ܬܲܫܥܝܼܬܵܐ ܕܛܘܼܒܼܵܢܵܐ ܡܵܪܢܙܟ݂ܵܐ:
ܘܕܡܵܪܝ ܐܲܚܵܐ:
ܐܲܦܸܣܩܘܿܦܵܐ ܡܝܼܛܪܵܦܘܿܠܹܝܛܵܐ ܕܚܕܲܬܵܐ ܪܵܥܝܵܐ ܕܓ݂ܘܼܡܠܹ̈ܐ
ܡܬܘܼܪܓܸܡܬܵܐ ܡ݂ܢ ܠܸܫܵܢܵܐ ܐܵܪܵܡܵܝܵܐ ܠܠܸܫܵܢܵܐ ܣܘܵܕܵܝܵܐ: ܡ݂ܢ ܟܬܵܒܼܵܐ (ܣܝܵܡܵܐ) ܕܡܵܪܝ ܬܐܘܿܡܵܐ ܕܡܲܪܓܵܐ ܕܘܼܒܵܩܵܐ ܩܵܕ݇ܡܵܝܵܐ: ܡܹܐܡܪܵܐ ܬܪܲܝܵܢܵܐ: ܪܹܫܵܐ: ܡܐ.
ܐܵܗܵܐ ܩܲܕܝܼܫܵܐ ܡܵܪܝ ܐܲܚܵܐ ܝܼܬܝܼܒܼܵܐ ܝܗ݇ܘܼܵܐ ܥܲܠ ܟܘܼܪܣܝܵܐ ܩܲܕܝܼܫܵܐ ܕܥܸܕܬܵܐ ܕܡܕ݂ܝܼܢ݇ܬܵܐ ܕܚܕܲܬܵܐ: ܚܲܣܝܵܐ ܘܙܲܗܝܵܐ ܡܵܪܢܙܟ݂ܵܐ: ܐܲܦܸܣܩܘܿܦܵܐ ܬܲܠܡܝܼܕܹܗ ܘܒܲܪ ܚܲܣܝܵܐ ܡܵܪܢܙܟ݂ܵܐ: ܐܲܦܸܣܩܘܿܦܵܐ ܬܲܠܡܝܼܕܹܗ ܘܒܲܪ ܬܸܫܡܸܫܬܹܗ ܕܪܲܒܲܢ ܐܲܦܢܝܼܡܵܪܲܢ: ܐܵܗܵܐ ܛܘܼܒܼܵܢܵܐ ܡܵܪܢܙܟ݂ܵܐ ܐܝܼܬ ܗ݇ܘ̣ܵܐ ܠܹܗ ܥܸܕܲܬ: ܒܝܵܘܡܵܢܹ̈ܐ ܕܨܵܘܡܹܗ ܩܲܕܝܼܫܵܐ ܡܵܪܲܢ: ܟܹܐ ܐܵܙܸܠ ܗ݇ܘ̣ܵܐ ܠܛܘܼܪ̈ܵܢܹܐ ܕܚܕܵܐ ܡܵܬܵܐ ܫܸܡܘܼܗ݁ ܙܝܼܢܲܝ: ܕܬܵܡܵܐ ܚܵܝܹܗ ܒܫܸܠܝܘܼܬܵܐ (ܘܪܸܚܩܵܐ ܡ݂ܢ ܒܢܲܝ̈ܢܵܫܵܐ.)
ܒܚܕܵܐ ܡ݂ܢ ܓܵܗܹ̈ܐ ܟܲܕ ܒܹܐܙܵܠܵܐ ܝܗ݇ܘ̣ܵܐ ܐܲܝܟ݂ ܥܵܕܲܬܹܗ ܠܛܘܼܪܵܐ ܡܘܼܕܟܸܪܵܐ: ܚܙܸܐ ܠܹܗ ܒܪܹܫܵܐ ܕܚܕܵܐ ܪܘܼܡܬܵܐ: ܒܕܡܘܼܬܵܐ ܕܚܲܕ݇ ܐ݇ܢܵܫܵܐ ܐܝܼܢܵܐ ܟܸܠܝܵܐ ܕܦܲܐܬ̈ܘܵܬܘܪܗܝ ܠܡܲܕܢܚܵܐ: ܟܲܕ ܡܵܪܢܙܟ݂ܵܐ ܒܹܐܬܵܝܵܐ ܡ݂ܢ
ܓܲܒܵܐ ܡܲܥܪܒܼܵܝܵܐ: ܡܓ̰ܘܼܘܸܒܠܹܗ ܘܐ݇ܡܝܼܪܹܗ: ܝܵܐ ܐܵܓ݂ܝܼ: ܐܵܢܵܐ ܡ݂ܢ ܩܵܕ݇ܡ ܐܲܪܒܥܝܼ ܫܸܢܹ̈ܐ ܦܝܼܫܠܝܼ ܦܪܝܼܫܵܐ ܐܲܦܸܣܩܘܿܦܵܐ ܠܡܒܲܕܪ̈ܐ (ܠܡܒܘܼܪܒܸܙܸܐ) ܕܒܐܲܪܥܵܐ ܕܡܸܨܪܹܝܢ: ܘܗ݇ܘܹܐܠܝܼ ܒܐܵܗܵܐ ܬܸܫܡܸܫܬܵܐ ܩܵܐ ܚܲܕܟ̰ܵܐ ܙܲܒܢܵܐ: ܗ݁ ܓܵܗ݇ ܬܵܡܵܐ ܗ݇ܘܹܐܠܵܗ݁ ܒܵܨܘܿܪܘܼܬܵܐ ܕܡܸܛܪܵܐ. ܩܛܸܥܠܲܢ ܨܵܘܡܵܐ ܘܒܵܥܘܿܬܵܐ: ܘܡܓ̰ܘܼܡܥܵܝܠܝܼ ܠܲܡܗܲܝܡܢܹ̈ܐ: ܘܦܠܝܼܛܠܲܢ ܠܒܲܪܝܼܵܐ ܠܡܨܵܠܘܿܝܹܐ: ܒܐܵܗܵܐ ܥܸܕܵܢܵܐ: ܐ݇ܬܹܐܠܗ݇ܘܿܢ ܐܲܢܹܐ ܛܲܝܵܝܹ̈ܐ (ܥܪ̈ܵܒܵܝܹܐ): ܥܲܡܪ̈ܵܢܹܐ ܒܡܲܫܟܢܹ̈ܐ ܩܵܡ ܚܲܪܕܵܝܠܝܼ ܘܐܵܢܝܼ ܐ݇ܚܹܪ̈݇ܢܹܐ ܟܠܲܝܗܝ ܚܠܝܼܨܠܗ݇ܘܿܢ: ܦܝܼܫܠܝܼ ܐܵܢܵܐ ܒܢܲܦ̮ܫܝܼ ܚܫܸܒܼܠܝܼ ܕܗܸܟ̰ ܡܸܢܕܝܼ ܚܸܪܒܵܐ ܠܵܐ ܥܵܒܼܕܝܼ ܥܲܠܝܼ: ܩܵܡ ܕܵܒܼܩܝܼܠܝܼ ܝܵܚܣܝܼܪ ܘܩܵܡ ܡܵܝܬܵܝܵܝܠܝܼ ܠܡܲܫܟܢܲܝ̈ܗܝ: ܘܩܵܡ ܦܵܪܫܝܼܠܝܼ ܕܗܵܘܸܢ ܪܵܥܝܵܐ ܕܐܲܢܹ̈ܐ ܓܘܼܡܠܹ̈ܐ ܕܒܸܚܙܵܝܲܝܗܝ ܝ݇ܘܸܬ: ܐܵܗܵܐ ܫܒܼܝܼܩܵܗ݁ ܠܝܼ ܠܪܸܙܵܝܹܗ ܕܡܵܪܲܢ. ܘܡܸܢ݇ܕܪܸܫ݇ ܒܡܸܢܕܝܼ ܕܩܵܡ ܦܵܪܸܫܠܝܼ ܡ݂ܢ ܕܘܼܒܵܪܹ̈ܐ ܕܐܵܕܝܼܒܘܼܬܵܐ: ܠܵܐ ܚܒܼܝܼܛܠܝܼ ܒܝܲܝܗܝܐܸܠܵܐ ܗܲܪ ܒܢܲܦ̮ܫܝܼ: ܡܵܘܕܘܿܝܸܐ ܝ݇ܘܸܢ ܠܐܲܠܵܗܵܐ ܒܐܵܗܵܐ ܒܲܪܝܼܵܐ ܒܕܵܝܹܡܘܼܬܵܐ: ܘܒܸܕܟ݂ܵܪܵܐ ܝ݇ܘܸܢ ܠܪܵܒܵܐ ܡ݂ܢ ܩܲܕܝܼܫܹ̈ܐ ܕܗ݇ܘܹܐܠܗ݇ܘܿܢ ܪ̈ܵܥܝܹܐ ܘܒܸܫܩܵܠܵܐ ܠܸܒܵܐ ܡܸܢܲܝܗܝ.
ܐܵܗܵܐ ܥܘܼܢܵܝܵܐ ܕܐܸܕܝܘܿܡ ܫܡܸܥܠܘܿܟ. ܡܸܢܝܼ: ܐܵܗܵܐ ܥܵܕܲܬ ܐܝܼܬܠܝܼ ܕܟܠ ܝܵܘܡܵܐ ܥܵܒܼܕܸܢ ܬܸܫܡܸܫܬܵܐ ܕܚܲܕ݇ ܥܹܐܕ݂ܵܐ ܡܵܪܵܢܵܝܵܐ: ܒܫܲܗܪܵܐ ܘܫܪ: ܐܸܕܝܘܿܡ ܒܸܥܒܼܵܕܵܐ ܝ݇ܘܸܢ ܗ݇ܘ̣ܵܐ ܬܸܫܡܸܫܬܵܐ ܕܥܹܐܕ݂ܵܐ ܕܩܝܵܡܬܹܗ ܕܡܵܪܲܢ (ܡܨܲܠܡܘܼܢܘܼܗ݁ ܝ݇ܘܸܢ ܗ݇ܘܵܐ ܓܵܢܝܼ): ܐܲܝܟ݂ ܕܗ݁ܝ ܐܸܢ ܟܸܠܝܵܐ ܝ݇ܘܸܢ ܩܵܕ݇ܡ ܡܲܕ݂ܒܚܹܗ ܕܡܵܪܲܢ: ܘܒܹܐܡܵܪܹܗ ܐܵܗܵܐ ܥܘܼܢܵܝܵܐ: ܘܐܲܕܝܵܐ ܡܬܘܼܡܸܡܠܗ݇ܘܿܢ ܐܲܪܒܥܝܼ (40) ܫܸܢܹ̈ܐ ܐܸܠܝܼ (ܠܲܐܟ݂ܵܐ) ܗܵܕܟ݂ܵܐ ܐܲܝܟ݂ ܕܒܸܚܙܵܝ ܝ݇ܘܸܬ: ܢܛܝܼܪܝܼܠܹܗ ܡܵܪܝܵܐ ܡ݂ܢ ܟܠ (ܓ̰ܘܼܪ̈ܵܒܹܐ) ܕܒܝܼܫܵܐ: (ܘܐܲܢܹܐ ܐ݇ܢܵܫܹ̈ܐ) ܟܹܐ ܚܵܫܒܼܝܼܠܝܼ ܐܲܝܟ݂ ܣܵܒܼܵܐ (ܘܐܲܝܟ݂) ܐܲܚܘܿܢܲܝܗܝ: ܣܵܒܵܒ ܚܸܙܝܝܼ ܝ݇ܢܵܐ ܫܲܪܝܼܪܵܐ ܘܡܸܫܬܲܡܥܵܢܵܐ: ܠܲܝܬܠܝܼ ܗܸܟ̰ ܩܘܵܠܬܵܐ ܡܸܢܲܝܗܝ: ܘܒܸܣܒܵܪܵܐ ܝ݇ܘܸܢ ܠܫܘܼܠܵܡܵܐ ܕܚܲܝܲܝ̈ ܕܡܬܲܡܸܡܝܼ ܐܲܝܟ݂ ܪܸܙܵܝܹܗ ܕܡܵܪܲܢ.
ܟܲܕ ܐܲܢܹܐ ܫܸܡܥܝܲܝܗܝ ܠܹܗ ܡܵܪܢܙܟ݂ܵܐ ܦܝܼܫܠܹܗ ܡܵܐܬ݁: ܘܡܥܘܼܓ̰ܸܒܠܹܗ ܡܫܘܿܪܹܐܠܹܗ ܠܒܟ݂ܵܝܵܐ: ܟܲܕ ܒܸܒܟ݂ܵܝܵܐ: (ܘܪܵܥܝܵܐ ܕܓܘܼܡܠܹ̈ܐ) ܠܟܸܣܠܹܗ: ܡܓ̰ܘܼܘܸܒܠܹܗ ܡܵܪܢܙܟ݂ܵܐ ܘܐ݇ܡܝܼܪܹܗ ܐܸܠܹܗ: ܒܸܬ ܕܵܝܪܸܢ ܘܡܵܬܝܸܢ ܙܘܼܙܹ̈ܐ ܘܝܗܒܸܢܘܿܢ ܘܡܦܲܪܩܸܢܘܿܟ݂: ܣܵܒܵܒ ܠܹܐ ܒܵܥܝܸܢ ܕܫܵܒܼܩܸܢܘܼܟ݂ ܒܐܵܗܵܐ ܢܦܵܠܬܵܐ ܟܪܵܝܲܬ (ܡܲܦܫܸܡܲܢܬܵܐ): ܡܓ̰ܘܼܘܸܒܠܹܗ (ܛܘܼܒܼܵܢܵܐ ܪܵܥܝܵܐ ܕܓܘܼܡܠܹ̈ܐ): ܐܵܡܸܪ ܐܸܠܹܗ: ܙܸܠ݇ ܒܫܠܵܡܵܐ ܡܵܪܝ (ܐܵܓ݂ܵܝ) ܐܲܦܸܣܩܘܿܦܵܐ ܠܒܘܼܒܵܪ̈ܘܿܟ݂ ܘܠܫܸܠܝܘܼܬܘܿܟ݂: ܠܵܐ ܡܲܓ̰ܗܸܬ ܓܵܢܘܿܟ݂ ܒܐܵܦ ܚܕܵܐ ܡ݂ܢ ܕܐܲܢܹ̈ܐ: ܒܗ݁ܝ ܕܐܸܢ ܗܵܘܸܢ ܗ݇ܘ̣ܵܐ ܒܸܥܝܵܐ: ܟܠ ܥܸܕܵܢܵܐ ܕܗܵܘܝܵܐ ܗ݇ܘ̣ܵܐ ܒܸܬ ܗܵܘܸܢ ܗ݇ܘ̣ܵܐ ܡܚܘܼܠܨܵܐ ܓܵܢܝܼ: ܝܲܢ ܥܪܝܼܩܵܐ ܝܲܡ ܙܸܐ ܙܒܼܝܼܢܘܼܗ݁ ܓܵܢܝܼ: ܐܸܠܵܐ ܐܵܗܵܐ ܪܸܙܵܝܵܐ ܕܐܲܠܵܗܵܐ ܝ݇ܠܹܗ: ܒܐܵܗܵܐ ܕܝ݇ܘܸܢ ܒܝܼܘܼܗ݁. (ܒܐܲܝܟܵܐ ܒܸܬ ܥܲܪܩܸܢ ܘܡܛܵܫܸܢܵܗ݁ ܓܵܢܝܼ ܡ݂ܢ ܕܗ݁ܘ ܕܝܼ݇ܠܹܗ ܒܸܥܡܵܪܵܐ ܒܫܡܲܝܵܐ ܘܒܐܲܪܥܵܐ ܘܒܝܵܡܵܬܹ̈ܐ؟ ܘܠܥܘܿܠܘܿܠ ܡ݂ܢ ܫܡܲܝ̈ܵܐ ܘܠܥܸܠܬܲܚܬ ܡ݂ܢ ܡܲܝ̈ܵܐ؟ ܘܒܟܠ ܕܘܼܟܬܵܐ ܕܐܵܙܸܠ݇ܢ ܬܵܡܵܐ ܝ݇ܠܹܗ: ܒܘܼܬ ܕܐܵܗܵܐ ܟܲܕ ܒܣܝܼܡܬܹܗ ܝ݇ܠܵܗ݁ ܕܐܵܙܸܠ݇ܢ ܬܵܡܵܐ ܝ݇ܠܹܗ: ܒܘܼܬ ܕܐܵܗܵܐ ܟܲܕ ܒܣܝܼܡܬܹܗ ܝ݇ܠܵܗ݁ ܕܗܵܘܸܢ ܠܲܐܟ݂ܵܐ ܘܒܕܐܲܢܹܐ ܐܲܗܘܵܠܲܬܹ̈ܐ: ܗܵܘܹܐ ܒܪܝܼܟ݂ܵܐ ܫܸܡܹܗ ܩܲܕܝܼܫܵܐ: ܚܘܿܫ ܗܵܘܹܐ ܪܸܙܵܝܹܗ) ܒܐܵܗܵܐ ܕܝ݇ܘܸܢ ܒܝܼܘܼܗ݁: (ܒܐܲܢܹܐ ܗܹܡܸܙܡܵܢܹ̈ܐ) ܡܘܼܥܒܸܕܠܹܗ ܠܐܲܦܸܣܩܘܿܩܵܐ (ܡܵܪܢܙܟ݂ܵܐ) ܕܐܵܙܸܠ ܒܫܠܵܡܵܐ: (ܐ݇ܡܝܼܪܹܗ ܩܵܬܹܗ): ܩܵܐ ܚܲܕܒܫܲܒܵܐ ܕܐܘܿܫܲܥܢܹ̈ܐܬ: ܐܝܼܡܲܢ ܕܕܵܝܪܸܬ (ܒܫܠܵܡܵܐ) ܡ݂ܢ ܛܘܼܪܵܐ ܘܨܵܠܹܬ ܠܡܕܝܼܢ݇ܬܘܿܟ݂: ܐܵܬܹܬ ܠܟܸܣܠܝܼ ܘܬܵܦܩܸܬ ܒܝܼܝܼ.
ܟܲܕ (ܫܒܼܝܸܩܠܹܗ) ܘܐ݇ܙܠ݇ܝܼܠܹܗ ܐܲܝܟ݂ ܕܦܝܼܫܠܵܗ݁ ܐܡܝܼܪܬܵܐ ܩܵܬܹܗ: ܘܒܪܲܡܫܵܐ ܕܝܵܘܡܵܐ ܕܚܲܕܒܫܲܒܵܐ ܕܐܘܿܫܲܥܢܹ̈ܐ: ܕܝܼܪܹܗ ܡܵܪܢܙܟ݂ܵܐ ܡ݂ܢ ܛܘܼܪܵܐ: ܐ݇ܬܹܐܠܹܗ ܘܚܙܹܐܠܹܗ ܚܲܕ݇ ܐ݇ܢܵܫܵܐ ܒܗ݁ܝ ܕܘܼܟܬܵܐ: ܚܫܸܒܼܠܹܗ ܕܐܲܦܸܣܩܘܿܦܵܐ ܝ݇ܠܹܗ ܪܵܥܝܵܐ ܕܓܘܼܡܠܹ̈ܐ: ܡܩܘܼܪܒܸܢܹܗ ܡܵܪܢܙܟ݂ܵܐ ܘܣܠ݇ܝܼܩܠܹܗ ܠܟܸܣܠܹܗ ܘܕܪܸܐ ܠܹܗ ܫܠܵܡܵܐ ܥܲܠܹܗ: ܒܘܼܩܪܹܗ: ܐܲܝܟܵܐ ܝܠܹܗ ܗ݁ܘ ܣܵܒܼܵܐ ܪܵܥܝܵܐ ܕܐܲܢܹܐ ܓܘܼܡܠܹ̈ܐ ܕܡ݂ܢ ܩܵܕ݇ܡ ܚܲܕܟ̰ܵܐ ܥܸܕܵܢܵܐ؟ ܗ݁ܘ ܐ݇ܢܵܫܵܐ ܡܓ̰ܘܼܘܸܒܠܹܗ: ܐܵܡܸܪ: ܡܝܼܬܠܹܗ: ܐܝܼܡܲܢ ܕܡܵܪܢܙܟ݂ܵܐ ܫܡܸܥܠܹܗ ܐܵܗܵܐ ܓ̰ܘܼܘܵܒ: ܥܝܼܩܠܹܗ ܪܵܒܵܐ (ܘܡܘܼܪܸܡܠܹܗ ܩܵܠܹܗ ܘܡܫܘܼܪܹܐ ܠܹܗ ܒܸܒܟ݂ܵܝܵܐ) ܒܡܲܪܝܼܪܘܼܬܵܐ: ܒܘܼܩܸܪܹܗ ܐܵܡܹܪ ܡ݂ܢ ܐܝܼܡܲܢ ܡܝܼܬܠܹܗ؟ ܗ݁ܘ ܡܓ̰ܘܼܘܸܒܠܹܗ ܐܵܡܹܪ ܒܐܲܢܹܐ ܝܵܘܡܵܢܹ̈ܐ: (ܐܲܦܸܣܩܘܿܦܵܐ ܡܵܪܢܙܟ݂ܵܐ) ܡܦܘܼܠܸܛܠܹܗ ܡܲܥܦܪܵܐ ܡ݂ܢ ܥܘܼܒܹܗ ܘܩܵܡ ܝܵܗ݇ܒܸܠܹܗ ܩܵܐ ܕܗ݁ܘ ܐ݇ܢܵܫܵܐ: ܟܲܕ ܒܹܐܡܵܪܵܐ ܫܩܘܿܒܼܠ ܐܵܗܵܐ ܘܙܸܠ݇ ܡܲܚܙܝܼܠܝܼ ܩܲܒܼܪܹܗ: ܣܵܒܵܒ ܕܵܘܣܬܝܼ (ܚܲܒܼܪܝܼ) ܝܗ݇ܘܵܐ: ܐܝܼܡܲܢ ܕܐ݇ܙܠ݇ܝܼܠܹܗ ܥܲܡܹܗ ܘܚܸܙܝܵܗ݁ ܠܹܗ ܩܲܒܼܪܵܐ ܡ݂ܢ ܪܸܚܩܵܐ: ܩܵܡ ܡܲܟܠܸܠܹܗ ܥܲܡܹܗ ܘܚܵܙܝܵܗ݁ ܠܹܗ ܩܲܒܼܪܵܐ ܡ݂ܢ ܪܸܚܩܵܐ: ܩܵܡ ܡܲܟܠܸܠܹܗ ܠܥܲܪܒܵܝܵܐ (ܕܠܵܐ ܐܵܙܸܠ ܥܲܡܹܗ ܠܩܲܒܼܪܵܐ): ܐ݇ܡܝܼܪܹܗ ܐܸܠܹܗ ܐܲܢ݇ܬ ܐ݇ܙܸܠ݇ ܠܟܸܣ ܓܘܼܡ̈ܠܘܼܟ݂: (ܗ݁ܘ ܐ݇ܡܝܼܪܹܗ ܗܵܕܟ݂ܵܐ) ܩܵܐ ܕܗܵܘܝܵܐ ܗ݇ܘ̣ܵܐ ܠܹܗ ܦܸܪܣܲܬ ܕܒܵܟܹܐ (ܒܐܵܙܵܕܘܼܬܵܐ): ܟܲܕ ܝܼܬܸܒܼܠܹܗ ܥܲܠ ܩܲܒܼܪܵܐ (ܘܡܘܼܪܸܡܠܹܗ ܩܵܠܹܗ ܡܸܢ݇ܕܪܸܫ݇ ܒܐܵܙܵܕܘܼܬܵܐ) ܘܒܡܲܪܝܼܪܘܼܬܵܐ ܘܒܸܒܟ݂ܵܝܵܐ (ܥܲܠ ܩܲܒܼܪܵܐ): ܐܲܝܟ݂ ܐܲܪܡܲܠܬܵܐ ܕܩܵܒܼܪܵܐ ܠܝܲܟܵܢܘܼܗ݁: (ܗܵܕܟ݂ܵܐ ܝܗ݇ܘ̣ܵܐ ܒܸܟ݂ܝܵܐ) ܘܒܹܐܡܵܪܵܐ: ܘܵܝܠܼ ܐܲܚܘܿܢܝܼ ܘܵܝܠܝܼ ܐܲܚܘܿܢܝܼ: ܩܵܡܘܿܕܝܼ ܡܛܘܼܫܝܵܠܘܿܟ݂ ܦܪܵܫܬܘܿܟ݂ ܡܸܢܝܼ: ܘܠܵܐ ܩܵܡ ܫܵܒܼܩܸܬܠܝܼ ܕܡܲܒܣܸܡܸܢ ܒܚܙܵܝܬܘܿܟ݂ ܐܸܠܵܐ ܩܲܡ ܫܲܕܪܸܬܠܝܼ ܡ݂ܢ ܠܟܸܣܠܘܿܟ݂: ܐܲܝܟ݂ ܕܡܫܘܼܕܸܪܹܗ ܛܘܼܒܼܵܢܵܐ ܦܵܘܠܹܐ ܠܐܲܒܼܵܐ ܐܲܢܛܘܿܢܝܼܣ.
ܩܝܼܡܠܹܗ ܛܘܼܒܼܵܢܵܐ ܡܵܪܢܙܟ݂ܵܐ (ܡ݂ܢ ܩܲܒܼܪܵܐ) ܘܪ݇ܚܝܼܫܠܹܗ ܠܚܕܲܬܵܐ (ܡܕܝܼܢ݇ܬܵܐ): ܬܵܡܵܐ ܥܒܼܝܼܕܠܹܗ ܙܘܼܝܵܚܵܐ ܕܥܹܐܕܵܐ ܕܐܘܿܫܲܥܢܹ̈ܐ: ܘܒܝܵܘܡܵܐ ܕܬܪܹܝܢܒܫܲܒܵܐ ܟ̰ܝܼܕܠܹܗ (ܠܟܠܹܗ) ܟܸܢܫܵܐ ܓܘܼܪܹ̈ܐ ܘܙܥܘܿܪܹ̈ܐ ܕܟܵܗܢܹ̈ܐ ܘܕܡܗܲܝܡܢܹ̈ܐ: ܐ݇ܡܝܼܪܹܗ ܐܸܠܲܝܗܝ: ܬܵܝܡܘܿܢ ܕܐܵܙܵܠ݇ܚ ܠܒܲܪܝܼܵܐ ܘܡܲܬܝܵܚ ܡ݂ܢ ܬܵܡܵܐ ܠܐܹܠܝܼܵܐ: ܬܵܝܡܘܼܢ ܥܲܡܝܼ ܠܚܵܪܵܒܝܼ: ܒܸܬ ܚܵܙܝܼܬܘܿܢ ܠܝܘܿܚܲܢܵܢ ܡܲܥܡܕܵܢܵܐ: ܬܵܝܡܘܿܢ ܥܲܡܝܼ: ܒܸܬ ܝܵܗ݇ܒܸܢܘܟ݂ܘܿܢ ܦܲܓ݂ܪܵܐ ܩܲܕܝܼܫܵܐ ܗ݁ܘ ܕܠܥܘܿܠܘܿܠ ܝ݇ܠܹܗ ܡ݂ܢ ܢܒ̈ܝܹܐ: ܟܲܕ ܐ݇ܙܠ݇ܝܼܠܗ݇ܘܿܢ ܥܲܡ ܐܲܦܸܣܩܘܿܦܲܝܗܝ: ܘܒܙܕܘܿܥܬܵܐ ܡܛܹܐܠܗ݇ܘܿܢ ܠܕܘܼܟܬܵܐ ܕܩܲܒܼܪܵܐ. ܡܫܘܼܪܹܐܠܗ݇ܘܿܢ ܒܨܠܘܿܬܵܐ ܕܬܸܫܡܸܫܬܵܐ ܕܥܲܠ ܚܲܕ ܦܲܪܨܘܿܦܵܐ: ܟܲܕ ܥܒܼܝܼܕܠܗ݇ܘܿܢ ܬܫܡܸܫܬܵܐ ܟܠܹܗ ܝܵܘܡܵܐ ܘܠܸܠܝܵܐ ܕܒܵܬܪܹܗ (ܡ݂ܢ ܒܵܬ݇ܪ ܬܸܫܡܸܫܬܵܐ): ܡܫܘܼܪܹܐܠܗ݇ܘܿܢ ܒܸܚܦܵܪܵܐ ܘܡܓܵܠܘܿܝܹܐ ܠܩܲܒܼܪܵܐ: (ܐܝܼܡܲܢ ܕܦܪܝܼܩܠܗ݇ܘܿܢ ܡ݂ܢ ܡܓܵܠܵܝܬܵܐ ܕܩܲܒܼܪܵܐ): ܦܲܓ݂ܪܹܗ ܩܲܕܝܼܫܵܐ ܠܵܐ ܡܘܼܫ݇ܟ̰ܸܚܠܗ݇ܘܿܢ (ܬܵܡܵܐ): ܡܘܼܓ̰ܸܚܠܗ݇ܘܿܢ ܐܲܚܟ̰ܝܼ ܬܲܪܬܹܝ ܥܵܒ̈ܝܵܬܵܐ ܕܥܵܡܪܵܐ: ܚܕܵܐ ܕܠܒܼܝܼܫܬܹܗ ܘܗ݁ܝ ܐ݇ܚܼܪ݇ܬܵܐ ܕܡܲܟܲܣܬܹܗ (ܗ.ܕ ܕܕܡܵܟ݂ܬܹܗ ܘܡܵܟܲܣܬܹܗ ܒܠܸܠܝܵܐ): ܘܦܲܓ݂ܪܹܗ (ܕܩܲܕܝܼܫܵܐ) ܠܵܐ ܦܝܼܫܠܹܗ ܚܸܙܝܵܐ ܗܲܠ ܐܸܕܝܘܿܡ ܝܵܘܡܵܐ: ܒܪܵܒܵܐ ܟܲܪܝܘܼܬܵܐ ܘܡܦܵܫܲܡܬܵܐ: ܫܩܝܼܠܗܘܿܢ ܠܕܐܵܢܝܼ ܬܲܪܬܹܝ ܥܵܒܵܝ̈ܵܬܵܐ: ܡ݂ܢ ܒܵܬ݇ܪ ܕܡܘܼܕܸܪܗ݇ܘܿܢ ܥܲܦܪܵܐ ܠܕܘܼܟܬܹܗ ܘܕܝܼܪܗ݇ܘܿܢ.
ܛܘܼܒܼܐ ܠܕܐܵܗܵܐ ܙܵܘܓܵܐ ܩܲܕܝܼܫܵܐ: ܕܗܵܐ ܦܝܼܫܠܵܗ݁ ܡܩܘܼܕܵܫܬܵܐ ܬܲܫܥܝܼܬܲܢ ܒܬܲܫܥܝܼܬܲܝܗܝ: ܘܫܚܝܼܡܘܼܬܵܐ ܕܹܡܸܙܡܵܢܲܢ ܒܬܸܫܒܘܿܚܬܲܝܗܝ: ܒܐܵܗܵܐ ܙܵܘܓܵܐ ܩܲܕܝܼܫܵܐ ܘܡܵܪܹܐ ܐܵܕܵܒ: ܕܛܥܝܼܢܬܵܐ ܝ݇ܠܵܗ݁ ܥܲܠ ܬܸܪܘܵܝ ܕܪ̈ܥܢܵܢܘܼܗ݁ ܬܲܫܥܝܼܬܹܗ ܕܡܵܪܝ ܐܲܚܵܐ ܒܲܪ ܬܸܫܡܸܫܬܲܝܗܝ: ܕܟܲܕ݇ ܡܸܢܲܝܗܝ ܟܹܐ ܚܵܝܹܐ ܗ݇ܘ̣ܵܐ ܘܪܵܥܹܐ ܗ݇ܘ̣ܵܐ ܥܲܡ ܗܲܝ̈ܘܵܢܹܐ ܕܒܲܪܝܼܵܐ (ܟܝܼܘܝܼ): ܘܗ݁ܘ ܐ݇ܚܹܪ݇ܢܵܐ ܟܹܐ ܚܲܕܸܪ ܗ݇ܘ̣ܵܐ ܥܲܡ ܓܘܼܡܠܹ̈ܐ ܘܡܲܪܥܸܐ ܗ݇ܘ̣ܵܐ ܠܗ݇ܘܿܢ: ܒܢܲܝ̈ܢܵܫܵܐ ܠܵܐ ܦܝܼܫܠܗ݇ܘܿܢ ܡܘܼܚܫܸܚܸܐ ܠܫܒܼܵܒܼܘܼܬܵܐ ܕܦܲܓ݂ܪ̈ܲܝܗܝ: ܐܲܝܢܝܼ ܕܠܲܝܬ ܗ݇ܘ̣ܵܐ ܠܗ݇ܘܿܢ: ܠܵܐ ܫܒܼܝܼܬܵܐ ܘܠܵܐ ܒܹܝܣܲܕܝܵܐ (ܣܦܵܕܝܼܬܵܐ): ܘܠܵܐ ܟܘܼܪܣܝܼ ܘܠܵܐ ܫܪܵܓ݂݇ܝܵܐ: ܘܠܵܐ ܦܵܬ݁ܘܿܪܵܐ: ܫܒܼܝܼܬܲܝܗܝ ܐܲܪܥܵܐ ܘܦܵܬ݁ܘܿܪ̈ܲܝܗܝ ܒܸܪ̈ܟܵܟܲܝܗܝ: ܬܘܼܪܣܵܝܲܝܗܝ ܓܸܠܵܠܹ̈ܐ ܝܵܪ̈ܩܘܿܢܹܐ: ܟܸܪ݇ܣܲܝܗܝ ܠܵܐ ܩܵܡ ܓ݂ܵܠܒܵܠܗ݇ܘܿܢ ܒܒܲܕܢܘܼܣܘܼܬܵܐ: ܘܡܫܵܘܲܬܬܵܐ ܠܵܐ ܩܵܡ ܓ݂ܵܠܒܵܠܗ݇ܘܿܢ ܒܡܫܵܕܵܠܝܵܬܘܼܗ݁ (ܦܲܢܕܘܼܗ̈): ܘܠܵܐ ܓ̰ܵܗ݇ܠܗ݇ܘܿܢ ܒܡܚܵܡܵܝܬܵܐ ܕܡܲܪ̈ܥܹܐ ܒܗܲܓ̰ܲܬ ܕܝܘܼܩܪܵܐ ܕܒܘܼܣܵܡܹ̈ܐ (ܕܐܵܗܵܐ ܥܵܠܡܵܐ ܥܵܒܼܘܿܪܵܐ): ܠܵܐ ܣܢܝܼܩܠܗ݇ܘܿܢ ܠܕܲܪ̈ܡܵܢܹܐ ܕܒܢܲܝ̈ ܓܵܠܝܼܢܘܿܣ (ܚܲܕ݇ ܐܵܣܝܵܐ ܡܫܲܡܗܵܐ): ܠܵܐ ܦܠܝܼܚܠܗ݇ܘܿܢ: ܘܚܵܘܵܐ ܠܵܐ ܩܵܡ ܫܵܕܠܵܐ ܠܗ݇ܘܿܢ: ܠܵܐ ܛܥܝܼܡܠܗ݇ܘܿܢ ܠܬܹܢܵܐ ܡܬܘܼܚܲܒܬܵܐ ܕܚܠܸܠܵܗ݁ ܒܫܲܡܲܚܬܵܐ ܕܒܹܝܬ݂ ܐܵܕܵܡ: ܕܠܵܐ ܕܥܝܼܬ݁ܠܗ݇ܘܿܢ ܒܵܬ݇ܪ ܦܕܵܢܵܐ ܒܦܘܼܠܚܵܢܵܐ ܡܲܓ̰ܗ݇ܝܼܵܢܵܐ ܘܡܗܲܨܠܵܢܵܐ ܕܟܝܼܬܒܹ̈ܐ: ܠܵܐ ܡܘܼܩܪܸܒܼܠܗ݇ܘܿܢ ܩܘܼܪ̈ܒܵܢܲܝܗܝ ܒܫܒܼܵܒܼܘܼܬܵܐ ܕܩܵܐܹܝܢ ܕܐ݇ܢܵܫܹ̈ܐ ܡܒܲܚܸܠܝܼ ܒܝܼܝܲܗܝ ܘܩܵܛܠܝܼܠܗ݇ܘܿܢ: ܠܵܐ ܫܬܹܐ ܠܗ݇ܘܿܢ ܚܲܡܪܵܐ ܘܦܝܼܫܠܵܗ݁ ܝܼܕܸܥܬܵܐ: ܘܦܝܼܫܠܗ݇ܘܿܢ ܡܘܼܣܚܸܪܹ̈ܐ ܡ݂ܢ ܟܢܲܥܢ ܦܵܝܫܵܢܵܐ ܝܼܕܸܥܝܵܐ: ܫܬܵܝܬܲܝܗܝ ܡܲܝܵܐ (ܦܫܝܼܛܹܐ ܝܲܢ ܥܵܕܵܬܝܼ): ܠܵܐ ܡܩܘܼܪܒܸܢܘܿܢ ܠܩܲܨܪܹ̈ܐ ܪ̈ܵܡܹܐ ܘܒܸܢܝܹ̈ܐ ܒܟܲܪܦܝܼܟ̰ܹܐ ܩܸܠܝܹ̈ܐ: ܓܕܝܼܠܹ̈ܐ ܠܒܵܪܒܵܪܘܼܬܵܐ ܕܐܲܪ̈ܕܸܟ݂ܠܹܐ (ܨܲܢܥܲܬܟܵܪܹ̈ܐ) ܦܫܝܼܛܹ̈ܐ (ܢܵܙܲܢܹ̈ܐ) ܘܠܵܐ ܚܙܹܐܠܗ݇ܘܿܢ ܐܲܬܪܵܐ ܕܒܘܼܠܒܵܠܵܐ (ܕܩܵܠܡܵܩܲܠܹ̈ܐ) ܘܥܪܝܼܩܠܗ݇ܘܿܢ ܡ݂ܢ ܡܬܵܥܠܲܡܬܵܐ܀
ܡ݂ܢ ܒܵܕܵܠ ܕܪܵܡܘܼܬܹܗ ܕܩܲܨܪܵܐ ܕܫܘܼܒܼܗܵܪܵܐ: ܒܪܹܫܵܐ ܕܪ̈ܘܼܡܝܵܬܵܐ ܥܲܡ ܥܸܪ̈ܒܹܐ ܕܘܵܠܵܐ (ܟܝܼܘܝܼ) ܟܹܐ ܪܵܥܝܼ ܗ݇ܘ̣ܵܘ: ܐܲܢܹܐ ܟܠܲܝܗܝ (ܩܘܼܒܠܝܼܠܗ݇ܘܿܢ ܥܲܠ ܓܵܢܲܝܗܝ): ܥܲܠ ܗܝܼܒܼܝܼ ܕܲܥܬܝܼܕ ܗ݁ܘ ܕܠܵܐ ܚܙܹܐ ܠܗ݇ܘܿܢ ܘܡܗܘܼܝܸܢܘܿܢ ܒܝܹܗ: ܗ݁ܘ ܕܪܸܚܩܵܐ ܝ݇ܠܹܗ ܘܐܵܢܝܼ ܩܵܡ ܚܵܫܒܼܝܼܠܹܗ ܩܘܼܪܒܵܐ: ܣܵܒܵܒ ܐܝܼܬܠܗ݇ܘܿܢ ܦܵܪܥܵܢܵܐ ܟܹܐܢܵܐ ܕܦܵܪܥܹܐ ܠܗ݇ܘܿܢ ܒܥܵܠܡܹܗ (ܗ.ܕ ܒܥܵܠܡܵܐ ܕܓܵܢܹܗ): ܠܵܐ ܐܲܝܟ݂ ܕܝܼܝܲܗܝ ܐܸܠܵܐ ܐܲܝܟ݂ ܕܝܹܗ: ܗ݁ܘ ܕܒܵܨܘܿܪܹ̈ܐ ܝ݇ܢܵܐ ܟܠ ܓ̰ܵܥܦܹ̈ܐ ܘܟܠ ܚܲܫܹ̈ܐ ܠܦܪܲܥܝܬܹܗ: ܕܐܘܿܦ ܐܸܠܲܢ (ܡܚܝܼܠܹ̈ܐ) ܡܫܲܪܸܟ ܥܲܡܲܝܗܝ ܒܒܘܼܣܵܡܹܗ.
ܒܨܠܵܘܵܬܲܝܗ̈ܝ (ܫܡܝܼ̈ܥܵܬܵܐ) ܐܵܡܹܝܢ.
܀ܫܠܸܡ܀
ܡܬܘܼܪܓܸܡܵܐ ܡ݂ܢ ܠܸܫܵܢܵܐ ܐܵܪܵܡܵܝܵܐ ܠܠܸܫܵܢܵܐ ܣܘܵܕܵܝܵܐ (ܕܗܲܡܙܲܡܬܵܐ)
ܒܝܲܕ ܛܘܼܒܼܬܵܢܘܼܬܹܗ ܡܵܪܝ ܬܐܘܿܡܵܐ ܕܲܪܡܘܿ:
ܡܝܼܛܪܵܦܘܿܠܹܝܛܵܐ ܕܥܸܕܬܵܐ ܕܡܲܕܢܚܵܐ ܒܗܸܢܕܘܼܣܬܵܢ
ܬܪܝܼܫܘܪܪ ܗܸܢܕܘܼ ܬܲܝܡܢܵܝܬܵܐ
1956
ܐܸܬ݂ܚܬܸܡ ܒܡܲܛܒܲܥܬܵܐ ܕܡܵܪܝ ܢܲܪܣܲܝ ܡܲܠܦܵܢܵܐ ܒܲܡܕܝܼܢܬ݇ܬܵܐ ܕܲܬ݂ܪܝܼܫܘܼܪ ܕܲܒܼܗܸܢܕܘܿ ܬܲܝܡܢܵܝܬܵܐ:
ܐܲܨܲܚ̈ܝܵܬܵܐ 1000
ܡܫܲܡܫܵܢܵܐ ܝܵܘܣܸܦ ܒܲܪ ܬܐܘܿܡܵܐ ܕܒܹܝܬ݂ ܐܲܪܲܢܓܵܫܹܝܪܝܼ: ܡܕܲܒܪܵܢܵܐ ܕܡܲܛܒܲܥܬܵܐ ܕܡܵܪܝ ܢܲܪܣܲܝ