܵܒ ܠܹܐ 17 ܚܵܝܪܸܬ ܠܦܵܬܵܐ ܕܐܢܵܫܵܐ. ܒܲܣ ܐܡܘܿܪ ܐܸܠܲܢ: ܕܵܐܟ̣ܝܼ ܒܸܚܫܵܒ̣ܵܐ ܝܘܸܬ: ܒܕܲܣܬܘܼܪ ܝܼܠܵܐ ܠܝܼܵܗ̄ܒ̣ܵܐ ܚܲܪܓ̰ ܕܪܹܫܵܐ ܠܩܹܣܲܪ: 18 ܝܲܢ ܠܵܐ. ܐܝܼܢܵܐ ܝܼܫܘܿܥ ܝܕܸܥܠܹܐ ܒܝܼܫܘܼܬܵܝ: ܘܐܡܸܪܹܐ: ܩܵܡܘܿܕܝܼ 19 ܓ̰ܵܪܘܿܒܹܐ ܝܬܘܿܢ ܐܸܠܝܼ: ܢܵܣܒܲܝ̈ ܒܐܲܦܹ̈ܐ. ܡܲܚܙܹܡܘܿܢ ܠܝܼ ܙܘܼܙܵܐ ܕܚܲܪܓ̰: ܘܐܵܢܝܼ ܡܘܼܬ̄ܝܹܠܘܿܢ ܠܟܸܣܠܹܗ ܕܸܝܢܵܪܵܐ. 20 ܘܐܡܸܪܹܐ ܐܸܠܵܝ: ܕܡܵܢܝܼ ܝܠܹܐ ܐܵܗܵܐ ܫܸܟܠܵܐ ܘܣܸܟܵܐ. 21 ܐܵܡܪܝܼ: ܕܩܹܣܲܪ ܗ̇ܝܓܵܗ ܐܡܸܪܹܐ ܐܸܠܵܝ: ܗܲܒ̄ܠܘܿܢ ܗܲܕܟ̣ܵܐ 22 ܕܩܹܣܲܪ ܠܩܹܣܲܪ: ܘܕܲܐܠܵܗܵܐ ܠܐܲܠܵܗܵܐ. ܘܟܲܕ ܫܡܸܥܠܘܿܢ: ܥܘܼܓ̰ܸܒܠܘܿܢ: ܘܫܒܸܩܠܘܿܢ ܐܸܠܹܗ ܘܐܙܸܠܘܿܢ. 23 ܒܗ̇ܘ ܝܘܿܡܵܐ ܐܬܹܠܘܿܢ ܠܟܸܣܠܹܗ ܙܕܘܼܩܵܝܹ̈ܐ: ܐܵܢܝܼ ܕܟܹܐ 24 ܐܵܡܪܝܼ ܠܲܝܬ ܩܝܵܡܬܵܐ: ܘܒܘܼܩܸܪܘܿܢ ܡܸܢܹܗ. ܒܹܐܡܵܪܵܐ: ܡܲܠܦܵܢܵܐ: ܡܘܼܫܹܐ ܐܡܸܪܹܐ ܐܸܠܲܢ: ܕܐܸܢ ܐܢܵܫܵܐ ܡܵܝܸܬ ܟܲܕ ܠܲܝܬ ܠܹܗ ܒܢܘܼܢܹ̈ܐ: [53] ܫܵܩܸܠ ܐܵܚܘܿܢܘܼܗܝ ܒܲܟ̣ܬܹܗ: ܘܡܲܩܸܡ ܙܲܪܥܵܐ 25 ܠܐܵܚܘܿܢܘܼܗܝ. ܐܵܕܝܼܵܐ ܐܝܼܬ ܗ̄ܘܵܘ ܠܟܸܣܠܲܢ ܫܲܒ̣ܥܵܐ ܐܵܚܘܿܢܘܵܬܹ̈ܐ. ܩܵܕ̄ܡܵܝܵܐ ܓܒܸܪܹܐ ܒܲܟ̣ܬܵܐ ܘܡܸܬܠܹܐ: ܘܕܠܲܝܬ ܗ̄ܘܵܐ ܠܹܗ ܙܲܪܥܵܐ: 26 ܫܒ̣ܝܼܩܵܠܹܐ ܒܲܟ̣ܬܹܗ ܠܐܵܚܘܿܢܘܼܗܝ. ܗܲܕܟ̣ܵܐ ܐܘܼܦ ܗ̇ܘ ܕܬܪܲܝ: 27 ܐܘܼܦ ܗ̇ܘ ܕܬܠܵܬ̄ܐ: ܘܗܲܠ ܫܲܒܥܲܢܬܵܝ. ܐܝܼܢܵܐ ܒܚܲܪܬܵܐ 28 ܕܟܠܵܝ: ܐܘܼܦ ܗ̇ܝ ܒܲܟ̣ܬܵܐ ܡܸܬܠܵܐ. ܒܩܝܵܡܬܵܐ ܗܲܕܟ̣ܵܐ ܠܐܲܝܢܝܼ ܡ̣ܢ ܕܐܲܢܹܐ ܫܲܒ̣ܥܵܐ ܒܸܬ ܗܵܘܝܵܐ ܒܲܟ̣ܬܵܐ: ܣܵܒܵܒ ܕܟܠܵܝ 29 ܓܒ̣ܝܼܪܵܠܘܿܢ. ܐܝܼܢܵܐ ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܒܸܚܠܵܛܵܐ ܝܬܘܿܢ: ܕܠܹܐ ܝܬܘܿܢ ܒܝܼܕܲܥܝܵܐ ܟܬܵܒܹ̈ܐ ܘܠܵܐ ܚܲܝܠܹܗ ܕܐܲܠܵܗܵܐ. 30 ܣܵܒܵܒ ܕܒܩܝܵܡܬܵܐ ܠܹܐ ܓܵܒ̣ܪܝܼ: ܐܘܼܦ ܠܹܐ ܦܵܝܫܝܼ ܝܘܼܗ̄ܒ̣ܵܐ 31 ܠܓܲܒ̣ܪܹ̈ܐ: ܐܸܠܵܐ ܐܲܝܟ ܡܲܠܲܐܟܹ̈ܐ ܕܐܲܠܵܗܵܐ ܝܢܵܐ ܒܫܡܲܝܵܐ. ܐܝܼܢܵܐ ܥܲܠ ܩܝܵܡܬܵܐ ܕܡܝܼܬܹܐ: ܠܵܐ ܩܪܹܠܵܘܟ̣ܘܿܢ ܡܸܢܕܝܼ ܕܦܸܫܠܹܐ 32 ܐܡܝܼܪܵܐ ܐܸܠܵܘܟ̣ܘܿܢ ܡ̣ܢ ܐܲܠܵܗܵܐ: ܒܹܐܡܵܪܵܐ. ܐܵܢܵܐ ܝܘܸܢ ܐܲܠܵܗܹܗ ܕܐܲܒ̣ܪܵܗܵܡ: ܐܲܠܵܗܹܗ ܕܐܝܼܣܚܵܩ: ܐܲܠܵܗܹܗ ܕܝܲܥܩܘܿܒ̣: ܐܲܠܵܗܵܐ 33 ܠܹܐ ܝܠܹܐ ܐܲܠܵܗܵܐ ܕܡܝܼܬܹ̈ܐ: ܐܸܠܵܐ ܕܚܵܝܹ̈ܐ. ܘܟܲܕ ܫܡܸܥܠܘܿܢ ܟܸܢܫܹ̈ܐ ܦܸܫܠܘܿܢ ܥܘܓ̰ܒܹܐ ܒܝܘܼܠܦܵܢܹܗ. 34 ܐܝܼܢܵܐ ܦܪ̈ܝܼܫܹܐ ܟܲܕ ܫܡܸܥܠܘܿܢ ܕܡܘܼܫܬܸܩܠܹܐ ܠܙܲܕܘܼܩܵܝܹ̈ܐ: 35 ܓ̰ܡܸܥܠܘܿܢ [54] ܡܸܚܕܵܕܹ̈ܐ. ܘܒܘܼܩܸܪܹܐ ܡܸܢܹܗ ܚܵܕ̄ ܡܸܢܵܝ: 36 ܫܲܪܥܲܬܟܵܪ: ܟܲܕ ܓ̰ܵܪܘܿܒܹܗ: ܒܹܐܡܵܪܵܐ. ܡܲܠܦܵܢܵܐ: ܐܲܝܢܝܼ 37 ܦܘܼܩܕܵܢܵܐ ܓܘܼܪܵܐ ܝܠܹܐ ܒܢܵܡܘܿܣܵܐ. ܘܝܼܫܘܿܥ ܐܡܸܪܹܐ ܐܸܠܹܗ: ܡܲܚܸܒܸܬ ܠܡܵܪܝܵܐ ܐܲܠܵܗܘܼܟ ܡ̣ܢ ܟܠܹܗ ܠܸܒܘܼܟ: ܘܡ̣ܢ ܟܠܵܗ̇ 38 ܓܵܢܘܼܟ: ܘܡ̣ܢ ܟܠܹܗ ܚܝܼܵܠܘܼܟ. ܐܵܗܵܐ ܝܠܹܐ ܦܘܼܩܕܵܢܵܐ 39 ܓܘܼܪܵܐ ܘܩܵܕ̄ܡܵܝܵܐ. ܘܕܬܪܲܝ: ܕܟܹܐ ܕܵܡܹܐ ܐܸܠܹܗ: ܡܲܚܸܒܸܬ 40 ܠܫܒ̣ܵܒ̣ܘܼܟ ܐܲܝܟ ܓܵܢܘܼܟ. ܒܐܲܢܹܐ ܬܪܲܝ ܦܘܼܩܕܵܢܹ̈ܐ ܬܸܠܝܹܐ ܝܢܵܐ ܟܠܹܗ ܢܵܡܘܿܣܵܐ ܘܢܒ̣̈ܝܹܐ. 41 ܐܝܼܢܵܐ ܟܲܕ ܓ̰ܡܸܥܝܹܐ ܗ̄ܘܵܘ ܦܪ̈ܝܼܫܹܐ: ܒܘܼܩܪܹܐ ܡܸܢܵܝ ܝܼܫܘܿܥ 42 ܘܐܡܸܪܹܐ. ܡܘܼܕܝܼ ܒܸܚܫܵܒ̣ܵܐ ܝܬܘܿܢ ܥܲܠ ܡܫܝܼܚܵܐ: ܒܪܘܼܢܵܐ 43 ܕܡܵܢܝܼ ܝܠܹܐ: ܐܵܡܪܝܼ ܐܸܠܹܗ: ܒܪܘܼܢܵܐ ܕܕܵܘܝܼܕ. ܐܵܡܸܪ ܐܸܠܵܝ: ܒܲܣ ܕܵܐܟ̣ܝܼ ܕܵܘܝܼܕ ܒܪܘܼܚܵܐ ܒܩܪܵܝܘܗܝ ܝܠܹܐ ܡܵܪܝܵܐ: ܟܲܕ 44 ܐܵܡܸܪ. ܐܡܸܪܹܐ ܡܵܪܝܵܐ ܠܡܵܪܝܼ: ܝܬܘܿܒ̣ ܠܘܼܟ ܡ̣ܢ ܝܲܡܝܼܢܝܼ: ܗܲܠ ܕܡܬܒܸܢ ܕܸܫܡܸܢܘܼܟ ܟܘܼܒ̣ܫܵܐ ܬܚܘܿܬ ܐܲܩܠܘܼ̈ܟ. 45 ܐܸܢ ܗܲܕܟ̣ܵܐ ܕܵܘܝܼܕ ܒܸܩܪܵܝܘܼܗܝ ܝܠܹܐ ܡܵܪܝܵܐ: ܕܵܐܟ̣ܝܼ ܒܪܘܼܢܹܗ 46 ܝܠܹܐ. ܘܐܢܵܫܵܐ ܠܵܐ ܡܨܹܠܹܐ ܠܓ̰ܘܘܼܒܹܗ ܚܲܒܪܵܐ ܘܐܢܵܫܵܐ ܠܵܐ ܩܘܼܫܕܸܪܹܐ ܐܚܹܪ̄ܢܵܐ ܡܗ̇ܘ ܝܘܿܡܵܐ ܠܒܵܩܘܿܪܹܐ ܡܸܢܹܗ.

ܩܦܠܐܘܢ: ܟܓ

1 ܗܵܝܓܵܗ ܝܼܫܘܿܥ ܗܘܼܡܙܸܡܠܹܐ ܥܲܡ ܟܸܢܫܹ̈ܐ ܘܥܲܡ 2 ܬܲܠܡܝܼܕܘܼ̈ܗܝ. ܒܹܐܡܵܪܵܐ: ܥܲܠ ܟܘܼܪܣܝܵܐ ܕܡܘܼܫܹܐ ܝܬܸܒ̣ܠܘܿܢ 3 ܣܵܦܪܹ̈ܐ ܘܦܪ̈ܝܼܫܹܐ. ܟܠ ܡܸܢܕܝܼ ܗܲܕܟ̣ܵܐ ܕܐܵܡܪܝܼ ܠܵܘܟ̣ܘܿܢ: ܢܛܘܿܪܘܿܢ ܘܢܒ̣ܘܿܕܘܿܢ. ܐܝܼܢܵܐ ܐܲܝܟ ܦܘܼܠܚܵܢܵܝ̈ ܠܵܐ ܥܵܒ̣ܕܝܼܬܘܿܢ: 4 ܣܵܒܵܒ ܕܟܹܐ ܐܵܡܪܝܼ ܘܠܹܐ ܥܵܒ̣ܕܝܼ. ܣܵܒܵܒ ܟܹܐ ܐܵܣܪܝܼ ܟܵܪ̈ܵܬܹܐ ܝܵܩܘܿܪܹ̈ܐ [55] ܘܥܲܣܩܵܐ ܠܸܛܥܵܢܵܐ: ܘܟܹܐ ܡܲܬܒ̣ܝܼ ܥܲܠ ܪ̈ܘܼܦ̮ܫܵܢܹܐ ܕܒܢܲܝ̈ܢܵܫܵܐ: ܐܝܼܢܵܐ ܐܵܢܝܼ ܒܨܸܒܥܵܝ ܠܹܐ ܒܲܥܝܝܼ ܕܕܵܩܪܝܼ 5 ܒܝܼܵܝ. ܘܟܠܵܝ ܦܘܼܠܚܵܢܵܝ̈ ܟܹܐ ܥܵܒ̣ܕܝܼ ܕܦܵܝܫܝܼ ܚܸܙܝܹܐ ܠܒܢܲܝ̈ܢܵܫܵܐ ܣܵܒܵܒ ܟܹܐ ܡܲܦܬܝܼ ܬܸܦܠܵܝ̈: ܘܟܹܐ ܡܲܪܝܸܟ̣ܝܼ 6 ܬܸܟ̣ܠܵܬܵܐ ܕܩܛܵܘܝܵܬܵܝ̈. ܘܟܹܐ ܡܲܚܸܒܝܼ ܪܹܫܵܐ ܕܝܬܝܼܒܹ̈ܐ 7 ܒܡܸܫܬܘܼܝܵܬܹ̈ܐ: ܘܪܹܫܵܐ ܕܡܵܘܬܒܹ̈ܐ ܒܟܢܘܼܫܝܵܬܹ̈ܐ. ܘܫܠܵܡܵܐ 8 ܒܫܘܼܩܹ̈ܐ: ܘܕܦܵܝܫܝܼ ܩܸܪܝܹܐ ܡ̣ܢ ܐܢܵܫܹ̈ܐ: ܪܵܒܝܼ. ܐܝܼܢܵܐ ܐܲܚܬܘܿܢ ܠܵܐ ܦܵܝܫܝܼܬܘܿܢ ܩܸܪܝܹܐ ܪܒܝܼ: ܣܵܒܵܒ ܕܚܵܕ̄ ܝܼܠܹܐ [56] ܪܒܝܼܵܘܟ̣ܘܿܢ: 9 ܘܐܲܚܬܘܿܢ ܟܠܵܘܟ̣ܘܿܢ ܐܵܚܘܿܢܘܵܬܹ̈ܐ ܝܬܘܿܢ. ܘܒܵܒܵܐ ܠܵܐ ܩܵܪܝܼܬܘܿܢ: ܠܵܘܟ̣ܘܿܢ: ܒܐܲܪܥܵܐ: ܣܵܒܵܒ ܕܚܵܕ̄ ܝܼܠܹܐ ܒܵܒܵܘܟ̣ܘܿܢ 10 ܕܒܫܡܲܝܵܐ. ܘܠܵܐ ܦܵܝܫܝܼܬܘܿܢ ܩܸܪܝܹܐ ܬܲܓܒܸܪ̈ܵܢܹܐ: ܣܵܒܵܒ ܕܚܵܕ̄ 11 ܝܼܠܹܐ ܬܲܓܒܸܪܵܢܵܘܟ̣ܘܿܢ: ܡܫܝܼܚܵܐ. ܐܝܼܢܵܐ ܗ̇ܘ ܕܝܼܠܹܐ ܓܘܼܪܵܐ 12 ܓܵܘܵܘܟ̣ܘܿܢ: ܒܸܬ ܗܵܘܹܐ ܐܸܠܵܘܟ̣ܘܿܢ ܚܸܠܡܲܬܟܵܪ. ܘܡ̇ܢ ܕܡܵܪܸܡ ܓܵܢܹܗ ܒܸܬ ܦܵܝܸܫ ܡܘܼܡܟܸܟ̣ܵܐ: ܘܡ̇ܢ ܕܡܲܡܟܸܟ ܓܵܢܹܗ ܒܸܬ ܦܵܝܸܫ ܡܘܼܪܡܵܐ. 13 [57] ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܐܵܟ̣ܠܝܼܬܘܿܢ ܒܵܬܹ̈ܐ ܕܐܲܪ̈ܡܸܠܝܵܬܹܐ: ܘܒܗܲܓ̰ܲܬ ܡܲܪܝܘܼܟܹܐ ܝܬܘܿܢ ܨܠܵܘܵܬܵܘ̈ܟ̣ܘܿܢ: ܣܵܒܵܒ ܕܐܵܗܵܐ ܒܸܬ ܩܵܒ̇ܠܝܼܬܘܿܢ ܕܝܼܘܵܢ ܙܵܘܕܵܐ. 14 ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܟܹܐ ܕܵܒ̣ܪܝܼܬܘܿܢ ܡܲܠܟܘܼܬܵܐ ܕܫܡܲܝܵܐ ܩܵܕ̄ܡ ܒܢܲܝ̈ܢܵܫܵܐ: ܣܵܒܵܒ ܠܵܐ ܐܲܚܬܘܿܢ ܒܹܐܘܵܪܵܐ ܝܬܘܿܢ: ܘܠܵܐ ܠܐܵܘܪ̈ܵܢܹܐ ܒܸܫܒ̣ܵܩܵܐ ܝܬܘܿܢ 15 ܕܐܵܘܪܝܼ. ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܚܵܕܪܝܼܬܘܿܢ ܝܵܡܵܐ ܘܒܸܪܙܵܐ: ܠܸܥܒ̣ܵܕܵܐ ܚܵܕ̄ ܓܝܼܘܿܪܵܐ: ܘܐܝܼܡܲܢ ܕܗ̄ܘܹܠܹܐ: ܟܹܐ ܥܵܒ̣ܕܝܼܬܘܿܢ ܠܹܗ ܒܲܪ ܓܹܗܲܢܵܐ ܚܵܕ̄ ܒܬܪܲܝ 16 ܥܲܠܵܘܟ̣ܘܿܢ. ܘܵܝ ܐܸܠܵܘܟ̣ܘܿܢ: ܬܲܓܒܸܪ̈ܵܢܹܐ ܣܸܡܝܹ̈ܐ: ܕܟܹܐ ܐܵܡܪܝܼܬܘܿܢ: ܡ̇ܢ ܕܝܵܡܹܐ ܒܗܲܝܟܠܵܐ: ܠܹܐ ܝܠܹܐ ܡܸܢܕܝܼ: ܐܝܼܢܵܐ ܡ̇ܢ 17 ܕܝܵܡܹܐ ܒܕܲܗܒ̣ܵܐ ܕܒܗܲܝܟܠܵܐ ܟܹܐ ܗܵܘܹܐ [58] ܕܵܝܢܵܢܵܐ. ܐܲܗܡܲܩܹ̈ܐ ܘܣܸܡܝܹ̈ܐ: ܣܵܒܵܒ ܐܲܝܢܝܼ ܝܠܹܐ ܓܘܼܪܵܐ: ܕܲܗܒ̣ܵܐ: ܝܲܢ ܗܲܝܟܠܵܐ 18 ܕܟܹܐ ܩܵܕܸܫ ܠܕܲܗܒ̣ܵܐ. ܘܡ̇ܢ ܕܝܵܡܹܐ ܒܡܲܕܒܚܵܐ ܠܹܐ ܝܠܹܐ ܡܸܢܕܝܼ: ܐܝܼܢܵܐ ܡ̇ܢ ܕܝܵܡܹܐ ܒܢܸܕܪܵܐ ܕܥܲܠܘܼܗܝ ܟܹܐ ܗܵܘܹܐ ܕܵܝܢܵܢܵܐ. 19 ܐܲܗܡܲܩܹ̈ܐ ܘܣܸܡܝܹ̈ܐ: ܣܵܒܵܒ ܐܲܝܢܝܼ ܝܠܹܐ ܓܘܼܪܵܐ: ܢܸܕܪܵܐ: ܝܲܢ 20 ܡܲܕܒܚܵܐ ܕܟܹܐ ܩܵܕܸܫ ܠܢܸܕܪܵܐ. ܡ̇ܢ ܗܲܕܟ̣ܵܐ ܕܝܵܡܹܐ ܒܡܲܕܒܚܵܐ: 21 ܟܹܐ ܝܵܡܹܐ ܒܝܹܗ: ܘܒܟܠ ܡܸܢܕܝܼ ܕܐܝܼܬ ܥܲܠܘܼܗܝ. ܘܡ̇ܢ ܕܝܵܡܹܐ ܒܗܲܝܟܠܵܐ: ܟܹܐ ܝܵܡܹܐ ܒܝܹܗ ܘܒܡ̇ܢ ܕܥܵܡܸܪ ܒܝܹܗ. 22 ܘܡ̇ܢ ܕܝܵܡܹܐ ܒܫܡܲܝܵܐ: ܟܹܐ ܝܵܡܹܐ ܒܟܘܼܪܣܝܹܗ ܕܐܲܠܵܗܵܐ: ܘܒܡ̇ܢ 23 ܕܝܵܬܸܒ̣ ܥܲܠܘܼܗܝ. ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ ܕܟܹܐ ܝܵܗ̄ܒ̣ܝܼܬܘܿܢ ܡܲܥܣܵܪܹ̈ܐ: ܢܲܥܢܵܐ ܘܫܸܒܸܬ ܘܟܲܡܘܼܢܵܐ: ܘܫܒܸܩܠܵܘܟ̣ܘܿܢ ܫܘܼܠܹ̈ܐ ܡܝܘܼܩܪܹ̈ܐ ܕܢܵܡܘܿܣܵܐ: ܕܝܼܘܵܢ ܘܪ̈ܲܚܡܹܐ ܘܗܲܝܡܵܢܘܼܬܵܐ. ܐܝܼܢܵܐ ܐܲܢܹܐ ܘܵܓ̰ܸܒ ܝܼܗ̄ܘܵܐ ܕܥܵܒ̣ܕܝܼܬܘܿܢ: ܘܐܵܢܝܼ 24 ܠܵܐ ܫܵܒ̣ܩܝܼܬܘܿܢ. ܬܲܓܒܸܪ̈ܵܢܹܐ ܣܸܡܝܹ̈ܐ: ܕܟܹܐ ܨܵܦܝܼ ܒܲܩܬܵܐ ܘܒܲܠܥܝܼ ܓܘܼܡܠܵܐ. 25 ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܕܵܟ̣ܝܼܬܘܿܢ ܠܒܲܪܹܗ ܕܟܵܣܵܐ ܘܕܙܵܒ̣ܘܿܪܵܐ: ܐܝܼܢܵܐ ܠܓܵܘܵܝܝܼ ܡܸܠܝܹܐ 26 ܝܢܵܐ [59] ܓ̰ܢܵܘܵܐ ܘܥܵܘܠܵܐ. ܦܪܝܼܫܵܐ ܣܸܡܝܵܐ: ܕܵܟ̣ܝܼ ܩܵܕ̄ܡܵܝܬܵܐ 27 ܓܵܘܹܗ ܕܟܵܣܵܐ ܘܕܙܵܒ̣ܘܿܪܵܐ: ܕܗܵܘܹܐ ܐܘܼܦ ܒܲܪܵܝ ܕܸܟ̣ܝܵܐ. ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܕܵܡܝܼܬܘܿܢ ܠܩܲܒ̣ܪܹ̈ܐ ܡܘܼܚܘܸܪܹ̈ܐ: ܕܡ̣ܢ ܠܒܲܕܲܪ ܟܹܐ ܦܵܝܫܝܼ ܚܸܙܝܹܐ ܫܵܦܝܼܪܹ̈ܐ: ܐܝܼܢܵܐ ܡ̣ܢ ܠܓܵܘܵܝܝܼ ܡܸܠܝܹܐ ܝܢܵܐ ܓܲܪ̈ܡܹܐ ܕܡܝܼܬܹ̈ܐ ܘܟܠܵܗ̇ 28 ܛܲܢܦܘܼܬܵܐ. ܗܲܕܟ̣ܵܐ ܐܘܼܦ ܐܲܚܬܘܿܢ ܡ̣ܢ ܠܒܲܕܲܪ ܟܹܐ ܦܵܝܫܝܼܬܘܿܢ ܚܸܙܝܹܐ ܠܒܢܲܝ̈ܢܵܫܵܐ ܐܲܝܟ ܙܲܕܝܼܩܹ̈ܐ: ܐܝܼܢܵܐ ܡ̣ܢ ܠܓܵܘܵܝܝܼ 29 ܡܸܠܝܹܐ ܝܬܘܿܢ ܡܲܣܲܒ̣ ܒܐܲܦܘܼܬܵܐ ܘܥܵܘܠܵܐ. ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܒܵܢܝܼܬܘܿܢ ܠܩܲܒ̣ܪ̈ܵܘܵܬܹܐ 30 ܕܢܒ̣̈ܝܹܐ: ܘܣܵܩܠܝܼܬܘܿܢ ܠܒܹܝܬ ܩܒ̣ܘܼܪܹ̈ܐ ܕܙܲܕܝܼܩܹ̈ܐ. ܘܟܹܐ ܐܵܡܪܝܼܬܘܿܢ: ܐܸܢ ܗܵܘܵܚ ܗ̄ܘܵܘ ܒܝܘܿܡܵܢܹ̈ܐ ܕܒܵܒܵܘܵܬܲܢ: ܠܹܐ ܗܵܘܵܚ 31 ܗ̄ܘܵܘ ܥܲܡܵܝ ܫܵܪ̈ܝܼܟܹܐ ܒܕܸܡܵܐ ܕܢܒ̣̈ܝܹܐ. ܒܲܣ ܒܸܣܗܵܕܵܐ ܝܬܘܿܢ ܥܲܠ ܓܵܢܵܘܟ̣ܘܿܢ: ܕܒܢܘܼܢܹ̈ܐ ܕܐܵܢܝܼ ܝܬܘܿܢ ܕܩܛܹܠܘܿܢ ܠܢܒ̣̈ܝܹܐ. 32 ܐܘܼܦ ܐܲܚܬܘܿܢ ܡܠܹܡܘܿܢ ܡܫܘܼܚܬܵܐ ܕܒܵܒܵܘܵܬܵܘ̈ܟ̣ܘܿܢ. 33 ܚܘܼܘܵܘܵܬܹ̈ܐ: ܙܲܪܥܵܐ ܕܐܵܟܸܕܢܹ̈ܐ: ܕܵܐܟ̣ܝܼ ܒܸܬ ܥܵܪܩܝܼܬܘܿܢ ܡ̣ܢ ܕܝܼܘܵܢ ܕܓܹܗܲܢܵܐ. 34 ܣܵܒܵܒ ܕܐܵܗܵܐ: ܗܵܐ: ܐܵܢܵܐ ܫܵܕܘܿܪܹܐ ܝܘܸܢ ܠܟܸܣܠܵܘܟ̣ܘܿܢ ܢܒ̣̈ܝܹܐ: ܘܚܲܟܝܼܡܹ̈ܐ: ܘܣܵܦܪܹ̈ܐ. ܡܸܢܵܝ ܒܸܬ ܩܵܛܠܝܼܬܘܿܢ ܘܡܵܚܝܼܬܘܿܢ ܠܙܩܝܼܦܵܐ: ܘܡܸܢܵܝ ܒܸܬ ܓ̰ܲܢܓ̰ܸܪܝܼܬܘܿܢ ܓܵܘ ܟܢܘܼܫܝܵܬܵܘ̈ܟ̣ܘܿܢ: ܘܛܵܪܕܝܼܬܘܿܢ ܠܗ̄ܘܿܢ ܡ̣ܢ ܡܕܝܼܢ̄ܬܵܐ 35 ܠܡܕܝܼܢ̄ܬܵܐ. ܗܲܕܟ̣ܵܐ ܕܐܵܬܹܐ ܥܲܠܵܘܟ̣ܘܿܢ ܟܠܹܗ ܕܸܡܵܐ ܕܙܲܕܝܼܩܹ̈ܐ ܫܘܼܦܟ̣ܵܐ ܥܲܠ ܐܲܪܥܵܐ: ܡ̣ܢ ܕܸܡܹܗ ܕܗܵܒܹܝܠ ܙܲܕܝܼܩܵܐ: ܗܲܠ ܕܸܡܹܗ ܕܙܟܲܪܝܵܐ ܒܪܘܼܢܹܗ ܕܒܪܲܟ̣ܝܵܐ: ܗ̇ܘ ܕܩܛܹܠܵܘܟ̣ܘܿܢ ܒܹܝܠ 36 ܗܲܝܟܠܵܐ ܠܡܲܕܒܚܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܐܵܬܝܼ ܐܲܢܹܐ ܟܠܵܝ ܥܲܠ ܕܐܵܗܵܐ ܐܘܼܓ̰ܵܓ̣. 37 ܐܘܿܪܸܫܠܸܡ: ܐܘܿܪܸܫܠܸܡ: ܩܵܛܠܵܢܬܵܐ ܕܢܒ̣̈ܝܹܐ: ܘܪܵܓ̰ܡܵܢܬܵܐ ܕܐܵܢܝܼ ܕܝܼܢܵܐ ܫܘܼܕܪܹܐ ܠܟܸܣܠܘܼܗ̇! ܟܡܵܐ ܓܵܗܹ̈ܐ ܒܣܸܡܠܵܐ ܠܝܼ ܕܓ̰ܲܡܥܸܢ ܒܢܘܼܢܵܟ̣ܝ̈: ܐܲܝܟ ܕܓ̰ܲܡܥܵܐ ܟܬܵܝܬܵܐ ܙܲܥܝܘܼ̈ܗ̇ 38 ܬܚܘܿܬ ܓܘܼܠܦܵܢܘܼ̈ܗ̇: ܘܠܵܐ ܒܣܸܡܠܵܐ ܠܵܘܟ̣ܘܿܢ. ܗܵܐ: ܦܝܵܫܵܐ 39 ܝܠܹܐ ܫܒ̣ܝܼܩܵܐ ܐܸܠܵܘܟ̣ܘܿܢ ܒܲܝܬܵܟ̣ܘܿܢ ܚܵܪܵܒܵܐ. ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܚܵܙܝܼܬܘܿܢ ܠܝܼ ܡܐܵܕܝܼܵܐ: ܗܲܠ ܕܐܵܡܪܝܼܬܘܿܢ: ܒܪܝܼܟ̣ܵܐ ܝܠܹܐ ܗ̇ܘ ܕܒܹܐܬܵܝܵܐ ܝܠܹܐ ܒܫܸܡܹܗ ܕܡܵܪܝܵܐ.

ܩܦܠܐܘܢ: ܟܕ

1 ܘܦܠܸܛܠܹܐ ܝܼܫܘܿܥ ܡ̣ܢ ܗܲܝܟܠܵܐ ܘܒܹܐܙܵܠܵܐ ܗ̄ܘܵܐ: ܘܐܬܹܠܘܿܢ 2 ܬܲܠܡܝܼܕܘܼ̈ܗܝ ܠܡܲܚܙܘܼܝܹܗ ܒܸܢܝܵܢܹܗ ܕܗܲܝܟܠܵܐ. ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܠܹܐ ܝܬܘܿܢ ܒܸܚܙܵܝܵܐ ܐܲܢܹܐ ܟܠܵܝ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܗܵܘܹܐ ܫܒ̣ܝܼܩܵܐ ܠܲܐܟ̣ܵܐ ܟܹܐܦܵܐ ܥܲܠ ܟܹܐܦܵܐ ܕܠܵܐ ܦܵܝܸܫ ܣܬܝܼܪܵܐ. 3 ܘܟܲܕ ܝܬܸܒ̣ܠܹܐ ܥܲܠ ܛܘܼܪܵܐ ܕܙܲܝܬܹ̈ܐ: ܐܬܹܠܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ ܒܢܲܦ̮ܫܹܗ: ܒܹܐܡܵܪܵܐ: ܐܡܘܿܪ ܐܸܠܲܢ ܐܝܼܡܲܢ ܐܲܢܹܐ ܒܸܬ ܗܵܘܝܼ: ܘܡܘܼܕܝܼ ܝܠܹܐ ܢܝܼܫܲܢܩܵܐ ܕܐܬܵܝܬܘܼܟ ܘܕܬܝܵܡܹܗ 4 ܕܥܵܠܡܵܐ. ܓ̰ܘܼܘܸܒܠܹܐ ܝܼܫܘܿܥ ܘܐܡܸܪܹܐ ܐܸܠܵܝ: ܗ̄ܘܹܡܘܿܢ ܗܸܫܝܵܪ 5 ܕܐܢܵܫܵܐ ܠܵܐ ܡܲܚܠܸܛ ܠܵܘܟ̣ܘܿܢ. ܣܵܒܵܒ ܪܵܒܵܐ ܒܸܬ ܐܵܬܝܼ ܒܫܸܡܝܼ: ܒܹܐܡܵܪܵܐ: ܐܵܢܵܐ ܝܘܸܢ ܡܫܝܼܚܵܐ: ܘܠܪܵܒܵܐ ܒܸܬ 6 ܡܲܚܠܸܛܝܼ. ܐܝܼܢܵܐ ܗܕܝܼܪܹܐ ܝܬܘܿܢ ܠܸܫܡܲܥܝܵܐ ܦܠܵܫܹ̈ܐ ܘܒܵܗ̄ܣܹ̈ܐ ܕܦܠܵܫܹ̈ܐ. ܚܙܹܡܘܿܢ ܕܠܵܐ ܫܵܓ̣ܫܝܼܬܘܿܢ: ܣܵܒܵܒ ܘܵܓ̰ܸܒ ܝܼܠܵܐ 7 ܕܟܠܵܝ ܗܵܘܝܼ: ܐܸܠܵܐ ܗܸܫ ܠܹܐ ܝܠܹܐ ܬܝܵܡܵܐ. ܣܵܒܵܒ ܕܒܸܬ ܩܵܝܸܡ ܛܵܝܸܦܵܐ ܥܲܠ ܛܵܝܸܦܵܐ: ܘܡܲܠܟܘܼܬܵܐ ܥܲܠ ܡܲܠܟܘܼܬܵܐ: 8 ܘܒܸܬ ܗܵܘܝܼ ܟܸܦܢܹ̈ܐ ܘܪ̈ܵܘܕܵܢܹܐ ܒܕܘܼܟܵܐ ܕܘܼܟܵܐ. ܐܝܼܢܵܐ ܐܲܢܹܐ 9 ܟܠܵܝ ܪܹܫܵܐ ܕܚܸܒ̣ܠܹܐ ܝܢܵܐ. ܗ̇ܝܓܵܗ ܒܸܬ ܣܵܦܝܼ ܠܵܘܟ̣ܘܿܢ ܠܐܘܼܠܨܵܢܵܐ: ܘܒܸܬ ܩܵܛܠܝܼ ܠܵܘܟ̣ܘܿܢ: ܘܒܸܬ ܦܵܝܫܝܼܬܘܿܢ ܣܸܢܝܹܐ 10 ܡ̣ܢ ܟܠܵܝ ܛܵܝܸܦܹ̈ܐ: ܒܚܵܬܸܪ ܕܫܸܡܝܼ. ܗ̇ܝܓܵܗ ܒܸܬ [60] ܟܵܦܪܝܼ ܪܵܒܵܐ: ܘܒܸܬ ܣܵܦܝܼ ܚܵܕ̄ ܠܗ̇ܘ ܐܚܹܪ̄ܢܵܐ: ܘܒܸܬ ܣܵܢܝܼ ܚܵܕ̄ 11 ܠܗ̇ܘ ܐܚܹܪ̄ܢܵܐ. ܘܪܵܒܵܐ ܢܒ̣̈ܝܹܐ ܕܵܓܵܠܹ̈ܐ ܒܸܬ ܩܵܝܡܝܼ: ܘܒܸܬ 12 ܡܲܚܠܸܛܝܼ ܠܪܵܒܵܐ. ܘܡܣܵܒܵܒ ܕܒܘܼܫܵܝܝܼ ܕܥܵܘܠܵܐ: ܒܸܬ 13 ܦܵܝܸܚ ܚܘܼܒܵܐ ܕܪܵܒܵܐ. ܐܝܼܢܵܐ ܡ̇ܢ ܕܚܵܡܸܠ ܗܲܠ ܚܲܪܬܵܐ: ܗ̇ܘ 14 [61] ܒܸܬ ܦܵܝܫܵܐ ܡܘܼܟܪܸܙܬܵܐ ܐܵܗܵܐ ܡܲܫܚܲܕܬܵܐ ܕܡܲܠܟܘܼܬܵܐ ܒܟܠܵܗ̇ ܕܘܼܢܝܹܐ: ܠܣܵܗܕܘܼܬܵܐ ܠܟܠܵܝ ܛܵܝܸܦܹ̈ܐ: 15 ܘܗ̇ܝܓܵܗ ܒܸܬ ܐܵܬܹܐ ܬܝܵܡܵܐ. ܗܲܕܟ̣ܵܐ ܐܝܼܡܲܢ ܕܚܵܙܝܼܬܘܿܢ ܢܝܼܫܲܢܩܵܐ ܛܲܢܦܵܐ ܕܚܵܪܵܒ̣ܝܘܼܬܵܐ ܕܦܸܫܠܹܐ ܐܡܝܼܪܵܐ ܒܝܸܕ ܕܵܢܝܼܐܹܝܠ ܢܒ̣ܝܼܵܐ: ܒܸܟܠܵܝܵܐ ܒܕܘܼܟܬܵܐ ܩܲܕܝܼܫܬܵܐ: ܗ̇ܘ ܕܩܵܪܹܐ ܦܲܪܡܵܐ. 16 ܗ̇ܝܓܵܗ ܐܵܢܝܼ ܕܒܝܼܗܘܼܕܵܐ: ܥܵܪܩܝܼ ܠܛܘܼܪ̈ܵܢܹܐ. ܘܗ̇ܘ ܕܥܲܠ 17 18 ܐܓܵܪܹܐ ܠܵܐ ܨܵܠܹܐ ܠܸܫܩܵܠܵܐ ܡܸܢܕܝܼ ܕܓܵܘ ܒܲܝܬܹܗ. ܘܐܲܝܢܝܼ ܕܓܵܘ ܚܲܩܠܵܐ ܠܵܐ ܕܵܝܸܪ ܠܒܵܬ̄ܪܹܗ ܠܸܫܩܵܠܵܐ ܠܒܸܫܬܹܗ. 19 ܐܝܼܢܵܐ ܘܵܝ ܠܐܵܢܝܼ ܕܝܼܢܵܐ ܒܛܝܼܢܹܐ: ܘܠܵܐܢܝܼ ܕܡܲܡܸܨܝܼ ܒܐܵܢܝܼ 20 ܝܘܿܡܵܢܹ̈ܐ. ܐܝܼܢܵܐ ܨܵܠܹܡܘܿܢ ܕܠܵܐ ܗܵܘܹܐ ܥܪܵܩܵܘܟ̣ܘܿܢ ܒܣܸܬܘܵܐ: 21 ܘܠܵܐ ܒܫܲܒܬܵܐ. ܣܵܒܵܒ ܗ̇ܝܓܵܗ ܒܸܬ ܗܵܘܹܐ ܐܘܼܠܨܵܢܵܐ ܓܘܼܪܵܐ: ܐܲܝܢܝܼ ܕܠܵܐ ܗ̄ܘܹܠܹܐ ܡ̣ܢ ܫܘܼܪܵܝܹܗ ܕܥܵܠܡܵܐ ܘܗܲܠ ܐܵܕܝܼܵܐ: ܘܐܘܼܦ 22 ܠܹܐ ܗܵܘܹܐ. ܘܐܸܢ ܠܵܐ ܗܵܘܝܼ ܗ̄ܘܵܘ ܡܘܼܟܪܝܹܐ ܐܵܢܝܼ ܝܘܿܡܵܢܹ̈ܐ: [62] ܠܹܐ ܚܲܝܹܐ ܗ̄ܘܵܐ ܟܠܹܗ ܒܸܣܪܵܐ. ܐܝܼܢܵܐ ܣܵܒܵܒ ܕܓܘܼܒ̇ܝܹ̈ܐ: ܒܸܬ 23 ܦܝܫܝܼ ܡܘܼܟܪܝܹܐ ܐܵܢܝܼ ܝܘܿܡܵܢܹ̈ܐ. ܗ̇ܝܓܵܗ ܐܸܢ ܐܢܵܫܵܐ ܐܵܡܸܪ ܐܸܠܵܘܟ̣ܘܿܢ: ܗܵܐ: ܠܲܐܟ̣ܵܐ ܝܠܹܐ ܡܫܝܼܚܵܐ: ܝܲܢ ܡܫܝܼܚܵܐ: ܝܲܢ ܬܵܡܵܐ ܝܠܹܐ: ܠܵܐ 24 ܗܲܡܸܢܝܼܬܘܿܢ. ܣܵܒܵܒ ܕܒܸܬ ܩܵܝܡܝܼ ܡܫܝܼܚܹ̈ܐ ܕܵܓܵܠܹ̈ܐ: ܘܢܒ̣̈ܝܹܐ ܕܵܓܵܠܹ̈ܐ: ܘܒܸܬ ܝܵܗ̄ܒ̣ܝܼ ܢܝܼܫܲܢܩܹ̈ܐ ܓܘܼܪܹ̈ܐ ܘܥܵܓ̰ܸܒܘܵܬܵܐ: 25 ܐܲܝܟ ܕܡܲܚܠܸܛܝܼ: ܐܸܢ ܡܵܨܚܵܐ: ܐܘܼܦ ܠܓܘܼܒ̇ܝܹ̈ܐ. ܗܵܐ: 26 ܡܩܵܕ̄ܡܵܝܬܵܐ ܐܡܸܪܝܼ ܐܸܠܵܘܟ̣ܘܿܢ. ܒܲܣ ܐܸܢ ܗܲܕܟ̣ܵܐ ܐܵܡܪܝܼ ܠܵܘܟ̣ܘܿܢ: ܗܵܐ: ܓܵܘ ܒܲܪܝܼܵܐ ܝܠܹܐ: ܠܵܐ ܦܵܠܛܝܼܬܘܿܢ: ܗܵܐ: 27 ܒܟܘܼܚܝܵـ̈ـܬܵܐ ܝܠܹܐ: ܠܵܐ ܗܲܡܸܢܝܼܬܘܿܢ. ܣܵܒܵܒ ܕܵܐܟ̣ܝܼ ܕܒܸܪܩܵܐ ܦܵܠܸܛ ܡ̣ܢ ܡܲܕܢܚܵܐ: ܘܦܵܝܸܫ ܚܸܙܝܵܐ ܗܲܠ ܡܲܥ̱ܪܒ̣ܵܐ: ܗܲܕܟ̣ܵܐ 28 ܒܸܬ ܗܵܘܝܵܐ ܐܬܵܝܬܹܗ ܕܒܪܘܼܢܹܗ ܕܐܢܵܫܵܐ. ܘܐܲܝܟܵܐ ܕܗܵܘܝܵܐ ܫܠܲܕܵܐ ܬܵܡܵܐ ܒܸܬ ܓ̰ܲܡܥܝܼ ܢܸܫܪܹ̈ܐ. 29 ܐܝܼܢܵܐ ܕܲܪܣܵܥܲܬ ܡܒܵܬ̄ܪ ܝܲܠܨܘܼܝ ܕܐܵܢܝܼ ܝܘܿܡܵܢܹ̈ܐ: ܫܸܡܫܵܐ ܒܸܬ ܚܵܒܹܐ: ܘܣܲܗܪܵܐ ܠܹܐ ܝܵܗ̄ܒܸܠ ܒܲܗܪܹܗ: ܘܟܵܘܟ̣ܒܹ̈ܐ ܒܸܬ ܢܵܦܠܝܼ ܡ̣ܢ ܫܡܲܝܵܐ: ܘܚܲܝ̈ܠܹܐ ܕܫܡܲܝܵܐ ܒܸܬ ܦܵܝܫܝܼ ܫܥܝܼܫܹܐ. 30 ܘܗ̇ܝܓܵܗ ܒܸܬ ܦܵܝܸܫ ܚܸܙܝܵܐ ܢܝܼܫܲܢܩܹܗ ܕܒܪܘܼܢܹܗ ܕܐܢܵܫܵܐ ܒܫܡܲܝܵܐ: ܘܗ̇ܝܓܵܗ ܒܸܬ ܥܵܒ̣ܕܝܼ ܬܵܙܝܼ ܟܠܵܝ ܐܘܼ̈ܓ̰ܵܓܹܐ  ܕܐܲܪܥܵܐ: ܘܒܸܬ ܚܵܙܝܼ ܠܒܪܘܼܢܹܗ ܕܐܢܵܫܵܐ ܒܹܐܬܵܝܵܐ ܥܲܠ ܥܢܵܢܹ̈ܐ ܕܫܡܲܝܵܐ: 31 ܥܲܡ ܚܲܝܠܵܐ ܘܚܸܩܪܵܐ ܓܘܼܪܵܐ. ܘܒܸܬ ܫܵܕܸܪ ܡܲܠܲܐܟ̣ܘܼ̈ܗܝ ܥܲܡ ܩܵܠܵܐ ܓܘܼܪܵܐ ܕܫܝܼܦܘܿܪܵܐ: ܘܒܸܬ ܓ̰ܲܡܥܝܼ ܠܓܘܼܒ̇ܝܹ̈ܐ ܕܝܹܗ ܡ̣ܢ ܐܲܪܒܥܵܐ ܦܵܘܚܹ̈ܐ: ܡ̣ܢ ܪܹܫܵܝ ܕܫܡܲܝܵܐ ܘܗܲܠ ܪܹܫܵܝ. 32 ܘܡ̣ܢ ܐܝܼܠܵܢܵܐ ܕܬܹܐܢܵܐ ܝܠܘܿܦܘܿܢ ܡܵܣܵܠܵܐ: ܟܲܕ ܦܲܥܘܵܢܘܼ̈ܗܝ ܐܵܕܝܼܵܐ ܗܵܘܝܼ ܪ̈ܵܟܝܼܟܹܐ ܘܒܲܪܛܸܢܝܼ ܛܲܪ̈ܦܘܼܗܝ: ܟܹܐ ܝܲܕܥܝܼܬܘܿܢ 33 ܕܡܛܹܠܹܐ ܩܲܝܛܵܐ. ܗܲܕܟ̣ܵܐ ܐܘܼܦ ܐܲܚܬܘܿܢ: ܐܝܼܡܲܢ ܕܚܵܙܝܼܬܘܿܢ 34 ܐܲܢܹܐ ܟܠܵܝ: ܝܕܸܥܡܘܿܢ [63] ܕܡܛܹܠܵܐ ܠܬܲܪܥܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܥܵܒ̣ܪܵܐ ܐܵܗܵܐ ܐܘܼܓ̰ܵܓ̣: ܗܲܠ 35 ܕܐܲܢܹܐ ܟܠܵܝ ܗܵܘܝܼ. ܫܡܲܝܵܐ ܘܐܲܪܥܵܐ ܒܸܬ ܥܵܒ̣ܪܝܼ: ܐܝܼܢܵܐ ܗܹܡܸܙܡܵܢܝܼ̈ ܠܹܐ ܥܵܒ̣ܪܝܼ. 36 ܐܝܼܢܵܐ ܥܲܠ ܕܗ̇ܘ ܝܘܿܡܵܐ ܘܥܲܠ ܕܗ̇ܝ ܣܵܥܲܬ: ܐܢܵܫܵܐ ܠܹܐ ܝܲܕܸܥ: ܐܘܼܦ ܠܵܐ ܡܲܠܲܐܟܹ̈ܐ ܕܫܡܲܝܵܐ: [64] ܐܸܠܵܐ ܒܵܒܵܐ ܒܢܲܦ̮ܫܹܗ. 37 ܐܝܼܢܵܐ ܕܵܐܟ̣ܝܼ ܕܝܘܿܡܵܢܹ̈ܐ ܕܢܘܿܚ: ܗܲܕܟ̣ܵܐ ܒܸܬ ܗܵܘܝܵܐ ܐܬܵܝܬܹܗ 38 ܕܒܪܘܼܢܹܗ ܕܐܢܵܫܵܐ. ܣܵܒܵܒ ܕܵܐܟ̣ܝܼ ܕܝܼܗ̄ܘܵܘ ܒܝܘܿܡܵܢܹ̈ܐ ܕܩܵܕ̄ܡ ܛܵܘܦܵܢܵܐ: ܒܹܐܟ̣ܵܠܵܐ ܘܒܸܫܬܵܝܵܐ: ܒܸܓܒ̣ܵܪܵܐ ܘܡܲܓܒ̣ܘܼܪܹܐ: ܗܲܠ 39 ܝܘܿܡܵܐ ܕܐܘܸܪܹܐ ܢܘܿܚ ܠܩܹܒ̣ܘܼܬܵܐ. ܘܠܵܐ ܝܕܸܥܠܘܿܢ ܗܲܠ ܕܐܬܹܠܹܐ ܛܵܘܦܵܢܵܐ: ܘܠܘܼܒܸܠܹܐ ܠܟܠܵܝ: ܗܲܕܟ̣ܵܐ ܒܸܬ ܗܵܘܝܵܐ 40 ܐܬܵܝܬܹܗ ܕܒܪܘܼܢܹܗ ܕܐܢܵܫܵܐ. ܗ̇ܝܓܵܗ ܬܪܲܝ ܒܸܬ ܗܵܘܝܼ ܒܚܲܩܠܵܐ: ܚܵܕ̄ ܒܸܬ ܦܵܝܸܫ ܠܘܼܒܠܵܐ: ܘܚܵܕ̄ ܒܸܬ ܦܵܝܸܫ 41 ܫܒ̣ܝܼܩܵܐ. ܘܬܲܪܬܹܝ ܒܸܬ ܗܵܘܝܼ ܒܸܓܪܵܣܵܐ ܒܓܵܪܘܿܣܬܵܐ: ܚܕܵܐ ܒܸܬ ܦܵܝܫܵܐ ܠܘܼܒܸܠܬܵܐ: ܘܚܕܵܐ ܒܸܬ ܦܵܝܫܵܐ ܫܒ̣ܝܼܩܬܵܐ. 42 ܥܒ̣ܘܿܕܘܿܢ ܫܵܗܲܪܬܵܐ ܗܲܕܟ̣ܵܐ: ܣܵܒܵܒ ܕܠܹܐ ܝܲܕܥܝܼܬܘܿܢ 43 ܒܐܲܝܢܝܼ ܝܘܿܡܵܐ ܒܹܐܬܵܝܵܐ ܝܠܹܐ ܡܵܪܵܘܟ̣ܘܿܢ. ܐܝܼܢܵܐ ܐܵܗܵܐ ܝܕܸܥܡܘܿܢ: ܕܐܸܢ ܝܲܕܸܥ ܗ̄ܘܵܐ ܡܵܪܵܐ ܕܒܲܝܬܵܐ ܒܐܲܝܢܝܼ ܒܲܕܠܵܐ ܐܵܬܹܐ ܗ̄ܘܵܐ ܓܹܢܵܒ̣ܵܐ: ܒܸܬ ܥܵܒܸܕ ܗ̄ܘܵܐ ܫܵܗܲܪܬܵܐ: ܘܠܹܐ ܫܵܒܸܩ ܗ̄ܘܵܐ 44 ܕܦܵܝܸܫ ܒܸܙܥܝܵܐ ܒܲܝܬܹܗ. ܣܵܒܵܒ ܕܐܵܗܵܐ ܐܘܼܦ ܐܲܚܬܘܿܢ ܗ̄ܘܹܡܘܿܢ ܗܵܙܸܪ: ܣܵܒܵܒ ܒܣܵܥܲܬ ܕܠܹܐ ܝܬܘܿܢ ܒܸܚܫܵܒ̣ܵܐ: 45 ܒܹܐܬܵܝܵܐ ܝܠܹܐ ܒܪܘܼܢܹܗ ܕܐܢܵܫܵܐ. ܒܲܣ ܡܵܢܝܼ ܝܠܹܐ ܪܹܓܵܐ ܡܗܘܼܡܢܵܐ ܘܗܵܘܢܵܢܵܐ: ܕܡܘܼܩܸܡܠܹܗ ܐܵܓ̣ܵܝܹܗ ܥܲܠ ܒܢܲܝ̈ ܒܲܝܬܹܗ: 46 ܕܝܵܗ̄ܒܸܠ ܠܗ̄ܘܿܢ ܡܹܐܟ̣ܘܼܠܬܵܐ ܒܙܲܒ̣ܢܵܗ̇. ܛܘܼܒ̣ܵܐ ܠܗ̇ܘ ܪܹܓܵܐ: 47 ܟܲܕ ܐܵܬܹܐ ܐܵܓ̣ܵܝܹܗ ܡܵܫ̄ܟ̰ܸܚ ܠܹܗ ܒܸܥܒ̣ܵܕܵܐ ܗܲܕܟ̣ܵܐ. ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܡܲܩܸܡ ܠܹܗ ܥܲܠ ܟܠ ܕܐܝܼܬ 48 ܠܹܗ. ܐܝܼܢܵܐ ܐܸܢ ܐܵܡܸܪ ܗ̇ܘ ܪܹܓܵܐ ܒܝܼܫܵܐ ܒܠܸܒܹܗ: ܕܐܵܓ̣ܵܝܝܼ 49 ܥܲܪܩܘܼܠܹܐ ܝܠܹܐ ܠܹܐܬܵܝܵܐ. ܘܫܵܪܹܐ ܠܸܡܚܵܝܵܐ ܠܚܲܒ̣ܪ̈ܵܘܵܬܹܗ: 50 ܘܗܵܘܹܐ ܒܹܐܟ̣ܵܠܵܐ ܘܒܸܫܬܵܝܵܐ ܥܲܡ ܪܵܘܵܝܹܐ. ܒܸܬ ܐܵܬܹܐ ܐܵܓ̣ܵܝܹܗ ܕܗ̇ܘ ܪܹܓܵܐ ܒܝܘܿܡܵܐ ܕܠܹܐ ܚܵܫܸܒ̣: ܘܒܣܵܥܲܬ ܕܠܹܐ ܝܲܕܸܥ. 51 [65] ܘܒܸܬ ܦܲܠܹܐ ܠܹܗ ܠܬܪܲܝ: ܘܒܸܬ ܣܵܡܹܗ ܥܲܡ ܢܵܣܒܲܝ̈ ܒܐܲܦܹ̈ܐ. ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ.

ܩܦܠܐܘܢ: ܟܗ

1 ܗ̇ܝܓܵܗ ܒܸܬ ܦܵܝܫܵܐ ܕܘܼܡܝܼܬܵܐ ܡܲܠܟܘܼܬܵܐ ܕܫܡܲܝܵܐ ܠܥܸܣܲܪ ܒܬܘܼܠܵـ̈ـܬܵܐ: ܐܵܢܝܼ ܕܫܩܸܠܘܿܢ ܠܲܡܦܹܝܕܵܝ̈: ܘܦܠܸܛܠܘܿܢ ܠܐܘܼܪܚܹܗ 2 ܕܚܸܬܢܵܐ. ܘܚܲܡܸܫ ܡܸܢܵܝ ܗܵܘܢܵܢܹ̈ܐ ܗ̄ܘܵܘ: ܘܚܲܡܸܫ ܢܲܙܵܢܹ̈ܐ. ܘܐܵܢܝܼ 3 4 ܢܲܙܵܢܹ̈ܐ ܫܩܸܠܘܿܢ ܠܲܡܦܹܝܕܵܝ̈: ܘܠܵܐ ܫܩܸܠܘܿܢ ܥܲܡܵܝ ܡܸܫܚܵܐ. ܐܝܼܢܵܐ ܐܵܢܝܼ ܗܵܘܢܵܢܹ̈ܐ ܫܩܸܠܘܿܢ ܡܸܫܚܵܐ ܒܡܵܐܢܵܝ̈ ܥܲܡ ܠܲܡܦܹܝܕܵܝ̈. 5 ܘܟܲܕ ܥܘܼܪܩܸܠܹܐ ܚܸܬܢܵܐ: ܢܸܡܠܘܿܢ ܟܠܵܝ ܘܕܡܸܟ̣ܠܘܿܢ. 6 ܘܒܦܲܠܓܹܗ ܕܠܲܝܠܹܐ ܗ̄ܘܹܠܵܐ ܩܲܘܲܚܬܵܐ: ܗܵܐ: ܚܸܬܢܵܐ ܒܹܐܬܵܝܵܐ 7 ܝܠܹܐ: ܦܠܘܿܛܘܿܢ ܠܐܘܼܪܚܹܗ. ܗ̇ܝܓܵܗ ܩܸܡܠܘܿܢ ܟܠܵܝ ܐܵܢܝܼ 8 ܒܬܘܼ̈ܠܵܬܵܐ: ܘܬܘܼܪܸܨܠܘܿܢ ܠܲܡܦܹܝܕܵܝ̈. ܐܝܼܢܵܐ ܐܵܡܪܝܼ ܐܵܢܝܼ ܢܲܙܵܢܹ̈ܐ ܠܗܵܘܢܵܢܹ̈ܐ: ܗܲܒ̄ܠܘܿܢ ܠܲܢ ܡ̣ܢ ܡܸܫܚܵܘܟ̣ܘܿܢ: ܣܵܒܵܒ: ܗܵܐ: 9 ܟ̰ܡܹܠܘܿܢ ܠܲܡܦܹܝ̈ܕܲܢ. ܓ̰ܘܼܘܸܒܠܘܿܢ ܐܵܢܝܼ ܗܵܘܢܵܢܹ̈ܐ ܘܐܵܡܪܝܼ: ܠܵܐ ܗ̄ܘܹܐ ܕܠܵܐ ܡܵܠܹܐ ܐܸܠܲܢ ܘܐܸܠܵܘܟ̣ܘܿܢ: ܐܸܠܵܐ ܙܹܠ̄ܡܘܿܢ ܠܟܸܣ 10 ܙܵܒ̇ܢܵܢܹ̈ܐ : ܘܙܒ̣ܘܿܢܘܿܢ ܠܵܘܟ̣ܘܿܢ. ܘܟܲܕ ܐܙܸܠܘܿܢ ܠܸܙܒ̣ܵܢܵܐ: ܐܬܹܠܹܐ ܚܸܬܢܵܐ: ܘܐܵܢܝܼ ܕܗܵܙܸܪ ܝܼܗ̄ܘܵܘ ܐܘܸܪܘܿܢ ܥܲܡܹܗ ܠܒܲܝܬܵܐ ܕܚܠܘܼܠܵܐ: 11 ܘܦܸܫܠܹܐ ܕܒ̣ܝܼܪܵܐ ܬܲܪܥܵܐ. ܐܝܼܢܵܐ ܒܚܲܪܬܵܐ ܐܬܹܠܘܿܢ ܐܘܼܦ ܐܵܢܝܼ ܒܬܘܼ̈ܠܵܬܵܐ ܐܚܹܪ̄ܢܹܐ: ܘܐܵܡܪܝܼ: ܡܵܪܲܢ: ܡܵܪܲܢ: ܦܬܘܿܚ ܐܸܠܲܢ. 12 ܐܝܼܢܵܐ ܗ̇ܘ ܓ̰ܘܼܘܸܒܠܹܐ ܘܐܡܸܪܹܐ ܐܸܠܵܝ: ܬܪܘܼܨܵܐ ܒܹܐܡܵܪܵܐ ܝܘܸܢ 13 ܐܸܠܵܘܟ̣ܘܿܢ: ܕܠܹܐ ܝܲܕܥܸܢܵܘܟ̣ܘܿܢ. ܥܒ̣ܘܿܕܘܿܢ ܫܵܗܲܪܬܵܐ ܗܲܕܟ̣ܵܐ: ܣܵܒܵܒ ܕܠܹܐ ܝܲܕܥܝܼܬܘܿܢ ܠܝܘܿܡܵܐ ܘܠܵܐ ܠܣܵܥܲܬ. 14 ܣܵܒܵܒ ܐܲܝܟ ܐܢܵܫܵܐ ܕܐܙܸܠܹܐ ܠܪܸܚܩܵܐ: ܩܪܹܠܹܐ ܠܪܹ̈ܓܵܘܵܬܘܼܗܝ: 15 ܘܣܘܼܦܹܠܹܐ ܒܝܼܵܝ ܡܸܢܕܝܹܗ. ܠܚܵܕ̄ ܝܸܗܒܸܠܹܗ ܚܲܡܫܵܐ ܟܲܟܪܹ̈ܐ: ܠܐܚܹܪ̄ܢܵܐ ܬܪܲܝ: ܘܠܐܚܹܪ̄ܢܵܐ ܚܵܕ̄: ܠܟܠ ܐܢܵܫܵܐ ܐܲܝܟ ܚܲܝܠܹܗ: 16 ܘܐܙܸܠܹܐ. ܘܕܲܪܣܵܥܲܬ ܐܙܸܠܹܐ ܗ̇ܘ ܕܫܩܸܠܹܐ ܚܲܡܫܵܐ ܟܲܟܪܹ̈ܐ: ܥܒܸܕܠܹܐ ܣܲܘܕܵܐ ܒܝܼܵܝ: ܘܡܘܼܙܝܸܕܠܹܐ ܚܲܡܫܵܐ ܟܲܟܪܹ̈ܐ ܐܚܹܪ̄ܢܹܐ. 17 ܘܗܲܕܟ̣ܵܐ ܐܘܼܦ ܗ̇ܘ ܕܬܪܲܝ: ܩܢܹܠܹܐ ܬܪܲܝ ܐܚܹܪ̄ܢܹܐ. 18 ܐܝܼܢܵܐ ܗ̇ܘ ܕܫܩܸܠܹܐ ܚܵܕ̄: ܐܙܸܠܹܐ ܚܦܸܪܹܐ ܒܐܲܪܥܵܐ: ܘܛܘܼܫܹܠܹܗ 19 ܠܙܘܼܙܵܐ ܕܐܵܓ̣ܵܝܹܗ. ܘܡܒܵܬ̄ܪ ܙܲܒ̣ܢܵܐ ܪܵܒܵܐ ܐܬܹܠܹܐ ܐܵܓ̣ܵܝܵܐ ܕܐܵܢܝܼ 20 ܪܹ̈ܓܵܘܵܬܹܐ: ܘܫܩܸܠܹܐ ܡܸܢܵܝ ܚܸܫܒܘܼܢܵܐ. ܘܐܬܹܠܹܐ ܗ̇ܘ ܕܝܼܗ̄ܘܵܐ ܫܩܝܼܠܵܐ ܚܲܡܫܵܐ ܟܲܟܪܹ̈ܐ: ܘܡܘܼܬ̄ܝܹܠܹܐ ܚܲܡܫܵܐ ܟܲܟܪܹ̈ܐ ܐܚܹܪ̄ܢܹܐ: ܘܐܡܸܪܹܐ: ܐܵܓ̣ܵܝܝܼ: ܚܲܡܫܵܐ ܟܲܟܪܹ̈ܐ ܝܸܗܒܸܠܘܼܟ ܐܸܠܝܼ: ܗܵܐ: ܚܲܡܫܵܐ 21 ܟܲܟܪܹ̈ܐ ܐܚܹܪ̄ܢܹܐ ܩܢܹܠܝܼ. ܐܵܡܸܪ ܐܸܠܹܗ ܐܵܓ̣ܵܝܹܗ: ܟ̰ܵܝܒܘܼ: ܪܹܓܵܐ ܛܵܒ̣ܵܐ ܘܡܗܘܼܡܢܵܐ: ܥܲܠ ܚܲܟ̰ܵܐ ܡܗܘܼܡܢܵܐ ܗ̄ܘܹܠܘܼܟ: ܥܲܠ ܪܵܒܵܐ ܒܸܬ ܡܲܩܸܡܸܢܘܼܟ. ܐܘܘܿܪ ܠܚܲܕܘܼܬܹܗ ܕܐܵܓ̣ܵܝܘܼܟ. 22 ܘܐܬܹܠܹܐ ܗ̇ܘ ܕܬܪܲܝ ܟܲܟܪܹ̈ܐ: ܘܐܡܸܪܹܐ: ܐܵܓ̣ܵܝܝܼ: ܬܪܲܝ ܟܲܟܪܹ̈ܐ 23 ܝܸܗܒܸܠܘܼܟ ܐܸܠܝܼ: ܗܵܐ: ܬܪܲܝ ܟܲܟܪܹ̈ܐ ܐܚܹܪ̄ܢܹܐ ܩܢܹܠܝܼ. ܐܵܡܸܪ ܐܸܠܹܗ ܐܵܓ̣ܵܝܹܗ: ܟ̰ܵܝܒܘܼ: ܪܹܓܵܐ ܛܵܒ̣ܵܐ ܘܡܗܘܼܡܢܵܐ: ܥܲܠ ܚܲܟ̰ܵܐ ܡܗܘܼܡܢܵܐ ܗ̄ܘܹܠܘܼܟ: ܥܲܠ ܪܵܒܵܐ ܒܸܬ ܡܲܩܸܡܸܢܘܼܟ. ܐܘܘܿܪ 24 ܠܚܲܕܘܼܬܹܗ ܕܐܵܓ̣ܵܝܘܼܟ. ܘܐܬܹܠܹܐ ܐܘܼܦ ܗ̇ܘ ܕܫܩܸܠܹܐ ܚܵܕ̄ ܟܲܟܪܵܐ: ܘܐܡܸܪܹܐ: ܐܵܓ̣ܵܝܝܼ: ܒܝܼܕܲܥܝܘܼܟ ܝܼܘܸܢ ܗ̄ܘܵܐ ܕܐܢܵܫܵܐ ܩܸܫܝܵܐ ܝܘܸܬ: ܒܸܚܨܵܕܵܐ ܐܲܝܟܵܐ ܕܠܵܐ ܙܪܸܥܠܘܼܟ: ܘܓ̰ܲܡܘܼܥܝܹܐ ܡܐܲܝܟܵܐ 25 ܕܠܵܐ ܒܘܼܪܒܸܙܠܘܼܟ. ܘܙܕܸܥܠܝܼ: ܘܐܙܸܠܝܼ ܛܘܼܫܹܠܝܼ ܟܲܟܪܘܼܟ 26 ܒܐܲܪܥܵܐ: ܗܵܐ: ܐܝܼܬ ܠܘܼܟ ܕܝܼܘܼܟ. ܐܝܼܢܵܐ ܓ̰ܘܼܘܸܒܠܹܐ ܐܵܓ̣ܵܝܹܗ ܘܐܡܸܪܹܐ ܐܸܠܹܗ: ܪܹܓܵܐ ܒܝܼܫܵܐ ܘܡܲܟܣܸܠܵܢܵܐ: ܒܝܼܕܲܥܝܵܐ ܝܘܸܬ ܗ̄ܘܵܐ ܕܟܹܐ ܚܵܨܕܸܢ ܐܲܝܟܵܐ ܕܠܵܐ ܙܪܸܥܠܝܼ: ܘܟܹܐ ܓ̰ܲܡܥܸܢ ܡܐܲܝܟܵܐ 27 ܕܠܵܐ ܒܘܼܪܒܸܙܠܝܼ. ܒܲܣ ܘܵܓ̰ܸܒ ܝܼܗ̄ܘܵܐ ܐܸܠܘܼܟ ܕܕܵܪܸܬ ܗ̄ܘܵܐ ܙܘܼܙܝܼ ܥܲܠ ܨܘܼܦܪܵܐ ܕܨܲܪ̈ܵܦܹܐ: ܘܐܵܬܸܢ ܗ̄ܘܵܐ ܐܵܢܵܐ ܘܫܵܩܠܸܢ ܗ̄ܘܵܐ 28 ܕܝܼܝܼ ܥܲܡ [66] ܪܸܒܝܼܬܹܗ. ܫܩܘܿܠܘܿܢ ܗܲܕܟ̣ܵܐ ܡܸܢܹܗ ܟܲܟܪܵܐ: 29 ܘܗܲܒ̄ܠܘܿܢ ܠܹܗ ܠܗ̇ܘ ܕܐܝܼܬ ܠܹܗ ܥܸܣܪܵܐ ܟܲܟܪܹ̈ܐ. ܣܵܒܵܒ ܟܠ ܡ̇ܢ ܕܐܝܼܬ ܠܹܗ ܒܸܬ ܦܵܝܸܫ ܝܘܼܗ̄ܒ̣ܵܐ ܐܸܠܹܗ ܘܒܸܬ ܦܵܝܸܫ ܡܘܼܙܝܸܕܵܐ. ܐܝܼܢܵܐ ܗ̇ܘ ܕܠܲܝܬ ܠܹܗ: ܐܘܼܦ ܗ̇ܘ ܕܐܝܼܬ ܠܹܗ ܒܸܬ 30 ܦܵܝܸܫ ܫܩܝܼܠܵܐ ܡܸܢܹܗ. ܘܠܪܹܓܵܐ ܒܹܐ ܦܲܝܕܵܐ ܦܵܠܛܘܿܢ ܠܹܗ ܠܚܘܼܒ̣ܝܵܐ ܒܲܪܵܝܵܐ: ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ. 31 ܐܝܼܢܵܐ ܐܝܼܡܲܢ ܕܐܵܬܹܐ ܒܪܘܼܢܹܗ ܕܐܢܵܫܵܐ ܒܚܸܩܪܹܗ: ܘܟܠܵܝ ܡܲܠܲܐܟ̣ܘܼ̈ܗܝ ܥܲܡܹܗ: ܗ̇ܝܓܵܗ ܒܸܬ ܝܵܬܸܒ̣ ܥܲܠ ܬܪܘܿܢܘܿܣ 32 ܕܚܸܩܪܹܗ. ܘܒܸܬ ܦܵܝܫܝܼ ܓ̰ܘܼܡܸܥܝܹܐ ܩܵܕ̄ܡܘܼܗܝ ܟܠܵܝ ܛܵܝܸܦܹ̈ܐ: ܘܒܸܬ ܦܵܪܸܫ ܠܗ̄ܘܿܢ ܚܵܕ̄ ܡܗ̇ܘ ܐܚܹܪ̄ܢܵܐ: ܐܲܝܟ ܕܪܵܥܝܵܐ ܦܵܪܸܫ 33 ܥܸܪ̈ܒܹܐ ܡ̣ܢ ܥܸܙܹ̈ܐ. ܘܒܸܬ ܡܲܟܠܹܐ ܠܥܸܪ̈ܒܹܐ ܡ̣ܢ ܝܲܡܝܼܢܹܗ: 34 ܘܠܥܸܙܹ̈ܐ ܡ̣ܢ ܣܸܡܵܠܹܗ. ܗ̇ܝܓܵܗ ܒܸܬ ܐܵܡܸܪ ܡܲܠܟܵܐ ܠܐܵܢܝܼ ܕܡ̣ܢ ܝܲܡܝܼܢܹܗ: ܬܹܡܘܿܢ: ܒܪ̈ܝܼܟܹܐ ܕܒܵܒܝܼ: ܝܪܘܿܬܘܿܢ ܡܲܠܟܘܼܬܵܐ ܕܝܼܗ̄ܘܵܐ ܗܘܼܕܸܪܬܵܐ ܐܸܠܵܘܟ̣ܘܿܢ ܡ̣ܢ ܒܸܢܝܲܬܹ̈ܐ ܕܥܵܠܡܵܐ. 35 ܣܵܒܵܒ ܕܟܦܸܢܝܼ: ܘܝܸܗܒܸܠܵܘܟ̣ܘܿܢ ܐܸܠܝܼ ܠܹܐܟ̣ܵܠܵܐ: ܨܹܗ̄ܠܝܼ: ܘܡܘܼܫܬܹܠܵܘܟ̣ܘܿܢ ܐܸܠܝܼ: ܢܘܼܟ̣ܪܵܝܵܐ ܗ̄ܘܹܠܝܼ: ܘܡܘܼܫܪܹܠܵܘܟ̣ܘܿܢ 36 ܐܸܠܝܼ. ܫܘܼܠܚܵܝܵܐ ܗ̄ܘܹܠܝܼ: ܘܡܘܼܠܒܸܫܠܵܘܟ̣ܘܿܢ ܐܸܠܝܼ: ܡܸܪܥܝܵܐ ܗ̄ܘܹܠܝܼ: ܘܬܦܸܩܠܵܘܟ̣ܘܿܢ ܒܝܼܝܼ: ܓܵܘ ܒܹܝܬ ܐܲܣܝܼܪܹ̈ܐ ܗ̄ܘܹܠܝܼ: 37 ܘܐܬܹܠܵܘܟ̣ܘܿܢ ܠܟܸܣܠܝܼ. ܗ̇ܝܓܵܗ ܒܸܬ ܓ̰ܲܘܸܒܝܼ ܠܹܗ ܐܵܢܝܼ ܙܲܕܝܼܩܹ̈ܐ: ܒܹܐܡܵܪܵܐ: ܡܵܪܲܢ: ܐܝܼܡܲܢ ܚܙܹܠܲܢ ܐܸܠܘܼܟ ܟܦܝܼܢܵܐ: 38 ܘܬܘܼܪܣܹܠܲܢ ܐܸܠܘܼܟ: ܝܲܢ ܨܸܗ̄ܝܵܐ: ܘܡܘܼܫܬܹܠܲܢ ܐܸܠܘܼܟ. ܘܐܝܼܡܲܢ ܚܙܹܠܲܢ ܐܸܠܘܼܟ ܢܘܼܟ̣ܪܵܝܵܐ: ܘܡܘܼܫܪܹܠܲܢ ܐܸܠܘܼܟ: ܝܲܢ ܫܘܼܠܚܵܝܵܐ 39 ܘܡܘܼܠܒܸܫܠܲܢ ܐܸܠܘܼܟ. ܘܐܝܼܡܲܢ ܚܙܹܠܲܢ ܐܸܠܘܼܟ ܡܸܪܥܝܵܐ: ܝܲܢ ܓܵܘ 40 ܒܹܝܬ ܐܲܣܝܼܪܹ̈ܐ: ܘܐܬܹܠܲܢ ܠܟܸܣܠܘܼܟ. ܘܒܸܬ ܓ̰ܲܘܸܒ ܡܲܠܟܵܐ ܘܐܵܡܸܪ ܐܸܠܵܝ: ܬܪܘܼܨܵܐ ܒܹܐܡܵܪܵܐ ܝܸܘܸܢ ܐܸܠܵܘܟ̣ܘܿܢ: ܕܟܡܵܐ ܕܥܒܸܕܠܵܘܟ̣ܘܿܢ ܠܚܵܕ̄ ܡܐܲܢܹܐ ܐܵܚܘܿܢܘܵܬܝܼ̈ ܙܥܘܿܪܹ̈ܐ: ܐܸܠܝܼ 41 ܥܒܸܕܠܵܘܟ̣ܘܿܢ. ܗ̇ܝܓܵܗ ܒܸܬ ܐܵܡܸܪ ܐܘܼܦ ܠܐܵܢܝܼ ܕܡ̣ܢ ܣܸܡܵܠܹܗ: ܙܹܠ̄ܡܘܿܢ ܠܵܘܟ̣ܘܿܢ ܡܸܢܝܼ: ܠܝܼܛܹ̈ܐ: ܠܢܘܼܪܵܐ ܕܠܵܐܒܵܕ: 42 ܗ̇ܘ ܕܝܼܠܹܐ ܗܘܼܕܪܵܐ ܠܐܵܟܸܠܩܲܪܨܵܐ ܘܠܡܲܠܲܐܟ̣ܘܼ̈ܗܝ. ܣܵܒܵܒ ܕܟܦܸܢܝܼ: ܠܵܐ ܝܸܗܒܸܠܵܘܟ̣ܘܿܢ ܐܸܠܝܼ ܠܹܐܟ̣ܵܠܵܐ: ܨܹܗ̄ܠܝܼ: ܘܠܵܐ 43 ܡܘܼܫܬܹܠܵܘܟ̣ܘܿܢ ܐܸܠܝܼ. ܢܘܼܟ̣ܪܵܝܵܐ ܗ̄ܘܹܠܝܼ: ܘܠܵܐ ܡܘܼܫܪܹܠܵܘܟ̣ܘܿܢ ܐܸܠܝܼ: ܫܘܼܠܚܵܝܵܐ ܗ̄ܘܹܠܝܼ: ܘܠܵܐ ܡܘܼܠܒܸܫܠܵܘܟ̣ܘܿܢ ܐܸܠܝܼ: ܡܸܪܥܝܵܐ ܗ̄ܘܹܠܝܼ: ܘܓܵܘ ܒܹܝܬ ܐܲܣܝܼܪܹ̈ܐ: ܘܠܵܐ ܬܦܸܩܠܵܘܟ̣ܘܿܢ ܒܝܼܝܼ. 44 ܗ̇ܝܓܵܗ ܒܸܬ ܓ̰ܲܘܸܒܝܼ ܐܘܼܦ ܐܵܢܝܼ ܘܒܸܬ ܐܵܡܪܝܼ: ܡܵܪܲܢ: ܐܝܼܡܲܢ ܚܙܹܠܲܢ ܐܸܠܘܼܟ ܟܦܝܼܢܵܐ: ܝܲܢ ܨܸܗ̄ܝܵܐ: ܝܲܢ ܢܘܼܟ̣ܪܵܝܵܐ: ܝܲܢ ܫܘܼܠܚܵܝܵܐ: ܝܲܢ ܡܸܪܥܝܵܐ: ܝܲܢ ܓܵܘ ܒܹܝܬ ܐܲܣܝܼܪܹ̈ܐ: ܘܠܵܐ ܥܒܸܕܠܲܢ ܚܸܠܡܲܬ 45 ܐܸܠܘܼܟ. ܗ̇ܝܓܵܗ ܒܸܬ ܓ̰ܲܘܸܒ ܘܐܵܡܸܪ ܐܸܠܵܝ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܡܵܐ ܕܠܵܐ ܥܒܸܕܠܵܘܟ̣ܘܿܢ ܠܚܵܕ̄ 46 ܡܐܲܢܹܐ ܙܥܘܿܪܹ̈ܐ: ܐܘܼܦ ܐܸܠܝܼ ܠܵܐ ܥܒܸܕܠܵܘܟ̣ܘܿܢ. ܘܒܸܬ ܐܵܙܠ̄ܝܼ ܐܵܢܝܼ ܠܓ̰ܘܼܢܓ̰ܵܪܵܐ ܕܠܵܐܒܵܕ: ܘܙܲܕܝܼܩܹ̈ܐ ܠܚܲܝܹ̈ܐ ܕܠܵܐܒܵܕ.

ܩܹܦܵܠܐܘܿܢ: ܟܘ

1 ܘܗ̄ܘܹܠܵܐ ܕܟܲܕ ܬܘܼܡܸܡܠܹܐ ܝܼܫܘܿܥ ܟܠܵܝ ܐܲܢܹܐ ܗܹܡܸܙܡܵܢܹ̈ܐ: 2 ܐܡܸܪܹܐ ܠܬܲܠܡܝܼܕܘܼ̈ܗܝ. ܒܝܼܕܲܥܝܵܐ ܝܬܘܿܢ ܕܡܒܵܬ̄ܪ ܬܪܲܝ ܝܘܿܡܵܢܹ̈ܐ ܒܸܬ ܗܵܘܹܐ ܦܸܨܚܵܐ: ܘܒܪܘܼܢܹܗ ܕܐܢܵܫܵܐ ܦܝܵܫܵܐ ܝܠܹܐ 3 ܣܘܼܦܝܵܐ ܕܦܵܝܸܫ ܙܩܝܼܦܵܐ. ܗ̇ܝܓܵܗ ܓ̰ܡܸܥܠܘܿܢ ܓܘܼܪ̈ܵܢܹܐ ܕܟܵܗܢܹ̈ܐ: ܘܚܘܵܪ̈ܕܸܩܢܹܐ ܕܛܵܝܸܦܵܐ ܠܕܵܪܬܹܗ ܕܓܘܼܪܵܐ ܕܟܵܗܢܹ̈ܐ: 4 ܕܦܵܝܸܫ ܩܸܪܝܵܐ ܩܲܝܵܦܵܐ. ܘܥܒܸܕܠܘܿܢ ܪܵܐܝܝܼ ܕܒܦܸܠܡܵܐ ܕܵܒ̣ܩܝܼ 5 ܠܝܼܫܘܿܥ ܘܩܵܛܠܝܼ ܠܹܗ. ܐܝܼܢܵܐ ܐܡܸܪܘܿܢ: ܠܵܐ ܒܥܹܐܕܵܐ: ܕܠܵܐ ܗܵܘܹܐ ܫܓ̣ܘܼܫܝܵܐ ܓܵܘ ܛܵܝܸܦܵܐ. 6 ܘܟܲܕ ܝܼܫܘܿܥ ܒܒܹܝܬ ܥܲܢܝܵܐ ܗ̄ܘܵܐ: ܓܵܘ ܒܲܝܬܹܗ ܕܫܸܡܥܘܿܢ 7 ܓܸܪܒ̣ܵܢܵܐ. ܐܬܹܠܵܐ ܠܟܸܣܠܹܗ ܒܲܟ̣ܬܵܐ ܕܐܝܼܬ ܗ̄ܘܵܐ ܠܵܗ̇ ܫܵܛܝܼܦܬܵܐ ܕܡܸܫܚܵܐ ܕܒܸܣܡܵܐ: ܛܝܼܡܵܢܬܵܐ ܪܵܒܵܐ: ܘܡܘܼܫܦܸܟ̣ܵܠܵܐ 8 ܥܲܠ ܪܹܫܹܗ ܟܲܕ ܝܬܝܼܒ̣ܵܐ ܠܨܘܼܦܪܵܐ. ܐܝܼܢܵܐ ܟܲܕ ܚܙܹܠܘܿܢ ܬܲܠܡܝܼܕܘܼ̈ܗܝ ܟܪܸܒ̇ܠܘܿܢ: ܘܐܡܸܪܘܿܢ: ܩܵܡܘܿܕܝܼ ܐܵܗܵܐ 9 ܬܠܵܩܵܐ. ܣܵܒܵܒ ܕܟܹܐ ܡܵܨܹܐ ܗ̄ܘܵܐ ܕܦܵܝܸܫ ܙܘܼܒܢܵܐ ܐܵܗܵܐ 10 ܒܪܵܒܵܐ: ܘܕܦܵܝܸܫ ܝܘܼܗ̄ܒ̣ܵܐ ܠܡܸܣܟܹܢܹ̈ܐ. ܐܝܼܢܵܐ ܝܼܫܘܿܥ ܝܕܸܥܠܹܐ: ܘܐܡܸܪܹܐ ܐܸܠܵܝ: ܩܵܡܘܿܕܝܼ ܡܲܓ̰ܗ̄ܘܼܝܹܐ ܝܬܘܿܢ ܠܒܲܟ̣ܬܵܐ: ܦܘܼܠܚܵܢܵܐ 11 ܨܦܵܝܝܼ ܥܒܸܕܠܵܐ ܐܸܠܝܼ. ܣܵܒܵܒ ܒܟܠ ܥܕܵܢܵܐ ܡܸܣܟܹܢܹ̈ܐ ܐܝܼܬ ܠܵܘܟ̣ܘܿܢ ܥܲܡܵܘܟ̣ܘܿܢ: ܐܝܼܢܵܐ ܐܵܢܵܐ ܒܟܠ ܥܕܵܢܵܐ ܠܲܝܬ 12 ܠܵܘܟ̣ܘܿܢ. ܐܝܼܢܵܐ ܐܵܗܵܐ ܕܕܪܹܠܵܐ ܐܵܗܵܐ ܒܸܣܡܵܐ ܥܲܠ ܓܘܼܫܡܝܼ: 13 ܐܲܝܟ ܕܠܩܒ̣ܵܪܬܝܼ ܥܒܸܕܠܵܐ. ܘܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܲܝܟܵܐ ܕܦܵܝܫܵܐ ܡܘܼܟܪܸܙܬܵܐ ܐܵܗܵܐ ܡܲܫܚܲܕܬܝܼ ܒܟܠܵܗ̇ ܕܘܼܢܝܹܐ: ܒܸܬ ܦܵܝܸܫ ܗܘܼܡܙܸܡܵܐ ܐܘܼܦ ܡܸܢܕܝܼ ܕܥܒܸܕܠܵܐ ܐܵܗܵܐ ܠܕܟ̣ܵܪܘܼܗ̇.

14 ܗ̇ܝܓܵܗ ܐܙܸܠܹܐ ܚܵܕ̄ ܡ̣ܢ ܬܪܸܥܣܲܪ: ܕܦܵܝܸܫ ܩܸܪܝܵܐ ܝܼܗܘܼܕܵܐ 15 ܣܟܲܪܝܘܼܛܵܐ: ܠܟܸܣ ܓܘܼܪ̈ܵܢܹܐ ܕܟܵܗܢܹ̈ܐ. ܘܐܡܸܪܹܐ ܐܸܠܵܝ: ܡܘܼܕܝܼ ܒܵܣܡܵܐ ܠܵܘܟ̣ܘܿܢ ܠܝܼܵܗ̄ܒ̣ܝܼ: ܘܐܵܢܵܐ ܒܸܬ ܣܵܦܸܢܹܗ ܐܸܠܵܘܟ̣ܘܿܢ: ܘܐܵܢܝܼ ܬܩܸܠܘܿܢ ܐܸܠܹܗ ܬܠܵܬܝܼ ܙܘܼܙܹ̈ܐ ܕܣܹܐܡܵܐ. 16 ܘܡܢ ܗ̇ܝܓܵܗ ܛܸܥܠܹܐ ܠܦܸܪܨܲܬ ܕܣܵܦܹܐ ܠܹܗ. 17 ܐܝܼܢܵܐ ܒܝܘܿܡܵܐ ܩܵܕ̄ܡܵܝܵܐ ܕܦܲܛܝܼܪܹ̈ܐ ܐܬܹܠܘܿܢ ܬܲܠܡܝܼܕܹ̈ܐ ܠܟܸܣ ܝܼܫܘܿܥ: ܘܐܡܸܪܘܿܢ ܐܸܠܹܗ: ܐܲܝܟܵܐ ܒܲܥܝܸܬ ܕܗܵܕܪܵܚ 18 ܠܘܼܟ ܕܐܵܟ̣ܠܸܬ ܦܸܨܚܵܐ. ܘܗ̇ܘ ܐܡܸܪܹܐ ܐܸܠܵܝ: ܙܠ̄ܡܘܿܢ ܠܡܕܝܼܢ̄ܬܵܐ ܠܟܸܣ ܦܸܠܵܢ: ܘܐܡܘܿܪܘܿܢ: ܐܸܠܹܗ: ܪܵܒܝܲܢ ܒܹܐܡܵܪܵܐ ܝܠܹܐ: ܙܲܒ̣ܢܝܼ ܡܛܹܠܹܐ: ܠܟܸܣܠܘܼܟ ܒܸܬ ܥܵܒ̣ܕܸܢ ܦܸܨܚܵܐ ܥܲܡ 19 ܬܲܠܡܝܼܕܝܼ̈. ܘܬܲܠܡܝܼܕܘܼ̈ܗܝ ܥܒܸܕܠܘܿܢ ܕܵܐܟ̣ܝܼ ܕܦܩܝܼܕܵܝܠܹܐ 20 ܝܼܫܘܿܥ: ܘܗܘܼܕܸܪܘܿܢ ܦܸܨܚܵܐ. ܘܟܲܕ ܗ̄ܘܹܠܹܐ ܕ̈ܡܫܵܐ: ܝܬܒܼܒ̣ܵܐ 21 ܗ̄ܘܵܐ ܠܨܘܼܦܪܵܐ ܥܲܡ ܬܪܸܥܣܲܪ. ܘܟܲܕ ܒܹܐܟܵܠܵܐ ܗ̄ܘܵܘ: ܐܡܸܪܹܐ: ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܚܵܕ̄ ܡܸܢܵܘܟ̣ܘܿܢ 22 ܒܸܬ ܣܵܦܹܐ ܠܝܼ. ܘܦܫܸܡܠܘܿܢ ܪܵܒܵܐ: ܘܫܘܼܪܹܠܘܿܢ ܠܹܐܡܵܪܵܐ 23 ܐܸܠܹܗ ܟܠ ܚܵܕ̄ ܡܸܢܵܝ: ܐܵܢܵܐ ܝܘܸܢ: ܡܵܪܝܼ. ܘܗ̇ܘ ܓ̰ܘܼܘܸܒܠܹܐ ܘܐܡܸܪܹܐ: ܡ̇ܢ ܕܒܸܛܡܵܫܵܐ ܝܠܹܐ ܐܝܼܕܹܗ ܥܲܡܝܼ ܒܡܵܐܢܵܐ: ܗ̇ܘ ܒܸܬ 24 ܣܵܦܹܐ ܠܝܼ. ܒܪܘܼܢܹܗ ܕܐܢܵܫܵܐ ܒܹܐܙܵܠܵܐ ܝܠܹܐ ܕܵܐܟ̣ܝܼ ܕܝܼܠܹܐ ܟܬܝܼܒ̣ܵܐ ܥܲܠܘܼܗܝ: ܐܝܼܢܵܐ ܘܵܝ ܠܗ̇ܘ ܐܢܵܫܵܐ ܕܒܐܝܼܕܹܗ ܒܪܘܼܢܹܗ ܕܐܢܵܫܵܐ ܦܵܝܸܫ ܣܘܼܦܝܵܐ: ܨܦܵܝܝܼ ܗ̄ܘܵܐ ܐܸܠܹܗ ܐܸܢ ܠܵܐ ܗܵܘܹܐ ܗ̄ܘܵܐ 25 ܗ̄ܘܝܼܵܐ. ܓ̰ܘܼܘܸܒܠܹܐ ܝܼܗܘܼܕܵܐ ܣܵܦܝܵܢܵܐ ܘܐܡܸܪܹܐ: ܐܵܢܵܐ ܝܘܸܢ: ܪܵܒܝܼ: ܐܵܡܸܪ ܐܸܠܹܗ ܝܼܫܘܿܥ: ܐܲܢ̄ܬ ܐܡܸܪܘܼܟ. 26 ܘܟܲܕ ܒܹܐܟ̣ܵܠܵܐ ܗ̄ܘܵܘ: ܫܩܸܠܹܐ ܝܫܘܿܥ ܠܲܚܡܵܐ: ܘܒܘܼܪܸܟ̣ܠܹܐ ܘܩܨܹܠܹܐ: ܘܝܸܗܒܸܠܹܐ ܠܬܲܠܡܝܼܕܘܼ̈ܗܝ: ܘܐܡܸܪܹܐ: ܫܩܘܿܠܘܿܢ 27 ܐܟ̣ܘܿܠܘܿܢ: ܐܵܗܵܐ ܝܠܹܐ ܦܲܓ̣ܪܝܼ. ܘܫܩܸܠܹܐ ܟܵܣܵܐ: ܘܫܘܼܟܸܪܹܐ: ܘܝܸܗܒܸܠܹܐ ܐܸܠܵܝ: ܘܐܡܸܪܹܐ: ܫܬܹܡܘܿܢ ܡܸܢܹܗ ܟܠܵܘܟ̣ܘܿܢ. 28 ܣܵܒܵܒ ܕܐܵܗܵܐ ܝܠܹܐ ܕܸܡܝܼ [67] ܕܕܝܵܬܹܩܹܐ [68] ܚܲܕܬܵܐ: ܕܡܒܵܕܵܠ 29 ܕܪܵܒܵܐ ܦܝܵܫܵܐ ܝܠܹܐ ܫܘܼܦܟ̣ܵܐ ܠܫܒ̣ܵܩܵܐ ܕܚܛܝܼܵܬܹ̈ܐ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܫܵܬܸܢ ܡܐܵܕܝܼܵܐ ܡ̣ܢ ܕܐܵܗܵܐ ܡܲܗܨܘܼܠ ܕܓܸܦܬܵܐ: ܗܲܠ ܗ̇ܘ ܝܘܿܡܵܐ ܕܒܝܹܗ ܫܵܬܸܢܹܗ ܥܲܡܵܘܟ̣ܘܿܢ ܚܵܕ̄ܬܵܐ ܒܡܲܠܟܘܼܬܹܗ ܕܒܵܒܝܼ. 30 ܘܫܘܼܒܸܚܠܘܿܢ ܘܦܠܸܛܠܘܿܢ ܠܛܘܼܪܵܐ ܕܙܲܝܬܹ̈ܐ. 31 ܗ̇ܝܓܵܗ ܐܡܸܪܹܐ ܐܸܠܵܝ ܝܼܫܘܿܥ: ܐܲܚܬܘܿܢ ܟܠܵܘܟ̣ܘܿܢ ܒܸܬ ܟܵܦܪܝܼܬܘܿܢ ܒܝܼܝܼ ܒܐܵܗܵܐ ܠܲܝܠܹܐ: ܣܵܒܵܒ ܟܬܝܼܒ̣ܵܐ ܝܠܹܐ: ܒܸܬ ܡܵܚܸܢ ܠܪܵܥܝܵܐ: ܘܒܸܬ ܦܵܝܫܝܼ ܒܘܼܪܒܸܙܹܐ ܥܸܪ̈ܒܹܐ ܕܦܸܣܩܹܗ. 32 ܐܝܼܢܵܐ ܡܒܵܬ̄ܪ ܕܩܵܝܡܸܢ: ܒܸܬ ܐܵܙܸܠ̄ܢ ܡܩܵܕ̄ܡ ܕܝܼܵܘܟ̣ܘܿܢ 33 ܠܓܠܝܼܠܵܐ. ܘܓ̰ܘܼܘܸܒܠܹܐ ܟܹܐܦܵܐ ܘܐܡܸܪܹܐ ܐܸܠܹܗ: ܐܸܢ ܟܠ 34 ܐܢܵܫܵܐ ܟܵܦܸܪ ܒܝܼܘܼܟ: ܐܵܢܵܐ ܗܲܪ ܠܹܐ ܟܵܦܪܸܢ ܒܝܼܘܼܟ. ܐܡܸܪܹܐ ܐܸܠܹܗ ܝܼܫܘܿܥ: ܬܪܘܼܨܵܐ ܒܹܐܡܵܪܵܐ ܝܘܸܢ: ܐܸܠܘܼܟ: ܒܐܵܗܵܐ ܠܲܝܠܹܐ: ܡܩܵܕ̄ܡ ܕܩܵܪܹܐ ܩܵܪܘܿܝܵܐ: ܬܠܵܬ̄ ܓܵܗܹ̈ܐ ܒܸܬ ܟܵܦܪܸܬ ܒܝܼܝܼ. 35 ܐܵܡܸܪ ܐܸܠܹܗ ܟܹܐܦܵܐ: ܐܘܼܦ ܐܸܢ ܗܵܘܝܵܐ ܠܵܙܸܡ ܕܡܵܝܬܸܢ ܥܲܡܘܼܟ: ܠܹܐ ܟܵܦܪܸܢ ܒܝܼܘܼܟ. ܘܗܲܕܟ̣ܵܐ ܐܘܼܦ ܟܠܵܝ ܬܲܠܡܝܼܕܹ̈ܐ ܐܡܸܪܘܿܢ. 36 ܗ̇ܝܓܵܗ ܐܬܹܠܹܐ ܥܲܡܵܝ ܝܼܫܘܿܥ ܠܕܘܼܟܬܵܐ ܕܦܵܝܫܵܐ ܩܪܝܼܬܵܐ ܓܲܕܣܹܡܵܢ: ܘܐܡܸܪܹܐ ܠܬܲܠܡܝܼܕܘܼ̈ܗܝ: ܝܬܘܿܒ̣ܘܿܢ ܠܲܐܟ̣ܵܐ ܗܲܠ 37 ܕܐܵܙܸܠ̄ܢ ܬܵܡܵܐ ܨܵܠܸܢ ܨܠܘܿܬܵܐ. ܘܠܘܼܒܸܠܹܐ ܠܟܹܐܦܵܐ: ܘܠܬܸܪܘܵܝ ܒܢܘܼܢܹ̈ܐ ܕܙܲܒ̣ܕܲܝ: ܘܫܘܼܪܹܠܹܐ ܠܸܦܫܵܡܵܐ: ܘܠܸܦܝܵܫܵܐ ܒܥܹܩܘܝܼ. 38 ܗ̇ܝܓܵܗ ܐܡܸܪܹܐ ܐܸܠܵܝ: ܦܫܝܼܡܬܵܐ ܝܠܵܐ ܓܵܢܝܼ ܗܲܠ ܡܵܘܬܵܐ: 39 ܥܲܪܩܸܠܘܿܢ ܠܲܐܟ̣ܵܐ ܘܥܒ̣ܘܿܕܘܿܢ ܫܵܗܲܪܬܵܐ ܥܲܡܝܼ. ܘܪܚܸܩܠܹܐ ܚܲܟ̰ܵܐ: ܘܢܦܸܠܹܐ ܥܲܠ ܦܵܬܹܗ: ܘܨܵܠܹܐ ܗ̄ܘܵܐ ܘܐܵܡܸܪ: ܝܵܐ ܒܵܒܝܼ: ܐܸܢ ܡܵܨܝܵܐ: ܥܵܒܸܪ ܡܸܢܝܼ ܐܵܗܵܐ ܟܵܣܵܐ: ܐܝܼܢܵܐ ܐܲܝܟ ܕܐܵܢܵܐ ܒܵܣܡܵܐ 40 ܠܝܼ: ܐܸܠܵܐ ܐܲܝܟ ܕܐܲܢ̄ܬ. ܘܐܬܹܠܹܐ ܠܟܸܣ ܬܲܠܡܝܼܕܘܼ̈ܗܝ: ܘܡܘܼܟ̰ܚܵܝܠܹܐ ܟܲܕ ܕܡܝܼܟܹܐ: ܘܐܡܸܪܹܐ ܠܟܹܐܦܵܐ: ܗܲܕܟ̣ܵܐ ܠܵܐ ܡܨܹܠܵܘܟ̣ܘܿܢ ܕܚܕܵܐ ܣܵܥܲܬ ܥܵܒ̣ܕܝܼܬܘܿܢ ܫܵܗܲܪܬܵܐ ܥܲܡܝܼ. 41 ܥܒ̣ܘܿܕܘܿܢ ܫܵܗܲܪܬܵܐ: ܘܨܵܠܹܡܘܿܢ ܕܠܵܐ ܐܵܘܪܝܼܬܘܿܢ ܠܓ̰ܘܼܪܵܒܵܐ ܪܘܼܚܵܐ ܟܹܐ ܒܵܣܡܵܐ ܠܵܗ̇: ܐܝܼܢܵܐ ܦܲܓ̣ܪܵܐ ܙܲܒܘܼܢ ܝܼܠܹܐ. 42 ܡܸܕܪܹܐ ܐܙܸܠܹܐ ܓܵܗܵܐ ܕܬܲܪ̈ܬܹܝ: ܘܨܘܼܠܹܠܹܐ: ܒܹܐܡܵܪܵܐ: ܝܵܐ ܒܵܒܝܼ: ܐܸܢ ܠܹܐ ܡܵܨܝܵܐ ܕܐܵܗܵܐ ܥܵܒܸܪ: ܫܒ̣ܘܿܩ ܡ̣ܢ ܕܫܵܬܸܢܹܗ: ܗܵܘܹܐ 43 ܪܸܙܵܝܘܼܟ. ܘܐܬܹܠܹܐ ܡܸܕܪܹܐ ܘܡܘܼܫ̄ܟ̰ܚܵܝܠܹܐ ܕܡܝܼܟܹܐ: ܣܵܒܵܒ 44 ܥܲܝܢܵܝ̈ ܝܘܼܩܪܸܢܹܐ ܗ̄ܘܵܘ. ܘܫܒ̣ܝܼܩܵܝܠܹܐ: ܘܐܙܸܠܹܐ ܡܸܕܪܹܐ ܨܘܼܠܹܠܹܐ 45 ܓܵܗܵܐ ܕܬܠܵܬ̄: ܘܗܲܪ ܗ̇ܝ ܗܹܡܸܙܡܵܢ ܐܡܸܪܹܐ. ܗ̇ܝܓܵܗ ܐܬܹܠܹܐ ܠܟܸܣ ܬܲܠܡܝܼܕܘܼ̈ܗܝ ܘܐܡܸܪܹܐ ܐܸܠܵܝ: ܕܡܘܿܟ̣ܘܿܢ ܡܐܵܕܝܼܵܐ ܘܡܲܢܝܸܚܘܿܢ: ܗܵܐ: ܡܛܹܠܵܐ ܣܵܥܲܬ: ܘܒܪܘܼܢܹܗ ܕܐܢܵܫܵܐ ܦܝܵܫܵܐ 46 ܝܠܹܐ ܣܘܼܦܝܵܐ ܒܐܝܼܕܵܬܹ̈ܐ ܕܚܲܛܵܝܹ̈ܐ. ܩܘܼܡܘܿܢ ܐܵܙܵܠ̄ܚ: ܗܵܐ: ܡܛܹܠܹܐ ܗ̇ܘ ܕܣܵܦܹܐ ܠܝܼ. 47 ܘܗܹܫ ܗ̇ܘ ܗܲܡܙܘܼܡܹܐ: ܗܵܐ: ܝܼܗܘܼܕܵܐ: ܚܵܕ̄ ܡ̣ܢ ܬܪܸܥܣܲܪ: ܐܬܹܠܹܐ: ܘܟܸܢܫܵܐ ܪܵܒܵܐ ܥܲܡܹܗ: ܥܲܡ ܣܲܝܦܹ̈ܐ ܘܚܘܼܛܪܹ̈ܐ: ܡ̣ܢ 48 ܠܟܸܣ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܕܛܵܝܸܦܵܐ. ܘܝܘܼܗ̄ܒ̣ܵܐ ܗ̄ܘܵܐ ܐܸܠܵܝ ܢܝܼܫܲܢܩܵܐ ܗ̇ܘ ܕܣܘܼܦܹܠܹܗ: ܒܹܐܡܵܪܵܐ: ܠܗ̇ܘ ܕܢܵܫܩܸܢ: 49 ܗ̇ܘ ܝܼܠܹܐ: ܕܒ̣ܘܿܩܘܿܢ ܠܹܗ. ܘܕܲܪܣܵܥܲܬ ܐܬܹܠܹܐ ܠܟܸܣ 50 ܝܼܫܘܿܥ: ܘܐܡܸܪܹܐ: ܫܠܵܡܵܐ: ܪܵܒܝܼ: ܘܢܫܸܩܠܹܗ. ܘܝܼܫܘܿܥ ܐܡܸܪܹܐ ܐܸܠܹܗ: [69] ܒܘܼܬ ܕܐܵܗܵܐ ܐܬܹܠܘܼܟ: ܚܲܒ̣ܪܝܼ: ܗ̇ܝܓܵܗ [70] ܩܘܼܪܒܸܢܘܿܢ ܘܕܪܹܠܘܿܢ ܐܝܼܕܵܝ̈ ܥܲܠ ܝܼܫܘܿܥ ܘܕܒܸܩܠܘܿܢ ܐܸܠܹܗ. 51 ܘܗܵܐ: ܚܵܕ̄ ܡ̣ܢ ܕܐܵܢܝܼ ܕܥܲܡ ܝܼܫܘܿܥ ܗ̄ܘܵܘ: ܦܘܼܫܸܛܠܹܐ ܐܝܼܕܹܗ ܘܓܪܸܫܠܹܐ ܣܲܝܦܹܗ: ܘܡܚܹܠܹܐ ܠܪܹܓܹܗ ܕܓܘܼܪܵܐ ܕܟܵܗܢܹ̈ܐ: 52 ܘܫܩܝܼܠܵܠܹܐ ܢܵܬܹܗ. ܗ̇ܝܓܵܗ ܐܡܸܪܹܐ ܐܸܠܹܗ ܝܼܫܘܿܥ: ܡܲܕܸܪ ܣܲܝܦܘܼܟ ܠܕܘܼܟܬܹܗ: ܣܵܒܵܒ ܕܟܠܵܝ ܐܵܢܝܼ ܕܫܵܩܠܝܼ ܣܲܝܦܵܐ: 53 ܒܣܲܝܦܵܐ ܒܸܬ ܬܵܠܩܝܼ. ܝܲܢ ܒܸܚܫܵܒ̣ܵܐ ܝܘܸܬ ܕܠܹܐ ܡܵܨܸܢ ܛܲܠܒܸܢ ܡ̣ܢ ܒܵܒܝܼ: ܘܒܸܬ ܫܵܕܸܪܝܼ ܐܵܕܝܼܵܐ ܙܵܘܕܵܐ ܡ̣ܢ ܬܪܸܥܣܲܪ 54 ܠܸܓ̣ܝܘܿܢܹ̈ܐ ܕܡܲܠܲܐܟܹ̈ܐ. ܒܲܣ ܕܵܐܟ̣ܝܼ ܒܸܬ ܦܵܝܫܝܼ ܬܘܼܡܸܡܹܐ 55 ܟܬܵܒܹ̈ܐ: ܕܗܲܕܟ̣ܵܐ ܘܵܓ̰ܸܒ ܝܼܠܵܐ ܕܗܵܘܝܵܐ. ܒܗ̇ܝ ܣܵܥܲܬ ܐܡܸܪܹܐ ܝܼܫܘܿܥ ܠܟܸܢܫܹ̈ܐ: ܐܲܝܟ ܕܥܲܠ ܓ̰ܵܠܵܠܝܼ ܦܠܸܛܠܵܘܟ̣ܘܿܢ ܒܣܲܝܦܹ̈ܐ ܘܒܚܘܼܛܪܹ̈ܐ ܠܸܕܒ̣ܵܩܝܼ: ܟܠ ܝܘܿܡܵܐ ܠܟܸܣܠܵܘܟ̣ܘܿܢ ܒܸܬܝܵܒ̣ܵܐ ܝܘܸܢ ܗ̄ܘܵܐ ܓܵܘ ܗܲܝܟܠܵܐ ܘܡܵܠܘܿܦܹܐ: ܘܠܵܐ ܕܒܸܩܠܵܘܟ̣ܘܿܢ 56 ܐܸܠܝܼ. ܐܝܼܢܵܐ ܐܵܗܵܐ ܟܠܵܗ̇ ܗ̄ܘܹܠܵܐ: ܕܦܵܝܫܝܼ ܬܘܼܡܸܡܹܐ ܟܬܵܒܹ̈ܐ ܕܢܒ̣̈ܝܹܐ. ܗ̇ܝܓܵܗ ܟܠܵܝ ܬܲܠܡܝܼܕܹ̈ܐ ܫܒܸܩܠܘܿܢ ܐܸܠܹܗ ܘܥܪܸܩܠܘܿܢ. 57 ܘܐܵܢܝܼ ܕܕܒܸܩܠܘܿܢ ܠܝܼܫܘܿܥ: ܠܘܼܒܸܠܘܿܢ ܐܸܠܹܗ ܠܟܸܣ ܩܲܝܦܵܐ: ܓܘܼܪܵܐ ܕܟܵܗܢܹ̈ܐ: ܐܲܝܟܵܐ ܕܣܵܦܪܹ̈ܐ ܘܚܘܵܪ̈ܕܸܩܢܹܐ ܓ̰ܸܡܥܝܹܐ 58 ܗ̄ܘܵܘ. ܐܝܼܢܵܐ ܟܹܐܦܵܐ ܒܹܐܙܵܠܵܐ ܗ̄ܘܵܐ ܒܵܬ̄ܪܹܗ ܡ̣ܢ ܪܸܚܩܵܐ: ܗܲܠ ܕܵܪܬܹܗ ܕܓܘܼܪܵܐ ܕܟܵܗܢܹ̈ܐ: ܘܐܘܸܪܹܐ ܠܓܵܘܵܝܝܼ ܝܬܸܒ̣ܠܹܐ ܥܲܡ 59 ܚܸܠܡܲܬܟܵܪܹ̈ܐ ܕܚܵܙܹܐ ܗܘܵܐ ܚܲܪܬܵܐ. ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܘܟܠܹܗ ܟܸܢܫܵܐ ܕܪܵܐܝܝܼ ܛܵܥܝܼ ܗ̄ܘܵܘ ܥܲܠ ܝܼܫܘܿܥ ܣܵܗܕܘܼܬܵܐ 60 ܕܵܓܵܠܬܵܐ ܕܡܲܡܝܸܬܝܼ ܗ̄ܘܵܘ ܠܹܗ. ܘܠܵܐ ܡܘܼܫ̄ܟ̰ܸܚܠܘܿܢ: ܟܲܕ ܐܬܹܠܘܿܢ ܪܵܒܵܐ ܣܵܗܕܹ̈ܐ: ܕܵܓܵܠܹ̈ܐ: ܐܝܼܢܵܐ ܒܚܲܪܬܵܐ ܐܬܹܠܘܿܢ 61 ܬܪܲܝ ܕܵܓܵܠܹ̈ܐ. ܘܐܵܡܪܝܼ: ܐܵܗܵܐ ܐܡܸܪܹܐ: ܟܹܐ ܡܵܨܸܢ ܕܣܵܬܪܸܢ 62 ܠܗܲܝܟܠܹܗ ܕܐܲܠܵܗܵܐ: ܘܒܬܠܵܬ̄ܐ  ܝܘܿܡܵܢܹ̈ܐ ܒܵܢܸܢܹܗ. ܘܩܸܡܠܹܐ ܓܘܼܪܵܐ ܕܟܵܗܢܹ̈ܐ ܘܐܡܸܪܹܐ ܐܸܠܹܗ: ܡܸܢܕܝܼ ܓ̰ܘܼܘܵܒ ܠܹܐ ܝܘܸܬ 63 ܡܲܕܘܼܪܹܐ: ܡܘܼܕܝܼ ܒܸܣܗܵܕܵܐ ܝܢܵܐ ܥܲܠܘܼܟ ܐܲܢܹܐ. ܐܝܼܢܵܐ ܝܼܫܘܿܥ ܫܬܝܼܩܵܐ ܗ̄ܘܵܐ. ܘܓ̰ܘܼܘܸܒܠܹܐ ܓܘܼܪܵܐ ܕܟܵܗܢܹ̈ܐ ܘܐܡܸܪܹܐ ܐܸܠܹܗ: ܡܲܡܘܼܝܘܼܟ ܝܼܘܸܢ ܒܐܲܠܵܗܵܐ ܚܲܝܵܐ: ܕܐܵܡܪܸܬ ܠܲܢ: ܐܸܢ ܐܲܢ̄ܬ ܝܼܘܸܬ 64 ܡܫܝܼܚܵܐ ܒܪܘܼܢܹܗ ܕܐܲܠܵܗܵܐ. ܐܵܡܸܪ ܐܸܠܹܗ ܝܼܫܘܿܥ: ܐܲܢ̄ܬ ܐܡܸܪܘܼܟ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܵܐܕܝܼܵܐ ܒܸܬ ܚܵܙܝܼܬܘܿܢ ܠܒܪܘܼܢܹܗ ܕܐܢܵܫܵܐ ܝܬܝܼܒ̣ܵܐ ܡ̣ܢ ܝܲܡܝܼܢܵܐ ܕܚܲܝܠܵܐ: 65 ܘܒܹܐܬܵܝܵܐ ܥܲܠ ܥܢܵܢܹ̈ܐ ܕܫܡܲܝܵܐ. ܗ̇ܝܓܵܗ ܓܘܼܪܵܐ ܕܟܵܗܢܹ̈ܐ [71] ܟ̰ܘܼܢܟ̰ܸܪܹܐ ܠܓ̰ܘܼܠܘܼ̈ܗܝ: ܘܐܡܸܪܹܐ: ܓܕܸܦܠܹܐ. ܡܐܵܕܝܼܵܐ ܩܵܡܘܿܕܝܼ ܝܢܵܐ ܠܵܙܝܼܡܲܢ ܣܵܗܕܹ̈ܐ: ܗܵܐ: ܐܵܕܝܼܵܐ ܫܡܸܥܠܵܘܟ̣ܘܿܢ ܓܘܼܕܵܦܹܗ. 66 ܡܘܼܕܝܼ ܒܸܚܫܵܒ̣ܵܐ ܝܬܘܿܢ: ܓ̰ܘܼܘܸܒܠܘܿܢ ܘܐܵܡܪܝܼ: ܓܘܼܢܵܗܟܵܪ 67 ܝܼܠܹܐ ܠܡܵܘܬܵܐ. ܗ̇ܝܓܵܗ ܪܸܩܠܘܿܢ ܥܲܠ ܦܵܬܹܗ: ܘܩܲܪܦܸܚܝܼ 68 ܗ̄ܘܵܘ ܠܹܗ: ܘܐܚܹܪ̄ܢܹܐ ܡܵܚܝܼ ܗ̄ܘܵܘ ܠܹܗ. ܘܐܵܡܪܝܼ: ܢܵܒܝܼ ܠܲܢ: ܡܫܝܼܚܵܐ: ܡܵܢܝܼ ܡܸܚܝܸܬܠܹܐ. 69 ܐܝܼܢܵܐ ܟܹܐܦܵܐ ܝܬܝܼܒ̣ܵܐ ܗ̄ܘܵܘ ܠܒܲܕܲܪ ܓܵܘ ܕܵܪܬܵܐ: ܘܐܬܹܠܵܐ ܠܟܸܣܠܹܗ ܚܕܵܐ ܚܹܕܲܡܬܵܐ: ܘܐܵܡܪܵܐ: ܐܘܼܦ ܐܲܢ̄ܬ ܥܲܡ ܝܼܫܘܿܥ 70 ܓܠܝܼܠܵܝܵܐ ܝܘܸܬ ܗ̄ܘܵܘ. ܐܝܼܢܵܐ ܗ̇ܘ ܟܦܸܪܹܐ ܩܵܕ̄ܡ ܟܠܵܝ: 71 ܘܐܡܸܪܹܐ: ܠܹܐ ܝܘܸܢ ܒܝܼܕܲܥܝܵܐ ܡܘܼܕܝܼ ܒܹܐܡܵܪܵܐ ܝܘܲܬܝ. ܘܟܲܕ ܦܠܸܛܠܹܐ ܒܬܲܪܥܵܐ: ܚܙܹܠܵܐ ܐܸܠܹܗ ܚܕܵܐ ܐܚܹܪ̄ܬܵܐ: ܘܐܵܡܪܵܐ 72 ܠܐܵܢܝܼ: ܐܘܼܦ ܐܵܗܵܐ ܥܲܡ ܝܼܫܘܿܥ ܢܵܨܪܵܝܵܐ ܗ̄ܘܵܐ. ܘܡܸܕܪܹܐ 73 ܟܦܸܪܹܐ ܒܡܵܘܡܵܬܹ̈ܐ: ܠܹܐ ܝܲܕܥܸܢ ܠܗ̇ܘ ܐܢܵܫܵܐ. ܐܝܼܢܵܐ ܡܒܵܬ̄ܪ ܚܲܟ̰ܵܐ ܐܬܹܠܘܿܢ ܐܵܢܝܼ ܕܟܸܠܝܹܐ ܗ̄ܘܵܘ: ܘܐܡܸܪܘܿܢ ܠܟܹܐܦܵܐ: ܒܫܲܪܝܼܪܘܼܬܵܐ ܐܘܼܦ ܐܲܢ̄ܬ ܡܸܢܵܝ ܝܘܸܬ: ܣܵܒܵܒ ܐܘܼܦ ܗܲܡܙܲܡܬܘܼܟ 74 ܡܲܕܘܼܥܝܘܼܟ ܝܼܠܵܐ. ܗ̇ܝܓܵܗ ܫܘܼܪܹܠܹܐ ܠܡܲܚܪܘܼܡܹܐ ܘܠܹܡܵܝܵܐ: ܕܠܹܐ ܝܲܕܥܸܢ ܠܗ̇ܘ ܐܢܵܫܵܐ. ܘܒܗ̇ܝ ܣܵܥܲܬ ܩܪܹܠܹܐ ܩܵܪܘܿܝܵܐ. 75 ܘܕܟܸܪܹܐ ܟܹܐܦܵܐ ܠܗܹܡܸܙܡܵܢܹܗ ܕܝܼܫܘܿܥ ܕܐܡܝܼܪܵܐ ܗ̄ܘܵܐ ܐܸܠܹܗ: ܕܡܩܵܕ̄ܡ ܕܩܵܪܹܐ ܩܵܪܘܿܝܵܐ: ܬܠܵܬ̄ ܓܵܗܹ̈ܐ ܒܸܬ ܟܵܦܪܸܬ ܒܝܼܝܼ. ܘܦܠܸܛܠܹܐ ܠܒܲܕܲܪ ܒܟܹܠܹܐ ܒܡܲܪܝܼܪܘܼܬܵܐ.

ܩܦܠܐܘܢ: ܟܙ

1 ܐܝܼܢܵܐ ܟܲܕ ܗ̄ܘܹܠܵܐ ܨܲܦܪܵܐ: ܥܒܸܕܠܘܿܢ ܪܵܐܝܝܼ ܥܲܠ ܝܼܫܘܿܥ ܟܠܝ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܕܛܵܝܸܦܵܐ: ܕܡܲܡܝܸܬܝܼ 2 ܗ̄ܘܵܘ ܠܹܗ. ܘܐܣܸܪܘܿܢ ܐܸܠܹܗ: ܘܠܘܼܒܸܠܘܿܢ: ܘܣܘܼܦܹܠܘܿܢ ܐܸܠܹܗ ܠܦܝܼܠܵܛܘܿܣ ܗܵܟܝܼܡ. 3 ܗ̇ܝܓܵܗ ܝܼܗܘܼܕܵܐ ܣܵܦܝܵܢܹܗ: ܟܲܕ ܚܙܹܠܹܐ ܕܦܸܫܠܹܐ ܥܒ̣ܝܼܕܵܐ ܓܘܼܢܗܟܵܪ ܗ̇ܘ: ܦܫܸܡܠܹܐ: ܘܡܘܼܕܸܪܹܐ ܠܐܵܢܝܼ ܬܠܵܬܝܼ ܙܘܼܙܹ̈ܐ 4 ܕܣܹܐܡܵܐ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܚܘܵܪ̈ܕܸܩܢܹܐ. ܘܐܡܸܪܹܐ: ܚܛܹܠܝܼ ܕܣܘܼܦܹܠܝܼ ܕܸܡܵܐ ܙܲܟܵܝܵܐ: ܐܝܼܢܵܐ ܐܵܢܝܼ ܐܡܸܪܘܿܢ ܐܸܠܹܗ: 5 ܩܵܐ ܕܝܲܢ ܡܘܼܕܝܼ: [72] ܐܲܢ̄ܬ ܟܹܐ ܝܲܕܥܸܬ. ܘܪܘܼܦܹܠܹܐ ܠܙܘܼܙܹ̈ܐ ܕܣܹܐܡܵܐ ܓܵܘ ܗܲܝܟܠܵܐ: ܘܫܘܼܢܹܠܹܐ: ܐܙܸܠܹܐ ܚܢܝܼܩܵܠܹܐ ܓܵܢܹܗ. 6 ܘܓܘܼܪ̈ܵܢܹܐ ܕܟܵܗܢܹ̈ܐ ܫܩܸܠܘܿܢ ܠܙܘܼܙܹ̈ܐ ܕܣܹܐܡܵܐ: ܘܐܡܸܪܘܿܢ: ܠܹܐ ܝܠܵܐ ܒܕܲܣܬܘܼܪ ܕܕܵܪܚ ܠܗ̄ܘܿܢ ܓܵܘ ܒܹܝܬ ܚܲܙܝܼܢܵܐ: ܣܵܒܵܒ 7 ܛܝܼܡܵܐ ܕܕܸܡܵܐ ܝܢܵܐ. ܘܥܒܸܕܠܘܿܢ ܪܵܐܝܝܼ: ܘܙܒܸܢܘܿܢ ܒܝܼܵܝ ܚܲܩܠܵܐ ܕܦܲܚܵܪܵܐ ܩܵܐ ܒܹܝܬ ܩܒ̣ܘܼܪܵܐ ܕܢܘܼܟ̣ܪ̈ܵܝܹܐ. 8 ܣܵܒܵܒ ܕܐܵܗܵܐ ܦܸܫܠܵܐ ܩܪܝܼܬܵܐ ܗ̇ܝ ܚܲܩܠܵܐ: ܚܲܩܠܵܐ 9 ܕܕܸܡܵܐ: ܗܲܠ ܐܵܗܵܐ ܝܘܿܡܵܐ. ܗ̇ܝܓܵܗ ܬܘܼܡܸܡܠܹܐ ܡܸܢܕܝܼ ܕܦܸܫܠܹܐ ܐܡܝܼܪܵܐ ܒܝܸܕ ܐܹܪܲܡܝܵܐ ܢܒ̣ܝܼܵܐ: ܕܐܡܸܪܹܐ: ܘܫܩܸܠܘܿܢ ܬܠܵܬ̄ܝܼ ܙܘܼܙܹ̈ܐ ܕܣܹܐܡܵܐ: ܛܝܼܡܹܗ ܕܡܘܼܥܡܸܠܵܐ: 10 ܕܡܘܼܥܡܸܠܘܿܢ ܡ̣ܢ ܒܢܲܝ̈ ܝܼܣܪܵܝܹܠ. [73] ܘܝܸܗܒ̣ܵܝܠܘܿܢ ܒܚܲܩܠܹܗ [74] ܕܦܲܚܵܪܵܐ: ܐܲܝܟ ܕܦܩܸܕܠܹܐ ܐܸܠܝܼ ܡܵܪܝܵܐ. 11 ܐܝܼܢܵܐ ܝܼܫܘܿܥ ܟܠܹܠܹܐ ܩܵܕ̄ܡ ܗܵܟܝܼܡ. ܘܒܘܼܩܸܪܹܐ ܡܸܢܹܗ ܗܵܟܝܼܡ: ܘܐܡܸܪܹܐ: ܐܸܠܹܗ: ܐܲܢ̄ܬ ܝܼܘܸܬ ܡܲܠܟܵܐ ܕܝܗ̄ܘܼܕܵܝܹ̈ܐ: ܐܵܡܸܪ 12 ܐܸܠܹܗ ܝܼܫܘܿܥ: ܐܲܢ̄ܬ ܐܡܸܪܘܿܟ. ܘܟܲܕ ܒܸܡܚܵܝܵܐ ܗ̄ܘܵܘ ܕܲܪܗܲܩܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ: ܗ̇ܘ ܡܸܢܕܝܼ ܓ̰ܘܼܘܵܒ ܠܵܐ 13 ܡܘܼܕܸܪܹܐ. ܗ̇ܝܓܵܗ ܐܡܸܪܹܐ ܐܸܠܹܗ ܦܝܼܠܵܛܘܿܣ: ܠܹܐ ܝܘܸܬ 14 ܒܸܫܡܲܥܝܵܐ ܟܡܵܐ ܣܵܗܕܘ̈ܬܵܐ ܒܝܼܵܗ̄ܒ̣ܵܐ ܝܢܵܐ ܥܲܠܘܼܟ. ܘܠܵܐ ܝܸܗܒܸܠܹܗ ܓ̰ܘܼܘܵܒ: ܐܘܼܦܠܵܐ ܒܚܕܵܐ ܗܹܡܸܙܡܵܢ: ܗܲܕܟ̣ܵܐ ܕܥܘܼܓ̰ܸܒܠܹܐ ܗܵܟܝܼܡ 15 ܪܵܒܵܐ. ܐܝܼܢܵܐ ܒܥܹܐܕܵܐ ܥܵܕܲܬ ܝܼܗ̄ܘܵܐ ܕܗܵܟܝܼܡ ܫܵܪܹܐ ܗ̄ܘܵܐ ܚܵܕ̄ 16 ܐܲܣܝܼܪܵܐ ܠܛܵܝܸܦܵܐ: ܐܲܝܢܝܼ ܕܐܵܢܝܼ ܒܲܥܝܝܼ ܗ̄ܘܵܘ. ܘܐܝܼܬ ܗ̄ܘܵܐ ܠܗ̄ܘܿܢ ܚܵܕ̄ ܐܣܝܼܪܵܐ ܡܲܫܗܘܼܪ ܕܦܝܵܫܵܐ ܗ̄ܘܵܐ ܩܸܪܝܵܐ ܒܲܪ ܐܲܒܵܐ. 17 ܘܟܲܕ ܓ̰ܸܡܥܝܹܐ ܗ̄ܘܵܘ: ܐܡܸܪܹܐ ܐܸܠܵܝ ܦܝܼܠܵܛܘܿܣ: ܠܡ̇ܢ ܒܲܥܝܝܼܬܘܿܢ ܕܫܵܪܸܢ ܐܸܠܵܘܟ̣ܘܿܢ: ܠܒܲܪ ܐܲܒܵܐ: ܝܲܢ ܠܝܼܫܘܿܥ ܕܦܝܵܫܵܐ ܝܠܹܐ 18 ܩܸܪܝܵܐ ܡܫܝܼܚܵܐ. ܣܵܒܵܒ ܕܟܹܐ ܝܲܕܸܥ ܗ̄ܘܵܐ ܕܡ̣ܢ ܒܲܚܸܠܵܢܘܼܬܵܐ ܣܘܼܦܹܠܘܿܢ ܐܸܠܹܗ. 19 ܐܝܼܢܵܐ ܟܲܕ ܝܬܝܼܒ̣ܵܐ ܗ̄ܘܵܐ ܗ̇ܘ ܥܲܠ ܟܘܼܪܣܝܵܐ ܕܕܝܼܘܵܢ: ܫܘܼܕܸܪܵܐ ܠܟܸܣܠܹܗ ܒܲܟ̣ܬܹܗ: ܘܐܵܡܪܵܐ ܐܸܠܹܗ: ܠܵܐ ܗܵܘܹܐ ܠܘܼܟ ܫܘܼܠܵܐ ܡܗ̇ܘ ܙܲܕܝܼܩܵܐ: ܣܵܒܵܒ ܪܵܒܵܐ ܩܘܼܒܸܠܝܼ ܚܲܫܵܐ ܒܚܸܠܡܝܼ 20 ܐܸܕܝܘܿ ܒܘܼܬ ܕܝܹܗ. ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܡܘܼܠܸܦܠܘܿܢ ܠܟܸܢܫܹ̈ܐ ܕܛܵܠܒܝܼ ܗ̄ܘܵܘ ܠܒܲܪ ܐܲܒܵܐ: ܘܕܬܵܠܩܝܼ 21 ܗ̄ܘܵܘ ܠܝܼܫܘܿܥ. ܘܓ̰ܘܼܘܸܒܠܹܐ ܗܵܟܝܼܡ ܘܐܡܸܪܹܐ ܐܸܠܵܝ: ܠܡ̇ܢ ܒܲܥܝܝܼܬܘܿܢ ܕܫܵܪܸܢ ܐܸܠܵܘܟ̣ܘܿܢ ܡ̣ܢ ܬܸܪܘܵܝ: ܘܐܵܢܝܼ ܐܡܹܪܘܿܢ: 22 ܠܒܲܪ ܐܲܒܵܐ. ܐܵܡܸܪ ܐܸܠܵܝ ܦܝܼܠܵܛܘܿܣ: ܒܲܣ ܠܝܼܫܘܿܥ ܕܦܝܵܫܵܐ ܝܠܹܐ ܩܸܪܝܵܐ ܡܫܝܼܚܵܐ ܡܘܼܕܝܼ ܥܵܒ̣ܕܸܢ: ܐܵܡܪܝܼ ܟܠܵܝ: ܦܵܝܸܫ 23 ܙܩܝܼܦܵܐ. ܐܵܡܸܪ ܐܸܠܵܝ: ܩܵܡܘܿܕܝܼ: ܡܘܼܕ ܚܸܪܒܘܼܬܵܐ ܥܒܸܕܠܹܐ: ܐܝܼܢܵܐ ܐܵܢܝܼ ܒܘܼܫ ܙܵܘܕܵܐ ܡܘܼܩܘܸܚܠܘܿܢ ܘܐܡܸܪܘܿܢ: ܦܵܝܸܫ ܙܩܝܼܦܵܐ. 24 ܘܦܝܼܠܵܛܘܿܣ: ܟܲܕ ܚܙܹܠܹܐ ܕܡܸܢܕܝܼ ܠܹܐ ܗ̄ܘܵܐ ܡܲܙܝܘܼܕܹܐ: ܐܸܠܵܐ ܕܒܘܼܫ ܙܵܘܕܵܐ ܫܓ̣ܘܼܫܝܵܐ ܒܸܗܘܵܝܵܐ ܗ̄ܘܵܐ: ܫܩܸܠܹܐ ܡ̈ܝܼܵܐ ܚܘܼܠܸܠܹܐ ܠܐܝܼܕܵܬܹ̈ܗ ܩܵܕ̄ܡ ܟܸܢܫܵܐ: ܘܐܡܸܪܹܐ: ܚܵܠܝܼܨ ܝܼܘܸܢ ܡ̣ܢ 25 ܕܸܡܹܗ ܕܐܵܗܵܐ ܙܲܕܝܼܩܵܐ: ܐܲܚܬܘܿܢ [75] ܟܹܐ ܝܲܕܥܝܼܬܘܿܢ. ܘܓ̰ܘܼܘܸܒܠܹܐ ܟܠܹܗ ܛܵܝܸܦܵܐ ܘܐܡܸܪܹܐ: ܕܸܡܹܗ ܥܲܠܲܢ ܘܥܲܠ ܒܢܘܼ̈ܢܲܢ. 26 ܗ̇ܝܓܵܗ ܫܪܹܠܹܐ ܐܸܠܵܝ ܠܒܲܪ ܐܲܒܵܐ: ܘܓ̰ܘܼܢܓ̰ܸܪܹܐ ܒܩܲܡ̈ܟ̰ܝܹܐ 27 ܠܝܼܫܘܿܥ: ܘܣܘܼܦܹܠܹܗ ܠܸܦܝܵܫܵܐ ܙܩܝܼܦܵܐ. ܗ̇ܝܓܵܗ ܣܲܪ̈ܒܵܙܹܐ ܕܗܵܟܝܼܡ ܠܘܼܒܸܠܘܿܢ ܠܝܼܫܘܿܥ ܠܦܪܵܛܘܿܪܝܼܢ: ܘܓ̰ܘܼܡܸܥܠܘܿܢ 28 ܥܲܠܘܼܗܝ ܟܠܵܗ̇ ܕܲܣܬܵܐ. ܘܫܘܼܠܸܚܠܘܿܢ ܐܸܠܹܗ: ܘܡܘܼܠܒܸܫܠܘܿܢ 29 ܐܸܠܹܗ ܓ̰ܘܼܒܵܐ ܕܩܸܪܡܝܼܙ. ܘܓܕܸܠܘܿܢ ܒܸܢܦܵܪ ܕܟܸܬܘܹ̈ܐ: ܘܡܘܼܬܸܒ̣ܠܘܿܢ ܒܪܹܫܹܗ: ܘܙܹܠܵܐ ܒܝܲܡܝܼܢܹܗ: ܘܒܪܸܟ̇ܠܘܿܢ ܩܵܕ̄ܡܘܼܗܝ: ܘܡܲܣܚܸܪܝܼ ܗ̄ܘܵܘ ܒܝܹܗ: ܘܐܵܡܪܝܼ: ܫܠܵܡܵܐ: 30 ܡܲܠܟܵܐ ܕܝܗ̄ܘܼܕܵܝܹ̈ܐ. ܘܪܸܩܠܘܿܢ ܥܲܠܘܼܗܝ: ܘܫܩܸܠܘܿܢ ܙܹܠܵܐ 31 ܘܡܵܚܝܼ ܗ̄ܘܵܘ ܠܹܗ ܥܲܠ ܪܹܫܹܐ. ܘܟܲܕ ܡܘܼܣܚܸܪܘܿܢ ܒܝܹܗ: ܫܘܼܠܚܵܠܘܿܢ ܡܸܢܹܗ ܓ̰ܘܼܒܵܐ: ܘܡܘܼܠܒܸܫܠܘܿܢ ܐܸܠܹܗ ܓ̰ܘܼܠܘܼ̈ܗܝ: 32 ܘܠܘܼܒܸܠܘܿܢ ܐܸܠܹܗ ܠܸܦܝܵܫܵܐ ܙܩܝܼܦܵܐ. ܘܟܲܕ ܒܸܦܠܵܛܵܐ ܗ̄ܘܵܘ: ܡܘܼܫ̄ܟ̰ܸܚܠܘܿܢ ܚܵܕ̄ ܐܢܵܫܵܐ ܩܸܘܪܝܼܢܵܝܵܐ: ܫܸܡܹܗ ܫܸܡܥܘܿܢ ܠܐܵܗܵܐ ܥܒܸܕܠܘܿܢ ܫܘܼܚܕܵܐ ܕܛܵܥܸܢ ܙܩܝܼܦܹܗ.

33 ܘܐܬܹܠܘܿܢ ܠܕܘܼܟܬܵܐ ܕܦܝܵܫܵܐ ܝܠܵܐ ܩܪܝܼܬܵܐ ܓܵܓ̣ܘܼܠܬܵܐ: 34 ܗ̇ܝ ܕܦܝܵܫܵܐ ܦܘܼܫܸܩܬܵܐ: ܕܘܼܟܵܐ ܕܩܲܪܩܲܦܬܵܐ. ܘܝܸܗܒܸܠܘܿܢ ܐܸܠܹܗ [76] ܚܲܡܪܵܐ ܠܸܫܬܵܝܵܐ: ܚܒ̣ܝܼܛܵܐ ܒܡܪܵܪܬܵܐ. ܘܟܲܕ ܛܥܸܡܠܹܗ: ܠܵܐ ܒܣܸܡܠܵܐ ܠܹܗ ܠܸܫܬܵܝܵܐ. 35 ܘܟܲܕ ܙܩܸܦܠܘܿܢ ܐܸܠܹܗ: ܦܘܼܠܹܠܘܿܢ ܠܓ̰ܘܼܠܘܼ̈ܗܝ ܒܕܪܵܝܬܵܐ 36 ܕܦܸܫܟܵܐ. ܘܝܬܸܒ̣ܠܘܿܢ: ܘܢܛܸܪܘܿܢ ܐܸܠܹܗ ܬܵܡܵܐ. 37 ܘܡܘܼܬܸܒ̣ܠܘܿܢ ܠܥܸܠܸܠ ܡ̣ܢ ܪܹܫܹܗ ܗܲܓ̰ܲܬܹܗ ܟܬܝܼܒ̣ܬܵܐ: ܐܗܐ ܝܠܐ ܝܫܘܥ ܡܠܟܐ ܕܝܼܗ̄ܘܼܕܵܝܹ̈ܐ. 38 ܗ̇ܝܓܵܗ ܦܸܫܠܘܿܢ ܙܩܝܼܦܹܐ ܥܲܡܹܗ ܬܪܲܝ ܓ̰ܵܠܵـ̈ـܠܵܝܹ̈ܐ: ܚܵܕ̄ 39 ܡ̣ܢ ܝܲܡܝܼܢܹܗ ܘܚܵܕ̄ ܡ̣ܢ ܣܸܡܵܠܹܐ. ܘܐܵܢܝܼ ܕܥܵܒ̣ܪܝܼ ܗ̄ܘܵܘ: 40 ܓܵܕܦܝܼ ܗ̄ܘܵܘ ܥܲܠܘܼܗܝ: ܘܫܵܥܫܝܼ ܗ̄ܘܵܘ ܪܹܫܵܝ. ܘܐܵܡܪܝܼ: ܣܵܬܪܵܢܵܐ ܕܗܲܝܟܠܵܐ ܘܒܵܢܝܵܢܹܗ ܒܬܠܵܬ̄ܐ ܝܘܿܡܵܢܹ̈ܐ: ܦܵܨܝܼ ܓܵܢܘܼܟ: 41 ܐܸܢ ܒܪܘܼܢܹܗ ܕܐܲܠܵܗܵܐ ܝܘܸܬ: ܘܨܠܝܼ ܡ̣ܢ ܙܩܝܼܦܵܐ. ܗܲܕܟ̣ܵܐ ܐܘܼܦ ܓܘܼܪ̈ܵܢܹܐ ܕܟܵܗܢܹ̈ܐ ܡܲܚܣܸܪܝܼ ܗ̄ܘܵܘ: ܥܲܡ ܣܵܦܪܹ̈ܐ 42 ܘܚܘܵܪ̈ܕܸܩܢܹܐ: ܘܐܵܡܪܝܼ. ܠܐܚܹܪ̄ܢܹܐ ܡܘܼܚܹܠܹܐ: ܓܵܢܹܗ [77] ܠܹܐ ܡܵܨܹܐ ܠܡܲܚܘܼܝܹܐ ܡܲܠܟܹܗ ܕܝܼܣܪܵܝܹܠ ܝܼܠܹܐ: ܨܵܠܹܐ ܐܵܕܝܼܵܐ ܡ̣ܢ 43 ܙܩܝܼܦܵܐ: ܘܗܲܡܸܢܵܝ ܒܝܹܗ. ܒܗܹܒ̣ܝܼ ܝܠܹܐ ܥܲܠ ܐܲܠܵܗܵܐ: ܦܵܪܸܩ ܠܹܗ ܐܵܕܝܼܵܐ ܐܸܢ ܒܵܣܡܵܐ ܠܹܗ ܒܝܹܗ. ܣܵܒܵܒ ܕܐܡܸܪܹܐ: ܒܪܘܼܢܹܗ 44 ܕܐܲܠܵܗܵܐ ܝܘܸܢ. ܗܲܕܟ̣ܵܐ ܐܘܼܦ ܓ̰ܵܠܵܠܵܝܹܐ: ܐܵܢܝܼ ܕܦܸܫܠܘܿܢ ܙܩܝܼܦܹܐ ܥܲܡܹܗ: ܠܵܝܡܝܼ ܗ̄ܘܵܘ ܠܹܗ. 45 ܐܝܼܢܵܐ ܡ̣ܢ ܣܵܥܲܬ ܕܐܸܫܬ ܗ̄ܘܹܠܹܐ ܚܸܫܟܵܐ ܥܲܠ ܟܠܵܗ̇ ܐܲܪܥܵܐ 46 ܗܲܠ ܣܵܥܲܬ ܕܐܸܬܫܲܥ. ܘܐܲܝܟ ܒܣܵܥܲܬ ܕܐܸܬܫܲܥ: ܡܘܼܩܘܸܚܠܹܐ ܝܼܫܘܿܥ ܒܩܵܠܵܐ ܪܵܡܵܐ: ܘܐܡܸܪܹܐ: ܐܹܝܠܝ: ܐܹܝܠܝ: ܠܡܵܢܵܐ ܫܒܩܬܵܢܝ ܝܲܥܢܹܐ: ܐܲܠܵܗܝܼ: ܩܵܡܘܿܕܝܼ ܫܒ̣ܝܼܩܸܢܘܼܟ. 47 ܘܐܢܵܫܹ̈ܐ ܡ̣ܢ ܕܐܵܢܝܼ ܕܟܸܠܝܹܐ ܗ̄ܘܵܘ ܬܵܡܵܐ: ܟܲܕ ܫܡܸܥܠܘܿܢ: 48 ܐܵܡܪܝܼ ܗ̄ܘܵܘ: ܐܵܗܵܐ ܠܐܹܠܝܼܵܐ ܒܸܩܪܵܝܵܐ ܝܠܹܐ. ܘܕܲܪܣܵܥܲܬ ܪܚܸܛܠܹܐ ܚܵܕ̄ ܡܸܢܵܝ: ܫܩܸܠܹܐ ܐܸܣܦܘܼܓܵܐ ܘܡܸܠܝܵܠܹܐ ܚܵܠܵܐ: 49 ܡܘܼܬܒ̣ܵܠܹܐ ܒܙܹܠܵܐ ܘܡܘܼܫܬܹܠܹܗ. ܐܝܼܢܵܐ ܐܚܹܪ̄ܢܹܐ ܐܵܡܪܝܼ ܗ̄ܘܵܘ: ܫܒ̣ܘܿܩ ܚܵܙܵܚ ܐܸܢ ܐܵܬܹܐ ܐܹܠܝܼܵܐ ܠܦܵܪܘܿܩܹܗ. 50 ܐܝܼܢܵܐ ܝܼܫܘܿܥ ܡܸܕܪܹܐ ܡܘܼܩܘܸܚܠܹܐ ܒܩܵܠܵܐ ܪܵܡܵܐ: 51 ܘܫܒ̣ܝܼܩܵܠܹܐ ܪܘܼܚܹܗ. ܘܗܵܐ: ܣܸܬܪܵܐ ܕܬܲܪܥܵܐ ܕܗܲܝܟܠܵܐ ܦܸܫܠܹܐ [78] ܟ̰ܘܼܢܟ̰ܸܪܵܐ ܠܬܪܲܝ: ܡ̣ܢ ܠܥܸܠܸܠ ܗܲܠ ܠܐܸܠܬܸܚ. 52 ܘܐܲܪܥܵܐ ܫܥܸܫܠܵܐ: ܘܟܹܐܦܹ̈ܐ ܦܸܫܠܘܿܢ ܟ̰ܠܝܼܦܹܐ. ܘܒܹܝܬ ܩܒ̣ܘܼܪܹ̈ܐ ܦܸܫܠܘܿܢ ܦܬܝܼܚܹܐ. ܘܪܵܒܵܐ ܦܲܓ̣ܪܹ̈ܐ ܕܩܲܕܝܼܫܹ̈ܐ ܕܕܡܝܼܟܹܐ 53 ܗ̄ܘܵܘ ܩܸܡܠܘܿܢ. ܘܦܠܸܛܠܘܿܢ ܡ̣ܢ ܒܹܝܬ ܩܒ̣ܘܼܪܹ̈ܐ: ܘܒܵܬ̄ܪ ܩܝܵܡܬܹܗ ܐܘܸܪܘܿܢ ܠܡܕܝܼܢ̄ܬܵܐ ܩܲܕܝܼܫܬܵܐ: ܘܦܸܫܠܘܿܢ ܚܸܙܝܹܐ ܠܪܵܒܵܐ. 54 ܐܝܼܢܵܐ ܩܸܢܛܪܘܿܢܵܐ ܘܐܢܝܼ ܕܥܲܡܹܗ ܒܸܢܛܵܪܵܐ ܗ̄ܘܵܘ ܠܝܼܫܘܿܥ: ܟܲܕ ܚܙܹܠܘܿܢ ܪܵܘܕܵܢܵܐ: ܘܡܸܢܕܝܵܢܹ̈ܐ ܕܗ̄ܘܹܠܘܿܢ: ܙܕܸܥܠܘܿܢ ܪܵܒܵܐ: 55 ܘܐܡܸܪܘܿܢ: ܫܲܪܝܼܪܵܐܝܼܬ ܐܵܗܵܐ ܒܪܘܼܢܹܗ ܕܐܲܠܵܗܵܐ ܗ̄ܘܵܐ. ܘܐܝܼܬ ܗ̄ܘܵܘ ܬܵܡܵܐ ܒܲܟ̣ܬܵܬܹ̈ܐ ܪܵܒܵܐ ܕܒܸܚܝܵܪܵܐ ܗ̄ܘܵܘ ܡ̣ܢ ܪܸܚܩܵܐ: ܐܵܢܝܼ ܕܐܬܝܹܐ ܗ̄ܘܵܘ ܒܵܬ̄ܪܹܗ ܕܝܼܫܘܿܥ ܡ̣ܢ ܓܠܝܼܠܵܐ: ܒܸܥܒ̣ܵܕܵܐ ܐܸܠܹܗ 56 ܚܸܠܡܲܬ. ܕܚܕܵܐ ܡܸܢܵܝ ܡܲܪܝܲܡ ܡܲܓ̣ܕܠܵܝܬܵܐ ܗ̄ܘܵܐ: ܘܡܲܪܝܲܡ ܝܸܡܹܗ ܕܝܲܥܩܘܿܒ̣ ܘܕܝܘܿܣܹܐ: ܘܝܸܡܵܐ ܕܒܢܘܼܢܹ̈ܐ ܕܙܲܒ̣ܕܲܝ. 57 ܐܝܼܢܵܐ ܟܲܕ ܗ̄ܘܹܠܹܐ ܪܲܡܫܵܐ: ܐܬܹܠܹܐ ܚܵܕ̄ ܐܢܵܫܵܐ ܕܵܘܠܲܬܡܲܢܕ ܡ̣ܢ ܪܵܡܬܵܐ: ܫܸܡܹܗ ܝܵܘܣܸܦ: ܕܐܘܼܦ ܗ̇ܘ ܦܝܼܫܵܐ ܗ̄ܘܵܐ ܬܘܼܠܡܸܕܵܐ 58 ܠܝܼܫܘܿܥ. ܐܵܗܵܐ ܐܬܹܠܹܐ ܠܟܸܣ ܦܝܼܠܵܛܘܿܣ: ܘܛܠܸܒܠܹܐ ܠܦܲܓ̣ܪܹܗ ܕܝܼܫܘܿܥ. ܗ̇ܝܓܵܗ ܦܩܸܕܠܹܐ ܦܝܼܠܵܛܘܿܣ ܕܦܵܝܸܫ 59 ܗ̄ܘܵܐ ܝܘܼܗ̄ܒ̣ܵܐ ܐܸܠܹܗ. ܘܫܩܸܠܹܐ ܝܵܘܣܸܦ ܠܦܲܓ̣ܪܵܐ: 60 ܘܟܘܼܪܸܟ̣ܠܹܗ ܒܩܸܛܢܵܐ ܕܟܸܬܵܢ ܕܸܟ̣ܝܵܐ. ܘܡܘܼܬܸܒ̣ܠܹܗ ܓܵܘ ܒܹܝܬ ܩܒ̣ܘܼܪܵܐ ܚܲܕܬܵܐ ܕܓܵܢܹܗ: ܕܢܩܝܼܪܬܵܐ ܒܩܵܝܵܐ: ܘܡܘܼܚܕܸܪܹܐ ܠܟܹܐܦܵܐ ܓܘܼܪܵܐ ܥܲܠ ܬܲܪܥܵܐ ܕܒܹܝܬ ܩܒ̣ܘܼܪܵܐ: ܘܐܙܸܠܹܐ. 61 ܘܐܝܼܬ ܗ̄ܘܵܘ ܬܵܡܵܐ ܡܲܪܝܲܡ ܡܲܓ̣ܕܠܵܝܬܵܐ ܘܡܲܪܝܲܡ ܐܚܹܪ̄ܬܵܐ: ܒܸܬܝܵܒ̣ܵܐ ܠܒܲܪܩܘܼܒ̣ܠ ܕܩܲܒ̣ܪܵܐ. 62 ܐܝܼܢܵܐ ܒܩܵܝܕܲܡܬܵܐ: ܕܝܼܗ̄ܘܵܐ ܒܵܬ̄ܪ ܝܘܿܡܵܐ ܕܗܵܕܲܪܬܵܐ: ܓ̰ܡܸܥܠܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܦܪ̈ܝܼܫܹܐ ܠܟܸܣ ܦܝܼܠܵܛܘܿܣ. 63 ܘܐܡܸܪܘܿܢ ܐܸܠܹܗ: ܐܵܓ̣ܵܝܲܢ: ܒܸܕܟ̣ܵܪܵܐ ܝܘܵܚ ܕܗ̇ܘ ܡܲܚܠܸܛܵܢܵܐ ܐܡܸܪܹܐ ܟܲܕ ܚܲܝܵܐ: ܡܒܵܬ̄ܪ ܬܠܵܬ̄ܐ ܝܘܿܡܵܢܹ̈ܐ ܒܸܬ ܩܵܝܡܸܢ. 64 ܦܩܘܿܕ ܗܲܕܟ̣ܵܐ ܕܗܵܘܝܼ ܗܸܫܝܵܪ ܒܩܲܒ̣ܪܵܐ ܗܲܠ ܝܘܿܡܵܐ ܕܬܠܵܬ̄ܐ: ܕܠܵܐ ܐܵܬܝܼ ܬܲܠܡܝܼܕܘܼ̈ܗܝ ܓܵܢܒ̣ܝܼ ܠܹܗ: ܘܐܵܡܪܝܼ ܠܛܵܝܸܦܵܐ: ܩܸܡܠܹܐ ܡ̣ܢ ܡܝܼܬܹ̈ܐ: ܘܒܸܬ ܗܵܘܝܵܐ ܚܸܠܛܘܼܢܝܘܼܬܵܐ ܐܚܵܪܵܝܬܵܐ 65 ܒܘܼܫ ܚܸܪܒܵܐ ܡ̣ܢ ܩܵܕ̄ܡܵܝܬܵܐ. ܐܡܸܪܵܐ ܐܸܠܵܝ ܦܝܼܠܵܛܘܿܣ: [79] ܐܝܼܬ ܠܵܘܟ̣ܘܿܢ ܢܵܛܘܿܪܹ̈ܐ: ܙܹܠ̄ܡܘܿܢ ܗ̄ܘܹܡܘܿܢ ܗܸܫܝܵܪ ܕܵܐܟ̣ܝܼ 66 ܕܝܲܕܥܝܼܬܘܿܢ. ܘܐܵܢܝܼ ܐܙܸܠܘܿܢ ܗ̄ܘܹܠܘܿܢ ܗܸܫܝܵܪ ܒܩܲܒ̣ܪܵܐ: ܘܡܚܹܠܘܿܢ ܡܵܘܗܪ ܠܗ̇ܘ ܟܹܐܦܵܐ ܥܲܡ ܢܵܛܘܿܪܹ̈ܐ.

ܩܦܠܐܘܢ: ܟܚ

1 ܘܒܦܠܵܛܵܗ̇ ܕܫܲܒܬܵܐ ܒܙܪܵܩܹܗ ܕܚܵܒ̣ܫܹܒܵܐ: ܐܬܹܠܵܐ ܡܲܪܝܲܡ 2 ܡܲܓ̣ܕܠܵܝܬܵܐ: ܘܡܲܪܝܲܡ ܐܚܹܪ̄ܬܵܐ: ܕܚܵܙܝܼ ܠܩܲܒ̣ܪܵܐ. ܘܗܵܐ: ܪܵܘܕܵܢܵܐ ܓܘܼܪܵܐ ܗ̄ܘܹܠܹܐ: ܣܵܒܵܒ ܕܡܲܠܲܐܟܹܗ ܕܡܵܪܝܵܐ ܨܠܹܠܹܐ ܡ̣ܢ ܫܡܲܝܵܐ: ܘܐܬܹܠܹܐ ܡܘܼܚܕܸܪܹܐ ܠܟܹܐܦܵܐ ܡ̣ܢ ܬܲܪܥܵܐ: ܘܝܼܬܸܒ̣ܠܹܐ 3 ܥܲܠܘܼܗܝ. ܘܚܸܙܘܹܗ ܐܲܝܟ ܒܸܪܩܵܐ ܗ̄ܘܵܐ: ܘܠܒܸܫܬܹܗ ܚܘܵܪܬܵܐ 4 ܐܲܝܟ ܬܲܠܓܵܐ. ܘܡܢ ܙܕܘܼܥܬܹܗ ܪܓܸܕܠܘܿܢ ܢܵܛܘܿܪܹ̈ܐ: ܘܗ̄ܘܹܠܘܿܢ 5 ܐܲܝܟ ܡܝܼܬܹ̈ܐ. ܐܝܼܢܵܐ ܓ̰ܘܼܘܸܒܠܹܐ ܡܲܠܲܐܟ̣ܵܐ ܘܐܡܸܪܹܐ ܠܒܲܟ̣ܬܵܬܹ̈ܐ: ܐܲܚܬܘܿܢ ܠܵܐ ܙܵܕܥܝܼܬܘܿܢ: ܣܵܒܵܒ ܕܒܝܼܕܲܥܝܵܐ ܝܘܸܢ ܕܠܝܼܫܘܿܥ 6 ܕܦܸܫܠܹܐ ܙܩܝܼܦܵܐ ܒܸܛܲܥܝܵܐ ܝܬܘܿܢ. ܠܹܐ ܝܠܹܐ ܠܲܐܟ̣ܵܐ: ܣܵܒܵܒ ܕܩܸܡܠܹܐ: ܕܵܐܟ̣ܝܼ ܕܐܡܸܪܹܐ. ܬܹܡܘܿܢ ܚܙܹܡܘܿܢ ܠܕܘܼܟܬܵܐ ܕܒܝܼܵܗ̇ 7 [80] ܡܘܼܬܒ̣ܵܐ ܗ̄ܘܵܐ ܡܵܪܲܢ. ܘܙܹܠ̄ܡܘܿܢ ܓ̰ܲܠܕܹܐ: ܐܡܘܿܪܘܿܢ ܠܬܲܠܡܝܼܕܘܼ̈ܗܝ: ܩܸܡܠܹܐ ܡ̣ܢ ܡܝܼܬܹ̈ܐ: ܘܗܵܐ: ܒܸܬ ܩܵܕܸܡ ܠܵܘܟ̣ܘܿܢ ܠܓܠܝܼܠܵܐ: ܬܵܡܵܐ ܒܸܬ ܚܵܙܝܼܬܘܿܢ ܠܹܗ. ܗܵܐ: ܐܡܸܪܝܼ 8 ܐܸܠܵܘܟ̣ܘܿܢ. ܘܐܙܸܠܘܿܢ ܓ̰ܲܠܕܹܐ ܡ̣ܢ ܩܲܒ̣ܪܵܐ ܒܙܕܘܼܥܬܵܐ ܘܒܚܲܕܘܼܬܵܐ ܓܘܼܪܬܵܐ: ܘܪܚܸܛܠܘܿܢ ܠܡܲܕܘܼܥܝܹܐ 9 ܠܬܲܠܡܝܼܕܘܼ̈ܗܝ. ܘܗܵܐ: ܝܼܫܘܿܥ ܬܦܸܩܠܹܐ ܒܝܼܵܝ: ܘܐܡܸܪܹܐ ܐܸܠܵܝ: ܫܠܵܡܵܐ ܠܵܘܟ̣ܘܿܢ. ܘܐܵܢܝܼ ܐܬܹܠܘܿܢ ܕܒܸܩܠܘܿܢ ܐܲܩܠܵܬܘܼ̈ܗܝ 10 ܘܣܓܸܕܠܘܿܢ ܐܸܠܹܗ. ܗ̇ܝܓܵܗ ܐܡܸܪܹܐ ܐܸܠܵܝ ܝܼܫܘܿܥ: ܠܵܐ ܙܵܕܥܝܼܬܘܿܢ: ܙܹܠ̄ܡܘܿܢ ܡܲܕܸܥܡܘܿܢ ܠܐܵܚܘܿܢܘܵܬܝܼ̈: ܕܐܵܙܠ̄ܝܼ ܠܓܠܝܼܠܵܐ: ܘܬܵܡܵܐ ܒܸܬ ܚܵܙܝܼ ܠܝܼ. 11 ܐܝܼܢܵܐ ܟܲܕ ܐܙܸܠܘܿܢ: ܗܵܐ: ܐܬܹܠܘܿܢ ܐܢܵܫܹ̈ܐ ܡ̣ܢ ܕܐܵܢܝܼ ܢܵܛܘܿܪܹ̈ܐ ܠܡܕܝܼܢ̄ܬܵܐ: ܘܡܘܼܕܸܥܠܘܿܢ ܠܓܘܼܪ̈ܵܢܹܐ ܕܟܵܗܢܹ̈ܐ ܟܠ ܡܸܢܕܝܼ 12 ܕܗ̄ܘܹܠܹܐ. ܘܓ̰ܡܸܥܠܘܿܢ ܥܲܡ ܚܘܵܪ̈ܕܸܩܢܹܐ ܘܥܒܸܕܠܘܿܢ ܪܵܐܝܝܼ: 13 ܘܝܸܗܒܸܠܘܿܢ ܙܘܼܙܹ̈ܐ ܠܵܐ ܚܲܟ̰ܵܐ ܠܣܲܪ̈ܒܵܙܹܐ. ܘܐܵܡܪܝܼ ܐܸܠܵܝ: ܐܡܘܿܪܘܿܢ: ܕܬܲܠܡܝܼܕܘܼ̈ܗܝ ܐܬܹܠܘܿܢ ܓܢܸܒ̣ܠܘܿܢ ܐܸܠܹܗ ܒܠܲܝܠܹܐ: 14 ܟܲܕ ܕܡܝܼܟܹܐ ܝܘܵܚ ܗ̄ܘܵܘ. ܘܐܸܢ ܐܵܗܵܐ ܦܵܝܫܵܐ ܫܡܥܝܼܬܵܐ ܩܵܕ̄ܡ ܗܵܟܝܼܡ: ܐܲܚܢܲܢ ܒܸܬ ܥܵܒ̣ܕܵܚ ܠܹܗ ܪܵܐܙܝܼ: ܘܐܸܠܵܘܟ̣ܘܿܢ ܕܠܵܐ 15 ܚܲܡ ܒܸܬ ܥܵܒ̣ܕܵܚ. ܘܐܲܢܹܐ ܟܲܕ ܫܩܸܠܘܿܢ ܠܙܘܼܙܹ̈ܐ: ܥܒܸܕܠܘܿܢ ܐܲܝܟ ܕܦܸܫܠܘܿܢ ܡܘܼܠܦܹܐ. ܘܦܠܸܛܠܵܐ ܐܵܗܵܐ ܗܹܡܸܙܡܵܢ ܒܓܵܘܵܐ ܕܝܗ̄ܘܼܕܵܝܹ̈ܐ ܗܲܠ ܐܵܗܵܐ ܝܘܿܡܵܐ. 16 ܐܝܼܢܵܐ ܬܲܠܡܝܼܕܹ̈ܐ ܚܲܕܸܥܣܲܪ ܐܙܸܠܘܿܢ ܠܓܠܝܼܠܵܐ: ܠܛܘܼܪܵܐ: 17 ܐܲܝܟܵܐ ܕܥܒ̣ܝܼܕܵܐ ܗ̄ܘܵܐ ܘܲܥܕܵܐ ܥܲܡܵܝ ܝܼܫܘܿܥ. ܘܟܲܕ ܚܙܹܠܘܿܢ ܐܸܠܹܗ: ܣܓܸܕܠܘܿܢ ܐܸܠܹܗ. ܐܝܼܢܵܐ ܡܸܢܵܝ ܦܝܼܫܹܐ ܗ̄ܘܵܘ ܒܫܸܟ. 18 ܘܐܬܹܠܹܐ ܝܼܫܘܿܥ ܗܘܼܡܙܸܡܠܹܐ ܥܲܡܵܝ ܘܐܡܸܪܹܐ ܐܸܠܵܝ: ܦܸܫܠܹܐ 19 ܝܘܼܗ̄ܒ̣ܵܐ ܐܸܠܝܼ ܟܠܹܗ ܗܘܼܟܡܵܐ ܒܫܡܲܝܵܐ ܘܒܲܐܪܥܵܐ. ܙܹܠ̄ܡܘܿܢ ܗܕܟ̣ܵܐ ܬܲܠܡܸܕܘܿܢ ܠܟܠܵܝ ܛܵܝܸܦܹ̈ܐ: ܘܡܲܥܡܸܕܘܿܢ ܠܗ̄ܘܿܢ. 20 ܒܫܸܡܹܗ ܕܒܵܒܵܐ ܘܒܪܘܼܢܵܐ ܘܪܘܼܚܵܐ ܕܩܘܼܕܫܵܐ. ܘܡܵܠܦܘܿܢ ܠܗ̄ܘܿܢ ܕܢܵܛܪܝܼ ܟܠ ܡܸܢܕܝܼ ܕܦܩܝܼܕܵܐ ܝܘܸܢ ܐܸܠܵܘܟ̣ܘܿܢ: ܘܗܵܐ: ܐܵܢܵܐ ܥܲܡܵܘܟ̣ܘܿܢ ܝܼܘܸܢ ܟܠܵܝ ܝܘܿܡܵܢܹ̈ܐ: ܗܲܠ ܬܝܵܡܹܗ ܕܥܵܠܡܵܐ. ܐܵܡܹܝܢ.

---

[1]  ܝܘܢܐܝܬ: ܠܐܲܡܘܿܣ: ܐܲܡܘܿܣ.

[2]  ܦܫܝܛ. ܘܚܟܡܐ ܐܨܚ̈. ܝܘܢ̈. ܠܒܪܘܢܵܗ̇ ܒܘܼܟ̣ܪܵܐ.

[3]  ܝܢ: ܩܪܸܒ̣ܠܵܐ.

[4]  ܝܢ: ܕܩܪܸܒ̣ܠܵܐ.

[5]  ܝܢ: ܫܵܒܵܟܹ̈ܐ.

[6]  ܝܢ: ܫܵܒܵܟܵܝ̈.

[7]  ܝܢ: ܫܵܒܵܟܵܝ̈.

[8]  ܚܟܡܐ ܐܨܚ̈. ܥܬ̈. ܝܘܢ̈ܝ. ܠܝܬ. ܕܠܐ ܗܲܓ̰ܲܬ.

[9]  ܝܘܢܐܝܬ: ܩܵܕ̄ܡ.

[10]  ܚܟܡܐ ܐܨܚ̈. ܥܬ̈. ܝܘܢـ̈. ܠܝܬ. ܘܒܵܪܟ̣ܘܿܢ ܠܐܵܢܝܼ.. ܕܣܵܢܝܼ ܠܵܘܟ̣ܘܿܢ.

[11]  ܚܟܡܐ ܐܨܚ̈. ܥܬ̈. ܝܘܢـ̈. ܠܲܝܬ. ܥܵܒ̣ܕܝܼ ܣܪܝܼܬܵܐ ܒܝܼܵܘܟ̣ܘܿܢ ܘ.

[12]  ܦܫܝܛ. ܘܚܟܡܐ ܐܨܚ̈. ܝܘܢـ̈. ܒܐܸܪܘܵܢܵܘܟ̣ܘܿܢ.

[13]  ܚܟܡܐ ܐܨܚ̈. ܥܬ̈. ܝܘܢـ̈. ܠܝܬ. ܣܵܒܵܒ ܕܝܼܘܼܟ ܝܼܠܵܐ.. ܐܵܡܹܝܢ.

[14]  ܝܘܢܐܝܬ: ܕܥܸܪ̈ܒܹܐ.

[15]  ܝܢ: ܪܹܓܝܼ.

[16]  ܝܢ: ܪܹܓܝܼ.

[17]  ܝܢ: ܪܹܓܹܗ.

[18]  ܚܟܡܐ ܐܨܚ̈. ܝܘܢ̈ـ. ܕܓܸܪ̈ܵܣܹܝܢܹܐ.

[19]  ܝܘܢܐܝܬ: ܫܵܕܸܪܲܢ ܓܵܘ ܒܲܩܪܵܐ ܕܚܙܘܼܪܹ̈ܐ.

[20]  ܝܢ: ܨܸܪܝܹܐ.

[21]  ܝܢ: ܡܒܵܕܸܪ.

[22]  ܝܢ: ܩܪܸܒ̣ܠܵܐ.

[23]  ܝܘܢܐܝܬ: ܬܲܪܩܸܠ.

[24]  ܚܟܡܐ ܐܨܚ̈. ܝܘܢ̈ـ. ܒܢܘܼܢܘܼ̈ܗ̇.

[25]  ܦܫܝܛܬܐ: ܦܸܫܠܵܟ̣ܝ ܡܘܼܪܸܡܬܵܐ.

[26]  ܝܢ: ܒܸܬ ܨܵܠܝܲܬܝ.

[27]  ܝܘܢܐܝܬ: ܟܹܐ ܬܲܪܩܸܠ.

[28]  ܝܢ: ܡܥܘܼܕܵܠܹܐ.

[29]  ܝܢ: ܬܘܼܪ̈ܩܵܠܹܐ.

[30]  ܝܢ: ܠܫܵܒܵܟܵܐ.

[31]  ܝܢ: ܘܦܸܫܠܘܿܢ ܡܬܘܼܪܩܸܠܹܐ.

[32]  ܝܘܢܐܝܬ: ܦܸܫܠܘܿܢ ܡܬܘܼܪܩܠܹܐ.

[33]  ܝܘܢܐܝܬ: ܡܲܓܵܕܵܢ.

[34]  ܦܫܝܛܬܐ: ܥܵܒ̣ܕܵܚ.

[35]  ܪܒܐ ܐܨܚ̈. ܥܬ̈. ܝܘܢ̈ـ. ܠܝܬ - ܓ̰ܪ. 21 .

[36]  ܝܘܢܐܝܬ: ܕܡܬܲܪܩܸܠ.

[37]  ܝܢ: ܟܹܐܦܵܐ ܕܐܸܪܚܹܐ.

[38]  ܝܘܢܐܝܬ: ܬܘܼܪ̈ܩܵܠܹܐ.

[39] ܝܘܢܐܝܬ: ܬܘܼܪ̈ܩܵܠܹܐ.

[40]  ܝܘܢܐܝܬ: ܬܘܼܪܩܵܠܵܐ.

[41] ܝܘܢܐܝܬ: ܡܬܲܪܩܸܠܵܐ.

[42]  ܝܘܢܐܝܬ: ܡܬܲܪܩܸܠܵܐ.

[43]  ܪܒܐ ܐܨܚ̈. ܠܝܬ - ܓ̰ܪ. 11

[44]  ܡܸܚܕܵܕܹ̈ܐ.

[45]  ܐܨܚ̈. ܥܬ̈. ܝܘܢ̈ـ. ܩܵܡܘܿܕܝܼ ܒܵܩܘܿܪܹܐ ܝܘܸܬ ܡܸܢܝܼ ܥܲܠ ܛܵܒ̣ܬܵܐ. ܚܵܕ̄ ܝܼܠܹܐ ܛܵܒ̣ܵܐ.

[46]  ܚܟܡܐ ܐܨܚ̈. ܝܘܢ̈ـ. ܠܝܬ. ܡ̣ܢ ܝܵܠܘܼܬܝܼ.

[47]  ܝܘܢܐܝܬ: ܒܸܬ ܦܵܝܸܫ ܡܘܼܩܸܡܵܐ.

[48]  ܦܫܝܛ. ܘܡܲܥܡܘܕܝܬܐ ܕܐܢܐ ܥܡܕܸܢ ܠܸܥܡܵܕܵܐ.

[49]  ܦܫܝܛ. ܘܡܲܥܡܘܿܕܝܼܬܵܐ ܕܐܵܢܵܐ ܥܵܡܕܸܢ ܒܸܬ ܥܵܡܕܝܼܬܘܿܢ.

[50]  ܝܢ: ܩܪܸܒ̣ܠܘܿܢ.

[51]  ܝܢ: ܟ̰ܵܪܵܣ.

[52]  ܝܢ: ܩܪܸܒ̣ܠܹܐ.

[53]  ܝܘܢܐܝܬ: ܥܵܒܸܕ ܘܵܓ̰ܸܒܘܼܬܵܐ ܕܐܸܕܡܵܐ ܠܒܲܟ̣ܬܹܗ.

[54]  ܝܢ: ܡܥܘܼܕܵܠܹܐ.

[55]  ܦܫܝܛ. ܘܚܟܡܐ ܐܨܚ̈. ܝܘܢـ̈ـ. ܠܝܬ. ܘܥܣܩܐ ܠܸܛܥܵܢܵܐ.

[56]  ܝܘܢܐܝܬ: ܡܲܠܦܵܢܵܘܟ̣ܘܿܢ.

[57]  ܚܟܡܐ ܐܨܚ̈. ܝܘܢ̈ـ. ܠܝܬ. ܓܸܪ. 13.

[58]  ܝܢ: ܐܣܝܼܪܵܐ ܒܡܵܘܡܝܼܬܹܗ.

[59]  ܝܢ: ܚܛܘܼܦܝܵܐ.

[60]  ܝܘܢܐܝܬ: ܬܲܪܩܸܠܝܼ.

[61]  ܝܘܢܐܝܬ: ܒܸܬ ܦܵܝܸܫ ܦܘܼܪܩܵܐ.

[62]  ܝܘܢܐܝܬ: ܠܹܐ ܦܵܝܸܫ ܗ̄ܘܵܐ ܦܘܼܪܩܵܐ.

[63]  ܝܘܢܐܝܬ: ܕܗ̇ܘ ܩܘܼܪܒܵܐ ܝܠܹܐ ܠܬܲܪܥܵܐ.

[64]  ܐܨܚ̈. ܥܬ̈. ܝܘܢ̈ـ. ܐܘܼܦ ܠܵܐ ܒܪܘܼܢܵܐ: ܐܸܠܵܐ ܒܵܒܵܐ ܒܢܲܦ̮ܫܹܗ.

[65]  ܝܢ: ܒܸܬ ܓ̰ܲܢܓ̰ܸܪܹܗ.

[66]  ܝܢ: ܙܵܘܕܘܿܢܝܹܗ.

[67]  ܝܢ: ܕܩܵܘܠܵܐ ܚܵܕ̄ܬܵܐ.

[68]  ܚܟܡܐ ܐܨܚ̈. ܥܬ̈. ܝܘܢ̈ـ ܠܝܬ ܚܲܕܬܵܐ.

[69]  ܝܢ: ܥܒ̣ܘܿܕ ܗ̇ܝ ܕܒܘܼܬ ܕܝܼܵܗ̇ ܐܬܹܠܘܼܟ: ܚܲܒ̣ܪܝܼ.

[70]  ܝܢ: ܩܪܸܒ̣ܠܘܿܢ.

[71]  ܝܢ: ܨܪܹܠܹܐ.

[72]  ܝܘܢܐܝܬ: ܐܲܢ̄ܬ ܚܵܙܸܬ.

[73]  ܦܫܝܛ. ܘܚܟܡܐ ܐܨܚ̈. ܝܸܗ̄ܒ̣ܵܝܠܝܼ.

[74]  ܝܢ: ܕܟܘܼܙܵܟ̰ܝܼ.

[75]  ܝܘܢܐܝܬ: ܚܙܹܡܘܿܢ.

[76]  ܝܢ: ܚܵܠܵܐ.

[77]  ܝܢ: ܠܹܐ ܡܵܨܹܐ ܠܡܲܚܘܼܝܹܐ.

[78]  ܝܢ: ܨܸܪܝܵܐ.

[79]  ܝܢ: ܫܩܘܿܠܘܿܢ.

[80]  ܝܢ: ܕܡܸܟ̣ܠܹܐ.